The New Testament of our Lord and Saviour Jesus Christ
1 Shin cu Abraham ah hta ng'shon, David ah pakhui, Jesuh Krit ah ng'shon law ang tän ah kiak ci. 2 Abraham ung tün ne David ghangpughang ung khüt ciah ng'shon ang täm law cu; Abraham ah hta Isak, Isak ah hta Jakop, Jakop ah hta Judah, Judah la a nau gui; 3 Judah ah hta goi Perez la Zerah (ani nu cu Tamar), Perez ah hta Heron, Heron ah hta Ram; 4 Ram ah hta Amminadap, Amminadap ah hta Nahshon, Nahshon ah hta Salomon; 5 Salomon ah hta Boaz (anu cu Rahap) Boaz ah hta Obet (anu cu Ruth), Obet ah hta Jesse, Jesse ah hta David ghangpughang ah kiak ci. 6 David ung kaa naw Israel chang gui Babilon kho ah ami hteh püi gui ung khüt ciah ng'shon ah ng'täm law gui cu; David ah hta Solomon (anu cu Uriah ah chu David ah khäm tu ba); 7 Solomon ah hta Rehaboam, Rehaboam ah hta Abijah, Abijah ah hta Asa; 8 Asa ah hta Jehoshaphat, Jehoshaphat ah hta Jehoram; 9 Jehoram ah hta Uzziah, Uzziah ah hta Jotham, Jotham ah hta Ahaz, Ahaz ah hta Hezekiah; 10 Hezekiah ah hta Manasseh, Manasseh ah hta Amon, Amon ah hta Josiah; 11 Josiah naw Babilon ah pha ne ami hteh püi gui zah ung ahta nak gui cu Jehoiachin la anua gui ah kiak ci. 12 Babilon kho ah ami hteh püi gui ung kaa naw, Jesuh Khrit ang tüi law ung khüt ciah ng'shon ang täm law gui cu; Jahoiachin ah hta Shealtiel, Shealtiel ah hta Zerubabel, Zerubabel ah hta Abiud; 13 Abiud ah hta Eliakim, Eliakim ah hta Azor; 14 Azor ah hta Zadok, Zadok ah hta Achim, Achim ah hta Eliud; 15 Eliud ah hta Eleazar, Eleazar ah hta Matthan, Matthan ah hta Jakop; 16 Jakop ah hta cu Mari ah cei Josef ah kiak ci. Mari cu Messiah ah ming ciah Jesuh ah anu ah kiak ci. 17 Cun ah kia sei Abraham ung kaa naw David ung khüt ciah ng'shon gha-lei-phli, David ung kaa naw Israel chang gui pha ne Babilon ah ami hteh püi gui ung khüt ciah ng'shon gha-lei-phli, Babilon ah pha ne ami hteh püi nak gui ung kaa naw Messiah ang tüi law ung khüt ciah ng'shon gha-lei-phli ah kiak ci. 18 Jesuh Khrit ang tüi law ah mawng cu shin ah kiak ci; Mari cu Josef ung ami beit kawn ah, kä ani ni om ng'chungla pha ung, Mumcha Theing awn käü mah lawk ci. 19 Josef cu düng ciah chang k'ni ah kia ne, chang ah ma ah Mari a lü ng' va kä ng'za hlü netah, ng'häng ba vai ah ngaih tüh ci. 20 Cun ah a ngaih tüh sang ung Khanpughi ah khankho chang naw, a ih mang ung, “David ah hta ng'shon Josef aw, Mari nakchu nak vai ah mawng cu kä na ng'ä ng'ai vai nei, ani cu Mumcha Theing naw vang na sei, käü mah ciah kiak ci. 21 Ani cu pamihta ah hta lawk khai. Cun ah Htapa cu ak chang gui ami kat nak ung kaa hun phiawn gui khai ah kia sei, ‘Jesuh’ ah ang ming nami sui vai cine kiak nak ci. 22 Shin ah amawngma gui cu profet gui-am Khanpughi naw am cäi nak gui ah ng'thu aküm nak ah kiak ci. 23 Cun ah ng'Thu cu; “Ng'Lamihta cu käü mah ne, Pamihta ah hta lawk khai. Ani cu Immanuel ah ang ming sui khai gui. (Immanuel ci cu mik awn atang ah om ciah Khanpughi ah kiak ci). 24 Cun ah kia sei Josef cu a ih nak ung kaa, a thawh law ba kawn ah Khanpughi ah khankho chang ah a pyein ah mäih ah Mari cu akchu ah khäm ci. 25 Cun ung phi Mari kä ahta pha ah chuih Josef naw kä ih om püi ci. Cun ah hta cu Josef naw Jesuh ah ang ming sui ci.
1 Bawi Jesuh cu Judea kho, Bethlehem gawu ah, Herod ghangpughang ah uk zah ung ami hta nak ah kiak ci. Cun zah ung hnilaw lam ah kaa, aisi läk lawk ciah hmuhmat chang gui cu, Jerusalem ah gawk law u netah, 2 “Tuhbäi ng'tüi lawk ciah Jew chang gui ah ghangpughang cu a hawi ang? Hnilaw lam ah ani ah aisi dang sei hmu u ne, ani cu khawihnah vai ah kami lawk ci nei, ci ne ng'shi gui ci gui. 3 Acun ng'za u netah Herod ghangpughang la Jerusalem ah chang gui cu cäicat zawp ci gui. 4 Herod ghangpughang naw taigüpa gui la thukhän saza gui cu khü gui netah, “Messiah cu a hawi ah ng'tüi khai ang? cine ng'shi gui ci. 5 Ngahmi naw, “Judea kho, Bethlehem gawnu ah ng'tüi khai nei, Profet ah guk ah cacim ung; 6 ‘Judea kho ung om ciah Bethlehem gawnu, Nang cu Judea kho gawnu gui ung, Ak zaw pibäih ah kä na kiak ci nei, Ka chang Israel gui, lam shüm gui khai cu, Nang ung kaa dang lawk khai nei’ ciah om ci, ci ne m'thein ba gui ci. 7 Cun kawn ah Herod ghangpughang naw hmuhmat chang gui cu a düm ah khü gui netah, aisi ah ang dang law nak ah akhin cu, ang khai ah ng'shi gui ci. 8 Cun ah ghangpughang naw, “Nangmi hteit ne akhmaw cu nami hmuh vai ah nami shui vai, nami hmuh ung nami nam thein law ba vai, kei phi hteit ne ka khawihnah tuk khai, ci ne m'cäi gui ci. 9 Cun ah kia sei ngahmi cu ng'düi law ne hteit ba u ne, ami hmuh te ah aisi cu hmuh ba u netah ang htei ah zeikiai ci gui. 10 Cun ah aisi naw ngahmi cu lam shüm gui lä ne, ak hmawhta ah omnak ung gawk netah ng'düm ci. 11 Ngahmi cu im kyong ah va lut u netah, ak hmawhta cu anu Mari awn atäng ah hmuk ci gui. Cun kawn ah ngahmi cu m'khuukdoong ne kaup u netah, ami law püi ah ghui ni, Frankinsen tui ng'ui ni, mura tui ng'ui ni gui awn khawihnah ci gui. 12 Herod ghangpughang ah om nak lam ah kä ami hteh ba vai ah Khanpughi naw ami ng'mang ung m'thein gui khätah, ngahmi cu alam hei ung ami kho ah hteit ba ci gui. 13 Hmuhmat chang gui ami hteh ba kawn ah Khanpughi ah khankho chang cu Josef ah ih mang ung dang law netah, “Herod naw ak hmaw cu ngawn vai ah shui lawk khai nei, tho law ne ak hmaw la anu cu Ejip kho ah dawng püi goi ä, Kei naw ‘Law ba vä, ’ kä ka ci pha ah chuih a cu ah na om pui goi vai nei, ci ne pyein ci. 14 Josef cu tho law ne, ak hmaw la anu cu khomü ung Ejip kho ah hteh püi gou netah, Herod a sih güt a cu ah om püi goi ci. 15 Cun ah mawng gui cu, “Ka Htapa cu Ejip kho ah kaa, ka law püi ba ci, ciah profet gui ung gawk lawk ciah Khanpughi ah ng'thu aküm nak ah kiak ci. 16 Herod cu hmuhmat chang gui naw ami theileh nak hmat netah ang htei ah m'lungshe ci. Cun ah kia sei ngahmi ah m'thein tu ah aisi ang dang nak ah khin cu m'khin ba netah, Bethlehem gawnu la apei ung pigaw gui ung kaa, a khokum kum goi la kum goi ah k'hmaw ba ciah ak hmaw gui cu avan ngawn sak gui ci. 17 Cun cu profet Jeremiah ah ng'thu pyein aküm nak ah kiak ci. Ani ah ng'thu pyein cu; 18 “Ramah kho kyong ah thüi kyah nak ah k'aw cu thang lawk ci, Rachelah cu ahta gui ah hmawk ah viik ne kyap ci, Ahta gui cu sihnak ung kä phiawn sak gui hlawt ci, ciah kiak ci. 19 Herod asih kawn ah Khanpughi ah khankho chang naw, Ejip kho ah Josef ah ih mang ung, 20 “Tho law ne akhmaw la anu cu Israel kho ah hteh püi ba goi ä, akhmaw ngawn hlük ciah chang gui cu si pyii ci gui nei, cine pyein ci. 21 Josef cu tho law ne, akhmaw la anu cu Israel kho ah hteh püi ba goi ci. 22 Cun ung phi Judea kho ung Archelaus cu apa Herod ah hnün ung ghangpughang ah ngoh ba ne om ci. A cun cu ng'za netah Josef cu Judea kho ah ahteh ba vai ah kyik ci. Cun ah kia sei ani cu Khanpughi naw ang mang ung ak phlan ah mäih ah Kalile kho ah hteit ne, 23 Nazaret gawnu ah om tuk ci. Cun cu profet gui ah ng'thu pyein ung, “Ani cu Nazareth chang ah kiak khai nei” ciah om ci cu aküm nak ah kiak ci.
1 Cun zah ung Tuihnim Johan cu Judea kho bung puk ah dang law ne, 2 “Nami shetkat nak ng'nü ung ng'zu ba vä, Khanpughi ah uk nak kho cu ng'et law pyii ci nei” ci ne ng'thu pyein ci. 3 Profet Isaiah naw, “Bawipa ah law nak vai lam piang vä, Ani ah hmawk ah lam cu düng sak zawp vä, ci ne, chang tumat bungpuk ah ng'shäü ci nei” a ci cu Johan a pyein ah kiak ci. 4 Johan cu kala-uk mu awn tah ah suinu sui ne, saphaw m'züi awn ak khei k'htün ci. A ei awk cu khoitui la khoi htalung ah kiak ci. 5 Jerusalem gawnu ung kaa gui, Judea kho ung kaa gui la Jordan tuinu pei zung ah om ciah chang gui cu Johan ah gawk lawk ci gui, 6 Ngahmi cu ami shekat nak ng'nü ng'zu ba u ne, ng'paá na u sei, Johan naw Jordan tuinu ung tuihnim gui ci. 7 Pharisee gui la Sadducee gui cu tui ng'hnim tuk khai gui ah ami law hmu gui netah Johan naw, “K'Phyu m'äm ah gui aw! Gawk lawk khai ah Khanpughi ah m'lungshe nak phiawn nak vai ah mawng cu a u naw ang aning m'thein gui? 8 Akcang ah nami ng'zu ba ah mawng cu nami om ih awn nami m'dang vai nei. 9 Abraham cu kami pa ah kiak ci nami ci nak düt awn, nangmi cu kat nak ung nami phiawng khai ah kä nami ngaih-en vai nei. Khanpughi naw shin ah lung gui cu la ne, Abraham ah hta gui ah tüi piang hning ci, ci cu ka ning m'thein gui ci nei. 10 Sing ghing gui ah kung ah chuk nak vai ah ghei cu, m'shän pyii ah kia sei, akni ah kä m'theih ciah a ghing phung cu, chu pit ne mei ung k'bum zawp vai nei. 11 Nangmi nami ng'zu ba ah hmawk ah tui awn tuihnim nak ka ning pe gui ci, Kei ah ka hnu ah lawk ciah Bawipa naw Mumcha Theing la mei awn hnim nak ning pe gui khai. Ani cu kei ah mä hlüngtai pi ci, Kei cu ani ah phahnak phi ka kawt khai ah kä ka khin ci. 12 Akut ung htang akchü nak vai ah chüdawn kawt ci. Amät ah geitkaw gui cu khäm zawp netah htang ang tak gui cu khei ung thun zawp khai. Ang shi gui läi cu m'sih ne käm khüt vai ah mei awn m'khih zawp khai, ci ne m'thein gui ci. 13 Cun sang ung Bawipa Jesuh cu Kalile kho ah kaa, Jordan tuinu pei ah Johan ah om nak ah tuinim khai ah gawk lawk ci. 14 Cun ung phi Johan naw, “Kei cu nang naw tuinim nak na na pek khai ah kiak ci, cun ung phi kei ah nang na lawk ci ma? ci ne ana maa nak ci. 15 Bawipa Jesuh naw, “Khanpughi ah a pyein ah bi mi bik khai kia sei, a cun ah na bi vai” ci ne kiak na khätah, cun kawn ah Johan naw zum ci. 16 Bawipa Jesuh cu tuinim pyii ne a Luh law ba kawn ah, khankho cu zung hmawng law khätah, Khanpughi ah Mumcha Theing cu müm bawk ah mäih ah zawng law ne, ak khan ah ngo law sei hmuk ci. 17 Cun kawn ah, “Shin cu kei ah ka m'hni ah Ka Htapa nei, ani cu ang htei ah ka zei nak ci nei, ciah khankho ah k'aw ng'shan lawk ci.
1 Cun kawn ah khoshe ah tüihtok nak a aut vai ah Bawipa Jesuh cu Mumcha naw bung ah hteh püi ci. 2 Bawipa Jesuh cu hnüüp phli-kip la mü phli-kip ung a ei kaa ah om netah, ei ah cawi lawk ci. 3 Cun kawn ah khoshe naw law shi netah, “Nang cu Khanpughi ah Htapa ah na kiak ung shin ah lung gui shi, m'htut ah kiaë khai ah pyang ä, ci ne kiak nak ci. 4 Cun ung phi Bawipa Jesuh naw, “Chang cu ei bäng awn ghing ciah kä kiak ci, Khanpughi ah ng'thu awn hnun m'ghin vai, ciah cacim ung om ci, ci ne kiak nak ci. 5 Cun kawn ah khoshe naw Bawipa Jesuh cu Jerusalem, theingcim pi ciah gawnu ung, ak hlüng pibäih pum im khan ah hteh püi netah; 6 “Cacim ung, Khanpughi naw nang ning m'hteihtang khai gui ah khankho chang gui zuk tüi law sei, ngahmi naw nang ah kho cu lung naw kä ning tawn-en khai ah ning chang khai gui’ ciah om ci. Cun ah kia sei nang cu Khanpughi ah Htapa akcang ah na kiak ung zu ng'htoü shüm ä, ci ne kiak nak ci. 7 Bawipa Jesuh naw, “Na Bawipa Khanpughi cu kä na tüihtok vai, ci ne cacim ung om ci, ci ne kiak nak ci. 8 Cu kawn ah khoshe naw Bawipa Jesuh cu, hlüngtai pibäih ciah khohtung khan ah hteh püi ne, khomdek khan ah chang ah uk nak kho avan la ami bämang nak avan cu m'hnuh netah, 9 “Kei cu m'khuukdong ne na na khawihnah ung shin gui avan ka ning pek khai, ci ne kiak nak ci. 10 Bawipa Jesuh naw, “khoshe a hei ah hteit ä! Cacim ung, ‘Na Bawipa Khanpughi bäng na khawhnah vai, ani ah bi bäng na bi vai’, ciah om ci nei, ci ne k'täm ci. 11 Cun kawn ah khoshe cu a hei ah hteit khätah, khankho chang gui kyum law u ne, Bawipa Jesuh cu m'hteihtang ci gui. 12 Bawipa Jesuh cu Johan pha ne ami chum ng'za netah, kalile kho ah hteit ci. 13 Ani cu Nazareth kho ung kä om ne, Zebulun la Nahtali kho ah ng'lak Kalile tuili pei, Kapernaum gawnu ah hteit ne om ci. 14 Cun ah abi cu profet Isaiah ah ng'thu aküm nak vai ah kiak ci. Profet Isaiah naw; 15 “Zebulun khaw la Naphtali kho, Tuinu ah hteh nak lam ung om ci gui ah Jordan tuinu vang ga kho, Chang pakhui hei gui ah om nak ah Kalile kho! 16 Ak hmüp nak ung om ciah chang gui naw, akdei khang hmu lawk khai gui; Sih nak ah khomü ung om ciah chang gui ah khan ah, Akdei khang cu gawk lawk khai nei, ci ne pyein ci. 17 Cun ung tüi ne Bawipa Jesuh naw, “Nami shetkat nak ng'nü ung ng'zu ba vä, khankho uk nak ng'et law pyii ci nei” ci ne ng'thu pyein lawk ci. 18 Bawipa Jesuh cu Kalile tuili nu pei ah a hteh sang ung ngakpha ng'phäi nau goi cu hmu goi ci. Cun goi cu Simon (Peter ah phi ami khü) la anau Andru ah kiak ci. Ngani cu tuili ung ng'vai vawi ne om ci goi. 19 Bawipa Jesuh naw, “Ka hnu ah na läk nä, chang phak ciah ngakpha ah ka ning pyang goi khai, ci ne khü goi ci. 20 Ngahni cu acun vai-am ani ng'vai nawng shüt ni ne, Bawipa Jesuh ah hnu ah läk ci goi. 21 Cun ung kaa hteit ba netah, Zebedee ah hta goi James la Johan ng'phäi nau goi cu hmu ba goi ci. Ngahni cu ani pa Zebedee awn atäng ah 'hleiko ung ng'vai kiang ne om ci goi. Bawipa Jesuh naw ngahni cu ahnu ah ani läk vai ah khü goi khätah, 22 ani hleiko la ani pa nawng shüt ne läk tuk ci goi. Gui 23 Bawipa Jesuh cu Kalile kho avan ung hteit ne pum im gui ung m'theithang gui ci. Khankho ah mawng ng'thu phi pyein ci, ahlü hlü ah gawpai ci gui phi gai sak gui ci. 24 Bawipa Jesuh ah mawng cu Siria kho avan ung thang law khätah, chang gui naw khoshe ah kai gui, mangtak ci gui, akut kho shum ci gui la agü ahlü ah gawpai ciah chang gui cu a om nak ah law püi ci gui. Bawipa Jesuh naw cun gui ami van gai sak gui ci. 25 Kalile kho, kho pagha ah ming ciah Dekapoli kho, Jerusalem gawnu, Judea kho la Jordan tuinu vang ga ah om ciah chang khli naw Bawipa Jesuh cu ahnu ah läk lawk ci gui.
1 Bawipa Jesuh cu chang gui akda hmu gui netah, m'htung khan ah hang kai ci. 2 A ngoh nak pei ah ang düihpüi gui naw veing ne k'bui u khäta shinah theithang gui ci; 3 “Mumcha geinvai ah mawng hmat ciah chang gui zeikiai vä; Khankho cu nangmi ah kho ah kiak ci! 4 “Am lung thüisei ci gui zeikiai vä; Khanpughi naw m'lung üp nak ning pe gui khai. 5 “Am lung hnip ne a om nik ciah chang gui zeikiai vä; Nangmi ung Khanpughi ah shaitaak cu kümbe khai! 6 “Khanpughi ah ng'zak hlü ah bilo hlük ciah chang gui zeikiai vä; Nangmi cu Khanpughi naw nami ng'zak hlü ning 'be sak gui khai! 7 “M'geinsei nak om ciah chang gui zeikiai vä; Nangmi cu Khanpughi naw ning m'geinsei gui khai 8 “Am lung kyong theingthap ci gui zeikiai vä; Nangmi naw Khanpughi nami hmuk khai! 9 “Dimdeeih nak bik ci gui zeikiai vä; Khanpughi naw ahta ah ning khü gui khai! 10 “Khanpughi ah düng nak abi nak awn, Shedam nak gah ciah chang gui zeikiai vä; Khankho cu nangmi ah kho ah kiak khai! 11 “Kei ah hmawk ah chang gui naw ning shedam na gui ne, käng düng ci awn ahlü hlü ah a ning m'kat law gui ung, nangmi cu zeikiai nak om sä, nangmi cu kei na läk ciah nami kiak ci nei. 12 Zeikiai ne lünlawi vä, khankho ah nangmi ah gah vai ah m'cümhnah nak cu däm aih ci nei. Caü profet gui phi a cun ah mäih ah shedam nak gah pyi ci gui nei. 13 Nangmi cu chang nüng ah hmawk ah m'shii ah mäih ah nami kiak ci. M'shii cu atui a maih kawn ah tui ba khai ah kä pyan ba hlawt nei. Kä ei mang ba phia sei, k'tai ah ghawh ung chang gui naw kai nak ci gui. 14 Nangmi cu m'dek khan avan ung akdei ah mäih ah nami kiak ci. M'Htung lai ah k'süm ah pigaw cu a i naw kä shung hlawt ci. 15 Mei m'däi netah a u naw dawn awn kä uk man ci. Im kyong ah chang avan adei vai ah lung k'pei ung vah mei m'däi man ci gui. 16 A cun ah mäih ah chang gui naw akni ah nami om cu ning teng gui u ne, khankho ah om ciah nami Pa cu ami m'hlüngtai vai ah, chang gui ah ma ah nami dei nak cu va deikhang sak vä. 17 Moses ah Thukhän la profet gui ah cacim cu ka plawh sheh khai ah ka lawk ciah kä nami ngaih-en vai. Ka plawh sheh khai ah ka lawk ciah kä kiak ci, a cun gui ka kümbe sak khai ah ka lawk ci nei. 18 Kei naw akcang ka pyein cu, khomdek la khankho a om zah ah chuih cacim ung kaa, ca ng'lung ät, ca ng'ma ät phi kä dimaih düt khai. Cacim ung om ci phung avan küm zawp khai nei. 19 Akzaw pibäih ah thukhän kä läk vai ah m'theithang tuk ciah chang cu, khankho ah akzaw ken pibäih ah kiak khai. Cun ung phi thukhän gui cu läk ne, chang-am phi a läk vai ah m'theithang tuk ciah chang cu, khankho ah hlüngtai pi khai. 20 Kei naw akcang ka pyein cu, Khanpughi ah ang zak hlü ah om nak ung, Pharisee gui la thukhän saza gui ah mä, kä nami bä pi ah a kiak ung khankho ah kä nami gawk hlawt khai. 21 ‘Chang kä nami ngawn vai, chang ngawn ci cu thawn kium khai, ’ ciah thukhän cu nami hmat pyii ci. 22 Cun ung phi kei naw tuhbäi ka pyein cu, a mät ah phäi nau m'lungshe nak ciah chang cu, thawng kium khai nei. Tumat la tumat ng'vawng shang ne ng'plah tang tuk ciah chang cu, zung ah m'kawt ung m'kat nak gah khai nei. A mät ah phäi nau chang k'she ah m'keih ciah chang cu, m'htei-mei ung lut khai nei. 23 Cun ah kia sei nang cu Khanpughi ah mangkiang ung, khawhcham na peit vai na pawng law püi ung, na phäi nau awn kä nani ng'gei nak a om ah a kiak ung, 24 na peit vai ah khawh cu, mangkiang ah ak ka ah nawng shüt netah, ani ah hteit ne nang gei püi ba cang vai, cun kawn ah law ba ne na peit vai ah khawh cu Khanpughi-am na ap vai. 25 ‘Chang naw zung ah a ning chaak ah a kiaë ung, ani awn atäng ah lam ung nani ng'gui zah ung, ani awn akzä ah nani ng'gei ba vai ah na bi vai. Cun ah kä na bi ung ani naw zung bawi ah ning ap sei, zungbawi naw mä thawngbawi ah ning ap ba khätah, thawng ung ning chum khai gui. 26 Na thung vai om ci avan kä na thung pha ah chuih, nang cu thawng ung kaa, kä na lut law ba khai, ’ ciah kei naw ka pyein ci. 27 ‘Chang ah chu hta kä kat püi vai, ’ ciah thukhän cu nami ng'za pyii ci. 28 Cun ung phi tuhbäi kei ah pyein cu, “Ng'zak nak hlü ah m'lung awn hnumi tumat cu nami teng ah a kiak ung, nami m'lung kyong ah a cun ah hnumi awn kat nak nami bi pyii ci. 29 Nakpat lam ah na mik naw a ning hmühma sak ung, a cun ah mik cu kawih ne na ghawh vai, na pumsa avan m'hteimei ung a luh ah k'dam ah na mik vangtäng am dauh cu bä tu ba khai. 30 Nak pat lam na kut naw a ning hmühma sak ung, cun ah kut cu tupit ne na ghawh vai. Na pumsa avan m'hteimei ung a luh ah k'dam ah na kut vangtäng a pit cu bä tu ba khai. 31 ‘Akchu ng'chaa püi hlük ciah chang naw ng'chaa nak ah ca gu ne a peit vai’ ciah thukhän om ci. 32 Cun ung phi chang tumat naw akchu cu, ahei awn akat nak kä om ciah ang chaa püi ah a kiak ung akchu ah khan ah kat nak bik ciah kiak ci. A cun ah hnumi chu na tu ba ci cun phi, chang ah chu kat püi ciah kiak ci’ ci cu ka ning m'thein gui ci. 33 ‘Cun kawn ah, thukhän shaitaak kä plawh vai, Khanpughi ah ma ah thukhän shaitaak ah mäih ah bilawh vai’ ci cu nami hmu ng'za pyii ci. 34 Cun ung phi nangmi naw thukhän shaitaak nami bi ung kä nami ng'phyun en vai. Khankho khü ne kä nami ng'phyun vai, khankho cu Khanpughi ah mangkiang ah kiak ci. 35 Khomdek khü na kä nami ng'phyun vai, khomdek cu Khanpughi ah kho ng'leh nak ah kiak ci. Jerusalem gawnu khü ne kä nami ng'phyun vai, Jerusalem cu ghangpughang ah mang gaw ah kiak ci. 36 Nami mät ah lu phi taam ne khü ne kä nami ng'phyun vai, a i ah kia sei ci ung lumu ng'ma ät phi le khai, bauk khai ah kä nami pyang thei ci. 37 Akcang la kä akcang cu düngnak awn nami pyein vai, cun ah kawn ah nami ng'thu cu khoshe ah ning thu sak gui ah kiak ci. 38 ‘Mik ah hmawk ah mik, ha ah hmawk ah ha, ’ ciah thukhän cu nami ng'za pyii ci. 39 Cun ung phi nangmi ning kat na gui ciah chang ah khan ah phu kä nami tuk vai, ci ne kei naw ka pyein ci. Nak pat lam nang being ami ning k'beeih ung, nak eng lam nang being mä na cun ba vai. 40 Nak htu ng'zung ät ami ning guh ung, na zih ng'zung phi na pek gui vai. 41 Ning shedam nah ne mäng ät ami ning hteh sak ung, mäng goi na läk tu vai. 42 Ning zawi lawk ci-am na peit tu vai, ning pu lawk ci-am nak pu tu vai. 43 ‘Nami teihpüi nami m'hni vai, nami gaa nami gen vai, ’ ciah thukhän cu nami ng'za pyii ci. 44 Cun ung phi nami gaa nami m'hni vai, ning shedam nah gui ci nami taigü peit vai, ciah kei naw ka pyein ci. 45 Cun ung vah nangmi cu Khanpughi ah hta ah nami kiak khai. Khanpughi naw chang k'ni, chang k'she van ah khan ah kho zuk so sak ci, akni akshe bik ci van ah khan ah kho phi zuk aa sak ci. 46 Ning m'hni gui ci bäng nami m'hni tu ba ung, a i chaa ah Khanpughi naw m'cümhnah nak ning pe gui khai ang? Akhawn look ciaè chang gui naw phi a cun ah mäih ah bik ci gui nei. 47 Nami teihpüi bäng nami ng'cengcäk püi ung, nami om ih cu a i chaa ah dang khai ang? Khanpughi kä hmat ci gui phi a cun ah mäih ah om ci gui nei. 48 Khankho ah nami Pa akümbe ah mäih ah nangmi phi nami kümbe vai nei.
1 ‘Chang ah ma ah chang gui ah ning hmuh gui vai ah peit taak nak cu kä nami bi vai. Chang gui ah ning hmuh gui vai ah nami bi ah a kiak ung, khankho ah om ciah nami Pa naw a i phi kä ning m'cümhnah gui khai. 2 ‘Cun ah kia sei peit taak nak nami bi ung ming thang hlük ci gui ah bi ah mäih ah pum nak im gui la lam kyum gui ung, dang khai ah kä nami bi vai. Ngahmi cu chang naw am hlüngtai gui vai ng'za hlü u ne, ami bi ah kiak ci. Kei naw akcang ka pyein cu, ngahmi cu ami mät ah ng'zak hlü gah pyii ci gui ah kiak ci nei. 3 ‘Peit taak nak nami bi ung kä ng'dang khai ah nami bi vai. 4 Nak pat lam naw abi cu nak eng lam naw phi kä a hmat ten vai nei, kängdang ciah bi cu hmuh thei ciah napa naw m'gein nak m'cümhnah ning pek khai nei. 5 ‘Nangmi cu nami taigü ung ming thang hlük ciah chang gui ah mäih ah kä nami taigü vai. Ngahmi cu chang ah hmuh gui vai ah, pum im kyong ung la lam kyum gui ung ng'düi ne taigü ci gui. Kei naw akcang ka pyein cu, ngahmi cu ami mät ah ng'zak hlü gah pyii ci gui nei. 6 Cun ah kia sei nangmi cu na mi taigü ung, kyong ah lut ba ne shoh khai netah, mik awn kä hmuh ah nami pa ah nami taigü vai. Kä dang khai ah bi cu hmuh thei ciah nami pa naw m'cümhnah nak ning pe gui khai. 7 ‘Nami taigü ung Khanpughi kä zum ci gui ah taigü ah mäih ah lawmkaam düt ne kä nami taigü vai. Ngahmi cu aksho ang sau ah taigü ung gah vai ah ngai ci gui. 8 Ngahmi ah mäih ah kä nami bi-en tu vai. Nami Pa naw kä nami ng'zawih pha ung nami ng'zak hlü avan cu hmat pyii ci. 9 Cun ah kia sei nami taigü ung; ‘Khankho ah om ciah kami Pa; Na ming theing thang sä; 10 Na uk nak gawk law sä; Khankho ah mäih ah m'dek khan ah phi nang zak hlü cu kümbe sä; 11 Ak hnüüp tä män h nak vai ei na pe gui ä. 12 Na kat na gui ci kami m'gein ah mäih ah, Kami kat nak nam gein gui ä. 13 Tüihtok nak ung kä gawk vai ah, Kä nik ci phung ung nam htei gui ä. Uknak, hlüngtai nak la Bawimang nak cu, Nang ung ang täih ah om sä, Amen, ’, ci ne nami taigü vai. 14 ‘Nami khan ah kat nak bi lawk ci phung nami m'gein ung khankho ah om ciah nami Pa naw nami kat nak cu ning m'gein gui khai. 15 Cun ung phi nangmi naw chang ah kat nak kä nami m'gein ung, nami Pa naw nami kat nak cu kä ning m'gein gui khai. 16 ‘Nangmi cu ei nami hlawi ah a kiak ung, ming thang hlük ci gui ah mäih ah müi ng'haam khai ah kä nami om vai. Ngahmi cu ei ami hlawi ah mawng ang dang vai ah ei cawi ciah müi hmai awn hteit hton ci gui. Kei naw akcang ka pyein cu, cun ah chang gui cu ami mät ah ng'zak hlü gah pyii ci gui nei. 17 Nangmi cu ei nami hlawi ah a kiak ung nami m'hmai m'hla ne, nami lu huih ne, nami säimai vai nei. 18 Cun ung vah mik awn kä hmuh thei ah nami Pa ah kawn ah a u naw phi ei nami hlawi ah mawng kä hmuhmat khai. Kä dang ciah bi cu hmuh thei ciah nami Pa naw, m'gein nak m'cümhnah ning pe gui khai. 19 ‘Thu kaa m'pyiit zaup ne, m'guk ei ah m'guuk nak thei ah, khomdek khan ung khawh chaam kä nami m'cun m'seh vai. 20 Kä thukaa kä m'kyiit zaup ne, m'guk ei ah kä m'guk nak thei ah, khankho ah khawh chaam cu nami m'cun m'seh vai. 21 A i ah kia sei ci ung nami khawh chaam ah om nak ah, nami m'lung cu gawk thei ci. 22 ‘Mik ui cu pumsa ah hmawk ah meidäi ah mäih ah kiak ci. Nami mik ui a ci ung nami pumsa avan dei zawp khai. 23 Nami mik ui a mü ung nami pumsa avan hmüp zawp khai. Cun ah kia sei nangmi ung om ciah akdei cu, ak hmüp ah a kiak lä ung, cun ah hmüp cu anghtei ah mü ne hmüp khai nei. 24 ‘A u chang phi bawi hnih ah chang shäm ah kä kia hlawt khai, a bawi tumat cu gen ne tumat cu m'hni khai; tumat ah pyein ah om-ne, tumat cu a i ah kä sui khai. Nangmi cu Khanpughi ah chang la ghui ngui ah chang ah akawng ät ah kä nami kia hlawt khai. 25 ‘Kei naw akcang ka pyein cu, a i ei auk vai ci ne, nami hnun gui ah hmawk ah kä nami ng'ä vai, a i suibei vai ci ne, nami pumsa ah hmawk ah kä nami ng'ä vai. Hnun ghin nak cu ei ah mä bä pi ne, pumsa cu suibei ah mä bä pi ciah kä kia ne ang? 26 Zong shüi shüi ciah, kha gui cä teng shüm vä, ngahmi cu m'shi kä phu ci gui, geit kä khäm ci gui, im khei ung ei käm sep ci gui; Cun ung phi khankho ah om ciah mi Pa naw ngahmi cu tumbei gui ci. Nangmi cu kha gui ah mä nami hlüngtai pi ciah kä kia ne ang? 27 Nangmi ung kaa a u naw, ang'ä ai nak awn, a hnun ghin nak ng'sau sak pi hning khai ang? 28 ‘A i ah kia sei nami suisak vai ah nami ng'ä ang? M'ghaw hmu ah chei pai gui cä teng shüm vä. Ngahmi cu bi phi kä bik ci gui, sui phi kä tah ci gui. 29 Cun ung phi ang htei ah bühmang ciah ghanpughang Solomon naw phi, cheipai tumat hta ah mäih ah kiom ci cu kä suisa man ci nei, ci cu ka ning m'thein gui ci. 30 Zum nak ken ciah chang gui, tuhngawi ching ne ngawi ung chawng sei mei ah uih vai ah, khu m'ghaw gui pang hngaw Khanpughi naw cun ah a müisa sak gui ung, nangmi läi cu, cun ah dämda hlüngtai pi khai ah, ning müisa sak gui khai ah kä kia ne ang? 31 ‘Cun ah kia sei a i ung kaa, ei auk vai, suibei vai, ci ne kä nami ng'ä ai vai. 32 (Khanpughi kä zum ci gui cu a cun ah ng'ä ai ci gui nei). Khankho ah om ciah nami Pa naw, cun gui nangmi naw nami ng'zak hlü cu avan hmat ci. 33 Khanpughi ah uk nak kho la ang düng nak cu akhtük bäih ah nami shui vai, cun kawn ah apäng avan cu ning pe gui khai. 34 Cun ah kia sei ngawi ung ah hmawk ah kä nami ng'ä vai, ngawi ung ah hmawk ah amät ah män h nak vai ng'ä ai nak om tu hnga ci. Tuhngawi bui aut ng'ä ai nak gui cu, tuhngawi ah hmawk ah bä pyii ci nei.
1 ‘Pawchang kä nami m'khoi m'chaa vai, cun ung Khanpughi naw kä ning m'khoi m'chaa gui khai. 2 Chang nami m'khoi chaa ah mäih ah Khanpughi naw ning m'khoi chaa gui khai. Chang nami m'khoi chaa nak ung nami bi ah mäih ah Khanpughi naw nami khan ah bi bik khai. 3 A i ah kia sei nami mät ah mik ung kaa, mik eek cu kä hmuh ah, nami phäi nau ah mik ung ng'voihta cu nami hmuh peit ang? 4 Na mät ah mik ung kaa mik eek cu nawng-en ne, a i ah kia sei na phäi nau ah mik ung kaa, ng'voihta cu, ning ghu pe vang na ci ang? 5 Nang thuvichang, na mät ah mik ung kaa mik eek cu, na ghu ma vai; cun ung vah na phäi nau ah mik ung kaa ng'voihta cu ang htei ah hmuh ne na ghu pe hlawt khai. 6 ‘Ak theingcim cu ui gui-am kä nami peit vai, cuh ah nami peit ung ng'hlat law ba ne ning htui gui khai. Ghui k'cünglung cu vawk gui ah ma ah kä nami m'shän vai, nami m'shän ung ami kho awn leh ne kai na khai gui. 7 ‘Ng'zoi vä nami gah khai, shui vä nami hmuk khai, kshoh cu khäk vä ning hmawn pe gui khai. 8 Ng'zoi ci naw gah ci, shui ci naw hmuk ci, kshoh khäk ci phi hmawn pek ci. 9 Nangmi ung ka, ahta naw m'htut ang zoih ung lung pek khai ah chang; 10 nga ang zoih ung kphyu pek khai ah chang, om ne ang? 11 Nangmi chang kaa gui hngaw naw nami hta gui-am ak ni peit vai nami hmat ung, khankho ah om ciah nami Pa naw, ama ah ng'zoi lawk ciah chang gui-am ak ni pi gui cu pek khai ah kä kia ne ang? 12 Nami mät ung chang naw abi vai nami ng'zak hlü ah mäih ah chang ung phi nami bi vai. Cun cu Moses ah thukhän la profet gui ah m'theithang nak ah kiak ci. 13 ‘Ng'hteik ciah m'kawt ung lut tu vä, m'hteikho ah hteh nak ah lam la m'kawt cu ng'shawng ciah kia sei, cun ah lam ung hteit ci gui cu da ci gui. 14 Ang täi ghin nak ah lam la m'kawt cu ng'hteik ciah kia sei, cun ah lam hmuk ci gui cu ken ci gui. 15 ‘Htome ah vun awn ng'hlawp ciah hngei ah mäih ah hleeihlak ne lawk ciah profet gui cu nami geing nak vai. 16 Ngahmi cu hleeihlak ciah profet ah ami kiak ah mawng cu, ami bilawh awn nami hmat khai. Ng'hling shun ung sapyit kä m'theih man ci, ng'hling ghing ung k'thei phi kä m'theih man ci. 17 A ghing nik ci cu akni ah m'theih ci, a ghing shek ci cu akshe ah m'theih ci. 18 A ghing nik ci cu akshe ah käm theih ci, a ghing shek ci cu akni ah käm theih ci. 19 Chang gui naw akni ah käm theih ciah a ghing gui phung cu, chupit ne mei ung k'bum man ci gui. 20 Cun ah kia sei hleeihlak ciah profet gui cu, ami mät ah bilawh awn nami hmat gui khai. 21 ‘Bawipa, Bawipa, ’ ci ne na khü ciah chang van düt, khankho ah kä lut hlawt khai, khankho ah om ciah ka Pa ah ang zak hlü ah om ciah chang bäng vah gawk hlawt khai. 22 M'khoichaa nak ah hnüüp a gawk law ung chang akda naw, ‘Bawipa, Bawipa, nang ah ming awn Khanpughi ah ng'thu cu ka pyein ci nei, nang ah ming awn khoshe khogam phi kami ktäm ci nei, nang ah ming awn cäi aih gui vai phi kami m'dang ci nei, ci ne kiak khai gui. 23 Cun ung phi cun ah chang gui-am, ‘Chang she gui aw, nangmi a i zah ung phi kä ka ning hmat gui man ci nei, ka pei ah kä om ne a hei ah hteit vä, ’ ci ne ka kiak na gui khai. 24 ‘Kei ah ng'thu cu ngai ne ng'za ne läk ciah chang cu, lung khui shawk ne im co ciah Lunglang ciah chang awn täng ci. 25 Khokhe aa ne, tuinu ng'güt ne, puikho khi ne ang tum law ung phi cun ah im cu, lung ung cawh ah kia ne kä ng'gäi hlawt ci. 26 ‘Kei ah ng'thu ngai ne ng'za lang ne, kä läk ciah chang cu bigin ung khui shawk ne im co ciah chang k'ang awn täng ci. 27 Khokhe aa ne, tuinu ng'güt ne, puikho khi ne ang tum law ung, cun ah im cu ng'gäi ne maih ci. Cun ah im adi-dam nak cu nui aih aih ci nei!”. 28 Cun ah Bawipa Jesuh naw ng'thu a pyein kawn ah, chang gui cu ani ah m'theithang ah hmawk ah cäicat ci gui. 29 A i ah kia sei ci ung ani naw thukhän saza gui ah mäih düt ah kä kiak ciah ah huham mah ne am theithang ah hmawk ah kiak ci.
1 Bawipa Jesuh cu m'htung khan ah kaa kyum law ba khätah, chang khli naw läk lawk ci gui. 2 Cun sang ung kheilei ung gaw ciah chang tumat cu, Bawipa ah ma ah m'kuukdoong netah, “Bawipa na ng'zak hlü a om ung kei ah gaw nak cu na theek sak ä, cik ci. 3 Bawipa Jesuh naw akut k'phiaat ne hei tawn netah, “Ka ng'zak hlü om ci nei, theingthap sä, cik ci. A cun vai-am cun ah chang cu theek ne gai ba ci. 4 Bawipa Jesuh naw, “Shin ah mawng cu a u-am kä nam thein-en vai, cun ung phi taigü ng'vai ah hteit ne na pumsa cu nam hnuh vai, cun kawn ah na gai nak ah mawng ang dang vai ah Moses ah thukhän ah mäih ah peit taak nak na bi vai, ci ne kiak nak ci. 5 Bawipa Jesuh cu Kapenaum gawnu ah a gawk law zah ung, Roman gabawi cu a pei ah law netah, 6 “Bawipa, kei ah ka chang tumat cu ang htei ah gawpai ne, a ih phak ung ng'zän ci nei, ci ne ng'hui paa nak ci. 7 Bawipa Jesuh naw, “Kei naw law ne ka gai sak khai nei, ci khätah; 8 Gabawi naw, “Nang cu kei awn kä ni khin ciah kiak sei, ka im kyong ah na law vai ah kä khin pang ci nei, m'khüt näng nak thu bäng na pyein ung ka chang cu gai ba khai nei. 9 Kei cu kang vai ah ng'thu ka ngai ci, kei ah kaa ah phi gakap gui om ci gui. Gakap tumat cu hteit ä, ka ci ung hteit ci, law ä, ka ci ung lawk ci, ka chang shäm cun phi cun bi ä, ka ci ung bik ci, ci ne pyein ci. 10 Cun a ci ah thu cu Bawipa Jesuh naw ng'za ne cäicat netah, chang gui-am, 11 Kei naw akcang ka pyein cu, shin ah mäih zum nak cu Israel chang gui ung kä ka hmu man ci. Chang akda cu hni law lam la hni kiaak lam ah ka Law u ne, Abraham ni, Isak ni, Jakop ni gui awn atäng ah vunvai ne ei auk khai gui. 12 Cun ung phi uknak kho ung khai shi ah chang gui läi cu thüi kyah nak, ha htui ne geinvai nak ah ak pung lam kho hmüp khui ah k'täm gui khai, ci ne pyein ci. 13 Cun kawn ah Bawipa Jesuh naw, gabawi-am, “Na im ah hteit ba ä, na zum ah mäih ah kiak khai nei, ci ne kiak nak ci. A cun zah ung gabawi ah chang cu gai ba pyii ci. 14 Bawipa Jesuh cu Peter ah im ah hteit netah, Peter ah kawinu gaw ne ih phak ung ng'zän sei hmuk ci. 15 Bawipa naw cun ah hnumi ah kut cu tawn khätah, ani cu a cun vai-am gai ba ne, Bawipa Jesuh cu khin nak ci. 16 Khomü lam ah chang gui naw khoshe ah kai, chang akda law püé u sei, khoshe gui cu k'de ne k'täm gui ci. 17 Cun ah abi gui cu profet Isaiah ah ng'thu ung, “Kami gaw nak gui näng ne, kami nat nak gui hteh püi zawp ci nei” ci cu a küm nak ah kiak ci. 18 Bawipa Jesuh naw a pei ung ah om ciah chang gui teng gui netah, tuili nu hei gaa ah vah kai vai ah, ang düihpüi gui cu khü gui ci. 19 Thukhän saza tumat cu law netah, “Bawipa na hteh nak päng ah ka ning läk tuk khai nei, ci ne kiak ci. 20 Bawipa Jesuh naw, “Sa-ui cu a khui om ne, kha cu ang bu om ci, cun ung phi chang ah Htapa cu ang düm nak vai a i kä om ci, ci ne kiak nak ci. 21 Ahei ang düihpüi tumat naw, “Bawipa, kapa ah gook ka va htüm ba cang khai, ci ne pyein ci. 22 Cun ung phi Bawipa Jesuh naw, “Ka hnu ah na läk ä, ak si cu ak si gui naw htüm u sä, ci ne kiak nak ci. 23 Bawipa Jesuh cu hleiko khan ah hang kai ba sei, ang düihpüi gui cun phi hteit tu ba ci gui. 24 Tuilinu ung akten ah puikho khinu ng'pheet ne khi ne, hleiko cu tui ng'hnawk naw k'plüm lawk ci. Cun ung phi Bawipa Jesuh cu abü ah ip ci. 25 Ang düihpüi gui naw Bawipa Jesuh cu m'tho u netah, “Bawipa na hun gui ä, kami si lawk khai kiak ci nei, ci ne pyein ci gui. 26 Bawipa Jesuh naw, “A i ah kia sei nami kyih aih ang? Nami zum nak ken aih ci nei, ci ne kiak na gui netah, khokhi tui ng'hnawk cu k'de ne ng'düm sak sei, a cun vai-am khokhi cu ng'düm zawp ci. 27 Ang düihpüi gui cu cäicat u netah, “Shin ah chang cu a i chang leng leng ang, khokhi tui ng'hnawk naw phi ang thu ngai ci nei, ci ne kiak ci gui. 28 Cun kawn ah Bawipa Jesuh cu tuilinu ah vang-gaa, Kadra kho lam ah vah kai ci. Cun zah ung khoshe ah kai chang sing goi cu, ng'cim hmun ung kaa lut law ni ne, Bawipa Jesuh cu hmu lawk ci goi. Ngahni cu ngetngawng aih ni sei cun ah lam ung a u kä hteit ba ci. 29 Ngahni naw, “Khanpughi ah Htapa, Bawipa, nang naw keini cu a i ah na na ci goi hlük ci ang? Akhin kä gawk law pha sei keini cu, na nam kat goi khai ah na lawk ci ma? ci ne m'lau ci goi. 30 Cun ah chang goi awn api ang shawng nak ung, vawk mak ät cu ei ei ne om ci gui. 31 Khoshe gui naw, “Bawipa, keimi na na k'täm gui vai ung, vawk gui ung kami luh vai ah nam gein gui ä, cik ci gui. 32 Bawipa Jesuh naw, “Hteit vä, ci khätah, khoshe gui cu chang goi ung kaa lut law u ne, vawk gui ung lut ci gui. Vawk gui mak ät lüng cu, tuikam zung ah ng'täm tu ne dawng u ne, tuili ung lut ne si zawp ci gui. 33 Vawk shäm ci gui cu gawnu kyong ah dawng ba u netah, khoshe ah kai ah chang goi ah mawng la ami hmuh nüng avan cu pyein ne ngak ci gui. 34 Cun ah kia sei pigaw ah chang avan cu Bawipa Jesuh ah om nak ah gawk lawk ci gui. Bawipa Jesuh cu hmuh law u netah, ami kho ung kä a om ba lä vai ah ng'ge püi ci gui.
1 Bawipa Jesuh cu 'hleiko ng'cum ne, tuili ah vang-gaa ah va kai ba netah, amät ah pigaw ah hteit ba ci. 2 Cun zah ung chang gui naw akshum tumat kawt ne law püi ci gui. Bawipa Jesuh naw cun ah chang gui ah zum nak cu hmu netah, shum ciah chang-am, “Kahta, kä na ng'ä vai, na kat nak cu ning k'phiawn pyii nei, cik ci. 3 Thukhän saza am shah gui naw, “Shin ah chang cu Khanpughi ah khan ah kat nak awn ng'thu pyein ci nei, ci ne ami mät ng'cengcäk ci gui. 4 Bawipa Jesuh naw, ngahmi ah ngaih cu hmat netah, “Nangmi a i ah kia sei cän ah akshe ah nami ngaih tüh ang? 5 Na kat nak ning k'phiawn pyii nei, ci ang a zäi tu ba, tho law ne hteit ä, ci vai ang a zäi tu ba? 6 Cun ung phi chang ah Htapa naw, khomdek khan ah kat nak ak phiawn hning cu, ka ning hmuh sak gui khai nei; ci netah shum ciah chang-am, “Tho law ne na ih phak look ne, na im ah hteit ba ä, ci ne kiak nak ci. 7 Cun ah chang cu tho law ne a im ah hteit ba ci. 8 A cun ah mawng hmuh teng tuk ciah chang gui cu cäicat u netah, chang gui-am shin ah mäih ah huham pek ciah Khanpughi cu m'hlüngtai ci gui. 9 Bawipa Jesuh naw cun ung kaa a hteh nak ba lam ah, azung kyong ah ngok ciah, akhawn look ciah Matthe cu hmu netah, “Ka hnu ah na läk ä, ci ne kiak na sei, Matthe cu tho law ne a hnu ah läk tuk ci. 10 Bawipa Jesuh cu Matthe ah im ah mü ei a ei tu zah ung, akhawn look ci gui la ami shadam nak ah chang gui phi vun ne ei tuk ci gui. 11 A cun gui cu Pharisee gui naw hmuh u netah, “Nami saza cu a i ah kia sei, shin ah changshe gui awn vun vai ne a ei awk tu ang? ci ne ang düihpüi gui cu ng'shik ci gui. 12 Cun ah ami ng'shi gui cu Bawipa Jesuh naw ng'zah netah, “Akgai ah hmawk ah seisaza kä hlü ci, akgaw ah hmawk ah vah hlü ci, 13 Kei cu peit taak ah mä m'gein nak kam hni pi ci, ciah cacim cu teng ne vang ngaih tüh ba vä. Kei cu chang k'ni gui ka hun gui khai ah ka lawk ciah kä kiak ci, chang she gui ka hun gui khai ah ka lawk ei nei, ci ne kiak na gui ci. 14 Cun kawn ah Johan ah ang düihpüi gui cu Bawipa Jesuh ah pei ah law u netah, “Keimi la pharisee gui cu a shäng shäng ei kami hlawi ci, cun ung phi nang Bawipa ah düihpüi gui cu, a i ah kia sei ei kä ami hlawi tu ang? ci ne ng'shik ci gui. 15 Bawipa Jesuh naw, “Chumah khai ah pamihta ah a teihpüi gui cu, cun ah pamihta awn atäng ah ami om zah ung, thüisei khai gui ang? Cun ung phi cun ah pamihta cu ngahmi ung kaa la ne ami hteh nak püi vai ah a khin gawk lawk khai nei. Cun kawn ah ngahmi cu ei hlawi khai gui nei. 16 A u naw phi sui ak kheei cu sui akthai awn kä k'dawm man ci nei. K'dawm ah a kiak ung akthai naw kaih sei ak kheei cu teek law pi ci. 17 Sapyit tui asü phi a u naw um akshe ung kä than man ci, than ah a kiak ung um pawk sei sapyit tui phi ng'chawt zawp khai. Cun ah kia sei um phi kä sheka ne sapyit tui phi kä ah dimaih vai ah sapyit tui asü cu um akthai ung than man nei, ci ne m'cäi gui ci. 18 Bawipa Jesuh naw cun ah ng'thu a pyein zah ung, Jew chang zungbawi tumat cu Bawipa Jesuh ah pei ah law ne m'khuukdoong netah, “Ka hta hnumi cu tuhbäi hta sik ci nei, cun ung phi nang Bawipa law ne ak khan ah na kut na taih ah a kiak ung, ani cu ghing ba khai nei, ci ne ng'hui ng'paa ne pyein ci. 19 Cun ah kia sei Bawipa Jesuh cu ng'düi law ne ani awn atäng ah hteit tuk ci. Ang düihpüi gui phi hteit tuk ci gui. 20 Kho kum gha-lei-goi ung asi ng'chawt sei gaw ciah hnumi tumat cu, Bawipa Jesuh ah hnu ah hei k'et netah, 21 “A suinu ah a pyai hta pang ka va tawk ung kei ka gai khai, ci ne ngai ne, a zih pyai cu va tawk ci. 22 Bawipa Jesuh naw ng'hlat ne va teng ne cun ah hnumi cu hmu netah, “Ka hta hnumi kä ng'ä ai ä, na zum nak naw ning gai sak pyii ci nei, cik ci. A cun vai-am cun ah hnumi cu gai ci. 23 Bawipa Jesuh cu zungbawi ah im ah gawk law netah, gook htüm ne, tum ng'lam ci gui cu hmu gui ci. 24 Cun kawn ah Bawipa Jesuh naw, “Ng'nawn vä, shin ah hnumi hta sik ciah kä kiak ci, ip ci nei, ci ne kia khätah, chang gui naw päipih ci gui. 25 Bawipa Jesuh naw chang gui akpung ah tüi gui netah, kyong ah va lut ne, cun ah hnumi hta ah kut cu k'pang ne, m'hto ba khätah hnumi hta cu tho law ba ci. 26 Cun ah a mawng cu cun ah kho avan ung thang zawp ci. 27 Bawipa Jesuh cu cun ung kaa hteit ba khätah, amik m'dauh ciah chang pakhnih naw läk law ni netah, “David ah Htapa nam htei goi ä, ci ne m'lau ci goi. 28 Bawipa Jesuh cu im tumat ung a gawk law zah ung, cun ah chang goi cu gawk lawk ci goi. Bawipa Jesuh naw, “Kei naw nani mik ka ning m'dei sak goi hning ciah nani zum ci ang? ci ne ng'shi goi khätah, “Kani zum ci nei, ci ne pyein ci goi. 29 Bawipa Jesuh naw, ani mik tawk goi netah, “Nani zum ah mäih ah kia sä, ci ne kiak na goi khätah, 30 ani mik cu a cun vai-am m'dei lawk ci. Bawipa Jesuh naw, “Shin ah a mawng cu a u-am kä nani m'thein-en vai, ci ne khän ne m'cäi goi ci. 31 Cun ung phi ngahni cu ani hteh ba vai-am Bawipa Jesuh ah a mawng cu, cun ah kho avan ung thang khai ah pyein ci goi. 32 Ngahni ani hteh ba kawn ah chang gui naw khoshe naw kai sei, ang ciah chang tumat cu Bawipa Jesuh ah law püi ci gui. 33 Bawipa Jesuh naw khoshe ak täm vai-am cun ah ak ang cu ng'thu law thei sei, cun hmuk ciah chang gui cu cäicat u netah, “Shin ahmäih ah amawng ama cu Israel kho ung kä hmuh man nei, ci ne pyein ci gui. 34 Pharisee gui naw, “Shin ah chang naw, khoshe bawi ah peit ah huham awn, khoshe cu k'täm ci nei, ci ne pyein ci gui. 35 Bawipa Jesuh cu gawnu, gawhta apigaw päng ung hteit ne, pum im gui ung m'theithang gui ci. Khanpughi ah uknak kho amawng thu k'ni gui cu m'theithang gui ne, gawpai nak ahlü hlü ung gawpai ci gui phi gai sak gui ci. 36 Chang gui cu htoshäm kä om ciah htome gui ah mäih ah, ami ngaih u vai kä om sei, ami ng'ä ai cu hmuh gui netah, chang gui cu m'gein gui ci. 37 Cun ah kia sei Bawipa Jesuh naw, “Khäm vai htangmguh da pang sei phi, khäm ciah chang gui cu ken aih ci gui. 38 Cun ah kia sei htangmguh khäm khai a tüih law vai ah, htangmguh nak ciah taigü vä, ci ne ang düihpüi gui cu m'cäi gui ci.
1 Bawipa Jesuh naw ang düihpüi chang sing gha-lei-goi cu khü gui netah, khoshe gui ami k'täm nak hning vai la gaw nak phung ami gai sak nak hning vai ah, huham cu pe gui ci. 2 Ang düihpüi gha-lei-goi ah ami ming gui cu; (Peter ami ciah) Simon la anau Andru; Zebedee ah hta goi James la Johan; 3 Philip la Bartolome; Thomas la Matthe akhawn look; Alphaeus ah hta James la Thadaeus; 4 M'lungling ciah Simon; la Bawipa Jesuh gaa-am ap ciah Judas Iskariot gui ah kiak ci. 5 Ang düihpüi chang gha-lei-goi cu Bawipa Jesuh naw shikchaa m'cäi ne tüi gui ci; “Chang pakhui hei gui ah kho gui ung la Samaritan gui ah pigaw gui ung kä nami hteh vai. 6 Maih ciah hto gui ah kiak ciah Israel chang gui ah om nak ah hteit ne, 7 ‘Khankho uk nak ng'et lawk ci nei, ci ne ng'thu pyein vä! 8 Akgaw gai sak vä, aksi m'ghin ba vä, kheei lei ah ei gui theek sak vä, khoshe gui k'täm vä, Khanpughi ah m'gein nak kä khleih ah nami gah ci kia sei, chang gui am aphu kä lak ah vah pe vä. 9 Ghui la ngui ni, khawh cham ni gui m'khäp ne kä nami k'bah vai. 10 Ng'zoih nak ah ng'ip, k'htu ang zung akda, phahnak la ng'shopawng gui phi kä nami hteh püi vai. A i ah kia sei ci ung bi bik ciah chang ah ang zak hlü cu peit taak vai ah kiak ci. 11 A i pigaw ung nami gawk law ung phi, ning dou gui khai ah chang nami shui vai. Cun ah pigaw ung kaa kä nami hteh ba pha ah chuih nami kai nak ah im ung nami om tu vai. 12 Im kyong ah nami gawk ung zeikiai nak om sä’ ci ne nami zavaih vai. 13 Im mah gui naw zei ne ami ning dou gui ung, nangmi ah zeikiai zavaih nak cu ngahmi ung gawk khai, kä ami ning dou gui ah a kiak ung nami zeikiai zavaih nak cu, nami mät ung law ba khai. 14 Kä ning dou gui ne nami ng'thu kä ngai ciah im, pigaw a om ah a kiak ung, a cun ung kaa lut law ba ne, nami kho ung m'vut phi nami khawn shüt vai. 15 Kei naw akcang ka pyein cu, m'khoichaa nak ah hnüüp ung cun ah pigaw gui cu, Sodom la Komorrah ahtah nui pi ciah m'shet nak cu hmuk khai nei. 16 ‘Ngai vä! Hngei khli ah ng'lung ah htome hta chah ah mäih ah, kei naw ka ning tüi gui ci nei. Cun ah kia sei, k'phyu ah mäih ah theileh u ne, am äm kä om ciah müm kha ah mäh ah nami m'lung gei sä. 17 Geing nah ne nami om vai, chang gui naw ning pha gui ne zung ah m'kawt ung ning hteh püi gui khai gui. 18 Mang ah im ung ning tuthat gui khai gui. Nangmi cu kei ah hmawk ah uk-chuk ci gui la ghangpughang gui ah ma ah ning hteh püi gui khai gui. Cun ah kia sei ngahmi gui la a pakhui hei gui-am ng'thu k'ni cu nami m'thein gui khai. 19 Cun gui ah kut ung ami ning ap gui ung, a i pyein ne ng'thu vai, a i ah ng'thu vai cu kä nami ng'ä vai; 20 A khin a gawk law ung nami ng'thu vai gui cu gawk lawk khai. Cun ah ng'thu gui cu nangmi ah thu ah kä kiak ci, nami Pa Khanpughi naw mumcha awn nangmi ung ang thu ah kiak ci. 21 ‘Chang phäi nau gui tumat la tumat sih nak ung ng'ap tuk khai gui, nupa gui naw ami hta gui sih nak ung ap khai gui, ami hta gui naw phi, ami nupa ah m'cäi kä ngai ne ngawn phak khai gui. 22 Kei ah hmawk ah chang naw ning gen gui khai, cun ung phi ak hnubäih ah khüt sei, düng ciah chang cu, hun phiawn nak gah khai. 23 Pigaw tumat ung ami ning shedam nak gui ung, a hei pigaw ah nami dawng vai. Kei naw ak cang ka pyein cu, Israel kho pigaw päng ung bilawh vai kä nami bi zawp pha ung, chang ah Htapa cu kyum lawk khai nei. 24 ‘Ng'thei tuk ci cu, m'thei tuk ciah kä hlüngtai pi ci, 25 Changshäm cun phi a bawi ah kä hlüngtai pi ci. Cun ah kia sei ng'thei tuk ci naw m'thei tuk ci k'pha ne, changshäm cu a bawi ah mäih ah a kiak tu ung zeikiai vai kiak ci. Im kyong ung ang vai pi cu, Beelzebul ah mi khü ung, im kyong ung om ciah chang hmün gui läi cu, akshe pi ah khü gui vai kiak khai. 26 ‘Cun ah kia sei chang kä nami kyih vai, küp gui phung avan ng'hmawng zawp khai, m'zih gui phung avan ng'hmat zawp khai. 27 Hmüp khui ung ka ning m'thein gui ah ng'thu cu khodei ung nami pyein ba vai. Adüm ah nami ng'zak ah ng'thu cu m'kiung khan ah kai ne nami shäü vai. 28 Pumsa a ngawn hlawt ung phi Mumcha kä ngawn hlawt ci cu kä nami kyih vai; pumsa la mumcha avan m'htei kho ah m'di hning ciah Khanpughi bäng nami kyih vai. 29 Biithta hnih cu ngui phe awn khleih hning vai ah kiak ci, cun ung phi biithta tumat phi Pa Khanpughi ah kä hmat ah kä chük maih düt khai. 30 Khanpughi naw nami lu ung lumu avan cu khei ne khän ci. 31 Cun ah kia sei kä nami kyih vai, nangmi cu biithta akda ah mä nami küikyang pi ci. 32 ‘Chang gui ah ma ah kei cu ana Bawipa ah pyein ne, m'dang ne ng'kiaa ciah chang cu, kei naw khankho ka Pa ah ma ah, kakchang nei ci ne m'dang ne ka pyein khai. 33 Cun ung phi chang gui ah ma ah kei na hnu ng'tuk püi ciah chang cu, khankho ka Pa ah ma ah kei naw ka hnu ng'tuk püi khai. 34 ‘Khomdek khan ah dimdeeih nak ka pek khai ah, ka lawk ciah kä nami ngaih-en vai. Dimdeeih nak ka pek khai ah ka lawk ciah kä kiak ci, ng'tai nak vai ah ka lawk ciah kiak ci. 35 Pa la hta, nu la hta, kawinu la a hta gui, ami ng'tai nak vaiah kei ka lawk ci. 36 Chang tumat ung ak nget pi bäih ah agaa cu, amät ah kyong ung kaa ah kiak khai nei. 37 ‘Kei ah mä, anu apa m'hni pi ciah chang cu kei ah düihpüi ah kä kia hlawt khai. Kei ah mä, ahta m'hni pi ciah chang cu, kei ah düihpüi ah kä kia hlawt khai. 38 Amät ah kutlamtung kawt ne ka hnu ah kä na läk ciah chang cu, kei ah düihpüi ah kä kia hlawt khai. 39 Amät ah hnun ghin nak vai k'tha nak ciah chang cu, a ghin nak maih khai, kei ah hmawk ah a hnun ghin nak pek ciah chang cu ghin nak gah khai. 40 ‘Nangmi ning dou gui ci cu kei na dou ciah kiak ci. 41 Kei na dou ci cu, kei na tüi lawk ci dou ciah kiak ci. Khanpughi ah ang shä tüih m'hni ne dou ciah chang cu, chang k'ni ah gah ah m'cümhnah nak gah tuk khai. 42 Kei naw akcang ka pyein cu, kei ah kang khahpüi gui ung kaa, akhmaw pi-am tui k'gei m'zak ät tu ciah chang cu, kei ah kang khahpüi ah gah ah m'cümhnah nak cu, kä gah ah kä om khai.
1 Bawipa Jesuh naw cun ah ang düihpüi gha-lei-goi cu m'cäi gui netah, acun ah kho pei zung pigaw gui ah ng'thu pyein ne m'theithang gui khai ah hteit ci. 2 Bawipa Jesuh ah bilawh gui cu Tuinim Johan naw thawng kyong ah a om nak ah ng'za netah, ang khahpüi gui am shah cu tüi law ne, 3 “Nang cu Johan naw lawk khai, a ci ah Bawipa ang? , kä cun ung a hei Bawipa kami ngäng ba khai ang? ciah ng'shi vä, ci ne, ng'shi sak gui ci. 4 Bawipa Jesuh naw, “Hteit ba ne nami hmuh nami ng'zak cu Johan-am m'thein ba vä. 5 Amik m'dauh gui, m'dei ba ci gui, shumkhem ci gui hteithon ba ci gui, kheilei ah ei gui theek ba ci gui, akpang ak ang gui ng'lang ba ci gui. Aksi gui ghing ba ci gui. Chang pyaam gui naw ng'thu k'ni ng'za pyii ci gui. 6 Kei ah khan ah ngaih gep ciah chang gui cu zeikiai nak om ci nei” ci ne m'cäi gui ci. 7 Johan ah a tüih law gui ami hteh ba kawn ah Bawipa Jesuh naw Johan ah mawng cu chang gui-am m'thein gui ci. “Nangmi cu a i vai Johan ah om nak k'pya lün nu ah nami hteh ang? Kho khi sei hnün ciah khu m'sai gui nami teng khai ang? 8 Kä cun ung a i vai nami hteit ci ang? Ak kyom suisak ci gui nami teng khai ang? Ak kyom suisak ci gui cu mang im kyong ah nei ami om. 9 Kä cun ung profet nami teng khai ang nami hteh? Akcang ah nangmi naw profet ah hlüngtai pi ci cu nami hmu pyii ci nei. 10 Johan ah mawng cu cacim ung; ‘Khanpughi naw, nang ah hteh nak vai ah lam cu pyang khai ah, kei naw ka ng'shä ka tüi law ma khai, cik ci ciah om ci. Johan cu a cun ah kiak ci. 11 Kei naw akcang ka pyein cu, khomdek khan ung Johan ah hlüngtai pi ci, a u kä om ci. Cun ung phi khankho ung akhmaw pibäih cu, Johan ah mä hlüngtai pi ci nei. 12 Tuihnim Johan naw ng'thu a pyein law ung tün ne, tuhngawi ung khüt sei khankho cu, changshe gui naw ng'tuk ng'ah püi ci gui. Cun ah kho cu changshe gui naw khäm zawp vai ah k'tha nak ci gui. 13 Johan ah ng'dang law nak ung khüt lawk khai ah profet gui la Moses ah ng'thukhän naw khankho ah mawng cu pyein pyii ci gui. 14 Ngahmi ah ng'thu pyein cu nami zum ah a kiak ung, Johan cu dang lawk khai ciah Elijah ah kiak ci, ci cun phi nami zum khai. 15 Cun gui cu ak hnga om ci phung naw ngai ne ng'za u sä. 16 ‘Tuhngawi chang gui cu a i awn m'tumtäng gui vai ang? Ngahmi cu sumlei hmun ung ngok ciah akhmaw hta awn täng ci gui. Ak hmawhta gui am shah naw, ahei am shah-am, 17 Keimi tumkhawng u ngä sei phi, nangmi kä nami ng'lam ci, keimi ng'äi kyap u ngä sei phi nangmi kä nami kyap ci’ ci ne ng'hawh tuk ci gui. 18 Tuihnim Johan cu ei phi hlawi ne, zu phi kä aw ne, nangmi ah om nak ah gawk law sei, nangmi naw “Shin ah chang cu khoshe ah kai nei, nami cik ci. 19 Chang ah Htapa cu ei ne, aw ne law sei phi, nangmi naw, ‘Teng tu vä, shin ah chang cu, ei aih aw aih ci nei. Akhawn look ci gui la chang she gui ah teihpüi ah kiak ci nei, ’ ci ne nami pyein ci. Khanpughi ah hmuhmat nak akcang ah a kiak cu, a cun ah hmuhmat nak ung kaa gawk lawk ciah, amawng gui naw ng'dang sak ci gui nei”. ci ne pyein ah gui ci. 20 Bawipa Jesuh naw cäi aih gui vai am dang nak pyii ah pigaw gui cu, kat nak ung kaa ng'zu ba nak kä om khätah, shin ah züi ne m'cäi gui ci. 21 “Aw Khorazin gawnu, nang cu thüisei nak om ci. Aw Bethsaidah gawnu, nang phi thüisei nak om ci. Nangmi ung kamdang ah cäi aih gui vai cu, Taia la Sidon ung kamdang vai sü ung, ngahmi cu cau pui, kat nak ung kaa ng'zu nak ah sui sui ne, m'vut awn ng'hluk ne ami kat nak ung kaa ng'zu ba khai sü gui te. 22 Cun ung phi Khanpughi naw am khoichaa law nak ah hnüüp ung, nangmi cu, Taia la Sidon ah mä däm pi ciah, hma m'kat nak cu nami gah khai. 23 Aw Kapernaum gawnu, nang cu khankho ah khüt khai ah, m'hlüngtai nak na gah khai ah na ngai ci ma? Nang cu m'hteikho ah khüt sei zuk buh nak na gah khai nei. Nang ung kamdang ah cäi aih gui vai cä, Sodom gawnu ung kamdang vai sü ung, cun ah gawnu cu tuhgüt om khai süte. 24 M'khoichaa nak ah kho hnüüp ung nang cu, Sodom ah mä däm pi ciah hma m'kat nak cu na gah khai nei, ci ne pyein ci. 25 Cun kawn ah Bawipa Jesuh naw, “Khankho la khomdek van uk ciah kapa, hmuhmat nak om ci gui-am kä nam dang gui cu, hmuhmat nak kä om ci gui-am m'dang gui ci sei ka ning m'hlüngtai ci. 26 Kapa Khanpughi, cun gui cu nang na mät ah ng'zak hlü ah kiak ci, ci ne pyein ci. 27 Bawipa Jesuh naw, “Kapa naw apäng avan na pe pyii ci, Kapa ah kawn ah ahta hmat ci, a u kä om ci. Ahta la ahta naw am dang gui ah chang ah kawn ah apa hmat ci a u kä om ci. 28 ‘A phuih gih sei cümbawng ciah chang gui kei ah law vä, kei naw ka ning hüizang sak gui khai. Kei cu hnip hnoi ng'awi ng'gi ne, kamlung neim ci. 29 Kei ah ka kawh cu kawt ne, kei ah ng'thei law vä, Nangmi cu hüizang nak nami hmuk khai. 30 Kei ah ning kawh sak gui ah kawh nak cu zäi ne, kei ah ning phuih sak gui ah phuih cu zang ci, ci ne m'cäi gui ci.
1 Cun kawn ah kä shou pha sei Bawipa Jesuh cu kyin hnüüp ung ami loma sun pah ne hteit ci. Ang düihpüi gui cu cawi law u netah, ami kiung htang cu m'zawt ne ei ci gui. 2 Cun cu pharisee gui naw hmu u netah, “Teng shüm ä, na düihpüi gui naw kyin hnüüp ung ami bilawh cu ng'thukhän awn hnu ng'tuk ci nei, cik ci gui. 3 Bawipa Jesuh naw, “David ghangpug hang naw, amät la ak chang gui ei cawi law u netah, bi abi cu kä nami phat tu man ci ma? 4 Ani la apaw gui cu Khanpughi ah pum im kyong ah lut u netah, taigü gui bäng naw ami ei man ah Khanpughi-am peit ah m'htut cu ei ci gui ah kä kia ne ang? 5 Cun kawn ah taigü gui naw kyin hnüüp päng ung kyin nak ah thukhän gui cu m'shet u sei phi m'kat nak gui kä om ci’ ciah Moses ah thukhän ung om ci cu kä nami phat tu man ci ma? 6 Kei naw ka ning m'thein gui cu, shin ung pum im ah tah hlüngtai pi ci om ci nei. 7 Cacim ung ‘Kei naw ngawnsheh vawihpeh ah mä, m'gein nak cu kamhni pi ci, ’ ciah om ciah amawng cu nami hmat vai sü ung, kat nak kä bik ciah chang gui düt thüi nah ne kä nami m'kat gui khai sü te. 8 Chang ah Htapa cu kyin hnüüp ah Bawipa ah kiak ci nei, ci ne kiak na gui ci. 9 Bawipa Jesuh cu a cun ung kaa naw pum im tumat ah hteit ci. 10 Pum im kyong ah akut vangtäng shum ciah chang tumat om ci. Bawipa Jesuh naw kat nak abi vai cu däät ne m'kat hlük ci ah chang gui naw, “Kyin hnüüp ung gaw nak gai sak hning vai ang? ci ne ng'shik ci gui. 11 Bawipa Jesuh naw, “Nangmi ung kaa chang tumat ah htome tumat cu, kyin hnüüp ung khui ung ang kiak ah a kiak ung, kä zu chaan tu ba ah nawng khai ah chang om ne ang? 12 Chang cu htome ah mä hlüngtai pi ci. Cun ah kia sei m'htei phyak ci m'htei tu vai cu, thukhän naw phi khüng ci, ci ne kiak na gui ci. 13 Cun kawn ah Bawipa Jesuh naw akut shum ci-am, “Na kut m'cün ne k'phiäih ä, ci ne kiak nak ci. Akut shum ciah chang naw akut cu k'phiäih khätah, shum ciah akut cu vangtäng ah mäih ah akni ah kia ba ci. 14 Pharisee gui cu pum im ung kaa hteit ba u netah Bawipa Jesuh cu ngawn vai ah ng'ge ci gui. 15 Bawipa Jesuh cu cun ah ami ng'ge ah mawng ng'zah netah, ahei lam ah hteit ba sei chang akda naw a hnu ah läk ci gui. 16 Ani naw gawipai ci gui cu gai sak gui ci. Cun ung phi ani ah mawng kä ami pyein-en vai ah m'zih sak gui ci. 17 Cun ah m'cäi ne am zih sak gui cu Khanpughi naw profet Isaiah-am a pyein sak ah ng'thu abäi nak ah kiak ci. Cun ah ng'thu cu; 18 “Shin cu kei naw ka ghü ah ka changshäm, Kam hni, ka zeikiai nak nei. Kei ah ka mumcha cu ani ah khan ah ka gawk sak khai, Ani naw kei ah k'bäi ah m'khoichaa nak cu kho nüng ung shäu khai nei. 19 Ani naw a i kä ng'cuh tuk khai, käm lau ng'pyang khai, Lam zung ah phi ak'aw m'can ne ng'thu a pyein nak kä om khai. 20 Ani naw ak thagui kä om ci cu k'dükdawm ne, a zi-hnei vai kä om ci cu chimgein khai. Ani cu düng nak awn näng nak ung khüt khai ah bi bik khai. 21 Chang pakhui avan naw phi ani cu ngaih u khai gui, ciah kiak ci. 22 Khoshe naw kai sei a i kä hmu ba ne, kä ng'thu ba hlawt ciah chang tumat cu, chang gui naw Bawipa Jesuh ah law püi ci gui. Bawipa Jesuh naw khoshe k'täm khätah cun ah chang cu, amik m'dei ba sei ng'thu law ba thei ci. 23 Chang gui cu ang htei ah cäicat u netah, “Shin ah chang cu David ah htapa ah kiak khai ang? ci ne kiak ci gui. 24 Cun ami ci cu pharisee gui naw ng'za u netah, “Shin ah chang naw khoshe gui ah bawimang Beezelbul ah ming awn nei khoshe gui cu ak täm hning, ci ne kiak ci gui. 25 Ngahmi ah m'lung ngaih cu hmat netah Bawipa Jesuh naw, “Khopäng tumat ung chang gui cu ami m'lung ngaih hnga hnga sei, ami mät gui ami ng'tuk-ah a kiak ung, cun ah khopäng cu kä shou pha sei, dimaih khai. Acun ah mäih ah m'lung ngaih kä kawng ät ciah pigaw, kä cun ung kyong khui cu kä khäng htek khai. 26 Cun ah kia sei, satan ah uk nak kho ung om ci gui cu ami mät gui ng'tu ng'aat u ne, ami kiak ung ani ah kho cu ng'phyeekpai pyii ci kia ne, dimaih khai ah kiak ci. 27 Nangmi naw kei cu Beelzebul ah na peit ah k'thagui awn khoshe ka k'täm ciah nami pyein ci, cun ah a kiak ung nangmi ah chang gui naw mä a u ah peit ah k'thamah nak awn, khoshe cu ami k'täm hning ang? Nangmi nami kat nak mawng cu nami chang gui ah bilawh naw ng'dang sak ci nei. 28 Kei naw Beelzebul ah na peit ah k'thamah nak awn kä kiak ciah, Khanpughi ah Mumcha ah na peit ah bämang thamah nak awn, khoshe gui cu ka k'täm ci. Cun ah kia sei Khanpughi ah uk nak kho cu nami khan ah gawk law pyii ci nei. 29 A u chang naw phi k'thagui mah ciah chang cu khit ne kä ak pawng cang ung, a im kyong ah lut ne a khawhcham kä lak pe hlawt khai, khit ne ak pawng kawn ah vah lak pe hlawt khai. 30 ‘Kei täng ah kä om ciah chang cu na hnu ng'tuk püi ciah kiak ci. Kei awn atäng ah kä ng'bum tuk ci cu ng'zaih-zam düt ciah kiak ci. 31 Cun ah kia sei kei naw ak cang ka pyein cu, kat nak ah hmawk ah phi bäi, akshe ah thu ng'htau ah hmawk ah phi bäi, chang gui cu m'gein nak hning om ci. Cun ung phi Mumcha Theing m'shetkat ne ng'thu ah hmawk ah m'gein nak kä om hning ci. 32 Chang ah Htapa m'shetkat ne ng'thu ci cu m'gein hning ung phi, Mumcha Theing m'shetkat ne ng'thu ci läi cu, ngawi zä güt m'gein nak kä om hlawt khai. 33 ‘Ak theih ak ni ng'zak hlü ung a ghing ak ni geit vai, a ghing shek ci cu ak she ah m'theih ci, ak theih awn a ghing ah mawng cu hmat vai kiak ci. 34 K'pyu m'äm mah gui, nangmi cu chang she ah nami kiak ci kia ne, a i hawk chaa ah ak ni ah nami ng'thu hlawt khai aw? M'lung kyong ah be ne om ci cu m'gawngshai ung ng'thu ah lut lawk ci. 35 Chang ni naw akni m'lung nane akni dang sak ci, chang she nak akshe m'lung nane akshe dang sak ci. 36 Kei naw akcang ka pyein cu, “m'khoichaa nak ah hnüüp ung chang gui cu ami ng'thu m'gawng düt düt ah hmawk ah k'cet ne ng'shi nak om khai. 37 Nangmi m'shekat nak nami gah vai la kä nami gah vai cu, nami mät ah ng'thu m'gawn awn m'khoichaa nak om khai nei,. ci ne kiak na gui ci. 38 Am shah Thukhän saza gui la pharisee gui naw, “Sazapa, keimi am cäi-aih vai tumat nam hnuh gui ä, ci ne k'thäh ci gui. 39 Bawipa Jesuh naw, “Shetkat nak awn om ne, Khanpughi kä zum ci gui ah tuhchü chang gui naw, cäi-aih vai cu k'thäh ci gui nei. Nangmi naw profet Jonah ah cäi-aih vai ah kawn ah, a hei nami hmuh vai a i kä om khai nei. 40 Jonah cu nganu ah puk khui ah hnüüp thum la mü thum a om ah mäih ah, chang ah Htapa cun phi m'dek khui ah hnüüp thum la mü thum om khai nei. 41 Nineveh chang gui cu Jonah ah ng'thu ngai u ne, kat nak ung kaa ng'zu ba ci gui ah kia sei, m'khoichaa nak ah hnüüp ung, ngahmi cu ng'düi law u ne, nangmi cu ning k'taap gui khai gui nei. Kei naw akcang ka pyein cu, shin ung tuhbäi Jonah ah hlüngtai pi ci gawk law pyii ci nei. 42 Sheba kho päng ciah ghanpughangnu cu, hmuhmat pi ciah Solomon ghangpughang ah ng'thu ngai tuk khai ah gawk law pyii ci nei. M'khoichaa nak ah hnüüp ung ani naw ng'düi law ne, nangmi cu ning k'taap gui khai nei. Kei naw akcang ka pyein cu, shin ung tuhbäi Solomon ghangpughang ah mä hlüngtai pi ci, gawk law pyii ci nei. 43 ‘Khoshe cu a om nak ah chang ung kaa lut law ne ahei ah a hteh ung, kiangma kho ng'gau zung ah a om nak vai shui shüi shüi ci. Cun ah shui shüi ne kä hmu law hlawt netah, 44 ‘azan ka om nak man ah ka hteit ba khai, ’ ci ne, amät ng'htau ci. Azan a om nak man ah hteit ba khätah, a om nak man cu aung ne, theingthap khai ah pheih phai ah kia sei hmuk ci. 45 Cun kawn ah amät ah mä shekha pi ciah khoshe pachih cu va khü tu ba gui sei, a cun ung atäng ah om ci gui. Cun ah kia sei khoshe ah kai ah chang, ak hnu ah a shetkat nak cu, ak htük ung kaa ah mä, shekha law pi ci. Shin cu tuhbäi shekha ciah chang gui ung gawk lawk khai aè amawng ah kiak ci nei., ci ne kiak na gui ci. 46 Bawipa Jesuh naw chang gui am theithang gui zah ung, anu la anau gui cu gawk law u neh, ani awn ng'hmuh hlü u netah akpung ah ng'düi ne ak ngäng ci gui. 47 Chang tumat naw, “Bawipa, nanu la na nau gui naw ning hmu hlü u ne, akpung ah ning ngäng ci gui nei, ci ne m'thein lawk ci gui. 48 Bawipa Jesuh naw, “Kei ah nu cu a u ang? Kei ah phäi nau gui cu a u gui ang? ci ne ng'shi gui netah, 49 ang düihpüi gui cu tawk gui ne, “Teng gui vä, shin gui cu kei ah kanu la ka phäi nau gui nei. 50 Khankho ah om ciah Kapa Khanpughi ah ang zak hlü ah bik ciah chang phung cu, kei ah phäi, kei ah nau, kei ah be, kei ah nu ah kiak ci nei, ci ne m'thein gui ci.
1 A cu hnüüp Bawipa Jesuh cu im ung kaa lut law ne, am thei nak gui vai ah tuili kam pei ah hteit ne ngok ci. 2 Gawk lawk ciah chang gui cu da aih u khätah, Bawipa Jesuh cu hleiko khan ah kai ne ngok ci. Chang gui cu tui kam ah ng'düi ci gui. 3 Bawipa Jesuh naw cun ah chang gui-am, m'tumtäng bäng bäng ne amawng akda m'thein gui ci. Bawipa Jesuh naw, “Hnüüp ät ung chang tumat cu m'shi phu khai ah hteit ci. 4 Loma ung aphu ah geit m'shi am shah cu, lam ung va kia sei kha gui naw law ne ei ci gui. 5 M'shi amshah cu, m'dek ah ng'pam nak lung khan ah kia lawk ci. 6 Ng'lih pyo pang ne phi, m'dek ng'pam ci kia ne, kho naw a so law ung kä pya hlawt ne si ba zawp ci. 7 M'shi amshah cu ng'hling hmu ah kia lawk ci, ng'lih pyo tupang ne phi, ng'hling gui naw k'düi u sei, si ba zawp ci. 8 M'shi amshah cu, am dek ah ni naë ung kia law ne, akni ah ng'lih pyo ghing gong sei, a phiaa, akchuk-kip. athum-kip ah ng'sep khawi ci. 9 Bawipa Jesuh naw akhnu ah, “Nami hnga a om ung ngai ne ng'zah vä, ci ne kiak na gui ci. 10 Ang düihpüi gui cu Bawipa Jesuh ah pei ah law u netah, “A i ah kia sei chang gui-am m'tumtäng bä bä ne namthein gui ang? ci ne ng'shik ci gui. 11 Bawipa Jesuh naw, “Nangmi naw Khanpughi ah kho ah mawng thuuk ne ng'kau ci cu hmuhmat nak thei vai nami gah ci. Chang hei gui cu cun kä gah tuk ci gui. 12 Khawh tak ciah chang cu k'be ba mä sei da law pi khai, khawh kä tak ciah chang cu ak om hta phi lak pe zawp khai. 13 Ngahmi-am a i ah kia sei m'tumtäng ne kam thein gui ang ci ung; ngahmi cu teng ne phi kä hmuk ci gui, ngai ne phi kä ng'zak ci gui, a i kä ami hmuhmat su ah kiak ci. 14 Cun ah kia sei Isaiah ah ng'thu thuuk ung; ‘Shin ah chang gui cu ngai ne, ngai ne phi kä hmat khai gui, Teng ne teng ne phi kä hmuk khai gui, 15 A i ah kia sei ci ung, ami m'lung cu ang ne, amik hnga cu pang ne, ami mik cu m'shing ciah kiak ci. Ami mik m'dei ne ami hnga ng'lang sei, ami m'lung kyong awn hmuhmat u ne ami kiak vai sü ung, Kei lam ah ng'hlat law u ne, na zi hnei u sei, Kei naw phi kam gein gui khai süte, ci ne Khanpughi naw pyein ci ciah kiak ci. 16 Nangmi ah hmawk ah a i hlawk ah zeikiai vai kiak ci ang? Nangmi cu nami mik m'dei ne nami hnga ng'lang ci. 17 Kei naw akcang ka pyein cu, profet gui la Khanpughi ah chang akda gui naw, nangmi ah mäih ah hmuh hlü u ne phi, kä hmuh hlawt ci gui, nangmi ah ng'zak ah mäih ah ng'za hlü ne phi kä ng'za hlawt ci gui nei. 18 “Cun ah kia sei m'shi phu ci awn m'tumtäng nak ah mawng cu ngai kheng shüm vä. 19 Lam ung kia lawk ciah m'shi ci cu, Khankho uk nak ah mawng ng'thu k'ni cu ng'zak tu lang ne phi, kä hmat ci awn täng ci. Ami m'lung kyong ung phu ah ng'thu m'shi cu, khoshe naw la ne hteh püi zawp ci. 20 Lung ung kia lawk ciah m'shi ci cu, ng'thu k'ni cu ami ng'zak tu vai-am zeikiai ne dou tuk ci gui ah kiak ci. 21 Cun ung phi ng'thu ni cu ngahmi ah m'lung kyong ung kä khäng htek ci, ashäng hta bäng gawk ne om ci. Ami dou ah ng'thu ni ah hmawk ah zaica nak la shedam nak ami aut law ung, a cun vai-am ng'hlat ba ci gui. 22 Hliing hmu ah kia lawk ciah m'shi ci cu, ng'thu ni cu ng'za tulang ne phi, ami ng'ä ai nak gui la ami bämang nak hlü gui naw, shung shet gui sei ng'thu ni cu kä vui pai hlawt ciah kiak ci. 23 M'dek ni ung kia lawk ciah m'shi ci cu, ng'thu ni cu ngai ng'za tu ne hmuhmat ci gui ah kiak ci. Ngahmi cu amshah aphiaa, amshah ak chuk-kip, amshah athum-kip ah vuipai ci gui, ci ne m'thein gui ci. 24 Bawipa Jesuh naw ahei tumat awn m'tumtäng ne am thein ba gui cu, “Khankho uk nak cu shin ah mäih ah kiak ci. Chang tumat naw aloma ah m'shi k'ni cu geit ci. 25 Khomü ät ung chang van ip zawp khtah, gaa tumat law ne m'ghaw m'shi cu phu shüt netah hteit ba ci. 26 Geit gui lut law ne ghing gong law u sei, m'ghaw gui phi lut law tuk ci gui. 27 Loma ah ak chang ghüh gui law u netah, ‘Bawipa, na loma ah geit m'shi k'ni na geit ciah kä kia ne ang? Khu m'ghaw gui a hawi kaa ang ami gawk law, ci ne ng'shik ci gui. 28 Lo mah naw, shin cu gaa ah bi ah kiak ci nei, ’ ci khätah, a ghüh gui naw, “Cun ah a kiak ung m'ghaw avan kami mawih züm züm vai ang? ’ cik ci gui. 29 Lo mah naw, ‘Kaa, kä mawi zawp hnga vä, khu m'ghaw avan nami mawih zawp ung, geit gui phi ng'mawi tuk khai gui nei. 30 Geit khäm khin ung khüt sei, geit la m'gho cu atäng ah phung ghing cang ni sä. Geit khäm khin a gawk law ung geit khäm ci gui-am; khu m'ghaw gui cu mawih sak gui ma netah, k'bum ne mei ung m'khih vä, cun kawn ah geit gui cu aat u ne, ka khei ung thun vä, ’ ci ne kam cäi gui khai, ’ cik ci, ci ne m'thein gui ci. 31 Bawipa Jesuh naw ahei tumat awn m'tumtäng ne a pyein cu, “Khanpughi ah uk nak ah kho cu shin ah mäih ah kiak ci. Chang tumat naw anhta ui cu la ne aloma ah geit ci. 32 Cun ah anhta ui cu geit m'shi gui nüng ung zaw pibäih ci. Cun ung phi ng'lih pyo ne a ghing gong law ung, a ghing gui avan ung akdäm pibäih ah kia lawk ci. Cun ah kia sei khahta gui cu ang ban gui ung ng'bu tuk ci gui” ciah kiak ci. 33 Bawipa Jesuh naw ahei awn m'tumtäng ne am thein ba mä gui cu, “Khanpughi ah uk nak kho cu shin ah mäih ah kiak ci. Hnumi tumat naw k'co cu la netah, m'htut den pyii taang ät ung k'caw sei, m'htut den avan cu tho ne pai ci, ciah kiak ci. 34 Bawipa Jesuh naw chang gui-am m'tumtäng bäng bäng ne m'thein gui ci. Kä m'tumtäng ah a i ah mawng phi kä pyein ci. 35 Cun ah a pyein sak ah mawng cu, profet gui ah ng'thu aküm nak vai ah hmawk ah kiak ci. Cun ah thu cu; “Kei naw nangmi ah ma ah ng'thu ka pyein ung m'tumtäng bäng bäng ne ka pyein khai; Khanpughi naw khomdek atüi ung tün ne, a u ah kä hmat man cu kei naw m'dang ne ka pyein khai, ciah kiak ci. 36 Bawipa Jesuh cu chang gui ah ng'lung ah kaa, ng'dü law ne kyong ah lut ba ci. Cun zah ung ang düihpüi gui naw apei ah law u netah, “Khumgho awn am tumtäng nak ah mawng cu m'dang ne nam thein gui ä, cik ci gui. 37 Bawipa Jesuh naw, “M'shi k'ni phu ciah chang cu chang ah Htapa ah kiak ci. 38 Loma cu khomdek khan ah kiak ci. M'shi k'ni cu khankho uk nak khäm ciah chang gui ah kiak ci. 39 Khumghaw m'shi cu khoshe ah chang gui ah kiak ci. Geit khäm khin cu kho ah khüt nak vai ah khin ah kiak ci. Geit khäm ciah chang gui cu khankho chang gui ah kiak ci. 40 Khu m'ghaw gui cu aat ne k'bum ne mei ung m'khih ah mäih ah, kho a khüt hnüüp ung khoshe ah chang gui cu mei awn m'khih ne m'di nak gui om khai nei. 41 Chang ah Htapa naw ak khankho chang gui tüi law ne, chang gui shetkat lam hma sak ci gui la shetkat nak bik ciah chang gui cu, a uk nak kho ung kaa, ghü gui ne la gui netah, 42 Caang ne ng'ai ciah mei ung k'htawm gui khai. Cun ah chang gui cu kyap ne m'lau ne, ami ha htui ne gein vai khai gui. 43 Cun zah ung Khanpughi ah chang gui cu ami pa ah uk nak kho ung, khohni ah mäih ah khang ne om khai gui. Ng'zak nak vai ah hnga om ci phung naw ng'za sä, ci ne m'thein gui ci. 44 “Khanpughi ah uk nak kho cu shin ah mäih ah kiak ci, Chang tumat naw, lai ah phuh ne gimah khawh ng'peeih cu hmu netah, lin ne phuh ba shüt ci. Cun kawn ah zeikiai ne hteit ba ne, akhawh avan zoi zawp netah, cun ah lai cu khleih ba ci, ci ne m'thein gui ci. 45 “Cun kawn ah phi Khanpughi ah uk nak kho cu shin ah mäih ah kiak ci. Chang tumat cu ghui cünglung gui shui lä netah, 46 Ang htei ah aphu küi ciah ghui cünglung cu hmuk ci. Cun kawn ah hteit ba ne akhawh avan zoi zawp netah ghui cünglung gui cu khleih ci. 47 “Cun kawn ah phi Khanpughi ah uk nak kho cu shin ah mäih ah kiak ci. Nga shui ci gui cu tuili ung ng'vai ami vawih ung nga ahlü hlü uk ne phak ci gui. 48 Ng'vai ung nga be ne awk khätah ng'vai Cu kawng ah kai püi ba ci gui. Ng'vai ung kaa nga gui cu ghü u netah, Nga ak ni gui cu ami pem ung m'kang u ne, nga ak she gui cu set ne ghawt ci gui. 49 Kho ang pyii hnüüp ung acun ah mäih ah kia lawk khai. Khankho Chang gui kyum law u ne, chang ni gui ah lung ung kaa, chang she gui cu ghü u netah, 50 Caang ne ng'ai ciah mei ung htawm khai gui. Cun gui cu kyap ne m'lau ne ami ha htui ne geinvai khai gui. 51 “Bawi Jesuh naw, “Shin ah amawng gui cu nami hmat ci ang? ci ne ng'shi gui khätah, ang düihpüi gui naw, kami hmat ci nei, cik ci gui. 52 Cun ah kia sei Bawi Jesuh naw, “Khankho uk nak kho ung düihpüi tumat ah kia lawk ciah chang phung cu, a im khei ung kaa, akhawh ak phyim akthai k'plawk ne law püi ciah, imah awn täng ci, ci ne m'thein gui ci. 53 Bawi Jesuh cu cun ah tumtäng nak am thein gui kawn ah, acun ung kaa pawng ne, 54 amät ah pigaw ah hteit ba ci, Pum im ah m'theithang gui sei, Cun hmuk ciah chang gui cu cäicat u netah, “Shin ah chang naw shin ah hmuhmat nak gui ahawi a gah ang? cäi aih gui vai mä a i hawkcha abi hning ang? , 55 Ani cu m'si sheh a hta ah kä kia ne ang? , ani cu Mary ah hta, a nau gui cu James, Josef, Simon la Judas ah kä kia ne ang? 56 Abe gui cu a shin ah pigaw ung om ci gui ah kä kia ne ang? , ani naw shin ah hlüngtai nak gui ahawi kaa ang agah ve, 57 Cun gui ah thu pyein ne ngahmi naw hnungtuk püi ci gui. Bawipa Jesuh naw, ngahmi-am, “Profet cu amät ah pigaw la amät ah kyongkhui ah tha ah a u naw phi kä hnu ng'tuk püi ci, ci ne kiak na gui ci. 58 Cun ah Nazaret chang gui cu ami zum nak kä om khätah, Bawi Jesuh naw cäi aih vai ai phi käm dang ling ci.
1 Cun zah ung Kalile kho uk ciah Herod naw Bawipa Jesuh ah a mawng cu ng'za netah, 2 “Ani cu sih nak ung ka tho ba ciah Tuihnim Johan akcang ah kiak khai. Cun ah kia ne ani ung cäi aih nak vai m'dang nak hning ah hlüngtai nak gui om ciah kiak ci, ci ne ak chang vai gui-am kiak na gui ci. 3 Herod naw Johan cu anau Philip ah chu, Herodias ah mawng awn pha ne thawng ung a chum te ah kiak ci. 4 A i ah kia sei ci ung Johan naw, “Na nau ah chu Herodias, cu na khäm tu ba vai ah kä nik ci, ci ne a kiak nak ah phäh ah kia ci. 5 Herod naw Johan cu ngawn hlü te ci, cun nung phi Jew chang gui naw Johan cu profet ah k'bäi u khätah, ngah mi cu kyih gui ne kä ngawn ci. 6 Herod ah ang tüi nak hnüüp ung Herodias ah hta hnumi hta cu mang khin gui ah ma ah ak ni ah lam khätah, Herod cu ang htei ah zei ci. 7 Cun ah kia sei Herod naw cun ah hnumi hta-am, “Nam hni a i phi ng'zoi ä, ka ning pek khai, ci ne khän ne kiak nak ci. 8 Cun ah hnumi hta naw anu ah m'cäi ah, “Tuihnim Johan ah lu cu tawnglang ung khäp ne, atuh bäi na peä, ci ne pyein ci. 9 Herod mang cu ang htei ah a zä pang ne phi, khin chang gui ah ma ah khän ne a pyein pyi ah kia sei, hnumi hta naw a pyein ah mäih ah pek vai ah bäi ci. 10 Cun ah kia sei Johan ah lupum cu thawng kyong ah chün sak gui netah, tawnglan ung khäp ne hnumi hta-am pek sak gui ci. 11 Hnumi hta naw cun ah lupum cu anu ah om nak ah hteh püi ci. 12 Johan ah ang khahpüi gui naw law ne, a gook cu hteh püi ba u ne, phuh ci gui. Cun kawn ah Bawipa Jesuh ah hteit ne amawng avan cu m'thein tuk ci gui. 13 Cun ah amawng gui cu Bawipa Jesuh naw ng'za hetah, amät bäng hleiko awn ading gei nak ah hteit ci. A pigaw päng ung chang gui naw, Bawipa Jesuh ah a hteh cu ng'za u netah, kawnglam ung hteit ne läk ci gui. 14 Bawipa Jesuh naw hleiko ung a kai kawn ah chang gui cu teng gui ne m'gein gui netah gawpai ci gui cu gai sak gui ci. 15 Kho mühun law khätah ang düihpüi gui cu Bawipa Jesuh ah pei ah law u netah, “Shin zah cu chang ah kä om nak ah kia ci, kho phi mü lawk khai kiak ci, shin ah chang gui pigaw gui ah hteit ne, ami mü-ei vai ami hleih vai ah tüi gui ä, ci ne pyein ci gui. 16 Bawipa Jesuh naw, “Ngahmi kä hteit u sä, nangmi naw ami ei vai pe gui vä, ci ne kiak na gui ci. 17 Ang duihpüi gui naw, “Keimi ung m'htut pum hma la nga pahnih bäng om ci nei, cik ci gui. 18 Bawipa Jesuh naw, “Cun ah m'htut la nga cu kei ah law püi vä, cik ci. 19 Bawipa Jesuh naw chang gui cu, taa ng'phan khan ah ngoh sak gui netah, m'htut, pum hma la nga pahnih cu la ne, khankho dan ne Khanpughi m'hlüngtai ci. Cun kawn ah m'htut cu bou ne ang düihpüi gui-am pe gui ci, ngahmi naw chang gui-am tei gui ci gui. 20 chang gui avan naw ami ei kawn ah ak pawih cu them-dawn ung a gha-lei-goi ah kaw ba ci gui. 21 Hnumi gui la ak hmaw hta gui kä khei tu ah m'htut ei ciah pami ng'vai bäng cu phia hma-kip lawk ci. 22 Cun kawn ah Bawipa Jesuh naw chang gui cu ami im ah tüi ba gui netah, ang düihpüi gui cu hleiko ung kai sak gui ne, tuili vangtäng ga ah vang kah sak gui ci. 23 Cun ah chang gui a tüih ba gui kawn ah amät cu taigü khai ah khomhtung khan ah kai ci. Kho mü law güt sei a cu ah amät om ci. 24 Cun zah ung ang düihpüi gui ah hleiko cu tuili lai ah gawk pyi ci. Kho khi ng'hlat sei hleiko cu tui naw hnawk püi ci. 25 Ngawilam ai khong htük ung Bawipa Jesuh cu ang düihpüi gui ah om nak ah lawk khai ah tui khan ah ana a vük ci. 26 Cun ah tui khan ah düi ne ana avü cu hmu u netah, ang düihpüi gui cu cäicat u ne, “m'cha nei, ci ne m'lau ci gui. 27 A cun vai-am Bawipa Jesuh naw, “Kä cäicat vä, kei nei, kä kyikyawk vä, ci ne kiak na gui ci. 28 Cun kawn ah Peter naw, “Bawipa, nang ah na kiak ung, kei cu tui ah khan ah hteit ne nang ah ka law hning vai ah k'bäi ne pyein nä ci ne pyein ci. 29 Bawipa Jesuh naw, “Law ä, ci khätah Peter cu hleiko ung kaa kyum law ne, Bawipa Jesuh ah hteit khai ah tui ung ana a pawng vük ci. 30 Cun ung phi kho akhi law hmu netah, cäicat ne tui ung zu hnim vü netah, “Bawipa aw, na khui ei tu ba ä, ci ne m'lau ci. 31 cun vai-am Bawipa Jesuh gawk law ne, akut awn Peter cu pang netah, “Na zum nak ken aih ci nei, a i vai kä na ngaih gep ang, ci ne kiak nak ci. 32 Bawipa Jesuh la Peter hleiko khan ah ani gawk ba ung kho phi kä khi ba ci. 33 Hleiko khan ah om ciah ang düihpüi gui cu Bawipa Jesuh ah kawp ne ngüm zawp u netah, “Nang cu ak cang ah Khanpughi ah Htapa ah na kiak ci nei, cik ci gui. 34 Bawipa Jesuh la ang düihpüi gui cu hleiko awn tui-kam vangtäng ah vang kat u ne, Kennesaret ah gawk ci gui. 35 Cun ah gawnu ung chang gui naw Bawipa Jesuh cu hmat ba u netah, pigaw pei zung avan ung chang gui tüi ne khü sak gui netah gawipai ci gui cu law püi ci gui. 36 Cun kawn ah gawpai ci gui naw Bawipa asui pyai hta bawtah ami tawn tu vai ah ng'zoi lawk ci gui. Cun ah tawh tuk ciah chang gui phung cun phi, gai ba ci gui.
1 Cun kawn ah Jerusalem ah kaa pharisee gui la thukhän saza gui cu Bawipa Jesuh ah law u netah, 2 “A i ah kia sei nang düihpüi gui naw pupa gui ah thungzo man cu kä ami läk ang? ngahmi cu thungzo man ah kut käm si ah ei ei ci gui nei, ci ne pyein ci gui. 3 Bawipa Jesuh naw, “Nangmi a i ah kia sei Khanpughi ah thukhän nawng-en ne, nami mät ah thungzo man düt nami läk ang? 4 Khanpughi naw, ‘Nanu la napa cu nak chang m'sui vai, anu pa züi gen ciah chang cu sih nak gah sä, ci ne thu khän ci. 5 Cun ung phi nangmi naw, chang tumat ung anu pa-am a peit vai khawh cham a om ung, cun cu Khanpughi-am peit pyi ah kiak ci, anu pa-am a peit vai kä hlü khai, ci ne nami theithang ci. 6 A cu cha ah nangmi cu Khanpughi ah thukhän nawng-en u ne, nami mät ah thungzo cu nami läk ci. 7 Thuvi chang gui, nangmi ah mawng Isaiah naw a pyein cu, akcang ah bä ci nei, cun ah thu cu; 8 Khanpughi naw, ‘shin ah chang gui naw, ami shai awn Kei cu nam hlüngtai ci gui, Cun ung phi ami m'lung cu kei awn ng'shawng aih ci. 9 Ngahmi naw kei ami na khawihnah cu akholä ah kiak ci, A i ah kia sei ci ung, ngahmi naw chang ah pyan ah thukhän gui cu, Khanpughi ah thukhän ah mäih ah, m'theithang ci gui!, ci ne kiak na gui ci. 10 Bawipa Jesuh naw chang gui cu a pei ah khü gui netah, “Ka thu cu ngai netah hmat vä, 11 Chang shetkat sak ci cu m'gawnglei ung zulut vük ciah kä kiakci, m'gawnglei ung kaa lut lawk ciah kia ci, ci ne kiak na gui ci. 12 Ang düihpüi gui naw a pei ah law u netah, “Nang Bawipa naw thu na pyein ah phäh ah pharisee gui m'lungkshe ci gui nei, na hmat ci ang? , ci ne pyein lawk ci gui. 13 Bawipa Jesuh naw, “Khankho Kapa ah geit ah kä kiak ciah a ging phung cu mawi ne ghawh vai nei. 14 Cun ah kia sei ngahmi ah hmawk ah kä nami ng'ä vai, ngahmi cu amik käm dei ci lam shüm tuk ciah amik m'dauh gui ah kiak ci gui. Amik m'dauh naw amik m'dauh cu lam am shüm ah a kiak ung, ani nik hnih cu m'ghawng ah lut khai goi nei, ci ne m'cäi gui ci. 15 Peter naw, “Shin ah tumtäng nak cu phlan ne nam thein gui ä, ci ne ng'zoi khätah; 16 Bawipa Jesuh naw, “Nangmi phi tuhgüt chang hei gui ah mäih ah a i kä nami hmat phak ci ma? 17 M'gawnglei ung zulut vük ci phung avan cu, chikhawn ung zu gawk netah, cun kawn ah ak pung ah aluh law ba cu kä nami hmat ci ma? 18 Cun ung phi m'gawnglei ung lut lawk ci cu m'lung kyong ung kaa lawk ciah kia ne, a cun naw chang cu shetkat sak ci nei. 19 Chang ngawn nak, chang ah chu hta kat püi nak, chang she awn ih om nak, m'guk-ei hleei pyein nak, la chang m'thüi khang nak gui ah kä nik ciah ngaih tüh gui phung cu, m'lung kyong ung kaa lut lawk ciah kiak ci. 20 Cun gui naw chang cu shetkat sak ci gui. Kut käm si ah ei ei naw chang cu kä shetkat sak ci nei, ci ne m'thein gui ci. 21 Bawipa Jesuh cu cun ung kaa hteit ba ne Taia la Sidon kho ah gawk ci. 22 A cu ah om ciah Kanan Hnuminu tumat cu law netah, “David ah Htapa, kei cu nam gein ä, kei ah hta hnumi cu khoshe naw kai sei, geinvai ne ng'zän ci nei, ci ne ng'pa ne zoi ci. 23 Cun ung phi Bawipa Jesuh naw a i ah phi käm shang ci. Ang düihpüi gui cu a pei ah law u netah, “Shin ah hnumi cu mi hnu ah na läk law gui ne, pamcai ci nei, züi ne gawt ba ä, ci ne pyein ci gui. 24 Bawipa Jesuh naw, “Kei cu maih ciah htome bum ah kiak ciah Israel chang gui ah hmawk bäng ah ka lawk ci nei, ci ne m'shang gui ci. 25 Cun ci khätah cun ah hnuminu naw akho pei ah khuukdong netah, “Bawipa, kei cu nam gein ä, ci ne ng'zoi ba ci. 26 Bawipa Jesuh naw, “Hta hmaw gui ah ei vai cu la ne, ui gui-am kä vuh vai nei, ci ne pyein ba ci. 27 Cun ah hnuminu naw, “hman ci nei Bawipa aw, cun ung phi ui gui cun naw, ami mah ah ei nak ung ng'theh ciah ei-book cu ei tu man ci gui nei, ci ne pyein ba mä ci. 28 Cun ci ba khätah, Bawipa Jesuh naw, “Nang hnumi, nang cu na zum nak däm aih ci nei, nang zak hlü ah mäih ah kia sä, ci ne kiak nak ci. A cun zah lung ung cun ah hnuminu ah hta cu gai ba ci, 29 Bawipa Jesuh cu cun ung kaa pawng ba ne, Kalile tuilinu kem zung ah hteit ba ci, Cun kawn ah m'htung ah hang kai ne ngok ci. 30 Chang gui naw akho khem, amik m'dauh, ak shum, ak ang gui la gawpai ci gui akda a pei ah law u sei, gai ba sak gui ci. 31 Ak ang gui thu thei ci gui, apumsa kä küm ci gui küm ba ci gui, akho khem gui hteit thei ci gui, amik m'dauh gui m'dei lawk ci gui, a cun gui cu chang gui naw hmu u netah, ang htei ah cäicat u neh Israel gui ah Khanpughi cu m'hlüngtai ci gui. 32 Bawi Jesuh naw ang düihpüi gui cu khü gui netah, “Shin ah chang gui kei awn atäng ah ami om tu cu hnüüp thum lüng lawk ci nei, Ngahmi ung ei vai kä om ci, kam gein gui ci nei. A i kä tumbei gui ung ami hteh ba ung lamah ami thagui maih khai nei, ci ne kiak na gui ci. 33 Ang düihpüi gui naw, “Shin ah bung hmu k'pyama ah, chang shi chü ah ei vai, a hawé shui ne gah vai ang? , cik ci gui. 34 Bawipa Jesuh naw, “Nangmi ung m'htut a i chü ang a om, ci ne ng'shi gui sei, “M'htut pum chih la nga api om ci nei, ci ne m'thein ba ci gui. 35 Cun kawn ah Bawipa Jesuh naw chang gui cu m'dek ung ngoh sak gui ci. 36 M'htut pum chih la nga api cu la ne, Khanpughi ah taigü netah, m'htut la nga cu bou ne ang düihpüi gui-am pe gui sei ang düihpüi gui naw chang gui-am tei gui ci gui. 37 Chang gui naw ami phü ah ami ei kawn ah ami ei ah ak pawih cu them dawn ung ak chih ah kaw ba ci gui. 38 M'htut ei ci gui cu ak hmaw la hnumi kä khei tu ung phia phli-kip lawk ci gui. 39 Cun kawn ah chang gui cu Bawipa Jesuh naw tüi ba gui netah, amät cu Makadon kho lam ah hteit ci.
1 Pharisee gui la Sadducee gui cu Bawipa Jesuh ah pei ah law u netah, ami phawtcam nak ah, Khanpughi a tüih law ah mawng cäi aih vai cu am dang vai ah k'thäh ci gui. 2 Bawipa Jesuh naw, “Khohni a hang luh vü vai ung, khosing ang theh ung, kho shen khai ci ne phi bäi, 3 Kho ngawi hta ung hni law lam ah meile a tawt ung kho aa khai ci ne phi bäi, nami pyein man ci. Nangmi cu khomik teng ne kho akhi aa vai cu hmat lang u ne, tuhbäi chü akhin ah a mawng cu m'khoicha ne kä nami hmat ci ma? . 4 Tuhchü chang gui cu ang htei ah shetkat u ne, düng nak kä om aih ci gui nei. Nangmi naw cäi aih vai nami thäh ci, cun ung phi Jonah ah m'dang ah cäi aih vai ah kawn ah a i nami hmuh vai kä om ci nei, ci ne kiak na gui ci. Cun kawn ah Bawipa Jesuh cu pawng ne ahei lam ah hteit ba ci. 5 Ang düihpüi gui cu tuili ah vang ga ah ami vah kai ba zah ung, m'htut ami sho vai sü cu m'hnih shüt ci gui. 6 Bawipa Jesuh naw, “Nangmi cu pharisee gui la Sadducee gui ah k'caw cu ngaih na ne nami hlawi vai, ci ne m'cäi gui ci. 7 Ang düihpüi gui naw, “Mik mi naw ei vai kä mi sho khätah, cun ah a pyein ah kiak khai, ci ne ami mät ng'cecäk ci gui. 8 Cun ah ami ng'cecäk cu Bawipa Jesuh naw ng'za gui netah, “A i ah kia sei ei kä nami sho ah mawng pyein ne nami ng'htau ang? 9 Zum nak ken ciah chang gui, tuhgüt kä nami hmuhmat lawk ci ma? , m'htut pum hma, chang phia hma-kip-am ka tei gui la, ami ei ah pawih dawn ung a i chü nami kaw ba cu, kä nami shüm ba ci ma? 10 m'htut pum chih, chang phia phli-kip naw ami ei ah mawng la ami ei pawih dawn ung a i chü nami kaw ba cu, kä nami shüm ba ci ma? 11 Ei ei vai ah mawng ka pyein ah kä kiak ci, ci cu kä nami hmat ci ma? Pharisee gui la Sadducee gui ah k'caw cu geeik na ne nami hlawi vai nei, ci ne kiak na gui ci. 12 Cun kawn ah ang düihpüi gui naw, m'htut pian nak ah k'caw ami hlawi vai ah kä kia ne, pharisee gui la Sadducee gui ah theithang cu kä ami läk-en vai ah Bawipa Jesuh naw am cäi gui cu, hmat lawk ci gui. 13 Ceasarae Philippi kho ah ami gawk law zah ung Bawipa Jesuh naw ang düihpüi gui cu, “Chang gui naw chang ah Htapa-am a u ah nei ami pyein? ci ne ng'shi gui ci. 14 Ang düihpüi gui naw, “Chang am shah naw ‘Tuihnim Johan’ cik ci, am shah naw, ‘Elijah’ cik ci, am shah naw Jeramaih kä cun ung profet ah kiak khai, ’ ci ne pyein ci gui nei, cik ci gui. 15 Bawipa Jesuh naw, “Nangmi naw mä, kei cu a u ah nei nami na pyein, ci ne ng'shi gui ci. 16 Simon Peter naw, “Nang cu ang täi ghing ciah Khanpughi ah Htapa, Messiah ah na kiak ci, ci ne pyein ci. 17 Bawipa Jesuh naw, “Johan ah hta Simon, nang ung zeikiai nak om ci, shin ah düng ciah amawng cu chang naw kä hmat hning ci, Khankho ah om ciah Kapa naw a ning m'thein ah kiak ci. 18 Cun ah kia sei nang cu, “Kheng lung, ah ming ciah “Peter” ah na kiak khai, a cun ah kheng lung ah khan ah ka pum im ka k'süm khai, cun cu sihnak naw phi kä näng hlawt khai. 19 Kei naw nang-am khankho hmawn nak ah htawh gui cu ka ning pek khai. Khomdek khan ung nang naw na khih pawn cu, khankho ah phi khih pawn nak om khai. Khomdek khan ung nang naw na chah cu khankho ah phi chah nak om khai, ci ne kiak nak ci. 20 Cun kawn ah Bawipa Jesuh naw amät Messiah ah a kiak ah mawng cu, a u-am kä ami m'thein-en vai ah ang düihpüi gui-am m'zih sak gui ci. Pyein Ci. 21 Cun ah akhin ung tün ne Bawipa Jesuh naw ang düihpüi gui am akdei angdang ah am thein gui cu, “Kei cu Jerusalem ah hteit ne, pum im ung ang vai gui, taigüpa gui la thukhän saza gui ah kut ung dukdeiu nak ka gah khai, cun kawn ah sih nak ung na gawksak khai gui, cun ung phi ak hnüüp thum hnüüp sih nak ung kaa ka tho ba khai, ciah kiak ci. 22 Peter naw Bawipa Jesuh cu a pei ah khü netah, “Bawipa, na pyein gui cu akcang ah kä ah bä-en vai ah, Khanpughi naw shungshet sä. Nang Bawipa cu a cun ah amawng ama gui-awn, a i zah ung phi kä bui awt-en ä, ci ne pyein ci. 23 Bawipa Jesuh naw Peter lam ah vang hlat netah, “Nang khoshe a hei ah hteit ä, nang cu vawntam nak vai ah na kiak ci, nang ah ngaih tüh gui cu Khanpughi lam ah kä kiak ci, chang lam ah kiak ci, ci ne kiak nak ci. 24 Cun kawn ah Bawipa Jesuh naw ang düihpüi gui-am, “Kei awn atäng ah hteit tu hlük ciah chang cu, amät ah ng'zak hlü nawng shüt ne, amät ah kutlam tung kawt netah, ka hnu ah a na läk vai. 25 amät ah hnun ghin nak phiawn hlük ciah chang cu sih nak hmuk khai, kei ah hmawk ah sih nak gah ciah chang cu, ghin nak hmuk khai. 26 Chang cu khomdek khan avan a uk ung phi amät ah ghin nak a maih ung a i ah mawng mei ba khai ang? , amät ah hnun ghin nak cu a i awn thong ne gah khai ang? 27 Chang ah Htapa cu apa Khanpughi ah bämang nak awn ak khankho chang gui awn atäng ah kyum lawk khai. Cun kawn ah chang gui-am, ami mät ah om ih ah ci ah, m'cümhnah nak cu pe gui khai. 28 Kei naw akcang ka pyein cu, shin ung om ciah chang avan kä a sih pha ung chang ah Htapa cu Ghangpughang ah kia ne law ba khai nei” ci ne m'cäi gui ci.
1 Ak hnüüp chuk nak ung Bawipa Jesuh naw, Peter ni, James la anau Johan ni cu khah püi gui ne khomhtung ah kai püi gui ci. 2 Ngahmi naw ami hmuh ge ah Bawipa Jesuh ah amüi cu ng'khukhlat lawk ci, a hmai cu khohni ah mäih ah pyü ne, asui sak gui cu bawk-en phäng phäng ne khang ci. 3 Cun kawn ah ang düihpüi gui naw, Moses la Elijah dang law ni sei, Bawipa Jesuh awn düi ne thu ng'htau u sei hmuk ci gui. 4 Cun ah kia khätah Peter naw, “Bawipa, shin ah hmun cu om nak ah ni aih ci nei, nang naw nang zak hlü ung, nang ah hmawk ah tumat, Moses ah hmawk ah tumat, Elijah ah hmawk ah tumat, k'pyu thum ah ka co khai nei, ci ne pyein ci. 5 Cun ah Peter naw thu a pyein zah ung a bawk phäng phäng ah khang ciah khomei naw küm law gui ci. Cun ah khomei ung kaa ng'shan lawk ciah k'aw cu, “Shin cu kei ah Htapa nei, ani awn ka zei kiai ci nei, ang thu cu ngai vä, ciah kiak ci. 6 Cun ah k'aw cu ang düihpüi gui naw ng'za u netah ang htei ah kyi kyawk u ne, m'dek ung kaup zawp ci gui. 7 Bawipa Jesuh naw law ba ne akut awn hnün gui netah, “Tho law ba vä, kä kyi kyawk vä, ci ne kiak na gui ci. 8 Ngahmi naw täu law ba ne teng u khätah Bawipa Jesuh ah kawn ah a u kä om ba ci. 9 Cun kawn ah Bawipa Jesuh la ang düihpüi gui cu, khomhtung ah kaa kyum law ba ci gui. Ami kyum law ba zah ung Bawipa Jesuh naw, “Tuhbäi nami hmuh gui cu, chang ah Htapa sih nak ung kaa a thawh law ba ung khüt sei, a u-am kä nami m'thein vai, ci ne ang düihpüi gui-am m'zih sak gui ci. 10 Ang düihpüi gui naw, “a i ah kia sei a htük bäih ah ‘Elijah kyum law ba khai, ’ ci ne thukhän saza gui naw ami pyein ang? ci ne ng'shik ci gui. 11 Bawipa Jesuh naw, “Elijah cu law ba ma ne amawng ama avan anam khüp ma khai, ’ ci cu akcang ah kiak ci nei. 12 Kei naw akcang ah ka pyein cu Elijah cu gawk law pyi ci nei. Cun ung phi chang gui naw ani cu kä hmat u ne, ani ah khan ah ami bi hlü hlü ah bik ci gui nei. A cun ah mäih ah chang ah Htapa cun phi chang gui ah kut ung shedam nak gah khai nei. 13 A cun kawn ah ang düihpüi gui naw tuihnim Johan ah mawng a pyein ah hmat lawk ci gui. 14 Bawipa Jesuh la ang düihpüi gui cu chang gui ah om nak ah gawk law ba u khätah, chang tumat cu Bawipa Jesuh ah ma ah law ne khuukdong netah, 15 “Bawipa, ka hta cu nam gein pe ä, ani cu mangtak ne, a shäng shäng tui ung phi lut ci, mei ung phi lut ci ci nei. 16 Ani cu nang düihpüi gui ah hteh püi ung phi kä gai sak hlawt ci gui nei, ci ne pyein ci. 17 Bawipa Jesuh naw, “Nangmi cu nami zum nak kä om sei nami ng'lihlak zawp ci nei. Kei naw nangmi a i güt ka ning om püi gui vai ang, a i güt ka ning ngaih peit gui vai ang, ak hmaw cu ka pei ah law püi vä, ci ne kiak na gui ci. 18 Bawipa Jesuh naw ak hmaw ung kaa khoshe cu täm khätah khoshe cu dawng sei, a cun vai-am ak hmaw cu gai ci. 19 Cun kawn ah ang düihpüi gui cu Bawipa Jesuh amät a om zah ung a pei ah law u netah, “Keimi naw khoshe cu a i ah kia sei kä kami täm hlawt ang? ci ne ng'shik ci gui. 20 Bawipa Jesuh naw, “Cun cu nami zum nak a ken su ah kiak ci nei, kei naw akcang ka pyein cu, nangmi ung, anhta ui teih pang zum nak a om ung, shin ah khomhtung cu ‘ng'nawn ä, ’ nami ci ung ng'nawn khai nei. Zum nak awn kä nami m'khüt cu a i kä om khai nei. 21 (Khoshe cu, taigü nak la ei hlawi nak ah kawn ah a i awn kä nami m'khüt khai nei), ci ne kiak na gui ci. 22 Bawipa Jesuh la ang düihpüi gui cu Kalile kho ah ami hteh hton zah ung Bawipa Jesuh naw, “Chang ah Htapa cu chang gui ah kut ung ap khai gui. 23 Ani cu ngawn khai gui, cun ung phi ak hnüüp thum hnüüp ung sih nak ung kaa tho law ba khai, ci ne m'thein gui ci. Ang düihpüi gui cu ang htei ah cäi ng'ä ci gui. 24 Bawipa Jesuh la ang düihpüi gui cu Kapernaum ah ami gawk law zah ung khawn look ci gui law u netah, Peter-am, “na saza naw pum im ah khawn m'cu ne ang? ci ne ng'shik ci gui. 25 Peter naw, “A! Pek ci nei, ci ne pyein ci. Cun kawn ah Peter cu kyong ah va lut ba khätah Bawipa Jesuh naw, “Simon, nang naw a i ah nei na ngaih, m'dek khan ghanpughang gui naw, ami mät ah kho chang gui-am ang a khawn ami m'cu sak? ; a kho hei ah kaa om tuk ciah chang gui-am ang a khawn ami m'cu sak? ci ne ma ne ng'shik ci. 26 Peter naw, “a kho hei ah kaa om tuk ci gui-am a khawn m'cu sak ci gui nei, ci ne pyein ci. Bawipa Jesuh naw, “Cun ah kia sei mät ah kho chang gui cu a khawn käm cu ci gui. 27 Cun ung phi ngahmi kä a mi m'lung she vai ah, tuili ah hteit ne nga vam htuih ä. Ngah na pha ung na pha ma ah m'gawng cu m'aan ne na teng vai. A cun ung tangkaa tumat na hmuk khai, cun cu kei la nang ah hmawk ah büh khai kia sei, la ne pum im khawn ah nam cu vai, ci ne m'cäi ci.
1 Cun kawn ah ang düihpüi gui cu Bawipa Jesuh ah pei ah hteit u netah, “Khankho uk nak ung ak hlüngtai pibäih cu a u ang? ci ne ng'shik ci gui. 2 Bawipa Jesuh naw ak hmaw hta tumat cu khü ne ama ah m'düih netah, 3 “Kei naw akcang ka pyein cu, nangmi cu ak hmawhta ah mäih ah nami m'lung kä nami m'thawng ung, khankho uk nak ung kä nami gawk khai. 4 Shin ah ak hmaw ah mäih ah am lung thawng ne neim sak ciah chang cu khankho uk nak ung ak hlüngtai pibäih ah kiak ci. 5 Kei ah ming awn shin ah mäih ah ak hmawhta dou ciah chang cu, kei na dou ciah kiak ci. 6 “Kei na zum ciah ak hmaw tumat a zum nak maih khai ah bik ciah chang cu, a gawn ung gawtlung khit ne m'awi netah, tuili thuuk ung shum ung ani ah phäh ah bä tuh ba khai. 7 Chang gui ah zum nak dimaih sak ciah amawng ama gui om sei, chang gui ung thüi sei nak om ci. Zum nak dimaih sak ci cu akcang ah om khai, cun ung phi zum nak dimaih sak ciah chang cu ang htei ah thüi sei nak om khai. 8 “Na kut naw phi bäi, na kho naw phi bäi na zum nak a dimaih sak ung, a cun ah kut kho cu m'chün ne na ghawh vai, kut kho küm sei m'htei mei ung luh ak dam, kutkho kä küm sei khankho ah kai cu nang ah hmawk ah bä pi ci. 9 Na mik ui naw na zum nak a dimaih sak ung cun ah mik cu kawih ne na ghawh vai, mik ui küm sei m'htei mei ung luh akdam, mik ui vangtäng m'dauh sei khankho ah kai cu, nang ah hmawk ah bä pi ci. 10 “Nangmi naw a u ak hmaw hta phi kä nami zoshe nak vai. Kei naw ka ning m'thein gui cu, ngahmi ah khankho chang gui cu, khankho kapa Khanpughi ah ma ah ang täi sei om ci gui. 11 (Chang ah Htapa cu maih ciah chang gui hun khai ah lawk ci). 12 “Nangmi naw a i cha ah ang nami ngaih; chang tumat naw htome phia a vuh ung kaa, tumat a maih ung ani naw ko-kip-lei-kaw cu khongnawi khu li hmu ah nawng shüt netah, maih ciah htome cu shui ba ci. 13 Maih ciah htome cu shui ne hmu ba netah, kä maih tuk ciah kokip lei-kaw ah mä, maih ciah tumat ah hmawk ah zeikiai pi ci nei, ci cu akcang ah ka pyein ci. 14 A cun ah mäih ah khankho ah nami Pa naw phi ak hmaw hta tumat lam hma ne adimaih vai cu käng za hlük ci. 15 Na phäi nau naw a ning kat nak ung, kat nak am dang thei vai ah a om nak ah na hteh vai. Nani mät ng'hmu ni ne na ning lak mah nak cu naning ge nak vai. Na thu ang ngaih ung naning gei ba khai. 16 Cun ung phi ani naw nang ah thu kä ang ngaih ah a kiak ung, na thu pyein ang düng vai ah cacim ung om ciah mäih ah, saksi tuk khai chang hnih thum na khü tu vai. 17 Ngami ah thu mä kä ang ngaih ah a kiak ung, amawng ama avan pyein ne pum im ung nami ap vai. Cun ung phi m'cäi kä ang ngaih ah a kiak ung, ak hnu bäih ah Khanpughi kä zum ciah chang khawn look ciah chang ah mäih ah namik bäi vai. 18 “Kei naw akcang ka pyein cu khomdek khan ung nami khihpawn cu khankho ah khihpawn nak om khai, khomdek khan ung nami chah cu Khankho ah chah nak om khai. 19 “Kei naw akcang ka pyein cu khomdek khan ung chang hnih hta naw phi zum ne, atäng ah nami taigü ung khankho ah om ciah Kapa naw nami ng'zoih phung cu ning pe gui khai. 20 A i ah kia sei ci ung chang hnih thum hta phi kei ah ming awn ami bum ah a kiak ung ngahmi awn atäng ah kei cu ka om ci, ci ne m'cäi gui ci. 21 Cun kawn ah Peter naw a pei ah law netah, “Bawipa, ka phäi nau naw ana kat nak ung a i chü vei kam gein vai ang? , chih vei m'gein vai ang!” ci ne ng'shik ci. 22 Bawipa Jesuh naw, “Chih vei bäng m'gein vai ah kä kiak ci, chih-kip chih vei m'gein vai ah kiak ci. 23 A i ah kia sei ci ung khankho uk nak cu shin awn täng ci; Kho hnüüp ät ung ghangpughang tumat cu ak chang shäm gui täih kiang gui khai k'bäi ci. 24 Ani naw tün ne k'tä gui netah ngui tämkäp phiaa khak a pu om ciah chang cu khü sak gui ci. 25 Ani naw a pu cu kä thung hlawt khätah, amät la ak chu a hta ni, a khawh cham ni avan cu zoi ne a thung vai ah ghangpughang naw k'bäi ci. 26 Cun ah kia khätah cun ah chang cu ghangpughang ah ma ah m'khukdong ne kawp netah, ‘Kei ah khan ah na ngaih peä, ka pu cu avan ka thung hlawt vai ah ka tha nak khai nei, ’ ci ne ng'hui paa nak ci. 27 Ghangpughang naw ani cu m'gein netah, a pu avan nawng pe ne amät phi phiawn ci. 28 “Cun ung phi ani cu phiawng ne a hteh ba kawn ah, lam ah ngui api ak pu tu ah ak changshäm paw cu hmu ne, a gawn ung pha ne k'pang netah, ‘Ka ngui na pu tu cu a tuhbäi na thung law ba ä, ’ ci ne k'ceet ci. 29 Cun ah chang cu m'khuukdong netah, ‘Kei ah khan ah na ngaih peä, ’ ka pu avan ka ning thung khai nei, ci ne ng'hui paa nak ci. 30 Cun ung phi ani naw kä ngaih pe ne, a pu avan kä a thung pha ah chuih a kium vai ah thawng ung chum ci. 31 Cun gui cu ami changshäm a paw gui naw hmu ng'za u netah, ang htei ah m'lung she ci gui. Cun ah kia sei ghangpughang ah hteit u ne a mawng avan cu m'thein ba ci gui. 32 Cun kawn ah ghangpughang naw cun ah changshäm cu khü netah, ’ nang chang shekha, nang naw kei nang paa nak ci sei, na na thung vai om ciah na pu avan cu ning nawng pe ne, ka ning k'phiawn ci. 33 Kei naw nang ka ning m'gein ah mäih ah na chang paw kä nam gein tu ba ci ma? ci ne, 34 ghangpughang cu m'lung she netah, cun ah chang cu a pu kä a thung zawp pha ah chuih kium khai ah thawng ung chum ci. 35 Cun ah kia sei nangmi cu phäi nau gui nami mät, tumat ah kat nak cu tumat naw, akcang ah kä nam m'gein tu ah a kiak ung, khankho ah kapa naw nami kat nak cu kä ning m'gein gui khai nei, ci ne m'cäi gui ci.
1 Bawipa Jesuh cu cun ah thu a pyein zawp kawn ah Kalile kho ung kaa naw, Jordan tuinu ah vang gaa Judea kho ah hteit ci. 2 Chang gui akda naw ahnu ah läk law u sei, gawpai ci gui cu gai sak gui ci. 3 Pharisee gui cu a pei ah law u netah, ami phawtcam nak ah, “Chang tumat cu a i ah a mawng awn phi bäi, ak chu awn ng'chaa hning ci goi ang? ci ne ng'shik ci gui. 4 Bawipa Jesuh naw, “Ak htük ge ung Pushipi naw pami la hnumi cu tüi piang goi ci. 5 Cun ah kia sei Khanpughi ah thu pyein cu, ‘Shin ah a mawng ung pami naw anu apa cu nawng shüt ne ak chu awn ng'puikhap ci goi, ngah ni cu sisa tumat ah kia ci goi. 6 Cun ah kia sei ngahni cu hnih ah kä kia ba ci, tumat ah kiak ci. Khanpughi naw ang puikhah sak cu chang naw kä am chaa-en vai nei’ ci ah cacim cu kä nami phat man ne ma? ci ne kiak na gui ci. 7 Pharisee gui naw, “Cun ah a kiak ung a i ah kia sei, ‘Chang naw ak chu cu ca pe ne m'cha hning ci, ’ ciah Mose naw thukhän abi ang? ci ne ng'shik ci gui. 8 Bawipa Jesuh naw, “Nangmi cu pyein kä nami ng'zak ciah chang gui ah kia uk ci sei, Mose naw nami chu awn nami ng'chaa hning ciah a pyein ah kiak ci, cun ung phi ng'tüi law htük zah ung cun ah kä kia man te ci. 9 Kei naw akcang ka pyein cu, pami naw ak chu cu, ak pami hei awn ani shetkat nak kä a om ah khawi ung, a i kat nak a om ung phi kä ang chaa-en püi vai, ak chu ng'chaa püi ne, a hei chu na tu ba ci cu, ak chu ah khan ah kat nak bik ciah kiak ci, ci ne m'thein gui ci. 10 Ang düihpüi gui naw, “Chungla goi ah ng'lak cun ah a kiak läi ung käng chula ne om ung bä tu ba khai, ci ne pyein ci gui. 11 Bawipa Jesuh naw, “Chang päng kä chu cei mah ah om hlawt ciah kä kiak ci, Khanpughi naw a om sak ah chang vah om hlawt ci. 12 Chang gui kä ami chu cei mah hlawt ah mawng akda om ci; am shah gui cu aming tüi püi ge ah kä chu cei mah hlawt ci gui, am shah gui cu chang naw plawh gui sei kä chu cei mah hlawt ci gui, am shah gui cu Khanpughi ah kho ah hmawk ah kä chu cei mah ci gui, kä chu cei mah ah om hlawt ci cu a cun ah om sä, ci ne kiak na gui ci. 13 Chang gui am shah naw akhmaw hta gui cu Bawipa Jesuh naw ami khan ah akut taih ne, hrilham apeit gui vai ah, a pei ah law püi ci gui. Cun ung phi ang düihpüi gui naw, ma na gui ci gui. 14 Bawipa Jesuh naw, “Akhmaw hta gui cu kei ah law u sä, kä ma na gui vä, khankho uk nak cu shin ah mäih ah akhmaw hta gui ah kho ah kiak ci nei, ci ne kiak na gui ci. 15 Bawipa Jesuh naw akhmaw hta gui cu ami khan ah akut taih ne, hrilham pe gui netah, a hei lam ah hteit ba ci. 16 Kho hnüüp ät ung chang tumat cu Bawipa Jesuh ah law netah, “Sazapa, ang täi ghin nak gah vai ah nik ciah bi a i nei ka bi kaw? ci ne ng'shik ci. 17 Bawipa Jesuh naw, “Nang naw nik ciah bi ah mawng a i ah kia sei kei na nang shi ang? Chang ni tumat bäng nei om ci, Nang cu ang täi ghin nak na gah hlü ung thukhän cu na läk vai, ci ne kiak nak ci. 18 A cun ah chang naw, “a i thukhän gui ang? ci ne ng'shi ba khätah, Bawipa Jesuh naw, “Chang kä na ngawn vai, chang ah chu hta kä na kat püi vai, kä nam guuk vai, käng düng ciah kä na saksi vai; 19 Na nupa cu nak chang m'sui vai, nak chang paw cu na mät awn m'täng ne nam hni vai, ci ne kiak nak ci. 20 Cun ah changnong naw, “Shin ah thukhän gui cu kei naw ka hmaw zah ung tün ne ka läk ci nei, cun kawn ah kei naw ka bi ba vai a i ang a hlü ba kaw, ci ne ng'shi ba ci. 21 Bawipa Jesuh naw, “Nang cu kümbe ciah chang ah na kiak hlü ung, hteit ba ne na khawhcham avan cu zoi netah, dukhaih ci gui-am na ngui avan cu na peit gui vai. Cun ah na bi ung nang cu khankho ah bühmang nak na hmuk khai, cun kawn ah ka hnu ah na na läk vai, ci ne kiak nak ci. 22 Cun ah chang cu ang htei ah bühmang ci kia ne, Bawipa Jesuh naw cun ah a pyein cu ng'za netah, kä zei nüng ne hteit ba ci. 23 Bawipa Jesuh naw ang düihpüi gui-am, “Kei naw akcang ka pyein cu, bühmang ciah chang gui cu Khanpughi ah uk nak kho ah ami gawk vai kä zäi ci. 24 Kei naw ka pyein ba mä cu bühmang ciah chang Khanpughi ah uk nak kho ah a gawk vai ah tah, ng'pyüm mik ung seikong a luh vaé cu zäi tu ba khai, ci ne kiak na gui ci. 25 Ang düihpüi gui naw Bawipa Jesuh ah thu ami ng'zak cu ang htei ah ngaih tüh khit u netah, “Cun ah a kiak ung a u chang naw hunnak cu gah hlawt khai ang? ci ne ng'shik ci gui. 26 Bawipa Jesuh naw ngahmi cu kheing ne teng gui netah, “chang naw a i phi käm khüt näng ci, cun ung phi Khanpughi naw a päng avan m'khüt näng ci, ci ne m'thein gui ci. 27 Cun kawn ah Peter naw, “Keimi naw a päng avan nawng shüt ne na hnu ah kami ning läk ci, keimi a i kami gah khai ang? ci ne ng'shik ci. 28 Bawipa Jesuh naw, “Kei naw akcang ka pyein cu, kho akthai a gawk law hnüüp ung chang ah Htapa cu, bämang nak awn kümbe ciah mang ah kiang ung ngok khai, Cun zaè ung kei ah kang düihpüi ah nami kiak ciah nangmi cu, mang ah kiang gha-lei-goi ung ngoh u ne, Israel pakhui gha-lei-goi cu nami uk khai. 29 Cun kawn ah phi kei ah hmawk ah a im, am dek, anu apa, a phäi a nau, akchu ahta, tumat mat nawng shüt ciah chang cu, a nawng shüt ah khan ah a phiaa ah däm pi sei gah ba khai, ang täi ghin nak phi gah khai. 30 Cun ung phi maa ciah chang gui cu hnu lawk khai gui, hnu ciah chang gui cu maa lawk khai gui nei.
1 “Khankho uk nak cu shin ah mäih ah kiak ci. Kho hnüüp ät ung sapyit lo tak ciah chang tumat cu lo bi ah ng'ghüh khai ah kho ngawi hta ah hteit ngawi ci. 2 Ghüh ah ng'cheng man ah hnüüp ät ung tangka aphe ci awn cheng gui vai ah ghüh gui ne lo ah tüi gui ci. 3 Ani cu khoplang taai, nazi kaw ung sumlei hmun ah hteit netah, a i kä bi ah düi shüi ciah chang gui cu hmu gui ci. 4 Cun gui-am, ‘sapyit lo ah hteit ne bi bi tu vä, akhin vai ah ka ning cheng gui khai nei, ’ cik ci. 5 Cun ah chang gui cun phi hteit ne bi tuk ci gui. Ani cu kho hnüüp lung ung phi bäi, kho k'awi lam ah phi bäi, a cun ah sumlei hmun ah hteit ne ng'ghüh ci. 6 Mühun k'awi nazi hma ung hteit ne ng'ghüh ba sei phi cun ah chang gui cu anang düi ba u sei hmu gui netah, ‘Nangmi a i ah kia sei a i kä bi ah mü ne nami om ang? ’ ci ne ng'shi gui ci. 7 Ngahmi naw, ‘A u naw kä na ghüh gui sei nei, ’ ci ne kiak ci gui. Cun kawn ah lo mah naw, ‘ka sapyit lo ah hteit ne bi tu vä, ’ ci ne kiak na gui ci. 8 Kho mühun law khätah lo mah naw ak chang vai cu khü netah, ‘aghüh gui cu khü gui netah, ak hnu ah bi law tuk ci ung tün ne, bi law ma ci gui ung khüt khai ah ng'cheng cu pe gui ä’ ci ne m'cäi ci. 9 Cun ah ak chang vai naw mühun nazi hma ung bi law tuk ci gui ah ghüh gui-am tangka aphe ci pe gui ci. 10 Ak htük bäih ah bi lawk ci gui ah ghüh gui ah khin gawk law khätah, nangmi cu a hmün gui ah däm pi sei gah khai gui ah ngai ci gui. 11 Cun ung phi, ngami phi tangka aphe ci bä gah tuk ci gui. 12 Cun ah kia khätah ami ghüh gui naw, shin ah chang gui cu nazi ät ashäng hta vah bi bi tuk ci gui, keimi mü ne khohni ling ung kami bik ci. Cun ung phi nang naw ngami awn atäng düt ah na na cheng gui ci nei, ’ ci ne lo mah ah pyein ba ci gui. 13 Lo mah naw a ghüh gui ung kaa tumat-am, ‘teihpüi aw, kei naw nang ka ning she nak ah kä kiak ci, hnüüp ät ung tangka aphe ah ng'cheng vai ah na zum cite can ah maw. 14 Nang cheng cu dou ne hteit baä. Ak hnu ah ka ghüh gui cun phi nang awn täng ne kak cheng gui hlük ci nei. 15 Ka mät ah ngui cu ka mät ah m'hni ah kä ka mang vai maa! Kei ah kang khai-lang ah phäh ah nam thüi ci maa!’ ci ne kiak nak ci, ci ne m'cäi gui ci. 16 Cun kawn ah Bawipa Jesuh naw, “Cun ah kia sei hnu lawk ciah chang gui cu ma u ne, ma ciah chang gui cu hnu khai gui nei, ci ne kiak na gui ci. 17 Bawipa Jesuh naw Jerusalem ah a hteh nak lam ah, ang düihpüi gui cu ami mät bäng ng'gui püi gui netah, 18 “Ngai vä, mik mi cu Jerusalem ah mi hteit lawk ci, a cun ah mang gaw ung chang ah Htapa cu, taigüpa gui la thukhän saza gui ah kutung ap khai gui nei. 19 Ngami naw ani cu ngawn vai ah k'bäi u netah chang pakhui hei gui-am ap khai gui. Chang pakhui hei gui naw ani cu päipih u ne, htung awn that u netah, kutlam tung ung tai ne ngawn khai gui nei. Cun ung phi chang ah Htapa cu ak hnüüp thum hnüüp ung sih nak ung kaa tho ba khai nei, ci ne pyein ci. 20 Cun kawn ah Zebedee ah chu cu ahta hnih ng'khah püi ne law ne, Bawipa Jesuh ah ma ah khuukdong netah ng'huipaa khai ah kawp ci. 21 Bawipa Jesuh naw, “a i nang za hlük ci ang? ci ne ng'shi khätah; Cun ah hnumi naw, “Nang Bawipa Ghangpughang ah na kiak law ung shin ah ka hta goi cu, nak eng lam lah nak pat lam ah ngoh sak goi ä, ci ne ng'huipaa ne pyein ci. 22 Bawipa Jesuh naw, “Nangmi a i nami ng'zoih ah nami mät naw kä nami hmat ci, Kei ah awk nak zaica nak ah khap cu, nami aw tu hlawt khai ang? ci ne ahta goi cu ng'shi goi ci. Ngani naw, “Kani aw tu hlawt khai nei, cik ci goi. 23 Bawipa Jesuh naw, “Nangni cu kei ah khap ung akcang ah nani awk khai, cun ung phi kei ah k'eng la k'pat ah nani ngoh vai cu, kei naw kä ka ning pe goi hning ci, cun ah ngoh nak gui vai cu Kapa naw a pian gui ah chang gui ah hmawk ah kiak ci, ci ne kiak nagoi ci. 24 Cun ah a mawng gui cu ang düihpüi gui chang ghaa naw ng'za u netah, cun ah phäi nau goi ah khan ah m'lung k'she ci gui. 25 Bawipa Jesuh naw, ang düihpüi gui ami van khü gui netah, “Ghangpughang gui cu chang gui ah khan ah ami hlüngtai nak ang dang ah mawng la chang vai gui cu ami chang gui ah khan ah khüt näng nak abe ah mawng cu, nami hmat pyi ci. 26 Nangmi läi ung cun ah mäih kä a om-en vai nei. Nangmi ung kaa ng'vai pibäih ciah chang cu nami chang shäm ah kiak khai. 27 Ak hlüngtai pi ah kia hlük ciah chang cu nangmi ah chang shäm ah kiak khai. 28 Chang ah Htapa cu chang ah m'htei vai ah lawk ciah kä kiak ci, chang m'htei khai la, a hnun gui pe ne chang avan hun phiawn khai ah lawk ciah kiak ci, nangmi cu a cun ah mäih ah nami kiak vai, ci ne m'cäi gui ci. 29 Bawipa Jesuh la ang düihpüi gui cu Jericho ah kaa ami ng'düih law ba ung chang khli naw läk law gui ci. 30 Bawipa Jesuh a law cu lam pei ah ngok ciah a mik m'dauh goi naw ng'za ni netah “Bawipa, David ah htapa, Keini nam gein goi ä, ci ne m'lau ci goi. 31 Chang gui naw adüm ah ani om vai ah k'she na goi ci gui. Cun ung phi ngami naw, “Bawipa, David ah htapa, keini cu nam gein goi ä, ci ne m'lau law pi ci goi. 32 Bawipa Jesuh naw, ng'düi ne cun ah chang goi cu a pei ah khü goi netah, “A i ka ning bi peit goi vai ang, nani ng'zak hlü, ci ne ng'shi goi ci. 33 Ngani naw, “Bawipa, Kani mik na nam dei sak goi vai, kani ng'za hlük ci nei, ci ne pyein ci goi. 34 Bawipa Jesuh naw, ngani cu m'gein goi netah, ani mik cu akut awn tawk goi ci. Ngani cu a cun vai-am ani mik m'dei law sei, Bawipa Jesuh ah hnu ah läk tuk ci goi.
1 Bawipa Jesuh la ang düihpüi gui cu Jerusalem k'et lawk ciah Olives khomhtung pei Bethphage gawnu ah gawk law ci gui. Bawipa Jesuh naw ang düihpüi hnih cu khü goi netah, 2 “mi hei ma ah om ciah pigaw ah ma ne na ni na hteh vai, a cu ah ng'se hta awn atäng ah ami pawn ah ng'senu cu na ni hmuk khai. Gui k'phian ne cun ah ng'se goi cu na ni law püi vai. 3 Chang tumat mat naw, ‘a i vai na ni k'phian ang? a ci ung, ‘Bawipa naw ng'za hlük ci nei, ’ ci ne na ni pyein vai, cun ung ani naw ng'se cu nani law püi vai ah pyein khai nei, ci ne m'cäi ne tüi goi ci. 4 Shin ah a mawng gui cu profet ah thu pyein abä nak ah kia ci. Cun ah thu cu; 5 “Zion mang gaw-am thu nami m'thein vai cu, ‘Teng tu vä, nami ghangpughang cu nami om nak ah gawk law ci nei! Ani cu hniphnoi ng'awi gi ne, Phuih näng ciah ahta ng'sehta ung cum ci nei, ciah kia ci. 6 Ang düihpüi goi cu ana ma ni ne Bawipa Jesuh ah am cäi goi ah mäih ah bik ci goi. 7 Ngani naw ng'se ang nuhta cu law püi ni ne, ani zih sui gui cu ak khan ah taih lawk ci goi. 8 Bawipa Jesuh cu cun ah ng'se ung cum ci. Chang akda naw ami zih sui gui cu lam ung ana phah ci gui, chang am shah naw sing hnah gui shui ne lam ung phah ci gui. 9 Bawipa Jesuh ah ahnu ama ung ana dou law ne läk lawk ciah chang gui cu, “David ah Htapa cu m'hlüngtai vä! Bawipa ang ming awn kyum lawk ci cu Khanpughi naw zeikiai nak pe sä! Khanpughi cu m'hlüngtai vä, ci ne m'lau ci gui. 10 Jerusalem gawnu kyong ah Bawipa Jesuh gawk law khätah, agawnu pum chang gui cu thüngkyüng zawp ci gui. Cun ah kia khätah chang gui naw, “Shin ah chang cu a u ang? ci ne ng'shi tuk ci gui. 11 Chang khli gui naw, “Shin ah chang cu Kalile kho, Nazaret gawnu ah kaa profet Jesuh nei” ci ne ng'shäu ci gui. 12 Bawipa Jesuh naw pum im kyong ah hteit netah, pum im kyong ah sumlei ci gui cu k'täm gui ci. Ngui m'thawng ci gui ah tawnglan la mümkha zoi ci gui ah m'küm gui cu gäi ne lat zawp ci. 13 Cun kawn ah Bawipa Jesuh naw, “Cacim ung Khanpughi naw, ‘Ka pum im cu taigü nak ah im ah kia ci nei, ’ cik ci. Cun ung phi nangmi naw m'guk ei ah ng'thuh nak ah nami piang ci nei, ci ne kiak na gui ci. 14 Pum im ah amik m'dauh gui la akho shum gui law u sei, Bawipa Jesuh naw gai sak gui ci. 15 Taigüpa gui la thukhän saza gui cu cäicat vai kiak ciah Bawipa Jesuh ah bi lawh gui cu hmu u ne, pum im kyong ah akhmaw gui naw, “David ah Htapa cu m'hlüngtai vä, ci ne a ming shäu cu zak u netah, ang htei ah m'lungshe ci gui. 16 Ngami naw Bawipa Jesuh-am “akhmaw gui a i ci ne ami m'lau cu nang zak ci ang? ci ne ng'shik ci gui. Bawipa Jesuh naw, “Akcang ah kang zak ci nei. Cacim ung, ‘Bawipa naw, htahmaw gui la nau hmaw gui cu ami m'hlüngtai thei vai ah Theithang gui ci nei, ’ ciah om ci cu, Kä nami phat man ci ma? ci ne kiak na gui ci. 17 Cun kawn ah Bawipa Jesuh cu cun ah gawnu ung kaa naw, hteit ba ne Bethani ah mü ip ci. 18 Kho ngawihta ah mang gawnu ah ami hteh ba lam ah Bawipa Jesuh cu ei cawi lawk ci. 19 Lam pei ah baangghing tumat om sei apei ah hteit ne teng ci. Cun ah baangghing cu käm theih ah ahnah gui bäng om ci. BawipaJesuh naw cun ah baangghing cu tawk ne, “Nang cu a ngawi ah phi kä nam theih khai, ci ne taam khätah, a cun vai-am cun baangghing cu ng'zai ne chawng ci. 20 A cun cu ang düihpüi gui naw hmu u ne, ang htei ah cäicat u netah, “Shin ah baangging cu a i hawkcha, a cun vai-am ng'zai ne ak chawng ang? ci ne ng'shik ci gui. 21 Bawipa Jesuh naw, “Kei naw akcang ka pyein cu, nangmi cu ngaih hnga nak kä om ciah zum nak a om ung baangghing ung kei ah bi ah mäih ah nami bi tu hning khai. Cun bäng ah kä kiak ciah shin ah m'htung cu ‘shin ung kaa ng'nawn ne tui ung lut ä, ’ nami ci ung nami pyein ah mäih ah kiak khai nei. 22 Nangmi naw zum nak awn nami zoih ung nami zoih phung cu nami gah khai nei” ci ne pyein ci. 23 Bawipa Jesuh naw pum im ah law ba ne am theithang gui zah ung taigüpa gui la ang vai gui cu Bawipa Jesuh ah pei ah law u netah, “Nang naw shin gui cu a i m'khüt näng nak awn na bi ang? Cun ah m'khüt näng nak cu a u naw a ning peit ang? ci ne ng'shik ci gui. 24 Bawipa Jesuh naw, “Kei naw tumat ka ning shi gui khai, Cun cu nami m'hlan ba hning ah a kiak ung shin ah a mawng gui cu, a i m'khüt näng nak awn ka bi ah ka ning m'thein gui khai. 25 Zohan naw tuihnim nak a peit cu, Khanpughi ah peit ah m'khüt näng nak awn ang a peit, chang ah peit ah m'khüt näng nak awn ang a peit? ci ne ng'shi gui ci. Ngami naw, “Khanpughi ah peit ah m'khüt näng nak awn pek ci mi ci ah a kiak ung, Zohan a i ah kia sei kä nami zum ang'ci ne nang shi ba gui khai, 26 Chang ah peit ah m'khüt näng nak awn pek ci mi ci ah a kiak ung chang gui naw Zohan cu profet tumat ah zum ci gui kia ne, cun ah chang gui cu kyih gui vai kiak ci, ci ne ami mät ng'cecäk ci gui. 27 Cun ah kia sei ngami naw, “Kä kami hmat ci nei, ci ne m'hlan ba ci gui. Cun kawn ah Bawipa Jesuh naw, “Kei naw kabi ah mawng gui phi a i m'khüt näng nak awn kabi ah kä ka ning m'thein gui khai, ci ne kiak na gui ci. 28 Cun kawn ah Bawipa Jesuh naw, “Nangmi naw a i hawkcha ah nami ngai ci ang? Chang tumat ung ahtapa pahnih om ci. Ani cu ahta ng'vai ba ah hteit netah, ‘Ka hta tuhngawi sapyit lo ah hteit ne bi na bi vai, ’ ci nak ci. 29 Ahta ng'vaipi naw, ‘Kä ka hteit khai, ’ cik ci. Cun ung phi a hngeng ah am lung thawng ba netah hteit ne bik ci. 30 Ani pa cu ahta hmawpi ah mä hteit ne a cun ah mäih ah pyein ci. Ahta hmawpi naw, ‘Ka hteit khai nei, pa oi, ’ cik ci. 31 Cun ung phi kä hteh ah om ci. Cun ah chang goi ung kaa a u naw ang apa ah beit ng'zak ciah a kiak kaw!” ci ne ng'shi gui ci. Ngami naw, “Hta vaipi naw beit zak ci nei, cik ci gui. Bawipa Jesuh naw, “Kei naw akcang ka pyein cu, khawn look ci gui la chang hlawhlang gui cu, nangmi ah mä ma pi ne, Khanpughi ah uk nak kho ah gawk khai gui nei. 32 Zohan naw nangmi ah law ne lam düng cu ning m'shüm gui sei phi, nangmi naw kä nami zum ci. Cun ung phi khawn look ci gui la chang hlawhlang gui naw zum ci gui nei. Shin ah amawng ama gui nami hmuhmat kawn ah phi, nangmi cu nami m'lung thawng ne Zohan cu kä nami zum hlawt ci. 33 “A hei tumtäng nak tumat cu ngai vä, sapyit akda geit ciah khomdek mah tumat om ci. Ani cu lo avan ng'vong ne sapyit neen nak vai khui phi shawk ci, shaam tumat phi co ci. Cun kawn ah a sapyit lo cu chang gui-am ak phlam a ei vai ah m'kai ne khah gui netah, a kho hei ah hteit ci. 34 Sapyit khäm vai akhin gawk law sei, ak chang shäm gui cu lo ng'vat ci gui ah tüi gui ne, a gah vai ah ak phlam cu lak sak gui ci. 35 Lo ng'vat ci gui naw ak chang shäm a tüih gui cu pha u netah am shah cu that ne, am shah cu ngawn ne, am shah cu lung awn vawi ne cik ci gui. 36 Cun kawn ah lo mah naw chang akda pi tüi ba gui sei, cun gui cun phi a cun bä ah ci ba ci gui. 37 Cun kawn ah ani naw, ‘Ka mät ah hta läi cu kyih aa khai gui, ’ ci ne ngai netah a mät ah hta cu tüi ne k'phlam cu soh sak gui ci. 38 Cun ung phi ngami naw lo maè ah hta cu hmu law u netah, ‘shin ah chang cu lo mah ah pakhui m'düng khai ah chang ah kiak ci, lawvä, ani cu mi ngawn u ne, ak chaw vai a khawh cham avan mi lak khai nei, ’ ci ne ng'ge u netah, 39 A hta cu pha u netah lo ng'naw ah hteh püi ne ngawn ci gui. 40 Cun ah a kiak ung lo mah a law ung lo ng'vat ne bik ci gui cu, a i ah ci gui khai ang, ci ne ng'shi gui ci. 41 Ngami naw, “Lo mah naw cun ah chang she gui cu ngawn ne ghawt gui khai nei. Lo cun phi sapyit khäm khin ung akcang ah phlam sook khai ah ahei gui-am bi sak gui khai nei, ci ne pyein ci gui. 42 Bawipa Jesuh naw, “Shin ah cacim cu kä nami phat tu man ci kia ne maa? “Lung im co ci gui naw ghü ne ami ghäih ah lung cu, Ak tung pibäih ung düi ciah lung ah kia lawk ci. Cun cu Bawipa ah bi ah kia ne, ang htei ah cäicat vai ah kia ci. 43 “Cun ah kia sei kei naw akcang ka pyein cu, Khanpughi ah uk nak kho cu nangmi ung kaa la ba ne, düng nak awn vuipai khai ah chang gui-am pe gui khai. 44 (Cun ah lung ah khan ah kia lawk ciah chang cu hngetbät khai, ak khan ah cun ah lung naw a kiak ah chang cun phi deng ne khui khai)” ci ne kiak na gui ci. 45 Bawipa Jesuh naw, cun na m'tumtäng nak am thein gui cu taigüpa gui la pharisee gui naw, ng'za u netah, ngami k'ü nak gui ah a pyein ah hmat ci gui. 46 Cun ah kia sei ngami naw Bawipa Jesuh cu phaa vai ah k'tha nak ci gui. Cun ung phi ngami naw, “Bawipa Jesuh cu profet nei, ’ ci ne zum ciah chang gui cu kyih gui ci gui.
1 Bawipa Jesuh naw ahei tumat awn m'tumtäng ne am cäi ba gui cu, 2 “Khanpughi ah uk nak kho cu shin ah mäih ah kia ci. Hngü ät ung ghangpughang tumat cu, ahta ah chu la ne m'um khai ah pawng hteim ci. 3 Ani naw ak chang shäm gui tüi gui ne, akhü tu ah chang gui cu khü sak gui ci. Cun ung phi a u kä law hlü khätah, 4 ghangpughang naw ak chang shäm gui tüi ba mä gui ne, ’ mü ei ei vai kia lawk ci nei, sei gui phi ngawn pyi nei, ei awk ghet vai kiak ci kia sei, hta m'um nak ah law tuh hlah vä, ci ne ng'khü sak gui ci. 5 Cun ung phi ami khü gui ah chang gui cu, khü lawk ciah chang gui a i ah kä tä ne, tumat cu lo ah hteit ci. 6 Ahei tumat cu sumlei khai ah hteit ci, am shah gui naw khü lawk ciah chang gui cu pha ne tuthat ci gui. 7 Ghangpughang cu ang htei ah m'lung she netah, gakap gui cu tüi gui ne, cun ah chang gui cu ngawn sak gui ne, ami pigaw phi mei awn m'khih gui ci. 8 Cun awn ah ak chang shäm gui khü ba gui netah, ‘Hta m'um nak ei awk vai cu küm pyi te ci, cun ung phi khü ah chang gui cu kä khinkha ci gui ah kiak ci. 9 Cun ah kia sei lam tung ung hteit ne, nami hmuh ah chang phung nami khü law vai nei’ ci ne m'cäi gui ci. 10 Chang shäm gui cu lam tung ung hteit u ne, ami hmuh phung chang ni chang she avan khü lawk ci gui. Cun ah kia sei hta m'um nak ah im ung khin gui be ci gui. 11 “Ghangpughang cu khin gui teng gui khai ah law netah, hta m'um nak ung sui vai ah sui kä sui tuk ciah chang tumat cu hmuk ci. Ghangpughang naw, ‘Teihpüi aw, a i ah kia sei, htam um sui sui ne kä ng'bilawh ah na law tu ang? ’ ci ne ng'shik ci. 12 “Cun ah chang cu a i ah phi käng thu tu ba thei netah om düt ci. 13 Cun kawn ah ghangpughang naw, ak chang shäm gui-am, ‘shin ah chang cu akut kho pin ne khit netah, ak pung ah hmüp khui ah m'shän vä, a cu ah ani cu kyap ne m'lau ne, aha htui ne om sä’ ci ne kiak na gui ci, ci ne pyein ci. 14 Cun kawn ah Bawipa Jesuh naw, “Khü ah chang gui läi da ci gui te, ghü ah chang gui cu ken ci gui nei, ci ne kiak na gui ci. 15 Cun kawn ah pharisee gui cu hteit ba u netah, ani cu a i i ah thuvi ne ng'shi vai ang’ ci ne ng'gepai ci gui. 16 Ngami naw a ming khah püi gui la Herod ah pati chang gui cu, tüi gui u netah, Bawipa, nang naw akcang pyein ne chang ah hmawk ah Khanpughi ah ng'zak hlü cu nam theithang ci, chang gui ah m'lung ngaih cu kä nam tung ci, chang ah hmai phi kä na teng ci. 17 Cun ah kia sei nang naw a i ah na ngaih cu nam thein gui ä, ‘ghangpughang-am khon look ne peit vai ang, kä peit vai ang? ci ne ng'shik ci gui. 18 Cun ung phi Bawipa Jesuh naw ngami ah shekat ciah ami ngaihtüh cu hmat netah, “Thuvi chang gui, a i ah kia sei nangmi naw thuvi ne nami nang shi ang? 19 Khon nami loh vai ah tangka tumat cä nam hnuh law vä, cik ci. Cun ah kia sei ngami naw tangka tumat law püi u khätah, 20 Bawipa Jesuh naw, “Shin cu u ah müi, a u ah ming ang, ci ne ng'shi gui ci. 21 Ngami naw, “Ghangpughang ah müi, ghangpughang ah ming nei, cik ci gui. Cun kawn ah Bawipa Jesuh naw, “Ghangpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä, ci ne kiak na gui ci. 22 Ngami cu cun ah a pyein ng'za u netah, ang htei ah cäcat ci gui. Cun kawn ah a hei lam ah hteit ba ci gui. 23 A cu hnüüp ung Sadducee gui cu Bawipa Jesuh ah gawk lawk ci gui. Ngami cu ‘Sihnak ung kaa thawh banak kä om ci, ’ ciah zum ci gui ah kiak ci. 24 Ngami naw, “Bawipa, chang tumat cu kä hta pha ne asih ah a kiak ung, ani ah chu hmei cu anau naw khäm tu ba sä, ani hta law ung cun ah akhmaw naw, a phäi ah kyong khui cu m'htei khai, ’ ci ne Moses naw pyein ci. 25 Keimi ung phäi nau gui singchih om ci gui. Ami phäi ang vaipi cu chumah thai ne sik ci. Kä hta phak ci kia sei akchu cu anau naw khäm tu ba ci. 26 Ak pahnih nak anau, ak thum nak anau la anau gui ami van cu, a cun ah hnumi chu na tuba bäng bäng u netah, a u phi kä hta ne si zawp ci gui. 27 Ak hnu ah cun ah hnumi phi sik ci. 28 Cun ah kia sei sih nak ung kaa thawh ba nak kho hnüüp ung, cun ah hnumi cu a phäi nau gui chih ung kaa a u ah chu ah kiak khai ang? ’ ci ne ng'shik ci gui. 29 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kia sei nami m'lung ngaih cu ng'lat ci. 30 Chang gui cu sih nak ung kaa ami thawh law ba ung chungla nak kä om ba khai. Ngami cu khankho chang gui ah mäih ah kiak khai gui. 31 Sih nak ung kaa thawh nak ba vai ah mawng Khanpughi ah thu cu kä nami phat man ne maa? 32 Khanpughi naw, ‘Kei cu Abraham ah Khanpughi, Issak ah Khanpughi, Jakop ah Khanpughi ah ka kiak ci nei. Ani cu aksi gui ah Khanpughi ah kä kiak ci, ghing ci gui ah Khanpughi ah kiak ci, ci ne m'thein gui ci. 33 Cun ah am theithang cu chang gui naw ng'za u netah, ang htei ah cäicat ci gui. 34 Sadducee gui naw kä ami m'hlan tuba hlawt vai ah Bawipa Jesuh ah thu pyein cu, pharisee gui naw ng'za u netah, a pei ah ng'bum lawk ci gui. 35 Ngami ung kaa thukhän saza tumat naw, thuvi ne ngaihtüh netah; 36 Bawipa ah thukhän gui ung, a i thukhän ang a hlüngtai pi, ’ ci ne ng'shik ci. 37 Bawipa Jesuh naw, “Na Bawipa Nak Khanpughi cu, nam lung kiong avan, na ngaihtüh avan La na hmuhmat nak avan nawn nam hni vai. 38 Shin cu ak hlüngtai pibäih la ak küikyang pibäih ah thukhän ah kiak ci. 39 Ak hnih nak ah ak hlüngtai pibäih la ak küikyang pi bäih ah thukhän cu, ‘Nak chang paw cu na mät awn m'täng ne nam hni vai, ’ ciah thukhän ah kiak ci. 40 Shin ah thukhän goi cu Moses ah thukhän avan la profet gui ah m'theithang nak avan khäm ciah kiak ci. 41 Pharisee gui ng'htawi law u khätah Bawipa Jesuh naw, “Messiah ah mawng cu a i ah ang nami ngaih? ani cu a u ah ng'shon ung kaa ah kiak khai ang? ci ne ng'shi gui ci. Ngami naw, “David ah ng'shon ah kiak khai nei, ci u khätah, 43 Bawipa Jesuh naw, “Cun ah a kiak ung a i ah kia sei mumcha Theing ah thawh let nak awn David naw, ‘Messiah Bawipa’ ci ne akhü ang? 44 Bawipa naw ka Bawipa-am, Na ga gui na kho kaa ah kä ka gawk sak pha ah chuih, Na ngoh vai, ’ ciah David Ghangpughang naw pyein ci. 45 David naw Messiah-am Bawipa ci ne a khü ah a kiak ung Messiah cu a i cha ah David ah ng'shon ah kiak khai ang? ci ne ng'shi gui ci. 46 Cun ung phi Bawipa Jesuh cu a u naw käm hlan ba ci. Cu hnüüp ung tün ne Bawipa Jesuh cu, a u naw phi käng shi law ba ci.
