John Teptee bang Lungdamna Thu

Nuntakna Kammal

1:1 Simlei a kibitphua maa in, Kammal sia na om khol zo hi; ama sia Pathian taw om a, ama mama in Pathian ahi hi. 2 A kipat phit hun ma in Kammal sia Pathian taw a om sa ahi hi. 3 Ama tungtawn in Pathian in na theampo bitphua hi; bitphua a minpiang ama ngawl taw a kivawt na khat beak a om bua hi. 4 Kammal sia nuntakna ii naak ahi hi. Taciang hi nuntakna in mihing nam theampo atu in khuavak hong puak hi. 5 Khuavak sia khuazing sungah tang a, khuazing in sumit zo ngawl hi. 6 Pathian in John a kici kamtaipa hong paisak a, 7 tua thu mihing theampo in za a, a up thei natu in, tua khuavak thu mihingte tungah son tu in, hong pai ahi hi. 8 Ama tatak ahile khuavak hi ngawl hi. Khuavak ii thu son tu in hong pai ahi hi. 9 Hi khuavak sia khuavak tatak hi a mihing nam theampo ii tungah a taang tu in leitung ah hong pai hi. 10 Kammal sia leitung ah om a, Pathian in leitung sia ama tungtawn in vawt hi napi, leitung in ama sia a he bua hi. 11 Ama sia ama ii ngamsung ma a hong pai ahihang amite in ama a saang bua uh hi. 12 Ahizong pawlkhat in ama saangin um uh hi. Tasia ciangin ama in tuate tungah Pathian tate sua thei natu thu pia hi. 13 Amate sia leitung ngeina taw Pathian tate a suak hi ngawl hi, cinopna in, pate ii hin tate bangin a piang ahi bua hi. Pathian mama sia amate ii Pa ahi hi. 14 Kammal sia mihing hong suak a, thuthiamna le thumaanna taw kidim a, ei sungah hong teang hi. Ama vaangletna ih mu hi. Pa ii Tapa khat a hina taw a saan vaangletna ih mu hi. 15 John in ama huvau son hi. Ama in hi bangin au hi. Hisia pa sia ka sason pa hi a, Kei nung pan hong pai hi, ahihang kei sangin lianzaw hi, banghangziam cile kei ii pian maa in ama om zo hi, ka ci sia ahi hi, ci hi. 16 A kidim a om, ama thuthiamna panin, ei theampo sia thupha hong pia a, thupha khat zawkciang khat, hong pia hi. 17 Pathian in Moses tungtawn in Thukham pia hi. Ahihang thuthiamna le thumaanna thu sia Jesu Christ tungtawn in hong pai hi. 18 Kuama in Pathian sia mu ngei ngawl hi. Pathian ma ahi, Pa kungah a om, Tapa khat bek in Pathian hong he sak hi.

Tuiphumpa John ii Thupuak

19 Jew thuneite in Jerusalem khua, John kungah thiampite le Levite pai sak a, Nang sia akua ni ziam? ci in dongh sak uh hi. 20 John in a zo tu a nial bua a, phualseal nei ngawl le thiangtho takin hi bangin son hi. Kei sia Messiah hi ngawl khi hi, ci hi. 21 Tua ahile akua ni ziam? Elijah ni ziam? ci in dongh uh hi. Hi ngawl khi hi, ci in John in zo kik hi. Kamsangpa ni ziam? ci in dongh uh hi. Hi ngawl khi hi, ci in ama in zo kik hi. 22 Tua ahile hong son tan, a kua ni ziam? ci uh hi. Ko hong sawlte munah thu ka puak kik uh kul hi. Nangma le nangma sia bang kici ni ziam? ci uh hi. 23 Isaiah kamsangpa ii sonna teng sia son sawn in, John in hi bangin a zo hi. Kei sia Senneal ngam sungah a au khat ii aw ka hi hi. Topa ii khualhaw natu lampi tangsak vun! 24 Phariseete ii kamtaite in, 25 John munah, Nang sia Messiah le hi ngawl, Elijah le hi ngawl, Kamsangpa le hi ngawl na hile, banghangin baptize ni ziam, ci in dongh uh hi. 26 Kei in tuidam taw kong baptize hi, ahihang no sungah na heak ngawl uh pa khat om hi. 27 Ama sia kei nung panin hong pai hi, ahihang ama peangdap suut tu in, zongh ka kilawm bua hi, ci in John in zo kik hi. 28 John ii baptize na Jordan ngun ii nisuana sangah a om Bethany khua ah, hi thu theampo piang hi.

Pathian Tuuno

29 Azing ciangin John in Jesu sia ama kungah hong pai a mu ciangin, Leitung buppi ii mawna a lakeak Pathian Tuuno, zia sungah om hi! 30 Mihing khat kei nung panin hong pai tu a, ama in kei pian maa in om khol zo ahikom, kei sangin ama lianzaw hi, ci in ka sason sia ahi hi. 31 Ama sia akua hi tu ziam, ci in ka he bua hi, ahihang Israel mite ii ama a heak natu in kei sia tuidam taw baptize tu in kong pai hi, ci hi. 32 Taciang in John in hi bangin tetti pang hi. Thaa sia vantung pan in ngam vakhu bangin hong tuaksuk a, ama tungah hong tu ka mu hi. 33 Ama ahi hunlam sia telcian tatak ngawlin ka om lai hi, ahihang Pathian in tuidam taw baptize a hong sawl lai in, Thaa sia hong paisuk in mihing khat ii tungah, hong tuak na mu tu hi; ama sia Thaa Thiangtho taw baptize tu pa hi, ci in hong son hi. 34 Tasia mu zo khi hi. Taciangin ama sia Pathian Tapa hi ci in hong son khi hi, John in ci hi.

Jesu Nungzui Phitbel teng

35 Azing ciangin John sia tua munah a nungzuite nii taw a dinkhop laitak in, 36 Jesu hong pai mu hi, Pathian Tuuno sia zia sia hi! ci hi. 37 Nungzuite nii in hi bangin a son sia za uh a, taciangin Jesu taw ton uh hi. 38 Jesu sia kingeilee a, amate in a nung a zui a mu ciang, Bang zong nu ziam? ci in dongh hi. Amate in, Koisung a teang ni ziam, Rabbi awng, (Syapa a ci nopna) ci in dongh uh hi. 39 Hong pai in hong en tavun, ci hi. (A hun sia nitak nai li bang saat tu hi) Tua ahikom amate sia ama taw paikhawm a, a tenna a mu uh hi. Ama taw nitum dong hunzangh uh hi. 40 Tuate sung pan khat sia Simon Peter ii suapui Andrew ahi hi. 41 Thakhat in a suapuipa mu in hi thu ko hi. Messiah mu zo khi hi, (Hi kammal sia Christ a cinopna hi). 42 Tua zawkciang ama in Simon sia Jesu kungah paipui hi. Jesu in ama en in, Na min sia John ii tapa Simon hi, ahihang nang sia Cephas hong kici tu hi, ci hi. (Cephas ii khiakna sia Peter taw ma kibang a suangpi a ci nopna hi.)

Jesu in Philip le Nathanael Sam

43 A zing ciangin Jesu in, Galilee ngamah pai tu in, khensat hi. Ama in Philip mu a,Hong zui tan, ci hi. 44 (Philip sia Andrew le Peter te ii tenna Bethsaida khua pan ahi hi.) 45 Philip in Nathanael munah, Moses thukham laibu sungah a ki at pa le, kamsangte zongh ii a thu a at pa ka mu zo uh hi, ci in son hi. Ama sia Nazareth pan Joseph tapa Jesu hi, ci hi. 46 Nazareth panin na pha piang thei thong tu ziam, ci in Nathanael in dongh hi. Hong pai in hong en tan, ci in Philip in zo kik hi. 47 Jesu in Nathanael sia ama kungah hong pai a mu ciangin, ama thu hi bangin son hi. Hi sungah, Israel mi tatak khat om hi. Ngual theam nopna thin a nei ngawl pa hi, en vun! ci hi. 48 Nathanael in, Bangbangin hong he ni ziam, ci in dongh hi. Philip ii hong sam maa theikung nuai ah na om lai in, kong mu zo hi, ci in Jesu in zo kik hi. 49 Nathanael in, Syapa awng, nang sia Pathian Tapa na hi hi! Israel Kumpipa na hi hi! ci hi. 50 Jesu in, Theikung nuai ah na om lai in, kong mu zo hi kong ci hu bek in, um ni ziam? Hisia sangin a thupi zaw, na tam mama na mu tu hi! ci hi. 51 Taciang in amate tungah, Thumaan hong son khi hi; vantung kihong na mu tu a, Mihing Tapa tungah Pathian ii vantung lalangte sia a tuaksuk a kaato kithale in om na mu tu hi, ci hi.

Cana khua ah Mopoai

2:1 Ni nii zawkciang Galilee ngam Cana khua ah mopoai khat om hi. Jesu ii nu sia tua munah om a, 2 Jesu le a nungzuite zongh, tua mopoai siim tu in, khual kihil uh hi. 3 A zu uh a bo ciangin, Jesu ii nu in, ama munah, Amate in zu nei nawn ngawl hi, ci hi. 4 Jesu in, Ka sep ka vawt tu hong son heak in, ka hun hong tung ngawl lai hi, ci hi. 5 Jesu ii nu in, naseamte munah, Ama hong sawl babangin seam vun, ci hi. 6 Jewte sia zeksa vai in, kithiansuana ngeina nei uh a, taciang tua taw kisai in thawl gallon kul pan sawm thum bang veu a ta, tuidam thambeal luk om hi. 7 Jesu in naseamte munah, Hi thambealte tui dimh vun, ci hi. Amate in thambeal ngong ciang in tui dimh uh a, 8 tua zawkciang ama in, Tu in tui tawm suak vun a, poai ukpa kungah paipui tavun, ci hi. Tua pa kungah a tui uh a paipui uh ciangin, 9 tua tui sapitzu na suak a, ama in tep hi. Ama in hi sapitzu koisung pan hong pai ci in a he bua hi. (ahihang naseamte in ahile he uh hi); tua ahikom zineipa sam a, 10 hi bangin ci hi, Ngualdangte in, a sapitzu uh a limbel teng veu hawm masa a, leangnate in tam mama a dawn zawkciang, sapitzu dang thathongte hawm sak hi. Ahihang nang na hile sapitzu limbel sia, tu dongin na khealsia hi! ci hi. 11 Jesu in hi a masabel na lamdang lakna sia Galilee ngam Cana khua ah vawt hi; tua munah ama vaang kilangh sak a, a nungzuite in ama um uh hi. 12 Hisia zawkciang, Jesu ii a nu, a suapuite le nungzuite sia Capernaum khua ah pai uh a, tua munah ni tawmvei sung taam uh hi.

Jesu Biakinn sungah Pai

13 Paisan Poai hun hong theng dektak ahikom in, Jesu Jerusalem ah pai hi. 14 Tua mun Biakinn sungah mihingte in, khuite, tuute, inn vakhute, zuakin a omte le sum theakte zongh sabuai ah to in a om mu hi. 15 Tua ahikom ama in khauhual vawtin, nganhing theampo, tuu le kealte Biakinn panin notkeak a; sum theakte ii sabuai sawnthal sak a, a sumte kithethaang sak hi; 16 taciangin inn vakhu zuakte munah, Hite pusua vun! ci in, Ka Pa inn sia sumzuakna mun suak sak heak vun! ci hi. 17 A nungzuite in, Laithiangtho ii, Na inn atu in, ka lawpna in, ka sungah mei bangin kuang hi, Pathian awng, ci a, a ki at teng phawk uh hi. 18 Jew thuneite in, Hi bangin na ngamtat thei natu in, bang na lamdang lakna taw na thunei theina, hong lak tu ni ziam, ci in dongh uh hi. 19 Jesu in, Hi Biakinn sia baltham vun, ni thum sungin sa kik tu khi hi, ci in zo hi. 20 Ni thum sungah sa kik thei takpi tu ni ziam? Hi Biakinn sak a kiman dongh sia kum sawm li le kum luk hai hi, ci uh hi. 21 Ahihang Jesu ii son Biakinn sia ama ii pumpi ahi hi. 22 Tua ahikom thina panin, a kithaw kik sak ciangin a nungzuite in, hi thu a son sia phawk kik uh a, amate in Laithiangtho le Jesu ii son thute um uh hi.

Mihingte Pianzia Jesu ii Heakna

23 Paisan Poai sungah Jesu sia Jerusalem ah a om laitakin, ama in na lamdang lakna a vawtte a mu mihing tam mamate in, ama um uh hi. 24 Ahihang Jesu in amate tungah muanna taw a ki aap ngam bua hi, banghangziam cile ama in amate he siat hi. 25 Amate ii thu kuama son kul ngawl hi, banghangziam cile ama mama in amate ii thinsung sia he siat hi.

Jesu le Nicodemus

3:1 Jewte lampui Nicodemus a kici khat om a, ama sia Pharisee pawlte ahi hi. 2 Zan khat Jesu kungah pai in, Rabbi awng, nang sia Pathian ii sawl Sya khat hi ci in kong he uh hi. Pathian in hong ompui bale, na lamdang lakna na vawtte sia, kuama in vawt thei ngawl tu hi, ci hi. 3 Jesu in, Thumaan hong son khi hi; Pathian Ngam sia nii vei a suak kik ngawl peuma, kuama in, mu thei ngawl tu hi, ci in zo hi. 4 Bangbangin mihing a khanthin sa khat sia suak kik thei tu ziam? A nu ngil sungah tumin nii vei suak kik thei ngawl tu hi, Nicodemus in ci hi. 5 Jesu in Thumaan hong son khi hi. Tui le Thaa taw a suak kik ngawl peuma, kuama Pathian Ngam sungah tum thei ngawl tu hi. 6 Mihing khat sia ci le sa taw nute pate sung panin kisuak a, ahihang ama sia thaa ii pianzia bangin Thaa taw in suak hi. 7 Na sua kik kul tu hi kong cina hangin, lamdang na sa heak in. 8 Vui zongh a uukna po ah va hi; a vak ciang a nging na za hi. Ahihang koisung pan hong pai a, koisung zuan ziam ci sia na he bua hi. Thaa taw a suak kik mihing simin, tabang ma ahi hi, ci in zo kik hi. 9 Nicodemus in,Bangbangin hi thu suak thei tu ziam, ci in dongh hi. 10 Jesu in, Nang sia Israel ngam sung sya thupi khat na hi hi, tua hi napi in hi thu tel ngawl ni ziam? 11 Thumaan hong son khi hi: ka heak uh te hong son a, ka mu uhte hong ko khu hi, tua hi napi note kuama in ko ii kong thupuak uhte, saang nuam ngawl nu hi. 12 Hi leitung nate ii thu kong son ciangin, hong um ngawl ni hi, tua ahile vantung nate ii thu kong son ciang, bangbangin hong um thei ngei tu ni ziam? 13 Taciangin vantung pan a hong tuaksuk Mihing Tapa sim ngawl kuama vantung ah kaato ngei ngawl hi, ci in zo hi. 14 Moses ii taungo ngul sia senneal ngamsung thingkhuam tungah a khai bangin Mihing Tapa zongh kikhai tu hi, 15 taciang ama a umte theampo in, nuntak tawntungna a nga tu hi. 16 Pathian in a Tapa a um mihing theampo thi ngawlin nuntak tawntungna a nga natu in, khat bek a nei a Tapa hong piak dongin leitung mihingte hong it hi. 17 Banghangziam cile Pathian in a Tapa sia thukhen tu in, hi leitung ah hong pai sak bua a, ngumpa tu in hong pai sak hi. 18 Tapa a umte peuma kuama thukhenna thuak ngawl tu hi; ahihang a um ngawl sia, thukhenna a thuak zo hi, banghangziam cile ama in, Pathian ii Tapa khat bek sia a um bua hi. 19 Hi thu sia thukhen zia hi: khuavak sia leitung ah hong pai hi, ahihang mihingte in, khuavak sangin khuazing deizaw uh hi, banghangziam cile amate ngamtat na uh pha ngawl hi. 20 Ngamtat pha ngawl a vawt peuma in, khuavak ngaimaw a, khuavak sungah hong pai ngawl tu hi, banghangziam cile a ngamtat phat ngawl nate kilangh sak nuam ngawl hi. 21 Ahihang thumaan a seam peuma in, khuavak sungah hong pai a, ama nasepna te sia Pathian thu mang a seam ahi hunlam tua khuavak in lak hi.

Jesu le John

22 Tua zawkciang, Jesu le a nungzuite in, Judea ngamkhen sungah hong pai uh a, tua munah amate taw hunte zangh khawmin, baptize na pia hi. 23 Salim pan a kikhuala ngawlna Aenon ah tui tam ahikom John zongh in tui sungah baptize na pia hi. Mihingte in ama zuan uh a, taciang ama in, baptize hi. 24 (Hi hun sia thong sungah John a kikhum ma hun ahi hi.) 25 John ii nungzuite pawlkhat in Jewte khat taw zeksa kisilna huvau kam kinial uh hi. 26 Tua ahikom amate John kungah pai in, hi bangin ci uh hi. Syapa awng, Jordan ngun nisuana sangah nang taw a omkhawm, ama thu na sason sia, na ciamtee lai ziam? Tu in ama zongh in, baptize a, a kuama po in, ama kung zuantek uh hi! ci hi. 27 John in zo a, Pathian in a pia bale kuama in, bangma nga thei ngawl hi. 28 Hi bang ka ci ciang, noma tatak ma keima ii tetti na hi uh hi, Kei sia Messiah hi ngawl khi hi, ahihang ama mai ah, kei hong kipai sak khol hi. 29 Mo ahile zineipa ii neisa hi. Ahihang zineipa lawmte sia a hui ah dingin thu ngai in om uh a, zineipa aw a zaak ciangin, a lungdam uh hi. Hisia in ka lungdamna a pawlcinna ahi hi. 30 Ama sia hong thupi va-ial tu a, kei sia thupi ngawl va-ial tu khi hi, ci hi.

Vantung pan Hong pai Pa

31 Tungsang pan hong pai sia in, a kuama theampo sangin, lian zaw hi. Leitung pan hong pai sia in, leitung neisa hi a, leitung nate thuson in nei hi. Ahihang vantung pan hong pai sia in, a kuama theampo ii tungsia ahi hi. 32 Ama in a mu sate son a, a zaak sate son hi, ahihang kuama in ama ii thu hong puakte saang tuan ngawl hi. 33 Ahihang a kuama po ama ii thupuakte a saangte in Pathian sia thumaan hi, ci in kip sak hi. 34 Pathian ii sawlpa in, Pathian ii kammalte pau hi, banghangziam cile Pathian in ama Thaa taw kidimna pia hi. 35 Pa in a Tapa it a, na theampo ama vaangletna sungah koi hi. 36 A kuama po Tapa a umte in, tawntung nuntakna nei hi; a kuama po Tapa a ni ngawlte sia nuntakna a nei batu a, Pathian ii daan piakna sungah om tu hi.

