1 Adipurbe Hodagan elo. Sei Hodagan Itchioro siot elo, ar Hodagan olode Itchior. 2 The adipurbe Itchioro loge elo. 3 Beg jabotio the baneie. The no baneiede jinij hitchu nei. 4 Tar siot poranan elo, ar sei poranan olode manjior phor. 5 Phoran andharot phuttiegi, hintu andharane sienore no sinilo. 6 Itchiore ek jon manus dipadeie, tar nangan olode Johon. 7 Phoranor sombonde shakki dibartei, shakki ijibe the ejchie, jene tar darai beg manuschune bischias jan para. 8 The Phor noi. Hintu The ejchiede olode Phoranor sombonde proman dibartei. 9 Sei phoran olode soittio Phor. Je songsarot ejchie beg manuschunore phor der. 10 Hodagan songsarot elo. Hintu The baneiede songsarano manuschune tare no sinilak. 11 The tar nijor manuschuno idu ejchie, hintu tar nijor manuschune tare gojhi no lolak. 12 Hintu jedog jone tare gojhi loion ar tar nangan bischias jan, sigunore Itchioro puo obartei the odhihar die. 13 Sigunor jormo lottun noi, nijor era ischiettun noi ar manjior ischiettuno noi, hintu Itchiorottun. 14 Sei Hodagan manei hule jormeinei, amar idu bojotti ologi. Ami tar mohimagan degilong. Sien olode Babpuottun ekkuo gori Puo agede sibier oborugkan. The olode doye ar soittiogandoi boron. 15 Johone tar sombonde proman dinei jogar pari-pari hor, “Etar sombonde ie mui hoiongge, ‘Mor porendi ebode sibie mortun bes dangor, haron The mor akke elo.’ ” 16 Ami tar puripunnuoganottun begkune doyettun doye peiei. 17 Haron Mosir darai Nioman die oie. Jisu Kristor darai doyegan ar soittiogan ejchie. 18 Huno jone je huno somoiot Itchiorore no degon. Tar ekkuo gori Puo, Babo horod thaidie sibiei tare janei die. 19 “Tui honna,” gori pujor goribartei Judaiune Jerusalem sohorottun dhormo guru ar Levi manus Johono sidu dipadeon. Ien olode Johone shakki dede sien. 20 The no bharenei ar haam heinei holo, “Mui Kristo noi.” 21 Sebeden, thara pujor gorilak, “Salen tui honna? Tui Elija ni na?” The holo, “Mui noi.” Sebeden tare holak, “Tui hi honna sei, Munibuo ni na?” The uttor dilo, “Noi.” 22 Sebeden thara tartun pujor gorilak, “Amare dipadeonde sigunore hoi parigoi para amare ho, tui honna? Tor sombonde tui hi hobe?” 23 Johone holo, “Mui olungge, muni Isaia hoiede doge, ‘Moruobomit ek jonor roi horte: “PROBUR podtan uju goro.” ’ ” 24 Thara dipadeonde sigun olakke Pharisi dolottun. 25 Ar sebeden thara tartun pujor gorilak, “Salen, tui judi Kristo no ole, Elijaio no ole ar munio no ole, a hittei tui baptisma gori duos?” 26 Johone tharare uttor dilo, “Mui panit baptisma gori duong, hintu tumi no sinnie ek jon tomar loge thiei agegi. 27 The mor porendi ejer. The mortun bes dangor. Mui tar joda durieno huei dibar lak noi.” 28 Sieni ghottiede Bethania adamot, Jordan Sora uhuledi. Sei jaganot Johone baptisma gori di der. 29 Tar hellie Johone Jisure tar mokkie ette deginei holo, “Sawh, songsaro pabo bhar nejaidie Itchioro Bera-shagolo Shawhbuo. 30 Etar sombonde ie mui hoiongge, ‘Mor porendi ek jon ebo. The mor akke elo hinottei, the mortun bes dangor.’ 31 Mui tare no sindung. Hintu Israel manuschunore tare dolei degei dibartei mui panit baptisma gori duongor.” 32 Johone proman dinei holo, “Aptabuo hodoro dogkie gori sorgottun lambegi ar tar ugure porsiede mui degkuong. 33 Mui tare no sindung. Hintu mui panit baptisma gori dibartei more dipadeiede sibiei hoie, ‘Aptabuo tar ugure porinei thagke tui debe, the olode Pobitro Aptaloi baptisma goridiebuo.’ 34 Mui sien degkuong ar mui proman dilungge jei, the olode Itchioro Puobuo.” 35 Tar hellie, Johone aro, di jon sisjioloi thiei age. 36 Jisu siot berade Johone tare deginei holo, “Sawh, Itchioro Bera-shagolo Shawhbuo!” 37 Sebeden di jon sisjioi the hoiede sien suninei thara Jisur pune-pune gelak. 38 Tar pune-pune jadonde hoi parinei, Jisu pije phiri rini seinei tharare holo, “Tumi hi togor?” Ar thara holak, “Robbi, tui hudu thas?” “Robbi” ortho olode, “Guruthagur.” 39 The tharare holo, “Tumi einei sawhgi na.” Thara jeinei the thaidie jagagan degilakkoi. Sebeden thara sei dinnie tar loge thelak. Sien olode perai beillie ser ta. 40 Johono hodagan suninei Jisur pune-pune jeie di jonottun ek jon olode Simon Pitoror bheibuo, Andrio. 41 The akke tar bheibuo Simonore lagot peinei tare holo, “Ami Messaiare lagot peiei.” (Messaia orthogan olode Kristo.) 42 Sebeden Andrio Simonore Jisur idu anilo. Jisu tare seinei holo, “Tui Jonar puo Simon. Mui tore ‘Kepha’ dagim.” (Kepha ortho olode, Sil.) 43 Tar hellie Jisur Galili dejot jebar mone holo. The Philibore lagot peineigoi tare holo, “Mor loge ai.” 44 Philibie olode Bethsaida sohorottun. Sien olode Andrio ar Pitore dagir sohoran. 45 Philibie Nathanaelore lagot peineigoi tare holo, “Niomanot Mosi jiber sombonde legi jeie ami sibiere lagot peiei. Muniguneio tar sombonde legi jeion. The olode Josebor puobuo Jisu, Nazareth adamortun.” 46 Nathanaele Philibore holo, “Nazareth adamortun hi gom jinij nigili paribo?” Sebeden Philibie tare holo, “Tui einei sagi na.” 47 Jisu Nathanaelore tar idu ette deginei tar sombonde holo, “Ui-o sawh, ek jon hati Israel manus, tartun hitchu phagara mon nei.” 48 Nathanaele Jisure holo, “Tui hingori more sinilie?” Jisu tare uttor dilo, “Philibie tore dagibar agendi, tui dumur gajchuo tole elede lokkene mui tore degkuong.” 49 Nathanaele Jisure holo, “Robbi, tui olede Itchioro Puobuo. Tui olede Israelo Rajabuo.” 50 Jisu tare holo, “Mui tore hongor, ‘Mui tore dumur gajchuo tole degkuong,’ sienottei tui bischias gorilede oi ni? Tui ienottun bes oborug ham degibie.” 51 Jisu Nathanaelore holo, “Mui tomare soittio hodagan soittio gori hongor, ienor porendi sorgogan hulo gori tumi degiba. Itchioro sorgo-dudtun Munischioro Puobuor ugure tumi uttie ar lambegi degiba.”
1 Tin din oinei Galili dejor Kana sohorot ekkan mela olo. Siot Jisur mabuo elo. 2 Jisure tar sisjiogun somot melat boleion. 3 Ar jokke tharar angguro rose no hulor, Jisur mabuoi tare holo, “Tharattun angguro ros nei ar.” 4 Jisu tare holo, “Tui olede milie, tor hi hobor pebar age? Mor somoibuo ejo no eje.” 5 Tar mai porsonigunore holo, “The tomare jien hoi sien goribade-sie.” 6 Judaiune sudduo onde doge, siot shobuo silor pani sari bojeie elak. Ekkuot aji ek shot litarδ ade. 7 Jisu tharare holo, “Pani sarigunot pani bhoro.” Ar sigunot thara haza song boron gori bhoreilak. 8 Sebeden Jisu tharare holo, “Ikkie ekkena nigileinei porsoni mukpattibuo sidu nejo.” Ar thara nilak. 9 Ar jokkene porsoni mukpattibuoi angguro ros oiede panigan sagi selo, sien huttun ejchie, the hobor no pelo. Panigan nigilei nuonde porsonigune hobor pan. Porsoni mukpattibuoi nuo-jameibuore dagilo. 10 The tare holo, “Akke begkune gom angguro ros hebar duon. Ar jokke gorbagune il oi song hebar ole, sebeden ekka horab angguro ros duon. Hintu tui ejo song gom angguro roschan rageios!” 11 Jisu sei sinnogani Galili dejor Kana sohorot arambo gorilo. Ei siennie gori the tar mohimagan degelo ar tar sisjiogune tare bischias gorilak. 12 Tar porendi, Jisu lami einei Kapernaum sohorot gelo. Tar loge tar ma, tar bheiun ar tar sisjioguno gelak. Siot thara hoiek din thelak. 13 Judaiunor Rokkie Utchob din hai einei, Jisu Jerusalem sohorot gelo. 14 Mondirbuot damara goru, bera-shagol ar hodor bejchonde sigunore ar siot boi agonde tengaδ bodoli diegunoreo the degilo. 15 Duriloi the ekkan sabuk banelo ar siendoi the tharare begkunore mondirbuottun nigilei dilo. Bera-shagolun ar damara gorugun The nigilei dilo. The tharar tengagunδ dali phelei dinei tharar tebilani ullei phelei dilo. 16 The hodor bejiegunore holo, “Ieni iottun nejo. Mor Babor ghoran ath-hola no baneio!” 17 Sebeden Sastrot legkiede hodagan tar sisjiogunor monot udilo, “Tor ghoranottei mor dhappane more hei pheleilo.” 18 Senottei Judaiune Jisuttun pujor gorilak, “Tui ei hamani goror jogon, tui amare hi sinno degebe?” 19 Jisu tharare uttor dilo, “Tumi ei mondirbuo bhangi pelo, ar tin dine ibie mui tulim.” 20 Senottei Judaiune holak, “Ei mondirbuo tullie shoisolis bojor lakkie, tui parapang ien tin dine tuli paribie?” 21 Hintu Jisu horte mondirbuo hodagan olode tar heyegano sombonde. 22 Senottei, jokkene tare morattun jiei tullie, tar sisjiogune monot tullionde the ei hodagan tharare hoie. Ar sisjiogune Sastro hodagani ar Jisu hoiede hodagan bischias gorilak. 23 Rokkie Utchobo somoi the Jerusalem sohorot elode lokkene tar oborug hamani deginei onek manjie tar nange bischias gorsion. 24 Hintu The begkunore hobor pai hinottei, Jisu The nije tharare bischias no gore. 25 Manjior monot hi age the hobor pai hinottei, manjior hobor tare janeidibar huno jon no lage.
1 Ek jon Pharisi manus tarnangan Nikodem. The ek jon Judaiunor murubbi elo. 2 Sei manuschuoi reidot Jisur idu einei tare hologi, “Robbi, ami hobor pei tui olede Itchiorottun ejchie ek jon guruthagur. Haron Itchior judi loge no thele, huno jone tui gorotte edogkie amok hamani goribar hemoda no thelun.” 3 Jisu tare uttor dinei holo, “Mui tore soittio hodagan soittio gori hongor, je nuo jormo no oi, the Itchioro rejjiogan degido noi.” 4 Nikodema Jisure holo, “Ek jon manus judi buro ole, hingori tar mai tare jormo di paribo? Tar mai tare jormo dibartei, the aro tar ma ghorbo bidirie somi poribo ni na?” 5 Jisu tare uttor dilo, “Mui tore soittio hodagan soittio gori hongor: Je panittun ar Aptartun jormo no oi, the Itchioro rejjiot somi parto noi. 6 Manjiortun jormeile manus ar Aptartun jormeile apta. 7 Mui holungge, ‘Tui nuo jormo oi pebe,’ siendoi tui amok no os. 8 Boierane jindi mone hoi sindi bai, ar tumi tar abaschuo suno. Hintu huttun eje ar hudu jai sien tumi hobor no po. Aptartun jigunor jormo oie, sigunorio thik sedogkie oi.” 9 Nikodema Jisuttun pujor gorilo, “Sieni hingori oi pare?” 10 Jisu tare uttor dilo, “Tui Israel manuschunor ek jon sigkie die, a hittei sieni hobor no pas? 11 Mui tore soittio hodagan soittio gori hongor, ami jieni hobor pei sieni hoi. Ami jieni degkiei sieni ami sunei di. Hintu ami sunei di die hodagani tumi mani no lo. 12 Mui tomare songsaro jinijchanir sombonde hoinei tumi bischias no goro. Senottei, mui judi tomare sorgo jinijchanir sombonde hong, hingori bischias goriba? 13 “Munischioro Puobuo sorgot jibe thai, ar je sorgottun ejchie, sibie bade huno jon sorgot no jan. 14 Mosi moruobomit sabpuore ojolot tangeiede dogkie gori Munischioro Puobuoreo ojolot tangei pebak. 15 Uddischuogan olode je, tare bischias jai, the nosto odo noi, hintu ononto jibon pebo. 16 Haron Itchiore songsaran edok gori hos peie, tar bana ekkuo gori Puo elode sibie dan die. Ar je tare bischias gore the nosto odo noi, hintu ononto jibon pebo. 17 Songsaran dujot pheleibartei Itchiore tar Puobuo songsarot di no padai. Hintu tar darai songsaro manuschune mukti pebartei di padeie. 18 Je tare bischias jai, the dujot porto noi. Hintu je tare bischias no jai, the honatto duji oi age. Haron Itchioror ekkuo gori Puo sibiere the bischias no jai. 19 Dujchan olode ien, phoran songsarot ejchie. Hintu tharar hamani bojong hinottei, manuschune phoranottun andharan bes hos pan. 20 Haronan olode je bojong ham gore, the phoranore hos no pai. Tar hamani bojong dega jai bilinei the phoranotio no eje. 21 Hintu je gom ham gore, tar hamani Itchioro ischie doge gora oie bili porak-porak gori dega jebartei the phorot eje.” 22 Sei porendi, Jisu tar sisjio-gundoi Judea dejot gelo. Siot The tharar loge thelo ar baptisma gorilo. 23 Salim adamano hai Ainon jaganot shagor pani elo hinottei Johone baptisma gorider. Manus-chune siot jadon ar Johone tharare baptisma gorider. 24 Haron sokkene Herode Johonore jiel-hanat no bhorai. 25 Sei lokkene Johono sisjiogune hoiek jon Judaiundoi sudduo onde sombonde torga-torgi arambo oie. 26 Thara Johono sidu jeinei tare holak, “Robbi, shah, Jordan Sora uhule tor loge elode sibiei manus baptisma gorider. Tui tar sombonde janei duos. Begkune tar sidu jadon.” 27 Johone holo, “Sorgottun no dile huno jone hitchu pebar nei. 28 Tumi mui hode suinnio daw, ‘Mui Kristo noi,’ hintu ‘Itchiore more tartun akke dipadeie.’ 29 Jadtun nuo buo age, the olode nuo-jamei. Hintu nuo-jameibuor shamalabuoi tar hai thai ar nuo-jameibuoi hoda hode sunilie baari hujhi oi. Senottei mor hujhigan pureilo. 30 Tartun bara poribo hintu mortun homa poribo. 31 “Je ugurottun eje the begottun seresto. Je pittimittun eje the pittimir hoda hoi. Je sorgottun eje the begottun seresto. 32 The jieni degkie ar jieni suinnie the shakki de. Ar huno jone tar shakki die hodagani mani no lon. 33 Je, tar shakkigan mannie the proman dede Itchiorbuo soittio. 34 Haron Itchiore jare dipadeie sibiei Itchioro hoda hoi. Itchiore tare Apta mabinei no de. 35 Babpuoi Puobuore hos pai. Ar tar adot beg gojei die 36 Je Puobuore bischias gore tar ononto jibon age, ar je Puobuore bischias no jai the jibon pedo noi. Ar Itchioro rakkan tar ugure thelo.”
