Naga: Angami Gospel of John JOHAN THUKESHU DIELIEKEVI Kerhei Dieu /1 Sietsenu Dieu tuo zo, mu Dieu Ukepenuopfu ze tuo, mu Dieu Ukepenuopfu zo. Suu sietsenu Ukepe-nuopfu ze tuo zo. Ketuokoyo puo bu chu phre; mu chukelieko puo bu chukemo puorei ju. Kerheiro bo puo nu tuo, mu kerheiro suu themia kezieu zo. Siro kezieu kezei nu va pezie tuoya zo, derei kezeiu puo telie mote. Ukepenuopfu kinu ketsekeshu Johan, ukechu mia puo vor. Suu la themia peteko bu pele-lieketuo la suu bu kezieu zhapu chushutuou di zhapu chu vor. Suu zowe kezieu mo, sirei kezieu zhapu chushutuou di lhou kesier zo. Themia pete va pezietuoukezhu kezie ketho-u kiju vortuou tuo. Puo vor kiju nu lhou siro puo thuo kijuu chushu zorei kiju nu kelhouko thuo puo silie mota zo. Puo puo thuo puo themiako ki vor zo, derei, puo themiako thuo puo zelie mvute. Sirei puo zekelie kheko, puo cha puo za nunu pelekelieko puo suko bu Ukepenuo- pfu nuonuo chutatuoukechu kekuo khashuwate; suko thezie nunu, morei uchu uphou medo nunu, morei themia medo nunu monyu Ukepenuopfu medo nunu penuokelie zo. Siro Dieu uchu uphou mevi vor di ngukemezhie mu ketho bu puo tshupfu di hieko donunu lhou; sidi hie puo Nuopfuliu puo Puo-u kinu puo kevi ngukelie, puo kevi suu mehoho vor zo. Johan rei puo zhapu shie khoui di sie, A hadzu, "A sie vorkezhuu, puo a ki zhate, kekreilamonyu puo a mhodzu tuo zokechu la," isi di puo dze puketuou hauha zo; isishu zo. Kekreilamonyu uko peteko puo ketshu sununu ngukemezhie tsu gei rei ngukemezhie ngu phrelie zokechu la. Thezho-u zowe Mosa dzie nunu keyieshu, sirei ngukemezhie mu ketho-u zowe Jisu Khrista geinu par zokechu la. Uke-penuopfu zowe miapuorei mhakipuorei puo ngu mo; puo Puou meru gei bakezha Nuopfuliu thuo pie mia pesi pengukeshu zo. Johan mia Baptaiz chukezhau dielie Siro Judako Jerusalem nunu zievoko mu Leviko ketsepie Johan ki shu di puo u. No supuo ga? idi ketso-nukeshu ki Johan-a zhapu chukeshu haha. Sukisu puo puphrashu zo, mu pushu mvuta mo zo; puo-a, A Khrista-u mo zo, idi pushu zo. Sitse uko sie, Siro kie? no Elia mo? isi di puo ketso ru puo sie, A stiu mo zo! sita. No siedzekesiu mo? Sitse puo lasie, Mo! sita. Sula uko sie puo ki, Hie bu se vo hie ketsekeshuko ki pushuketuo la pushuchie, No supuo ga? No n thuo n use kipuo uya ga? sita. Puo sie, Siedzekesiu Isaya thiedzu, "Nieko Niepuu cha chu kemezhuliechie!" isi di nhatsa nunu mia puo shie khouiketuo pfeu su a zo; sita. Mu suko Farisiko kinu ketseshu zo. Siro uko puo ketso di sie puo ki, No Khristau mo, mu Elia rei mo, mu siedzekesiu rei mo liro, kidi mia baptaiz chuya ga? sita. Johan lasie uko ki, A dzu nunu mia baptaiz chu tuoyakezha zo: nieko donu nieko puo sikemo puo tha; puo a sie vorzhu mu a puo phikou pha rei phreilie su mo; sita. Mha hakoha Johan-a mia baptaiz kechu Jordan ru khie Bethani nunu chuwata zo. Ukepenuopfu Kuonuo-u Susie nhie puo-a Jisu puo ki vorkezhu ngulie di sie, Harie, kiju kephoumau chu setatieyakezha Ukepe-nuopfu Kuonuou! Khinyhu a, "Mia puo a sie vorzhu, puo a ki zhate, kekreilamonyu