Miqyail nail daoq, tsaol-aq pevq lee khi, jaol lee-a nail ganl
1 Iqmoeq-u nee Daoq jiav nail ngaol. Daoq al neq, Miqyail nee mail jaol khi Daoq al neq, Miqyail ngaol. 2 Daoq al neq, iqmoeq-u nee Miqyail nee mail jaol nail ngaol. 3 Khal jaol, khal jiav nail iqsanl, aivq-i mail teivq-ai thaq nail ngaol. Khal teivq-ai thaq nail juq nail lavqkhoel, aivq-i mail maq teivq-ai thaq nail teevq phaq-ail, maq jiav-ail. 4 Aivq nail lavqkhoel bhai doevq nail phaq aol nail ngaol. Doevq nail al neq, tsaol-aq yaq nail aqbhaq ngaol. 5 Aqbhaq al neq, aqnav nail lavqkhoel bhai bhaq nail ngaol. Aqnav neq, aqbhaq al bhai maq gaq lai nia-ail. 6 Miqyail-i mail bhi lee-a nail Yaolhaq dai, mil-ai thaq nail teevq gaq jaol nail ngaol. 7 Aivq neq, aqbhaq al nail ganl salkhil khanq lee-a nail ngaol. Aivq bhaqda nee tsaol-aq iqsanl mail, aqbhaq al bhai neema thaqtsaol lal dai, aivq salkhil khanq lee-a nail ngaol. 8 Aivq neq, aqbhaq al maq ngel-ail. Aqbhaq al nail ganl salkhil khanq lee-a nail teevq-eel ngaol. 9 Maldil pevq nail aqbhaq al neq, miltsaq kovtavq bhai lee khi, tsaol-aq yaq iqsanl bhai bhaq bhiq lee nail ngaol. 10 Aivq neq, miltsaq kovtavq bhai jaol nail ngaol. Miltsaq niil aivq-i mail teivq-ai thaq nail ngaol. Thailhai ngaol-aoq, miltsaq yaq juq aivq bhai maq heeq nia-ail. 11 Aivq nail jaol duq bhai, aivq lee khi ngaol-aoq, aivq nail jeq-e jaq-a juq aivq bhai maq hav-al. 12 Thailhai ngaol-aoq, aivq bhai khal hav bhoel nail tsaol-aq, aivq bhai neema khal thaqtsaol nail tsaol-aq iqsanl mail, Miqyail nail yaq pevq lal nail aqkhaoqanq ya-a nail ngaol. 13 Aqyu juq Miqyail nail yaq pevq lal-a nail neq, jeq-e jaq-a bhaqda nee maq ngel-ail. Aqsivq haqjoil nail neenoeq neekhaol bhaqda nee iqsanl, maq ngel-ail. Yaqyov-aq nail neenoeq neekhaol bhaqda nee iqsanl maq ngel-ail. Miqyail bhaqda nee aqyu juq Miqyail nail yaq pevq lal-a nail ngaol. 14 Daoq al neq, tsaol-aq pevq lee khi, ngadao nee mail jaol lee-a nail ngaol. Aivq nail seiqleiq khaoqsail bhai nvjuq ya moel-a nail ngaol. Seiqleiq khaoqsail al neq, Aqbhu Miqyail nee mail dov lee-a nail Yaqyov teevq gaq teevq-eel nail seiqleiq khaoqsail ngaol. Yaqyov al gaq neq, geeqlaoq eeljaol khi mail saljial ivq nail phaq teevq bhee aol nail ngaol. 15 Yaolhaq aivq nail ganl salkhil khanq khi niailhai gul nail ngaol: “Ngaq nail haoqnao lee nail gaq neq, ngaq-ai nee maqtsil eeq nail ngaol. Khul khi mail dai ngal-aq neq, ngal maq doevq lee-u nee mail, aivq doevq nail ngaol dai, ngaq-i mail ge nail al gaq neq, aivq ngaol” dai, Yaolhaq mailma-ail salkhil khanq nail ngaol. 16 Aivq nail lavqkhoel bhai geeqlaoq eeljaol teevq bhee aol nail ngaol. Geeqlaoq al juq teevq phaq khai-aq neq, teevq phaq ngadao ya nail ngaol. 17 Miqyail aoldaoq kovqdaoq bivq lavq-u phao, Molseiq bhai juq khi, bivq lavq-a nail ngaol. Thailhai ngaol-aoq, geeqlaoq eeljaol khi saljial ivq nail phaq neq, Yeiqsul Khali nee mail dov lee-a nail ngaol. 18 Tsaol-aq teevq gaq iqsanl, Miqyail bhai maq moeldaiq gaoq-aol. Aivq teevq gaq taivq-ail Miqyail pevq khi, Aqbhu nail jail-nq bhai jaoldeel-nvq thaq nail Yaqyov al gaq neq, Miqyail khaq sil gaq pevq nail ganl, phaodaiq lee-a nail ngaol.
Ulcuvq saol bhiq nail Yaolhaq salkhil khanq nail ganl
19 Yeiqlulsaqlaiq meenq bha jaol nail Yuldav nail tsaol-aq juq neq, Philma juq khi mail Leiqbhil tsaol-aq juq bhai, Yaolhaq jaol nail bha khoel gai-aivq-a nail ngaol. “Naol khaq sil gaq” dai, aqyu juq Yaolhaq bhai naldaiq-u phao, Yaolhaq salkhil niailhai khanq-a nail ngaol: 20 -21 Aivq maq jil mail, “Ngal neq, Khali maq ngel” dai, daolcoev dai, ge bhiq-a nail ngaol. A bhai nee ngal-aq, aqyu juq gaoq naldaiq nail: “Thailhai phal-iq neq, naol Eillilya laiq.” “Ngal Eillilya maq ngel” dai, aivq ge kovq bhiq-a nail ngaol. “Naol Miqyail nail haqbhoil gedan nail al gaq laiq” dai, gaoq naldaiq nail ngaol. “Maq ngel” dai, aivq gaoq ge kovq bhiq-a nail ngaol. 22 Tsaol-aq al juq ge nail: “Naol khaq sil gaq dai, nvjuq bhai khoel-ai leevq-a nail tsaol-aq juq bhai cavq lai kivq dai, naol yovqgavq bhai yovqgavq, khaq sil gaq dai, ge heeq” dai, gaoq naldaiq nail ngaol. 23 Yaolhaq ge nail: “Miqyail nail haqbhoil gedan nail Ilsaqyal-i mail ge-ai thaq nail khe-ai, ‘Heeqphaq lee nail haqbhoil gailkhaol lav daol yaoq’ dai, haqtsoiq haqyal bhai jaol khi gul nail al gaq, ngal ngaol” dai, ge kovq bhiq-a nail ngaol. 24 Naldaiq lee-a nail tsaol-aq al juq neq, Phaqliqsail juq-i mail khoel-ai leevq-a juq iqsanl, kheq nail ngaol. 25 Aqyu juq ge nail: “Naol neq, Khali iqsanl maq ngel. Eillilya iqsanl maq ngel. Miqyail nail haqbhoil gedan nail al gaq iqsanl maq ngel nail phal-iq neq, khul khi mail, naol yu bhai ulcuvq saol bhiq nail-aiq” dai, naldaiq-a nail ngaol. 26 Yaolhaq ge nail: “Ngal yu bhai ulcuvq lavqkhoel bhai, ulcuvq saol bhiq nail ngaol. Thailhai ngaol-aoq, nuljuq maq heeq nia nail tsaol-aq teevq gaq, nuljuq nee mail jaol nail ngaol. 27 Aivq neq, ngaq nail haoqnao lee nail gaq ngaol. Ngal neq, aivq nail saiqnaov neeqtsaq bhai iqsanl pheel nail maq geel-nvq-ail” dai, ge bhiq-a nail ngaol. 28 Yaolhaq Yaoldaq laoljaol a phao lelkhel bhai jiav nail Bheiqtaqnil nail julgu bhai jaol khi, ulcuvq saol bhiq-u phao, aqyu juq Yaolhaq bhai alhai naldaiq-a nail ngaol.
Miqyail nail Yaolyaq bhai heldaiq
29 Yaoq n yaoq, aivq jaol nail bha Yeiqsul lee nail bhai, Yaolhaq ya moel-u phao, aivq ge nail: “Miltsaq yaq nail oeqbal bhai phi ha lee-a nail Miqyail nail Yaolyaq bhai heldaiq daiq. 30 ‘Ngaq nail haoqnao lee nail gaq, ngaq-ai nee maqtsil eeq nail ngaol. Khul khi mail dai ngal-aq neq, ngal maq doevq lee-u nee mail aivq doevq nail ngaol’ dai, ngaq-i mail ge nail al gaq neq, aivq ngaol. 31 Iqmoeq-u, ngal aivq bhai maq heeq kivq-al. Thailhai ngaol-aoq, Ilsaqleiqlal nail tsaol-aq aivq bhai aqmeeq-ai ya heeq ya moel dai, ngal lee khi, yu bhai ulcuvq lavqkhoel bhai ulcuvq saol bhiq lee-a nail ngaol” dai, ge bhiq-a nail ngaol. 32 Al ovqtavq, Yaolhaq salkhil khanq khanq-ail ge nail: “Meeqnail Haolnail Aqhaqlal khaoqkhoiq khe-ai nqtavq kovtavq nee yavq kha lee khi, aivq nail kovtavq-ai deivq lee-a nail bhai, ngal ya moel-a nail ngaol. 33 Iqmoeq-u ngal aivq bhai maq heeq kivq-al. Thailhai ngaol-aoq, ‘Ulcuvq lavqkhoel-ai yu bhai ulcuvq saol bhiq yaoq’ dai, ngaq bhai khoel nail gaq, ngaq bhai niailhai ge lavq-a nail ngaol: ‘Tsaol-aq teevq gaq nail kovtavq bhai Meeqnail Haolnail Aqhaqlal yavq kha lee khi jaol nail bhai, naol ya moel-u phao, Meeqnail Haolnail Aqhaqlal lavqkhoel ulcuvq saol bhiq nail gaq neq, aivq ngaol dai, naol ya heeq kivq naol. 34 Ngal alhai pevq lal-a nail bhai ya moel-a nail ngel-i mail, tsaol-aq al gaq neq, Miqyail nail Yaqyov ngaol dai, ngal salkhil khanq nail ngaol’ ” dai, Yaolhaq ge nail ngaol.
Yaqlaol iqmoeq ilmoeq pevq lal-a nail juq
35 Yaoq n yaoq, Yaolhaq aivq nail yaqlaol nvq gaq nee mail, a bhai gaoq thulphaol-nvq thaq nail ngaol. 36 Aq-u phao, aivq Yeiqsul lee nail bhai ya moel khi, “Miqyail nail Yaolyaq bhai heldaiq daiq” dai, ge bhiq-a nail ngaol. 37 Yaqlaol al nvq gaq, Yaolhaq ge nail daoq al daoq ya gaiq khi, Yeiqsul nail haoqnao tsaothel laivq-a nail ngaol. 38 Yeiqsul haoqnaol naolkovq kovq daiq khi, aqyu nvq gaq aivq nail haoqnao tsaothel lavq nail bhai, ya moel-u phao, “Nul-nq nvq gaq khul halpov lal-a nail-aiq” dai, naldaiq-a nail ngaol. Aq-u phao, aqyu nvq gaq: “Laqbhil-ol, naol khaq bha jaol nail-aiq” dai, aivq bhai naldaiq-a nail ngaol. Laqbhil dai ge nail neq, saqlaq bhai ge nail ngaol. 39 “Heldaiq lal yaoq” dai, Yeiqsul aqyu nvq gaq bhai ge bhiq-a nail ngaol. Alheel ngel-i mail, aqyu nvq gaq lai khi, aivq nail jaol duq bhai ya moel-a nail ngaol. Yanq al yanq neq, kivq hail lail ma phao naqli liq lavq niidai bhee lal-aoq nail ngel-i mail, aq-u n-gaol aqyu nvq gaq a bhai jaol-a nail ngaol. 40 Yaolhaq-i mail ge-a nail daoq al daoq ya gaiq khi, Yeiqsul nail haoqnao tsaothel laivq-a nail al nvq gaq nail lavqkhoel khe teevq gaq neq, Silmoq Bheiqtuvluv nail jaqbheq, Aqdaiqlaiq ngaol. 41 Aqdaiqlaiq iqmoeq ilmoeq nl-a nail neq, aivq nail aqivq Silmoq bhai halpov moel-ail khi, “Nv-nvq gaq Meiqsilya bhai moel-a nail ngaol” dai, ge bhiq-a nail ngaol. Meiqsilya dai ge nail neq, Khali bhai ge nail ngaol. 42 A bhai nee ngal-aq, Aqdaiqlaiq neq, Silmoq bhai Yeiqsul jaol nail bha hel-aivq-a nail ngaol. Yeiqsul Silmoq bhai heldaiq khi, “Naol neq, Yaolhaq nail yaqyov Silmoq nial. Yaqhao neq, naoq bhai Geiqphal dai, ya khul naol” dai, ge bhiq-a nail ngaol. Geiqphal dai ge nail neq, lovmav bhai ge nail ngaol.
Pillilpuv khi mail Naqdaqneiqlal bhai khul-a nail ganl
43 Niaohao Gaqliqlail milkhaoq bhai ail naol dai, Yeiqsul noeqceiv-ai thaq nail ngaol. Aq-u phao, aivq Pillilpuv bhai thaoqphuq khi, “Ngaq nail haoqnao tsaothel lavq yaoq” dai, ge bhiq-a nail ngaol. 44 Pillilpuv neq, Aqdaiqlaiq khi mail Bheiqtuvluv jaol nail Bheiqjeildaq meenq bhai jaol nail ngaol. 45 Pillilpuv neq, Naqdaqneiqlal bhai halpov moel-ail khi ge nail: “Molseiq-i mail gevq-ai thaq nail, aoldaoq kovqdaoq lavqkhoel khi mail, Miqyail nail haqbhoil gedan nail tsaol-aq juq-i mail gevq-ai thaq nail lavqkhoel, aqyu juq-i mail gevq-ai thaq nail tsaol-aq al gaq bhai, nvjuq ya moel-aoq nail ngaol. Aivq neq, Naqsaqlail meenq yaq, Yaolsai nail yaqyov Yeiqsul ngaol” dai, ge bhiq-a nail ngaol. 46 “Naqsaqlail meenq bhai aqmeeq phaq dov lal nia nail laiq” dai, Naqdaqneiqlal naldaiq-a nail ngaol. “Heldaiq lal yaoq thoil” dai, Pillilpuv ge bhiq-a nail ngaol. 47 Yeiqsul Naqdaqneiqlal lal thailthaiq nail bhai ya moel-u phao, Naqdaqneiqlal nail ganl niailhai ge-a nail ngaol: “Ilsaqleiqlal nail tsaol-aq maldil pevq nail gaq bhai heldaiq yaoq. Aivq neq, goiqbhaoq bhaoq nail neema maq aol-ail” dai, ge bhiq-a nail ngaol. 48 “Naol ngaq bhai khalhai khi heeq kivq-a nail-aiq” dai, Naqdaqneiqlal Yeiqsul bhai naldaiq-a nail ngaol. “Pillilpuv naoq bhai maq khul-u nee mail, naol heeqguq aqbhaol nail daoqthaoq bhai jaol-u phao nee, ngal naoq bhai moel-aoq nail ngaol” dai, ge kovq bhiq-a nail ngaol. 49 Naqdaqneiqlal ge nail: “Saqlaq-ol, naol neq, Miqyail nail Yaqyov nial. Ilsaqleiqlal nail Heeqphaq iqsanl ngel-ail nial” dai, Yeiqsul bhai ge bhiq-a nail ngaol. 50 Yeiqsul ge nail: “ ‘Naol heeqguq aqbhaol daoqthaoq bhai jaol-u nee mail, ngal naoq bhai moel-a nail ngaol’ dai, ge nail ngel-i mail, naol ngaq bhai neema thaqtsaol nail laiq. Niidai nee maqtsil eeq nail ganl juq bhai iqsanl, naol ya moel naol” dai, ge bhiq-a nail ngaol. 51 Yeiqsul gaoq ge nail: “Ngal nuljuq bhai maldil dai, ge lavq bhel. Nqtavq phao-ai thaq nail bhai nuljuq ya moel naol. Miqyail nail nqtavq gaqkhoel Tsaol-aq nail Yaqyov nail kovtavq bhai tsaoq thoiq tsaoq dav dai, tsao nail bhai ya moel naol” dai, ge bhiq-a nail ngaol.
Gaqnaq julgu bhai khaqma hevqjaq-a nail ganl
1 A bhai nee ngal-aq, hail n jel-ail khi, Gaqliqlail milkhaoq bhai jiav nail Gaqnaq julgu bhai yu khaqma hevq jaq-a nail ngaol. Yeiqsul nail aqma iqsanl, a bhai jaol nail ngaol. 2 “Khaqma hevqjaq nail bhai lee yaoq” dai, yu Yeiqsul khi mail aivq nail yaqlaol juq bhai iqsanl khul-a nail ngaol. 3 Aqheeq tsilju nail ullul gil lai-a nail ngel-i mail, “Aqyu juq nail aqheeq tsilju nail ullul gil lai-aoq nial” dai, Yeiqsul nail aqma Yeiqsul bhai ge bhiq-a nail ngaol. 4 Yeiqsul ge nail: “Aqma-ol, ngal naoq-ai nee mail khalhai tavq nail-aiq. Ngaq nail yanq maq tsaq lal haq-al” dai, ge bhiq-a nail ngaol. 5 “Yeiqsul nuljuq bhai khal khoel nail khe-ai nl yaoq” dai, Yeiqsul nail aqma gaqmaol maoljaq nail juq bhai ge bhiq-a nail ngaol. 6 Yuldav nail tsaol-aq juq neq, aolsaolkovq bhai tavq lai khi, ulcuvq ya jiivq haol nail aol jiav nail ngaol. Alheel ngel-i mail, al nail haqbhoil ulcuvq keivq bhoel nail caivlov kovq heeq a bhai bhi jiav thaq nail ngaol. Caivlov al teevq heeq nail lavqkhoel bhai neq, ulcuvq ngaq bhun kovq bhun niidai dail lai nail ngaol. 7 “Caivlov thoil juq nail lavqkhoel bhai ulcuvq teevq bhee keivq bhoel yaoq” dai, Yeiqsul gaqmaol maoljaq nail al juq bhai khoel bhiq-a nail ngaol. Aqyu juq iqsanl, ulcuvq teevq bhee keivq bhoel-a nail ngaol. 8 “Niil aq-il neq, khuq khi, khaqma hevq nail bhai heldaiq nail aqivq gaq bhai tsil-aivq bhiq yaoq” dai, Yeiqsul khoel bhiq-a nail ngaol. Aqyu juq iqsanl, khuq khi tsil-aivq bhiq-a nail ngaol. 9 Khaqma hevq jaq lee-a nail bhai heldaiq nail aqivq jiovq nail gaq, ulcuvq nee aqheeq tsilju nail ullul pevq lal-a nail al bhai, micil daol daiq-a nail ngaol. Aqheeq tsilju nail ullul al, khaq bha nee ya-a nail dai, aivq maq heeq nia-ail. Thailhai ngaol-aoq, ulcuvq keivq bhoel-a nail gaqmaol maoljaq nail juq neq, heeq nia nail ngaol. Aq-u phao, khaqma hevq nail bhai heldaiq nail aqivq jiovq nail gaq, khaqma hevq nail gaq bhai khul khi ge bhiq-a nail: 10 “Tsaol-aq yaq, yaoq gaq yaoq-ao nee, aqheeq tsilju nail ullul aqkheel iqmoeq bhi daol khi, yu daol bov gaq haq neq, maq kheel nail aqheeq tsilju nail ullul bhi daol nail ngaol. Thailhai ngaol-aoq, naol neq, niil aq-il kev dai, aqheeq tsilju nail ullul aqkheel tsiq thaq-ai thaq-il thoq” dai, ge bhiq-a nail ngaol. 11 Yeiqsul neq, iqmoeq ilmoeq khe pov, bhi heeq bhi moel nail niil phaq, Gaqliqlail milkhaoq bhai jiav nail, Gaqnaq julgu nail lavqkhoel bhai, aivq nail seiqleiq khaoqsail yu bhai bhi moel-a nail ngaol. Alheel ngel-i mail, aivq nail yaqlaol juq neq, aivq bhai neema thaqtsaol lal-a nail ngaol. 12 A bhai nee ngal-aq neq, Yeiqsul khi mail aivq nail aqma, aivq nail jaqbheq juq khi mail, aivq nail yaqlaol juq neq, Gaqbheiqneiqoq meenq bhai ail-a nail ngaol. Aqyu juq a bhai mee nia n maq jaol-al.
Uqhuq thaoq nail ilkhaol il ma bhai bhi lav haol-a nail ganl
13 Yuldav nail tsaol-aq nail Bhaqsaqkhaq bhaoqaiq lav sav nail yanq aqjail jail lal-u phao, Yeiqsul Yeiqlulsaqlaiq meenq bha dav lai-a nail ngaol. 14 Aq-u phao, uqhuq thaoq nail ilkhaol il ma nail khainl lavqkhoel bhai, yaol, niaoqnel khi mail khaoqkhoiq gaoq nail tsaol-aq bhai Yeiqsul ya moel-a nail ngaol. Phul dovq phal bhiq nail tsaol-aq juq jaoldeel-nvq thaq nail bhai iqsanl, ya moel-a nail ngaol. 15 Yeiqsul neeqtsaq deeq yaq nieivq jil khi, thoiqthaiq-a nail ngaol. A bhai nee ngal-aq, aqyu juq iqsanl bhai maqkhaiq, yaol khi niaoqnel juq bhai maqkhaiq, uqhuq thaoq nail ilkhaol il ma nail khainl lavqkhoel nee the ha-a nail ngaol. Phul dovq phal bhiq thailthaiq nail tsaol-aq juq nail phul bhai ngaoq khal khi, aqyu juq nail kovqkhail iqsanl ngaoq ha-a nail ngaol. 16 Khaoqkhoiq gaoq nail tsaol-aq bhai iqsanl, “Khaoqkhoiq niil juq bavq dol-aivq yaoq. Ngaq nail Aqbhu nail ilkhaol bhai leiv thaq bhi pevq lal” dai, ge bhiq-a nail ngaol. 17 Aq-u phao, “Miqyail-ol, naoq nail ilkhaol bhai, ngal gaiq-a nail, ngaq nail neema lavqkhoel bhai miqjaq tovq nail khe-ai, dul-ail nial” dai, Jalliq lavqkhoel bhai gevq-ai thaq nail al daoq bhai, aivq nail yaqlaol juq noeq dov lal bhiq-a nail ngaol. 18 Aq-u phao, Yuldav tsaol-aq nail aqivq aqtsu juq Yeiqsul bhai ge bhiq-a nail: “Naol thailhai nl kivq nail bhaqaoq aol nail phal-iq neq, naol nvjuq bhai bhi heeq bhi moel nail phaq khul nl daiq lavq nail-aiq” dai, aivq bhai naldaiq-a nail ngaol. 19 Yeiqsul ge nail: “Uqhuq thaoq nail ilkhaol il ma niil peiv ha yaoq. Hail n nail lavqkhoel, ngal cov phal naol” dai, ge bhiq-a nail ngaol. 20 Aq-u phao, Yuldav nail tsaol-aq teevq pav ganav juq ge nail: “Liq tsel kovq kovq bhee dai, uqhuq thaoq nail ilkhaol il ma niil il cov-a nail ngaol. Hail n nee taivq-ail naol cov phal kivq naol laiq” dai, ge bhiq-a nail ngaol. 21 Yeiqsul alhai ge nail neq, uqhuq thaoq nail ilkhaol il ma pevq nail, aivq nail aqmaol bhai ge movq nail ngaol. 22 Yeiqsul gaoq doevq kovq lal-u phao, aivq-i mail ge-ai thaq nail daoq al daoq, aivq nail yaqlaol juq noeq dov lal bhiq-a nail ngaol. A bhai nee ngal-aq, Jalliq bhai iqsanl, Yeiqsul-i mail ge-ai thaq nail daoq bhai iqsanl, aqyu juq neema thaqtsaol-a nail ngaol.
Yeiqsul neq, tsaol-aq nail neema bhai heeq nia nail ngaol
23 Bhaqsaqkhaq bhaoqaiq lav sav nail yanq lavqkhoel, Yeiqlulsaqlaiq meenq bha Yeiqsul jaol-u phao, aivq-i mail nl-a nail noeq-u maq dov nail bhi heeq bhi moel nail phaq bhai, yu ya moel khi, tsaol-aq mee nia gaq aivq bhai neema thaqtsaol lal-a nail ngaol. 24 Thailhai ngaol-aoq, Yeiqsul aivq nail aqmaol tsaol-aq al juq bhai maq av bhiq-al. Khul khi mail dai ngal-aq neq, aivq tsaol-aq iqsanl bhai heeq nia nail ngaol. 25 Aivq tsaol-aq nail neema bhai heeq nia nail ngel-i mail, tsaol-aq nail ganl yu aivq bhai ge bhiq nail maq loq-ail.
Yeiqsul khi mail Nilgaoldiq daoq ge tsaoq pheeljaq-a nail ganl
1 Aq-u phao, Nilgaoldiq dai mil-ai thaq nail Phaqliqsail teevq gaq jaol nail ngaol. Aivq neq, Yuldav nail tsaol-aq nail kovtavq bhai aqivq jiovq nail maoqbhaoq nl nail munl munl ma nail lavqkhoel bhai aol nail ngaol. 2 Nqkivq kivq lee-u phao, aivq Yeiqsul jaol nail bha lal khi, “Saqlaq-ol, naol neq, Miqyail-i mail bhi lee thaq nail saqlaq teevq gaq nial dai, nvjuq heeq kivq naol. Khul khi mail dai ngal-aq neq, naoq-i mail bhi heeq bhi moel nail phaq nl-a nail juq, nl nail gaq nee mail Miqyail maq jaol lao-aol nul neq, tsaol-aq teevq gaq-ail maq nl nia-ail” dai, ge bhiq-a nail ngaol. 3 Yeiqsul ge nail: “Ngal naoq bhai maldil dai, ge lavq bhel. Tsaol-aq teevq gaq iqsanl, nvq pov teevq pov maq doevq phal lal haq neq, Miqyail Milkhaoq bhai maq ya moel-ail” dai, ge bhiq-a nail ngaol. 4 Nilgaoldiq ge nail: “Joiqmaoq teevq gaq khalhai khi doevq phal lal nia nail-aiq. Aqma nail ovqmav lavqkhoel bhai aol lai khi, teevq pov gaoq doevq lee nia nail laiq” dai, naldaiq nail ngaol. 5 Yeiqsul ge nail: “Ngal naoq bhai maldil dai, ge lavq bhel. Ulcuvq lavqkhoel khi mail Meeqnail Haolnail Aqhaqlal nail lavqkhoel maq doevq phal lal haq neq, Miqyail Milkhaoq lavqkhoel bhai maq ya aol lai-ail. 6 Aqsivq haqjoil nee doevq lee-a nail phaq neq, aqsivq haqjoil ngaol. Meeqnail Haolnail Aqhaqlal nee doevq lee-a nail phaq neq, aqhaqlal ngaol. 7 Nuljuq nvq pov teevq pov ya doevq phal lal naol dai, ngal naoq bhai ge nail bhai, noeq-u maq dov ail thaq pevq-ail. 8 Lilmoel neq, khal bhoel-aivq movq nail phao, bhoel-aivq nail ngaol. Lilmoel bhoe nail aqthel bhai, naol ya gaiq khi ngaol-aoq, lilmoel al kha phao nee bhoel lavq khi, kha phao bhoel-aivq nail dai, naol maq heeq nia-ail. Meeqnail Haolnail Aqhaqlal lavqkhoel doevq lee nail tsaol-aq yaoq gaq yaoq-ao nee mail, alhai dul nail ngaol” dai, ge bhiq-a nail ngaol. 9 “Ganl niil juq khalhai pevq lal nia nail-aiq” dai, Nilgaoldiq Yeiqsul bhai naldaiq nail ngaol. 10 Yeiqsul ge nail: “Naol neq, Ilsaqleiqlal nail tsaol-aq nail lavqkhoel bhai saqlaq teevq gaq jiovq khi ngaol-aoq, ganl niil juq maq heeq kivq-ail laiq. 11 Ngal naoq bhai maldil dai, ge lavq bhel. Nvjuq heeq kivq nail ganl nvjuq ge khi, nvjuq moel nail ganl nvjuq salkhil khanq nail ngaol. Thailhai ngaol-aoq, nvjuq salkhil khanq nail bhai, nuljuq maq hav bhoel movq-ail. 12 Miltsaq bhai tavq nail ganl juq ngal ge bhiq khi ngaol-aoq, nuljuq neema maq thaqtsaol haq neq, nqtavq kovtavq bhai tavq nail ganl juq ngal nuljuq bhai ge bhiq khi ngaol-aoq, nuljuq khalhai khi neema thaqtsaol heeq. 13 Nqtavq kovtavq nee yavq kha lee-a nail Tsaol-aq nail Yaqyov maq ngel nail neq, tsaol-aq teevq gaq-ail, nqtavq kovtavq bhai maq dav lai daiq-al. 14 -15 Aivq bhai neema khal thaqtsaol nail tsaol-aq, maq ya cov-ail nail nee ovqtavq, nqmaq maqluv halyeel ya doevq nail haqbhoil, haqtsoiq haqyal bhai, Molseiq eellel bhai kha thul-a nail khe-ai, yu tsaol-aq nail Yaqyov bhai ya kha thul naol” dai, Yeiqsul ge bhiq-a nail ngaol.
Miqyail miltsaq yaq bhai gaiq-a deedee nail ganl
16 Yeiqsul gaoq ge nail: “Miqyail miltsaq yaq bhai gaiq-a deedee nail ngel-i mail, aivq nail Yaqyov teevq gaq teevq-eel ngaol-aoq, bivq lavq-a nail ngaol. Yaqyov bhai neema khal thaqtsaol nail tsaol-aq maq ya cov-ail nail nee ovqtavq, nqmaq maqluv halyeel ya doevq nail ngaol. 17 Khul khi mail dai ngal-aq neq, miltsaq yaq bhai yalkhaq bhi dal nail dai khi, Miqyail aivq nail Yaqyov miltsaq kovtavq bhai bhi lee-a nail maq ngel-ail. Miltsaq yaq bhai bhi hevqkovq lee-a nail ngaol. 18 Aivq bhai neema khal thaqtsaol nail tsaol-aq yalkhaq dal nail bhai maq daq-ail. Neema maq thaqtsaol nail tsaol-aq, Miqyail nail Yaqyov bhai neema maq thaqtsaol nail ngel-i mail, niil aq-il iqsanl yalkhaq dal-ai thaq nail bhai daq thailthaiq nail ngaol. 19 Yalkhaq dal nail al neq, niailhai ngaol. Miltsaq kovtavq bhai aqbhaq bhaq lee gaq khi ngaol-aoq, tsaol-aq yaq juq haqeiv nail phaq nl nail ngel-i mail, aqbhaq nee maqtsil, aqnav bhai neema tsaq nail ngaol. 20 Haqeiv nail phaq nl nail tsaol-aq neq, aqbhaq bhai maq heldaiq nul nail ngel-i mail, aqyu juq nl nail phaq maq ya dov lal dai, aqbhaq bhaq nail bhai maq lal-ail. 21 Maldil tsaq nail phaq nl nail tsaol-aq neq, aqyu juq nl nail juq Miqyail bhai juq khi nl-a nail ngaol dai, bhi dov lal dai, aqbhaq bhaq nail bhai lal nail ngaol” dai, ge bhiq-a nail ngaol. Yeiqsul neq, ya eeq ya heel-ail khi Yaolhaq neq, ya theq ya nil-ail naol 22 A bhai nee ngal-aq, Yeiqsul khi mail aivq nail yaqlaol juq, Yuldav milkhaoq bhai ail-a nail ngaol. Aivq yaqlaol juq nee mail a bhai jaol khi, yu bhai ulcuvq saol bhiq-a nail ngaol. 23 Saqliq meenq aqjail bhai, Eilnoq dai mil-ai thaq nail dao, ulcuvq maodai deq nail ngel-i mail, Yaolhaq iqsanl, a bhai yu bhai ulcuvq saol bhiq-a nail ngaol. Tsaol-aq teevq pav ganav juq a bhai ulcuvq saol lee-a nail ngaol. 24 Aq-u phao neq, Yaolhaq bhai thaonq lavqkhoel bhai maq laol bhoel haq-al. 25 Yaolhaq nail yaqlaol teevq pav ganav juq neq, Yuldav nail tsaol-aq teevq gaq nee mail bhi haol lal nail aol juq nail ganl jil pheeljaq thailthaiq nail ngaol. 26 Aq-u phao, aqyu juq Yaolhaq jaol nail bha lai khi ge nail: “Saqlaq-ol, Yaoldaq laoljaol a phao lelkhel bhai naoq-ai nee mail jaol-u phao, aivq nail ganl naol salkhil khanq-a nail al gaq, yu bhai ulcuvq saol bhiq thailthaiq nail ngaol. Tsaol-aq maodai aivq jaol nail bha ail thailthaiq nail ngaol” dai, ge bhiq-a nail ngaol. 27 Yaolhaq ge nail: “Miqyail-i mail bivq lavq nail phaq, maq ngel nail neq, tsaol-aq yaq teevq phaq iqsanl maq ya nia-ail. 28 Ngal neq, Khali maq ngel. Khali nail iqmoeq khoel-ai leevq-a nail gaq neq, ngal ngaol dai, ngal nuljuq bhai ge bhiq-a nail ngaol. Ge bhiq-a nail daoq al daoq gaiq-a naol dai, nuljuq iqsanl, salkhil khanq kivq naol. 29 Maol ail nail gaq bhai hevq nail gaq neq, khaqma hevq nail gaq ngaol. Khaqma hevq nail gaq nail aqtsaoq neq, aivq nail aqjail bhai thulphaol khi, khaqma hevq nail gaq nail daoq ya gaiq-u phao, lavqkhiq tsail deedee nail ngaol. Alhai dul dai, ngal iqsanl lavqkhiq tsail deedee-ail nial. 30 Yeiqsul neq, ya eeq ya heel ail nail ngaol. Thailhai ngaol-aoq, ngal neq, ya theq ya nil ail naol” dai, ge bhiq-a nail ngaol.
Nqtavq nee mail lee-a nail gaq nail ganl
31 Yaolhaq gaoq ge nail: “Nqtavq kovtavq nee mail lee-a nail gaq neq, iqsanl nail kovtavq bhai eeq jaiq nail ngaol. Miltsaq yaq, miltsaq bhai tavq khi, miltsaq nail ganl taivq-ail ge nail thail nail ngaol. Nqtavq kovtavq nee mail lee-a nail gaq neq, iqsanl nail kovtavq bhai eeq jaiq nail ngaol. 32 Aivq ya gaiq ya moel-a nail ganl juq, aivq salkhil khanq nail ngaol. Thailhai ngaol-aoq, aivq-i mail salkhil khanq nail bhai, tsaol-aq teevq gaq iqsanl, maq hav bhoel-ail. 33 Aivq salkhil khanq nail bhai neema thaqtsaol nail tsaol-aq juq neq, Miqyail neq, saljial ivq deedee nail ngaol dai, heeq duq khi, salkhil khanq nail ngaol. 34 Miqyail-i mail khoel-ai lee-a nail gaq neq, Miqyail nail daoq ge nail thail nail ngaol. Miqyail neq, aqhaqlal bivq-u phao, maq phaiq maq hav dai, teevq bhee bivq nail ngaol. 35 Aqbhu Miqyail neq, Yaqyov bhai gaiq-a khi, yaoq phaq yaoq-ao nee aivq bhai av bhiq gil-ai thaq nail ngaol. 36 Yaqyov bhai neema thaqtsaol nail gaq neq, nqmaq maqluv halyeel doevq nail phaq ya nail ngaol. Yaqyov nail daoq bhai maq naldaiq nail gaq neq, nqmaq maqluv halyeel doevq nail phaq maq ya-ail. Miqyail neema phail nail phaq aivq nail kovtavq bhai jiav nail ngaol” dai, ge bhiq-a nail ngaol.
