1:1 मूसा यहोवा क सेवक रहा। नून क पूत यहोसू मूसा क सहायक रहा। मूसा क मनइ क पाछे यहोवा यहोसू स बातन किहस। यहोवा यहोसू स कहेस, 2 “मोर सेवक मूसा मर गवा। अब इ सबइ लोग अउर तू यरदन नदी क पार जा। तू पचन्क उ भुइँया मँ जाइ चाही जेका मइँ इस्राएल क लोगन क यानी तू पचन्क दइ देत अहउँ। 3 मइँ मूसा क इ वचन दिहे रहेउँ कि इ भुइँया मइँ तू पचन्क देब। ऍह बरे मइँ तू पचन्क उ हर एक पहँटा देब, जउन कउने ठउरे पइ भी तू जाब्या। 4 “इ भुइयाँ अउर रेगिस्तानी भुइँया लोबानोन स लइके फरात नदी तलक, हित्तियन क पूरी भुइँया अउर हिआँ स लइके पच्छिम मँ भूमध्य सागर तलक क भुइँया तोहार इलाके क अन्दर तलक होइ। 5 मइँ मूसा क संग रहेउँ अउर मइँ उहइ तरह तोहरे संग रहब। तोहरे पूरी जिन्नगी मँ, तू पचन्क कउनो भी मनई तोस स खिलाफ करइ मँ समरथ नाहीं होइ। मइँ तू पचन्क छोड़ब नाहीं। मइँ कबहु तू पचन्क दूर नाहीं होब। 6 “यहोसू, तू पचन्क मजबूत अउ हिम्मती होइ चाही। तोहका, इ मनइयन क अगुआ होइ चाही उ जइसे पचे आपन भुइँया लइ सकइँ। इ उहइ भुइँया बाटइ जेका मइँ ओनका देइ क ओनके पुरखन क वचन दिहे रहेउँ। 7 मुला तू पचन्क मजबूत अउ हिम्मती रहइ क होइ। तू पचन्क ओन आदेसन क मानब निहचय क संग करइ चाही, जेनका मोर सेवक मूसा तू पचन्क दिहस ह। दाहिने या बाए कइती मत मुड़ा, तउ तू जउन कछू करब्या ओहमाँ सफल होब्या। 8 व्यवस्था क इ किताब हमेसा तोहरे दिमाग मँ होइ चाही। इ किताब क सावधानी स दिन-रात पढ़ब, ताकि तू हर उ कछू जउन एहमाँ लिखा भवा अहइ कइ सकब्या। अगर तू इ करब्या, तउ तू बुदिधमान बनब्या अउर जउन कछू करब्या ओहमाँ सफल होब्या। 9 याद राखा, कि मइँ तोहका मजबूत अउ हिम्मती बना रहइ क हुवुम दिहे रहेउँ। ऍह बरे कबहुँ जिन डेराअ, काहेकि तोहार परमेस्सर यहोवा तोहरे संग सबहिं जगह रही, जहाँ कहूँ तू जाब्या।” 10 ऍह बरे यहोसू लोगन क प्रमुखन क आदेस दिहस। उ कहेस 11 “डेरा स होइके जा अउर लोगन क तइयार होइ क कहा। लोगन स कहा, ‘कछू खइया क तइयार कइ लेइँ। अबहिं स तीन दिना पाछे, हम पचे यरदन नदी पार करब। हम पचे जाब अउ उ भुइँया क आपन कब्जा मँ लेब जेका परमेस्सर यहोवा तोहका दइ देत ह।’“ 12 तब यहोसू रूबेन अउ गाद क परिवार समूहन स, अउ मनस्से क आधे परिवार समूह स बतियान। यहोसू कहेस, 13 “ओका याद राखा, जउन यहोवा क सेवक मूसा तू सबन स कहे रहा। उ कहे रहा कि परमेस्सर, तोहार यहोवा तू पचन्क आराम अउर सांति क ठउर देइ। उ इ भुइँया क तू पचन्क देइ। तोहार पचन्क पत्नियन, तोहार पचन्क गदेलन अउ तोहार पचन्क जनावरन इ भुइँया मँ रहि सकत हीं। 14 मुला तोहार पचन्क जोधा लोग तोहरे पचन्क भइयन क संग यरदन नदी क जरुर पार करिहीं। तू पचन्क जुद्ध बरे तइयार रहइ चाही अउ आपन भुइँया लेइ मँ आपन भइयन क मदद करइ चाही। 15 यहोवा तू पचन्क आराम देइ क एक जगह दिहेस बाटइ, अउर उ तोहरे पचन्क भइयन बरे वइसा ही करी। मुला तू पचन्क आपन भइयन क मदद बरे तब तलक करइ चाही जब तलक उ पचे उ भुइँया क नाहीं लइ लेतेन जेका यहोवा, तोहार परमेस्सर ओनका दइ देत अहइ। तब तू पचे यरदन नदी क पूरब आपन भुइँया मँ लउटि सकत ह। उहइ उ भुइँया अहइ जेका यहोवा क सेवक मूसा तू पचन्क दिहे रहा।” 16 तब मनइयन यहोसू क जवाब दिहेन, “जउन भी करइ बरे तू हुँवुम देब्या, हम पचे करब। जउने जगह पइ तू पठउब्या, हम पचे जाब! 17 हम पचे पूरी तरह मूसा क हुवुम माना ह। उहइ तरह हम पचे सब मानब जउन तू कहब्या। हम पचे यहोवा स सिरिफ एक बात चाहित ह। हम पचे परमेस्सर यहोवा स इहइ मँाग करित ह कि उ तोहरे संग वइसा ही रहइ जइसेन ही उ मूसा क संग रहा। 18 तब, कउनो व्यक्ति तोहार हुवुम मानइ स इन्कार करत ह या कउनो मनई तोहरे खिलाफ खड़ा होत ह, तब उ मारी डावा जाइ। सिरिफ मजबूत अउ हिम्मती रहा!”

2:1 नून क पूत यहोसू अउ सब मनइयन सित्तीम मँ डेरा डाए रहेन। यहोसू दुइ ठु गुप्तचरन क पठएस। कउनो दूसर मनई क पता नाहीं लाग कि यहोसू इ मनइयन क पठए रहा। यहोसू इ मनइयन स कहेए, “जा अउ भुइँया क जाँच करा, यरीहो सहर क होसियारी स लखा।”ऍह बरे उ पचे यरीहो गएन। उ पचे एक ठु रंडी क घर गएन अउर हुआँ ठहरेन। इ मेहरारू क नाउँ राहाब रहा। 2 कउनो यरीहो क राजा स कहेस, “इस्राएल क कछू लोग आजु रात हमरी धरती पइ गुप्तचरी करइ आवा अहइँ।” 3 ऍह बरे यरीहो क राजा राहाब क हिआँ इ खबर पउएस: “ओन मनइयन क छिपावा नही जउन आइके तोहार हिआँ ठहरा अहइँ। ओनका बाहेर लिआवा। उ पचे मेदलेइ आपन देस मँ आवा अहइँ।” 4 मेहरारु दुइनउँ मनई क छिपाइ रही। मुला मेहरारु कहेस, “उ पचे दुइनउँ मनई आए तउ रहेन, मुला मइँ नाहीं जानत हउँ कि उ पचे कहाँ स आए रहेन। 5 सहर दुआर बन्द होइ क समइ उ पचे मनई साँझ क चला गएन। मइँ नाहीं जानत हउँ कि उ पचे कहाँ गएन। मुला अगर तू हाली जाब्या, तउ साइद तू पचे ओनका धइ लेब्या।” 6 (राहाब उ सबइ स कहेस, मुला असिल मँ मेहरारु ओनका छते पइ पहोंचाइ दिहे रही, अउर ओनका उ चारा मँ छिपाइ दिहे रही, जेकर ढेर उ ऊपर लगाए रही।) 7 ऍह बरे इस्राएल क दुइ ठु मनइयन क खोज मँ राजा क मनई चला गएन। राजा क मनइयन क जरिये सहर छोड़ देइ क तुरन्त पाछे सहर क दुआर बन्द कइ दीन्ह गएन। उ पचे ओन ठउरन पइ गएन जहाँ स लोग यरदन नदी क पार करत रहेन। 8 दुइनउँ मनई रात मँ सोवइ क तइयारी मँ रहेन। मुला मेहरारु छते पइ गइ अउ उ ओनसे बात किहस। 9 राहाब कहेस, “मइँ जानत हउँ कि इ भुइँया यहोवा तोहरे लोगन क दिहेस ह। तु पचे हम लोग क डेरावत अहा। इ देस मँ रहइवाले सबहिं लोगन तू स बहोत डेरान अहइँ। 10 हम पचे डेरान अही काहेकि हम पचे सुनि चुका अही कि यहोवा तू लोगन क मदद कइसे किहस ह। हम सुने अही कि तू पचे मिस्र स बाहेर आवा अहा तउ यहोवा लाल सागर क पानी क सोखाइ दिहस। हम पचे इ भी सुने अही कि तू लोग दुइ ठु एमोरी राजा लोग, सीहोन अउ ओग क संग का किह्या। हम पचे सुने अही कि तू लोग यरदन नदी क पूरब मँ रहइवाले ओन दुइ राजा लोगन क कइसे पूरी तरह स हरा दिहेस। 11 हम पचे ओन सबइ घटना क सुने अही अउर बहोत जियादा डेराइ ग अही अउर अब हम मँ स कउनो मनई ऍतना हिम्मती नाहीं कि तू लोगन स लड़ि सकइ। काहेकि तोहार परमेस्सर यहोवा ऊपर सरग अउ तरखाले भुइँया पइ हुवूमत करत ह। 12 तउ अब, मइँ चाहत हउँ कि तू पचे मोका वचन द्या। मइँ तोहार पचन्क मदद किहेउँ ह अउ तू पचन्पइ दाया किहेउँ ह। ऍह बरे यहोवा क समन्वा वचन द्या कि तू पचे हमरे परिवारे पइ दाया करब्या। वृपा कइके मोका कछू निसान द्या कि तू पचे अइसा करब्या। 13 मोसे तू पचे इ कहा कि तू पचे मोरे परिवार क जिअत रहइ देब्या जेहमाँ मोरे पिता, भाई, बहिनियन अउर ओनके परिवार होइहीं। तू पचे प्रण करा कि तू पचे हमका मउत स बचउब्या।” 14 ओ मनइयन ओका मान लिहन। उ पचे कहेन, “हम तोहरी जिन्नगी बरे अपनी जिन्नगी क बाजी लगाइ देब। कउनो मनई स न बतावा कि हम पचे का करत अही। तब जब यहोवा हम लोगन क हमार देस देइ, तब हम पचे तोहे पइ दाया करब। तू हम पचन्पइ बिस्सास कइ सकत ह।” 15 उ मेहरारू क घर सहर क देवारे मँ देवारे क एक ठु हींसा क रूप मँ बना रहा। ऍह बरे उ मेहरारू सहर क देवारे क अन्दर अउर बाहेर क हींसा मँ रहर रहेन। ऍह बरे उ महरारू लसुरी क उपयोग कइ क ओनका आपन खिड़की स नीचे (सहर क बाहेर भुइँया प) उतारहेस। 16 तब उ मेहरारु ओनसे कहेस, “पच्छिम क पहाड़ियन मँ जा, जेहसे राजा क सिपाही तू पचन्क एकाएक न घर पकड़इँ। हुआँ तीन दिन छुपा रहा। राजा क मनई जब लउटि आवइँ तब तू पचे आपन राहे पइ जाइ सकत ह।” 17 मनइयन ओसे कहेन, “हम पचे तोहका वचन दिहे अही। मुला तोहका एक ठु काम करइ क होइ, नाहीं तउ हम पचे आपन वचन बरे जिम्मेदार नाहीं होब। 18 तू इ लाल लसुरी क उपयोग हम पचन्क बचिके पराइ जाइ बरे करति अहा। हम पचे इहइ ठउर मँ लउटब। उ समइ तोहका इ लाल लसुरी क आपन खिड़की स जरुर बाँधइ क होइ। तोहका आपन पिता, आपन महतारी, आपन भाई अउर आपन पूरा परिवार क आपन संग इ घरे मँ रखइ क होइ। 19 हम पचे हर एक मनई क सुरिच्छत रखब जउन इ घरे मँ होइ। अगर तोहरे घरे क भीतर कउनो क चोट पहोंचत ह, तउ ओकरे बरे हम जिम्मेदार होब। अगर तोहरे घरे स कउनो मनई बाहेर जाइ, तउ उ मार डावा जाइ सकत ह। उ मनई बरे हम जिम्मेदार नाहीं होब। इ ओकर आपन दोख होइ। 20 हम पचे इ वाचा तोहरे संग करत अही। मुला अगर तू कउनो क बतउबिउ कि हम पचे क करत अही, तउ हम पचे आपन इ वचन स अजाद होब।” 21 मेहरारु जवाब दिहस, “मइँ ऍका अंगीकार करत हउँ।” मेहरारु नमस्कार किहस अउर मनइयन ओकर घर छोड़ दिहन। मेहरारु खिड़की मँ लाल लसुरी बाँधेस। 22 उ पचे ओकरे घरे क तजिके पहाड़ियन मँ चला गएन जहाँ उ पचे तीन दिन रुकेन। राजा क मनइयन पूरी सड़किया पइ ओनकर खोजबीन किहस। तीन दिन पाछे राजा क मनइयन खोज बन्द कइ दिहन। उ पचे ओनका नाहीं हरे पाएन, सो उ पचे सहर मँ लउटि आएन। 23 तब दुइनउँ मनइयन यहोसू क लगे लउटि आएन। मनइयन पहाड़ियन क तजेन अउर नदी पार किहन। उ पचे नून क पूत यहोसू क लगे गएन अउर जउन कछू ओनके संग भए रहेन, उ सबइ यहोसू क बताएन। 24 उ पचे यहोसू स कहेन, “यहोवा फुरइ सारा भुइँया हम लोगन क दइ दिहस ह। उ देस क सबहिं लोग हम पचन्स डेरान अहइँ।”

3:1 दूसर दिन भिन्सारे यहोसू अउ इस्राएल क सबहिं लोग उठेन अउ उ पचे सित्तीम क छोड़ि दिहेन। उ पचे यरदन नदी तलक जात्रा किहन। उ पचे पार करइ स पहिले यरदन नदी पइ डेरा डाएन। 2 तीन दिन पाछे सेनापति डेरा क बीच स होइके निकरेन। 3 उ पचे लोगन क हुवुम दिहेन। उ पचे कहेन, “तू लोग याजक अउ लेवी परिवार समूह क आपन परमेस्सर यहोवा क करार क सन्दूख लइ जात भए लखब्या। उ समइ तू पचे जहाँ ह्वा, ओका तजि देब्या अउ ओनके पाछे चलब्या। 4 मुला ओनके बहोत निअरे जिन रहा। लगभग एक हजार गज दूर ओनके पाछे रहा। तू पचे यह सासता क जात्रा कबहुँ नाहीं किह्या ह। ऍह बरे अगर तू पचे ओनके पाछे चलब्या, तउ तू पचे जान लेब्या कि तू पचन्क कहाँ जाइ क अहइ।” 5 तब यहोसू लोगन स कहेस, “आपन क पवित्तर करा, काहेकि काल्ह भियान यहोवा तू लोगन क बीच मँ चमत्कार देखाइ।” 6 तब यहोसू याजकन स कहेस, “करार क सन्दूख क उठावा अउर लोगन क समन्वा स नदी क पार चला।” ऍह बरे याजक लोग सन्दूख क उठाएन अउर ओका लोगन क समन्वा लइ गएन। 7 तब यहोवा यहोसू स कहेस, “आजु मइँ इस्राएल क लोगन क निगाह मँ तू पचन्क महान मनई बनाउब सुरु करब। तब लोग जनिहीं कि मइँ तोहरे सबन क संग वइसेन ही अहउँ जइसेन मँ मूसा क संग रहेउँ। 8 याजक लोग करार क सन्दूख लइ चलिहीं। याजक लोगन स इ कहा, ‘यरदन नदी क किनारे तलक जा अउर यरदन नदी मँ रुकि जा।’“ 9 तब यहोसू इस्राएल क लोगन स कहेस, “आवा अउर आपन परमेस्सर यहोवा क हुवुम सुना। 10 इ इ बात क प्रमाण अहइ कि यहोवा तू लोगन क संग अहइ अउर उ तोहरे पचन क सत्रु कनान क लोगन हित्तियन, हिव्वियन, परिज्जियन, गिर्गासियन, एमोरी लोगन अउर यबूसी लोगन क हराइ अउर ओनका उ देस तजइ क विवस करी। 11 प्रमाण हिआँ अहइ। सारा संसार क सुआमी क करार क सन्दूख उ समइ तोहरे पचन्क अगवा चली जब तू पचे यरदन नदी पार करब्या। 12 आपन बीच स बारह मनइयन क चुना। इस्राएल क बारह परिवार समूहन मँ स हर एक स एक मनई चुना। 13 याजक लोग समूचे संसार क सुआमी, यहोवा क करार क सन्दूख क लइके चलिहीं। उ पचे उ सन्दूख क तोहरे समन्वा यरदन नदी मँ लइ जइहीं। जब उ पचे पानी मँ घुसिहीं, तउ यरदन क पानी क बहब रुकि जाइ। पानी रुकि जाइ अउर उ जगह क पाछे ढेर मँ ठाड़ होइ जाइ।” 14 याजक मनइयन क समन्वा करार क सन्दूख लइके चलेन अउर मनइयन यरदन नदी पार करइ बरे डेरा क तजि दिहन। 15 (फसिल कटइ क समइ यरदन नदी आपन किनारन स ऊपर बहत ह। ऍह बरे नदी पूरी तरह भरी भई रही।) सन्दूख लइ चलइवालन याजक लोग नदी क किनारे पहोंचेन। उ पचे पानी मँ गोड़ धरेन। 16 अउर फौरन उहइ समइ पानी क बहब बन्द होइ गवा। पानी नदी क ऊपर ढेर मँ खड़ा होइ गवा। पानी नदी क चढ़व कइँती लम्बी दूरी तलक लगातार आदाम तलक (सारतान क निअरे एक ठु सहर) ठाड़ होत चला गवा। मनइयन यरीहो क लगे नदी क पार किहन। 17 याजक लोग यहोवा क करार क सन्दूखे क नदी क बीच लइ जाइके खड़ा होइ गएन अउर हुवाँ भुइँया झुरान होइ गएन जब तलक इस्राएल क लोग यरदन नदी क झुरान भुइँया स होत भए चलिके पार नाहीं करइ लइ, तब तलक याजक हुआँ ओनका जोहत रहेन।

4:1 जब सबहिं लोग यरदन नदी क पार कइ लिहन तब यहोवा यहोसू स कहेस। 2 “मनइयन मँ स बारह ठु मनई चुना। हर एक ठु परिवार समूह स एक ठु मनई चुना। 3 मनइयन क हुवुम द्या कि उ पचे हुआँ नदी क बीच मँ स सिलन क बटोरा जहाँ याजक लोग खड़ा अहइ। ओन बारह सिलन क आपन संग लइ जा। ओन बारह सिलन क उ जगह पइ धरा जहाँ तू पचे आजु रात ठहरा।” 4 ऍह बरे यहोसू हर एक परिवार समूह स एक ठु मनई चुनेस तब उ बारह मनइयन क एक संग बोलाएस। 5 यहोसू ओनसे कहेस, “नदी मँ हुआँ तलक जा जहाँ पवित्तर सन्दूख अहइ जेहमाँ तोहार परमेस्सर यहोवा क वाचा अहइ। तू पचन मँ स हर एक क एक सिला क खोज करइ चाही। इस्राएल क बारह परिवार समूहन मँ स हर एक बरे एक ठु सिला होइ। उ सिला क आपन काँधे पर ढोवा। 6 इ सबइ सिलन याद रखइ बरे तोहरे पचन्क बीच चीन्हा होइहीं। भविस्स मँ तोहर पचन्क गदेलन इ पुछिहीं, ‘इ सबइ सिलन क का महत्व अहइ?’ 7 गदेलन स कहा कि यहोवा यरदन नदी मँ पानी क बहब बन्द कइ दिहे रहा। जब यहोवा क करार क सन्दूख नदी क पार किहस तब पानी क बहब बन्द होइ ग रहा। इ सिलन इस्राएल क लोगन बरे इ घटना सदा ही यादगारी होब्या।” 8 ऍह बरे इस्राएल क मनइयन यहोसू क हुवुम मानेन। उ पचे यरदन नदी क बीच स बारह सिलन लइ गएन। इस्राएल क बारह परिवार समूहन मँ स हर एक बरे एक ठु सिला रही। उ पचे उ वइसेन ही किहन जइसा यहोवा यहोसू क आदेस दिहे रहा। उ पचे मनई सिलन क आपन संग लइ गएन। तब उ पचे ओन सिलन क हुआँ रखेन जहाँ उ पचे आपन डेरा डाएन। 9 (यहोसू क भी यहोवा क पवित्तर सन्दूखे क ढोवइवाला याजकन जहाँ खड़ा रहेन, हुअँई यरदन नदी क बीच मँ बारह सिलन रखइ क रहेन। उ सबइ सिलन आजु भी उ जगह पइ अहइँ।) 10 यहोवा यहोसू क आदेस दिहे रहा कि उ लोगन स कहइ कि ओनका का करइ चाही। उ सबइ उहइ बातन रहिन, जेनका जरुर करइ बरे मूसा यहोसू स कहे रहा। ऍह बरे पवित्तर सन्दूख क ढोवइवाला याजकन नदी क बीच मँ तब तलक खड़ा ही रहेन, जब तलक इ सबइ सबहिं काम पूरा नाहीं होइ गएन। मनइयन हाली किहन अउ नदी पार कइ गएन। 11 जब लोग नदी क पार कइ लिहेन, तब याजक यहोवा क सन्दूख लइके मनइयन क समन्वा आएन। 12 रूबेन अउर गादी क परिवार समूह, अउ मनस्से क आधा परिवार समूह, मूसा ओनका जउन करइ क कहे रहा, किहस। इ मनइयन दूसर लोगन क समन्वा नदी क पार किहेन। इ सबइ लोग जुद्ध बरे तइयार रहेन। इ सबइ लोग इस्राएल क दूसर लोगन क उ देस क लेइ मँ मदद करइ जात रहेन, जेका यहोवा ओनका देइ क वचन दिहे रहा। 13 लगभग चालीस हजार फउजी, जउन जुद्ध बरे तइयार रहेन, यहोवा क समन्वा स गुजरेन। उ पचे यरीहो क मइदान कइँती बढ़त रहेन। 14 उ दिन यहोवा इस्राएल क सबहिं लोगन क निगाह मँ यहोसू क एक महान मनई बनाइ दिहस। उ समइ स अगवा लोग यहोसू क सम्मान करइ लागेन। उ पचे यहोसू क सम्मान जिन्नगी भइ वइसेन ही करइ लागेन जइसेन मूसा क करत रहेन। 15 जउने समइ सन्दूख लइ ढोवइवाला याजकन अबहिं नदी मँ खड़ा ही रहेन, यहोवा यहोसू स कहेस। 16 “याजकन क नदी स बाहेर आवइ क हुवुम द्या।” 17 ऍह बरे यहोसू याजक लोगन क आदेस दिहस। उ कहेस, “यरदन नदी क बाहेर आवा।” 18 याजक लोग यहोसू क आग्या मानेन। उ पचे सन्दूखे क लइके नदी स बाहेर आएन। जब याजक लोगन क गोड़ नदी क दूसरे कइँती भुइँया क छुएन, तब नदी क पानी फुन बहइ लाग। पानी फुन किनारन क ऊपर स वसाइ बहत लाग जइसे इ सबइ लोगन क नदी पार करइ क पहिले रहा। 19 मनइयन यरदन नदी क पहिले महीना क दसएँ दिन पार किहन। मनइयन यरीहो क पूरब गीलगाल मँ डेरा डाएन। 20 मनइयन ओन बारह सिलन क आपन संग लइ चलत रहेन जेनका उ पचे यरदन नदी स निकारे रहेन अउर यहोसू ओन सिलन क गीलगाल मँ कायम किहे रहा। 21 तब यहोसू लोगन स कहेस “भविस्स मँ तोहार गदेलन आपन महतारी अउर बाप स पूछिहीं, ‘इ सबइ सिलन क का महत्व अहइ?’ 22 तू पचे गदेलन क बतउब्या, ‘इ सबइ सिलन हम लोगन क इ सुमिरन करावइ मँ मदद करत हीं कि इस्राएल क लोग कउने तरह झुरान भुइँया पइ स यरदन नदी क पार किहन। 23 तोहार परमेस्सर यहोवा नदी क पानी बहब रोक दिहस। नदी तब तलक झुरान रही जब तल इस्राएल क लोग नदी क पार नाहीं कइ किहन। यहोवा यरदन नदी पइ लोगन बरे उहइ किहस, जउन उ पचे लोगन बरे लाल सागर पइ किहे रहेन। याद करा कि यहोवा लाल सागर पइ पानी क बहब ऍह बरे रोके रहा कि लोग ओका पार कइ सकइँ।’ 24 यहोवा इ ऍह बरे किहस कि इ देस क सबहिं लोग जान लेइँ कि तोहार परमेस्सर यहोवा महान सक्ती धरत ह जेहसे लोग सदा ही यहोवा तोहरे परमेस्सर स डेरात रहइँ।”

