Nunnak Thu

1:1 A hramthokah Thu a rak um. Cuih Thu cu Pathian thawn a um ih Pathian a si. 2 A hramthok ihsin cuih Thu cu Pathian thawn a um zo. 3 Amah sung ihsin Pathian in ziang hmuahhmuah a seemsuah; seemsuah mi thil hmuahhmuah sungah hin amah tel loih tuahmi pakhatte hman a um lo. 4 Cuih Thu cu nunnak ih hram a si ih cuih nunnak cun minung hnenah tleunak a run thlen. 5 Tleunak cu khawthim sungah a tleu ih thimnak in a hmit thei dah lo. 6 Pathian in a palai Johan a thlah ih, 7 Johan cu mi hnenah cuih tleunak thu sim dingin a ra. A simmi hmuahhmuah in an theih ih an zumnak dingah a ra a si. 8 Anih cu tleunak a si lo; tleunak thu sim dingah a rami a si sawn. 9 Cuih tleunak cu tleunak taktak a si. Cuih tleunak cu leitlun ah a ra ih mi hmuahhmuah tlettu a si. 10 Cuih Thu cu leitlun ah hin a um ih amah sung ihsin Pathian in leilung hi a tuah nain leilung in amah cu a thei lo. 11 A ram sungah a ra nain a minung pawl in an rak saang lo. 12 Mi t'henkhat cun an saang ih an zum; curuangah Pathian ih faate cantheinak thu a pek. 13 Pathian ih faate an cannak cu leilung daan, minung ih thi le sa in hrinmi in a si lo; Pathian amah rori kha an Pa a si. 14 Cuih Thu cu minung ah a cang ih kan lakah a um; zaangfahnak le thutak in a khat. A sunlawinak kan hmu ih a Pa in a fapa neihsun hnenih a pekmi sunlawinak a si. 15 Johan in cupa ih thu cu hiti in a sim: " ‘Amah cu ka hnuah a ra; a sinain kei hnakin a tum sawn, ziangah tile amah cu ka suah hlanah a rak um zo,’ tiih ka lo simmi kha amah ih thu hi a si," tiah a ti. 16 A famkim zetmi a zaangfahnak thawn kannih cu in thlawsuah zo ih a thlawsuah cu pakhat hnu pakhat in pek a si. 17 Pathian ih Daan cu Moses hnen ihsin in pek; a sinain zaangfahnak le thutak cu Jesuh Khrih sung ihsin a ra. 18 Zohman in Pathian cu an hmu dah lo. A Pa ih Fapa neihsun, a t'aang sungih a pommi, Pathian a si mi in a langter zo a si.

Baptisma Petu Johan Simmi Thu

19 Jerusalem ih Judah hotu pawl in puithiam t'henkhat pawl le Levi mi pawl kha Johan hnenah cun an thlah ih, "Nang hi zoso na si?" tiah an va sut. 20 Johan cun an thusuhmi cu pheh lotein a let ih, "Kei hi Messiah ka si lo," tiah fiangtein zapi theih ah a sim. 21 Annih in, "Asile zoso na si? Elijah na si maw?" tiah an sut. Johan in, "Ka si lo," a ti. Annih in, "Profet na si maw?" an ti lala. "Ka si lo," a ti thotho. 22 Annih in, "Cuti a sile zoso na si, in simhnik. Na thu lehmi cu in thlahtu hnenah kan va sim sal a t'ul. Zo ka si, tiin so na ti awk?" tiah an sut. 23 Johan in Profet Isaiah ih simmi kha a vun lak ih, "Kei cu ‘Bawipa ih fehnak lamzin kha dingter uh,’ tiih ramt'hingih a au-mi aw kha ka si,"tiah a ti. 24 Farasi pawlih an thlahmi palai pawl cun, 25 Johan cu thu an sut sal ih, "Messiah na si lo ih Elijah le Profet khal na si lo ahcun ziangah so baptisma na pek?" tiah an ti. 26 Johan in, "Kei cun tidai in baptisma ka pek, a sinain nan lakah nan theih hrih lomi mi pakhat a um. 27 Amah cu ka dungah a ra lai; sikhalsehla kei cu a kedam hri phoihtu hmanah ka tlak lo," tiah a ti. 28 Hitiih an suh awknak hmun cu Johan in baptisma a peknak Jordan tiva ihsin nisuah lamih a ummi Bethani khua ah a si.

Pathian Tuufa

29 A thaisun ah Johan in Jesuh a hnenih a rat lai kha a hmu ih, "Leilung sualnak a phurtu Pathian Tuufa khi zohhnik uh! 30 ‘Ka dungin mi pakhat a ra, a sinain kei hnakin a tum sawn, ziangah tile ka suah hlanah anih cu a rak um zo,’ tiih a thuhla ka sim rero zo mipa cu amah hi a si. 31 Amah hi zo a si ding ti ka rak thei lo. Asinain amah hi Israel mi pawlih an theihnak dingah tidai in baptisma ka pek rero sannak a si," tiah a ti. 32 Johan in, "Thlarau cu vancung ihsin thuro bangin a rung ih a parah a rung fut kha ka hmu. 33 Amah teu a si tihi ka rak thei thotho cuang lo, sikhalsehla tidai in baptisma pe dingih i thlahtu Pathian in ‘Thlarau a rung ding ih mi pakhat parih a fut kha na hmu ding; cupa cu Thlarau Thianghlim in baptisma petu ding a si,’ tiah i sim. 34 Cupa cu ka hmu ngah zo. Fiangtein ka lo sim: Amah cu Pathian Fapa a si," tiah a hmuhmi le a theihmi kha a sim.

Jesuh Dungthluntu Hmaisa Bik Pawl

35 A thaisun ah Johan le a dungthluntu pahnih cu cutawk ah an ding sal ih, 36 Jesuh a rat kha an hmuh tikah, "Pathian Tuufa khi zohhnik uh," tiah Johan in a ti. 37 Cutiih a timi cu a dungthluntu pahnih cun an thei ih Jesuh hnenah cun an feh ve. 38 Jesuh cu a dunglet a her ih an rak thlun kha a hmuh tikah, "Ziang so nan hawl?" tiah a sut. Annih in, "Rabbi, khui-ah so na um?" tiah an let. Rabbi ticu zirhtu Sayapa tinak a si. 39 Jesuh in, "Ra uhla ra zohhnik uh," tiah a ti. Cuih tikcu cu zanlam nazi pali hrawng a si. An feh ih a umnak cu an va hmu ih cuih ni cu a hnenah an caam ta. 40 Cuih mi pahnih lakah pakhat cu Simon Piter ih naupa Andru a si. 41 Hmakhatteah a u-pa Simon kha a va hawl ih a hmuh tikah, "Messiah cu kan hmu zo," tiah a ti. Messiah timi cu Khrih tinak a si. 42 Cule Simon cu Jesuh hnenah a fehpi. Jesuh in amah cu a zoh ih, "Na hmin cu Johan fapa Simon a si; sikhalsehla Sefas tiah kawh na si thlang ding," a ti. Sefas ticu Piter ti thawn a bang aw ih a tican cu ‘lungto,’ tinak a si.

Jesuh In Filip Le Nathanael A Ko

43 A thaisun ah Jesuh cu Galilee feh a tum. Filip kha a hmu ih a hnenah, "I thlun aw," tiah a ti. 44 Filip cu Andru le Piter umnak Bethsaida khua mi a si. a si. 45 Filip in Nathanael a tong ih a hnenah, "Moses in Daan cabu sungah a thuhla a nganmi le profet pawl khal in a thuhla an ngan mipa kha kan tong zo. Amah cu Josef fapa Jesuh, Nazareth khuami a si," tiah a ti. 46 Nathanael in, "Nazareth khua in thil t'ha a suak thei pei maw?" tiah a ti. Filip in, "Ra zohhnik awla!" tiah a ti. 47 Jesuh in Nathanael a rat kha a hmuh tikah, "Israel mi taktak hi zohhnik uh! A thinlung ah zianghman hrawhhrawlnak a um lo," tiah a ti. 48 Nathanael in, "Ziangtin so i theih?" tiah a sut. Jesuh in, "Filip ih a lo kawh hlan theipi kung hnuai ih na to lai ah khan ka lo hmu zo," tiah a ti. 49 Nathanael in, "Sayapa, nang cu Pathian Fapa na si! Israel Siangpahrang na si!" tiah a ti. 50 Jesuh in, "Theipi kung hnuai ih na to lai ka lo hmu, ka ti ruangah i zum a si maw? Hi hnakih thil maksak tampi na hmu lai ding!" tiah a ti. 51 Cule an hnenah, "Thungai in ka lo sim: vancung khi a ong aw ding ih Milai Fapa parah hin Pathian ih vancungmi an t'um le an kai kha nan hmu ding," tiah a ti.

Kana Khua Ih Nupi t'hit Puai

2:1 Ni hnih hnuah Galilee peng Kana khua ah nupi t'hit puai a um. Jesuh ih nu khal cunah a um ih, 2 Jesuh le a dungthluntu pawl kha an sawm ve. 3 An Sabitti a cem tikah a nu in Jesuh hnenah, "Sabitti an nei nawn lo," tiah a ra sim. 4 Cutikah Jesuh in, "Ka nu, i sim duh hlah; ka tikcu a kim hrih lo," tiah a ti. 5 A nu cun hnen-um pawl hnenah, "A lo simmi poh tuah uh," tiah a ti. 6 Cutawkah Judah daanih a um vekin an kut kholhnak hrangah tidai ralca beel tumpi beel ruk an ret. Beel khat in galan kul ihsin sawmthum tiang a dawl thei. 7 Jesuh in hnen-um pawl hnenah cun, "Hi beel pawl hi tidai khat tein than uh," a ti. Liam thluahthlo in an than ih, 8 an hnenah cun, "Beel sung tidai cu vun suak uhla puaituahnak a tawlreltu pa hnenah hei pek uh," tiah a ti. Tidai cu an hei pek. 9 Cuih tidai cu Sabitti ah a cang ih cumi cu a tep. Khuitawkin cuih Sabitti cu a ra ti a thei lo; tidai a suaktu hnen-um pawl cun an thei ko. Curuangah nupi t'hitu pa cu a ko ih, 10 a hnenah cun, "Zozo khal in Sabitti thaw bik kha a hmaisa bikah an pe t'heu ih mi tampi an khawh deuh hnuah Sabitti menmen kha an pe t'heu; a sinain nang cun Sabitti thaw bik kha a netnak tiang na pe thei," tiah a ti. 11 Jesuh in hi mangbangza hmaisa bik hi Galilee peng Kana khua ah a tuah. Cuticun a sunlawinak a langter ih a dungthluntu pawl in an zum. 12 Cuih hnuah Jesuh le a nu, a naule pawl le a dungthluntu pawl cu Kapernaum khua ah an feh ih cutawkah ni malte sung an cam.

Biakinn Ah Jesuh A Feh

13 Lantak Puai tikcu a kim zik thlang ih Jesuh cu Jerusalem ah a feh. 14 Biakinn a thlen tikah cutawkih caw le tuu le laileng pawl a zuartu le tangka a thlengtu pawl an cabuai ih an to kha a hmu. 15 Curuangah hri kha vuaknak fung ai-ah a merh ih, tuu siseh caw siseh an zuarmi pawl cu a vuak ih Biakinn sung ihsin a dawi t'heh; tangka thlengtu pawlih cabuai pawl khal a linglet t'heh ih an tangkanawi pawl a thehdarh t'heh. 16 Laileng a zuartu pawl cu, "Hitawk ihsin nan laileng pawl kha tlanpi t'heh uh! Ka Pa ih inn cu nan dawr tuahnak ah hmang nawn hlah uh!" tiah thu a pek. 17 Cutikah a dungthluntu pawl in, "Maw Pathian, na inn ka tlaihsannak cu ka lung sungah meisa bangin a alh," tiah Ca Thianghlim ih a rak timi kha an vun mang sal. 18 Judah mi hotu pawl cu an ra sal ih, "Hi bangtuk thil tuah theinak thu ka nei, ti na langternak ah ziang hmuhsaknak so in hmuh ding?" tiah an sut. 19 Jesuh in, "Hi Biakinn hi bal uhla ni thum sungah ka sak sal thei ding," tiah a ti. 20 Annih in, "Ni thum sungah na sak sal thei ngai pei maw? Hi Biakinn saknak ah hin kum sawm li le kum ruk a rei a si," tiah an ti. 21 Sikhalsehla Jesuh ih a sim duhmi Biakinn cu amah ih taksa ruangpi kha a si. 22 Curuangah Jesuh thihnak ihsin a thawhsal tikah a dungthluntu pawl in amah ih taksa ruangpi thu a sim ti kha an thei sal ih Ca Thianghlim simmi le Jesuh simmi kha an zum. Jesuh In Minung Sizia A Thei t'heh 23 Jesuh cu Lantak Puai sung Jerusalem khawsungih a um laiah mi tampi in mangbangza a tuahmi an hmuh ruangah amah kha an zum. 24 Asinain Jesuh cun a thinlung zatein a zum hai lo, ziangah tile minung cu ziangvek an si ti kha a thei t'heh. 25 An thuhla cu midang ih sim a t'ul lo, ziangah tile an thinlung ziangvek a si ti cu amah in a thei t'heh a si.

Jesuh Le Nikodemas

3:1 Judah mi hotu pa pakhat, a hminah Nikodemas an timi a rak um; amah cu Farasi mi a si. 2 Zan khat cu Jesuh hnenah a va feh ih Jesuh cu, "Rabbi, nang cu Pathian ih run thlahmi saya na si, ti kan lo thei. Mangbangza na tuahmi pawl hi Pathian tel lo cun zohman in an tuah thei lo ding," tiah a ti. 3 Jesuh in, "Thungaite in ka lo sim: zokhal hrin sal a si lo ahcun Pathian Uknak a hmu thei lo ding," tiah a ti. 4 Nikodemas in, "Ziangtin so patling cia cu hrin sal a si thei ding? A nuih pum sungah lut tahratin voihnih hrin sal cu a si thei hrimhrim lo ding," tiah a sawn. 5 Jesuh in, "Thungaite in ka lo sim: zokhal tidai le Thlarau in hrin sal a si lo ahcun Pathian Uknak sungah a lut thei lo ding. 6 Minung cu taksa lam cun a nu le a pa sung ihsin hrinmi a si; sikhalsehla thlarau lamah cun Thlarau ih hrinmi a si. 7 Hrin salmi na si a t'ul ka ti tikah na mangbang hlah. 8 Thli cu a duhnak poh ah a hrang; a thawm na thei, a sinain khuitawk ihsin a ra ih khuilamah a feh ding ti na thei lo. Thlarau ih hrinmi khal cu cubangtuk in an si," tiah a ti. 9 Nikodemas cun, "Ziangtin so cumi cu a si thei ding?" tiah a sut. 10 Jesuh in, "Nang cu Israel mi lakah zirhtu saya pakhat na si ih himi hman na thei thei lo maw? 11 Thungaite in ka lo sim: kannih cu kan theihmi kan sim ih kan hmuhmi kha kan than; a sinain zokhal in kan thu simmi nan pom duh lo. 12 Hi leitlun thuhla ka lo sim ih i zum lo; cuti a sile ziangtinso vancung thuhla ka lo sim tikah na zum thei ding? 13 Vancung ihsin a rung t'ummi Milai Fapa siarlo zohman vancungah a kaitu an um lo," tiah a ti. 14 "Moses in nelrawn ah fung parih dar rul a thlai bangtuk in Milai Fapa khal thlai a si ve ding; 15 cuti cun amah a zumtu hmuahhmuah cu kumkhua nunnak an ngah ding. 16 Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding. 17 Ziangah tile leilung tlunah Pathian in a Fapa a run thlah tikah leilung thut'hentu dingah a thlah lo, leilung runtu dingah a thlah a si. 18 Zokhal Fapa a zumtu cu thut'hennak a tong lo ding; sikhalsehla a zum lotu cu Pathian ih Fapa neihsun a zum lo ruangah thut'hennak a tong zo. 19 Thut'hennak timi cu hiti in a si: leilung tlunah hin tleunak a ra thleng, a sinain mi in tleunak hnakin thimnak an duh sawn; ziangah tile an tuahnak a t'hat lo ruangah a si. 20 Zokhal thil t'ha lo a tuahtu cun tleunak a hua ih tleunak sung khal ah a ra lo ding, ziangah tile a thil t'ha lo tuahmi kha a lang pang ding ti a phang. 21 Sikhalsehla a dikmi a tuahtu cu tleunak sungah a ra ih a tuahmi cu Pathian duhmi thlunin a tuah a si ti kha cuih tleunak cun a langter," tiah a ti.

Jesuh Le Johan

22 Cuih hnuah Jesuh cu a dungthluntu pawl thawn Judea peng ah an feh ih an hnenah malte sung a um ih baptisma tla a pek. 23 Johan khal Aenon timi, Salim ihsin a hlat lonak hmun ah, baptisma a pek ve, ziangah tile cutawkah cun tidai tampi a um. Mi tampi a hnenah an ra ih baptisma a pek hai. 24 Himi cu Johan thawng an thlak hlanih a cangmi thil a si. 25 Johan dungthluntu t'henkhat pawl le Judah mipa pakhat cu thianfaiter awknak thu ah thu an el aw. 26 Curuangah Johan hnenah an feh ih, "Sayapa, Jordan tiva ihsin nisuah lamih nangmah thawn a rak um dah pa kha na ciing lai a si lo maw? A thu na rel t'heu mi kha! Atu-ah baptisma a pek rero ve ih mi tampi a hnenah an feh a si," tiah an ti. 27 Johan in, "Pathian pekmi ti lo cun zohman in zianghman comi an nei thei lo ding. 28 Keimah rori in, ‘Kei cu Messiah ka si lo; a hlanih a rak thleng sungmi ka si,’ tiah ka simmi theitu cu nanmah nan si. 29 t'hitmi mothar cu a t'hitu tlangval pa ih ta a si; a sinain nupi t'hitu tlangval pa ih rualpi, a ding ih aw thawm a ngaitu pa cu, tlangval pa ih aw a theih tikah cun a lung a awi ngaingai. Cuih lungawinak cu ka ta a si ih ka lungawinak cu a famkim a si. 30 Amah cu a t'hangso ding ih kei cu ka t'umsuk ding," tiah a ti.

Vancung Ihsin A Rungt'ummi Pa

31 Tlunlam ihsin a rungmi cu mi hmuahhmuah hnakin a tum sawn. Leilung ih a ummi cu leilung ta a si ih leilung tlun thuhla a sim; a sinain vancung ihsin a rami cu ziang hmuahhmuah tlunah a um. 32 Amah cun a hmuhmi le a theihmi thuhla pawl a sim nain zohman in a thu cu an pom lo. 33 Sikhalsehla zokhal a thu simmi a pomtu cu cutiih a pomnak in Pathian cu a dik a si, ti kha a hngetter. 34 Pathian ih a thlahmi cun Pathian ih thu a phuang, ziangah tile Pathian in a Thlarau famkim in a hnenah a pek. 35 A pa in a Fapa cu a duhdawt ih ziang hmuahhmuah a kut sungah a pek. 36 Fapa a zumtu cun kumkhua nunnak a nei; Fapa-ih thu a eltu cun nunnak a nei lo ding ih Pathian ih thinhengnak a tuar ding.

