Sango Ka Aguñ
1 Kapyojaho aguñ hii dotii, ho aguñ Pinii agiñho dotii, ho aguñ hii Pinii tii. 2 Mo kapyo jaho hokii Pinii agiñho dutii; 3 kapane drih hii mohkokiila putii, ho mo nyima pa hang pumatii puto laka donii hiiniiñ heho. 4 Mohko sango hii dotii, ho sangohii miyu atañka hutoh. 5 Hutoh hii kamomi byohutii, ho kamohii hiimi domiñ lamatii. 6 Miyu kone dutii Pinii kokii ka kiiniñnii, hiika armyañ Jon hiila. 7 Mo pyakodupa ahtii, hutohmi haki bidupa hiila, niimpalukoda miilañjami henje kiine dupa mohkokiila. 8 Mo hutoh bomatii, hojalo hutohmi haki bidupa hiila ahtii. 9 Jijeka hutoh miyu kone abi mika byohu nii hii dohadolo ho ahtii. 10 Mo dohadolo ho dutii, ho dohadolo mi putii mohmi pugi nambiila, hojalo dohadolo hii mohmi chimatii. 11 Mo mohka atoh ude ho ahtii, ho mohka atoh miyuatañ mohmi larii nyama tii. 12 Hojalo hikha hutiina mohmi lariitiinii, hutiina mohka armyañ mi tajetiinii, mo harchichike mi bitii Pinii ka oho pa lyidopa; 13 hutiina buko tiinii, ai loma malo asiialyo ka henko homa malo miyu ka henko homa, hojalo Pinii kokiila. 14 Ho Aguñ hii asiialyo pa lyitii ho ngunuka punkoho duhatii, aroh-aya la jije poteje giitola; ngunu ko mohka tatukatu hii do, hiila ka tatu katu mo Aba ka hiiro kone kontii. 15 (Jon mohpa haki lyibitii, ho gyutii, “Siikasi hiike humina ngo lutonii, ‘Mo huna ngiika hiiba ho ahdonii ngiimi kaye yake, niimpalukoda mo ngiimi kapyo yatii.’”) 16 Ho mohka poteje doniiñ hokii ngunu miilañru lariitii, aroh-aya ka hahoho aroh-aya. 17 Niimpalukoda dapo hii Mose kokiila bitii; aroh-aya la jije hii Jisu Kristo kokiila ahtii. 18 Kone hetḛr Pinii mi kapama; Oho kontiisii, huna Aba ka harbiilapyo ho dunii, mo mohmi chindopa miitii.
Jon Baptisma Binii Boka Puyu
19 Ho siikasi Jon ka pyakonii, Jew atañka nyibu atañ la Lebait atañ Jerusalem hokii la mohmi taka kiine dupa ka kiiniñ lyiho, “No huyape hiila?” 20 Mo khakotii, mo amuh matii, hojalo khakotii, “Ngo Kristo make.” 21 Ho mohlu mohmi takatii, “Hokoda nii? No Elija ha?” “No nyibuhenii ha?” Mo lutii, “Ma ngoma.” “No nyibuhenii ha?” mohlu tahiitii. mo lusitii, “Ma.” 22 Mohlu mohmi lutii hokoda, “Hu no? Ngunumi lukonaniiñ bipe ngunu mika kiiniñbopa. No atoh mi nii hiila lusudu?” 23 Mo lutii, “Ngo jabyo daka gyula donii kone hiike, Attoh ka lembo mi parda pa miibi to, nyibuhenii Aijaya ka lunii chulipa.” 24 Siisi mohlu Parisi atañ kokii kiiniñtii. 25 Mohlu mohmi takatii, “Hokoda niimpa no baptisma bidu, no matiirḛ Kristo makoda, malo Elija makoda, malo nyibuhenii makoda?” 26 Jon mohlumi lusitii, “Ngo yasie lo baptisma bidu; hojalo nunuka punkoho kone da humina nunu chimanii, 27 hii ngiika hiiba hoka ahsabo, ngo mohka luku rappo nanii mika tapya binii patḛr lyima.” 28 Siikasi Betany ho lyitii Jordan ka pacheho, nohna Jon baptisma bitiinii.
Pinii Ka Subuñ Atu
29 Allo lohe yaho mo Jisu mi mohkii dalyi ahla dopa kappatii, ho lutii, kato, Pinii ka subuñ atu, huna dohadolo ka ingyamiigya niimi bapa bidonii! 30 Siikasi hiike humina ngo lutonii, Ngiika hiiba ho miyu kone ahkiñdo ngiimika kaye yanii, niimpalukoda mo ngiimika kapyo yanii. 31 Ngotiirḛ ya mohmi kachiñma; hojalo ngo sipa ahdu yasie lo baptisma bidupa hiila, niimpalukoda mohmi Isrel mi kakiñ kiine dupa. 32 Ho Jon haki pa lyibitii, “Ngo Yajiyallo mi yapuñ hokii pakoo chuli todo pa kapato, ho hiikahii mohko duhane. 33 Ngotiirḛ mohmi chima; hojalo mo huna ngiimi kiiniñ tiinii yasie lo baptisma binii pa ngiimi lune, ‘Huko hona no Yajiyallo mi todopa kappa talyinii ho duhadopa, hiike Darii Yajiyallo lo baptisma bikiñ donii.’ 34 Ho ngo kappatii ho haki pa lyilyi siikasi Pinii ka Oho ke hiila.”
Jisu Ka Kapyoja Henjeajiñ
35 Allo lohe yaho hiira Jon mohka henjeajiñ anye ka agiñho datii; 36 ho mo Jisu mi kaditii mo ila dokele, ho lutii, “Kato, Pinii ka subuñ atu!” 37 Henjeajiñ anye mohka siika luniiñ siimi tapatii, ho mo anye Jisu mi imbo montii. 38 Jisu mokurtii, ho mo anye mi imbo mondo pa kappatii, ho mo anye mi lutii, “Niinyi nii miidu?” Ho mo anye mohmi lutii, “Tonsḛrbo”, “No no dudu?” 39 Mo mohlumi lutii, “Ahto ho kakato.” Mohlu ahtii ho kappatii nohna mo dutiinii; ho mohlu hiika allo ho mo agiñho dubo montii, niimpalukoda hiika hii alyiñdalyi ka gunta tahepa lyitii. 40 Hiika anye Jon ka luniiñ mika tapabo konehii, ho mohmika imbo moniibo, Andrew tii, Saimon Pitar ka anu. 41 Mo kapyopa mohka anu Saimon mi kappatii, ho mohmi lutii, “Ngunu Masiah mi kappa tiike” (siika luniiñsi Kristo mi). 42 Mo mohmi Jisu ko ahgii bitii. Jisu mohmi kaditii, ho lutii, “No Saimon, Jon ka oho ah? Niimi Cepas hiila myakiñ doke”
Jisu Pilip La Natanel Nyimi Gyotii
43 Allo lohe yaho Jisu Galili ho inchi hiila hentii. Ho mo Pilip mi kappatii ho mohmi lutii, “Ngiimi imbo monto.” 44 Siisi Pilip Betsaida hokiitii, Andrew la Pitar nyika citi hokii. 45 Pilip Natanel mi kappatii, ho mohmi lutii, “Ngunu mohmi kappatii humina Mose ketiinii dapo ka khetaho ho nyibuhenii tiirḛ ketiinii, Nazaret daka Jisu, Josep ka oho.” 46 Natanel mohmi lutii, “Nazaret hokii hang aya drih lila kendo peha?” Pilip mohmi lutii, “Ahto ho kakato.” 47 Jisu Natanel mi mohko ahla dopa kappatii, ho mohmi lutii, “Kato, jije Isrel miyu kone, hukohona gollumisu giimanii!” 48 Natanel mohmi lutii, “Niihtañ pa no ngiimi kala du?” Jisu mohmi lusitii, “Philip ka niimi gyoma rampa, niika taro sannii aruñhoka daho ho, Ngo niimi kapato.” 49 Natanel mohmi lusitii, “Tonsḛrbo, no Pinii ka Oho! No Isrel ka Radde!” 50 Jisu mohmi lusitii, “Niimpa ngo niimi lutii, Ngo niimi taro sannii ka aruñho kapato hiila, no taje doha? No siika siimi kayeya drih atañmi kappa kendoke.” 51 Ho mo mohmi lutii, “Jijeloda, jijeloda, ngo niimi lukoso, no dariiganda mi yako dopa kappa kendoke, ho Pinii ka miidopopi mi tola ho chala miyu ka Oho ka hahoho.”
Kana Hoka Mihie Millo Lasunii
1 Allo lohiñ niiho mihie millo lasutii Galili daka Kana ho, ho Jisu ka annii hiiko datii; 2 Jisu mitrḛ mihie millo lasu koho gyotii, mohka henjeajiñ atañ agiñho. 3 Roalha tanja kukele, Jisu ka annii mohmi lutii, “Mohlukii roalha nyiku mayuke.” 4 Ho Jisu mohmi lutii, “Annii akha si, ngiimi niipa nii miitote hiila? Ngiika myodu siisi ahma ranke.” 5 Mohka annii miira atañmi lutii, “Mo nii hiila luchi hiimi miito.” 6 Siisi hiiko yakhañ khañkhe dutii, Jew atañka darii miiju miina naniiñpa, yakhañ khange abi nyikhañhe malo hikhañhe harpo kane ahnii. 7 Jisu mohlumi lutii, “Yakhañ atañmi yasie hilii to.” Ho mohlu alañ lohepa poteje hiliitii. 8 Mo mohlumi lutii, “Siisi hokii iche suliñto, ho hiimi butiiapiñ honiiñmika kagii bomi bito.” Hopa mohlu hokii suliñtii. 9 Butiiapiñ honiiñ mika kagiibo yasie ka roalha lyiku niimi tanka lala, ho mo chimatii si nohkii ahtii hiila (miira yasie suliñbo chinsu tii), butiiapiñ honiiñ mika kagiibo mabo mi gyoliitii 10 ho mohmi lutii, “Miyu kone abi kapyopa aya miya bipyodu; ho miyu atañka tangii lyikuho, ho sarsii roalha mi bidu; hojalo no roalha tampyo yamiya siisi lohepa atii budunii.” 11 Siikasi, mohka miipyoja kagiñnanii miiniiñ, Jisu Galili ka Kana ho miitii, ho mohka tatu katu mi kakiñtii; ho mohka henjeajiñ atañ mohmi henje nyatii. 12 Siika hiiba ho mo Keparnam ho totii, mohka annii ho mohka anubarmii ho mohka henjeajiñ agiñho; ho hiiko mohlu allo lonye lohiñ hepa dutii.
Jisu Piniiude Ho Intii
13 Jew atañka impobiiniiñ dituñ tunii tiiku, ho Jisu Jerusalem ho chatii. 14 Piniiude ho mo siihhiibo ho subuñ ho pakoo atañmi pyula doniimi kappatii, ho tiicko bihii bikhe siiniiñ mi mohluka kiiri miiko ho. 15 Ho lopalo hibii dola, mo hikha rumi mompa limbiido, siibuñ agiñho siihhiibo miilañmi, piniiude ka agoho; ho tiicko bihii bikhe siila donii posa atañmi kumpa tii ho mohluka miitananii atañmi jopatii. 16 Ho mo hutiina pakoo atañmi pyula dotiinii lukotii, “Siika drih atañmi jopa limbiihe; nunu ngiika Aba ka ude mi kiiri miiko ude pa biila kemake.” 17 Mohka henjeajiñ atañ hempatii hiila ketola done hiila, “Niika ude paka henahii ngiimi lyamu chikañ lyabiilyi.” 18 Jew atañ ho mohmi lutii, Nii kagi nanii no ngunumi kakiñpa siimi miibii dola? 19 Jisu mohlumi lusitii, “Pyadu loto siika piniiude mi, ho allo lohiñ heho ngo siimi pencha talyike,” 20 Jew atañ ho lutii, Siika piniiude mi pendupa alyañpiilye la nyañkhe anyañ nyane, ho no siimi allo lohiñ heho pencha lakiñdo hiilaha? 21 Hojalo mo mohka apoka piniiude mi lutii. 22 Mohka shiiniiñ hokiika turilyikuho, mohka henjeajiñ atañ hempatii mo siika siimi lune hiila; ho mohlu piniipota mi tajetii ho Jisu ka aguñ luniiñ atañmi.
Jisu ka Miyu Henju Mika Chiniiñ
23 Siisi mo Jerusalem ho Impobiiniiñ dituñ butiiapiñ diiko dakele, abuje henje nyatii mohka armyañ mi mohlu kagiñnanii atañ mohka miiniiñmi kappa lala; 24 hojalo Jisu mo atohmi mohluka henjeho atii matii, 25 niimpalukoda mo hikha miyu atañmi chintii ho kone mitrḛ miyukii dalyi hokii hakipa anna matii; niimpalukoda mo atoh loda chintii miyu ko nii giido hiila.
Jisu la Nikodemas nyi
1 Siisi hiiko Parisi atañ hokii miyu kone dutii, Nikodemas hiila, Jew atañ mika sangiinii. 2 Siika miyu si Jisu ko ahtii ayoh ho mohmi lutii, “Tonsḛrbo, ngunu chindo no tonsḛrbo, Pinii kokii ahnii hiila; niimpalukoda kone hetḛr niika kagiñnanii miiniiñ hiilyañ miila kema, nii dahepa Pinii mo agiñho dabo montema.” 3 Jisu mohmi lusitii, “Jijeloda, jijeloda, ngo niimi lukoso, nii dahepa konehii buti kotema, mo Pinii ka raddeganda mi kappa kema.” 4 Nikodemas mohmi lutii, “Niihtañpa miyu hii buti kola kendo mo akha dokula? Mo ronye niipa annii ka erre ho ahla kendo ha ho buti kodupa? 5 Jisu lusitii, Jijeloda, jijeloda, ngo niimi lukoso, nii dahepa kone yasie la yajiyallo lo buko tama, mo Pinii ka raddeganda ho ahla kema. 6 Niihna asiialyo lo buko tiinii hii asiialyo ke, ho niihna yajiyallo lo buko tiinii hii yajiyallo ke. 7 Ngiika niimi ka luniiñmi kapuñtale yo, ‘No nitipa buti kokiñdo lodake.’ 8 Allyi noh henañdo ho hedu, ho no hiika allyi hekurniimi tapadu, hojalo no chima hii nohkii hehado malo noh hekiñdo hiila; hii chulipa siikasi koneabi ka agiñho lyikiñdo huna yajiyallo lo bukotiinii.” 9 Nikodemas mohmi lutii, “Niihtañ pa si lyila kendo?” 10 Jisu lusitii mohmi, “No Isrel ka tonsḛrbo siiha, hojalo no siimi tachiñ ma ha? 11 Jijeloda, jijeloda, ngo niimi lukoso, ngunu ludu niihmi ngunu chindo, ho hakipa dudu niihmi ngunu kappatii; hojalo no ngunuka pyakoniimi taliima. 12 Ngo matiirḛ niimi kiiddiapiñ ka drih atañmi lukotii ho no tajema, niihtañpa no taje talyi ngo matiirḛ niimi dariiganda ka drih atañmi luko dokoda? 13 Kone hetḛr dariiganda ho chama hojalo mo kontiisii huna dariiganda hokii totiinii, miyu ka Oho. 14 Ho niihtañpa Mose tabumi zabyo ho lyuchatii, hiichuli pa miyu ka Oho mitrḛ lyucha kendo, 15 niimpalukoda hujalo henje talyi hiimi santḛrlamanii sango bidupa.” 16 Niimpalukoda Pinii dohadolo mi ano hela mohka Oho konekontii mi bitii, hujalopa mohmi henje talyi hii lyukiñma hojalo santḛrlamanii sango giikiñdo. 17 Niimpalukoda Pinii Oho mi dohadolo ho kiiniñtii, dohadolo mi khiipa dupa ma, hojalo dohadolo mi lyangur dupa mo kiilo. 18 Huna henje talyinii hiimi khiipa kema; huna henje manii hiimi khiipa tola doku, niimpalukoda mo henje matii Pinii ka Oho kone kontii ka armyañ mi. 19 Ho siika sike ayakacho kaniiñ, hutoh hii dohadolo so ahtii, ho miyuatañ kamo miya hembyo nyada hutoh mi hentola, niimpalukoda mohluka miiniiñ atañ hii diimmah tii. 20 Niimpalukoda kone abi huna diimmah mi miidonii hii hutoh mi kana madu, ho hutoh ho linyama, hiila makoda mohluka miiniiñ atañmi kapa kendola hiila. 21 Hojalo huna jijemi miinya danii hii hutoh ho lindu, niimpalukoda hiimi darii loda kadḛr dopa mohka miiniiñ atañ hii Pinii ka muju ho miido hiila.
Jisu la Jon nyi
22 Siikahiiba ho Jisu la mohka henjeajiñ atañ Judia gandaho intii; hiiko mo mohluka agiñho dutii ho baptisma bikotii. 23 Jon tiirḛ Salim aruñ daka Aenon ho baptisma bitii, niimpalukoda hiiko yasie abuje dotii; ho miyuatañ ahtii ho baptisma bikotii. 24 Niimpalukoda Jon mi siisi pattiih ho tuma tiirañ. 25 Siisi taka risutii Jon ka henjeajiñ la Jew nyika punkoho dariimiiniiñ piigo mi. 26 Ho mohlu Jon ko ahtii, ho mohmi lutii, “Tonsḛrbo, niika agiñ hoka Jordan pache dalyi hoka daniibo, hupana no haki bine nii, sike mo, baptisma bila, ho miilañru mo agiñho ilyi.” 27 Jon lusitii, “Kone hetḛr hang pala kema niihna mohmi dariiganda hokii bitiinii hiimi apalala. 28 Nunu atoh atoh ngiipa haki pa dula lala, hiila ngo luto, ngo Kristo make, hojalo ngiimi mohmi kapyo yapa kiiniñtii. 29 Hii hukiina mihie dunii hiike millo; millo ka ajiñ, huna dabo dunii ho mohmi tapa donii, hempḛr hempyodu milo ka aguñmi tapa lyiho; hopa siika ngiika hempyo hii siisi pote dokuke. 30 Mo kahe yaya kendo, hojalo ngo atu yaya kendo.”
Hii Huna Dariiganda hokii Ahdonii
31 Hii huna ayoh hokii ahdonii hii miilañ jami ayoh jake; hii huna kiiddiapiñ hokiinii hii kiiddiapiñ kiisuke, ho mo kiiddiapiñ kiimi sii lusudunii; hii huna dariiganda hokii ahdonii miilañjami ayoh jake. 32 Mo hakipa du nii mina mo kappa tiinii ho tapa tiinii, hojalo kone hetḛr mohka pyakoniimi talii matii; 33 huna mohka pyakoniimi talii donii mohko hiimi miiho tola doku, Pinii jije hiila. 34 Niimpalukoda humina Pinii kiiniñ tiinii Pinii aguñ luliñla doku, niimpalukoda khuka biidola mo yajiyallo mi bimake; 35 Aba hii Oho mi hendo, ho kapane drih mi mohka alah ho bitii. 36 Hii huna Oho mi henje donii hiiko santḛrlamanii sango hii doku; hii huna Oho ka luniiñmi tamanii hii sango mi kappa kema, hojalo Pinii ka hadii hii mohko dokañ doku.