5:1 इ तरह, यहोवा यरदन नदी क तब तलक झुरान राखेस जब तलक इस्राएल क लोग ओका पार नाहीं कइ लिहन। यरदन नदी क पच्छिम मँ बसइयन एमोरी राजा लोग अउर भूमध्य सागर क किनारे पइ बसइयन कनानी राजा लोग एकरे बारे मँ सुनेन अउर उ पचे बहोत जियादा डेराइ ग रहेन। ओकरे पाछे उ पचे मँ इस्राएल क लोगन क विरुदध जुद्ध करइ क हिम्मत नाहीं रहि गएन।इस्राएलियन क खतना 2 उ समइ, यहोवा यहोसू स कहेस, “चकमक पाथर क छूरी बनावा अउर इस्राएल क लोगन क खतना फुन करा।” 3 ऍह बरे यहोसू चकमक पाथर क छुरी बनाएस। तब उ इस्राएल क लोगन क खतना क रीति गिबआत हाअरलोत मँ पूरा किहस। 4 इहइ कारण अहइ कि यहोसू ओन सबहिं मनइयन क खतना किहस, जउन इस्राएल क लोगन क जरिये मिस्र छोड़ देइ क पाछे फउज मँ रहइ क उम्र क होइ ग रहेन। रेगिस्तान मँ रहइ क समझ ओन फउजियन मँ स कई लोगन यहोवा क बात नाहीं मानेन। ऍह बरे यहोवा ओन मनइयन क अभिसाप दिहे रहा कि उ पचे “दूध अउ सहद क नदियन वाले भुइँया” क नाहीं लखि पाइँही। यहोवा हमरे पुरखन क उ भुइँया देइ क वचन दिहे रहा, मुला इ सबइ मनइयन क कारण लोगन क चालीस बरिस तलक रेगिस्ताने मँ भटकइ क पड़ा अउर इ तरह उ सबइ फउजी मरि गएन अउर ओनकर जगहिया ओनकइ बेटवन लइ लिहन। मुला मिस्र स होइवाली जात्रा मँ जेतने गदेलन रेगिस्ताने मँ पइदा भ रहेन, ओनमाँ स कउनो क खतना नाहीं होइ सका। ऍह बरे यहोसू ओनकइ खतना किहस। 5 6 7 8 यहोसू सबहिं मनइयन क खतना पूरा किहस। उ पचे तब तलक डेरा मँ रहेन, जब तलक तन्दुरुस्त नाहीं भएन। 9 उ समइ यहोवा यहोसू स कहेस, “जब तू मिस्र मँ गुलाम रह्या तब तोहका गुलामी क लज्जा रह्या। मुला आजु मइँ तोहार लज्जा दूर किहेउँ ह।” ऍह बरे यहोसू उ जगह क नाउँ गिलगाल धरेस अउर उ जगह आजु भी गिलगाल कही जात ह। 10 जउने समइ इस्राएल क लोग यरीहो क मइदान मँ, गिलगाल क जगह डेरा डाए रहेन, उ पचे फसह पर्व मनावत रहेन। इ महीना क चउदहवाँ दिन क साँझ क रहा। 11 फसह पर्व क पाछे, अगला दिन मनइयन अनाज क उ खइया क खाएन जउन भुइँया पइ उगि रहा। उ पचे बेखमीरे क रोटी अउर भूँजा अनाज खाएन। 12 उ दिना जब मनइयन भोजन कइ लिहन, ओकरे पाछे सरग स खास भोजन क आउब बन्द होइ ग। ओकरे पाछे, इस्राएल क लोग सरग स बिसेख भोजन नाहीं पाएन। ओकरे पाछे उ पचे उहइ भोजन खाएन जउन कनान मँ पइदा होइ रहा। 13 जब यहोसू यरीहो क निअरे रहा तब उ ऊपर आँखी उठाएस अउर उ आपन समन्वा एक ठु मनई क लखेस। उ मनई क हाथे मँ एक ठु तरवार रही। यहोसू उ मनई क लगे गवा अउ ओहसे पूछेस, “का तू हमरे मीतन मँ स कउनो एक अहा या हमार दुस्मनन मँ स?” 14 उ मनई जवाब दिहस, “मइँ दुस्मन नाहीं हउँ। मइँ यहोवा क फउज क सेनापति अहउँ। मइँ अबहुँ-अबहुँ तोहरे लगे आवा हउँ।”तब यहोसू आपन मूँड़ भुइँया तलक आपन सम्मान परगट करइ बरे निहुराएन। उ पूछेस, “का मोरे सुआमी क मोर बरे कउनो हुवुम अहइ? मइँ तोहार सेवक अहउँ।” 15 यहोवा क फउज क सेनापति जवाब दिहस, “आपन पनही उतारा। जउन जगह पइ तू खड़ा अहा उ ठउर पवित्तर अहइ।” ऍह बरे यहोसू ओकर हुवुम मानेस।

6:1 यरीहो सहर क दुआर बन्द रहेन। उ सहर क लोग डेरान रहेन काहेकि इस्राएल क लोग निअरे रहेन। कउनो सहर मँ नाहीं जात रहा अउर कउनो सहर स बाहेर नाहीं आवत रहा। 2 तब यहोसू यहोवा स कहा, “लखा, मइँ यरीहो सहर क तोहरे अधिकार मँ दइ दिहेउँ ह। ऍकर राजा अउर एकर सारे सिपाही तोहरे मातहत अहइँ। 3 छ: दिना तलक हर एक दिन आपन फउज क संग सहर क चारिहुँ कइँती गस्त करा। 4 भेड़ क सींगन क तुरहियन क लइके सात याजकन क चलइ द्या। याजकन स कहा कि उ पचे पवित्तर सन्दूखन क समन्वा चलइँ। सतएँ दिन सहर क चारिहुँ कइँती सात फेरा करा। सतएँ दिन याजक लोगन स कहा कि उ पचे चलइ क समइ तुरही बजावइँ। 5 याजक लोग तुरहियन स खूब जोर क अवाज करिहीं। जब तू उ अवाज सुना तउ तू सब लोगन स चिचियाब सुरु करइ कहा। जब तू अइसा करब्या तउ सहर क देवारन भहराइ जइहीं। तब तोहार लोग सीधा सहर मँ जइहीं।” 6 इ तरह नून क पूत यहोसू याजकन क बटोरेस। यहोसू ओनसे कहेस, “यहोवा क पवित्तर सन्दूख क लइ चला। सात याजकन क भी तुरही लइ चलइ बरे ल्या। ओन याजकन क सन्दूखे क समन्वा चलइ चाही।” 7 तब यहोसू लोगन क हुवुम दिहस, “जा अउर सहर क चारिहुँ कइँती ताकत क परिवमा करा। अस्त्र-सस्त्र वाले फउजी यहोवा क पवित्तर सन्दूखे क अगवा चलइँ।” 8 जब यहोसू लोगन स बोलब पूरा किहस तउ यहोवा क समन्वा सात याजक लोग चलब सुरु किहेन। उ पचे तुरहियन लिए भए रहेन। चलत समइ उ पचे तुरहियन बजावत रहेन। यहोवा क सन्दूख क लइके चलइवालन याजक लोग ओनके पाछे चलन रहेन। 9 अस्त्र-सस्त्र धारण करइवाले फउजी याजक लोगन क अगवा चलत रहेन। याजक तुुरही बजावत रहेन। बचा भवा मनई तुरही बजावत भए पवित्तर सन्दूख क पाछे चलत रहेन। 10 मुला यहोसू ओनका आवाज न लगइ बरे हुवुम दिहेस। उ कहेस, “जिन बोला अउ नाहीं आवाज करा जब तलक कि मइँ हुवुम न दइ। मोरे कहइ क समइ तू पचे ललकार सकत ह।” 11 ऍह बरे यहोसू याजक लोगन क यहोवा क पवित्तर सन्दूख क संग सहर क चारिहुँ कइँती लइ चलइ क हुवुम दिहस। तब उ पचे आपन डेरा मँ लउटि गएन अउर रात भइ हुवँइ ठहरेन। 12 दूसर दिन, भिन्सारे यहोसू उठा। याजक फिन यहोवा क पवित्तर सन्दूख क लइके चलेन। 13 अउर सातउँ याजक लोग सात तुरही लइके यहोवा क पवित्तर सन्दूख क समन्वा बजावत भएन चलेन। उ पचे कदम स कदम मिलावत रहेन। ओनके समन्वा अस्त्र-सस्त्र धारणकरइवालन फउजी चलत रहेन। अस्त्र-सस्त्र धारणकरइवालन फउजी जउन याजक लोग तुरहियन बचावत रहेन क संग यहोवा क सन्दूख क पाछे चलत रहेन। 14 ऍह बरे दूसर दिन, ओन सबइ लोग एक दाईर् सहर क चारिहुँ कइँती चक्कर लगाएन अउर तब उ पचे आपन डेरन मँ लउटि गएन। उ पचे लगातार छ: दिन तलक इ किहन। 15 सतएँ दिन उ पचे भोर मँ उठेन अउर उ पचे सहर क चारिहुँ कइँती सात चक्कर लगाएन। उ पचे उहइ तरह सहर क चक्कर लगाएन जउने तरह उ पचे ओकरे पहिले लगाइ चुका रहेन, मुला उ दिन उ पचे सात चक्कर लगाएन। 16 जब उ पचे सतइँ दाईर् सहर क चक्कर लगाएन तउ याजक लोग आपन तुरही बजाएन। उ समइ यहोसू आदेस दिहस, “अब तू जोर स आवाज लगा। यहोवा इ नगर तू पचन्क देत अहइ। 17 सहर अउ एहमाँ क हर एक चीज यहोवा क अहइ।सिरिफ पतुरिया राहाब अउ ओकरे घरे मँ रहइवाले लोग ही जिअत रइहीं। इ सबइ मारा नाहीं जाइ चाही काहेकि राहाब ओन दुइनउँ गुप्तचरन क मदद किहे रही। 18 इहउ सुमिरा कि हम क ऍकरे अलावा दूसर चिजियन्क बरबाद करइ क अहइ। ओन चिजियन्क जिन ल्या। अगर तू पचे ओन चिजियन्क लेत अहा अउर आपन डेरन मँ लिआवत अहा तउ तू पचे खुद बरबाद होइजाब्या अउर तू पचे आपन सबहिं इस्राएली लोगन पइ भी मुसीबत लिअउब्या 19 सबहिं चाँदी, सोना अउर लोहा क बनी चिजियन यहोवा क अहइँ। इ सबइ चिजियन यहोवा क खजाने मँ ही धरी जाइ चाही।” 20 याजक लोग तुरही बजाएन। मनइयन तुरहियन क अवाज सुनेन अउर आवाज लगवत सुरु किहेन। देवारन भहरानिन अउर लोग सीधे सहर मँ धावइ लागेन। इ तरह इस्राएल क लोग सहर क हराएन। 21 मनइयन सहर क हर एक चीज बरबाद किहेन। उ पचे हुआँ क हर एक जिअत परानी क बरबाद किहन। उ पचे नउजवान, बु़ढ़वन, जवान मेहररुअन, बुढ़ियन, भेड़िन अउर गदहन क मार डाएन। 22 यहोसू दुइनउँ गुप्तचरन स बतियान। उ कहेस, “पतुरिया क घरे जा। ओका बाहेर लइ आवा। सबइ मनइयन क बाहेर लइ आवा अउर ओन लोगन क भी बाहेर लइ आवा जउन ओकरे संग अहइँ। इ तू पचे ऍह बरे करा कि तू पचे ओका वचन दिहे अहा।” 23 दुइनउँ मनई घर मँ गएन अउर राहाब क बाहेर लिआएन। उ पचे ओकर पिता, महतारी, भाइयन अउ ओकर समूचइ परिवार अउ ओकरे साथे क दूसर सबहिं क बाहेर निकारेन। उ पचे इस्राएल क डेरा क बाहेर इ सबहिं लोगन क सुरच्छित रखेन। 24 तब इस्राएल क लोग सारा सहर जराए दिहन। उ पचे सोना, चाँदी, काँसा, अउर लोहा स बनी चिजियन क अलावा सबहिं चिजियन क जराए दिहन। इ सबइ चिजियन यहोवा क खजाने बरे बचाइ लीन्ह गइन। 25 यहोसू राहाब, ओकर परिवार अउ ओकरे रिस्तेदारन क बचाइ लिहस। यहोसू ओनका जिअत रहइ दिहस काहेकि राहाब ओन लोगन क मदद किहे रही, जेनका उ यरीहो मँ जासूसी करइ बरे पठए रहा। राहाब आज भी इस्राएल क लोगन मँ आपन सन्ताने क रुप मँ रहति ह। 26 उ समइ, यहोसू किरिया खाएस। उ कहेस:“कउनो मनई जउन यरीहो सहर क फिन निर्माण क जतन करी यहोवा कइँती स अभिसापित होब्या। जउन मनई सहर क नींव रखी, आपन पहिलउटी बटवा क खोइ। जउन मनई फाटक लगाइ उ आपन सबन त लहुरा बटवा क खोई।” 27 एह बरे यहोवा, यहोसू क संग रहा अउर इ तरह यहोसू पूरे भुइँया मँ प्रसिद्ध होइ गवा।

7:1 मुला इस्राएल क लोग परमेस्सर क आग्या नाहीं मानेन। यहूदा परिवार समूह क एक मनई आकान कम्मीर् क पूत जउन जब्दी क पूत रहा। आपन संग कछू वजिर्त चिजियन धइ लिहेस जेनका बरबाद करइ क रहा। ऍह बरे यहोवा इस्राएल क लोगन पइ कोहाइ गवा। 2 जब उ पचे यरीहो क हराइ चुकेन तब यहोसू कछू लोगन क पठएस। ऐ, बेतेल क पूरब बेतावेन क लगे रहा। यहोसू ओनसे कहेस, “ऐ जा अउर उ छेत्र क कमजोरियन क लखा।” ऍह बरे लोग उ देस मँ जासूसी करइ गएन। 3 पाछे उ मनईयन यहोसू क लगे लउटिके आएन। उ पचे कहेन, “ऐ कमजोर छेत्र अहइ। हम लोगन क ओनका हरावइ बरे आपन सबहिं लोगन क जरुरत नाहीं पड़ी। हुआँ लड़इ बरे दुइ हजार या तीन हजार मनइयन क पठवा। आपन सबहिं फउजन क हुआँ उपयोग करइ क जरुरत नाहीं अहइ। हुआँ पइ थोड़ा मनई हम लोगन क खलाफ लड़इवाला अहइँ।” 4 ऍह बरे लगभग तीन हजार मनईयन ऐ क खिलाफ गएन। मुला ऐ क लोग लगभग छत्तीस इस्राएल क मनइयन क जंग मँ मार गिराएन अउ बचा भवा इस्राएल क लोग पराइ गएन। ऐ क लोग सहर-दुआर स लगातार पाथर क खदानन तलक पाछा किहन। इ तरह ऐ क लोग ओनका ढलवान पइ बुरी तरह हराएन।जब इस्राएल क लोग इ लखेन तउ उ पचे बहोत डेराइ गएन अउर आपन हिम्मत हार गएन। 5 6 जबहिं यहोसू एकरे बारे मँ सुनेस तउ उ आपन ओढ़ना फाड़ि डाएस। उ पवित्तर सन्दूखे क समन्वा भुइँया पइ ओलरा। यहोसू हुआँ साँझ तलक पड़ा रहा। इस्राएल क नेता लोग इहइ किहन। उ पचे आपन मूँड़ि पइ धूरि डाएन। 7 तब यहोसू कहेस, “यहोवा, मोर सुआमी। तू हमरे लोगन क यरदन नदी क पार लिआया। मुला तू हमका ऍतनी दूर काहे लिआया, का सिरिफ एमोरी लोगन क जरिये स हम लोगन क बरबाद करइ बरे लिआया? हम लोग यरदन नदी क दूसरे किनारे पइ ठहरा होइत अउर सन्तुट्ठ रहित। 8 मोरे मालिक, मइँ आपन जिन्नगी क कसम खाइके कहत हउँ कि मइँ तोहस का कहइ सकत हउँ। इस्राएल आपन दुस्मनन क पास स भाग गहेस ह। 9 कनानी अउ इ देस क सबहिं लोग इ सुनिहीं जउन भवा, तब उ पचे हम लोगन क खिलाफ अइहीं अउर हम सबन क मारि डइहीं। तब इ तू आपन महान नाउँ क रच्छा बरे का करब्या?” 10 यहोवा यहोसू स कहेस, “खड़ा होइ जा। तू आपन मुँहे क बल काहे गिरा अहा? 11 इस्राएल क लोग मोरे खिलाफ पाप किहन। उ पचे मोरी उ करार क तोड़ेन, जेका मइँ ओनका संग किहेस रहेउँ। उ पचे उ चिजियन मँ स कछू चिजियन लिहन जेनका बरबाद करइ क हुवुम मइँ दिहेउँ ह। उ पचे मोर चोरी किहेन ह। उ पचे लबार बात कहेन ह। उ पचे उ सबइ चिजियन आपन लगे धरेन ह। 12 इहइ कारण अहइ कि इस्राएल क फउज आपन दुसमनन क नाहीं हराइ सकेस। उ पचे पलटेन अउर आपन दुस्समन स पराइ गएन काहेकि कउनो मनई ओन चिजियन क लिहेन जेका बरबाद करइ चाहत रहा। मइँ तब तलक तोहार मदद नाहीं करब जब तलक तू उ चिजियन क बरबाद नाहीं करब्या जेका मइँ तू पचन्क क बरबाद कइ करइ क हुवुम दिहे रहा। 13 “अब तू जा अउर लोगन क पवित्तर करा। लोगन स कहा, ‘उ पचे आपन क पवित्तर करइँ। भियान बरे तइयार होइ जा। इस्राएल क परमेस्सर यहोवा कहत ह कि कछू लोग उ सबइ चिजियन आपन लगे धरे अहइँ, जेनका मइँ बरबाद करइ क हुवुम दिहे रहेउँ। तू तब तलक आपन दुस्मनन क हरावइ क जोग्गा नाहीं होब्या, जब तलक तू ओन चिजियन क खतम नाहीं कइ देब्या। 14 “‘भियान भिन्सारे तू सबन्क यहोवा क समन्वा खड़ा होइ क होइ। सबहिं परिवार समूह यहोवा क समन्वा पेस होइहीं। दूसर परिवार समूह मँ स यहोवा एक परिवार समूह क चुनी। तब सिरिफ उहइ परिवार समूह यहोवा क समन्वा खड़ा होइ। तब बस उहइ परिवार समूह स यहोव एक कबीला क चुनी। तब सिरिफ उहइ कबीला यहोवा क समन्वा खड़ा होइ। तब यहोवा उ कबीला क प्रत्येक परिवार क परखी अउर उ मँ स एक क चुनी। तब उ परिवार अकेले यहोवा क समन्वा खड़ा होइ जउन कि उ परिवार स एक एक क चुनी। 15 उ मनई जउन इ चिजियन क संग पावा जाइ जेनका मइँ बरबाद करइ क हुवुम दिहे रहेउँ, धइ लीन्ह जाइ। तब उ मनई क अउर ओकरे संग ओकर हर एक चीज आगी मँ झोंकिके जरि दीन्ह जाइ। उ मनई यहोवा क करार क तोड़ेस ह। उ इस्राएल क लोगन क बीच मँ बहोत ही सरमनाक काम किहेस ह।’“ 16 दूसरे भिन्सारे यहोसू इस्राएल क सबहिं लोगन क यहोवा क समन्वा लइ गवा। सारा परिवार समूह यहोवा क समन्वा खड़ा होइ गवा। यहोवा यहूदा परिवार-समूह क चुनेस। 17 तब यहूदा क सारा परिवार समूह यहोवा क समन्वा खड़ा भएन। यहोवा ओन मँ स जेरह कबीला क चुनेस। तब जेरह कबीला क सबहिं परिवार यहोवा क समन्वा खड़ा भएन। ऍनमँा स जब्दी क परिवार चुना गवा। 18 तब यहोसू इ परिवार क सबहिं मनसेधुअन क यहोवा क समन्वा आवइ क कहेस। यहोवा कमीर् क पूत आकान क चुनेस। (कमीर् जब्दी क पूत अउर जब्दी जेरह क पूत रहेन।) 19 तब यहोसू आकान स कहेस, “पूत, तोहका आपन पराथना कहइ चाही। इस्राएल क यहोवा परमेस्सर क सम्मान करइ चाही अउर ओहसे तोहका पापन्क कबूलइ चाही। मोका बतावा कि तू क किह्या? मोहसे कछू छुपावइ क कोसिस जिन करा!” 20 आकान जवाब दिहस, “इ फुरइ अहइ! मइँ इस्राएल क यहोवा परमेस्सर क खिलाफ पाप किहेउँ ह। मइँ जउन किहे हउँ उ इ अहइ: 21 “हम लोग यरीहो सहर क ऍकर सबहिं चिजियन क संग आपन कब्जे मँ लीन्ह। ओन चिजियन मँ मइँ सिनार क एक सुन्नर आढ़ना अउर लगभग पाँच पौण्ड चाँदी अउर एक पौण्ड सोना लखा। मोर ऍन चिजियन क अपने बरे धरइ क बहोतइ इच्छा रही। ऍह बरे मइँ ओनका लइ लिहेउँ। तू ओन चिजियन क मोरे तम्बू क खाले जमीन मँ गड़ा भवा पउब्या। चाँदी ओढ़ना क खाले अहइ।” 22 ऍह बरे यहोसू कछू मनइयन क तम्बू मँ पठएस। उ पचे धावत धावत पहोंचेन अउर ओन चिजियन क तम्बू मँ छुपा पाएन। चाँदी ओढ़ना क नीचे रही। 23 उ पचे ओन चिजियन क तम्बू स बाहेर लिआएन। उ पचे ओन चिजियन क यहोसू अउ इस्राएल क सबहिं लोगन क लगे लइ गएन। उ पचे ओका यहोवा क समन्वा जमीने पइ लिआइके पटक दिहेन। 24 तब यहोसू अउर सबहिं लोग जेरह क पूत आकान क घाटी मँ लइ गएन। उ पचे चाँदी, ओढ़ना, सोना, आकान क बिटियन-बेटवन, ओकर गोरुअन, ओकर गदहन, भेड़िन, तम्बू अउर सबहिं चिजियन क भी लिहन। ऍन सबहिं चिजियन क उ पचे आकान क संग आकोर क घाटी मँ लइ गएन। 25 तब यहोसू कहेस, “तू हमरे बरे इ सबइ मुसीबतन काहे किह्या? अब यहोवा तोह पइ मुसीबत लिआइ।” तब सबहिं लोगन आकान अउर ओकर परिवार पइ तब तलक पाथर लोकाएन जब तलक उ पचे मरि नाहीं गएन। उ पचे ओकरे परिवार क मार डाएन। तब मनइयन ओनका अउ ओकर सबहिं चिजियन क बारि दिहेन। 26 आकान क बारि देइ क पाछे ओकरे तने पइ उ पचे कईउ सिलन क धरेन। इ सबइ सिलन आजु भी हुआँ अहइँ। इ तरह यहोवा आकान पइ विपद ढाएस। इहइ कारण अहइ कि ठउर ओकोर घाटी कही जात ह। ऍकरे पाछे, यहोवा लोगन स नाखुस नाहीं रहा।