Yeiqsul Saqmaqliv nail yaqmai-aq teevq gaq bhai thaoqphuq-a nail ganl
1 Yeiqsul neq, Yaolhaq nee maqtsil yu bhai yaqlaol bhi pevq lal khi, ulcuvq saol bhiq thailthaiq nail ngaol dai, Phaqliqsail juq ya gaiq-a nail ngaol. 2 Maldil dai, ge haq neq, Yeiqsul yu bhai ulcuvq maq saol bhiq-al. Aivq nail yaqlaol juq taivq-ail, yu bhai ulcuvq saol bhiq-a nail ngaol. 3 Ganl niil ganl Phaqliqsail juq ya gaiq-ao naol dai, Yeiqsul heeq nia-u phao, Yuldav milkhaoq nee mail dov ail khi, Gaqliqlail milkhaoq bhai teevq pov gaoq ail-a nail ngaol. 4 Aq-u phao, Saqmaqliv milkhaoq bhai aivq ya ail pav nail ngaol. 5 Saqmaqliv milkhaoq lavqkhoel bhai jaol nail, Sulkhaq dai khul nail meenq teevq meenq bhai, aivq lai kev-a nail ngaol. Meenq al meenq neq, Yaqkov-i mail aivq nail yaqyov Yaolsai bhai bivq thaq-ail ceevq-a nail miltsaq al dao nail aqjail bhai jiav nail ngaol. 6 A bhai Yaqkov nail lovduq jiav nail ngaol. Yeiqsul gaq doil tsao doil-a nail ngel-i mail, lovduq aqjail bhai jaoldeel-a nail ngaol. Yanq al yanq neq, n-gaol laolma ngaol. 7 Aq-u phao, Saqmaqliv nail yaqmai-aq teevq gaq ulcuvq keivq lee-a nail ngaol. “Ngaq bhai ulcuvq micil bhi daol lavq yaoq” dai, Yeiqsul aivq bhai hal nail ngaol. 8 Aq-u phao, Yeiqsul nail yaqlaol juq neq, meenq bhai jaqjaq daoldaol ul lai-a nail ngaol. 9 Yaqmai-aq al gaq ge nail: “Ngal neq, Saqmaqliv tsaol-aq ngaol. Naol neq, Yuldav nail tsaol-aq ngaol. Khul khi mail, naol ngaq bhai ulcuvq hal daol nail-aiq” dai, ge bhiq-a nail ngaol. Khul khi mail alhai ge nail dai ngal-aq neq, Yuldav nail tsaol-aq neq, Saqmaqliv nail tsaol-aq bhai, aqtsaoq teevq peivq-ail maq tsaoq tavq khaoq-ail. 10 Yeiqsul ge nail: “Miqyail-i mail bivq-ai leevq-a nail kovpavq khi mail naoq bhai ulcuvq hal daol nail gaq bhai, naol heeq nia-ail nul neq, naol aivq bhai ulcuvq hal daol naol. Aivq iqsanl, naoq bhai doevq nail ulcuvq bhi daol lavq naol” dai, ge bhiq-a nail ngaol. 11 Yaqmai-aq al gaq ge nail: “Heeqphaq-ol, naol ulcuvq keivq dov nail teevq phaq-ail maq aol nail nee ovqtavq, lovduq niil duq neq, navq deedee nail ngaol. Naol doevq nail ulcuvq khaq bha keivq-ail nail-aiq. 12 Ngadao nail Aqbhu Yaqkov, lovduq niil duq nvjuq bhai bivq lavq-a nail ngaol. Aivq khi mail aivq nail yaq juq iqsanl, lovduq niil duq bhai keivq daol-a nail ngaol. Aivq nail jaiqyaq juq bhai iqsanl, keivq dov khi bhi daol-a nail ngaol. Naol Yaqkov nee maqtsil eeq nail laiq” dai, naldaiq-a nail ngaol. 13 Yeiqsul ge bhiq-a nail: “Ulcuvq niil khal daol nail tsaol-aq, ulcuvq gaoq moevq lal nail ngaol. 14 Thailhai ngaol-aoq, ngaq-i bhi daol nail ulcuvq khal daol nail tsaol-aq, ulcuvq teevq thal-iq, maq moevq lal yaoq-aol. Ngaq-i bhi daol nail ulcuvq al, tsaol-aq al gaq nail lavqkhoel bhai nqmaq maqluv halyeel doevq nail phaq dov lee nail ulcuvq laolbev pevq lal nail ngaol” dai, aivq bhai ge bhiq-a nail ngaol. 15 Yaqmai-aq al gaq ge nail: “Heeqphaq-ol, ngal ulcuvq maq ya moevq lal nail nee ovqtavq, niilniai iqsanl ulcuvq maq ya keivq lee dai, ulcuvq al ngaq bhai bhi daol lavq yaoq” dai, ge bhiq-a nail ngaol. 16 “Naoq nail yovjil khul lai yaoq” dai, Yeiqsul aivq bhai ge bhiq-a nail ngaol. 17 “Ngal yovjil maq bhao” dai, Yaqmai-aq al gaq ge kovq bhiq-a nail ngaol. Yeiqsul ge nail: “Yovjil maq bhao dai, naol ge nail neq, tsaq naol. 18 Khul khi mail dai ngal-aq neq, naol neq, ngaq aol hal-aoq nail ngaol. Niil aq-il naoq-ai nee mail jaol nail gaq, naoq nail yovjil maq ngel-ail. Naol thailhai ge nail neq, tsaq nail ngaol” dai, ge bhiq-a nail ngaol. 19 Yaqmai-aq al gaq ge nail: “Heeqphaq-ol, naol neq, Miqyail nail haqbhoil gedan nail gaq nial dai, ngal heeq kivq lal-aoq naol. 20 Nvjuq Saqmaqliv tsaol-aq nail aqphiq aqbhal juq neq, gaoqjaoq niil jaoq nail kovtavq-ai, Miqyail bhai uqhuq thaoq-a nail ngaol. Thailhai ngaol-aoq, Miqyail bhai uqhuq thaoq nail neq, Yeiqlulsaqlaiq meenq bha thaoq nail tsaq naol dai, nuljuq Yuldav nail tsaol-aq juq ge nail ngaol” dai, ge bhiq-a nail ngaol. 21 Yeiqsul ge nail: “Ngal ge nail daoq bhai, neema thaqtsaol yaoq. Gaoqjaoq niil jaoq nail kovtavq bhai maqkhaiq, Yeiqlulsaqlaiq meenq lavqkhoel bhai maqkhaiq, nuljuq Aqbhu Miqyail bhai uqhuq maq ya thaoq lai nail yanq kev lee nail ngaol. 22 Nuljuq neq, nuljuq maq heeq nia nail phaq bhai uqhuq thaoq nail ngaol. Nvjuq neq, nvjuq heeq kivq nail phaq bhai uqhuq thaoq nail ngaol. Khul khi mail dai ngal-aq neq, hevqkovq nail phaq neq, Yuldav nail tsaol-aq nail lavqkhoel nee dov lal nail ngaol. 23 Miqyail bhai maldil uqhuq thaoq nail tsaol-aq juq neq, aqhaqlal lavqkhoel khi, saljial ivq nail neema aol nail lavqkhoel nee, uqhuq thaoq nail yanq kev lee nail ngaol. Niil aq-il iqsanl, kev lee-aoq nail ngaol. Khul khi mail dai ngal-aq neq, Aqbhu Miqyail neq, aivq bhai alhai uqhuq thaoq nail tsaol-aq bhai oil movq nail ngaol. 24 Miqyail neq, aqhaqlal ngaol. Alheel ngel-i mail, aivq bhai uqhuq khal thaoq nail tsaol-aq juq neq, aqhaqlal lavqkhoel khi, saljial ivq nail neema aol nail lavqkhoel nee, uqhuq ya thaoq nail ngaol” dai, ge bhiq-a nail ngaol. 25 Yaqmai-aq al gaq ge nail: “Meiqsilya lee naol dai, ngal heeq kivq naol. Aivq lee kev-u phao, nvjuq bhai yaoq phaq yaoq-ao nee cavq lavq naol” dai, ge bhiq-a nail ngaol. Meiqsilya dai ge nail neq, Khali bhai ge nail ngaol. 26 “Naoq-ai nee mail daoq ge tsaoq thailthaiq nail ngal neq, Meiqsilya ngaol” dai, Yeiqsul aivq bhai ge bhiq-a nail ngaol.
Yaqlaol juq Yeiqsul jaol nail bha kovq lal-a nail ganl
27 Aq-u phao, aivq nail yaqlaol juq kovq kev lee-a nail ngaol. Yeiqsul yaqmai-aq al gaq nee mail daoq ge tsaoq nail bhai aqyu juq ya moel-u phao, noeq-u maq dov dai, pevq ail-a nail ngaol. Thailhai ngaol-aoq, “Naol khul oil movq nail, khul khi mail, naol aivq nee daoq ge tsaoq nail-aiq” dai, teevq gaq iqsanl maq naldaiq-al. 28 -29 Yaqmai-aq al gaq, aivq nail miltsaq iqlaoq bavq thaq-ail ceevq khi, meenq bhai kovq lai-a nail ngaol. “Ngaq-i mail khal nl jel lavq-a nail iqsanl bhai gedaiq lavq-a nail gaq bhai heldaiq lee yaoq. Aivq neq, Khali ngel-ail meeq” dai, meenq bhai jaol nail tsaol-aq juq bhai ge bhiq lai-a nail ngaol. 30 Aqyu juq meenq nee dov lee khi, Yeiqsul jaol nail bhai lee-a nail ngaol. 31 Aqyu juq Yeiqsul jaol nail bha lee thailthaiq-u phao, “Saqlaq-ol, jaq lal yaoq” dai, yaqlaol juq Yeiqsul bhai hal-a nail ngaol. 32 “Ngal nuljuq maq heeq nia nail jaq nail phaq jiav naol” dai, Yeiqsul aqyu juq bhai ge bhiq-a nail ngaol. 33 “Tsaol-aq teevq gaq ganav aivq bhai bhi jaq bhi daol thaq nail jaol-aq” dai, yaqlaol juq aqyu juq nail gaiqlaq bhai ge pheeljaq nail ngaol. 34 Yeiqsul ge nail: “Ngaq bhai khoel-ai leevq-a nail gaq neema tsaq dai nl khi, aivq nail ganl nl gil-a nail niil neq, ngaq nail jaq nail phaq ngaol. 35 Bhala liq heeq jail-ail haq neq, gov gaiq nail yanq kev lal aoq nial dai, nuljuq ge nail maq ngel-ail laiq. Thailhai ngaol-aoq, ngal nuljuq bhai ge lavq bhel. Gov gov yal bhai heldaiq yaoq. Niil aq-il iqsanl gov mi lal khi, gov gaiq mao lal-aoq nail ngaol. 36 Haiq nail gaq khi mail, gaiq nail gaq teevq gaq khe-ai lavqkhiq ya tsail dai, gaiq nail gaq aqphoiq ya thailthaiq khi, nqmaq maqluv halyeel doevq nail aqheeq deeq bhoi thailthaiq nail ngaol. 37 Teevq gaq haiq khi, teevq gaq gaiq nail ngaol dai, daoqdaq daq nail daoq al daoq, niilniai maldil tsaq lai nail ngaol. 38 Nuljuq-i mail maq nl-ai thaq nail yalgaol bhai ngal nuljuq bhai gov bhi gaiq-ail naol. Yu-i mail nl-ai thaq nail yalgaol bhai nuljuq ya gaiq jaq naol” dai, ge bhiq-a nail ngaol.
Saqmaqliv tsaol-aq maodai gaq neema thaqtsaol lal-a nail ganl
39 Meenq al meenq nail lavqkhoel bhai jaol nail Saqmaqliv nail tsaol-aq maodai gaq Yeiqsul bhai neema thaqtsaol lal-a nail ngaol. “Ngaq-i mail khal nl jel lavq-a nail iqsanl mail, aivq ngaq bhai gedaiq lavq-a nail ngaol” dai, yaqmai-aq al gaq salkhil khanq-a nail ngel-i mail ngaol. 40 Alheel ngel-i mail, Saqmaqliv nail tsaol-aq al juq, Yeiqsul jaol nail bha lee kev khi, “Nvjuq nee mail jaol lavq yaoq” dai, hal nail ngel-i mail, aivq a bhai nvq n jaol-a nail ngaol. 41 Yeiqsul-i mail ge-a nail daoq al juq bhai ya gaiq-a nail ngel-i mail, tsaol-aq maodai aivq bhai neema thaqtsaol lal-a nail ngaol. 42 Aqyu juq yaqmai-aq al gaq bhai ge bhiq-a nail: “Nvjuq naoq nail daoq bhaqda nee taivq-ail, Yeiqsul bhai neema thaq tsaol nail maq ngel yaoq-aol. Nvjuq aivq nail daoq ya gaiq-a nail ngel-i mail, tsaol-aq niil gaq maldil miltsaq yaq bhai Hevqkovq nail gaq nial dai, nvjuq heeq kivq lal-aoq nail ngaol” dai, ge bhiq-a nail ngaol.
Eeq nail heel nail teevq gaq nail yaqyov bhai, Yeiqsul lav meeq bhiq-a nail ganl
43 Yeiqsul a bhai nvq n jaol gaq khi, Gaqliqlail milkhaoq bhai ail-a nail ngaol. 44 Khul khi mail dai ngal-aq neq, “Miqyail nail haqbhoil gedan nail gaq neq, yovqgavq nail jaolkhaoq jaollaoq bhai khaoqsail maq jiav-ail” dai, Yeiqsul aivq salkhil khanq-ai thaq nail ngaol. 45 Thailhai ngaol-aoq, aivq Gaqliqlail milkhaoq bhai ail kev-u phao, Gaqliqlail nail tsaol-aq juq aivq bhai hav bhoel-a nail ngaol. Khul khi mail dai ngal-aq neq, Yeiqlulsaqlaiq meenq bha bhaoqaiq lav sav-u phao, aqyu juq iqsanl jaol khi, Yeiqsul-i mail khal nl-a nail phaq ya moel-a nail ngaol. 46 A bhai nee ngal-aq, aivq Gaqliqlail milkhaoq, Gaqnaq julgu bhai gaoq lai kev-a nail ngaol. Julgu al gu neq, aivq-i mail ulcuvq bhai aqheeq tsilju nail ullul bhi pevq lal-a nail julgu ngaol. Aq-u phao, Gaqbheiqneiqoq meenq bhai jaol nail heeqphaq teevq gaq nail yaqkav nail yaqyov coevq sil nail ngaol. 47 Yeiqsul Yuldav milkhaoq nee mail Gaqliqlail milkhaoq bhai lal kev-aoq naol geiq dai, eeq nail heel nail al gaq ya gaiq-a nail ngaol. Aq-u phao, aivq nail yaqyov sil lai-aiq nail ngel-i mail, aivq Yeiqsul jaol nail bha lai khi, “Ngaq nail yaqyov bhai lav meeq lee lavq yaoq” dai, Yeiqsul bhai hal nail ngaol. 48 Yeiqsul ge nail: “Bhi heeq bhi moel nail juq khi mail noeq-u maq dov nail juq bhai nuljuq maq ya moel haq neq, nuljuq neema maq thaqtsaol-ail” dai, ge bhiq-a nail ngaol. 49 “Heeqphaq-ol, ngaq nail Yaqyov maq sil-u nee mail lee lavq yaoq” dai, eeq nail heel nail al gaq, Yeiqsul bhai hal nail ngaol. 50 “Naoq nail Yaqyov meeq lai-aoq nail ngaol. Kovq ail yaoq” dai, Yeiqsul aivq bhai ge bhiq-a nail ngaol. Eeq nail heel nail al gaq Yeiqsul-i mail ge nail daoq bhai, neema thaqtsaol khi, kovq ail-a nail ngaol. 51 Aivq kovq ail thailthaiq-u phao, gailphail lail ma bhai, aivq nail yaqkav juq aivq bhai thaoqphuq khi, “Naoq nail yaqyov meeq lai-aoq nail ngaol” dai, ge bhiq-a nail ngaol. 52 “Ngaq nail yaqyov khul yanq bhai meeq lai-a nail-aiq” dai, naldaiq-u phao, “Milgaol n-gaol laolma naqli teevq lavq bhai aivq coevq sil nail meeq lai-a nail ngaol” dai, yaqkav al juq aivq bhai ge bhiq-a nail ngaol. 53 Yanq al yanq neq, “Naoq nail yaqyov meeq lai-aoq nail ngaol” dai, Yeiqsul aivq bhai ge bhiq-a nail yanq bhai tsaq nail ngaol dai, aivq heeq nia nail ngaol. Aq-u phao, aivq iqsanl, aivq nail miqyaq khaqma iqsanl mail, Yeiqsul bhai neema thaqtsaol lal-a nail ngaol. 54 Bhi heeq bhi moel nail niil neq, Yeiqsul Yuldav milkhaoq nee mail Gaqliqlail milkhaoq bhai ail kev khi, bhi heeq bhi moel nail phaq nl-a nail nvq phaq teevq phaq ngaol.
Ngaqkha aqjail bhai, Yeiqsul nal nail tsaol-aq teevq gaq bhai lav meeq bhiq-a nail ganl
1 A bhai nee ngal-aq, Yuldav nail tsaol-aq nail bhaoqaiq lav sav nail yanq kev lal-a nail ngel-i mail, Yeiqsul Yeiqlulsaqlaiq meenq bha dav lai-a nail ngaol. 2 Yeiqlulsaqlaiq meenq lavqkhoel, yaol nail laolkhoiq bhai, Heiqbhail nail daoq, Beiqdeiqsaqdal dai khul nail ngaqkha teevq lao jiav nail ngaol. Ngaqkha al nail aqjail bhai gaqnaq yavqtsoel ngaq tsoel jiav nail ngaol. 3 Gaqnaq yavqtsoel al ngaq tsoel nail lavqkhoel bhai, nal nail tsaol-aq, maivpeivq peivq nail tsaol-aq, khil khoi khoi nail tsaol-aq khi mail, khil sil lavq sil sil nail tsaol-aq maodai iqthaiq nail ngaol. 4 Yanq kev lal haq neq, nqtavq gaqkhoel yavq kha lee khi, ulcuvq bhai lav dao lee nail ngaol. Ulcuvq al dao lal-u phao, yu nail iqmoeq aol ail nail gaq neq, aivq khul nail nalgoel nal khi ngaol-aoq, meeq lai nail ngaol. 5 Hail tsel eivq kovq bhee dai, nal bhee lavq thaq nail yaqyov-aq teevq gaq a bhai jaol nail ngaol. 6 Yeiqsul tsaol-aq al gaq bhai ya moel-u phao, aivq nal nail maoq lal-aoq naol dai, heeq nia khi, “Naol meeq lai movq-ail laiq” dai, aivq bhai nal daiq-a nail ngaol. 7 Tsaol-aq al gaq ge nail: “Heeqphaq-ol, ulcuvq niil dao lal-u phao, ngaqkha lavqkhoel-ai, ngaq bhai tsiq bhoel lavq nail teevq gaq-ail maq jaol-ail. Ngal aol ail nail khi-u phao, yaoq gaq yaoq ngaq nail iqmoeq nee aol ail nail ngaol” dai, ge bhiq-a nail ngaol. 8 Yeiqsul ge nail: “Thul yaoq. Naoq nail iqjial bavq khi dov ail yaoq” dai, ge bhiq-a nail ngaol. 9 Tsaol-aq al gaq teevq pov nee meeq lai khi, aivq nail iqjial bavq khi dov ail-a nail ngaol. Aq-u n-gaol neq, Yuldav nail tsaol-aq nail jaol n n-gaol ngaol. 10 Alheel ngel-i mail, meeq lai-a nail tsaol-aq al gaq bhai, Yuldav nail tsaol-aq teevq pav ganav juq ge bhiq-a nail: “Yanqgaol neq, jaol n n-gaol ngaol. Naol naoq nail iqjial bavq bavq-ail maq tsao khaoq-ail” dai, ge bhiq-a nail ngaol. 11 Aq-u phao aivq ge nail: “Ngaq bhai bhi meeq lai lavq-a nail gaq, ‘Naoq nail iqjial bavq khi dov ail yaoq’ dai, ngaq bhai khoel nail ngaol” dai, aqyu juq bhai ge kovq bhiq-a nail ngaol. 12 “ ‘Naoq nail iqjial bavq khi dov ail yaoq’ dai, naoq bhai khoel nail al gaq, khaq sil gaq” dai, aqyu juq aivq bhai naldaiq-a nail ngaol. 13 Meeq lai-a nail al gaq, aivq bhai lav meeq lavq-a nail al gaq khaq sil gaq dai, aivq maq heeq nia-ail. Khul khi mail dai ngal-aq neq, a bhai tsaol-aq munl munl ma jaol nail ngel-i mail, Yeiqsul a bhai nee dov ail-a nail ngaol. 14 A bhai nee ngal-aq, uqhuq thaoq nail ilkhaol il ma lavqkhoel, Yeiqsul tsaol-aq al gaq bhai halpov moel khi ge bhiq-a nail: “Naol meeq lai-aoq thaq nial. Iqmoeq-u nee maqtsil doil nail phaq, naoq nail kovtavq bhai maq ya kev lee dai, oeqbal thaq gaoq nl” dai, ge bhiq-a nail ngaol. 15 Meeq lai-a nail tsaol-aq al gaq, Yuldav nail tsaol-aq teevq pav ganav juq jaol nail bha ail khi, “Ngaq bhai bhi meeq lai lavq-a nail gaq neq, Yeiqsul ngaol” dai, ge bhiq-a nail ngaol. 16 Yeiqsul jaol n n-gaol alhai bhi meeq lai-a nail ngel-i mail, Yuldav nail tsaol-aq teevq pav ganav juq, aq-u n-gaol nee ngal-aq, Yeiqsul bhai khoeq bhiq jiovq bhiq nail phaq nl-a nail ngaol. 17 Aq-u phao Yeiqsul ge nail: “Niil aq-il kev dai, ngaq nail Aqbhu khaq mao iqsanl maq naq lai dai, ganl nl nail ngaol. Alheel ngel-i mail, ngal iqsanl ya nl naol” dai, ge bhiq-a nail ngaol. 18 Alheel ngel-i mail, Yuldav nail tsaol-aq nail aqivq juq neq, iqmoeq-u nee maqtsil Yeiqsul bhai deeq heivq nail khi, halpov nail ngaol. Khul khi mail dai ngal-aq neq, aivq neq, jaol n n-gaol maq nl khaoq nail phaq nl-a nail nee ovqtavq, Miqyail bhai aivq nail Aqbhu dai khul nail ngel-i mail, aivq khi mail Miqyail teevq gaq kheel ngaol dai, ge movq nail khe-ai dul lai nail, ngel-i mail ngaol.
Yaqyov bhaqaoq aol nail ganl
19 Yeiqsul ge nail: “Ngal nuljuq bhai maldil dai, ge lavq bhel. Yaqyov neq, aivq bhai aivq teevq phaq-ail maq nl kivq-ail. Aqbhu Miqyail nl nail bhai ya moel-a nail khe-ai, Yaqyov iqsanl nl nail ngaol. Aqbhu khal nl nail yaoq phaq yaoq-ao nee, Yaqyov nl naol. 20 Aqbhu Miqyail neq, Yaqyov bhai gaiq-a nail ngel-i mail, aivq khal nl nail iqsanl mail, Yaqyov bhai, nl daiq bhi nail ngaol. Nuljuq noeq-u maq dov-ail bhi pevq-ail nail dai khi, niidai nee maqtsil eeq nail yaoq phaq yaoq iqsanl, aivq Yaqyov bhai nl daiq bhiq naol. 21 Aqbhu Miqyail neq, sil nail tsaol-aq bhai gaoq bhi doevq kovq lal nail khe-ai, Yaqyov iqsanl aivq bhi doevq kovq lal movq nail tsaol-aq bhai, bhi doevq kovq lal nail ngaol. 22 Aqbhu Miqyail tsaol-aq teevq gaq bhai iqsanl, yalkhaq maq dal-ail. Yalkhaq dal nail bhaqaoq iqsanl mail, Yaqyov bhai av bhiq gil-ai thaq nail ngaol. 23 Khul khi mail dai ngal-aq neq, tsaol-aq iqsanl mail, Aqbhu Miqyail bhai ev nail khe-ai, Yaqyov bhai iqsanl ev dai, av bhiq gil-ai thaq nail ngaol. Yaqyov bhai maq ev nail tsaol-aq, Yaqyov bhai bhi lee-a nail Aqbhu Miqyail bhai iqsanl, maq ev-ail. 24 Ngal nuljuq bhai maldil dai, ge lavq bhel. Ngaq nail daoq naldaiq khi, ngaq bhai bhi lee lavq-a nail gaq bhai, neema thaqtsaol nail gaq neq, nqmaq maqluv halyeel doevq nail phaq ya nail ngaol. Neema thaqtsaol nail al gaq neq, yalkhaq dal nail bhai maq ya daq-ail. Aivq neq, sil nail lavqkhoel nee dov ail khi, doevq nail lavqkhoel bhai aol lai-aoq nail ngaol. 25 Ngal nuljuq bhai maldil dai, ge lavq bhel. Sil-a nail tsaol-aq juq neq, Miqyail nail Yaqyov nail daoq bhai, ya gaiq nail yanq kev lee nail ngaol. Niil aq-il iqsanl kev lee-aoq nail ngaol. Ya gaiq-a nail tsaol-aq iqsanl mail ya doevq naol. 26 Aqbhu neq, doevq nail phaq dov lee duq pevq nail khe-ai, aivq nail yaqyov iqsanl, doevq nail phaq dov lee duq pevq dai, aivq nl bhiq nail ngaol. 27 Al ovqtavq, aivq neq, Tsaol-aq nail Yaqyov ngel-i mail, yalkhaq dal nail bhaqaoq, Aqbhu Miqyail aivq bhai av bhiq-a nail ngaol. 28 Ganl niilniai noeq-u maq dov dai, thaq pevq-ail. Khul khi mail dai ngal-aq neq, luqdaol bhai duqpheeq-ai thaq nail tsaol-aq iqsanl mail, aivq nail daoq ya gaiq khi, luqdaol nee dov lal nail yanq kev lee nail ngaol. 29 Aqmeeq phaq nl-a nail tsaol-aq juq neq, aqdoevq doevq nail phaq ya nail haqbhoil gaoq doevq kovq lal nail ngaol. Haqeiv nail phaq nl-a nail tsaol-aq juq neq, yalkhaq dal nail bhai daq nail haqbhoil, gaoq doevq kovq lal naol” dai, Yeiqsul ge bhiq-a nail ngaol.
Yeiqsul nail ganl salkhil khanq nail juq
30 Yeiqsul gaoq ge nail: “Ngal taivq-ail neq, khul teevq phaq-ail maq nl kivq-ail. Ngal ya gaiq-a nail khe-ai, ngal yalkhaq dal nail ngaol. Ngal dal nail neq, tsaq nail daol nail ngaol. Khul khi mail dai ngal-aq neq, ngaq bhai khoel-ai leevq lavq-a nail gaq neema tsaq nail khe-ai, ngal nl naol. Ngal neema tsaq nail khe-ai, ngal nl nail maq ngel. 31 Ngal teevq gaq taivq-ail ngaq nail ganl salkhil khanq haq neq, ngal khanq nail salkhil maq tsaq-ail. 32 Ngaq nail ganl, salkhil khanq nail teevq gaq jaol nail ngaol. Aivq khanq nail al neq, tsaq nail ngaol dai, ngal heeq kivq naol. 33 Nuljuq yu bhai, Yaolhaq jaol nail bha khoel gai-aivq-u phao, aivq maldil pevq nail ganl, salkhil khanq-a nail ngaol. 34 Maldil dai, ge haq neq, tsaol-aq-i mail khanq nail salkhil bhai ngal maq juq. Thailhai ngaol-aoq, nuljuq hevqkovq nail phaq ya dai, ngal niailhai ge lavq bhel. 35 Yaolhaq neq, tovq bhaq-ai thaq nail phalmanq khe-ai dul nail ngaol. Aivq nail aqbhaq bhaq nail bhai, nuljuq teevq yanq taivq-ail, lavqkhiq tsail movq nail neema aol nail ngaol. 36 Thailhai ngaol-aoq, Yaolhaq-i mail salkhil khanq-a nail nee maqtsil eeq jaiq nail ngaq nail ganl, salkhil khanq-ai thaq nail jiav nail ngaol. ‘Ganl niil juq nl gil yaoq’ dai, Aqbhu Miqyail ngaq bhai khoel nail ngaol. Niil aq-il ngal nl nail niil neq, Aqbhu Miqyail ngaq bhai khoel-ai leevq-a nail ngaol dai, salkhil pevq nail ngaol. 37 Ngaq bhai khoel-ai leevq lavq-a nail Aqbhu Miqyail iqsanl, ngaq nail ganl salkhil khanq nail ngaol. Nuljuq neq, Aqbhu Miqyail nail daoq maq gaiq daiq haq-al. Aqbhu Miqyail bhai iqsanl maq moel daiq haq-al. 38 Aqbhu Miqyail nail daoq, nuljuq nail lavqkhoel bhai, jaol duq maq jiav-ail. Khul khi mail dai ngal-aq neq, aivq-i mail khoel-ai leevq-a nail gaq bhai, nuljuq neema maq thaqtsaol-ail. 39 Jalliq lavqkhoel bhai, nqmaq maqluv halyeel doevq nail phaq halpov moel kivq naol dai, nuljuq noeq nail ngel-i mail, nuljuq Jalliq lavqkhoel bhai halpov halpov-ail ge nail ngaol. Jalliq al neq, ngaq nail salkhil khanq-ai thaq nail ngaol. 40 Thailhai ngaol-aoq, aqdoevq doevq nail phaq ya dai, nuljuq ngal jaol nail bha maq lal movq-ail. 41 Tsaol-aq yaq-i mail tsiq eeq lal nail bhai ngal halpov nail maq ngel. 42 Thailhai ngaol-aoq, Miqyail nail goil nail gaiq-a nail phaq, nuljuq nail neema lavqkhoel bhai maq aol-ail dai, ngal heeq kivq naol. 43 Ngal ngaq nail Aqbhu nail aqmil kov-uvq nee lee khi ngaol-aoq, nuljuq ngaq bhai maq hav bhoel-ail. Thailhai ngaol-aoq, yovqgavq nail aqmil kov-uvq nee yovqgavq lee-a nail yaoq gaq yaoq bhai, nuljuq hav bhoel naol. 44 Nuljuq teevq gaq nee teevq gaq, tsiqeeq nail bhai oil movq nail ngaol. Thailhai ngaol-aoq, aivq teevq gaq taivq-ail Miqyail pevq nail gaq-i mail bhi tsiqeeq dai, nuljuq maq halpov-ail. Alheel ngel-i mail, nuljuq ngaq bhai, neema khalhai khi thaqtsaol nail-aiq. 45 Aqbhu Miqyail nail sivtavq-ai, nuljuq bhai oeqbal thaq nail gaq, ngal ngaol dai, thaq noeq. Nuljuq bhai oeqbal thaq nail teevq gaq jaol nail ngaol. Al gaq neq, nuljuq-i mail juq nail Molseiq ngaol. 46 Nuljuq Molseiq bhai, neema thaqtsaol-ail nul neq, ngaq bhai iqsanl neema thaqtsaol nail ngaol. Khul khi mail dai ngal-aq neq, aivq ngaq nail ganl gevq-ai thaq nail ngaol. 47 Nuljuq aivq-i mail gevq-ai thaq nail juq bhai, neema maq thaqtsaol haq neq, ngaq nail daoq bhai neema khalhai khi thaqtsaol heeq” dai, Yeiqsul ge bhiq-a nail ngaol.
Yeiqsul tsaol-aq ngaq hinl gaq bhai bhi jaq-a nail ganl
1 A bhai nee ngal-aq, Gaqliqlail ngaqkha a phao lelkhel bha ceiv lai-a nail ngaol. Gaqliqlail ngaqkha bhai Deiqbheiqlil dai iqsanl, khul nail ngaol. 2 Yu bhai bhi heeq bhi moel nail dai khi, Yeiqsul nal nail goel nail tsaol-aq bhai bhi meeq lai-u phao, ya moel-a nail tsaol-aq munl munl ma juq, Yeiqsul nail haoqnao tsaothel-aivq-a nail ngaol. 3 Yeiqsul gaoqjaoq bhai dav lai khi, aivq nail yaqlaol juq nee mail jaoldeel-a nail ngaol. 4 Aq-u phao, Yuldav nail tsaol-aq nail Bhaqsaqkhaq bhaoqaiq lav sav nail yanq aqjail jail lal-aoq nail ngaol. 5 Yeiqsul heldaiq gai-aivq-u phao, tsaol-aq munl munl ma juq, aivq jaol nail bha lal nail bhai ya moel-a nail ngaol. “Ngadao juq, tsaol-aq niil juq bhai bhi jaq nail khaqmul khaq bha ul ail heeq” dai, Yeiqsul Pillilpuv bhai naldaiq-a nail ngaol. 6 Yeiqsul aivq khalhai ya khi nail-aiq dai, heeq nia khi ngaol-aoq, Pillilpuv bhai laonqdaiq movq nail ngel-i mail, alhai naldaiq-a nail ngaol. 7 Pillilpuv ge nail: “Tsaol-aq niil juq teevq gaq micil ya jaq dai, khaqmul nvq yal bavq nail aqphoiq ul ail khi ngaol-aoq, maq lovq lai-ail” dai, Yeiqsul bhai ge kovq bhiq-a nail ngaol. 8 -9 Aivq nail yaqlaol juq nail lavqkhoel, Silmoq Bheiqtuvluv nail jaqbheq Aqdaiqlaiq ge nail: “Niilniai jaol nail yaqyov teevq gaq, khaqmul ngaq heeq khi mail delgil nvq maol aol-ail nial. Thailhai ngaol-aoq, tsaol-aq niidai nail haqbhoil neq, khul maq niail lai-ail jaol-aq” dai, Yeiqsul bhai ge bhiq-a nail ngaol. 10 “Tsaol-aq niil juq bhai bhi jaoldeel yaoq” dai, Yeiqsul aivq nail yaqlaol juq bhai ge bhiq-a nail ngaol. A bhai neq, moeqgaq doevq nail daikhaoq aqsal ngaol. A bhai jaoldeel-a nail tsaol-aq juq neq, yaqyov-aq taivq-ail, ngaq hinl gaq niidai bhee nail ngaol. 11 Aq-u phao, Yeiqsul khaqmul al oil khi, Miqyail bhai tsiqeeq-a nail ngaol. A bhai nee ngal-aq, jaoldeel-nvq thaq nail tsaol-aq al juq bhai, bhi bhoil bhiq-a nail ngaol. Delgil al iqsanl, alhai bhi bhoil bhiq-a nail ngaol. Tsaol-aq iqsanl mail, teevq bov ya jaq-a nail ngaol. 12 Tsaol-aq al juq jaq bov gaq-u phao, “Teevq peivq-ail maq ya peivq-ail dai, maq jaq gil-ail jaiq lal-a nail juq iqsanl mail, gov kovq yaoq” dai, Yeiqsul aivq nail yaqlaol juq bhai ge bhiq-a nail ngaol. 13 Alheel ngel-i mail, aqyu juq gov kovq daiq-u phao neq, tsoelthoel-i mail lav sav-ai thaq nail khaqmul al ngaq heeq nail jaiq lal thaq nail juq, pheeqdeel nee tsel-nvq deel bhee nail ngaol. 14 Yeiqsul-i mail nl-a nail bhi heeq bhi moel nail phaq bhai tsaol-aq al juq ya moel-u phao, “Tsaol-aq niil gaq neq, miltsaq kovtavq bhai lee naol dai, ge-ai thaq nail Miqyail nail haqbhoil gedan nail al gaq maldil nial” dai, ge nail ngaol. 15 Tsaol-aq al juq, aivq bhai nieivq khi, heeqphaq bhi jiovq nail khi bhai, Yeiqsul heeq nia nail ngel-i mail, aivq teevq gaq taivq-ail gaoqjaoq bhai gaoq dav lai-a nail ngaol.
Yeiqsul ulcuvq kovtavq bhai gailkhaol tsao-a nail ganl
16 -17 Nqkivq kivq lee-u phao, Yeiqsul nail yaqlaol juq ngaqkha jiav nail bha yavq kha ail khi, laovq bhai aol ail-a nail ngaol. A bhai nee ngal-aq, aqyu juq ngaqkha a phao lelkhel phao jiav nail Gaqbheiqneiqoq meenq bhai kovq ceiv lai-a nail ngaol. Aq-u phao, nqkivq kivq lee-aoq nail ngaol. Thailhai ngaol-aoq, Yeiqsul neq, aqyu juq nail haoqnao maq the kheel lee haq-al. 18 Aq-u phao, lilmoel lil ma bhoe lal khi, eelkhaol thaoq deedee nail ngaol. 19 Aqyu juq hail lail liq lail bhee dai, laovq e kel-aivq-u phao, Yeiqsul ulcuvq kovtavq bhai tsao tsao-ail, laovq nail aqjail-ai tsao kel leevq nail bhai aqyu juq ya moel khi, geesil deedee lal bhiq-a nail ngaol. 20 “Nuljuq thaq geesil. Ngal ngaol” dai, Yeiqsul aqyu juq bhai ge bhiq-a nail ngaol. 21 A bhai nee ngal-aq, aqyu juq lavqkhiq tsail nail lavqkhoel nee Yeiqsul bhai, laovq lavqkhoel bhai khul bhoel khi, aqyu juq-i mail ail nail dao bhai, teevq yanq lal yanq nee mail, ail kev-a nail ngaol.