Jesu le Samaria Numei

4:1 John sangin Jesu in nungzui tamzaw nga in, baptize hi ci in Phariseete in za uh hi. 2 A tatak sia Jesu in kuama baptize nei ngawl hi. (A nungzuite bek in batize uh hi.) 3 Tua ahikom Jesu in bang kison, ci sia a zaak ciangin Judea ngam nusia in Galilee ah pai hi; 4 tua munah a pai natu in, Samaria ngam kantan tu kul hi. 5 Samaria ngam Sychar kici khuano khat ah theng hi, tua khua sia Jacob ii a tapa Joseph tungah a piak lo taw kikhuala ngawl hi. 6 Jacob ii tuikhuk tua munah om a, tua tuikhuk hui ah Jesu sia a khualhawna pan toi in, to hi. Tua hun sia sun laitak khawng ahi hi. 7 Samaria numei khat tui toai tu in hong pai a, tasia ciang Jesu in ama munah, Tui dawn khat pia tan, ci hi. 8 (A nungzuite sia khua sungah an lei tu in pai uh hi.) 9 Numeinu in zo a, Nang sia Jew mi hi a, kei sia Samaria mi khi hi tua hi a, banghangin tui hong ngen thei ni ziam, ci hi (Jewte in Samariate ii zak hai le kuangte zangh ngawl hi.) Jesu in, Pathian in bang teng pia hi ci sia le nang tungah tuidawn tu hong ngen sia akua ziam, ci thu tel thong lete nangma in ama mun ah na ngen zaw tu a, ama in nuntakna tui hong pia tu hi, ci hi. 11 Numei nu in, Topa awng tuipheal nei ngawl ni hi, taciang tuikhuk sia thuk mama hi. Tua nuntakna tui, koisung pan nga tu ni ziam? 12 Hi tuikhuk hong pia sia ih pu Jacob hi; ama le a tate le a nganno honte in, hi tuikhuk panin dawn tek hi. Jacob sangin lianzaw kisa na hi ba na ziam, ci hi. 13 Jesu in, A kuama po hi tui a dawn sia in, a dangko kik tu hi, 14 ahihang kei ii ka piak tui a dawnte in a dangko kik ngei nawn ngawl tu hi. Tui ka piak tu sia ama sung pan ciktui in hong piang tu a, tua in nuntakna tui hi tu a, taciangin tawntung nuntakna nga sak tu hi, ci in zo hi. 15 Topa awng, tua tui kei hong pia tan! Tua hile ka dangko nawn ngawl tu a, tui toai tu in hi munah ka pai a kul nawn batu hi, numei nu in ci hi. 16 Pai tan a, na pasal sam tan, taciang hong pai kik tan, Jesu in ci hi. 17 Kei pasal ka nei bua hi, ci in zo hi. Jesu in, Pasal nei bong na ci sia thumaan hi. 18 Pasal nga taw na kiteang ngei zo a, tu a na tenpuipa sia zongh na pasal tatak hi ngawl hi. Thumaan hong son ni hi, ci in zo kik hi. 19 Topa, nang sia kamsang khat na hi hunlam kong he hi. 20 Ko Samaritan khangluite in, hi mualtung ah Pathian bia hi, ahihang no Jewte in Jerusalem sia Pathian biakna tu mun hi, ci nu hi, ci hi. 21 Jesu in ama munah, Hong um tan, numei awng, Pa sia hi mual tungah ahizong, Jerusalem ah ahizong mihingte ii biak ngawl hun hong tung tu hi. 22 No Samariate in na biak uh sia akua ziam, ci in he tatak ngawl nu hi; ahihang ko Jewte in, ka biak uh sia ka he uh hi, banghangziam cile ngupna sia Jewte tung panin hong pai hi. 23 Ahizong a hun hong tung tu a, tu mama in hi sungah hong tutung zo hi, Pathian ii Thaa vaangletna taw Pa sia ahi tu bangin kibia tu a, ama dei biakpiakna maan taw kibia tu hi. 24 Pathian sia Thaa hi a, taciang ama Thaa ii vaangletna taw bek in ama a hi bang tatakin kibia thei hi, ci hi. 25 Numei nu in, Messiah hong pai tu a, ama hong pai ciangin, na theampo hong son tu hi, ci in ka he hi, ci hi. 26 Nang taw a kipaupui keima sia tua pa ka hi hi, Jesu in ci hi. 27 Tua hun laitakin Jesu nungzuite hong heak kik a, Jesu sia numei khat taw, thu sason in om a mu uh ciangin, amate in lamdang sa mama uh hi. Ahihang kuama in, Nang bang nuam ni ziam, ci in numei nu mun ahizong, Banghangin hi numei taw thuson ni ziam, ci in ahizong a dongh a om bua uh hi. 28 Tasia ciangin numeinu in, a tuibeal nusia in, khua sungah heak kik a, tua lai mihingte munah, 29 Ka sep ka vawt theampo hong he siat mihing khat en tu in hong pai tavun. Ama in Messiah hi thei tu ziam? ci hi. 30 Tua ahikom, amate in a khua uh nusia in, Jesu kungah pai uh hi. 31 Tua laitakin, a nungzuite in Jesu munah, Syapa awng, bang khat papo ne in! ci uh hi. 32 Ahihang ama in, No ii nong heak pui ngawl uh anneak tu ka nei hi, ci in zo hi. 33 Tua ahikom nungzuite amate khat le khat kidongh a, Khat po in an puak zo hi tu ziam, ci uh hi. 34 Jesu in, Kei ii an sia, hong sawlpa ii thu ka nit tu le, hong piak nasep ka zaw tu ahi hi. 35 Noma in paunak khat nei nu hi, Tha li zawkciang anlaak hun hi tu, ci thei nu hi. Ahihang lote pha tak en vun; lo ante min zo a, laak hial tu bek in om zo hi! 36 An la pa sia thaman kipia a, ama in tawntung nuntak natu ante kaikhawm hi; tua ahikom ancii a tu pa le anlapa lungdam khawm tu hi. 37 Mihing khat in thai tu a, a dang khat in anla hi, ci paunak sia thumaan hi. 38 No ii sepna sa ahi ngawl lote sungah anla tu in hong pai sak khi hi; ngualdangte in tua munah seam uh a, taciang in no sia amate sepna tung panin a meet na nga uh hi, ci hi. 39 Numeinu in, Keima ngamtatna theampo hong son hi, a cina hangin tua Samaria khua mihing tam mama in, Jesu um uh hi. 40 Tua hi a Samaria mite ama kungah hong pai ciangin, amate khua ah a taam natu in kunh uh hi, Jesu in tua munah ni nii taam hi. 41 A tamzaw seseam in ama thusonna hu in um uh a, 42 Numeinu tungah, Tu in um khu hi, tasia in nang nong son hang hi ngawl a, koma mama in, ama thuson ka za zo uh a, ama sia leitung Ngumpa hi takpi hi, ci in ka he uh hi, ci uh hi.

Jesu in Upa khat ii Tapa Dam sak

43 Tua munah ni nii a taam zawkciang Jesu dingin, Galilee ngam zuan hi. 44 Banghangziam cile ama mama in, Kamsangpa khat sia ama ngam sungah ki zakta ngawl hi, ci hi. 45 Galilee ngam a thet ciangin, tua lai mihingte in muak uh hi banghangziam cile amate sia Paisan Poai simin Jerusalem ah pai a, poai sungah ama vawt theampo mu siat uh hi. 46 Tua zawkciang Jesu sia Galilee ngam Cana khua ah pai kik hi, tua mun sia ama in tui pan zu a suasakna mun ahi hi. Kumpi naseam ulian khat om a, a tapa sia Capernaum khua ah a ciina in om hi. 47 Ama in Jesu sia Judea ngam pan in Galilee ngam ah hong pai hi, ci in a zaak ciangin ama in Jesu kungah zuan a, Capernaum khua ah, thi tu in a om a tapa sia a dam sak natu in, tua khua ah Jesu a pai natu ngen hi. 48 Jesu in,No sungah na lamdang laknate le, a tumdang nate na mu bua uhle, kuama in na um ngei bua uh hi, ci hi. 49 Ulianpa in, Topa awng, ka tapa a thi maa in hong pai tan, ci hi. 50 Jesu in, Pai tan, na tapa nungta tu hi! ci hi. Tua pa in Jesu kammalte um in pai paih hi. 51 Inn ah a cia lam in, a naseamte in, Na tapa nungta tu hi! ci thu taw ama muak uh hi. 52 Patang dam tu a kipat sia, banghun hi tu ziam ci in amate tungah ulianpa in a dokciang, Zeini sun nai khat hun in, a ci suk hong thai hi, ci uh hi. 53 Tasia ciang Jesu ii, Na tapa nungta tu hi, a ci hunlian laitak ahi hunlam a pa in phawk hi. Tua ahikom ama le a innkuanpuite in um uh hi. 54 Judea pan in Galilee hong thet zawk in hi thu in Jesu ii na lamdang lakna a niina ahi hi.

Tuili ah Ciidam sakna

5:1 Tua zawkciang, Jerusalem khua Biakna poai ah Jesu pai hi. 2 Jerusalem Tuu Kongpi hui ah, talap nga a nei tuicing khat om hi; tua mun sia Hebrew kam in Bethzatha kici hi. 3 Mittaw peang bai langngaw ciina honpui khat sia, tua talap nuai ah lum uh hi. 4 Amate in tui a kilok tu ngak uh hi, banghangziam cile makphet makphet in Topa ii vantung lalang khat in tua tui sungah tuaksuk a, tui sau hi. Tui kinok laitak in, a tuaksuk phit ciina sia in, bang natna po a vei zongin dam hi. 5 Kum sawm thum le kum liat ciina sa pasal khat zongh tua sungah om hi. 6 Jesu in tua pa lum in a om mu a, khua ngei mama ciina in om hi, ci in he hi; tua ahikom, Na dam nuam ziam? ci in dongh hi. 7 Ciinapa in, Topa awng, tui a kinok laitakin, kei hong khiasuk tu, kuama ka nei bua hi; tuisung theng nuamin, ka hanciam hang, ngualdang veu tuaksuk masa hi, ci in zo hi. 8 Jesu in Tho in, na luppha luakin lampai in, ci hi. 9 Thakhat thu in tua pasalpa dam hi; ama in a luppha luakin, lampai tu in hong kipan hi. Hi thu a pian ni sia Sabbath ni ahi hi. 10 Tua ahikom Jew thuneite in a kidam sakpa munah, Tuni sia Sabbath ni hi, na luppha na puak sia, ih thukham taw ki nungngat hi, ci uh hi. 11 Ama in, Hong dam sakpa in ka luppha luakin lampai tu hong sawl hi, ci hi. 12 Hi bang ngamta a hong sawlpa sia akua ziam, ci in dongh uh hi. 13 Ahihang dam sakna a ngapa in, Jesu sia akua cisia a he bua hi, banghangziam cile tua munah mihonpi khat om a, tuate kawm panin Jesu ngel ku hi. 14 Tasia zawkciang Jesu in ama sia Biakinn sungah mu a, Hong ngai tan, tu in dam zo ni hi; tua ahiciang, mawna vawt tu kheal in, tua ahibale hi sangin a nasia zaw in thuak tha tu ni hi, ci hi. 15 Tua zawkciang pasalpa sia pai a, Jew biakna sung a thuneite munah, ama a dam sak sia, Jesu ahi hunlam son hi. 16 Tua ahikom, amate in Jesu sia vawtsia tu in kipan uh a, banghangziam cile hi ciidam sakna, Jesu in Sabbath ni in seam hi. 17 Jesu in amate tungah, Ka Pa sia a tawntung in na seam ahi bangma kei zongh ka sep kul hi, ci in zo hi. 18 Hi bangin a pau hu in, Jew thuneite in, Jesu sia thalup sawm seseam uh hi; Sabbath thukham bek paltan ngawl in, Pathian sia ama aituam ii Pa hi ci a tabangin ama le ama sia Pathian taw a za kikim sak hi, ci uh hi.

Tapa ii Thuneina

19 Tua ahikom Jesu in, A tatak in kong ci hi: Tapa in ama thu taw bangma vawt thei ngawl hi; a Pa ii a vawt a mu teng bekma vawt hi. Pa ii vawt teng sia Tapa zongh in vawt hi. 20 Pa in Tapa sia it ahikom ama ii vawt teng mama Tapa lak hi. Hite sangin a nasia zaw laite zongh, vawt in lak tu a, tasia ciangin lamdang na sa tek tu uh hi. 21 Pa in mithite phongh a, nuntakna a piak bangma in, Tapa in a piak nopte tungah nuntakna pia hi. 22 Pa in kuama tungah thukhen ngawl hi. Ama in Tapa tungah thukhen theina thu a cingin pia hi, 23 tua thu sia mihing theampo in, Pa a zatak bangma in, a zatak natu deina ahi hi. Tapa a zatak vawt ngawlte in, ama a sawl Pa zakta ngawl ahi hi. 24 A tatak in kong ci hi: ka kammal za a, kei hong sawlpa a umte in, tawntung nuntakna nei zo hi. Ama tungah thu kikhen ngawl tu a, thina kantan in nuntakna sungah a theng zo hi. 25 A tatak in kong ci hi: a hun hong tung tu a tu zongh in hong tutung zo hi a thi sate in, Pathian Tapa ii aw za tu a, taciangin a zate hong nungta tu hi. 26 Pa, ama mama sia nuntakna ii naak ahi bangma in, ama Tapa sia nuntakna ii naak suak sak zo hi. 27 Taciang ama Tapa ii tungah thukhen theina thu pia hi, banghangziam cile ama sia Mihing Tapa ahi hi. 28 Hi thu tungtaang ah lamdang sa heak vun; a hun hong thet tak ciangin, a thi sate theampo in ama aw za tu a, 29 thaankuul sung panin hong pusuak tu hi; na pha a seam ngeite sia tho in nungta tu a, siatna vawtte sia tho in mawna thukhenna thuak tu hi.

Jesu tungah Tetti Pangte

30 Keima aituam thuneina taw bangma ka vawt thei bua hi; Pathian hong hil bang bek in thu ka khen hi, tua ahikom ka thukhenna sia tang hi, banghangziam cile, keima dei bangin ka hanciam bua a, hong sawl pa dei bangin ka vawt hi. 31 Keima le keima tetti in ka kipang le, ka son thute maan hi, kici thei ngawl hi. 32 Ahihang kei taangin tetti hong pang a dang khat om a, taciangin kei huvau ama sonte maan hi, ci in ka he hi. 33 John sia na kamtaite na pai sakna uh pa hi a, taciang ama in thumaan son hi. 34 Mihingte ii tetti hong pan tu kul tuan ngawl hi; hi bang ka ci sia noma ii na suatak natu ka deina ahi hi. 35 John sia mei inn bang hi a, kuangin taang a, taciangin ama ii khuavak sia, tawmvei sungteng na nop sakpui uh hi. 36 Ahihang John ii tetti panna saangin, a lianzaw kei atu tetti khat ka nei hi: ka sep papo ka Pa ii sep tu hong piakte in, kei taangin, hong pau a, Pa hong sawl ahi hunlam lak hi. 37 Hong sawlpa Pa zongh in, kei atu tetti hong pang hi. No in ama aw na za ngei bua uh a, a meal zongh na mu ngei bua uh hi, 38 taciangin ama ii thu hong puakte zongh, na thin sungah na khol bua uh hi, banghangziam cile a ma ii hong puakpa sia na um bua uh hi. 39 Laithiangtho na sim uh hi, banghangziam cile tuate sungah tawntung nuntakna mu tu in, na ki um uh hi. Taciangin hi Laithiangtho mama in, keima ii thu son hi! 40 Hi napi nuntakna na nga natu in kei kungah nong pai nuam bua uh hi. 41 Kei sia mihingte ii pok tu a zong hi ngawl khi hi. 42 Ahihang no bangbang mihingte na hi uh ci sia kong he a, taciangin na thin sunguh ah Pathian itna na nei ngawl uh sia kong he hi. 43 Pa ii thuneina tengma kengin kong pai hangin nong saang bua uh hi; ahihang in khat po in ama ii thuneina taw hong pai le na saang tu uh hi. 44 No sia khat le khat kipok tu na uuk uh hi, ahihang ama bek Pathian ahi Pa ii tung panin pokna nga tu in, na hanciam bua uh hi; tua ahile bangbangin kei hong um thei tu nu ziam? 45 Ahihang Pa mai ah note maw hong pu sak tu sia, kei hi tu in hong um heak vun. Na lam et uh na muanmawk uh pa Moses sia note maw hong pu sak tatak tu pa ahi hi. 46 Moses na um tatak uh le kei sia nong up tu uh hi zo hi, banghangziam cile ama in keima thu at hi. 47 Ahihang ama at te um ngawl na hi uh nungsang, kei kammal bangbangin um thei tu nu ziam? ci in zo kik hi.

Jesu in Pasal Tul Nga Anvaak

6:1 Tua zawkciang, Jesu sia Galilee tuili (Tiberias Tuili zongh kici) kantan in pai hi. 2 Mi honpi khat in a nungzui hi, banghangziam cile ciina dam sakna taw na lamdang a lakte na mu uh hi. 3 Jesu sia nungzuite taw mualno khat tungah kaato in to hi. 4 Paisan Poai hun hong nai hi. 5 Jesu in a kiimkot a et ciangin, mi honpi khat ama kungah a zuan mu a, tua ahikom Philip munah, Hi mihingte theampo ih vaak natu in, koisung panin a kicing an lei thei tu hi ziam, ci hi. 6 (Hi bangin a ci sia Philip a ze-etna hi a, ama in a vawt tu sia he khol zo hi.) 7 Philip in, Mihing sim ii tawmno tek a neak tu bek zongh ngun dangka za nii vaal taw anluum lei kul tu hi, ci in zo hi. 8 A nungzuite sung pan a dang khat Simon Peter ii suapuipa Andrew in, 9 Hi sungah patangno khat om a, ama in mangtaang taw a kivawt anluum nga le ngasa nii nei hi. Ahihang tateng sia hi mihonte theampo atu in, kicing ngawl het tu hi, ci hi. 10 Mipite to sak vun, Jesu in ci hi. (Tua munah lopa tam om hi.) Tua ahikom mihingte to siat uh a, pasal tul nga bang pha uh hi. 11 Jesu in anluum la a, Pathian tungah lungdam ko in, a to mihingte sungah hawm hi. Ama in tabangma in ngasate zongh hawm a, amate in a du zaza ne uh hi. 12 Amate kham siat zawk uh ciang, a nungzuite munah A bek a kikhe laite tawm vun; tawm zongh pakvawt ba tawng, ci hi. 13 Tua ahikom amate in a khoptua uh ciangin, mangtaang taw vawt, mihonte neak anluum nga panin, a neak vaal uh khum sawm le khum nii nga uh hi. 14 Hi na lamdang lakna Jesu ii vawtte a mu uh ciangin, tua munah a om mihingte in, Hi sia leitung a hong pai tu Kamsangpa a ci sia hi takpi hi! ci uh hi. 15 Amate hong pai in zawthawk thu taw ama manin kumpi suak sak nuam ci in, Jesu in he ahikom ama nguakin, mual tungah pai hi.