8:1 तब यहोवा यहोसू स कहेस, “डेराअ जिन। हिम्मत न छोड़ा आपन सबहिं सिपाहियन क ऐ लइ जा। मइँ ऐ क राजा क हरावइ मँ तोहार मदद करब। मइँ ओकर नागरिक क, ओकरे सहर क अउर ओकर भुइँया क तोहका दइ देत अहँउ। 2 तू ऐ अउर ओकरे राजा क संग उहइ करब्या, जउन तू यरीहो अउ ओकरे राजा क संग किह्या ह। इ दाईर् तू सिरिफ इ सहर क सारी सम्पत्ति अउ पसु-धन लेब्या अउर आपन लगे धरब्या अउर आपन लगे धरब्या। फुन तू आपन लोगन क बीच मँ ओकर बँटवारा करब्या। अब तू आपन कछू सिपाहियन क सहर क पाछे छुपइ क हुवुम देब्या।” 3 ऍह बरे यहोसू आपन पूरी फउज ऐ कइँती लइ गवा। तब यहोसू तीस हजार ताकतवर लराकन आपन फउज मँ स चुनेस। उ ऍनका राति क बाहेर पठइ दिहस। 4 यहोसू ओनका इ हुवुम दिहस: “मइँ जउन कहत हउँ, ओका होसियारी स सुना। तू पचन्क सहर क पाछे क धेत्र मँ छुपा रहइ चाही। हमला क समइ क बाट जोहा। सहर स बहोत दूर जिन जा। होसियारी स लखत रहा अउ तइयार रहा। 5 मइँ फउजियन क आपन संग सहर कइँती हमला बरे लइ जाबउँ। हम लोगन क खिलाफ लड़इ बरे सहर क लोग बाहेर अइहीं। हम लोग मुड़ि जाब अउर पहिले क तरह पराइ जाब। 6 उ पचे हम लोगन क तब तलक पाछा करिहीं जब तलक हम लोग ओनका सहर स दूर न लइ जाब। काहेकि उ पचे इ आपन आप मँ सोचिहीं कि उ पचे हम पचन स पहिले क तरह परात अही। ऍह बरे हम लोग ओन लोगन स पराइ जाब। 7 तब तू पचे आपन लुकाइ क जगहिया स अउब्या अउ सहर पइ कब्जा कइ लेब्या। तोहार परमेस्सर यहोवा तू पचन्क जीत जाइ क सक्ती देइ। 8 “ऍह बरे तू पचे जब सहर पइ कब्जा कइ लया तब ओका बारि द्या। जइसा कि यहोवा तू पचे स कहेस ह। लखा मइँ तू पचन्क इ करइ क हुवुम देत अहउँ।” 9 तब यहोसू ओन सिपाहियन क ओनके लुकाइ क जगहिया पइ पठइ दिहेस अउ जोहइ लाग। उ पचे बेतेल अउर ऐ क बीच क जगह गएन। इ जगह ऐ क पच्छिम मँ रही। मुला यहोसू आपन लोगन क संग रात भइ हुअँई रुका रहा। 10 अगले भिन्सारे यहोसू लोगन क बटोरेस। तब यहोसू अउर इस्राएल क बुजुर्गन सिपाहियन क ऐ लइ गएन। 11 यहोसू क सबहिं सिपाहियन ऐ पइ हमला किहन। उ पचे सहर क दुआर क समन्वा रुकेन। फउज आपन डेरा सहर क उलर दिसा मँ डाएस। फउज अउर ऐ क बीच मँ एक ठु घाटी रही। 12 यहोसू लगभग पाँच हजार फउजियन क चुनेस। यहोसू ऍनका सहर क पच्छिम मँ छिपइ बरे उ जगह पठएस, जउन बेतेल अउर ऐ क बीच मँ रही। 13 मुख्य डेरा सहर क उत्तर दिसा मँ रहा। दूसर सिपाहियन पच्छिम मँ लुकान रहेन। उ रात यहोसू घाटी मँ बिताएस। 14 पाछे, ऐ क राजा इस्राएल क फउज क लखेस। राजा अउर ओकर लोग लखेन अउ हाली स इस्राएल क फउज स लड़इ बरे अगवा बढ़ेन। ऐ क राजा सहर क पूरब यरदन घाटी कइँती बाहेर गवा। ऍह बरे उ इ न जान सका कि सहर क पाछे फउजी लुकान रहेन। 15 यहोसू अउ इस्राएल क सबहिं सिपाहियन ऐ क फउज क जरिये आपन क पाछे ढकेलइ दिहन। यहोसू अउ ओकरे फउजियन पूरब मँ रेगिस्तान कइँती धाउब सूरु किहन। 16 सहर क लोग सोर मचाइ अउर यहोसू क खदेरइ सुरु किहन। अउर ओकरे सिपाहियन सहर तजइ सुरु किहन। 17 ऐ अउर बेतेल क सबहिं लोग इस्राएल क फउज क पाछा फिहन। सहर खुला छोड़ दीन्ह गवा रहा, कउनो भी सहर क रच्छा बरे नाहीं रहा। 18 यहोवा यहोसू स कहेस, “आपन भाला क ऐ सहर कइँती किए रहा। मइँ इ सहर तोहका देबउँ।” ऍह बरे यहोसू आपन भाला क ऐ सहर कइँती किहस। 19 इस्राएल क लुकान फउजियन ऍका लखेन। उ पचे हाली स आपन लुकाइ क जगहियन स निकरेन अउर सहर कइँती तेजी स चल पड़ेन। उ पचे सहर मँ घुस गएन अउर ओह पइ कब्जा कइ लिहन। तब फउजियन सहर क बारइ बरे आगी लगाउब सुरु किहन। 20 ऐ क लोग मुड़िके लखेन अउ आपन सहर क जरत पाएन। उ पचे धुआँ अकासे मँ उठत निहारेन। ऍह बरे उ पचे आपन ताकत अउ हिम्मत खोइ दिहन। उ पचे इस्राएल क लोगन क पाछा करब छोड़ेन। इस्राएल क लोगन पराब बन्द किहन। उ पचे मुड़ि गएन अउ ऐ क लोगन स लड़इ चल पड़ेन। ऐ क लोगन बरे पराइ क कउनो सुरच्छित जगह नाहीं रही। 21 यहोसू अउ ओकर फउजियन लखेन कि ओकर फउज सहर पइ कब्जा कइ लिहस। उ पचे सहर स धुआँ भी उठत निहारेन। इ तब उ पचे पराब बन्द किहन अउर ऐ क लोगन स जुद्ध करइ सुरु किहन। 22 तब उ सबइ फउजियन जउन लुकान रहेन, जुद्ध मँ मदद बरे सहर स बाहेर निकरि आएन। ऐ क फउजियन क दुइनउँ कइँती इस्राएल क फउजी रहेन, ऐ क फउजी जाल मँ फँस ग रहेन। इस्राएल ओनका हराइ दिहस। उ पचे तब तलक लड़त रहेन जब तलक ऐ क कउनो भी मनसेधू जिअत न रहा, ओनमाँ स कउनो पराइ नाहीं सका। 23 मुला ऐ क राजा जिअत छोड़ दीन्ह गवा। यहोसू क फउजी ओका ओकरे लगे लिआएन। 24 जुद्ध क समइ, इस्राएल क फउज ऐ क फउजियन क मइदानन अउर रेगिस्ताने मँ ढकेल दिहन अउर इ तरह इस्राएल क फउज ऐ स सबहिं फउजियन क मारइ क काम मइदानन अउर रेगिस्ताने मँ पूरा किहस। तब इस्राएल क सबहिं फउजी ऐ क लउटेन। तब उ पचे ओन लोगन क जउन सहर मँ जिअत रहेन, मारि डाएन। 25 उ दिन ऐ क सबहिं लोग मारा गएन। हुआँ बारह हजार मनसेधू अउ मेहरारु रहेन। 26 यहोसू आपन भाला क, ऐ कइँती आपन लोगन क सहर बरबाद करइ क संकेत क बनाए राखेस अउर यहोसू संकेत देब तब तलक बन्द नाहीं किहस जब तलक सहर क पुरी आबादी बरबाद नाहीं होइ गएन। 27 इस्राएल लोग गोरुअन अउ सहर क चीजन्क अपने लगे धरेन। इ उहइ बात रही कि जेका करइ क यहोवा यहोसू क हुवुम देत समइ, कहे रहा। 28 तब यहोसू ऐ सहर क बार दिहस। उ सहर सूनी चट्टानन क ढेर बन गवा। इ आजु भी वइसा ही अहइ। 29 यहोसू ऐ क राजा क एक बृच्छ पइ फाँसी दइके टाँग दिहस। उ ओका साँझ तलक बृच्छ पइ टँगा रहइ दिहस। सूरज डूबे पइ यहोसू राजा क ल्हास क बृच्छ स उतारइ क हुवुम दिहस। उ पचे ओका सरीर क सहर क दुआर पइ लोकाइ दिहन अउर इका सिलन स ढाँकि दिहन। सिलन क उ ढेर आजु तलक हुअँइ अहइ। 30 तब यहोसू इस्राएल क परमेस्सर यहोवा बरे एक वेदी बनाएस। उ इ वेदी एबाल पर्वत पइ बनाएस। 31 यहोवा क सेवक मूसा इस्राएल क लोगन क बताए रहा कि वेदियन कइसे बनई जाइँ। ऍह बरे यहोसू वेदी क वइसे ही बनाएस जइसे मूसा क व्यवस्था क किताबे मँ समुझावा ग रहा। वेदी बगैर कटे भए पाथरन स बनी रही। ओन पाथरन पइ कबहुँ कउनो औजारे क उपयोग नाहीं भवा रहा। उ पचे उ वेदी पइ यहोवा क होमबलि अउ मेलबलि चढ़ाएन। 32 उ ठउर पइ यहोसू मूसा क व्यसस्था क एक नकल क पाथरन पइ लिखेस। उ इ इस्राएल क सबहिं लोगन क लखइ बरे किहस। 33 सबइ अगुआ नेता लोग, अफसरन, निआव क अफसरन अउ इस्राएल क सबहिं लोग पवित्तर सन्दूखे क चारिहुँ कइँती खड़ा रहेन। उ पचे ओन लेवी कबीला क याजकन क समन्वा खड़ा रहेन, जउन यहोवा क करार क पवित्तर सन्दूखे क लइ चलत रहेन। इस्राएली अउर बिदेसी प्रवासियन सबहिं लोग हुआँ खड़ा रहेन। आधा लोग एबाल पर्वत क समन्वा खड़ा रहेन अउर दूसर आधा लोग गिरिज्जीम पर्वत क समन्वा खड़ा रहेन। यहोवा क सेवक मूसा ओनसे अइसा करइ क कहेस रहा। मूसा ओनसे अइसा करइ क इ आसीर्बाद बरे कहे रहा। 34 तब यहोसू व्यवस्था क सब वचनन क बाँचेस। यहोसू आसीर्बाद अउ अभिसाप बँचेस। उ सबहिं कछू उ तरह बाँचेस, जउने तरह उ व्यवस्था क किताबे मँ लिखा रहा। 35 इस्राएल क सबहिं लोग हुआँ बटुरा रहेन। सबहिं मेहररुअन, गदेलन अउ इस्राएल क लोगन क संग रहइवाला सबहिं विदेसियन हुआँ बटुरा रहेन अउ यहोसू मूसा क जरिये दीन्ह गएन हर एक आदेस क बाँचेस।

9:1 यरदन नदी क पच्छिम क सब राजा लोग इ सबइ घटना क बारे मँ सुनेन। इ सबइ हित्ती, एमोरी, कनानी, परिज्जी, हिव्वी, यबूसी लोगन क राजा लोग रहेन। उ पचे पहाड़ी भुइँयन अउर मइदानन मँ रहत रहेन। उ पचे लबानोन तलक भूमध्य सागर क किनारन क लगे भी रहत रहेन। 2 उ पचे सबहिं राजा लोग बटुरेन। उ पचे यहोसू अउ इस्राएल क लोगन क संग जुद्ध क योजना बनाएन। 3 गिबोन क लोग उ तरीका क बारे मँ सुनेन, जेहसे यहोसू यरीहो अउ ऐ क हराए रहा। 4 ऍह बरे उ पचे इस्राएल क लोगन क धोखा देइ क ठान लिहन। ओनकर इ योजना रही: उ पचे चाम क पुराना बोरियन क आपन गोरुअन पइ लादेस। उ पचे आपन गोरुअन क ऊपर दाखरस क चाम क पुराना मसक क भी डाएन, जेहसे उ पचे अइसा देखाँइ पड़इँ मान ल्या कि उ पचे बहोतइ दूरी क जात्रा कइके आवा अहइँ। 5 मनइयन पुरान पनहियन पहिर लिहन। उ पचे पुरान ओढ़ना भी पहिर लिहेन। उ मनइयन कछू बासी, रुखी, खराब रोटियन भी लइ लिहन। इ तरह उ सबइ मनसेधुअन अइसा लगत रहेन मान ल्या उ पचे बहोतइ दूरी क देस स जात्र किहे होइँ। 6 तब इ सबइ मनसेधुअन इस्राएल क लोगन क डेरन क लगे गएन। इ डेरा गिलगाल क लगे रहा।उ सबइ मनसेधुअन यहोसू क लगे गएन अउर उ पचे ओसे कहेन, “हम लोग एक बहोतइ दूर क देस स आवा अही। हम लोग तोहरे संग सान्ति क सन्धि करइ चाहित ह।” 7 इस्राएल क लोग इ हिव्वी लोगन स कहेन, “होइ सकत ह तू लोग हम पचन्क धोखा दइ देत ह्वा। होइ सकत ह तू हमरे निचके क रहइवाला ह्वा। हम तब तलक सान्ति क संधि नाहीं कइ सकित जब तलक हम इ नाहीं जान लेइत कि तू पचे कहाँ स आवा अहा।” 8 हिव्वी लोग यहोसू स कहेन, “हम पचे आप क सेवक अही।”मुला यहोसू पूछेस, “तू पचे कउन अहा? तू पचे कहाँ स आवा अहा?” 9 मनसेधुअन जवाब दिहन, “हम लोग आप क सेवक अही। हम पचे एक बहोलइ दूरी क देस स आवा अही। हम ऍह बरे आर कि हम पचे तोहरे परमेस्सर यहोवा क महान सक्ती क बारे मँ सुना ह। हम लोग उ भी सुने अही, जउन उ किहस। हम लोग उ सब कछू सुना ह, जउन उ मिस्र मँ किहस। 10 अउर हम लोग इ भी सुना कि उ यरदन नदी क पूरब दुइ ठु एमोरी लोगन क राजा लोगन क हराएस। हेस्बोन क राजा सीहोन अउर असतारोत क देस मँ बासान क राजा ओग रहेन। 11 ऍह बरे हमरे अगुआ अउर हमरे लोग हमसे कहेन, ‘आपन जात्रा बरे जियादा भोजन लइ ल्या। जा अउ इस्राएल क लोगन स बात करा। ओनसे कहा, “हम आप क सेवक अही। हम लोगन क संग सान्ति क सन्धि करा।”‘ 12 “हमरी रोटियन क लखा। जब हम लोग घर छोड़ा तब इ सबइ गर्मागरम अउ ताजी रहिन। मुला अब आप लखत हीं कि इ सबइ झुरान अउ बासी अहइँ। 13 हम लोगन क दाखरस क मसकन क निहारा। जब हम लोग घर तजा तउ इ सबइ नई अउ दाखरस स भरी रहिन। आप लखि सकत हीं कि इ सबइ फाट अउ फुरान अहइँ। हमार ओढ़नन अउ चप्पलन क लखा। आप लखि सकत हीं कि लम्बी जात्रा हमरी चिजियन क खराब कइ दिहे अहइ।” 14 इस्राएल क लोग जाना चाहत रहेन कि इ सबइ मनई का फुरइ बोलत अहइँ। ऍह बरे उ पचे रोटियन क चखेन, मुला उ पचे यहोवा स नाहीं पूछेन कि ओनका क करइ चाही। 15 यहोसू ओनके संग सान्ति-सन्धि करइ बरे तइयार होइ गवा। उ ओनका जिअत छोड़इ बरे तइयार होइ गवा। इस्राएल क प्रमुखन यहोसू क वचन क समर्थन कइ दिहन। 16 तीन दिना पाछे, इस्राएल क लोगन क पता चला कि उ सबइ लोग ओनके डेरा क बहोत निचके रहत हीं। 17 ऍह बरे इस्राएल क लोग हुआँ गएन, जहाँ उ सबइ लोग रहत रहेन। तीसरे दिन, इस्राएल क लोग गिबोन, कपीरा, बेरोत अउर किर्यत्यारीम सहरन क आएन। 18 मुला इस्राएल क फउज इ सहरन क खिलाफ लड़इ क जतन नाहीं किहस। उ पचे ओन लोगन क संग सान्ति संधि कइ चुका रहेन। उ पचे ओन लोगन क संग इस्राएल क परमेस्सर यहोवा क समन्वा प्रण किहे रहेन।सबहिं लोग ओन प्रमुखन क खिलाफ सिकाइत करत रहेन, जउन सन्धि किहे रहेन। 19 मुला प्रमुख लोगन जवाब दिहन, “हम पचे प्रण किहे अही। हम लोग इस्राएल क परमेस्सर यहोवा क समन्वा प्रण किहे अही। हम ओनके खिलाफ अब लड़ नाहीं सकित। 20 हम लोगन क सिरिफ ऍतना ही करइ चाही। हम ओनका जरुर जिअत रहइ देब। हम ओनका चोट नाहीं पहोंचाइ सकित काहेकि ओनके संग कीन्ह गवा प्रण क तोड़ देइ पइ यहोवा क किरोध हम लोगन क खिलाफ होइ। 21 ऍह बरे ऍनका जिअत रहइ द्या। इ सबइ हमार सेवक होइहीं। उ पचे हमरे बरे लकड़ी कटिहीं अउर हमरे मनइयन बरे पानी ढोइहीं।” इ तरह प्रमुखन इ सबइ लोगन क संग कीन्ह गइ आपन सान्ति-सन्धि क नाहीं तोड़ेन। 22 यहोसू गिबोनी लोगन क बोलाएस। उ कहेस, “तू लोग हम स झूठ काहे बोल्या? तोहार भुइँया हम लोगन क डेरा क लगे रहा। मुला तू लोग कह्या कि हम लोग बहोत दूरी क देस क अही। 23 अब तोहरे लोगन क बहोत कस्ट होइ। तोहार सबहिं लोग दास होइहीं। ओनका परमेस्सर क निवासबरे लकड़ी काटब अउर पानी भरइ क पड़ी।” 24 गिबोनी लोग जवाब दिहन, “हम लोग आप स झूठ बोले काहेकि हम लोगन क डर रहा कि आप कहूँ हम लोगन क मारि न डावइँ। हम लोग सुना ह कि परमेस्सर आपन सेवक मूसा क इ आदेस दिहे रहा कि उ पचे तोहका इ सारा भुइँया दइ देइँ अउर परमेस्सर तोहसे उ भुइँया मँ रहइवालन सबहिं लोगन क मारि डावइ बरे कहेस। इहइ कारण अहइ कि हम लोग आप स झूठ बोले। 25 अब हम आप क सेवक अही। आप हमार उपयोग जइसा ठीक समुझइँ, कइ सकत हीं।” 26 इ तरह गिबोन क लोग दास होइ गएन। मुला यहोसू ओनकर जिन्नगी बचाएस। यहोसू इस्राएल क लोगन क ओनका मारइ नाहीं दिहस। 27 यहोसू गिबोन क लोगन क इस्राएल क लोगन क दास बनइ दिहस। उ पचे इस्राएल क लोगन अउ यहोवा क चुने भए जउनो भी ठउर क वेदी बरे लकड़ी काटत अउ पानी भरत रहेन। उ सबइ लोग अब तलक दास अहइँ।