1 Cun kawn ah Bawipa Jesuh naw ang düihpüi gui la chang hei gui-am, 2 “Thukhän saza gui la Pharisee gui cu, Moses ah thukhän gui m'dang ne pyein nak hning gah ci gui ah kia ci. 3 Cun ah kia sei ngami ah m'theithang m'cäi ä gui cu nami läk vai. Cun ung phi ngami cu ami pyein ah mäih ah kä om ci gui ah kia sei, ngami ah om ah mäih ah kä nami om-en tu vai. 4 Ngami naw chang gui-am gih ne phuih khit vai kiak ci cu phuih sak ci gui, ami mät läi naw cun ah phuih cu ami kut m'dawng awn phi kä tawn hlük ci gui. 5 Ami bilawh phung chang naw a hmat vai ah bik ci gui. Ami m'cakau la ami baan ung akdäm nu gui ah cacim guh ne m'kawh ci gui. Ami sui ung phi akdäm ang sau nu gui ah cacim guh ne m'kawh ci gui. Ami sui cun phi akdäm ang sau nu gui ah chui ne sui ci gui. 6 Ei awk nak pawi ung ani nak pi ung ngoh u ne, pum im gui ung phi ng'khoi tu hnga ne om hlük ci gui. 7 Sumlei hmun gui ung phi chang gui naw ami chang m'sui vai ng'za hlük ci gui. ‘Sazapa’ ciah chang naw a khü gui vai m'hni ci gui. 8 Cun ung phi nangmi nami van cu ng'phäi nau gui ah nami kiak ci kia ne nangmi ung sazapa tumat bäng om ci kia sei, ‘Sazapa’ ciah khü vai kä nami ng'zak hlü vai. 9 Khomdek khan ah a u phi ‘Pa’ ah kä nami khü vai, nangmi ung khankho ah nami pa tumat bäng om ci. 10 Nangmi naw ang vaipi ciah khü phi kä nami ng'zak hlü vai, Nangmi ung Messiah ciah nami ng'vaipi tumat bäng om ci. 11 Nangmi ung ka hlüngtai pi ci cu nami chang shäm ah kiak khai. 12 Amät naw amät m'hlüngtai ci cu ng'neim pibäih khai, amät naw amät ng'neim sak ci cu hlüngtai nak gah khai. 13 “Thuvi ciah Pharisee gui la thukhän saza gui, nangmi ung thüinak aih om ci. Nangmi cu khankho ah chang gui naw ami kai nak vai ah m'kawt nami khai ci. Nami mät phi kä nami lut ci, lut hlü ne tha nak ciah chang phi kä nami luh sak ci. 14 (Thuvi ciah pharisee gui la thukhän saza gui, nangmi ung thüisei nak om ci. Nangmi naw hmeinu gui ah khawh chaam gui cu käng düng ciah lam awn lak pe u netah, chang naw a hmuh ng'zak ung nik khai ah ang sau aih ah nami taigü ci. A cun ah phäh ah nangmi cu nui pi ciah m'kat nak nami gah khai). 15 “Thuvi ciah ah pharisee gui la thukhän saza gui, nangmi ung thüisei nak om ci. Chang tumat a zum law tu vai ah tui 'kat ne, ng'zung khum ne nami hteit ci. Zum nak ung nami m'hluh tu kawn ah, cun ah chang cu, nami mät ah mä a goi ah shekat pi ne, m'htei kho ah hteit ciah nik khai ah nami piang ci. 16 “Lam shüm ciah chang mik m'dauh gui, nangmi ung thüisei nak om ci. Chang tumat naw pum im awn m'kyuk ne ang phyun ung, cun ah ng'pyun nak cu kä bä ci, cun ung phi im ung ghui awn m'kyuk ne ang phyun läi ung bä ci nei’ ci ne nami pyein ci. 17 Chang she mik m'dauh gui ngai shüm vä, ghui ang, a küikyang pi, ghui theing thap sak ciah pum im ang a küikyang pi? 18 Chang tumat naw mangkyang awn m'kyuk ne ang phyun ung kä bä ci, mangkyang ah khan ah kaa, peit taak awn m'kyuk ne ang phyun vah bä ci, nami cik ci. 19 Changshe mik m'dauh gui, peit taak nak ang a küikyang pi, peit taak gui theing thap sak ciah mangkyang ang a küikyang pi? 20 Mangkyang awn m'kyuk ne ng'phyun ciah chang cu, mangkyang la ak khan ah om ci avan awn m'kyuk ne ng'phyun ciah kiak ci. 21 Pum im awn m'kyuk ne ng'phyun ciah chang cu, pum im la pum ung om ciah Khanpughi awn m'kyuk ne ng'phyun ciah kiak ci. 22 Khankho khü ne ng'phyun ci cu Khanpughi ah mangkyang ah khan ah ngok ciah Khanpughi cu khü ne ng'phyun ciah kiak ci. 23 “Thuvi ciah pharisee gui la thukhän saza gui, nangmi ung thüisei nak om ci. Nangmi cu m'lui, k'bei, an mai nüng bum gha bum ät nami peit ung phi, taga nak, m'gein nak, düngnak gui ah thukhän ung küikyang pi ci gui cu nami nawng ci. Nangmi naw bum gha bum ät phi pe khenggeng ne thukhän phi nami läk vai. 24 “Lam shüm ciah a mik m'dauh gui, nangmi cu k'pi kä nami K'düh-en vai ah, tui m'cim ne nami awk ci, cun ung phi kala-uk läi nami k'düük ci nei. 25 “Thuvi ciah pharisee gui la thukhän saza gui, nangmi ung thüisei nak om ci, nangmi cu nami eik-bei la nami m'zakkoi gui ak pung ah theing khai ah nami m'si ung phi, nami m'lung kyong ah ng'zak nak hlü aih la ngetngawng nak cu be ci nei. 26 A mi m'dauh ah pharisee gui, nami tui m'zak ah ak kyong cu theingthap sak ma vä, cun ung ak pung phi theingthap lawk khai nei. 27 “Thuvi ciah pharisee gui la thukhän saza gui, nangmi cu bawk khai ah hluk ah guh-am awn nami täng ci nei, guh-am gui cu ak pung ah teng ung ami kiom ung phi, ak kyong ah gook ah a guh, ak thu gui awn be ci. 28 A cun ah mäih ah nangmi cun phi, ak pung ung chang ah ma ah, chang k'ni gui ah nami ng'shei ung phi, nami m'lung kyong ah thuvi nak la shetkat nak gui awn nami be ci. Pyein ci. 29 “Thuvi ciah pharisee gui la thukhän saza gui, nangmi ung thüsei nak om sä. Nangmi cu profet gui ah ng'cim hmun lung gui nami cawih pe gui ci. Chang ni gui ah cim hmun lung gui nami m'tui m'thau pe gui ci. 30 Cun kawn ah nangmi naw, ‘Keimi cu pughi pa gui ah om zah ung kami om vai sü ung ngami ah mäih ah profet gui cu kä kami ngawn sheh gui khai sü, ’ nami cik ci. 31 Cun ah kia sei nangmi cu profet gui ngawn ci gui ah hta nau gui ah nami kiak aè mawng, nami ng'kiaa pyi ciah kiak ci nei. 32 Nami pughi pa gui naw tün ne ami bi ah kat nak cu, ang pyii ung khüt khai ah nami bi vai nei. 33 K'phyu m'äm ah gui lah k'phyu m'äm-ah ah hta gui, nangmi cu m'hteimei ung luh nak vai ung kaa, a i chaa nami phiawng khai ang? 34 Kei naw akcang ka pyein cu, nangmi ah om nak ah profet gui, saza gui la hmuhmat ciah chang gui ka tüi lawk khai. Nangmi naw cun ah chang gui cu am shah nami ngawn khai, am shah kutlam tung ung nami tai khai, am shah pum im ah k'caw ah nami tuthat khai, am shah gui cu apigaw päng ung hteit ne nami pha gui khai. 35 Cun ah kia sei kat nak kä bik ci gui ah Abel ung tün na, pum im la mamgkiang ah ng'lak ung nami ngawn ah Berachiah ah hta Zachariah ung khüt khai ah, nami ngawn gui ah hmawk ah shetkat nak nami gah khai. 36 Kei naw akcang ka pyein cu, shin ah amawng ama gui ah hmawk ah tuhchü chang gui cu shetkat nak gah khai gui. 37 “Aw Jerusalem! nang naw profet gui cu ngawn ne Khanpughi ah ng'shä tüih gui cu lung awn na vawi ci nei, ainu naw ang phiaa awn aihta gui ak boop gui ah mäih ah nak chang gui kei naw ka kut ng'hnim ung ka koi nak gui cu sho law aih ci nei, cun ung phi nang naw kei cu kä na na dou ci. 38 Cun ah kia sei na pum im cu Khanpughi naw nawng sei, im ghawng ah kia lawk khai nei. 39 kei naw tuhbäi ka pyein cu, ‘Bawipa ming awn kyum lawk ci cu Khanpughi naw phyutheh nak be sä, ’ ci ne kä pyein pha ah chuih nang naw kei cu kä na na hmu ba khai nei, ci ne pyein ci.
1 Bawipa Jesuh cu pum im ung kaa a luh law ba zah ung ang düihpüi gui naw a pei ah law u netah, “Pum im ami cawh cu m'hnuh tuk ci gui. 2 Bawipa Jesuh naw, “Shin ah cawh kyan gui cu nangmi naw nami hmuk ci nei, kei naw akcang ka pyein cu shin ah pum im cu cawh nak ah lung tumat phi a mät ah om nak ung kä ng'zän ba khai ah ng'gäi ne maih lawk khai nei, ci ne pyein ci. 3 Bawipa Jesuh cu Olive khohtung ah amät a ngoh zah ung ang düihpüi gui cu a pei ah law u netah, “Tuhbäi na pyein ah a mawng gui cu a i ah khin ung kia lawk khai ang? Nang Bawipa kyum law ba nak khin la kho ang pyi law nak vai ah khin ung a i gui dang lawk khai ang? , nam thein gui ä, ci ne ng'shik ci gui. 4 Bawipa Jesuh naw, “Nangmi a u naw kä a mi ning m'hleeihlak-en gui vai ah geing na ne om vä. 5 Kei cu Messiah nei, ’ ci ne chang akda naw kei ah ng'hlawk ne chang khli m'hleeihlak lawk khai gui nei. 6 Nangmi naw ang et nak ung ng'tuk nak ah k'aw gui nami ng'zak khai, a shou nak ah ng'tuk ah mawng gui nami ng'zak khai, cun ung phi kä nami kyih kyawk vai. A cun gui cu om lawk khai, cun ung phi kho a khüt nak kä gawk law phak ci. 7 Chang pakhui tumat la tumat uk nak khopäng tumat la tumat, ng'tuk nak om khai. Akho päng ung ei vai maih khai, shihpi thüng khai, 8 cun gui cu gawk lawk khai ah zaica nak gui vai ah, lam ma lawk ciah kiak ci. 9 “Cun kawn ah chang gui naw nangmi cu ning pha gui u ne ami ning m'kat gui vai la ami ning ngawn gui vai ah ning ap gui khai gui. Chang gui naw kei ah hmawk ah ning gen gui khai gui. 10 Cun ah khin ung chang gui cu ami zum nak nawng u ne, tumat la tumat ng'cha tuk khai gui, ng'gen tuk khai gui nei. 11 Profet ah ng'hlawk ci chang akda om law ne, chang gui cu m'hleeihlak lawk khai gui nei, 12 chang shekha da law pi täi ne khawk sheng nak cu maih lawk khai nei. 13 Cun ung phi ak hnu ah khüt sei düng ciah chang cu hunphiawn nak gah khai nei. 14 Khankho uknak ah mawng thu ni cu khodek khan avan ung chang nüng ah ma ah saksi ne pyein zawp kawn ah, kho ah ng'pyi nak vai ah khin cu gawk lawk khai nei. 15 “Profet Daniel ah pyein ah kyihkyawk tükyai vai kiak ci cu a theingcim nak ung ng'düi sei nami hmuk khai. (Ca phat ci naw, shin ah mawng cu ang ngaih thei vai). 16 Cun ah ami hmuh law ung Judea kho ah chang gui cu, khomhtung ah dawng u sä. 17 Im kiung khan ah om ciah chang cu im kyong ah khawh la ba khai ah kä lut-en ba sä. 18 Lai ah om ciah chang cun phi suisak la ba khai ah im ah kä hteit-en ba sä. 19 Cun ah akhin ung käumah ci gui la htazüt shäm ci gui cu zaica khai gui nei. 20 Nami dawng nak vai ah khin cu khosik kho la kyin hnüüp ung kä ng'awt-en vai ah, nami taigü vai nei. 21 Cun ah a khin ung ang htei ah shekak ciah zaica nak gawk lawk khai. Cun hlawk ah shekak ciah zaica nak cu khodek ang tüi law ung tün ne a i zah ung phi chang gui naw kä bui awt man khai gui. Ngawi ah phi bui awt ba vai ah kä kiak ci. 22 Khanpughi naw cun ah khin cu kä a tawi sak ah a kiak ung a u phi ghing ne kä om ba hlawt khai. Cun ung phi Khanpughi naw a ghü ah chang gui ah hmawk ah cun ah a khin mü hnüüp cu tawi sak khai nei. 23 “Cun zah ung chang gui naw, ‘shi ah Messiah om ci nei, cä ah Messiah om ci nei, ’ ami ci ung phi kä nami zum phung vai. 24 Messiah ah ng'hlawk ci gui, profet ah ng'shei ci gui cu dang lawk khai gui nei. Cun gui naw ami m'khüt hning ung, Khanpughi ah ghü ah chang gui pui ami m'hleeihlak nak vai ah cäi aih vai gui la küikyang ciah amawng gui cu m'dang lawk khai gui nei. 25 Ngai vä bäi, shin ah amawng gui kä a gawk law pha ung kei naw ng'daut ne ka ning m'thein gui ah kiak ci nei. 26 “Chang gui naw, ‘Teng vä, Messiah cu bungpuk ah om ci nei, ’ ami ci ung phi kä nami teng-en vai, im kyong ah om ci nei’ ami ci ung phi kä nami zum-en vai. 27 Hnilaw ung kaa naw hni kiaak ung khüt khai ah khankho mik avan deikhang sak ciah kholailäp ah mäih ah chang ah Htapa cu kyum lawk khai nei. 28 “Chang si gui ah om nak ah langta gui ng'bum khai gui nei’. 29 “Cun ah zaica nak ah khin a gawk law kawn ah, a cun vai-am hni mü ne hmüp khai, chaa phi kä khang ba khai, aisi gui phi khankho ah kaa kiawi ne kia law zawp khai gui. Khankho ah kumkü aisi gui ah lam cu ng'thawng zawp khai. 30 Cun zah ung chang ah Htapa a kyum law nak vai ah a mawng cu khankho ung dang lawk khai nei. Chang ah Htapa cu khankho ah meibawk ung cum ne, chünla ciah hlüngtai nak la küikyang ciah bämang nak awn a kyum law cu khomdek chang gui naw ami hmuh ung kyap ne m'lau khai gui nei. 31 Cun kawn ah chang ah Htapa naw chünla ciah phyungheng tum sak gui netah, ak khankho chang gui cu hnilaw hnikiaak, ahtum asiip ah tüi gui ne, khomdek vang kem ah kaa naw vang kem ah khüt khai ah a ghü ah chang gui cu m'cut sak gui khai nei. 32 “Theighing ah mawng ung m'theithang nak tumat cu nami ngaih vai. Cun ah theighing ah ang ban gui cu m'khek law ne ak thai ah a lim law ung kho a chaa vai ng'et lawk ciah nami hmat ci. 33 A cun ah mäih ah ka pyein pyi ah amawng ma gui gawk law sei nami hmuh ung, chang ah Htapa cu nami m'kawt pei ah gawk law pyi ciah nami hmat vai. 34 Kei naw akcang ka pyein cu, shin ah mawng avan cu tuhbäi ghing ciah chang gui kä ami sih pha ung gawk lawk khai nei. 35 Khankho la khomdek a maih ung phi kei ah thu cu kä maih khai nei. 36 “Cun ung phi cun ah hnüüp la cun ah akhin cu a u naw kä hmat ci. Khankho chang naw phi kä hmat ci, Ahtapa naw phi kä hmat ci, PaKhanpughi bäng naw hmat ci. 37 Chang ah Htapa a kyum law ung Noah ah khin ung a kiak ah mäih kiak khai nei. 38 A cun zah ung tui naw kä ak plüm pha ah chuih Noah hteinpaw im ung aluh ung khüt sei Chang gui cu ei ne aw ne, chungla ne om ci gui. 39 Cun ah chang gui cu tui naw plüm gui sei dimaih law güt u ne, a i kä hmat ne om ci gui. Chang ah Htapa a kyum law zah ung phi a cun ah mäih ah kiak khai nei. 40 Cun zah ung lai ah chang hnih ani om ung tumat cu hteh püi sei tumat cu pawih shüt khai. 41 Sum suk ci goi ah hnumi hnih ung kaa tumat cu hteh püi sei tumat cu pawih shüt khai. 42 Cun ah kia sei geing nah ne nami ngäng vai, nami Bawipa a i zah ung alaw vai kä nami hmat ci. 43 Im ah naw m'guk ei a law vai ahmat ung, geing ah ne om sei, m'guk ei naw a im cu hmawng ne käm gu hlawt khai ah nami hmat ci. 44 Chang ah Htapa cu nangmi naw kä nami ngaih zah ah akhin ung kyum lawk khai kia sei, nangmi cun phi ang täi zah ngaih nah ne nami om vai. 45 “Düng ciah chang shäm cu a u ang? Cun ah chang cu a hei chang shäm gui uk khai la a khin päng ung ei awk vai tei gui khai ah a bawi naw am düih ah kiak ci. 46 Ani naw a mät ah a bi lawh gui vai phung akni ah abi cu a bawi law ba ne a hmuh ung zeikiai nak om ci. 47 Kei naw akcang ka pyein cu, ‘a bawi ah akhawh chaam avan m'hteihtang vai ah cun ah chang-am ap khai nei. 48 Cun ung phi cun ah chang shäm cu changshe ah a kiak ung, ka bawi kä law ba zäk khai shou ba cang khai ci ne, 49 chang shäm hnumi pami gui cu tuthat gui ne, ei awk ci gui awn atäng ah ei awk tat ne om khai nei. 50 Cun kawn ah ani naw kä ang ngaih nak khin, kä ah hmuh zah ung a bawi cu law ba ne, 51 ak nui ah tuthat sei thuvi chang gui ah gah ah mäih ah gah khai nei. Ani cu kyap ne m'lau ne aha htui ne geiî vai khai nei.
1 “Cun ah akhin ung Khanpughi ah uk nak kho cu shin ah mäih ah kiak khai. Hnü ät ung lamihta singhga cu chumah khai ah pamihta dou khai gui ah mei im kawt sek sek ne hteit ci gui. 2 Cun gui ung kaa sing hma cu lunglang ci gui, sing hma cu kä lunglang ci gui. 3 Kä lunglang ci gui cu mei im law püi pang u ne phi zinan akdäm kä kei ci gui. 4 Lunglang ci gui cu ami mei im ung be khai ah zinan kei ne, law püi ci gui. 5 Chumah khai ah pamihta cu kä law zä sei, ngahmi cu ami van ngam ne ip zawp ci gui. 6 Kho cawih ding law khätah, “Chumah khai ah pamihta gawk law ci nei, law ne dou law vä, ’ ciah ng'khü k'aw cu ng'zak ci gui. 7 Lamihta sing gha cu tho law ba u ne, ami mei im piang ne pawng m'hteim ci gui. 8 Kä lunglang ci gui cun naw, kä lunglang ci gui-am ‘Kami mei si lawk khai kiak ci, zanan api na pe tu gui vä, ’ ci ne ng'zoi tuk ci gui. Kä lunglang ciah lamihta gui naw, 9 ‘Nangmi ah phäh la keimi ah phäh ah zinan kä män h khai, cun ah kia sei ami zoih nak ah vak hleih ba cang vä, ’ cik ci gui. 10 Kä lunglang ci gui cu zinan hleih khai gui ah ami hteh zah ung chumah khai ah pamihta cu gawk lawk ci. Ana ngäng ge ciah lamihta gui cu ani awn atäng ah hta m'um pawi kyong ah lut u netah shoh cu ak khai shüt ci gui. 11 Hmuhmat nak kä om ciah ng'lamihta gui cun phi gawk law ba u ne, ‘saza, saza, shoh nak hmawn tu gui vä, ’ ci ne ng'khü ci gui. 12 Cun ung phi chumah ciah pamihta naw, ‘Nangmi a u gui ang, shoh kä ka ning ak hmawn gui khai nei, ’ ci ne kiak na gui ci. 13 “Cun ah kia sei nangmi cun phi cun ah hnüüp, cun ah khin cu kä nami hmat ci kia sei, ngaih na ne nami ngäng vai nei!’ 14 “Cun ah khin ung khankho uk nak cu shin ah mäih ah kiak khai. Hnüp ät ung chang tumat cu lam hteit khai ah pawng m'hteim ci, ani naw ak chang shäm gui khü gui netah, a khawh cu ap gui ci. 15 Cun ah khawh cu ami mät ah näh ci vai ah k'pai ne, tumat-am ghui pit hma-kip, tumat-am pit m'ku, tumat-am pit gha, ciah ap gui ci. 16 Cun kawn ah ani cu akho hei ah hteit ci. Ghui pit hma-kip gah ciah chang cu a cun vai-am sumlei ne, ghui pit hma-kip ah khan ah pit hma-kip ak pawih khai ah gah ci. 17 A cun ah mäih ah pit m'ku gah ciah chang cun phi pit m'ku ah khan ah pit m'ku ak pawih khai ah gah ci. 18 Cun ung phi pit gha gah ciah chang cu ang thuh nak ung m'dek co netah a bawi ah ghui cu m'dek ung phuh ci. 19 “Shou hta khätah ami bawi cu law ba ne ak chang shäm gui cu k'tä gui ci. 20 Ghui pit hma-kip gah ciah chang cu ghui pit hma-kip ak pawih ci cu law püi ne, ‘Bawi aw, nang naw ghui pit hma-kip na na ap shüt cu tuhbäi pit hma-kip ak pawih khai ah ka bik ci nei, ’ ci ne pyein ci. 21 A bawi naw, ‘Na bä ci, nang cu düng ciah chang ni ah na kiak ci. Bi api ung nang düng ciah kia sei, bi ak däm cu ka ning ap khai, kei ah law ne kei awn atäng ah zeikiai ne na om khai nei, ’ ci ne kiak nak ci. 22 “Ghui pit m'ku gah ciah chang cun phi law ne, ‘bawi aw, nang naw ghui pit m'ku na na ap shüt ci, tuhbäi pit m'ku ak pawih khai ah ka bik ci nei, ’ ci ne pyein ci. 23 A bawi naw ‘na bä ci nang cu düng ciah chang ni ah na kiak ci. Bi api ung nang düng ci kia sei bi akdäm cu ka ning ap khai, kei ah law ne kei awn atäng ah zeikiai ne na om khai nei, ’ ci ne kiak nak ci. 24 “Cun ung phi pit gha gah ciah chang cu law ne, ‘Bawi aw, kei cu nang bawi ah mawng ka hmat ci, nang cu na nget-ngawng ci kia ne kä na geit phi na khäm ba man ci, kä na phu geit phi nam sep ba man ci. 25 Kei naw ning kyih netah na ghui cu m'dek co ne kak phuh ci nei, teng ä, shin ung na ghui om ci nei’ cik ci! 26 “A bawi naw, ‘shekak ciah changdam, kei naw kä ka geit phikhäm ne, kä ka phu phi kam sep man ciah na hmat ung, 27 Kei ah ghui cu pan ah na ap vai sü. Cun ung vah kei ka law ba ung ak pawih mah ah na gah hning khai süte, ’ cik ci. 28 Cun kawn ah ‘ani ah ghui pit gha cu la ba ne¬ ghui pit phiaa om ci-am pe vä. 29 Bühmang ci cu peit ba mä ung bühmang law pi täi khai, cun ung phi ghawi-pyam ciah kaa cu, ak om hta phi lak peit zawp vai. 30 A i ah kä mawng ciah shin ah chang shäm cu, ak pung ah hmüp khui ung hteh püi vä, a cu ah kyap ne m'lau ne aha htui ne om sä’, ci ne kiak na gui ci. 31 “Chang ah Htapa cu khankho chang gui naw kiung u sei ghangpughang ah kia ne a kyum law ba ung näng nak mangkiang ung ngok khai. 32 Cun zah ung kho nüng ah kaa chang pakhui avan cu ama ah ng'cut lawk khai gui. Htoshäm naw hto la me khoichaa ah mäih ah chang ah Htapa naw phi chang gui cu k'pai ne m'khoichaa gui khai. 33 Düng ciah chang ni gui cu ak pat lam ah k'bum gui ne, changshe gui cu ak eng lam bum gui khai. 34 Cun kawn ah ghangpughang naw akpat lam ah om ciah chang gui-am, ‘law vä, Kapa ah phyutheh nak nami gah ciah chang gui, khomdek a tüi pian ung tün ne nangmi ah hmawk ah a pian ah uk nak kho ung om vä. 35 Nangmi cu kei ei ka cawi zah ung ei nami nam bei ci, tui ka gha zah ung tui nami na tu ci, kei cu khin ah ka kiak zah ung nami na khin nak ci. 36 Kei ka sui vai kä ah om zah ung sui nami nam sui ci. Ka gawpai ung nami htei ci, thawng ung ka kium zah ung nami na teng m'kein lawk ci’ ci ne pyein ci. 37 “Cun ci khätah changdüng gui naw, ‘Bawipa, nang ei na cawi cu ning hmu ne, a i zah ung ei kami ning m'bei, nang tui na gha cu ning hmu ne a i zah ung ang tui kami ning tui, 38 khin ah na kiak a i ah ung ang ning hmu ne, kami ning khin nak, sui kä na sui a i ah ung ang ning hmu ne sui kami ning m'sui. 39 Na gawipai, thawng ung na kium a i zah ung ang ning hmu ne kami ning m'hteihtang’ ci ne pyein ci gui. 40 Ghangpughang naw, ‘kei naw akcang ka pyein cu, shin ah ka nau gui ung kaa, zoken pi ciah chang, nam hteihtang tu phung avan cu kei na nam hteihtang ah kiak ci nei’ ci ne kiak nak khai. 41 “Cun kawn ah ghangpughang naw ak eng lam ah om ciah chang gui-am, ‘thüi sei nak om ciah chang gui, shin ung kaa düi law ne, hteit vä, khoshe gui la ami khah püi gui ah hmawk ah pian ah m'hteimei lam ung zu kia vä. 42 Kei ei ka cawi zah ung ei kä na mi nam bei ci, tui ka gha zah ung tui kä nami tu ci, 43 kei khin ah ka kiak zah ung kä nami na khin nak ci, kei ka sui vai kä a om zah ung kä nami nam sui ci, kei ka gawpai zah ung, thawng ung ka kium zah ung kä nami nam hteihtang ci, ’ ci ne kiak na gui ci. 44 “Cun ah chang gui naw, ‘Bawipa, nang ei na cawi, tui na gha khin ah na kiak, sui ah nak kheei, na gawpai, thawng ung na kium cu ning hmu lang ne. a i zah ung ang kä ning tu m'bei, kä ning m'hteihtang ah kami om’ ci ne pyein tu ba khai gui. 45 Cun kawn ung ghangpughang naw, ‘kei naw akcang ka pyein cu shin ah chang gui ung kaa ak zoken pi ah chang käm hteihtang ne nami om phung cu, kei kä nam hteihtang ne nami om ah kiak ci’ ci ne kiak na gui khai. 46 Cun na kia sei ngami cu ang täi ah shetkat nak gah khai gui. Düng ciah chang ni gui läi cu ang täi ghin nak kho ah gawk khai gui.
1 Bawipa Jesuh naw cun ah am theitang gui kawn ah ang düihpüi gui-am, 2 “Ak hnüüp hnih nak ung phiawn nak pawi om khai ah nami hmat ci. Cun zah ung Chang ah Htapa cu kutlam tung ung tai ne ami ngawn vai ah ga ah kut ung ap khai gui nei, ci ne pyein ci. 3 Cun zah ung taigüpa gui la chang vai gui cu taigütung Kaiaphas ah mang im ah ng'bum ci gui. 4 Ngami naw Bawipa Jesuh cu adüm ah pha netah ngawn vai ah ng'ge ci gui. 5 Cun ah chang gui naw, ‘chang gui thüngphyong püipawng vai u sei, pawi ah kyong ung kä pha vai’ ci ne kiak ci gui. 6 Bawipa Jesuh cu Bethani gawnu ah kheilei ung azan gaw te ciah Simon ah im ah kai ci. 7 Bawipa Jesuh ei a ei tu zah ung hnumi tumat naw ang htei ah a phu küi ciah tuing'ui cu lung-um ung law püi netah, cun ah tuing'ui awn Bawipa Jesuh ah lu cu shawi ci. 8 Cun cu ang düihpüi gui naw hmu u netah, m'lung she u ne, “A i ah kia sei shin ah tuing'ui na plawh m'htah düt ang? ; 9 Shin ah tuing'ui cu ngui akda ah zoi netah, ghawipyam ci gui-am peit ung bä khai süt te nei, cik ci gui. 10 Bawipa Jesuh naw, cun ami ci cu ng'za netah, “A i ah kia sei shin ah hnumi na mi tüitok ang, ani ah bi cu ang htei ah ni ne kiom ci nei! 11 Ghawipyam ci gui cu nangmi awn atäng ah nami om lä khai, kei läi cu nangmi awn atäng ah kä ka om law ba khai. 12 Shin ah hnumi naw kei tuing'ui awn ana shawi cu, kei ah pumsa a gook m'cim vai ah piang m'tham ah kiak ci nei. 13 Kei naw akcang ka pyein cu, Thu Ni cu khomdek khan avan ung ami pyein law ung, shin ah hnumi cu chang naw a shüm vai ah, ani ah bi lawh cun phi pyein sak khai gui nei, ci ne kiak na gui ci. 14 Ang düihpüi gha-lei-goi ung ka Judas Iskariot cu taigüpa gui ah hteit netah; 15 “Jesuh cu nami kut ung ka ning ap gui ung, a i nami na pek khai ang, ci ne ng'shi gui ci. Ngami naw tangka thumkip khei ne pek ci gui. 16 Cun ung tün ne Judas naw, Bawipa Jesuh cu ga ah kut ung ap nak vai ah akhin ni cu shui ci. Mü-ei ei ci Gui. 17 K'caw kä shum ah m'htut ei nak ah pawi tün nak ah hnüüp ung ang düihpüi gui cu Bawipa Jesuh ah pei ah law u netah, nang Bawipa ah hmawk ah Passakha mü-ei cu a hawi ah pian vai ang? ci ne ng'shik ci gui. 18 Bawipa Jesuh naw, “Gawnu kyong ah chang vai tumat ah hteit ne nami pyein vai, Bawipa naw ‘kei ah ka khin cu gawk lawk ciah kia sei, kang düihpüi gui awn atäng ah nang ah im ung passkha pawi kami bi hlük ci’ ci ne nam cäi gui ci” ci ne nami pyein vai cik ci. 19 Ang düihpüi gui naw Bawi Jesuh ah m'cäi gui ah mäih ah bi u ne, passkha mü-ei cu piang m'tham ci gui. 20 Khaw mü hun law khätah Bawipa Jesuh cu ang düihpüi gui gha-lei-goi awn atäng ah ngo u ne, mü-ei cu ei ci gui. 21 Ei ami ei zah ung Bawipa Jesuh naw, “Kei naw akcang ka pyein cu, chang tumat naw, kei cu ga ah kut ung na ap khai nei, ci ne kiak na gui ci. 22 Ang düihpüi gui cu ang htei ah ami m'lung thüi sei, cun cu kei ana pyein ah kä kia ci ang’ ci ne tumat la tumat ng'shi tuk ci gui. 23 Bawipa Jesuh naw, “Kei awn atäng ah ei-bei ät ung ei ciah chang naw kei cu ga ah kut ung na ap khai nei. 24 Cacim ung om ciah mäih ah chang ah Htapa cu sik khai nei, cun ung phi chang ah Htapa ga ah kut ung ap ci cu, thüisei nak om ci nei. Kä ang tüi tu ge vai sü ung ani ah hmawk ah ni pi khai süte, ci ne pyein ci. 25 Bawipa Jesuh ga ah kut ung ap khai ah Judas naw, “Bawipa, cun ah chang cu kei ah kä kia naw? ci ne ng'shi khätah, Bawipa Jesuh naw, “Na pyein ah mäih ah hman ci nei, ci ne kiak nak ci. 26 Bawipa Jesuh naw ang düihpüi gui awn atäng ah mü-ei ami ei zah ung, m'htut cu la ne Khanpughi m'hlüngtai netah, m'htut cu bou ne, “Shin ah m'htut cu kei ah pumsa ah kiak ci, la ne ei vä, ci ne ang düihpüi gui-am tei gui ci. 27 Cun kawn ah khap cun phi la ne, Khanpughi m'hlüngtai netah ang düihpüi gui-am pe gui ne, “Shin ah khap cu nami van naw la ne aw vä, shin cu Khanpughi naw aning m'hnüt nak gui ah thukhän thai; 28 Hnicim chang ah cheishoh nak m'si nak ah, ka huk ah ka si ng'hlui ah kiak ci nei. 29 Kei naw akcang ka pyein cu tuhbäi ung tün ne, kapa ah uk nak kho ah nangmi awn atäng ah sapyit tui ak thai kä awk pha ah chuih, kei naw cun kawn ah sapyit tui kä ka aw tuba khaé nei, ci ne pyein ci. 30 Cun kawn ah ngami cu ng'äi m'cu u ne Olive khomhtung lam ah hteit ci gui. 31 Cun kawn ah Bawipa Jesuh naw, “Khanpughi naw htoshäm cu ngawn khätah, hto gui cu püipiang zawp khai gui ciah, cacim ung a om ah mäih ah, tuhmü nangmi cu kei na nawng ne nami dawng zawp khai nei. 32 Cun ung phi kei cu sih nak ung kaa ka thawh ba kawn ah, nangmi ah ma ung Kalile kho ah ka gawk ma khai nei, ci ne ang düihpüi gui-am kiak na gui ci. 33 Peter naw, “A hei gui avan naw ami ning nawng ung phi, kei läi naw a i zah ung phi kä ka nin nawng hlawt khai nei, ci ne khän ne pyein ci. 34 Bawipa Jesuh naw, “Kei naw akcang ka pyein cu, atuhmü ai kä a khon pha ung, nang naw kei cu, ‘ani kä ka hmat ci nei, ’ ci ne thum-vei na na mak khai nei, ci ne Peter cu kiak nak ci. 35 Peter naw, “Kei cu nang awn atäng ah ka sih vai ung phi kä ka ning hmat ciah pyein ne kä ka ning mak khai nei, ci ne pyein ci. Ahei ang düihpüi gui cun naw phi, a cun bäng bäng ah pyein tuk ci gui. 36 Cun kawn ah Bawipa Jesuh cu ang düihpüi gui awn Ketsemane ami ciah kho hmun ah htei ci gui. Bawipa Jesuh naw, “Nangmi shin ung ana ngo vä, kei ahei ah hteit ne ka taigü khai, ci ne ang düihpüi gui cu m'cäi gui netah; 37 Peter la Zebedee ah hta goi cu khah püi gui ci. Bawipa Jesuh cu ang htei ah am lung kä ding gei sei zaica aih netah; 38 “Kei cu ka sih awn täng sei kam lung thüisei ci, nangmi cu kei awn atäng ah shin ung om vä, ci ne ang düihpüi chang sing thum-am kiak na gui ci. 39 Cun kawn ah ama lam ah api vang nawn ne, khomdek ung ng'bawk netah, “Oh, Kapa bäpi khai a kiak ung shin ah zaica nak ah khap cu na hen pe ba ä, cun ung phi kei ah ng'zak hlü ah kä kiak ci, na mät ah ng'zak hlü ah kia sä, ci ne taigü ci. 40 Cun kawn ah Bawipa Jesuh cu ang düihpüi gui ah om nak ah law ba ne, ip u sei hmu gui netah, Peter-am, “Nangmi thum cu nazi ät hta phi kä nami na ngäng hlawt ci ma, 41 Tüihtok nak nami khütnäng nak vai ah taigü ne nami na ngäng vai nei. Mumcha naw ang zak hlü ung phi pumsa thagui kä om ci nei, ci ne kiak nak ci. 42 Bawipa Jesuh cu ang hnih vei nak ah hteit ba mä netah, “Oh Kapa shin ah zaica nak ah khap cu kei naw kä ka awk ung käng phlän khai ah a kiak ung, nang ah ng'zak hlü ah kiak sä, ci ne taigü ci. 43 Cun ah Bawipa Jesuh a law ba ung phi ang düihpüi gui cu ami mik käm dei hlawt ah ip u sei hmu gui ci. 44 Bawipa Jesuh cu cun kawn ah hteit ba mä ne acita ak taigü ah mäih ah ak thum-vai nak ah taigü ba mä ci. 45 Cun kawn ah ang düihpüi gui ah om nak ah law ba netah, “Nangmi cu ip ne ng'düm ne nami om ci ma? Chang ah Htapa cu chang she gui ah kut ung ap vai ah akhin gawk lawk ci nei. 46 Tho law vä mi hteit kaw, ga ah kut ung kei na ap khai cu gawk law pyi ci nei, ci ne kiak na gui ci. 47 Cun ah Bawipa Jesuh naw thu a pyein zah ung, ang düihpüi gha-lei-goi ung kaa, Judas cu, htung tawn ni, khim ni, kawt ci gui ah chang khli awn atäng ah gawk lawk ci gui. Cun ah chang gui cu taigüpa gui la ami ng'vai gui naw ami tüih law gui ah kiak ci. 48 Bawipa Jesuh ga am ap ciah chang naw, ani awn atäng ah lawk ciah chang gui-am, “Kei naw m'hnam ne kang ui ah chang cu Jesuh ah kiak ci, ani cu nami phaa vai nei, ci ne am cäi gui ah kiak ci. 49 Judas cu Bawipa Jesuh ah zäih ne dawng law netah “Bawipa Zeikiai nak om sä, ci ne Bawipa Jesuh cu m'hnam ne ng'ui ci. 50 Bawipa Jesuh naw, “Teihpüi aw, nabi vai cu ang ghit ah nabi vai nei, ci ne kiak nak ci. Chang gui naw law u ne, Bawipa Jesuh cu pha ne k'pang ci gui. 51 Cu zah ung Bawipa Jesuh läk lawk ciah chang tumat naw ak khim phawng ne, taigü ng'vai ah changshäm tumat cu tu sei, ak hnga vang täng hlang ci. 52 Bawipa Jesuh naw, “Na khim cu bun baä, khim awn väih ciah chang cu khim awn sih ba khai nei. 53 Kei naw kapa ah kang zoih ah a kiak ung Kapa naw ga-mo mawng gha-lei-goi ah däm ciah khankho chang gui cu, tüi lawk khai ci cu, kä nami hmat ci maa? 54 Cun ung phi kei naw cun ah ka bi ung a i hawk-cha ah cacim cu kümbe hlawt khai ang, ci ne kiak na gui ci. 55 Cun kawn ah Bawipa Jesuh naw, chang gui-am, “Nangmi cu m'gut ei pha ah mäih ah kei nami na phak khai ah, htung tawn ni khim ni kawt ne nami lawk ci ma? Kei naw ak hnüüp tä pum im ung ngo ne kam theithang zah ung nangmi naw kei kä nami na phak ci maw? 56 Cun ung phi shin ah amawng gui a kiak law nak cu cacim ung profet gui ah pyein ah mäih ah ang dang law vai ah hmawk ah kiak ci nei, ci ne pyein ci. Cun zah ung ang düihpüi gui ami van cu Bawipa Jesuh nawng shüt ne dawng zawp ci gui. 57 Pha lawk ci gui ah chang gui naw Bawipa Jesuh cu taigü tung Kaiaphas ah im ah hteh püi ci gui. A cun ah thukhän saza gui la ami ng'vai gui cu ng'cut ne om ci gui. 58 Peter cu ng'shawng pi pi ne Kaiaphas ah im vong pei ah khüt ne, Bawipa Jesuh cu läk lawk ci. Cun kawn ah vong kyong ah lut law tu ne, Bawipa Jesuh ah mawng a i ah ami pyein ah a hmat vai ah phäh ah taigü tung ah gakap gui awn, atäng ah ngo tuk ci. 59 Taigüpa gui la kawngsi ng'vai gui naw Bawipa Jesuh ngawn nak hning vai ah käng düng ciah saksi cu shui ci gui. 60 Cun ung phi kä hmu hlawt ci gui. A hleei pyein ciah saksi läi cu akda om ci. 61 Ak hnu ah chang hnih cu ng'düi law ni netah, “shin ah chang naw, kei naw Khanpughi ah pum im cu, gäi netah, hnüüp thum ah kyong ung ka cou ba hning ci cik ci nei, ci ne saksi ci goi. 62 Taigütung cu düi law netah, “Shin ah chang gui naw nang cu a i ng'gu ang, ami ning bün, nang naw m'hlan ne na pyein tu ba vai kä om ba ne ma, ci ne Bawipa Jesuh cu ng'shik ci. 63 Cun ung phi Bawipa Jesuh cu kä chiu phung ne om ci. Taigü tung naw nang cu Khanpughi ah Htapa, Messaiah ah na kiak ci ma, kei-am nam thein-ä. Ghing ne om ciah Khanpughi ung thukhäm ne ka ning shik ci nei, ci ne pyein ci. 64 Bawipa Jesuh naw, “Nang naw na pyein cu hman ci nei, kei naw akcang ka pyein cu, ngawi ah chang ah Htapa cu hlüngtai pibäih ciah Bawimang ah k'pat lam ah a ngoh la khomei bawk cum ne a kyum law ba cu nami hmu lawk khai nei, ci ne pyein ci. 65 Cun ci khätah taigütung naw, amät ah zih sui shum ne pang netah, “shin ah chang naw Khanpughi kat na ne, thu pyein ci nei, saksi kä hlü ba te ci nei. Khanpughi kat na ne ang thu cu tuhbäi nami ng'za zawp ci nei. 66 a i cha phupit ne k'bäi vai ang? ci ne ng'shi gui ci. Cun ah chang gui naw, “A kat nak dang ci kia sei, sihnak peit vai nei, cik ci gui. 67 Cun kawn ah chang gui naw Bawipa Jesuh cu a hmai ung m'thui u ne, am shah gui naw thäk u sei, am shah gui naw a hmai ung k'beeih u netah, 68 Messaiah Bawi, a u naw a ning pung beeih cu pyein law shümä, ci ne kiak nak ci gui. 69 Peter cu zung im vong kyong ah k'pung lam ah a ngoh tu zah ung ami chang shäm hnumi hta cu law netah, “Nang phi Kalile ah kaa, Jesuh ah apaw ah na kiak ci, cik ci. 70 Peter naw, “Nang ah pyein cu kä ka hmat ci nei, ci ne ma netah, düi law ne vong kawt lam ah hteit ci. 71 Ahei ami chang shäm hnumi hta naw mä hmu netah, cun ung om ciah chang gui ah ma ah shin ah chang cu Nazaret chang Jesuh ah paw nei, cik ci. 72 Peter naw, “Cun ah chang kä ka hmat ci nei, ci ne ng'cim ne pyein ne ma ba mä ci. 73 Cun kawn ah shängshäng hta khätah a pei ung ah düi ciah chang gui cu Peter ah pei ah law u netah, “Nang cu akcang ah ani ah paw ah na kiak ci, nang thu chi awn hmat phyak ci nei, ci ne kiak nak ci gui. 74 Peter naw, “kei naw cun ah chang cu kä ka hmat ci nei, ka hleei ka pyein ung Khanpughi naw na hmu sä, ci ne pyein ne ma ba mä ci. 75 A cun vai-am ai khong law khätah, ’ ai kä a khon pha ung nang naw kei cu, ani kä ka hmat ci nei, ci ne thum-vei na na mak khai, ci ne Bawipa Jesuh naw a kiak nak te cu, shüm law ba netah, ak pung ah hteit ne ang htei ah thüi ne kyap ci.
1 Kho ngawi hta sik ah taigüpa gui la ami ng'vai gui cu Bawipa Jesuh ngawn vai ah ng'ge ci gui. 2 Cun kawn ah Bawipa Jesuh cu khit netah, Roman bawi Pilat ah hteh püi ci gui. 3 Cun kawn ah Bawipa Jesuh ga ah kut ung ap ciah Judas cu Bawipa Jesuh ami ngawn vai ah a mawng ng'za ne, ang htei ah ng'zu ba netah, tangka thum-kip cu taigüpa gui la ami ng'vai gui ah ma ah law püi ba ci. 4 Cun kawn ah ani naw, “Kei naw kat nak kä om ciah chang cu sih nak vai ah ap ne, kat nak bäih ka bik ci nei, cik ci. Cun ung phi nangmi naw, “Shin ah mawng ung keimi kä na nak phaa gui vai, na mät ah bi ah kiak ci, ci nak ci gui. 5 Cun kawn ah Judas cu Pum im kyong ah tangka thumkip cu ghawt shüt netah hteit ba ci. Cun kawn ah ahei lam ah hteit netah gui awn ng'awk ne sik ci. 6 Taigüpa naw cun ah tangka cu kaw netah, “shin cu sikplai ngui ah kiak ci, mi thukhän awn hnung tuk ci kia sei, pum im ngui m'küm ung käm dawn tu vai, cik ci. 7 Ngami cu ng'ge zawp u netah cun ah ngui awn am sheh ciah khomdek cu khleih ci gui. Cun ah dek cu chang pakhui hei gui ah ng'cim hmun vai ah k'bäi ci gui. 8 Cun ah kia sei cun ah khomdek cu, “siplai hmun, ah tuhgüt pyein ci gui. 9 Cun cu profet Jeremiah naw, “Israel chang gui naw ani ah phu nei ci ne ami k'bäi ah mäih ah tangka thum-kip cu la u netah, 10 Khanpughi naw kei a nam cäi ah mäih ah amsheh ciah khomdek cu khleih ci gui, ciah thu cu aküm nak ah kiak ci. 11 Bawipa Jesuh cu Roman bawi ah ma ah gawk law khätah, ani naw, “Nang cu Jew chang gui ah ghangpughang ah na kiak ci ma? , ci ne ng'shik ci. 12 Bawipa Jesuh naw, “Na pyein ah kiak ci nei, ci nak ci. Cun ung phi taigüpa gui la ami ng'vai gui naw m'kat ne ami ng'shi nak gui cu, a i ah phi kä m'hlan tuba gui phung ci. 13 Cun ah kia sei Pilat naw, “Chang gui naw shin hlawk ah ning m'kat ne ami ning huutaap cu kä na ng'zak ci ma? , ci ne kiak nak ci. 14 Cun ung phi Bawipa Jesuh cu m'kha ät ah phi käng thu tu ba ne om ci. Cun ah kia sei Pilat cu ang htei ah ngaih tüh khit ci. 15 Roman bawi naw passakha pawi päng ung, chang khli naw ak phiawn hlü a thawngkium tumat cu k'phiawn ci ci. 16 Cun zah ung Jesuh Barabbas ming nak ciah chang gui naw ami hmat ah thawngkium tumat om ci. 17 Cun ah kia sei chang gui akda gawk law u khätah Pilat naw, “Nangmi naw a u ang k'phiawn vai nami ng'zak hlü, Jesuh Barabbas ang? , Messiah ami ciah Jesuh ang? ci ne ng'shi gui ci. 18 Jew chang ng'vai gui naw ami thüi nak su ah, Bawipa Jesuh cu akut ung ami ap ah ani naw hmat ci. 19 Pilat cu m'khoicha nak zung ah a ngoh zah ung akchu naw chang tumat tüi law ne, “cun ah kat nak kä bik ciah chang cu, a i ah phi kä na ci-en vai nei, zanmü kang mang ung ani ah phäh ah kam lung kyong ang htei ah zaica ci nei, ci ne pyein law sak ci. 20 Taigüpa gui la aming vai gui naw, “Barabbas cu k'phiawn ne Jesuh cu ngawn vä”, ci ne ami m'lau vai ah, chang gui cu m'cäi gui ci gui. 21 Pilat naw, “shin ah chang sing goi ung kaa, a u ang k'phiawn vai nami ng'zak hlü? ci ne ng'shi gui ci. Chang gui naw, “Barabbas cu k'phiawn vai nei, cik ci gui. 22 Pilat naw, “Cun ah a kiak ung Messiah ami ci ah Jesuh cu a i ah ci vai ang, ci ne ng'shi gui ci. Chang ami van naw, “Kutlamtung ung tai ne ngawn vai nei, cik ci gui. 23 Pilat naw, “ani naw a i kat nak ang a bi? ci ne ng'shi guici. Cun ung phi chang gui naw, “kutlamtung ung tai ne ngawn vai nei, ci ne ami k'aw m'can ne m'lau ci gui. 24 Pilat naw, a pyein ba gäk gäk ung kä bä khai, thüngphyong m'lau pyang law pi khai gui ah hmu netah, tui cu la ne ami ma ah “shin ah chang ah sih nak cu kei ah bi ah kä kiak ci, nangmi ah bi ah kiak ci nei, ci netah, akut cu m'si ci. 25 Chang gui naw, “Shin ah chang asih nak cu, keimi la keimi ah hta nau gui naw kamik chaw nak khai nei, cik ci gui. 26 Cun kawn ah Pilat naw, Barabbas cu k'phiawn ne Bawipa Jesuh cu tuthat netah, kutlamtung ung tai ne ami ngawn vai ah ap gui ci. 27 Pilat ah gakap gui naw, Bawipa Jesuh cu bawi ah mang im ah hteih püi ci gui. Gakap-mo mawng ät ami van naw Bawipa Jesuh cu k'bui ci gui. 28 Gakap gui naw Bawipa Jesuh ah a suisak cu suh pe u netah, hlui sen ciah suinu cu m'sui ci gui. 29 Cun kawn ah ng'hling awn sak ah lukhu cu k'bün ci gui. Htung tawn tumat cu ak pat lam kut ung pek ci gui. Cun kawn ah ama ah m'khuukdoong u netah, “Jew ghangpughang cu ghi ne ghing sä, ci ne päipih ci gui. 30 Ngami naw Bawipa Jesuh cu ami m'si awn m'thui ci gui. Htung tawn la u ne alupum ung that ci gui. 31 Cun ah päipih u netah hlui ne sen ciah suinu cu suh pe ba u ne, amät ah sui cu m'sui ba ci gui. Cun kawn ah kutlamtung ung tai ne ngawn vai ah Bawipa Jesuh cu hteh püi ci gui. 32 Ngami naw ami hteh püi nak lam ah Kerene kho ah kaa, Simon ming nak ciah chang tumat cu hmu u netah, ani cu ang cet ah khü u ne, Bawipa Jesuh ah kutlamtung cu kawh sak ci gui. 33 Lu k'am päng ah ming ciah Kolkotha ami ci nak ah gawk law u netah, 34 Seikha awn ami k'caw ah sapyit tui cu Bawipa Jesuh-am tu gui. Bawipa Jesuh naw, m'dep shüm netah kä awk ah nawng ci. 35 Ngami naw Bawipa Jesuh cu kutlamtung ung tai ne ngawn ci gui. A suisak cu m'shüih tawk ne ng'pai ci gui. 36 Cun kawn ah ngoh ne ngäng ci gui. Ani ami m'kat nak ah a mawng cu alu khan ah. 37 “Shin cu Jesuh, Jew Chang gui ah ghangpughang nei” ci ah ca gu ne tai ci gui. 38 Cun zah ung m'guk-ei hnih cun phi Bawipa Jesuh awn atäng ah tumat ak pat lam, tumat ak eng lam ah kutlamtung ung tai ne ngawn ci gui. 39 A cun ah pei ah hteit ciah chang gui naw, ami lu tum ne Bawipa Jesuh cu k'shedam nak ci gui. 40 “Pum im gäi ne hnüüp thum ah kyong ung co ba khai ah chang, Khanpughi ah Htapa ah na kiak ung na mät naw namät k'phiawn ä, kutlamtung ung kaa a tuhbäi kia law baä, ci ne k'shedam nak ci gui. 41 A cun ah mäih ah taigüpa gui, thukhän saza gui la ami ng'vai gui cun naw phi, 42 “Shin ah chang cu, chang hei lä k'phiawn hning ci, amät läi kä k'phiawn hning ne maw, ani cu Israel ghangpughang ah kä kia ne ma, kutlamtung ung kaa a tuhbäi a kyum law ba ung keimi naw kami zum khai nei. 43 Ani cu Khanpughi zum ciah Khanpughi ah Htapa ah pyein ci maw! cun ah kia sei Khanpughi naw am hni ah akiak ung a tuhbäi k'phiawn sä, ci ne shedam nak ci gui. 44 Bawipa Jesuh awn atäng ah kutlamtung ung ami ngawn ah m'guk-ei goi naw phi a cun ah mäih ah päipih tuk ci goi. 45 Kho hnüüp lung ung tün ne nazi thum lüng khai ah kho ah khan avan cu mü ne hmüp zawp ci. 46 Kho k'awi nu nazi thum akhin ung Bawipa Jesuh cu, “Eli. Eli, Lama sabachthani, ci ne ng'shan sei m'lau ci. A cun cu “Ka Khanpughi a i ah kia sei kei na na nawng ang” ci ne a pyein ah kiak ci. 47 A pei ah ng'düi ciah chang gui naw cun a ci cu ng'za u netah, “Eliah cu khü ci nei, cik ci gui. 48 Nga mi ung kaa chang tumat naw dawng ne m'zak awn sapyit tui aktai cu va sok netah, ng'lawi ung m'sawi ne Bawipa Jesuh-am han pek ci. 49 Cun ung phi tumat naw, “Om-ei sä, Eliah naw law ne ahun la kä ahun ah mi teng cang kaw, cik ci. 50 Bawipa Jesuh cu ng'shan khai ah m'lau netah si lawk ci. 51 Cun zah ung pum im kyong ah ami m'cha nak ah khingzih cu khan mawng ah kaa naw ka mawng ah khüt khai ah hnih ah ng'bou ne teek ci. Shihpi thüng ci, lung song gui piawn ne kia lawk ci gui. 52 Ng'cim hmun gui ng'hmawng sei Khanpughi ah chang gui akda tho law ba ci gui. 53 Bawipa Jesuh sih nak ung kaa a thawh ba kawn ah cun ah chang gui cu, ng'cim hmun ung kaa lut law u ne, theingthap ciah mang gaw ung lut tu u sei, chang akda naw hmuk ci gui. 54 Bawipa Jesuh ngäng ci gui ah gabawi la gakap gui naw, shihpi a thüng la ahmün cäicat vai gui cu hmu law u ne, ang htei ah kyikyawk u netah, “Shin ah chang cu akcang ah Khanpughi ah Htapa ah kiak ci nei, cik ci gui. 55 A cun zah ung shawng ne dan ci gui ah hnumi gui phi om ci gui. Ngami cu Kalile ah tün ne Bawipa Jesuh cu läk u ne, m'htei htang ci gui ah kiak ci gui. 56 Cun gui cu Mari Magdalene, James la Josef ah anu Mari la Zebedee ah chu ni gui ah kiak ci. 57 Kho mühun law khätah Arimathea gawnu ah kaa Josef ming nak ciah bühmang ciah chang cu gawk lawk ci. Ani cu Bawipa Jesuh ah ang khah püi tumat ah kiak ci. 58 Ani cu Pilat ah hteit netah, Bawipa Jesuh ah a gook cu lak khai ah, va pyein ci. Pilat naw, Bawipa Jesuh ah a gook cu Josef-am peit vai ah zum ci. 59 Josef naw a gook cu la netah zih bawk awn k'tom ci. 60 Cun kawn ah kä shou phak ciah lung kheng ami shawk ah amät ah ng'cim hmun khui ung chum ne phuh netah, khui m'kawt cu lungnu tumat k'täng ne khai shüt netah hteit ba ci. 61 Ng'cim hmun pei ah Mari Magdalene la a hei Mari ni cun phi ngo ne om ci gui. 62 A cun ah ngawi ung kyin hnüüp ah kia sei taigüpa gui la Pharisee gui cu Pilat ah hteit u netah, 63 “bawi aw, cän ah hleei ciah chang a ghin zah ung ‘Kei ak hnüüp thum hnüüp sih nak ung kaa ka tho ba khai, ’ a ci cu kami shüm ba ci nei. 64 Cun ah kia sei a hnüüp thum ung khüt khai ah ng'cim hmun cu akni ah khai ne, ami ngäng vai ah k'bäi gui ä, Kä cun ung ak chang gui naw a gook cu m'gu u netah, sih nak ung kaa tho ba ci nei ci ne, chang gui-am m'thein khai gui nei. Cun ung ak hnu ah hleeihlak nak cu ak htük ah tah shekha law pi khai nei, ci ne vah pyein ci. 65 Pilat naw, “Gamo mawng ät khü ne ng'cim hmun cu akni ah ngäng sak gui vä, cik ci. 66 Cun ah kia sei nagmi cu ng'cim hmun ah hteit u netah, Khai nak ah lung cu, ca gei ne m'hnüt ne, phuh hmun m'kawt cu khäng htek khai ah khai ci gui. Cu kawn ah gakap gui-am ngäng sak ci gui.
1 Kyin hnüüp ah ngawi ung ng'leen hnüüp kho thai ghi ghi sei, Mari Magdalene la ahei Mari cu ng'cim hmun ah hteit ci goi. 2 Cun zah ung shihpi ak tung ah thüng lawk ci. Khanpughi ah khankho chang cu khankho ah kaa kyum law ne, phuh hmun khui m'kawt khai nak ah lungnu cu lat netah, ak khan ah ngok ci. 3 Ani ah müi cu kho alai läp ah mäih ah kia ne, ani ah sui cu khlüi toi ah mäiè ah bawk ci. 4 Ngäng ciah gakap gui cu ang htei ah kyikyawk u ne, ak si ah mäiè ah kiak ci gui. 5 Khankho chang naw hnumi gui-am, “Kä kyikyawk vä, kutlamtung ung tai ne, ami ngawn ah Jesuh cu nami shui ciah ka ning hmat gui ci nei. 6 Ani shin ung kä om ci, a bäi a pyein ah mäih ah tho ba pyi ci nei. 7 Law ne ang zän nak te cu teng law vä, a tuhbäi ak zang ah hteit ne ang düihpüi gui-am m'thein-gui vä. Ani cu sih nak ung kaa tho ba pyi ci, tuhbäi Kalile kho ah ma ne, ana hteit pyi ci kia sei, a cu ah ani cu nami hmuk khai nei. Kei ah ning m'thein gui cu käm hnihen vä, ci ne kiak na gui ci. 8 Cun ah hnumi gui cu ami kyihkyawk pang ung phi ang htei ah zeikiai u ne, a cun gui cu ang düihpüi gui-am m'thein ba khai gui ah dawng ba ci gui. 9 A cun zah ung Bawipa Jesuh cu a mi ma ah dang law ne “Nangmi ah khan ah ding gei nak om sä, ci ne kiak ci. Cun ah hnumi gui naw a pei ah k'et u ne, a kho ung k'pang u netah, khawihnah ci gui. 10 Bawipa Jesuh naw, “Kä kyikyawk vä, hteit ba ne ka phäi nau gui-am Kalile kho ah ami hteh vai ah m'thein gui vä, ngami naw a cu ah na hmuk khai gui nei, ci ne m'cäi gui ci. 11 Hnumi gui ami hteh law ba zah ung ngäng ciah gakap gui naw pigaw kyong ah hteit u ne, taigüpa gui-am a mawng ama avan cu m'thein gui ci gui. 12 Taigüpa gui la aming vai gui cu ng'cut u netah gakap gui-am ngui akda pe ne, 13 “kho mü ah kami ih zah ung ang düihpüi gui naw a gook cu m'gu ne hteh püi ci gui nei, ci ne nami pyein vai. 14 Cun ah mawng cu Pilat bawi naw ang zak ba ung nangmi kä aning gen gui vai ah, keimi naw kami pyein khai nei, ci ne m'cäi gui ci gui. 15 Gakap gui cu ngui la u netah, ami m'cäi gui ah mäih ah pyein ci gui. Gakap gui ah pyein ah thu cu tuh ngawi güt Jew chang gui ah ng'lung ah thang lä ci. 16 Ang düihpüi chang sing gha-lei-ät gui cu Bawipa Jesuh ah m'cäi gui ah mäih ah Kalile kho m'htung ah khan ah hteit ci gui. 17 Ngami naw Bawipa Jesuh cu hmu u netah, kawp ne khawihnah ci gui. Cun ung phi am shah gui naw, kä ngaih gep ci gui. 18 Bawipa Jesuh cu ang düihpüi gui ah pei ah law netah, “Khankho la khomdek ung huham nak avan cu kei naw ka gah pyi ci nei, 19 nangmi htei ne kho nüng ung chang van cu, kei ah ng'khah püi ah kiak sak zawp vä. Cun ah chang gui cu Apa, Ahta la Mumcha Theing ah ming ung tuinim nak pe vä. 20 Kei naw nangmi-am ka ning peit gui ah thukhän phung cu ami läk vai ah, m'theithang gui vä. Kei naw kho a khüt güt ung nangmi cu ang täi ah ka ning om püi gui khai nei, ci ne m'cäi gui ci.
1 Shin cu Khanpughi ah Htapa, Bawipa Jesuh Khrit ah amawng Thu Ni ah kiak ci. 2 Cun ah ang tün law ah mawng profet Isaiah ah caguk ung om ci cu; Khanpughi naw, nang ah lam cu m'awng khai ah 3 Bungpuk ah ng'shä ci cu na ma ung ka tüi khai nei, ‘Bawipa ah law nak vai ah lam cu piang tham ge vä; Ani ah hteh nak vai ah lam cu düng sak ge vä’ cine pyein ci. 4 Cun ah kia sei Tuihnim Johan cu bungpuk ah dang law netah, tuihnim nak pe ne ng'thu a shäu law cu “Nami kat nak gui ung ng'zu ba ne tuihnim zawp vä, cun ung Khanpughi naw nami kat nak ning m'gein gui khai nei” ciah kiak ci. 5 Judea kho la Jerusalem mang gaw ung kaa chang akda cu law ne Johan ah thu ngai lawk ci gui, ngahmi cu ami kat nak ung ng'zu ba u ne, Jordan tuinu ung tuihnim ci gui. 6 Johan cu kala-uk ah mu awn tah ah sui cu sui ne, mehvun cu m'ciu ah vawp ci. Ani ah ei awk cu khingkhighi la khoitui ah kiak ci. 7 Ani naw chang gui ah ma ah thu a shäu cu, “Kei ah hlüngtai pi ciah Bawipa cu kei ah hnu ah dang lawk khai nei. Kei cu ani ah phahnak gui k'phian khai a phi kä ka khin ci nei. 8 Kei naw nangmi cu tui awn hnim nak ka ning pe gui ci, cun ung phi ani naw Mumcha Theing awn hnim nak ning pe gui khai nei”. ciah kiak ci. 9 Kä shou pha sei Bawipa Jesuh cu kalile kho, Nazaret gawnu ung kaa law ne, Jordan tuinu ung Johan ah tuihnim nak cu lak ci. 10 Tui ung kaa a thawh law ba vai-am khankho m'kawt hmawng khätah Mumcha Theing cu Müm bawk ah mäih ah ak khan ah kyum law sei hmuk ci. 11 Cun kawn ah khankho ah kaa k'aw cun phi, “Nang cu kam hni aih ah ka ning Htapa nei, nang ung kei ka zeikiai ci nei” ciah thang lawk ci. 12 A cun vai-am Mumcha naw Bawipa cu bungpuk ah hteh püi ci. 13 Cun ah bungpuk ah khoshe naw Bawipa cu kho hnüüp phli-kip ung tüihtok ci. Cun ah bung ah kiung ciah khisa gui om ci gui, cun ung phi khanchang gui naw Bawipa cu m'hteihtang ci gui. 14 Johan thawng ung ami chum kawn ah Bawipa Jesuh cu Kalile kho ah law ne Khanpughi ung kaa lawk ciah Thu Ni cu pyein ci. 15 Bawipa Jesuh naw, “Akhin cu küm pyi ci nei, Khanpughi ah uknak kho cu ng'et lawk ci nei, nami kat nak gui nüng ung ng'zu ba ne Thu Ni cu zum tu vä” ci ne pyein ci. 16 Bawipa Jesuh cu Kalile tuinu kam zung ah a hteh zah ung nga shui ne ng'vai vawi ci goi ah Simon la anau Andru cu hmu goi ci. 17 Bawipa Jesuh naw, “Law nä, ka hnu ah na läk nä, nangni cu chang phak ciah ngak'pha ah ka ning piang goi khai” ci ne kiak na goi ci. 18 Ngani naw a cun vai-am ani ng'vai nawng shüt ni ne Bawipa ah a hnu ah läk ci goi. 19 Bawipa Jesuh cu hteit ba shäng shäng netah, Zebedee ah hta goi James la Johan cu hmu ba goi ci. Ngani cu hleiko ung ng'vai kiang ne om ci goi. 20 Bawipa Jesuh naw ngani cu a hmu goi vai-am khü goi sei, ngani naw ani pa Zebedee la ak chang gui cu hleiko khan ah nawng shüt ne ahnu läk tuk ci goi. 21 Bawipa Jesuh la ang düihpüi gui cu Kapernaum gawnu ah gawk law u netah, kyin hnüüp ung Bawipa Jesuh naw pum im ah hteit ne m'theithang gui ci. 22 Bawipa Jesuh naw thukhän saza gui ah mäih ah kä kiak ciah, m'gäi ciah chang ah mäih ah m'theithang gui ci. Cun ah kia sei chang gui cu ang htei ah cäicat ci gui. 23 Cun zah ung pum im ah khoshe ah kai ah chang tumat om ci 24 Cun ah chang naw, “Nazaret chang Jesuh Bawipa, nang naw keimi a i ah na na ci gui hlük ci ang? Keimi na nam di gui khai ah na lawk ci ang? Nang a u ah na kiak cu ka ning hmat ci nei, nang cu Khanpughi ah Theingcim ciah shä tüih ah na kiak ci nei”. ci ne m’lau ci. 25 Bawipa Jesuh naw, “kä chawkchek ne, chang ung kaa lut law ne ahei ah hteit ä” ci ne taam ci. 26 Khoshe naw chang cu ng'tum ne ng'khlet khai ah ghu shüt netah, ng'shan sei m'lau ne lut law ne hteit ci. 27 Chang gui cu ang htei ah cäicat u netah, “shin ah amawng cu a i hawkcha ah ang? , m'theithang nak ak thai ahei ang? Ani naw khoshe gui cu k'täm gui sei, ngami naw ang thu cu ngai ci gui nei” ci ne ami mät ng'cecäk ci gui. 28 A cun vai-am Bawipa Jesuh ah amawng cu Kalile kho avan ung pigaw gui zung pum ah thang lawk ci. 29 Cun kawn ah Bawipa Jesuh la ang düihpüi gui cu pum im ung kaa lut law ba ne Simon la Andru ah im ah hteit ci gui. James la Johan phi hteit tuk ci goi. 30 Simon ah akchu ah nu cu gaw ne ih phak ung ng'zän sei, Bawipa Jesuh a gawk law vai-am a nam thein ci gui. 31 Bawipa Jesuh naw a pei ah hteit netah, akut ung pang ne m'tho ne gai sak sei, cun ah hnumi naw ngami cu khin chah na gui ci. 32 Khohni sip ne khomü hun law khätah, chang gui naw gawpai ci gui la khoshe ah kai gui cu Bawipa Jesuh ah om nak ah law püi ci gui. 33 Cun ah pigaw ung kaa chang gui ami van law u ne, cun ah im pei ah ng'bum lawk ci gui. 34 Bawipa Jesuh naw nat nak a hlü hlü ah gaw ci gui cu gai sak gui ne, khoshe gui phi k'täm gui zawp ci. Khoshe gui naw ani cu a u ah akiak ah hmat pyi ci gui ah kia sei, Bawipa Jesuh naw ng'thu ami pyein vai ah akhin cu kä pe gui ci. 35 A ngawi ung khongawi kho thai ghi ghi sei, Bawipa Jesuh cu tho ne lut law ne, a ding gei nak ah hteit ne taigü ci. 36 Cun zah ung Simon la apaw gui naw Bawipa cu shui ba ci gui. 37 Shui ne hmu ba u netah, “chang akda naw ning shui ci gui nei” ci ne m'thein ci gui. 38 Bawipa Jesuh naw, “a shin ah pigaw k'et, pigaw gui zung ah mi hteit khai. Cun ah pigaw gui zung ah phi thu ka pyein khai, a cun vai ah kei ka lawk ci” ci ne ang düihpüi gui-am kiak na gui ci. 39 Bawipa Jesuh cu Kalile kho avan ung hteit ne, pum im gui ung thu pyein ne, khoshe gui phi k'täm gui ci. 40 Kheilei ung gaw ciah chang tumat cu Bawipa Jesuh ah pei ah law ne, m'khukdong netah, “Bawipa nang zak hlü a om ung kei cu na theek gai sak ä” ci ne ng'zoi ci. 41 Bawipa Jesuh naw m'gein netah, akut awn nüm ne tawk ne, “Kei naw kang zak hlü om ci nei, theek ne gai ä” cik ci. 42 A cun vai-am a nat nak maih sei, cun ah chang cu theek ne gai ba ci. 43 Acun vai-am Bawipa Jesuh naw ak zä ah a hteh ba vai ah m'cäi netah, 44 “Shin ah amawng cu a u-am kä nam thein-en vai, taigü ng'vai ah ang ghit ah hteit ne na pumsa cu na vam hnuh vai. Cun kawn ah na theek gai ah mawng chang gui naw ami hmat vai ah Moses ah thukhän ah mäih peitnak cu na bi vai” ci ne m'cäi ne tüi ba ci. 45 Cun ah chang cu hteit ba netah, a theek gai ah mawng cu van-am m'thein ne ngak ci. Cun ah amawng cu chang van naw zat sei, ng'za pyi ciah kia sei, Bawipa Jesuh cu a i pigaw ah phi akdei ang dang ah kä hteit hlawt ci. Ang thuh nak pigaw k'pung lam ah hteit ne om ci ci. Cun ung phi apigaw päng ung kaa chang akda cu a om nak ah gawk lawk ci gui.
1 Hnüüp api shou hta khätah, Bawipa Jesuh cu Kapernaum gawnu ah gawk law ba ne om sei, ‘im ah gawk law ba ne om ci’ ci cu chang gui naw ng'zak ci gui. 2 Cun ah kia sei chang gui ng'bum law u ne, im kyong ung m'kawt law ah khüt khai ah be ci gui. Bawipa Jesuh naw cun ah chang gui-am Thu Ni cu m'thein gui ci. 3 Cun zah ung chang phli naw shuum ciah chang tumat cu kawt law ci gui. 4 Chang da aih sei kä luh law püi hlawt u netah, im khan ah kai püi ne m'dikcih kaih pawk netah, Bawipa Jesuh ah ma ah gui shawn ne zuk chah ci gui. 5 Bawipa Jesuh naw ngami ah zum nak a i hlawk ah a däm cu hmu netah, shuum ciah chang-am, “Ka hta, na kat nak cu ning phiawn sak pyi nei” cik ci. 6 Cun ung phi cun ung om tuk ci gui ah thukhän saza gui naw, “a i ah kia sei shin ah chang naw, shikcha ah a pyein ang? 7 Ani naw Khanpughi cu kat na pyi ci nei. Khanpughi bäng naw vah chang ah kat nak cu phiawn sak hning ci”. ci ne ngaih tüh ci gui. 8 Bawipa Jesuh naw cun ami ngaih tüh cu hmat netah, “Nangmi a i ah kia sei, cän ah nami ngaih tüh ang? 9 Shuum ciah chang-am, ‘Na kat nak cu ning k'phiawn nei ci ang a zäi tu ba kaw? , kä cun ung ‘Tho law ne na ih phak look ne hteit ä’ ci ang a zäi tu ba kaw? 10 “Chang ah Htapa naw khomdek khan ung kat nak ak phiawn hning ah mawng cu ka ning hmuh sak gui khai” ci netah; akut kho shuum ci-am, 11 “Tho law ne, na ih phak look ne im ah hteit baä” ci ne kiak nak ci. 12 Chang khli ah ma ah cun ah chang cu tho law ne, a ih phak kawt ne hteit ba ci. Cun ah tho law ne a hteh ba cu hmu u netah, chang gui cu ang htei ah cäicat ci gui. “Shin ah mäih cu a i zah ung phi kä hmuh ng, zak man nei” ci ne Khanpughi cu m'hlüngtai ci gui. 13 Bawipa Jesuh cu Kalile tuinu kam zung ah a htehhton ba zah ung, chang khli cu a om nak ah law u sei m'theithang gui ci. 14 Cun kawn ah Bawipa Jesuh naw a hteh nak ba ah khon ami loh nak ah zung ung ngok ciah Alphaeus ah hta Levi cu hmu netah, “Ka hnu ah na läk ä” ci ne khü khätah, Levi naw ng'düi law ne ahnu ah läk ci. 15 Bawipa Jesuh cu Levi ah im ah ei a ei tu sangung khan look ci gui la changshe ah ami khoikhei gui ah chang khli naw läk law u ne, am shah gui cu amät la ang düihpüi gui awn atäng ah ei an tuk ci gui. 16 A cun ah khon look ci gui la changshe ah ami khoikhei gui awn atäng ah ami ei awk cu pharisee ah kiak ci gui ah thukhän saza gui naw hmu u netah, “A i ah kia sei shin ah changshe gui awn atäng ah a ei awk ang” ci ne ang düihpüi gui cu ng'shi gui ci gui. 17 Cun ah ami ng'shi gui cu Bawipa Jesuh naw ng'za gui netah, “Gai ciah hmawk ah sei bawi kä hlü ci, gaw ciah hmawk ah hlü ci, Kei cu chang k'ni gui ka khü gui khai ah ka lawk ciah kä kiak ci, changshe gui ka khü gui khai ah ka lawk ci” ci ne kiak na gui ci. 18 Kho hnüüp ät ung Johan ah khahpüi gui la pharisee gui cu ei hlawi ci gui. Chang am shah gui cu Bawiapa Jesuh ah law u netah, “Tuihnim Johan ah ang khahpüi gui la pharisee gui cu ei hlawi ci gui, a i ah kia sei nangah düihpüi gui naw ei kä ami hlawi tu ang? ci ne ng'shik ci gui. 19 Bawipa Jesuh naw, “Chumah ciah pamihta ah akhin gui cu, amät awn atäng ah ami om zah ung ei hlawi hning khai gui ang? Chumah ciah pamihta a om ah chuih ei kä hlawi khai gui nei. 20 Cun ung phi ngami ung kaa, cun ah pamihta ng'pai ne ahteh nak ba vai ah hnüüp a gawk law ung, ngami cu ei hlawi khai gui nei. 21 A u naw phi sui akheei teek ci cu, tahsa akthai awn kä k'dawn man ci. Cun ah dawn ung sui kheei cu zün ne teek na pi ci. 22 A cun ah mäih ah sapyit tui asü cu um she ung u naw kä than man ci. Um she ung tha ung sapyit tui asü naw um she cu k'poh teek sei sapyit tui la um avan di zawp khai. Sapyit tui asü cu um akthai ung than vai’ ci ne kiak na gui ci. 23 Kyin hnüüp ung Bawipa Jesuh cu ang düihpüi gui awn atäng ah htanglo gui sun pah ne ami hteh nak ah, ang düihpüi gui naw htang vui gui cu dü ne shui ci gui. 24 Cun hmuk ci gui ah pharisee gui naw, “Teng ä, nang düihpüi gui naw thukhän awn hnungtuk khai ah kyin hnüüp ung bi bik ci gui nei” ci ne Bawipa Jesuh cu kiak nak ci gui. 25 Bawipa Jesuh naw, “David naw amät la ak chang gui cawigha law aih u netah abilawh ah mawng cu kä nami hmat tu man ne ma? 26 Taigütung Abiatha a om zah ung David cu Khanpughi ah pum im ah lut ne, Khanpughi ami khawihnah nak ah, taigütung bäng naw a ei man ah m'htut cu, amät naw ei ne, ak chang gui-am phi m'bei gui ci ah kä kia ne ang? ci ne kiak na gui ci. 27 Cun kawn ah Bawipa Jesuh naw akhnu ah, “Chang ah ni nakvai ah hmawk ah kyin nak hnüüp cu m'hnüt ah kiak ci, kyin nak hnüüp ah hmawk ah chang cu tüisho ah kä kiak ci. 28 Cun ah kia sei chang ah Htapa cu kyin nak hnüüp ah Bawipa ah kiak ci” ci ne kiak na gui ci.
1 Cun kawn ah Bawipa Jesuh cu pum im ah hteit ba ci. Cun ah pum im ah akut vangtäng shum ciah chang tumat om ci. 2 Cun ung om ciah chang gui naw Bawipa Jesuh ah a kat nak cu hmu hlü u netah, kyin hnüüp ung cun ah akut shuum ciah chang cu a gai sak la kä a gai sak ah teng kheng ci gui. 3 Bawipa Jesuh naw akut shuum ci-am, “Chang gui ah ma ah law ne ng'düi ä” ci ne kiak nak ci. 4 Cun kawn ah Bawipa Jesuh naw, “mik mi ah thukhän a i ah mäih ah ang a om? kyin hnüüp ung akni bi vai ang, akshe bi vai ang? chang phiawn sak vai ang, m'di m'dap vai ang? ’ ci ne ng'shi gui ci. Ngami cu api ah phi kä chiu ne om ci gui. 5 Cun ah chang gui ah shekha m'ghämce ah hmawk ah, Bawipa Jesuh cu thüi ah phi thüi ne, am lung phi she khätah, ngami lam ah ng'hlat ne teng gui netah, akut shuum ciah chang-am, “Na kut cu hei phiäih ä” ci ne kiak nak ci. Ani naw akut hei phiäih khätah akut cu akni ah kia ba ci. 6 Pharisee gui cu acun vai-am lut law ba u ne, Bawipa Jesuh cu ngawn vai ah k'bäi ci gui. 7 Bawipa Jesuh cu ang düihpüi gui awn atäng ah Kalile tuili pei ah hteit ba u sei, chang khli naw ahnu ah läk lawk ci gui. 8 Cun ah chang gui cu Kalile ah kaa gui ni, Judea ah kaa gui ni, Jerusalem ah kaa gui ni, Idumea ah kaa gui ni, Jordan tuinu ah van ga täng ah ka gui ni, Taiah la Sidon ah apei zung ah kaa gui ni ah kiak ci. Cun ah chang gui cu Bawipa Jesuh ah bilawh gui ng'za tu u netah cun ah gawk lawk ci gui ah kiak ci. 9 Chang gui da aih u khätah cun ah chang gui naw Bawipa Jesuh cu kä ami müt pah-en vai ah, amät ah phäh ah hleiko ami m'shei peit ge vai ah ang düihpüi gui cu m'cäi gui ci. 10 Bawipa Jesuh naw gawipai ciah chang akda gai ba sak ci kia sei, gawpai ciah chang gui cu Bawipa Jesuh va tawn khai gui ah vang tawn vük ci gui. 11 Khoshe ah kai gui ah chang gui naw Bawipa Jesuh cu hmu u netah, ama ah ng'dawkphah u ne “Nang cu Khanpughi ah ning Htapa nei” ci ne m'lau ci gui. 12 Bawipa Jesuh naw mumcha she gui cu, ani a u ah akiak ah mawng m'dang ne kä ami pyein vai ah khän ne k'bäi gui ci. 13 Cun kawn ah Bawipa Jesuh cu khomhtung khan ah hang kai netah, ahnu ah läk khai ah ang zak hlü ah chang gui cu khü gui ci. 14 Ngami cu apei ah gawk law u khätah, chang sing gha-lei-goi cu ghü gui netah, ang düihpüi gui ah ami min cu sui gui ci. Bawipa Jesuh naw, “Kei naw nangmi cu kei awn atäng ah nami om khai ah ka ningghü gui ci, thu nami pyein khai ah ka ning tüi gui khai. 15 Khoshe nami k'täm nak vai ah huham phi ka ning pe gui khai” ci ne m'cäi gui ci. 16 Bawipa Jesuh naw a ghü gui ah chang sing gha-lei-goi ah ami ming cu; Simon (Bawipa Jesuh naw Peter ah ang ming asui), 17 James la anau Johan, Zebedee ah hta goi (Bawipa Jesuh naw Boanerake ah ani ming a sui goi, kho hmum chang ciah ming ci); 18 Andru, Philip, Bartholome, Matthe, Thomas, James (Alphaeus ahhta), Thaddaeus, Simon (küi khän nak om ci), la 19 Bawipa Jesuh ga kut ung ap ciah Judas Iskariot ni gui ah kiak ci. 20 Cun kawn ah Bawipa Jesuh cu im ah hteit ba ci. Chang gui akda ng'bum law ba u sei, Bawipa Jesuh la ang düihpüi gui cu ei ami ei nak vai phi akhin kä gah ci gui. 21 Chang gui naw, Bawipa Jesuh-am, “gu lawk ci nei” ci ne kia u sei ng'za u netah, Bawipa Jesuh ah ak kyong ung kaa gui cu, ani m‘hteihtang khai gui ah apei ah lawk ci gui. 22 Jerusalem ah kaa lawk ciah thukhän saza am shah gui naw, “Ani cu Beelzebulah naw a kai nei, ani cu khoshe gui ah ng'vai pi ah kia sei a cun ah ming awn khoshe gui cu m'khütnäng ci nei” ci ne pyein ci gui. 23 Bawipa Jesuh naw ngami cu khü gui netah, m'tumtäng nak awn “A i hawkcha ah khoshe naw khoshe cu k'täm hning khai ang? 24 Chang gui ami m'lung ngaih ng'pai sei ami küüt-neet nak ah kho cu a hei hei ah ng'pai zawp khai nei. 25 Kyong khui ät ung chang gui ami m'lung ngaih ng'pai sei ami küüt-neet ung ami kyong khui cu ng'pai zawp khai nei. 26 A cun ah mäih khoshe gui cun phi ami ng'pai ah a kiak ung, ami kho ng'pyi sei maih khai gui ah kiak ci nei. 27 M'gäi ciah chang cu khit ne pawng cang ci naw vah, a im ung lut ne a khawh cu gut hlawt khai, kä cun ung a u naw kä gut hlawt khai. 28 Kei naw akcang ka pyein cu, chang gui cu ami mät ah kat nak ah khan ah phi bäi, Khanpughi kat na ne ami thu chiu ah khan ah phi bäi, m'geinsei nak om ci. 29 Cun ung phi Mumcha Theing kat nak ciah chang ah khan ah m'geinsei nak kä om ci. A i ah kia sei ci ung ani cu ang täi ah kat nak bik ciah chang ah kiak ci, ci ne kiak na gui ci. 30 Cun ah Bawipa Jesuh naw a pyein ah mawng cu, chang am shah naw “ani cu khoshe ah kai nei” ci ne ami kiak nak ah hmawk ah kiak ci. 31 Bawipa Jesuh ah anu la anau gui cu gawk law u ne, im ah ak pung ah düi u netah, Bawipa Jesuh cu va khü sak gui ci gui. 32 Chang gui naw, Bawipa Jesuh cu k'bui ne ngok ci gui. Ang khü lawk ci gui naw, “Na nu la na nau gui naw, ak pung ah düi ne ning khü ci gui nei” ci ne m'thein ci gui. 33 Bawipa Jesuh naw, “Kei ah kanu la kanau gui cu a u gui ang? ci ne kiak na gui ne, k'bui ne ngok ci gui cu teng gui netah, 34 “Kei ah kanu la kanau gui cu a shin gui nei! 35 Khanpughi ah ang zak hlü ah bilo ciah chang phung cu, kei ah nau, kei ah be, kei ah nu ah kiak ci nei” ci ne kiak na gui ci.
1 Bawipa Jesuh naw Kalile tuili kem ah chang gui cu m'thei thang ba gui ci, Chang khli cu a pei ah law ne ng'bum lawk ci gui. Chang gui da law aih u sei Bawipa Jesuh cu tuili kam ah hleiko ung kai ne ngok ci. 2 Chang gui cu tui kem ah ng'düi ci gui. Bawipa Jesuh naw amawng alam akda cu m'tumtäng ne m'theithang gui ci. 3 Cun ah am theithang nak gui ung Bawipa Jesuh naw, “Ngai vä, hnü ät ung m'shi phu ciah chang cu m'shi phu khai ah loma ah hteit ci. 4 M'shi a phu law ung m'shi am shah cu lam ung kia law sei kha gui naw ei zawp ci gui. 5 M'shi am shah cu m'dek ng'pam ciah lung ah khan ah kia law ne, ak zang ah ang lih pyo law pang ung phi, 6 kho ang ling law ung a pya kä khüi ci sei ng'zai ne chawng zawp ci gui. 7 M'shi am shah cu ng'hling hmu ah kia law ne, ang lih pyo ung phi ng'hling naw k'düi sei kä vuipai hlawt ci. 8 M'shi am shah cu am dek ah ni nak ung kia law ne, akni ah ng'lih pyo ne ghing gong ne, a thumkip, ak chuk-kip, a phia ah vuipai ne m'theih tak ci” ci ne m'thein gui ci. 9 Cun kawn ah Bawipa Jesuh naw, “Ng'zak nak vai hnga om ci phung naw ng'za sä” cik ci. 10 Bawipa Jesuh amät a om zah ung ang düigpüi chang gha-lei-goi la ahnu ah läk lawk ciah chang gui naw am tumtäng nak ah mawng cu ng'shi lawk ci gui. 11 Bawipa Jesuh naw, “Nangmi naw thuuk ne kau ciah Khanpughi ah uknak kho ah mawng cu nami hmat pyi ci. Cun ah kä hmat tu hning ci gui cu m'tumtäng ne m'thein gui ah kiak ci. 12 A i ah kiak sei ci ung; “Ngami cu teng ne phi kä hmuk ci gui, Ngai ng'za ne phi kä hmat ci gui, Ami teng cu hmu u ne, 2 Ami ng'zak cu hmat u ne, ami kiak vai sü ung, Khanpughi lam ah ng'hlat lawk khai sü gui te, Cun ung ngami ah kat nak phi m'gein gui khai sü te, Ci ah cacim ung om ci” ci ne m'thein gui ci. Gui ci. 13 Bawipa Jesuh naw, “Nangmi cu shiî ah m'tumtäng nak hngaw kä nami hmat ung, a i awn m'tumtäng nak nami hmat hlawt khai ang? 14 M'shi phu ci naw Khanpughi ah ng'thu m'shi cu phu ci. 15 Chang am shah gui cu lam ung kia lawk ciah geit m'shi awn täng ci gui, Khanpughi ah thu ng'za te ci gui, cun ung phi a cun vai-am khoshe naw lak pe gui zawp ci. 16 Chang am shah gui cu lung hmu ah kia lawk ciah geit m'shi awn täng ci gui, ngami cu Khanpughi ah ng'thu ami ng'zak vai-am zeikiai ne dou ci gui. 17 Cun ung phi cun ah ng'thu cu kä khäng htek ne a shäng hta bäng om ci. A cun ah ng'thu ah hmawk ah zaica nak la shedam nak ami bui awt law ung ang ghit ah ng'hlat ba ci gui. 18 Chang am shah gui cu ng'hling hmu ah kia lawk ciah m'shi awn täng ci gui, Ngami cu Khanpughi ah ng'thu ngai ng'zak ci gui. 19 Cun ung phi pumsa ah ghin nak vai ah hmawk ah ng'ä ai nak gui, män hmang nak hlü gui, la a hei ng'zak nak hlü gui naw ang thu ng'zak cu shungshet ci gui. Cun ah kia ne kä m'theih tak hlawt ci. 20 Chang am shah gui cu m'dek ni ung kia lawk ciah geit m'shi awn täng ci gui, ngami cu Khanpughi ah ng'thu ngai ng'za u ne dou ci gui ah kiak ci. Ngami cu a thum-kip, ak chuk-kip, a phia ah vuipai m'theih tak ci gui” ci ne m'thein gui ci. 21 Bawipa Jesuh naw, “Meidäi cu dawn awn uk vai ah kä kiak ci ih phak ah kaa ah thoi vai ah phi kä kiak ci. Meidäi cu lungk'pei ah khan ah m'däi vai ah kä kia ne ma? 22 Thuh phung dang zawp khai, küm phung cu ng'hmawng zawp khai. 23 ng'zak nak vai ah hnga om ci phung naw ng'za sä” ci ne kiak na gui ci. 24 Cun kawn ah bawipa Jesuh naw, “Nami ng'zak cu ng'htei khai ah ngai vä! Nangmi naw chang-am nän ne nami peit nak ung, Khanpughi naw nangmi-am nän ne ning pe ba gui khai; Cun ah däm pi khai ah phi nän ne ning k'bäi pe gui khai. 25 Khawh mah ci-am län ne k'be pek khai, a i kä om ciah kaa ak om hta phi lak pe zawp khai. 26 Cun kawn ah mä Bawipa Jesuh naw, “Khanpughi ah uknak kho cu shin ah mäih ah kiak ci, 27 Chang tumat cu loma ah m'shi geit ci. A geit kawn ah mü ah ip ne, hnüüp ah om ne a kiak zah ung, geit m'shi cu m'set law ne ng'lih pyo lawk ci. A i hawkcha ah ang lih pyo law cu ani naw kä hmat ci. 28 Khomdek amät naw ng'lih pyo sak ne vuipai sak ci. Ak htük ung m'guh sak ci, cun kawn ah vuipai sak ci, Cun kawn ah ak htang ah phü ne dang lawk ci. 29 Htang vui a hmin law ung, htang ah vai ah akhin gawk lawk ciah kia sei, chang naw tün ne aat ge ci” ci ne m'thein gui ci. 30 Cun kawn ah Bawipa Jesuh naw, “Khanpughi ah uknak kho cu a i awn m'tumtäng vai ang? A i awn m'tumtäng ne m'dang vai ang? 31 Khanpughi ah uknak kho cu anhta ui awn täng ci. Anhta ui cu m'dek ung geit zah ung geit m'shi gui nüng ah zaw pi bäih ci. 32 Geit ung a ghing ghong law kawn ah a hei sing-ghing aläm gui avan ah däm pi ci . Ang ban gui akda ah pang law sei, kha gui naw phi ng'bu tu ne ami ng'zi nak hmuh lawk khai kiak ci” ci ne m'thein gui ci. 33 A shin ah mäih ah Bawipa Jesuh naw, chang gui naw ami hmat zäi vai awn m'tumtäng ne Khanpughi ah ng'thu cu m'theithang gui ci. 34 kä m'tumtäng ah a i phi kä m'theithang gui ci. Cun ung phi ami mät ami om zah ung ang düih püi gui-am a päng avan cu m'dang ne m'thein gui ci. 35 A cu hnüüp khomü hun lam ah Bawipa Jesuh naw ang düihpüi gui-am, “Tuili ah vantäng ga ah mi vang kat khai” ci ne kiak na gui ci. 36 Ang düihpüi gui cu chang gui nawng shüt u ne, Bawipa Jesuh ah ngoh nak ah hleiko ung kai law tu u sei, vang ga ah vang kat vük ci gui. 37 A hei hleilo gui phi hteit tuk ci gui. Cun zah ung ak ten ah puikho khi ne tuinu ng'hnawk law sei, hleiko ung tui be law hlük ci. 38 Bawipa Jesuh cu hleiko ah ahnu lam ah aknep ah khum ne ip ci. Ang düihpüi gui naw Bawipa Jesuh cu m'tho ba u netah, “Bawipa, mik mi tui ung lut ne mi si lawk khai kiak ci nei kä na hmat tuk ci ma? ci ne ng'shik ci gui. 39 Bawipa Jesuh cu tho ne ng'düi law netah, “Khokhi aw ng'düm ä, tui hnawk aw kyeim ä” ci ne khämtam ne pyein ci. A cun vai-am kho khi cu ng'düm ne, tui hnawk cun phi kyeim ci. 40 Cun kawn ah Bawipa Jesuh naw ang düihpüi gui-am, “A i ah kia sei shin hlawk ah nami kyihkyawk ang? Tuhbäi güt ung nangmi naw, kei cu nami na zum nak kä om ne ma? ci ne ng'shi gui ci. 41 Cun zah ung ngami cu ang htei ah kyikyawk u netah, “Shin ah chang cu a u ah mäih chang ang? Khokhi la tui hnawk naw phi ani ah ng'thu cu ngai ci gui nei” ci ne ami mät gui ng'htau ci gui .
1 Bawipa Jesuh la ang düihpüi gui cu Kalile tuili ah vang ga, Keras kho ah gawk ci gui. 2 Bawipa Jesuh hleiko ung kaa a kyum law vai-am, khoshe ah kai chang tumat cu, ng'cim hmun ung kaa lut law ne, 3 Bawipa Jesuh cu hmu lawk ci. Ani cu ng'cim hmun gui ah lung ah om ci. Ani cu a u naw phi m'si gui awn khit ne kä pawng m'khüt ci. 4 Ani cu akda vei akut akho m'si gui awn khit ne, ami pawn man te, cun ung phi ami khih nak ah m'si gui düt pit zawp ci ci. Ani cu a u naw pang ne kä am khüt vai ah gaigawng ci. 5 Ani cu ng'cim hmun gui ah ng'lung la khomhtung zung ah, amü ak hnüüp viik ne m'lau ne, amät ah sa amät naw lung awn shudeng ne om ci. 6 Cun ah chang naw Bawipa Jesuh cu ang shawng ah a hmuh vai-am, dawng law ne ama ah kawp netah, 7 “Hlüngtai pibäih ciah Khanpughi ah Htapa, Jesuh Bawipa, Kei cu nang naw a i cha ah ang na na ci hlü? , kä na k'dukdeiu-en na bäi Khanpughi ah ming awn ka ning zoi ci nei” ci ne ng'shan khai ah m'lau ci. 8 (Cun ah am lau cu, Bawipa Jesuh naw, khoshe kha, shin ah chang ung kaa lut law ne maih ä' ci ne khämtam ne ak täm ah phäh ah kiak ci) 9 Cun kawn ah Bawipa Jesuh naw, “Nang ming a u ang” ci ne ng'shik ci. Cun ah chang naw, “Kei ka ming cu Mob nei, keimi cu ang htei ah kami da aih ci nei, ci ne m'thein netah; 10 ngami gui cu cun ah kho ung kaa kä aktäm gui vai ah ng'huipa ne ng'zoi ci. 11 Cun zah ung khomhtung nawi ah lum ci gui ah vawk mak gui cu om ci gui. 12 Khoshe gui naw, “Keimi vawk ung kami luh vai ah nam gein gui ä” ci ne ng'zoi ci gui. 13 Bawipa Jesuh naw zum khätah, khoshe gui cu, chang ung kaa lut law u ne, vawk gui ung lut ci gui. Phia m'ku vai lawk ciah vawk khli cu tuikam k'täi ung dawng law u ne, tuili ung lut ne di zawp ci gui. 14 Vawk shäm ci gui cu dawng zawp u ne, gawnu gawhta avan ung a cun ah mawng cu ngak ne pyein ci gui. Cun ah mawng ng'zak ciahchang gui naw law ne teng law tuk ci gui. 15 Chang gui cu Bawipa Jesuh ah pei ah ami gawk law ung, khoshe ah kai te ah Mob cu, akni ah ng'sui ng'sak ne, chang k'ni ah kia ne ngoh sei hmu u netah, kyikyawk ci gui. 16 A cun gui hmu tuk ciah chang gui naw, khoshe ah kai te ah chang la vawk gui ah mawng cu, lawk ciah chang gui-am m'thein tu gui ci gui. 17 Cun ah kia sei chang gui naw, Bawipa Jesuh cu, ami kho ung kaa naw a hei ah a hteh ba vai ah k'thäh ci gui. 18 Bawipa Jesuh cu hleiko ung a hang kai vü ba zah ung, khoshe ah kai te ah chang naw, ahnu ah läk tuk khai ah pyein ne ng'zoi ci. 19 Bawipa Jesuh naw maa nah netah, “Na im ah hteit ba ne, Khanpughi naw nang ah khan ah a i hlawk ah bi abi ah mawng la nang a ning m'gein ah mawng cu nak kyong ung kaa gui-am m'thein tu ba gui ä” ci ne kiak nak ci. 20 Cun ah chang cu hteit ba ne Dekapoli kho gawnu gha avan ung hteit ne, Bawipa Jesuh naw ani ak khan ah abi lawh ah mawng gui cu ngak ne pyein ci. Ng'za tuk cia chang gui cu cäicat ci gui. 21 Bawipa Jesuh cu hleiko awn tuili vang ga ah vang kat ba khätah, chang gui akda cu a pei ah law ne ng'bum lawk ci gui. 22 Tuikem ung a om zah ung Zairus ming nak ciah pum im uk ciah chang vai tumat cu gawk lawk ci. 23 Ani naw Bawipa Jesuh cu hmu netah, akho pei ah kawp ne, “Kei ah ka htahnumi hta cu gaw ne si law ge vai ci nei, na bä ni, law ne ak khan ah na kut taih ne, nak taigü law pe ä, cun ung gai ba ne ghing ba khai nei” ci ne ng'huipa ne ng'zoi ci. 24 Cun ah kia sei Bawipa Jesuh cu Zairus awn atäng ah hteit tuk ci. Chang khli naw a hnu ah läk law u ne, Bawipa Jesuh cu net hngaw ne hteit ci gui. 25 A cun zah ung kho kum gha-lei-goi ung asi ng'chawt sei gaw ciah hnumi tumat om ci. 26 Ani cu seibawi akda naw phi ami m'htei tu khit, a khawcham akda ng'pyi khai ah phi ng'pün khit ci, cun ung phi kä gai hlawt ne ka law piktäi ci. 27 Cun ah hnumi cu Bawipa Jesuh ah amawng ng'za tu netah, 28 “Bawipa ah a sui pang ka tawn ung ka gai khai” ci ne, amät ng'htau ne, chang gui ah ng'lung ah ng'tawn tu ne, Bawipa ah hnu ah gawk lawk netah; 29 Bawipa Jesuh ah asui cu va tawk ci, a cun vai-am asi cu kik ne a gaw nak maih sei a gai ah mawng cu ang ghit ah hmat ci. 30 A cun vai-am Bawipa Jesuh naw amät ung ahuham lut lawk ciah hmat netah, chang gui lam ah ng'hlat ne, “Kei ah ka suinu a u naw ang a tawn” ci ne ng'shi gui ci. 31 Ang düihpüi gui naw, “Nang ning tawn ne, ning net ne, hteit ciah chang khli cu hmu lang ne, Kei u naw ang a na tawn' ci ne na na ng'shi gui ci ma? cik ci gui. 32 Cun ung phi Bawipa Jesuh naw, a u naw a tawn ah a hmat vai ah mang shüi ne teng ci. 33 A suinu tawn ciah hnumi cu amät ah gai ah mawng hmat netah, ng'khlet ne kyi ne, ama ah law ne kawp netah, amawng avan akcang cu m'thein zawp ci. 34 Bawipa Jesuh naw, “Kahta hnumi na zum nak naw ning gai sak pyi ci, dimdeeih nak awn hteit baä, na kat nak maih zawp sä” ci ne kiak nak ci. 35 Cun zah ung Zairus ah im ah kaa chang gui cu law u netah, “Na hta hnumi si pyi ci nei, Bawipa kä khü ling ä” ci ne kiak nak ci gui. 36 Bawipa Jesuh naw cun ah ami pyein law cu ng'za netah, “Kä ng'ä ai zä, a zum bäng ah zum ä” ci ne pum im uk ciah ang vai-am kiak nak ci. 37 Cun kawn ah Peter, James la anau Johan gui bäng khah püi gui ne hteit ci. 38 Zairus ah im ah ami gawk ung chang gui cu, kyap ne m'lau ci ni, cäicat ui cai ci ni ah kiak ci gui. 39 Bawipa Jesuh cu im kyong ah va lut netah, cun ah chang gui-am, “a i ah kia sei nami ung-cang dük-chaak ang? A i ah kia sei nami thüi kyah ang? Shin ah hnumi hta cu sik ciah kä kiak ci, ip ci nei” ci ne pyein ci. 40 Cun ci khätah chang gui naw Bawipa Jesuh cu päipih ci gui. Bawipa Jesuh naw chang gui avan ak pung ah hteh sak gui netah, cun ah hnumi hta ah anu la apa ni, ang düihpüi chang sing thum bäng khü gui ne, hnumi hta ami m'shän nak ah kyong ah va lut ci gui. 41 Bawipa Jesuh naw hnumi hta cu akut ung k'pang netah, “Talitha, koum” ci ne kiak nak ci (Cun cu hnumi hta, na thawh law vai, kei naw ka pyein ci, a ci ah kiak ci). 42 Bawipa Jesuh naw cun a ci vai-am, hnumi hta cu tho law ne hteit ci. (Cun ah hnumi hta cu akho kum gha-lei-goi lawk ci), Cun hmu netah chang gui cu ang htei ah cäicat ci gui. 43 Bawipa Jesuh naw, “Shin ah amawng cu a u-am phi kä nami m'thein-en vai” ci ne ak tung ah khän gui netah, “hnumi hta-am ei m'bei vä” ci ne kiak na gui ci.
1 Bawipa Jesuh cu ang düihpüi gui awn atäng ah acun ung kaa ng'düi law ba u ne; amät ah pigaw ah gawk lawk ci gui. 2 Kyin hnüüp ung Bawipa Jesuh naw pum im ah hteit ne m'theithang gui ci. Cun ah am theithang gui cu ng'za u netah chang gui cu cäicat u ne, “Shin ah chang naw shin ah hmuhmat nak a hawi kaa ang a gah? Ani ah hmuhmat nak cu a i hmuhmat nak ang? Cäi aih vai gui mä a i hawkcha ah am dang hning ang? 3 Shin ah chang cu Mari ah hta, im co ciah chang, James, Josef Judas la Simon ni ah ami phäi ah kä kia ne ang? Ani be gui phi mi pigaw chang gui ah maw? ci ne ami mät ng'htau ci gui. Cun ah kia sei ngami naw Bawipa Jesuh cu maa nak ci gui. 4 Bawipa Jesuh naw, cun ah chang gui-am, “Profet cu amät ah pigaw, amät ah mätzah, amät ah kyongkhui ah kawn ah, a hawi phi chang m'sui nak om ci nei” ci ne kiak na gui ci. 5 Bawipa Jesuh cu cun ah pigaw ung gawpai ci gui api akut taih ne a gai sak gui ah kawn ah cäi aih vai a i phi kä m'dang hning ci. 6 Bawipa Jesuh cu ngami ung zum nak kä a om ah phäh ah cäi ng'ä ci. 7 Cun kawn ah Bawipa Jesuh cu apigaw ah pei ng'et zung pigaw gui ah hteit ne m'theithang gui ci. Ang düihpüi gha-lei-goi cu khü gui netah, sing goi ci ah ng'khap sak gui ne, pigaw gui ah tüi gui ci. Ngami-am khoshe m'khütnäng nak ah huham phi ap gui ci. 8 Cun kawn ah Bawipa Jesuh naw, “Nami hteh nak ah ng'sho pawng ah kawn ah a i phi kä nami hteh püi vai, sho ei, ng'za k'bah, ngui ng'ip gui a i phi kä nami hteh püi vai. 9 Phahnak nami ng'cum vai, cun nung phi k'htu ng'zung kä nami m'shawih vai. 10 A i pigaw ah phi nangmi ning dou gui htük ciah im cu, kä nami ng'plon taak vai. Kä nami hteh ba pha ah chuih a cun ah im ung nami om tu vai. 11 Nangmi ning maa na gui ciah pigaw ung kä nami om tu vai. Nami ng'thu kä ngai ciah chang gui nami hteh taak gui vai. Cun ah nami hteh taak gui ung nami kho pha ung kaa, m'vut nami khawn shüt vai, cun cu ngami ah hmawk ah ng'thu m'shi nami sho shüt ah kiak khai” ci ne m'cäi gui ci. 12 Ang düihpüi gui cu hteit u ne chang gui ami kat nak ung kaa ami ng'zu ba vai ah ng'thu pyein ci gui. 13 Khoshe akda phi k'täm ci gui. Gawpai ciah chang akda cu khitui awn hluk ne gai sak ci gui. 14 Bawipa Jesuh ah amawng cu kho nüng ung thang law sei, Herod ghangpughang naw phi ng'za tuk ci. Chang am shah naw Bawipa Jesuh-am, “Tuihnim Johan sih nak ung kaa tho ba ci nei, cun ah kia ne cäi aih vai gui phi m'dang ci nei” ci ne kiak ci gui. 15 Chang am shah naw ani cu, “Elijah nei” cik ci gui. Chang am shah naw, “ani cu, bäi profet gui man ah mäih ah kiak ciah profet nei” cik ci gui. 16 Herod naw Bawipa Jesuh ah bilawh gui ah amawng cu ng'za netah, “Ani cu Tuihnim Johan nei, kei naw alu kam chün te tuhbäi ghing ba pyi ci nei” cik ci. 17 Herod naw anau Philip ah chu Herodias cu gut ne akchu nak ah mawng ung Johan cu pha ne thawng ung a chum ah kiak ci. 18 John naw, Herod-am, “Na nau ah chu gut ne nak chu nak cu, kä bä ci nei” ci ne a pyein tu laih laih ah hmawk ah kiak ci. 19 Cun ah kia sei Herodias naw, Johan cu ang htei ah ngawn hlük ci, cun ung phi kä ngawn hlawt ci. 20 Johan cu chang k'ni la chang theing ah a kiak ah mawng cu Herod naw hmat netah, ani cu kyih ne akni ah om sak ci. Herod cu Johan ah ng'thu pyein ang zak tu päng ung, am lung kyong cäi ng'ä ne a kiak pang ung phi, zeikiai ne ngai tu hlük ci. 21 Herod ah ng'tüi nak hnüüp ung Herodias ah bi bi nak hlü ah lam cu ng'dang lawk ci. Cun ah hnüüp ung Herod naw, Kalile kho ung kaa bawi ng'vaipi gui, gakap bawi gui, la mangpa gui nüng cu khü gui ne, mü-ei aktung ah piang m'tham ne khin na gui ci. 22 Cun ah mü-ei ami ei nak ung, Herodias ah hta hnumi cu law ne akni akiom ah ng'lam ci. Cun ah kia sei Herod la akhin gui cu ang htei ah zeikiai u netah, ghangpughang naw cun ah hnumihta-am, “Nam hni a i phi nang zoih vai, kei naw ka ning pek khai nei, 23 Kei naw ka uk nak ah kho a teih phi k'bou ne ka ning pek khai nei” ci ne ng'thu khän ne pyein ci. 24 Cun ah hnumi hta cu anu ah va dawng ba netah, “kei naw a i ang kang zoih ung ani kaw” ci ne vang shi ba ci. Anu naw, “Tuihnim Johan ah alupum ng'zoi ä” ci ne kiak nak ci. 25 Hnumi hta cu a cun vai-am ghanpughang ah ma ah dawnglaw ba netah, “Tuihnim Johan ah lupum cu tawnglawng ung m'khäp netah atuhbäi na na peit vai ka zum ci nei” ci ne pyein ci. 26 Cun ng'za netah ghangpughang cu ang htei ah a zä ci, cun ung phi khin gui khli ah ma ah, ng'thu khän ne a pyein pyi ah kia sei, kä peit ah kä om hlawt ci. 27 Cun ah kia sei Johan ah lupum law püi khai ah gakap tumat cu tüi ci. Gakap naw thawng kyong ah hteit ne Johan ah lupum cu m'chün ci. 28 Cun kawn ah tawnglang ung m'khäp ne law püi, khätah, cun ah hnumi hta-am pek ci gui, cun kawn ah ani naw anu-am pe ba mä ci. 29 Johan ah ang khah püi gui naw cun ah amawng cu ng'za u netah, law u ne Johan ah a gook cu k'phuh ne m'cim ci gui. 30 Ang düihpüi gui cu Bawipa Jesuh ah law ba u ne, ami bilawh gui la ami m'theithang gui cu pyein law ba ci gui. 31 Cun zah ung chang khli gui cu hteithton lut lang ne kia u sei, Bawipa Jesuh la ang düihpüi gui cu ei ami ei vai phi akhin kä gah ci gui. Cun ah kia sei Bawipa Jesuh naw, “Mik mi a u ah kä om nak ah hteit ne ashäng ming düm cang khai nei” ci ne pyein sei, 32 Bawipa Jesuh la ang düihpüi gui cu, ang thuh nak lam ah hleiko awn pawng ne hteit ci gui. 33 Cun ah ami hteh cu chang gui naw hmu gui u netah, Bawipa Jesuh la ang düihpüi gui ah hmat gui ci gui. Cun ah kia sei apigaw päng ung kaa lawk ciah chang gui cu, Bawipa Jesuh ah hteh nak vai lam ah, ng'zung lam ung ak zang ah ana ma u ne, Bawipa Jesuh la ang düihpüi gui kä gawk pha u sei, ana gawk ci gui. 34 Bawipa Jesuh cu hleiko ung hang kai netah, chang khli cu hmu gui ci. Chang gui cu htoshäm kä om ciah hto gui ah mäih ah kia u sei m'gein gui netah, ng'Thu Ni akda cu pyein ne m'theithang gui ci. 35 Khomü hun law khätah ang düihpüi gui cu Bawipa Jesuh ah pei ah law u netah, “Tuhbäi khomü law pyi ci, 36 Shin zah ah chang a u phi kä om ci, ei awk vai khleih khai gui ah pigaw imlo zung ah chang gui cu tüi gui ä” ci ne pyein ci gui. 37 Bawipa Jesuh naw, “Nangmi nami mät naw shin ah chang gui ei m'bei gui vä” ci nekiak na gui ci. Ang düihpüi gui naw, “Keimi naw tangka phia goi phu, ei vai khleih ne shin ah chang gui-am kami m'bei gui vai ma? ci ne ng'shi ba ci gui. 38 Bawipa Jesuh naw, “Nangmi ung ei vai m'htut a i chü ang a om, hteit ne teng ba vä” ci ne kiak na gui ci. Ngami naw hteit ba ne ei vai hmuh u netah, “M'htut pum hma la nga pahnih om ci nei” ci ne pyein ba ci gui. 39 Bawipa Jesuh naw ang düihpüi gui-am, chang gui cu kho adou nak ung ang bum phäh phäh ah ami ngoh sak gui vai ah m'cäi gui ci. 40 Chang gui cu hma-kip ni, phia ni ah ang bum phäh phäh ah ngoh sak gui ci gui. 41 Cun kawn ah Bawipa Jesuh naw m'htut pum hma la nga pahnih cu la netah khankho dang ne Khanpughi ah bämang nak cu m'hlüng tai ci. Cun kawn ah m'htut cu k'bou ne chang gui-am ami tei gui vai ah ang düihpüi gui-am pe gui ci. A cun ah nga pahnih cun phi ang düihpüi gui-am pe gui ci. 42 Chang gui ami van naw ami phü ciah ei ci gui. 43 Cun kawn ah ang düihpüi gui naw m'htut la nga ami ei ah ak pawih cu, m'dawn ba u sei them dawn ung a gha-lei-goi lawk ci. 44 Cun ung ei tuk ciah chang pami ng'vai bäng cu phia hma-kip lawk ci. 45 Cun kawn ah Bawipa Jesuh naw chang gui cu ami im ah tüi ba gui netah, a cun vai-am ang düihpüi gui cu hleiko ung kai ba sak gui ne, tuili ah vang ga Bethsaida ah heik hma ba gui ci. 46 Bawipa Jesuh cu chang gui gidam gui shüt netah taigü khai ah khomhtung ah kai ci. 47 Kho amü hun law zah ung ang düiphüi gui ah hleiko cu tuili lai ah om ci. Bawipa Jesuh läi cu amät kawng ah om shüt ci. 48 Hleiko khan ah kho naw ng'pheet ne khi gui sei, ami zaica cu hmu gui netah Bawipa Jesuh cu tui khan ah m'khan ne hteit ne ami om nak ah lawk ci. Cun ah akhin cu ai khon htük ah kiak ci. Bawipa Jesuh cu ami pei ah phlän gui ne hteit khai ah pawng ci. 49 Ngami naw tui ah khan ah Bawipa Jesuh ahteh cu hmu u netah, 50 m'cha ah ngai u ne, kyi ne m'lau ci gui. A cun vai-am Bawipa Jesuh naw, “Kä ng'ä vä, kä kyikyawk vä, kei nei” ci ne kiak na gui ci. 51 Cun kawn ah ami om nak hleiko ah khan ah hang kai tuk ci. Ang düihpüi gui cu ang htei ah cäicat ne ngaih tüh khit ci gui. 52 A i ah kia sei ci ung, Bawipa Jesuh naw m'htut am bei gui zah ung ami hmuh te ah cäicat vai ah amawng cu kä ami hmat ah hmawk ah kiak ci. Ngami ung cun ah mawng hmuhmat nak hlawt vai a i kä om ci. 53 Bawipa Jesuh la ang düihpüi gui cu tuili vang ga ah vang kat u ne, Kennesaret ah ami hleiko m'düm ci gui. 54 Ngami hleiko ung kaa ami kyum law vai-am chang gui naw Bawipa Jesuh cu hmat ba ci gui. 55 Apigaw päng avan ung dawng shüi shüi u ne, gawpai ci gui cu shui u netah, Bawipa Jesuh ah gawk nak vai ah ami ngaih nak päng ah, ak gaw gui cu kawt ne law püi ci gui. 56 Bawipa Jesuh a hteh nak vai ah gawnu gui, lo gui la lam gui nüng ung ak gaw gui cu m'shän gui ci gui. A suinu ah pyai mawng hta pang ami tawn tu hlawt vai ah ng'coipa ne ng'zoi ci gui. Va tawn tu hta hlawt ciah chang phung cu ang ghit ah gai ci gui.
1 Pharisee gui la Jerusalem ah kaa lawk ci gui ah thukhän saza gui naw, Bawipa Jesuh cu veing ne k'bui ci gui. 2 Cun zah ung ang düihpüi gui naw ami kut kä theingthap ci awn ei ami ei cu hmuk ci gui. 3 Pharisee gui la Jew chang gui cu pupa gui ah thungzo läk ci gui ah chang gui ah kiak ci. Ami kut m'za avan kä ami m'si ung ei kä ei man ci gui. 4 Ei vai ami khleih ung phi m'si züm züm netah ei ci gui. Um k'am koi m'zak gui m'si m'säi nak ung tün ne pupa gui ah thungzo cu läk ci gui. 5 Cun ah kia sei pharisee gui la thukhän saza gui naw, “A i ah kia sei nang düih püi gui naw pupa gui ah thungzo kä läk u ne, ami kut kä m'si ah ei ami ei ang? ci ne Bawipa Jesuh cu ng'shik ci gui. 6 Bawipa Jesuh naw, “Nangmi ah mawng profet Isaiah naw a pyein cu bä ne ng'khän ci nei Nangmi cu thuvi ciah chang gui nei, Cun ah kia sei Isaiah naw nangmi ah mawng a guk cu; “Shin ah chang gui naw kei cu, ami m'gawng shai awn nam hlüngtai ci gui nei, Cun ung phi ngami ah m'lung kyong cu, Kei awn ng'shawng aih ci nei. 7 Ngami naw kei ah ami taigü cu A kholä ah kiak ci nei. A i ah kia sei ci ung ngami naw chang ah Pian ah thukhän gui cu, Khanpughi ah thukhän ah mäih ah m'theithang ci gui nei” ci ah kiak ci nei. 8 Nangmi cu Khanpughi ah thukhän nawng-en u ne, chang ah thungzo m'theithang düt cu nami läk ci nei” ci ne kiak na gui ci. 9 Cun kawn ah mä Bawipa Jesuh naw, “Nangmi naw nami mät ah m'theithang nami läk hlawt vai ah Khanpughi ah thukhän cu, k'phiui hnawk ne nami theileh aih ci nei. 10 Moses naw ang thukhän ung, “Nanu la napa cu nak chang m'sui goi vai, anu pa züigen ciah chang cu sih nak ung hteit sä, ci ne pyein ci. 11 Cun ung phi nangmi naw chang tumat cu anu pa am htei nak vai khawhcham a om ah a kiak ung, “cun cu Corban” (Khanpughi naw a khäm pyi) ah a kiak ah khoi ung, 12 ani naw anu pa am hteihtang vai kä hlü ba khai” ciah nami m'thei thang ci. 13 A cun ah nangmi naw nami thungzo gui bäng bäng ng'dou ne nami m'theithang nak awn Khanpughi ah thukhän cu nami m'shet ci. A cun ah mäih ah ahei thungzo gui phi nangmi naw akda nami läk ba ci” ci ne kiak na gui ci. 14 Cun kawn ah Bawipa Jesuh naw chang gui cu apei ah khü ba gui netah, a pyein ba mä cu, “Kei ah ng'thu cu nami van naw ngai ne, hmat zawp vä. 15 Ak pung ah kaa chang ung lut ci naw, chang cu kä shetkat sak hlawt ci, chang ah puk kyong ung kaa lut lawk ci naw chang cu shetkat sak ci. 16 (Ak hnga om ci naw ng'za sä) ci ne kiak na gui ci. 17 Cun kawn ah Bawipa Jesuh cu chang gui ah ng'lung ah kaa ng'düi law ba ne, kyong ah lut ba khätah, ang düihpüi gui naw am tumtäng nak ah mawng cu am thein gui vai ah ng'shik ci gui. 18 Bawipa Jesuh naw, “Nangmi shin hlawk hngaw kä nami hmat hlawt ci ma? 19 Ak pung lam ah kaa chang ah akyong ah lut ci phung cu chang ah m'lung kyong ung kä gawk hlawt ci, chi-khawn ung gawk netah pumsa ah ak pung ah lut law ba zawp ci. Cun ah kia sei chang ah pumsa kyong ah zulut vük ci naw chang kä shetkat sak hlawt ci, ci cu kä nami hmat ci ma? ci ne kiak na gui ci. (shin ah a pyein nak ung ei man gui phung cu avan ei vai ciah am dang nak ah kiak ci). 20 Cun kawn ah mä Bawipa Jesuh naw, “Chang ah puk kyong ung kaa lut lawk ci naw chang cu shetkat sak ci. 21 Chan ah pukhui m'lung kyong ung kaa shetkat ciah ngaih tüh nak gui cu lut lawk ci; cun gui cu ng'zo ng'pawm hlü nak, m'guk nak, chang ngawn nak; 22 chang ah chu chang ah hta kat püi nak, ng'zak hlü aih nak, nget ngawng nak, hleei hlak nak, ng'zak hlü düt ah om nak, m'thüimkhang nak, chang ah ming m'shet nak, chang ah ng'shei nak, gu-ang nak, gui ah kiak ci. 23 Shin ah shetkat nak gui nüng cu chang ah puk kyong ung kaa lut lawk ciah kia ne, chang cu shetkat sak ci” ci ne m'thein gui ci. 24 Bawipa Jesuh cu cun ung kaa Taiah gawnu ah hteit ci. Cu ah a gawk ung im tumat ah kai netah, ani a gawk ah mawng a u naw phi a hmat vai kä ng'za hlük ci. 25 Cun ung phi ng'thup ne kä om hlawt ci. Ahta hnumi khoshe ah kai ah hnumi nu tumat cu, Bawipa Jesuh a gawk law ah mawng ng'za tu netah, a cun vai-am dawng law ne a kho pei ah kawp lawk ci. 26 Ani cu Siria kho Phoenicia gawnu ung kaa Karik hnumi ah kiak ci. Ani naw ahta hnumi ung kaa khoshe cu, Bawipa Jesuh naw ak täm peit vai ah law ne ng'huipa ci. 27 Bawipa Jesuh naw, “Hta hmaw gui cu ak htük ung phü khai gui ah m'bei gui vai kiak ci, hta hmaw gui ah ei vai sü la ne, ui-am kä vuh vai nei” ci ne kiak nak ci. 28 Cun ah hnumi naw, “Bawipa, cun cu hman ci nei, cun ung phi hta hmaw gui ah k'book theh, ei dawn ka ah ng'zaih ci cu, ui gui naw ei tu man ci gui nei” ci ne pyein tu ba ci. 29 Cun ci khätah Bawipa Jesuh naw, “Nang naw cun ah nam hlan tu ba cu bä ci nei, na im ah hteit baä, na hta ung kaa khoshe cu dawng pyi sei na hmuk khai nei” ci ne kiak nak ci. 30 Cun ah hnumi nu cu a im ah hteit ba netah, a hta hnumi hta ung kaa khoshe cu dawng pyi sei, ani cu adüm hta ah ng'zän ne ip sei hmuk ci. 31 Bawipa Jesuh cu Taiah gawnu ung kaa pawng ba ne Sidon gawnu la Dekapoli kho gawnu gha cu sun ba pah ne Kalile tuilinu ah gawk ba ci. 32 Chang gui naw pang ne ang ciah chang tumat cu law püi u netah, “Ani ah khan ah na kut taih pe ä” ci ne ng'zoi ci gui. 33 Bawipa Jesuh naw chang gui ah ng'lung ah kaa cun ah chang cu chang ah kä om naë ah khü netah, ak hnga khui ah akut m'dawng awn hei tawk ci. Am shi awn m'thawh ne am lei phi tawk pek ci. 34 Cun kawn ah khan mawpi dan ne, “Ephphatha” ci ne pyein ci, cun cu “Ng'lang sä” a ciah kiak ci. 35 A cun vai-am cun ah chang cu ak hnga ng'lang ne am lei düng law sei, akni ah htu law thei ci. 36 Bawipa Jesuh naw cun ah amawng gui cu, a u-am phi kä ami m'thein-en vai ah m'zih sak gui ci. Cun ah Bawipa Jesuh naw m'zih sak gui sei phi, chang gui naw acun ah mawng cu pyein law pi k'täi ci gui. 37 Cun ah a mawng ng'za tuk ciah chang gui cu ang htei ahcäicat u netah, “Bawipa naw a päng avan cu düng khai ah bi pyi ci nei, ak hnga pang ci gui ng'lang sak gui ne, awng ang ci gui ng'thu thei sak gui ci nei” ci ne pyein aih ci gui.
1 Kä shou pha sei chang khli cu ng'bum law ba ci gui. Cun ah chang gui ami ei vai kä om khätah; 2 Bawipa Jesuh naw ang düihpüi gui khü gui netah, “Shin ah chang gui cu kei awn atäng ah kho hnüüp thum om lawk ci gui kia ne ami ei vai kä om ba ci. Cun ah kia sei kei naw kam gein gui ci. 3 Chang am shah gui cu lam a shou nak ah kaa lawk ci gui, ngami cu a i kä m'bei gui ah tüih ba gui ung, lam ah cawi ne ng'zän zawp khai gui nei” ci ne pyein ci. 4 Ang düihpüi gui naw, “Shin ah bungnu ah chang shikchü am m'bei vai, ei vai a hawi gah vai ang? ci ne ng'shi ba ci gui. 5 Bawipa Jesuh naw, “Nangmi ung m'htut a i chü ang a om” ci ne ng'shi gui ci. Ang düihpüi gui naw, “M'htut pum chih om ci nei” ci ne pyein ci gui. 6 Bawipa Jesuh naw chang gui cu m'dek ung ngok sak gui netah, m'htut pum chih cu la ne, Khanpughi m'hlüngtai netah, m'htut cu k'bou ne chang gui-am ami tei gui vai ah ang düihpüi gui-am pe gui ci. Ang düihpüi gui naw chang gui-am tei gui ci gui. 7 Ngami ung nga phi api om ci. Bawipa Jesuh naw Khanpughi m'hlüngtai netah, nga cun phi chang gui-am ami tei gui vai ah ang düihpüi gui cu täk gui ci. 8 Chang gui ami van naw ami phü ah ei ci gui. Ami ei ah pawih gui cu them dawn chih ung k'bum ne m'khäp ci gui. 9 M'htut ei ciah chang gui cu phia phli-kip lawk ci gui. Bawipa Jesuh naw cun ah chang gui cun ung kaa tüi ba gui ci. 10 A cun vai-am amät cu ang düihpüi gui awn atäng ah hleiko ung kai ba ne, Dalamanutha kho ah hteit ci gui. 11 Pharisee am shah gui cu law u netah, Bawipa Jesuh cu ng'kütneet ne ng'cuhcan püi ci gui. Ngami naw ami thuvi nak awn, “Khanpughi naw a ning m'hni nak saksi dang khai ah cäi aih vai tumat cu m'dang law shüm ä, ci ne thäh ci gui. 12 Bawipa Jesuh naw ngai shäng netah, “Tuhchü chang gui naw a i ah kia sei cäi aih vai ami thäh ang? Kei naw akcang ka pyein cu, shin ah chang gui-am, cun ah cäi aih vai gui cu, kä m'dang gui vai nei” ci ne kiak na gui ci. 13 Bawipa Jesuh cu cun ung kaa ng'düi law ba ne, hleiko ung kai ba netah, tuili vang täng ga ah vang kat vü ba ci. 14 Ang düihpüi gui naw hleiko khan ah ei vai akda kä law püi ah m'htut pum ät bäng law püi ci gui. 15 Bawipa Jesuh naw, “Nang mi naw Pharisee gui ah k'caw la Herod ah k'caw cu geing nah ne nami hlawi vai nei” ci ne ang düihpüi gui cu m'cäi gui ci. 16 Ang düihpüi gui cu ei vai kä ami shaw a mawng pyein ne ami mät ng'cengcäk ci gui. 17 Cun ah ami ng'cengcäk cu Bawipa Jesuh naw hmat gui netah, “Nangmi naw ei vai kä nami shaw ah mawng cu a i ah kia sei nami pyein ang? Tuhgüt kä nami hmuhmat phak ci ma? A i ah kia sei nami m'lung hnga a pang aih ang? . 18 Nami mik om lang sei kä nami hmuk ci ma? Nami hnga om lang sei kä nami ng'zak ci ma? 19 Kei naw chang phia hma-kip-am m'bei vai m'htut pum hma kak bou cu kä nami shüm ba ci ma? Cun ung m'htut ak pawih gui them dawn ung a i chü ang nami kaw ba? ci ne ng'shi gui ci. Ang düihpüi gui naw, “them dawn unç a gha-lei goi ah kami kaw ba ci nei” cik ci gui. 20 Cun kawn ah Bawipa Jesuh naw, “Kei naw chang phia phli-kip-am m'bei vai m'htut pum chih kak bou zah ung, m'htut ak pawih cu dawn a i chü ung ang nami kaw ba? ci ne ng'shi ba gui ci. Ang düihpüi gui naw, “Them dawn ung ak chih ah kami kaw ba ci nei” cik ci gui. 21 Bawipa Jesuh naw, “Cun ah kia lang sei nangmi cu tu ä güt a i kä hmuhmat ne nami om ci ma? ci ne ng'shi gui ci. 22 Bawipa Jesuh la ang düihpüi gui cu Bethsaida pigaw ah gawk lawk ci gui. Cun zah ung chang gui naw a mik m'dauh tumat cu law püi u netah, ani cu akut awn tawk ne a gai sak vai ah ng'zoi ci gui. 23 Bawipa Jesuh naw a mik m'dauh cu akut awn k'pang ne pigaw k'pung ah hteh püi ci. A cun ah mik cu am shi awn m'thawh netah, ak khan ah akut taih ci. Cun kawn ah, “Tuhbäi na hmuk ci ang? ci ne ng'shik ci. 24 Ani naw täu law netah, “Kei cu chang gui ka hmuk ci nei, ngami cu sing ghing gui awn täng ci gui, cun ung phi hteit hton ci gui” ci ne ptein ci. 25 Cun kawn ah Bawipa Jesuh naw ani ah mik khan ah akut taih ba mä ci. Cun kawn ah ani cu k'tha na ne m'dei khätah amik cu m'dei law sei, a i phi ng'htei khai ah hmu lawk ci. 26 Bawipa Jesuh naw ani cu, “Pigaw ng'lung ah kä na hteh-en ba vai” ci ne m'cäi netah, a im ah tüi ba ci. 27 Bawipa Jesuh la ang düihpüi gui cu Caesarea Philippi pigaw zung ah hteit shüi ci gui. Lam ami hteh zah ung Bawipa Jesuh naw, “Chang gui naw kei cu a u ah ka kiak ciah ang, ami pyein, pyein vä, ci ne ang düihpüi gui cu ng'shi gui ci. 28 Ang düihpüi gui naw, “Chang am shah naw nang cu; Tuihnim Johan nei cik ci gui, chang am shah naw, 'Elijah' nei cik ci, chang am shah naw 'profet tumat nei' cik ci” ci ne pyein ci gui. 29 Bawipa Jesuh naw, “Nangmi naw mä kei cu a u ah ang nami na ngaih” ci ne ng'shi gui ci. Peter naw, “Nang cu Messiah nei” ci ne ng'kiaa ne pyein ci. 30 Cun kawn ah Bawipa Jesuh naw, “Kei a u ah ka kiak ah mawng cu a u-am kä nami m'thein-en vai nei” ci ne khän ne m'cäi gui ci. Mawng Pyein ci. 31 Cun kawn ah Bawipa Jesuh naw ang düihpüi gui-am, “Chang ah Htapa cu zaica nak akda bui awt khai, chang ng'vaigui, taigüpa gui la thukhän saza gui naw hnu ng'tuk püi khai gui. Ani cu ngawn khai gui, cun ung phi ak hnüüp thum hnüüp ung tho ba ne ghing ba khai” ci ne m'thein thang gui ci. 32 Cun gui cu Bawipa Jesuh naw akdei dang ah m'thein gui ci. Cun ah kia sei Peter naw Bawipa Jesuh cu ang thuh nak ah khü netah, m'kat ne ng'thu püi ci. 33 Bawipa Jesuh naw ang düihpüi gui cu teng gui netah, Peter- am, “Nang khoshe a hei ah hteit ä, nang ah ngaih tüh cu Khanpughi ung ka lawk ciah kä kiak ci, chang ung ka lawk ciah kiak ci” ci ne k'she na ne m'cäi ci. 34 Bawipa Jesuh naw ang düihpüi gui la chang khli gui cu a pei ah khü gui netah, “Kei ah chang ah kia hlük ciah chang naw, amät ah hmawk cu nawng ne, amät ah kutlamtung kawt ne, ka hnu ah ana läk vai. 35 Amät ah hnun gui k'phiawn hlük ciah chang cu dimaih khai, kei la ThuNi ah hmawk ah a hnun gui pek ciah chang cu hun nak gah khai. 36 Chang cu khomdek khan avan a uk ung phi, a hnun gui adi maih ung ninak bänak a i om khai zaw? 37 Amät ah hnun gui ghin nak adi maih ung a i awn m'thawng ba hlawt khai-aw? 38 Khanpughi kä shüm ne shetkat nak ah tuhchü akhin ung, kei ah hmawk la kei ah m'theithang ah hmawk ah lü ng'a ciah chang cu, Apa Khanpughi ah bämang nak awn, chang ah Htapa, khan chang theing gui naw 'kiuung u sei a kyum law ba hnüüp ung ani ah hmawk ah lü ng'a nak om khai nei” ci ne kiak na gui ci.
1 Cun kawn ah Bawipa naw, “Kei naw akcang ka pyein cu, hlüngtai nak awn Khanpughi ah uk nak kho gawk law sei, kä ami hmuh phaa ah chuih, shin ah kho ung om ciah chang am shah gui cu kä sik khai gui nei” ci ne kiak na gui ci. 2 Cun ung ka naw hnüüp chuk lüng khätah Bawipa Jesuh naw, Peter, James la Johan ni bäng khah püi gui ne, hlüng ciah khomhtung ah kai püi gui ci. A cun vai-am ami hmuh ge ah Bawipa Jesuh ah müi hmai cu ng'khuk hlat lawk ci. 3 A suisak cu pyü ne ng'shü ne bawk ne khang lawk ci, a cun ah mäih ah bawk khai ah khomdek khan chang naw a u naw kä m'sumsäi hlawt khai. 4 Elijah la Moses cu dang law ni ne, Bawipa Jesuh awn atäng ah ng'cengcäk u sei, ang düihpüi thum gui naw hmuk ci gui. 5 Cun ah kia khätah Peter naw, “Bawipa, shin ah hmun cu om nak vai ah nik ci nei, nang ah phäh ah k'pyu tumat, Moses ah phäh ah k'pyu tumat, Elijah ah phäh ah k'pyu tumat, k'pyu tung thum ah kami co khai nei” ci ne Bawipa Jesuh ah ma ah pyein ci. 6 Ang düihpüi gui cu ang htei ah kyikyawk u ne, Peter naw a i a pyein vai phi kä hmat netah, a cun ah a pyein ah kiak ci. 7 Cun kawn ah khomei tumat dang law ne ami khan ah hnim law gui ci. “Shin cu kei ah m'hni ah Ka Htapa nei, ani ah ng'thu cu ngai vä” ciah k'ow cu khomei ung kaa ng'thang lawk ci. 8 Cun ah kia khätah ang düihpüi gui naw ami pei zung ah mang shüi ne teng ci gui, cun ung phi Bawipa Jesuh ah kawn ah a u phi a om kä hmu ba ci gui. 9 Cun kawn ah Bawipa Jesuh la ang düihpüi gui cu khomhtung khan ah kaa kyum law ba ci gui. Cun ah ami kyum law ba zah ung Bawipa Jesuh naw, “Nangmi naw tuhbäi nami hmuh cu, chang ah Htapa sih nak ung kaa kä a thawh ba pha ah chuih, a u-am phi kä nami m'thein-en vai” ci ne ang düihpüi gui cu khän ne m'cäi gui ci. 10 Ngahmi naw cun ah thu khän cu ami ngaih pang ung phi, “Sih nak ung kaa tho ba ci cu a i ang” ci ne ami mät ng'shi ng'thäh tu ne ng'cengcäk ci gui. 11 Cun kawn ah thukhän saza gui naw, Bawipa Jesuh cu, “A i ah kia sei Elijah kyum law ba khai ci ne ami pyein ang” ci ne ng'shik ci gui. 12 Bawipa Jesuh naw, “Apäng avan cu ana piang m'tham ma khai ah Elijah cu akcang ah kyum law ma khai. Cun ung phi cacim naw, “Chang ah Htapa cu zaica nak la shedam nak khan khai” ci ne a i ah kia sei a pyein ang? 13 Elijah cu kyum law pyi ci nei, cacim ung lawk ciah mäih ah chang gui naw ani cu, ami ci-cum hlü hlü ah ci-cum pyi ci gui nei, ci ne nangmi-am ka ning m'thein gui ci, ci ne kiak nak gui ci. 14 Bawipa Jesuh la ang düihpüi thum gui cu, a hei ang düihpüi gui ah om nak ah gawk law ba u netah, chang khli naw anak bui gui sei hmuk ci gui. Am shah thukhän saza gui la ana om ciah ang düihpüi gui cu ng'kük net ne ng'thu pyein ci gui. 15 Chang gui cu Bawipa Jesuh a law ba hmu u netah cäicat u ne, zavaih ne ana dou ci gui. 16 Bawipa Jesuh naw ang düihpüi gui-am, “Nangmi cu ngami awn a i ah mawnglam ang thu nami pyein? ci ne ng'shi gui ci. 17 Chang khli ah ng'lung ah ka chang tumat naw, “Bawipa, ka hta cu nang ah om nak ah ka law püi ci nei, khoshe naw a kai law ba päng ung, 18 kiuh ne ng'zän ne, am shi phawp gui lut law sei, a ha kyeet ne, kiai ne ng'zän ci ci nei. Nang ah nang düihpüi gui naw cun ah khoshe cu ami k'täm vai ah khü gui ung phi, ngami naw käm khüt ci gui nei, ci ne ng'zawi ne pyein ci. 19 Bawipa Jesuh naw, “Nangmi cu a i hlawk ah a zum nak kä om ciah chang gui ang? Kei cu nangmi awn atäng ah a i güt ka om vai ang? A i güt nangmi ka ning ngaih peit gui vai ang? , cun ah akhmaw kei ah om nak ah law püi vä” ci ne kiak na gui sei, 20 Cun ah akhmaw cu a pei ah law püi ci gui. Khoshe naw Bawipa Jesuh a hmuh vai-am, ak hmaw cu ci cum law ba sei, ani cu ng'tum ne ng'khlet ne, am shi phawp hmoh ne, m'dek ung kiu ne ng'zän ne ng'taih shüé shüi ci. 21 Bawipa Jesuh naw, “Shin ah a kiak law shou law ne ang” ci ne apa cu ng'shik ci. Apa naw, “a zoh hta zah ge ung a cän ah kiak ci nei, 22 Khoshe naw akhmaw asih vai ah, mei ung phi, tui ung phi akda vei luh sak ci nei. Nang Bawipa naw nam khüt hning vai a kiak ung nam gein gui ne nam htei tu pe gui ä” ci ne pyein ci. 23 Bawipa Jesuh naw, “Nam khüt hning vai a kiak ung ci ne a i ah kia sei na pyein ang? A zum nak om ciah chang naw kä am khüt a i kä om ci” ci ne kiak nak ci. 24 A cun vai-am akhmaw ah pa naw, “Kei naw akcang ah a zum ci nei, ka zum nak kä be ci kia sei, nam gein tu hta ä” ci ne m'lau ne ng'paa nak ci. 25 A pei ah chang gui dawng law u sei, Bawipa Jesuh naw hmu gui netah, “ang ne pang ciah khoshe, tuhbäi akhmaw ung kaa lut law ne a hei ah na hteh vai, a i zah ung phi kä na ng'et-en law ba vai, kei naw ka ning k'täm ci nei” ci ne khoshe cu k'täm ci. 26 Khoshe cu m'lau ne, akhmaw cu ng'tum ne ng'thüng khai ah ng'khlet sak netah, lut law ne a hei ah hteit ci. Cun ah ak hmaw cu aksi vai sü ah ng'zän sei, chang gui naw, “ak hmaw sik ci nei” cik ci gui. 27 Cun ung phi Bawipa Jesuh naw, ak hmaw cu akut ung k'pang ne m'tho sei tho law ba ci. 28 Bawipa Jesuh im ah law ba ne a om zah ung ang düihpüi gui naw, “Keimi naw cun ah khoshe cu a i ah kia sei kä kami k'täm hlawt ang? ci ne ng'shik ci gui. 29 Bawipa Jesuh naw, “Taigü nak bäng awn nei, shin ah mäih khoshe cu k'täm hlawt vai, cun kawn ah k'täm nak vai a hei kä om ci” ci ne kiak na gui ci. 30 Bawipa Jesuh la ang düihpüi gui cu, acun ung kaa naw Kalile kho cu sun pah ne hteit ci gui. Cun ah ami sun pah cu a u naw phi a hmat vai kä ng'za hlük ci. 31 A i ah kia sei ci ung, “Chang gui ah kut ung chang ah Htapa cu ap khai gui, ani cu ngawn khai gui, cun ung phi ak hnüüp thum hnüüp ung sih nak ung kaa tho ba khai” ci ne ang düihpüi gui-am am thei thang gui su ah kiak ci. 32 Cun ung phi ang düihpüi gui naw, Bawipa Jesuh ah m'theithang cu kä hmat ci gui, cun ung phi ami ng'shi vai ah kyik ci gui. 33 Bawipa Jesuh la ang düihpüi gui cu Kapernaum gawnu ah gawk u ne, ami im kai ah im kyong ah gawk u netah, Bawipa Jesuh naw, “Nangmi lam cawih ah a i ah mawng ang nami pyein? ci ne ng'shi gui ci. 34 Ang düihpüi gui cu kä shipdep ne om ci gui, a i ah kia sei ci ung, ami mät gui ung kaa a u ak hlüngtai pi ah kiak ci, ci ah lam cawih ah ng'thu ami pyein te ah hmawk ah kiak ci. 35 Bawipa Jesuh cu ngoh netah, ang düihpüi gha-lei-goi cu khü gui ne, “ak hlüng pi ung gawk hlük ciah chang cu, ang neim pi ung om khai, chang avan naw atäk phan pi ah phi kiak khai” ci ne kiak na gui ci. 36 Cun kawn ak hmaw tumat cu khü ne ang düihpüi gui ah ma ah m'düih netah, ak hmaw cu zäk ne chang ne, 37 'Kei ah ming awn shin ah mäih ah ak hmaw dou ciah chang cu kei na dou ciah kiak ci. Kei na dou ciah chang cu kei bäng na dou ciah kä kiak ci, kei na tüi lawk ci phi dou ciah kiak ci” ci ne kiak na gui ci. Kiak ci. 38 Johan naw, “Bawipa, nang ah ming awn chang tumat naw, khoshe cu k'täm sei kami hmuk ci. Ani cu keimi awn atäng ah kä hteit tuk ci. Cun ah kia sei keimi naw, nang Bawipa ah ming kä a pyein vai ah kami maa nak nei” ci ne m'thein lawk ci. 39 Bawipa Jesuh naw, “Ani kä nami maa nak vai, kei ah ming awn cäi aih vai gui cu bi netah, kei nam shetkat khai ah chang a u kä om ci. 40 Mik mi kä na hnu ng'tuk püi gui ciah chang cu mik mi ah chang ah kiak ci. 41 Kei naw akcang ka pyein cu, kei ah ng'düihpüi ah nami kiak cu a hmat nak awn nangmi-am tui m'zak ät ning tu gui ci cu, akcang ah m'khum taih ne gah tang nak om khai. 42 “Kei a na zum nak di maih khai ah, shin ah mäih ak hmaw tumat lam hma sak ciah chang cu, ak hnü-gawn ung lungsum nu khit ne, m'awi netah, tuinu ung buhtawn ung ani ah phäih ah bä tuba khai. 43 Na kut naw na zum nak adi maih sak ung, cun ah kut cu na tukpit vai, na kut avan küm sei, ang täi ah däi ciah m'htei-mei ung, na luh akdam, na kut vangtäng pit sei ang täi ghin nak nagah cu bäpi khai. 45 Na kho naw na zum nak adi maih sak ung, cun ah kho cu na tukpit vai, na kho avan küm sei ang täi ah däi ciah m'htei-mei ung na luh akdam, na kho vangtäng pit sei ang täi ghin nak na gah cu bäpi khai. 47 Na mik-ui naw na zum nak adi maih sak ung, cun ah mik cu kawih ne na ghawh vai, geinvai vai ah m'kyiit naw shawk ne a ei nak la ang täi sei däi ciah m'thei-mei ung namik-ui küm sei na gawk ah k'dam, na mik vangtäng m'dauh sei Khanpughi ah uknak kho ung na gawk cu bä pi khai. 49 “Ng'ghu-tha nak cu m'shi shum ne theingthap sak ah mäih ah, chang nüng nüng cu mei naw theingthap sak khai nei. 50 “M'shi cu nik ci, cun ung phi a tuui amaih ah a kiak ung, nangmi naw a i cha tuui khai ah kä nami piang ba hlawt khai. “Nangmi ung teihpüi mah nak ah m'shi cu om sak u netah, nami mät gui dimdeeih nak awn om vä” ci ne m'cäi gui ci.
1 Cun kawn ah Bawipa Jesuh cu, cun ung kaa ng'düi law ne Judea kho ah hteit netah, Jordan tuinu hei kat ci. Chang gui cu Bawipa Jesuh ah pei ah ng'cut law ba u sei, am theithang man ah m'theithang ba gui ci. 2 Cun zah ung Pharisees gui cu law u ne, “Chang naw amät ah chu cu ng'chaa püi hning khai, ci ah thukhän ung om ne ang? ci ne thuvi ne ng'shik ci gui. 3 Bawipa Jesuh naw, “Moses naw a i cha ah ang thukhän a ning peit gui” ci ne ng'shi tu ba gui ci. 4 Ngami naw, “Chu cu nawng nak ca pe ne, ng'cha püi hning nei, ci ne Moses naw pyein ci” ci ne pyein tu ba ci gui. 5 Bawipa Jesuh naw, “Nangmi cu ng'thu käng za u ci sei, Moses naw cun ah ng'thukhän gu ne a nawng shüt ah kiak ci. 6 Cacim ung om ciah mäih ah ak htük ung Khanpughi naw pami la hnumi cu tüisho ci. 7 Cun ah kia sei shin ah mawng ung pami naw anu la apa cu nawng shüt ne akchu awn ng'puikhap ci goi, 8 ngani cu sisa tumat ah kia lawk ci goi. Cun ah kia sei ngani cu hnih ah kä kia ba ci, tumat ah kiak ci. 9 Khanpughi naw ang puikhhah sak cu chang naw kä am chaa-en vai nei” ci ne m'cäi gui ci. 10 Ang düihpüi gui cu im ah gawk ba u netah, a cun ah mawng cu län ne Bawipa Jesuh cu ng'shi ba mä ci gui. 11 Bawipa Jesuh naw, “Akchu nawng ne ahei hnumi chu na tu ba ciah pami cu akchu ah khan ah kat nak bik ciah kiak ci. 12 A cun ah mäih ah a cei nawng ne ahei pami cei na tu ba ciah hnumi cu, a cei ah khan ah kat nak bik ciah kiak ci” ci ne m'thein gui ci. 13 Chang am shah gui naw ak hmaw hta gui cu, Bawipa Jesuh naw ami khan ah akut taih ne m'shumphyuk nak a peit gui vai ah law püi ci gui. Cun ung phi ang düihpüi gui naw ma na gui ci gui. 14 Bawipa Jesuh naw hmu gui netah, m'lung she ne, “Akhmaw hta gui cu kei ah law u sä, kä ma na gui vä, Khanpughi ah uk nak kho cu ngami ah kho ah kiak ci nei. 15 Kei naw akcang ka pyein cu, akhmaw hta gui ah mäih ah Khanpughi ah uknak kä dou ciah chang cu khankho ah kä gawk tuk khai” ci ne kiak na gui ci. 16 Cun kawn ah Bawipa Jesuh naw akhmaw hta gui cu chang ne k'pawm gui netah, ami khan ah akut taih ne m'shumphyuk nak pe gui ci. 17 Bawipa Jesuh cu a hei lam ung hteit khai ah a pawng zah ung chang tumat cu a pei ah law ne, m'khukdong netah, “Nik ciah sazapa, ang täi ghin nak ka gah vai ah a i ang ka bi kaw? ci ne ng'shik ci. 18 Bawipa Jesuh naw, “A i ah kia sei kei-am chang k'ni ah na na pyein ang? Khanpughi ah kawn ah nik ciah chang a u kä om ci nei. 19 Chang kä ngawn vai, chang ah chu kä kat püi vai, käm guk vai, käng düng ciah kä saksi vai, kä hleeihlak vai, nupa m'htei vai, ciah thukhän gui cu na hmat ciah kä kia ne ang? ci ne kiak nak ci. 20 A cun ah chang naw, “Bawipa, Cun ah thukhän gui cu kei naw kak hmaw zah ge ung tün ne ka läk ci nei” ci ne pyein ba ci. 21 Bawipa Jesuh naw ani cu am hni nak awn kheing ne teng netah, “Nang ung tumat nabi vai hlü ba ci, hteit ba ne na khawh avan zoi netah ghawi-pyam ci gui-am na peit gui vai, cun ung nang cu khankho ah bühmang nak om khai. Cun kawn ah ka hnu ah na na läk vai” ci ne m'cäi ci. 22 Cun ah chang cu ang htei ah bühmang ciah chang ah kia ne, Bawipa Jesuh ah ng'thu cu ng'za netah, a hmai m'kyum ne thüi ne hteit ba ci. 23 Bawipa Jesuh naw ang düihpüi gui cu teng gui netah, “Bühmang ciah chang gui Khanpughi ah kho ah ami gawk vai cu khak aih ci nei” ci ne kiak na gui ci. 24 Ang düihpüi gui cu Bawipa Jesuh ah ng'thu ng'za u netah, ngai khit ci gui. Cun kawn ah Bawipa Jesuh naw, “Ka hta gui aw, Khanpughi ah kho ah gawk vai cu khak aih ci nei! 25 Ng'pyüm mik ung seikong a luh vai zäi hngaw khai, cun ung phi Khanpughi ah kho ah män hmang ciah chang a luh vai cu kä zäi ci nei” ci ne m'thein gui ci. 26 Cun ci khätah ang düihpüi gui naw, cäicat ne ngai khit u netah, “Cun ah a kiak ung a u naw hun phiawn nak gah hlawt khai ang? ci ne ami mät gui ng'ceng'cäk ci gui. 27 Bawipa Jesuh naw ngami cu kheing ne teng gui netah, “Cun cu chang naw kä am khüt hlawt ung phi Khanpughi naw m'khüt hlawt ci. Ang tüi avan cu Khanpughi naw m'khüt hning ci nei” ci ne m'thein gui ci. 28 Cun ci khätah Peter naw, “Keimi naw ang tüi avan nawng shüt u netah na hnu ah kami ning läk ci nei” ci ne pyein tu ba ci. 29 Bawipa Jesuh naw, “Kei naw akcang ka pyein cu, kei ah hmawk la Thu Ni ah hmawk ah a im lo, a phäi nau, a pai nau, anupa, a hta nau nawng shüt ciah chang cu; 30 a ghin zah ung shedam nak cu näng ne, a phia ah däm ciah im lo, phäi nau, pai nau, nupa, hta nau gui cu gah ba khai. Cun kawn ah gawk lawk khai ah kho ung phi ang täi ghin nak cu gah khai. 31 Cun ung phi tuhbäi ma lawk ciah chang gui cu hnu lawk khai gui, tuhbäi hnu ciah chang gui cu ma lawk khai gui” ci ne m'thein gui ci. 32 Bawipa Jesuh la ang düihpüi gui cu, Jerusalem ah ami hteh ba lam ah, Bawipa Jesuh cu ma ne hteit ci. Cun ah ami hteh zah ung ang düihpüi gui cu kyikyawk ci gui, a hei law tuk ciah chang gui phi kyikyawk ci gui. Bawipa Jesuh naw ang düihpüi gui cu khü gui netah, a bui awt law vai ah amawng ama gui cu m'thein gui ci. 33 Bawipa Jesuh naw, “Ngai vä mik mi cu Jerusalem ah mi hteit lawk ci. Jerusalem kho ung chang ah Htapa cu, taigüpa gui la thukhän saza gui ah kut ung ap lawk khai gui nei. Ngami naw chang ah Htapa cu sih nak ung tüi u ne, chang khui hei gui-am ap khai gui nei. 34 Chang khui hei gui naw chang ah Htapa cu päipih u ne, ami m'shi awn m'thui khai gui, that khai gui, ngawn khai gui; cun ung phi ak hnüüp thum hnüüp ung sih nak ung kaa tho ba khai nei” ci ne m'thein gui ci. 35 Zebedee ah hta goi James la Johan cu Bawipa Jesuh ah om nak ah law ni netah, “Bawipa, keini naw ka ni ng'zoih hlü api om ci” ci ne pyein ci goi. 36 Bawipa Jesuh naw, “A i ang nani ng'zak hlü” ci ne ng'shi goi ci. 37 Ngani naw, “Bawipa, bämang nak awn mang kiang ung ngo ne na uk law hnüüp ung, keini cu nak eng lam la nak pat lam ah na ngoh sak goi ä” ci ne ng'zoi ci goi. 38 Bawipa Jesuh naw, “Nangni naw a i nani ng'zoih cu kä nani hmat ci, kei ah awk vai ah zaica nak ah khap cu nani aw tu hlawt khai ang? Kei ah tui hnim ah mäih ah nani ng'hnim tu hlawt khai ang? ci ne ng'shi goi ci. 39 Ngani naw, “kani m'khüt khai nei” ci ne pyein ci goi. Bawipa Jesuh naw, “Nangni cu akcang ah kei ah awk vai ah khap cu nani aw tuk khai, Kei ah tui hnim ah mäih tui nani ng'hnim tuk khai, 40 Cun ung phi kei naw k'eng la k'pat ah ngoh nak vai kä ka ning pe goi hning khai. Cun cu Khanpughi naw a pian tham peit gui ah chang ah hmawk ah vah kiak ci” ci ne kiak na gui ci. 41 Cun ah a mawng cu a hei ang düihpüi chang sing gha naw ng'za u netah, ngani ah khan ah m'lung she ci gui. 42 Cun ah kia sei Bawipa Jesuh naw ang düihpüi avan cu khü gui netah, “Chang uk ciah chang gui naw chang ah khan ah ami hlüngtai nak m'dang u ne, ng'vai pi ciah chang gui naw ami m'gäi nak awn bik ci gui. 43 Nangmi läi ung cun ah mäih kä om-en sä. Nangmi ung kaa ng'vai pi hlük ciah chang cu nami van ah ngaih u vai ah a kiak vai nei. 44 Nangmi ung kaa hlüngtai pi hlük ciah chang cu nami van ah chang shäm ah a kiak vai nei. 45 Chang ah Htapa cun phi chang tüitäk khai ah lawk ciah kä kiak ci, chang ah tüihtäk vai la amät ah hnun gui pe ne chang khli hun m'htei khai ah kyum lawk ciah kiak ci” ci ne m'thein gui ci. 46 Bawipa Jesuh la ang düihpüi gui cu Jerikho gawnu ah ami gawk kawn ah, chang khli awn atäng ah a cun ung kaa naw ng'düi ne hteit ba ci gui. Cun ah ami hteh ba nak ah ng'zoi ne ei ciah Timaeus ah hta Bartimaeus cu lam pei ah ana ngok ci. 47 Ani naw Nazaret ah kaa Bawipa Jesuh a gawk law cu ng'za tu netah, “Jesuh Bawi, David ah Htapa, kei cu nam gein ä, ci ne m'lau ci. 48 Chang gui naw, kä m'lau ne a düm ah a om vai ah ng'li ne züi ci gui. Cun ung phi ani cu, “David ah Htapa, kei cu nam gein ä” ci ne m'lau law pi k'täi ci. 49 Bawipa Jesuh cu ng'düi netah, “Cän ah chang, khü ne law püi vä” ci ne kiak na gui ci. Chang gui naw a mik m'dauh-am, “Kä ng'ä ne, ng'düi law ä, Bawipa naw ning khü ci nei” ci ne kiak nak ci gui. 50 Cun ah chang cu a zih ng'vai lim ne phluh shüt netah, zong ne ng'düi law ne, Bawipa Jesuh ah pei ah lawk ci. 51 Bawipa Jesuh naw, “Nang ah phäh ah a i ka ning bi peit vai ang nang zak hlü” ci ne ng'shik ci. A mik m'dauh ciah chang naw, “Bawipa, ka mik nam dei ba sak ä” ci ne pyein ci. 52 Bawipa Jesuh naw, “Hteit ba ä, na zum nak naw na nat nak cu maih sak pyi ci nei” ci ne kiak nak ci. A cun vai-am cun ah chang cu a mik m'dei ba sei, Bawipa Jesuh ah hteh nak ah lam ung a hnu ah läk tuk ci.
1 Bawipa Jesuh la ang düihpüi gui cu Jerusalem mang gaw k'et law u ne, Betfeit la Bethani gawnu pei Olive m'htung ah gawk lawk ci gui. 2 Cun kawn ah Bawipa Jesuh naw ang düihpüi chang sing goi cu, shin ah m'cäi ne lam ma sak goi ci. “Mi hei ma ah om ciah pigaw ung ma ne ana hteit nä, pigaw ah nani luh vai-am a u naw phi kä ang cum nak man ah ng'se hta, gui awn khit ne ami k'pawn cu nani hmuk khai. 3 Gui cu k'phian ne cun ah ng'se hta cu nani law püi vai. Chang naw ‘a i vai ng'se gui nani k'phian ang’ ci ne aning shi goi ung, “Shin ah ng'se cu kami Bawi naw ng'za hlük ci, ang ghit ah ning thak law ba gui vai nei’ ci ne nani pyein vai” ci ne m'cäi goi ci. 4 Ang düihpüi goi cu hteit ni ne, im kawt pei ah lam ung ami k'pawn ah ng'se hta cu hmu ni netah, gui cu k'phian ci goi. 5 Lam ung düi ciah chang am shah gui naw, “Ng'se gui cu a i vai nani k'phian ang” ci ne ng'shi goi ci gui. 6 Ang düihpüi goi naw Bawipa Jesuh ah m'cäi goi ah mäih ah pyein ni khätah, ng'se cu k'phian ne ani hteh püi vai ah pyein ci gui. 7 Ang düihpüi gui naw ng'se hta cu Bawipa Jesuh ah om nak ah law püi u netah, ami suisak gui cu ng'se ah khan ah phah ci gui. 8 Cun kawn ah Bawipa Jesuh cu ng'se ung ng'cum ne hteit ci. Chang gui naw ami zih ng'vai gui cu lam ung ana phah ci gui. Am shah naw sing hnah gui tuh ne lam ung ana phah ci gui. 9 Bawipa Jesuh ah a hnu ah hteit ci gui la ama ah hteit ci gui naw, “Khanpughi cu m'hlüngtai vä, Khanpughi ah ang ming awn kyum lawk ci cu zeikiai nak om sä. 10 Gawk lawk khai ah mipa David Ghanpughang ah uk nak kho cu zeikiai nak om sä, Khanpughi cu m'hlüngtai vä” ci ne m'lau ci gui. 11 Bawipa Jesuh cu Jerusalem mang gaw ah gawk law netah, pum im kyong ah hteit ne apäng k'tä ne teng ci. Cun kawn ah khomü hun law khätah ang düihpüi gui awn Bethani pigaw ah hteit ba ci gui. 12 A ngawi ung Bawipa Jesuh la ang düihpüi gui cu, Bethani ahkaa ami law ba lam ah, ei cawi lawk ci. 13 Cun zah ung a hnah khlum sei ghing ciah baangging cu hmu netah, m'theih hman khai ci ne, a pei ah hteh shi ci. Am theih khin ah kä kia sei a ghing cu a hnah gui bäng om ci. 14 Cun ah kia khätah Bawipa Jesuh naw, “A ngawi ah phi nang ah m'theih a u naw kä ei-en sä” ci ne k'phyun ne taam shüt ci. Cun ah a pyein cu ang düihpüi gui naw ng'zak ci gui. 15 Bawipa Jesuh la ang düihpüi gui cu Jerusalem mang gaw ah gawk u netah, Bawipa Jesuh cu pum im ah hteit ne, pum im kyong ah sumlei ci gui cu k'täm gui ci. Ngui m'thawng ci gui ah tawnglang la müm kha zoi ci gui ah ngoh nak gui cu lat pe gui ci. 16 Pum im sun pah ne khawh cham, a u naw phi kä am kawn m'hteh ba vai ah phi pyein ci. 17 Cun kawn ah Bawipa Jesuh naw, “Cacim ung Khanpughi naw, ‘Kei ah pum im cu kho nüng ung, chang päng ah taigü nak ah mang im ah sui vai’ ciah om ci. Cun ung phi nangmi naw m'guk ei ah ng'thuh nak ah im ah nami piang pyi ci nei” ci ne chang gui cu m'cäi ne m'thein gui ci. 18 Taigü ng'vai gui la thukhän saza gui naw, a cun a ci cu ng'za u netah, Bawipa Jesuh ngawn nak vai ah lam cu shui ci gui. Chang gui naw cun ah am theithang gui cu cäicat ne ngai khit u netah Bawipa Jesuh cu kyihkyawk ci gui. 19 Khomü hun k'awi law sei Bawipa Jesuh la ang düihpüi gui cu a hei lam ah hteit ba ci gui. 20 A ngawi ung kho ngawi hta ah Bawipa Jesuh la ang düihpüi gui cu lam ami hteh zah ung baangghing cu hmu ba ci gui. Cun ah baangghing cu a phyaa ah khüt khai ah ng'zai ne chawng ci. 21 Peter naw shüm law ba netah, ‘Bawipa, Teng ä, nang naw na taam shüt ah baangghing cu ng'zai ne chawng pyi ci nei” ci ne pyein ci. 22 Bawipa Jesuh naw, “Khanpughi cu zum vä, 23 Kei naw akcang ka pyein cu, kam lung kyong ah kä ngaih gep nak kä om ciah kang thu cu, akcang ah bä khai, ciah zum ciah chang naw, ‘Shin ah m'htung cu ng'nawn ne tuinu ung lut sä’ ci ne a pyein ung, a pyein ah mäih ah kiak khai nei. 24 Cun ah kia sei kei naw ka ning m'thein gui cu, ’ Taigü ne kami ng'zoih cu, kami gah ci, ciah nami zum vai, cun ung nami ng'zoih phung nami gah khai. 25 Nangmi cu ng'düi law ne nami taigü ung kat nak gui nüng nami m'gein vai. Cun ung khankho ah om ciah nami pa naw nami kat nakgui cu ning m'gein gui khai. 26 (Nangmi naw chang ah kat nak gui cu kä nami m'gein ung, khankho ah om ciah nami pa naw, nami kat nak cu kä ning m'gein gui khai)” ci ne ang düihpüi gui cu m'thein gui ci. 27 Bawipa Jesuh la ang düihpüi gui cu Jerusalem mang gaw ah gawk law ba u netah, Bawipa Jesuh cu pum im lam ah a hteh zah ung, taigüpa gui, thukhän saza gui la chang ng'vai gui cu Bawipa Jesuh ah pei ah law u netah, 28 “Nang naw shin ah amawng ama gui cu a i huham awn ang na bi? Cun ah huham cu a u naw ang a ning peit? ci ne ng'shik ci gui. 29 Bawipa Jesuh naw, “Kei naw tumat ka ning shi gui khai, cun nami pyein kawn ah, shin ah amawng ama gui cu, a i huham awn ka bi ah ka ning m'thein gui khai. 30 Johan naw tuihnim nak a peit cu, Khanpughi ah huham awn ang a peit, chang ah huham awn ang a peit, nami pyein vai” ci ne kiak na gui ci. 31 Ngami naw ami mät ng'teng tu u netah, “A i mi cik khai ang, Khanpughi ah huham awn mi ci ah a kiak ung, a i ah kia sei Johan kä nami zum ang? ci ne nang shi ba gui khai. 32 chang ah huham awn ci ne mi pyein khai ang? ci ne ngahtüh khit ci gui. (Chang gui naw Johan cu Profet ah k'bäi ne zum ci gui ah kia sei, chang gui cu ngami naw kyih ci gui). 33 Cun ah kia sei ngami naw, “Kä kami hmat ci nei” ci ne pyein ci gui. Cun ah kia sei Bawipa Jesuh naw, “a cun ah mäih ah kei naw phi, shin ah amawng ama gui cu a i huham awn ka bi ah, kä ka ning m'thein gui khai” ci ne kiak na gui ci.