Jesu Tui tungah Lampai

16 Nitak hun hong thet ciangin, Jesu nungzuite Galilee ah paisuk uh a, 17 ngunkuang sungah to in, tuili kantan in Capernaum ah pai kik uh hi. Khua hong zan a, Jesu amate kung hong zuan ngawl lai hi. 18 Tua hun laitak, vui nasia takin hong va in, tui kilok hi. 19 Nungzuite in tai thum tai li bang ngunkuang a haw zawkciang, Jesu tui tungah hong pai mu uh a, ngunkuang sang hong neak ciangin, amate lau uh hi. 20 Lau heak vun, keima khi hi, Jesu in ci hi. 21 Tasia ciangin amate in, lungdam takin Jesu sia ngunkuang tungah kaa sak uh a, hai ngawlin amate zot nopna mun tuivaal theng uh hi.

Mihingte in Jesu Zong

22 A zing ciangin, tuili langkhat a om mihonpite in, ngunkuang khat bek a om hunlam phawk kik uh hi. Jesu sia tua ngunkuang sungah, nungzuite taw pai khawm ngawl ahi hunlam le nungzuite amate nguak a, a pai hunlam phawk uh hi. 23 Topa ii lungdam a ko zawkciang mipite ii anluum a neakna mun, tuili vaal taw kinai na ah, Tiberias pan hong pai ngunkuang dangte a kinaina vaalbo ah hong theng hi. 24 Mihonte in Jesu sia tua munah om ngawl a, nungzuite zongh om ngawl ci in a mu uh ciangin, tua ngunkuangte tungah kaa in, ama zong tu in Capernaum khua ah pai uh hi.

Jesu Nuntakna Anluum

25 Mihingte in Jesu sia tuili langkhat ah a mu uh ciangin, ama munah, Syapa awng, hi sung bang hunin theng ni ziam, ci in dongh uh hi. 26 Jesu in, A tatak in kong ci ciang, kei nong zon uh sia, banghangziam cile ka na lamdang laknate na tel uh hang hi ngawlin, anluum na du uh za a na neak uh hang ahi hi. 27 A lal thei an atu in, naseam heak vun; tua sangin a ki khomsuan tawntung nuntakna an atu in seam zaw vun. Hisia in Mihing Tapa ii hong piak tu an ahi hi, banghangziam cile Pathian a Pa in, ama tungah lungkim tepteena koi zo hi, ci in zo hi. 28 Tua ahikom, amate in, Pathian deina bangin ka sep thei natu in bang vawt tu khu ziam, ci in dongh uh hi. 29 Jesu in, Pathian ii a dei nasep sia, ama ii a sawlpa na up tu ahi hi, ci in zo hi. 30 Ka mu thei tu uh le nang kong up thei natu in, bang na lamdang lakna na vawt tu ziam? Bang vawt tu ni ziam? 31 Laithiangtho in, Ama in vantung panin a neak tu uh anluum pia hi, a ci bangma in, ka pute in senneal ngam sungah manna an ne uh hi, ci in zo kik uh hi. 32 A tatak in ka ci hi: Moses ii hong piak sia vantung pan hi ngawl hi. Vantung pan a anluum tatak hong pia pa in ka Pa ahi hi. 33 Banghangziam cile, Pathian hong piak anluum in, hi leitung ah nuntakna a pia tu in, vantung pan hong paisuk pa ahi hi, Jesu in ci hi. 34 Amate in, Topa awng, hi anluum hong pia tawntung tan, ci uh hi. 35 Jesu in, Keima in, nuntakna anluum ka hi hi. Kei kungah hong pai pa in, a ngilkial ngei nawn ngawl tu hi; kei hong umte in, a dangko ngei nawn ngawl tu hi. 36 Kong son sa bangma, tu in kei nong mu zo uh a, ahizong nong um bua uh hi. 37 Ka pa hong piak mihing sim in kei kungah hong pai tu hi. Kei kung hong zuan peuma ka nilkeak batu hi, 38 banghangziam cile keima deina bangin a seam tu in vantung panin, hong pai ka hi bua a, hong sawlpa deina bang a seam tu in, hong pai ka hi hi. 39 Hong sawlpa ii deina sia, hong piak sa theampo sung pan khat zongh bosua ngawlin, ni tawpkhak ni ciangin, nuntakna sungah, ka phok kik siat natu ahi hi. 40 Banghangziam cile ka Pa deina sia, Tapa mu a, ama a umte theampo in tawntung nuntakna a nga natu ahi hi. Taciang ni tawpkhak bel ni ciangin, amate sia nuntakna sungah ka phongto tu hi, ci hi. 41 Keima in vantung pan hong paisuk anluum ka hi hi, a ci hu in, mihonte in ama sia phunsan siasua uh hi. 42 Tua ahikom, amate in Hi Jesu sia Joseph tapa hi kana ngawl ziam? A pa le a nu ih heak hi. Tua ahile banghangin, tu in vantung panin, kong paisuk hi, ci thei ziam? ci uh hi. 43 Jesu in, Noma sung tengah phun teaptup heak vun. 44 Kei hong sawlpa Pa in kei kungah hong puak bale, kuama kei kungah hong pai thei ngawl hi; ni tawpkhakbel ni ciang nuntak tawntungna sungah ka phongto tu hi. 45 Kamsangte in, Pathian in mihing sim a hil tu hi, ci in at zo hi. A kuama po Pa thu za a, a hete bek kei kungah hong pai hi. 46 Hisia in khat po in, Pa mu ngei hi, cinopna hi ngawl hi; Pathian kung panin, hong pai sia bek in, Pa mu ngei hi. 47 A tatak in kong ci hi: a umte in tawntung nuntakna nga hi. 48 Keima nuntakna anluum ka hi hi. 49 Na pute in senneal ngam sungah manna an ne uh hi, ahihang amate thi hi. 50 Ahihang vantung pan hong paisuk anluum sia nam tuam khat hi a, a ne theampo thi ngawl tu hi. 51 Keima in vantung pan hong pai a nungta anluum ka hi hi. Khat po in hi anluum a ne le nungta tawntung tu hi. Ama ka piak tu anluum in, leitung nuntak natu a, ka piak ka taksa ahi hi, ci hi. 52 Hi thu hangin, amate sungah thin uuk a, kinialna kipan hi. Bangbangin hi sia pa in, a taksa neak tu in, ei hong pia thei tu ziam? ci uh hi. 53 Jesu in amate munah, A tatak in kong ci hi: Mihing Tapa ii taksa na ne bua uh a, a chi na dawn bua uh le, na sungah nuntakna na nei batu uh hi. 54 A kuama po ka taksa ne a, ka chi a dawnte in, tawntung nuntakna nga a, ni tawp khakbel ni ciangin nuntakna sungah ka phongto tu hi. 55 Banghangziam cile ka taksa sia an tatak hi a, ka chi sia dawn tu tatak ahi hi. 56 Ka taksa ne a, ka chi a dawn papo in, kei sungah teang a, ama sungah ka teang hi. 57 A nungta Pathian in kei hong sawl a ama hu in, kei zongh ka nungta hi. Tasia bangma in, kei hong ne peuma in kei hu in nungta tu hi. 58 Tua ahikom hisia in, vantung pan hong paisuk anluum ahi hi. Na pute neak anluum taw kibang ngawl hi, amate in ne ahihang in thi hi. Hi anluum a nete in, a tawntung in nungta tu hi, ci hi. 59 Jesu in Capernaum khua synagogue ah hi teng pau in hil hi.

Tawntung Nuntakna Kammalte

60 A nungzuite tam ma in hi thu za uh a, Hi kihilna sia tel thei tu haksa mama hi. Akua in, saang zo thong tu ziam, ci uh hi. 61 Kuama ii son ngawl bul in, Jesu in amate ii phunna sia he ahikom, amate munah, Hi sia in, na thin uh hong kiam sak ahi ziam? 62 Tua le, sonteena, Mihing Tapa sia ama om maksakna munah a pai mu leute bang na ci tu uh ziam? 63 Nuntakna a pia sia Pathian ii Thaa ahi hi: mihing thahatna sia mannung mama ngawl hi. No tung a kammal ka paute sia, nuntakna a pia, Pathian ii Thaa hong tut ahi hi. 64 Ahihang no pawlkhat in um ngawl nu hi, ci hi. (Jesu in a kipat pan ma, akua teng in um ngawl tu a, akua in ama sia leeheak tu cisia a heak sa ahi hi.) 65 Taciangin ama in belap a, Ama atu, ahi thei tu in, Pa in vawt bale, kuama kei kungah hong pai thei ngawl tu hi, kong cisia, hisia hang mama ahi hi, ci hi. 66 Hisia hangin, Jesu nungzui tam mama heak kik uh a, ama taw tonkhawm nawn ngawl hi. 67 Tua ahiciang, ama in, nungzui sawm le niite munah, No zongh, nong nusia nuam uh ziam? ci in dongh hi. 68 Simon Peter in, Topa, akua kung a pai tu khu ziam? Tawntung nuntakna a pia kammalte nangma in na nei hi. 69 Taciangin nang in Pathian kung pan hong pai, Thiangtho Pa hi ci in kong he uh a, kong um uh hi, ci in zo hi. 70 Jesu in, No sawm le nii teng sia, keima kong teal hi kana ngawl nu ziam? Tua hi napi, no sungah khat sia doai khat ahi hi, ci hi. 71 Ama in Simon Iscariot ii tapa Judas huvau son ahi hi. Banghangziam cile Judas sia nungzui sawm le nii sungah khat ahihang in ama a leeheak tu pa ahi hi.

Jesu le A suapuipate

7:1 Tua zawkciang, Jesu sia Galilee ngam sungah khualhaw hi; ama in Judea ngam sungah khualhaw nuam ngawl hi, banghangziam cile, Jew thuneite in, tua sung ngamah ama thatlum nuam uh hi. 2 Buk Poai hun nai zo a, 3 tua ahikom Jesu suapuite in, Hi mun nusia in, na nungzuite in na vawt nate hong mu thei tu in, Judea ah pai tan. 4 Ngual heak tu a nuamte in, a nasep uh a sealcip bua uh hi. Hi bangte seam na hi ciang leitung bup in he sak lete pha hi! ci uh hi. 5 (A suapuite ngangawn in ama a um bua uh hi.) 6 Jesu in amate munah Kei atu in a hun hong tung ngawl lai hi. Hun khat papo sia, no atu in pha hi. 7 Leitung in note hong ensan thei ngawl tu hi, ahihang kei hong ensan hi, banghangziam cile, ama lampite pha ngawl hi, ci in ka son tawntung hi. 8 Poai ah noma pai tavun. Hi poai ah kei pai ngawl tu khi hi, banghangziam cile kei atu in, hun pha hong tung ngawl lai hi, ci hi. 9 Hi bang teng ci in Galilee ah taam thua hi.

Jesu Buk Poai ah

10 A suapuite poai siim tu in a pai zawkciang, Jesu zongh pai hi; ahihang a kilangh in pai ngawlin, paikuu hi. 11 Jew thuneite in, poai sungah ama zong uh a,Ama a koisung ah om ziam? ci in dongh uh hi. 12 Mihonte sungah ama huvau kihuau tek uh hi. Ama sia mihing pha hi, pawlkhat in ci hi. Hi ngawl hi, ama in mihingte theam hi, a dangte in ci uh hi. 13 Ahihang kuama in ama thu a langh takin a son ngam bua uh hi, banghangziam cile amate in Jew thuneite kiita uh hi. 14 Poai a lang bang a kiman zawkciang, Jesu in Biakinn ah pai in hilna nei hi. 15 Jew thuneite in lamdang sa mama uh a, Banghangin hisia pa in, sang ah sinna nei ngei ngawl napi hiza in, he ziam? ci uh hi. 16 Jesu in, Kei kong hil thu in keima aituam hilna hi ngawl a, hong sawlpa Pathian kung pan hong pai hi. 17 Pathian dei bang a ngamta nuamte in, Pathian kung panin hong pai thu ziam, tua ahibale keima aituam thuneina taw hil khi ziam, ci in he tu hi. 18 Ama aituam thuneina taw a paupa sia, ama atu, minthanna nga nuam a hanciam ahi hi. Ahihang a sawlpa atu in, minthanna a deisak sia thumaan a, ama sungah leeilot thu a om bua hi. 19 Moses in note Thukham hong pia hi ngawl ziam? Ahihang note kuama in Thukham na ni bua uh hi. Kei sia banghangin thalup hong sawm nu ziam? ci in zo kik hi. 20 Na sungah doai khat om hi! Kuama in nang hong thatlum nuamin hanciam na ziam? ci in mihonte in zo uh hi. 21 Jesu in, Na lamdang lakna khat kong vawt a, lamdang mama nasa uh hi. 22 Moses in na tapate ii vunteap at natu in thu hong pia hi. (tua nasep a pan sia in Moses hi ngawl a, na pute ahi hi) Tua ahikom Sabbath ni in patang khat ii vunteap na at uh hi. 23 Patang khat Sabbath ni in vunteap na at uh ciangin, Moses Thukham paltan kisa ngawl na hi uhle, Sabbath ni in mihing khat ka dam thiangtho sak hu in, banghangin kei tungah hong thin uuk nu ziam? 24 A puatham muna taw thukhen nate kheal vun, thumaan thutakte taw thu khen vun, ci in zo hi.

Ama Messiah ahi ziam?

25 Jerusalem a om mihing pawlkhat in, Thuneite ii thalup tu in a hanciam uh sia, hisia pa hi ngawl ziam? 26 En vun! Mihon mai ah a kilangh in thuson a, amate in pauna haamna nei ngawl hi! Ama sia Messiah hi ci in amate in tel tatak hi thei ziam? 27 Ahihang Messiah hong pai ciang ahile, ama sia koisung pan hong pai, ci in kuama in he ngawl tu hi. Hisia pa hong paina ih he tek hi, ci uh ih. 28 Jesu in Biakinn sungah a hil laitakin, awnging taw, Kei hong he takpi nu ziam, taciang kei koisung pan hong pai ci in hong he nu ziam? Keima aituam thuneina taw hong pai ngawl khi hi. Ahihang kei hong sawlpa ahile thumaan hi. Note in ama na he bua uh hi, 29 ahihang keima in ka he hi, banghangziam cile, ama kung panin, kong pai a, ama in hong sawl hi, ci hi. 30 Tasia ciangin amate in ama man tu in, hanciam ahihang kuama in ama tungah a khut a nga thei bua uh hi, banghangziam cile ama hun sia a tung balai hi. 31 Ahihang mihonte kung pan, mihing tam ma in ama thu um a, Messiah hong pai ciangin, hisia pa ii vawtte sangin, a nasia zaw na lamdang laknate, a vawt tu ziam, ci uh hi.

Jesu A Man tu in, Tavuan nei Mihing Kipai sak

32 Jesu huvau mihonte ii kihuauna uh a zaak uh ciang, Phariseete le thiampite in, Jesu man tu in, biakinn cingte pai sak uh hi. 33 Jesu in, No taw tawmvei sung kong omkhawm lai tu a, tua zawkciang, hong sawlpa kungah ka pai tu hi. 34 Nong zong tu a, ahihang nong mu batu hi, banghangziam cile, kei om natu mun no na pai thei batu uh hi, ci hi. 35 Jew thuneite in, amate le amate kikum uh a, Eite ii mu ngawl tu in, ama koi sungah pai sawm ziam? Ih mihingte omna Greek khuapite ah pai in, Greek mite hil tu hi tu ziam? 36 Eite in ama zong tu a, ama mu ngawl tu, ama omna ah, pai thei ngawl tu hong ci sia, bang a ci nopna hi tu ziam? ci uh hi.

Nuntakna A Pia Luituite

37 Poai sungah ni thupibel ni le a khakbel ni in, Jesu dingto in awnging tak taw, A kuama po a dangko te, kei kungah hong pai in dawn tahen. 38 Laithiangtho ii ci bangma in, a kuama po, kei hong umte in, ama sung pan nuntakna a pia luitui hong luang tu hi, ci hi. 39 Jesu in hi bang a pau sia ama a umte ii saan tu, Thaa thu son ahi hi. Tua hun laitakin Thaa kipia ngawllai hi, banghangziam cile Jesu sia minthanna sungah kiphong to ngawl lai hi.

Mihingte sungah Kikhenna

40 Mipite sung pan, mihing pawlkhat in, hi thu a son za a, Hisia pa in Kamsangpa tatak sia hi, ci uh hi. 41 Pawlkhatte in, Ama sia Messiah hi! ci uh hi. Ahihang a dangte in, Messiah sia Galilee pan hong pai ngawl tu hi. 42 Laithiangtho in, Messiah sia David Kumpipa suan hi tu a, David tenna ahi Bethlehem ah suak tu hi, ci hi, ci uh hi. 43 Tua ahikom Jesu hangin, mihonte sungah ngaisut kisik ngawlna om hi. 44 Pawlkhat in Jesu sia man nuam ahihang kuama in ama a thutha bua hi.

Jew Thuneite ii Up ngawlzia

45 Tavuan nei mihingte a heak kik uhciang, thiampi liante le Phariseete in, Banghangin hong paipui ngawl nu ziam, ci in dongh uh hi. 46 Tavuan nei mihingte in, Hisia pa bangin, kuama kampau ngei om ngawl hi, ci uh hi. 47 No zongh theam thuak na hi uh ziam? ci in Phariseete in dongh hi. 48 Thuneite khat ahibale Phariseete khat in, ama sia um hi ci in na za ngei uh ziam? 49 Hi mihonte in Moses Thukham he ngawl a, tua ahikom amate sia Pathian haamsiatna nuai a om hi! ci uh hi. 50 Tua munah a om Phariseete khat sia Jesu taw kimu tu a, a pai ngeipa Nicodemus ahi hi. Ama in a dangte munah, 51 Ih thukham bangin ci leang, mihing khat sia bang ngamtatna teng nei ci in ih zaak, ih kat mateng in, maw sak natu ngeina om ngawl hi, ci hi. 52 Amate in, Pha hi. Nang zongh Galilee pan ma na hi ziam? Laithiangtho pha takin sim lete, Galilee pan kamsang hong pai ngei ngawl hi, ci in na he tu hi, ci uh hi.

Nupa Palngul mawna A vawt Numei khat Kimatna

8:1 Tua zawkciang ngual theampo cia siat uh a, ahihang Jesu in, Olive Mualtung ah pai hi. 2 A zingciang zing tuungin ama Biakinn ah pai kik hi. Mihing theampo ama ii kiim ah hong kikhawmtua uh a, taciangin ama to in amate tungah hilna nei hi. 3 Thukham hil syate le Phariseete in, nupa palngul mawna a vawt laitak a mat uh numei khat hong paipui uh a, amate theampo ii mai ah, ding sak hi. 4 Amate in Jesu munah, Syapa awng, hi numei nu sia nupa palngul mawna a vawt laitakin kiman hi. 5 Ih Thukham sungah Moses in tabang numei khat sia suangtum taw denlup natu in thupia hi. Tu in nang in bang na ci tu ziam? ci uh hi. 6 Amate in hi bangin a ci uh sia Jesu a mawsiat thei natu in aitaa nuam ahi uh hi. Ahihang ama kunin, a khutme taw lei ah lai at hi. 7 Amate in tabangin thu a dok ciangin, ama hong dingmaam a, amate tungah, Note sungah akua po ahizong, mawna a vawt ngei ngawl het sia in, deang masa tahen, ci hi. 8 Tua zawkciang, kunsuk kikin, lei ah lai at kik hi, 9 Hi thu a zaak ciangin, amate in nusia siat uh hi. Khanghaam teng masa in, khat zawkciang khat cia uh a, a kungah a ding numei le Jesu bek taang lai hi. 10 Ama in dingmam in, numeinu munah, Koi sung omsiat ziam? Nang hong mawsak tu kuama om ngawl ziam, ci hi. 11 Kuama om nawn ngawl hi, Topa awng, ci in ama in zo hi. Tua ahile pha hi, kei zongh in, kong maw sak bua hi. Pai tan, ahizong mawna vawt nawn heak in, Jesu in ci hi.