10:1 इ समइ अदोनीसेदेक यरूसलेम क राजा रहा। इ राजा सुनेस कि यहोसू ऐ क जीतेस ह अउर एका पूरी तरह बरबाद कइ दिहस ह। राजा क इ पता लाग कि यहोसू यरीहो अउ ओकरे राजा क संग भी इहइ किहस ह। राजा क इ भी जानकारी मिली कि गिबोनी लोग इस्राएल क संग सान्ति-सन्धि कइ लिहस ह अउर उ सबइ लोग यरूसलेम क बहोत निचके रहत रहेन। 2 ऍह बरे अदोनीसेदेक अउ ओकर लोग इ सबइ घटना क कारण बहोत डेरान रहेन। गिबोन ऐ क तरह नान्ह सहर नाहीं रहा। गिबोन एक ठु बहोत बड़ा सहररहा जेहमाँ राजा रहे रहा। अउर सहर क सबहिं मनसेधू अच्छा जोधा रहेन। 3 यरूसलेम क राजा अदोनीसेदेक हेब्रोन क राजा होहाम स बातन किहेस। उ यर्मूत क राजा पिराम, लाकीस क राजा यापी, एगलोन क राजा दबीर स भी बातचीत किहस। यरूसलेम क राजा इ मनइयन स पराथना किहस, 4 “मोरे संग आवइँ अउर गिबोन प हमला करइ मँ मोर मदद करइँ। गिबोन यहोसू अउ इस्राएल क लोगन क संग सान्ति-सन्धि कइ लिहस ह।” 5 इ तरह पाँच एमोरी राजा लोग फउजन क मिलाएन। (इ सबइ पाँचउ यरूसलेम क राजा, हेब्रोन क राजा, यमूर्त क राजा, लाकीस क राजा, अउर एग्लोन क राजा रहेन।) उ सबइ फउजन गिबोन गइन। फउजन सहर क घेरि लिहन अउ एकरे खिलाफ जुद्ध करब सुरु किहन। 6 गिबोन सहर मँ बसइयन मनइयन गिलगाल क डेरा मँ यहोसू क खबर भेजेन: “हम पचे तोहर सेवक अही। हम लोगन क अकेल्ले मँ जिन तजा। आवा अउर हमार रच्छा करा। हाली करा। हम पचन्क बचावा। पहाड़ी देसन क सबहिं एमोरी राजा आपन आपन फउजन क एकउट कइ चुका बाटेन अउर हम पचन पइ हमला किहेस।” 7 ऍह बरे यहोसू गिलगाल स आपन पूरी फउज क संग जुद्ध बरे चला। यहोसू क उत्तिम जोधा ओकरे संग रहेन। 8 यहोवा यहोसू स कहेस, “ओन फउजन स जिन डेराअ। मइँ तू पचन क ओनका हरावइ देब। ओन फउजन मँ स कउनो भी तू पचन क हरावइ मँ समर्थ नाहीं होइ।” 9 यहोसू अउ ओकर फउज रात भइ गिबोन कइँती बढ़त रही। दुस्मन क पता नाहीं रहा कि यहोसू आवत अहइ। ऍह बरे जब उ हमला किहस तउ उ पचे चौंक पड़ेन। 10 यहोवा ओन फउजन क इस्राएल क फउजन क जरिये हमाला क समइ का करइ या न करइ चाही सोच मँ डाइ दिहस। यह बरे इस्राएलियन ओनका हराइके बहोत बड़ी जीत पाइ लिहन। इस्राएलियन पाछा कइके ओनका गिबोन स खदेर दिहन। उ पचे बेथोरोन तलक जाइवाली सड़क तलक ओनकर खदेर दिहन। इस्राएल क फउज अजेका अउ मक्केदा तलक क समूचइ राहे मँ मनसेधुअन क मारेस। 11 इस्राएल क फउज बेथ-हरोन क जाइवाली सड़क तलक दुस्मनन क खदेर दिहस। जबहिं उ पचे दुस्मनन क खदेरत रहेन तउ यहोवा भारी ओला क बर्खा अजेका तलक अकासे स किहस। बहोत स दुस्मन ऍन भारी ओला क बर्खा स मरि गएन। इ सबइ ओला स ओहसे जियादा दुस्मन मारा गएन जेतना इस्रलियन क तरवारन स मरि ग रहेन। 12 उ दिना यहोवा इस्राएलियन क जरिये एमोरी लोगन हार जाइ दिहन अउ उ दिन यहोसू इस्राएल क सबहिं क समन्वा खड़ा भवा अउ उ यहोवा स कहेस:“हे सूरज, गिबोन क अकासे मँ खड़ा रहा अउ हट्या जिन। हे चन्द्र, तू अय्यालोन क घाटी क ऊपर अकासे मँ ठाड़ रहा अउ जिन हटा।” 13 सूरज स्थिर होइ गवा अउ चन्दा भी तबहिं तलक चलब तजि दिहस जब तलक मनइयन आपन दुस्मनन क हराइ नाहीं दिहन। इ फूरे भवा, इ कथा यासार क किताबे मँ लिखी अहइ। सूरज असमान क बीच रुका। इ पूरा दिन हुआँ स नाहीं हटा। 14 अइसा उ दिन क पहिले कउनो भी समइ कबहुँ नाहीं भवा रहा अउर तब स अब तलक कबहुँ नाहीं भवा बाटइ। उहर दिन रहा, जब यहोवा मनई क बिनती सुनेस। असल मँ यहोवा इस्राएलियन बरे जुद्ध करत रहा। 15 एकरे पाछे, यहोवा अउ ओकर फउज गिलगाल क डेरा मँ वापस भइ। 16 जुद्ध क समइ पाँचहु राजा पराइ गएन। उ पचे मक्केदा क निअरे गुफा मँ लुकाइ गएन। 17 मुला कछु मनइयन ओनका गुफा मँ लुका भवा पाएस। यहोसू क एकरे बारे मँ पता चला। 18 ऍह बरे उ कहेस, “गुफा क जाइवाला दुआरे क बड़वार सिलन स ढाँपि द्या। कछू मनसेधुअन क गुफा क रखवारी बरे हुआँ रखा। 19 मुला हुआँ खुद न रहा। दुस्मन क पाछा करत रहा। ओन पइ पाछे स हमला करत रहा। दुस्मनन क आपन सहर तलक सुरच्छित जिन पहोंचइ द्या काहेकि तोहार परमेस्सर यहोवा तू पचन्क ओन पइ विजय दिहेस ह।” 20 इ तरह यहोसू अउ इस्राएल क मनइयन दुस्मनन क मर डाएन। मुला दुस्मनन मँ स कछू आपन सहरन मँ जाइ सकेन अउ लुकाइ गएन। उ सबइ मनइयन नाहीं मारा गएन। 21 जुद्ध क पाछे, यहोसू क फउजी मक्केदा मँ ओनके लगे आएन। उ प्रदेस मँ कउनो मँ कउनो भी जाति क लोगन मँ स कउनो भी ऍतना हिम्मती नाहीं रहा कि उ लोगन क खिलाफ कछू कहि सकइ। 22 यहोसू कहेस, “गुफा क दुआर क रोकइवाली सिलन क हटावा। ओन पाँचउ राजा लोगन क मोरे लगे लिआवा।” 23 ऍह बरे यहोसू क लोग पाँचउ राजा लोगन क गुफा स बाहेर लिआएन। इ सबइ पाँचउ यरूसलेम, हेब्रोन, यमूर्त, लाकीस अउ एग्लोन क राजा लोग रहेन। 24 ऍह बरे उ सबइ ओन पाँचउ राजा लोगन क यहोसू क लगे लिआएन। यहोसू आपन सबहिं लोगन क हुआँ आवइ बरे कहेस। यहोसू फउज क अफसरन स कहेस, “हिआँ आवा। ऍन राजा लोगन क गले पइ आपन गोड़ धरा।” ऍह बरे यहोसू क फउज क अफसर लोग निचके आएन। उ पचे राजा लोगन क गले पइ आपन गोड़ धरेन। 25 तब यहोसू आपन फउजियन स कहेस, “मजबूत अउ हिम्मती बना। डेराअ जिन। मइँ देखाउब कि यहोवा ओन दुस्मनन क संग का करी, जेनसे तू पचे भविस्स मँ जुद्ध करब्या।” 26 तब यहोसू पाँचउ राजा लोगन क मार डाएस। उ ओनकर ल्हास पाँच ठु बृच्छन पइ लटकाइ दिहस। यहोसू ओनका सूरज बूड़इ तलक हुअँइ लटकत छोड़े रखा। 27 सूरज बूड़े पइ यहोसू आपन लोगन स ल्हासन क बृच्छन स उतारइ क कहेस। तब उ पचे ओन ल्हासन क उ गुफा मँ बहाइ दिहस, जेहमाँ उ पचे लुकान रहेन। उ पचे गुफा क दुआर क बड़वार पाथर क सिलन स ढाँकि दिहन, जउन आजु तलक हुअँइ अहइँ। 28 उ दिन यहोसू मक्केदा क हराएस। यहोसू राजा अउ उ सहर क लोगन क मार डाएस। हुआँ कउनो मनई जिअत नाहीं छोड़ा गवा। यहोसू मक्केदा क राजा क संग उहइ किहस जउन उ यरीहो क राजा क संग किहे रहा। 29 तब यहोसू ऊउ इस्राएल क सबहिं लोग मक्केदा स जात्रा किहन। उ पचे लिब्ना गएन अउर उ सहर पइ हमला किहन। 30 यहोवा इस्राएल क लोगन क उ सहर अउ ओकरे राजा क हार जाइ दिहस। इस्राएल क लोग उ सहर क हर मनई क मार डाएन। कउनो मनई जिअत नाहीं छोड़ा गवा। यहोसू लिब्नाह क राजा क संग उहइ किहेस जइसा उ पचे यरीहो क राजा क संग किहे रहेन। 31 तब यहोसू अउ इस्राएल क सबहिं लोग लिब्ना क तजि दिहन अउर उ पचे लाकीस तलक क जात्रा किहन। यहोसू अउ ओकर फउज लिब्ना क चारिहुँ कइँती डेरा डाएस अउर तब उ पचे सहर पइ हमला किहन। 32 यहोवा इस्राएल क मनइयन क जरीये लाकीस सहर क हार जाइ दिहस। दुसरे दिना उ पचे सहर क हराएन। इस्राएल क मनइयन इ सहर क हर एक मनई क मार डाएन। इ वइस ही रहा जइसा उ लिब्ना मँ किहे रहा। 33 इहइ समइ गेजेर क राजा होरोम लाकीस क मदद करइ आवा। मुला यहोसू ओका अउ ओकरी फउज क भी हराएस। कउनो मनई जिअत नाहीं छोड़ा गवा। 34 तब यहोसू अठर इस्राएल क सबहिं लोग लाकीस स एग्लोन गएन। उ पचे एग्लोन क चारिहुँ कइँती डेरा डाएन अउर ओह पइ हमला किहन। 35 उहइ दिन उ पचे सहर पइ कब्जा किहन अउर सहर क सबहिं लोगन क मार डाएन। इ वइसा ही किहन जइसा उ पचे लाकीस मँ किहे रहेन। उ पचे सहर क बरबाद किहन अउ ओकरे सबहिं मनइयन क मार डाएन। 36 तब यहोसू अउ इस्राएल क सबहिं लोग एग्लोन स हेब्रोन क जात्रा किहन। उ पचे हेब्रोन पइ हमला किहन। 37 उ पचे सहर अउ हेब्रोन क निअरे क सबहिं नान्ह कस्बन पइ कब्जा कइ लिहन। इस्राएल क लोग सहर क हर एक मनई क मार डाएन। हुआँ कउनो भी जिअत नाहीं छोड़ा गवा। इ वइसा ही रहा जइसा उ पचे एग्लोन मँ किहे रहेन। उ पचे सहर क बरबाद किहन अउ ओकर सबहिं मनइयन क मार डाएन। 38 तब यहोसू अउ इस्राएल क सबहिं लोग दबीर क गएन अउर उ सहर पइ हमला किहन। 39 उ पचे उ सहर, ओकर राजा अउ दबीर क निअरे क सबहिं कस्बन क जीत लिहन। उ पचे उ सहर क सबहिं लोगन क मार डाएन। हुआँ कउनो जिअत नाहीं छोड़ा गवा। इस्राएल का मनइयन दबीर अउ ओकरे राजा क संग उहइ किहन जउन उ पचे हेब्रोन अउ ओकरे राजा क संग किहे रहेन। इ वइसा ही रहा जइसा उ पचे लिब्ना अउ ओकरे राजा क संग किहे रहेन। 40 इ तरह यहोसू पहाड़ी देस नेगेव पच्छिमी अउ पूवीर् पहाड़ियन क तराई क सहरन क राजा लोगन क हराएन। इस्राएल क परमेस्सर यहोवा यहोसू स सबहिं लोगन क मारि डावइ क हुवुम दिहे रहा। ऍह बरे यहोसू ओन जगहियन पइ कउनो क जिअत नाहीं छोड़ेस। 41 यहोसू कादेसबनेर् स अज्जा तलक क सबहिं सहरन पइ कब्जा कइ लिहस। उ गोसेन क भुइँया स लइके गिबोन तलक क सबहिं सहरन पइ कब्जा कइ लिहस। 42 यहोसू एक अभियान मँ ओन सहरन अउ ओनके राजा लोगन क जीत लिहस। यहोसू इ ऍह बरे किहस कि इस्राएल क परमेस्सर यहोवा इस्राएल बरे लड़त रहा। 43 तब यहोसू अउ इस्राएल क सबहिं लोग गिलगाल क आपन डेरा मँ लउटि आएन।

11:1 हासेर क राजा, याबीन जउन कछू भवा ओकरे बारे मँ सुनेस। ऍह बरे उ कइउ राजा लोगन क फउजन क एक संग बोलावइ क निर्णय लिहस। याबीन मादोन क राजा योबाब, सिम्रोन क राजा, अच्छाप क राजा अउर 2 उत्तर क पहाड़ी देस क अउ रेगिस्ताने क सबहिं सासकन लोगन क लगे संदेसा पठएस। याबीन किन्नेरेत क दक्खिन क राजा लोगन, नेगेव अउ पच्छिम निची पहाड़ियन क राजा लोगन क आपन सँदेसा पठएस। उ पच्छिम मँ नफोथ दारे क राजा क भी सँदेसा पठएस। 3 याबीन पूरब अउ पच्छिम क कनानी लोगन क राजा लोगन क लगे सँदेसा पठएस। उ पहाड़ी प्रदेसन मँ बसइयन एमोरी, हित्तियन, परिज्जयन अउ यबूसियन क लगे सँदेसा पठएस। उ मिस्पा पहँटा क हेमोर्न पहाड़ क नीचे बसइयन हिव्वी लोगन क भी सँदेसा पठएस। 4 ऍह बरे ऍन सबहिं राजा लोगन क फउजन एक संग आइन। हुआँ अनेक जोधा, घोड़न अउ रथ रहेन। उ बहोत बड़वार फउज रही, उ अइसी देखाइ पड़त रही, मान ल्या ओहमाँ ऍतना फउजी रहेन जेतना समुद्दर क किनारे बालू क कण। 5 इ सबइ राजा छोटकी नदी मेरोम क निअरे बदुर गएन। उ पचे आपन फउजन क एक डेरा मँ बटोरेन। उ पचे इस्राएल क खिलाफ जुद्ध करइ क योजना बनाएन। 6 तब यहोवा यहोसू स कहेस, “उ फउज स जिन डेराअ। भियान इहइ समइ, मइँ तू पचन्क ओनका हरावइ देब। तू पचे ओन सबहिं क मार डउब्या। तू पचे ओनकइ घोड़न क लगड़ा लूला करइ देब्या। अउ ओनकर सबहिं रथन क बार डउब्या।” 7 यहोसू अउ ओकर पूरी फउज एकाएक हमला कइके ओनका चौंकाइ दिहस। उ पचे मेरोम नदी पइ दुस्मनन पइ हमला किहन। 8 यहोवा इस्राएलियन क ओनका हरावइ दिहस। इस्राएल क फउज ओनका हराएस अउर ओनकर पूरब मँ वृहत्तर सीदोन, मिस्रपोत-मैम अउ मिस्पा क घाटी तलक पाछा किहस। इस्राएल क फउज ओनसे तब तलक जुद्ध करत रही जब तलक दुस्मनन मँ स कउनो भी मनई जिअत न बचा। 9 यहोसू उहइ किहस जउन यहोवा कहे रहा कि उ करी यानी यहोसू ओनकइ घोड़न क टँगियन काटेस अउ ओनकर रयन क बारेस। 10 तब यहोसू लउटा अउ हासोर सहर पइ कब्जा किहस। यहोसू हासोर क राजा क मार डाएस। (हासोर ओन सबहिं राज्यन मँ प्रमुख रहा जउन इस्राएल क खिलाफ लड़ा रहेन।) 11 इस्राएल क फउज उ सहर क हर एक क मार डाएस। उ पचे सब लोगन क पूरी तरह बरबाद कइ दिहन। हुआँ कछू भी जिअत नाहीं रहइ दीन्ह गवा। तब उ पचे सहर क जराइ दिहन। 12 यहोसू इ सबइ सहरन पइ कब्जा किहस। उ ओनके सबहिं राजा लोगन क मार डाएस। यहोसू इ सबइ सहरन क हर एक चीज क पूरी तरह बरबाद कइ दिहस। उ इ यहोवा क सेवक मूसा जइसा हुवुम दिहे रहा वइसा ही किहस। 13 मुला इस्राएल क फउज कउने भी अइसे सहर क नाहीं जराएस जउन पहाड़ी पइ बना रहा। उ पचे पहाड़ी पइ बने सिरिफ एक ठु हासोर सहर क जराएस। इ उ सहर रहा, जेका यहोसू बारेस। 14 इस्राएल क मनइयन उ सबइ चिजियन क आपन लगे धरेन, जउन ओनका उ सहरन मँ स मिलिन। उ पचे ओन जनावरन क अपन लगे धरेन, जउन ओनका सहर मँ मिलेन। मुला उ पचे हुआँ क सबहिं मनइयन क मार डाएन। उ पचे कउनो मनई क जिअत नाहीं छोड़ेन। 15 यहोवा बहोत पहिले आपन सेवक मूसा क इ करइ क हुवुम दिहे रहा। तब मूसा यहोवा क इ करइ क हुवुम दिहे रहा। इ तरह यहोसू यहोवा क आग्या पूरा किहस। 16 काहेकि उ ओन चिजियन मँ स कछु भी नाहीं लिहस जउन का यहोवा लइ क हुवुम नाहीं दिहे रहा। इ तरह यहोसू इ पूरे देस क सबहिं लोगन क हराइ दिहस। पहाड़ी प्रदेस, नेगेव-छेत्र, सारा गोसोन-छेत्र, पच्छिमी निची पहाड़ियन क प्रदेस, यरदन घाटी, इस्राएल क पहाड़ अउ ओनकर निचके क पहाड़ियन पइ ओकर अधिकार होइ गवा रहा। 17 यहोसू क अधिकार सेईर क निअरे हालाक पहाड़े स लइके हेमोर्न पहाड़े क खाले लबानोन क घाटी मँ बालगाद तलक क प्रवेस पइ होइ ग रहा। उ राजा लोगन क गिरफतार कइ क मरि दिहे रहा। 18 यहोसू ओन राजा लोगन स कइउ बरिस लड़ा। 19 उ पूरा देस मँ सिरिफ एक सहर इस्राएल क संग सान्ति-संधि किहेस। उ हिब्बी लोगन क सहर गिबोन रहा। दूसर सबहीं सहर जुद्ध मँ हार गएन। 20 यहोवा चाहत रहा कि उ सबइ लोग सोचइँ कि उ पचे सक्तीसाली रहेन। तब उ पचे इस्राएल क खिलाफ लड़िहीं। इ तरह उ पचे बगैर दाया क ओनका बरबाद कइ सकत रहेन, जउने तरह यहोवा मूसा क करइ क हुवुम दिहे रहा। 21 अनाकी लोग हेब्रोन, दबीर, अनाब अउ यहूदा अउर इस्राएल क छेत्रन क पहाड़ी प्रदेस मँ रहत रहेन। यहोसू इ सबइ अनाकी लोगन क खिलाफ लड़ा। यहोसू इ लोगन अउ इ सबन्क सहरन क पूरी तरह बरबाद कइ दिहस। 22 हुआँ कउनो भी अनाकी मनई इस्राएल मँ जिअत न छोड़ा गवा। जउन अनाकी लोग छोड़ दीन्ह ग रहेन, उ सबइ अज्जा, गत अउर असदोद मँ रहेन। 23 यहोसू पूरा इस्राएल प्रदेस पइ कब्जा कइ लिहस। इ बात क यहोवा मूसा स बहोत पहिले ही कहि दिहस। यहोवा उ इ देस इस्राएल क ऍह बरे देहस काहेकि उ ऍनकइ बरे वचन दिहे रहा। तब यहोसू इस्राएल क परिवार समूहन मँ उ प्रदेस क बाँट दिहस तब जुद्ध बन्द भवा अउ अखिरी रुप मँ सान्ति कायम होइ गइ।

12:1 इस्राएल क लोग यरदन नदी क पूरब क भुइँया पइ कब्जा कइ लिहन। ओनकइ अधिकार मँ अब अनोर्र्न क संकरी घाटी स हेमोर्न पहाड़े तलक क भुइँया अउ यरदन घाटी क पूरब क सारा प्रदेस रहा। इ देस क लेइ बरे इस्राएल क लोग जउन राजा लोग क हराएन ओनकइ इ सूची अहइ: 2 हेसबोन सहर मँ बसइयन एमोरी लोगन क राजा सीहोन अनोर्न क सँकरी घाटी पइ अरोएर स लइके यब्बोक नदी तलक क प्रदेस पइ सासन करत रहा। ओकर प्रदेस उ दर्रा क बीच स सुरु होत रहा। अम्मोनी लोगन क संग इ ओनकर चउहद्दी रही। सीहोन गिलाद क आधा प्रदेस पइ हुवूमत करत रहा। 3 उ गिलगाल स मृत सागर (खारा सागर) तलक यरदन क पूरब क प्रदेस पइ भी सासन करत रहा अउ बेत्यसीमोत स दक्खिन पिसगा क पहाड़ियन तलक सासन करत रहा। 4 बासान क राजा ओग रपाई लोगन संतान रहा। ओग असतारेात अउ एद्रेई मँ सासन करत रहा। 5 ओग हेमोर्न पहाड़, सलका सहर, अउ बासान क समूचइ छेत्र पइ सासन करत रहा। ओकरे प्रदेस क चउहद्दी हुआँ तलक जात रही जहाँ गसूर अउ माका लोग रहत रहेन। ओग गिलाद क आधा भाग पइ सासन करत रहा। इ प्रदेस क सीमा क आखीर हेसबोन क राजा सीहोन क प्रदेस पइ होत रहा। 6 यहोवा क सेवक मूसा अउ इस्राएल क लोग इ सबहिं राजा लोगन क हराएन अउ मूसा उ प्रदेस क रूबेन क परिवार समूह, गाद क परिवार समूह अउ मनस्से क परिवार समूह क आधा लोगन क दिहस। मूसा इ प्रदेस ओनका आपन कब्जा मँ रखइ बरे दिहस। 7 इस्राएल क लोग उ प्रदेस क राजा लोगन क भी हराएन, जउन यरदन नदी क पच्छिम मँ रहा। यहोसू लोगन क इ प्रदेस मँ लइ गवा। यहोसू लोगन क इ पहँटा दिहस अउर एका साढ़े नौ परिवार समूहन मँ बाटेस। इ उ देस रहा जेका ओनका देइ बरे यहोवा वचन दिहे रहा। इ प्रदेस लबानोन क घाटी मँ बालगात अउ सेईर क निअरे हालाक पहाड़े क बीच रहा। 8 एहमाँ पहाड़ी देस, पच्छिम क तराई क प्रदेस, यरदन घाटी, पूबीर् पहा़डियन, रेगिस्तन अउ नेगेव सामिल रहेन। इ उ प्रदेस रहा जेहमाँ हित्ती, एमोरी, परिज्जी, कनानी, अब्बी अउर यबूसी लोग रहत रहेन। जउन लोगन क इस्राएल क लोग हराएन ओनकर सूची इ बाटइ: 9 यरीहो क राजा 1ऐ क राजा बेतेल क निअरे 1 10 यरूसलेम क राजा 1हेब्रोन क राजा 1 11 यर्मूत क राजा 1लाकीस क राजा 1 12 एग्लोन क राजा 1गेजेर क राजा 1 13 दबीर क राजा 1गेदेर क राजा 1 14 होर्मा क राजा 1अराद क राजा 1 15 लिब्ना क राजा 1अदुल्लाम क राजा 1 16 मक्केदा क राजा 1बेतेल क राजा 1 17 तप्पूह क राजा 1हेपेर क राजा 1 18 अपेक क राजा 1लरसारोन क राजा 1 19 मादोन क राजा 1हासोर क राजा 1 20 सिम्रोन मरोन क राजा 1अच्छाप क राजा 1 21 तानाक क राजा 1मगिद्दो क राजा 1 22 केदेस क राजा 1कमेर्ल मँ योकनाम क राजा 1 23 दोर क पर्वत मँ दोर क राजा 1गिलगाल मँ गोयीम क राजा 1 24 तिर्सा क राजा 1सब मिलाइके राजा लोगन क संख्याँ रहेन 31