1 Cun kawn ah Bawipa Jesuh naw ngami-am m'tumtäng ne am thein gui cu, “Chang tumat naw sapyit lo cu bi ne, geit ne ng'vong ci. Sapyit m'theih m'seh nak vai ah khui phi shawk ne, tängkyäng phi co ci. Cun kawn ah ani cu a sapyit lo khah gui ne bi sak gui netah, a kho hei zung ah hteit ci. 2 sapyit bih nak vai ah a khin gawk lawk khätah, ak chang shäm tumat cu lo ng'vat ne bik ci gui ah tüi ne, k'phlam cu ng'zoih sak ci. 3 Lo ng'vat ne bik ci gui naw cun ah ak chang tüih cu pha ne that u netah a i kä peit ah tüi ba ci gui. 4 Kho mah naw ak chang shäm tumat cu tüi ba mä ci. Lo ng'vat ci gui naw alu ung that pawk pawk ne ng'a khai ah cik ci gui. 5 Kho mah naw a hei ak chang shäm tumat tüi ba mä sei lo ng'vat ci gui naw cun ah chang shäm cu ngawn ci gui. A cun ah mäih ah a hei ak chang shäm am shah gui cun phi am shah that ne, am shah ngawn ci gui. 6 Kho mah ung ahta pami tumat om ci. Cun ah kia sei, ‘ka hta läi cu kyih aa khai gui’ ci ne ak hnu ah a hta pami cu tüi ci. 7 Cun ung phi ngami naw, “Shin cu kho mah ah pakhui m'düng ciah kiak ci, law vä, ani cu mi ngawn khai nei, cun ung vah ani ah khomdek mik mi naw mi khäm khai” ci ne ng'ge u netah; 8 Ani cu pha ne ngawn u ne, ng'vong pung ah ghawt ci gui. 9 Cun ah a kiak ung kho mah naw a i cha ah bi bik khai ang? ani cu law ne lo ng'vat ci gui ngawn gui zawp netah, cun ah lo cu a hei gui-am bi sak gui khai nei. 10 Cacim ung om ci cu nami phat man khai nei; ‘Lung im co ci gui naw, ami nawng düt ah lung cu, Ak küikyang pibäih ah lungtung ah kia lawk ci nei. 11 Shin cu Khanpughi ah bi bi ah kiak ci, Mik mi ah ma ah cäicat aih vai kiak ci nei” ci ne kiak na gui ci. 12 Bawipa Jesuh naw ngami a pyein nak gui ah am tumtäng cu Jew chang gui ah ami ng'vai gui naw hmat u netah, Bawipa Jesuh cu phak khai gui ah k'tha nak ci gui. Cun ung phi chang khli cu kyih u netah a hei lam ah hteit ba ci gui. 13 Cun kawn ah pharisee am shah gui la Herod ah pati chang am shah gui cu Bawipa Jesuh ah tüi law u ne, phawtcam nak ah ng'shi sak gui ci gui. 14 Cun ah chang gui cu Bawipa Jesuh ah law u netah, “Bawipa, nang naw ng'düng nak awn thu na pyein ci, chang ah ngaih kä nam tung ci, chang ah hmai kä na teng ci, Khanpughi ah ang zak hlü ah ng'düng ciah nam theithang nak cu kami hmat ci nei. Cun ah kia sei Roman ghangpughang-am k'phlam peit vai ang, kä peit vai ang, keimi naw mä kami pek khai ang kä kami pek khai ang? ci ne phawtcam nak awn ng'shik ci gui. 15 Bawipa Jesuh naw ngami ah phawtcam nak cu hmat netah, “Nang mi naw a i ah kia sei kei ka shetkat vai ah nami ng'zak hlü ang? Tangka tumat ka teng vai law püi vä” ci ne kiak na gui ci. 16 Law püi u khätah Bawipa Jesuh naw, “Shin ah gup, shin ah ming cu a u ah gup, a u ah ming ah ang a kiak? ci ne ng'shi gui ci. Ngami naw, “Ghanpughang ah gup, ghangpughang ah ming ah kiak ci nei” ci ne pyein ci gui. 17 Bawipa Jesuh naw, “Ghanpughang ah kaa cu ghangpughang-am ap ba vä, Khanpughi ah kaa cu Khanpughi-am ap ba vä” ci ne kiak na gui khätah ang htei ah cäicat ci gui. 18 Sih nak ung kaa thawh ba nak kä om khai cik ci gui ah Sadducee am shah gui cu, Bawipa Jesuh ah law u netah; 19 “Bawipa, 'chang tumat cu kä hta phah ne a sih ah a kiak ung akchu cu a phäi nau naw akchu nak tu ba vai. Sik ciah pakhui cu khäm tu ba ciah ahta anau naw m'düng khai’ ci ne Moses naw nam thein gui shüt ci. 20 Hngü-ät ung ng'phäi nau gui chang sing chih om ci gui. Ami phäi ang vaipi cu chumah netah kä hta pha ne sik ci. 21 Akchu cu a nau ang vai tuba naw khäm tu ba netah, ani phi kä hta pha ne sik ci. A cun ah mäih ah anau ba tumat cun phi a cun ah a phäi ah chu khäm tu ba netah kä hta pha ne sih ba mä ci. 22 A cun ah mäih ah ang phäi nau gui chang sing chih cu ami van naw cun ah hnumi cu chu na u netah, ami van kä hta ne sih zawp ci gui. 23 Ak hnu ah cun ah hnumi phi sik ci. Ang phäi nau gui chang sing chih ami van naw cun ah hnumi cu chu nak ci gui kia sei, sih nak ung kaa thawh ba nak ah kho hnüüp ung, cun ah hnumi cu a u ah chu ah kiak khai ang? ci ne ng'shi ci gui. 24 Bawipa Jesuh naw, “Nangmi cu cacim phi kä nami hmat ci, Khanpughi ah hlüngtai nak phi kä nami hmat ci, cun ah kia ne nangmi cu lam nami hma ci. 25 Chang gui cu sih nak ung kaa ami thawh law ba hnüüp ung kä chu cei mah ba khai gui, khankho ah khan chang gui ah mäih ah kiak khai gui. 26 Sih nak ung kaa thawh nak ba ah mawng Moses ah cacim cu kä nami phat man ne ma? Cun ah cacim, mei ah däi ciah cap-plum ah amawng ung, Khanpughi naw, “Kei cu Abraham ah nak Khanpughi, Isak ah nak Khanpughi, Jakop ah nak Khanpughi nei” ci ne Moses ah ma ah thu pyein ci. 27 Ani cu sik ci gui ah Khanpughi ah kä kiak ci, ghing ci gui ah Khanpughi ah kiak ci, nangmi cu akcang ah cheishoh nak ung nami hteit pyi ci nei” ci ne kiak na gui ci. 28 Cun ah Bawipa Jesuh la Sadducee gui ami ng'thu zah ung, ami pei ah thukhän saza tumat om tuk ci. Ani naw Sadducee gui-am Bawipa Jesuh naw akni ah m'hlan ne am thein gui cu ng'za netah, Bawipa Jesuh ah pei ah law ne, “Thukhän gui nüng ung ak küikyang pi cu a i ang? ci ne ng'shik ci. 29 Bawipa Jesuh naw, “Israel chang gui, ngai vä, mik mi ah Bawipa Khanpughi cu tumat bäng nak ciah Khanpughi ah kiak ci. 30 Ak küikyang pibäih ah thukhän cu, ‘Na Bawipa nak Khanpüghi cu, nam lung kyong avan, na hmuhmat nak avan, na ngaih tüh nak avan la nak thagui avan awn nam hni vai’ ciah kiak ci. 31 Ak hnih nak ah ak küikyang pibäih ah thukhän cu, na mät ah paw chang cu na mät awn m'täng ne nam hni vai' ciah kiak ci. Shin ah thukhän goi ah kawn ah ahei thukhän kä om ba ci” ci ne m'thein gui ci. 32 Cun ah thukhän saza naw, “Bawipa, nang ah thu pyein cu ang htei ah bä aih ci nei, Khanpughi cu tumat bäng om ci, Khanpughi ah kawn ah a hei kä om ba ci nei. 33 Khanpughi cu m'lung kyong avan, hmuhmat nak avan la k'tha gui avan nawn m'hni vai, mät ah paw chang cu mät awn m'täng ne m'hni vai' ciah thukhän hnih läk cu Khanpughi-am ak ghing ngawn ne m'khih ne khawihnah nak la Khanpughi-am a hei gui peit nak nüng ah tah bä pi ci nei” ci ne pyein tu ba ci. 34 Ani naw cun ah hmuhmat nak awn a pyein cu Bawipa Jesuh naw hmat netah, “Nang cu Khanpughi ah kho awn kä nani ng'shawng ba ci nei” ci ne kiak nak ci. Cun kawn ah a u naw phi Bawipa Jesuh cu kä ng'shi ba zäi ci gui. 35 Bawipa Jesuh naw pum im ah am theithang gui zah ung, ani naw ang shi gui cu, ‘Messiah cu David ah hta ng'shong ung kaa ah kiak khai’ ci ne, a i hawk cha ah thukhän saza gui naw ami pyein hning ang? 36 Mumcha Theing naw David ang thu m'sak cu; ‘Khanpughi naw ka Bawipa-am, Nang ah na ga gui cu, na kho pha kaa ah, Kä ka gawk sak pha ah chuih, Kei ah kak pat lam ah na ngoh vai nei’ ci ne kiak nak ci” ciah kiak ci. 37 Shin ung David amät naw Messiah-am Bawipa ci ne khü ciah kia sei, a i cha ah Messiah cu David ah hta ng'shon ah kia hning khai ang? ci ne m'theithang gui sei chang gui naw zeikiai ne ngai zak ci gui. 38 Cun ah am theithang gui zah ung Bawipa Jesuh naw, “Thukhän saza gui cu nami geing nak gui vai, ngami cu suinu sui ne, chang ah ng'shei ne hteithton hlük ci gui. Sumlei hmun ung phi chang naw ak chang m'sui gui vai ng'za hlük ci gui. 39 Pum im kyong ah phi ng'khoikhei hlük ci gui, ng'bum law nak ung phi ani nak pibäih ung ngo hlük ci gui, 40 Hmeinu gui ah khawh cham gui gut u netah, chang naw ang ngaih ung ani vai düt ah akshonu taigü ci gui. Cun ah kia sei ngami ah khan ah Khanpughi naw am kat nak gui cu khak pibäih khai” ci ne kiak na gui ci. 41 Bawipa Jesuh cu pum im kyong ah khawh ami peit nak ah m'küm pei ah ngoh netah, cun ah m'küm ung chang gui naw ami peit ah ngui ami ghawn law cu teng gui ci. Bühmang ciah chang gui naw ngui akda ghawn ne pek ci gui. 42 Ghawi-pyam ciah hmeinu tumat cun phi law tu ne, pia-gha phu nak khai ah ngui pia goi cu zuk ghawn tuk ci. 43 Cun kawn ah Bawipa Jesuh naw, ang düihpüi gui khü gui netah, “Shin ah pyamtham ciah hmeinu naw, pum im ah peit nak ah m'küm ung ghawn ne pek ci gui nüng ah da pi sei pek ci nei’ ciah akcang ah ka ning m'thein gui ci nei. 44 Chang hei gui cu ami ei-mang ah k'pawih ami ngui pek ci gui, cun ung phi shin ah hmeinu naw, am hu awi ne bi ne a gah, avan pek ci nei” ci ne m'thein gui ci.
1 Bawipa Jesuh cu pum im kyong ah kaa a luh law ba zah ung ang düihpüi tumat naw, “Bawipa, teng tuä, lung nu gui phi däm ne, im nu phi chün aih ci nei” ci ne pyein ci. 2 Bawipa Jesuh naw, “Shin ah chün aih ciah im nu cu tuhbäi nang naw na hmuk ci. Shin ah im ung kaa lung gui cu avan she ne ng'gäi zawp khai, lung tumat phi amät ah om nak ung kä om ba khai” ci ne pyein ci. 3 Bawipa Jesuh cu Olive khomhtung ah pum im lam ah va mang ne amät a ngoh zah ung, 4 Peter, James, Johan la Andru ni cu a pei ah law u netah, “Bawipa, nang naw na pyein ah amawng gui cu a i zah ung küm lawk khai ang? Cun ah amawng ama gui a küm law zah ung a i gui dang lawk khai ang? Nam thei gui ä” ci ne ng'shik ci gui. 5 Bawipa Jesuh naw, “Chang naw kä a ning m'hleei m'hlak-en gui vai ah nami ngaih nak vai. 6 Chang akda cu kei ah mäih ah ng'hlawk ne lawk khai gui. Ngami naw ami mät cu Messiah ah pyein u ne chang khli cu m'hleei m'hlak khai gui. 7 Nangmi naw a shou nak, ang et nak ung ng'tuk nak ah mawng nami ng'zak ung kä nami kyih kyawk vai, Cun gui cu akcang ah küm khai, cun ung phi kho ah khüt nak vai cu kä gawk law phak ci. 8 Chang pakhui tumat la tumat, kho päng tumat la tumat ng'tuk bi nak om khai. A kho pääng ung shihpi thüng khai, ei awk vai maih ne kho zo khai. Cun gui cu hta lawk khai naw nau poi am neh law ma ah mäih ah ma lawk khai ah dukdeiu nak ah kiak khai. 9 Nangmi cu ngaih na ne nami om vai. Chang gui naw nangmi cu zung ah m'kawt ung ning ap gui khai gui. Pum im ah k'caw ah ning that gui khai gui. Nangmi cu kei ah hmawk ah bawimang gui la ghanpughang gui ah ma ah gawk u ne, Thu Ni pyein ne nami ng'shä khai. 10 Kho kä a khüt pha ung nangmi naw Thu Ni cu shäu ne chang pakhui avan-am nami m'thein khai. 11 Nangmi cu ning pha gui u ne zung ah ami ning ap gui ah a kiak ung, a i cha ng'thu vai ang, ci ne ng'dawt ne kä nami ng'ä vai. A cun ung nami m'lung kyong ah dang lawk ci cu nami pyein vai. Cun ah ng'thu gui cu nangmi ah ng'thu ah kä kia ne, Mumcha Theing ah ng'thu ah kiak khai. 12 Chang gui cu ami mät ng'phäi nau goi sih nak vai ah ng'ap tuk khai gui. Apa naw ahta cu a sih vai ah ap khai, ami hta gui naw phi ami nupa cu ng'küknet püi u ne, ami sih vai ah ap khai gui. 13 Kei ah hmawk ah chang van naw nangmi cu ning gen gui khai, cun ung phi akhnu ah khüt sei düng ciah chang cu hun nak gah khai nei. 14 “Tükyai shemshai ci cu kä om nak khin ung om sei nami hmuk khai. (Shin ah amawng cu ca phat ci naw ngai thei sä). Cun nami hmuh law ung Judea kho ung om ciah chang gui cu khomhtung ah dawng u sä. 15 Im m'kiung khan ah om ciah chang cu, im kyong ah lut ba ne, a i baw la ba khai ah kä a zu kyum men ba cang vai. 16 Lai ah om ciah chang phi zih sui la ba khai ah im ah kä hteit-en ba sä. 17 Cu hnüüp ung käu mah ci gui la htazüt shäm ciah chang gui cu zaica aih khai gui nei. 18 Cun ah akhin cu khosik kho ah kä a kiak-en vai ah nami taigü vai nei. 19 Khanpughi naw khomdek a tüi pian ung tün ne, a i zah ung phi shin ah mäih zaica nak cu, a u naw kä awt man ci, ngawi ah phi a u naw kä bui awt ba khai. 20 Khanpughi naw cun ah akhin cu kä a tawi sak ah a kiak läi ung a u naw sih nak cu kä phiawn ah hlawt khai nei. Cun ung phi, Khanpughi naw aghü pyi ah chang gui ah hmawk ah cun ah khin cu tawi sak khai nei. 21 “Cun ah khin ung chang tumat mat naw, ‘Teng law tu vä, shi ah Messiah om ci nei, cä ah Messiah om ci nei, ’ ci ne a pyein ung kä nami zum-en vai. 22 Messiah ah ng'hlawk ci gui la profet ah ng'hlawk ci gui cu, akda ng'dang lawk khai gui nei. Ngami naw ami näng ah akiak ung Khanpughi naw a ghü ah chang gui hngaw m'hleei m'hlak nak gui hning vai ah cäicat nak gui vai la cäi aih nak gui vai cu m'dang khai gui nei. 23 Nangmi cu ngaih na ne nami om vai, shin ah amawng gui kä ang dang law pha ung ng'dawt ne ka ning m'thein gui nei. 24 Zaica nak gui a gawk law kawn ah khohni cu mü ne hmüp khai, Cha phi kä vai ba khai. 25 Aisi gui phi khankho ah kaa kiawi ne kia law zawp khai gui. Khankho mik ung hlüngtai ci gui ah hmun-lam gui phi ng'phleng zawp khai gui. 26 Cun kawn ah khomei gui ah ng'lung ah hlüngtai nak la bämang nak awn kyum lawk ciah chang ah Htapa cu nami hmuk khai. 27 Cun kawn ah chang ah Htapa naw, khankho chang gui cu tüi gui ne, khomdek khan kho cawi ung kaa naw, khankho, kho cawi ung khüt khai ah, a ghü pyi ah chang gui cu, khäm ne k'bum sak gui khai . 28 “Baang ghing ung kaa theithang vai tumat cu ka ning m'thei gui khai. Cun ah a ghing ung ang ban tawt ba ne a hnah am khek law ba ung kho cha lawk khai ah nami hmat ci. 29 A cun ah mäih ah ka pyein gui ah amawng ama gui a küm law ung, chang ah Htapa cu nangmi ah pei ah m'kawt ung gawk law pyi ciah nami hmat vai. 30 Kei naw akcang ka pyein cu, shin ah amawng ama gui kä a küm pha ung, tuhbäi chü chang gui kä si zawp phak khai gui nei, 31 Khankho la khomdek a maih ung phi kei ah ng'thu cu kä maih khai nei. 32 “Cun ung phi cun ah akhin cu a u naw kä hmat ci. Khankho chang naw phi kä hmat ci, Ahtapa naw phi kä hmat ci. 33 Pa Khanpughi amät bäng naw vah hmat ci. Cun ah akhin cu a i zah ung gawk lawk khai ah kä nami mi hmat ci kia sei, ngaih nah ne nami ngäng vai nei, ci m'gang ne nami om vai nei. 34 Cun ah mawng cu shin ah m'tumtäng nak awn täng ci; Chang tumat cu a kho hei ah hteit vai netah, a im cu ak chang shäm gui-am ap gui shüt ci. Ngami-am ami bi phäh phäh vai ah bi cu phäh m'sak gui ne ap gui shüt ci. M'kawt ngäng ci-am phi geing na ne a ngäng vai ah m'cäi shüt ci. 35 Nangmi naw imah a i zah ung a gawk law ba vai cu kä nami hmat ci, mü lam ung phi gawk law hning ci, kho cawih ding ah phi gawk law hning ci, ai khong k'htük ung phi gawk law hning ci, kho thaih hta ung phi gawk law hning ci. 36 Cun ah kia sei imah a gawk law ghet ung, ip uk ci sei kä a ning hmuh en gui vai ah ngaih nah ne nami ngäng vai nei. 37 Nangmi ka ning m'cäi gui ah mäih ah chang avan kam cäi ci nei, ngaih na ne ngäng vä” ci ne kiak na gui ci.
1 Phiawn nak pawi la k'caw kä shum ne m'htut den nak ah pawi a gawk law nak vai hnüüp goi m'hni ba khätah, taigüpa gui la thukhän saza gui cu Bawipa Jesuh adüm ah pha ne ngawn nak vai ah lam shui ci gui. 2 Ngami naw, “Chang gu thüngphyong ne ami kiak law vai ah ng'ä ah kia sei pawi ah ak kyong ung kä nami pha vai” ci ne m'cäi gui ci gui. 3 Bawipa Jesuh cu Bethani pigaw ah khei-lei ung gaw man-te ciah Simon ah im ah kai ne om tuk ci. Ani ei a ei tu zah ung hnumi hta tumat naw, ang htei ah a phu küi ciah Naduh tui ng'ui cu k'doulung tui-um ung law püi netah, a cun ah tui-um cu shu zauh ne, cun ah tui ng'ui awn Bawipa Jesuh ah lu cu shawi ci. 4 Chang am shah gui cu m'lungshe u ne, “a i ah kia sei tui ng'ui cu akholä ah a plawh-m'htah ang? 5 Shin ah tui ng'ui cu ngui pit thum ah zoi ne, ghawi pyam ci gui-am peit gui vai ah kha te ci nei” ci ne ami mät gui ng'htau u ne, cun ah hnumi cu m'kat ci gui. 6 Bawipa Jesuh naw, “Cän ah hnumi naw amät ah m'hni ah bi bi sä, a i ah kia sei nami tüihtok ang? Ani ah bi cu kei ah phäh ah ang htei ah nik ci nei. 7 Ghawi pyam ciah chang gui cu nangmi awn ang täi ah atäng ah nami om ci. Nangmi naw nami ng'zak hlü päng ung nami m'htei gui hning ci. Kei läi cu nangmi awn ang täi ah kä ka om khai. 8 Shin ah hnumi naw amät ah m'khüt nak bäät awn kei cu nam htei ci nei. Kei ah ka gook cu m'cim vai ah ng'dawt ne tui ng'ui awn shawi pyi ci nei. 9 Kei naw akcang ka pyein cu, Thu Ni shäu nak ah kho nüng ah shin ah hnumi cu chang naw a shüm vai ah, ani ah bilawh cu pyein sak khai gui nei” ci ne kiak na gui ci. 10 Ang düihpüi gha-lei-goi ung kaa ah kiak ciah Judas Iskariot cu Bawipa Jesuh ami kut ung ap gui khai ah taigüpa gui ah om nak ah hteit ci. 11 Cun ah chang gui naw Judas a law ah mawng cu ng'za u netah, ang htei ah zeikiai u ne, ani-am ngui pek khai gui ah ng'thu khän ci gui. Cun ah kia sei Judas naw, Bawipa Jesuh cu ga gui ah kut ung a ap nak gui vai ah lam cu ngaih tüh ne shui ci. Gui Ci 12 Phiawn nak Htome hta cu ngawn ne k'caw kä shum ah m'htut den nak ah pawi tün htük hnüüp ung, ang düihpüi gui naw, Bawipa Jesuh-am, “Nang Bawipa ah hmawk ah phiawn nak mü-ei cu a hawi ang kami pian kaw? ci ne ng'shik ci gui. 13 Bawipa Jesuh naw ang düihpüi pahnih-am, “Nangni pigaw kyong ah nami hteh vai, a cu ah tui khlüng kawt ne ana lawk ciah chang tumat cu nami hmuk khai, a cun ah chang cu ahnu ah nami läk vai. 14 Ani ah luh nak ba ah im ah hteit tu ni netah, im-ah-am, “Bawipa naw, ‘Kei la kang düihpüi gui naw phiawn nak mü-ei ei nak vai ah kyong khui a hawi ang? ci ne nang ng'shi sak gui ci’ ci ne nani pyein vai 15 Ani naw a khan kyong khui cu ning mihmuh goi khai, a cun ung apäng küm be khai nei, ci ne m'cäi goi ci. 16 Ang düihpüi goi pahnih cu pigaw kyong ah hteit ni ne, Bawipa Jesuh naw am cäi goi ah mäih aè apäng cu hmu ni netah, phiawn nak mü-ei ei vai cu piang m'tham ci goi. 17 Khomü hun law khätah Bawipa Jesuh cu ang düihpüi gha-lei-goi awn atäng ah, gawk lawk ci gui. 18 Ngami cu atäng ah vun vai ne ami ei zah ung Bawipa Jesuh naw, “Kei naw akcang ka pyein cu, tuhbäi atäng ah vun ne mi ei ciah nangmi ung kaa chang tumat naw, kei cu ga ah kut ung na ap khai nei” ci ne kiak na gui ci. 19 Ang düihpüi gui cu ami m'lung thüi zawp khätah, “Cun cu kei na na pyein ah kä kiak ci ang? ci ne ami van naw ng'shi lawk ci gui. 20 Bawipa Jesuh naw, “Cun ah chang cu kang düihpüi gha-lei-goi ung kaa ah kiak ci. Kei ah ka ei nak ah k'bei ung phyom ne ei tuk ciah kiak ci. 21 Cacim ung om ciah mäih ah chang ah Htapa cu sik khai, cun ung phi chang ah Htapa ap ciah chang cu ang htei ah thüi sei nak om ci. A ni cu kä ang tüi tu ge vai sü ung ani ah hmawk ah bä pi khai süte” ci ne pyein ci. 22 Bawipa Jesuh la ang düihpüi gui cu mü-ei ami ei zah ung, Bawipa Jesuh naw m'htut cu la netah Khanpughi m'hlüngtai ne taigü ci. Cun kawn ah m'htut cu k'bou ne, “Shin ah m'htut cu kei ah ka pumsa ah kiak ci, la ne nami ei vai” ci ne ang düihpüi gui-am tei gui ci. 23 Cun kawn ah khap cun phi la ne Khanpughi m'hlüngtai netah, ang düihpüi gui-am tei gui sei, ngami ami van naw awk ci gui. 24 Bawipa Jesuh naw, “Shin ah khap cu Chang akda ah hmawk ah kei, naw ka huk ah ka si, Khanpughi naw ang thukhän am hnüt nak ah ka si, ah kiak ci. 25 Kei naw ka ning m'thein gui cu, Khanpughi ah kho ung sapyit tui awk nak ah kho hnüüp kä a gawk law pha ah chuih, cän kawn ah kei cu sapyit tui kä ka aw tu ba khai” ci ne ang düihpüi gui-am kiak na gui ci. 26 Cun kawn ah Bawipa Jesuh la ang düihpüi gui cu, m'hlüngtai nak ng'äi m'cu u ne Olive khomhtung lam ah hteit ci gui. ci 27 Bawipa Jesuh naw, “Nangmi nami van cu kei na nawng ne nami dawng zawp khai nei, a i ah kia sei ci ung cacim ung, ‘Khanpughi naw hto shäm cu ngawn khätah, hto gui cu püi piang zawp khai gui nei” ciah om ci. 28 Cun ung phi kei cu sih nak ung kaa tho ba ne, Kalile kho ah ma ne ka na hteit khai nei, ci ne ang düihpüghi gui-am kiak na gui ci. 29 Peter naw, “A hei gui ami van naw ami ning nawng ung phi, kei naw kä ka ning nawng khai nei” ci ne pyein ci. 30 Bawipa Jesuh naw Peter-am, “Kei naw akcang ka pyein cu, tuhmü ai kä a khon pha ung, nang naw kei cu, ‘ani kä ka hmat ci nei’ ci ne na na mak khai nei” ci ne kiak nak ci. 31 Cun ung phi Peter naw, “Kei cu nang Bawipa awn atäng ah ka sih tu vai ung phi, nang kä ka ning hmat ciah kyein ne, kä ka ning mak khai nei” ci ne ak thuuk ah pyein ci. A hei ang düihpüi gui cun phi a cun ah mäih ah pyein tu zawp ci gui. 32 Bawipa Jesuh la ang düihpüi gui cu, Ketsemane kho hmun ah gawk law u netah, Bawipa Jesuh naw, “Kei ka taigü zah ung shin ung ana ngo vä” ci ne m'cäi gui ci. 33 Cun kawn ah Peter, James la Johan ni gui cu, a hteh nak ah khah püi gui ci. Bawipa Jesuh cu ang htei ah zaica ng'ä ng'ai netah, 34 “Kei cu kam lung kyong na aih khai ah ka zaica ci. Nangmi naw shin ung ngaih na ne nami na gin vai nei” ci ne ang düihpüi thum gui cu m'cäi gui shüt ci. 35 Bawipa Jesuh cu cun ung kaa api vang nawn ne, m'dek ung m'khukdong netah, 36 “Kapa Khanpughi, nang cu ang täi avan nam khüt hning ci kia sei, shin ah zaica nak ah khap cu na phiawn ah sak ä. Cun ung phi kei ah ng'zak hlü ah kä kia-en ne, na mät ah ng'zak hlü ah kia sä” ci ne ani naw a bui awt law vai ah zaica nak cu, bä khai a kiak ung a phiawn nak hning vai ah taigü ci. 37 Cun kawn ah Bawipa Jesuh cu ng'hlat law ba netah, ang düihpüi gui thum cu ip u sei hmu gui ci. Cun ah kia sei Bawipa Jesuh naw, Peter-am, “Simon, na ip ci ma? Nazi khat hta bäng ah kyong hngaw ung kä ih ah kä na om hlawt ci ma? ci ne kiak nak ci. 38 Cun kawn ah Bawipa Jesuh naw, “Nangmi naw tüihtok nak nami phiawn nak vai ah taigü ne ana ging vä, mumcha naw ng'za hlü sei phi, pumsa thagui kä om ci nei” ci ne kiak na gui ci. 39 Cun kawn ah Bawipa Jesuh cu hteit ba ne a cun ah mäih ah taigü ba mä ci. 40 Taigü zawp ne law ba sei ang düihpüi thum gui cu, a cun bä ah ana ip ba u sei hmu gui ci. Ngami cu käm dei law hlawt ne ngam u netah, Bawipa Jesuh ah ma ah a i ami pyein vai kä hmat ci gui. 41 Bawipa Jesuh cu ak thum vei nak ah taigü ne law ba netah, “Nangmi cu tuhgüt ip ne, ng'te ne, nami om ci ma? Bä khai nei, akhin gawk lawk ci nei, chang ah Htapa cu chang she gui ah kut ung ap lawk khai gui nei. 42 Law vä, mi hteit kaw, ga ah kut ung kei na ap khai ah chang cu gawk law pyi ci nei” ci ne kiak na gui ci. 43 Cun ah Bawipa Jesuh naw ng'thu a pyein zah ung ang düihpüi chang gha-lei-goi ung kaa Judas cu gawk lawk ci. Ani awn atäng ah khim ni, htung tawn ni kawt ci gui ah, chang akda cu law tuk ci gui. Cun gui cu taigü pa gui, thukhän saza gui la Jew chang vai gui ah tüih law gui cu ah kiak ci. 44 Bawipa Jesuh cu ga ah kut ung ap khai ah chang naw, “Kei naw kang ui ah chang cu Jesuh ah kiak ci nei. Ani cu pha netah ngäng ne shäm ne hteh püi vä” ci ne ngami cu a nüt gui shüt ah kiak ci. 45 Judas cu a gawk law vai-am Bawipa Jesuh ah pei ah law netah, “Ka Bawipa, ci ne Bawipa Jesuh cu ng'ui ci. 46 A cun vai-am chang gui naw Bawipa Jesuh cu pha ne k'pang ci gui. 47 Cun zah ung a pei ah ng'düi ciah chang tumat naw, ak khim phawnç ne taigüpa ah ak chang shäm cu tuh sei, ak hnga vang täng hlang ci. 48 Bawipa Jesuh naw, “Nangmi cu m'guk ei pha ah mäih ah kei nami na phak khai ah khim la htung tawn gui khawt ne nami lawk ci ma? 49 Kei cu ak hnüüp tä sei nami ma ge ung pum im ah m'theithang gui ne ka om ci. Cun zah ung nangmi naw kä nami na phak ci. Cun ung phi cacim cu akcang ah küm khai nei” ci ne kiak na gui ci. 50 Cun zah ung ang düihpüi gui cu Bawipa Jesuh nawng shüt ne püi ne dawng zawp ci gui. 51 Zih lang hta ng'vai ciah ak hmaw chang tumat cu Bawipa Jesuh ah hnu ah läk lawk ci. Chang gui naw ani cu pha hlü u khätah, 52 ani cu a zih ng'vai nawng shüt ne ak plui ah dawng ne maih ci. 53 Ngami naw Bawipa Jesuh cu Taigütung ah im ah hteh püi ci gui. Taigüpa gui, Jew chang ng'vai gui la thukhän saza gui cu a cun ah im ah ng'cut lawk ci gui. 54 Peter cu ng'shawng pipi ne taigütung ah im cham kyong ah khüt ne, Bawipa Jesuh cu läk lawk ci. Ani cu taigütung ah a gakap gui awn atäng ah mei awm ne ngo tuk ci. 55 Taigüpa gui la kawngsi zung bawi gui naw Bawipa Jesuh ngawn nak hning ah kat nak saksi cu k'tha na ne shui ne phi kä hmuk ci gui. 56 Acun ah mawng ung chang akda naw ami hleei pyein ne saksi ci gui. Cun ung phi ngami ah saksi gui cu a hei ah kiak ci. 57 Chang am shah gui naw ng'düi law ne huttaap ne ng'thu ami pyein cu, 58 “Chang ah kut awn cawh ah shin ah pum im cu kei naw ka plawh khai, cun kawn ak hnüüp thum hnüüp ung chang ah kut awn kä cawh ah pum im cu kei naw ka co khai” ci ne a pyein cu kami mät naw 59 kami ng'zak ci nei, “ciah mäih gui pyein ne hleehlak ci gui. Cun ung phi cun ah ami pyein gui cu kä kawng ät ci. 60 Taigütung naw chang gui ah ng'lung ah ng'düi law netahBawipa Jesuh-am, “Ngami naw ng'thu nikbün ne ning huttaap ne ami kiak cu, a i ah phi kä nam hlan tuba gui ci ma? ci ne ng'shik ci. 61 Cun ung phi Bawipa Jesuh cu m'kha ät ah phi ng'thu kä pyein ne a düm hta ah om ci. Taigütung naw, “Nang cu zeikiai nak ah Khanpughi ah Htapa Messiah ah na kiak ci ma? ci ne ng'shi ba mä ci. 62 Bawipa Jesuh naw, “Kei cu a cun nei, nangmi naw chang ah Htapa cu ahlüngtai säih ah Bawimang ah k'pat lam ah ngoh sei phi bäi, khomei ung cum ne kyum law ba sei phi bäi, nami hmu lawk khai nei” ci ne kiak nak ci. 63 Cun kawn ah taigütung cu azih sui akut awn shum netah, “Mik mi naw saksi mi shui baksai vai kä hlü ci. 64 Kat nak awn ang thu cu nami ng'za pyi ci, nangmi naw a i ah phupit ne nami k'bäi khai ang? ci ne ng'shi gui ci. Cun ah chang gui ami van naw, “akat nak dang ci kia sei, sih nak peit vai ah khin ci nei” ci ne m'lau ci gui. 65 Chang am shah gui naw Bawipa Jesuh cu ami m'shi awn m'thui ci gui. A hmai uk ne tuthat u netah, “A u ning tuthat ci ang pyein shüm ä” ci ne kiak nak ci gui. Taigütung ngäng ciah gakap gui naw a hmai cu k'beeih ci gui. 66 Peter cu im cham kyong ah a om zah ung, taigütung ah a shäm hnumi hta cu gawk lawk ci. 67 Peter mei awm ne a ngoh tu cu ani naw hmu netah kheing ne, “Nang phi Nasaret Jesuh ah chang ah na kiak ci” ci ne kiak nak ci. 68 Peter naw, “Nang naw na pyein cu kei naw kä ka k'shing ci, hmat ah phi kä ka hmat ci, ci ne ma ne pyein ci. Cun kawn ani cu im cham ah m'kawt pei lam ah hteit ci. A cun zah ung ai khong law htük ci. 69 Ami shäm ah hnumi hta naw Peter cu hmu ba mä netah, a pei ah ng'düi ci gui-am, “Shin ah chang cu ngami ah ami paw nei” ci ne kia ba mä ci. 70 Peter naw, “Kaa nei” ci ne ma ba mä ci. Shou hta shang khätah cun ung düi ci gui naw Peter-am, “Nang cu Kalile chang ah na kiak ci, ngami ah ning paw nei, kä na ma hlawt khai nei” ci ne kiak nak ci gui. 71 Cun ung phi Peter naw, “akcang ka pyein nei, nangmi ah pyein ah chang cu kä hmat ci nei, Khanpughi naw phi hmat sä” ci ne ma ba mä ci. 72 Cun zah ung ai ak hnih vei nak ah khong ba ci. Cun ah kia khätah, “ai hnih vai kä a khon pha ung, nang naw kei cu kä na nak shing ciah pyein ne, thum vei na na mak khai nei” ci ne Bawipa Jesuh a pyein te ah ng'thu cu shüm law ba netah Peter cu ang htei ah thüi ne kyap ci.
1 A ngawi ung khongawi htaksiik ah taigüpa gui cu, Jew chang ng'vai gui, thukhän saza gui la, kawngsi zung bawi gui awn ng'hmu ne ng'ge u netah, Bawipa Jesuh cu khit u ne Pilat bawi ah hteh püi ci gui. 2 Pilat bawi naw, “Nang cu Jew chang gui ah ghangpughang akcang ah na kiak ci ma? ci ne ng'shik ci. Bawipa Jesuh naw, “Nang ah pyein ah kiak ci nei” ci ne pyein ci. 3 Taigüpa gui naw Bawipa Jesuh cu aktung ah m'kat ne huttaap ci gui. 4 Cun ah kia sei Pilat bawi naw Bawipa Jesuh-am, “Nang cu a i ah phi käng thu ne na om düt ci ma? Nang cu a i hlawk ah ning m'kat ne ami ning huttaap cu na hmat khai nei” ci ne kiak nak ci. 5 Cuî ung phi Bawipa Jesuh cu kä chiü ne a düm ah om khätah, Pilat bawi cu ang htei ah ngaihtüh khit ci. 6 Phiawn nak pawi ah a khin päng ung Pilat bawi naw, chang gui ah ng'zak hlü ah, thawng cum tumat cu m'hlawt ci man ci. 7 A cun zah ung Barabbas ming nak ciah chang ni, bawi gui hnungtuk püi ciah chang gui ni, m'guk-ei gui ni cu thawng ung cum ci gui. 8 Chang gui naw phiawn nak pawi päng ung ami thäh man ah thäh ba khai gui ah Pilat bawi ah law u khätah, Pilat bawi naw, 9 “Nangmi naw Jew chang gui ah ghangpughang cu m'hlawt vai ah nami ng'zak hlük ci ang? ci ne ng'shi gui ci. 10 Cun ah ang shi gui ah mawng cu, taigüpa gui naw Bawipa Jesuh cu kä ng'za hlü u netah, ani ah om nak ah law püi ne ami ap law cu hmat netah a pyein ah kiak ci. 11 Taigüpa gui naw ni püi gui u sei, chang gui naw Bawipa Jesuh ah a hnün ung Barabbas cu m'hlawt vai ah k'thäh ci gui. 12 Pilat bawi naw, “Jew chang gui ah ghanpughang nami ci cu a i ah ka ci vai ang? ci ne ng'shi ba gui ci. 13 Ngami naw kutlam tung ung tai ne ngawn vai nei”ci ne m'lau ci gui. 14 Pilat naw, “Ani naw shetkat nak a i ang abi? ci ne ng'shi ba gui ci. Chang gui naw, “Cun ah chang cu kutlamtung ung tai ne ngawn vai nei” ci ne m'lau law piktäi ci gui. 15 Pilat naw, amät cu chang gui naw ami zum vai ng'za hlü netah Barabbas cu k'phiawn ne Bawipa Jesuh cu tuhthat netah, kutlam tung ung tai ne ami ngawn vai ah ap gui ci. 16 Gakap gui naw Bawipa Jesuh cu gawnu bawi ah im ah hteh püi u netah gakap nawng ät naw 'koi ci gui. 17 Cun kawn ah Bawipa Jesuh-am sui asen hlui bäng m'sui u ne, ng'hling lukhu k'bün u netah, 18 “Jew Chang gui ah ghanpughang ghi ne ghing sä” ci ne ngüm täu ne päipih ci gui. 19 Cun kawn ah alu ung htung awn that ci gui, ami m'shi awn m'thui ci gui, ama ah m'khukdoong ne kawp ne taigü ng'hlawk ci gui. 20 Cun ah päipih u netah asen hlui ah sui cu suh ba sak u ne, amät ah sui te cu m'sui ba ci gui. Cun kawn ah kutlam tung ung tai ne, ngawn vai ah Bawipa Jesuh cu hteh püi ci gui. 21 Cun zah ung lam ah Sairin kho ah kaa (Aleksandä la Rufus ah ani pa) Simon cu ana law sei k'pang u netah, Bawipa Jesuh ah kutlam tung cu kaw sak ci gui. 22 Cun kawn ah Bawipa Jesuh cu (Lukoi k'am) ah ming ciah Kolkotha kho hmun ah hteh püi ci gui. 23 Ngami naw muran naw ami k'caw ah sapyit tui cu tu ci gui, cun ung phi Bawipa Jesuh naw kä awk ci. 24 Cun kawn ah Bawipa Jesuh cu kutlamtung ung tai ne ngawn ci gui. A suisak gui cu chang gui naw m'shüih tawk ne ng'pai ci gui. 25 Bawipa Jesuh kutlamtung ung tai ne ami ngawn nak ah khin cu, kho plang k'tai nazi kaw a khin ah kiak ci. 26 Bawipa Jesuh ami m'kat nak ah kutlamtung ung gu ne ami tai ah ca cu, “Jew Chang gui ah Ghanpughang” ciah kiak ci. 27 Bawipa Jesuh awn atäng ah m'guk-ei pahnih cun phi akpat lam ah tumat ak eng lam ah tumat ah kutlamtung ung tai ne ngawn tuk ci gui. 28 (A cun gui naw, ‘Bawipa cu kat nak bik ciah ng'louh sak ci gui’ ciah cacim ung om ci cu küm sak ci. ) 29 Lam ung hteit hton ciah chang gui naw Bawipa Jesuh cu m'hai ne dan u netah, “Pum im cu gäi netah hnüüp thum ung co ba khai ah chang can ah maw! 30 Kutlamtung ung kaa kyum law ba ä, na mät naw na mät hun law shüm ä” ci ne päihpih ci gui. 31 A cun ah mäih ah taigüpa gui la thukhän saza gui naw phi päihpih u ne, “Shin ah chang cu chang a hei gui läi hun gui hning ci, cun ung phi amät naw amät läi kä hun hning ci nei. 32 Israel Ghanpughang, Messiah Bawipa, kutlamtung ung kaa kyum law ba sä, cun kami hmuh ung kami zum khai nei” ci ne kiak nak ci gui. Bawipa Jesuh awn atäng ah kutlamtung ung ami ngawn goi naw phi Bawipa Jesuh cu päipih ci goi. 33 Kho hnüüp lunglai ung tün ne kho k'awi nazi thum güt ung khomdek khan avan cu mü ne hmüp zawp ci. 34 Kho k'awi nazi thum ah khin ung Bawipa Jesuh cu, “Eloi, Eloi, lema sabachthani? ci ne m'lau ci. Cun cu, “Ka Khanpughi, Ka Khanpughi, a i ah kia sei kei na na nawng nei” a ci ah kiak ci. 35 Apei ah ng'düi ci gui naw cun ah ng'thu cu ng'za u netah, “Ngai tu vä, Elijah khü ci nei” ci ne kiak ci gui. 36 Cun zah ung chang tumat cu dawng law ne, sapyit tui pyeng ci cu, m'zak awn sook ne, ng'lawi ung m'sawi ne, han tu netah, “Ani la lawk khai ah Elijah a law la kä a law ah mi teng shüm kaw” ci ne kiak ci gui. 37 Bawipa Jesuh cu shalawng khai ah m'lau netah kät lawk ci. 38 Acun vai-am pum im kyong ah ami zai ah zih cu vang mawng ah kaa vang mawng ah khüt khai ah hnih ah teek ne ng'chak ci. 39 Bawipa Jesuh ah sih nak ah ma ah ng'düi ciah gakap bawi naw, Bawipa Jesuh asih law cu hmu netah, “shin ah chang cu akcang ah Khanpughi ah Htapa ah kiak ci nei”ci ne pyein ci. 40 Hnumi am shah gui naw ng'shawng pipi netah Bawipa Jesuh cu teng ci gui. Cun ah chang gui cu, Mari Makdalene, Ak hmaw ba James la Josef ah nu Mari la Salome ni gui ah kiak ci. 41 Ngami cu Bawipa Jesuh Kalile kho ah a om zah ge ung tün ne, ahnu ah läk ne m'hteihtang ci gui ah kiak ci. Ngami ah kawn ah Bawipa Jesuh awn atäng ah Jerusalem ah kaa ng'läk law tuk ciah hnumi gui phi om ci gui. 42 A cun ah hnüüp mühun lam ah Arimathea ah kaa, Josef ming nak ciah chang tumat cu gawk lawk ci. Ani cu chang ah kyih aa tu ah bawimang chang vai ah kiak ci. Ani cu Khanpughi ah uk nak kho a gawk law vai cu zum ne ngäng ciah kiak ci. (Cu hnüüp cu a ngawi ung kyin vai kia sei ami pawng m'hteim nak ah kiak ci). A cun ah chang naw Pilat ah ang ghit ah va hteit ne Bawipa Jesuh ah a gook cu htüm vai ah vak thäh ci. 44 Pilat naw Bawipa Jesuh a kät pyi cu ng'za ne cäicat netah, gakap bawi cu khü ne Bawipa Jesuh a kät nak a i güt a lüng law ah ng'shik ci. 45 Ani naw gakap bawi ah m'thein ba ang zak kawn ah Josef am a gook cu htüm vai ah ap ci. 46 Josef naw Bawipa Jesuh ah a gook cu kutlamtung ung kaa, chang ba netah zih bawk awn hlawp ne k'tom ci. Cun kawn ah lung ami shawk ah ng'cim hmun khui ung k'phuh netah, khui m'kawt cu lungnu m'hlat ne khai shüt ci. 47 Cun ah ami khai cu Mari Makdalene la Josef ah nu Mari naw hmu tuk ci goi.
1 Kyin nak hnüüp ang pyi kawn ah Mari Makdalene la, James ah nu Mari ni, Salome ni gui cu Bawipa Jesuh ah a gook hluk nak vai ah tui ng'ui khleih ci gui. 2 Ng'len hnüüp khongawi htasiik ah khohni aluh law zah ung ngami cu ng'cim hmun ah hteit ci gui. 3 Ami hteh lam ah ngami cu, khui m'kawt khai nak ah lungnu a u naw m'hlat ne nak hmawn tu gui khai ang? ’ ci ne ami mät ng'htau ci gui. (Cun ah lung nu cu ang htei ah däm aih ci). Ngami naw gawk ne teng law u khätah, cun ah lungnu cu m'hlat ne k'hmawn pyi ah kia sei hmuk ci gui. 5 Cun kawn ah ngami cu khui m'kawt ung va lut u netah, a bawk pükpük sui ciah akhmaw chang tumat k'pat lam ung ngo sei hmuk ci gui. Cun ah kia sei ngami cu cäicat ci gui. 6 Cun ah chang naw, “Kä kyikyawk vä, nangmi naw kutlamtung ung tai ne nami ngawn ah Nazaret chang Jesuh cu nami shui ciah kä kia ne ang? Ani shin ung kä om ba ci nei, sih nak ung kaa tho ba pyi ci nei. Teng shüm vä, shin cu ani ah a gook phuh nak te ah kiak ci nei. 7 Nangmi cu Peter la ahei ang düihpüi gui ah hteit ne, “Bawipa cu hteit ma ne Kalile kho ah ana gawk khai nei, azan a ning m'thein gui ah mäih ah Bawipa cu Kalile kho ah nami hmu ba khai nei” ci ne pyein ci. 8 Cun ah hnumi gui cu cäicat kyikyawk aih u netah, ng'cim hmun ah kaa dawng ba ci gui. Ngami cu kyikyawk aih u netah a u phi kä thu püi ba ci gui. 9 (Hnumi gui cu Peter la apaw gui ah om nak ah hteit u netah, ami hmuh ng'zak gui phung cu avan m'thein gui ci gui. 10 Cun kawn ah Bawipa Jesuh naw, ang düihpüi gui cu kho nüng kho cawi ah khüt khai ah tüi gui ne, Theing cim ne ang täi ghing ciah ng'thu ah kiak ciah ang täi hun nak ah mawng cu pyein sak gui ci). 11 Cun ah kia sei Bawipa Jesuh ghing ne a om la Mari naw a hmuh ah mawng ng'za u ne phi kä zum ci gui. 12 Cun kawn ah ang düihpüi pahnih cu pigaw zung ah ani hteh zah ung, Bawipa Jesuh cu amüi agü ahlü ah kia ne ani ma ah dang lawk ci. 13 Ngani naw a hei ang düihpüi gui ah ma ah hteit ba ne a cun ah mawng cu pyein ci goi, cun ung phi ngami naw kä zum ci gui. 14 Cun kawn ah ang düihpüi chang sing gha-lei-ät naw ei vai ne ami ei zah ung, Bawipa Jesuh cu ami ma ah ng'dang lawk ci. Ngami cu ami zum nak kä a om ah hmawk la Bawipa Jesuh sih nak ung kaa a thawh ba kawn ah Bawipa Jesuh hmuk ciah chang gui ah ami pyein cu kä ami zum nak hning ah hmawk ah züi gui ne m'cäi gui ci. 15 Bawipa Jesuh naw, “Khomdek khan avan ung hteit ne chang nüng nüng-am Thu Ni cu m'thein vä. 16 Zum ne tuihnim nak lak ciah chang phung cu hun phiawn nak gah khai hei; kä zum tuk ciah chang phung cu shetkat nak om khai nei. 17 Zum ciah chang gui cun naw cäi aih vai bi nak hning ah hlüngtai nak gah khai gui. Kei ah ming awn khoshe phi k'täm khai gui, thu a hlü hlü phi pyein hning khai gui, 18 Ngami naw k'phyu k'nget ami k'pan ung phi bäi, sih nak vai ah ng'tuui tui ami awk ung phi bäi, ngami ung sih nak kä om khai. Gawpai ci gui ah khan ah ami kut taih ne gai sak gui khai gui” ci ne m'thein gui ci. 19 Cun ah Bawipa Jesuh cu ang düihpüi gui ang thu püi gui, kawn ah khankho ah kai püi ba u sei Khanpughi ah k'pat lam ung hang zong ne ngok ci. 20 Ang düihpüi gui cu kho nüng ah hteit ne Thu Ni cu pyein ci gui. Ngami cu Bawipa naw atäng ah om püi gui ne, ami ng'thu pyein ang düng ah mawng saksi dang khai ah cäi aih nak gui vai ami m'dang nak hning vai ah hlüngtai nak cu pe gui ci. ) [
1 Teihpüi Theophilus aw; Mik mi ah zum nak ung dang pyi ciah amawng tung gui cu chang akda naw akni pi ah gu ne piang pyi ci gui. 2 Cun ah ami guk cu akhtük ung hmuhmat ci gui la pyeinsak ci gui ah m'thein m'kan ba gui ah kiak ci. 3 Cun ah kia sei shin ah mawng gui cu, kei naw va tün ne teng kheng netah, na hmat thei vai ah guk ung nik khai ah ngai ne ka guk nei. 4 Shin cu nang naw na hmuh ng'zak man phung akcang ah küm khai ah na shüm hmat vai ah ka guk ah kiak ci nei. 5 Judea kho ung Herod ghangpughang naw a uk sang ung Taigü kyong chang Zechariah ming nak ciah taigü om ci. Ak chu cun phi taigü kyong ung kaa Elizabeth ming nak ciah kiak ci. 6 Ngani cu Khanpughi ah ng'zak hlü ah om ni ne, Bawipa ah thukhän shaitaak cun phi läk ci goi. 7 Ngani cu ghi law pyi ci goi, Elizabeth kä hta sei ani hta kä om ci. 8 Hnüüp ät ung Zechariah cu Taigü im kyong ah taigü ah bi cu bi ba ci. 9 Taigü gui ah thung man ah mang kiang ung phyuh vawi khai ah ghü u sei, Bawipa ah Taigü im ah hteit ci. 10 Ani naw kyong ah vawihpeh vai m'khih ne ak phyuh theh zah ung chang gui akpung ah taigü ci gui. 11 M'khih ne vawihpeh nak mang kiang k'patlam ung Bawipa ah khankho chang dang law sei; 12 Zechariah naw hmu netah cäi ne kyik ci. 13 Cun ung phi khankho chang naw, “Zechariah aw, kä na kyih vai nei, Khanpughi naw na k'taigü cu ng'zak ci, na k'chu Elizabeth cu pamihta ah hta lawk khai, ang ming cu Johan ah na sui vai. 14 Ani ang tüi law ung a i hlawk ah na zeikiai khai ang? , na püipaw gui mä a i hlawk ah zeikiai tuk khai gui ang? 15 Ani cu Khanpughi lam ah chang m'gäi ah kia ci. Awktat man phung kä ei awk khai, anu puk ge ung Mumcha Theing awn kümbe khai. 16 Ani naw Israel chang van cu ami Bawipa Khanpughi ah law püi ba gui khai. 17 Ani cu Bawipa ah lam ung lam ma ciah kia ne, profet Elijah ah mäih ah khüighaat ne hlüngtai khai. Ani naw pa la hta atäng ah om ba sak goi khai; ani naw ng'thu kä ngai ciah chang gui düng ciah lu ng'lang nak ung ng'hlah law ba sak gui khai; Khanpughi ah hmawk ah ng'düi ge khai gui ah Bawipa ah chang gui cu ana m'cäi gui khai, ci ne pyein ci. 18 Zechariah naw khankho chang-am, “Cun ah a kiak vai cu a i hawk cha ka hmat khai ang? Kei phi ka ghi lawk ci, ani phi ghi lawk ci” ci ne pyein ci. 19 Khankho chang naw, “Kei cu Khanpughi ah ma ah ng'düi ciah Kabriel nei; shin ah ng'Thu Ni nang-am ka ning m'thein khai ah Khanpughi naw ana tüih law nei. 20 Cun ung phi akhin a küm law ung bä khai ah ng'thu kei ah pyein cu nang naw kä na zum ci. Cun kä na zum ah hmawk ah nang cu na aang khai, kei ah ng'thu bä ne kä ang dang pha güt käng thu phung ah na om khai” ci ne kiak nak ci. 21 Cun ah khin pum ung Zechariah cu chang gui naw ging law zai u netah, a i haw ne shin güt leng leng pum im kyong ah a ding ang? ci ne cäicat ci gui. 22 Ani cu a luh law ba ung kä ng'thu ba thei ci. Cun ah kia sei ngami naw Taigü im kyong ah mikhmuk ciah ah hmat ci gui. Kä ng'thu ba thei netah akut awn nüt püi gui ci. 23 Taigü im kyong ah taigü nak a khin ng'pyi sei, Zechariah cu a im ah hteit ba ci. 24 Cun kawn ah shou hta khätah Elizabeth cu m'gai law ne cha hma ung kä luh law ah om ci. 25 Elizabeth naw, “Khanpughi naw kei cu nam gein pyi ci, Chang ah ma ah lü ng'aa nak ung kaa nak phiawn pyi ci” cik ci. 26 Elizabeth am gai nak ak cha chuk nak ung, Khanpughi naw khankho chang Gabriel cu Kalile kho Nazareth gawnu ah tüi lawk ci. 27 Khankho chang naw David ghangpughang ah ng'shon Josef ah k'chu vai ami beit ah Mari-am ng'thu m'thein lawk ci. 28 Khankho chang naw Mari ah ma ah, “Na khan ah ding gei nak om sä, Bawipa naw atäng ah ning om püi ne, küikyang ciah hrilham ning k'be sä., ci nak ci. 29 Mari cu khankho chang ah ng'thu ng'za ne cäicat netah, “a i a pyein ni mä” ci ne ngai ci. 30 Khankho chang naw, “Mari awi, kä kyikyawk ä, Khanpughi naw ning m'hlüngtai pyi ci nei. 31 Nang cu m'gai ne pami hta ah na hta lawk khai. 32 Ang ming cu Jesuh ah na sui vai. Ani cu hlüngtai ne hlüngtai pi ciah Khanpughi ah hta ah kiak ci. Ani cu David ghangpughang ah ang shon ah kia sei, Khanpughi naw ghangpughang ah ngoh sak ba khai. 33 Ani cu Jakop ah hta ng'shon ung ngawi zä ghangpughang ah kiak khai, a uk nak cu kä düt hlawt khai” ci ne pyein ci. 34 Mari naw khankho chang-am, “Kei cu ng'lamihta nei shin ah na pyein gui cu a i hawk cha ah kia thei khai ang? ci ne ng'shik ci. 35 Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai. 36 Na paw Elizabeth ah mawng cu ngai shüm ä, ng'züü ciah ami pyein, ghi law pyi ciah chang ani cu, tuhbäi cha chuk m'gai pyi ci nei. 37 Khanpughi ah kä m'khüt a i kä om ci nei” ci ne pyein ci. 38 Mari naw, “Kei cu Khanpughi ah changshäm ah ka kiak ci, na pyein ah mäih ah kia sä” ci khätah, khankho chang cu maih ba ci. 39 Cun kawn ah Mari cu pawng m'hteim ne, Judea kho, khosiip lam gawnu tumat ah hteit ci. 40 Mari cu Zechariah ah im ah hteit ne Elizabeth cu zavaih nak ci. 41 Elizabeth naw Mari ah zavaih nak ang zak sang ung a puk kyong ah ak hmawhta cu hnün ci. Elizabeth cu Mumcha Theing awn be netah, 42 “Nang cu hnumi gui nüng ung hlüngtai nak om pi bäih ci, na hta law nak vai ah ak hmaw cun phi hlüngtai nak om ci! 43 A i ah kia ne, kei ah khan ah shin ah hlüngtai nak gui a gawk law ang? 44 Ka Bawipa ah anu cu kei ah gawk lawk ci nei. Nang ah zavaih nak kang zak vai-am kei ah puk kyong ah ak hmaw cu zeikiai ne hnün ci nei. 45 Khanpughi ah ng'thu akcang ah bä lawk khai ci ne, na zum ah hmawk ah nak khan ah zeikiai nak om ci nei” ci ne m'lau ne pyein ci. 46 Mari naw, Ka m'lung naw Bawipa m'hlüngtai ci; 47 Khanpughi Hunbawi hmawk ah ka mumcha zeikiai ci, 48 Ani naw zoken ciah akchang shäm cu na shüm ci nei, Tuhbäi tün ne chang van naw zeikiai chang ah na khü Khai gui nei, 49 A i ah kia sei ci ung hlüngtai säih ciah Khanpughi naw kei ah hmawk ah aküikyang cu bi pyi ci nei. Ani ah Ming cu theingcim ci; 50 Ani m'tamkhah ci gui ah khan ah ang shon päng ung am gein nak cu dang sak ci. 51 Am gäi nak ah akut awn am lung m'däm ci gui cu, m'taai gui zawp ci. 52 M'gäi ciah ghangpughang gui mang kiang ung kaa zuk chah gui ne, zoken ciah chang gui han chaang gui ci. 53 Cawigha ci gui-am tuihlim ci tumbei gui ne, bämang ci gui cu ami züng ah hteh sak gui ci. 54 Pupa gui ah ma ah a shaitaak cu kümbe sak ne, ak chang shäm Israel chang gui cu m'htei gui khai ah law pyi ci nei. 55 Ani naw Abraham-am am dang ah am gein nak cu, hta ng'shon ung dang lä ci nei” ci ne ng'äi ci. 56 Mari cu Elizabeth ni ah cha thum om tu netah, a im ah hteit ba ci. 57 Elizabeth cu akcha küm law sei pami hta ah hta lawk ci. 58 A im ng'phei la a mät zah gui naw, ani ah khan ah Khanpughi naw cäicat vai abi cu hmu u netah, ani awn atäng ah zeikiai tuk ci gui. 59 Ak hmawhta hnüüp chih lüng sei, vun-ah pawi ami bi nak ung law tuk ciah chang gui naw, apa ah ming, Zechariah bä ah sui ba vai ah ng'za hlük ci gui. 60 Cun ung phi anu naw “Johan ah sui vai nei” cik ci. 61 Ngami naw “nangmi ung cun ah ming kä om man ci” cik ci gui. 62 Cun kawn ah apa naw a i ah a sui hlü ah nüt ne ng'shik ci gui. 63 Zechariah naw guk nak vai k'thäh gui netah, “Aming cu Johan nei” ci ne gu khätah, chang gui cu cäicat ci gui. 64 A cun vai-am Zechariah cu ng'thu law ba thei netah, Khanpughi cu m'hlüngtai ci. 65 Ami im ng'phei gui cu ami van kyikyawk ci gui. 66 Cun ah a mawng gui cu Judea kho, khosiip lam avan ung thang zawp ci. Cun ah mawng ng'za tuk ciah chang gui naw, “Cun ah ak hmaw cu a i ah mäih chang ah kia lawk khai ang? cik ci gui. Cun ah ang htei kawn ah Bawipa ah hlüngtai nak cu ani ah khan ah om ci. 67 Johan ah pa Zechariah naw Mumcha Theing awn be netah, Khanpughi ah ng'thu a pyein cu; 68 “Israel gui ah Khanpughi Bawipa cu m'hlüngtai tu vä, Ani cu akchang gui m'htei gui khai ah law ne, phiawn sak gui pyi ci nei. 69 Ak changshäm David ah hta ng'shon ung, hlüngtai ciah Hunbawi cu dang sak pyi ci nei. 70 Cau theingthap ciah profet gui-am shaitaak nak a peit gui ah mäih ah, 71 Ani naw ga ah kut kyong ung kaa la, na thüi na gui ciah kut kyong ung kaa na hun gui pyi ci nei. 72 Ani naw mi pupa gui am gein nak gui cu pyein ne, ang thu khän theing cun phi shüm ci nei. 73 Mik mi cu ga ah kut ung nak phiawn gui ne, kä kyikyawk ne abi mi bi vai ah mipa Abraham ah ma ah shaitaak nak pe pyi ci. 75 Cun ah kia sei mik mi cu theingcim nak la düng nak awn Khanpughi ah ma ah mi ghin nak chuih mi om khai. 76 “Nang, kei ah chang hmaw, ahlüngtai säih Khanpughi ah profet ah ning khü vai nei. Nang cu Bawipa ah ma ung law ne, ani ah hmawk ah lam na piang khai. 77 Bawipa ah ak chang gui-am, ami kat nak m'gein gui sei, hun nak ami gah vai ah mawng m'thein gui khai nei. 78 Mik mi ah Khanpughi cu m'gein nak la k'dük nak awn be ci. Ani naw a hun nak ah akdei cu mi khan ah ng'shü law sak ne, 79 Sihnak ah ang hnim ka ah om ci gui ah khan ah khankho ah akdei cu khang lawk khai, mik mi-am phi ding gei nak lam nam shüm gui khai” ciah kiak ci. 80 Ak hmaw cu däm ng'vai law ne pumsa, mumcha avan ung kümbe lawk ci. Ani cu Israel chang gui ah ng'lung ah dang khai ah bi kä abi pha güt ung kho ng'gau kho ah om cang ci.
1 Cun zah ung ghangpughang Aukustus naw Roman khopäng avan ung chang sing avan khei vai ah k'bäi ci. 2 Cun ah chang sing khei nak cu Kuirinius naw Siria kho a uk sang ung atün law htük ah kiak ci. 3 Chang avan cu ami ming ng'khei tuk khai gui ah ami pigaw phäh phäh ah hteit ci gui. 4 Josef cu Kalile kho Nazareth ung kaa naw, Ghanpughang David ah ng'tüi nak Judea kho Bethlehem gawnu ah hteit ci. Josef cu David ah hta ng'shon ah kiak ciah kia ne acu ah hteit ciah kiak ci. 5 Josef cu ng'khei tuk khai ah, akchu nak vai ah shai ami taak ah Mari awn hteit ci goi. Mari cu käu mah ci, 6 ngani cu Bethlehem ah ani om tu zah ung ahta nak vai ah hnüüp ng'päng law sei, 7 Mari cu pamihta ah hta lawk ci. Ngani cu ani im kai nak vai im kä awng ci kia sei, ak hmawhta cu zih awn hlawp ne vantang ei-ko ung m'ih ci goi. 8 Cun ah kho ung htomeshäm gui cu khomü ah khodo zung ah htome ngäng ne om ci gui. 9 Cun sang ung Khanpughi ah khankho chang dang law ne, Khanpughi ah bämang nak cu khang law sei htoshäm gui cu ang htei ah kyik ci gui. 10 Khankho chang naw, “Kä kyikyawk vä, chang avan naw ang htei ah a zeikiai nak vai ah ng'thu Ni cu nangmi ah hmawk ah ka law püi ci nei. 11 Tuhngawi David ah gawnu ung Khrit Bawipa, nami Hunbawi cu ng'tüi pyi ci nei. 12 Ak hmawhta cu zih awn hlawp ne, vantang ei-ko ung ami m'ih cu nami hmuk khai, cun nami hmuh ung ani cu nami hmat khai nei” cik ci. 13 Cun vai-am chünla ciah khankho gakap gui cu khankho chang veing ne ng'dang law u netah; 14 “Ahlüngtai säih Khanpughi ah bämang nak cu, khankho ah be sä, khomdek khan ung phi ding gei nak om sä, am hni ah chang gui ah khan ah m'gein nak om sä” ci ne Khanpughi m'hlüngtai ne ng'äi m'cu ci gui. 15 Khankho chang gui khankho ah ami hteh ba kawn ah, htoshäm gui cu ami mät ng'htau u ne, “Mik mi Bethlehem ah mi hteit khai, Khanpughi naw anam thein gui cu hteit ne mi teng khai” ci ne ng'ge u netah Bethlehem ah hteit ci gui. 16 Gawk u netah, Mari la Josef la vantang ko ung ami m'ih ah ak hmawhta cu hmuk ci gui. 17 Htoshäm gui naw akhmawhta hmu u netah, ak hmaw ah mawng khankho chang ah ng'thu cu m'thein gui ci gui. 18 Htoshäm gui ah ng'thu pyein ng'za tuk ci gui cu cäicat ci gui. 19 Cun ung phi Mari cu acun ah mawng gui avan ngai ne shüm ba ci. 20 Htoshäm gui cu Khankho chang ah pyein ah mäih ah hmu ng'za u netah, Khanpughi ng'äi ne m'hlüngtai ne hteit ba ci gui. 21 Ak hmawhta cu hnüüp chih lüng sei vun-ah nak ami bi nak ah hnüüp ung “Jesuh” ah ang ming sui ci gui. Cun cu kä ami m'gai nak pha ge ung khankho chang naw sui vai ah a pyein ah kiak ci. 22 Mose ah thukhän ah mäih ah theingcim nak bi vai akhin gawk lawk ci kia sei, ak hmawhta cu Mari la Josef naw Jerusalem ah law püi ni ne, Taigü im ah Bawipa am ap ci goi. 23 Bawipa ah thukhän ung, “Hta htük phung cu Khanpughi-am nami ap vai, 24 müm kha hnih la cholung hnih phi Khanpughi-am pe ne nami taigü vai” ciah om ci kia sei, acun ah taigü ci gui. 25 Cun zah ung Jerusalem ah Simeon ming nak ciah chang om ci. Ani cu Khanpughi kyih-aa ciah chang k'ni ah kiak ci. Israel chang gui hun nak ami gah vai ah ngäng ciah chang ah kiak ci. 26 Mumcha Theing cu ani awn atäng ah om ne, “Nang cu Khanpughi ah shaitaak ah Messiah kä na hmuh pha ung kä na sik khai” ci ne am cäi ah kiak ci. 27 Simeon cu Mumcha Theing ah lam shüm nak awn Taigü im kyong ah lut ci. Thukhän ung om ciah mäih ah bi vai ah anu la apa naw ak hmaw ani law püi cu hmu netah, 28 Simeon naw ak hmaw cu chang ne, Khanpughi am hlüngtai ah ng'thu cu; 29 “Bawipa, tuhbäi na shaitaak küm pyi ci kia sei, na chang shäm cu dimdeeih nak ah hteh sak ä. 30 Ka mät ah mik awn na hun phiawn nak cu ka hmu pyi ci nei, 31 Cun cu chang van ah ma ah nang naw na pian m'tham ah; 32 Na ng'zak hlü dang sak ciah akdei cu chang hei gui ah hmawk ah ak khang vai la; na chang gui Israel chang gui ah bämang nak a gawk law ah hmawk ah kiak ci” cik ci. 33 Ak hmawhta ah anu la apa cu cun ah Simeon ah ng'thu ng'za ni netah cäicat ci goi. 34 Simeon naw hrilham pe gui netah, Nu Mari-am a pyein nak cu; Israel chang da gui ami didap vai la hun nak ami gah vai ah hmawk ah shin ah ak hmawhta cu Khanpughi naw a ghü pyi nei. Ani cu Khanpughi m'hnüt nak ah kia ne, chang gui naw hnu ng'tuk püi ne ami ng'thu nak awn, ami mät ah m'lung kyong cu dang sak khai gui nei. 35 Nang ah m'lung kyong cu khim ghaat awn k'tawk ah mäih ah nak khai nei” ci ne Mari-am kiak nak ci. 36 Asher pakhui ung kaa Phanuel ah hta Anna ming nak ciah profet hnumi tumat om ci. Ani cu ghi law pyi ci, ak hmaw chang zah ung ceimah ne, kum chih bäng ung a cei awn om ci goi. 37 Ani cu tuhbäi a khokum cheit-kip-lei-phli law pyi ci. Ani cu amü ak hnüüp taigü im ah om ne ei hlawi ne taigü ci. 38 Ak hmaw ami ap law sang ung cun ah hnumi cu gawk law netah, Khanpughi m'hlüngtai ci!Cun kawn ah Jerusalem cu hun lawk khai’ ciah ngäng ci gui ah chang gui-am, ak hmawhta ah mawng cu m'thein gui ci. 39 Josef la Mari cu Bawipa ah thukhän ami bi kawn ah ami pigaw Kalile kho Nazareth ah hteit ba ci gui. 40 Ak hmaw cu däm ng'vai ne gaigawng ci. Ani cu cüivai lunglang ci, Khanpughi ah m'shumphyuk nak cu ani ah khan ah be ci. 41 Bawipa Jesuh ah anu la apa cu phiawn nak pawi akhin päng ung akum tä sei, Jerusalem ah hteit ci ci goi. 42 Jesuh akhokum kum gha-lei-goi a law zah ung phi, Jerusalem ah phiawn nak pawi ung hteit ba ci gui. 43 Cun ah pawi ng'pyi sei chang gui cu ami im ah hteit ba ci gui. Cun ung phi ak hmawhta Jesuh cu, Jerusalem ah om shüt ci. A om shüt cu anu la apa naw kä hmat ci goi. 44 Chang gui ah ng'lung ah hteit tuk ciah ngai ci goi. Hnüüp ät mü ne hteit u netah, ami mätzah teihpüi gui ah ng'lung ah shui ba ci goi. 45 Cun ung phi kä hmu ba ni netah, Jerusalem ah hteit ne shui ba ci goi. 46 Ak hnüüp thum hnüüp taigü im kyong ah Jew saza gui awn ngo u ne, ami ng'thu ngai ne, ng'shi ca gui ne kia sei hmu ba ci goi. 47 Ani ah hmuhmat nak la ang thu gui ng'zak ciah chang gui cu ang htei ah cäicat ci gui. 48 Josef la Mari cun phi ani hmu law ne cäicat ni netah, Anu naw, “Ka hta, a i ah kia sei shikchaa ah na kiak ang? Napa la kei naw ang htei ah ng'ä ne ka ni ning shui ba ci nei” cik ci. 49 Jesuh naw, “Nang nu la pa, a i vai na ni na shui ba ang? Kei Kapa ah im ung ka om khai ah kä nani hmat ne ma? cik ci. 50 Cun a ci cu ngami naw kä hmat ci gui. 51 Cun kawn ah ak hmawhta Jesuh cu anu la apa awn atäng ah Nazareth ah hteit ba u netah, anu la apa ah ng'thu ngai ne om ci. Cun ah a kiak ah mawng gui cu anu Mari naw am lung kyong ung avan htin ci. 52 Ak hmaw Jesuh cu däm ng'vai law ne a hmuhmat nak dämda law pi sei, Khanpughi la chang ah ma ah a hmai kiang sei om ci.
1 Ghangpughang Tiberius ah uk nak khokum gha-lei-hma alaw sangung Pontius Pilat naw Judea uk ci. Herod naw Kalile uk ci, a nau Philip naw Iturea la Trachonitis uk ci, Lisanias naw Abilene uk ci, 2 Annas la Kaiaphas cu taigü tung ah kiak ci goi. Cun zah ung Khanpughi ah ng'thu cu, bung puk ah om ciah Zechariah ah hta Johan ung gawk lawk ci. 3 Cun ah kia sei Johan cu Jodan Tuinu lawngzung pigaw avan ung hteit netah, “Nami kat nak ng'zu ba ne tui ng'hnim zawp vä; Khanpughi naw nami kat nak ning m'gein gui khai nei” ci ne ng'thu pyein ci. 4 A cun ah mawng profet Isaiah ah guk ah ca uk ung om ci cu; “Bungpuk ah chang tumat ah ng'shäu law cu; ‘Bawipa ah lam cu ngaih na ne piang ge vä, A hteh nak vai ah lam düng sak vä, 5 Kho kawk kho ng'nawi k'be zawp vai, Kho gui khomhtung ng'tei zawp khai. Lam ng'khep lam ng'koi ng'düng zawp khai, Lam m'gho lam k'ghat k'sei pian vai. 6 Hnicim chang avan naw Khanpughi ah hun nak cu hmuk khai nei” ciah kiak ci. 7 Chang am shah gui cu tui ng'hnim khai gui ah Johan ah law u khätah, “Chang m'äm mah gui, gawk lawk khai ah Khanpughi ah m'lung she nak, phiawn nak vai ah mawng a u naw ang a ning m'thein gui? 8 Kat nak ung kaa phiawn vai ah ng'zu ba zawp vä, Abraham cu kami pughi ci ne kä khähghah vä, Khanpughi naw lung gui phi la ne Abraham ah ng'shon ah piang hning ci nei. 9 Singghing päng ah kung cu ghei akghaat awn m'täh ci nei, kä m'theih ciah sing phung cu chu pit ne, mei k'cang ung k'bum khai nei. 10 Chang gui naw, “cun ung a i ah kiak vai” ci ne ng'shi u khätah; 11 Johan naw, “k'htu ng'zung goi om ci naw kä om ci-am ng'zung ät m'thuh tu sä, ei vai om ci naw kä om ci-am m'bei tu sä. 12 A khawn look ciah chang gui cu tuihnim khai gui ah law u netah, “Saza, a i kami bi vai ang? ci ne ng'shik u khätah, 13 “Nami bawi ah m'hnüt ah kawn ah m'däm ne akhawn kä nami loh vai” ci ne kiak na gui ci. 14 Gakap gui naw phi, “keimi mä a i ah kami kiak khai ang? ci ne ng'shi u khätah; Johan naw, “Chang ah ngui kä nami guh vai, chang kä nami zawkshe nak vai, nami gah awn nami män h vai” ci nah gui ci. 15 Chang gui naw Johan cu “Messiah ah kiai bawk ci ni” ci ne ngai law u khätah, 16 Johan naw, “Kei naw tui awn ng'hnim nak ka ning pe gui ci. Cun ung phi kei ah hlüngtai pi ci cu lawk khai, Kei cu ani ah phahnak gui phi kä ka k'phian hning ci, ani naw Mumcha Theing la mei awn hnim nak ning pe gui khai; 17 Ani naw alo ma ah geit khäm ne chüdawn awn chü netah, ang tak cu khei ah thun ne, ang shi cu kä phät hlawt ciah mei awn m'khih khai. 18 Johan naw chang gui cu lam k'ni ung ami hteh vai ah ng'thu ahlü hlü m'thein gui ci. 19 Cun kawn ah Johan naw, anau ah chu Herodias phi chu na ne, kat nak akda bik ciah Herod cu, akat nak dang zawp khai ah m'cäi ci. 20 Cun ah kia khätah Herod naw Johan pha ne thawng ung chum ne, akat nak ah khan ah kat nak m'taih ne kat nak bik ci. 21 Chang gui akda tui ami ng'hnim kawn ah Bawipa Jesuh phi tui ng'hnim tuk ci. Ani ak taigü sang ung khankho m'kawt ng'hmawng sei, 22 Mumcha Theing cu mümbawk ah mäih ah zong law ne, ak khan ah ngo law khätah, “Nang cu ka ning m'hni aih ah ka ning Htapa nei” ciah khankho ah ng'thu k'aw cu thang lawk ci. 23 Abi tün ne abi law sang ung Bawipa Jesuh cu akhokum thumkip lawk ci. Ani cu Josef ah hta ah chang gui naw ngai ci gui. 24 Josef cu Heli ah hta, Heli cu Matthat ah hta, Matthat cu Levi ah hta, Levi cu Melchi ah hta, Melchi cu Jannai ah hta, Jannai cu Josef ah hta; 25 Josef cu Mattathias ah hta, Mattathias cu Amos ah hta, Amos cu Nahum ah hta, Nahum cu Esli ah hta, Esli cu Nakai ah hta; 26 Nakai cu Maath ah hta, Maath cu Mattathias ah hta, Mattathias cu Semein ah hta, Semein cu Josech ah hta, Josech cu Joda ah hta; 27 Joda cu Joanan ah hta, Joaanan cu Rhesa ah hta, Rhesa cu Zerubbabel ah hta, Zerubbabel cu Shealatiela ah hta, Shealatiela cu Nari ah hta; 28 Nari cu Melachi ah hta, Melachi cu Addi ah hta, Addi su Kosam ah hta, Kosam cu Elamadam ah hta, Elamadam cu Erah ah hta; 29 Erah cu Joshua ah hta, Joshua cu Eliezerah ah hta, Elizerah cu Jorim ah hta, Jorim cu Matthat ah hta, Matthat cu Levi ah hta; 30 Levi cu Semeon ah hta, Semeon cu Judah ah hta, Judah cu Josef ah hta, Josef cu Jonam ah hta, Jonam cu Eliakim ah hta; 31 Eliakim cu Melea ah hta, Melea cu Menna ah hta, Menna cu Mattatha ah hta, Mattatha cu Nathan ah hta, Nathan cu David ah hta; 32 David cu Jesse ah hta, Jesse cu Obed ah hta, Obed cu Boaz ah hta, Boaz cu Salamon ah hta, Salamon cu Nahshon ah hta; 33 Nashon cu Amminadap ah hta, Amminadap cu Admin ah hta, Admin cu Arni ah hta, Arni cu Hezron ah hta, Hezron cu Perez ah hta, Perez cu Judah ah hta; 34 Judah cu Jakop ah hta, Jakop au Isaac ah hta, Isaac cu Abraham ah hta, Abraham cu Terah ah hta, Terah cu Nahor ah hta, 35 Nahor cu Seruk ah hta, Seruk cu Pelek ah hta, Pelek cu Eber ah hta, Eber cu Shelah ah hta; 36 Shelah cu Kainam ah hta, Kainan cu Araphasat ah hta, Araphasat cu shem ah hta, Shem cu Noah ah hta, Noah cu Lamech ah hta; 37 Lamech cu Methuselah ah hta, Methuselah cu Enoch ah hta, Enoch cu Jered ah hta, Jared cu Mahalaleelah ah hta, Mahalaleelah cu Kenan ah hta; 38 Kennan cu Enosh ah hta, Enosh cu Seth ah hta, Seth cu Adam ah hta, Adam cu Khanpughi ah hta ah kia ci.
1 Bawipa Jesuh cu Mumcha Theing awn be ne Jordan tuinu ah kaa law ba khätah, Mumcha naw bungbuk ah khah püi ci. 2 Acu ah hnüüp phli-kip ung khoshe ah tüihtok nak gah ci. Hnüüp cun gütung Bawipa cu ei kä ei ah om ci kia ne ang htei ah ei cawi lawk ci. 3 Cun kawn ah khoshe naw, “Nang cu Khanpughi ah hta ah na kiak ung shin ah lung cu m'htut ah piang ä” ci ne kiak nak ci. 4 Bawipa Jesuh naw, “Cacim naw pyein ci, chang cu ei ei bäng awn ghing ciah kä kiak ci. ci ne kiak na ci. 5 Akhnih vei nak ah khoshe naw, Bawipa Jesuh cu chaang ne, khomdek khan ung Bawimang uknak avan cu m'hnuh netah; 6 “Shin ah bämang hlüngtai nak avan kei naw ka ning pek khai, shin gui avan cu kei ah kut ung om ci, a u-am phi kei naw ka pe hning ci. 7 Kei na na khawihnah ung shin gui avan ka ning pek khai” ci ne kiak nak ci. 8 Bawipa Jesuh naw, “Cacim naw pyein ci, ‘Na Bawipa na Khanpughi bäng khawihnah taigü ne, ani ah bi bäng na bi vai” ci ne kiak nak ci. 9 Cun kawn ah Bawipa Jesuh cu Jerusalem ah hteh püi ne, ahlüng nak pi k'bäih ah ngoh sak netah, “Nang cu Khanpughi ah htapa akcang ah na kiak ung, shin ung na ng'phäi khai; 10 Cacim naw pyein ci, ’ Nang ning m'htei khai gui ah Khanpughi anw khankho chang gui cu m'düih gui khai; 11 Ngami naw ami kut naw ning chaang u sei, na kho phi lung naw kä ning plawh khai’ ciah om ci, ci ne pyein ci. 12 Bawipa Jesuh naw, “Cacim naw pyein ci, ’ Na Bawipa la Na Khanpughi cu kä na phawtcam vai” ci ne kiak nak ci. 13 Khoshe naw Bawipa Jesuh cu akda vei tüihtok netah ng'hlah ta ne a hei ah hteit ci. 14 Bawipa Jesuh cu Mumcha Theing awn be ne, Kalile kho ung law ba khätah, ani ah mawng cu cun ah kho avan ung thang ci. 15 Ani naw chang gui ah pum nak päng ah hteit ne m'theithang gui sei, chang gui naw m'hlüngtai ci gui. 16 Cun kawn ah Bawipa Jesuh cu a däm ng'vai law nak Nazaret gawnu ah hteit ba ci. Ani cu kyin hnüüp ung ahteh man ah, pum im ah hteit ne, cacim cu phat khai ah ng'düi law khätah; 17 Pum im ngäng ciah chang naw profet Isaiah ah guk ah ca-uk cu pe lawk ci. Bawipa Jesuh naw cun ah ca-uk cu kawt netah; 18 “Khanpughi ah Mumcha cu kei khan ah gawk law pyi ci, Geinvai ci gui-am Thu Ni m'thein gui vai ah Kei cu na ghü pyi ci, Thawng ung kium ci gui ah phiawn nak vai, A mik m'dauh ci gui ah m'dei ba nak vai la Shedam nak gah ci gui ah phiawn nak vai ah mawng shäu ne pyein vai ah kei cu ghü ne na tüi pyi ci 19 Khanpughi naw akchang gui a hun nak gui ah khin a gawk law ah mawng shäu ne pyein vai ah, Kei cu ana tüih law nei’ ciah cacim cu phat ci. 20 Bawipa Jesuh cu, aphat ah ca-uk chaw ne pum im ngäng ci-am pe be netah ngoh ba ci. Pum im kyong ah lawk ciah chang avan naw cäi ne teng ci gui. 21 Bawipa Jesuh naw, “Shin ah cacim ung om ci cu, tuhbäi nami ng'zak ah mäih ah küm pyi ci nei” ci ne pyein ci. 22 Chang gui naw ani cu m'tamkhah u ne, ang thu pyein cun phi ngaihtüh u netah, “Ani cu Josef ah hta ah kä kia ne ang? ci ne kiak ci gui. 23 Bawipa Jesuh naw, “Nangmi naw, ‘nang seibawi, na mät ah nat nak, na mät naw na gai vai ah m'htei ä’ ciah khuishui ah mäih ah nami na ng'thu püi khai, Kapernaum ah na bi ah mäih ah, na mät ah pigaw ung phi na bi vai, ci ne nami kiak khai; 24 Bawipa Jesuh naw khen gui netah “Kei naw akcang ka pyein cu, a u profet phi amät ah pigaw ung a u naw m'tamkhah ne kä dou man ci nei” ci ne kiak na gui ci. 25 Ka pyein cu ngai vä, Eliah a om zah ung Israel kho ung hmeinu akda om man ci. Cun zah ung kho kum thum la avang ung kho ng'kyang sei chang gui cawigha geinvai ci gui. 26 Cun ung phi profet Eliah cu Khanpughi naw a u ah om nak ah phi kä tüih ah, hmeinu tumat ah om nak Sidon khopäng Zarephat pigaw bäng ung tüi ci. 27 Profet Elisha ah om zah ung phi Israel chang gui akda khei-lei ung gaw u sei, a u phi kä gai sak ci, Sirian ah kaa Naaman bäng gai sak ci” ci ne m'thein gui ci. 28 Cun ah ng'thu ng'za u netah pum im kyong ah chang gui cu, m'lung she ci gui. 29 Ami van ng'düi law u netah, Bawipa Jesuh cu ami pigaw m'htung lai ah kheing ung, buh hlit vai ci ne, hteh püi ci gui. 30 Cun ung phi Bawipa Jesuh cu chang gui ah ng'lung ah lut ne, ahei lam ah hteit- ei ci. 31 Bawipa Jesuh cu Kalile kho Kapenaum gawnu ah hteit ne, pum hnüüp ung pum im ah hteit ne m'theithang gui ci. 32 Bawipa Jesuh ah ang thu k'aw cu huham ah aih khätah chang gui cu cäi ci gui. 33 Cun zah ung zarat ung khoshe ah kai chang tumat om ci. Acun ah chang naw m'lau ne, 34 Nazaret ah kaa Jesuh awi, nang cu keimi awn a i ah na ng'mäihzah ci ang? Na na m'di gui khai ah ang na law? Kei naw, nang cu a u ah na kiak ah ka ning hmat ci nei, nang cu Khanpughi ah theingcim ciah ng'shä k'ni ah na kiak ci nei” ci ne pyein ci. 35 Bawipa Jesuh naw khoshe cu huuttaap ge ne, “Khoshe, kä chawkchek ne, shin ah chang ung kaa lut law ne, ahei ah hteit ä” ci ne k'täm ci. Acun vai-am, ami ma ge ung khoshe cu, chang a i ah phi kä plawh kheih shüt ah lut law ne dawng ci. 36 Chang gui cu cäicat u netah, “a ni a i hlawk ah huham ah ne ang, khoshe hngaw aktäm hning? ci ne ami mät ng'ce ng'cäk u netah hteit ba ci gui. 37 Bawipa Jesuh ah amawng cu acun ah kho avan ung thang zawp ci. 38 Bawipa Jesuh cu pum im ung kaa kyum law ba ne, Simon ah im ah hteit khätah, Simon ah akchu ah anu, ang htei ah gaw sei anam htei ci gui. 39 Bawipa Jesuh naw akgaw ah pei ah hteit netah, gawnak cu k'taap ge ne k'täm ci. Gaw nak maih sei, acun vai-am ani cu tho law ba ne, ngami cu khin na gui ci. 40 Khohni a sip kawn ah chang gui naw akgaw gui akda law püi u sei, ak gaw gui ah khan ah tän ne akut taih ne gai sak gui ci. 41 Khoshe gui cu chang gui ung kaa lut law zawp u netah, “nang cu Khanpughi ah Htapa ah na kiak ci nei” ci ne ng'shäu u ne dawng zawp ci gui. Bawipa Jesuh Messiah ah a kiak cu khoshe gui naw hmat ci gui ah kia sei, acun ah mawng kä ami pyein vai ah m'cäi gui ci. 42 Kho thai law khätah Bawipa Jesuh cu, pigaw ung kaa ading gei nak ah hteit ci. Chang gui naw shui ba ne hmu law u netah, kä a hteh taak gui vai ah cho ci gui. 43 Cun ung phi Bawipa Jesuh naw, “Kei cu Khanpughi naw ka hteit khai ana tüih law ah kia sei, Khanpughi ah uknak ah mawng ng'Thu Ni cu, akho hei zung ah phi hteit ne ka pyein khai nei” cik ci. 44 Cun kawn ah Bawipa Jesuh cu Judah kho avan, pum im päng ung hteit ne ng'thu pyein ci.
1 Kho hnüüp ät ung Bawipa Jesuh cu Kennesaret tuili kem ah ang düih zah ung Khanpughi ah ang thu ngai khai gui ah gawk lawk ci gui. 2 Cun zah ung tui kem ah hleiko hnih gawk lawk ci; hleiko ung kaa nga shui ciah chang gui cu kyum law u ne, ami ng'vai m'si ba ci gui. 3 Bawipa Jesuh cu Simon ah hleiko ung vah kai ne tui lam ah hei m'hnawn ba sak gui netah, chang gui-am ng'thu m'thein gui ci. 4 Ng'thu pyein zawp netah, Simon-am, “Tui a thuuk nak ah va ng'nawn ne, ng'vai vawi vä” ci ne kiak na gui ci. 5 Simon naw, “Bawipa, Keimi amü pum ng'vai vawi ne nga kä ka mi phak ci nei, cun ung phi na na vawih sak gui ung kami vawi shüm khai nei” cik ci. 6 Ngami naw vang nawn ne ng'vai vawi u netah ng'vai teek ghep ghep khai ah nga akda phak ci gui. 7 Cun ah kia sei a hei hleiko ung kaa ami paw gui väk ne khü gui u ne, ami van ah hleiko ung be ne hnim ghep ghep khai ah nga phak ci gui. 8 Simon Peter cu acun gui hmu netah Bawipa Jesuh ah ma ah m'kuukdong ne, “Bawipa, kei cu kat nak bik ciah chang ah ka kiak ci kia sei, kä na k'et ne a hei ah hteit tei-ä” cik ci. 9 Ani la apaw gui cu nga akda aih pha u netah cäcat ci gui. 10 Simon ah apaw goi Zebedee ah hta goi James la Johan phi cäi tuk ci goi. Bawipa Jesuh naw, Simon-am, “Kä kyi kyawk vä, tuhbäi ung tün ne nangmi cu chang phak ciah nga k'pha ah nami kiak khai nei” ci ne kiak na gui ci. 11 Ngami cu ami ng'hleiko tui kam ah m'hnawng ba u netah, ami khawh nüng nawng shüt u ne Bawipa Jesuh ah hnu ah läk ci gui. 12 Kho hnüüp ät ung Bawipa Jesuh cu pigaw tumat ung gawk lawk ci. Cun ah pigaw ah kheilei ung gaw ciah chang tumat om ci. Ani naw Bawipa Jesuh cu hmu netah, ama ah kawp ne, “Sazapa, na ng'zak hlü a om ung na theingthap sak ä” cik ci. 13 Bawipa Jesuh naw akut awn tawk netah, “Kei ah ng'zak hlü om ci nei, tuhbäi theingthap sä” ci khätah, acun vai-am ak khei gui cu khan zawp ci. 14 Bawipa Jesuh naw, “Shin ah mawng cu a u-am kä nam thein-en vai nei, taigüpa ah zäih ne hteit ne, na pumsa na teng sak vai, cun ung chang van naw na gai ah mawng hmat tuk khai gui. Cun kawn ah Moses ah thukhän ah mäih ah peit taak nak na bi vai nei” ci ne kiak nak ci. 15 Cun ung phi Bawipa Jesuh ah mawng cu thang law pi k'täi khätah, ang thu ngai hlük ci gui la gai nak gah hlük ci gui cu da law pi k'täi ne gawk lawk ci gui. 16 Cun kawn ah Bawipa Jesuh cu a ding gei nak ah amät hteit ne k'taigü ci. 17 Kho hnüüp ät ung Bawipa Jesuh naw am theithang gui zah ung, Kalile, Judah la Jerusalem khaw, pigaw päng ung kaa lawk ciah Pharisee gui la tuhkhän saza gui cu ngo tuk ci gui. Ak gaw a gai sak nak ah Khanpughi ah huham cu Bawipa Jesuh ung om ci. 18 Chang gui naw shum ciah chang tumat cu kawt law u ne, kyong ah luh püi vai ah k'tha nak ci gui. 19 Cun ung phi chang da aih sei kä luh püi hlawt u netah, im khan ah kai püi ne, m'di k'sih kaih pawk u netah, Bawipa Jesuh ah ma ah zuk chah ne m'shän ci gui. 20 Bawipa Jesuh naw ami zum nak adäm aih cu hmu netah, shum ciah chang-am, “Teihpüi awi, na kat nak ning k'phiawn pyi nei” ci ne kiak nak ci. 21 Pharisee gui la Saza gui naw, “Khanpughi bäng naw vah shetkat nak phiawn hning ci, shin ah mäih ah ng'thu lawk ci, shin ah chang a u ang? ci ne ngai ne ami mät ng'ce ng'cäk ci gui. 22 Bawipa Jesuh naw cun ah ami ngaih tüh cu hmat gui netah, “A i ah kia sei cun ah nami ngaih tüh ang? . 23 Na shetkat nak ning k'phiawn nei ci la na gaw thawh ne tho ne hteit ä, ci cu zäi ciah hmat u ne ang? 24 Kei naw akcang ka pyein cu, hmakat nak k'phiawn hning ciah huham cu Chang ah Htapa ung om ne, khomdek khan ah gawk law pyi ci nei, ci netah, shum ciah chang-am, “Tuhbäi tho law ne, na ih phak lok ne kawt ne, na im ah hteit ba ä” ci ne kiak nak ci. 25 Acun vai-am ak shum cu, ami ng'lung ah ng'däi lawk phäi ne, a ih phak lok ne kawt ne, Khanpughi m'hlüngtai netah, a im ah hteit ba ci. 26 Cun hmuk ciah chang gui ami van cäicat kyikyawk u netah, “tuhngawi mi hmu teng cu ang htei ah küikyang aih ci nei” ci ne kiak ci gui. 27 Cun kawn ah Bawipa Jesuh cu ahteh ba nak lam ah azung ah ngok ciah, akhon look ciah Levi cu hmu netah “Na läk ä” ci ne khü ci. 28 Levi naw ng'düi law ne a khawh avan nawng shüt netah, Bawipa Jesuh cu läk ci. 29 Cun kawn ah Bawipa Jesuh cu Levi naw a im ah aktung ah khin nak ci. Acun ung akhon look ci gui la chang hei gui khin akda law tuk ci gui. 30 Pharisee gui la Thukhän saza gui naw, “a i ah kia sei a khon look ci gui la changshe gui awn atäng ah nami ei awk ang? ci ne k'she na gui ci gui. 31 Bawipa Jesuh naw, “ak gai naw seibawi kä ng'za hlük ci, ak gaw naw vah ng'za hlük ci. 32 Kei cu chang k'ni gui ng'zu ba khai gui ah ka khü gui khai ah ka lawk ciah kä kiak ci, changshe gui ng'zu ba khai gui ah ka khü gui khai ah ka lawk ci” ci ne kiak na gui ci. 33 Chang am shah gui naw, Bawipa Jesuh-am, “Johan ah ng'khah püi gui la pharisee gui ah ng'khah püi gui cu, ashäng shäng ei hlawi ne taigü ci gui, cun ung phi nang ah ng'düihpüi gui läi ei aw ne om ci gui nei” cik ci gui. 34 Bawipa Jesuh naw, “Hta m'um nak ung chumah ciah pami a om ah chuih khin gui cu ei hlawi sak gui khai ang? 35 Cun ung phi chumah ciah pami cu nagmi ung kaa ami hteh nak püi vai ah hnüüp gawk lawk khai nei, cun kawn ah ngami cu ei hlawi khai gui nei” ci ne kiak na gui ci. 36 Bawipa Jesuh naw m'tumtäng nak tumat am thein ba gui cu, a u naw phi sui akthai k'teek ne, sui akkheei kä k'dawm man ci, cun ah k'dawm ah a kiak ung sui akthai phi di ne, sui akkheei naw phi kä kiom nak khai. 37 Cun kawn ah sapyit tui asü cu um akkheei ung a u naw kä than ci, cun ah than ung sapyit tui phi um k'pawk ung zut zawp ne um phi di khai. 38 Cun ah kia sei sapyit tui asü cu um akthai ung than vai, 39 sapyit tui ak phyim aw pyi ci naw ak thai kä aw ba hlük ci, ak phyim cu ni pi ci, ci ne kaik na gui ci.
1 Kyin hnüüp ung Bawipa Jesuh htang loma sun pah ne a hteh zah ung, ang düihpüi gui naw kiung htang cu m'ghawt ne m'hnoi ne ei ci gui. 2 Cun cu pharisee gui naw hmu u netah, “Thukhän ung kyin hnüüp ung a i kä bi vai om ci maw, a i ah kia sei bi nami bi ang? ci ne ng'shi gui ci gui. 3 Bawipa Jesuh naw, “David la ak chang gui naw ei ah cawi u netah ami bilawh gui cu kä nami phat tu man ne ma? 4 Ani cu Khanpughi ah pum im kyong ah lut ne, Khanpughi-am ami vawih cu ei ci, ak chang gui phi m'bei gui ci. Cun cu taigü bäng naw a ei vai’ ciah thukhän om te ci maw” ci ne kiak na gui ci. 5 Cun kawn ah Bawipa Jesuh naw, “Chang ah Htapa cu Kyin Hnüüp ah Bawipa ah kiak ci” ci ne kiak na gui ci. 6 Kyin ba hnüüp ung Bawipa Jesuh cu pum im ah hteit ne m'theithang gui ci. A cu ah ak patlam akut shum ciah chang tumat om ci. 7 Pharisee gui la thukhän saza gui cu, Bawipa Jesuh ami m'kat nak vai amawng shui hlü u netah, kyin hnüüp ung cun ah akut shum gai sak hman khai ci ne teng ci gui. 8 Bawipa Jesuh naw cun ah ami ngaih hmat netah, akut shum-am, “Ng'düi law ne ma lam ah lawä” ci khätah, cun ah chang cu tho law ne ama lam ah law ne ng'düi ci. 9 Cun kawn ah Bawipa Jesuh naw, “Ming'thukhän ung, kyin hnüüp ung ak'ni bi vai ang, akshe bi vai ang, a om? Chang phiawn sak vai ang? chang ngawn vai ang? , ka ning shi gui ci nei” ci na gui ci. 10 Bawipa Jesuh naw, cun ah chang gui avan teng gui netah, akut shum ci-am, “Na kut k'phiäih ä” ci nak ci. Cun ah chang naw a kut cu k'phiäih khätah, akut cu akni ah kia ba ci. 11 Pharisee gui cu ang htei ah thüi ne m'lungshe u netah Bawipa Jesuh ah khan ah a i hawk cha ah bi bi vai ciah ng'ge ci gui. 12 Cun kawn ah Bawipa Jesuh cu m'htung ah kai ne, Khanpughi ah mü lüng ne k'taigü ci. 13 Khaw thai law khätah ak chang gui ami van khü gui netah, ami van ung kaa gha-lei-goi ghü gui ne, ang düihpüi gui ah, ami ming cu sui gui ci. 14 Cun ah gha-lei-goi gui cu; (Peter ah a sui ah (Simon, anau Andrew, James la Johan, Philip la Batholome; 15 Matthe la Thomas, Alphaeus ah hta James, la apakhui m'hni pi ciah Simon, 16 James ah hta Judas la a ngawi ah Bawipa ga-am ap khai ah Judas Iskariot gui ah kia ci. 17 Bawipa cu ang düihpüi gui awn khomhtung ah kaa kyum law ba u ne ak chang khli gui awn ng'düi gi cui. Cun kawn ah Judea khaw ah kaa, Jerusalem ah kaa, la Tai-ar la Sidon pigaw gui ung kaa chang akchün om ci gui. 18 Ngami cu Bawipa Jesuh ah ng'thu ngaih tu vai la gai nak gah tu vai ah lawk ci gui ah kiak ci. Khawshe ah kai gui phi law u ne, gai ne hteit ba ci gui. 19 Bawipa Jesuh ung kaa hlüngtai nak naw chang khli gai sak khätah, chang gui naw Bawipa Jesuh ami tawn tu hning vai ah k'tha nak ci gui. 20 Bawipa Jesuh naw ang düihpüi gui tän ne teng gui netah, “Pyam tham ciah chang gui zeikiai vä, Khanpughi ah Uknak khaw cu nangmi ah khaw ah kia ci. 21 “Cawigha ciah chang gui zeikiai vä, Nangmi cu nami Phü m'ghüm khai nei. “Ang phli li ciah chang gui zeikiai vä, nami zeigaih nak gawk lawk khai nei. 22 “Chang ah Htapa ah hmawk ah chang gui naw, ami ning hnu ng'tuk püi gui ung, ami ning nawng gui ung, chang she ah ami ning pyein gui ung, nami zeikiai vai, 23 Cun ah mäih nami bui awt law ung nami zeikiai vai, zeikiai ne nami ng'lam vai; khankho ah nangmi ah gah vai cu däm aih ci. Ngami ah pughi gui naw profet gui ah khan ah phi acun ah bi man ci gui. 24 “Cun ung phi, män hmang ciah chang gui ding gei sei nami om ci, Nangmi ung thüi sei nak om ci nei! 25 “Tuhbäi nami plumshau ci gui thüi sei nak om ci. Nangmi, ung cawi gha nak gawk lawk khai nei. “Tuhbäi nami zei gaih ci gui thüi sei nak om ci, ng'phli li sei Nami thüisei nak gawk lawk khai nei. 26 “Chang ah ning m'hlüngtai gui cu thüi sei vai kia ci, Ngami ah pupa gui naw, hleeihlak ciah profet gui phi acun ah M'hlüngtai man ci gui. 27 Cun ung phi ka ng'thu ngai ciah chang gui aw, nami gaa cu m'hni vä, ning thüi na gui ciah khan ah akni bi vä, 28 Ning züi-gen gui ci-am, ng'thu k'ni m'khäh vä, ning hleip taap gui ci-am k'taigü pe vä. 29 Nang being vangtäng ami ning k'beeih ung, vangtäng phi na cuun ba vai, na suinu ami ning guh peit ung, na sui hta phi na peit gui vai. 30 Nang ah ng'zoi lawk ci phung-am na peit vai, na khawhchaam ning lak pek ciah kä na shan-en ba vai. 31 Chang naw na khan ah abi vai na ng'zak hlü ah mäih ah, chang ah khan ah na bi vai. 32 “Ning m'hni gui ci bäng nami m'hni tu ba ung, a i hawkcha ah Khanpughi ah hrilham nami gah khai ang? Katnak bik ci gui naw phi m'hni gui ci cu m'hni tu ba ci gui nei. 33 Nami khan ah akni bik ciah chang ah khan bäng ah akni nami bi tu ba ung a i hawkchaa ah Khanpughi ah hrilham nami gah khai ang? Kat nak bik ci gui phi acun ah mäih ah bik ci gui nei. 34 Ning thung ba gui hlawt khai ah nami ngaih ah chang bäng-am nami k'pu m'hnih ah a kiak ung a i hawk chaa ah Khanpughi ah hrilham nami gah khai ang? Kat nak bik ciah gui ah chang gui phi, Na thung law ba khai ciah ngaih u nak awn chang-am k'pu tuk ci gui nei. 35 Nangmi cu nami gaa nami m'hni vai, chang ah khan ah akni nami bi vai. Gah ba vai ciah kä ngaih u en ah nami ng'pu tu vai. Cun ah nami bi ung nangmi cu hlüngtai ciah m'tamkhah nak gah ne, hlüng pik'bäih ciah Khanpughi ah hta ah nami kiak khai. Cun ah Khanpughi cu m'gein nak kä hmat ci gui la changshe gui ah khan ah akni bik ci. 36 Nami Pa Khanpughi naw a ning m'gein gui ah mäih ah nami ng'gein tu vai. 37 Chang ah kat nak kä na pyein peit vai, cun ung Khangpughi naw na kat nak kä ning pyein Pek khai. Chang kä nami m'shuk chaak vai, cun ung Khanpughi naw kä ning m'shukcha gui khai. Chang ah kat nak nami m'gein vai, cun ung Khanpughi naw nami kat nak ning m'gein gui khai. 38 Chang-am nami peit vai, cun ung Khanpughi naw ning pe ba gui khai. Det ne, khuk ne, m'htung chah ne nami peit ung, a cun ah nami gah ba khai. Nän ne chang-am nami peit nak ung, Khanpughi naw nän ne ning pe ba gui khai” ci ne m'cäi gui ci. 39 Bawipa Jesuh naw am tumtäng nak cu, a mik m'dauh ci naw, amik m'dauh cu lam kä m'shüm hlawt khai, lam am shüm ung ani nik hnih ghem ah lut khai goi. 40 Ng'thei tuk ci cu m'thei tuk ciah kä ng'vai pi ci, Cun ung phi ang thei tu zawp kawn ah a saza cu k'phaa hning ci. 41 Na mät ah mik ek kä hmuh ah na paw ah mik mu ung ng'väi hta cu kä na teng peit vai. 42 Na mät ah mik ek kä ghu ah a i cha ah na paw-am na mik ek ning ghu pe vang ci ne, na pyein thei khai zaw? Limmaa ciah chang gui ngai vä, na mät ah mik ek na ghu kawn ah vah na paw ah mik ek hmu ne a ghu vai ah nam thein thei khai ah kiak ci. 43 Aghing nik ci cu shek ci ah kä m'theih ci. Aghing akshe cu akni ah kä m'theih ci. 44 Sing am theih awn aghing cu hmat vai kiak ci. Ng'hling sing ung k'thei m'theih sei kä chan man, ng'hlo ma ah sapyit up kä k'bih man. 45 Am lung ngaih nik ci cu akni ah ng'thu ng'htau ci, am lung ngaih shek ci cu akshe ah ng'thu ng'htau ci. A i ah kia sei ci ung, chang naw am lung ung om ci vah, a shai awn pyein ci. 46 “Ka ng'thu kä ngai lang ne a i ah kia sei Bawipa, Bawipa ci ne nami na khü ang? 47 Kei ah law ne ka ng'thu theing ng'za ne läk ciah chang cu lung ung khui shawk ne, k'tung ling ne, im co ci awn täng ci. 48 Kho khi ne aa sei tuinu ang güüt law ung phi cun ah im cu khäng khai ah cawh ah kia ne, kä ng'gäi hlawt ci. 49 Kei ah pyein ah ng'thu theing cu ng'za lang ne, kä läk ciah chang cu bigin ung khui shawk ne im co ci awn täng ci. Ani cu kho khi ne aa ne tuinu ang güüt law ung ng'gäi ne maih zawp khai” ci ne m'cäi gui ci.
1 Bawipa Jesuh cu cun ah chang gui am cäi guikawn ah Kapernaum ah hteit ba ci. 2 A cu ah Roman gabawi ung beit ng'zak ciah akchangshäm om ci. Ani cu si ghep ghep ne gaw ci. 3 Gabawi naw Bawipa Jesuh ah mawng ng'za netah law ne am gai law tu ba vai ah Judah ng'vai gui tüi ne khü sak gui ci. 4 Bawipa Jesuh ah gawk u netah, “Shin ah gabawi cu nang naw nam gein vai ah bä ci nei. 5 Ani cu keimi pakhui nam hni gui ne pum im tumat phi na cawh pe gui ci nei” ci ne ng'coi ng'pa ne pyein ci gui. 6 Bawipa Jesuh cu ngami awn atäng ah hteit tu ne, gawk law ghep ghep u khätah, gabawi naw chang gui am m'cäi law gui ne, “Bawipa, bawngbai ne kä law hnga ä, kei ah kyong khui cu nang awn kä khin ci nei, 7 kei ka mät phi nang ah law khin ciah chang ah kä ka kiak ci, cun ah kia sei, ‘gai sä’ na ci ah khoi ung kak chang cu gai khai nei. 8 Kei cu ang vai ah ak ka ung ka om ci, kei ah ka ung phi gakap gui om ci gui. Ngami ung kaa “Htiet ä” ka ci ah chang cu hteit ci, “Law ä” ka ci ah chang cu lawk ci. Ka changshäm cun phi “shin na bi vai” ka ci ung acun cu bik ci” ci ne pyein ci. 9 Gabawi ah ng'thu ng'za netah, Bawipa Jesuh cu cäicat ne chang gui teng gui netah, ani ah mäih ah zum ci cu, Israel chang gui ung phi kä ka hmu phak ci nei” cik ci. 10 Gabawi ah tüih gui cu im ah ami gawk law ba ung changshäm cu ana gai ba pyi sei hmuk ci gui. 11 Cun kawn ah Bawipa Jesuh cu ang Düihpüi gui awn ng'khap ne chang khli naw läk sei Nain gawnu ah hteit ci. 12 Gaw m'kawt pei ah ami gawk law zah ung chang gui naw gook kawt ne ana luh law püi u sei chang akda naw ana läk lawk ci gui. Cun cu hmeinu ah ahta tumat hta te sik ciah kiak ci. 13 Bawipa Jesuh naw cun ah hmeinu cu hmuh ne m'gein aih netah, “Kä kyap ä” ci ne kiak nak ci. 14 Cun kawn ah gook cu akut awn tawk sei, kawt ci gui cu ng'düm ci gui. Bawipa Jesuh naw, “Phäi hta, tho ba ä” ci khätah, chang k'si cu tho ne ngoh ne ng'htau ci. 15 Cun kawn ah Bawipa Jesuh naw anu-am ap ba ci. 16 Chang gui cäicat u netah mik mi ung profet mang tumat dang law pyi ci nei, Khanpughi cu akchang gui hun khai ah law pyi ci nei” ci ne Khanpughi cu m'hlüngtai ci gui. 17 Bawipa Jesuh ah a mawng cu Judah khopäng la a pei leng avan ung gawk zawp ci. 18 Johan-am ang khahpüi gui naw, amawng avan m'thein tu u khätah ang khahpüi sing goi khü ne, 19 Bawipa Jesuh ah tüi netah, “Nang cu kyum lawk khai ci ne kami gin ah Bawipa ah na kiak ci ang? Kä cun ung a hei kami ging ba khai ang? ci ne ng'shi sak goi ci. 20 Ngani cu Bawipa Jesuh ah om nak ah law ni netah, “Nang cu Kyum lawk khai ci ne Johan naw a pyein ah Bawipa ah na kiak ci ang? Kä cun ung a hei kami ging ba khai ang? ’ ci ne ning shi vai ah Tuihnim Johan naw ana tüih law goi nei” ci ne m'thein ci goi. 21 Cun zah ung Bawipa Jesuh naw chang akda cu gawpai nak natnak gui ung gai sak gui ne, khoshe phi k'täm ci, amik m'dauh phi m'dei ba sak ci. 22 Bawipa Jesuh naw Johan ah tüih law gui-am, “Hteit ba ne nami hmuh nami ng'zak cu Johan-am m'thein ba vä; amik m'dauh ci gui m'dei ba ci gui, akho ng'khem ci gui hteit ba thei ci gui, kheilei ung gaw ci gui theek ba ci gui, ak hnga pang ci gui ng'za ba ci gui, sik ci gui ghing ba ci gui, dukhaih ciah chang gui naw ng'Thu Ni ng'za pyi ci gui nei. 23 Kei ah khan ah ang ngaih gep ci cu zeikiai nak akda om ci nei” ci ne m'thein goi ci. 24 Johan ah tüih law goi ani hteh ba kawn ah Bawipa Jesuh naw chang gui-am Johan ah mawng am thein gui cu, “A i nami teng khai ah ang, Johan ah om nak k'pya lün ah nami hteh? , kho khi sei hnün ciah m'long kyai gui nami teng khai ma? , 25 Kä cun ung akni sui sa ne ng'bilawh ci gui nami teng khai ma? Akni sui ei ci gui cu bawimang ah im ung om ci gui nei. 26 Kä cun ung profet nami teng khai ma? Akcang ah profet ah bä pi ci cu nami hmuk khai nei. 27 Cacim theing ung Khanpughi naw, “Na law nak vai ah lam ung ma lawk khai ah ka ng'shä ka tüi lawk khai nei” a ci cu Johan ah kiak ci nei. 28 ‘Anu ah puk ung ng'tüi lawk ciah chang gui nüng ung, Johan ah bämang pi ci cu a u kä om ci nei” ci ne ka ning m'thein gui ci. Cun ung phi Khanpughi ah Uknak kho ung akzaw pi k'bäih cu Johan na mä bämang ba pi ci nei” ci ne m'thein gui ci. 29 Khanpughi ah ng'thu ngai ne Johan ah tuihnim nak gah ci gui ah akhawn look ci gui la chang akda cu, acun ah ng'thu ng'za u netah zeikiai ci gui nei. 30 Cun ung phi Pharisee gui la ng'thukhän hmat ci gui läi cu, Khanpughi ah ng'zak hlü nawng ci gui ah kia ne, Johan ah tuihnim nak cu maa nak ci gui. 31 Bawipa Jesuh naw, “Tuhchü chang gui cu a i awn ka m'tumtäng gui khai ang? Ngami cu a i awn täng ci gui ang? 32 Ngami cu sumlei lam ung ngoh u neh, ‘akni ah tum ung kä nami ng'lam ci, thüi kyah nak ng'äi m'cu ung phi kä nami thüi kyap ci’ ci ne ng'htau ci gui ah ak hmawhta gui awn täng ci gui. 33 A i ah kia sei ci ung Tuihnim Johan law ne, ei kä ei ne, sapyeit tui kä aw ne om sei, ‘ani ung khoshe om ci nei’ nami cik ci. 34 Chang ah Htapa law ne, ei ne aw sei, ‘ei aw aih ci, chang she gui la akhawn look ci gui ng'khawtsheng püi gui ci’ nami cik ci. 35 Cun ung phi Khanpughi ah hmuhmat nak gah pyi ci gui naw, cun ang düng ah mawng cu dang sak ci gui nei” ci ne pyein ci. 36 Pharisee Simon naw Bawipa Jesuh cu mü-ei am bei tu vai ah khü sei, Bawipa Jesuh cu Simon ah im ah hteit ne ei ei vai ah ngo tuk ci. 37 Cun ah gawnu ung kat nak bik ciah hnumi tumat om ci. Ani cu Pharisee ah im ah Bawipa Jesuh ei ei tu ne a om tu ng'za netah, tuing'ui um ät law püi ne, Bawipa Jesuh ah kho pei ah kyap ne ng'düi ci. 38 Ang phli tui gui cu Bawipa Jesuh ah kho khan ah zu hteu khätah, alu sam awn ghu ba ci. Cun kawn ah a khaw cu ng'ui netah tuing'ui awn hluk pek ci. 39 Pharisee Simon naw cun cu hmu netah, “Shin ah chang shi profet akcang ah a kiak läi ung, akhaw k'pan pek ciah hnumi cu a u ah a kiak, a i kat nak bik ciah a kiak ah hmat khai süte” ci ne ngai ci. 40 Cun zah ung Bawipa Jesuh naw ani-am, “Simon, ka ning m'thein vai om ci nei” ci ne pyein ci. Simon naw, “Bawipa nam thein ä” cik ci. 41 Bawipa Jesuh naw, “Ngui ng'pu ciah chang tumat ung ngui pu tuk ciah chang sing goi om ci. Tumat naw phia hma, tumat naw hma-kip ciah pu tuk ci goi. 42 Ani nik hnih naw kä thung law ba hlawt ni sei, ngui ng'pu ci naw nawng pe goi ci. Cun ung ngani ung kaa a u naw ngui ng'pu ci cu zei na pi khai ang? ci ng'shik ci. 43 Simon naw, Ngui akdäm pi a nawng peit ah chang naw zei na pi khai ah ka ngai ci” ci ne pyein ci. 44 Bawipa Jesuh naw, “Nang ah ngaih cu hman ci nei, ci nak ci. Cun kawn ah hnumi lam ah ng'hlat netah, Simon-am, “Shin ah hnumi na hmuk ci ang? Kei cu na im kyong ah ka luh law zah ung khaw m'si nak vai kä na na pek ci. Cun ung shin ah hnumi naw ang phli tui awn ka khaw nam si ne, alusam awn ghu pyi ci nei. 45 Nang naw kei kä na na ng'ui ci, cun ung phi shin ah hnumi naw shin ah im ung ka luh law ung tün ne kei ah khaw cu na ng'ui ci nei. 46 Nang naw kei ah lu cu kä na na hluk ci, cun ung phi ani naw tuing'ui awn kei ah lu cu hluk pyi ci nei. Cun ah kia sei nang-am ka ning m'thein cu, ’ shin ah hnumi cu hmakat nak akda ung kaa phiawng pyi ci nei. 47 Cun ah a phiawn ah mawng cu, ani ah däm aih ciah a zum nak naw dang sak ci nei. Akat nak apihta bäng phiawn nak ciah chang cu a zum nak apihta bäng om ci. ci ne kiak na gui ci. 48 Cun kawn ah Bawipa Jesuh naw, “Na kat nak ka ning phiawn sak pyi ci nei” ci ne cun ah hnumi-am kiak nak ci. 49 Bawipa awn atäng ah ei ei ci gui ah chang gui naw, “kat nak hngaw phiawn sak hning ci, shin ah chang cu a u ang? ci ne ami mät ng'cecäk ci gui. 50 Cun ung phi Bawipa Jesuh naw, cun ah hnumi-am, “Na zum nak naw ning phiawn sak pyi ci nei, zeikiai ne hteit ba ä” ci ne kiak nak ci.
1 Api a shou hta kawn ah Bawipa Jesuh cu gawnu gawhta apigaw päng ung hteit ne, Khanpughi ah uknak khaw ah mawng Thu Ni cu shäu ne pyein ci. 2 Ang düihpüi gha-lei-goi cun phi ani awn atäng ah hteit tuk ci gui. Khoshe ah kai gui la nat nak ung kaa ak phiawn gui ah hnumi gui cun phi Bawipa Jesuh cu läk tuk ci gui. Cun gui cu; Ng'zo pachih naw a om nak man te phiawn nak gah ciah Mari Makdalen; 3 Herod ah mangkyong ung bawi ah kiak ciah Chuza ah chu Joanna; Susanna la Bawipa Jesuh la ang düihpüi gui-am tu m'bei gui vai ah ami mät ah ei awk phui ne law tuk ci gui ah ahei hnumi akda gui ah kiak ci. 4 Apigaw päng ung kaa gawk lawk ciah chang gui cu, apei ah ng'bum law u khätah, Bawipa Jesuh naw shin ah m'tumtäng ne m'thein gui ci; 5 Hnü ät ung chang tumat cu loma ah hteit ne m'shi phu ci. A phu ah m'shi am shah cu lam ung kia lawk ci, cun ah m'shi cu chang naw kai na ne, k'phiu kha naw ei zawp ci. 6 M'shi am shah cu lung hmu ah kia lawk ci, ng'lih pyou te ci, cun ung phi kä ghing hlawt ne si ba zawp ci. 7 M'shi am shah cu ng'hling hmu ah kia lawk ci. Ang lih pyou, a ghing gong pang ung phi ng'hling naw k'düi sei kä vuipai hlawt ci. 8 M'shi am shah cu ng'lei k'ni ung kia law ci, cun cu akni ah ng'lih pyou ne, ghing gong ne, phia ciah vuipai m'theih tak ci” ci ne m'thein gui ci. Cun kawn ah “ak hnga om ci naw ng'za sä” ci ne m'lau ci. 9 Ang düihpüi gui naw cun ah m'tumtäng ne a pyein hlü ah mawng cu ng'shi u khätah, 10 Bawipa Jesuh naw, “Nangmi läi cu Khanpughi ah thuuk ne ng'kau ciah khankho ah mawng cu nami hmat pyi ci. Cun ung phi chang akda cu teng lang ne kä hmuk ci gui, ng'za lang ne kä hmat ci gui kia sei, m'tumtäng ne m'thein gui ah kiak ci nei” ci ne pyein ci. 11 Shin ah m'tumtäng ne pyein nak hlü cu; m'shi cu Khanpughi ah ng'thu ah kiak ci. 12 Lam ung kia lawk ciah m'shi ci cu, Khanpughi ah ng'thu ng'zak ci, cun ung phi ng'zak ci gui naw zum law ne hun nak ami gah vai ah khogam cu ng'ä law netah, ami m'lung kyong ung kaa Khanpughi ah ng'thu cu lak pe gui zawp ci. 13 Lung hmu ah kia lawk ciah m'shi ci cu, Khanpughi ah ng'thu ng'za ne zeikiai ne zum ci gui ah kiak ci. Cun ung phi ngami ah m'lung kyong ah Khanpughi ah ng'thu cu kä khäng ne, ashäng hta düt lüng sei tüihtok nak a bui awt law ung maih zei ba ci. 14 Ng'hling hmu ah kia lawk ciah m'shi ci cu, Khanpughi ah ng'thu ang zak kawn ah kyikyawk ng'ä ng'ai nak, bühmang nak la hlimtui nak gui naw m'khüt sei kä hnün tho hlawt ciah kiak ci. 15 Ng'lei k'ni ung kia lawk ciah m'shi ci cu, Khanpughi ah ng'thu ang zak kwn ah nik ci la ng'düng ciah, m'lung khäng htek khai ah zum ne, vuipai m'theih tak ciah kiak ci. 16 “Mei m'däi netah a u naw dawn awn kä uk ci, ih phak kaa ah phi a u naw kä hmoh man ci. Kyong ah lut lawk ci gui naw a deikhang ami hmuh vai ah lung k'pei ung taih ne m'däi ah kiak ci. 17 Thuh phung ng'dang khai, küp phung ng'hmawng khai, akdei cu khang khai. 18 Cun ah kia sei nami ngaih ng'zak cu geing na vä, om ciah kaa län ne k'be ba khai, kä om ci ah kaa, a taak hta phung avan lak pek khai” ci ne pyein ci. 19 Bawipa Jesuh ah anu la anau gui cu a om nak ah lawk ci gui. Cun ung phi chang da aih sei kä hmu hlawt ci gui. 20 Chang gui naw, “Na nu la na nau gui naw ning hmu hlü u ne ak pung ah ning ging ci gui nei” ci ne m'thein lawk ci gui. 21 Bawipa Jesuh naw, “Khanpughi ah ng'thu ngai ne ng'za ne läk ciah chang gui cu kei ah ka nu la ka nau ah kiak ci gui nei. cik ci. 22 Kho hnüüp ät ung Bawipa Jesuh cu ang düihpüi gui awn Hleiko ung ng'cum unetah “Tuili hei gaa ah mi va kai khai nei” ci sei, va pawng vük ci gui. 23 Hleiko awn cun ah ami vang kah vü sang ung Bawipa Jesuh cu ip ci. Cun zah ung tuili khan ah puikho khi ne ng'pheet law sei, ami hleiko ung tui be law hmet hmet ci. Ngami cu tui ung lut ne di lawk khai gui ah kia lawk ci. 24 Ang düihpüi gui naw Bawipa Jesuh cu m'tho ba u ne, “Bawipa, kami si lawk khai kiak ci nei” ci ne m'lau ci gui. A ih nak ung kaa tho law ba netah, Bawipa Jesuh naw kho khi la tui ng'hmawk cu ng'düm sak ci, kho khi ng'düm ne tui hnawk pyei ci. 25 Bawipa Jesuh naw, “A hawi ang nami zum nak? ci ne ang düihpüi gui cu kiak na gui ci. Ang düihpüi gui cu cäicat kyikyawk u netah, “Shin ah chang cu a u ang? Kho khi la tui hnawk naw ani ah ng'thu ngai ci gui nei” ci ne ami mät ng'htau ci gui. 26 Bawipa Jesuh la ang düihpüi gui cu Kalile kho hei ga, Kerasa gawnu ah va kai ci gui. 27 Tui kem ah ami va gawk vai-am pigaw ah kaa chang tumat cu Bawipa Jesuh ah om nak ah lawk ci. Ani cu khoshe naw a kai shou law pyi ci kia ne, im ah phi kä om ba ne, ng'cim hmun zung ah ak plui tawn ah om ci. 28 Ani naw Bawipa Jesuh cu hmu netah, kyap ne m'lau ne m'khuukdong ne, “Hlüngtai pi säih ciah Khanpughi ah Htapa, Jesuh Bawi! Kei cu a i hawk cha ah ang na na kiak sak hlü? Kei kä na sheit kat-en sak kä bäi” ci ne ng'paa nak ci. 29 Cun ah a pyein cu Bawipa Jesuh naw ani ung om ciah khoshe a dawng vai ah aktäm ah hmawk ah kiak ci. Ani cu khoshe naw akda vei a kai man ah kiak ci. Ani cu akut khaw avan m'si gui awn khit ne ami k'pawn ung phi, m'si gui kaih pit pit ne khoshe ah khah püi nak, bung puk ah hteit ci man ciah kiak ci. 30 Bawipa Jesuh naw, “Na ng'ming a u ang? ci ne ng'shik ci. Ani naw, “Kei ka ming cu Mob nei” cik ci. Ani cu khoshe akda naw a kai ah kia sei cun ah a pyein ah kiak ci. 31 Khoshe gui naw, “keimi cu m'htei lung khui ung kami gawk khai ah kä na k'täm men gui ä” ci ne ng'cawi ng'paa nak ci gui. 32 Cun zah ung vawk mak ät cu kho gui ng'nawi zung ah lum ci gui. Khoshe gui naw vawk gui ung ami luh hning vai ah Bawipa Jesuh ah ng'cawi ng'pa ci gui. 33 Bawipa Jesuh naw ä za pe gui sei, chang ung kaa lut law ne vawk gui ung lut ci gui. Acun vai-am vawk gui cu tui kam keing ung ng'hlü ne dawng u ne, tuili ung lut zawp ci gui. 34 A cun gui hmuk ci gui ah vawk shäm ci gui cu, püi ne dawng ne gawnu gawhta akda ung acun ah mawng gui cu ngak ci gui. 35 A cun gui teng tuk khai gui ah chang akda gawk law u ne, Bawipa Jesuh ah pei ah law u netah, Bawipa Jesuh ah pei ah, ng'suisak kha thüüp ne, chang k'ni ah kia ne ngok ciah, khoshe ah kai te ah chang cu hmu u netah ami van kyikyawk ci gui. 36 Khoshe ah kai a phiawn sak hmu tuk ciah chang gui naw gawk law ba ci gui-am amawng avan m'thein tu gui ci gui. 37 Cun ah kho ung chang gui cu ang htei ah kyikyawk u netah Bawipa Jesuh cu akzang ah ahei ah a hteh vai ah pyein u sei, Bawipa Jesuh cu hleiko ung kai ba ne a hei ah hteit ba ci. 38 Khoshe phiawn nak ciah chang naw Bawipa a hnu ah läk tuk khai ah pyein lawk ci. 39 Cun ung phi Bawipa Jesuh naw, “Na im ah hteit ba ne, Khanpughi ah m'gein nak na gah ah mawng cu m'thein tu gui ä” ci nak ci. Cun ah chang naw pigaw avan ung hteit ne ani ah khan ah Bawipa Jesuh naw abi ah mawng cu zei ne ngak ci. 40 Bawipa Jesuh cu tuili vang gaa ah gawk law ba khätah ana ging ciah chang gui naw, ana dou ci gui. 41 Cun zah ung Jairus ming nak ciah chang cu gawk lawk ci. Ani cu pum im uk ciah chang ah kiak ci. Bawipa Jesuh ah khaw pei ah m'khukdong ne a im ah a hteh tu vai ah khü ci. 42 A kho kum gha-lei-goi lüng ciah tumat hta ah a hta hnumi cu si ghep ghep ne gaw khätah cun ah a khü ah kiak ci. Bawipa Jesuh cu ani awn atäng ah hteit tu khätah chang akda naw net ne hteit ci gui. 43 Cun gui ah ng'lung ah kho kum gha-lei-goi ung asi ng'chawt sei gaw ciah hnumi tumat om ci. Amät ung om ciah ngui ghui avan ng'pyi khai ah sei saza akda ghüh ne ng'pün ne phi kä gai ba ci. 44 Cun ah hnumi cu Bawipa Jesuh ah ahnu ah law netah, azih sui ah a pyai hta tawk khätah, acun vai-am asi ng'chawt ci cu ng'düm ci. 45 Bawipa Jesuh naw, “A u ang na tawk ci” ci ne ng'shi gui ci. Chang gui naw, “Kä ka mi ning tawk ci nei” ci ne pyein u khätah, Peter la a paw gui naw, “Bawipa, chang akda naw ning hnet ne hteit ci gui maw a u ang na tawk ci, ci ne a i ah kia sei na pyein ang? cik ci gui. 46 Cun ung phi Bawipa Jesuh naw, “Chang tumat naw kei na tawk ci nei, kei ung ka hlüngtai nak aluh law ka hmat ci nei” ci ne pyein ci 47 Cun ah hnumi cu ani naw a tawk hmat law khätah Bawipa Jesuh ah ma ah law ne kawp ci. Cun kawn ah a i ah kia sei Bawipa Jesuh atawk ah mawng la atawk vai-am a gaw nak a maih ah mawng cu chang gui ah ng'zak tu ah pyein ci. 48 Bawipa Jesuh naw, “Ka hta hnumi, na zum nak naw ning gai sak pyi ci nei, zeikiai ne hteit baä” ci ne kiak nak ci. 49 Cun ah Bawipa Jesuh naw thu a pyein zah ung pum im uk ciah im ah kaa chang tumat gawk law ne, “na hta hnumi si pyi ci nei, saza ng'vai kä khü ling ä” ci ne Jairus-am kiak nak ci 50 Bawipa Jesuh naw, cun a ci ng'za netah, Jairus-am, “Kä kyi kyawk kä, azum bäng ah zum ä, na hta hnumi gai ba khai nei” ci ne kiak nak ci. 51 Bawipa Jesuh cu pum im uk ciah im ah ahteh zah ung Peter, Johan, James la cun ah ak hmaw ah nu la pa bäng kyong ah luh püi gui ci. Cun ah hnumi hta sik ci kia sei chang akda cu kyap ci gui. 52 Bawipa Jesuh naw, “Kä kyap vä, shin ah ak hmaw cu kä sik ci nei, ip ci nei” cik ci. 53 Hnumi hta si pyi ciah hmat ciah chang gui naw, Bawipa Jesuh cu m'lep nak ci gui. 54 Bawipa Jesuh naw hnumi hta ah kut cu k'pang netah, 55 “Paihta, tho lawä” cik ci. Hnumi hta cu ghing law ba ne acun vai-am ng'düi lawk ci. Bawipa Jesuh naw cun ah hnumi hta-am ei ami m'bei vai ah m'cäi gui ci. 56 Anu pa gui cu ang htei ah cäicat ci gui. Cun ung phi shin ah amawng gui kä ami pyein sak vai ah ng'thu khän gui ci.
1 Bawipa Jesuh naw ang düihpüi sing gha-lei-goi cu a pei ah khü gui netah, khoshe m'khüt nak la nat nak näng nak ah hlüngtai nak la m'khüt näng nak cu ap gui ci. 2 Cun kawn ah Khanpughi ah uknak kho ah mawng ami pyein vai la gawpai ci gui ami gai sak vai ah mawng m'cäi ne tüi gui ci. 3 “lam ah ei-mang vai a i phi kä nami hteh püi vai; ng'sho htung, awi k'bah, sho-ei, ngui ghui a i phi kä nami hteh püi vai. Sui phi kä nami m'shawih vai. 4 Nami gawk nak ah pigaw ah ning dou gui sei nami kai nak ma ah im ung kä nami hteh ba pha ah chuih nami om tu vai. 5 Nami gawk nak ah pigaw ah a u naw kä a ning dou gui ah akiak ung, cun ah pigaw ung kaa nami ng'düih law ba ung, ng'thu m'shi sho ah nami khawpha ung kaa, m'vut nami khawn ba shüt vai” ci ne m'cäi gui ci. 6 Ang düihpüi gui cu ng'düi law ne hteit ne apigaw päng ung hun nak Thu Ni shäu ne pyein u ne, gawpai ci phi gai sak ci gui. 7 Kalile kho uk ciah Herod mang cu Bawipa Jesuh ah bi ng'za netah ang htei ah ang ngaih awng-aa ci, A i ah kia sei ci ung chang am shah naw, “Tuihnim saza Johan tho ba ci nei” cik ci. 8 Am shah naw, “Elijah law ba ci nei” cik ci, am shah naw, “cau profet tumat ghing ba ne law ba ci nei” cik ci ah ami pyein gui cu Herod mang naw ng'za netah, 9 “Kei naw Johan ah lu ka m'chün pyi ci, tuhbäi a ming ka ng'zak ah chang cu a u ang? ci ne Bawipa Jesuh cu ahmuh vai ah k'tha nak ci. 10 Ang düihpüi gui cu law ba u ne ami bilawh gui avan cu Bawipa Jesuh-am m'thein law ba ci gui. Bawipa Jesuh naw ngami cu Bethsaida gawnu ah khü ne hteh püi gui ci. 11 A cun ah mawng cu ng'za u netah, chang akda naw a hnu ah läk lawk ci gui. Bawipa Jesuh naw chang gui cu dan gui ne Khanpughi ah uknak kho ah mawng cu m'thein gui ci. Gawpai ci gui phi gai ba sak gui ci. 12 Khohni sip ne kho mü hun law khätah, ang düihpüi gui cu Bawipa Jesuh ah law u ne, shin ah chang gui shi, pigaw gui la lo k'pyu gui zung ah ami ih om tu vai la ami ei awk tu vai ah tüih gui vai nei, shin zah cu chang ah kä om nak ah kiak ci nei” ci ne pyein ci gui. 13 Bawipa Jesuh naw, “Na mi mät naw ei m'bei gui vä” cik ci. Ang düihpüi gui naw, “Keimi ung m'htut pum hma la nga hnih hta bäng vah om ci, Shin ah chang gui avan ah ei vai cu hteit ne kami khleih vai ang? ci ne ng'shik ci gui. 14 (Cun ung chang avan phia-hma-kip lawk ci gui). Bawipa Jesuh naw ang düihpüi gui-am, “Chang hma-kip ciah ng'bum khai ah ngoh sak gui vä” ci ci. 15 A cun ah ami ngoh sak gui kawn ah, 16 Bawipa Jesuh naw m'htut pum hma la nga hnih cu la netah, M'htut la nga cu k'bou ne chang gui-am ami tei gui vai ah ang düihpüi gui-am pe gui ci. 17 Chang ami van naw ami phü ah ei ci gui. Ami ei k'pawih avan m'dawn ba u sei, them dawn gha-lei-goi ung be lawk ci. 18 Kho hnüüp ät ung Bawipa Jesuh cu amät taigü ne a om zah ung ang düihpüi gui cu a pei ah law u khätah, Bawipa Jesuh naw, “Chang gui naw kei cu a u ah ang ami na ngaih” ci ne ng'shi gui ci. 19 Ang düihpüi gui naw, “Chang am shah naw tuihnim Johan nei cik ci, chang am shah naw Elijah nei ci ci, chang am shah naw cau kaa ghing ne law ba ciah Profet nei cik ci” ci ne pyein ci gui. 20 Cun kawn ah Bawipa Jesuh naw, “Nangmi naw mä, kei cu a u ah ang nami na ngaih? ci ne ng'shi gui ci. Peter naw, “Nang cu Khanpughi ah Messiah nei” ci ne ng'kiaa ne pyein ci. 21 Bawipa Jesuh naw acun ah mawng api ah phi kä ami ngak-en vai ah m'cäi gui ci. 22 Cun kawn ah Bawipa Jesuh naw, “Chang ah Htapa naw zaica nak akda awt khai, chang ng'vai gui, taigüpa gui, thukhän saza gui naw, shedam nak khai gui. Ani cu sih nak phi awt khai, cun ung phi ak hnüüp thum hnüüp tho ba ne ghing ba khai” ci ne ang düihpüi gui-am m'thein gui ci. 23 Cun kawn ah Bawipa Jesuh naw chang gui-am, “Kei ah ng'khahpüi ah kia hlük ciah chang naw, amät ah hmawk nawng shüt ne, amät ah kutlam tung cu, ak hnüüp tä kawt netah ka hnu ah na läk sä. 24 A ghin nak ka ng'vang ci cu, a ghin nak maih khai, kei ah hmawk ah a ghin nak pek ci cu, ghin nak gah khai. 25 Chang cu khomdek khan avan akhäm ung phi a ghin nak amaih ung a kholä ah kiak ci. 26 Kei la kei ah ng'thu ah hmawk ah lü ng'aa ciah chang cu, chang ah Htapa amät ah bämang nak la Apa ah bämang nak, khankho chang theing gui ah bämang nak awn, a kyum law ba hnüüp ung, ani ah hmawk ah lü ng'aa nak om khai. 27 Kei naw nangmi-am akcang ka pyein cu, shin ah kho ung chang am shah cu Khanpughi ah uknak kho kä mi hmuh pha ung kä sik khai gui nei. cik ci. 28 Cun ah ng'thu a pyein nak, ak hnüüp chih nak ung Bawipa Jesuh cu Peter, Johan, James, ni gui awn taigü vai ah khomhtung ah kai ci gui. 29 Ak taigü zah ung a müi hmai cu ng'khuk hlat ne, asuisak phi a bawk ah pyü ne khang lawk ci. 30 Chang hnih cu ang ghit ah ng'dang law ni ne, Bawipa Jesuh awn ng'thu ci goi. Ngani cu Moses la Elijah ah kiak ci. 31 Ngani cu Khankho bämang nak awn kyum law ni ne, Khanpughi ah ng'zak hlü ah Jerusalem ung kä shou pha seih Bawipa Jesuh asih law vai ah mawng cu pyein ci goi. 32 Peter la apaw gui cu ngam ne ip ci gui. Cun ung phi ami ng'shüm law ba ung Bawipa Jesuh ah pyü khang nak la ani awn atäng ah ng'düi ciah chang goi cu hmuk ci gui. 33 Cun ah chang goi maih law ba ni khätah Peter naw, “Bawipa, shin zah cu om nak ah nik ci nei, nang ah hmawk ah phung tumat, Moses ah hmawk ah phung tumat, Elijah ah hmawk ah phung tumat, phung tung thum ah kami co khai nei ci ne, ang shüm kang ah pyein ci. 34 Cun ah a pyein zah ung khomei kai ne ami khan ah ng'hniim law gui sei ang düihpüi gui cu kyikyawk ci gui. 35 Cun zah ung khankho ah kaa k'aw cu, “Shin cu kei ah Htapa nei, ani cu ghü ne ka m'düih pyi nei, ani ah ng'thu nami ngaih vai nei” ciah thang lawk ci. 36 Cun ah k'aw ang thang law kawn ah Bawipa Jesuh amät bäng ng'düi sei, ang düihpüi gui naw hmuk ci gui. Cun ung phi cun ah ami hmuh ah mawng cu cun zah ung api ah phi kä pyein ah adüm ah om ci gui. 37 Angawi ung Bawipa Jesuh la ang düihpüi gui cu m'htung ah kaa kyum law ba u sei, chang akda naw ana dou ci gui. 38 Chang gui ah ng'lung ah kaa tumat naw, “Bawipa, Kahta na teng law tu peä, tumat hta bäng ah ka hta nei, khoshe naw kai sei, akten ah m'lau ci ci. 39 Khoshe naw ani cu m'lau ne ng'tat khai ah ci sei, am shi phawp phi hmoh ci ci nei. Ani cu ang htei ah bawngbai zaica khai ah ci ne tah khoshe cu lut law ba ci ci. 40 Na ng'düihpüi gui cu khü ne ka k'täm sak gui ung phi ngami naw kä m'khüt ci gui nei” cik ci. 41 Bawipa Jesuh naw, “Zum nak kä om ciah hmu ah ng'hlat ba thei ciah chang gui, kei naw nangmi a i güt ka ning ngäng gui khai ang? ci netah a cun ah chang-am, “Na hta cu law püi zä” ci nak ci. 42 Cun ah ak hmaw a gawk law zah ung khoshe naw m'gaw law ba sei m'dek ung ng'tat ne, ng'khlet ne ng'zän ci. Bawipa Jesuh naw khoshe cu k'täm ne, ak hmaw cu gai sak netah, apa-am ap ba ci. 43 Chang gui cu Khanpughi ah küikyang hlüngtai nak cu hmu u netah cäicat ci gui. Chang gui naw abilawh gui ah phäh ah ami cäicat zah ung, Bawipa Jesuh naw, 44 “Chang ah Htapa cu chang gui ah kut ung ap khai gui nei, Cun cu kä nami m'hnih-en vai nei. ci ne ang düihpüi gui-am kiak na gui ci. 45 Cun ung phi ang düihpüi gui naw kä hmat ci gui. Shin ah ng'thu cu kä ami hmat vai ah ng'zih ci, cun ung phi Bawipa Jesuh cu kä ng'shi veing ci gui. 46 Ang düihpüi gui cu ami mät gui zung kaa a u ang ak bä pi k'bäih ci ne, ng'cuh ci gui. 47 Bawipa Jesuh naw, cun ah ami ng'cuh cu ng'za netah, ak hmaw tumat khü ne a pei ah m'düih ci. 48 Cun kawn ah Bawipa Jesuh naw, “Kei ah ming awn shin ah ak hmaw dou ci cu, kei na dou ci ah kiak ci, kei na dou ciah chang cu, kei na tüi lawk ci dou ciah kiak ci, Nangmi ung kaa ak zaw pi k'bäih cu ak bä pi k'bäih ah kiak ci” cik ci. 49 Johan naw, “Bawipa nang ah ming awn khoshe k'täm ciah chang tumat kami hmuk ci, ani cu mik mi ah paw ah kä kiak ci, keimi naw ani am nang Bawipa Jesuh ah ming awn, kä abi vai ah kami maa nak shüt nei” cik ci. 50 Bawipa Jesuh naw, “Cun ah chang kä maa-en na vä, nangmi kä ning hnungtuk püi gui ci cu, nami chang ah kiak ci nei. ci na gui ci. 51 Khankho ah a kai ba vai ng'et law khätah Bawipa Jesuh cu Jerusalem ah hteh vai ah k'bäi ci. 52 Cun ah kia sei ak chang gui cu, a i baw ana bi lawk khai gui ah Samaria pigaw tumat ah hei k'hma gui ci. 53 Cun ung phi Bawipa Jesuh naw Jerusalem ah a hteh lam ah kia sei, pigaw ah kaa gui naw ana maa nak ci gui. 54 Cun gui cu ang düihpüi James la Johan naw hmu ni netah, “Bawipa, Khankho ah kaa, mei k'däi kia law ne a uih gui vai ah, nang ng'zäk hlü om ne ang? ci ne ng'shik ci goi. 55 Bawipa naw ngani cu akni ah m'cäi goi ci. 56 Cun kawn ah Bawipa Jesuh la ang düihpüi gui cu a hei pigaw tumat ah hteit ci gui. 57 Cun ah ami hteh zah ung chang tumat naw Bawipa Jesuh-am, “Na hteh nak päng ah ka ning läk khai nei” cik ci. 58 Bawipa Jesuh naw, “Sa ui cu a khui om ci, kha phi ang bu om ci, cun ung phi chang ah Htapa alu m'chim ne ang düm nak vai phi kä om ci. 59 Bawipa Jesuh naw, a hei chang tumat-am, “Na läk law ä” ci nak ci. Cun ung phi ani naw, “Kapa ah gook cu ka va m'cim ba cang khai nei” cik ci. 60 Bawipa Jesuh naw, “Aksi cu aksi gui naw m'cim u sä, nang hteit ne Khanpughi ah Uknak kho ah mawng cu na pyein vai nei” ci nak ci. 61 A hei tumat naw, “Bawipa, ka ning läk khai nei, cun ung phi ka kyong ung kaa gui ka va gidam ba gui cang khai” cik ci. 62 Bawipa Jesuh naw, “Vintang, m'hachaa kawt ne, ahnu ah va mang ba ci cu Khanpughi ah Uknak kho ah hmawk ah a i ah kä mawng ci nei” ci na gui ci.
1 Cun kawn ah Bawipa Jesuh naw ang khah püi chang sing chih-kip-lei-goi cu ghü ba gui netah, chang sing goi ci ah ng'khap sak gui ne, amät ah a hteh law nak vai ah pigaw gui ung tüi gui ci. 2 Bawipa Jesuh naw, “Htang m'guh ah vai akda om ci, cun ung phi aat ciah chang cu ken aih ci. Cun ah kia sei htang m'guh aat khai akda tüih vai ah htang m'guh nak ciah ma ah taigü vä. 3 Hteit vä! Hngei khli ah ng'lung ah htome chah mäih ah ka ning tüi gui ci nei. 4 Ngui ng'ip, ng'za, phahnak a i phi kä nami hteh püi vai. Lam ah ng'düi ne a u phi kä nami zavaih vai. 5 A u ah im ung phi nami luh ah a kiak ung, “Shin ah kyong khui ung ding gei nak om sä” ci ne nami taigü vai. 6 Cun ah im ung dim deeih nak ng'za hlük ci a om ung, nangmi ah taigü cu ani ah khan ah gawk khai. Cun ah mäih ah chang a u kä ah om ung nami k'taigü nak cu nami mät ung gawk law ba khai. 7 Nami om nak tu ah im ung ami ning m'bei m'awk tu gui nami ei awk tu vai, a i ah kia sei ci ung bi bik ci naw ng'cheng gah khai ah kiak ci. Nami om nak tu htük ah im ung kaa naw, a hei im ah kä nami ng'plon-en vai. 8 Nangmi ning dou gui ciah pigaw ung ami ning tu m'bei tu gui nami ei awk vai. 9 Cun ah pigaw ung gawpai ci gui nami gai sak gui vai. Cun kawn ah ngami ung, “Khanpughi ah Uknak kho gawk law pyi ci” ci ne nami m'thein gui vai. 10 Nangmi kä ning dou gui ciah pigaw ung lam ung ng'düi netah, “Nangmi ah ma ah ng'thu m'shi sho ah kami kho ung kaa m'vut kami khawng shüt ci. 11 Cun ung phi Khanpughi ah Uknak kho cu nangmi ah pei ah gawk law pyi ci, nami hmat vai nei” ci ne nami m'thein gui vai. 12 Kei naw akcang ka pyein cu, m'khoichaa nak ah hnüüp ung cun ah gawnu cu Sodom gawnu ah mä she tu ba khai nei. 13 Aw Chorazin! nang ah phäh ah kyikyawk aih vai kiak ci nei, Aw Bethsaida! nang ah phäh ah phi kyikyawk aih vai kiak ci nei. Nangmi ung bilawh gui ah cäi aih vai gui cu, Tai-ar la Sidon gawnu gui ung bilawh vai sü ung, cun ah gawnu gui cu a cau ä pui ge ung ng'zu nak sui sui ne m'vut khui ung ngo ne ng'zu ba pyi khai sü gui ah kiak ci. 14 M'khoichaa nak ah hnüüp ung nangmi ah mä Tai-ar la Sidon ah khan ah Khanpughi ah m'gein nak cu ng'dang tu ba khai nei. 15 Aw Kapernaum gawnu! Nang cu khankho ah gawk khai ah m'hlüngtai vai na ng'za hlük ci ang? nang cu m'htei kho ah ning zuk buh hlit vai nei” cik ci. 16 Bawipa Jesuh naw, Ang düihpüi gui-am, “nangmi ah ng'thu ngai ci cu kei ah ng'thu ngai ci, nangmi ning nawng gui ci cu, kei na nawng ci, kei na nawng ci cu, kei na tüi lawk ci cu nawng ciah kiak ci” ci ne m'thein gui ci. 17 Ang khah püi chih-kip-lei-goi cu ang htei ah zeikiai ne law ba u netah, “Bawipa, nang ah ming awn khoshe gui phi kami näng ci nei” ci ne pyein law ba ci gui. 18 Bawipa Jesuh naw, “Khankho ah kho alai-läp ah mäih ah Satan cu kia law sei ka hmuk ci. 19 Ngai vä, nangmi-am m'khüt näng nak ka ning pe gui pyi ci nei. Am äm-ah k'phyu m'khaw gui la Satan khoshe ga nüng nüng nami m'khüt näng khai nei. 20 A i gaa phi nami khan ah gawk lawk khai, cun ung phi khoshe nami m'khüt näng ah phäh ah kä zeikiai vä, khankho ah nami ming guk pyi ah phäh ah zeikiai vä” cik ci. 21 Cun zah ung Bawipa Jesuh cu Mumcha Theing awn zeikiai nak gah netah, “Khankho la khomdek ah Pa Khanpughi, hmuhmat tatlah ci gui ah ma ah, nam zih cu kä hmuhmat ci gui ah ma ah ng'dang sei ka ning m'hlüngtai ci. Aw Kapa cun cu na mät ah ng'zak hlü ah kiak ci. 22 Kapa Khanpughi naw apäng avan na pyi ci. Ahtapa cu a u ciah hmat ci cu Kapa ah kawn ah a u kä om ci. Kapa cu a u ciah hmat ci cun phi Ahtapa la Ahtapa naw m'dang khai ah a ghü ah chang ah kawn ah a u kä om ci. 23 Cun kawn ah Bawipa cu ang düihpüi gui lam ah ng'hlat netah, “tuhbäi nami hmuh teng gui hmuh teng nak cu ang htei ah zeikiai vai kiak ci. 24 Kei naw akcang ka pyein cu, profet gui la ghangpughang gui naw, nangmi ah hmuh gui shi hmu hlü te ci gui, cun ung phi kä hmu hlawt ci gui. Nangmi ah ng'zak gui shi ng'za hlü te ci gui, kä ng'za hlawt ci gui” cik ci. 25 Thukhän saza tumat cu Bawipa Jesuh ah pei ah law netah, “Sazapa, ang täi ghin nak ka gah vai ah a i ang ka bi kaw? ci ne a phawtcam nak ah ng'shik ci. 26 Bawipa Jesuh naw, “Cacim ung a i ah nei a om? Nang naw a i ah nei na hmat? ci ne ng'shi tu ba ci. 27 A cun ah chang naw, “Na Khanpughi na Bawipa cu, na m'lung kyong avan, na hmuhmat nak avan, na k'thagui avan la na ngaih tüh nak avan nawn na m'hni vai; na ng'kho chang cu na mät awn m'täng ne nam hni vai” ciah om ci nei cik ci. 28 Bawipa Jesuh naw, “nang cu na hman ci, a cun ah na bi ung ang täi ghin nak na gah khai nei” cik ci. 29 Thukhän saza naw amät ah hmuhmat nak m'dang hlü netah, “Kei ah ka ng'kho chang cu a u ang? ci ne ng'shi ba ci. 30 Bawipa Jesuh naw, “Hnüüp ät ung chang tumat cu Jerusalem ah kaa Jerikho ah a hteh nak lam ah, m'guk ei gui naw hmu u netah asuisak a khawh avan gut u ne, m'ghuih zät zät ne m'shäm shüt u sei, kä sih kä ghin ah a na ng'zän ci. 31 Taigüpa tumat cu cun ah lam ung hteit ne ani cu hmuk ci, Cun ung phi lek ne hteh tak ci. 32 A cun ah mäih ah levi chang tumat cun phi law ne, leim ciah chang cu hmu ne teng netah lek ne hteh tak ci. 33 Cun ung phi Samaritan chang tumat cu cun ah lam ung a hteh nak lam ah leim ne ng'zän ciah chang cu hmu netah, ang htei ah m'gein ci. 34 Ani cu a pei ah hteit ne ak hma leim gui cu tui la sapyit tui gui awn, m'si pe ne akni ah hlawp tu netah, ang se ung taih ne ng'et ciah im ah hteh püi ne m'hteit tuk ci. 35 A ngawi ung hteit law ba vai netah, im mah-am ngui phe m'ku pe shüt ne, “shin ah a leim cu akni ah m'htei tu vä, ng'pyi ciah a phu avan ka law ba lam ah ka ning pe gui khai nei” cik ci. 36 Cun ah thum gui ung kaa, m'guk ei ah k'phleim ah chang ah ng'khochang cu a u ah kiak khai ah na ngai ci ang? ci ne ng'shik ci. 37 Thukhän saza naw, “Ak leim cu m'gein ne m'htei tuk ciah chang ah kiak ci nei” cik ci. Bawipa Jesuh naw, “Nang hteit ba ne ani ah mäih ah na bi vai” ci ne kiak nak ci. 38 Bawipa Jesuh la ang düihpüi gui cu lam ami hteh nak ah pigaw tumat ung gawk lawk ci gui. Cun ah pigaw ung Mahta ming nak ciah hnumi tumat naw dou ne khin na gui ci. 39 Mahta ung Mari ming nak ciah a nau tumat om ci. Ani cu Bawipa ah pei ah ngo ne ang thu ngai ci. 40 Mahta cu khinchah nak gui vai bilo tawtlaw aih netah Bawipa ah ma ah, “Bawipa, ka nau Mari cu khin chah nak vai bilawh avan, kei bäng am na bilawh sak ci kia sei, law ne ana bilawh law püi vai ah pyein ä, cik ci. 41 Bawipa Jesuh naw, “Mahta, Mahta, nang cu bilawh gui vai ah nang ä aih ci, nang ung hlü ci tumat om ci. 42 Mari naw akni pi ghü pyi ci, cun cu a u naw kä gut hlawt khai” cik ci.
1 Kho hnüüp ät ung Bawipa Jesuh cu amät taigü ne om ci. Ak taigü zawp kawn ah ang düihpüi tumat naw, “Bawipa, Johan, naw ang khahpüi gui-am am thein gui ah mäih ah taigü vai na m'thein gui ä” cik ci. 2 Bawipa Jesuh naw, “Nami taigü ung shi chaa ah nami taigü vai; “Khankho ah om ci kami Pa, Na ming theing thang sä, Na uknak gawk law sä, Khankho ah mäih ah m'dek khan ah phi Na ng'zak hlü cu be sä, 3 “Ak hnüüp tä kami män h nak vai Ei na pe gui ä. 4 “Na kat na gui ci kami m'gein ah mäih ah Kami kat nak na m'gein gui ä, Tüihtok nak ung kä gawk vai ah, Kä nik ci phung ung na m'htei gui ä”, ci ne nami taigü vai cik ci. 5 Cun kawn ah Bawipa Jesuh naw, “Nangmi ung kaa chang tumat cu kho cawih ding ah a teihpüi ah im ah hteit ne, ’ m'htut pum thum na k'pu toä, 6 lam hteit te ci ka teihpüi ka im ah gawk law sei ka m'bei tu vai kä om ci nei” ci ne va pyein khai. 7 Im mah naw “Kä na k'pam cai gui ä, choh kami khai pyi ci nei, kei ka hta gui awn kami ip pyi ci nei, let law ba ne m'htut kä ka ning hang pe ba hlawt khai nei” ci ne kyong ah om ne ak pyein khai. 8 Im mah naw ka teihpüi ah kiak ci, ci ne let law ba ne m'htut kä hang pe ba khai. Cun ung phi ani cu kä lü ng'aa ne ang zawih laih laih ah a kaik ung im mah naw let law ba ne m'htut cu hang pe ba ling khai. 9 Kei naw akcang ka pyein cu, ng'zoi vä nami ng'zoih ung nami gah khai, shui vä nami shui ung nami hmuk khai, choh cu khäk vä nami khäk ung choh cu ng'hmawng khai. 10 Ng'zoi ci naw gah khai, shui ci naw hmuk khai, choh khäk ci cu hmawn pek khai. 11 Nangmi ung kaa a u naw a hta-am nga ang zoih ung k'pyu pek khai ang? 12 Ai m'tui ang zoih ung m'khaw pek khai ang? 13 Nangmi cu changshe ah kia pang u ne phi nami hta gui-am akni nami peit gui ung, khankho ah om ciah nami Pa Khanpughi naw ng'zoi ciah chang gui-am Mumcha Theing cu akbä ah pek khai nei” cik ci. 14 Bawipa Jesuh naw, chang awng-ang ung kaa khoshe k'täm sei, khoshe a dawng kawn ah cun ah chang cu ng'thu law thei ci. 15 Chang gui cu cäicat ci gui, cun ung phi chang am shah naw, shin ah Bawipa cu kho gui ah ng'vaipi Beelzebulah ah peit ah k'thagui awn khoshe k'täm ci nei” cik ci gui. 16 Chang am shah naw, ami phawtcam nak ah, “Khanpughi ah cäicat vai tumat m'dang law ba ä” cik ci gui. 17 Bawipa Jesuh naw, ngami ah ngaih hmat gui netah, “Khopäng tumat ung chang gui ami ngaih ang pai ah a kiak ung cun ah kho cu kä shou pha sei dimaih khai, kyong khui tumat tung chang gui cu ami ngaih ang pai ung cun ah kyong khui cu kä shou pha sei dimaih khai. 18 Khoshe gui ah kho ung ami ngaih ang pai ung kä kawng ät thei khai gui. Nangmi naw Beelzebulah ah na peit ah k'thagui awn khoshe ka K'täm ciah nami pyein ci. 19 Kei naw Beelzebulah ah angming awn khoshe ka k'täm ciah a kiak ung nangmi ah chang gui mä a u ah ming awn nei khoshe cu ami k'täm? Nami mät ah chang gui naw nami hma ah mawng m'dang ci gui nei. 20 Cun ung phi kei naw Khanpughi ah hlüngtai nak awn Khoshe ka k'täm ci kia sei, Khanpughi ah uknak ah kho cu nangmi ung gawk law pyi ci nei” cik ci. 21 “K'thamah ciah chang naw ak pyu a im a ngäng ung akhawh cham cu ngaih gep ci. 22 Cun ung phi ani ah mä k'thagui däm tu ba ciah chang law ne ani cu am khüt näng ah a kiak ung ani ah ngaih u ah likhim gui phi gut zawp ne akhawh cham gui phi gut zawp ne, amät ah chang gui- am k'pai gui khai. 23 “Kei lam ah kä om ciah chang cu kei na hnungtuk püi ciah kiak ci. Kei awn atäng ah kä ng'bum tuk ciah chang cu pyäi pyah ciah kiak ci. 24 Khoshe cu chang ung kaa lut law ne, a hei ah a hteh ung khopuk ung hteit ne a om nak vai shui ci, shui ne kä a hmuh ung, “Ka om nak man ah ka hteit ba khai” ci ne ngaih tüh ba ci. 25 Cun ah kia sei ani cu a om nak man nah law ba ne teng law ba netah theingthap sei hmuk ci. 26 Cun kawn ah a mät ah mä sheka tu ba ci khoshe sing chih va khü tu ba netah, lut ne om ci gui. Cun ah kia sei khoshe ah kai ah chang ah a khüt nak cu, ak htük ah mä ka law pi ci” ci ne m'cäi gui ci. 27 Bawipa Jesuh naw, cun ah am cäi gui kawn ah chang khli ah ng'lung ung kaa hnumi tumat naw, “Nang ning hta na ne, ning m'ghin ciah hnumi ah khan ah zeikiai nak om sä” cik ci. 28 Cun ung phi Bawipa Jesuh naw, “Khanpughi ah ng'thu ngai ne läk ciah khan ah zeikiai nak om sä, ci ung ni pi khai nei” cik ci. 29 Chang gui akda ng'bum law u khätah Bawipa naw, “Tuhchü chang gui cu ang htei ah shekha ci gui nei. Ngami naw cäi aih vai m'dang vai k'thäh ci gui. Cun ung phi Jonah naw cäiaih vai abi ah kawn ah a hei kä m'dang vai nei. 30 Nineveh chang gui ah hmawk ah Jonah cu cäiaih vai ah a kiak ah mäih ah tuhchü chang gui ah hmawk ah chang ah Htapa cu cäiaih vai ah kiak khai nei. 31 Thu m'chaa nak ah hnüüp ung Sheba kho ah Bawinu cu ng'düi ne tuhchü chang gui cu ning m'kyuk gui khai. A i ah kia sei ci ung ani cu Solomon ghangpughang ah ng'thu thuuk ngai khai ah khocawi ah kaa gawk lawk ciah kiak ci. Tuhchü shin ung Solomon ah tah hlüngtai pi ci gawk lawk ci nei. 32 Ng'thu m'chaa nak ah kho hnüüp Nineveh chang gui naw ng'düi law u neh nangmi cu ning k'shedam na gui khai gui nei, a i ah kia sei ci ung ngami cu Johan ah ng'thu ng'za u ne, ami kat nak ung kaa ng'zu ba pyii ci gui ah kiak ci. Kei naw akcang ka pyein cu, thubäi shin ung Jonah ah hlüngtai pi ci gawk law ci nei. 33 Mei m'däi ci naw kä thup man ci, dawn awn phi kä uk man ci. Kyong ah lut lawk ci gui naw akdei ami gah vai ah lung k'pei zung taih ne m'däi man ci gui. 34 Mik cu pumsa ah akdei ah kiak ci. Nami mik a ci ah akiak ung nami pumsa avan khang khai. Nami mik kä a ci ah a kiak ung nami pumsa avan hmüp khai nei. 35 Cun ah kia sei nangmi ung om ciah akdei cu ak hmüp ah kä a kiak- en vai ah nami geing nak vai nei. 36 Akcang ah nami pumsa avan cu ak hmüp kä om ne akdei khang ah a kiak ung, mei k'däi cu nami khan ah dei ne akhang ah mäih ah nami pumsa avan cu dei ne khang khai nei. cik ci. M'kyuk Gui Ci. 37 Bawipa Jesuh cu cun ah ng'thu a pyein kawn ah a im ah ei ei vai ah pharisee tumat naw khü law sei hteit tu ne ei ei vai ah ngo tuk ci. 38 Bawipa Jesuh naw kut kä m'si ah ei ei vai ne pawng sei, pharisee gui naw hmu u ne ngai khit u khätah. 39 Bawipa Jesuh naw, “Nangmi pharisee gui, nami ei bei, um-k'am gui akpung ah theing khai ah nami m'si ung phi, nami m'lung kyong läi cu ng'tuk ng'ah nak hlü la shetkat nak awn be ci nei. 40 Chang shekha gui aw, akpung piang ci naw akyong phi piang ciah kä kia ne ang? Nami eikbei, um k'am avan cu dukhaih ci gui-am pe gui vä. 41 Cun ah nami bi ung nangmi ah hmawk ah avan theingthap khai nei. 42 “Pharisee gui aw, nangmi ung shetkat nak om ci, nangmi cu thuilim, am-hnah avan ung bum ghaa bum ät, Khanpughi-am nami peit ung phi, m'tara nak la Khanpughi zum hni nak cu nangmi naw kä nami zuk ngai lawk ci nei. Peit taak nak phi nami bi vai, ahei bilawh vai gui phi kä nami nawng vai ah kiak ci nei. 43 “Pharisee gui aw, nangmi ung shetkat nak om ci, nangmi cu pum im kyong ung hlüng pi ciah ngoh nak la sumlei hmun ung chang ah chang m'sui nak cu nami ng'za hlük ci. 44 Nangmi ung shekat nak om ci. Nangmi cu a hnün kä om ciah ng'cim hmun awn nami täng ci. Cun ah ng'cim hmun cu chang gui naw akhan ah kai na u ne phi, ng'cim hmun bä ah kä hmat ci gui. ci ne kiak na gui ci. 45 Thukhän saza tumat naw, Sazapa, nang naw cun ah na pyein cu, keimi na na k'shedam nak gui ah kiak ci” ci ne pyein ci. 46 Bawipa Jesuh naw, “Thukhän saza gui aw, nangmi ung phi shetkat nak om ci nei, Phuih khit vai ah phuih gih chang-am k'phuih u netah, nami mät läi naw nami kut m'dawng awn phi kä nami tawn hlük ci. 47 Nangmi cu shetkat nak awn nami be ci, nami pughi pa gui naw ami ngawn gui vai ah profet gui ah hmawk ah nangmi cu ng'cim hmun nami piang ciah kiak ci. 48 Nangmi cu nami pughi pa gui ah kut nak ung nami kawng ät tuk ciah kiak ci. Ngami naw profet gui ngawn u sei, nangmi naw ng'phuh hmun nami co ci. 49 Ashin ah mawng Khanpughi naw ng'thu thuuk ung a pyein cu, “Kei naw ngami ah ng'lung ah profet gui la ng'shä gui cu ka tüi gui khai, ngami naw am shah cu ngawn u ne, am shah cu k'shedam nak khai gui. 50 Tuhchü chang gui cu khomdek ang tüi law ung tün ne, profet gui ami ngawn gui ah hmawk ah hma m'kyuk nak gah khai gui. 51 Abelah ami ngawn ung kaa naw, mang kiang la hmun theingcim ah ng'lak ung ami ngawn ah Zecharaiah ung khüt khai ah ami ngawn gui ah hmawk ah tuhchü chang gui cu hma m'kyuk nak gah khai gui nei. 52 Thukhän saza gui nangmi ung shetkat nak om ci nei, nangmi cu hmuhmat nak ah im kawt hmawn nak cu gim mei u netah, nami mät phi kä nami lut ci, lut hlük ci phi nami maa nak ci” ci ne kiak na gui ci. 53 Cun ung kaa Bawipa Jesuh cu ng'düi law ne a hteh ba kawn ah thukhän saza gui la pharisee gui naw, Bawipa Jesuh cu akshe ah süsawng ne pyein sak ci gui. 54 Ng'thu a pyein nak ung a hmakat nak ang dang vai ah akda ah ng'shi ne phawtcam ci gui.