puo a mhodzu tuota zokechu la, isi di puo dze kepuu hauha zo. Mu a rei puo silie mota zo; sirei puo pie Israelmia pesishuketuo la, sula a dzu nunu mia baptaiz chu kevor zo; sita. Sizomonyu Johan-a zhapu chu sa di sie, Ruopfuu teigei nu mekhru mhiei ker di puo gei bakelie a-a ngu zo. Mu a zowe puo silie mota zo: sirei dzu nunu mia baptaiz chunu di a ketsekeshuu puo thuo a ki, No Ruopfuu puo gei ker di puo gei bakelie ngukeliu suu Kemesa Ruopfuu nunu mia baptaiz chuketuo-u zo ho; isishu zo. Mu a rei suu ngulie di hauha Ukepenuopfu Nuou zowe ikechu puo zhapu chushuwata zo ho. Jisu siedzi chukelie kerieko Lasie susie nhie Johan-a puo siedzimia kenie ze tha di Jisu phereketuo ngu di sie, Lerei luu Ukepenuo-pfu Kuonuou zo! sita. Sitse pethakelie sunie puo diepu silie di unie Jisu siemedzita. Suki Jisu reipra unie puo siemedzi ketuo ngulie di sie unie ki, Nnie, kedipuo pfuya ga? sita. Sitse unie sie puo ki, Rabi (puo cha Kepethau) no kirapuo baya ga? sisie. Puo unie ki, Vorlie, siro nnie thuo ngulietuo; sita. Sula unie vo di puo kebachu ngulie; sidi unie sunhie puo ze bata; sukisu bavudo ker-u meseta. Johan diepu si di Jisu siemedziketanie mia puo we Simon Pitor siezeu Andria. Puo kenourhei vo puo thuo puo dzurieu Simon pfulie di sie puo ki, Hie Messiah (puo cha Khristau) su ngulie-tewe! sita. Sidi puo puo ze Jisu ki vorlie. Jisu puo meho di sie. No Johan nuou Simon: n use Kefa (puo cha Pitor) chutatuo; sita. Jisu-a Filip mu Nathanael kiekelie Susie nhie Jisu Galil nu vo nyu sie ru, puo Filip ngulie di sie puo use, A siemedziliechie! Siro Filip rei Andria mu Pitor unie runa Betsaidamia zo. Filip Nathanael ngulie di sie puo ki, Hie thiedzu Mosa-a thezho-u nu puo dze thupieketuo mu siedzekesiko rei thupieketuou nguliete, puo Josef nuou Nazaret Jisu zo! sishu. Sitse Nathanael sie puo ki, Nazaret nunu mha kevi par lievi ma? sita. Filip sie puo ki, Vor di meho-chie! sita. Jisu-a Nathanael puo ki vokezhu ngulie di sie puo dze pu di, Lerei, kethera chiekemo Israel kethomia puo! sita. Nathanael sie puo ki, No kikidi a silie ga? sita. Jisu lasie puo ki, Filip n kekie mhodzu, no chiedebo khro keba ki a n nguwe: sita. Nathanael lasie puo ki Rabi, no Ukepenuopfu Nuou zo; no Israel kediu zo! sita. Jisu lasie puo, ki "A chiedebo khronu n nguwe" isi di n ki pukeshu la no pelete ma? No hako ki rei mha zha kechu sakechu kro puo ngutuo; sita. Sizomonyu puo sie puo ki, A nieko ki pu toushutuo, Nieko-a tei khrushu di Themianuou mhogei Ukepenuo-pfu dielieko khokezhu mu kerkezhu ngulietuo; sita. Kana nu nuyiekechu /2 Siro zha se nhie Galil Kana runa nu nuyie puo chu; mu Jisunuo zuo sunu ba. Siro nuyie suu nu mia Jisu mu puo siedziko rei sa kie. Mu khubedzu tsata tse, Jisunuo zuo puo ki, Uko khubedzu jute! sita. Sitse Jisu sie puo ki, Thenupfti, kedipuo chu di no a u siya? A tei tso moluo; sita. Puo zuo sie kituoko ki, Puo nieko ki kehoupuo pu shierei chuliechie; sita. Sukisu Judamia u chu kemesaketuo zho-u la dzu mom kenie kese shuliekezha ketsie dzubou sorou ba. Jisu sie