1:1 फारस क राज्ज वुस्रू क सासन क पहिले बरिस यहोवा वुस्रू क आतिमा क एक ठु घोसणा करइ क बरे उत्साहित किहस। कुस्रू उ घोसणा क लिखवाएस अउ अपने राज्ज मँ हर एक जगह बँचवाएस। इ एह बरे कीन्ह गवा रहा ताकि यहोवा क उ सँदेसा जउन यिर्मयाह क जेरिये कहा गवा रहा, पूरा होइ सकइ। घोसणा इ अहइ: 2 “फारस क राजा कुस्रू क सँदेसा:सरग क परमेस्सर यहोवा, पृथ्वी क सारे राज्ज मोका दिहेस ह अउर यहोवा मोका यहूदा देस क यरूसलेम मँ ओकर एक ठु मन्दिर बनावइ बरे चुनेस। 3 यहोवा, इस्राएल क परमेस्सर अहइ, उ परमेस्सर जउन यरूसलेम मँ अहइ। जदि परमेस्सर क कउनो लोग तोहरे बीच रहत अहइ तउ मइँ इ पराथना करत हउँ कि परमेस्सर ओका आसीर्बाद देइ। उ पचे क यहूदा देस क यरूसलेम मँ जाइ चाही। उ पचे यहोवा क मन्दिर क बनावइ बरे जाइ चाही, 4 अउर एह बरे कउनो भी उ जगह मँ जहाँ इस्राएल क लोग बचे होइँ। उ जगहिया क लोगन क ओन बचे हुवन क मदद करइ चाही। ओन लोगन क चाँदी, सोना, गाइ अउर दूसर चिजियन द्या। यरूसलेम मँ परमेस्सर क मन्दिर बरे ओका भेंट द्या।” 5 एह बरे यहूदा अउर बिन्यामीन क परिवार समूहन क प्रमुखन यरूसलेम जाइ क तइयारी किहन। उ पचे यहोवा क मन्दिर क बनवाइ बरे यरूसलेम जात रहेन। परमेस्सर जउन लोगन क प्रोत्साहित किहे रहा उ पचे भी यरूसलेम जाइ क तइयार होइ गएन। 6 ओनकर सबहिं पड़ोसियन ओका चाँदी अउर सोना क चिजियन औजार, जनावरन अउर कीमती चिजियन क ओन दुसर चिजियन क अतिरिक्त जउन उ पचे मेल भेंट क रूप मँ दिहन, दइ क ओनका मदद किहन। 7 राजा कुस्रू भी ओन चिजियन क लिआवा जउन यहोवा क मन्दिर क रहिन। नबूकदनेस्सर ओन चिजियन क यरूसलेम स लूट लिआवा रहा। नबूकदनेस्सर ओन चिजियन क अपने उ मन्दिर मँ धरेस, जेहमाँ उ अपने लबार देवतन क धरत रहा। 8 फारस क राजा कुस्रू अपने उ मनई स ओकरे धने क देखरेख करत रहा, एन चिजियन क बाहेेेर लिआवइ बरे कहेस। उ मनई क नाउँ मिथूदात रहा। एह बरे मिथूदात ओन चिजियन क यहूदा क प्रमुख सेसबस्सर क लगे लइके आवा। 9 जिन चिजियन क मिथूदात यहोवा क मन्दिर स लिआवा रहा, उ सबइ इ सबइ रहिन:सोना क भाँड़ी 30चाँदी क भाँड़ी 1,000चावू अउर कड़ाहियन 29 10 सोना क खोरन 30सोना क खोरन जइसे चाँदी क खोरन 410अउ एक हजार दूसर तरह क भाँडी 1,000 11 सब मिलाइके हुवाँ सोना चाँदी क बनी पाँच हजार चार सौ चिजियन रहिन। सेसबस्सर एन सबहिं चिजियन क अपने संग उ समइ लिआवा जब बन्दियन बाबेल छोड़ेन अउर यरूसलेम क वापस लउट गएन।

2:1 इ सबइ राज्ज क उ सबइ मनई अहइँ जउन बंधुवाई स लउटिके आएन। बाबेल क राजा नबूकदनेस्सर ओन लोगन क बन्दी क रूप मँ बाबेल लिआवा रहा। इ सबइ लोग यरूसलेम अउ यहूदा क वापस आएन। हर एक मनई यहूदा मँ अपने-अपने नगर क वापस गवा। 2 इ सबइ उ सब लोग अहइँ जउन जरूब्बाबेल क संग वापस आएन: येसू, नहेम्याह, सरायाह, रेलायाह, मोर्दकै, बिलसान, मिस्पार, बिगवै, रहूम अउर बाना। इ इस्राएल क ओन लोगन क नाउँ अउर ओनकर गनती अहइ जउन वापस लउटेन: 3 परोस क संतान 2,172 4 सपत्याह क संतान 372 5 आरह क संतान 775 6 येसू अउर योआब क परिवार कपहत्मोआब क संतान 2,812 7 एलाम क संतान 1,254 8 जत्तू क संतान 945 9 जक्कै क संतान 760 10 बानी क संतान 642 11 बेबै क संतान 623 12 अजगाद क संतान 1,222 13 अदोनीकाम क संतान 666 14 बिगवै क संतान 2,056 15 आदीन क संतान 454 16 आतेर क संतान (हिजकिय्याह क परिवारिक पीढ़ी स) 98 17 बेसै क संतान 323 18 योरा क संतान 112 19 हासूम क संतान 223 20 गिब्बार क संतान 95 21 बेतलेहेम नगर क लोग 123 22 नतोपा क नगर स 56 23 अनातोत नगर स 128 24 अजमावेत क नगर स 42 25 किर्यतारीम, कपीरा अउर बेरोत नगरन स 743 26 रामा अउ गेबा नगर स 621 27 मिकमास नगर स 122 28 बेतेल अउर ऐ नगर स 223 29 नबो नगर स 52 30 मगबीस नगर स 156 31 एलाम नाउँ क दूसर नगर स 1,254 32 हारीम नगर स 320 33 लोद, हादीद अउ ओनो नगरन स 725 34 यरीहो नगर स 345 35 सना नगर स 3,630 36 याजकन क नाउँ अउर ओनकर गनती क सूची इ अहइ:यदायाह क संतान (येसू कपारिवारिक पढ़ी स) 973 37 इम्मेर क संतान 1,052 38 पसहूर क संतान 1,247 39 हारीम क संतान 1,017 40 लेवीबंसी कहे जाइवाले लेवी क परिवार क गनती इ अहइ:येसू अउर कदमिएल (होदग्याह क पारिवारिक पढी स) 74 41 गायकन क गनती इ अहइ:आसाप क संतान 128 42 मन्दिर क दुआरपालन क गनती इ अहइ:सल्लूम, आतेर, तल्मोन, अक्वूब, हतीता अउर सोबै क संतान 139 43 मन्दिर क खास सेवक क इ सबइ सन्तानन अहइँ:सीहा क संतानन, हसूपा क संतानन, तब्बओत क संतानन, 44 केरोस क संतानन, सीअहा क संतानन, पादोन क संतानन, 45 लबाना क संतानन, हागाब क संतानन, अक्वूब क संतानन, 46 हागाब क संतानन, सल्मै क संतानन, हानान क संतानन, 47 गिद्दल क संतानन, गहर क संतानन, रायाह क संतानन, 48 रसीन क संतानन, नकोदा क संतानन, गज्जाम क संतानन, 49 उज्जा क संतानन, पासेह क संतानन, बेसै क संतानन, 50 अस्ना क संतानन, मूनीम क संतानन, नपीसीम क संतानन, 51 बकबूक क संतानन, हवूपा क संतानन, हर्हूर क संतानन, 52 बसलूत क संतानन, महीदा क संतानन, हर्सा क संतानन, 53 बकोर्स क संतानन, सीसरा क संतानन, तेमह क संतानन, 54 नसीह अउ हतीपा। 55 इ सबइ सुलैमान क सेवकन क संतानन अहइ:सोतै क संतानन, हस्सोपेरेत क संतानन, परूदा क संतानन। 56 याला क संतानन, दकोर्न क संतानन, गिद्देल क संतानन, 57 सपत्याह क संतानन, हत्तील क संतानन, पोकरेत क संतानन, सबायीम क संतानन, 58 मन्दिर क सेवक अउ सुलैमान क सेवकन क वुल संतान। 392 59 कछू लोग एन नगरन स यरूसलेम आएन: तेल्मेलह, तेलहर्सा, करूब, अद्दान अउर इम्मोर। मुला इ सबइ लोग इ प्रमाणित नाहीं कइ सकेन कि ओनकर परिवार इस्राएल क परिवार स अहइँ। ओनकर नाउँ अउर ओनकर गनती इ अहइ: 60 दलायाह क संतानन, तोबिय्याह क संतानन अउर नकोदा क संतानन 652 61 याजकन क परिवारन क नाउँ इ अहइँ:हबायाह क संतानन, हक्कोस क संतानन अउ बजिर्ल्लै क संतानन (एक मनई जउन गिलादी क बजिर्ल्लै क बिटिया स बियाह किह रहा अउर बजिर्ल्लै क पारिवारिक नाउँ स ही जान जाना रहा।) 