1 Cun zah ung phiaa m'ku-gha ah chang gui cu ng'tawn ne, ng'hnet tu ne gawk law u khätah, Bawipa Jesuh naw ang düihpüi gui-am, “Pharisee gui ah k'caw ah mäih ah ami thuvi cu nami geing nak vai, 2 Küp phung ng'hmawng khai, m'zih phung ng'phleh khai nei. 3 Cun ah kia sei, hmüp khui ung nami ng'htau ah ng'thu cu kho dei ung chang naw ng'zak khai nei, kyong khui ah adüm ah nami pyein ah ng'thu cu im khan ah ng'shan sei ng'shäu khai nei” ci ne pyein ci. 4 “Ka teihpüi gui aw, pumsa bäng ngawn ne a hmün a i phi kä ci hning ci cu kä nami kyih vai. 5 Nami kyih vai cu ka ning m'thein gui khai, ngawn netah mä m'htei ah tüi hning ci, huham mah ciah Khanpughi cu nami kyih vai nei, ka pyein cu nami zun vai, kyih vai cu ani bäng om ci nei. 6 “Biit hta hma cu ngui phe goi ah zoih ah kä kia ne ang? Cun ung phi Khanpughi naw biit hta tumat phi kä m'hnih ci nei. 7 Nami lumu ng'ma phi avan khei pyi ci nei, cun ah kya sei kä nami kyih vai, nangmi cu biit hta akda ah mä nami küikyang pi ci nei. 8 “Kei naw akcang ka pyein cu, chang ah maa ah, kei ah chang ah pyein ne, amät ng'kiaa ciah chang cu; khankho chang ah maa ah, Chang ah Htapa naw, amät ah chang ah pyein ne ng'kiaa pek khai. 9 Chang ah ma ah kei na hnungtuk püi ciah chang cu Khanpughi ah khankho chang ah maa ah Chang ah Htapa naw hnungtuk püi khai. 10 “Chang ah Htapa m'kat ne ng'thu ciah chang ah khan ah kat m'gein nak a om ung phi, Mumcha Theing m'kat ne ng'thu ciah khan ah kat m'gein nak kä om khai nei. 11 “Chang gui naw nangmi cu, zung ah m'kawt mang ah khlaak ung phi bäi, bawi ah maa mang ah maa ah phi bäi, khaw ne ami ning düih sak gui ung, a i chaa ah ka ng'thu khai, ci ne kä nami ng'ä vai, 12 Nangmi a i chaa ah nami ng'thu vai cu, acun zah ung Mumcha Theing naw ning m'thein law gui khai” ci ne kiak na gui ci. 13 Chang khli ung kaa chang tumat naw, “Sazapa, kami pa ah khawh kami ng'pai vai ah kei ah hmawk ah na pyein peä” ci ne Bawipa Jesuh ah k'thäh ci. 14 Bawipa Jesuh naw, “Teihpüi aw, nangmi ah ng'lak ung ng'shä ne nami pa khawh ning k'pai gui vai ah, a u naw kei cu na ghüh ne ang? 15 Cun kawn ah chang gui avan-am, “Ng'zak hlü nak a hlü hlü cu nami ngaih nak vai, chang ah ghin nak cu ngui ghui khawh cham ung kä om ci nei” ci ne kiak na gui ci. 16 Cun kawn ah Bawipa Jesuh naw, shin ah m'tumtäng ne m'cäi gui ci, “Hngü ät ung bühmang ciah chang tumat ung ang htei ah nik ciah a kholo om ci. 17 Cun ah kia sei ka geitkaw gui ni aih ci, a zung ka m'sep khai ang? ci ne ngaih tüh khit ci. 18 Cun kawn ah, “Ka khei ak pyim gui phye ne, khei akthai akdäm nu gui ah ka co ba khai. Ka geitkaw gui la ka khawhchaam gui cu, cun ah khei akthai gui ung ka gim khai. 19 Cun kawn ah khawkum akda ei mang vai, khei ung kaa m'küm hmawng sei, zeikiai ne ei aw ne na om vai ci ne ka mät naw ka mät ka pyein khai” cik ci. 20 Cun ung phi Khanpughi naw, “Chang shekha aw, atuhmü si ne shing gui na nawng shüt khai nei, cun ung nang ah m'küm ah khawh chaam gui a u naw khäm khai ang? ci ne kiak nak ci. 21 Cun kawn ah akhnu ah Bawipa Jesuh naw, “Ngui ghui khawhchaam akda am küm ung phi, Khanpughi ah maa ah ghawipyam ciah chang cu, ashin ah bühmang ciah chang awn täng ci nei” ci ne m'thein gui ci. 22 Cun kawn ah Bawipa Jesuh naw, ang düihpüi gui-am, “Cun ah kia sei, a i ei ne ghin vai ci ne hnun ah hmawk ka kä nami ng'ä vai, a i sui ne om vai ci ne pumsa ah hmawk ah phi kä nami ng'ä vai. 23 Hnun ghin nak cu ei awk ah ta bä pi ci, pumsa cu suisak ah tah bä pi ci. 24 Kha gui cu teng gui vä, ngami cu m'shi kä geit ci gui, kä khäm tawng ci gui, im khei kä co ci gui, cun ung phi Khanpughi naw ngami cu tumbei gui ci. 25 Nangmi ung kaa a u naw ang'ä ai nak awn amät ah ghin nak cu ng'sau ba pi khai ah bi hning khai ang? 26 Cu cha ah apihta phi kä m'khüt hning ah a kiak ung a i vai a hei hei gui ah nami ng'ä ang? 27 M'ghaw ma ah cheipai gui cu teng shüm vä, ngami cu hmui kä bik ci gui, tah kä tah ci gui, cun ung phi Solomon ghangpughang naw phi acun ah mäih ah kä suisa hning ciah nami hmat vai nei. 28 Zum nak ken ciah chang gui! Tuh ngawi ghing ne hnah ci a ngawi ung chawng sei mei maw a uih ah khu m'ghaw gui hngaw Khanpughi naw cun ah am sui m'sak gui ung, nangmi cu a cun ah mä bä pi khai ah ning m'sui m'sak gui khai ah kä kia ne ang? 29 Cun ah kia sei ‘a i ei awk vai’ ci ne kä nami ng'ä vai, (Khongzo zum ci gui phi ang täi sei a cun ah ng'ä ci gui nei). 30 Cun gui nangmi naw nami ng'zak hlü cu nami Pa Khanpughi naw hmat pyi ci. 31 Cun ah kia sei, Khanpughi ah uknak kho cu akhtük bäih ah nami shui vai, cun ung shin gui cu ning pe gui khai. 32 “Htome ng'bum hta, kä kyi vä, nami Pa naw a uk nak a ning peit gui vai ah, ang zak hlü om ci. 33 Nami khawh chaam gui zoi ne ghawipyam ci gui-am pe gui vä, kä thu ka thei ciah ngui ng'ip kawt ne, m'guk-ei ah kä m'guk nak, ca ah kä ei nak hlawt ah khankho ah kä ng'pyi hlawt ciah bühmang nak cu shui vä. 34 A i ah kia sei ci ung nami khawhchaam ah om nak ah nami m'lung phi gawk thei ciah kiak ci. 35 Nangmi cu ng'düih law ghet vai ah sui-sa u ne, mei m'däi ge ne om vä. 36 Hta m'um nak ah kaa ami bawi law ba ne choh akhäk law ung ng'ghit ah law ne, choh hmawn vai ah ngäng ci gui ah changshäm gui ah mäih ah nami om vai. 37 Akchang shäm gui naw ami ngäng cu ami bawi alaw ba ung hmu gui ci. Changshäm gui cu zeikiai ci gui. Kei naw akcang ka pyein cu, bawi naw cun ah changshäm gui cu khin ah khän gui ne, atäng ah ngoh püi gui ne, m'sui msak gui ne, tumbei khin chah na gui khai. 38 Ani cu khocawih ding ah phi bäi, ai khong k'htük ung phi bäi, a law ba ung ngäng ciah chang gui cu zeikiai ci gui. 39 Akcang ah im ah naw m'guk-ei a law nak vai ah akhin cu ahmat ung ani ah im ung m'guk-ei kä lut hlawt khai ci cu nami hmat khai. 40 Changah Htapa cu nangmi naw kä nami ngaih tüh ah akhin ung gawk lawk khai kia sei, geing na ne, ngaih na ne nami om vai” ci ne m'cäi gui ci. 41 Peter naw, “Bawipa, shin ah m'tumtäng nak cu keimi ah hmawk ah ang? Kä cun ung chang avan ah hmawk ah ang? ci ne ng'shik ci. 42 Bawipa Naw, “Bekhüt ne cüivai ciah changshäm cu a u ang? Khuimah tumat naw akchangshäm gui khawngmang gui ne, uk gui ne, ei-awk phi tei gui khai ah changshäm tumat cu ghü ne m'düih khai. 43 Khuimah naw law ba ne am cäi atäng ah abi a hmuh ah akiak ung, akchangshäm ah khan ah zeikiai nak om ci. 44 Kei naw akcang ka pyein cu, khui mah naw, cun ah changshäm-am khawhchaam avan m'hteihtang vai ah ap khai nei. 45 Cun ung phi cun changshäm khawngmang ci cu ka bawipa kä law ba zäk khai ci ne ngai ne, abü bü ei-aw ne ak changshäm hnumi pami gui, m'ghuih teeuh gui ne a kiak ung, 46 ani naw kä a ngaih tüh nak ah a khin ung khui mah cu law ba ne a vuuk nak vai tan pe sei, changshäm cu kä bekhüt ne kä ng'düng ciah chang ah chaw vai cu ma nak ci. 47 “A bawi ah ng'zak hlü hmat lang ne ng'dawt ne kä bilo ne a bawi ah ng'zak hlü phi kä läk ciah chang shäm cu aktung ah geinvai nak gah khai. 48 Cun ung phi a bawi ah ng'zak hlü kä hmat netah kat nak bik ciah chang läi cu geinvai nak api gah khai. Chimgein nak akdäm gah ciah chang cu abi vai akda om khai. Zum ne ngaih gep nak pi gah ciah chang cu abi vai akda pi om khai. 49 “Kei cu khomdek khan mei awn ka m'khih khai ah ka lawk ci. Acun ah mei atuhbäi a gawk law vai ah ka ng'za hlük ci. 50 Kei naw tuihnim nak ka lak vai om ci, cun ah bi cu kä ka pyi pha ah chuih kei ah m'lung cu zaica ci. 51 Shin ah khomdek khan ung dimdeeih nak ka pek khai ah ka lawk ciah nami ngai ci ma? Dimdeeih nak vai ah kä kiak ci, chang gui ami ng'phyeekpai nak vai ah kei ka lawk ci. 52 Tuhbäi ung tün ne chang sing hma om ciah kyong khui ung, sing goi vangtäng, sing thum vangtäng ah ng'pai khai gui. 53 Apa la ahta, anu la ahta, ahta la akchu la acei ah nu ami van ng'phyeekpai zawp khai gui nei” cik ci. 54 Cun kawn ah Bawipa Jesuh naw, “Hni kiak lam ah ng'mei a kai law ung kho aa law ge khai nami cik ci. Nami pyein ah mäih ah aa tuk cang ci. 55 Htum lam ah kho akhi law ung kho shek khai nami cik ci, nami pyein ah mäih ah she tuk cang ci. 56 Thuvi ciah chang gui, nangmi cu khomdek la khan kho teng ne kho khi kho k'aa nami hmat ci. A i ah kia sei tuhchü ah a khin m'khoi m'cha ne kä nami hmat hning ang? 57 “Düng nak dang khai ah a i ah kia sei nami mät naw kä nami m'khoichaa ang? 58 Nani kei-nang ciah chang goi, m'khoichak ciah suki ah nani hteh law ung, lam ah ng'gei ba vai ah na ng'ge püi vai. Cun ah kä na bi ung ani naw nang cu, m'khoichak ciah suki ah saw ne ning hteh püi khai. Cun ah suki naw bawi ah kut ung ning ap sei, bawi naw thawng ung ning chum khai. 59 Na puu kä na thung zawp phaa ah chuih thawng ung kaa kä na lut law ba hlawt khai, ci ne kei naw ka pyein ci” ci ne chang gui-am m'thein gui ci.
1 Cun zah ung chang am shah gui cu Bawipa Jesuh ah law u ne, Khanpughi ah ami taigü zah ung Pilat naw a ngawn gui ah Kalile chang gui ah amawng pyein lawk ci gui. 2 Bawipa Jesuh naw, “Cun ah chang gui cun ah ami ngawn gui cu, a hei Kalile chang gui ah mä kat nak bi pi ci gui ah nami ngai ci ma? Ngami cu kat nak bi pi ci gui ah kä kiak ci nei. 3 Cun ah mäih ah nangmi phi kä nami ng'zu ba ung sih maih nak ung nami gawk khai. 4 Siloam tänghän ng'gäi sei sik ciah chang sing gha-lei-cheit mä Jerusalem ah om ciah chang gui zah tah kat nak bi pi ci gui ah nami ngai ci ma? 5 Ngami cu kat nak bi pi ci gui ah kä kiak ci, ci cu ka ning m'thein gui hlük ci. Cun ung nangmi phi kä nami ng'zu ba ah a kiak ung ngami ah mäih ah nami si tuk khai” cik ci. 6 Cun kawn ah Bawipa Jesuh naw shin ah m'tumtäng nak pe gui ci. Chang tumat ah chaam kyong ah ami geit ah k'thei ghing tumat om ci. Ka mah law ne teng law netah, cun ah thei ghing ah am theih cu kä hmuk ci. 7 Ka mah naw, “Kei law ne, shin ah thei ak theih la kä ak theih ah ka teng law nak kum thum law lawk ci. Cun ung phi pum ät ah phi kä m'theih ci, cun ne ghawt-en ä, khomdek tai düt ci nei” ci ne chaam ngäng ci-am kiak nak ci. 8 Chaam ngäng ci naw, “shin ah thei ghing kum ät om ba cang sä, m'dek ni awn vui ne ka m'htah ba cang khai nei. 9 Hngeng kum läi m'theih khai nei, kä a m'theih ah a kiak ung chu pit ne ghawh vai nei, ci ne pyein tu ba ci” cik ci. 10 Pum hnüüp ung Bawipa Jesuh cu pum im ah m'theithang gui ne om ci. 11 A cun ah khoshe naw kai sei, khokum gha-lei-cheit ung ng'khem ne ng'zän ciah hnumi tumat om ci. 12 Ani cu ak khei ng'khun sei kä zäih ba hlawt ci. Bawipa Jesuh naw cun ah hnumi cu hmu netah, a pei ah khü ne, “hnumi aw, na gaw nak maih pyi ci nei. ci netah 13 ak khan ah a kut taih sei, ani cu acun vai-am ak khei zäih ba sei gai ba ne, Khanpughi m'hlüngtai ci. 14 Cun ah Bawipa Jesuh naw pum hnüüp ung ak gaw am gai ba ah, phäh ah pum im ngäng ci cu m'lung k'she netah, “Bi bi nak vai kho hnüüp chuk om ci. A cun zah ung law ne gai nak nami ng'zoih law vai, Pum hnüüp ung kä nami law-en vai, ci ne chang gui- am kiak na gui ci. 15 Bawipa Jesuh naw, “Chang thuvi gui, ‘nangmi cu pum hnüüp ung nami sei gui, nami k'se gui gui k'phian ne saw ne tui nami tu man ci ah kä kia ne ang? 16 Abraham ah hta ah kä kiak ciah shin ah hnumi cu khokum gha-lei- cheit ung satan ah khih pawn nak gah ci. Ani cu cun ah khih pawn nak ung kaa pum hnüüp ung kä m'hlawt vai ma? cik ci. 17 Cun ci khätah, Bawipa Jesuh ah a gaa gui cu ng'aa ci gui. Chang gui akda cu Bawipa Jesuh naw cäi aih vai abi gui ah hmawk ah zeikiai ci gui. 18 Bawipa Jesuh naw, “Khanpughi ah uk nak ah kho cu a i awn täng ci ang? 19 A i awn m'tumtäng vai ang? Khanpughi ah uknak kho cu shin ah mäih ah kiak ci. Anhta ui cu chang tumat naw la netah, a lo ma ah geit ci. A ui cu ng'lih pyou ne phung ghing law sei, ang ban ung kha gui ngo ne ng'bu tuk ci gui. cik ci. 20 Cun kawn mä Bawipa Jesuh naw, “Khanpughi ah uknak ah kho cu a i awn m'tumtäng vai ang? 21 Cun cu shin ah mäih ah kiak ci. Hnumi tumat naw k'caw la netah m'htut den pyi them thum ung k'caw sei m'htut avan tho ne pai ci” ci ne pyein ci. 22 Bawipa Jesuh cu Jerusalem ah a hteh nak lam ah gawnu gawhta a gawk nak päng ah hei m'hteihtang vü gui ne hteit ci. 23 Chang tumat naw, “Sazapa, chang api naw ma hun nak ami gah kaw? ci ne ng'shik ci. Bawipa Jesuh naw, 24 “Nangmi cu ng'hteik ciah m'kawt ung nami luh vai ah k'tha na vä. Chang akda naw cun ah m'kawt ung luh vai ah k'tha nak ci gui. Cun ung phi ami luh nak hlawt vai ah k'thagui kä om ci. 25 Im ah naw choh khai sei, nangmi akpung ah nami om khai. Nangmi naw choh hei khäk ne, “Im mah aw, choh na ak hmawn tu gui ä, ci ne nami kiak ung phi im mah naw, “Nangmi a hawi kaa nak mi lawk ci ang? Kä ka ning hmat gui ci nei” cik khai. 26 Nangmi naw, “Keimi cu nang awn atäng ah mi ei awk ciah chang nei, keimi ah pigaw ung nang naw na na m'hteihtang gui te ci nei, nami cik khai. 27 Cun ung phi ani naw, “nangmi a hawi kaa nami lawk ciah kä ka ning hmat gui ci, chang k'she gui a hei ah hteit vä” 28 Nangmi naw Khanpughi ah uknak kho ah Abraham, Isak la Jakop ni, profet ni gui cu, hmu tu lang u ci sei, akpung ah ami ning k'täm gui ung nami haa kyeet ne, kyap ne m'lau ne nami kiak khai nei. 29 Chang gui cu a htum a siip ak khei ak kiang ah kaa law u ne, Khanpughi ah uknak pawi ung hteit khai gui. 30 Cun ah kho hnüüp ung tuhbäi hnu ciah chang cu ma khai, tuhbäi ma ciah chang cu hnu khai” ci ne m'cäi gui ci. 31 Cun zah ung Pharisee gui law u ne, “A hei lam ah hteit ne om mei ä, Herod mang naw ning ngawn khai pawng ci nei” cik ci gui. 32 Bawipa Jesuh naw, “Kei cu tuh ngawi la ngawi zung khoshe gui k'täm ne, ak gaw gui ka gai sak gui khai. Ak hnüüp thum ung ka bi cu ka pyi khai nei ci ne kiak ci, ci ah sa ui-am m'thein ba vä. 33 Cun ung phi tuh ngawi, ngawi ung la cituh cu, ka lam ung ka hteit gäk gäk khai. Profet nak ci cu Jerusalem ah kawn ah a hawi phi chang naw a ngawn vai ah kä ng'hlawi ci nei” ci ne pyein ci. 34 “Aw Jerusalem, Jerusalem, Profet gui na ngawn ci, Khanpughi ah ng'shä chang gui lung awn na vawi ci, ai nu naw ai hta gui ak boop gui ah mäih ah kei naw nang ah hta gui ka k'bum nak hlü gui cu da lawk ci, cun ung phi nang naw, kä na ng'za hlük ci. 35 Cun ah kia sei, nang ah pum im cu Khanpughi naw nawng lawk khai, kei naw akcang ka pyein cu, Khanpughi ah ang ming awn lawk ci cu, ang ming thang sä! ci ne na kiak nak ah hnüüp kä a gawk pha ah chuih kei cu kä na na hmuk khai nei” ci ne m'thein gui ci.
1 Kyin nak ah hnüüp ät ung Bawipa Jesuh cu Pharisee ang vai tumat ah im ah ei ei tuk khai ah hteit ci; cun zah ung Bawipa Jesuh cu chang gui naw adäm ah m'kein ci gui. 2 Bawipa Jesuh ah a pei ah khonu ung gaw ciah chang tumat cu gawk law khätah, 3 Bawipa Jesuh naw, “Kyin hnüüp ung gawpram ci gai sak vai ang? ci ne pharisee gui la thukhän saza gui cu ng'shi gui ci. 4 Cun ung phi ngami cu kä chiü ne om ci gui. Bawipa Jesuh naw akgaw cu khü ne gai sak netah, hteh ba sak ci. 5 Cun kawn ah Bawipa Jesuh naw, “Nangmi ung kaa a hta baw, asei baw, gheem ah a luh ung kyin ah hnüüp ci ne kä khui tu ba ah a u om khai ang? ci ne ng'shi gui ci. 6 Cun ung ngami naw a i ah phi m'hlan ne kä pyein ba ci gui. 7 Cun ah ei awk nak ung gawk lawk ciah khin gui cu, akni nak pi bäng bäng ghü ne ngo u sei hmu gui netah, Bawipa Jesuh naw, shin ah m'tumtäng ne m'thein gui ci. 8 “Nangmi cu hta m'um nak pawi ung ning khü tu gui u sei, nami ng'khäh tu ah a kiak ung, akni nak pi bäih ung kä nami ngoh tu ma vai. Nangmi ah bä ng'vai pi ci ami lak tu a law ah a kiak ung; 9 im mah naw nang ah law ne, khin ah ngoh nak vai ng'nawn tu pe ä, ci lawk khai. Cun ung nang cu ng'aa ne ang neim nak ung na ngo ba khai. 10 Cun ah kia sei nang cu ning khü tu u sei, na ng'khäh tu ah a kiak ung ang neim nak pi ung na ngoh vai. Cun ung im mah naw nang ah law ne, “Teihpüi aw, ani nak pi ung hteit ne ngo tuä” ci ne ning khü ne ning ngoh tu sak khai. Cun ung nang cu khin chang ah ma ah aa-mah ne na om tuk khai. 11 Amät naw amät m'hlüngtai ci cu, neim sak nak gah khai, amät naw amät neim sak ci cu, m'hlüngtai nak gah khai” ci ne m'cäi gui ci. 12 Cun kawn ah Bawipa Jesuh naw, im mah-am, “Nang cu ngawi ei, mü ei chang-am tumbei ne na khin chah law nak ung, na teihpüi gui, na phäi nau gui, na mätzah gui, bühmang ciah na paw chang gui, cu khü ne kä na tumbei gui vai. Cun ah na tumbei gui ung nang phi ning khü tuba ne acun ah ning tumbei tu ba khai gui. 13 Cun ah kia sei khin chah nak pawi na bi law ung; ghawipyam ci gui, akut khaw ng'khem ci gui, amik hna kak ci gui, khü gui ne na tumbei gui vai. 14 Cun ung nang ah khan ah zeikiai nak om khai, a i ah kia sei ci ung ngami naw nang cu kä ning tumbei tuba hlawt khai gui. Chang k'ni gui sih nak ung kaa ami thawh law ba hnüüp ung na bi nak cu Khanpughi naw ning m'thung ba khai. 15 Bawipa Jesuh awn atäng ah pawi ung om tuk ciah chang tumat naw, cun ah ng'thu cu ng'za netah, “Khanpughi ah uknak kho ah khin ei vai tuk ciah chang cu, zeikiai nak om ci” ci khätah; 16 Bawipa Jesuh naw, “Kho hnüüp ät ung chang tumat cu, ak tungchün ah khin ei shong ne chang ui akda khü gui ci. 17 Ei awk vai a khin gawk law sei chang tumat cu tüi ne, akhü tu gui ah chang gui ami law ba vai ah khaw ba sak gui ci. 18 Ngami ami van naw kä kami law hlawt khai nei, ci ne kia zawp ci gui. Akhtük ung tumat naw, “Lai ka khleih hteit ne ka teng tuk khai kia sei, kä ka law hlawt khai nei, kä na gen vä” cik ci. 19 Ahei chang tumat naw phi, “Seipat hmaa ka khleih ci kia sei, hteit ne ka teng tuk khai, kä ka law hlawt khai, kä na gein sä” cik ci. 20 Ahei tumat naw phi, “Kei tuhbäi ka chumah thai ci kia sei, kä ka law hkawt khai nei, kä na gen sä” cik ci. 21 Ak chang tüih cu law ba ne, acun gui avan cu im mah-am m'thein law ba ci. Im mah cu m'lungshe netah, “Lam kyum lam k'cawh, k'htawk-kem zung ah hteit ne, ghawipyam ci gui, akutkho ng'khem ci gui, amik hnga kak ci gui, khü gui ne law püi gui ä, ci ne tüi ba ci. 22 Kä shou pha sei, akchang tüih cu gawk law ba ne, “Na pyein nah mäih ah, ka khü gui pyi ci nei, cun ung phi ngoh nak vai awng ba ci nei” cik ci. 23 Im mah naw, “Pigaw im lo zung nüng ah hteit ne, ka im ung be khai ah, chang gui khü law gui zä, azan khü gui ma ah chang tumat naw phi; 24 Shin ah khin ei kä ami ei-en law tu vai nei, ci ne ka ning m'cäi gui ci nei” cik ci. 25 Hnü ät tung chang khli cu ani awn atäng ah law tu u khätah, va mang ba netah, Bawipa Jesuh naw, 26 “Kei ah alaw tu pang ung phi, kei ana m'hni ah mä, anupa, achu hta, aphäi nau la amät m'hni pi ciah chang cu, kei ah ng'düihpüi ah kä kia hlawt khai. 27 Amät ah kutlam tung kawt ne ka hnu ah kä na läk ci phung cu, kei ah ng'düihpui ah kä kia hlawt khai. 28 Nangmi ung kaa chang tumat naw, tänghän tumat co khai ah apawnng m'hten ung, cawh kyan nak vai a i chü ng'pyi khai, cawh kyan nak vai ngui ghui a i chü om khai ang? ci ne ngaih tüh cang khai kiak ci nei. 29 Cun ah kä ngaih tüh kä pawng m'htein ah, co law ghet netah, kä am üp law hlawt ung, chang gui naw gaih tuk khai gui nei. 30 Shin ah chang cu tün ne läi co law te ci, kä m'üp hlawt ci nei” ci ne päipih khai gui nei. 31 “Ghangpughang tumat cu, gakap phia-ghaa ng'khahpüi ne, gakap phiaa m'ku khah püi ciah, ahei ghangpughang cu, tuk khai ah ang düih law ung kam khüt khai ang? kä ka m'khüt khai ang! ci ne, ngo ne ngaih tüh cang khai ah kä kia ne ang? 32 Avaisü ah tuh ne kä m'khüt khai ah a kiak ung, ng'shä hei tüi ne, ng'khawt ng'gei vai ah ng'ge khai nei. 33 A cun ah mäih ah nangmi ung kaa a u phi amät ung om ci nüng kä nawng shüt zawp hlawt ci cu, kei ah ng'düihpüi ah kä kia hlawt khai” ci ne m'cäi gui ci. 34 “M'shi cu nik ci, cun ung phi a tuui a maih kawn ah a tuui nak a hawi hmuh ba hlawt vai ang? 35 Lai ah hmawk ah phi bäi, m'dek ani vai ah hmawk ah phi bäi, kä mang ba phyak ci. Cun ah kia sei chang gui naw, fit ghawt düt ci gui, akhngaa om ci naw ng'za sä” cik ci.
1 Akhawn look ci gui la changshe gui cu, Bawipa Jesuh ah ng'thu ngai tuk khai gui ah, a pei ah ng'et lawk ci gui. 2 Pharisee gui la ng'thukhän saza gui naw, “Shin ah chang cu changshe gui dou gui ne, atäng ah ei awk püi gui ci nei” ci ne pyeinsak ci gui. 3 Cun ah kia khätah Bawipa Jesuh naw, shin ah m'tumtäng nak cu pe gui ci. 4 “Nangmi ung kaa, chang tumat ung htome phiaa om ci ung kaa, tumat a maih ung a i ah kiak khai ang? Ani naw k'pawih ba ciah ko-kip-lei-ko cu khu ah li nak ah nawng gui shüt netah, maih ciah htome cu, kä ah hmuh ba pha ah chuih shui ba khai nei. 5 Cun ah htome a hmuh ba ung, ak phleing ung taih ne, zeikiai ne law ba khai nei. 6 A im ah a gawk law ba ung a teihpüi gui la, a im pei ah kaa gui cu khü gui ne, “maih ciah htome ka hmu ba ci nei, kei awn atäng ah zeikiai tu vä” cik khai nei. 7 Acun ah mäih ah kei naw akcang ka pyein cu, ang zu ba vai kä hlü ciah chang k'ni ko-kip-lei-ko ah mä, changshe tumat ang zu ba ah hmawk ah zeikiai nak däm pi khai nei” cik ci. 8 Cun kawn ah hnumi tumat ah ngui phe ghaa ung kaa, ngui phe a maih ung, ani cu mei m'däi netah kyong zung avan pheikphai ne shui ba khai nei. 9 A cun ah ngui a hmuh ba ah a kiak ung a teihpüi gui la a im pei ah kaa gui cu khü gui ne, maih ciah ngui, ka hmu ba ci nei, kei awn atäng ah zeikiai tu vä, cik khai nei. 10 A cun ah mäih ah Khanpughi ah khankho chang gui cu, changshe tumat ang zu ba ah hmawk ah zeikiai ci gui nei” cik ci. 11 Cun kawn ah Bawipa Jesuh naw, “chang tumat ung ahta hnih om ci. Ahta ak hmaw pi naw, apa-am, 12 “kei naw ka gah tu vai ah khawh cu k'pai ne na pe ä” cik ci. Cun ah kia sei apa naw, a khawh cu ahta goi-am k'pai goi ci. 13 Kä shou pha sei ahta ak hmaw pi cu, apa ah khawh chaam avan zoi ne, a gah ah ngui avan hteh püi ne, a kho hei ah hteit ci. Ani cu a gawk nak ah kho ah a ngui gui cu a i baw düt ah ci ne ei mang zawp ci 14 A ngui avan ng'pyi khätah acun ah kho ah cawi khaih nak kho zaw sei ani cu ang htei ah cawi gha lawk ci. 15 Cun ah kia sei, cun ah chang tumat cu pan ne om tuk ci. Cun ah chang naw, ani cu lo ah vawk gui ngäng sak ci 16 Ani cu vawk gui-am vuh ah m'lui tawi gui düt ei law hluk ci. Cun ung phi ani-am a u naw a i phi kä m'bei tuk ci. 17 Cun ah kho ah ani cu akcang ah ng'zu ba netah kapa ah im ah bi bik ci gui ah chang gui hngaw ami phü ah ei awk ci gui. Kei läi shin ung ang htai ah cawi gha ne ka gein vai ci. 18 A tuhbäi ng'düi law ne, kapa ah hteit ba netah, Kapa aw, Khanpughi la nang Kapa ah khan ah katnak ka bi pyi ci nei, 19 Nang kapa ah na hta ah kä ka khin ba ci nei, ci ne ka pyein khai” cik ci. 20 Cun kawn ah ng'düi law ne apa ah om nak ah hteit ba ci. Ashou nak pui ah ana a vü ba cu apa naw hmu netah, ang htei ah m'gein ne dou law ne kyap ne ng'ui ci. 21 Ahta naw, “Kapa aw, kei cu Khanpughi la nang Kapa ah khan ah kat nak ka bi pyi ci nei. Cun ah kia sei, nang kapa ah hta ah kä ka khin ba ci nei” cik ci. 22 Apa naw, “Akzang ah shui ne suisak akni m'sui m'sak law vä, kutcüp akni m'hnak law vä, phahnak akni ng'cum law sak vä, 23 Ak plan pi bäih ah seipat ngawn vä, ei aw ne mi zeikiai khai nei. 24 Ka hta cu azan asih te ung phi tuhbäi ghing ba ci nei, azan a maih te ung phi tuhbäi hmuh ba pyi nei” ci ne akchang gui-am pyein ah gui ci. Cun kawn ah ngami cu ei aw ne zeikiai zawp ci gui. 25 Cun zah ung ahta ang vai pi cu lo ah hteit ci. Lo ah kaa law ba ne, im pei ah ang et law ba ung ami tum ng'lam gui ah k'aw cu ng'za netah, 26 ami chang tumat khü ne, “A i cik ci gui ang? ci ne ng'shik ci. 27 A cun ah chang naw, “Na nau cu ghing gai ne gawk law ba sei, napa naw seipat ak plan pi ngawn pek ci nei” cik ci. 28 Ahta ng'vai pi m'lungshe ne, kyong ah kä luh tu ba ah om ci. Apa cu akpung ah lut law ne ahta ng'vaipi kyong ah aluh law tu ba vai ah ng'ge püi ci. 29 Ahta ng'vaipi naw, “Kei cu khokum akda ung nang pa ah pyein ah om ne bi ka bik ci. Nang pa ah ng'thu hngü ät phi kä ka heng man ci. Cun ung phi ka teihpüi gui awn zeikia ne kami ei vai ah mehta tumat phi kä na na ngawn pe man ci. 30 Nang pa ah khawchaam gui la ne hteh püi ne, chang pawmzam gui awn atäng ah m'di m'dap zawp netah, law ba ciah ani läi-am seipat ak plan pi na ngawn pek ci nei” cik ci. 31 Apa naw, “Kahta aw, nang cu kei awn ang täi sei, atäng ah na om ci. Kei ah khawhchaam avan nang naw na khäm ci. 32 Cun ung phi nang na nau cu azan si te ci, tuhbäi ghing law ba ci, azan maih te ci tuhbäi mi hmu ba ci. Cun ah kia sei mik mi cu mi zeikiai ne, ei awk nak mi bi püi ah kiak ci, ci ne m'cäi gui ci.
1 Bawipa Jesuh naw ang düihpüi gui-am, “Hngü ät ung bühmang ciah chang ung a changvai tumat om ci. Ani naw mang ah khawhchaam gui cu ei mang m'di m'dap zawp ci, ci ne chak ci gui. 2 Mang naw ani cu khü netah, ‘Nang ah mawng akda ah kang zak ci, na bilawh nak gui cu apüh akheh ah piang ne law püi ä, nang cu kei ah changvai ah kä na kia ba khai” ci ne kiak nak ci. 3 Cun ah kia khätah changvai cu, “Kei a i ah ka kiak khai, kei nang naw changvai ung kaa na na k'täm pyi ci, kei ung m'dek cawh nak hning vai k'thagui kä om ci, ng'zoi ne ka ei vai phi ka ng'aa ci. 4 Cun ung phi kei cu changvai ung kaa ka ng'plawt kawn ah kei na dou ne na ng'khawt püi khai ka hmat pyi ci” ci ne amät ng'htau netah, 5 a mang ah pu ng'zoi tu man ciah chang gui avan khü gui ci. Ahtük bäih ah chang tumat-am, “kei ah mang-am na thung ba vai a i chü ang a om? ci ne ng'shik ci. Ani naw, “Khitui pit phiaa om ci” cik ci. 6 Changvai naw, “A tuhbäi ngo ne pit hmakip ah ca uk ung na hei guk vai” ci na khätah acun ah guk ci. 7 Cun kawn ah a hei tumat mä khü ne, “nang mä na thung vai a i chü nei a om? ci ne ng'shik ci. Ani naw, “Htang m'guh tang phia ghaa ka thung vai om ci” ci khätah, “A tuhbäi na ca uk la ne phiaa cheit ah na guk vai nei” ci sei, a cun ah guk ci. 8 Cun ah theileh ne abilawh ah hmawk ah kä ng'düng cih changvai cu amang naw m'hlüngtai ci. A i ah kia sei ci ung khomdek chang gui cu, khomdek khan ah mawng bilawh nak ung akdei ah hta gui ah mä ami theileh pi ah hmawk ah kiak ci. 9 “Cun kawn ah kei naw ka ning m'cäi gui cu, khomdek khawhchaam bühmang nak kawn m'gein sei ng'khawtsheng nak cu bi vä. Cun ung vah cun ah bühmang nak ang pyi law ung, Khanpughi naw nangmi cu ang täi ghin nak ghui im ah ning na dou gui khai. 10 Api bi ung bekhüt ciah chang cu akdäm bi ung phi bekhüt ci. Api bi ung düng ciah chang cu akdäm bi ung phi düng ci. 11 Cun ah kia sei nangmi cu khomdek khawhchaam bühmang nak ung, bekhüt nak kä a om ung, bühmang nak akcang cu, a u naw nangmi- am ning ap gui khai aw? 12 Nangmi cu chang ah khawhchaam ah khan ah bekhüt nak kä a om ung a u naw nami mät ah khäm ah khawhchaam cu ning ap gui khai aw? 13 A u chang phi bawimang hnih ah changshäm ah kä kia hning ci, Ani cu tumat gen ne tumat m'hni lawk khai. Tumat ah khan ah ng'düng nak awn om ne, tumat cu a i ah kä sui ba khai. Nangmi cu Khanpughi la khomdek khawhchaam ah ng'zak hlü cu atäng ah kä nami bi hlawt khai” cik ci. 14 Ngui ng'za hlük ciah pharisee gui cu, cun ah ng'thu cu ng'za u netah, Bawipa Jesuh cu m'lep nak ci gui. 15 Bawipa Jesuh naw, “Nangmi cu, nami mät naw nami mät chang khän gui ah chang ah ma ah nami m'dang ci. Cun ung phi Khanpughi naw nami m'lung kyong ning hmat gui ci. Chang gui naw ang khän ah ami ngaih cu Khanpughi ah ma ah m'sheshai ah kiak ci. 16 Tuihnim Johan kä a ng'dang pha ung Moese ng'thukhän gui la profet gui ah cacim gui cu kümbe te ci. Johan ang dang kawn ah tün ne, Khanpughi ah uknak ah mawng ng'Thu Ni cu pyein sak law ah kiak ci. Chang akda gui Khanpughi ah uknak kho ah ng'gut ne lut lawk ci gui. 17 Cun ung phi Thukhän shaitaak cang'ma ng'lung ät adi maih vai ah mä, khomdek la khankho adi maih vai cu zäi tuba ci. 18 Akchu nawng ne ahei chu na tu ba ciah pami cu, akchu ah khan ah kat nak bik ciah kiak ci. Chang ah ng'chaa püi ah hnumi chu nak ci cu chang ah chu kat püi ciah kiak ci. 19 Hngü ät ung chang mangpa tumat om ci. Ani cu ak hnüüp tä akni ak kiom suisa ne, bühmang ä le ne om ci. 20 Ani ah im kawt pei ah ghawipyam zaica ciah Lazarus ming nak ciah chang tumat cu ng'zän ne om ci. Ani cu apumsa nüng khei bäng ah kia sei ui gui naw law ne akhei cu m'leik ci ci gui. 21 Ani cu mangpa ah ei k'book kaw ne a ei tu vai ah ng'zoi tu ci ci. 22 Cun kawn ah ghawipyam ci cu si sei, khankho chang gui naw la law u ne, Abrham ah k'coi ung m'shän ci gui, Mangpa cun phi si sei, m'cim ci gui. 23 Ani cu m'htei mei khui ah ang htei ah gein vai law aih ne khankho cu han dang netah, Abraham la a k'pat lam ah ngok ciah Lazarus cu hmu goi ci. Cun ah hmu goi netah, Mangpa naw; 24 “Paka Abraham aw, kei cu nam gein ä, kei cu m'htei mei khui ung ang htei ah ka geinvai ci nei. Lazarus naw akut m'dawng awn tui tawk netah ka m'lei ung ana m'hteei tu vai ah ka om nak ah zuk tüi law” ci ne m'awi ne ng'khü ci. 25 Cun ung phi Abraham naw, “Ka hta aw, khomdek khan ah nang bühmang gui man la Lazarus ah ghawipyam zaica man gui cu, ngai ba ne shüm ba ä. Tuhbäi ani cu bämang nak ung gawk sei, nang cu geinvai nak ung na gawk pyi ci. 26 Cun bäng ah kä kiak ciah keimi la nangmi ah ng'lak ung thuuk aih ciah gheem-kiaa nu om ci. Cun ah kia sei keimi lamah kaa nangmi lam ah phi bäi, nangmi lam ah kaa keimi lam ah phi bäi a u kä hteit hton hlawt ci nei” ci ne kiak nak ci. 27 Mangpa naw, “Kapa aw, cun ah a kiak ung kei ah kapa ah im ah Lazarus cu na tüih law ba vai ah ka ng'za hlük ci nei. 28 Kei ah ka nau chang sing hma om ci, ngami bawtah shin ah geinvai nak ah kä ami gawk law tu vai ah va m'thein ba gui khai ah Lazarus cu zuk tüi law ba ä” cik ci. 29 Abraham naw, “Nang ah nau gui-am m'thein tu gui khai ah Moses la profet gui om ci gui. Ngami ah ng'thu ngai tu u sä” ci ne kiak nak ci. 30 Cun ung phi mangpa naw, “Kapa, Abraham, cun ah kä kiak ci nei, akcang ah si pyi ciah chang gui ung kaa tumat cu ngami ah a hteh ba ah a kiak ung ngami cu ng'zu ba hman khai gui nei” ci nak ci. 31 Abraham naw, “Ngami cu Moses la Profet gui ah ng'thu kä a mi ngaih läi ung sih nak ung kaa tho law ba ci a om ung phi ngami naw, kä zum hlawt khai gui cik ci” ci ne m'thein gui ci.
1 Bawipa Jesuh naw, ang düihpüi gui-am, “Katnak bi nak vai ah tüihtok nak cu akcang ah om khai, cun ung phi cun ah tüihtok nak bik ciah chang ah hmawk ah ang htei ah kyihkyawk vai kiak ci. 2 Ak hmaw tumat kat nak ung gawk khai ah tüihtok nak bik ciah chang cu lungsum khit ne a gawn ung m'äh netah tuili ung shum ung bä tu ba khai. 3 Cun na kia sei geing na ne nami bilawh vai. “Na phäi nau naw a ning kat nak ung, ani cu na m'cäi vai, ani ang zu ba ung akat nak nam gein vai. 4 Ani naw kho hnüüp ät ung chih vei ning kat na netah, acun päng ung law ne kei ka kat nak ka ng'zu ba ci nei a ci ung, nang naw ani ah kat nak cu nam gein vai, ci ne m'cäi gui ci. 5 Ang düihpüi gui naw, Bawipa-am, “Kami zum nak na hlüngtai sak gui ä” cik ci gui. 6 Bawipa Naw, “Nangmi ung zumnak anhta ui teih pang a om ah a kiak ung, nangmi naw shin ah anli ghing-am, Na phung ah ng'son ne, tuinu ung ghing ne ng'düi ä” nami ci ung nami pyein ah mäih ah kiak khai nei. 7 “Nangmi ung kaa a u naw, lai thawn netah baw, htome shäm netah baw, law ba ciah akchangshäm-am, a gawk law ba vai-am, ei ei law ä ci ne ana khü khai ang? 8 “Kei ah hmawk ah ei lo chang ne, ka ei awk zah ng'bi ng'lawh ne, na khap piang netah, ka ei zawp khawn ah na ei tu vai, cik khai ah kä kia ne ang? 9 Changshäm cu pyein ah a om ah phäh ah na bä ni ci nak vai kä om ci. 10 A cun ah mäih ah nangmi cun phi; ami ning bi sak gui avan nami bi zawp ung, “Keimi cu changshäm düt ah kami kiak ci, kami bi vai ah kiak ci cu, kami bi ah kiak ci nei, nami ci vai” ci ne m'cäi gui ci. 11 Bawipa Jesuh cu Jerusalem ah a hteh nak lam ah Samaria la Kalile kho ah khogi lam ung hteit ci. 12 Pigaw tumat ung ami gawk law ung khei-lei ah ei chang sing ghaa naw Bawipa cu ana dou ci gui. Ngami cu ang shawng pi pi ah ng'düi u netah, 13 “Bawipa Jesuh aw, keimi nam gein gui ä” ci ne m'lau ci gui. 14 Bawipa Jesuh naw, hmu law gui netah, “Nangmi hteit ne taigü gui-am nami pumsa vam hnuh gui vä” cik ci. Ngami cu Taigü gui ah ami hteh nak lam ah hteit ba zawp ci gui. 15 Ngami ung kaa, chang tumat cu anat nak a maih hmat law netah, Khanpughi cu m'lau ne m'hlüngtai ne, Bawipa Jesuh ah pei ah law ba ci. 16 Cun kawn ah a kho pei ah m'khuuk doong ne kawp ne, abäkhäk ah mawng cu m'tamkhah ci. 17 Ani cu Samaritan chang ah kiak ci. Bawipa Jesuh naw, “Khei-lei ah ei chang sing ghaa cu theek ba ci gui, chang sing ko mä a hawi ang? 18 Khanpughi m'hlüngtai khai ah shin ah chang khui hei ah kawn ah a u kä om ba ne ma? ci ne ng'shi gui ci. 19 Cun kawn ah ani-am, “ng'düi law ne hteit ba ä, na zum nak awn na nat nak theek pyi ci nei” ci ne kiak nak ci. 20 Pharisee am shah gui naw, “Khanpughi ah uknak kho cu a i zah ung gawk lawk khai ang? ci ne Bawipa Jesuh cu ng'shik ci gui. Bawipa Jesuh naw, “Khanpughi ah Uknak kho cu mik awn hmuh vai ah dang ciah kä kiak ci. 21 A u naw phi teng tu vä, Khanpughi ah uknak kho cu shin ung om ci, cän ung om ci, ci ne pyein thei vai kä kiak ci. Akcang ah pyein ung Khanpughi ah uknak kho cu na m'lung kyong ah om ci nei” cik ci. 22 Cun kawn ah Bawipa Jesuh naw ang düihpüi gui-am, “Chang ah Htapa ah kho hnüüp ät la nangmi ah ng'zak hlü ah kho hnüüp cu gawk lawk khai. Cun ung phi cun goi cu, kä ng'bui khai. 23 Chang gui naw, “chang ah Htapa cu shi ah nei a om, cä ah nei a om” ci ne ami pyein ung phi, läk ne kä nami shui- en tu vai. 24 Kho a lai läp ung khankho mik cu kho cawi, kho kem ah khüt ne adei khang ah mäih ah, chang Htapa a kyum law ba hnüüp kiak khai nei. 25 Cun ung phi chang ah Htapa cu nuipai ciah zaica nak la tuhchü chang gui ah huut-taap nak cu bui maa khai nei. 26 Noah ah om zah ung a kiak ah mäih ah chang ah Htapa a gawk law ba khin ung kia law ba khai. 27 Noah ni, htein-paw im kyong ah ami luh kawn ah tui naw lin gui sei, chang gui ami didap ah hnüüp kä gawk pha ung chang gui cu, ei ne aw ne, ng'chu-la ne om te ci gui. 28 A cun ah mäih ah Lotah ah om zah ung phi, chang gui cu ei aw ne, sumlei ne, k'pyu-im ne, kholo ne om te ci gui. 29 Sodom ung kaa Lotah ang düih law hnüüp ung khankho ah kaa zam- mei kho aa law sei, chang gui avan dimaih zawp ci gui. 30 Chang ah Htapa ang dang law ba hnüüp ung phi a cun ah mäih ah kia law ba khai. 31 A cu hnüüp im m'kiung khan ah om ciah chang naw, a khawhchaam va la ba khai ah im kyong ah kä a vah luh-en ba vai. Lai ah om ciah chang phi im mah kä a hteh-en ba vai. 32 Lotah ah chu nami shüm ba vai. 33 A ghin nak hun hlük ci cu, a ghin nak ng'chah khai, a ghin nak ah kä ng'vang ci cu hun nak gah khai. 34 Kei naw akcang ka pyein cu, cun ah mü ung, ih phak tumat ung ip ghawm ci goi ah chang hnih ung kaa, tumat cu la ne tumat cu nawng shüt khai. 35 Sum ng'gon ne suk ciah hnumi hnih ung kaa tumat cu la ne, tumat cu nawng shüt khai. 36 Lai atäng ah bik ci goi ah pami hnih ung kaa tumat cu la ne, tumat cu nawng shüt khai” ci ne m'thein gui ci. 37 Ang düihpüi gui naw, “Bawipa, cun gui cu, a hawn ah kho ung kia lawk khai ang? ci ne ng'shi u khätah; Bawipa Jesuh naw, “Aksi gui ah om nak ah langta gui ng'bum lawk khai gui nei” ci ne m'thein gui ci.
1 Cun kawn ah Bawipa Jesuh naw, ang düihpüi gui-am, kä kia düt- en ne ang täi ah ami taigü vai ah, m'tumtäng ne m'thei gui ci. 2 Pigawnu tumat ung suki tumat om ci. Ani cu Khanpughi phi kä kyih ci, chang phi kä aa cih chang ah kiak ci. 3 A cun ah pigaw ung hmeinu tumat om ci. Ani cu suki ah a shäng shäng law ne, “Ka ng'küükneet püi ah chang cä, ka näng vai ah na ci pe ä” cik ci. 4 Hmeinu ah pyein cu suki naw akda vei maa nak ci. Cun ung phi ak hnu ah “Kei cu Khanpughi phi kä ka kyih ci, chang phi kä ka aa ci. 5 Shin ah hmeinu, k'paamcai aih ci, ani ah mawngma düng khai ah ka pyein tu pek khai. Kä cun ung kei nak paamcai lä ne, na zaica sak khai” ci ne amät naw ngai ci. 6 “Shin ah kä nik ciah suki ah ng'thu cu ngai shüm vä, 7 Khanpughi naw akchang gui cu, am gein gui vai ah amü akhnüüp m'lau ne ami ng'zoih ung kä m'khoichaa gui ah om khai ang? Ani naw ngami am gein gui vai ah düngzeng düt khai ang? Kei naw akcang ka pyein cu; 8 Bawipa naw ang ghit ah ng'düng khai ah m'khoichaa pe gui khai nei. Cun ung phi chang ah Htapa a law ba ung khomdek khan ah zumnak cu hmuk khai ang” cik ci. 9 Amät naw amät chang khän ah ngai ne, chang k'shedam nak ciah chang gui-am Bawipa Jesuh naw, shin ah m'tumtäng nak cu m'thein gui ci. 10 “Kho hnüüp ät ung chang hnih cu taigü khai goi ah pum im ah hteit ci goi; tumat cu pharisee, tumat cu akhawnlook ciah kiak ci. 11 Pharisee cu amät bäng ng'düi hnga netah, “Aw, Khanpughi aw, chang gui cu, a i baw ng'za hlük tat ci ni, kä düng ci ni, chang ah hta kat püi ci ni ah kiak ci gui. Kei cu cun ah chang gui ah mäih ah kä ka kiak ci. Shin ah akhawnlook ciah chang ah mäih ah phi kä ka kia tuk ci, cun ah kia sei Khanpughi ka ning m'hlüngtai ci. 12 Kho hnüüp chih ung hnüüp goi ci, ei hlawi ne ka taigü ci, ka gah phung ah bum ghaa bum ät phi Khanpughi-am ka pek ci, ci ne taigü ci. 13 Cun ung phi akhawnlook ciah chang läi cu, ani awn ang shawng ah ng'düi net, khan kä dang dat ah kawp netah, “Aw, Khanpughi aw, kat nak ka bik ciah kei chang kaa cu nam gein ä” ci ne ang kyang k'beeih ne taigü ci. 14 Kei naw ka ning m'thein gui cu, cun ah akhawnlook cu akat nak k'phiawn sei a im ah hteit ba ci, pharisee läi cu akat nak kä k'phiawn ci. A i ah kia sei ci ung, amät naw amät m'hlüngtai ci cu neim saknak gah khai, amät naw amät neim sak ci cu m'hlüngtai nak gah khai” ci ne m'cäi gui ci. 15 Cun sang ung chang am shah gui naw ami hta k'hmaw gui cu Bawipa Jesuh naw ami khan ah akut taih ne hrilham a peit gui vai ah law püi ci gui. Cun cu ang düihpüi gui naw hmu u netah, gen gui ci gui. 16 Cun ung phi Bawipa Jesuh naw akhmaw gui cu khü gui netah, “Akhmaw hta gui kei ah law u sä, kä maa na gui vä, Khanpughi ah uknak kho cu ngami ah kho ah kiak ci nei; 17 Kei naw akcang ka pyein cu, akhmawhta ah mäih ah kä zum ciah chang phung cu Khanpughi ah uknak kho ah kä lut hlawt khai nei, ci ne m'thein gui ci. 18 Jew changvai tumat naw, “Nik ciah saza aw, angtäi ghin nak gah vai ah a i ang ka bi kaw” ci ne Bawipa Jesuh cu ng'shi lawk ci. 19 “Bawipa Jesuh naw, a i ah kia sei kei cu chang k'ni ah na na khü ang? Khanpughi ah kawn ah chang k'ni a u kä om ci nei. 20 Thukhän gui na hmat pyi ci kia ne; changah chuhta kä kat püi vai, chang kä ngawn vai, kä m'guuk vai, hleei pyein ne kä saksi vai, nupa chang m'sui vai, ci gui cu na läk vai” ci ne kiak nak ci. 21 Cun ah chang naw, “Cun ah thukhän gui cu ka hmaw sang ung tün ne ka läk pyi ci” cik ci. 22 Cun aci cu Bawipa Jesuh naw ng'za netah, “Nang ung tumat hlü ba ci, na khawhchaam avan zoi ne, ghawipyam ci gui-am na peit gui vai, cun ung nang cu khankho ah na bühmang khai; cun kawn ah kahnu ah na na läk vai” ci ne kiak nak ci. 23 Cun ah chang cu bühmang ciah kia ne, Bawipa Jesuh ah ng'thu cu ng'za netah ahmai m'kyuum ne hteit ba ci. 24 Cun cu Bawipa Jesuh naw hmu netah, “bühmang ciah chang Khanpughi ah uknak kho ah aluh vai cu khak aih ci nei, 25 Ng'pyüm mik ung seikong a luh vai cu azäi ung zäi hngaw khai, cun ung phi bühmang ciah chang Khanpughi ah uknak kho ah a gawk vai cu kä zäi ci nei” ci ne kiak na gui ci. 26 Cun ah ng'thu ng'zak ciah chang gui naw, “Cun ah akiak ung a u hun nak ah gawk hlawt khai ang? cik ci gui. 27 Bawipa Jesuh naw, “chang naw kä am khüt cu Khanpughi naw m'khüt ci nei” ci ne kiak na gui ci. 28 Cun kawn ah Peter naw, “Bawipa, keimi cu kami pyu im nawng shüt ne kami ning läk pyi ci nei” ci khätah, 29 Bawipa Jesuh naw, “Kei naw akcang ka pyein cu, Khanpughi ah uknak kho ah hmawk ah, a im lo, akchu hta, anu pa, a phäi nau nawng shüt ciah chang cu. 30 tuhchü a ghin zah ung khawhchaam ang peeih a gah kawn ah, maa ah lawk khai ah kho ung angtäi ghin nak gah khai nei” ci ne m'cäi gui ci. 31 Bawipa Jesuh naw, ang düihpüi gui gha-lei-goi cu khü gui netah, “Ngai vä, mik mi cu Jerusalem ah mi hteit lawk ci. Chang ah Htapa ah mawng profet gui naw ami guk ah mäih ah kümbe lawk khai nei. 32 Chang ah Htapa cu chang pakhui hei ah kut ung ap khai gui, päipih khai gui, ami m'shi awn m'thui khai gui; 33 htung awn that khai gui, ngawn khai gui. Cun ung phi ak hnüüp thum hnüüp ung tho ba ne ghing ba khai nei” cik ci. 34 Cun ung phi ang düihpüi gui naw, ani ah ng'thu cu api phi kä hmat ci gui. Bawipa ah ng'thu cu thuuk aih ne, ng'zih khätah, ngami naw kä hmat hlawt ci gui. 35 Bawipa Jesuh cu, Jerikho gawnu pei ah a gawk law sang ung amik m'dauh tumat cu lam pei ah ngo ne, ng'zoi ne om ci. 36 Ani cu chang gui ah hteh hton shim netah, ng'shi tu gui ci. 37 Chang gui naw, Nazaret ah kaa Bawipa Jesuh a law ah mawng m'thein tuk ci gui. 38 A cun ah chang naw, “David ah Htapa, Jesuh Bawipa, kei cu na m'gein ä” ci ne m'lau ci. 39 Ama ah om ciah chang gui naw, adüm ah a om vai ah ng'lii ne pyein ci gui. Cun ung phi ani cu, “David ah Htapa, Jesuh Bawipa, kei cu nam gein ä” ci ne m'lau gäk gäk ci. 40 Cun ah kia sei Bawipa Jesuh cu ng'düi netah, cun ah chang cu ami law püi vai ah pyein ci. Cun ah chang cu a pei ah gawk law khätah; 41 Bawipa Jesuh naw, “Nang ah hmawk ah a i ka ning bi peit vai ang? ci ne ng'shik ci. Amik m'dauh naw, “Bawipa, ka mik ma ne m'dei sak ä” cik ci. 42 Bawipa Jesuh naw, “Na mik m'dei sä, na zum nak naw, na mik ning m'dei sak pyi ci nei” ci nak ci. 43 A cun vai-am ani cu amik m'dei lawk ci Cun kawn ah Khanpughi ah bämang nak m'hlüngtai ne, Bawipa Jesuh ah hnu ah läk tuk ci. A cun gui cu hmu tuk ciah chang gui ami van cu Khanpughi ah ming m'hlüngtai ci gui.
1 Bawipa Jesuh cu Jerikho gawnu sun pah ne a hteh nak lam ah 2 A cun ah gawnu ung Zakhaeus ming nak ciah, akhawnlook ciah, ang vaipi tumat om ci. Ani cu bühmang ci. 3 Ani naw Bawipa Jesuh a i ah mäih lawk ci ang ci ne, a hmuh tu vai ah k'tha nak ci. Cun ung phi ani cu tawi hta ci kia ne, chang da aih khätah Bawipa Jesuh cu kä hmu tu hlawt ci. 4 Cun ah kia sei, Bawipa Jesuh a law nak vai ah lam ung ana va dawng ma netah, k'thei ghing ung kai ne, ana teng ci. 5 Bawipa Jesuh cu a cun ung a gawk law ung sing ah khan ah han dan netah, “Zakhaeus, a tuhbäi kyum law ba ä, tuh ngawi nang ah im ah ka kai lawk khai nei” cik ci. 6 Zakhaeus cu sing ghing ah khan ah kaa kyum law ba netah, Bawipa Jesuh cu zeikiai ne a na daou ci. 7 A cun gui hmu u netah, chang gui naw, “shin ah chang cu kat nak bik ciah im ah kai khai ah hteit ci nei” ci ne ng'htau ci gui. 8 Zakhaeus cu ng'düi law netah, Bawipa Jesuh-am “Bawipa, kei ah ka khawh cu a teih k'pai ne ghawipyam ci gui-am ka pek khai nei. Kei naw chang ah ngui kä düng ciah ka lak a om ung phi, a cun ah ngui ah ak phli ah ka pe ba khai nei” cik ci. 9 Bawipa Jesuh naw, “shin ah chang cun phi Abraham ah hta ng'shon ah kia sei, hun nak cu a tuh ngawi shin ah im khan ah gawk law pyi ci nei. 10 Chang ah Htapa cu maih ciah chang gui shui ba gui ne hun gui khai ah kyum lawk ci nei” ci ne Zakhaeus-am kiak nak ci. 11 Cun zah ung Bawipa Jesuh cu Jerusalem gawnu pei ah gawk lawk ci. Chang gui naw Khanpughi ah uknak kho cu atuh bäi dang lawk khai ci ne ngai ci gui. 12 Cun ah kia khätah Bawipa Jesuh naw, “Mang ah hta tumat cu, ghangpughang-ah kia law vai netah, akho hei ah a shäng hteit ci. 13 Kä a hteh pha ung akchang shäm gui sing ghaa cu khü gui netah, kei kä ka gawk law ba phaa ah chuih nami sumlei vai” ci ne gui tangka a phe ci pe gui ci. 14 Cun ung phi a kho ung ak chang gui naw, ani cu m'thüi na u netah, ‘ani ah uknak kä kami ng'za hlük ci nei’ ci ne ng'shä tüi ne pyein lawk ci gui. 15 Ani cu Ghangpughang ah kia ne law ba netah, a gawk law ba vai-am a peit gui shüt ah ngui awn sumlei ne a i chü ci ami gah ah hmat hlü netah, chang shäm gui cu khü ne ng'shi gui ci. 16 Ak htük ah changshäm tumat cu law ne, “Bawipa aw, na na peit shüt tangka aphe awn phe gha ka gah ci nei, cik ci. 17 Ghangpughang naw, “Na bä ci, nang cu changshäm k'ni ah na kiak ci, api ung phi na bekhüt ci kia sei, gawnu ghaa na uk vai ka ning pek ci nei” ci nak ci. 18 Ak hnih nak tumat cun phi law ne, “Bawipa aw, na na peit shüt ah tangka aphe awn phe hma ka gah ci” ci ne pyein ci. 19 Ghanpughang naw, “Nang-am phi gawnu gaw hma na uk vai ka ning pek ci” ci nak ci. 20 Changshäm tumat cun phi law ne, “Bawipa aw, na na peit shüt ah tangka aphe cu acun a lüng ah om ci nei, ak ni ah ka gim ci nei, 21 Nang cu na nget aih ci kia sei ka ning kyih ci. Nang cu kä na kaa phi na lak ci, kä na geit phi na khäm ci ci, ci ne pyein ci. 22 Ghangpughang naw, “Nang changshe, namät ah ng'thu awn ka ning m'khoi m'chak khai. Kei cu nget ne kä ka kaa phi ka lak ah mawng, kä ka geit phi ka khäm ah mawng, cu hmat lang ne, 23 a i ah kia sei ng'lon khai ah kä bi ah, ashin düt na na ap law ba ang? ci ne ng'shik ci. 24 Cun kawn ah ghangpughang naw, apei ah chang gui-am, “Ani ung kaa tangka aphe cu la ne, tangka phe ghaa tak ci-am peit vai nei” cik ci 25 Chang gui naw, “Bawi aw, ani ung tangka phe gha om pyi ci nei” cik ci gui. 26 Ghangpughang naw, “Kei naw akcang ka pyein cu, bühmang ci-am ka pe ba mä khai, shuh ghawi ciah kaa ak om hta avan ka lak pek khai. 27 Cun kawn ah kei ah uknak kä ng'za hlük ciah kei ah gaa gui cu, kama ah lawpüi ne ngawn gui vä, ci ne pyein ci” ci ne m'thein gui ci. 28 Acun kawn ah Bawipa Jesuh cu Jerusalem ah hteh vai ah amät ma ne hteit ci. 29 Olive khomhtung pei Bethpheik la Bethani pigaw pei ah gawk law u netah ang düihpüi gui am, 30 “Mi ma lam ah om ciah pigaw ah nami hteh vai, pigaw ah nami gawk vai-am, a u naw kä ang cun nak man ah ng'se hta tumat cu nami hmuk khai. Cun ah ng'se cu gui awn khit ne k'pawng khai gui, gui cu k'phian ne nami law püi vai. 31 Chang naw a i vai ng'se nami k'phian ang ci ne, ami ning shi gui ung, “Shin ah ng'se cu kami Bawipa naw ng'za hlük ci nei ci ne nami pyein vai, ci ne m'cäi gui ci. 32 A tüih ah chang gui cu hteit u netah, Bawipa naw am cäi gui ah mäih bä ah apäng hmuk ci gui. 33 Ngami naw ng'se ami k'phian zah ung ka nak ci naw, “Nangmi a i ah kia sei, ng'se nami k'phian ang? ci ne ng'shi gui ci. 34 Ngami naw, “Shin ah ng'se cu kami Bawipa naw ng'za hlük ci nei” ci ne pyein ci gui. 35 Cun kawn ah ng'se cu Bawipa Jesuh ah om nak ah law püi ci gui. Ng'se ah khan ah ami zih gui phah ne Bawipa Jesuh cu ng'cum sak ci gui. 36 Bawipa Jesuh a law nak ah lam ung chang gui naw, ami zih gui ana phah ci gui. 37 Jerusalem gawnu ang et law nak, Olive m'htung zuk khum nak lam ah a khahpüi law tuk ci gui ami van cu cäicat vai gui ami hmuh ah phäh ah Khanpughi ah ming cu m'lau ne m'hlüngtai ne zeikiai ci gui. 38 Ngami naw, “Khanpughi ah ming awn kyum lawk ciah, Ghangpughang ung Khanpughi ah zeikiai nak om sä. Khankho ung ding gei nak om sä; Khanpughi ah bämang nak cu Khankho ung be sä” ci ne m'lau ci gui. 39 Cun zah ung chang gui ah ng'lung ah kaa pharisee gui naw “Bawipa, na chang gui adüm ah ami om vai ah m'cäi gui ä” cik ci gui. 40 Bawipa Jesuh naw, “Kei naw akcang ka pyein cu, shin ah chang gui adüm ah ami om ah a kiak ung lung gui cu tho law ne m'lau lawk khai gui nei” cik ci. 41 Bawipa Jesuh cu Jerusalem gawnu ah gawk law ne, cun ah gawnu cu hmu law netah, kyap ci. Bawipa Jesuh naw, “Nang Jerusalem, 42 nang naw tuh ngawi dimdeeih nak na hmat vai sü ung, zeikiai nak om khai sü te, cun ung phi nang naw, cun kä na hmuk ci. 43 Gaa gui naw nang cu, am kawt päng ung ning mah u ne, ami ning koi nak ah khin gawk lawk khai nei. 44 Cun ah gaa gui naw, nang la gaw kyong ah om ciah chang gui cu, avan ngawn ne m'dimdap zawp khai gui. Lung tumat ah khan ah tumat phi ng'taih ne kä om ba khai. A i ah kia sei ci ung nang cu ning hun khai ah Khanpughi a kyum law nak ah khin cu, kä na hmat ah hmawk ah kiak ci” ci ne pyein ci. 45 Cun kawn ah Bawipa Jesuh cu taigü im ah hteit ne sumlei ci gui cu k'täm ne gawt gui ci. 46 Bawipa Jesuh naw, “Khanpughi ah ng'thu, cacim ung, ‘Kei ah im theing cu Taigü im ah kiak khai’ cik ci. Cun ung phi nangmi naw tuhbäi, ng'thup ciah m'guk-ei gui ah om nak ah nami piang pyi ci nei” ci ne taigü im ung sumlei ci gui-am kiak na gui ci. 47 Bawipa Jesuh naw ak hnüüp tä Taigü im ah m'theithang gui ci. Cun ung phi taigü ng'vai gui, Thukhän saza gui la, Jew chang ng'vai gui naw Bawipa Jesuh cu, ami ngawn vai ah k'tha nak ci gui. 48 Cun ung phi chang akda naw Bawipa Jesuh ah ng'thu cu, aktung ah ngai ci gui kia sei, a i chaa ah ngawn vai ci cu kä hmat ci gui.
1 Kho hnüüp ät ung Bawipa Jesuh naw chang gui m'cäi gui ne ng'Thu Ni am thein gui zah ung taigü ng'vai gui ni, thukhän saza gui ni, Jew chang ng'vai gui ni cu law u netah; 2 “Shin gui bi nak hning vai ah nang ung a i ang a om? Cun ah bi nak hning cu a u naw ang a ning peit? na pyein vai nei” ci ne ng'shik ci gui. 3 Bawipa Jesuh naw, “Kei phi tumat ka ning shi gui khai, Johan naw tui hnim nak a peit cu; 4 Khanpughi ah bi sak ang? chang ah bi sak ang? nami pyein vai nei” ci ne ng'shi tuba gui ci. 5 Ngami cu ami mät ng'ge u netah, “a i mi cik khai ang? Khanpughi ah bi sak mi ci ung, a i ah kia sei Johan kä nami zum ang? ci lawk khai. 6 Chang ah bi sak mi ci ung, Johan cu profet ah kiak ci ciah zum ci gui naw, lung awn na vawi gui khai gui” ci ne kia u netah, 7 ngami naw, “a u ah bi sak ah abi cu kä kami hmat ci nei” cik ci gui. 8 Cun ci u khätah, Bawipa Jesuh naw, “Shin ah kabi gui cu a u naw na bi sak sei kabi ah kei naw phi kä ka ning m'thein gui khai” cik ci. 9 Cun kawn ah Bawipa Jesuh naw shin ah m'tumtäng nak m'thein gui ci. “Chang tumat naw sapyit lo ung ang geitkaw kawn ah, chang gui ghüh ne bi ne ei sak gui ci. Amät cu a kho hei ah hteit ne aksho om ci. 10 Hnü ät ung ak chang tumat tüi ne, alo ah k'phlam cu shan sak ci. Cun ung phi lo bik ci gui naw, tu that u netah a i kä peit ah tüi ba ci gui. 11 Cun kawn ah lo mah naw ak chang a hei tumat mä tüi ba ci. Cun cun phi tuthat u netah a i kä peit ah hlawt ba ci gui. 12 Cun kawn ah lo mah naw, ak chang a hei tumat cu tüi ba mä ci. Cun ah chang cun phi leim khai ah tuthat netah, akpung ah k'täm ne gawt ci gui. 13 Cun kawn ah lo mah naw, “Ka hta tumat om ci, acun baw ka tüi khai, ani ahteh läi ung kyih aa khai gui” ci netah, ahta cu tüi ci. 14 Cun ung phi lo bik ci gui naw ani hmuh netah, “Ani cu lo mah ah hta, pakhui m'düng khai ah chang ah kiak ci, ani ngawn netah lo mi kaa nak khai’ ci u netah; 15 Lo mah ah hta cu akpung ah hteh püi ne ngawn ci gui. Cun ah a kiak ung lo mah naw a i ci lawk khai ang? 16 Ani naw law ne ng'hlawh ci gui avan gawt gui netah, a sapyit lo cu a hei ghüh ba ne bi sak khai nei” cik ci. Chang gui naw cun cu ng'za u netah, “cun ah kä kia-en sä” ci ne kiak ci gui. 17 Bawipa Jesuh naw, chang gui teng gui netah, “Lung im co ci gui naw, ami ghawh ah lung cu, aphu küi pibäih ciah, lung ah kia lawk ci” ciah cacim ah mawng cu ka ning m'thein gui khai. 18 A cun ah lung ah khan ah zu kiak ciah chang cu hnget ne ng'bät khai, a cun ah lung naw a kiak shi ah chang cu khui ne ng'piäüh khai” ci ne m'thein gui ci. 19 Thukhän saza gui la taigü ng'vai gui cu, Bawipa Jesuh naw ngami-am ci gui ah amtumtäng cu hmat u netah, Bawipa Jesuh cu pha hlük ci gui. Cun ung phi chang gui cu kyih gui ci gui. 20 Cun ah kia sei ngami naw ami phaa nak vai ah m'kawt cu shui ci gui. Ang thu a hma law ung Roman bawi-am pha ne ap vai ci ne, chang k'ni ah ng'shei ciah chang gui cu Bawipa Jesuh ah tüi ne ng'shi sak ci gui. 21 Nagmi naw “Sazapa, na ng'thu la na m'theithang cu hman ciah kami hmat ci. Nang cu chang ah hmai kä teng-en ah Khanpughi ah ng'düng nak ah mawng bäng na pyein ci. 22 Cun ah kia sei, akcang cu na m'thein gui ä; Roman ghangpughang- am k'phlam kami ap khai ang? kä kami ap khai ang? ci ne ng'shik ci gui. 23 Bawipa Jesuh naw ngami ah theileh cu hmat netah, 24 “Tangka tumat na m'hnuh law vä, shin ah tangka ung a u ah gup la a u ah ming ang a om? ci ne ng'shi gui ci. Ngami naw, “Roman ghangpughang ah gup la aming om ci nei” cik ci gui. 25 Bawipa Jesuh naw, “Roman ghangpughang ah kaa cu Roman ghangpughang-am nami ap vai. Khanpughi ah kaa cu Khanpughi-am nami ap vai” cik ci. 26 Ngami naw chang gui ah ma ah Bawipa Jesuh ah ng'thu a hma nak cu kä hmu hlawt u netah, ani ah ng'thu ngai ne, cäi ne adüm ah om ci gui. 27 Sihnak ung kaa thawh ba nak kä om khai ci ah zum ciah Sadducees gui cu Bawipa Jesuh ah law u netah, 28 “Sazapa, Mose ah thukhän ung chang tumat cu ahta kä om sei asih ung akchu cu a phäi nau naw akhäm tu ba vai, a phäi nau ah hnün ung pakhui am düng vai” ciah om ci. 29 Hnü ät ung ng'phäi nau gui chang sing chih om ci gui. Ami phäi ng'vaipi cu chumah netah kä hta pha ne sik ci. 30 Akchu cu anau ng'vaipi naw khäm tu ba ci. Ani phi kä hta pha ne si ba ci. A cun ah anau naw mä khäm tu ba ci. 31 Ani phi kä hta ne si ba sei, ami van ng'phäi nau chang sing chih cu ami hta kä om sei si zawp ci gui. 32 Ak hnu ah cun ah hnumi phi sik ci. 33 Cun ah hnumi cu, cun ah ng'phäi nau chang sing chih ami van ah chu ah kia sei, sih nak ung kaa ami thawh law ba hnüüp ung, ani cu a u ah chu ah kiak khai ang? ci ne ng'shik ci gui. 34 Bawipa Jesuh naw, “Shin ah m'dek khan ung chang gui cu ng'chula ci gui. 35 Cun ung phi sih nak ung kaa tho ba ne khankho ah kai khai ah chang gui cu, kä ng'chula ba khai gui. 36 Ngami cu khanchang gui ah mäih ah kia ne kä si ba hlawt khai gui Ngami cu sih nak ung kaa tho ba ci gui ah kia ne, Khanpughi ah hta ah kiak ci gui. 37 “Moses naw, mei ah däi ciah k'pluup ah mawng a pyein nak ung, Khanpughi cu Abraham ah Khanpughi, Issak ah Khanpughi, Jakop ah Khanpughi a ci cu, sih nak ung kaa, thawh ah mawng a pyein ah kiak ci. Ngami cu Khanpughi ah ma ah ghing ne om ci gui kia sei, 38 Khanpughi cu sik ci gui ah Khanpughi ah kä kiak ci, ghing ci gui ah Khanpughi ah kiak ci” ci ne m'thein gui ci. 39 Thukhän saza am shah naw, “Sazapa, shin cu nik ciah ng'thu na m'hlan ba ah kiak ci nei” cik ci gui. 40 Ngami naw län ne ami ng'shi ba vai kä om khätah, cun ami ci ah kiak ci. 41 Bawipa Jesuh naw, ngami-am, “A i kia sei Messiah cu David ah ng'shon ah kiak khai, nami ci ang? 42 David ghangpughang amät naw Salan cacim ung; “Bawipa naw ka Bawipa-am, Na gaa gui cu na kho kaa ah ka gawk sak gui zawp khai. 43 Cun ah kä ah kiak phaa ah chuih Ka k'pat lam ah na ngoh vai” ci ne pyein ci. 44 David naw Messiah-am, Bawipa, ci ne khü ci kia sei, a i chaa ah Messiah cu David ah ng'shon ah kia thei khai ang? ci ne ng'shi gui ci. 45 Bawipa Jesuh naw ngai tuk ciah chang khli ah ng'zak vai ah ang düihpüi gui-am, 46 “Thukhän saza gui cu geing na ne nami hlawi gui vai. Ngami cu suinu sui ne ä-mak ne hteit shüi shüi ci gui. Sumlei hmun ung chang ah chang m'sui gui vai ng'za hlük ci gui. Pum im ung ak hlüng nak pi ung ngo u ne, da law nak ah pawi ung ani nak pi ung ngo hlük ci gui. 47 Hmeinu gui ah khawhchaam phi gut ci gui. Chang naw aktung ah ang ngaih gui vai ah ang sau nu ah taigü ci gui. Ngami ah khan ah Khanpughi ah m'kat nak däm pi khai nei” ci ne m'thein gui ci.
1 Bawipa Jesuh naw mang shüi netah, pum im ah peit nak ung bühmang ci gui naw, ami khawh ami peit cu hmuk ci. 2 Ghawipyam ciah hmeinu tumat naw, kyei tangka hnih hta apeit tu cun phi hmuk ci. 3 Bawipa Jesuh naw, “Kei naw akcang ka pyein cu, shin ah ghawipyam ciah hmeinu naw avan ah däm pi sei pek ci nei. 4 Chang a hei gui cu ami khawh akpawih law ung vah Khanpughi-am pek ci gui. Shin ah heminu läi cu a ghawipyam pang ung phi ani ung om ciah a khawh avan pe pyi ci nei” ci ne pyein ci. Ng'thu Pyein. 5 Ang düihpüi gui am shah naw, Taigü im ami cawh nak ah lung gui a kiom ah mawng la Khanpughi ami peit tah khawhchaam gui abäkhäk ah mawng cu pyein ne ng'thu ci gui. 6 Bawipa Jesuh naw, “Shin ah nami hmuh gui cu avan she ne maih khai nei. Lung k'pei tumat phi a hnün ung kä ng'taih ba shüt sei she ne a maih nak ah a khin gawk lawk khai nei, cik ci. 7 Ngami naw, “Sazapa, a i a khin ung cun gui cu kia lawk khai ang? Acun ah a kiak law gui vai hmat nak vai ah a i gui dang law ma khai ang? ci ne ng'shik ci gui. 8 Bawipa Jesuh naw, “Chang naw kä a ning m'hleei-en gui vai ah geing na ne om vä. Chang akda cu kei ah mäih ah ng'hlawk ne ‘Kei cu Messiah nei’ cik ci om lawk khai nei, acun ah khin cu gawk law pyi ci nei, ci ne ning m'hleei gui ci phi om lawk khai nei. 9 A cun gui ah hnu ah kä nami läk-en vai nei. Ng'tuk-ah ah mawng la ng'küükneet nak ah mawng nami ng'zak ung kä nami kyihkyawk- en vai. Acun gui cu akhtük ung gawk law ma khai, cun ung phi kho ang pyi nak vai ah a khin kä gawk law phak ci nei” cik ci. 10 Cun kawn ah Bawipa Jesuh naw, “Chang pakhui tumat la tumat, kho ahei la ahei ng'tuk nak om khai. 11 A kho päng ung ak nuipai ah shihpi ah thüng nak, ei awk ah maih nak, gawpyam ah ng'peeih nak gawk lawk khai. Kyihkyawk cäicat gui vai khankho ah dang lawk khai. 12 Cun gui kä a gawk law pha ung chang gui naw ning pha gui ne, ning dukdeiu na gui khai gui. Pum im ah m'khoichaa vai ah ning ap gui u ne, thawng ung ning chum gui khai gui. Nangmi cu kei ah hmawk ah ghangpughang ah ma, bawi ah ma ah nami gawk khai. 13 Cun gui cu nangmi naw Thu Ni nami pyein nak vai ah akhin k'ni ah kiak khai. 14 Cun ah kia sei a i ah nami thu tuba vai kä ng'ä-en u ne, nami m'lung ung nami k'üüp vai. 15 A i ah kia sei ci ung nami gaa naw kä a ning m'khüt gui vai ah hmuhmat nak la ng'thu m'gawng thei nak cu ka ning pe gui khai. 16 Nami nupa, phäi nau, mätzah gui naw gaa ah kut ung ning ap gui khai gui. Nangmi ung kaa am shah cu ngawn khai gui. 17 Kei ah hmawk ah chang gui naw ning gen gui khai gui. 18 Cun ung phi nami lu ung lusam ng'ma ät phi kä di düt khai. 19 Akhäng htek ah nami ng'düih vai, cun ung hun phiawn nak nami gah khai. 20 Jerusalem cu gakap gui naw ngäng u sei nami hmuh ung adi law nak vai ng'et lawk ciah nami hmat vai. 21 Cun zah ung Judea kho ung om ci gui khomhtung lam ah dawng u sä, pigaw kyong ah om ci gui, pigaw k'pung ah hteit u sä, pigaw pei ah om ci gui pigaw kyong ah kä hteit-en u sä. 22 Cun cu “Hmakat m'kyuk nak ah hnüüp” ah kiak ci, ciah cacim ung kaa ang dang law nak ah kiak ci. 23 Cun zah ung käu mah ci la ahta züt ciah hnumi gui cu ang htei ah zaica khai gui. Judea kho cu zaica nak ung gawk khai, chang gui ah khan ah hma m'kyuk nak om khai. 24 Chang am shah cu chim awn sik khai gui, am shah cu pha ne, khlei- htein nah ne, a kho päng ung hteh püi khai gui. Chang khui hei gui naw ami uknak kä ang pyi pha ah chuih Jerusalem cu ami kho awn kai nak khai gui. 25 “Hni cha aisi gui ung cäicat vai gui dang lawk khai. Khomdek khan ah chang gui cu tuinu ah ng'hnawk ng'za ne cäicat khai gui. 26 Khomdek khan ah kho ah shet nak a gawk law vai hmat ciah chang gui cu, cäi ng'ä aih khai gui. Kho k'häu ung kumkü aisi gui cu thüng ne zong zawp khai gui. 27 Cun kawn ah küikyang ciah hlüngtai nak la bämang nak awn be ne, ng'mei bawk ung ng'cum ne lawk ciah chang ah Htapa cu nami hmuk khai. 28 Acun gui tün ne agawk law ung, Khanpughi naw aning hun nak gui vai ng'et lawk ci kia sei, täu law ne, ng'düi law ne nami na dan vai” ci ne m'cäi gui ci. 29 Cun kawn ah Bawipa Jesuh naw, m'tumtäng ah am thein gui cu; “Thei ghing la ahei sing ghing gui cä teng vä, 30 Sing gui ami lim law ba ung kho chaa lawk khai ah nami hmat ci. 31 Acun ah mäih ah ka pyein gui cu dang law sei nami hmu ung, ‘Khanpughi ah uknak kho ng'et law ci’ ciah nami hmat vai. 32 “Kei naw akcang ka pyein cu, tuhbäi ghing ciah chang gui kä ami sih phaa zawp ung ka pyein gui cu ng'dang zawp khai nei. 33 Khankho la khomdek ang pyi ung phi, kei ah ng'thu cu kä ng'pyi khai. 34 “Nangmi cu ei awk zeikiai nak düt la khomdek pumsa ah phäh düt ah kä mü thai u ne, geing na ne nami om vai nei. 35 m'khoichaa nak ah hnüüp cu thau ah ng'chawi ah mäih ah nami khan ah akten ah gawk lawk khai nei. Cun ah hnüüp cu khomdek khan chang avan ah khan ah gawk khai nei. 36 Tholet ne nami om vai, gawk lawk khai ah kho ah shet nak cu m'khüt ne, chang ah Htapa ah ma ah ng'düi ne m'khoichaa nak nami awt hning vai ah angtäi sei taigü ne nami om vai nei” ci ne m'cäi gui ci. 37 Bawipa Jesuh cu kho hnüüp zah ung pum im ah m'theithang gui ne, khomü lam ah Olive khomhtung ah kai ci ci. 38 Chang gui cu ang thu ngai tuk khai gui ah kho ngawi ah ng'dawt ne pum im ah law ci ci gui.
1 Phiawn nak pawi ah ming ciah k'caw kä shum ne m'htut deng ne bi ah pawi cu ng'et lawk ci. 2 Taigü ng'vai gui la thukhän saza gui cu, chang gui kyih u netah, Bawipa Jesuh ngawn nak vai ah lam cu adüm ah shui ci gui. 3 Cun kawn ah Satan cu Judas Iskariot ah m'lung kyong ah lut ci. 4 Judas cu Taigü ng'vai gui la Pum im ngäng ciah bawi gui ah hteit sei, a i cha ah ami kut ung Bawipa Jesuh a ap gui vai ah mawng cu ng'ge nak ci gui. 5 Ngami cu zeikiai u netah, Judas-am ngui peit vai ah shai tak ci gui. 6 Judas naw a cun zum netah, chang khli ah kä hmat-en ah ami kut ung Bawipa Jesuh a ap nak gui vai ah a khin cu dät ne om ci. 7 K'caw kä shum ah m'htut deng ne binak ah pawi ung, htome hta ngawn ne taigü vai ah a khin cu gawk lawk ci. 8 Bawipa Jesuh naw, Peter la Johan-am, “Nangmi hteit ne mi ei vai paskha mü ei ana piang niä” ci ne tüi goi ci. 9 “Ngani naw, “a hawi ah kani na pian vai ang? ci ne ng'shi ba ci goi. 10 Bawipa Jesuh naw, “Nangni cu pigaw kyong ah nani gawk law ung tui-um phui ciah chang tumat awn nami ng'hmuk khai. Acun ah hnu ah läk ne aluh nak ba ah im ung nani luh tu vai. 11 Cun kawn ah im mah-am, “Bawipa naw, kang düihpüi gui awn atäng ah pasakha mü ei cu, a hawn ung kami ei khai ang? ci ne kiak ci nei, ciah nami m'thein vai, 12 Im mah naw, a im ah khan ah kyong ang shawngnu ning m'hnuh gui khai, acun ung nami pian vai” ci ne m'cäi goi ci. 13 Ang düihpüi goi cu hteit ni ne, am cäi goi ah mäih ah chang hmu ni netah, pasakha mü ei vai cu piangtham ci goi. 14 Akhin gawk law sei Bawipa Jesuh cu ang düihpüi gui awn atäng ah mü-ei ei vai ah ngok ci gui. 15 Bawipa Jesuh naw, “Kei kä ka sih pha ung pasakha mü-ei cu nangmi awn atäng ah ei vai ah ka ng'za hlük ci. 16 Kei naw ka ning m'thein gui cu, “Khanpughi ah uknak kho ung shin ah mü-ei ei ah mawng, kä ang dang pha ah chuih kei naw kä ka ei ba khai” ci ne pyein ci. 17 Cun kawn ah Bawipa Jesuh naw, sapyit tui khap cu la ne, Khanpughi m'hlungtai netah, “Shin ah khap cu la ne ng'tei ne aw vä, 18 Kei naw ka ning m'thein gui cu, tuhbäi ung tün ne Khanpughi ah uknak kho kä a gawk law pha ah chuih, kei naw shin ah mäih cu kä ka aw ba khai nei” cik ci. 19 Cun kawn ah Bawipa Jesuh naw, m'htut cu la ne Khanpughi m'hlüngtai netah, m'htut cu k'bou ne, ang düihpüi gui-am tei gui netah, ‘Shin ah m'htut cu nangmi ah hmawk ah ka k'bou ah ka pumsa ah kiak ci, 20 kei nami na shüm nak ah la ne ei vä” cik ci. Acun ah mäih ah ei ami ei kawn ah sapyit tui khap cun phi la netah, “Shin ah khap cu Khanpughi ah thukhän thai, aning m'hnüt nak gui vai ah nangmi ah hmawk ah ka huk ah, kasi ah kiak ci, ci ne pyein ci. 21 “Cun ung phi teng vä, gaa ah kut ung kei na ap khai ah chang cu kei awn atäng ah vai tuk ci nei. 22 Chang ah Htapa cu Khanpughi naw akbäi ah mäih ah akcang ah sik khai, cun ung phi ani gaa ah kut ung ap ciah chang ah khan ah shetkat nak om khai nei” cik ci. 23 Ang düihpüi gui naw, ‘Cun ah bik khai cu, mik mi ung kaa a u ang? ’ ci ne ami mät gui ng'shi tuk ci gui. 24 Ang düihpüi gui naw, ami mät ung kaa a u hlüngtai pi ciah ng'cuhcan u khätah, 25 Bawipa Jesuh naw, “Khomdek ghangpughang gui cu chang gui ah khan ah ami hlüngtai nak om ci, uknak ung om ciah chang gui naw phi, kei ng'tüi chang naw na chang m'sui ci, ciah ami mät naw ngai ci gui. 26 Cun ung phi nangmi naw cun ah kä nami ngaih vai. Nangmi ung hlüngtai pi ci cu, ak hmaw pi ah mäih ah om sei, ng'vai pi ci cu changshäm ah mäih ah a om vai. 27 Ngo ne ei khai ah chang la tumbei khai ah chang ung kaa, a u ang ahlüngtai pi kaw? Ngo ne ei khai ah chang cu hlüngtai pi ciah kä kia ne ang? Cun ung phi kei cu nangmi ung tumbei khai ah changshäm ah mäih ka kiak ci. 28 Nangmi cu kei awn atäng ah tüihtok nak nami bui awt pyi ciah kiak ci. 29 Kapa Khanpughi naw uknak vai ana peit ah mäih ah nangmi-am ka ning pe gui ci. 30 Nangmi cu kei ah uknak kho ung kei awn atäng ah nami ei aw tuk khai. Cun kawn ah mang ah kiang ung ngo u netah, Israel pakhui gha-lei-goi cu nami uk khai nei” cik ci. Pyein Ci. 31 Bawipa Jesuh naw, “Simon, Simon, htangmguh m'hääi ne, angshi angtak m'chaa ah mäih ah ning m'khoimchaa gui khai ah Satan naw akhin gah pyi ci nei. 32 Cun ah kia sei na zum nak ahtek vai ah ka ning taigü pek ci nei. Nang cu kei ah nang hlah law ba kawn ah, na phäi nau gui cu thagui na peit gui vai nei” cik ci. 33 Peter naw, “Bawipa, kei cu nang awn, thawng na kium ung phi atäng ah ka kium vai, m'htei na hteh ung atäng ah ka hteh vai ah ka zum ci nei” cik ci. 34 Bawipa Jesuh naw, “Peter aw, kei naw akcang ka pyein cu hngeng mü, ai kä a khon phaa ung, ‘ani kä ka hmat ci nei’ ci ne thum vei na na mak khai nei” ci ne kiak nak ci. 35 Cun kawn ah Bawipa Jesuh naw, “ngui ng'ip hnih la phahnak cu kä nami hteh püi vai pyein ne ka ning tüi gui ci. Cun ung nangmi ung kä küm ci, a i om ne ang? ci ne ang düihpüi gui cu ng'shi gui ci. Ang düihpüi gui naw, “A i kä om ci nei” cik ci gui. 36 Bawipa Jesuh naw, “Tuhbäi läi ngui ng'ip la ng'za om ciah chang naw a law püi vai nei. Chim kä om ci naw, akhtu zoi ne chim ak khleih vai. 37 Kei naw akcang ka pyein cu, ani phi ngawn phaa nak ng'küh tuk ci nei” ciah cacim cu kei ung küm khai. A i ah kia sei ci ung kei ah mawng ami guk phung cu küm ci nei” ci ne kiak na gui ci. 38 Ang düihpüi gui naw, “Bawipa, teng ä, shin ung chim lu goi om ci nei” cik ci gui. Bawipa Jesuh naw, “Bäi khai nei” cik ci. 39 Bawipa Jesuh cu ahteh man ah Olive m'htung ah hang kai ba sei ang düihpüi gui naw ahnu ah läk tuk ci gui. 40 Khomhtung ah gawk u netah Bawipa Jesuh naw, “Tüihtok nak ung kä nami gawk vai ah taigü vä” cik ci. 41 Cun kawn ah ang düihpüi gui awn li-kiak ät vai ng'lak nak khai ah hteit netah, m'khuukdong ne, 42 Aw Kapa, nang zak hlü a om ung shin ah zaica nak ah khap cu kei ung nang shawng sak ä, cun ung phi kei ah ng'zak hlü ah kä kia ne, na mät ah ng'zak hlü ah kia sä” ci ne taigü ci. 43 Khankho ah kaa khanchang kium law ne, ani-am k'thagui be sak ci. 44 Bawipa Jesuh cu ang htei ah zaica ne aktung ah taigü ci; am hutui gui cu si ah mäih ah lut law ne m'dek ung kia lawk ci gui. 45 Bawipa Jesuh cu ak taigü nak ung kaa tho ne law ba netah, ang düihpüi gui ip u sei hmu gui ci. 46 Bawipa Jesuh naw, “A i ah kia sei nami ih ang? Tho law ba ne, tüihtok nak ung kä nami gawk vai ah taigü vä” ci na gui ci. 47 Cun ah Bawipa Jesuh naw ng'thu a pyein zah ung ang düihpüi gha- lei-goi ung kaa Judas cu chang gui khah püi ne lawk ci, Ani cu Bawipa Jesuh ah pei ah ng'et law netah, Bawipa Jesuh cu ng'ui ci. 48 Bawipa Jesuh naw, “Judas, nang naw chang ah Htapa cu ng'ui netah, gaa ah kut ung na ap khai ma? ci ne ng'shik ci. 49 Ang düihpüi gui naw a i ah kia lawk khai, avan hmat u netah “Bawipa, kami chim awn kami väih vai ang? ci ne ng'shik ci gui. 50 Ang düihpüi tumat naw, taigü ng'vai ah changshäm tumat cu chim awn tu sei, akpat lam akhnga hlang ci. 51 Bawipa Jesuh naw, “A cän bäng ah” ci netah, a cun ah hnga cu akut awn tawk ne m'htei tu sei khan ba ci. 52 Cun kawn ah Bawipa Jesuh naw, ani phak khai ah lawk ci gui ah, taigü ng'vai gui ni, pum im ngäng ciah ng'vai gui ni, Jew chang ng'vai gui ni ah ma ah, “Nangmi naw, kei cu m'guk-ei pha ah mäih ah nami na phak khai ah, chim ni, htungtawn ni awn nami lawk ci ma? 53 Kei cu nangmi awn a täng ah ak hnüüp tä sei pum im ah om lang ngä sei, a i ah kia sei kä nami na pha ang? Cun ung phi nangmi ah akhin cu kho hmüp khui ah kiak ci, ci ne kiak na gui ci. 54 Cun ah chang gui naw Bawipa Jesuh cu pha u netah, taigü tung ah im ah hteh püi ci gui. Peter cu ng'shawng pi pi ne läk law gui ci. 55 Chang am shah gui cu im chaam kyong ah mei cik ne awm u sei, Peter cu ami ng'lung ah hteit ne mei awm tuk ci. 56 Peter a ngoh law tu cu hnumi hta naw hmu ne, m'htei ne teng netah, “Shin ah chang cu Jesuh ah apaw nei” ci ne pyein ci. 57 Cun ung phi Peter naw, “Hnumi hta aw, ani cu kei naw kä ka hmat ci nei” cik ci. 58 Cun shäng shäng ba sei, chang tumat naw Peter cu hmu netah, “Nang phi ngami ung kaa ah na kiak ci” cik ci. Cung ung phi Peter naw, chang aw, kei cu ngami ung kaa ah kä kiak ci nei” cik ci. 59 Cun kawn ah shei cakzat vai lüng ba khätah, chang tumat naw, “Shin ah chang cu Kalile chang ah kiak ci, kia sei, Jesuh ah apaw ah kiak ci nei” ci ne ang kheing ah pyein ci. 60 Cun ung phi Peter naw “Chang aw, nangah na pyein ah mawng cu, kei naw kä ka hmat ci nei” cik ci. Peter naw, cun a ci vai-am, ai khong lawk ci. 61 Bawipa naw a mang law ne Peter cu m'htei ne teng ci. Cun hmu netah, Peter naw, “Hngeng mü ai kä a khon phaa ung nang naw, ‘Ani kä ka hmat ci nei’ ci ne thum vei na na mak khai” ci ne Bawipa ah pyein cu shüm ba ci. 62 Cun ah kia sei, akpung ah lut law ne ang htei ah thüi ne kyap ci. 63 Bawipa Jesuh cu ngäng ne m'täp ciah chang gui naw päipih u ne, tuthat ci gui. 64 A hmai shung u netah, nang a u naw ang a ning tukthah, na pyein vai nei” ci ne kiak nak ci gui 65 A hei ng'thushe gui awn phi Bawipa Cu shedam nak ci gui. 66 Kho thai law khätah Jew chang ng'vai gui ah kiak ciah taigüpa gui la thukhän saza gui cu ng'cut u netah Bawipa Jesuh cu Kongci zung ah hteh püi ci gui. 67 Ngami naw, “Nang cu Messiah ang? Nam thein gui ä” ci ne ng'shik ci gui. 68 Bawipa Jesuh naw, “Ka ning m'thein gui ung phi nangmi naw kä nami zum khai. Ka ning shi gui ung phi nangmi naw kä nami pyein khai. 69 Tuhbäi ung tün ne, chang ah Htapa cu hlüngtai pi k'bäih ciah Khanpughi ah akpat lam ah ngo pyi khai nei” ci ne m'thein gui ci 70 Ngami naw, “Cun ah a kiak ung nang cu, Khanpughi ah Htapa ah na kiak ci ma? ci ne ng'shi ba ci gui. Bawipa Jesuh naw, “Kei cu Khanpughi ah Htapa ah ka kiak ciah nangmi naw nami pyein ci” ci ne kiakna gui ci. 71 Ngami naw, “Saksi a hei kä hlü ba khai nei, mi mät naw ang thu mi ng'za pyi ci nei” ci ne kiak ci gui.
1 Phak ciah chang gui ami van ng'düi law u ne, Bawipa Jesuh cu Pilat bawi ah hteh püi ci gui. 2 Ngami naw, “Shin ah chang kami pha ah mawng cu Khanpughi-am k'phlam kä pe ba vä, ci ne chang gui m'cäi gui ne, amät naw amät phi ‘Kei Messiah nei, Kei ghangpughang nei’ ci ne kia sei, kami hmuk ci nei” ci ne kiak ci gui. 3 Pilat bawi naw, Bawipa Jesuh-am nang cu Jew Ghangpughang ah na kiak ci ma? ci ne ng'shik ci. Bawipa Jesuh naw, “Na pyein ah mäih ah kiak ci nei” cik ci. 4 Cun kawn ah Pilat bawi naw, taigüpa gui la chang khli gui-am, “Shin ah chang hniim nak vai ah amawng kä ka hmuk ci nei” ci ne kiak na gui ci. 5 Cun ung phi ngami naw, “shin ah chang cu Kalile kho ung tün ne Judea kho, shin ung gawk lawk khai ah chang gui m'hleei gui ne thüngpyong sak gui ci nei” ci ne m'lau law pi ne pyein ci gui. 6 Pilat naw cun ami ci ng'za netah, “Ani cu Kalile chang maa? ci ne ng'shi gui ci. 7 Herod mang ah uknak Kalile ah kaa ah hmat netah, Bawipa Jesuh cu Herod ah hteh püi sak gui ci. Cu zah ung Herod cu Jerusalem ah om zah ci. 8 Herod cu Bawipa Jesuh hmu law netah, ang htei ah zei ci. Ani cu Bawipa Jesuh ah mawng ng'za pyi ci kia ne a hmuh nak hlü phi shou lawk ci. Ani cu cäi aih vai gui, Bawipa Jesuh naw abi ung teng tuk khai ah ngaih u ci. 9 Herod naw Bawipa Jesuh cu akda ah ng'shi sei phi kä m'hlan tuba ci. 10 Tagüpa gui la thukhän saza gui naw, Bawipa Jesuh cu akgai ah k'uum ne huut taap ci gui. 11 Herod la agaakap gui naw phi, Bawipa Jesuh cu, päipih ne shedam nak ci gui. Cun kawn ah aktung ah m'sui m'sak netah Pilat bawi ah tüi ba ci. 12 Herod la Pilat cu a zan ani ng'gen tu man pang ung phi, cun ah hnüüp ung ng'khawt ba ci goi. 13 Pilat naw taigüpa gui Jew chang ng'vai gui la chang ahei gui khü gui netah; 14 Shin ah chang cu, chang gui hleei hlak ne thüngphyong sak gui ci, ci ne nami law püi ci, cun ung phi na mi ma ah kami ng'zak vai ah ng'shi ngä sei, ani hniim nak vai, a i kä ng'dang ci. 15 Herod mang naw phi a i kä hmu ne, kei ah tüi law ba ci. Shin ah chang ung sihnak vai kat nak a i kä om ci. 16 Cun ah kia sei ani cu, htung awn that netah, ka tüi ba khai nei” cik ci. 17 Pilat cu Pasakha pawi päng ung chang gui ah hmawk ah thawng kium ci tumat phiawn sak ci man ci. 18 Chang khli ami van naw, “Shin ah chang cu ngawn ä, keimi ah hmawk ah Barabbas cu phiawn sak ä, ci ne atäng ah m'lau ci gui. 19 (Barabbas cu pigaw kyong ah a thüngphyong sak gui ah phäh la chang a ngawn ah phäh ah thawng kium ci kiak ci). 20 Pilat naw Bawipa Jesuh cu phiawn sak hlü netah, chang gui ah ma ah pyein ba mä ci. 21 Cun ung phi chang gui naw, “Shin ah chang cu kutlamtung ung tai ne ngawn vä, Kutlamtung ung tai ne ngawn vä” ci ne m'lau ci gui. 22 Pilat naw, “Ani naw a i kat nak ang a bi? Ani ngawn nak vai ah kat nak tumat phi kä ka hmuk ci. Cun ah kia sei ani cu htung awn that ne m'cäi netah ka tüi ba khai” ci ne ak thum vei nak ah pyein ci. 23 Cun ung phi chang gui naw, Bawipa Jesuh cu ktumlamtung ung tai ne ngawn vai ah m'lau laih laih u netah, akhnu ah näng ci gui. 24 Pilat naw ngami ah pyein ah mäih ah m'khoichaa nak cu bik ci. 25 Chang akthüng phyong sak nak la chang ah ngawn nak awn thawng kium ci cu ami pyein ah mäi ah phiawn sak ci. Bawipa Jesuh läi cu ami m'hni ah ami bi vai ah ap gui ci. 26 Gakap gui naw Bawipa Jesuh ami hteh law püi zah ung Sairin pigaw ah kaa Simon ming nak ciah chang cu ana law sei, hmu u netah, pha u ne, ktulamtung cu kawh sak u ne, Bawipa Jesuh ah hnu ah läk sak ci gui. 27 Chang gui akda naw a hnu ah läk lawk ci gui. Hnumi gui am shah gui cu ami ng'kyang k'beeih ne kyap ne läk law tuk ci gui. 28 Bawipa Jesuh naw, cun ah hnumi gui lam ah ng'hlat netah, Jerusalem ah hnumi gui aw, kei ah hmawk ah kä kyap u ne, nami mät la nami hta gui ah hmawk ah nami kyah vai. 29 Ahta kä om ci, kä hta ci la tuui kä tu man ciah hnumi cu zeikiai nak om ci, ci nak ah akhin gawk lawk khai nei. 30 Cun ah akhin ung chang gui naw, khomhtung gui-am, ‘keimi ah khan ah piawn ne kia law vä’ ci u ne; khogui gui-am, ‘Keimi ng'min ne na lin law gui ä’ ci ne kiak khai gui. 31 Chiing ne lim ciah a ghing hngaw shin hlawk ah ka zaica ung a ghing chawng ci a i hlawk ah zaica khai ang” ci ne kiak na gui ci. 32 Katnak bik ciah changshe hnih cun phi Bawipa Jesuh awn atäng ah ami ngawn gui vai ah hteh püi ci gui. 33 “Lu koihmun” ming nak ciah k'päng ah gawk u netah, Bawipa Jesuh cu kutlamtung ung tai ne ngawn ci gui. Changshe hnih cun phi tumat akpat lam, tumat ak-eng lam ah tai ne ngawn goi ci gui. 34 Bawipa Jesuh naw, “Ngami cu a i ami bi ah ami mät naw kä hmat ci gui nei, m'gein gui ä” ci ne pyein ci. Chang gui naw Bawipa Jesuh ah a suisak gui cu, m'shüih tawk ne ng'pai ci gui. 35 Chang gui naw ng'düi ne ami dan zah ung Jew chang ng'vai gui naw, “Shin ah chang cu chang hei gui hun gui ciah, Khanpughi naw am düih ah Messiah ah a kiak ung amät naw, amät hun law shüm sä” ci ne päipih ci gui. 36 Gakap gui cun phi zu aktai tu u netah, 37 “Nang cu Jew Ghangpughang ah na kiak ung, na mät naw na mät hun law shüm ä” ci ne päipih ci gui. 38 Bawipa Jesuh ah alu khan ah phi, “Shin cu Jew chang gui ah Ghangpughang nei” ci ne ca gu ne tai ci gui. 39 Kutlamtung ung ami tai goi ah changshe hnih ung kaa tumat naw, “Nang cu Messiah ah kä na kia ne ma? Na mät phi hun ne, keini phi na hun tu goi ä hawza!” ci ne päipih ne pyein ci. 40 Ahei changshe tumat naw, “Nang Khanpughi cu kä na kyih ci ma? Nikni cu ani mäih ah m'kat nak ni gah ung phi; 41 ni mät ah kat nak awn ni mät ni hteit ciah kiak ci, cun ung phi a ni cu a i phi akat nak kä om ci nei” ci ne kiak nak ci. 42 Cun kawn ah Bawipa Jesuh-am, “Ghangpughang ah kia ne na uk law hnüüp ung kei phi na shüm tu ba bäi” ci ne pyein ci. 43 Bawipa Jesuh naw, “Kei naw thukhän ne ka pyein cu, atuh ngaw nang cu kei awn atäng ah paradise kho ah na om khai nei” ci ne kiak nak ci. 44 Kho hnüüp ng'lung ung tün ne kho k'awinu a khin ung khüt khai ah khomdek khan avan ung khohni kä dei ba ne shitne hmüp zawp ci. 45 Taigü im kyong ah ami zai ah zih phi hnih ah teek ne ng'chak ci. 46 Bawipa Jesuh cu, “Aw Kapa, Na kut ung Ka Mumcha ka ning ap ci nei” ci ne m'lau netah kät lawk ci. 47 Acun gui cu gakap bawi naw hmu netah, “Shin ah chang cu akcang ah, changni chang khän ah kiak ci, ci ne Khanpughi m'hlüngtai ci. 48 Teng tuk khai ah lawk ciah chang gui naw, acun gui cu hmu u netah, ang htei ah azä u ne hteit ba ci gui. 49 Kalile ah kaa law tuk ci gui ah Bawipa läk lawk ci gui ah hnumi gui la Bawipa hmat ciah chang gui cu ang shawng ah ng'düi u netah, Bawipa Jesuh cu teng ci gui. 50 Judea kho Arimathea pigaw ung kaa Josep ming nak ciah chang ng'vai tumat om ci. 51 Ani cu changni changdüng ah kia ne Khanpughi ah uknak kho a gawk law vai cu ging ciah chang ah kiak ci. Ani cu kongci ng'vai ah a kiak ung phi, ang vai gui ah k'bäi nak la bi nak cu kä zum tuk ciah kiak ci. 52 Ani cu Pilat ah hteit ne Bawipa Jesuh ah a gook cu htüm khai ah va pyein ci. 53 Cun kawn ah kutlamtung ung kaa Bawipa Jesuh ah a gook cu la ba ne, zih bawk awn hlawp netah, a u ah kä ng'phuh nak man lung ami shawk ah khui akthai ung k'phuh ne m'cim ci. 54 Cun ah hnüüp cu akchuk hnüüp ah kia ne, a ngawi ung kyin nak hnüüp ah kia lawk khai kiak ci. 55 Kalile ah kaa Bawipa läk lawk ciah hnumi gui cun phi hteit ne m'cim tu u ne, 56 ng'cim hmun la a gook m'shän ne ami k'phuh cu ang hteing ah hmu tuk ci gui. Kyin nak hnüüp ung thukhän läk u ne, a i kä bi ah adüm ah om ci gui.
1 Ak hnüüp ät hnüüp kho ngawi hta ah, kho kä thai thai sei, hnumi gui cu ami pian m'tham ah tuing'ui gui hteh püi ne, ng'cim hmun ah hteit ci gui. 2 Ng'phuh hmun khui m'kawt ami khai nak ah lungnu cu m'hnawn ah kia sei hmu u netah, khui kyong ah lut ci gui. 3 Cun ung phi Bawipa Jesuh ah a gook cu kä hmuk ci gui. 4 Cun ah kia sei ngaih tüh khit u ne ami kiak zah ung, pyü ne khang sei suisak ciah chang hnih cu ami ma ah ang ghit ah ng'dang lawk ci goi. 5 Cun ah hnumi gui cu kyi ne kawp u khätah, cun ah chang goi naw? “A i ah kia sei ghing ne om ci cu aksi ah om nak ah nami shui ang? 6 Ani shin ung kä om ba ci, ghing ne tho ba pyi ci nei. Kalile kho ah a om zah ung; 7 “Chang ah Htapa cu kat nak bik ciah chang gui ah kut ung ap khai gui. Kutlamtung ung tai ne ngawn khai gui, cun kawn ah ak hnüüp thum hnüüp ghing ne tho ba khai, ci ne a pyein cu ngai ba shüm vä, ci ne kiak na gui ci. 8 Cun kawn ah hnumi gui cu Bawipa Jesuh ah ng'thu gui man shüm law ba u netah; 9 Ng'cim hmun ah kaa im ah dawng ba u ne, ang düihpüi gha-lei-ät la, ang khahpüi gui ami van-am, amawng avan cu m'thein tu gui ci gui. 10 Ang düihpüi gui-am cun ah m'thein law ba ciah hnumi gui cu, Mari Makdale, Joanna la James ah nu Mari la ahei hnumi gui ah kiak ci. 11 Ang düihpüi gui naw hnumi gui ah pyein cu, kä zum veih ci gui. 12 Cun ung phi Peter cu dawng ne ng'cim hmun ah hteit netah, ng'phuh hmun cu m'kein ne teng ci. Hlawp nak ah zih akawn ah a i phi kä om khätah, ang htei ah cacät ne im ah dawng law ba ci. 13 A cu hnüüp ung ang düihpüi hnih goi cu Emmaus pigaw ah hteit ci goi. Cun ah pigaw cu Jerusalem ung kaa naw mü chih shou ci. 14 Ngani cu a cun ah amawng gui pyein ne ng'htau ne lawk ci goi. 15 Cun ah ng'htau ne ani hteh zah ung Bawipa Jesuh amät ani pei ah gawk law ne, ngani awn atäng ah ng'gui law tu ci. 16 Ngani naw, ani cu hmu ni ne phi Bawipa Jesuh bä ah kä hmat ci goi. 17 Bawipa Jesuh naw, “Nangni lam na ni hteh ah k'phei ah a i ang nani pyein” ci ne ng'shi goi ci. Cun kawn ah ngami cu, ani hmai m'kiuum ne ng'düi ni netah, 18 ngani ung kaa Kleopas naw, “Jerusalem ah gawk lawk ciah khin gui ung kaa, nang bäng vah shin ah kho hnüüp gui ah kyong ung, Jerusalem ah hmu ng'zak ah amawng gui cu kä na hmat tu phak ciah kiak ci, ci ne kiak nak ci 19 Bawipa Jesuh naw, “A i ah amawng gui ang? ci ne ng'shi goi ci. Ngani naw, “Nazaret ah kaa Jesuh ah amawng gui nei. Ani cu Khanpughi la chang ah ma ah ang thu ng'htau a bilawh ung hlüngtai thamah nak awn be ciah profet ah kiak ci nei. 20 Keimi ah taigü ng'vai gui la uk ci gui naw ami ngawn vai ah ap u sei, ani cu kutlamtung ung tai ne ami ngawn nei. 21 Ani cu Israel chang gui k'phiawn gui khai ciah ami ngaih u ah kiak ci. Cun gui ah akiak law ah amawng gui cu, tuh ngaw awn hnüüp thum law lawk ci nei. 22 Keimi ah kami paw gui hnumi gui cu kho ngawihta ah ng'cim hmun ah hteit ci gui. 23 Ngami naw a gook kä hmu ba ci gui. Khankho chang gui bäng kami hmuk ci, ci ne pyein law ba ci gui. Cun ah khankho chang gui naw, Bawipa Jesuh cu ghing ba ne om ci nei, cik ci gui, ci ne pyein ci gui. Cun ah kia sei kami ngai khit ci. 24 Keimi ung kaa am shah gui cun phi ng'cim hmun ah hteit tu u ne, hnumi gui ah hmuh ah mäih bä ah hmu tuk ci gui. Bawipa Jesuh läi kä hmuh nei, cik ci gui. 25 Cun kawn ah Bawipa Jesuh naw, “Profet gui ah pyein man gui zum vai ah, shokshü aih ciah chang k'ang gui aw, 26 Messiah cu bämang hlüngtai nak kä a gah pha ung, ashin ah mäih ah zaica nak cu abui awt vai ah hlü ciah kä kia ne ma? ci ne ng'shi goi ci. 27 Cun kawn ah Bawipa Jesuh naw, Messiah ung tün ne profet gui naw, ngami ah mawng ami guk ah cacim gui cu tän ne pyein ne m'thein goi ci. 28 Ami hteh nak vai ah pigaw k'et law u netah, Bawipa cu ng'täi ne hteit khai pawng ci. 29 Cun ung phi ngani naw, “Tuhbäi kho mü lawk khai kiak ci, keimi awn atäng ah mi ip tu kaw, ci ne khü tuk ci goi. Bawipa Jesuh cu ngani awn atäng ah ip tuk khai ah läk tu goi ci. 30 Ngani awn atäng ah va kai ne ngo tu netah, m'htut cu la ne taigü ci. Cun kawn ah m'htut cu k'bou ne pe tu goi ci. 31 Cun kawn ah ngani cu ani mik m'dei law sei, Bawipa Jesuh cu hmat lawk ci goi. Cun ung phi Bawipa cu ani mik ah hmuh ge ah maih ba ci. 32 Ngani naw lam ah ana ng'htau püi goi zah ung phi bäi, cacim ana m'thein goi zah ung bäi, m'lung kyong ah mei däi ciah mäih ah kiak ci nei, ci ne ani mät ng'htau ci goi. 33 Ngani cu acun vai-am ng'düi law ba ne Jerusalem ah hteit ba ci goi. Acu ah ang düihpüi gha-lei-ät la ang khahpüi gui cu ng'bum ne ana om u sei hmuk ci gui. 34 Ng'bum ne ana om ciah chang gui naw, “Bawipa cu akcang ah tho ba pyi ci nei, Simon Peter ah ma ah ng'dang ba ci nei” ci ne kiak ci gui. 35 Cun kawn ah ngami naw phi, lam ah ami ng'gui ah mawng, m'htut akbou law zah ung Bawipa ah ami hmat law ah mang gui cu, m'thein tu gui ci goi. 36 Cun ah amawng gui cu ang düihpüi goi naw ami m'thein tu gui zah ung, Bawipa Jesuh cu ami lung ah dang law netah, “Nangmi ung Ding gei nak om sä” ci ne pyein ci. 37 Ngami cu mumchaa naw m'kyih gui ciah ngai ne kyikyawk ci gui. 38 Bawipa Jesuh naw, “A i ah kia sei nami kyihkyawk ang? A i ah kia sei m'lung kä üp, ngaih kä gep sei nami kiak ang? Kei ah ka kut la ka kho gui cu na teng vä. 39 Tuhbäi nami hmuh cu kei ka mät ah kiak ci nei. Kei cu na tawn shüm vä, nami hmuh ah mäih ah kei ung ka sa la ka guh gui om ci nei. 40 Cun kawn ah a kut la a kho gui cu ang düihpüi gui-am m'hnuh gui ci. 41 Cun ung phi ngami cu cäi aih u netah, kä zum hlawt ne ami kiak zah ung, “Nangmi ung ei vai om ne ang? ci ne ng'shi gui ci. 42 Ngami naw ngai ng'shai am cawt cu pek ci gui. 43 Bawipa naw cun cu la netah ami ma ah ei tuk ci. 44 Cun kawn ah Bawipa Jesuh naw, “Moses ah thukhän, profet gui ah cacim la Salan cacim ung, kei ah mawng ami guk gui phung cu, akcang ah küm khai nei, ci ne nangmi awn atäng ah ka om zah ung ka ning m'thein gui pyi ci. Ka pyein ah mäih ah tuhbäi küm law pyi ci nei” ci ne m'thein gui ci. 45 Cun kawn ah ang düihpüi gui naw cacim ami hmat vai ah ami m'lung cu hmawn pe gui netah, 46 Bawipa Jesuh naw, “Cacim ung, Messiah cu sihnak awt khai, cun kawn ah ak hnüüp thum hnüüp sihnak ung kaa tho ba khai. 47 Ani ah ang ming awn kat phiawn nak la ng'zu vat ba nak ah mawng cu Jerusalem ung tün ne, akho päng ung, chang pakhui avan-am m'thein gui vai nei. 48 Nangmi cu a cun ah mawng gui nami mik awn nami hmuk ciah saksi ah nami kiak ci. 49 Kapa ah shaitaak ah mäih ah nami khan ah ka gawk law sak khai nei. Cun ung phi nangmi cu, khankho ah kaa hlüngtai nak kä nami gah phaa ah chuih Jerusalem ah om ne nami gin vai nei” ci ne m'cäi gui ci. 50 Bawipa Jesuh naw ang düihpüi gui cu Bethani pigaw pei ah khüt ne hteh püi gui netah, akut k'phiat ne hrilham pe gui ci. 51 Cun ah hrilham a peit gui zah ung, Bawipa Jesuh cu ang düihpüi gui ah ma ung kaa pawng ne, khankho ah kai ba ci. 52 Ang düihpüi gui cu ang htei ah zeikiai ne Bawipa Jesuh ah taigü u netah, Jerusalem ah hteit ba u ne; 53 Taigü im ung ang täi sei Khanpughi ah ming m'hlüngtai ne om ci gui.
1 Khomdek kä a ng'tüi pha ung Thu cu om ci. Thu cu Khanpughi awn atäng ah om ci. Thu cu Khanpughi ah phi kia ci. 2 Akhtük bäih ung Thu cu Khanpguhi awn atäng ah om ci. 3 Khanpughi naw Thu awn ang tüi avan tüisho ci. 4 Ani ah kä tüisho a i phi kä om ci. Thu ung ghinnak om ci. ghinnak cu chang gui ah akdei ah kia ci. 5 Akdei cu akhmüp ung khang sei, akhmüp naw kä dou hlük ci. 6 Johan ming nak ci cu Khanpughi naw ng'shä ah tüi lawk ci. 7 Chang gui naw akdei ami zum hmat tu vai ah, akdei ah mawng pyein khai lawk ci. 8 Ani cu akdei ah kä kia ci. Akdei ah mawng pyein khai ah lawk ci. 9 Akcang ah akdei cu khomdek khan ah gawk law ne chang van ah khan ah khang ci. 10 Thu cu khomdek khan ah om pyi ci. Khanpughi naw ani awn khomdek phi tüisho pyi ci. 11 Cun ung phi khomdek naw ani kä zum hmat ci. Ani cu amät ah kho ng'lei ung law na sei phi ak chang gui naw kä dou ci gui. 12 Ani dou ne zum ciah chang gui-am Khanpughi ah hta ah kiak nak pe gui ci. 13 Cun ah hta gui cu amät ng'tüi lawk ci la chang pa nah ne ng'tüi lawk ci gui ah kä kia ci. Khanpughi ung ng'tüi lawk ci gui ah kiak ci. 14 Thu cu chang ah zung tüi law pyi ci. M'geinsei nak la düngnak awn be ne mik mi ung om pyi ci. Abämang nak phi mi hmu pyi ci. Cun ah bämang nak cu Khanpughi ah Htapa ah a kiak nak awn agah ah kiak ci. 15 Johan naw ani ah mawng ng'shä ne a pyein cu, “Kei naw ka pyein man ah chang cu ani nei, ani cu kei ah hnu ah lawk ci, cun ung phi kei ah hlüngtai pi ci, a i ah kia sei ci ung ani cu kei kä ka ng'tüi pha ung ng'tüi pyi ci. 16 Ani cu m'geinsei nak awn kümbe ne, chang van tumat täi-am m'shumhyuk nak na pe gui ci. 17 Khanpughi naw Thukhän cu Mose ung na pe gui ci, cun ung phi geinsei nak la düng nak cu Jesuh Chrit ung na pe gui ci. 18 Khanpughi cu a u naw kä hmu man ci, cun ung phi Khanpughi awn täng ne ani ah coi ung om ciah Ahtapa naw Khanpughi cu m'dang pyi ci. 19 Jerusalem kho ah Judah ng'vai gui naw, taigü gui la levit gui cu Johan ah tüi law u netah, “Nang cu a u ang? ciah ng'shi sak gui ci gui. 20 Johan naw, “Kei cu Messiah ah kä ka kiak ci nei” ci ne akdei angdang ah m'thein gui ci. 21 Ngami naw, “Cun ung nang a u ang? Nang Eliah ma? ci ne ng'shi ba ci gui. Johan naw, “Kei cu Eliah ah kä ka kia ci nei” ci ba ci. Cun ung nang profet ma ci ne ng'shi ba mä u sei phi, “ka nei” ci ba ci. 22 Ngami naw cun ung nang a u ah na kiak cu nam thein gui ä, nang shi sak gui ci-am kami m'thein ba gui vai” cik ci gui. 23 Johan naw, “Kei cu profet Isaiah ah pyein ah mäih ah, Bawipa ah lam ng'düng sak vä ci ne, bungpuk ah ng'khü ciah chang ah ka kiak ci” cik ci. 24 Pharise gui ah tüih law chang gui naw, “Nang cu Messiah ah phi kä na kiak ung, 25 Elijah ah phi kä na kiak ung, profet ah phi kä na kiak ung, a i vai tuihnim nak na peit ang? cik ci gui. 26 Johan naw, “Kei naw tuihnim nak ka ning pe gui ci, cun ung phi nami ng'lung ah kä nami hmat tumat om ci, ani cu kei ah hnu ah lawk ci, 27 Cun ung phi kei cu ani ah phahnat gui k'phian khai ah phi kä ka khin ci” cik ci. 28 Shin ah bi nak gui avan cu Johan naw tuihnim nak apeit nak Jordan tuinu hei gaa Bethani kho ung kaa ah kiak ci. 29 A ngawi ung Bawipa Jesuh a law Johan naw hmu netah, “Teng vä! ani cu, khomdek khan ah hmakat nak hteh püi ciah Khanpughi ah Htome hta nei”. 30 Kei ah hnu ah lawk ci cu, kei kä kang tüi pha ung ng'tüi ne kei ah hlüngtai pi ci nei, ci ne ka pyein man cu ani ah kiak ci nei. 31 Azan ani kä hmat man ci, cun ung phi Israel chang gui naw, ami hmat vai ah tuihnim nak ka peit nei” cik ci. 32 Cun kawn ah Johan naw, “Müüm bawk ah mäih lawk ciah Mumcha Theing cu, khankho ah kaa kyum law ne, alu khan ah ngo law sei ka hmuk ci. 33 Azan ani kä hmat man ci, cun ung phi tuihnim nak ka pek khai ah na tüi lawk ciah Khanpughi naw, Khankho ah kaa Mumcha Theing kyum law ne, alu khan ah ngo law sei, na hmuh ah chang cu Mumcha Theing awn hnim nak pek khai ah chang nei, ci ne ana m'thein pyi ah kia ci. 34 Cun ah chang cu kei naw ka hmu pyi ci kia sei, “Ani cu Khanpughi ah Htapa ah kiak ci nei, ci ne ka ning m'thein gui nei” cik ci. 35 A ngawi ung Johan la ang khahpüi goi ami ng'düih zah ung, Bawipa Jesuh a law hmu u netah, Johan naw, 36 “Teng tu vä, Khanpughi ah Htome hta cu ani nei” cik ci. 37 Cun a ci ng'za u netah, ang khahpüi goi cu, Bawipa Jesuh ah ahnu ah läk tuk ci goi. 38 Bawipa Jesuh naw ani läk law hmu goi netah, “a i na ni shui ci- ang? ci ne ng'shi goi ci. Ngani naw, “Rabbi, a hawi na om ci ang? ci ne ng'shik ci goi. 39 Bawipa Jesuh naw, “Law ne teng law niä, ci sei, ahnu ah hteit tu ne, a om nak ah gawk tu ni netah, mü ne om tuk ci goi. 40 Bawipa Jesuh ah hnu läk ci goi ung kaa, tumat cu, Antaru, Simon Peter ah a phäi ah kiak ci. 41 Antaru naw anau Simon hmu netah, “Messiah ni hmu pyi ci nei” cik ci. (Messiah cu Chrit ah kiak ci). 42 Cun kawn ah Simon cu Bawipa Jesuh ah om nak ah hteh püi ci. Bawipa Jesuh naw, Simon cu hmu law netah, “Nang cu Johan ah hta Simon ah na kiak ci, Cun ung phi tuhbäi ung tün ne, Cephasa (cun cu Peter, ci la lungnu ciah kiak ci) na ming nak khai” cik ci. 43 Angawi ung Bawipa Jesuh cu Kalile kho ah a hteh nak ba ah, Philip cu hmu netah, “Na läk ä” cik ci. 44 (Philip cu Antaru la Peter ah om nak Bethsaida kho ah kaa ah kiak ci). 45 Philip naw Nahtanelah hmu netah, “Mose naw thukhän ung a guk la, Profet gui naw ami guk ah mäih ah, Nazareth kho ah kaa Josep ah hta Jesuh cu, ni hmu pyi ci nei” cik ci. 46 Nahtanelah naw, “Nazaret ung kaa akni ng'tüisho hning khai ma? ci khätah, Philip naw, “Law ne teng lawä” cik ci. 47 Bawipa Jesuh naw Nahtanelah a law hmu netah, “Ani cu, Israel chang akcang ah kiak ci nei, ani ung hleeihlak nak kä om ci nei” cik ci. 48 Nahtanelah naw, “A i hawk cha ah kei na na hmat ang? ci ne ng'shik ci. Bawipa Jesuh naw, “Philip naw kä a ning khü pha ung, kthei ghing kaa ah om ci sei, ka ning hmuk ci nei” cik ci. 49 Nahtanelah naw, “Rabbi, nang cu Khanpughi ah Htapa ah na kiak ci, Israel ah Khanpughi ah na kiak ci” cik ci. 50 Bawipa Jesuh naw, Ani-am, “Thei ghing kaa ah om ci sei, ka ning hmuk ci, ka ci ah hmawk ah na na zum ci ma? Cun ah tah cäicat pi gui vai na hmu lawk khai nei” cik ci. 51 Bawipa Jesuh naw, “Kei naw akcang ka pyein cu, Khankho m'kawt hmawng law khätah chang ah Htapa ah khan ah khankho chang gui kyum kai u sei nami hmu lawk khai nei” ci na gui ci.
1 Hnüüp goi a lüng kawn ah Kalile kho Kana gawnu ah hta m'um nak om ci. 2 A cu ah Bawipa Jesuh ah nu cu om tuk ci. Bawipa Jesuh la angdüihpüi gui cun phi hta m'um nak ah khü tu gui ci gui. 3 Hta m'cüüm nak sapyit tui ng'pyi khätah, Bawipa Jesuh anu naw, “Ami sapyit tui ng'pyi ci nei” ci ne Bawipa Jesuh-am m'thein ci. 4 Bawipa Jesuh naw, “Kei naw bi kabi vai kä nam cäi ä, ka bi vai akhin kä gawk law phak ci nei” cik ci. 5 Bawipa Jesuh ah nu naw, “A pyein päng ah om vä” ci ne ami shäm gui-am kiak na gui ci. 6 A cun ung chang gui naw, ami m'simsäi nak vai tui taang goi ci ah zu nak ah hlüng nu gui chuk om ci. 7 Bawipa Jesuh naw, ami chang shäm gui-am, “khlüng gui cä, tui k'be vä” ci khätah, khlüng avan pleeip khai ah k'be ci gui. 8 Bawipa Jesuh naw, “Khlüng ung kaa tui sook ne, imah ang vaipi- am thak vä” ci sei, sook ne thak ci gui. 9 Ang vaipi naw tui ng'ploüh ciah sapyit tui cu aw shüm ci. Tui than ci gui naw, sapyit tui a i ung kaa ng'khukhlat lawk ciah ami hmat ung phi, ang vai naw kä hmat ci. 10 Cun ah kia sei ang vai naw chu mah cu khü netah, “Chang gui naw, sapyit tui asü cu cung ma u netah, akhnu ah aktai cu cung ba man ci gui, nang läi tuhgüt asü na gim ci” cik ci. 11 Cun ah Bawipa Jesuh cu Kalile kho Kana gawnu ah cäi aih vai ah abäimang nak dang law htük khätah, angdüihpüi gui naw zum lawk ci gui. 12 Cun kawn ah Bawipa Jesuh cu, anu ni, anau gui ni, angdüihpüi ni awn, atäng ah Kapenium gawnu ah hteit ne, hnüüp goi thum om tuk ci gui. 13 Jew chang gui ah phiawn nak pawi ng'et law sei, Bawipa Jesuh cu Jerusalem ah hteit ci. 14 Jerusalem pum im ung, sepat ni, htome ni, mümkha ni, zoi ci gui, tangka m'thawnghlai ci gui cu, 15 Bawipa Jesuh naw hmu gui netah, htome ni seipat ni gui cu pum im ung kaa htung awn that ne k'täm gui ci. Ami ngui gui huk pe gui ne, ami tawnglang phi lat pe gui ci. 16 Cun kawn ah Bawipa Jesuh naw, “Shin gui avan hteh püi ba vä, Kapa ah im cu sumlei hmun ah kä kiak ci” ci ne mümkha zoi ci gui-am kiak na gui ci. 17 Cun kawn ah ang düihpüi gui naw, Ka taigü nak Khanpughi ah im theing ah hmawk ah, kamlung kyong cu mei cang ah mäih ah ng'ling aih ci” ciah cacim cu shüm ba ci gui. 18 Jew chang vai gui naw, “Nang naw shin gui na bi hning ah mawng kami hmat vai ah, cäicat vai a i ang nam dang hning kaw? ci ne ng'shik ci gui. 19 Bawipa Jesuh naw, “Shin ah pum im phi phye ne phlu vä, hnüüp thum ah kyong ung ka co ba khai nei” cik ci. 20 Jew chang gui naw, “Shin ah pum im cu, kho kum phli-kip lei-chuk ung kami cawh nei, hnüüp thum ung na co ba hning khai ma? cik ci gui. 21 Bawipa Jesuh naw, pum im a ci cu amät ah pumsa a pyein ah kiak ci. 22 Cun ah kia sei angdüihpüi gui naw, Bawipa Jesuh sih nak ung kaa a thawh ba kawn ah, Bawipa Jesuh ah pyein gui ah thu m'kha la cacim cu shüm ba u netah zum law pi ci gui. 23 Bawipa Jesuh naw, phiawn nak (Pasakha) pawi zah ung Jerusalem ah cäi aih vai abi gui cu, chang gui naw hmu u netah, chang akda naw zum lawk ci gui. 24 Cun ung phi Bawipa Jesuh naw ami m'lung ngaih hmat gui zawp ci kia ne, kä ngaih gep gui ci. 25 Ani naw ngami ah m'lung ngaih hmat gui zawp ci kia ne, ngami ah mawng cu a u naw am thein vai kä hlü ci.
1 Jew chang gui ah ng'vaipi Nikodemus ming nak ciah pharise tumat cu, khomü ät ung Bawipa Jesuh ah om nak ah law netah, 2 “Rabbi, nang cu Khanpughi ah tüih law ah saza ah na kiak ciah kami hmat ci nei. A i ah kia sei ci ung, Khanpughi naw atäng ah kä a om püi ah chang naw, nang ah bi ah cäi aih gui vai cu kä bi hlawt khai nei” ci ne pyein ci. 3 Bawipa Jesuh naw, “Kei naw akcang ka pyein cu, hnih vei ng'tüi nak kä gah ci naw Khanpughi ah uknak kho kä hmuk khai” ci ne kiak nak ci. 4 Nikodemus naw, “Ang vai pyi cu a i cha ah ng'tüi ba khai ang? Anu ah puk khui ah lut ba netah, akhnih vei nak ah ng'tüi ba khai ma? ci ne ng'shik ci. 5 Bawipa Jesuh naw, “Kei naw akcang ka pyein cu, tui la Mumcha Theing awn kä ng'tüi ci cu Khanpughi ah uknak kho ah kä lut hlawt khai. 6 Chang ah sisa ung ng'tüi ci cu chang ah kia ba ci, Mumcha theing ung ng'tüi ci cu Mumcha Theing ah kia ba ci. 7 Akthai ah nami ng'tüi ba vai ka ci ah phäh ah kä cäicat vä. 8 Khokhi cu akhi nak hlü lam ah khi ci, kho akhi hmat ung phi a hawi täng ah tün ne, a hawi täng ah khi khai ah kä hmat hlawt ah mäih ah Mumcha Theing awn ng'tüi ci cu kiak ci, ci ne m'thein ci. 9 Nikodemus naw, “Cun cu a i ah kiak khai” ci ne ng'shi ba mä khätah; 10 Bawipa Jesuh naw, “Nang cu Israel chang gui ah saza ng'vai ah kia lang ne, cun ka ci cu kä na hmat ci ma? 11 Kei naw akcang ka pyein cu, keimi naw kami hmat cu pyein u ne, kami hmuh cu kami ngak ci. Cun ung phi keimi ah pyein sak cu nangmi naw kä nami zum ci. 12 Khomdek khan ah mawng ka pyein hngaw kä nami zum ung, khankho ah mawng ka pyein cu a i cha ah nami zum khai ang? 13 Khankho ah kaa kyum lawk ciah Chang ah Htapa ah kawn ah a u phi khankho ah kä gawk man ci nei. 14 Mose naw bungpuk ah ng'lawi awn k'phyu a tai ah mäih ah chang ah Hta cu m'düih ne tai nak om khai nei. 15 Cun ah kia sei ani zum ciah chang phung cu ang täi ghin nak gah khai nei. 16 Khanpughi naw khomdek chang gui m'hni aih netah tumat bäng ah Ahtapa cu zuk m'kyum lawk ci, Ani zum ciah chang phung cu sihnak ung kä gawk ne angtäi ghin nak gah ci. 17 Khanpughi naw Ahtapa am kyum law cu, khomdek khan ah kat nak m'kat khai ah kä kiak ci, hun phiawn nak pek khai ah kiak ci. 18 Khanpughi ah Htapa zum ciah chang cu a hma m'kat nak kä om ci, kä zum ciah chang cu, Khanpughi ah Htapa kä ah zum ah hmawk ah, tuhbäi ge hma m'kat nak gah ci. 19 Hma ci m'kat ne m'khoichaa nak ah mawng cu; akdei cu khomdek khan ah gawk lawk ci. Cun ung phi akshe ah om ci gui ah chang gui cun naw, akdei ah mä ak hmüp cu m'hni pi ci gui. 20 Akshe ah om ciah chang phung naw, akshe abi ang dang vai kyi ne, akdei cu kä ng'za hlük ci. 21 Cun ung phi ng'düng nak awn om ciah chang cu, Khanpughi ah ng'zak hlü ah a om ah mawng ang dang vai ah akdei ah law hlük ci. 22 Cun kawn ah Bawipa Jesuh cu ang düipüi gui awn atäng ah Judea kho pigaw gui zung ah hteit u ne zum ci gui cu tuihnim nak pe ne om ci gui. 23 Johan cun phi Salim gawnu pei Anon pigaw ah tuihnim nak pe gui ne om ci. Zum ciah chang gui cu Johan ah law ne tui ng'hnim ci gui. 24 (Cun zah ung Johan thawng ung kä kium phak ci). 25 Johan ah khahpüi am shah gui cu, Jew chang gui awn tuihnim nak ah mawng pyein ne ng'cuhcan ci gui. 26 Cun ah kia sei, ngami cu Johan ah law u netah, “Saza, Jordan tuinu hei gaa ah nang ah law man ci, a mawng phi na pyein man ah chang cu, na shüm ba ne ang? Ani naw tuhbäi tuihnim gui sei, chang akda ani ah lawk ci gui nei” ci ci. 27 Johan naw, “Khanpguhi naw kä a peit ung a u naw a i käm khüt ci. 28 Kei cu Messiah ah kä ka kiak ci, ani ah ma ung ami nak hma law ah ka kiak ci. Cun ka ci nami ng'zak ci cu saksi ah nami kiak ci. 29 Ceimah ci khäm ci cu chumah ci ah kiak ci. Chumah ci ah teih püi cun naw, chumah ci ah k'o cu ng'düi ne ngai netah, ang zak ung ang htei ah a zeikiai ah mäih ah, kei ang htei ah ka zeikiai pyi ci nei. 30 Ani cu hlüngtai law pi khai, kei cu kang neim law pi khai nei, cik ci. 31 Khankho ah kaa kyum lawk ci cu, van nüng ah hlüngtai pi ci. Khomdek ung kaa lawk ci cu khomdek chang ah kia ne, m'dek khan ah mawng cu pyein ci. Cun ung phi khankho ah kaa lawk ci cu apäng avan ah hlüngtai pi ci. 32 Ani naw a hmuh la ang zak cu pyein sei phi ani ah ng'thu cu a u naw kä dou ci. 33 Ani ah ng'thu dou ciah chang naw Khanpughi cu düng nak ah a kiak ah mawng dang sak ci. 34 Khanpughi naw a tüih law cu Mumcha awn pleip khai ah akbe ah kia ne, ani cu Khanpughi ah ng'thu bäng pyein ci. 35 Apa Khanpughi naw Ahtapa cu m'hni aih netah, bämang nak avan cu akut ung ap ci. 36 Ahtapa zum ciah chang cu angtäi ghin nak gah ci. Kä zum ciah chang cu ghin nak kä hmuk khai. Ani ah khan ah Khanpughi ah m'lung she nak om khai.
1 Bawipa Jesuh naw Johan ah peit ah da pi khai ah zum ci gui-am tuihnim nak a peit gui cu, pharise gui naw ng'zak ci gui. 2 (Akcang ah Bawipa Jesuh amät naw tuihnim nak kä pek ci, ang düihpüi gui bäng naw pek ci gui. ) 3 Pharise gui naw ami ng'zak cu Bawipa Jesuh naw hmat netah Judea kho ah kaa Kalile kho ah htie ba ci. 4 Cun ah lam cu Samaria kho sun pah ne hteh ah kiak ci. 5 Ngami cu Samria kho Jakop naw ahta Josef-am a peit ah lo pei ah, Saika pigawnu ah gawk lawk ci gui. 6 A cun ung Jakop ah tui shawk om ci. Bawipa Jesuh cu lam a hteh nak bawngbai netah, tui shawk pei ah ngok ci. Cun zah cu hnüüp lunglai ah kiak ci. 7 Samaritan hnumi cu tui than khai ah law khätah Bawipa Jesuh naw, “Tui na tu toä” cik ci. 8 (Cun zah ung ang düihpüi gui cu pigaw ah ei vai khleih zah ci gui). 9 Cun ah hnumi naw, ‘Nang cu Jew chang ah na kiak ci, kei cu Samaritan chang ah ka kiak ci, a i vai tui na na ng'zoih ang? cik ci. (Jew chang gui cu Samaritan chang gui ah ei awk nak ung, kä ei aw tu man ci gui ah kia sei, cun ah a pyein ah kiak ci). 10 Bawipa Jesuh naw, “Nang naw Khanpughi ah m'gein nak la, tuhbäi tui ning ng'zoi ci cu na hmat vai sü ung, ani ah ghin tui gei cu nang zoi khai sü te, ani naw phi cun ah tui cu ning pek khai süte” cik ci. 11 Cun ah hnumi naw, “Bawipa, nang ung tui than nak vai phi kä om ci, tui shawk phi thuuk ci, a i chaa ah ghin nak tui gei cu na gah khai ang? 12 Shin cu kami pughi Jakop ah tui shawk ah kia sei a hta ng'shon ung, asei akchang avan naw a awk ah kiak ci nei, ani ah mä nang na ng'vai pi ciah kia ne ma? cik ci. 13 Bawipa Jesuh naw, “Shin ah tui awk ci cu tui gha ba khai; 14 cun ung phi kei ah pei tah tui awk ci cu a ngawi ah phi tui kä gha ba khai. Cun ah tui cu ani ah m'lung kyong ung ghin nak tui gei ah khawng ne long ne, ani-am angtäi ghin nak cu pek khai” cik ci. 15 Cun ah hnumi naw, “Bawipa, cun ah tui cu, na peä, cun ung tui phi kä ka gha ba khai, tui phi kä ka than ba khai” ci ne ng'zoi ci. 16 Bawipa Jesuh naw, “Hteit ne na cei va khü baä” cik ci. 17 Cun ah hnumi naw, “Kei kä ka ceimah ci” ci ne pyein ci. 18 Bawipa Jesuh naw, “Kä ka ceimah ci, na ci cu na cang ci, cun ung phi na cei chang sing hma om pyi ci, tuhbä na ni om ci cu, akcang ah na cei ah kä kiak ci. Tuhbäi nang naw akcang na pyein ci” ci ne kiak nak ci. 19 Cun ah hnumi naw, “Bawipa, nang cu profet ah na kiak ci. 20 Keimi Samaritan chang gui naw, shin ah m'htung ung Khanpughi kami khawihnah ci, nangmi Jew chang gui naw, Jerusalem ah Khanpughi nami khawihnah ci” ci ne kiak nak ci. 21 Bawipa Jesuh naw, “Hnumi awi, ka pyein cu ngai ä; shin ah m'htung ah phi bäi, Jerusalem ah phi bäi, Khanpughi kä khawihnah nak ba vai ah akhin gawk lawk khai nei. 22 Nangmi Samaritan chang gui naw, a u nami khawihnah kä nami hmat ci, keimi Jew chang gui naw a u kami khawihnah cu kami hmat ci; a i ah kia sei ci ung hun phiawn nak cu Jew chang gui ung kaa, gawk lawk ciah kiak ci. 23 Cun ung phi Khanpughi khawihnah ci naw mumcha thamah nak awn akhawihnah vai ah akhin cu gawk law pyi ci, cun cu Khanpughi ah ng'zak hlü ah kiak ci. 24 Khanpughi cu Mumcha ah kia sei, khawihnah ci naw, mumcha la bekhüt nak awn a khawihnah vai” cik ci. 25 Cun ah hnumi naw, “Messiah Bawipa a gawk law vai cu, ka hmat ci, ani a gawk law ung apäng avan nam thein gui khai” ci ne pyein ci. 26 Bawipa Jesuh naw, “Cun ah Messiah Bawipa cu, tuhbäi nang ning thu püi ciah, kei ah kiak ci nei” ci ne kiak nak ci. 27 Cun zah ung, Bawipa Jesuh ah ang düihpüi gui gawk law ba u ne, cun ah hnumi awn ani ng'thu cu hmu u netah, ang htei ah cäcat ci gui. Cun ung phi, nang hnumi a i nang za hlük ci ang? Nang Bawipa a i vai shin ah hnumi nang thu püi ang? , ci ne a u naw phi kä pyein ci gui. 28 Cun ah hnumi cu a tui than nak nawng shüt-en ne, pigaw vah dawng ba netah chang gui ah ma ah, 29 “Kei ah ka om ih phung avan pyein hning ciah chang lawk ci nei, law ne teng law tu vä, ani cu Messiah ah kiak khai nei, cik ne m'thein gui ci. 30 A cun vai-am pigaw ah chang gui cu Bawipa Jesuh ah om nak ah lawk ci gui. 31 A cun zah ung angdüihpüi gui naw, “Sazapa, ei ei toä” cik ci gui. 32 Bawipa Jesuh naw, “Nangmi ah kä hmat ah ei ka ei pyi ci nei” ci ne kiak na gui ci. 33 Cun ci khätah ang düihpüi gui cu, “A u naw bawh ei vai thak law pyi sei ang? ci ne ami mät ng'thu ci gui. 34 Bawipa Jesuh naw, nagmi-am, Kei ah ei awk cu, na tüi lawk ciah ang zak hlü ah om vai la abi pyi ne bi vai ah kiak ci. 35 Nangmi naw, chaa-phli a om ba ung, geit khäm khin gawk lawk khai nami cik ci, cun ung phi geit ko gui cu, khäm ge vai ah hmin pyi ci gui nei, 36 geit khäm ci cu, ng'cheng gah ne, angtäi ghin nak ah geit cu khäm ba ci, cun ah kia sei, geit ci la khäm ci cu angtäi ah zei kiai khai goi nei”. 37 Tumat naw geit sei tumat naw khäm ba ci” ciah ng'thu cu akcang ah küm ci nei. 38 Kä nami geitko nak te ah lo ung, nami khäm tawng ba khai ah ka ning tüi gui ci, a hei gui ah bi nak ung kaa, nangmi ung akpawih lawk khai nei” cik ci. 39 Samaritan hnumi naw, Bawipa Jesuh naw apäng avan a hmat ah mawng cu m'thein tu gui sei, Samaritan chang akda naw Bawipa Jesuh cu zum ci gui. 40 Cun ah kia sei Samaritan chang gui law u ne, Bawipa Jesuh cu a om tu cang vai ah chou u sei, hnüüp goi om tuk ci. 41 Bawipa Jesuh ah ang thu ng'zak netah chang akda naw zum lawk ci gui. 42 Ngami naw cun ah hnumi-am, “Keimi naw kami zum law cu nangah nam thein gui ah hmawk ah kä kiak ci, kami mät naw ang thu cu ng'za u ne kami zum ci. Khomdek khan ah Hunbawi akcang ah kiak ciah kami hmat ci” cik ci gui. Gai Sak ci. 43 Cun ah pigaw ah hnüüp goi om tu netah Bawipa Jesuh cu Kalile kho ah hteit ba ci. 44 “Profet cu a mät ah kho ah chang naw akchang m'sui nak kä om ci” ci ne amät naw pyein ci. 45 Kalile kho ah a gawk law ba ung Bawipa Jesuh cu chang akda naw a na dou ci gui. A i ah kia sei ci ung Jerusalem ah pasakha pawi ung Bawipa Jesuh ah bilawh gui cu avan hmu tu pyi te ci gui ah kia ne, kiak ci. 46 Cun kawn ah Bawipa Jesuh cu tui, sapyit tui ah a pyan nak, Kalile kho kana pigawnu ah gawk law ba ci. Cun ung asozah zung bawi tumat om tuk ci. Ani ah hta cu Kapenium gawnu ah gaw ne om ci. 47 Ani naw Bawipa Jesuh cu Judea kho ah kaa, Kalile kho ah a law ba hmat netah, Kapenium gawnu ah law ne, si lawge vai ne gaw ciah a hta cu am gai ba vai ah khü lawk ci. 48 Bawipa Jesuh naw, “Nangmi cu cäi aih gui vai la cäicat gui vai, kä nami hmuh ung kä nami zum ci” ci ne kiak na gui ci. 49 Zungbawi naw, “Bawipa, ka hta kä a sih pha ung na gawk law vai ah lawä” cik ci. 50 Bawipa Jesuh naw, “hteit baä, na hta ghing gai ba khai nei” cik ci. 51 Bawipa Jesuh ah ng'thu cu zum ne hteit ba khätah lam ah akchang shäm ana law ne, “na hta gai ba pyi ci nei” cik ci. 52 Ani naw a hta a i ah khin ung tüi ne agai law ba ah ng'shi gui sei, ngami naw, “zanta hnüüp keeing nazi khat zah ung gai law ba ci” cik ci gui. 53 Bawipa Jesuh naw, “Na hta ghing ba khai nei” a ci nak cu a cun ah akhin ah kiak ciah apa naw shüm ba netah, ani la akyong ung kaa ami van naw Bawipa Jesuh cu zum ci gui. 54 Cun cu Judea kho ah kaa naw Kalile kho ah alaw ba kawn ah Bawipa Jesuh naw cäi aih vai abi nak akhnih vei nak ah kiak ci.
1 Cun kawn ah Jew chang gui ah pawi om sei Bawipa Jesuh cu Jerusalem kho ah hteit ba ci. 2 Jerusalem pigaw hto m'kawt pei ah ng'phoh hma ah ami ng'vong ah tuili tumat om ci. Cun cu Hebru ng'thu awn ‘Bethzatha’ ah pyein ci gui. 3 Cun ah ng'vong pei ah amik m'dauh ni, akho hnget ni, akut kho shum ci ni, ak gaw akda ng'zän ci gui. 4 (Khanpughi ah khankho chang cu kyum law ne, tui ak hnawh law ung, tui ng'hnawk ung ng'hnim ma ci cu gai ba man ci kia sei, tui hnawk cu ngäng ci gui). 5 A cun ung khokum thum-kip-lei-cheit ung gaw ci phi om tuk ci. 6 Bawipa Jesuh naw, cun ah chang a hmuh vai-am aksho a gaw law cu hmat netah, “Na gai hlük ci ang? ci ne ng'shik ci. 7 Cun ah ak gaw naw, “Bawipa, tui ang hnawh law ung, tuili ung nang hnim tu sak khai phi a u kä om ci nei. Tui ung kang hnim tuk khai ka pawng tu zah ung a hei ng'hnim ma ci ci nei” ci ne pyein ci. 8 Bawipa Jesuh naw, “Ng'düi law ne, na zih phah kawt ne hteitä” ci ne kiak nak ci. 9 A cun vai-am ak gaw cu gai ba ne, azih phah kawt ne ng'düi law ne hteit ci. Cun ah Hnüüp cu Kyinnak Hnüüp ah Kiak ci. 10 Cun ah kiak sei Jew chang ng'vai gui naw, “A u naw a ning gai ba sak ang? thu ngawi cu kyinnak hnüüp ah kiak ci, na zih phah la ne na law ba cu thukhän nak kaan ciah kiak ci” ci ne kiak nak ci gui. 11 Gai ba ciah chang naw, “Na gai sak ba ci naw, na zih phah la ne, ng'düi law ne hteit ä, cik ci nei” ci khätah; 12 Ngami naw, “cun ah nabi vai pyein ci cu a u ang? ci ne ng'shik ci gui. 13 Cun ung phi cun zah ah chang akda om ci gui ah kia ne, Bawipa Jesuh abü ah hteit tei ba sei, ani gai ba sak ci cu a u bä ah kä hmat ba ci. 14 Cun kawn ah Bawipa Jesuh naw cun ah chang cu pum im ah hmu ba netah, “Tuhbäi na gai lawk ci, cun kawn ah hmakat nak kä na bi vai, hmakat nak na bi ba ung cun ah tä pi ci cu na aut khai” ci ne kiak nak ci. 15 Ani cu hteit ba netah, Jew chang ng'vai gui ah ma ah, “Na gai ba sak ci cu Jesuh nei” ci ne m'thein ba gui ci. 16 Cun ah kyin hnüüp ung akgaw a gai ba sak ung tün ne, Bawipa Jesuh cu Jew chang vai gui naw, gen lawk ci gui. 17 Bawipa Jesuh naw, “Kapa cu angtai ah bi bik ciah kia sei, kei phi ka bik khai” cik ci. 18 Kyin hnüüp ng'thukhän kaan ne bi bik netah mä, Khanpughi am kapa a ci la amät Khanpughi awn täng ciah a pyein ah hmawk ah Jew chang ng'vai gui naw, Bawipa Jesuh cu ngawn vai ah ng'ge law pi ci gui. 19 Bawipa Jesuh naw, “Kei naw akcang ka pyein cu, ’ Ahtapa naw amät ah ngaih ah a i kä bi hning ci, Apa ah bi bi a hmuh ah mäih ah vah bi bik ci. Apa naw abi cu Ahta naw phi a cun ah bi ba ci. 20 Apa naw Ahta cu m'hni ne abi gui phung cu m'thein zawp ci. Shin ah a mawng gui ah hlüngtai pi ci cu Apa naw m'theikaan khai kia sei, nangmi naw nami ngaih tüh khit khai. 21 Apa naw aksi m'ghin ba ne, ghin nak a peit ah mäih ah Ahtapa naw phi ang zak hlü ah chang cu m'ghin ba khai. 22 Apa naw a u phi kä m'khoi m'chak ci. Cun ung phi Ahtapa-am düng sei m'khoichaa nak nüng cu pek ci. 23 Cun ah kiak sei Apa kyih-aa ah mäih ah Ahtapa phi chang van naw a kyih aa vai nei. Ahtapa kä kyih aa ci cu, tüi lawk ciah Apa kä kyih-aa ciah kiak ci. 24 Kei naw akcang ka pyein cu, “Kei ah ng'thu ngai ne, kei na tüi lawk ci, zum ciah chang cu, angtäi ghin nak gah ci. Ani ung m'khoichaa nak kä om ba khai. Ani cu sih nak näng ne ghim nak gah pyi ciah kiak ci. 25 Kei naw akcang ka pyein cu, akhin gawk law pyi ci, chang si gui naw Khanpughi ah Ahtapa ah k'o ng'za u netah, ghin nak ami gah nak ba vai ah akhin cu, tuhbäi gawk law pyi ci nei. 26 Apa cu ghin nak ah a phung ah a kiak ah mäih ah Ahtapa cun phi, ghin nak ah a phung ah a kiak vai ah ap pyi ci nei. 27 Ahtapa cu chang ah Htapa ah kia sei m'khoichaa nak nüng vai phi ap pyi ci nei. 28 Cun ah phäh ah kä cäicat vä, aksi gui cu Khanpughi ah Ahtapa ah ak'o cu ng'za u netah; 29 ng'cim hmun ung kaa ami thawh ba nak vai ah a khin cu gawk khai nei; a om nik ci gui cu tho ba ne ghing ba khai gui, a om shek ci gui cu tho ba u ne phi shetkat nak gah khai gui nei. 30 “Ka mät ah m'khüt näng nak awn a i kä ka bi hning ci, Khanpughi ah nam cäi ah mäih ah m'khoichaa nak ka bik ci. Ka mät ah ng'zak hlü ah ka bi vai ah kä ka tha nak ci, na tüi lawk ciah ang zak hlü bäng ah bi ka bik ci; cun ah kia sei kei ah m'khoichaa nak cu düng ci. 31 Kei naw ka mät ah mawng pyein ne ka saksi ung kä nami ngaih gep khai. 32 Cun ung phi kei ah mawng pyein ne saksi ci tumat om ci. Ani ah saksi cu düng ciah kei naw ka hmat ci. 33 Nangmi naw Johan-am ng'shä nami tüih ci, ani cu düng nak awn saksi ci. 34 Kei ah hmawk ah chang a saksi vai ah kä hlü te ci, cun ung phi nangmi naw hun nak nami gah vai ah ka pyein ah kiak ci. 35 Johan cu ng'läh ne däi ciah mei-im awn täng sei, ani ah akdei ung ashäng zei ne nami om hlük ci. 36 Cun ung phi Johan ah saksi ah däm pi ciah saksi nak kei ung om ci. Kapa naw na ap sei tuhbäi ka bilawh nak gui awn, kei cu Kapa naw ana tüih law ah mawng saksi cu dang ci nei. 37 Na tüi lawk ciah Kapa Khanpughi amät naw phi, kei ah mawng cu saksi ci. Nangmi naw ani ah k'o kä nami ng'za man khai, amüi phi kä nami hmu man khai; 38 Ani ah tüih law kä nami zum ci kia ne, ani ah ng'thu cu nangmi ah m'lung kyong ung kä om ci. 39 Cacim ung angtäi ghin nak om khai ah ngai ne cacim bäng nami teng ci. Acun ah cacim naw kei ah mawng cu saksi ci. 40 Cun ung phi nangmi cu angtäi ghin nak gah vai ah kei ah kä nami law hlük ci. 41 “Chang ah m'hlüngtai vai kei naw kä ka ng'za hlük ci, 42 Cun ung phi nangmi ah mawng cu ka hmat ci. Nangmi ah m'lung kyong ung Khanpughi zumhni nak kä om ci. 43 Kei cu Kapa ah m'khüt näng nak awn ka lawk ci, cun ung phi nangmi naw kä nami na dou ci. Chang tumat cu amät ah m'khüt näng nak awn a law vai sü ung nami dou khai sü te nei. 44 Nangmi nami mät tumat naw tumat am hlüngtai vai nami ng'za hlük ci. Cun ung phi tumat bäng om ciah Khanpughi naw aning m'hlüngtai gui vai kä nami tha nak ci. Cun ah kia sei nangmi naw kei a hawk chaa ah nami na zum khai zaw? 45 Cun ung phi kei naw Khanpughi ah ma ah cheishoh nak ka ning pe gui khai ah kä nami ngaih vai. Nami cheishoh nak ning m'dang pe gui khai cu nami ngaih u ah Mose ah kiak ci. 46 Mose naw kei ah mawng cu ca ung gu pyi ci kia sei, ani akcang ah nami zum ung kei phi nami na zum khai. 47 Cun ung phi nangmi naw Mose ah ca guk cu, kä nami zum ci kia ne, a i hawk chaa ah kei ah ng'thu cu nami zum khai ang? ci ne kiak na gui ci.
1 Cun kawn ah Bawipa Jesuh cu Kalile tuili (Tiperih tuili) hei ga lam ah vang kat ci. 2 Gawpai ci gui a gai sak ba gui cäi aih vai ah hmu tu te ci gui ah chang akda naw a hnu ah läk lawk ci gui. 3 Bawipa Jesuh cu m'htung khan ah hang kai ne, ang düihpüi gui awn atäng ah ngok ci gui. 4 Cun zah ung Jew chang gui ah phiawn nak pawi cu ng'et lawk ci. 5 Bawipa Jesuh naw a pei ah chang akda a law hmu netah, “Chang shikchü naw a ei vai a hawi khleih vai ang? ci ne Philip cu ng'shik ci. 6 (Cun cu Philip am nüm nak ah ang shi ah kiak ci, a mät naw a i a bi vai avan hmat pyi ci). 7 Philip naw, “Ngui phia-goi phu khleih ung phi, chang shikchü naw api ciah phi käng küh khai gui nei” ci ne pyein ci. 8 Ang düihpüi tumat Siomn Peter ah anau Antaru naw, 9 “shi ah akhmaw tumat naw m'hut pum hma la nga pahnih sho ci nei. Cun ung phi chang shikchü-am män h khai ah käm bei hlawt vai nei” cik ci. 10 Bawipa Jesuh naw, “Chang gui cu ngoh sak gui vä” cik ci. (Cun zah ah ngoh nak vai nep ci). Cun ah kia sei phia-hma-kip ah däm ciah chang gui cu ngok ci gui. 11 Bawipa Jesuh naw m'htut cu la ne Khanpughi ah taigü netah, chang gui-am tei gui ci. Nga phi la ne tei gui ci. 12 Chang avan naw ami phü ci ah ei ci gui. Chang avan naw ei ne ami phü kawn ah Bawipa Jesuh naw ang düihpüi gui-am, “Ami ei pawih gui käng theh-en khai ah m'dawn ne gim ba vä” ci ne kiak na gui ci. 13 M'htut pum hma la nga pahnih Bawipa Jesuh naw a tei, chang gui naw ami ei pawih avan m'dawn ba u sei, them-dawn gha-lei-goi ung be lawk ci. 14 Cun ah Bawipa Jesuh naw cäi aih vai abi gui hmu tuk ciah chang gui naw, “Shin ah chang cu khomdek khan ah gawk lawk khai ami ciah, profet akcang ah kiak ci nei” cik ci gui. 15 Cun ah chang gui naw Bawipa Jesuh cu, ghangpughang ah ling ne k'hmoh lawk khai gui ah hmat netah, amät bäng khomhtung khan ah kai ne om ci. 16 Mühun lam ah Bawipa Jesuh ah ang düihpüi gui cu, Kalile tuili ah zu kyum ba u ne, 17 hleiko ng'cum ne Kapenium gawnu gaa ah vang kat vü ba ci gui. Khomü law güt sei Bawipa Jesuh cu ang düihpüi gui ah om nak ah kä gawk law ba ci. 18 Cun zah ung kho ng'pheet ne khi law sei, tuili ung tui ng'hnawk lawk ci. 19 Ang düihpüi gui cu, maing thum phli vai ung hleiko awn ami hteh kawn ah Bawipa Jesuh cu tui khan ah ng'düi ne ana a vü sei hmu u netah, cäicat ne kyikyawk ci gui. 20 Bawipa Jesuh naw, “Kä kyikyawk vä, kei nei” cik ci. 21 Cun kawn ah ang düihpüi gui cu zeikiai u ne, Bawipa Jesuh cu ng'hleiko khan ah ana dou ba ci gui. A cun vai-am vang gaa tui- kam ah gawk ne va kai ci gui. 22 A ngawi ung vang gaa ah om shüt ciah chang gui naw, hleiko tumat om te ci, ci ne shui ba ci gui. A cun ah hleiko ung Bawipa Jesuh kä om tu sei, ang düihpüi gui bäng ami hteh ba cu hmuk ci gui. 23 Cun ung phi Tiperia ah kaa lawk ciah hleiko gui cu Bawipa Jesuh naw taigü ne chang akda-am ei am bei nak gui te ah pei ah gawk lawk ci gui. 24 Chang gui naw a cun ung Bawipa Jesuh la ang düihpüi gui cu kä hmu u netah, hleiko ung kai ba ne Bawipa Jesuh shui ba khai gui ah Kapenium kho gaa ah vang kat vü ba ci gui. 25 Chang gui naw Bawipa Jesuh cu tui vang gaa täng ah hmu ba u netah, “Sazapa, a i zah ung shin gaa ah na gawk law ba ci-ang? ci ne ng'shik ci gui. 26 Bawipa Jesuh naw, “Kei naw akcang ka pyein cu, nangmi naw kei nami na shui cu, cäi aih vai kabi nami hmuhmat su ah kä kiak ci, m'htut nami phü ah nami ei tu ah hmawk ah kiak ci. 27 Shekaa thei ciah ah ei awk cu käk tha nah ne, kä shekaa thei ciah, ang täi ghin nak ah ei awk cu tha na vä. Khanpughi naw hlüngtai nak a ap pyi ah kia sei, chang ah Htapa naw cun ah ei awk cu nangmi-am ning pe gui khai nei” ci ne m'cäi gui ci. 28 Chang gui naw, “Keimi cu Khanpughi ah ng'zak hlü ah kami hnünthawh hning vai ah a i ang kami bi kaw? ci ne ng'shik ci gui. 29 Bawipa Jesuh naw, “Khanpughi ah ang zak hlü cu amät naw a tüih law ah akchang cu nami zum vai ah kiak ci nei” ci ne kiak na gui ci. 30 Cun ah chang gui naw, “Keimi naw hmu u netah, kami ning zum nak hning vai ah, a i cäi aih vai gui ang nam dang kaw? 31 A i gui ang nabi kaw? Cacim theing ung, “Ani naw khankho ah kaa m'htut cha lawk ci” ciah a om ah mäih ah kami pughi gui naw, bungpuk khong-gau ah Mannah m'htut cu ei ci gui nei” cik ci gui. 32 Bawipa Jesuh naw, “Kei naw akcang ka pyein cu Mose ah ning peit gui ah m'htut cu, khankho ah kaa ei awk ah kä kiak ci, Kapa Khanpughi naw aning peit gui cu, khankho ah kaa m'htut akcang ah kiak ci. 33 Khanpughi ah na peit gui ah m'htut cu, khankho ah kaa kyum law ne, khomdek chang gui-am ghin nak pe gui ciah kiak ci, ci ne m'thein gui ci. 34 Cun ah chang gui naw, “Bawipa, cun ah m'htut cu keimi am angtäi sei na pe gui ä” ci ne ng'zoi ci gui. 35 Bawipa Jesuh naw, “Kei cu ghin nak m'htut ah ka kiak ci, kei ah lawk ci cu a i sangung phi ei kä cawi ba khai; kei na zum ci cu a i zah ung phi tui kä gha ba khai. 36 Cun ung phi nangmi naw, kei cu, na hmu lang u ne, kä nami na zum ci, ka ci pyi ci nei. 37 Kapa naw a na ap ah chang phung cu kei ah lawk khai gui. Kei ah lawk ciah chang phung cu a u phi kä ka m'hlat ba khai. 38 A i ah kia sei ci ung, kei cu kamät ah ng'zak hlü ka bik khai ah khankho ah kaa ka kyum lawk ciah kä kiak ci, na tüi lawk ciah ng'zak hlü ka bik khai ah ka kyum lawk ciah kiak ci. 39 Na tüi lawk ciah ang zak hlü cu, amät ah na ap ah chang gui di maih nak ung kä gawk khai gui ah, akhnu hnüüp ung sihnak ung kaa ka thawh ba sak gui vai ah kiak ci. 40 Kapa Khanpughi naw Ahtapa hmu ne zum ciah chang phung cu, angtäi ghin nak a gah vai ah ng'za hlük ci. Kei naw phi, ngami cu, akhnu hnüüp ung sihnak ung kaa, ka thawh ba sak gui khai” ci ne m'thein gui ci. 41 Bawipa Jesuh naw, “Kei cu khankho ah kaa kia lawk ciah m'htut ah ka kiak ci” cik ci. Cun a ci cu chang gui naw ngai khit u netah, 42 “Shin ah chang cu Josep ah hta, Jesuh ah kä kia ne ang? Ani ah anu la apa phi mi hmat zawp ci maw, a i ah kia sei tuhbäi, ‘Kei cu khankho ah kaa ka kyum lawk ci’ a ci ang? cik ci gui. 43 Bawipa Jesuh naw, “Nami mät naw kä ngaih tüh khit vä, na tüi lawk ciah Kapa naw kä a law püi ung, 44 a u phi kei ah kä law hlawt khai, kei ah lawk ci cu akhnu hnüüp ung sih nak ung kaa ka thawh sak ba khai. 45 Profet gui ah ca guk ung, “Chang avan cu Khanpughi naw m'theithang gui khai, Kapa ah ng'thu ng'za ne akni ah ng'thei ci gui phung cu kei ah law ci gui. 46 Kei naw ka pyein hlü cu, chang naw Khanpughi hmu man ci, ka ci ah kä kiak ci, Khanpughi ung kaa lawk ciah chang bäng naw, Khanpughi cu hmu man ci. 47 Kei naw akcang ka pyein cu, “Kei na zum ciah chang cu angtäi ghin nak gah ci. 48 Kei cu ghin nak m'htut ah ka kiak ci. Nami pughi pa gui cu, 49 bungpuk khonggau ah, mannah m'htut cu ei u ne phi, si zawp ci gui. 50 Cun ung phi khankho ah kaa kia lawk ciah m'htut ei ci cu, sih nak kä hmuk khai. 51 Kei cu khankho ah kaa kia lawk ciah ghing ciah m'htut ah ka kiak ci. Cun ah m'htut ei ciah chang phung cu, angtäi ah ghing khai. Kei naw ka ning peit gui ah m'htut cu, khomdek chang gui naw ghin nak ami gah nak vai ah, ka sa ah kiak ci, ci ne m'thein gui ci. 52 Cun ci khätah chang gui naw, “A i hawkchaa ah ani naw mi ei vai ah asa na pe gui khai ang? ci ne m'lungshe ne ng'cuh ci gui. 53 Bawipa Jesuh naw, “Kei naw akcang ka ning m'thein gui cu, chang ah Htapa ah asa kä ei ne, asi kä nami awk ung, nangmi naw ghin nak kä nami gah khai. 54 Kei ah sa ei ne kei ah si awk ci cu, ang täi ghin nak gah ci, akhnu hnüüp ung ani cu kei naw sih nak ung kaa ka thawh ba sak khai. 55 Kei ah sa cu ei akcang ah kiak ci, kei ah si cu awk akcang ah kiak ci. 56 Ka sa ei ne ka si awk ci cu kei ung om ci, kei phi ani ung ka om ci. 57 Ghing ci ah Kapa naw ana tüih law ah kia ne, kei cun phi Kapa awn ka ghing ci. A cun ah mäih ah kei na ei ciah chang cu, kei awn ghing khai. 58 Shin ah m'htut cu khankho ah kaa kia lawk ciah kia ne, ei kawn ah sik nak ah kiak ciah, nami pupa gui ah ei ah m'htut awn kä täng ci. Shin ah m'htut ei ciah chang phung cu angtäi ah ghing khai” ci ne m'thein gui ci. 59 Shin gui cu Kapenaum gawnu ah pum im ung Bawipa Jesuh naw am theithang gui ah kiak ci. 60 A hnu ah läk ci gui ah chang akda naw, shin ah ng'thu gui cu ng'za u netah, “Shin ah am theithang gui cu ghaat aih ci, a u naw läk m'khüt khai ang? cik ci gui. 61 Cun ah ami ngaih khit cu a u naw kä am thein ah, Bawipa Jesuh naw hmat netah, “Shin ah ng'thu ah hmawk ah nami m'lungk'si ne ma? 62 Chang ah Htapa cu a om nak htük ah kho ah a hang kai vü ba nami hmuh law ung mä, a i ah nami ngai khai ang? 63 Khanpughi ah Mumcha Theing naw hnun gui cu ghin sak ci, chang ah hlüngtai nak naw a i käm khüt ci. Kei naw tuhbäi ka ning m'thein gui ah ng'thu cu, Khanpughi ah ghin nak Mumcha ah kiak ci. 64 Cun ung phi nangmi ung kaa am shah naw kä zum ci” ci ne kiak na gui ci. (Kä zum tuk ciah chang gui la ga ah kut ung ap khai ah chang cu Bawipa Jesuh naw akhtük ge ung hmat ci). 65 Cun ah kia sei Bawipa Jesuh naw, “Kei naw tuhbäi ka pyein hlü cu, Kapa Khanpughi naw kä am gein ung a u phi, kei ah kä law hning ci” ci ne kiak na gui ci. 66 Cun ung tün ne Bawipa Jesuh ah angkhah püi gui akda cu kängläk tu ba ne ng'hlat ba shüt ci gui. 67 Cun ah kia sei Bawipa Jesuh naw, angdüihpüi chang gha-li-goi am, “Nangmi mä, kei ah hnu ah nami na läk nak ung kaa nami ng'hlat ba hlük ci ang? ci ne ng'shi gui ci. 68 Simon Peter naw, “Bawipa, a u ah om nak ah keimi kami hteh vai ang? Nang Bawipa bäng naw vah angtäi ghin nak ah ng'thu cu na pyein ci. 69 Nang cu Khanpughi ung kaa kyum lawk ciah, khan chang theing ah na kiak cu, tuhbäi hmat ne kami ning zum ci nei” ci ne pyein ci. 70 Bawipa Jesuh naw, “Kei naw chang gha-lei-goi ka ning ghü gui ciah kä kia ne ang? Cun ung phi nangmi ung kaa chang tumat cu, khoshe ah kiak ci nei” ci ne kiak na gui ci. 71 Simon Iskariot ah hta Judas cu, angdüihpüi gha-lei-goi ung kaa ah kia tu pang ne phi, Bawipa Jesuh cu gaa ah kut ung ap khai ah chang ah kia khätah, cun ah a pyein ah kiak ci.
