/1 Lendak delokai duuna, ngoluke tattonam, ngoluke agi amiglok kaasunam, kaala ngoluke alaklok uktet sunam sim delokke turmona Agom sim ngolu pogoodung. Turname aato, ngolu kaasuto, delokerongem Abulokke ngoluking aana duuyarna turnamem ngolu noluking pogoo bodung. Nolute ngoluking angoope idokupe nolukelo ngoluke kaanam kennam sim ngolu pokan bidungku; Delokrongem ngoluke ajonde Abu kilang delokke Jisu Kristoking iyeku. Ngoluke ashenge apiidope emlamin ngo sim atdune. Bikkelok tatnamem ngoluke noluking pokan binam kobore simino: depe emnamde Shedi bi angune; bikking kaamo kamaberok. Ngolu bim angong ngobo sudung emdula kaamolo yedumilo, ngolu medung, delokke arolok yemang. Idakkom bi angunlo yedunade emla ngolu angunlo yemilo, ngoluke aralo ajung bosudung, delokke bikke Oo Jisuke iyyie ngolum paab takamlokke deemoyeku. Ngolu paab kamang emsudumilo, ngolu agisuem yadsudung delokke arode ngolukelo kamang. Idola ngolu ngoluke paabem sikar sumilo bi ngoluke paabem maab biyeku, delokke deemang aamo takamlokke ngolum arbinyeku, kapeila bi miidinam arolo yene. Ngolu paab imang emsudumilo, ngolu bim yadne emla lenggee sudung delokke bik agome ngoluke yenamlo jega kamadung.

/2 Ngokke ayanam omo kidia, ngokke sim atnamde nolu paab imadope emlamin; Idakkom seko paab idudi ngoluke legape Abuem ngolukepe pobipena ako kadung de idung; Deena ami Jisu Kristo bi.