Leitung Khuavak ahi Jesu

12 Jesu in Phariseete tungah ci kik hi, Keima in leitung khuavak ka hi hi, ci hi. Kei hong zuite peuma in nuntakna khuavak nei tu a, khuazing sungah a vak ngei batu hi, ci hi. 13 Phariseete in, Tu in nangma le nangma tetti kipang hi bek ni hi; na sonte maan hi ci natu om ngawl hi, ci uh hi. 14 Jesu in, Hi ngawl hi, keima le keima tetti in kipang hi leng zong, ka thusonte maan hi, banghangziam cile koisung pan hong pai a, koisung zuan tu khi ziam, ci in ka kihe hi. Koisung pan hong pai a, koisung zuan tu khi ziam ci in note in nong he bua uh hi. 15 Note in mihing pianzia taw bek thu na khen uh hi; kei in kuama tungah thu ka khen bua hi. 16 Ahihang tabangin vawt ka leng zong, ka thukhenna sia maan tu hi, banghangziam cile hisia sungah kei nguak hi ngawl khi hi, kei hong sawlpa Pa in kei sangah tetti hong pang tu hi. 17 Na thukham sungah tetti nii in a thukim le amate son sia maan hi, ci in ki at hi. 18 Keima le keima tetti in ka kipang a, hong sawlpa Pa zongh in kei atu in, hong pang hi, ci hi. 19 Na pa koisung om ziam? ci in amate in dongh uh hi. Jesu in, Keima ahizong, ka Pa ahizong, na he bua uh hi. Keima hong he leute ka Pa zongh he tu nu hi, ci in zo hi. 20 Jesu in hi thute theampo, Biakinn sung sumpi khiakna thingkuang koina inndoi sungah hil hi. Taciangin ama sia kuama in a man bua uh hi, banghangziam cile ama hun a tung balai hi.

Ka Paina ah Note hong Pai thei ngawl tu

21 Taciang Jesu in, Kei ka pai tu a; nong zong tu uh hi, ahizong na mawna uh sungah na thi tu uh hi. Ka pai natu munah, na pai thei batu uh hi, ci hi. 22 Tua ahikom Jew thuneite in, Ama paina ah ei pai thei ngawl tu hi ci hi. Ama le ama kithatlum tu a cinopna ziam, ci uh hi. 23 Note sia hi leitung, hi mun a nuai sang ii neisa na hi uh hi, ahihang kei sia tungsang pan hong pai ka hi hi. No sia hi leitung pan na hi uh a, ahihang kei sia hi leitung pan ka hi bua hi. 24 Na mawna sungah thi tu nu hi, kong ci sia tua hang ahi hi. Taciangin, Kei sia keima ka hi hi, ci in nong um bua uh le, na mawna sungah na thi tu uh hi, ci in Jesu in zo hi. 25 Nang akua ni ziam, ci in amate in dongh uh hi. Jesu in, A kipat pan ma a, kong son sa sia ka hi hi. 26 No ii tungtaang ah ka pau tu tam mama om a, kong maw sak natu tam mama om hi. Ahihang hong sawlpa sia thumaan a, taciangin, ama tung pan, ka zaak teng bek, leitung ah ka son hi, ci in zo hi. 27 Jesu in a Pa huvau sason ahi hunlam amate in a tel bua uh hi. 28 Tua ahikom ama in amate tungah, Mihing Tapa na lapto uh ciangin, Kei sia Keima ka hi hunlam na he tu uh hi; tasia ciangin, keima aituam thuneina taw bangma vawt ngawlin, Pa hong sawl bang bekin, pau ka hi sia nong he tu uh hi. 29 Taciangin kei hong sawlpa in kei hong ompui hi; kei nguak hong nusia bua hi. Banghangziam cile, ama dik sakte ka vawt tawntung hi, ci hi. 30 Jesu ii hi thute a son teng a za mihing tam mama in ama um uh hi.

Mihing A Suaktate le Silate

31 Tua ahikom Jesu in, ama a umte munah, Ka hilnate na ni uh le, ka nungzui maan tatakte na hi uh hi; 32 thumaanna na he tu a, tua thumaanna in hong suakta sak tu hi, ci hi. 33 Amate in, Ko sia Abraham suante hi a, kuama ii sila hi ngei ngawl khu hi. Na suakta tu uh hi, na ci sia bang na ci nopna ziam, ci in zo hi. 34 Jesu in, A tatak in kong ci ciang, a kuama po mawna a vawt sia in, mawna ii sila ahi hi. 35 Sila khat sia bangkua khat ii neisa hi tawntung ngawl hi, ahihang tapa khat ahile bangkua khat ii neisa hi top hi. 36 Tapa in hong suakta sak le na suakta takpi tu uh hi, 37 Abraham suante na hi uh sia kong he hi. Tua hi ka sap, kei hong thatlum tu in, hanciam nu hi, banghangziam cile ka hilna na saang thei bua uh hi. 38 Kei sia ka Pa ii hong lak bang teng ka pau a, no sia na pa uh hong sawlteng na vawt uh hi, ci hi. 39 Amate in, Ko ka pa uh sia Abraham hi, ci in zo uh hi. Jesu in, Abraham ii tate hi takpi leute, ama ii vawt teng ma vawt tu nu hi. 40 Pathian tung pan a ka zaak thumaan teng ma son bek napi, hong thatlum nuamin, hanciam nu hi. Abraham sia hi bangin ngamta ngawl hi! 41 Note in, na pa sep teng naseam uh hi, ci in zo kik hi. Pathian bekma, kote ii khat bek ka nei ka Pa uh hi a, taciangin ko sia ama tate tatak ka hi uh hi, ci in amate in zo uh hi. 42 Jesu in, Pathian sia na Pa tatak uh ahile kei nong it natu ahi hi, banghangziam cile, Pathian kung panin, kong pai a, tu in hi munah ka om hi. Keima aituam thuneina taw hong pai ka hi bua a, ama ii hong sawl ahi hi. Ka son teng banghangin tel ngawl nu ziam? Banghangziam cile ka thu hong puakte, na ngai zawk ngawl uh hang ahi hi. 44 No sia na pa uh doaimangpa tate na hi uh a, taciangin na pa uh deina bek na zui nuam uh hi. A kipatcil pan kipan, ama sia mihing thatpa hi a, thumaan sangah a pang ngei bua hi, banghangziam cile, ama sungah thumaan a om bua hi. Ama in leeilot thu a son ciangin, ama pianzia bangin pau ahi hi, banghangziam cile, ama sia leeilot pa hi a, leeilotna ii a pa ahi hi. 45 Ahihang kei in thumaan kong son hi, tua hu in nong um bua uh hi. 46 No sungah akua in kei sia mawnei hi ci in hong lak thei tu nu ziam? Thumaan a son ka hi nale, banghangin hong um ngawl nu ziam? 47 Pathian kung pan hong pai pa in, Pathian kammal ngai hi. Ahihang no sia Pathian kung pan na hi bua uh a, tua hu in hong ngai nuam ngawl nu hi, ci hi.

Jesu le Abraham

48 Amate in Jesu munah, Nang sia Samaria mi hi a, doai vei ni hi kong ci uh sia, maan hi ngawl khu ziam, ci uh hi. 49 Jesu in, Doai vei ngawl khi hi, ka Pa zongh ka upat hi, ahihang note in kei sia nong upat bua uh hi. 50 Keima atu in minphatna ka zong bua hi. Ahihang tabangin a zong, kei hong panpui, thukhen khat om hi. 51 A tatakin kong ci hi: a kuama po ka hilna a nite sia, a thi ngei batu hi, ci in zo hi. 52 Amate in, Tu in nang sia doai vei na hi hunlam kong telcian uh hi! Abraham thi a, kamsangte zongh thi hi, tua hi napi na hilna a nite thi ngel tu hi, ci ni hi. 53 Ih Pu Abraham sia thi zo hi; Abraham sangin lianzaw khi hi ci nuam ngawl buang hi ngawl ni ziam? Taciangin kamsangte zongh thi zo hi. Nang sia akua kisa ni ziam, ci uh hi. 54 Jesu in, Keima le keima ki thupi sak tu hi leng, tua ki thupi sakna sia, bangma manh nei ngawl tu hi. Kei hong thupi sak sia in ka Pa hi a, ka Pathian uh hi, na ci sia pa ma ahi hi. 55 No sia ama na he ngei bua uh hi, ahihang kei in ka he hi. Ama he ngawl khi hi, ci tu hi leng, noma bangma in a leeilot ka hi tu hi. Ahihang ama sia ka he takpi a, taciangin ama ii thu ka ni hi. 56 Na pa uh Abraham in kong pai tu hun a mu tu hu in, lungdam hi; ama in mu zo a, a lungdam hi, ci uh hi. 57 Amate in ama munah, Nang sia kum sawm nga zongh pha ngawl lai ni hi Abraham sia mu zo ni ziam? ci uh hi. 58 A tatakin kong ci hi, Abraham pian ma in, Keima, ka om zo hi, ci in Jesu in zo kik hi. 59 Tasia ciangin, amate in, a den natu in suangtum zam ahihang Jesu bu a, Biakinn nusia hi.

Jesu in Mittaw sa a Suak khat Dam sak

9:1 Jesu in lam a papai laitakin, mittaw sa a, a suak, pasal khat mu hi. 2 A nungzuite in, Syapa awng, akua mawna hangin, ama sia mittaw sa a suak sak ziam? Ama khialna hang ziam maw, a nu a pate khialna hang hi tu ziam, ci in dongh uh hi. 3 Ama mawna hang ahizong, a nu a pa mawna hang ahizong, mittaw hi ngawl hi. Pathian vaangletna ii nasepna ama sungah a kimu natu in a mittaw hi. 4 Sun hun laiteng in kei hong sawlpa na ih seam tu hi; zan hong theng le kuama in naseam thei ngawl hi. 5 Leitung ah ka om laiteng in, leitung atu in khuavak ka hi hi, ci hi. 6 Hi bangin a ci zawkciang, Jesu in lei ah cilphii a, ciltee taw buan a vawt zawkciang, ama in, mittawpa mit noi sak a, 7 taciang, Pai tan a, Shiloam Tuicing ah na mai phiat tan, ci hi. (Siloam cisia Sawl a ci nopna hi). Tabangin mittawpa pai in, a mai a phia ciang, khuamu thei a, hong heak kik hi. 8 Tasia ciangin a innpaamte le khutdaw ngenin a omlai a mu ngeite in, Hisia pa khutdaw ngen in a to bul sia hi ngawl ziam? ci uh hi. 9 Khat in, Ama hi peu hi, ci hi, a dangte in Ama hi ngawl hi; a kibanpui khat hi tu hi, ci uh hi. Tua ahikom pasalpa in, Keima in tasia pa ka hi hi, ci hi. 10 Tu in khua na mu thei sia bangbangziam? ci in dongh uh hi. 11 Jesu a kici pa in buan tawm vawt a, ka mitte hong noi sak zawkciang, Siloam ah na maiphiat tan, hong ci hi. Tua ahikom, pai a, ka mai ka phia po ciangin, ka mu thei hi, ci in zo hi. 12 Ama koisung om ziam, ci in dongh uh hi. He ngawl khi hi, ci hi.

Phariseete in A Damna Thu kan

13 Tua zawkciang amate in a mittaw ngeipa sia, Phariseete kungah paipui uh hi. 14 Jesu in buan vawt a mittawpa a dam sak ni sia Sabbath ni ahi hi. 15 Tasia ciang Phariseete in, a mit a kidam sakna thu, pasalpa munah dongh kik uh hi. Ama in buan taw ka mitte hong noi sak hi; ka mai ka phiat a, tu in khua ka mu thei hi, ci in ama in zo hi. 16 Phariseete pawlkhat in, Hi bang a vawt, mihing in, Pathian kung pan hi thei ngawl tu hi, banghangziam cile ama in Sabbath Thukham ni ngawl hi, ci uh hi. A dangte in, Bangbangin mawnei mi khat in, hi bang na lamdang lakna vawt thei tu ziam, ci uh hi. Taciangin amate sungah a thu uh kisi ngawlin, pawl kikhen uh hi. 17 Tua ahikom, Phariseete in pasalpa sia khatvei ma dongh kik uh hi. Ama in na khuamu ngawlna pan hong dam sak hi, ci ni hi ama huvau bangbangin na ngaisun ziam? Ama sia kamsang khat hi, ci in pasalpa in zo kik hi. 18 Jew thuneite in, bang po ahizong hisia pa sia, mittaw a, khuamu thei hi, ci thu sia um nuam ngawlin, a pate a nute samin, a dok phot ngawlin peuma a um bua uh a, 19 taciangin,Hisia na tapa ahi ziam? Ama sia mittaw sa in suak hi ci nu hi; tua ahile bangbangin tu in khua mu thei ziam? ci in dongh uh hi. 20 A pa le a nu in Ama sia ka tapa uh hi a, taciangin mittaw sa in suak ci sia he khu hi. 21 Ahihang bangbangin tu in khua mu thei ziam, ci in he ngawl khu hi, akua in dam sak ziam ci zongh ka he bua uh hi. Ama dongh vun; ama sia a khan zongh haam ngawp zo hi, ama atu, ama in hong zo thei hi! ci uh hi. 22 Jew biakna thuneite in, lungkimna khat a koina ah, a kuama po Jesu sia Messiah hi, ci in a um peuma, synagogue sung pan kinot tu hi, ci ahikom tua mittawpa ii nu le pa in, Jew biakna thuneite a kiitak hu in, hi bangin ci ahi hi. 23 Tua ahikom, Ama sia a khan haam ngawp zo hi, ama dongh vun! a nu le a pa in ci hi. 24 Mittaw sa suakpa sia, a nii veina sam kik uh a, ama tungah, Thumaan ka son tu hi, ci in Pathian mai ah kiciam in, nang hong dam sak pa sia, mimaw hi ci in he khu hi, ci uh hi. 25 Ama sia mimaw ahile ahi ngawl he ngawl khi hi. Ka heak thu khat sia, ka mittaw ngei a, tu in khua ka mu hi, ci in zo kik hi. 26 Ama in bang hong law ziam? Na khua mu ngawlna pan, bangbangin hong dam sak ziam? ci in dongh uh hi. 27 Kong son zo a, noma in nong ngai bua uh hi, a banghangin za kikik nuam nu ziam? No zongh ama nungzuite suak nuam nu ziam? ci in ama in zo hi. 28 Amate in, ama selno a, Tasia pa nungzui sia nangma ni hi; ko sia Moses ii nungzuite khu hi. 29 Pathian in Moses paupui hi, ci in he khu hi; ahizong ziasia pa ahile koisung pan hong pai ziam, ci in heak pui beak ngawl khu hi! ci uh hi. 30 Pasalpa in, Bangza in a lamdang thu ziam! Ama koisung pan hong pai ziam ci in he ngawl nu hi, ahihang ama in kei sia ka khua mu ngawlna pan hong dam sak zo hi. 31 Pathian in mimawte ii ngetna ngai ngawl hi, ci in he khi hi; ama in ama zakta a, a sawlna bang a ngamtate ngetna bek ngai hi. 32 Simlei pian pan kipan, mittaw sa in a suak khat sia damna pia hi ci in kuama ii thu kiza ngei ngawl hi. 33 Hisia pa sia Pathian kung pan hong pai hi bale, bangma vawt thei ngawl tu hi, ci hi. 34 Amate in, Nang sia mawna sungah suak a, mawna sung ma a khangto ni hi ko hong hil tu in hanciam ni ziam? ci in zo uh hi. Taciangin amate in ama sia synagogue panin not uh hi.

Thaa Thu ah Mittawna

35 Jesu in bang thu teng piang ci in a zaak zawkciang, pasalpa mu a, Mihing Tapa na um ziam, ci in dongh hi. 36 Ka up thei natu in, ama kua ziam? Topa awng hongs on tan, ci in zo hi. 37 Jesu in, Ama sia mu zo ni hi, ama in tu in nangma taw a kipaupui sia ahi hi, ci hi. 38 Ka um hi, Topa awng! ci in Jesu mai ah a khupdin hi. 39 Jesu in, Mittawte in khua a mu natu le, khuamute in, a mittaw a sua natu in, thukhen tu in hi leitung ah kong pai hi, ci hi. 40 Ama kung a om Pharisee mi pawlkhat in, hi bang a pau za a, Ko zongh mittaw hi hong ci nuam na hi ziam? ci in dongh uh hi. 41 Jesu in, Mittaw hizaw leute, maw ngawl tu nu hi; ahihang khuamu thei khu hi, ci na hi uh komin, a maw nginge hi lai nu hi, ci hi.

Tuucingpa Thusontee na

10:1 Jesu in, A tatak in kong ci hi: tuukhawk sungah tum tu in, kongbiang pan tum ngawlin, leidang pan kaato a, a tum sa sia nguta le ngualsuam nuamte ahi hi. 2 Kongbiang pan a, a tum sia in, tuucingpa ahi hi. 3 Kongkha cingpa in ama atu kongkha hon sak hi; a tuute sia a min taw a sam ciangin a tuute in ama aw a za uh hi, taciang ama in, a tuute lampui in pusua pui hi. 4 A tuute a pusua sak zawkciang, ama in a mai ah pai in, tuute in a nung zui uh hi, banghangziam cile a tuute in, a aw tel uh hi. 5 A tuute in ngualdang khat zui ngawl tu uh hi; tabang mihing dang khat ii kung panin a tuute sia taikeak zaw tu hi, banghangziam cile tuute in tua pa aw a tel bua uh hi, ci hi. 6 Jesu in hi thu sonteena sia son ahihang, amate in bang ci nuam ziam, a tel zo bua uh hi.