1 Cun kawn ah Bawipa Jesuh cu Kalile kho ah pawng ne hteit ba ci. Jew chang gui naw ngawn vai ah ami ng'ge cu hmat netah, Judea kho ah kä hteit ba hlük ci. 2 Jew chang gui ah geit ah shawk nak ah pawi cu ng'et lawk ci; 3 Cun ah kia sei Bawipa Jesuh ah anau gui naw, “Nang ah bilawh gui cu ning läk lawk ciah chang gui naw, ami hmuhmat tu vai ah shin ung kaa pawng ne, Judea kho ah hteit baä, 4 Ming thang hlük ciah chang naw a u naw phi abilawh cu käm zih man ci nei. Nang naw cäi aih gui vai na bi ba ung, khomdek ah khan ung chang avan naw a hmat vai ah na bi vai nei” ci ne pyein ci gui. 5 (A nau gui naw phi Bawipa Jesuh cu kä zum ci gui). 6 Bawipa Jesuh naw, “Kei ah akhin kä gawk law phak ci, nangmi ah a khin läi cu angtäi sei gawk lawk ci. 7 Khomdek chang naw nangmi kä ning thüi na gui ci, cun ung phi ngami ah shetkat nak cu, kei naw m'dang ne pyein ngä sei, kei cu na thüi nak ci gui. 8 Cun ah pawi ung nangmi hteit vä, kei cu ka khin kä gawk law phak ci ah kia sei kä ka hteit khai” ci ne kiak na gui ci. 9 Cun ci netah Bawipa Jesuh cu Kalile kho ah om lä ci. Bawipa Jesuh Hteit ci. 10 Cun ah pawi ung anau gui ami hteh kawn ah Bawipa Jesuh cu adüm ah hteit tuk ci. 11 Jew chang vai gui naw cun ah pawi ung Bawipa Jesuh cu shui u netah “Cun ah chang a hawi ang” ci ne k'tä ci gui. 12 Chang akda naw ani ah mawng cu adüm düm ah pyeinsak ci gui. Am shah naw, “shin ah chang cu chang ni nei” cik ci. Am shah naw, “chang ni ah kä kiak ci, chang m'hleehlak ciah chang nei” cik ci gui. 13 Cun ung phi Jew chang vai gui cu kyi u netah, a u naw phi ang dang ah kä pyeinsak ci. 14 Pawi ami bi nak kho hnüüp cawih cawih law khätah, Bawipa Jesuh cu taigü im ah hteit ne m'theithang gui ci. 15 Jew chang ng'vai gui cu ang htei ah cäicat u netah, “a hawi ah phi kä ng'theithang man ci naw, a i hawk chaa ah shin gui a hmat ang” cik ci gui. 16 Bawipa Jesuh naw, “Shin gui cu ka mät ah m'theithang ah kä kiak ci, na tüi lawk ciah Khanpughi ung kaa lawk ciah kiak ci. 17 Khanpughi ah ang zak hlü ah om hlük ciah chang phung naw, kei ah ng'thu pyein gui cu ang ngaih ung, Khanpughi ah ng'thu la kei ka mät ah ng'thu ah a kiak ah, m'khoicha ne hmat khai nei. 18 Amät ah ng'zak hlü pyeinsak ci cu, amät ah ming thang nak vai ah kiak ci. Cun ung phi tüi lawk ciah ming thang vai ng'za hlük ci naw, düng nak awn ng'thu pyein ci, ani ung hleeihlak nak kä om ci. 19 Mose naw thukhän ning pe gui ciah kä kia ne ang? Nangmi tumat naw phi thukhän kä nami läk ci. A i ah kia sei kei nami na ngawn khai ah nami pawng püi ang? ci ne kiak na gui ci. 20 Cun ah chang gui naw, “Nang ung khoshe om ci nei, a u naw nang ning ngawn khai ah pawng püi sei ang? ci ne kiak na tu ba ci gui. 21 Bawipa Jesuh naw, “Kei naw cäi aih vai tumat ka bi ung nami van nami cäi cat ci. 22 Mose naw ‘nami hta gui cu vun-aat ne nami kyon gui vai’ ci sei, kyin hnüüp ung phi ak hmaw cu vun-aat ne nami kyon ci. (Cun cu Mose ah tün law ah kä kiak ci, nami pupa gui ah bi man ah kiak ci. 23 Akhmaw tumat kyin hnüüp ung vun-aat ne kyon ah hmawk ah Mose ah thukhän kaan ah kä ah kiak ung; a i ah kia sei kyin hnüüp ung akgaw ka gai sak ah hmawk ah nami m'lungshe ang? 24 Khan shai awn dang ci düt teng ne käm khoichaa u ne, düng nak awn m'khoichaa nak nami bi vai nei” ci ne kiak na gui ci. 25 Jerusalem ah chang am shah gui naw, “Shin ah chang cu ang vai gui naw ngawn vai ah shui ci gui ah kä kia sei ang? 26 Teng vä, ani naw, chang khli naw a hmuhmat vai ah m'theithang ci nei. Cun ung phi a u naw phi kä maa nak ci nei. Ani cu Messiah ah kiak ci, ciah ang vai gui naw phi akcang ah hmat u ne ang? 27 Messiah cu a law ung a hawi ah kaa lawk ciah a u naw kä hmat khai, cun ung phi shin ah chang ah a law nak cu a u naw phi mi hmat ci nei” cik ci. 28 Taigü im ung m'theithang gui ne a om zah ung Bawipa Jesuh naw, “Nangmi naw kei cu nami na hmat ci, a hawi ah kaa ka law phi nami hmat ci. Cun ung phi kei cu ka mät ah ngaih ah ka lawk ciah kä kiak ci, kei na tüi lawk ci cu düng nak awn kümbe ci, ani cu nangmi naw kä nami hmat ci. 29 Cun ung phi kei cu ani naw na tüi law sei, ani ung kaa ka lawk ciah kia ne, kei naw ani cu ka hmat ci, ci ne m'lau ne pyein ci. 30 Chang gui naw Bawipa Jesuh cu phak khai gui ah tha na tu pang u ne phi, amät ah khin kä gawk phak ci kia sei, a u naw phi kä phak ci gui. 31 Chang khli ung kaa akda naw Bawipa Jesuh cu, zum law u netah, “Messiah a kyum law ung, shin ah chang ah bilawh ah mä, däm pi ciah cäi aih gui vai cu m'dang lawk khai ang? ci ne ng'shik ci gui. 32 Cun ah chang gui naw, Bawipa Jesuh ah mawng ami pyein cu ng'za u netah, pharise gui la taigüpa gui naw, gakap gui cu tüi ne Bawipa Jesuh cu phaa sak gui ci gui. 33 Bawipa Jesuh naw cun ah chang gui-am, Kei cu nangmi awn atäng ah ashäng hta bäng om ba netah, na tüi lawk ciah om nak ah ka hteit ba khai nei. 34 Nangmi naw kei cu nami na shui ung phi kä nami na hmuk khai, a i ah kia sei ci ung, kei ah gawk nak vai ah nangmi kä nami law tu hlawt khai” ci ne kiak na gui ci. 35 Jew chang vai gui naw, “Mik mi naw shui ne kä mi hmuh vai ah, a hawi lam ah hteit khai ang? Mi chang gui ah om nak Karik mang gaw gui ah hteit ne m'theithang gui khai ang? 36 Ani naw nami na shui ung phi kä nami na hmuk khai, ka gawk nak ah phi kä nami law tu hlawt khai, cik ci; cun cu a i a pyein hlü ang? ci ne ami mät ng'thu ci gui. 37 Ami pawi ah ang hning nak pi la ang pyi nak ah hnüüp ung, Bawipa Jesuh cu ng'düi law netah, “Tui gha ci naw kei ah law ne tui aw law sä; 38 Cacim ung om ciah mäih ah, kei na zum ciah chang ah m'lung kyong ung ghin nak tui cu, tui-ci lawng ah mäih ah khawng ne long khai nei” ci ne m'lau ne pyein ci. 39 Cun zah ung Bawipa Jesuh cu ahlüngtai nak kä dang phak ciah kia sei, zum ciah chang gui-am Mumcha theing phi kä ap gui hning phak ciah kiak ci. Cun ah kia sei zum ci gui ah gha law vai ah Mumcha Theing cu pyein ne ang shäu ah kiak ci. 40 Chang khli ung kaa chang akda naw Bawipa Jesuh ah ng'shäu cu ng'za u netah, “Shin ah chang cu profet akcang ah kiak ci nei” cik ci gui. 41 Chang am shah naw, “Messiah cu Kalile kho ung kaa law hning khai ma? 42 Messiah cu David Ghangpughang ah htang'shon, David Ghangpughang ah gawnu Bethlehem ung ng'tüi lawk khai ciah, cacim ung om ciah kä kia sei ang? cik ci gui. 43 Cun ah kia sei Bawipa Jesuh ah mawng pyein ne chang gui ami ngaih ng'pai zawp ci. 44 Chang am shah naw ani cu pha hlü u ne phi a u naw kä phak ci. 45 Gakap gui cu pharise gui la taigüpa gui ah om nak ah law ba u khätah, a i ah kia sei pha ne kä nami law püi ang? ci ne ng'shi gui ci gui. 46 Gakap gui naw, “A u chang naw phi shin ah chang ah mäih ah ng'thu kä pyein man ci nei” cik ci gui. 47 Pharise gui naw, “Nangmi mah mah ah ning m'hleei law gui ne ma? 48 Mi ng'vai gui la Pharise gui ung kaa, ani zum ciah chang om ne ang? 49 Shin ah chang gui cu ng'thukhän kä hmat ci gui ah kia ne, Khanpughi ah taam nak gah pyi ci gui nei” cik ci gui. 50 Cun ah pharise gui ung Nikodemus phi ng'khap tuk ci. Ani cu azan Bawipa Jesuh ah law man ciah chang ah kiak ci. 51 Nikodemus naw, “Mik mi ah thukhän awn pyein ah a kiak ung; a u chang phi akat nak dang khai ah käng shi-en ah, a pyein nak tuba hning vai kä peit-en ah, mi m'kat hning khai ma? ci ne pyein ci. 52 Cun ah chang gui naw, “Nangmi Kalile kho ah kaa ma? Cacim cu teng ba shüm ä, Kalile kho ung a u profet phi kä om man ci, cun cu na hmat khai nei” ci ne kiak nak ci gui.
1 (Cun kawn ah chang gui cu ami im phäh phäh ah hteit ba ci gui. 2 Cun ung phi Bawipa Jesuh läi cu Olive m'htung ah kai ci. A ngawi ung kho ngawi hta ah taigü im ah hteit ba ne chang gui akda law u sei, ngo netah m'theithang gui ci. 3 Thukhän saza gui la pharise gui naw, hnumi tumat cu pami awn ani ng'zaw zah ung hmu u netah pha ne law püi ci gui. Ngami naw cun ah hnumi cu ami ma ah m'düih u netah; 4 Bawipa Jesuh ah ma ah, “Sazapa, shin ah hnumi cu, pami awn ng'zaw ni sei hmu ne kami phaa nei. 5 Thukhän ung Mose naw, “shin ah mäih hnumi cu lung awn vawi ne ngawn vai” ci ne thu na khän gui ci, nang naw a i ah na pyein khai ang? ci ne ng'shik ci gui. 6 Ngami naw Bawipa Jesuh cu m'kat hlü guih u netah, a i ah a pyein law hman ah ci ne, ami m'nüm nak ah kiak ci. Cun ung phi Bawipa Jesuh cu kawp netah, akut khiu awn m'dek chüüt ne gu ne ngok ci. 7 Ngami naw cun ah leng ba ba ne ng'shi laih u khäh tah, Bawipa Jesuh naw, “Nangmi ung kaa ahma kat nak kä om ciah chang naw, ani cu lung awn vawi law ma sä” ci ne kiak na gui ci. 8 Cun kawn ah kawp ne m'dek chüüt ne ngoh ba ci. 9 Cun aci ng'za u netah ang vai ba gui ma ba u sei, tumat täi ah hteit ba zawp ci gui. Hnumi amät bäng Bawipa Jesuh ah pei ah ng'düi ba shüt ci. 10 Bawipa Jesuh cu täu law ba netah, cun ah hnumi am, “Ahawi ang ami hteh zawp, nang na kat nak ning m'khoichaa pek khai, tumat phi kä om ba ne ma? ci ne kiak nak ci. 11 Cun ah hnumi naw, “Bawipa, tumat phi kä om ba ci nei” ci ne pyein ci. Bawipa Jesuh naw, “Kei naw phi na kat nak kä ka ning m'khoichaa khai, hteit baä, cun kawn ah kat nak kä na bi ba vai” ci ne kiak nak ci). 12 Bawipa Jesuh naw, Pharise gui-am, Kei cu khomdek khan ah akdei ah ka kiak ci, kei ah hnu ah na läk ciah chang cu ghin nak akdei gah khai, a i zah ung phi kho hmüp khui ung kä hteit ba khai”, cik ci. 13 Pharise gui naw, “Nang cu na mät ah hmawk ah na saksi ci, cun ah kia sei ngaih gep vai kä kiak ci” cik ci gui. 14 Bawipa Jesuh naw, “Kei naw ka mät ah mawng ka saksi cu, ngaih gep ci. A i ah kia sei ci ung, a hawi lam ah kaa law ne, a hawi lam ah hteh ba vai cu kei naw ka hmat ci, Nangmi naw a hawi lam ah kaa law ne, a hawi lam ah hteh ba vai cu kä nami hmat ci. 15 Nangmi naw chang ah ng'zak hlü bäng ah m'khoichaa nak nami bik ci; kei naw a u ah khan ah phi m'khoichaa nak kä ka bik ci. 16 Kei naw m'khoichaa nak ka bi ung phi cun cu ng'düng ci. A i ah kia sei ci ung kei cu ka mät ka om ciah kä kiak ci, na tüi lawk ciah Kapa Khanpughi awn atäng ah kani om ci. 17 Nangmi ah thukhän ung saksi hnih naw a kawng ät ah ani pyein cu akcang ah kiak ci, ciah om ci. 18 Kei naw ka mät ah mawng ka saksi ci, na tüi lawk ciah Kapa naw phi, kei ah mawng cu saksi ci” ci ne kiak na gui ci. 19 Ngami naw, “Napa cu a hawi ang? ci ne ng'shik ci gui. Bawipa Jesuh naw, “Nangmi naw kei phi kä nami na hmat ci, Kapa phi kä nami hmat ci. Kei nami na hmat vai sü ung Kapa phi nami hmat khai sü te” ci ne kiak na gui ci. 20 Shin cu Bawipa Jesuh naw, taigü im khawh peit nak ah kyong khui ah am theithang gui ah kiak ci. Cun ung phi amät ah akhin kä gawk law phak ciah kiak sei, ani cu a u naw phi kä phak ci. 21 Bawipa Jesuh naw, “Kei ka hteit ba khai, nangmi naw nami na shui khai, cun ung phi nangmi nami kat nak awn nami sik khai, kei ah hteh nak ah nangmi kä nami hteit tu hlawt khai, ci ne kiak na gui ci. 22 Jew chang vai gui naw, “Ani a hteh nak ah mik mi kä mi hteit tu hlawt khai ah pyein ci, amät naw amät ngawn ne sik khai ang? cik ci gui. 23 Bawipa Jesuh naw, “Nangmi cu shin ah m'dek nami kho nak ci, kei cu khan ah kaa ka lawk ci. Nangmi cu shin ah khomdek chang ah nami kiak ci, kei cu shin ah khomdek chang ah kä ka kiak ci. 24 Cun ah kia sei nangmi cu, nami kat nak awn nami sik khai, “Kei cu kei ah ka kiak ci” ka ci cu kä nami zum ah a kiak ung nami kat nak awn nami sik khai” ci ne kiak na gui ci. 25 Ngami naw, “Nang a u ang? ci ne ng'shik ci gui. Bawipa Jesuh naw, “Kei a u ah ka kiak cu, a htük ung ka ning m'thein gui pyi ci. 26 Nangmi ah mawng ka pyein vai akda om ci, nami kat nak ka ning m'kat gui vai phi akda om ci. Kei na tüi lawk ci cu düng ci, ani ung kang zak gui bäng vah, khomdek chang gui-am ka ning m'thein gui ci, ci ne kiak na gui ci. 27 Bawipa Jesuh naw Apa Khanpughi ah mawng a pyein phung cu ngami naw kä hmat ci gui. 28 Cun ah kia sei ani naw, “Chang ah hta cu häi ne nami tai kawn ah vah, ’ Kei cu kei ah'ka kiak ah mawng la kei naw ka mät ah ng'zak hlü ah kä kiak ciah, Pa Khanpughi ah nam cäi ah mäih ah ka bilawh cu nami hmat khai. 29 Kei na tüi lawk ci cu kei awn atäng ah om ci; ani ah ng'zak hlü bäng ah ang täi sei ka bik ci kia sei, ani naw kei ka mät bäng kä na nawng ci” ci ne m'thein gui ci. 30 Cun ah Bawipa Jesuh ah ng'thu ng'zak ciah chang akda naw, Bawipa Jesuh cu zum lawk ci gui. 31 Bawipa Jesuh naw zum ciah chang gui-am, “Nangmi cu kei ah kang thu zum ne, nami bi ung kei ah kang düihpüi ah nami kiak ci; 32 Nangmi naw düng nak cu nami hmat khai, düng nak naw nangmi cu ning m'hlawt gui khai, ci ne kiak na gui ci. 33 Cun ah chang gui naw, “Keimi cu Abraham ah hta ng'shon ah kami kiak ci. A u ah changshäm ah phi kä kami kia man ci, a i ah kia sei ning m'hlawt gui khai, na ci ang? cik ci gui. 34 Bawipa Jesuh naw, “Kei naw akcang ka pyein cu kat nak bik ciah chang phung cu, kat nak ah changshäm ah kiak ci. 35 Chang shäm cu im kyong ung angtäi ah kä om tuk ci, cun ung phi htapa läi cu ang täi ah om ci. 36 Htapa naw a ning m'hlawt gui ah a kiak ung nangmi cu akcang ah nami phiawng khai. 37 Nangmi cu Abraham ah hta ng'shon gui ah ka ning hmat gui ci. Cun ung phi kei ah m'theithang kä ng'za hlü u ne, kei nami na ngawn khai ah nami tha nak ci. 38 Kei cu Kapa ah nam cäi ah mäih ah kang thu ci, nangmi cu nami pa ah pyein ah mäih ah nami bik ci, ci ne kia ne gui ci. 39 Ngami naw, “Keimi ah pa cu Abraham nei” cik ci gui. Bawipa Jesuh naw, “Nangmi cu Abraham ah hta gui ah nami kiak ung, Abraham ah mäih ah nami bik khai. 40 Khanpughi ah ng'thu kang zak ah mäih ah kei naw ka ning m'thein ba gui ci, cun ung phi nami na ngawn khai ah nami tha nak ci, Abraham naw cun ah kä bi te ci. 41 Nangmi läi nami pa ah bi ah mäih ah nami bi ba ci” ci na gui ci. Ngami naw, “Keimi ung Khanpughi bäng kami pa om ci, keimi cu ani ah na hta gui nei” cik ci gui. 42 Bawipa Jesuh naw, “Khanpughi cu nami Pa akcang ah a kiak ung, nangmi naw kei nami nam hni khai, a i ah kia sei ci ung, kei cu Khanpughi ung kaa law ne, ka gawk lawk ci, ka mät ah ngaih ah ka lawk ciah kä kiak ci, ani naw ana tüih law ah kiak ci. 43 Kei ah thu cu a i ah kia sei kä nami hmat ang ci ung, nangmi ung kei ah ng'thu nami hmat nak vai thagui kä ah om su ah kiak ci. 44 Nangmi ah pa cu satan ah kiak ci, nangmi cu nami pa ah ng'zak hlü bäng ah nami bi hlük ci. Satan cu a htük ge ung chang ngawn ciah kiak ci, Ani ung düng nak kä om sei, düng nak awn kä om phung ne hleeihlak thei ci. Ani cu hleeihlak nak ah apa ah kia ne, ang tüi püi ge ah hleeihlak thei ci. 45 Kei naw düng nak akcang pyein-ä sei, nangmi naw kä nami zum ci. 46 Kei naw kat nak kabi ah mawng a u naw m'dang hning khai ang? Kei naw düng nak akcang ka pyein ung a i ah kia sei kä nami zum ang? 47 Khanpughi ung kaa lawk ci naw Khanpughi ah thu ngai ci, nangmi cu Khanpughi ung kaa kä nami lawk ciah kia ne, ani ah ng'thu cu kä nami ngai ci” ci na gui ci. 48 Ngami naw Bawipa Jesuh-am, Nang cu Samaritan chang, khoshe ah kai nei “kami ci cu kä hman ne ma? ci nak ci gui. 49 Bawipa Jesuh naw, “Kei cu khoshe naw kä na kai ci, kei naw Kapa cu kamtam khah ci, cun ung phi nangmi naw kei cu nami na ng'zomsho ci. 50 Kei naw ka mät ah hlüngtai nak vai kä ka shui ci, cun ung phi kei ah hlüngtai nak vai shui ne, kei lam ah om ne, m'khoichak ci cu om ci. 51 Kei naw akcang ka pyein cu, kei ah m'theithang läk ci phung cu ngawi ah phi kä sik khai” ci na gui ci. 52 Ngami naw, “Nang cu khoshe naw a ning kai ah kami hmat ci nei, Abraham si pyi ci, profet gui phi si pyi ci gui, cun ung phi kei ah thu ngai ci cu kä si hlawt khai” na cik ci. 53 Nang cu si pyi ciah kami pa Abraham ah mä na hlüngtai pi ne ma? Profet gui phi si zawp pyi ci gui nei, nang naw na mät cu a u ah nang ngai ci ang? ci ne ng'shik ci gui. 54 Bawipa Jesuh naw, “Kei naw ka mät kamtam khah ung, kei ah hlüngtai nak cu a kholä ah kiak ci. Kei namtam khah ci cu kei ah Kapa ah kiak ci. Ani cu nangmi naw kami Khanpughi nei” nami cik ci. 55 Nangmi naw ani cu kä nami hmat ci, cun ung phi kei naw ka hmat ci. Kä ka hmat ci ka ci ung ka hleei ka pyein ciah kiak khai. Kei naw Kapa cu akcang ah hmat ne ang thu cu ka ngai ci. 56 Nami pa Abraham cu kei ka law vai ah a khin hmu lawk khai kia ne zei ci, a cun hmu tuk cang ci kia ne zeikiai ci, ci na gui ci. 57 Ngami naw, “Nang cu na khokum hma-kip phi kä be phak ci, a i hawk chaa nei, Abraham cu na hmuh tu man vü” cik ci gui. 58 Bawipa Jesuh naw, “Kei naw akcang ka pyein cu, Abraham kä ang tüi pha ung kei ka om pyi ci nei” ci na gui ci. 59 Ngami naw Bawipa Jesuh ami vawih nak vai lung kaw ci gui. Cun ung phi Bawipa Jesuh cu ng'thup ne taigü im ung kaa a hei lam ah hteit ci.
1 Bawipa Jesuh a hteh shüi shüi nak ah anupuk ah amik m'dauh ciah chang cu hmuk ci. 2 Angdüihpüi gui naw, “Sazapa, shin ah chang a mik m'dauh cu amät ah kat nak ah phäh ah ang? ; anupu ah kat nak ah phäh ah ang? ci ne ng'shik ci gui. 3 Bawipa Jesuh naw, “Ani ah mik am dauh cu, amät ah katnak suh ah phi kä kiak ci, anupa ah kat nak ah phäh ah phi kä kiak ci, Khanpughi ah hlüngtai nak ani ung ang dang vai ah hmawk ah kiak ci. 4 Kei na tüi lawk ciah ah bi cu kho adei zah ung mi bik khai. A u naw bi kä abi nak hlawt vai ah kho a münak gawk lawk khai. 5 Kei cu khomdek khan ah ka om zah ung khomdek khan ung akdei ah ka kiak ci, cik ci. 6 Cun ci netah Bawipa Jesuh naw m'dek la ne amshi awn m'thawh ne m'thau ci, cun kawn ah amik m'dauh ah mik cu, ng'nai awn hluk netah, hteit ne Silom tuili ung vam hla ä” cik ci. 7 (Silom ah ming cu, ‘Tui ci’ ciah kiak ci). Ani cu hteit ne a hmai vam hla netah m'dei ne law ba ci. 8 Ani cu ng'zoi ne ei man te ci kia sei, azan ani hmuh man te ciah, ami pei ah kaa gui naw, “ani cu ngo ne ngui ng'zoi man ciah kä kia ne ang? cik ci gui. 9 Chang am shah naw, “ani nei” cik ci gui, am shah naw “Kä ani nei, ani awn täng ciah chang nei” cik ci gui. Amät naw “Kei cu a cun ah chang nei” cik ci. 10 Chang gui naw, “A i hawk cha ah ang na mik am dei law ba” cik ci gui. 11 Ani naw, “Jesuh ming nak ciah chang naw, ng'nai awn kamik na hluk netah, Silom tuili ung nam hla sak sei, vam hla netah kam dei law ba ci” cik ci. 12 Chang gui naw, “Ani hawi ang? ci u sei, cun ah chang naw, “kä ka hmat ci nei” cik ci. Ami ng'Shi ah Mawng 13 Chang gui naw azan amik m'dauh te ciah chang cu, Pharise ah om nak ah law püi ci gui. 14 Bawipa Jesuh naw, ng'nai piang ne cun ah mik am dei sak ba hnüüp cu kyin nak hnüüp ah kiak ci. 15 Pharise gui naw amik am dei law ba ah mawng cu ng'shik ci gui. Ani naw, “Kei ah mik cu ng'nai awn na hluk khätah tui ung vam hla ne, kam dei lawk ci” cik ci. 16 Pharise am shah naw, “Ani cu kyin nak thukhän kä ngai ci, Khanpughi ah kaa lawk ciah kä kiak khai” cik ci gui. Am shah naw, “Kat nak abi ah akiak ung cäi aih vai gui kä bi hning khai sü te” cik ci gui. Cun ah kiak ne ngami cu ami ngaih ng'pai lawk ci. 17 Pharise gui naw, amik m'dauh te ci ah chang-am, “Na mik ning m'dei ba sak ci cu a u chang ang? ci ne ng'shi ba ci gui. Cun ah chang naw, “Ani cu profet nei” ci ne m'thein ba gui ci 18 Cun ung phi Jew chang vai gui naw, ani amik am dauh te tuhbäi am dei law ba cu kä zum u netah, anupa gui khü ne ng'shik ci gui. 19 “Shin ah chang cu nami, hta ang? Ami pyein ah mäih ah anupuk ung amik m'dauh te ci ang? Acun ah a kiak ung ani a i hawkcha ah amik m'dei lawk ciang? ci ne ng'shik ci gui. 20 Anupa gui naw, “Shin ah chang cu kami hta nei, anupuk ge ung amik m'dauh man ci nei. 21 cun ung phi a i chaa ah amik am dei law ba la a u naw amik am dei ba sak cu, keimi naw kä kami hmat ci nei, ani ng'vai law pyi ci kia sei amät ng'shi vä, amät naw hmat khai nei” cik ci gui. 22 Cun ah ami pyein cu Jew chang vai gui naw, Bawipa Jesuh cu Messiah nei, ciah zum ciah chang phung pum nak ung kaa, k'täm vai ah amik bäi pyi ah kia sei, a cun ami kyih ah hmawk ah kiak ci. 23 Cun ah kia sei anupa gui naw, ani ng'vai pyi ci, amät ng'shi vä” ami ci ah kiak ci. 24 Pharise gui naw, amik m'dauh te ciah chang cu khü ba mä u netah, “Khanpughi ah ma ah thukhän ne, düng nak awn na pyein vai, namik ning m'dei sak ba ciah chang cu kat nak bik ciah kami hmat pyi ci” ci nak ci gui. 25 Ani naw, “Cun ah chang kat nak abi la kä ah bi cu kä ka hmat ci, kei ka mik m'dauh man te ci, tuhbäi kam dei law bäng vah ka hmat ci” cik ci. 26 Ngami naw, “Ani naw a i chaa ang abilawh, a i chaa ang na mik a ning m'dei ba sak” ci ne ng'shi ci gui. 27 Ani naw, “Hnü ät ka ning m'thein gui pyi ci, kä nami ngai ci, a i ah kia sei nami ng'zak ba hlü mä ang? Nangmi mä ani ah chang ah nami kia tu hlük ci ma? ci ne ng'shi tu ba gui ci. 28 Ngami naw, “Nang nei ani ah nik chang, keimi läi Mose ah nak chang gui nei. 29 Khanpughi naw, Mose am thu am thein cu kami hmat ci, cun ung phi shin ah chang a hawi kaa a law ah kä kami hmat ci” cik ci gui. 30 Ani naw, “Nangmi naw ani a hawi kaa lawk ciah kä nami hmat ung phi, ani naw kei ah mik nam dei sak pyi ci nei” ci na gui ci. 31 Khanpughi naw kat nak bik ciah taigü kä ngai ci, Khanpughi kyih-aa ne ang zak hlü ah bik ciah chang ah taigü vah ngaih pek ci. 32 Cau puzin ung tün ne, anupuk ung amik m'dauh ci m'dei ba sak ci, ci cu kä mi ng'za man ci. 33 Ani cu Khanpughi ah kaa lawk ciah kä a kiak ung shin gui kä bi m'khüt khai sü te” cik ci. 34 Ngami naw, “Nang cu nanupuk ung kat nak awn nang vai lawk ciah kia lang ne, keimi na nam thein gui ci ma, ci ne pum im ung kaa k'täm ci gui. 35 Cun ah a mik täm kawn ah ani cu Bawipa Jesuh naw hmu ba netah, “Nang naw chang ah Htapa na zum ci ang? ci ne ng'shik ci. 36 Cun ah chang naw, “chang ah Htapa ci cu a u ang? Nam thein tuä, ka zum khai” cik ci. 37 Bawipa Jesuh naw, “Nang naw ani na hmu man ci, ani cu tuhbäi nang awn nani ng'thu ciah kiak ci. 38 Amik m'dauh te ciah chang naw, “Bawipa, ka ning zum ci nei” ci ne Bawipa Jesuh ah ma m'khu khudong ne kyap ci. 39 Bawipa Jesuh naw, “A mik m'dauh gui, ami mik m'dei ne amik m'dei ci gui ami mik m'dauh khai ah m'khoichaa nak ka bik khai, khomdek khan ah ka lawk ci” cik ci. 40 Bawipa Jesuh a pei ah om ciah pharise gui naw, Bawipa Jesuh ah ng'thu cu ng'za u netah, “Keimi mä kami mik m'dauh ciah na pyein ci ma? ci ne ng'shik ci gui. 41 Bawipa Jesuh naw, “Nangmi nami mik am dauh vai sü ung tuhbäi nami kat nak kä om khai sü, cun ung phi keimi kami m'dei ci nei, nami cik ci kia ne, nangmi ung kat nak om ci” cik ci.
1 Bawipa Jesuh naw, “kei naw akcang ka pyein cu, htochaam ah kyong ah m'kawt ung kä lut ne, a hei lam ung lut ci cu m'guk ei ah kiak ci. 2 M'kawt ung lut ci cu htoshäm ah kiak ci. 3 M'kawt ngäng naw htoshäm-am m'kawt hmawn pek ci. Hto gui naw, htoshäm ah k'aw ngai ci gui. Ani naw hto gui ami ming ung khü gui ne khahpüi gui ci. 4 Hto gui a chah gui van ung, amät ma ne hteit sei hto gui naw ak'aw hmat ne a hnu ah läk ci gui, ngami naw chang hei kä läk ci gui, 5 Chang a hei ami hmuh ung, ani ah k'aw kä hmat ci gui kia ne püi ne dawng ci gui. 6 Bawipa Jesuh naw, “Shin ah m'tumtäng nak am thein gui cu a i ah pyein hlü ah kä hmat ci gui. 7 Bawipa Jesuh naw a pyein ba mä cu, Kei naw akcang ka pyein cu, kei cu hto gui ah luh nak m'kawt ah ka kiak ci. 8 Kei ah ma ung lawk ci gui avan cu, m'guk ci gui ah kiak ci, ngami ah ng'thu cu hto gui naw kä ngai ci gui. 9 Kei cu m'kawt ah ka kiak ci, cun ah m'kawt ung kei awn lut ci phung cu hun nak gah khai, ani cu lut ng'laang ne khu ali nak hmuk khai. 10 M'guk ei cu, m'guk khai, ngawn khai, plawhsheh khai ah lawk ci. Kei läi cu nangmi naw ghin nak nami gah vai la ghin nak akümbe vai ah ka lawk ci. 11 “Kei cu Htoshäm Ni ah ka kiak ci. Htoshäm ni cu hto gui ah hmawk ah a hnun ghin nak phi pek ci. 12 Chang ghüh cu htoshäm ah kä kiak ci, hto gui ah ami mah ah phi kä kiak ci, cun ah kia ne, hngei a law ung hto gui cu nawng shüt gui ne dawng sei, hngei naw hto gui cu lo gui ci, hto gui phi püi ne dawng zawp ci gui. 13 Chang ghüh cu ng'vah ah kiak ne, hto gui nawng gui ne dawng ci. 14 Kei cu htoshäm ni ah ka kiak ci, Kapa naw kei cu na hmat ci, kei naw phi Kapa cu ka hmat ci, a cun ah mäih ah kei naw ka hto gui ka hmat gui ci, ngami naw phi kei cu na hmat ci gui. Kei cu ka hto gui ah hmawk ah sih vai ka zum ci. 16 Shin ah chaam kyong ah kä lut law tu phak ciah a hei hto gui phi kei naw ka khäm ci, cun gui phi ka chum ba gui khai, ngami naw kang thu na ngai khai gui. Cun ah kia sei htomak tumat htoshäm tumat bäng ah kiak khai. 17 Kei cu ghin nak gah ba vai ah hmawk ah ka ghin nak ka pek ci kia sei, Kapa naw kei cu nam hni ci. 18 A u naw ghin nak kä na peit sak ci, ka mät ah ngaih ah ka peit ah kiak ci. Kei ung ghin nak ka peit nak hning la ka gah nak ba hning om ci. Cun ah ka bi vai ah Kapa naw ana täk ah kiak ci. 19 Cun ah a ng'thu ah phäh ah chang gui ami ngaih ng'pai ba mä ci. 20 Chang am shah naw, “Ani cu khoshe ah kai, ak gu nei, a i vai ang thu nami ngaih ang” cik ci gui. 21 Chang am shah naw, “Khoshe ah kai cu, cun ah kä ng'thu hning khai, khoshe ah kai naw a i chaa ah a mik m'dauh käm dei ba sak hlawt khai” cik ci gui. 22 Cun zah cu khohting kho ah kia ne, Jerusalem ung taigü-im ap nak pawi bi zah ci gui. 23 Bawipa Jesuh cu taigü kyong, Solomon ah k'caw ah hteit shüi shüi ci. 24 Chang gui naw ani cu k'Koi u netah, “Keimi naw kami ngaih khit vai ah nang, a i güt na kiak khai ang? Messiah ah na kiak ung keimi-am ang dang ah nam thein gui ä” cik ci gui. 25 Bawipa Jesuh naw, “Kei naw ka ning n'thein gui pyi ci, cun ung phi nangmi naw kä nami zum ci. Khanpughi ah nam cäi ah kabi nak naw kei ah mawng cu saksi ci. 26 Nangmi cu kei ah htome ah kä nami kiak ci kia ne, kei cu kä nami na zum ci. 27 Ka htome gui cu kang thu ngai ci gui, kei naw ngami ka hmat gui ci, ngami naw phi kei na läk ci gui. 28 Kei naw ang täi ghin nak ka peit gui ah kia ne, ngami kä si hlawt khai gui. A u naw kei ah kut ung kaa, ngami cu kä na gut hlawt khai. 29 Ngami gui kei-am na ap ciah Kapa cu, avan ah hlüngtai pi ci kia ne, a u naw phi cun ah htome gui cu Kapa ah kut ung kaa kä gut hlawt khai. 30 Kapa la kei cu tumat ah kani kiak ci. cik ci. 31 Cun ci khätah chang gui naw ami vawih nak vai lung kaw ba mä ci gui. 32 Bawipa Jesuh naw, “Kapa naw na tüi täk sei, kei naw akni gui ka bi pyi ci, cun gui zung kaa a i ah phäh ah, kei lung awn nami na vawih hlü ang? cik ci. 33 Ngami naw, “Akni nabi ah phäh ah kami ning vawih hlü ah kä kiak ci, nang cu chang ah kia lang ne, Khanpughi ah ng'shei ne nang thu ah phäh ah kami ning vawi khai” cik ci gui. 34 Bawipa Jesuh naw, “Nami ng'thu khän ung Khanpughi naw, Nangmi cu Khanpughi ah mäih ah nami kiak ci ci ne pyein ci. Cacim ung om ci cu angtäi ah bä ciah mi hmat ci. 35 Khanpughi naw ang thu a peit gui cu, “Khanpughi ah mäih ah kia ci gui” cik ci. 36 Khanpughi naw kei cu na ghü ne khomdek khan ah na tüi lawk ci. Cun ah kia sei, ‘Kei cu Khanpughi ah na Htapa ah ka kiak ci’, ka ci ah phäh ah Khanpughi m'kat ne thu ka pyein ah, a i chaa ah nami pyein hning khai ang? 37 Kapa ah ng'zak hlü ah kä ka bi ung kä nami na zum vai, kabi ung kei kä nami na zum ung phi kabilawh cu nami zum vai. 38 Cun ung vah Kapa cu kei ung om sei, kei cu Kapa ung ka om cu, na mi hmuhmat lawk khai” cik ci. 39 Cun ci khätah chang gui naw, Bawipa Jesuh cu phak khai gui ah tha nak ci gui, cun ung phi ani naw lek gui ne a hei ah hteit ci. 40 Bawipa Jesuh cu Jordan tui hei gaa ah vang kat ba ne, tuihnim Johan naw, tuihnim a peit nak man ah hteit ba ne om ci. 41 Chang akda cu Bawipa Jesuh ah gawk law u netah, “Johan naw a i phi cäcat vai käm dang ci, cun ung phi shin ah chang ah mawng Johan ah pyein avan cu küm ci nei” cik ci gui. 42 Cun ah kia sei, chang akda naw Bawipa Jesuh cu zum lawk ci gui.
1 Bethani gawnu ah om ciah Lazaruh cu gaw ci. Bethani cu Mari la Mahta ni ami om nak ah gawnu ah kiak ci. 2 (Shin ah Mari cu Bawipa Jesuh akho, tui ng'ui awn shawi ne alusam awn m'si ciah kiak ci, gaw ciah Lazaruh cu ani ah be ah kiak ci). 3 Cun ah ng'pai nau goi naw, “Bawipa, nang naw nam hni ah chang cu gaw ci nei” ci ne chang m'cäi lawk ci goi. 4 Bawipa Jesuh naw cun cu ng'za netah, “Shin ah gaw nak cu, sih nak vai ah kä kiak ci, Khanpughi ah hlüngtai nak ang dang nak vai la a shin ah gaw nak awn Khanpughi ah Ahtapa ah hlüngtai nak ang shü khang nak vai ah kiak ci. 5 Bawipa Jesuh naw Mahta la Mari ni Lazaruh ni cu m'hni gui ci. 6 Bawipa Jesuh cu Lazaruh ah gaw ang zak kawn ah a om nak ah hnüüp goi om ba ci. 7 Cun kawn ah “Judea kho ah mi hteit ba khai nei” ci ne ang düihpüi gui kiak na gui ci. 8 Angdüihpüi gui naw, “Zasapa, chang gui naw lung awn ami ning vawih hlü nak kä shou phak ci maw, a cun ah kho bä ah na hteit ba khai ma? cik ci gui. 9 Bawipa Jesuh naw, “Hnüüp ät ung nazi gha-lei-goi om ciah kä kia ne ang? Kho hnüüp ung hteit ci cu akdei hmuk ci kia ne, kä m'thuih shawng ne akni ah hteit ci. 10 Khomü ung hteit ci cu akdei kä hmuk ci kia ne m'thuihshawng ne ng'täng man ci” cik ci. 11 Bawipa Jesuh cu cun ah a pyein kawn ah, “Mi teihpüi Lazaruh cu ip ci nei, ani kam tho ba khai ah ka hteit khai” cik ci. 12 Angdüihpüi gui naw, “Ani ip ciah a kiak ung gai law ba khai nei” cik ci gui. 13 Bawipa Jesuh naw Lazaruh asih cu a pyein ah kiak ci, cun ung phi angdüihpüi gui naw ih man ah a ih amawng a pyein ah ngai ci gui. 14 Cun ah kia sei Bawipa Jesuh naw, “Lazaruh sik ci nei; 15 Ani a gaw zah ung kei kä ka gawk law cu nangmi naw nami zum vai ah phäh ah kia sei, nangmi ah phäh ah ka zei ci, ani ah mi hteit khai” cik ci. 16 (Ang phi ah ming ciah) Thoma naw, “Sazapa awn atäng ah sih vai ah mi van mi hteit tuk khai” cik ne apaw gui kiak na gui ci. 17 Bawipa Jesuh a gawk law zah ung Lazaruh ami m'cim nak cu hnüüp hli lüng pyi ciah kiak ci. 18 Bethani cu Jerusalem awn maing goi phi kä ng'lak nak ci. 19 Jew chang gui akda cu Mari la Mahta ani be ah sih nak ah law u ne thüi tu püi ci gui. 20 Mahta cu Bawipa Jesuh a law ng'za netah, “va dou khai ah hteit ci, Mari cu im ah om shüt ci. 21 Mahta naw, “Bawipa, nang na om vai sü ung kabe kä sik khai süte; 22 Cun ung phi nang Bawipa naw nang zoih ung, Khanpughi naw ning pek khai ah, kei naw ka hmat ci nei, cik ci. 23 Bawipa Jesuh naw, “Nabe cu ghing ba khai nei” cik ci. 24 Mahta naw, “ak hnubäih kho hnüüp sik ci gui ami thawh law ba ung, tho ba ne ghing ba khai ah ka hmat ci nei” ci ne pyein ci. 25 Bawipa Jesuh naw, “Kei cu thawh nak ba la ghin nak ah ka kiak ci, kei na zum ciah chang cu, a sih ung phi ghing ba khai; 26 Kei na zum ne tuhbäi ghing ciah chang cu, a i zah ung phi kä sik khai, kang thu na zum ci ang? ci nak ci. 27 Mahta naw, “Ka zum ci nei Bawipa, nang cu khomdek khan ung kyum lawk ciah Khanpughi ah Htapa, Messiah ah na kiak cu, ka zum ci nei” ci ne pyein ci. 28 Cun kawn ah Mahta cu im ah hteit ba ne a nau Mari cu va khü ba netah, “Bawipa Lawk ci, nang ah mawng phi na ng'shik ci, cik ci. 29 Cun ang zak vai-am Mari cu ng'düi law ne, Bawipa Jesuh ah om nak ah lawk ci. 30 Bawipa Jesuh cu pigaw kyong ah kä gawk phak ci. 31 Mahta naw ava dou nak ung om zah ci. Mari ngoh püi ne im ah om ciah chang gui naw, Mari ak zaang ah ng'düi law ne hteit khätah, ng'ciim hmun ah hteit khai ah ngai ne läk tuk ci gui. 32 Mari cu Bawipa Jesuh ah om nak ah gawk ne, Bawipa Jesuh cu hmu law netah, “Bawipa, nang na om vai sü ung kabe kä sik khai süte nei” cik ci. 33 Bawipa Jesuh naw, Mari la ani awn lawk ci gui ah chang gui ami van kyap u sei hmu gui netah, ang htei ah thüi ne am lung kyong ah azä ci. 34 Bawipa Jesuh naw, “A hawi ang nami m'ciim? ci ne ng'shi gui ci. Ngami naw, “Bawipa, law ne teng law ä” cik ci gui. 35 Bawipa Jesuh cu kyap ci. Cun hmu u netah, Bawipa Jesuh akchang gui naw, 36 “Teng tu vä, ani naw Lazaruh cu ang htei ah m'hni ci nei” cik ci gui. 37 Chang am shah gui naw, amik m'dauh hngaw m'dei ba sak ciah chang naw, Lazaruh cu käm ghin ba hlawt ne ma? cik ci gui. 38 Bawipa Jesuh cu ang htei ah azä aih netah, ng'ciim hmun ah hteit ci. 39 Phuh hmun cu lung awn khai ci gui. Bawipa Jesuh naw, “Lungnu cu m'hnawn vä” cik ci. Sik ciah pai Mahta naw, “tuhta läi thu lawk khai nei, asih nak hnüüp phli law pyi ci” cik ci. 40 Bawipa Jesuh naw, “Nang naw na zum ah a kiak ung Khanpughi ah bämang nak na hmuk khai nei, ci ne ka pyein ciah kä kia ne ma? cik ci. 41 Cun ah kia sei chang gui naw, lung cu m'hnawn ci gui. Cun kawn ah Bawipa Jesuh naw, khankho dang netah “Kapa, ka taigü na ngaih pek ci sei, ka zeikiai ci nei; 42 Kapa nang naw kak taigü na na ngaih peit cu ka hmat ci, cun ung phi nang naw kei na na tüih law cu, chang gui naw ami hmat vai ah, ngami ah hmawk ah ka pyein ah kiak ci nei” cik ci. 43 Cun kawn ah “Lazaruh, tho law ba ä” ci ne m'lau khätah si sei amik phuh cu akut la akho ung zawknak zih awn ng'hlawp ne, 44 a hmai phi hlawp nak naw uk sei tho ne lut lawk ci. Bawipa Jesuh naw, “Ang hlawp nak ah zih cu k'phian pe vä” ci ne kiak na gui ci. 45 Cun zah ung Mari ah om nak ah lawk ciah chang akda naw, Bawipa Jesuh ah bilawh cu hmu tu u netah, Bawipa Jesuh cu zum lawk ci gui. 46 Amshah naw, Pharise gui ah hteit ne, Bawipa Jesuh ah bilawh gui cu m'thein tu gui ci gui. 47 Cun ah kia sei, taigü ng'vai gui la pharise gui naw ng'cuh u ne kawngsi ah hteit u netah, Shin ah chang naw cäi aih vai gui akda bi pyi ci, mik mi naw a i kä bi ne mi om khai ma? 48 Shin ah chang ashin ah mi nawng ung chang päng naw ani cu zum lawk khai gui. Cun ung Roman bawi gui law u ne, na ci law gui khai gui, mi taigü im gui phi plawh lawk khai gui, mi kho phi m'di lawk khai gui” ci ne pyein ci gui. 49 Ngami ung kaa cun ah khokum ung taigütung ah kiak ciah Kaiaphas naw, 50 “Nangmi nami ang ci nei, Jew pakhui avan didap ah k'dam ah, pakhui avan ah hamwk ah chang tumat asih ung bä pi khai ah kä nami hmat ci ma? ci ne kiak na gui ci. 51 (Cun aci cu ani amät ah ngaih düt ah a pyein ah kä kiak ci, ani cu acu kum taigütung ah kiak ciah kia ne, Jew chang avan ah hmawk ah Bawipa Jesuh asih vai ah mawng la, 52 akho hei hei ah püipawng ci gui ah Khanpughi ah chang gui, ami bum ba vai ah hmawk ah Bawipa Jesuh asih vai ah mawng cu ng'dawt ne a pyein ah kiak ci). 53 Cun ah hnüüp ung tün ne Jew chang vai gui cu, Bawipa Jesuh ngawn vai ah tängpang ne pawngpüi ci gui. 54 Cun ah kia sei Bawipa Jesuh cu Judea kho ung ang ngaih ah kä hteit hton ba ci. Cun ung kaa ng'düi ba ne, kho ng'gau kho ah pei Ephaim gawnu ah hteit ne, ang düihpüi gui awn atäng ah om ci gui. 55 Jew chang vai gui ah pasakha pawi ng'et law ciah kia sei, pigaw zung ah chang gui pawi kä a gawk law pha ung theingthap nak bi vai ah Jerusalem ah gawk lawk ci gui. 56 Ngami naw Bawipa Jesuh cu shui ci gui. Ngami cu taigü im ah ng'bum law u netah, “Ani cu shin ah pawi ung kä law tuk khai ah hmatphyak ci nei, a i ah nami ngai tuk ci ang? ci ne ami mät ng'cecäk ci gui. 57 Taigüpa gui la ang vaipi gui naw, “Jesuh cu pha vai kia sei, ani ah om nak hmat ciah chang naw a pyein law vai nei” ci ne ng'thu ami m'shäk zawp pyi ah kiak ci.
1 Pasakha pawi ami bi nak vai hnüüp chuk m'hni ba khätah, Bawipa Jesuh cu Bethani ah hteit ne, sih nak ung kaa tho ba ciah Lazaruh ah im ah om tuk ci. 2 Bawipa Jesuh-am mü-ei m'bei vai ah Mahta naw ei loi ne chang ci. Bawipa Jesuh awn atäng ah vun ne, Lasaruh phi ei vai tuk ci. 3 Cun zah ung Mari naw ang htei ah aphu küi ciah Naduh tuing'ui awn Bawipa Jesuh ah akho cu hluk netah, alusam awn htuut ne ghu pek ci. 4 Cun ah tuing'ui cu kyong khui avan ung ng'ui lawk ci. 5 Angdüihpüi tumat Bawipa zoi khai ah chang naw, “a i ah kia sei shin ah tuing'ui cu ngui phia thum ah zoi ne pyamthaam ci gui-am kä na peit gui ang? cik ci. Ani cu angawi ah ga ah kut ung Bawipa Jesuh ap khai ah chang ah kiak ci. 6 ani naw a cun ah a pyein cu, pyamthaam ci gui am gein gui su ah kä kiak ci, m'gu man te ci kia netah acun ah a pyein ah kiak ci. Ani cu ngui ng'ip k'bah ci kia ne ngui m'gu ne mang ci ci. 7 Bawipa Jesuh naw, “Cun ah hnumi cu kä tüihtook vä, kei ah ka gook htüm law ung kaa vai ah, shin ah tuing'ui cu gim sä. 8 Pyamthaam ci gui cu nangmi awn angtäi ah nami om ci, kei läi cu nangmi awn angtäi ah kä ka om khai” ci ne kiak na gui ci. 9 Bawipa Jesuh Bethani ah a gawk law cu ng'zak u netah chang akda gawk law ci gui. Ngami cu Bawipa Jesuh ami hmuh vai bäng ah kä kiak ciah, Bawipa Jesuh naw sih nak ung kaa am ghin ba ah, Lasaruh phi hmu hlük ci gui. 10 Taigüpa gui naw Lasaruh ngawn vai ah pawngpüi ci gui. 11 A i ah kia sei ci ung, Lasaruh ah hmawk ah Jew chang gui naw, ngami cu nawng-en gui ne, Bawipa Jesuh cu ami zum law ah hmawk ah kiak ci. 12 A ngawi ung Pasakha pawi ung lawk ciah chang khli naw, Bawipa Jesuh cu Jerusalem ah lawk khai ci cu ng'zak ci gui. 13 Ngami cu hliip hnah, m'chum hnah gui kawt ne law u netah, “Khanpughi ah bämang nak cu m'hlüngtai vä! Khanpughi ah ang ming awn kyum lawk ciah Bawipa ah khan ah hlüngtai nak om sä! Israel Ghangpughang ah khan ah Khanpughi ah m'shumpyuk nak om sä!” ci ne m'lau ne Bawipa Jesuh cu ana dou ci gui. 14 Cacim ah aküm vai ah Bawipa Jesuh cu ng'se nong tumat hmu netah ng'cum ne lawk ci. Cacim ung, “Zion mangkho kä na kyih vai, 15 Nami Ghangpughang cu ng'se nong ung cum ne gawk lawk ci nei” ciah om ci. 16 Ang düihpüi gui naw akhtük ung shin ah cacim cu kä hmat ci gui. Bawipa Jesuh ah bämang nak ang dang law kawn ah shin ah cacim naw Bawipa ah mawng a pyein la, Bawipa ah hmawk ah ngami ah bilawh gui cu shüm hmat lawk ci gui. 17 Bawipa Jesuh naw Lasaruh cu ng'cim hmun ung kaa khü ne sih nak ung kaa am ghin ba cu hmu tute ciah chang gui naw, 18 Cun ah cäi aih vai ah mawng gui cu ngak ba u sei, ng'zak tuk ciah chang gui cu Bawipa Jesuh ana dou vai ah gawk lawk ci gui 19 Pharisee gui naw, “Mik mi a i phi mi näng nak kä om ci, teng tu vä, khomdek khan avan naw ani ah hnu ah läk law pyi ci gui nei, ci ne ami mät ng'cecäk ci gui. 20 Ami khawihnah taigü nak ung pum tuk khai gui ah Jerusalem ah hteit ci ah chang gui ung, Karik chang amshah hteit tuk ci gui. 21 Ngami cu Philip (Kalile kho Bethsaida ah kaa) ah hteit u netah, “Saza, Keimi maw, Bawipa Jesuh kami hmu hlük ci” ci ne pyein ci gui. 22 Philip naw Andaru ah hteit ne acun ah amawng cu m'thein tu khätah, ngani cu Bawipa Jesuh ah teit ni ne acun ah amawng cu pyein ci goi. 23 Bawipa Jesuh naw, “Chang ah Htapa ah bämang nak ang dang nak ah khin gawk lawk ci nei, 24 Kei naw akcang ka pyein cu, geit m'shi cu m'dek ung kä va kia ne, kä thuce ne a om ah a kiak ung, amät ah kawn ah kä da lawpi hlawt khai nei. M'dek ung va kia netah, athu ce ung vah akda ah vuipai m'theih tak ba man ci; 25 Amät ah ghin nak vai bäng m'hni ci cu didap ci nei; khomdek khan ah mät ah ghin nak ah kä ng'vang ciah chang cu angtai ghin nak gim ciah kiak ci nei. 26 Kei ah bi bi hlük ci naw ka hnu ah na läk khai, kei ah chang cu a hawi ka om ung phi kei awn atäng ah om tuk khai. Kei ah bi bik ci cu Kapa Khanpughi naw m'tamkhah khai nei” cik ci. 27 “Tuhbäi kei cu kamlung thüi ci nei, a i ci ne ka taigü khai aw? Kapa, tuhbäi kei ah khan ah gawk lawk khai ah akhin ung kaa na phiawn sak kä! ka cik khai ang? 28 Cun ung phi kei cu shin ah caiza nak ah a khin cu ka aut khai ah ka lawk ci nei. O Kapa, Na ming theing ung na bämang nak dang sak ä” ci ne kiak ci. Acun vai-am Khankho ah kaa thang lawk ciah k'aw naw, “Kei naw ka ming theing ah bämang nak cu kang dang sak pyi ci nei, cun kawn ah phi ka dang sak ba khai nei” ci ne pyein ci. 29 Cun zah ah ng'düi tuk ciah chang gui cu acun ah k'aw ng'za tu u netah, chang amshah naw, “kho ang hmum nei” cik ci, chang anshah naw, “khankho chang naw ani cu zuk thu püi ci nei” ci sei ami mät ng'thu ci gui. 30 Cun ung phi Bawipa Jesuh naw ngami-am, “Shin ah k'aw agawk law cu, kei ah phäh ah kä kiak ci, nangmi ah phäh ah kiak ci nei. 31 Shin ah khomdek cu tuhbäi m'khawichaa nak gah pyi ci nei, khomdek khan uk ci cun phi tuhbäi htin lawk khai nei. 32 Kei cu m'dek ung kaa chang ne k'phäi nak ka gah kawn ah chang avan cu kei ah gawk lawk khai ah ka thäm khai nei” cik ci. 33 (Shin ah pyein nak ung ani cu a i ah mäih ah asih vai ah mawng a pyein ah kiak ci. 34 Chang gui naw, “Keimi ah thukhän ung, Messiah cu angtäi ah ghing khai, ciah om ci; chang Ahtapa cu m'dek ung kaa han k'phäi nak gah khai, na ci cu a i ang? chang ah Htapa cu a u ang? ci ne ng'shik ci gui. 35 Bawipa Jesuh naw, “Akdei cu nangmi ung a shäng hta nei om ba khai. Kho hmüp naw kä a ning küp gui vai ah akdei ah om zah ung hteit hton vä; hmüp khui ung hteit hton ci naw ani ahawi lam a hteh ah kä hmat ci nei. 36 Cun ah kia sei akdei ah om zah ung zum tu vä, cun ung nangmi cu akdei ah hta ah nami kiak khai nei” ci ne kiak na gui ci. Cun ah ng'thu a pyein kawn ah Bawipa Jesuh cu ngami naw kä ami hmuh ba vai ah ng'thup ne om ci. 37 Ami hmuh vai ah cäi aih vai gui m'dang sei phi ngami naw kä zum ci gui. 38 Cun cu prophet Isaiah ah ng'thu aküm nak ah kiak ci; Cun ah thu ung; “Bawipa, Keimi ah ng'thu pyein cu a u naw ang a zum ve? Bawipa naw ahlüngtai nak cu a u chang ung ang ang dang sak? ciah kiak ci. 39 A cun ah mäih ah ngami ung zum nak hning vai kä om ci. Cun cu Isaiah naw; 40 “Khanpughi naw ami mik m'dauh sak gui ne ami m'lung khai pe gui ci nei, Cun ah kia sei, ami mik naw a i kä hmuk ci, ami m'lung naw a i kä hmat ci nei, Kei naw ka gai sak gui vai ah Kei ah om nak ah a u phi kä law ba ci nei, ci ne Khanpughi naw pyein ci” ciah guk ci. 41 Isaiah cu Bawipa Jesuh ah bämang nak hmuh pyi ciah kia ne, ani ah mawng cu shin ah apyein ah kiak ci. 42 Cun ung phi huham nak om ciah Jew chang akda naw Bawipa Jesuh cu zum ci gui. Cun ung phi pharisee gui naw ngami cu pum im ung kaa amik täm gui vah kyi u netah, a u naw phi azum nak ah mawng cu ang dang ah kä pyein ci. 43 Ngami cu Khanpughi ah m'tamkhah nak ah mä, chang ah m'tamkhah nak cu m'hni pi ci gui ah kiak ci. 44 Bawipa Jesuh naw, akdäm ah m'lau ne a pyein cu, “Kei na zum ci cu kei bäng na zum ciah kä kiak ci, kei na tüi lawk ci phi zum ciah kiak ci. 45 Kei na hmuk ci cu kei na tüi lawk ci phi hmuk ciah kiak ci nei. 46 Kei cu m'dek khan ung akdei ah kia ne ka lawk ci, kei na zum ci cu kho hmüp khui ung kä om ba khai. 47 Kei ah ng'thu ng'za lang ne kä läk ciah chang cu kei naw m'khoichaa nak kä ka pek khai; kei cu m'dek khan kam khoichak khai ah kä ka lawk ci, ka hun khai ah ka lawk ci. 48 Kei na hnu ng'tuk püi ne kei ah ng'thu kä ngai ciah chang m'khoichak khai tumat om ci. Akhnu hnüüp ung kei ah ng'thu cu cun ah chang m'khoichak ciah bawi ah kiak khai. 49 A i ah kia sei ci ung, kei naw kamät ah ngaih ah thu ka pyein ciah kä kiak ci, na tüi lawk ciah Kapa ah huham awn ng'thu ka pyein ah kiak ci. 50 Cun ah huham ng'thu naw angtäi ghin nak pek ciah ka hmat ci. Ka pyein gui ah ng'thu phung cu Kapa ah nam cäi gui bäng bäng ah kiak ci” ci ne pyein ci.
1 Akhin cu Pasakha pawi agawk nak vai hnüüp ät m'hni ba ci. Bawipa Jesuh naw khomdek nawng shüt ne Apa ah a hteh nak ba vai ah akhin a gawk law cu hmat ci. Ani naw khomdek khan ah ak chang gui cu ang htei ah m'hni gui ci, kho ang pyi ung khüt khai ah m'hni gui ci. 2 Bawipa Jesuh la ang Düihpüi gui cu mü-ei ei ci gui. Khoshe naw Simon Iskariot a hta Judas cu, gaa ah kut ung Bawipa Jesuh cu a ap vai ah am lung kyong ah am cäi pyi ah kiak ci. 3 Apa naw hlüngtai nak akbe ah a peit cu Bawipa Jesuh naw hmat ci; Khanpughi ah kaa law ne, Khanpughi ah a hteh ba vai cun phi hmat ci. 4 Cun ah kia sei, a ngoh nak ung kaa ng'düi law ne, a suinu cu sut netah, hmai ghunak la ne akhei cu ven nak ci. 5 Cun kawn ah tuiko ung tui kei ne ang düihpüi gui ah khaw cu m'si netah, hmai ghu nak kawn ami kho cu ghu pe gui ci. 6 Simon Peter ah gawk khätah, Peter naw, “Bawipa kei ah kho nam si khai maa? cik ci. 7 Bawipa Jesuh naw, “Kei ah bi cu tuhbäi nang naw kä na hmat ci, cun ung phi ngawi ah na hmat khai nei” ci ne kiak nak ci. 8 Peter naw, “nang Bawipa naw kei ah kho cu a i zah ung phi kä nam si khai nei” cik ci. Bawipa Jesuh naw, “Kei naw na kho kä ka ning m'si ung, nang cu kei ah ng'düihpüi ah kä na kia ba khai” ci ne kiak nak ci. 9 Peter naw, “Bawipa, ka kho bäng ah kä kiak ciah ka kut la ka pum phi nam si ä” cik ci. 10 Bawipa Jesuh naw, “Tui ng'si pyi ci cu apum avan theing pyi ci kia sei, akho bäng m'si vai hlü ci. Nangmi ung kaa tumat ah kawn ah nami van nami theing pyi ci nei” ci ne pyein ci. 11 (Bawipa Jesuh naw gaa ah kut ung ap khai ah chang cu hmat pyi ciah kia netah, tumat ah kawn ah nami van nami theing pyi ci nei’ aciah kiak ci). 12 Bawipa Jesuh cu ang düihpüi gui ah kho am si kawn ah asuinu sui ba ne ngo tu ba ci. Cun kawn ah Bawipa naw, “nangmi ah khan ah kabi cu nami hmat ci ang? ci ne ng'shi gui ci. 13 “Nangmi naw kei-am, ‘Saza awi, Bawipa awi’ ci ne nami na khü ci. Acun ah ka kiak ci kia sei, acun ah nami na khü cu nik ci. 14 Kei cu nami Bawipa la nami saza ah ka kiak ci, cun ung phi nami kho kam si pyi ci. Cun ah kia sei nami mät gui nami kho nami ng'si tu peit vai. 15 Nangmi ah khan ah ka bi ah mäih ah nami mät gui ung nami bi vai ah ka ning m'shüm thein gui nei. 16 Kei naw akcang ka pyein cu, “Changshäm cu khuimah ah mä kä tai pi man ci. 17 Tuhbäi nangmi naw ng'thu düng nami hmat pyi ci, a cun ah mäih ah nami om ung, nangmi ung zeikiai na om khai”. 18 “Nangmi nami van ka ning pyein gui ah kä kiak ci; ka ning ghü gui ah kia sei ka ning hmat gui zawp ci. Cun ung phi cacim ung, “Kei ah buh ei ci naw kei na khep ba ci nei” ci cu kümbe khai nei. 19 Shin ah mawng gui ng'dawt ne ka ning m'thein gui cu, ka pyein gui akcang ah a kiak law hnüüp ung ‘Kei cu Kei'ah ka kiak ah mawng nami zum vai ah hmawk ah kiak ci. 20 Kei naw akcang ka pyein cu, “Kei ah tüih law dou ci cu kei na dou ciah kiak ci, kei na dou ci cu kei na tüi lawk ci dou ciah kiak ci” ci ne m'thein gui ci. Ci 21 Cun kawn ah Bawipa Jesuh cu am lung kyong ah ang htei ah zaica netah, “kei naw akcang ka pyein cu, nangmi ung kaa chang tumat naw kei cu gaa ah kut ung na ap khai nei” ci ne ang dang ah pyein ci. 22 A u bä a pyein ah kä hmat u netah, ang düihpüi gui cu tumat la tumat cäi ne ng'teng tuk ci gui. 23 Cun zah ung Bawipa Jesuh ah am hni pi ah ang düihpüi chang tumat cu akpat lam ah ngok ci. 24 Simon Peter naw, “Nang Bawipa a u nei na pyein, ci ah ang shi vai ah mik m'ghi nak ci. 25 Acun ah ang düihpüi cu Bawipa Jesuh ah pei ah vang et netah, “Bawipa, a cun ah chang cu a u nei” ci ne ng'shik ci. 26 Bawipa Jesuh naw, “Shin ah m'htut k'bou ne khap ung zuk phung netah ka peit ah chang cu a ani nei” ci ne m'htut bou la ne khap ung phung netah, Simon Iskhariot ah hta Judas-am pek ci. 27 Cun ah m'htut la ne a ei vai-am satan cu ani ah kyong ah lut pyi ci. 28 Cun kawn ah Bawipa Jesuh naw, “na bi vai cu akzä ah nabi vai nei” ci ne kiak nak ci. A i ah kia sei Judas-am cun a ci nak ah acun ung ngok ci gui naw kä hmat ci gui. 29 Judas cu ngui ip shäm ne ngui khäm ciah kia sei, pawi ung kaa vai a i bawi khleih vai, kä cun ung, pyamthaam ci-am peit taak vai ah Bawipa Jesuh naw täk ciah am shah naw ngai ci gui. 30 Judas Iskhariot cu m'htu k'bou tumat la netah a cun vai-am akpung ah hteit ci. Cun zah cu mü ah kiak ci. 31 Judas a hteh kawn ah Bawipa Jesuh naw, “Tuhbäi chang ah Htapa ah bämang nak cu deikhang pyi ci, Khanpughi ah bäimang nak phi chang ah Htapa ung dei ne dang pyi ci. 32 Khanpughi naw abämang nak cu chang ah Htapa ung ang dang sak kawn ah chang ah Htapa ah bämang nak phi amät naw dang sak khai, atuhbäi acun cu bi law ge khai. 33 Ka hta gui aw, kei cu nangmi awn atäng ah ashäng hta vah ka om ba khai. Nangmi naw nami na shui khai, kei ka hteh nak ah nangmi kä nami hteit tu hlawt khai; ci ne, Jew chang ng'vai gui ka pyein nak gui ah mäih ah tuhbäi nangmi ka ning pyein na gui ci. 34 Tuhbäi Thukhän thai ka ning pe gui ci, “tumat la tumat nami ng'hni tu vai nei, kei naw ka ning m'hni gui ah mäih ah nami mät nami ng'hni tu vai nei. 35 Nangmi tumat la tumat zumhni tu ne nami om ah a kiak ung, ning teng gui ciah chang gui phung naw, kei ah ning düihpüi gui ah ning hmat gui khai nei” ci ne kiak na gui ci. Ci 36 Simon Peter naw, “Bawipa, ahawi ah na hteit khai? ci ne ng'shik ci. Bawipa Jesuh naw, “Kei ah ka hteh nak ah tuhbäi kä na na läk hlawt khai, angawi ah vah na na läk hlawt khai” ci ne kiak nak ci. 37 Peter naw, “Bawipa, a i ah kia sei tuhbäi kä ka ning läk hlawt vai ang? Nang ah hmawk ah ka ghin nak phi ka pek khai nei” ci ne pyein ci. 38 Bawipa Jesuh naw, “Nang naw kei ah hmawk ah na ghin nak na pek khai maa? Kei naw akcang ka pyein cu, ai kä ah khawn pha ung ani kä ka hmat ci nei ci ne thum vei na na mak khai nei” ci ne kiak nak ci.
1 Bawipa Jesuh naw, “Nangmi kä ng'ä ai vä, Khanpughi zum vä, kei phi na zum vä. 2 Kapa ah imah kyongkhui akda om ci, cun kä ah om ung nangmi ah om nak vai hteit ne ka piang khai ah kä ka pyein khai 3 Kei cu hteit ne nami om nak vai piang netah, law ba ne ka om nak ung nami om tu vai ah ka ning la law ba gui khai. 4 Kei ah hteh nak ah gawk nak vai ah lam cu nangmi naw nami hmat ci” ci ne pyein ci. 5 Thomas naw, “Bawipa, keimi naw nang a hawi na hteh vai kä kami hmat ci; a i hawk cha ah na hteh nak vai ah lam cu ka mi hmat khai ang? ci ne pyein ci. 6 Bawipa Jesuh naw, “Kei cu lam ah ka kiak ci, düngnak ah phi ka kiak ci, ghin nak ah phi ka kiak ci, kei ung kä hteit ciah chang phung cu Kapa ah om nak ah kä gawk khai. 7 Tuhbäi kei nami na hmat pyi ci, Kapa phi nami hmat lawk khai. Tuhbäi ung tün ne Kapa cu hmat ne nami ng'hmuh püi pyi ci nei. ci ne pyein ci. 8 Philip naw, “Bawipa, Mipa cu nam hmuh gui ä, cun cu kami van ah ng'zak hlü ah kiak ci nei” ci ne k'thäh ci. 9 Bawipa Jesuh naw, “Philip, kho cän güt ung nangmi awn atäng ah ka om ci, Kä na na hmat ci ma? Kei na hmuk ciah chang naw Kapa cu hmuk ci, a i ah kia sei, ‘Mipa nam hnuh gui ä’ na ci ang? 10 Kei kapa ung ka om ci, Kapa kei ung om ci ‘ka ci cu kä na zum ci ma? Nangmi ah ma ah kei ah pyein gui cu ka mät ah ng'thu ah kä kiak ci, kei ah bi gui cu kei ung om ciah Kapa ah bi gui ah kiak ci. 11 Kei kapa ung ka om ci, Kapa kei ung om ci, ka ci cu zum vä. Kä nami zum ung ka bi gui cu teng netah zum vä. 12 Kei naw akcang ka pyein cu, Kei na zum ciah chang naw kei ah bi gui cu bi hlawt khai. 13 Cun ah däm pi ci phi bi hlawt khai, a i ah kia sei ci ung; kei cu Kapa ah om nak ah hteit netah, nangmi naw kei ah ming awn nami taigü phung cu, ka bik khai nei. Cun cu Khanpughi ah bämang nak Ahtapa ung ang dang vai hmawk ah kiak ci. 14 Nangmi naw kei ah ming awn a i phi nami ng'zoih ah a kiak ung, nami ng'zoih ah mäih ah kei naw ka bik khai nei”. 15 “Kei nami nam hni ung ka thukhän cu nami läk khai. 16 Kei naw Kapa ah kang zoih ung, Kapa cu nangmi awn atäng ah om ne nangmi ning m'htei gui khai cu tüi law hnga khai. Ani cu Khanpughi ah a mawng cacim awn m'dang ciah Mumcha Theing ah kia ci. 17 Khomdek chang gui naw cun ah Mumcha Theing cu kä hmuhmat man ci gui kia ne kä zum hlawt ci gui. Cun ung phi ani cu nangmi awn atäng ah om ne, nangmi ung om ci kia sei nami hmat ci. 18 “Kei ka hteh law ung nami mät kä ka ning nawng gui khai, 19 Nangmi ah om nak ah kei ka law ba khai. Ashäng shäng ung m'dek chang gui naw kei kä na hmu law ba khai gui, cun ung phi nangmi naw nami na hmuk khai; a i ah kia sei ci ung, Kei ka ghing ci kia sei nangmi phi nami ghing khai. 20 Cun ah hnüüp ung, ‘kei Kapa ung ka om ci, nangmi ung kei ka om ah mäih ah, kei ung nangmi nami om ci’ ka ci cu nami hmat khai. 21 “Ka thukhän dou ne läk ciah chang cu kei nam hni ciah kiak ci. Kei nam hni ci cu Kapa naw m'hni ci, kei naw phi ani cu m'hni ne, ani ung ka mät kang dang khai” cik ci. 22 (Judas Iskariot ah kä kiak ciah) ahei Iskariot naw “Bawipa a i hawkchaa ah m'dek chang gui ung kä dang ah keimi gui ung nang dang khai ang? ci ne ng'shik ci. 23 Bawipa Jesuh naw, “Kei nam hni ciah chang naw kei ah m'thei thang cu ngai khai. Ani cu Kapa naw m'hni khai, Kapa la kei cu law ni ne ani atäng ah kani om püi khai. 24 Kei kä nam hni ciah chang naw, kei ah m'thei thang phi kä ngai khai. Kei ah ning m'thei thang gui cu ka mät ung kaa lawk ciah kä kiak ci, kei na tüi lawk ciah Kapa ung kaa lawk ciah kiak ci. 25 “Nangmi awn atäng ah ka om zah ung shin ah ka ning m'thein gui ah kiak ci. 26 Kapa naw kei ah ming awn a tüih law ah ning m'htei gui ciah Mumcha Theing naw a päng avan ning m'thei thang gui ne, kei naw ka ning m'thei thang gui phi avan ning shüm ba sak gui khai. 27 “Kei naw dimdeeih nak ka ning nawng pe gui shüt ci, kei ah dimdeeih nak nangmi am ka ning pe gui ci. M'dek chang gui ah peit ah mäih ah ka ning peit gui ah kä kiak ci, kä ng'ä ai vä, kä kyikyawk vä. 28 Kei tuhbäi ka hteh ung phi nangmi ah om nak ah ka law ba khai’ ka ci cu nami ng'za pyi ci. Kapa cu kei ah hlüngtai pi ci, acun ah kia sei, nangmi naw kei nami nam hni ung, Kapa ah ka hteh ba ung nami zeikiai khai. 29 Shin ah amawng gui agawk law ung nangmi naw nami zum vai ah hmawk ah kä a gawk law pha ung ka ning m'thein gui ah kiak ci. Nangmi awn kei aksho kä mi ng'thu ba khai, 30 Khomdek khan uk ci cu gawk law pyi ci, cun ung phi, ani ung kei anam khüt nak vai a i kä om ci. 31 Cun ung phi kei naw Kapa kam hni cu m'dek chang avan naw a hmat vai nei, Kei naw Kapa cu m'hni ne a nam cäi phung avan ka bik ci, ‘Law vä a hei ah mi hteit kaw’ cik ci.
1 “Kei cu sapyit phung akcang ah ka kiak ci, Kapa cu kho ng'lei k'ngäng ah kiak ci. 2 Kei ung kä m'thein ciah ang ban phung cu tupit ne ghawt ne, m'theih ciah ang ban cu am theih law pi vai ah piang m'tham ci. 3 Nangmi cu kei ah m'theithang nak awn nami theing cim pyi ci. 4 Kei ung kawng ät ne om vä, kei phi nangmi ung kawng ät ne ka om khai. Ang ban tumat cu ang shun tung kaa apait ung kä m'theih hlawt ci. A cun ah mäih ah nangmi phi kei ung kä nami om ung kä nami m'theih hlawt khai. 5 Kei cu sapyit phung ah ka kiak ci, nangmi cu ang ban ah nami kiak ci. Nangmi cu kei ung kä nami ng'zung ung a i kä nami m'khüt khai. Chang tumat cu kei ung om sei, kei phi ani ung ka om ah a kiak ung ani cu akda ah m'theih tak khai. 6 kei ung kä om ci cu k'set ne ghawh ah ang ban chawng ah mäih ah kiak ci. Chang gui naw cun ah ang ban chawng gui cu k'bum ne mei ung m'khih u seih, mei naw ui zawp ci. 7 Nangmi cu kei ung om uk ci sei, kei ah ng'thu cu nangmi ung a om ah a kiak ung, nangmi naw nami ng'zoih hlü phung ng'zoi ne nami gah khai. 8 Akda ah nami m'theih tak nak awn Kapa ah bämang nak cu nami dang sak ci; nangmi cun phi kei ah ng'düihpüi ah nami kia lawk ci. 9 Kapa naw kei a nam hni ah mäih ah kei naw ka ning m'hni gui ci. Kei ah kam hni ah om vä. 10 Kei naw Kapa ah thukhän läk ne ani ah m'hni ah ka om ah mäih ah, kei ah thukhän nami läk ung kei ah m'hni ah nami om khai. 11 Shin ah ng'thu ka pyein cu, kei ah zeikiai nak nangmi ung gawk sei, nangmi ah zeikiai nak a kümbe vai ah hmawk ah kiak ci. 12 Kei ah thukhän cu; kei naw ka ning m'hni gui ah mäih ah tumat la tumat nami zumhni tu vai nei. 13 A paw chang ah hmawk ah a ghin nak pe ne m'hni ciah, m'hni nak ah kawn ah, däm pi ciah m'hni nak kä om ba ci. 14 Nangmi cu kei ah thukhän nami läk ung kei ah teihpüi ah nami kiak ci. 15 Tuhbäi ung tün ne chang shäm ah kä ka ning khü ba gui ci, a i ah kia sei ci ung, chang shäm naw khuimah ah bilawh kä hmat ci. Kapa ah ng'thu kang zak avan cu ka ning m'thein gui pyi ah kia sei, tuhbäi ung tün ne ‘Teihpüi’ ah ka ning khü gui ci. 16 Nangmi naw kei kä nami na ghü ci, nangmi hteit ne akda ah m'theih ne ang tak ah nami vui vai ah kei naw ghü ne ka ning m'düih gui ci. Cun ah kia sei kei ah ming awn nami ng'zoih phung cu Kapa naw ning pe gui khai. 17 Cun kawn ah ‘Tumat la tumat nami zumhni tu vai nei’ ciah thukhän ka ning pe gui ci. 18 M'Dek chang naw ami ning gen gui ung kei na gen ma ci gui ah nami hmat vai nei. 19 M'dek khan ng'zak hlü cu nami khäm ah a kiak ung m'dek khan naw khäm ne ning m'hni gui khai. Cun ung phi shin ah m'dek khan ung kaa kei naw ka ning ghü gui ci, nangmi naw m'dek khan kä nami k'chaw na ba ci; cun ah kia sei m'dek chang naw nangmi cu ning gen gui ci. 20 Nami shüm vai ah ka ning m'thein gui cu; ‘Chang shäm cu abawi ah kä hlüngtai pi man ci’. Kei ami na dukdeiu nak ung nangmi phi ning dukdeiu na gui khai gui; kei ah ng'thu ami ngaih ung nangmi ah ng'thu phi ngai khai gui. 21 Ngami naw a cun ah bik khai gui, a i ah kia sei ci ung, nangmi cu kei ah chang ah nami kiak ci ngami naw kei na tüi lawk ci phi kä hmat ci gui. 22 Kei naw law ne kä kam thein gui vai sü ung ami kat nak kä dang khai sü te; tuhbäi läi ami kat nak a u naw phi käm'zih ba hlawt ci gui. 23 Kei na gen ci naw Kapa phi gen ci. 24 Kei naw ngami ah ma ah a u ah kä bi man gui kä ka bi vai sü ung, ngami ah kat nak kä dang khai süte. Tuhbäi ngami naw kei ah bi gui cu hmu u netah, kei la Kapa cu na gen goi ci gui. 25 Cun cu ami thukhän ung “Ngami naw kei cu alä ah na gen ci gui” ciah om ci cu aküm nak vai ah kiak ci. 26 Khanpughi ah mawng cacim awn dang sak ciah, ning m'htei gui ciah Mumcha Theing cu lawk khai, ani cu Kapa ung kaa lawk ciah kiak ci, kei naw Kapa ung kaa ani cu ka tüi lawk khai, ani naw kei ah mawng thu pyein khai. 27 Nangmi naw phi kei ah mawng thu nami pyein khai, a i ah kia sei ci ung akhtük ge ung nangmi cu kei awn atäng ah nami om ci kiak ci.
1 Nami zum nak kä nami nawng-en vai ah shin ah ka ning m'thein gui ci nei. 2 Nangmi cu pum im ung kaa ning k'täm gui khai gui. Chang gui naw nangmi ning ngawn gui netah, Khanpughi ah bi kami bik ci, ci ne ami ngaih nak ah khin gawk lawk khai. 3 Ngami cu Kapa phi kä hmat ci gui, kei phi kä na hmat ci gui ah kia ne, a cun ah bik khai gui nei. 4 Chang gui naw shin ah mawng gui ami bi nak vai ah khin a gawk law ung, nangmi naw nami shüm ba vai ah ka ning m'thein gui ah kiak ci nei. “Kei cu nangmi awn atäng ah ka om mei zah ci kia sei, akhtük ung shin ah mawng gui kä ka ning m'thein gui ah kiak ci. 5 Tuhbäi kei cu na tüi lawk ciah om nak ah ka hteit law ba khai. Cun ung phi kei a hawi lam ka hteh vai cu a u naw phi kä nami na ng'shik ci. 6 Acun ah mawng ning m'thein gui ngä sei nami m'lung thüi ngai ci. 7 Cun ung phi kei akcang ka pyein cu, kei ka hteh law ung nangmi ah hmawk ah ni pi khai. Kei kä ka hteh ung ning m'htei gui khai cu kä lawk khai. Kei ka hteh ung vah cun ah Mumcha Theing cu ka ning tüih law gui khai. 8 Ani a law ung m'dek chang gui ah kat nak ah mawng düng nak ah mawng la Khanpughi ah m'khoichaa nak ah mawng gui cu dang sak zawp khai. 9 Kei kä ami na zum ah hmawk ah kat nak cu dang zawp khai. 10 Kei cu Kapa ah ka hteh law ba ung kä nami na hmu law ba khai kia sei, düng nak cu kei ung dang ci. 11 M'dek khan uk ciah bawi cu m'khoichaa nak gah pyi ci kia sei, m'khoichaa nak ah mawng dang khai. 12 Kei naw akda ka ning m'cäi gui vai om ba ci, cun ung phi avan nangmi naw kä nami shüm zawp khai kiak ci. 13 Cun ung phi Khanpughi ah mawng cacim awn dang sak ciah Mumchaa Theing cu a kyum law ung ani naw cacim avan cu ning m'thein gui khai, ngawi ah gawk lawk khai ah amawng gui phi ning m'thein gui khai. 14 Ani naw kei ung kaa a gah ah ng'thu cu ning m'thein gui khai kia sei, kei ah bämang nak cu dang lawk khai. 15 Kapa ung om ci phung cu kei ung om ci; cun ah kia sei, Mumcha Theing naw kei ung kaa a gah ah ng'thu cu ning m'thein gui khai, ka ci ah kiak ci. 16 “Kä shou pha sei kä nami na hmu law ba khai, cun kawn ah kä shou pha sei nami na hmu law ba khai” ci ne pyein ci. 17 Ang düihpüi gui am shah naw, “kä shou pha sei kä nami na hmu law ba khai, cun kawn ah kä shou pha sei nami na hmu law ba khai” cik ci. Cun kawn ah Kapa ah ka hteit ba khai” phi cik ci. 18 “Kä shou pha sei a ci cu a i ang? Ani naw a i a pyein hlü cu kä mi hmat ci nei” ci ne ami mät ng'htau ci gui. 19 Bawipa Jesuh naw ami ng'shi hlü hmat netah, “Kä shou pha sei kä nami na hmu law ba khai, cun kawn ah kä shou pha sei nami na hmu law ba khai” ka ci ah mawng ang pyein ne nami ng'htau. 20 Kei naw akcang ka pyein cu, “Nangmi nami thüi kyap khai, khomdek chang gui zeikiai khai gui. Nangmi nami thüi sei khai cun ung phi nami thüisei nak cu zeikiai nak ah ng'lat zawp khai. 21 Hnumi tumat cu ahta law vai ung a nau poi m'neh ne ang htei ah zaica ci, cun ung phi ahta kawn ah m'dek khan ah chang tumat ng'tüi lawk ci kia sei, anat nak cu kä shüm ba ci. 22 Nangmi tuhbäi nami thüisei ci, cun ung phi kei awn mi ng'hmu ba mä khai kia sei nami m'lung cu zeikiai nak awn be khai, cun ah zeikiai nak cu hnicim chang naw kä m'shet hlawt khai. 23 “Cun ah hnüüp ung nangmi naw kei cu a i phi kä nami na ng'shi ba khai. Kei naw akcang ka pyein cu, ‘Kei ah ming awn nami ng'zoih phung cu Kapa naw ning pe gui khai. 24 Tuhbäi ung khüt khai ah nangmi naw kei ah ming awn a i phi kä nami ng'zoi phak ci. Nami zeikiai nak a kümbe nak vai ah ng'zoi vä, nami gah khai nei. 25 “Shin ah mawng gui cu m'tumtäng ne ka ning m'thein gui ci, Kapa ah mawng kä tumtäng ling ne, ang dang ah pyein nak vai ah a khin gawk lawk khai. 26 Cun ah a khin a gawk law ung, kei ah ming awn nami ng'zoih ba ung phi, nangmi ah hmawk ah Kapa ah ka ning zoih pe gui khai, ci ne kä ka pyein ba khai. 27 A i ah kia sei ci ung Kapa amät naw nangmi ning m'hni gui ci. Nangmi naw kei nam hni ne, Khanpughi ung kaa ka lawk ciah nami zum ah hmawk ah, Kapa naw ning m'hni gui ci. 28 Kei cu Kapa ung kaa pawng ne m'dek khan ah ka lawk ci; tuhbäi ung m'dek khan ung kaa pawng ne Kapa ah ka hteit ba khai. ci ne pyein ci. 29 Ang düihpüi gui naw, “Nang naw tuhbäi kä m'tumtäng ne ang dang ah na pyein pyi ci. 30 Nang naw a päng ang nüng na hmat cu, kami hmat pyi ci, kami ning shi vai a i kä om ba ci nei. A shin gui kami hmat nak awn nang cu, Khanpughi ung kaa na lawk ciah kami zum ci nei” cik ci gui. 31 Bawipa Jesuh naw, “Tuhbäi nami zum ci ang? Akhin cu gawk lawk ci, tuhbäi gawk law pyi ci. 32 Nangmi nami im phäh phäh ah püi ne nami dawng nak ba vai ah a khin gawk lawk khai nei. Kei cu ka mät nami na nawng shüt khai. Cun ung phi akcang ah ka mät kä ka om khai, Kapa naw na om püi khai. 33 Nangmi cu kei awn nami kawng ät nak awn, dimdeeih nak nami gah vai ah shin ah ng'thu ka pyein ah kiak ci. Nangmi cu m'dek khan naw ning zaica sak gui khai. Cun ung phi nami m'gäi vai nei, kei naw m'dek khan cu ka näng pyi ci” ci ne pyein ci.
1 Cun ah thu a pyein kawn ah, Bawipa Jesuh cu Khankho dan netah, “Kapa, a khin gawk law pyi ci nei, Na htapa ung na bämang nak ang dang vai ah, Na Htapa am bämang nak cu zuk pe lawä. 2 Na Htapa ah kut ung na ap ah chang gui-am ang täi ghin nak a peit gui hning vai ah, nang naw Na Htapa-am chang nüng m'khüt nak ah hlüngtai nak cu na pe pyi ci nei. 3 Ang täi ghin nak ci cu, nang Khanpughi ning hmat nak la na tüih law ah Bawipa Jesuh hmat nak ah kiak ci. 4 Khomdek khan ung kei naw na bämang nak cu kam dang pyi ci. Ka bi vai ah na na peit ah bi phi ka bi zawp pyi ci. 5 Kapa! Khomdek kä ang tüi pha ung nang awn atäng ah ka gah ah bämang nak cu, tuhbäi kei-am na zuk pe lawä. 6 Khomdek khan ung kaa ghü ne, kei ah kut ung na na ap ah chang gui-am, nang ah mawng cu kam thein gui pyi ci nei. Ngami cu nang naw khäm gui ne, kei-am na na ap pyi ci, ngami naw nang thu phi ngai pyi ci gui. 7 Kei ung om ci phung cu nang ah na peit, nang ung kaa lawk ciah hmat pyi ci gui. 8 Nang ah na peit ah Thu Ni cu, kei naw ngami-am pe gui ngä sei, ngami naw dou ci gui nei. Nang ung kaa kei ka law cu akcang ah kiak ci, ci cun phi hmat pyi ci gui, nang naw kei na na tüih law cun phi zum pyi ci gui nei. 9 “Ngami ah phäh ah kei ka taigü ci, m'dek chang gui ah phäh ah kä kiak ci. Nang naw kei-am na na ap ah chang gui cu, nang ah khäm gui ah kia sei, ngami ah hmawk ah ka taigü ci. 10 Kei ung om ci nüng nang naw na khäm ci, nang ung om ci nüng phi kei naw ka khäm ci. Cun gui awn kei ah bämang nak cu dang ci. 11 Kei cu tuhbäi nang ah ka lawk khai kia sei, m'dek khan ah kä ka om ba khai, cun ung phi ngami om ba khai gui. Theing cim ciah Kapa! kei-am na na peit ah ming, huham mah ciah nang ming awn phiawn sak gui ä. Cun ung vah kei la nang tumat ah ni kiak ah mäih ah ngami phi tumat ah kiak khai gui. 12 Kei cu ngami awn kami om zah ung, nang naw na na peit ah ming, hlüngtai ciah ming awn kam htei gui ci. Kei naw ngami cu ka shungvong gui ci. Cacim ung om ciah mäih ah maih khai ah k'bäi ah chang tumat ah kawn ah tumat phi a u kä maih ci nei. 13 Tuhbäi kei cu nang ah ka lawk khai nei. Ngami kei ah zeikiai ah mäih ah ami zeikiai nak a be vai ah, m'dek khan ah ka om zah ung shin ah ng'thu ka pyein ah kiak ci. 14 Nang ah ng'thu cu ngami-am ka pe gui pyi ci, Kei cu m'dek khan naw kä a na khäm ah mäih ah ngami phi kä khäm gui ci. 15 Cun ah kia ne m'dek chang naw ngami gen gui ci gui. Ngami cu shin ah m'dek khan ung kaa, nang naw na hteh sak gui vai ah, ka taigü ah kä kiak ci, ngami naw khoshe ami phiawn nak vai ah, nam htei gui vai ah ka taigü ah kiak ci. 16 Kei cu khomdek khan awn kä ka ng'guiphaa ah mäih ah ngami phi kä ng'guiphaa ci gui. 17 Nang ah hmawk ah ngami cu düng nak awn khoi ne om sak gui ä, Nang ah thu cu düng ci. 18 Nang naw kei cu m'dek khan ah na na tüih law ah mäih ah, kei naw ngami cu ka tüi gui ci. 19 Ngami naw bi bi nak vai ami pumsa ami ap nak hlawt vai ah, kei naw ngami ah hmawk ah ka pumsa cu ka ap ci. 20 “Kei cu ngami ah hmawk bäng ah kä ka taigü ci, ngami ah thu pyein nak awn kei na zum lawk ci gui ah hmawk ah phi ka taigü ci. 21 O Kapa! Nang cu kei awn kawng ät ci sei, kei phi nang awn ka kawng ät ah mäih ah, ngami gui cu kawng ät sak gui ä. Kei cu nang naw na na tüih law ah m'dek chang gui naw ami zum vai ah, ngami gui cu kawng ät sak gui ä. 22 Nang la kei cu ni kawng ät ah mäih ah ngami phi ami kawng ät vai ah, nang naw kei-am na na peit ah bämang nak cu ka pe gui pyi ci. 23 Ngami ung kei ka om ah mäih nang cu kei ung na om ci. Cun ah kia sei ngami cu ami kawng ät nak awn, nang naw kei na na tüih law ah mawng la, kei na nam hni ah mäih ah ngami phi nam hni gui ah mawng cu, m'dek chang gui naw hmat khai gui kiak ci. 24 O Kapa! Khomdek kä ah ng'tüi pha ung nang naw na na peit ah bämang nak cu, kei-am nang naw na na ap ah chang gui naw, ami hmuh tu vai ah ngami cu kei awn na om sak gui ä. 25 “Düng ciah Kapa! M'dek chang gui naw kä ning hmat u sei phi, kei naw ka ning hmat ci nei. Shin ah chang gui naw kei cu, nang naw na na tüih law ah hmat ci gui nei. 26 Nang ah na peit ah m'hni nak cu ngami ung a om vai la kei cu ngami ah m'lung kyong ung ka om vai ah, nang ah na mawng cu ngami-am ka hmat sak gui pyi ci, a ngawi ah phi ka hmat sak ba gui lä khai nei” cik ci.
1 Cun ah ak taigü kawn ah Bawipa Jesuh cu ang düihpüi gui awn atäng ah Kidron tuilawng cu hei kan ci gui. A cu ah lo-chaam tumat om ci, ngami cu a cun ah lo-chaam kyong ah hteit ci gui. 2 A cun ah hmun cu Bawipa Jesuh la ang düihpüi gui naw a shäng shäng ami hteh nak man ah kia sei, hnukuk Judas naw hmat ci. 3 Cun ah kia sei hnukuk Judas naw, Roman gakap gui la, taigüpa gui la Pharisee gui ngäng gui ciah chang gui cu thäm ne law püi gui ci. Ngami cu mei im ni mei k'däi ni, sehnet gui ni kawt ci gui. 4 Bawipa Jesuh naw, amät ah khan ah gawk lawk khai gui avan cu hmat pyi netah, ami ma ah vang phäi ne, “A u ang nami shui” ci ne ng'shi gui ci. 5 Ngami naw, “Nazareth Jesuh nei” cik ci gui. Bawipa Jesuh naw, “Kei cu ani nei” cik ci. Hnukuk Judas cu ngami awn atäng ah ng'düi tuk ci. 6 Bawipa Jesuh naw, “Kei cu ani nei” ci ne pyein khätah, ami hnu ah vang nawn ba u ne, m'dek ung kiu zawp ci gui. 7 Bawipa Jesuh naw, “A u nei nami shui” ci ne ng'shi ba gui mä ci. Ngami naw, “Nazareth Jesuh nei” ci ne pyein ba ci gui. 8 Bawipa Jesuh naw, “Ani cu kei nei, ci ne ka ning m'thein gui pyi ci, Nangmi naw kei nami na shui ci a kiak ung, shin ah chang gui hteit tei u sä” cik ci. 9 (Cun a ci cu, ‘Kapa, nang naw na na ap ah chang tumat phi kä dimaih khai’ a ci cu, a küm vai ah hmawk ah kiak ci). 10 Simon Peter cu chim akghaat bun ci. Ani naw ak chim phawng ne taigü tung ah changshäm cu akpat lam ak hnga hlang khai ah tuk ci. Ani ah ming cu Malachus ah kiak ci. 11 Bawipa Jesuh naw, “Na chim cu bun ba ä, Kapa naw ana peit ah zaica nak ah khap cu kei naw kä ka awk khai ah na ngai ne ma? ci ne Peter cu m'cäi ci. 12 Gabawi ah khawng Roman gakap gui la, im ngäng ciah Jew chang gui naw, Bawipa Jesuh cu pha ne khit u netah, Annas ah hteh püi ci gui. 13 Ani cu cun kum Taigü Tung ah kiak ciah Kaiaphas ah ak kawi ah kiak ci. 14 Kaiaphas cu, ‘Chang akda ah hmawk ah chang tumat asih cu bä pi khai’ ci ne Jew chang ng'vai gui m'cäi gui ciah chang ah kiak ci. 15 Simon Peter la a hei ang düihpüi tumat cu, Bawipa Jesuh ah hnu ah läk tuk ci goi. A hei ang düihpüi tumat cu Taigü Tung awn ng'hmat ci goi kia ne, Bawipa Jesuh awn atäng ah Taigü Tung ah im ng'vonh kyong ah hteit tuk ci. 16 Cun zah ung Peter cu ng'vong pung ah ng'düi ci. Taigü Tung awn ng'hmat tuk ciah ang düihpüi tumat cu, ng'vong pung ah lut law netah, m'kawt ngäng-am m'thein ne Peter cu ng'vong kyong ah khü lawk ci. 17 M'kawt ngäng ciah hnumi hta naw, “Nang phi ani ah ng'düihpüi ah kä kia ne ang? ci ne ng'shi khätah, Peter naw, “Ka, kei ah kä kiak ci nei” cik ci. 18 Cun zah ung kho sik ci kia sei, ngäng ci gui la changshäm gui cu, mei cik ne ng'tän ne ng'düi ne awm ci gui. Peter phi ami pei ah ng'düi ne mei awm tuk ci. 19 Täigu Tung naw, Bawipa Jesuh cu, ang düihpüi gui ah a mawng la am theithang ah a mawng gui cu k'cet ne ng'shik ci. 20 Bawipa Jesuh naw, “Kei naw chang gui ah ma ah ang dang ah kam thein gui ci. Jew chang gui ah ng'bum nak ah kiak ciah pum im la taigü im ung vah kei naw kam theithang gui ci, a i zah ung phi ng'zih kuh ne kä ka ng'thu man ci. 21 Cun ah kia sei a i vai, k'cet ne kei cu na na ng'shi ang? Kei ah m'theithang ngai ng'zak ci gui cu ng'shi gui ä, kei naw a i ah kam theithang gui cu ng'shi gui ä, ngami naw hmat ci gui nei” ci ne kiak nak ci. 22 Bawipa Jesuh naw cun ci khätah, ngäng ciah chang tumat naw, “Taigü Tung ah ma ah a i vai shikcha ah nang thu ang” ci ne Bawipa Jesuh cu a hmai ung k'beeih ci. 23 Bawipa Jesuh naw, “Ka ng'thu kä a hman ung kä hman ci cu na pyein vai, a hman ah a kiak ung a i vai kei cu na na k'beeih ang? cik ci. 24 Cun kawn ah Annas naw khit gäk gäk ne, Taigü Tung Kaiaphas ah hteh püi sak gui ci. 25 Peter cu ng'düi ne mei awm tu lä ci. Chang am shah naw, “Nang mä shin ah chang ah ng'düihpüi ah kä kia ne ang? ci ne ng'shik ci gui. Peter naw, “Ka, kä kei nei” ci ne mak ci. 26 Taigü Tung ah changshäm, Peter naw ak hnga a tuk hlang ah a paw naw, “Nang, ani awn atäng ah lo-cham kyong ah ka ning hmu goi ciah kä kia ne ang? ci ne ng'shik ci. 27 Peter naw, “Ka, kä kei nei” ci ne ma ba mä ci. A cun vai-am ai khong lawk ci. 28 A ngawi ung kho ngawi hta Bawipa Jesuh cu, Kaiaphas ah im ung kaa naw, gawmang ah im ah hteh püi ci gui. Jew chang ng'vai gui cu phiawn nak mü ei ami ei vai ng'et law sei, ami mät naw ami mät ami zum nak lam awn theing sak hlü u netah gawmang ah im kyong ah kä lut tuk ci gui. 29 Cun ah kia sei Pilat cu lut law netah, “Shin ah chang cu kat nak a i bi sei ang nami law püi? ci ne ng'shi gui ci. 30 Ngami naw, “Ani cu kat nak bik ciah chang ah kä ah kiak ung nang ah kä ka mi law püi khai nei” cik ci gui. 31 Pilat naw, “Nami mät naw hteh püi ba ne nami mät ah ng'thukhän awn m'khoichaa vä” cik ci. Jew Chang gui naw, “Keimi naw chang tumat sih nak kä kami pe hning ci nei” cik ci gui. 32 (Cun ami ci cu Bawipa Jesuh naw amät ah sih vai ah mawng a pyein cu ang dang nak vai ah hmawk ah kiak ci) 33 Pilat naw, a im kyong ah lut ba ne, Bawipa Jesuh cu khü netah, “Nang cu Jew chang gui ah ghangpughang ah na kiak ci ma? ci ne ng'shik ci. 34 Bawipa Jesuh naw, “Shin cu nang gawmang, na mät ah ngaih ah na na ng'shi ang, kä cun ung kei ah mawng chang hei naw ning m'thein pyi ne ang? ci ne ng'shi tu ba ci. 35 Pilat naw, “Kei cu Jew chang ah na na ngai ci ma? Kei ah nang ning law püi ci gui cu, na mät pakhui chang gui la taigü gui nei, nang, kat nak a i ang na bi? ci ne ng'shi ba ci. 36 Bawipa Jesuh naw, “Kei ah uknak kho cu shin ah m'dek khan awn kä shigaa ci; kei ah uknak kho cu shin ah m'dek khan awn ashigaa vai sü ung, Jew chang gui ah kut ung kä ka gawk khai ah ka ng'khah püi gui naw ng'tuk bik khai gui süte. Kei ah uknak kho cu shin ah m'dek khan awn kä shigaa ci nei” ci ne pyein ci. 37 Pilat naw, “Cun ung nang cu ghangpughang ma? ci ne ng'shi ba ci. Bawipa Jesuh naw, “Nang naw kei cu ghangpughang ah na na pyein ci, kei cu düngnak bäng ka pyein khai ah ng'tüi ne m'dek khan ah ka lawk ci. Düngnak awn om ciah chang phung naw kei ah ng'thu cu ngai ci gui” ci nak ci. 38 Pilat naw, “düngnak cu a i ang? ci ne ng'shi ba ci. Cun kawn ah Pilat cu chang gui ah ma ah lut law netah, “Ani ung m'kat nak vai ah kat nak kä ka hmuk ci. 39 Cun ung phi nangmi ah thung ah phiawn nak pawi ah kyong ung thawng cum ci tumat cu ka phiawn sak ci man ci. Nangmi ah hmawk ah Jew Ghangpughang cu kak phiawn vai nami ng'za hlü ne ang? ci ne ng'shi gui ci. 40 Ngami naw, “Ani käk phiawn vai nei, Barabbas nei k'phiawn vai” ci ne m'lau ci gui. (Barabbas cu m'guk ei ah kiak ci).
1 Cun kawn ah Pilat naw Bawipa Jesuh cu khü netah, tukthah sak gui ci. 2 Gakap gui naw ng'hling lukhu k'bün ci gui; suinu asen phi m'sui ci gui. 3 A pei ah hteit u netah, “Jew ghangpughang ak shou ghing sä” ci ne m'lau u ne, a hmai ung k'beeih ci gui. 4 Pilat cu lut law ba mä netah, chang gui-am, “Ani ung sih nak vai ah kat nak kä ka hmuh ah mawng cu, nangmi naw nami hmat vai ah nami ma ah ka law püi khai nei” cik ci. 5 Bawipa Jesuh cu ng'hling lukhu män ng ne, suinu asen sui ne ak phung ah lut law ba ci. Pilat naw, “Teng vä, ani nei” ci ne pyein ci. 6 Taigüpa gui la Taigü im ngäng ci gui naw, hmu u netah, “Ani cu kutlam tung ung tai ne ngawn vä, kutlam tung ung tai ne ngawn vä” ci ne m'lau ci gui. Pilat naw, “nami mät naw kutlam tung ung tai ne ngawn vä, ani ngawn nak vai ah mawng a i kä ka hmuk ci nei” ci ne pyein ci. 7 Chang gui naw, “Ani cu amät naw a mät Khanpughi ah Hta ah a pyein ah hmawk ah sih nak peit vai ah keimi ah ng'thukhän ung om ci nei” cik ci gui. 8 Chang gui ah m'lau ng'za netah Pilat cu cäi ne kyi lawk ci. 9 Cun ah kia sei kyong ah lut law ba netah, Bawipa Jesuh-am, “Nang a hawi kaa na lawk ci ang? ci ne ng'shik ci. 10 Cun ung phi Bawipa Jesuh naw käm shang ci. Pilat naw, “A i ah kia sei kä na nam shan ang? Kei naw nang ka ning k'phiawn hning la kutlamtung ung tai ne ka ning ngawn hning cu, kä na hmat ci ma? ci ne kiak nak ci. 11 Bawipa Jesuh naw, “Kei ah khan ah cun ah na bi nak hning vai cu, Khanpughi ah ning peit ah kiak ci. Nang ah kut ung kei na ap lawk ciah chang cu a kat nak däm pi ci” ci ne kiak nak ci. 12 Cun ah a pyein cu ng'za netah Pilat naw, Bawipa Jesuh k'phiawn nak vai ah lam cu shui ci. Cun ung phi chang gui naw, “Ani nak phiawn ah a kiak ung, nang cu ghangpughang ah teihpüi ah kä na kiak khai. Amät naw amät ghangpughang ah pyein ciah chang cu, ghangpughang ng'küütneet püi ciah kiak ci nei” cik ci gui. 13 Cun ami ci cu Pilat naw ng'za netah, Bawipa Jesuh cu ak pung ah luh law püi ba netah, lung ami pian ah bawi ah ngoh nak ung ngok ci. (Cun ah cu Hebrew ng'thu awn Gabbatha) ah pyein ci gui. 14 Cun cu phiawn nak pawi a ngawi ung ami tün nak vai, hnüüp ng'lunglai zah ung ah kiak ci. Pilat naw, “Teng vä, nami ghangpughang” ci ne Jew chang gui-am kiak na gui ci. 15 Ngami naw, “Ngawn vai nei, ngawn vai nei, kutlamtung ung tai ne ngawn vai nei” ci ne m'lau ci gui. Pilat naw, “Nami ghangpughang cu kutlamtung ung tai ne ngawn vai nami ng'za hlük ci ma? ci ne kiak na gui ci. 16 Cun kawn ah Pilat naw Bawipa Jesuh cu kutlamtung tai ne ami ngawn vai ah ami kut ung ap gui ci. Cun ah kia sei Bawipa Jesuh cu hteh püi ci gui. 17 Bawipa Jesuh cu kutlamtung kawt ne, ‘Luguh Hmun’ ami ci nak ah hteit ci. 18 (A cun cu Hebrew ng'thu awn Kolakotha) cik ci gui. a cun ah hmun ah Bawipa Jesuh cu kutlamtung ung tai ne ngawn ci gui. Bawipa Jesuh awn atäng ah a hei chang hnih cun phi, ak englam ah tumat, akpat lam ah tumat tai ne ngawn ci gui. Bawipa Jesuh cu ang lung ung tai ci gui. 19 Pilat naw ca gu ne Bawipa Jesuh ah kutlamtung ung tai sak gui ci. Cun ah ca cu, “Jew chang gui ah ghanpughang Nazareth Jesuh” ciah kiak ci. 20 Bawipa Jesuh kutlamtung ung tai ne ami ngawn nak cu, gawnu awn ng'et ci kia sei, chang akda naw cun ah ca cu phat ci gui. Cun ah ca cu Hebrew, Latin la Kagik ca gui awn ami guk ah kiak ci. 21 Taigüpa gui naw, “Jew ghanpughang ah kä guk vai; shin ah chang naw, kei cu Jew ghangpughang ah ka kiak ci nei, cik ci nei” ciah guk vai, ci ne Pilat ah ma ah pyein ci gui. 22 Pilat naw, “Kei naw ka guk pyi cu a cun ah kiak khai” ci na gui ci. 23 Gakap gui naw Bawipa Jesuh cu kutlamtung ung tai ne, ami ngawn kawn ah asui sak cu k'phli ah k'pai ne lak ci gui. Cun kawn ah a suinu phi lak ci gui. Cun ah suinu cu chui gui kä om khai ah tah ah kiak sei gakap gui naw, “Kä k'teek-en vä, m'shüih tawk ne mi lak khai nei” cik ci gui. 24 Gakap gui naw cun ah ami bi cu, cacim ung; ngami naw kei ah suisak ng'pai ci gui, ka suinu phi m'shüih tawk ne lak ci gui” ci cu a küm nak vai ah kiak ci. 25 Cun zah ung Bawipa Jesuh ah anu la anu ah anau ni, Clopas ah k'chu Mari la Mari Makdalin ni gui cu Bawipa Jesuh ah kutlamtung pei ah ng'düi ci gui. 26 Bawipa Jesuh naw anu la a nau ah pei ah am hni ah ang düihpüi tumat cu ng'düi sei hmuk ci. Cun ah kia sei, Bawipa Jesuh naw anu-am, “nu awi, shin cu nang ah hta nei” cik ci. 27 Cun kawn ah ang düihpüi-am, “Shin cu na nu nei” ci nak ci. Cun ung tün ne cun ah ang düihpüi naw, anu cu a im ah hteh püi ne m'hteihtang ci. 28 Cun kawn ah Bawipa Jesuh naw avan küm pyi ciah hmat netah, cacim ung om ci ang dang vai ah “Kei tui ka gha ci nei” cik ci. 29 Cun zah ah sapyit tui be ciah khlüng tumat om ci. Ngami naw tui m'zak awn sapyit tui cu cum netah, ng'lawi ung m'sawi ne, 30 Bawipa Jesuh-am tu ci gui. Bawipa Jesuh cu cun ah sapyit tui aw netah, “Bi ng'pyi ci nei” ci ne ak hngü bat ne kät lawk ci. 31 Jew chang ng'vai gui naw kutlamtung ung ami tai gui ah kho gui cu m'khep u netah, ami gook gui ami lak vai cu, Pilat ah ma ah pyein ci gui. Cun ah ami pyein ah mawng cu, cun nak hnüüp cu ak hmaa hnüüp ah kia sei, a ngawi ung ami kyin vai hnüüp ung, kutlamtung ah khan ah gook kä ah om vai la, cun ah kyin hnüüp cun phi hnüüp theing ah a kiak ah hmawk ah kiak ci. 32 Cun kawn ah gakap gui cu law ne Bawipa Jesuh awn atäng ah ami ngawn goi ah kho cu tumat täi ah m'khep hnget ci gui. 33 Bawipa Jesuh ah om nak ah ami gawk law ung kät pyi ciah kia khätah, a kho cu kä m'khep ci gui. 34 Cun ung phi gakap tumat naw Bawipa Jesuh ah am hnaak cu k'htei awn shun khätah, acun vai-am si la tui cu lut lawk ci. 35 (Shin ah a mawng gui cu nangmi naw phi nami zum tu vai ah hmu tuk ci amät naw a pyein ah kiak ci. Ani ah pyein cu hman ci, ani naw amät akcang a pyein phi hmat ci). 36 Cun cu'ani ah guh tumat phi kä hnget khai’ ciah cacim ung om ci cu a küm nak ah kiak ci. 37 Cun kawn ah phi, “Ngami naw ami k'htei awn ami shun cu, teng khai gui nei ciah cacim ung om ba ci. 38 Cun kawn ah Arimathea ah kaa Josef cu Pilat ah hteit ne, Bawipa Jesuh ah gook cu a lak sak vai ah pyein ci. (Josef cu Bawipa Jesuh ah ang khah püi ah kiak ci, cun ung phi Jew chang ng'vai gui kyih gui ne a düm ah ng'läk tuk ciah kiak ci). Pilat naw hlawt sei, Bawipa Jesuh ah a gook cu Josef naw la ne hteh püi ci. 39 Azan khomü ah Bawipa Jesuh hmu law te ciah Nikodemus cun phi, tui ng'ui a hlü hlü pit m'ku-lei-hma law püi ne, Josef cu läk tuk ci. 40 Ngani naw Jew chang gui ah ami thung man ah, tui ng'ui awn shawi ne, zih bawk awn hlawp ne k'tom ci goi. 41 Bawipa Jesuh kutlamtung ung tai ne ami ngawn nak pei ah lo-chaam tumat om ci. Cun ah chaam ung a u phi kä ami k'phuh nak phaa ah khui cawh ak thai om ci. 42 Cun ah hnüüp cu, Jew chang gui naw a ngawi ung ami kyin nak vai ah hnüüp ah kia sei Bawipa Jesuh ah gook cu a cun ah khui ung k'phuh ci gui.
1 Hnüüp chih ung ak hnüüp ät hnüüp, kho ngawi hta ah kho thai ghi ghi sei, Mari Makadalen cu ng'cim hmun ah hteit netah, khui m'kawt ami khai nak ah lung cu ng'hmawng sei hmuk ci. 2 Ani cu Simon Peter la Bawipa Jesuh naw am hni pi ah ang düihpüi ah om nak ah dawng ba netah, “Chang gui naw Bawipa cu, phuh hmun ung kaa lak ci gui nei, a hawi ami tha kä hmat nei” ci ne m'thein gui ci. 3 A cun vai-am Peter la ng'düihpüi tumat cu ng'cim hmun ah dawng ci goi. 4 Ngani cu atäng ah dawng pang ni ne phi, a hei ang düihpüi tumat cu Peter ma ta ne dawng ne, ng'cim hmun ah gawk ma ci. 5 Ani naw khui m'kawt zuk teng netah, k'tom nak ah zih gui cu ng'phlu sei hmuk ci. Cun ung phi khui ung kä vah luh ah ng'düi ci. 6 Ak hnu ah dawng lawk ciah Simon Peter cu, khui m'kawt ung phläi ge ne lut netah, zih gui bäng ang phlu la; 7 Bawipa Jesuh ah lu ami hlawp nak ah lupawng cu, zih gui awn kä ng'caw ah a hei ah ng'cho ne ng'zän tu hnga sei hmuk ci. 8 Cun kawn ah ng'cim hmun ah gawk law ma ciah ang düihpüi cun phi, khui kyong ah lut law tu ne, acun gui hmu tu netah zum ge ci. 9 (Ani cu sih nak ung kaa tho ba khai, ci ah cacim ung om ci cu, cun güt ung ngani naw kä shüm ba ci goi). 10 Cun kawn ah ang düihpüi gui cu im ah hteit ba ci gui. 11 Mari cu kyap ne ng'cim hmun ah ng'düi ci. Ani naw khui 12 m'kawt tung kawp ne zuk m'kein netah, Bawipa Jesuh ah a gook ami shän nak ung, alu täng ah tumat, ale täng ah tumat, a bawk pük pük sui ciah khankho chang goi cu ngo ni sei hmu goi ci. 13 Khankho chang goi naw, “Hnumi hta awi, a i ah kia sei na kyah ang? ci ne ng'shik ci goi. Mari naw, “Chang gui naw kapa cu hteh püi ci gui, a hawi ami tha kä ka hmat ci nei” ci ne pyein ci. 14 Cun kawn ah a hnu täng ah vang hlat netah Bawipa Jesuh cu ng'düi sei hmuk ci. 15 Cun ung phi Bawipa Jesuh bä ah kä hmat ci. Bawipa Jesuh naw, “Hnumi hta awi, a i ah kia sei na kyah ang? a u ang na shui? ci ne ng'shik ci. Mari naw, ani cu lo-cham ngäng ciah ngai netah, “Sazapa, Bawipa ah a gook cu nang naw na laak ah a kiak ung, a hawi na tha cu nam thein ä, hteit ne ka la ba khai” ci ne pyein ci. 16 Bawipa Jesuh naw, “Mari” ci ne khü khätah, Mari cu vang hlat ne, “Rabboni” ci ne pyein ci. (Hebrew thu Rabboni cu “Saza” ciah kiak ci. 17 Bawipa Jesuh naw, “Kei cu kä na k'pang-en ä, Kapa ah kä ka kai ba phak ci, cun ung phi ka nau gui ah hteit ne, Kei ah Kapa ah kiak ciah nami Pa, Kei ah Khanpughi ah kiak ciah nami Khanpughi ah om nak ah ka kai ba vai ah mawng cu m'thein gui ä” cik ci. 18 Cun ah kia sei Mari Madalen cu ang düihpüi gui ah om nak ah dawng ba netah, Bawipa a hmuh ah mawng la Bawipa naw am cäi gui cu m'thein ba gui ci. 19 Hnüüp ät hnüüp mühun ah ang düihpüi gui cu, Jew chang vai gui kyih u netah, kyong ah shoh khai ne om ci gui. Cun sang ung Bawipa Jesuh cu ami ma ng'lung ah ng'düi law netah, “Nami khan ah ding gei nak om sä” cik ci. 20 Cun kawn ah akut m'zaa la am hnaak cu ang düihpüi gui-am m'hnuh gui ci. Ang düihpüi gui naw Bawipa cu hmu netah ang htei ah zai ci gui. 21 Bawipa Jesuh naw, “Nami khan ah ding gei nak om sä, Kapa naw kei ana tüih law ah mäih ah, kei naw nangmi cu ka ning tüi gui ci nei” cik ci. 22 Cun kawn ah Bawipa Jesuh naw ami khan ah phyuh theh netah, “Mumcha Theing cu dou vä, 23 Nangmi naw chang gui ah kat nak cu nami m'gein ung, ngami cu phiawng khai gui; nangmi naw kä nami m'gein ung ngami naw phiawn nak kä gah khai gui. 24 Ang düihpüi gha-lei-goi ung kaa Thomas (ang phi ah ming ci) cu Bawipa Jesuh ang dang law ba zah ung apaw gui-awn atäng ah kä om tuk ci. 25 Cun ah kia sei apaw gui naw, “Bawipa kami hmu ba pyi ci nei” ci ne m'thein tuk ci gui. Thomas naw, “Akut ung ami khen nak ah hnün kä ka hmuh ung akut awn ami khen nak ah ng'gai kä ka m'tham shüm ung, am'hnaak ka kut awn kä ka m'tham shüm ung, kä ka zum khai nei” cik ci. 26 Cun kawn ah ak hnüüp cheit hnüüp ung ang düihpüi gui cu, kyong ah shoh khai ne ng'bum ba ci gui. A cun ung Thomas cun phi om tuk ci. Cun zah ung Bawipa Jesuh cu ami ng'lung ah ng'düi law netah, “Nami khan ah ding gei nak om sä” cik ci. 27 Cun kawn ah, Thomas-am, “Na kut awn shin ung nam tham ä, ka kut phi na teng ä, na kut k'phiaat ne kam hnaak cu nam tham shüm ä, a i ni mä, ciah kä ngai ne zum ä” ci nak ci. 28 Thomas naw, “Ka Bawipa La Ka Khanpughi ah na kiak ci nei” ci ne pyein ci. 29 Bawipa Jesuh naw, “Nang naw kei cu hmu netah na na zum ci, kei kä na hmuh ah na zum ci gui ah khan ah zeikiai nak be ci nei” ci ne pyein ci. 30 Bawipa Jesuh naw ang düihpüi gui ah ma ah am dang cäicat vai gui, shin ah ca uk ung kä guk tu akda om ci. 31 Cun ung phi Bawipa Jesuh cu Messiah, Khanpughi ah Htapa ah kiak ci, ci ne nami zum vai la, nami zum nak awn nangmi ung ghin nak nami gah vai ah, shin ah ca uk cu guk ah kiak ci nei.
1 Cun kawn ah Bawipa Jesuh cu Tiberias Tuili pei ah ang düihpüi gui ah ma ah ng'dang ba ci. 2 Ang dang ba ah mawng cu; Simon Peter, Thomas (ang phi ah ming ci), Nathanaelah (Kalile kho Kana ah kaa), Zebedee ah hta goi la a hei ang düihpüi hnih goi ni gui cu atäng ah om ci gui. 3 Simon Peter naw, apaw gui-am, “Kei cu nga ka shui khai nei” cik ci. Apaw gui naw, “Keimi phi kami hteit tuk khai” ci u sei, ngami cu ng'hleiko awn nga shui khai gui ah hteit ci gui. Cun ung phi thai ne shui ne tumat phi kä phak ci gui. 4 Khohni a luhlaw zah ung Bawipa Jesuh cu tuikam ah ng'düi ci. Cun ung phi ang düihpüi gui naw kä hmat ci gui. 5 Bawipa Jesuh naw, “Ak hmaw gui awi, nga nami phak ci ang? ci ne ng'shi gui ci. Ngami naw, “Kä kami phak ci nei” cik ci gui. 6 Bawipa Jesuh naw, “Nami hleiko ah k'patlam ung nami ng'vai cu hei vawi vä, nga nami phak khai nei” ci na gui ci. A pyein ah mäih ah ngami naw ng'vai hei vawi u netah, ng'vai chaang ne kä ami näng vai ah nga phak ci gui. 7 Cun kawn ah Bawipa Jesuh ah ahnu ah ang düihpüi naw, “Mik mi ah Bawipa nei” ci ne Peter-am m'thein ci. Peter cu cun ang zak vai-am akhtu suut ne akhei k'htün netah tui ung zung phäi ci. 8 Ang düihpüi am shah gui cu nga be ciah ng'vai so ne, hleiko awn tuikem lam ah hteit ci gui. 9 Ngami cu tuikem ah ami gawk law ung m'htut gui la nga ng'shai cu hmuk ci gui. 10 Bawipa Jesuh naw, “Tuhbäi nami phaa ah nga am shah law püi vä” cik ci. 11 Simon Peter cu hleiko khan ah kai ba netah, nga be ciah ng'vai cu kawng ah kaih lawk ci. Phiaa la hma-kip-lei-thum ah däm ciah nga awk sei phi ng'vai cu kä teek ci. 12 Bawipa Jesuh naw, “Law ne ei law vä” cik ci. Ang düihpüi gui ami van naw ami Bawipa ah hmat zawp ci gui kia ne, a u naw phi, “Nang a u ang” ci ne käng shik ci. 13 Bawipa Jesuh cu ami om nak ah law netah, m'htut cu ngami-am pe gui ci, nga phi pe gui ci. 14 Bawipa Jesuh sih nak ung kaa a thawh ba kawn ah ang düihpüi gui ah ma ah ang dang ba cu tuhbäi awn thum vei lawk ci. 15 Cun ah ami ei kawn ah Bawipa Jesuh naw Simon Peter-am, “Johan ah hta Simon, a hei gui naw ami nam hni ah däm pi ciah kei na nam hni ci ang? ci ne ng'shik ci. Peter naw, “A za Bawipa, kei naw ka ning m'hni cu nang na hmat ci nei” cik ci. Bawipa Jesuh naw, “Ka Htome gui na m'htei vai nei bäi” ci nak ci. 16 Ak hnih vai nak ah Bawipa Jesuh naw, “Johan ah hta Simon, kei na nam hni ci ang” ci ne ng'shi ba mä ci. Peter naw, “A za Bawipa, kei naw ka ning m'hni cu nang naw na hmat ci nei” ci ba ci. Bawipa Jesuh naw, “Ka htome gui nam htei vai nei bäi” ci ba ci. 17 Ak thum vei nak ah Bawipa Jesuh naw, “Johan ah hta Simon, Kei na nam hni ci ang? ci ne ng'shi ba mä ci. Cun ah ak thum vai nak ah ng'shi ba mä khätah, Peter cu thüi netah, “Bawipa, nang naw apäng avan na hmat ci nei, kei naw ka ning m'hni cu na hmat ci nei” ci ne pyein ci. Bawipa Jesuh naw, “Ka htome gui nam htei vai nei bäi, 18 Kei naw akcang ka pyein cu; nang cu nak hmaw zah ung ng'düi law ne na hteh nak hlü ah na hteit man ci, cun ung phi nang cu na ghi law ung na kut vang goi vei k'shäng ci sei chang naw ning khitpawng ne, kä na hteh nak hlü ah ning hteh püi khai” cik ci. 19 (Cun a ci cu Khanpughi ah bämang nak dang khai ah Peter ah a sih vai ah mawng a pyein ah kiak ci. Cun kawn ah Bawipa Jesuh naw, “Na läk ä” ci nak ci. 20 Peter cu mang shüi shüi netah, akhnu ah Bawipa Jesuh naw, am hni ah ang düihpüi tumat cu hmuk ci. Ani cu mü-ei ami ei zah ung, “Bawipa, ga ah kut ung nang ning ap khai cu, a u ang? ci ne ng'shik ciah chang ah kiak ci. 21 Peter naw ani cu hmu netah, “Bawipa, ani mä a i ah kiak khai ang? ci ne ng'shik ci. 22 Bawipa Jesuh naw, “Kei ka law ba güt ung ani ghing ne a om vai ah kei naw kang zak hlü ah a kiak ung, nang naw a i na pyein vai kä om ci, ka hnu ah na läk ä” ci ne kiak nak ci. 23 Cun ah kia sei, ‘cun ah ang düihpüi cu kä si hlawt khai’ ciah Bawipa Jesuh ah ang düihpüi gui ami van ung ng'thu zat ci. Cun ung phi Bawipa Jesuh naw ani kä sik khai ah a pyein ah kä kiak ci, “Kei ka law ba güt ani ghing ne a om vai ah, kei naw kang zak hlü ung phi, nang naw na pyein vai kä om ci” a ci ah kiak ci. 24 Shin ah a mawng gui pyein ne gu ne m'dang ci cu ani ah kiak ci. Ani ah pyein gui küm ciah mik mi naw mi hmat ci. 25 Bawipa Jesuh ah bi a hei akda om ba ci. Cun gui cu avan tumat täi ah guk vai sü ung, cun gui guk nak ah ca uk gui gim nak vai cu, khomdek khan ung a i kä om khai ah ka ngai ci nei.
1 Theophilus aw; Ka guk htük ah cauk cu Bawipa Jesuh naw bi abi law nak ung leng neh, 2 Khankhaw ah akai ba ung khüt ciah kia ci. Cun ah kä ah kai pha ung a ghü gui ah ang düihpüi gui cu Mumcha Theing awn lam shüm gui shüt ci. 3 Ani cu asih kawn ah hnüp phlikip ah kyawng ung ang düihpüi gui ah ma ah akda vei ng'dang ba neh a ghin ba ah mawng cu ak cang ah m'dang shüt ci. Ang düihpüi gui naw ani cu hmuk ci gui, ani naw phi Khanpughi ah uk nak khaw ah mawng cu m'theithang gui ci. 4 Ami ng'bum law zah ung Bawipa Jesuh naw, “Jerusalem ung ka kä na mi hteh cang vai, ka ning m'thein gui man ah Pa Khanpughi ah Shaitak cu na mi gin vai. 5 Johan naw tui awn hnim nak pek ci, cun ung phi nang mi cu kä sho pha seih Mumcha Theing awn hnim nak na mi gah khai” ci neh m'cäi gui ci. 6 Ang düihpüi gui cu ng'bum law u ne tah, “Bawipa, shin ah khin cu Israel chang gui am ami khaw na ap nak ba gui vai ah akhin ah kiah ne ang? ci ne ng'shik ci gui. 7 Bawipa Jesuh naw, “Akhin cu Pa Khanpughi ah m'khüt näng nak bäng ah kiak seih nang mi naw na mi hmat vai ah kä kiak ci. 8 Cun ung phi na mi khan ah Mumcha Theing a kyum law ah a kiak ung, nang mi cu hlüng tai nak awn nami be khai. Cun kawn ah nang mi cu Jerusalem, Judea, Samaria lah khaw cawi ah khüt neh kei ah mawng pyein ciah saksi ah nami kiak khai” ci neh kiak na gui ci. 9 Cun ah ng'thu a pyän kawn ah ami hmuh ge ah Bawipa Jesuh cu, khan khaw ah kai khätah kho ng'mei naw shung sei kä hmu ba ci gui. 10 Cun ah a kai kawn ung ang düihpüi gui cu, khankhaw cäi ne dan ci gui. Cun zah ung abauk sui ciah chang gawi ami pei ah ng'dang law ni ne tah, 11 “Kalilee chang gui, a i ah kiak seih khankhaw ng'düi ne nami dan ang? Nang mi ung ka, nami hmuh ge ah khan khaw ah kai ciah Bawipa Jesuh cuh, a cun ah mäih ah kyum law ba khai nei” ci ne pyein ci gawi. 12 Cun kawn ah ang düihpüi gui cu Olive m'htung ung ka naw, Jerusalem ah hteit ba ci gui. Olives m'htung cu Jerusalem ung kaa naw män m'cawt sho ci. 13 Ngah mi cu pigaw ah gawk u ne tah, ami im kai ah im kyawng ah lut ci gui; cun gui cu, Peter, Johan, James, Andru, Philip, Thomas, Bartholome, Matthe, Alfeas ah hta James, Simon ak ling lah James ah hta Judas gui ah kiak ci. 14 Ngah mi cu Bawipa Jesuh ah anu Mary lah ahei hnu mi gui ni, a naü gui ni, ashäng ashäng atäng ah ng'bum ne k'tai gü ci ci gui. 15 Kho hnüüp api sho law khä tah, zum ciah chang gui phia lah m'ku cu ng'bum lawk ci gui. 16 Cun kawn ah Peter cu ng'düi law ne tah, “Phäi näu gui aw, Bawipa Jesuh phak khai gui am, lam shüm gui ciah, Judas Iskariot ah mawng ca ng'cim ung om ci cu küm pyi ci nei. Cun ah ca ng'cim cu Mumcha Theing naw David ah ng'thu awn a pyein ah kiak ci. 17 Judas cu ang düihpüi tumat ah a ghü tu ah kiah seih mik mi ung ka ah kiak ci. 18 (Ani cu a shet kat nak awn a gah ah ngui awn, lai tumat cu khleih ne tah, a cun ah lai ung apawi teek ne, ak chi lut law seih kiuh ne sik ci. 19 Cun ah amanwg cu Jerusalem ah chang gui naw ng'zah u ne tah, cun ah lai cu ami mät ah ng'thu awn “Akeldama” ah sui ci gui, cun cu “Si lon kho” ci ah kiak ci. 20 “Salan ca ng'cim ung, ‘A im cu shiü sä, akyawng khui ah u kä awm ba sä! ‘Ani ah a hnün ung chang ahei naw ng'düi ne bi sä” ciah om ci. 21 “Cun ah kia sei Bawipa Jesuh a thawh ba ah mawng mik mi awn atäng ah saksi tuk khai ah chang tumat mi m'düih ba khai. Cun ah chang cu Johan naw tui hnim apeit nak ung tün neh Bawipa Jesuh khankhaw ah akai ba ung khüt khai ah, mik mi awn a täng ah hteit htawn bi lo tuk ciah chang ah kiak khai” ci ci. 23 Cun kawn ah ngah mi cu chang sing gawi ung ka tumat ghü vai ah k'bäi ci gui. Cun ah chang gawi cu, Barsabbas ami ci (Justus ah phi ami pyein) ah Josef lah Matthias ah kiak ci. 24 Cun kawn ah ngah mi cu, “Bawipa, nang naw chang ah m'lung kyawng avan na hmat ci, Judas cu amät ah ng'zak hlü ah ang'düihpüi ung ka hteit pyi ci. 25 Ani ah hnün ung bik khai ah shin ah chang hnih ung ka, a u na ghü ah nam thein gui ä” ci gui. 26 Cun kawn ah ngah mi ah hmawk ah htung tän neh ng'zuk u ne tah, Matthias cu ghü u neh ang'düihpüi gha-lei-ät awn atäng ah bi tuk khai ah m'düih ci gui.
1 Pentekos hnüüp ung zum ciah chang gui cu hmun ät ung atäng ah ng'bum ci gui. 2 A cun zah ung khankhaw ah ka, khaw khi nu ah mäih ah ng'hmum ciah k'aw cu ami om nak ah kyawng khui ah gawk law ne be ci. 3 Ngami naw mei ah pying cih k'aw cu hmuh ci gui, cun ah pying ne ng'kah ciah mei m'ghi cu tumat ciah khan ah pek ne gawk ci. 4 Ngah mi cu Mumcha Theing awn küm be u ne tah, Mumcha Theing ah ng'thu m'sak gui ah ng'thu ahei hei awn ng'thu pyän ci gui. 5 Cun zah ung khomdek ah khan, khaw ung ah ka lawk ciah zum nak om ci guiah Judah chang gui cu Jerusalem ah om zah ci gui. 6 Cun ah k'aw cu ng'zak u ne tah, chang khli gui cu ng'bum lawk ci gui. Ang düipüi gui ah ng'thu pyein cu, chang päng naw ami mät ah ng'thu phäh phäh awn ng'zah u ne tah cäi cat ci gui. 7 Cun ah cäi cat ne ngai khit u ne tah, “Shin ah ng'thu pyein ci gui cu Kalile chang gui ah maw? 8 a i hawk cha ah, mik mi van naw mi ng'tüi püi ah ng'thu phäh phäh awn mi ng'zak hning ang? 9 Mik mi cu Parthia, Media, lah Elam; Mesopotamia, Judea, lah Kappadocia, 10 Pontus lah Asia; Phrigia lah Pamfilia; Egypt lah Cyrene ah pei Libya ah ka gui ah mi kiak ci. 11 Am shah gui cu Rom ah ka lawk ci gui ah Judah chang gui lah Judah thung ah om tuk ci gui ah akhui hei chang gui ah kiak ci. Am shah gui cu Crete lah Arabia chang gui ah kiak ci. Cun ung phi chang avan naw, Khanpughi ah bä khäk nak ah mawng ami ng'thu pyein cu, mi mät ah ng'thu phäh phäh awn mi ng'zak ci nei” ci ne kiak ci gui. 12 Ngah mi cu ang'htei ah cäi cat u ne tah, “Shin ah mawng cu a i hawk cha leng leng ang? ci ne ami mät ng'ce cäk ci gui. 13 Cun ung phi am shah gui naw, “shin ah chang gui awk tat ci gui nei” cu ne päipih ci gui. 14 Cun kawn ah Peter cu ang'düihpüi chang gha lei ät ah ng'lung ah ng'düi law ne tah, ak'aw ng'shawng awn, “Judah chang gui lah Jerusalem ung om ciah chang gui, nami van naw nang ngai vä, shin ah mawng cu ka ning m'thien gui khai. 15 Shin ah chang gui cu nang mi ah pyein ah mäih ah awk tat ci gui ah kä kiak ci nei, tuk bäi cu ngawi lam nazi kaw ah vah kiah phak ci. 16 Shin gui cu prophet Joel ah ng'thu aküm nak ah kiak ci. Cun ah prophet ah pyein cu; 17 “Ak hnu bäih ah khaw hnüp gui ung, Chang nüng ah khan ah Mumcha Theing cu ka zuk chah khai, Na mi hta gui kei ah ng'thu shäu khai gui, Ak hmaw chang gui mik hmuk khai gui, aghi ng'vai gui ng'mui mang mah khai gui. 18 Cun ah khaw hnüüp gui ung, Ka chang gui hnumi 'pami van ah khan ah, Ka Mumcha Theing ka zuk chah lawk khai, ngah mi naw kei ah ng'thu shäu khai gui. 19 Ak khan ah om ciah khankhaw ah, cäi aih gui vai kam dang khai, ak ka ah om ciah m'dek khan ah, ngaih khit gui vai kam dang khai. Si ng'hlui ng'huk khai, mei m'lei taut neh, mei khu thet khai. 20 Hngi zin mü seih kho hnüüp khai, cha si ng'hlui ah ng'lat neh sen khai, Hlüng tai neh bä khäk ciah Bawipa ah kyum law nak vai ah hnüüp kä ah gawk law pha ung cun gui cu küm lawk khai. 21 Cun zah ung Khanpughi ah ng'hui neh k'tai gü ci gui cu, hun nak gah khai gui” ciah Khanpughi naw pyein ci. 22 “Israel chang gui kei ah ng'thu cu ngai zawp vä, Khanpughi naw cäi aih gui vai lah ngaih khit gui vai ah Nazareth chang Bawipa Jesuh ah m'khüt näng nak cu ani awn m'dang pyi ci nei. Cun ah amawng gui cu nami ng'lung ah ng'dang pyi ci kiah seih nami van naw nami hmat zawp pyi ci. 23 Khanpughi naw pyein neh ak bäi pyi ah mäih ah Bawipa Jesuh cu, nami kut ung ning ap gui pyi ci; nang mi naw ani cu chang k'she gui am kutlam'tung ung na mi ngawn sak gui pyi ci. 24 Cung ung phi ani cu sih nak naw shung neh kä m'khüt ci, Khanpughi naw sih nak ah hlüng tai nak ung ka 'phiawn neh thawh ba sak pyi ci. 25 Ani ah mawng cu David naw; “Khanpughi cu ang täi seih ka hmuk ci; Ani cu kei ah pei ah om seih, kei cu ng'ä ai nak kä om ci. 26 Cun ah kiak sei kei cu zeikiai nak awn küm be neh, kang thu m'gawng ung phi zeikiai nak ah ng'thu be ci. Kei cu sih nak ma nak ciah chang ah ka kiak ung phi, ngaih u nak awn dim deeih nak om khai nei. 27 A i ah kiah sei ci ung nang Bawipa naw kei cu, sih nak ah khaw ung kä nah na nawng düt khai; Nang ung ng'düng ciah na chang cun phi, Ng'cim hmun ung kä na thu kat sak düt khai ah kiak ci. 28 Ghin nak ah lam cu nah na m'shüm pyi ci, atäng ah nah na om püi nak naw na zei kiai sak khai nei” ci neh pyein ci. 29 “Phäi naü gui aw, ming shon law ung ang ming thang ciah David ghangpughang ah amawng cu, ak dei ang dang ah ka ning m'thein gui khai nei. Ani cu si seih m'cim pyi ci gui, ani ah ng'cim hmun cu, tuk ngawi güt mi hmuh vai ah om ci. 30 Ani cu prophet ah kiah neh amät ah hta ng'shawn ung ka, ghangpughang ah kiah ba khai ci ah Khanpughi ah shai tak cu hmat ci. 31 David naw ngawi ah Khanpughi naw a i bi lawk khai ci cu hmuh hmat ne tah, Messiah a thawh ba vai ah mawng cu ng'daut ne apyein nak ung; “Ani naw Bawipa cu sih nak ah khaw ung kä nawng düt khai, apum sa phi ng'cim hmun ung kä thu kah düt khai” ci ne pyein ci. 32 Khanpughi naw Bawipa Jesuh sih nak ung ka athawh ba sak ah amawng ung mik mi cu mi van saksi ah mi kiak ci. 33 Ani cu Apa Khanpughi ah ak pat lam ah ngawk khai ah tho ba neh, Khanpughi ah shaitak ah Mumcha Theing cu gah pyi ne tah, tuk bäi na mi hmuh ng'zak ah Mumcha theing cu mik mi ah khan ah zuk chah lawk ci. 34 David cu Bawipa Jesuh ah mäih ah Khankhaw ah kai ci ah kä kiak ci; Cun ung phi ani naw; “Bawipa naw ka Bawipa am, 35 ‘Na ga gui avan cu na khaw leh nak gui vai ah, Na khaw ka ah kä kam khäm gui pha ah chuih, kak pat lam ah na ngawh vai’ ci neh kiak nak ci” ci neh pyein ci. 36 Cun ah kiah sei Israel chang gui aw, nang mi naw kut lam tung ung tai ne na mi ngawn ah Bawipa Jesuh cu Khanpughi naw Hun Bawipa lah Messiah ah ak bäi pyi cu akcang ah na mi hmat vai nei” ci neh pyein ci. 37 Cun ah ng'thu ng'zak ciah chang gui cu, ang htei ah ami lung khih gui khä tah, Peter lah ahei ang düihpüi gui am, “Phäi naü gui aw, a i ah mi kiak khai ang” ci ne ng'htau gui ci gui. 38 Peter naw, “nang mi ak chang sing cu, nami kat nak ung ka nami ng'zu ba vai, Bawipa Jesuh Khrih ah ming awn tui nami hnim vai, cun ung nami kat nak cu ning m'gein gui seih, nang mi naw Khanpughi ah Mumcha Theing cu nami gah khai. 39 Khanpughi ah shai tak cu, nang mi ah hmawk, nami hta naü gui ah hmawk lah ang shawng ah om ci gui ah Khanpughi naw akhü gui ah chang gui phung ah hmawk ah kiak ci” ci neh m'thein gui ci. 40 Peter naw cun bäng ah kä kiak ciah, ng'thu akda pyein neh am cäi gui cu, “nang mi cu, chang she gui naw ami gah vai ah kak ci m'kat nak ung, nami mät naw nami mät cu phiawn sak vä” cik ci. 41 Chang ak da naw a ni ah ng'thu zum u neh tui ng'hnim u seih cun ah hnüüp ung chang sing phia thum kip lawh law neh da lawk ci gui. 42 Ngah mi cu ang düihpüi gui ah ng'thei thang tu u neh atäng ah ip om u neh, atäng ah ei awh u neh, atäng ah k'tai gü u neh, mü pyang ci gui. 43 Ang düihpüi gui naw cäi aih gui vai lah ngaih khit gui vai ak da m'dang u khähtah chang gui cu kyi kyawk zawp ci gui. 44 Zum ciah chang gui cu kawng ät neh om u neh ami khawh cham gui phi ng'tei ng'pai neh ei mang ci gui. 45 Ngah mi cu ami khawh cham zawi tuh u neh pyamtham ci am ami ng'zak hlü ah ci ah tei pai ci gui. 46 Ngah mi cu ak hnüüp tä seih pum im ah ng'bum ci gui. Ami im gui ung phi m'lung neim nak lah, zeikiai nak awn atäng ah vun vai ne ei awk ci gui. 47 Ngah mi cu Khanpughi m'hlüng m'tai u neh chang ah ng'lung ah mik hmai kiang seih om ci gui. Khanpughi naw ak hnüüp tä seih hun nak gah ci gui cu da law sak gui ci.
1 Khaw hnüüp ät ung Peter lah Johan cu kho k'awinu, 'taigü nak khin ung pum im ah hteit ci gawi. 2 M'kawt law 'kiom ami ci ah m'kawt pei ah anu puk ah a khaw shum ciah chang tumat cu om ci. Ani cu ak hnüüp tä sei pum im ah lawk ci gui ah ngui ng'zawi khai ah law püi neh ami ngoh sak ciah kiak ci. 3 Ani naw Peter lah Johan pum im ah lut khai gawi ah ani law cu hmuh gawi ne tah, a i baw ani peit vai ah ng'zawi gawi ci. 4 Ngah ni naw ani cu m'htei neh teng ni netah, Peter naw, “kei ni na teng gawi ä” ci ne kiak nak ci. 5 Cun ah kia sei ani naw, a i baw pe lawk khai gawi ah ngai neh, kheing ne teng gawi ci. 6 Cun kawn ah Peter naw, “kei ung ghui ngui kä om ci, cun ung phi kei ung om ci cu ka ning pek khai; Nazaret Bawipa Jesuh Khrit ah ming awn, tho ne na hteh vai, kei naw ka ning khän ci nei, ci neh kiak nak ci. 7 Cun kawn ah ak pat lam a kut ung k'pamgne m'tho ci; acun vai am akhaw la akhaw pha gui cu khüi law seih, ani cu tho ne ng'düi law ne hteit ci. 8 Cun kawn ah zeikiai neh Khanpughi m'hlüng m'tai ne, zawng ne kiah ne dawng ne, ami hnu ah hteit tu neh Pum im kiawng ah lut tuk ci. 9 Cun ah Khanpughi m'hlüng m'tai neh a hteh cu, chang gui naw hmu u ne tah; 10 ani cu pum im m'kawt 'kiom pei ah ngawh ne ng'zawi man ciah chang ah hmat ba ci gui. Cun ah kiah seih ani ah mawng cu chang gui naw cäi cat ne ngai khit ci gui. 11 Acun ah chang naw Peter lah Johan cu khem gawi kheng geng khä tah chang gui cu cäi cat u neh Solomon ah k'caw ah ami om nak ah dawng lawk ci gui. 12 Peter naw chang gui cu hmu gui ne tah, “Israel chang gui, a i ah kiak sei nami cäi cat ang? a i ah kiah seih kei mi cäi cat ne na mi na teng gui ang? kami mät ah hlüng tai nak lah m'khüt näng nak awn, shin ah chang kami gai sak ciah nami ngai ci ma? 13 Abraham, Issac, Jakob ni ah Khanpughi, mipu pa gui ah Khanpughi naw, ak chang shäm Bawipa Jesuh am khankhaw bä khäk nak cu pe pyi ci nei. Cun ung phi nang mi naw ga am ap neh, Pilat naw k'phiawn vai ah k'bäi sei phi, Pilat ah ma ah nami k'she 'dam nah pyi ci nei. 14 Ani cu theing ne ng'cim ne, nik ciah chang ah kiah lang sei phi, nang mi naw Pilat ah ma ah ani cu k'she 'dam nah u ne, chang ngawn ci cu phiawn vai ah na mi ling ci nei. 15 Ghin nak pe hning ciah Bawipa cu na mi ngawn pyi ci, cun ung phi Khanpughi naw sih nak nung ka thawh ba sak pyi ci, cun cu kei mi naw kami mik awn kami hmuk ci. 16 Cun ah Bawipa ah hlüng tai ci ah ang ming naw shin ah shum ciah chang cu gai sak pyi ci. Tuk bäi nami hmuh lah nami hmat cu cun ah Bawipa ah ng'ming ung zum nak awn bi ah kiak ci; nami van naw nami hmuh ah mäih ah, Bawipa Jesuh ung zum nak bäng naw shin ah chang cu gai sak ciah kiak ci. 17 “Phäi naü gui aw, nang mi lah nami ng'vai gui naw, Bawipa Jesuh ah khan ah nami bi gui cu, i kä nami hmat su ah kiak ci, ci cu ka hmat ci nei. 18 Khanpughi naw Messiah asih vaiah mawng cu prophet gui ung ng'cä neh pyein pyi ci nei; shin cu ang cä ah küm nak ah kiak ci. 19 Cun ah kiah seih ng'zu ba u neh Khanpughi ah ng'hlat law vä, nami kat nak ning m'gein gui khai. 20 Cun ung vah Khanpughi ah ka mumcha tha mah nak agawk law nak ah khin küm law seih, nangmi ah hmawk ah ghü ne am düih pyi ah Jesuh Messiah cu nami om nak ah tüi lawk khai. 21 Khanpughi naw a prophet theing gui ah om zah ung a pyein ah mäih ah, a päng avan ak thai ah kä ang'pian pha ah chuih cun ah Bawi cu khan khaw ah om cang khai. 22 Nami Bawipa Khanpughi naw, kei a na tüih law ah mäih ah prophet tumat cu nang mi ah tüi lawk khai; cun ah Bawi cu nami mät pakhui ung ka ah kiak khai, ani ah pyein ah ng'thu phung cu, nang mi naw nami ngaih vai nei. 23 Cun ah prophet ah ng'thu kä ngai ci phung cu, Khanpughi ah ak chang ung ka m'chah ne k'pai netah m'di khai. 24 Samuel lah ahei prophet gui nawh tuk ngawi ng'dang lawk khai ah amawng gui cu, pyein shüt pyi ci gui nei. 25 Khanpughi naw a prophet gui awn apeit ah shai tak gui lah, Nami pu pa gui am Khanpughi ah ng'thu m'khän gui cu, nang mi ah hmawk ah kiak ci. Khanpughi naw Abraham am, “Nang ah hta ng'shon gui awn khomdek chang avan cu hrilham ka pe gui khai nei. 26 Cun ah kiah seih nang mi naw, nami shet kat nak gui nawng shüt neh, hrilham nami gah vai ah, Khanpughi naw a ghü ah a mät ah chang shäm cu, ak htük bäih ah ning tüih law gui ci nei” ci neh Peter naw pyein ci.
1 Peter lah Johan naw chang gui am ng'thu ami m'thein gui zah ung taigü gui, pum im ngäng ciah ng'vai lah Sudducees gui cu gawk law ci gui. 2 Ngah mi naw sih nak ung ka thawh ba nak ah mawng, m'dang ciah Bawipa Jesuh ah thawh ba ah mawng cu, m'thein gui ni khä tah ngah mi cu m'lung k'she ci gui. 3 Cun ah kiah seih ngah ni cu pha gawi u ne a cun hnüüp kho mü khätah a ngawi ung, khaw ngawi güt thawng ung chum gawi ci gui. 4 Cun ung phi a ni ng'thu ng'zah tuk ciah chang ak da naw, Bawipa zum tuk ci gui. Zum ciah chang avan phia hma kip law lawk ci. 5 Angawi ung Judah ng'vai gui, agham gui lah ng'thu m'khän saza gui cu Jerusalem ah ng'bum ci gui. 6 Ngah mi cu taigü tung Annas lah akyawng ung ka gui ah kiak ciah, Khaiaphar, Johan, Alexander lah ami paw gui awn ng'ge ci gui. 7 Ngah mi naw ang düihpüi hnih cu ami ma ah m'düih u ne tah, “Nang ni naw a i cha shin na ni bi ang? , a i hlüng tai nak, a u ah ng'ming awn na ni bi ang? ci ne ng'ng'shi gawi ci gui. 8 Cun ah kiah khä tah Peter naw, Mumcha Theing awn be ne tah, “Chang guiah ami ng'vai gui lah a gham gui aw, 9 a khaw shum ciah chang, ak ni ah a gai law ba ah mawng ung kei ni k'cet ne na mi na ng'shi gawi ci, shin ah chang cu, 10 nang mi naw kut lam tung ung tai ne ngawn uk ci seih Khanpughi naw a thawh ba sak ah Nazaret Bawipa Jesuh Khrit ah hlüng tai ciah ang ming awn theek ne gai ne, nami ma ah ang düih cu, nang mi lah Israel chang van naw nami hmat khainei. 11 Jesuh Khrit cu; “Lung im nami cawh ung nami nawng shüt ah lung cu, ak kui kyang pi bäih ah lung ak tung ah kiah lawk ci” ci ah ca ng'cim ah pyein cu Bawipa Jesuh, ah kia ci. 12 Ani bäng cun vah Hun Bawi ah kiak ci, khomdek ah khan ung ani ah kawn ah, mik mi na hun gui khai, Khanpughi ah ghü u kä om ci” ci neh m'hlan ba gui ci. 13 Peter la Johan cu hmuh hmat nak kä däm ciah chang ah kia lang ni neh ani ng'thu htaü hning cu kawngsi ng'vai gui naw hmuh u ne tah ang htei ah cäi cat ci gui. Ngah ni cu Bawipa Jesuh ah ng'düihpüi gawi ah phi hmat gawi ci gui. 14 Cun ung phi gai ba nak gah ciah chang cu Peter lah Johan awn atäng ah ng'düi ci kiah khäh tah a i phi kä pyein hlawt ci gui. 15 Cun ah kiah seih ang düihpüi gui cu tüi ba gui u ne tah 16 “Shin ah chang gui a i ah ci gui vai ang? cäi aih gui vai ami m'dang cu Jerusalem ung om ciah chang avannaw hmuh hmat pyi ci, käk hleei nak gui hlawt vai kiah pyi ci. 17 Cun ung phi shin ah amawng cu chang khli naw kä a hmat ten tu vai ah cän kawn ah shin ah chang gawi naw Jesuh ah ming awn a i kä a ni pyein nen ba vai ah khen neh mi ma nah gawi khai nei” ci neh ng'ge ci gui. 18 Cun kawn ah ang düihpüi gui cu khü ba gui u ne tah Jesuh ang ming awn a i phi kä ami pyein sak, m'thei thang ba gui vai ah khen neh m'cäi gui ci gui. 19 Cun ung phi Peter la Johan naw, “Nang mi ah ng'thu ngaih vai lah Khanpughi ah ng'thu ngaih vai cu, Khanpughi lam ah ngaih ung a i, ang düng pi ah na mi mät naw m'khoi chah vä; 20 Kei mi läi kami hmuh lah kami ng'zak cu kä pyein ah kä ka mi om hlawt khai nei” ci neh kiak nah gui ci gui. 21 Kawngsi ng'vai gui naw, ngah ni cu khen neh k'taap ba goi ne tah tüi ba gawi ci gui. Acun ah amawng gui hmuh tuk ciah chang gui naw Khangpughi m'hlüng m'tai zawp u khä tah ang düihpüi gui cu a i ah phi käm kat gui hlawt ci gui. 22 Shum te ci, cäi cat vai ah gai ciah chang cu a khaw kum phli-kip ah däm ci. 'Taigü Nak. 23 Peter lah Johan cu ami tüih ba goi kawn ah ani paw gui ah hteit ba ni ne tah taigü ng'vai gui lah agham gui ah pyein ah ng'thu cu m'thein tu ba gui ci gawi. 24 Cun ah ng'thu cu ng'zah u ne tah zum ciah chang gui cu bum u neh, “Khankhaw lah khomdek, tuinu lah ak ghing om avan tüi piang ne uk ciah Khanpughi, 25 na chang shäm, kami pughi David am Mumcha Theing awn nang thu cu; “A i ah kia seih chang pakhui hei gui ami tung tu ang; A i ah kia seih chang gui naw ak she m'zih neh ami pawng püi ang? 26 Khomdek khan ghangpughang gui naw, Khanpughi cu ng'tuk püi vai ah pawng püi pyi ci gui, Bawipa lah Messiah cu hnu ng'tuk püi vai ah ng'bum pyi ci gui” ciah kiak ci. 27 A cun ah mäih ah Herod lah Pontius Pilate cu, chang pa hei gui lah Israel chang gui awn atäng ah Messiah ah nam düih, na chang shäm ah Bawipa Jesuh cu hnu ng'tuk püi vai ah ng'bum man ci gui nei. 28 Cun ah ami bum cu na hlüng tai nak lah nang zak nak hlü awn nak bäi pyi gui aküm be nak vai ah kiak ci nei. 29 Aw Bawipa ngah mi ah pawng püi nak cu zuk chah pe gui ä. Na na chang shäm gui am, nang thu kami pyein nak hning vai tha gui na zuk pe gui ä. 30 Gawi ci naw a gai nak vai, na kut zu k'phiat lawä; Na shäm ah Bawipa Jesuh ah ming theing awn cäi aih vai gui lah ngaih khit vai gui gui cu, zuk m'dang lawä” ci neh Khanpughi ah taigü ci gui. 31 Ami taigü zawp vai am cun ah ami taigu nakah hmun cu ng'tum ne thüng ci. Ngah mi cu ami van Mumcha Theing awn be u ne tah, Khanpughi ah ng'thu cu thamah nak awn pyein sak ci gui. 32 Zum ciah chang gui cu ami m'lung ngaih kawng ät u neh, a u naw phi amät ah khawh cham cu aka ah käm tung sei, ami khawh cham avan cu ami ka ghawm ah ngai ci gui. 33 Ang düihpüi gui cu hlüng tai nak awn k'thamah ne, Bawipa Jesuh a thawh law ba ah mawng cu saksi ci gui, Khanpughi naw phi ngah mi ah khan ah män h mang nak hrilham cu k'be gui ci. 34 Im tak ci naw a im, lai tak ci naw a lai, zawi u ne tah ang düihpüi gui am ap lawk ci gui. 35 Cun kawn ah ang düihpüi gui naw tumat ciah, ng'zak hlü ah ciah, tei pai gui ci gui. Cun ah kiah sei ngah mi ung i kä tak ci cu kä om ci. 36 Saipras khaw ah ka Levit ah ng'shon Josef, ang düihpüi gui naw barnabas (shawih khem tuk ciah ming ci) ah ami khü ah chang tumat cu om ci. 37 Ani naw amät ah lai cu zawi ne tah ngui law püi neh ang düihpüi gui am ap gui ci.
1 Ananias ming nak ciah chang tumat la ak chu Saphira cu ani khomdek zawi ci gawi. 2 Cun-ung phi Ananias cu ak chu ng'ge püi netah alai a zawih cu ateih k'pai neh am shah cu amät ah ka vai gim ne; am shah cu ang düihpüi gui am ap gui ci. 3 Peter naw, “Ananias, nang cu na lai na zawih k'pai ne na gim ah phäh ah Mumcha Theing nam hleei pyi ci nei, a i vai khoshe ah pyein ah na bi ang? 4 Shin ah lai kä na zawih pha ung phi na mät ah ka ah kiak ci, shin ah lai na zawih kawn ah phi lai ah phu ngui cu na mät ah ka ah kiak ci, cun ah kia lang sei, a i vai cun ah na ngaih tüh ang? Nang cu chang nam hleei ciah kä kiak ci, Khanpughinam hleei ci ah kiak ci nei” ci ne kiak nak ci. 5 Cun ah ng'thu ang zak vai am Ananias cu, kiuh ne sih seih, acun hmuh ng'zah tuk ciah chang gui cu ang htei ah kyi kyawk ci gui, 6 Ak hmaw chang gui naw law neh Ananias ah agook cu, zih awn k'tawm ne tah ak pung ah hteh püi neh m'cim ci gui. 7 cun kawn ah nazi k'thum lung khä tah Ananias ah ak chu cu gawk lawk ci. Ani cu kä ah gawk law pha ung, ami kiak gui cu kä hmat tu phak ci. 8 Peter naw, “na ni lai ngui i chü ah ang na ni zawih? nam thein ä? cineh ng'shik ci. Cun ah hnu mi nawh” ak cang ah, a cun chü ah nei ka ni zawih “cik ci, 9 Peter naw, a i ah kiah sei nang ni naw Khanppughi ah Mumcha Theing m'hleei m'hlak vai ah na ni k'bäi ang? Na cei m'cim ciah chang gui m'kawt law k'pha law ba ci gui nei, ngah mi naw nang mä kawt ne ning m'cim lawk khai gui nei” ci ne kiak nak ci. 10 Acun vai am cun ah hnu micu Peter ah khaw pei ah kiuh ne sik ci, Ak hmaw chang gui naw cun ah a sih cu hmuh u ne tah kawt ne hteh püi neh a cei ah pei ah m'cim tuk ci gui. 11 Pum ci gui ami van la cun ah amawng ng'zah tuk ciah chang avan cu ang hteiah kyi kyawk ci gui. 12 Ang düihpüi gui naw chang gui ah ma ah cäi aih gui vai la ngaih khit gui vai akda m'dang ci gui. Zum ciah chang gui ami van cu Solomon ah k'caw ah ng'bum ci gui. 13 Chang gui naw ngahmi cu m'hlüng m'tai gui pang u ne phi a u phi ngahmi ung a zäi ah kä ng'läk tuk ci gui. 14 cun ung phi Bawipa zum ciah hnumi pami gui cu da law pi täi ci gui. 15 Chang gui naw gaw pai ci gui cu law püi ci gui. Peter a hteh zah ung apü püi naw baw tah ang'hnim vai ah phak ni, kawh nak gui ni awn lam ung m'shäm ci gui. 16 Cun bäng ah kä kiak ciah Jerusalem ah pei pigaw zung ah ka gawpai ci gui, Khaw ‘she ah kai gui cu ami van gai ba zawp ci gui. 17 Cun kawn ah Taigü tung la, apaw gui ah kiak ciah pigaw gui ah ka Sadducee gui cu ang Düihpüi gui ah khan ah ang htei ah käng zah hlü ne m'thüi u netah, ci gui vaiah k'bäi ci gui. 18 Ngahmi naw ang düihgui cu pha gui ne, thawng ung chum gui ci gui. 19 Cun ung phi khaw mü ah Khanpughi ah khan khaw chang naw, thawng m'kawt cu hmawng ne, ang düihpüi gui cu ak pung ah m'hlaut gui netah, 20 “Nangmi cu Taigü imah hteit u netah chang gui am ghin nak akthai ah mawng m'Thein gui vä” cik ci. 21 Ang düihpüi gui cu khankhaw chang ah ng'thu ngai u ne, ai khawn htük ung taigü imah hteit ne m'thei thang ci gui. Taigü tung la apaw gui ni, kawngsi gui ni ng'ge nak vai cineh Zudah ng'vai gui cu khü gui ci gui. Cun kawn ah gakap gui tüi gui ne, ang düihpüi gui cu khü sak gui ci gui. 22 Cun ung phi thawng ah ang düihpüi gui cu kä hmuh u ne, kawngsi gui ah om nakah law ba u netah 23 Keimi kami gawk ung thawng m'kawt cu ak ni ah ng'khai ci, m'kawt ngäng ci gui phi m'kawt pei ah ng'düi u sei kami hmuh gui ci; cun ung phi chawh hmawng ne kami va luh ung ak kyawng ah u phi kä kami hmuk ci, ci ne pyein ci gui. 24 Cun ami ci cu Taigü khem lah m'kawt ngäng ciah ang vaipi naw ng'zak ni netah, “Shin ah mawng cu a i hawk cha ang cineh ngai khit ci gui. 25 Cun zak ung chang tumat gawk law netah, Thawng ung nami chum gui ah chang gui cu taigü im kyawng ah om ne, chang gui m'thei thang gui ci gui nei” ci ne m'thein law gui ci. 26 Cun kawn ah m'kawt ngäng ciah ang vai naw ak chang gui khah püi gui ne, ang düngpüi gui cu va kgü ba gui ci. Cun ung phi chang gui naw lung awn ami vawih gui vaiah ng'ä u netah ang düihpüi gui cu kä tuthat gui ci gui. 27 Cun ah ang düihpüi gui cu law püi gui ne kawngsi gui ah ma ah m'düih gui u netah Taigü tung naw ng'shi gui ci. Ani naw, 28 “A cun ah chang ah ng'ming awn kä na mi m'theithang en ba vai ah, keimi naw ak khengah kami ning maa nah gui pyi ci, Cun ung phi nangmi naw Jerusalem khaw avan ung na mi m'theithang gui pyi ci. Ani ah sih phi keimi ah om ah nami pyein law hlü pyi ci nei” ci ne kiak nah gui ci gui. 29 Peter la apaw gui naw, “Keimi ah ngaih vai cu Khanpughi ah kiak ci, chang ah kä kiak ci. 30 Kami pughi guiah Khanpughi naw kutlamtung ung tai ne nami ngawn ah Bawipa Jesuh cu, thawh ba sak pyi ci. 31 Israel chang gui ng'zu ba u netah ami kat ami phiawn nak vai ah, Khanpughi naw cun ah Bawipa cu, thawh ba sak netah akpat lam ung ang vaipi lah Hun Bawipa ah ngoh sak pyi ci nei. 32 Shin ah amawngung keimi cu saksi ah kami kiak ci, ang thu ngai ci gui am a zuk m'kyum lawah kiak ciah, Mumcha Theing cun phi saksi ah kiak ci” ci ne pyein tuba ci gui. 33 Cun ah ng'thu cu kawngsi ng'vai gui naw ng'zah u netah ang htei ah m'lung she u neh ang düihpüi gui cu ngawn hlü gui ci gui. 34 Cun ung phi Gamallel ming nak ciah Pharisee tumat cu, kawngsi zungah ng'düi law netah ang düihpüi gui cu ashäng ak pung ah ami hteh püi gui vai ah pyein ci. Ani cu chang gui naw ami chang m'sui tu ah ng'thu m'khän saza ah kiak ci. 35 Cun ah chang naw, “Israel chang gui aw, shin ah chang guiah khan ah nami bi vai cu geing nah ne nami bi vai nei, 36 Azan hta Shängung Theudas ming nak ciah chang tumat cu amät naw amät chang k'tung khak ah m'hlüng m'tai ne om ci, a hnu ah läk ciah chang phia'phli vai lawk ci. Cun ung phi ani ami ngawn kawn ah ak chang gui püi zawp u sei abi mawng phi maih zawp ci. 37 Cun kawn ah ming ami k'tä zah ung Galile chang Judas cu ng'dang law ba ne chang gui ng'ge ne m'htawi gui ci. Cunung phi ani cu ngawn u sei ak chang gui phi püi pawng zawp ci gui. 38 Cun ah kiah sei kei naw ka pyein hlü cu, shin ah chang gui kä hei nah gui vä, ami bü ah om u sä; 39 Ngahmi ah ngaih tüh bilawh gui cu, chang ah pawng püi ah akiak ung maih ne ng'kawn khai nei, cunung phi cun gui cu Khanpughi ah ngaih tüh bilawh gui ah akiak ung, nangmi naw kä nami m'dimdap gui hlawt khai, nangmi cu Khanpughi nami hnung'tuk püi ciah kiak lawk khai nei” ci ne pyein ci gui. 40 Kawngsi ng'vai gui naw Gamaliel ah ng'thu cu ngai u netah ang düihpüi gui cu khü gui ci gui. Cun kawn ah that gui u netah Bawipa Jesuh ah ng'ming awn ng'thu kä ah mi pyein nen ba vaiah, khen neh m'cäi gui netah tüi ba gui ci gui. 41 Ang düihpüi gui cu Khanpughi naw Bawipa Jesuh ah hmawk ah hmai m'sheit nak aut khin ci gui ah ak bäi gui ah phäh ah zeikiai u ne kawngsi zungah ka hteit ba ci gui. 42 Ak hnüüp tä sei taigü im gui lah chang gui ah im gui ung, Bawipa Jesuh cu Messiah ah akiak ah mawng ng'thu’ ni cu pyän u ne, m'thei thang ba gäk gäk ci gui.