1 Jisu Johonottun bes sisjio tullie ar baptisma gori die. Pharisigune sien suinnion bili Probuie hobor pelo. 2 Judio Jisu the nije baptisma gori no de, hintu tar sisjiogune baptisma gori duon. 3 The Judea dejchan phelei jei aro Galili dejot jebartei nigililo. 4 The Samaria dejchan phuri jei pelo. 5 Senottei, the ekkan Samaria sohorot Sykar honde siot lungilogoi. Sien olode ago dinot Jakobe tar puo Josebore dede jagano hai. 6 Jakobor jhanggabuo siot elo. Jisu atte-atte oran oie hinottei, jhanggabuo hai bojilo. Sien bel diboro oktot. 7 Ekkuo Samari milie pani tulibartei elo. Jisu tare holo, “More pani dena haang.” 8 Sei lokkene tar sisjiogune hebar jinij hinibartei sohorot jeion. 9 Sebeden Samari miliebuoi tare holo, “Tui olede ek jon Judai manus, mui olungge Samari milie. Tui hingori mortun pani hebar magor?” Haron Judai manuschune Samaria manuschundoi song no poron. 10 Jisu tare uttor dinei holo, “Tui judi hobor pede Itchioro danan hi, ar ‘Honna more pani dena,’ haang hor, sale tui tartun pani magidie ar the tore jibono pani dido.” 11 Miliebuoi tare holo, “Babu, tortun pani tulibar balti nei, ar janggabuo olode gobhin. Salen tui huttun sei jibono pani phele? 12 Amar Purbo-puruschun Jakobe, je amare ei janggabuo die ar tar puogune ar tar poshugune iottun pani heion, tui tartun dangor obe parapang?” 13 Jisu tare uttor dinei holo, “Je ei panigan hai tar aro pani saj goribuo. 14 Hintu mui dimbie panigan je hai, tar huno din pani saj shobai gorto noi ar. Haron mui dimbie panigan tar Pobitro oinei ononto jibon song nal adibo.” 15 Miliebuoi tare holo, “Babu, mor pani saj no gore para ar mui idu pani hoja ei no pang para, more sei panigan de na.” 16 Jisu tare holo, “Ja, tor negkuoredagiandoi.” 17 Miliebuoi tare holo, “Mortun neg nei.” Jisu tare holo, “Tui soittio hoda hole, oi ‘Mortun neg nei.’ 18 Haron tortun paschuo neg elak, ar ikkie torloi thaidie manuschuoio tor neg noi hinottei, tui soittio hoda hole.” 19 Sebeden miliebuoi Jisure holo, “Babu, mui hoi parilung, tui ek jon muni. 20 Amar Purbo-puruschunune ei mounnuo ugure tobona gorsion. Hintu tumi Judaiune hode, manuschune Jerusalemo jaganot tobona gorana osit.” 21 Jisu tare holo, “Miliebuo, mor hoda bischias gor. Babore tumi ei mounnuot, bah, Jerusalemot tobona no goribade somoibuo ejer. 22 Tumi tobona gorode sibiere hobor no po. Muktigan Judai jado darai ejer hinottei ami tobona goridie ibiere ami hobor pei. 23 Ekkuo somoi ebo ar ejchie. Sokkene ajol tobona goriegunore togai. 24 Itchior olode Apta. Jigune tare tobona goron, apta ar soittioloi tobona goriegune Babore apta ar soittioloi tobona goribak. Babeio sedogkie tare tobona gora poribo.” 25 Miliebuoi tare holo, “Mui hobor pang, Messaia,” (jare Kristo hon,) “the ejer. Jokkene the ebo, the begkani amare janei dibogi.” 26 Jisu tare holo, “Sibie olungge mui, torloi hoda hongorte ibie.” 27 Jisu sei hodagan holoio tar sisjiogun lungilakki. The ekkuo milieloi hoda hode deginei thara amok olak. Hintu tharattun ek joneo tare no holakke, “Tui hi sas?” nahi “Tui tarloi hittei hoda hor?” 28 Sebeden miliebuoi tar pani hummuo phelei jei sohorot jeinei manuschunore hologoi, 29 “Ejo, ek jon manus mor jibonot gorsiongge sieni begkani hoidede sibiere sawhgi. The Kristo obode noi ni?” 30 Senottei sohorottun thara nigili einei Jisur idu eja dorilak. 31 Sei bidirie, tar sisjiogune tare hujoli gorinei hodon, “Robbi, ha.” 32 Hintu the tharare holo, “Tumi hobor no peie hebar bhat mortun age.” 33 Senottei tar sisjiogune thara-thara huobula gorton, “Tartei huno jone bhat ani duon ni na?” 34 Jisu tharare holo, “Mor bhat olode more dipadeie sibier ischie doge mor gorana ar tar haman mor gori phurona. 35 Tumi hode noi ni, ‘Dhan haba aro ser mas bagi age’? Suno, mui tomare hongor, hedtani sawh, pakkie hinottei diebar okto oie. 36 Je diei the bedon pai ar the ononto jibonotteio phol thubei thoi. Senottei biji shidiebuoi ar dieiebuoio duo jone song gori hujhi on. 37 Ei siennie gori ei dagho hodagan soittio, ‘Ek jone shidie ar ek jone habe.’ 38 Tumi dug no gorsie sien diebarlottei mui tomare di padeiong. Oinnio jone dug gorsion ar tumi tharar dugo bhagkan pela.” 39 Sei sohoranottun balukjon Samaria manjie Jisure bischias gorsion. Haron miliebuoi proman dinei hoie, “Mui gorsiongge sieni begkani the hoi die.” 40 Senottei jokke Samaria manuschune tar idu elak, tharar loge thebartei thara Jisure hujoli gorilak. Senottei, the thara siot di din thelo. 41 Ar tar hoda suninei aro balukjone bischias gorilak. 42 Sebeden miliebuore thara holak, “Bana tor hoda suninei ami bischias no jei. Ikkie ami nije suninei hobor pelongge ete hamakkai Kristo, songsar Muktigoriebuo.” 43 Hintu sei di dino porendi, Jisu siottun jeinei, Galili dejot gelo. 44 Jisu nije holo jei munie nijor dejot sorman no pan. 45 Senottei, jokke the Galili dejot lungilogi, Galili hulliegune tare lobiot gorilak. Haron tharar utchobo somoi Jerusalem Sohorot jeion ar utchobo lokkene Jisu gorsiede sieni begkani degkuondoi. 46 Senottei, Jisu Galili dejor Kana adamot pani angguro ros banei dede siot aro lungilogi. Ek jon rajar murubbi puo Kapernaum adamot aw-sug oinei elo. 47 Judea dejottun Galili dejot Jisu ejchie bili the suninei, the tar sidu gelo. Tar puobuo morong morong oie hinottei tar puobuore gom goridibartei the Jisure hujoli gorilo. 48 Sebeden Jisu tare holo, “Tumi sinno ar amok ham judi no dego, tumi shobai bischias no jeba.” 49 Rajar murubbibuo tare holo, “Probu, mor puobuo no motte akke tui ai na.” 50 Jisu tare holo, “Ja, tor puobuo bajibo.” Ar manuschuoi Jisu tare hoiede doge hodagan bischias gorinei gelogoi. 51 The jadte seiot, tar sagorsiegune tare lak peinei tare janei dilak, “Tor puobuo bajilo.” 52 Senottei the hon oktot gom oie the tharattun pujor gorilo. Ar thara tare holak, “Gelle hellie bel alondit tar joran gom oie.” 53 Senottei puobuor babpuoi buji parilode, thik sei lokkene Jisu tare hoie, “Tor puobuo bajibo.” The ar tar goda ghorbobuo bischias gorilak. 54 Sien olode Judea dejottun Galili dejot einei Jisu gorilogidie dibar sinno haman.
1 Sienir porendi, Judaiunor ekkan utchob awr ar Jisu Jerusalem sohorot gelo. 2 Jerusalemot Bera-shagolo Duoro Girie hure ekkuo pour age. Ienot paschan baranda age. Hebru hodadi ieno nangan olode Bethesda. 3 Sienit ek jhag manus pori agon. Thara olakke aw-sugkie, han, leng ar ajorchie pirellie. Thara panigan loribartei barsei agon. 4 Haron okte-okte ekkuo sorgo-dud Pourbuot einei panigan ghudegi. Sebeden sorgo-dudtuoi panigan ghudonar porendi, je akke paniganot lami tangore, tar je huno pirie gom oi. 5 Siot attris bojorchie pirellie ek jon elo. 6 Jokke Jisu tare degilo, siot The bhalukbilon song siennie gori agede hobor pelo. Jisu tare holo, “Tortun gom obar mone hoi ni?” 7 Pirelliebuoi Jisure uttor dilo, “Babu, jokke sorgo-dudtuoi panigan ghudegi, more huno jone Pourbuot lamei die nei. Hintu mui jade oinnio jone mortun akkuondoi.” 8 Jisu tare holo, “Thie, tor bischonan loinei adi ja.” 9 Jogon-togon sei manuschuo gom olo. Tar bischonan loinei adi-adi gelo. Sei dinnuo elode Sabbath. 10 Senottei, Judaiune Jisu gom gori dede manuschunore holak, “Edchie dinnuo olode Jireni Din. Tor bischonan nibar niome no hoi.” 11 The tharare holo, “More gom gori dede sibiei more hoie, ‘Tor bischonan loinei adi ja.’ ” 12 Senottei thara tartun pujor gorilak, “Sibie honna tore hoie, ‘Tor bischonan loinei adi ja’?” 13 Jisu gom goridede manuschuoi sibie honna hobor no pai. Haron sei jaganot shagor manus elak ar Jisu siottun sube-sabe jeiegoi. 14 Jeredi, Jisu tare mondirbuot lagot pelo ar tare holo, “Shah, tui gom oios. Tor huno ekkan bojong no oi para pab no goris ar.” 15 Manuschuoi jeinei Judaiunore hologoi jei tare gom goridede sibie olode Jisu. 16 Senottei, sei Judaiune Jisure hosto lagadon ar tare morei pheleibar tharar mone hor. Haron the sieni Jireni Dinnuot gorer. 17 Jisu tharare holo, “Mor Babe ejo song ham gorer ar muio gorongor.” 18 Senottei Judaiunottun sie bes tare morei pheleibar mone hor. The bana Jireni Dinnuor niom bhonggo no gore, hintu Itchiororeio tar nijor Bab hoi. Ei sedogkie gori the nijore-nije Itchiorloi song gorer. 19 Sebeden Jisu tharare holo, “Mui tomare soittio hodagan soittio gori hongor, Puobuoi nijottun hitchu gori no pare. Babe jien goribar hoi, the siennie gore. Haron Babe jien gore Puobuoio sien gore. 20 Babe Puobuore hos pai ar the nije jien gore the sieni begkani Puobuore degai. Tumi amok aw para, the ienittun bes ham Puobuore degebo. 21 Babe jeannie gori morattun jiei tullie ar tharare jibon de, thik sedogkie gori, Puobuoio tartun jare mone hoi tare jibon dibo. 22 Babe haro bijier no gore, hintu The beg bijiero bharan Puobuore die. 23 Senottei Babore jedogkie gori sorman goron, thik sedogkie gori, Puobuoreo begkune sorman goron para The more bijiero bharan die. Je Puobuore sorman no gore, the Puobuore dipadeiede Baboreo sorman no gore. 24 “Mui tomare soittio hodagan soittio gori hongor, je mor hoda sune ar more dipadei dede sibiere bischias gorsie, the ononto jibon peie. The bijierot porto noi ar, hintu the moranaganottun sarinei jibon pelo. 25 Mui tomare soittio hodagan soittio gori hongor, somoibuo ejer ar honatto lungiegi. Sei lokkene mora manuschune Itchioro Puobuor robuo sunibak. Ar jigune sunon, sigune jeda obak. 26 Haron Babor jeannie poran age sedogkie poran thebartei the Puobuoreo dilo. 27 The Munischioro Puo hinottei the bijier gore para tare odhihar dilo. 28 Ienot amok no oio. Haron ekkuo somoi ejer, sokke jigune sidie shalot agon, sigune begkune tar robuo sunibak. 29 Ar thara nigili ebag. Jigune gom ham gorsion, sigune jibon pebartei jiei udibag, ar jigune bojong ham gorsion, sigune bijierot poribartei jiei udibag. 30 Mor nijottun hitchu gori no parong. Mui jeannie sunong, siennie bijier gorong, ar mui dharmig bijier gorong. Haron mui mor monjokka goribar no sang, hintu more dipadeiede Babpuor ischie doge goribar sang. 31 “Mui judi nijore-nije shakki duong, sale, mor shakkigan soittio noi. 32 Oinnio ek jone mor sombonde shakki der. Ar mui hobor pang the mor sombonde shakki dette sien soittio. 33 “Tumi Johono idu pujor goribartei dipadeo ar the soittiogano sombonde shakki die. 34 Mui manjiortun shakki no sang. Hintu tumi mukti pebartei sieni mui tomare hongor. 35 Johone olode phor angette ar phor dette serago dogkie. Ar tomar tar phoranot hanekkon gori hujhi obar mone hoie. 36 “Hintu Johono shakkiganottun bes dangor shakki mor age. Sieni mui gori phureibartei Babe more hoiekkani ham die. Sei hamani gorongotte ienie Babe more dipadeie gori shakki der. 37 Ar more dipadeiede Babpuoio the nije mor sombonde shakki die. Tumi huno din tar robuo no suno ar tar dogkanio no dego. 38 Tumi tar hodagan monot no rago hinottei the dipadeiede ibereo bischias no goro. 39 “Sastrot tumi ononto jibon peba bili mone gorinei sieni tumi togo, ar ei Sastroganie mor sombonde shakki der. 40 Tobuio, tumi jibon pebartei mor idu ebar mone no hoi. 41 Mui manjiortun sorman no haang. 42 Hintu mui tomare hobor pelung, tomartun Itchiorottei hospanan nei. 43 Mui mor Babo nange elung ar tumi more gojhi no lola. Oinnio jone judi tar nijor nange edo, tumi tare gojhi lolan. 44 Tumi sorman gora-gori goro. Ar jei sormanan bana Itchiorottun eje, sien tumi no togo. Senottei hingori bischias goriba sei? 45 Babo idu mui tomare duji banem bili mone no gorsio. Ek jone tomare duji banai, ar sibie olode Mosi jare tumi asha goro. 46 Haron tumi judi Mosire bischias gorida, moreio bischias gorilan. Haron the mor sombonde legkie. 47 Hintu tumi judi the legkiede sien bischias no gorilie, hingori tumi mor hodagani bischias goriba?”