62 एन लोग अपने पारिवारिक इतिहासन क खोज किहन, मुला ओका पाइ नाहीं सकेन। ओनकर नाउँ याजकन क सूची मँ नाहीं सामिल कीन्ह गए रहेन। उ सबइ इ प्रमाणित नाहीं कइ सकेन कि ओनकर पुरखा याजक रहेन। इहइ कारण उ पचे याजक नाहीं होइ सकत रहेन। 63 राज्यपाल एन लोगन क आदेस दिहेस कि इ सबइ लोग कउनो भी पवित्र भोजन न करइँ। उ पचे तब तलक इ पवित्र भोजन नाहीं खाइ सकतेन जब तलक ओन मँ स कउनो एक ऊरीम अउर तुम्मीमक उपयोग न कइ ले। 64 सब मिलाइके 42,360 लोग उ समूह मँ रहेन जे वापस लउट आएन। 65 ओनके अतिरिक्त एहमाँ 7,337 सेवक अउर सेविकन रहेन। ओनके संग 200 गायक अउ गायिकन भी रहिन। 66 ओनके लगे 736 घोड़न, 245 खच्चर, 67 चार स पेंतीस उँट अउ 6,720 गदहन रहेन। 68 उ समूह यरूसलेम मँ यहोवा क मन्दिर क पहोंचा। तब परिवार क प्रमुखन यहोवा क मन्दिर क बनावइ क बरे आपन भेंट दिहेन। उ पचे जउन मन्दिर नस्ट होइ गवा रहा उहइ क जगह पइ नवा मन्दिर बनावइ चाहेन। 69 ओन लोग ओतना दिहन जेतना उ पचे दइ सकत रहेन। इ सबइ उ सब चिजियन अहइँ जेनका उ पचे मन्दिर बनावइ क बरे दिहेन: लगभग 500 किलो सोना, तीन टन चाँदी अउर याजकन क पहिरइ वाले 100 चोगन। 70 इ तरह याजक, लेवीवंसी अउर कछू दूसर लोग यरूसलेम अउर ओकरे चारिहुँ कइँती क पहँटा मँ बस गएन। इ समूह मँ मन्दिर क गायक, दुआरपाल अउर मन्दिर क सेवक सामिल रहेन। इस्राएल क दूसर लोग अपने निजी निवास जगहन मँ बस गएन।

3:1 एह बरे सतवें महीने स इस्राएल क लोग अपने अपने नगरन मँ लउट गएन। उ समइ, सबहिं लोग यरूसलेम मँ एक संग एकट्ठे भएन। उ पचे सबहिं एक इकाई क रूप मँ संगठित रहेन। 2 तब योसादाक क पूत येसू अउर ओकरे संग याजकन अउ सालतीएल क पूत जरूब्बाबेल अउ ओकरे संग क लोग इस्राएल क परमेस्सर क वेदी बनाएन। ओन लोग इस्राएल क परमेस्सर बरे वेदी एह बरे बनाएन ताकि उ पचे एह पइ बलि चढ़ाइ सकइँ। उ पचे ओनका ठीक मूसा क नेमन क अनुसार बनाएन। मूसा परमेस्सर क बिसेस सेवक रहा। 3 उ सबइ लोग अपने आस पास क रहइवाले दूसर लोगन स डरे भए रहेन। मुला इ डर ओनका रोक न सका अउर उ पचे वेदी क पुरानी नेंव पइ वेदी बनाएन अउर ओह पइ यहोवा क होमबलि दिहन। 4 तब उ पचे आस्रयन क त्यौहार ठीक वइसे ही मनाएन जइसा मूसा क नेम मँ कहा गवा अहइ। उ पचे उत्सव क हर एक दिन क बरे उचित गनती मँ होमबलि दिहन। 5 ओकरे पाछे, उ पचे लगातार चलइवाली हर दिन क होमबलि नवा चाँद, अउर सबहिं दूसर उत्सव व बिस्राम क दिनन क भेंटन चढ़ाउब सुरू किहन जइसा कि यहोवा क जरिये आदेस दीन्ह गवा रहा। लोग दूसर ओन भेंटन क भी चढ़ावइ क लागेन जेनका उ पचे यहोवा क चढ़ावइ चाहत रहेन। 6 एह बरे सतएँ महीना क पहिले दिन इस्राएल क एन लोग यहोवा क फुन भेंट चढ़ाउब सुरु किहन। इ तब भी कीन्ह गवा जब कि मन्दिर क नेंव अबहिं फुन स नाहीं बनी रही। 7 तब ओन लोग जउन बन्धुवाई स छुटिके आए रहेन, संगतरासन अउर बढ़इयन क धन दिहेन अउर उ पचे सोर अउर सीदोन क लोगन क भोजन, दाखरस अउर जैतून क तेल दिहन। ताकि उ पचे लबानोन क देवदार क बृच्छ लिआवइ सकेन। उ पचे चाहत रहेन कि उ पचे जापा नगर क समुद्री तट पइ लट्ठन क जहाजन क मँ लिआवइँ। फारस क राजा कुस्रू इ करइ बरे ओनका मंजूरी दइ दिहस। 8 एह बरे यरूसलेम मँ मन्दिर पइ ओनके पहोंचइ क दूसर बरिस क दूसर महीने मँ सालतीएल क पूत जरूब्बाबेल अउर योसादाक क पूत येसू काम करब सुरू किहस। ओनकर भाइयन, याजकन, लेवीबंसियन अउ हर एक मनई जउन बन्धुवाई स यरूसलेम लउटे रहेन, सब ओनके संग काम करब सुरू किहन। उ पचे यहोवा क मन्दिर क बनावइ बरे ओन लेवीबंसियन क निरीच्छक चानेन जउन बीस बरिस या ओहसे जियादा उमिर क रहेन। 9 इ सबइ उ सब लोग रहेन जउन मन्दिर क बनइ क देखरेख करत रहेन, येसू क पूत अउर ओकर भाई, कदमीएल अउ ओकर पूत (यहूदा क सन्तान रहेन) हेनादाद क पूत अउ ओनकर बंधु लेवीबंसी। 10 कारीगरन यहोवा क मन्दिर क नेव डाउब पूरी कइ दिहन। जब नेंव पड़ गइ तब याजकन अपने खास ओढ़ना पहिरेन। तब उ पचे आपन तुर्रुही लिहन अउ आसाप क पूतन अपनी झाँझन क लिहन। उ पचे यहोवा क स्तुति क बरे अपने अपने जगह लइ लिहन। इ उहइ तरह कीन्ह गवा जउने तरह करइ क बरे भूतकाल मँ इस्राएल क राजा दाऊद आदेस दिहे रहा। 11 यहोवा जउन कछू किहस, उ पचे ओकरे बरे ओकर बड़कई करत भए अउ धन्नवाद देत भए, इ गीत गाएन “उ अच्छा अहइ, ओकर इस्राएल क बरे पिरेम सास्वत अहइ।” अउर तब सबहिं लोग खुस भएन। उ पचे बहोत जोर स उद्घोस अउ यहोवा क स्तुति किहन। काहे काहेकि मन्दिर क नेंव पूरी होइ चुकी रही। 12 मुला बुजुर्ग याजकन मँ स बहोत स, लेवीबंसी अउर परिवार प्रमुख रोइ पड़ेन। काहे काहेकि ओन लोग पहिले मन्दिर क लखे रहेन, अउर उ पचे इ याद करत रहेन कि उ केतना सुन्नर रहा। उ सबइ रोइ पड़ेन जब उ पचे नवे मन्दिर क लखेन। उ पचे रोवत रहेन जब बहोत स दूसर लोग खुस रहेन अउर सोर मचावत रहेन। 13 उद्घोस बहोत दूर तलक सुना जाइ सकत रहा। ओन सबहिं लोग ऍतना सोर मचाएन कि कउनो मनई खुसी क उद्घोस अउ रोवइ मँ अन्तर नाहीं कइ सकत रहा।

4:1 उ पहँटा मँ रहइवाले बहोत स लोग यहूदा अउ बिन्यामीन क लोगन क बिरुद्‌ध रहेन। ओन दुस्मनन सुनेन कि सबइ लोग जउन बन्धुवाई स आएन ह उ सबइ, इस्राएल क परमेस्सर यहोवा क बरे एक ठु मन्दिर बनावत अहइँ। एह बरे उ सबइ दुस्मन जरुब्बावेल अउ परिवार प्रमुखन क लगे आएन अउ उ पचे कहेन, “मन्दिर बनावइ मँ हम क तू पचन क मदद करइ द्या। हम लग उहइ अही जउन तू अहा, हम तोहरे पचन्क परमेस्सर स मदद माँगित ह। हम लोग तोहरे पचन्क परमेस्सर क तब स बलि चढ़ावा ह जब स अस्सूर क राजा एसर्हद्दोन हम लोगन क हिआँ लिआव।” 2 3 मुला जरूब्बाबेल, येसू अउर इस्राएल क दूसर परिवार प्रमुखन जवाब दिहन, “नाहीं, तू जइसे लोग हमरे परमेस्सर क बरे मन्दिर बनावइ मँ हम क मदद नाहीं कइ सकतेन। सिरिफ हम लोग ही यहोवा क बरे मन्दिर बनाइ सकित ह। उ इस्राएल क परमेस्सर अहइ। फारस क राजा कुस्रू जउन करइ क आदेस दिहस ह, उ इहइ अहइ।” 4 यह बरे उ देस क लोग मन्दिर क बनावइ क कार्य रोकइ क बरे जतन करत भए यहूदी लोगन क हिम्मत तोड़इ क बरे ओनका डराउब सुरु किहन। 