Jesuh Le Samaria Nunau

4:1 Jesuh cu Johan hnakin dungthluntu tam deuh a nei ih baptisma tla tam deuh a pek, tiah Farasi mi pawl in an thei. 2 A ngaingai ahcun Jesuh amah cun zohman baptisma a pek lo; a dungthluntu lawng in an pek. 3 Cutiih an rel ruri mi cu Jesuh in a theih tikah Judah ram ihsin a suak ih Galilee ah a kir sal. 4 A kir phahah Samaria ram a pal phah. 5 Samaria ramih a feh laiah Saikhar an timi khua pakhat a thleng. Cuih Saikhar khua cu Jakob in a fapa Josef hnenih a pekmi loram ihsin a hlat lo. 6 Cutawkah cun Jakob tikhur a um. Jesuh cu a khual tlawnnak ah a bang zet ih cuih tikhur kiangah cun a to. A tikcu cu sun hrawng a si. 7 Samaria nunau nu pakhat cu tidai khai dingah a ra ih Jesuh in a hnenah, "Tidai in ding i pe aw," tiah a dil. 8 A dungthluntu pawl cu rawl lei dingah khawsung ah an feh. 9 Cuih nunau nu cun, "Nang cu Judah mi na si ih kei cu Samaria mi ka si; ziangtinso tidai in ding i dil?" tiah a ti. Judah mi pawl cun Samaria mi pawlih hmanmi khokheng pawl an hmang duh lo. 10 Jesuh in, "Pathian ih a lo pekmi laksawng hi ziang a si, tile tidai a lo diltu hi zo a si, ti thei cila amah sawn na dil ding ih anih in nunnak tidai a lo pe ding nain!" tiah a ti. 11 Cuih nunau nu in, "Bawipa, balt'in na nei lo ih tikhur hi a thuk zet fawn. Khuitawk in so cuih nunnak tidai cu na lak ding? 12 Kan pu Jakob in hi tikhur hi in pek; amah le a fapa pawl siseh, a tuu rual le a caw rual pawl siseh, hi tikhur ihsin tidai an ngah. Jakob hnakin ka tum sawn tiah na ruat aw maw si?" tiah a sut. 13 Jesuh in, "Zokhal siseh hi tidai a intu cu a ti a haal sal ding. 14 Sikhalsehla ka pek dingmi tidai a intu cu a ti a haal nawn lo ding. Ka pek dingmi tidai cu amah sungah cirhti ah a cang ding ih cumi cun nunnak tidai le kumkhua nunnak a pe ding," tiah a ti. 15 Nunau nu in, "Bawipa, cuih tidai cu i pe aw! Cuticun ka ti a haal nawn lo ding ih hitawk ah tidai khai ding khalah ka rat a t'ul nawn lo ding," tiah a ti. 16 Jesuh in, "Na pasal va ko awla ra sal aw," tiah a ti. 17 Anih in, "Pasal ka nei lo," tiah a let. Jesuh in, "Pasal ka nei lo na ti cu thudik na sim a si. 18 Pasal panga na nei zo ih atu na umpi mi pa hi na pasal ngaingai a si lo. Thudik i sim a si," tiah a ti. 19 Nunau nu in, "Bawipa, profet na si ti ka lo thei. 20 Kannih Samaria mi kan pupa pawl cun hi tlang parah hin Pathian an rak biak; sikhalsehla nannih Judah mi cun Pathian cu Jerusalem ah biak ding a si, nan ti," tiah a ti. 21 Jesuh cun a hnenah, "Nunau nu, ka lo simmi hi zum aw: Mi in Pathian cu hi tlang ah siseh, Jerusalem khal ah siseh, an biak lo can a ra thleng ding. 22 Nannih Samaria mi cun nan biakmi nan thei ngaingai lo; a sinain kannih Judah mi cun kan biakmi kan thei, ziangah tile rundamnak cu Judah mi hnen ihsin a ra. 23 Sikhalsehla Pathian Thlarau hruainak thawngin Pathian a bia taktaktu in Pa cu thlarau le thutak thawn an biak caan a ra thleng ding; a si, cuih caan cu atu-ah a ra thleng zo. Cutiih biak cu Pathian in a duhmi a si. 24 Pathian cu Thlarau a si ih a biatu pawl in thlarau le thutak in an biak ding," tiah a ti. 25 Nunau nu in a hnenah, "Messiah cu a ra ding ih a rat tikah cun ziang hmuahhmuah amah in in sim leh ding," tiah a ti. 26 Jesuh in, "Na hnenih a t'ong rerotu hi amah cu ka si," tiah a ti. 27 Culai fangah Jesuh dungthluntu pawl cu an ra kir ih nunau nu thawn an biak awk rero kha an hmuh tikah an mang a bang ngaingai. Sikhalsehla zohman in cu nu cu, "Ziang so na duh?" tiah an sut lo. Jesuh khal cu, "Ziangah so hi nu cu na biak?" tiah an sut ve lo. 28 Cule nunau nu cu a tithawl a tanta ih khawsungih a vung feh hnuah mi seenpi hnenah, 29 "Hlanih thil ka tuah ciami hmuahhmuah i sim theitu pa hi ra zohhnik uh! Amah hi Messiah cu a si pei maw?" tiah a ti. 30 Cuticun khawsung in an suak ih Jesuh hnenah cun an feh. 31 Culai ah dungthluntu pawl in Jesuh cu, "Sayapa, rawl ei aw," tiah an fial. 32 Anih in, "Nan theih lomi rawl ei ding ka nei," tiah a ti. 33 Cule a dungthluntu pawl cun, "Pakhat khat in rawl an rak pek a si pei maw?" tiah pakhat le pakhat an sut aw. 34 Jesuh in an hnenah, "Kei ka rawl cu i thlahtu-ih duhnak tuah le hnat'uan i fialmi t'uan t'heh hi a si. 35 t'ongt'himnak ah ‘Thla li hnuah rawl khawm caan,’ tiah nan ti. Sikhalsehla thungai in ka lo sim: lo sung khi hei zohhnik uh! Lorawl an thar zo ih rawl lak caan a cu zo a si. 36 Rawl a latu pa cu a hlawhman kha pek a si ih rawl cu kumkhua a nunnak hrangah a khawm. Cuticun thlaici a tuhtu le rawl a latu cu hmun khatah an lung a awi tlang ding. 37 Ziangah tile t'ongt'himnak ih ‘Mi pakhat in a tuh; a dang pakhat in a at,’ timi cu a dikzet a si. 38 Nan rak t'uan dah lonak lo sungah fang at dingin ka lo thlah hai. Cutawkah midang ih an rak t'uan cianak ihsin midang hnat'uan ruangah a miat nan ngah a si," tiah a ti. 39 Nunau nu in, "Ka rak tuah ciami hmuahhmuah i sim sal t'heh," tiah a ti hrangah cuih khawsungih a ummi Samaria mi tampi in Jesuh cu an zum. 40 A hnenah Samaria mi pawl an ra ih, "Kan hnenah cam hrih aw," tiah an ra sawm ih ni hnih a cam. 41 Jesuh thusimmi an thei ih mi tam sinsin in an zum. 42 Cule nunau nu hnenah cun, "Atu cu nangmah ih thusimmi ruangah si loin kanmah rori in a thu simmi kan thei ih kan zum; amah hi leilung Runtu a si taktak ti khal kan thei," tiah an ti.

Jesuh In Bawi Pakhat Ih Fapa A Damter

43 Cutawkah ni hnih a cam hnuah Jesuh cu a suak ih Galilee ah a feh. 44 Ziangah tile amah rori in, "Profet cu amah ih ramah cun upatnak a ngah lo," tiah a rak ti. 45 Galilee-ih a thlen tikah cutawkih mipi pawl in an rak hmuak, ziangah tile Jerusalem khua Lantak Puai ah a feh ih cuih puai sungih a thil tuahmi hmuahhmuah an rak hmuh zo ruangah a si. 46 Cule Jesuh cu tidai kha Sabitti ih a rak canternak Galilee peng Kana khua ah a feh sal. Cutawkah acozah bawi pakhat a rak um ih a fapa pakhat Kapernaum khua ah a na. 47 Jesuh cu Judea ihsin Galilee a ra thleng ti a theih tikah a hnenah cun a va feh ih, Kapernaum khua ah va feh in a thizikmi a fapa damter dingah zaangfah a dil. 48 Jesuh in, "Hmuhsaknak le khuaruahhar thil tla nan hmuh dah ti lo ahcun zohman in nannih pawl cun nan zum lo ding," tiah a ti. 49 Cuih acozah bawipa cun, "Bawipa, ka fapa a thih hlanah ra hram aw," tiah a dil. 50 Jesuh in a hnenah cun, "Va tlung aw, na fapa cu a nung ding," tiah a ti. Cupa in Jesuh ih t'ong cu a zum ih a tlung. 51 A tlunnak lamzin ihsin a hnen-um pawl in an rak hmuak ih, "Na fapa cu a nung ding," tiah an ti. 52 Anih in, "Ziangtik caanah so ka fapa cu a dam deuh?" tiah a sut tikah annih in, "Mizan sun zanlam nazi pakhat ah a khurhnat a reh," tiah an ti. 53 Cuih caan cu Jesuh in ‘Na fapa a nung ding,’ tiih a rak ti caante kha a si, tiah a pa cun a hun thei sal. Cuticun amah le a innsaang zatein an zum. 54 Himi hi Jesuh cu Judea ihsin Galilee-ih a rat hnuah a voihnihnak mangbangza a tuahmi a si.

Tili Kap Ih Mina Damternak

5:1 Cuih hnuah Jesuh cu Jerusalem ah Judah biaknak puai pakhat a um ih a feh. 2 Jerusalem khua ah cun Tuu Kotka an timi kiangah tili pakhat a um ih a kapah deu suanmi panga a um. Cuih tili cu Hebru t'ong in Bethzatha 3 Cuih deusuan sungah cun mina tampi an it teptep. t'henkhat cu mitcaw, t'henkhat cu ke-awl le t'henkhat cu a zengmi tla an si. 4 A caancaan ah Bawipa ih vancungmi a rung t'um ih tidai kha a caangter t'heu. Cutiih tidai a cang vete in tili sungih a dawp hmaisa bik kha an natnak ihsin an dam t'heu. Curuangah mina pawl cun tidai caang ding kha an hngak. 5 Cutawkah mipa pakhat kum sawm thum le kum riat sung a nami a um. 6 Cutawkih a ih ringring kha Jesuh in a hmu ih kum reipi a na zo ti tla a thei. Curuangah Jesuh in, "Dam na duh maw?" tiah a sut. 7 Cupa in, "Bawipa, tidai a caang tikah tili sungih i hnimtu ding zohman an um lo. Tili sungah ka vung t'um ding ka ti laifangah midang in in rak khelh ringring t'heu," tiah a ti. 8 Jesuh in, "Tho awla na ihphah la in feh aw," tiah a ti. 9 Hmakhatteah cupa cu a dam; a ihphah cu a lak ih a feh. Cuih ni cu Sabbath ni a si. 10 Curuangah Judah mi hotu pawl in damnak a ngahtu pa cu, "Tuih sun hi Sabbath ni a si ih na ihphah na fehpi hi kan Daan in a duh lo a si," tiah an ti. 11 Anih in, "Keimah i damtertu pa in na ihphah la awla feh aw, i ti si!" tiah a ti. 12 Annih in, "Cutiih a lo titu cu zo so a si?" tiah an sut. 13 Asinain damnak a ngahtu pa cun Jesuh cu zo a si ti a thei lo, ziangah tile cutawkah miburpi an um ih an lakin Jesuh cu a rak feh zo. 14 Neh hnuah cupa cu Jesuh in Biakinn sungah a tong ih, "Zohhnik! Atu cu na dam zo; curuangah va sual nawn hlah. Culole na parah thil t'ha lo sinsin a thleng ding," tiah a ti. 15 Cule cupa cu a feh ih Judah mi hotu pawl hnenah, "I damtertu cu Jesuh a si," tiah a va sim. 16 Sabbath ni ih mi a damter ruangah cun Jesuh cu an ralsan ih harsatnak an pek. 17 Jesuh in an hnenah, "Ka pa cu hna a t'uan ringring ih kei khal hna ka t'uan ve a t'ul a si," tiah a ti. 18 Cutiih a ti ruangah Judah mi hotu pawl cu an thin-ai a thok ih amah kha thah an tum sinsin; Sabbath a buar lawng si loin Pathian cu ka Pa a si, a ti ruangah Pathian tlukah a tuah aw tiah an ruat.

Fapa Ih Thuneihnak

19 Curuangah Jesuh in an hnenah, "Thungai in ka lo sim: Fapa cun amah tein zianghman a tuah thei lo. A Pa ih tuahmi a hmuhmi lawng kha a tuah a si. Pa in a tuahmi kha Fapa khal in a tuah ve. 20 Ziangah tile Pa in a Fapa kha a duhdawt ih a tuahmi hmuahhmuah kha a hmuh t'heh. Himi hnakin tuah ding a nasa sawn mi kha a hmuh hrih ding ih nan mang a bang ding. 21 Pa in mithi a thawhter ih nunnak a pek vekin Fapa khal in a duhmi poh hnenah nunnak a pe ve a si. 22 Pa in zo ih par hmanah thut'hennak a tuah lo. Fapa hnenah thut'hen theinak a pe zo. 23 Curuangah Pa a upattu hmuahhmuah in Fapa khal an upat ve pei. Zokhal Fapa a upat lotu cun a thlahtu a Pa khal a upat ve lo a si. 24 Thungaite in ka lo sim: zokhal ka simmi a thei ih i thlahtu a zum ahcun kumkhua nunnak a nei. Thut'hennak a tong lo ding; cutiin thihnak ihsin nunnak ah a lut zo. 25 Thungaite in ka lo sim: mithi in Pathian Fapa ih aw an thei ding; a theitu hmuahhmuah in nunnak an ngahnak caan a ra ding ih atu khalah a thleng rero zo. 26 Pa amah rori cu nunnak ih hramhri a si; cuvek thotho in Fapa khal cu nunnak ih hramhri a siter zo. 27 Cule Fapa cu Milai Fapa a si ruangah thut'hennak thu a pek. 28 Hiti a si ruangah nan mangbang hlah uh; mithi hmuahhmuah in a aw an theih ih, 29 an thlaan sung ihsin an suahnak tikcu a ra thleng ding: thil t'ha a tuahtu pawl cu nung dingah an tho sal ding; cule thil t'ha lo a tuahtu pawl cu hnon dingah an tho sal ve ding," tiah a ti.

Jesuh Hrangih Thutheitu

30 Jesuh in, "Keimah ih thu in zianghman ka tuah thei lo. Thut'hennak ka tuah a sile Pathian ih i simmi vekin ka tuah; curuangah ka thut'hennak cu a dik a si, ziangah tile ka duhmi tuah ka tum lo, i thlahtu ih duhmi lawng tuah ka tum a si. 31 Keimah in keimah ih thu lawng ka rel a si ahcun ka thusimmi cu a dik ngaingaimi a si, ti a theih lo ding. 32 Sikhalsehla ka ai-ah keimah ih thu a simtu ding midang pakhat a um ih ka thu a simmi cu a dik a si, ti ka thei. 33 Johan hnenah nan palai pawl nan thlah ih amah in thutak a rak sim hai. 34 Hitiih ka ti tikah theihpitu minung ka neih a t'ul ka tinak a si lo; rundamnak nan ngah theinak dingah ka simmi a si. 35 Johan cu a alh ih a tleumi mei-inn vek a si; a tleunak sungah caan malte sung lawng nan lung a awi. 36 Asinain ka ai-ah ka thuhla i theihpitu a um ih Johan ih thutheihpinak hnakin a tum sawn; cumicu Pa in i pekmi ka thil tuahmi pawl hi an si. Cuih ka thil tuahmi cun Pa in i thlah ti a langter. 37 Cule i thlahtu ka Pa khal hi ka ai-ah ka thu i theihpitu a si. A aw nan thei dah lo, a hmuihmel khal nan hmu dah lo; 38 cule a thu simmi khal nan thinlung sungah nan ret lo, ziangah tile a thlah mipa hi nan zum lo. 39 Ca Thianghlim sung nan hawl; cutiih nan hawlnak cu hi Ca Thianghlim sungah hin kumkhua nunnak kan hmu ding, tiah nan ruah ruangah a si. Hi Ca Thianghlim cu keimah ih thu a simtu a si. 40 Sikhalsehla nunnak ngah dingah ka hnenah nan ra duh cuang lo. 41 Minung hnen ihsin thangt'hatnak ngah ding ka hawl lo. 42 Sikhalsehla mi ziangvek nan si ti ka lo thei ih nan thinlung sungah Pathian duhdawtnak zianghman a um lo. 43 Ka Pa ih hmin thawn ka ra nain in saang duh lo; a sinain mi pakhat amah ih hmin lawng in a ra a sile amah sawn cu nan rak pom ding. 44 Pakhat le pakhat hnen ihsin porh le lomnak ngah nan duh zet, a sinain amah lawng Pathian a si mi hnen ihsi cun thangt'hatnak ngah nan tum lo; cuti a si ahcun ziangtinso kei cu in zum thei ding? 45 Keimah hi Pathian ih hmaiah in mawhthluktu a si ding, tiah i ruat hlah uh. A parih ruahsannak nan neih bikmi Moses rori hi a lo mawhthluktu a si ding. 46 Moses nan zum ngah ngaingai rak sisehla keimah khal hi in zum ve ding; ziangah tile Moses in ka thu a rak ngan a si. 47 Sihmansehla amah ih nganmi nan zum lo a si ahcun, ka simmi hi ziangtinso nan zum thei ding?" tiah a ti.

Jesuh In Mi Thawng Nga Rawl A Dar

6:1 Cuih hnuah Jesuh cu Galilee Tili khatlam ral ah a va feh. Cuih Tili cu Tiberias Tili ti tla in an ko. 2 Hmuhsaknak a tuahnak in mina tampi a damtermi kha an rak hmuh zo ruangah miburpi in amah cu an thlun. 3 Jesuh cu tlangpar ah a hung kai ih cunah a dungthluntu pawl thawn an to. 4 Lantak Puai timi Judah mi pawlih puai cu a nai thlang. 5 Cule Jesuh in a kiangkap kha a zoh tikah miburpi in amah an pan luailo kha a hmu ih Filip hnenah, "Minung hi-hmuah ei dingah khui tawkin so rawl kan lei ding?" tiah a sut. 6 Hitiih a suh cu Filip hniksaknak ah a si; a ngaingai ti ahcun ziang ka tuah ding ti kha a thei cia zo. 7 Filip in, "Mi pakhat in malte fingfing co ding hmanah mi hizat ih ei ding ahcun ngun tangka za hnih man lei hmanah a daih lo ding," tiah a ti. 8 A dungthlun a si vemi midang pakhat, Simon Piter ih nau Andru in, 9 "Hinah hin nauhak pakhat a um ih barli saang hlom nga le nga pum hnih a nei. Asinain minung hizat hrangah cun zianghman a si tham lo," tiah a ti. 10 Jesuh in, "Mi seenpi pawl cu toter hai uh," tiah a dungthluntu pawl cu a sim. Cutawkah cun hrampi a tamzet. Cuti cun mipi cu an to ih an zatein thawng nga tluk an si. 11 Jesuh in saang cu a lak ih Pathian hnenah lungawi thu a sim hnuah a tomi pawl hnenah cun a zem. Nga khal cutivek t'hiamt'hiam in a zem ih miseenpi cun an ei thei tawkin an ei. 12 Rawl an ei khawh tikah a dungthluntu pawl hnenah cun, "An hlahmi kha sar t'heh uh; malte hman hlon lak hlah uhsi," tiah a ti. 13 Cutiin an hlahmi cu an sar khawm tikah barli saang hlom nga sungin mipi ih an ei hnuah a taangmi bawm hleihnih an sar. 14 Jesuh ih tuahmi hmuhsaknak cu mipi in an hmuh tikah annih in, "Leilung ah a ra ding, timi profet cu amah rori hi a si," tiah an ti. 15 Miseenpi in an siangpahrang ih tuah dingah hranhram in in ra kai ding, ti kha Jesuh in a thei; curuangah tlangpar ah amahte lawng a feh.