Tsaol-aq munl munl ma Yeiqsul bhai halpov nail ganl
22 Nqbhaq bhaq lal-u phao, tsaol-aq munl munl ma al juq, ngaqkha a phao lelkhel phao jaol-aiq haq nail ngaol. Milgaol neq, niilniai laovq teevq laovq taivq-ail jiav nail ngaol dai, aqyu juq heeq nia nail ngaol. Yeiqsul laovq bhai maq aol lai dai, aivq nail yaqlaol juq taivq-ail, laovq jeel-aivq-a nail bhai, aqyu juq moel-a nail ngaol. 23 Yeiqsul Miqyail bhai tsiqeeq khi aqyu juq-i mail khaqmul ya jaq-a nail al dao nail aqjail bhai, Deiqbheiqlil meenq nee mail laovq yaoq juq yaoq lal kev-a nail ngaol. 24 Yeiqsul khi mail aivq nail yaqlaol juq niilniai maq jaol-aoq thaq nail dai, tsaol-aq munl munl ma al juq, heeq nia lal-u phao, aqyu juq laovq jeeq khi, Yeiqsul bhai halpov ail nail dai khi, Gaqbheiqneiqoq meenq bhai ail-a nail ngaol.
Yeiqsul neq, aqdoevq bhi doevq lal nail khaqmul ngaol
25 Aqyu juq ngaqkha a phao lelkhel-ai, Yeiqsul bhai halpov moel-u phao, “Saqlaq-ol, naol niilniai khaq mao lee kev-a nail-aiq” dai, Yeiqsul bhai naldaiq-a nail ngaol. 26 Yeiqsul ge nail: “Ngal nuljuq bhai maldil dai, ge lavq bhel. Nuljuq bhi heeq bhi moel phaq bhai ya moel-a nail ngel-i mail, ngaq bhai halpov nail maq ngel-ail. Khaqmul teevq bov ya jaq nail ngel-i mail, ngaq bhai halpov nail ngaol. 27 Buvq-ail tsiq-ail nia nail jaqjaq daoldaol nail haqbhoil maq laijai dai, nqmaq maqluv halyeel bhi doevq nail jaqjaq daoldaol nail haqbhoil, laijai yaoq. Tsaol-aq nail Yaqyov pevq nail, ngal nuljuq bhai jaqjaq daoldaol al phaq, bhi jaq naol. Khul khi mail dai ngal-aq neq, Aqbhu Miqyail ngaq bhai neema tsaq khi junq deeq-ai thaq nail ngaol” dai, ge bhiq-a nail ngaol. 28 “Miqyail nail ganl nl kivq dai, nvjuq khalhai ya khi nail-aiq” dai, aqyu juq Yeiqsul bhai naldaiq-a nail ngaol. 29 “Miqyail-i mail khoel-ai leevq-a nail gaq bhai neema thaqtsaol nail phaq neq, Miqyail nail ganl nl nail phaq pevq nail ngaol” dai, Yeiqsul aqyu juq bhai ge kovq bhiq-a nail ngaol. 30 Aqyu juq ge nail: “Thailhai phal-iq neq, nvjuq ya moel khi, neema thaqtsaol lal dai, bhi heeq bhi moel nail khul phaq, naol nvjuq bhai bhi moel lavq heeq. Naol khul phaq nl daiq lavq nail-aiq. 31 Ngadao nail aqphiq aqbhal juq neq, haqtsoiq haqyal bhai jaol-u phao, maqnav khaqmul ya jaq-a nail ngaol. Aqyu juq ya jaq dai, ‘Nqtavq kovtavq khe khaqmul, Miqyail bivq-a nail ngaol’ dai, Jalliq lavqkhoel bhai gevq-ai thaq nail ngaol” dai, aqyu juq Yeiqsul bhai ge bhiq-a nail ngaol. 32 Yeiqsul ge nail: “Ngal nuljuq bhai maldil dai, ge lavq bhel. Nuljuq bhai nqtavq kovtavq khe khaqmul bivq lavq-a nail gaq, Molseiq maq ngel-ail. Maldil nqtavq khe khaqmul, ngaq nail Aqbhu nuljuq bhai bivq-a nail ngaol. 33 Miqyail nail khaqmul neq, nqtavq kovtavq nee lee khi, miltsaq yaq bhai aqdoevq bhi doevq lal nail khaqmul ngaol” dai, aqyu juq bhai ge bhiq-a nail ngaol. 34 “Heeqphaq-ol, khaqmul al nvjuq bhai khaq mao iqsanl bhi jaq lavq yaoq” dai, aqyu juq Yeiqsul bhai hal nail ngaol. 35 Yeiqsul ge nail: “Ngal neq, aqdoevq bhi doevq lal nail khaqmul ngaol. Ngal jaol nail bha lal nail tsaol-aq, maq moevq lal yaoq-aol. Ngaq bhai neema thaqtsaol nail tsaol-aq ulcuvq iqsanl, maq moevq lal yaoq-aol. 36 Nuljuq ngaq bhai moel khi ngaol-aoq, ngaq bhai neema maq thaqtsaol-il dai, ngal nuljuq bhai ge lavq bhel. 37 Ngaq nail Aqbhu, ngaq bhai khal bivq lavq-a nail tsaol-aq iqsanl mail, ngal jaol nail bha lal naol. Ngal jaol nail bha khal lal nail tsaol-aq bhai, ngal maldil maq khaonq ha-ail. 38 Khul khi mail dai ngal-aq neq, ngal neema tsaq nail khe-ai nl nail dai khi, nqtavq kovtavq nee lee-a nail maq ngel. Ngaq bhai khoel-ai leevq lavq-a nail gaq, neema tsaq dai nl nail dai khi, ngal lee-a nail ngaol. 39 Ngaq bhai khoel-ai leevq lavq-a nail gaq, neema tsaq nail neq, niil ngaol. Aivq ngaq bhai khal bivq lavq-a nail tsaol-aq juq nail lavqkhoel, ngal teevq gaq-ail maq bhi peivq-ail nail nee ovqtavq, daoq loi loi lai-u n-gaol, ngal aqyu juq iqsanl bhai gaoq bhi doevq kovq lal nail neq, aivq neema tsaq nail ngaol. 40 Yaqyov bhai moel khi, aivq bhai neema thaqtsaol nail tsaol-aq yaoq gaq yaoq-ao nee mail, nqmaq maqluv halyeel ya doevq nail neq, ngaq nail Aqbhu neema tsaq nail ngaol. Daoq loi loi lai-u n-gaol ngal iqsanl, tsaol-aq al juq bhai gaoq bhi doevq kovq lal naol” dai, Yeiqsul ge bhiq-a nail ngaol. 41 “Ngal neq, nqtavq kovtavq nee mail lee-a nail khaqmul ngaol” dai, aivq ge nail ngel-i mail, Yuldav nail tsaol-aq juq ge doil nail ngaol. 42 “Aivq neq, Yaolsai nail yaqyov Yeiqsul maq ngel-ail laiq. Aivq nail aqbhu aqma iqsanl ngadao juq heeq kivq nail ngaol. ‘Ngal nqtavq kovtavq nee mail lee-a nail ngaol’ dai, aivq khalhai ge nail meeq” dai, aqyu juq nail gaiqlaq bhai ge nail ngaol. 43 Aq-u phao Yeiqsul ge nail: “Nuljuq nail gaiqlaq bhai thaq ge doil. 44 Ngaq bhai khoel-ai leevq lavq-a nail Aqbhu Miqyail-i mail, ngal jaol nail bha, maq hel lavq haq neq, tsaol-aq teevq gaq iqsanl, ngal jaol nail bha maq lal nia-ail. Aqbhu Miqyail-i mail ngal jaol nail bha bhi lal-a nail tsaol-aq bhai, daoq loi loi lai-u n-gaol, ngal gaoq bhi doevq kovq lal naol. 45 Miqyail nail haqbhoil gedan nail juq nail haoqgavq lavqkhoel, ‘Miqyail neq, aqyu juq iqsanl bhai cavq bhi cov bhi naol’ dai, gevq-ai thaq nail ngaol. Aqbhu Miqyail nail daoq gaiq khi, Aqbhu Miqyail-i mail cavq nail cov nail bhai naldaiq nail tsaol-aq yaoq gaq yaoq-ao nee mail, ngal jaol nail bha lal naol. 46 Tsaol-aq teevq gaq-ail, Aqbhu Miqyail bhai maq moel daiq haq-al. Miqyail jaol nail nee lee-a nail gaq taivq-ail, Aqbhu Miqyail bhai moel daiq-a nail ngaol. 47 Ngal nuljuq bhai maldil dai, ge lavq bhel. Ngaq bhai neema thaqtsaol nail tsaol-aq, nqmaq maqluv halyeel doevq nail phaq ya nail ngaol. 48 Ngal neq, aqdoevq bhi doevq lal nail khaqmul ngaol. 49 Nuljuq nail aqphiq aqbhal juq neq, haqtsoiq haqyal bhai jaol-u phao, Maqnav khaqmul ya jaq khi ngaol-aoq, aqyu juq sil gil-a nail ngaol. 50 Ngal ge movq nail khaqmul neq, nqtavq kovtavq nee mail lee-a nail khaqmul ngaol. Khaqmul niil jaq nail tsaol-aq maq ya sil-ail. 51 Ngal neq, nqtavq kovtavq nee mail lee-a nail khaqmul ngaol. Khaqmul niil neq, aqdoevq bhi doevq lal nail khaqmul ngaol. Khaqmul niil jaq nail tsaol-aq nqmaq maqluv halyeel ya doevq nail ngaol. Miltsaq yaq aqdoevq doevq nia dai, ngaq-i mail bivq-a nail khaqmul niil neq, ngaq nail haqjoil ngaol” dai, ge bhiq-a nail ngaol. 52 Aq-u phao, Yuldav nail tsaol-aq al juq ge nail: “Tsaol-aq niil gaq, aivq nail haqjoil, ngadao juq bhai khalhai khi bhi jaq lavq nia nail-aiq” dai, aqyu juq nail gaiqlaq bhai jil pheeljaq nail ngaol. 53 Yeiqsul ge nail: “Ngaq nuljuq bhai maldil dai, ge lavq bhel. Tsaol-aq nail Yaqyov nail haqjoil maq jaq-ail, aivq nail aqsivq maq daol haq neq, nuljuq nail lavqkhoel bhai aqdoevq doevq nail phaq maq aol-ail. 54 Ngaq nail haqjoil jaq khi, ngaq nail aqsivq daol nail tsaol-aq, nqmaq maqluv halyeel doevq nail phaq ya nail ngaol. Daoq loi loi lai-u n-gaol, ngal aqyu juq bhai gaoq bhi doevq kovq lal naol. 55 Khul khi mail dai ngal-aq, ngaq nail haqjoil neq, maldil jaq nail phaq pevq khi, ngaq nail aqsivq iqsanl maldil daol nail phaq pevq nail ngaol. 56 Ngaq nail haqjoil jaq khi, ngaq nail aqsivq daol nail tsaol-aq, ngaq nail lavqkhoel bhai jaol nail ngaol. Ngal iqsanl, aivq nail lavqkhoel bhai jaol naol. 57 Doevq nail Aqbhu Miqyail ngaq bhai khoel-ai leevq lavq khi, aivq bhaqda nee, ngal doevq nail ngaol. Alhai dul dai, ngaq bhai jaq nail tsaol-aq ngal bhaqda nee, aqdoevq ya doevq naol. 58 Khaqmul niil neq, nuljuq nail aqphiq aqbhal juq-i mail ya jaq-a nail khaqmul al khe-ai, maq dul-ail. Aqyu juq neq, khaqmul al ya jaq khi ngaol-aoq, sil gil-a nail ngaol. Thailhai ngaol-aoq, khaqmul niil neq, nqtavq kovtavq nee lee-a nail ngaol. Khaqmul niil jaq nail tsaol-aq, nqmaq maqluv halyeel ya doevq nail ngaol” dai, ge bhiq-a nail ngaol 59 Gaqbheiqneiqoq meenq bhai jiav nail, uqhuq thaoq nail ilkhaol lavqkhoel bhai cavq bhiq cov bhiq-u phao, ganl niil juq, Yeiqsul ge-a nail ngaol.
Aqdoevq bhi doevq nail daoq
60 Aivq nail yaqlaol juq daoq al daoq ya gaiq-u phao, “Daoq niil daoq neq, haq deedee nail neq, khaq sil gaq hav bhoel tsaol nail-aiq” dai, mee nia gaq nail gaiqlaq bhai ge nail ngaol. 61 Aivq nail yaqlaol juq ganl al bhai alhai khoiq thail pheeljaq nail bhai, Yeiqsul aivq nail neema lavqkhoel bhai heeq nia khi ge nail: “Daoq niil daoq bhaqda nee, nuljuq ngaq bhai khaonq movq nail laiq. 62 Thailhai phal-iq neq, tsaol-aq nail Yaqyov aivq nail jaol duq bhai gaoq kovq dav lai nail bhai, nuljuq ya moel haq neq, khalhai khi nail-aiq. 63 Miqyail nail Aqhaqlal taivq-ail, aqdoevq bhi doevq lal nia nail ngaol. Aqsivq haqjoil neq, khul maq nl nia-ail. Ngaq-i mail nuljuq bhai ge bhiq-a nail daoq juq neq, aqhaqlal pevq khi aqdoevq bhi doevq lal nail phaq pevq nail ngaol. 64 Thailhai ngaol-aoq, nuljuq teevq pav ganav juq neq, neema maq thaqtsaol-ail” dai, aqyu juq bhai ge bhiq-a nail ngaol. Khul khi mail dai ngal-aq neq, khul gaq aivq bhai neema maq thaqtsaol khi aivq bhai yu nail aqlavq lavqkhoel bhai av bhiq nail gaq bhai iqsanl, iqmoeq-u nee mail, Yeiqsul heeq nia nail ngaol. 65 Aivq gaoq ge nail: “Alheel ngel-i mail, ngaq nail Aqbhu maq bhi lal haq neq, tsaol-aq teevq gaq iqsanl ngal jaol nail bha maq lal nia-ail dai, ngal nuljuq bhai ge-a nail ngaol” dai, ge bhiq-a nail ngaol. 66 A bhai nee dan khi, aivq nail yaqlaol juq mee nia gaq, aivq nee mail pav-ail khi, aivq nail haoqnao maq tsaothel-aivq-al. 67 “Nuljuq iqsanl kovq ail naol laiq” dai, Yeiqsul gaqkhoel tsel-nvq gaq bhai naldaiq-a nail ngaol. 68 Silmoq Bheiqtuvluv ge nail: “Heeqphaq-ol, nvjuq khaq sil gaq nail haoqnao gaoq tsaothel-aivq nail-aiq. Nqmaq maqluv halyeel doevq nail daoq, naol jaol nail bhai jiav nail ngaol. 69 Naol neq, Miqyail nail Tsaolmeeq Tsaolhaol gaq nial dai, nvjuq heeq kivq lal khi neema thaqtsaol lal-aoq nail ngaol” dai, Yeiqsul bhai ge kovq bhiq-a nail ngaol. 70 Yeiqsul ge nail: “Nuljuq tsel-nvq gaq bhai ngaq-i mail tsel dov-ai thaq nail maq ngel-ail laiq. Thailhai ngaol-aoq, nuljuq nail lavqkhoel khe teevq gaq neq, neivq heeqphaq ngaol” dai, aqyu juq bhai ge bhiq-a nail ngaol. 71 Aivq alhai ge nail neq, Silmoq Ilsaqgaqliqoq nail yaqyov Yuldav bhai ge movq nail ngaol. Khul khi mail dai ngal-aq neq, aivq neq, gaqkhoel tsel-nvq gaq nail lavqkhoel bhai aol khi ngaol-aoq, Yeiqsul bhai yu nail aqlavq lavqkhoel bhai av bhiq-a nail ngaol.
Yeiqsul nail jaqbheq juq, Yeiqsul bhai neema maq thaqtsaol nail ganl
1 A bhai nee ngal-aq, Yeiqsul neq, Gaqliqlail milkhaoq lavqkhoel, teevq dao nee teevq dao ail-a nail ngaol. Yuldav nail tsaol-aq juq aivq bhai deeq heivq nail dai khi, halpov nail ngel-i mail, Yuldav milkhaoq lavqkhoel bhai aivq maq ail movq-ai bhiq-ail. 2 Aq-u phao neq, Yuldav nail tsaol-aq nail saivqqgov nail bhaoqaiq lav sav nail yanq aqjail jail lal-aoq nail ngaol. 3 Aivq nail jaqbheq juq Yeiqsul bhai ge bhiq-a nail: “Naol nl nail ganl juq, naoq nail yaqlaol juq ya moel dai, niilniai nee dov ail khi, Yuldav milkhaoq bhai lai yaoq. 4 Khul khi mail dai ngal-aq neq, yovqgavq nail aqmil bhi dov lal movq nail tsaol-aq neq, yu maq moel nail bhai, khul teevq phaq-ail maq nl-ail. Naol ganl niil juq nl haq neq, miltsaq yaq bhai naoq nail aqmaol bhaqlaoq kheq dai, bhi moel yaoq” dai, ge bhiq-a nail ngaol. 5 Khul khi mail, aqyu juq alhai ge nail dai ngal-aq neq, aivq nail jaqbheq juq iqsanl, aivq bhai neema maq thaqtsaol-ail. 6 Aq-u phao, Yeiqsul ge nail: “Ngaq nail haqbhoil, yanq maq tsaq-ai haq-al. Thailhai ngaol-aoq, nuljuq nail haqbhoil neq, khaq mao iqsanl yanq tsaq nail ngaol. 7 Miltsaq yaq juq neq, nuljuq bhai neejiav maq jiav-ail. Thailhai ngaol-aoq, aqyu juq-i mail nl nail phaq neq, haqeiv nail phaq pevq dai, ngal salkhil khanq nail ngel-i mail, miltsaq yaq juq, ngaq bhai neejiav jiav nail ngaol. 8 Bhaoqaiq lav sav nail bhai, nuljuq lai yaoq. Ngaq nail haqbhoil yanq maq tsaq-ai haq nail ngel-i mail, ngal maq lal-ai haq-al” dai, ge bhiq-a nail ngaol. 9 Yeiqsul alhai ge gaq khi, Gaqliqlail milkhaoq bhai jaol-ail ceevq-a nail ngaol.
Yeiqsul saiqgov nail bhaoqaiq lav sav nail bhai ail-a nail ganl
10 Aivq nail jaqbheq juq bhaoqaiq lav sav nail bhai lai jel-u phao, yu maq bhi heeq maq bhi moel dai, Yeiqsul iqsanl lai-a nail ngaol. 11 Bhaoqaiq lav sav nail lavqkhoel, Yuldav nail tsaol-aq aivq bhai halpov halpov-ail, “Aivq khaq bha ail-a nail-aiq” dai, aqyu juq nail gaiqlaq bhai naldaiq nail ngaol. 12 Tsaol-aq munl munl ma juq, aivq nail ganl ge pheeljaq thailthaiq nail ngaol. Teevq pav ganav juq ge nail: “Aivq neq, tsaol-aq aqmeeq ngaol” dai, ge nail ngaol. Teevq pav ganav juq ge nail: “Aivq neq, tsaol-aq aqmeeq maq ngel, tsaol-aq bhai hevq bheeq nail tsaol-aq ngaol” dai, ge nail ngaol. 13 Thailhai ngaol-aoq, Yuldav nail tsaol-aq bhai geesil nail ngel-i mail, tsaol-aq teevq gaq iqsanl, Yeiqsul nail ganl bhaqlaoq kheq dai, maq ge tseq-ail. 14 Bhaoqaiq lav sav nail teevq pav pav lal-u phao, Yeiqsul uqhuq thaoq nail ilkhaol il ma bhai dav lai khi, cavq bhiq cov bhiq-a nail ngaol. 15 Yuldav nail tsaol-aq juq noeq-u maq dov dai, pevq-ail khi, “Tsaol-aq niil gaq neq, haoqgavq maodai maq saol daiq khi ngaol-aoq, khalhai khi niidai dai-ail heeq nia nail meeq” dai, ge nail ngaol. 16 Yeiqsul ge nail: “Ngal cavq nail cov nail daoq niil neq, ngaq nail daoq maq ngel-ail. Ngaq bhai khoel-ai leevq lavq-a nail gaq nail daoq ngaol. 17 Miqyail neema tsaq dai nl movq nail khul gaq maqkhaiq, ngal cavq nail cov nail daoq niil, Miqyail nail daoq ngel-ail laiq, ngaq nail neenoeq bhai juq khi cavq nail cov nail daoq ngel-ail laiq dai, tselpav nia nail ngaol. 18 Yovqgavq nail neenoeq yovqgavq cavq nail cov nail gaq neq, yovqgavq nail khaoqsail ya dai, halpov nail ngaol. Thailhai ngaol-aoq, aivq bhai khoel-ai leevq-a nail gaq nail seiqleiq khaoqsail ya dai, halpov nail gaq neq, tsaq nail ngaol. Maq tsaq nail phaq teevq peivq-ail maq aol-ail. 19 Molseiq nuljuq bhai aoldaoq kovqdaoq bivq lavq-a nail maq ngel-ail laiq. Thailhai ngaol-aoq, nuljuq teevq gaq iqsanl, aoldaoq kovqdaoq al bhai maq nl-ail. Nuljuq ngaq bhai deeq heivq nail dai khi, khul khi mail, halpov nail-aiq” dai, ge bhiq-a nail ngaol. 20 Tsaol-aq al juq ge nail: “Naol neq, neivq aol nail niil. Naoq bhai deeq heivq nail dai khi, khaq sil gaq halpov nail-aiq” dai, ge bhiq-a nail ngaol. 21 Yeiqsul ge nail: “Ngal teevq phaq nl naol. Al bhai nuljuq iqsanl mail noeq-u maq dov dai, pevq-ail naol. 22 Molseiq nuljuq bhai bavkov uqjaq oev nail aol bhi nl-a nail ngaol. (Maldil dai, ge haq neq, Molseiq-i mail bhi nl-a nail maq ngel-ail. Aqphiq aqbhal juq-i mail nl khal leevq-a nail ngaol.) Jaol n n-gaol iqsanl nuljuq bavkov uqjaq oev nail ngaol. 23 Molseiq-i mail bivq-a nail aoldaoq kovqdaoq maq ya cov-ail dai, jaol n n-gaol iqsanl, nuljuq bavkov uqjaq oev nail ngaol. Thailhai phal-iq neq, jaol n n-gaol ngal tsaol-aq teevq gaq nail aqmaol bhai bhi meeq lai-a nail ngel-i mail, nuljuq ngaq bhai neema phail nail laiq. 24 Nuljuq-i mail ya moel-a nail juq bhai taivq-ail, heldaiq khi yalkhaq thaq dal. Maldil tsaq nail lavqkhoel nee, yalkhaq dal yaoq” dai, Yeiqsul ge bhiq-a nail ngaol.
Niil gaq Khali ngaol laiq
25 Alheel ngel-i mail, Yeiqlulsaqlaiq meenq bha jaol nail tsaol-aq teevq pav ganav juq ge nail: “Aqyu juq deeq heivq nail khi mail halpov nail gaq, thoil gaq maq ngel-ail laiq. 26 Heldaiq, aivq bhaqlaoq kheq dai, cavq bhiq cov bhiq khi ngaol-aoq, aqyu juq aivq bhai khul teevq phaq iqsanl maq ge-il. Tsaol-aq niil gaq Khali ngaol dai, aqivq aqtsu juq maldil heeq nia-aoq thaq nail meeq. 27 Thailhai ngaol-aoq, tsaol-aq niil gaq khaq bha nee dov lal-a nail dai, ngadao juq heeq kivq nail ngaol. Khali lee-u phao neq, aivq khaq bhai nee dov lee nail dai, teevq gaq-ail maq heeq nia-ail” dai, ge nail ngaol. 28 -29 Alheel ngel-i mail, Yeiqsul uqhuq thaoq nail ilkhaol il ma lavqkhoel bhai cavq bhiq cov bhiq-u phao, mailma-ail ge nail: “Nuljuq ngaq bhai heeq nia nail ngaol. Ngal khaq bhai nee dov lee-a nail dai iqsanl, nuljuq heeq nia nail ngaol. Thailhai ngaol-aoq, ngaq nail neenoeq ngal lee-a nail maq ngel. Ngaq bhai khoel-ai leevq lavq-a nail gaq neq, saljial ivq nail ngaol. Nuljuq aivq bhai maq heeq nia-ail. Ngal neq, aivq bhai heeq kivq naol. Khul khi mail dai ngal-aq neq, ngal aivq jaol nail nee lee khi, aivq iqsanl ngaq bhai khoel-ai leevq lavq-a nail ngaol” dai, ge bhiq-a nail ngaol. 30 Alheel ngel-i mail, aqyu juq aivq bhai nieivq nail dai khi, naoqjaoq nail ngaol. Thailhai ngaol-aoq, aivq nail yanq maq tsaq-ail haq nail ngel-i mail, tsaol-aq teevq gaq iqsanl, aivq bhai maq nieivq nia-ail. 31 Tsaol-aq al juq nail lavqkhoel, tsaol-aq mee nia gaq aivq bhai neema thaqtsaol nail ngaol. Aqyu juq ge nail: “Khali lee kev haq neq, tsaol-aq niil gaq-i mail nl-a nail, bhi heeq bhi moel nail phaq nee maqtsil, aivq bhi heeq bhi moel nail phaq nl naol laiq” dai, aqyu juq ge nail ngaol.
Yeiqsul bhai bhi nieivq ail-a nail ganl
32 Tsaol-aq munl munl ma juq, Yeiqsul nail ganl ge pheeljaq nail bhai Phaqliqsail juq ya gaiq-a nail ngaol. Alheel ngel-i mail, Philma juq khi mail Phaqliqsail juq neq, Yeiqsul bhai bhi nieivq-ail nail dai khi, uqhuq thaoq nail ilkhaol il ma bhai jaol khi heldaiq phail nail tsaol-aq juq bhai, khoel gai-aivq-a nail ngaol. 33 Aq-u phao, Yeiqsul ge nail: “Ngal nuljuq nee mail, teevq yanq jaol naol. Teevq yanq khai-aq neq, ngaq bhai khoel-ai leevq lavq-a nail gaq jaol nail bha ngal kovq lai naol. 34 Nuljuq ngaq bhai halpov naol. Halpov khi ngaol-aoq, maq halpov moel nia-ail. Nuljuq ngal jaol nail bha maq lal nia-ail” dai, ge bhiq-a nail ngaol. 35 Aq-u phao, Yuldav nail tsaol-aq juq ge nail: “Ngadao juq aivq bhai maq ya moel dai, aivq khaq bha ail nail khi meeq. Heiqlaqsal tsaol-aq nee mail jaol ail-a nail tsaol-aq juq jaol nail bha ail khi, Heiqlaqsal tsaol-aq juq bhai, cavq bhiq cov bhiq ail nail khi meeq. 36 ‘Nuljuq ngaq bhai halpov naol. Halpov khi ngaol-aoq, maq halpov moel nia-ail. Nuljuq ngal jaol nail bha maq lal nia-ail’ dai, Yeiqsul ge nail neq, khul bhai ge movq nail meeq” dai, aqyu juq ge nail ngaol.
Aqdoevq bhi doevq nail laoljaol
37 Bhaoqaiq lav sav nail haoqnao n-gaol, eeq jaiq nail aqn al n bhai, Yeiqsul thulphaol khi aqthel aqkav kav dai ge nail: “Ulcuvq khal moevq nail tsaol-aq ngal jaol nail bha daol lal yaoq. 38 Ngaq bhai neema thaqtsaol nail juq neq, Jalliq lavqkhoel bhai gevq-ai thaq nail khe-ai, aqyu juq nail neema lavqkhoel bhai aqdoevq bhi doevq nail laoljaol juq il dol leevq nail ngaol” dai, ge bhiq-a nail ngaol. 39 Aivq alhai ge nail neq, aivq bhai neema thaqtsaol nail tsaol-aq juq yaqhao ya nail Aqhaqlal Miqyail bhai, ge nail ngaol. Khul khi mail yaqhao ya nail dai ngal-aq, Yeiqsul seiqleiq khaoqsail maq ya haq nail ngel-i mail, Aqhaqlal Miqyail maq jaol lee haq-al.
Aqyu juq Yeiqsul nail ganl nee, nvq munl pevq ail-a nail ganl
40 Aqyu juq daoq al daoq ya gaiq-u phao, tsaol-aq teevq pav ganav juq ge nail: “Tsaol-aq niil gaq neq, Miqyail nail haqbhoil gedan nail al gaq maldil nial” dai, ge nail ngaol. 41 Teevq pav ganav juq ge nail: “Tsaol-aq thoil gaq neq, Khali nial” dai, ge nail ngaol. Thailhai ngaol-aoq, teevq pav ganav juq ge nail: “Khali neq, Gaqliqlail milkhaoq bhai dov lal naol laiq. 42 ‘Khali neq, Daqbhil nail jeq-e jaq-a ngel-i mail, Daqbhil nail jaol duq, Bhaiqlaiqhaiq meenq bhai dov lal naol’ dai, Jalliq lavqkhoel bhai gevq-ai thaq nail maq ngel-ail laiq” dai, ge bhiq-a nail ngaol. 43 Aq-u phao, aqyu juq Yeiqsul nail ganl nee mail nvq munl pevq ail-a nail ngaol. 44 Teevq pav ganav juq, aivq bhai nieivq movq nail ngaol. Thailhai ngaol-aoq, tsaol-aq teevq gaq iqsanl, aivq bhai maq nieivq nia-al.
Aivq cavq nail cov nail khe-ai, teevq gaq iqsanl maq cavq maq cov daiq haq-al
45 Aq-u phao, Philma juq khi mail Phaqliqsail juq-i mail khoel gai-aivq-a nail tsaol-aq al juq, kovq lal-a nail ngaol. “Nuljuq khul khi mail, aivq bhai maq nieil lavq-a nail-aiq” dai, Philma juq khi mail Phaqliqsail juq naldaiq-a nail ngaol. 46 “Tsaol-aq al gaq cavq nail cov nail khe-ai teevq gaq iqsanl, maq cavq maq cov daiq haq-al” dai, tsaol-aq al juq ge kovq bhiq-a nail ngaol. 47 Phaqliqsail al juq ge nail: “Nuljuq bhai iqsanl aivq-i mail hevq bheel-aivq lavq-ao nail laiq. 48 Aqivq aqtsu khi mail Phaqliqsail juq nail lavqkhoel, aivq bhai neema thaqtsaol nail teevq gaq ganav jaol naol laiq. 49 Aoldaoq kovqdaoq teevq peivq-ail maq heeq nia nail tsaol-aq al juq neq, iqkhail yavq nail bhai ya daq nail ngaol” dai, ge bhiq-a nail ngaol. 50 Aq-u phao, Yeiqsul jaol nail bha ail daiq-a nail, Nilgaoldiq dai mil-ai thaq nail gaq iqsanl, aqyu juq nail munl lavqkhoel bhai jaol nail ngaol. 51 Aivq ge nail: “Ngadao juq nail aoldaoq kovqdaoq lavqkhoel bhai gevq-ai thaq nail, tsaol-aq teevq gaq ge nail daoq bhai maq ya gaiq dai, aivq-i mail nl-a nail ganl bhai, maq ya heeq kivq-u kev dai, aivq bhai yalkhaq dal nail aol maq jiav-ail” dai, aqyu juq bhai ge bhiq-a nail ngaol. 52 Aqyu juq ge nail: “Naol iqsanl, Gaqliqlail nail tsaol-aq laiq. Jalliq bhai aqmeeq-ai ge daiq yaoq. Miqyail nail haqbhoil gedan nail tsaol-aq teevq gaq iqsanl, Gaqliqlail milkhaoq lavqkhoel bhai maq dov lal daiq-a nail bhai, naol ya moel naol” dai, ge bhiq-a nail ngaol.
Yu nee mail bhee nail yaqmai-aq teevq gaq bhai hel lavq-a nail ganl
53 Aq-u phao, aqyu juq yovqgavq nail ilkhaol bhai yovqgavq kovq ail-a nail ngaol.
1 Thailhai ngaol-aoq, Yeiqsul neq, Saqloq gaoqjaoq bhai dav lai-a nail ngaol. 2 Nqhao navqmav-ail, aivq uqhuq thaoq nail ilkhaol il ma nail khainl lavqkhoel bhai gao yavq kha lee khi, tsaol-aq iqsanl mail, aivq jaol nail bha lal-a nail ngaol. Aq-u phao, aivq jaoldeel khi aqyu juq bhai cavq bhiq cov bhiq-a nail ngaol. 3 Aoldaoq kovqdaoq cavq nail cov nail juq khi mail Phaqliqsail juq, yu nee mail bheeq nail yaqmai-aq teevq gaq bhai moel khi Yeiqsul jaol nail bha hel lavq-a nail ngaol. Yaqmai-aq al gaq bhai gaoltsi-ai hevq thaq-ai thaq nail ngaol. 4 Aq-u phao, aqyu juq ge nail: “Saqlaq-ol, yaqmai-aq niil gaq, yu nee mail bheeq nail bhai, nvjuq moel khi nieil lavq-a nail ngaol. 5 Niilheel nail tsaol-aq bhai lovmav-i mail ya liv heivq naol dai, Molseiq nail aoldaoq kovqdaoq lavqkhoel bhai gevq-ai thaq nail ngaol. Naol neq, khalhai ge nail-aiq” dai, ge bhiq-a nail ngaol. 6 Aqyu juq alhai ge nail neq, Yeiqsul bhai oeqbal thaq nia dai, aivq bhai laonqdaiq-a nail ngaol. Thailhai ngaol-aoq, Yeiqsul thaoqkovq khi, miltsaq bhai lavqnoil-i mail gevq-a nail ngaol. 7 Aq-u phao, aqyu juq aivq bhai naldaiq thailthaiq nail ngel-i mail, aivq thul lal khi ge nail: “Nuljuq nail lavqkhoel, oeqbal maq aol nail tsaol-aq teevq gaq, lovmav-i mail aivq bhai iqmoeq liv yaoq” dai, aqyu juq bhai ge bhiq-a nail ngaol. 8 A bhai nee ngal-aq, aivq teevq pov gaoq thaoqkovq khi, miltsaq bhai lavqnoil-i mail gaoq gevq-a nail ngaol. 9 Aqyu juq Yeiqsul nail daoq al daoq ya gaiq-u phao, aqkovq jiav jaiq nail gaq nee mail, aqkovq nil jaiq nail gaq bhai kev dai, teevq gaq khai-aq neq, teevq gaq dov gil-ail khi, Yeiqsul teevq gaq taivq-ail jaol-ail ceevq-a nail ngaol. Yaqmai-aq al gaq iqsanl, a bhai thulphaol nail ngaol. 10 Aq-u phao, Yeiqsul thul khi ge nail: “Aqyu juq khaq bha ail gil-aoq nail-aiq. Tsaol-aq teevq gaq iqsanl, naoq bhai yalkhaq maq dal lavq-al lai laiq” dai, naldaiq-a nail ngaol. 11 “Heeqphaq-ol, ngaq bhai teevq gaq iqsanl yalkhaq maq dal lavq-al” dai, yaqmai-aq al gaq ge bhiq-a nail ngaol. Yeiqsul ge nail: “Ngal iqsanl naoq bhai yalkhaq maq dal. Ail yaoq. Oeqbal thaq gaoq nl ail dei-eiq” dai, ge bhiq-a nail ngaol.
Yeiqsul neq, miltsaq nail aqbhaq ngaol
12 Yeiqsul aqyu juq bhai teevq pov gaoq ge bhiq-a nail: “Ngal neq, miltsaq nail aqbhaq ngaol. Ngaq nail haoqnao lal nail tsaol-aq neq, aqnav nail lavqkhoel bhai maq ya tsao-ail. Aqdoevq bhi doevq nail aqbhaq, aivq jiav nail ngaol” dai, ge bhiq-a nail ngaol. 13 Phaqliqsail juq, Yeiqsul bhai ge bhiq-a nail: “Naol neq, naoq nail ganl salkhil khanq nail niil. Naoq nail salkhil neq, maq tsaq-ail” dai, ge bhiq-a nail ngaol. 14 Yeiqsul ge nail: “Ngaq nail ganl, ngal salkhil khanq khi ngaol-aoq, ngaq nail salkhil neq, tsaq nail ngaol. Khul khi mail dai ngal-aq neq, ngal khaq bha nee lee khi, ngal khaq bhai ail nail dai iqsanl, heeq kivq naol. Ngal khaq bha nee lee khi, ngal khaq bhai ail nail dai iqsanl, nuljuq maq heeq nia-ail. 15 Nuljuq neq, miltsaq yaq yalkhaq dal nail khe-ai, dal nail ngaol. Ngal neq, tsaol-aq teevq gaq bhai iqsanl, yalkhaq maq dal. 16 Thailhai ngaol-aoq, ngal yalkhaq dal-ail nul neq, ngal dal nail neq, tsaq nail ngaol. Khul khi mail dai ngal-aq neq, ngal teevq gaq taivq-ail jaol nail maq ngel. Ngaq bhai khoel-ai leevq lavq-a nail Aqbhu, ngaq-ai nee mail jaol nail ngaol. 17 Tsaol-aq nvq gaq salkhil khanq haq neq, salkhil khanq nail al, tsaq nail ngaol dai, nuljuq nail aoldaoq kovqdaoq lavqkhoel bhai gevq-ai thaq nail ngaol. 18 Ngaq nail ganl, ngal salkhil khanq nail ngaol. Ngaq bhai khoel-ai leevq lavq-a nail Aqbhu iqsanl, ngaq nail ganl salkhil khanq nail ngaol” dai, ge bhiq-a nail ngaol. 19 “Naoq nail Aqbhu khaq bha jaol nail-aiq” dai, aqyu juq naldaiq nail ngaol. Yeiqsul ge nail: “Nuljuq neq, ngaq bhai iqsanl, ngaq nail Aqbhu bhai iqsanl maq heeq nia-ail. Nuljuq ngaq bhai heeq nia-ail nul neq, ngaq nail Aqbhu bhai iqsanl, heeq nia naol” dai, ge kovq bhiq-a nail ngaol. 20 Uqhuq thaoq nail ilkhaol il ma nail khainl lavqkhoel bhai, phuldaq daq duq bhai jaol khi daoq al juq, Yeiqsul cavq bhiq cov bhiq-a nail ngaol. Thailhai ngaol-aoq, aivq nail yanq maq tsaq nail ngel-i mail, tsaol-aq teevq gaq-ail, aivq bhai maq nieivq-al.