5 ओन दुस्मनन सलाहकारन क यहूदा क लोगन क खिलाफ काम करइ क बरे बेसहि लिहन। उ सलाहकारन ओनके जोजनन मँ बाधा डावइ क जतन किहेन। इ कारज तब तलक लगातार चलत रहा जब तलक कुस्रू फारस क राजा रहा अउर बाद मँ जब तलक दारा फारस क राजा नाहीं होइ गवा। 6 ओन दुस्मनन यहूदियन क रोकइ क बरे जतन करत भए फारस क राजा क पत्र भी लिखेन। अउर उ पचे इ पत्र फारस क राजा छयर्स क सासन काल क सुरू मँ लिखेन। 7 पाछे, जब अर्तछत्र फारस क नवा राजा भवा, एन लोगन मँ स कछू यहूदियन क खिलाफ सिकाइत करत भए एक ठू अउर पत्र लिखेन। जउन लोग उ पत्र लिखेन, उ सबइ इ सब रहेन: बिसलाम, मिथदात, ताबेल अउर ओकरे दल क दूसर लोग। उ पचे पत्र राजा अर्तछत्र क अरामी मँ अरामी लिपि क उपयोग करत भए लिखेन। 8 तब सासन अधिकारी रहूम अउर लिपिक सिमसै यरूसलेम क लोगन क खिलाफ पत्र लिखेन। उ पचे राजा अर्तछत्र क पत्र लिखेन। उ पचे जउन लिखेन उ इ रहा: 9 सासन अधिकारी रहूम, लिपिक सिमसै, निआधीसन अउर तर्पली, फारसी, एरेकी, बाबेली लोगन पइ क महत्त्वपूर्ण उच्चय अधिकारियन अउर सूसनी क एलामी लोगन क कइँती स, 10 अउ उ सबइ दूसर लोग क ओर स जेनका महान अउर सक्तीसाली ओस्नप्पर सोमरोन क नगरन अउर परात नदी क पच्छिमी पहँटा क दूसर जगहन पइ बसाए रहेन। 11 इ उ पत्र क प्रतिलिपि अहइ जेका ओन लोग अर्तछत्र क पठए रहेन।राजा अर्तछत्र क, परात नदी क पच्छिमी पहँटा मँ आप क सेवकन कइँती स अहइ। 12 राजा अर्तछत्र हम आप क सूचित करइ चाहित ह कि जउन यहूदियन क आप-अपने लगे स पठया ह, उ पचे हिआँ आइ गएन ह। उ सबइ यहूदी उ नगर क फुन स बनावइ चाहत हीं। यरूसलेम एक बुरा अउर बिद्रोही नगर अहइ। अब उ पचे यहूदी परकोटन क जेवन क पक्का करत बाटेन अउर देवारन खड़ी करत अहइँ। 13 राजा अर्तछत्र आप क इ जान लेइ चाही कि जदि यरूसलेम अउर एकर परकोटन फुन बन गएन तउ यरूसलेम क लोगन कर देब बन्द कइ देइहीं। उ पचे आप क सम्मान करइ बरे धन पठउब बन्द कइ देइहीं। उ पचे सेवा कर भी रोक देइहीं अउर राजा क उ सारे धन स हाथ धोवइ पड़ी। 14 राजा क एकर जानकारी होइ चाही कि हम लोग राजा क वफ़ादार होइ क वादा किहे रहेन। ऍह बरे जिम्मेदारी हम लोगन पइ अहइ। हम लोगन क इ सबइ घटित होब नाहीं लखइ चाहतेउँ कि राजा क अपमान होइ। इहइ कारण अहइ कि हम लोग इ पत्र क जरिये राजा क इ बात क सम्बंध मँ सूचना दिहे अहउँ। 15 राजा अर्तछत्र हम इ चाहित ह कि आप ओन राजा लोगन क लेखन क पता लगावइँ कि जउन आपक पहिले हुवूमत किहन। आप ओन लेखन मँ लखिहीं कि यरूसलेम मँ सदा ही दूसर राजा लोगन क बरे बिद्रोह किहन। इ दूसर राजा लोगन अउ रास्ट्रन क बरे बहोत कठिनाइयन पइदा किहन ह। पुराने समइ स ही इ नगर बिद्रोह क उभारत अहइ ह। इहइ कारण अहइ कि यरूसलेम नस्ट भवा। 16 राजा अर्तछत्र हम आप क सूचित करइ चाहित ह कि जदि इ नगर अउ एकर परकोटन फुन स बन गवा तउ फरात नदी क इ कइँती क छेत्र आप क हाथे स निकरि जइहीं। 17 तब अर्तछत्र इ जवाब पठएस:सासन अधिकारी रहूम अउ लिपिक सिमसै अउ ओनकर सबहिं साथियन क जउन सोमोरन अउ परात नदी क दूसर पच्छिमी प्रदेस मँ रहत हीं क सुभ-कामनाऐं, 18 तू लोग जउन हमरे लगे पत्र पठाया ओकर अनुवाद भवा अउर मोका सुनावा गवा। 19 मइँ आदेस दिहेउँ कि मोरे पहिले क राजा लोगन क लेखन क खोज कीन्ह जाइ। लेख बाँचे गएन अउर हम लोगन क ग्यात भवा कि यरूसलेम क जरिये राजा लोगन क खिलाफ बिद्रोह करइ क एक लम्बा इतिहास अहइ। यरूसलेम अइसी जगह रहा नगर जहाँ अक्सर बिद्रोह अउ गद्दारी होत रहत हीं। 20 यरूसलेम अउ फरात नदी क पच्छिम क पूरे पहँटा पइ सक्तीसाली राजा राज्ज करत रहेन ह। राज्ज कर अउ राजा क सम्मान बरे धन अउ बिविध प्रकार क कर ओन राज लोगन क दीन्ह गएन ह। 21 अब तू पचन्क ओन लोगन क काम बन्द करइ क बरे एक ठु आदेस देइ चाही। इ आदेस यरूसलेम क पुन: निर्माण क रोकइ क बरे तब तलक अहइ, जब तलक कि मइँ वइसा करइ क आग्या न देउँ। 22 सावधान रहया अउर इ आग्या क पालन करइ स इनकार जिन करा यरूसलम क पून:निमार्ण चलत नाहीं रहइ चाही, वरना मइँ यरूसलेम स मिलइवाला आमदनी क खोइ देबउँ। 23 तउ उ पत्र क प्रतिलिपि, जेका राजा अर्तछेत्र पठएस रहूम, लिपिक सिमसै अउ ओकरे संग क लोगन क बाँचिके सुनाई गइ। तब उ सबइ लोग बड़ी तेजी स यरूसलेम मँ यहूदियन क लगे गएन। उ पचे यहूदियन क निर्माण कार्य बन्द करइ क मजबूर किहन। 24 इ तरह यरूसलेम मँ परमेस्सर क मन्दिर क काम रुक गवा। फारस क राजा दारा क सासनकाल क दूसरे बरिस तलक इ कार्य नाहीं चला।

5:1 तब हाग्गै नबी अउ इद्दो क पूत नबी जकर्याह इस्राएल क परमेस्सर क नाउँ पइ यहूदा अउ यरूसलेम मँ यहूदियन स नबुवत करब सुरु किहन। 2 एह बरे सालतीएल क पूत जरुब्बाबेल अउ योसादाक क पूत येसू फुन यरूसलेम मँ मन्दिर क निर्माण करब सुरु कइ दिहस। अउर परमेस्सर क नबी ओनके संग रहेन अउ कार्य मँ मदद करत रहेन। 3 उहइ समइ फरात नदी क पच्छिम क पहँटा क राज्जपाल तत्तनै रहा। तत्तनै, सतबोर्जनै अउ ओनके संग क लोग जरुब्बाबेल अउर येसूर अउ निर्माण करइवालन क लगे गएन। तत्तनै अउ ओकरे संग क लोग जरुब्बाबेल अउ ओकरे साथ क लोगन स पूछेस, “तू पचन्क इ मन्दिर क फुन स बनावइ अउ एका दिवारन क बनावइ क काम पूरा करइ क आदेस कउन दिहस?” 4 उ पचे जरुब्बाबेल स इ भी पूछेन, “जउन लोग इ इमारत क बनावइ क काम करत अहइँ ओनकर नाउँ क अहइ?” 5 मुला परमेस्सर यहूदा क प्रमुखन पइ दृस्टि रखत रहा। निर्माण करइ वालन क तब तलक काम नाहीं रोकब पड़ा जब तलक ओनकर विवरण राजा क जरिये न पठइ दीन्ह गवा। उ पचे तब तलक काम करत रहेन जब तलक राजा दारा आपन जवाब वापस नाहीं पठएस। 6 फरात क पच्छिम क छेत्रन क सासन अधिकारी तत्तनै, सतबोर्जनै अउर ओनके संग क महत्तवपूर्ण मनइयन राजा दारा क लगे पत्र पठएन। 7 इ उ पत्र क प्रतिलिपि अहइ: 8 राजा दारा, आप क मालूम होइ चाही कि हम लोग यहूदा प्रदेस मँ गएन। हम लोग महान परमेस्सर क मन्दिर क गए। यहूदा क लोग उ मन्दिर क बड़के पाथरन स बनावत अहइँ। उ पचे देवारन मँ काठे क बड़की बड़की सहतीरन डावत अहइ। काम बड़ी होसियारी स कीन्ह जात अहइ, अउर यहूदा क लोग बहोत मेहनत करत अहइँ। 