Tidai Parah Jesuh A Feh

16 Zanlam khua a rung tlai tikah Jesuh ih dungthluntu pawl cu tili lamah an vung ih, 17 long sungih an to hnuah tili khatlam ral, Kapernaum khualam ah cun an va kir sal. Zan a si zo ih an hnenah Jesuh cu a ra thleng hrih lo. 18 Culai fangah thli nasa zetin a hung hrang ih tilet a tho ciamco. 19 Long cu an hlau ih peng thum peng li tluk an feh tikah Jesuh cu tidai parah feh tahratin anmah lamih a rat vivo kha an hmu ih an t'ih ngaingai. 20 Sikhalsehla Jesuh in, "t'ih hlah uh; Keimah ka si!" tiah a ti. 21 Cule lungawi zetin Jesuh cu an long sungah an kaiter ih an feh duhnak hmun ah reilote-ah an va thleng.

Mipi In Jesuh An Hawl

22 A thaizing ah tili khatlam ralih a ummi miseenpi pawl in cutawkah long pakhat lawng a um, cuih long sungah Jesuh a um lo ih a dungthluntu pawl lawng an feh a si, ti kha an thei. 23 Tiberias ihsin a rami long dangdang tla cu Bawipa in lungawi thu a sim hnuah miseenpi in saang an einak hmun kiang tili kapah an ra thleng. 24 Cutawkah Jesuh le a dungthluntu pawl an um lo tikha miseenpi in an hmuh tikah cutawkih long pawl to in Jesuh hawl duh ah Kapernaum ah an feh.

Jesuh Cu Nunnak saang A Si

25 Jesuh cu tili khatlam ralih an va hmuh tikah mipi pawl cun, "Sayapa, ziangtikah so hitawk ih na thlen?" tiah an sut. 26 Jesuh in, "Thungaite in ka lo sim: in ra hawl hi hmuhsaknak ka tuahmi nan theihthiam ruangah a si lo, saang khop zetih nan ei ruangah a si. 27 A siat theimi rawl hrangah hna t'uan hlah uh; sikhalsehla kumkhua a daihmi nunnak rawl hrangah t'uan uh. Cuih rawl cu Milai Fapa ih a lo pek dingmi a si, ziangah tile Pa Pathian in a parah a lungkimnak tacik a khen zo," tiah a ti. 28 Curuangah annih in, "Pathian in t'uan haiseh ti in duh sakmi tuah dingah ziangso kan tuah ding?" tiah an sut. 29 Jesuh in, "Pathian in t'uan haiseh ti a lo duh sakmi cu a thlahmi pa zum kha a si," tiah a ti. 30 Annih in, "Kan hmuh ih kan lo zum theinak dingah ziangvek hmuhsaknak so na tuah ding? Ziang si na tuah dingmi cu? 31 Ca Thianghlim sungih ‘An ei dingah vancung ihsin saang a pek,’ tiih a um vekin kan pupa pawl cun nelrawn ramt'hing ah khan manna saang an ei a si," tiah an ti. 32 Jesuh in, "Thungaite in ka lo sim: Moses ih a lo pekmi cu vancung saang ngaingai a si lo. Ka Pa in vancung saang ngaingai cu a lo pek a si. 33 Ziangahtile Pathian ih a pekmi saang cu vancung ihsin a rungt'um ih leilung mi nunnak a petu pa hi a si," tiah a ti. 34 Annih in, "Bawipa, cuih saang cu in pe ringring aw," tiah an dil. 35 Jesuh in an hnenah cun, "Keimah hi nunnak saang ka si. Ka hnenih a rami cu a riil a rawng dah lo ding; keimah i zumtu cu a ti a haal dah lo ding. 36 Cule ka lo sim hai zo vekin a hmuh cu in hmu zo nain in zum duh lo. 37 Ka Pa ih i pekmi pohpoh cu zokhal ka hnen ah an ra ding. Ka hnenih a rami cu zohman ka khir lo ding, 38 ziangah tile vancung ihsin ka rung t'um tikah hin keimah ih duhmi tuah dingah ka rung lo, i thlahtu ih duhmi tuah dingah ka rung a si. 39 Cule i thlahtu ih duhmi cu hihi a si: I pekmi hmuahhmuah kha pakhat hman hloter loin, ni neta bik ni-ah an zate ih ka thawhter sal t'heh ding kha a si. 40 Ziang hrangah tile ka Pa ih duhmi cu Fapa kha a hmu ih a zumtu hmuahhmuah cu kumkhua nunnak an ngahnak ding kha a si. Cule ni neta bikah nunnak ah ka thoter ding a si," tiah a ti. 41 "Keimah hi vancung ihsin a rungmi saang ka si," a ti ruangah Judah mi seenpi pawl cu an phunzai ruri. 42 Curuangah, "Hi pa hi Josef fapa Jesuh a si lo maw? A nu le a pa tla cu kan theih thluhmi an si ko! Ziangtin so ‘Vancung ihsin ka rung,’ tiah a ti rero thei?" tiah an ti. 43 Jesuh in, "Phunzai ruri nawn hlah uh! 44 I thlahtupa in ka hnenih a kuat lo ahcun zohman ka hnenah an ra thei lo ding; cutiih ka hnenih a rami cu ni neta bikah nunnak ah ka thoter ding. 45 Profet pawl in, ‘Zokhal Pathian in a zirh hai ding,’ tiah an rak ngan. Zokhal Pa a thei ih a hnen ihsin a zirtu cu ka hnenah a ra. 46 Hiti ka ti tikah zokhal in Pa cu an hmu zo, tinak a si lo; Pathian hnen ihsin a ra mipa lawng hi Pa hmutu cu a si. 47 Thungaite in ka lo sim: a zumtu cun kumkhua nunnak a nei. 48 Keimah hi nunnak saang ka si. 49 Nan pu le nan pa pawl cu nelrawn ramt'hing ah manna saang an ei nain an thi thotho. 50 Sikhalsehla vancung ihsin a rung t'ummi saang hi a eitu hmuahhmuah cu an thi lo ding. 51 Keimah hi vancung ihsin a rung t'ummi saang nung ka si. Hi saang a eitu cu kumkhua in a nung ding. Ka pek dingmi saang cu hi leilung in nunnak a ngah theinak dingih ka pekmi ka taksa hi a si," tiah a ti. 52 Cutiih a ti ruangah cun an lakah thinheng thu-el awknak tiang a suak ih, "Ziangtin so hi pa hin kan ei dingah a taksa cu in pek thei ding?" tiah an ti ciamco. 53 An hnenah Jesuh in, "Thungaite in ka lo sim: Milai Fapa taksa nan ei lo ih a thisen tla nan in lo ahcun nan sungah nunnak nan nei lo ding. 54 Zokhal ka taksa a ei ih ka thisen a intu cu kumkhua nunnak a nei ih ni neta bikah nunnak ah ka thoter ding. 55 Ziangah tile ka taksa hi rawl taktak a si ih ka thisen cu in dingmi taktak a si. 56 Zokhal ka taksa a ei ih ka thisen a intu cu ka sungah a nung; cule keimah khal a sungah ka nung a si. 57 A nungmi Pa in i thlah ih amah ih ruangah kei khal ka nung a si. Cubangtuk thotho in keimah i eitu cu keimah ih ruangah a nung ve ding. 58 Vancung ihsin a rungmi saang timi cu himi hi a si; nan pu le nan pa pawl cun saang an ei ih malte a hung rei cun an thi thotho; vancung ihsin a rungmi saang cu cuvek a si lo. Hi saang a eitu ih piang cu kumkhua in an nung ding," tiah a ti. 59 Himi cu Kapernaum khua sinakok sungih thu a zirh laiih a simmi pawl an si.

Kumkhua Nunnak t'ongkam

60 Amah a thluntu tampi in cuih thu cu an thei ih, "A thu zirhmi hi a hartuk ual! Zoso a thei thei ding?" tiah an ti. 61 An sim lo nain cuih thu-ah an phunzai ciamco ti kha Jesuh in a thei ih an hnenah, "Himi hin nan thinlung ah buainak a suahter maw si? 62 Thut'himnak ah Milai Fapa hi hlanih a rak umnak hmunih a hung feh sal kha hmu uhla ziangtinso nan ti ding? 63 Nunnak taktak a petu cu Thlarau a si; milai-ih taksa cu san a tlai lo. Nan hnenih ka simmi t'ongkam hi nunnak le Thlarau petu a si. 64 Asinain mi t'henkhat cun nan zum lo," tiah a ti. Jesuh in a hramthokte ihsin zoso i zum lotu ding, tile zoso i zuartu ding ticu a thei t'heh zo. 65 Cule Jesuh in, "Hiti a si ruangah sokhaw Pa in ka hnenih a ratter lo ahcun zohman ka hnenah an ra thei lo ding, tiah ka lo simnak kha a si cu!" tiah a ti. 66 Curuangah Jesuh dungthluntu miseenpi cun kir in an tlansan. 67 Curuangah a dungthluntu hleihnih kha, "Nannih teh tlan nan duh ve maw?" tiah a sut. 68 Simon Piter in, "Bawipa, zo ih hnenah so kan feh cuang ding? Kumkhua nunnak petu t'ongkam a neitu cu nangmah na sisi! 69 Cule atu cun Pathian hnen ihsin a rami Mi Thianghlim na si ti kha kan zum ih kan thei ngah a si," tiah a ti. 70 Jesuh in, "Nannih hleihnih hi keimah ih hriilmi nan si, a si lo maw? Asinain pakhat cu satan a si," tiah a ti. 71 Hitiih a ti sanmi cu Simon Iskariot ih fapa Judas kha a si. Ziangah tile Judas cu dungthluntu hleihnih lakih a telmi a si nain Jesuh zuartu ding a si.

Jesuh Le A Naule Pawl

7:1 Cuih hnuah Jesuh cu Galilee peng sungah khual a tlawng; cule Judea ram Judah mi hotu pawl in a thah an tum ruangah Judea peng ahcun a tlawng duh lo. 2 Puanthlam Puai a nai zo ih, 3 curuangah a naule pawl in Jesuh cu, "Na thil tuahmi tla hi a lo thluntu pawl in an hmuh dingah hi hmun ihsin suak awla Judea peng ah feh aw. 4 Mi tampiih theihmi si a duhtu cun a thil tuahmi cu a thup dah keel lo. Hi bangtuk thil hi na tuah ruangah leilung pumpi in lo thei thluh haiseh!" tiah an ti. 5 Amah ih naule pawl hman in Jesuh cu an zum lo. 6 Jesuh in an hnenah, "Ka tikcu a kim hrih lo. Nannih hrangah cun ziangtik khal hi nan tikcu a si ko. 7 Leilung in nannih cu a lo hua lo, sikhalsehla kei cun a thil tidaan a t'ha lo a si tiih ka sim ringring ruangah leilung in i hua a si. 8 Puai tuahnak ahcun va feh uh. Kei cu ka tikcu a kim hrih lo ruangah ka feh lo ding," tiah a ti. 9 Cutiin a sim ih Galilee ah cun a umta.

Puanthlam Puai Ah Jesuh A Feh

10 Puai ah a naule pawl cu an feh ih cuih hnuah Jesuh khal a feh ve; a sinain langhngan tukih feh loin a thup deuh in a feh. 11 Puai hmun ah cun Judah hotu pawl cun an hawl ih, "Khui-ah so a si?" tiah an sut vivo. 12 Mipi pawl in amah ih thuhla cu an rel ih an phun supso rero. t'henkhat in, "Mit'ha sokhaw a si!" an ti. Mi dang in, "Si hlah e, miseenpi a hruai sual a sisi!" an ti. 13 Zohman in langhngan in an t'ong ngam lo, ziangah tile Judah mi hotu upa pawl kha an t'ih. 14 Cuih puai tuah caan a hrek tlukah Jesuh cu Biakinn ah a feh ih thuzirh a thok. 15 Judah mi hotu pawl cu an mang a bang ngaingai ih, "Hi pa hi khui hmanah zirnak a neih dah ual lo; ziangtinso hi zatzat thu a theih thei?" tiah an ti. 16 Jesuh in, "Ka thuzirhmi hi keimah palungih zirhmi a si lo; i thlahtu hnen ihsin a rami a si. 17 Pathian duhnak tuah a tumtu zokhal in ka thuzirhmi hi Pathian hnen ihsin a ra maw, keimah palung in so ka sim, ti cu a thei ding. 18 Zokhal sisehla amah ih thuneihnak lawngin a t'ongtu cun amah hrangah thangt'hatnak a hawl a si. Sikhalsehla amah a thlahtu hrangih thangt'hatnak a hawltu cun a sungah hrokhrawlnak zianghman a nei lo ih zumtlak in a um a si. 19 Moses in Daan a lo pek a si lo maw? Sikhalsehla zohman in cuih Daan cu nan thlun lo. Ziangah so a thah lehlam in tum rero?" tiah a ti. 20 Mipi in, "Na sungah khuavang a um a si! Zoso thah a lo tum?" tiah an ti. 21 Jesuh in, "Hmuhsaknak pakhat ka tuah ih nan khuaruah a har t'heh. 22 Moses in nan fapa pawl an serh tan dingah thu a lo pek, (hi serhtannak a thoktu cu Moses a si lo, nan pupa pawl an si); cule nan fapa cu Sabbath ni ah a serh nan tan. 23 Moses Daan buar lonak dingah tiah nan fapa Sabbath ni ah a serh nan tan a si ahcun ziangah so kei in Sabbath ni ih mi pakhat ka damter ruangah ka parah nan thin a heng? 24 A lenglam zohnakin thu t'hen hlah uh; thudik a sinak zoh in thu t'hen uh," tiah a ti.

Messiah A si Maw?

25 Jerusalem khawsungmi t'henkhat in, "Judah mi hotu pawlih thah an tummi pa cu hi pa hi a si lo maw? 26 Zohhnik uh! Mi zapi theihhngan ah duh tawkin thu a sim ih zianghman an ti lo. Hi pa hi Messiah a si tiah an thei ngah ngaingai teh a si pei maw? 27 Sikhalsehla Messiah a rat tikah cun khuitawkin a ra, ti kha zohman in an thei lo ding; a sinain hi pa hi cu khuitawk in a ra ti cu kan zatein kan theih t'heh mi a si fawn," tiah an ti. 28 Jesuh in Biakinn sungah cutiih thu a zirh rero laiah cun, aw ring zetin, "Keimah hi in thei ngaingai maw? Khuitawk ihsin ka rat ti hi nan thei ngah ngaingai maw? Keimah ih thu in ka ra lo. Asinain i thlahtu cu zumtlak ngaingai a si. Nannih in i thlahtu cu nan thei lo, 29 a sinain kei cun ka thei, ziangah tile amah in i thlah ih a hnen ihsin ka ra," tiah a ti. 30 Cutikah amah kha kaih an tum, a sinain zohman in an kai ngaingai lo; ziangah tile a tikcu a kim hrih lo. 31 Sikhalsehla miseenpi sungih mi tampi in an zum ih, "Messiah a rat ngaingai tikah hi pa ih a tuahmi hnakin hmuhsaknak tam deuh a tuah pei maw?" tiah an ti.

Jesuh Kai Dingah Mi An Thlah

32 Jesuh thuhla miseenpi in an rel ruri kha Farasi pawl in an theih tikah puithiam upa pawl thawn Jesuh kaitu dingah biakinn kiltu palik pawl an thlah. 33 Jesuh in, "Nan hnenah tikcu malte sung ka umta hrih ding ih cuih hnuah i thlahtu hnenah ka feh ding. 34 In hawl ding nain in hmu thei lo ding, ziangah tile ka umnak ahcun nan feh thei lo ding," tiah a ti. 35 Judah mi hotu pawl in pakhat le pakhat hnenah, "Kan hmuh thei lonak hmun khuitawkah so feh a tum? Kan minung pawl an umnak Grik khua pakhat khat ah feh tahratin Grik mi pawl a zirh tum a si pei maw? 36 ‘In hawl ding nain in hmu lo ding. Ka umnak ahcun nan feh thei lo ding,’ tiah in ti. A sim duhmi ziang a si pei?" tiah an ti aw.

Nunnak Petu Tiva

37 Puai tuah ni neta bik le ni sunglawi bik ni ah Jesuh cu a ding ih aw ring zetin, "Zokhal ti a haal mi cu ka hnenah ra sehla ra in seh. 38 Ca Thianghlim in ‘Zokhal keimah i zumtu cu a thinlung sung ihsin nunnak tiva a put ding,’ tiah a ti vekin a si ding," tiah a sim. 39 Hitiin Jesuh in a sim tikah amah a zumtu hmuahhmuah in Thlarau an ngahnak ding thu kha a sim duhnak a si. Cuih caan ahcun Thlarau kha pek a si hrih lo, ziangah tile Jesuh kha sunlawinak ah thlenter a si hrih lo.

Miburpi An t'hen Aw

40 Cutiih a t'ongmi kha miburpi lakih t'henkhat in an theih tikah, "Hi pa hi profet ngaingai a si," tiah an ti. 41 A dang t'henkhat in, "Messiah a si," an ti. Midang in, "Messiah cu Galilee in ra ding a si ual lo! 42 Ca Thianghlim in ‘Messiah cu Siangpahrang David tesinfa a si ding ih David a rak umnak Bethlehem khua ah a suak ding,’ a ti kha!" tiah an ti. 43 Cutiin Jesuh ih ruangah cun mizapi lakah t'hent'hek awknak a um. 44 Mi t'henkhat in a kaih an duh, a sinain zohman in an kai ngaingai lo.

Judah Hotu Pawlih Zumlonak

45 Biakinn kiltu palik pawl an ra kir tikah puithiam upa pawl le Farasi pawl in, "Ziangah so nan ratpi lo?" tiah an sut. 46 Palik pawl cun, "Hi pa bangtuk in zohman an t'ong dah lo," tiah an sawn. 47 Cutikah Farasi pawl in, "Nannih khal a lo bum ngah ve maw si? 48 Judah hotu lakah pakhat tal, a si lole Farasi lakah pakhat tal amah zumtu nan theihmi an um dah maw? 49 Hi miseenpi sawh lam cu Moses ih Daan an theih lo ruangah Pathian ih camsiatnak hnuai ah a ummi an si!" tiah an ti. 50 Cutawkih a ummi Farasi mi lakah Nikodemas an timi, Jesuh a rak tong dah zotu kha a um ve. Anih in an hnenah cun, 51 "Kan Daan vekih kan rel a si ahcun mi pakhat cu amah ih hmurka kan theih hlan le a tuahmi kan hmuh ngah hlan ahcun kan hnong thei lo ding," tiah a ti. 52 Cutikah annih in, "Nang khal Galilee mi na si ve maw si? Ca Thianghlim kha siar awla Galilee ihsin profet an suak dah lo, ti kha na thei ko ding," tiah an ti. 53 Cun mi hmuahhmuah cu an inn ciarah an tlung; 8:1 a sinain Jesuh cu Olif Tlang parah a hung feh. 2 A thaisun zingthlapit ah Biakinn ah a feh sal. Mi tampi in an pan, cule Jesuh cu a to ih thu a zirh. 3 Culai fangah Daanthiam saya pawl le Farasi mi pawl in t'aangt'awm sualnak a tuah laifang rori an kaihmi nunau nu kha an hruai ih zapi hmaiah an dinter. 4 Jesuh hnen ahcun, "Sayapa, hi nunau nu hi t'aangt'awm sualnak a tuah laifang rori-ih kaihmi a si. 5 Kan Daan sungah Moses ih thupekmi vekin cubangtuk nunau cu lungto in denthat ding a si. Nang ziangti in so na ruah?" tiah an sut. 6 Hitiih an suhnak cu Jesuh kha sual an puh theinak dingih thang an kammi a si. Asinain anih cu a kun ih leilung ah a kutzung in ca a ngan. 7 Cutiin thu an sut rero ruangah cun Jesuh cu dingtein a hung to ih an hnenah, "Nanmah lakah sualnak a tuah dah lomi in hmaisa bikah lungto in deng uh," tiah a ti. 8 Cule a kun sal ih leilung ah ca a ngan sal. 9 Cumi an theih tikah an zatein pakhat hnu pakhat an tlan t'heh: Upa upa in an tlan hmaisa. Cule Jesuh lawng a taang ih a hmaiah cuih nunau nu lawng a ding. 10 Dingte in a hung to sal ih a hnenah, "Khui ah so an si t'heh? Mawh a lo phurhtu dingah zohman an taang nawn lo maw?" tiah a sut. 11 Nunau nu cun, "A si Bawipa, zohman an taang lo," tiah a ti. Jesuh in, "Cuti a sile kei khal in mawh ka lo phurh lo ding, va tlung awla va sual nawn hlah," tiah a ti.