uko ki, Nieko dzu pie dzubouko tshu phreliechie; sita. Sitse uko suko tshu kho puo nyie tso phreshu. Sidi puo uko ki, Chusie nieko thoulie di pie vo thehe suu nu kezhau ki shuchie, sita. Mu uko rei pie vota. Siro thehe suu nu kezhau dzu khubedzu chuketa methakechu ki, kirapuo nu ngulie shikechu si mo, (derei kituo dzu upfu kevorko we si), sukisu puo-a yasa-u kie di sie puo ki, Themia kehoupuorei tseki khubedzu kevi khashu ba di mia krie perelie tse suki kesuo khashutaya: no zowe tsie rei khubedzu kevi khashu ba ze ha! sita. Jisu Galil Kana runa nunu puo zasi kerie hau chushu di puo kekuo pie mia pesi pengushu: mu puo siedziko rei puo pelelie. Susie puo puo zuo mu puo siezeko mu puo siedziko uko keze Kapernaum nu ke; mu uko sunu zha cha ba ba mota. Jisu kerusuoki nu kevo Sukisu Judako chiekevonyi penuota ru Jisu Jeru-salem nu khota Sidi puo kerusuoki nu mia mithu mu tekuo mu paruonuo zekebako mu raka kelikezhako keba ngulie. Sitse puo kero pie mha kevusei chulie di kerusuoki nunu tekuo mu mithuko rei sa, suko peteko whuo phrewa ; mu puo raka likebako raka bielawa, tsiu uko mizhuko rei phou pelawa. Siro puo sie paruonuo zekebako ki, Nieko hanunu hako se tuotaliechie; a Puo ki use lhithoki chu hiechie! sita. Suki puo siedziko-a, A n ki la shurheikechu thuo a chu pejuwatuo, isi di thupiekezhu dieu rukralie. Sitse Judako lasie puo ki, No mha hako chuyakezha kedipuo zasi thapie hie pekieya ga? sita. Jisu lasie uko ki, Nieko kerusuoki hau bietsowaliechie, siro a zha se nu phou lalietuo; sita. Sula Judako sie, Kerusuoki hau chie hiediaasorou chu mu no suu zha se nu phoulietuo le? sita. Sirei puo puo mo rusuokiu dze kepu zo. Sula kesiako donunu puo rheilasiekelie ki puo hau pushu zokechu puo siedziko-a rukralie di uko ketholeshu dieu rei mu Jisu-a pukeshu dieu rei pelelie. Jisu-a tbemia pete ruleikesiu Susie chiekevonyi ki puo Jerusalem nu keba ki thenyikiko puo zasi chukeshuko ngu di themia kekra puo za nunu pelelie. Derei Jisu zowe uko le pevi mo; kekreilamonyu puo themia pete ruli sikechu la; sizo-monyu themia nu kedipuo tuo shikechu puo thuo si zo-kechu la, miapuorei bu puo ki themia dze zhapu chukechu ba ju zo. Jisu Nikodema ze keruchukechu /3 Siro Nikodema ukechu Judamia kezhamia puo Farisiko donu tuoya. Suu pezei ze Jisu ki vor di puo ki, Rabi, no Ukepenuopfu kinu kevor kepethamia puo zokechu hie si bata zo; kekreilamonyu Ukepenuo-pfu puo ze tuo kemosie miapuorei no zasi chuyakezha hako ha chulie kenju zokechu la; sita. Jisu lasie puo use, A n ki pu toushutuo, Penuo kesa la kemosie miapuorei Ukepenuopfu kedi ngukelie ju zo; sita. Nikodema sie puo ki, Themia tsaketa ze kikidi penuo lievi ta? puo puo zuo vanu la le di penuo la lievi ma? sita. Jisu lasie, A n ki pu toushutuo, Dzu mu Ruopfu nunu penuolie kemosie miapuorei Uke-penuopfu kedi nu lekelie ju zo. Uchu nunu kepenuo su uchu zo, mu Ruopfu nunu kepenuo su ruopfu zo. A n ki, "Nieko penuo kesa la morosuo" ikeshu la n ngo hiechie. Tei rukhriese puo thuo puo nei tsatie voya, mu no puo pfe