Jisu la Samaritan Annii akha nyi
1 Siisi Attoh Parisi atañ Jisu Jon mi abuyapa baptisma ho henjeajiñ miibiido hiila tapabiido hiila chila lala 2 (biniiñ hii Jisu mo loda baptisma bimasii, hojalo mohka henjeajiñ atañ sii), 3 mo Judia mi apatela ho hiira Galili ho impa intii. 4 Mo Samaria mi impo biikiñ tii. 5 Hopa mo Samaria citi ho ahtii, Saichar luniiñ ho, Jakob ka mohka oho Josep mika aji biniiñ aruñho. 6 Jakob ka sukuñ ho dotii, ho Jisu tiirḛ ho datii, rengetiiku niimpalukoda mo myodi bola dotii, sukuñ ka aruñho dutii. Hiika hii alloka gunta talyañlenye hepa lyitiiku. 7 Hiiko Samaria annii akha kone lintii yasie haliñpa. Jisu mohmi lutii, “Ngiimi yasie gonge tanke nempe.” 8 Niimpalukoda mohka henjeajiñ atañ citi ho diigo riite pa intii. 9 Samarita annii akha mohmi lutii, “Niihtañ pa si, no Jew, ngiiko hokii yasie tandu pa kudunii, Samaria annii akha kokii?” Niimpalukoda Jew atañ la Samaritan atañ hang bihii bikhe siima. 10 Jisu mohmi lutii, No matiirḛ Pinii ka ahmiñayiñ mi chintii koda, ho huna si niimi lula donii hiila, ngiimi yasie gonge bipe, no ya mohmi kududo, ho mo niimi turnii yasie bitiido 11 Annii akha mohmi lutii, Tonsḛrbo, no hang hana naniiñ biimapa, ho sukuñ si urañdo; nohkii no hiika turnii yasie mi hakiñdo? 12 No ngunuka aba Jakob mi kahe ya ehna, huna ngunumi sukuñ bitiinii, ho mo attoh tiirḛ sokii tantii, ho mohka oho atañ tiirḛ, ho mohka siihsubu miilañ hii? 13 Jisu mohmi lutii, “Kone abi huna siika yasie sokii tandonii hiira hangḛr kendo, 14 hojalo hujalopa ngiika yasie biniiñ hokii tanchi hii ronge hetḛr hangḛr keñku ma, ngiika yasie biniiñ hii mohko shoo huliñnii yasie pa lyikiñdo santḛrlamanii sango pa huliñla dokiñdo.” 15 Annii akha mohmi lutii, “Tonsḛrbo, ngiimi siika yasie mi bipe, ngiimi hangḛr kuma dopa, malo sotrḛ yasie ha kuma dopa.” 16 Jisu mohmi lutii, “Ingeku, niika millo mi gyobii, ho so ahgii.” 17 Annii akha mohmi lusitii, “Ngiikii millo nyima.” Jisu mohmi lutii, “No ludiko ludo, ‘ngiikii millo nyima hiila’; 18 niimpalukoda niikii millo yangohe dutii, ho hii huka agiñho no siisi du hii niika millo ma; siika niika luniiñ jijeloda.” 19 Annii akha mohmi lutii, “Tonsḛrbo, ngo chimbiido no nyibuhenii hiila. 20 Ngunu ka aba atañ siika putoo ho heriitii; ho no luda Jerusalem sike lengo nohna miyuatañ heriikendo nii hiila.” 21 Jisu mohmi lutii, “Annii akha, ngiimi henjeto, myodu ahlyidiike niidana siika putoo malo Jerusalem hotiirḛ nunu Aba mi herii keñkumanii. 22 Nunu heriida nii mina nunu chima nii; ngunu heriidu nii mina ngunu chindonii, niimpalukoda sangopyako hii Jew atañ kokii siike. 23 Hojalo myodu hii ahlyi ke, ho siisi ke, niidana jije heriinii atañ herii kendonii Aba mi yajiyallo ho jije lo, niimpalukoda Aba sitañ mohmika heriiniike medonii. 24 Pinii hii yajiyallo ke, ho huna mohmi herii donii, yajiyallo ho jije lo herii kendo lodake.” 25 Annii akha mohmi lutii, “Ngo chindo Masiah ahkiñdo hiila (humi na Kristo hiila gyokiñ donii); mohka ahlyi ho, mo hikha drih atañmi ngunumi kakiñ kendo.” 26 Jisu mohmi lutii, “Ngo niimika lurii bo ngo hiinyañ.” 27 Hojaho mohka henjeajiñ atañ ahtiiku. Mohlu hemur nyatii annii akha mika mohka lurii laka daniimi, hojalo konetiirḛ hang lumatii, “Nii hiila no hendo?” malo, “Niimpa no mohmi lurii du hiila?” 28 Hopa annii akha mohka yasie pinta mi apatii, ho citi ho intiiku, ho miyu atañmi lutii, 29 “Ahto, kato miyu kone, ngiika hikha miiniiñ mika luko bomi. Si Kristo kendo peha?” 30 Mohlu citi ka agoho lintii ho mohko ahnyatii. 31 Hiikamyodu ho henjeajiñ atañ mohmi yartii, lubiidola, “Tonsḛrbo, diito.” 32 Hojalo mo mohlumi lutii, “Ngiiko diigo diidu pa doke nii mina nunu chimanii.” 33 Hopa henjeajiñ atañ kone anyañ mi lusu nyatii, “Mi mohmi diigo biilii bitii yuha?” 34 Jisu mohlumi lutii, Ngiika diigo hii mohka heniiñ mika miiniiñ ke huna ngiimi kiiniñ tiinii, ho mohka miigo mika miipe binii. 35 Nunu lumasa ehna, Piilo barpe dorañ hiila, ho amoo pidu ahkiñ do hiila? Ngo nunumi lukoso, nunuka amee kachato, ho kato niihtañpa aji atañsi puloo nyado ku amoo pidu kupa. 36 Hii huna pidonii ajho injomi larii kendo, ho santḛrlamanii sango ka ahee mi tukuñ biikiñdo, niimpalukoda liloniila ho pinii nyi hempyo hehiñdupa hiila. 37 Niimpalukoda nitiñ tindiko tintii, “Kone lilodu ho koneya pidu. 38 Ngo nunumi kiiniñ biilyi piniipa nii mina nunu miimanii; khiibe miitii, ho nunu mohluka miiko hoke ahdonii.” 39 Abuje citi hoka Samaritan atañ mohmi henje nyatii annii akha ka pyako kopa, “Mo ngiimi lukone hikha ngiika miiniiñmi.” 40 Hopa Samaritan atañ mohko ahkele, mohlu mohmi mohluka agiñho duto lubiido; ho mo hiiko allo lonye dutii. 41 Ho hempḛr abuje henje nyatii mohka luniiñ kiipa. 42 Mohlu annii akha mi lutii, “Siikasi niika luko hopa kontii ngunu henje make, niimpalukoda ngunu miilañ attohpa tapatii, ho ngunu chindo siikasi jijeloda dohadolo mika Lyangur nii hiila.”
Jisu Sabii ka Oho mi Miipya Biido
43 Allo lonye dala la mo Galili ho impa intii. 44 Niimpalukoda Jisu mo attoh tiirḛ lusutii nyibuhenii mi attoh gandaho khiima hiila. 45 Hopa mo Galili ho ahchi biikele, Galili atañ mohmi karii katañtii, Jerusalem butii apiñ diiko hoka hikha miiniiñmi kappa tiinii, niimpalukoda mohlutrḛ butiiapiñ diikoho intii. 46 Hopa mo hiira Galili daka Kana ho ahtii, nohna mo yasie mi roalha pa miitiinii. Ho Keparnam ho sabii kone dutii huka oho na achihtiinii. 47 Mo Jisu Galili hokii Judia ho ahdo hiila tapa lala, mo intii ho mohmi yarbiido ahla ho mohka oho mi miipya tope hiila, niimpalukoda mo shiipa miila dotiiku. 48 Hopa Jisu mohmi lutii, “Nii dahepa nunu kagiñnanii la kahotamo kappa tama nunu henje kemake.” 49 Sabii mohmi lutii, “Tonsḛrbo, ngiika oho ka shiima rampa ahto.” 50 Jisu mohmi lutii, “Inge; niika oho sankiñ doke.” Hiika miyu Jisu ka mohmika luniiñmi henjetii ho mohka lembo ho intiiku. 51 Mo tola doku kiile, mohka miira atañ mohmi kappa lala ho mohmi lukotii niika oho hempyo doku hiila. 52 Hopa mo mohlumi takatii nii myodu hona hempyo rinenii, ho mohlu mohmi lutii, biilyo alyiñdalyi ka gunta tahe niiho mohka doli achih hempyo neku. 53 Aba chintii hiija hiika gunta hii Jisu ka mohmika luniiñ, “Niika oho sankiñ doke hiila”; ho mo henjetii, ho hikha mohka ude uru atañ. 54 Siikasi ronye niipa Jisu ka kagiñnanii miiniiñ mohka Judia hokiila Galili hoka ahlyi ho.
Siipḛr Hoka Miipya niiñ
1 Hiikahiibaho hiiko Jew atañka dituñ dotii, ho Jisu Jerusalem ho chatii. 2 Siisi Jerusalem ho siipḛr kone dotii Siibuñ Hagya luniiñ aruñho, Hebrew ho hiimi Betzata ludu, hiika hii liirii liingohe giitii. 3 Hiiko abuje miyu achihnii dotii, micha, liicha, lukuñlamunii. 4 niimpalukoda Attoh ka miidopopi myodu ho siipḛr ho totii, ho yasie mi abyu dopa miitii, hujalopa kapyo japa daha talyi yasie ka abyu dalyi niihtañ achih mo giido jalo miipya kodatii. 5 Miyu kone hiiko dotii, hii hikhañhela nyampinye achih laka donii. 6 Mohmi Jisu kappa lala ho chintii mo hiiko ho anyañ abuje giila dotii hiila, mo mohmi lutii, “No miipya kona doha?” 7 Achih miyu mohmi lusitii, “Tonsḛrbo, ngiikii mi nyima ngiimika jolo niipa siipḛr ho yasie ka abyu chalyiho, ho ngo topa miihañ milo koneya ngiimi kapyoyapa togodo.” 8 Jisu mohmi lutii, “Gurito, niika pepu mi khebii kula, ho ingeku.” 9 Ho ohepada miyu hii hempyo datii, ho mo pepu mi khebii kula ho intiiku. Siisi hiika allo hii dumoalo tii. 10 Hopa Jew atañ miyu mi lutii hukiina hempyo tiikunii, “Siikasi dumoalo, siikasi miiju make niika pepu mika khebii niisi.” 11 Hojalo mo mohlumi lusitii, “Ngiimi ka miipya bo miyu ngiimi lune, ‘Niika pepu mi khebii kula ho ingeku.’” 12 Mohlu mohmi takatii, “Huna hiika miyu niimi ka, ‘Pepu mi khebii kula, ho ingeku luniibo’?” 13 Siisi hiika miyu humina miipya tiinii chimatii hu hiika hii hiila, niimpalukoda Jisu insa giitiiku hiiko miyuabuje dalyinii. 14 Dahidamo lala, Jisu mohmi piniiude ho kappa biido, ho mohmi lutii, “Kato, no aya dokuke! Ho hiira ingyamiigya kulya yo, hiila makoda ayamaya pa niiko lyiko diike.” 15 Hiika miyu intiiku ho Jew atañmi lukotii hiika hii Jisu ke mohmika miipya bo. 16 Ho hiipa Jew atañ Jisu mi miihimiire tii, niimpalukoda mo siika simi dumoalo ho miitii. 17 Hojalo Jisu mohlumi lusitii, “Ngiika Aba siisijalo miilado, ho ngo miiladu.” 18 Siika sipa Jew atañ uroyaya metii mohmi mendu pa hiila, niimpalukoda mo dumoalo mi kontii muduloma, hiikahaho ho Pinii mi mohka Aba hiila lubiidola hiila, attohmi Pinii kalyañ miisuda.
Oho ka Otority
19 Jisu mohlumi lutii, “Jijeloda, jijeloda, ngo nunumi lukosa, Oho mo attoh pa hang miila kema, hojalo Aba niihna miidonii hiimi kala lala kontiisii; niimpalukoda niijalo mo miido, hiimisii Oho miisu danii hii chulipa. 20 Niimpalukoda Aba Oho mi hendo, ho mohmi kakiñda hikha mohka miiniiñmi; ho kayeya miigo atañmi mo mohmi kakiñ kendo, nunumi kapuñtale dopa. 21 Niimpalukoda niihtañpa Aba shiinii mi turdopa miido ho mohlumi sango bido, hiichulipa Oho tiirḛ sango bido humina mo bina donii. 22 Aba kone mitrḛ haliima, hojalo hikha ayakacho kasa niimi Oho mi bitii, 23 niimpalukoda miilañ rumi Oho mi khiike nendupahiila, Aba mika mohluka khiichañ ho. Hii huna Oho mi khiima nii hii Aba mitrḛ khiima mohmi huna kiiniñ tiinii. 24 Jijeloda, jijeloda, ngo nunumi lukoso, hii huna ngiika aguñmi tadonii ho mohmi henje donii ngiimika kiiniñ bomi, mohko santḛrlamanii sango do; mo ayakacho kako ahkiñma, hojalo shiigo mi impo biila sango ho daku. 25 “Jijeloda, jijeloda, ngo nunumi lukoso, myodu hii ahlyi ke, ho siisi ke, niidana shiinii atañ Pinii ka Oho aguñmi tapa talyinii, ho hutiina tapa talyinii sankiñdo. 26 Niimpalukoda Aba kii sango do mo atohko, hiichulipa mo Oho mi bitola do sango mo attoh ko dopa, 27 ho mohmi otority mi bitola do ayakacho kaniipa, niimpalukoda mo miyu ka Oho. 28 Siimi tala la kapuñtale nyayo; niimpalukoda myodu hii ahlyike niidana hikha hutiina byuh ho donii mohka aguñmi tapa nyakiñdo 29 ho linya kendo, hutiina aya miigo miinya tiinii, turiturku niika sango dalyi, ho hutiina diimmah pa miinya tiinii, turiturku kendo ayakacho kako dupa.
Jisu mika Haki Biniiñ
30 “Ngo ngiika atoh otority lo hang miila kema, ngo niihtañpa tapado, ngo hiitañpa ayakacho kadu; ho ngiika ayakacho kaniiñ hii kadikoke, niimpalukoda ngo ngiika henko ho mema hojalo mohka henkoho huna ngiimi kiiniñ tiinii 31 Ngo matiirḛ attohmi haki bisu dokoda, ngiika pyakonii hii jijema; 32 koneya da huna ngiimi haki bidonii, ho ngo chindo mohka ngiipaka pyakobiniiñ hii jije hiila. 33 Nunu Jon mi kiiniñtii, ho mo jijemi haki bitii. 34 Si ngo miyu ka pyakoniimi lariido hiilamake; hojalo ngo simi ludu niimpalukoda nunumi lyangur kiine dupa. 35 Mo tila dotii, ho byonii muru ke, ho nunu talii nyado ichuche hempyo dupa mohka hutoh ho. 36 Hojalo ngiiko hoka pyakonii donii hii Jon kiimi hentola kahe yake; Aba ka ngiimika miigo miipe dopaka biniiñ hii, siika ngiika miigo miiniiñsi, ngiimi haki bido, ngo Aba loka kiiniñ koniiñ hiila. 37 Ho Aba huna ngiimi kiiniñ tiinii mo loda ngiimi haki bitii. Mohka aguñmi nunu ronge hetḛr tapa make, mo niihtañ hiimi nunu ronge hetḛr kappa make; 38 ho nunu mohka aguñmi nunuko atiima, niimpalukoda nunu mohmi henjema humina mo kiiniñ tiinii. 39 Nunu piniipota mi medo, niimpalukoda nunu hendo hiiko santḛrlamanii sango do hiila; ho hiika atañke ngiipa haki bitiinii; 40 hojalo nunu ngiiko ahdupa taliinyama nunuko sango mi giidupa. 41 Ngo miyu atañka assañdiilañ mi larii make. 42 Hojalo ngo chindo nunuko Pinii ka heniiñ hii nunuka ura ho nyima. 43 Ngo ahdu ngiika Aba ka armyañ pa. ho nunu ngiimi larii nyama; koneya matiirḛ mo attoh armyañ pa ahdo koda, mohmi nunu larii kendo. 44 Niihtañpa nunu henje lakiñdo, huna kone anyañ ka assañ niimi larii siila ho Pinii kokiika assañdiilañ ahnii miya menya mapa? 45 Hiila heyo ngo nunumi Aba ka agiñho haliido hiila; si Mose ke nunu mika haliibo, huko hona nunu nunuka hentiñ mi atii donii. 46 Nunu matiirḛ Mose mi henje dokoda, nunu ngiimi tiirḛ henje kendo, niimpalukoda mo ngiika piigo mi ketii. 47 Hojalo nunu matiirḛ mohka keniiñ mi henje makoda, niihtañpa nunu ngiika aguñmi taje talyi?”
Jisu Jarngohemi Diigo Hobiido
1 Siikahiibaho Jisu Galili siimie ka pache dalyiho botii, Tiberias ka siimie ho. 2 Ho miyuabuje mohmi imbomontii, niimpalukoda mohlu mohka kagiñnanii miiniiñmi kappatii hutiina achih nyatiinii. 3 Jisu putoo ka ayoh ho chatii, ho hiiko mohka henjeajiñ atañ agiñho dutii. 4 Siisi Impobiiniiñ, Jew atañ dituñ sodu tunii tiiku. 5 Mohka amee mi kadu chala la, ho miyuabuje mohko ahla do hiila kappa lala, Jisu Pilip mi lutii, “Niihtañ pape ngunu yatañ riichinii, siika miyu atañmi diike nendupa?” 6 Siikasi mo mohmi tenka dupa lutii, niimpalukoda mo attoh chinsutii mo niihpe miikiñ doniiñ. 7 Pilip mohmi lusitii, “Lanye denarii lotrḛ khe dopa yatañ riila kemake koneabi mi chesa khedupa.” 8 Mohka henjeajiñ kone, Andrew, Saimon Pitar ka anu, mohmi lutii, 9 Inkasi himme koneda hukiina yatañ pyarngohe ho ngiiyyi sonye biidonii; hojalo hiimi niimiichi mohlu hiimkane abu da? 10 Jisu lutii, “Miyu atañmi duha kiineto.” Siisi abuje tammi dotii hiika gandaho; hopa miyuatañ duha nyatii, khiikako jarngo hepa dutii. 11 Jisu ho yatañ mi latii, ho payapacho lulala, mo mohlumi bitii duha tola ka dunii atañmi; hiichuli ngiiyyi mitrḛ, niimkane mohlu diinado bitii. 12 Ho mohlumi mohluka erre ho diide pake nelala, mo mohka henjeajiñ atañmi lubiido, “Tiikuñ toku petupeponii palle mi, niimpalukoda hang dopa madopa.” 13 Hopa mohlu hiimi tukuñtupa tiiku ho yagii giilyañlenye yatañ petupeponii tukuñtiiku yatañ pyarngohe hokii, mohluka diile kuniiñ. 14 Miyu atañ mohka kagiñnanii miiniiñmi kappa lala, mohlu lutii, “Siikasi jije nyibuhenii ke huna dohadolo so ahkiñ nenii!” 15 Chimpa biitola mohlu ahpa miilado ho mohmi chechepa ingiila radde miipa miido hiila, Jisu hiira insa giila putoo ho mo attohpa chagiitii.
Jisu Yasie Ho Indo
16 Alyiñ kukele, mohka henjeajiñ atañ siimie ho totii, 17 huluho chatii, ho iritii siimie ka pachedalyi Keparnam ho. Siisi kamo tiiku, ho Jisu mohluka agiñho siisi jalo ahma tiirañ. 18 Siimie hii lando poritii niimpalukoda hempḛr uro allyi heritii. 19 Mohlu nyatu pohiñ pope pahe khoku lala, mohlu Jisu mi yasie ho ila dopa kappa biido ho hulu ka aruñho ahdopa. Mohlu biisotii, 20 hojalo mo mohlumi lutii, “Si ngoke; biisoyo.” 21 Ho mohlu hempyo biidola mohmi huluho chagiitii, ho ohepada hulu hii kiiddi ho bochi tiiku nohna mohlu impa intiinii.