9 हम लोग ओनके प्रमुखन स कछू सवाल ओनके निर्माण कार्य क बारे मँ पूछेन हम लोग ओनसे पूछेन, “तू पचन्क इ मन्दिर क फुन स बनावइ अउर एकरी छते क काम पूरा करइ क मंजूरी कउन दिहस ह” 10 हम लोग ओनकर नाउँ भी पूछेन। हम लोग ओन लोगन क प्रमुखन क नाउँ लिखइ चाहेउँ जेहसे आप जान सकइँ कि उ पचे कउन लोग अहइँ। 11 उ पचे हमक इ जवाब दिहन:“हम लोग सरग अउ पृथ्वी क परमेस्सर क सेवक अही। हम लोग उहइ मन्दिर क बनावत अही जेका बहोत बरिस पहिले इस्राएल क एक महान राजा बनाएस अउर पूरा किहे रहा। 12 मुला हमार पुरखन सरग क परमेस्सर क किरोधित किहन। एह बरे परमेस्सर हमरे पुरखन क बाबेल क राजा नबूकदनेस्सर क दिहस। नबूकदनेस्सर इ मन्दिर क नस्ट किहेस अउर उ लोगन क बन्दी क रूप मँ बाबेल जाइ क मजबूर किहस। 13 मुला बाबेल पइ कुस्रू क राजा होइ क पहिले बरिस मँ राजा कुस्रू परमेस्सर क मन्दिर क फुन स बनावइ क बरे बिसेस आदेस दिहस। 14 कुस्रू बाबेल मँ अपने लबार देवता क मन्दिर स ओन सोने चाँदी क चिजियन क निकारेस जउन भूतकाल मँ परमेस्सर क मन्दिर स चोरी कइ क लइ जाइ गइ रहिन। नबूकदनेस्सर ओन चिजियन क मन्दिर स लिहेस अउर ओनका बाबेल मँ लबार देवतन क मन्दिर मँ लइ आवा। तब राजा कुस्रू ओन सोने चाँदी क चिजियन क सेसबसार क दइ दिहस, कुस्रू सेसबस्सर क राज्यपाल मुकर्रर किहस। 15 कुस्रू तब सेसबस्सर स कहेस रहा, “एन सोना चाँदी क चिजियन क ल्या अउर ओनका यरूसलेम क मन्दिर मँ वापस रखा। उ जगह पइ परमेस्सर क मन्दिर क बनावा जहाँ उ पहिले रहा” 16 एह बरे सेसबस्सर आवा अउर उ यरूसलेम मँ परमेस्सर क मन्दिर क नेंव क काम पूरा किहस। उ दिना स आजु तलक मन्दिर क निर्माण क कार्य चलत आवत अहइ। मुला इ अबहिं तलक पूरा नाहीं भवा ह।” 17 अब जदि राजा चाहत हीं तउ वृपा कइके उ पचे राजा लोगन क लेखन क हेरइँ। इ लखइ बरे हेरइँ कि का कुस्रू राजा क जरिये यरूसलेम मँ परमेस्सर क मन्दिर क फुन स बनावइ क दीन्ह गवा आदेस फुरइ अहइ अउर तब, महामहिमा, वृपा कइके आप हम लोगन क पत्र पठवइँ जेहसे हम जान सकी कि आप इ विसय मँ का करइ क निर्णय लिहन ह।

6:1 एह बरे राजा दारा अपने पहिले क राजा लोगन क लेखन क जाँच करइ क आदेस दिहस। उ सबइ लेख बाबेल मँ हुवइँ रखे रहेन जहाँ खजाना धरा गवा रहा, 2 अहमत्ता क किले मँ एक दण्ड मँ चिपका गोल पत्रक मिला। एकवतन मादे प्रान्त मँ अहइ। उ दण्ड मँ लिपटे गोल पत्रक पइ जउन लिखा रहा, उ इ अहइ:सरकारी टिप्पणी: 3 उ कुस्रू क राजा होइ क पहिले बरिस मँ कुस्रू यरूसलेम मँ परमेस्सर क मन्दिर क बरे एक ठू आदेस दिहस। आदेस इ रहा:परमेस्सर क मन्दिर फुन स बनइ द्या। इ बलि भेंट करइ क जगह होइ। एकरी नेंव क बनइ द्या। मन्दिर साठ हाथ उँच अउ साठ हाथ चौड़ा होइ चाही। 4 एकर परकोटन मँ बिसाल पाथरन क तीन ठु कतारन अउर बिसाल काठे क सहतीरन क एक ठू कतार होइ चाही। मन्दिर क बनावइ क खर्च राजा क खजाने स कीन्ह जाइ चाही। 5 साथ ही साथ, परमेस्सर क मन्दिर क सोना अउ चाँदी क चिजियन ओकरे जगह पइ वापस रखी जाइ चाही। नबूकदनेस्सर ओन चिजियन क यरूसलेम क मन्दिर स लिहे रहा अउर ओनका बाबेल लिआए रहा। उ सबइ परमेस्सर क मन्दिर मँ वापस रख दीन्ह जाइ चाही। 6 एह बरे अब, मइँ दारा, फरात नदी क पच्छिम क पहँटन क सासन अधिकारी तत्तनै अउ सतबोर्जनै अउ उ प्रान्त क रहइवाले सबहिं अधिकारियन, तू पचन्क आदेस देत हउँ कि तू लोग यरूसलेम स दूर रहा। 7 समिकन क परेसान जिन करा। परमेस्सर क उ मन्दिर क काम क बन्द करइ क जतन जिन करा। यहूदा क राज्यपाल अउर यहूदा क बुर्जुगन क एनका फुन स बनावइ द्या। ओनका परमेस्सर क मन्दिर क उहइ जगह पइ फुन स बनावइ द्या जहाँ पहिले रहा। 8 अब मइँ एक आदेस देत हउँ कि तू पचन्क परमेस्सर क मन्दिर क बनावइ वाले यहूदा क बुर्जुगन बरे का करइ चाही: इमारत क लागत क भुगतान राजा क खजाने स होइ चाही। इ धन फरात नदी क पच्छिम क छेत्र क प्रान्तन स कर क रूप मँ इकट्ठा कीन्ह गवा रहा। इ सबइ काम हाली स करा, जेहसे काम रुकइ नाहीं। 9 ओन लोगन क उ सब द्या जेकर ओनका जरूरत होइ। जदि ओनका सरग क परमेस्सर क बलि क बरे जवान बर्धन, भेड़न या मेमनन क जरूरत पड़इ तउ ओनका उ सब कछू द्या। जदि यरूसलेम क याजक गोहूँ, नोन, दाखरस अउ तेल माँगइ तउ बिना भूल चूक क हर रोज इ सबइ चिजियन ओनका द्या। 10 इन चिजियन क ओनका द्या जेहसे उ पचे सरग क परमेस्सर क खुस करइवाली बलियन भेंट करइँ अउर राजा अउ ओकरे पूतन क कल्यान बरे पराथना करइँ। 11 मइँ इ आदेस भी देत हउँ कि जदि कउनो मनई इ आदेस क बदलत ह तउ उ मनई क मकान स एक ठु काठे क कड़ी क निकार लेइ चाही अउ उ काठे क कड़ी क उ मनई क तने पइ घँसाइ देइ चाही अउ ओकरे घरे क तब तलक नस्ट कीन्ह जाइ चाही जब तलक कि उ पाथरन क ढेर न बनि जाइ। 12 परमेस्सर यरूसलेम पइ आपन नाउँ अंकित करइ अउर मोका आसा अहइ कि परमेस्सर कउनो भी उ राजा या मनई क पराजित करी जउन इ आदेस क बदलइ क जतन करत ह। जदि कउनो यरूसलेम मँ इ मन्दिर क नस्ट करइ चाहत ह तउ मोका आसा अहइ कि परमेस्सर ओका नस्ट कइ देइ।मइँ, दारा, इ आदेस दिहेउँ ह। इ आदेस क पालन हाली अउर पूर्ण रूप स होइ चाही। 13 एह बरे फरात नदी क पच्छिम पहँटा क प्रसासक तत्तनै, सतबोर्जनै अउर ओकरे संग क लोग राजा दारा क आदेस क पालन किहन। ओन लोगन आग्या क पालन हाली अउर पूर्ण रूप स किहन, 14 एह बरे यहूदी अग्रजन (प्रमुखन) निर्माण कार्य जारी रखेन अउर उ पचे सफल भएन काहेकि हग्गै नबी अउ इद्दो क पूत जकर्याह ओनका प्रोत्साहित किहस। ओन लोग मन्दिर क निर्माण कार्य पूरा कइ लिहन। इ इस्राएल क परमेस्सर क आदेस पालन करइ क बरे कीन्ह गवा। इ फारस क राजा लोगन, कुस्रू, दारा अउर अर्तछत्र जउन आदेस दिहे रहेन ओनकर पालन करइ बरे कीन्ह गवा। 15 मन्दिर क निर्माण अदर महीने क तीसरे दिन भवा। इ राजा दारा क सासन क छठएँ बरिस मँ भवा। 16 तब इस्राएल क लोग बहोत उल्लास क संग परमेस्सर क मन्दिर क समर्पण उत्सव मनाएन। याजक, लेवीबंसी अउर बन्धुवाई स वापस आए दूसर सबहिं लोग इ उत्सव मँ सामिल भएन। 17 उ पचे परमेस्सर क मन्दिर क इ तरह समपिर्त किहन: उ पचे एक सौ बर्धन, दुइ सौ भेड़न अउर चार सौ मेमनन भेंट किहन अउर उ पचे पूरे इस्राएल क बरे पाप भेंट क रूप मँ बारह बोकरन भेंट किहन अर्थात इस्राएल क बारह परिवार समूह मँ स हर एक क बरे एक बोकरा भेंट किहन। 