13:1 जब यहोसू बहोतइ बुढ़वा होइ गवा तउ यहोवा ओहसे कहेस, “यहोसू तू बुढ़वा होइ ग अहा, मुला अबहिं तोहका बहोत स भुइँया पइ कब्जा करइ क बाटइ। 2 तू अबहिं तलक गसूर लोगन क भुइँया अउर पलिस्तियन क भुइँया नाहीं लिह्या ह। 3 तू मिस्र क चउहद्दी पइ सिहोर नदी स लइके उत्तर मँ एवोन चउहद्दी तलक क छेत्र नहीं लिह्या ह। उ उबहिं तलक कनानी लोगन क अहइ। तू पचन्क अज्जा, असदोद, असकलोन, गत अउ एवोन पाँचहूँ पलिस्ती क प्रमुख्य सहरन क हराउब अहइ। तू पचन्क ओन अब्बी लोगन्क हरावइ चाही, 4 जउन कनान क सारे भुइँया क दक्खिन मँ अउर मिराह मँ जउन कि सिदोनी लोगन, अफेक क अधिकार मँ अहइ अउर अमोरी लोगन सरहद तलक क भुइँया मँ रहत हीं। 5 तू अभी तलक गबाली लोगन्क छेत्र क नाहीं हराया ह अउर बालगाद क पूरब अउ हेमोर्न पहाड़े क घाटी हमाथ क प्रवेस दुआर तलक क बीच क अलबानोन क छेत्र भी अभी तलक हराइ क बचा भवा अहइ। 6 “सिदोन क लोग लबानोन स मिस्रपोतमैम तलक पहाड़ी प्रदेस मँ रहत अहइँ। मुला मइँ इस्राएल क लोगन बरे इ सबहिं क दबाइके निकारि बाहेर करब। जब तू इस्राएल क लोगन मँ भुइँया बाँट्या, तु इ प्रदेस क निहचय ही सुमिर लिह्या। ऍका वइसेन ही करा जइसेन मइँ कहेउँ ह। 7 अब, तू भुइँया क नौ परिवार समूह अउ मनस्से क आधा परिवार समूह क मँ बाटा।” 8 मइँ मनस्से क आधा परिवार समूह क लोगन क पहिले ही भुइँया दइ दीन्ह ह। मइँ रूबेन क परिवार समूह अउ गाद क परिवार समूह क भी पहिले ही भुइँया दइ दीन्ह ह। यहोवा क सेवक मूसा यरदन नदी क पूरब क प्रदेस ओनका दिहस। 9 मूसा अउन भुइँया यरदन नदी क पूरब मँ ओनका दिहे रहा, उ इ अहइ: इ भुइँया क भीतर दीबोन स मेदबा तलक क पूरा मइदान आवत ह। इ भुइँया अर्नान सँकरी घाटी स सुरु होत ह। इ भुइँया घाटी क बीच सहर तलक लगातार फइली अहइ। 10 एमोरी लोगन क राजा सीहोन जउने सहरन पइ सासन करत रहा, उ पचे इ भुइँया मँ रहेन। उ राजा हेसबोन सहर मँ सासन करत रहा। उ भुइँया लगातार उ छेत्र तलक रही जेहमाँ एमोरी लोग रहत रहेन। 11 गिलाद सहर भी अहइ भुइँया मँ रहा। गसूर अउ माका लोग जउनो छेत्र मँ रहत रहेन उ उहइ भुइँया मँ रहा। सारा हेमोर्न पहाड़ अउर सल्का तलक सारा बासान उ भुइँया मँ रहा। 12 राजा ओग क सारा राज्ज उहइ भुइँया मँ रहा। राजा ओग बासान मँ सासन करत रहा। पहिले उ आसतरोत अउ एदेई मँ सासन करत रहा। ओग रपाइ लोगन मँ स रहा। मूसा ओन लोगन क हराए रहा अउर ओनका प्रदेस लइ लिहे रहा। 13 इस्राएल क लोग गसूर अउर माका लोगन क जबरदस्ती निकारिके बाहेर नाहीं कइ सकेन। उ सबइ लोग अब तलक आजु भी इस्राएल क लोगन क संग रहत रहेन। 14 सिरिफ लेवी क परिवार समूह ही अइसा रहा जेका कउनो भुइँया नाहीं मिली। ओकरे बदले आनेका उ सबइ भेंटन मिलिन जेका इस्राएल क परमेस्सर यहोवा क चढ़ाई जात रहिन। यहोवा लेवी परिवार समूह क सन्तानन क इ वचन दिहे रहा। 15 मूसा रूबेन क परिवार समूह स हर एक परिवार समूह क कछू भूइँया दिहस। इ भुइँया अहइ जेका उ पचे पाएन 16 अनोर्न क सँकरी घाटी क निअरे अरोएर स लइके मेेदबा सहर तलक क भुइँया। एहमाँ सारा मइदान अउ दर्राक बीचक सहर सामिल रहा। 17 इ भुइँया हेसबोन तलक लगातर फइली रही। इ भुइँया मँ मइदान क सबहिं सहर रहेन। इ सबइ सहर दीबोन, बोमोतबाल, बेतबालमोन, 18 यहसा, कदेमोत, मेपात, 19 किर्यातैम, सिबमा, इ मँ घाटी क सहरन सेरेध-साहार, 20 बेतपोर, पिसगा क पहाड़ियन अउ बेत्यसीमोत सामिल रहेन। 21 इ भुइँया मँ मइदान क सबहिं सहर अउ एमोरी लोगन क राजा सीहोन जउने छेत्रन पइ सासन किहे रहा उ सबइ छेत्र रहा। उ राजा हेसबोन पइ सासन किहे रहा। मुला मूसा ओका अउर मिद्यानी लोगन क हराए रहा। उ सबइ लोग एवी, रेकेम, सूर, हूर अउर रेबा रहेन। इ सबइ नेतन जउन उ देस मँ रहत रहेन सीहोन क संग जुद्ध करत रहेन। 22 इस्राएल क लोग बारे क पूत बिलाम क मारेन। बिलाम भविस्सबाणी बरे जादू क उपयोग करइ क जतन किहस। इस्राएल क लोग जुद्ध मँ अनेक लोगन क मारेन। 23 जउन पहँटा रूबेन क दीन्ह ग रहा, ओकर अन्त यरदन नदी क किनारे पइ होत रहा। ऍह बरे इ भुइँया रूबेन क परिवार समूहन क दइ दीन्ह गइ, एहमाँ इ सबइ सहर अउ सूची मँ लिखे भए सबहिं खेत सामिल रहेन। 24 मूसा गाद क परिवार समह क भुइँया क गाद कबिलन क बीच मँ बाँटे दिहस। 25 गाद क प्रदेस याजेर क पहाँटा अउ गिलाद क सबहिं नगर मँ रहेन। मूसा ओनका अम्मोनी लोगन क भुइँया का आधा हींसा रब्बा क निअरे अरोएर तलक भी दिहे रहा। 26 इ प्रदेस मँ हेसबोन रामतमिस्पे अउ बेतोनीम क छेत्र सामिल रहेन। इ प्रदेस मँ महनैम स दबीर तलक क छेत्र सामिल रहेन। 27 एहमाँ बेथारम क घाटी, बेत्रिम्रा, सुक्कोत अउर सापोन सामिल रहेन। बाकी क उ समूचा हींसा जेह पइ हेसबोन क राजा सीहोन सासन किहे रहा, एहमाँ सामिल रहा। इ भुइँया यरदन नदी क पूरब कइँती अहइ। इ भुइँया लगातार गलील झिलिया क आखीर तलक फइली अहइ। 28 इ सारा पहँटा उ अहइ जेका मूसा गाद क परिवार समूह क दिहे रहा। इ भुइँया मँ इ सबइ देस रहेन जउन सूची मँ अहइँ। मूसा उ भुइँया हर एक कबिलन क बांटे दिहस। 29 मूसा मनस्से क आधा परिवार समूह क कबिलन क बीच मँ भी भुइँया बांटे रहा। मनस्से क परिवार समूह क कबिलना इ भुइँया पाएन: 30 भुइँया महनैम स सुरु भइ। एहमाँ उ पूरा बासान यानी जउन सारा प्रदेस पइ बासान क राजा ओग सासन करत रहा अउर बासान मँ याइर क सबहिं सहर सामिल रहेन। (सब मिलाइके साठ सहर रहेन।) 31 इ भुइँया मँ आधा गिलाद, अस्तारोत अउ एदेई सामिल रहेन। (गिलाद, अस्तारोत अउ एदेई उ सबइ सहर रहेन जेहमाँ ओग रहत रहा।) इ सारा प्रदेस मनस्से क पूत माकीर क परिवार क दीन्ह गएन। ऍन आधा पूतन इ पहँटा क पाएन। 32 मूसा मोआब क मइदान मँ इ सबइ परिवार समूह क इ पूरी भुइँया दिहस। इ यरीहो क पूरब मँ यरदन नदी क पार रही। 33 मुला मूसा लेवी परिवार समूह क कउनो भुइँया नाहीं दिहस। इस्राएल क परमेस्सर यहोवा इ वचन दिहस कि उ खुद लेवी क परिवार समूह क भेंट क रुप मँ होइ।

14:1 याजक एलीआज़ार, नून क पूत यहोसू अउ इस्राएल क परिवार समूह क प्रमुख लोग निहचय किहन कि उ पचे कउने भुइँया क कउन लोगन क दिहन। इ सारी भुइँया यरदन नदी क पच्छिम कइँती कनान मँ रहेन। 2 यहोवा उ ढंग मूसा क बहोत पहिले बताइ दिहे, जउने ढंग स उ चाहत रहा कि लोग आपन भुइँया चुनइँ। साढ़े नौ परिवार समूह क लोग कउन स भुइँया उ पचे पइहीं ऍकर निहचय करइ बरे गोट डाएन। 3 मूसा अढ़ाई परिवार समूहन क ओनकर भुइँया ओनका यरदन नदी क पूरब मँ दइ दिहे रहा। मुला लेवी क परिवार समूह क दूसर लोगन क तरह कउनो भी भुइँया नाहीं मिली। 4 बारह परिवार समूहन क आपन खुद क भुइँया दइ दीन्ह गइ। यूसुफ क पूत दुइ परिवार-समूहन-मनस्से अउ एप्रैम मँ बँट ग रहेन अउर हर एक परिवार समूह कछु भुइँया पाइ लिहस। मुला लेवी क परिवार समूह क कबिलन क कउनो भुइँया नाहीं दीन्ह गइ। ओनका रहइ बरे कछू सहर दीन्ह ग रहेन अउर इ सबइ सहर हर एक परिवार-समूह क भुइँया मँ रहेन। ओनका जनावरन बरे खेत भी दीन्ह ग रहेन। 5 यहोवा मूसा क बताइ दिहे रहा कि उ कउने ढंग स इस्राएल क परिवार समूहन क भुइँया देइ। इस्राएल क लोग उहइ ढंग स भुइँया क बाँटेन, जउने ढंग स बाँटइ बरे यहोवा क हुवुम रहा। 6 एक दिन यहूदा परिवार समूह क लोग गिलगाल मँ यहोसू क लगे गएन। ओन लोगन मँ कनजी यपुन्ने क पूत कालेब रहा। कालेब यहोसू स कहेस, “कादेसबनेर् मँ यहोवा जउन बातन कहे रहा। तोहका याद अहइ। यहोवा आपन सेवकबातन करत रहा। यहोवा तोहरे अउ मोरे बारे मँ बात करता रहा। 7 यहोवा क सेवक मूसा मोका उ भुइँया क जासूसी करइ बरे पठएस जहाँ हम पचे जात रहे। उ समइया मइँ चालीस बरिस क रहेउँ। जब मइँ लउटेउँ तउ मूसा क मइँ उ बताएउँ, जउन मइँ उ भुइँया क बारे मँ अनुभव राखत रहेउँ। 8 मुला जउन दूसर मनई मोरे संग गए रहेन उ पचे ओनसे अइसी बातन किहन जेहसे लोग डेराइ गएन। मुला मइँ यहोवा क हुवुमन क वफादारी स पालन किहस। 9 ऍह बरे मूसा वचन दिहसा, ‘जउने देस मँ तू गए रह्या उ तोहार होइ। उ देस सदा तोहरे गदेलन क होइ। मइँ उ छेत्र तोहका देब, काहेकि तू यहोवा मोरे परमेस्सर पइ पूरा भरोसा किह्या ह।’ 10 “अब, सोचा कि उ समइ स यहोवा जइसा कहे रहा उहइ तरह मोका पैंतालीस बरिस तलक जिअत रखेस ह। उ समइ हम सब रेगिस्तान मँ भटकत रहेन। अब, मइँ पचासी बरिस क होइ गवा हउँ। 11 मइँ अबहुँ भी ओतना ही सकतीसाली हउँ जेतना सक्तीसाली मइँ उ समइ रहेउँ, जब मूसा मोका पठए रहा। मइँ ओन दिनन क तरह अब भी जुद्ध करइ क तइयार अहउँ। 12 ऍह बरे उ पहाड़ी देस मोका दइ द्या जेका यहोवा बहोत पहिले उ दिन मोका देइ क वचन दिहे रहा। उ समइ तोहका पता लाग रहा कि सहर बहोत बड़ा अउर किलेदार रहेन अउ ओन दिनन सक्तीसाली अनाकी लोग ओन सहरन पइ सासन करत रहेन। मुला अब यहोवा मोरे संग अहइ अउर मइँ उ प्रदेस क वइसेन ही लइ लेब जइसा यहोवा कहेस ह।” 13 यहोसू यपुन्ने क पूत कालेब क आसीर्बाद दिहस। यहोसू हेब्रोन सहर क ओकरे अधिकार मँ दइ दिहस। 14 अउर उ सहर अब भी कनजी यपुन्ने क पूत कालेब क परिवार क अहइ। उ प्रदेस अब तलक ओकरे लोगन क अहइ काहेकि, उ इस्राएल क परमेस्सर यहोवा क आग्या मानेस अउर ओह पइ पूरा बिस्सास किहस। 15 पहिले इ सहर क नाउँ किर्यतर्बा रहा। सहर क नाउँ अनाकी लोगन क सब त महान अर्बा नाउँ क मनई क नाउँ पइ रखा गवा रहा।एकरे पाछे, उ देस मँ सान्ति रही।

15:1 यहूदा क जउन प्रदेस दीन्ह गवा उ ओकरे सारे कबिलन क बीच मँ बँटा। उ प्रदेस एदोम क छेत्र तलक अउर सीन क रेगिस्तान मँ ऍका सबइ त दक्खिन छेत्र तलक फइला रहा। 2 यहूदा क प्रदेस क दक्खिनी सीमा मृत सागर क दक्खिनी छोर स सुरु होत रही। 3 इ सीमा बिच्छू दर्रा क दक्खिन तलक जात रही अउर सीन तलक बढ़ी भइ रही। तब इ सीमा कादेसबनेर् क दक्खिन तलक लगातार गइ रही। इ सीमा हेस्रोन क आगे अद्दार तलक चलत चली गइ रही। अद्दार स चउहद्दी मुड़त रही अउर ककराआ तलक गइ रही। 4 इ सीमा अम्मोन स होत भइ मिस्र क नहर तलक लगातार चलिके अन्त मँ भूमध्य सागर तलक पहोंचत रही। उ प्रदेस, प्रदेस क दक्खिनी सीमा बनावत रही। 5 उ प्रदेस क पूबीर् सीमा मृत सागर (खारा समुद्दर) क किनारे स सुरू होत रही जहाँ पइ यरदन नदी समुद्र मँ गिरत रही।उत्तरी सीमा उ छेत्र स सुरू होत रही जहाँ यरदन नदी मृत सागर मँ गिरत रही। 6 तब उत्तरी सीमा बेथोग्ला स होत भइ गएन अउर बोहन चट्टान (बोहन रूबेन क पूत रहा।) होत भइ उत्तरी बेतराबा तलक चली गइ रही। 7 तब उत्तरी सीमा आकोर क घाटी स होइके दबीर तलक गइ रही। हुआँ सीमा उत्तर क मुड़ि जात रही अउर गिलगाल तलक जात रही। गिलगाल उ सड़क क पार अहइ जउन अदुम्मीम पहाड़े स होइके जात ह जउन कि घाटी क दक्खिन कइँती अहइ। इ सीमा एनसेमेस पानी क बहाव क संग लगातार गइ रही। एन रोगेल पइ सीमा खतम रही। 8 तब इ सीमा यबूसी सहर क दक्खिन कइँती स बेन हिन्नोम घाटी स होइके गइ रही। उ यबूसी सहर क यरूसलेम कहा जात रहा। (उ जगह पइ सीमा हिन्नोम घाटी क उलरी छोर प रही।) 9 तब सीमा पहाड़ क चोटी पइ स नेप्तोह क पानी क झील तलक जात रही। ओकरे पाछे सीमा एप्रोन पहाड़े क निचके क सहरन तलक जात रही। उ जगह पइ सीमा मुड़त रही अउर बाला क जात रही जो कि किर्यत-यारीम अहइ। 10 बाला स सीमा पच्छिम कइँती मुड़ी अउर सेईर क पहाड़ी देस क गइ। यारीम पहाड़े क उत्तर क छोर तलक सीमा चलत रही (एका कासालोन भी कहा जात ह) अउर बेतसमेस तलक गइ। हुआँ स सीमा तिम्ना क पार गइ। 11 तब इकरोन क उत्तरी छोर मँ क गइ। तब उ जगह स सीमा सिक्करोन क मुड़ी अउर बाला पर्वत क पार गइ। इ सीमा लगातार यब्नेल तलक गइ अउर भूमध्य सागर पइ खतम भइ। 12 भूमध्य सागर यहूदा प्रदेस क पच्छिमी सीमा पइ रहा। इ सबइ यहूदा क प्रदेस सीमा रहेन। यहूदा क परिवार समूह इ प्रदेस मँ रहत रहा। 13 यहोवा यहोसू क आदेस दिहे रहा कि उ यपुन्ने क पूत कालेब क यहूदा क भुइँया मँ स हींसा देइ। ऍह बरे यहोसू कालेब क उ प्रदेस दिहस जेकरे बरे परमेस्सर आदेस दिहे रहा। यहोसू ओका किर्यत-अर्बा क सहर दिहस (जउन हेब्रोन भी कहा जात रहा)। (अर्बा अनाक क बाप रहा।) 14 कालेब तीन अनाक परिवारन क हेब्रोन, जहाँ उ पचे रहत रहेन, छोड़ देइ क मजबूर किहस। उ सबइ परिवार रहेन: सेसाइ, अहीमन अउ तल्मै। उ सबइ अनाक क परिवार क रहेन। 15 कालेब दबीर मँ रहइवाले लोगन स लड़ा। (पुराने जमाना मँ दबीर भी किर्यत्सेपेर कहा जात रहा।) 16 कालेब कहेस, “कउनो मनई जउन किर्यत्सेपेर पइ हमला करी अउर उ सहर क जीत लइ, उहइ मोर बिटिया अकास स बियाह कइ सकी। इ ओकरे बरे एक भेंट होब्य।” 17 कालेब क भाई कनजी क पूत ओत्नीएल उ सहर क हराएस। ऍह बरे कालेब आपन बिटिया अकसा क ओका आपन पत्नी होइ बरे कन्यादान दिहस। 18 ओत्नीएल अकसा स कहेस कि उ आपन बाप स कछू जियादा भुइँया माँगइ। अकसा आपन बाप क लगे गइ। जब उ आपन गदहा स उतरी तउ ओकर बाप ओहसे पूछेस, “तू का चाहति अहा?” 19 अकसा जवाब दिहस, “मइँ आपन एक ठु आसीर्बाद पावइ चाहत हउँ। मइँ पानीवाली भुइँया चाहत हउँ जउन भुइँया आप मोका जेगेब मँ दिहा ह, उ बहोत झुरान अहइ, ऍह बरे मोका अइसी भुइँया द्या जेहमाँ पानी क सोता होइँ।” ऍह बरे कालेब ओका भुइँया क ऊपरी अउ खाले क हींसा मँ सोतन क साथ भुइँया दिहस। 20 यहूदा क परिवार समूह उ भुइँया पाएस जेका परमेस्सर ओका देइ क वचन दिहे रहा। हर एक कबीला समूह भुइँया क हींसा पाएस। 21 यहूदा क कबीला दक्खिन मँ सबइ सहरन क पाएस। इ सबइ सहर एदोम क प्रदेस क निचके रहेन। इ सबइ रहेन:कबसेल, एदेर, यागूर, 22 कीना, दीमोना, अदादा, 23 केदेस, हासोर, यित्नान, 24 जीप, तेलेम, बालोत, 25 हासोर्हदत्ता, करिय्योत-हेस्रोन (हासोर भी कहा जात रहा।), 26 अमाम, समा, मोलादा, 27 हर्सगद्दा, हेसमोन, बेत्पालेत, 28 हसर्र्सूआल, बेसेर्बा, बिज्योत्या, 29 बाला, इय्यीम, एसेम, 30 एलतोलद, कसील, होर्मा, 31 सिकलग, मदमन्ना, सनसन्ना, 32 लबाओत, सिल्हीम ऐन अउ रिम्मोंन। सब मिलाइके उन्तीस सहर अउर ओनके सबहिं खेत रहेन। 33 पच्छिमी पहाड़ियन क तलहटी क सहरन: एसताओल, सोरा, असना, 34 जानोह, एनगन्नीम, तप्पूह, एनाम, 35 यर्मूत, अदुल्लाम, सोको, अजेका, 36 सारैम, अदीतैम अउ गदेरा (गदेरोतैम भी कहा जात रहा)। सब मिलाइके हुआँ चोचह सहर अउ ओनकर सारे खेत रहेन। 37 सनान, हदासा, मिगदलगाद, 38 दिलान, मिस्पे, योक्तेल, 39 लाकीस, बोस्कत, एग्लोन, 40 कब्बोन, लहमास, कितलीस, 41 गेदोरेत, बेतदागोन, नामा, अउर मक्केदा, सब मिलाइके हुआँ सोलह सहर अउर ओनकर सारा खेत रहेन। 42 लिब्ना, ऐतेर, आसान, 43 यिप्ताह, असना, नसीब, 44 कीला, अकजीब अउ मारेसा। सब मिलाइके इ सबइ नौ सहर अउर ओनकर सारा खेत रहेन। 45 एवोन अउर ऍकर चारिहुँ कइँती क गाँव, अउर खेतन। सहर अउ निचके क नान्ह सहर सारा खेतन क संग पाएन। 46 एवोन क पच्छिम क छेत्र, सारा खेत अउर असदोद क निअरे क सहरन। 47 असदोद क चारिहुँ कइँती क छेत्र अउर हुआँ क नान्ह नगर जउन कि यहूदा प्रदेस क हींसा रहेन, ऍकर संग चारिहुँ ओर क खेतन अउर सहरन समेत। गाजा क सबइ कइँती क छेत्र ओनकर प्रदेस मिस्र क नदी अउर आगे लगातार भूमध्य सागर क किनारे तलक फइला रहा। 48 पहाड़ी देस सहरन: सामीर, यत्तीर, सोको, 49 दन्ना, किर्यत्सन्ना (एका दबीर भी कहत रहेन), 50 अनाब, एसतमो, आनीम, 51 गोसेन, होलोन अउर गीलो सब मिलाइके ग्यारह सहर अउर ओनकर खेत रहेन। 52 अराब, दूमा, एसान, 53 यानीम, बेत्तप्पूह, अपेका, 54 हुमता, किर्यतर्बा (हेब्रोन) अउर सीओर इ सबइ नौ सहर अउर एनकर सारा खेत रहेन। 55 माओन, कमेर्ल, जीप, यूता, 56 यिज्रेल, योकदाम, जानोह, 57 कैन, गिबा अउर तिम्जा। इ सबहिं दस सहर अउर ओनकर सारा खेत रहेन। 58 हलहूल, बेतसूर, गदोर, 59 मरात, बेतनोत अउर एलतकोन सबहिं छ: सहर अउ ओनकर सारा खेत रहेन। 60 रब्बा अउर किर्यत-बाल, जेका किर्यत-यारीम भी कहा जात रहा। 61 यहूदा क लोगन क रेगस्तिन मँ सहर दीन्ह ग रहेन। ओन सहरन क सूची इ अहइ। बेतराबा, मिद्दीन, सकाका, 62 निबसान, लवण सहर अउर एनगदी। सब मिलाइके छ: सहर अउ ओनकर सारा खेत रहेन। 63 यहूदा क फउज यरूसलेम मँ बसइयन यबूसी लोगन क जबरदस्ती बाहेर करइ मँ समरथ नाहीं भइ। ऍह बरे अब तलक यबूसी लोग यरुसलेम मँ यहूदा लोगन क बचि रहत हीं।