Jesuh Cu Leilung Tleunak A Si

12 Jesuh cun Farasi mi pawl hnenah, "Kei cu leilungih tleunak ka si. Zokhal keimah i thluntu cu a nunnak ah tleunak a nei ding ih khawthim sungah a feh dah lo ding," tiah a ti. 13 Farasi pawl cun a hnenah, "Na sinak thu cu nangmah in na sim. Curuangah na simmi hi zianghman lak tlak a si lo," tiah an ti. 14 Jesuh in, "A si lo; keimah ih thu cu keimah in ka sim hmanah ka simmi cu a dikmi a si, ziangah tile khuitawk ihsin ka ra ti le khuitawkah ka feh ding ti ka thei. Nannih cun khuitawk ihsin ka ra ti le khuitawkah ka feh ding ti nan thei lo. 15 Nannih cun minung ih tisa daan in thu nan t'hen t'heu; kei cun zo ih par hmanah thut'hennak ka tuah lo. 16 Asinain thu ka t'hen hman va sisehla ka thut'hennak cu a dik ding, ziangah tile hi thut'hennak ah hin keimah lawng ka si lo, i thlahtu pa khal ka hnenah a um a si. 17 Nan Daan cabu sungah ‘Thu theitu pahnih an lung a kimtlang a si ahcun an simmi cu a dik a si,’ tiah a um. 18 Keimah ih thu cu keimah in ka sim ih i thlahtu ka Pa khal in ka thu cu a sim ve," tiah a ti. 19 Annih in, "Khuitawkah so na Pa cu a um?" tiah an sut. Jesuh in, "Keimah siseh, ka Pa siseh, in thei lo. Keimah in theih ahcun ka Pa khal nan thei ding," tiah a ti. 20 Hi thu pawl a simnak cu Biakinn sungih thu a zirhnak thawhlawm kuang pawl an retnak khaan ah a simmi a si. Cule zohman in an kai lo, ziangah tile a tikcu a kim hrih lo.

Ka Fehnak Ah Nan Feh Thei Lo Ding

21 Jesuh in an hnenah, "Kei cu ka feh ding; in hawl ding nain nan sualnak sungah nan thi ding. Ka fehnak ahcun nan feh thei lo ding," tiah a ti. 22 Curuangah Judah mi hotu pawl cun, "Ka fehnak ah nan feh thei lo ding, tiah in ti. Amah le amah thah awk a tum a si pei maw?" tiah an ti. 23 Jesuh in, "Nannih cu hnuailam mi nan si; a sinain kei cu tlunlam mi ka si. Nannih cu hi leilung ihsin nan si, kei cu hi leilung ihsin ka si lo. 24 Curuangah a si nan sualnak sungah nan thi ding, ka lo tinak cu! Cule ‘Keimah cu Keimah a si mi ka si,’ tihi in zum lo a si ahcun nan sualnak sungah nan thi rori ding a si," tiah a ti. 25 Cutikah annih in, "Zoso na si?" tiah an sut. Jesuh in, "A hramthok ihsin ka lo simmi kha a si ko. 26 Nan thuhla hi sim ding tampi ka nei; mawhthluk tlak nan sizia khal hi tampi rel ding ka nei. Asinain i thlahtu cu zumtlak a si ih a hnen ihsin ka theihmi lawng kha hi leilungah hin ka than," tiah a ti. 27 Jesuh in an hnenah Pa ih thu a sim kha an thei lo. 28 Curuangah an hnenah, "Milai Fapa hi nan thlai tikah ‘Keimah cu Keimah a si mi ka si,’ ti kha nan thei ding. Cule keimah ih thuneihnak in zianghman ka tuah lo; Pa in sim dingih i fialmi lawng ka sim a si ti nan thei ding. 29 Cule i thlahtu cu ka hnenah a um ih keimah lawng i tanta dah lo; ziangah tile amah ih lungkimmi lawnglawng ka tuah a si," tiah a ti. 30 Hi thu a simmi a theitu tampi in Jesuh cu an zum.

Miluat Le Sal Pawl

31 Curuangah Jesuh in amah a zumtu pawl hnenah, "Ka thu zirhmi nan thlun ahcun keimah ih dungthluntu ngaingai nan si ding; 32 thutak cu nan thei dingih cuih thutak cun a lo luatter ding," tiah a ti. 33 Annih in, "Kannih cu Abraham ih tesinfa kan si ih zo ih sal hman kan si dah lo. ‘Miluat nan si ding,’ na ti tikah hin ziangso na ti duh san?" tiah an ti. 34 Jesuh in an hnenah, "Thungaite in ka lo sim: zokhal sisehla sualnak a tuahtu cu sualih sal a si. 35 Sal cu innsaang sungah kumkhua in a um thei lo; a sinain fapa cu innsaang sungah kumkhua in a um. 36 Fapa in a lo luatter a si ahcun miluat taktak nan si ding. 37 Abraham ih tesinfa nan si cu ka thei. Asinain a thah in tum thotho, ziangah tile ka thu zirhmi nan pom thei lo. 38 Ka Pa ih i hmuhmi thu ka lo sim; sikhalsehla nannih cun nan pa ih a lo simmi kha nan tuah," tiah a ti. 39 Annih in, "Kan pa cu Abraham a si," tiah an ti. Jesuh in "Abraham ih faate nan si ngaingai ahcun a tuahmi vek nan tuah ding. 40 Ziang hmuahhmuah ka tuahmi hi Pathian hnen ihsin thutak ka theihmi pawl ka lo simnak a si; a sinain nannih cun a thah lawnglawng in tum. Abraham in cubangtuk thil zianghman a tuah lo! 41 Nannih nan tuahmi hi cu nan pa ih tuahmi a si," tiah a ti. Annih in, "Pathian amah lawng hi kan Pa cu a si ih kannih hi a fa taktak kan si," tiah an ti. 42 Jesuh in an hnenah, "Pathian hi nan Pa si taktak sehla keimah hi in duh ding; ziangah tile Pathian hnen ihsin ka ra ih atu hinah ka um. Keimah ih thu in ka ra lo; amah ih thlahmi ka si. 43 Ka simmi hi ziangah so nan theih thei lo? Ka thu simmi hi nan tuar thei lo ruangah a si. 44 Nannih cu nan pa Satan ih fa nan si; nan pa ih duhnak nan thlun duh ve a si. A hramthok ihsin anih cu mithat a si ih thutak lam ahcun a t'ang dah lo, ziangah tile anih cu a sungah thutak a um lo. Anih in thuphan a per tikah amah ih si daan a thlun vemi a si, ziangah tile anih cu thuphan pertu a si ih thuphan hmuahhmuah ih pa a si. 45 Asinain kei cun thutak ka sim ih curuangah nannih cun in zum duh lo. 46 Nanmah lakah hin sualnak na tuah a si, tiah i hmuh theitu pakhat tal nan um maw? Thutak ka sim nain ziangah so in zum duh lo? 47 Pathian hnen ihsin a rami cun Pathian ih t'ongkam a ngai. Sikhalsehla nannih cu Pathian hnen ihsin a rami nan si lo ruangah a thu nan ngai duh lonak hi a si," tiah a ti.

Jesuh Le Abraham

48 Judah mi pawl cun Jesuh cu, "Nang cu Samaria mi na si ih na sungah khuavang a um, kan lo ti tikah kan dik a si lo maw?" tiah an ti. 49 Jesuh in, "Khuavang ka nei lo; kei in ka Pa cu ka sunloih, nannih in kei cu in nautat. 50 Keimah ih hrangah hminthannak ka hawl lo. Asinain sunlawinak a hawltu pakhat a um ih amah cu ka lam t'angin thut'hentu a si. 51 Thungaite in ka lo sim: zokhal ka thu a thluntu cu a thi dah lo ding," tiah a ti. 52 Annih in Jesuh cu, "Atu-ah cun khuavang na nei a si, ti kan theifiang sinsin! Ziangtin tile Abraham cu a thi zo, profet pawl khal an thi t'heh zo; a sinain nang in na thu a thluntu cu an thi lo ding, tiah na ti. 53 Kan Pa Abraham cu a thi zo; Abraham hnakih tum sawnah na ruat aw maw si? Cule profet pawl tla an thi zo; zo ka si tiin so na ruah awk?" tiah an ti. 54 Jesuh in, "Keimah ih hminthannak ka hawl a si ahcun cuih hminthannak cu zianghman a si lo ding. Kei i sunloihtu cu ka Pa a si ih ‘Kan Pathian a si’ nan timi rori hi a si. 55 Nannih cun nan thei dah lo; a sinain kei cun ka thei. Amah cu ka thei dah lo ka ti ahcun nanmah vek thotho in thuphan pertu ka si ding. Sikhalsehla amah cu ka thei taktak ih a thu khal ka thlun. 56 Nan pa Abraham cu ka ratnak ding tikcu caan hmuh duh in a hngakhlap zet; a hmu ngah ngaingai ih a lung a awi zet a si," tiah a ti. 57 Annih in, "Kum sawmnga hman na kim hrih lo sikhawh ziangtinso Abraham cu na hmuh?" tiah an ti. 58 Jesuh in, "Thungaite in ka lo sim: Abraham a suah hlan khalah Keimah a si mi ka si," 59 Cule lungto an sar ih den an tum, a sinain Jesuh cu a relh ih Biakinn ihsin a feh hlo.

Jesuh In Mitcawpa A Damter

9:1 Jesuh cu cutiih a feh rero laiah a suah ihsin a mit a cawmi pa pakhat a hmu. 2 A dungthluntu pawl in, "Sayapa, zo ih sualnak ruangah so mitcaw in a suah? Amah ih sualnak ruangah maw, a nu le a pa ih sualnak ruangah so?" tiah an sut. 3 Jesuh in, "A mit a cawtnak hi amah ih sualnak ruangah a si lo, a nu le a pa ih sualnak ruang khalah a si lo. Pathian thil ti theinak hi hi pa damternak ihsin a langnak ding ah a si. 4 Sun a si sung ahcun i thlahtu ih hna kan t'uan rero a t'ul. Zan a ra thleng cing ding ih zohman hna an t'uan thei nawn lo ding. 5 Leilung tlunih ka um sungah cun keimah hi leilung tleunak ka si," tiah a ti. 6 Cutiih a ti hnuah Jesuh in leilungah cil a phui ih cuih a cil in leivut a beekter hnuah cu pa ih mit ah cun a man. 7 Cu hnuah, "Va feh awla Siloam Tili ah na hmai va phiah aw," tiah a ti. Siloam timi cu Tirhthlah tican a si. Cuti cun cupa cu a feh ih a hmai cu a phiah, khua a hmu thei sal ih a ra kir. 8 A innhnen pawl le tuih hlanih rawl dil in a hmu t'heutu pawl in "Hi pa hi to hmun in tangka a dil t'heutu kha a si lo maw?" tiah an ti. 9 Mi t'henkhat in, "Amah a si ko," tiah an ti. Midang in, "Amah a si lo; amah vek midang a si," tiah an ti. Cupa amah rori in, "Nan timi pa cu ka si," tiah a ti. 10 Annih in, "Ziangtin so atu-ah khua na hmuh thei sal?" tiah an sut. 11 Anih in, "Jesuh an timi pa in ciarbek malte a tuah ih ka mit ah i man hnu ah Siloam ah va feh awla na hmai va phiah aw tiah i ti. A ti vekin ka feh ih ka hmai ka phiah vete in khua ka hmu thei sal a si," tiah a ti. 12 Annih in, "Cupa cu khui-ah so a um?" tiah an sut. Anih in, "Ka thei lo," a ti.

Farasi Pawl In Cuih Thu An Zingzoi

13 Cule annih in mitcaw dah pa cu Farasi pawl hnenah an fehpi. 14 Jesuh in ciarbek a tuah ih a mitcawtnak a damter ni cu Sabbath ni a si. 15 Curuangah Farasi mi pawl cun a mit khua a hmuhnak thu cu an sut sal. Anih in, "Ka mit ah ciarbek a run hnih, cule ka hmai ka phiah ih ka hmu thei a si ko," tiah a ti. 16 Farasi mi t'henkhat in, "Hi bangtuk thil a tuahtu pa cu Pathian hnen ihsin a rami a si thei lo ding, ziangah tile Sabbath daan a thlun lo a si," tiah an ti. Midang pawl in, "Misual a si ahcun hi bangtuk hmuhsaknak cu ziangtinso a tuah thei ding?" tiah an ti ve. Cutiin an lakah t'henawknak a um. 17 Curuangah Farasi mi pawl in cupa cu thu an sut sal ih, "Na mit a lo vangter sikhawh cupa cu ziangti in na ruat?" tiah an sut. Anih in, "Profet a si tiah ka ruat," tiah a ti. 18 Judah mi hotu pawl cun mitcaw pa thu cu a nu le a pa an sut ngah hlanah cun mitcaw in a suak ih atu-ah khua a hmu thei ticu an zum duh hrimhrim lo. Curuangah a nu le a pa cu an ko ih, 19 "Hi pa hi nan fa a si maw? Mitcaw in a suak tiah nan ti; cuti a sile ziangtinso atu-ah khua a hmuh thei?" tiah an sut. 20 A nu le a pa cun, "Amah hi kan fapa a si ti kan thei; cule mitcaw in a suak ti kan thei. 21 Sikhalsehla ziangti in atu-ah khua a hmu thei ti le a mitcawtnak hi zo in a damter ti khal kan thei lo. Amah sut uh; upa a si ve thlang ih amah in a lo let thei ko hai ding," tiah an ti. 22 A nu le a pa cun cutiin an sim, ziangah tile Judah mi hotu pawl an t'ih ruangah a si. Judah mi hotu pawl cun: zokhal Jesuh hi Messiah a si tiah ka zum a timi poh cu sinakok ihsin suah siseh, tiah lungkimnak an rak nei zo. 23 Curuangah a nu le a pa in, "Upa a si ve thlang ih amah sut uh," tiah an tinak cu a si. 24 Mitcaw pa cu a voihnihnak an ko sal ih, "Thudik ka sim ding tiah Pathian hmaiah thu kam aw! A lo damtertu pa hi misual a si hrimhrim ti kan thei," tiah an ti. 25 Cupa cun, "Misual a si le si lo kei ka thei lo. Asinain pakhat cu ka thei: ka mit a rak caw nain atu cu khua ka hmu thei zo," tiah a ti. 26 Annih in, "Ziangtin so a lo tuah?" tiah an sut. "Na mit cawtnak cu ziangtinso a lo damter?" tiah an ti. 27 Anih in, "Ka lo sim zo hai nain nan ngai duh lo. Ziangah so a theih sal cu nan duh? Nannih tla amah thluntu si nan duh ve maw si?" tiah a ti. 28 Cutikah annih in cupa cu an camriam ih, "Nangmah sawn hi cupa ih dungthluntu na si. Kannih cu Moses thluntu kan si. 29 Pathian in Moses hnenah thu a sim, ti kan thei; sikhalsehla kha pa cu khuitawkin a ra ti hman kan thei dah lo!" tiah an ti. 30 Cupa cun, "Hi thil cu a va mak so! Nannih cun khuitawk ihsin a ra ti nan thei lo, a sinain kei cu ka mitcaw i vanter! 31 Pathian in misual pawlih t'ongkam a ngai dah lo ti kan thei; a sinain amah a upattu le a duhnak a tuahtu pawlih t'ongkam cu a ngai a si. 32 Mitcaw ciaih a suakmi khua a hmuter theitu an um ti hi leilung hramthok ihsin zohman in kan thei dah lo. 33 Hi pa hi Pathian hnen ihsin rami a si lo ahcun zianghman tuah theimi a nei lo ding," tiah a ti. 34 Annih in, "Sualnak sungah a suak ih sualnak lakih a t'hang mi pa nang lamlam in maw thuzirh in tum ve?" tiah an ti ih sinakok inn ihsin an dawihlo.

Thlarau Mitcawtnak

35 Cubangtuk thil hmuahhmuah cu Jesuh in a theih tikah cupa cu a hmu ih, "Milai Fapa hi na zum maw?" tiah a sut. 36 Cupa cun "Bawipa, cupa cu zoso a si? Amah ka zum theinak dingah i simhnik aw!" tiah a ti. 37 Jesuh in, "Amah cu na tong zo ih atuih a lo bia rerotu hi a si!" tiah a ti. 38 Cupa in, "Bawipa, ka zum!" ti phah in Jesuh hmaiah cun a khuk a bilh ih a biak. 39 Jesuh in, "Hi leilungah hin thut'hen dingah ka ra; cumicu mitcaw in khua an hmu ih khua a hmumi pawl in an mit a cawtnak dingah a si," tiah a ti. 40 Farasi mi t'henkhat cutawkah an um ih cutiih a simmi a theitu pawl in, "Kannih khal hi mitcaw nan si ve in ti duhnak a si maw?" tiah an sut. 41 Jesuh in, "Mitcaw rak si uhcila mawhthluk nan si lo ding; sikhalsehla khua kan hmu thei nan ti ruangah hin mawhthluk nan si ih nan sualnak cu a taanglai a si," tiah a ti.

Tuukhaaltu Taht'himnak

10:1 Jesuh in, "Thungaite in ka lo sim: tuu inn sungah saangka in lut loin hmun dang in a kai ih a luttu cu rukru le suamhmang an si. 2 saangka in a luttu cu tuu a khaaltu a si. 3 saangka kiltu pa in a hrangah saangka cu a on sak. A tuu pawl cu an hminin a ko ih a aw cu an thei ih lengah a suahpi. 4 Cutiih a suahpi hnuah a tuu pawl hmaiah a feh ih a tuu in an thlun; ziangah tile a aw kha an thei. 5 Midang cu zohman an thlun lo ding; ziangah tile a aw an theih thiam lo ruangah a hnen ihsin an tlan hlo sawn ding," tiah a ti. 6 Jesuh in hi taht'himnak hi a sim, a sinain a sim duhmi ih tican cu an thei thei lo.