Miyu Atañ Jisu mi Medo
22 Allo lohe yaho miyuatañ hutiina siimie ka pache dalyiho datiinii kappatii hiiko hulu tare kontiisii dosunenii, ho Jisu huluho mohka henjeajiñ agiñho chabo matii, hojalo mohka henjeajiñ atañ mohlu kontii intii. 23 Hojalo, Tiberias hokiika hulu hii hiika kiiddi ho ahchi tiiku nohna mohlu yatañ diitiinii Attoh ka payapacho hiila luku lala. 24 Ho miyuatañ hiiko Jisu mi kappa malyi nii, malo mohka henjeajiñ atañ mitrḛ, mohlutrḛ huluho chatii ho Keparnam ho intii, Jisu mi metela.
Jisu Sango ka Yatañ
25 Mohlu mohmi siimie ka pache dalyiho kappa lala, mohlu mohmi lutii, “Tonsḛrbo, no niido so ahhii?” 26 Jisu mohlumi lusitii, “Jijeloda, jijeloda, ngo nunumi lukoso, nunu ngiimi medo, nunu kagiñnanii kappa kopama, niimpalukoda nunu erre khedopa yatañ diibiine hopa. 27 Lyusanii diigo pa kontii miigo miiyo, hojalo hiika diigo pa miito santḛrlamanii sango giigii saniimi, nii mina miyu ka Oho nunumi bikiñ donii; niimpalukoda mohmi Pinii Aba mohka miihonaniilo miihotola doku.” 28 Ho mohlu mohmi lutii, “Niihpe ngunu miikiñ donii, Pinii ka miigomi miidupa?” 29 Jisu mohlumi lusitii, “Siika sike Pinii ka miigo, nunuka mohmika henjenii hii humina mo kiiniñ tiinii.” 30 Hopa mohlu mohmi lutii, “Hokoda no nii kagiñnanii miikiñtalyi, ngunumi kake nendupa, ho niimi henje dopa? Nii miigo no miichi? 31 Ngunuka aba atañ jabyo ho manna diitii; hiila ketola do, ‘Mo mohlumi dariiganda hokii yatañ bitii diike nendupa.’” 32 Jisu ho mohlumi lutii, “Jijeloda, jijeloda ngo nunumi lukoso, hii Mose make nunu mika dariiganda hokiika yatañ biniibo; ngiika Aba nunumi jijeka yatañ dariiganda hokii bido. 33 Niimpalukoda Pinii ka yatañ hiike dariiganda hokii todonii, ho sango bido dohadolo mi.” 34 Mohlu mohmi lutii, “Attoh, ngunumi kiirañ siika yatañ mi bipe.” 35 Jisu mohlumi lutii, “Ngo sango ka yatañ ke; huna ngiiko ahdonii hii haya kemake, ho huna ngiimi henje talyinii hii iche tiirḛ hangḛr kema. 36 Hojalo ngo nunumi ludu nunu ngiimi kapa siido ho hojalo henje nyama. 37 Hikha Aba ka ngiimika biniiñhii ngiiko ahkiñdo; ho huna ngiiko ahdonii ngo hiimi mompa tama. 38 Niimpalukoda ngo dariiganda hokii todu, ngiika henko miipama, hojalo mohka henko huna ngiimi kiiniñ tiinii; 39 ho siikasi mohka heniiñ huna ngiimi kiiniñ tiinii, ngiimi hang kone mitrḛ hikha mo biniiñ mi alyu mado koda hiila, hojalo kami kalo ho mohmi seri kiine dupa. 40 Niimpalukoda siikasi ngiika Aba ka heniiñ, koneabi huna Oho mi kapa lala ho mohmi henje talyi nii hiiko santḛrlamanii sango dopa; ho ngo hiimi kami allo ho seri talyiku.” 41 Ho Jew atañ mohmi budubudu lunyatii, niimpalukoda mo lutii, “Ngo yatañ dariiganda hokiika tonii.” 42 Mohlu lutii, “Si Jisu masuha ehna, Josep ka oho, huka annii-aba mina ngunu chindunii? Niihtañpa mo siisi luda, ‘Ngo dariiganda hokiika tonii hiila’?” 43 Jisu mohlumi lusitii, “Nunuka punkoho budubudu lusu nyayo. 44 Kone hetrḛ ngiiko ahla kemake nii dahepa Aba ngiiko mohmi nelii bitema; ho ngo hiimi kami allo ho seri talyi. 45 Si nyibuhenii atañ ko ketola do, ‘Ho mohlu Pinii lo tonsḛr kokiñ doke.’ Koneabi huna tapatiinii ho Aba kokii chingiitiinii ngiiko ahdo. 46 Kone hetḛr Aba mi kapama hii kontiisii huna Pinii kokiinii; mo Aba mi kappatii. 47 Jijeloda, jijeloda, ngo nunumi lukoso, huna henjedonii hiiko santḛrlamanii sango doke. 48 Ngo sango ka yatañ ke. 49 Nunuka aba atañ manna diitii zabyo ho, ho mohlu shiitii. 50 Siika yatañ si dariiganda hokiika toniike, miyu atañmi siimi diike nendupa ho shiima yapa. 51 Ngo turnii yatañke dariiganda hokiika tonii; hujalo siika yatañ siimi matiirḛ diichi, hii ayu dahepa sankiñdo; ho yatañ nii mina ngo bichi nii dohadolo ka sangopa hii ngiika apoke 52 Ho Jew atañ mohluka punkoho chesu ritii, lubiidola, “Niihtañpa siika miyu si ngunumi mohka apomi bila kendo diidupa?” 53 Hopa Jisu mohlumi lutii, “Jijeloda, jijeloda, ngo nunumi lukoso, nii dahepa nunu miyu ka Oho ka apomi diitema ho mohka ai mi tantema, nunuko sango giimake; 54 hii huna ngiika apomi diidonii ho ngiika ai mi tandonii hiiko santḛrlamanii sango do, ho ngo mohmi kami allo ho seri talyi. 55 Niimpalukoda ngiika aposi diigo jijeke, ho ngiika ai si tango jijeke. 56 Huna ngiika apomi diidonii ho ngiika ai mi tandonii hii ngiiko da, ho ngo mohko. 57 Niitañpa turnii Aba ngiimi kiiniñtii, ho ngo turdo niimpalukoda Aba kiipa, hopa huna ngiimi diichinii hii turkiñdo niimpalukoda ngiikiipa 58 Siika sike yatañ niihna dariiganda hokii totiinii, aba atañka diila lalaka shiiniiñ chuli ma; huna siika yatañ siimi diichinii ayu dahepa turkiñdo.” 59 Siimi mo sinagog ho lutii, Keparnam hoka tonsḛr toncha ho.
Santuñlamanii Sango ka Aguñ
60 Mohka abuje henjeajiñ atañ, mohlu siimi tapa lala, lutii, “Siika luniiñsi alḛrdo; hu siimi tala talyiho?” 61 Hojalo Jisu, mo chimbii tola mohka henjeajiñ atañ simika budubudu luniiñmi, mohlumi lutii, “Nunu siika siimi takho duha? 62 Hokoda nunu matiirḛ miyu ka Oho mi mohka kapyo duko ho chala dopa kappa doko dano? 63 Si yajiyallo ke sango bidonii, asiialyoho piigo amake; ngiika nunu mika aguñ luniiñ hiike yajiyallo la sango nyi. 64 Hojalo nunuka punkoho tange henje nyama.” Niimpalukoda Jisu chintii kapyo jaho hokii hutiina henje nyama tiinii, ho huna mohmi talubalo kendonii. 65 Ho mo lutii, “Si hopa ngo nunumi lukodu kone hetḛr ngiiko ahla kema nii dahepa Aba hiimi ahdopa bitema.” 66 Hiikahiibaho abuje mohka henjeajiñ atañ inkur nyatiiku ho mo agiñho imbo kumatii. 67 Jisu alyañlenye mi lutii, “Nunu tiirḛ inkur nando kuha?” 68 Saimon Pitar mohmi lusitii, “Attoh, huko ngunu inchi? Niiko santḛrlamanii sango ka aguñ hii do; 69 ho ngunu henjedu, ho chindo, no Pinii ka Darii kone hiila.” 70 Jisu mohlumi lusitii, “Ngo nunumi kahe masuha ehna?, alyañlenye, ho nunuka punkoho kone igii ke.” 71 Mo Judas mi lutii Saimon Iskariot ka ohomi, niimpalukoda mo, alyañlenye hokii kone, mohmi talubalo saniibo.
Jisu la Mohka Anubarmii Atañ
1 Siika hiiba ho Jisu Galili dalyiho intii; mo Judia dalyi imatii, niimpalukoda Jew atañ mohmi mendupa mela dotii. 2 Siisi Jew atañka Tabarnakel dituñ hii tunii tiiku. 3 Hopa mohka anubarmii atañ mohmi lutii, “Siimi apatela ho Judia ho insa, niimpalukoda niika henjeajiñ atañmi niika miigo miiniiñ atañmi kapa kiine dupa. 4 Niimpalukoda kone hetḛr miisila miigo miimake mo kone abilo chinko nando koda. No matiirḛ siika drih atañmi miido koda, attoh mi dohadolo mi kakiñ siito.” 5 Niimpalukoda mohka anubarmii atañ tiirḛ mohmi henje matii. 6 Jisu mohlumi lutii, “Ngiika myodu siisi ahma ranke, hojalo nunuka myodu hii kiirañ so dokañ sudu ke. 7 Dohadolo nunumi kariñ kemake, hojalo si ngiimi ke kariñ kendonii niimpalukoda ngo ludu mohluka miigo atañsi diimmah hiila. 8 Nunu attoh ya dituñ ho inge; ngo siika dituñ so chate make, niimpalukoda ngiika myodu hii siisi lohepa ahma ranke.” 9 Hiila lubiidola, mo Galili ho datii.
Jisu Shiitiñ Giiko Dituñ ho
10 Hojalo mohka anubarmii atañka dituñ hoka chane kuho, motrḛ chatii, miyuatañ mi kapa dopa ma hojalo chasila chatii. 11 Jew atañ mohmi dituñ soko ho metii, ho lunyatii, “Nohna mo?” 12 Ho hiikoho abuje mohka piigo mi budubudu miyuatañ lusu nyatii. Ho kone lutii, “Mo denki miyu ke,” tange lutii, “Ma, mo miyu atañmi lembo ngogii da.” 13 Hojalo Jew atañ mika biiso mi kone hetrḛ goropa mohmi luma tii. 14 Dituñ solaka dorañho Jisu piniiude ho chatii ho tonsḛrtii. 15 Jew atañ hiimi hemur nyatii, lubiidola, “Niitañpa siika miyu si chindonii, mo hang puri masu tiirḛ?” 16 Hopa Jisu mohlumi lusitii, “Ngiika tonsḛr niisi ngiikii make, hojalo mohkiike huna ngiimi kiiniñ tiinii; 17 mi miyu kone jalo mohka miigo miina dokoda, mo chinkiñ do tonsḛr niisi Pinii kokiiha malo ngo ngiika atoh otority lo ludoha hiila. 18 Huna atoh ka otority lo ludonii hii atoh mi assañ shiipa miido; hojalo huna mohmi assañ dupa miidonii huna mohmi kiiniñ tiinii hii jije, ho mohko hang gollumisu giima. 19 Mose nunumi dapo mi bima siiha ehna? Hojalo nunu kone hetḛr dapo mi talii nyama. Niimpa nunu ngiimi mendupa medu?” 20 Miyu atañ lusitii, “Niiko igii giido! Hu niimi mempa medo?” 21 Jisu mohlumi lusitii, “Ngo miigo kone miihañ kiile, ho nunu hikha hiimi kapuñtale nyada. 22 Mose nunumi mitupipa koniiñ mi bitii (hii Mose kokii ma, hojalo aba atañ kokii), ho nunu miyu mi dumoalo ho mitupipa danii. 23 Miyu matiirḛ dumoalo ho mitupipa kodo koda, Mose ka dapo mi tatu mayapa hiila, nunu ngiimi dumoalo ho ngo miyu mi hikha mohka apo mi miipya dula hiila ha hadii dunii? 24 Nyitumoru mi kala lala ayakacho kayo, hojalo ayakacho kadiko kabiidola haliito.”
Mo Masiah Peha?
25 Hopa Jerusalem daka miyu tange luda, “Siika miyu simi masu peha humi na mohlu mendupa mene nii? 26 Ho si da mo, tapa dopa lula da, ho mohlu mohmi hang luma! otority atañ Jijepa chinsu dopeha si Kristo hiila? 27 Hojalo ngunu chindo siika miyu si nohkii ahdo hiila; ho Kristo ka ahlyi ho, kone hetḛr chinkiñma mo nohkii ahdo hiila.” 28 Hopa Jisu gyukotii, piniiude hoka mo tonsḛr toncha ho, “Nunu ngiimi chindo, ho nunu chindo ngo nohkii ahdo hiila? Hojalo ngo atoh pa ahsu make; mo ngiimika kiiniñ bo jije ke, ho mohmi nunu chima. 29 Ngo mohmi chindo, niimpalukoda ngo mohkokii ahdu, ho mo ngiimi kiiniñtii.” 30 Hopa mohlu mohmi ladupa metii; hojalo kone hetḛr mohmi alah tenga lamatii, niimpalukoda mohka myodu ahma tiirañ. 31 Hojalo abuje miyuatañ mohmi henje tii; mohlu lutii, “Niida Kristo ahchi, mo siimi abu yapa kagiñnanii drih miikiñ doha siika miyu ka miiniiñmi hentola?”
Kalyabiiniiñ Atañ mi Kiiniñtii Jisu mi Patiih bodupa
32 Parisi atañ tapatii miyu atañka budubudu mo piigo mika lusu niimi, ho nyibu burii la Parisi atañ sabii atañmi kiiniñtii mohmi lake nendupa. 33 Jisu ho lutii, “Ngo nunuka agiñho ichuche dakiñ dorañke, ho ngo inchi ku mohko huna ngiimi kiiniñ tiinii; 34 nunu ngiimi mekiñdo ho nunu ngiimi mepa kema; noh ngo da ho nunu ahla kema.” 35 Jew atañ kone anyañ mi lusu nyatii, “Nohyu siika miyusi impa miidunii ngunuka mechi lasa mako? Mo Grik miyuatañ duko impa peha miidonii ho Grik atañmi tonsḛr dupa hiila? 36 Nii hiila ka lusa niimi pe ludonii, ‘Nunu ngiimi mekiñdo ho nunu ngiimi mepa lakiñma,’ ho, No ngo da ho nunu ahla kema?”
Sango Binii Yasie Siigañ
37 Dituñ soniiñ ka kamija allo ho, hempḛr kahe allo, Jisu guri biila ho gyutii, “Mi kone matiirḛ hangḛr domilo, mohmi ngiiko ahke nento ho tanke nento. 38 Huna ngiimi henje talyi nii, piniipota ka lunii chulipa, Mohka ahha hokii turnii yasie biliñ kendo.” 39 Siisi siikasi Yajiyallo ka piigo mi mo lutii, huna mohmi henje talyi nii hii larii kendo; niimpalukoda siisilohepa Yajiyallo mi bima tiirañ, niimpalukoda Jisu mi siisi lohe pa assañ matii rañ.
Miyu Atañ ka Punko hoka Tache Siiniiñ
40 Mohlu siika aguñ atañmi tapa lala, miyu tange lutii, “Siikasi jije nyibuhenii.” 41 Tonge lutii, “Siikasi Kristo.” Hojalo tange lutii, “Kristo Galili hokii ahkiñ siine? 42 Piniiaguñ hiila lumasa ehna Kristo David ka halugiira hokii kendo hiila, ho Betlehem hokii ahkiñ do hiila, David nii lemba hokii tiinii?” 43 Hopa miyu atañka punko tache tahe ritii mohka piigo pa. 44 Tange mohmi ladupa hentiñ, hojalo kone hetḛr mohmi alah tenga lamatii.
Jew Otority Atañ ka Henje maniiñ
45 Sabii atañ inkur tiiku nyibu burii atañ la Parisi atañ ko, mohlumi hiila lutii, “Niimpa nunu mohmi ahgiima?” 46 Sabii atañ lusitii, “Kone hetḛr siika miyu ka luniiñ chulipa luma!” 47 Parisi atañ ho mohlumi lusitii, “Nunu ngogii koma byoha, nunu tiirḛ ha? 48 Otority atañ la malo Parisi atañ hokii mohmi henje nyane peha? 49 Hojalo siika miyuatañ, hutiina dapo mi chinya manii, halii kokiñdo.” 50 Nikodemas, huna mohko kapyo ho ahtiinii, ho mohluka apur hokii kone, mohlumi lutii, 51 “Ngunuka dapo hii ayakacho kada dupeha miyu mi kapyopa mohmi tapa kiine marañpa ho chimpa kiine marañpa mo nii miitii hiila?” 52 Mohlu lusitii, “No tiirḛ Galili hokii peha? Meto ho no kapa kendoke Galili hokii nyibuhenii kone hetḛr linkiñ make hiila.” 53 Mohlu atoh atoh ude ho intiiku.
Annii akha mi Ipfyo Dopa Latutii
1 Hojalo Jisu Olives Putoo ho chatii. 2 Arokonchi ho hiira mo piniiude ho ahtii; hikha miyuatañ mohko ahtii, ho mo duhatii ho mohlumi tonsḛrtii. 3 Pagenii atañ la Parisi atañ annii akha kone ahgii bitii humina ipfyo dopa latutiinii, ho mohmi liipa jaho atiitii 4 mohlu mohmi lutii, “Tonsḛrbo, siika annii akha mi ipfyo la dopa latutii. 5 Siisi Mose ka lujubiniiñ dapoho ngunumi sitañmi yalañ kuto ludo. No nii hiilape mo piigo ho luchinii?” 6 Siikasi mohlu mohmi tenka la lutii, niimpalukoda mohlu mohmi halii dupa hiila. Jisu chuki hala ho mohka lacheelo kiiddiho ketii. 7 Ho mohluka mohmi takala dorañpa, mo guritii ho mohlumi lutii, “Kappyojapa hiimi yalañ kupyo kiineto mohmi, nunuka punko hokii huna ingyamiigya giimanii.” 8 Ho rongeta mo chuki hala ho mohka lacheelo kiiddi ho ketii. 9 Hojalo mohlu siimi tapalala, mohlu intiiku, kone kone irila, abañ jaho hokii impyo rigiila, ho Jisu kontiisii dasu tiikunii, mo hata hoka annii akha danii agiñho. 10 Jisu nyari biila ho mohmi lutii, Annii akha, mohlu nohna? Niimi kone hetḛr khiilii kumapo? 11 Mo lutii, “Ma Kone hetḛr khiilii ma, Attoh.” Ho Jisu lutii, “Ngotiirḛ niimi khiilii make; ingeku, ho hiira ingyamiigya kulyayo.”
Jisu Dohadolo Ka Hutoh
12 Hiira Jisu mohlumi lukotii, lubiidola, “Ngo dohadolo ka hutoh ke; huna ngiimi imbo monchinii hii kamo ho ingkiñ make, hojalo sango ka hutoh mi giikiñdo.” 13 Parisi atañ ho mohmi lutii, “No atoh atoh hakipa lyisuda; niika pyakonii hii jije make.” 14 Jisu lusitii, “Ngo atoh atoh hakipa lyisu dojalo, ngiika pyakonii jijeke, niimpalukoda ngo chindo ngo nohkii ahnii ho ngo no inkiñdo, hojalo nunu chima ngo nohkii ahnii malo ngo noh inkiñdo. 15 Nunu asiialyo ka ayakacho kachañ ho kado, ngo kone mitrḛ ayakacho kaliima. 16 Ngo matiirḛ halii doja lopa, ngiika ayakacho kanii hii kadikoke niimpalukoda hii ngo kontii ayakacho kamake, hojalo ngola hiinyike huna ngiimi kiiniñ tiinii. 17 Nunuka dapo ho hiila ketola do miyu anye ka pyakonii hii jije hiila; 18 Ngo atoh mi haki bisutii, ho Aba ngiimika kiiniñ bo ngiipa haki lyibido.” 19 Hopa mohlu mohmi lutii, “No niika Aba?” Jisu lusitii, “Nunu ngiimi tiirḛ malo ngiika Aba mitrḛ chima; nunu matiirḛ ngiimi chintii koda, nunu ngiika Aba mitrḛ chintiido.” 20 Siika aguñ atañmi alḛrdrih atii koho lutii, piniiude ho mohka tonsḛr nii chulipa; hojalo kone hetḛr mohmi latu matii, niimpalukoda mohka myodu hii ahma tiirañ.