18 तब उ पचे यरुसलेम मँ मन्दिर मँ सेवा करइ क बरे याजकन अउ लेवी बंसियन क समूह बनाएन। इ सब उ पचे उहइ प्रकार किहन जउने प्रकार मूसा क किताबे मं बतावा गवा ह। 19 पहिले महीने क चौदहवें दिन ओन यहूदियन फसह क त्यौहार मनाएन जउन बन्धुवाई स वापस लउटे रहेन। 20 याजकन अउर लेवीबंसियन अपने क सुद्ध किहन। ओन सबहिं फसह क त्यौहार मनावइ क बरे अपने क स्वच्छ अउ तइयार किहन। उ पचे बन्धुवाई स लउटइवाले सबहिं यहूदियन क बरे फसह क त्यौहार क मेमने क मारेन। उ पचे इ अपने बरे अउर अपने याजकन बंधुअन क बरे किहन। 21 एह बरे बन्धुवाई स लउटे इस्राएल क सबहिं लोग फसह क त्यौहार क बलि खाएस अउर उ प्रदेस मँ रहइवाले दूसर सबइ लोग जउन अपने आप क ओन असुद्ध चिजियन स अलग हटिके सुद्ध कइ रहेन अउर जउन ओन लोगन मँ सामिल होइ रहेन, ओन लोग भी फसह क त्यौहार क भोजन मँ हींसा लिहन। ओन लोग इ एह बरे किहन ताकि उ पचे भी यहोवा इस्राएल क परमेस्सर क उपासना करइ सकइँ। 22 उ पचे अखमीरी रोटी क उत्सव सात दिन तलक बहोत जियादा खुसी स मनाएन। यहोवा ओनका बहोत खुस किहस काहेकि उ अस्सूर क राजा क बेउहार क बदल दिहे रहा। अस्सूर क राजा इस्राएल क परमेस्सर क मन्दिर क बनावइ मँ ओनकर मदद किहे रहा।

7:1 फारस क राजा अर्तछत्र क सासनकाल मँ एन सब बातन क होइ जाइ क पाछे एज्रा बाबेल स यरूसलेम आवा। एज्रा सरायाह क पूत रहा। सरायाह अजर्याह क पूत रहा। अजर्याह हिल्किय्याह क पूत रहा। 2 हिल्किय्याह सल्लूम क पूत रहा। सल्लूम सादोक क पूत रहा। सादोक अहीतूब क पूत रहा। 3 अहीतूब अमर्याह क पूत रहा। अमर्याह अजर्याह क पूत रहा। अजर्याह मराथोर्त क पूत रहा। 4 मरायोत जरह्याह क पूत रहा। जरह्याह उज्जी क पूत रहा। उज्जी बुक्की क पूत रहा। 5 बुक्की अबीसू क पूत रहा। अबीसू पीनहास क पूत रहा। पीनहास एलीआज़र क पूत रहा। एलीआज़र महायाजक हारून क पूत रहा। 6 एज्रा बाबेल स यरूसलेम आवा। एज्रा एक लिपिक रहा। उ मूसा क नेमन क माहिर रहा। मूसा क नेम यहोवा इस्राएल क परमेस्सर क जरिये दीन्ह गवा रहा। राजा अर्तछत्र एज्रा क उ हर चीज़ दिहस जेका उ माँगेस काहेकि यहोवा परमेस्सर एज्रा क संग रहा। 7 इस्राएल क कछू लोग, अउर कछू याजकन, लेवियन, गायकन, दुआरपालन अउर मन्दिर क सेवकन एज्रा क संग आएन। उ पचे अर्तछत्र क सासनकाल क सतएँ बरिस यरूसलेम आएन। 8 एज्रा यरूसलेम मँ राजा अर्तछत्र क राज्जकाल क सतएँ बरिस क पाँचवें महीने मँ आवा। 9 एज्रा अउ ओकर समूह बाबेल क पहिले महीने क पहिले दिन यरूसलेम पहोंचा। यहोवा परमेस्सर एज्रा क संग रहा। 10 एज्रा आपन पूरा धियान यहोवा क नेमन क अध्ययन अउर ओनका पालन करइ मँ दिहस। एज्रा इस्राएल क लोगन क यहोवा क नेमन अउर आदेसन क सिच्छा देइ चाहत रहा। 11 एज्रा, एक ठु याजक अउर लिपिक रहा। इस्राएल क यहोवा क जरिये दीन्ह गए आदेसन अउर नेमन क बारे मँ उ काफी गियान रखत रहा। इ उ पत्र क प्रतिलिपि अहइ जेका राजा अर्तछत्र लिपिक एज्रा क दिहे रहा: 12 राजा लोगन क राजा अर्तछत्र कइँती स याजक एज्रा क जउन सरग क परमेस्सर क नेमन क पिपिक अहइ: 13 मइँ इ आदेस देत हउँ: कउनो मनई जउन इस्राएल क अहइ, याजक अउर इस्राएल क लेवीबंसी जउन मोरे राज्ज मँ रहत ह अउर एज्रा क संग यरूसलेम जाइ चाहत ह, तोहार संग जाइ सकत ह। 14 एज्रा, मइँ अउर मोरे सात सलाहकार तू पचन्क पठवत हीं। तू पचन्क यहूदा अउर यरूसलेम क जाइ चाही। इ लखा कि तोहार लोग तोहरे परमेस्सर क नेमन क पालन कइसे करत अहइँ। तोहरे पचन्क लगे नेम अहइ। 15 मइँ अउ मोर सलाहकार इस्राएल क परमेस्सर क सोना चाँदी देत अहइँ। परमेस्सर क निवास यरूसलेम मँ अहइ। तू पचन्क इ सोना चाँदी अपने संग लइ जाइ चाही। 16 तू पचन्क बाबेल क सबहिं प्रान्तन स होइके जाइ चाही। लोगन अउर याजकन क स्वच्छा भेंट क संग सबइ सोना अउ चाँदी क बटोरा। इ सबइ भेंटन यरूसलेम मँ ओनके परमेस्सर क मन्दिर बरे अहइँ। 17 इ धने क उपयोग बर्धन, भेड़न अउ मेमनन बेसहइ मँ करा। ओन बलियन क संग जउन अन्न भेंट अउ पेय भेंट चढ़ाई जाब अहइँ, ओनका बेसहा। तब ओनका यरूसलेम मँ अपने परमेस्सर क मन्दिर क वेदी पइ बलि चढ़ावा। 18 ओकरे पाछे तू अउर दूसर यहूदी बचे भए सोने चाँदी क जइसा भी चाहा, खर्च कइ सकत ह। एकर उपयोग वइसे ही करा, जउन तोहरे परमेस्सर क खुस करइवाला होइ। 19 ओन सबहिं चिजियन क यरूसलेम क परमेस्सर क लगे लइ जा। उ सबइ चिजियन तोहरे परमेस्सर क मन्दिर मँ उपासना क बरे अहइँ। 20 तू कउनो भी दूसर चिजियन लइ सकत ह जेनका तू अपने परमेस्सर क मन्दिर क बरे जरूरी समुझत अहा। राजा क खजाने क धन क उपयोग जउन कछू तू चाहत अहा ओकरे बेसहइ क बरे कइ सकत ह। 21 अब मइँ, राजा अर्तछत्र इ आदेस देत हउँ: मइँ ओन सबहिं लोगन क जउन फरात नदी क पच्छिमी पहँटा मँ राजा क कोसपाल अहइँ, आदेस देत हउँ कि उ पचे एज्रा क जउन कछू भी माँगइ देइँ। एज्रा सरग क परमेस्सर क नेमन क लिपिक अउर याजक अहइ। इ आदेस क हाली अउ पर्ण रूप स पालन करा। 22 एज्रा क एतना तलक दइ द्या: पौने चार टन चाँटी, छ: सौ बुसल गोहूँ, छ: सौ गैलन दाखरस, छ: सौ गैलन जइतून क तेल अउ ओतना नोन जेतना एज्रा चाहइ। 23 सरग क परमेस्सर, एज्रा क जउने चीज क पावइ बरे आदेस द्या ओका तू पचन्क हाली अउर पूरी तरह स एज्रा क देइ चाही। सरग क परमेस्सर क मन्दिर क बरे इ सबइ सब चिजियन करा। हम नाहीं चाहित कि परमेस्सर मोरे राज्ज या मोरे पूतन पइ किरोधित होइ। 24 मइँ चाहत हउँ कि तू लोगन क मालूम होइ कि याजकन, लेबियन, गायकन, दुआरपालन अउ परमेस्सर क मन्दिर क दूसर कर्मचारियन अउ सेवकन क कउनो भी तरह क कर देइ क बरे मजबूर करब, नेम क खिलाफत अहइ। 25 एज्रा मइँ तोहका तोहरे परमेस्सर क जरिये प्राप्त बुद्धि क उपयोग अउ सरकारी अउर धामिर्क निआव अधीसन क चुनइ क अधिकार देत हउँ। इ सबइ लोग फरात नदी क पच्छिम मँ रहइवाले सबहिं लोगन क बरे निआव अधीस होइहीं। उ पचे ओन सबहिं लोगन क निआव करिहीं जउन तोहरे परमेस्सर क नेमन क जानत हीं। जदि कउनो मनई ओन नेमन क नाहीं जानत तउ उ पचे निआव अधीस ओका ओन नेमन क बतइहीं। 26 जदि कउनो अइसा मनई जउन तोहरे परमेस्सर क नेमन या राजा क नेमन क पालन नाहीं करत होइ, तउ ओका जरूर दण्डित कीन्ह जाइ चाहीं। अपराध क अनुसार ओका मृत्य दण्ड, देस निकारी, ओकरी सम्पत्ति क जब्त करब या जेल मँ डावइ क सजा दीन्ह जाइ चाही। 27 हमरे पुरखन क परमेस्सर यहोवा क स्तुति करा। उ राजा क मन मँ इ सबइ बिचार डाएस कि उ यरूसलेम मँ यहोवा क मन्दिर क सम्मान करइ। 28 यहोवा क राजा, ओकरे सलाहकारन अउर बड़के अधिकारियन क सामने मोह पइ आपन सच्चा पिरेम परगट किहा। यहोवा मोरे परमेस्सर मोरे संग रहा, एह बरे मइँ साहसी रहा अउर मइँ इस्राएल क प्रमुखन क अपने संग यरूसलेम जाइ बरे एकट्ठा किहेउँ।