1 Apipi shou law sei, ang khah püi gui da law pi k'täi ci gui. Cun zah ung Greek ng'thu ah ng'thu ciah Jew chang gui la khomah Jew chang gui ah ng'lak ah kä ami ng'gei nak om ci. Greek ng'thu ah ng'thu ciah Jew chang gui naw, hmeinu gui cu ak hnüüp tä män h khai ah ngui käk dük ci gui cineh’ she nah gui ci gui. 2 Cun ah kiah sei ang düihpüi gha-lei-gawi naw zum ciah chang van cu khü gui u netah “Keimi cu Khanpughi ah ng'thu pyein nak nawng en neh ngui ah mawng kami bilawi khai ah kä kiak ci. 3 Cun ah kiah sei, phäi nau gui aw, nangmi ung ka Mumcha Theing awn be neh hmuh hmat nak om ciah chang sing chih nami ghü vai, shin ah mawng bik khai gui ah ngahmi cu kami m'düih gui khai. 4 Keimi läi cu taigü nak lah Khanpughi ah ng'thu pyein nak awn akhin be khai ah kami bik khai” cik ci gui. 5 Cun ah ami ci cu aming khah püi gui avan naw zum zawp ci gui. Ngahmi naw Mumcha Theing awn be neh ng'düng nak om ciah Stephen cu ghü htük ci gui. Cun kawn ah Philip, Prochorus, Nicanor, Timon, Parmenas lah ak khui hei, Antioch ah ka, Jew thungman zum tuk ciah Nicolaus gui cu ghü gui ci gui. 6 Zum ci gui naw cun ah chang gui cu, ang düihpüi gui ah pei ah law püi u khätah ami khan ah ami kut taih ne taigü pe gui ci gui. 7 Khanpughi ah ng'thu cu pyän law pi k'täi u sei Jerusalem ung zum ciah chang cu da law pi sei, taigü ng'vai gui phi akda naw zum lawk ci gui. 8 Stephen cu Khanpughi ah bäkhäk nak la hlüngtai nak cu akbe ah gah ciah kiah ne, cäicat gui vai lah ngaih khit gui vai cu akda m'dang ci. 9 Cunung phi ani cu Cicrene lah Alexandria ah ka, Jew chang gui mah ah pum im ung ka, päize chang gui naw hnu ng'tuk püi ci gui. Acun gui lah Cilicia lah Asia ah ka, Jew chang gui naw Stephen cu ng'küüngneet püi ci gui. 10 Cun ung phi Stephen cu Mumcha Theing ah peit ah hmuh hmat nakawn ng'thu ci kiah neh käm hlan tu ba hlawt ci gui. 11 Cun ah kiah khätah ani cu Mose lah Khanpughi cu m'kat ne ng'thu pyein sei kami ng'zak ci nei” ci neh ami kiak vai ah, chang am shah am khawh pe neh pyein sak gui ci gui. 12 Cun ah bi u neh chang akda gui, ami ng'vai gui lah ng'thu m'khä saza gui cu k'tü k'phlawh gui u sei, ngahmi naw Stephen cu phah neh kawngsi zung ah hteh püi ci gui. 13 Cun kawn ah hleei neh saksi khai gui phi, thäm law gui ci gui. Cun ah saksi gui naw, “Shin na chang cu taigü im lah Mose ah ng'thu m'khän cu hnu nah neh ng'thu pyein ci nei, 14 Nazaret chang Jesuh naw 'taigü im cu gä netah, Mose ah peit ah thungzo phi m'shet ciah thu pyein sei kami ng'zak ci nei” ci ne pyän ci gui. 15 Kawngsi zung ah gawk ciah chang gui naw Stephen cu kheing ne teng u netah, ani ah hmai cu khankhaw chang ah hmai awn täng sei hmuk ci gui.
1 'Taigü tung naw Stephen am, “Ngahmi ah pyein cu ak cang ang? ci ne ng'shik ci. 2 Stephen naw, “Phäi nau gui lah Pa ng'vai gui aw, nang ngai vä, mi pughi Abraham cu Haran khaw ah hteit ne kä a om pha ung Mesopotamia ah a om zah ung hlüng tai ciah Khanpughi cu ng'dang netah, 3 Na mät zah gui lah na khaw cu nawng shüt neh ka ning m'shüm nak ah khaw ah na hteh vai” ci ne kiak nak ci. 4 Cun ah kiah sei Abraham cu Chaladean khaw ah ka, Haran kho ah hteit ne om tuk ci. Apa asih kawn ah tuk bäi nami om nak ah khaw ah Khanpughi naw tüi ne om sak ci. 5 Cun zah ung Khanpughi naw cun ah khaw ung Abraham am khawh a i phi kä pek ci, khomdek dawng veing hta phi kä pek ci. Cun ung phi cun ah khaw cu, amät am phi bäi, ahta nau gui am phi bäi avan ka ning ap khai ciah shai tak ci. Cun zah ung Abraham ung ahta kä om phak ci. 6 Khanpughi naw Abraham am, “Na hta nau gui cu a khaw hei ah chang hei nu ah kiah ne om tuk khai gui, khaw kum phia-phli ung khlei- htein ah kiah u seih chang naw shedam nah gui khai. 7 Ngahmi khlei-htein nah gui ciah chang gui cu, kei naw kam khoichaa gui khai. Cun kawn nah nang ah hta nau gui cu cun nah khaw ung ka phiawng u neh, shin ah khaw ung kei cu nak taigü khai gui” ci neh kiak na gui ci. 8 Cun kawn ah Khanpughi naw, ang thu m'khän am dang nak ah, vun aat nak ah mawng cu Abraham am ap ci. Cun ah kiah sei Abraham naw, ahta Isaak cu ami hta nak ah ak hnüüp cheit ung van aat nak bi pek ci. Jakob naw ahta sing gha-lei-gawi phi, vun aat nak bi pe gui ci. Jakob ah hta gui cu chang pakhui gha-lei-gawi ah pa gui ah kia lawk ci gui. 9 Jakob ah hta gui naw ami nau Josef cu m'thüi nah u neh tah Egipt khaw ah khlei-htein nak kiak khai ah zawi ci gui. 10 Cun ung phi ani cu Khanpughi naw atäng ah om püi neh, gein vai nak gui ung ka, phiawn sak ci. Josef cu Egipt ghanpughang ah ma ah a gawk law ung Khanpughi naw a hmai kiang sak neh hmuh hmat nak phi pek ci. Cun ah kia sei ghangpughang naw ani cu, Egipt khaw ung bawi ng'vaipi la gawnu mang ah k'hmoh ci. 11 Cun zah ung Egipt lah khanan khaw ung khaw zaw sei gein vai ci gui. Mi pupa gui cu ami ei vai kä om ba ci. 12 Jakob naw Egipt khaw ung ei vai htang om ciah ng'zah netah ahta gui cu ak htük ah tüi gui ci. 13 Ak hnih vei nak ami law ba ung Josef naw a phäi gui naw ami hmat vai ah m' thein gui ci. Egipt ghangpughang naw phi Josef ah kyongkhui ah mawng cu hmat lawk ci. 14 Cun ah kia sei Josef naw apa Jakop cu cük ne, chang sing chih- kip-leihma lawk ci gui ah apaw gui ami van Egipt khaw ah ami law vai ah, k'thäh gui ci. 15 Jakob cu Egipt khaw ah law tuk ci, acu ah amät lah ahta gui ami van sih tuk ci gui. 16 Ami gok gui cu Shehem pigaw ah hteh püi gui netah Hamor pahta ni ah Abraham naw ngui awn a thawn ba ah ng'cim hmun ung m'cim gui ci gui. 17 Khanpughi naw Abraham am apeit ah shai tak nak aküm law vai ng'et law khä tah Egipt khaw ung Israel chang gui da law pi ci gui. 18 Cun kawn ah Egipt khaw ung Josef kä hmat ciah ghangpughang kai lawk ci. 19 Cun ah ghanpughang naw mi pughi gui cu m'khawi hnga gui neh shedam nah gui ci. Ami hmaw hta gui ami sih vai ah imah ak pung ah hta sak gui ci. 20 Cun zah cu Mose ami hta nak ah khin ah kiak ci, Mose cu ang htei ah kiom ciah ak hmaw hta ah kiak ci. Ani cu cha thum ung apa ah imah ami om püi ah kiak ci. 21 Ani cu im ah akpung ah ami ghawh kawn ah Pharaoh Ghangpughang ah hta hnumi hta naw lah neh ahta ah tha neh om püi ci. 22 Mose cu Egipt chang gui ah hmuh hmat nak avan ng'theithang netah, hmuh hmat nak lah m'khüt sheng nak ung hlüngtai ciah chang ah kia lawk ci. 23 Ani cu a khaw kum phli-kip law khä tah, amät ah pakhui Israel chang gui ah om nak ah hteit khai ah k'bäi ci. 24 Cun ah ahteh zah ung Israel chang cu Egipt chang naw tuthat sei hmuh netah apaw gung tu neh Egipt chang cu ngawn neh phu tuk ci. 25 (Mose naw, Khanpughi naw Israel chang gui k'phiawn gui khai ah a tüih cu, ak chang gui naw hmat khai gui ah ngai ci, cun ung phi ngahmi naw kä hmat ci gui). 26 Angawi ung Israel chang gawi ng'tuh ni sei hmuh gawi netah, Mose naw, “Nang ni cu ng'phäi nau gawi ah kiah netah a i vai na ni ng'tuk ang” ci neh m'chah gawi ci. 27 Cun ung phi ak she ah bik ciah chang naw Mose cu buh neh 'kit netah “Keimi na uk gui neh na na m'khoichaa gui khai ah, a u naw a ning m'düih ang? 28 Zanta Egipt chang na ngawn ah mäih ah, kei mä nah na ngawn hlük ci ma? ci ne ng'shik ci. 29 Mose cu cun ah ng'thu ng'zah netah Egipt khaw ah ka, dawng neh Midian khaw ah om tuk ci. Cu ah a om nak tu ah pami hnih ah hta ci. 30 Khaw kum phli-kip lüng khä tah Sinai khaw m'htung pei ‘pya lün nu ah, mei ah däi ciah k'plup ah ng'lung ah khankhaw chang cu Mose ah hmuh ah ng'dang ci. 31 Cun hmuh ne Mose cu ang htei ah cäi cat ne, m'htei neh ahmuh vai ah hei 'et khäh tah, 32 “Kei cu napu pa gui ah Khanpughi, Abraham, Issac lah Jakob niah Khanpughi nei” ciah Khanpughi ah k'aw cu ng'zak ci. Mose naw kyih kyawk aih netah kä teng hlawt ci. 33 Khanpughi naw Mose am? , Na phahnak suut ä, nang düih nak cu theing thap ciah hmun nei, 34 Ka chang gui Egipt khaw ah ami shedam nak gui cu, ka hmu pyi ci nei, Ngahmi ah ng'hlaw ng'ei m'lau ng'pyan phi kang zah pyi ci nei. Cun ah kia sei ngahmi ka hun gui khai ah ka kyum law pyi ci, Tuk bäi law ä, Egipt khaw ah ka ning tüi khai” cik ci. 35 Mose cu Israel chang gui naw ami hnu nak ah chang ah kiak ci. Ngah mi naw, “Keimi na uk gui neh na na m'khoicha gui khai ah a u naw a ning m'düih ang? ci ne, ng'shik ci gui. Ani cu chang gui uk gui neh mei ah däi ciah k'plup ung dang ciah khankhaw chang ah bi nak püi awn, ak chang gui k'phiawn gui khai ah Khanpughi ah tüih ah kiak ci. 36 Ani naw Egipt khaw lah Tuisen tuinu ung phi bäi, khaw kum phli- kip ung k'pya lünnu ah phi bäi, cäi aih gui vai lah ngaih khit gui vai cu m'dang neh Egipt khaw ah ka, Israel chang gui law püi ba gui ciah kiak ci”. 37 Khanpughi naw ami mät pakhui ung ka, Profet tumat cu, kei a na tüih law ah mäih ah tüi lawk khai nei” ci neh Mose naw Israel chang ghu am kiak na gui ci. 38 Ani cu bung puk ah om ci gui ah Israel chang gui, kami pu pa gui lah Sinai khaw m'htung ung ng'thu püi ciah khankhaw chang awn atäng ah om ciah chang ah kiak ci. Mik mi am ana peit gui vai ah Khanpughi ah ghing ciah ng'thu gah ciah chang ah phi ki ak ci. 39 “Cun ung phi mi pu pa gui cu, ani ah ng'thu kä ngai u neh, ani nawng-en neh Egipt khaw ah hteit ba hlük ci gui. 40 Cun ah kia seih ngahmi naw, Aron am, Keimi lam nam shüm gui khai ah khanpughi-hta gui na pian pe gui ä. Keimi Egipt khaw ah ka, na law püi ba gui ciah Mose cu a i ah kiak ciah kä ka mi hmat ci nei” ci neh kiak ci gui. 41 Cun kawn ah ami mät naw, seipat hta ah gup piang u neh, acun-am vawih peh taigü neh zeikiai ci gui. 42 Cun ah kia sei Khanpughi naw ng'hlah tah gui neh, khankhaw ah aisi gui ah k'taigü sak gui ci. Cun ah mawng Profet guiah ca guk cu; Israel chang gui aw, nang mi naw ‘Pya lün nuah khaw kum phli-kip ah kyawng ung m'ghu ng'tha neh nami tumbei cu, 43 Nangmi naw nami m'kawn law gui cu, Molech ah ng'zo kiang lah nami aisi pughi Rephan ah kiak ci nei; Cun gui cu nami khawihnah vai ah nami mät naw nami pian ah agup gui ah kiak ci. Cun ah kia sei nangmi cu Babilon phlän neh nami hteit khai ah ka ning k'täm gui khai” ciah kiak ci. 44 “Kami pupa gui naw, Khanpughi ah om nak ah khaw-phung cu k'pya lün pum ung m'kawn lawk ci gui. Mose am Khanpughi naw am'hmuh ah mäihah cun ah khaw-phung ami cawh ah kiak ci. 45 Kami pupa gui naw cun ah khaw-phung cu, ami pa gui ah kut ung do u neh Khanpughi naw ak täm gui ah om nak khaw ah, Joshua awn atäng ah ami tuk gui zah ung m'kawn neh hteh püi ci gui. Cun ah khaw-phung cu David ah uk zah ung khüt sei cun ah khaw ah om ci. 46 David cu Khanpughi ah ma ah ahmai kiang ci kiah neh Jakob ah Khanpughi ah a om nak vai taigü im cu Khanpughi naw a cawh sak vai ah 'thäh ne taigü ci. 47 Cun ung phi cun ah im a cawh sak cu Solomon ghangpughang ah kiak ci. 48 “Cun ung phi hlüng tai pi 'bäih ci ah Khanpughi cu chang ah cawk ah im ung kä om ci. A i ah kia sei ci ung profet ah ng'thu pyein ung; 49 “Khanpughi naw, Khankhaw cu ka mang kiang ah kiak ci, Khomdek cu kang leh khän nak ah kiak ci. Kei ah hmawk ah a i ah mäih im na co khai ang? Kei ah om nak vai ah hmun cu a hawi ang a om? 50 Kei ka mät naw ang tüi avan ka tüi piang ciah kä kia ne ang? ci ne pyein ci” ci ah om ci. 51 Stephen naw, “Nang mi cu nami ling aih aih ci, na mi m'lung naw Khanpughi kä zum hlawt ci, Khanpughi ah ng'thu phi kä nami zum hlük ci, nang mi cu nami pupa gui ah mäih ah Mumcha Theing cu ang täi sei nami hnu nak ci nei, 52 nami pupa gui naw kä ami shedam nak ah profet a u om ne ang? Ngah mi cu Khanpughi ah ng'düng ciah chang shäm akyum law vai ah mawng pyein ciah ng'shä gui cu ngawn ci gui nei. 53 Tuk bäi nangmi naw cun ah Bawipa cu, ga ah kut ung ap neh nami ngawn pyi ci nei. Khankhaw chang gui ung Khanpughi naw aning peit gui ah ng'thu m'khän cu gah lang u neh, kä nami läk ci nei. ci ne kiak nah gui ci. 54 Judah kawngsi ng'vai gui cu Stephen ah ng'thu ng'zah u netah ami ha htui neh m'lung k'she ci gui. 55 Cun ung phi Stephen cu Mumcha Theing awn be neh khankhaw cu han dan netah, Khanpughi ah bä khäk nak lah Khanpughi ah k'pat lam ung ng'düi ciah Bawipa Jesuh cu hmuk ci. 56 Cun kawn ah Stephen naw, “Teng tu vä, khankhaw m'kawt ng'hmawng khätah, Khanpughi ah k'pat lam ung Chang ah Htapa ng'düi sei ka hmuk ci nei” ci ne pyein ci. 57 Kawngsi ng'vai gui cu m'lau u neh, ami kut awn ami k'hnga 'bawm zawp u neh, ani ah om nak ah dawng lawk ci gui. 58 Stephen cu phah u neh pigaw k'pung ah hteh püi u netah, ng'lung nah ne lung awn vawi ci gui. Vawi ciah chang gui cu ami suinu suut netah Soul ming nak ciah ak hmaw chang tumat am ap ci gui. 59 Cun ah lung awn ami vawih zah ung Stephen cu, “Oh Jesuh Bawipa kamumcha na zuk la peä” ci ne 'taigü ci. 60 Ani cu m'khuukdoong netah, “Khanpughi awi, shin ah chang gui ah ami kat nak cu m'gein gui ä” ci neh ak'aw m'can neh m'lau netah kät lawk ci. Soul cu Stephen ngawn vai ah zum tuk ciah chang ah kiak ci.
1 Cu hnüüp ung tün neh Jerusalem ung om ciah khritha gui cu, ak she ah dudeiu nah gui ci ci gui. Cun ah kiah sei ngah mi cu Judea khaw lah Samaria khaw zung ah püi piang zawp u sei. Ang düihpüi gui bäng om ba ci gui. 2 Zum ciah chang am shah cu Stephen nah gook cu m'cim u neh thui sei kyap m'lau ci gui. 3 Cun ung phi Soul naw khrithabum gui cu m'di gui vai ah 'tha nak ci. Ani cu a im tung päng ung hteit neh, hnumi 'pami sawkaih gui neh thawng ung chum gui ci. 4 A khaw hei hei ah püi piang ci gui ah zum ciah chang gui naw ng'Thu Ni cu hei pyein vük ci gui. 5 Philip cu Samaria khaw pigaw ak däm pi ung hteit neh Messiah ah mawng cu pyein ci. 6 Chang gui naw Philip ah m'dang ah cäi aih vai gui cu hmu u netah, ang thu cun phi akcang ah ngai ci gui. 7 Khaw 'she ah kai gui ah chang akda ung ka, khaw 'she gui cu m'lau ne lut law ne dawng ci gui. Akut khaw shum ciah chang gui phi gai ba ci gui. 8 Cun ah kia sei cun ah gawnu ung om ciah chang ami van cu zei kiai ci gui. 9 A cun ah pigaw ung Simon ming nak ciah chang tumat om ci. Ani cu amät naw amät ang vai pi ah pyein neh, k'ce kia ne Samaria chang gui cu cäi cat sak gui ci. 10 Ak kiom akshe, akpyam ang mang chang akda law u netah, “ani cu hlüng tai pi ciah Khanpughi am hlüngtai ah kiak ci nei” ci ne ang thu cu ngai ci gui. 11 Ngahmi cu Simon ah ce ah mawng ung ami cäi cat nak she law pyi ci kiah sei cun nah m'hteih ne ngai ci gui ah kiak ci. 12 Cun ung phi Khanpughi ah uk nak khaw a mawng ng'Thu Ni lah Bawipa Jesuh amawng Philip naw a pyein zum ciah chang 'hnumi 'pami cu tui ng'hnim ci gui. 13 Simon amät cun phi zum law tu netah, tui ng 'hnim tu neh Philip ah pei ah om tuk ci. Ani cu cäi aih gui vai lah ngaih khit gui vai cu hmu netah ang htei ah cäi cat ci. 14 Jerusalem ah om ciah ang düihpüi gui naw, Samaria chang gui naw Khanpughi ah ng'Thu ami do cu ng'zah u netah, Peter la Johan cu ngah mi ah om nak ah tüi gawi ci gui. 15 Ngahni gawk law ni netah zum ciah chang gui naw Mumcha Theing ami gah vai ah 'taigü pe gui ci gawi. 16 A i ah kiah sei ci ung cu hnüüp ung khüt sei, Mumcha Theing cu a u ah khan ah phi kä kyum law phak ciah kiak ci. Ngahmi cu Bawipa Jesuh ah ming awn tui bäng hnim phak ci gui ah kiak ci. 17 Cun kawn ah Peter lah Johan naw ami khan ah ani kut taih ni khä tah ngah mi cu Mumcha Theing gah ci gui. 18 Ang düihpüi gui naw ami kut ami taih nak ah chang gui, Mumcha Theing ami gah cu Simon naw hmu tu netah, 19 “Kei naw ka kut ka taih nak ah chang, Mumcha Theing a gah vai ah, kei am phi hlüng tai nak cu na pe tu vä” ci neh ngui pe gui ci. 20 Cun ung phi Peter naw, “Nang naw Khanpughi ah m'gein nak cu ngui awn nak khleih khai ah na ngaih ah phäh ah na ngui cu, na mät awn atäng ah m'htei khaw a hteit sä; 21 Khanpughi ah ma ah nang ngaih käng düng ci kia sei kei mi ah bi nak ung, nang kä na bi tuk khai. 22 Cun ah na shet kat ah phäh ah nang zu ba vai, Cun ah na ngaih tüh cu Khanpughi naw a ning m'gein vai ah nak taigü vai. 23 Nang cu m'thüi nak awn be neh kat nak ah thawng ung na kium ciah ka ning hmuk ci nei” ci ne kiak nak ci. 24 Simon naw Peter lah Johan am? , “Tuk bäi na ni pyein gui cu kei ah khan ah kä a gawk law vai ah Khanpughi ah nak taigü pe nä” ci ne ng'zawi ci. 25 Peter lah Johan cu Bawipa Jesuh ah mawng ani hmuh ng'zak gui m'dang neh Khanpughi ah ng'thu cu pyein ni netah Jerusalem ah hteit ba ci gawi. Ani hteh nak ba lam ah Samaria pigaw akda ung Bawipa Jesuh ah mawng ng'Thu Ni cu pyein ci gawi. 26 Khanpughi ah khankhaw chang naw Philip am, “Ng'düi law neh Jerusalem ung ka naw Kaza ah hteh nak lam, htum lam ah hteit ä. ci ne kiak nak ci. (Cun ah lam ung tuhbäi a u kä hteit ba ci). 27 Cun vai am philip cu ng'düi law neh hteit ci. Cun zah ung Etheopia ghangpughang nu ah khawh m'htei pek ciah akci ami k'phyet ah Etheopian bawi tumat om ci. Ani cu a law nak ba ah lam pumung prophet Isaiah ah guk ah cang cim cu phat ci. 29 Mumcha Theing naw Philip am, “ani ah om nak ah hteit neh atäng ah ng'gui püi ä” ci ne kiak nak ci. 30 Cun ah kia sei Philip cu dawng ne apei ah hteit neh, Isaiah ah guk ah cangcim aphat cu ng'zah netah, “Na phat ah cang cim ah mawng cu na hmat ciang? ci ne ng'shik ci. 31 Cun ah chang naw, “a u naw kä a nak phlan tu ung kä ka hmat hlawt khai” ci netah, Philip cu zatha kiaangung atäng ah a ngawh tu vai ah khü ci. Ani ah phat ah cangcim cu; 32 “Ngawn vai ami hteh püi ah Htome hta ah mäih ah ani cu hteh püi ci gui. Amu ami k'teiü peit ung ak'aw käm hluh law neh om ciah Htome hta ah mäih ah, ani cu ak'aw käm hluh law ah om ci. 33 Ani cu ng'zo m'shaw nak gah ci, ani ah hmawk ah tutäng khai ah bi nak kä om ci. Khomdek khan ah ani ah ghin nak cu ng'pyi pyi ci kiah sei, Ani ah hta nau gui am m'thein m'kan gui khai tumat phi kä om ci. ci ah kiak ci. 34 Cun ah bawi naw, Philip am, “Prophet naw a u ah mawng a pyein ang? amät ah mawng ang? Chang hei ah mawng ang? nam thein tuä” ci ne ng'shik ci. 35 Philip naw a cun ah cangcim awn tün neh, Bawipa Jesuh ah mawng Thu 'Ni cu m'thein tuk ci. 36 Ngah ni cu hteit gäk gäk ni netah tui ah om nak ah gawk lawk ci gawi. Cun kawn ah cun nah bawi naw, “Shin zah ung tui om ci, tui kä kang hnim cang vai ah na shung shet ci ah mawng a i om ne ang? ci neh ng'shik ci. 37 (Philip naw, “Nang cu nam lung kyawng avan awn Bawipa Jesuh na zum ah akiak ung tui nang hnim vai” ci neh kiak nak ci. Cun ah bawi naw, “Bawipa Jesuh Khrit cu Khanpughi ah Htapa ah kiak ciah, kei naw ka zum ci nei” cik ci. ) 38 Cun kawn ah ng'se cu ng'düm sak netah, ngah ni cu tui ung zu kyum law ni neh Philip naw cun ah bawi cu tui ng'hnim sak ci. 39 Ngah ni cu tui ung ka, ani kai law ba vai am, Khanpughi ah Mumcha Theing naw Philip cu, a khaw hei ah hteh püi sei cunah Bawi naw Philip cu kä hmuh ba ci. Cun ung phi ani cu zeikiai neh lam hteit ba ci. 40 A kawn ah Philip cu Azotus gawnu ah gawk ciah hmat lawk ci. Cun kawn ah Sisarea ah hteit ba neh, ahteh nak ba ah lam apigaw päng ung Bawipa Jesuh ah mawng ng'Thu 'Ni cu hei pyein vük ci.
1 Cun ah akhin ung Soul naw Bawipa ah hnu läk ci gui cu, ngawn pha gui vai ah pawng püi ci. Ani cu 'taigü tung ah hteit natah, 2 Bawipa ah hnu läk ciah hnumi 'pami avan ahmuh ung phah neh Jerusalem ah alaw püi nak hning vai ah ap nak ah ca cu, Damaskas ah pum im gui ah ami guk vai ah vah pyein ci. 3 Soul cu Damaskas gawnu pei ah agawk law zah ung khan khaw ah ka akdei cu ang ghit ah ng'dang law neh khang neh shü lawk ci. 4 Ani cu khomdek ung kiu neh ng'zän netah, “Soul, Soul? , a i ah kiah sei kei nah na k'dudeiu nak ang? Ciah 'aw cu ng'zak ci. 5 Soul naw, “Bawipa Nang cu a u ang? cineh ng'shik ci. 6 A cun ah k'aw naw, “Kei cu nang naw nak dudeiu nak ah Jesuh nei, cun ung phi tuk bäi ng'düi law ba neh, pigawnu kyawng ah hteit ä, cun kawn ah na bi vai cu na hmat lawk khai nei” ci neh kiak nak ci. 7 Soul awn ng'gui lawk ciah chang gui cu, cun ah k'aw ng'zah tupang u neh phi, a i phi kä hmu tuk ci gui kiah neh cäi neh ng'düi ci gui. 8 Soul cu m'dek ung ka, ng'düi law ba neh phi amik awn a i kä hmuh ba ci. Cun ah kia sei ang gui püi gui naw, ani cu akut ung k'pang tuh neh Damaskas ah hteh püi ci gui. 9 Ani cu ak hnüp thum güt ung a i kä hmu teng ba ci, cun zah pum ung a i phi kä ei auk ah om ci. 10 Cun zah ung Damaskas ah Ananias ming nak ciah, Khrihta tumat om ci. Ang muimang ung Bawipa naw, “Ananias awi” ci neh khü khätah, “Shi ah ka om ci nei Bawipa” ci neh äi ci. 11 Bawipa naw, “Nang cu ng'düi law neh lam ng'düng ming nak ciah lam ung hteit netah, Judas ah im ung Tarsus pigaw ah ka, Soul ming nak ciah chang cu nah vah shui vai. Ani cu 'taigü netah, 12 ang muimang ung, Ananias ming nak ciah chang law neh, ak khan ah akut taih khätah amik m'dei law ba ciah, hmuh pyi ci nei” ci neh kiak nak ci. 13 Ananias naw, “Bawipa, Jerusalem ah na chang gui ah khan ah, cun ah chang naw ak she ah abi lawh gui cu, chang akda naw pyein u sei kang zah pyi ci nei. 14 Ani cu 'taigü khem ah peit ah bi nak hning awn, nang ning khanihnah ciah chang gui cu, pha gui khai ah, Damaskas ah lawk ciah kiak ci nei” ci neh pyein ci. 15 Bawipa naw ani am, “Hteit ä, cun ah chang cu, chang pakhui hei gui, ghangpughang gui lah Israel chang gui am, keiah ming cu m'thein gui khai ah ka ghü ah kiak ci nei. 16 Kei ah hmawk ah a zaica nak gui vai ah mawng cu, ka mät naw, ani am kam dang khai nei” ci ne kiak nak ci. 17 Cun ah kia sei Ananias cu Soul ah om nak tu ah im ah hteit netah, ak khan ah akut taih ne, “Ka nau Soul awi, na mik am dei ba vai lah, Mumcha Theing awn na be vai ah hmawk ah, na law nak lam ah na ma ah ng'dang ciah Bawipa Jesuh naw kei cu ana tüih law nei” ci neh pyein ci. 18 A cun vai am Soul cu ak phlep gui ng'kawk ciah mäih ah amik ung ka, kiah law sei amik cu ci ba ci. Ani cu tho law neh tui ng'hnim ci. 19 Cun kawn ah tuiei eiawh seih ak thagui be law ba ci. Soul cu Damascus ah zum ciah chang gui awn atäng ah ashäng om ci. 20 Ani cu pum im ah hteit neh Bawipa Jesuh cu, Khanpughi i ah htapa ah akiak ah mawng ng'thu pyein ci. 21 Ani ah ng'thu ng'zak ciah chang gui cu cäicat u nehtah, “Shin ah chang cu, Jerusalem ah Bawipa Jesuh ah 'taigü ciah chang gui phung ngawn phah gui ciah kä kia ne ang? Zum ciah chang gui phung phah ne, 'taigü pa gui ah om nak ah hteh püi khai ah sha lawk ciah kä kia ne ang? ci ne kiak ci gui. 22 Cun ung phi Soul naw, Bawipa Jesuh cu Messiah ah akiak ah mawng cu m'khüt näng nak awn pyein khä tah, Damascus ah om ciah Jew chang gui naw käm hlan tuba hlawt ci gui. 23 Khaw hnüüp akda ashou law kawn ah, Jew chang gui cu ng'bum uneh, Soul cu ngawn vaiah ng'ge ci gui. 24 Cun ung phi ngahmi ah ng'ge cu Soul naw hmat ci. Ngahmi cu Soul ngawn vaiah amü, ak hnüüp pigaw m'kawt päng ung ng'mah ci gui. 25 Cun ung phi Soul cu ak chang gui naw, khawmü ah vawh ung m'khäp netah, ng'vawng k'pung ah hei chah ci gui. 26 Soul cu Jerusalem ah hteit ba netah ang düihpüi gui ung ng'dawn tuk khai ah k'tha nak ci, Cun ung phi ngahmi naw, ani ang duihpüi ah akiak law tu cu, akcang ah kä ngai u netah kyih ci gui. 27 Cun kawn ah Barnabas naw, Soul cu ang düihpüi gui ah om nak ah khah law püi netah, Bawipa cu Soul naw lam cawih ah ahmuh law amawng, Bawipa naw Soul ang thu püi ah mawng la Damascus ah Soul naw Bawipa Jesuh ming awn ng'thu a pyein ah mawng gui cu tän neh m'thein gui ci. 28 Soul cu ang düihpüi gui awn atäng ah om tuh netah, Jerusalem avan ung hteit neh, Bawipa Jesuh ah ming ung näng nak awn ng'thu pyein ci. 29 Ani cu Greek thu ah ng'thu ci gui ah Jew chang gui awn phi, ng'küüknet neh ng'thu pyein ci gui, Cun ung phi ngahmi naw ani cu ngawn vaiah ng'ge nak ci gui. 30 Cun ah mawng cu ak chang gui naw ng'zah u netah, Soul cu Siesarea ah hteh püi u neh cun ung ka naw, Tarsus ah hteh sak ci gui. 31 Cun ah kia sei cun yah ung, Judea, Kalile, la Samaria khrihtabum gui cu ding gei nak om lawk ci. Khrithabum ghui cu Khanpughi kyih aa m'hlüngtai u ne, Mumcha Theing ah htagui be nak awn da law pi k'täi ci gui. 32 Peter cu kho päng ung hteit shüi netah, hnüät ung Khanpughi ah chang gui ah om nak, Lidda pigaw ah gawk lawk ci. 33 A cu ah shum ne khem ne, kho kum cheit ung zän ci ah Aeneas ming nak ciah chang cu Peter naw hmu netah, 34 “Aneas, Jesuh Khrit naw ning gai sak ci nei, tho ne na ih phak look ä” ci ne kyak nak sei, Aenaes cu a cun vai am hto lawk ci. 35 Cun cu Lidda la Sharon pigaw ah om ci ah chang gui naw hmu u netah, Bawipa cu ami van naw zum lawk ci gui. 36 Joppa pigaw ung, Khanpughi zum ci, Tabitha ming nak ciah hnumi tumat om ci. (Karik thu awn ah ming cu Dorcas ah kya ne kigang ciah kyak ci). Ani cu angtäi sei ak ni bi ne chang phi geinsei ci. 37 Ani cu gaw ne sik sei m'si m'hla u na im akhan kyong ah m'shän ci gui. 38 Lidda pigaw cu Joppa gawnu awn et ci kia sei, zum ciah chang gui naw Peter cu Lidda ah a om hmat u netah, “keimi ah ak zang ah a law vai nei” ci ne m'cäi ne chang hnih tüi ci gui. 39 Cun ah kia sei Peter cu, cun ah chang goi awn atäng ah gui law tuk ci. A gawk law vai am chang gui naw Peter cu im akhan kyong ah hteh püi ci gui. Hmeinu gui cu kyap ne Peter ana bui u ne, Dorkas naw a ghin zah ung a tah ah suinu suitha gui cu ana m'hnuh ci gui. 40 Peter naw cun ah chang gui ami van k'caw ah tüi gui netah, khuuk dong ne taigü ci. Cun kawn ah gook lam ah ng'hlat netah, “Tabitha, hto vä, ci ne pyein ci. Tabitha cu m'dei law ba ne, Peter cu hmu netah, hto ne ngok ci. 41 Peter naw cun ah hnumi cu k'pang ne ng'düih sak netah, hmeinu gui mah mah ah zum ciah chang gui ami van cu khü gui ne, ghing ba ciah Dorkas cu ap gui ci. 42 Cun ah mawng cu Joppa kho van ung thang sei, chang akda naw Khanpughi cu zum lawk ci gui. 43 Peter cu cun ah Joppa pigaw ah mehvun piang ciah Simon awn atäng ah ak sho om tuk ci.
1 Sisaria gawnu ah Konelius ming nak ciah chang tumat om ci. Ani cu Italian ming nak ciah Roman gaakap shekshen ung kaptain ah kya ci. 2 Ani la akyong ung kaa gui ami van cu Khanpughi zum ne kyih aa ci gui ah kia ci. Ani cu Jew chang gui am akda pe taak gui ne, angtai sei Khanpughi ah taigü ne om ci. 3 Kho k'awi ät nayi thum akhin ung Khanpughi ah khan kho chang cu kyum law ne, “Konelius” cine khü sei hmu ng'zak ci. 4 Ani cu cäicat ne khankho chang cu teng netah, “Bawi awi, a i nei” ci ne ng'shik ci. Khankho chang naw, “Na taigü la m'gein nak na bi lawh gui cu Khanpughi naw m'hni ne ning zum ci nei. 5 Atukbäi chang tüi ne Joppa gawnu ah Simon Peter ming nak ciah chang cu thäm sak gui ä. 6 Ani cu mehvun piang ciah Simon ah im ung om tuk ci, cun ah im cu tuinu kem ah om ci” ci ne kiak nak ci. 7 Khankho chang hteit ba khäh tah Konelius naw ak chang shäm hnih la zum nak om ciah ang ngaih u ah gaakap tumat khü gui netah, 8 amawng avan m'thein gui ne, Joppa pigaw ah tüi gui ci. 9 Ngahmi cu hteit gäk gäk u ne, a ngawi ung Joppa gawnu pei ah gawk law ci gui. Cun zah cu kho hnüüp lung zah ah kya sei Peter cu taigü khai ah im kiungah hang kai ci. 10 Ani cu ei cawi lawk ci, a ei auk vai ami pian sang ung ani cu mik hmuk ci. 11 Cun ah amik hmuh nak ung khan kho cu ng'hmawng khätah akit phli ung zu khüt va gawk ciah, zih dung nu ah mäih cu khomdek khan ah kiah law sei hmuk ci. 12 A cun ung kuhzawng khisa, phyuciik khamkho, phiukha avan küm ci. 13 “Peter; tho law ne, ngawn ne ei gui ä” ci ah k'aw cu ng'zak ci. 14 Peter naw, “Bawipa! Cun ah kä kia khai nei, a i zah ung phi kei naw sheka ne kä theingthap ci cu kä ka ei man ci nei” ci nepyein ci. 15 Cun kawn ah k'aw ng'shan law ba mä ne, “Khanpughi naw theingthap ciah a pyein cu nang naw kä theingthap ciah kä na pyein vai. ci ne pyein ba ci. 16 A cun laihlaih ah thum vei a kiak awn ah, zihdung nu ah mäih ah kia lawk ci cu, khankho ah ng'lim ne maih ba ci. 17 Peter naw cun ah amik hmuh ah mawng cu ak tung ah ngaih tüh ne om ci. Cun zah ung Konelius ah tüih law ah chang gui cu, Simon ah im k'tä ne shui u ne, m'kawt law pei ah gawk law ne ak düi ci gui. 18 Cun ah chang gui naw, “Simon Peter ming nak ciah nami khin om tu naw? ci ne ak shi gui ci gui. 19 Peter naw amik hmuh ah mawng a ngaih tüh khit sang ung, Mumcha Theing naw, “Chang thum naw ning shui lawk ci gui nei, 20 Tho law ne zu kyum ä, ngahmi cu kei naw ka tüih law gui ah kia sei kä shokshü ne ngahmi awn atäng ah na hteh tu vai nei” ci ne kiak nak ci. 21 Cun ah kia sei Peter cu lut law netah, “Nangmi naw nami shui ah chang cu kei nei, a i a mawng om sei nami lawk ci ang? ci ne ng'shi gui ci. 22 Cun ah chang gui naw, “keimi cu kaptain Konelius naw ana tüih law gui nei, Ani cu chang k'ni, Khanpughi zum ci, Jew chang gui naw ami kyih aa ah chang ah kiak ci nei. Khankho chang naw ani ah ma ah nang ning khü ne, na thu a ngaih vai ah pyein ci nei” ci ne pyein ci gui. 23 Peter naw cun ah chang gui cu kyong ah khü gui netah, cu mü ih tu sak gui ci. A ngawi ung Peter cu khü lawk ci gui ah zung ah theit tu sei, Joppa gawnu ah kaa zum ciah chang gui cun phi hteit tuk ci gui. 24 A ngawi ung Peter cu Sisarea gawnu ah gawk law sei, a na ng'bum ci gui ah Konelius la a phäi nau a teih püi gui naw a na do ci gui. 25 Peter a luh law vai am Konelius naw a na do ne a kho pei ah m'khuuk dong ne ngok ci. 26 Cun ung phi Peter naw, “Tho law ba, kei phi chang ah ka kiak ci nei” ci ne Konelius cu thawh ba sak ci. 27 Cun kawn ah Konelius awn atäng ah ng'htau ne im kyong ah va lut netah, chang akda ana bum u sei hmuk ci. 28 Cun ah chang gui am Peter naw, “Jew chang tumat cu chang pakhui hei ung kä ah khawtsheng tu vai, kä ah ng'et sheng tu vai, ciah zum nak cu nami hmat pyi ci. Cun ung phi, a u shekak ci, a u kä theingthap ci, ci ne käm khoichaa vai ah Khanpughi naw nam hnuh pyi ci nei. 29 Cun ah kia sei, kei cu na khü ci sei kä shokshü ne ka lawk ci, kei nah na khü ah mawng cu pyein law shüm ä” ci ne kiak nak ci. 30 Konelius naw, “hnüüp thum lüng lawk ciah kho hnüüp ät, kho k'awi nayi thum ung kei cu im kyong ah taigü ne ka om ci. Cun zah ung pyü ne ng'shü sei suisak ciah chang tumat cu ka ma ah ng'düi law ne, 31 “Konelius! na taigü cu Khanpughi naw ng'za ne, na peit taak cun phi do pyi ci nei. 32 Cun ah kia sei Joppa pigaw ah chang tüi ne, Simon Peter ming nak ciah chang cu na khaw vai. Ani cu tuinu kam pei ah mehvun piang ciah Simon ah im ah om tuk khai nei” ci ne pyein ci. 33 Cun ah kya sei kei naw chang akzang ah ka tüih law nei. Nang na law ah phäh ah ang thei ah ka zei kyai ci nei. Bawipa ah mawng cu nang ah thu awn kami ng'zak khai ah keimi cu Khanpughi ah ma ah kami gawk law pyi ci nei” ci ne pyein ci. 34 Cun kawn ah Peter naw, “Khanpughi naw ak cang ah chang ah müi hmai ak zaw ak däm kä teng ci, ci cu ka hmat pyi ci nei. 35 Ani kyih aa ne ang zaak hlü ah om ciah chang phung cu, Khanpughi naw pakhui käm khoi chak ci. 36 Israel chang gui am, chang van ah Bawi, Jesuh Khrit ung dimdeeih nak thu k'ni a peit cu nami hmat pyi ci nei. 37 Johan naw tuihnim nak ah mawnglam a pyein kawn ah Kalile ung tün ne, Israel kho avan ung dangshai ci gui la, 38 Nazaret chang Bawipa Jesuh ah khan ah Khanpughi naw Mumcha Theing la hlüng tai nak a peit ah mawng cu nami hmat pyi ci. Ani cu Khanpughi naw atäng ah om püi sei, hteit shüi shüi ne, khoshe ah ei auk gui ah chang gui m'gein gui ne gaigawng sak gui ci. 39 Jerusalem gawnu la Israel kho ung Bawipa naw abi lawh nak gui nüng ung keimi cu saksi ah kami kiak ci. Bawipa cu chang gui naw kutlam tung ung khen ne ngawm ci gui. 40 Cun ung phi Khanpughi naw ak hnüüp thum hnüüp thawh ba sak ne, dang ba sak ci. 41 Chang nüng naw Bawipa cu kä hmuk ci, Khanpughi naw saksi ah ana ghü gui ah keimi naw vah kami hmuk ci. Keimi cu Bawipa sih nak ung kaa a thawh ba kawn ah atäng ah kami ei auk ci. 42 Bawipa naw chang gui am thu k'ni kami thein vai la Bawipa cu ak si, ak ghing van m'khoichak khai ah Khanpughi naw am düih ah mawng, kami pyein vai ah khän ne nam cäi gui ci. 43 Bawipa zum ci gui ah chang phung cu a hlüngtai nak ming awn ami kat nak m'geinsei gui khai, ci ne prophet gui naw pyein man ci gui” ci ne pyein ci. 44 Cun ah Peter naw thu a pyein sang ung thu ngai ciah chang van ah khan ah Mumcha Theing cu kyum lawk ci. 45 Chang pakhui hei gui cun naw phi Khanpughi ah Mumcha Theing cu gah tu u khä tah, Joppa ah kaa Peter awn atäng ah lawk ci gui ah Jew chang gui cu ang htei ah cäicat ci gui. 46 A i ah kia sei ci ung ngahmi naw kä hmat ah ng'thu awn Khanpughi ami hlüng tai ah hmawk ah kia ci. 47 Cun kawn ah Peter naw, “Shin ah chang gui cu mik mi ah mäih ah Mumcha Theing gah ci gui ah kia ci, cun ah kia sei tui ami hnim vai cu a u naw maa nah gui hning khai ang? ci ne pyein ci. 48 Cun kawn ah Peter naw ngah mi cu Bawipa Jesuh Khrit ah ming ung tui ami hnim vai ah khän gui ci. Ngahmi naw Peter cu a om tu shäng cang vai ah chokai ci gui.
1 Chang pakhui hei gui naw phi Khanpughi ah Thu Ni ami dogah tu ah mawng cu Judea kho ung ang düihpüi gui la zum pyi ci gui ah chang gui naw ng'za ba ci gui. 2 Peter cu Jerusalem ah gawk law khä tah vun aat bi ne zum ciah chang gui naw ng'cecäk püi ci gui. 3 Ngahmi naw, “Nang cu vun aat nak kä bik ci gui ah chang gui ah hteit ne ngahmi awn atäng ah na ei awk tuk ci nei” ci nak ci gui. 4 Cun ah kia sei Peter naw amawng ama avan cu va tüi netah m'thein tu gui ci. 5 Peter naw, “Kei naw Joppa pigaw ah kamik hmuh nak ung, zih dung nu ah mäih cu, ak kit phli ung k'pang ne, khankho ah kaa ami zuk chah law cu ka hmuk ci. 6 Cun ah zihdung nu cu ka pei ah ng'et law sei, m'htei ne teng law ung, kuhzawng khisa, phyuciik khamkhaw, la phyukha gui ah kia sei ka hmuk ci. 7 Cun kawn ah, “Peter tho law ne, ngawn ne ei gui ä” ciah k'aw cu ka ng'zak ci. Cun ung phi kei naw, “Bawipa, kä bä khai nei, kä theingthap ci la shekak ci cu kei naw a i sang ung phi kä ka ei man ci nei” ci ne ka pyein tu ba ci. 8 Cun ah k'aw naw, “Khanpughi naw theingthap ciah a pyein cu nang naw kä theingthap ciah kä na pyein vai” ci ne pyein ci. 9 A cun laih laih ah thum vei kia netah, a cun gui cu khankho ah ng'lim ne maih ba ci gui. 10 Cun kawn ah ka om nak ah im ah chang sing thum gawk law ghet ci gui. 11 Ngahmi cu Sisarea ah kaa kei ah ami tüih law gui ah kiak ci. 12 Mumcha Theing naw kä ng'shauk ne ngahmi ung ka ng'läk tu ge vai ah pyein ci. Joppa gawnu ah kaa zum ciah chang sing chuk cun phi kei awn atäng ah hteit tu u sei, kami van cu Konelius ah im ah kami lut ci. 13 Konelius naw a im kyong ah khankho chang ng'düi law sei a hmuh ah mawng la, cun ah khankho chang naw Joppa gawnu ah chang tüi ne Simon Peter ming nak ciah chang cu va khü ä. 14 Ani naw nang la na kyong ung kaa gui naw hun nak nami gah nak vai ah thu ni cu ning thein gui khai nei” ci ne a pyein ah mawng cu nam then tu gui ci. 15 Cun kawn ah kei naw tün ne thu ka pyein law zah ung, Mumcha Theing cu a htük ung keimi ah khan ah a gawk law ah mäih ah, ngahmi ah khan ah phi gawk law ci. 16 Cun kawn ung Bawipa naw, “Johan naw tui awn hnim nak pek ci, cun ung phi nang mi cu Mumcha Theing awn hnim nak na mi gah khai” a ci cu ka shüm ba ci. 17 Khanpughi naw Bawipa Jesuh Khrit mi zum ci gui am m'gein nak ana peit gui ah mäih ah akhui hei gui am phi a peit gui cu dang ci nei. Cun ah kia sei kei cu a i ah kia ne phi Khanpughi cu kä ka maa na hlawt khai” ci ne pyein ci. 18 Cun ah thu ng'za u netah cun ah chang gui cu, kä pyein m'shet ba u ne, “Khanpughi naw chang pakhui hei gui am phi, ng'zuvat ba ne ghin nak gah vai ah mawng cu pe gui ci nei” ci ne Khanpughi cu m'hlüngtai ci gui. 19 Bawipa Jesuh zum ciah chang gui cu Stephen ami ngawn zah ung ami shedam ngawn pha gui ah hmawk ah a hei hei ah püi piang zawp ci gui. Am shah gui cu Phoenisia, Saipras, la Antiok gawnu zung ah gawk u ne thu ni cu Jew chang gui bäng am m'thein gui ci gui. 20 Cun ung phi Sairin la Saipras ah kaa zum ciah chang gui cu Antiok ah hteit u ne, Bawipa Jesuh Khrit ah mawng thuni cu chang pakhui hei gui am phi m'thein gui ci gui. 21 Ngahmi ung Bawipa ah hlüngtai nak cu om sei, chang akhli naw Bawipa cu zum ne ng'hlat lawk ci gui. 22 Shin ah a mawng gui cu Jerusalem ah khrithabum gui naw ng'za u netah Barnabas cu Antiok ah tüi ci gui. 23 Ani cu cunah gawnu ah gawk ne, Khanpughi naw chang gui am hriham a peit gui cu hmu ne zeikyai netah, ami m'lung kyong avan awn Khanpughi zum ne ng'düng nak awn ami om vai ah m'cäi gui ci. 24 Barnabas cu chang k'ni ah kia ne, Mumcha Theing awn phi be ne, Düng nak awn phi küm ci kia ne, chang akda cu Bawipa ah khü law gui ci. 25 Cun kawn ah Barnabas cu Soul shui khai ah Tarsus ah hteit ci. 26 Ani cu hmuh netah Antiok khaw ah law sei, ngahmi cu a khokum pum khrithabum gui awn ng'hmuh u ne, chang akda cu m'theithang ci goi. Bawipa zum ciah chang gui ak htük bäih ah Khrihta ah ami khü nak gui cu Antiok gawnu ah kiak ci. 27 Cun ah khin ung Prophet amshah gui cu Jerusalem ah kaa Antiok ah lawk ci gui. 28 Cun gui ung kaa Akabus ming nak ciah prophet cu Mumcha Theing ah thamah nak awn düi law netah khomdek khan avan ung kho zaw ne ei ng'geing khai” ci ne k'cä ci. (Ghanpughang Klaudius ah uk sang ung ak cang ah kho zaw ne ei ng'geing ci). 29 Zum ciah chang gui naw ami m'khüt hning phäh phäh ah, Judea kho ah khritha phäi nau gui cu peit taak gui vai ah k'bäi ci gui. 30 Cun ah k'bäi u netah Jerusalem Khrithabum a gham gui am ami peit taak ah ngui gui cu, Barnabas la Soul am m'khäh gui ci gui.
1 Cun ah khin ung ghangpughang Herod cu Khritha gui k'dudeiu nak gui vai ah tha nak ci. 2 Ani naw Johan ah nau James cu khim awn ngawn sak gui ci. 3 Cun ah amawng Jew chang gui naw ami ng'zaak hlü hmat netah Peter cu pha ne khit ci. (Cun ah khin cu k'cow kä shum ne m'htut den ah pawi khin ah kia ci. ) 4 Herod naw Peter cu a pha kawn ah chang sing phli ci lawk ciah gaakap hläm phli am ap ne thawng ung chum ci. Herod naw ani cu Pasakha pawi ang pyi kawn ah Jew chang khli ah ma ah m'khoicha vai ah k'bäi ci. 5 Cun ah kya sei Peter cu thawng ung chum ci gui. Cun ung phi khrithabum gui naw ami m'lung m'hlün ne Khanpughi ah taigü pek ci gui. 6 Herod naw Peter cu chang gui ah ma ah kä a k'plawk pha ah kho mü ät ung, Peter cu ngäng ciah gaakap hnih ang lak ung ip ci. Ani cu m'si gui hnih awn khih u ne, thawng m'kawt pei ah phi gaakap gui naw ngäng ci gui. 7 Khanpughi ah khankho chang cu ang ghit ah Peter ah pei ah ng'düi law sei, thawng im kyong cu dei ne khang ci. Khankho chang naw Peter cu ak phleing ung pang ne, “ang ghit ah tho law” ci ne m'tho ci. A cun vai am Peter ah kut ung m'si gui gui cu ng'phian ne zu kia vü yawp ci. 8 Khankho chang naw, “na khei htün ne na phahnak ng'cum ba ä” ci ne kiak nak ci. Peter naw a pyein na mäih ah bik ci. Cun kawn ah khankho chang naw, “na suinu sui ne ka hnu ah na läk lawä” cik ci. 9 Peter cu thawng kyong ah kaa lut law ne khankho chang ah hnu ah läk ci. Ani naw khankho chang ah bi cu ak cang ah kä ngai ci, amät mik hmuk ciah vah ngai ci. 10 Ngahni cu vah hleih ci la tawi nak ah ami ngäng nak ah m'kawt cu phlän ni ne, thawng m'si m'kawt nu pei ah gawk law ci goi. Cun ah m'si kawt cu amät hmawng law khä tah ngah ni cu lam gäk gäk ung lut law ne hteit ci goi. Cun kawn ah khankho chang cu ang ghit ah Peter ah pei ah kaa maih ba ci. 11 Peter cu ang shüm law ba kawn ah, “Khanpughi naw a khankho chang cu tüi law ne, Herod ah kut ung kaa la Judah chang gui naw kei ah khan ah ami bi law vai ah zaica nak ung kaa a na phiawn cu tuk bäi ka hmat pyi ci nei” cik ci. 12 Cun ah a hmat law ba kawn ah ani cu Johan Maku ah nu Mari ah im ah hteit ci. Cun ah im ah chang akda ng'cut ne taigü ci gui. 13 Peter naw cunah im kawt cu hei khäk khä tah, choh hmawng khai ah Rodah ming nak ciah ami shäm ah hnumi hta cu lawk ci. 14 Ani cu Peter ah k'aw hmat ba ne zeikyai netah, choh phi kä hmawn ling ah im kyong ah dawng ne lut ba ne, m'kawt pei ah Peter law ne ang düih cu chang gui am m'thein gui ci. 15 Cun ah chang gui naw, “nang na gu ci ma? ci ne kiak nak ci gui. Cun ung phi cun ah ami shäm ah hnumi hta naw ak cang a pyein nah ling ba khä tah cun ah chang gui naw,Cun ung Peter ah khan chang ah kiak khai” cik ci gui. 16 Peter naw choh cu hei khäk laih laih khä tah choh ak hmawng u ne, Peter cu hmu u netah cäicat ci gui. 17 Peter naw a düm ah ami om vai ah a kut awn nüt ne m'cäi gui netah, Khanpughi naw thawng ung kaa ak phiawn ba ah mawng cu m'thein tu gui ci. Cun kawn ah “Shin ah mawng cu James la khritha phäi nau gui am m'thein tu gui vä” ci ne m'cäi gui netah a kho hei lam ah hteit ci. 18 Kho thai law khä tah, “Peter hawi kiak ci ang” ci ne ngäng ciah gaakap gui cu ang htei ah cäicat ne kyikyawk ci gui. 19 Herod naw Peter cu shui ba sak gui sei, shui ba ne kä hmuh ba u khä tah ngäng ci gui cu ngawn gui vai ah k'bäi ci. Cun kawn ah Herod cu Judea kho nawng shüt ne Sisarea ah hteit ne om shäng shäng ci. 20 Herod cu Taiar la Sidon ung om ci gui ah chang gui ah khan ah ang htei ah m'lung she khätah, ngahmi cu ng'cut u ne ani cu hmuk khai gui ah lawk ci gui. Ak htük bäih ah mang im uk ciah chang Blastus cu hmuh u netah, ani ah m'gein nak gui awn ghangpughang ah hteit u ne dim gei nak htu pyein ci gui. A i ah kya sei ci ung ngahmi cu Herod ah kho ung kaa ei auk vai ami gah tu ah hmawk ah kiak ci. 21 A mi k'bäi nak hnüüp ung Herod cu bawi ah mang zih sui ne, ghangpughang ah mang kiang ung ngoh netah, chang gui ah ma ah ng'thu pyein ci. 22 Chang gui naw, “Shin ah k'aw cu chang ah k'aw ah kä kiak ci Khanpughi ah k'aw ah kiak ci” ne ci ne m'lau ci gui. 23 Acun vai am Herod cu Khanpughi kä akchang m'sui ah phäh ah Khanpughi ah khan kho chang naw m'di sei, ak seng naw ei sei sik ci. 24 Cun zah ung Khanpughi ah thu cu kho ung thang sei zum ci cu da law pi law pi k'täi ci. 25 Barnabas la Soul cu ani bi ng'pyi law sei Johan Maku khah püi ne Jerusalem ah law ba ci goi.
1 Antiok khrithabum kyong ung prophet gui la saya gui akda om ci gui; Cun gui cu; Barnabas, Simeon (Pa Le ah phi ami khü) Sairin ah kaa Lucius, Herod Antipas ah a püi Manaen, la Soul ah kiak ci. 2 Cun ah chang gui cu Khanpughi ah taigü ne, ei hlawi ne ami om zah ung Mumcha Theing naw ngahmi am, “Kei ah ka bi bik khai goi ah Soul la Barnabas cu khän ne ghü goi vä” ci ne kiak na gui ci. 3 Ngahmi cu ei hlawi ne taigü u ne, ani khan ah ami kut taih neh taigü u netah Khanpughi ah bi bik khai ah tüi goi ci gui. 4 Barnabas la Soul cu Mumcha Theing ah lam shüm ah mäih ah Seleucia gawnu ah gawk ni ne, cun ung kaa naw Saipras ah htinpaw awn hteit ci goi. 5 Ngahni cu Salamis ah gawk ni netah Judah gui ah pum im ung Khanpughi ah thu pyein ci goi. Johan Maku cun phi ani bi bi lawh püi gui ne ng'gui tuk ci. 6 Ngahmi cu cun ah tuikoi phlän ne, Paphos gawnu ah gawk ci gui. Cun ah pigaw ah Bar-Jesuh ming nak ciah, Judah chang prophet ah ng'hlawk ciah k'ce tumat om ci. 7 Ani cu gawmang Sergius Paulus a teihpüi ah kiak ci. Cun ah gawmang cu hmuhmat thei ciah chang ah kia ci. Ani cu Khanpughi ah ng'thu ng'za hlü netah Barnabas la Soul cu khü goi ne pyein sak goi ci. 8 Cun ung phi (karik thu awn Elimas ming nak ciah) k'ce naw, gawmang naw kä a zum hlawt vai ah Barnabas la Soul cu ng'cuhcan püi goi ci. 9 Cun ah kia khä tah Paul ah phi ming ciah Soul cu Mumcha Theing awn be ne k'ce cu kheing ne teng netah, 10 “Khoshe ah hta, akni m'cheishoh ciah gaa, hleeihlak thei ciah chang, nang cu Khanpughi ah düng nak shek khai ah na bik ci nei. 11 Nang cu a tuk bäi Khanpughi naw ning m'di sei na mik m'dauh khai, khokum ak shou khohni kä na hmu tu ba khai, ci ne tam ci. A cun vai am k'ce Elimas cu amik le naw shung ne mü sei, akut ung k'pang ne khah tu püi khai cu shui zap ci. 12 Gawmang naw acun ah mawng gui hmu netah, Bawipa Jesuh cu zum lawk ci, Bawipa ah thu ang ngaih zaak tu ah hmawk ah ang htei ah cäicat ci. 13 Paul la a paw gui cu Paphos gawnu ung kaa htinpaw awn Pamphilia kho, Petka gawnu ah gawk ci gui. A cun ung Johan Maku naw nawng gui shüt ne Jerusalem ah hteit ba ci. 14 Ngahmi cu Perka gawnu ung kaa naw Pisidia kho Antiok gawnu ah gawk u ne, kyin hnüüp ung pum im ah hteit ne ngok ci gui. 15 Mose ah thu khäm la prophet gui ah ca guk gui cu ami phat pyi kawn ah, Pum im ung ang vai gui naw, “Phäi nau gui aw, chang gui ah thamah nak vai thu nami pyein vai a om ah a kiak ung, nami pyein vai kami zaak hlük ci nei” ci ne chang tüi law ne pyein lawk ci gui. 16 Paul naw ng'düi law ne akut awn nüt netah thu a pyein cu, ; “Israel chang gui la Khanpughi zum ciah khui hei chang gui, ngai zawp vä! 17 Israel chang gui ah Khanpughi naw mi pughi pa gui cu Egypt kho ah omk'tu ah kia ne ami om tu zah ung ghü gui ne pakhui mah ah am düih gui ah kia ci. A hlüngtai nak awn Egypt kho ah kaa k'plawk ba gui ne, 18 k'pya lün nu ah khokum phli-kip pum ung hnimgei ne khah püi gui ci. 19 Ani naw Kanaan kho ung kaa chang pakhui chih cu nawng gui netah, cun ah kho cu ak chang gui am khäm sak gui ci. 20 Shin ah amawng ama ung khüt lawk khai ah khokum phia phli la hma-kip shou lawk ci. Cun kawn ah prophet Samuel ung khüt khai ah m'khoichak ci gui cu pe gui ci. 21 Cun kawn ah ami ghangpughang vai ng'zoi u khä tah, Khanpughi naw Benjamin pakhui, Kisha ah htapa Soul cu khokum phli-kip ung ghangpughang ah kiak khai ah m'düih pe gui sei ani, maw kho kum phli-kip ung uk ci. 22 Cun kawn ah Khanpughi naw Soul cu nawng ne David cu Israel ghangpughang ah m'düih ba ci, Khanpughi naw “Jesse ah hta David cu Ka m'lung am lawk ciah chang, Kei ah ng'zak hlü phung bik khai ah chang ah kia sei, ka hmu pyi ci nei” ci ne David ah mawng cu pyein ci. 23 Khanpughi naw a shaitaak ah mäih ah Israel chang gui ah hmawk ah Hunbawi cu David ah hta ng'shon ung ng'tüi law sak ci. Cun cu Bawipa Jesuh ah kia ci. 24 Cun ah Bawi kä a gawk law pha ung Johan naw Israel chang gui am, ami kat nak ng'zu ba ne tui ami hnim vai ah m'thein gui ci. 25 A bi lawh gui ng'pyi law vai khä tah Johan naw ak chang gui am, “Kei a u ah na mi na ngai ne ang? Kei cu nami gin ah Bawi ah kä ka kiak ci, Cun ah Bawi cu kei ah hnu ah gawk lawk khai, kei cu ani ah pha hnat gui phi ka k'phian khai ah kä khin ci” ci ne pyein ci. 26 “Abraham ah hta ng'shon ah kiak ciah phäi nau gui la Khanpughi zum ciah chang pakhui hei gui aw, Khanpughi naw hun nak ah Thu k'ni cu mik mi ah gawk law sak ci. 27 Jerusalem ung om ciah chang gui la ami ng'vai gui naw cun ah Bawi cu Hunbawi ah akiak kä hmat ci gui, kyin hnüüp päng ung ami phat ah prophet gui ah ca guk ah amawng phi kä hmat ci gui. Cun ung phi ngah mi naw prophet gui ah ng'thu pyein a bä vai ah cun ah Bawi cu ngawn pyi ci gui. 28 Ani ngawn nak vai ah kat nak a i kä om pang sei phi, ani cu ngawn vai ah Pilat bawi ah k'thäh ci gui. 29 Ngahmi naw cun ah Bawipa ah mawng cacim ung om ciah täng ah ami bi zawp kawn ah cun ah Bawipa ah ang düihpüi gui naw a gook cu kutlam tung ung kaa chang ba u ne, ng'cim hmun khui ung k'phuh ci gui. 30 Cun ung phi Khanpughi naw ani cu sik nak ung kaa thawh ba sak ci. 31 Cun kawn ah ani cu, Kalile ung kaa naw Jerusalem ah atäng ah ng'gui lawk ci gui ah chang gui ah ma ah kho hnüüp ak sho dang ba ci. Cun ah chang gui cu tuk bäi chü Israel chang gui ah ma ah Hunbawi ah mawng pyein ne saksi ci gui. 32 Tuk bäi kei mi naw Thu Ni cu nang mi ah kami law püi ci, Khanpughi naw a bi lawh gui vai, mi pupa gui ah ma ah shai a taak cu Ami na hta ng'shon gui mik mi ah ma ah, Bawipa Jesuh tho ne a ghin nak ba awn ng'dang pyi ci. Salan ak hnih nak ung; “Nang cu ka Hta ah na kiak ci, tuk ngawi keicu na Pa ah ka kia pyi ci, ci ne ami guk ah mäih ah kya pyi ci. 34 Sih nak ung kaa a thawh ba ah mawng la ng'cim hmun ung kä a gawk ba phung vai ah mawng cu, Khanpughi naw; “David ah ma ah shai ka taak ah mäih ah, Nang mi am phi A theing la hriham cu ka ning pe gui khai, ci ne pyein ci. 35 A hei ca mawng ung, “Nang naw düng ciah na chang cu thukat nak ung kä na gawk sak khai”, ciah a pyein cu ak cang ah kiak ci. 36 David cu a ghin om zah ung Khanpughi ah ng'zak hlü ah bi bik ci, a sih kawn ah a pupa gui ah ng'cim hmun pei ah m'cim tuk ci gui. A pumsa cu ng'cim hmun ah thukat nak ung gawk ci. 37 Cun ung phi Khanpughi naw sih nak ung kaa a thawh ba sak ah pumsa cu thukat nak kä om ci. 38 phäi nau gui aw, nang mi am ning hmat sak gui hlü cu; Bawipa Jesuh awn kat nak m'gein nak ah mawng ning m'thein nak gui la Ani zum ciah chang phung cu Mose ah thukhän naw kä ak phiawn hlawt ah hmakat nak nüng ung phiawn nak gah ci, ciah kiak ci. 40 Prophet gui ah ca guk ung; 41 A i, i ah kä tä ciah chang gui, teng shüm vä! Tuk ngawi kei naw ka bi lawh gui vai cu, Chang naw tän ne a ning m'thein tu gui ung phi, Kä nami zum ah täng khai, Cun ah kia sei nang mi cu cäicat ne si vä” ciah om ci cu nami khan ah kä gawk law hlawt khai ah nami geing nak vai nei” ci ne m'thein gui ci. 42 Pum im ung kaa Paul la Barnabas cu lut law ba ni khä tah chang gui naw, law ba khai ah pum hnüüp phi a cun ah amawng gui ani pyein ba vai ah k'thäh ci gui. 43 Pum nak ung kaa ami ng'pai law ba ung Judah chang gui la, Judah thung ung kaa ng'hlat lawk ciah chang akda naw Paul la Barnabas cu läk law goi ci gui. Ngahmi naw cun ah chang gui am, Khanpughi ah m'gein nak ung ami ghin vai ah m'cäi gui ci goi. 44 Cun kawn ah pum ba hnüüp ung gawnu ung kaa chang avan ngai ngai gawk law ci gui. 45 Cun ung phi Judah chang gui naw chang khli cu hmu u netah, m'thüi na u ne, Paul ah ng'thu pyein cu ng'cuh püi ci gui. 46 Paul la Barnabas naw azan kaa ah tah thamah nak pi awn, Ak htük bäih ah keimi naw Khanpughi ah thu ni cu kami ning m'thein tu gui ci, Cun ung phi nang mi naw cun ah thu cu hnu nah ne, ang täi ghin nak awn kä nami khin thäk tuk ciah nami k'bäi pyi ci nei. Cun ah kia sei keimi cu, nangmi ung kaa ng'düi law ba ne chang pakhui hei gui ah om nak ah kami hteit khai nei. 47 Bawipa naw ana peit gui ah thukhän cu; “Kei naw nangmi cu chang pakhui hei gui ah hmawk ah, akdei ah ka ning m'düih gui ci, Cun ah kia sei khomdek khan avan naw hun nak gah khai, ci ne pyein ci” ci ne pyein sak ci goi. 48 Cun ah thu cu chang pakhui hei gui naw ng'za u netah zeikyai u ne, Bawipa ah thu ni cu m'hlüng tai ci gui. Ang täi ghin nak gah khai gui ah a ghü gui naw Bawipa Jesuh cu zum lawk ci gui. 49 Cun ah kia sei Bawipa ah thu ni cu, cun ah kho avan ung gawk zawp ci. 50 Cun ung phi Judah chang gui naw, gawnu ung ang vai gui la Khanpughi zum ciah män mang ci gui ung kaa hnumi gui cu, took gui u sei, ngahmi naw Paul la Barnabas cu k'dudeiu na goi netah ami kho ung kä om tu ba khai goi ah gawt ne k'täm goi ci gui. 51 Ang düihpüi goi naw cun ah chang gui ah shetkat nak ang dang vai ah ani kho ung kaa m'vut cu hei khawng shüt netah Ikonium gawnu ah hteit ci goi. 52 Antiok gawnu ah zum ciah chang gui cu zeikyai u ne Mumcha Theing awn küm be ci gui.
1 Ikonium gawnu ung phi Paul la Barnabas naw Pum im ah hteit ne ng'thu pyein ni sei, Judah chang gui la chang pakhui hei gui ak chün naw Bawipa Jesuh cu zum lawk ci gui. 2 Cun ung phi kä zum tuk ciah Judah chang gui naw, chang pakhui hei gui cu touk gui u ne, zum ci gui kä ami zei nak gui vai ah m'thüi ci gui. 3 Ang düihpüi gui cu cun ah kho ah ak shou om u ne, Bawipa ah mawng cu k'thamah nak awn pyein ci gui. Bawipa naw ngahmi-ah pyein ah am geinsei nak ah mawng akcang ah ang dang nak vai ah ngahmi am cäi aih gui vai la ngaih khit gui vai ami bi nak hlawt vai ah hlüngtai nak cu pe gui ci. 4 Cun ah gawnu ung om ciah chang gui cu k'hnih ah ng'pai ci gui, am shah cu Judah chang gui lam ah kia tuk ci gui, am shah cu Ang düihpüi gui lam ah kia tuk ci gui. 5 Judah chang m'shah la chang pakhui hei am shah gui cu ami ng'vai gui awn ng'ge nah u ne, ang düihpüi gui cu k'dukdeiu nah gui ne lung awn vawih gui vai ah k'bäi ci gui. 6 Cun ah mawng cu ang düihpüi gui naw ng'za u netah Likaonia kho Liatra la Dabe pigaw ung ah dawng ci gui. 7 Ngahmi cu a cun ah kho ung ah Thu Ni cu shäu ne pyein ci gui. 8 Listra pigaw ah a nupuk ge ah a kho ng'khem sei kä hteit thei ciah chang tumat om ci. 9 Ani cu Paul ah ng'thu pyein ngoh ne ngai tuk ci. Paul naw ani cu kheing ne teng ne, anat nak a maih nak hlawt vai ah a zum nak a om cu hmu netah, 10 “Tho ne ng'düi ä” ci ne a k'aw m'can ne pyein ci. A cun vai am cun ah chang cu tho ne ng'düi ne m'khan ne hteit ci. 11 Chang gui naw Paul ah bi cu hmu u netah, “Khogam bawi gui cu chang ah ng'hlawk u ne mik mi ah gawk law ci gui nei” ci ne ami mät ah Likaonian thu awn m'lau ci gui. 12 Ngahmi naw Barnabas cu Zeus ah sui u ne, ng'vai pi ne thu pyein ciah Paul cu Hermes ah sui ci gui. 13 Zeus khobawi ah taigü im cu pigaw k'pung ah om sei, k'taigü naw pat gup la papai gui cu pigaw m'kawt pei ah law püi ci. Cun ah taigü la chang gui cu ang düihpüi gui ah ma ah vawi k'pet ne taigü hlük ci gui. 14 Cun ah ami pawngpüi cu Paul la Barnabas naw ng'za ni netah, ani suisak teek ne ghawt ne, chang gui ah lung ah va dawng ni netah, 15 “Paw chang gui aw, a i vai shicha na mi bi ang? Keimi phi nangmi ah mäih ah chang ah kami kiak ci nei, Nangmi naw a shin ah mäih ah bi lawh gui cu nawng shüt u neh, ang täi ghing ne, khan la kaa, tui la m'dek, ak ghing ak om avan tüi sho ciah Khanpughi cu nami zum tu vai ah, Thu Ni cu kami pyein khai ah kami lawk ci nei. 16 Cau pui kho läi Khanpughi naw chang gui cu ami mät ah ng'zaak hlü ah om ih sak gui ci. 17 Cun ung phi Khanpughi naw a om ah mawng cu ak ni a bi nak awn ang täi sei chang gui am m'dang gui ne, Khankho ah kaa kho zuk aa sak ne, amät ah khin ung vuipai m'theihtak ci phi ning pe gui ci. Ei auk vai ning k'be gui ne m'lung zeikyai nak phi ning pe gui ci” ci ne m'lau ne pyein ci. 18 Cun ah m'lau ne ami pyein ung phi vawi pet khai ah pawng ci gui cu ma nah ne kä m'khüt ci gui. 19 Cun ung phi Pisidia kho Antiok la Ikonium ah kaa Judah chang gui gawk law u ne, chang gui cu ami mät täng ah m'hläm gui ci gui. Cun kawn ah Paul cu lung awn vawi u netah si pyi ciah ngai u ne, pigaw k'pung ah so ne hteh püi ci gui. 20 Cun ung phi Paul cu ak chang gui naw läk ne k'bui law u khä tah tho law ba ne pigaw kyong ah hteit ba ci. A ngawi ung Paul la Barnabas cu Derbe pigaw ah hteit ci goi. 21 Paul la Barnabas naw Derbe gawnu ah Thu Ni cu pyein ni sei chang akda khritha ah kia lawk ci gui. Cun ung kaa naw Listra Ikonium la Pisidia kho Antiok ah hteit ba ci gui. 22 Ngahni naw, “Khanpughi ah uk nak kho ung gawk vai ah zaica nak akda mi aut khai” ci ne m'theithang gui ne, k'thamah m'lung üp nak pe gui ci goi. 23 Ngahni naw khritha bum päng ung a gham gui hei m'düih vü ne, ei hlawi ne taigü nak awn, ami zum ah Khanpughi ah ap gui ci ci goi. 24 Paul la Barnabas cu Pisilia kho a ni phlän kawn ah Pamphilia kho ah gawk ci goi. 25 Cun ung kaa naw Perka pigaw ah thu pyein ni netah Attalia pigaw ah gawk ci goi. 26 Antiok ah gawk ba ci gui, Antiok cu tuk bäi ng'pyi khai ah bi a mi bi nak ung m'gein nak ami gah vai ah Khritha bum gui naw Khanpughi ah taigü ne ami ap nak gui ah kia ci. 27 Antiok gawnu ah ami gawk law ba ung ngah ni naw khrithabum gui m'cut gui netah, ngahmi awn Khanpughi naw bi abi nak gui la a pakhui hei gui naw ami zum law tu vai ah lam a hmawn peit gui ah mawng cu m'thein tu ba gui ci goi. 28 Cun kawn ah ngah ni cu zum ciah chang gui awn atäng ah acu ah ak shou om ci goi.
1 Chang am shah gui cu Judea kho ah kaa Antiok ah hteit u netah, “nangmi cu Mose ah thukhän na mäih ah vun aat nak kä nami bi tu ung hun nak kä nami gah tuk khai” ci ne m'theithang ci gui. 2 Paul la Banabas cu cun ah chang gui awn ak tä ah ng'cucan ne ng'küknet ci gui. Cun ah kya sei khrithabum gui naw, cun ah ami ng'cuh a mawng cu ng'shi k'ca ng'ge pai khai goi ah Paul la Barnabas cu ghü goi u netah, zum ci chang am shah gui awn atäng ah ang düihpüi gui la khrithabum ang vai gui ah om nak Jerusalem ah tüih goi vai ah k'bäi ci gui. 3 Khrithabum gui naw cun ah ami chang ghü gui cu pigaw k'pung ah khüt ne tha gui u sei, Rhoenicia la Samaria kho gui cu sun ne hteit ci gui. Cun ah ami hteh nak lam ah khritha gui ah ma ah chang pakhui hei gui naw Khanpughi ami zum law tu a mawng cu m'thein tu gui ci gui; cun ah amawng gui cu ng'za u netah zum ciah chang gui cu zeikyai ci gui. 4 Paul la Barnabas cu Jerusalem ah ami gawk law ung, khrithabum gui, ang düihpüi gui la ang vai gui naw a na dou gui u sei, ngahmi awn Khanpughi naw bi a bi ah mawng cu m'thein tu gui ci gui. 5 Cun ung phi Pharisee pati ung kaa Bawipa Jesuh zum law tuk ciah chang am shah gui cu ng'düi law u ne, “Chang pakhui hei gui cu vun aat nak bi tuk khai gui, Mose ah thukhän phi läk tuk khai gui” ci ne kiak ci gui. 6 Cun ah kia sei ang düihpüi gui la ang vai gui cu cun ah a mawng ng'ge nak vai ah ng'bum ci gui. 7 Ak shou ami pyein kawn ah Peter naw ng'düi law netah, “Phäi nau gui aw, Khanpughi naw kei cu chang pakhui hei gui naw ami zum tu vai ah Thu Ni ka pyein khai ah, azan pui nangmi ung kaa kei a na ghü cu nami hmat pyi ci, 8 Chang gui ah m'lung ngaih, hmat zawp ciah Khanpughi naw Mumcha Theing cu mik mi am ana peit gui ah mäih ah chang pakhui hei gui am phi a peit nak tu gui awn, ngah mi m'hni ne ang zaak nak hlü gui cu m'dang ci nei. 9 Bawipa naw ngahmi cu mik mi awn kä na m'khoicha gui ci; ngah mi naw ami zum ah hmawk ah ami kat nak cu m'gein gui ci. 10 Cun ah kia sei nang mi naw a i ah kia sei Khanpughi nami ng'küknet püi hlü ang? Mi pupa gui naw phi bäi, mi mät naw phi bäi kämi phuih hlawt ah phuih cu a i ah kia sei ngah mi am nami phuih sak gui hlü ang? 11 Mik mi cun phi ngahmi ah mäih ah mi zum u ne, Bawipa Jesuh ah m'gein nak awn hun nak mi gah ci” ci ne pyein ci. 12 Khanpughi naw ngahmi awn chang pakhui hei gui ah ng'lung ah cäi aih gui vai la ngaih khit gui vai a bi cu, Barnabas la Paul naw ngak ni khä tah chang a van naw kyiip ah ngai ci gui. 13 Ngah ni naw a ni pyein zawp kawn ah James naw, “Phäi nau gui aw, na ngai tu vä! 14 Khanpughi naw ak htük bäih ah chang pakhui hei gui ung kaa am shah gui cu ak chang ah ghü gui ne am gein gui ah mawng cu Simon naw pyein pyi ci. 15 Prophet gui ah ng'thu gui cun phi shin ah amawng gui awn ng'müi ci nei. Cacim ung; 16 Bawipa naw, “Cun kawn ah kei law ba ne, David ah uk nak kho cu ka m'düng ba khai, Shekak ci phi ka co kyang ba khai, 17 Om ciah chang nüng nüng cu kei ah lawk khai, Kei naw ka khü gui ah chang pakhui hei gui phung cun phi ka khäm gui khai. 18 Shin cu cau pui Bawipa naw hmat ne a pyein ah kia ci. ci ne pyein ci. 19 James naw k'däih ne, “Kei naw ka pyein hlü cu, Khanpughi zum law tuk ci gui ah chang pakhui hei gui zaica khai gui ah bi kä nami bi en vä. 20 Cun ung phi khongzo vawihpeh ng'ghutha nak kä ei vai ah mawng; kä ng'zo khoh dütdüt vai ah mawng; a gawn ung kheik ne ngawn la si phung phung kä ei vai ah mawng gui cu ami hmat hlawi vai ah ca gu ne mi pe gui khai ah ka ngai ci. 21 A i ah kia sei ci ung, cau ä tün ne, apigaw päng pum im gui ung, kyin hnüüp phung ung Mose ah thukhän gui cu phat ne, thu awn phi pyein lä ah kia ci” ci ne pyein ci. 22 Cun kawn ah ang düihpüi gui ni, ang vai gui ni, khrithabum gui ni ci ng'ge u netah, Paul la Barnabas awn ng'khap khai ah chang ghü ne, Antiok ah tüih vai ah k'bäi ci gui. Cun ah kia sei, khritha gui naw ang htei ah a mi chang m'sui ah Barsabbas ah ming ciah Judas la Silas cu ghü ci gui. 23 Ngahni am ca tumat gu ne m'kan goi ci gui, cun ah ca cu; “Na mi phäi nau gui ah kia ciah, ang düihpüi gui la ang vai gui naw, Antiok gawnu, Siria kho la Cilicia kho ung om ci gui ah chang pakhui hei khritha gui am zeikyai ne ca kami ning pe law gui ci nei. 24 Keimi ung kaa chang am shah cu, u ah kä m'cäi ä ah, nangmi ah om nak ah law ne, m'lung ah cüngvawn nak vai ah ng'thu pyein ne, nangmi a mi ning zaica sak gui ah mawng cu kami ng'zak ci nei. 25 Cun ah kia sei keimi naw chang ghü ne nangmi ah tüih law vai ah kami k'bäi ci nei. Ngahni cu keimi naw kami m'hni ah Paul la Barnabas awn atäng ah ng'gui khai gui nei. 26 Paul la Barnabas cu mi Bawipa Jesuh ah bi cu ani sih am lawk khai ah k'tha nah ne bik ci goi ah kia ci. 27 Cun ah kia sei keimi naw ngahni awn atäng ah Judas la Silas cu kami tüi lawk ci nei. Shin ah ca ung kami guk ah a mawng gui cu ami mät naw phi ning m'thein gui khai gui nei. 28 Khongzo am vawihpeh ah ei cu kä ei vai, si phi kä ei vai. 29 A gawn kheik ne ngawn ah sa kä ei vai, kä ng'zawpawm dütdüt vai, ciah thukhän nah kawn ah a hei phuih gih nami khan ah kä a gawk law vai ah Mumcha Theing awn keimi kami gup ät ci nei. Shin ah amawng gui cu nami hlawi ah khoi ung nangmi ah hmawk ah bä ei khai nei. Gai ne zei ne om vä!” ci ah guk ci gui. 30 Ami chang tüih gui cu hteit u ne Antiok ah gawk u netah zum ciah chang gui cu ng'bum sak gui ne, ami ca m'khäh cu pe gui ci gui. 31 Cun ah ca cu phat u khä tah ngami am thagui ami peit nak gui ah kia sei ang htei ah zeikyai ci gui. 32 Judas la Silas cu ma lam ah amawng hmat ci gui ah prophet ah kia ni ne, akhin ak shou ung zum ci gui am pumsa thagui mumcha thagui khän nak la thamah nak pe gui ci goi. 33 Ngahni cu acu ah ak shou om tu ni netah, zum ciah chang gui naw chidam goi ne tüi ba goi ci gui. 34 (cun ung phi Silas cu om shüt khai ah k'bäi ci). 35 Paul la Barnabas cu Antiok gawnu ah om shou ni ne, Bawipa ah thu ni cu chang hei gui awn atäng ah m'theithang pyeinsak ci goi. 36 Hnüüp a pipi shou law khä tah Paul naw Barnabas am, “Bawipa ah Thu Ni mi pyein nak ah pigaw päng phäi nau gui ah om nak ah hteit ne, a i ah ami om ih law cu mi teng m'kein gui khai” ci ne pyein ci. 37 Barnabas naw Johan Maku cu khü ne ng'gui püi vai ah zum ci. 38 Cun ung phi Paul naw ami bi bi nak ang pyi güt ah kä hteh tu ah nawng en gui ne Pamphilia ung hlah ta gui te ci kia sei, ani khü tu ba vai cu kä zum ci. 39 Ngahni acun ah mawng ak tä ah ng'cuhcan ni netah ng'pai ci goi; Barnabas cu Maku khü ne, Saiprus ah htinpaw awn hteit ci. 40 Paul cu Silas khü ne hteit ci, zum ci gui naw Paul cu Bawipa ah m'gein nak a gah vai Khanpughi ah ap ci gui. 41 Paul cu Siria la Cilicia kho zung ah hteit ne, khrithabum gui am k'thamah nak pe gui ci.
1 Paul cu Derbe la Listra pigaw gui ah gawk law ci. Listra pigaw ah Timothi ming nak ciah khritha tumat om ci. Ani cu Judah chang khritha ah kia ci, cun ung phi a pa cu Krik chang ah kia ci, 2 Listra la Ikonium ung om ciah khritha gui naw Timothi cu m'hlüngtai ci gui. 3 Paul naw Timithi cu amät awn atäng ah bi abi tu vai ng'za hlü netah, vun aat nak pek ci. Cun ah a bi ah mawng cu cun ah kho ung om ciah Judah chang gui naw Timothi ah pa cu Krik chang ah kia ciah ami hmat pyi ah hmawk ah kia ci. 4 Ngahmi cu apigaw päng ung ami hteh nak ah, Jerusalem ah om ci gui ah ang düihpüi gui la ang vai gui ah thukhän gui cu hmat phyak khai ah hei m'theithang vü gui ne, cun ah thukhän gui cu zum ciah chang gui naw ami läk vai ah m'thein gui ci gui. 5 Cun ah kia sei khrithabum ah zum nak khüighaat law pi k'täi ne, zum tuk ciah chang phi da law pi k'täi ci. 6 Ngahmi cu Phrikia la Kalatia kho cu phlän ne hteit ci gui, a i ah kia sei ci ung Asia kho ung thu ami pyein vai ah Mumcha Theing naw lam kä m'shüm gui ci. 7 Ngahmi cu Misia khogi ung ami gawk law zah ung Bithinia kho ah hteh vai ah tha nak ci gui. 8 Cun ung phi Bawipa Jesuh ah Mumcha Theing naw kä hteh sak gui sei, Misia kho cu phlän ne Troas gawnu ah gawk ci gui. 9 Cu mü Paul naw ang mui mang ung, “Macedonia kho ah law ne na bawm gui vä” ci ne Mecedonia chang tumat naw ng'düi ne ng'zoi sei hmuk ci, 10 Cun ah Paul naw amik hmuh vai am keimi cu Macedonia kho ah hteh vai ah kami pawng m'htein ci, a i zah kia sei ci ung, cun ah kho ah om ciah chang gui ah ma ah Thu Ni kami pyein vai ah Khanpughi naw na khü gui ci ciah kami zum nak awn ah kia ci. 11 Keimi cu Troas ung kaa Samothrsia tuigoi bü ne htinpaw awn hteit u ne, a ngawi ung Neapolis pigaw ah kami gawk ci. 12 Cun ung kaa naw Philippi gawnu ah kami hteit ci. Philippi cu Macedonia kho ah mang gaw tumat ah kia ci. Roman chang gui ah gawnu ah phi kia ci. Cun ung keimi cu kho hnüüp akda kami om ci. 13 Kyin hnüüp ung keimi cu pigaw k'pung ah lut law u ne, Judah chang gui ah taigü nak hmun om khai ah kami ngaih nak ah tui kam pei ah kami hteit ci. A cun ung hmumi gui ana ngo u sei, ngoh tu u ne kami m'thein tu gui ci. 14 Cun ah chang gui ung Thiatira pigaw ung kaa, aphu küi suisak zoi ciah Lidia ming nak ci ah hnumi tumat om ci. Ani cu Khanpughi zum ciah chang ah kia ci. Khanpughi naw Paul ah thu pyein a ngaih zaak nak tu kheng vai ah cun ah hnumi ah m'lung kyong pian tham pek ci. 15 Cun ah kia sei amät la akyong ung kaa gui ami van cu tui hnim ci gui. Cun kawn ah Lidia naw, “Kei naw Bawipa cu ak cang ah ka zum ciah nami ngaih gep ah akiak ung ka im ah law ne om law tu vä” ci ne k'shet ne na khü gui ci. 16 Kho hnüüp ät ung keimi cu taigü nak hmun ah kami hteh nak lam ah khoshe naw kai sei cecai ciah, ami chang shäm hnumi hta tumat cu kami hmuk ci. Ani cu ak ce ng'cheng awn a bawi gui ah hmawk ah ngui akda gah ci. 17 Cun ah hnumi hta naw Paul la keimi cu kami hnu ah na läk law gui netah, “Shin ah chang gui cu Hlüngtai pi bäih ciah Khanpughi ah chang gui nei! ngahmi cu nangmi am hun nak ah mawng ning m'thein gui ciah kia ci gui nei” ci ne m'lau ci. 18 Cun ah hnumi hta cu kho hnüüp akda ung a cun ci ne ng'hawh laih laih khä tah, Paul cu am lung kä ni law sei, cun ah chang cu ng'hlah shi netah, “Jesuh Khrit ah ming awn kei naw ka ning k'täm ci, shin ah hnumi ung kaa lut law ne a hei ah na hteh vai” ci ne khoshe cu k'täm ci. Acun vai am khoshe cu lut law ne a hei ah hteit ci. 19 Cun ah hnumi ah a bawi gui naw ngui ami gah nak vai ah m'kawt ang khai ah thüi u netah, Paul la Silas cu pha goi u ne, sumlei nak hmun ah sukyi ng'vai gui ah om nak ah hteh püi goi ci gui. 20 Ngahni cu Roman bawi gui ah ma ah hteh püi goi u netah, “Shin ah chang goi cu Judah chang goi ah kia ci nei, Pigaw kyong ah thüngphyong khai ah bi bik ci goi nei. 21 Ngahni naw mik mi ah thukhän nawn hnu ng'tuk gui cu m'theithang ci goi nei; Mik mi cu Roman changah mi kia ci, ngahmi a m'theithang ah thungzo gui cu kämi dou tu hning ci, kämi läk tu hning ci, ci ne chah goi ci gui. 22 Chang khli gui cun naw ng'lung nah ne Paul la Silas cu tuthat goi ci gui. Ang vai gui naw, Paul la Silas cu ani suisak suut netah ami thah goi vai ah k'bäi ci gui. 23 Paul la Silas cu tä aih khai ah that goi u netah thawng ung chum goi ci gui. 24 Ang vai gui naw ngahni cu üp-oi khai ah ami chum goi vai ah pyein u khä tah, ngahni cu thawng hmüp khui ah m'tawk goi u ne, ani kho phi sing vüt ne ceep goi ci gui. 25 Khomü cawih ah Paul la Silas cu taigü ni ne, Khanpughi m'hlüngtai ne ng'äi m'cu ni sei, a hei thawng kium gui cun naw ngai tuk ci gui. 26 Cun zah ung ang ghit ah shihpi thüng law khä tah thawng im nu cu ng'kyeet ne thüng ci. Cun vai am thawng m'kawt gui avan ng'hmawng ci, thawng kium gui ami khih nak ah m'si gui gui phi avan ng'phian zawp ci. 27 Thawng ngäng cu ng'shüm law ne thawng m'kawt gui avan ng'hmawng sei hmu netah, thawng kium gui dawng yawp ci gui ah ngai neath, akhim zu phawng ne amät ng'ngawn ne sik khai ah pawng ci. 28 Cun ung phi Paul naw, “Kä ng'cawh en ä, keimi kami van shin ung kami om ci nei” ci ne m'lau ne hawh ci. 29 Thawng ngäng cu mei m'däi ne dawng ne lut law netah, ng'khlet ne Paul la Silas ah kho pei ah kaup ci. 30 Cun kawn ah ngahmi cu k'pung ah luh law püi gui netah, “Bawi gui aw, Hun nak ka gah vai ah a i nei ka bi kaw? ci ne ng'shi gui ci. 31 Ngahmi naw, “Jesuh Bawipa cu na zum vai, cun ung na mät la na kyong ung kaa gui nami van naw hun nak nami gah khai” ci ne m'thein ci gui. 32 Cun kawn ah amät la a im ung om ciah chang gui am Bawipa ah Thu Ni cu m'thein gui ci gui. 33 A cun mü, acun ah khin ung thawng ngäng naw Paul la Silas cu khü goi ne, ani leim cu m'tui m'seih pe goi ci. Cun kawn ah a cun vai am amät la akyong ung kaa gui cu tui hnim ci gui. 34 Ani naw Paul la Silas cu a im ah khü goi ne, khin nah ne tu m'bei goi ci. Amät la akyong ung kaa gui ami van cu Khanpughi ami zum tu ah phäh ah ang htei ah zeikyai ci gui. 35 A ngawi ung kho ngawi Roman bawi gui naw gaakap ng'vai gui am, “Shin ah chang gui chah ba gui vä” ci ne khän gui ci gui. 36 Cun ah kia sei thawng bawi naw, Paul am, “Bawi naw, nang la Silas cu ning chah ba gui vai ah k'bäi ci nei, cun ah kia sei dimdeeih nak awn hteit ba nä” ci ne m'thein ci. 37 Cun ung phi Paul naw gaakap bawi ah ma ah, “Kei mi cu Roman kho chang ah kami kiak ci, a i hma nak la kat nak phi käm koicha ah, ngahmi naw keini cu, chang khli ah ma ah, that netah thawng ung na chum goi ci gui. Tuk bäi a düm ah na chah ba gui hlü u ne ang? Kä kami lut law ba khainei, Roman bawi gui ami mät law ne na chah ba gui u sä” ci ne kiak nak ci. 38 Gaakap bawi gui naw Roman bawi gui am, a cun ah mawng cu m'thein ba u sei, Paul la Silas cu Roman kho chang ah ani kiak cu hmat law u netah ang htei ah kyikyawk ci gui. 39 Cun ah kia sei ngah mi cu law u ne, Paul la Silas cu ng'ge püi ba goi u netah, thawng ung kaa k'plawk ba goi u ne, cun ah gawnu ung kaa naw ani hteh ba vai ah m'cäi goi ci gui. 40 Paul la Silas cu thawng ung kaa lut law ba ni ne, Ladia ah im ah hteit ci goi. Cun kawn ah zum ciah phäi nau gui awn ng'hmuh u netah, thamah nak ah thu ani pyein kawn ah cun ah gawnu ung kaa naw hteit ba ci goi.
1 Paul la Silas cu Amphilolis la Apollonia pigaw gui sun law ne, Thessalonika gawnu ah gawk law ci gui. Cun ah gawnu ah pum im tumat om ci. 2 Paul cu abi man ah mäih ah pum im ah hteit ne, pum hnüüp thum vei ung, cacim cu m'hlan ne tän ne pyein ne chang gui awn ng'cecäk ci gui. 3 Messiah naw zaica nak a bui aut vai ah mawng, la sih nak ung kaa a thawh ba vai ah a mawng gui cu cacim va teng teng ne ng'kheing khai ah m'thein gui ci. Paul naw, “Kei naw nangmi am ka ning m'thein gui ah Bawi Jesuh cu Messiah ah kiak ci” ci ne pyein ci. 4 Chang am shah gui cu Paul ah thu pyein zum u ne Paul la Silas ah chang ah kya lawk ci gui. A cun ah mäih ah Khanpughi zum ciah Krik chang akda gui la hnumi ng'vai gui cu ngahni ah chang ah kia lawk ci gui. 5 Cun ung phi Judah chang gui cu m'thüi u netah, lam zung ah chang ngetngawng gui khü gui u ne, chang khli ah kiak khai ah ng'bum sak gui netah, pigaw avan ung thüngphyong sak gui ci gui. Cun ah chang gui cu Jason ah im ah lut u ne, Paul la Silas cu chang khli ah ma ah kaih ne m'düih goi vai ah shui goi ci gui. 6 Shui ne kä hmu goi u netah cun ah chang gui naw, Jason la zum ciah chang am shah cu pha ne, bawi ng'vai gui ah ma ah law püi u netah, “Shin ah chang gui naw theit shüi shüi ne chang zaica sak ci gui, ngahmi tuk bäi mik mi ah gawnu ah gawk law u sei Jason naw a im ah dou gui ci. 7 Shin ah chang gui naw Jesuh ming nak ciah Ghangpughang a hei om ci ci u ne, nang ghangpughang ah thukhän cu plawh ci gui nei” ci ne m'lau ne pyein ci gui. 8 Cun ah a mawng gui cu ng'za u netah, chang khli gui la gawnu ung ng'vai gui cu thüngkyüng zawp ci gui. 9 Bawi ng'vai gui naw Jason la a paw gui cu ngui kyäng ne ng'lawh sak gui netah tüi ba gui ci gui. 10 Kho a mü law vai-am zum ciah chang gui naw Paul la Silas cu Berea gawnu ah tüi goi ci gui. Cu ah gawk ni netah ngahni cu pum im ah hteit ci goi. 11 Berea ah chang gui cu Thessalonika ah chang gui ah mä ami m'lung ng'htei pi ci. Cun ah kia ne Paul ah thu pyein cu k'tha na ne ngai ci gui. Paul la Silas ah thu pyein cu ak cang la kä ak cang ah ami hmat nak vai ah cacim cu ak hnüüp tä sei teng kheng ci gui. 12 Cun ah kia ne chang akda naw Bawipa Jesuh cu zum lawk ci gui, cun ah zum lawk ci gui ung bühmang ci ah Krik hnumi gui la k'pami ng'vai gui phi akda om tuk ci gui. 13 Cun ah Paul naw Berea gawnu ung Khanpughi ah Thu Ni a pyein ah mawng cu Thesslonika ah Judah chang gui naw ng'za u netah, Berea ah law u ne chang gui cu touk ne thüngphyong sak ci gui. 14 A cun vai am zum ciah chang gui naw Paul cu tuinu kam lam ah hteh sak ci gui. Silas la Timothi läi cu Berea ah om shüt ci goi. 15 Paul tha tuk ci gui ah chang gui cu a ni awn atäng ah Athens ah khüt ne hteit tuk ci gui. Cun kawn ah Paul naw Silas la Timothi cu akzang ah ami tüih goi vai ah m'cäi gui khä tah Berea ah hteit ba ci gui. 16 Paul cu Athens gawnu ah Silas la Timothi cu ging goi ne a om zah ung, gawnu avan cu agup bäng ah kia sei hmu netah ang htei ah am lung thüi ci. 17 Cun ah kia sei pum im ah Judah chang gui, Khanpughi zum ciah chang pakhui hei gui la ak hnüüp tä sumlei ne lawk ciah chang gui awn ng'cecäk ci gui. 18 Epicurean la Stoik Greek hmuhmat chang gui awn phi ng'kükneet ne pyeinsak ci gui. Cun ah chang am shah gui naw, “i baw hmuhmat ciah ng'hlawk ciah shin ah chang cu a i a pyein tu khan ang? ci ne kiak ci gui. A hei chang gui naw, “Shin ah chang naw, a kho hei chang gui ah khanpughi gui a pyein ah kiak khai nei” cik ci gui. Cun ah ami pyein cu Paul naw Bawi Jesuh amawng la sih nak ung kaa thawh ba ah mawng a pyein ah hmawk ah kia ci. 19 Cun ah kia sei Paul cu kawng si zung Areopakas gawnu ah hteh püi u netah, “Nang naw na pyeinsak ah m'theithang nak ak thai ah mawng cu kami hmat tu hlük ci nei. 20 Nangmi naw nami pyeinsak ah amanwg am shah gui cu keimi ah hmawk ah ak thai ah kia ci, cun gui ah mawng cu m'hlan ne kami hmat tu hlük ci nei” cik ei 21 (Athens chang gui la a kho hei ah kaa lawk ciah ami khin gui cu, cun ah thu thai gui ami ngaih zaak, ami pyeinsak nak awn a khin ng'pyi sak ci gui. 22 Paul cu Areopaka zungnu ma ah ng'düi netah, “Athens chang gui aw, nangmi cu ang htei ah nami zum nak om ciah, apäng avan ka hmuh nak awn ka ning hmat gui ci nei. 23 Kei cu nami gawnu avan ung hteit shüi shüi ne, nami taigü nak gui cu teng netah, ‘Kä hmat ah Khanpughi ah’ ci ne ca guk ah taigü kiang tumat cu ka hmuk ci. Cun ah nang mi naw kä hmat ne nami taigü ah Khanpughi ah mawng cu tuk bäi ka ning m'thein gui ah kia ci. 24 Khomdek la khomdek khan ah om ci nüng tüi piang ciah Khanpughi cu, khomdek la khankho uk ciah Khanpughi ah kia ne, chang naw kut awn a pian ah pum im ung kä om ci. 25 Khanpughi cu chang avan am hnun gui ghing nak la a päng avan zuk pek ciah kia ne, ang zaak hlü tumatmat om ciah mäih ah chang naw kut awn bi vai kä ng'za hlük ci. 26 Khanpughi naw khomdek khan avan ung om ciah, chang pakhui avan cu, chang tumat ung kaa ng'shon khai ah tüisho netah, ami ghin nak vai ah akhin cu k'bäi pe gui ne, ami om nak vai ah hmun cu m'hnüt pe gui ci. 27 Cu ah abi ah mawng cu chang gui naw Khanpughi cu ami hmu ei hman ah ami shui zap shüm vai ah hmawk ah kia ci. Cun ung phi ak cang ah Khanpughi cu mik mi ung kaa tumat awn phi ng'shawng ciah kä kia ci. 28 Chang tumat naw; “Mik mi cu Khanpughi awn ghing ne, hnün tho ne, om ih ne mi kiak ci. Nang mi ung kaa ng'äi awn m'thei ciah chang gui naw phi; “Mik mi cun phi Khanpughi ah Hta gui ah mi kiak ci” ci ne ng'äi awm ci gui. 29 Cun ah mik mi cu Khanpughi ah hta gui ah mi kiak ci kia sei, Khanpughi cu chang gui naw ami ngaih tüh ah ami hmuhhmat nak awn ami pyantham ah ghui gup, ngui gup, lung gup, gui ah mäih lawk ci ci ah kä nami hmat ten vai nei. 30 Khanpughi naw i kä ami hmuhhmat zah ung chang gui cu kä a teng kheng gui ung phi, tuk bäi ung kho ng'nü ah om ciah chang gui am, “Na mi kat nak cu ng'zu ba zawp vä” ci ne ng'thu khän gui ci. 31 A i ah kia sei ci ung khomdek chang avan, ghü ne am düih pyi ah Bawipa awn, ng'düng ciah m'khoicha nak vai ah hnüüp cu, ak bäi pyi ah hmawk ah kya ci. Cun ah abi law vai ah mawng cu, cun ah Bawipa sih nak ung kaa a thawh ba sak nak awn, khäng htek ciah saksi m'dang pyi ci” ci ne pyein ci. 32 Paul naw, sih nak ung kaa thawh ba nak ah mawng a pyein cu ng'za u netah chang am shah naw päipih ci gui. Cun ung phi am shah gui naw, “Shin ah mawng na pyein cu kami ng'za ba hlü mä ci nei” cik ci gui. 33 Cun ah kia sei Paul cu cun ah zung ung kaa tho ne hteit ba ci. 34 Chang am shah gui cu Paul awn ng'khawt u netah zum law tuk ci gui. Cun gui cu Areopakas ah zung ung kaa Dionicius la Damaris ming nak ciah hnumi tumat la chang hei am shah gui ah kia ci.
1 Cun kawn ah Paul cu Athens ah kaa naw Korin ah hteit ci. 2 Cun ah gawnu ah Pontus kho ah kaa Akuila ming nak ciah Judah chang tumat la ak chu Priscilla cun awn ng'hmuk ci gui. Ngahni cu ghangpughang Klaudius naw, Roman ung kaa Judah chang avan a hteh ba vai ah k'bäi ne pyein sei Itali ah kaa law ba thai ci goi ah kia ci. 3 Ngah ni cu Paul ah mäih ah mehvun bi ne ei awk ci ah chang ah kia ni khä tah, Paul cu ngahni ah om nak ah hteit ne atäng ah bi lo tuk ci. 4 Ani cu pum im ah pum hnüüp päng, ung Judah chang gui la Krik chang gui naw ami zum law tu vai ah ng'thu m'thein gui ci. 5 Macedonia ah kaa Silas la Timothi ani law ba kawn ah Paul cu thu Ni bäng k'tha nah ne pyein ne, Bawipa Jesuh cu Messiah ah a kiak ah mawng Judah chang gui am ak ni ah m'thein gui ci. 6 Ani cu Judah chang gui naw hnu ng'tuk püi ne k'shedam nah u khätah, Paul naw ami ma ah a sui 'khawng ne, “Nangmi nami dimaih ung phi nami mät ah chaw ah kiak khai nei, kei naw kä ka pyein tu ba khai, tuk bäi ung tün ne chang pakhui hei gui ah hteit ne ka pyein khai nei” ci ne kiak na gui ci. 7 Cun kawn ah ani cu, Khanpughi zum ciah Titius Justus ming nak ciah chang pakhui hei ah im ah hteit ne om tuk ci. Cun ah im cu pum im awn ng'et hta ci. 8 Pum im uk ciah Krispus ming nak ciah chang la ak kyong ung kaa gui cu Khanpughi zum tuk ci gui. A hei Korin chang akda gui cun phi Thu Ni ng'za tu ne zum tu u ne, tui hnim ci gui. 9 Kho mü ät ung Paul ah muimang ung Bawipa naw a pyein cu, “Kei naw nang cu ka ning om püi ci kia sei, kä na kyih vai, na pyein gäk gäk vai, hnu ah kä na ng'hlah en ba vai. 10 A u naw phi nang kä ning k'shedam nak khai, shin ah gawnu ung om ciah chang akda cu, kei na zum ciah chang gui nei” ci ne pyein ci. 11 Cun ah kia sei Paul cu cun ah gawnu ung kum ät la avang om ne, chang gui am Khanpughi ah Thu Ni cu m'theithang gui ci. 12 Achaia kho cu Kallio naw Roman bawi ah kia ne a uk zah ung, Judah chang gui ng'cut u netah Paul cu pha ne, zung ah m'kawt ah law püi ci gui. 13 Cun ah chang gui naw, “Shin ah chang cu, thukhän nawn hnu ng'tuk ci lam awn Khanpughi cu zum vai ah chang gui cu k'süksaw gui ci nei” ci ne chak ci gui. 14 Paul naw m'shang tu ba gui khai ah ang bü zah ung Kallio naw, Judah chang gui am, “Shin ah mawng cu hmakat nak ah baw, hleeihlak nak ah baw akyak vai sü ung, nangmi ah ng'chaak nak cu hnimgei ne ka ning ngaih pe gui khai sü te; 15 Cun ung phi shin cu thu m'gawng pyeinsak ah mawng ah kiak ci kia sei, nami mät naw m'khoicha vä, kei naw kä ka m'khoichak khai nei” ci ne tah 16 zung ung kaa naw k'täm ba gui ci. 17 Ngami naw pum im uk ci ah Sosthenes cu pha u netah zung düma ah tuthat ci gui. Cun ung phi Kallio naw i ah kä sui gui ci. 18 Paul cu Korin ah zum ci gui awn atäng ah kho hnüüp akda om netah, Priscilla la Akuila awn ng'gui ne Siria kho ah htinpaw awn hteit ci gui. Kenkhrea ung kaa htinpaw kä a ng'düih law phaung, Paul cu Khanpughi ah thu khän bik ci kia sei a lu k'teiu ci. 19 Ephesus ah gawk u netah Paul naw Priscilla la Akuila cu nawng shüt goi ci. Cun kawn ah Pum im ah hteit ne Judah chang gui awn ng'cecäk ci gui. 20 Chang gui naw ngahmi ah a om tu shou cang vai ah chou u sei phi, Paul naw ma nah gui netah, 21 “Khanpughi naw ang zaak hlü a om ung nang mi ah om nak ah ka law ba khai nei” ci ne kiak na gui netah, Ephesus ung kaa naw hteit ba ci. 22 Ani cu Sisarea ah gawk netah htinpaw ung kaa naw kyum law ne, Jerusalem ah hteit ne khritha bum gui cu zavaih ah gui ci. Cun kawn ah Antiok ah hteit ci. 23 A cu ah ak shou om netah, Kalatia kho la Phrikia kho zung ah hteit ne zum ciah chang gui am thamah nak pe gui ci. 24 Cun zah ung Alexandria ah kaa Apollos ming nak ciah Judah chang tumat cu Ephesus ah lawk ci. Ani cu ang htei ah ng'thu m'gawng thei ne cacim phi hmat ciah chang ah kia ci. 25 Ani cu Khanpughi ah bilawh mawnglam phi ngaiza theithang ciah kiak ci, Bawipa Jesuh ah ng'düng ciah amwng ama gui cun phi k'thamah nak awn pyeinsa ne, m'theithang ci. Cun ung phi ani naw Johan ah tui hnim nak bäng hmat ci. 26 Ani cu pum im ah thamah nak awn thu pyein ci, Ang thu ngaiza tuk ci goi ah Priscilla la Akuila naw, ani cu ani im ah khü ni netah, Khanpughi ah bilawh mawnglam cu ng'kheing pi khai ah m'thein tuk ci goi. 27 Apollos cu Achaia kho ah hteit hlü khä tah, Epheus ah zum ciah chang gui naw Achaia ah zum ciah chang gui am, ang hmat nak tu vai ah ca guh ne m'kan ci gui. Ani ci Achaia kho ah gawk netah Khanpughi ah m'gein nak awn zum ciah chang gui cu ak tung ah bilawh püi gui ci. 28 A i ah kia sei ci ung, ani cu chang khli ah ng'lung ah ng'thu a pyein nak ung cacim ung kaa bäng bäng awn m'küikhän ne, Bawi Jesuh Messiah ah a kiak ah mawng cu, Judah chang gui am, ng'kheing khai ah m'hlan ne, am thein gui hning ah phäh ah kia ci.
1 Apollos cu Korin ung a om zah ung Paul cu a htehthon nak ah kho ung kaa Ephesus ah gawk law ci. Cun ah gawnu ah ang khah püi am shah gui cu hmu gui netah, 2 äNangmi cu zum ciah nami kiak awn ah Mumcha Theing cu nami gah pyi ne ang? ä ci ne ng'shi gui ci. Ngahmi naw, Mumcha Theing a om ah mawng phi kä kami ng'za tu man ci nei cik ci gui. 3 Paul naw, Cun ah a kiak ung nang mi cu a i ah mäih ah tui hnim nak ang nami gahä ci ne ng'shi ba gui ci. Ngahmi naw, Johan ah tui hnin nak kami gak ci nei cik ci gui. 4 Paul naw, Johan ah tuihnim cu kat nak ung kaa ng'zu ba ci gui ah hmawk ah kia ci, Johan naw ka hnu ah lawk ciah Bawipa cu nami zum vai ci ne Judah chang gui am m'thei gui ci. Cun ah Bawi cu Bawipa Jesuh ah kia ciü ci ne m'thein gui ci. 5 Cun ah thu cu ngai za u netah ngami cu Bawipa Jesuh ah ming ung tui hnim ci gui. 6 Paul naw ami lu khan ah a kut taih khäh tah Mumcha Theing cu ami khan ah gawk law sei kä hmat ah thu pyein u ne, Khanpughi ah thu phi pyein ci gui. 7 Cun gui ami van cu gha-lei-goi lawk ci gui. 8 Paul cu chaa thum ah kyong ung chagat ah hteit ne chang gui awn ng'cecäk u ne, Khanpughi ah uk nak kho a mawng cu chang gui naw hmuhmat ne ami dou vai ah kä kyihkyawk ah m'theithang gui ci. 9 Cun ung phi chang am shah gui cu ami m'lung m'sing sei kä zum u ne, chang khli ah ng'lung ah Bawipa ah lam ah mawng cu pyein m'sheet ci gui. Cun ah kia sei paul naw zum ci gui cu khah püi gui ne, ngahmi gui cu hteh ta gui netah, Tirannus ah ng'thei im kyong ung ak hnüüp tä sei ng'thu ng'ge püi gui ci. 10 Cun ah kho kum goi ung lüng ne pyein sa ne bilo khü tah, Asia kho ung om ciah Judah chang la chang pakhui hei chang avan naw, Khanpughi ah Thu Ni cu ngai za zawp ci gui. 11 Khanpughi naw Paul awn ang htei ah küikyang ciah cäi aih gui vai cu m'dang ci. 12 Chang gui naw Paul ah bi ah zih la Tampu gui pang cu ak gaw gui la khoshe ah kai gui ah om nak ah, ami hteh püi ah akiak ung, nat nak gui cu maih ne, chang kai ciah khoshe gui cu dawng ci gui. 13 Hteit shäi shäi ne khoshe k'täm ci gui ah Judah chang am shah gui cun naw phi, Bawipa Jesuh ah ang ming awn khoshe k'täm vai ah k'tha nak ci gui. Ngahmi naw Paul ah pyein ah Jesuh ah ming awn nang cu ka ning k'täm ci nei ci ne chang kai ciah khoshe cu kiak nak ci gui. 14 Cun ah bik ci gui ah chang gui cu, Judah Taigü tung Sheva ah hta gui chang sing chih ah kia ci. 15 Cun ung phi khoshe naw, Jesuh cu ka hmat ci, Paul ah mawng phi ka hmat ci, cun ung phi, nang mi cu a u gui ang? ä ci ne ng'shi gui ci. 16 Cun kawn ah ngahmi cu khoshe ah kai ah chang naw, ak tä ah ng'toh püi gui ne m'khüt gui sei, leimbai u ne, ami suisak phi ng'phyit sei, cun ah im ung kaa dawng zawp ci gui. 17 Cun ah a mawng cu Ephesus ung om ciah Judah chang gui la Krik chang gui naw ng'za u netah, ang htei ah kyikyawk u ne, Bawipa Jesuh ah ming cu m'hlüngtai ci gui. 18 Bawipa Jesuh zum ciah chang akda gui cun phi law u ne, ng'zou hleip ne ami bilawh kä ani nak cu ah mawng chang gui ah ma ah pyein ne ng'kiaa ci gui. 19 Ng'zou hleip te ciah chang gui naw, ami hleip nak ah cauk gui cu m'cut ne law püi u netah, chang gui ah ng'lung ah mei awn m'khih ci gui. Cun ah cauk gui ah phu cu tän ne khei ung tangka tämkäp hma-kip phu lawk ci. 20 Cun ah kia sei Bawipa ah huham awn ang Thu cu ng'shui ne abi bi nak cu khüi ghaat law pi ci. 21 Cun gui a kiak kawn ah Paul cu Macedonia la Achaia kho ung kaa naw Jerusalem ah hteit khai ah k'bäi ci. Ani naw, Cu ah ka hteh kawn ah Rom ah phi ka hteit khaiä ci ne pyein ci. 22 Ani naw ak chang goi, Timothi la Erastus cu Macedonia a ah tüi goi netah, amät cu Asia kho ung ak shou hta om ci. 23 Cun zah ung Ephesus ah Bawipa ah mawnglam ah hmawk ah thängkyäng thängphyong nak om ci. 24 Demetrius ming nak ciah nguisheh ciah chang naw Artemis kho ah hnumitha ah a gup cu sheh sei, ak chang gui naw khawh akda gah nak ci gui. 25 Ani naw a cun ah ngui sheh ne bi bik ci gui la, acun ah mäih ah a hei bi bik ci gui cu m'cut gui netah, Paw chang gui aw, shin ah bi mi bi nak awn khawh cham akda mi gah law cu nami hmat ci. 26 Tukbäi nami hmuhmat ah mäih ah Paul naw, chang ah pian ah a gup gui cu Khanpughi ah kä kia ci nei, ci ne Ephesus bäng ung ah kä kya ciah Asia kho avan ung changgui m'hleeihlak ne lam hma sak gui ci nei. 27 Mik mi ah bi lawh cu ang ming she ne ng'ä vai ah kia lawk ci. Cun bäng ah kä kia ciah, Asia la khomdek khan van naw a zum ah kho hnumitha Artimis cun phi ng'ä nak vai kia law ne, a hlüngtai nak phi dimaih lawk khai nei ci ne pyein ci. 28 Cun ah thu cu ng'za u netah i baw sheh ciah chang gui cu m'lung k'she u ne, Ephesus ah khohnumitna Artemis cu hlüngtai ci nei ci ne m'lau ci gui. 29 Gawnu avan pälääk ne thängkyäng u ne, chang gui naw Paul ah ng'gui püi goi, Macedonia ah kaa, Kaius la Aristarkas cu pha goi u ne gaw ng'lung im nu ah hteh püi goi ci gui. 30 Paul naw cun ah chang gui cu amät naw hmu gui hlük ci, cun ung phi zum ciah ak chang gui naw maa nak ci gui. 31 Huham om ciah a teih püi chang gui cun naw phi, gaw ng'lung imnu kyong ah kä a hteh vai ah, Paul cu chang tüi ne m'cäi ci gui. 32 Cun zah ung chang khli cu ng'bum law u ne, am shah a hei, am shah a hnga ah m'lau ci gui, a i ah kia sei ci ung cun ah chang gui akda pi naw ami ng'bum law ah mawng cu kä hmat ci gui. 33 Judah chang gui naw Alexander cu k'hma ne hteh sak u khütah, shin ah a mawng cu ani ah awm ah chang am shah naw mgai ci gui. Alexander naw chang gui ak ding ah ami om vai ah akut awn nüt gui ne, a mawng ama m'thein gui khai ah k'tha nak ci. 34 Cun ung phi ani cu Judah chang ah kia ciah hmat u netah, Ephesus ah kho hnumitha Aetemis cu hlüngtai ci nei ci ne nazi hnih vai ung a täng ah m'lau ci gui. 35 Ak hnu ah gawnu ca k'gu naw chang gui cu ak ding ah om sak gui netah, Ephesus chang gui aw, Ephesus gawnu cu hlüngtai ciah Artemis mang gaw, la khankaw ah kaa kya lawk ciah lung theing gup ah hmun ah kiak ci, ci cu, chang van naw hmat ci nei. 36 Cun cu u chang naw kä käi hlawt khai nei. Cun ah kia sei m'lung ah phu däät ah i kä bi ne, ak ding gei ah om vä. 37 Nang mi naw shin goi cu pha ne nami law püi goi ci, cun ung phi ngahni cu mi pum im kyong ah lut ne kä m'gu m'gheim ci goi, mi kho hnumi phi sawngkhei ne kä ng'thu ci goi. 38 Cun ah kia sei Demetrius la a paw gui naw chang tumat cu zung ah ami chaak hlü ung, zung bawi gui la zung ami hmawn nak ah hnüüp gui om ci kia sei, chah hning ci gui nei. 39 Cun ung phi nangmi ung nami pyein vai ah a mawng a hei a om ah a kiak ung, tuungpa ci gui naw ng'ge nah ne m'hnüt k'bäi vai kiak khai nei. 40 Tuk ngawi thängkyäng thängphyong nak shi, mik mi am nam suh gui hning ci gui nei. Shin ah thängkyäng nak vai ah a mawng i kä om ci, thängkyäng nak ah mawng ami nam dang sak gui ung kä mi m'dang hlawt khai nei. ä ci ne pyein ci. 41 Cun ah thu pyein netah gawnu ca k'gu naw, chang gui cu tüi ba gui ci.
1 Thängkyäng thängphong nak ding law khü tah Paul cu zum ciah ak chang gui m'cäi gui ne k'tha gui pe gui netah Macedonia kho ah hteit ci. 2 Ani cu cun ah kho ah zum ciah chang gui cu hteit shäi shäi ne thagui pe gui netah Achaia kho ah hteit ba ci. 3 Ani cu a cu ah chaa thum vai om ci. Cun kawn ah Siria kho ah hteit ba khai a pawng zah ung Judah chang gui naw ng'ge na ne hnim vai ah a mi pawngpäi cu hmat ci. Cun ah kia sei Macedonia kho lam ah ng'hlat ne hteit ba khai ah k'bäi ci. 4 Berea ah kaa Pirrhus ah hta Sopater, Thessalonia ah kaa Aristarchua la Sekuntus, Derbe ah kaa Kaius, Asia kho ah kaa Tichikus la Trophimus, la Timothi gui cu ani awn ng'gui tuk ci gui. 5 Ngahmi cu ana hteit ma u netah Trosa pigaw ah na ging gui ci gui. 6 K'caw kä shum ah m'htut den nak ah pawi ng'pyi khü tah keimi cu Philippi ah kaa htinpaw awn law u ne, hnüüp hma lüng khü tah ngahmi ah om nak Troas ah ka mi gawk law ci. A cu ah hnüüp chih kami om tuk ci. 7 Hnüüp chih hnüüp ung keimi cu vunvai ne ei auk vai ah kami ng'bum ci. Paul cu a ngawi ung hteit law ba khai ah kia netah cu mä kho cawih ung khüt sei thu pyein ne m'thei thang gui ci. 8 Keimi ah ng'bum nak ah kyong khui ah mei im akda kami m'düi ci. 9 Eutikus ming nak ciah ak hmaw chang tumat cu, Paul naw thu a pyein ah ung m'kawt khan ah ngoh ne ngam ci. Ngam ne ip law netah im ah ang dän thum nak kaa kia lawk ci. Chang gui naw ami zu chan tu ba zah ung ani cu si pyi ciah kiak ci. 10 Cun ung phi Paul cu kyum law ne cun ah chang cu Kaup shi ne kyawp netah, kä ng'ä ai vä! ani ghing zah ci nei ci ne pyein ci. 11 Paul cu im khan ah hang kai ba netah ang khah püi gui awn atäng ah vunvai ne ei auk ci gui. Ami ei auk awn nah kho thai ghi ghi güt sei ak chang gui awn atäng ah ak shou ng'cecäk u netah cun ah pigaw ung kaa pawng ne hteit ci. 12 Ang khah püi gui naw kia ne ghing ba ciah chang cu a im ah ami hteh püi ba kawn ah ami m'lung zu kia ba ci. 13 Keimi cu ak zang ah ma ne htinpaw awn Assos ah kami na hteit ci Paul cu 'kawng Lam ah hteit netah a cu ah htinpaw ung kium tuk khai kiak ci. 14 Keimi cu Assos ah Paul awn ng'hmu u netah ani mah ah htinpaw awn Mitilene ah kami hteit ci. 15 A ngawi ung tui hei ga Chios ah hteit u ne, cun ah ngawi ung Samos tui koi ah kami gawk ci, cun ah ngawi ba ung mä Miletus pigaw ah kami gawk ci. 16 Paul cu Asia kho ah ak shou kä om hlü netah Ephesus sun pah ne htinpaw awn hteh vai ah k'bäi ci. Ani cu Jerusalem ah Pentekost hnüüp pha vai ah ak zang ah hteit ci. 17 Miletus ah kaa ge naw Paul naw, Ephesus ah Khrithabum a gham gui am, ami hmuh law vai ah ca gu ne pe gui ci. 18 Ngahmi gawk law u khütah Paul naw, Kei cu Asia kho ah ka gawk law hnüüp ung tän ne a i hawk cha ah ka bi lawh cu nang mi naw nami hmat ci. 19 Kei cu Judah chang gui ah shedam nak awn zaica nak ka gawk zah ung ka ng'phli tui kia law sei phi kam lung neim sak ne, Khanpughi ah chang shäm ah kia ne a bi cu kabik ci. 20 Chang khli ah ng'lung ah phi bäi, nami im gui ah phi kyai, ka pyeinsak m'theithang ung, nangmi ah hmawk ah nik khai phung cu kä ka k'pawih na man ci. 21 Judah chang gui am phi bäi, chang pakhui hei gui am phi bäi, Khanpughi ah ma ah ami kat nak ng'zu ba u ne, Bawipa Jesuh cu ami zum vai ah kheing ne ka m'thein gui ci. 22 Tuk bäi Mumcha Theing ah lam shäm nak cu ngai ne Jerusalem ah ka hteit khai. Cä ah a i ah a kiak vai cu kä ka hmat ci. 23 Kei naw ka hmat cu, a gawnu päng ung Mumcha Theing naw, Thawng kium nak la zaica nak ung na gawk khai nei a ci bäng ah kia ci. 24 Kei cu ka hnun gui ah kä ka ng'vang ci, a nam hnüt peit ah bi la, Bawipa Jesuh ah na peit ah bi, pyi ne bi vai cu ak tung ah kia sei, Khanpughi ah m'gein nak mawng Thu Ni cu hteit shäi ne pyein vai bäng ah kia ci. 25 Kei naw hteit shäi shäi ne nami ng'lung ah, Khanpughi ah uk nak kho ah mawng cu ka pyein pyi ci. Cun ung phi nangmi ung kaa a u phi kei na hmu law ba khai kä om ciah ka hmat ci. 26 Cun ah kia sei nang mi ung kaa chang tumatmat cu, a di maih ah a kiak ung, kei ah awm ah kä kiak khai ci cu, ak dei dang ah ka ning m'thein gui ci. 27 A i ah kia sei ci ung kei naw nangmi am Khanpughi ah ang zaak hlü cu ka ning m'thein gui pyi ah hmawk ah kya ci. 28 Cun ah kia sei nami mät naw nami mät la, Mumcha Theing naw nami kut ung a ning ap gui ah Htome gui cu nami m'htei vai. Khanpughi ah khritha bum cu htoshüm ah mäih ah nami m'htei vai, Cun cu Athapa naw a ghinnak pe ne a sih nak awn Amät ah kaa ah k'bäi pyi ci. 29 Kei ka hteh ba kawn ah k'hnei sou gui cu nami ng'lung ah law u ne m'ghä m'ce ne ning tuten gui khai gui ci cu ka hmat pyi ci. 30 Nami mät ung kaa chang am shah naw, zum ciah chang gui naw ami läk gui vai ah, hleeihlak ne ami k'tä phlawh nak ah khin gawk law khai nei. 31 Cun ah kia sei kei naw nang mi am kho kum thum pum ung amä ak hnääp, ka ng'phli tui kia law sei, ka ning m'theithang gui cu nami shäm ba khenggeng vai nei. 32 äTuk bäi kei naw nang mi cu Khanpughi ah kut ung la, am gein nak ah Thu Ni ung ka ning ap gui ci. Cun ah Thu Ni naw, Khanpughi naw ak chang gui ah hmawk ah am hnüt ah, hriham ning pe gui ne ning düih sak gui khai. 33 Kei naw chang ah ghui, ngui, sui awi kä kam hni ci. 34 Kei naw shin ah kut awn bi bi ne ka chang gui ah sui ei vai la ka mät ah ng'zaak hlü gui, ka küm be sak cu nami van naw nami hmat pyi ci. 35 K'tha nah ne bi law netah ghawipyam ci m'gein tu nak vai ah a mawng avan cu ka ning m'dang gui pyi ci. Bawipa Jesuh naw, Va dou nak katah hei peit nak cu, zei kiai nak da pi ciü a ci cu nami shäm ba vai nei. 36 Paul cu thu pyein zawp netah ang khah püi gui awn atäng ah m'khuuk doong ne taigü ci gui. 37 Ngahmi naw Paul cu, kyap ne kyawp ne, ng'uui hnam u ne, gidam ci gui. 38 Paul naw, Kei cu cän kawn ah kä nami na hmu ba khaiä a ci ah hmawk ah ang htei ah thüi sei zaica ci gui. Cun kawn ah ngahmi naw htinpaw ah khüt ne tha tuk ci gui.
1 Keimi cu ngahmi awn kami ng'pai kawn ah Kos tuikoi ah kami gawk ci. A ngawi ung Rhodes päng ah gawk u ne, cun ung kaa naw Patara pigaw ah kami hteit ci. 2 Cun ung kaa naw Phoenicia ah hteit khai ah htinpaw tumat bui u ne, a cung kai tu ne k'täi ne kami hteit ci. 3 Saiprus päng hmuh nak vai ung gawk law u netah, htum täng Siria kho lam ah ka mi hteit ci. Taia gawnu ung ami khawh gui chah shüt khai kia sei kami ng'däm pah ci. 4 A cu ah zum ciah chang gui awn ng'hmu u ne, hnüüp chih kami om tuk ci. Ngahmi naw Mumcha Theing ah lam shäm nak awn Paul cu Jerusalam ah kä ah hteh vai ah maa nak ci gui. 5 Cun ah ngah mi awn kho hnüüp chih kami om tu kawn ah k'täi ne kami hteit ba ci. Zum ciah chang gui cu ami k'chu , ami hta gui ni, ami van naw pigaw k'pung tui kam pei ah khüt ne na tha tu ba gui u sei, tui kam ah kami van m'khuuk doong ne kami taigü ci. 6 Cun kawn ah ng'gidam tu u netah, keimi cu htinpaw khan ah kai u ngäh sei ngahmi cu ami im ah hteit ba ci gui. 7 Keimi cu Taia ung kaa naw Ptolemais pigaw ah gawk u ngäh sei, zum ciah chang gui naw na dou law gui u sei, a cu ah hnüüp ät kami om tuk ci. 8 A ngawi ung düi law ne hteit ba u ne, Sisarea ah kami gawk ci. A cu ah Thu Ni pyein ciah Philip ah kami kai ci. Ani cu ang düih püi gui bi bi püi gui khai ah Jerusalem khritahbum naw chang sing chih ami ghü nak ung kaa tumat ah kia ci. 9 Ani ung kä ceimah phak ciah ahta hnumi phli om ci. Ngahmi cu Khanpughi ah Thu Ni shäu ne pyein ci gui ah kia ci. 10 Keimi cun ung kami om nak tu a pi pi shou law khäh tah, Akabus ming nak ciah Prophet tumat cu Judea kho ah kaa gawk lawk ci. 11 Ani cu keimi ah om nak ah law ne, Paul ah khei khih nak la ne, akut akhaw cu pin netah, Shin ah kheikhih nak ka nak ciah chang cu, Jerusalem ah Judah chang gui naw, a shin ah mäih ah khit ne pin u netah, chang pakhui hei gui am ap khai gui nei, ci ne Mumcha Theing naw pyein ci nei ci ne pyein ci. 12 Cun cu ng'za u netah, keimi la ana om ciah chang gui naw Paul cu Jerusalem ah kä ah hteh vai ah kami maa nak ci. 13 Cun ung phi Paul naw, A i ah kia sei nang mi kyap lau u ne, kam lung nami na thüi sei sak ang? Kei cu Bawipa Jesuh ah hmawk ah, Jerusalem ung pha ne khih nak bäng ah kä kaak ciah, sih nak vai ah phi ka ng'düi ge ci nei ci ne kiak na gui ci. 14 Paul cu m'cäi ne kä gah u netah kei mi naw, Khanpughi ah ang zaak hlü ah kia sä ci ne kami om däät ci. 15 Kami om tu shäng kawn ah kei mi cu pawng ba u ne, Jerusalem ah kami hteit ba ci. 16 Sisarea ah kaa zum ciah chang am shah gui cu keimi awn atäng ah law tu u ne, Saiprus ah kaa, zum ciah chang Mnason ah im ah kai vai ah na hteh püi gui ci gui. 17 Keimi cu Jerusalem ah kami gawk law zah ung zum ciah chang gui naw ak ni ah na dou gui ci gui. 18 A ngawi ung Paul cu keimi awn atäng ah James hmuk khai ah hteit ci, cun zah ung a gham gui cu ana ng'bum ci gui. 19 Paul naw ngahmi cu zei ne dou gui netah chang pakhui hei gui ah ma ah ani awn Khanpughi naw a bi law ah a mawng gui cu m'thein tu gui ci. 20 Ngahmi naw Paul ah m'thein tu gui cu ng'za u netah Khanpughi cu m'hlüngtai ci gui. Cun kawn ah Paul am, Kami nau Paul aw, Judah chang gui ung kaa, tämkäk phia khak naw Bawipa Jesuh cu zum law u ne, ngahmi naw thu khän läk vai ah a i hlawk ah ami ng'zaak hlü cu na hmat pyi ah kia ci nei. 21 Nang naw chang pakhui hei gui ah ng'lung ah om tuk ciah Judah chang gui am, Nami hta gui vun aat nak kä nami bi peit gui vai, Judah thung kä nami läk vaiä ci ne, Mose ah thukhän ami nawng vai ah nam theithang gui cu ngahmi naw ng'zak ci gui nei. 22 Tuk bäi nang na law cu k'hläp ah hmat khai gui, a i hawkcha mi bik khai ang? 23 Cun ah kia sei keimi ah pyein ah bi na bi ung nik khai. Keimi ung thukhän shaitaak bi ciah chang phli om ci. 24 Ngahmi awn atäng ah hteit u netah atäng ah theingcim nak cu nami bi vai, nami lu nami k'teiu nak ah ang khah cu nang naw na peit vai. Cun ah na bi ung nang ah mawng chang gui ah pyein cu kä hman ciah hmu u ne, na mät naw ma ne, Mose ah thukhän cu na läk ciah chang a van naw hmat khai gui. 25 Bawi Jesuh zum law tuk ciah chang pakhui hei ah hmawk läi ah, a gup am ami tu m'bei ah ei auk, si la a gawn ung kheik ne ngawn gui phung kä a mi ei auk vai la ng'zopawm dütdüt gui cu ami hlawi vai ah m'hnüt ne k'bäi u ne, ca guh ne kami pe gui ci nei. ä ci ne pyein ci gui. 26 Cun ah kia sei Paul naw a ngawi ung cun ah chang phli cu khü gui netah theingcim nak cu bi püi gui ci. Cun kawn ah ani cu pum im ah hteit ne, theingcim nak a mi bi ang pyi nak vai ah a khin la ami mät phäh phäh naw ap ne ami peit nak vai ah a khin cu ng'daut ne m'thein gui ci. 27 Ak hnüüp chih nak cu ng'pyi law ghep ghep khü tah Asia kho ah kaa Judah chang am shah gui naw, pum im ah Paul cu hmu u netah, chang gui cu took gui ne, Paul cu ng'lung nah ne phak ci gui. 28 Cun ah pha u netah, Israel chang gui aw, na bi law püi gui vä, shin ah chang cu kho ng'nä ah hteit ne Israel chang gui ni, Mose ah thukhän pum im ah mawng gui ni cu päipih täitawk ne chang gui am m'theithang gui ci nei. Cun bäng ah kä kya ciah shin ah chang naw chang pakhui hei gui cu pum im kyong ah law püi gui ne, ak theingcim nak pi cu shetkat sak ci nei ci ne m'lau ci gui. 29 (A i ah kya sei cun ah ami pyein ci ung ngahmi naw Paul cu, Ephesus ah kaa Trophimus awn atäng ah gaw ng'lung ah hmu te u netah, Paul naw pum im kyong ah law püi ciah ngai ne ami pyein ah kia ci). 30 Pigaw avan thängkyäng u ne, chang gui avan dawng law u ne Paul cu pha ne pum im ah k'pung ah saw law ba u netah, pum im m'kawt cu ang ghit ah hei khai ci gui. 31 Chang gui naw Paul cu ngawn vai ah ami tha nak zah ung, Roman gaakap bawi naw, Jerusalem gawnu avan ung thängkyäng thängphyong ci, ci cu ng'za netah, 32 a cun vai am gaakap bawi gui la gaakap gui cu khü gui ne, chang gui ah ng'bum nak ah dawng lawk ci gui. Chang gui naw gaakap bawi la gaakap gui cu hmu gui netah Paul cu kä tukhtah ah om ci gui. 33 Cun zah ung gaakap bawi gawk law ne Paul cu pha sak gui ne, m'si gui k'hnih awn pha ne khih sak gui ci. Cun kawn ah Paul cu a u chang ah a kiak la a i kat nak a bi ah ng'shi k'ca gui ci. 34 Cun ah chang gui naw a hei hei ah m'lau ne pyein ci gui. Cun ah m'lau ne k'pamcai u sei, gaakap bawi naw a mawng ak cang cu kä hmat hlawt netah, Paul cu a zung ah ami hteh püi vai ah pyein ci. 35 Gaakap bawi ah zung khlaak pei ah ami gawk law zah ung, chang gui naw k'bui law aih u khü tah, gaakap gui naw Paul cu chang ne hteh püi ci gui. 36 Chang khli gui naw a hnu ah läk law u netah, Shin ah chang cu ngawn vä ci ne m'lau ci gui. 37 Gaakap gui naw Paul cu im kyong ah luh law püi vai u khütah, Paul naw gaakap bawi am, Nang a pi ah ka ning thu püi hlük ciü ci ne pyein ci. Gaakap bawi naw, Nang Krik thu ah na ng'thu thei ne ang? 38 Zanhta shäng ung ng'käükneet ne ng'tuk bi khai ah, chang phia phli-kip khah püi ne, bunghmu ah dawng ciah, Egypt chang cu nang ah kä kia ne ang? ä ci ne ng'shik ci. 39 Paul naw, Kei cu Judah chang ah ka kyak ci, Cilicia kho, Tarsus mang gaw ung ng'tüi ciah gaw ng'liing mang chang ah ka kiak ci. Na bä ni, chang gui ah ma ah ng'thu ka pyein vai ah nam gein nä ci ne pyein ci. 40 Gaakap bawi naw zum sei, Paul cu khlaak ung ng'düi netah, chang gui ami dingkyiip vai ah akut awn nüt ci. Chang gui dingkyiip zawp u khütah Paul naw Hebru ng'thu awn; shicha pyein ci.
1 äIsrael chang nupa phäi nau gui aw, tuk bäi ka mät ah mawng phlehphlang ne ka pyein lawk khai na ngai tu vä! 2 Cun ah Hebru ng'thu awn a pyein cu chang gui naw ng'za u netah dingkyiip law pi ne ngai ci gui. 3 Paul naw k'tüih ne, ä Kei cu Cilicia kho Tarsus gawnu ung ng'tüi ci ah Judah chang tumat ah ka kiak ci. Jerusalem ung däm ng'vai law ne, pu pa gui naw ami läk ah thukhän cu Kamaliel ah a lüng ah ka theithang tuk ci. Tuk ngawi nangmi Khanpughi ung nami m'lung a ling ah mäih ah kei phi kam lung ling man ci. 4 Kei naw Bawipa Jesuh ah lam läk ciah chang gui cu ngawn gui haw ne kak'dudeiu na gui man ci. Hnumi gui, k'pami gui akda pha gui ne Thawng ung phi ka chum gui man ci. 5 Kei naw ka pyein ak cang ah a kiak cu, Taigü tung la Kawngsi ng'vai gui mät saksi hning khai gui nei. Ngahmi naw Damaskus ah Judah chang phäi nau gui am ami guk gui ah ca cu, kei naw ka gah ci. Cun ah kia sei Cun ah Bawipa zum ciah chang gui phung pha ne Jerusalem ah law püi ne m'kat gui vai ah, kei cu Damaskas ah ka hteit ci. 6 äKei cu lam ka hteit te ci, Damaskas gawnu kak et law zah, hnüüp lunglai khin ung khankho ah kaa ak dei nu cu ang ghit ah kia law ne, veing ne na shä lawk ci. 7 Kei cu m'dek ung kiu ne ng'zän netah, Soul, Soul, a i ah kia sei kei cu nah na k'dudeiu nak angä ciah k'aw cu ka ng'zak ci. 8 Kei naw Bawipa, nang u nei ci ne ng'shi ngütah, Bawipa naw, Kei cu nang naw na k'dudeiu nak ah, Nazaret chang Jesuh nei ci ne pyein ci. 9 Kei awn atäng ah kami ng'gui ciah chang gui naw ak dei cu hmu tu pang u ne phi kei na ng'thu püi ciah k'aw cu kä ng'za tuk ci gui. 10 Kei naw, Bawipa, Kei a i ah ka kiak khai angä ci ne ng'shi ba ngütah, Bawipa naw, Tho law ne, Damaskas ah hteit , cu ah na gawk awn ah a i ah na kiak vai cu Khanpughi naw ning m'thein khai nei ci ne pyein ci. 11 Kei cu cun ah ak dei ah nam dang nak ka mik m'dauh sei, kami ng'gui ci gui naw na k'pang tu u ne, Damaskas ah na hteh püi ci gui. 12 Cun ah gawnu ah Ananias ming nak ciah chang tumat om ci. Ani cu thukhän läk ne zum nak om ciah chang ah kia sei, Cun ah gawnu ung om ciah Judah chang avan naw amik chang m'sui ah chang ah kia ci. 13 Ani cu law ne ka pei ah ng'düi netah, Ka nau Soul, na mik m'dei ba sä ci ne pyein ci. A cun vai am ka mik m'dei law ba sei ani cu teng ä tah, 14 Aninias naw, Nang cu mi pupa gui ah Khanpughi naw a ng'zaak hlü na hmat vai, düng ciah ak chang shäm na hmuh vai la a cun ah Bawi ah thu k'aw na ng'zaak vai ah hmawk ah ning ghü pyi ci nei. 15 Nang cu na hmuh na ng'zaak gui a van na pyein khai ah cun ah Bawi ah saksi ah na kya khai nei. 16 Cun ah kia sei tuk bäi a i vai na ngaih shäng ang? Tho law ne, tui hnim , na kat nak gui a ning m'si peit vai ah Bawipa ah taigü ä ci ne pyein ci. 17 äKei cu Jerusalem ah hteit ba ne, pum im ah ka taigü zah ung ka mik hmuk ci. 18 Cun ah ka mik hmuh nak ung Bawipa cu dang law netah, Ang ghit ah kä shou shä ne Jerusalem ung kaa a hei ah na hteh vai, shin ung om ciah chang gui naw, kei ah mawng na saksi cu kä dou khai gui nei ci ne pyein ci. 19 Kai naw, Bawipa Pum im päng ung hteit ne, nang ning zum ciah chang gui pha gui ne, tuthat gui ciah chang, kei ah ka kiak cu ngahmi naw hmat pyi ci gui nei. 20 Nang Bawi ah mawng saksi ciah Stephen ami ngawn zah ung phi kei cu a pei ah om ne ka tängpang tuk ci, ngawn ci gui ah suisak cu ka kawh pe gui ci. ä ci ne m'hlan ba ngä tah. 21 Bawipa naw, Hteit , a shou nak ah om ciah chang pakhui hei gui ah, nang cu ka ning tüi khai nei ci ne pyein ciü cik ci. 22 Chang gui naw Paul ah thu cu shin ah thu a pyein güt ngai u netah, shin ah chang m'dek khan ah kä om tu ba sä, ngawn vä, a ghin tu ba ah kä nik ci nei ci ne m'lau ne ng'pyang ci gui. 23 Ngah mi cu ami sui khleek u ne, m'vut kaw ne khankho ah han phyang ne m'lau ci gui. 24 Cun ah kia khü tah Roman Gaakap bawi naw ak chang gui am, Paul cu zung im kyong ah luh püi u netah a i ah kia sei chang gui shin ah ami kiak ah mawng, tuthat ne ng'shi vai ah k'bäi ne täk gui ci. 25 Ani cu tukthah vai ah pin ne ami khih zah ung Paul naw a pei ah ng'düi ciah gaakap bawi ah ma ah, Roman chang pa tumat, kä ng'shica, kä m'khoicha ah, tukthah vai cu, thukhän nawn ng'bääi ne ang? ä ci ne ng'shik ci. 26 Cun ah Thu cu ng'za netah gaakap bawi naw gakap ng'vaipi ah hteit ne, A i hawkcha na bi ang? A ni cu Roman chang pa tumat ah kyak ci nei cik ci. 27 Cun kawn ah gakap ng'vaipi cu Paul ah om nak ah law ne, ä Nang cu Roman changpa maa? Nam thein ä ci khü tah, Paul naw, ä ä cik ci. 28 gakap ng'vaipi naw, Kei cu ngui akda pe netah, Roman changpa ah ka kia lawk ci nei ci khütah, Paul naw, Kei läi Roman changpa ah ka ng'tüi law ge ci nei ci ne pyein tu ba ci. 29 A cun vai-am Paul cu ng'shica m'khoicha tuk khai ah chang gui phi ng'hlat ba zawp ci gui. Paul cu Roman changpa ah akiak ah mawng la ani m'sii gui awn pin ne ami khih ah mawng cu hmat netah, gakap ng'vaipi cu ang htei ah kyikyawk ci. 30 Paul cu Judah chang gui naw a i kat nak k'bän ne ami k'sung cu, gakap ng'vaipi naw ang dang ah hmat hlük ci. Cun ah kya sei a ngawi ung Paul ami khih nak ah m'sii gui, gui cu k'phian tu ba netah, Taigü la kawngsi ng'vai gui cu ng'cut sak gui ci. Cun kawn ah Paul cu law püi ne ami ma ah ng'düih sak ci.
1 Paul naw kawngsi ng'vai gui cu kheing ne teng gui netah, Israel phäi nau gui aw, Kei cu tuk ngawi ung khüt sei, ka ghin na chuih Khanpughi ah ma ah kam lung kyong theingcim sei ka bilo om ih ci nei ci ne pyein ci. 2 Taigü tung Ananias naw a pei ah ng'düi ciah chang gui am, Paul cu am gawng ung k'beeih sak gui ci. 3 Paul naw, A bauk awn hluk ah k'pang! Nang cu Khangpughi naw ak cang ah ning m'kat khai nei. Nang naw kei cu thukhän teng ne nah na m'khoicha khai ah pawngpäi lang ne, kei ami na thah vai ah na pyein na hmawk ah thukhän cu nam shet pyi ci nei ci ne kiak nak ci. 4 A pei ah ng'düi ci naw Paul am, Nang naw Khanpughi ah Taigü khem cu na k'shedam nak ci maa? ä ci ne ng'shi u khütah, 5 Paul naw, Israel Phäi nau gui aw, ani taigü khem ah a kiak cu kei naw kä ka hmat ci nei, cacim ung, ä na kho chang uk ciah bawimang cu ak she ah kä na thu püi vaiä ci ah om ci nei ci ne kiak na gui ci. 6 Paul naw cun ah kawngsi ung amshah cu Pharisee gui, am shah cu Sadduces gui ah ami kiak cu hmat law netah, Kei cu Pharisee nei, Pharisee ah na hta nei, sih nak ung kaa thawh ba vai ah ka ngaih u ah hmawk ah, tuk bäi cet ne nami na ng'shi ah kiak ci nei ci ne kawngsi zung k'poh khai ah m'lau ne pyein ci. 7 Cun kawn ah Pharisee gui la Sadducee gui cu ami mät ng'cuhcan law u ne, hnih ah ng'pai ci gui. 8 (Sadducee gui naw, sih nak ung kaa thawh nak ba kä om ci, khankho chang phi kä om ci, mumcha phi kä om ci, cik ci gui. Cun ung phi Pharisee gui naw cun ah thum avan om ciah zum ci gui). 9 Ami ng'vookshan ah k'aw cu ng'shawng law pi k'täi khütah, Pharisee pati ung kaa thukhän saya gui cu ng'düi law u ne, Shin ah chang ung hmakat nak i kä om ci, khankho chang naw baw, mumcha naw baw ng'thu m'sak ci ah kiak khaiä ci ne ng'käükneet ne ng'cuh ci gui. 10 Ami ng'cuhcan nak cu däm law pi k'täi khütah, gakap ng'vaipi naw Paul cu ami ngawnsheh law vai ah ng'ä netah, gaakap gui am Paul cu m'htei ne zung im kyong ah ami hteh püi ba vai ah pyein ci. 11 A cun mä Khanpughi cu Paul ah ma ah ng'düi netah, Kä na kyih vai, nang cu Jerusalem ung kei ah mawng na saksi ah mäih ah Rom ung phi na saksi ba khai nei ci ne kiak nak ci. 12 A ngawi ung kho ngawi Judah chang amshah gui cu ng'cut ne ng'hmuh u netah, Paul kä mi ngawn pha ah chuih a i phi kä ei auk ah mi om khai ci ne k'bäi ci gui. 13 Cun ah ng'ge ci gui cu chang sing phli-kip vai lawk ci gui. 14 Ngahmi cu taigü khem la ang vai gui ah ma ah hteit u netah, Keimi cu Paul kä kami ngawn pha ah chuih a i phi kä kami ei aw ba khai ah kami k'bäi ci nei, ä 15 Cun ah kia sei nang la kawngsi ng'vai gui naw Paul cu ak tung ah nami ng'shica hlük ci hlawk ah, Roman gakap bawi ah nami k'thäh ba vai nei. Nangmi ah om nak ah kä ah gawk law pha ung ani cu ngawn vai ah kami na ngäng khai nei ci ne pyein ci gui. 16 Cun ung phi Paul ah be ah hta naw cun ah ami ng'ge cu ng'za netah, zung im kyong ah hteit ne Paul am m'thein ci. 17 Paul naw, gaakap ng'vai tumat cu khü netah, Shin ah chang hta gakap ng'vaipi ah hteh püi , gakap vaipi am, am'thein vai a mawng om ci nei ci ne pyein ci. 18 Cun ah kya sei gaakap bawi naw cun ah chang cu gakap vaipi ah hteh püi netah, thawng kium Paul naw shin ah chang cu nang ah ka law püi vai pyein sei ka law püi nei, ani naw nang ah ma ah a pyein vai amawng tumat om ci nei ci ne pyein ci. 19 Shekshen bawi naw cun ah chang hmaw cu akut ung k'pang ne a hei ah hteh püi netah, Kei ah ma ah a i ang na pyein vai a omä ci ne ng'shik ci. 20 Cun ah chang naw, Judah ng'vai gui naw Paul cu ak tung ah ng'shica hlük ci gui hlawk ah kia ne, ngawi ung nang naw kawngsi zung ah na hteh püi vai ah, ning k'thäh khai gui ah ng'ge ci gui nei. 21 Ngahmi ah k'thäh law cu kä na zum men vai nei. Lam ah chang sing phli-kip naw ng'thup ne mah ci gui nei. Ngahmi cu Paul kä ngawn pha ah chuih a i kä ei auk ba vai, ci ne thukhän ci gui nei. A tuk bäi ge ngahmi cu Paul ngawn vai ah pawng u neh nang bawi ah thu m'cha cu ging ci gui nei ci ne pyein ci. 22 Shekshen bawi naw, tuk bäi nah na m'thein gui cu a u am kä nam thein nem vai nei ci ne m'cäi netah cun ah chang cu tüi ba ci. 23 Shekshen bawi naw gaakap bawi hnih cu khü goi netah, Sisarea ah hteit khai gui ah, gaakap phia goi, k'se cum gaakap chih-kip, la k'htei kawt gaakap phia goi cu hneng mä nazi kaw ung ng'düi ge khai gui ah nami m'hnüt vai nei. 24 Paul hmawk ah k'se gui phi nami pawngpäi ge vai. Cun kawn ah ani cu m'htei ne Gawmang Felix ah nami hteh püi vai nei ci ne m'cäi gui ci. 25 Shekshen bawi naw ca phi gu ne pe gui ci. Cun ah ca ung; 26 äKlawdius Lisias naw Gawmang Felix ah chang m'sui nak awn ca gu lawk ci nei. 27 Judah chang gui naw shin ah chang cu pha ne ngawn khai gui pawng ci gui. Ani cu Roman changpa ah a kiak cu kei naw hmat netah, gaakap gui awn hteit ne ani cu kami k'phiawn nei. 28 Judah chang gui naw a i kat nak k'bän ne ami k'sung cu kei naw hmat hlü netah, ami kawngsi ah ka hteh püi te ci nei. 29 Ani ung sih nak vai kat nak la thawng cum nak vai ah kat nak, a pi phi a om kei naw kä ka hmuk ci. Judah chang gui naw ani cu ami mät ah thukhän nawn m'kat ne ami k'sung ah kia ci. 30 Judah chang gui naw ani ngawn khai gui ah ami pawngpäi cu hmat netah, a cun vai am nang ah ka tüih law ah kiak ci nei. Cun ah chang gui naw phi ami ng'chaak nak ami pyein hlü cu nang ah ma ah ami pyein vai ah ka k'bäi gui nei. ä ci ah om ci. 31 Gaakap gui naw gakap ng'vaipi ah pyein ah mäih ah Paul cu hteh püi u neh a cun mä Antipatris gawnu ah gawk püi ci gui. 32 A ngawi ung gaakap gui cu ng'hlat law ba u sei, k'se cum gaakap gui naw Paul cu hteh püi ci gui. 33 K'secum gaakap gui cu Sisarea ah gawk u netah gakap ng'vaipi ah ca cu Gawmang am pe u ne, Paul cun phi ap ci gui. 34 Gawmang naw ca cu phat netah, nang a i kho ah kaa angä ci ne Paul cu ng'shik ci. Ani cu Cilicia kho ah kaa ah a kiak cu hmat netah gawmang naw, 35 äNang ning chak ci gui gawk law u khü tah ka ning shik khaiä ci ne kiak nak ci. Cun kawn ah Paul cu Gawmang ah mang im kyong ah ngoh sak ne ami ngäng vai ah m'cäi gui ci.
1 Ak hnüüp hma hnüüp ung taigü tung Ananias cu ang vai gui awn, ng'Thukthei Tertullus cu khah püi ne Sisarea ah gawk law ci. Ngahmi cu Gawmang Felix ah ma ah law u ne, Paul cu kat nak k'bän ne k'chak ci gui. 2 Gawmang naw Paul cu khü ne m'düih khütah, thukthei Tertullus naw; Nang bawi Gawmang ah na bämang nak la na hmuhmat nak awn tuhgüt ung ding gei sei kami om ci nei. Kami kho ah hmawk ah ak ni pi ak thai pi ah na piantham phi bä ci nei. 3 Cun gui cu keimi naw a kho päng ung ang tüi sei zeikyai ne kami dou ci nei. 4 Kei naw a khin ak shou kä ka la hlük ci. Cun ah kia sei keimi naw ak tawi ah kami pyein cu nah na ngaih pek gui vai ah ka pyein hlük ci. 5 Shin ah chang cu k'täphlawh thei ci ah kyihkyawk vai ah chang ah kami hmuk ci nei. Ani naw khom'dek khan ung Judah chang gui thängphyong khai gui ah tüihtok gui ci nei. Ani cu Nazaret chang ah pati ung ng'vai tumat ah kiak ci nei. 6 Pum im cun phi shetkat sak khai ah k'tha nah khü tah kami pha nei. (Keimi naw ani cu thukhän awn m'khoichaa vai ah ng'za hlü u ngäh sei phi, 7 gakap ng'vaipi Lisias naw kami kut ung kaa ak gat ah ana guh ba gui nei. 8 Ani ah kat nak pyein ci gui ah chang gui cun phi nang ah ami law vai ah pyein ci nei). Nang bawi na mät naw na ng'shi ah a kiak ung keimi naw k'sung ne kami k'bän ah kat nak gui avan cu na hmat khai nei ci ne pyein ci. 9 Judah chang khli gui cun naw phi, ani ah pyein gui cu ak cang bäng bäng nei ci ne, Paul cu ng'lung nah ne k'sung ci gui. 10 Gawmang naw nüt ne Paul am pyein tu ba sak khü tah, Paul naw, Nang naw shin ah kho chang ah khan ah, khokum ak shou ung m'khoicha nak na bi law cu ka hmat ci nei. Tuk bäi ka mät ng'küikyan ne ak cang ka pyein tu ba ah phäh ah phi ka zei ci nei. 11 Kei cu Jerusalem ah Khanpughi ah ka taigü khai ah ka hteh cu hnüüp gha-lei-goi vah law phak ci. Cun cu na mät naw na ng'shi gui ung phi na hmat khai nei. 12 Taigü im ung phi bä, pum im gui ungphi bäi, pigaw kyong ah phi bäi, chang gui Thängpyong khai gui ah kei naw ka tüih tok cu Judah chang gui naw kä hmuh man khai gui nei. 13 Tuk bäi kei ami na k'sung nak cu ngahmi naw saksi kä m'dang hlawt khai gui nei. 14 Cun ung phi ngahmi naw kä ng'düng ciah ami pyein ah lam ung pupa gui ah Khanpughi cu ka taigü ci. Mose ah thukhän avan la prophet gui ah cacim avan cun phi ka zum ci. 15 Kei cu Khanpughi ka zum ci kia ne, chang k'ni, chang she, chang avan cu, sih nak kung kaa tho ba khai ah ka ngaih u ci. A cun ah mäih ah ngahmi naw phi zum ne ngaih u ci gui. 16 Cun ah kia sei kei cu Khanpughi ah ma, chang ah ma ah, kam lung kyong theing cim khai ah ang tüi sei ka k'tha nak ci. 17 Kei cu Jerusalem ung kaa naw ka hteh nak khokum akda shou law khütah, ka mät ah chang gui am ngui ka thak gui khai la, Khanpughi am peittaak nak ka bik khai ah, ka gawk law ba ci. 18 Taigü im kyong ah kei cu theingcim nak ka bi kawn ah, peit taak nak ka bi law zah ung, ngahmi naw kei cu na hmuk ci gui. Cun zah ung chang a u kä om ci, thängpyong pamcai nak phi i kä om ci. 19 Cun ung phi cun sang ung, Asia kho ah kaa lawk ciah Judah chang am shan gui om ci gui. Kei am k'sung vai kat nak om ci a kiak ung shin ung ami mät law u ne, 20 kei ah kat nak cu nang bawi ah ma ah m'dang ne pyein khin ci gui te. 21 Kä cun ung phi kei naw kawngsi ah m'hlan ne ka pyein tuba zah ung, Kei naw sik ciah chang gui tho ba khai ciah ka ngaih u ah hmawk ah tuk ngawi nami na cet ah kiak ci nei ci ne m'lau ne ka pyein ah kawn ah a hei ka hma nak a om ah ngahmi naw tuk bäi pyein u sä ci ne pyein ci. 22 Felix cu a mawng a ma hmat ciah chang ah kia ne, ang shica nak gui cu ng'däm sak gui netah, gakap ng'vaipi Lisias gawk law khütah ning m'khoicha peit gui vai nei ci ne kiak na gui ci. 23 Paul cu ngäng ne m'htei sak gui ne, a paw chang gui naw ami teng m'kein m'hteihtang vai phi zum ne m'cäi gui ci. 24 Kho hnüüp a pi shou law khütah Felix cu ak chu Drusilla awn atäng ah lawk ci goi. Drusilla cu Judah hnumi ah kiak ci. Felix naw Paul cu khü sak gui netah, Bawi Jesuh Khrit zum nak ah mawng a pyein gui cu ngai ng'zak ci. 25 Cun ung phi Paul naw, ni kiom nak ah mawng, htingling vuihgiip nak ah mawng, la gawk law khai ah m'khoichaa nak ah mawng gui cu, tän ne pyein khütah, Felix cu kyikyawk law netah, Tuk bäi na hteit ba hning ci, cän kawn ah a khin a om nak ung ka ning khü law ba khaiä ci ne kiak nak ci. 26 Cun kawn ah phi Felix cu Paul naw ak phiawn vai ah ngui pek khai ah ngai natah a shängshäng khü ne ng'thu püi ci ci. 27 Cun kawn ah khokum goi lüng khü tah, Felix ah hnün ung Porcius Festus cu Gawmang ah kia lawk ci. Felix cu Judah chang gui naw ami chang m'sui vai ng'za hlü netah, Paul cu thawng ung chum lä shüt ci.
1 Festus cu cun ah kho ah a gawk law nak hnüüp thum lüng khütah, Sisarea ah kaa Jerusalem ah hteit ci. 2 Taigü khem gui la Judah chang ang'vaih gui cu, kat nak a hlühlü Paul naw a bi ah pyein neh. Festus ah ma ah chak ci gui. 3 Ngahmi cu Paul ami law püi ung lam ah mah ne ngawn vai ah pawng pyi ci gui ah kia ne, Ngahmi am hlän nak gui ah Paul cu Jerusalem ah a hteh püi ba sak gui vai ah k'thäh ci gui. 4 Festus naw, Paul cu Sisarea ah thawng ung chum ne ngäng ci gui. Kei ka mät kä shou pha sei a cu ah ka hteit lawk khai. 5 Nami ng'vaihta gui cu kei awn atäng ah hteit tu u ne, Paul ung a kat nak a om ah a kiak ung tän ne pyein ne kei ah chah u sä ci ne kiak na gui ci. 6 Festus cu Jerusalem ah hnüüp cheit, kaw, ghaa om ba netah Sisarea ah hteit ci. A ngawi ung thu m'cha nak mang kyang ung ngoh netah Paul cu khü sak gui ci. 7 Paul gawk law khü tah Jerusalem ah kaa lawk ciah Judah chang gui naw, ani cu k'bui u netah, thuuk ne shah ciah kat nak gui k'bän ne k'sung ci gui, cun ung phi a cun ah mawng saksi küm dang hlawt ci gui. 8 Paul naw, Kei naw, Judah chang gui ah thukhän ah khan ah phi bäi, Pum im ah khan ah phi bäi, ghangpughang ah khan ah phi bäi, ka shetkat nak tumat hta phi kä om ci, ä ci ne m'hlan tu ba gui ci. 9 Festus cu Judah chang gui ah chang m'sui nak ng'za hlü netah, Nang cu Jerusalem ah ning hteh püi netah kei naw ka ning ng'shi vai na zum khai ang? ä ci ne Paul cu ng'shik ci. 10 Paul naw, Kei cu m'khoichaa vai ah ghangpughang ah mang kiang ung ka ng'düi pyi ci. Nang naw na hmat pyi ah mäih ah Judah chang gui ah khan ah kei naw ka kat nak i kä om ci. 11 Ak cangah thukhän khep ne, sih nak vai khin ciah kat nak ka bi ah a kiak ung, nami nam gein vai ah kä ka ng'yoi khai nei. Cun ung phi ngahmi ah nak sung nak cu kä ak cang ah a kiak läi ung a u naw phi kei cu ngah mi ah kut ung kä na ap hlawt khai nei. Kei cu ghangpughang ah ka ng'coipaa ci nei ci ne pyein ci. 12 Festus cu ak chang vai gui awn ng'ge ba u netah, Nang cu ghangpughang ah na ng'paa ci kia sei, ghangpughang ah na hteit khaiä ci ne kiak nak ci. 13 Cun kawn ah shou hta khü tah Akrippa ghangpughang la ak chu Bernice cu gawmang Festus hmuh ne dou khai goi ah Sisarea ah gawk law ci goi. 14 Ngahmi ak shou ani om tu kawn ah Festus naw, Ghangpughang am Paul ah mawng cu m'thein tuk ci. Festus naw, Shin ung Felix naw thawng ung a chum shüt ah chang tumat om ci. 15 Kei Jerusalem ah ka hteh zah ung, taigü khem gui la Judah chang vai gui naw, shin ah chang cu shetkat nak k'sung u ne, kei naw kam kat vai ah k'thäh ci gui. 16 Kei naw, ami chak ah chang tumat cu, chak ci gui ah chang gui awn mik hmai ng'chum sei kä ng'hmu sak ah, ngahmi ah chak nak ah mawng cu am hlan nak tu ba gui vai ah, a khin kä peit ah, k'sung ne m'kat cu, Roman thung ah kä kiak ci, ci ne kam thein gui ci. 17 Cun ung phi ngah mi cu a shi ah gawk law u sei, kei naw ak zä ah a ngawi ung ge, zung ah ngoh ne, cun ah chang cu ka khü sak gui ci. 18 Chak ci gui naw, ng'düi law ne, ani cu m'kat ne ami k'sung ung phi kei ah ngaih ah kat nak awn ah kä kiak ci. 19 Ngahmi ah ng'cuh nak cu, ami mät ah zum nak ah mawng la Jesuh ming nak ciah chang ah mawng bäng ah kiak ci. Cun ah Jesuh cu si pyi te ci, cung phi Paul naw ghing ne om ci nei cik ci. 20 Kei naw cun ah mawng gui cu kä pyein m'khüt netah Paul am, Nang cu Jerusalem ah hteit ne, shin ah ami ning k'sung ah mawng cu, ning shi vai ah na zum ci ang? ä ci ne ng'shi ngä sei; 21 Cun ung phi Paul naw nang ghangpughang ah m'khoichaa bäbä ng'za hlük ciah pyein ci. Ani na thawng ung om lä netah ghangpughang ah thu m'chaa bä ng'za hlük ciah pyein sei, ani cu nang ghangpughang ah ap law nak ah a khin ung khüt khai ah ami chum vai ah ka pyein nei ci ne m'thein tuk ci. 22 Akrippa Ghangpughang naw, Cun ah chang ah ng'thu cu ka mät naw ka ng'za tu hlük ci nei ci khü tah, Festus naw, A cun ah chang ah thu cu ngawi ung na ngai ng'zak khai nei ci ne pyein ci. 23 A ngawi ung Ghangpughang Akrippa la ak chu Bernice cu, ang htei ah ng'hning kyau khai ah ng'pyang tham ne, gaakap bawi gui la gawnu ung ang vaihta gui awn atäng ah, gawnu im ng'ki kyong ah lut law ci. Cun zah ung Festus ah pyein ah Paul cu luh püi ci gui. 24 Cun kawn ah Festus naw, Akrippa ghangpughang la shin ung gawk lawk ciah chang ng'vai gui aw, Jerusalem la shin ah gawnu ung om ciah Judah chang gui van naw, Shin ah chang cu kä m'ghin vai nei ci neh kei ah k'thäh lawk ci gui. Cun ah ami chaak cu shin ah chang nei. 25 Ani naw sih nak khin vai ah kat nak a bi tumat phi kei naw kä ka hmuk ci nei. Cun ung phi a mät naw ghangpughang ah ka ng'coi ng'paa khai ci sei, nang ghangpughang ah law püi vai ah ka k'bäi ah kiak ci nei. 26 Nang ghangpughang ah ma ah ani ah mawng cu, kei naw a khenggeng ah ka pyein vai i kä om ci nei. Cun ah kia sei ani cu nami ma ah ka law püi ah kiak ci nei. Nang ghangpughang ah ma ah ak tung ah ka ning ap lawk ci nei. Shin ah ka law püi cu, nang ghangpughang naw ng'shi ci tah kei naw ca ka guk vai mawng ang dang vai ah hmawk ah kiak ci nei. 27 A mawng ama a i kä m'dang ah thawng kium tumat chah ba vai cu, lam kä ng'shung khai ah ka ngai ci nei ci ne pyein ci.