1 Sieno porendi, Jisu Galili Sagoro uhule par ologoi. Ei billuore Tiberia Sagor hon. 2 Pirellieguno ugure sinno ham gorididede sieni thara degkuon hinottei, shagor manus tar pune-pune jadon. 3 Ar Jisu ekkuo mouno pidit udinei tar sisjiogun somot bojilogoi. 4 Sei lokkene Judaiunor Rokkie Utchobpan hai ejchie. 5 Jisu jokkene rini selo, shagor manus tar mokkie ette deginei Philibore holo, “Ei manuschune hebartei huttun pidie hinibonggoi?” 6 Hintu Philibore joga sebartei Jisu sei hodagan holo. Haron the nije hobor pai the hi goribuo. 7 Philibe tare uttor dilo, “Jon bagene ekka-ekka bhag pebartei, di shot denarirδ pidieio no hulebo.” 8 Tar sisjiottun ek jone Simon Pitoror bheibuo Andrio Jisure holo, 9 “Iot ekkuo gurottun paschan hon bhado pidie ar dibie gori maj agon. Hintu edok jon manjiortei sigundoi hi obo?” 10 Sebeden Jisu holo, “Manuschunore boja bajei duo.” Sei jaganot shagor her elo hinottei manuschune bojilak. Siot morod elakke perai, pas azar jon. 11 Jisu pidiegani lolo. The donniobad denar porendi sisjiogunore dilo. Ar sisjiogune boi agonde sigunore bhag gori dilak. Sedogkie gori majchuno the bhag gori dilo. Jar jedog mone hoi sedog helak. 12 Manuschunor ped bhoranar porendi, Jisu tar sisjiogunore holo, “Hitchu borbat no jai para, ugursieni tulilo.” 13 Senottei, sei paschan hon bhado pidiettun hei hai ugursieni thara tuli lolakke baro lei. 14 Sebeden Jisu gorsiede sinnogan manuschune deginei thara holak, “Songsarot ebode Munibuo hamakkai ete obode.” 15 Senottei thara bolajure tare dhorinei raja tulibartei ebar oion bili Jisu buji parinei, the ek huredi gai-gai mounnuot gelogoi. 16 Reid oinei, tar sisjiogune sagoranot lamilakkoi. 17 Thara ekkan nawt udi sagoro uhuledi Kapernaum adamot jadon. Honatto andhar oie, ar Jisu thara sidu no jai. 18 Bor boier bar hinottei sagorot tubol udtie. 19 Tin bah ser meilδ pangei bei jana porendi, thara Jisure sagoro adi ette degilak. The nawgano hai ejer hinottei thara dorelak. 20 Hintu Jisu tharare holo, “Mui, mui, no doreo.” 21 Sebeden thara tare hujhie nawganot tulilak. Ar thara jadonde jaganot abada gori nawgan lungilogi. 22 Tar hellieio manuschun sagoro uhuledi elak. Thara hobor pan sisjiogune uttuonde sieno bade ar siot oinnio sigon naw elo. Ar thara hobor pan Jisu tar sisjioguno loge sigon nawganot gori no jai, hintu sisjiogune tare pheleinei jeiondoi. 23 Hintu oinnio sigon naw Tiberia sohorottun ejchie. Sieni Probuie hujhi hoda hoinei pidie habeiede jagano hai elo. 24 Senottei, manuschune Jisure ar tar sisjiogunore siot no deginei, tharaio nawt udi Jisure togeibartei Kapernaum adamot gelak. 25 Jisure sagoro uhuledi thara lak peineioi tare holak, “Robbi, tui hokke idu ejchiosh?” 26 Jisu tharare uttor dilo, “Mui tomare soittio hodagan soittio gori hongor, tumi sinno ham degkuode senottei more no togor. Tumi ped boron pidie heiode senottei more togotte. 27 Hoi jaidie bhadottei hosto no gorsio. Hintu ononto jibon song tegede bhadottei hosto goro. Munischioro Puobuoi tomare dibode bhattun umore-umor song tigibak. Haron Bab Itchiore mor ugure marga di thoie.” 28 Sebeden thara Jisure holak, “Itchioro ham goribartei amar hi gora poribo?” 29 Jisu tharare uttor dilo, “Ien olode Itchioro haman, the dipadeiede ibiere tumi bischias goro.” 30 Senottei thara tare holak, “Ami deginei tore bischias jei para, tui hi sinno degebe? Tui hi ham goribe? 31 Amar buro-burigune moruobomit manna heion. Sien Sastrot legkie age, ‘Itchiore tharare sorgottun pidie hebar die.’ ” 32 Sebeden Jisu tharare holo, “Mui tomare soittio hodagan soittio gori hongor, Mosi tomare sorgottun pidie no de. Hintu mor Babe tomare ajol pidie sorgottun der. 33 Haron Itchioro pidiegan olode the, je sorgottun lami einei songsarore jibon dede sibie.” 34 Sebeden thara Jisure holak, “Probu, siennie pidie amare onsur dis.” 35 Jisu tharare holo, “Mui jibonor pidiegan. Je mor idu eje, tar shobai ped no puribo. Ar je more bischias gore tar huno din shobai pani saj no goribuo. 36 Hintu mui tomare hongorte, tumi more degineo more bischias no goro. 37 Baba more jigun die, sigune mor idu ebag. Ar je mor idu eje mui tare huno din phelei didung noi. 38 Mor nijor monjokka goribartei mui sorgottun lami no ejong. Hintu more dipadeiede sibier mon purei dibartei mui ejchiong. 39 More dipadeiede Babo ischie olode ien, the more jigun die, sigun ek jono mui no areidung, hintu sejo dinnuot sigunore jiei tulidung. 40 Ar more dipadeiede iber ischie olode ien, je Puobuore dege ar tare bischias gore the ononto jibon pebo, ar mui tare sejo dinnuot jiei tulim.” 41 “Mui sorgottun lami ejchiongge pidiegan” Jisu hoie hinottei, Judaiune tar biruddie budhu-budhu gorton. 42 Ar thara hodon, “Ami tar babpuore ar tar mabuore sini, ete Josebor puobuo Jisu, noi ni? Senottei, the hingori hoi pare, ‘Mui sorgottun lami ejchiong’?” 43 Senottei Jisu tharare uttor dilo, “Tumi, tumi budhu-budhu no gorsio. 44 More dipadeiede Babpuoi tani no anilie, huno jon mor idu no ejon. Ar mui tare sejo dinnuot jiei tulim. 45 Munigune boiot legkuon, ‘Ar Itchiore tharare begkunore sigeibo.’ Senottei je Babo hoda sune ar shigie, the mor idu eje. 46 Ajole, huno jone Babore no degon. Bana Itchiorottun ejchiede sibiei Babore degkie. 47 Mui tomare soittio hodagan soittio gori hongor, je more bischias gorsie, the ononto jibon peie. 48 Mui sei jibono pidiegan. 49 Tomar buro-burigune moruobomit manna heion, ar thara mori jeion. 50 Ei pidiegan sorgottun lami ejchiede olode, je hai the no more para. 51 Mui sorgottun lami ejchiongge ibie olungge jeda goraidie pidiegan. Je huno jone judi ei pidiegan haan, the umore-umor bajibo. Ar mui dimbie pidiegan olode mor heyegan. Mui ien songsaro manuschunor jibonanittei dim.” 52 Siendoi Judaiune thara-thara torga-torgi gorton, “Ei Manuschuoi hingori tar heyegan amare hebar dibo?” 53 Sebeden Jisu tharare holo, “Mui tomare soittio hodagan soittio gori hongor, tumi judi Munischioro Puobuor eragan no ho ar tar logan pan no goro, salen tomar nijor jibon nei. 54 Je mor eragan hai ar mor logan hai, the ononto jibon pai. Ar sejo dinnuot mui tare jiei tulim. 55 Haron mor eragan olode jodepode haidie jinij ar mor logan olode jodepode pan gorede jinij. 56 Je mor eragan hai ar mor logan pan gore, the mor bidirie thai ar mui tar bidirie thang. 57 Jeda Babe more dipadeie ar Babor darai mui jeda agong. Thik sedogkie gori, je more hai, theo mor darai jeda thebo. 58 Ien olode sorgottun lami ejchiede pidiegan. Tomar buro-burigune manna heion, hintu mori jeiondoi. Ien sedogkie noi. Je ei pidiegan hai, the umore-umor bajibo.” 59 Jokke Jisu Kapernaum adamot sigkie die, the sei hodagani synagogot hoie. 60 Senottei, tar sisjiogune ien suninei, bhaluk jone holak, “Ien baari aghattie hoda, honna buji paribo?” 61 Sei hodaganottei tar sisjiogune budhu-budhu gortonde lokkene Jisu mone-mone buji parinei, the tharare holo, “Siendoi tumi ogoman pelade? 62 Tumi judi Munischioro Puobuore the agendi jidu elo, sidu uttiegoi degilie, salen hi obo? 63 Aptabuoi jibon de, hintu heyegane hitchu lab no pai. Mui tomare hongorte hodagan olode apta ar jibon. 64 Hintu tumi hoiek jone bischias no goro.” Haron Jisu polliettun duri hobor pai, hugune bischias no goribak ar honna tare dhora bajei dibo. 65 Ar the holo, “Ienottei mui tomare hongor, mor Babe judi bol no dile, huno jon mor idu ei no paron.” 66 Siottun duri balukjon tar sisjioi phiri gelak ar tar loge no gelak ar. 67 Senottei, Jisu baro jon sisjiore holo, “Tomartuno jebarloi mone hor ni na?” 68 Sebeden Simon Pitore tare uttor dilo, “Probu, ami a har idu jebong? Tortun ononto jibono hodagan age. 69 Ami tore bischias gorsei ar ami hobor peiei, tui olede Kristo, jeda Itchioro Puobuo.” 70 Jisu tharare uttor dillo, “Mui tomar baro jonore tulliong, ar tomartun ek jon suni noi ni?” 71 Hintu The Simonor puobuo Juda Iskariodor sombonde holo. Haron, the tare dhora bajei diebuo ar the olode baro jonottun ek jon.
1 Sei porendi Jisu Galili dejot berar. Judaiune tare morei pheleibar sadon hinottei the Judea dejot bereibar no selo. 2 Sei lokkene Judaiunor Bajei Utchobpan hai ejchie. 3 Senottei tar guro bheiune tare holak, “Ei jagan phelei jeinei Judea dejot jagoi, tui gorotte hamani tor sisjiogune degon para. 4 Haron je nangkora obar sai, the gubone hitchu no gore. Tui judi ieni jodepode gori goroschie oi, salen tui nije songsaro manuschunore dega.” 5 Tar bheiune tare bischias no goron hinottei thara sien holak. 6 Sebeden Jisu tharare holo, “Mor somoibuo ejo no eje, hintu tomar somoibuo daw onsur age. 7 Songsaro manuschune tomare hinsie no goribak, hintu tharar hamani bojong hoi duong hinottei thara more hinsie goron. 8 Tumi ei utchobpanot jo. Mor somoibuo ejo song puro gori no eje hinottei ikkie mui ei utchobpanot no jeim.” 9 The sei hodagan honar porendi, the Galili dejot thelo. 10 Hintu tar bheiune utchobot janar porendi, theio gelo, hintu The hulomela gori no jai, gubone jeie. 11 Senottei, Judaiune utchobot tare togadon ar hodon, “The hudu age?” 12 Ar manjior jhagot shagor manjie tar sombonde shanggadik budhu-budhu gorton. Ek dagie holak, “The gom manus.” Aro ek dagie holak, “Noi die suo the manuschunore hu-podedi nejaidie sie!” 13 Hintu thara Judaiunore doreon hinottei tar sombonde huno jone hulo mela gori no holak. Utchobpanot Jisur Sigkie 14 Utchobo song bhago oktot, mondirbuot Jisu jeinei sigkie der. 15 Ar Judaiune tare amok olak. Thara hodon, “Ei Manuschuoi hingori madei jane? The lega no shigie” 16 Jisu tharare uttor dilo, “Mor sigkiegan mortun noi, hintu ien olode more dipadeiede sibiettun. 17 Huno jone judi tar ischie doge goribar mone hoi, the hobor pebo mor sigkiegani huttun ejer. Ien hi Itchiorottun, nahi, mor nijor odhiharottun hongor. 18 Je nijor hoda hoi, the nijottei baini togai, hintu je tare dipadeie sibiere baini goribar sai, the soittio. Ar tar huno be-dhormi nei. 19 Mosi tomare Niom no de ni na? Ar tumi huno jone sei Niom no palo. A hittei tumi more morei pheleibar sor?” 20 Jonogone uttor dilak, “Tore bhude peiede. Tore honna morei pheleibar satte?” 21 Jisu tharare uttor dilo, “Mui ekkan ham gorinei tumi begkune amok awr. 22 Ienottei na, Mosi tomare sundu-sam habibar ugum dede. Jireni Dinnuot tumi sundu-sam habi duo. Hintu sundu-sam habi denagan Mosittun no eje. Ien daw buro-burigunottun. 23 Mosir Nioman bhonggo no oie gorinei judi Jireni Dinnuot sundu-sam habi die ole, Jireni Dinnuot mui ek jon manus puro gori gom gori dinei, a hittei tumi mor ugure shanggadik rak oio? 24 Ugure-ugure seinei bijier no gorsio na. Hintu thik mode bijier gorsio.” 25 Sebeden hoiek jon Jerusalem sohoro manjie holak, “Etare noi ni amar murubbigune morei pheleibartei sadonde? 26 Sawh, the hulomela gori hor ar thara tar biruddie hitchu no hodon. The hamakkai Kristo bili murubbigune hoi parsionde noi ni? 27 Ami hobor pei the huttun ejchie. Hintu Kristo ele, the huttun ebo huno jone hobor no pebak.” 28 Senottei mondirbuot Jisu sigkie dede, the birat ro gori holo, “Tumi more sino ar mui huttun tumi hobor po. Mui nije-nije no ejong. Hintu more dipadeiede sibie soittio ar tare tumi hobor no po. 29 Mui tartun hinottei, mui tare hobor pang ar the more dipadeie.” 30 Senottei thara tare dhoribar pod togadon. Hintu tar somoibuo ejo song no eje hinottei, tare huno jone ad no lagan. 31 Hintu sei manuschunottun bhaluk jone tare bischias gorsion ar hodon, “Kristo ele, ei Manuschuoi gorilode ienittun bes The sinno ham goribogi ni na?” 32 Sei hodagani manuschune tar sombonde budhu-budhu gori hode, Pharisigune suinnion. Sebeden Jisure dhoribartei, Pharisigune ar rajguruthagurune mondiro polischun dipadelak. 33 Senottei Jisu tharare holo, “Tomar loge mui aro hanekkon gori theimbe. Tar porendi, more dipadeiede sibier sidu mui jeimgoi. 34 Tumi more togeinei suph no peba ar mui theimboidie siot tumi jei no pariba.” 35 Sebeden Judaiune thara-thara huobula gorton, “Ami tare suph no pei para The hudu jebar sai? Grik manuschuno sere settera oie Judaiuno sidu jeinei Grik manuschunore sigkie dibogoi ni na? 36 The holode sien hi? ‘Tumi more togeinei suph no peba, ar mui theimboidie siot tumi jei no pariba’?” 37 Utchobo sejo mul dinnuot, Jisu thieinei birat ro gori holo, “Jar pani saj gore, the mor idu ejok, pani hokki. 38 Je more bischias gore, Sastroie hoiede doge, tar ontorottun jibono pani nal adibo.” 39 Hintu The ien holode, jigune tare bischias gorinei Apta pebak, ei sei sombonde. Haron Jisure ejo song mohimagan die no oi hinottei ejo song Pobitro Apta die no oi. 40 Senottei shagor manjie ei hodagan suninei holak, “Ete hamakkai sei Munibuo.” 41 Ek dagie holak, “Etedeie Kristo.” Hintu ek dagie holak, “Galili dejottun Kristo ebo ni? 42 Kristo Davidor bongsot jormeibogi. The Davide roiede Bethlehem adamanot jormeibogi gori Sastroie no hoi ni?” 43 Senottei tar darai manuschun bhag oi gelak. 44 Sigunottun hoiek jone tare dhoribar mone holo, hintu hono jone tare ad no bajan. 45 Sebeden mondiro polischune rajguruthagurunor ar Pharisigunor idu phiri elak. Thara tharare holak, “Tumi a hittei tare no anila?” 46 Mondiro polischune uttor dilak, “Huno jone ei Manuschuo dogkie gori huno din hoda no hon.” 47 Sebeden Pharisigune tharare holak, “Tumio bhulot porilagoi die? 48 Murubbittun ar Pharisigunottun ek joneo tare bischias gorsion ni? 49 Hintu ei Niom hobor no pande manuschune obisabot porilag.” 50 Agendi reidot Jisur sidu jeiede Nikodemaio ek jon tharar dolot elo, the tharare holo, 51 “Amar Niomane akke manuschuoi hi gorsie, sei sombonde tartun juob no loie gori tare duji banai ni na?” 52 Thara tare uttor dilak, “Tuio Galili dejottun ni na? Hobor loi-loi togei sa dei, huno jon muni Galili dejottun no ejon.” 53 Sebeden jon bagene jar ghorot the gelakkoi.