8:1 इ बाबेल स यरूसलेम लउटइवाले परिवार प्रमुखन अउर दूसर लोगन क सूची अहइ जउन मोरे (एज्रा) क संग लउटेन। हम लोग राजा अर्तछत्र क सासनकाल मँ यरूसलेम लउटेन। इ नाउँन क सूची अहइ: 2 पीनहास क संतानन मँ स गेसोर्म रहा; ईतामार क सन्तानन मँ स दानिय्येल रहा; दाऊद क सन्तानन मँ स हत्तूस रहा, 3 सकन्याह क सन्तानन मँ स परोस, जकर्याह क सन्तान अउ डेढ़ सौ दूसर लोग; 4 पहत्मोआब क सन्तानन मँ स जरह्याह क पूत एल्यहोएनै अउर दूसर दूइ सौ लोग, 5 जत्तू क सन्तानन मँ स यहजीएल क पूत सकन्याह अउर तीन सौ दूसर लोग; 6 आदीन क सन्तानन मँ स योनातान क पूत एबेद अउर पचास दूसर लोग, 7 एलाम क सन्तानन मँ स अतल्याह क पूत यसायोह अउर सत्तर दूसर लोग, 8 सपत्याह क सन्तानन मँ स मीकाएल क पूत जबघाह अउर अस्सी दूसर लोग, 9 योआब क सन्तानन मँ स यहीएल क पूत ओबद्याह अउर दूइ सौ अट्ठारह दूसर मनई, 10 बानी, योसिप्याह क पूत सलोमति क सन्तानन मँ स अउर एक सौ साठ दूसर लोग, 11 बेबै क सन्तानन मंँ स बेबै क पूत जकर्याह अउर अट्ठाईस दूसर मनई, 12 अजगाद क सन्तानन मँ स हक्कातान क पूत योहानान अउर एक सौ दस दूसर लोग; 13 अदोनीकाम क अंतिम सन्तानन मँ स एलीपेलेत योएल, समायाह अउर साठ दूसर मनई रहेन, 14 बिगवै क सन्तानन मँ स उत्तै, जब्बूद अउर सत्तर दूसर लोग। 15 मइँ ओन सबहिं लोगन क अहवा कइँती बहइवाली नदी क लगे एक संग एकट्ठा होइ क बोलाएउँ। हम लोग हुवाँ तीन दिन तलक डेरा डाए। मोका इ पता लगा कि उ समूह मँ याजक रहेन, मुला कउनो लेवीबंसी नाहीं रहा। 16 तउ मइँ एन प्रमुखन क बोलाएउँ: एलीएजेर, अरीएल, समायाह, एलनातान, यारीब, एलनातान, नातान, जकर्याह अउ मसुल्लाम अउ मइँ योयारीब अउर एलनातान (इ सबइ लोग सिच्छक रहेन) क बोलाएस। 17 मइँ ओन मनइयन क इद्दो क लगे पठएउँ। इद्दो कासिप्या नगर क प्रमुख रहा। मइँ उ मनई क बताएउँ कि उ पचे इद्दो अउर ओकर सम्बंधियन स का कहइँ। ओकर सम्बंधी कासिप्या मँ मन्दिर क सेवक अहइँ। मइँ ओन लोगन क इद्दो क लगे पठएउँ जेहसे इद्दो परमेस्सर क मन्दिर मँ सेवा करइ क बरे हमरे लगे सेवकन क पठएस। 18 काहेकि परमेस्सर क वृपालु हाथ हमरे ऊपर रहेन। इद्दो क सम्बंधियन एन मनइयन क हम लोगन क लगे पठएस: महली क सन्तानन मँ स सेरेब्याह नाउँ क बुद्धिमान मनई। महली लेवी क पूतन मँ स एक रहा। लेवी इस्राएल क पूतन मँ स एक रहा। उ पचे हमरे लगे सेरेहब्याह अउर ओकरे पूतन क पठएस। इ सबइ सब मिलाइके उ परिवार स इ सबइ अट्ठारहे मनई रहेन। 19 उ पचे मरारी क सन्तानन मँ स हसब्याह अउर यसायाह क भी ओनकर बन्धुअन अउर ओनके पूतन क संग पठएस। उ परिवार स वुल मिलाइके बीस मनई रहेन। 20 उ पचे मन्दिर क दुइ सौ बीस सेवक भी पठएन। ओनकर पुरखन उ सबइ लोग रहेन जेनका दाऊद अउ बड़के अधिकारियन लेवीबंसियन क मदद बरे चुने रहा। ओन सब क नाउँ सूची मँ लिखे भए रहेन। 21 हुवाँ अहवा नदी क लगे, मइँ घोसणा किहेउँ कि हमका उपवास रखइ चाही। हम क अपने क परमेस्सर क समन्वा बिनम्र बनावइ क बरे उपवास रखइ चाही। हम लोग परमेस्सर स अपने बरे, अपने बच्चन क बरे, अउर जउन चिजियन हमार रहिन, ओनके संग सुरच्छित जात्रा क बरे पराथना करइ चाहत रहे। 22 राजा अर्तछत्र अपनी जात्रा क समइ अपनी सुरच्छा बरे फउजी अउ घुड़सवारन क माँगइ मँ मइँ लजान रहेउँ। सड़किया पइ दुस्मन रहेन। मोरी लज्जा क कारण इ रहा कि हम राजा स कहि रखे रहे कि, “हमार परमेस्सर उ हर मनई स संग अहइ जउन ओह पइ बिस्सास करत ह अउर परमेस्सर उ हर मनई पइ किरोधित होत ह जउन ओहसे मुँह फेरि लेत ह।” 23 एह बरे हम लोग अपनी जात्रा क बारे मँ उपवास रखे अउर परमेस्सर स पराथना कीन्ह। उ हम लोगन क पराथना सुनेस। 24 तब मइँ याजकन मँ स बारह क नियुक्त किहेउँ जउन प्रमुख रहेन। मइँ सेरेब्याह, हसब्याह अउर ओनके दस भाइयन क चुनेउँ। 25 मइँ चाँदी, सोना अउर दूसर चिजियन क तउलेउँ जउन हमरे परमेस्सर क मन्दिर क बरे दीन्ह गइ रहिन। मइँ एन चिजियन क ओन बारह याजकन क दिहेउँ जेनका मइँ नियुक्त किहे रहेउँ। राजा अर्तछत्र, ओकर सलाहकार, ओकर बड़के अधिकारियन अउर बाबेल मँ रहइवाले सबहिं इस्राएलियन परमेस्सर क मन्दिर क बरे ओन चिजियन क दिहन। 26 मइँ एन सबहिं चिजियन क तउलेउँ। हुवाँ चाँदी पच्चीस टन रही। हुवाँ चाँदी क बर्तन व दूसर चिजियन रहिन। जेनकर वजन पौने चार किलोग्राम रहा। हुवाँ सोना पौने चाट टन रहा। 27 अउर मइँ ओनका बीस सोना क खोरन दिहेउँ। खोरन क वजन लगभग साढ़े आठ किलो रहा अउर मइँ ताँबा क चमकदार दूई ठु बरतन दिहस जउन कि सोना क समान कीमती रहा। 28 तब मइँ ओन बारह याजकन स कहेउँ: “तू अउर इ सबइ चिजियन यहोवा क बरे पवित्र अहइँ। लोग इ चाँदी अउर सोना यहोवा तोहरे पचन्क पुरखन परमेस्सर क दिहन। 29 एह बरे एनकर रच्छा होसियारी स करा। तू पचे एकरे बरे तब तलक जिम्मेदार अहा जब तलक तू पचे एका यरूसलेम मँ मन्दिर क प्रमुखन क नाहीं दइ देत्या। तू पचे एनका प्रमुख लेवीबंसियन क अउर इस्राएल क परिवार प्रमुखन क देब्या। उ सबइ ओन चिजियन क तउलिहीं अउर यरूसलेम मँ यहोवा क मन्दिर क कोठरियन मँ धरिहीं।” 30 तउ ओन याजकन अउ लेवियन उ चाँदी, सोना अउर ओन बिसेस वस्तुअन क ग्रहण किहन जेनका एज्रा तउले रहा अउर ओनका यरूसलेम मँ परमेस्सर क मन्दिर मँ इ सबइ चिजियन लइ जाइ क बरे कहा गवा रहा। 31 पहिले महीने क बारहवें दिन हम लोग अहवा नदी क छोड़ेे अउर हम यरूसलेम कइँती चल पड़े। परमेस्सर हम लोगन क संग रहा अउर उ हमार रच्छा दुस्मनन अउ डावुअन स पूरे रास्ते भर किहस। 32 तब हम यरूसलेम आइ पहोंचे। हम हुवाँ तीन दिन आरम कीन्ह। 33 चउथे दिन हम परमेस्सर क मन्दिर क गए अउर चाँदी, सोना अउर बिसेस चिजियन क तउले। हम याजक ऊरीयाह क पूत मरेमोत क उ सबइ चिजियन दिहेन। पीनहास क पूत एलीआजर मरेमोत क संग रहा। अउर लेवीबंसी येसू क पूत योजाबाद अउर बिन्तूई क पूत नोअद्याह भी ओनके संग रहा। 34 हम हर एक चीज गिने अउर ओनका तउले। तब हम उ समइ वुल वजन लिखे। 35 तब ओन यहूदी लोग जउन बंधुवाई स आए रहेन, इस्राएल क परमेस्सर क होमबलि दिहन। उ पचे बारह बर्धन पूरे इस्राएल क बरे छियानबे भेड़न, सतहत्तर मेमनन अउ बारह बोकरन पाप भेंट बरे चढ़ाएन। इ सब यहोवा क बरे होमबलि रही। 36 तब ओन लोग राजा अर्तछत्र क पत्र, राजकीय अधिपतियन अउ फरात क पच्छिम क छेत्र क प्रसासकन क दिहन। तब उ पचे इस्राएल क लोगन अउर मन्दिर क अपना समर्थन दिहन।