silieya; sirei puo kirapuo nu vorya shi; mu kirapuo votaya shi, no suu siya mo: themia kehoupuorei Ruopfu nunu kepenuo sumhie zo; sita. Nikodema lasie puo ki, Mha suko kikidi chulie ta? sita. Jisu lasie puo ki, No Israelmia kepetha chu tuo di die hako siya mo le? A n ki pu toushutuo. Hie hie kesiko puya, mu hie kenguko zhapu chuya; derei nieko hie zhapu zeya mo. A nieko ki kiju nu dieko pu zorei nieko suko thuo rei peleya mo liro, a nieko ki teigei dieko pu ro, nieko kikidi pelelieta? Siro teigei keba Themianuou teigei nu keker-u zo kemosie miapuo-rei teigei sie chie mo. Tsiu Mosa thiedzu nhatsa nunu tinyhuu pie kesie tuoi, susu tuoi Themianuou rei piesie morosuo zo; kekreilamonyu themia kehoupuo-rei puo pelekelieu kechachie kerhei ngulieketuo la. Siro Ukepenuopfu-a kijuu khriethor zo di puo Nuopfuliu khashu zo, kekreilamonyu themia kehoupuo-rei puo pelekelieu kau juta mo di kechachie kerhei ngulieketuo la. Tsiu kijuu bu jotatuou di Ukepenuo-pfu puo Nuo ketsepie kiju nu shu monyu, kijuu bu puo la kelakelie ngulieketuo la zo. Puo pelekeliemia pejo lielho, pelekemomia, puo Ukepenuopfu Nuopfuliu za nunu pelelie moketa la tsie rei pejo piebata zo. Siro kejo die suusu, kezieu kiju vor zo, mu themia u mha-thoko mezhu mokechu la kezieu ki kezeiu khriekuotake-chuu zo. Themia kehoupuorei keruzhu chuyakezhamia kezieu rutseya mu puo mhathoko jouketa keprei la kezieu ki vorya mo. Sirei themia kehoupuorei ketho chuyakezhamia, puo mhathoko Ukepenuopfu lanu chukelie zoukechu pie pesishulieketuo la Ukepenuopfu ki voya: sita. Johan Jisu zhapukechu Susie Jisu puo siedziko ze Judia kiju nu vor; mu puo uko ze sunu ba di mia baptaiz chu. Siro Johan rei Salim kepenuo Inon nu dzu ba hukechu la mia baptaiz chu ba; mu mia vor di baptaiz chulie. Suki mia Johan tepie kedieki nu shuwa moluo. Siro Johan siedziko Judamia puo ze u kemesa-kechu dze pu keprulita. Mu mia Johan ki vor di sie puo ki, Rabi, Jordan ru lutsa khienu hadzu n ze ketuou no puo zhapukeshuu, harie suu mia baptaiz chu tuote, mu themia peteko puo ki votazhie! sishu. Johan lasie, Teigeinu kha themia tsukeshuu zo kemosie puo mhapuo-rei ngukelie ju. A Khristau mo zo, derei puo mhodzu a ketsekeshu zo", isi di a hadzu pukeshu nieko thuo zo rei a zhapu ba zo. Yasapfu ngukelieu su yasau zo: derei yasau khrietho-u tha di puo pfe runyu kethau yasau die la puo nei phi tha zo: sula a kenei suu tseilieta zo. Puo we zha miemieta morosuo, derei a we chu mie-mieta morosuote; sita. Teigei nu kevor-u peteko mho zo Peso geinu kevor-u peteko mho zo: kiju nu kepar-u kiju nuo zo, mu puo kiju die puya; teigei nu kevor-u peteko mho zo. Puo puo kesi kenguko, suko zhapu chuya, sirei miapuorei puo zhapu zeya mo. Puo zhapu zelieketau Ukepenuopfu-a ketho-u zokechu puo zasi suu vupfulietaya. Kekreilamonyu Ukepenuopfu-a ketsekeshuu Ukepenuopfu dieko puya, mu puo meju mo zo di Ruopfuu khashuyakechu la. Puou Nuou khrieya, mu mha peteko khapie puo dzie nu shuwate. Themia kehoupuorei Nuou pele-kelieu kechachie kerhei ngulie bate; derei themia