1 Hintu Jisu Oliv Mounnuot gelo. 2 Ar phor ode-ode, Jisu aro mondirbuot gelo ar beg manuschun tar idu elak. The boinei tharare sigkie der. 3 Sebeden, shanda gorte dhora porsie ekkuo milie dhormo niomor mastorune ar Pharisigune tar idu anilak. Tare song moiddie thie bajei dilak. 4 Ar thara Jisure holak, “Guruthagur”, ami ei miliebuore shanda gorte dhora pheleiei. 5 Niomanot Mosi amare ugum dede, ami edogkie miliere sil mela dena. Hintu tui hi hode sas?” 6 Tare duj badei dibartei ekkan haron pan para, thara ei hodagan tare sagi sebartei holak. Hintu Jisu no sunede dogkie gori nigurinei angulloi madit legilo. 7 Tartun thara bar bar pujor gorton hinottei, the ujonnie seinei holo, “Tomartun je pab no gore, the akke tare sil mela duok.” 8 The aro nigurinei madit leger. 9 Sebeden tar hodagan thara suninei, ar tharar bhul oie bili buji parinei burogunottun duri jero manuschuo song ek jon ek jon gori nigili gelak. Ar Jisu gai-gai olo ar miliebuoio jagat thiei rolo. 10 Jisu uju oinei, harore no degi hintu miliebuore gai-gai deginei tare holo, “Miliebuo, tore duj badei didonde sigun hudu? Huno jone tore duj badei duon ni na?” 11 The holo, “Probu, more huno jone duj badei no duon.” Ar Jisu tare holo, “Muio tore duj badei no dim. Jagoi ar pab no goris ar.” 12 Sebeden Jisu aro manus-chunore holo, “Mui songsaro phor. Je mor pune-pune eje, the shobai andharot bere daw noi, hintu the jibono phor pebo.” 13 Sebeden Pharisigune tare holak, “Tui nijor hodagan nije shakki duor. Tor hodagan soittio noi.” 14 Jisu tharare holo, “Mui mor hoda nije shakki dileo mor hodagan soittio. Haron mui hobor pang mui huttun ar hudu jeim. Hintu tumi hobor no po mui huttun ejchiong ar hudu jeim. 15 Tumi manjior doge bijier goro. Mui daw harore bijier no gorong. 16 Judi mui bijier gorilie, mui jien bijier gorong sien soittio. Haron mui gai no gorong, hintu mui ar more dipadeiede Babaloi gori. 17 Tomar niomanot lega oiede, di jone ekkan shakki dile sien soittio. 18 Mor hoda mui nije hong, ar more dipadeiede Babpuoi mor sombonde hoi.” 19 Senottei thara tare holak, “Tor Bab hudu?” Jisu uttor dilo, “Tumi moreio hobor no po ar mor Baboreo hobor no po. Tumi judi more hobor peda, mor Baboreo hobor pelan.” 20 The mondirbuot sigkie dette lokkene, Jisu sei hodagani dan goronde gudhibuot hoie. Tar somoibuo ejo song no eje hinottei, tare huno jone no dhoron. 21 Sebeden Jisu aro tharare holo, “Mui jangorloi ar tumi more togeiba ar tumi tomar pabe moriba. Mui jidu jeim sidu tumi jei no pariba.” 22 Senottei Judaiune holak, “The hi monor hujhie moribarloitei hor ni na, haron The hor, ‘Mui jidu jeim sidu tumi jei no pariba’?” 23 The tharare holo, “Tumi tolettun, mui ugurottun. Tumi ei songsarottun, mui ei songsarottun noi. 24 Senottei mui tomare hongor, tomar pabe tumi moriba. Mui olungge sibie hinottei, tumi judi bischias no goro, tomar pabe tumi moriba.” 25 Sebeden thara tare holak, “Tui honna?” Ar Jisu tharare holo, “Mui olungge tomare polimortun duri hoiongge sibie. 26 Tomar sombonde mor hobar ar bijier goribar shagor age. Hintu more dipadeiede sibie soittio. Ar mui tartun jieni suinniong, sieni mui songsaro manuschunore hong.” 27 The Babo sombonde horte sien thara buji no parilak. 28 Sebeden Jisu tharare holo, “Jokke tumi Munischioro Puobuore ojolot tuliba, sokke tumi buji pariba, sibie olungge mui. Tumi hobor peba, mui mortei hitchu no gorong. Hintu Baba more sigeiede doge mui sieni hong. 29 More dipadeiede sibie mor loge age. The hujhi oidie hamani mui onsur gorong hinottei, Baba more gai-gai gori phelei no jai.” 30 The sei hodagani hode, shagor manjie tare bischias gorilak. 31 Sebeden Jisu tare bischias gorsionde Judaiunore holo, “Tumi judi mor hoda doro, sale, tumi jodepode mor sisjio. 32 Soittiogan tumi hobor peba ar soittiogane tomare shorei dibo.” 33 Thara tare holak, “Ami Abrahamor bongso ar ami haror banidajit no hadi. Tui hingori hos, ‘Tomare uddhar gora obo’?” 34 Jisu tharare uttor dilo, “Mui tomare soittio hodagan soittio gori hongor, je pab gore, the pabor banidaji. 35 Banidajibuo umor song ghorot no thai. Hintu puobuo umor song thai. 36 Senottei Puobuo judi tomare iri de, salen tumi jodepode uddhar oba. 37 Mui hobor pang tumi Abrahamor bongso. Hintu tomar ontorot mor hodaganor jaga nei hinottei, tumi more morei pheleibar sor. 38 Mui mor Babpuo sidu jieni degkuong sieni hong. Hintu tumi tomar babo sidu jieni degkuo sieni tumi goro.” 39 Thara tare holak, “Amar babpuo olode Abraham.” Jisu tharare holo, “Tumi judi Abrahamor puo oda sale, Abrahamor sannie ham gorta. 40 Itchiorottun suinniongge soittio hodagan mui tomare holungge sibiere, hintu tumi ikkie more morei pheleibar togor. Abrahame daw edogkie no gore. 41 Tumi tomar babo sannie ham gorode.” Sebeden thara Jisure holak, “Ami jarbuo puo noi. Amattun ekkuo Bab age, sibie Itchiorbuo.” 42 Senottei Jisu tharare holo, “Itchiorbuo judi tomar Bab odo, tumi more hos pelan. Haron Itchiorottun mui ejchiong. Mui nije-nije no ejong, hintu The more dipadeie. 43 Tumi mor hodagan a hittei buji no paror? Tumi mor hodagan suni no paror hinottei. 44 Tumi olade tomar bab Diabolatunδ. Tomar babottun goribar mone hoidie sieni tomar goribar mone hoi. Polliettun duri the elode hungoriebuo, ar tar siot soittiogan nei hinottei, the soittioganot thei no pare. The olode gal madie ar galor bab. Senottei, the jokke mijie hoda hoi, sien tar nijottun hoi. 45 Mui soittio hodagan hong hinottei, tumi more bischias no goro. 46 Tomartun honna more pabi bilinei proman di pariba? Hintu mui judi soittio hodagan hole, a hittei tumi more bischias no goro? 47 Je Itchiorbuottun, the Itchioro hoda sune. Tumi Itchiorbuottun noi hinottei, tumi Itchioro hoda no suno.” 48 Sebeden Judaiune tare holak, “Tui Samari jad, ar tore bhude peie hoieidie sien thik noi ni?” 49 Jisu uttor dilo, “More bhude no pai. Mui mor Babore sorman gorong, hintu tumi more aw-mannio goro. 50 Mui hintu sorman hedung no sang. Ek jone more sorman gorer ar bijier gorer. 51 Mui tomare soittio hodagan soittio gori hongor, je mor hoda mane, the umor song moranagan degido noi.” 52 Sebeden Judaiune tare holak, “Ikkie ami hobor pelong, tore bhude peie. Abrahame mori jeie ar muniguno mori jeion. Ar tui hos, ‘Je mor hoda mane, the motto noi.’ 53 Tui hi morsiede amar babpuo Abrahamottun bes dangor parapang? Munigun mori jeion. Tore tui hi baneide sas?” 54 Jisu uttor dilo, “More mui sorman gortung, mor sormanan hitchu no olun. Tumi mor Babore Itchior bilinei dabi goro, je more sorman gore. 55 Tobuio tumi tare hobor no po. Hintu mui tare hobor pang. Mui judi ‘Tare no sinong’ hodung mui tomar dogkie galluo olungun. Hintu mui tare hobor pang ar mui tar hoda manong. 56 Tomar bab Abrahame mor dinnuo sebartei shanggadik hujhi oie. Ar the ien deginei hujhi oie.” 57 Sebeden Judaiune tare holak, “Tui ejo ponjas bojoro no os. Ar tui horte, tui Abrahamore degkuos?” 58 Jisu tharare holo, “Mui tomare soittio hodagan soittio gori hongor, Abrahame jormeibar agottun duri MUI AGONG.” 59 Senottei thara tare mela dibartei sil adot lolak, hintu Jisu polleie. The tharar serendi jeinegoi mondirbuottun nigili gelo. Ar ei sedogkie gori the gelogoi.
1 Ar Jisu jade-jade ek jon jormortun duri han manus degilo. 2 Tar sisjiogune tartun pujor gorilak, “Robbi, har pabo darai ei manuschuo jormortun duri han oie? Tar pabo darai, nahi, tar bab-magunor pabo darai?” 3 Jisu uttor dilo, “Manuschuo pab no gore ar tar bab-maguneo pab no goron. Udischuogan olode, Itchiorbuoi ei Manuschuor darai tar hamani degebartei. 4 Din thagode more dipadeiede sibier hamani mor gorana dorkar. reid ole, huno jone ham gori no paron. 5 Mui songsarot thagode, mui songsaro phor.” 6 Jisu sei hodagan honar porendi, the madit sep dilo ar seppoi pheg banelo. Ar the sei phegkan han Manuschuor sogkunot guli dilo. 7 Jisu tare holo, “Ja, Siloam pourbuot tor sogkun dogoi.” Siloam ortho “The dipadeie.” Senottei han Manuschuoi jeinei dologoi. Sebeden sogedi deger hinottei the phiri elo. 8 Sebeden parallie ar oinnio jone jigune tare agendi han gori degkuon thara holak, “Ete noi ni bojinei bikkie magette?” 9 Hoiek jone holak, “Oi, oi ete.” Hintu ek dagie holak, “The ekkere sibier dogkie.” Hintu The holo, “Sibie mui.” 10 Senottei thara tare holak, “Tor sogkun hingori gom olak?” 11 The uttor dilo, “Ek jon manus tare Jisu honde sibiei pheg banenei mor sogkunot guli die. Ar the more hoie, ‘Siloam pourbuot ja ar tor sogkun dogoi.’ Mui jeinei dhoionggoi ar mor sogkun gom oion.” 12 Sebeden thara tare holak, “The hudu age?” the holo, “Mui hobor no pang.” 13 Agendi han elode Manus-chuore paralliegune Pharisiguno sidu nejeilak. 14 Jisu pheg banenei tar sogkun gom gori dede dinnuo elode Sabbath 15 Pharisigune aro tartun pujor gorilak, hingori tar sogkun gom oion. Ar the tharare holo, “The mor sogkunot pheg guli die ar mui mor sogkun dhoineigoi mui degong.” 16 Senottei hoiek jon Pharisie holak, “Sei Manuschuo Itchiorottun no eje. The Jireni Dinnuo no palai.” Ek dagie holak, “Pabi manjie hingori edogkie sinno ham gori paribo?” Sebeden thara-thara bhag olak. 17 Thara han manuschuore aro holak, “The tor sogkun gom gori die hinottei, tui tare hi mone goros?” the holo, “The ek jon muni.” 18 Hintu Judaiune the han elo ar tar sogkun gom oion bili han elode manuschuor bab-magun no dagon song tare bischias no goron. 19 Thara tharattun pujor gorilak, “Ibie tomar puo oi ni jibere tumi hode the jormortun duri han? Salen, ikkie the hingori deger?” 20 Tar bab-magunor tharare uttor dilak, “Ami hobor pei ibie amar puo. Ami hobor pei the jormortun duri han. 21 Hintu ikkie the hingori deger ami hoi no pari. Tar sogkun honna gom gori die ami hobor no pei. Tar jodasto boios oie. Tartun pujor goro. The tar nijor hoda hobo.” 22 Judaiunore thara dhoran hinottei tar bab-magune sei hodagani holak. Haron Judaiune honatto begkune mani loionde, je Jisure Kristo bili judi mane, tare synagogottun bar gori die obo. 23 Senottei tar bab-magunore holak, “The jodasto boios oie. Tartun pujor goro.” 24 Senottei Judaiune han elode manuschuore aro ekbar daginei tare holak, “Itchiorore baini gor. Ami hobor pei sei manuschuo pabi.” 25 Sebeden the holo, “The pabi ni na mui hobor no pang. Ekkan jinij mui hobor pang. mui han elung ar ikkie mui degong.” 26 Ar thara tare aro holak, “The tore hi gori die? The hingori tor sogkun gom gori die?” 27 The tharare uttor dilo, “Mui tomare honatto hoiong ar tumi no suno. A hittei tumi aro sunibar sor? Tumio tar sisjio obar mone hor ni na?” 28 Sebeden thara tare thajei geil dilak, “Tui tar sisjio. Hintu ami Mosir sisjio. 29 Ami hobor pei Itchiore Mosire hoie. Hintu sei Manuschuo huttun ejchie ami hobor no pei.” 30 Manuschuoi tharare holo, “Sien ekkan asarjio hoda. Tumi hobor no po the huttun, tobuio the mor sogkun gom gori die. 31 Hintu ami hobor pei Itchiore pabigunor hoda no sune. Hintu je Itchior tobona gore ar tar ischie doge gore, Itchiore sibier hoda sune. 32 Songsar sristi oiede siottun duri, jormottun duri han manjior sog ek jone gom gori dede suno no jai. 33 Sei Manuschuo judi Itchiorottun no aw daw, tar hitchu goribar hemoda no thelun.” 34 Thara tare holak, “Tui jodepode pabor phole jormo oios. Tui amare sigeibar sorte?” Ar thara tare bar gori dilak. 35 Pharisigune han manus-chuore bar gori duon bili Jisu suninei, tare lagot peinei holo, “Tui Itchioro Puobuore bischias goros ni?” 36 The uttor dilo, “Probu, mui tare bischias jebartei, the honna more ho.” 37 Jisu tare holo, “Tui tare degkuos ar, torloi hoda hongorte ibie olungge sibie.” 38 Sebeden the holo, “Probu, mui bischias gorong!” Ar the Jisure tobona gorilo. 39 Ar Jisu holo, “No degonde sigune debartei, ar jigune degon sigun han obartei mui ei songsarot bijierottei ejchiong.” 40 Ar hoiek jon Pharisi Jisur loge elakke sigune sei hodagan suninei, thara holak, “Amio han ni na?” 41 Jisu tharare holo, “Tumi han oda, pab no gorilan. Hintu ikkie tumi hor, ‘Ami degi.’ Tumi sien hola hinottei tomar pabpan thelo.