Nuljuq ngal lai nail bhai maq lal nia-ail
21 Yeiqsul teevq pov gaoq ge nail: “Ngal lai naol. Nuljuq ngaq bhai halpov khi ngaol-aoq, nuljuq nail oeqbal lavqkhoel bhai ya sil naol. Nuljuq ngal ail nail bhai maq lal nia-ail” dai, aqyu juq bhai ge bhiq-a nail ngaol. 22 Aq-u phao, Yuldav nail tsaol-aq juq ge nail: “ ‘Nuljuq ngal lai nail bhai maq lal nia-ail’ dai, aivq ge nail neq, aivq bhai aivq lav heivq nail khi mail meeq” dai, ge nail ngaol. 23 Yeiqsul ge nail: “Nuljuq neq, nqtavq nail kov-uvq khe tsaol-aq ngaol. Ngal neq, nqtavq nail tsaol-aq ngaol. Nuljuq neq, miltsaq bhai tavq nail ngaol. Ngal neq, miltsaq bhai maq tavq. 24 Alheel ngel-i mail, nuljuq neq, nuljuq nail oeqbal lavqkhoel nee ya sil naol dai, ngal nuljuq bhai ge lavq bhel. Ngaq-i mail ge-a nail khe-ai, ngaq bhai al gaq nial dai, nuljuq neema maq thaqtsaol haq neq, nuljuq neq, nuljuq nail oeqbal lavqkhoel nee ya sil naol” dai, aqyu juq bhai ge bhiq-a nail ngaol. 25 “Naol khaq sil gaq thoil” dai, aqyu juq aivq bhai naldaiq-a nail ngaol. Yeiqsul ge nail: “Iqmoeq-u nee, nuljuq bhai ge bhiq-ai thaq nail khe-ai ngaol” dai, ge kovq bhiq-a nail ngaol. 26 “Ngal nuljuq nail ganl ge khi, yalkhaq dal heeq phaq-ail tsaq nail mee nia phaq jiav-ai haq nail ngaol. Thailhai ngaol-aoq, ngaq bhai khoel-ai leevq lavq-a nail gaq neq, saljial ivq nail ngaol. Ngal aivq nail daoq ya gaiq-a nail khe-ai, miltsaq yaq bhai ge bhiq naol” dai, aqyu juq bhai ge bhiq-a nail ngaol. 27 Yeiqsul-i aqyu juq bhai ge bhiq-a nail gaq neq, Aqbhu Miqyail ngaol dai, aqyu juq maq heeq nia-ail. 28 Alheel ngel-i mail, Yeiqsul ge nail: “Nuljuq tsaol-aq nail Yaqyov bhai kha thul-u phao, ngal neq al gaq nial dai, nuljuq heeq nia lal naol. Ngal taivq-ail neq, khul maq nl nail nee ovqtavq, Aqbhu Miqyail ngaq bhai cavq lavq cov lavq-a nail khe-ai taivq-ail, ngal ge nail bhai iqsanl, nuljuq heeq nia lal naol. 29 Ngaq bhai khoel-ai leevq lavq-a nail gaq, ngaq-ai nee mail jaol nail ngaol. Ngal teevq gaq taivq-ail ya jaol dai, aivq ngaq bhai maq khaonq-ail. Khul khi mail dai ngal-aq neq, aivq neema tsaq nail phaq, ngal khaq mao iqsanl nl nail ngaol” dai, ge bhiq-a nail ngaol. 30 Aivq daoq al daoq ge-u phao, tsaol-aq maodai aivq bhai neema thaqtsaol lal-a nail ngaol.
Maldil tsaq nail phaq neq, nuljuq bhai bhi jel-ail lavq nail ngaol
31 Aq-u phao, aivq bhai neema thaq tsaol nail Yuldav nail tsaol-aq bhai, Yeiqsul ge bhiq-a nail: “Nuljuq ngaq nail daoq bhai naldaiq haq neq, nuljuq ngaq nail yaqlaol maldil pevq lal naol. 32 Nuljuq maldil tsaq nail phaq bhai ya heeq nia lal khi, maldil tsaq nail al phaq neq, nuljuq bhai bhi jel-ail lavq naol” dai, ge bhiq-a nail ngaol. 33 Aqyu juq ge nail: “Nvjuq neq, Aqbhaqlaqhaq nail jeq-e jaq-a ngaol. Nvjuq yu nail yaqkav teevq pov iqsanl, maq jiovq daiq haq-al. ‘Nuljuq bhai phaiq lavq naol’ dai, naol khalhai ge nail-aiq” dai, Yeiqsul bhai ge kovq bhiq-a nail ngaol. 34 Yeiqsul ge nail: “Ngal nuljuq bhai maldil dai, ge lavq bhel. Oeqbal nl nail tsaol-aq yaoq gaq yaoq-ao nee mail, oeqbal nail yaqkav ngaol. 35 Yaqkav neq, ilkhaol lavqkhoel bhai khaq mao iqsanl ya jaol nail maq ngel-ail. Yaqyov neq, khaq mao iqsanl jaol nail ngaol. 36 Yaqyov nuljuq bhai phaiq lavq haq neq, nuljuq yaqkav jiovq nail nee maldil jel-ail nail ngaol. 37 Nuljuq neq, Aqbhaqlaqhaq nail jeq-e jaq-a ngaol dai, ngal heeq kivq naol. Thailhai ngaol-aoq, ngaq nail daoq bhai maq hav bhoel nail ngel-i mail, nuljuq ngaq bhai deeq heivq nail dai khi, halpov nail ngaol. 38 Ngal neq, ngaq nail Aqbhu nee mail jaol-u phao, moel-a nail juq ge nail ngaol. Nuljuq iqsanl, nuljuq nail Aqbhu-i mail cavq bhiq cov bhiq-ai thaq nail khe-ai nl nail nial” dai, aqyu juq bhai ge bhiq-a nail ngaol.
Neivq heeqphaq nail yaq juq
39 Yuldav nail tsaol-aq juq Yeiqsul bhai ge bhiq-a nail: “Aqbhaqlaqhaq neq, nvjuq nail aqbhu ngaol” dai, ge bhiq-a nail ngaol. Yeiqsul ge nail: “Nuljuq Aqbhaqlaqhaq nail yaq ngel haq neq, Aqbhaqlaqhaq nl nail khe-ai nl nail ngaol. 40 Miqyail-i mail ngaq bhai ge lavq-a nail maldil pevq nail phaq ngal nuljuq bhai ge bhiq khi ngaol-aoq, nuljuq ngaq bhai deeq heivq nail khi halpov nail ngaol. Aqbhaqlaqhaq neq, thailhai maq nl-ail. 41 Nuljuq neq, nuljuq nail aqbhu nl nail khe-ai nl nail nial” dai, aqyu juq bhai ge bhiq-a nail ngaol. Aqyu juq ge nail: “Nvjuq neq, del yaq maq ngel. Miqyail teevq gaq taivq-ail nvjuq nail Aqbhu ngaol” dai, Yeiqsul bhai ge kovq bhiq-a nail ngaol. 42 Yeiqsul ge nail: “Miqyail nuljuq nail Aqbhu ngel haq neq, nuljuq ngaq bhai gaiq-a naol. Khul khi mail dai ngal-aq neq, Miqyail jaol nail nee ngal lee-a nail ngaol. Ngaq nail neenoeq nee lee-a nail maq ngel-ail, aivq ngaq bhai khoel-ai leevq-a nail ngaol. 43 Ngaq-i mail ge nail daoq bhai khul khi mail, nuljuq maq gov heeq nia nail dai ngal-aq neq, ngal cavq nail cov nail daoq bhai nuljuq maq naldaiq nul nail, ngel-i mail ngaol. 44 Nuljuq nail aqbhu neq, neivq heeqphaq ngaol. Aivq neema tsaq nail khe-ai, nuljuq nl movq nail ngaol. Aivq neq, iqmoeq-u nee tsaol-aq bhai lav heivq nail aqheel ngaol. Aivq nail lavqkhoel bhai tsaq nail phaq teevq peivq-ail maq aol nail ngel-i mail, tsaq nail lavqkhoel bhai aivq maq jaol nia-ail. Aivq goiqbhaoq bhaoq-u phao, aivq nail lavqkhoel bhai pevq nail khe-ai, aivq bhaoq nail ngaol. Khul khi mail dai ngal-aq neq, aivq neq, goiqbhaoq bhaoq nail aqheel pevq khi, goiqbhaoq bhaoq nail aqbhu ngaol. 45 Ngal maldil tsaq nail daoq ge nail ngel-i mail, nuljuq ngaq bhai neema maq thaqtsaol-ail. 46 Ngaq bhai oeqbal aol-ail nial dai, nuljuq nail lavqkhoel khaq sil gaq tsiqtsoe kivq nail-aiq. Ngal maldil tsaq nail daoq ge nail ngel haq neq, khul khi mail, nuljuq ngaq bhai neema maq thaq tsaol nail-aiq. 47 Miqyail nail lavqkhoel nee pevq dov lal-a nail tsaol-aq neq, Miqyail nail daoq naldaiq nail naol. Thailhai ngaol-aoq, nuljuq neq, Miqyail nail lavqkhoel nee pevq dov lal-a nail maq ngel-ail. Alheel ngel-i mail, Miqyail nail daoq bhai nuljuq maq naldaiq movq-ail” dai, ge bhiq-a nail ngaol.
Aqbhaqlaqhaq maq doevq lee-u nee mail, Yeiqsul jaol nail ngaol
48 Yuldav nail tsaol-aq juq ge nail: “Naol neq, Saqmaqliv nail tsaol-aq ngaol. Al ovqtavq, neivq aol nail tsaol-aq iqsanl ngel-ail nial dai, nvjuq ge nail neq, tsaq nail maq ngel-ail laiq” dai, Yeiqsul bhai ge bhiq-a nail ngaol. 49 Yeiqsul ge nail: “Ngal neivq aol nail tsaol-aq maq ngel. Ngal ngaq nail Aqbhu bhai thaqeeq nail ngaol. Nuljuq neq, ngaq bhai maq thaqeeq-ail. 50 Thailhai ngaol-aoq, seiqleiq khaoqsail ya dai, ngal halpov nail maq ngel. Ngaq bhai seiqleiq khaoqsail bhi ya nail dai khi, halpov nail teevq gaq jaol nail ngaol. Aivq neq, yalkhaq dal nail gaq ngaol. 51 Ngal nuljuq bhai maldil dai, ge lavq bhel. Ngaq nail daoq naldaiq nail tsaol-aq, teevq thal-iq maq ya sil ail” dai, Yeiqsul aqyu juq bhai ge bhiq-a nail ngaol. 52 Yuldav nail tsaol-aq juq ge nail: “Naol neq, neivq aol nail tsaol-aq nial dai, niil aq-il nvjuq heeq kivq duq-ao nail ngaol. Aqbhaqlaqhaq khi mail Miqyail nail haqbhoil gedan nail juq iqsanl, sil gil-aoq nail ngaol. ‘Ngaq nail daoq naldaiq nail tsaol-aq, khaq mao iqsanl maq ya sil-ail’ dai, naol ge nail laiq. 53 Naol ngadao nail aqbhu Aqbhaqlaqhaq nee maqtsil eeq jaiq nail laiq. Aivq neq, sil-aoq nail ngaol. Miqyail nail haqbhoil gedan nail juq iqsanl sil-a nail ngaol. Naol neq, khaq sil gaq jiovq nail-aiq” dai, naldaiq bhiq-a nail ngaol. 54 Yeiqsul ge nail: “Seiqleiq khaoqsail ya dai, ngal nl haq neq, seiqleiq khaoqsail al neq, teevq peivq-ail ganl maq tsoiq-ail. Ngal seiqleiq khaoqsail ya dai, ngaq nail Aqbhu ganl nl nail ngaol. Nuljuq ngaq nail Aqbhu al gaq bhai, ‘Aivq neq, nvjuq nail Miqyail ngaol’ dai, ge nail ngaol. 55 Thailhai ngaol-aoq, nuljuq aivq bhai maq heeq nia-ail. Ngal neq, aivq bhai heeq kivq naol. Ngal iqsanl, aivq bhai maq heeq kivq-ail dai ge-ai nul neq, ngal iqsanl, nuljuq khe-ai goiqbhaoq bhaoq nail tsaol-aq pevq naol. Thailhai ngaol-aoq, ngal aivq bhai heeq kivq khi, aivq nail daoq naldaiq nail ngaol. 56 Ngal lee nail aqn bhai ya moel naol dai, noeq khi, nuljuq nail aqbhu Aqbhaqlaqhaq lavqkhiq tsail nail ngaol. Aivq maldil ya moel khi, lavqkhiq ya tsail-a nail ngaol” dai, ge bhiq-a nail ngaol. 57 Yuldav nail tsaol-aq juq ge nail: “Naol neq, ngaq tsel kovq maq bhee lal haq-al. Naol Aqbhaqlaqhaq bhai moel daiq-ao nail laiq” dai, naldaiq-a nail ngaol. 58 Yeiqsul ge nail: “Ngal nuljuq bhai maldil dai, ge lavq bhel. Aqbhaqlaqhaq maq doevq lee-u nee mail, ngal jaol nail ngaol” dai, aqyu juq bhai ge bhiq-a nail ngaol. 59 Alheel ngel-i mail, aqyu juq lovmav gov khi, aivq bhai liv nail khi ngaol. Thailhai ngaol-aoq, aqyu juq maq bhi moel dai, Yeiqsul neq, uqhuq thaoq nail ilkhaol il ma nee mail dov ail-a nail ngaol.
Doevq lee-u nee maivpeivq peivq nail teevq gaq nail ganl
1 Yeiqsul ail thailthaiq-u phao, doevq lee-u nee mail maivpeivq peivq nail tsaol-aq teevq gaq bhai, ya moel-a nail ngaol. 2 Aq-u phao, aivq nail yaqlaol juq ge nail: “Saqlaq-ol, tsaol-aq niil gaq doevq lee-u nee mail, maivpeivq peivq nail neq, khaq sil gaq nail oeqbal bhaqda nee meeq. Aivq nail oeqbal bhaqda nee laiq. Maq ngel haq neq, aivq nail aqbhu aqma nail oeqbal bhaqda nee laiq” dai, aivq bhai naldaiq-a nail ngaol. 3 Yeiqsul ge kovq bhiq-a nail: “Aivq nail oeqbal bhaqda nee maq ngel-ail. Aivq nail aqbhu aqma nail oeqbal bhaqda nee iqsanl maq ngel-ail. Miqyail taivq-ail nl nia nail noeq-u maq dov nail phaq bhai aivq nail lavqkhoel nee yu ya moel dai, aivq alhai doevq lee-a nail ngaol. 4 Ngaq bhai khoel-ai leevq lavq-a nail gaq nail ganl bhai, n-gaol phao ngadao ya nl naol. Nqkivq kivq lee haq neq, tsaol-aq teevq gaq iqsanl, ganl maq nl nia-ail. 5 Ngal miltsaq kovtavq bhai jaol-u phao, ngal miltsaq nail aqbhaq ngaol” dai, ge-a nail ngaol. 6 Yeiqsul alhai ge gaq khi, miltsaq bhai thaiqkhaq thaiqkha khi, cavqnoevq nieivq pevq-a nail ngaol. A bhai nee ngal-aq, tsaol-aq al gaq nail maivneev bhai leivq bhiq-a nail ngaol. 7 A bhai nee ngal-aq, Silloq dai khul nail ngaqkha bhai, “Maivpuvq puvq haol-ail yaoq” dai, Yeiqsul aivq bhai khoel-a nail ngaol. Silloq dai ge nail daoqceevq neq, khoel gai-aivq-a nail dai, ge movq nail ngaol. Alheel ngel-i mail aivq maivpuvq puvq haol ail-a nail ngaol. Aq-u phao, aivq maivneev moel lal khi, kovq lal-a nail ngaol. 8 Maivpeivq peivq daiq-a nail al gaq nee mail ilkhaiq tavq nail tsaol-aq juq khi mail, aivq hal jaq hal daol nail bhai moeldaiq-a nail tsaol-aq juq ge nail: “Tsaol-aq niil gaq, jel lal-u phao jaoldeel khi hal jaq hal daol lao nail al gaq maq ngel ail laiq” dai, ge nail ngaol. 9 Teevq pav ganav juq ge nail neq: “Thoil gaq ngaol.” Teevq pav ganav juq ge nail neq: “Thoil gaq maq ngel-ail. Aivq neq, al gaq khe-ai dul lai nail niil” dai, ge nail ngaol. Aq-u phao, tsaol-aq al gaq ge nail: “Ngal neq, nuljuq ge thailthaiq nail al gaq ngaol” dai, ge bhiq-a nail ngaol. 10 “Thailhai phal-iq neq, naoq nail maivneev khalhai khi moel lal-a nail-aiq” dai, aqyu juq aivq bhai naldaiq-a nail ngaol. 11 Aivq ge nail: “Yeiqsul dai mil-ai thaq nail gaq miltsaq bhai thaiqkhaq thaiqkha khi cavqnoevq nieivq pevq khi ngaq nail maivneev bhai leivq lavq-a nail ngaol. A bhai nee ngal-aq, ‘Silloq dai khul nail ngaqkha bhai maivpuvq puvq haol-ail yaoq’ dai, aivq khoel nail ngel-i mail, ngal puvq haol ail-a nail ngaol. Aq-u phao, ngaq nail maivneev moel lal-a nail ngaol” dai, ge bhiq-a nail ngaol. 12 “Tsaol-aq al gaq khaq bha jaol nail-aiq” dai, aqyu juq aivq bhai naldaiq-u phao, “Ngal maq heeq kivq” dai, ge kovq bhiq-a nail ngaol.
Maivneev khalhai khi moel lal-a nail ganl, Phaqliqsail juq naldaiq nail
13 Tsaol-aq al juq, maivpeivq pevq daiq-a nail al gaq bhai Phaqliqsail juq jaol nail bha, hel-aivq-a nail ngaol. 14 Yeiqsul cavqnoevq nieivq pevq khi, tsaol-aq al gaq bhai maivneev bhi moel lal-a nail aqn al neq, Yuldav nail tsaol-aq nail jaol n n-gaol ngaol. 15 Aivq maivneev khalhai khi moel lal-a nail ganl, Phaqliqsail juq iqsanl, aivq bhai naldaiq-a nail ngaol. Maivpeivq peivq daiq-a nail al gaq ge nail: “Aivq ngaq nail maivneev bhai cavqnoevq leivq lavq khi, ngal maivpuvq puvq haol ail-u phao, moel lal-a nail ngaol” dai, aqyu juq bhai ge bhiq-a nail ngaol. 16 Phaqliqsail nail tsaol-aq teevq pav ganav juq ge nail: “Tsaol-aq al gaq, Miqyail jaol nail nee lee-a nail maq ngel-ail. Khul khi mail dai ngal-aq neq, jaol n n-gaol iqsanl, aivq maq lao-ail” dai, ge bhiq-a nail ngaol. Thailhai ngaol-aoq, teevq pav ganav juq ge nail: “Oeqbal yaq teevq gaq, niilheel nail bhi heeq bhi moel nail phaq, khalhai khi nl nia nail-aiq” dai, ge nail ngaol. Alheel ngel-i mail, aqyu juq nvq munl pevq ail-a nail ngaol. 17 Aqyu juq maivpeivq peivq daiq-a nail al gaq bhai: “Naoq nail maivneev bhai bhi moel lal-a nail tsaol-aq al gaq nail ganl, naol khalhai ge heeq” dai, teevq pov gaoq naldaiq-u phao, “Aivq neq, Miqyail nail haqbhoil gedan nail gaq ngaol” dai, ge kovq bhiq-a nail ngaol. 18 Yuldav nail tsaol-aq nail aqivq juq, maivneev moel lal-a nail tsaol-aq al gaq nail aqbhu aqma bhai maq ya naldaiq-u kev dai, iqmoeq-u aivq maivpeivq peivq khi niil aq-il maivneev moel lal-a nail ngaol dai, aqyu juq neema maq thaqtsaol-ai haq-al. 19 Alheel ngel-i mail, tsaol-aq al gaq nail aqbhu aqma bhai, aqyu juq naldaiq-a nail: “Niil gaq, nul-nq nvq gaq nail yaqyov ngaol laiq. Doevq lee-u nee mail, maivpeivq peivq nail ngaol dai, nul-nq nvq gaq-i mail ge nail neq, niil gaq ngaol laiq. Thailhai phal-iq neq, niil aq-il aivq maivneev khalhai khi moel nia lal-a nail-aiq” dai, naldaiq-a nail ngaol. 20 Aivq nail aqbhu aqma ge nail: “Niil gaq neq, nv-nvq gaq nail yaqyov ngaol. Doevq lee-u nee mail maivpeivq peivq nail ngaol dai, nv-nvq gaq heeq kivq nail ngaol. 21 Thailhai ngaol-aoq, niil aq-il aivq nail maivneev khalhai khi moel nia lal thaq nail dai, nv-nvq gaq maq heeq kivq. Aivq nail maivneev bhai khaq sil gaq-i mail bhi moel lal-a nail dai iqsanl, nv-nvq gaq maq heeq kivq. Aivq bhai naldaiq yaoq, aivq eeq lal-aoq nail ngaol. Aivq nail ganl, aivq ge daiq lavq nia nail ngaol” dai, ge bhiq-a nail ngaol. 22 Aivq nail aqbhu aqma Yuldav nail tsaol-aq bhai geesil nail ngel-i mail, alhai ge-a nail ngaol. Khul khi mail, geesil nail dai ngal-aq neq, “Yeiqsul bhai Khali ngaol dai, khal ge nail tsaol-aq bhai, nvjuq nail uqhuq thaoq nail ilkhaol bhai maq bivq tavq mail the dov naol” dai, Yuldav nail tsaol-aq juq-i mail ge ceiv-ai thaq nail ngaol. 23 Alheel ngel-i mail, “Aivq eeq lal-aoq nail ngaol. Aivq bhai naldaiq yaoq” dai, aivq nail aqbhu aqma ge nail ngaol. 24 A bhai nee ngal-aq, Phaqliqsail juq maivpeivq peivq daiq-a nail al gaq bhai, khul lavq khi ge bhiq-a nail: “Miqyail bhai taivq-ail tsiq eeq yaoq. Tsaol-aq al gaq neq, oeqbal yaq ngaol dai, nvjuq heeq kivq nail ngaol” dai, aivq bhai ge bhiq-a nail ngaol. 25 Aq-u phao, aivq ge nail: “Aivq oeqbal yaq ngel nail, maq ngel nail neq, ngal maq heeq kivq. Teevq phaq taivq-ail ngal heeq kivq nail ngaol. Aq-u phao ngal maivpeivq peivq khi ngaol-aoq, niil aq-il ngal maivneev moel lal-aoq nail ngaol” dai, aqyu juq bhai ge bhiq-a nail ngaol. 26 “Aivq naoq bhai khalhai lav sav lavq-a nail-aiq. Naoq nail maivneev bhai khalhai khi lav moel lavq-a nail-aiq” dai, aqyu juq aivq bhai gaoq naldaiq-a nail ngaol. 27 Aivq ge nail: “Aq-il dai, ngal nuljuq bhai ge bhiq khi ngaol-aoq, nuljuq maq naldaiq-ail, khul khi mail, nuljuq teevq pov gaoq gaiq movq nail-aiq. Nuljuq iqsanl, aivq nail yaqlaol jiovq movq lal-aoq nail laiq” dai, ge bhiq-a nail ngaol. 28 Aqyu juq aivq bhai khaq khaq-ail khi ge nail: “Naol neq, aivq nail yaqlaol nial. Nvjuq neq, Molseiq nail yaqlaol ngaol. 29 Miqyail Molseiq bhai daoq ge tsaoq lee-a nail ngaol dai, nvjuq heeq kivq naol. Thailhai ngaol-aoq, tsaol-aq al gaq khaq bha nee lal-a nail dai, nvjuq maq heeq kivq-ail” dai, ge bhiq-a nail ngaol. 30 Maivpeivq peivq daiq-a nail al gaq ge nail: “Aivq ngaq nail maivneev bhai bhi moel lal khi ngaol-aoq, aivq khaq bha nee lal-a nail dai, nuljuq maq heeq nia nail neq, noeq-u maq dov-ail nial. 31 Miqyail neq, oeqbal yaq nail daoq maq naldaiq-ail dai, ngadao heeq kivq naol. Thailhai ngaol-aoq, tsaol-aq teevq gaq ganav Miqyail bhai ev khi, aivq neema tsaq nail khe-ai nl haq neq, Miqyail tsaol-aq al gaq nail daoq naldaiq nail ngaol. 32 Nq teivq mil teivq teivq-u nee mail, yanqgaol kev dai, doevq lee-u nee mail maivpeivq peivq nail tsaol-aq bhai, maivneev bhi moel lal-a nail ganl, tsaol-aq teevq gaq iqsanl, maq gaiq dai haq-al. 33 Tsaol-aq al gaq Miqyail jaol nail nee lee-a nail maq ngel-ail nul neq, aivq teevq phaq iqsanl, maq nl nia-ail” dai, aqyu juq bhai ge bhiq-a nail ngaol. 34 Aqyu juq ge nail: “Naol neq, oeqbal lavqkhoel bhai doevq lee khi ngaol-aoq, nvjuq bhai cavq lal cov lal nail laiq” dai, ge khi, maivpeivq peivq daiq-a nail al gaq bhai the dov bhiq-a nail ngaol.
Aqhaqlal phao maivpeivq peivq nail ganl
35 Tsaol-aq al gaq bhai yu the dov-a nail ganl Yeiqsul ya gaiq-a nail ngaol. Yeiqsul aivq bhai halpov moel-ail khi, “Naol tsaol-aq nail Yaqyov bhai neema thaqtsaol naol laiq” dai, naldaiq-a nail ngaol. 36 “Heeqphaq-ol, ngal aivq bhai neema thaqtsaol dai, tsaol-aq nail Yaqyov neq, khaq sil gaq” dai, tsaol-aq al gaq naldaiq-a nail ngaol. 37 Yeiqsul aivq bhai ge bhiq-a nail: “Naol aivq bhai ya moel-a nail nee ovqtavq, niil aq-il naoq-ai nee mail daoq ge tsaoq thailthaiq nail gaq neq, aivq ngaol” dai, ge kovq bhiq-a nail ngaol. 38 “Heeqphaq-ol, ngal neema thaqtsaol naol” dai, ge khi, Yeiqsul bhai uqhuq thaoq-a nail ngaol. 39 A bhai nee ngal-aq, Yeiqsul ge nail: “Maivneev maq moel nia nail tsaol-aq maivneev moel nia lal khi, maivneev moel nia nail tsaol-aq maivpeivq peivq-ail dai, yalkhaq dal nail khi mail miltsaq kovtavq bhai ngal lee-a nail ngaol” dai, ge bhiq-a nail ngaol. 40 A bhai, aivq nee mail jaol nail, Phaqliqsail tsaol-aq teevq pav ganav juq, daoq al daoq ya gaiq-u phao, “Nvjuq iqsanl maivpeivq peivq nail tsaol-aq laiq” dai, Yeiqsul bhai naldaiq-a nail ngaol. 41 Yeiqsul ge nail: “Nuljuq maldil maivpeivq peivq-ail nul neq, nuljuq oeqbal maq aol-ail. Thailhai ngaol-aoq, nvjuq maivpeivq maq peivq-ail dai, niil aq-il nuljuq ge nail ngel-i mail, nuljuq oeqbal aol nail ngaol” dai, ge bhiq-a nail ngaol.
Yaol yaol khu nail ganl daoqma uqhuq daoq
1 Yeiqsul gaoq ge nail: “Ngal nuljuq bhai maldil dai, ge lavq bhel. Yaol yaol khu bhai aol lal-u phao, govkhoiq nee mail maq aol lal mail, yaoq dao yaoq nee mail dav bhoel lavq nail gaq neq, khoiqbhaoq tsaolpheel ngaol. 2 Thailhai ngaol-aoq, govkhoiq nee mail aol lal nail gaq neq, yaol lovq nail gaq ngaol. 3 Govkhoiq bhai lovq nail gaq, aivq bhai lolgov phao bhiq nail ngaol. Yaol juq neq, aivq nail daoq naldaiq nail ngaol. Aivq neq, aivq nail yaol al juq nail aqmil khul khi, yaol al juq bhai hevq dol-aivq nail ngaol. 4 Aivq nail yaol juq iqsanl mail phaiq dov gil haq neq, yaol juq nail iqmoeq, aivq ail nail ngaol. Yaol juq iqsanl, aivq nail aqthel heeq nia nail ngel-i mail, aivq nail haoqnao tsaothe nail ngaol. 5 Yaol al juq neq, aqyu juq maq heeq nia nail tsaol-aq nail haoqnao maq tsaothe-ail. Khul khi mail dai ngal-aq neq, aqyu juq nail aqthel bhai maq heeq nia nail ngel-i mail, tsaoq nail ngaol” dai, aqyu juq bhai ge bhiq-a nail ngaol. 6 Yeiqsul daoqma uqhuq daoq niil daoq nee mail aqyu juq bhai cavq bhiq cov bhiq-a nail ngaol. Thailhai ngaol-aoq, aivq khalhai ge movq nail dai, aqyu juq maq heeq nia-ail.
Yeiqsul neq, yaol bhai aqmeeq meeq dai, tsu lovq nail gaq ngaol
7 Alheel ngel-i mail, Yeiqsul teevq pov gaoq ge nail: “Ngal nuljuq bhai maldil dai, ge lavq bhel dei-eiq. Ngal neq, yaol juq aol lal nail govkhoiq ngaol. 8 Ngaq nail iqmoeq nee lee-a nail tsaol-aq iqsanl mail, khoiqbhaoq tsaolpheel ngaol. Yaol juq neq, aqyu juq nail daoq maq naldaiq-ail. 9 Ngal neq, govkhoiq ngaol. Ngaq-ai nee mail khal aol lal nail gaq neq, hevqkovq nail phaq ya nail ngaol. Tsaol-aq al gaq, aol iqsanl aol lai, dov iqsanl dov lee dov lee-ail, gavjaq duq ya moel nail ngaol. 10 Khoiqbhaoq tsaolpheel neq, khoiq nail, heivq nail, lav cov nail khi taivq-ail lal-a nail ngaol. Ngal neq, yaol juq ya doevq nail nee ovqtavq, doevq nail al teevq bhee teevq lovq ya nia dai, lee-a nail ngaol. 11 Ngal neq, yaol bhai aqmeeq meeq dai, tsu lovq nail gaq ngaol. Yaol bhai aqmeeq meeq dai, tsu lovq nail gaq neq, yaol juq nail haqbhoil sildan naol. 12 Gaqmaol maoljaq nail tsaol-aq neq, yaol bhai tsu lovq nail gaq maq ngel nail nee ovqtavq, aivq nail yaol maq ngel nail ngel-i mail, oelnel lal nail bhai ya moel-u phao, yaol juq bhai khaonq-ail ceevq khi tsaoq nail ngaol. Aq-u phao, oelnel al juq neq, yaol juq bhai keivq keivq-ail, the pav the sav gil nail ngaol. 13 Tsaol-aq al gaq, gaqmaol maoljaq nail tsaol-aq taivq-ail pevq khi, yaol juq nail haqbhoil khul iqsanl maq saol-nvq dai, aivq tsaoq nail ngaol. 14 -15 Ngal neq, yaol bhai aqmeeq meeq dai, tsu lovq nail gaq ngaol. Aqbhu Miqyail ngaq bhai heeq nia khi, ngal iqsanl Aqbhu Miqyail bhai heeq kivq nail khe-ai, ngaq nail yaol juq bhai ngal heeq kivq naol. Ngaq nail yaol juq iqsanl, ngaq bhai heeq nia nail ngaol. Ngal yaol juq nail haqbhoil ngaq nail aqmaol av bhiq khi sildan naol. 16 Yaol yaol khu niil khu bhai, maq tavq nail yaol yaoq juq yaoq iqsanl ngal jaol-aiq haq naol. Yaol al juq bhai iqsanl ngal ya hevq ail haq nail ngaol. Aqyu juq ngaq nail daoq naldaiq nail ngaol. Aq-u phao, yaol teevq munl taivq-ail pevq lal khi, yaol bhai tsu lovq nail aqheel iqsanl teevq gaq taivq-ail pevq lal nail ngaol. 17 Ngal gaoq doevq kovq lal dai, ngaq nail aqmaol av bhiq khi sildan nail ngel-i mail, Aqbhu Miqyail ngaq bhai gaiq-a nail ngaol. 18 Ngaq nail doevq nail phaq, tsaol-aq teevq gaq-ail maq luv dov nia-ail. Ngal neema kev nail lavqkhoel, sildan naol. Ngal sildan nail bhaqaoq khi mail gaoq doevq kovq lal nail bhaqaoq jiav nail ngaol. Alhai nl dai, Aqbhu Miqyail ngaq bhai khoel-ai leevq lavq-a nail ngaol” dai, aqyu juq bhai ge bhiq-a nail ngaol. 19 Yeiqsul nail daoq al juq bhaqda nee, Yuldav nail tsaol-aq juq nvq munl pav ail-a nail ngaol. 20 Aqyu juq nail lavqkhoel, tsaol-aq mee nia gaq ge nail: “Aivq neq, neivq aol khi naiquq uq ail-aoq thaq nail niil. Nuljuq khul khi mail, aivq nail daoq naldaiq nail-aiq” dai, ge nail ngaol. 21 Teevq pav ganav juq ge nail: “Aivq nail daoq neq, neivq aol nail tsaol-aq nail daoq maq ngel-il. Neivq neq, maivpeivq peivq nail tsaol-aq bhai maivneev bhi moel lal nia nail laiq” dai, ge nail ngaol.
