1:1 परमेस्सर क सँदेसा। इ सँदेसा यहोवा क अहइ। इ सँदेसा क मलाकी इस्राएल क दिहस। 2 यहोवा कहेस, “लोगो, मइँ तू पचन्स पिरेम करत हउँ।”मुला तू कह्या, “कइसे पता लागइ कि तू हम स पिरेम करत अहा?”यहोवा कहेस, “एसाव याकूब क भाई रहा। ठीक? मुला मइँ याकूब क चुनेउँ 3 अउर मइँ एसाव क अंगीकार नाहीं किहेउँ। मइँ एसाव क पहाड़ी प्रदेस क नस्ट किहेउँ। एसाव क देस नस्ट कीन्ह गवा अउर अब हुआँ सिरिफ जंगली वूवुर रहत हीं।” 4 संभव अहइ एदोम क लोग कहइँ, “हम पचे नस्ट कीन्ह गएन। मुला हम लोग वापस जाब अउर आपन सहरन क फुन बनाउब।”मुला सर्वसक्तीमान यहोवा कहत ह, “अगर उ पचे ओन सहरन क फुन बनावत हीं तउ मइँ ओनका फुन नस्ट करब।” लोग एदोम स कहब, दुट्ठ प्रदेस अउर लोग जेहसे यहोवा सदा बरे घिना करत रहेन। 5 हे लोगो, तू पचे इ सबइ लखब्या अउर कहब्या, “यहोवा इस्राएल स बाहेर भी समानित भएस ह।” 6 सर्वसक्तीमान यहोवा कहेस, “गदेलन आपन बाप क सम्मान करत हीं। नउकरन आपन सुआमियन क सम्मान करत हीं। मइँ तोहरे बाप क जइसा हउँ, किन्तु उ सम्मान कहाँ बाटइ जेका तोहका मोका देइ चाही? मइँ तोहार सुआमी हउँ, किन्तु उ सम्मान कहाँ बाटइ जेका तोहका मोका देइ चाही? यहोवा इ सबइ प्रस्न ओन याजकन स पूछेस जउन ओकरे नाउँ क अपमान किहेस।”मुला तू पचे कहत अहा, “हम पचे का कीन्ह ह, जउन परगट करत ह कि हम पचे तोहरे नाउँ क सम्मान नाहीं करत्या?” 7 यहोवा कहेस, “तू पचे मोर वेदी पइ असुद्ध रोटी क भेंट चढ़ाइके मोर अपमान किहेस ह।” मुला तू पचे कहत अहा, “उ रोटी असुद्ध कइसे बाटइ?”यहोवा कहेस, “तू पचे मोर वेदी क सम्मान नाहीं करत्या। 8 तू पचे आँधर जनावर बलि बरे लिआवत ह अउर इ गलत अहइ। तू पचे बलि बरे रोगी अउ विकलांग जनावर लिआवत ह। इ गलत बाटइ। तू पचे आपन सासन करइवालन क ओग रोगी जनावरन क भेंट देइ क जलन करा। का उ एन जनावरन क भेंट क रूप मँ अंगीकार करी? नाहीं। उ ओन भेंटन क अंगीकार नाहीं करी।” सर्वसक्तीमान यहोवा इ सब कहत ह। 9 “याजक लोगो! तू पचन्क यहोवा स हमरे बरे नीक बना रहइ क पराथना करइ चाही। मुला उ तोहार पचन्क नाहीं सुनी अउर इ सारा दोख तोहार सबन्क अहइ।” सर्वसक्तीमान यहोवा इ सब कहेस। 10 “तोहका मोर मन्दिर क दुआरन क बन्द कइ देइ चाही रहा अउर मोरे वेदी पइ बेकार मँ, बलि क आगी क जराइ बन्द कइ देइ चाही रहा! काहेकि तउ मइँ तू लोगन स खुस नाहीं हउँ अउर न ही तोहार भेंट अंगीकार करब।” सर्वसक्तीमान यहोवा इ सब कहत ह। 11 “संसार मँ सब जगह लोग मोरे नाउँ क सम्मान करत हीं। संसार मँ सब जगह लोग मोरे बरे नीक भेंट लिआवत हीं। उ पचे अच्छी सुगन्धि मोरे बरे भेंट क रूप मँ बारत हीं। काहेकि मोर नाउँ ओन सबहिं लोगन बरे महत्व स भरा अहइ।” सर्वसक्तीमान यहोवा इ सब कहेस। 