1 “Mui tomare soittio hodagan soittio gori hongor, je bera-shagol ghorot duoredi no sominei, giriedi udi oinnio hittendi some, the sur ar daget. 2 Hintu je duoredi some, the bera-shagol soreie. 3 Duor subidarbuoi tartei duoran huli de. Ar bera-shagolune tar robuo sunon. The tar bera-shagolun nang dorinei dage ar soreibartei nejai. 4 The tar nijor bera-shagolun nigileinei, the tharattun akke-akke jai. Ar thara tar robuo hobor pan hinottei, bera-shagolune tar pune-pune jan. 5 Thara aw-sin manjior ro hobor no pan hinottei, thara tar pune-pune shobai no jan. Thara tartun dhei jebak.” 6 Jisu ei tulona hodagan manuschunore hoi dilo. Hintu tharare the hi hor, thara no bujilak. 7 Senottei Jisu tharare aro holo, “Mui tomare soittio hodagan soittio gori hongor. Mui olungge bera-shagoluno girie duoran. 8 Mor agendi jigune ejchion, sigun olakke begkun sur ar daget. Hintu bera-shagolune tharar hoda no sunon. 9 Mui olungge duoran. Je mor darai somibo, the rokkie obo. The somibo ar nigilibo, ar soribar jagaio pebo. 10 Surbuo ebode bana sur goribartei, morei pheleibartei ar nas goribartei. Mui ejchiongge thara jibon pebartei ar sien alajhala gori thara pan para. 11 Mui olungge gom bera-shagol soreiebuo. Gom bera-shagol soreiebuoi tar bera-shagolunottei tar poranan de. 12 Hintu sagorsiebuo olode bera-shagol soreie noi hinottei bera-shagolun tar noi ar bera-shagolun pheleinei dhei jai. Pebobuoi bera-shagolun hamarai ar settera gore. 13 Sagorsiebuoi bedonottei ham gore hinottei the dhei jai. The bera-shagolun gome no sai. 14 “Mui olungge gom bera-shagol soreiebuo. Mor bera-shagol mui hobor pang, ar mor bera-shagolune more hobor pan. 15 Baba more jeannie gori hobor pai, muio siennie gori Babare hobor pang. Ar bera-shagolunottei mor poranan duong. 16 Ei shagolo palluo baraio oinnio bera-shagol mor agon ar sigun mor ana poribo. Thara mor robuo sunibak ar thara ek jon bera-shagol soreiebuor ek palot obakki. 17 Haron, mui mor poranan aro phirei loi parong para dim hinottei, Baba more hos pai. 18 Mortun huno jone mor poranan hari loi no nejeibak. Hintu mui nije-nije dim. Mor poranan dibaro hemoda age ar aro phirei lobaro mor hemoda age. Ei uguman mor Babottun peiong.” 19 Sei hodaganittei Judaiune aro bhag olak. 20 Hintu bhaluk jone holak, “Tare bhude peie ar pagole dorsie. Tar hoda tumi a hittei sunor?” 21 Ek dagie holak, “Ei hodagani bhude peie manjior hoda noi. Bhude han manjior sog gom gori di paron parapang?” 22 Gojei Dena Utchobpan Jerusalem sohorot porilo. Sien olode jarhallie. 23 Jisu mondirbuot, Solomono barandat berei-berei age. 24 Sebeden Judaiune tar seropala einei tare holak, “Tui amare hodog bilon song mono dugot rageibe? Tui judi Kristo ole, amare pang gori bhangi hona.” 25 Jisu tharare uttor dilo, “Mui tomare hoiong daw ar tumi more bischias no goro. Babo nange mui hamani gorong, sienie mor sombonde proman de. 26 Mui tomare hoiongge sannie gorinei tumi mor bera-shagol noi. Senottei tumi more bischias no goro. 27 Mor bera-shagolune mor robuo sunon ar mui tharare hobor pang. Ar thara mor pune-pune jan. 28 Mui tharare ononto jibon dim ar thara umore-umor nas no obak. Huno jone mor adottun tharare hari loi no nejeibak. 29 Mor Babpuo sigun more dede sibie begkunottun dangor. Ar sigun mor Babo adottun hari ni parie huno jon nei. 30 Baba ar mui olongge ek.” 31 Senottei, tare sil mela dibartei Judaiune aro sil adot lolak. 32 Jisu tharare holo, “Mui tomare Babattun bhalukkani gom ham degelung. Sei hamanittun hon hamanittei more sil mela diba?” 33 Judaiune tare uttor dilak, “Tui gom ham goroschie sienittei ami tore sil mela no dir. Tui Itchior sorjas hinottei, ar manus oineio tui Itchior holas.” 34 Jisu tharare holo, “Tomar niomanot legkie agede noi ni, ‘Mui holung, “Tumi olade Itchior” ’? 35 Jei Manuschuo idu Itchioro hodagan ejchie, sigunore the Itchior hoie. Ar huno jone Sastro hodagan bhonggo gori no paron. 36 Babe nokbhaj gorsiebuo ar songsarot dipadei dede sibiere tumi horte, ‘Tui Itchiorore sorjior,’ haron mui holungge siendoi je ‘Mui olungge Itchioro Puobuo’? 37 Mui judi mor Babo ham no gorong, tumi more bischias no gorsio. 38 Hintu mui judi gorong, more bischias no gorilieo, mor hamani bischias goro na, jene tumi hobor po ar bischias goro jei Baba mor iot age ar mui Baba siot agong.” 39 Senottei thara aro Jisure dhoribartei pod togadon. Hintu The tharar adottun sari gelo. 40 The aro Jordan Sora uhule jeinei, Johone akke baptisma gori dede jaganot jeinei sidu thelogoi. 41 Ar shagor manus tar sidu jeionde sigune holak, “Johone hitchu sinno ham no gore. Hintu Johone ei Manuschuor sombonde hoiede sieni begkani soittio.” 42 Ar shagor manjie siot Jisure bischias gorilak.
1 Lazar nange ek jon manus Bethani adamot aw-sugkie elo. Sien olode Meri ar tar bonnuo Martha dagir adaman. 2 Sibie olode Probure tumbas tel guli dinei tar sulaniloi Jisur thengani puji dede Meri. Aw-sug elode sibie olode tar bheibuo Lazar. 3 Senottei thara di bone Jisure hobor duon, “Probu, shah tui hos paschie sibie aw-sug oie.” 4 Hintu Jisu sien suninei holo, “Sei aw-sugkan olode moribartei noi, Itchioror mohima obartei ar sienor darai Itchioro Puobuo mohima oi para.” 5 Jisu Marthare, tar bonnuore ar Lazare hos pai. 6 Lazare aw-sug oie suninei, the elode jaganot aro di din thelo. 7 Sebeden sei porendi Jisu tar sisjiogunore holo, “Judea dejot aro jei.” 8 Tar sisjiogune tare holak, “Robbi, bes diri no ol, Judaiune tore sil mela dibar togeion, tui aro sidu jebede?” 9 Jisu uttor dilo, “Baro ghonta dino phor thaidie noi ni? Je dinot berai, the ei songsaro phoran dege hinottei, the azar no hai. 10 Hintu je reidot berai, tar nijor phor nei hinottei the azar hai.” 11 Jisu sei hodagan honar porendi, the tharare holo, “Amar somarsie Lazare ghum jar. Hintu mui tare jagei tulibartei jeim.” 12 Sebeden tar sisjiogune tare holak, “Probu, the judi ghum jai, the gom obo.” 13 Lazare morsiede sombonde Jisu hoie, hintu thara bujilakke the jodepode ghum jar. 14 Senottei Jisu tharare pang gori bhangi holo, “Lazare morsie. 15 Tumi bischias goro para, mui siot no elung hinottei mui tomartei hujhi. Jei ami tar sidu jei.” 16 Sebeden Thoma, Zama honde sibiei, tar somarsie sisjio-gunore holo, “Ami tar somare moribartei amio jei.” 17 Sebeden jokkene Jisu sidu lungilogoi, Lazare sojan holat honatto ser din oie bili Jisu hobor pelo. 18 Bethani adaman olode Jerusalem sohoro hai. Perai di meilδ durot obode ai. 19 Meri ar Marthare tharar bheibuo morsiede sombonde bujeibartei ejchionde siguno loge balukjon Judai manus mijeilakki. 20 Jisu ejer bili suninei, Martha jeinei tarloi egottor ologoi. Hintu Meri ghorot thelo. 21 Sebeden Martha Jisure holo, “Probu, tui judi thede, mor bheibuo no morilun. 22 Hintu mui hobor pang ikkunuio Itchiorottun tui jien magos sien Itchiore tore dibo.” 23 Jisu tare holo, “Tor bheibuo aro jiei udibo.” 24 Martha Jisure holo, “Mui hobor pang ses dinnuot jiei uduonaganot the aro jiei udibo.” 25 Jisu tare holo, “Mui jiei uduonagan ar poranan. Je more bischias gore, the morilieio bajibo. 26 Je jeda age ar more bischias gore, the huno din no moribo. Tui ien bischias goros ni?” 27 Martha tare holo, “Oi daw Probu, mui bischias gorong tui olede Kristo. Tui olede Itchioro Puobuo songsarot ebar elode sibie.” 28 Martha sei hodagan honar porendi the gelogoi. The tar bonnuo Merire juj gori daginei tare holo, “Guruthagurbuo ejchie ar the tore dager.” 29 Sien Meri sunineio, the bhujut gori udi tar sidu gelo. 30 Sei lokkene Jisu adamanot no lungegi. The Martha loi lak pa-pi oionde jaganot ejo song age. 31 Judaiune Meri somot ghoro bidirie elak. Thara tare bujodon. Meri bhujut gori udinei jade thara degkion hinottei thara tar pune-pune gelak. Thara holak, “The sojan holat hanibarloittei sidu jar.” 32 Meri Jisu elode jaganot lungilogi. The Jisure deginei the tar thengot salam gori porinei holo, “Probu, tui judi thede, mor bheibuo no morilun.” 33 Senottei Jisu tare gujhi-gujhi hande deginei ar tar loge ejchionde Judaiunore gujhi-gujhi hande deginei bo nijes iri dilo. 34 Sebeden the holo, “Tare hudu gareiogoi?” Thara tare holak, “Probu, ai sagi.” 35 Jisu hanilo. 36 Senottei Judaiune holak, “Sawh dei, Jisu tare hodog sitpurer!” 37 Hintu tharattun hoiek jone holak, “Ei Manuschuottun han manjior sog gom gori dibar hemoda age. Ei Manuschuoreo no more para gori parilunde noi ni?” 38 Sebeden Jisu aro ek bar bo nijes iri dinei sidie shalanot gelo. Sien olode ekkuo gat. Ekkuo silloi sien nadi thuo oie. 39 Jisu holo, “Silluo jagattun laro.” Martha, morsiede sibier bonnuoi tare holo, “Probu, the ser din olo morsiede, ikkunu pojabas obo.” 40 Jisu tare holo, “Mui tore hongor tui judi bischias goros, tui Itchioro mohimagan debe, mui tore no hong ni na?” 41 Sebeden mora Manuschuo gareionde siottun thara silluo lareilak. Jisu ujonnie seinei holo, “Oh Ba, tui mor hoda suinnios hinottei mui tore donniobad duongor. 42 Mui hobor pang tui onsur mor hoda sunos. Hintu mor seropala thiei agonde manuschunottei mui ien holung, tui more dipadeos bili thara bischias jan para.” 43 Sei hodagani honar porendi, Jisu birat ro gori holo, “Lazar, nigili ai!” 44 Sebeden morsiede sibier, Lazaror adot thengot mora manjior habor bannie gori ar tar muonot mora manjior habor bereie bade nigili elo. Jisu tharare holo, “Bereieni huei dinei ja bajei duo.” 45 Balukjon Judai manus Meri sidu jeionde sigune Jisu gorsiede sieni deginei, thara Jisure bischias gorilak. 46 Hintu tharattun hoiek jon Pharisiguno sidu jeinei Jisu gorsiede sieni tharare holakkoi. 47 Senottei rajguruthagurune ar Pharisigune Senhedrino temmangot bojinei huobula gorton, “Ami hi goribong? Ei manuschuoi daw bhalukkani amok ham gorilo. 48 Ami judi goribartei di, the onsur goribuo ar beg manuschune tare bischias goribak. Ar Romor manuschune einei amar podobigani ar amar jadtuo hari lobakki.” 49 Sebeden tharattun ek jon, Kaiapha, sei bojorot moharajguruthagur elode sibiei tharare holo, “Tumi hitchu hobor no po. 50 Tumi amattei bhabi no sawh de, goda jadtuo nas obode darane, manuschunottei ek jon moranagan gom.” 51 Sien the tar nijottun no hoi. Hintu sei bojor the moharajguruthagur elo hinottei the muni dogkie gori agami hoidilode, Jisu tharar jadtuo azai moribo. 52 Bana sei jadtuottei noi, hintu settera oie Itchioro puogun the begkun ek dolot thubeibartei the moribo. 53 Ar sei dinnuottun duri Jisure morei pheleibartei temmangot thara thik gorilak. 54 Senottei Jisu Judaiunor loge hulomela gori berei no parilo ar. Hintu the siottun jeinei murobomi hure ekkan sohor Ephraim honde siot tar sisjiogun somot rologoi. 55 Sei lokkene Judaiunor Rokkie Utchobo dinnuo hai ejchie. Rokkie Utchobo agendi nije-nije sudduo-shanggo obartei shagor manus adamortun Jerusalem sohor song jeion. 56 Thara Jisure togadon. Mondirbuot thara thiei thagke huobula gorton, “Tumi hi mone goro? The utchobot ebo ni?” 57 Rajguruthagurune ar Pharisigune ugum duonde jei Jisu hudu age judi huno jone hobor phele janadok, thara tare dhori parondoi para.
1 Sebeden Rokkie Utchobor shoi din agendi, Jisu Bethani adamot jeie. Morsiede sibiere the morattun jiei tulliede Lazare siot elo. 2 Senottei, thara Jisuttei bellie ek saj bhat jugol gorsion. Martha lobiot gorer, hintu Lazareio tharar somare Jisur loge bhat poiot bojsie. 3 Sebeden Meri mongga ek sijiri dami hati ador tel aninei, Jisur thenganit guli dilogi. Tar sulaniloi Jisur thengani puji dilo. Telo tumbaschandoi ghoro bidirie gonggolar. 4 Sebeden Jisur ek jon sisjio Simonor puobuo, Juda Iskariode, tare dhora bajei dibode sibiei holo, 5 “Ei tumbas telan tin shot denariδ loi bejinei gorib dugkiere a hittei die no gelo?” 6 Gorib dugkiegunore sit purinei the ei hodagan no hor. Hintu the sur hinottei ar tengaδ baksubuo tar siot elo ar tenga baksubuot tenga bhorei thole, the loi hinottei the sei hodagan hor. 7 Hintu Jisu holo, “Miliebuore the jien gorto sat goribar duo. The ei telan more garebartei rageiede. 8 Haron goribpun daw tomar loge onsur agon. Hintu tumi more onsur no peba.” 9 Sebeden shagor Judai manuschune Jisu siot age bili hobor pelak ar thara sidu gelak. Hintu bana Jisure sebartei thara no jan hintu morattun jiei tulliede Lazaroreio sebartei thara jeion. 10 Senottei, rajguruthagurune Lazaroreio morei pheleibartei thara temmang gorsion. 11 Haronan olode Lazaror darai shagor Judai manus jeiondoi ar thara Jisure bischias gora horilak. tulliede lokkene manuschun tar loge elakke sigune shakki duon. 12 Tar hellie, birat ek jhag utchobot jeie manus, Jisu Jerusalem sohorot ejer bili thara suninei ejchuon. 13 Thara bollie somot tal gajo pada loinei tarloi egottor obarloittei thara gelak ar thara joi-jogar parton, “Hossana! Israelor Rajabuo ‘PROBUR nange ejette sibie donniobad gori thok!’ ” 14 Sebeden Jisu, ekkuo gadha shawh peinei sibier pidit udilo. Sien Sastrot legkie doge olo, 15 “Oh Zaionor jhibuo, tui no dores. Sah, tor Rajabuo gadha shawh pidit gori ejer.” 16 Polim tar sisjiogune sieni buji no paron. Hintu jokkene Jisure mohima gora oie, sebeden tharar monot udilode, sieni tar sombonde Sastrot lega oie. Ar thara tare sieni gorsion. 17 Senottei Jisu Lazarore daginei sidie shalottun morattun jiei tulliede lokkene manuschun tar loge elakke sigune shakki duon. 18 Sienotteio manuschune sei amok haman The gorsie suninei, tarloi egottor olakki. 19 Senottei Pharisigune thara-thara huobula gorton, “Sawh dei, tumi hitchu shadi no paror. Sawh, goda songsaro manuschun tar loge jadondoi.” 20 Utchobot, tobona goribartei jeionde sigunor loge hoi ek jon Grik manus elak. 21 Senottei, sigune Galili dejottun Bethsaida hullie Philibo sidu jeinei tare hujoli gori holak, “Babu, amar Jisure sebar mone hor.” 22 Philibe jeinei Andriore hologoi. Sebeden Andrioloi Philibe Jisure holakkoi. 23 Hintu Jisu tharare holo, “Munischioro Puobuore mohima gora obode somoibuo ejchie. 24 Mui tomare soittio hodagan soittio gori hongor, ekkuo gom judi madit porinei mori no gele ekkuo gori thai. Hintu judi mori jai, sibiei shagor utponno gore. 25 Je tar poranan hos pai, the areibo. Ar je tar poranan ei songsarot hos no pai, the ononto jibonottei rokkie obo. 26 Je mor ham gore the mor loge ejok. Ar mui jidu theim mor sagorsiebuoi sidu thebogoi. Je mor ham gore, mor Babe tare sorman goribuo. 27 “Ikkie mor monan jagulug olo, ar mui hi hom? ‘Oh Ba, more ei bibodottun uddhar gor’? Hintu, iennottei na mui ei hennuot ejchiongge. 28 Oh Ba, tor nangan mohima gor.” Sebeden sorgottun ekkuo sobdo einei hologi, “Mui ien mohima gorsiong ar aro mui mohima gorim.” 29 Manuschune siot thiei elak ar sien suninei, thara holakke debabuoi gujurilo. Ek dagie holak, “Ekkuo sorgo-dude tarloi hoda holo.” 30 Jisu tharare holo, “Sobdobuo mortei no eje, hintu tomartei ejchie. 31 Ikkie somoibuo olode ei songsaro bijierottei. Ikkie ei songsaro rajabuore bar gori die obo. 32 Hintu more judi pittimittun tuli neja oi, mor idu beg manuschunore mui nije thani lom.” 33 The hingori moribo sei sombonde the agami holo. 34 Manuschune tare holak, “Niomo boibuottun ami suinnei, Kristo umore-umor thebo. Sale, tui hingori hor, ‘Munischioro Puobuore tuli neja obo’? Honna sei Munischioro Puobuo?” 35 Sebeden Jisu tharare holo, “A hanekkon song tomar loge phoran age. Andharan no eje para phoran thagode phoranot bero. Je andharot berai, the hudu jar the hobor no pai. 36 Tomar phor thagode, phoranore bischias goro, phoranor puogun oi paro para.” Jisu sieni honar porendi, the siottun jeinei tharattun pollei rologoi. 37 Judio the tharar mujungot bhalukkani amok ham gorilieo, thara tare bischias no goron. 38 Siendoi muni Isaia hoiede hi ghodibo sien puron olo, “Probu, honna amar hoboran bischias gorsie? Har idu PROBUR ado bolan dega diegi?” 39 Sienottei na thara bischias gori no paron, haron sien aro Isaia hoie, 40 “Tharar sogkunedi no degon para, the tharar sogkun han gori di die. Tharar akkolani loi buji no paron para, the tharar akkolani han gori di die. Siennie no ole, thara tharar akkolani phireibak ar mui tharare gom gori di dim.” 41 Purbe muni Isaia Probur mohimagan deginei sieni the hoinei ar tar sombonde hoie. 42 Tobuio, murubbittunio bhaluk jone Jisure bischias gorsion. Hintu Pharisigunottei tharare synagogottun nigilei duon bilinei thara dore haam no haan. 43 Thara olakke Itchiore tharare baini goranattun bes manjie tharare baini goranagan thara gom pan. 44 Sebeden Jisu jogar parinei holo, “Je more bischias gore, the more bischias no gore, hintu more dipadeide sibiere bischias gorsie. 45 Je more sai, the more dipadeiede sibiere saidie dogkie. 46 Mui songsarot phoro dogkie gori ejchiong. Senottei je more bischias gore, the andharot no thebo. 47 Je mor hoda suninei bischias no gore, mui tare duji no banem. Haron songsaran duji banebartei mui no ejong. Hintu songsaran uddhar goribartei mui ejchiong. 48 Je more no mane ar mor hoda no dhore tare bijier gorie ek jon age. Mui holungge hodagane tare sejo dinnuot bijierot pheleibo. 49 Haron mui mor nijottun no hong. Hintu more dipadeiede Babpuoi mui hi hom ar hingori hom The more ugum die. 50 Ar mui hobor pang, tar uguman olode ononto jibon. Senottei Baba more jeannie gori hobartei hoie, siennie gori mui hong.”