Nunu ila Kema Ngiika Inko Ho
21 Hiira mo mohlumi lutii, “Ngo inchikuke, ho nunu ngiimi mekiñdo ho nunuka ingyamiigya ho shiikiñdo; noh ngo inchi, nunu ahla kema.” 22 Ho Jew atañ lutii, “Mo atoh mensu payuha, mo ludonii, Ngiika inko ho, nunu ahla kema?” 23 Mo mohlumi lutii, “Nunu akañ hokiike, ngo ayoh hokii; nunu siika dohadolo hokii, ngo siika dohadolo hokii make. 24 Ngo nunumi lukodu nunu nunuka ingyamiigyanii atañ ho shiikiñdo, niimpalukoda nunu shiikiñdo nunuka ingyamiigyanii atañ ho nii dahepa nunu henjetama ngo hii hiila.” 25 Mohlu mohmi lutii, “Hu no?” Jisu mohlumi lutii, “Ngo nunumi lotu jaho hokii luko siidu. 26 Ngiiko abuje nunu piigo mi lusa do ho abuje ayakacho kasa niitrḛ; hojalo ngiimika kiiniñ bo jijeke, ho dohadolo mi lukodu niihna ngo mohkokii tapa dunii.” 27 Mohlu tachiñ lamatii mo mohlumi Aba ka piigo mi ludo hiila. 28 Hopa Jisu lutii, “Nunu miyu ka Oho mi yucha kulala, ho nunu chinkiñdo ngo hii hiila, ho ngo ngiika attoh otority la hang miima hojalo hiimi sii lusu dunii Aba ka ngiimika tonsḛr niimi. 29 Ho mo huna ngiimi kiiniñ tiinii hii ngiika agiñho da; mo ngiimi kontii apama, niimpalukoda ngo kiirañ hiimi sii miisu dunii niihna mohmi hempyo giidonii.” 30 Mo hiila lukele, abuje mohmi henje nyatii.
Jije Hii Nunumi Tupya Kendo Ke
31 Jisu ho Jew atañmi lutii hutiina mohmi henje nyatiinii, “Nunu matiirḛ ngiika luniiñ talii takañ dokoda, nunu jijeloda ngiika henjeajiñ atañ ke, 32 ho nunu jije mi chinkiñ do, ho jije hii nunumi tupya kendoke.” 33 Mohlu mohmi lusitii, “Ngunu Abraham ka ohoasi, ho ronge hetḛr mika miirapa biikola duka ma. Niihtañ pa no ludu, ‘Nunumi tupya kendoke hiila’?” 34 Jisu mohlumi lusitii, “Jijeloda, jijeloda, ngo nunumi lukoso, hujalopa ingyamiigya da hii ingyamiigya ka miira ke. 35 Miira hii ayu dahepa ude ho dupe momma, oho sii ayu dahepa dupe monsu dunii. 36 Hopa Oho matiirḛ nunumi tupya doku koda, nunu tupya koku nii lodake. 37 Ngo chindo nunu Abraham ka ohoasi hiila; hojalo nunu ngiimi mendupa mela do, niimpalukoda ngiika luniiñsi nunupa tadiñma. 38 Ngo ludu niihna ngo ngiika Aba agiñho kapa tiinii, ho nunu miido niihna nunu nunuka aba kokii tapa tiinii.” 39 Mohlu mohmi lusitii, “Abraham ngunuka aba.” Jisu mohlumi lutii, “Nunu matiirḛ Abraham ka wiinga koda, nunu Abraham nii miitii hiimi miikiñdo, 40 hojalo siisi nunu ngiimi mendupa mela do, hiika miyu huna nunumi jijemi luko donii nii mina ngo Pinii kokii tapa tiinii; si chitañ Abraham miimane. 41 Nunu miido niihna nunuka aba miitiinii.” Mohlu mohmi lutii, “Ngunu datuapu pula buko make; ngunu kii aba konesii, Pinii tiirḛ.” 42 Jisu mohlumi lutii, “Pinii matiirḛ nunuka Aba koda, nunu ngiimi henkiñdo, niimpalukoda ngo irito ho ahdu Pinii kokii; ngo attoh pa ahsuma, hojalo mo ngiimi kiiniñtii. 43 Niimpa nunu tachiñ nyama ngo nii hiila ludo? Si niimpalukoda nunu pigii lama ngiika aguñmi. 44 Nunu nunuka aba igii kokii, ho nunuka heniiñ hii nunu aba ka henko ho miichi hiila. Mo lotu jaho hokii miyumenii, ho jije agiñho hang miisa nyimake, niimpalukoda mohko hang jije giima. Mohka amuh lyiho, mo ludu mohka atoh henju jaho, niimpalukoda mo gollunii ho golluka aba. 45 Hojalo, niimpalukoda ngo jije mi lukodu, nunu ngiimi henjema. 46 Hu nunu kokii hu halii lakiñdo ngo ingyamiigyanii hiila? Ngo matiirḛ jije mi luko dokoda, niimpa nunu ngiimi taje nyama? 47 Mo huna Pinii kokiinii hii Pinii ka aguñmi tadu; niimpa nunu hiimi tama lukoda nunu Pinii kokiima.”
Jisu La Abraham Nyi
48 Jew atañ mohmi lusitii, “Ngunu ludiko luma siiha ehna no Samarita hiila ho igii giido hiila?” 49 Jisu lusitii, “Ngiiko igii giimake; hojalo ngo ngiika Aba mi khiila sii, ho nunu ngiimi khiima. 50 Hojalo ngo attohmi assañ kodupa mema; Kone du huna siimi medonii ho mo ayakacho kanii bopa dukiñdo. 51 Jijeloda, jijeloda, ngo nunumi lukoso, hujalopa matiirḛ ngiika aguñmi atiibiichi, mo shiigo mi kapa kema.” 52 Jew atañ mohmi lutii, “Siisi ngunu chindo niiko igii giido hiila. Abraham shiine, hii chulipa nyibuhenii atañ tiirḛ; ho no luda, ‘hujalopa matiirḛ ngiika aguñmi atii biichi, mo shiiniiñ mi kapa kema.’ 53 No ngunuka aba Abraham mi kaye ya ehna, huna shiine kunii? Ho nyibuhenii atañ tiirḛ shiine! No hu hiila lusudu?” 54 Jisu lusitii, “Ngo matiirḛ attohmi assañ siido koda, ngiika assañ siiniiñ hang ma; siikasi ngiika Aba ke ngiimi assañdonii, humina nunu nunuka Pinii hiila ludu nii. 55 Hojalo nunu mohmi chimake; Ngo mohmi chindu. Ngo matiirḛ ludo koda, ngo mohmi chima, ngotiirḛ nunu chuli gollu kendo; hojalo ngo mohmi chindu ho ngo mohka aguñmi atiibiidu. 56 Nunuka aba Abraham hempyo ne mo ngiika allo mi kapa kendo hiila; mo kapa biine ho hempyo ne.” 57 Ho Jew atañ mohmi lutii, “No siisi lyihepa nyang alyañlyango marañ, ho no Abraham mi kapato hiila?” 58 Jisu mohlumi lutii, “Jijeloda, jijeloda, Ngo nunumi lukoso, Abraham mi kapyo yapa, ngo dato.” 59 Hopa mohlu yalañ tutii mohmi kudupa; hojalo Jisu mo achugiitii, ho piniiude hokii ago lintii ku.
Jisu Micha Dopa Bukonii Miyu Mi Miipya Biido
1 Mo impo biikele, bulyi hokiija micha nii miyu kone mi mo kapa biido. 2 Ho mohka henjeajiñ atañ mohmi tahii biido, “Tonsḛrbo, hu ingyamiigya tii, siika miyu siha malo mohka annii-aba ha? Mo micha dopa buko niisi.” 3 Jisu lusitii, “Siikasi siika miyu ingyamiigya tii hiilama, malo mohka annii-aba, hojalo Pinii ka miigomi mohkokiila kakiñ kengiñ naniipa. 4 Ngunu mohka miigomi miikiñdo huna ngiimi kiiniñ tiinii, allo dorañpa; ayoh hii ahlyi, kone hetḛr miigo miila ma. 5 Nii dahe pa ngo dohadolo so dachi, ngo dohadolo ka hutoh ke.” 6 Mo hiila siimi lula la, mo kiiddi ho chukḛr chutii ho dekiñ nyimi hoyo lala ho miyu ka amee ho neliitii dekiñ agiñho, 7 mohmi lubiido, Inge, Siloam (Kiiniñto lusa niimi) ka siipḛr ho hasu he. Hopa mo intii ho hasu tela ho kapa kula ahkur tiiku. 8 Ariapii atañ la mohmika kapyo hoka myado laka dupa kapa nii atañ, lutii, “Siika miyu si soka dunii ho myado boma siiha ehna?” 9 Tange lutii, “Siikasi mo”; tange lutii, “Ma, hojalo mo hii chulido.” Mo lutii, “Ngo hiika miyu ke.” 10 Mohlu mohmi lutii, “Hokoda niihtañpa niika amee kapa doku?” 11 Mo lusitii, “Jisu hiila miyu kone dekiñ mi hoyolala ho ngiika amee ho nelii ho ngiimi luhii, ‘Siloam ho ingela ho hasuhe’; hopa ngo ila ho hasute ho ngiika amee kapa doku.” 12 Mohlu mohmi lutii, “No mo da?” Mo lutii, “Ngo chima.”
Parisi Atañ Miipya Niimi Hangka nyado
13 Mohlu Parisi atañ ko miyu mi ahgii bitii kapyo hoka micha bomi. 14 Siisi hiika hii dumoalo tii Jisu ka dekiñ mi hoyo lala ho mohka amee mika mida dopa miilyiho. 15 Parisi atañ hiira mohmi tahii biido niihtañpa no niika amee kapa toku. Ho mo mohlumi lutii, “Mo dekiñ mi ngiika amee ho nelii, ho ngo hasuto, ho ngo kapaku.” 16 Parisi tonge lutii, “Siika miyu si Pinii kokii make, niimpalukoda mo dumoalo mi khiima.” Hojalo tange lutii, “Niitañpa miyu huna ingyamiigya danii sitañ kagiñnanii miila kendo?” Mohluka punkoho tache risutii. 17 Hopa hiira mohlu micha miyu mi lutii, “No nii hiila mohka piigo mi ludu? niimpalukoda mo niika amee mi mida dopa miitii.” Mo lutii, “Mo nyibuhenii kone.” 18 Jew atañ taje matii mo micha hiila ho mohka kapa kuniiñ mi, nii dahepa mohlu hiika miyu ka annii-aba mi gyolii tama huka amee na kapa tiiku nii, 19 ho mohlumi tahiitii, “Siikasi niika oho ha? humina nunu bulyi hokii micha luda nii, Niihtañpa hokoda mo siisi kapa doku?” 20 Mohka annii-aba lusitii, “Ngunu chindo siikasi ngiinyi ka oho hiila, ho mohmi micha dopa bii; 21 hojalo niihtañpa mo siisi kapa doku ngiinyi chima, malo hiila tiirḛ chima hu mohka amee mi mida dopa miitii hiila. Mohmi tahiito; mo akha siido kuke, mo attohpa luko siila kendo kuke.” 22 Mohka annii-aba siimi lutii niimpalukoda mo anye Jew atañmi biisotii, niimpalukoda Jew atañ hiila taliisiitola dotii hujalopa matiirḛ mohmi Kristo hiila khako talyi, mohmi sinagog hokiila agoho nempa linkiñdo. 23 Hopa mohka annii-aba lutii, “Mo akha dokuke, mohmi tahii he.” 24 Hopa ronye niipa mohlu hiika miyu mi gyotii huna micha nenii, ho mohmi lutii, “Pinii mi assañto; ngunu chindo siika miyu si ingyamiigyanii hiila.” 25 Mo lusitii, “Mo ingyamiigyaniiha, ngo chima; drih kone ngo chindo, ngo michato, siisi ngo kapa doku.” 26 Mohlu mohmi lutii, Nii mii mo niimi? Niihtañpa mo niika amee mi mida dopa miibiine? 27 Mo mohlumi lusitii, Ngo nunumi luko toku, ho nunu tage mane. Niimpa nunu hiira siimi tana do? Nunu tiirḛ mohka henjeajiñ pa lyinañ dopo? 28 Ho mohlu mohmi nyapakoyatii, lubiidola, “No mohka henjeajiñ, hojalo ngunu Mose ka henjeajiñ atañ. 29 Ngunu chindo Pinii Mose mi luriitii hiila, hojalo siika miyu pa, ngunu chima mo nohkii ahdo hiila.” 30 Hiika miyu lusitii, “Niimpa, siikasi kapuñtale do! Nunu chima mo nohkii ahdo hiila, ho hojalo mo ngiika amee mi mida dopa miitii. 31 Ngunu chindo Pinii ingyamiigyanii atañ kiimi tagema hiila, hojalo hujalo pa matiirḛ Pinii mi herii talyi ho mohka heniiñmi miidu, Pinii mohmi tage du. 32 Dohadolo ka doribii jaho hokii hiila tapa ma mi kone amee micha dopaka bukonii miyu mi mida dopa miitii hiila. 33 Siika miyu si matiirḛ Pinii kokii makoda, mo hang miila diima.” 34 Mohlu mohmi lusitii, “No hempḛr uro ingyamiigya niiho buko lala, ho no ngunu miya tonsḛr pa miidunii?” Ho mohlu mohmi mompa biido.
Yajiyallo Michanii
35 Jisu tapatii mohlu mohmi mompa biine hiila, ho mohmi kapa lala mo lutii, “No henje duha miyu ka Oho mi?” 36 Mo lusitii, “Ho hu mo, tonsḛrbo, ngo mohmi henje talyi?” 37 Jisu mohmi lutii, “No mohmi kapa biine, ho hiika hii mo niimi ka lurii laka danii bo.” 38 Mo lutii, “Attoh, Ngo henjedo”; ho mo mohmi heriitii. 39 Jisu lutii, “Ngo ayakacho mi kadu pa dohadolo so ahdu, niimpalukoda huna kapa nyama nii kapa kiine dupa, ho hutiina kapa nyadonii hiimi micha kiine dupa.” 40 Parisi tonge mohka aruñhoka danii siimi tapa biido, ho mohlu mohmi lutii, “Ngunu miilañ micha doha?” 41 Jisu mohlumi lutii, “Nunu matiirḛ micha tiikoda, nunu hang miigya diima; hojalo nunu siisi luda, ‘Ngunu kapado,’ nunuka miigya nii dokañ do.
Subuñsornii Mika Lutiñnaniiñ
1 “Jijeloda, jijeloda, ngo nunumi lukoso, huna subuñdako ho alyeh pa amapa hojalo lembo byahe yapa giiha donii, hiika miyu hii diipyonii ho ronii; 2 hojalo huna alyeh pa ahdonii hii subuñ mika sorniibo. 3 Hiipa alyeh kalyabo miiko bikiñdo; subuñ mohka aguñmi tapa kendo, ho mo mohka attoh subuñ mi armyañ gyobiidola gyokiñdo ho mohlumi agoho lingii kendo. 4 Niida mo hikha mohkiimi agoho lingii talyi, mo mohluka hataho inkiñdo, ho subuñ mo kiiliñ ho imbo kendo, niimpalukoda mohlu mohka aguñmi talado. 5 Kachiñmanii mi mohlu imbo kema, hojalo mohlu mohkokii hargii kendo, niimpalukoda mohlu kachiñmanii atañka aguñmi tala ma.” 6 Siika lujju mi Jisu mohlumi luta nantii, hojalo mohlu tachiñ matii mo mohlumi nii hiila ludo hiila.
Jisu Denki Subuñsornii
7 Hopa Jisu hiira mohlumi lutii, “Jijeloda, jijeloda, ngo nunumi lukoso, ngo subuñ ka hagya ke. 8 Hikha huna ngiimi kapyo yapa ahtiinii diipyonii ho ronii atañke; hojalo subuñ atañ mohlumi tage matii. 9 Ngo hagya ke; hujalo matiirḛ ngiiko hopa ahchi, mo lyangur kokiñdo, ho ahkiñdo ho linkiñdo ho hiisañhiima diiko kapa kendo. 10 Diipyonii ahdu diipyo pa kontiisii ho mempa ho pyadu lopasii; ngo ahdu niimpalukoda mohlumi sango kapa kiine dupa, ho hiimi poteje giike nendupa. 11 Ngo denki subuñsornii ke. Denki subuñsornii mohka sango mi hempa siibidu subuñ atañpa. 12 Humina ajho tiinii ho subuñsornii manii, huka subuñ na mo atoh kiimanii, siipya mi ahla dopa kapa lala ho subuñ mi apatela ho hargii du; ho siipya mohlumi chibiidu ho mohlumi mompya monsa du. 13 Mo hargiidu niimpalukoda mo ajho konii ho subuñ atañpa hang hena giima. 14 Ngo denki subuñsornii ke; ngo ngiikii attoh kiimi chindu ho ngiikii ngiimi chindu, 15 niihtañpa Aba ngiimi chindu ho ngo Aba mi chindu; ho ngo ngiika sango mi subuñ atañpa hempa bidu. 16 Ho ngiikii ponge ya subuñ da, hiika atañhii siika giiri hokiima; ngo mohlumi tiirḛ ahgii kendo, ho mohlu ngiika aguñmi tage kendo. Hopa hiikaho subuñ tonge, subuñsornii konesii dakiñ siidonii,. 17 Siika piigopa Aba ngiimi hendo, niimpalukoda ngo ngiika sango mi hempa bitii, hiimi ngo hiira laku dukupa. 18 Kone hetḛr hiimi ngiiko hokii labii lakiñma, hojalo ngo ngiika henko ho hiimi hempa bikiñdo. Ngiiko hiimi hempa bina naniipa harchichike giido, ho ngiiko hiimi ka lakur nanii patḛr harchichike giido; siika miisaniimi ngo ngiika Aba kokii labii.” 19 Hiiko hiira Jew atañka punkoho tache ritii siika aguñ atañpa. 20 Abuje mohlu lutii, “Mohko igii giido, ho mo rundo ke; niimpa mohka luniiñ tadu?” 21 Tange lutii, “Siika kolobiisie si igii poha koto laka luniiñ pa tama. Igii amee micha niimi kapa dopa miila kendo ha?”