1 Akrippa naw Paul am, na mät ah hmawk ah thu na pyein hning ciü ci ne kiak na khü tah; Paul naw a kut k'phyaat ne nüt ne, 2 Akrippa ghangpughang! Kei ah khan ah Judah chang gui naw, kat ami na k'sung nak ah mawng cu, nangah ma ah m'hlan ne ka pyein nak tu ba vai ah a khin ka gah cu ang htei ah bä aih ciah ka ngai ci nei. 3 Nang naw Judah chang gui ah thung man la ami ng'cuhcan gui man cu na hmat pyi ci. Cun ah kia sei kei ah thu pyein tu ba cu hnimgei nak awn nah na ngaih pet vai ah ka ng'za hlük ci nei. 4 äKei ka hmaw sang ung tän ne, ka ng'tüi law nak ah kho ung phi bäi, Jerusalem gawnu ung phi bäi, a i hawkcha ka om ih man cu Judah chang gui avan naw hmat ci gui nei. 5 Ngahmi naw kei ami na hmat cu shou lawk ci nei. Kei cu Judah gui ah zum nak aküikyang pi k'bäih ah thukhän mah ciah pati ung Pharisee tumat ah ka kiak cu, ami saksi hlü ung saksi hning ci gui nei. 6 Khanpughi naw kami pupa gui ah ma ah a shai taak cu ka ngaih u ah phäh ah tuk bäi shin ung ng'cet nak ka aut ah kiak ci. 7 Cun ah shaitaak cu Judah pakhui gha-lei-goi naw, amä ak hnüüp Khanpughi ah taigü ne, ami ngaih u ah kiak ci. Ka ghangpughang! A cun ah kei naw ngaih u ne ka om ah hmawk ah Judah chang gui naw kat ami na k'sung ah kia ci nei. 8 Shin ung gawk law ciah chang gui! Khanpughi naw sik ci a thawh ba sak cu, kä zum vai kiak ciü ci ne a i ah kia sei nami pyein ang? 9 Kei ka mät naw phi Nazaret chang Jesuh ah ming awn hnu ng'tuk khai ah bi bi vai ka zum man ci. 10 Jerusalem ung kei naw ka bi gui cu; Kei cu Taigü khem gui ah huham gah netah, Khanpughi ah chang gui cu pha ne thawng ung ka chum gui ci; ngahmi ngawn gui vai ah ami k'bäi law ung phi zum ne ka k'cang na gui ci. 11 Pum im gui ung phi kei naw akda vei ngahmi cu m'sheitkat gui ne, ami zum nak ami nawng vai ah ka k'tha na man ci. Kei cu ngahmi ah khan ah m'lung k'she aih netah, a kho hei gawnu gui zungpum ah hteit ne ngahmi cu ka k'dudeiu na gui ci. 12 äA cun ah ng'bä nak awn kei cu Taigü khem ah huham nak ca la netah Damaskas ah ka hteit ci. 13 Cun ah kami hteh zah, kho hnüüp lunglai ung, hni ah dei pi ciah ak dei cu, khankho ah kaa kia law ne, veing ne na shä law sei ka hmuk ci, kami ng'gui ci gui naw phi hmu tuk ci gui. 14 A cun vai am kami van kiu ne m'dek ung kami ng'zän ci. Cun kawn ah Hebru ng'thu awn, Soul, Soul! A i ah kia sei kei nah na k'dudeiu nak ang? Vantang naw a mah ah thah htung ak peh ah mäih ah, nang naw htung m'shum cu nak peh ung na mät ung nak khai nei. ä ciah k'aw cu ka ng'za ci. 15 Kei naw, Bawipa nang a u nei ci ne ng'shi ngä tah, Bawipa naw, Kei cu nang naw na k'dueiu nak ah Jesuh nei, 16 Nang cu kei ah bi na bik khai, ka ning m'düih khai ah, tuk bäi ka lawk ci. Tuk ngawi na hmuh gui ah a mawng ama gui la, ngawi ah ka ning m'hnuh law vai ah amawng ama gui cu, nang naw chang hei gui ah ma ah saksi ne na pyein khai. 17 Kei naw nang cu Israel chang gui ah kut ung phi bäi, kei naw ning tüi ngäh sei na hteh nak ah chang pakhui hei gui ah kut ung phi bäi, ka ning hun khai. 18 Nang naw chang pakhui hei gui ah mik nam dei sak gui khai, ak hmüp ung kaa naw ak dei ah na ng'lat sak gui khai, khogam ah hlüng tai nak ung kaa naw Khanpughi ah hlüngtai nak ung na gawk sak gui khai. Cun ah kia sei ngahmi cu kei ami na zum nak awn, ami kat nak phyawn nak gah ah u ne, Khanpughi ah ghü ah chang gui ah ng'lung ah ami hmun kho gah tuk khai gui. 19 äAkrippa Ghangpughangmang! Kei naw khankho ah kaa ka hmuh cu kä pyein ah kä ka hlawt ci nei. 20 Damaskas ung tän ne, Jerusalem, Judea kho avan ung la chang pakhui hei gui am, ami kat nak ung ng'zu ba ne, Khanpughi ah ami ng'hlah law ba vai la ng'zu pyi ciah chang ah mäih ah ami om ih gui vai cu, m'thein gui ne, ng'thu ka pyein ci nei. 21 A cun ah hmawk ah Judah chang gui naw kei cu taigü im kyong ah na pha u ne, na ngawn hlük ci gui. 22 Cun ung phi tuk ngawi ung khüt khai ah Khanpughi naw nam htei sei, ak pyam, ang mang, chang khli ah ma ah, ka saksi ci nei. Mose la prophet gui ah ng'thu pyein ah mäih bä bä ah; 23 Messiah cu sih nak a aut kawn ah, sih nak ung kaa tho ba htük ne, Israel chang gui la chang pakhui hei gui am, hun nak ah ak dei ah mawng cu shäu ne m'thein gui khai nei ci ne m'hlan ne pyein tu ba ci. 24 Paul naw cun ah thu a pyein zah ung, Festus naw, Paul aw, nang na gu pyi ci nei, na mät ah hmuhmat nak naw ning gu sak pyi ci nei ci ne m'lau ne pyein ci. 25 Paul naw, Ghanpughang aw, kei ak gu ah kä ka kiak ci nei, ak cang cu ngaih na ne ka pyein nei. 26 Ghangpughang mang aw, nang naw shin ah a mawng cu na hmat pyi ci kia sei, na ma ah shicha ka pyein hning ah kiak ci nei. Shin ah a mawng gui cu ang thuh nak ung dang ciah kä kiak ci, nang ghangpughang naw phi avan na hmat pyi ciah ka ngai ci nei. 27 Ghangpughang aw, prophet cacim gui cu na zum ci ang? Na zum ciah kei naw ka hmat ci nei ci ne pyein ci. 28 Akrippa naw Paul am, Nang naw kei cu, a shäng hta ung khritha ah na na kiak sak khai ah na ngai ci maa? ä ci ne kiak nak ci. 29 Paul naw, ashäng hta la ak shou nu cu ak tung ah kä kiak ci, nang ghangpughang la tuk bäi ka ng'thu ngai ng'za tuk ciah chang avan cu, shin ah khihpawn nak ung kaa phiawng ne, kei ah mäih ah nami kiak law tu vai ah, Khanpughi ah kak taigü ci nei ci ne pyein ci. 30 Cun ah kia khü tah, ghangpughang la ak chu Bernice ni, Gawmang ni, ami chang gui ni ami van cu ng'düi law ba ci gui. 31 Cun ah ng'düi law ne ami hteh ba kawn ah, shin ah chang cu sih nak kä cun ung thawng kium nak khin vai ah kat nak abi kä om ciü ci ne ami mät ng'htau ci gui. 32 Akrippa naw Festus am, Shin ah chang cu ghanpughang ah ng'paa nak kä a bi vai sä ung k'phiawn hning te nei ci ne pyein ci.
1 Keimi cu Itali kho ah na hteh püi gui khai gui ah k'bäi u netah, Paul la thawng kium gui ami van cu, Festus naw Ghangpughang ah shekshenä a mi ciah Roman shekshen ung gaakap bawi Julius ah kut ung ap gui ci. 2 Keimi cu Asia kho tuinu kem, pigaw päng ung hteit khai ah, Adrammittium ah kaa lawk ciah htinpaw ung kai tuk u ne, k'täi ne kami hteit ci. Thessalonika ah kaa Macedonia chang, Aristarkas cun phi keimi awn kami ng'gui ci. 3 A ngawi ung keimi cu Sidon ah kami gawk ci. A cu ah Julius naw Paul cu m'gein netah a teihpüi gui awn hmuh sak gui ci. Ngahmi am phi khin chah na sak gui ci. 4 Cun ung kaa kami hteh kawn ah kho khi aih khütah khohki ah ng'hlawi nak Saiprus ah kami hteit ci. 5 Cun ung kaa naw Cillicia la Pamphilia tuinu ung hteit u ne, Licia kho Maria ah kami gawk ci. 6 A cu ah Alexandria ah kaa law ne Itali ah hteit khai ah htinpaw ung ang vai naw na kai tu sak gui sei kami kai tuk ci. 7 Keimi cu kho hnüüp akshou hteit kyäp kyäp unetah, Kanidus pigaw pei ah zai ngai ngai ne kami gawk ci. Khokhi kä ng'hlawi sei, khokhi ah ng'shung nak Krete tuikoi lam ah hteit u ne, Salmone m'zum cu kami sun pah ci. 8 Tuikem awn ng'et pipi khai ah htinpaw awn hteit u ne, khak ngai ngai sei Lasea pigaw pei, Safe kho ng'phäng ami ci nak ung kami gawk ci. 9 Keimi cu cun ung kho hnüüp akda om tu u ngähtah ei hlawi nak ah pawi hnüüp phi ng'phlän pyi ci. Cun ah kya sei tuinu ung hteh vai cu ng'ä ai vai kia lawk ci. Cun ah kya khütah Paul naw, 10 äAng vai gui aw, tuk bäi chü tuinu ung htinpaw awn mi hteh ah a kiak ung khawhcham bäng ah kä kyak ciah chang phi mi si hning ciah kei naw ka hmuk ci nei ci ne m'thein gui ci. 11 Cun ung phi gaakap bawi naw Paul ah thu cu kä zum ne, kaptain la htinpaw kaa nak ciah pyein cu zum ci. 12 Cun ah pigaw tuikam ung kho hting kho ah htinpaw ang däm nak vai kä ni khähtah, chang akda naw Phoenik tuikam ung ang däm vai ah zum ci gui. Phoenik gawnu tuikam cu, Krete kho ung om ne hni kiaak htumsiip lam ah hmai nak khai ah ami sak ah pigaw ah kiak ci. 13 Htum lam ah kaa kho khi law khü tah, htinpaw ung chang gui cu ami ngaih bä ah kia lawk ciah ngai u ne, htinpaw awn Krete tui kam zawi gäk gäk ne hteit ci gui. 14 Cun ung phi kä shou pha sei hni law siip khokhi ah ami pyein ah khokhi cu ng'gäät ne khi lawk ci. 15 Htinpaw naw kho akhni law nak ma-pam ne kä m'khüt law ba khü tah keimi cu kami k'tha maih sei, kho ah khi nak lam ah kami ng'nawng tuk ci. 16 Kauda tuikoi ah htum lam ah kami gawk law zah ung api kami ng'shung nak vai om khütah htinpaw ah hnu ah phyawn nak vai hleikaw hta cu kä di khai ah kami k'tha nak ci. 17 Htinpaw ung bik ci gui ah chang gui naw hleikaw cu zu kaih u netah htinpaw ah pum ung khäng khai ah pawng ci gui. Ngahmi naw htinpaw cu Libya tuiken laigim hmu ah ang tang vai kyi u netah, htinpaw zih hmai cu api ah m'hlat ba u ne, kho ah khi nak ah ng'nawng sak ci gui. 18 A ngawi ung cun phi puikho khi ne ng'pheet laih laih khütah htinpaw ung bi ci gui ah ah chang gui naw htinpaw khan ah khawhcham gui cu, kaw ne ak pung ah ghawt zawp ci gui. 19 A ngawi ung mä htinpaw ung ami pyamtham nak ba ah khawhcham gui cu la ne ghawt zawp ci gui. 20 Keimi cu kho hnüüp ak shou hni chaa, aisi kä kami hmu ba ci, kho phi ak tä ah khi laih laih ci. Ak hnu ah keimi cu kä ghin pyi ah ngai ne kami thagui maih zawp ci. 21 Chang gui cu a i kä ei auk ah kho hnüüp ak shou om law zai u khütah, Paul naw ami ng'lung ah ng'düi netah, ä Ang vai gui aw, nangmi naw kei ah thu cu ngai uk ci sei, Krete ung kaa kä hteit ne mi om vai sä ung, tuk bäi kümi di maih khai sä te. 22 Cun ung phi kä nami ng'ä ai vai, nangmi ung kaa tumat phi kä di maih khai, htinpaw bäng vah di maih khai. 23 Kei ah ka Bawi, kei naw ka taigü ah Khanpughi ah khankho chang cu, zanmä kei ah law netah, 24 äPaul kä na kyih vai, Nang cu ghangpughang ah ma ah na gawk khai. Khanpughi naw nang cu a ning m'hni nak awn, atäng ah htinpaw ng'cum tuk ci gui ah chang gui cu sih nak ung kaa k'phiawn gui khai nei. ä ci ne pyein ci. 25 Cun ah kia sei kä nami kyih kyawk vai, kei cu Khanpughi ka zum ci, cun ah kia sei, kei ah ma ah khankho chang naw a pyein ah mäih ah kia lawk khai, ciah ka zum ci nei. 26 Cun ung phi mik mi cu tui koi kho kawng tumat ung mi ng'däm khai nei ci ne pyein ci. 27 Ak hnüüp gha-lei-phli nak kho mä ah, keimi cu, khokhi ne ang pheet nak Meditteranean tuinu ng'lung ah kami om ci. Kho cawih ding ah htinpaw ung bik ci gui ah chang naw kho kawng ng'et lawk ciah hmat ci gui. 28 Ngahmi naw tui ah thuuk cu nüt u netah dawng cheit-kip law sei hmuk ci gui, Cun kawn ah a pi vang nawn ba ne nüt ba u netah dawng ko-kip law sei hmu ba ci gui. 29 Ngahmi cu lung mawk vai ah kyi u ne, htinpaw ama lam ah lung shung nak phli cu zuk chah u netah, khaw thai law hlah sä ci ne, taigü ci gui. 30 htinpaw ung bi bik ci gui ah chang gui cu htinpaw ah ma lam ah ng'shung nak vai piang ci gui ah ng'shei u netah, phiawn nak ah hleiko ung dawng khai gui ah ami pawng zah ung; 31 Paul naw gaakap bawi la gaakap gui am, htinpaw ung bi bik ci gui kä ami om ba ung, nangmi nami mät phi nami ghin vai ah ngaih u nak kä om ba khaiä ci ne kiak na gui ci 32 Cun kawn ah gaakap gui naw phiawn nak ah hleiko ami khih nak ah gui cu tupit ne hleiko cu kaa ah zuk chak ci gui. 33 Kho thai law hlü khütah Paul naw, ei ami ei auk vai ah m'cäi gui ne, A i ah kiak vai ni mä ci ne ngai ne nami om nak hnüüp gha-lei-phli law lawk ci, cun zah pum ung nangmi a i kä nami ei auk cik, 34 Nangmi nami ghin vai ah hmawk ah ei nami ei vai ah ka ning m'cäi gui ci. Nang mi ung chang tumat ah lu ung kaa, lumu ng'ma ät phi kä di maih khai nei. 35 Cun kawn ah Paul naw m'htut cu la ne, ami van ah ma ah Khanpughi m'hlüngtai ne taigü netah, m'htut cu k'bo ne ei ci. 36 Cun kawn ah ami van k'thamah law ba u netah atäng ah ng'ei ng'auk ci gui. 37 htinpaw khan ah chang a van cu phya goi la chih-kip-lei chuk lawk ci. 38 Avan phä vai ah kami 'ei auk kawn ah, htinpaw a zaang vai ah hmawk ah k'htang ip gui cu tui ung shum ci gui. 39 Kho thai law khütah htinpaw ung bi bik ci gui ah chang gui cu, a haw a i zah ah gawk ah kä ami hmat ung phi, tui ng'khep khokawng tumat hmuh u netah, a cun ung htinpaw ng'däm ne vah kai vai ah k'tha nak ci gui. 40 Ngahmi naw lung ami m'kaih nak ah gui, gui cu aat pit u ne lung gui cu tui ung zuk chak ci gui. A cun zah ung a mawng vang ah ami khih nak ah gui, gui cun phi k'phian ci gui. Cun kawn ah htinpaw ma lam ah zihdung cu tai ba u ne, tui kam lam ah m'hnawng ci gui. 41 Cun ung phi htinpaw cu tui ah ken nak ah gawk ne ng'tang ci. Htinpaw ma lam cu ng'säh sei, kä k'hnün ba hlawt ci a hnu lam läi tui ng'lum gui naw that sei ana a di väk ci. 42 Cun zah ung gaakap gui naw thawng cum gui tui ng'väk ne ami dawng vai ah kyih u netah, kaap ne ngawn gui vai ah k'bäi ci gui. 43 Cun ung phi gaakap bawi naw Paul cu k'phiawn hlü netah, gaakap gui naw ami k'bäi ah mäih ah kä ami bi vai ah maa na gui netah, tui ng'väk thei ci gui cu, htinpaw ung kaa ng'phäi sak gui ne, kawng ah vah kai sak gui maa ci. 44 Cun kawn ah k'pawih ba ci gui cu, k'peei phe gui ung la, htinpaw kak ciah ak pi gui ung ng'cum ne ami vah kai vai ah m'cäi gui ci. A cu cha ah kei mi cu ka mi van phiawng u ne, kawng ah kami gawk ba ci.
1 Keimi cu cun ah phiawng ne kaung ah kami gawk awn ah cun ah kho kaung cu Malta ming nak ciah kami hmat lawk ci. 2 A cun ung om ciah chang gui naw keimi cu ang htei ah nam gein gui ci gui. Kho aa ne kho m'zu law khü tah, mei cik ne nam awm gui u ne, na khin nah gui ci gui. 3 Paul naw sing pawk ät cu la ne mei ung m'sui ci, Sing cu ui law khütah, sing pawk kyong ah kaa phyuu tumat lut law ne, Paul ah kut ung htui ne ng'bah nak ci. 4 Cun ah htui ne ang bah nak cu, cun ung om ciah chang gui naw hmu u netah, Shin ah chang cu chang ngawn ciah kiak khai, tuinu ung kä si ne a phiawn ung phi, ng'düng nak naw ani kä ghin sak ciü ci ne ami mät ng'htau ci gui. 5 Cun ung phi Paul naw phyuu cu k'thäng ne mei ung k'htawp ne, a i phi kä m'neh ne om ci. 6 Ngahmi naw Paul cu apumsa ng'phling law sei, kiu ne si lawk khai ah ngai ne teng ci gui. A cun ah ak shou ngäng ne teng u sei phi, Paul cu a i ah phi kä kia law khütah, ngahmi cu ami m'lung thawng sei, Shin ah chang cu ng'zou nu kya ci nei ci ne kyak ci gui. 7 A cun na pei et ah ami ng'vaipi Publius ah akaa, lai gui om ci. Ani naw keimi gui cu na dou gui ne, hnüüp thum ung na khin nah gui ci. 8 Publius ah a pa cu a pawi na sei gaw ne ng'zän ci. Paul cu ani ah im kyong ah lut ne taigü ci. Cun kawn ah ani ah khan ah a kut taih ne gai ba sak ci. 9 Cun kawn ah cun ah tui koi kawng ung kaa gawpai ciah chang gui cu Paul ah lawk ci gui. Paul naw ngahmi cu gai sak gui ci. 10 Ngahmi naw keimi am khawh akda na m'cäm'hnah gui ci gui. Keimi kami hteh law ba vai ung phi kami sho ei vai cu htinpaw khan ah na thak law gui ne nam sho gui ci gui. 11 Chaa thum lüng khütah keimi cu, cun ah tuikoi ung däm te ciah htinpaw awn kami hteit law ba ci. Cun cu Alexandria ah kaa lawk ciah, Hnamnu ng'phiä ming nak ciah htinpaw ah kia ci. 12 Keimi cu Sirakua gawnu ah ng'däm u neh hnüüp thum kami om pah ci. 13 Cun ung kaa naw hteit ba u ne, Rhekium gawnu ah kami gawk ci. Cun ung kaa naw khokhi ni sei hteit ba u ne, hnüüp goi lüng khütah Puteoli pigaw ah kami gawk ci. 14 Cun ah pigaw ah zum ciah chang gui awn ng'hmuh u ne, kho hnüüp chih kami om vai pyein ne na chou gui u sei, om tu u netah, Romah ah k'tüih ne kami hteit ci. 15 Romah om ciah zum ciah chang gui naw kami gawk cu ng'za u netah, Appius Market ah phi bäi, kami kai nak im tung thum ah khüt law ne phi bäi, na dou law gui ci gui. Ngahmi cu Paul naw hmu gui netah, Khanpughi m'hlüng m'tai ne k'tha mah law ba ci. 16 Romah kami gawk awn ah Paul cu, amät bäng, gaakap tumat naw angäng tu hnga vai ah a khin gah ci. 17 Hnüüp thum lüng khü tah Paul naw cun ah gawnu ung om ciah Judah chang ng'vai gui khü gui ci. Ngahmi cu law ne ng'cut law u khütah, Paul naw, Israel chang phäi nau gui aw, kei naw mi mät ah pakhui ah khan ah phi bäi, mi pupa gui ah thung man gui ah khan ah phi bäi, m'shetkat ne a i phi ka bi lawh kä om lang sei, kei cu Jerusalem ah Jew chang gui naw na pha u netah, Rom chang gui ah kut ung na ap ci gui nei. 18 Ngahmi naw kei cu na cet u ne, kei ah bi nak ung sih nak khin vai ah mawng a i kä hmu u netah na phiawn hlük ci gui. 19 Cun ung phi Judah chang gui naw ke khenggeng u sei, kä ng'nüng law netah ghanpughang ah ka ng'paa ah kiak ci. Cun cu mi mät pakhui chang gui ka hnu ng'tuk püi hlü su ah kä kyak ci. 20 Cun ah kia sei nangmi awn ng'hmuh vai ah ka k'tha nak ah kia ci. Kei shin ah m'si gui, gui awn ami na khih cu, Israel chang gui naw, mi ngäng ah Bawipa ah hmawk ah kiak ciü ci ne pyein ci. 21 Ngahmi naw, Keimi naw nang ah mawng, ca tumat phi Judea kho ah kaa kä ka mi gah man ci. Mik mi Judah chang, tumat naw phi law ne, nang ah mawng kä ak ni ah kä pyein man ci. 22 Cun ung phi chang akda naw, a hawi hawi baw, nang ah pati ah mawng cu hnu ng'tuk püi ne ng'thu ci gui nei. Cun ah kia sei nang ah pati ah mawng cu keimi naw phi kami ng'za tu hlük ci nei. ä cik ci gui. 23 Cun ah kia sei ngahmi cu Paul awn hnüüp ng'nüt u netah, ami ng'nüt nak ah hnüüp ung chang akda Paul ah om nak ah gawk law ci gui. Paul naw kho ngawi ah tän ne, mä hun nah khüt khai ah khanpughi ah uk nak ah mawng Thu Ni cu m'thein gui ci. Bawipa Jesuh ah a mawng cun phi, Mose ah thukhän la prophet gui ah cacim gui awn küm khai ah, ngahmi naw ami zum tu vai ah k'tha nah ne m'thein tu gui ci. 24 Chang am shah gui naw Paul ah thu pyein cu bä ci ci ne zum tu u sei phi, am shah gui naw kä zum tuk ci gui. 25 Paul naw shin ah a mawng tumat cu pyein khü tah, ami mät gui ng'cuh ng'can u ne, ng'düi law ne hteit ba ci gui. Paul naw, Mumcha Theing naw, prophet Isaiah ung, nami pupa gui am, am dang cu ni bä bä ci nei! 26 Cun ah am dang cu; Nang cu Judah chang gui ah ma ah hteit netah, Nangmi naw ngai ne, ngai ne, phi kä nami hmat khai; Teng ne, teng ne phi kä nami hmuk khaiä ci ne kiak nak gui vai. 27 A i ah kia sei ci ung, shin ah chang gui ah m'lung cu aang ci, ami k'hnga cu pang ci, ami mik cu m'shing ci. Cun ah kä kia ne, akcang ah; 28 Paul naw a khääp nak ah, Cun ah kia sei hun phiawn nak ah mawng Khanpughi ah Thu Ni, chang pakhui hei gui ah ma ah pyein khai ah chang cu tüih pyi ah kia sei, ngahmi naw ngai zak khai guiä ci cu nami hmat vai nei ci ne m'thein gui ci. 29 (Cun ah Paul naw ng'thu a pyein kawn ah Judah chang gui cu ami mät naw ng'cuh ng'can u ne hteit ba ci gui. ) 30 Paul cu cun ah gawnu ah ang vah ah im ung khokum goi ung om ci, ani ah om law tuk ciah chang gui cu ana dou gui ne, ak ni ah khin chah na gui ci. 31 Ani naw Khanppughi ah uknak kho amawng thu phi pyein ne, Bawipa Jesuh Khrit ah mawng phi abü ang ngaih ah thamah nak awn m'theithang gui ci.
1 Khanpughi naw Thu Ni shau khai ah ghu ne am'duih, Jesuh Khrit ah chang sham, kei Paul naw ca ka gu lawk ci. 2 Cau pui ge ung Khanpughi naw, Thu Ni cu a purofet gui ung pek khai ah a shaitaak cu Cacim Theing ung om ci. 3 Cun cu Khanpughi ah Htapa, mi Bawipa Jesuh Khrit ah mawng ah kya ci; Ani cu ak hnicim chang nak ah David ah ng'shon ung ng'tui lawk ci; 4 Ak khan chang theing nak ah, Khanpughi ah Htapa ah a kiak cu ang dang vai ah Khanpughi naw abamang hlungtai nak awn sih nak ung kaa thawh ba sak ci. 5 Khanpughi naw ani ung ang duihpui ah kyak nak vai ah akhin k'ni cu na pe ne, kho avan ung, chang avan naw Khanpughi cu zum ne ami lak vai ah kei cu m'duih ne na tui ci. 6 Rom gawnu ung nami om ciah nang mi cun phi Jesuh Khrit ah chang gui ah Khanpughi naw a ning khu gui pyi ah ka sei, cun ah chang gui ah k'um ah nami kia pyi ci. 7 Cun ah kia sei Khanpughi naw ning m'hni gui ne aning khu gui pyi ah Rom Khrithabum am shin ah ca cu ka ning guk law gui nei. Mi Pa Khanpughi la Bawipa Jesuh Khrit naw m'geinsei nak la dimdeeih nak cu ning pe gui sa. 8 Khomdek khan avan ung nang mi ah zum nak ng'za pyi ci gui ah kia sei, ak htuk baih ah Zesuh Khrit ah ming ung Khanpughi cu kam hlungtai ci. 9 Ahtapa ah mawng Thu Ni shau ne pyein ne, kam lung kyong avan ap ne, Khanpughi ah khuut cu ka bik ci. 10 Kei naw ka taigu khin pang ung ka ning shum gui cu Khanpughi naw hmat ci. Khanpughi naw ang zak hlu a om ung ka shou pha sei nang mi ah om nak ah ka gawk law vai ah ka taigu ci nei. 11 Nami k'thamah nak vai ah mumcha hrilham cu ning pai tu gui hlu ne, ang htei ah ka ning hmu gui hlu khaat ci. 12 Cun ah ka pyein cu nangmi la kei, atang ah mi ng'hmuh law ung, kei naw ka zum nak awn, nang mi naw nami zum nak awn, mi ng'hteihtang tu vai hmawk ah kyak ci. 13 Nami shum ba vai nei, phainau gui aw, nangmi ah om nak ah ka lawk khai ah akda vei ka pawng ci nei, cun ung phi apipi cungvawn nak om ci, chang pakhui hei gui ah lung ah ka bi nak ung ami ng'hlah law nak a om ah maih ah nang mi ung phi a om vai ah ka ng'za hluk ci nei. 14 Ng'awigi ci la ghaatghum ci, hmuhmat ci la ka hmuhmat ci, chang avan ah hmawk ah kei naw ka mawng nak ci kia sei; 15 Rom gawnu ung nami om ciah nangmi am phi Thu Ni cu shau ne ka ning m'thein gui hlu aih ci nei. 16 Kei cu Thu Ni ung kam lungup ngaih gep ci; cun ah Thu Ni cu zum ci gui ah, Jew chang gui la chang pakhui hei gui cu, a hun nak ah Khanpughi ah hlungtai nak ah kia ci. 17 Khanpughi naw chang gui, a i chaa ang dung sak gui ah mawng cu, Thu Ni naw m'dang ci; cun cu tun nak ung kaa naw khut nak ung phleh khai ah zum nak bang awn ah kia ci. Cun na kia sei, cacim ung, ‘ ‘Zum nak awn Khanpughi ung dung ciah chang cu ghing ne om khai, ci ah om ci. 18 Dung nak cu chang gui naw ka ami hmat vai ah cheishoh, shetkat nakgui ah khan ah, khankhaw ah khanpughi ah m'lung k'she nak a gawk ah mawng cu dang law pyi ci nei. 19 Khanpughi ah mawng hmat vai gui phung cu, Khanpughi amat naw ahmat sak gui nak awn Khanpughi naw ngahmi cu m'kat gui ci. 20 Khanpughi naw shin ah khomdek khan a tui pian ung tun ne ani ah ng'tai ciah ka hmuh hningah hlungtai nak la Khanpughi ah a kiak nak ah ang zung cu chang gui naw ang dang ah hmuk hmat ci gui. Cun ah ami hmuhmat cu Khanpughi ah tui pian gui ami hmuhmat nak awn ah kia ci. Cun ah kia sei chang gui cu ami kat nak ah hmawk ah ka kui hlawt ci gui. 21 Ngahmi cu Khanpughi hmat ci gui, cun ung phi Khanpughi ah bakhak nak m'hlungtai khin ah ka m'hlungtai ci gui. Ami m'hlungtai nak vai su ung a khola ah kiak khai gui dut ngaih tuh ci gui, ngahmi ah ghawng ciah m'lung kyong cu hmup nak naw kup zawp ci. 22 Ngahmi naw ami mat cu hmuhmat ci gui ah ami pyein ung phi, akcang ah a i ka hmuhmat ci gui ah kiak ci; 23 Ka si hning ciah Khanpughi khawihmah nak vai su ung, si hning ciah chang, ni, k'phyu kha, khisa ni, k'phyu m'khaw ni gui ah mui gup gui dut piang ne khawihnah ci gui. 24 Cun ah a mawng ung Khanpughi naw cun ah chang gui cu, ami m'lung kyong ah ng'zak hlu ah ami kyak nak vai la, tumat la tumat thui hmai nak ami bi nak vai ah nawng gui ci. 25 Ngahmi naw Khanpughi ah ng'dung nak cu ak she awn m'thawng ci gui, ngahmi naw tui sho ciah Khanpughi cu nawng en u ne, a tui sho gui dut cu khawihnah ci gui. Cun ah Bawimang cu ang tai sei hlungtai sa! Amen. 26 Cun ah kya sei Khanpughi naw chang gui cu shekat pi ciah thuihmai nak ung ami hteh vai ah nawng gui ci. Hnumi gui cu pami la hnumi aè ng'zaw ng'koh man ah ka kya u ne, ami mat ng'zaw ng'koh ci gui. 27 Pami gui cun phi hnumi awn ng'zaw ng'koh man ah ka kya u ne, ami htuktui naw ui gui sei, ami mat ng'zaw koh ci gui. Pami gui cu tumat la tumat thuihmai nak vai bi ne ami shekat ah hmawk ah hma m'kat nak cu gah ci gui. 28 Cun ah chang gui cu Khanpughi ka shum hmat u khatah, Khanpughi naw shekat nak ung nawng gui sei, ka a khin ka ak khaa ah kya lawk ci gui. 29 Ngahmi cu shekat nak ahluhlu bi u ne, ngetngawng nak, shemshai nak, ng'zak hlu aih nak, om k'she nak, m'thuikhang nak, chang ngawn nak, ng'tuk nak, hleeihlak nak, ng'u hngeit nak, gui cu m'chei m'shoh ci gui. Ngahmi cu khleei u ne; 30 chang ah mawng cu ak she ah pyein sak ci gui. Ami mat ng'shedam na tu u ne, chang ah ng'shei ne, khahgah ci gui. Shekha law pi k'tai khai ah ngaih tuh u ne, ami nupa ah thu phi ka ngai ci gui. 31 A mi om she zawp sei, ami shaitaak ah phi ka om ci gui, ami paw chang phi ka chimgein ci gui. 32 Cun ah om ciah chang gui cu sih nak ung hteit khai gui ciah Khanpughi ah thukhan cu ngahmi naw hmat ci gui. Cun ung phi, ami mat naw shin ah shekhaa gui ami bi bang ah ka kyak ciah, a cun ah maih bik ci gui cun phi k'cang nak ci gui.
1 Cun ah kya sei teihpui aw, nang naw chang ah kat nak nam khoichaa ung phi, na mat ah kat nak ka nam zih hlawt khai. Nang cu kat nak bik ciah chang ah kya lang ne, na paw chang cu nam khoichaa tu ah a kyak ung na mat naw na mat nam kat ciah kyak ci. 2 Cun ah maih ah bik ciah chang Khanpughi naw am kat cu, ng'dung ciah mi hmat ci nei. 3 Cun ung phi teihpui aw, paw chang m'khoichaa nak ah kat nak cu nang na mat naw nam cheishoh pyi ci nei. Nang cu Khanpughi ah m'khoichaa nak na phiawn nak khai ah na ngai ci maa! 4 Ka cun ung Khanpughi ah chimgein nak, m'lung sau nak la hnimgei nak gui cu a i ah ka na sui ci maa!Khanpughi naw nang cu nang zu ba vai ah lam ning m'shum ne, a ning m'gein ah mawng cu, nang naw akcang ah na hmat ci nei. 5 Cun ung phi nang cu lingkeng ciah nam lung om ci, Cun ah kya sei, Khanpughi ah m'lung she nak la dung ciah m'khoichaa nak a gawk law hnuup ung, nang cu nuipai ciah shet m'kat nak na gah khai. 6 A cu hnuup ung Khanpughi naw chang nung nung cu amat ah bi lawh a ci ah, m'khoichaa nak pek khai. 7 Ak ni ah om ne, bamang nak, m'kumtou nak la sih nak ka om ciah ghin nak shui ciah chang gui am, Khanpughi naw ang tai ghin nak cu pek khai. 8 Amat ah ba nak vai bang teng ne, ng'dung nak cu hnu na ne, shet nak lam ah lak ciah chang gui cu Khanpughi ah m'lung k'she nak hmuk khai gui. 9 Shetkat nak bik ci gui ah Jew chang gui ung tun ne, khui hei chang gui van ah khan ah zaica nak la nat nak cu om khai. 10 Cun ung phi ni kiom nak bik ciah Jew chang gui ung tun ne, khui hei chang gui van ah khan ah Khanpughi naw bamang nak, m'kumto nak la dimdeeih nak cu pe gui khai. 11 Khanpughi naw chang nunç nung cu, ka m'khoi hnga ne, m'khoi m'cha gui khai. 12 Mose ah thukhan ka hmat ci gui ah chang khui hei gui cu, kat nak ami bi ung thukhan ah k'pung ah dimaih ci gui kyak ci. Thukhan hmat ci gui ah Jew chang gui cu, kat nak ami bi ung thukhan ah m'khoichaa nak cu gah ci gui. 13 Chang cu thukhan ng'zak nak dut awn Khanpughi ah ma ah ng'dung ciah ka kyak ci, thukhan ah pyein lak ciah chang cun vah, Khanpughi ah ma ah ng'dung ciah kyak ci. 14 Chang pakhui hei gui cu ngahmi ung thukhan ka a om ung phi, thukhan awn ng'lak khai ah ami om ih ah a kyak ung, ngahmi cu thukhan lak ci gui ah kyak ci. 15 Thukhan ah pyein gui cu ami m'lung kyong ung guk ah maih ah ami om ih naw m'dang ci. Ami m'lung kyong ung phi cun cu ng'dung ci ciah m'dang ci. Ami m'lung ngaih naw ak hnguat m'kat gui ne, ak hnguat k'baa gui ci. 16 Cun ah kya sei, kei naw ka shau ah Thu Ni ah pyein ah m'khoichaa nak ah kho hnuup ung Khanpughi naw, Bawipa Jesuh Khrit awn chang gui naw m'zih ne ami ngaih tuh gui phung cu, m'khoi m'cha ne m'dang zawp khai nei. 17 Nang a i hawkcha ang? Nang cu na mat naw, kei cu Jew chang nei ci ne, thukhan ung khung ne, Khanpughi awn na khahgah ci. 18 Nang cu Khanpughi ah ng'zak hlu na hmat ciah kyak ci. Thukhan ah m'theithang nak awn, ng'dung ci la ka cun phi na ghu thei ciah kyak ci; 19 Nang cu na mat naw na mat, amik m'dauh gui ah lam shum, hmup khui ah om ci gui ah ak dei; 20 Chang k'she gui ah lam piang, a i ka hmat ci gui ah ng'thei nak ah ka kyak ci ciah akcang ah na ngai ci. Thukhan cu hmuhmat nak la ng'dung nak ah kum nak ah kyak ciah phi akcang ah na hmat ci. 21 Nang naw chang m'theithang lang ne, a i ah kya sei na mat naw na mat ka nam theithang ang! Nang cu chang ka a m'guuk vai ah m'theithang lang ne, a i ah kya sei na mat nam guuk ang! 22 Nang naw chang ka a plet beng vai ah m'theithang lang ne, a i ah kya sei na mat na plet beng ang! Nang cu a gup m'tuih lang ne, a i ah kya sei a gup ah om nak ah taigu im cu na ng'guhtep tu ang! 23 Nang cu Khanpughi ah Thukhan ung khahghah lang ne, a i ah kya sei cun ah thukhan cu m'chei m'shoh ne, Khanpughi ah thang nam shet ang! 24 Cacim ung, “Jew chang gui ah om ah chang khui hei gui naw, Khanpughi ah ming cu paipih ci gui nei, ci ne om ci ah maih kia lawk ci nei. 25 Nang cu thukhan na lak ah a kyak ung, vun-ah nak na bi cu ak kuikyang ah kyak ci, cun ung phi nang cu thukhan nam shet ciah a kyak lai ung, vun-ah nak ka na bi tu ling te ung ni pi khai su ah kyak ci nei. 26 A vaisu ah vun-ah nak ka bi tuk ciah khui hei chang tumat cu, thukhan ah pyein gui avan a lak tu ah a kyak ung, Khanpughi naw vun-ah nak bik ciah chang ah maih ah dou khai ah ka kya ne ang! 27 Nang mi Jew chang gui cu, gu ne tai ah thukhan la vun-ah nak cu gah tu pang u ne phi, thukhan cu nami m'shet ci nei. Chang khui hei gui cu pumsa awn vun-ah nak ka a mi bi ung phi, thukhan cu lak ci gui nei. Cun ah kya sei nangmi Jew chang gui cu, chang khui hei gui naw nami kat nak ning m'khoichaa gui khai gui nei. 28 Cun kawn ah Jew chang ah chang naw ang ngaih phung cu Jew chang ah ka kyak ci. Chang tumat cu vun-ah nak a bi nak dut awn Jew chang ah ka kya lawk ci nei. 29 Jew chang akcang lai cu am lung kyong ah vun-ah nak bi pyi ciah chang ah kyak ci nei. Cun ah chang Jew chang ah kyak sak ci cu gu ne tai ah thukhan ah ka kyak ci, Khanpughi ah Mumcha naw vah chang cu am lung kyong ung Jew chang ah kyak sak ci. Ani cu chang ah m'hlungtai nak gah ciah ka kyak ci, Khanpughi ah m'hlungtai nak gah ciah kyak ci.
1 Cun ah a kyak ung Jew chang gui cu khui hei chang gui ah ma ba tu ba u ne ang! Ngahmi naw vun-ah nak ami bi cu, a phuma ma om ne ang! 2 A phuma lai cu akda om ci, a htuk baih ah Khanpughi ah ng'thu m'than cu Jew chang gui ung gawk law ma ci. 3 Chang am shah cu pyein ah ka ami om ah a kyak ung, a cun ah phah ah Khanpughi phi pyein ah ka om ciah kya thei khai ang! 4 Cun ah ka kyak ci, chang ah hta van a hleeihlak ung phi Khanpughi cu ng'dung khenggeng ne om ci. Cacim ung, “Thu na pyein cu ng'dung baba ne, M'khoichaa nak na aut ung phi nang nak om khai nei, ciah om ci. 5 Mik mi ah cheishoh nak naw Khanpughi ah dung nak cu dang sak pi ciah a kyak ung, a i ah mi pyein khai ang! Khanpughi naw mi kat ana m'kat gui cu, Khanpughi cheishoh ciah mi pyein khai ang! (Cun cu chang gui ah thu man dut ah thu ah kyak ci). 6 Cun ah ka kyak ci, Khanpughi ka a ng'dung ah a kyak ung, a i chaa khomdek khan cu m'khoichaa hlawt khai ang! 7 A vaisu ah kei ah ka ng'dung nak naw, Khanpughi ah ng'dung nak cu dang sak pi ne, hlungtai sak pi ciah a kyak ung, a i ah kya sei kei cu shekat ciah chang ah kya ne, hma m'kat nak cu ka gah ang! 8 “Ak ni a gawk law vai ah ak she cu mi bi vai, ci ne mi pyein khai ang! A cun ah maih ah kei naw ka pyein ah pyein u ne chang am shah naw ng'thu gu na k'bun ne na kat nak ci gui nei. Cun ah chang gui cu ami gah vai ah maih ah m'khoichaa nak gah khai gui nei. 9 Cun ah a kyak ung mik mi Jew chang gui cu, chang khui hei gui ah ma mi ni kiom nak tuba ah a mawng om ne ang! A i phi mi nikiom nak tuba ka om ci, Jew chang gui la chang khui hei gui avan cu, kat nak ah hlungtai nak kaa ah mi om ah mawng cu kei naw ka pyein pyi ah kiak ci . 10 Cacim theing ung; “Ng'dung ciah chang tumat phi ka om ci, 11 Akcang ah hmuhmat ciah chang tumat phi ka om ci, Khanpughi khawihnah ciah chang tumat phi ka om ci. 12 Chang avan cu lam hma zawp ci gui nei, Chang avan cu atang ah shekat zawp ci gui nei; Chang k'ni tumat phi ka om ci, tumat hta phi ka om ci nei. 13 Ngahmi ah ami ng'thu m'kha cu, sih nak ng'cim hmun ah kyak ci; Ami m'lei awn thuvi hleeihlak ci gui, Ami m'gawng m'lei cu k'phyu m'am ah maih ah amam om ci 14 Ami m'gawng cu shaila ng'plahtang, nget ngawng nak awn be ci, 15 Ami khawlek cu chang ngawn nak vai ung zangkhai aih ci; 16 Ami gawk nak pang ah ngahmi ah kut awn shetkat dimaih nak om ci; 17 Ngami cu dimdeeih nak ah lam ka hmuk ci gui 18 Ngami ung Khanpughi kyih-aa nak ah m'lung api phi ka om ci, ciah om ci. 19 Thukhan ung om ciah thu gui phung cu, thukhan ah kaa ah om ci gui ah hmawk ah kyak ci, ci cu mi hmat ci. Cun cu hnicim chang gui naw thu m'khaat phi ka pyein u sei, khomdek khan avan cu Khanpughi ah m'khoichaa nak ung a gawk vai ah kyak ci. 20 Thukhan lak nak awn a u chang phi Khanpughi ah maa ah ka ng'dung hlawt ci; Thukhan cu chang gui ah shetkat nak dang sak ciah kyak ci. 21 Cun ung phi Khanpughi ung chang gui ami ng'dung nak vai ah lam cu dang pyi ci nei. Khanpughi ung dung nak cu thukhan nawn na ka kyak ci, cun ah amawng cu Mose ah Thukhan la puorfet gui naw saksi m'dang ci gui. 22 Khanpughi naw chang gui cu ami zum nak awn, Jesuh Khrit ung dung sak gui ci. Cun cu Khanpughi naw Bawi Khrit zum ciah chang phung ung abi ah kyak ci, a i ah kya sei ci ung, chang gui ung ng'lakmah nak a i ka om ci; 23 Chang nung nung cu shekat u ne, Khanpughi ah bakhak nak cu ka gah ci gui. 24 Cun ung phi chang gui hun gui ciah Jesuh Khrit ung, Khanpughi naw, aphu ka peit ah m'gein nak awn chang gui cu dung sak gui ci. 25 Jesuh Khrit ah a sih nak awn chang gui cu, kat nak ung kaa ami phiawn vai ah Khanpughi naw, ani cu chang m'kui nak ah m'hnut ne k'bai ci. Chang gui cu ani ami zum nak awn kat nak ung kaa phiawn nak gah ci gui. Khanpughi naw cun ah abi cu, a i chaa ah chang gui ang dung sak gui ah mawng am dang nak ah kyak ci. Zana akhin ung chang gui ah kat nak cu, Khanpughi naw hnimgei nak awn m'dum gui ci. 26 Cun ung phi tuk bai akhin ung Khanpughi naw, amat ah ng'dung nak cu am dang nak ah, chang gui ah kat nak cu, m'hnih sak gui ci. Cunah a bi nak awn Khanpughi naw, amat cu ng'dung ciah a kyak ah mawng la, Bawipa Jesuh zum ciah chang phung ang dung sak ah mawng cu m'dang ci. 27 Cun ah kya sei mik mi mi khahghah nak vai om khai ang! a i ka om ci nei. A i ah kya sei ang! Thukhan mi lak u sei ang! Cun ah ka kyak ci, Khanpughi mi zum ah hmawk ah kyak ci. 28 Chang cu a zum nak bang awn vah Khanpughi ung ng'dung nak gah ci, thukhan lak nak awn gah ah ka kyak ci, ci cu mi hmat ci. 29 Khanpughi cu Jew chang gui ah Khanpughi bang ah kya ne ang! Chang khui hei gui ah Khanpughi ah ka kya tu ne ang! Akcang ah van ah Khanpughi ah kyak ci nei. 30 Khanpughi cu tumat bang om ci, Jew chang gui cu ami zum nak awn amat ung dung sak gui khai; a cun ah maih ah chang khui hei gui cun phi ami zum nak awn amat ung dung sak gui khai. 31 Cun ah a kyak ung mik mi naw Khanpughi zum nak awn thukhan cu mi nawng en ah kyak khai ang! Cun ah ka kyak ci, thukhan cu mi khan htek sak nak ah kyak ci nei.
1 Cun kawn ah mi pughi Abraham ah mawng cu mi ngaih tuh khai. Ani ah buiaut law gui cu a i ang! 2 Abraham cu amat a bilawh om ih nak awn Khanpughi ung ng'dung ciah a kyak vai su ung, a ni ung khahghah nak vai om khai su te; cun ung phi ani cu Khanpughi ah ma ah ka khahghah hlawt ci. 3 Cacim theing ung, “Abraham cu Khanpughi zum ci, a zum nak awn Khanpughi naw, chang dung ah k'bai ne dou ci, ciah om ci. 4 Chang tumat cu bi bi ne, ng'cheng a gah ah a kyak ung, cun ah ng'cheng cu ghuh ci naw a peit tu dut ah ka kyak ciah, gah khin ne a gah ah kyak ci. 5 Chang cu amat ah bilawh om ih dut ka ngaih u ne, Khanpughi zum ne a ngaih u ah a kyak ung, Khanpughi naw ani ah zum nak cu ngaih pe ne, ani cu kat nak ka om ciah m'hnut ne k'bai ci. A cu chaa ah Khanpughi naw chang cu dung sak ne dou ci. 6 Amat ah bilawh nak awn ka kyak ciah Khanpughi naw dung ciah chang ah a dou cu zeikiai nak om ci, ci ah mawng cu, David naw; 7 “Cheishoh nak ung m'geinsei nak gah ci gui la, Shetkat nak ung hun phiawn nak gah ci gui cu, zeikiai nak om ci! 8 A shetkat nak Bawipa naw ka a khei peit ah chang cu zeikiai nak om ci!” ciah guk ci. 9 Shin ah David ah pyein ah zeikiai nak cu, vun-ah nak bik ci gui bang ah gah ah kya ne ang! Cun ah ka kyak ci, vun-ah nak ka bi tuk ci gui naw phi gah tuk ci gui nei. Mik mi naw mi hmuh pyi ah cacim ung, “Abraham cu Khanpughi zum ci, a zum nak awn Khanpughi naw chang dung ah k'bai ne dou ci. 10 Cun ah Abraham cu chang dung ah Khanpughi naw k'bai ne a dou nak ah khin cu, Abraham naw vun-ah nak abi kawn ah ang! ka a bi pha ung ang!, abi kawn ah ka kyak ci, ka abi pha ung ah kyak ci. 11 Cun ah Abraham cu Khanpughi naw k'bai ne a dou kawn ah vun-ah nak cu bik ci. Cun ah vun-ah nak abi ah mawng cu, Khanpughi naw Abraham ah zum nak cu hmu netah, vun-ah nak ka abi pha ung, chang dung ah k'bai ne a dou cu saksi ah ng'dang khai ah am hnut nak ah kyak ci. Cun ah kya sei Abraham cu vun-ah nak ka abi ung phi, Khanpughi a zum nak awn, chang dung ah k'bai ne dou nak gah ci gui ah Pa ah kya lawk ci. 12 Ani cu vun-ah nak bik ci gui ah Pa ah phi kyak ci. Cun kawn ah ani cu vun-ah nak bik ci gui bang ah ka kya ne, mi pughi Abraham naw vun-ah nak ka a gah pha ung, Khanpughi cu zum ne, ghing ne om te ci gui cu thei tu gui ci gui ah Pa ah phi kyak ci. 13 Khanpughi naw Abraham la a hta ng'shon am, khomdek khan a van cu na kham khai ci ne shaitaak nak pek ci. Cun ah shai a taak cu, Abraham naw thukhan a lak ah hmawk ah ka kyak ci, Khanpughi a zum nak awn ani cu, Khanpughi naw chang dung ah k'bai ne a dou ah hmawk ah kyak ci. 14 A vaisu ah thukhan lak ciah chang naw vah shaitaak cu kum sei gah khai ah a kyak lai ung, chang ah zum nak phi a khola ah kya ne, Khanpughi ah shaitaak phi a khola ah kyak khai. 15 Thukhan naw Khanpughi ah m'lung k'she nak cu m'dang ci; cun ung phi thukhan ka a om ung m'shekat nak phi ka om khai kyak ci. 16 Cun ah kya sei Abraham ah hta ng'shon gui naw Khanpughi ah shaitaak, a phu ka peit ah ami gah vai cu ngaih gep khai ah, Khanpughi naw Abraham ah zum nak ah khan ah shaitaak nak a peit ah kyak ci. Cun ah shaitaak cu thukhan lak ci gui ah hmawk bang ah ka kyak ci, Abraham ah maih ah Khanpughi zum ciah chang gui ah hmawk ah phi kyak ci; a i ah kya sei ci ung Abraham cu mi van ah pa ah akyak ah hmawk ah kyak ci. 17 Cun cu cacim theing ung, “Kei naw nang cu chang pakhui-van ah pa ah ka ning piang ci nei, ci ne a pyein ah maih ah kya ci. Cun ah kya sei Khanpughi ah shaitaak cu kumbe ci. Khanpughi cu Abraham ah ngaih u, sik ciah chang gui ghin ba sak ci la, ka ng'tui om man ci gui ng'tui om sak ciah Khanpughi ah kyak ci. 18 Abraham cu a khaw m'vui ne a kyak zah ung phi Khanpughi cu zum ne ngaih u ci. Cun ah kya ne ani cu chang pakhui avan ah pa ah kya lawk ci. Cacim theing ung, “Nang ah hta ng'shon gui cu aisi k'chu ah pui khai nei, a ci ah maih ah kya ci. 19 Abraham cu a khokum phyaa law pyi sei a pumsa cu ak si ah maih ah kyak ci, Sarah cun phi ka hta hning khai ah ghi pyi ci, cun ung phi Khanpughi a zum nak cu khang htek aih ci. 20 Ani cu a zum nak ka ng'hlat phung ci, Khanpughi ah shaitaak phi ka a ngaih gep nak ka om ci; a zum nak naw hlungtai nak awn be sak sei, Khanpughi cu m'hlungtai ci. 21 Khanpughi naw a shaitaak ah maih ah bik khai ci cu Abraham naw ak be ah zum ci. 22 Cun ah a zum ah hmawk ah Khanpughi naw ani cu, chang dung ah k'bai ne adou ah kyak ci. 23 “Khanpughi naw ani cu chang dung ah k'bai ne dou ci, ciah thu cu Abraham ah hmawk bang ah ka kyak ci; 24 Mik mi ah hmawk ah phi kyak ci, a i ah kya sei ci ung, Jesuh mi Bawipa sih nak ung kaa thawh ba sak ciah Khanpughi cu, mi zum nak awn Khanpughi naw chang dung ah na k'bai gui ne a na dou gui ah hmawk ah kyak ci. 25 Khanpughi naw Bawipa Jesuh cu mik mi ah kat nak ah hmawk ah sih nak ung gawk sak ci, Khanpughi naw mik mi cu chang dung ah k'bai ne ana dou gui vai ah hmawk ah sih nak ung kaa thawh ba sak ci.
1 Tuk bai mik mi cu mi zum nak awn Khanpughi ung mi ng'dung pyi ci kya ne, mi Bawipa Jesuh Khrit awn Khanpughi ah ma ah dimdeeih nak cu mi gah ci. 2 Mik mi naw Jesuh Khrit cu mi zum ci kya sei, ani naw mik mi am, Khanpughi ah m'geinsei nak cu na hmat sak gui ci. Tuk bai cun ah m'geinsei nak cu mi gah u ne, Khanpughi ah hlungtai nak gah vai cun-phi ngaih gep nak om sei mi zeikiai ci. 3 Mik mi cu zaica zah ung phi mi zeikiai ci, a i ah kya sei ci ung zaica nak naw hnimgei nak; 4 Hnimgei nak naw m'khutnang nak, m'khut nang nak naw m'lungup ngaih u nak cu dang sak ci, ci cu mi hmat ci. 5 Mik mi cu cun ah m'lungup ngaih u nak a om ung a i zah ung phi mi m'lung ka hau vang khai. A i zah kya sei ci ung Khanpughi naw ana peit gui ah Mumcha Theing awn, anam hni nak gui cu, mi m'lung kyong ah anglih pyou sak pyi ah kyak ci. 6 Mik mi cu am gein kaa ah mi kyak zah ung, Bawi Khrit cu Khanpughi ah k'bai nak ah khin ung, mik mi la chang k'she gui ah hmawk ah sik ci nei. 7 Dung ciah chang tumat ah hmawk ah sih pek khai a u ka om ci, chang k'ni tumat ah hmawk lai ah sik khai cu a om ung om hman khai. 8 Cun ung phi mik mi naw kat nak mi bi k'chung ung Bawi Khrit naw mik mi ah hmawk ah si nak awn Khanpughi naw a i hlawk ah anam hni gui cu m'dang ci. 9 Mik mi cu Jesuh Khrit ah sih nak awn Khanpughi ung mi ng'dung pyi ci kya sei, Khanpughi ah m'lung k'she nak ung a na k'phiawn gui cu ngaih gep vai kyak ci. 10 Mik mi cu Khanpughi ah gaa ah mi kya te ci, cun ung phi Ahtapa a sih nak awn A teihpui ah na piang gui ci. Tuk bai mik mi cu Khanpughi ah teihpui ah mi kya pyi ci, cun ah kya sei, ghing ciah Bawi Khrit ung hun nak mi gah vai cu ngaih gep ah kyak ci. 11 Cun bang ah ka kyak ciah Khanpughi naw mik mi cu, Bawi Khrit ung a teihpui ah ana pian gui pyi ah kya sei, zeikiai nak phi mi gah ci. 12 Shetkat nak cu khomdek khan ah chang tumat awn gawk law ci, ani ah kat nak awn sih nak phi gawk lawk ci. Cun ah kya sei hnicim chang van cu kat nak bi u ne, sih nak ung gawk ci gui. 13 Thukhan ka a om pha ung khomdek khan ah kat nak om pyi ci; cun ung phi cun zah ung thukhan ka om ci kya sei, Khanpughi naw chang gui ah kat nak cu ka khei pe gui ci. 14 Cun ung phi Adam ung tun ne Mose ung khut khai ah hnicim chang gui cu sih nak naw kum gui ci. Cun ah chang gui cu Adam ah maih ah Khanpughi ah thukhan m'cheishoh ne kat nak ka a mi bi ung phi, sih nak naw kum gui ci. Adam cu a ngawi ah gawk lawk khai ah Bawipa ah mawng m'dang ciah kyak ci. 15 Cun ung phi ngahni cu ka tang ci goi, Khanpughi ah m'gein nak cu Adam ah kat nak ah maih ah ka kyak ci. Cun ah chang tumat ah kat nak awn chang khli van naw a sih nak ah kyak ci, ci cu akcang ah kyak ci. Cun ung phi Khanpughi ah m'gein nak la Khanpughi naw chang gui am a peit ah, chang tumat ah kyak ciah Jesuh Khrit ah m'gein nak cu cun ah kat nak ah ma kuikyang hlungtai pi ci. 16 Khanpughi ah peit ah m'gein nak la chang tumat ah kat nak cu, ang lak mah nak om ci. Khanpughi naw Adam naw kat nak a bi cu kat nak ah ng'khan ci ci ne m'khoi m'chak ci. Cun ung phi cun kawn ah chang gui naw kat nak ami bi cu ka ami khin pang ung phi, kat nak ka om ci ci ne m'khoi m'chaa gui ci. 17 Chang tumat ah kat nak naw sih nak awn uk ne ak kum ah a kyak ung, A hei chang tumat ah kyak ciah Jesuh Khrit ah bilawh ah mawng cu a i hlawk ah hlungtai khai ang! Khanpughi ah bakhak ciah am gein nak la, Khanpughi ah ma ah dung nak ah am gein nak, gah ciah chang gui cu, Jesuh Khrit ung ghing ne, nang ne om khai gui nei. 18 Cun ah kya sei, chang tumat ah kat ah hmawk ah hnicim chang avan cu hma m'kat nak ami gah a maih ah, ahei chang tumat naw ng'dung nak abi nak awn, hnicim chang avan naw kat nak phiawn ah ne, ghin nak gah ci gué nei. 19 Chang tumat naw Khanpughi ah ng'thu ka a ngaih nak awn chang gui avan cu kat nak bik ciah ami kyak zawp ah maih ah, chang tumat naw Khanpughi ah ng'thu a ngaih nak awn, chang gui avan cu Khanpughi ung ng'dung nak gah ci gui. 20 Cheishoh nak ada law pi vai ah Khanpughi naw thukhan cu am hnut ah kyak ci. Cun ung phi kat nak ada law pi u ng Khanpughi ah m'gein nak cun phi dam law pi ci. 21 Kat nak naw sih nak awn a uk ah maih ah, mi Bawipa Jesuh Khrit ung ang tai ghin nak mi gah vai ah, Khanpughi ah m'geinsei nak naw ng'dung nak awn na uk gui ci.
1 Cun ah a kyak ung a i ah pyein vai ang! Khanpughi ah m'geinsei nak a dam law pi vai ah kat nak cu bi la vai maa! 2 Cun ah ka kyak ci nei, kat nak mi hnu nah pyi ciah chang cu, a i ah kya sei kat nak ung mi ng'len ba la vai ang! 3 Nang mi naw akcang ah nami hmat vai cu, mik mi cu Bawi Khrit Jesuh awn kawngat nak ah tui mi ng'hnim nak awn, ani awn atang ah mi si tuk ci ah kyak ci. 4 Cun ah kya sei mik mi cu tui hnim nak awn Bawi Khrit awn atang ah mi ng'phuh ne, ani awn atang ah mi sik ci. Cun ah ani awn atang ah mi sih ah mawng cu, Pa Khanpughi naw abakhak hlungtai nak awn Bawi Khrit cu sih nak ung kaa a thawh ba sak ah maih ah, mik mi cu ghin nak thai ung mi om vai ah hmawk ah kyak ci. 5 A i ah kyah sei ci ung, ani awn atang ah mi sih tu ung, ani awn atang ah sih nak ung kaa mi thawh tu ba vai ah hmawk ah kyak ci. 6 Mi ghin nak k'phyim cu Bawi Khrit awn atang ah kutlam tung ngawn pyi ah kyak ci. Cun ah kya sei kat nak awn be ciah mi m'lung kyong cu dimaih pyi ci kya ne, mik mi cu kat nak ah khlei-htein ah ka mi kya ba ci, ci cu mi hmat pyi ci. 7 Bawi Khrit ung sik ciah chang cu shetkat nak phiawn nak ciah kyak ci. 8 Mik mi cu Bawi Khrit awn atang ah mi si pyi ci kya sei, ani awn atang ah mi ghing khai ah, mi zum ci. 9 Bawi Khrit cu sih nak ung kaa tho ba pyi ci kya sei, ani ung sih nak ka om ba phung khai, sih nak naw ani cu ka uk ba hlawt khai. 10 Cun ah kya sei ani cu sih nak nang ci kya ne, kat nak ah hlungtai nak naw ani cu ka uk ba hlawt sei, tuk bai Khanpughi awn lunlawi ne ghing ne om ci. 11 A cun ah maih ah nang mi cun phi, sih nak nang ne, kat nak nawng shut ne, Bawi Khrit Jesuh awn, Khanpughi ung lunlawi ne nami om vai. 12 Cun ah kya sei nami pumsa ah ng'zak hlu ah ka nami lak en hlawt vai ah, kat nak naw nami pumsa cu kam khut ten hlawt sa. 13 Nami pumsa cu a i zah ung phi shetkat nak ah hmawk ah ka nami mang en vai. Cun nak vaisu ung, sih nak ung kaa ghing ba ciah chang gui ah kya ne, nami pumsa cu Khanpughi am nami ap vai, Dung nak ah amawng ung a ning mang gui vai ah pumsa la ghin nak avan cu, Khanpughi ung nami ng'ap vai nei. 14 Kat nak cu nami bawimang ah ka kya en sa; nang mi cu thukhan ah kaa ah ka nami om ci, Khanpughi ah m'gein nak ah kaa ah nami om ci nei. 15 Cun ah kya sei mik mi cu, kat nak ah kaa ah ka om ba ne, Khanpughi ah m'geinsei nak ah kaa ah mi om ci kya sei, kat nak mi bik khai ah mi pyein khai ang!cun ah ka kyak ci. 16 Nang mi cu chang tumat ah khlei-htein ah kya ne nami ng'ap ung, a cun ah bawi ah khlei-htein ah nami kyak cu ak cang ah nami hmat ci. Nang mi cu kat nak ah khlei-htein nah nami kyak ung, nang mi ah gah vai cu sih nak ah kyak ci, Khanpughi ah ng'thu nami ngaih ung nang mi cu Khanpughi naw chang dung ah ning dou gui khai. 17 Nang mi cu kat nak ah khlei-htein ah nami kyak man ung phi, tuk bai nami gah ah m'theithang nak cu, nami m'lung kyong avan nawn nami lak ah hmawk ah Khanpughi cu kam hlungtai ci. 18 Nang mi cu kat nak ah khlei-htein nami phiawn nak kawn ah, ng'dung nak ah khlei-htein ah nami kya lawk ci. 19 (Nang mi cu ng'thu thuuk ka hmat man uk ci sei, chang ah hmat zai vai ah thu awn ka guk nei). A zana nang mi cu, cheishoh nak a hluhlu bi nak vai ah shetkat nak ah khlei-htein ah ng'kham ne nami ng'ap ci. A cun ah maih ah tuk bai nangmi cu, theing cim ciah bi bi nak vai ah, ng'dung nak ah kaa ah khlei-htein ah kya ne ng'kham ne nami ng'ap vai. 20 Nang mi cu kat nak ah khlei-htein ah nami kyak zah ung ng'dung nak awn nami ng'tai ci. 21 Cun zah ung nami bi lawh gui naw a i ah phi ka ning khui ng'vong gui ci, cun naw tuk bai ning lu ng'aa sak gui ne, ak hnu ah sih nak ung ning gawk sak gui ci. 22 Cun ung phi nang mi cu tuk bai kat nak ung kaa phiawng ne, Khanpughi ah khlei-htein ah nami kya pyi ci. Nang mi ah gah ah bamang nak cu, Bawipa am nami ghin nak ak be ah ap ne, ak hnu ah ang tai ghin nak nami gah ah kyak ci. 23 Shetkat nak ah a phu cu sih nak ah kyak ci; Cun ung phi Khanpughi naw a phu ka m'hnut vai ah am gein nak cu, mi Bawipa Jesuh Khrit ung kawngat nak awn gah ah ang tai ghin nak ah kyak ci.
1 Phai nau gui aw, nang mi cu thukhan nami hmat pyi ci kia ne tuk bai ka pyein vai ah a mawng gui cu nami hmat khai nei. Chang cu a ghin zah ak chuih thukhan ah kyong ung om ci. 2 Ceimah pyi ciah hnumi tumat awn m'tumtang ah a kyak ung, cun ah hnumi cu a cei a ghin zah ak chuih ng'chungla nak ah thukhan ah kaa ah om ci. Cun ung phi a cei a sih ah a kyak lai ung ng'chu laa nak thukhan phiawn nak ciah kyak ci. 3 Cun ah kya sei ani cu a cei ghing ne om lang sei, a hei pami awn ani om ba ah a kyak ung ani cu thuihmai chang ah pyein vai kyak ci. Cun ung phi a cei a sih lai ung, ani cu thukhan phiawn na pyi ci kya sei, a hei pami awn ani ng'chulaa ba ung thuihmai chang ah pyein vai ah ka kyak ci. 4 Phai nau gui aw, shin ah mawng cu nang mi awn phi ng'lung ci nei. Nang mi cu Bawi Khrit ah pumsa ah nami kya pyi ci kya ne, thukhan ung nami ghin nak cu si pyi ci nei. Khanpughi ah khuut bi nak ung hnuntho ciah mi kyak nak vai ah sih nak ung ka tho ba ciah BawiKhrit ah chang ah nami kya pyi ci nei. 5 Mik mi cu khomdek pumsa ah ng'zak hlu ah ghing ne mi om zah ung thukhan awn lawk ciah shetkat nak hlu ah m'lung naw mi pumsa kyong ah bi bi ne, mik mi cu na sih sak gui ci. 6 Zana na khitpawng gui man ciah thukhan cu mi sih pui pyi ci kya sei, tuk bai mik mi naw thukhan cu mi phyawn ah pyi ci nei. Tuk bai mik mi cu gu ne pian ah thukhan lam k'phyim awn ka kyak ciah, Mumcha ah pian ah lam k'thai awn Khanpughi ah khuut cu mi bik ci nei. 7 Cun ah a kyak ung thukhan amat cu kat nak ah mi pyein khai ang!Cun ah ka kyak ci!Cun ung phi kat nak cu a i ang, ci cu thukhan naw na hmat sak ci. A vaisu ah, “chang ah khawh ka ng'zak hlu dut vai, ciah thukhan naw ka a pyein vai su ung, ng'zak hlu nak dut ah mawng cu kei naw ka ka hmat khai su te, 8 Kat nak naw mik mi am cun ah thukhan cu na shum sak gui ne, mi m'lung kyong ah ng'zak hlu nak a hluhlu cu dang sak ci. Thukhan ka a om ung kat nak cu ak si ah kyak ci. 9 Kei ka mat phi thukhan cu ka ka hmat man ci, thukhan ka hmat law vai am tun ne, kat nak cu kei ung ghing lawk ci. 10 Cun kawn ah kei cu ka sik ci. Kei naw ka ghing nak vai ah pyein ah thukhan naw kei cu na sih sak ci nei. 11 Kat nak naw lam shui ne thukhan am'dang nak awn kei cu na sih sak ci nei. 12 Cun ah kya sei thukhan cu theing cim ci, thukhan cu ng'cim ne, ng'dung ne, nik ci. 13 Cun ah a kyak ung akni naw kei cu na sih sak ne ang! Cun ah ka kyak ci, Kei na sih sak ci cu kat nak ah kyak ci, kat na cu kei ah ka nupuk ng'tuipui ah ang dang vai ah, ak ni cu mang ne kei cu ana sih sak ah kyak ci. Cun ah kya sei kat nak a i hlawk ah ashetkat ah mawng cu thukhan awn hmat ah kyak ci. 14 Thukhan cu mumcha lam ah kyak ciah mi hmat ci, cun ung phi kei cu kat nak ah khlei-htein, chang ah hta ah ka kyak ci. 15 Kei naw a i ka bi cu ka ka hmat ci. A i ah kya sei ci ung, kei naw ka bi hlu cu ka bi phung ne, ka ka ng'zak hlu bangbang cu ka bik ciah kyak ci. 16 Kei naw ka ka bi hlu bangbang te, ka bik ciah a kyak nak awn, thukhan cu ng'dung ciah kak bai ci. 17 Cun ah kya sei kei naw ka bilawh gui bik ci cu kei akcang ah ka kyak ci; kei ah m'lung kyong ung ghing ciah kat nak ah bi ah kyak ci. 18 Hnicim chang ah ka kyak ciah kei ung akni ka om ciah kei naw ka hmat ci. A i ah kya sei ci ung kei naw akni ka bi hlu ung phi, akni cu ka ka bi hlawt ci. 19 Kei naw ka ng'zak hlu ah akni cu ka bi hlawt ne, ka ka ng'zak hlu ah akshe bangbang cu ka bik ci. 20 Kei naw ka ka ng'zak hlu bangbang ka bi cu, kei ah bi ah ka kyak ci, kei ah m'lung kyong ung ghing ne om ciah kat nak ah bi ah kyak ci. 21 Cun ah kya sei thukhan ah bi nak ung kei naw ka hmuh cu, Kei naw akni ka bi hlu nak awn, akshe bangbang ghu ne ka bik ciah kyak ci. 22 Khanpughi ah thukhan cu kei ah m'lung kyong naw zeikiai ne dou ci. 23 Cun ung phi kei ah pumsa kyong ah kei ah m'lung ngaih ah ng'zak hlu awn ng'kukneet ng'tu ng'aat ciah thukhan ah mawng tumat om ci. Cun cu kei ah pumsa kyong ah hnuntho law ne, kei cu kat nak ah thawng khui ah na chum ci. 24 Kei cu ang htei ah kam lung thui aih ci nei, Kei na sih sak ciah shin ah pumsa ung kaa a u naw kei cu na hun tuk khai ang! 25 Mi Bawipa Jesuh Khrit awn na hun gui ciah Khanpughi ah m'gein nak cu hlungtai aih ci nei. Ak hnu ah ka mat ah mawng ka pyein hlu cu, Ka m'lung kyong awn Khanpughi ah khuut ka bi sang ung, ka hnicim chang nak naw kat nak ah bi cu ka bik ci nei.
1 Cun ah kya sei Jesuh Khrit ung kawngat ne om ciah chang gui cu Khanpughi ah shet m'kat nak phiawn nak ci gui. 2 Cun ah kya sei Jesuh Khrit ung na kawngat sak ciah Mumcha ah thukhan naw, kat nak la sih nak ah thukhan ung, kei cu na phiawn sak pyi ci nei. 3 Hnicim chang ak tha ka om sei, thukhan naw ka a bi peit hlawt cu Khanpughi naw bi pyi ci nei. Khanpughi naw hnicim chang ung om ciah kat nak cu m'kat khai ah Ahtapa cu zuk m'kyum lawk ci. Ahtapa cu kat nak k'tam ne m'di khai ah, hnicim chang ah maih ah kat nak nupuk nah ne ng'tui lawk ci. 4 Khanpughi naw cun ah abi cu hnicim chang nupuk nak ciah ka kya ne, Mumcha ung ghing ciah, mik mi naw thukhan ah ng'dung sei mi lak vai ah hmawk ah kyak ci. 5 Hnicim chang nupuk nah ne ghing ciah chang gui cu, hnicim chang ah ng'zak hlu bangbang ngaih tuh ci gui, Mumcha ah m'cai m'a ah ghing ciah chang gui cu, Mumcha ah ng'zak hlu bangbang ngaih tuh ci gui, 6 Hnicim chang ah ng'zak hlu bang ngaih tuh ciah chang cu sih nak ung gawk ci, Mumcha ah ng'zak hlu ngaih tuh ciah chang cu ghin nak la dimdeeih nak gah ci. 7 Hnicim chang ah ng'zak hlu bang ngaih tuh ciah chang cu Khanpughi ah gaa ah kyak ci, ani naw Khanpughi ah thukhan ka lak hlawt ci, akcang ah ka lak hlawt ci. 8 Amat ah hnicim chang ah ng'zak hlu ah lak ciah chang cu, Khanpughi naw ka m'tamkhah hlawt ci. 9 Cun ung phi Khanpughi ah Mumcha cu nang mi ung akcang ah om ciah a kyak ung, hnicim chang ah m'cai ah ka om u ne, Mumcha Theing ah m'cai ah nami om vai. Bawi Khrit ah Mumcha ah ka om nak ah chang cu Bawi Khrit awn ka ng'phaa ci. 10 Nangmi ung Bawi Khrit cu akcang ah om ciah a kyak ung, nami pumsa cu kat nak awn sik khai ah a kyak tu pang ung phi. Mumcha naw ning ghin sak gui khai, a i ah kya sei ci ung nang mi cu Khanpughi ung ng'dung nak nami gah pyi ciah a kyak ah hmawk ah kyak ci. 11 Bawi Jesuh sih nak ung kaa thawh ba sak ciah Khanpughi ah Mumcha cu nang mi ung akcang ah om ciah a kyak ung, Bawi Khrit sih nak ung kaa thawh ba sak ciah Bawipa naw, amat ah Mumcha awn sih thei ciah nami pumsa cun phi ghin sak khai nei. 12 Cun ah kya sei phai nau gui aw, mik mi cu hnicim chang ah ng'zak hlu ah ka mi om ne, Khanpughi ah Mumcha ah m'cai ah mi om khai nei. 13 Nang mi cu hnicim chang ah ng'zak hlu ah nami om ah a kyak ung nami sik khai nei, cun ung phi nami shetkat nak cu Mumcha Theing awn nami sih sak ah a kyak ung ghin nak nami gah khai nei. 14 Khanpughi ah Mumcha ah lam shum nak lak ciah chang cu Khanpughi ah Hta ah kyak ci. 15 Khanpughi ah ning peit gui ah Mumcha naw nang mi cu Khlei-htein ah ka ning k'hmoh gui ci, kyih ah phi ka ning kyihkyawk sak gui ci. Mumcha naw mik mi cu Khanpughi ah hta gui ah na piang gui sei, Mumcha ah na peit gui ah hlungtai nak awn Khanpughi cu, “Ka Pa, Ka Pa, ci ne khu tu vai ah mi khin tuk ci. 16 Mik mi cu Khanpughi ah hta gui ah mi kyak ah mawng ang dang vai ah Khanpughi ah Mumcha naw, mi mumcha cu ng'khap pui ci. 17 Mik mi cu Khanpughi ah hta gui ah mi kyak ci kya sei, aë chang gui ah hmawk ah Khanpughi naw am hnut ah hrilham cu mi kham khai. Bawi Khrit ah hmawk ah Khanpughi naw am hnut ah bakhak nak cun phi mi kham tuk khai. Mik mi cu Bawi Khrit awn atang ah gein vai nak mi gah ah a kyak ung, ani awn atang ah bamang nak phi mi gah khai. 18 Tuk bai chu mi bui aut ah gein vai nak cu, Khanpughi naw a na peit law gui vai ah bamang nak awn ka tutang khai ciah kei naw ka zum ci. 19 Khanpughi naw ahta gui am, am dang gui vai ah amawng gui cu, a tui pian avan naw ang htei ah ging co ci gui. 20 Khanpughi naw a tui pian avan cu ala k'ding ah kyak khai ah m'shetkat ci. Cun ah abi cu khomdek khan ah ng'zak hlu ah ka kyak ci, Khanpughi ah ang zak hlu ah kyak ci. Cun ung phi ngaih u nak om ci; 21 Cun ah ngaih u nak cu, kho hnuupat ung a tui pian gui naw khihpawn didap nak ung kaa phiawng ne, Khanpughi ah hta gui awn atang ah bamang lunlawi nak ami gah vai ah hmawk ah kyak ci. 22 Mi van naw mi hmat zawp ah tuh baichu a khin ung, a tui pian gui avan cu, nau poi m'neh ah maih ah nat nak om ci. 23 A tui pian ah khomdek khan bang ah ka kyak ciah, Khanpughi naw ak htuk baih ah a peit ah Mumcha gah ciah mik mi cun phi, Khanpughi ah hta ah kyak nak vai la, mi pumsa avan hun nak a gah nak vai cu, mi ging ne mi geinvai ci. 24 Mik mi cu ngaih u nak awn hun nak mi gah ci. Cun ah mi ngaih u cu mik mi naw ka mi hmuk ci, mi hmuh ah a kyak ung cun cu akcang ah mi ngaih u ah ka kyak ci. Mik awn hmuh ei cu a u naw ngaih u khai ang! 25 Mik mi naw ka mi hmuh cu m'lungup ne mi ngaih u ne, hnimgei nak awn mi ngang ci. 26 A cun sang ung Mumcha naw ak tha ken ciah mik mi cu nam htei gui khai ah gawk lawk ci. Mik mi naw a i chaa taigu vai ka mi hmat ci; m'gawng shai awn ka pyein thei vai ah ak aw awn, Mumcha amat naw, mik mi ah hmawk ah Khanpughi ah na ng'zoih pe gui ci. 27 Chang gui ah m'lung kyong hmu thei ciah Khanpughi naw Mumcha ah m'lung ngaih cun phi hmat zawp ci. A i ah kya sei ci ung Mumcha naw Khanpughi ah ang zak hlu ah, ak chang gui ah phah ah ang zoih ah hmawk ah kyak ci. 28 Khanpughi m'hni u sei ang zak hlu ah a khu gui ah chang gui naw, ami bilawh nak ung kaa ng'dang lawk khai ah, Khanpughi naw ngahmi awn atang ah abilawh cu mi hmat ci. 29 Khanpughi naw a ghu ah chang gui cu, Ahta ah maih ah ami kyak vai ah m'cha ne m'hnut ne om sak gui ci. Ahta cu ng'phai nau gui akda ung, ang vai pi ah a kyak vai ah hmawk ah cun ah a ci ah kyak ci. 30 Cun ah kya sei Khanpughi naw ghu ne ak pai gui cu khu gui ci; a khu gui ah chang gui cu amat ung chang dung ah k'bai gui netah, amat ah bakhak nak cun phi gah sak gui ci. 31 Shin ah amawng gui avan cu teng ah a kyak ung, Khanpughi cu mik mi lam ah a om ung a u naw na hnu ng'tuk pui gui hning khai ang! 32 Khanpughi naw amat ah Htapa cu ka ng'vang nah ne, chang van ah hmawk ah pe ne, na kuikyan gui ci nei. Ahtapa hngaw mik mi ah hmawk ah pek ciah Khanpughi naw, apang avan cu, ka ng'vangca ah ka na pe gui ne ka om khai nei. 33 Khanpughi naw a ghu ah chang gui cu a u naw m'kat gui khai ang! Ngahmi ung kat nak ka om ciah Khanpughi amat naw m'dang pyi ci nei. 34 Cun ah kya sei ngahmi cu a u naw ka m'kat gui hlawt ci. Sih nak bang ah ka kyak ciah sih nak ung kaa tho ba ciah Jesuh Khrit naw Khanpughi ah ak pat lam ah ngoh netah, mik mi ah hmawk ah ng'hui ng'paa ne om ci. 35 Cun ah kya sei a u naw mik mi cu Bawi Khrit ah m'hni nak awn nam chaa gui hlawt khai ang! Zaica nak, cumbawng nak, k'dukdeiu nak, cawigha nak, pyamthaam nak, gaa kyih nak la sih nak; cun gui naw Bawipa ah m'hni nak awn nam chaa gui hlawt khai maa! 36 Cacim Theing ung; “Bawipa ah Hmawk ah Kei mi cu, ak hnuup pum ung, sih nak gaa awn kami ng'aut ci nei; Ngawn vai ah ami k'bai ah htome ah maih ah, Chang naw kei mi cu na ngai gui ci nei”, ciah om ciah maih ah kyak ci. 37 Ka ng'chaa bang ah ka kyak ciah, a cun ah mawng gui avan awn ng'aut law nak ung, mik mi nam hni gui ciah Bawipa naw khut sei, nang nak cu mi gah ci. 38 Cun ah kya sei, a i naw phi mik mi cu Bawipa ah m'hni nak awn ka nam chaa gui hlawt khai; sih nak la ghin nak ka phi kya, khan chang gui la khankhaw uk ne hlungtai ci gui ah phi kya, tuh chu mawng nak ah phi kya, ngawi ah ma nak vai ah phi kya, 39 m'dek ah khan ah phi kya, m'dek ah kaa ah phi kya, kho ah kaa ung a tui sho avan naw phi kya; a i naw phi mi Bawipa Jesuh Khrit awn Khanpughi naw ana peit gui ah m'hni nak awn ka nam chaa gui hlawt khai, ci cu kei naw akcang ah ka hmat ci nei.
1 Kei naw akcang ka pyein cu; kei ung Bawi Khrit om ci kya sei kei ka ka hleei ci. Mumcha Theing ah uk nak awn om ciah kam lung kyong naw kei ka ka hleei ah mawng cu dang sak ci. 2 Kei cu ang htei ah ka thui ci. Kam lung kyong ah ang tai sei zaica nak om ci. 3 Ka chang gui, ka k'chi ng'chung gui ah hmawk ah Khanpughi ah m'kyuk nak la Bawi Khrit awn ng'pai nak phi ka aut hluk ciah m'lung om ci nei. 4 Ngahmi cu Khanpughi ah chang ah kyak ci gui; Khanpughi naw ngahmi cu a hta ah piang gui ne abamang nak cu hmuh sak gui ci; Bawipa naw ngahmi awn thukhan bik ci, ngah mi am thukhan pe gui ci; Ngah mi naw ak cang ah khawihnah ci gui; Ngahmi naw Khanpughi ah shaitaak gah ci gui; 5 Ngah mi cu mingthang ciah Hebru hta ng'shon ah kyak ci gui. Bawi khrit cun phi hnicim chang pumsa ung ngah mi ah pakhui ah kyak ci. Ang tui avan uk ciah Ka Khanpughi cu ang tai sei hlungtai nak om sa! Amen. 6 Khanpughi ah shaitaak cu zu kyavuk dut ciah ka pyein ah ka kyak ci; a i ah kya sei ci ung Israel chang gui bang Khanpughi ah chang gui ah ka kyak ci, chang khui hei gui phi Khanpughi ah chang gui ah kyak ci. 7 Abraham ah hta ng'shon avan cun phi Khanpughi ah hta gui ah ka kyak ci gui. Khanpughi naw, “Nang cu Isaak bang awn vah na ng'shon ba khai, ciah shaitaak ka ning pek ci, ci ne Abraham cu kyak nak ci. 8 Abraham ah hta ng'shon avan cu Khanpughi ah hta gui ah ka kyak ci, Khanpughi ah shaitaak awn ng'tui lawk ciah chang gui cun vah, Abraham ah hta ng'shon akcang ah kyak ci gui. 9 Khanpughi naw, “A khin a kum law ung kei ka lawk khai, Sarah cu k'pami hta ah hta lawk khai nei, ci ne Abraham am shaitaak nak pek ci. 10 Cun kawn ah Rebekka ah hta goi cu Mi pughi Issak awn ani hta goi ah kyak ci. 11 Ngahni ka ng'tui law pha ni ne, ak ni ak kaa ka a ni bilawh pha ung Khanpughi naw, Rebekka am, “Na hta ng'vai pi naw, ak hmaw pi cu hnun thawh pek khai nei, ci ne kyak nak ci. Cun ah a pyein cu Khanpughi naw amat ah ng'zak hlu ah a hta tumat a ghu a mawng cu am dang ah kyak ci. Khanpughi naw cun ah abi cu, chang ah bilawh nak teng ne a ghu ah ka kyak ci, amat ah m'hni ah ghu ne a khu ah kyak ci. 13 Cacim theing ung; “Kei naw Jakop cu ka m'hni ci, Cun ung phi Esau cu ka gen ci, ciah om ci. 14 Cun ung Khanpughi ka taga ciah mi pyein khai ang!Cun ah ka kyak ci. 15 Khanpughi naw Mose am, “Kei naw ka chimgein hlu cu ka chimgein khai, Kei naw kam hteihtang hlu cu kam hteihtang khai, ci ne kyak nak ci. 16 Cun ah kya sei Khanpughi ah ghu nak cu, chang ah ng'zak hlu la bilawh nak awn ah ka kyak ci, Khanpughi ah chimgein nak awn ah kyak ci. 17 Khanpughi naw Egypt ghangpughang Pharaoh am, “Kei naw nang ghangpughang ah ka ning m'duih cu, nang awn ka hlungtai nak cu m'dang ne, m'dek ah khan avan ung kei ah ka hluicang nak cu a gawk vai ah hmawk ah kyak ci, ciah a kyak nak cu cacim theing ung om ci. 18 Cun ah kya sei Khanpughi naw ak chimgein hlu cu chimgein ne, a lingkeng sak hlu cu lingkeng sak ci. 19 “Cun ah a kyak ung Khanpughi naw a i chaa chang gui cu m'kat gui khai ang! A u naw Khanpguhi ah ng'zak hlu cu hnu ng'tuk pui hlawt khai ang!” ci ne na ng'shi hluk ciah chang om khai nei. 20 Teih pui aw, nang cu a u ah kya ne, Khanpughi cu, cuk chaa na ng'shi hning vai ang!A tui sho ah chang naw, tui sho ciah Bawipa cu, “A i ah kya sei, nang naw kei cu shin chaa ah na na tui sho ang, ci ne ng'shi hning khai ang! 21 K'am sheh ci naw k'am m'dek cu amat ah ng'zak hlu ah piang hning ciah ka kya ne ang! Ani naw k'am m'dek tumat awn, akni akshe, am hni ah sheh hning ciah ka kya ne ang! 22 Khanpughi ah bi cu a shin ah maih ba ah kyak ci. Khanpughi naw am lung k'she nak cu ng'dang sak ne, a hlungtai nak cu ang thang vai ah ng'za hluk ci. Cun ung phi am lung k'she nak ung di maih ci gui ah khan ah ang htei ah hnimgein nak om ci. 23 Cun kawn ah Khanpughi cu ak chimgein gui ah chang gui naw, chunla ciah a bamang nak ami hmuh vai ah ng'za hluk ci. Cun ah chang gui cu Khanpughi ah bamang nak ami gah tu vai ah Khanpughi naw a pian tham gui ah kyak ci. 24 Mik mi cu Khanpguhi ah na khu ah chang gui ah mi kyak ci. Khanpughi naw mik mi a na khu nak gui ung, Jew chang gui ung kaa bang ah ka kyak ciah, chang khui hei gui ung kaa phi khu gui ci. 25 Hosea ah ca guk ung Khanpughi naw; “Kei ah ka chang ah ka kyak ci gui cu ka chang ah ka khu gui khai; Ka ka m'hni ah chang pakhui gui cu, Ka m'hni ah chang pakhui ah ka khu gui khai; 26 “A i kho ah phi nang mi cu kei ah chang ah ka nami kyak khai, ci ne a kyak nak gui ah chang gui cu, Ghing ciah Khanpughi ah hta gui nei, ciah khu gui vai nei, ci ne pyein ci. 27 Israel chang gui ah mawng cu Isaiah naw, “Israel chang gui cu, tuinu kem ah laigin k'chu ah ami da ung phi, ngahmi ung kaa chang api naw vah hun nak cu gah khai gui. 28 A i ah kya sei ci ung Khanpughi naw khomdek khan ah chang gui cu, ang ghit ah m'khoi m'chaa gui khai, ci ah mawng ah kyak ci, ci ne pyein ci. 29 Cun kawn ah Isaiah naw, “Hlungtai pi k'baih ciah Khanpughi naw, mi pakhui ka a maih vai ah mi hta ng'shon gui cu ka a nam gein gui vaisu ung, mik mi cu Sodom la Komorah ah maih ah mi kyak khai sute, ci ne a pyein ah maih ah kyak ci. 30 Kei mi ah pyein hlu cu shin ah kyak ci, Khanpughi ah ma ah ng'dung vai ah ka k'tha nak ciah khui hei chang gui cu, ami zum nak awn Khanpughi ung ng'dung nak gah ci gui. 31 Cun ung phi Khanpughi naw a ghu ah chang gui cu, Khanpughi ah ma ah ng'dung nak vai ah thukhan cu shui u ne phi ka hmuk ci gui. 32 A i ah kya sei ci ung ngahmi cu Khanpughi ami zum nak ung ka ng'dui u ne, ami mat ah bilawh nak ung ami ng'duih ah phah ah kyak ci. Cun ah kya sei ngahmi cu cacim theing ung om ciah lung ung ng'vawn ne ng'tang ci gui. 33 Cacim Theing ung; “Teng va, chang gui naw ami ng'vawn nak vai ah, lung tumat cu Zion m'htung khan ah ka m'shan khai nei, Chang gui cu cun ah lung ung ng'vawn ne ng'tang khai gui nei. Cun ung phi Lung ah kyak ciah Bawi Khrit zum ciah chang gui cu, a i zah ung phi ami thuisei nak ka om khai nei, ci ah om ci.
1 Phai nau gui aw, kei naw ka chang gui hun nak ami gah vai cu ka m'lung kyong avan awn ng'za hlu aih netah, ngahmi ah hmawk ah Khanpughi ah ka taigu ci nei. 2 Ngah mi naw Khanpughi ami kyih aa ah mawng cu kei naw akcang hmat ne ka pyein ci nei. Cun ung phi ngahmi ah kyih aa nak ah lam cu ka ng'dung ci nei. 3 Ngahmi naw, Khanpughi naw chang gui ang dung sak nak gui ah lam cu ka hmu u netah, cun ah lam ung ka hteh ah, ami mat naw k'tha na ne ami pian ah lam ung hteit ci gui. 4 Bawi Khrit naw thukhan ah a khin cu ang pyi sak pyi ah kya sei, zum ciah chang nung am Khanpughi ung ng'dung nak cu pe pyi ci nei. 5 Moses naw thukhan lak nak awn, Khanpughi ung dung nak ah mawng a guk cu; “Thukhan ung thu kui lak ciah chang phung cu ghing khai, ciah kyak ci. 6 Cun ung phi cacim theing naw, zum nak awn Khanpughi ung dung nak ah mawng a pyein cu, “A u-ang khankho ah a hang kai kaw! (Cun cu Bawi Khrit hang khu vai ah kyak ci); 7 “A u ang kaa khaw ah a zu kyum kaw! (Cun cu Bawi Khrit sih nak ung a thawh ba vai ah phawng vai ah kyak ci), ci ne nami mat naw nami mat ka nami ng'shi en vai. 8 Cacim theing ah pyein hlu cu; Khanpughi ah ng'thu cu nami pei ah om ci; Cun ah thu cu nami m'gawng awn pyein ne, nami m'lung ung nami m'kum ci, ciah kyak ci. Cun ah thu cu kei naw ka ning m'thein gui ah Khanpughi zum nak ah mawng ah kyak ci. 9 Bawi Jesuh cu Bawipa nei, ci ne ng'kyaa ne, Ani cu Khanpughi naw sih nak ung kaa thawh ba sak ci nei, ci ne nami m'lung ung nami zum ah a kyak ung, nang mi cu hun nak nami gah khai. 10 Mi zum ak awn Khanpughi ung ng'dung nak mi gah ne, mi ng'kyaa nak awn hun nak mi gah ci. 11 Cacim theing ung, “A u chang phi Bawipa zum ciah chang cu thuisei nak ka om khai, ciah om ci. 12 Khanpughi cu hnicim chang van ah Bawipa ah kya ne, ani khu ne ng'zoi ciah chang phung am bamang ciah hrilham zuk m'kyum lawk ci. Cun ah kya sei, Jew chang, khui hei chang ciah m'khoichaa nak ka om ci. 13 Cacim theing naw “Bawipa khu ne ng'zoi ciah chang phung cu hun nak gah khai, ci ne pyein ci. 14 Cun ung phi ngahmi naw ka ami zum ung a i chaa khu ne ng'zoi khai gui ang! Thu pyein ka a mi ng'zak ung, a i chaa zum khai gui ang! Thu shau ne pyein ci ka a om ung, a i chaa ng'zak khai gui ang! 15 Thu shau khai a u naw ka a tuih ung, a u naw thu shau ne pyein khai ang! Cacim theing naw, “Thu Ni zon lawk ciah thukpui gui ah law nak cu ng'khan haih haih ci nei”, 16 Cun ung phi Thu Ni cu chang van naw ka dou ci gui. Isaiah amat naw, “Bawipa, Keimi ah thu pyein cu a u naw zum ci ang!” ci ne pyein ci. 17 Cun ah kya sei thu ng'zak nak awn zum nak cu lawk ci, Bawi Khrit ah mawng shau ne pyein nak ung, thu cu chang naw ng'zak ci. 18 Cun ung phi chang gui naw cun ah thu cu ka ng'za u ne ang! ka ning ng'shi gui hluk ci; Ngahmi naw akcang ah ng'zak ci gui. Cacim theing ung; “Thu Ni shau ci gui ah k'aw cu khomdek khan avan ung Thang ne gawk ci; Ngah mi ah Thu m'kha cu kho cawi kheng ah khut ne gawk pyi ci nei; ” ciah om ci nei. 19 Cun kawn ah ka ning shi ba gui hlu cu, ‘Israel chang gui naw cun ah a mawng cu ka hmuhmat man u ne maa!Khanpughi naw Mose ung ak htuk baih ah am hlan nak cu; Kei naw ka khu ah chang pakhui gui cu mang ne Ka chang gui cu kam thui sak gui khai; Chang pakhui k'she gui awn Ka chang gui cu kam lung k'she sak gui khai, ciah kyak ci. 20 Khanpughi naw Isaiah am cun ah tai pi khai ah a thu pyein cu; Kei ka na shui ciah chang gui naw Kei cu na hmuk ci gui; Kei ah mawng ka k'ta, ka shui ciah chang gui naw Kei cu na khawihnah ci gui, ciah kyak ci. 21 Cun ung phi Israel chang gui ah mawng ung, “Kei na hnu ng'tuk pui ne, kei ah ng'thu ka lak ciah chang gui cu, kei naw amu ak hnuup ka kut shang ne ka na dou gui ci nei” ciah Khanpughi ah ng'thu om ci, ci ne Isaiah naw pyein ci.
1 Cun ah kya sei kei naw ka ning shi gui hluk ci; Khanpughi naw amat ah chang gui cu hnu ng'tuk pui gui ne maa! Ka hnu ng'tuk pui gui ci. Kei ka mat cu Israel chang, Abraham ah hta ng'shon, Benjamin pakhui ah ka kyak ci. 2 Khanpughi naw ak htuk ge ung a ghu ah ak chang gui cu ka hnu ng'tuk pui ci. Cacim theing ung Elijah naw, Israel chang gui cu hnu ng'tuk pui gui ne, Khanpughi ah maa ah ng'thu a pyein cu nami hmat khai nei. 3 Cun ah ng'thu ung Elijah naw, “Khanpughi aw, can ah chang gui naw, na purofet gui cu ngawn ci gui nei; Na mang kiang phi plawh ci gui nei; Kei ka mat bang ka om ba ci, kei cun phi na ngawn khai gui ah k'tha nak ci gui nei, ciah pyein ci. 4 Cun ung phi Khanpughi naw Elijah ah ma ah thu a pyein ba cu, “Kei naw Baal khoshe ah gup ka khawihnah ciah, chang tamkap chih cu, ka mat ah hmawk ah ka k'pawih na pyi ci nei, ciah kyak ci. 5 Tuk bai phi a cun ah maih ah Khanpughi naw am gein nak awn a ghu ah chang api k'pawih ba ci nei. 6 Khanpughi ah ghu nak cu amat ah m'gein nak awn ah kyak ci, cun ah chang gui ah bilawh nak awn ah ka kyak ci. Khanpughi ah ghu nak cu chang ah bilawh om ih nak awn ah a kyak vaisu ung, ani ah m'gein nak cu m'gein nak akcang ah ka kyak khai sute. 7 Cun ah kya sei á i ah pyein vai ang!Israel chang gui naw ami shui cu ka hmuk hlawt ci gui nei. Cun ah ami shui cu Khanpughi ah ghu, chang apihta bang naw hmu hlawt ci gui nei; k'pawih ba ciah chang gui naw Khanpughi ah ng'khu k'aw cu ka ng'zak ci gui nei. 8 Cacim theing ung, “Khanpughi naw cun ah chang gui ah m'lung k'hnga cu aung ang sak gui ci, tuh ngawi gut ung ngahmi cu a i ka hmu ng'za thei ci gui. 9 Cun ah kya sei David naw; “A mi mang ei cu ngah mi ah hmawk ah, ami ng'awh gui la ami ng'cawh nak ah kya sei, Khanpughi naw m'shekat gui sa! 10 Teng ne ka ami hmuh nak thei vai ah ami mik mu sa; Ami zaica nak ah phuih gih awn, amik khei phi ang tai sei ng'khun sa, ci ne pyein ci. 11 Cun ah kya sei Jew chang gui cu, ami dimaih nak ung khut khai ah plawh kheih gui ne maa! ciah ka ning ng'shi gui hluk ci. Cun ah ka plawh kheih gui ci. Ngah mi cu ami shetkat ah hmawk ah hun nak cu chang khui hei gui naw gah ci gui, cun ah kya sei Jew chang gui naw chang khui hei gui cu m'thui nak ci gui. 12 Jew chang gui ah shetkat nak naw, m'dek ah khan chang van am, buhmang ciah hrilham cu gah sak ci, Ngahmi ah mumcha ghawipai nak naw, chang khui hei gui am buhmang ciah hrilham cu gah sak gui ci. Cun ah kya sei Jew chang gui ami van Bawi Khrit ung ami ng'kham law hnuup ung, ngah mi naw hlungtai pi ciah hrilham cu gah khai gui nei. 13 Kei naw nang chang khui hei gui ah maa ah ng'thu ka pyein ci nei. Kei cu chang khui hei gui ah hmawk ah ang duih pui ah ka kyak ci kya sei, ka mat ah bi nak awn ka khahghah ci nei. 14 Kei naw ka mat ah pakhui chang gui ung m'thui nak ah m'lung om khai ah ka bi nak awn, ngahmi ung kaa chang am shah naw bawtah hun nak gah tuk khai gui nei. 15 Khanpughi naw ngahmi cu a nawng gui zah ung, hnicim chang gui cu, a gaa ah ami kyak nak ung kaa naw a teihpui ah ng'thon sak gui zawp ci. Cun ah kya sei Jew chang gui cu Khanpughi naw a dou ba gui zah ung a i ah maih ah kyak khai ang! Ak si gui ghin sak gui ah maih ah caicat vai ah kyak khai nei. 16 M'htut pumat cu k'bou ne Khanpughi am ap ah a kyak ung m'htut pum avan cu ap ah kyak ci, Singghing tumat ah ang zung cu Khanpughi am ap ah a kyak ung ang ban avan phi ap ah kyak ci. 17 Chang gui naw olive sing k'tui ah ng'ban cu m'chun u netah, pyupying k'thui ah ng'ban awn m'dun ne ng'ling ci gui. Pyupying k'thui naw, pyupying k'tui ah ang'zung la a ghing ung kaa, a ei auk tu ah maih ah, nang mi khui hei chang gui naw cu Jew chang gui ung kaa mumcha ghin nak cu nami gah tuk ci. 18 Cun ah kya sei nang mi naw chuk pit ah maih ah kyak ciah ang ban gui cu ka nami paipih vai. Nang mi nami khahghah nak vai a i ka om ci, Nang mi cu ang ban ah nami kyak ci, nang mi naw ang zung a pyaa cu ka nami tu m'bei ci, ang zung a pyaa naw vah nang mi cu ning tu m'bei gui ci. 19 Cun ung phi nang mi naw, “Kei mi naw hmun kami gah vai ah hmawk ah pyupying ah ng'ban gui cu tu pit zawp ciah ka kya ne ang!” na mi cik khai. 20 Nang mi ah pyein cu ng'dung ci. Ngah mi chuk pit nak gui cu Khanpughi ka ami zum ah hmawk ah kyak ci. Nang mi cu Khanpughi na mi zum ah hmawk ah ang ban ah nami kya lawk ci. Cun ung phi nang mi chang ah ka nami ng'shei vai¬ chang kyih aa ne nami om vai. 21 Khanpughi naw ami nupuk ah ang ban gui ah kyak ciah Jew chang gui hngaw ka am dum gui ung, nang mi lai ka ning m'dum gui khai nei. 22 Shin ung Khanpughi cu a i hlawk ah chang m'gein ci la, a i hlawk ah nget ngawng ciah mi hmuk ci. Khanpughi naw kat nak bik ciah chang gui cu ak nuipai ah m'khom chaa gui ci. Cun ung phi nang mi cu a ning m'gein gui khin vai ah nami om ah a kyak ung, Khanpughi naw ning m'gein gui khenggeng ci; cun ah ka nami om ah a kyak ung nang mi cun phi chu pit ne ning ghawt gui khai. 23 Jew chang gui cu ami m'lung thawng sei Khanpughi ami zum ah a kyak ung, ak hmui cu m'dun ba ne geit kaw nak cu om khai, Khanpughi naw cun ah bi hning ci. 24 Chang pakhui hei ah kyak ciah nang mi ah nami ng'tuipui ah kyak ciah pyupying k'thui cu chu pit ne, nami ng'tuipui ah ka kyak ciah pyupying k'tui ung m'dun ne geit hning ah a kyak ung; pyupying k'tui ah ang tuipui ah ang ban ah kyak ciah Jew chang gui cu, ang tuipui ah pyupying ung a zaihta ah m'dun ne geit ba khai ah ka kya ne ang! 25 Phai nau gui aw, nami mat naw nami mat kami hmuhmat tei pyi ci, ciah ka nami ngaih en vai ah thuuk ne ng'kau ciah a mawng cu ka ning m'thein gui hluk ci. Cun cu, Jew chang gui cu ang tai sei ang laam khai gui ah ka kyak ci, Khanpughi ah lawk khai ah khui hei chang gui ami ng'kum ung khut khai ah kyak ci. 26 Cun kawn ah Israel chang avan cu hun nak gah khai gui nei, cun ah mawng cu cacim theing ung; “Hun Bawipa cu Zion khomhtung ah kaa kyum law ne, Jakop ah hta ng'shon gui ah shetkat nak avan cu nawt heng zawp khai nei. 27 Kei naw ngahmi ah shetkat nak cu ka k'phiuawn gui hnuupung ngahmi awn shin ah thukhan cu ka bik khai nei, ci ah om ci. 28 Jew chang gui cu Thu Ni hnu ng'tuk pui u ne, Khanpughi ah gaa ah kya lawk ci gui. Cun cu nang mi khui hei chang gui ah zei nak vai ah hmawk ah kyak ci. Cun ung phi ngahmi cu Khanpughi naw a ghu gui te ah kya ne, ami pupa gui ung thukhan a peit nak gui awn ngahmi cu m'hni gui la ci. 29 Khanpughi naw a u chang phi ghu ne hrilham a peit kawn ah, Khanpughi naw am lung ka m'thawng ba ci. 30 Nang mi khui hei chang gui cu a zana, Khanpughi ka nami lak man ci; cun ung phi nang mi naw tuk bai m'gein nak nami gah cu, Jew chang gui naw Khanpughi ka ami lak ah hmawk ah kyak ci. 31 Cun ah nang mi naw m'gein nak nami gah ah maih ah, Jew chang gui cun phi, Khanpughi ah m'gein nak ami gah vai ah Khanpughi cu ka lak ne om ci gui. 32 Khanpughi naw hnicim chang avan cu, thu ka lak ciah thawng k'cum ah piang gui zawp ci. Cun ah abi cu chang ah hta avan am am gein nak am dang nak hlu ah kyak ci. Khanpughi ah bamang nak cu hlungtai aih ci nei! Khannpughi ah lu ng'lang nak la hmuhmat nak cu thuuk aih ci nei! Khanpughi naw m'hnut ne ak bai cu a u naw a cangkha ah m'dang hning khai ang! Khanpughi ah bilawh mawnglam cu a u naw shum hmat hlawt khai ang! 34 Cacim theing ung!Bawipa ah m'lung ngaih cu a u naw hmat ci ang! Baipa ah cu a u naw m'shum hmuh tu hning ci ang! 35 Baipa naw a thung sah ba vai ah a u naw ani-am kpu mhnik khai ang!ciah om ciah maih ah kuyak ci. 36 Ang tui avan cu Bawipa ah tui sho ah kyak ci. Ang tui avan cu ani awn ghing ne. ani ah hmawk ah om ci gui. Khanpughi ah bamang nak cu ang tai sei cui vai sa!Amen.
1 Cun ah kya sei phai nau gui aw, Khanpughi naw a nam gein nak gui cu dam aih ci kya sei, kei naw ka ning m'cai gui hlu cu; Ak ghing ah m'kui m'khan nak ah Khanpughi ung ng'ap une, a khuut bi nak ung ngun kyuk ne nami zei vai nei. Cun cu nang mi naw nami ng'ap nak cu akcang ah khawihnah nak ah kyak ci nei. 2 Khomdek khan ung zodam nak ung ka nami ng'ku ng'neet tu vai, Khanpughi ung nami m'lung kyong avan ng'thawng sak u ne, m'lung ngaih ak thai awn nami om vai. Cun ung vah ni kiom nak, amat ung zeikiai nak la kumbe nak gui ah Khanpughi ah ang zak hlu cu nami hmat khai. 3 Khanpughi ah na peit ah ba mang nak awn, ak chang sing ka ning m'cai gui hlu cu; na mi mat ung ng'mui ciah tha ah hlung pi khai ah m'lung ka nami m'dam vai. Khanpughi naw a ning peit gui ah zum nak ah azun ak bawng ah ciah, nami mat awn khinkhaa khai ah, nami mat naw nami mat nami m'khoichaa vai nei. 4 Pumsa tumat ung ang phyeek akda om ci, cun ah ang phyeek gui pang ung ami bi vai om phah phah ci. 5 A cun ah maih ah mik mi cu mi da ung phi, Bawi Khrit ung mi kawngat nak awn pumsa tumat ah mi kyak ci, Mik mi cu ng'phyeek ng'pai ciah pumsa tumat ah maih ah mi ng'khih ng'kaih zawp ci. 6 Cun ah kya sei Khanpughi naw m'geinsei nak a na peit gui ah ci ah, mi mat phah phah naw mi gah ah m'gein nak cu mi mang khai. Mik mi ah gah ah m'gein nak cu Khanpughi ah n 'thu pyein nak hning ah a kyak ung, mik mi naw mi zum nak ah ci ah, cun ah m'gein nak awn mi bik khai ah kyak ci. 7 Mik mi ah gah m'gein nak cu, chang gui m'theithang nak gui vai a kyak ung mi m'theithang gui khai. 8 Chang gui k'thamah nak peit nak gui vai a kyak ung, mi pe gui khai. Chang am pektaak ciah chang naw, ng'khai ng'lang nak awn a pektaak vai, huham om sei ng'vai pi ci naw k'tha nak cang ne abilawh vai; geinvai ciah chang m'gein tuk ci naw m'lung gei zeikiai nak awn am hteihtang tu vai. 9 M'hni nak cu akcang ah zumhni nak ah a kyak vai nei. Shetkat nak cu thui na u ne, ni kiom nak cu k'pang khup va. 10 Nang mi cu tumat la tumat khritha phai nau ah maih ah nami ng'khawtsheng vai, tumat la tumat chang m'sui nak tu cu ang ghit ah nami bi vai. 11 Ka damduh ne k'tha na ne bi nami bi vai. Nami m'lung kyong avan ap ne Khanpughi ah khuut nami bi vai. 12 Nami ngaih u om ci kya sei nami zeikiai vai, zaica geinvai nak nami aut law ung hnimgein nak om sa, ang tai sei nami k'taigu vai nei. 13 Pyam thaam ciah khrihta phai nau gui am nami khawhchaam nami tei pai tu gui vai, lam hteit ciah chang gui am nami im kawt nami k'hmawn peit gui vai. 14 Nang mi ning k'shedam na gui ciah chang ah hmawk ah Khanpughi naw hrilham a peit vai ah nami ng'zoih peit vai, cun ah chang gui cu ka zuigen u ne, hrilham nami peit vai. 15 Zeikiai ci gui nami zeikiai pui gui vai, thuikyap ci gui nami thuikyah pui gui vai. 16 Tumat la tumat nami ng'hteinghtang tu vai, ka nami m'gham'ce vai, zawken ciah bi phi nami bi vai, nami mat naw nami mat, nami hmuhmat aih ciah ka nami ngaih vai. 17 Nami khan ah akshe bi lawk ciah a om ung akshe awn ka nami thung ba vai, chang gui ah maa ah ni kiom nak nami bi vai ah nami k'tha nak vai. 18 Chang nung nung awn ng'gei gaan ne nami om vai nei, 19 Teihpui gui aw, phu ka nami tuk nung nung vai, Khanpughi amat naw kat nak cu m'htei khai nei. Cacim theing ung, “Kei naw phu ka tuk khai, kat nak ah ciah kei naw ka thung khai, ci ne Bawipa naw pyein ci. 20 Cun ah kya sei, phu nami tuk nak vaisu ung nami bilawh vai ah cacim theing naw a pyein cu, “Nami gaa cu ei a cawi ung ei nami m'bei tu vai, tui a gha ung tui nami tuu tu vai, cun ah na bi nak awn nang naw na gaa cu na ng'aa sak khai nei, ci ah kyak ci 21 Shetkat nak awn ka na ng'zom men vai, akni awn akshe cu na nang vai nei.
1 Chang pang naw kho uk ciah bawi ah huham cu a lak vai nei. A i huham phi Khanpughi naw ka a m'hnut ung ka om ci nei. Huham gah ne uk ciah khobawi cu Khanpughi naw m'hnut ne am duih ah kyak ci. 2 A u chang phi huham gah ne uk ciah bawi hnu ng'tuk pui ci cu, Khanpughi ah ng'thukhan hnu ng'tuk pui ciah kyak ci; cun ah bik ciah chang cu m'shetkat nak gah khai nei. 3 Akni ah ka om ci naw a kyih vai kyak ci akni ah om ci naw akyih vai ka kyak ci. Huham om ciah bawi cu ka na kyih hlu ung akni ah na om vai nei, cun ung ani naw ning m'hlungtai khai nei. 4 A i ah kya sei ci ung, ani cu nang ah ni nak vai ah Khanpughi naw ak chang ah am duih ah kyak ci. Cun ung phi kat nak na bi ah a kyak ung ani cu na kyih vai, aniung akcang ah shet m'kat nak vai ah huham nak cu om ci. Ani cu Khanpughi ah chang sham ah kya ne, kat nak bik ciah chang gui cu Khanpughi ah huham awn m'shetkat gui ci ah kyak ci. 5 Cun ah kya sei nang cu Khanpughi ah m'shetkat nak kyih nak bang awn ah ka kyak ciah namat ah m'lung kyong theing cim nak awn, uk ciah bawi ah huham cu na lak vai nei. 6 Shin ah a mawng ung nang mi cu kphlam phi nami m'cu ci. A i ah kya sei ci ung, uk ciah bawi gui cu ami bi m'htei ne ami bi ah a kyak ung Khanpughi ah khuut bik ci gui ah kyak ci. 7 Cun ah kya sei nang mi naw nami peit vai ah khin ci phung cu nami peit vai, a khawn m'cu vai ah a mawng om ciah phah phung ah nami m'cu vai nei, uk ciah bawi gui ami van cu m'tamkhah gui ne nami chang m'sui gui vai nei. 8 Nang mi tumat la tumat nami ng'zumhni tu ah kawn ah a i pupawn phi ka om men sa. A paw chang m'hni ciah chang cu thukhan lak ciah kyak ci. 9 A i ah kya sei ci ung, “chang ah k'chuhta ka na kat pui vai, chang ka na ngawn vai, ka na m'guuk vai, chang ah khawh ka na ng'zak hlu dut vai, ci ah thukhan gui la a hei thukhan avan cu, “Na chang paw cu na mat awn m'tang ne nam hni vai, ciah thukhan naw avan ak kum zawp ah kyak ci. 10 Ak chang paw m'hni ciah chang cun naw, a i zah ung phi am hni ah shetkat nak vai cu ka bik khai nei. Cun kya sei ak chang paw m'hni ciah chang cu thukhan a van l ak ciah kyak ci. 11 Nang mi cu nami ih nak ung kaa nami thawh nak ba vai ah a khin gawk law ciah nami hmat pyi ci kya sei, ng'zumhni tu ne nami om vai. A i ah kya sei ci ung mik mi naw hun nak mi gah nak vai ah khaw hnuup cu, mi zum law nak htuk ah ma, ang et law pi k'tai ah hmawk ah kyak ci. 12 Khaw ah mu nak ng'pyi law ne, khaw cu thai law ghi ghi ci nei. Cun ah kya sei mik mi cu, hnup khui ah ng'zak hlu ah om ih nak gui cu mi nawng shut ne, akdei ung gaa tuk nak vai ah li khim cu mi pawng pui khai nei. 13 Mik mi cu akdei ung om ciah chang gui ah maih ah ak ni ah mi om ih khai nei; auk tat nak, om k'she nak, plet beng nak, lu ng'aa nak, ng'tuk ng'ah nak, m'thui m'khang nak gui cu avan mi nawng zawp khai nei. 14 Bawipa Jesuh Khrit cu li khim ah maih ah nami suisak vai nei, ng'tuipui ah nami shetkat nak cu nawt heng u ne, mat ah ng'zak hlu dut ah ka nami om ih ba vai nei.
1 A zum nak ken ciah chang cu nami dou vai, cun ung phi ani ah m'lung ngaih ah mawng ung ka nami ng'cuh ng'can nen pui vai. 2 Azum nak khang ciah chang naw a i ei phi ei hning ci, a zum nak ka khang ciah chang naw, thui an bang vah ei thei ci. 3 A i ei phi ei thei ciah chang naw cun ah ka ei tu thei ciah chang cu ka a zokshe nak vai; Thui an bang ei thei ciah chang naw phi, a i ei phi ei thei ciah chang cu ka ah m'shetkat vai; a i ah kya sei ci ung a i ei phi ei thei ciah chang cu Khanpughi naw a dou pyi ah kyak ci. 4 Nang a u ah kya ne chang hei ah chang sham cu nam khoichaa tu vai ang! Cun ah chang sham naw abilawh a nang la ka a nang cu, amat ah bawi naw m'khoichak khai nei. Ani cu nang khai nei, a i ah kya sei ci ung Bawipa naw ani cu nang khai ah am htei ah kyak ci. 5 Chang am shah naw kho hnuupat cu a hei kho hnuup gui ah kuikyang pi ciah ngai ci, chang am shah naw kho hnuup gui avan cu tang ciah ngai ci. Ngahmi cu a i ah ami ngaih ung phi, cun ah ami ngaih cu dung ciah ngaih gep u sa. 6 Kho hnuup k'ni ngaih tuh ciah chang cu Bawipa am tamkhah nak ah a ngaih tuh ah kyak ci; a i ei phi ei thei ciah chang cu Bawipa am tamkhah nak ah a ei ah kyak ci, a i ah kya sei ci ung ani naw cun ah ei ah hmawk ah Khanpughi cu m'hlungtai ci. Ei am shah hlawi ciah chang cun phi Bawipa am tamkhah nak ah a hlawi ah kyak ci, ani naw phi cun ah a hlawi ah hmawk ah Khanpughi cu m'hlungtai ci. 7 Mik mi ung kaa a u chang phi amat ah hmawk bang ah ka ghing ci, amat ah hmawk bang ah ka sik ci. 8 Mik mi mi ghin ah a kyak ung mi ghin nak cu Bawipa ah hmawk ah kyak ci, mik mi mi sih ah a kyak ung mi sih nak cu Bawipa ah hmawk ah kyak ci. Cun ah kya sei mik mi cu, mi sih ung phi, mi ghin ung phi, Bawipa cu mi kham ci. 9 A i ah kya sei ci ung Bawi Khrit cu, ghing ci la sik ci gui ah Bawipa ah a kyak nak vai ah sih nak ung kaa a thawh ba pyi ah hmawk ah kyak ci. 10 Cun ah kya sei, thui am bang ei hning ciah chang gui, a i ah kya sei nami phai nau nami m'khoichaa ang!A i ei phi ei thei ciah chang gui, a i ah kya sei nami phai nau na mi zokshe nak ang!Mik mi mi van cu a nam khoichaa gui vai ah Khanpguhi ah maa ah mi ng'dui zawp khai nei. 11 Cacim theing ung Khanpughi naw; “Kei cu akcang ah ghing ciah Khanpughi ah ka kyak ci, ci ne Bawipa naw pyein ci, Chang ah hta van cu kei ah maa ah m'khuuk khodoong khai nei. Chang ah hta avan naw Kei Khanpughi ah ka kyak ah mawng cu ng'kyaa ne pyein khai nei, ci ne pyein ci. 12 Cun ah kya sei chang ah hta mi van naw, mi bilawh om ih phung cu, Khanpughi ah maa ah pyein ne mi m'thein khai nei. 13 Cun ah kya sei tumat naw tumat am khoichaa nak cu nawng shut ne, nami phai nau ah cheishoh nak vai la shetkat nak ung a luh nak vai cu, ka kami bi phung phung khai ci ne, nami m'lung ngaih nami phukpit vai nei. 14 Bawipa Jesuh ung ka kawngat nak naw, a i ei phi ang tui pui ah ka ah theingthap nak ka om ci, ci cu na hmat sak ci; cun ung phi, shin ah ei cu ka theing ci ciah zum ciah chang ah hmawk ah cun ah ei cu ka theing ci. 15 Ei tumatmat na ei nak awn na phai nau cu ngaih na khak sak ah a kyak ung, nang naw ani ah khan ah na om k'she nak ah kyak ci. Bawi Khrit ah sih nak cu cun ah chang ah hmawk ah phi kya tuk ci kya sei, tumatmat ah ei nami ei nak awn cun ah chang ah ngaih cu ka khak en sak va. 16 Nang mi naw nik ciah nami ngaih cu chang ah hmawk ah shetkat nak ah ka kya en sa. 17 Khanpughi ah uk nak ah kho cu ei nak la auk nak awn ka ng'phaa ci, Mumcha Theing ah peit ah ng'dung nak, dimdeeih nak la zeikiai nak awn vah ng'phaa ci. 18 Ashin ah maih ah Bawi Khrit ah khuut bik ciah chang cu Khanpughi naw zei nak ci, chang naw phi m'hlungtai ci. 19 Cun ah kya sei mik mi ung dimdeeih nak na pe gui khai la tumat la tumat k'thagui ming peit nak tu vai ah nam hteihtang gui khai cu, ang tai sei mawng nah ne mi bi vai kyak ci. 20 Ei auk vai ei auk nak awn Khanpughi ah bi cu ka m'shet en va. Ei vai phung cu ei vai kyak ci, cun ung phi cun ah ei ei nak awn chang tumatmat kat nak ung luh sak khai a kyak ung, cun ah ei ei cu m'cheishoh nak ah kyak ci. 21 Nami phai nau naw shetkat nak khai a kyak ung, asa phi bai sapyit tui phi bai, a hmun a i ei auk phi bai, avan nami hlawi vai. 22 Shin ah a mawng ung nang naw a i ah zum ne na bi cu, na mat la Khanpughi ung vah ng'shing khai. A mat naw ng'dung ciah a zumnak awn bilou m'khoicha ne, a ngaih gep nak om ciah chang cu zeikiai nak om ci. 23 Cun ung phi amat ah ei nak ah khan ah ngaih gep nak ka om ciah chang cu, a cun a ei ah hmawk ah Khanpughi naw m'shetkat ci, a i ah kya sei ci ung ani ah bi cu zum nak awn a bi ka kyak ci. Zum nak awn ka kyak ciah bilawh phung cu shetkat nak ah kyak ci.
1 Mi zum nak khang htek ciah chang gui naw, azum nak ken ciah chang gui cu m'hteihtang gui vai kyak ci. Mi mat ah zeikiai nak bang vai ah mi bi khai ah ka kyak ci. 2 Mik mi mi van naw azum nak ka khang htek tu phak ciah phai nau gui, ami zum nak a khan htek law tu vai ah, ngahmi ah zeikiai nak la ni kiom nak cu mi piang khai. 3 Bawi Khrit cu amat ah zeikiai nak vai a i ka bik ci, cun ah abi nak vaisu ung cacim theing ung om ciah; “Chang gui naw Bawipa ami k'shedam nak cu kei ami na k'shedam nak ah kyak ci nei, a ciah maih ah chang gui ah k'shedam nak cu gah ci. 4 Cacim ung ami guk phung cu mik mi ami nam theithang nak gui ah kyak ci. Cun ah ami guk ah mawng cu, mik mi naw cacim ah na peit gui ah hnimgei nak la k'thamah nak awn m'lungup ngaih gep nak a om vai ah hmawk ah kyak ci. 5 Nang mi naw Bawi Khrit Jesuh ah lam shum cu lak ne, m'lungat ngaihat awn nami om vai ah hnimgei nak la k'thamah nak ning pe gui ciah Khanpughi naw, nangmi cu ning m'htei gui sa. 6 Cun ung vah nang mi naw mi Bawipa Jesuh Khrit ah Pa, Khanpughi cu k'aw tumat awn a kawngat ah nami m'hlungtai khai. 7 Bawi Khrit naw nangmi cu a ning dou gui ah maih ah, Khanpughi ah bamang nak ang dang vai ah tumat la tumat nami ng'dou tu vai. 8 Kei naw ka ning m'thein gui cu, Bawi Khrit naw a ghin zah ung khuut abi nak cu, Jew chang gui ah hmawk ah kyak ci. Cun cu khanpughi ba ne ang khan ah mawng am dang nak la pu pa gui am khanpughi naw shaitaak nak a peit gui cu ng'dung ne ba khai ah abi nak ah kyak ci. 9 Cun bang ah ka kyak ciah Chang Pakhui hei gui naw phi amat ah chim'gein nak awn Khanpughi ami m'hlungtai tu hlawt vai ah hmawk ah ani cu kyum lawk ciah kyak ci. Cacim Theing ung; “Cun ah kya sei kei naw chang khui hei gui ah ng'lung ah Khanpughi cu kam hlungtai khai nei; Ng'ai awn ka m'hlungtai khai nei, ci ah om ci. 10 Cun kawn ah a pyein ba ma cu; “Chang pakhui hei gui, Khanpughi ah chang gui awn atang ah Zeikiai va, ci ah kyak ci. 11 Cun kawn ah; Chang khui hei gui nami van naw Bawipa cu m'hlungtai va, Chang ah hta avan naw Bawipa cu m'hlungtai va, ci ne pyein ba ma ci. 12 Cun kawn ah Isaiah naw; “Jesse ah hta ng'shon tumat cu dang lawk khai nei; Ani cu khui hei chang gui uk gui khai ah lawk khai nei, Cun ah chang gui naw ani cu ak be ah ngaih u khai gui nei, ci ne pyein ba ci. 13 Zum ne ngaih u nak ah ang zung ah kyak ciah Khanpughi naw, ani ung nami zum nak awn, zeikiai nak la dimdeeih nak cu ning k'be gui sa. Cun ah kya sei zum ne nami ngaih u nak cu, Mumcha Theing hlungtai nak awn, phung ghing ne ng'ghotai khai nei. 14 Phai nau gui aw, nang mi cu ni kiom nak awn be ne, hmuhmat nak phi kum sei, tumat la tumat m'theithang nak hning phi a om ah phah ah ning ngaih gep gui ne ka zeikiai ci. 15 Cun ung phi shin ah ca ung, am shah amawng ama gui ah mawng ung nang mi ka ning m'cai nak gui ung, kei naw Khanpughi ah na peit ah akhin k'ni cu mang ne m'gai nak awn ka guk nei. 16 Cun ah m'gai nak cu chang khui hei gui ah hmawk ah a khuut bi vai ah Bawi Khrit Jesuh ah chang sham ah kyak nak ah kyak ci. Chang pakhui hei gui cu Khanpughi ah dou hlu ah khawihnah nak ah kyak ci. Chang pakhui hei gui cu Khanpughi ah dou hlu ah khawihnah nak ah kyak ciah, Mumcha Theing naw Khanpughi am a ap ah ami kyak law vai ah, keinaw k'taigu ah bi bi ne, Khanpughi ah kaa lawk ciah Thu Ni cu shau ne ka pyein ci nei. 17 Bawi Khrit Jesuh ung kawngat nak awn, Khanpughi ah khuut ka bi hning ah phah ah, kei cu khahghah ne ka zei ci nei. 18 Chang khui hei gui naw Khanpughi ah ng'thu ami lak tu vai ah, Bawi Khrit naw ana bilawh sak ah mawng cu, kei naw m'gai ne ka pyein khai nei. Cun ah Khanpughi ah ng'thu ami lak law tu cu, kei ah thu pyein la bilawh nak 19 Caicat vai ah cai aih gui vai la ngaih khit gui vai, Mumcha Theing ag hlungtai nak gui awn ah kyak ci. Cun ah kya sei kei cu, Jerusalem ung kaa naw Illirikam ung khut sei, ka hteh nak phung la ka gawk nak phung ung, Bawi Khrit ah mawng Thu Ni cu ak be ah shau ne ka pyein ci. 20 Kei cu chang gui ah cawh nak pyi ah im hmun ung ka ka cokyang hluk ci, kei ah ng'bu nak cu, Bawi Khrit ah mawng ka ng'za tu phak ciah khohmun ung ah, Thu Ni cu shau ne pyein vai ah kyak ci. 21 Cacim theing ung; “Cun ah Bawi ah mawng cu, a u naw ka a pyein man ung phi, Ngahmi naw hmu tuk khai gui nei, Ka ng'za tuh man ciah chang gui naw phi hmat tuk khai gui nei, ciah a pyein ah maih ah kyak ci. 22 Shin ah a mawng awn nang mi ah ka gawk law vai ah kei naw akda vei kak tha nak ci. 23 Cun ung phi cun ah kho ung ka bi gui vai cu, tuk bai ka bi pyi ci nei. Nang mi ah ka law vai ah cau pui tui ne ka ngaih tuh ah maih ah, 24 tuk bai ka law hning khai ah ka ngai ci nei. Kei cu Spain kho ah ka hteh lam ah, nang mi ah ka lawk khai ah ka ngai te ci, nang mi ah om nak ah a shang ka om tu kawn ah, Spain kho ah ka hteh hlawt vai ah nami na m'hteihtang tu vai ka ng'za hluk ci nei. 25 Cun ung phi tuk bai hta kei cu, Khanpughi ah chang gui m'hteihtang gui vai ah, Jerusalem ah ka hteit khai nei. 26 A i ah kya sei ci ung Macedonia kho la Achaia kho ah Khritha bum gui naw, Jerusalem ah pyamthaam ciah Khanpughi ah chang gui cu m'hteihtang peitaak gui vai ah ami k'bai pyi ah hmawk ah kyak ci. 27 Cun ah ami k'bai cu, chang ah bi sak gui ah ka kyak ci, ami mat ah ngaih ah, ami mat ah m'gein nak awn ami bi ah kyak ci, pyamthaam ci m'gein tu vai cu ngahmi ah bi ah kyak ci. Jew chang gui naw, khui hei chang gui am, ami mumcha hrilham cu ami teipai tu gui ah kya sei, khui hei chang gui naw phi, Jew chang gui am ami pumsa hrilham cu, ami teipai gui vai ah kyak ci. 28 Cun ah kya sei kei naw cun ah gahtang ah ngui gui cu, ngahmi am pe gui ne, ap nak gui ah mawng cu ka bi zawp kawn ah, Spain khaw ah ka hteh nak lam ah, nang mi ah om nak ah phi ka lawk khai nei. 29 Kei cu nang mi ah om nak ah ka law ah a kyak ung, Bawi Khrit ah hrilham ak be law pui ne ka lawk khai ah kei naw akcang ah ka hmat ci nei. 30 Phai nau gui aw, Bawipa Jesuh Khrit mi zum nak la, Mumcha Theing ah na peit gui ah zumhni nak awn; kei ah hmawk ah kei awn atang ah Khanpughi ah nami taigu tu vai ah ka ning khu gui ci nei. 31 Judea kho ah ka zum ci ah chang gui ka phiawn nak gui vai ah kei ah m'hteihtang nak gui cu, Jerusalem a kaa Khanpughi ah chang gui naw zeikiai ne ami dou nak hning vai ah, nami taigu vai nei. 32 Cun kawn ah Khanpughi naw ang zak hlu a om ung, zeikiai nak awn nangmi ah om nak ah law ne nang mi awn atang ah lunlawi ne ka om tuk khai nei. 33 dinggei nak ung mi zum ah kyak ciah Khanpughi cu, nami van awn atang ah om sa, Amen.
1 Kei naw mi be Phoebe ah mawng cu kuikyan ne ka pyein hluk ci. Ani cu Cenchreae gawnu, khritha bum ung bi bik ci. 2 Khanpughi ah chang gui ah mi kyak ci kya sei ani cu Bawipa ah ming awn nami dou vai nei. Nami m'hteihtang tu vai a hlu ah a kyak ung nami m'hteihtang tu vai nei. Ani cu chang akda m'hteihtang tuk ciah teihpui k'ni ah kyak ci, kei phi nam hteihtang tuk ci. 3 Bawi Khrit Jesuh ah khuut bi nak kami biat ciah Pricilla la Aquila cu ka zavaih na goi ci nei. 4 Ngah ni cu kei ah hmawk ah ani hnun gui pe ne bi bik ci goi nei. Ngah ni cu kei bang ah ka kyak ciah khui hei chang khritha bum avan naw zei na goi ci gui nei. 5 Ami mat ah im ah ng'bum ne pum ci gui ah khritha bum gui cun phi ka zavaih na gui ci nei. Asia kho ung Bawi Khrit zum law maa ciah ka teihpui k'ni Epaenetus cun phi khaih na ne, ka zavaih nak ci nei. 6 Nang mi ah hmawk ah k'tha nah ne bi bik ciah Mari cun phi zavaih nak nei. 7 Andronikas la Juniasr cun phi ka zavaih na goi ci nei. Ngah ni cu kei awn atang ah thawng kyum ci goi ah Jew chang goi ah kyak ci; ngah ni cu ang duihpui gui ah ng'lung ah chang khli naw hmat goi sei, kei ah ka zum tu pha ung Khritha ah kya pyi ci goi ah kyak ci. 8 Bawipa ung kawngat ne ka teihpui k'ni ah kyak ciah Ampliatus phi ka zavaih nak ci nei. 9 Bawi Khrit ah khuut atang ah mi bik ciah Urbanus la ka teihpui Stachis phi ka zavaih na goi ci nei. 10 Bawi Khrit ung khang ciah Apelles la Aristobulus ni kyong cun phi ka zavaih na gui ci nei. 11 Jew chang ah kyak ciah Herodion la Narcissus ni kyong, Khritha phai nau gui cun phi ka zavaih na gui ci nei. 12 Bawipa ah khuut bik ci goi ah Tryphaena la Tryphosa la, Bawipa ah hmawk ah akda bik ciah ka teihpui Persis gui cun phi ka zavaih na gui ci nei. 13 M'hlungtai vai ah Bawipa ah khuut bik ciah Rufus la ahta ah maih ah ang tai sei nam hteihtang ciah anu ah khan ah ang htei ah ka zavaih ci nei. 14 Asinchritus, Phlekon, Hermes, Patrobas, Hermas, la ngah mi awn om ci gui ah khritha phai nau gui avan cu ka zavaih na gui ci nei. 15 Philolokus la Julia, Nereus la abe, Olympas la ngahmi awn om ci gui ah Khanpughi ah chang gui avan cu ka zavaih na gui ci nei. 16 Phai la nau ah ng'ui ng'hnam ne, tumat la tumat ng'zavaih na tu va. Bawi Khrit ah Khritha bum avan naw nang mi cu ning zavaih gui ci nei. 17 Phai nau gui aw, nang mi naw nami gah ah m'theithang nak gui cu hnu ng'tuk pui ne, chang gui ah m'lung ngaih ng'pai sak ne, chang gui ah zum nak lam hma sak ciah chang gui cu, nami geing nak gui vai nei, ngahmi cu nami hlawi gui vai nei! 18 Cun gui cu mi Bawipa Jesuh Khrit ah khuut bik ci gui ah ka kyak ci, a i ei ei ung ba khai ciah ngaih tuh ne bik ci gui ah kyak ci. Ngahmi naw tuihlim ciah ng'thu la m'hlungtai ah k'chiu awn ng'dung ciah chang gui cu m'hleeihlak ci gui nei. 19 Nang mi naw Thu Ni cu a i hlawk ah nami m'lung ung nami khan htek sak cu chang avan naw hmat ci nei. Cun ah kya sei nang mi ah hmawk ah ang htei ah ka zei ci. Nang mi cu ni kiom nak hmat ne lunglang ciah chang ah kya u ne, shetkat nak phiawn nak ciah nami kyak vai ah ka ng'za hluk ci. 20 Mi dinggei nak ah ng'zung ah kyak ciah Khanpughi naw Satan cu ang ghit ah m'hnoi ne nami khophaa 'ka ah gawk sak khai nei. Mi Bawipa Jesuh ah m'geinsei nak cu nang mi ah khan ah om sa. (Aí shah naw shin ah ca kyawng cu nawng shut ci). 21 Kei awn atang ah kani bik ciah Timothi la kei ah maih ah Jew chang ah kyak ciah Lucius, Jason la Sosipater gui naw phi Khritha gui zavaih na gui ci gui nei. 22 Kei, Tertius, naw shin ah ca cu lak ne ka guk nei, kei naw phi Khritha zaviah nak cu ka ning m'khah law gui ci nei. 23 Kei na khinchah nak ci, khritha gui naw ami pum nak im nak ciah Kaius naw phi ning zavaih na gui ci nei. Gawmang ah nguimkum, Erastus la mi phai nau Kuartus naw phi ning zavaih na gui ci goi nei. 24 (Mi Bawipa Jesuh Khrit ah m'geinsei nak cu nami van ah khan ah om sa® Amen. 25 Khanpughi ah bamang nak cu mi m'hlungtai khai nei! Ani naw nang mi ah zum nak cu ning khanhtek sak gui ci nei. Kei naw Bawi Jesuh Khrit ah mawng Thu Ni ka shau nak ung shin ah ka pyein ci, cau puipui tui ne ng'thup ne om ciah ng'zih ciah ng'dung nak naw phi a cun na m'dang ci. 26 Cun ung phi tuh bai chu, cun ah ng'zih ciah ng'dung nak cu profet gui ah guk ah cacim ung dang zawp pyi ci nei. Ang tai ah ghing ciah Khanpughi ah thukhan awn, kho avan ung chang avan naw hmat ne, zum ne, ami lak vai ah cun ah ng'dung nak cu shau ne pyein pyi nei. 27 Tumat bang nak ciah Khanpughi nah ne, apang avan lunglang hmuhmat ciah Khanpughi cu, Bawipa Jesuh Khrit awn ang tai sei bamang ne om sa! Amen.
1 Khanpughi ah ang zak hlü ah khü ne, Bawi Khrit Jesuh ah ang düihpüi ah am düih ah kei Paul la mi nau Sosthenes naw; 2 Korin gawnu ung Khanpughi ung ng'bum ciah chang gui la, a kho päng ung kaa mi Bawi la ami Bawi ah Bawipa Jesuh Khrit khawihnah ciah chang avan la, Bawi Khrit Jesuh ung kawngüt nak awn Khanpughi ah chang avan la, Bawi Khrit Jesuh ung kawngüt nak awn Khanpughi ah chang theing ah a khü gui ah chang gui am ca ning guk law gui nei. 3 Mipa Khanpughi la Bawipa Jesuh Khrit ah m'geinsei nak la dimdeeih nak cu nami van ah khan ah om sä. 4 Nangmi am Bawi Khrit Jesuh ung geinsei nak a ning pek gui ah hmawk ah Khanpughi cu ang tüi sei kam hlüngtai ci. 5 Nang mi cu Bawi Khrit ung nami kawng ät nak awn, thu m'gawng thei nak la hmuhmat nak mah mah ah bühmang nak cu nami gah ci. 6 Keimi naw kami pyeinsak ah Bawi Khrit ah mawng cu nami m'lung kyong ung phung ghing ne khäng pym ci. 7 Cun ah kya sei nangmi naw Bawi Khrit Jesuh a kyum law vai cu nami gin zah ung, nangmi naw kä nami gah tu ah hriham cu a i kä om khai. 8 Ani naw nangmi cu kho a khütunggawk sei ning düng sak gui khai. Cun ah kia sei Bawipa Jesuh Khrit naw ng'thu am chaa hnüüp ung cu kat nami phiawn nak khai. 9 Khanpughi cu dängnak apnak ah kyak ci. Ani naw nangmi cu Ahtapa mi Bawipa Jesuh Khrit ung nami ng'awi gei vai ah aning khü gui ah kyak ci. 10 Phäinau gui aw, Mi Bawipa Jesuh Khrit ah huham awn kei naw nangmi cu ka ning m'cumcäi gui ci nei. Nami thu m'gawng ung nami kawng ät vai, cun ung nami ng'phyeekpai nak kä om khai. M'lung ngaih tumat, bä nak tumat ung nami kawng ät zawp vai. 11 Phäinau gui aw, nangmi nami ng'gen tu ah mawng cu Chloe ah kyongkhui chang gui naw nam thein u sei ka ng'zak ci nei. 12 Nangmi ung kaa chang am shah naw kei cu Paul ah nak chang cik ci, am shah naw Apollos ah nak chang cik ci, am shah naw Peter ah nak chang cik ci, am shah naw Bawi Khrit ah nak chang ci sei aheihei ahnami thuom cu ka pyein na kyak ci. 13 Bawi Khrit cu aphäh phäh ah ng'pyeekpai ne ang! Nangmi ah hmawk ah kutlam tung khan ah sik ci cu Paul ah kia ne-ang? Nangmi cu Paul ah ming awn tui nami ng'hniim ne-ang? 14 Crispus la Kaius ah kawn ah nangmi a u phi, tui kä ka ning hniim sak gui ci kia sei Khanpughi kam hlüngtai ci. 15 Cun ah kia sei nangmi cu kei ah ming ung tui nami hniim ciah a u naw kä pyein hlawt khai. 16 (Stepha-nas la akyong ung kaa gui cu tui ka ng'hniim sak gui ci, cun kawn ah a u tui ka ng'hniim sak kä ka shäm ba ci). 17 Bawi Khrit naw tuihniim nak ka pek khai ah ana tüih ah kä kyak ci. Thu Ni ka pyein khai ah ana tüih ah kyak ci. Cun ah kya sei hnicim chang ah hmuhmat nak ah thu kä pyein ne, kutlam tung ung Bawi Khrih ah sih nak ah hlüngtai nak kä a häu vai ah cun ah Thu Ni bäng pyein vai ah kyak ci. 18 Kutlam tung ung Bawi Khrih ah sih nak ah mawng cu, dimaih khai ah chang gui ah hmawk ah akholä ah a kyak ung phi, hun nak gah ci gui ah mik mi ah hmawk ah, Khanpughi ah hlüngtai nak ah kyak ci. 19 Cacim ung; cäi vai ci gui ah lunglang nak cu di sak ne, Langkhaa ci gui ah hmuhmat nak cu ka heng khai ne!ä ciah om ci. 20 Cun ah kia sei hmuhmat ciah chang a hawi-ang a om, Cacim hmat ciah chang ahawi-ang a om, ng'thu m'gawng thei ciah chang a hawi-ang a om! Khomdek khan ah hmuhmat nak phung cu Khanpughi naw gu-aang sak pyi ci nei! 21 Khomdek chang ah hmuhmat nak awn Khanpughi a u naw kä a hmat hlawt vai ah, Khanpughi naw ak cäikhai nak awn pyang ci nei. Chang gui naw gu-aang nak ah ami ngaih ah, keimi ah pyein ah thu awn zum ciah chang gui cu hun gui vei ah Khanpughi naw k'bäi ci nei. 22 Jew chang gui naw cäi aih vai gui cu k'thäh ci gui, Karikchang gui naw hmuhmat nak cu shum ci gui. 23 Keimi läi cu kutlam tung ung ami ngawn ah Bawi Khrih ah mawng säu ne kami pyein ci. Cun cu Jew chang gui ah kä ng'ak hlä, clang khum hei gum ah hmawk ah akholä ah kyak ci. 24 Cun ung phi Jew chang phi bäi, khui hei chang phi bäi, Khanpughi naw a khäpi ah chang phung ah hmawk ah Bawi Khrih cu Khanpughi ah hlüngtai nak la k'cäikhai nak ah kyak ci. 25 Khanpughi ah shuhghawi nak ah ngaih cu hnicim chang ah hmuhmat nak ahtah bä pi ci, Khanpughi ah k'tha m'zu nak ah ngaih cu, hnicim chang ah k'thamah nak katah bä pi ci. 26 Phäinau gui aw, nami mät Khanpughi naw a ning khü gui ah mawng cu nami ngaih tüh ba vai nei. Hnicim chang ah hmuh nak ung, nang mi cu, hmulmatciah chang, hlüngtai ciah chang, a pakhui küikyang ciah chang kä nami da ci. 27 Cun ung phi Khanpughi nawhmuhmat ciah chang gui ah ng'aa nak vai ah chang k'shekha gui cu ghü gui ci; Thamah ciah chang gui ah lä nak vai ah ak tha m'zu gui cu ghü gui ci. 28 Khanpughi naw khomdek khan ung chang naw bä ciah ang ngaih gui m'shet nak vai ah, chang ah zaw k'she nak, chang ah päipih gui cu ghü gui ci. 29 Cun ah kia sei Khanpughi ah maa ah a u chang phi a khähghah vai amawng kä om ci. 30 Khanpughi naw nang cu Bawi Khrih Jesuh ung ning kawng ät sak gui ci, Khanpughi naw Bawi Khrih cu mik ah Lulang nak ah kyak sak ci. Bawipa awn mik mi cu Khanpughi ung mi ng'düng ci; mik mi cu Khanpughi ah chang theing ah mi kia law ne, phiawn nak mi gah ci. 31 Cun ah kia sei cacim ung om ciah mäih ah, A u chang phi khähgha hlük ciah chang phung cu, Bawipa ah bi nak ah khan ung khänghah sä.
1 Phäinau gui aw, kei naw nangmi ah law ne, Khanpughi ah ng'düngcim 2 Nangmi awn atäng ah ka om zah ung kei cu Bawi Zesuh Khrih ah mawng la kutlam tung ung a sih ah mawng ah kawn ah a i phi avan m'hnih ne nawng shüt vai ah ka k'bäi pyi ci nei. 3 Cun ah kya sei kei cu nangmi ah ka law zah ung ka k'tha ken sei, kyikyawk ne, 4 ka pyeinsak m'theithang nak ung, hnicim chang ah hmuhmat nak ah thulung cu kä ka pyein ci, Khanpughi ah Mumcha hlüngtai nak awn be ciah ng'thulung bäng awn ka pyein ci. 5 Cun ah kia sei nangmi ah zun nak cu hnicim chang ah hmuhmat nak ung kä phung ci, Khanpughi ah hlüngtai nak ung phung ci. 6 Cun ung phi kei naw cäivai nak ah ng'thu cu mumcha ng'bähbei pyi ci gui ah maa ah ka pyein ci. Cun ah cäivai nak cu khodek khan awn kä ng'phaa ci, khodek khan bawi gui ah hlüngtai nak awn phi kä ng'phaa ci, khodek khan bawi gui ah hlüngtai nak cu ken law pipi ci nei. 7 Kei naw ka shäu ah Khanpughi ah ng'cim ciah cäivai nak cu, hnicim chang ah maa ah ng'zih ciah cäivai nak ah kyak ci. Cun cu khodek kä a tüisho pha ung mik mi ah bämang nak vai ah a gäi pyi ah kyak ci. 8 Khodek khan bawi gui naw cun ah cäivai nak ah mawng cu a u naw kä hmat ci. Ngahmi naw ami hmat vai sä ung bämang ciah Bawipa cu kutlam tung ung kä ngawn khai sä gui te. 9 Cun ung phi cacim ung; Chang naw kä a hmuh man, kä a ng'zak man, Cun ah kia lawk khai ciah chang naw kä a ngaih tüh man, gui cu, Khanpughi naw ani m'hni ciah chang gui ah hmawk ah pyamtham pyi ciü ciah om ci. 10 Khanpughi naw mik mi am amät ah m'zih gui cu, Mumcha awn nam dang gui ci. Mumcha naw apäng avan bäng ah kä kyak ciah, Khanpughi ah thuuk ne ng'zih ciah ang bä nak gui cun phi shuilei ci. 11 Chang tumat ah amawng avan cu ani ah kyong ung om ciah ang mumcha naw vah hmat zawp ci; a cun ah mäih ah Khanpughi ah mawngma avan cu Khanpughi ah Mumcha naw vah hmat zawp ci. 12 Mik mi cu shin ah khodek khan ung mumcha mi gah ciah kä kyak ci; Khanpughi naw a tüih law ah Mumcha cu mi gah ciah kia ci. Cun ah kia sei mik mi naw Khanpughi ah na peit gui phung cu mi hmat ci. 13 Cun ah kia sei Mumcha 14 Mumcha kä gah ciah chang naw Khangpughi ah Mumcha ung ka lawk ciah m'gein nak cu kä gah hlawt khai. Mumcha ung phung pawng ci naw vah a cun ah aphu cu m'khoicha hlawt ci kia sei, Mumcha kä gah ciah chang naw, Mumcha ah m'gein nak ah mawng cu ak cang ah kä hmat ci, ani ah phäh ah cun gui cu akholä ah kyak ci. 15 Mumcha gah ciah chang naw apäng avan na aphu cu m'khoicha hlawt ci, cun ung phi ani cu a u naw küm khoichaa hlawt. 16 Cacim theing ung; Bawipa ah m'lung ngaih cu a u naw hmat ci-ang? Bawipa cu a u naw m'cumcäi hning ci-ang? ä ciah om ci. Cun ung phi mik mi cu Bawi Khrih ah m'lung ngaih mi gah pyi ciah kyak ci.
1 Phäinau gui aw, shin ah a mawng ung kei naw nangmi cu Mumcha khüighaat ciah chang gui ah mäih ah kä ka ning thu püi gui ci; khomdek chang ah mäih ah phi bäi, Bawi Khrih ung htazät hta gui ah mäih ah phi bäi ka ning thu püi gui ci. 2 Nangmi cu guh ciah ei kä nami ei pha thei ci kya sei, suuktui bäng ka ning tu gui ah kyak ci. Cun ung phi nangmi naw cun hngaw kä nami kdääk m'khüt ci. 3 A i ah kia sei ci ung nangmi cu khomdek chang gui ah om ah mäih laih laih ah vah nami om ci. Tumat la tumat nami m'thüikhang ci, nami ng'vawng'shang ci, cun ah nami om naw khomdek chang gui ah mäih düt ah nami om cu m'dang ciah kä kia ne-ang? 4 Nangmi ung kaa am shah naw, Kei cu Paul ah na chang, cik ci, am shah naw Apollos ah na chang cik ci, ä cun ah nami om cu khomdek chang ah mäih düt ah nami om ah kä kia ne-ang? 5 Apollos cu a u-ang? Paul cu a u-ang? Keimi cu Khanpughi ah changshäm ah kia u ne, nangmi naw Khanpughi nami zum tu vai ah kami ning m'shüm tu gui ciah kyak ci. Keimi tumat ci naw Bawipa naw anam hnüt peit gui phäh phäh ah khuut cu kami bik ci. 6 Kei naw m'shi ka geit ci, Apollos naw tui shawi ci, cun ung phi ng'lih pyo sak ci cu Khanpughi ah kyak ci. 7 M'shi geit ci la tui shawi ci cu ak tung ah kä kyak ci, ng'lih pyo sak ciah Khanpughi cun vah ak tung ah kyak ci. 8 M'shi geit ci la tui shawi ci cu ani ng'lak mah nak kä om ci; Khanpughi naw ak chang sing cu amät ah bi phäh phäh ah ci ah m'cümhnah nak pek khai. 9 Keimi cu Khanpughi ah khuut atäng ah kami bik ciah bik bi gui ah kami kyak ci, nangmi cu Khanpughi ah lomaa ah nami kyak ci. Nangmi cu Khanpughi ah im ah phi nami kyak ci. 10 Kei naw Khanpughi ah na peit ah m'gein nak cokyang thei ciah chang ah mäih ah, ng'lei leh ne kam hnep ci, a hei chang tumat naw a cun ah khan ah cokyang ci. Cun ung phi cokyang lawk ciahchang cu a i chaa ah a cawhkyan law ah geing nak khenggeng vai nei. 11 Khanpughi naw Bawi Jesuh Khrih tumat bäng awn ng'lei leh ne am hnep pyi ah kia sei, a hei ng'lei leh hning khai a u kä om ci. 12 Chang am shah gui naw cun ah ng'leileh ak khan ah ghui ni, ngui ni, vailung ni awn cokyang khai gui; chang am shah gui naw sing ni, m'ghaw ni, htang gong ni awn cokyang khai gui. 13 Cun ah chang gui ah cawhkyan nak ah a phu phäh phäh cu, Bawi Khrit a kyum law hnüüp ung ng'tän ne dang lawk khai. Cun ah hnüüp ung meidüi naw chang tumat ciah bi cu m'dang khai; cun ah mei naw chang tumat ci ah bilawh cu akcang ah m'hnüt m'cah ne m'khoichak khai. 14 Mei naw kä a uih m'khüt vai ah cokyang ciah chang cu m'cümhnah nak gah khai. 15 Cun ung phi chang tumat ah cawhkyan nak cu mei naw a uih ah a kyak ung, ani ah bilawh cu dimaih ciah kyak khai, cun ung phi amät läi cu meidüi ah leeng ung kaa phiawng lawk ciah mäih ah hun nak gah khai. 16 Nangmi cu Khanpughi ah pum im ah nami kyak ci, nangmi ung Khanpughi ah Mumcha om ci!ci cu akcang ah nami hmat ciah kä kya ne-ang! 17 Cun ah kya sei Khanpughi ah pum im m'shet ci cu, Khanpughi naw m'shet khai. A i ah kya sei ci ung Khanpughi ah pum im cu ng'ciim ci, nangmi nami mät cu Khanpughi ah pum im ah nami kyak ci. 18 A u naw phi amät naw amät küm hleei en sä. Khomdek khan ah mawng ung kei ka hmuhmat ci, cik ciah chang cu, akcang ah hmuhmat ciah a kyak nak vai ah, chang k'she ah kya sä. 19 Khomdek chang gui naw cäivai nak ah ami ngaih cu Khanpughi ah maa ah akholä ah kyak ci. Cacim ung; äKhanpughi naw hmuhmat ciah chang gui cu ami mät ah theileh nak awn pha ba gui ciü ciah om ci. 20 Cacim amanwg hei ung, Hmuhmat ci gui ah ngaih tüh nak cu akholä ah kyak ci, ci cu Khanpughi naw hmat ciü ciah om ci. 21 Cun ah kya sei chang ah bilawh nak awn a u phi kä khähghah hning ci. Akcang ah apäng avan cu nang mi naw nami khäm ci. 22 Apollos, la Peter ni, shin ah khomdek khan ni, sih nak la ghin nak ni, tuh bäi kaa la ngawi ah kaa vai ni, avan nangmi naw nami khäm ci. 23 Nangmi cu Bawi Khrih naw ning khäm gui sei, Bawi Khrih cu Khanpughi naw khäm ci.
1 Nangmi naw keimi cu Khanpughi ah ng'düngciim nak lääng ne m'htei ci gui ah, Bawi Khrih ah changshäm ah kami kyak ciah nami hmat vai nei. 2 Cun ah changshäm ung om khai ah k'thamah nak tumat cu amät ah bawi ung ang bekhüt nak ah kyak ci. 3 Kei cu nangmi naw nami nam khoichaa ung phi changah m'hnüt nak am nami na tüihtok ung phi, a i ah kä ka ngai ci; Ka mät naw ka mät phi m'khoichaa nak kä ka bik ci. 4 Kei ah kam lung kyong cu theingcim ci, cun cu kei ung kat nak kä om ciah ka pyein na kä kyak ci. Kei nam khoichak ci cu Bawi tumat bäng ah kyak ci. 5 Bawipa ah akhin kä a gawk law pha ah chuih, nangmi naw a u phi kä nami m'khoichaa en ba vai. Bawipa a gawk law ung khüt sei ak hnubäih ah m'khoichaa nak cu nami gin vai. Bawipa naw akdei law püi ne, hmüp khui ung ng'zihkuh ci gui la chang gui ah m'lung kyong ung thuhthaw gui avan cu dang sak zawp khai. Cun kawn ah chang nüng nüng naw amät awn khin ciah Khanpughi ah m'hlüngtai nak cu gah khai. 6 Phäinau gui aw, nangmi ah hmawk ah shin ah amawng ung, Apollos la kamät awn m'tumtäng ne ka pyein ah kyak ci nei. Cun cu Thukhän cu kä nak kaan vaiä ciah thu thuuk cu hmat ne nami ng'thei nak vai ah hmawk ah kyak ci nei. Nangmi cu tumat la tumat kä nami ng'khinkhawn tu vai, kä nami ng'päipih tu vai. 7 A u naw nangmi cu chang hei ah nami hang tai pi khai ah ning piang gui khai-ang? Nangmi ung om ci phung avan cu Khanpughi ah ning peit tui ah kä kya na ang! Nami gah taang gui avan Khanpughi ah kä ning peit gui ah ngaih vai ah nami khähghah nak cu, a i hawkchaa ah-ang? 8 Nangmi cu nami ng'zak hlü päng kumbe pyi ne maa! Nami ng'bäh mang ei pyi ci maa!Keimi hnaw ghangpughang ah kä kya u ngä sei, nangmi ghangpughang ah nami kya pyi ci maa! Nangmi cu akcang ah ghangpughang ah nami kyak vai ka ng'za hlük ci, cun ung vah keimi phi nangmi awn atäng ah ghangpughang ah kami kya tuk khai. 9 Ami ngawn vai ah ami phaa ah gaa cu, phak ci gui chang khli ah ng'nawng nak ung ak hnu bäih ah ami hteh sak gui ah mäih ah, khankho chang la hnicim chang gui naw ami na teng gui vai ah, keimi ang düihpüi gui cu Khanpughi naw ak hnu bäih ah nam düih gui ciah ka ngai ci nei. 10 Keimi cu Bawi Khrih ah hmawk ah chang she ah kami kyak ci, Cun ung phi nangmi cu Bawi Khrih ung nami kawng ät nak awn cäivai ciah nami kyak ci!Keimi cu kami k'tha ken ci, nangmi cu nami k'thamah ci; Keimi cu chang naw na päipih gui ci, nangmi cu chang naw ning chang m'sui gui ci! 11 Tuh bäichü akhin ung keimi cu kami cawigha ci, kami päkheei ci; Tukthah nak kami gah ci; im lo k'kaa ah om ne kami ng'plon shäi shäi ci; 12 Keimi cu k'thagui na sei kami bilo ci. K'shedam nak kami gah ung hrilham kami pek ci; dukdeiu nak kami gah ung, kami hniimgei ci; 13 Na zokshe na gui ci a om ung m'gein nak thu kami m'khäh ci. Keimi cu tuh bäichü m'dek khan ah k'shinshap, khomdek ung ng'awt ng'saup ah mäih ah kami kyak ci. 14 Shin ah ka guk cu nangmi ka ning lä ng'aa nak sak gui ah kä kyak ci, ka ning m'hni ah ka ning hta gui ka ning m'shüm thein nak gui ah kyak ci. 15 Khrihta ah nami ghin nak ung ning m'theithang gui khai tämkäp phyaa khak a om ung phi nami Pa cu tumat bäng ah kyak ci. Kei naw Thu Ni cu nangmi ah law püi ngä sei, Bawi Khrih Jesuh ung nami ghin nak tu awn kei cu nangmi ah pa ah ka kya lawk ci. 16 Cun ah kya sei kei cu nami na thei tu vai ah ka ning m'cäi gui ci. 17 A cun ah mawng ung Timohti cu nangmi ah ka tüi lawk khai nei. Ani cu khrihta ghin nak ung ngaih gep vai la bekhüt ciah ka hta ah kyak ci nei. Kei kamät naw läk netah akho päng Khrihtabum gui ung kam theithang ah, Bawi Khrih Jesuh ung kawng ät nak ah ghin nak thai ah amawng tung gui cu ani naw nagmi am ning shäm hmat ba sak gui khai nei. 18 Nangmi ah kei kä ka law ba khai ah ngai u netah chang am shah gui cu chang ah ng'shei ci gui nei. 19 Cun ung phi Khanpughi naw ang zak hlü ung kä shou pha sei kei ka lawk khai nei. Cun ung cun ah chang gui ah thu m'gawng bäng ah kä kyak ciah, ami hlüngtai nak gui phi kamät naw ka hmu lawk khai nei. 20 Khanpughi ah uk nak ng'kyaa ne dou nak cu thu awn ah kä kyak ci, amät ah hlüngtai nak awn ah kyak ci. 21 Nangmi naw a i ang nami ng'zak hlä! Kei cu ng'mui tawn kawt ne ka law vai ang! Kä cun ung m'hni nak la ng'awi gei nak awn ka law vai ang!
1 Khrihta ah kä kyak ci gui hngaw naw shetkat ciah ami ngaih ah ng'zaw ng'pawm pletbeng nak cu nang mi ung om ciah ka ng'zak ci. Chang tumat cu anu chui awn ng'zaw ne ip ci goi ciah ka ng'zak ci nei. 2 Cun hlawk ah shetkat nak om sei phi a i ah kya sei nami khähghah lä ang! A i ah kya sei cun ah hmawk ah kä nami thui ng'aa ang!A i ah kya sei cun ah mäih ah chang cu nami bum nak ung kaa kä nami k'täm ang! 3 Kei cu nangmi ah, pumsa awn kä ka gawk law ung phi, Mumcha awn atäng ah ka om ci nei. Kei ka mät nangmi ah om nak ah ka gawk lawk ciah mäih ah, shetkat nak bik ciah chang cu Bawi Jesuh ah ming awn, m'khoichaa nak ka bik ci nei. 4 Kei cu nangmi awn atäng ah ka om ciah mäih ah, mi Bawipa Jesuh ah hlüngtai nak ung nami van ng'hmuh ne ng'bum ba zawp va. 5 Bawipa a law hnüüp ung cun ah chang ah mumcha cu hun nak a gah tu vai ah hmawk ah, a pumsa cu, am di vai ah Satan nam nami ap vai nei. 6 Nangmi cu chang ah kä nami ng'shei vai. k'caw api hta naw m'htut den avan cu thawh sak ciü ciah thu thuuk cu nami hmat ci. 7 K'caw k'phyim ah kyak ciah kat nak cu nami nawng shüt vai, cun ung vah nangmi cu nami theingcim lawk khai. Cun ung nangmi cu k'caw kä shum ah m'htut den k'thai ah mäih ah nami kyak khai. Cun ah nangmi akcang ah nami kyak cu kei naw ka hmat ci. Mik mi ah phiawnnak Htome ah kyak ciah Bawi Khrih awn ng'küikyan pyi ah kya sei, phiawnnak pawi cu bige vai kyak ci nei. 8 Cun ah kya sei kat nak la cheishoh nak ah kyak ciah k'caw ak pyim shumah m'htut awn ah kä kyak ciah ng'cim nak la ng'düng nak ah kyak ciah k'caw kä shum ah m'htut awn phiawn nak pawi cu mi bik khai nei 9 Azan ka guk law nak ah ca ung pletbeng ciah chang gui awn kä nami m'gu ng'pawng vai ah ka ning m'cai gui ci. 10 Cun ah ka pyein nak ung pletbeng ci gui, ng'zak hlü nak da aih ci gui, m'guk ci gui, agup khawihnah ci gui phung kä nami m'gu pawng püi gui vai ah ka pyein ah kä kayk ci. Ngahmi cuhlawi gui vai a kyak ung nangmi cu shin ah khomdek khan ung kä nami om tu ba ciah kyak khai. 11 Kei naw ka pyein hlü cu kei khrihta nei ci netah pletbeng ci gui, ng'zak hlü nak aih om ci gui, agup hkawihnah ci gui, m'thüikhang ci gui, awktat ci gui, la m'guk ci gui awn kä nami kawng ät vai ah ka pyein ah kyak ci. Cun ah chang gui awn atäng ah ei awk vai ah ngoh ah phi kä nami ngoh en tu vai. 12 Chang hei gui nüng m'khoichaa vai cu kei ah bi ah kä kyak ci. Ngahmi cu Khanpughi naw m'khoichaa gui khai. Cun ung phi nangmi naw nami mät ah chang bum ung kaa nami m'khoicha hning ciah kä kya ne ang!Cacim naw, Nami changbum ung kaa, chang she cu k'täm vä ci ne pyein ci.