1 Rokkie Utchobo agendi, Jisu hobor pelode the ei songsaran phelei jeinei Babo sidu jebode tar somoibuo lungiegi. Ei songsarot agonde tar nijor manuschunore the hos pedo ar thum song The hos peie. 2 Thara bellie saschuo hadon. Simonor puo Juda Iskariodor monot Diabolaδ Jisure dhora bajei dibartei honatto mone ho bajei die. 3 Jisu hobor peie Babe begkani tar adot gojei die. The hobor pai the Itchiorottun ejchie ar the Itchioro sidu jebo. 4 Jisu sieni begkani hobor peinei, bhat poiottun udi, tar haborani ek huredi thoinei ekkan tobollie hani, tar homorbuot bereilo. 5 Sebeden, the ekkuo gabalat pani dalilo. The tar sisjioguno thengani dhoi die arambo gorilo. Ar tar homorot bainniede thoillie hanigandoi thengani puji dilo. 6 Siennie gori Jisu Simon Pitoro idu elo. Pitore tare holo, “Probu, tui mor thengani dhoi dibede parapang?” 7 Jisu tare uttor dilo, “Mui hi gorongor tui ikkie hobor no pebe. Tui porendi hobor pebe.” 8 Pitore tare holo, “Tui mor thengani huno din dhoi no dis.” Jisu tare holo, “Mui judi tore dhoi no duong, tui mortun bhag no pebe.” 9 Simon Pitore tare holo, “Probu, siennie ole, bana mor thengani noi, mor adtani ar siriebuoio dhoide.” 10 Jisu tare holo, “Je ghattie, tar thengani bade ar hitchu dhobar no lage, the puro poriskar. Tumi poriskar daw, hintu tumi begkun poriskar noi.” 11 Honna tare dhora bajei dibo, the hobor pai hinottei the hoie, “Tumi begkun poriskar noi.” 12 Sebeden the tharar thengani dhoi denar porendi, the tar haborani urilo ar bojinei tharare holo, “Mui tomare hi goridilung tumi bujor ni? 13 Tumi more Guruthagur ar Probu dago, sien thik, haron mui sibie oi. 14 Mui, tomar Probu ar Guruthagurbuoi judi tomare theng dhoi duong, tumio theng dhoi diedi gorana osit. 15 Mui tomare gori dilungge dogkie gori tumio goribartei mui tomare ekkan tulona dilung. 16 Mui tomare soittio hodagan soittio gori hongor, ek jon banidaji tar girojchuottun dangor noi. Ek jon hoborbuo tare dipadeibuottun hono dangor noi. 17 Judi tumi ei hodagani hobor peinei goro, tumi hoballie. 18 “Mui tomar begkunor hoda no hongor. Mui jigunore bei tulliong sigunore mui sinong. Mui tharare bei tulliongge Sastro hodagan puron obartei, ‘Je mor pidie hai, the mor ugure theng alok gorsie.’ 19 Ien ghodi no jade, ikkie mui tomare akke duri hongor. Jokke ien ghodi jebo, tumi bischias goro para, mui olungge sibie. 20 Mui tomare soittio hodagan soittio gori hongor, mui padangge sibiere je gojhiloi the more gojhiloi ar je more gojhiloi the more dipadeide sibiereio gojhiloi.” 21 Jisu sei hodagani hoinei tar monan jagulug olo. The pang gori bhangi holo, “Mui tomare soittio hodagan soittio gori hongor, tomartun ek jone more dhora bajei dibo.” 22 Sebeden tar sisjiogune the hare hor udis no peinei thara-thara sa-si gorton. 23 Hintu tar ek jon sisjio Jisur buguot abuji elo. Tare Jisu hos pedo. 24 Simon Pitore Sibiere ijiriedi Jisu hare hor, pujor gora bajei dilo. 25 Sebeden Jisur buguot abuji agede sisjiobuoi tare holo, “Probu, the honna?” 26 Jisu tare uttor dilo, “Hodorabuot pidie hottagan bureinei mui jare dim, ei sibie sie.” Sebeden pidie hottagan bureinei the Simonor puo Juda Iskariodore dilo. 27 Juda Iskariode pidie hottagan lonar porendi, tar ontorot Soitan somilo. Sebeden Jisu tare holo, “Tui hi goribe jhadi gor.” 28 Hintu tebilo hure agonde sigunottun huno jone Jisu sei hodagan tare hittei holo buji no parilak. 29 Haron hoiek jone bhabilakke, Juda adot tengaδ baksubuo ragai hinottei Jisu tare hor, “Utchobo lokkene amar hi-hi lage hindoi,” bah, goribpunore hi-hi dibar age degoi. 30 The pidie hottagan loieo jeiegoi. Sokkene reid oie. 31 Juda janar porendi, Jisu holo, “Ikkie Munischioro Puobuore mohima gora oie, ar tar darai Itchiorbuoreoio mohima gora oie. 32 Itchiorbuore judi tar darai mohima gora oi, Itchioreo tare tar nijor darai jogon-togon mohima goribuo. 33 Oh bheilog, mui tomar loge a hanekkon gori theimbe. Tumi more togeiba. Judaiunore mui hoiongge dogkie gori, ikkie mui tomare hongor, ‘Mui jidu jeim tumi sidu jei no pariba.’ 34 Mui tomare ekkan nuo ugum dim. Tumi hos pa-pi gorsio. Mui tomare hos peiongge dogkie gori, tumio hos pa-pi gorsio. 35 Tumi judi hos pa-pi goro, salen tumi mor sisjio bili bege hobor pebak.” 36 Simon Pitore tare holo, “Probu, tui hudu jebe?” Jisu tare uttor dilo, “Mui jeimbe sidu tui ikkie mor loge jei no paribie. Hintu jeredi tui mor loge jei paribie.” 37 Pitore tare holo, “Probu, ikkie a hittei mui Tor loge jei no parim? Mui Tortei mor poranano dim.” 38 Jisu tare uttor dilo, “Tui mortei tor poranan hamakkai dibe daw? Mui tore soittio hodagan soittio gori hongor, jedogkon na tui more tin bar bharebe sedogkon song radai dag no haribak.
1 “Tomar monani jagulug no ok. Itchiorore bischias goro, moreio bischias goro. 2 Mor Babo ghorot shagor thebar jaga age. Judi no thedo, mui tomare holungun. Mui tomartei ekkan jaga jugolei dibar jangor. 3 Mui judi jang, ar tomartei ekkan jaga jugolei duonggoi, mui aro tomare hoja eimboi, mui theimboidie siot tumio thei parogoi para. 4 Mui hudu jeim tumi hobor po, podtanio hobor po.” 5 Thoma Jisure holo, “Probu, tui hudu jor ami hobor no pei, a hingori podtan hobor pebong?” 6 Jisu tare holo, “Mui podtan, soittiogan ar jibonan. Mor darai no ole, huno jon Babo sidu jei no paribak. 7 Tumi judi more hobor po, mor Baboreo hobor peio. Ar ikkiettun duri tumi tare hobor po ar tare degkuo.” 8 Philibe tare holo, “Probu, Babpuo amare degei de. Ien amar jodasto.” 9 Jisu tare holo, “Philip, mui tomar loge edok bilon song agong, tobuio tui more hobor no pas? Je more degkie, the Babare degkie. A hittei tui hor, ‘Babpuo amare dega’? 10 Mui Baba siot agong ar Baba mor iot age bili tui bischias no goros ni na? Mui tomare hongge hodagani mor nijottun noi. Hintu mor idu thaidie Babe jobei dide. 11 Mui Baba siot agong ar Baba mor iot age bili tumi bischias goro. Anole, mor hamanittei ole more bischias goro na. 12 Mui tomare soittio hodagan soittio gori hongor, je more bischias gore, theio mui gorongge hamani goribuo. Mui Baba sidu jeim hinottei, the sei hamanittun bes dangor ham goribuo. 13 Tumi mor nange jien mago sien mui gori dim, jene Puobuor iot Babe mohima oi. 14 Mor nange tumi jien mago, sien mui gori dim. 15 “Tumi judi more hos po, mor ugumani mannio. 16 Mui Babottun hujoli gori magi dim ar the tomare aro ek jon Boldie tomar loge umore-umor thebartei dibo. 17 Boldiebuo olode soittior Apta. Songsaro manuschune tare no degon ar no sinon hinottei thara, tare loi no paron. Hintu The tomar loge age ar tomar bidirie thebo hinottei tumi tare hobor po. 18 Mui tomare bab-ma mora shawh dogkie gori phelei no jeim. Mui tomar idu eimboi. 19 Hanekkonottei songsaro manuschune more no debak ar. Hintu tumi more deba. Mui baji agong hinottei tumio baji theba. 20 Sei dinnuot tumi hobor peba, mui Baba siot agong ar tumi mor iot ago ar mui tomar loge agong. 21 Jar iot mor ugumani age ar the sieni mane, the more hos pai. Je more hos pai, tare mor Babe hos pebo. Mui tare hos peim ar tar idu mui nije-nije azil ombi.” 22 Juda (Iskariode noi) tare holo, “Probu, tui nije-nije songsaro manuschuno idu azil no oie gori hingori amar idu azil obegi?” 23 Jisu tare uttor dilo, “Je more hos pai the mor hoda manibo. Mor Babe tare hos pebo ar ami tar idu ebong. Ami tar loge thebonggi. 24 Je more hos no pai, the mor hoda no mane. Tumi sunotte hodagani mor hoda noi, ieni olode more dipadeiede Babor hoda. 25 “Mui tomar loge agongge lokkene sei hodagani mui tomare holung. 26 Hintu mor nange Boldiebuo Baba dipadeibo ar sibie olode Pobitro Aptabuo. The tomare begkani sigeibogi ar mui tomare hoiongge beg hodagani the tomare idot tuli dibogi. 27 “Mui tomare mor shantigan phelei di jeim. Songsare dede shantigano dogkie shanti mui tomare no dim. Tomar ontorani nije-nije jagulug no ok, noio dorok. 28 Mui tomare hode tumi suinnio, ‘Mui jangorloi ar mui tomar idu phiri eimboi.’ ‘Mui Baba sidu jeim’ sien holung hinottei tumi judi more hos pei thago, tumi hujhi oba. Haron mor Baba mortun bes dangor. 29 Ikkie sien ghodibar agendi, mui tomare holung, sien ghodi gele tumi more bischias goro para. 30 Ei songsaro rajabuo ejer hinottei, mui tomare bes hodung noi ar. Haron mor iot tar hitchu odhihar bhag pebar nei. 31 Hintu songsaro manuschune hobor padok, mui Babore hos pang ar Babe more ugum dede doge mui gorong. Uduo, iottun jogoi.
1 “Mui ajol angguro ludigan. Mor Baba olode bagano girojchuo. 2 Mor iot jei dhelagunot gulo no dhoron, sigun the habi phelei de. Gulo dhoronde dhelagun aro bes gori gulo doribartei the hajei dide. 3 Mui tomare hoiongge hodaganiloi tumi honatto poriskar oio. 4 Tumi mor iot thago ar mui tomar iot theim. Dhelagun judi ludiganot ek tade no thele, gulo dori no paron. Thik sedogkie gori tumio judi mor iot no thele nije-nije phol di no pariba. 5 Mui angguro ludigan. Tumi olade dhelagun. Tumi mui sara hitchu gori no paro hinottei, je mor iot thebo mui tar iot theim ar the shagor phol dibo. 6 Je mor iot no thai, tare dhela dogkie gori habi phelei die obo. Sien shugei jebo ar hureinei agunot phelei dinei puri pela obo. 7 Tumi judi mor iot thago, mor hodagano tomar iot thebo. Sebeden tumi jien mago sien tomartei goridie obo. 8 Tumi judi phol di parilie sienit mor Baba mohima obo. Sebeden tumi mor sisjio oba. 9 “Baba more hos paidie dogkie muio tomare hos pang. Mor hospanaganot thago. 10 Mui Baba ugumani manniong ar tar hospanaganot thang. Thik sedogkie gori, tumi judi mor ugumani mano, tumi mor hospanaganot theba. 11 Mor hujhigan tomar iot thebartei, mui ei hodagani tomare holung. Ar tomar hujhigan pureibartei mui sieni holung. 12 Ien olode mor uguman, mui tomare hos peiongge dogkie gori tumio hos pa-pi gorsio. 13 Ienottun para haror dangor hospana nei ar, ek jone tar bondhuttei jibon dena. 14 Tumi judi mui tomare ugum duongge sieni goro, salen, tumi mor bondhu. 15 “Mui tomare sagorsie no hom ar. Haron sagorsiebuoi tar girojchuoi hi gorer hobor no pai. Hintu mui tomare bondhu dagilung. Haron mor Babottun mui jieni sunong, mui tomare hong. 16 Tumi more bei no tulo, hintu mui tomare bei tulliong. Tumi jeinei phol di paribartei ar tomar pholluo tigibartei mui tomare bei tulliong ar thik gorsiong. Senottei, mor nange tumi Babattun jien mago, the sien tomare dibo. 17 Tumi hos pa-pi goribartei mui sieni tomare holung. 18 “Songsaro manuschune judi tomare insie goron, salen, tumi hobor peio, thara tomare insie no gorte, more akke insie gorsion. 19 Tumi judi songsaro manus oda, songsare tomare nijor bili hos pelun. Hintu mui tomare bei tulliong hinottei, tumi songsaro manus noi. Senottei, songsaro manjie tomare insie goron. 20 Mui tomare hoiongge hodagan monot rageio, ‘Bani dajibuoi tar girojchuottun dangor noi.’ Thara judi more uttiesar gorilie, tomareo uttiesar goribak. Thara judi mor hoda manidak, tomar hodaio manilakkun. 21 Hintu mor nanganottei thara sieni begkani tomare goribak. Haron more honna dipadeie thara hobor no pan. 22 Mui judi no edung ar tharare no hodunggi, tharar pab no thelun. Hintu ikkie tharar pabottei sholona dibar nei. 23 Je more bis dege, the mor Babareo bis dege. 24 Huno jone no goronde hamani mui judi thara siot gortung, tharar pab no thelun. Hintu ikkie thara amok hamani degineo thara more ar Babare hos no pan. 25 Hintu sien ghodi gelode jene tharar niomo boibuot legkiede sien puron obartei, ‘Thara more magana-magana bis degon.’ 26 Hintu Boldiebuoi ele, the mor hoda hoi dibogi. Sibie olode Babattun Boldie tomare mui dipadembe sibie. The olode Babottun nigilede soittior Aptabuo. 27 Polliettun duri tumi mor loge ela hinottei, tumio mor hoda hoi duo.