16:1 इ उ प्रदेस अहइ जेका यूसुफ क परिवार पाएस। इ प्रदेस यरीहो क लगे यरदन नदी स सुरु भवा अउ आगे पूरब मँ यरीहो पानी तलक रहा। तउ इ प्रदेस यरीहो स बेतेल क रेगिस्तानी पहाड़ी तलक चली गइ। 2 सीमा लगातार बेतेल स लूज तलक अउर फुन अतारोत पइ एरेकी सीमा तलक चली गइ रही। 3 तब इ चउहद्दी पच्छिम मँ यपलेती लोगन क चउहद्दी तलक चली गइ। इ चउहद्दी लगातार खाले बेथोरोन तलक चली गइ रही। इ चउहद्दी गेजेर तलक गइ अउर समुद्दर तलक चलतइ चलत गइ। 4 इ तरह मनसे अउर एप्रैम आपन प्रदेस पाएस। (मनस्से अउ एप्रैम यूसुफ क पूत रहेन।) 5 इ उ प्रदेस अहइ जेका एप्रैम क कबिलन क दीन्ह गवा: ओनकर पूरबी चउहद्दी ऊपरी बेथोरोन क निअरे अत्रोतदार पइ सुरु भइ। 6 अउर इ हुआँ स सागर तलक जात रही। चउहद्दी उत्तर मँ मिकमतात क छोड़ कर तानतसीलो क मुड़ी अउ लगातार पूरब कइँती यानोह तलक चली गइ रही। 7 तब चउहद्दी यानोह स अतारोथ अउ नारा तलक चली गइ। इ चउहद्दी लगातार चलत भइ यरीहो छुअत ह अउर यरदन नदी पइ खतम होइ जात ह। 8 इ चउहद्दी तप्पूह स होत भइ पच्छिम कइँती कानाह नाला क जात ह अउर सागर पइ खतम होइ जात ह। इ उ प्रदेस अहइ जउन एप्रैम क लोगन क ओकरे परिवार समूह क अनुसार दीन्ह गवा रहा। 9 एप्रैम क बहोत स चउहद्दी क सहर असल मँ मनस्से क चउहद्दी मँ रहेन मुला एप्रैम क लोगन ओन सहरन अउर आपन खेतन क पाएन। 10 मुला एप्रैम लोग कनानी लोगन क गेजेर सहर छोड़इ क मजबूर करइ मँ समर्थ नाहीं होइ सकेन। ऍह बरे कनानी लोग अब तलक एप्रैमी लोगन क बीच रहत हीं। मुला कनानी लोग एप्रैमी लोगन क दास क रूप मँ रहत रहेन।

17:1 तब मनस्से क परिवार समूह क भुइँया दीन्ह गइ। मनस्से यूसुफ क पहिला पूत रहा। मनस्से क पहिला पूत माकीर रहा जउन गिलाद क बापरहा। माकीर महान जोधा रहा, ऍह बरे गिलाद अउ बासान माकीर क परिवार क दीन्ह गएन। 2 मनस्से क परिवार समूह क दूसर कबिलन क भी भुइँया दइ दीन्ह गइ। उ सबइ कबिलन अबीएजेर, हेलेक, अस्त्रीएल, सेकेम, हेपेर अउ समीदा रहेन। इ सबहिं मनस्से क दूसर पूत रहेन, जउन यूसुफ क पूत रहा। 3 सलोफाद हेपेर क पूत रहा। हेपेर गिलाद क पूत रहा। गिलाद माकीर क पूत रहा अउर माकीर मनस्से क पूत रहा। मुला सलोफोद क कउनो पूत नाहीं रहा। ओकर पाँच बिटियन रहिन। बिटियन क नाउँ महला, नोआ, होग्ला, मिल्का अउर तिर्सा रहेन। 4 बिटियन याजक एलीआज़ार अउर नून क पूत यहोसू क इलावा सबहिं प्रमुखन क लगे गइन। बिटियन कहेन, “यहोवा मूसा स निदेर्स दिहस कि उ हमका वइसेन ही भुइँया देइँ जइसेन हमार भाईयन क दीन्ह जात हीं।” ऍह बरे एलीआज़ार, यहोवा क हुवुम मानत भए एन बिटियन क वाइसेन ही भुइँया दिहेस जइर्सन ओनके चाचा लोगन क मिली रही। 5 इ तरह मनस्से क परिवार क लगे यरदन नदी क पच्छिम मँ भुइँया क दस छेत्र रहेन अउर यरदन नदी क दुसरी कइँती दुइ ठु दूसर छेत्र गिलाद अउ बासान रहेन। 6 मनस्से क पोतियन क वइसेन ही भुइँया दीन्ह गइ जइसेन मनस्से क दूसर बेटवन सन्तानन क दीन्ह गइ रही। गिलाद प्रदेस मनस्से क सेस परिवार क दीन्ह गवा। 7 मनस्से क भुइँया आसेर अउ मिकमतात क छेत्र क बीच रही। इ सकेम क निअरे अहइ। एकर चउहद्दी एनतप्पूह स दक्खिन तलक जात रही। 8 तप्पूह क भुइँया मनस्से क रही मुला तप्पूह सहर ओकर नाहीं रहा। तप्पूह सहर जउन कि मनस्से क प्रदेस क चउहद्दी पइ रहा उ एप्रैम क बेटवन स आबाद रहा। 9 मनस्से क चउहद्दी काना नाले क दक्खिन मँ रही। मनस्से क इ छेत्र क सहर एप्रैम क रहेन। मनस्से क चउहद्दी नदी क उत्तर मँ रही अउर इ पच्छिम मँ लगातार भूमध्य सागर तलक चली गइ रही। 10 दक्खिन क भुइँया एप्रैम क रही अउर उत्तर क भुइँया मनस्से क रही। भूमध्य सागर पच्छिम क चउहद्दी बनावत रहा। इ चउहद्दी उत्तर मँ आसेर क प्रदेस क छुअत रही अउ पूरब मँ इस्साकार क प्रदेस क। 11 इस्साकार अउ आसेर क छेत्र क बेतसान अउ एकर चारिहुँ कइँती क गाँव उ यिबलाम अउ एकर चारिहुँ कइँती क गांव मनस्से क रहेन। मनस्से क कब्जा मँ दोर अउ एकर चारिहुँ कइँती क गाँव अउ एनदोर अउर एकर चारिहुँ कइँती क गाँव भी रहेन। नापात क तीन ठु सहरन समेत तानाक अउर ओकर चारिहुँ कइँती क गाँव भी मनस्से क कब्जा मँ रहा। 12 मनस्से क लोग ओन सहरन क नाहीं हराइ सका रहेन। ऍह बरे कनानी लोग हुआँ रहत रहेन। 13 मुला इस्राएल क लोग सक्तीसाली भएन। जबहिं अइसा भवा तउ उ पचे कनान क लोगन क गुलामी मँ जाइ बरे मनबूर किहेन। मुला उ पचे कनानी लोगन क उ भुइँया तजि देइ बरे मजबूर नाहीं किहेस। 14 यूसुफ क परिवार समूहन यहोसू स बातन किहेन अउर कहेन, “तू भुइँया क हमका एक हींसा दिह्या ह। मुला हम बहोत स लोग अहइँ। तू हम लोगन क उ देस क एक हींसा ही काहे दिह्या जबकि यहोवा हम लोगन क आसीर्बाद दिहस?” 15 अउर यहोसू ओनका जवाब दिहस, “अगर तू लोग गनती मँ जियादा ह्वा तउ पहाड़ी प्रदेस क जंगलन मँ ऊपर चढ़ा अउर हुआँ रहइ बरे अपन जगह बनावा। इ प्रदेस परिज्जन अउ रपाई लोगन क अहइ। अगर एप्रैम क पहाड़ी प्रदेस तू लोगन क जरुरत स छोटवार अहइ तउ उ भुइँया क लइ ल्या।” 16 यूसुफ क लोग कहेन, “इ फुरइ अहइ कि एप्रैम क पहाड़ी प्रदेस हम लोगन बरे काफी नाहीं अहइ। मुला इ प्रदेस जहाँ कनानी लोग रहत हीं खतरनाक बाटइ। उ सबइ वुसल जोधा अउ ओनके लगे लोहा क रथ अहइँ। अउर उ सबइ यिज्रेल क घाटी अउर एकर चारिहुँ कइँती क गाँव क इलावा बेतसान क छेत्र पइ दबदबा रखत हीं।” 17 तब यहोसू यूसुफ, एप्रैम अउर मनस्से क लोगन स कहेस, “मुला तू लोगन क गनती बहोतइ जियादा अहइ। अउर तू लोग बड़की ताकत धरत ह। तू लोगन क जियादा भुइँया मिलइ चाही। 18 तू लोगन क पहाड़ी प्रदेस लेइ क होइ। इ जंगल अहइ, मुला तू लोग बृच्छन क काटि सकत ह अउर रहइ जोग्ग नीक जगह बनाइ सकत ह। इ सारा पचन्क होइ। तू लोग कनानी लोगन क उ प्रदेस क तीज देइ बरे मजबूर करब्या। तू लोग ओनका सक्तीसाली रथ क होत भए भी जउन ओनका सक्ती प्रदान करत ह हराइ देब्या।”

18:1 इस्राएल क सबहिं लोग सीलो नाउँ क ठउर पइ बटुर गएन। उ ठउरे पइ उ पचे मिलापवाला तम्बू खड़ा किहन। इस्राएल क लोग उ प्रदेस क सबहिं दुस्मन क हराए रहेन अउर उ प्रदेस ओनके अघिकार मँ रहेन। 2 मुला उ समइ भी इस्राएल क सात परिवार समूह अइसेन रहेन, जेनका परमेस्सर क जरिये वचन दीन्ह जाइ पइ भी ओनका दीन्ह गइ भुइँया नाहीं मिली रही। 3 ऍह बरे यहोसू इस्राएल क लोगन स कहेस, “तू लोग आपन प्रदेस लेइ मँ ऍतनी देर काहे जोहत अहा? यहोवा, तू पचन्क परमेस्सर इ प्रदेस तू पचन्क दिहे अहइ। 4 ऍह बरे तेाहरे सबन्क हर एक परिवार समूह क तीन मनई चुनइ चाही? मइँ ओन मनइयान क ओन प्रदेसन क जाँच बरे पठउब। उ सबइ उ पूरे प्रदेस स होइ क जाब अउर उ प्रदेस क विवरन तइयार करिहीं तब उ सबइ मोरे लगे लउटिहीं। 5 उ पचे देस क सात ठु हींसा मँ बँाटि देइहीं। यहूदा क लोग आपन प्रदेस दक्खिन मँ रखिहीं। यूसुफ क लोग आपन प्रदेस उत्तर मँ रखिहीं। 6 मुला तू लोगन क भुइँया क उल्लेख करत भवा विवरण तइयार करइ चाही अउ प्रदेस क सात ठु हींसन मँ बाँटि देइ चाही। विवरण मोरे लगे लिआवा। अउर मइँ हिआँ यहोवा हमार परमेस्सर क मौजूदगी मँ तोहार बरे पाँसा (लोटरी) डालब। 7 मुला लेवी परिवार समूह ऍन प्रदेसन क कउनो हींसा नाहीं पइहीं। उ सबइ याजक अहइँ अउर ओनकर कारज यहोवा क सेवा करब अहइ। गाद अउर रूबेन क परिवार समूह अउ मनस्से क आधा क परिवार समूहन क लोग पहले वचन क अनुसार दीन्ह गवा आपन प्रदेस पाइ चुका अहइँ। इ सबइ प्रदेस यरदन नदी क पूरब मँ अहइँ। यहोवा क सेवक मूसा उ प्रदेस क पहिले ही दइ दिहे रहा।” 8 ऍह बरे चुने भए मनई उ भुइँया क लखइ अउ ओकर नक्सा बनावइ बरे चला गएन। यहोसू ओनसे कहेस, “जा, अउर उ प्रदेस क जाँच करा अउर ओकर नक्सा तइयार करा। तब मोरे लगे लउटि आवा। उ समइ मइँ यहोवा स कहबउँ कि जउन देस तू पचन्क मिली ओका चुनइ मँ उ पचे मोर मदद करइँ।” 9 ऍह बरे ओन मनसेधुअन उ जगह तजेन अउर उ देस मँ उ पचे चला गएन। उ पचे देस क जाँच किहेन अउर यहोसू बरे नक्सा तइयार किहेन। उ पचे हर सहर क जाँच किहेन अउर पाएन कि प्रदेस क सात ठु हींसा अहइँ। उ पचे आपन नकसा क तइयार किहन अउर यहोसू क लगे गएन। यहोसू तबहुँ सीलो क डेरा मँ रहा। 10 उ समइ यहोसू यहोवा स मदद माँगेस। यहोसू हर एक परिवार समूह क देइ बरे एक ठु प्रदेस चुनेस। यहोसू प्रदेस क बाँटेस अउर हर एक परिवार समूह क ओकरे हींसा क प्रदेस दिहस। 11 तब बिन्यामीन क परिवार समूह अउर ओनकइ कबीलन बरे पाँसा डावा गवा रहा अउर पाँसा यहोदा अउर यूसुफ क परिवार समूहन क भुइँया क बीच पड़ेन। 12 ऍकर उत्तरी चउहद्दी यरदन नदी स सुरु भइ। इ चउहद्दी यरीहो क उत्तरी छारे स गइ रही। तब इ चउहद्दी पच्छिम क पहाड़ी प्रदेस मँ गइ रही। इ चउहद्दी लगातार बेतावेन क ठीक पूरबी ढलान तलक रही। 13 तब इ चउहद्दी लूज़ (यानी बेतेल) क दक्खिनी ढलान तलक गइ। फिन इ चउहद्दी अत्रोद्दार तलक खाले गइ। अत्रोतद्दार खाले बेथोरोन क दक्खिनी पहाड़ी क ढलान पइ अहइ। 14 चउहद्दी दक्खिन कइँती मड़ी अउर बैथ-हेरोन क लगे उ पहाड़ी क पच्छिमी कइँती क निचके स गइ। इ चउहद्दी आगे किर्यत बाल जउन किर्यत-यारीम भी कहलावत ह तलक गएन। इ एक सहर रही जहाँ यहूदा क लोग रहत रहेन। इ पच्छिमी चउहद्दी रही। 15 दक्खिन क चउहद्दी किर्यत्यारीम स सुरु भइ अउर नेप्तोह क पानी क चसमा तलक गइ। 16 तब चउहद्दी हिन्नोम क घाटी क निचके पहाड़ी क तलहटी मँ गइ। इ रपाईम घाटी क उत्तरी छोर रहा। इ चउहद्दी यबूसी सहर क ठीक दक्खिन हिन्नोम घाटी मँ चलत भइ चली गइ। तब चउहद्दी एनरोगेल तलक चली गइ। 17 हुआँ, चउहद्दी उत्तर कइँती मुड़ी अउर एन सेमेस क गइ। इ चउहद्दी लगातार गलीलोत तलक जात ह। (गलीलोत, पहाड़न मँ अदुम्मीम दरेर् क निअरे अहइ।) इ चउहद्दी उ बड़की चट्टान तलक गइ जेकर नाउँ रूबेन क पूत, बोहन बरे धरा गवा रहा। 18 इ चउहद्दी बेतअरबा क उत्तरी भाग तलक लगातार चली गइ। 19 तब इ बेथोग्ला क उत्तरी भाग क जाइके, लवण सागर क उत्तरी तट पइ खतम भइ। इ उहइ जगह अहइ जहाँ यरदन नदी समुद्र मँ गिरत ह। इ दक्खिनी चउहद्दी रही। 20 पूरब कइँती यरदन नदी क चउहद्दी रही। इ तरह इ भुइँया रही जउन बिन्यामीन क परिवार समूह क दीन्ह गइ। इ सबइ चारिहुँ कइँती क चउहद्दी रहीन। 21 बिन्यामीन क हर एक परिवार समूह क, इ तरह, इ भुइँया मिली। ओनके कब्जा मँ इ सबइ सहर रहेन। यरीहो, बेथोग्ला, एमेक्कसीस, 22 बेतराबा, समारैम, बेतेल, 23 अव्वीम, पारा, ओप्रा, 24 कपरम्मोनी, ओप्नी अउ गेबा। इ सबइ बारहु सहर, उस छोटके छेत्र मँ, ओनके आसपास खेतन क साये रहेन। 25 बिन्यामीन क परिवार समूह क लगे गिबोन, रामाबेरोत, 26 मिस्पा, कपीरा, मोसा, 27 रेकेम, यिपेर्ल, तरला, 28 सेला, एलेप, यबूस सहर (यरुसलेम), गिबत अउर किर्यत-यरीम सहर भी रहेन। इ सबइ चउदह सहर, उ छोटके छेत्र मँ ओनके आसपास क खेतन क साथे रहेन। इ सबइ पहाँटा बिन्यामीन क परिवार समूह पाए रहा।

19:1 सिमोन क परिवार बरे दूसर पाँसा डावा गवा रहा। जउन ओनका मिली, यहूदा क अधिकार-छेत्र क भीतर रही। 2 इ उ भुइँया क विवरण रही जउन ओनका मिली: बेसेर्बा जउन सेबा भी कहलावत ह। मोलादा, 3 हसर्सूआल, बाला, एसेम, 4 एलन्तोलद, बतूल, होर्मा, 5 सिक्लग, बेत्मकराबोत, हसर्सूसा, 6 बेतलबाओत अउ सारुहने, इ सबइ तेरह सहर अउर ओनकर सारा खेत सिमोन क रहेन। 7 ओनका ऐन, रिम्मोन, एतेर अउ आसान सहर भी एकर खेतन क साथ पाए रहेन। 8 उ पचे उ सबइ सारा खेत सहरन क साथे पाएन जउन बालत्बेर तलक फइला रहेन। (इ नेगव छेत्र मँ रामा ही अहइ।) इ तरह इ उ प्रदेस रहा, जउन सिमोनी लोगन क परिवार समूह क दीन्ह गवा। हर एक इ भुइँया क पाएस। 9 सिमोनी लोगन क भुइँया यहूदा क प्रदेस क भाग स लीन्ह गइ रही। यहूदा क लगे ओनँ लोगन क जरुरत स जियादा भुइँया रही। ऍह बरे सिमोनी लोगन क ओनकी भुइँया क हींसा मिला। 10 जबूलून क परिवार समूह अउर ओकरे कबीलन बरे तीसर पाँसा डावा गवा रहा। जबूलून क प्रदेस सारीद तलक जात रही। 11 फिन उ पच्छिम मँ दब्बेसेत स होत भइ मरला क छेत्र क निचके तलक पहोंचत रहा। तब इ चउहद्दी संकरी घाटी स होत भए योकनाम क छेत्र तलक जात रही। 12 तब इ चउहद्दी पूरब कइँती मुड़ी रही। इ सारीद स किसलोत्ताबोर क छेत्र तलक पहोंचत रही। तब इ चउहद्दी दाबरत अउ यापी तलक चलत गइ रही। 13 तब चउहद्दी पूरब मँ गथेपेर अउर इत्कासीन तलक लगातार रही। इ चउहद्दी रिम्मोन पइ खतम भइ। तब चउहद्दी मुड़ी अउर नेआ तलक गइ। 14 नेआ पइ फिन चउहद्दी मुड़ी अउ उत्तर कइँती गइ। इ चउहद्दी हन्नातोन तलक पहोंची अउर लगातार यिप्तहेल क घाटी तलक गइ। 15 इ चउहद्दी क भीतर कत्तात, नहलाल, सिम्रोन यिदला अउर बेतलेहेम सहर रहेन। सब मिलाइके इ सबइ बारह सहर आपन खेतन क साथे रहेन। 16 ऍह बरे इ सबइ सहर अउ छेत्र अहइँ जउन जबूलून क कबीलन क दीन्ह गएन। 17 चउथा पाँसा इस्साकार क परिवार समूह क कबिलन बरे डावा गवा रहा। 18 उ परिवार समूह क जउन भुइँया दीन्ह गइ रही उ इ अहइ: यिज्रेल, कसुल्लोत, सूनेम 19 हपारैम, सीओन, अनाहरत, 20 रब्बीत, किस्योन, एबेस, 21 रेमेत, एनगन्नीम, एन हददा अउर बेतपस्सेस। 22 ओनकर प्रदेस क चउहद्दी ताबोरसहसूसा अउर बेतसेमेस क छुअत रही। इ चउहद्दी यरदन छेत्र पइ खतम होत रही। सब मिलाइके सोहाह सहर अउर ओनकर खेत रहेन। 23 इ सबइ सहर अउर कस्बा इस्साकार परिवार समूह अउर ओनकइ कबीलन क दीन्ह गएन प्रदेस क हींस रहेन। 24 पाँचवाँ पाँसा आसेर क परिवार समूह अउर ओनकइ कबीलन बरे डावा गवा रहेन। 25 उ परिवार समूह क जउन भुइँया दीन्ह गइ उ इ अहइ: हेल्कत, हली, बेतेन, अच्छाप, 26 अलाम्मेल्लेक, अमाद अउ मिसाल।पच्छिमी चउहद्दी लगातार कम्मेर्ल पहाड़ अउ सीहोलिब्नात तलक रही। 27 तब चउहद्दी पूरब कइँती मुड़ी। इ चउहद्दी बेतदागोन तलक गइ। इ चउहद्दी जबूलून अउ यिप्तहेल क घाटी क छुअत रही। तब इ चउहद्दी बेतेमेक अउ नीएल क उत्तर क गइ। इ चउहद्दी काबुल क उत्तर स गइ रही। 28 तब इ चउहद्दी एब्रोन, रहोब अउर हम्मोन होत भइ काना तलक गइ रही। इ प्रदेस लगातार एक सक्तीसाली सहर सिदोन तलक गइ रही। 29 इ चउह्ददी रामा कइँती मुड़ी अउर फुन किलाबन्द सहर सूर तलक गइ। तब फुन मुड़ी अउर होसा तलक गइ। इ चउहद्दी अकज़ीब, 30 उम्मा, अपेक अउर रहोब क छेत्र मँ समुद्दर पइ खतम होत रही।सब मिलाइके हुआँ बाईस सहर अउ ओनकर खेत रहेन। 31 इ सबइ सहर अउ ओनके खेत आसेर परिवार समूह क दीन्ह गए भुइँया क हींसा रहेन। उ परिवार समूह क हर एक कबिला इ भुइँया क कछू हींसा पाएस। 32 छठा पाँसा नप्ताली क परिवार समूह अउर ओनकर कबीलन बरे डावा गवा रहेन। 33 ओनकर प्रदेस क चउहद्दी सानन्नीम क छेत्र मँ बिसाल बृच्छ स सुरू भइ। इ हेलेप क निअरे रहा। तब इ चउहद्दी अदानीमेकेब अउ यब्नेल स होइके गइ। इ चउहद्दी लक्वूम पइ खतम भइ। 34 तब इ चउहद्दी पच्छिम क अजनोत्ताबोर होइके गइ। इ चउहद्दी हुक्कोक पइ खतम भइ। इ चउहद्दी दक्खिन क जबूलून छेत्र तलक गइ। इ चउहद्दी पच्छिम मँ आसेर क छेत्र तलक पहोंचत रही। इ चउहद्दी पूरब मँ यरदन नदी पइ यहूदा क जात रही। 35 इ चउहद्दी क भीतर कछू बहोत सक्तीसाली सहर रहेन। इ सबइ सहर सिद्दीम, सेर, हम्मत, रक्कत, किन्नेरेत, 36 अदामा, रामा, हासोर, 37 केदेस, एद्रेइ, अन्हासेर, 38 यिरोन, मिगदलेल, होरेम, बेतनात अउ बेतसेमेस रहेन, सब मिलाइके हुआँ उन्नीस सहर अउर ओनकर खेत रहेन। 39 इ सबइ सहर अउर ओनकर चारिहुँ कइँती क कस्बन उ प्रदेस क हींसा रहेन, जउन नप्ताली क परिवार समूह क ओनकइ कबीलन क अनुसार दीन्ह ग रहेन। 40 तब सताएँ पाँसा दान क परिवार समूह अउर ओनकर कबीलन बरे डावा गवा रहेन। 41 ओनका जउन कछू प्रदेस दीन्ह गवा उ इ अहइ: सोरा, एस्ताओल, ईरसेमेस, 42 सालब्बीन, अय्यालोन, यितला, 43 एलोन, तिम्ना, एवोन, 44 एलतके, गिब्बतोन, बालात, 45 यहूद, बेनेबराक, गत्रिम्मोन, 46 मेयकोर्न, रक्कोन अउ यापो क निचके क छेत्र। 47 मुला दान क लोगन क आपन प्रदेस लेइ मँ परेसानी उठावइ क पड़ी। हुआँ सक्तीवाला दुस्मन रहेन अउर दान क लोग ओनका आसानी स हराइ नाहीं सकत रहेन। ऍह बरे दान क लोग गएन अउर लेसेम क खिलाफ लड़ेन। उ पचे लेसेम क हराएन अउ जउन लोग हुआँ रहत रहेन, ओनका मार डाएन। ऍह बरे दान क लोग लेसेम सहर मँ रहेन। उ पचे ओकर नाउँ बदलिके दान कइ दिहन काहेकि इ नाउँ ओनके परिवार समूह क पुरखा क रहा। 48 इ सबइ सबहिं सहरन अउर खेत उ भुइँया मँ रहेन जउन दान क परिवार समूह क ओनकर कबीलन क अनुसार दीन्ह ग रहेन। 49 इ तरह प्रदेसन क बँटवारा करब अउर अलग अलग परिवार समूहन क ओनका देब पूरा किहन। तब इस्राएल क सब लोग नून क पूत यहोसू क भी कछू प्रदेस देइ क निहचय किहन। 50 यहोवा हुवुम दिहस कि ओका उ भुइँया मिलइ। ऍह बरे उ पचे एप्रैम क पहाड़ी प्रदेस मँ यहोसू क विम्नत्सेरह सहर दिहन। इहइ उ सहर रहा, जेकरे बरे यहोसू कहे रहा कि मइँ ओका चाहत हउँ। यहोसू उ सहर क फुन: बनाएस अउर उ ओहमाँ रहइ लाग। 51 इ तरह इ सबइ प्रदेस इस्राएल क अलग अलग परिवार समूहन क दीन्ह गएन। याजक एलीआजार, नून क पूत यहोसू अउ हर एक परिवार समूह क नेता लोग सिलोह मँ मिलापवाला तम्बू क दुआर पइ यहोवा क मौजूदगी मँ बटुरा रहेन। इ तरह उ पचे प्रदेस क बँटवारा पूरा कइ लिहन।