Tuukhal t'ha Jesuh

7 Jesuh in hiti in a sim sal, "Thungaite in ka lo sim: Kei cu tuu hrangah saangka ka si. 8 Ka hlan ih a ratu hmuahhmuah cu rukru le suamhmang an si ruangah tuu in an aw an ngai lo. 9 Kei cu saangka ka si. Keimah ih sungin a luttu cu rundammi a si ding. An lut an suak ding ih hrampi a hningmi an hmu ding. 10 Rukru cu ru ding, that ding le siatsuah ding lawnglawngah a ra. Kei cu nunnak an ngah ih tlamtling zetih an neihnak dingah ka ra a si. 11 Kei cu tuukhaal t'ha, tuu hrangih a nunnak a pe siangtu ka si. 12 Tuukhal ngaingai a si lomi, a man phalh in fialcop mipa, amah in tuu a nei dah ve lomi cun cinghnia a rat kha a hmuh tikah tuu kha a tanta ih a tlan hlohsan. Cutiin cinghnia in a tuu cu a deh ih a t'hekdarh t'heh. 13 Manphalh ih fial mipa cu a tlan hlo, ziangah tile man phalhcop menmi a si ih tuu zawn a ruat ngaingai lo. 14 - 15 Kei cu tuukhaal t'ha ka si. Ka Pa in i thei ih kei khal in ka Pa cu ka theih vekin ka tuu pawl cu ka thei ih annih khal in in thei ve. Cule an hrangah ka nunnak tiangin ka pe siang a si. 16 Hi tuurual sungih a tel lomi tuu dang ka nei. Annih khal ka finkhawm ve hai ding. Ka aw an thei ding ih tuukhaal pakhat hnuai-ah tuuruun pakhat ah an cang ding! 17 Pa in i duhdawt, ziangah tile ka nunnak hi lungtho tein ka pek siang a si; cutiih ka pek siannak cu ka lak sal theinak dingah a si. 18 Ka nunnak cu zohman in in lak sak thei lo. Keimahte siang zetin ka pekmi a si. Keimah in pek theinak thu ka nei ih lak sal theinak thu khal ka nei. Cumi cu ka tuah dingah ka Pa in thu i pek zomi a si," tiah a ti. 19 Cutiih a t'ong ruangah mipi pawl cu an ruahnak a t'hen aw lala. 20 Mi tampi in, "Khuavang a nei. A aa thla a si! Ziangah so a thu nan ngai?" tiah an ti. 21 Asinain mi t'henkhat in, "Khuavang nei cun hi bangtuk in a t'ong lo ding! Ziangtin so khuavang nei in mitcaw cu a damter thei ding?" tiah an ti ve.

Jesuh Thu An Pom Lo

22 Khawsik laifang a si ih Biakinn Apnak Puai kha Jerusalem ah an tuah rero laifang a si. 23 Biakinn sungih Solomon Hulhliap timi ah Jesuh a feh laiah, 24 Judah mi an ra ih, "Ziangtik tiangso awloksong in in ret ding? Thufel in simhnik: Messiah na si maw?" tiah an sut. 25 Jesuh in, "Ka lo sim zo nain in zum duh lo. Ka Pa ih thu in ka tuahmi thil pawl hin ka thuhla hmuahhmuah cu an langter t'heh a si. 26 Asinain ka tuurual nan si lo ruangah nan zum lo. 27 Ka tuu pawl cun ka aw an ngai; keimah in ka thei hai ih annih in in thlun. 28 An hnenah kumkhua nunnak ka pek ih ziangtik hmanah an thi nawn lo ding. Zohman in in long thei fawn lo ding. 29 Anmah ka hnenih i petu ka Pa cu ziangzongza hnakin a tum ih amah ih kut sung ihsin zohman in an long thei lo ding. 30 Ka Pa le keimah cu pakhat kan si," tiah a ti. 31 Cun mipi in amah deng dingah lungto an sar lala. 32 Jesuh in an hnenah, "Nan mit hmuh rori ah ka Pa in tuah dingih i fialmi thil t'ha tampi ka tuah zo; khuimi bik ruangah hin so lungto ih den in tum?" tiah a sut. 33 Annih in, "Lungto ih kan lo den duhnak cu thil t'ha na tuahmi ruangah a si lo, Pathian na hmuhsuam ruangah a si sawn! Nang cu milai menmen na si, a sinain Pathian tlukah na tuah aw!" tiah an ti. 34 Jesuh in an hnen ah, "Nan Daan cabu sungah Pathian in ‘Nannih cu pathian nan si,’ ti in nganmi a um. 35 Ca Thianghlim ih simmi cu kumkhua in a dikmi a si ti kan thei; cule Pathian in a thu a simmi minung pawl kha ‘pathian,’ tiin a ko hai. 36 Kei cu ka Pa ih hriilmi le leilung ah i thlahmi ka si. Cuti a sile ziangtinso keimah hi Pathian Fapa ka si ka ti ruangah Pathian hmuhsuamtu na si, in ti thei? 37 Ka Pa ih duhmi thil pawl ka tuah lo a si ahcun i zum duh hlah uh! 38 Sikhalsehla ka tuah a si ahcun keimah in zum duh lo hmanah ka tuahmi tal cu nan zum dingah a mawi a si; cuticun Pa cu ka sungah a um ih Pa sungah kei ka um a si, ti nan theih ringringnak dingah a si," tiah a ti. 39 Cutikah Jesuh cu a kaih an tum lala, a sinain an kaih ngah hlanah a suak hlo. 40 Cun Jesuh cu Jordan tiva khatlam ral, Johan in baptisma a rak peknak hmunah khan a va kir sal ih cunah a caam. 41 Mi tampi a hnenah an ra ih, "Johan in hmuhsaknak zianghman a tuah lo. Asinain hi pa ih thuhla a simmi hmuahhmuah cu a dik t'heh a si," an ti. 42 Cutawkah mi tampi in amah cu an zum.

Lazaras A Thi

11:1 Bethani khuaih a ummi Lazaras an timi pa cu a na. Bethani cu Mari le a u Martha an umnak khua a si. 2 Hi Mari cu Bawipa ih ke ah zihmui a toih ih a sam in a hnawttu nu kha a si. A na mi Lazaras cu a t'a a si. 3 An unau in Jesuh hnenah, "Bawipa, na duhdawtmi na rualpa a na a si," tiah thu an hei cah. 4 Cumi cu Jesuh in a theih tikah, "Hi natnak cu Lazaras ih thihnak ding natnak a si lo. Hi natnak cu Pathian sunlawinak langter dingah le Pathian Fapa in sunlawinak a ngahnak ding khalah a si," tiah a ti. 5 Jesuh in Martha le a nau nu le Lazaras cu a duhdawt zet. 6 Asinain Lazaras a na ti thu a theih hnuah cuih a umnak ah cun a hlei in ni hnih a caam ta. 7 Cule a dungthluntu pawl hnenah, "Judea ah va feh sal uhsi," tiah a ti. 8 Dungthluntu pawl cun, "Sayapa, kan dung rei lote ah mipi in cutawkah lungto in den an lo tum zo; atu na va feh sal ding maw?" tiah an ti. 9 Jesuh in, "Ni khatah nazi hleihnih a um a si lo maw? Zokhal sun vangih a fehtu cu a bah dah lo, ziangah tile leilungih a ummi tleunak a hmu. 10 Sikhalsehla khawthim sungih a feh ahcun a bah, ziangah tile tleunak a nei lo a si," tiah a ti. 11 Cumi a sim t'heh in Jesuh cun, "Kan rual Lazaras cu a itthat zo; a sinain ka feh ding ih ka va t'hang ding," tiah a ti. 12 Dungthluntu pawl in, "Bawipa, a it a si ahcun a dam ko ding," an ti. 13 Jesuh ih sim duhmi cu Lazaras a thi, tinak kha a si ih dungthluntu pawl cun itthat menmen a ti si hmang, tiah an ruat. 14 Curuangah Jesuh in fiangtein a sim ih, "Lazaras cu a thi zo; 15 a sinain nan hrangah nan zum theinak dingah a hnenih ka rak um lo cu ka lung a awi a si; tho uhla a hnenah kan feh pei," tiah a ti. 16 Thomas (Faphir an timi pa) in dungthluntu a rualpi pawl hnenah, "Sayapa thawn thi tlang dingah feh uhsi," tiah a ti.

Jesuh Cu Thawhsalnak Le Nunnak A Si

17 Jesuh a va thlen tikah Lazaras an phumnak ni li a si zo. 18 Bethani cu Jerusalem ihsin peng hnih kim deuh lo a si ih, 19 Judah mi tampi cu an t'apa ih thih sanmi Martha le Mari topi dingah an ra. 20 Jesuh a ra lai rero ti kha Martha in a theih tikah amah hmuak dingah a feh, a sinain Mari cu inn ah a um. 21 Martha cun Jesuh hnenah, "Bawipa, hinah rak um ta cila ka t'apa cu a thi lo ding nain! 22 Sikhalsehla atu hmanah hin Pathian in na dilmi cu a lo pe ko ding ti ka thei," tiah a ti. 23 Jesuh in, "Na t'apa cu a nung sal ding," tiah Martha cu a ti. 24 Martha in, "A si, ni neta bikah cun a tho sal leh ding ti cu ka thei," tiah a let. 25 Jesuh in a hnenah, "Kei cu thawhsalnak le nunnak ka si. Zokhal keimah i zumtu cu thi hmansehla an nung ding. 26 Zokhal keimah sungah a nungmi le i zumtu cu an thi nawn lo ding. Himi hi na zum maw?" tiah a sut. 27 Martha in, "A si Bawipa, nang cu leilung ah a ra dingmi Pathian ih Fapa Messiah na si ti ka lo zum," tiah a ti.

Jesuh A t'ap

28 Cutiih a sim hnuah Martha cu a vung kir ih a thupte in a nau Mari kha a ko. "Sayapa hinah a um ih a lo hlam a si," tiah a ti. 29 Cumi cu Mari in a theih tikah a pok ih hmuak dingah zamrangin a va feh. 30 Jesuh cu khawsungah a ra thleng hrih lo; Martha ih a tonnak hmun ah khan a um lai hrih. 31 Mari a topitu le a hnemtu pawl cu Mari a pok ih zamrangin a feh kha an hmuh tikah amah cu an thlun ve. Thlaan ah a va t'ap hmang ding tiah an ruat. 32 Jesuh umnak ahcun Mari cu a va thleng ih Jesuh a hmuh vete in a ke hramah cun a khuk a bilh ih, "Bawipa, hitawk ah rak umta cila ka t'apa a thi lo ding nain!" tiah a ti. 33 Jesuh in Mari le a topitu mipi pawl tla an t'ah kha a hmuh tikah a thin a na ih a lung a hno. 34 "Khuitawkah so nan phum?" tiah a sut. Annih in, "Bawipa, ra awla ra zoh aw," tiah an ti. 35 Cule Jesuh cu a t'ap. 36 Mipi in, "Lazaras cu a va duhdawt lawmmam so!" tiah an ti. 37 Asinain mi t'henkhat in, "Mitcaw pa mit a vangter a si lo maw? Lazaras hi thi loin ziangah so a tuah ve lo?" tiah an ti.

Lazaras A Nung Sal

38 Jesuh cu a ning a hang ngaingai ih thlaan ah a va feh. Cuih thlaan cu lungkua a si ih a ka cu lungpheng pakhat in an khar. 39 Jesuh in, "Lungpheng hi t'hawn uh," tiah thu a pek. Mithi pa ih farnu Martha in, "Bawipa, a nam zo ding. Kan phumnak ni li a si zo!" tiah a ti. 40 Jesuh in a hnenah, "Na zum taktak a si ahcun Pathian sunlawinak na hmu ding, tiah ka lo sim zo a si lo maw?" tiah a ti. 41 Cule lungpheng cu an t'hawn. Jesuh in tlunlam a hun zoh ih, "Ka Pa, ka simmi i ngai ruangah na parah ka lung a awi. 42 Ka t'ong i theih sak ringring ti ka thei, a sinain hitawk ih a ummi pawl hin nangmah thlahmi ka si kha an zum theinak dingah anmah ruangah hiti ih ka lo simnak hi a si," tiah a ti. 43 Cutiih a sim hnuah aw ring zetin, "Lazaras, ra suak aw!" tiah a au. 44 Lazaras cu, a kut le a ke ruaktuamnak puan in an tuam ih a hmai tla an tuam; cutiih an t'emnak thawn a ra suak ngaingai. Jesuh in, "Phoih uhla feh seh!" tiah a ti.

Jesuh That Dingin An Phiar

45 Mari topi dingih a rami Judah mi tampi in Jesuh ih thil tuahmi cu an hmuh tikah amah cu an zum. 46 Asinain mi t'henkhat cu Farasi pawl hnenah an kir ih Jesuh ih thil tuahmi cu an sim t'heh. 47 Curuangah Farasi pawl le puithiam upa pawl cu Khonsil pawl thawn an tong aw ih, "Ziangtin so kan tuah ding? Hi pa ih hmuhsaknak a tuah vivomi hi zohhnik uh! 48 Hitiih kan zoh men ringring a si ahcun mi hmuahhmuah in amah hi an zum ding ih cutikah Rom Acozah thuneitu pawl in kan Biakinn le kan miphun an siatsuah t'heh ding a si," tiah an ti. 49 Anmah lakih mi pakhat, Kaiafas an timi, cuih kumah Puithiam saang a t'uantu in, "Nan va aa so! 50 Mi tampi ai-ih mi pakhat thih cu miphun phunkhat a pumpi ih siatral t'heh hnak cun a t'ha deuh a si, ti nan thei lo maw si?" tiah a ti. 51 A ngaingai ti ah cun cutiih a t'ong cu a palungih t'ongmi a si lo; cuih kum cu amah Puithiam saang a si vekin Judah miphun ai-ah Jesuh cu a thi ding, tiah profet bangin a rak simsungmi a si. 52 A thihnak ding cu anmah hrang lawngah si loin hmun kipih a t'hekdarh awmi Pathian minung pawl pumkhat ih finkhawmnak ding khalah a si. 53 Cuih ni thok ihsin Judah mi hotu pawl cun Jesuh that dingah thu an phiar. 54 Curuangah Judea pengah Jesuh cu zapi hmuh in khual a tlawng nawn lo; cutawk ihsin a suak ih ramt'hing kiangih a ummi Efraim an timi khua ah a feh ih cunah a dungthluntu pawl thawn an um. 55 Judah mi pawlih Lantak Puai caan a nai thlang ih mi tampi cu puai tuah hlan thianfaiter awknak tuah dingah an khawte ihsin Jerusalem ah an feh ciamco. 56 Annih in Jesuh cu an hawl; Biakinn sungih an tonkhawm awk tikah pakhat le pakhat, "Ziangtin nan ruat? Puai tuahnak ah cun a ra ngai pei maw?" tiah an sut aw. 57 Puithiam upa le Farasi pawl in, "Jesuh umnak a theitu nan um ahcun kan kaih theinak dingah in sim pei," tiah thu an than.

Jesuh Cu Zihmui An Culh

12:1 Lantak Puai hlan ni ruk ah Jesuh cu Bethani ah thihnak ihsin a thawhter sal mi Lazaras te ih inn ah khan a va feh. 2 Cutawkah a hrangah zanriah an suang ih Martha in rawl pek a bawm. Jesuh thawn cabuai ih rawl a eitu lakah Lazaras cu a tel ve. 3 Cule Mari in a phun a t'ha zet le a man a khung zetmi zihmui thawl khat a lak ih Jesuh ih ke ah a toih hnuah a sam in a hnawtsak. Cuih zihmui rim cu inn sung a khat t'heh. 4 Jesuh dungthluntu lakih pakhat, Jesuh a zuartu ding Judas Iskariot in, 5 "Ziangah so hi zihmui cu tangka zathum ah zuar in cuih tangka cu mi farah an t'hen sawn lo?" tiah a ti. 6 Hitiih a sim tikah mi farah pawl zawn a ruah ruangah a si lo; rukru a si ruangah a si sawn. Tangka bawm kha amah in a keng ih cuih tangka cu amah hrangah a hmang t'heu. 7 Sikhalsehla Jesuh in, "Hi nu hi mawhthluk hlah uh! Ka ruak phum ni hrangih a tuah dingmi cu tuah koseh. 8 Mifarah cu nan lakah an um ringring ko ding; a sinain kei cu nan lakah ka um ringring lo ding," tiah a ti.

Lazaras Thah An Tum

9 Judah mi tampi in Bethani ah Jesuh a um ti an theih tikah cutawkah cun an feh. Jesuh hmuh duh lawngah si loin Jesuh in thlaan ihsin a thawhter salmi Lazaras hmuh duh hrimhrim ah an feh. 10 Curuangah puithiam upa pawl in Lazaras khal thah ve dingah thu an ruat. 11 Ziangah tile Judah mi tampi in Lazaras ruangah hin anmah puithiam upa pawl cu hnon an tong ih Jesuh sawn kha an zum ruangah a si.

Sunglawi Zetih Jerusalem Luhnak

12 A thaisun ah Lantak Puai ih a rami miburpi in Jesuh cu Jerusalem ah a ra ding, ti kha an thei. 13 Cuhrangah tuum hnah an lak ih amah hmuak dingah feh phah in, "Pathian cu thangt'hat uh! Bawipa ih hminin a ratu cu Pathian in thlawsuahnak pe hramseh! Pathian in Israel Siangpahrang cu malsawm hram seh!" tiah an au ciamco. 14 Jesuh in laak note pakhat a hmu ih a parah a to; Ca Thianghlim in: 15 "Maw Zion khawpi, Na thinphang hlah; Na Siangpahrang cu laak note parah to-in a ra lai a si," tiah a ti bangtuk in a kim a si. 16 A dungthluntu pawl in culaiah cun hi thu ih tican hi an rak thei lo. Asinain Jesuh kha sunlawinak ih thawhter sal a si tikah amah thu-ah hin Ca Thianghlim in hi bangtuk in a rak sim ih amah hrangah hi bangtuk in an tuah a si, ti kha an vun mang sal. 17 Jesuh in Lazaras kha thlaan ihsin a ko suak ih thihnak ihsin a thawhter laiih a rak hmu vetu mi tampi in cuih thu cu midang tampi an sim sin. 18 Cubangtuk hmuhsaknak a tuah a si ti kha an theih ruangah miburpi in an rak hmuahnak a si. 19 Cutikah Farasi pawl cun, "Kan ti tho lo maw; kan kham thei nawn lo hi! Zohhnik uh, leilung pumpi in a thlun zo hi!" tiah pakhat le pakhat an ti aw.

Grik Mi In Jesuh An Hawl

20 Cuih puai ih Pathian bia dingah Jerusalem ih a hung fehtu mi tampi lakah cun Grik mi tla an tel ve. 21 Filip hnenah an feh ih, "Sayapa, Jesuh hmuh kan duh," tiah an va ti. Filip cu Galilee peng Bethsaida khuami a si. 22 Filip cu Andru hnenah a feh ih a va sim; cule an pahnih in Jesuh hnenah an va feh ih an va sim. 23 Jesuh in an hnenah, "Milai Fapa in sunlawinak a ngahnak caan a ra thleng zo. 24 Thungaite in ka lo sim: sangvut ci fangkhat cu lei lung sungah tuh ih a thihta lo ahcun amah keel in a taang ringring. A thihta hnu lawngah ci tampi a suahter. 25 Cubangtuk in zokhal amah ih nunnak a duhtu cun a nunnak cu a sung ding; a sinain zokhal hi leilung ah amah ih nunnak a huatu cun kumkhua hrangin a nunnak cu a neita ding. 26 Zokhal keimah i rian duhtu cun i thlun hrimhrim a t'ul ding ih ka umnak ah a um ve ding. Cule zokhal keimah i riantu cu ka Pa in upatnak a pe ding," tiah a ti.

Jesuh In A Thihnak Ding Thu A Sim

27 Jesuh in, "Ka thinlung a baang tuk; ziangso ka sim ding? ‘Ka Pa, hi caan hi ka parah thlenter hram hlah aw,’ ka ti ding maw? Asinain hi tuarnak sungih thleng dingah leilung tlunih ka rat sannak cu hihi a si fawn! 28 Ka Pa, na hmin cu sunloih ko aw," tiah a ti. Cule van ihsin aw a rung thang ih, "Ka sunloih zo ih ka sunloih sal hrih ding," tiah a ti. 29 Cuih aw cu cutawkih a dingmi miburpi in an theih tikah mi t'henkhat in, "Khua a ri," tiah an ti; a t'hen in, "Vancungmi in a run bia a si," an ti. 30 Sikhalsehla Jesuh in an hnenah, "Hi aw a rung than hi keimah ih hrangah a si lo, nanmah ih hrangah a si sawn. 31 Hi leilung hi thut'hennak a ton caan a kim zo; atu-ah hi leilung uktu cu dawi hlo a si ding. 32 Leilung ihsin khai ka si tikah mi hmuahhmuah ka hnenah ka hiip thluh ding," tiah a ti. 33 Hitiih a ti tikah ziangbangtuk thihnak a tuar ding ti kha a langternak a si. 34 Miburpi in, "Kan Daan in Messiah cu kumkhua in a nung ding, tiah in sim. Cuti a sile ziangtinso Milai Fapa cu khai a si ding tiah nang in na ti? Hi Milai Fapa hi zoso a si?" tiah an ti. 35 Jesuh in, "Tleunak cu nan hnenah tikcu malte sung a um hrih ding. Tleunak nan neih sungah nan fehnak lamzinah cun feh hrih ko uh; cuti cun thimnak in a lo man lo ding; ziangah tile khawthim sungih a feh pawl cun khuilamah kan feh ti an thei lo. 36 Cuhrangah tleunak nan neih laiah cun, tleunak ih minung nan si theinak dingah, tleunak cu zum uh," tiah a ti. Cutiih Jesuh in a sim hnuah a suak ih an hmuh thei lonak hmun ah a relh. 37 An mithmuh rori ah hmuhsaknak tampi a tuah nain amah cu an zum lo. 38 Cumi cu profet Isaiah in: "Bawipa, kan thu simmi cu zo in so an zum? Zo hnenah so Bawipa in a huham a langter?" tiah a rak timi a kimnak dingah a si.