Tuucing Pha Jesu

7 Tua ahikom Jesu in hi bangin ci kik hi. A tatak in kong ci hi: Kei sia tuute ii kongkha ka hi hi. 8 Kei mai a hong pai sa theampo sia ngutate le ngualsuamte ahi uh hi, ahihang tuute in, amate aw a ngai bua uh hi. 9 Keima in kongkha ka hi hi. A kuama po kei hong tawn in, a tumte sia kingum tu hi; ama sia sungtang in, pusuak tu a, nganthana mun mu tu hi. 10 Ngutapa ahile a ngu tu, a that tu le a lalcip sak tu bekma in, hong pai hi. Kei kong paina sia, nuntakna na nga natu uh le a kicing nuntakna na nga natu uh ahi hi. 11 Keima in tuucing pha ka hi hi, tuucingpha in, a tuute atu in, a nuntakna pia ngam hi. 12 Tuucingpa ahi ngawl, tuu nei ngawl a kicial tawm pa in, ngiapui hong pai a mu ciangin, a tuute nusia in taisan hi; tua ahikom ngiapui in a tuute zap sak a, kithethaang sak hi. 13 A kicial tawm pa sia banghangin tai ziam, ama sia a kicialtawm hi bek a, tuute a awlmawk bua hi. 14 -15 Keima in tuucing pha ka hi hi. Pa in kei hong heak bangma in kei zongh in Pa ka he hi, tasia bangma in ka tuute ka he a, amate in kei hong he uh hi. Amate atu in ka nuntakna ka pia ngam hi. 16 Hi tuukhawk sung a om ngawl keima tuu a dang zongh omlai hi. Tuate zongh ka paipui tu a, amate in ka aw hong ngai tu a, tuucingpa khat ii nuai ah tuuhon khat suak tu uh hi. 17 Ka nuntakna ka nga kik natu in, pia ngam ka hikomin, Pa in kei hong it hi. 18 Kuama in ka kung pan, ka nuntakna hong laak sak bua hi. Keima thu in ka pia a, ka piak natu le ka laak kik natu sia keima thu ahi hi. Hi sia in ka Pa ii ka vawt tu a, hong thupiak ahi hi, ci hi. 19 Taciang hi kammalte hu in, mihingte sungah ngaisut kisik ngawlna piang leleau hi. 20 Amate sung pan, mihing tam mama in, Ama doaivei hi! Ama a thin am hi! Banghangin a thuson ngangai nu ziam? ci uh hi. 21 Ahihang a dangte in, Doaivei mihing khat in hi bangin thuson thei ngawl hi. Banghang, doai khat in mittawte khua mu kik sak thei tu ziam, ci uh hi.

Jesu Kisaang ngawl

22 Phalbi hi a, Biakinn Aapna Poai Jerusalem ah kivawt hi. 23 Jesu sia Biakinn huang sung Solomon Mailim nuai ah vavak in a om laitakin, 24 mihingte sia a kiim ah hong kikhawm uh a, amate in, Bangtan vei thinngim hong pia nuam ni ziam? A thiangtho takin thumaan hong son tan. Nang sia Messiah na hi ziam, ci uh hi. 25 Jesu in zo kik a, Hong son zo khi hi, ahihang kei hong um nuam ngawl nu hi. Ka Pa thuneina taw ka septe in keima luangin pau hi; 26 ahihang nong um bua uh hi. Banghangziam cile note sia ka tuute na hi bua uh hi, 27 Ka tuute in ka aw hong ngai hi; amate ka he a, amate in ka nung hong zui uh hi. 28 Amate tawntung nuntakna ka pia a, taciangin amate sia a thi thei nawn batu hi. Kuama in ka kung pan amate hong sut zo batu hi. 29 Ka Pa hong piak sia in na theampo sangin thupi zaw a, kuama in ka Pa ii kepcingna sung panin a sut zo batu hi. 30 Pa le kei sia khat ka hi uh hi, ci hi. 31 Taciang mihingte in suangtum zam in deang tu in kipan uh hi. 32 Ka Pa ii sep tu a hong piakna pha tam mama noma mai ah kong seam zo hi. Tuate sung pan koi sia ka sep hu in, suang tum taw den hong sawm nu ziam? Jesu in ci hi. 33 Amate in zo kik a, Na pha khat papo nasep hu in, hong deang nuam hingawl khu hi. Ahihang Pathian min na dai sak hu in hong deang nuam khu hi! Nang sia mihing ma hi napi nangma le nangma Pathian kisuak sak nuam a, na hanciam hu in hong deang nuam khu hi, ci uh hi. 34 Na Thukham sungah ki at a, Pathian in no sia pathiante nu hi, ci hi. 35 Laithiangtho ii ci peuma a tawntung in maan hi, ci in ih he hi. Taciang Pathian in thu a piak, tua mite sia, pathiante ci hi. 36 Kei ka hile Pa in hong teal a, leitung ah hong pai sak hi. Tua ahile, Pathian Tapa kahi hi, ka ci ciangin, bangbangin Pathian min dai sak hi hong ci thei nu ziam? 37 Pa in vawt a hong oaite vawt ngawl kahile, tasia ciangin hong um heak vun. 38 Ahihang tuate ma kavawt le, kei nong um bua uh zong, Pa sia kei sung om a, kei sia Pa sungah om kahina thu na up natu in, ka septe beak na up tu uh ahi hi, ci in Jesu in zo hi. 39 Khat vei ma amate in Jesu sia man tu in hanciam ahihang, amate khut taw kipeal hi. 40 Jesu in, tua zawkciang, Jordan ngun kantan in John ii baptize na munah pai kikin, tua munah taam hi. 41 Mihing tam mama ama kungah hong pai uh hi. Amate in, John in na lamdang lakna bangma vawt nei ngawl hi. Ahihang hisia pa thu sia ama son theampo maan hi, ci uh hi. 42 Taciang in, tua munah a om mihing tam mama in ama um uh hi.

Lazarus Thina

11:1 Bethany ah a teang Lazarus a kici pa a ciina hi. Tua Bethany sia Mary le a suapuinu Martha ii tenna khua ahi hi. 2 (Hi Mary sia Topa ii peang tungah sathau namtui buak a, a sam taw a nawl sia nu ahi hi. A ciina Lazarus sia ama ii suapuipa ahi hi.) 3 Unau numeite nii in, Jesu tungah za sak a, Topa awng, na it na lawmpa sia a ciina hi, ci uh hi. 4 Jesu in a zaak ciangin, Hi natna sia Lazarus ii thina taw tawp ngawl tu hi; hi thu in Pathian minthan natu in piang zo hi. Taciang, Pathian Tapa ii minthanna a nga natu ahi hi, ci hi. 5 Jesu in Martha, a suapuinu le Lazarus it hi. 6 Hi napi Lazarus ii natna thu a zaak zawk in, tua munah ni nii taam lai hi. 7 Tua zawkciang a nungzuite munah, Judea ngamah pai kik tawng, ci hi. 8 A nungzuite in, Syapa awng, tu nung hiat ma in, tua munah mihingte in, suangtum taw den hong sawm zo hi kasap, pai kik sawm lai ni ziam? ci uh hi. 9 Jesu in, Ni khat sungin, nai sawm le nai nii om hi kana ngawl ziam? Tua ahikom, a kuama po sun tangin, a vak sia in lutu ngawl tu hi, banghangziam cile ama in hi leitung khuavak mu hi. 10 Ahihang ama in zan in a vak le lutu tu hi, banghangziam cile ama in khuavak nei ngawl hi, ci hi. 11 Jesu in hi teng ci a, tua zawkciang, Ih lawmpa Lazarus mutthip hi, ahihang pai in ka phong tu hi, ci in belap hi. 12 Nungzuite in, Ama mutthip ahile, Topa awng, a ciidam tu hi, ci uh hi. 13 Jesu in, Lazarus thi zo hi ci nuam ahihang amate in, mut thathongna thu son sa uh hi. 14 Tua ahikom, Jesu in, thiang takin, Lazarus thi zo hi, 15 ahihang, no atu ka ngaisut ciang, na up thei natu in, ama taw ka omkhop ngawl sia ka lungdam hi, ama kungah ih pai tu hi, ci hi. 16 Thomas (A peang a kici) in, nungzui pui dangte munah, Syapa taw paikhawm in, ama taw thikhawm tek tawng! ci hi.

Thawkikna le Nuntakna ahi Jesu

17 Jesu hong thet ciang, Lazarus sia a kivui zawk ni li pha zo, ci in he hi. 18 Bethany sia Jerusalem panin tai nii a pha zo bua hi. 19 Taciangin, Judea mi tam mama sia Martha le Mary taw kimu in, a suapuipa ii thi hu in heneam tu in pai uh hi. 20 Martha in Jesu hong pai hi ci in a zaak ciang, ama muak tu in pusuak hi. Mary ahile inn sungah om hi. 21 Martha in Jesu munah, Topa awng, hi sungah hong om hile te, ka suapuipa thi ngawl tu hi, ci hi. 22 Ahizong tu mama zongin, Pathian tungah na nget papo hong pia tu, ci in ka he hi, ci hi. 23 Na suapuipa sia nuntakna sungah tho tu hi, Jesu in ci hi. 24 Ni tawpkhak ni ciang, ama sia tho kik tu hi, ci in ka he hi, Martha in ci hi. 25 Jesu in, Keima in thawkikna le nuntakna ka hi hi. Kei hong um peuma a thi zongin, a nungta tu hi; 26 nungta a, kei hong um peuma a thi ngei batu hi. Hi thu na um ziam, ci hi. 27 Ama in, Um khi hi, Topa awng! Leitung ah hong pai tu a kici, Pathian Tapa Messiah na hi sia hong um khi hi, ci hi.

Jesu Kap

28 Martha sia hi teng a ci zawkciang heak kik in, a suapuinu Mary sam tuam hi. Syapa hi sungah om hi, ama in nang hong kan hi, ci in son hi. 29 Mary in hi thu a zaak ciang, dingto in ama taw kisi tu in, manlang takin pai hi. 30 (Jesu sia khuano sung hong theng ngawl lai a, Martha taw a kimuna munah omlai hi.) 31 Mary taw innsung a om mihingte in, ama heneam a, a om uh laitak, ama dingin, manlang tak pusuak a mu uh ciangin, zui uh hi. Thaan ah a kap tu in pai tu hi vak ci in ngaisun uh hi. 32 Jesu omna ah Mary theng hi. Ama a mu po ciangin, a peang ah bokin, Topa awng, hi sungah hong om hile te ka suapuipa sia thi ngawl tu hi! ci hi. 33 Jesu in ama a kakap mu a, ama taw a omkhawm mihingte zongh, kakap in a om mu si hi. A thin hong suu a, nasia takin khuangai hi. 34 Koisung ah phum nu ziam? ci in dongh hi. Topa awng, hong pai in hong en tan, amate in ci uh hi. 35 Jesu kap hi. 36 Mihingte in, En vun, bangza in ama it ziam! ci uh hi. 37 Ahihang amate sung pan pawlkhat in, Mittawpa zongh khuamu sak hi ngawl ziam? Lazarus sia a thi ngawl natu in vawt thei ngawl ziam? ci uh hi.

Lazarus Nungta sak

38 Jesu sia khatvei ma nasia takin, hong khuangai kik a, suanghawng khat ii kongvang ah suangtum khat taw a kikhak thaan ah pai hi. 39 A suang lakeak vun! ci in Jesu in thu pia hi. Mithipa suapuinu Martha in zo a, Topa awng, ui zo tu hi. Ama a kiphum zawk ni li pha zo hi, ci hi. 40 Jesu in ama munah, Na um le Pathian vaangletna na mu tu hi ci in hong son hi ngawl khi ziam? ci hi. 41 Amate in suangtum lakeak uh hi. Jesu in khuadak to a, Pa awng, nong ngai hu in, lungdam kong ko hi. 42 Nong ngai tawntung hi, ci in kong he hi, ahizong hi bang a ka ci sia hi sungah om mihingte zaak tu ka deina ahi hi. Amate in kei nong sawl hunlam a up thei natu ahi hi, ci hi. 43 Hi bang a ci zawkciang, awnging tatak taw au in, Lazarus awng, hong pusuak tan! ci hi. 44 Ama hong pusuak a, a khut le a peangte sia thaanpuan taw kitun a, a maitang sia puan taw kivial hi. Phel sak vun. Ama pai sak vun, ci in Jesu in sawl hi.

Jesu Thalup A kisawmna

45 Mary kungah haw tu in mihing tam mam hong pai in, Jesu vawt teng mu uh a, ama um uh hi. 46 Ahihang pawlkhat sia Phariseete kungah heak kik in, Jesu sep teng ko uh hi. 47 Tua ahikom Phariseete le thiampi liante sia Councilte taw kisitua in, Bang law tu hi ziam? Hisia pa ii nalamdang a vawt theampo en vun! 48 Hi bangin ama ki koithong le, mihing theampo in ama um tu a, Rome thuneite in, ih Biakinn le ih ngam hong susia tu hi, ci uh hi. 49 Amate sung pan Caiaphas kici tua kum a Thiampi Saang in Bang mawmawt nu ziam! 50 Ngambup ih lalcip sangin, pasal khat sia mihingte taangin, thi le note atu phazaw ahi hunlam phawk ngawl nu ziam? ci hi. 51 A tatak sia ama uuk thu taw, hi bangin pau ahi bua hi; tua hi ngawl zaw in, ama sia tua kum in, Thiampi Saang ahi bangma, Jesu sia Jew minamte atu in thi tu hi ci in, a son khol ahi hi. 52 Tua mihingte atu bek hi ngawlin, Pathian mihing a kithethaangte pumkhat suak tu in akikaikhop natu zongin sonkhol ahi hi. 53 Tua ni pan kipan Jew thuneite in, Jesu a thalup natu, vaihawmna nei uh hi. 54 Tua ahikom Jesu sia Judaea ngam ah a kilangh takin, khual haw nawn ngawl a, ahihang tua mun nusia in, senneal ngam nai Ephraim a kici khuapino khat ah pai in, a nungzuite taw taam hi. 55 Paisan Poai hun hong nai a, mihing tam mama in, ngamsung pan kithiansua zeksa vawt tu in, Jerusalem ah, poai hun maa in pai uh hi. 56 Amate in Jesu zazong uh hi, taciang, amate Biakinn sungah kikhawmtua uh a, amate in khat le khat, Bangbang hi tu in, na um uh ziam? Poai sungah hong pai ngam ngawl tu hi ngawl ziam? kici uh hi. 57 Thiampi liante le Phariseete in thupia a, Jesu omna a he a omle, ama a kimat thei natu in, thu hong puak tu nu hi, ci uh hi.

Jesu sia Bethany ah Sathau Kinoai

12:1 Paisan Poai tu ni luk a kisap ciangin, Jesu sia Bethany ah pai a, thina pan a phok kik Lazaruste inn ah tung hi. 2 Amate in nitak an sia tua munah huan uh hi. Martha in anhuan hu hi. Lazarus sia Jesu taw sabuai kiim ah a tote sungah kihel hi. 3 Tua zawkciang Mary in a manpha mama nard sathau namtui thawl khat hong paipui a, Jesu peangah buak in, a sam taw nawl sak hi. Sathau namtui in, innsung bup zel hi. 4 Jesu nungzuite khat ahi Judas Iscariot ama a leeheak tu pa in hi bangin ci hi, 5 Banghang in sathau namtui sia ngun dangka za thum taw zuakin mizawngte kipia ngawl ziam? 6 Ama hi bang a pau sia a zawngte awlmaw takpi hi ngawl a, ngutapa khat ahihang ahi hi. Ama in sumip keam a, sumte ama atu in, a la tawntung pa ahi hi. 7 Ahihang Jesu in, Ama koi po vun! Ka kiphum ni ciang atu in, ama ii nei paaknamtuite keam sak po vun. 8 A zawngte sia no taw omkhawm tawntung tu hi. Ahihang kei sia tabang in hong omkhawm tawntung ngawl tu khi hi, ci hi.

Lazarus A Kithasawmna

9 Jesu sia Bethany ah om hi ci in a za mihing tam mama te in, tua munah hong pai uh a, Jesu hang bek zongh hi ngawl in, thina pan a, Jesu ii a phok kik Lazarus mu tu in, hong pai ahi uh hi. 10 Tua ahikom thiampi liante in Lazarus zongh thalup natu vaihawmna nei uh hi. 11 Banghangziam cile hi thu hu in Jew mi tam mama te in, amate nial a, Jesu um uh hi.

Jerusalem ah Mualsuana taw Tumna

12 A zing ciangin Paisan Poai siim tu in hong pai mihonpi khat in, Jesu sia Jerusalem khua ah hongpai hi, ci in za uh hi. 13 Tua ahikom amate in palm thingbaak la in, ama muak tu in pai uh a, Pathian pok vun! Topa min taw hong paipa sia, Pathian in thupha pia tahen! Pathian in Israel Kumpipa thupha pia tahen! ci in au uh hi. 14 Jesu in laa khat mu in a tung ah to hi. Laithiangtho in hibang in a at sia a tangtun natu ahi hi. 15 Zion khuapi awng lau heak in! Hi sungah na kumpipa hong pai a, laano tungah to hi. 16 A nungzuite in hi thu sia tua hun laitakin, a tel bua uh hi; ahihang Jesu sia minthanna sungah a kiphok to ciangin, Laithiangtho in ama huvau, hi bangin at a, ama atu in hi bangin kivawt hi, ci in phawk kik uh hi. 17 Lazarus thaan sung pan sam a, thina pan a phok kik lai in, Jesu taw a omkhawm mihingte in, bang thu piang ci sia thu kikona nei uh hi. 18 Tasia hu in mihon in ama muak uh hi. Banghangziam cile ama ii hi na lamdang a vawt sia amate in za zo uh hi. 19 Phariseete in khat le khat, Eite in ih zo zo peuma bua hi! En vun, leitung bup in ama zui zo hi! ci uh hi.

Greek te Pawlkhat in Jesu Zong

20 Jerusalem ah poai sung teng biakpiakna nei tu in, a paite sungah Greek te pawlkhat om hi. 21 Amate in Philip (Galilee ngam Bethsaida khua mi) munah pai in, Syapa awng, ko Jesu taw kimu nuam khu hi, ci uh hi. 22 Philip pai in Andrew kungah son a, a nii in Jesu munah son uh hi. 23 Jesu in, Mihing Tapa ii a lian minthanna a saan tu hun hong tung zo hi. 24 A tatakin kong ci hi: zungtaang tang khat lei ah taak a, a thi phot bale ama nguak hi top hi. A thi le antang tam piang sak hi. 25 A kuama po a nuntakna a it sia in, taan tu hi. A nuntakna hi leitung ah a ngaimaw peuma in, tawntung nuntak natu in keam tu hi. 26 Keima omna po ah ka naseampa zongh a om natu in kei atu hong sep sak nuam sia in, kei hong zui kul tu hi. Tua hile kei atu hong sep sak khat papo sia ka Pa in upat tu hi.

Jesu in A Thi natu Son

27 Tu in ka thinngim hi tua hi a, bang son tu khi ziam? Pa awng, hi hun sia kei tungah hong tung sak heak in, ci tu khi ziam? Ahihang hi thuakna kantan a ka pai natu in hong pai kahi hi. 28 Pa awng, nangma min thang sak in! ci hi. Taciang vantung pan in, aw khat hong nging a, Minthang sak zo khi hi, taciang in minthang sak kik tu khi hi, ci hi. 29 Tua munah ding mihonte in awnging sia za uh hi. Amate sung pan pawlkhat in, Vanto hi, ci a pawlkhat in, Vantung lalang khat in ama paupui hi, ci uh hi. 30 Ahihang Jesu in, Kei atu in tua aw hong nging hi ngawl in no atu in hong nging ahi hi. 31 Tu in hi leitung atu in thukhen natu hun hong theng zo hi. Tu in hi leitung a ukpa kisuanthal tu hi. 32 Leitung panin ka kilapto ciangin mihing theampo ka kungah ka kai tu hi, ci hi. 33 (Hi bangin a pau sia ama thuak tu thina zia sia a sonna ahi hi.) 34 Mihonpi in zo kik a, Ih Thukham in Messiah sia nungta tawntung tu hi, ci hi. Tua ahile bangbang in Mihing Tapa sia kila to tu hi, ci thei ni ziam? Hi Mihing Tapa sia akua ziam? ci uh hi. 35 Jesu in zo kik a, Khuavak sia no taw tawmvei hong omkhawm lai tu hi. Khuazing sia no tungah hong thet ngawl natu in, khuavak na nei uh laitakin, na pai natu po ah paisuak tavun; banghangziam cile khuazing sungah a om pa in koi sungah pai ci in a kihe bua hi. 36 Taciang khuavak sia note taw a omkhop laitakin, khuavak mihingte na sua natu in, khuavak na um vun, ci hi.