Jisu Mi Khiipatii
22 Siikasi Tiiliibiniiñ ka dituñ tii Jerusalem ho; 23 hii dorii piilo tii, ho Jisu piniiude ho ila dotii, Solomon ka hagya ho. 24 Hopa Jew atañ mohmi dakḛr pabiilala ho mohmi lutii, “Nii dahepa no ngunumi hendḛr lama dopa atiipa? No matiirḛ Kristo milo, didḛrpa ngunumi lukope.” 25 Jisu mohlumi lusitii, “Ngo nunumi lukoto, ho nunu tajema. Siika miigo si ngo ngiika Aba ka armyañ pa miidu, hiikahii ngiimi haki bido; 26 hojalo nunu henje nyama, niimpalukoda nunu ngiika subuñ hokiima. 27 Ngiika subuñ ngiika aguñmi tadu, ho ngo mohlumi chindu, ho mohlu ngiimi imbo du; 28 ho ngo mohlumi santḛrlamanii sango bidu, ho mohlu iche hetḛr lyukiñma, ho kone hetḛr mohlumi ngiika alah hokii robii lakiñma. 29 Ngiika Aba, huna ngiimi mohlumi bitiinii, miilañrumi kaheja, ho kone hetḛr mohlumi Aba ka alah hokii robii lakiñma. 30 Ngo la ho Aba nyi konesii.” 31 Jew atañ hiira yalañ tubiinyatii mohmi ridu pa. 32 Jisu mohlumi lusitii, “Ngo nunumi abuje aya miigo atañmi kakiñtii Aba kokii; hiika atañ kiipa nunu ngiimi yalañ kupa miidunii?” 33 Jew atañ mohmi lusitii, “Siikasi ngunu niimi aya miigo miiko hopa yalañ kumake hojalo nipakopa ke; niimpalukoda no, miyu sii, no attohmi Pinii pa miisudo.” 34 Jisu mohlumi lusitii, “Hiila nunuka dapo ho ketola domasa, ‘Ngo ludu, nunu pinii ke’? 35 Mo matiirḛ mohlumi pinii hiila gyodo koda, hukohona Pinii ka aguñ hii ahtiinii (ho piniipota mi tache lakiñma), 36 nunu mohmiha ludu nii Aba ka dariimiila lala ho dohadolo hoka kiiniñ niimi, No nipadake, niimpalukoda ngo lutii, Ngo Pinii ka Oho hiila?” 37 Ngo matiirḛ ngiika Aba ka miigo atañmi miima milo, hokoda ngiimi henje yo; 38 hojalo ngo matiirḛ hiimi miido milo, nunu ngiimi henje majalo, miigomiiniiñ mi henje to, niimpalukoda nunu chindupa ho chila kendoke Aba ngiiko du ho ngo Aba ko du hiila. 39 Hiira mohlu mohmi latupa miitii, hojalo mo mohluka alah ho ahma tii. 40 Mo hiira Jordan ka pache dalyiho botii nohna Jon kapyopa baptisma bitiinii, ho hiiko mo dutii. 41 Ho abuje mohko ahtii; ho mohlu lutii, “Jon hang kagiñnanii miima ne, hojalo kapane Jon siika miyu ka piigo mika luniiñ hii jije.” 42 Ho abuje mohmi henje nyatii hiikoho.
Lajaras Ka Shiiniiñ
1 Siisi miyu kone achih la dotii, Betany daka Lajaras, Mary la mohka ammi Marta ka lemba ho. 2 Siikasi Mary tii huna Attoh mi arrḛyartii nii kutu lo ho mohka alih mi mohka adiñdimu lo nyupa tii, huka barrona Lajaras achih la dotiinii. 3 Hopa anuami nyi mohmi luliitii, lubiidola, “Attoh, no humina hendunii mo achihla doke.” 4 Hojalo Jisu siimi tapa lala mo lutii, “Siika achih niisi shiigii saniiñmake; siikasi Pinii mika assañdiilañ giisa niike, niimpalukoda Pinii ka Oho mi silo assañdiilañ giidu pa.” 5 Siisi Jisu Marta la mohka anu Mary ho Lajaras mi hentii. 6 Hopa mo mohmi achih la do hiila tapa lala, mo lonye abuyapa hiika gandaho datii nohna mo datiinii. 7 Ho hiikahiibaho mo mohka henjeajiñ atañmi hiila lutii, “Kiije hiira Judia ho insa.” 8 Henjeajiñ atañ mohmi lutii, “Tonsḛrbo, Jew atañ siisi niimi yalañ kudu pa mela done, ho hiira no hiikoho impa ha?” 9 Jisu lusitii, “Allo lohe ho gunta talyañlenye domasa ehna? Hujalopa matiirḛ allo ho inchi, mo liichi make, niimpalukoda mo siika dohadolo ka hutoh mi kapa do. 10 Hojalo hujalopa ayoh ho inchi, mo liichi du, niimpalukoda hutoh hii mohko nyima.” 11 Hiila mo lubiido, ho mo mohlumi lutii, “Ngunuka ajiñ Lajaras imi dokuke, hojalo ngo mohmi imilaka doniimi ahu takiñdo.” 12 Henjeajiñ atañ mohmi lutii, “Attoh, mo matiirḛ imi dokoda, mo hempyo kendoke.” 13 Siisi Jisu mohka shiiniiñ mi lutii, hojalo mohlu hentii mo hemmo laka imila doniiñ mi ludo hiila. 14 Ho Jisu tadḛrpa mohlumi lukotii, “Lajaras shiido kuke; 15 ho nunu kiipa ngo hempyodo niimpalukoda ngo hiiko dama, niimpalukoda nunumi henje kiine dupa. Hojalo kiije mohko insa.” 16 Tomas, bupyuñ siiniiñ luniibo, mohka henjeajiñ ahiñ mi lutii, “Kiije ngunu miilañ insa, niimpalukoda ngunu miilañ mo agiñho shiibo dupa.”
Jisu Turiturku La Sango Ke
17 Siisi Jisu ahbii kiile, mo chimpabiido Lajaras byuh ho allo lope dotiiku hiila. 18 Betany Jerusalem ka aruñho dotii, nyatu ponye hepa adhotii, 19 ho abuje Jew atañ Mary la Marta nyika ude ho ahtola datii mo anye mi aroh robyuñ hala mo anye ka barro kiipa. 20 Marta Jisu ahla do hiila tapa lala, mo intii ho mohmi kappatii, Mary ude ho dusu tii. 21 Marta Jisu mi lutii, “Attoh, no matiirḛ so datii koda, ngiika barro shiidiima. 22 Ho siisi jalo ngo chindo niijalo no Pinii kokii kuchi, Pinii niimi bikiñdo.” 23 Jisu mohmi lutii, “Niika barro hiira turku kendoke.” 24 Marta mohmi lutii, “Ngo chindo mo hiira turku kendo kami allo hoka turiturku lyikuho.” 25 Jisu mohmi lutii, “Ngo turiturku kunii la sango ke; huna ngiimi henje talyi nii, mo shiijalo, hojalo mo sankiñdo, 26 ho hujalopa sando ho ngiimi henjedo hii iche hetrḛ shiikiñma. Nunu siimi taje doha?” 27 Mo mohmi lutii, “ḛh, Attoh; ngo henjedo no Kristo hiila, Pinii ka Oho, mo huna siika dohadolo so ahkiñ neniiñ.”
Jisu Khedo
28 Mo siimi lula la, mo ura ahtii ho mohka anu Mary mi gyobiido, chomyo pa lubiidola, “Tonsḛrbo si dake ho niimi gyodo ke.” 29 Ho mo siimi tapa lala, mo nyibya loda gurila ho mohko lintii. 30 Siisi Jisu lemba ho ahma tiirañ, hojalo hiira hiika lengo ho datii nohna Marta mohmi kapa tiinii. 31 Jew atañ hutiina mo agiñho ude ho dutiinii, mohmi aroh robyuñla, Mary mi nyibya loda guri la ago hoka innii mi kapa biido, mohlu mohmi imbo montii, hiilahela mo byuh ho ila hiiko khedupa miido. 32 Ho Mary, nohna Jisu danii ho ahtii ho mohmi kappatii, mohka alih ho chuhatii, mohmi lubiido, “Attoh, no matiirḛ so datii koda, ngiika barro shiidii ma.” 33 Jisu mohmi khedo pa kapa lala, ho Jew atañka kheniiñ mitrḛ hutiina mo agiñho ahbo tiinii, mo uropa yajiyallo ho duritii ho henga henkhatii; 34 ho mo lutii, “No nunu mohmi alietii?” Mohlu mohmi lutii, “Attoh, ahla ho kakato.” 35 Jisu khetii. 36 Hopa Jew atañ lutii, Kato niimkane mo mohmi hentii! 37 Hojalo tange lutii, “Mo micha miyu mi mida dopa miinii bo siika miyu mi shiisa nii hokii atiñ lama yuha?”
Lajaras Mi Turku dopa Miitii
38 Ho Jisu, hiira hempḛr heru biidola, byuh ho ahtii; hii lampii tii, ho hiika agoho yalañ giipiñ tola dotii. 39 Jisu lutii, “Yalañ mi giipa to.” Marta, shiiniiñ boka barmii hii, mohmi lutii, “Attoh, siika myodu so naru kendo kuke, niimpalukoda mohka shiikunii allo lope duku.” 40 Jisu mohmi lutii, “Ngo luma siito ha no matiirḛ henje dokoda no Pinii ka tatu katu mi kapa kendoke hiila?” 41 Hopa mohlu yalañ mi giipa biido. Ho Jisu mohka amee mi kadu chalala ho lutii, “Aba, ngo niimi payapacho ludu niika ngiimika tage kopa. 42 Ngo chindo no kiirañ ngiimi tage du hiila, hojalo ngo siimi ludo siika miyu danii atañpa, niimpalukoda mohlumi henje kiine dupa no ngiimi kiiniñtii hiila.” 43 Mo siimi lula lala, mo goropa gyutii, “Lajaras, ago linto.” 44 Miyu shiinii bo ago lintii, mohka alih la alah nyi jihiñ lo puto dotii, ho mohka nyimo hii pulye lo aputii. Jisu mohlumi lutii, “Mohmi tapya to, ho mohmi inke nento.”
Jisu Mika Rhuniiñ
45 Hopa abuje Jew atañ, hutiina Mary agiñho ahbo montii nii ho kappatii niihna mo miitiinii, mohmi henje tii; 46 hojalo tange hii Parisi ko intii ho mohlumi lukotii niihna Jisu miitiinii. 47 Hopa nyibu burii atañ la Parisi atañ bulyañ mi gyokuñ lala, ho lutii, “Niihpe ngunu miichi nii? Siika miyu si abuje kagiñnanii miibiido. 48 Mohmi matiirḛ sichuli pa miikañ kiine dokoda, kone abi mohmi henje kendo, ho Rom atañ ahla ho ngunuka darii lengo la ngunu ganda nyimi pyadu lokiñ do.” 49 Hojalo mohluko hokii kone, Kaipas, hiika anyañ hoka bukuñ nyibu, mohlumi lutii, “Nunu hang chima lodake; 50 nunu chima pake, hiilaya aya yakiñdo nunupa miyu koneka shiipa biniiñ miyu atañpa, ho hikha ganda mi lyuke nensa byolo” 51 Mo siikasi mo attoh pa lumatii, hojalo hiika anyañ hoka bukuñ nyibu pa lyilyinii mo nyibuhentii Jisu ganda pa siibi kendo hiila, 52 ho ganda kontii pamapa, hojalo Pinii ka oho atañmi gyokuñ dukupa hutiina adhoganda ho gyapya gyasa nyatiinii. 53 Hopa hiika allo hokiija mohlu takasiitii niihtañ pape mohmi mendu pa miichi nii hiila. 54 Jisu hopa kado pa Jew atañka punkoho inku matii, hojalo hiiko hokii ganda ka aruñare daka jabyo ho intii, Ephraim hiila taun luniiñ ho; ho hiiko mo henjeajiñ atañ agiñho dutii. 55 Siisi Jew atañ Impobiiniiñ dituñ tunii tiiku, ho abuje mohluka ganda hokii Jerusalem ho intii Impobiiniiñ dituñ ka kapyo yaho, mohlu attoh mi darii miisu dupa. 56 Mohlu Jisu mi mela dotii ho kone anyañ lusutii mohlu piniiude ho dala, “Nii hiila nunu hendo? Mo dituñ soko so ahdiima hendoha?” 57 Siisi nyibu burii atañ la Parisi atañ luliñtii hu kone jalo pa mo noh da chindo milo, mohlumi hiimi chinke nempe, niimpalukoda mohlu mohmi latu dupa.
Jisu Mi Betany Ho Arrḛyartii
1 Impobiiniiñ dituñ ka allo lokhe dorañpa, Jisu Betany ho ahtii, nohna Lajaras dutiinii, humina Jisu shiinii mi turdopa miitiinii. 2 Hiiko mohlu mohpa alyiñapiñ diidupa miimyo bitii; Marta miihotii, ho Lajaras diitananii hoka mo agiñ ho dubo nii konetii. 3 Mary hempḛr khiiniiñ hang miiyomanii nard kutu mi jola lala ho Jisu ka alih ho arrḛyartii ho mohka alih mi mohka adiñdimu lo nyupa biido; ho ude ho poteje kutu ka naru nempyo sula dotii. 4 Hojalo Judas Iskariot, mohka henjeajiñ atañ hokii kone (mo huna mohmi talubalo kentiinii), lutii, 5 “Niimpayu siika kutu mi lahiñhe denariipa pyula lala ho arromiyu mi bimapa?” 6 Siimi lutii, mo arromiyu mi henado hiilamapa hojalo niimpalukoda mo diipyonii, ho mohko tiicko bako dosu lyiniiñ mo hoka aliinii hokii lala lyitii. 7 Jisu lutii, “Mohmi kahpa siito, mohmi simi atii biike nento ngiimi alie lyi allo hopa. 8 Arro miyu kiirañ nunuka agiñ ho dalyi diike, hojalo nunu kiirañ ngiimi dagii kemake.”
Lajaras Mika Rhuniiñ
9 Hempḛr miyu taro Jew atañ hokii mo ho da hiila chimpa lala, mohlu ahtii, Jisu ka piigo kontii pama pa Lajaras mitrḛ kadu pa hiila, humina mo shiinii mi turdo pa miitiinii. 10 Hopa nyibu burii atañ Lajaras mitrḛ mendu pa hemmyo tii, 11 niimpalukoda mohka piigopa abuje Jew atañ impa nyatii ku ho Jisu mi henje la.
Jerusalem hoka Ahniiñ
12 Allo lohe yaho hempḛr miyu taro hutiina dituñ soko ho ahtiinii Jisu Jerusalem ho ahla do hiila tapatii. 13 Hopa mohlu pam sannii ka halloh mi tarbiila mohmi kapa dupa agoho linyatii, gyubii dola, “Hosana! Lyanko kendo hii huna Attoh ka armyañ pa ahdonii, Isrel ka Radde tiirḛ!” 14 Ho Jisu gadoh gapho dore kappatii ho hiiko dutii: hiila ketola dotii, 15 “Biisoyo, Zayon ka wiinga; kato, nunuka radde ahdoke, gadoh gapho ho dula!” 16 Mohka henjeajiñ atañ kapyoho siimi tadḛrlama tii; hojalo Jisu mi assañdiilañ kukele, ho mohlu hemparido siika keniiñ si mohmi ketii ho mohpa miitii. 17 Miyu abuje danii atañ hakibitii Lajaras mika byuh hokii ka agoho mohka gyoliñ lala ho shiinii mika turdo miiniiñmi. 18 Niimpa miyuatañ mohmi kapa dupa intii lukoda mohlu tapatii mo siika kagiñnanii mi miitii hiila. 19 Parisi atañ ho lutii kone anyañmi, “Nunu kato nunu hang miila kema; kato, dohadolo si mohmi imbo monya lyi.”
Grik Tange Jisu Mi Medo
20 Siisi dituñ hoka herii dupa ka ahnii atañ tange hii Grik tii. 21 Hopa hiika atañ Pilip ko ahtii, Galili daka Betsaida hokiitii, ho mohmi lutii, “Tonsḛrbo, ngunu Jisu mi kapa nando.” 22 Pilip intii ho Andrew mi lukotii; Andrew Pilip agiñho intii ho mo anye Jisu mi lukotii. 23 Ho Jisu mo anye mi lusitii, Myodu si ahdoku miyu ka Oho mi assañdiilañ dupa. 24 Jijeloda, jijeloda, ngo nunumi lukoso, nii dahepa emmo elyañ kiiddi ho liihi tama ho shiitema, hii kontiisii dokañ siidunii; hojalo hii matiirḛ shiido koda, hiika hii abuje ahee hidu. 25 Hu attoh ka sango mi abyo siido hii alyu siidu, ho huna attoh ka sango mi siika dohadolo so hempa siidonii hii santḛrlamanii sango pa dokiñdo. 26 Hujalopa matiirḛ ngiimi miihotalyi, mo ngiimi imbo monkiñdo loda; ho noh ngo da, hiiko ngiika miira tiirḛ dakiñdo; hujalopa ngiimi matiirḛ miihotalyi, Aba mohmi khiikiñdo.
Jisu Mohka Shiisanii Piigo Mi Ludo
27 Siisi ngiika yallo si ahiaredo. Ho niihiila pe ngo luchinii? Aba, ngiimi siika myodu sokii lyangur pe? Ma, siika piigopa ngo siika myodu so ahdu. 28 Aba, niika armyañ mi assañ diilañto. Ho dariiganda hokii aguñ gonge luliñtii, “Ngo hiimi assañdiilañ tiikuke, ho hiira ngo hiimi assañdiilañ talyi.” 29 Miyu abuje danii atañ hiimi tapa biido ho lutii si yapuñ ke gendo nii. Tange lutii, “Miidopopi mohmi luriida.” 30 Jisu lusitii, “Siika aguñ nunu pake lindo nii, ngiipa make. 31 Siisi ke siika dohadolo mika ayakacho kadu, siisi siika dohadolo mika sangii bomi mompa kendo; 32 ho ngo, niida ngiimi kiiddiapiñ sokii yucha talyi, hikha miyu atañmi ngiiko selii giichi.” 33 Mo siimi lutii kakiñ dupa hiila niihtañ shiiju pana mo shiikiñ donii hiila. 34 Miyuabuje danii atañ mohmi lusitii, “Ngunu dapo ho tapa to Kristo ayu dahepa dukiñdo hiila. Niihtañ pa no ludu miyu ka Oho mi yucha kendo hiila? Hu siika miyu ka Oho?” 35 Jisu mohlumi lutii, “Hutoh si nunuka agiñ da ichu chesuke dasutalyinii. Into nii dahepa nunuko hutoh do, hiilamakoda kamosi nunumi miipu biichi ke; huna kamo ho indo nii chinsu make mo noh indo hiila. 36 Nunukoka hutoh dorañ ho, hutoh mi henjeto, nunu hutoh ka oho atañpa lyidu pa.”
Henjemanii Miyuatañ
Jisu siimi luku lala, mo intiiku ho mo attoh mi mohluko hokii achih giitii ku. 37 Mo abuje kagiñnanii mohluka hataho miibii siine, hojalo mohlu mohmi henje nyama; 38 siikasi nyibuhenii Aijaya ka keto laka doniimi lyipe kiine dupa: “Attoh, hu ngunuka luko niimi taje kendo, ho humi Attoh ka lapo hii kakiñ kendo?” 39 Hopa mohlu henjelama tii. Niimpalukoda Aijaya hiira lutii, 40 “Mo mohluka amee mi micha dopa miitii ho mohluka ahha mi alḛr dopa miitii, hiila makoda mohlu mohluka amee lo katiido ho mohluka ahha hela tiido, ho ngiiko anyañ tiido mohlu miipya kodupa.” 41 Aijaya siimi lutii niimpalukoda mo mohka tatukatu mi kappatii ho mohmika luniiñmi. 42 Hiilamapa abuje otority atañ tiirḛ mohmi henje nyatii, hojalo Parisi atañ mika biisomi mohlu hiimi khako matii, hiila makoda mohlumi sinagog hokii agoho nempa linkiñdo: 43 niimpalukoda mohlu miyu ka assañ niimi uro yapa hemi lyado Pinii ka assañ niimi hentola.