kehou-puorei Nuou die zekemo-u kerhei ngu lielho, sirei Ukepenuopfu noupfuu puo gei bataya. Jisu Samariamiapfu puo ze keruchukechu /4 Siro Jisu Johan ki mia bu pethakelie chu pekralie di baptaiz chukelie Farisiko silieketa Niepuu-a silie; (sirei Jisu puo thuo mia baptaiz chu monyu puo sie-dziko thuo chukechuu zo;) suki puo Judia khawa di tuose Galil kiju nu la votatuouzhu. Mu puo Samaria kiju pfuthe vo morosuota. Sidi puo tuose thiedzu Jakob lietsa puo pie puo nuo Josef tsukeshuu kepenuo ki Sikar ukechu Samaria runa nadi puo tsolie. Mu sunu Jakob dzukhou ba. Sukisu Jisu cha tuo mezieta di ke dzukhou khieki balie. Suki bavudo sorouu meseki ta. Ru Samariamiapfu puo dzu utuou vor; Jisu sie puo ki, Dzu pie a bu kriechie, sita. Puo-a pethakelieko we suki kechucha khrutuou di runa nadiu nu vota. Sitse Samariapfu puo ki, No Judamia di a Samariamiapfu ki kidi dzu chaya ga? sita. (Kekreilamonyu Judamia Samariamia ze mhapuorei chuya kemo la). Jisu lasie supfu ki, No Ukepenuopfu mhaza, mu n ki, "Dzu pie a bu kriechie!" ikeshuu siyakezha siewe, no puo ki mha cha sietuo, mu puo kerhei dzu khapie n tsutiechui! sita. Thenupfu sie puo ki, Kezhau, no mhapuorei pie thou-kelie ju, siro dzukhou rei sou: siro no kirapuo nu kerhei dzu ngulietuo ga? No dzukhou hau hie ketsu hie puo Jakob ki zha ma? puo puo thuo rei mu puo nuonuoko rei mu puo riko rei thiedzu krie vor zo! sita. Jisu lasie puo ki, themia kehoupuorei dzu hau kekriemia terhu latatuo: sirei themia kehoupuorei a dzu kha puo tsuketuou kekriemia mhakipuorei terhuta lielho; sizo-monyu a dzu kha puo tsuketuou puo nunu dzuluo ruluo kepar dzukhou puo chu di vo kechachie kerhei tsotuo, sita. Thenupfu sie puo ki, Kezhau, a bu terhu molie-ketuo la rei mu tuo ha thechie nu vor dzu utuo molie-ketuo la no dzu suu khapie a tsuchie! sita. Jisu sie puo ki, No tuo vo di n nupfu kie ze hanu vorliechie; sita. Thenupfu lasie puo ki, A nupfu ju; sita. Jisu sie puo ki, No "A nupfu ju" isikechu no pu toushu zo: n nupfu pengou nyiwate; mu no tsie puo ze kebau n nupfu mo zo; no die hau ketho pushu zo; sita. Thenupfu sie puo ki, Kezhau, no siedzekesimia zokechu a le bate. Hie puonuoko thiedzu kijuthou ha geinu rusuo tuoya; derei nieko themia bu vo di rusuo kezhu Jerusalem nu thechu ba usiya; sita. Jisu sie puo ki, Thenupfu, a die pele tuochie, zopuo nieko kijuthou hau geinu morei Jerusalem nunu rei Puou rusuo motaketuo tei puo vortazhie. Nieko we puo rusuoyakezhau siya mo; hie we rusuoyakezhau si di rusuoya; kekreilamonyu Judamia kinu kelakelie par bata zokechu la. Sirei ketho chu di rusuokezhako ruopfu mu ketho nunu Puou rusuoketuo tei vorzhie, mu tsie rei vor bate; kekreilamonyu Puo mia bu sidi puo kerusuo-mia chutuou di pfu tuoya zokechu la. Ukepenuopfu su ruopfu zo: mu puo rusuokezhamia ruopfu mu ketho nunu rusuo moro suo; sita. Thenupfu sie puo ki, Messiah, Khrista ukezhau, vortuouzhukechu a si bate; puo vor ro, mha peteko pupie uko kietuo; sita. Jisu sie puo ki, A n ze keruchukethau suu zo! sita. Si keba nu puo-a pethakelieko