9:1 जब हम लोग इ सब कइ चुके तब इस्राएल क प्रमुख मोरे लगे आएन। उ पचे कहेन, “एज्रा इस्राएल क लोगन अउ याजकन अउ लेवी बंसियन अपने चाहिहुँ कइँती रहइवाले लोगन स अपने क अलग नाहीं रखेस ह। इस्राएल क लोग कनानियन, हित्तियन, परिज्जियन, यबूसियन, अम्मोनियन, मोआबियन, मिस्र क लोगन अउ एमोरियन क जरिये कीन्ह जाइवालो बहोत स बुरी बातन स प्रभावित भए हँ। 2 इस्राएल क लोग एन लोगन क बिटियन स बियाह किहेन ह। जउन कि इस्राएली नाहीं रहेन इस्राएल क लोग पवित्तर पीढ़ीअहइ। मुला अब उ पचे अपने चारिहुँ ओर रहइवाले दूसर लोगन स मिलिके दोगले अउर असुद्ध होइ गएन ह। इस्राएल क लोगन क नेतन अउर बड़के अधिकारियन इ अपराध क करइ मँ पहिले रहेन ह।” 3 जब मइँ इ बारे मँ सुनेउँ, मइँ अफ्ना लबादा अउ अंगरखा इ देखावइ बरे फार डाएउँ कि मइँ बहोत परेसान हउँ। मइँ अपने मूँड़ि अउर दाढ़ी क बार नोंच डाएउँ। मइँ दुःखी अउ अस्त - व्यस्त बइठ गएउँ। 4 तब हर एक मनई जउन इस्राएल क परमेस्सर क नेमन क आदर करत रहा, भय स काँप उठा। उ पचे डर गएन काहेकि जउन इस्राएल क लोग बन्धुवाई स लउटेन, उ पचे परमेस्सर क भक्त नाहीं रहेन। मोका धक्क लगा अउर मइँ घबराइ गएउँ। मइँ हुवाँ साँझ क बलि भेंट क समइ तलक बइठा रहेउँ अउर उ पचे लोग मोरे चारिहुँ कइँती एकट्ठा रहेन। 5 तब, जब साँझ क बलि भेंट क समइ भवा, मइँ आपन दुःख क अवस्था मँ ही उठेउँ। मइँ बहोत लजान रहेउँ। मोर लबादा अउ अंगरखा दुइनउँ फटे रहेन अउर मइँ घुटरुअन क बल बइठिके यहोवा अपने परमेस्सर कइँती हाथ फइलाएउँ। 6 तब मइँ पराथना किहेउँ:हे मोरे परमेस्सर, मइँ एतना लजान अउर संकोच मँ हँउ कि तोहरी कइँती मोर आँखिन नाहीं उठतिन, हे मोर परमेस्सर! मइँ लजान हउँ काहेकि हमरे पाप हमरे मूँड़े स ऊपर चले गए हँ। हमरे अपराधन क ढेरी एतनी होइ गइ ह कि उ अकासे तलक पहोंच चुकी ह। 7 हमरे पुरखन क समइ स अब तलक हम लोग बहोत जियादा पाप किहा ह। हम लोग पाप किहा, एह बरे हम, हमरे राजा अउर हमरे याजक दण्डित भएन। हम लोग बिदेसी राजा लोगन क जरिये तरवार स अउर बन्दीखाने मँ धाँधे जाइ तलक दण्डित भएन ह। उ पचे राजा हमार धन लइ गएन अउर हमका लज्जित किहन। इ स्थिति आजु भी वइसी अहइ। 8 आखीर मँ अब तू हम पइ वृपालु भवा ह। तू हमरे बचा भवा लोगन क बन्धुआई स निकरि आवइ दिहा ह अउर आपन पवित्र जगह मँ पनाह दिहा ह। यहोवा, तू हम क नवा जीवन दिहा ह अउर हमरी गुलामी स अजाद किहा ह। 9 हाँ, हम दास रहे, मुला तू हम क सदा ही क बरे दास नाहीं रहइ देइ चाहत रहा। तू हम पइ वृपालू रहा। तू फारस क राजा लोगन क हम पइ वृपालु बनाया। तोहार मन्दिर नेस्त नाबूद होइ गवा रहा। मुला तू हम क नवी जिन्नगी दिहा जेहसे हम तोहरे मन्दिर क फुन बनाइ सकित ह अउर नवे क तरह पक्का कइ सकत हीं। ह परमेस्सर तू हम पचन्क यहूदिया अउर यरूसलेम मँ बेराबनाइ दिहस। 10 हमरे परमेस्सर, अब हम तोहसे का कहि सकित ह हम लोग तोहरी आग्या क पालन करब फुन तजि दीन्ह ह। 11 हमरे परमेस्सर, तू अपने सेवकन अर्थात नबियन क उपयोग किहा अउर ओन आदेसन क हम क दिहा। तू कहे रह्या: “जउने देस मँ तू रहइ जात अहा अउर जेका आपन बनावइ जात रह्या ह, उ देस भ्रस्ट अहइ। इ ओन बहोत बुरे कामन स भ्रस्ट भवा ह जेनका हुवाँ रहइवालन किहेन ह। ओन लोग इ देस मँ हर जगह पइ बहोत जियादा बुरे काम किहेन ह। उ पचे इ देस क अपने पापन स गंदा कइ दिहेन ह। 12 एह बरे इस्राएल क लोगो, अपने बच्चन क ओनके बच्चन स बियाह जिन करइ द्या। ओनके संग सम्बंध न रखा। अउर ओनकर चिजियन क लालसा न करा। मोरे आदेसन क पालन करा जेहसे तू सक्तीसाली होब्या अउर इ देस क अच्छी चिजियन क भोग करब्या। तब तू इ देस क बनाए रखब्या अउर अपने बच्चन क देब्या।” 13 जउन बुरी घटनन हमरे संग घटिन उ सबइ हमार अपनी अपनी गलतियन स घटिन। हम लोग पाप क करम किहे अही अउर हम लोग बहोत अपराधी अही। मुला हमार परमेस्सर, तू हम क ओहसे बहोत, कम दण्ड दिहा ह जेतना हम मिलइ चाही। हम लोग बड़े भयानक करम किहे अही अउर हम लोगन क एहसे जियादा दण्ड मिलइ चाही। अइसा होत भए भी तू हमरे लोगन मँ स कछू क बन्धुवाई स अजाद होइ जाइ दिहा ह। 14 एह बरे हम जानित ह कि हम क तोहरे आदेसन क तोड़इ नाहीं चाही। हम क ओन लोगन क संग बियाह नाहीं करइ चाही। उ सबइ लोग बहोत बुरे काम करत हीं। परमेस्सर जदि हम लोग ओन बुरे लोगन क संग बियाह करत रही तउ हम जानित ह कि तू हम क नस्ट कइ देब्या। तब इस्राएल क लोगन मँ स कउनो भी जिअत नाहीं बचि पाइ। 15 यहोवा, इस्राएल क परमेस्सर, तू अच्छा अहइ। अउर तू अब भी हम मँ स कछू क जिअत रहइ देब्या। हाँ, हम अपराधी अहइ। अउर अपने अपराध क कारण हम मँ कउनो क भी तोहरे समन्वा खड़े होइ नाहीं दीन्ह जाइ चाही।