Jisu Aguñ Atañ Loka Ayakacho Kanii
44 Ho Jisu gyuritii ho lutii, “Huna ngiimi henje nyadonii, ngiimi henje make hojalo hiimi ke huna ngiimi kiiniñ tiinii. 45 Ho huna ngiimi kado nii mohmi kado huna ngiimi kiiniñ tiinii. 46 Ngo hutoh pa lyila dohadolo so ahdu, niimpalukoda hujalopa ngiimi henjetalyi kamo ho duku madopa. 47 Hujalopa ngiika kolobiisie mi matiirḛ tapa lala ho hiimi atii biima koda, ngo mohmi ayakacho kalii make; niimpalukoda ngo dohadolo so ayakacho kapa ahma hojalo dohadolo mi lyangur dupa. 48 Huna ngiimi khiipa donii ho ngiika kolobiisie niimi, halii tiiku; ngiika aguñ luniiñ hii mohmi halii kendo kami allo ho 49 Niimpalukoda ngo ngiika attoh otority la lusuma; Aba ngiimika kiiniñbo mo loda ngiimi lujubiniiñ mi bitii nii lusanii ho nii lukiñdo. 50 Ho ngo chindo siika lujubiniiñ so santḛrlamanii sango do. Ngo nii luchi, hopa, ngo ludu Aba ka ngiimika lunge luniiñmi.”
Jisu Mohka Henjeajiñ Atañ Ka Alih Mi Harbiido
1 Siisi Impobiiniiñ dituñ soma rampa, Jisu chintii mohka myodu ahdoku siika dohadolo simi apa tekula Aba ko indu kupa, mohka attoh miyu atañmi hentii hutiina dohadolo so danii, mo henkañ kendo kamikalo lohepa. 2 Ho alyiñapiñ diila doho, igii hii Saimon ka oho Judas Iskariot ka ahha ho ahto kula dotii ku, mohmi talubalo kiine dupa hiila, 3 Jisu, Aba hikha drih atañmi mo alah ho bitii hiila chimbii tola, ho mo Pinii kokii ahdo ho Pinii ko inkiñdo hiila, 4 alyiñapiñ diiko hokii guritii, mohka pulye mi aruñho atii lala, ho nyupasiina nanii pulye mi attoh tiigiitii, 5 Ho paka ho yasie toliñ tii, ho henjeajiñ atañka alih mi haritii, ho nyupasiina nanii pulye la nyupatii nii mina mo tiigiitiinii. 6 Mo Saimon Pitar ko ahtii; ho Pitar mohmi lutii, “Attoh, no ngiika alih mi harpa?” 7 Jisu mohmi lusitii, “Ngo niimi nii miipa miido siisi no chima ranke, hojalo piijoda no chinkiñ doke.” 8 Pitar mohmi lutii, “No pema ngiika alih mi haryo.” Jisu mohmi lusitii, “Ngo matiirḛ niimi harma koda, no ngiiko ahgyo make.” 9 Saimon Pitar mohmi lutii, “Attoh, ngiika alih mi kontiimapa hojalo ngiika alah ho ngiika adiñ miilañmi hokoda!” 10 Jisu mohmi lutii, “Huna ahu hasu tiinii hii yasii dopa lyimake, mohka alih kontii misuke, hojalo nunu hikha darii doke, ho no darii doke, hojalo nunu kone abi make.” 11 Niimpalukoda mo chintii huna mohmi talubalo kendo nii hiila; hopa mo lutii, “Nunu hikharu darii make.” 12 Mo mohluka alih mi harku lala, ho mohka pulye laku lala, ho mohka duko duha kula, mo mohlumi lutii, “Nunu chindu ha ngo nunumi nii miitii hiila? 13 Nunu ngiimi Tonsḛrbo ho Attoh hiila gyodo; ho nunu gyodi ko gyodo, niimpalukoda ngo hiila. 14 Hojalo ngo matiirḛ, nunuka Attoh ho Tonsḛrbo, nunuka alih mi hartii, nunu tiirḛ kone anyañ ka alih mi harbi siikiñ do. 15 Niimpalukoda ngo nunumi kakiñ biilyi ke, niimpalukoda nunu tiirḛ miito ngiika nunu paka miichañ ho. 16 Jijeloda, jijeloda, ngo nunumi lukoso, miira hii atoh mi kahe yama ke; malo hiitiirḛ huna kiiniñ kotiinii mohmika kiiniñ bomi kahe yama ke. 17 Nunu matiirḛ siika drih atañ siimi chindo koda, lyanko kendo nunu matiirḛ siika atañmi miido koda. 18 Ngo nunu miilañ rumi luma ke; ngo chindo ngo humina kahe tiinii hiila; siikasi piniipota mi miipe kiinedupa, ‘Huna ngiika yatañ mi diitiinii mohka ludu lo ngiimi nyoje biido.’ 19 Ngo siisi nunumi siimi lukodu, siika drih lyima rampa, niimpalukoda niida si lyichi nunumi henje kiine dupa ngo hii hiila. 20 Jijeloda, jijeloda, ngo nunumi lukoso, huna kone mijalo ngiika kiiniñ niimi karii donii; ho huna ngiimi karii donii hii mohmi kariido huna ngiimi kiiniñ tiinii.”
Jisu Mohmika Talubalo Bomi Hempa hemmyo Biido
21 Jisu siimi luku lala, mo yajiyallo ho henga henkha tii, ho pyakoritii, “Jijeloda, jijeloda, ngo nunumi lukoso, nunu kokii kone ngiimi talubalo kendo.” 22 Henjeajiñ atañ kone anyañ mi kako siido, humina mo ludonii hendḛr lama pa. 23 Mohka henjeajiñ kone, humina Jisu hentiinii, Jisu mi giida biitola dutii; 24 hopa Saimon Pitar mohmi hohe lala ho lutii, “Lukope ngunumi hu hii humina mo ludonii.” 25 Jisu ka aruñ ho giila dobiidola, mo mohmi lutii, “Attoh, hii hupe?” 26 Jisu lusitii, “Hiika hii hiike humina ngo siika petu niisi mi niihi lala bichi nii.” Ho petu niimi mo niihi lala, mo Judas mi hiimi bibiido, Saimon Iskariot ka oho. 27 Yatañ petu niika hiiba ho, Saitan mohko ahtiiku. Jisu mohmi lutii, “No nii miipa miidu, nyibya miito.” 28 Siisi diitananii hoka duniiñ atañ kone hetrḛ chima mo niimpa siimi mohmi ludo hiila. 29 Tange hiila hentii, rongkoda Judas ko tiicko bako doniiñ, Jisu mohmi lukotii, “Riito niihna ngunu dituñpa anna donii”; malo, rongkoda mo arro mi ngoya bike nendupa hiila. 30 Hopa, yatañ petu mi lala la, mo nyibya loda agoho lintii; ho hiikahii ayoh tii.
Niti Lujubiniiñ
31 Mohka ago linne kuho, Jisu lutii, “Siisi miyu ka Oho mi assañdiilañ kendo, ho mohko Pinii mi assañdiilañ kendo; 32 Pinii mi matiirḛ mohko assañdiilañ dokoda, Pinii tiirḛ mohmi assañdiilañ kendo mohko, ho rongepa mohmi assañdiilañ kendo. 33 Himme atu atañ, hojalo ichuche ngo nunu agiñho date hela. Nunu ngiimi mekiñdo; ho niihtañpa ngo Jew atañmi luto hii chulipa siisi ngo nunumi ludu, ‘Ngiika inko ho nunu ahla kemake.’ 34 Niti lujubiniiñ ngo nunumi biso, nunu kone anyañ mi hensu tolya; ngiika nunumika henchañho, hiichuli nunu tiirḛ kone anyañ mi hensu tolya. 35 Siika silo hikha miyuatañ chinkiñ doke nunu ngiika henjeajiñ atañ hiila, nunu matiirḛ kone anyañmi hensu dokoda.”
Jisu Pitar Ka Mapah Niimi Luko Lumyo Biido
36 Saimon Pitar mohmi lutii, “Attoh, no noh impa?” Jisu lusitii, “Ngiika inko ho no siisi imbo lakiñ make; hojalo no piijoda imbo monkiñdo.” 37 Pitar mohmi lutii, “Attoh, niimpa ngo siisi niimi imbo lakiñma? Ngo ngiika sango mi niipa hempa bichi.” 38 Jisu lusitii, “No niika sango mi ngiipa hempa bichi ha? Jijeloda, jijeloda, ngo niimi lukoso, paro khokiñ make, nii dahepa no ngiimi rohiñhe mapah tama.
Jisu Aba Koka Inko Lembo
1 “Nunu ahha heru yo; Pinii mi henjeto, ngiimi miilañ henjeto. 2 Ngiika aba ka ude ho abuje chidii doke; ho matiirḛ nyima lyimilo, ngo nunumi luko matoha ngo nunupa duko miimyo dupa ilyi ke hiila? 3 Ho ngo ila ho nunupa duko miimyo tela, Ngo hiira ahkur talyi ho ngo nunumi ingii talyi, niimpalukoda noh ngo da ho nunu miilañmi dagii dupa. 4 Ho nunu chindo lembomi ngo noh ilyi hiila.” 5 Tomas mohmi lutii, “Attoh, ngunu chima no noh ilyi hiila; niihtañpa ngunu chila kendo lembomi?” 6 Jisu mohmi lutii, “Ngoke lembo, ho jije, ho sango; kone hetḛr Aba ko ahla kema, hojalo ngiiko hopasii. 7 No matiirḛ ngiimi chintii koda, no ngiika Aba mitrḛ chintii do; siisikiila no mohmi chindo ho mohmi kapa tiiku.” 8 Pilip mohmi lutii, “Attoh, ngunumi Aba mi kakiñpe, ho ngunumi hembyañ biidopa.” 9 Jisu mohmi lutii, “Hiimkane diirii ngo nunu agiñho dabii lyiku, ho siisi lohepa no ngiimi chima rañ, Pilip? Huna ngiimi kapa tiinii hii Aba mi kappatii; niihtañpa no ludu, ‘Ngunumi Aba mi kakiñpe hiila’? 10 No hiila henjema ha Ngo Aba ko da ho Aba Ngiiko da hiila? Ngiika aguñ niimi ka lurii niisi ngo ngiika atoh otority lo luma; hojalo Aba ngiika ura hoka duniibo mo mohka miigo atañmi miido. 11 Henjeto ngiimi Ngo Aba ko da hiila ho Aba ngiiko da hiila; malo hojalo ngiimi henjeto niimpalukoda miigo miiniiñ atañpa. 12 “Jijeloda, jijeloda, ngo nunumi lukoso, huna ngiimi henje talyinii hiitiirḛ ngiika miiniiñ chulipa miigo atañmi miikiñdo; ho siika atañ mitrḛ kayeya miigo miikiñdo, niimpalukoda ngo Aba ko ilyiku. 13 Niijalo nunu ngiika armyañ pa kuchi, Ngo hiimi miibi talyi, niimpalukoda Aba mi Oho ko assañ kiinedupa; 14 niijalopa nunu ngiika armyañ pa kuchi, ngo hiimi miibi talyi.
Darii Yajiyallo Mika Hemme Biniiñ
15 “Nunu matiirḛ ngiimi hendo koda, nunu ngiika lujubiniiñ atañmi atii kendo. 16 Ho ngo Aba mi kuchi, ho mo nunumi Hembyuñnii koneya bikiñdo, nunuka agiñho ayu dahepa dabo niipa, 17 jijeka Yajiyallo tiirḛ, humina dohadolo si larii lamanii, niimpalukoda mohmi kapa lama malo mohmi chinya ma; nunu mohmi chindo, niimpalukoda mo nunuka agiñho da, ho nunuko giikiñdo. 18 “Ngo nunumi kapa tama ke; ngo nunuko ahchike. 19 Hojalo ichuche dahidamo lala, ho dohadolo atañ ngiimi kapa keñku ma, hojalo nunu ngiimi kapa kendo; niimpalukoda ngo turla dakiñdo, ho nunu tiirḛ turla dakiñdo. 20 Hiika allo ho nunu chinkiñdo ngo Aba ko da hiila, ho nunu ngiiko, ho ngo nunuko da hiila. 21 Hii huko hona ngiika lujubiniiñ donii ho hiimi atii biido nii, hiike huna ngiimi hendo nii; ho hii huna ngiimi hendo nii ngiika Aba lo henko kendo, ho mohmi henchi ho ngo atohmi kakiñ siichi mohmi.” 22 Judas (Iskariot mapa) mohmi lutii, “Attoh, niihtañpa hii no atohmi ngunumi kakiñ siikiñ do, ho dohadolo mima pa?” 23 Jisu mohmi lusitii, Miyu matiirḛ ngiimi hendo koda, mo ngiika aguñmi atii biikiñdo, ho ngiika Aba mohmi henkiñdo, ho ngunu mohko ahkiñdo ho ngunuka ude mi mohko penkiñdo. 24 Hii huna ngiimi hema nii ngiika aguñ atañ mitrḛ atiima; ho nunuka aguñ tapa niisi ngiikii make hojalo Aba kii huna ngiimi kiiniñ tiinii. 25 Siika drih atañmi ngo nunumi lubii lyike, ngiika nunu agiñho darañso. 26 Hojalo hembyuñnii, Darii Yajiyallo, humina Aba ngiika armyañ pa kiiniñ tiinii, mo nunumi hikha drih atañmi tonsḛr kendoke, ho nunumi hempa dopa miilyi diike hikha ngiika nunu mika luniiñmi. 27 Chimie mi ngo nunuko atii bibii lyike; ngiika chimie mi nunumi bibii lyike; dohadolo ka bichañ ho ngo nunumi bima lyike. Nunuka ahha heru yo, malo hiimi biiso kiine yo. 28 Nunu ngiika nunumika luniiñmi tapa biilyi, Ngo ilyi kuke, ho ngo nunuko ahchi ke. Nunu matiirḛ ngiimi hendo koda, nunu hempyo kendoke, niimpalukoda ngo Aba ko ilyi ke; niimpalukoda Aba ngiimi kahe yake. 29 Ho siisi ngo nunumi lyima rampa luko lumyo biilyi ke, niimpalukoda niidana hiila lyichinii, nunumi henje kiine dupa. 30 Ngo nunumi ano lurii lukañ takuñ make, niimpalukoda siika dohadolo mika sangiinii ahla do. Mo ngiimi harchichike giimiñ lakiñ make; 31 hojalo Aba ngiimi nii miito ludo hiimi siike ngo miisu dunii, niimpalukoda dohadolo mi chinke nendupa ngo Aba mi hendo hiila. Gurito, kiije ngunu insa.
Jisu Jije Rosannii
1 Ngo jije rosannii ke, ho ngiika Aba rosannii mika miini niike. 2 Halloh buhe abi ngiiko hoka giinii ahee hima koda, mo papa du, ho halloh buhe abi ahee hiniiñ mi mo miini du, niimpalukoda hiimi ahee abu yapa hike nendupa. 3 Nunumi darii miito kula dokuke ngiika nunumika aguñ luniiñlo. 4 Ngiiko giigela duto, ho ngo nunuko. Niihtañ pa halloh hii attohpa ahee hisu lama, nii dahepa hii rosannii ho giigela dutema, nunu tiirḛ hiila kema, nii dahepa nunu ngiiko giigela dutema. 5 Ngo rosannii ke, nunu halloh atañ ke. Hu ngiiko giigela du, ho ngo mohko, hiika hii mo ahee abuje hikiñdo, niimpalukoda ngiiko hokii giisa tola nunu hang miila kemake. 6 Miyu matiirḛ ngiiko giige makoda, mohmi halloh mika pachañ ho papadu ho sendu; ho halloh atañmi tukuñ lala, yamu ho gopa liidu ho hompa du. 7 Nunu matiirḛ ngiiko giige dokoda, ho ngiika aguñ nunuko giido koda, kuto niijalo nunuka heniiñmi, ho hiimi nunupa miibi kendoke. 8 Siika silo ngiika Aba assañkodu, nunuka abuje ahee hiniiñlo, ho ngiika henjeajiñ hiila kakiñ siito. 9 Niihtañpa ngiika Aba ngiimi hendu, hiichuli ngo nunumi hendu; ngiika hennii ho giige tola duto. 10 Nunu matiirḛ ngiika lujubiniiñ mi atii dokoda, nunu ngiika heniiñ ho giigela dokiñdo, niihtañpa ngo ngiika Aba ka lujubiniiñ mi atii biidu ho mohka heniiñ ho giigedu. 11 Siika drih atañmi ngo nunumi luko biilyi ke, niimpalukoda ngiika hempyo hii nunuko doke nendupa, ho nunuka hempyo hii poteje dopa. 12 “Siika sike ngiika lujubiniiñ, nunu kone anyañ mi hensu to ngiika nunu mika henchañho. 13 Simi kayeya miyu hennii nyikiñma, miyu attoh ka sango mi mohka ajiñ atañ paka hempa biniiñ. 14 Nunu ngiika ajiñ atañ ke nunu ngiika nunumika luniiñmi miido koda. 15 Ngo nunumi miira hiila gyote kuma, niimpalukoda miira hii chima mohka atoh nii miido hiila; hojalo ngo nunumi ngiika ajiñ hiila gyodu, niimpalukoda hikha ngo niihna ngiika Aba kokii tapa tiinii hiimi nunumi chindopa miitii. 16 Nunu ngiimi kahe make, hojalo ngoke nunumi kahe tiinii ho bibiilyinii ingela ho ahee hidopa ho nunuka ahee mi giigela dopa; niimpalukoda niijalo nunu Aba mi ngiika armyañ pa kuchi, mohmi nunumi bike nendupa. 17 Siika sike ngo nunumi lubii lyiniiñ, kone anyañmi hensu tolya.
Dohadolo Ka Kanamanii
18 “Dohadolo matiirḛ nunumi kanamapa miilyi milo, chintolya hii ngiimike kanamapa miidonii nunu mika miima rampa. 19 Nunu matiirḛ dohadolo kiikoda, dohadolo hii henkiñdo mo attoh kiimi; hojalo nunu dohadolo kiima, ngo nunumi kahe tiiku dohadolo hokii, hopa dohadolo hii nunumi kanamapa miido. 20 Henge giitolya dohadolo mi ngiika nunumika luko niimi, ‘Miira hii atoh mi kahe yama ke.’ Mohlu matiirḛ ngiimi miihimiire dokoda, mohlu nunumi miihimiire kendo; mohlu matiirḛ ngiika aguñmi atii biido koda, mohlu nunuka aguñ mitrḛ atii biikiñ doke. 21 Hojalo hikha siika atañ siimi mohlu ngiika piigo pake nunumi miikiñ donii, niimpalukoda mohlu mohmi chima huna ngiimi kiiniñ tiinii. 22 Ngo matiirḛ ahma tiikoda ho mohlumi luma tiikoda, mohlu ingyamiigya diimmah; siisi mohlu mohluka ingyamiigya mi legii ko nyikuma. 23 Huna ngiimi kanamadonii ngiika Aba mitrḛ kanamapa miido. 24 Ngo matiirḛ mohluka punkoho mih kone katrḛ miimanii miigomi miima tiikoda, mohlu ingyamiigya diimmah; hojalo siisi mohlu kapa biineku ho ngiimi ho ngiika Aba ngiinyimi kanañ mapa miido. 25 Siikasi mohluka dapo hoka keto laka doniimi miipe kiine dupa, ‘Mohlu ngiimi hang miimapa kahu nyada.’ 26 Hojalo niidana Hembyuñnii ahchinii, humina ngo nunuko Aba kokii kiiniñ talyinii, jije ka Yajiyallo mitrḛ, huna Aba kokii lindonii, mo ngiipa haki lyibi kendo; 27 ho nunu tiirḛ haki lyibi kendo, niimpalukoda nunu lotu jaho hokii ngiika agiñho da.
1 “Ngo hikha siika simi nunumi ludu niisi nunumi giiyi kiine diila hiila. 2 Mohlu nunumi sinagog ka agoho nempa lilyido; jije, myodu hii ahlado hujalopa nunumi menchi mohlu hensu kendo Pinii pasu miidunii hiila. 3 Ho mohlu siika simi miikiñdo niimpalukoda mohlu Aba mi chima, malo ngiimi tiirḛ. 4 Hojalo ngo nunumi siika drih atañmi lubii lyike, niimpalukoda niidana mohluka myodu ahchinii nunumi hempa kiine dupa siika atañmi ngo lukone hiiha.