Mihingte Thu Up thei ngawlzia

Jesu in hi teng a ci zawkciang ama in paisan in buu hi. 37 Nalamdang lakna hite amate mai ah vawt ahihang ama a um bua uh hi. 38 Kamsangpa Isaiah ii sonna teng a tun natu ahi hi: Topa awng, ko ii son thu akua in um na ziam? Akua tungah Topa in a vaangletna pualaak ziam? 39 Tua ahikom amate in um thei ngawl hi, banghangziam cile Isaiah in hi bangin ci lai hi. 40 Pathian in amate ii mit taw sak a, a thinsung humcip sak hi, a mit taw a mu thei ngawl natu a thinsung taw a tel ngawl natu taciang amate in kei kungah hong heak kik in, damna ka piak ngawl natu ahi hi, Pathian in ci hi. 41 Isaiah ii hi bangin a ci sia Jesu ii vaangletna mu a, ama huvau son ahi hi. 42 Tua zawkciang ngangawn in Jew thuneite tam mama in, Jesu um uh hi. Ahihang Phariseete a kiitak uh hu le, synagogue pan, amate a kinawkeak ngawl natu in, a kilangh takin a upna thu a son ngam bua uh hi. 43 Amate in, Pathian ii pok tu sangin, mihingte ii pok tu uuk zaw uh hi.

Jesu Kammal taw Thukhenna

44 Jesu in awnging takin, A kuama po kei hong umte in kei bek hong um hi ngawl a, kei hong sawlpa zongh um ahi hi. 45 A kuama po kei hong mu te in kei hong sawlpa zongh mu ahi hi. 46 Kei hong um peuma khuazing sungah a omcip ngawl natu in leitung ah khuavak bangin kong pai hi. 47 Ka thu hong puakte za napi a ni ngawlte tungah thu ka khen batu hi. Leitung ngum tu in kong pai a, a tungah thukhen tu in kong pai bua hi. 48 Kei hong nial a, ka thu hong puak a saang ngawl po thu a khen tu khat a nei uh hi. Ka pau sa kammal te in ni tawpkhak ni ciangin ama ii thukhenpa hi tu hi. 49 Hi thu in thumaan hi, banghangziam cile kei in keima aituam thu neina taw ka pau bua hi. Ahihang ka Pa in ka son tu le, ka pau tu thu hong pia hi. 50 Taciangin ama ii thupiakna in tawntung nuntakna hong puak hi, ci in ka he hi. Tua ahikom ka paute sia Pa ii pau a hong sawl bang ahi hi, ci hi.

Jesu in Ama Nungzuite Peang Sil sak

13:1 Tu in Paisan Poai vawt tu ni khat in samh lai hi. Jesu in leitung nusia in, a Pa kung a pai natu hun hong theng hi, ci in he hi. Ama neisa ahi leitung mihingte it tawntung a, a tawp dongin it hi. 2 Jesu le a nungzuite nitak an ne uh hi. Simon Iscariot ii tapa Judas ii thin sungah Jesu leeheak nopna thin Doaimangpa in khum zo hi. 3 Jesu in a Pa vaangletna theampo a cingin, a piak sia kihe hi; ama in Pathian kung pan, hong pai a, Pathian kung zuan kik tu ahi sia kihe hi. 4 Tua ahikom sabuai pan dingin, a laktong puasilh suutin, a kawng ah dial khat vet hi. 5 Tua zawkciang kuang khat sungah tui pawlkhat sung a, nungzuite peang sil sak tu le, a kawng a, a vet dial taw nawl sak tu in kipan hi. 6 Simon Peter kung hong thet ciangin, Kei peang hong sil sak tu ni ziam? Topa awng, ci hi. 7 Tu a ka sep sia tu laitakin tel ngawl nu hi, ahihang nungsang ciangin na tel tu uh hi, ci in Jesu in zo hi. 8 Bang hun po ahizong kei peang hong sil sak ngei ngawl tu ni hi! Peter in ci hi. Na peang ka sil batu ahile ka nungzui na hi nawn batu hi, ci in Jesu in zo kik hi. 9 Simon Peter in, Tua ahile Topa awng, ka peang bek hong sil sak heak in! Ka khut le ka lu zongh hong sil sak tan! ci hi. 10 Jesu in, A kuama po a kibual sa sia in a buppi thiangtho a, a peang sim ngawl sil a kul bua hi. No sungah khat sim ngawl thiangtho nu hi, ci hi. 11 (Jesu in ama a leeheak tu pa sia he zo hi; tua hu in Khat sim ngawl thiangtho nu hi ci hi.) 12 Jesu in a peang uh a sil sak zawkciang a laktong puasilh silh kik in a tona ngei sabuai ah to kik hi, Tu a, no tung a kong vawt teng na tel uh ziam? ci in dongh hi. 13 Sya awng, Topa awng, hong ci nu hi, nong ci uh sia maan hi, banghangziam cile keima sia tabang mihing ka hi hi. 14 Kei na Syapa uh le, na Topa in na peang uh kong sil sak hi. No zongh khat le khat tabangin, na kisil sak vun. 15 No ii ettee tu ngamtatna khat kong koi sak a, kei ii no tungah kong hi bangin, no zongh khat le khat tungah na ngamta tavun. 16 A tatak in kong ci hi: sila khat sia a topa sangin lianzaw ngawl a, kamtaipa khat sia a sawlpa sangin lianzaw ngawl hi. 17 Tu in thumaan he zo na hi uhkom, seam leu te bangza in a lungdamte hi tu nu ziam! 18 Na vekpi kong ci nopna a hi bua hi; ka teal sate, keima in ka he hi. Ahihang Laithiangtho sungah, Kei taw ankuang uumkhawmpa in kei hong langpan hi, a ci sia a tun kul tu hi. 19 A piang tu thu a pian maa in, hi bangin kong son kholna in, Kei sia tua Keima a ci sia ka hi hunlam nong up natu ahi hi. 20 A tatak in kong ci hi: ka sawlpa a saang sia in, kei zongh hong saang hi a; kei hong saang pa in kei hong sawlpa saang ahi hi, ci hi.

Jesu in A kileeheak natu Sonkhol

21 Jesu in hi teng a ci zawkciang ama sia nasia takin thin ngim a, a langhtak in hi bang pau hi, A maan tak kong ci hi: no sung pan khat in kei hong leeheak tu nu hi, ci hi. 22 A nungzuite khat le khat ki en a, ama ci nop sia akua ziam ci in lungmang mama uh hi. 23 Jesu ii it pa nungzui khat sia Jesu taw a kicial in to hi. 24 Simon Peter in tua pa sia neak phei a, Akua ci nuam ziam dongh in, ci hi. 25 Tua ahikom tua nungzuipa in Jesu kung neak zaw lai in, Akua ziam? Topa awng, ci hi. 26 Jesu in, Anluum sia metui sungah kong pap tu a, ka piak sia pa hi tu hi, ci hi. Tua zawkciang ama in, anluum bek khat la in, metui sungah a papsuk zawkciang, Simon Iscariot ii tapa Judas pia hi. 27 Judas in anluum a saan po ciangin, Satan sia ama sungah tum hi. Jesu in ama munah, Na vawt tu po vawt memeang tan! ci hi. 28 Jesu in banghangin hi bangin ci ziam ci sia sabuai ah a to teng in a tel bua uh hi. 29 Judas sia sumip keampa ahikom nungzuite pawlkhat ii ngaisutna ah poaisung a, amate kisap tu vanhte lei a sawl ziam, tua ahibale, a zawngte bang khat po pia tu sawl ziam, hi tu hi, ci in ngaisun uh hi. 30 Judas in anluum saangin, thakhat in pusuak hi. Tua hun sia zan hun ahi hi.

Thukham Thak

31 Judas ii nusiat zawkciang Jesu in, Tu in Mihing Tapa ii minthanna kilangh hi; Tu in Pathian minthanna sia ama tungtawn in kilangh hi. 32 Taciang ama tungtawn in Pathian minthanna kilangh ahile, Pathian in Mihing Tapa minthanna sia ama mama sungah kilangh sak tu a, taciangin thakhat thu in tabangin vawt tu hi. 33 Ka tate awng, kei sia no taw ngei hong omkhawm nawn ngawl tu khi hi. Note in kei nong zong tu uh hi; ahihang, Jew thunei mihingte munah ka ci sa bangin, Kei pai natu munah note nong pai thei batu hi, ci in tu in kong son hi. 34 Taciangin, tu in thukham thak khat kong pia hi: Note kong it bangma in, khat le khat na ki it vun. 35 Khat le khat na ki it uh le mihing theampo in, no sia ka nungzuite na hi na uh hong he tu hi, ci hi.

Peter ii Nial tu Jesu in Sonkhol

36 Koisung pai tu ni ziam Topa? ci in Simon Peter in dongh hi. Tu in kei pai natu ah nong zui thei batu hi, ahihang nungsang ciangin hong zui tu ni hi, ci in Jesu in zo hi. 37 Topa awng, banghang in, tu laitak nang hong zui thei ngawl tu khi ziam? Nang atu thi tu in ka kinging hi! Peter in ci hi. 38 Jesu in, Kei atu thi tu in kinging tatak ni ziam? A maan tak kong ci hi: ak khuan maa in ka he bua hi ci in thum vei nong nial tu hi, ci in zo hi.

Pa kung Thet natu Lampi Jesu

14:1 Jesu in, Thinngim in thin kiam heak vun, ci hi. Pathian um vun a, kei zongh hong um tavun. 2 Ka Pa inn sungah inndoi tuam tam mama om hi, no atu omna pua khol tu in, ka na pai tu hi. Tabang hi bale hi bangin kong son batu hi. 3 No atu pai in, omna ka pua khol zawkciang kong heak kik tu a, keima omna ah na om thei natu in ka kungah kong la tu hi. 4 Ka pai natu mun hong then thei lampi na he uh hi, ci hi. 5 Thomas in, Topa awng, koisung zuan tu ni ziam? ci in hong he ngawl khu hi; tua ahiciang tua mun thet thei natu lampi sia koi bangin he thei tu khu ziam? ci in dongh hi. 6 Jesu in, Keima in lampi ka hi hi, thumaan thutak ka hi hi, nuntakna ka hi hi; kei taw ngawlin kuama in Pa kung a theng batu hi. 7 Tu in kei hong he zo na hi uh ciang, ka Pa zongh na he tu uh hi, taciang tu pan kipan ama na he uh a, na mu zo uh hi, ci hi. 8 Philip in, Topa awng, Pa hong lak tan, tua hile ka kisap uh dang om nawn ngawl hi, ci hi. 9 Jesu in, No teng bup taw khua ngei mama omkhawm zo napi; hong he ngawl lai ni ziam? Philip awng. Kei hong mu po in Pa a mu zo hi. Tua ahile banghang in Pa hong lak tan ci ni ziam? 10 Philip awng, Pa sungah kei om a, kei sungah Pa a om hunlam um ngawl ni ziam? ci hi. Tua zawkciang Jesu in nungzui dangte munah, No tung a kong son kammalte sia keima sung panin, hong pusuak ahi bua hi. Ka sung a om Pa in, ama nasep tu teng seam hi. 11 Pa sungah kei ka om a, kei sungah Pa om hi kong ci ciangin, hong um tavun. Tua ahibale zong ka sep ka vawtte hangin kei hong um tavun. 12 A maan takin kong ci ciangin; kei hong um peuma in, ka vawt teng a vawt tu hi hi hi, a thupi zaw zongh vawt tu hi, banghangziam cile kei sia Pa kung ka zuan tu hi. 13 Taciangin keima min suang a nong nget papo sia Tapa tungtawn in Pa minthan natu in kong vawt sak tu hi. 14 Na khat papo kei min suangin nong ngen uh le kong vawt sak tu hi.

Thaa Thiangtho Piak tu Kamciam

15 Nong it uh le ka thupiakte na ni tu uh hi. 16 Pa munah ka ngen tu a, ama in, Hupa a dangkhat hong pia tu hi, ama in no taw a tawntung in hong omkhawm tu hi. 17 Ama in Pathian ii thumaan thutakna hong lak Thaa ahi hi. Leitung in ama sia saang thei ngawl hi, banghangziam cile ama sia mu thei ngawl a, he ngawl hi. Ahihang no in ama na he uh hi, banghangziam cile ama sia note taw omkhawm in, note sungah hong om hi. 18 Ka pai ciangin, no nguak hong ki nusia batu hi; note kungah kong heak kik tu hi. 19 Tawmvei zawkciangin, leitung in kei hong mu nawn ngawl tu hi. Ahizong note in nong mu tu uh hi; taciang keima nungta ka hikom no zongh na nungta tu uh hi. 20 Tua ni hong thet ciang, kei sia Pa sungah om a, no sungah kei ka om bangma in, kei sungah no na om uh hunlam na he tu uh hi. 21 A kuama po ka thupiakna saangin, thu a ni sia in kei hong it ahi hi. Ka Pa in kei hong it papo a it hi; kei zongh in ama ka it tu a, ama tungah keima le keima ka kilak tu hi, ci hi. 22 Judas (Judas Iscariot ahi ngawl sia) in, Topa awng, bangbangin leitung ah kilak ngawlin ko tungah hong kilak tuam thei tu ni ziam? ci hi. 23 Jesu in, A kuama po kei hong it sia in ka hilna a zui tu hi. Ka Pa in tua pa it tu a, ka Pa le keima in ama kungah pai in, ama taw ka teang tu uh hi. 24 Akua po kei hong it ngawl sia in ka hilna a zui batu hi. Na zaak sa uh hi hilna sia kei aa, hi ngawl a, kei hong sawlpa Pa kung pan hong pai ahi hi. 25 No taw kong omkhop lai in, hi thu hong son zo khi hi. 26 Thaa Thiangtho ahi Hupa keima min taw hong pai sak tu sia in, na theampo hong hil tu a, kong sonte zongh hong phawk kik sak tu hi. 27 Thin nopna kong nusiat hi; keima aituam neisa thin nopna kong pia hi. Leitung ii piak bangin kong pia bua hi. Thinngim in thinkiam heak vun; lau heak vun. 28 Hong nusia tu khi hi, ahihang hong pai kik tu khi hi, ka ci sia na za zo uh hi. Nong it uh le Pa kung ka zot tu sia na lungdam tu uh hi; banghangziam cile ama sia kei sangin lianzaw hi. 29 Na theampo a pian maa tu laitakin hite hong son khol zo khi hi, hong pian takpi ciangin, na up thei natu uh ahi hi. 30 No taw hun sauzaw thuson thei nawn ngawl tu khi hi, banghangziam cile hi leitung a ukpa hong pai hi. Ama in kei tungah bangma vaang hong nei bua hi, 31 ahihang Pa ka itna sia, leitung in a heak kul tu hi. Tua hu in ama ii thu hong piak babang in, na theampo ka vawt hi. Hong pai tavun, hi mun panin pai tawng.

Jesu Sapitngui Tatak

15:1 Keima in Sapitngui tatak ka hi a, ka Pa in huan neipa ahi hi. 2 Ama in kei sungah a nga ngawl baak theampo thiaktan tu a, nga a nga baak theampo a thiantho natu le tamzaw a nga thei natu in heu tu hi. 3 Note sia hilna kong piakte hangin hong kithiangtho sak zo hi. 4 Kei sungah hong om tavun, no sungah kong om tu hi. A baak khat nguak bek sia a nga thei bua hi; a ngui taw a kizop ciang bekin, nga thei hi. Tasia bangma in kei sungah nong om bua uh le a nga na nga thei batu uh hi. 5 Keima in sapitngui hi a, note in a baakte na hi uh hi. A kuama po in kei sungah hong om a, ama sungah kei ka om le ama in nga tam mama nga tu hi; banghangziam cile kei ngawl taw bangma na vawt thei batu uh hi. 6 A kuama po kei sungah hong om ngawlte sia thingbaak bangin kivawk in, kocip hi; tabang a baakte kitawm in meimang sungah kibum tu a, kaangtum tu hi. 7 Kei sungah nong om uh a, ka kammalte note sungah a omle tasia ciang na uuk papo nong ngen tu a, na nga tu uh hi. 8 A nga tam mama te na nga uh ciang ka Pa minthanna kilangh sak hi; taciang keima nungzuite na suak uh hi. 9 Pa ii kei hong it bangma in note kong it hi; kong itna sungah kip vun. 10 Ka Pa thupiak ni a, ama itna sungah ka kip bangma in, kei kong thupiakte na ni uh le kei itna sungah na kip tu uh hi. 11 Note sungah ka lungdamna a om natu le na lungdamna uh a kicin natu in hi thu kong son hi. 12 Kong thupiak in hi thu ahi hi: keima ii kong it bangma in, khat le khat na ki it vun. 13 A lawmte atu a nuntakna a piapa sangin, a lianzaw ki itna a nei kuama om ngawl hi. 14 Taciangin, ka thupiakte na seam uh le, ka lawmte na hi uh hi. 15 Silate awng, kong ci nawn bua hi, banghangziam cile silapa in a topa in bangteng vawt ziam, ci in a he bua hi. Tua sangin lawmte awng kong ci hi, banghangziam cile Pa kung pan ka zaak thu theampo kong son zo hi. 16 Note in kei nong teal bua uh hi; keima in note sia a kikhomsuan a nga tam mama na nga natu in, kong teal a, nasep kong pia hi. Tua ahikom Pa in kei min taw, ama tungah na nget uh po, hong pia tu hi. 17 Tua ahikom hi thu in note tungah kong thupiak ahi hi: khat le khat na ki it tavun.

Leitung ii Etsatna

18 Leitung in note hong ensan ahile keima hong ensan masa ahi sia phawk tavun. 19 Leitung neisa hi leu te leitung in ama aituam bangin hong it tu hi. Ahihang hi leitung panin note kong teal zo hi, tua hu in note sia leitung neisa na hi nawn bua uh hi; tua hu in leitung in note hong ensan hi 20 Kong son sa thu phawk tavun: Silapa in a topa sangin lianzaw ngawl hi. Amate in kei hong vawtsia le no zongh hong kivawtsia tu hi; amate in ka hilna a mang uhle no hilna zongh zui tu hi. 21 Ahihang hite theampo note tungah hong kivawt tu hi, banghangziam cile note sia keima neisa na hi uh hi. Banghangziam cile amate in kei hong sawlpa he ngawl hi. 22 Amate tungah thuson tu in, kei hong pai hi leng amate sia mawna a nei batu uh hi; tu in ahile amate sia a mawna huvau in kamzon natu a nei nawn bua uh hi. 23 Kei hong ensan sia in ka Pa zongh ensan ahi hi. 24 Ngualdang ii vawt ngei ngawlte amate sungah vawt ngawl hi leng amate sia a maw batu uh hi. Tu in ahile amate in ka sep teng hong mu zo a, kei le ka Pa hong ensan khawm hi. 25 Amate Thukham sungah, Amate in thu om ngawl pipi in, kei hong ensan zo hi, ci in a ki at sia, a tangtun natu hi bang teng a pian kul hi. 26 Thaa ahi Hupa hong pai tu a Pathian ii thumaan thutak le Pathian kung pan a hong paipa sia hong kilaak tu hi. Pa kung panin, ama kong pai suk sak tu a, ama in kei thu hong son tu hi. 27 Taciang note zongh in kei thu na son tu uh hi, banghangziam cile a kipat panin note sia kei taw nong omkhawm zo uh hi.