10:1 एज्रा पराथना करत रहा अउर पापन क स्वीकार करत रहा। उ परमेस्सर क मन्दिर क समन्वा रोवर रहा अउर निहुरिके प्रणाम करत रहा। जउने समइ एज्रा इ कहत रहा उ समइ इस्राएल क लोगन क एक बड़ा समूह मेहरारू मनसेधू अउर बच्चन ओकरे चारिहुँ कइँती बटुर गएन। उ सबइ लोग भी जोर-जोर स रोवत रहेन। 2 तब यहीएल क पूत सकन्याह जउन एलाम क सन्तानन मँ स रहा, एज्रा स बातन किहस। सकन्याह कहेस, “हम लोग अपने परमेस्सर क भक्त नाहीं रहे। हम लोग इ भुइँया क लोग क बिदेसी मेहररूअन क संग बियाह किहा ह। मुला जदपि हम इ कइ चुके अहइ तउ भी इस्राएल क बरे आसा अहइ। 3 अब हम अपने परमेस्सर क समन्वा ओन सबहिं मेहररूअन अउर ओनके बच्चन क वापस पठवइ क वाचा करी। हम लोग इ एज्रा क सलाह मानइ बरे अउ ओन लोगन क सलाह मानइ क बरे करब जउन परमेस्सर क नेमन क सम्मान करत हीं। हम परमेस्सर क नेमन क पालन करब। 4 एज्रा खड़े हवा, इ तोहार उत्तरदायित्व अहइ, किन्तु हम तोहार समर्थन करब। एह बरे साहसी बना अउर एका करा।” 5 एह बरे एज्रा उठ खड़ा भवा। उ प्रमुख याजक, लेवीबंसियन अउर इस्राएल क सबहिं लोगन स जउन कछू उ कहेस, ओका करइ क प्रतिग्या कराएस। 6 तब एज्रा परमेस्सर क भवन क समन्वा स दूर हट गवा। जब तलक एज्रा हुवाँ रहा उ भोजन नाहीं किहस अउर न ही पानी पियस। उ इ किहस काहेकि उ तब भी बहोत दुःखी भवा। उ इस्राएल क ओन लोगन बरे दुःखी रहा जउन यरूसलेम क वापस आए रहेन। 7 उ पचे यहूदा अउ यरूसलेम मँ हर एक जगहिया मँ इ एलान किहेस कि सबइ यहूदी लोग जउन कि बन्धुवाई स वापस लउटे यरूसलेम मँ एक संग एकट्ठा होइ। 8 कउनो भी मनई जउन तीन दिन क भीतर यरुसलेेमा नाहीं आई, तउ ओकर सम्पत्ति उ भुइँया मँ जबत कइ लीन्ह जाई। बड़के अधिकारियन अउर नेतन (प्रमुखन) इ निर्णय लिहन अउर उ मनई ओन लोगन क समूह क निअंबर नाहीं रहि जाई जउन कि बन्धुवाई स वापस लउटी क आएन। 9 एह बरे तीन दिन क भीतर यहूदा अउ बिन्यामीन के परिवार क सबहिं मनई यरूसलेम मँ एकट्ठा भएन अउर नवें महीने क बीसवें दिन सबहिं लोग मन्दिर क आँगन मँ आइ गएन। उ पचे इ बिसय क डर स अउर भारी बर्खा क कारण काँपत रहेन। 10 तब याजक एज्रा खड़ा भवा अउर उ ओन लोगन स कहेस, “तू लोग परमेस्सर क बरे बिस्सासी नाहीं रहेन। तू पचे बिदेसी मेहररूअन क संग बियाह किहा ह। तू पचे वइसा कइके इस्राएल क अउर जियादा अपराधी बनाया ह। 11 अब तू लोगन क यहोवा क समन्वा स्वीकार करब होइ कि तू पचे पाप किहा ह। यहोवा तू लोगन क पुरखन क परमेस्सर अहइ। तू पचन्क यहोवा क आदेस क पालन करइ चाही। अपने चारिहुँ ओर रहइवाले लोगन अउ अपनी बिदेसी मेहररूअन स अपने अलग करा।” 12 तब पूरा समूह जउन एक संग एकट्ठा रहा, एज्रा क जवाब दिहस। उ पचे ऊँची आवाज मँ कहेन: “एज्रा तू बिल्वुल ठीक कहत ह। हम क उ करइ चाही जउन तू कहत ह। 13 मूला हुवाँ बहोत स लोग अहइँ अउर इ बर्खा क समइ अहइ तउ हम लोग बाहेर खड़े नाहीं रहि सकित। इ समस्या एक या दुइ दिन मँ हल नाहीं होइ काहेकि हम लोग बुरी तरह पाप किहे अही। 14 पूरे समूह क सभा कइँती स हमरे प्रमुखन क निर्णय करइ द्या। तब निहचित समइ पइ हमरे नगरन क हर एक मनई जउन कउनो बिदेसी मेहरारू स बियाह किहेस ह, यरूसलेम आएन। ओनका अपने अग्रजन (प्रमुखन) अउर नगरन क निआव अधीसन क संग हिआँ आवइ दीन्ह जाइ। तब हमार परमेस्सर हम पइ किरोधित होब तजि देइ।” 15 सिरिफ थोड़े स मनई इ जोजना क बिरुद्ध रहेन। इ सबइ मनई रहेन असाहेल क पूत योनातान अउ तिकवा क पूत यहजयाह रहेन। लेवीबंसी मसुल्लाम अउ सब्बतै भी इ जोजना क बिरुद्ध रहेन। 16 एह बरे इस्राएल क उ सबइ लोग, जउन यरूसलेम मँ वापस आए रहेन, उ जोजना क स्वीकार करइ क सहमत होइ गएन। याजक एज्रा परिवार क प्रमुख मनईयन क चुनेस। उ हर एक परिवार स एक मनई क चुनेस। हर एक मनई नाउँ लइके चुना गवा। दसवें महीने क पहिले दिन जउन लोगन चुने गए रहेन हर एक मामले क जाँच क बरे बइठेन। 17 पहिले महीने क पहिले दिन तलक उ पचे ओन सबहिं मनइयन पइ बिचार करब पूरा कइ लिहन जउन विदेसी मेहररूअन स बियाह किहे रहेन। 18 याजकन क सन्तानन मँ इ सबइ नाउँ अहइँ जउन बिदेसी मेहररूअन स बियाह किहन: योसादाक क पूत येसू क सन्तानन, अउर येसू क भाइयन मँ स इ सबइ मनई: मासेयाह, एलीआज़र, यारीब अउर गदल्याह। 19 एन सबहिं अपनी-अपनी मेहररूअन स सम्बंध तोरब स्वीकार किहन अउर अपने-अपने अपराध क स्वीकार करत भए हर एक अपने रेवड़ स एक-एक भेड़ा अपराध भेंट क रूप मँ चढ़ाएस। उ पचे अइसे अपने-अपने अपराधन क कारण किहन। 20 इम्मेर क सन्तानन मँ स इ सबइ मनई रहेन: हनानी, अउर जबधाह। 21 हारीम क सन्तानन मँ स इ सबइ मनई रहेन: मासेयाह, एलीयाह, समायाह, यहीएल अउर उज्जिय्याह। 22 पसहूर क सन्तानन मँ स इ सबइ मनई रहेन: एल्योएनै, मासेयाह, इसमाएल, नतनेल, योजाबाद अउर एलासा। 23 लेवीबंसियन मँ स एन मनइयन बिदेसी मेहररूअन स बियाह किहस: योजाबाद, सिमी, केलायाह (एका कलीता भी कहा जात)। ह पतहवाह, यहूदा अउर एलीआज़र। 24 गायकन मँ सिरिफ इ मनई अहइ, जउन बिदेसी मेहरारू स बियाह किहस:एल्यासीब, दुआरपालन मँ स इ सबइ लोग अहइँ जउन बिदेसी मेहररूअन स बियाह किहस: सल्लूम, तेलेम अउर ऊरी। 25 इस्राएल क लोगन मँ स इ सबइ लोग अहइँ जउन बिदेसी मेहररूअन स बियाह किहन:परोस क सन्तानन स इ सबइ मनई: रम्याह, यिज्जियाह, मल्किय्याह, मियामीन, एलीआजर, मल्किय्याह अउर बनायाह। 26 एलाम क सन्तानन मँ स इ सबइ मनई: मत्तन्याह, जकर्याह, यहीएल, अब्दी, यरेमोत अउर एलीयाह। 27 जत्तू क सन्तानन मँ स इ सबइ मनई एल्योएनै, एल्यासीब, मत्तन्याह, यरेमोत, जाबाद अउर अजीज़ा। 28 बेबै क सन्तानन मँ स इ सबइ मनई: यहोहानान, हनन्याह, जब्बै, अउर अतलै। 29 बानी क सन्तानन मँ स इ सबइ मनई: मसुल्लाम, मल्लूक, अदायाह, यासूब, साल अउर यरामोत। 30 पहतमोआब क सन्तानन मँ स इ सबइ मनई: अदना, कलाल, बनायाह, मासेयाह, मत्तन्याह, बसलेल, बिन्नूई अउर मनस्से। 31 हारीम क सन्तानन मँ स इ सबइ मनई: एलीआज़र, यिस्सिय्याह, मल्कियाह, समायाह, सिमोन, 32 बिन्यामीन, मल्लूक अउर समर्याह। 33 हासूम क सन्तानन मँ स इ सबइ मनई: मत्तनै, मत्तत्ता, जाबाद, एलीपेलेत, यरेमै, मनस्से अउर सिमी। 34 बानी क सन्तानन मँ स इ सबइ मनई: मादै, अम्राम, ऊएल, 35 बनायाह, बेदयाह, कलूही, 36 बन्याह, मरेमोत, एल्यासीब, 37 मत्तन्याह, गत्तनै, यासू, 38 बिन्नूई क सन्तानन मँ स इ सबइ मनई: सिमी, 39 सेलेम्याह, नातान, अदायाह, 40 मक्नदबै, सासै, सारै, 41 अजरेल, सेलेम्याह, सेमर्याह, 42 सल्लूम, अमर्याह, अउर योसेफ। 43 नबो क सन्तानन मँ स इ सबइ मनई: यीएल, मत्तित्याह, जाबाद, जबीना, यद्दो, योएल अउर बनायाह। 44 एन सबहिं लोग बिदेसी मेहररूअन स बियाह किहे रहेन अउर एनमाँ स कछू क एन मेहररूअन मँ स बच्चे भी रहेन।