vor di puo thenu-miapfu puo ze keruchu keba ngu di uko ngota: derei miapuorei. No kedipuo si nyu di ga? morei, No kidi puo ze keruchu ba ga? isi chie mo. Suki thenupfu puo lipfu khawa di tuo runa nadiu nu vo di themiako ki, Nieko par mia puo mehochie! puo a chukewako pie a ki pu phreshu zo! Puo Khristau zo mo kishi! sita. Uko runa nadi sununu tuose puo ki prazhu. Sukisu pethakelieko Jisu ki cha di sie, Rabi, mha chuliechie sita Sirei puo sie uko ki, A-a nieko sikemo kechucha puo ba; sita. Sula pethakelieko sie huonie-huo use, Huomia kechucha huo se vo puo tsu ma? sita. Jisu sie uko ki, A kechucha-a a ketsekeshuu nei chutuoukechu mu puo mhatho chu tseishutuoukechuu zo. Nieko-a Lieyie tei vortaketuo khru dia ba saluo, isiya mo ma? harie a nieko ki pushutuo nieko tosie lieko mehoshu phichie; tsie rei suko krapie relie rei vi zhute. Reyakezhamia u zhakhra ngulieya, mu puo si pfu kengupie kechachie kerhei nu shupie zhulieya; sidi tsia vayakezhamia mu reyakezhamia keze u nei batuo. Siro mia puo tsia vaya mu kekreimia puo reya, isike-zha dieu su lesiekechu ketho zo. A nieko ketsepie nieko kemezhieshu kemora renushuya; mia kekreimia kemezhieshu, mu nieko bu suko mhathoko nu kele zo: sita. Siro thenu supfu, "A chukewako puo a ki pu phreshu zo," isi di zhapu chukeshu la runa nadi suu nu Samariamia kekra Jisu pelelie. Sidi Samariako puo ki vorkelie ki puo bu uko ze balienu di puo ki chata; mu puo sunu zha kenie bata. Siro puo die lanu themia kekra pele salie. Sidi uko sie thenupfu ki, Hie tsie we n diepu rubei la pele zo mote: kekreilamonyu hie hie thuo hie nyie pie runyuliete, mu hauha kiju kelakelieu kethota zokechu silieketa la; sita. Jisu pehumia puo nuo chu keshurhokeshu Siro zha sunie sie puo sununu tuose Galil nu vota. Siedzekesimia puo thuo puo rakhe nu zowe therhu juukechu Jisu puo thuo pushu ze ru. Sidi puo tuo Galil nu vorkelie ki puo Jerusalem nu thenyi ki mha chukeshu kheko ngukelie la Galilko puo zelie: kekreilamonyu uko rei thenyi sunu khokechu la. Siro puo dzu pie khubedzu chukeshu Galil Kana runa nu la vorlie. Sukisu Kapernaum nu pehumia puo puo nuo thepfunuomia puo mhachuzhu. Puo Jisu use Judia kiju nunu tuo Galil nu vorketa sikelie ki puo Jisu ki vo di puo bu ke puo nuou chu keshurhoshunu di chata, puo nuo sia tevutatuouzhuketala. Suki Jisu puo ki, Nieko we zasiko mu ungo mhathoko ngu zo kemosie mhakipuorei pele nyuya mo zo; sita. Pehu suu sie puo ki, Kezhau, no a nuo siaketa mhodzu ker zoyi! sita. Jisu sie puo ki, No tuo votalie; n nuo rheilie zotuo; sishu. Themia suu Jisu puo ki kepu dieu pele di tuo zo vota. Siro puo kekezhu ki puo kituoko vor puo selie di sie puo nuo rhei bata usishu. Sitse puo uko ki puo kedimesekinu vi chie sierta ga? ikechu ketso ru uko puo ki, Ndu bavudo thenieu meseki puo ruki mote; sita. Sitse puo puou Jisu sumesetouki puo ki, "N nuo rheilietuo" isishu zokechu silie di puo rei mu puo kinuko pete rei pelelieta. Suu va su Jisu Judia kiju nunu Galil nu vor di zasi chu lakeshu kenieu. Ruzie khieki nu shurhokelieu /5