12 “मुला लोगो! तू पचे इ सब परगट करत अहा कि तू पचे मोरे नाउँ क सम्मान नाहीं करत्या। तू पचे कहत अहा कि यहोवा क वेदी पवित्तर नाहीं अहइ। 13 अउर तू पचे उ मेज स खइया क खाब पसंद नाहीं करत्या। तू पचे भोजन क सूँघत अहा अउर ओका खाइ स इनकार करत अहा कि इ बुरा अहइ। मुला इ फुरइ नाहीं। तू पचे रोगी, विकलांग अउ चोट खाए भए जनावर मोरे बरे लिआवत अहा। तू पचे रोगी जनावर क मोका बलि क रूप मँ भेंट करइ क जतन करत अहा। मुला मइँ तू पचन्स ओन रोगी जनावरन क अंगीकार नाहीं करब। 14 कछू लोग मोरे लगे नीक जनावर क बलि देइ क प्रतिग्या करत हीं। किन्तु उ पचे छिपे रूप स ओन नीक जनावरन क बदल देत हीं अउर मोका रोगी जनावर देत हीं। ओनकर संग बुरी बातन घटिहीं। मइँ महान राजा हउँ। संसार मँ सब जगह लोग मोर सम्मान करत हीं।” सर्वसक्तीमान यहोवा इ सब कहेस।

2:1 “याजक लोगो! इ नेम तोहरे पचन्क बरे बाटइ। मोर सुना। जउन मइँ कहत हउँ ओह पइ धियान द्या। मोर नाउँ क सम्मान करा। 2 अगर तू पचे मोरे नाउँ क सम्मान नाहीं करत्या तउ तोहरे सबन्क संग बुरा घटित होइ। तू पचे आसीर्वाद देब्या, मुला उ पचे अभिसाप बनिहीं। मइँ बुरा घटइ क कराउब काहेकि तू पचे मोरे नाउँ क सम्मान नाहीं करब्या।” सर्वसक्तीमान यहोवा इ सब कहेस। 3 “लखा, मइँ तू पचन्क बंस मँ जनम लेइवालन क सजा देब। याजक लोगो, तू पचे पवित्तर दिनन क मोका बलि भेंट करत अहा। तू पचे गोबर अउ मरे जनावरन क अंतड़ियन क लेत अहा अउर ओन हीसंन क लोकाइ देत अहा। मुला मइँ ओन गोबर क तू पचन्क चेहरन पइ मलब अउर तू पचे एकरे संग लोकाइ दीन्ह जाब्या। 4 तब तू पचे समुझब्या कि तू पचन्क इ आदेस काहे देत हउँ? मइँ तू पचन्क इ सबइ बातन एह बरे बतावत हउँ कि लेवी क संग मोर वाचा चलत रही।” सर्वसक्तीमान यहोवा इ सब कहेस। 5 यहोवा कहेस, “मइँ इ वाचा लेवी क संग किहेउँ। मइँ ओका सान्ति स भरि जिन्नगी देइ क प्रतिग्या किहेउँ अउर मइँ ओका उ दिहेउँ। लेवी मोका सम्मान दिहेस। उ मोरे नाउँ क सम्मान दिहस। 6 लेवी सच्ची सिच्छा दिहस। लेवी लबार उपदेस नाहीं दिहस। लेवी ईमानदार अउ सान्ति चाहइवाला मनई रहा। लेवी मोर अनुसरण किहस अउर अनेक मनइयन क पाप करमन स बचाएस। 7 याजक क परमेस्सर क उपदेसन क जरूर जानइ चाही। लोगन क याजक क लगे परमेस्सर क उपदेसन सुनइ बरे जाइ क जोग्ग होइ चाही। याजक क लोगन बरे परमेस्सर क दूत होइ चाही।” 8 यहोवा कहेस, “याजक लोगो, तू पचे मोर अनुसरण करब तजि दिहा। तू पचे सिच्छन क उपयोग लोगन स बुरा करम करावइ बरे किहा। तू पचे लेवी क संग कीन्ह गए वाचा क भ्रस्ट किहा।” सर्वसक्तीमान यहोवा इ सब कहेस। 