Mi In An Zum Lo

39 Cule an zum thei thotho lo, ziangah tile Isaiah thotho in: 40 "Pathian in an mit a cawtter ih, An thinlung khal a pitter. Cuti a si lo ahcun an mit in an hmu pang ding ih, An thinlung in an thei pang ding; Ka lam an hoi pang ding ih, A dam tla ka damter pang ding, tiah Pathian in a ti," tiin a rak sim fawn. 41 Isaiah in hiti a simnak cu Jesuh sunlawinak kha a rak hmu cia zo ih a thu khal a rak sim zo ruangah a si. 42 Cutiin a si ruangah Judah mi hotu tampi in Jesuh cu an zum; Sikhalsehla Farasi pawl in sinakok ihsin in suah pang ding ti phan ah Jesuh an zumnak cu langhngan in an sim ngam lo. 43 Pathian hnenih sunlawinak ngah hnakin minung hnenih sunlawinak ngah an duh sawn.

Jesuh Ih t'ongkam In Thut'hennak

44 Jesuh cun aw ring zetin, "Zokhal keimah i zumtu cu keimah i zum lawng a si lo, i thlahtu khal a zum a si. 45 Zokhal keimah i hmutu cu i thlahtu khal a hmu a si. 46 Zokhal keimah i zumtu cu khawthim sungih a um lonak dingah hi leilung tlunah hin tleunak in ka ra zo. 47 Zokhal ka thu simmi a thei ih a thlun lotu cu kei cun a thu ka t'hen lo ding. Leilung thut'hen dingah ka ra lo, rundam dingah ka ra. 48 Zokhal i hnongtu le ka thu simmi a pom lotu cu thut'hentu pakhat a nei. Ka t'ongmi hi ni neta bik ni ah a thut'hentu ah a cang ding! 49 Ziangah tile keimah thuneihnak huham ih ka simmi a si lo, i thlahtu ka Pa in ka t'ong ding le ka sim ding kha thu i pek vekin ka sim a si. 50 Cule a thupekmi cu kumkhua nunnak a si ti ka thei. Curuangah ka simmi hi ka Pa in sim dingih i fialmi a si," tiah a ti.

Jesuh In Dungthlun Pawlih Ke A Kholh

13:1 Lantak Puai ni a thlennak ding ni khat lawng a duh thlang. Jesuh in hi leilung fehsan in a Pa hnenih a fehnak tikcu a ra thleng zo ti kha a thei. Leilung tlunih a ummi amah ih ta a si mi pawl cu a duhdawt zet ringring ih a netnak tiangin a duhdawt. 2 Jesuh le a dungthluntu pawl cu zanriah an hil tlang. Satan in Jesuh zuarnak ding ruahnak cu Simon Iskariot ih fapa Judas thinlung sungah a umter zo. 3 Ka Pa in thuneihnak hmuahhmuah i pe zo ti kha Jesuh in a thei; Pathian hnen ihsin ka ra ih Pathian hnenah ka feh sal ding ti khal a thei. 4 Curuangah cabuai ihsin a tho ih a angki fual a phoih hnuah taaingerh puante a taai ah a vel. 5 Cule kheng kuumpi sungah tidai a thlet hnuah a dungthlun pawlih ke a kholhsak ih a taai ih a velmi puante in a hnawt vivo. 6 Simon Piter hnen a thlen tikah anih in, "Bawipa, ka ke i kholh ngaingai ding maw?" tiah a sut. 7 Jesuh in, "Hitiih ka tuahmi hi atu ahcun a sullam na thei lo, a sinain neh hnuah na thei sal leh ding," a ti. 8 Piter in, "Ka ke cu ziangtik khalah i kholhsak hrimhrim lo ding," a ti. Jesuh in, "Na ke ka lo kholh lo a si ahcun ka hnenah na tel thei nawn lo ding," tiah a ti. 9 Simon Piter in, "Bawipa, cuti a si ahcun, ka ke lawng i kholh hlah! Ka kut le ka lu khal i kholh aw," tiah a ti. 10 Jesuh in, "Zokhal tikholh cia a si mi cu a pumpuluk in a fai zo; a ke dah ti lo cu a kholh awk sal a t'ul lo. Nan zatein nan fai t'heh zo, pakhat siar lo cu!" tiah a ti. 11 Jesuh in zo in so i zuar ding, ti a thei cia. Curuangah nan zatein nan thiang a si, pakhat siar lo cu, tiah a tinak a si. 12 Jesuh cu a dungthluntu pawlih ke a kholhsak hnuah a angki fual cu a hruk sal ih a tonak cabuai ah a to sal. "Atu nan parih ka tuahmi thil hi a tican nan thei maw? 13 Nannih in, ‘Sayapa,’ tile ‘Bawipa,’ tiin in ko ih nan dik a si, ziangah tile in ti vekin ka si ngaingai. 14 Nan Bawipa le nan Sayapa keimah in nan ke ka lo kholh zo. Curuangah nannih khal pakhat le pakhat nan ke nan kholh aw ve pei. 15 Nan hrangih thil ka tuahmi vek cekci in nan tuah venak dingah nan mithmuh ah zoht'him ding ka tuah zo. 16 Thungaite in ka lo sim: sal cu a bawipa hnakin a tum sawn lo; tirhthlahmi khal thlahtu hnakin a tum sawn dah lo. 17 Hi thu pawl nan thei zo ih nan thlun ngaingai a si ahcun ziangtluk mi lungawi so nan si ding? 18 "Hitiih ka t'ong tikah nan zate ih thu ka rel lo. Ka hriilmi pawl cu keimah in ka thei. Sikhalsehla Ca Thianghlim in ‘Keimah thawn rawl a ei tlangtu pa in i dodal a si,’ a timi cu a kim a t'ul a si. 19 Hi thil cu a kim hlanah ka lo sim: cutiin a hung kim ngaingai tikah ‘Keimah cu Keimah a si mi ka si’ tihi nan zum leh ding. 20 Thungaite in ka lo sim: Keimah ih ka tirhthlahmi zokhal a rak pomtu cu keimah khal i pom a si; cule keimah i pomtu cu keimah i thlahtu khal a pom ve a si," tiah a ti.

Jesuh In An Zuarnak Ding Thu A Sim Cia

21 Cutiin Jesuh in a sim hnuah a thin a nuam lo ngaingai ih langhngan in, "Thungaite in ka lo sim: nanmah lakah pakhat in i zuar ding," tiah a ti. 22 Dungthluntu pawl cu pakhat le pakhat an zoh aw ih a tisanmi hi zo a si pei tiah mangbang awloksong in an um. 23 Dungthluntu lakih pakhat, Jesuh ih a duh zetmi pa cu Jesuh kiang ah a to. 24 Simon Piter in cupa cu a kut a hei zaap ih, "A tisanmi zo a si, sut hnik," tiah a ti. 25 Curuangah dungthluntu cun Jesuh a hei naih deuh ih, "Na tisanmi hi zoso a si, Bawipa?" tiah a sut. 26 Jesuh in, "saang hi kheng sungah ka hnim pei ih ka pek dingmi pa hi a si," tiah a ti. Cutiin Jesuh in saang hlom khat a lak ih a hnim hnuah Simon Iskariot ih fapa Judas hnenah a pek. 27 Judas in cuih saang a lak vete in a sungah Satan a lut. Jesuh in a hnen ah, "Na tuah dingmi cu zamrangin tuah hmen!" tiah a ti. 28 Cabuai kiangih a totu dang zokhal in ziang ruangah Judas hnenah cutiin a sim ti an thei lo. 29 Judas cu tangka dip kengtu a si ruangah dungthluntu t'henkhat pawl cun Jesuh in puai hrangih a t'ulmi kha lei a fial a si hmang, a si lole mi farah hnenah ziang lo thil pek a fial a si hmang, tiah an ruat.

Thukham Thar

30 Judas in Jesuh pekmi saang cu a lak ih hmakhatte ah a suak. Cuih tikcu cu zan a si. 31 Judas a tlansuak hnuah Jesuh in, "Atu-ah Milai Fapa ih sunlawinak cu a lang zo; cule amah ih sungin Pathian sunlawinak khal a lang a si. 32 Cule a sungin Pathian sunlawinak langter a si ahcun Pathian in Milai Fapa ih sunlawinak cu amah sung rori in a langter ve ding. Cumi cu rei lote-ah a tuah ding a si. 33 Ka faale pawl, nan hnenah reipi ka um nawn lo ding. Keimah hi in hawl ding; sikhalsehla Judah mi hotu pawl hnenih ka sim vekin nan hnen khalah ka sim: ‘Ka fehnak ah nan feh thei lo ding.’ 34 Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei. 35 Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si," tiah a ti.

Piter Ih A Phatnak Ding A Sim Cia

36 Simon Piter in, "Bawipa, khui-ah so na feh ding?" tiah a sut. Jesuh in, "Ka fehnak ah cun i thlun thei hrih lo ding, a sinain neh hnuah i thlun leh ding," tiah a ti. 37 Piter in, "Bawipa, ziangah so atu-ah ka lo thlun thei lo? Na hrangah thih ka ngam a sisi!" tiah a let. 38 Jesuh in, "Ka hrangah thih na ngam ngaingai maw? Thungaite in ka lo sim: ar a khuan hlanah anih ka thei lo, tiah voi thum tiang i phatsan ding," tiah a ti.

Jesuh Cu Pa Hnenih Thlennak Lamzin

14:1 Jesuh in a dungthluntu pawl hnenah, "Thinlung har le beidong in um hlah uh. Pathian zum uhla keimah khal i zum uh. 2 Ka Pa ih inn ah innkhaan tampi a um ih nan hrangih umnak rem dingah ka feh ding. Cutiin si hlah sehla hiti in ka lo sim lo ding. 3 Cule ka feh ih nan umnak ka rem ngah hnuah ka ra sal ding ih ka hnenah ka lo hruai ding; cuticun ka umnak ah nan um ve ding. 4 Ka fehnak ding hmunih lamzin cu nan thei ko," tiah a ti. 5 Thomas in, "Bawipa, khuiah na feh ding ti kan thei lo; curuangah ziangtinso a fehnak lamzin cu kan theih ding?" tiah a sut. 6 Jesuh in, "Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo. 7 Atu-ah cun zo ka si, ti in thei zo ih ka Pa khal nan thei ding; atu ihsin amah cu nan thei ih a hmuh khal nan hmu zo," tiah a ti. 8 Filip in Jesuh hnenah, "Bawipa, na Pa cu in hmuh aw; cule kan lung a kim ding," a ti. 9 Jesuh in, "Nan hnenah caan reipi ka um zo nain atu tiang in thei hrih lo maw, Filip? Zokhal keimah i hmutu cu ka Pa a hmu zo. Ziangtin so ‘Na Pa in hmuh aw,’ tiah i sut hrih. 10 Filip, keimah hi ka Pa sungah ka um ih ka Pa khal ka sungah a um, tihi na zum lo maw? Nan hnenih ka t'ongmi hi keimah palung in a suakmi a si lo; ka sungih a ummi ka Pa ih hnat'uannak in a si. 11 Keimah hi ka Pa sungah ka um ih ka Pa khal keimah ih sung ah a um, tiih ka timi hi zum uh. Cumi nan zum thei lo a sile thil ka tuahmi ruang tal in zum uh. 12 Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding. 13 Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuahsak ding. 14 Ka hmin in nan dilmi pohpoh cu ka tuah ding a si," tiah a ti.

Thlarau Thianghlim Pek Ding Tiamkamnak

15 Jesuh in, "Keimah in duhdawt ahcun ka thukham pawl nan thlun ding. 16 Pa hnenah ka dil ding ih nan hnenih kumkhua a um dingmi Bawmtu dang a lo pe ding. 17 Amah cu Pathian thutak a langtertu Thlarau a si. Leilung in Amah cu a hmu thei lo ih a theih thei fawn lo ruangah a pom thei lo. Sikhalsehla nannih cun nan thei, ziangah tile amah cu nan hnenah a um ih nan sungah a caam ding a si. 18 Ka feh tikah nanmahte lawngin ka lo tanta lo ding; nan hnenah ka ra sal ding. 19 A rei hlanah leilung mi cun in hmu thei nawn lo ding, sikhalsehla nannih cun in hmu ding; cule kei cu a nungmi ka si ruang ah nannih khal nan nung ve ding. 20 Cuih ni a thlen tikah keimah nan sungih ka um vek hin ka Pa ih sungah ka um ti le nannih khal ka sungah nan um ve ti kha nan thei ding. 21 Zokhal ka thukham pawl a pom ih a thluntu cu i duhdawtu a si. Keimah i duhdawtu poh cu ka Pa in a duhdawt ding; keimah khal in ka duhdawt ding ih a hnenah ka lang ding," tiah a ti. 22 Judas Iskariot a si lomi Judas in, "Bawipa, ziangtinso leilung mi hnenah si loin kan hnen sawnah na lang awkter ding?" tiah a sut. 23 Jesuh in, "Zokhal keimah i duhtu cun ka thu zirhmi a thlun ding. Ka Pa in a duhdawt ding ih ka Pa le keimah kan ra ding ih a hnenah kan um ding. 24 Keimah i duh lotu cun ka thuzirhmi khal a thlun lo. Cule ka thuzirhnak nan theihmi pawl hi keimah ih thusuak an si lo, i thlahtu ka Pa hnen ihsin a rami an si. 25 Nan hnenih ka um laiah hi thu cu ka lo sim zo. 26 Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding. 27 Nan hnenah hnangamnak ka lo tanta. Keimah ih hnangamnak ka lo pek a si. Leilung mi ih pek vekin ka lo pe a si lo. Donhar le vansaang in um hlah uh; nan thin khal phang hlah uh. 28 Nan hnenah, ‘Ka feh ding, a si nain ka ra kir sal ding,’ tiih ka timi nan thei. In duh ngaingai a si ahcun Pa hnenih ka feh ding hi nan lung a awi ding; ziangah tile Amah cu keimah hnakin a tum sawn. 29 Ka sim vekin a hung can ngaingai tikah nan zum theinak dingah atu a can hlan ihsin ka lo sim cia a si. 30 Nan hnenah reipi thu ka sim thei nawn lo; ziangah tile hi leilung uktu pa a ra zo a si. Ka parah thuneihnak zianghman a nei lo, 31 sikhalsehla ka Pa ka duhdawt kha leilung mi in an theih a t'ul; cutiih an theih theinak dingah Amah in thu i pekmi hmuahhmuah ka tuah t'heh a si. Ra uh, hitawk hmun ihsin feh uhsi," tiah a ti.

Jesuh Cu Sabit Hri Ngaingai A Si

15:1 Jesuh in, "Keimah cu Sabit hri ngaingai ka si ih ka Pa cu hmuan neitu a si. 2 Ka sungih rah a rah lomi hnge tla cu a tan t'heh ih a rahmi hnge kha a thiannak dingah le rah tam sinsin a rahnak dingah a hnge t'ha lo pawl kha a tansak. 3 Nannih tla cu thu ka lo zirhmi thawngin nan thiang zo. 4 Keimah thawn pehzom uhla kei khal nanmah ka lo pehzom ve ding. Sabit hnge cu amahte lawngin rah a rah thei dah lo; Sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding. 5 Keimah cu Sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangah tile keimah tel lo cun zianghman nan tuah theimi a um lo. 6 Zokhal keimah sungih a um lomi cu Sabit hnge an hlon ih a carmi bangtuk a si ding. Cubangtuk hnge pawl cu an khawm ih meisa sungah an hlon ih a kang t'heh. 7 Keimah sungah nan um ih ka thu hi nan sungih a um ve ahcun nan duhmi pohpoh nan dil tikah nan ngah ding. 8 Rah tampi nan rahnak hin ka Pa ih sunlawinak nan langter ih cuti cun ka dungthluntu nan can theinak a si. 9 Ka Pa ih i duhdawt vekin nannih khal ka lo duhdawt ve; ka duhdawtnak sungah um ringring uh. 10 Ka Pa ih thukham ka thlun ih cuti cun amah ih duhdawtnak sungih ka um vekin ka thukham nan thlun a si ahcun ka duhdawtnak sungah nan um ve ding. 11 Ka lungawinak cu nan sungah a um ih nan lungawinak cu lungawi famkim a sinak dingah hi thu hi ka lo sim. 12 Ka thukham cu hihi a si: Keimah ih ka lo duhdawt vek hin nannih khal pakhat le pakhat duhdaw aw ve uh! 13 Mi pakhat in a rualpi pawl hrangah duhdawtnak tum bik a neihmi cu an hrangih a nunnak pek hi a si. 14 Cule ka thupekmi nan tuah ahcun ka rualpi nan si. 15 Nannih tla cu hnen-um tiah ka lo ti nawn lo, ziangah tile hnen-um cun a bawipa ih tuahmi kha a thei lo. ‘Hnen-um,’ ti nawn loin ‘Rualpi,’ tiah ka lo ko: ziangah tile ka Pa hnen ihsin ka theihmi hmuahhmuah cu ka lo sim t'heh zo a si. 16 Nannih in in hriil lo; keimah in ka lo hriil hai ih kumkhuaih a hmunmi rah nan va rah theinak dingah ka lo fial a si. Ka hmin in Pa hnenih nan dilmi hmuahhmuah cu a lo pe ding. 17 Cule ka thupekmi cu hihi a si: pakhat le pakhat duhdaw aw uh.

Leilung In A Lo Hua Ding

18 Nannih hi leilung in a lo hua a si ahcun keimah i hua hmaisa zo ti kha cing ringring uh. 19 Leilung ih ta si uh cila leilung hin ka ta tiah a lo duhzet hai ding. Sikhalsehla leilung ihsin ka lo hriil zo ih a ta nan si nawn lo; curuangah leilung in a lo huatnak cu a si. 20 ‘Sal cu a bawipa hnakin a tum sawn lo,’ tiah ka lo timi kha cing ringring uh. Keimah in hrem ahcun nannih khal an lo hrem ve ding; ka thu an thlun ahcun nan thu an thlun ve ding. 21 Sikhalsehla atu cu ka milai nan si ruangah hi thil hmuahhmuah hi nan parah an tuah ding. Ziangah tile keimah i thlahtu zo a si ti an thei lo. 22 An hnenah ra loin le thusimnak nei loin um ningla an tlunah sualnak a um lo ding; a sinain atu vek a si ahcun an sualnak ruangah puhmawh ding dang zianghman an nei lo. 23 Keimah i huatu cun ka Pa khal a hua ve a si. 24 An lakah zohmanih an tuah dah keel lomi thil pawl tuah loin um ningla an tlunah sualnak a um lo ding; sikhalsehla atu vek a si ahcun ka thil tuahmi an hmu t'heh zo na cingin ka Pa thawn in hua a si. 25 Hi vekih a can a t'ul, ziangah tile an Daan cabu sungah ‘Ziang thuhla hman um loin in hua,’ tiah rak nganmi a um ih cumi a kimnak dingah a si. 26 Ka Pa hnen ihsin Bawmtu Thlarau a ra ding ih amah cu Pathian thutak langtertu a si ding. Ka Pa hnen ihsin ka run thlah ding ih keimah ih thuhla simtu a si ding. 27 Nannih khal a hramthok ihsin ka hnenih nan um zo ruangah ka thuhla nan sim ve ding.