16:1 Na upna uh na thasua ngawl natu in, hi teng hong son khi hi. 2 Note synagogue pan hong kinot keak tu a, khat po in note hong thalup ciangin, Pathian atu naseam ci in a kiheak sak hun hong theng tu hi. 3 Mihingte in note tungah hi bang a hong ngamtat tu sia banghangziam cile amate in Pa ahizong kei ka hizong hong heak ngawl hang ahi hi. 4 Ahihang hi bang kong sonna in, amate in hi nate a sep tu hun hong thet ciang kong son sa teng na phaw kik natu uh ahi hi.

Thaa Thiangtho Nasepna

A kipat pan hite kong son bua hi, banghangziam cile keima in note taw ka omkhawm hi. 5 Ahihang tu in hong sawlpa kungah zuan tu khi hi, tua hi napi kuama in ka pai natu nong dong bua uh hi. 6 Taciang tu in hi thu kong son zawkciang na thinsung uh heena taw kidim hi. 7 Ahihang thumaan hong son khi hi: kei pai leng no atu phaz aw hi, banghangziam cile kei ka pai bua le Hupa note kungah hong pai ngawl tu hi. Ahihang ka pai na le ama sia no kungah kong pai sak tu hi. 8 Taciangin ama hong pai ciangin, mawna thu, thumaan thu le Pathian thukhenna huvau a ngaisutna uh te maan ngawl hi ci in leitung mihingte tungah lak tu hi. 9 Amate in mawna huvau sia ngaisun khial hi, banghangziam cile amate in kei hong um ngawl hi. 10 Amate in a maan thu zongh ngaisun khial hi, banghangziam cile kei sia Pa kung ka zuan tu a, note in nong mu nawn batu uh hi; 11 taciangin amate in, thukhenna telkhial hi, banghangziam cile hi leitung a ukpa tungah thu kitan zo hi. 12 Thu son tu tam ma ka nei lai hi, ahihang tu laitak ahile note dawl tu in tam lei hi. 13 Ahizong Thaa hong pai in, Pathian thumaante hong pualaak ciangin ama in thumaan thu theampo sungah lam hong pui tu hi. Ama in ama aituam thuneina taw hong son ngawl tu hi, ahizong ama zaak teng hong son tu a, hong piang tu thute hong son tu hi. 14 Ama in kei sia minthanna hong pia tu hi, banghangziam cile ka sonte la tu a, note tungah hong son tu hi. 15 Ka Pa neisa theampo keima neisa hi a; tua hu in Thaa in ka piakte la in no tungah hong son tu hi, kong ci hi.

Heena le Lungdamna

16 Tawmvei no sungin kei nong mu nawn batu uh a, taciangin tawmvei zawkciangin nong mu kik tu uh hi, ci hi. 17 A nungzuite pawlkhat in amate sungah kidongh uh a, Bang ci nuam hi tu ziam? Tawmvei sung eite in ama mu nawn ngawl tu a, tawmvei zawkciangin ih mu kik tu hi: taciang ama in, Banghangziam cile ka Pa kungah ka pai tu ci si hi. 18 Tawmvei zawkciang a ci sia bang a ci nopna ziam? Ama in bang teng son ci sia ih he bua hi, ci uh hi. 19 Jesu in ama thu dongh nuam ahi sia tel ahikom amate tungah, Tawmvei sung nong mu batu uh a, taciang tawmvei zawkciang in nong mu kik tu uh hi, hong ci khi hi. Noma sung a na kidok thu in tu sia ahi ziam? 20 A tatak in kong ci hi: note au in kap tu nu hi, ahizong leitung lungdam tu hi; note hee tu nu hi, ahihang na heena uh sia lungdamna taw kihukthuan tu hi. 21 Numei khat nau a sua tu ciangin, hee hi, banghangziam cile a ngim natu hun hong theng ahi hi; ahihang nau hong sua ciang ama in a ngimna teng mangil hi, banghangziam cile leitung ah nausen khat hong suak ahi hu in, ama lungdam hi. 22 Tasia bangma na hi tu uh hi: tu in hee nu hi, ahizong kei in note kong mu kik tu a, na thinsung lungdamna taw kidim tu uh hi. Tua lungdamna sia kuama ii laak kik thei ngawlte ahi hi. 23 Tua ni hong thet ciangin, kei tungah bangma nong ngen batu uh hi. A maan tatak kong ci hi: Pa in kei min suangin na nget papo hong pia tu hi. 24 Tuciang dong kei minsuangin, bangma na ngen balai uh hi; na lungdamna uh a pawl cin natu in, ngen vun na nga tu uh hi.

Leitung Zawna

25 Sonteena kammalte zangh in, hi thute kong son zo hi. Ahihang sonteena kammalte zangh ngawlin, Pa ii thu thiang takin kong son tu hun hong theng tu hi. 26 Tua ni hong thet ciangin kei min suangin na ngen tu uh hi; taciang no atu kong nget sak tu hi kong ci bua hi. 27 Banghangziam cile Pa, ama mama in note hong it hi. Ama in banghang note hong it ziam cile noma in kei nong it uh a, taciang Pathian kung pan kong pai nong um uh hi. 28 Pa kung panin kong pai takpi a, leitung ah kong pai zo hi; tu in leitung nusia in, Pa kungah ka pai tu hi, ci hi. 29 Tasia ciang nungzuite in, Tu ahile sonteena kamte zangh ngawlin a thiangin na son hi. 30 Na theampo na heak sia tu in kong he uh hi; kuama ii hong thudok tu na kul sak bua hi. Hi thu in Pathian kung pan nong paina hong um sak hi, ci uh hi. 31 Jesu in, Tu in na um uh ziam? 32 Note theampo kithethaang in, na inn tek zuanin, kei nguak nong nusiat tu uh hun hong theng tu hi, tu mama in hong theng zo hi. Ahihang kei nguak bek ka hi bua hi, banghangziam cile Pa in kei taw omkhawm hi. 33 Kei taw kipawl na hi uh hangin, thin nopna na nga natu in, hi thu kong son hi. Leitung ah ngim le kham na thuak tu uh hi. Ahihang na thin uh lian sak vun! Leitung ka zo zo hi, ci hi.

A Nungzuite atu Jesu Thungen

17:1 Jesu in hi teng a son zawkciang van ento in, Pa awng, a hun hong theng zo hi. Tapa in nang tungah minthanna hong piak thei natu in, na Tapa tungah minthanna hong pia tan. 2 Banghangziam cile ama tungah na piaksate, tawntung nuntakna a piak thei natu in, mihing namcin tungah thuneina sia ama tungah na pia zo hi. 3 Taciang in tawntung nuntakna ci sia in nangma bek a maan Pathian heakna le na sawlpa Jesu Christ heakna ahi hi. 4 Na minthanna sia leitung ah ka lak zo hi; sep tu a nong piak nasep teng ka man zo hi. 5 Pa awng! simlei pian maa a ih nei khop minthanna sia tu in na mai ah kei hong pia tan. 6 Leitung pan a nong piaksate munah nang kong he sak zo hi. Amate sia nangma neisa hi a, amate kei nong pia zo hi. Amate in na kammalte hong ni hi. 7 Taciang tu in, nong piak sa theampo nangma kung pan hong pai hi ci in amate in he uh hi. 8 Nong piak thute sia amate tungah ka pia a, amate in saang uh hi; amate in kei sia nang kung pan, pai ka hi sia maan hi ci in he uh hi, taciangin nong sawl ka hi zongh hong um uh hi. 9 Amate atu in, thu kong ngen hi. Leitung atu thu ka ngen bua hi, nangma neisa ahi nong piakte atu in kong ngen hi. 10 Keima neisa theampo nangma aa hi a, nang neisa theampo keima aa ahi hi; ka minthanna sia amate tungtawnin kilak hi. 11 Tu in kei sia nangma kungah kong zuan hi; kei sia leitung ah ka om nawn bua a, ahihang amate leitung ah om hi. A thiangtho Pa awng! Nang le kei khat ih hi bangma in, amate zongh khat ahi thei natu in, nong piak sa min ahi a vaanglian na min taw amate keamcing ta in. 12 Amate taw ka om khop lai in, nong piak sa min ahi a vaanglian na min taw, amate ka keamcing zo hi, Laithiangtho a tun natu in, bo tu a, a kilaitan sa khat sim ngawl amate sia ka hung a, ka bosua bua hi. 13 Tu in nang kungah kong zuan a, hi bangin leitung ah ka son sia a thin sungah ka lungdamna a cingin a nei thei natu ahi hi. 14 Na thute ka pia a, tasia ciang leitung in, amate ensan hi, banghangziam cile keima sia leitung ii neisa ka hi ngawl bangma, amate zongh leitung ii neisa ahi bua hi. 15 Hi leitung panin amate na lak natu in, kong ngen bua hi, ahihang Ngilopa khut sung pan na kepcing natu in kong ngen hi. 16 Keima sia leitung ii neisa ka hi ngawl bangma in, amate zongh leitung ii neisa ahi bua uh hi. 17 Na kammal sia thumaan hi a, tua thumaan taw nangma atu in amate na thiansua in. 18 Nangma in leitung ah nong sawl bangma in, amate sia leitung ah ka sawl hi. 19 Amate zongh maan tak a, nang tungah hong ki aap thei natu in, keima in, amate ngaisutna in, nang tungah kong ki aap hi. 20 Amate atu bek ngen ngawlin, amate ii thupuak hu in, kei hong um theampo atu zongh kong ngen hi. 21 Amate a vekpi in lomkhat ahi thei natu in kong ngen hi. Pa awng, nangma in keima sungah nong om a, keima in nangma sungah kong om bangma in, amate in eima sungah hong om tahen, tua hile, leitung in nong sawl ka hi hunlam hong um tu hi. 22 Nang le kei sia khat ih hi bangma in, amate zongh khat ahi thei natu in, kei nong piak minthanna sia ma amate tungah ka pia hi. 23 Leitung in nong sawlna thu le, keima nong it bangma amate na itna thu, a heak natu amate pumkhat a sua bup natu in, keima in amate sungah om in, nangma in keima sungah nong om hi. 24 Pa awng! Amate sia nong piak sa hi a, nong piak sa ka minthanna sia a mu thei natu in, ka omna munah, hong om tek tu ka dei hi, banghangziam cile, simlei pian maa in, nong it zo hi. 25 Thumaan thutang Pa awng! leitung in nang hong he bua hi, ahihang keima in kong he hi, taciang hite in nong sawl ahi hunlam he uh hi. 26 Kei nong itna sia amate sungah a om thei natu le amate sungah kei zongh ka om thei natu in, nang sia amate in ka he sak zo a, tabangma in ka seam lai tu hi, ci hi.

Jesu Kimatna

18:1 Jesu in hi thungetna teng a nget zawkciang a nungzuite taw Kidron luam a kici sia kantan in pai hi. Tua munah huan khat om hi. Jesu le a nungzuite huan sungah tum uh hi. 2 Leeheakpa Judas in hi huan ii omna he hi, banghangziam cile, Jesu in a nungzuite taw tam vei mama tua munah kisi ngei zo uh hi. 3 Tua ahikom Judas in huan sungah pai a, Rome ngalkapte Thiampi liante le Phariseete ii sawltak Biakinn cingte keng hi, amate in ngalhiam taw kinging a, mei-inn le meila lom keng uh hi. 4 Jesu in amate tungah a piang tu na theampo he a, tua ahikom ama in mai ah pai in, Na zon uh sia akua ziam?, ci in dongh hi. 5 Nazareth khua mi Jesu hi, amate in ci uh hi. Keima khi hi, ama in ci hi. Leeheakpa Judas sia amate taw tua munah ding hi. 6 Jesu in, Keima khi hi, a ci ciangin, amate sia nungkin uh a, lei ah puk uh hi. 7 Jesu in khat vei ma, Na zon uh sia akua ziam? ci in dongh hi. Amate in, Nazareth khua mi Jesu hi, ci uh hi. 8 Keima khi hi, kong ci zo hi. Kei hong zong na hi uh le hi a dang teng cia sak vun, ci hi. 9 (Pa awng, nong piak sate khat zongh ka bo sua bua hi, a ci teng a tangtun natu in hi bang teng in ci ahi hi.) 10 Namsau khat a nei Simon Peter in a namsau dokin, Thiampi lianpa ii silapa bil ziatsang sa keak sak hi. Tua silapa ii min sia Malchus ahi hi. 11 Jesu in Peter munah, Na namsau a pai sungah thun kik in! Ka Pa ii ka dawn tu a hong piak thuakna hai sia, dawn ngawl tu in hong um ni ziam? ci hi.

Annas mai ah Jesu

12 Tua zawkciang Rome ngalkapte, ngalkapmangpa le Jew Biakinn cingte in Jesu man uh a, khau khii in, 13 Annas kungah paipui masa uh hi. Ama sia tua kum a Thiampi lian ahi Caiaphas ii sunghpa ahi hi. 14 Minam bup luangin mihing khat thi le pha zaw hi ci in, Jew thuneite tungah ngaisutna a pia sia in, Caiaphas ahi hi.

Peter in Jesu Nial

15 Simon Peter le a dang nungzui khat in, Jesu zui uh hi. Tua nungzui dang khat sia in Thiampi lianpa ii heak mama pa hi a, tua ahikom ama in, Jesu taw Thiampi lianpa leitual dong pai a, 16 Tua laitakin Peter sia kongpi puasia ah om hi. Taciang nungzui dangkhat sia pusuak kik a, kongbiang ah numei khat a om sia taw a kipaupui zawkciang, Peter tumpui hi. 17 Kongkha a om numei in, Peter munah, Nang zongh ziasia pa ii nungzui khat hi kana ngawl ni ziam, ci hi. Kei ka hi bua hi, Peter in ci hi. 18 Khuasik ahikom silate le biakinn cingte in meihol thut in, a kiim ah mei oai in ding uh hi. Tua ahikom Peter zongh pai in amate taw dingin mei oai khawm hi.

Thiampi Saang in Jesu Thu dongh

19 Thiampi Saang in Jesu munah a nungzuite thu le a hilna huvau thu dongh hi. 20 Mihing theampo ii mai ah ka sonlaak sa hi, ka hilna theampo zongh synagogue le Biakinn sungah, mihingte hong paina munah kivawt siat a, a thimtham in bangma ka son ngei bua hi. 21 Tua hi kasap banghangin, thu hong dongh ni ziam? Ka pau hong zate dongh tan. Ka son thute amate munah dongh tan amate in ka son thute he hi, ci in Jesu in zo hi. 22 Jesu in hi bangin a ci ciang, tua munah biakinn cingte khat in Jesu beang a, Bangbangin Thiampi Saang tungah tu bangin pau ngam ni ziam, ci hi. 23 Pau khial nei ka hile hi sungah omte theampo munah ka pau khialna sia son in. Ahihang ka pauna sia a maan thu ahile banghangin hong vua ni ziam? ci in Jesu in zo hi. 24 Tasia ciang Annas in Jesu sia hencip sa ma in, Thiampi Saang Caiaphas kungah puak hi.

Peter in Jesu Nial kik

25 Peter sia tua mun ma ah mei oai in om lai hi. Tua ahikom a dangte in, Nang zongh ziasia pa ii nungzui khat hi ngawl ni ziam? ci uh hi. Ahihang Peter in nial a,Kei ka hi bua hi, ci hi. 26 Peter ii a bil a saatkeak sak pa ii bete khat ahi thiampi lian ii sila khat in, Ama taw huan sungah hong mu hi ngawl khi ziam? ci in dongh hi. 27 Khatvei ma Peter in, Kei ka hi bua hi, a ci laitak thakhat in aklui khat hong khuang hi.

Pilate mai ah Jesu

28 Zing tuungin Jesu sia Caiaphas ii inn pan ngam uk maangpa kumpi inn ah kipaipui hi. Jew mi thuneite in kumpi innhuang sungah a tum bua uh hi, banghangziam cile Paisan Poai anneak natu in amate zeksa vai in a thiangtho in om nuam uh hi. 29 Tua ahikom Pilate sia amate omna sangah pusuak in, Hi pa sia bang teng taw maw sak nu ziam? ci in dongh hi. 30 Amate in, Ama in thukham paltan bale nang kungah hong paipui ngawl tu khu hi, ci uh hi. 31 Tua ahile noma in, ama la vun a noma thukham taw kizui in thusit tavun, Pilate in ci hi. Amate in, Kote sia kuama tungah thidaan dong piak thei natu thu nei ngawl khu hi, ci uh hi. 32 (Jesu in a thi natu zia a sonkholte a tun natu hi bangin piang ahi hi.) 33 Pilate in kumpi inn sungah tum kikin Jesu sam a, Nang Jew mite ii kumpipa na hi ziam? ci in dongh hi. 34 Jesu in, Hi thu dokna sia nangma thin sung pan hong piang ziam, ahibale kei thu sia ngual in nang tungah hong son ziam? ci hi. 35 Pilate in zo kik a, Jew mi khat hong sa ni ziam? Nangma kei tungah hong aapte sia nang ma mipuite le thiampi liante ahi hi. Bang vawt nei ni ziam, ci hi. 36 Jesu in, Ka ngam sia hi leitung ahibua hi; ka ngam sia hi leitung hi le, Jew thuneite tungah hong ki aap ngawl natu in, ka nungzuite in, do in hong hung tu hi. Hi ngawl hi, ka ngam sia hi sung hi ngawl hi! ci hi. 37 Pilate in, Tua ahile kumpipa khat na hi ziam? ci in dongh hi. Jesu in, Kumpipa hong ci sia nangma na hi hi. Hi leitung ah suak a, thumaan thutak son tu in, kong pai hi. Thumaan thutang ii neisa ahite peuma in kei thu hong ngai hi, ci in zo hi. 38 Thumaan thutak sia bang ziam? Pilate in dongh hi.

Jesu Thi natu Thukitan

Tua zawkciang Pilate sia doipua ah pai kik a, mihingte tungah, Hi sia pa maw sak natu bangma ka mu bua hi, ci hi. 39 Ahihang noma ngeina khat na nei uh bangin, Paisan Poai sungah thongtaak khat ka suakta sak tawntung hi. Jewte Kumpipa suakta sak leng nong oai uh ziam, ci hi. 40 Amate in aw khat suakin, Ama hi ngawl hi! Barabbas dei khu hi! ci in au uh hi. (Barabbas sia ngual suampa ahi hi.)