Darii Yajiyallo Ka Miigo
“Ngo siika drih atañ siimi lotu ho luma to, niimpalukoda ngo nunuka agiñho dato. 5 Hojalo siisi ngo ilyi ku mohko huna ngiimi kiiniñ tiinii; hojalo kone hetrḛ nunu ngiimi takama, ‘No noh impa?’ 6 Hojalo ngo nunumi siika drih atañmi luko biilyi, heru hii nunuka ahha ho poteje giido. 7 Hojalo ngo nunumi jije mi lukoso: siikasi nunuka aya kiipa ke ngo ile lyiniiñ, niimpalukoda ngo matiirḛ ima koda, Hembyuñnii nunuko ahkiñma; hojalo ngo matiirḛ indo koda, ngo mohmi nunuko kiiniñ bichi. 8 Ho niida mo ahchi, mo dohadolo mi lyarkiñdo ingyamiigya ho denki ho ayakacho kanii ka piigo ho: 9 ingyamiigya piigomi, niimpalukoda mohlu ngiimi henje nyama; 10 denki ka piigomi, niimpalukoda ngo Aba ko ilyi, ho nunu ngiimi kapa keñkuma; 11 ayakacho kaniiñ ka piigomi, niimpalukoda siika dohadolo mika sangiibo halii kotii. 12 “Ngo abuje drih atañmi nunumi lukiñ dorañ, hojalo nunu hiika atañmi siisi henge giila kemake. 13 Niida jije ka Yajiyallo ahchi, mo nunumi ingii kendoke hikha jije ho; niimpalukoda mo attoh ka otority lo lukiñ make, hojalo mo niihmi tapado hiimi sii lukiñ siido nii, ho mo nunumi luko kendo drih atañ ahsa niimi. 14 Mo ngiimi assañdiilañ kendo, niimpalukoda mo niihna ngiikii hiimi labii kendo ho hiimi nunumi luko kendo. 15 Hikha Aba kii hii ngiikii ke; hopa ngo ludu mo niihna ngiikii hiimi labii kendo ho hiimi nunumi luko kendo.
Heruniiñ la Hempyoniiñ
16 “Ichuche dahi damolala, ho nunu ngiimi kapa keñkuma; hiira ichuche dala la, ho nunu ngiimi kapa kendo.” 17 Mohka henjeajiñ atañ tange kone anya mi lusutii, “Niihpe siikasi mohka ngunumika luniiñsi, ‘Ichuche dahidamo lala, ho nunu ngiimi kapa keñkuma, ho hiira ichuche dala la, ho nunu ngiimi kapa kendo’; ho, ‘niimpalukoda ngo Aba ko ilyi ke’?” 18 Mohlu lutii, “Nii hiila mo lusa niimi pe ‘ichuche dahidamo lala’? Ngunu chima mo nii hiila lusa niimi.” 19 Jisu chintii mohlu mohmi taka nando hiila; hopa mo mohlumi lutii, “Hiila nunuka punkoho taka siinya danii, nii lusa niimi pe ngiika luniiñsi, ‘Ichuche dahi damo lala, ho nunu ngiimi kapa kema, ho hiira ichuche dala la, ho nunu ngiimi kapa kendo’? 20 Jijeloda, jijeloda, ngo nunumi lukoso, nunu khekiñdo ho heru kendo, hojalo dohadolo hempyo kendo; nunu heru kendo, hojalo nunuka heru hii hempyopa lyiguh rikiñdo. 21 Annii akha ka hiijañ akhii chilyi ho mo herudu, niimpalukoda mohka myodu hii ahdoku; hojalo mo wiinga mi buku lala, mo achihchiniiñ mi hempa kuma, niimpalukoda wiinga mika dohadolo hoka buniiñ mi hempyo kopa. 22 Hopa nunuko siisi heru hii do, hojalo ngo nunumi hiira kapa talyi ho nunuka ahha hii hempyo kendoke, ho kone hetrḛ nunuka hempyo mi nunu kokii lara biila kema. 23 Hiika allo ho nunu ngiimi hang kukiñ kuma. Jijeloda, jijeloda, ngo nunumi lukoso, nunu matiirḛ niijalo Aba kokii kuchi, mo nunumi hiimi bikiñ doke ngiika armyañ pa. 24 Siisijalo nunu hang kumarañ ngiika armyañ pa; kuto, ho nunu pakiñ doke, nunuka hempyo mi pote kiine dupa.
Dohadolo Mika Pamiñnii
25 “Ngo nunumi simi lutiñ nambii dola luko biilyi ke; myodu ahkiñ doke niidana ngo nunumi lutiñ nangku mapa hojalo pardapa Aba ka piigo mi luchinii. 26 Hiika allo ho nunu ngiika armyañ pa kukiñdo; ho ngo nunumi hiila lutema ngo Aba mi nunupa kutoso; 27 niimpalukoda Aba mo loda ya nunumi hendo, niimpalukoda nunu ngiimi hentii ho henjeda ngo Aba kokii ahdo hiila. 28 Ngo Aba kokii ahdu ho dohadolo so ahdu; hiira, ngo dohadolo mi apatela inchi ku ho Aba ko inchi.” 29 Mohka henjeajiñ atañ lutii, “ḛh, siisi no parda pa ludo, hang lutiñ namapa! 30 Siisi ngunu chindo no hikha drih atañmi chindo hiila, ho kone hetrḛ taka dopa lyima; sokii ngunu henjedo no Pinii kokii ahdo hiila.” 31 Jisu mohlumi lusitii, “Nunu siisi henje dokuha? 32 Myodu ahlyi kuke, jije siisi ahdoku, nunu harpya hasa nyakiñdo, miyu kone abimi mohka ude ho, ho ngiimi kontii apa kendo; hojalo ngo kontii dakiñma, niimpalukoda Aba ngiika agiñho dakiñdo. 33 Ngo siika simi nunumi lubii lyike, ngiikoho nunupa chimie hii dodopa. Dohadolo so nunuko hentḛrkanyi dolyi diike; hojalo ngarka jilya datolya, ngo dohadolo mi pamiñ tiike.”
Jisu Mohka Henjeajiñ Atañpa Kudo
1 Jisu siika aguñ atañmi luku lala, mo mohka amee mi yapuñ hahoho kacha lala ho lutii, “Aba, myodu ahdoku; niika Oho mi assañdupa niimpalukoda Oho niimi assañdupa, 2 niimpalukoda no mohmi hikha miyu atañmi diimiñlumiñ ladopa harchichike bitii, santḛrlamanii sango bidopa humina no mohmi bitiinii. 3 Ho siikasi santḛrlamanii sango, mohlu hiila chindokoda no kontiisii jije Pinii, ho Jisu Kristo humina no kiiniñ tiinii. 4 Ngo niimi kiiddiapiñ so assañdiilañ biilyi, miigomi miipe lala niika ngiimika miido paka biniiñ mi; 5 ho siisi, Aba, ngiimi no niika agiñho tatukatu kiinepe hiika tatukatu ho nii mina ngo dohadolo mika puma rampa niika agiñho giitonii. 6 “Ngo niika armyañ mi miyu atañmi chindopa miitii niika ngiimika dohadolo hokiika biniiñmi; mohlu niikii, ho no mohlumi ngiimi bitii, ho mohlu niika aguñmi talii biinyane. 7 Siisi mohlu chindo amane drih niika ngiimika biniiñ hii niiko hokii hiila; 8 niimpalukoda ngo mohlumi niika ngiimika aguñ biniiñ mi bitii, ho mohlu hiimi larii biine ho jije mi chindoku ngo niiko hokii ahdo hiila; ho mohlu henjedo no ngiimi kiiniñtii. 9 Ngo mohlupa kubidu; ngo dohadolo pa kubima hojalo hiipa humina no ngiimi bitiinii, niimpalukoda mohlu niikii; 10 hikha ngiikii hii niikii ke, ho niikii hii ngiikii, ho ngiimi mohlukoho assañdiilañ da. 11 Ho siisi ngo dohadolo so daku malyike, hojalo mohlu dohadolo so dalyi ke, ho ngo niiko ahlyi kuke. Darii Aba, mohlumi niika armyañ pa atii tokulya, humina no ngiimi bitiinii, niimpalukoda mohlumi konepa lyidopa, ngiinyi ka kone paka lyichañho. 12 Ngiika mohluka agiñ hoka daho, ngo mohlumi niika armyañ pa atiito, humina no ngiimi bitiinii; ngo mohlumi dagur biito, ho kone hetrḛ lyuma hojalo lyusa boka oho kontii, piniipota mi lyipe kiine dupa. 13 Hojalo siisi ngo niiko ahlyi kuke; ho siika drih atañmi ngo dohadolo so luko du, niimpalukoda mohluko ngiika hempyo mi mohlupa giitii pake nendupa. 14 Ngo mohlumi niika aguñmi bibii lyike; ho dohadolo si mohlumi kana malyike niimpalukoda mohlu dohadolo hokiima, niihtañpa ngo tiirḛ dohadolo hokiima. 15 Ngo hiila kuma lyike no mohlumi dohadolo hokii labii heku hiila, hojalo no mohlumi diimmah hokii achuñ tolyape. 16 Mohlu dohadolo hokii make, niihtañpa ngo tiirḛ dohadolo hokii ma. 17 Dariimiito mohlumi jijeho; niika aguñ hii jije. 18 Niihtañpa no ngiimi dohadolo so kiiniñtii, hii chulipa ngo mohlumi dohadolo so kiiniñ biilyi ke. 19 Ho mohlu kiipa ke ngo atohmi tiilii siitiinii, niimpalukoda mohlumi tiirḛ jije ho tiiliisiike nendupa. 20 “Ngo siika atañpa kontii kuma lyike, hojalo hiika atañ patrḛ hutiina henje talyi nii mohluka aguñmi tala la, 21 mohlu miilañ rumi konepa lyike nendupa; niihtañpa no, Aba, ngiiko do, ho ngo niikii ho, hiichulipa mohlumi tiirḛ ngiinyi ko doke nento, niimpalukoda dohadolo mi henje kiine dupa no ngiimi kiiniñtii hiila. 22 Niika ngiimika tatukatu biniiñ mi ngo mohlumi bibii lyike, niimpalukoda mohlumi konepa lyike nendupa niihtañpa ngiinyi konepa lyidu, 23 Ngo mohluko ho no ngiiko, niimpalukoda mohlumi ayaloda konepa lyike nendupa, niimpalukoda dohadolo mi chinke nendupa no ngiimi kiiniñtii hiila ho mohlumi hento niihtañpa ngiimi no hendu. 24 Aba, ngo hendo mohlutrḛ, humina no ngiimi bitiinii, ngiika agiñho dado koda nohna ngo danii, ngiika tatukatu mi kapa dopa niika ngiimika biniiñmi niika heniiñ ho dohadolo mika pumarampa. 25 O denki Aba, dohadolo niimi chima, hojalo ngo niimi chindu; ho siika atañ chindo no ngiimi kiiniñtii hiila. 26 Ngo mohlumi niika armyañ mi chindopa miitii, ho ngo siimi chindo miipa talyi, niimpalukoda niika ngiimika heniiñ chulipa mohluko hotiirḛ doke nendupa, ho ngo mohluko ho dodupa.”
Jisu Mika Latunii
1 Jisu siika aguñ atañmi luku lala, mo henjeajiñ atañ agiñho Kidron Pabupako pache dalyiho bodo, nohna balu ngohe dotiinii, hiiko mo la mohka henjeajiñ atañ ahtii. 2 Siisi Judas, mohmika talubalobo, motrḛ chintii ganda mi; niimpalukoda hiikoho Jisu mi kiirañ mohka henjeajiñ atañ agiñho kappatii. 3 Hopa Judas sipahi tarotange yargiitii ho sabii tange nyibu burii atañ kokii ho Parisi atañ, yamu ho muru ho dankho panyi bitola intii. 4 Ho Jisu, hikha mohkoka lyisa niimi chimbii tola, lingila ho mohlumi lutii, “Humi nunu medu?” 5 Mohlu mohmi lusitii, “Nazaret daka Jisu mi.” Jisu mohlumi lutii, “Ngoke hii.” Judas, mohmika talubalobo, mohluka agiñho dabo montii. 6 Mo mohlumi, “Ngoke hii,” hiila lukele, mohlu kiiliñ sonkur linku lala ho kiiddi ho giiyitii. 7 Hiira mo mohlumi tahiibiido, “Humi nunu medu?” Ho mohlu lutii, “Nazaret daka Jisu mi.” 8 Jisu lusitii, “Ngo nunumi lukotii ngoke hii hiila; hopa, nunu matiirḛ ngiimi medu milo, siika miyu atañmi inke nento ku.” 9 Siikasi mohka aguñ luniiñmi lyipe kiine dupa lyitii, “Niika binii hokii kone mitrḛ ngo alyu make.” 10 Ho Saimon Pitar, ilyo giisu lyinii, hiimi seliñ lala ho bukuñ nyibu ka miira mi patii ho mohka rubi yaroo mi papa lintii. Miira ka armyañ Malkas hiila. 11 Jisu Pitar mi lutii, “Niika ilyo mi hiika hubyu ho hiilii giito ku; ngo ngiika Aba ka turla biniiñ mi takiñma ehna?”
Jisu Annas Ka Hata Ho
12 Hopa sipahi atañ la mohlumika dagiibo ho Jew atañka sabii atañ Jisu mi latutii ho mohmi ratii. 13 Kappyopa mohlu mohmi Annas ko ahgiitii; niimpalukoda mo Kaipas ka attobotii, hiika anyañ ho mo bukuñ nyibu pa dutii. 14 Hiika hii Kaipas tii Jew atañ mika tonsḛrbo, hiilaya aya yakiñdo miyu koneka shiiniiñ hii hikha miyu mi hentola.
Pitar Jisu Mi Mapah Biido
15 Saimon Pitar Jisu mi imbo montii, ho hiichulipa khiibe henjeajiñ tiirḛ. Siika henjeajiñ bukuñ nyibu mika chinsu lyiniiñ, mo bukuñ nyibu ka lengo ho ahbomontii Jisu ka agiñho, 16 Pitar alyeh ka ago datii. Khiibe henjeajiñ hiitiirḛ, huna bukuñ nyibu kala tiinii, agoho lintii ho nyimii miira mi luriitii alyeh hoka kalya bomi, ho Pitar mi ura ho ahgiitii. 17 Nyimii miira alyeh mika kalya biiniibo Pitar mi lutii, “Notiirḛ siika miyu ka henjeajiñ atañ hokii kone masu ha ehna?” Mo lutii, “ngo hiila ma.” 18 Siisi miira atañ la sabii atañ yamu pabitii, niimpalukoda hiikaho lakhiitii, ho mohlu dala ho mohlu atohmi yamu higyu siitii; Pitar tiirḛ mohluka agiñho dabo montii, dala ho mo atohmi higyu siitii.
Bukuñ Nyibu Jisu Mi Taka Biido
19 Bukuñ nyibu Jisu mi mohka henjeajiñ atañ la mohka tonsḛr niika piigo mi takatii. 20 Jisu mohmi lusitii, “Ngo dohadolo mi tapa dopa luto; ngo kiirañ sinagog la piniiude ho tonsḛrto, nohna hikha Jew atañ ahkuñ nyadu nii; ngo lusila hang luma. 21 Niimpa no ngiimi taka du? Hutiina tapa nenii hiimi ya taka hetiika, niihna ngo mohlumi lukotonii; mohlu chineke ngiika luniiñmi.” 22 Mo hiila siimi lukele, sabii kone hoka danii Jisu mi mohka alah lo pita biido, lubiidola, “sitañpa no bukuñ nyibu mi luko dunii?” 23 Jisu mohmi lusitii, “Ngo matiirḛ lukha tiimilo, lukha niimi haki bito; hojalo ngo matiirḛ luda tiikoda, niimpa no ngiimi pita du?” 24 Annas ho mohmi Kaipas bukuñ nyibu ko kiiniñtii.
Pitar Hiira Jisu Mi Mapah Biido
25 Siisi Saimon Pitar dala ho atohmi higyu siila dotii. Mohlu mohmi lutii, “Notiirḛ mohka henjeajiñ hokii kone masuha?” mo hiimi mapah siitii ho lutii, “ngo hiila ma.” 26 Bukuñ nyibu ka miira hokii kone, Pitar loka yaroo papa konii boka disho hokii kone, tahiibiido, “Ngo niimi balu ho mohka agiñho kapa masu toha ehna? 27 Pitar hiira hiimi mapah siibiido; ho ohepada paro khodatii.
Jisu Pailet Ka Hata ho
28 Ho mohlu Jisu mi Kaipas ka ude hokii raddeduko lengo ho ahgiitii. Hiika hii arro hotii. Mohlu hiika raddekalengo amatii, niimpalukoda mohlu miibḛr kodiila hiila, impobiiniiñ ka diigo diidupa. 29 Hopa Pailet ago mohluko lintii ho lutii, “Nii hiila nunu siika miyu mi halii budu?” 30 Mohlu mohmi lusitii, “Siika miyu si matiirḛ diimmah miinii makoda, ngunu mohmi so ahgii bidiima.” 31 Pailet mohlumi lutii, “Nunu mohmi sebii heku ho nunuka atoh dapo lo mohmi halii siito.” Jew atañ mohmi lutii, “Siikasi ngunuka mujuma mi miyu mi shiido paka miiniiñsi.” 32 Siikasi Jisu ka aguñ luniiñmi lyipe kiine dupa niihtañ shiigo na mo shiikiñ donii hiila kakiñ dupa. 33 Pailet hiira raddeduko lengo ho ahkur tiiku ho Jisu mi gyobiido, ho mohmi lutii, “No Jew atañka Radde ha?” 34 Jisu lusitii, “No siikasi atoh pa ludu nii, malo khiibemiyu niimi ngiika piigo mika luko niiha?” 35 Pailet lusitii, “Ngo Jew peha? Niika atoh gandaho nyibu burii atañ sii niimi ngiimi nembi siitii nii; no nii miibi tola?” 36 Jisu lusitii, “Ngiika radde sangii saniiñ siika dohadolo somake; ngiika raddesangii saniiñ matiirḛ siika dohadolo hotii koda, ngiika miira atañ padudo, niimpalukoda ngiimi Jew atañ ko bike nendii ma; hojalo ngiika raddesangii saniiñ siika dohadolo hokii make.” 37 Pailet mohmi lutii, “Hokoda no radde ha?” Jisu lusitii, “No ludo ngo radde hiila. Sipa ngo bukotii, ho sipa ngo siika dohadolo so ahdu, jije mi haki bidu pa hiila. Kone abi huna jije hokii nii hiika hii ngiika aguñmi tadu.” 38 Pailet mohmi lutii, “Jije hii nii?”
Jisu Mi Mendo Pa Lubiido
Siimi mo luku lala, mo hiira Jew atañ agiñho agoho lintii, ho mohlumi lukotii, “Ngo hang miigyanii mohko kapa ma. 39 Hojalo nunuko muju dodu miyu kone mi nunupa apa lila Impobiiniiñ dituñ ho; nunu hendoha ngiimi nunupa Jew atañka radde mi apalindo koda hiila?” 40 Mohlu hiira gyutii, “Siika miyu mima, hojalo Barabas mi!” Barabas diipyo niitii.