9 “काहेकि तू मोरे आदेसन क पालन नाहीं किहे अउर तू लोगन क बिस्सास स मोर नेम क सिच्छा नाहीं दिहेस एह बरे तू पचन्क बिना महत्व क बनाउब। लोग तोहार पचन्क सम्मान नाहीं करिहीं।” 10 हम सबइ क एक ही परमेस्सर अहइ। उहइ परमेस्सर हम सबन्क बनाएस। एह बरे लोग आपन भाइयन क ठगत हीं? उ सबइ लोग परगट करत हीं कि उ पचे वाचा क सम्मान नाहीं करतेन। उ पचे उ वाचा क सम्मान नाहीं करतेन जेका हमार पुरखन परमेस्सर क संग किहन। 11 यहूदा क लोग दूसर लोगन क ठगेन। यरूसलेम अउ इस्राएल क लोग खउफनाक काम किहन। यहूदा क निवासी लोग यहोवा क पवित्तर मंदिर क सम्मान नाहीं किहन। परमेस्सर उ जगह स पिरेम करत ह। यहूदा क लोग ओन बिदेसी मेहररूअन स बियाह किहन जउन लबार देवतन क पूजा करत रहिन। 12 यहोवा ओन लोगन क यहूदा क परिवार स दूर कइ देइ। उ सबइ लोग यहोवा क लगे भेंट लिआइ सकत हीं, मुला ओहसे कउनो मदद नाहीं मिली। 13 तू पचे रोइ सकत ह अउर यहोवा क वेदी क आँसुअन स ढाँकि सकत ह, मुला यहोवा तोहार सबन क भेंट अंगीकार नाहीं करी। यहोवा ओन चिजियन स खुस नाहीं होइ, जेनका तू पचे ओकरे लगे लिअउब्या। 14 तू पचे पूछत अहा, “हमार भेंटन यहोवा क जरिये अंगीकार काहे नाहीं कीन्ह जातिन?” काहेकि यहोवा तोहरे सबन्क बुरे करमन क लखेस, उ तोहरे सबन्क खिलाफ गवाह अहइ। उ लखेस कि तू पचे आपन पत्नियन बरे अविस्सासी रहा ह। तू पचे उ आपन पत्नी क संग तबहिं स ब्याहा अहा जब स तू पचे जवान भए रह्या। उ तोहार प्रेमिका रही। तब तू पचे आपुस मँ एक दूसर बरे किरिया खाए रहा। अउर उ तोहार पत्नी होइ गइ। मुला तू ओकरे बरे अविस्सासी रहा ह। 15 परमेस्सर चाहत ह कि मनसेधू अउ मेहरारू एक बदन अउ एक आतिमा होइ जाइँ। काहे ताकि ओनकर गदेलन पवित्तर होइँ। एह बरे उ आध्यात्मिक एकता क रच्छा करा। आपन पत्नी क बिसस्साघाती जिन बना। उ तोहार पत्नी तब स अहइ जब स तू जवान भवा। 16 इस्राएल क परमेस्सर यहोवा कहत ह, “मइँ बियाह-विच्छेद स घिना करत हउँ। मइँ मनसेधुअन क त्रूर करमन स घिना करत हउँ। एह बरे आतिमा क एका क सुरच्छा करा। आपन पत्नी का धोखा जिन द्या।” 17 तू पचे गलत सिच्छा दिहा ह। अउर ओन गलत सिच्छन यहोवा क बहोत दुःखी किहन ह। तू पचे इ सिच्छा दिहा कि परमेस्सर ओनका पसंद करत ह जउन बुरे करम करत हीं। तू पचे कह्या कि परमेस्सर ओनका नीक लोग समुझत ह अउर तू पचे इ सिच्छा दिहा कि परमेस्सर लोगन क बुरा करम करइ बरे सजा नाहीं देत।