19:1 Tua zawkciangin, Pilate in Jesu la a, vel sak hi. 2 Ngalkapte in lingnguite taw kumpi lukhu khat vawtin, a lu tungah khu sak uh hi; tua zawkciang puantual san khat silh sak uh a, 3 tua zawkciang ama kungah hong pai uh a, Jew mite Kumpipa a khansau tahen! a ci zawk uh ciangin, beang uh hi. 4 Pilate sia khatvei ma pusuak kikin, En vun ama sia maw sak natu bangma ka mu ngawlna thu na mu natu in, ama hi sungah hong paipui tu khi hi, ci hi. 5 Tabangin Jesu sia lingngui kumpi lukhu khu in, puantual san silh in hong pusuak hi. Pilate in, En vun! Hi sungah ama om hi! ci hi. 6 Thiampi liante le biakinn cingte in amu uh ciang, Thinglamte tungah that vun, Thinglamte tungah that vun, ci in au uh hi. Pilate in amate munah, Tua ahile noma la in, Thinglamte tungah that vun. Ama sia maw sak natu bangma thu mu ngawl khi hi, ci hi. 7 Mipite in zo kik a, Ama in Pathian Tapa ka hi ci ahikom ka thukham uh sungah thidaan piak natu thu om hi, ci uh hi. 8 Pilate in hi thu a zaak ciangin, lau va-ial hi. 9 Ama kumpi inn sungah tum kik a, Jesu munah, Nang koisung pan hong pai ni ziam, ci in dongh hi. Ahihang Jesu in zo kik nawn ngawl hi. 10 Pilate in ama tungah, Ka kam hong zo ngawl tu ni ziam? Ngaisun in. Na suatak natu le thinglamte tungah na thi natu, thu nei khawm khi hi, ci hi. 11 Jesu in, Pathian hong piak hu bek in, kei tungah thu na nei hi. Tua ahiciang nang tungah kei hong aap pa in, mawna nasia zaw vawt ahi hi, ci hi. 12 Pilate in hi thu a zaak ciangin, Jesu a suatak natu in lam zong hi. Ahihang mihonte au kik a, Ama na suatak le Ngam uk lianpa ii lawm na hi batu hi. Kumpi ka hi a ci papo in, ngam uk lainpa ii ngalpa ahi hi, ci uh hi. 13 Pilate in hi thute a zaak ciangin ama in Jesu sia doipua ah paipui sak a, Suangpheak Kipha a kici thukhente tona ah (Hebrew kam in Gabbatha kici hi) to hi. 14 Tua hun sia Paisan Poai a thet ma ni khat sunkim dektak hun ahi hi. Pilate in, Hi sungah na Kumpipa uh om hi, ci hi. 15 Amate in, That vun! That vun! Thinglamte tungah that vun! ci in au uh hi. Pilate in Na kumpipa uh thinglamte tungah kong tha sak tu dei nu ziam, ci in dongh hi. Thiampi liante in, Kumpipa khat bek ka nei uh sia Rome Ngam uk lianpa hi, ci in zo hi. 16 Tasia ciang Pilate in Jesu sia thinglamte tungah that tu in, amate tungah aap hi.

Jesu Kithat

Tua ahikom amate in Jesu la uh hi. 17 A thinglamte pua in ama hong pusuak a, Lungu Mun a kici na hong theng hi. (Hebrew kam in Golgotha kici hi) 18 Tua munah amate in a thinglamte tungah kilh uh hi; pasal nii zongh a lang le a lang ah kilh in, Jesu a zanglai ah khai uh hi. 19 Pilate in laino khat at in, thinglamte tungah koi sak hi. Jewte Kumpipa Nazareth khua mi Jesu, ci in at hi. 20 Jew mite tam ma in sim uh hi, banghangziam cile, Jesu a kikhaina mun sia khuapi taw a ki khuala bua hi. A lai taak sia Hebrew kam, Latin kam, le Greek kam in at hi. 21 Thiampi liante in, Jewte ii Kumpipa, ci in at heak in. Hisia pa in, Jewte Kumpipa ka hi hi, ci hi, ci in at zaw in, ci uh hi. 22 Pilate in, Ka at sa sia ka at sa bangma in kip tahen, ci hi. 23 Jesu thinglamte tungah a kilh zawkciang ngalkapte in a puansilh sia suutin, ngalkap khat sim in, khenkhat tek a cin tu in, khen li in khentham in hawm uh hi. Amate in puantual a silh sak sia zongh la uh hi, tua puantual sia a kipe suak khuina om ngawl sa khat ahi hi. 24 Hi sia balkeak ba tawng, akua in ih nga ziam, aisaan tawng, ci uh hi. Laithiangtho sungah hi bang a ci sia a tangtun natu ahi hi. Amate in ka puante hawm a, ka Puantual a tu in kikhaam uh hi, Hisia in ngalkapte ngamtatna ahi hi. 25 Jesu ii thinglamte taw a kinaina ah, a nu ii suapuinu, Clopas ii zi Mary, le Mary Magdalene te ding uh hi. 26 Jesu in a nu le a it nungzuipa a ding khawm mu a, tua ahikom a nu munah Ama sia na tapa hi, ci hi. 27 Tua zawkciang a nungzuipa munah, Ama sia na nu hi, ci hi. Tua hun pan kipan nungzuipa in, ama inn ah a et tu in, a nu ciapui hi.

Jesu Thina

28 Tu in na theampo khuangkhim siat zo hi, ci in Jesu in he hi, taciang Laithiangtho kammal a tun natu in, Jesu in, Ka dangko hi, ci hi. 29 Tua munah kuang khat sungah sapitzu thuk om a, tui a hup thei na khat pap suk in, Hyssop thingbaak dawn ah a thua zawkciang, Jesu muk ah taa uh hi. 30 Jesu in tua sapitzu a neak zawkciang, Kizo zo hi, ci hi. Tua zawkciang a lu kunsuk in, thi hi.

Jesu Pangh Kisun

31 Jew thuneite in, Pilate munah a kithatte ii peang a thiatan natu le, thinglamte tung pan a luangte a laaksuk kik natu thu a piak natu in ngen uh hi. Hi bang a nget theina uh sia banghangziam cile tua ni sia nipi zawk ni nga ni hi a, hong pai tu Sabbath sia a thiangtho tuam a kingaisun ahikom a luang uh thinglamte tungah, Sabbath ni in a omtop tu sia a dei bua uh hi. 32 Tua ahikom a ngalkapte in, Jesu taw a kikhai khawmte a masa sia pa ii peangte thiaktan a, tua zawkciang a dang khat sia ii peangte zongh thiaktan uh hi. 33 Ahihang Jesu kung hong thet uhciang, ama sia a thi sa in mu uh a, tua ahiciang, a peang a thiaktan bua uh hi. 34 Ahizong ngalkapte khat in, a tei taw a pang a sut ciangin thakhat in chi le tui hong bua hi. 35 (Hi thu na up thei natu in, hi thupiang a mu pa in ama muna bangin hong son ahi hi. Ama thusonte a maan hi a, a son pa in thumaan son ahi hunlam zongh kihe hi.) 36 Hi bangin a kivawt sia Laithiangtho kammal a tun natu ahi hi: Ama ii ngute khat zongh taltan ngawl tu hi, ci hi. 37 Laithiangtho mundang khat ah, Mihingte in amate ii holletpa sia a en tu uh hi, ci si hi.

Jesu Kiphumna

38 Hisia zawkciang Arimathea khua mi Joseph in Pilate munah, Jesu luang a laak thei natu in ngen hi. (Joseph sia Jesu nungzui khat hi a, ahizong Jew thuneite a kiitakna taw a thimtham in a zuipa khat ahi hi.) Pilate in a luang laak thei natu thupia ahikom Joseph in a luang la in paipui hi. 39 Zan lai in Jesu taw kimu tu in, a pai masa pa, Nicodemus sia Joseph taw ton a, ama in thing namtui myrrh le aloes a kihel toai khat bang hong paipui hi. 40 Tua pasalte nii in, Jewte ii kiphum tu ciang, a luang a pua kholna ngeina om bangin, Jesu luang la in, hel namtui thau taw zuutin, puankaang neal taw tun uh hi. 41 Jesu a kithalupna hui ah huan khat om a, tua munah kuama a kiphum ngei ngawl thaankuul thak khat om hi. 42 Sabbath cin natu ni khat bek ii sap ahi hu le, a thaankuul sia nai ahikom, Jesu luang sia tua sungah sial uh hi

Thaankuul Hawm

20:1 Nipi ni zingsang tuung khuavak maa in, Mary Magdalene thaan vil tu a pai ciang, a kongvang pan suangtumpui sia kilumliik sa in a om mu hi. 2 Ama in Simon Peter le a dang nungzui, Jesu ii itpa kung zuan in tai a, Amate in Topa sia thaan pan, la zo hi, ama koi sungah koi ziam ci sia he ngawl khu hi! ci hi. 3 Tasia ciang Peter le a dang nungzui pa sia thaan ah pai uh hi. 4 Amate nii sia taikhawm ahihang nungzui dangkhat sia Peter sangin a tai ngang zaw ahikom thaan ah theng masa hi. 5 Ama kun in thaankul sung a et suk ciangin, a kitunna puankaang nealte mu a, ahihang a sungah tum ngawl hi. 6 Ama nung pan Simon Peter hong pai a, ama in thaankuul sung thakhat in tum paih hi. Ama in a kitunna puankaang nealte lei ah mu a, 7 taciang in Jesu lutang vialna in a kizangh puan zongh mu hi. Tua lutang kiim ah a vial puan sia kitunna puankaang neal dangte taw om khawm ngawl a, a tuamin, a kizial sa in om hi. 8 Tua zawkciang thaan a theng masa nungzui dang khat sia zongh tum a; ama in mu in um hi. 9 (Amate in, Laithiangtho ii ama sia, thina pan tho kik tu hi, a ci sia a tel balai uh hi.) 10 Tua zawkciang nung zuite inn ah cia kik uh hi.

Mary Magdalene tungah Jesu Kilak

11 Mary sia thaan pua sangah dingin kap hi. A kaa kawmin kun a thaanhawng sung en hi, 12 taciang vantung lalangte nii puanpaak silh in, Jesu luang omna ah, khat a luthung, khat a khawdop ah to in mu hi. 13 Numei awng, banghangin kap ni ziam? ci in amate in dongh hi. Ama in, Amate in ka Topa la a, koisung ah koi ziam, ci in ka he bua hi, ci in zo hi. 14 Taciangin ama a kiheak le, Jesu sia ama kungah a ding mu hi; ahihang ama in Jesu ahi hunlam he ngawl hi. 15 Numei awng, banghangin kap ni ziam? Na zon sia akua ziam? ci in Jesu in dongh hi. Numeinu in ama sia huan neipa sa in, Ama la zo na hi le, syapa awng, na koina hong son tan. Pai in ka la kik tu hi, ci hi. 16 Jesu in, ama tungah, Mary awng! ci hi. Numeinu ama sangah nga in, Hebrew kam in, Rabboni ci hi. (Hi kammal sia syapa a ci nopna hi.) 17 Hong len heak in, Banghangziam cile Pa kungah paito ngawl lai khi hi. Ahihang ka suapuipate tungah son tan. Kei ii Pa le amate ii Pa, kei ii Pathian le amate ii Pathian kungah heak kik tu khi hi, Jesu in ci hi. 18 Tua ahikom Mary Magdalene sia pai in nungzuite tungah, Topa a muna le ama ii son in a sawl teng son hi.

A Nungzuite tungah Jesu Kilangh

19 Nipi nitak khua niam sang hi a, nungzuite in innkha kikha in kikhawm uh hi, banghangziam cile amate in Jew thuneite kiita uh hi. Tasia ciang Jesu hong tum a, amate kawm ah hong ding hi, Note sungah thin nopna om tahen, ci hi. 20 Hi teng a ci zawkciang ama in a khut le a peang sia amate tungah lak hi. Nungzuite in Topa a mu uh hu in, lungdamna taw kidim uh hi. 21 Jesu in khatvei ma, Note sungah thinnopna om tahen, ci kik hi. Pa ii kei hong sawl bangma in, kei in note kong sawl hi, ci hi. 22 Tua zawkciang amate tungah, a hu mut in, Thaa Thiangtho saang vun, ci hi. 23 Mihingte tungah mawmai sakna na pia uh le amate sia kimai sak tu hi; amate mawna na mai sak bua uhle amate sia a kimai sak batu hi, ci hi.

Jesu le Thomas

24 Jesu hong pai lai in, nungzui sawm le niite sung pan khat ahi, Thomas (A peang a kici) sia amate taw a omkhawm bua hi. 25 Tua ahikom nungzui dangte in, Topa ka mu zo uh hi, ci in ama tungah son uh hi. Thomas in, A khut thikpim mapawnte mu in, ka khutme taw tham in a pangh ka zawt bale ka um batu hi, ci hi. 26 Nipi khat zawkciang nungzuite inn sungah omkhawm kik uh a, Thomas zongh om hi. Kongkhate kikalh ahihang, Jesu hong tum a, amate sungah dingin, Note sungah thinnopna om tahen, ci hi. 27 Tua zawkciang, Thomas tungah, Na khutme taw hi sung hong zawt tan, ka khutte hong en tan; taciangin na khut vaan in ka pangh hong zawt tan. Um la heak in, um in! ci hi. 28 Thomas in, Ka Topa le ka Pathian awng! ci in zo hi. 29 Jesu in, Nong mu hu in hong um ni ziam? Hong mu ngawl napi a hong umte bangza in thupha nga tu ziam! ci hi.

Hi Laibu ii Deina

30 A nungzuite ii mutang in, Jesu in hi laibu sungah a kikhum ngawl, na lamdang lakna tam mama vawt hi. 31 Ahihang hite hong ki atna sia Jesu in Pathian Tapa Messiah a hina thu, na up natu uh le ama na upna uh tungtawn in, nuntakna na nga thei natu uh ahi hi.

Jesu Nungzui Salite tungah Kilak

21:1 Hisia zawkciang Jesu sia khatvei ma Tiberias Tuili ah nungzuite tungah kilak hi. A kilak zia sia hi bang ahi hi. 2 Simon Peter, Thomas (a peang a kici), Nathanael (Galilee ngam Cana khua mi) Zebedee ii tate, a dang Jesu ii nungzuite nii sia kikhawmtua uh hi. 3 Simon Peter in, Kei ngasa paai in ka pai tu hi, a dangte tungah ci hi. Ko zong kong zui tu uh hi, ci in a dangte in zo kik uh hi. Tua ahikom amate in, ngunkuang khat taw pai uh hi, ahihang tua ni zan bup sia bangma a man bua uh hi. 4 Ni hong sua ciangin, Jesu sia tuivaal ah hong ding a, ahihang nungzuite in, Jesu hi ci in a he bua uh hi. 5 Tanote awng, bangma man ngawl nu ziam? ci in Jesu in dongh hi. Bangma man ngawl khu hi, ci uh hi. 6 Ama in, Na ngen uh ngun kuang ziat sangah paai leute pawlkhat man tu nu hi, ci hi. Tua ahikom amate in ngen a paai uh ciang, a dawk kik zo nawn bua hi, banghangziam cile amate in ngasa tam mama man uh hi. 7 Jesu ii it nungzuipa in, Peter munah, Tu a sia Topa hi! ci hi. Peter in Topa hi ci in a zaak ciang, a laktong puasilh taw kitun hi. (Banghangziam cile ama in a puan suut hi) Taciangin tui sungah leangsuk hi. 8 Nungzui dangte sia ngasa ngendim kaikawm in, ngunkuang taw vaalbo ah hong pai uh hi. Amate omna sia tui hui lei taw a kikhuala ngawlna, kaih za khat na bang hi tu hi. 9 Amate in vaalbo ah hong kaa uh ciangin, meihol kithut khat mu uh a, a tungah ngasa ki em a, anluum pawlkhat zongh om hi. 10 Jesu in, Na mat tawm uh ngasa pawlkhat zongh hong paipui tavun, ci hi. 11 Simon Peter sia ngunkuang sungah tuakin, ngasa lian a dim a om ngen sia vaalbo ah hong kai hi. A vekpi in za le sawm nga le thum pha hi; taza in tam ahihang a ngen uh sia a ektham bua hi. 12 Jesu in, Hong pai tavun a ne vun, ci hi. A nungzuite kuama in, Nang kua ni ziam? ci in a dongh ngam khat zongh a om bua uh hi, banghangziam cile amate in Topa ahi sia he uh hi. 13 Tua ahikom amate kung zuan in, anluum la in amate pia hi. Ngasa zongh tabang ma in pia hi. 14 Hisia in Jesu thina pan a kithaw kik sak zawk, a nungzuite mun a kilak a thum veina ahi hi.

Jesu le Peter

15 An a neak zawk uh ciang Jesu in Peter tungah, John ii tapa Simon awng, hi mihingte ii hong it sangin, kei nong itzaw ziam, ci hi. Hi hi, Topa awng nang kong it sia nangma in na he hi, ci in ama in zo hi. Jesu in, Ka tuunote na keam in, ci hi. 16 A nii veina Jesu in, John ii tapa Simon awng, kei nong it ziam? ci hi. Hi hi, Topa awng, nang kong it sia nangma in na he hi, Peter in ci in zo hi. Ka tuute na keam in, Jesu in ci hi. 17 A thum veina Jesu in, John ii tapa Simon awng kei nong it ziam? ci hi. Peter sia Jesu ii, Kei nong it ziam, ci in a thum vei dong a dok hu in, khuangai a, tua ahikom ama munah, Topa awng na theampo na he hi, nang kong itna sia na he hi, ci hi. Jesu in, ama munah Ka tuute na keam in. 18 A maan tatakin kong ci hi: na khanmoi lai in, na uukna theampo ah pai tu in, na ki ngingta bul hi, ahihang na huai ciangin, na khutte na vaan tu a, taciang khat in khau hong khii tu a, na uuk ngawlna ah hong paipui tu hi, ci hi. 19 (Hi bang a Jesu ii a ci sia Pathian minthan natu in Peter ii a thi natu teng a sonna hi. Tua zawkciang Jesu in, Hong zui tan, ci hi.

Jesu le Nungzui Dangkhat

20 Peter in, a kiheak ciang nungzui dang khat Jesu ii itpa sia mu hi, Topa awng nang sia akua in hong leeheak tu ziam? ci a anneakna sungah a dongh Topa neal in a to sia pa ahi hi. 21 Peter in a mu ciang, Jesu tungah dongh a, Topa awng, hisia pa bangbangin om tu ziam? ci hi. 22 Jesu in zo kik a, Kong pai kik dong nungta in ka oai le zong nang bang nuam maw ni ziam? Hong zui tan! ci hi. 23 Ahihang a thi batu hi, Jesu in a ci bua hi. Kong pai kik dong nungta in ka oai le zong bang nuam maw ni ziam? ci hi. Tua ahikom tua nungzuipa sia thi ngawl tu hi, ci in Jesu nungzuite sungah thu kizel hi. 24 Ama sia hi thute a son nungzuipa hi a, lai taw a atpa zongh ahi hi; taciangin ama ii sonte sia thumaan hi, ci in ih he hi.

Thukhupna

25 Tu in Jesu ii vawt na dang tam mama om hi. Tuate kikhum suk siat le leitung bup in tua laibute huam zo ngawl tu hi.