1 Ho Pailet Jisu mi selii lala ho mohmi hike nembiido. 2 Ho sipahi atañ tare hokii raddebyopa pa miila lala, ho mohka adiñ ho khelii biido, ho niiji pulye agii biido; 3 mohlu mohko lohe chatii, lubiidola, “assañlyi, Jew atañka radde mi!” ho mohmi mohluka alah lo pita biido. 4 Pailet hiira agoho lintii, ho mohlumi lutii, “Kato, ngo mohmi nunupa lingii biilyi ke, niimpalukoda nunumi chinke nendupa ngo hang miigya nii mohko kapa ma.” 5 Hopa Jisu agoho lintii, tare byopa la niiji pulye mi giitola. Pailet mohlumi lutii, “Kato siika miyumi!” 6 Nyibu burii atañ la sabii atañ mohmi kala la, mohlu gyutii, “Ledato mohmi, ledato mohmi!” Pailet mohlumi lutii, “Nunu atohpa mohmi sebii he ho mohmi leda he, niimpalukoda ngo hang mohmi miigya nii kapa ma.” 7 Jew atañ mohmi lusitii, “Ngunu ko dapo do, ho hiika dapo kii dalyipa mo shiido pa lyido, niimpalukoda mo atohmi Pinii ka Oho pa miisuda.” 8 Pailet siika aguñmi tapa lala, mo uro yapa biisotii; 9 mo raddeduko lengo ho hiira ahkur biila ho Jisu mi lutii, “No nohkii pe?” Hojalo Jisu luko matii. 10 Pailet hopa mohmi lutii, “No ngiimi lurii tama ha?” No chima po ngiiko niimi apadopa jalo harchichike hii do ho ledadopa jalo harchichike hii do hiila? 11 Jisu mohmi lusitii, “Niiko ngiimi miila dopa harchichike hii lyidiima niimi ayoh hokii bima tiikoda; hiiko hopa huna ngiimi niiko nembi tiinii hii uro yapa ingyamiigya dake.” 12 Siika luniiñ kiipa Pailet mohmi apalindupa hentii, hojalo Jew atañ gyutii, “No matiirḛ mohmi apa lilyi milo, no Kesar ka ajiñ make; kone abi huna atohmi radde pa miisu danii hii Kesar mi chekhoda.” 13 Pailet siika aguñmi tapa lala, mo Jisu mi agoho lingiitii ho duhatii ayakacho kako duko ho dutii Pavement luniiñ gandaho, ho Hebrew aguñ pa, Gabbatha hiila. 14 Siisi hiika hii Impobiiniiñ ka Miimyo biniiñ allo pa lyitii; hiika hii gunta talyañlenye pa lyitii. Mo Jew atañmi lutii, “Kato nunuka Radde mi!” 15 Mohlu gyutii, “Mohmi mento, mohmi mento, mohmi ledato!” Pailet mohlumi lutii, “Nunuka Radde mi ngo leda talyiha?” Nyibu burii lusitii, “Ngunukii radde nyimake hojalo Kesar siike.” 16 Ho mo mohmi mohlumi bibiido leda kiine dupa.
Jisu mi Ledatii
17 Hopa mohlu Jisu mi ingiitii, ho mo intii, mohka atoh pogyañ mi jobii tola, hiika gandaho dinkhu ganda lukoho, nii mina Hebrew ho Golgota lutii nii. 18 Hiiko mohlu mohmi ledatii, ho mo agiñho khiibe anyeta, pache konsa, ho Jisu mo anye ka liipa jaho. 19 Pailet armyañ miilañ ketii ho hiimi pogyañ ho tiiliitii; hiila ketii, “Nazaret daka Jisu, Jew atañka Radde.” 20 Abuje Jew atañ siika armyañ keniiñ mi rikatii, niimpalukoda nohna Jisu mi leda tiinii citi hokiila ano adho matii; ho hiikahii Hebrew pa, Latin pa ho Grik pa ketii. 21 Nyibu burii atañ la Jew atañ ho Pailet mi lutii, “Hiila keyo, ‘Jew atañka Radde hiila,’ hojalo, ‘Siika miyu si lune, Ngo Jew atañka radde hiila.’” 22 Pailet lusitii, “Nii ngo ketii ngo ketii kuke.” 23 Sipahi atañ Jisu mika leda lyiho mohlu mohka abitarii atañmi labiitii ho piilye pa dopa miitii, sipahi kone abipa; mohka abi miilañmi. Hojalo abi ho jigañ giimatii, akañ hokiila ayoh lohe pa alah loka chiniiñ; 24 hopa mohlu kone anyañ mi lusutii, “Simi ngunu sarche masa, hojalo pota tuka siisa si hupana dokiñ donii.” Siikasi piniipota mi lyipe kiine dupa lyitii, “Mohlu ngiika abitarii mi mohluka punkoho tache siibiine, ho ngiika pulyepa mohlu pota tuka siinyado.” 25 Hopa sipahi atañ simi miitii. Hojalo Jisu ka pogyañ aruñho mohka annii, ho mohka annii ka anuami, Mary Klopas ka mihie, ho Mary Magdalen datii. 26 Jisu mohka annii mi kapa lala, ho henjeajiñ humina hentii nii aruñho dapa kapa lala, mo mohka annii mi lutii, “Annii akha, kato, niika oho mi!” 27 Ho mo henjeajiñ mi lutii, “Kato, niika annii mi!” Ho hiika myodu hokiija henjeajiñ mohmi mohka ude ho ingii tiiku.
Jisu ka Shiiniiñ
28 Siika hiibaho Jisu, hikha miijaku hiila chimbii tola, lutii (piniipota mi miipe dupa), “Ngo hangḛrdo.” 29 Hiiko ho roalha poteje paka kohe da dotii; hopa mohlu empya lo tajer ho poteje roalha niima lala ho mohka aguñ ho hiimi niima liitii. 30 Jisu roalha mi larii lala, mo lutii, “Siikasi hiine kuke”; ho mohka adiñ mi nyanki lala ho mohka yajiyallo mi apabibii doku.
Jisu mi Adañ Niibiido
31 Hiika hii Miimyo biniiñ allo pa lyilyi nii, shiima apo mi pogyañ ho dumoalo ho dokenena mapa (niimpalukoda dumoalo hii hempḛr khiiniiñ pa lyilyi nii), Jew atañ Pailet mi lubiido mohluka alih mi dantrḛ dokoda, ho mohlu jopa biikiñ doku. 32 Hopa sipahi atañ ahtii ho kapyo jaka alih mi dantrḛ biido, ho kone mitrḛ mo agiñ hoka leda lehiñ konii bomi; 33 hojalo mohlu Jisu ka aruñho ahbii kiile ho mohmi shiido ku kala la, mohlu mohka alih mi dantrḛ matii. 34 Hojalo sipahi kone mohka khiike ho adañ niilii tii, ho ohepada hiikohokii ai la yasie nyi biliñtii. 35 Huna hiimi kapa tiinii haki bitii, mohka pyakonii hii jije, ho mo chindo ho mo jije mi lukoda niimpalukoda nunu mitrḛ henje kiine dupa. 36 Siika drih atañsi lyitii piniipota mi lyipe kiine dupa, “Mohka alloh buhe mitrḛ dantrḛ kema.” 37 Ho hiira gongeta piniipota ludo, “Mohlu mohmi kala dakiñdo humina mohlu niilii talyinii.”
Jisu mika Alie kuniiñ
38 Siika hiibaho Arimatia daka Josep, Jisu ka henjeajiñ kone, hojalo mi chimapa, Jew atañmi biiso biidola, Pailet mi takatii Jisu ka apo mi jobii talyi kula hiila, ho Pailet mohmi bibiido. Hopa mo ahtii ho mohka apo mi jobii tiiku. 39 Nikodemas tiirḛ, hiika ayoh hoka mo koka ahnii bo, mirr la aloe miiyo nii biiliila ahtii, tiicko lange khiiniiñ hepa. 40 Mohlu Jisu ka apo mi jobii tiiku, ho pulye bolyo lo apu tii narunempyo takitero ka agiñho, Jew atañka byuh alie lyiju ho. 41 Siisi mohmika leda ko hiiko balu ngohe dotii, ho balu ho niti byuh kone dotii nohna kone mitrḛ hiiko alie matii rañ. 42 Hopa Jew ka Miimyo biniiñ allo kopa, byuh hii aruñho dosu lyiniiñ, mohlu hiiko Jisu mi alietii.
Byuh Ara
1 Siisi kanualo ka kapyo ja allo ho Mary Magdalen arokonchi ho byuh ho ahtii, kamo dorañpa, ho byuh hokii yalañ mi giipa tola dopa kappatii. 2 Hopa mo hartii, ho Saimon Pitar ko haratii ho khiibe henjeajiñ kotrḛ, humina Jisu hentiinii, ho mohlumi lutii, “Mohlu Attoh mi byuh hokii jora biitii, ho ngunu chima mohlu mohmi noh atiitii hiila.” 3 Pitar ho henjeajiñ kone agiñho lintii, ho mohlu byuh dalyiho intii. 4 Mo anye hartii, hojalo henjeajiñ kone bo Pitar mi hargo yatii ho byuh ho harpyo hatii; 5 ho nyangala kakatii, mo pulye mi hiiko dopa kappatii, hojalo mo ura ho amatii. 6 Ho Saimon Pitar ahtii, mohmi harbo mola, ho byuh ura ho ahtii; mo pulye mi dopa kappatii, 7 ho nyupa nanii mila, niihna mohka dinta ho dotiinii, pulye doko dota mapa kartola attohpa doko dosutii. 8 Ho konebo henjeajiñ, byuh hoka harpyo haniibo, hiitiirḛ ura ho ahtii, ho mo kappatii ho henjetii; 9 hojalopa siisi jalo mohlu piniipota mi chimarantii, mo shiite hela turiturku kendo loda hiila. 10 Ho henjeajiñ atañ mohluka ude atañ ho inkur tiiku.
Jisu Mary Magdalen ko Ahdo
11 Hojalo Mary byuh ka agoho khela datii, ho mo khebii dola byuh ka ura ho nyanga la kakatii; 12 ho mo miidopopi anye mi puloo pa kappatii, Jisu ka shiima joko ho dupa, kone hii adiñ dalyiho kone hii alih dalyiho. 13 Mohlu mohmi lutii, “Annii akha, niimpa no khedu?” Mo mohlumi lutii, “Niimpalukoda mohlu ngiika Attoh mi jora biine, ho ngo chima mohlu mohmi noh atiitii hiila.” 14 hiila lubii dola, mo mokurtii ho Jisu mi dapa kappatii, hojalo mo chimatii si Jisu hiila. 15 Jisu mohmi lutii, “Annii akha, niimpa no khedu? Humi no medu?” Mohmi balu miiniipa hela lala, mo mohmi lutii, “Tonsḛrbo, no matiirḛ mohmi jopa tiimilo, ngiimi lukope no mohmi noh atiitii, ho ngo mohmi jobii talyi kula.” 16 Jisu mohmi lutii, “Mary.” Mo mokur biila mohmi Hibru pa lutii, “Rabboni!” (Tonsḛrbo lusa niimi). 17 Jisu mohmi lutii, Ngiimi tenneyo, niimpalukoda ngo siisilohepa Aba ko chama ranke; hojalo ngiika anubarmii ko ingela ho mohlumi lunge, ngo chalyi kuke ngiika Aba ho nunuka Aba ko, ngiika Pinii ho nunuka Pinii ko. 18 Mary Magdalen intii ho henjeajiñ atañmi lutii, “Ngo Attoh mi kapate”; ho mo mohlumi lukotii mo siika drih atañmi mohmi lukone hiila.
Jisu Mohka Henjeajiñ Atañ ko Ahdo
19 Hiika allo ka alyiñho, kanualo ka kapyoja allo ho, alyeh hii giipiñ tola dotii nohna henjeajiñ atañ dutiinii, Jew atañ mika biisomi, Jisu ahtii ho mohluka punkoho datii ho mohlumi lutii, “Chimie nunu agiñho dokiñcho.” 20 Mo siimi luku lala, mo mohlumi mohka alah la mohka khiike mi kakiñtii. Ho henjeajiñ atañ hempyotii mohlu Attoh mi kapa lala. 21 Jisu hiira mohlumi lutii, “Chimie nunu agiñho dokiñcho. Niihtañpa Aba ngiimi kiiniñtii, hiichulipa ngo nunumi kiiniñ biilyi ke.” 22 Ho mo siimi luku lala, mo mohlumi muhi biido, ho mohlumi lutii, “Darii Yajiyallo mi larii tolya. 23 Nunu matiirḛ mika ingyamiigya niimi hello bido koda, mohlumi hello tiikuke; nunu matiirḛ mika ingyamiigya niimi hello bima koda, mohlu giikañ kendo.”
Jisu la Tomas nyi
24 Siisi Tomas, alyañlenye hokii kone, bupyuñ siiniiñ luniiñbo, dabo matii mohluka agiñho Jisu ahlyi ho. 25 Hopa khiibe henjeajiñ atañ mohmi lukotii, “Ngunu Attohmi kapato.” Hojalo mo mohlumi lutii, “Nii dahepa ngo mohka alah daka dachañkuti tiicko mi kapa tama, ho ngiika lahchi mi dachañkuti tiicko ho tenka tama, ho ngiika alah mi mohka khiike ho tenga tama, ngo taje tama.” 26 Allo lopinye daku lala, mohka henjeajiñ atañ hiira ude ho dutii, ho Tomas tiirḛ mohluka agiñho dubo montii. Alyeh hii giipiñ tola dotii, hojalo Jisu ahtii ho mohluka agiñho datii, ho lutii, “Chimie nunu agiñho dokiñcho.” 27 Ho mo Tomas mi lutii, “Niika lahchi mi so tenga to, ho ngiika alah mi kato; ho niika alah mi lyuliñ biila, ho ngiika khiike ho tenga to; henjemapa miiyo, hojalo henjeto.” 28 Tomas mohmi lusitii, “Ngiika Attoh ho ngiika Pinii!” 29 Jisu mohmi lutii, “No henje dokuha niimpalukoda no ngiimi kapa tiiku? Lyanko kendo hiika atañ hutiina kapa masu hojalo henje nyadonii.”
Siika Kheta Sika Doniiñsi
30 Siisi Jisu abuje kagiñnanii miitii henjeajiñ atañka kadopa, hiimi siika kheta so kematii; 31 hojalo siika atañ siimi ka keniiñsi nunumi Jisu hii Kristo hiila henje kiine dupa, Pinii ka Oho, ho henje biidola nunumi sango kapa kiine dupa mohka armyañ pa.
Jisu Kanuhe Henjeajiñ atañ ko Ahdo
1 Siika hiibaho hiira Jisu attoh mi kakiñ siitii henjeajiñ atañmi Tiberias ka siimie ho; ho mo attoh mi sitañpa kakiñ siitii. 2 Saimon Pitar, Tomas bupyuñ siiniiñ luniiñbo, Kana Galili daka Natanel, Zebedi ka oho atañ, ho mohka khiibe henjeajiñ anye dabo montii. 3 Saimon Pitar mohlumi lutii, “Ngo ngiiyyi kute talyike.” Mohlu mohmi lutii, “Ngunu tiirḛ niika agiñho inchi.” Mohlu intii ho huluho chatii; hojalo hiika ayoh ho mohlu hang kubii matii. 4 Allo kupa miikele, Jisu kiitiñ ho datii; hojalo henjeajiñ atañsi Jisu hiila chima tii. 5 Jisu mohlumi lutii, “Himmeatañ, nunuko hang ngiiyyi do ha?” Mohlu mohmi lusitii, “Ma.” 6 Mo mohlumi lutii, “Pakhe mi hulu ka lahbi dalyiho kuloto, ho nunu kubii kendoke.” Hopa mohlu kulo tii, ho siisi mohlu hiimi setu biila matiiku, niimpalukoda ngiiyyi abuje dotii. 7 Henjeajiñ atañ hutiimina Jisu hentiinii Pitar mi lutii, “Siikasi Attoh ke!” Saimon Pitar siikasi Attoh hiila tapa lala, mo mohka pulye tarii mi giitiiku, niimpalukoda mo khepa tola datii miigo miidupa hiila, ho yasie ho beritii. 8 Hojalo khiibe henjeajiñ atañ huluho ahtii, poteje ngiiyyi donii pakhe mi seliñ nyatii, niimpalukoda mohlu kiiddi hokiila ano adho damatii, hojalo dakuñdanyi lanye hepa adho ho datii. 9 Mohlu kiiddi ho linku lala, mohlu hiiko yamu miiri kappatii, hiiko ngiiyyi dopa, ho yatañ miilañ. 10 Jisu mohlumi lutii, “Ngiiyyi iche biilii siisi ka nunuka labii nii hokii.” 11 Hopa Saimon Pitar intii ho pakhe mi kiitiñ ho sechatii, poteje ngiiyyi soro adiñ, langela alyañlyango hela sohiñhe hiiko dotii; ho abuje hiiko dosutii, hojalo pakhe hii paja giimatii. 12 Jisu mohlumi lutii, “Ahto ho aroapiñ diisa.” Siisi henjeajiñ atañ hokii kone tiirḛ haro matii mohmi taka dupa, “No huyape?” Mohlu chintii si Attoh hiila. 13 Jisu ahtii ho yatañ mi tula la ho mohlumi hiimi bitii, ho hiichulipa ngiiyyi mitrḛ 14 Siikasi rohiñniipa Jisu kakiñ siitii henjeajiñ atañmi mohka shiite hela turiturku bii hokii.
Jisu la Pitar nyi
15 Mohlu aroapiñ mi diija kula la, Jisu Saimon Pitar mi lutii, “Saimon, Jon ka oho, no ngiimi siika atañmi uro yapa hendu ha?” Mo mohmi lutii, “Ḛh, Attoh; no chindo ngo niimi hendu hiila.” Mo mohmi lutii, “Ngiika subuñ atañmi diigo bitolya.” 16 Ronye niipa mo mohmi lutii, “Saimon, Jon ka oho, no ngiimi hendu ha?” Mo mohmi lutii, “Ḛh, Attoh; no chindo ngo niimi hendu hiila.” Mo mohmi lutii, “Ngiika subuñ atañmi kage tolya.” 17 Mo rohiñniipa mohmi lutii, “Saimon, Jon ka oho, no ngiimi hendu ha?” Pitar herutii niimpalukoda mo mohmi rohiñniipa lutii, “No ngiimi hendu ha hiila?” Ho mo mohmi lutii, “Attoh, no amanehemi chindo ke; no chindo ngo niimi hendo hiila.” Jisu mohmi lutii, “Ngiika subuñ mi diigo bitolya. 18 Jijeloda, jijeloda, ngo niimi lukoso, niika yapa doho, no atoh atoh abitarii giila ho no inado inne; hojalo niika akha lyikuho, no niika alah mi lyuliñ bikiñdo, ho koneya niimi agii kendo ho no noh inama ho niimi ingii kendo.” 19 (Siikasi mo lutii niihtañ pana mo shiikiñ tiinii Pinii mi assañdiilañ dupa.) Ho hiikahiiba ho mo mohmi lutii, “Ngiika kiiliñho imboto.”
Jisu la Henjeajiñ Kone nyi
20 Pitar kakutii ho mo anye mi imbo mondo pa kappatii henjeajiñ mi humina Jisu hentiinii, huna alyiñapiñ diilyi ho mohmi habyañho giida biidola lunenii, “Attoh, huna hii niimi ka talubalo saniibo?” 21 Pitar mohmi kapa lala, mo Jisu mi lutii, “Attoh, siika miyu si nii lyikiñdo?” 22 Jisu mohmi lutii, “Ngiika henko matiirḛ lyido koda mo ngiika ahlyi ku lohepa dalya dokoda, hiimi no niihpa? Ngiimi imbo monto!” 23 Luniiñsi hikha adhoganda anubarmii miilañ tapa tii siika henjeajiñ shiikiñma hiila; hojalo Jisu mohmi no shiikiñma hiila lumatii, hojalo, “Ngiika henko matiirḛ lyido koda mo ngiika ahlyi ko lohepa dalya dokoda, hiimi no niihpa?” 24 Siika sike henjeajiñ huna siika drih atañmi haki bitiinii, ho huna siika drih atañmi ketiinii; ho ngunu chindo siika pyakoniisi jije hiila.
Lumelujakuniiñ
25 Hojalo akota abuje drih atañ dorañ Jisu ka miiniiñ; hikha kone abimi kedo koda, ngo hendo dohadolo soya atii ko nyidiima siika kheta keniiñ atañmi.