3:1 सर्वसक्तीमान यहोवा कहत ह, “लखा, मइँ आपन दूत पठवत हउँ। उ मोरे बरे मारग तइयार करी। यहोवा जेकरी खोज मँ तू पचे अहा, उ एकाएक आपन मंदिर मँ आइ। वाचा क सँदेसा लेवइया फुरइ आवत बा! 2 “कउनो मनई उ समइ बरे तइयारी नाहीं कइ सकत। कउनो मनई ओकरे खिलाफ खड़ा नाहीं होइ सकत, जब उ आइ। उ बरत आगी क नाईर् होइ। उ बढ़िया रेह क तरह होइ जेका लोग चिजियन क स्वच्छ करइ उपयोग मँ बइपरत हीं। 3 उ लेवीबंस क संतानन क पवित्तर करी। उ ओनका अइसे सुद्ध करी जइसे आगी चाँदी क सुद्ध करत ह। उ ओनका सुद्ध सोना अउ चाँदी क समान बनाइ। तब उ पचे यहोवा क भेंट लइहीं अउर उ पचे ओन करमन क ठीक तरिके स करिहीं। 4 तब यहोवा यहूदा अउ यरूसलेम मँ भेंटन क अंगीकार करी। इ बीते काल क समान रही। इ पुरान लम्बा समइ क तरह होइ। 5 तब मइँ तोहरे लगे निआव बरे आउब। मइँ उ गवाह क तरह होब जउन लोगन क जरिये कीन्ह गए बुरे करमन क बारे मँ निआव क जज स कहत ह। कछू लोग बुरा जादू करत हीं। कछू लोग बिभिचार क पाप करत हीं। कछू लोग झूठी प्रतिग्यन करत हीं। कछू लोग आप मजदूरन क उगत हीं। उ पचे आपन वाचा क कीन्ह गइ रकम नाहीं देतेन। कछू लोग विधवा अउरत अउर अनाथन क मदद नाहीं करतेन। कछू लोग बिदेसियन क मदद नाहीं करतेन। कछू लोग मोसे नाहीं डरतेन अउर मोर सम्मान नाहीं करतेन।” सर्वसक्तीमान यहोवा इ सब कहेस। 6 “मइँ यहोवा हउँ, अउर मइँ बदलत नाहीं। तू पचे याकूब क सन्तान अहा। सिरिफ मोर बिस्सासहीनता क कारण तू पचे पूरी तरह स नस्ट नाहीं कीन्ह जात्या। 7 मुला तू पचे मोरे नियमन क कबहुँ अनुपालन नाहीं किह्या। हिआँ तक कि तोहार सबन्क पुरखन मोर अनुसरण करब बंद कइ दिहन। मोरे लगे वापस लउटा अउर मइँ तोहरे पचन्क लगे वापस लउटब।” सर्वसक्तीमान यहोवा इ सब कहेस।तू पचे कहत अहा, “हम पचे वापिस कइसे लउटि सकित ह” 8 परमेस्सर क लूटब बंद करा। लोगन्क परमेस्सर क चिजियन नाहीं चोरावइ चाही!मुला तू पचे मोर चिजियन चोराया?“तू पचन्क मोका आपन चिजियन क दसवाँ हींसा देइ चाही रहा। तू पचन्क मोका खास भेंट देइ चाही रही। मुला तू पचे उ सबइ चिजियन मोका नाहीं दिहा। 9 इ तरह तोहार पचन्क समूचा रास्ट्र मोर चिजियन क चोराएस ह। ऍहसे तू पचन्क समूचा रास्ट्र मोर चिजियन क चोराएस ह। ऍहसे बुरी सबइ घटना तू पचन्क संग घटति अहइँ।” सर्वसक्तीमान यहोवा इ सबइ कहत ह। 10 सर्वसक्तीमान यहोवा कहत ह, “इ परीच्छा क जाँचा। आपन चिजियन क दसवाँ हींसा मोका लिआवा। ओन चिजियन क खजाने मँ रखा। मोरे घरे खइया क लिआवा। एहका परखिके तउ लखा। तू पचे अगर ओन करमन क करब्या तउ मइँ, फुरइ ही, तू पचन्क आसीर्वाद देब। तू पचन्क लगे नीक चिजियन वइसे ही होइ जइहीं जइसे गगन स बर्खा होत ह। तू पचे हर चीज जरूरत स जियादा पउब्या। 