Yuldav nail tsaol-aq juq Yeiqsul bhai khaonq-a nail ganl
22 Yanq al yanq neq, aqcoevq coevq nail yanq ngaol. Yeiqlulsaqlaiq meenq bha uqhuq thaoq nail ilkhaol il ma av bhiq nail bhaoqaiq lav sav nail ngaol. 23 Uqhuq thaoq nail ilkhaol il ma nail khainl lavqkhoel bhai jiav nail, Saollavmoq nail gaqnaq yavqtsoel lavqkhoel bhai Yeiqsul tsao thailthaiq nail ngaol. 24 Aq-u phao, Yuldav nail tsaol-aq juq aivq jaol nail bhai jil lal khi ge nail: “Naol nvjuq bhai khal ngel nail khe-ai maq ge lavq dai, khaq mao kev dai bhi haq lavq nail-aiq. Nvjuq bhai daolcoev dai, ge lavq yaoq. Naol Meiqsilya ngaol laiq” dai, ge bhiq-a nail ngaol. 25 Yeiqsul ge nail: “Ngal nuljuq bhai ge bhiq gaq jel-aoq nail ngaol. Thailhai ngaol-aoq, nuljuq ngaq bhai neema maq thaqtsaol-ail. Ngaq nail Aqbhu bhai juq khi ngaq-i mail nl-a nail ganl juq, ngaq nail haqbhoil salkhil khanq nail ngaol. 26 Thailhai ngaol-aoq, nuljuq ngaq bhai neema maq thaqtsaol-ail. Khul khi mail dai ngal-aq neq, nuljuq ngaq nail yaol maq ngel-ail. 27 Ngaq nail yaol juq neq, ngaq nail daoq naldaiq nail ngaol. Aqyu juq bhai ngal heeq kivq khi, aqyu juq ngaq nail haoqnao tsaothe nail ngaol. 28 Aqyu juq bhai nqmaq maqluv halyeel doevq nail phaq ngal bivq khi, aqyu juq teevq thal-iq maq ya luq maq ya seil-ail yaoq-aol. Tsaol-aq teevq gaq iqsanl, aqyu juq bhai ngaq nail aqlavq lavqkhoel nee mail maq luv dov nia-ail. 29 Yaol al juq ngaq bhai bivq lavq-a nail gaq pevq nail, ngaq nail Aqbhu neq, iqsanl nail kovtavq bhai eeq jaiq nail ngaol. Ngaq nail Aqbhu heldaiq nail kov-uvq bhai aqyu juq teevq gaq iqsanl, maq luv dov nia-ail. 30 Aqbhu khi ngal neq, teevq gaq teevq-eel ngaol” dai, aivq aqyu juq bhai ge bhiq-a nail ngaol. 31 Aq-u phao, tsaol-aq al juq lovmav oil khi, aivq bhai liv-aiq nail khi mail ngaol. 32 Yeiqsul ge nail: “Aqbhu-i mail bhi nl lavq-a nail, meeq nail ganl mee nia phaq ngal nuljuq nail sivtavq bhai nl gaq-ao nail ngaol. Ganl al juq nail lavqkhoel, ganl khul phaq bhaqda nee, nuljuq ngaq bhai lovmav-i mail liv nail dai khi, gaoq lainq nail-aiq” dai, aqyu juq bhai naldaiq-a nail ngaol. 33 Yuldav nail tsaol-aq juq ge nail: “Naol ganl aqmeeq phaq nl-a nail bhaqda nee, naoq bhai lovmav-i mail liv nail khi maq ngel. Naol Miqyail bhai khal ge movq-ail ge-a nail ngel-i mail, liv nail khi ngaol. Al ovqtavq, naol tsaol-aq pevq khi ngaol-aoq, Miqyail jiovq-il” dai, Yeiqsul bhai ge bhiq-a nail ngaol. 34 Yeiqsul ge nail: “Nuljuq nail aoldaoq kovqdaoq lavqkhoel bhai, nuljuq neq, Miqyail juq ngaol dai, Miqyail-i mail ge-ai thaq nail daoq teevq dao gevq-ai thaq nail, maq ngel-ail laiq. 35 Jalliq lavqkhoel bhai gevq-ai thaq nail daoq neq, tsaq nail ngaol dai, ngadao heeq kivq nail ngaol. Miqyail-i mail aivq nail daoq bhi gaiq ail-a nail tsaol-aq juq neq, miqyail juq dai khul nail ngaol. 36 Thailhai phal-iq neq, Aqbhu Miqyail-i mail tsel dov khi, miltsaq kovtavq bhai khoel-ai leevq-a nail al gaq, ‘Ngal Miqyail nail Yaqyov ngaol’ dai, ge nail ngel-i mail, ‘Naol Miqyail bhai khal ge movq-ail ge nail niil’ dai, nuljuq ge nail laiq. 37 Ngal ngaq nail Aqbhu nail ganl maq nl haq neq, ngaq bhai neema thaq thaqtsaol. 38 Thailhai ngaol-aoq, ngal ngaq nail aqbhu nail ganl nl haq neq, nuljuq ngaq bhai neema maq thaqtsaol khi ngaol-aoq, ngaq-i mail nl-a nail ganl juq bhai neema thaq tsaol yaoq. Alhai neema thaqtsaol haq neq, Aqbhu Miqyail ngaq nail lavqkhoel bhai jaol khi, ngal iqsanl Aqbhu Miqyail nail lavqkhoel jaol-ail nial dai, nuljuq ya heeq ya moel naol” dai, ge bhiq-a nail ngaol. 39 Aq-u phao, aqyu juq Yeiqsul bhai nieivq nail khi, gaoq laijai-a nail ngaol. Thailhai ngaol-aoq, aqyu bhai maq bhi nieivq dai, jel ail-a nail ngaol. 40 Yaolhaq-i mail ulcuvq iqmoeq ilmoeq saol bhiq-a nail, Yaoldaq laoljaol a phao lelkhel bhai, Yeiqsul teevq pov gaoq ail khi, a bhai jaol ail-a nail ngaol. 41 Tsaol-aq mee nia gaq aivq jaol nail bhai ail-a nail ngaol. Aqyu juq ge nail: “Yaolhaq neq, bhi heeq bhi moel nail phaq teevq phaq iqsanl maq nl-al. Thailhai ngaol-aoq, tsaol-aq niil gaq nail ganl, Yaolhaq-i mail khal ge-ai thaq nail iqsanl, tsaq-ail nial” dai, ge nail ngaol. 42 Yeiqsul al bhai jaol-u phao, tsaol-aq mee nia gaq, aivq bhai neema thaqtsaol lal-a nail ngaol.
Laqsaqlul sil-a nail ganl
1 Bheiqtaqnil julgu bhai jaol nail, Laqsaqlul dai mil-ai thaq nail tsaol-aq teevq gaq nal thailthaiq nail ngaol. Bheiqtaqnil julgu neq, Maqlil khi mail aivq nail aqivq Maqtha aqyu nvq mail jaol nail julgu al gu ngaol. 2 Maqlil neq, Yeiqsul nail aqkhil bhai huqbhiq nil nail ulcuvq hoel dav khi, aivq nail tsailkheel-i mail siv bhiq-a nail yaqmai-aq al gaq ngaol. Nal thailthaiq nail Laqsaqlul neq, Maqlil nail jaqbheq ngaol. 3 “Heeqphaq-ol, naoq-i mail gaiq-a nail gaq nal-ai bhiq nail ngaol” dai, Maqlil khi Maqtha aqyu nvq mail Yeiqsul jaol nail bha, bhi cavq gaiq lai-a nail ngaol. 4 Daoq al daoq bhai Yeiqsul ya gaiq-u phao, niailhai ge nail ngaol: “Nal nail al neq, sil heeq phaq-ail nal kav khoeq nail nalgoel maq ngel-ail. Nal nail al bhaqda nee, Miqyail seiqleiq khaoqsail ya khi, Miqyail nail Yaqyov iqsanl, al bhaqda nee seiqleiq khaoqsail ya nail ngaol” dai, ge bhiq-a nail ngaol. 5 Maqtha, Maqlil, Laqyaqlul aqyu hail mail bhai, Yeiqsul gaiq-a nail ngaol. 6 Thailhai ngaol-aoq, Laqyaqlul nal nail ganl, Yeiqsul ya gaiq khi ngaol-aoq, lavqtsail mail maq lai mail. Aivq-i mail jaol nail bhai nvq n gaoq jaol-a nail ngaol. 7 A bhai nee ngal-aq, Yeiqsul ge nail: “Ngadao Yuldav milkhaoq bha kovq ail bhel” dai, yaqlaol juq bhai ge bhiq-a nail ngaol. 8 Yaqlaol juq ge nail: “Saqlaq-ol, milgaol sinqgaol bhai, a bhai jaol nail tsaol-aq juq, naoq bhai lovmav-i mail liv nail dai khi, maq ngel-ail laiq. Naol a bhai gaoq kovq ail nail khi laiq” dai, ge bhiq-a nail ngaol. 9 Yeiqsul ge nail: “Teevq n lavqkhoel, naqli tsel-nvq lavq jiav nail maq ngel-ail laiq. N-gaol phao khal tsao nail tsaol-aq neq, miltsaq nail aqbhaq bhaq nail ngel-i mail, phaqthiq maq thiq lai-ail. 10 Thailhai ngaol-aoq, nqkiv phao tsao haq neq, aivq nail lavqkhoel phao aqbhaq maq aol nail ngel-i mail, phaqthiq thiq lai nail ngaol” dai, ge bhiq-a nail ngaol. 11 Yeiqsul alhai ge gaq khi, teevq pov gaoq ge nail: “Ngadao nail aqtsaoq Laqsaqlul iqthaiq kov-ai thaq nail ngaol. Thailhai ngaol-aoq, ngal ail khi lav noeq-ail bhiq naol” dai, ge bhiq-a nail ngaol. 12 Yaqlaol juq ge nail: “Heeqphaq-ol, aivq iqthaiq kov-ai thaq nail teevq-eel phal-iq neq, meeq lai nail ngaol” dai, ge bhiq-a nail ngaol. 13 Yeiqsul ge movq nail neq, Laqsaqlul sil-aoq nail ngaol dai, ge movq nail ngaol. Thailhai ngaol-aoq, yaqlaol juq neq, aivq maldil iqthaiq kov-ai thaq nail ngaol dai, gov heeq-a nail ngaol. 14 Alheel ngel-i mail, Yeiqsul aqyu juq bhai daolcoev dai, ge bhiq-a nail: “Laqsaqlul sil-aoq nail ngaol. 15 Ngal Laqsaqlul nee mail maq jaol-ail ceevq-a nail ngel-i mail, nuljuq nail haqbhoil lavqkhiq tsail-ail nial. Khul khi mail dai ngal-aq neq, ganl al bhaqda nee, nuljuq ngaq bhai neema thaqtsaol lal nail ngaol. Niil aq-il ngadao juq aivq jaol nail bha ail bhel” dai, ge bhiq-a nail ngaol. 16 Teevq pov taivq-ail nvq gaq doevq lee-a nail Tholmav dai khul nail gaq, aivq nail aqtsaoq yaqlaol juq bhai ge bhiq nail: “Ngadao juq iqsanl saqlaq nee teevq gaq khe-ai ail khi, aivq nee mail teevq gaq khe-ai sil naol” dai, ge bhiq-a nail ngaol.
Gaoq doevq kovq lal nail phaq khi aqdoevq doevq nail phaq nail ganl bhai, Yeiqsul cav bhiq cov bhiq nail ganl
17 Yeiqsul kev lee-u phao, Laqyaqlul duqpheeq thaq nail, liq n bhee lal-aoq thaq nail bhai ya moel-a nail ngaol. 18 Bheiqtaqnil julgu neq, Yeiqlulsaqlaiq meenq nee mail nvq lal bhai jiav nail ngaol. 19 Alheel ngel-i mail, Yuldav nail tsaol-aq maodai Maqtha khi Maqlil jaol nail bha lal khi, aqyu nvq gaq nail jaqbheq sil-a nail ngel-i mail, aqyu nvq mail bhai gaq bivq nail dai khi, jil lal thaq nail ngaol. 20 Yeiqsul lee thaq nail ganl ya gaiq-u phao, Maqtha dov ail khi hav laq ail-a nail ngaol. Aq-u phao Maqlil gaq neq, ilkhaol bhai jaol nail ngaol. 21 A bhai nee ngal-aq, Maqtha Yeiqsul bhai ge bhiq-a nail: “Heeqphaq-ol, naol niai jaol-ail ceevq-a nul neq, ngaq nail jaqbheq Laqsaqlul maq sil-ail. 22 Thailhai ngaol-aoq, niil aq-il iqsanl, naol khal hal nail phaq bhai Miqyail naoq bhai nl bhiq naol dai, ngal heeq kivq naol” dai, ge bhiq-a nail ngaol. 23 Yeiqsul ge nail: “Naoq nail jaqbheq Laqsaqlul gaoq doevq kovq lal naol” dai, ge bhiq-a nail ngaol. 24 Maqtha ge nail: “Miltsaq niil daoq loi loi lai-u n-gaol, aivq gaoq doevq kovq lal nail ngaol dai, ngal heeq kivq naol” dai, ge bhiq-a nail ngaol. 25 Yeiqsul ge nail: “Ngal neq, doevq kovq lal nail phaq khi aqdoevq doevq nail phaq pevq nail ngaol. Ngaq bhai neema thaqtsaol haq neq, sil khi ngaol-aoq, doevq-ai haq nail ngaol. 26 Aqdoevq doevq-u phao, ngaq bhai neema thaqtsaol nail tsaol-aq, teevq thal iqsanl, maq ya sil-ail dai. Ngaq nail daoq bhai naol neema thaqtsaol naol laiq” dai, ge bhiq-a nail ngaol. 27 Maqtha ge nail: “Heeqphaq-ol, ngal neema thaqtsaol naol. Naol neq, miltsaq kovtavq bhai lee nail, Miqyail nail Yaqyov Khali ngaol dai, ngal neema thaqtsaol naol” dai, ge bhiq-a nail ngaol.
Yeiqsul nioil-a nail ganl
28 Maqtha alhai ge gaq-u phao, Maqlil jaol nail bha ail khi, “Saqlaq kev lee khi, naoq bhai khul thailthaiq nail ngaol” dai, aqtsi tsu dai, ge bhiq-a nail ngaol. 29 Daoq al daoq bhai Maqlil ya gaiq-u phao, lavqtsail mail tsaoq thul khi, Yeiqsul bhai hav laq ail-a nail ngaol. 30 Yeiqsul neq, julgu bhai maq aol lee dai, Maqtha bhai thaoqphuq-a nail dao bhai jaol-ai haq nail ngaol. 31 Maqlil nail ilkhaol bha lee khi, gaq bivq lee-a nail Yuldav nail tsaol-aq al juq iqsanl, Maqlil lavqtsail mail tsaoq thul khi, dov ail nail bhai ya moel-u phao, tsaothel-aivq-a nail ngaol. Aivq luqdaol bha ail khi, nioilkhaoq khaoq-ail nail khul-il dai, aqyu juq noeq nail ngaol. 32 Maqlil Yeiqsul jaol nail bha ail kev khi, aivq bhai ya moel-u phao, teevq pov taivq-ail peevqceevq kovdoiq doiq khi, “Heeqphaq-ol, naol niai jaol-ail nul neq, ngaq nail jaqbheq Laqsaqlul maq sil-ail” dai, ge bhiq-a nail ngaol. 33 Maqlil neq, nioil thailthaiq khi, Maqlil nee mail lee-a nail tsaol-aq juq iqsanl nioil nail bhai, Yeiqsul ya moel-u phao, aivq nail neema bhai yao deedee lal bhiq-a nail ngaol. 34 “Nuljuq aivq bhai, khaq bha duqpheeq ail-a nail-aiq” dai, aivq aqyu juq bhai naldaiq-u phao, “Heeqphaq-ol, lee khi heldaiq lee yaoq” dai, aqyu juq ge bhiq-a nail ngaol. 35 Aq-u phao, Yeiqsul nioil-a nail ngaol. 36 Alheel ngel-i mail, “Heldaiq yaoq. Aivq Laqsaqlul bhai khadai gaiq-a nail ngel-ail” dai, Yuldav nail tsaol-aq al juq ge nail ngaol. 37 Thailhai ngaol-aoq, teevq pav ganav juq ge nail: “Maivpeivq bhai maivneev moel nia lal dai, aivq nl nia nail maq ngel-ail laiq. Laqsaqlul maq ya sil dai, aivq maq nl bhiq nia-ail laiq” dai, ge bhiq-a nail ngaol.
Laqsaqlul bhai bhi doevq kovq lal-a nail ganl
38 Aq-u phao, Yeiqsul nail neema bhai gaoq yao deedee lal bhiq khi, luqdaol bha ail-a nail ngaol. Luqdaol al neq lovmav lov khaoq pevq khi luqdaol al nail moeqkhoeq bhai lovmav ngaoq tsoiq-ai thaq nail ngaol. 39 “Lovmav ngaoq ha yaoq” dai, Yeiqsul daoq bivq-a nail ngaol. Sil-a nail gaq nail aqivq pevq nail Maqtha ge nail: “Heeqphaq-ol, aivq aqbuvq aqnil nil lal-aoq nail ngaol. Khul khi mail dai ngal-aq neq, aivq bhai duq pheeq-a nail, liq n bhee lal-aoq nail ngaol” dai, ge bhiq-a nail ngaol. 40 Yeiqsul aivq bhai ge bhiq-a nail: “Naol neema thaqtsaol haq neq, Miqyail nail seiqleiq khaoqsail bhai ya moel nail ngaol dai, ngal naoq bhai ge bhiq-ai thaq nail, maq ngel-ail laiq” dai, ge bhiq-a nail ngaol. 41 Aq-u phao, aqyu juq lovmav ngaoq ha-a nail ngaol. Yeiqsul nqtavq phao gaollel khi ge nail: “Aqbhu-ol, ngaq nail hal daoq bhai naol naldaiq lavq-a nail ngel-i mail, naoq bhai tsiqeeq nail ngaol. 42 Naol ngaq nail hal daoq bhai khaq mao iqsanl, naldaiq naol dai, ngal heeq kivq naol. Thailhai ngaol-aoq, ngal hal nail niil neq, niai khe jaol nail tsaol-aq juq nail haqbhoil ngaol. Ngaq bhai naoq-i mail khoel-ai leevq-a nail ngaol dai, aqyu juq neema thaqtsaol lal dai, hal nail ngaol” dai, ge bhiq-a nail ngaol. 43 Yeiqsul alhai ge gaq-u phao: “Laqsaqlul-ol, dov lee yaoq” dai, mailma-ail gul nail ngaol. 44 Aq-u phao, Laqsaqlul dov lee-a nail ngaol. Aqkhil aqlavq bhai maoltoev toev-ai thaq khi, maivphaoq bhai lavqsiv-i mail lee cuvq-ai thaq nail ngaol. “Aivq bhai maoltoev pheel ha bhiq yaoq” dai, Yeiqsul aqyu juq bhai ge bhiq-a nail ngaol.
Yeiqsul bhai heivq nail haqbhoil khoiq ge pheeljaq nail ganl
45 Maqlil jaol nail bha lee-a nail Yuldav nail tsaol-aq maodai, Yeiqsul-i mail alhai nl-a nail bhai ya moel-u phao, aivq bhai neema thaqtsaol lal-a nail ngaol. 46 Thailhai ngaol-aoq, teevq pav ganav juq neq, Phaqliqsail jaol nail bha kovq lai khi, Yeiqsul-i mail nl-a nail ganl al juq bhai, ge bhiq lai-a nail ngaol. 47 Aq-u phao, Philma juq khi Phaqliqsail juq neq, maoqbhaoq nl nail munl munl ma bhai khul jil khi, “Ngadao khalhai khi heeq. Khul khi mail dai ngal-aq neq, tsaol-aq al gaq neq, bhi heeq bhi moel nail phaq nl thailthaiq nail ngaol. 48 Aivq bhai alhai taivq-ail nl nl-ail bhi jaol haq neq, tsaol-aq yaoq gaq yaoq-ao nee aivq bhai neema thaqtsaol gil lal nail ngaol. Alhai pevq lal haq neq, Lolmav nail tsaol-aq juq lal khi, ngadao nail uqhuq thaoq nail ilkhaol il ma khi ngadao nail jeq-e jaq-a bhai lav luq lav seil lal nail ngaol” dai, ge bhiq-a nail ngaol. 49 Aqyu juq nail lavqkhoel khe, Gaqyaqphal dai khul nail, aq-u kovq Philma aqivq jiovq-ai thaq nail gaq ge nail: “Nuljuq neq, khul iqsanl maq heeq nia-il. 50 Tsaol jeq-e teevq jeq-e jeq lao-ail maq ya luq maq ya seil-ail nail haqbhoil, tsaol-aq teevq gaq tsaol jeq-e nail haqbhoil sildan nail neq, meeq jaiq nail ngaol dai, nuljuq bhai maq gov heeq lal-ail laiq” dai, aqyu juq bhai ge bhiq-a nail ngaol. 51 Daoq al daoq neq, aivq bhai aivq noeq dov khi ge nail maq ngel-ail. Aq-u kovq, aivq Philma aqivq gaq jiovq thailthaiq nail ngel-i mail, Yeiqsul neq, jeq-e niil jeq-e nail haqbhoil sildan nail ngaol dai, Miqyail nail daoq gedan nail phaq pevq nail ngaol. 52 Aqyu juq nail haqbhoil taivq-ail maq ngel mail, miltsaq doi dai bhi the peiv-ai thaq nail Miqyail nail tsaol-aq juq teevq munl taivq-ail gaoq bhi jil lal nail haqbhoil, aivq ya sildan nail ganl gedan nail iqsanl, pevq nail ngaol. 53 Aq-u n-gaol nee dan khi, aqyu juq Yeiqsul bhai heivq nail haqbhoil lainq-a nail ngaol. 54 Alheel ngel-i mail, Yeiqsul Yuldav milkhaoq lavqkhoel bhai yu moel nail bhai maq tsao dai pevq-ail khi, haqaiq mildai haqtsoiq haqyal nail aqjail bha jiav nail, Eilphaqleiq meenq bha ail khi, yaqlaol juq nee mail a bhai jaol ail-a nail ngaol. 55 Bhaqsaqkhaq bhaoqaiq lav sav nail aqjail jail lal-a nail ngel-i mail, bhaoqaiq maq lav sav-u phao nee, aqmaol lav haol nail aol nl lai nail haqbhoil, daoltavq bha jaol nail tsaol-aq maodai, Yeiqlulsaqlaiq meenq bha lai thailthaiq nail ngaol. 56 Aqyu juq Yeiqsul bhai halpov halpov-ail, uqhuq thaoq nail ilkhaol il ma nail lavqkhoel bhai jil lai khi jaol-u phao, “Nuljuq bhai khalhai noeq nail-aiq. Aivq bhaoqaiq niil nail lavqkhoel bhai maq lal nail neq, aqduq bhao nail, maq ngel-ail laiq” dai, aqyu juq nail gaiqlaq bhai ge pheeljaq nail ngaol. 57 Yeiqsul jaol nail bhai khal moel nail tsaol-aq, Philma juq khi Phaqliqsail juq bhai ya cavq gaiq lal nail ngaol dai, daoq bivq-ai thaq nail ngaol. Aqyu juq Yeiqsul bhai nieivq miv kivq dai, daoq alhai bivq-ai thaq nail ngaol.
Maqlil-i mail Yeiqsul nail aqkhil bhai huqbhiq nil nail ulcuvq leivq bhiq-a nail ganl
1 Bhaqsaqkhaq maq kev lal nail kovq n jiav-u phao, aivq-i mail bhi doevq kovq lal-a nail Laqyaqlul al gaq jaol nail Bheiqtaqnil julgu bhai Yeiqsul lai-a nail ngaol. 2 A bhai, aivq bhai aoqbhaol laol bhiq-a nail ngaol. Maqtha gaq neq, aoq laoq jal laoq laoq nail gaq jiovq khi, Laqsaqlul gaq neq, kovqkhail bhai Yeiqsul nee mail aoq jaoq jaoq nail ngaol. 3 Aq-u phao Maqlil neq, aqphoiq mao-ail phoiq nail naqdul dai khul nail, huqbhiq nil nail aqtseel hail khanl tsiq khi, Yeiqsul nail aqkhil bhai leivq bhiq khi, aivq nail uqhuq tsailkheel-i mail siv bhiq-a nail ngaol. Huqbhiq nil nail aqtseel al ilkhaol teevq il il lao-ail, huqbhiq nil deedee nail ngaol. 4 Yeiqsul nail yaqlaol juq nail lavqkhoel khe, haoqnao Yeiqsul bhai gaoq jaq-a nail Yuldav Ilsaqgaqliqoq al gaq, niailhai ge nail ngaol: 5 “Huqbhiq nil nail aqtseel thoil cavq hail yal bavq nee gaoq khi, haq nail aoq nail juq bhai, khul khi mail, maq bhoil bhiq ail nail-aiq” dai, ge bhiq-a nail ngaol. 6 Haq nail aoq nail juq nail haqbhoil saol-nvq khi, aivq alhai ge nail maq ngel-ail. Aivq neq, khoiqbhaoq teevq gaq ngel-i mail alheel nail daoq ge nail ngaol. Aivq neq, phul baivluvq thaoq nail gaq pevq khi, al nail lavqkhoel khe phul khoiq daiq-a nail ngaol. 7 Yeiqsul ge nail: “Aivq bhai teevq phaq iqsanl thaq lav tsoiq lai. Ngaq bhai duqpheeq nail haqbhoil aivq huqbhiq nil nail ulcuvq niil cavq lainq-ai thaq nail ngaol. 8 Haq nail aoq nail juq neq, nuljuq nee khaq mao iqsanl jaol naol. Thailhai ngaol-aoq, ngal neq, nuljuq nee khaq mao iqsanl jaol nail, maq ngel-ail” dai, ge bhiq-a nail ngaol.
Laqsaqlul bhai heivq nail dai, lainq-ai thaq nail ganl
9 Yeiqsul Bheiqtaqnil julgu bhai jaol nail ganl, tsaol-aq maodai ya gaiq khi, a bhai lai-a nail ngaol. Yeiqsul bhai moel movq nail ngel-i mail taivq-ail lai-a nail iqsanl, maq ngel-ail. Yeiqsul-i mail bhi doevq kovq lal-a nail Laqsaqlul bhai iqsanl, moel movq nail ngel-i mail, lai-a nail ngaol. 10 Alheel ngel-i mail, Philma juq Laqyaqlul bhai iqsanl, heivq nail dai khi, lainq-ai thaq nail ngaol. 11 Khul khi mail daiq ngal-aq neq, aivq sil khi gaoq doevq kovq lal-a nail bhaqda nee, Yuldav nail tsaol-aq maodai aqyu juq nail munl lavqkhoel nee dov ail khi, Yeiqsul bhai neema thaqtsaol lal thailthaiq nail ngaol. Yeiqsul moeqphaq laljieiv maol yaq jeeq khi, Yeiqlulsaqlaiq meenq bha aol lai-a nail ganl 12 Yaoq n yaoq, Bhaqsaqkhaq bhaoqaiq jaq nail bha lal-a nail tsaol-aq munl munl ma al juq, Yeiqsul Yeiqlulsaqlaiq meenq bha lal thailthaiq nail ganl, ya gaiq-a nail ngaol. 13 Alheel ngel-i mail, aqyu juq dal-aol lavqmeiv bavq khi, aivq bhai hav lavq ail nail dai khi, niailhai gul gul-ail dov ail-a nail ngaol: “Hoqsaqnaq! Heeqphaq Miqyail nail aqmil kov-uvq nee lee nail gaq geeqlaoq eeq dei-eiq. Ilsaqleiqlal nail jeq-e nail Heeqphaq geeqlaoq eeq dei-eiq” dai, aqyu juq gul nail ngaol. 14 Jalliq lavqkhoel bhai gevq-ai thaq nail jiav nail khe-ai, Yeiqsul moeqphaq laljieiv maol yaq teevq maol halpov moel khi jeeq nail ngaol. Jalliq lavqkhoel bhai niailhai gevq-ai thaq nail ngaol: 15 “Yeel-ovq Yaqmiq-ol, thaq geesil. Naoq nail Heeqphaq moeqphaq laljieiv maol yaq jeeq khi lee thailthaiq nail bhai, heldaiq yaoq” dai, gevq-ai thaq nail ngaol. 16 Aivq nail yaqlaol juq ganl al, maq heeq nia-ai haq-al. Thailhai ngaol-aoq, Yeiqsul seiqleiq khaoqsail ya gaq-u phao, aivq nail ganl alhai gevq-ai thaq nail bhai maqkhaiq, yu aivq bhai alhai nl bhiq nail bhai maqkhaiq, aqyu juq noeq dov lal bhiq-a nail ngaol. 17 Yeiqsul Laqsaqlul bhai luqdaol lavqkhoel nee khul dol lavq khi, bhi doevq kovq lal-a nail bhai moel-a nail tsaol-aq juq, aqyu juq-i mail ya moel-a nail khe-ai, yu bhai ge daiq bhiq-a nail ngaol. 18 Tsaol-aq munl al munl Yeiqsul-i mail nl-a nail phaq noeq-u maq dov nail ganl al, ya gaiq-ai thaq nail ngel-i mail, aivq bhai hav laq lai-a nail phaq pevq nail ngaol. 19 Aq-u phao, Phaqliqsail juq teevq gaq nee teevq gaq ge pheeljaq nail: “Heldaiq. Ngadao juq-i mail noeq-ai thaq nail phaq maq nl pevq kivq yaoq-aol. Miltsaq yaq iqsanl aivq nail haoqnao tsaothel-aivq-ao nail ngaol” dai, ge pheeljaq nail ngaol.
Heiqlaqsal nail tsaol-aq juq Yeiqsul bhai halpov nail ganl
20 Bhaqsaqkhaq bhaoqaiq lav sav-u phao, Yeiqlulsaqlaiq meenq bha uqhuq thaoq lai-a nail juq nail lavqkhoel bhai, Heiqlaqsal nail tsaol-aq iqsanl kheq nail ngaol. 21 Heiqlaqsal tsaol-aq al juq, Gaqliqlail milkhaoq Bheiqjeildaq meenq bhai jaol nail Pillilpuv jaol nail bha ail khi, “Saqlaq-ol, nvjuq Yeiqsul bhai moel movq-il” dai, ge bhiq ail-a nail ngaol. 22 Pillilpuv Aqdaiqlaiq bhai tsaoq ail khi, aqyu nvq gaq teevq gaq khe-ai Yeiqsul bhai ge bhiq lai-a nail ngaol. 23 Yeiqsul aqyu nvq gaq bhai ge bhiq-a nail: “Tsaol-aq nail Yaqyov neq, seiqleiq khaoqsail ya nail aqyanq kev lal-aoq nail ngaol. 24 Ngal nul-nq nvq gaq bhai maldil dai, ge lavq bhel. Aqiq aqneev teevq neev neq, miltsaq bhai ga ail khi maq sil-u kev dai, aqiq aqneev teevq neev teevq-eel ngaol. Thailhai ngaol-aoq, aqiq aqneev al neev sil-u phao, aqiq aqneev maodai gaoq mao lal nail ngaol. 25 Yovqgavq nail doevq nail phaq bhai gaiq-a nail tsaol-aq neq, doevq nail phaq sunq ail nail ngaol. Miltsaq kovtavq bhai doevq-u phao, yovqgavq nail doevq nail phaq bhai neejiav jiav nail tsaol-aq neq, nqmaq maqluv halyeel doevq nail phaq ya nail ngaol. 26 Ngaq nail haqbhoil ganl nl movq nail tsaol-aq khul gaq maqkhaiq, ngaq nail haoqnao ya tsaothel lavq naol. Khul khi mail dai ngal-aq neq, ngaq nail yaqkav neq, ngal khal jaol nail bha ya jaol nail ngaol. Ngaq nail ganl khal nl nail tsaol-aq bhai, ngaq nail Aqbhu thaqeeq thaqheel bhiq nail ngaol” dai, ge bhiq-a nail ngaol.
Yeiqsul aivq ya sil nail ganl ge nail
27 Yeiqsul gaoq ge nail: “Ngaq nail neema haqaoq nl deedee-ail nial. Khalhai ge heeq dai, maq heeq lal-il. ‘Aqbhu-ol, aqyanq niil yanq ngaq nail kovtavq bhai maq yaq kev lee’ dai, ge haq neq, meeq-ail meeq. Thailhai ngaol-aoq, niil nail haqbhoil ngal lee-a nail phaq pevq nail ngaol. 28 Aqbhu-ol, naoq nail seiqleiq khaoqsail bhiq moel yaoq” dai, ge bhiq-a nail ngaol. Aq-u phao, nqtavq nee daoq ge dov-ai leevq-a nail: “Ngaq nail seiqleiq khaoqsail bhai moel gaq-ao nail ngaol. Thailhai ngaol-aoq, teevq pov gaoq bhi moel-ai haq naol” dai, ge-ai leevq thaq nail ngaol. 29 A bhai thulphaol thailthaiq nail tsaol-aq munl munl ma aqthel al thel bhai ya gaiq-u phao, teevq pav ganav juq neq, “Nqjaiq jaiq nail niil” dai, ge khi, teevq pav ganav juq neq, “Nqtavq gaqkhoel aivq bhai daoq ge tsaoq lee thaq nail niil” dai, ge nail ngaol. 30 Thailhai ngaol-aoq, Yeiqsul aqyu juq bhai ge bhiq-a nail: “Daoq niailhai ge dov-ai lee-a nail neq, ngaq nail haqbhoil maq ngel-ail. Nuljuq nail haqbhoil ngaol. 31 Niil aq-il miltsaq bhai yalkhaq dal nail aqyanq tsaq lal-aoq nail ngaol. Niil aq-il miltsaq niilniai uvthaiq nail gaq bhai, bhi the ha nail ngaol. 32 Miltsaq niil nail kovtavq bhai ngaq bhai kha thul lavq-u phao, tsaol-aq yaoq gaq yaoq-ao nee ngal jaol nail bha lal dai, ngal he naol” dai, ge bhiq-a nail ngaol. 33 Yeiqsul alhai ge nail neq, aivq khalhai ya sil nail ganl, ge movq nail ngaol. 34 Tsaol-aq munl munl ma juq ge nail: “Nvjuq nail aoldaoq kovqdaoq lavqkhoel bhai, ‘Meiqsilya neq, nqmaq maqluv halyeel doevq nail ngaol’ dai, ge-ai thaq nail ngaol. Tsaol-aq nail Yaqyov bhai bhi kha thul nail ngaol dai, naol khalhai ge nail-aiq. Tsaol-aq nail Yaqyov al gaq neq, khaq sil gaq” dai, naldaiq bhiq-a nail ngaol. 35 Yeiqsul ge nail: “Aqbhaq neq, nuljuq jaol nail bha niil aq-il teevq yanq taivq-ail bhaq nail ngaol. Aqbhaq khal bhaq-u kev dai, tsao yaoq. Maq ngel haq neq, aqnav nuljuq bhai the kheel lal nail ngaol. Aqnav nail lavqkhoel bhai tsao nail tsaol-aq neq, yovqgavq bhai yovqgavq khaq bha ail nail dai iqsanl, maq heeq nia-ail. 36 Nuljuq jaol nail bhai aqbhaq bhaq-u phao, nuljuq aqbhaq nail yaq pevq lal dai, aqbhaq bhai neema thaqtsaol yaoq” dai, aqyu juq bhai ge bhiq-a nail ngaol. Aivq alhai ge gaq-u phao, aqyu juq maq jaol nail bha dov ail khi jaol ail-a nail ngaol.
Yuldav nail tsaol-aq jemao Yeiqsul bhai neema maq thaqtsaol-ail
37 Aqyu juq nail sivtavq bhai noeq-u maq dov nail phaq a dai dai-ail nl daiq bhi khi ngaol-aoq, aqyu juq Yeiqsul bhai neema maq thaqtsaol-ail. 38 Aqyu juq neema maq thaqtsaol nail al neq, Miqyail nail haqbhoil gedan nail Ilsaqyal-i mail ge-ai thaq nail daoq al daoq, bhee lal-a nail ngaol. Aivq ge nail: “Heeqphaq-ol, nvjuq ge nail daoq bhai khaq sil gaq neema thaqtsaol nail-aiq. Miqyail nail bhaqaoq khaq sil gaq bhai phaodaiq bhiq nail-aiq” dai, ge-ai thaq nail ngaol. 39 Aqyu juq maldil neema maq thaqtsaol nia-ail. Khul khi mail dai ngal-aq neq, Ilsaqyal niailhai gaoq ge-ai thaq nail ngaol: 40 “Tsaol-aq niil juq neema gaol khi, naqkov aqthul bhi thul lal khi, maivneev maivpeivq lav peivq bhiq yaoq. Alhai maq lav sav bhiq haq neq, aqyu juq maivneev moel nia khi, naqkhaol gaiq nia lal nail nee ovqtavq, neema lavqkhoel bhai gov heeq nia lal nail ngel-i mail, ngal jaol nail bhai kovq lal khi, ngal aqyu juq bhai bhi meeq lai nail ngaol” dai, ge-ai thaq nail ngaol. 41 Ilsaqyal-i mail alhai ge-ai thaq nail al neq, Yeiqsul nail seiqleiq khaoqsail bhai aivq ya moel khi, aivq nail ganl ge-ai thaq nail phaq pevq nail ngaol. 42 Thailhai ngaol-aoq, Yuldav tsaol-aq nail aqivq aqtsu juq nail lavqkhoel bhai iqsanl, Yeiqsul bhai neema thaqtsaol nail tsaol-aq maodai jaol nail ngaol. Alhai neema thaqtsaol khi ngaol-aoq neq, Yuldav nail tsaol-aq nail uqhuq thaoq nail ilkhaol bhai maq bhi tavq lavq dai, Phaqliqsail juq the ha lal nail bhai geesil nail ngel-i mail, bhaqlaoq kheq dai maq ge dov tseq-ail. 43 Miqyail-i mail tsiqeeq bhiq nail nee maqtsil, tsaol-aq yaq-i mail tsiqeeq bhiq nail phaq bhai, aqyu juq oil movq nail ngaol.