1 “Tomar bischiaschan phelei no duo para sieni mui tomare holung. 2 Thara tomare synagogottun bar gori dibag. Somoibuo ejer, sekke je tomare morei pelai, the Itchiorottei dhormo ham gorer bili mone goribuo. 3 Thara more ar Babareo hobor no pan hinottei thara tomare sieni goribak. 4 Mui ieni tomare holungge jokke somoibuo ebo, sokke mui tomare sieni hoiong bili tumi idot tulo para. Mui tomar loge elung hinottei akke duri ei hodagani mui tomare no hong. 5 “Ikkie mui tar sidu jangor. Hintu tomartun huno jone pujor no gorila, ‘Tui hudu jor?’ 6 Mui sei hodagani holung hinottei tomar mono dug olo. 7 Hintu mui tomare soittio hodagan hongor. Mui gelegoi tomartei gom obo. Mui no gele, Boldiebuo tomar idu no ebo. Hintu mui judi jang, mui tare tomar idu di padeim. 8 The ele, songsaro manuschunore pabo sombonde, dharmigo sombonde ar bijiero sombonde bujei dibogi. 9 Thara more bischias no goron hinottei, the pabo sombonde bujei dibogi. 10 Mui Baba sidu jeim ar tumi more no deba ar hinottei, the dharmigo sombonde bujei dibogi. 11 Ei songsaro rajabuore dujot phellie hinottei, the bijiero sombonde bujei dibogi. 12 “Mor ebosong tomare hobar shagor age, ikkie tumi sieniloi no pariba. 13 Hintu jokke soittior Aptabuo ebo, sokke the tomare beg soittioganit nejeibo. The nijottun hoda no hobo hinottei the jien sune sien The hobo ar ebode sieni janei dibogi. 14 Jieni mor sieni the ninei tomare janei dibogi hinottei, the more mohima goribuo. 15 Jieni Babar sieni begkani mor. Senottei mui holung, jieni mor sieni the ninei tomare janei dibogi. 16 “Mui Baba sidu jeim hinottei tumi more hanekkon porendi no deba. Aro hanekkon porendi tumi more deba.” 17 Sebeden hoiek jon sisjioi thara-thara huobula gorton, “The amare hi hor ar sienir ortho hi, ‘Hanekkon porendi tumi more no deba, ar aro hanekkon porendi tumi more deba,’ ar ‘Mui Baba sidu jeim’?” 18 Senottei thara holak, “Sien The hi hor, ‘Hanekkon porendi’? The hi hor ami no bujir.” 19 Sebeden thara tartun pujor goribar mone hor bili Jisu hobor peinei, the tharare holo, “Mui holungge siendoi tumi-tumi pujor gora-gori gorotte, ‘Hanekkon porendi tumi more no deba, ar aro hanekkon porendi tumi more deba’? 20 Mui tomare soittio hodagan soittio gori hongor, tumi gujhi-gujhi haniba. Hintu songsaro manuschune hujhi obak. Tomar mono dug obo, hintu tomar mono dugkan mono hujhit jebo. 21 Milier guro ode somoibuo ele, monot dug on hintu gurobuo onar porendi hostogani monot no ragan ar. Haron songsarot ekkuo guro jormo oie hinottei. 22 Tomar ikkie monot dug age hintu mui tomarloi aro egottor ombi. Sokkene tomar monani hujhi obo ar tomar hujhigan huno jone hariloi no paribak. 23 Sei lokkene tumi mortun hitchu no magiba. Mui tomare soittio hodagan soittio gori hongor, tumi Babattun mor nange jien mago, the sien dibo. 24 Ejosong mor nange tumi hitchu no mago. Mago, tumi puro gori hujhi aw para peba. 25 “Tomare mui sieni tulona hodadi hoi dilung. Hintu somoibuo ejer, sokkene mui tomare tulona hodadi no hom ar. Hintu Babar sombonde mui tomare pang gori bhangi hom. 26 Sei lokkene tumi mor nange magiba. Mui tomartei Babattun bor magi dim bili mui tomare no hongor. 27 Tumi more hos peio ar mui Itchiorottun ejchiong bili bischias gorsio hinottei Baba The nije tomare hos pai. 28 Mui Babattun songsarot ejchiong. Aro songsaran phelei jei mui Baba sidu jeim.” 29 Tar sisjiogune tare holak, “Shah, ikkie daw tui pang gori bhangi hole. Tui tulona hoda no hos. 30 Ikkie ami hobor pelong, tui begkani hobor pas, ar tor huno jonottun pujor goribar dorkar no lage. Siendoi ami bischias goridie tui Itchiorottun ejchios.” 31 Jisu tharare holo, “Ikkie tumi bischias gela ni? 32 Sawh, somoibuo ejer ar honatto ejchie. Sei lokkene tumi begkune nijor nijor jagat settera oba. Tumi more gai-gai gori phelei jeba. Hintu Baba mor loge age hinottei mui gai-gai noi. 33 Mor iot tumi shanti pebartei sieni mui tomare holung. Songsarot tomar hosto age. Hintu sahoj goro. Mui songsaran jittuong.”
1 Jisu sieni hoinei, ujonnie seinei holo, “Oh Ba, somoibuo ejchie. Tor Puobuore mohima gor, tor Puobuoio tore mohima gore para. 2 Tui tare beg manuschunor ugure odhihar duoschie dogkie gori, tui tare duoschie beg manuschunore ononto jibon de. 3 Ek mattro tui soittio Itchior ar tui dipadeoschie Jisu Kristore thara hobor panagan olode ononto jibon. 4 Mui tore pittimit mohima gorilung. Tui more goribar duoschie haman gori phureilung. 5 Oh Ba, ikkie tor mujungot more oborugkan de. Songsaran sristi no ode mui tor loge elungge lokkene elode oborugkandoi more oborug gor. 6 “Songsaranottun tui more duoschie manuschuno idu mui tor nangan janei dilung. Thara tor manus elak ar sigun begkun tui more duos. Thara tor hoda manilak. 7 Tui more jieni-jieni duos, sieni begkani tortun bili thara hobor pelak. 8 Haron tui more je hodagani tharare hobartei duos, mui sieni tharare hoi duong. Ar thara sei hodagani gojhi loion. Mui tortun ejchiong bili thara jodepode gori hobor pelak ar tui more dipadeos bilio thara bischias gelak. 9 Tui more duoschie manuschun tor manus hinottei mui tharattei bor magongor. Hintu mui songsaro manuschunottei bor no magongor. 10 Jieni mor sieni begkani tor. Sienittei mui tharar iot mohima olung. 11 Mui songsarot no theim ar. Hintu ei manuschun songsarot agon. Mui tor idu eim. Oh Pobitro Ba, tui more duoschie igunore tor nange rokkie gor. Ami jedogkie ek, tharaio sedogkie ek oi paron para tharare rokkie gor. 12 Mui songsarot tharar loge thagke, mui tharare tor nange rokkie gorsiong. Tui more duoschie sigunore mui rokkie gorsiong. Sastro hodagan puron oi para nas obode sibier bade huno jon ajhi jedak noi. 13 “Ikkie mui tor idu ejongor. Songsarot tui duoschie sigunore sieni holungge mor hujhigan tharar iot puron oi para. 14 Mui tor hodagan tharare dilung. Mui songsaror no idie dogkie gori, tharaio songsaror noi hinottei, songsaro manuschune tharare insie goron. 15 Songsarottun tharare tuli nibartei mui bor no magongor, hintu tui tharare dujtobuottun rokkie goribartei mui bor magongor. 16 Mui jeannie gori songsaror noi, tharaio songsaror noi. 17 Tor soittiogandoi tharare pobitro gor. Tor hodagan olode soittiogan. 18 Tui more songsarot dipadeoschie dogkie gori, muio tharare songsarot dipadeong. 19 Soittioganor darai thara pobitro on para, mui nije-nije tharattei pobitro olung. 20 “Bana igunottei mui bor magi no duongor, hintu tharar prosaro darai more jigune bischias goribak, sigunotteio mui bor magi duongor. 21 Oh Ba, tui jeannie gori mor iot agos ar mui tor iot agong, tharaio begkune ek oinei amar iot thadok. Tui more dipadeos bili songsaro manuschune bischias jan para. 22 Ami jeannie gori ek, tharaio ek obartei tui more duoschie oborugkan mui tharare duong. 23 Tui more dipadeos ar tui more jedogkie gori hos peios, tharareio sedogkie gori tui hos peios bili songsaro manuschune hobor pebartei. Ar thara puro gori ek obartei mui thara iot agong ar tui mor iot agos. 24 “Oh Ba, songsar sristi no gorte tui more hos peios hinottei, mor oborugkan thara degon para, tui more duoschie manuschun mui jidu theim sidu tharaio mor loge thebartei mortun mone hor. 25 “Oh dhormitto Ba, songsaro manuschune tore hobor no pan, hintu mui tore hobor pang. Ar ei manuschune hobor pan tui more dipadeos. 26 Tui more jei hospanagandoi hos peios, sei hospanagan thara siotio thai para ar mui thara iot thang para, mui tor nangan tharare janei duong ar janei dim.”
1 Jisu bor magi phureinei, the tar sisjiogun somot sohoranottun nigili jei Kidron Jurigan par olakkoi. Siot ekkan bagan elo, ar the tar sisjiogun somot bagananot somilogoi. 2 Jisu nitto tar sisjiogundoi siot egottor oigoi hinottei, Juda Iskariode tare dhora bajei diebuoio sei jagan hobor pai. 3 Sebeden Juda rajguruthagurunottun ar Pharisigunottun ek dol soinnio ar mondiro polischun loinei, lembo, agun luro ar attier somot sidu thara gelak. 4 Sebeden Jisu tar hi ghodi jebo begkani hobor peinei, the thara sidu jeinei tharare holo, “Tumi hare togor?” 5 Thara tare uttor dilak, “Nazareth hullie Jisure.” Jisu tharare holo, “Sibie mui.” Juda Iskariode tare dhora bajeidiebuoio siot thara loge thiei elo. 6 Sebeden, “Sibie mui,” The tharare hoieio, thara pijendi jeinei madit bojilak. 7 Senottei the aro tharattun pujor gorilo, “Tumi hare togor?” Ar thara holak, “Nazareth hullie Jisure.” 8 Jisu holo, “Mui tomare hongor, sibie mui. Senottei tumi judi more togeile, igunore jebartei duo.” 9 The sien holode tar hodagan puron obartei, “Tui more duoschie sigun mui ek jonio no arang.” 10 Sebeden, Simon Pitore tar elode horgogan phueinei moharaj-guruthagurbuor banidajibuor den hanan beja urei habi phelei dilo. Banidajibuor nangan olode Malka. 11 Sebeden Jisu Pitorore holo, “Tor horgogan dappuot bhorei tho. Baba more ei golojchuo dede siottun mui no heim ni na?” 12 Sebeden soinniogun, senapoti-buoiδ ar Judaiunor lobiot goriegune Jisure dhorinei banilak. 13 Thara akke tare Anna sidu nejeilak. Haron Anna olode Kaiaphar sour ar sei bojorot moharajguruthagurbuo olode the. 14 Ei Kaiapha Judai-unore buddhi die. The hoiede jei, manuschunottei ek jon morilie gom obo. 15 Simon Pitor ar oinnio ek jon sisjio Jisur pune-pune gelo. Sei sisjiobuore moharajguruthagurbuoi sinie hinottei, the Jisur loge moharajguruthagurbuor udonanot gelo. 16 Hintu Pitore duoro barendi thiei age. Senottei sei sisjiobuo, moharajguruthagurbuoi sinede sibiere phiri einei duor subi thaidie miliebuore hoinei Pitorore bidirie bhoreilogoi. 17 Sebeden duor subi thaidie miliebuoi Pitorore holo, “Tuio ei Manuschuor ek jon sisjio noi ni?” The holo, “Mui noi.” 18 Jar porsie hinottei banidajigune ar mondiro polischune angaraloi agun jaleinei thie-thie thara agun phuodon. Ar Pitore tharar loge thie-thie agun phuorloi. 19 Moharajguruthagurbuoi tar sisjioguno sombonde ar tar sigkie sombonde Jisuttun pujor gorilo. 20 Jisu tare uttor dilo, “Songsaro manuschunore hulomela gori mui hoiong. Mui onsur synagogot ar mondirbuot sigkie duong. Judaiune onsur sienit thubon. Gubone mui hitchu no hong. 21 Tui a hittei mortun pujor goros? Jigune mui hode suinnion, sigunottun pujor gor na. Shah, mui hi hoiong thara hobor pan.” 22 Hintu Jisu sei hodagani hode seiet, ek jon mondiro polis tar hai thiei elode sibiei tare ado padaloi suoreinei holo, “Moharajguruthagurbuore tui sei dogkie gori uttor duotte oi ni?” 23 Jisu tare holo, “Mui judi bojong hoda hoi thang, mui hi bojong hoda hoiong proman de. Mui judi thik hoda hoi thang, a hittei tumi more maror?” 24 Thara Jisure bananar porendi, moharajguruthagur Anna Kaiapha sidu tare padei dilo. 25 Simon Pitore thieinei agun phuor. Sebeden thara tare holak, “Tui ek jon tar sisjio oidie noi ni?” the bharenei holo, “Mui noi.” 26 Moharajguruthagurbuor ek jon banidaji siot elo. Sibie olode Pitore han habi phelei dede Manuschuor sodorsie. The holo, “Mui tore bagananot tar loge degkuongge noi ni?” 27 Pitore aro bhareloio ar jogon-togon ekkuo radai dag harilo. 28 Sebeden bennie poittie thara Jisure Kaiaphar ghorottun Praetoriumotδ nilak. Aw-shijhi on bilinei bijier goronde ghudibuot thara no somilakkoi. Thara judi aw-shijhi ole, Rokkie Utchobo haana hei no paribak. 29 Senottei, Pilade thara sidu jeinei holo, “Tumi ei Manuschuore hi duj pela?” 30 Thara tare uttor dilak, “The judi duj gori no thedo ami tor adot gojei no dilongundi.” 31 Sebeden, Pilade tharare holo, “Tare nejo ar tomar nijor niomo onusare tare bijier gorogoi.” Senottei Judaiune tare holak, “Manus morei pelana amar ainot nei.” 32 Thara holakke siendoi Jisu hedogkie gori moribo the hoiede sombonde hodagan puron obo. 33 Sebeden Pilade aro praetoriumotδ sominei Jisure daginei holo, “Tui ne Judaiunor Rajabuo?” 34 Jisu tare uttor dilo, “Tui tor nijor monottun hor, nahi, oinnio jone tore mor sombonde hoion?” 35 Pilade uttor dinei holo, “Mui Judai jad ni na? Tor nijor jado manuschune ar rajguruthagurune Tore mor idu gojei duondi, tui hi gorsios?” 36 Jisu uttor dilo, “Mor rejjiogan ei songsarot noi. Mor rejjiogan judi ei songsarot odo, salen mor sagorsiegune mui Judaiunor adot no porong para judduo gorilakkun. Hintu mor rejjiogan ei songsaranottun noi.” 37 Sebeden Pilade tare holo, “Sale, tui raja oi ni?” Jisu uttor dinei holo, “Tui holede sien soittio, mui raja. Sienottei daw soittiogan janei dibartei mui songsarot einei jormeionggi. Je soitioganor the mor robuo sune.” 38 Pilade tare holo, “Soittiogan hi?” the sien honar porendi, the aro Judaiunor sidu jeinei holo, “Mui tare hitchu duj no pelung. 39 “Hintu tomar ekkan dostur age. Rokkie Utchobo lokkene mui ek jon tomartei jiel-hanattun iri diduong. Senottei, Judaiunor Rajabuo mui tomartei iri didung tomar mone hoi ni?” 40 Sebeden thara begkune aro jogar parinei holak, “Ami ei Manuschuore no sei, hintu Barabbare sei.” Barabba olode daget.