11 मइँ कीड़न क तू पचन्क फसलन क नस्ट नाहीं करइ देब। तोहरे पचन्क अंगूरे क सबहिं बेलन अंगूर पइदा करिहीं।” सर्वसक्तीमान यहोवा इ सबइ कहत ह। 12 “दूसर रास्ट्रन क लोग तू पचन्क बरे भले रइहीं। तोहार सबन्क देस फुरइ अचरजे स भरा देस होइ।” सर्वसक्तीमान यहोवा इ सबइ कहत ह। 13 यहोवा कहत ह, “तू पचे मोहसे ओछी बातन कह्या।”मुला तू पचे पूछत अहा, “हम पचे तोहरे बारे मँ का कहा?” 14 तू पचे कह्या, “यहोवा क उपासना बेकार अहइ। हम पचे उ सबइ करम किहेन जउन यहोवा करइ क कहेस, मुला हम लोगन्क कछू नाहीं मिला। हम पचे आपन पापन बरे वइसे ही दुःखी रहेन जइसे मइयत मँ रोवत लोग। मुला एहसे कछू काम नाहीं निकरा। 15 हम समुझत रहेन कि घमंडी लोग सुखी रहत हीं। दुस्ट लोग सफल होत हीं। उ पचे परमेस्सर क धीरज क परीच्छा करइ बरे बुरे करम करत हीं, अउर परमेस्सर ओनका सजा नाहीं देत।” 16 उ लोगन क बीच मँ जउन ओकरे नाउँ क सम्मान किहेन आपुस मँ बतियानेन अउर यहोवा ओनका सुनेन। ओकरे समन्वा एक पुस्तक अहइ। उ किताबे म उ लोगन क नाउँ अहइ जउन यहोवा क नाउँ क सम्मान करत हीं। 17 यहोवा कहेस, “उ सबइ लोग मोर अहइँ। मइँ ओन पइ कृपालु रहब। मनई आपन ओन लरिकन पइ जियादा कृपालु रहत ह जउन ओकर आग्याकारी होत हीं। उहइ तरह मइँ आपन मनवइयन पइ कृपालु रहब। 18 हे लोगो, तू पचे मोरे निअरे वापिस लउटब्या अउर तू पचे नीक लोगन अउ बुरे लोगन क फरक जानब्या। तू पचे परमेस्सर क लोगन अउर दूसर लोगन क बीच क फरक समुझब्या।

4:1 “निआव क समइ आवत ह। इ गरम भट्ठी जइसा होइ। सबहिं घमण्डी मनई उ समइ सजा पइहीं। उ पचे सबहिं बुरा करम करइवाले लोग सूखी घास क तरह बरिहीं। उ पचे उ पेड़ क जइसा बरत होइहीं, जउन सिखर स ठुँठ तलक बिना कछू छोड़े बारत हीं” सर्वसक्तीमान यहोवा इ सब कहेस। 2 “मुला, तू सबइ जउन मोर नाउँ क सम्मान किहेस ह, तू पचन पइ अच्छाई उदय होत भए सूरज क तरह चमकी। इ सूरज क किरणन क तरह तन्दुरुस्ती लिआब्या। तू पचे अइसे ही अजाद अउ खुस होब्या जइसे अपने थान स अजाद भए बछवन। 3 तब तू पचे ओन बुरे लोगन्क वुचरि डउब्या, उ पचे तोहरे सबन क गोड़े क नीचे राखी जइसे होइहीं। मइँ निआव क समइ इ सबइ घटना क घटित कराउब।” सर्वसक्तीमान यहोवा इ सब कहेस। 4 “मूसा क व्यवस्था क सुमिरा अउर अनुपालन करा। मूसा मोर सेवक रहा। मइँ होरेब पर्वते पइ ओन कानूनन अउ नेमन क ओका दिहेउँ। उ सबइ नेम इस्राएल क सबहिं लोगन बरे अहइँ।” 5 यहोवा कहेस, “लखा, मइँ नबी एलिय्याह क तोहरे लगे पठउब। उ यहोवा क हिआँ स उ महान अउ खउफनाक निआव क समइ स पहिले आइ। 6 एलिय्याह महतारी-बाप अउर गदेलन क बीच पुन: रिस्ता कायम करी। वरना, मइँ, परमेस्सर आउब अउर तोहरे सबन क देस क पूरी तरह नस्ट करब।”