20:1 तब यहोवा यहोसू स कहेस: 2 “मइँ मूसा क उपयोग तू लोगन क हुवुम देइ बरे किहेउँ ह। मूसा तू लोगन स सुरच्छा क विसेस सहर बनवइ बरे कहे रहा। तउ सुरच्छा बरे ओन सहरन क चुनाव करा। 3 अगर कउनो मनई कउनो मनई क मार डावत ह, मुला अइसा संजोग क कारण होत ह अउर ओकर इरादा ओका मार डावइ क नाहीं होत तउ उ मरे मनई क ओन रिस्तेदारन स जउन बदला लेइ बरे ओका मारि डावइ चाहत हीं, आत्मरच्छा बरे सुरच्छा नगर मँ सरण लइ सकत ह। 4 “उ मरा मनई क इ करइ चाही। जब उ पराइ अउर ओन सहरन मँ कउनो एक मँ पहोंचइ तउ ओकर सहर दुआर पइ रुकइ चाही। ओका सहर दुआरे पइ खड़ा रहइ चाही अउर नगर प्रमुखन क बतावइ चाही कि का घटा अहइ। तब नगर प्रमुख ओका सहर मँ प्रवेस करइ दइ सकत हीं। उ सबइ ओका आपन बीच मँ रहइ क जगहिया देइहीं। 5 मुला उ मनई जउन ओकर पाछा करत अहइ उ सहर तलक ओकर पाछा कइ सकत ह। अगर अइसा होत ह तउ नगर प्रमुखन क ओका यो ही नाहीं तजि देइ चाही, बल्कि ओनका उ मनई क रच्छा करइ चाही जउन ओनके लगे सुरच्छा बरे आवा अहइ। उ सबइ उ मनई क रच्छा ऍह बरे करिहीं कि उ जेका मार डाएस ह, ओका मारि डावइ क ओकर इरादा नाहीं रहा। इ संजोग क कारण होइ गवा। उ कोहान नाहीं रहा अउर उ मनई क मारइ क निहचय नाहीं किहे रहा। इ कछू अइसा रहा, जउन होइ ही गवा। 6 उ मनई क तब तलक सहर मँ रहइ चाही जब तलक उ सहर क निआव क कचहरी क जरिये ओकरे मोकदमा क निर्णय नाहीं होइ जात अउर ओका तब तलक उहइ सहर मँ रहइ चाही जब तलक महा याजक नाहीं मर जात। तब उ आपन घर मँ उ सहर मँ लउटि सकत ह, जहाँ स उ भागत भवा आवा रहा।” 7 ऍह बरे इस्राएल क लोग “सुरच्छा सहर” नाउँ क सहरन क चुनेन। उ सबइ सहर इ सबइ सहर रहेन:नप्ताली क पहाड़ी प्रदेस मँ गलील क केदेस; एप्रैम क पहाड़ी प्रदेस मँ सकेम; किर्य्यतर्बा जउन यहूदा क पहाड़ी प्रदेस मँ रहा। 8 रूबेन क प्रदेस क रेगिस्तान मँ, यरीहो क निअरे यरदन नदी क पूरब मँ बेसेर; गाद क प्रदेस मँ गिलाद मँ रमोत; मनस्से क प्रदेस मँ बासान मँ गोलान। 9 कउनो इस्राएली मनई या ओनके बीच रहइवाला कउना भी विदेसी, अगर कउनो क मार डावत ह, मुला इ संजोग क कारण होइ जात ह, तउ उ ओन सुरच्छा नगरन मँ स कउनो एक मँ सुरच्छा बरे पराइके जाइ सकत रहा। तब उ मनई हुआँ सुरच्छित होइ सकत रहा अउर पाछा करइवाला कउनो क जरिये मारा नाहीं जाइ सकत रहा। उ सहर मँ उ मनई क मोकदमा क निबटारा उ सहर क निआव क कचहरी क जरिये होइ।

21:1 लेवी परिवार समूह क सासक लोग याजक एलीआज़ार, नून क पूत यहोसू अउ इस्राएल क दूसर परिवार समूहन क सासक लोगन स बात किहेस। 2 इ कनान देसा मँ सीलो सहर मँ भवा। लेवी परिवार समूह क सासक लोग ओनसे कहेन, “यहोवा मूसा क आदेस दिहे रहा कि तू हम लोगन क रहइ बरे सहर देब्या अउर तू हम लोगन क मइदान देब्या जेहमाँ हमार जनावर चरि सकिहीं।” 3 ऍह बरे उ पचे यहोवा क आदेस क माना। उ पचे लेवी परिवार समूह क इ सबइ सहर अउर ओनके गोरुअन बरे खेत दिहेन: 4 पहिला पाँसा कोहात कबीला बरे जउन लेवी परिवार समूह स रहा। कछू कोहात कबिलन क एक हींसा स तेरह सहर दीन्ह ग रहेन। इ सबइ सहर उ प्रदेस मँ रहेन जउन यहूदा, सिमोन अउ बिन्यामीन क होत रहा। इ सबइ सहर ओन कोहातियन क दीन्ह ग रहेन जउन महा याजक हारून क संतान रहिन। 5 कोहात कबीला क दूसर सारे सदस्य क दस सहर दीन्ह ग रहेन। इ सबइ दस सहर एप्रैम, दान अउर मनस्से क आधा परिवार क समूहन क प्रदेसा मँ स रहेन। 6 गेसोर्न कबीला क तेरह सहर दीन्ह ग रहेन। इ सबइ सहर उ प्रदेस मँ रहेन जउन इस्साकार, आसेर, नप्ताली अउर बासान मँ मनस्से क आधा परिवार समूह क भुइँया मँ रहेन। 7 मरारी कबीला क बारह सहर दीन्ह ग रहेन। इ सबइ सहर ओन प्रदेसन मँ रहेन जउन रूबेन, गाद अउ जबूलून क रहेन। 8 इ तरह इस्राएल क लोग लेवी परिवार समूह क इ सबइ सहर अउर ओनके चारिहुँ ओर क खेत दिहन। उ पचे इ मूसा क आदेस क अनुसार यहोवा क हुकूम क मानइ बरे किहन। 9 यहूदा अउ सिमोन परिवार समूहन क प्रदेस क सहरन जेका कि लेवी परिवार समूह क दीन्ह ग रहेन इ सबइ रहेन। 10 इ सहरन कोहात कबीला क सदस्य क रहेन जउन कि लेवी परिवार समूह स हारून क संतानन रहेन। 11 उ पचे ओनका किर्यत-अर्बा जेका नाउँ अनाक क पिता अरबा क नाउँ पाइ धरा गवा रहेन, एकर चारिहुँ कइँती क खेतन क संग दिहेस। इ कसबा क यहुदा क पहाड़ी देस मँ हेब्रोन स भी जाना जात ह। 12 मुला खेत अउर किर्यत-अर्बा सहर क चारिहुँ कइँती क छोटकन सहर यपुन्ने क पूत कालेब क रहेन। 13 इ तरह उ पचे हेब्रोन सहर क हारून क संतानन क सुरच्छा क सहर क रूप मँ अउ लिब्ना अउर ऍकर चारिहुँ कइँती क घास क मइदान दइ दिहस। 14 उ पचे यत्तीर, एसतमो अउर ओनकर घास क मइदान, 15 होलोन, दबीर, 16 ऐन, युत्ता अउर बेतसेमेस भी ओनकइ चारिहुँ कइँती क घास क मइदान समेत पाएन। ऍन दुइनउँ समूहन क यहूदा अउ सिम्मोन क जरिये नौ सहर दीन्ह गएन। 17 उ पचे हारून क संतानन क उ सबइ सहर भी दिहन जउन बिन्यामीन परिवार समूह क रहेन। इ सबइ सहर गिबोन, गेबा अउर ओनकर घास क मइदान, 18 अनातोत अउ अल्मोन रहेन। उ पचे इ सबइ चार सहर अउर ऍनकइ चारिहुँ कइँती क सब खेत दिहन। 19 इ तरह इ सबइ सहर याजकन क दीन्ह गएन। (इ सबइ याजक, याजक लोग हारून क संतान रहेन।) सब मिलाइके तेरह सहर अउ ओनकइ सब खेत ओनके जनावरन क दीन्ह गएन। 20 कोहाती कबीला क दूसर लोगन क इ सहर दीन्ह गएन, जउन कि एप्रैम परिवार समूह क रहेन: 21 उ पचे ओनका एप्रैम क पहाड़ी मुल्क मँ सेकेम सहर जउन कि सुरच्छा क सहर रहा एकर चारिहुँ कइँती क घास क मइदान क संग दिहन। उ पचे गेजरे, 22 किबसैम अउर, बेथोहरोन भी ओनका दिहन। सब मिलाइके उ पचे चार सहर अउ ओनकर चारिहुँ कइँती क सारा खेत ओनका दिहन। 23 दान क परिवार समूह ओनका एलतके, गिब्बतोन, 24 अय्यालोन अउ गत्रिम्मोन दिहन। सब मिलाइके इ सबइ चार सहर अउ ओनकर सारा खेत ओनके जनावरन क बरे रहेन। 25 मनस्से क आधा परिवार समूह ओनका तानाक अउ गत्रिम्मोन दिहन। ओनका उ सबइ सारा खेत भी दीन्ह गएन जउन ऍन दुइनउँ सहरन क चारिहुँ ओर रहेन। 26 इ तरह इ सबइ दस जियादा सहर अउ ऍन सहरन क चारिहुँ कइँती क भुइँया ओनकर जनावरन बरे कोहाती समूह क दिन्ह गइ रही। 27 लेवी परिवार समूह क गेसोर्नी कबीला क इ सबइ सहर दीन्ह ग रहेन।मनस्से परिवार समूह क आधा परिवार ओनका बासान मँ गोलान दिहस। (गोलान एक सुरच्छा सहर रहा।) मनस्से ओनका बे-एसतरा भी दिहस। उ पचे इ दुइनउँ सहरन क चारिहुँ ओर क घास क मइदान भी पाएन। 28 इस्साकार क परिवार समूह ओनका किस्योन, दाबरत, 29 यरमूत अउ एनगन्नीम अउर ओनकर घास क मइदान दिहेस। वुल मिलाइके चार सहर। 30 आसेर क परिवार समूह ओनका मिसाल, अब्दोन, 31 हेल्कात अउ रहोब दिहस। एन चारिहुँ सहरन क चारिहुँ कइँती क भुइँया भी ओनका ओनकर जनावरन बरे दीन्ह गइ। 32 नप्ताली क परिवार समूह ओनका गलील मँ केदेस क सुरच्छा क सहर क रूप मँ दिहस। नप्ताली क परिवार समूह ओनका हम्मोतदोर अउ कर्तान भी दिहस। ओनकर घास क मइदान क संग तीन सहर। 33 सब मिलाइके गेसोर्नी कबीला तेरह सहर अउ ओनकर चारिहुँ ओर क खेतन पाएस। 34 दूसर लेवी कबीला मरारी कबीला रहा। मरारी लोगन क इ सहर दीन्ह ग रहेन: जबूलून क परिवार समूह ओनका योक्नाम, कर्ताह, अउर ओनकर घास क मइदान, 35 दिम्ना अउ नहलाल अउर ओनकर घास क मइदान - चार सहर दिहेन। 36 रूबेन क परिवार समूह ओनका यरदन क पूरब मँ बेसेर, यहसा, 37 केदमोत अउ मेपात सहर दिहन। सारी भुइँया, जउन ऍन चारिहुँ सहरन क चारिहुँ कइँती रही, मरारी लोगन क ओनकर जनावरन बरे दीन्ह गइ। 38 गाद क परिवार समूह ओनका गिलाद मँ सुरच्छा क सहर रामोत अउर एकर घास क मइदान दिहस। उ पचे ओनका महनैम अउर एकर घास क मइदान, 39 हेस्बोन अउ याजेर भी दिहन। गाद ऍन चारिहुँ सहरन क चारिहुँ कइँती क सारी भुइँया भी ओनकर जनावरन बरे दिहन। 40 सब मिलाइके मरारी कबीला जउन कि आखिरी लेवी कबीला रहा क बारह सहर दीन्ह गएन। 41 सब मिलाइके लेवी परिवार समूह अड़तालीस सहर अउर ओकर संग ऍन सहरन क चारिहुँ कइँती क खेत पाएन। इ सबइ सहर उ प्रदेसन मँ रहेन, जउन इस्राएल क दूसर परिवार समूह क लोगन क कबजा मँ रहेन। 42 हर एक सहर क साथ ओनकइ चारिहुँ कइँती क अइसी भुइँया अउर खेत रहेन। जेन पइ जनावरन जिन्नगी बिताइ सकत रहेन। इहइ बात हर सहर क साथे रही। 43 इ तरह यहोवा इस्राएल क लोगन क जउन वचन दिहे रहा, ओका पूरा किहस। उ ओनका सारा प्रदेसन दइ दिहस जेका देइ क उ ओनकर पुरखन क वचन दिहे रहा। लोग उ प्रदेसन क लिहन अउर ओहमाँ रहइ लागेन। 44 अउर यहोवा ओनकर प्रदेस क चारिहुँ कइँती सान्ति स्थापित होइ दिहस काहेकि उ ओनकइ संतानन स वचन दइ रहा। ओनकर कउनो दुस्मन ओनका नाहीं हराएन। यहोवा इस्राएल क लोगन क हर एक दुस्मन क हरावइ दिहस। 45 यहोवा इस्राएलियन क दीन्ह गए आपन सबहीं वचनन क पूरा किहस। कउनो अइसा वचन नाहीं रहा, जउन पूरा न भवा होइ। हर एक वचन पूरा भवा।

22:1 तब यहोसू रूबेन, गाद क परिवार समूह अउ मनस्से क आधा परिवार समूह क सबहिं लोगन क एक सभा किहस। 2 यहोसू ओनसे कहेस, “तू पचे यहोवा क सेवक मूसा क दीन्ह गए सबहिं हुवुमन क मान्या ह। अउर तू पचे मोरे सबाहिं हुवुमन क भी मन्या ह। 3 अउर इ पूरा समइ मँ तू लोग इस्राएल क दूसर लोगन क मदद किह्या ह। तू लोग यहोवा क ओन सबहिं हुवुमन क बहोत ही होसियार स मानइ रह्या, जेनका तोहार परमेस्सर यहोवा तू पचन्क दिहे रहा। 4 तोहार परमेस्सर यहोवा इस्राएल क लोगन क सान्ति देइ क वचन दिहे रहा। ऍह बरे अब यहोवा आपन वचन पूरा कइ लिहस ह। इ समइ तू लोग आपन घरे लउटि सकत ह। तू लोग, आपन उ प्रदेस मँ जाइ सकत ह जउन तू पचन्क दीन्ह ग अहइ। इ प्रदेस यरदन नदी क पूरब मँ अहइ। इ उहइ प्रदेस अहइ जेका यहोवा क सेवक मूसा तू पचन्क दिहे रहा। 5 मुला याद राखा कि जउन व्यवस्था मूसा तू पचन्क दिहे अहइ, ओनका माना जात रहइ। तू पचन्क आपन परमेस्सर यहोवा स पिरेम करब अउ ओकरे हुवुमन क मानइ क अहइ। तू पचन्क ओनके पाछे चलइ चाही, अउर पूरी आस्था क साथ ओनकर सेवा करा।” 6 तब यहोसू ओनका आसीर्बाद दिहस अउर उ पचे बिदाइ लिहन। उ पचे आपन घरे लउटि गएन। 7 मूसा आधा मनस्से परिवार समूह क बासान प्रदेस दिहे रहा। यहोसू दूसर आधा मनस्से परिवार समूह क यरदन नदी क पच्छिम मँ प्रदेस दिहस। यहोसू ओनका आपन घरे पठएसा यहोसू ओनका आसीर्बाद दिहस। 8 उ कहेस, “तू पचे बहोत सम्पन्न अहा। तोहरे पचन्क लगे चाँदी, सोना अउर दूसर बहुमूल्य जेवरन क संग बहोत स जनावर अहइँ। तू लोगन क लगे अनेक सुन्नर वस्त्र अहइँ। तू पचे आपन दुस्मनन स बहोत स चिजियन लिह्या ह। ऍन चिजियन क तू पचन्क आपुस मँ बाँट लेइ चाही। अब आपन आपन घरे जा।” 9 ऍह बरे रूबेन अउ गाद क परिवार समूह अउर मनस्से क आधा परिवार समूह इस्राएल क दूसर लोगन स बिदाइ लिहेन। उ पचे कनान मँ सीलो मँ रहेन। उ पचे उ जगह क तजेन अउर उ पचे गिलाद क लउटेन। इ ओनकर आपन प्रदेस रहा। मूसा ओनका इ प्रदेस दिहे रहा, काहेकि यहोवा ओका अइसा करइ क आदेस दिहे रहा। 10 रूबेन, गाद अउ मनस्से क अधा परिवार समूह क लोग गेलिलोथ नाउँ क जगह क जात्रा किहन। इ यरदन नदी क किनारे कनान देस मँ रहा। उ जगह पइ उ पचे एक ठु सुन्नर वेदी बनाएन। 11 मुला इस्राएल क लोगन क दूसर समूहन, जउन तब तलक सीलो मँ रहेन, उ वेदी क बारे मँ सुनेन जउन ऍन तीनहुँ परिवार समूह बनाए रहेन। उ पचे इ सुनेन कि इ वेदी कनान क सीमा पइ गोत्र नाउँ क जगह पइ रही। इ यरदन नदी क किनारे इस्राएल कइँती रही। 12 इस्राएल क सबहिं परिवार समूह ऍन तीनउँ परिवार समूहन पइ बहोत कोहाइ गएन। उ पचे बटुर गएन अउर उ पचे ओनकइ खिलाफ जुद्ध करइ क निहचय किहन। 13 ऍह बरे इस्राएल क मनइयन कछू लोगन क रूबेन अउर गाद क परिवार समूह अउ मनस्से क आधा परिवार समूह क लोगन स बातन करइ बरे पठएन। इस्राएल क लोग प्रमुख याजक जउन कि एलीआज़र क पूत पीनहास रहा क बात पइ चर्चा करइ बरे पठाएस। 14 उ पचे हुआँ क परिवार समूहन क दस नेतान क पठएन। उ पचे सीलो मँ ठहरेन। इस्राएल क परिवार समूहन मँ हर एक परिवार समूह स एक मनई रहा। 15 इ तरह इ सबइ गियारह मनई गिलाद गएन। उ पचे रूबेन, गाद अउ मनस्से क लोगन स बातन करइ गएन। गियारह मनइयन ओनसे कहेन: 16 “इस्राएल क सबहिं लोग तू पचन्स पूछत हीं: तू पचे इस्राएल क परमेस्सर क खिलाफ इ काहे किह्या ह तू पचे यहोवा क खिलाफ कइसे होइ गया? तू लोग आपन बरे वेदी काहे बनाया? तू पचे जानत अहा कि इ परमेस्सर क सिच्छा क खिलाफ अहइ। 17 पोर नाउँ क जगह क याद करा।हम लोग पाप क कारण अबहुँ कस्ट सहित ह। इ बड़के पाप बरे परमेस्सर इस्राएल क बहोत स लोगन क बुरी तरह बीमार कइ दिहे रहा अउर हम लोग अबहुँ उ बेरामी क कारण कस्ट सहत अही। 18 अउर अब तू पचे उहइ करत अहा। तउ पचे यहोवा क विरुद्ध जात बाट्या। का तू पचे यहोवा क हुवुम क मानइ स मना करब्या? अगर तू पचे जउन करत अहा, बन्द नाहीं करत्या तउ यहोवा इस्राएल क हर मनई प कोहाइ जाइ। 19 “अगर तोहार पचन्क प्रदेस उपासना बरे ठीक नाहीं अहइ तउ हमरे प्रदेस मँ आवा। यहोवा क तम्बू हमरे प्रदेसन मँ अहइ। तू पचे हमार कछू पहँटा लइ सकत ह अउर ओहमाँ बसि सकत ह। मुला यहोवा क खिलाफ जिन ह्वा। दूसर वेदी जिन बनावा। हम लोगन क संग पहिले स ही आपन परमेस्सर यहोवा क वेदी यहोवा क संग मलइ बरे खास तम्बू मँ अहइ। 20 “जेरह क पूत आकान क सुमिरा। आकान आपन पाप क कारण मरा। उ ओन चीजन क बारे मँ हुवुम क मानइ स इन्कार किहस, जेनका नस्ट कीन्ह जाब रहा। उ एक मनई परमेस्सर क नेम क तोड़ेस, मुला इस्राएल क सबहिं लोगन क दण्ड मिला। आकान आपन पाप क कारण मरा। मुला बहोत स दूसर लोग भी मरेन।” 21 रूबेन अउ गाद क परिवार समूह क लोग अउर मनस्से क आधा परिवार समूह क लोग इस्राएल क कबीला क प्रमुखन क जवाब दिहन। उ पचे इ कहेन, 22 “हमार परमेस्सर यहोवा अहइ। हम लोग फुन दोहरावत अही कि हमार परमेस्सर यहोवा अहइअउर परमेस्सर जानत ह कि तू लोग भी इ जाना। तू लोग ओकर फइसला कइ सकत अहा जउन हम लोग किहे अही। अगर तू लोगन क इ बिस्सास अहइ कि हम लोगा पाप किहे अही तउ तू लोग हम पचन्क अबहिं मार सकत ह। 23 अगर हम पचे परमेस्सर क नेम तोड़े अही तु हम कहब कि यहोवा खुद हमका सजा देइ। का तू लोग इ सोचत अहा कि हम लोग इ वेदी क होमबलि चढ़ावइ अउर अन्नबलि अउर मेलबलि चटावइ बरे बनावा ह 24 नाहीं। हम लोग ऍका इ उछेस्य स नाहीं बनावा ह। हम लोग इ वेदी काहे बनावा ह हम पचन्क डर रहा कि भक्स्सि मँ तोहार सबन्क लोग हम पचन्क आपन रास्ट्र क एक ठु हींसा नाहीं समुझिहीं। तब तोहरे लोग इ कहिहीं, तू लोग इस्राएल क परमेस्सर यहोवा क उपासना नाहीं कइ सकत्या। 25 परमेस्सर हम लोगन्क यरदन नदी क दूसर कइँती प्रदेस दिहे अहइ। एकर अरथ इ भवा कि यरदन नदी क सीमा बनावा ह। हमका डर अहइ कि जब तोहरे पचन्क गदेलन बड़ा होइके इ प्रदेस पइ सासन करिहीं तब उ पचे हमका बिसरि जइहीं, कि हम भी तोहार लोग अही। उ पचे हमसे कहिहीं, ‘हे रूबेन अउर गाद क परिवार समूह, तू पचे इस्राएल क हींसा नाहीं अहा!’ तब तोहार संतानन हमरे संतानन क यहोवा क उपासना करइ स रोकिहीं। 26 “ऍह बरे हम लोग इ वेदी क बनावा। मुला हम लोग इ योजना नाहीं बनावत अही कि यह पइ होमबलि चढ़ाउब अउर बलियन क देब। 27 हम पचे जउने सच्चे उद्धेस्य बरे वेदी बनाए रहे, उ आपन लोगन क सिरिफ देखाउब रहा कि हम पचे उ परमेस्सर क उपासना करित ह जेकर तू लोग उपासना करत अहा। इ वेदी तोहरे पचन बरे, हम लोगन बरे अउर भपिस्स मँ हम लोगन क गदेलन बरे इ बात क प्रमाण होइ कि हम लोग परमेस्सर क उपासना करित ह। हम लोग यहोवा क बलियन, अन्नबलि अउ मेलबलि चड़ाइत ह। हम पचे चाहत रहे कि तोहार गदेलन बड़इँ अउर जान लेइँ कि हम लोग भी तोहरी तरह इस्राएल क मनई अही। 28 भविस्स मँ अगर अइसा होत ह कि तोहार गदेलन कहइँ, ‘हम लोग इस्राएल स सम्बंध नाहीं रखित तउ हमार गदेलन तब कहि सकिहीं कि होसियारी स धियान देइँ कि हमार पुरखन, जउन हम पचन स पहिले रहेन, एक ठु वेदी बनाइ रहेन। इ वेदी ठीक वइसे ही अहइ जइसी पवित्तर तम्बू क समन्वा यहोवा क वेदी अहइ। हम लोग इ वेदी क उपयोग बलि देइ बरे नाहीं करत। मुला इ बाने क संकेत करत ह कि हम लोग इस्राएल क एक हींसा अही।” 29 “फुरे तउ इ अहइ कि हम लोग यहोवा क खिलाफ नाहीं होइ चाहित। हम लोग अब ओकर अनुसरण करब तजि देइ नाहीं चाहित। हम लोग जानत अही कि एक मात्र सच्ची वेदी उहइ अहइ जउन पवित्तर तम्बू क समन्वा अहइ। उ वेदी, हमरे परमेस्सर यहोवा क अहइ।” 30 याजक पीनहास अउर दस नेतन रूबेन अउर गाद क परिवार समूह अउ मनस्से क आधा परिवार समूह क लोगन क कही गइ बात सुनेन। उ पचे ओनकइ बात स संतुट्ठ रहेन। 31 ऍह बरे एलीआजार क पूत याजक पीनहास कहेस, “अब हम लोग समुझत अही कि यहोवा हमरे संग अहइ अउर हम लोग जानत अही कि तू पचन मँ स कउनो भी ओकरे खिलाफ नाहीं गवा अहा। हम लोग खुस अही कि इस्राएल क लोगन क यहोवा स सजा नाहीं मिली।” 32 तब पीनहास अउ नेतन उ जगह क तजेन अउर उ पचे आपन घरे चला गएन। उ पचे रूबेन अउर गाद क लोगन क गिलाद प्रदेस मँ तजेन अउर कनान क लउटि गएन। उ पचे लउटिके इस्राएल क लोगन क लगे गएन अउर जउन कछू भवा रहा, ओनसे कहेस। 33 इस्राएल क लोग भी सन्तुट्ठ होइ गएन। उ पचे खुस रहेन अउर उ पचे परमेस्सर क धन्यवाद दिहन। उ पचे निर्णय लिहन कि उ पचे रूबेन, गाद अउ मनस्से क आधा परिवार समूह क लोगन क खिलाफ जाइके नाहीं लड़िहीं। उ पचे ओन प्रदेसन क नस्ट न करइ क निर्णय किहन। 34 अउर रूबेन अउर गाद क लोग कहेन, “इ वेदी सबहिं मनइयन क इ बतावत ह कि हम पचन्क इ बिस्सास बाटइ कि यहोवा परमेस्सर अहइ अउर ऍह बरे उ पचे वेदी क नाँउ ‘प्रमाण’ धरेन।”