1 Sebeden Pilade Jisure ninei sabukkoi mara bajei dilo. 2 Ar soinniogune ekkuo hada tokkie banenei tare madat di dilak. Tare halisuri habor ekkan urei dilak. 3 Sebeden thara holak, “Ju, Judaiunor Rajabuo!” Ar thara tare suorelak. 4 Sebeden Pilade aro jeinei tharare hologoi, “Sawh, mui tare hitchu duj no pelung bili tumi hobor pebartei tare aro anilung.” 5 Jokke Jisu hada tokkie madat gori ar halisuri haboran ursie gori elo, Pilade tharare holo, “Eie, manshunore sawh.” 6 Sebeden rajguruthagurune ar mondiro polischune tare daginei jogar pari-pari holak, “Tare krosot duo! Tare krosot duo!” Pilade tharare holo, “Mui tare hitchu duj no pang hinottei, tumi tare ninei krosot duogoi.” 7 Judaiune tare holak, “Amattun ekkan ein age. The Itchioro Puo holai hinottei amar aino onusare the morana osit.” 8 Pilade sei hodagan suninei, the sie bes dorelo. 9 The aro praetoriumotδ jeinei Jisuttun pujor gorilo, “Tui huttun?” Hintu Jisu tare uttor no dilo. 10 Sebeden Pilade tare holo, “Tui a hittei morloi hoda no hos? Mor Tore krosot dibartei odhihar age ar Tore iri dibartei odhihar age, tui hobor no pas?” 11 Jisu uttor dilo, “Ugurottun judi tore odhihar die no odo, mor ugure tor hitchu odhihar no thelun. Senottei, je more tor adot gojei die, tar dangor pab age.” 12 Sei porendi Pilade Jisure iri dibartei pod togei selo. Hintu Judaiune jogar parinei holak, “Tui judi ei Manuschuore iri duos, tui Kaisaror bondhu noi. Je raja holai the Kaisaror biruddie made.” 13 Sebeden Pilade sien suninei the Jisure barendi nejeinei, the bijiero jaganot bojilo. Sien silloi baneie hon ar, Hebru hodadi sienore Gabbatha hon. 14 Sei dinnuo olode Rokkie Utchobottei Jugol goronde Din. Bel diboro oktot the Judaiunore holo, “Tomar Rajabuore sawh!” 15 Hintu thara jogar pari pari holak, “Morei pelo, morei pelo! Tare krosot duo!” Pilade tharare holo, “Mui tomar rajabuo krosot didung para pang?” Rajguruthagurbuoi tare uttor dilo, “Kaisara bade ar amar raja nei.” 16 Sebeden Jisure krosot dibartei Pilade tharar adot gojei dilo. Thara Jisure loinei gelakkoi. 17 Ar Jisu tar kroschan hanat gori ninei, Hulosara Jaga honde jaganot nilo. Hebru hodadi Golgotha hon. 18 Siot tare krosot duon. Jisure song moiddie ar tar di dagedi di jon krosot dilak. 19 Pilade ekkan gonggola leginei kroschano madat thangei dilo. Legagan olode, NAZARETH HULLIE JISU JUDAIUNOR RAJABUO. 20 Jisure krosot duonde jagagan sohorano hai hinottei, shagor Judai manjie gongolagan madeilak. Sien Hebru, Grik ar Latin hodadi legkie elo. 21 Sebeden Judaiunor rajguruthagurbuoi Piladore holo, “Judaiunor Raja” no leginei, edogkie gori leg. “The hoiede, ‘Mui Judaiunor Raja.’ ” 22 Pilade holo, “Mui jei doge legkuong sei doge legkie bade thok.” 23 Sebeden soinniogune Jisure krosot dinei, tar haborani lolak. Thara ser jone ser bhag gorilak. Shilummuo a shileie, goda ek tade bunnie elo. 24 Senottei thara-thara huobula gorilak, “Shilummuo no phadinei, honna pai ak sei.” Senottei soinniogune sien gorinei Sastro hodagan puron olo, “Thara mor haborani thara-thara bhag gorilak. Mor ek hotta haborottei thara ak selak.” 25 Jisur mabuo kroschano hai thiei elo. Jisur mojengabuo, Kliopar mogkuo, Meri ar Meri Magdalinio siot elak. 26 Sebeden Jisu tar mare ar the hos paidie sisjiobuore siot thiei agonde deginei, tor mare holo, “Oh miliebuo, tor puobuore shah.” 27 Sebeden the sisjiobuore holo, “Tor mare shah.” Ar sekkettun duri sisjiobuoi Jisur mabuore tar nijor ghorot nejeilo. 28 Tar porendi, Jisu hobor pelo beg jabotio pureilo. Sastro hodagan puron obartei, the holo, “Mortun pani saj gorer.” 29 Siot ek toba horo mod elo. Soinniogune horo modot pul bureinei, pulan hagara ludigo madat bajeinei tar muonot di dilak. 30 Horo modtan Jisu sagi seinei holo, “Phureie.” Tar siriebuo nigurinei tar aptabuo iri dilo. 31 Sei dinnuo Judaiunor Jugol Goribar Din elo hinottei heyegani kroschani ugure Jireni Dinnuot no thai para, Judaiune Piladore hujoli gorilak. Jireni Dinnuo dangor din elo. Krosot die manuschunore theng bhangi dinei heyegani kroschanittun lamei nibartei, Pilade ugum de para tare hujoli gorilak. 32 Sebeden soinniogune einei Jisur loge krosot duonde polim manuschunore ar aro ekkuore theng bhangi dilak. 33 Hintu thara Jisu iot einei, the honatto morsiede deginei thara tare theng bhangi no dilak. 34 Hintu ek jon soinnio tare dagot jadhiloi gudeieio lo ar pani nigillie. 35 Mui sien degkuong ar janei dilung. Mor shakkigan soittio. Tumi bischias jo para mui soittio hoda hongor. 36 Sastroie hoiede doge obartei sieni ghodi gelo, “Tare ekkuo aaro bhangi die no obo.” 37 Sastroganor aro ekkan hodai hoiede, “Thara gudeionde Sibiere rini sebak.” 38 Sienir porendi, Jisur heyegan lamei anibartei Pilade ugum de para, Arimathea adammie Josebe Piladore hujoli gorilogoi. Pilade tare onumoti dilo. Sebeden the jeinei Jisur heyegan lamei anilogoi. Josebe Jisur sisjio elo. Hintu Judaiunore the dhorai hinottei the gubonor sisjio elo. 39 Nikodemaio perai ponjas ser poiriek ar muraδ mijeinei anilo. The olode reidot Jisur idu akkendi ejchiede sibie. 40 Sebeden thara Jisur heyegan lameinei Judaiune garande dosturo doge sei tumbas jinijchani somot padol haborloi bereilak. 41 Tare krosot duonde jaganot ekkan bagan elo. Ar sei bagananot ekkan nuo sidiesal elo. Siot huno mora bhorei no thon. 42 Judaiunor Jugol goribar Din ar sidie shalan hai hinottei, Jisure siot garelakkoi.
1 Saptar polim dinnuot, bennie poittie andhar-andhar thagode, Meri Magdalini sidiesalanot gelo. Gattuor duoranottun silluo lareie gori degilogoi. 2 Sebeden the daba daba gelo. Simon Pitor ar oinnio ek jon sisjio Jisu hos paidie sibie sidu jeinei tharare hologoi, “Probur sidie shalanottun nuon ar tare hudu tholakkoi ami hobor no pei.” 3 Senottei Pitore ar oinnio ek jon sisjio nigilinei sidiesalanot jadon. 4 Thara duo jon daba daba jadon. Oinnio sisjiobuoi Pitorottun akkoie ar the akke sidie shalanot lungiegoi. 5 The nigurinei pado haborani siot agede degkie. Hintu the bidirie no somai oi. 6 Sebeden Simon Pitore tar porendi lungiegoi. The sidie shalanot sominei pado haborani siot agede degilo. 7 Tar siriebuot bereie elode hobongan pado haborani loge no elo, hintu shap gorsie gori ekkan jagat age. 8 Sebeden oinnio sisjiobuoi akke lungiegoidie sibieio sidie shalano bidirie somilogoi. The deginei bischias gelo. 9 Haron thara ejosong hobor no pan Sastrot hoiede, Jisu morattun aro jiei uduo poribo. 10 Sebeden sisjiogune tharar nijor ghorot phiri gelakkoi. 11 Hintu Meri sidiesalano hai barendi hani-hani thiei age. The hande-hande, nigurinei sidiesalan rini selo. 12 The di jon sorgo-dud dhub habor ursie gori degilo. Jisur heyegan elode siot thara boi agon. Ek jon sidenedi ar ek jon poidenedi. 13 Thara tare holak, “Miliebuo, tui a hittei hanor?” Meri tharare holo, “Mor Probure nuon hinottei mui hanongor. Tare hudu tholakkoi mui hobor no pang.” 14 The sieni honar porendi, the phiri seie, Jisu siot thiei agede degilo. Sibie Jisu bili the hobor no pai. 15 Jisu tare holo, “Miliebuo, tui a hittei hanor? Tui hare togor?” Meri tare mone gorsiede bagano girojchuo. Senottei the tare holo, “Probu, tui judi tar heyegan ni thas, tare tui hudu thoioschoi, jagan more ho. Mui tare siottun nejeim.” 16 Jisu tare holo, “Meri.” Ar Meri phirinei tare holo, “Robbini.” Sienor orthogan, Guruthagur. 17 Jisu tare holo, “More no dhoris. Haron mui ejo mor Baba sidu no jang. Mor bheilogkuno sidu jeinei mui hoiong bili tharare hogoi, ‘Mui tomar Babo ar mor Babo sidu, tomar Itchior ar mor Itchiorbuo sidu jangor.’ ” 18 Meri Magdalini sisjioguno sidu gelo. The Probure degkie ar Probuie sei hodagani tare hoie bili the tharare hologoi. 19 Saptar polim dinnuot sei dinnie bellie, thara Judaiunore dhoran hinottei, thara thubei agonde ghoro duorani sisjiogune nadi thoion. Tobuio, Jisu einei tharar song moiddie thieinei tharare hologi, “Tomar idu shantigan thok!” 20 The sien honar porendi, Jisu tharare tar adtani ar tar dakkan degelo. Sebeden sisjiogune Probure deginei hujhi olak. 21 Senottei Jisu tharare aro holo, “Tomar idu shantigan thok! Babe more jedogkie gori dipadeie, muio tomare thik sedogkie gori dipadangor.” 22 The sien hoinei the tharar ugure muor bhab phelei dilo. The tharare holo, “Pobitro Apta lo. 23 Tumi jare pabottei mab duo tare mab die obo, ar tumi jare pabottei mab no duo tare mab die no obo.” 24 Hintu jokkene Jisu siot elo, Thoma, zama honde sibie tharar loge no elo. The olode baro jon sisjiottun ek jon. 25 Senottei, oinnio sisjiogune tare holak, “Ami Probure degkiei.” Hintu Thoma tharare holo, “Mui judi tar adtanit joloi marsie marani no degong, angulloi tar joloi marsie maranit angul no duong, ar mui judi no sang, mui shobai bischias gortung noi.” 26 Attio din porendi tar sisjiogun aro ghoro bidirie elak, ar Thomaio tharar loge elo. Judi oh beg duorani bannie elo, Jisu siot lungiegi. The tharar song moiddie thieinei holo, “Tomar idu shantigan thok!” 27 Sebeden the Thomare holo, “Tor angulluo loi mor adtan dhori shah. Tor adtan babeinei mor dakkan dhori shah. Bischias no gorsie gori no theis, bischias gor.” 28 Thoma tare holo, “Mor Probu, ar mor Itchior.” 29 Jisu tare holo, “Thoma, tui more degilie hinottei bischias gorilie. Jigune more no degkie gori bischias gorsion, thara hoballie.” 30 Jisu tar sisjioguno mujungot shagor oinnio amok ham gorsie. Sieni ei boibuot lega no oi. 31 Hintu Jisu olode Kristo, Itchioro Puobuo bili tumi bischias goribartei ar tumi bischias gorinei tar nanganot jibon pebartei ieni lega oie.
1 Sienir porendi, Jisu nije-nije aro Tiberia Sagoranot sisjioguno idu tare the degelogi the edogkie gori dega dilogi: 2 Simon Pitor, Thoma, (Zama honde sibie) ar Galili dejor Kana adamortun Nathanael ar Zebedior puogun ar di jon oinnio sisjio ek loge elak. 3 Simon Pitore tharare holo, “Mui maj mara jangor.” Thara tare holak, “Amio tor loge jebong.” Thara jeinei jogon-togon ekkan nawt udilakkoi. Sei reidtuot thara hitchu no pelak. 4 Bennie phor oinei, Jisu hulo ugure thiei agegi. Tobuio, sisjiogune sibie Jisu bili no sinon. 5 Sebeden Jisu tharare holo, “Oh tunggolok, tomartun jei huno hebar jinij age ni?” Thara tare uttor dilak, “Nei.” 6 Jisu tharare holo, “Nawgano den dagedi jalan pelo, tumi maj peba.” Sebeden thara jalan pheleilak. Shagor maj baschuon hinottei, thara jalan tani borei no etton. 7 Sebeden Jisu hos paidie sisjiobuoi Pitorore holo, “Sibie sie Probu!” Simon Pitore sibie Probu bili sininei, the uttie-buttie age hinottei, the habor urinei panit jham dilo. 8 Oinnio sisjioguneo sigon nawt gori elak. Haron thara hulo sorottun bes durot noi, perai di shot ad obode. Thara jalan somot majchun tanilak. 9 Thara hulo ugure udineigoi, angaraloi agun jallie gori degilakkoi. Sei ugure maj ar pidie shegodondeio degilakkoi. 10 Jisu tharare holo, “Ikkunu marsiode siottun gulodok maj idu ano.” 11 Simon Pitore jeinei jalan sejerei hulo ugure tulilogoi. Majchundoi jalan bhorsie. Siot eksho-teppannobuo birat birat maj elak. Shagor maj bajineio jalan no phade. 12 Jisu tharare holo, “Ejo, hogi.” Hintu sisjiogune, sibie Probu bili hobor peion hinottei, “Tui honna?” pujor goribar hemodai no huloi. 13 Sebeden Jisu thara sidu gelo ar pidie adot loinei tharare dilo. Ar sedogkie gori, the majo dilo. 14 Jisure morattun jiei tulonar porendi, the nije-nije tar sisjioguno idu dega dilogidie ien tin bar olo. 15 Thara haanar porendi, Jisu Simon Pitorore holo, “Jonar puo Simon, tui ienittun bes more hos pas ni?” Simone tare holo, “Oi Probu, tui hobor pas, mui Tore hos pang.” Jisu tare holo, “Mor bera-shagolo shawhgun paleis.” 16 Jisu tare aro dibar holo, “Jonar puo Simon, tui more hos pas ni?” Simone tare holo, “Oi Probu, tui hobor pas, mui Tore hos pang.” Jisu tare holo, “Mor bera-shagolun soreis.” 17 Tin bar Jisu tare holo, “Jonar puo Simon, tui more hos pas ni?” Tin bar Jisu tare, “Tui more hos pas ni?” holo hinottei, Pitore monot dug peinei the Jisure holo, “Probu, tui begkani hobor pas, mui Tore hos pangge sieno hobor pas.” Jisu tare holo, “Mor bera-shagolun paleis. 18 Mui tore soittio hodagan soittio gori hongor, tui gabur thagke, tui tor nijor haborani urinei tor jidu mone hoi sidu jas. Ar tui buro ole, tui tor adtani alok goribe, ar oinnio jone tore habor urei dibag. Tartun jidu jebar mone no hoi, the tore sidu nibo.” 19 Jisu sei hodagan Simonore holode, the hingori moribo sien agami hoi dibartei. Sedogkie gori, the Itchiorore mohima goribuo. Jisu sien tare honar porendi, holo, “Mor loge ai.” 20 Hintu Pitore phiri seinei, Jisu hos paidie sisjiobuore degilo. Theo tharar pune-pune jar. The olode bellie saschuo hade, Jisur buguot abujinei hoiede sibie, “Probu, tore dhora bajei dibode sibie honna?” 21 Pitore tare deginei, Jisure holo, “Probu, etar hi obo?” 22 Jisu tare holo, “Mui ejong song judi mui tare ragang, sien tor hi obo? Tui mor pune-pune ai.” 23 Senottei, sei hodagan bheilogkuno idu phogodang oiede, sei sisjiobuo no moribo. Jisu tare the no moribo gori no hoi. Hintu Jisu hoiede, “Mui ejong song judi mui tare ragang, sien tor hi obo?” 24 Shakki duongotte sisjiobuo olungge mui. Mui sieni legkuong, ar ami hobor pei, mor shakkigan soittio. 25 Jisu shagor oinnio amok ham gorsie. Sieni judi ekkan-ekkan gori lega odo, mui mone gorong, sei legkie boiun songsaranot no adilakkun. Amen.
New Testament, Chakma Version, copyright © 2012 by Bibles International. Used by permission. All rights reserved worldwide.