Yeiqsul nail daoq-i mail yalkhaq dal nail ganl
44 Yeiqsul aqthel aqkav kav dai ge nail: “Ngaq bhai neema khal thaqtsaol nail tsaol-aq, ngaq bhai taivq-ail neema thaqtsaol nail maq ngel-ail. Ngaq bhai khoel-ai leevq-a nail gaq bhai iqsanl, neema thaqtsaol nail khe-ai, dul nail ngaol. 45 Ngaq bhai moel-a nail tsaol-aq, ngaq bhai khoel-ai leevq-a nail gaq bhai moel-a nail khe-ai dul nail ngaol. 46 Ngaq bhai neema khal thaqtsaol nail tsaol-aq, aqnav nail lavqkhoel bhai maq ya jaol dai, aqbhaq khe-ai miltsaq niil nail kovtavq bhai, ngal yavq kha lee-a nail ngaol. 47 Ngaq nail daoq gaiq khi ngaol-aoq, maq naldaiq nail tsaol-aq bhai, ngal yalkhaq maq dal. Miltsaq bhai yalkhaq dal lee nail khi ngal lee-a nail maq ngel-ail. Hevqkovq lee nail dai khi, lee-a nail ngaol. 48 Ngaq bhai maq hav bhoel-ail, ngaq nail daoq bhai maq naldaiq nail tsaol-aq bhai yalkhaq dal nail dao jiav nail ngaol. Miltsaq niil daoq loi loi lai-u n-gaol, ngaq-i mail ge jel lavq-a nail daoq niil juq, aivq bhai yalkhaq dal nail ngaol. 49 Ngal ngaq nail neenoeq tsaq dai, teevq phaq iqsanl maq ge-ail. Ngaq bhai khoel-ai leevq-a nail Aqbhu Miqyail, ngal khalhai ya ge ya thail nail dai, aivq ngaq bhai ge lavq-a nail ngaol. 50 Aivq-i mail bivq-ai leevq-a nail daoq lavqkhoel bhai nqmaq maqluv halyeel doevq nail phaq aol naol dai, ngal heeq kivq naol. Alheel ngel-i mail, ngaq-i mail ge nail daoq neq, Aqbhu Miqyail-i mail ngaq bhai bhi ge lavq-a nail daoq ngaol” dai, Yeiqsul aqyu juq bhai ge bhiq-a nail ngaol.
Yeiqsul-i mail yaqlaol juq nail aqkhil tsiq bhiq-a nail ganl
1 Bhaqsaqkhaq bhaoqaiq maq kev lal nail iqmoeq-u n-gaol, aivq miltsaq niilniai nee gaoq ail khi, Aqbhu Miqyail jaol nail bha ya kovq lai nail aqyanq tsaq lal-aoq nail ganl, Yeiqsul heeq nia nail ngaol. Miltsaq kovtavq-ai jaol nail aivq bhai neema thaqtsaol nail tsaol-aq juq bhai aivq gaiq-a khi, haoqnao naosaq-u n-gaol kev dai, gaiq-a nail ngaol. 2 Yeiqsul khi aivq nail yaqlaol juq aoqkivq jaq thailthaiq nail ngaol. Silmoq Ilsaqgaqliqoq nail yaqyov Yuldav nail neema lavqkhoel bhai, Yeiqsul bhai gaoq jaq movq nail neema, neivq heeqphaq-i mail oil bhoel bhiq gaq-ai thaq nail ngaol. 3 Aqbhu Miqyail-i mail, Yeiqsul bhai bhaqaoq teevq bhee bivq-ai thaq nail ganl Yeiqsul heeq nia nail ngaol. Aivq Aqbhu Miqyail jaol nail bha nee lee khi, Aqbhu Miqyail jaol nail bha ya kovq lai nail ganl iqsanl, heeq nia nail ngaol. 4 Alheel ngel-i mail, aivq kovqkhail nee thulphaol lal khi, kovtavq khe phailkhaoq heelma loev khi, aqjiovq bhai lavqsiv pheethaiq-a nail ngaol. 5 A bhai nee ngal-aq, maiqgaoq thailphail phail ma bhai, ulcuvq hoel bhoel khi, yaqlaol juq nail aqkhil tsiq bhiq khi, aqjiovq bhai pheethaiq-ai thaq nail lavqsiv-i mail siv gee bhiq-a nail ngaol. 6 Silmoq Bheiqtuvluv jaol nail bha kev ail-u phao, niailhai ge nail ngaol: “Heeqphaq-ol, naol ngaq nail aqkhil bhai tsiq lavq nail dai khi laiq” dai, Silmoq naldaiq nail ngaol. 7 Yeiqsul ge nail: “Ngal nl thailthaiq nail ganl niilniai, niil aq-il naol maq gov heeq nia-ail haq-al. Thailhai ngaol-aoq, yaqhao heeq kivq lal nail ngaol” dai, ge bhiq-a nail ngaol. 8 Bheiqtuvluv ge nail: “Naoq-i mail ngaq nail aqkhil bhai teevq thal-iq maq bhiq tsiq-ail” dai, ge bhiq-a nail ngaol. Yeiqsul ge nail: “Naoq nail aqkhil bhai ngal maq ya tsiq bhiq haq neq, naol ngaq-ai nee maq tavq-ail” dai, ge kovq bhiq-a nail ngaol. 9 Aq-u phao, Silmoq Bheiqtuvluv ge nail: “Heeqphaq-ol, thailhai phal-iq neq, ngaq nail aqkhil taivq-ail maq ngel dai, aqlavq khi uqhuq iqsanl tsiq lavq yaoq” dai, ge bhiq-a nail ngaol. 10 Yeiqsul ge nail: “Aqmaol jiivq gaq-a nail tsaol-aq, aqhaol ngel-i mail, aqkhil maq ngel nail neq, tsiq nail maq loq-ail. Nuljuq nail lavqkhoel khe teevq gaq maq ngel nail neq, iqsanl aqhaol ngaol” dai, ge bhiq-a nail ngaol. 11 Khul gaq aivq bhai gaoqjaq nail ganl bhai, Yeiqsul heeq nia nail ngel-i mail, “Nuljuq nail lavqkhoel khe, teevq gaq maq ngel nail neq iqsanl, aqhaol ngaol” dai, ge nail ngaol. 12 Yeiqsul aqyu juq nail aqkhil tsiq gaq gil-u phao, phailkhaoq heelma gaoq doi kovq khi, aivq nail jaol duq bhai aoq jaoq gaoq jaoq lai khi, niailhai ge nail ngaol: “Nuljuq bhai ngaq-i mail nl bhiq-a nail niil, nuljuq gov heeq lal-ail laiq. 13 Nuljuq ngaq bhai, saqlaq-ol, Heeqphaq-ol, dai khul nail ngaol. Nuljuq alhai khul nail, tsaq nail ngaol. Khul khi mail dai ngal-aq neq, ngal neq, nuljuq-i mail khul nail khe-ai, nuljuq nail saqlaq khi Heeqphaq pevq nail ngaol. 14 Nuljuq nail Heeqphaq khi nuljuq nail saqlaq pevq nail ngal neq, nuljuq nail aqkhil bhai tsiq bhiq gaq-ao nail ngaol. Alheel ngel-i mail, nuljuq iqsanl teevq gaq nee teevq gaq aqkhil ya tsiq bhiq nail ngaol. 15 Nuljuq ngaq bhai heldaiq khi nl tsao nia dai, ngal nuljuq bhai nl dai bhiq gaq-ao nail ngaol. 16 Ngal nuljuq bhai maldil dai, ge lavq bhel. Yaqkav neq, yovqgavq nail ilheel nee maqtsil maq eeq-ail. Khoel-ai leevq nail bhai ya daq-a nail gaq iqsanl, khoel nail gaq nee maqtsil maq eeq-ail. 17 Niil aq-il ganl niil juq, nuljuq heeq nia gil-aoq nail ngaol. Heeq kivq-a nail khe-ai, nl haq neq, nuljuq khadai geeqlaoq eeq nail ngel-ail. 18 Nuljuq iqsanl nail ganl, ngal ge thailthaiq nail maq ngel. Ngaq-i mail tsel dov-ai thaq nail tsaol-aq bhai, ngal heeq kivq naol. Thailhai ngaol-aoq, Jalliq lavqkhoel bhai gevq-ai thaq nail, ‘Ngaq-ai nee mail jaltsoiq maiqgaoq teevq gaoq bhai tavq khi jaq nail gaq, ngaq bhai gaoqjaq nail ngaol’ dai, ge-ai thaq nail daoq al daoq ya bhee lal nail ngaol. 19 Ganl al maldil pevq lal-u phao, ngaq-i mail ge nail khe-ai, ngal neq, Meiqsilya ngel lao thaq nial dai, nuljuq heeq nia dai, maq pevq lal-u phao nee mail, nuljuq bhai ge bhiq-ai thaq nail ngaol. 20 Ngal nuljuq bhai maldil dai, ge lavq bhel. Ngaq-i mail khoel gai-aivq-a nail tsaol-aq bhai hav nail gaq neq, ngaq bhai hav nail khe-ai dul khi, ngaq bhai khal hav nail tsaol-aq, ngaq bhai khoel-ai leevq-a nail gaq bhai iqsanl, hav nail khe-ai dul nail ngaol” dai, ge bhiq-a nail ngaol.
Yu aivq bhai gaoqjaq naol dai, Yeiqsul ge nail ganl
21 Yeiqsul alhai ge gaq-u phao, aivq nail neema haqaoq nl deedee nail lavqkhoel, niailhai bhaqlaoq kheq dai, ge dov bhiq-a nail ngaol: “Ngal nuljuq bhai maldil dai, ge lavq bhel. Nuljuq nail lavqkhoel khe teevq gaq, ngaq bhai yu nail aqlavq lavqkhoel bhai av bhiq nail ngaol” dai, ge bhiq-a nail ngaol. 22 Yaqlaol juq teevq gaq nee teevq gaq heldaiq heldaiq-ail, “Aivq khaq sil gaq bhai ge movq nail meeq” dai, kalkav-ai kav lai-a nail ngaol. 23 Yeiqsul mailma-ail gaiq-a nail yaqlaol teevq gaq, Yeiqsul bhai laiq dal khi iqthaiq nail ngaol. 24 Silmoq Bheiqtuvluv-i mail yaqlaol al gaq bhai aqlavq dao bhiq khi, “Khaq sil gaq bhai ge movq nail-aiq dai, teevq pov naldaiq daiq yaoq” dai, ge bhiq-a nail ngaol. 25 Yaqlaol al gaq, Yeiqsul jaol nail phao gaolgai khi, “Heeqphaq-ol, khaq sil gaq bhai ge movq nail-aiq” dai, naldaiq-a nail ngaol. 26 Yeiqsul ge nail: “Ngal khaqmul oil khi jaltsoiq bhai thaoqsoil khi bivq naol. Ngaq-i mail bivq nail al gaq neq, ngaq-i mail ge nail al gaq ngaol” dai, ge bhiq-a nail ngaol. A bhai nee ngal-aq, aivq khaqmul oil khi, jaltsoiq bhai thaoqsoil khi, Silmoq Ilsaqgaqliqoq nail yaqyov Yuldav bhai bivq-a nail ngaol. 27 Khaqmul al bhai Yuldav oil gaq-al ngal neq, neivq Saqdaq aivq nail lavqkhoel bhai aol lai-a nail ngaol. “Naoq-i mail nl nail dai khi, lainq-ai thaq nail phaq bhai lavqtsail mail nl-ail yaoq” dai, Yeiqsul aivq bhai ge bhiq-a nail ngaol. 28 Khul khi mail Yeiqsul aivq bhai alhai ge bhiq nail meeq dai, kovqkhail bhai aoq jaoq jaoq nail tsaol-aq yaoq juq yaoq neq, maq heeq nia-ail. 29 Yuldav neq, phul baivluvq aqheel thaoq-nq thaq nail gaq ngel-i mail, Yeiqsul aivq bhai khoel khi, Bhaoqaiq lav sav nail lavqkhoel bhai yuq nail phaq maq ngel haq neq, haq yaq aoq yaq bhai bivq nail teevq phaq ganav bhi ul ail nail khul-il dai, yaqlaol teevq gaq ganav juq, noeq nail ngaol. 30 Yuldav neq, khaqmul al khoeq oil khi dov ail-a nail ngaol. Yanq al yanq neq, hul-iq tsilma ngaol.
Daoq aqsivq teevq daoq bivq-a nail ganl
31 Yuldav dov ail jel-u phao, Yeiqsul ge nail: “Niil aq-il Tsaol-aq nail Yaqyov seiqleiq khaoqsail ya-aoq nail ngaol. Miqyail iqsanl aivq bhaqda nee seiqleiq khaoqsail ya-a nail ngaol. 32 Aivq bhaqda nee Miqyail seiqleiq khaoqsail ya nail phal-iq neq, Miqyail iqsanl, Yaqyov bhai seiqleiq khaoqsail bivq nail ngaol. Aivq teevq pov taivq-ail alhai nl nail ngaol. 33 Ngaq nail yaq juq-ol, ngal nuljuq nee mail maodai maq ya jaol yaoq-aol. Nuljuq ngaq bhai halpov nail ngaol. Yuldav nail tsaol-aq nail aqivq juq bhai ngaq-i mail ge bhiq-a nail daoq al, ngal nuljuq bhai gaoq ge lavq bhel. Ngal lai nail jaol duq bhai nuljuq maq lal nia-ail. 34 Niil aq-il, ngal nuljuq bhai daoq aqsivq teevq daoq bivq-ail ceevq naol. Teevq gaq nee teevq gaq gaiq-a yaoq. Ngal nuljuq bhai gaiq-a nail khe-ai, nuljuq teevq gaq nee teevq gaq ya gaiq-a nail ngaol. 35 Nuljuq teevq gaq nee teevq gaq gaiq-a nail phaq aol haq neq, nuljuq ngaq nail yaqlaol nial dai, tsaol-aq iqsanl mail heeq nia nail ngaol” dai, Yeiqsul ge bhiq-a nail ngaol.
Yeiqsul bhai maq heeq kivq-ail dai, Bheiqtuvluv jil nail ganl
36 Silmoq Bheiqtuvluv ge nail: “Heeqphaq-ol, naol khaq bha lai nail-aiq” dai, ge bhiq-u phao, Yeiqsul ge nail: “Ngaq-i mail lai nail dai khi, lainq-ai thaq nail bhai naol niil aq-il nee mail maq tsaothel lavq nia ail haq-al. Thailhai ngaol-aoq, yaqhao neq, tsaothel lavq kivq naol” dai, ge bhiq-a nail ngaol. 37 Bheiqtuvluv ge nail: “Heeqphaq-ol, khul khi mail, ngal naoq nail haoqnao niil aq-il nee mail maq tsaothel lavq kivq nail-aiq. Ngal naoq nail haqbhoil sildan tseq naol” dai, ge bhiq-a nail ngaol. 38 Yeiqsul ge nail: “Naol ngaq nail haqbhoil maldil sildan tseq naol laiq. Ngal naoq bhai maldil dai, ge lavq bhel. Yavphoil maq doil lal nail gaiqlaq bhai, ngaq bhai maq heeq kivq-ail dai, hail pov bhee dai, naol jil nail ngaol” dai, ge bhiq-a nail ngaol.
Aqbhu Miqyail jaol nail bha lai nail gailkhaol neq, Yeiqsul ngaol
1 Yeiqsul aqyu juq bhai ge bhiq-a nail: “Nuljuq nail neema bhai haqaoq thaq nl. Miqyail bhai neema thaqtsaol yaoq, ngaq bhai iqsanl neema thaqtsaol yaoq. 2 Ngaq nail Aqbhu nail ilkhaol bhai jaol duq jiav gao nail ngaol. Ngal nuljuq nail haqbhoil jaol duq lav sav lai naol. Jaol duq maq jiav-ail nul neq, maq jiav-ail dai, ngal daolcoev dai, ge bhiq nail ngaol. 3 Ngal jaol duq lav sav gaq-u phao, nuljuq bhai gaoq hevq lee khi, ngaq-ai nee mail bhi jaol lal naol. 4 Ngal lai nail dai, lainq-ai thaq nail jaol duq al dao nail gailkhaol bhai, nuljuq heeq nia nail ngaol” dai, ge bhiq-a nail ngaol. 5 Tholmav ge nail: “Heeqphaq-ol, naol khaq bha lai nail-aiq dai, nvjuq maq heeq kivq-ail. Naol lai nail jaol duq al dao nail gailkhaol bhai, nvjuq khalhai khi ya heeq kivq nail-aiq” dai, naldaiq bhiq-a nail ngaol. 6 Yeiqsul aivq bhai ge bhiq-a nail: “Ngal neq, gailkhaol pevq naol. Maldil tsaq nail phaq pevq khi aqdoevq doevq nail phaq iqsanl, pevq nail ngaol. Ngaq bhai maq juq haq neq, tsaol-aq teevq gaq iqsanl, Aqbhu Miqyail jaol nail bha maq kev lai nia-ail. 7 Ngal khaq sil gaq dai, nuljuq heeq nia-ail nul neq, ngaq nail Aqbhu khaq sil gaq dai iqsanl, nuljuq heeq nia nail ngaol. Yanqgaol nee pultavq neq, nuljuq aivq bhai aqmeeq-ai ya heeq ya moel-aoq nail ngaol” dai, ge bhiq-a nail ngaol. 8 Pillilpuv ge nail: “Heeqphaq-ol, nvjuq bhai Aqbhu Miqyail bhi moel lavq yaoq. Aivq bhai ya moel haq neq, nvjuq neekhaol sil naol” dai, ge bhiq-a nail ngaol. 9 Yeiqsul ge nail: “Ngal nuljuq nee mail niidai jaol kel lavq khi ngaol-aoq, Pillilpuv, naol ngaq bhai maq heeq kivq-ai haq-al laiq. Ngaq bhai khal ya moel-a nail tsaol-aq, Aqbhu Miqyail bhai ya moel-a nail khe-ai dul nail ngaol. ‘Nvjuq bhai Aqbhu Miqyail bhi moel lavq yaoq’ dai, khul khi mail ge nail-aiq. 10 Aqbhu Miqyail nail lavqkhoel bhai ngal jaol khi, ngaq nail lavqkhoel bhai Aqbhu Miqyail jaol naol dai, Pillilpuv, naol neema maq thaqtsaol-ail laiq. Ngal nuljuq bhai ge bhiq nail daoq niil juq neq, ngaq nail neenoeq nee ge nail maq ngel-ail. Ngaq nail lavqkhoel bhai jaol nail Aqbhu Miqyail ganl nl nail phaq pevq nail ngaol. 11 Ngal Aqbhu Miqyail nail lavqkhoel bhai jaol khi, Aqbhu Miqyail ngaq nail lavqkhoel bhai jaol nail bhai, neema thaqtsaol yaoq. Maq ngel haq neq, ngaq-i mail nl-a nail juq bhaqda nee, ngaq bhai neema thaqtsaol yaoq. 12 Ngal nuljuq bhai maldil dai, ge lavq bhel. Ngaq bhai neema thaqtsaol nail tsaol-aq, ngaq-i mail nl-a nail ganl al juq nl nail ngaol. Ngal ngaq nail Aqbhu jaol nail bha kovq lai nail ngel-i mail, niidai nee maqtsil eeq nail juq iqsanl, aivq nl nail ngaol. 13 Aqbhu Miqyail neq, Yaqyov bhaqda nee seiqleiq khaoqsail ya dai, nuljuq ngaq nail aqmil bhai juq khi, khal hal nail iqsanl mail, ngal bhi pevq lal naol. 14 Nuljuq ngaq nail aqmil bhai juq khi teevq phaq ganav hal haq neq, nuljuq-i mail hal nail khe-ai, ngal bhi pevq lal naol” dai, ge bhiq-a nail ngaol.
Aqhaqlal Miqyail bhi lee naol dai, Yeiqsul ge nail ganl
15 Yeiqsul gaoq ge nail: “Nuljuq ngaq bhai gaiq-a haq neq, ngaq-i mail bivq-a nail daoq juq bhai, naldaiq nail ngaol. 16 Ngal Aqbhu Miqyail bhai hal nail khi ngaol, ngal hal nail khe-ai, khaq mao iqsanl, nuljuq nee mail bhi jaol nail dai khi, nuljuq bhai Tsaojao-ai nail gaq, Aqbhu Miqyail nuljuq bhai bivq lavq naol. 17 Aivq neq, Miqyail nail ganl maldil tsaq nail phaq phaodaiq bhiq nail gaq pevq nail, Aqhaqlal Miqyail ngaol. Miltsaq yaq juq aivq bhai neema lavqkhoel bhai maq hav bhoel nia-ail. Khul khi mail dai ngal-aq neq, aqyu juq aivq bhai maq heeq nia, maq moel daiq-al. Thailhai ngaol-aoq, nuljuq aivq bhai heeq nia nail ngaol. Khul khi mail dai ngaol-aoq neq, aivq nuljuq nee mail jaol khi, nuljuq nail neema lavqkhoel bhai aol nail ngaol. 18 Ngal nuljuq bhai aqbhu aqma maq bhao nail yaqtsiq khe-ai khaonq-ail ceevq nail maq ngel-ail. Ngal nuljuq jaol nail bha gaoq kovq lee naol. 19 Teevq yanq lal yanq nail lavqkhoel, Miltsaq yaq ngaq bhai maq ya moel yaoq-aol. Thailhai ngaol-aoq, nuljuq ngaq bhai ya moel nail ngaol. Ngal doevq nail bhaqda nee, nuljuq iqsanl ya doevq nail ngaol. 20 Aqn al n kev lee-u phao, ngal Aqbhu Miqyail nail lavqkhoel bhai jaol nail bhai maqkhaiq, ngal nuljuq nail lavqkhoel bhai jaol nail khe-ai, nuljuq iqsanl ngaq nail lavqkhoel bhai jaol nail bhai, nuljuq ya heeq kivq duq nail ngaol. 21 Ngaq-i mail bivq-ai thaq nail daoq bhai ya gaiq khi, naldaiq nail tsaol-aq, ngaq bhai gaiq-a nail tsaol-aq ngaol. Ngaq bhai khal gaiq-a nail tsaol-aq bhai, ngaq nail Aqbhu gaiq-a nail ngaol. Ngal iqsanl, aqyu juq bhai gaiq-a khi, ngaq nail aqmaol aqyu juq bhai bhaqlaoq kheq dai, bhi moel nail ngaol” dai, ge bhiq-a nail ngaol. 22 Yuldav Ilsaqgaqliqoq maq ngel nail, Yuldav dai mil-ai thaq nail gaq ge nail: “Heeqphaq-ol, naoq nail aqmaol nvjuq bhai ya bhi moel nail bhai, khul khi mail, miltsaq yaq juq bhai maq bhi moel kivq nail-aiq” dai, naldaiq-a nail ngaol. 23 Yeiqsul ge nail: “Ngaq bhai gaiq-a nail tsaol-aq, ngaq-i mail cavq bhiq cov bhiq nail daoq bhai naldaiq nail ngaol. Alhai naldaiq nail tsaol-aq bhai, ngaq nail Aqbhu gaiq-a khi, ngaq nail Aqbhu nv-nvq gaq aqyu juq nail neema lavqkhoel bhai jaol lee nail ngaol. 24 Ngaq bhai maq gaiq-a nail tsaol-aq, ngaq nail daoq bhai maq naldaiq-ail. Nuljuq-i mail ya gaiq thailthaiq nail daoq niil juq neq, ngaq nail daoq maq ngel-ail. Ngaq bhai khoel-ai leevq-a nail Aqbhu Miqyail nail daoq ngaol. 25 Niil aq-il ngal nuljuq nee mail jaol-u phao, daoq niil juq nuljuq bhai ge bhiq-ai thaq nail ngaol. 26 Nuljuq bhai tsaojao-ai nail gaq dai khul nail Aqhaqlal Miqyail neq, ngaq nail aqmil kov-uvq nee Aqbhu Miqyail bhi lee naol. Aqhaqlal Miqyail al gaq neq, nuljuq bhai yaoq phaq yaoq-ao nee cavq lavq cov lavq khi, ngaq-i mail ge-ail ceevq-a nail daoq niil juq bhai, nuljuq noeqmoel lal dai, tsaojao-ai lavq nail ngaol. 27 Ngal nuljuq bhai neesal-ovq nail phaq bivq-ail ceevq nail ngaol. Ngaq-i mail bivq nail neesal-ovq nail phaq neq, miltsaq yaq juq neesal-ovq nail phaq bivq nail khe-ai, maq dul-ail. Nuljuq neema haqaoq thaq nl. Gee iqsanl, thaq geesil. 28 Ngal nuljuq bhai teevq yanq khaonq-ail ceevq khi ngaol-aoq, teevq pov gaoq lee naol dai, nuljuq bhai ge bhiq gaq-ao nail ngaol. Nuljuq ngaq bhai gaiq-a haq neq, ngal Aqbhu Miqyail jaol nail bha kovq lai-u phao, nuljuq lavqkhiq tsail nail ngaol. Khul khi mail dai ngal-aq neq, aivq neq, ngaq-ai nee maqtsil eeq jaiq heel jaiq nail ngaol. 29 Ganl al juq pevq lal-u phao, nuljuq neema thaqtsaol dai, niil aq-il maq pevq lal-u phao nee mail, ngal nuljuq bhai ge bhiq nail ngaol. 30 Ngal nuljuq nee mail daoq ge tsaoq ge tsaoq-ail jaol nail aqyanq maq jiav yaoq-aol. Khul khi mail dai ngal-aq neq, miltsaq bhai uvthaiq nail gaq lee thailthaiq nail ngaol. Aivq neq, ngaq bhai gaq lal nia nail bhaqaoq maq jiav-ail. 31 Thailhai ngaol-aoq, ngal Aqbhu Miqyail bhai gaiq-a nail, niidai miltsaq yaq ya heeq ya moel dai, Aqbhu Miqyail ngaq bhai daoq bivq lavq-a nail khe-ai, ngal nl naol. Thul yaoq. Ail bhel” dai, ge bhiq-a nail ngaol.
Yeiqsul neq, maldil aqheeq tsilju nail aqjiav daoqthaoq ngaol
1 Yeiqsul gaoq ge nail: “Ngal neq, maldil aqheeq tsilju nail aqjiav daoqthaoq ngaol. Ngaq nail Aqbhu neq, gaoqkhail lav sav nail aqheel ngaol. 2 Aqheeq maq heeq nail ngaq nail lavqmeiv juq bhai, aivq he dil bhiq nail ngaol. Aqheeq heeq nail lavqmeiv juq bhai neq, gaoq bhi heeq jaiq lee nail dai khi, aivq ganl maq tsoiq nail lavqmeiv meiv yaq juq bhai thaiq ha nail ngaol. 3 Ngaq-i mail cavq bhiq cov bhiq-a nail daoq bhaqda nee, nuljuq haol lal gaq-ao nail ngaol. 4 Ngaq nail lavqkhoel bhai jaol yaoq. Ngal iqsanl, nuljuq nail lavqkhoel bhai jaol naol. Lavqmeiv juq neq, aqjiav daoqthaoq bhai maq covq cavq haq neq, aqyu juq bhai aqyu juq aqheeq maq heeq lee nia nail khe-ai, nuljuq iqsanl, ngaq nail lavqkhoel bhai maq jaol haq neq, aqheeq maq heeq lee nia-ail. 5 Ngal neq, aqheeq tsilju nail aqjiav daoqthaoq ngaol. Nuljuq neq, lavqmeiv ngaol. Khaq sil gaq maqkhaiq, ngaq bhai covq cavq khi, ngal iqsanl aqyu juq bhai covq cavq nail gaq neq, aqheeq maodai heeq lee nail ngaol. Ngaq bhai maq covq cavq haq neq, nuljuq khul teevq phaq iqsanl, maq nl nia-ail. 6 Ngaq bhai maq khal covq cavq nail tsaol-aq neq, miltsaq bhai ga ail khi gee lai nail lavqmeiv khe-ai dul nail ngaol. Alheel nail lavqmeiv juq bhai govjil khi, miqjaq jaibhoil bhai gov poiv khi, kheq ha nail ngaol. 7 Nuljuq ngaq nail lavqkhoel bhai jaol khi, ngaq nail daoq nuljuq nail lavqkhoel bhai aol haq neq, nuljuq khal hal movq nail phaq hal yaoq. Khal hal nail phaq ya nail ngaol. 8 Nuljuq aqheeq maodai heeq lee nail bhai heldaiq khi, ngaq nail Aqbhu nail seiqleiq khaoqsail bhai yu ya moel nail ngaol. Aq-u phao, nuljuq ngaq nail yaqlaol pevq lal-aoq nail ngaol dai, ge kivq nail ngaol. 9 Aqbhu Miqyail ngaq bhai gaiq-a nail khe-ai, ngal iqsanl, nuljuq bhai gaiq-a naol. Ngaq nail goil nail gaiq-a nail lavqkhoel bhai ivqdao dai, jaol yaoq. 10 Ngaq nail Aqbhu nail daoq bhai ngal naldaiq khi, ngaq nail Aqbhu nail goil nail gaiq-a nail lavqkhoel bhai ngal jaol nail khe-ai, nuljuq ngaq nail daoq bhai naldaiq haq neq, ngaq nail goil nail gaiq-a nail lavqkhoel bhai, nuljuq jaol nail ngaol. 11 Ngaq nail lavqkhiq tsail nail phaq, nuljuq nail lavqkhoel bhai aol khi, nuljuq lavqkhiq tsail nail phaq bhee lal dai, nuljuq bhai ngal niailhai ge bhiq nail phaq pevq nail ngaol. 12 Nuljuq bhai daoq niil daoq bivq nail ngaol. Ngal nuljuq bhai gaiq-a nail khe-ai, nuljuq iqsanl, teevq gaq nee teevq gaq gaiq-a yaoq. 13 Yovqgavq nail aqtsaoq nail haqbhoil sildan nail nee maqtsil eeq jaiq nail goil nail gaiq-a nail phaq, maq jiav yaoq-aol. 14 Ngaq-i mail daoq bivq-ai thaq nail khe-ai, nuljuq nl haq neq, nuljuq ngaq nail aqtsaoq ngaol. 15 Niai nee pultavq neq, ngal nuljuq bhai yaqkav dai, maq khul yaoq-aol. Khul khi mail dai ngal-aq neq, ilheel khal nl nail phaq yaqkav maq heeq gil nia-ail. Ngal nuljuq bhai aqtsaoq dai, khul naol. Khul khi mail dai ngal-aq neq, ngaq nail Aqbhu-i mail khal ge lavq-a nail phaq, nuljuq bhai ngal ge bhiq gil-aoq nail ngaol. 16 Nuljuq-i mail ngaq bhai tsel-a nail maq ngel-ail. Ngaq-i mail nuljuq bhai tsel-a nail ngaol. Nuljuq ail khi, aqheeq heeq lee nail nee ovqtavq, aqheeq al ivqdao dai pevq lal nail haqbhoil, ngal nuljuq bhai tsel dov-ai thaq nail ngaol. Alheel ngel-i mail, ngaq nail aqmil lavqkhoel nee, nuljuq hal nail phaq, Aqbhu Miqyail nuljuq bhai bivq lavq nail ngaol. 17 Ngaq-i mail nuljuq bhai bivq nail daoq neq, niailhai ngaol. Nuljuq teevq gaq nee teevq gaq, gaiq-a yaoq” dai, ge bhiq-a nail ngaol.
Miltsaq yaq nuljuq bhai neejiav jiav nail ngaol
18 Yeiqsul gaoq ge nail: “Miltsaq yaq nuljuq bhai neejiav jiav lal-u phao, nuljuq bhai neejiav maq jiav lal-u phao nee mail, ngaq bhai iqmoeq neejiav jiav-aoq nail ngaol dai, heeq kivq thaq-ai yaoq. 19 Nuljuq miltsaq niilniai tavq haq neq, miltsaq yaq niil nuljuq bhai aivq nail yaq khe-ai gaiq-a lavq nail ngaol. Thailhai ngaol-aoq, miltsaq niil nail lavqkhoel nee nuljuq bhai ngaq-i mail tsel dov gaq-ai thaq nail ngaol. Miltsaq niilniai nuljuq maq tavq yaoq-aol. Alheel ngel-i mail, miltsaq yaq juq nuljuq bhai neejiav jiav nail ngaol. 20 Yaqkav neq, yovqgavq nail ilheel nee maqtsil maq eeq-ail dai, ngaq-i mail nuljuq bhai ge bhiq-a nail daoq bhai, thaq nioilpeivq. Miltsaq yaq juq ngaq bhai khoeq lavq jiovq lavq nail ngaol. Nuljuq bhai iqsanl, khoeq lal jiovq lal nail ngaol. Aqyu juq ngaq nail daoq bhai naldaiq haq neq, nuljuq nail daoq bhai iqsanl, naldaiq nail ngaol. 21 Thailhai ngaol-aoq, nuljuq ngaq nail tsaol-aq pevq nail ngel-i mail, aqyu juq nuljuq bhai nl khoeq lal nail ngaol. Khul khi mail dai ngal-aq neq, ngaq bhai khoel-ai leevq-a nail gaq bhai, aqyu juq maq heeq nia-ail. 22 Ngal lee khi aqyu juq bhai maq ge bhiq lee-al nul neq, aqyu juq oeqbal maq aol-ail dai, ge kivq nail ngaol. Thailhai ngaol-aoq, niil thal khe pov neq, aqyu juq-i mail nl nail phaq oeqbal dai maq dul-al dai, maq jil nia yaoq-aol. 23 Ngaq bhai neejiav jiav nail tsaol-aq, ngaq nail Aqbhu bhai iqsanl, neejiav jiav nail khe-ai, dul nail ngaol. 24 Tsaol-aq teevq gaq iqsanl, maq nl daiq-a nail ganl niil juq bhai, aqyu juq jaol nail bha ngal maq nl-a nail nul neq, aqyu juq oeqbal maq aol-ail. Thailhai ngaol-aoq, ngaq-i mail nl-a nail ganl bhai aqyu juq ya moel khi, ngaq bhai maqkhaiq, ngaq nail Aqbhu bhai maqkhaiq, aqyu juq neejiav jiav nail ngaol. 25 Aqyu juq nail aoldaoq kovqdaoq lavqkhoel bhai, ‘Khul nail ganl maq jiav nail bhai, aqyu juq ngaq bhai neejiav jiav nail ngaol’ dai, gevq-ai thaq nail jiav nail ngel-i mail, daoq al bhee lal dai, pevq lal-a nail ngaol. 26 Aqbhu Miqyail nee dov lee nail Tsaojao-ai nail gaq ngal nuljuq jaol nail bha khoel-ai leevq naol. Aivq neq, tsaq nail phaq pevq khi tsaq nail phaq bhai phaodaiq lavq nail Aqhaqlal Miqyail ngaol. Aivq lee kev haq neq, ngaq nail ganl, salkhil khanq nail ngaol. 27 Nuljuq iqsanl, iqmoeq-u nee mail ngaq-ai nee jaol nail ngel-i mail, ngaq nail haqbhoil salkhil khanq nail ngaol” dai, ge bhiq-a nail ngaol.
1 Yeiqsul gaoq ge nail: “Nuljuq neema thaqtsaol nail phaq bhai maq ya khaonq dai, ngal nuljuq bhai niailhai ge bhiq-a nail phaq pevq nail ngaol. 2 Nuljuq bhai Yuldav nail tsaol-aq nail uqhuq thaoq nail ilkhaol juq bhai maq bhi tavq dai, the ha lavq nail ngaol. Nuljuq bhai heivq nail neq, Miqyail neekhaol sil nail ngaol dai, nuljuq bhai heivq lal nail tsaol-aq juq noeq nail aqn kev lee nail ngaol. 3 Aqyu juq Aqbhu Miqyail bhai maqkhaiq, ngaq bhai maqkhaiq, maq heeq nia nail ngel-i mail, nuljuq bhai alhai khoeq lal jiovq lal nail ngaol. 4 Alheel ngel-i mail, tsaol-aq al juq nuljuq bhai alhai khoeq lal jiovq lal nail aqyanq kev lee-u phao, alhai kev lee nail ngaol dai, ngaq-i mail nuljuq bhai ge bhiq-ai thaq nail bhai, nuljuq bhi noeq moel nail haqbhoil, ngal nuljuq bhai niil aq-il nee ge bhiq-ai thaq nail ngaol. Ngal nuljuq nee jaol-ai haq nail ngel-i mail, ganl niil iqmoeq-u phao nee, ngal nuljuq bhai maq ge bhiq-al” dai, ge bhiq-a nail ngaol.