16:1 "Nan zumnak ihsin nan tluksawn lonak dingah hi thu hi ka lo sim. 2 Sinakok ihsin an lo dawi ding; zozo khal in nanmah thah hi Pathian hnat'uan ih an ruah caan a ra thleng ding. 3 Mi in cuti vek cun nan parah an tuah ding, ziangah tile Pa an thei lo ih keimah khal in thei lo. 4 Asinain atu ihsin ka lo sim cia, ziangah tile nan parih an tuah ngaingai tikah in rak sim cia zo ti kha nan thei ding.

Thlarau Thianghlim Hnat'uannak

"Nan hnenih ka um ruangah a hramthok ihsin hi thu hi ka lo sim lo. 5 Atu cu i thlahtu hnenah ka feh thlang ding; sikhalsehla zohman in khuiah na feh ding tiah in sut hrih lo. 6 Hitiih ka lo sim hai ruangah nan thinlung cu riahsiatnak in a khat. 7 Asinain thungaite in ka lo sim: ka feh ahcun nan hrangah a t'ha sawn, ziangah tile ka feh lo ahcun nan hnenah Bawmtu a ra lo ding. Asinain ka feh ahcun amah cu nan hnenah ka run thlah ding. 8 Cule a rat tikah leilung mi pawl hnenah sualnak thu an ruah daan a palhzia, thudik an ruah daan a palhzia le Pathian thut'hennak thu an ruah daan a palhzia pawl kha a langter ding. 9 Sualnak thu an ruah daan a palh, ziangah tile keimah in zum lo ruangah a si. 10 Thudik an ruah daan a palh, ziangah tile ka Pa hnenah ka feh ding ih in hmuh nawn lo ding ruangah a si. 11 Cun thut'hennak thuhla khalah an ruah daan a palh, ziangah tile leilung uktu bawi hi thut'hen cia zo a si ruangah a si. 12 "Nan hnenah sim ding tampi ka nei, a sinain atu-ah cun nan ciing thei cawk lo ding. 13 Sikhalsehla Thlarau a run tikah cun Pathian thutak langtertu a si ruangah thutak hmuahhmuah ah a lo hruai ding. Ziangah tile amah ih thuthu in zianghman a t'ong lo ding; a sinain a theihmi kha a sim ding ih a ra thleng leh dingmi thu tla kha a phuang ding. 14 Amah in sunlawinak i pe ding, ziangah tile ka sim ciami kha a lak ding ih nan hnenah a phuang ding. 15 Ka Pa ih neihmi hmuahhmuah cu ka ta a si, curuangah Thlarau in ka pekmi cu a la ding ih nan hnenah a phuang ding, tiah ka lo tinak a si.

Riahsiatnak Le Lungawinak

16 "Tikcu rei lote-ah in hmu nawn lo ding; cule caan malte hnuah in hmu sal ding," tiah Jesuh in a ti. 17 A dungthluntu t'henkhat pawl cun, "Cumi cu a tican ziang a si pei? Tikcu rei lote-ah in hmu nawn lo ding; cule caan malte hnuah in hmu sal ding, tiah in ti. Cule ‘Pa hnenih ka feh ding ruangah,’ ti tla in a ti fawn. 18 ‘Rei lote-ah,’ timi hi ziang a ti duhnak a si pei? A sim duhmi hi kan thei thei hrimhrim lo!" tiah pakhat le pakhat an ti aw. 19 A hnenah thusuh an duh kha Jesuh in a thei ih an hnenah, "Kei in ‘Tikcu rei lote-ah in hmu nawn lo ding; cule caan malte rei hnuah in hmu sal ding,’ ka ti ruangah maw nannih pakhat le pakhat thu nan sut awk rero? 20 Thungaite in ka lo sim: nannih cu nan t'ap nan ai ding nain leilung cu a lung a awi ding; nan riah a sia ding, a sinain nan riahsiatnak cu lungawinak ah a cang leh ding. 21 Nunau in nau a hrin zik tikah natnak a tuar, ziangah tile nauhrin nat a ra thleng zo; sikhalsehla naute a suak ngah tikah cun lei tlunah naute thar pakhat a suah ruangah a tuarnak hmuahhmuah cu a hngilh t'heh. 22 Cubangtuk in nannih tla nan si ve ding: atu-ah cun nan riah a sia, sikhalsehla ka lo hmu sal ding ih nan thinlung cu lungawinak in a khat ding; cuih lungawinak cu zohman in an lo long thei nawn lo ding. 23 Cuih ni a thlen tikah cun zianghman in sut nawn lo ding. Thungai in ka lo sim: ka hmin in nan dilmi hmuahhmuah cu ka Pa in a lo pe ding. 24 Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding.

Leilung Ka Neh Zo

25 "Atu tiang cu hi thu pawl ka sim tikah taht'himnak lawnglawng ka hmang. Sikhalsehla taht'himnak hmang nawn loin lailan in ka Pa ih thu ka simnak tikcu a ra thleng ding. 26 Cuih ni a thlen tikah a hnenah ka hmin in nan dil ding; nanmah ih ai-ah ka lo dilsak ding tiah ka sim lo; 27 ziangah tile ka Pa amah rori in a lo duhdawt a si. Nannih in in duhdawt ih Pathian hnen ihsin ka rat kha nan zum zo ruangah ka Pa in a lo duhdawt a si. 28 Pa hnen ihsin ka ra ih leilungah ka ra thleng. Atu cu leilung ka tlansan ding ih Pa hnenah ka feh ding," tiah a ti. 29 Cun a dungthluntu pawl in a hnenah, "Atu-ah cun taht'himnak telh loin lailante in in sim ruangah, 30 ziang hmuahhmuah theitu na si, ti kan thei zo; curuangah thu kan lo suh rero a t'ul nawn lo. Cumi in Pathian hnen ihsin a rami na si, ti kha in zumter zo," tiah an ti. 31 Jesuh in, "Atu-ah in zum ngaingai maw? 32 Nan zatein t'hendarh t'heh nan si ding ih nan inn ciarah nan tlung ding; keimahte lawng in taan tikcu a ra thleng ding; a si, atu a ra thleng zo. Sikhalsehla Pa ka hnenih a um ruangah keimah lawng ngaingai cu ka si lo. 33 Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral t'ha uh; Leilung cu ka neh zo!" tiah a ti.

Jesuh In A Dungthluntu Pawl Hrangah Thla A Cam

17:1 Jesuh in hi thu a sim t'heh hnuah vanlam a zoh ih, "Ka Pa, a tikcu a ra thleng zo. Fapa in sunlawinak a lo pek theinak dingah na Fapa hnenah hin sunlawinak run pe hram aw. 2 Fapa hnenih na pek zomi mi hmuahhmuah hnenih kumkhua nunnak a pek theinak dingah leilung tlun miphun hmuahhmuahih tlunah thuneihnak na pek zo. 3 Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si. 4 Hnat'uan i pekmi ka t'uan t'heh zo ih na sunlawinak cu leilung ah ka langter zo. 5 Curuangah maw ka Pa, leilung seemsuah a si hlanih nangmah thawn sunlawinak ka rak neihmi kha atu na mithmuh ah hin i pe hram aw! 6 "Leilung ihsin na kawhsuakmi pawl hnenah na hmin cu ka langter zo. Cupawl cu na ta an si ih ka hnenah i pekmi an si. Na thu an thlun ih, 7 atu cu ka hnenih i pekmi hmuahhmuah hi na hnen ihsin a rami an si ti tla an thei. 8 I pekmi na thu kha ka sim hai ih annih in an pom zo. Na hnen ihsin a rami ka si ti thutak hi an thei taktak ih i thlahmi ka si ti khal hi an zum zo. 9 "Anmah hrangah thla ka cam. Leilung hrangah thla ka cam lo, a sinain i pekmi pawl hrangah ka cam; ziangah tile na ta an si. 10 Ka neihmi hmuahhmuah hi na ta an si ih na neihmi hmuahhmuah khal hi ka ta an si; cule an sung ihsin ka sunlawinak a lang. 11 Cun atu-ah na hnenah ka ra ding; kei cu leilungah ka um nawn lo ding, a sinain annih cu leilungah an um hrih ding. A Thiangmi ka Pa, nangmah le keimah cu pakhat kan si vekin leilungih a um hrihmi pawl cu pumkhat an si theinak dingah i pekmi na hminih huham in humhim hai aw. 12 An hnenih ka um laiah nangmah ih i pekmi na hminih huham in ka hum hai. Ca Thianghlim sungih a ummi a kimnak dingah a hloral ding a rak si ciami pakhat dah ti lo cu mi pakhat hman an hloral lo; ka humhim t'heh hai a si. 13 Atu cu na hnenah ka ra thlang ding; leilung tlunah hi thu pawl ka simnak cu ka lungawinak kha an thinlung sungah famkim zetih an neih theinak dingah a si. 14 Keimah cu hi leilungih ta ka si lo vek hin annih khal hi leilungih ta an si ve lo; curuangah na thu cu an hnenih ka sim tikah leilung in anmah a huatnak cu a si. 15 Anmah kha leilung ihsin lasuak aw tiah ka lo dil lo, a sinain Mit'ha lo pa ih hnen ihsin humhim hai aw tiah ka lo dil a si. 16 Kei cu leilungih ta ka si lo vekin annih khal leilungih ta an si ve lo. 17 Annih cu thutak in na ta siter hai aw; na t'ongkam cu thutak a si. 18 Kei cu leilungah i thlah vekin annih khal ka thlah ve a si. 19 Anmah tla thutak ih thianter an si theinak dingah keimah khal ka thiangter aw a si. 20 "Anmah hrang lawngah thla ka cam a si lo; an thusimmi a thei ih keimah i zumtu ding pawl hrang khalah thla ka cam. 21 An zatein pakhat an si theinak dingah thla ka cam. Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram haiseh. Nangmah in i thlah hi leilung in an zum theinak dingah annih cu pakhat ah cang hram haiseh. 22 Nangmah le keimah cu pakhat kan si vekin annih khal pakhat ih an can theinak dingah nangmah ih i pekmi sunlawinak kha anmah khal ka pek ve a si. 23 Annih pawl cu pakhat taktak an si ih cuticun leilung in nangmah ih thlahmi ka si ti a theihnak dingah le keimah i duhdawt vekin annih khal na duhdawt ti an theihnak dingah kei cu anmah ih sungah ka um ih nang cu ka sungah na um a si. 24 "Ka Pa, nangmah ih i pekmi ka sunlawinak hi annih in an hmuh theinak dingah nangmah in annih cu ka kut sungah i pe zo. Anmah cu keimah ka umnak poh-ah um ve haiseh ti ka duh; ziangah tile leilung seemsuah hlan ihsin i duhdawt zo. 25 A dingmi ka Pa, nang cu leilung hin a lo thei lo, sikhalsehla kei cun ka lo thei ih annih in nangmah ih i thlah hi an thei. 26 An hnenah na hmin cu ka phuang zo ih, ka parih duhdawtnak na neihmi hi an sungih a um venak dingah le keimah khal an sungih ka um venak dingah na hmin cu ka phuang vivo hrih ko ding," tiah thla a cam.

Jesuh An Kaihnak

18:1 Hitiin Jesuh in thla a cam t'heh hnuah dungthluntu pawl thawn an pok ih Kidron an timi tivate ral ah an feh. Cutawkah hmuan pakhat a um ih Jesuh le a dungthluntu pawl cu cuih hmuan sungah an lut. 2 Cuih hmuan cu Jesuh le a dungthluntu pawl an ton awk t'heunak a si ruangah a zuartu Judas in khuitawkah a um ti a thei. 3 Curuangah cuih hmuan ahcun Judas cu Rom ralkap bur khat, puithiam upa le Farasi pawlih thlahmi Biakinn kiltu palik pawl thawn, hriamnam an keng ih mei-inn le meifar thawn an feh. 4 Jesuh in a parah ziangbangtuk thil a ra thleng ding ti kha a theih t'heh ruangah hmaiah a va suak ih, "Zoso nan hawl?" tiah a rak sut. 5 Annih in, "Nazareth mi Jesuh," an ti. Jesuh in, "Keimah hi amah cu ka si," a ti. A zuartu Judas cu an kiangah cun a ding. 6 Jesuh in, "Keimah hi amah cu ka si," a timi an theih tikah dunglamah ah siip ih leilungah an tlu. 7 Jesuh in, "Zoso nan hawl?" tiah a sut lala. Annih in, "Nazareth mi Jesuh," tiah an ti thotho. 8 Jesuh in, "Keimah hi amah cu ka si, tiah ka lo sim zo. Keimah in hawl a si ahcun midang hi cu fehter uh," tiah a ti. 9 Hitiih a tinak cu, "Ka Pa, ka kut sungih i pekmi cu pakhat hman ka hlohtermi an um lo," a timi kha kimternak dingah a si. 10 Simon Piter in ralnam a kenmi cu a vun zuk ih Puithiam saang salpa ih vorhlam hna a sat thlak. Cuih salpa ih hmin cu Malkhas a si. 11 Jesuh in Piter hnenah, "Na ralnam cu a kawm ah thun sal aw! Ka Pa ih i pekmi tuarnak hai hi ka in lo dingah maw si na ruat?" tiah a ti.

Annas Hmaiah Jesuh An Fehpi

12 Cule Rom ralkap cun an hotu ralbawi le Judah mi palik pawl thawn Jesuh cu an kai; an t'em hnuah, 13 hmaisa bikah Annas hnenah an fehpi. Annas cu cuih kumih Puithiam saang a t'uantu Kaiafas nupi ih pa a si. 14 Kaiafas cu mizapi ai-ah mi pakhat thih a t'ha sawn tiih Judah hotu pawl hnenih ruahnak petu kha a si.

Piter In Jesuh A Phatsan

15 Simon Piter le a dang dungthluntu pakhat in Jesuh kha an thlun. Cuih dungthluntu cu Puithiam saang thawn a thei aw zetmi an si ih Jesuh cu a thlun ih Puithiam saang ih tual ah a vung feh. 16 Asinain Piter cu kotka lengah a rak um. Cule cuih dungthluntu cu a kir ih kotka kiltu nu cu a va biak hnuah Piter a run luhpi. 17 Kotka kiltu nu in, "Khi pa a thluntu lakah na tel ve a si lo maw?" tiah Piter kha a ti. Piter in, "Ka si lo," tiah a ti. 18 Khua a sih ruangah hnen-um pawl le kiltu palik pawl in meihol in meipual an sep ih a dingin meisa an ai. Piter khal cu a va feh ve ih an hnenah dingin meisa a ai ve.

Puithiam saang In Jesuh Thu A Sut

19 Puithiam saang in Jesuh cu a dungthluntu pawlih thu le a thuzirhmi thu pawl a sut ciamco. 20 Jesuh in, "Langhnganin mizapi hnenah thu ka sim ringring. Mi tampi an ra khawmnak sinakok ah le Biakinnpi ah thu ka zirh ringring. A thup in ziang thu hman ka sim dah lo. 21 Cuti a sinain ziangah so thu i sut? Ka thusimmi i theitu pawl kha sut sawn aw. Ka simmi an thei t'heh ko," tiah a ti. 22 Cutiih a ti tikah cutawkih a ummi palik pakhat in Jesuh kha a beng ih, "Puithiam saang hnenah ziangtinso cutiin na t'ong ngam?" tiah a ti. 23 Jesuh in, "Ka t'ongsual mi a um ahcun cuih ka t'ong sualmi cu hitawk ih a ummi hmuahhmuah hnenah hin simhnik! Asinain ka t'ongmi hi a dikmi a si ahcun ziangah so i beng?" tiah a sawn. 24 Cutiin Annas in a t'emnak phoih sak cuang loin Jesuh cu Puithiam saang Kaiafas hnenah a kuat.

Piter In Jesuh A Phatsan Lala

25 Piter cu cutawkah meisa ai-in a ding lai. Culai ah midang pawl in, "Nang khal hi a dungthluntu lakah pakhat na si ve a si lo maw?" tiah an ti. Piter in, "Ka si lo," a ti. 26 Puithiam saang hnen-um lakih pakhat, Piter in a hna a sahtan mi pa ih sungkhat pa in, "Hi Jesuh thawn hmuan sungah ka lo hmu a si lo maw?" tiah a sut. 27 Asinain Piter cun, "Kei ka si lo," a ti thotho. Cutikah ar a khuang.

Pilat Hmaiah Jesuh An Hruai

28 Zingpit ah Jesuh cu Kaiafas inn ihsin Mangki bawi innah an hruai. Judah mi hotu pawl cu an daan vekin thianghlimte ih Lantak Puai rawl ei an duh ruangah Mangki bawi inn sungah cun an lut lo. 29 Curuangah Pilat cu a va suak ih an hnenah, "Hi pa hi ziang sualnak so a neih?" tiah a sut. 30 Annih in, "Sualnak nei lo sisehla na hnenah hin kan rak hruai lo ding," tiah an sawn. 31 Pilat in an hnenah, "Cuti a sile nanmah in hruai uhla nanmah ih daan vekin a thu cu va rel uh," tiah a ti. Annih in, "Kannih cun mithah theinak thu kan nei lo," tiah an ti. 32 Jesuh in ziangbangtuk thihnak so ka tuar ding ti ih a rak sim ciami t'ongkam kimnak dingah hi vekih a cannak cu a si. 33 Pilat cu a inn sungah a lut sal ih Jesuh cu a ko. "Judah Siangpahrang na si maw?" tiah a sut. 34 Jesuh in, "Hi thu i suhmi hi nangmah ih palung a si maw, midang in ka thu an lo sim ruangah so a si?" tiah a sut. 35 Pilat in, "Judah mi ah maw si i ruat? Ka hnen a lo thlentu hi na miphun le puithiam upa pawl sokhaw an si! Na tuahmi thil cu ziangso a si?" tiah a ti. 36 Jesuh in, "Kei ka uknak ram cu hi leilung tlunah a si lo; hi leilung tlunah sisehla Judah mi hotu pawl kut sungih thleng lo dingin ka dungthluntu pawl in an do ding. Ka uknak ram cu hi leilungah a si lo," tiah a ti. 37 Cutikah Pilat in, "Siangpahrang cu na si ngai maw?" tiah a sut. Jesuh in, "Nang cun Siangpahrang na si i ti. Leilung ih ka suahsanmi le ka ratsanmi cu thu pakhat lawng a si: cumi cu thutak sim ding hi a si. Thutak sungih a ummi hmuahhmuah cun ka thu simmi an ngai a si," tiah a ti. 38 Cutikah Pilat in, "Thutak cu ziang so a si?" tiah a sut. Cun Pilat cu miseenpi hnenah a va suak sal ih an hnenah cun, "A parah mawhnak thu ka hmu lo. 39 Curuangah daan nan neihmi vekin Lantak Puai ah thawngtla pakhat khat ka lo thlah sak t'heu. Judah siangpahrang hi lo thlah sak ningla nan duh maw?" tiah a sut.