23:1 यहोवा इस्राएल क ओकरे चारिहुँ कइँती क ओनके दुस्मनन स सान्ति प्रदान किहस। यहोवा इस्राएल क सुरच्छित बनाएस। बरिस बीत गएन अउर यहोसू बहोत बूढ़ा होइ गवा। 2 इ समइ यहोसू इस्राएलियन अउर ओनका बुजुर्गन, नेतन, निआवधीसन अउर फउज क अफसरन क बइठक बोलाएस। यहोसू ओन लोगन स कहेस, “मइँ बहोत बूढ़ा होइ गवा अहउँ। 3 तू पचे उ लख्या जउन यहोवा हमरे दुस्मनन क संग किहस। उ इ हमरी मदद बरे किहस। तोहार पचन्क परमेस्सर यहोवा तोहरे सबन बरे जुद्ध किहस। 4 लखा, मइँ ओन रास्ट्रन क सबहीं भुइँया क बाँट दिहस ह जेका इस्राएल क परिवार समूह स निकाला नाहीं गएस। इ भुइँया यरदन नदी अउ पच्छिम क भुमध्य समुद्दर क बीच अहइ, अउर ओन रास्ट्रन क सामिल कइ लिहस जेका मइँ हरइ रहा। 5 उ तोहार पचन्क परमेस्सर यहोवा लोगन क उ जगह क तजि देइ बरे मजबूर करी। जइस ही पचे उ प्रदेस मँ घुसब्या यहोवा ओन लोगन क उ प्रदेस तजइ बरे मजबूर करी। तोहार परमेस्सर यहोवा तू पचन्क इ वचन दिहस ह। 6 “तू पचन्क ओन सबइ हुवुमन क मानइ मँ सावधान रहइ चाही जउन यहोवा हमका दिहे अहइ। उ हर नियमन अउर विधियन क पालन करा जउन मूसा क व्यवस्था क किताबे मँ लिखा अहइ। उ व्यवस्था क खिलाफ जिन जा। 7 इ करा ताकि गैर इस्राएली लोग जउन कि तोहका आपन दोस्त बनाइ बरे नाही ललचाइ। ओनकइ देवतन क पूजा नाही करा अउर ना ही ओकर देवतन क नाउँ ल्या। किरिया खाइ बरे ओन देवतन क नाउँ क प्रयोग जिन करा। अउर ओन देवतन क पूजा अउ सेवा जिन करा। 8 तू पचन्क सदा आपन परमेस्सर यहोवा क अनुसरण करइ चाही। तू पचे इ बीते जमाने मँ किह्या ह अउर तू पचन्क इ करत रहइ चाही। 9 “यहोवा अनेक सक्तीवाला रास्ट्रन क हरावइ मँ तोहार मदद किहेस ह। यहोवा ओन लेगन क आपन देस तजइ बरे मजबूर किहस ह। कउनो भी रास्ट्र तू पचन्क हरावइ मँ समरथ नाहीं होइ सका। 10 यहोवा क मदद स इस्राएल क एक मनई एक हजार मनइयन क हराइ सकत ह। ऍकर कारण इ अहइ कि तोहार परमेस्सर यहोवा तोहरे बरे जुद्ध करत ह। यहोवा इ करइ क वचन दिहेस ह। 11 ऍह बरे तू पचन्क आपन परमेस्सर यहोवा क भक्ति करत रहइ चाही। आपन पूरी आतिमा स ओहसे पिरेम करा। 12 “यहोवा क रस्ता स कबहुँ दूर जिन जा। ओन दूसर लोगन स दोस्ती न करा जउन अबहिं तलक तोहरे पचन्क बीच तउ अहइँ मुला जउन इस्राएल क अंग नाहीं अहइँ। ओनमाँ स कउनो क संग बियाह जिन करा। मुला अगर तू पचे ऍन लोगन क मीत बनब्या, 13 तब तोहार परमेस्सर यहोवा तोहरे दुस्मनन क हरावइ मँ तोहार मदद नाहीं करी। इ तरह इ सबइ लोग तोहरे बरे एक जाल बन जइहीं। मुला उ पचे तोहरे पचन्क पिठिआ बरे कोड़न अउ तोहरी सबन्क आँखिन बरे काँटा बन जइहीं। उ पचे पलट जइहीं अउर नफरत करिहीं जब तलक कि तू पचे इ नीक भुइँया स बिदा न होइ जाब्या जेका तोहार परमेस्सर यहोवा तू पचन्क दिहे बाटइ। मुला अगर तू पचे इ हुवुम क नाहीं मनब्या तउ तू पचे नीक भुइँया क खोइ देब्या। 14 इ करीब-करीब मोरे मरइ क समइ बा। तू पचे जानत अहा अउर फुरइ बिस्सास करत अहा कि यहोवा तोहरे पचन्क बरे बहोतइ बड़के काम किहेस ह। तू सबइ जानत अहा कि उ आपन दीन्ह भए वचनन मँ स कउनो क पूरा करइ मँ असफल नाहीं रहा अहइ। यहोवा ओन सबहिं वचनन क पूरा किहेस ह, जउन उ हमका दिहस ह। 15 जे तरह उ सबहिं आसीर्बाद जउन तोहार परमेस्सर यहोवा दिहस ह, पूरी तरह सच भएन, उहइ तरह सबहिं विपत्तियन क घटइ क यहोवा कारण होब्या, जब तलक कि उ तोहका इ नीक भुइँया क स जउन यहोवा तोहार परमेस्सर तोहका दिहस ह नास नाहीं कइ देइ। 16 इ घटि जाइ, अगर तू पचे आपन परमेस्सर यहोवा क संग कीन्ह गइ समझौता क मानइ स इंकार करब्या। अगर तू पचे दूसर देवतन क लगे जाब्या अउर ओकर आराधना करब्या तउ तू पचे इ भुइँया क खोइ देब्या। अगर तू पचे अइसा करब्या तउ यहोवा तू पचन पइ बहोत गुस्साइ जाइ। तब तू पचे इ धरती स हाली गायब होइ जाब्या जेका उ तू पचन्क दिहस ह।”

24:1 तब इस्राएल क सबहिं परिवार समूह सकेम मँ बटुर गएन। यहोसू ओन सबहिं क हुआँ एक संग बोलाएस। तब यहोसू इस्राएल क बुजुर्गन, ओनकइ नेतन, ओनकइ निआवधीसन अउर ओनकइ फउज क अफसरन क बोलाएस। इ सबइ मनई परमेस्सर क समन्वा खड़ा भएन। 2 तब यहोसू सबहिं लोगन स बात किहस। उ कहेस, “मइँ उ कहत हउँ जउन यहोवा, इस्राएल क परमेस्सर तू पचन्स कहत अहइ:बहोत समइ पहिले तोहरे पचन्क पुरखन परात नदी क दुसरी कइँती रहत रहेन। मइँ ओन मनइयन क बारे मँ बात करत अहउँ, जउन इब्राहीम अउर नाहोर क पिता तेरह क तरह रहेन। ओन दिनन तोहार पचन्क पुरखन दूसर देवतन क पूजा करत रहेन। 3 मुला मइँ, यहोवा तोहरे पचन्क पुरखन इब्राहीम क नदी क दूसर कइँती क भुइँया स बाहेर लिआएउँ। मइँ ओका कनान क भुइँया स होइके लइ गएउँ अउर ओका अनेक सन्तानन दीन्ह। मइँ इब्राहीम क इसहाक नाउँ क पूत दिहेउँ। 4 मइँ इसहाक क याकूब अउर एसाव नाउँ क दुइ पूत दिहेउँ। मइँ साईर पहाड़े क चारिहुँ कइँती क प्रदेस एसाव क दिहेउँ। मुला याकूब अउर ओकर सन्तानन हुआँ नाहीं रहिन। मिस्र चले गएन। 5 तब मइँ मूसा अउ हारून क मिस्र पठएउँ। मइँ मिस्र क लोगन पइ भयंकर विपत्तियन पड़इ दिहेउँ। तब मइँ तू सबइ पचन्क मिस्र स बाहेर लिआएउँ। 6 इ तरह मइँ तोहरे पचन्क पुरखन क मिस्र स बाहेर लिआएउँ। उ पचे लाल सागर तलक आएन अउर मिस्र क लोग ओनकर पाछा करत रहेन। ओनके संग रथ अउ घुड़सवार रहेन। 7 ऍह बरे मनइयन मोसे यानी यहोवा स मदद माँगेन अउर मइँ मिस्र क लोगन पइ बहोत बड़की विपत्ति आवइ दीन्ह। मइँ यानी यहोवा समुद्दर मँ ओनका बोर दिहेउँ। तू लोग खुद ही लख्या कि मइँ मिस्र क फउज क संग का किहेउँ। ओकरे पाछे तू पचे रेगिस्तान मँ लम्बे समइ तलक रह्या। 8 तबइ मइँ तू पचन्क एमोरी लोगन क धरती मँ लिआएउँ। इ यरदन नदी क पूरब मँ रहा। उ सबइ लोग तोहरे पचन्क खिलाफ लड़ेन, मुला मइँ तू पचन्क ओनका हरावइ दिहेउँ। मइँ तू पचन्क ओन लोगन्क नस्ट करइ बरे सक्ती दिहेउँ। तब तू पचे उ धरती पइ अधिकार किह्या। 9 तब सिप्पोर क पूत मोआब क राजा बालाक इस्राएल क लोगन क खिलाफ लड़इ क तइयारी किहस। राजा बोर क पूत बिलाम क बोलाएस। उ बिलाम स तू पचन क सराप देइ क कहेस। 10 मुला मइँ यहोवा बिलाम क एक न सुनेउँ। ऍह बरे बिलाम आपन चाहत क खिलाफ तू लोगन बरे नीक चीज होइ क याचना किहस। उ तू पचन्क खुले मन स आसीर्बाद दिहस। इ तरह मइँ तू पचन्क बिलाम स बचाएउँ। 11 तब तू पचे यरदन नदी क पार तलक जात्रा किह्या। तू लोग यरीहो प्रदेस मँ आया। यरीहो सहर मँ बसइयन तोहर पचन्क खिलाफ लड़ेन। एमोरी, परिज्जी, कनानी, हित्ती, गिर्गासी, हिव्वी अउर यबूसी लोग भी तोहरे पचन्क खिलाफ लड़ेन। मुला मइँ तू पचन्क ओन सबका हरावइ दिहेउँ। 12 जब तोहार पचन्क फउज अगवा बढ़ी तउ तोहार दुस्मन पराइ गएन जइसे मइँ ओनका अउर अमोरी राजा क खिलाफ भोंड़ा पठाइ रहा। ऍह बरे तू लोग आपन धनुस या तरवार क प्रयोग किए बिना ही ओन पइ कब्जा कइ लिहा। 13 इ मइँ, ही रहेउँ, जउन तू पचन्क उ धरती दिहेउँ। मइँ तू पचन्क उ धरती दिहेउँ जहाँ तू पचन्क कउनो काम नाहीं करइ क पड़ा। मइँ तू पचन्क सहर दिहेउँ जेनका तू पचन्क बनाउब नाहीं भवा। अब तू पचे उ धरती अउर ओन सहरन मँ रहत अहा। तोहरे सबन्क लगे अंगूरे क लता अउ जइतून क बाग अहइँ, मुला ओन बागन क तू पचे नाहीं लगाया।” 14 तब यहोसू लोगन स कहेस, “अब तू लोग यहोवा क कहब सुनि लिह्या ह। ऍह बरे तू पचन्क यहोवा क सम्मान करइ चाही अउ ओकर सच्ची सेवा करइ चाही। ओन लबार देवतन क बहाइ द्या जेनका तोहार पचन क पुरखन पूजत रहेन। इ सब कछू बहोत समइ क पहिले फरात नदी क दूसर कइँती, मिस्र मँ भी भवा रहा। अब तू पचन्क यहोवा क सेवा करइ चाही। 15 “मुला होइ सकत ह कि तू पचे यहोवा क उपासना नाहीं करइ चहत्या। तू पचन्क खुद आज ही इ चुन लेइ चाही। तू पचन्क आजु तय कइ लेइ चाही कि तू पचे केकर उपासना करब्या। तू पचे ओन देवतन क उपासना करब्या जेनकर उपासना तोहरे पचन्क पुरखन उ समइ करत रहेन जब उ पचे नदी क दूसर कइँती रहत रहेन? या तू पचे ओन एमोरी लोगन क देवतन क उपासना करइ चाहत अहा जउन हिआँ रहत रहेन? जहाँ तलक मोरी अउ मोरे परिवार क बात अहइ, हम यहोवा क उपासना करब।” 16 तब मनइयन जवाब दिहन, “नाहीं, हम यहोवा क अनुसरण करब कबहुँ न तजब। नाहीं, हम लोग कबहुँ दूसर देवतन क सेवा नाहीं करब। 17 हम जानित ह कि उ परमेस्सर यहोवा रहा जउन हमरे लोगन क मिस्र स लिआवा। हम लोग उ देस मँ दास रहे। मुला यहोवा हम लोगन बरे हुआँ बड़कन-बड़कन काम किहस। उ उ देस स हम लोगन क बाहेर लिआवा अउर उ समइ तलक हमार रच्छा करत रहा जब तलक हम लोग दूसर देसन स होइके जात्रा कीन्ह। 18 तब यहोवा ओन एमोरी लोगन क हरावइ मँ हमार मदद किहस जउन उ प्रदेस मँ रहत रहेन जेहमाँ अज हम पचे रहित ह। ऍह बरे हम लोग यहोवा क सेवा करतइ रहब। काहेकि उ हमार परमेस्सर अहइ।” 19 तब यहोसू कहेस, “तू पचे यहोवा क काफी सेवा अच्छी तरह स नाहीं कइ सकब्या। यहोवा, पवित्तर परमेस्सर अहइ अउर परमेस्सर आपन लोगन क जरिये दूसर देवतन क पूजा स घिना करत ह। अगर तू पचे उ तरह परमेस्सर क खिलाफ जाब्या तउ परमेस्सर तू पचन्क छिमा नाहीं करी। 20 तू पचे यहोवा क तजि देब्या अउर दूसर देवतन क सेवा करब्या तब यहोवा तू पचन पइ भयंकर विपत्तियन क लिआइ। यहोवा तू पचन्क बरबाद करी। यहोवा तोहरे पचन्क बरे अच्छा रहा ह, मुला अगर तू पचे ओकरे विरूद्ध चलत अहा तउ उ तू पचन्क नास कइ देइ।” 21 मुला मनइयन यहोसू स कहेन, “नाहीं। हम पचे यहोवा क सेवा करब।” 22 तब यहोसू कहेस, “खुद आपन अउर आपन संग क लोगन क चारिहुँ कइँती निहारा। का तू पचे जानत अहा अउर अंगीकार करत अहा कि तू पचे यहोवा क सेवा करब चुन्या ह का तू सब एकर गवाह अहा?”मनइयन जवाब दिहन, “हाँ, इ फुरइ अहइ। हम लोग धियान रखब कि हम लोग यहोवा क सेवा करब चुना ह।” 23 तब यहोसू कहेस, “ऍह बरे आपन बीच मँ जउन बीच मँ जउन लबार देवतन रखत अहा ओनक जरइ द्या। आपन पूरा हिरदइ स इस्राएल क परमेस्सर यहोवा स पिरेम करा।” 24 तब मनइयन यहोसू स कहेन, “हम लोग यहोवा, आपन परमेस्सर क सेवा करब। हम लोग ओकर आग्या क पालन करब।” 25 ऍह बरे यहोसू लोगन बरे उ दिन एक वाचा किहस। यहोसू इ वाचा क ओन लोगन क जरिये मानइ बरे एक ठु नेम बनाइ दिहस। इ सकेम नाउँ क सहर मँ भवा। 26 यहोसू इ सबइ बातन क परमेस्सर क व्यवस्था क किताबे मँ लिखेस। तब यहोसू एक ठु बड़की सिला लिआवा। इ सिला इ करारा क प्रमाग रही। उ इ सिला क यहोवा क पवित्तर तम्बू क निअरे बलूत बृच्छ क खाले धरेस। 27 तब यहोसू सबहिं लोगन स कहेस, “इ सिला तू पचन्क ओका याद दिआवइ मँ सहायक होइ जउन कछू हम पचे आजु कहे अही। इ सिला तब हिआँ रही जब परमेस्सर हम लोगन स बतियात रहा। ऍह बरे इ सिला कछू अइसी रही जउन तू पचन्क याद दिआवइ मँ मदद करी कि आजु क दिन का भवा रहा। इ सिला तोहरे बरे एक गवाह बनी रही। इ तू पचन्क तोहर परमेस्सर यहोवा क खिलाफ जाइ स रोकी।” 28 तब यहोसू लोगन स आपन घरे लउटि जाइ क कहेस तउ तउ हर एक मनई आपन प्रदेस क लउटि गवा। 29 ओकरे पाछे नून क पूत यहोसू मर गवा। उ एक सौ दस बरिस क रहा। 30 यहोसू आपन भुइँया तिम्नत्सेरह मँ दफनावा गवा इ रास पहाड़ क उत्तर मँ एप्रैम क पहाड़ी प्रदेस मँ रहा। 31 इस्राएल क लोगन यहोसू क जिन्नगी क समइ मँ यहोवा क उपासना किहन अउर यहोसू क मरइ क पाछे भी, लोग यहोवा क उपासना करत रहेन। इस्राएल क लोग तब भी यहोवा क उपासना करत रहेन जब तलक सबहिं बुजुर्गन जउन कि यहोसू क पाछे जिअत रहेन। इ सबइ उ सब नेता रहेन, जउन उ पचे उ सब कछू लखे रहेन जउन यहोवा इस्राएल बरे किहे रहा। 32 जब इस्राएल क लोगन मिस्र तजि दिहेन तब उ पचे यूसुफ क तने क हाड़ आपन संग लइ आएन रहेन। ऍह बरे लोग यूसुफ क हाड़ सकेम मँ दफनाएन। उ पचे हाड़न क उ भुइँया मँ दफनाएन जेका याकूब सकेम क बाप हमोर क पूतन स बेसहे रहा। याकूब उ भुइँया क चाँदी क सौ सिक्कन स बेसहे रहा। इ प्रदेस यूसुफ क सन्तानन क रहा। 33 हारून क पूत एलीआजार मर गवा। उ गिबा मँ दफनावा गवा। गिबा एप्रैम क पहाड़ी प्रदेस मँ एक ठु सहर रहा। उ सहर एलीआजार क पूत पीनहास क दीन्ह गवा रहा।