Aqhaqlal Miqyail-i mail nl nail ganl
5 Yeiqsul gaoq ge nail: “Niil aq-il neq, ngaq bhai khoel-ai leevq-a nail gaq jaol nail bha, ngal kovq lai nail khi ngaol. Thailhai ngaol-aoq, ‘Naol khaq bha ail nail-aiq’ dai, nuljuq teevq gaq iqsanl, ngaq bhai maq naldaiq-ail. 6 Nuljuq bhai ganl niil juq ge bhiq-a nail ngel-i mail, nuljuq nail neema haqaoq nl thailthaiq nail ngaol. 7 Ngal nuljuq bhai maldil dai, ge lavq bhel. Ngal kovq lai nail neq, nuljuq nail haqbhoil meeq jaiq nail ngaol. Khul khi mail dai ngal-aq neq, ngal maq kovq lai haq neq, Tsaojao-ai nail gaq nuljuq jaol nail bha maq lee-ail. Ngal kovq lai haq neq, Tsaojao-ai nail gaq nuljuq jaol nail bha khoel-ai leevq naol. 8 Aivq kev lee-u phao, oeqbal nail ganl maqkhaiq, tsaq nail daol nail ganl maqkhaiq, yalkhaq dal nail ganl maqkhaiq, aivq miltsaq yaq bhai phaodaiq bhiq nail ngaol. 9 Aqyu juq nail oeqbal neq, neema thaqtsaol nail phaq bhai laiq ail-a nail ngaol. Khul khi mail dai ngal-aq neq, aqyu juq ngaq bhai neema maq thaqtsaol-ail. 10 Tsaq nail daol nail ganl, aivq phaodaiq lavq nail ngaol. Khul khi mail dai ngal-aq neq, ngal Aqbhu Miqyail jaol nail bha kovq lai nail ngel-i mail, nuljuq ngaq bhai maq yaq moel yaoq-aol. 11 Miltsaq niilniai uvthaiq nail gaq bhai, yalkhaq dal bhiq-a nail ngel-i mail, yalkhaq dal nail ganl bhai iqsanl, aivq phaodaiq lavq nail ngaol. 12 Ngal nuljuq bhai ge bhiq nail phaq maodai jiav-ai haq nail ngaol. Thailhai ngaol-aoq, niil aq-il nuljuq nail neema lavqkhoel bhai maq hav bhoel gil tsaol-ail. 13 Thailhai ngaol-aoq, maldil tsaq nail phaq phaodaiq lavq nail gaq pevq nail Aqhaqlal Miqyail lee-u phao, tsaq nail daol nail yaoq phaq yaoq-ao nee, nuljuq heeq nia lal dai, aivq hevq daiq lavq nail ngaol. Khul khi mail dai ngal-aq neq, aivq nail neenoeq neelov nee maq ge mail, Aqbhu Miqyail-i mail khal ge bhiq thaq nail phaq, nuljuq bhai ge lavq khi, yaqhao pevq lal nail ganl juq bhai iqsanl, phaodaiq lavq nail ngaol. 14 Ngal seiqleiq khaoqsail ya dai, aivq nl nail ngaol. Khul khi mail dai ngal-aq neq, ngaq bhai tavq nail juq aivq oil khi, nuljuq bhai phaodaiq lavq nail ngaol. 15 Aqbhu Miqyail-i mail khal jiav nail juq iqsanl, ngaq nail ngaol. Alheel ngel-i mail, Aqhaqlal Miqyail neq, ngaq-i mail khal bivq-a nail daoq juq oil khi, nuljuq bhai gaoq ge bhiq lee nail ngaol” dai, Yeiqsul aqyu juq bhai ge bhiq-a nail ngaol.
Noeqhaq nail phaq neq, lavqkhiq tsail nail phaq pevq lal nail ganl
16 Yeiqsul gaoq ge nail: “Teevq yanq khai-aq neq, nuljuq ngaq bhai maq ya moel yaoq-aol. Teevq yanq gaoq khai-aq neq, nuljuq ngaq bhai gaoq ya moel nail ngaol” dai, ge bhiq-a nail ngaol. 17 Yaqlaol juq nail gaiqlaq bhai ge nail: “Khalhai ge movq nail ngel-ail. Teevq yanq khai-aq neq, ngadao juq aivq bhai maq gaoq ya moel-ail. Teevq yanq gaoq khai-aq neq, ngadao juq aivq bhai gaoq ya moel nail ngaol dai, ge nail ngaol. Khul khi mail dai ngal-aq neq, ngal Aqbhu Miqyail jaol nail bha kovq lai nail dai iqsanl, aivq gaoq ge nail ngaol. 18 Teevq yanq khai-aq neq dai, ge nail thoil, khul bhai ge movq nail-aiq. Aivq khalhai ge movq nail-aiq dai, maq gov heeq kivq-il” dai, ge bhiq-a nail ngaol. 19 Aqyu juq aivq bhai naldaiq movq nail bhai, Yeiqsul heeq nia nail ngel-i mail, niailhai ge kovq bhiq-a nail ngaol: “Teevq yanq khai-aq neq, nuljuq ngaq bhai maq ya moel-ail, teevq yanq gaoq khai-aq neq, nuljuq ngaq bhai gaoq ya moel naol dai, ngal ge nail ngaol. Ngal khalhai ge movq nail meeq dai, nuljuq nail gaiqlaq bhai ge pheeljaq nail maq ngel-ail laiq. 20 Ngal nuljuq bhai maldil dai, ge lavq bhel. Nuljuq ya nioil nail nee ovqtavq, nioilkhaoq iqsanl ya khaoq nail ngaol. Thailhai ngaol-aoq, milkhaoq yaq juq lavqkhiq tsail nail ngaol. Nuljuq neema haqaoq ya nl nail ngaol. Thailhai ngaol-aoq, nuljuq-i mail noeqhaq-a nail al, lavqkhiq tsail nail phaq pevq lal nail ngaol. 21 Yaqmai-aq teevq gaq yaq tsiq-u phao, yaq tsiq nail yanq kev lal khi, mao-ail nal nail ngaol. Thailhai ngaol-aoq, yaq tsiq gaq-u phao, miltsaq kovtavq bhai tsaol-aq teevq gaq doevq lee-a nail ngel-i mail, lavqkhiq tsail deedee khi, iqmoeq-u phao aivq-i mail ya nal-a nail juq bhai, nioilpeivq gil-ail nail ngaol. 22 Nuljuq iqsanl, alhai dul nail ngaol. Niil aq-il nuljuq ya noeqhaq nail ngaol. Thailhai ngaol-aoq, ngal nuljuq bhai gaoq moel-u phao, nuljuq lavqkhiq tsail deedee nail ngaol. Aq-u phao, nuljuq nail lavqkhiq tsail nail phaq bhai, teevq gaq iqsanl, maq luv dov nia-ail. 23 Aqn al n kev lee haq neq, nuljuq ngaq bhai teevq phaq iqsanl, maq naldaiq lal yaoq-aol. Ngal nuljuq bhai maldil dai, ge lavq bhel. Ngaq nail aqmil lavqkhoel nee nuljuq khal hal nail phaq, Aqbhu Miqyail bivq lavq nail ngaol. 24 Yanqgaol kev dai, ngaq nail aqmil nail lavqkhoel nee, nuljuq teevq phaq iqsanl maq hal haq-al. Nuljuq lavqkhiq tsail nail phaq teevq bhee teevq lovq ya dai, hal yaoq. Hal haq neq, ya nail ngaol” dai, ge bhiq-a nail ngaol.
Yeiqsul miltsaq bhai gaq lai-aoq nail ganl
25 Yeiqsul gaoq ge nail: “Ngal daoqma uqhuq daoq nee ganl niil juq bhai cavq bhiq cov bhiq-a nail ngaol. Thailhai ngaol-aoq, ngal daoqma uqhuq daoq bhai maq yuq mail, Aqbhu Miqyail nail ganl nuljuq bhai daolcoev dai, ya ge bhiq nail aqn kev lee nail ngaol. 26 Aqn al n kev lee-u phao, nuljuq ngaq nail aqmil lavqkhoel nee, Aqbhu Miqyail bhai hal nail ngaol. Nuljuq nail haqbhoil ngal aivq bhai hal nail maq loq yaoq-aol. 27 Nuljuq ngaq bhai gaiq-a khi, Miqyail jaol nail nee lee-a nail ngaol dai, neema thaqtsaol nail ngel-i mail, Aqbhu Miqyail nuljuq bhai gaiq-a nail ngaol. 28 Ngal Aqbhu Miqyail jaol nail bha nee lee khi, miltsaq kovtavq bhai lee-a nail ngaol. Thailhai ngaol-aoq, niil aq-il ngal miltsaq niilniai khaonq ha-ail ceevq khi, Aqbhu Miqyail jaol nail bha kovq lai naol” dai, ge bhiq-a nail ngaol. 29 Aq-u phao, yaqlaol juq Yeiqsul bhai ge bhiq-a nail: “Niil thal khe pov neq, naol daoqma uqhuq daoq maq yuq-ail, daolcoev dai, cavq lavq cov lavq nail ngaol. 30 Naol neq, Miqyail jaol nail nee lee-a nail ngaol dai, nvjuq neema thaq tsaol naol. Khul khi mail dai ngal-aq neq, naol iqsanl bhai heeq nia khi, tsaol-aq teevq gaq-ail naoq bhai naldaiq nail bhai, naol maq loq-ail dai, niil aq-il nvjuq heeq kivq lal-aoq nail ngaol” dai, ge bhiq-a nail ngaol. 31 Yeiqsul aqyu juq bhai ge bhiq-a nail: “Niil aq-il nuljuq aqduq bhao dai, neema thaqtsaol lal-aoq naol laiq. 32 Nuljuq iqsanl bhi the gaoq bhi the gail gil khi, yovqgavq nail ilkhaol bha yovqgavq kovq gil-ail nail nee ovqtavq, ngaq bhai taivq-ail khaonq ha-ail ceevq nail aqyanq kev lee nail ngaol. Thailhai ngaol-aoq, ngal neq, teevq gaq teevq-eel maq ngel-ail. Khul khi mail dai ngal neq, Aqbhu Miqyail ngaq-ai nee mail jaol nail ngaol. 33 Ngaq nail lavqkhoel bhai nuljuq neesal-ovq nail phaq ya nia dai, nuljuq bhai niailhai ge bhiq nail ngaol. Miltsaq kovtavq bhai, khoeq nail jiovq nail phaq bhai, nuljuq ya daq nail ngaol. Thailhai ngaol-aoq, teevq peivq-ail thaq geesil. Miltsaq niilniai ngal gaq lai-aoq nail ngaol” dai, ge bhiq-a nail ngaol.
Yeiqsul yovqgavq nail haqbhoil geeqlaoq hal nail ganl
1 Yeiqsul alhai ge gaq-u phao, nqtavq phao gaollel khi, niailhai geeqlaoq hal-a nail ngaol: “Aqbhu-ol, aqyanq kev lee-aoq nail ngaol. Yaqyov bhaqda nee naoq nail seiqleiq khaoqsail bhai yu moel nia dai, naoq nail Yaqyov bhai seiqleiq khaoqsail bivq lavq yaoq. 2 Khul khi mail dai ngal-aq neq, naoq-i mail Yaqyov bhai khal av bhiq-ai thaq nail tsaol-aq iqsanl bhai, nqmaq maqluv halyeel doevq nail phaq Yaqyov bivq nia dai, miltsaq tsaoljeq iqsanl nail kovtavq bhai, naol aivq bhai bhaqaoq bivq-ai thaq nail ngaol. 3 Naol teevq gaq taivq-ail maldil Miqyail ngaol dai, heeq nia khi, naoq-i mail khoel-ai leevq-a nail Yeiqsul Khali bhai heeq nia nail al neq, nqmaq maqluv halyeel doevq nail phaq, pevq nail ngaol. 4 Miltsaq kovtavq bhai naoq nail seiqleiq khaoqsail bhai, ngal bhi moel gaq-ao nail ngaol. Khul khi mail dai ngal-aq neq, naoq-i mail bhi nl lavq-a nail ganl bhai iqsanl ngal nl gil-aoq nail ngaol. 5 Aqbhu-ol, miltsaq maq teivq-u phao nee, ngal naoq-ai nee mail jaol-u phao, ngaq-i mail jiav nail seiqleiq khaoqsail al, niil aq-il naoq nail sivtavq-ai ngaq bhai gaoq bhi ya lavq yaoq” dai, geeqlaoq hal-a nail ngaol.
Yeiqsul yaqlaol juq nail haqbhoil geeqlaoq hal nail ganl
6 Yeiqsul geeqlaoq gaoq hal-a nail: “Miltsaq niil nail kovtavq bhai, naoq-i mail ngaq bhai bivq dov lavq-a nail tsaol-aq juq naoq bhai heeq nia dai, ngal nl gaq-ao nail ngaol. Aqyu juq naoq nail tsaol-aq pevq khi, naoq-i mail ngaq bhai bivq lavq-a nail ngaol. Naoq nail daoq bhai aqyu juq naldaiq nail ngaol. 7 Naoq-i mail ngaq bhai khal bivq lavq-a nail yaoq phaq yaoq-ao nee, naol jaol nail nee lee-a nail ngaol dai, aqyu juq niil aq-il heeq nia lal-aoq nail ngaol. 8 Khul khi mail daiq ngal-aq neq, naoq-i mail ngaq bhai bivq lavq-a nail daoq juq, aqyu juq bhai ngal cavq bhiq cov bhiq khi, aqyu juq naldaiq nail ngaol. Ngal neq, naol jaol nail bha nee lee-a nail ngaol dai, aqyu juq heeq nia khi, naoq-i mail ngaq bhai khoel-ai leevq thaq nail ngaol dai, aqyu juq neema thaqtsaol nail ngaol” dai, ge bhiq-a nail ngaol. 9 Yeiqsul geeqlaoq gaoq hal-a nail: “Naoq-i mail ngaq bhai bivq lavq-a nail tsaol-aq juq nail haqbhoil, ngal geeqlaoq hal nail ngaol. Khul khi mail dai ngal-aq neq, aqyu juq naoq nail tsaol-aq pevq nail ngaol. Miltsaq yaq nail haqbhoil ngal geeqlaoq hal nail maq ngel. 10 Ngal khal jiav nail phaq iqsanl, naoq nail pevq khi, naol khal jiav nail phaq iqsanl, ngaq nail pevq nail ngaol. Aqyu juq nail lavqkhoel-ai ngaq nail seiqleiq khaoqsail bhai, yu ya moel nail ngaol. 11 Niai nee pultavq ngal-aq, ngal miltsaq kovtavq bhai maq jaol yaoq-aol. Thailhai ngaol-aoq, tsaol-aq niil juq neq, miltsaq kovtavq bhai jaol nail ngaol. Ngal naol jaol nail bha kovq lal naol. Meeqnail Haolnail Aqbhu-ol, ngadao nvq phaqyaq teevq gaq taivq-ail pevq nail khe-ai, aqyu juq iqsanl, neema teevq heeq thaq-ail tavq nia lal dai, naoq-i mail ngaq bhai bivq lavq-a nail tsaol-aq bhai, naoq-i mail ngaq bhai bivq lavq-a nail aqmil kov-uvq nee heldaiq phail bhiq yaoq. 12 Ngal aqyu juq nee mail jaol-u phao, naoq-i mail ngaq bhai bivq lavq-a nail tsaol-aq bhai, naoq-i mail ngaq bhai bivq lavq-a nail aqmil kov-uvq nee, ngal heldaiq phail-a nail ngaol. Jalliq lavqkhoel bhai gevq-ai thaq nail khe-ai, bhee lal dai peivq ail-a nail al teevq gaq maq ngel nail neq, aqyu juq teevq gaq iqsanl, maq bhi peivq-ail dai, ngal heldaiq phail-a nail ngaol” dai, ge bhiq-a nail ngaol. 13 Yeiqsul geeqlaoq gaoq hal-a nail: “Niil aq-il naol jaol nail bha ngal kovq lal-aiq nail khi ngaol-aoq, aqyu juq nail neema bhai ngaq nail lavqkhiq tsail nail phaq teevq bhee ya nail haqbhoil, ngal miltsaq kovtavq bhai jaol-u phao, daoq niil juq niailhai ge nail ngaol. 14 Ngal aqyu juq bhai naoq nail daoq cavq bhiq cov bhiq-a nail ngaol. Miltsaq yaq juq, aqyu juq bhai neejiav jiav nail ngaol. Khul khi mail dai ngal-aq neq, ngal miltsaq niilniai maq tavq nail khe-ai, aqyu juq iqsanl, miltsaq niilniai maq tavq-ail. 15 Aqyu juq bhai miltsaq kovtavq bhai maq bhi jaol mail hevq dol-aivq yaoq dai, ngal hal nail maq ngel-ail. Aqyu juq haqeiv nail phaq bhai jel-ail nia dai, aqyu juq bhai heldaiq phail bhiq yaoq dai, ngal hal nail ngaol. 16 Ngal miltsaq niilniai maq tavq nail khe-ai, aqyu juq iqsanl miltsaq bhai maq tavq-ail. 17 Maldil tsaq nail phaq-i mail aqyu juq bhai bhi haol lal yaoq. Naoq nail daoq neq, maldil tsaq nail phaq pevq nail ngaol. 18 Naol ngaq bhai miltsaq kovtavq bhai khoel-ai leevq-a nail khe-ai, ngal iqsanl aqyu juq bhai, miltsaq kovtavq bhai khoel gai-aivq-a nail ngaol. 19 Aqyu juq nail aqmaol maldil tsaq nail phaq nail lavqkhoel nee, naoq bhai ya av bhiq dai, aqyu juq nail haqbhoil ngaq nail aqmaol naoq bhai av bhiq-a nail ngaol” dai, geeqlaoq hal-a nail ngaol.
Yeiqsul neema thaqtsaol nail tsaol-aq iqsanl nail haqbhoil geeqlaoq hal nail ganl
20 Yeiqsul geeqlaoq gaoq hal-a nail: “Aqyu juq nail haqbhoil taivq-ail, ngal naoq bhai geeqlaoq hal nail maq ngel-ail. Aqyu juq nail daoq bhaqda nee ngaq bhai neema thaqtsaol lal-a nail tsaol-aq juq nail haqbhoil iqsanl, hal nail ngaol. 21 Aqyu juq iqsanl mail, neema teevq heeq taivq-ail tavq nia lal dai, ngal geeqlaoq hal nail ngaol. Aqbhu-ol, naol ngaq nail lavqkhoel bhai jaol khi, ngal iqsanl, naoq nail lavqkhoel bhai jaol nail khe-ai, aqyu juq iqsanl mail, neema teevq heeq taivq-ail tavq khi, ngadao nvq phaqyaq nail lavqkhoel bhai bhi jaol yaoq. Alhai jaol haq neq, naoq-i mail ngaq bhai khoel-ai leevq thaq nail ngaol dai, miltsaq yaq juq neema thaqtsaol lal nail ngaol. 22 Ngadao nvq phaq yaq neema teevq heeq taivq-ail tavq nail khe-ai, aqyu juq iqsanl, neema teevq heeq taivq-ail tavq nia lal dai, naoq-i mail ngaq bhai bivq lavq-a nail seiqleiq khaoqsail al, aqyu juq bhai ngal bivq nail ngaol. 23 Naoq-i mail ngaq bhai khoel-ai leevq-a nail ganl khi, ngaq bhai naol gaiq-a nail khe-ai, ngaq bhai neema thaqtsaol nail tsaol-aq niil juq bhai iqsanl, naol gaiq-a nail ganl bhai miltsaq yaq juq heeq nia lal nail haqbhoil, ngaq bhai neema thaqtsaol nail tsaol-aq niil juq, neema teevq heeq taivq-ail tavq nia lal dai, ngaq nail lavqkhoel bhai naol jaol khi, aqyu juq nail lavqkhoel bhai ngal jaol nail ngaol” dai, ge bhiq-a nail ngaol. 24 Yeiqsul geeqlaoq gaoq hal-a nail: “Aqbhu-ol, naoq-i mail bivq lavq-a nail tsaol-aq niil juq, naoq-i mail ngaq bhai bivq lavq-a nail seiqleiq khaoqsail bhai moel nia dai, aqyu juq bhai ngal khal jaol nail bha bhi jaol movq nail ngaol. Khul khi mail dai ngal-aq neq, miltsaq maq teivq-u nee mail, naol ngaq bhai gaiq-a nail ngaol. 25 Tsaq dee daol deedee nail Aqbhu-ol, miltsaq yaq juq naoq bhai maq heeq nia khi ngaol-aoq, ngal naoq bhai heeq kivq khi, naoq-i mail ngaq bhai khoel-ai leevq-a nail ngaol dai, tsaol-aq niil juq heeq nia nail ngaol. 26 Aqyu juq naoq bhai heeq nia lal dai, ngal cavq bhiq cov bhiq naol. Iqmoeq phaoq iqsanl, gaoq cavq bhiq gaoq cov bhiq nail ngaol. Khul khi mail dai ngal-aq neq, naoq-i mail ngaq bhai goil nail gaiq-a nail al phaq, aqyu juq nail lavqkhoel bhai aol khi, ngal aqyu juq nail lavqkhoel bhai jaol kivq dai, alhai cavq bhiq cov bhiq naol” dai, Yeiqsul geeqlaoq alhai hal-a nail ngaol.
Yeiqsul bhai nieivq-a nail ganl
1 Yeiqsul alhai geeqlaoq hal gaq-u phao, aivq nail yaqlaol juq hevq khi, Gildaqloq laoljaol a phao lelkhel phao ceiv ail-a nail ngaol. Al bhai gaoqkhail teevq khail jiav khi, Yeiqsul khi aivq nail yaqlaol juq, gaoqkhail al khail bhai aol lai-a nail ngaol. 2 Yeiqsul bhai gaoqjaq-a nail Yuldav al gaq iqsanl, gaoqkhail al khail bhai heeq nia nail ngaol. Khul khi mail dai ngal-aq neq, Yeiqsul aivq nail yaqlaol juq nee gaoqkhail al khail bhai mee nia pov ail daiq-a nail ngaol. 3 Alheel ngel-i mail, Yuldav neq, Philma juq khi Phaqliqsail juq-i mail khoel-ai leevq thaq nail uqhuq thaoq nail ilkhaol il ma bhai jaol khi heldaiq phail nail tsaol-aq juq khi mail genl dev nail juq hevq khi lal-a nail ngaol. Aqyu juq phalmanq tovq khi, miqhuq kheq khi, genl dev nail khen kha-ao iqsanl, bavq-nvq thaq nail ngaol. 4 Yeiqsul neq, aivq nail kovtavq bhai kev lee thailthaiq nail, yaoq phaq yaoq-ao nee bhai heeq nia nail ngel-i mail, iqmoeq phao dov lee khi, “Nuljuq khaq sil gaq bhai halpov nail-aiq” dai, ge bhiq-a nail ngaol. 5 “Naqsaqlail meenq bhai jaol nail, Yeiqsul bhai halpov nail ngaol” dai, aqyu juq ge nail ngaol. “Ngal neq, Yeiqsul ngaol” dai, aivq ge kovq bhiq-a nail ngaol. Yeiqsul bhai gaoqjaq-a nail Yuldav iqsanl, tsaol-aq al juq nee thulphaol-nvq thaq nail ngaol. 6 “Ngal Yeiqsul ngaol” dai, aqyu juq bhai Yeiqsul ge bhiq-u phao, aqyu juq haoqnaol phao jiiv kovq-ail khi helbhail lail-nq khaoqthaq-ail bavq tsuq ail-a nail ngaol. 7 “Nuljuq khaq sil gaq bhai halpov nail-aiq” dai, Yeiqsul teevq pov gaoq naldaiq-a nail ngaol. “Naqsaqlail meenq bhai jaol nail Yeiqsul bhai halpov nail ngaol” dai, aqyu juq gaoq ge bhiq-a nail ngaol. 8 Yeiqsul ge nail: “Ngal Yeiqsul ngaol dai, nuljuq bhai ge bhiq-ao nail maq ngel-ail laiq. Nuljuq ngaq bhai halpov nail phal-iq neq, ngaq nail haoqnao tsaothe jaol nail tsaol-aq niil juq bhai neq, maq nieivq mail bhi kovq ail yaoq” dai, ge bhiq-a nail ngaol. 9 Yeiqsul alhai ge nail al neq, “Aqbhu-ol, naoq-i mail ngaq bhai bivq lavq-a nail tsaol-aq teevq gaq iqsanl, maq bhi peivq ail-al” dai, aivq-i mail ge-ai thaq nail daoq al daoq bhi bhee lal nail haqbhoil ge nail ngaol. 10 Aq-u phao, Silmoq Bheiqtuvluv aivq-i mail bavq-nvq thaq nail thaoma gaol dov khi, Philma nail yaqkav teevq gaq bhai tsil gai-aivq khi, lavqmal phao khe naqkov tsilceiv gai-aivq-a nail ngaol. Yaqkav al gaq nail aqmil neq, Maqlaqkhul ngaol. 11 Aq-u phao, Yeiqsul Bheiqtuvluv bhai ge bhiq-a nail: “Naoq nail thaoma thaobhai bhai soiq bhoel yaoq. Aqbhu Miqyail-i mail ngaq bhai bhi daq lavq nail haq dee aoq deedee phaq bhai, ngal yaq daq nail, maq ngel-ail laiq” dai, ge bhiq-a nail ngaol.
Yeiqsul bhai Aqnaq jaol nail bha hel-aivq-a nail ganl
12 Aq-u phao, Philma juq khi Phaqliqsail juq-i mail khoel-ai leevq thaq nail tsaol-aq khi mail genl dev nail juq Yeiqsul bhai nieivq khi pheel-aivq-a nail ngaol. 13 A bhai nee ngal-aq, Aqnaq jaol nail bhai iqmoeq hel-aivq-a nail ngaol. Aqnaq neq, aq-u kovq bhai Philma aqivq gaq jiovq thailthaiq nail Gaqyaqphal nail tsaolmaoq ngaol. 14 “Tsaol jeq-e teevq jeq-e je lao-ail ya luq ya seil-ail nail haqbhoil, tsaol-aq teevq gaq bhi sildan nail neq, meeq jaiq nail ngaol” dai, Yuldav tsaol-aq nail aqivq aqtsu juq bhai ge noeq ge dul bhiq-a nail gaq neq, Gaqyaqphal ngaol.
Yeiqsul bhai maq heeq kivq-ail dai, Bheiqtuvluv jil nail ganl
15 Silmoq Bheiqtuvluv khi yaqlaol yaoq gaq yaoq, Yeiqsul nail haoqnao tsaothel-aivq-a nail ngaol. Yaqlaol al gaq, Philma aqivq gaq bhai heeq nia nail ngel-i mail, Philma aqivq gaq nail ilkhaol khe khainl lavqkhoel-ai, Yeiqsul nail haoqnao tsaothel-aivq-a nail ngaol. 16 Bheiqtuvluv neq, lavqniil phao khe khainl lolgov aqjail bhai jaol-ail ceevq-a nail ngaol. Yaqlaol al gaq gaoq kovq lee khi, khainl lolgov bhai lovq nail yaqmai-aq al gaq bhai ge bhiq khi, Bheiqtuvluv bhai hevq bhoel-aivq-a nail ngaol. 17 Khainl lolgov bhai lovq nail yaqmai-aq al gaq Bheiqtuvluv bhai ge bhiq-a nail: “Naol iqsanl, tsaol-aq al gaq nail yaqlaol juq nail lavqkhoel bhai aol nail, maq ngel-ail laiq” dai, ge bhiq-a nail ngaol. Bheiqtuvluv neq, “Ngal maq aol-ail” dai, ge kovq bhiq-a nail ngaol. 18 Aqcoevq coevq nail ngel-i mail, yaqkav juq khi ilkhaol lovq phail nail tsaol-aq juq, calgevq-i mail miqjaq sivtovq khi, teevq jaoq thulphaol khi aqcoevq loil-a nail ngaol. Bheiqtuvluv iqsanl, a bhai thulphaol khi, aqyu juq nee mail aqcoevq loil-a nail ngaol.
Philma aqivq gaq Yeiqsul bhai naldaiq nail ganl
19 Philma aqivq gaq Yeiqsul bhai, aivq nail yaqlaol juq nail ganl khi, aivq-i mail cavq bhiq cov bhiq-a nail ganl juq bhai peivtsel khi naldaiq nail ngaol. 20 Yeiqsul ge nail: “Ngal yu bhai daoq khal ge tsaoq-u phao, tsaol-aq maodai jaol nail sivtavq nee bhaqlaoq kheq dai, ge tsaoq-a nail ngaol. Tsaol-aq iqsanl mail, jil lal duq pevq nail uqhuq thaoq nail ilkhaol juq khi, uqhuq thaoq nail ilkhaol il ma bhai taivq-ail, ngal cavq bhiq cov bhiq-a nail ngaol. Bhallal phao nee khoiq ge nail teevq phaq iqsanl, maq jiav-ail. 21 Khul khi mail, naol ngaq bhai peivtsel khi naldaiq nail-aiq. Ngaq nail daoq bhai ya gaiq-a nail tsaol-aq juq, ngal khalhai ge laoq-aol dai, aqyu juq heeq nia nail ngaol. Aqyu juq bhai naldaiq yaoq” dai, ge bhiq-a nail ngaol. 22 Yeiqsul alhai ge-u phao, a bhai ilkhaol bhai lovqphail nail tsaol-aq teevq gaq, aivq nail bhaqbha bhai teiv khi ge nail: “Naol Philma aqivq gaq bhai thailhai ge khaoq nail laiq” dai, ge bhiq-a nail ngaol. 23 Yeiqsul Philma aqivq gaq bhai ge bhiq-a nail: “Ngaq-i mail ge nail daoq maq ngel haq neq, maq ngel-ail dai, niai jaol nail tsaol-aq yaoq gaq yaoq-ao nee nail sivtavq bhai ge duq yaoq. Thailhai ngaol-aoq, ngaq-i mail ge nail daoq ngel haq neq, khul khi mail, ngaq nail bhaqbha bhai bhi teiv nail-aiq” dai, ge bhiq-a nail ngaol. 24 A bhai nee ngal-aq, aivq bhai pheethaiq-ai thaq nail nee maq pheel bhiq dai, Aqnaq-i mail Yeiqsul bhai Philma aqivq gaq pevq nail Gaqyaqphal jaol nail bha bhi hel-aivq-a nail ngaol. Yeiqsul bhai maq heeq kivq-ail dai, Bheiqtuvluv teevq pov gaoq jil nail ganl 25 Bheiqtuvluv neq, a bhai thulphaol khi aqcoevq loil nail ngaol. Yu aivq bhai naldaiq nail: “Naol iqsanl, tsaol-aq al gaq nail yaqlaol maq ngel-ail laiq” dai, naldaiq-u phao, “Maq ngel-ail” dai, Bheiqtuvluv jil nail ngaol. 26 Bheiqtuvluv-i mail naqkov tsilceiv bhiq-a nail gaq nee aqivq jaqbheq tavq nail, Philma aqivq gaq nail yaqkav teevq gaq, Bheiqtuvluv bhai ge nail: “Naol iqsanl, Yeiqsul nee mail gaoqkhail lavqkhoel-ai jaol nail bhai, ngal moel-a nail ngaol” dai, ge bhiq-a nail ngaol. 27 “Maq ngel-ail” dai, Bheiqtuvluv teevq pov gaoq jil-a nail ngaol. Aq-u phao, teevq pov taivq-ail yavphoil doil lal-a nail ngaol.
Yeiqsul bhai heeqphaq Phillav nail sivtavq bhai hel-aivq a nail ganl
28 Yaoq n yaoq nqhao navqmav-ail, Yeiqsul bhai Gaqyaqphal nail ilkhaol nee hevq dol-aivq khi, heeqphaq nail haol ilkhaol bha hel-aivq-a nail ngaol. Yuldav tsaol-aq nail aqivq aqtsu juq neq, Bhaqsaqkhaq bhaoqaiq jaq nail bhai aol lai nail haqbhoil yovqgavq nail aqmaol aqhaol haol dai bhi jiav movq nail ngel-i mail, heeqphaq nail haol ilkhaol lavqkhoel bhai maq aol lai dai, jaol nail ngaol. 29 Alheel ngel-i mail, Phillav lavqniil bha dov lee khi, ge nail: “Tsaol-aq niil gaq khul phaq laiq nail dai, nuljuq ge movq nail-aiq” dai, naldaiq bhiq-a nail ngaol. 30 Aq-u phao, aqyu juq ge nail: “Tsaol-aq niil gaq haqeiv nail phaq nl thaq nail maq jiav-ail nul neq, aivq bhai naol jaol nail bha nvjuq maq hel lavq-ail” dai, ge bhiq-a nail ngaol. 31 Phillav ge nail: “Thailhai phal-iq neq, nuljuq aivq bhai hevq kol-aivq khi, nuljuq nail aoldaoq kovqdaoq khal jiav nail khe-ai yalkhaq dal-ail yaoq” dai, ge bhiq-a nail ngaol. Aq-u phao, aqyu juq ge nail: “Nvjuq tsaol-aq teevq gaq bhai iqsanl, heivq nail aqkhaoqanq maq jiav-ail” dai, Yuldav nail tsaol-aq juq ge kovq bhiq-a nail ngaol. 32 Aqyu juq alhai ge nail neq, “Ngal neq, alhai ya sil nail ngaol” dai, Yeiqsul-i mail ge-ai thaq nail khe-ai, bhee lal dai, ge nail ngaol. 33 Phillav haol lavqkhoel bhai gaoq-aol lai khi, Yeiqsul bhai khul khi, naldaiq nail: “Naol Yuldav tsaol-aq nail Heeqphaq ngaol laiq” dai, naldaiq bhiq-a nail ngaol. 34 Yeiqsul ge nail: “Daoq thoil daoq maldil naoq nail daoq ngaol laiq. Maq ngel haq neq, ngaq nail ganl yu-i mail naoq bhai ge lavq-a nail daoq bhai juq khi, ge nail laiq” dai, ge kovq bhiq-a nail ngaol. 35 Phillav ge nail: “Ngal Yuldav nail tsaol-aq laiq. Naoq nail jeq-e jaq-a khi Philma aqivq-i mail, naoq-ai ngaq nail aqlavq lavqkhoel-ai av lavq-a nail ngaol. Naol khul nl-a nail-aiq” dai, naldaiq bhiq-a nail ngaol. 36 Yeiqsul ge nail: “Ngaq nail milkhaoq neq, miltsaq niilniai tavq nail maq ngel-ail. Ngaq nail milkhaoq miltsaq niilniai tavq nail nul neq, ngaq bhai Yuldav tsaol-aq nail aqivq aqtsu juq-i mail maq nieivq-u phao nee, ngaq nail tsaol-aq juq genl dev lal nail ngaol. Ngaq nail milkhaoq neq, miltsaq niilniai maq tavq-ail” dai, ge bhiq-a nail ngaol. 37 Aq-u phao, Phillav aivq bhai naldaiq nail: “Naol Heeqphaq ngaol laiq.” Yeiqsul ge nail: “Ngal Heeqphaq ngaol dai, ge nail neq, nuljuq ngaol. Ngal miltsaq kovtavq bhai yavq kha lee khi, doevq lee-a nail neq, tsaq nail salkhil khanq lee-a teevq-eel ngaol. Maldil tsaq nail phaq phao, khal jaol nail tsaol-aq neq, ngaq nail daoq naldaiq nail ngaol” dai, ge bhiq-a nail ngaol. 38 Phillav ge nail: “Maldil tsaq nail phaq dai, ge nail neq, khul bhai ge nail-aiq” dai, naldaiq bhiq-a nail ngaol.
Yeiqsul bhai heivq nail haqbhoil dalceiv-a nail ganl
A bhai nee ngal-aq, haol ilkhaol nail lavqniil bhai jaol nail Yuldav nail tsaol-aq juq jaol nail bha, Phillav dov lee khi, niailhai ge bhiq lee-a nail ngaol: “Tsaol-aq niil gaq nail laiq nail tsa nail phaq bhai, ngal maq halpov moel kivq-il. 39 Thailhai ngaol-aoq, Bhaqsaqkhaq bhaoqaiq khal kev lal-u phao, nuljuq nail haqbhoil tsaol-aq teevq gaq ngal ya phaiq bhiq nail aolsaolkovq jiav nail ngaol. Nuljuq nail haqbhoil Yuldav nail tsaol-aq nail Heeqphaq niil gaq bhai, ngal bhi phaiq movq-ail laiq” dai, ge bhiq-a nail ngaol. 40 Aqyu juq mailma-ail gaoq gul kav lal khi ge nail: “Aivq bhai thaq phaiq, Bhaqlaqbhal bhai phaiq yaoq” dai, gul nail ngaol. Bhaqlaqbhal neq, tsaolpheel teevq gaq ngaol.