Jesuh That Dingin A Relcat

40 Annih in, "Anih thlah kan duh lo! Barabbas thlah kan duh!" tiah an au ciamco. Barabbas cu suamhmang a rak si.

19:1 Cule Pilat in Jesuh cu a hruai ih ralkap pawl a vuakter. 2 Ralkap pawl in hling a neimi thinghnge in lukhuh an phiar ih an khumter. Cule puan sen an sinter. 3 A hnenah an feh ih, "Judah Siangpahrang hi a nunkhua sau hramseh," tiah an ti ih an beng. 4 Pilat cu a va suak sal ih mipi hnenah, "Ngaihnik uh! A parah thah tlak sualnak ka hmu lo, ti langternak ah nan hnenah ka rak hruai ding," tiah a ti. 5 Cuti cun hling lukhuh khumin le puan sen sinin Jesuh cu a ra suak. Pilat in an hnenah, "Zoh uh! Mi pa cu hi pa hi a si!" tiah a ti. 6 Puithiam upa pawl le Biakinn kiltu palik pawl in an hmuh tikah, "Thinglamtah ah that aw! Thinglamtah ah that aw," tiah an auh. Pilat in an hnenah, "Nanmahte in hruai uhla thinglamtah ah va that uh! Kei cun a parah sualnak ka hmu lo," tiah a ti. 7 Cule Judah mi pawl cun, "Daan kan nei ih cuih daan vek cun a thih a t'ul a si, ziangah tile Pathian Fapa ka si a ti," tiah an let. 8 Cumi cu Pilat in a theih tikah a thin a phang deuhdeuh. 9 A inn sungah a vung lut sal ih Jesuh cu, "Khuiinso na rat?" tiah a sut. Asinain Jesuh cun a sawn lo. 10 Pilat in, "I sawn lo ding maw si? Nangmah thlah theinak le thah theinak thu ka neih hi na thei maw?" tiah a ti. 11 Jesuh in, "Ka tlunih thu na neih theinak hi Pathian ih a lo pek ruangah a si. Curuangah nang hnakin na kutih i thlengtertu pa hi a sual sawn a si," tiah a ti. 12 Cumi cu Pilat in a theih tikah Jesuh thlah theinak lamzin kha a hawl. Asinain mipi cun, "Hi pa na thlah a sile Rom Siangpahrang ih rualpi na si lo. Zokhal Siangpahrang ka si a ti awtu cu Rom Siangpahrang ih ral an si," tiah an au ciamco. 13 Cuih t'ong cu Pilat in a theih tikah Jesuh cu lengah a hei suahpi ih, "Lungphah Tual," timi hmunih thut'hentu tonak ah a to. Cuih hmun cu Hebru t'ong in "Gabbatha," an ti. 14 Lantak Puai ding ni khat a duh ni a si ih sunlai hrawng a si. Pilat in mipi pawl cu, "Nan Siangpahrang hi zohhnik uh!" tiah a ti. 15 Annih in, "That aw! That aw! Thinglamtah parah that aw!" tiah an au ciamco. Pilat in, "Nan Siangpahrang hi maw thinglamtah parah ka thah ding?" tiah a sut. Puithiam upa pawl in, "Sizar siarlo Siangpahrang dang kan nei lo," tiah an ti. 16 Cule Pilat in Jesuh cu thah dingah an kut sungah a pek. Cutiin Jesuh cu an fehpi.

Thinglamtah Ah Jesuh An Khen

17 A thinglamtah pu in a suak ih "Luruh Hmun," an timi hmunah a thleng. Cuih hmun cu Hebru t'ong in "Golgotha," an ti. 18 Cutawkah Jesuh cu thinglamtah ah an khen. A dang mipa pahnih tla an khen ve ih an karlak ah Jesuh cu an thlai. 19 Pilat in ca a ngan ih thinglamtah parah a taarter. Cuih ca a nganmi cu, "Nazareth mi Jesuh, Judah Siangpahrang," ti a si. 20 Jesuh an thlainak hmun cu khawpi ihsin a hlat lo ruangah cuih ca cu mi tampi in an siar. Hebru t'ong, Hi tawkih Hebru t'ong an timi hi a ngaingai-ah cun Aram mi (Aramaik) t'ong a si. Latin t'ong le Grik t'ong in nganmi a si. 21 Puithiam upa pawl in Pilat cu, " ‘Judah Siangpahrang,’ ti si loin ‘Judah Siangpahrang ka si, a ti,’ tiah ngan aw," an ti. 22 Pilat in, "Ka ngan zomi cu ka ngan vekin um seh," tiah a ti. 23 Ralkap pawl in Jesuh cu thinglamtah parih an khen t'heh hnuah a hnipuan cu an lak ih pakhat ciar co dingah t'hen li ah an t'hen. Cule zungt'hit nei lo ih tahmi a korfual khal cu an lak. 24 Ralkap pawl cun, "Hi korfual cu kan thlek lo pei. Zo in a co ding ti theihnak ah camcawhfung kan zuk sawn pei," tiah an ti. Hitiih thil a cannak cu Ca Thianghlim sungih, "Ka hnipuan cu an t'hen aw ih, Ka kor hrangah camcawhfung an zuk," timi a kimnak dingah a si. Cubangtuk cekci cun ralkap pawl in an tuah. 25 Jesuh ih thinglamtah kiangah cun a nu le a nu ih naunu le Klopas nupi Mari le Mari Magdalene pawl an ding. 26 Jesuh in a nu le a duhdawtmi dungthluntu pa cutawkih an din kha a hmu ih a nu hnenah cun, "Amah kha na fapa a si," tiah a ti. 27 Cule a dungthluntu pa hnenah cun, "Anih kha na nu a si," tiah a vun ti. Cuihsin thokin dungthluntu pa in Jesuh ih nu cu a innah a umter.

Jesuh A Thi

28 Jesuh in ziang hmuahhmuah a kim t'heh zo ti kha a thei; Ca Thianghlim sungih a ummi kimnak dingah, "Ka ti a haal," tiah a ti. 29 Cutawkah Sabitti thur beel khat a um ih cuih Sabit thur sungah puansia an hnim ih hissop fung zimah t'emcih tahratin Jesuh cu a kaa-ah an hun hnih. 30 Jesuh in cuih Sabit thur cu a tep ih, "A kim t'heh zo," a ti. Cule a lu a kuun ih a thaw a cem.

Jesuh Ih Hnak An Sun

31 Cule Judah mi hotu pawl cu Pilat hnenah an feh ih thinglamtah parih an thahmi pawlih ke khiak dingah le an ruak pawl la dingah an va dil. An dil ni cu Tlawngkai Ninga a si, ziang ruangah an dil tile an thahmi ruak pawl cu Sabbath ni-ah thinglamtah parih an thlai awk hrih ding kha an duh lo; cuih Sabbath cu a thianghlim cemi ni a si fawn. 32 Curuangah ralkap pawl an va feh ih Jesuh thawn hmunkhatih an thahmi pakhat pa ih ke an khiak ih cuih hnuah a pahnihnak pa ih ke khal an khiak. 33 Asinain Jesuh hnen an thlen tikah a thi ngah zo ti kha an hmu ih anih cu a ke an khiak lo. 34 Ralkap pakhat in Jesuh ih hnak kha a feipi in a hun sun ih hmakhatte ah thi le tidai a suak. 35 Cuih thil a hmutu pa amah rori in a t'ongmi a si ih nan zum theinak dingah a si. A simmi hi a dikmi a si ih amah khal in thudik ka sim a si ti hi a thei. 36 Hitiih thil a cannak cu Ca Thianghlim sungah, "A ruh pakhatte hman an khiak lo ding," tiih a ummi kha a kimnak dingah a si. 37 Cule Ca Thianghlim hmun dangah, "An sunmi kha an zoh ding," ti tla in a um.

Jesuh An Phum

38 Cuih hnuah Arimathea khuami Josef in Jesuh ruak lak dingah Pilat hnenah a va dil. Josef cu Jesuh dungthluntu pakhat a sinain Judah hotu pawl kha a t'ih ruangah a thupte in a rak thlun vivo. Pilat in Jesuh ruak kha na la thei, a ti ruangah Josef cun a va lak. 39 Jesuh tong dingah zanih a rak feh dahtu Nikodemas khal Josef hnenah a feh ve ih zihmui pawng zakhat tluk, mura zihmui le cing thling rawimi kha a keng. 40 An pahnih in Jesuh ruak kha an lak ih Judah pawlih mithi phum daan vekin zihmui thawn puanrang nemtein an tuam. 41 Jesuh an thahnak hmunah cun hmuan pakhat a um ih cuih hmuan sungah cun zohman an phum dah hrih lonak thlaan thar pakhat a um. 42 Sabbath ni a si zik thlang ih cuih thlaan cu a naite fawn ruangah Jesuh ih ruak cu cutawkah an phum.

A Lawngmi Thlaan

20:1 Nipi Ni zingpit khua a van hlanah, Mari Magdalene cu thlaan ah a va feh ih thlaankhar lungpheng t'hawn cia-in a um kha a hmu. 2 Simon Piter le Jesuh ih a duhdawtmi dungthluntu hnenah a va tlan ih, "Thlaan ihsin Bawipa an thiar hlo zo; khuitawkih an ret ti kan thei lo!" tiah a sim. 3 Cun Piter le a dang dungthluntu cu an pok ih thlaan ah an va feh. 4 An pahnih in an tlan ih a dang dungthluntu cu Piter hnakin tlan a cak deuh ruangah hmaisa deuh ah thlaan ah a thleng. 5 Thlaan sung cu a vun bih ih ruak tuamnak puan nemte cu a hmu, a sinain a vung lut lo. 6 A dungin Simon Piter cu a ra thleng ih thlaan sung ahcun a vung lut mai. Ruak tuamnak puan nemte le, 7 Jesuh ih lu t'emnak puan kha a hmu. Asinain a lu t'emnak puan cu ruak tuamnak puan nemte umnak ah a um lo; amah dangte in zual aw in a um. 8 Cule dungthluntu dang, thlaan a thlengtu hmaisa deuhtu pa khal cu thlaan sungah cun a lut ve ih a hmu ih a zum. 9 Thihnak ihsin a thosal ding tiih Ca Thianghlim ih a timi kha a tican an thei thiam hrih lo. 10 Cule dungthluntu cu an inn ah an tlung.

Mari Magdalene Hnenah Jesuh A Lang

11 Mari cu thlaan lengah a ding ih a t'ap rero. Cutiih a t'ah phah in a kuun ih thlaan sung cu a vun bih ih, 12 vancungmi pahnih puanrang thawn thuam aw in Jesuh ruak an rak retnak ah khan a lu lamah pakhat, a ke lamah pakhat an to kha a hmu. 13 Vancungmi cun, "Ziangah so na t'ah rero?" tiah Mari cu an sut. Anih in, "Ka Bawipa zo in si maw an lak ih khuitawkah an ret ti ka thei lo," tiah a sawn. 14 Cule Mari cu a her ih cutawkih Jesuh a din kha a hmu; a sinain Jesuh a si kha a thei lo. 15 Jesuh in, "Nunau nu, ziangah so na t'ah rero? Zoso na hawl?" tiah a sut. Cutiih a biatu cu hmuan kiltu a si tiin a ruat ih Mari cun, "Bawipa, nangmah in na lak a si ahcun na retnak kha i sim awla ka feh ding ih ka va la ding," tiah a ti. 16 Jesuh in, "Mari!" tiah a vun ko. Mari cun Jesuh lam a hoi ih Hebru t'ong in "Rabboni!" tiah a ti. Rabboni ti cu Sayapa tican a si. 17 Jesuh in Mari cu, "I kai hlah! Ziangah tile Pa hnenah ka thleng hrih lo. Asinain ka unau pawl hnenah va sim awla ‘An Pa a si vemi ka Pa, an Pathian a si vemi ka Pathian hnenah ka feh ding a ti,’ tiah va sim aw," a ti. 18 Cuti cun Mari Magdalene cu a feh ih Bawipa a hmuhnak thu le a hnenih a t'ongmi pawl hmuahhmuah cu dungthluntu pawl hnenah a sim.

Dungthluntu Hnenah Jesuh A Lang

19 Cuih Nipi ni zanlam ah dungthluntu pawl cu hmunkhatah an tong aw. Judah mi hotu pawl an t'ih ruangah saangka hmuahhmuah an khar t'heh. Cule Jesuh cu a ra lang ih anmah lakah a ding ih, "Nan hnenah daihnak um koseh," tiah a ti. 20 Cumi a t'ong t'heh in an hnenah a kut le a hnak a hmuh. Dungthluntu pawl cu an Bawipa an hmuh tikah an lung a awi ngaingai. 21 Jesuh in an hnenah cun, "Nan hnenah daihnak um koseh! Ka Pa in i thlah vekin nannih khal ka lo thlah ve a si," tiah a ti. 22 Cutiih a t'ong hnuah an parah a thaw a thawt ih, "Thlarau Thianghlim rak co uh! 23 Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding," tiah a ti.

Jesuh le Thomas

24 Dungthluntu hleihnih lakah pakhat a si mi (Faphir an timi) Thomas cu Jesuh a lang laiah an hnenah a um lo. 25 Curuangah dungthluntu dang pawl in, "Bawipa kan hmu sokhaw!" tiah an sim. Thomas in an hnenah, "A kut thir in an khennak hma si ka hmuh ih ka kut in cuih hma si le a hnak kha ka tham ngah hlanah cun ka zum lo ding," tiah a ti. 26 Zarhkhat hnuah dungthluntu pawl cu innkhaan sungah an um ih Thomas khal a um ve. saangka an khar t'heh nain Jesuh cu a ra lang ih an lakah a ding in, "Nan hnenah daihnak um koseh!" tiah a ti. 27 Cule Thomas hnenah cun, "Hinah na kutzung rak re hnik awla ka kut hi zohhnik aw; na kut rak dawh awla ka hnak hi tham aw. Zum loin um nawn hlah; zum thlang aw!" tiah a ti. 28 Thomas in, "Ka Bawipa le ka Pathian!" tiah a ti. 29 Jesuh in, "I hmuh ruangah na zum a si maw? Keimah i hmu lo nain a zumtu cu mi thlawsuak an si," tiah a ti.

Hi Cabu Ngantu Ih Tumtahmi

30 A dungthluntu pawlih mit hmuhah Jesuh in hmuhsaknak tampi a tuahmi, hi cabu sungih ngan lomi tampi a um. 31 Sikhalsehla hi hmuah hi ka ngan ih ka ngannak sullam cu nannih in Jesuh cu Messiah, Pathian Fapa a si ti nan zum ih amah nan zumnak thawngin le amah ih hminin nunnak nan neihnak dingah a si.

Galilee Ah A Dungthluntu Hnenah Jesuh A Lang

21:1 Cuih hnuah Jesuh cu a dungthluntu pawl hnenah Tiberias Tili ah a lang sal. A lang daan cu hiti in a si. 2 Simon Piter, Faphir timi Thomas, Galilee peng Kana khuami Nathanael, Zebedi fapa pawl le Jesuh dungthluntu pahnih tla hmunkhat ah an tong khawm aw. 3 Simon Piter in, "Kei cu sur ka vorh ding," tiah a ti. Midang khal cun, "Kan ra tel ve ding," an ti fingfing. Cutiin long pakhat in an feh; a sinain cuih zan cu zianghman an kai lo. 4 Ni a hung suah zawng ah Jesuh cu tikapte-ah a ding, a sinain Jesuh a si ti kha dungthluntu pawl cun an thei lo. 5 Jesuh in, "Naule uh, ziangtal nan kai lo maw?" tiah a sut. Annih in, "Zianghman kan kai lo," an ti. 6 Jesuh in, "Nan long ih vorhlam kamah khan nan sur hei vorh uhla malte tal cu nan kai ding," a ti. Cuti cun an sur cu an hei vorh ngaingai ih tamzet an awk ngah ruangah an sur hman cu an dir sal thei nawn lo. 7 Jesuh ih a duhdawtmi dungthluntu cun Piter hnenah, "Bawipa sokhaw a si!" tiah a ti. Piter in Bawipa a si ti kha a theih tikah (a hnipuan a rak phoih cia ruangah) a kor lenghruk kha a hruk lohli ih ti sungah a dawp. 8 Dungthluntu dang pawl in nga a khatmi an sur cu an dir vivo ih tikap an thleng. Leilung ihsin a hla lem lo, pi zathum tluk lawng a rak si. 9 Tikap ih an hung kai tikah meiling parah nga le saang em ciami kha an hmu. 10 Cule Jesuh in an hnenah, "Nan kaihmi nga cu rak keng uh,"tiah a ti. 11 Simon Piter cu long sungah a hung kai ih nga tumpipi a khatmi sur cu tikap ah a dirh. Nga cu pum za le sawmnga le pum thum a si; cutluk tam a si nain sur cu a tlek lo. 12 Jesuh in an hnenah, "Ra uhla thawhhlam ra ei uh!" a ti. Dungthluntu lakah zohman in, "Zoso na si?" tiah an sut ngam lo; ziangah tile Bawipa a si ti an thei. 13 Jesuh cu a va feh ih saang kha a lak ih a pek; nga khal a pek hai. 14 Himi cu Jesuh thihnak ihsin a thawh hnuah dungthluntu hnenih a lang voithumnak a si.

Jesuh Le Piter

15 An ei t'heh hnuah Jesuh in Simon Piter cu, "Johan fapa Simon, hi midang pawlih in duhdawt hnakin nang in i duhdawt sawn maw?" tiah a sut. Simon in, "A si Bawipa, ka lo duhdawt cu na thei," tiah a ti. Jesuh in a hnenah, "Ka tunote pawl kilkhawi aw," tiah a ti. 16 A voihnihnak ah Jesuh in, "Johan fapa Simon, i duhdawt maw," tiah a sut sal. Simon in, "A si Bawipa, ka lo duhdawt cu na thei," tiah a let. Jesuh in, "Ka tuu pawl kilkhawi aw," tiah a ti. 17 Jesuh in, "Johan fapa Simon, i duhdawt maw?" tiah voithumnak a sut lala. Cutiin voithum tiang Jesuh in, "I duhdawt maw?" tiih a sut ruangah Piter cu a riah a sia ih Jesuh hnenah cun, "Bawipa, nang cun ziang hmuahhmuah na thei t'heh. Ka lo duhdawt ti khal na thei t'heh ko a sisi!" tiah a ti. Cule Jesuh in, "Ka tuu pawl kilkhawi aw. 18 Thungaite in ka lo sim: na no laiah cun na tim na tuah ih na duhnak hmun poh ah na feh; a sinain na tar tikah cun na ban na pharh ding ih midang in an lo t'em ding ih na duh lonak hmunah an lo fehpi ding," tiah a ti. 19 Hiti’n a t'ong tikah Piter hi ziangbangtuk thihnak a tuar ding ih ziang bangtuk in Pathian hnenah sunlawinak a pe ding, ti kha Jesuh in a langternak a si. Cule Jesuh in, "I thlun aw," tiah a ti.

Jesuh Le Dungthluntu Dang

20 Piter cu a her ih a dunglamah Jesuh ih a duhdawtmi dungthluntu kha a hmu. Hi dungthluntu pa cu rawl an ei laiah Jesuh a hei naih ih, "Bawipa, a lo zuartu ding cu zoso a si?" tiih a suttu kha a si. 21 Piter in cupa kha a hmuh tikah, "Bawipa, hi pa hi teh ziangti in so a si ding?" tiah Jesuh cu a sut. 22 Jesuh in, "Ka rat tiang nung dingih ka duhmi a si ahcun na hrangah ziangso a poinak a um? I thlun sawn aw!" tiah a ti. 23 Curuangah hi dungthluntu cu a thi lo ding tiah Jesuh ih dungthluntu pawl lakah thu a thang. Sikhalsehla Jesuh in a thi lo ding, a timi a si lo: "Ka rat tiang nung dingih ka duhmi a si ahcun na hrangah ziangso a poinak a um?" a timi a si. 24 Hi dungthluntu cu hi thu pawl a simtu le a ngantu khal a si; cule a simmi cu a dik a si ti kan thei.

Thu Netnak

25 Jesuh ih a tuahmi thil dang tampi a um hrih. Pakhat hnu pakhat ngan vivo sehla nganmi cabu pawl cu leilung pumpi hmanah hin a tlem cawk lo ding tiah ka ruat.