1 A bhai nee ngal-aq, Phillav-i mail Yeiqsul bhai hevq dol-aivq khi, neeqtsaq-i mail bhi jiivq deedee-a nail ngaol. 2 Genl dev nail juq aqgoe aqjiav-i mail heel uqtsaoq khe-ai jievq khi, aivq bhai nieivq tsaoq bhiq-a nail ngaol. A bhai nee ngal-aq, nel nav nav nail heeqphaq nail phailkhaoq heelma nieivq doi bhiq-a nail ngaol. 3 Aqyu juq aivq nail aqjail bhai lai khi, “Yuldav nail tsaol-aq nail heeqphaq, geeqlaoq eeq dei-eiq” dai, ge ge-ail khi, bhaqbha bhai teiv-a nail ngaol. 4 Phillav teevq pov gaoq dov lee khi ge nail: “Ngal tsaol-aq niil gaq nail lavqkhoel khe laiq nail tsa nail teevq phaq iqsanl, maq moel-al dai, nuljuq ya heeq nia dai, ngal aivq bhai nuljuq jaol nail bha hevq dol leevq-a nail ngaol” dai, aqyu juq bhai ge bhiq-a nail ngaol. 5 Aq-u phao, Yeiqsul neq, aqgoe uqtsaoq tsaoq khi, nel nav nav nail heeqphaq nail phailkhaoq heelma iqsanl doi khi mail, dov lee-a nail ngaol. “Tsaol-aq niil gaq bhai heldaiq daiq-o” dai, Phillav aqyu juq bhai ge bhiq-a nail ngaol. 6 Philma juq khi mail uqhuq thaoq nail ilkhaol il ma bhai lovq phail nail juq Yeiqsul bhai ya moel-u phao, aivq bhai, “Lavqyavq kovtavq bhai tavq heivq yaoq, tavq heivq yaoq” dai, mailma-ail ge nail ngaol. Phillav ge nail: “Nuljuq yovqgavq bhai yovqgavq aivq bhai he dol-aivq khi, lavqyavq kovtavq bhai tavq heivq ail yaoq. Ngal aivq nail lavqkhoel khe laiq nail tsa nail teevq phaq iqsanl, maq moel-al” dai, aqyu juq bhai ge bhiq-a nail ngaol. 7 Yuldav nail tsaol-aq juq ge nail: “Nvjuq nail aoldaoq kovqdaoq jiav nail khe-ai, nl haq neq, aivq sil nail tsaq nail ngaol. Khul khi mail dai ngal-aq neq, aivq neq, ‘Ngal Miqyail nail Yaqyov ngaol’ dai, ge nail ngaol.” 8 Phillav daoq al daoq ya gaiq-u phao, iqmoeq-u nee maqtsil gaoq geesil lal bhiq-a nail ngaol. 9 Aivq haol ilkhaol lavqkhoel bha gaoq aol lal khi, “Naol khaq bha nee lal-a nail tsaol-aq” dai, Yeiqsul bhai naldaiq-a nail ngaol. Thailhai ngaol-aoq, Yeiqsul aivq bhai khul teevq phaq iqsanl, maq ge kovq bhiq-al. 10 Alheel ngel-i mail, Phillav ge nail: “Khul khi mail, naol ngaq bhai daoq maq ge tsaoq lal nail-aiq. Naoq bhai phaiq bhi nail maqkhaiq, naoq bhai lavqyavq kovtavq bhai tavq heivq nail maqkhaiq, ngal bhaqaoq jiav nail bhai, naol maq heeq kivq-ail laiq” dai, aivq bhai ge bhiq-a nail ngaol. 11 Yeiqsul ge nail: “Miqyail-i mail naoq bhai bhaqaoq bivq-ai thaq nail ngel-i mail taivq-ail, naol ngaq nail kovtavq bhai bhaqaoq jiav nail ngaol. Alheel ngel-i mail, ngaq bhai naoq nail aqlavq lavqkhoel bhai av bhiq-a nail gaq neq, naoq-ai nee maqtsil oeqbal eeq jaiq nail ngaol” dai, ge bhiq-a nail ngaol. 12 Daoq al daoq bhai Phillav ya gaiq-u phao, Yeiqsul bhai phaiq bhiq nail gailkhaol halpov nail ngaol. Thailhai ngaol-aoq, Yuldav nail tsaol-aq juq mailma-ail ge nail: “Naol aivq bhai phaiq bhiq haq neq, naol heeqphaq Gailsaq nail aqtsaoq maq ngel yaoq-aol. Yovqgavq bhai yovqgavq, heeqphaq ngaol dai, ge nail tsaol-aq neq, heeqphaq Gailsaq bhai genl dev nail tsaol-aq ngaol” dai, ge bhiq-a nail ngaol. 13 Daoq al daoq bhai Phillav ya gaiq-u phao, Yeiqsul bhai lavqniil bha hevq dol leevq khi, lovmav-i mail kheq-ai thaq nail jaol duq dai, khul nail bha jiav nail yalkhaq dal nail doiqbev bev ma bhai jaoldeel lai-a nail ngaol. Lovmav-i mail kheq-ai thaq nail jaol duq al bhai, Heiqbhail daoq neq, Gaqbhaqdaq dai, khul nail ngaol. 14 Aq-u n-gaol neq, Bhaqsaqkhaq bhaoqaiq lav sav nail haqbhoil lainq nail aqn pevq khi, n-gaol gaol kavkav lal-aiq nail ngaol. Phillav tsaol-aq al juq bhai ge bhiq-a nail: “Nuljuq nail heeqphaq bhai heldaiq yaoq” dai, ge bhiq-a nail ngaol. 15 Aq-u phao, aqyu juq gul nail: “Aivq bhai heivq yaoq. Aivq bhai heivq yaoq. Lavqyavq kovtavq bhai tavq heivq yaoq” dai, gul nail ngaol. Phillav aqyu juq bhai gaoq ge bhiq-a nail: “Nuljuq nail heeqphaq bhai lavqyavq kovtavq bhai tavq heivq-o laiq.” Aq-u phao, Philma juq ge nail: “Nvjuq nail heeqphaq neq, heeqphaq Gailsaq teevq gaq teevq-eel ngaol” dai, ge bhiq-a nail ngaol. 16 A bhai nee ngal-aq, Yeiqsul bhai lavqyavq kovtavq bhai tavq heivq nail haqbhoil, Phillav-i mail aqyu juq nail aqlavq lavqkhoel bhai av kovq bhiq-a nail ngaol.
Yeiqsul bhai lavqyavq kovtavq bhai tavq heivq-a nail ganl
A bhai nee ngal-aq, aqyu juq-i mail, Yeiqsul bhai he dol-aivq-a nail ngaol. 17 Yeiqsul aivq nail lavqyavq bavq khi, Uqcov dai khul nail jaol duq bha lai kev-a nail ngaol. Jaol duq al dao bhai, Heiqbhail daoq neq, Gaollaqgaoldav dai, khul nail ngaol. 18 Al bhai, aqyu juq aivq bhai lavqyavq kovtavq bhai tavq heivq-a nail ngaol. Tsaol-aq nvq gaq bhai iqsanl, aivq nail jail-nq phao teevq phao teevq gaq dai, tavq thaiq-ai thaq khi, aivq bhai neq, gaoltsi bhai tavq thaiq-ai thaq nail ngaol. 19 Heeqphaq Phillav-i mail haoqgavq gevq khi, lavqyavq kovtavq bhai bhi tavq bav-ai thaq nail ngaol. “Niil gaq neq, Yuldav nail tsaol-aq nail Heeqphaq pevq nail Naqsaqlail meenq bhai jaol nail Yeiqsul ngaol” dai, gevq-ai thaq nail ngaol. 20 Yeiqsul bhai lavqyavq kovtavq bhai tavq thaiq-ai thaq nail jaol duq al neq, meenq nee mail mao-ail maq eq nail ngel-i mail, tsaol-aq maodai haoqgavq gevq-ai thaq nail al bhai ya ge nail ngaol. Haoqgavq al neq, Heiqbhail nail daoq, Latinq nail daoq, Heiqlaqsal nail daoq, niil hail phaq hail phaq-ail gevq-ai thaq nail ngaol. 21 Philma juq Phillav bhai ge bhiq lai-a nail: “Yuldav nail tsaol-aq nail Heeqphaq dai, maq gevq mail, tsaol-aq niil gaq yovqgavq bhai yovqgavq, Yuldav nail tsaol-aq nail Heeqphaq ngaol dai, ge nail ngaol dai, gevq nail neq, tsaq jaiq nail ngaol” dai, ge bhiq-a nail ngaol. 22 Phillav ge nail: “Ngaq-i mail gevq gaq-a nail phaq neq, khal gevq-ai thaq nail khe-ai, ya bhi jiav nail ngaol” dai, ge bhiq-a nail ngaol. 23 Genl dev nail juq Yeiqsul bhai lavqyavq kovtavq bhai tavq thaiq gaq-u phao, aivq nail aqgaq aqdoi bhai liq bhoil bhoil khi, teevq gaq teevq bhoil oil-a nail ngaol. Lavqkhoel phao doi bhoel nail phailkhaoq heelma al keiv iqsanl, aqyu juq oil-a nail ngaol. Phailkhaoq al keiv neq, phalkhaol maq bhao dai, teevq keiv keiv lao-ail teevq pov taivq-ail yavq thaq nail ngaol. 24 Alheel ngel-i mail, aqyu juq ge nail: “Phailkhaoq niil keiv maq he pav mail, khaq sil gaq oil nail tsaq nail ngel-ail dai, ya heeq kivq dai, eellaoq bheq bhel” dai, teevq gaq nee teevq gaq ge pheeljaq nail ngaol. Aqyu juq alhai ge nail neq, “Aqyu juq ngaq nail aqgaq aqdoi bhoilpav khi, ngaq nail phailkhaoq kha sil gaq oil nail tsaq nail ngel-ail dai, eellaoq bheq khi oil nail ngaol” dai, Jalliq lavqkhoel-ai gevq-ai thaq nail daoq al daoq bhee lal dai, genl dev nail juq alhai nl-a nail ngaol. 25 Yeiqsul nail lavqyavq aqjail bhai thulphaol nail tsaol-aq juq neq, Yeiqsul nail aqma, Yeiqsul nail meelmee, Gaqlaolphal nail khaqma Maqlil khi Maqgaqdaqlal meenq bhai jaol nail Maqlil, niil liq gaq ngaol. 26 Yeiqsul neq, aivq nail aqma khi aivq mailma-ail gaiq-a nail yaqlaol al gaq, a bhai thulphaol nail bhai ya moel-u phao, “Aqma-ol, aivq bhai naoq nail yaq khe-ai saol-nvq yaoq” dai, ge bhiq-a nail ngaol. 27 A bhai nee ngal-aq, yaqlaol al gaq bhai iqsanl, “Aivq naoq nail aqma khe-ai, saol-nvq yaoq” dai, ge bhiq-a nail ngaol. Aq-u n-gaol nee ngal-aq, yaqlaol al gaq Yeiqsul nail aqma bhai he kol-aivq khi, aivq nail ilkhaol bha bhi jaol-a nail ngaol.
Yeiqsul sil-a nail ganl
28 Niil thal khe pov neq, yaoq phaq yaoq-ao nee bhee lal gaq-ao nail ganl, Yeiqsul heeq nia nail ngaol. Jalliq lavqkhoel bhai gevq-ai thaq nail khe-ai bhee lal dai, “Ulcuvq moevq-il” dai, Yeiqsul ge nail ngaol. 29 A bhai, aqtsel tsel nail aqheeq tsilju nail ullul deq nail caivlov heeq yaq teevq heeq, jiav nail ngaol. Aqyu juq iqyaq iqma khe mullul khe-ai dul nail niaqpeovq teevq khai oil khi, aqtsel tsel deedee nail aqheeq tsilju nail ullul nail lavqkhoel bhai gov deev-a nail ngaol. A bhai nee ngal-aq, lunl aqkhaoq bhai soiqtsaoq khi, Yeiqsul nail moeqthaoq bhai soiq tuv bhiq-a nail ngaol. 30 Yeiqsul neq, aqtsel tsel deedee nail aqheeq tsilju nail ullul al daol gaq-al nee ngal-aq neq, “Ganl nl gil-aoq nail ngaol” dai, ge khi, uqhuq ga movq lee khi mail aqhaq ceiv-a nail ngaol.
Yeiqsul nail aqbhail bhai geeqkhaoq-i mail coev-a nail ganl
31 A bhai nee ngal-aq, lavqyavq kovtavq-ai tavq thaiq-ai thaq nail tsaol-aq al juq nail aqkhil deeq khoi khi, lavqyavq kovtavq nee bavq khal leevq nail haqbhoil, Yuldav tsaol-aq nail aqivq aqtsu juq heeqphaq Phillav bhai hal nail ngaol. Aq-u n-gaol neq, jaol n n-gaol nail haqbhoil lainq nail aqn pevq khi, sil thaq nail aqmaol al juq bhai jaol n n-gaol kev dai, lavqyavq kovtavq bhai maq bhi jiav movq nail ngel-i mail, aqyu juq alhai hal nail ngaol. Al ovqtavq, jaol n al n neq, meeq jaiq haol jaiq nail jaol n teevq n pevq nail ngel-i mail ngaol. 32 Alheel ngel-i mail, genl dev nail juq neq, Yeiqsul nee mail lavqyavq kovtavq-ai bhi tavq thaiq-ai thaq nail tsaol-aq al nvq gaq nail aqkhil bhai deeq khoi-a nail ngaol. 33 Genl dev nail juq, Yeiqsul nail aqjail bhai kev lee-u phao, Yeiqsul neq, sil ceiv-aoq thaq nail bhai ya moel khi, aqkhil maq deeq khoi dai, khaonq-a nail ngaol. 34 Thailhai ngaol-aoq, genl dev nail teevq gaq-i mail Yeiqsul nail aqbhail bhai geeqkhaoq-i mail coev khi, aqsivq khi mail ulcuvq teevq pov taivq-ail il dol leevq-a nail ngaol. 35 Pevq lal-a nail ganl bhai moel duq-a nail al gaq, nuljuq iqsanl neema thaqtsaol lal dai, salkhil khanq nail ngaol. Aivq ge nail neq, maldil tsaq khi, aivq daolcoev dai, ge lao thaq nial dai, aivq bhai aivq heeq nia-a nail ngaol. 36 “Aivq nail haqeeq teevq khaoq iqsanl maq ya khoi-ail” dai, Jalliq lavqkhoel bhai gevq-ai thaq nail daoq al daoq bhee lal dai, alhai pevq lal-a nail ngaol. 37 Jalliq lavqkhoel bhai teevq dao gaoq gevq-ai thaq nail: “Aqyu juq-i mail geeqkhaoq-i coev-a nail tsaol-aq al gaq bhai, aqyu juq heldaiq nail ngaol” dai, gevq-ai thaq nail ngaol.
Yeiqsul bhai duq pheeq-a nail ganl
38 A bhai nee ngal-aq, Aqlilmaqthaiq meenq bhai jaol nail, Yaolsai al gaq, Yeiqsul nail aqmaol bavq kol-aivq nail haqbhoil, heeqphaq Phillav bha hal lai-a nail ngaol. Yaolsai al gaq neq, Yuldav tsaol-aq nail aqivq aqtsu juq bhai geesil nail ngel-i mail, Yeiqsul nail yaqlaol aqtsi tsu dai, jiovq-nq thaq nail teevq gaq ngaol. Yeiqsul nail aqmaol bavq kol-aivq nia dai, Phillav aivq bhai daoq bivq-a nail ngel-i mail, aivq lai khi bavq kovq lai-a nail ngaol. 39 Jel lal-u phao, Yeiqsul jaol nail bha nqkiv phao lal daiq-a nail Nilgaoldiq al gaq iqsanl, mullaq khi aqjaoq kheq khi lav sav-ai thaq nail huqbhiq nil nail aqtseel nvq tsel jao-ai niidai oil khi, Yaolsai nee mail ail-a nail ngaol. 40 Aqyu nvq gaq Yeiqsul nail aqmaol bavq khi, huqbhiq nil nail aqtseel al bheq bav bheq bav-ail, Yuldav nail tsaol-aq maoltoev toev nail aolsaolkovq jiav nail khe-ai, haoltaiv deel haqphal-i mail maoltoev toev-a nail ngaol. 41 Yeiqsul bhai lavqyavq kovtavq bhai tavq thaiq-a nail jaol duq al nail aqjail bhai, gaoqkhail teevq khail jiav nail ngaol. Gaoqkhail al khail nail lavqkhoel-ai, tsaol-aq teevq gaq iqsanl maq duqpheeq daiq-a nail, lovmav-i mail tavq-ai thaq nail luqdaol aqsivq teevq daol jiav nail ngaol. 42 Aq-u n-gaol neq, Yuldav tsaol-aq nail jaol n n-gaol nail haqbhoil lainq nail aqn pevq khi, luqdaol al daol iqsanl, aqjail bhai jiav nail ngel-i mail, aqyu nvq gaq Yeiqsul bhai, al dao bhai duq pheeq-a nail ngaol.
Yeiqsul gaoq doevq kovq lal-a nail ganl
1 Jaol n jel-ail khi teevq n n-gaol nqhao navqmav-ail nqbhaq maq bhaq lal-u nee mail, Maqlil Maqgaqdaqlal luqdaol bha heldaiq ail-u phao, luqdaol moeqkhoeq bhai ngaoq tsoiq-ai thaq nail lovmav ngaoq ha-ai khi jiav nail bhai ya moel-a nail ngaol. 2 Aq-u phao, Silmoq Bheiqtuvluv khi Yeiqsul mailma-ail gaiq-a nail yaqlaol al gaq jaol nail bha, tsaoq kol-aivq khi, “Aqyu juq Heeqphaq Yeiqsul bhai, luqdaol lavqkhoel nee bavq dol-aivq khi, khaq bha bavq thaq-ai thaq nail dai, maq heeq kivq yaoq-aol” dai, ge bhiq ail-a nail ngaol. 3 Alheel ngel-i mail, Bheiqtuvluv khi yaqlaol al gaq luqdaol bha heldaiq ail-a nail ngaol. 4 Aqyu nvq gaq teevq gaq khe-ai tsaoq tsaoq-ail, ail-a nail ngaol. Thailhai ngaol-aoq, yaqlaol al gaq Bheiqtuvluv nee maqtsil lav nail ngel-i mail, Bheiqtuvluv nail iqmoeq, luqdaol bha tsaoq kel-aivq-a nail ngaol. 5 Aivq thaoq kovq khi heldaiq-u phao, maoltoev haqphal jiav nail bhai ya moel-a nail ngaol. Thailhai ngaol-aoq, aivq luqdaol lavqkhoel bhai maq aol lai daiq dai, jaol nail ngaol. 6 Aivq nail haoqnao Bheiqtuvluv tsaoq kel leevq khi, luqdaol lavqkhoel bha aol ail-a nail ngaol. Maoltoev haqphal ga nail bhai, Bheiqtuvluv ya moel-a nail ngaol. 7 Yeiqsul nail uqhuq bhai pavqthaiq bhiq-a nail lavqsiv al keiv iqsanl, a bhai ga nail ngaol. Lavqsiv al keiv neq, maoltoev haqphal nee teevq gaq khe-ai maq ga dai, yaoq daoq yaoq phao kaolteiv teiv khi jiav nail ngaol. 8 Aq-u phao, luqdaol bhai iqmoeq tsaoq kel leevq-a nail yaqlaol al gaq iqsanl, luqdaol lavqkhoel bhai aol lee khi, alhai jiav nail bhai ya moel-a nail ngel-i mail, neema thaqtsaol lal-a nail ngaol. 9 Aq-u kev dai, Yeiqsul neq, gaoq doevq kovq lal nail ngaol dai, Jalliq lavqkhoel bhai gevq-ai thaq nail ganl al bhai aqyu nvq gaq aqmeeq-ai maq gov heeq haq-al. 10 A bhai nee ngal-aq, aqyu nvq gaq kovq lai-a nail ngaol.
Maqlil Maqgaqdaqlal bhai, Yeiqsul daoq ge tsaoq lee-a nail ganl
11 Maqlil neq, luqdaol nail lavqniil phao thulphaol khi nioil thailthaiq nail ngaol. Aivq nioil nioil-ail thaoq kovq khi, luqdaol lavqkhoel bhai heldaiq bhoel gai-aivq-a nail ngaol. 12 Aq-u phao, nqtavq gaqkhoel nvq gaq, aqgaq aqdoi aqphul doi khi, Yeiqsul nail aqmaol bhai bavq thaq khi bhi jiav-a nail al dao bhai, uqhuq phao teevq gaq, aqkhil phao teevq gaq dai, jaol nail bhai, aivq ya moel-a nail ngaol. 13 “Yaqmiq-ol, khul khi mail nioil nail-aiq” dai, nqtavq gaqkhoel al nvq gaq, aivq bhai naldaiq bhiq-a nail ngaol. Maqlil ge nail: “Yu ngaq nail Heeqphaq bhai bal-aivq khi, khaq bha bavq thaq-ai thaq nail-aiq dai, ngal maq heeq kivq-i mail, nioil nail ngaol” dai, aqyu nvq gaq bhai ge kovq bhiq-a nail ngaol. 14 Aivq alhai ge gaq khi, haoqnaol tsiq phaol gaiq-u phao, Yeiqsul a bhai thulphaol nail bhai ya moel-a nail ngaol. Thailhai ngaol-aoq, Yeiqsul niil dai, aivq maq heeq nia-ail. 15 Yeiqsul aivq bhai ge bhiq-a nail: “Yaqmiq-ol, khul khi mail nioil nail-aiq. Naol khaq sil gaq bhai halpov thailthaiq nail-aiq” dai, ge bhiq-a nail ngaol. Maqlil Yeiqsul bhai, gaoqkhail nl nail tsaol-aq niidai dul khi ge nail: “Heeqphaq-ol, naoq-i mail aivq bhai bavq dol-aivq-a nail phaq al neq, khaq bha bavq thaq-ail a nail-aiq dai, ngaq bhai teevq pov ge lavq yaoq. Aivq bhai, ngal bavq kovq-ail naol” dai, ge bhiq-a nail ngaol. 16 Yeiqsul aivq bhai, “Maqlil-ol” dai, khul-u phao, aivq tsiqphaol-ail khi, “Laqbhaolnil” dai, eq-el kha-a nail ngaol. Laqbhaolnil dai, ge nail neq, Heiqbhail nail daoq pevq khi, saqlaq dai, ge movq nail ngaol. 17 Yeiqsul aivq bhai ge bhiq-a nail: “Ngaq bhai thaq nieivq thaiq. Khul khi mail dai ngal-aq neq, ngal ngaq nail Aqbhu jaol nail bha maq kovq lai haq-al. Ngaq nail yaqlaol juq jaol nail bha ail khi, ‘Ngaq nail Aqbhu khi nuljuq nail Aqbhu pevq nail, ngaq nail Miqyail khi, nuljuq nail Miqyail jaol nail bha, ngal kovq lai naol dai, ge nail ngaol’ dai, ge bhiq-ail yaoq” dai, ge bhiq-a nail ngaol. 18 Aq-u phao, yaqlaol juq jaol nail bha, Maqgaqdaqlal meenq bhai jaol nail Maqlil ail khi, aivq Heeqphaq Yeiqsul bhai ya moel-a nail ganl khi, Yeiqsul-i mail aivq bhai ge bhiq-a nail daoq juq, aqyu juq bhai ge daiq bhiq-a nail ngaol.
Yeiqsul aivq nail aqmaol yaqlaol juq bhai bhi moel-a nail ganl
19 Jaol n jel-ail khi teevq n n-gaol nqkiv phao, yaqlaol juq Yuldav tsaol-aq nail aqivq aqtsu bhai geesil nail ngel-i mail, teevq dao bhai jil lai khi, lolgov saiqthaiq khi jaol nail ngaol. Aq-u phao, Yeiqsul aqyu juq nail gaoltsi bhai thulphaol lee khi, “Nuljuq neesal-ovq dei-eiq” dai, ge bhiq-a nail ngaol. 20 Alhai ge gaq khi, aqyu juq bhai aivq nail aqlavq khi aqbhail bhai bhi heldaiq-a nail ngaol. Yaqlaol juq Heeqphaq Yeiqsul bhai ya moel-a nail ngel-i mail, lavqkhiq tsail deedee nail ngaol. 21 Yeiqsul aqyu juq bhai teevq pov gaoq ge bhiq-a nail: “Nuljuq neesal-ovq dei-eiq. Aqbhu Miqyail ngaq bhai khoel-ai leevq-a nail khe-ai, nuljuq bhai iqsanl, ngal khoel gai-aivq naol” dai, ge bhiq-a nail ngaol. 22 Alhai ge gaq-u phao, aqyu juq nail kovtavq bhai aivq aqhaq jiiv khi, niailhai ge nail ngaol: “Meeqnail Haolnail Aqhaqlal bhai hav bhoel yaoq. 23 Nuljuq-i mail oeqbal phaiq bhiq nail tsaol-aq bhai, Miqyail oeqbal phaiq bhiq nail ngaol. Nuljuq-i mail oeqbal maq phaiq bhiq nail tsaol-aq bhai, Miqyail oeqbal maq phaiq bhiq-ail” dai, ge bhiq-a nail ngaol.
Yeiqsul Tholmav bhai daoq ge tsaoq lee-a nail ganl
24 Yaqlaol juq jaol nail bha Yeiqsul lee-u phao, yaqlaol tsel-nvq gaq nail lavqkhoel bhai aol nail, Tholmav al gaq maq jaol-ail. (Tholmav daiq ge nail neq, teevq pov taivq-ail nvq gaq doevq lee thaq nail bhai, ge nail ngaol.) 25 Alheel ngel-i mail, “Nvjuq Heeqphaq Yeiqsul bhai ya moel-a nail ngaol” dai, yaqlaol juq aivq bhai ge bhiq-a nail ngaol. Tholmav aqyu juq bhai ge bhiq-a nail: “Aivq nail aqlavq bhai hail hailtsoe mail tavq-ai thaq nail malbavq bhai, ngal moel duq khi, ngaq nail lavqnoil-i mail malbavq al bhai thoiq daiq gaq khi, aivq nail aqbhail bhai ngaq nail aqlavq-i mail aqmeeq-ai heivdaiq gaq khi, pultavq maq ngel nail neq, ngal neema maq thaqtsaol-ail” dai, ge bhiq-a nail ngaol. 26 Jaol n teevq jao jel ail-u phao, yaqlaol juq ilkhaol teevq il bhai jil lai khi jaol nail ngaol. Tholmav iqsanl, aqyu juq nee mail jaol nail ngaol. Aqyu juq lolgov saiqthaiq-ai thaq nail ngaol. Thailhai ngaol-aoq, Yeiqsul aqyu juq jaol nail bha thulphaol lee khi, “Nuljuq neesal-ovq dei-eiq” dai, ge nail ngaol. 27 Aq-u phao, Yeiqsul Tholmav bhai ge bhiq-a nail: “Naoq nail lavqnoil-i mail thoiq daiq lal khi, ngaq nail aqlavq bhai heldaiq duq lal yaoq. A bhai nee ngal-aq, naoq nail aqlavq gaoltsaoq khi, ngaq nail aqbhail bhai heivdaiq lal yaoq. Pov pov lav lav-ail maq noeq mail, neema thaq tsaol yaoq” dai, ge bhiq-a nail ngaol. 28 Tholmav ge nail: “Naol neq, ngaq nail Heeqphaq khi ngaq nail Miqyail nial” dai, ge bhiq-a nail ngaol. 29 Yeiqsul ge nail: “Naol ngaq bhai ya moel-a nail ngel-i mail, neema thaq tsaol nail nial laq. Ngaq bhai maq moel khi ngaol-aoq, neema thaqtsaol nail tsaol-aq neq, geeqlaoq eeq nail ngaol” dai, aivq bhai ge bhiq-a nail ngaol.
Khul khi mail haoqgavq niil gevq-a nail ganl
30 Haoqgavq niil keiv nail lavqkhoel bhai, maq gevq bhoel gil-ai thaq nail, noeq-u maq dov nail mee nia phaq, yaqlaol juq nail sivtavq bhai, Yeiqsul nl-a nail ngaol. 31 Thailhai ngaol-aoq, niai khal gevq-ai thaq nail niil juq neq, Yeiqsul neq, Khali khi Miqyail nail Yaqyov pevq nail bhai, nuljuq neema thaq tsaol lal dai maqkhaiq, nuljuq aivq bhai neema thaqtsaol lal-u phao, doevq nail phaq ya nia dai maqkhaiq, gevq-ai thaq nail phaq pevq nail ngaol.
Yaqlaol sivq gaq bhai, Yeiqsul nail aqmaol bhi moel-a nail ganl
1 A bhai nee ngal-aq, Deiqbheiqlil ngaqkha daoljail bhai, yaqlaol juq jaol nail bhai Yeiqsul teevq pov gaoq dov lee-a nail ngaol. Ganl al neq, niailhai ngaol. 2 Silmoq Bheiqtuvluv, nvq gaq doevq lee-a nail dai khul nail Tholmav, Gaqliqlail milkhaoq Gaqnaq meenq bhai jaol nail Naqdaqneiqlal, Seiqbheiqdail nail Yaqyov nvq gaq, al maq ngel nail Yeiqsul nail yaqlaol nvq gaq, niil juq teevq gaq khe-ai jaol nail ngaol. 3 “Ngal ovjeel joe ail la” dai, Silmoq Bheiqtuvluv aqyu juq bhai ge bhiq-u phao, “Nvjuq iqsanl, naoq-ai nee mail lee naol” dai, aqyu juq ge nail ngaol. A bhai nee ngal-aq, aqyu juq laovq jeeq khi dov ail-a nail ngaol. Thailhai ngaol-aoq, aq-u nqkivq teevq kivq kivq lao-ail, aqyu juq delgil teevq maol iqsanl, maq joe miv-al. 4 Nqhao nlma dov lal-u phao, Yeiqsul ngaqkha daolbhaq bhai thulphaol nail ngaol. Thailhai ngaol-aoq, Yeiqsul niil dai, yaqlaol juq maq heldaiq heeq-al. 5 “Aqtsaoq juq-ol, delgil joe miv-a naol laiq” dai, Yeiqsul naldaiq bhiq-u phao, “Maq joe miv-al” dai, aqyu juq ge kovq bhiq-a nail ngaol. 6 “Laovq nail lavqmal phao joe yaoq. Delgil miv lal nail ngaol” dai, Yeiqsul aqyu juq bhai ge bhiq khi, aqyu juq joe-u phao, delgil phee deedee lai thaq nail ngel-i mail, ovjeel maq he dil tsaol-ail. 7 Yeiqsul mailma-ail gaiq-a nail yaqlaol al gaq Bheiqtuvluv bhai, “Tsaol-aq al gaq neq, Heeqphaq Yeiqsul niil” dai, ge bhiq-a nail ngaol. Yeiqsul niil dai, ge nail bhai Bheiqtuvluv ya gaiq-u phao, aqgaq aqdoi he doi khi ulcuvq bha tsaoq pul-aivq-a nail ngaol. Khul khi mail daiq ngal-aq neq, aivq aqgaq aqdoi maq doi dai, ovjeel joe thailthaiq nail ngaol. 8 Yaqlaol yaoq juq yaoq neq, laovq e khi, delgil teevq bhee phee lai thaq nail ovjeel al keiv bhai, ngaqkha daolbhaq bhai he dol lavq-a nail ngaol. Aqyu juq-i mail ovjeel joe-a nail al neq, ngaqkha daolbhaq nee sivq tsel lail khaiq-ail teevq-eel ngaol. 9 Aqyu juq daolbhaq bhai dov lal-u phao, calgevq-i mail miqjaq sivtovq khi delgil poiv-ai thaq khi khaqmul iqsanl, jiav nail bhai ya moel-a nail ngaol. 10 “Nuljuq-i mail niil aq-il joe miv lavq-a nail delgil thoil, micil oil lavq yaoq” dai, Yeiqsul aqyu juq bhai ge bhiq-a nail ngaol. 11 Silmoq Bheiqtuvluv laovq bhai aol ail khi, delgil maol ma teevq bhee phee lai thaq nail ovjeel al keiv bhai, daolbhaq bhai he dol lavq-a nail ngaol. Delgil maol ma iqsanl mail, teevq yal ngaq tsel hail maol bhee nail ngaol. Delgil aqdai dai-ail phee lai khi ngaol-aoq, ovjeel al keiv maq pav-ail dai, jiav nail ngaol. 12 Yeiqsul aqyu juq bhai, “Aoqhaoq jaq lal yaoq” dai, ge bhiq-a nail ngaol. Yaqlaol juq aivq bhai, “Naol khaq sil gaq” dai, teevq gaq iqsanl maq naldaiq tseq-ail. Khul khi mail dai ngal-aq neq, aivq neq, Heeqphaq Yeiqsul ngaol dai, aqyu juq heeq nia-aoq nail ngaol. 13 Yeiqsul khaqmul oil-aivq khi, aqyu juq bhai bhoil bhiq-a nail ngaol. Delgil poiv-ai thaq nail al iqsanl, gaoq oil-aivq khi bhoil bhiq-a nail ngaol. 14 Yeiqsul doevq kovq lal gaq khi mail, aivq nail aqmaol yaqlaol juq bhai bhi moel-a nail niil pov, hail pov teevq pov ngaol.
“Naol ngaq bhai gaiq-a naol laiq” dai, Yeiqsul Bheiqtuvluv bhai naldaiq nail ganl
15 Aqyu juq jaq gaq daol gaq-u phao, Yeiqsul Silmoq Bheiqtuvluv bhai naldaiq-a nail: “Yaolhaq nail Yaqyov Silmoq-ol, tsaol-aq niil juq ngaq bhai gaiq-a nail nee maqtsil, naol ngaq bhai gaiq-a naol laiq.” Bheiqtuvluv ge nail: “Gaiq-a naol, Heeqphaq-ol. Ngal naoq bhai gaiq-a nail, naol heeq nia nail ngaol.” Yeiqsul aivq bhai ge bhiq-a nail: “Yaol aqyaq bhai bhi jaq bhi daol nail khe-ai, ngaq nail yaol aqyaq juq bhai bhi jaq bhi daol yaoq” dai, ge bhiq-a nail ngaol. 16 Yeiqsul aivq bhai nvq pov teevq pov gaoq naldaiq-a nail: “Yaolhaq nail Yaqyov Silmoq-ol, naol ngaq bhai gaiq-a naol laiq.” Aivq ge nail: “Gaiq-a naol, Heeqphaq-ol. Ngal naoq bhai gaiq-a nail, naol heeq nia nail ngaol.” Yeiqsul aivq bhai ge bhiq-a nail: “Ngaq nail yaol juq bhai heldaiq yaoq” dai, ge bhiq-a nail ngaol. 17 Yeiqsul aivq bhai hail pov teevq pov gaoq naldaiq nail: “Yaolhaq nail Yaqyov Silmoq-ol, naol ngaq bhai gaiq-a naol laiq.” Yeiqsul aivq bhai hail pov naldaiq kel lavq-ao nail ngel-i mail, Bheiqtuvluv neema maq sal-ail, niailhai ge kovq bhiq-a nail ngaol: “Heeqphaq-ol, naol yaoq phaq yaoq-ao nee heeq nia nail ngaol. Ngal naoq bhai khadai gaiq-a nail dai, naol heeq nia nail ngaol.” Yeiqsul aivq bhai ge bhiq-a nail: “Ngaq nail yaol bhai bhi jaq bhi daol yaoq. 18 Ngal naoq bhai maldil dai, ge lavq bhel. Naol yaqkhaq yaquv-ail jiav-u phao, yovqgavq bhai yovqgavq jiovqpavq pavq khi, naol khal ail movq nail bha, ail nail ngaol. Thailhai ngaol-aoq, naol joiqmaoq maoq lee-u phao, naoq nail aqlavq bhai yu nieivq thaiq khi, naol maq ail movq nail bha hel-aivq lavq nail ngaol” dai, ge bhiq-a nail ngaol. 19 Yeiqsul alhai ge nail neq, Miqyail nail seiqleiq khaoqsail bhai yu ya moel dai, yaqhao Bheiqtuvluv khalhai ya sil nail ganl bhai, ge movq nail ngaol. A bhai nee ngal-aq, Yeiqsul Bheiqtuvluv bhai, “Ngaq nail haoqnao tsaothel lavq yaoq” dai, ge bhiq-a nail ngaol.
Yeiqsul nail ganl, salkhil khanq nail gaq nail ganl
20 Bheiqtuvluv haoqnaol naolkovq kovq daiq gai-aivq-u phao, Yeiqsul mailma-ail gaiq-a nail yaqlaol al gaq, aqyu nvq gaq nail haoqnaol bhai tsaothel lavq nail bhai, ya moel-a nail ngaol. Yaqlaol al gaq neq, aoqkivq jaq tavq-u nqkiv Yeiqsul bhai laiqdal khi, “Heeqphaq-ol, naoq bhai gaoq jaq nail gaq neq khaq sil gaq” dai, naldaiq-a nail, al gaq ngaol. 21 Bheiqtuvluv yaqlaol al gaq bhai ya moel-u phao, Yeiqsul bhai niailhai naldaiq nail ngaol: “Heeqphaq-ol, niil gaq thoil-oiq. Aivq nail haqbhoil sivtavq phao khalhai pevq lal nail-aiq” dai, naldaiq-a nail ngaol. 22 Yeiqsul ge nail: “Ngal kovq lee-u phao kev dai, aivq bhai ngal bhi doevq kev movq haq neq, naoq bhai khalhai tavq nail-aiq. Naol neq, ngaq nail haoqnao lal yaoq” dai, aivq bhai ge bhiq-a nail ngaol. 23 Aqivq jaqbheq Khali yaq juq, daoq al daoq ya gaiq-a nail ngel-i mail, yaqlaol al gaq neq, maq yaq sil yaoq-aol dai, aqyu juq noeq nail ngaol. Thailhai ngaol-aoq, yaqlaol al gaq maq ya sil-ail dai, Yeiqsul alhai ge nail maq ngel-ail. “Ngal kovq lee-u kev dai ngal aivq bhai bhi jaol movq haq neq, naoq bhai khalhai tavq nail” dai, Yeiqsul ge nail ngaol. 24 Yaqlaol al gaq neq, ganl niil juq salkhil khanq nail gaq pevq nail nee ovqtavq, gevq dov-a nail gaq iqsanl, pevq nail ngaol. Aivq-i mail ge jel lavq-a nail ganl niil juq neq, maldil tsaq naol dai, ngadao heeq kivq nail ngaol. 25 Yeiqsul-i mail nl-a nail ganl maodai phaq jiav-ail haq nail ngaol. Aivq-i mail khal nl-a nail ganl juq bhai teevq phaq gil-aq teevq phaq dai, gevq dov haq neq, gevq dov-a nail haoqgavq phaldoiq al juq neq, miltsaq kovtavq bhai maq dail lai-ail khul-il dai, ngal noeq nail ngaol.