1 Khrihta gui nami mät ah kyong ung ng'cuhcan nak a om ung, Khanpughi ah chang gui ah ng'gepai nak awn nami pyi phleh vai sä te, a i ah kya sei khrihta ah kä kyak ciah chang ng'vai gui ah nami ng'chaak tu ang! 2 Khanpughi ah chang gui naw khomdek khan m'khoichak khai gui ci cu kä nami hmat ci maa! Khomdek khan m'khoichak khai ah nangmi cu, amawngma apihta hngaw kä nami m'khoicha hlawt ci maa! 3 Mik mi naw khankho chang gui phi mi m'khoicha gui khai ci cu kä nami hmat ci maa! Cun ah kya sei khomdek khan ung amawng gui läi cu mi m'khoicha pui khai ah kyak ci nei. 4 Ng'cuhcan nak gui a om law ung Khrihta ah kä kyak ciah chang gui am kä nami m'khoichaa en sak vai. 5 Nangmi cu lä ng'aa vai ah nami kyak ci nei. Khrihta gui nami mät ng'cuhcan nak a om law ung, ng'gepai m'khoicha hning khai, nami mät ah kyong ung hmuhmat ci a u kä om ne maa! 6 Bawi Jesuh kä zum ciah chang gui ah maa ah khrihta gui nami mät, nami ng'shawkcha tu aih ciah kya ci nei. 7 Nami mät gui nami ng'shawkchak tu nak naw khrihta ah kyak nak ah ming thang cu shet sak leng leng ci nei. Cun ah k'dam cheishoh nak nami awt ung kä bä tu ba khai ang! m'gukplet nak nami bui ung kä ni tu ba khai ang! 8 Cun ah nami kyak nak vai sä ung nami mät gui nami ng'tu ng'tai ci, ng'phäinau goi nami ng'guhtep tu pek ci! 9 Khanpughi ah uk nak kho cu chang shekha naw kä khäm khai ci cu akcang ah nami hmat ci nei. Ang lat ah kä nami ngaih en vai nei; Pletbeng ci gui, agup khawihnah ci gui, chang ah chu hta kat püi ci gui, pami goi ng'zawpawm ci gui; 10 M'guk ei gui, ng'zak hlü nak aih om ci gui, awktat ci gui, ng'plahtang ci gui, la chang ah khawh guttep ci gui cu, a u naw phi Khanpughi ah uk nak kho kä khäm tuk khai gui nei. 11 Nangmi am shah gui cu a cu k'chaa ah nami kya man ci, cun ung phi nami kat nak cu ning theing cim sak gui pyi ci; Nangmi cu Khanpughi ung nami ng'ap pyi ci; Bawipa Jesuh Khrih ah ming awn la mi Khanpughi ah Mumcha awn nangmi cu Khanpughi ung düng nak nami gah pyi ci. 12 Chang atumat naw, Kei cu i phi ka bi hning ciü ci ne kyak ciah chang om khai. Cun ung phi, apäng avan cu nangmi ah hmawk ah kä nik khai. Kei naw a i phi ka bi hning ciah ka pyein ung phi, a i naw phi kei cu ani ah khleihtein ah kä na k'hmoh hlawt khai. 13 Chang atumat naw, Ei cu chi ah phäh ah kyak ci, chi cun phi ei ah phäh ah kyak ciü ci ne pyein ci om khai. A cun ah kyak ci, cun ung phi Khanpughi naw a cun goi ani nik hnih cu dimaih sak khai. Pumsa cu ng'zawpawm pletbeng nak düt vai ah kä kyak ci, Khanpughi ah bi bi nak vai ah kyak ci; Khanpughi naw phi pumsa ung hlü ci gui cu zuk m'kyum lawk ci. 14 Khanpughi naw Bawipa cu sih nak ung kaa thawh ba sak ci, a cun ah mäih ah mik mi cun phi a hlüngtai nak awn sih nak ung kaa na thawh ba sak gui khai. 15 Nami pumsa cu Bawi Khrih ah pumsa ah ng'phyeekpai ah kyak ciah nami hmat ci. Kei naw Bawi Khrih ah pumsa ng'pai cu la netah, chang hlawhlangnu ah pumsa ng'pai ah ka pyan ung bä khai ang! Kä bä khai nei! 16 Chang thuiplet awn ng'zaw ng'pawm ci goi ah chang cu, a cun ah chang awn pumsa tumat ah kyak ci goi ci cu kä nami hmat ci maa!Cacim naw ang dang ah a pyein cu, Cun ah chang hnih cu pumsa tumat ah kyak khai goi nei ciah kyak ci. 17 Cun ung phi Bawipa ung ng'dou pyi ciah chang cu mumcha awn ani ung pumsa tumat ah kya lawk ci. 18 Pletbeng nak cu nami hlawi vai. A hei kat nak naw chang tumat ah pumsa cu kä di sak ci; cun ung phi ng'zawpawm pletbeng nak bik ciah chang cu amät ah pumsa m'di ciah kyak ci. 19 Nami pumsa cu Mumcha Theing ah pum im ah kyak ciah kä nami hmat ci maa!Cun ah nangmi ung om ciah Mumcha Theing cu Khanpughi ah ning peit gui ah kyak ci. Nami mät naw nami mät kä nami khäm ci, Khanpughi naw vah khäm ci. 20 Khanpughi naw aphu pe ne a ning khleih gui ah kyak ci, cun ah kya sei, Khanpughi ah bämang nak ah hmawk ah nami pumsa cu nami mang vai nei.
1 Tuh bäi ca nami guk law gui ah mawng cu m'hlan ne ka ning m'thein gui khai. Pami cu kä chumah ne a om ung nik ci; (kä) 2 Cun ung phi pletbeng nak ada aih ah hmawk ah pami päng ak chu om ne hnumi päng a cei om sä. 3 K'pami naw cei ah bilawh vai bi sä, hnumi naw chu ah bilawh vai bi sä, tumat ah ng'zak hlü cu tumat naw kümbe sak sä. 4 Ak chu naw amät ah pumsa cu kä khäm ci, acei naw khäm ci; a cun ah mäih ah acei naw amät ah pumsa cu kä khäm ci, ak chu naw khäm ci. 5 Nangmi naw k'taigü nak vai ah ng'dawt ne nami k'bäi ah akhin nami peit ah kawn ah, ng'chula goi ah ng'zak hlü cu kä nami ng'chei en sak vai nei. K'Taigü nak ang pyi kawn ah nami om man ah nami om ba vai nei. Cun ung vah nami m'lung cu htingling sak hlawt u ne Satan ah tüihtok nak cu nami m'khüt nüng khai. 6 Cun cu kei naw ka ning khäntam gui ah kä kyak ci, ka ning bilawh sak gui ah kyak ci. 7 Akcang ah chang avan cu ka mät ah mäih ah ka kyak sak hlük ci; cun ung phi Khanpughi naw chang tumat ci am m'cümhnah nak a phäh phäh cu na pek gui ci. 8 Cun ah kya sei kä ceimah ci gui la hmeinu gui cu, kei ah so ah k'täi ne ami mät ami om ung nik ci. 9 Cun ung phi nami ng'zak hlü nak ah m'lung kä nami k'ääp hlawt läi ung nami ng'chula vai nei. m'lung so ne ling sei om ah mä ng'chula ne om cu bä tu ba ci nei. 10 Ng'chula ci gui am ng'thu ka khän hlük ci, cun cu kei ah thukhän ah kä kyak ci. Bawipa ah thukhän ah kyak ci; ak chu naw acei cu kä ang ng'chaa püi vai. 11 Ang chaa püi ah a kyak ung phi kä ceimah tu ba ne a om vai, kä cun ung, a cei te ah baw ang dawn ba vai. A cei naw phi ak chu cu kä a ng'chaa en püi vai. 12 Ahei chang gui am kei naw (Bawipa ah kä kyak ci, kei ka mät) thu ka khän hlü cu, khritha pami tumat naw kä khritha hnumi tumat cu ak chu nak ung, cun ah hnumi naw ng'khap ne om vai a zum ah khoi ung kä a ng'chaa en püi vai. 13 A cun ah mäih ah ah khritha hnumi tumat naw kä khritha pami tumat cu a cei nak ung, cun ah pami naw ng'khap ne om vai a zum ah khoi ung kä a ng'chaa en püi vai. 14 Kä zum tuk ciah a cei cu zum ciah ak chu awn ani ng'khap ah hmawk ah, ani cu Khanpughi naw dou ci, kä zum tuk ciah ak chu cun phi zum ciah a cei awn ani ng 'khap ah hmawk ah ani cu Khanpughi naw dou ci. Cun ah kä a kyak ung cun ah chang gui ah ami hta gui cu khoshe ah hta ah kyak khai gui. Cun ung phi cun ah hta gui cu Khanpughi naw zei ne a dou gui ah kyak ci gui. 15 Khritha ah kä kyak ciah chang tumat naw, khritha tumat cu ang chaa püi hlü ah a kyak ung ng'chaa püi sä. Cun ah amawng ung chu ah phi kya, cei ah phi kya, khritha apaw ah khan ah amät ah m'hni ah hnüntho hning ci. Khanpughi naw nangmi cu dimdeeih sei nami om vai ah ghü ne ning khü gui ci. 16 Khritha hnumi, na cei hun nak kä na gah sak ung, na mät naw a i cha na gah khai ang? khritha pami, nak chu hun nak kä na gah sak ung na mät naw a i cha na gah khai ang? 17 Chang avan cu Khanpughi naw am shum k'phyuk awn ng'mä khai ah Khanpughi naw a khü zah ung a om ah mäih ah a om vai ah kyak ci. Cun cu khrihtabum päng ung kam theithang ah thukhän ah kyak ci. 18 Vun-ah nak gah pyi ciah chang tumat cu Khanpughi ah khü a i ah a kyak ung vun-ah nak ah ak hma cu am shet vai ah ak tha nak vai kä hlü ci; vun-ah nak kä gah phak ciah chang cu Khanpughi ah khü a ai ah a kyak ung, vun-ah nak abi ba vai kä hlü ci. 19 Vun-ah la kä ah cu ak tung ah kä kyak ci, Khanpughi ah thukhän läk cu ak tung ah kyak ci. 20 Ak chang sing cun naw Khanpughi ah ng'khä a i zah ung abi cu abi gäkgäk vai kyak ci. 21 Khanpughi naw aning khü zah ung nang cu khleihtein ah na kyak ung, phi, a i ah kä kyak khai; nang cu ng'päi om chang ah na kyak nak vai akhin a om ung a cun cu na mang vai. 22 Khleihteih tumat cu Bawipa naw a khü ah a kyak ung ani cu ng'päi om chang ah kya lawk ci; a cun ah mäih ah ng'päi om chang tumat cu Bawi Khrih naw a khü ah a kyak ung, ani cu Bawi Khrih ah khleihtein ah kya lawk ci. 23 Nangmi cu Khanpughi naw a phu pe ne a ning khleih gui pyi ah kya sei, chang ah khleihtein ah kä nami kyak ken vai. 24 Phäinau gui aw, nangmi cu Khanpughi naw a ning khü gui zah ung nami om te ah mäih ah Khanpughi awn pui m'ca ne nami om vai nei. 25 Ca guh ne nami na ng'shi nak ah kä chucei mah ci gui ah mawng ung; Kei naw ka pyein vai cu Bawipa ah thukhän ah kä kyak ci, cun ung phi Bawipa ah nam gein nak awn, ng'ap ne khin ciah chang tumat ah ka kyak nak awn, ka mät ah ngaih cu ka ning m'thein gui nei. 26 Tuh bäichü a khin cu teng nak awn pami tumat cu amät ah om te khläm ah a om ung bä tuba ci. 27 Nang cu na chumah pyi ci a kyak ung, na chu na nawng vai ah kä na k'tha nak vai. Kä na chumah phak ciah a kyak ung na k'chu vai kä na shui ling vai. 28 Na chumah ah a kyak ung phi, nang cu kat nak na bik ciah kä kyak ci; kä ceimah phak ciah hnumi hta a ceimah cun phi kat nak bik ciah kä kyak ci. Cun ung phi chuceimah ciah chang gui naw ak hnüüp tä ami bui awt ah zaica nak gui cu nami phiawn nak vai ng'za hlü ne ka pyein na kyak ci nei. 29 Phäinau gui aw, kei naw ka pyein hlü cu; akhin kä om ba ci, Tuhbäi ung tän ne chumah ciah pami gui cu kä chumah ciah mäih ah om u sä. 30 Kyap ci gui cu kä thüi ci gui ah mäih ah om u sä; gaih ci gui cu kä zei ci gui ah mäih ah om u sä; khleih gah ci gui cu a i kä om ciah mäih ah om u sä; 31 M'dek khan khawhchaam ei mang ci gui cu, kä ng'bähbei ci gui ah mäih ah om u sä. A i ah kya sei ci ung tuhbäi shin ah m'dek ah khan cu, kä shou pha sei ng'pyi lawk khai ah a kyak ah hmawk ah kyak ci. 32 Kei naw nangmi cu ng'ä ai nak ung ka ning phiawn sak gui hlük ci. Kä chumah ciah pami naw Khanpughi ah khuut cu ak tung ah tha ci, ani naw Bawipa ah ng'zak hlü cu k'tha na ne bik ci. 33 Chumah ciah pami naw ak chu ah m'hni vai ng'za hlü netah amät ah hmawk ah m'dek khan mawngma gui cu ak tung ah tha ci. 34 Cun ah kya sei ani ah m'lung naw hnih mawng nak ci. Kä ceimah ciah hnumi kä cun ung ng'lami hta cu, Khanpughi am a pumsa, ang mumcha avan ap hlük ci kya ne, Bawipa ah khuut cu ak tung ah tha ci. Cun ung phi ceimah ciah hnumi läi cu, a cei ah m'hni vai ng'za hlük ci kya ne, amät ah hmawk ah m'dek khan mawngma gui cuak tung ah tha ci. 35 Kei naw shin ah ka pyein cu nangmi ka ning khüivawng nak gui hlü ah kyak ci. Nangmi ka ning shum gui khai ah ka k'tha nak ah kä kyak ci. Nangmi ng'düng ne nami bä vai la Bawipa ah khuut cu kä ng'zu ng'zawn ne ng'ap ne nami bi vai ah ka ng'zak hlü ah hmawk ah kyak ci. 36 Hta be ne gah pyi kawn ah ngahni ani mät naw kä ng'chula ling vai ah ani k'bäi ung phi; Pami naw hnumi ah khan ah a om ih kä nik ciah a hmat law ung phi bäi, am lung kä k'ääp hlawt ne ng'chula kung ung bä khai ah a ngaih ung phi bäi, ang zak hlü ah mäih (kä) Pami tumat la ahta hnumi; ani naw hnumi ah khan ah a om ih kä nik ciah a hmat law ung, (kä) Cun ah hnumi cu ceimah khin ciah a kyak ung, ani naw a mät ah ng'zak hlü ah chu na sä. ah ng'chula ni sä. Cun ah bi nak ung kat nak kä om ci. 37 Cun ung phi pami naw amät ah m'hni ah kä chumah(kä) Ahta hnumi kä ceimah sak ne. ne om khai ah ak pit ah ak bäi ah a kyak ung, cun kawn ah amät ah m'lung phi akcang ah k'ääp hlawt ne amaa law nak gui vai cu am khüt ah a kyak ung, cun ah hnumi(kä) kä ceimah sak ne. cu kä chu na ne phi om sä. 38 Cun ah kya sei beit pyi ah ng'lami chunak (kä) Ahta hnumi ceimah sak ci. ciah ng'pyangmi cu nik ci, cun ung phi kä chumah ling (kä) Kä ceimah sak ling. ci cu bä pi ci. 39 Ceimah ciah hnumi cu acei a ghin zah ah chuih khihpawn nak om ci; Cun ung phi acei a sih kawn ah a u pami phi amät ah m'hni cei na tuba hning ci, acei tuba cu khriatian bäbä ah a kyak nai. 40 Cun ung phi cun ah hnumi cu kä ceimah tuba ah a om ung ni pi k'bäih ci. Cun cu ka mät ah ngaih ah kyak ci, kei cun phi Khanpughi ah Mumcha ka gah ciah ka zum ci nei.
1 Tuhbäi ung agup-am sonkian ah ei ah mawng nami na ng'shi cu ka ning m'hlan gui khai. Mik mi mi van ung hmuhmat nak om ci ci cu akcang ah kyak ci, Cun ung phi hmuhmat nak naw chang cu lämaa sak ci; m'hni nak naw vah chang cu m'käi m'khän ci. 2 Kei ka hmuhmat ci cik ciah chang cu akcang ah a i kä hmuhmat ciah kyak ci. 3 Cun ung phi Khanpughi m'hni ciah chang cu Khanpughi naw hmuhmat ci. 4 Cun ah kya sei a gup am sonkian ah ei cu ei ah mawng pyein ah a kyak ung, agup cu akcang ah ghing om ciah agup ah kä kyak ci, ci cu mi hmat ci; Khanpughi tumat bäng om ci, ci cun phi mi hmat ci. 5 Kho ah kaa m'dek ah khan ung Khanpughiä ah ming ci, bawiä ah ming ci, akda a om ung phi; 6 Mik mi ung mi Pa Khanpughi tumat bäng om ci, ani cu avan tüisho ciah Pushihpi ah kyak ci, ani ah hmawk ah mik mi cu mi ghing ci; Mik mi ung Bawipa tumat bäng om ci, cun cu Jesuh Khrit ah kyak ci, ani naw apäng avan cu tüisho sei, ani ung mi ghing ci. 7 Cun ung phi chang van naw shin ah düng nak cu kä hmat ci. Chang am shah gui cu agup khawihnah te ci gui ah kya netah, tuh ngawi güt ung ami ei ei cu agup-am sonkian ah ei ah ngai ne ei awk ci gui. Cun ah kya sei ngahmi cu ami m'lung kä ng'cim sei, cun ah ei ei naw m'shet gui ciah ngai ci gui. 8 Ei cu Khanpughi lam ah ak tung ah kä kyak ci; ei kä ei ung phi dishum nak vai kä om ci, ei ei ung phi nüng m'khüt nak vai kä om ci. 9 Cun ung phi nangmi naw ng'päize ne nami ei awk nak tu awn, azum nak ken ci gui ah cheishoh nak vai ah kä kya-en khai ah nami geing nak vai. 10 Shin ah a mawng ung am lung kä ng'cim veih ciah chang tumat naw, sonkian ne pui m'ghu nak, pui m'ghu im ung nami ei awk tu a ning hmuh gui ah a kyak ung; cun ah m'ghu nak cu ani naw phi ei law tuk khai ah kä kya ne ang? 11 Cun ah kya sei ak thagui ken ciah na phäinau ah hmawk ah BawiJesuh si pyi ciah akiak pang ung phi, nang ah hmuhmatä nak awn ani cu dimaih ciah kyak ci. 12 Ashikchaa ah nangmi cu nami khrihta phäinau cheishoh na u ne, Bawi Khrih phi nami cheishoh nak ci, aktha ken ciah m'lung phi nami sheit sak ci nei. 13 Cun ah kya sei sa ka ei naw ka phäinau a cheishoh sak ah a kyak läi ung, ka phäinau ah kä cheishoh nak vai ah, a i sa phi kä ei ne ka om khai nei.
1 Kei cu ng'päi om chang ah kä kya ne ang? Ang düihpüi ah kä kya ne ang? Mi Bawipa Jesuh ka hmuk ciah chang ah kä kya ne ang? Nangmi cu Bawipa ah bi ka bi nak ung kaa nami dang lawk ciah kä kya ne ang? 2 Chang hei gui naw kei cu ang düihpüi ah kä ami na dou ung phi, nangmi naw nami na dou ci maw! Nangmi Bawi Khrih ung om ne nami ghin nak naw, kei ang düihpüi ah ka kyak nak cu ng'dang sak ci nei. 3 Kei na täitawk ciah chang gui ah ma ah shikchaa ah ka ng'thu hlük ci; 4 Kei cu ka bilawh ah hmawk ah ka ei awk khin ciah kä kya ne ang? 5 Peter la Bawipa ah nau gui ni, ang düihpüi m'shah gui ni ah mäih ah kei cu ka htehhtawn nak ah ka k'chu ka khahpäi hning ciah kä kya ne ang? 6 Kei la Barnabas bäng naw kani ghin nak vai ah hmawk ah bi kani bik khai maa? 7 A u gakaap naw amät ah ei ei ne ng'tuk bi man ne ang? A u lo k'bi naw a lo ung kaa a geit cu kä ei ah om mang ne ang? A u htome k'shüm naw a shäm ah htome ah suuktui cu kä awk ah om man ne ang? 8 Shin ah kei ah m'tumtäng nak gui bäng ah kä kyak ciah, thukhän naw phi a cun bä ah pyein ci nei. 9 Mose ah thukhän ung, Htang leh ciah seipat cu am gawng käk bääp vaiä ciah om ci. Khanpughi naw cun ah a pyein cu seipat ah hmawk ah kya ne ang? 10 Mik mi ah hmawk ah akcang ah a pyein ah kä kya ne ang? Mik mi ah phäh ah akcang ah guk ah kyak ci nei. Lai thawn ci la geit khäm ciah chang naw ami khäm law vai cu ngaih u ne bik ci gui nei. 11 Kei mi naw nangmi ah ng'lung ah mumcha m'shi kami phu ci. Nangmi ung kaa pumsa ghin nak kami khäm ba ung kami laawn aih khai maa? 12 A hei gui hngaw naw nangmi ung kaa ami gah khin ah a kyakung, keimi läi naw däm pui sei kami gah khin ciah kä kya ne ang? Cun ung phi keimi naw cun gui cu kä kami lak ci. Bawi Khrih ah mawng Thu Ni kä a ng'phleng nak vai ah kami bui aut phung kami hnimgei ci nei. 13 Pum im kyong ah bi bik ciah chang naw pum im kyong ah ei vai gah ci, Mang kyang ung khawihhah ciah chang naw, mang kyang ung khawihnah nak cu gah tuk ci, ci cu akcang ah nami hmat ci nei. 14 A cun ah mäih ah Thu Ni pyein ciah chang gui cu, Thu Ni ami pyein nak awn ami hnun m'ghin khai gui, ci ne Bawipa naw k'bäi ci. 15 Cun ung phi kei naw cun ah mäih cu kä ka la man ci, cun ah mäih gui gah vai ah ka ng'zawih nak ah shin ah ca ka guk ah phi kä kyak ci. Cun ah ka ng'zawih ah k'dam ah ka sih ei bä tu ba khai. Kei ah ka khähghah nak cu a kholä ah kyak khai ah bi nak vai cu a u-am kä ka pek khai nei. 16 Thu Ni ka pyein nak awn kei ung khähghah nak vai kä om ci, Khanpughi ah thukhän nawn kei naw ka bi ah kyak ci. Kei naw Thu Ni cu kä pyein ah ka om ung a i hlawk ah thüisei vai kyak khai ang! 17 Kei naw ka mät ah ng'päiom ah bi ka bik ciah a kyak vai sä ung ng'cheng ka gah khai säte; Cun ung phi shin ah bi cu Khanpughi naw a na ap ah kya sei bälääng ne ka bi ah kyak ci. 18 Kei naw a i ng'cheng ka gah khai ang? Kei ah gah cu, ng'cheng kä om ciah Thu Ni shäu ne pyein nak la, cun ah pyein ah phäh ah gah ah khin ci gui cu kä k'thäh ah ka om nak hning ah kyak ci. 19 Kei cu ng'päiom chang, a u ah khleihtein ah kä ka kyak ci; Cun ung phi zum ciah chang ada law pipi vai ah kei cu chang van ah khleihtein ah ka kyak ci. 20 Kei cu Jew chang gui ah lung ah ka bi zah ung ngahmi ami phiawn nak vai ah, Jew chang ah mäih ah ka om tuk ci, Mose ah thukhän phi läk ciah chang ah mäih ah ka om ci. Thukhän ah kaa ah om ci gui k'phyawn nak gui vai ah thukhän ah kaa ah om ciah mäih ah ka om tuk ci. 21 A cun ah mäih ah chang khui hei gui ung bi ka bi ung, ngahmi k'phiawn nak gui vai ah, thukhän ah k'pung ah chang khui hei gui ah mäih ah ka om tuk ci. Cun cu kei naw Khanpughi ah thukhän kä ka läk ah kä kyak ci, kei cu akcang ah Bawi Khrih ah thukhän kaa ah ka om ci. 22 Kei cu zum nak ken ci gui ah ng'lung ah ka gawk ung, ngahmi ka k'phiawn nak gui vai ah zum nak ken ciah mäih ah ka om tuk ci. Chang a käkä cu k'phiawn nak gui hlawt vai ah chang a heihei ah a hlühlü ah ka om tuk ci. 23 Nangmi awn atäng ah Thu Ni awn hrilham mi gah vai ah, Thu Ni ah hmawk ah shin gui cu ka bi ah kyak ci. 24 Chang khli ng'lüngna ne dawng law nak ung tumat bäng naw vah nüng nak ng'chuh cu gah ci, ci cu nami hmat ci. Cun ah kyasei ng'chuh nami gah vai ah tha na ne dawng vä. 25 Ng'lüngna tuk khai ah ng'theithang ciah gäng'lah ciah chang phung naw, ng'kheing ciah thum'hnüt cu läk ci. Cun cu kä ng'tüi ciah lukhu gah vai ah hmawk ah kyak ci; cun ung phi mik mi läi cu ng'tüi ciah lukhu gah vai ah mi bi ah kyak ci. 26 Kei cu ka bä nak ung düng sei ka dawng ci; a kut m'hnüm alä düt ah käkphäi ciah ng'thäk thei ciah chang awn ka täng ci. 27 Kei naw chang gui ng'lüngna tuk khai gui ah khü gui netah, ka mät kä ka k'pawih en shüt vai ah, ka pumsa cu liu ne guh khai ah khüi ne ka ng'läm ci nei.
1 Phäinau gui aw, Mose ng'vaipi ciah mi pupa gui ung dang ciah amawng gui cu ka ning shäm ba sak gui hlük ci. Ngahmi cu khawmei naw kphiawn nak gui ah ka ung, Tuisen Tuinu cu ghing phiawng ne kat law ba ci gui. 2 Ngahmi cu khawmei la tuinu ung Mose ah chang ah ami kyak nak ah tui-hniim ci gui. 3 Ami van naw täng ciah mumcha m'htut cu ei u ne, täng ciah mumcha tui cu awk ci gui. 4 Ngahmi cu, ngahmi awn atäng ah hteittuk ciah mumcha lungnu ung kaa tui cu awk ci gui; Cun ah Lungnu cu Bawi Khrih amät ah kyak ci. 5 Cun ung phi ngahmi ung kaa akda pi cu Khanpughi ah kä ng'zak hlü gui ah kya ne, ami gook gui cu bungpuk ah ho shüt ci. 6 Shin ah m'tumtäng nak cu mik mi ah phäh ah kia ci, cun ah kia sei, ngahmi ah bi ah mäih ah akshekha gui cu kä mi ng'zak hlü en vai; 7 ngahmi ah mäih ah agup kümi khawihnah vai ah ana khäntam nak gui ah kyak ci, cacim ung, Chang gui cu ng'hne ne ei awktat u ne ng'nauknam ci guiä ciah om ci. 8 Mik mi naw cun ah chang am shah gui ah mäih ah pletbeng nak cu kä mi läk ken tu vai, ngahmi ung kaa chang tämkäp m'ku-lei-thum cu hnüüp ät ung sik ci gui. 9 Mik mi naw chang am shah gui ah mäih ah Bawi Khrih cu kümi phawtcam men vai, ngahmi cu k'phyu naw k'dawk gui sei si zawp ci gui. 10 Mik mi cu chang am shah gui ah mäih ah kümi ng'nakso tuk khai, ngahmi cu Sihnak ah khanchang naw m'di gui zawp ci. 11 Ngahmi ung cun ah a kyak gui cu ahei gui ah ng'shümhmuh nak vai ah kyak ci. Mik mi cu kho ah khüt law nak vai ah khin ung mi ghing om ciah kyasei, ami na khäntam nak gui ah shin gui cu ami guk ah kyak ci. 12 Kei khüi ne kang düi ci cik ciah chang naw kä a kyuktäät vai ah ak tha nak pi vai nei. 13 Nangmi naw tuhbäi nami buiaut ah tüihtok nak gui cu, chang ung gawk law man ci bängbäng ah kyak ci nei. Khanpughi cu a shaitaak ah mäih ah om ciah kya ne, nangmi naw kä nami m'khüt vai ah tüihtok nak cu kä ning awt sak gui khai. Täihtok nak nami awt law ung nami m'khütnäng nak vai ah k'thagui ning pe gui ne, nami phiawn nak vai ah lam ning m'hnuh gui khai. 14 Cun ah kyasei ka m'hni teihpüi gui aw, agup nami khawihnah nak cu nawng shüt vä. 15 Hmuhmat thei ciah chang gui ah k'bäi ne ka ning thu püi gui nei. Kei ah thu cu ngaih tüh kheng shäm vä. 16 Mik mi naw Bawipa ah mä ei mi ei ung, Khanpughi cu m'hlüngtai ne khap cu la ne mi awk ung, Bawi Khrih ah si mi ng'pai tu ah kyak ci. M'htut cu k'bo ne la ne mi ei cun phi, Bawi Khrih ah sa mi ng'pai tu ah kyak ci. 17 M'Htut pum ät bäng om ci, mik mi cu mi da pang ung phi, cun ah m'htut pum ät cu mi ng'pai ci kya sei pumsa tumat ah mi kyak ci. 18 Jew chang gui cu teng gui shäm vä; ngahmi cu khawihnah nak ei ci gui ah kya ne, Khanpughi ah mang kyang ung khawihnah tuk ci gui. 19 Cun ah kyasei agup kä cunung agup am sonkyan ah ei cu küikyang ciah ka pyein ah kya naw; 20 Cun ah kä kyak ci! Kei naw ka pyein cu, khawzo ah kyang ung sonkyan phung cu, khoshe am vawihpeh ah kyak ci, Khanpughi khawihhnah nak ah kä kyak ci. Kei naw nangmi cu khoshe ah pawchang ah nami kyak vai kä ka m'hni ci. 21 Nangmi naw Bawipa ah khap cu aw netah, khoshe ah khap cu kä nami aw hning ci; Bawipa ah tawnglang ung ei netah, khoshe ah tawnglang ung kä nami ei hning ci. 22 Mik mi naw Bawipa cu mi m'thüi m' khang nak khai ang? Mik mi cu Bawipa ah mä mi khüighaat pi ciah mi ngai ne ang? 23 Nangmi naw, Keimi naw a i phi kami bi hning ciü nami ci cu akcang ah a kyak ung phi apängavan cu kä nik ci nei. Keimi naw a i phi kami bi hning ciü nami ci ung apängavan cu kä bä ci nei. 24 A u naw phi nami mät ah chaw kä nami shui vai, chang ah k'chaw nami shui peit vai. 25 Nami m'lung ah ng'cim nak awn sumlei hmun ung ami zoih ah sa cu, kä awng-aa ling ah khleih ne nami ei vai. 26 Cacim naw, Khomdek la khomdek khan ung om ci ng'nä cu Khanpughi naw khäm ciü ci ne pyein ci. 27 Bawi Jesuh kä zum ciah chang tumat naw, ning khin na gui khai ah ning khü gui sei, hteh vai ah nami k'bäi ah a kyak ung, nami m'lung ah ng'cim nak awn, ami ning chaan gui ah ei cu, kä ng'shica gui ling ne nami ei vai. 28 Cun ung phi chang tumatmat naw, shin ah ei cu m'ghuthaa nak nei ci ne a pyein ah a kyak ung; cun ah ning m'thein gui ciah chang ah hmawk la m'lung ang cim vai ah hmawk ah, cun ah ei cu kä nami ei tu vai. 29 Nami mät ah m'lung ang cim vai pyein ah kä kyak ci, ning m'thein gui ciah m'lung ang cim vai pyein ah kyak ci. Nangmi ung kaa chang tumatmat naw, A i ah kya sei kei ah ng'päize nak cu, a hei chang tumat ah m'lung ah ng'cim nak naw ana shum ang? 30 Kei naw Khanpughi m'hlüngtai ne ka ei ah a kyak ung, cun ah m'hlüngtai ne ka ei nak ah mawng ung, a i ah kyasei chang hei naw kei, ana täitawk tu vai ang? ä ci ne nami ng'shi nak om khai. 31 Nangmi cu nami ei ung phi, nami awk ung phi, a i nami bilawh ung phi, Khanpughi ah bämang nak ah hmawk ah nami bi vai. 32 Jew chang gui, Khui hei chang gui, Khanpughi ah pum im chang gui, a u chang ah hmawk ah phi zaica nak kä om men khai ah nami ghin om vai nei. 33 Kei cu kabilawh nak phung ung ka mät ah hmawk ah ka ng'ä ne, chang gui ami zei vai ah, chang ah hmawk bäng ah ka bik ci. Cun cu ngahmi naw hun nak ami gah vai ah kyak ci, nangmi phi kei ah bi ah mäih ah nami bi tu vai.
1 Bawi Jesuh ka theitu ah mäih ah kei nami na theitu vai. 2 Nangmi naw kei cu ang tüi sei na shümba u ne, ka ning m'thei thang gui cu nami läk ah hmawk ah ka ning m'hlüngtai gui ci. 3 Kei naw ka ning hmat sak gui hlü cu, pami avan cu Bawi Khrih naw uk ci, ak chu cu a cei naw uk ci, Bawi Khrih cu Khanpughi naw uk ci, ciah kyak ci. 4 Khawihnah nak ung alu uk ne taigü ci, kä cun ung ng'Thu pyein ciah pami cu Bawi Khrih ng'zo m'sho ciah kyak ci. 5 Khawihnah nak ung alu kä uk ne taigü ci, kä cun ung Thu pyein ciah hnumi cu a cei ng'zo m'sho ciah kyak ci; ani cu alu k'plut ciah hnumi awn a i kä ng'lak nak ci goi. 6 Hnumi cu alu kä uk ah a om mei ah a kyak ung, alu ak theiu ung ni tu ba ci. Lu k'theiu la lu k'plut cu hnumi ah hmawk ah lä ng'aa vai kyak ciah kya sei, hnumi naw alu uk sä. 7 Pami naw alu a uk vai kä hlü ci, a i ah kya sei ci ung, pami cu Khanpughi ah mäi la bämang nak cu, khang sak ciah kyak ci. Hnumi läi cu pami ah bämang nak cu vai sak ciah kyak ci; 8 Pami cu hnumi ung kaa a tüi ah kä kyak ci, hnumi cu pami ung kaa a tüi ah kyak ci. 9 Pami cu hnumi ah hmawk ah a tüi ah kä kyak ci, hnumi cu pami ah hmawk ah a tüi ah kyak ci. 10 Cun ah kyasei hnumi cun naw, khankho chang gui a kyih aa nak la a cei ah uk nak kaa ah a om ah mawng am dang nak ah a lu a uk vai nei. 11 Cun ung phi Bawipa ung mi ghin nak ung hnumi cu pami awn kä ang chah hlawt ah mäih ah pami phi hnumi awn käng chah hlawt ci. 12 Hnumi cu pami ung ka a pian ah kiak ci pami cun phi hnumi naw ahta nak ah kiak ci; cun ung phi apäng avan tüisho ci cu Khanpughi ah kiak ci. 13 Hnumi naw Khanpughi ah taigü nak ung alu kä uk ne ak taigü ung abäi la kä ah bäi cu nami mät naw m'khoicha vä. 14 Nupuk ung thei ne mi hmat nak ge cu, lusam m'sau cu pami ah phäh ah lä ng'aa vai kyak ci; 15 cun ung phi hnumi ah hmawk ah kyom nak ah kyak ci. Lusam ng'sau nak cu hnumi am lu uk nak ah a peit ah kyak ci. 16 Shin ah a mawng pyein ne ng'cuhcan hlük ciah chang gui am, Keimi ung phi bäi, Khanpughi ah khrihtabum ung phi bäi, shin ah kawn ah thungzo a hei kä om ci nei ciah kam thein gui ci nei. 17 Shin ah m'shümthein nak ka ning peit nak gui ung, ka ning pyein nak gui vai tumat om ci. Cun cu, nangmi cu khawihnah ne nami pum nak ung, akni ah mä akshe dapi ci. 18 Ak htük bäih ah ng'bum ne nami pum nak ung nami m'lung ngaih hnu ng'tuk ne ang pai ah mawng cu ka ning hmat gui ci. 19 (Nami m'lung ngaih ang pai nak cu om khai, cun ung vah ng'düng nak cu dang lawk khai). 20 Nangmi ng'bum ne nami ng'hmuh law cu, Bawipa ah mä ei nami ei vai ah hmawk ah kä kyak ci. 21 Nangmi cu nami mät ah ei phäh phäh nami ei ci kya ne, am shah ei cawi sei, am shah awktat sei, nami kyak ci. 22 Nangmi ung nami ei awk nak vai nami mät ah pyu im kä om ne maa? Kä cun ung nangmi naw Khanpughi ah Khrihtabum päipih u ne, ghawipyam ciah chang gui cu nami lä ng'aa sak gui ci maa? Nangmi ah mawng a i ah ka pyein vai nami ng'a hlük ci ang? Ka ning m'hlüngtai gui vai maa? api ah phi kä ka ning m'hlüngtai gui khai nei. 23 Kei naw tuhbäi ka ning peit gui vai ah m'theithang nak cu Bawipa ah ka gah ah kyak ci. Gaa ah kut ung ami ap nak vai ah khomü ung, Bawi Jesuh naw m'htut cu la ne, 24 Khanpughi m'hlüngtai netah, m'htut cu k'bou ne, Shin cu nangmi ah hmawk ah kak bou ah ka pumsa ah kyak ci, kei nami na shäm ba nak ah, shikchaa ah nami bi vai nei ci ne pyein ci. 25 A cun ah mäih ah mäei ami ei kawn ah khap cu la netah, Shin ah khap cu kei ah ka si ng'hlui awn geei ne m'hnüt ah Khanpughi ah Thukhän thai ah kyak ci. Shin ah khap nami awk law phung ung kei nami na shäm nak vai ah shikchaa ah nami bi vai nei ci ne pyein ci. 26 Nangmi cu shin ah m'htut ei ne, shin ah khap nami awk ung Bawipa a sih ah mawng cu, a kyum law ba ung khüt sei, shäu ne nami pyein ci. 27 kä khinkhaa lang ne Bawipa ah m'htut ei ne khap ung aw tuk ciah chang cu, Bawipa ah a si la a sa hnu ng'tuk püi ne m'cheishoh ciah kyak ci. 28 Cun ah kyasei, chang päng naw amät naw amät ngaih tüh päk päk netah, m'htut cu ei ne khap cu aw sä. 29 Bawipa ah pumsa ah mawng kä hmat men netah, m'htut cu ei ne, khap ung awk ciah chang cu, amät ah khan ah m'khoichaa nak a gawk law nak vai ah ei awk ciah kyak ci. 30 Cun ah kyasei nangmi ung gaw ci akda, ak thagui ken ci akda, sik ci akda om ci. 31 Mi mät naw mi mät ak htük bäih ah mi m'khoichaa ah a kyak ung, mik mi cu Khanpughi ah m'khoichaa nak ah kaa ah kä mi gawk khai. 32 Cun ah Bawipa naw nam khoicha gui ne a na m'kat nak gui cu, khomdek chang awn atäng ah m'kat nak kä mi gah tu vai ah hmawk ah kyak ci. 33 Cun ah kyasei phäinau gui aw, Bawipa ah mä ei nami ei khai ah ng'cut ne nami ng'bum law ung tumat la tumat nami ng'gin tu vai. 34 Cun ah nami ng'cut law ung, Khanpughi ah m'khoichaa nak kä nami gah vai ah, ei cawi ci naw a im ah a ei shüt ge vai. A hei a mawng gui cu ka mät ka law kawn ah ka ning m'thein gui khai.
1 Tuhbäi ca guh ne nami na ng'shi ah Mumcha Theing ah m'cümhnah nak ah mawng, ka ning m'thein gui khai. Phäinau gui aw, cun ah a mawng cu akcang ah nami hmat vai ah ka ng'za hlük ci nei. 2 Nangmi cu khrihta ah kä nami kyak pha ung lam hma u ne, kä ghing ciah a gup gui ahlühlü ah nami khawihnah man cu nami hmat pyi ah kyak ci. 3 A u chang phi Khanpughi ah Mumcha ah lam shäm nak kä gah ci naw Bawipa Jesuh cu kä k'she na hning khai; a chang phi Mumcha Theing naw lam kä am shäm naw Jesuh cu Bawi Neiä ci ne kä ng'kyaa hlawt khai, ci cu ka ning hmat sak gui hlük ci. 4 Mumcha m'cümhnah nak a hlühlü om ci, cun ung phi cun gui avan cu Mumcha tumat bäng naw pek ci. 5 Khuut bi nak a hlühlü a om ung phi, akhuut bi peit ah Bawipa tumat bäng om ci. 6 Khuut bi nak vai k'thagui a hlühlü a om ung phi, chang a phähphäh am, thagui a hlühlü pek ci cu Khanpughi tumat bäng ah kyak ci. 7 Chang van ah nikyom nak vai ah, chang pängpäng naw, amawng tumatmat awn, Mumcha thagui cu gah phähphah ci gui. 8 Mumcha Bawi naw chang tumat am kümbe ciah cäivai nak awn pyeinsak nak cu pek ci, acun ah Mumchabawi bä naw, a hei chang tumat am kümbe ci hmuhmat nak awn thuuk ne ng'kau ci pyeinsak nak thei cu pek ci. 9 Acun ah Mumchabawi tumat bä naw chang tumat am, zum nak ah hlüngtai nak cu pe ne, a hei chang tumat am, gawpai ci gai sak nak ah hlüngtai nak cu pek ci. 10 Mumchabawi naw chang tumat am cäi aih vai bi nak ah hlüngtai nak, a hei tumat am Khanpughi ah Thu thuuk pyein nak; a hei tumat am Mumchabawi ah peit ah thagui ah kyak ci la kä kyak ciah m'khoichaa nak, cu pe ne; chang tumat am Ng'thu a hlühlü pyein thei nak, a hei tumat am, cun ah thu a hlühlü cu k'phlan ne pyein nak ah k'thagui cu pek ci. 11 Cun ung phi cun gui avan pek ci cu Mumchabawi tumat bäng ah kyak ci; Mumchabawi naw, a mät ah ng'zak hlü ah, chang tumat ci am, m'cümhnah nak a hnga hnga cu zuk m'kyum law gui ci. 12 Bawi Khrih cu akda ah ng'phyeekpai ciah pumsa tumat awn täng ci; ang phyeekpai a hnga hnga a om ung phi pumsa cu tumat bäng ah kyak ci. 13 A cun ah mäih ah, Jew chang, khui hei chang, chang khleihtein, chang ng'päi om, chang mi van cu Mumchabawi tumat ung tui mi ng'hniim u ne, pumsa tumat ah mi kya lawk ci. A cun ah Mumcha cu chang mi van naw mi gah ah kyak ci. 14 Pumsa ung ang phyeekpai tumat bäng om ciah kä kyak ci, akda om ci. 15 Kho naw, kei cu kut ah kä ka kyak ci, pum awn kä ka ng'phaa ciü a ci ung cun a ci nak awn ani cu pum ung kä ng'phaa tuk ciah kya ne ang? 16 Hnga naw, kei cu mik ah kä ka kyak ci, pum awn kä ka ng'phaa ciü a ci ung cun a ci nak awn ani cu pum ung kä ng'phaa tuk ciah kya ne ang? 17 Pumsa avan cu mik ah a kyak ung a i chaa mi ng'zak khai ang? Pumsa avan cu hnga ah a kyak ung a i chaa ah mi ng'ghi khai ang? 18 Khanpughi naw amät ah ng'zak hlü ah pumsa ung ang phyeekpai gui cu a tüi m'hnüt ah kyak ci. 19 Ang phyeekpai tumat bäng a om ung pumsa ah kä küm hlawt khai. 20 Cun ah kyasei ang phyeekpai akda a om ung phi pumsa cu tumat bäng ah kyak ci. 21 Cun ah kyasei, mik naw kut am, Nang kä ka ning za hlük ciü ci ne kä pyein hning ci. Lu naw phi kho am, Nang kä ka ning za hlük ciü ci ne kä pyein hning ci. 22 Pumsa ung zoken tu ba ciah mi ngaih cu kä a om ung kä bä ci; 23 Kä mäisa ngai ciah mi ngaih nak zah ah ang phyeekpai cu mi geingbawi nak pi vai ah kyak ci, pumsa ung kä teng k'phyaa ngai ciah mi ngaih nak zah cu, ak tung pi ah mi pyamtham ah kyak ci, 24 a kyom ei nak zah läi cu pyamtham vai kä hlü ci. Khanpughi naw pyamtham vai hlü ci gui cu, m'tamkhah nak pi vai ah, atäng ah m'dawn ne tüi sho gui ci. 25 Cun ah kyasei pumsa tumat ung hngi hnga nak kä om ci, ang phyeekpai gui a van cu ng'gui ng'phaa zawp ci gui. 26 Pumsa ah ang phyeekpai tumat a zaica ah a kyak ung, a hei gui ami van zaica zawp ci gui; pumsa ang phyeek pai tumat m'hlüngtai nak a om ah a kyak ung, a hei gui ami van zei kyai zawp ci gui. 27 Nangmi nami van cu Bawi Khrih ah pumsa ah nami kyak ci, nangmi ak chang sing cu, apumsa ah ng'phyeekpai ah nami kyak ci. 28 Khanpughi naw khrihtabum ah kyong ung, ak htük bäih ah ang düih püi gui, ak hnih nak ah purofet gui, ak thum nak ah saza gui; cun kawn ah cäi aih vai m'dang ci gui, cun ah hnu ah gawpai ci gai sak nak ah hlüngtai nak om ci gui, pawchang m'hteihtang hning ci gui, m'shüm thein hning ci gui, kä hmat ah ng'thu ah thu nak thei gui a phäh phäh ah tüi m'hnüt gui ci. 29 Ngahmi cu ami van ang düihpüi gui, purofet gui, saza gui ah kä kyak ci gui. Ngahmi ami van ung cäi aih nak vai ah hlüngtai nak phi kä om ci. 30 Ngahmi ami van cu gawpai ci gai sak ci, kä hmat ah thu ah thu pyein hning ci, a cun ah ng'thu k'phlan ne pyein hning ciah kä kyak ci gui nei. 31 Cun ah kyasei nangmi naw küikyang pi ciah m'cümhnah nak cu nami m'lung ung khän sak vä. Cun ah küikyang pi ciah m'cümhnah nak cu ka ning m'dang gui khai nei;
1 Kei cu m'dek chang ah thu a hlühlü la khan chang ah thu ah ka ng'thu thei ung phi, m'hni nak kä a om ung, tum bä ung ng'ging ciah k'bei la ng'sheei ah mäih ah ka kyak ci. 2 Kei cu kümbe ciah thu ka pyein hning ung phi; thuuk ne ng'kau ci hmuhmat nak la langkha nak a om ung phi; khom'htung ng'nawn sak hning ciah zum nak a om ung phi-kei ung m'hni nak kä a om ung, kei cu a kholä ah kyak ci. 3 Kei ung om ciah khawh avan pe ne, ka pumsa mei ung m'khih hning ne Khähghah nak hlü vai ah ka ap ung phi, kei ung m'hni nak kä a om ung, kei ung bä nak kä om ci. 4 M'Hni nak cu hniimgei nak, ng'awi ng'gi nak ah kyak ci; m'thüi m'khang nak, khähghah nak, chang ah ng'shei nak kä om ci. 5 M'Hni nak cu ak she kä shui ci, mät ah chaw ah kä k'hman ci, kä m'lung k'she ci, chang ah kat nak kä m'kat ci; 6 M'Hni nak cu ak she ah hmawk ah zei nak kä om ci, düng nak ah hmawk ah zei nak om ci. 7 M'Hni nak ung hnu ng'hlah nak kä om ci; m'hni nak ung zum nak, ngaih ä nak la hniimgei nak cu kä ng'chei phung ci. 8 M'Hni nak cu langtäi ci. Kümbe ciah thu thei nak, küikyang ciah thu a hlühlü pyein nak, thuuk ciah hmuhmat nak gui cu maih zawp khai nei. 9 Thuuk ciah mi hmuhmat nak, kümbe ciah mi ng'thu thei nak gui cu, kä kümbe ci; 10 Cun ung phi kümbe nak a gawk law hnüüp ung kä kümbe nak gui cu ng'kawn zawp khai nei. 11 Kei cu ka k'hmaw zah ung ka ng'thu htau, ka om ih, ka m'lung ngaih cu ak hmaw ah mäih ah kyak ci; tuh bäi ka ng'vai law kawn ah ak hmaw ah mäih ah kä ka kyak ba ci. 12 Tuh bäi mik mi ah hmuh nak cu mäi m'dang ci ung mäi teng ah mäih ah kyak ci; cun kawn ah mik hmai ng'chum sei mi ng'hmu lawk khai. Tuh bäi kei ah hmuhmat nak cu kä kümbe ci, cun kawn ah, Khanpughi naw kei cu kümbe sei a na hmuhmat ah mäih ah, kei naw kümbe sei ka hmuhhmat lawk khai. 13 Ak tung ah pyein ung zum nak, ngaih u nak, m'hni nak ciah ng'tüi ci mawng thum om ci; cun gui ung m'hni nak cu ak hlüngtai pi ah kyak ci.
1 Cun ah kyasei m'hni nak nami k'pan vai ah läk vä. Mumcha m'cümhnah nak cu ng'zak hlü nak om sä, Khanpughi ah ng'thu shäu ne pyein nak cu ak tung ah ng'za hlü pi vä. 2 Kä hmat ah ng'thu pyein ci cu, chang ng'thu püi ciah kä kyak ci, Khanpughi ng'thu püi ciah kyak ci, ani ah ng'thu cu a u naw kä hmat ci. Ani cu Mumcha hlüngtai nak awn thuuk ciah ng'thu gui pyein ci. 3 Cun ung phi Khanpughi ah ng'thu shäu ciah chang cun naw, chang gui ng'thu püi gui ne, m'hteihtang nak gui, m'shümthein nak gui, shungvong nak gui ah ng'thu pyein ci. 4 Kähmat ah ng'thu pyein ciah chang naw amät küikyan ci, Khanpughi ah ng'thu shäu ne pyein ciah chang naw Khrihtabum avan küikyan ci. 5 Nangmi nami van cu ng'thu a hlühlü nami pyein vai ah ka ng'za hlük ci; cun ung phi Khanpughi ah ng'thu shäu nak ah m'cümhnah nak nami gah vai cu ka ng'za hlü pi ci. Khanpughi ah ng'thu shäu ne pyein ciah chang cu kä hmat ah ng'thu pyein ciah mä küikyang hlüngtai tu ba ci. Kä hmat ah ng'thu pyein ci cu, m'hlan ne pyein ci a om ung vah Khrihtabum ah phäh ah a phu om ci. 6 Cun ah kyasei phäinau gui aw, nangmi ah kei ka law ung, ng'thu a hlühlü awn ng'thu ka pyein ung bä khai ang? Kei ah law püi ah ng'thu cu, Khanpughi ah ng'thu thuuk, hmuhmat nak, kümbe ciah ng'thu la m'theithang nak ah kä a kyak ung, a i ah kä ng'khän khai nei. 7 Ghin nak kä om ciah k'pyung la k'pen m'hlui gui cä teng shäm vä, cän gui ah k'aw cu ng'theiu ne kä ang gin ung, a i ng'äi ah mawng ah a u naw kä hmat khai nei. 8 K'Phyungheng tum ah k'aw kä a ng'theiu vah a kyak ung, gaa tuk vai ah a u kä pawng m'teim khai nei. 9 A cun ah mäih ah kä hmat ah ng'thu awn nami pyein ah thu cu, m'hlan ne a u naw kä a pyein ung a u naw kä hmat khai cun ung nami ng'thu cu khokhi ung a kholä ah maih tu düt khai nei. 10 Khomdek ah khan ung ng'thu a hlühlü om ci, cun ung phi chang ah kä hmat a i ng'thu kä om ci. 11 Kei ah kä hmat ah ng'thu ciah chang cu, kei ah hmawk ah, a kho hei chang ah kyak ci, ani ah hmawk ah kei phi a kho hei chang ahka kyak ci. 12 Nangmi cu Mumcha m'cümhnah nak nami ng'za hlü aih ci, cun ah kyasei Khrihtabum cawhkyan nak vai ah m'cümhnah nak cu nami mang thei vai ah nami k'tha nak vai nei. 13 Kä hmat ah ng'thu pyein ciah chang naw, ang thu cu k'phlah ne a pyein hning vai ah ak taigü vai nei. 14 Kei naw kä hmat ah ng'thu awn ka k'taigü ung, ka mumcha ak taigü ung phi, kam lung kyong ung a i kä om ci. 15 Cun ung kei naw a i chaa ka bik khai ang? Ka mumcha awn ka taigü ung kam lung kyong ung phi kak taigü khai; ka mumcha awn ng'äi kam cu ung kam lung kyong ung ng'äi kam cu khai. 16 Nang cu nang mumcha bäng awn Khanpughi m'hlüngtai ne na k'taigü ah a kyak ung, pum tuk ciah chang tumat naw, nami ng'thu kä hmat ci kya ne, a i hawkchaa ah Amenä a ci tu vai ang? 17 Nang naw Khanpughi m'hlüngtai ne na taigü nak cu, a i hlawk ah a ni ung phi, chang hei ah phäh ah a bä nak kä om ci. 18 Kei cu nangmi ah mä thu a hlühlü ka pyein thei pi hning ci kya sei Khanpughi kam hlüngtai ci. 19 Cun ung phi pum ne khawihnah nak läi ung, kähmat ah thu tämkäp phya khak pyein na k'dam, hmat zäi vai ah thu m'kha hma bäng awn kei naw kam theithang pyeinsa hlük ci nei. 20 Phäinau gui aw, ak hmawhta gui ah mäih ah kä nami kyak vai nei; ak hmawhta gui ah mäih ah shetkat nak phiawn tah u ne, ang vai pyi ah mäih ah nami ngaih tüh vai. 21 Cacim ung; Ka chang gui cu, chang ah hta ah thu a heihei awn, ka ng'thu püi gui khai. Akho hei chang gui ah m'gawng awn ka ng'thu püi gui khai, Cun ung phi ka chang gui naw Kei ah ng'thu cu kä ngai khai gui, ci ne Bawipa naw pyein ciü ciah om ci. 22 Cun ah kyasei kä hmat ah ng'thu pyein nak ah m'cümhnah nak cu kä zum ci gui ah hmawk ah cäicat nak ah kyak ci, zum ci gui ah hmawk ah kä kyak ci, Khanpughi ah ng'thu shäu nak ah m'cümhnah nak cu, zum ci gui ah hmawk ah cäicat nak ah kyak ci, kä zum ci gui ah hmawk ah kä kyak ci. 23 Khrihta gui akda atäng ah ng'bum u netah, ami van kä hmat ah ng'thu ah ami ng'thu zah ung kä hmat ciah chang, kä cun ung kä zum tuk ciah chang gui ami law ung, Nangmi ak gu gui nei ci ne kä pyein khai gui ang? 24 Cun ung phi Khanpughi ah ng'thu thuuk shäu ne pyein ci a om zah ung kä zum tuk ciah chang, kä cun ung kä hmat tuk ciah chang, a luh law ah a kyak ung, nami ng'thu pyein ang zak nak tu awn, ani cu kat nak bik ciah chang ah a kyak ah mawng hmat lawk khai nei. 25 A cun ah ang zak tu gui naw ani cu m'khoicha sei, ani ah m'zih ne ang ngaih tüh gui cu avan ng'dang sei, Khanpughi cu nami ng'lung ah akcang ah om ci nei ci ne ng'kyaa ne, m'khuukdoong ne, Khanpughi cu khawihnah khai nei. 26 Cun ah kyasei phäinau gui aw, nangmi cu khawihnah vai ah nami pum law ah a kyak ung, tumat naw ng'äi m'cu sei, tumat naw m'theithang sei, tumat naw Khanpughi ah ng'thu thuuk pyein sei, tumat naw ng'thu a hlühlü awn ng'thu pyein sei, a hei tumat naw cun ah ng'thu m'hlan ba sei, nami bi vai. Cun ah nami bi nak phung cu Khrihtabum ah bä nak ah kia sä bäi. 27 Kähmat ah ng'thu awn pyein law vai ung, hnih phi bäi, akda pi thum naw phi bäi, tumat tüi ah nami pyein vai. Chang tumat naw cun ah pyein phung cu chang ah hmat vai ah m'hlan ne a pyein ba vai. 28 Ng'thu m'hlan ba khai a u kä a om ah a kyak ung, kähmat ah thu awn pyein hlük ciah chang cu pum im kyong ah kä chiu en ah a däm ah a om vai, amät la Khanpughi bäng ang thu püi vai. 29 Khanpughi naw ng'thu a pyein sak ah chang hnih naw baw, thum naw baw, ng'thu pyein khütah k'pawih ba ci gui naw m'khoicha ne ngaih tüh u sä. 30 Cun ah pum nak ung ngo tuk ciah chang tumat naw Khanpughi ah ng'thu a gah law ah a kyak ung, ng'thu pyein ciah chang cu ng'däm sä. 31 Nangmi nami van naw tumat tüi ah Khanpughi ah thu cu nami shäu vai, cun ung ngai lawk ciah chang gui cu ng'theithang u ne, k'thamah nak gah khai gui. 32 Khanpughi ah thu shäu nak ah m'cümhnah nak gah ciah chang naw a mät thu a khäm vai; 33 a i ah kya sei ci ung Khanpughi naw kä ng'khämbawi khai ah bi vai cu kä ng'za hlük ci, ng'awi ng'gi nak la dimdeeih nak vah ng'za hlük ci. 34 Khanpughi ah Khrihtabum gui ung mi m'tämgan law ah mäih ah ng'bum nak ung hnumi gui cu a däm hta ah om u sä. Ngahmi cu thu kä pyein tu hning ci gui; Jew chang gui ah thukhän ung, Hnumi gui cu pum nak ung ang vai ah kä ami kyak en vaiä ci ah om ci. 35 Ngahmi cu ami hmuhmat tu hlü a om ah a kyak ung im ah hteit ba netah, ami cei ami ng'shi tu ba vai. Khrihtabum gui ah pum nak ung hnumi naw ng'thu a pyein tu cu lä ng'aa nak ah kyak ci. 36 Khanpughi ah ng'thu thuuk cu nangmi ung kaa lawk ciah kya ne ang? Kä cun ung, cun ah ng'thu cu nangmi bäng ung gawk lawk ciah kya ne ang? 37 Amät naw amät Khanpughi ah ng'düihpüi ah ka kyak ci cik ciah chang, mumcha m'cümhnah nak ka gah ci cik ciah chang naw, Khanpughi ah thukhän awn shin ah ca ka guk law ah mawng cu zum ngak sä. 38 Cun ah kä a zum ngak ung ani cu a i ah kä nami tä en vai nei. 39 Cun ah kyasei phäinau gui aw, Khanpughi ah ng'thu shäu ne pyein nak ung nami m'lung khäng htek sä, ng'thu a hlühlü pyein nak phi kä maa en nah vä. 40 A mawng ammaa avan cu a khüimaai ang käkhtäng ah nami bi vai nei.
1 Phäinau gui aw, kei naw ka ning m'thein gui ah Thu Ni cu ka ning shäm ba sak gui hlük ci, cun cu nangmi naw gah ne, nami zum nak ah ng'düih nak ah kyak ci. 2 Cun ah Thu Ni cu kei naw nangmi ah maa ah ka pyein ah ng'thu ah kyak ci. Cun ah Thu Ni cu khäng khai ah nami k'pan ah a kyak ung nangmi cu hun nak nami gah khai, Kä cun ung nangmi ah zum cu a kholä ah kyak khai. 3 Kei naw ka mät ah gah ah küikyang aih ciah a mawng cu m'dou ne ka ning pe gui ci; cun cu cacim ung om ciah mäih ah Bawi Khrih cu mik mi ah kat nak ah hmawk ah a sih ah mawng; 4 Cacim ung om ciah mäih ah ami k'phuh a mawng, ak hnüüp thum hnüüp sih nak ung kaa a thawh ba ah mawng; 5 Peter ah maa ah ang dang ba ah mawng la ang düihpüi gha-lei-goi ah maa ah ang dang ba ah mawng gui ah kyak ci. 6 Cun kawn ah a hnu ah läk ciah chang phya hma naw atäng ah ami hmuh vai ah ng'dang ba ci. Cun ah chang gui ung kaa am shah a sih ung phi akda pi cu tuh güt ghing ci gui. 7 Cun kawn ah James ah maa ah dang ba ne, ang düihpüi ami van ah maa ah phi ng'dang ba ci. 8 Ak hnu ah zawih nah ne ami hta nak ah mäih ah kyak ciah kei ah maa ah phi dang ba ci. 9 Kei cu ang düihpüi gui ung ak chui pi k'bäih ah ka kyak ci—Khanpughi ah Khrihtabum kak dukdeiu nak ci kya sei, ang düihpüi ah khü vai ah phi kä ka khin ci. 10 Cun ung phi Khanpughi ah m'gein nak awn kei ah ka kyak ci, kei am a na peit ah cun ah m'gein nak cun phi a kholä ah kä kyak ci. Kei cu a hei ang düihpüi gui ah ta k'tha nah pi ne khuut ka bik ci. Cun ah ka bi cu ka mät ah k'tha gui awn ah kä kyak ci, kei ung om ciah Khanpughi ah m'gein nak awn ah kyak ci. 11 Cun ah kyasei, kei naw phi bäi, a hei ang düihpüi gui naw phi bäi, cun ah Thu Ni cu kami pyeinsak ci, nangmi naw phizum ne nami dou ci. 12 Tuhbäi keimi naw Bawi Khrih sih nak ung kaa a thawh ba ah mawng thu cu kami pyein ci, a i ah kyasei nangmi ung kaa am shah naw sih nak ung kaa thawh ba nak kä om ciü ci ne nami pyein ang? 13 Cun cu akcang ah a kyak ung, Bawi Khrih cu sih nak ung kaa kä tho ba ciah kyak khai; 14 Bawi Khrih cu sih nak ung kaa kä tho ba ciah a kyak ung, keimi ah ng'thu pyein cu akholä ah kyak ci, nangmi ah zum cun phi a kholä ah kyak ci. 15 Sik ci gui ah thawh ba nak kä om ci, ci cu akcang ah a kyak ung Khanpughi naw Bawi Khrih cu kä thawh ba sak khai sä te—Keimi naw, Khanpughi naw Bawi Khrih cu sih nak ung kaa thawh ba sak ci nei ci ne ng'thu kami pyein cun phi Khanpughi lam ah kami hleeihlak ah kyak ai. 16 Sik ci gui ah thawh ba nak kä a om ung Bawi Khrih phi kä tho ba khai säte. 17 Bawi Khrih kä a thwah ba vai sä ung, nangmi cu nami zum nak ung lam hma u ne, shetkat nak ung nami chük maih lä khai sä te. 18 Cun bäng ah kä kyak ciah Bawi Khrih zum ne sik ciah chang gui cun phi mäih zawp khai gui sä te. 19 Bawi Khrih ung mi ngaih u nak cu tuhbäi mi ghin nak bäng ah phäh ah kyak ci, kä lawn ci, ah a kyak vai sä ung, m'dek ah khan ah mik mi ah kawn ah m'gein vai ci a u kä om ba khai nei. 20 Cun ung phi akcang cu Bawi Khrih cu sih nak ung kaa tho ba pyi ci, cun cu sih nak ung ip ciah chang gui ami thawh ba vai ah mawng ang kyän nak ah kyak ci. 21 M'dek ah khan ung chang tumat awn sih nak a gawk law ah mäih ah chang tumat awn sih nak ung kaa thawh ba nak phi gawk lawk ci. 22 Chang gui cu Adam ung ami kawng ät nak awn sik ci gui, a cun ah mäih ah Bawi Khrih ung ami kawng ät nak ung, tho ba ne ghing khai gui. 23 Cun ah kyasei chang gui cu akhüimai angkäkhtäng ah tho ba khai gui; ak htük bäih ah Bawi Khrih tho ba ci, cun kawn ah ani a kyum law ba ung, ani khäm ciah chang gui cu tho ba khai gui. 24 Cun kawn ah kho ah ng'pyi nak gawk lawk khai; Cun kawn ah Bawi Khrih naw, mumcha uk ci gui a van, huham nak gui avan, hlüngtai nak gui a van cu nüng ne khäm netah, Uknak kho cu Pa Khanpughi ah kut ungap khai. 25 Khanpughi naw gaa gui avan tu ne m'shiu ne, a kho kaa ah a gawk sak ung khüt sei Bawi Khrih naw a van uk khai. 26 Ak hnu ah a tuk vai ah gaa cu sih nak ah kyak ci. 27 Cacim ung, Khanpughi naw apäng avan cu a kho kaa ah gawk sak ciü ciah om ci. Apän avanä ci nak ung Khanpughi kä boi tuk ci, a i ah kyasei ci ung apäng avan Bawi Khrih ah kho kaa ah gawk sak ci cu Khanpughi ah kyak ci. 28 Apäng avan cu Bawi Khrih ah uk nak ka ah a gawk awn ah, amät Ahtapa cun phi, apäng avan a kho kaa ah gawk sak ciah Khanpughi ah kaa ah gawk khai; cun kawn ah Khanpughi naw apäng avan cu kümbe khai ah uk zawp khai. 29 Sik ci gui ah k'chaw ah tuihniim ci gui cu, a i ah hmawk ah, a i ngaih u ne ami bi ang? Sik ci gui tho ne ami ghin nak ba kä om ci ci cu akcang ah a kyak ung, a i ah kyasei sik cun gui ah k'chaw ah, chang gui naw tui ami hniim ang? 30 A i ah kyasei mik mi mä a khin päng sei, kyihkyawk vai mi bui aut laih laih ang? 31 Phäi nau gui aw, kei cu ak hnüüp tä sei sih nak ka aut ci nei! Kei cu nangmi ah hmawk ah ka zeikyai ci, mi Bawipa Jesuh Khrih awn kawng ät ne mi ghin nak awn shin ah ka pyein ah kyak ci. 32 Kei cu hnicim chang ah ng'zak hlü düt zum ne Ephesus gawnu ah kawng khawmä gui awn kami ng'toh vai sä ung, kei naw a i ka cik khai sä ang? Sik ci gui tho ne ghing ba khai gui ah kä ah kyak ung läi Ngawi ung mi si lawk khai kya sei, ei ne aw ne mi om düt kawä 33 Ang lih lat ah kä ngai en vä. Ang khawt püi a shet ung chang k'ni shek cik. 34 Ng'däng nak awn law vä, nami kat nak phung nawng shüt vä. Nangmi ung kaa am shah naw Khanpughi kä hmat ci, cun ah ka pyein cu nami lä ng'aa nak vai ah hmawk ah kyak ci. 35 Chang tumatmat naw, Ak si cu a i chaa ah tho ne ghing ba khai ang? Cun cun naw a i ah mäih pumsa nak khai ang? Ci ne ang shi law ung; 36 Cun cu chang k'ang ah ng'shi ah kyak ci! M'dek ung han geit ah m'shi cu kä a thu ce ung kä ng'lih pyo hlawt ci. 37 M'Dek ung nami han geit cu, htang m'shi, kä cun ung m'shi tumatmat ah kyak ci, a ngawi ah däm lawk khai ah a phung ghing lüng nami geit ah kä kyak ci. 38 Khanpughi naw amät ah ng'zak hlü ah cun ah geit m'shi cu ghing gong sak ci; geit m'shi phung am amät awn ng'nän ciah ghing gong cu pek ci. 39 A ghing gui avan ah ami sa cu kä täng ci gui; chang ah sa a hei, khisa ah sa a hei, khaa ah sa a hei, nga ah sa a hei ah kyak ci. 40 Khankho pumsa la khodek pumsa ciah om ci; khankho pumsa ah ni kyom nak cu khodek pumsa ah ni kyom nak awn kä täng ci. 41 Hni ung a kyom nak om hnga ci, chaa ung a kyom nak om hnga ci, aisi gui ung phi ami kyom nak om hnga ci. ; aisi gui tumat la tumat phi ami kyom nak a hlühlü ah kyak ci. 42 Sik ci gui tho ne ami ghin ba ah mawng cu ka ning m'thein gui khai. Pumsa cu m'ciim zah ung thuka thei ciah kyak ci; a thawh law ba ung kä thuka thei ciah kyak ci. 43 M'ciim zah ung sheka ne k'thagui maih ci, a thawh law ba ung kyomsang ne k'thagui be ci. 44 M'ciim zah ung m'dek chang pumsa ah kyak ci, a thawh law ba ung mumcha pumsa ah kyak ci. M'dek-chang pumsa om ci kyasei mumcha pumsa phi om ci. 45 Cacim ung, Ak htük ah chang Adam cu, a hnun ghing ah a tüi ah kyak ci, ak hnu bäih ah Adam cu Mumcha ghin sak ciah kyak ci. 46 Mumcha pumsa ng'tüi law htük ciah kä kyak ci, khodek pumsa a om kawn ah Mumcha pumsa om lawk ci. 47 Ak htük bäih Adam cu khodek a pyan ah kya ne, khodek ung kaa lawk ciah kyak ci; Ak hnih nak Adam cu Khankho ah kaa lawk ciah kyak ci. 48 Khodek khäm ciah chang gui cu, khodek pyan ah mäih lawk ci gui; Khankho khäm ciah chang gui cu khankho ah kaa kyum lawk ciah mäih lawk ci gui. 49 Mik mi cu khodek pyan ah chang ah mäi, mi mäisa nak ah mäih ah, khankho ah kaa kyum lawk ciah chang ah mäi, mi mäisa nak khai nei. 50 Phainau gui aw, kei naw ka pyein hlü cu, si la sa awn pyan ah chang naw Khanpughi ah uk nak kho kä khäm hlawt khai. Thuka thei ci cu käthuka thei ciah kä kya hlawt khai. 51 Ngai vä, thuuk ne ng'düng ciah mawng cu ka ning m'thein gui khai. 52 Mik mi mi van cu kä mi sik khai, cun ung phi pyungheng ami tum law ung mik mi cu mik m'chip ah mäih ah a shänghta ung mi ng'thang zawp khai. Ak hnu ah k'phyungheng ami tum law ung sik ci gui cu tho ba u ne, sih nak cu ang tüi ah phyawng nak khai gui. Mik mi mi van cun phi mi ng'thong zawp khai. 53 Thuka thei ci cu kä thuka thei ciah ng'thong khai; si thei ci cu kä si hlawt ciah ng'thong khai. 54 Thuka thei ci cu kä thuka thei ciah phi bäi, si thei ci cu kä si thei ciah phi bäi, ang thon kawn ah, Sih nak cu m'shiu ne m'di pyi nei, khütnäng nak cu kümbe pyi ci nei ci ah cacim cu akcang ah khäm khai. 55 äSih nak, nang ah k'sam mei cu a hawi ang? Sih nak nang ah m'khütnäng nak cu a hawi ang? 56 Sih nak ah k'sam mei cu kat nak ah kyak ci, kat nak ng'huuk nak cu thukhän ah kyak ci. 57 Cun ung phi mi Bawipa Jesuh Khrih ung, sih nak m'khütnäng nak na pe gui ciah Khanpughi cu kam hlüngtai aih ci nei. 58 Cun ah kyasei phäinau gui aw, khüi ne ng'düi ne ghaat ne ng'bi vä. Khanpughi ah khuut bi cu a i zah ung phi a kholä ah kä kyak ci, ci cu hmuhmat u ne, ang tüi sei khüighaat vä.
1 Ca nami guk law ah, Judea kho ah Khanpughi ah chang gui m'htei nak gui vai ah ngui ah mawng ung, Kalatia kho ah Khtihtabum gui kam cäi gui ah mäih ah nami bi vai nei. 2 Kei ka gawk law ung ngui loh vai kä hlü khai ah, pum hnüüp päng ung, ak chang sing naw nami mät ah khawh gah a ci ah, pe u ne, nami na m'cun vai nei. 3 Kei ka gawk law ah a kyak ung, nami ghü ah chang am, ca guh ne m'khah ne, cun ah ngui cu Jerusalem ah vah peit sak vai nei. 4 Kei ka hteit khai a kyak ung phi cun ah chang gui cu kei ung ami ng'gui tu ung bäi khai nei. 5 Kei cu Macedonia kho lam ah ka lawk khai kya sei, Macedonia kho ung ka hteh zawp kawn ah, nangmi ah om nak ah ka lawk khai nei. 6 Nangmi awn atäng ah ak sho hta ka om hngaw khai, khoksik zah pum ung a cä ah ka om tu hman khai nei Cun kawn ah ka hteh nak hlü ah ka hteh hning vai ah nami nam hteihtang khai ah ka ngai ci nei. 7 Kei cu nangmi ah ka ng'däm tu pah düt ah kä kyak ciah, Khanpughi naw a zum ung nangmi awn ak shou ka om hlük ci nei. 8 Pentekos hnüüp ung khüt sei, Ephesus gawnu ah ka om khai nei. 9 A cu ah kei na hnu ng'tuk püi ci akda om pang sei phi, a khuut bi nak vai a khin akni om ci nei. 10 Nangmi ah Timothi a gawk law ah a kyak ung akni ah dou ne nami khinchah nak vai nei, a i ah kyasei ci ung ani cu kei ah mäih ah Khanpughi ah khuut bik ciah kyak ci. 11 Ani cu a u naw phi kä ak shedam men nak vai nei. Kei cu khrihta phäinau gui awn atäng ah ani kami ging ci kya sei, keimi ah om nak ah akni ah a gawk law vai ah nami m'htei htang vai nei. 12 Ka nau Apollos cu, khrihta phäi nau gui awn atäng ah, nangmi ah om nak ah a law vai ah, ang tüi sei kam cäi ci nei. Cun ung phi a law nak vai ah khin cu ak pit ah kä k'bäi phak ci nei. Akhin a gah law ung, a i ah a kyak ung phi lawk khai nei. 13 Nami cäivai vai, nami zum nak ung khäng htek sei nami ng'düih vai, nami hlui cang vai, nami k'thamah vai. 14 Nami bi phung m'hni nak awn nami bi vai. 15 Nangmi naw Stephanas la ak kyong ung kaa gui cu nami hmat ci. Ngahmi cu Achaia kho ung khrihta ah kya law ma ci gui ah kya ne, Khanpughi ah chang gui ah hmawk ah bi bi vai ah ng'ap ci gui ah kyak ci. 16 Phäinau gui aw, a shin ah mäih ah chang gui ah lam shäm nak la, ngahmi awn atäng ah k'tha na ne khuut bik ci gui ah lam shäm nak cu nami läk vai ah ka ning m'cäi gui ci nei. 17 Kei cu Stephanas, ni, Fortunatus ni, Achaikus ni gawk law u sei ka zei ci nei, ngahmi naw nangmi ah hnün ung kei cu nam hteihtang ci gui nei. 18 Ngahmi naw nangmi ah m'lung ami ning zei sak gui ah mäih ah kei phi na zei sak ci gui nei. Cun ah mäih gui cu chang m'sui nak gah khin ci gui nei. 19 Asia kho ah Khrihtabum gui naw phi ning zavaih gui ci gui nei; Akuila la Priscilla ni, ami im ah nami pum nak gui ah khrihta gui naw phi ning zavaih gui ci gui nei. 20 Shi ah om ciah khrihta phäi nau gui ami van naw ning zavaih gui ci gui nei. Theingthap ciah ng'ui ng'hnam nak awn tumat la tumat ng'zavaih na tu vä. 21 Ka mät ah kut awn, Paul ah zavaih nakä ci ne ka hei guk nei. 22 A u chang phi Bawipa kä m'hni ci phung cu— kyuk sä! Marana tha— Kami Bawipa Kyum lawä! 23 Bawi Jesuh ah m'gein nak cu nami khan ah om sä. 24 Bawi Khrih Jesuh ung kei ah m'hni nak cu nami van ah khan ah om sä. Amen.
1 Khanpughi ah ang zak hlü ah Bawi Khrih Jesuh ah ang düihpüi Paul la anau Timothi naw— Korin ung Khanpughi ah Khrihtabum la Achaia kho Khanpughi ah chang gui a van am ca pe lawk ci goi nei. 2 Mi Pa Khanpughi la Bawipa Jesuh Khrih naw m'gein nak la dim nak cu ning pe gui sä. 3 M'hteihtang ciah Bawi, chimgein ciah Pa, mi Bawipa Jesuh Khrih ah Pa Khanpughi cu mi m'hlüngtai khai nei! 4 Ani naw zaica nak phung ung nam htei gui ci, cun ah kyasei Khanpughi ung mi gah cun ah m'htei nak awn, zaica ciah chang gui cu mi m'htei tu hning ci nei. 5 Mik mi naw Bawi Khrih ah aut ah, da aih ciah geinvai nak cu mi aut tu ah mäih ah Bawi Khrih ung Khanpughi ah na peit gui ah m'htei nak cun phi mi gah ci. 6 Kei mi kami geinvai ung, nang mi naw m'htei nak la hun nak nami gah vai ah hmawk ah kyak ci. Keimi m'htei nak kami gah ung nangmi cun phi m'htei nak gah u ne, keimi naw kami aut ah geinvai nak cu hnimgei ne, aut m'khüt nak ah thagui cu nami gah khai. 7 Cun ah kya sei nangmi cu keimi ah aut ah geinvai nak gui nami aut tu ah mäih ah keimi ah gah ah m'htei nak cun phi nami gah tuk ci; ci cu khäng sei ka mi zum ci. 8 Phäinau gui aw, Asia kho ah ka mi aut ah zaica nak ah mawng cu ka ning m'htein gui hlük ci. Cun ah zaica nak cu däm ne gih aih khütah, ghin nak hngaw kami hnu ng'hlah tak ci nei. 9 Kami mät naw kami mät sih nak ung kami gawk ciah kami ngai ci. Cun ah a kyak cu keimi naw, kami mät kä ngaih u, u ne, ak si thawh ba sak ciah Khanpughi kami ngiah u vai ah hmawk ah kyak ci. 10 Cun hlawk ah kyih aih vai ah sih nak ung kaa, Bawipa naw na hun gui ci; na hun ba gui khai; cun kawn ah phi na hun ba gui mä khai ah zum ne mi ngaih u ci. 11 Nangmi naw keimi cu taigü nak awn nami nam htei gui vai. Nangmi akda naw nami k'taigü cu Khanpughi naw ngai ne, keimi cu hrilham na pe gui khai. Chang akda naw keimi ah hmawk ah ami k'aw m'hlaw ne, Khanpugui cu m'hlüngtai khai gui. 12 Keimi ung m'lung ngaih theing awn khähghah nak vai tumat om ci, cun cu khodek khan ah ghin nak ung, ak tung pi ah, nangmi awn ng'khuihphaa nak ung chang ah cäivai nak awn ah kä kyak ciah Khanpughi ah hlüngtai ciah m'gein nak ung, Khanpughi ah na peit gui ah m'lung theing awn kami pawngpäi bilawh ah kyak ci. 13 Shin ah guk ah ca gui cu nangmi naw nami phat hning la nami hmat hning bäng ah kyak ci. 14 Tuhbäi keimi ah mawng am shah bäng nami hmat ung phi, avan nami hmat khai ah, ka ngaih u ci nei. Cun ah kyasei Mi Bawipa Jesuh a law hnüüp ung, nangmi ah hmawk ah kami khähghah ah mäih ah keimi ah hmawk ah nami khähghah khai nei. 15 Kei naw shin ah a mawng gui cu ngaih gep ne, nangmi naw hrilham hnih vei nami gah vai ah, 16 Macedonia kho ah ka hteh lam ah hnä t, ka law ba lam ah hnüt t, ka lawk khai, cun ung kaa naw Judea kho ah ka hteh hlawt vai ah nami na m'htei khai ah ka ngai ci. 17 Cun ah ka ngaih cu kam lung hnih ah ng'pai sei ang Cun ah ka k'bäi cu ka mät bäng ah ngaih ah kyai khai bawk ang? Atäng düt ah ä , ka kaä ka ci ah kyak khai ang? 18 Khanphghi ah ng'thu cu akcang ah ng'düng ci kyasei, kei ah shaitaak cu, ä la kaä hnih ah kä kyak ci. 19 Silas ni, Timothi ni, kei ni naw shäu ne kami pyein ah Khanpughi ah Htapa, Bawi Jesuh cu, ä ci shäm kaä ci shäm ciah Bawi ah kä kyak ci. Ani cu Khanpughi ah ng'zak hlü cu ä zaä cik ciah Bawi ah kyak ci. 20 Khanpughi ah shaitaak avan cang ah m'dang ciah kyak ci. Cun ah kyasei Khanpughi ah bämang nak ang dang vai ah, Bawi Jesuh Khrih ung Amenä mi ciah kyak ci. 21 Bawi Khrih ung kawng ät nak awn keimi la nangmi na ghin sak gui ci cu, Khanpughi a mät ah kyak ci. 22 Khanpughi a mät naw m'khoi ne na khei gui ne, amät ah chang ah ng'kheing vai ah nam hnüt gui ci. Mik mi ah gah vai a na m'küm peit gui cu a kyän nak ah Mumcha Theing cu mi m'lung kyong ung na pe gui ci. 23 Korin ah kä ka law vai ah ka k'bäi cu nangmi ka ning m'gein nak gui ah a kyak cu kei ah m'lung hmat ciah Khanpughi saksi ci. 24 Nangmi naw a i nami zum vai ah ning k'bäi gui ah kä kyak ci, nangmi ah zum nak cu khäng ciah kami hmat ci. Keimi naw nangmi ah zeikyai nak vai ah nangmi awn atäng ah kami bi ah kyak ci.
1 Nangmi ah kei ka law ung nami m'lung kä nik khai kyasei, kä ka law ba khai ah ka k'bäi ci nei. 2 Nangmi nami m'lung kä nik khai ah ka bi ung, a u naw kei na zei sak khai ang? Kei ah hmawk ah am lung kä nik ci gui ah kawn ah na zei nak ci a u kä om khai nei. 3 Nangmi naw kei cu nami na zei sak khai säte, cun ung phi, kei ka law ung nangmi ah hmawk ah kam lung a thüi vai kyi netah, ca ka guk law te ah kyak ci nei. Kei ka zei ung nangmi nami van nami zei khai ah ka zum ci nei. 4 Kei cu ang htei ah thüisei zaica ne, ng'phli tui awn cun ah ca cu ka guk nei; Cun cu nami thüi nak vai ah kä kyak ci Nangmi naw a i hlawk ah ka ning m'hni gui nami hmat nak vai ah ka guk ah kyak ci. 5 Chang tumat naw kei a nam thüi ah a kyak ung, kei bäng ah kä kyak ci, nang mi nami van, kä cun ung am shah läi cu ning m'thüi gui ciah kyak ci. (A cun ah chang ah khan ah kat nak kä k'bum hlü ne cun ah ka pyein ah kyak ci). 6 Nang mi akda pi naw nami m'kat nak a gah ani naw a kyä vai ah m'kat nak ah kyak ci nei. 7 Tuhbai nuipai sei kä a thüi aih vai ah, ani cu m'gein ne, thamah nak pe vä. 8 Kei naw ka ning m'cäi gui cu, akcang ah ani nami m'hni cu nami hmat sak vai nei. 9 Zanä kei naw ca ka ning guk law gui cu, tüihtok nak m'khüt vai ah nami ng'düih la, kei ah ning m'shümthein gui läk ghet vai ah nami om ah, hmat nak vai ah kyak ci. 10 Nangmi naw chang tumat ah kat nak cu nami m'gein ung, kei naw phi ani cu kam gein ci. Chang tumat cu kei naw kam gein vai a hlü law ung, nangmi ah hmawk teng ne Bawi Khrih ah ma ah kam gein ci nei. 11 Cun ung vah Satan cu mik mi ah khan ah kä a nüng vai ah mi shung hlawt khai; Satan ah theileh cu mik mi naw mi hmat ci. 12 Bawi Khrih ah mawng Thu Ni shäu vai ah Troas ung ka gawk law zah ung, a cu ah a khuut bi vai ah Bawipa naw lam kawt na hmawn pe sei ka hmuk ci. 13 Cun ung phi mi nau Titus cu kä hmu netah ang htei ah ka cäi ng'ä ci. Cun ah kyasei a cu ah chang gui cu zavaih gui netah Macedonia kho ah ka hteit ci. 14 Cun ung phi Khanpughi kam hlüngtai ci! a i ah kyasei ci ung Khanpughi naw mik mi cu Bawi Khrih ung na kawng ät sak gui ne, Bawi Khrih ah nüng nak tung ak chang phaa ah khän ne a na ng'leen püi gui ah hmawk ah kyak ci. Bawi Khrih ah mawng hmuh hmat nak cu, tui ng'ui ah mäih ah kho ng'nä ung ang ui vai ah Khanpughi naw na mang gui ci. 15 Mik mi cu Bawi Khrih naw Khanpughi a khawihnah nak ah ng'ui ah mäih ah, hun nak gah sang ci gui la chükmaih sang ci gui ah ng'lung ah mi ng'ui ci. 16 Chäkmaih ci gui ah phäh ah cun ah ng'ui cu, sih nak ah kya ne, hun nak gah ci gui ah phäh ah cun cu ghin nak ah kyak ci. Cun ah kyasei cun ah mäih cu a u awn khinkha khai ang? 17 Keimi naw a hei chang gui ah so ah, Khanpughi ah ng'thu cu, aphu k'zän khawhchaam ah mäih ah kä kami sumlei nak ci; Khanpughi naw ana tüih gui ah kyasei, amaa ah ang thu cu, Bawi Khrih chang shäm ah kya ne ng'düng sei kami pyein ci.
1 Shin ah mawng ung keimi cu kami khähghah ciah kya ne ang? Chang am shah gui ah mäih ah k'bääi nak ah ca gui cu, keimi naw nangmi am kami ning peit gui vai hlü ne ang? kä cun ung nangmi ah kami laak vai hlü ne ang? 2 Nangmi nami mät cu chang avan naw hmat ne a phat vai ah, keimi ah m'lung ung guk ah ca ah nami kyak ci. 3 Cun ah ca cu Bawi Khrih amät naw gu netah keimi am ana tei sak gui cu dang ci nei. Cun ah ca cu hmein nawn guk ah kä kyak ci, ghing ciah Khanpughi ah Mumcha awn guk ah kyak ci, cun ah ca cu lung ung guk ah kä kyak ci, chang ah m'lung ung guk ah kyak ci. 4 Cun ah kami pyein cu Keimi naw Bawi Khrih ung Khanpughi kami zum ah hmawk ah kyak ci. 5 Shin ah khuut kami bi hning ciah pyein nak vai ah keimi ung a i k'thagui phi kä om ci, Khanpughi ah na peit gui ah k'thagui bäng vah om ci. 6 Kei mi naw thukhän thai ah hmawk ah kami bilawh nak vai ah k'thagui cu na pe gui ci, cun cu guk ah thukhän ah kä kyak ci, Mumcha ah kyak ci. Guk ah thukhän cu sih nak ah kyak ci, Mumcha cu ghin nak ah kyak ci. 7 Lung ung guk ah thukhän a peit zah ung Khanpughi ah bämang nak cu deikhang ci. Cun ah deikhang nak cu Mose ah hmai ung ang shu law pipi ung phi, ang htei ah ng'shü sei, Israel chang gui naw kheing ne kä teng hkawt ci gui. Sih nak law püi ciah thu khän hngaw, shin ah mäih bämang nak awn a peit ah a kyak ung, 8 Mumcha ah hnüntawh nak ah bä mang nak läi cu a i hlawk ah ng'shükhang khai ang! 9 Shet m'kat nak ah thukhän hngaw bämang nak a om ung; Hun nak pek ciah hnünthawh nak cu a i hlawk ah bämang pi khai ang! 10 Cäu ng'shü man ciah bämang nak cu ng'kon sei, cun ah ng'shü pi ci naw tuh bäi chü küm ci nei. 11 A shänghta hang om ci hngaw ung bämang nak a om ung, ang tüi ah om ci ung a i hlawk ah bämang nak om khai ang! 12 Keimi ung cun ah ngaih u nak om sei ang htei ah kami hluicang ci. 13 Keimi cu Mose ah mäih ah kä kami kyak ci, ani cu ng'shu ne maih lawk ciah a hmai ung akdei Israel chang gui naw kä ami hmuh vai ah, a hmai cu shung ci. 14 Israel chang gui ah m'lung cu ng'khai ci, tuh ngawi güt ung thukhän phyim cu ami phat ba phung ung ami m'lung cu, cun ah tampu naw shung gui ci. Bawi Khrih ung ghing ciah chang bäng naw vah cun ah tampu cu liim hlawt ci. 15 Tuh ngawi güt, Mose ah thukhän ami phat ba phung ung ami m'lung cu, tampu naw shung gui lä ci. 16 Mose ah mawng cacim ung om ciah mäih ah, Ani Bawipa ah ang hlah kawn ah a tampu cu ng'liim pyi cik, 17 Bawipa ci cu Mumcha ah kyak ci Bawipa ah Mumcha ah om nak cu ng'päi ng'zee nak ah kyak ci. 18 Mik mi mi van ah hmai cu a i naw kä shung ba sei, Bawipa ah bämang nak naw na khang gui ci; A cun ah bämang nak cu Mumcha ah kyak ciah Bawipa ung kaa law ne, Amät ah mäi ah na ng'huh püi gui sei, ang tät ah abämang nak cu hlüngtai ci.
1 Khanpughi naw chimgein nak awn a khuut bi vai ah na pe gui sei, k'tha dam nak vai a i kä om ci. 2 Keimi naw m'zih vai la lä ng'aa nak vai cu kami nawng shüt ci; keimi cu kä kami thuvi ci, Khanpughi ah ng'thu phi hleei ne kä kami pyein ci. Keimi cu Khanpughi ah maa ah düng ciah akdei ung ghing u ne, chang gui ah ni kyom nak vai ah k'tha na ne kami bik ci. 3 Keimi ah pyein, ah Thu Ni cu ang zih ah a kyak ung chükmaih ci gui ah hmawk ah ng'zih ciah kyak khai. 4 Khodek khan ah khoshe naw ami m'lung cu shung sei, ngahmi naw kä zum hlawt ci gui. Satan naw shung gui sei, Khanpughi ah mäi ak cang ah kyak ciah, Bawi Khrih ah bämang nak ah mawng, ngahmi ah khan ah ng'shü lawk ciah ; Thu Ni ah akdei cu kä hmu hlawt ci gui. 5 Keimi naw ka mi mät ah mawng kami pyeinsak ah kä kyak ci; Jesuh Khrih cu Bawi ah a kyak ah mawng la keimi cu Bawi Jesuh ah hmawk ah nangmi ah changshäm ah kami kyak ah mawng kami pyein ci. 6 äHnäp ah khui ung akdei ng'shü lawk khaiä ci ne pyein ciah Khanpughi cu, Bawi Khrih ah hmai ung ng'shü ne khang ciah bämang nak ah mawng cu hmat nak vai ah, mik mi ah m'lung kyong ung, akdei cu ng'shü law sak ciah Khanpughi ah kyak ci. 7 Cung ung phi Mumcha khawh mi m'küm ciah mik mi cu, m'dek am düt ah mäih mi lawk ci kyasei, mik mi ung uk nak ah hlüngtai nak kä om ci, Khanpughi bäng ung vah om ci. 8 Mik mi cu ashäng shäng mi zaica ung phi kä mi ng'pyäuh sagei ci; ak hngä ät mi khüi khaa ung phi, m'lung kä thüi ci; 9 Mi gaa ada ung phi, teihpüi kä maih ci, ng'tään vai ah ami nam shän ung phi kä mi di ci. 10 Bawi Jesuh cu mik mi ah pumsa ung ang dang vai ah, thuka thei ciah mi pumsa naw Bawi Jesuh ah autah sih nak cu ang tüi sei mi aut ci. 11 Mik mi cu mi ghin zah ak chuih Bawi Jesuh ah hmawk ah sih nak cu mi aut ci, cun cu mik mi ah thuka thei ciah pumsa ung Bawi Jesuh a ghin ah mawng ang dang vai ah hmawk ah kyak ci. 12 Sih nak cu keimi ung a hnün thawh ung phi ghin nak cu nangmi ung hnüntho ci. 13 Cacim ung, Kei naw zum ne Thu ka pyein ciü a ci ah mäih ah keimi ung phi zum nak om sei, zum nak awn thu kami pyein ci. 14 Bawipa Jesuh thawh ba sak ciah Khanpughi naw, kei mi cun phi Bawipa Jesuh awn atäng ah na thawh ba sak gui ne, nangmi awn atang ah ama ah na hteh püi gui khai ci cu kami hmat ci. 15 Shin gui avan cu nangmi ah hmawk ah kyak ci; Khanpughi ah m'gein nak gah ci da law pipi ne, Khanpughi ah bämang nak m'hlüngtai ne taigü ci phi da law pipi khai khai nei. 16 Shin ah mawng ung keimi a i zah ung phi kami tha kä maih khai nei. Ka mi pumsa cu a dängphai law ung phi ka mi mumcha cu ak hnüüp tä k'thai ba pi pi ci nei. 17 Keimi naw a shäng ak zaang ah kami aut ah zaica nak naw cun ah hlüngtai pi ciah ang tüi sei bämang nak cu na gah sak gui khai nei. 18 Kei mi naw mik awn hmuh cu kä kami kheing ci, mik awn kä hmuh vah kami kheing ci. Mik awn hmuh cu a shängta khäng ne, Mik awn kä hmuh cu ang tüi sei khäng ci.
1 Mik mi ah om nak ah kyak ciah khodek pumsa cu ang kawn ah a kyak ung, Khanpughi naw khankhaw ah, amät ah pyan ah, ang tüi om nak ah im, na k'hman gui khai ci cu mi hmat ci. 2 Khodek pumsa awn mi om zah ung khankhaw im cu mi hmu hlü ne, mi ng'hlo ei ci; 3 cun ah khankhaw im ah sui cu mi sui law ung mik mi cu pumsa k'maih ah kä mi kyak khai. 4 Khodek im ung mi om zah ung mik mi cu mi ng'hlo ei ci, cun cu khodek pumsa mi nawng hlü su ah kä kyak ci, thuka thei ci ung ng'huuk ne, ang tüi ghin nak ah khankhaw pumsa cu ng'zak hlü ah hmawk ah kyak ci. 5 Cun ah ng'huuk nak vai na pyan pe gui ci cu khanpughi ah kyak ci, Mik mi am a na gim peit gui, a kyän nak ah Mumcha cu na pe gui ci. 6 Cun ah kyasei keimi cu kami k'tha mah ci. Mik mi cu pumsa im ung mi om zah ah chuih Bawipa ah im awn mi ng'shawng ci, ci cu mi hmat ci. 7 Mi ghin nak ung zum nak cu ak tung ah kyak ci, mik awn hmuh nak cu ak tung ah kä kyak ci. 8 Kei mi cu k'thamah nak om sei, pumsa im cu nawng shüt ne, Bawipa awn atäng ah om vai cu kami ng'za hlü pi ci. 9 Keimi cu shi ah, cä ah, a hawi ah om ung phi Bawipa naw ana zei nak gui vai kami ng'za hlük ci. 10 Mik mi mi van cu m'khoichaa nak mi gah khai ah Bawi Khrih ah maa ah mi gawk zawp khai. Pumsa awn mi om zah ung ak ni, ak she mi bi gui ah ci ah, mi k'chaw phähphäh cu mi gah khai. 11 Keimi cu Khanpughi kami kyih aa ci kya ne, chang gui cu kami m'cäi m'ä gui ci. Khanpughi naw mik mi cu na hmat gui zäm ci; nangmi naw kei ah mawng cu nami m'lung kyong ah, nami hmat zäm khai ah ka ngai ci. 12 Cun cu keimi ka mi ming thang vai ah tha nak ba ah kä kyak ci, keimi ah khan ah nangmi ah mingthang nak vai cu k'tha na ne ning peit gui ah kyak ci. Cun ung vah, chang ah om ih kä teng ah a mäisa düt teng ne khähghah ciah, chang gui ah ng'thu cu nami m'hlan tuha hlawt khai. 13 Keimi cu kä ka mi gu ei ci ang? Kami gu ah a kyak ung Khanpughi ah hmawk ah kyak khai. Kä ka mi gu ah a kyak ung, nangmi ah hmawk ah kyak khai. 14 Chang tumat cu chang avan ah hmawk ah si sei, chang avan naw ani awn atäng ah sik nak ami aut ah mawng cu tuhbäi keimi naw kami hmat pyi ci kya sei, keimi cu Bawi Khrih ah m'hni nak naw na uk gui pyi ci nei. 15 Bawipa cu chang van ah hmawk ah sik ci, cun ah kyasei chang gui cu ami ghin zah ung ami mät ah hmawk ah kä ghing ba u ne, ngahmi ah hmawk ah a hnun gui pe ne, tho ne ghing ba ciah Bawipa ah hmawk ah a mi ghin vai ah kyak ci. 16 Cun ah kyasei keimi naw chang ah m'hnüt nak awn, a u kä kami m'khoi cha ba ci. Zanä keimi naw, Bawi Khrih cu chang ah m'hnüt nak awn kami m'khoichaa man ung phi, tuhbäi cun ah kä kami kya ba ci. 17 Chang nak ci cu Bawi Khrih ung a ghin ung, ak thai ah ng'tüi ba ciah kyak ci; ak phyim avan ng'kawn zawp ne, avan ak thai ah kya zawp ci. 18 Cun avan cu Khanpughi ah bi ah kyak ci, Khanpughi naw mik mi cu a gaa ung kaa a teihpüi ah Bawi Khrih awn na ng'thon sak gui ci, chang hei gui cun phi a teihpüi ah ami kyak law tu vai ah, bi nak vai cu na pe gui ci. 19 Keimi ah ng'thu pyein cu, Khanpughi naw hnicim chang avan, Bawi Khrih awn 20 Tuhbäi keimi naw Bawi Khrih ah hnün ung kami ning thu püi gui ci, Khanpughi a mät naw keimi ung om ne a ning thu püi gui ah mäih ah kyak ci. Bawi Khrih ah hnün ung keimi kami ng'ge ci nei; Khanpughi ah gaa ung kaa naw a teihpüi ah ng'thawng tu vä. 21 Bawi Khrih cu kat nak kä om ci, cun ung phi mik mi cu ani awn kawng ät ne, Khanpughi ah mäih ah mi ng'düng vai ah, Khanpughi naw Bawi Khrih cu mik mi ah hmawk ah, mi kat nak a aut sak ah kyak ci.
1 Cun ah kyasei Khanpughi ah khuut bi nak ghawm awn nangmi cu kami ning hui na gui ci. Nangmi cu Khanpughi ah m'gein nak nami gah ci kyasei, cun cu kä nami m'di en vai. 2 Khanpughi naw, Ka ning m'htei nak gui vai ah khin a gawk law ung, Nami ng'zoih cu ka ning ngaih pe gui ci nei; Ka ning hun nak gui vai ah khin a gawk law ung, Ka ning m'htei gui ci nei a ci cu ngai zah vä. Ngai vä, Khanpughi ah m'gein nak gah nak vai ah khin cu, a tuh bäi ah kyak ci; hun nak ah hnüüp cu a tuh ngawi ah kyak ci! 3 Keimi ah khuut bi nak ah mawng ung chang naw kä ah nam kat en gui vai ah, chang ah kä ng'zak hlü a i phi kä kami bi vai ah kami k'tha nak ci. 4 Zaica nak khüikhaa nak la geivai nak gui cu, hnimgei nak awn aut u ne, amawng avan ung Khanpughi ah chang shäm ah, kami kyak ah mawng cu kami m'dang ci nei. 5 Keimi cu tukthah nak, thawng chum nak, m'thüiplah nak kami gah ci; kä ng'däm ah bi kami bik ci kya ne, ih khin ei khin phi kä om ci. 6 Theingcim nak, htangkhaa nak, hnimgei nak, ng'awi ng'gi nak gui awn phi bäi, Mumcha Theing ah m'gein nak la kami m'hni nak ak cang awn phi bäi; 7 ng'dung ciah ng'thu pyein nak la Khanpughi ah hlüngtai nak awn phi bäi, keimi cu Khanpughi ah changshäm ah kami kyak ah mawng cu kami dang sak ci. Ng'tuk bi nak la gaa shung nak ung, ng'düng nak cu, kami li khim ah mäih ah kami mang ci. 8 Keimi cu m'tamkhah nak la zoshe nak, päipih nak la m'hlüngtai nak kami gah ci. Kami hleeihlak ciah na pyein gui u sei phi düng nak cu ka mi pyein ci; 9 kä mingthang ciah kami kyak ung phi chang van naw na hmat gui ci; ak si ah kami kyak ung phi, nami hmuh a mäih ah kami ghing ci. M'kyuk nak kami gah ung phi a u naw kä na ngawn gui ci. 10 Thäisei nak a om ung phi ang tüi sei kami zei ci; chang k'pyaam ah kami kyak ung phi chang akda kami maang sak ci; khawh a i kä kami taak ung phi apäng avan kami khäm ci. 11 Korin ah teihpüi gui aw! Keimi naw akdei dang ah kami ning thu püi gui ci nei kami m'lung choh phi ang shawng ah kami hmawng ci nei. 12 Ami m'lung choh khai ci gui cu keimi ah kä kyak ci; keimi ah ma ah ami m'lung choh khai ci cu nangmi ah kyak ci. 13 Tuhbäi kei naw ka hta gui ah mäih ah ka ning m'cäi gui ci nei; Keimi ah ning ngaih gui ah mäih ah na ngai gui u ne, nami m'lung choh a ng'shawng ah k'hmawng vä! 14 Kä zum ci gui awn atang täng ah kä nami hnün thawh vai, atäng ah om ih vai ah kä kyak ci. Ak ni la ak ka cu kä ng'gui ng'pha hlawt khai goi. Akdei la ak hnäp cu atäng ah kä om hlawt khai goi. 15 Bawi Khrih la khoshe cu kä kawng ät hlawt khai goi. Zum ciah chang cu kä zum ciah chang awn kä om ghawm hlawt khai goi. 16 Khanpughi ah pum im cu a gup gui awn ng'thu kä khän hlawt khai gui. Mik mi cu Ghing ciah Khanpughi ah Pum im ah mi kyak ci! Khanpughi amät naw; Ka chang gui awn ka im ka pyang khai, Ami ng'lung ah ka om khai! Kei cu ngahmi ah Khanpughi, Ngahmi cu kei ah chang gui ah kyak khai guiä ci ne pyein ci. 17 Cun ah kyasei Bawipa naw; Ngahmi cu nawng shüt gui ne, ngahmi awn ng'cha ne nami om vai. Kä theingcim ci cu kut awn phi kä nami tawk en vai, cun ung ka ning dou gui khai. 18 Kei cu nangmi ah Pa, Nangmi cu kei ah hta gui, ah nami kyak khai, ci ne m'gäi pi ciah Khanpughi naw pyein ciü ciah khän ne pyein ci.
1 Teihpüi gui aw, shin ah shaitaak gui cu mik mi ah hmawk ah kyak ci. Cun ah kyasei pumsa la m'lungkyong shetkat sak ci phung cu theingcim sak ne, Khanpughi kyih aa nak awn kümbe ciah theingcim ne mi om khai nei. 2 Keimi nam hni gui vä. Keimi naw a u phi kami shetkat nak kä om ci; a u phi kä kami didap sak ci, a u ah khan ah phi kä nik khai ah kami m'käng nak kä om ci. 3 Cun ah ka pyein cu nangmi ka ning m'kat gui ah kä kyak ci, azan ka pyein ah mäih ah, nangmi awn sih ung phi ghin ung phi atäng ah om vai ah ka mi ning m'hni gui ah hmawk ah kyak ci. 4 Nangmi ka ning ngaih gep gui ci, nang mi ah phäh ah ka lüngtang ci! Zaica nak a i chü a om ung phi, kei cu k'thamah ne ang htei ah ka zeikyai ci. 5 Macedonia kho ah kami gawk law kawn ah phi kami ng'däm nak kä om ci; zaica nak akda kami aut ci, chang gui ah ng'tuk ng'vauk nak akda om sei, ang htei ah kami kyikyawk ng'ä ng'ai ci. 6 Zaica ng'ä ng'ai ci, k'thamah sak ciah Khanpughi naw, keimi ah gawk lawk ciah Titus awn k'thagui na pe ba gui ci. 7 Cun bäng ah kä kyak ciah, Titus nami m'htei tu ah mawng phi ng'za ne kami zei ci. Kei nami na hmuh hlü aih ah mawng, nami ng'ä aih ah mawng, kei nami na küikyan khai ah nami ng'düih ge ah mawng gui cu, ng'za netah ka zeikyai pi aih ci nei. 8 Ka guk law ah ca naw nami m'lung a ning m'thääi gui ung phi cun ah ca ka guk ah phäh ah kä ka ng'zu ba ci nei. Cun ah ca ah phäh ah kä nami zei cu hmat ne ka thüi te ci, cun ung phi, 9 tuhbäi ka zei ci nei, cun cu ka ning m'thüi gui ah hmawk ah kä kyak ci nami thüi nak naw, nami m'lung a ning thawng sak gui ah hmawk ah kyak ci. Cun ah thüisei nak cu Khanpughi naw mang ci kyasei, nangmi ning zaica nak sak gui a i kä om ci. 10 Khanpughi ah mang ah thüisei nak naw m'lung kyong ng'thawng sak ne, hun nak ah gawk sak ci Cun ah phäh ah thüi nak pi kä om ci! Cun ung phi ng'zu ba nak kä om ciah thüisei nak cu sih nak ah kyak ci. 11 Nami thüisei nak ung Khanpughi ah bi bi cu teng vä! Nami k'thamah law pyi ci, nami kat nak a theing ah mawng nami m'dang law pyi ci, nami m'lung k'she ah phäh ah nami ng'ä pyi ci, nami kyikyawk pyi ci, nami ng'ap pyi ci, cheishoh nak m'kat vai nami hmat pyi ci, a mawng avan ung kat nak nami phyawn nak ah mawng nami mät naw nami m'dang pyi ci nei. 12 Cun ah kyasei a zan ka guk law ah ca cu, cheishoh ciah chang ah hmawk ah phi kä kyak ci, ami cheishoh nak ah chang ah hmawk ah phi kä kyak ci. Khanpughi ah maa ah nangmi naw keimi cu a i hlawk ah nami na zum hni gui cu akcang ah ang dang vai ah phäh ah kyak ci. 13 cun cu dang sei keimi cu kami k'thamah ci. Kami k'thamah bäng ah kä kyak ciah Tutus cu m'hteihtang uk ci sei, ani a zeikyai cu hmuh u netah, ang htei ah kami zei kyai ci. 14 Kei naw nangmi ah mawng, Ani ah ma ah khähghah ne kam thein te ci, a cun cu nangmi naw dang khai ah nami bi ah kyak ci. Keimi naw nangmi ah maa ah düng ciah thu bä ka mi pyein ci, Titus ah maah khähghah ne kami pyein cun phi ak cang ah kya pyi ci nei. 15 Ani ah ng'thu ngai ghet khai ah nami om la, ani kyih aa ne nami na dou ah mawng cu, ani naw shäm ba netah, nangmi cu ning m'hni law gui pi ci nei. 16 Kei cu nangmi ah khan ah m'lung p ngaih gep nak om khütah ang htei ah ka zeikyai ci nei!
1 Phäinau gui aw, Macedonia Kho ah Khrihtabum gui am Khanpughi naw am gein nak gui ah mawng cu ka ning m'thein gui hlük ci nei. 2 Ngahmi cu zaica nak ak nui ah aut ci gui. Cun ung phi ang htei ah zeikyai u ne, ang htei ah ami pyamthaam pang ung phi, peit taak nak ung, ng'khailang aih ci gui. 3 Ngahmi naw ami peit hning ah kawn ah hang lawn pui khai ah ami peit cu, kei naw ak cang ah hmuh ne ka pyein ci nei. 4 Ngahmi naw Judea kho ah Khanpughi ah chang gui cu m'htei tu hlük ci gui, cun ah kya sei keimi ah k'thäh law laih laih ci gui. 5 Ngahmi naw keimi ah ngaih zatah däm pi khai ah pe hning ci gui. Ak htük bäih ah ngahmi cu Bawipa ung ng'ap ci gui, cun kawn ah khanpughi ah ng'zak hlü ah keimi ung ng'ap ci gui. 6 Shin ah bi tän ne bi lawk ciah Titus naw, shin ah m'hni nak ah bi cu, ang pyi ung khüt sei a ning bi püi gui vai ah kami m'cäi ci nei. 7 Nangmi cu zum nak, thu thei nak, hmuhmat nak, m'hteihtang hlü nak la keimi nami nam hni nak gui 8 Shin cu ka ning khänkhi gui ah kä kyak ci. Chang gui ah peittaak m'hteintang nak ah mawng ka ning m'thein gui cu nangmi ah m'hni nak ak cang, ah hmat vai ah phäh ah kyak ci. 9 Nangmi naw mi Bawipa Jesuh Khrih ah m'gein nak cu nami hmat ci; Ani cu bühmang ciah Bawipa ah a kyak ung phi, nangmi ah hmawk ah pyam ci. A pyaamthaam nak awn ning bühmang sak gui ci. 10 Ka mät ah ngaih ka pyein hlü cu, tuh kum tän ne nami bi cu, tuhbäi nami m'khääp ung bä pi khai. Nangmi naw zum nak awn peittaak nak cu nami tän ci. 11 Cun ah kyasei shin ah bi cu k'täi ne m'khääp ne bi vä. Nangmi naw shin ah bi cu nami ngaih tüh ah mäih ah, m'khääp ne nami bi vai nei. Nami ngaih ah mäih ah nami peit taak vai nei. 12 Nangmi naw na mi peit hlü cang ah a kyak ung Khanpughi naw, zum nak cang awn nami peit cu ning dou pe gui khai, nangmi ah kä peit nak hning cu Khanpughi naw kä ning k'thäh gui khai. 13 Nangmi ung gih ne chang ung a zang vai ah ka pyein ah kä kyak ci, a tutäng vai ah ka pyein ah kyak ci. Tuh chü nangmi ah bühmang nak naw pyamtham ci gui ak bukbe tu ah mäih ah, nangmi nami pyaamthaam tu ba ung ngahmi ah bühmang nak naw ning k'bukbe ba gui khai. 15 Cacim naw, Akda gah ciah kaa, kä k'pawih ci; api gah ciah kaa kä ken ciü a ciah mäih ah kyak ci. 16 Keimi naw kami ning m'hteihtang gui hlü ah mäih ah Titus cu kyak sak ciah Khanpughi cu m'hlänttai nei. 17 Titus naw keimi ah khü a dou nak bäng ah kä kyak ciah a mät ah m'hteihtang nak hlü ah m'lung awn, nang mi ah lawk khai ah amät naw ak bäi ah kyak ci nei. 18 Keimi naw ani awn atäng ah kami nau cu kami tüi lawk ci nei, ani cu, ng'Thu Ni pyein ne bi nak ung Khrihtabum gui naw ami chang m'sui ah chang ah kyak ci nei. 19 Cun bäng ah kä kyak ciah peittaak nak ah bi bi nak ung keimi awn atäng ah hteit hton ne bi tuk khai ah Khrihtabum gui naw ami ghü ah kyak ci nei. Shin ah peit taak nak ah mawng kami bi cu, Khanpughi ah bämang nak ah hmawk la keimi ah m'hteihtang nak cu ang dang vai ah, phäh ah kyak ci 20 Cun ah ng'khailang ne ami peit gui cu kami bilawh nak ung, keimi cu chang naw kä a nam kat ten gui vai ah kami geing nak ci nei. 21 Keimi ah ng'bä nak cu Bawipa ah ma bäng ah kä kyak ciah chang ah ma ah phi ng'düng khai ah bi vai ah kyak ci. 22 Cun ah kya sei ngah ni awn atäng ah kami nau tumat phi kami tüi lawk ci nei; ani cu akda vei teng kheng u ngä sei, chang m'hteihtang ciah chang ah kyak ci nei. Ani cu nangmi ning ngaih gep gui ciah kya ne, ning m'hteihtang gui hlü pi ci nei. 23 Titus cu nangmi ah hmawk ah kei awn atäng ah bi bik ciah kyak ci; ani awn lawk ci gui ah kami nau gui cu, khrihtabum ah ghü gui, Bawi Khrih ah bämang nak law püi ci gui ah kyak ci. 24 Keimi ah khähghah nak ak cang ah ami hmat tu vai la, ngahmi ung kaa naw khrihtabum gui naw ami hmat tu vai ah, nami hni nak cu nami m'dang gui vai nei.
1 Judea kho ah Khanpughi ah chang gui m'hteihtang gui vai ah mawng cu ca awn ka guk vai kä hlü ci. 2 Nangmi naw nami m'hteihtang hlü gui cu kei naw ka hmat ci, nangmi ah mawng ung Macedonia chang gui ah ma ah ka khähghah ci. Achaia kho ah phäinau gui tuh kum ge peit taak vai ah pawng tuh kum ge peit taak vai ah pawng pyi ci gui. ä ci ne kam thein gui ci. Nangmi ah bi nak hlü naw ngahmi cu k'thamah sak gui ci. 3 Cun ung phi nangmi ah mawng kami khähghah nak k'cang ah ang dang vai ah, phäinau gui cu kami tüih law ah kyak ci. Ka pyein ah mäih ah nami peittaak vai cu nami m'shei m'tawn ge vai nei. 4 Kei awn a täng ah Macedonia ah chang gui cu law tu u ne , kä nami ng'sheitawn cu, ami ning hmuh law gui ah a kyak ung, nang mi bäng kä nami ng'aa khai, kami ning ngaih gep gui ah phäh ah kaimi phi ka mi ng'aa khai nei. 5 Cun ah kyasei ahei nami taak ah mäih ah nami peit vai na mi nam shei nak vai ah, shin ah phäinau gui tüih law gui ma vai ah hlü ciah ka ngai ci nei. Kei ka gawk law ung nami nam shei pyi ah kyasei, peit vai ah kyasei peit ah kä kyak ciah, zum nak awn peit cu dang khai nei. 6 M'shi api geit ci naw geit api khäm ba khai, m'shi akdäm geit ci naw, geit akdäm khäm ba khai! ci cu nami hmat vai nei. 7 Ak chang sing naw amät ah m'lung ung azum nak awn a peittaak vai, ng'vang lang ne kä a peit vai, kä peit ung kä bä khai ciah ngai ne kä a peit vai; Khanpughi naw am lung zei nak awn pek ci cun vah m'hni ci. 8 Na mi ng'zak hlü avan cu ang tüi ah gah u ne, ni kyom nak ahlühlü nami bi nak hning vai ah, Khanpughi naw, nami ng'zak hlü ah däm sei ning pe gui m'khüt ci nei. 9 Cacim ung; Ani naw pyaamthaam ci gui cu, ng'khailang ne pe gui ci; Ani ah m'gein nak cu khäng ne ng'tüi ci. ä ciah om ci. 10 M'shi geit ciam, geit m'shi la ei vai pek ciah Khanpughi naw, nami ng'zak hlü ah m'shi avan cu ning pe gui ne, ng'lih pyo sak khai nei. Nami ng'khailang nak ung kaa chünla ciah am theihpai cun phi nami hmuk khai nei. 11 Nangmi naw ang tüi sei nami ng'khailang nak vai ah Khanpughi naw ak phlät sei bühmang nak ning pe gui khai nei. Nangmi ah peittaak nak keimi ah kut ung gah ci gui naw Khanpughi cu m'hlüngtai khai gui nei. 12 Nangmi naw shin ah bi awn pyamthaam ciah Khanpughi ah chang gui nami m'htei gui bäng ah kä kyak ciah, Khanpughi m'hlüngtai nak ah k'aw phi nami thang sak ci nei. 13 Shin ah bi nami bi nak awn chang akda naw Bawi Khrih ah mawng Thu Ni cu khäng sei ami zum tu ah phäh la, nami khawhchaam gui cu, ngahmi la chang hei gui am ng'khailang ne nami peitaak gui ah hmawk ah Khanpughi cu mi m'hlüngtai khai nei. 14 Nangmi cu Khanpughi ah küikyang ciah m'gein nak cu nami gah ciah kyasei, ngahmi naw nangmi cu ang htei ah ning zum ngak gui u ne, nangmi ah phäh ah k'taigü khai gui nei. 15 Mik mi naw khei ung kä ng'pyi khai ah am gein nak ah hmawk ah Khanpughi cu mi m'hlüng m'tai khai nei.
1 Kei Paul Naw Ka ning m'cäi gui hlü cu, —Kei cu nangmi ah ma ah hnawhdeh ne, kä nami hmuh nak ung ka lingtha ciah nami ngai khai. Bawi Khrih ah m'Lung neim nak la ng'awi ng'gi nak awn ka ning hui na gui ci nei, 2 Keimi cu khodek khan ah mawng ung kami hnüntho ciah na pyein gui ciah chang gui ah ma ah lingtha nak cu m'dang vai kyak ci nei, nangmi om nak ah ka law ung cun ah mäih lingtha nak m'dang nak vai kä om men sä. 3 Keimi cu khodek khan ah kami om ciah ng'khän ci, cun ung phi khodek khan ah hmawk ah ng'tuk kami bik ciah kä kyak ci. 4 Keimi ah kawh ah likhim cu chang ah kawh ah likhim ah kä kyak ci, gaa ah manggaw nüng nak ah khanpughi ah hlüngtai nak likhim ah kyak ci. 5 Keimi naw kä nik ciah ng'cuhcan nak gui; Khanpughi ah mawng hmuhmat nak gui shungshet ciah om she nak gui kami m'shet zawp ci nei. Chang ah ngaihtüh gui phung cu pha ne k'pang ne, Bawi Khrih cu kami läk sak ci nei. 6 Nangmi naw keimi ah ng'thu avan nami ngaih cu kami hmat kawn ah thu kä ngai ci gui cu m'kat ge vai ah keimi om ci nei. 7 Nangmi naw ak pung mäisa vah nami teng ci, Nangmi ung kaa kei bawi Khrih chang ah ka kyak ci cik ciah chang a u om ne ang? A om ah a kyak ung ani ah mäih ah Keimi phi Bawi Khrih ah chang ah kami kyak ci ci cu, ngaih tüh ba sä 8 Kei cu Bawipa ah na peit ah huham ka mang däm te ung phi kä ka ng'aa ci nei, cun ah huham cu nang mi, ning m'shukchaak nak gui vai ah kä kyak ci, ning m'düih m'thawh nak gui vai ah kyak ci. 9 Kei naw ca gu ne ka ning m'kyihkyawk gui ciah kä nami ngaih vai nei. 10 Chang am shah naw, gai ne lingtha ci, keimi awn atang ah a om zah läi ung hnawhdeh ne ang thu phi kä ng'khän te ciü nami cik khai. 11 Keimi cu nangmi awn mi ng'sahwng zah ung, ca kami guk law ah mäih ah kami bik khai ci cu nami hmat sak gui vai nei. 12 Ami mät naw ami mät m'hlüngtai ciah chang gui awn kä kami ng'caw hlük ci nei, m'tumtäng nak vai phi kä ka mi ng'za hlük ci nei. Ami mät naw ami mät ak tung ah m'düih u netah, täitawk m'khoichak ciah chang gui cu, shekha aih ci gui nei. 13 Keimi läi cu m'hnüt nak phlän ne kä kami khähghah khai, Nangmi ah hmawk ah kami bi mah mah ah, Kami bi vai ah Khanpughi naw anam hnüt peit nak gui bäng ung kami khähghah ci nei. 14 Nangmi cu Khanpughi ah m'hnüt nak ah kyong ung nami om ci kyasei, kei mi naw Bawi Khrih ah mawng Thu Ni kami law püi nak ung kho kami kaan ciah kä kyak ci. 15 Cun ah kyasei Khanpughi naw bi vai ah a nam hnüt peit gui ah kawn ah chang gui ah bi ah hmawk ah kä kami khähghah ci nei. Nami zum nak däm lawk ciah kyasei, Khanpughi ah am hnüt nak ah kyong ung, nangmi ah ng'lung ah bi nak cu bä lawpi khai ah kami ngaih u ci nei. 16 Cun ah kyasei keimi naw nangmi ah kho kaan ne a hei kho ung ah, Thu Ni cu kami pyein hning khai. Chang hei gui ah kho ung kami bilawh ah hmawk ah a i ah ung, kä ka mi khähghah khai nei. 17 Cacim ung, Khähghah hlük ciah chang cu Bawipa ah bilawh ah hmawk ah khäghah sä ciah om ci. 18 A i ah kyasei ci ung Khanpughi naw am hni ah chang cu, amät naw m'hlüngtai ciah kä kyak ci, Bawipa naw am hlüngtai ah chang ah kyak ci.
1 Kei ah api ah ka shetkat nak cu nami hnimgei vai nei, Nami Bä ni! 2 Kei cu nang mi ah hmawk ah Khanpughi a m'thüi ah mäih ah kam thüi ci nei; nangmi cu Bawi Khrih tumat bäng awn ng'puikhah khai goi ah beit pyi ah htalaa ah nami kyak ci. 3 Eve cu k'phyu naw theileh ne am hleeihlak ah mäih ah—nami m'lung cu ng'gogan sei, Bawi Khrih zum ne nami ap nak ang chei vai ah kan ng'ä ci. 4 Chang tumat cu nangmi ah law ne, keimi ah kä pyein man ah, a hei Jesuh ah mawngaa pyein law ung, nangmi naw zei ne nami na dou ci; Keimi naw kami pyein ah Thu Ni la keimi ung nami gah ah Mumcha awn api ah phi kä täng ciah thu ni la mumcha cu nami dou ci! 5 Kei cu nangmi naw ak tung ah, angdüihpüi ah nami khü ah chang gui ah mä kä ka ng'neim pi khai nei! 6 Kei cu thu pyein nak ung ka ghawi ngai ung phi, hmuhmat nak om ciah, chang ah ka kyak ci. Keimi naw cun gui cu, a mawng avan ung ang täisei kami ning hmat sak gui pyi ci. 7 Nangmi ak küikyang ah nami kyak vai ah hmawk ah, kei naw ka mät cu ng'neim sak ne, Khanpughi ah mawng Thu Ni cu, alä ah ka ning m'thein gui ci nei. Cun cu kei ah cheishoh ah kya naw? 8 Nangmi ah ng'lung ah khuut kabi zah ung khrihtabum a hei gui naw na pe taak ci gui nei. Cun cu nangmi ning m'hteihtang nak gui vai ah a hei khrihtabum gui guhtep gui ah mäih lawk ci. 9 Kei cu nangmi awn atäng ah ka om zah ung ngui ka ng'zak hlü zah ung kä ka ning zaica sak gui man ci. Macedonia ah phäinau gui naw kei ah ng'zak hlü phung cu law püi ci ci gui. Kei naw a cau phi; ngawi ah phi, nami phuih kä ka gih sak khai. 10 Cun ah kei ah khähghah nak cu, Achaia kho avan ung a u naw k'ääp ne kä m'khüt khai ci cu kei ung om ciah Bawi Khrih ah ng'düng nak awn shai ka tak ci nei. 11 Cun ah ka pyein cu nangmi kä ka ning m'hni gui su ah ang? Kei naw ka ning m'hni gui cu Khanpughi naw hmat ci. 12 Cun ung phi cun ah ang düihpüi ah pyein ciah chang gui naw, keimi ah mäih ah bi tuk ci gui pyein ne kä ami khähghah en hlawt vai ah, tuhbäi kabi ah mäih ah kabi gäk gäk khai nei. 13 Cun ah chang gui cu ang düihpüi ak cang ah kä kyak ci gui, ng'hlukhlei ci gui ah kyak ci; Bawi Khrih ah ng'düihpüi ak cang ah ng'hlawk u ne, hleeihlak ne bilo ci gui ah kyak ci. 14 Cun ah ami bi cu cäcat vai kä kyak ci, Satan hngaw akdei ah khankhaw chang ah ng'hlawk thei ci. 15 Cun ah kyasei Satan ah chang gui naw ng'düng nak ah mawng pyeinsak ci gui ah ami ng'hlawk cu cäicat vai kä kyak ci. Ak hnu ah ngahmi cu ami mät ah bilawh ah ciah ak cang ah gah ba khai gui nei. 16 A u naw phi kei cu ak gu ah kä na ngai en sä, cung ung phi nangmi naw ak gu ah mäih ah bawtah na dou vä, cun ung kei ung ka khähghah nak vai api baw tah om khai. 17 Tuhbäi ka khähghah cu Khanpughi ah ng'zak hlü ah kä kyak ci, ak gu ah mäih ah kei naw khähghah ne ka ng'thu ah kyak ci. 18 Chang akda cu chang ah bilawh nak lam ung khähghah man ci gui kya sei, kei phi ka khähghah khai nei. 19 Nangmi cu nami hmuhmat ciah chang gui ah kya ne, ak gu cu zei ne nami m'gein khai. 20 Nangmi naw ning täk phan gui ci, ning m'zung m'za na gui ci, ning hlawt na gui ci, a i ah kä ning sui tu gui ci, nami hmai ning k'beei gui ci, gui cu nami hniimgei ci. 21 Keimi naw nang mi ah maa ah shin ah mäih gui kä ka mi bi hning ah mawng cu ng'aa pipi ne ka pyein ci nei. 22 Cun ung phi chang tumat cu ak gu ah mäih ah ang thu ah a kyak ung, kei phi a cun ah mäih ah ka ng'thu khai nei Cun cu gu ng'thu ah kyak ci nei. Cun ah chang gui cu Hebru ah ami kyak ung kei phi a cun, Israel ah ami kyak ung, kei phi a cun, Abraham ah hta ng'shon ah ami kyak ung kei phi a cun, 23 Bawi Khrih ah changshäm ah ami kyak ung, kei cu ak gu ah mäih ah ka ng'thu ung phi, ngahmi ah tah bä pi ciah ak chang shäm ah ka kyak ci. Kei cu ngahmi ah zai pi ne ka bik ci, da pi sei thawng ka cum ci da pi sei tukthah nak ka hmuk ci, da pi sei sih nak vai ka aut ci. 24 Jew chang gui naw kut thum-kip-lei-ko vei ci hma vei ami na thah nak ka aut ci. 25 Roman chang gui naw thum vei ami na thah nak ka aut ci; Lung awn phi hnä ät na vawi ci gui. Hteinpaw a shet nak thum vei lawk ci, hnä ät ung nazi m'ku lei phli ung tui ung ka ng'hteh ci. 26 Kei cu akda vei ka hteh hton nak ung tui ah lin nak, m'guk ei ah guhtep nak, la ka pakhui chang Jew ah gaa, khui hei chang gui ah gaa; gawnu gui ung gaa, bung hmu ah gaa, tui nu gui kyih nak la teihpüi k'she gui kyih nak gui cu ka aut ci. 27 Kei cu zaica bawngbai ne khuut ka bik ci; ih ah phi kä ka ip hlawt ci, tui ah ka gha ci, ei ah ka cawi ci; phä ne ei vai kä om ci, zii vai kä om ci, sui vai kä om ci 28 Cun kawn ah kä ka pyein tu ah zaica nak gui la khrihtabum ah phäh ah ak hnüüp tä ng'ä ai nak gui om ci. 29 Ak tha zawken ci a om ung, kei phi kak tha ken tuk ci; shetkat nak bi lawk ci om ung ani ah hmawk ah ka ng'ä ai aih ci. 30 Kei cu ka khäghah vai ung ka tha a ken nak ah mawng ung ka khäghah khai. 31 Kei kä ka hleeihlak ah mawng cu Bawi Jesuh ah Pa Khanpughi naw hmat ci, cun ah Bawi ah ming cu ang tüi sei hlüngtai sä! 32 kei cu Damaskas ung ka om zah ung Aretas ghangpughang ah ka ung kaa bawi naw, kei cu ami na phaa vai ah m'kawt cu ngäng sak gui ci. 33 Cun ung phi ka chang gui naw, vawh ung m'khäp ne ng'vong k'pung ah na va k'chah ba u sei kei cu ka phyawng ci.
1 Khäghah cu kä a ni ung phi, kei ka khäghah vai om ci. Cun ah kyasei Bawipa naw ana peit ah muimang la Thuphlaan ah mawng cu m'dang ne ka pyein khai. 2 Zanä khokum gha-lei-phli zah ung khrihta tumat cu, ak hlüng pi ah khan khaw ah a zon püi cu kei naw ka hmat ci (Cun cu ak cang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci). 3 A cun ah chang cu Paradise khaw ah zon püi sei, chang ah m'gawng awn kä pyein hlawt ah thu cu ng'zak ci, ci cu leng ne ka pyein ba ci, (Cun cu ak cang ah a kyak la muimang ah a kyak ah kei naw kä ka hmat ci, Khanpughi bäng naw vah hmat ci). 5 Cun ah chang ah mawng ung kei ka khäghah khai, cun ung phi ka mät läi cu kak tha a ken ah mawng ah kawn ah khähghah vai kä om ci. 6 Kei cu ka khghah hlü ung, ak gu ah kä ka kyak khai, ak cang pyein ciah ka kyak khai Cun ung phi chang naw ana hmuh ng'zak ahtah bä pi sei ana m'hlüngtai vai kä ka ng'za hlük ci kya ne, kä ka khäghah khai nei. 7 Kei naw ka hmuh ah cäicat vai mawng ung kei cu kä ami nam hlüngtai en vai ah, kei cu ka pumsa awn geinvai nak ka aut ci nei. Cun ah geinvai nak naw, Satan ah ng'shü tüih ah mäih ah, kei cu na hnem ne, kam ghü m'ce nak cu na k'cheih pek ci nei. 8 Cun gui ana liim pet vai ah Bawipa ah thum vei kak taigü ci nei. 9 Cun ung phi ani ah nam shan nak cu, Nang nak tha a ken zah ung kei ah hlüngtai nak cu, ak kuikyang pi ah kyak ci, cun ah kyasei kei ah m'gein nak bäng cu nang ung hlü ciah kyak ci. ä ciah kyak ci. Cun ah kyasei kei cu Bawi Khrit ah hlüngtai nak ung ka ng'zii nak vai ah, kak tha a ken ah hmawk ah, zeikyai aih ne ka khäghah ci nei. 10 Kei cu Bawi Khrit ah hmawk ah tha ken nak, ghingshe nak, geinvai nak, k'dudei nek, la tüihtok nak gui ka aut ung phi, kei cu kak tha a ken zah ung kak thamah ba pi ci nei. 11 Kei cu ak gu ah mäih ah ka kya lawk ci, cun cu nang mi ah na kyak sak ah kyak ci. Nangmi cu kei nak püi ciah nami kya khin te ci. Kei cu a i ah kä ka mawng pang ung phi, ang düihpüi ah nami k'bäi gui ah kä ka ng'neim pi khai. 12 Kei cu ang düihpüi ah ka kyak ah mawng cu, cäi aih gui vai la cäicat gui vai awn, hniim gei nak awn ka ning m'dang gui ci. 13 Kei naw nangmi cu a hei khrihtabum gui ah mäih ah m'täng ne ka ning om püi gui ci, ngui ah mawng bäng ung kä ka ning bilawh sak gui ci. Cun ah kä täng khai ah ka bi ah hmawk ah kei cu nami nam gein vai nei. 14 Tuh bäi nangmi ah ak thum vei nak ah ka lawk khai ah ka pawng ci nei. Cun ung phi nangmi kä ka ning khüikhaa sak gui khai nei. Nangmi ah khawh kä ka ng'za hlük ci, nangmi vah ka ning za hlü gui ci. Hta hmaw gui naw nupa gui ah hmawk ah khawh küm cun ci gui, nupa gui naw vah hta hmawk gui ah hmawk ah khawh m'cun ci gui. 15 Nangmi ah hmawk ah a kyak ah khoi ung ka khawh la ka mät cu zeikyai ne ka ng'pyi sak khai nei. Kei naw ang htei ah ka ning m'hni gui ung nangmi naw a pi ah nami nam hni khai maa 16 Kei naw nangmi phuih kä ka ning gih sak gui ah mawng cu, nami ng'kyaa khai nei. Cun ung phi chang a tumat naw kei naw thuvi ne ka ning m'hleeihlak gui ciah ngai hngaw khai nei. 17 A i chaa ah ang kei naw ka ning m'hleei gui? Ka tüih law ah chang gui ung kaa, a u awn ang kei naw ka lünglawt nak a om? 18 Kei naw Titus cu ng'paa na ne tüi law ne, ani awn atäng khrihta tumat phi ka tüih law nei. Titus cu nangmi ung lünglawt ciah pyein vai kya ne ang? Ani la kei cu ka ni m'lung ngaih täng sei lam tumat ung ka ni hteit ciah kä kya ne ang? 19 Keimi naw a thawm ah kami mät kami ng'küikyan ciah nami ngai hngaw khai nei! cun ah kä kyak ci, Bawi Khrit ah nam theithang gui ah mäih ah, Khanpughi ah ma ah ng'thu kami pyein ah kyak ci. Teih püi gui aw, keimi ah bi gui phung cu nangmi ah hmawk ah kyak ci nei. 20 Nangmi ah kei ka gawk law ung, ka ning hmuh gui hlü ah mäih ah kä ka ning hmuh gui vai la, nangmi naw phi kei cu nami na hmuh hlü ah mäih ah kä nami na hmuh vai ah kang ä ci nei. Ng'tukvook nak, m'thüikhang nak, m'lungshe nak, ng'käükneet nak, ghingshe nak, khleei nak, m'ghäm'ce nak, ng'go ng'gan nak gui ka hmuh vai ah ang htei ah ka ng'ä ci nei. 21 Cän kawn ah nangmi ah kei ka law ba ung Khanpughi naw, nami ma ah, kei cu na lä ng'aa sak khai ni mä, zan ä sheka u netah tuh güt kä ng'zu ba u ne, m'gu plet ng'zaw ng'pawm däut ciah chang gui ah hmawk ah, kei cu ka ng'phli tui kya law ei bawk khai ni mä, ci ne kang ä ci nei.
1 Tuh bäi kei cu ak thum vei nak ah nangmi ah ka lawk khai nei. Cacim naw, Amawng ama phung cu chang hnih thum a saksi ung vah m'khoichaa vaiä ciah pyein ci. 2 Ak hinh vei nak ka law zah ung, kat nak bik ci gui la chang a hei gui am, ä cän kawn ah ka law ba ung kä ka ning m'däm gui khai nei, ci ne, kam cäi gui ah mäih ah, tuhbäi phi a sho nak ah om netah khän ne ka ning m'cäi ba gui mä ci nei. 3 Bawi Khrit naw kei awn thu a pyein ah mawng nangmi naw nami ng'zak hlü cu, ak cang ah nami gah khai nei. Nang mi awn a om nak ung, ani cu ak tha kä ken sei, a hlüngtai nak cu nangmi am ning m'dang gui ci nei. 4 Bawipa cu kutlam tung ung ami ngawn zah ung ak tha ken ci ah mäih ah a kyak ung phi, tuhbäi Khanpughi ah hlüngtai nak awn ghing ne om ci nei. Ani ung mi kawng ät nak ung mik mi phi mik tha ken te ci; cun ung phi, Khanpughi ah hlüngtai nak awn, Bawi Khrit ung a täng ah ghing ne, nangmi awn mi ng'hmu teng khai nei. 5 Zum ne nami ghin nak a bä la kä cun ah, nami mät naw nami mät m'htei ne m'khoicha shäm vä. Cun ung kä nami pyai ah a kyak ung, Bawi Khrit Jesuh nangmi ung a om cu ak cang ah nami hmat khai nei. 6 Keimi kä kami pyai ciah nangmi naw nami hmat khai ah kei naw ka zum ci nei. 7 Nangmi kä nami cheishoh phung vai ah Khanpughi ah kami taigü ci nei. Cun cu keimi kami nüng ci, ciah m'dang nak ah kä kyak ci nangmi naw ng'düng nak nami bi vai ng'zak nak hlü ah kyak ci, keimi cu kami pyai ciah mäih ah a kyak ung phi a i ah kä kyak khai nei. 8 Keimi naw ng'düng nak hnu na ne kä kami bi hlawt khai, düng nak lam ung om ne vah kami bi hlawt khai. 9 Keimi kami k'tha ken ne, nangmi nami k'tha a ghaat ung, kei mi kami zei ci nei. Cun ah kyasei nang mi kümbe ciah chang ah nami kyak law vai ah phi kami k'taigü ci nei. 10 Kei naw shin ah ng'daut ne ca ka ning pet law gui ah mawng cu; kei ka gawk law ung Bawipa ah na pet ah huham cu ak ghaat ah kä ka mang vai ah phäh ah kyak ci. Cun ah huham cu nangmi ning m'käi m'khän nak gui vai ah kyak ci, ning m'shukchaak nak gui vai ah kä kyak ci. 11 Ka phäinau gui aw, gai ne om vä! Kümbe ciah chang ah nami kyak vai ah k'tha nah vä; kei ah ning m'cäi m'ä gui cu ngai ng'zah ne, tumat la tumat kawng ät u ne, dimdeeih nak awn om vä. M'hni nak la dimdeeih nak ah Khanpughi cu, nangmi awn atäng ah om khai nei. 12 Tumat la tumat ng'phäinau ah ng'ui hnaam ne, ng'zavaih na tu vä. Khanpughi ah chang avan naw ning zavaih gui ci gui nei. 13 Bawipa Jesuh Khrit ah m'gein sei nak, Khanpughi ah m'hni zum nak la Mumcha Theing ung pui m'ca nak cu, nami van ah khan ah om sä.
1 Chang ung kaa lawk ci la chang ah m'düih ah kä kyak ciah, Jezuh Khrit la ani sih nak ung kaa thawh ba sak ciah Apa Khanpughi ah m'düih, ang düihpüi kei Paul La; 2 shi ah kei awn kami om ghawm ciah phäi nau gui naw, Kalatia kho ah khrihtabum gui-am ca kami pe lawk ci nei; 3 Mi Pa Khanpughi la Bawipa Jezuh Khrit ah m'gein nak la dim deeih nak cu na mi khan ah om sä. 4 Mi Pa Khanpughi ah ang zak hlü ah Bawi Khrit cu shin ah shetkat nak ah khin ung na k'phiawn gui khai ah, mi kat nak ah hmawk ah ng'ap pyi ci nei. 5 Khanpughi ah bämang nak cu ang tüi sei deikhang sä! Amen. 6 Bawi Khrit ah m'gein nak awn nang mi ning khü gui ciah Khanpughi cu, ang ghit ah nawng u ne, ng'Thu Ni a hei nami dou ah hmawk ah ka ning cäi nah gui ci nei. 7 Akcang ah pyein ung Bawi Khrit ah mawng Thu Ni ahei, ä kä om ci, cun ung phi chang am shah gui naw, Bawi Khrit ah ng'Thu Ni cu m'hlat shäi shäi u ne, ning awng-aa sak gui ci gui. 8 Cun ung phi kei naw ka pyein ah ng'Thu Ni awn kä täng ciah ng'thu pyein ci cu, keimi phi bäi, khanchang phi bäi, m'hteikhaw ah hteh nak güt ah m'kat nak cu gah khai nei. 9 Keimi naw leng ba ne kami pyein ba mä cu; nangmi naw nami dou ah ng'Thu Ni awn kä täng ciah, ng'Thu Ni pyein ciah chang cu, m'hteikho ah hteh nak güt ah m'kat nak gah sä! 10 Cun ah ka pyein cu chang naw a na k'bääi vai ah ka pyein ah kya ne ang? Cun ah kä kyak ci, Kei ah ng'zak hlü cu Khanpughi ah nak bääi vai bäng ah kyak ci. Kei cu chang ah na chang m'sui vai ah ka k'tha nak ciah kya ne ang? Cun ah ka k'tha nak ciah a kyak ung kei cu Bawi Khrit ah chang shäm ah kä ka kyak khai. 11 Ka ning m'thein gui khai phäi nau gui aw, kei ka pyein ah ng'Thu Ni cu chang ung kaa lawk ciah kä kyak ci. 12 Kei naw chang tumatmat ung kaa ka gah ah kä kyak ci, chang tumatmat naw a nam theingthang ah phi kä kyak ci. Bawipa JesuhKhrit amät naw khän ne a nam dang ah kyak ci. 13 Kei naw Jew gui ah zum nak ung ka om zah ung a i ah ka bilawh man cu ka ning m'thein gui pyi ah kyak ci. Kei naw Khanpughi zum ci gui cu ak she ah k'dudeiu na gui ne, khrihtabum cu m'di vai ah ka k'tha na pi k'bäih ci. 14 Kei cu Jew gui ah zum nak akcang ah bi nak ung, kami thawn lawk ciah Jew chang gui ung, pupa gui ah thung law zoman cu k'tha na pi k'bäih ne ka läk ciah kyak ci. 15 Cun ung phi kei kä ka ng'tüi pha ge ung Khanpughi naw am gein nak awn na ghü ne, a khuut bi vai ah ana khü ah kyak ci. 16 Cun kawn ah chang pakhui hei gui-am Ahtapa ah mawng Thu Ni cu kam thein gui khai, kei-am Ahtapa cu ana hmu sak ah kyak ci. Cun ah kyasei nam shäm thein tuk khai ah a u phi kä ka ng'shi man ci; 17 Ang düihpüi ah kya law ma ci gui, ka ng'shi gui khai ah Jerusalem ah phi kä ka hteit man ci. Ak htük bäih ah Arabia kho ah hteit netah Damaskas ah ka law ba ci. 18 Khokum thum a lüng kawn ah kei cu Peter ka hmuk khai ah Jerusalem ah hteit ne, ani awn atäng ah hnüüp gha lei-hma ka om tuk ci. 19 Cun ung phi kei naw Bawipa ah nau James ah kawn ah ang düihpüi a heiä ä u phi kä ka hmuk ci. 20 Shin ah ka guk cu ng'düng ci, kä ka hleei ciah a kyak ah mawng cu Khanpughi naw hmat ci! 21 Cun kawn ah kei cu Siria la Cilicia kho ah ka hteit ci. 22 Cun zah ung Judea kho ah khrihtabum gui naw kei cu kä na hmat phak ci gui. 23 Ngahmi naw chang hei gui ah pyein ami ng'zak cu, Mik mi na k'dudeiu na gui man ciah chang naw, zan ä am di vai ah ak tha nak man ah zum nak ah mawng cu, shäu ne pyein ci nei, ä ciah kyak ci. 24 Cun ah kyasei ngahmi naw kei ah mawng ung Khanpughi cu m'hlüngtai ci gui.
1 Khokum gha lei-phli lüng khütah kei la Banabas cu Titus khah püi ne, Jerusalem ah kani hteit ba ci. 2 Cun ah ka hteh cu Khanpughi ah lam shäm nak ah kyak ci. Kei cu ang vai ba gui awn ng'hmu u ne, khui hei chang gui-am kam thei tu gui ah Thu Ni ah mawng cu kam thein gui ci. Kei naw azan ka bi phi bäi, tuhbäi ka bi phi bäi, a kholä düt ah a kyak vai kä ka ng'za hlük ci. 3 Ka paw Titus cu Karik chang ah a kyak ung phi ling ne vun-ah nak cu kä ka bi sak ci; 4 cun ung phi am shah gui lä naw bi sak vai ng'za hlük ci gui. Cun ah chang am shah gui cu, keimi naw Bawipa Jesuh ung kami kawng ät nak awn kami gah ah ng'päize nak cu na k'tä gui hlü neh keimi ah ng'bum nak ung lut law tuk ci gui ah kyak ci. Ngahmi naw mik mi cu na khlei htein ah gui hlük ci gui. 5 Cun ung phi ng'Thu Ni ah düng nak cu nangmi ah hmawk ah a khän nak vai ah, ngahmi cu api ah phi a khin kä kami pe gui ci nei. 6 Ang vai ah ng'shei ci gui, a u naw phi kei-am ak thai kä na m'shüm thein tuk ci gui. Ngahmi ang vai ah ami kyak la kä ami kyak cu kei ah hmawk ah kä küikyang ci, a i ah kyasei ci ung Khanpughi naw ak pung a teng nak awn a i kä m'khoichak ci. 7 Ngahmi naw ami nam shäm thein nak tu vai sä ung, Khanpughi naw Peter-am Thu Ni cu Jew chang gui-am thein sak gui ah mäih ah, kei-am Thu Ni cu Khui hei chang gui-am kam thein vai ah ana m'düih cu hmu lawk ci gui. 8 Khanpughi naw a hlüngtai nak awn Peter cu Jew chang gui ah hmawk ah ang düihpüi ah am düih ah mäih ah, kei cun phi Khui hei chang gui ah hmawk ah ang düihpüi ah nam düih ci. 9 Ang vai gui ah kyak ciah James, Peter la Johan ni naw, kei-am Khanpughi naw aküikyang ah ana peit cu na zum pek ci gui. Cun ah kyasei atäng ah bilaw ghawm ah ami k'bäi nak ah, kei la Banabas cu kut ung k'pang ne na zavaih goi ci gui. Kei la Banabas naw khui hei chang gui ng'lung ah ani bi vai la ngahmi naw Jew chang gui ah ng'lung ah ani bi vai ah kami van naw zum ne kami k'bäi ci. 10 Ngahmi naw ghawipyam ci gui, nami shäm gui vai nei, ci ne nam cäi gui ci gui, cun cu kei naw ka bi hlü pi ah kyak ci. 11 Antiok ung Peter a gawk law zah ung ani ah bilawh cu akcang ah cheishoh ci kyasei, chang gui ah ma ah ani cu m'kat ne ka ng'thu ci. 12 Ani cu chang khui hei phäi nau gui awn vun vai ne ei aw te ci, cun ung phi James ah tüih law ah chang gui ami gawk law kawn ah, khui hei gui awn vun vai ne kä ei aw ba ci. A i ah kyasei ci ung ani naw, khui hei gui-am vun-ah nak kä bi sak tu gui vai ah pyein ciah chang gui cu a kyih su ah kyak ci. 13 A hei Jew khrihta gui cun phi Peter ah mäih ah pyai law shäi shäi u sei, Banabas hngaw naw läk law tu gui ci. 14 Cun ah ngahmi ah bilawh cu ng'Thu Ni ah ng'düng nak awn kä ah ng'mäi law cu, kei naw hmu netah, chang gui ah ma ah, Peter-am, Nang cu Jew chang ah na kyak ci, cun ung phi chang khui hei ah mäih ah na om ci, Jew chang ah mäih ah kä na om ci. Cun ah kya lang ne a i ah kyasei khui hei chang gui Jew chang gui ah mäih ah ami om tu vai ah na ling nak gui ang? ä ci ne ka ng'shik ci. 15 Keimi cu Jew chang ah kami ng'tüi lawk ci, kat nak bik ciah khui hei chang gui ah kä kami kyak ci. 16 Chang cu Bawi Jesuh Khrit a zum nak bäng awn Khanpughi ung ng'düng nak gah ci, ng'thukän a läk nak awn ah kä kyak ci. Keimi cun phi Bawi Khrit Jesuh zum nak awn, Khanpughi ung düng nak gah vai ah, Bawi Khrit cu kami zum ah kyak ci, thukhän läk nak awn ah kä kyak ci. A u chang phi thukhän läk nak awn Khanpughi ung düng nak kä gah hlawt ci. 17 Mik mi cu Bawi Khrit ung kawng ät nak awn, Khanpughi ung düng nak gah vai ah k'tha nak ah mawng ung, mi mät phi chang khui hei gui ah mäih ah kat nak mi bi cu mi hmuh law ah a kyak ung, Bawi Khrit naw kat nak cu na bi sak gui ciah mi pyein khai ang? Cun ah kä kyak ci nei! 18 Kam shet pyi cu kam thawh ba ah a kyak ung, kei cu kamät naw ka mät thukhän m'shet ciah kam dang ah kyak ci. 19 Thukhän naw kei cu na sih sak ciah kyasei, thukhän ah mawng ung kei cu chang k'si ah ka kyak ci. Cun ung kei cu Khanpughi awn atäng ah sih nak ka gah pyi ci; 20 Cun ah kyasei kei kä ka ghing ba ci, Bawi Khrit cu kei ung ghing ci. Tuhbäi ka ghin nak cu Khanpughi ah Htapa ka zum nak awn ka ghin ah kyak ci, cun ah Htapa naw kei nam hni ne, kei ah hmawk ah a hnun gui pe pyi ci. 21 Kei naw Khanpughi ah m'gein nak cu kä ka ma phung khai. Cun ung phi chang tumat cu ng'thukhän awn Khanpughi ung düng nak gah ciah a kyak ung, Bawi Khrit ah sih cu a kholä ah kyak ci nei!
1 Kalatia chang k'ang gui! A u naw ang a ning pluh gui ve? Kutlam tung ung Bawi Jesuh Khrit asih cu, nami mik awn nami hmuh awn täng khai ah, ka ning m'dang gui pyi ci nei! 2 Khanpughi ah Mumcha nami gah nak cu, thukhän nami läk nak awn ang? Kä cun ung Thu Ni ngai ne nami zum nak awn ang? m'hlan ne nami pyein vai nei! 3 Nangmi cu a i ah kyasei shin hlawk ah nami ang-ang! Khanpughi ah Mumcha awn tän law u netah, nami mät ah hlüngtai nak awn nami pleh hlük ci maa? 4 Nami bui aut gui ah mawng cu a kholä ah kya zawp ne maa? A kholä ah kä kya düt khai nei! 5 Khanpuhgi naw Mumcha ning zuk m'kyum gui ne, cäi aih gui vai a ning hmuh sak gui cu, thukhän nami läk nak awn ang? Thu Ni ngai ne nami zum nak awn ang? 6 Abraham ah mawng cu mi ngai shäm kaw; cacim naw, Abraham naw Khanpughi zum ci, a zum nak awn Khanpughi naw chang düng ah dou ciü ciah pyein ci. 7 Cun ah kyasei Khanpughi akcang ah zum ci gui cu, Abraham ah hta ng'shon gui ah kyak ci, ci cu nami hmat vai nei. 8 Khanpughi naw chang khui hei gui cu ami zum nak awn amät ung düng sak gui khai, ciah cacim naw k'cä ci. Cun ah kyasei cacim naw Thu Ni Abraham-am am thein cu, Khanpughi naw nang ung, chang ah hta avan-am m'shumphyuk nak pek khai, ä ciah kyak ci. 9 Abraham naw zum ne m'shumphyuk nak gah ci; ani ah mäih ah zum ciah chang phung naw m'shumphyuk nak cu gah ci gui. 10 Thukhän läk vai bäng ngaih u ci gui cu a cun naw kyuk gui ci. Cacim theing ung, Thukhän ca uk ung ami guk phung kä läk ciah chang cu Khanpughi naw m'kyuk ci, ä ciah om ci. 11 A u chang phi Thukhän awn Khanpughi ung düng nak kä gah ci, ci cu dang ci, a i ah kyasei ci ung, cacim ung, äZum nak awn Khanpughi ung düng ciah chang cu, ghing ne om khai. ä 12 Cun ung phi thukhän cu zum nak awn api ah phi kä ng'pha ci. Cacim ung, Thukhän ung om ci phung-läk ciah chang cu ghing khai nei, ä ciah om ci. 13 Cacim ung, Singlam khan ah tai ne ami ngawn naw Khanpughi ah m'kyuk nak gah pyi ci nei, ä ciah a om ah mäih-ah Bawi Khrit cu mik mi ah hmawk ah m'kyuk nak gah netah, thukhän awn m'kyuk nak mi gah nak vai sä ung na phiawn gui ci. 14 Cun ah a mawng cu, chang khui hei gui naw, Abraham-am Khanpughi ah shaitaak ah m'shumphyuk nak cu, Bawi Khrit ah ming ung ami gah tu vai ah kyak ci. Cun ah kyasei mik mi cu zum nak awn, Khanpughi ah shaitaak ah Mumcha cu mi gah khai. 15 Phäi nau gui aw, ak hnüüp tä nami aut ah m'tumtäng nak tumat ka pyein khai; Chang hnih naw ng'thu khän ne ca ani guk ah a kyak ung, cun ah ca cu a u naw phi kä khui ba hning ci, kä k'be ba hning ci. 16 Tuhbäi Khanpughi ah shaitaak cu Abraham la ahta ng'shon ah hmawk ah kyak ci. Cacim ah pyein cu Hta shon guiä chang akda a pyein ah kä kyak ci, Hta shonä chang tumat a pyein ah kyak ci, aming cu Bawi Khrit ah kyak ci. 17 Ka pyein hlü cu Khanpughi naw Abraham awn Thukhän bi netah, a cun läk vai ah shaitaak nak a peit ah kyak ci. Khokum phya phli la thum-kip kawn ah ng'dang lawk ciah thukhän naw, cun ah thukhän la Khanpughi ah shaitaak cu kä m'shet hlawt ci. 18 A vai sä ah Khanpughi ah m'shumphyuk nak cu thukhän ung düi ciah a kyak ung, cun cu shaitaak ung düi ciah kä kya ba khai. Cun ung phi Khanpughi naw a shaitaak awn Abraham cu, cun ah am shumphyuk ah kyak ci. 19 Cun ah a kyak ung thukhän ah ng'bä nak cu a i ang? Thukhän cu shetkat nak ah mawng m'dang nak ah kyak ci. Cun ah thukhän cu shaitaak nak gah ciah Abraham ah hta ng'shon, kä a gawk law pha ah a khin bäng ung om khai ah kyak ci. Cun ah thukhän cu khanchang gui awn, ng'shü tumat ung a zuk peit law ah kyak ci. 20 Cun ung phi chang tumat bäng naw abi ah kya ne, ng'shü kä hlü ba ci; Khanpughi cu tumat bäng ah kyak ci. 21 Cun ung thukhän la Khanpughi ah shaitaak cu hnu ng'tuk ni ne ang? Kä hnu ng'tuk ci goi nei! Chang ah hta naw ghin nak ah thukhän ami gah vai sä ung, a cun läk nak awn chang phung cu Khanpughi ung düng nak gah khai sä te. 22 Cun ung phi, cacim naw, m'dek ah khan avan cu, kat nak ah hlüngtai nak ah kaa ah om ci nei, ci ne pyein ci. Cun ah kyasei Bawi Khrit zum nak ung phung ciah a shaitaak ah m'shumphyuk nak cu, zum ciah chang gui naw gah ci gui. 23 Zum nak kä a gawk law pha ung, zum nak ang dang law vai zung khüt sei, thukhän naw äp ne na khai gui ci. 24 Mik mi cu zum nak awn Khanpughi ung düng nak mi gah vai ah thukhän naw, Bawi Khrit a law ba güt ung na ngäng gui ci. 25 Cun ung phi tuhbäi zum nak gawk law pyi ci kyasei thukhän naw kä na kut shum ba gui ci. 26 Nangmi cu zum nak awn Bawi Khrit Jesuh ung kawng ät ne Khanpughi ah hta ah nami kyak ci. 27 Nangmi cu Bawi Khrit ung kawng ät ne tui nami ng'hnim pyi ci kyasei, Bawi Khrit suisa u ne, Bawi Khrit ah mäih ah ghing ne nami ng'thu ci. 28 Cun ah kyasei Jew chang la khui hei, khlei htein la khui mah, pami la hnumi ciah ang lakmah nak kä om ba ci; nangmi nami van cu Bawi Khrit Jesuh ung akawng ät ah nami kyak ci. 29 Nangmi cu Bawi Khrit nami khäm ah a kyak ung, Abraham ah hta ng'shon ah kya u ne, Khanpughi ah a shaitaak cu nami gah khai.
1 M'täi ne pyein ung Chang tumat ah hta cu apa khawh chaam avan ei mang khai ah a kyak ung phi, kä a ng'vai pha ung khlei htein ah mäih ah om ci. 2 Ani cu apa ah k'bäi nak ah akhin kä a gawk pha ung, ani m'hteihtang ci gui la m'cum'cäi ci gui ah kaa ung om ci. 3 Acun ah mäih ah mik mi cun phi mumcha ung kümi khüighaat pha ung, khovang mumcha gui ah khlei htein ah mi kyak ci. 4 Cun ung phi ak hnu ah akhin küm law khütah, Khanpughi naw Ahtapa cu zuk m'kyum lawk ci. Ani cu hnicim chang nu nah ne ng'tüi law ne, Jew gui ah thukhän kaa ah om lawk ci; 5 Cun cu mik mi Khanpughi ah hta ah mi kyak vai ah, thukhän ah kaa ung kaa, ana k'phiawn gui ah kyak ci. 6 Nangmi cu a hta gui ah nami dang vai ah, Khanpughi naw, Abba, Ka Pa, ä ci ne ng'khä ciah Ahtapa ah Mumcha cu mi m'lung kyong ah zuk m'kyum lawk ci. 7 Cun ah kyasei nangmi cu khlei htein ah kä kya ba ne, Ahta ah nami kya pyi ci. Ahta ah nami kya pyi ci kyisei, nangmi cu Khanpughi ah pakhui m'däng ciah Ahtapa ah nami kyak ci. 8 Nangmi cu Khanpughi kä nami hmat pha ung, Khanpughi ah ng'hlawkä ci gui ah khlei htein ah nami kya man ci. 9 Tuhbäi ung nangmi naw Khanpughi nami hmat ci—Tuhbäi ung nangmi cu Khanpughi naw ning hmat gui ci—ci ne ka pyein khai. Cun ah kyasei nangmi naw ak tha kä om sei, m'gein vai ciah kho ng'zo cu, a i ah kyasei nami ng'hlah ba shi hlü ang? A i ah kyasei khozo ah khlei htein ah nami kyak ba hlü ang? 10 Nangmi naw hnääp, chaa, kum, akhin am shah gui cu, aküikyang ah nami m'hnüt ci. 11 Nangmi ah hmawk ah ka ng'ä ci nei! Nangmi ah hmawk ah ka bi gui shi a kholä düt ah kä kyai lawk khai aw? 12 Phäi nau gui aw, kei ah mäih ah nami kyak tu vai ah ka ning m'cäi gui ci nei. Kei cu nangmi ah mäih ka lawk ci nei. Nangmi naw kei ah khan ah nami kat nak kä om hnga ci. 13 Ak htük bäih ah Thu Ni ka ning m'thein law gui cu kei ka gawpyam su ah kyak ci, ci cu nami shäm ba khai. 14 Kei ka gawpyam nak naw nangmi a ning cängvawn sak gui ung phi, nangmi naw kei cu kä nami na päipih ci, kä nami na hnu ng'tuk püi ci; Khankhochang ah mäih, Bawi Khrit Jesuh ah mäih ah nangmi naw kei cu nami na dou ci. 15 Cun zah ung ang htei ah nami zeikiai te ci, tuhbäi a i ah nami kia lawk ci ang? Cun zah ung nangmi cu nami m'khüt vai sä ung nami mik hngaw kawih ne nami na pek khai ah nami kyak cu ka pyein ba hlük ci. 16 Tuhbäi kei naw düng ci ka pyein ah hmawk ah, nami gaa ah ka kyai law bawk khai ang? 17 Chang a hei gui naw nangmi cu ang htei ah ning cungngai gui ci gui, cun cu akni su ah kä kyak ci. Ngahmi ah ng'zak hlü cu, nangmi kei awn nami ng'chaa vai ah kyak ci, cun ung vah nangmi naw ngahmi cu nami cungngai tu ba gui khai kyak ci. 18 Ak ni su lam ah ngaih peit tu cu nik ci, kei naw ka ning om püi gui zah bäng ah kä kyak ciah, ngahmi cu ang tüi sei a cun ah ngaih tüh ei u sä! 19 Kam hni ah ka hta nau gui aw! Bawi Khrit ah m'lung ngaih nangmi ung kä a om pha ah chuih, kei cu hta lawk khai ah nu ah mäih ah ka zaica ci nei. 20 Kei naw nangmi cu a hei ah m'hleen ne ka ning m'cäi gui hlü ah phäh ah, tuhbäi ge nangmi awn atäng ah ka om hlük ci nei. Kei cu nangmi ah phäh ah ka ng'ä aih ci nei! 21 Thukhän ah kaa ah om hlük ciah chang gui, ka ning shi gui hlük ci; thukhän ah pyein cu nangmi naw kä nami ng'zak ci ma? 22 Cun ah thukhän naw, Abraham ung ahtapa hnih om ci, tumat cu khlei htein hnumi ah hta ah kyak ci, tumat cu ng'päi om hnumi ah hta ah kyak ci. 23 Khlei htein hnumi ah hta cu, hta man düt ah a hta nak ah kyak ci; ng'päi om hnumi ah ahta läi cu Khanpughi ah shaitaak awn ng'tüi lawk ciah kyak ci. 24 Shin cu m'tumtäng nak ah kyak ci; hnumi hnih cu thukhän hnih ah kyak ci. Hnumi tumat cu Hakar ah kya ne, ani ah hta gui cu khlei htein ah kyak ci gui, ani naw Sinai Khomhtung ah Thukhän cu dang sak ci. 25 Hakar cu Arabia kho ah, Sinai m'htung ah hnün ung ng'düi ci. Ani naw tuhbäi khlei htein ah kyak ciah Jerusalem la a cun ung chang gui cu dang sak ci. 26 Cun ung phi Khanmawpi ah Jerusalem cu, ng'päize nak ah kya ne, mi nu ah kyak ci. 27 A i ah kyasei ci ung, Cacim naw; Kä hta ciah hnumi, kä na hta man ung phi zeikiai! Nau poi kä na m'neh man ung phi, viik ne m'lau! A cei naw a nawng ah hnumi cu, A cei om ciah hnumi ah mä, da pi sei, Hta nau khai nei!ä ciah pyein ci. 28 Phäi nau gui aw, nangmi cu Isaak ah mäih ah Khanpughi ah shaitaak awn nami ng'tüi ciah hta gui nami kyak ci. 29 Cun zah ung ng'tüi law düt ciah hta naw, Khanpughi ah Mumcha awn ng'tüi lawk ciah hta cu k'dudeiu nak ci, tuhbäi phi a cun ah kyak ci. 30 Cun ung phi cacim naw a i ah pyein ci ang, ci ung, Khlei htein la a hta cu k'täm goi vä; khlei htein hnumi ah hta cu ng'päi om hnumi ah hta awn atäng ah pakhui kä m'däng tuk khai nei, ä ci ne pyein ci. 31 Cun ah kyasei phäi nau gui aw, mik mi cu, khlei htein hnumi ah hta gui ah kä mi kyak ci, ng'päi om hnumi ah hta gui ah mi kyak ci nei.
1 Mik mi cu Bawi Khrit naw na k'phiawn gui pyi ci kyasei ng'päizee nak mi gah pyi ci! Cun ah kyasei ng'päizee chang ah kya ne ng'düi vä! Cän kawn ah khlei htein ah kyak ba vai ah kä nami om men vai nei. 2 Ngai vä! Kei Paul naw ka ning thu pää gui cu, nangmi naw vun ah nak nami lak ah a kyak ung, Bawi Khrit cu nangmi ah hmawk ah a i ah phi kä ng'khän ciah mäih lawk khai. 3 Vun ah nak gah ci phung naw thukhän avan cu a läk vai nei, ciah ka ning m'cäi ba gui mä ci. 4 Khanpughi ung düng nak cu, thukhän läk nak awn nami shui ah akyak ung, nangmi cu Bawi Khrit awn ng'cha u ne, Khanpughi ah m'gein nak ah ak pung ah nami gawk ciah kyak khai. 5 Keimi läi cu, kami zum nak ung hlüngtai ciah Khanpughi ah Mumcha ah bi nak awn, Khanpughi ung düng nak cu gah vai ah kami ngaih u ci. 6 Mik mi cu Bawi Khrit Jesuh ung mi kawng ät kawn ah, vun ah la kä ah cu ak tung ah kä kyak ci, ak tung cu m'hni nak dang sak ciah zum nak ah kyak ci. 7 Azan nangmi ah bi cu bä ci te! Däng nak kä läk vai ah ä u naw ang a ning maa nak gui? A i chaa ang a ning k'tä k'phlawh gui? 8 Cun ah tüihtok nak cu nangmi ning khü gui ciah Khanpughi ah bi ah kä kyak ci. 9 äM'htut den khui avan cu k'caw apihta naw thawh sak ci, ä ciah thu cu ngaih tüh ba vä. 10 Cun nung phi nang mi cu ka ning ngaih gep gui ci. Mik mi cu Bawipa ung mi kawng ät pyi ciah kyasei, nangmi cu a hei ah kä nami ng'phyeek pai khai ah ka ngiah gep ci. Cun nung phi nangmi ning awng aa, ngaih pai sak gui ciah chang cu, Khanpughi naw m'shetkat khai. 11 Phäi nau gui aw, kei naw vun ah nak cu, bi lä vai nei ci ne, ng'thu ka pyein ciah a kyak ung, a i ah kyasei k'dudeiu nak ka aut vai ang? Cun gui cu akcang ah akyak ung, Bawi Khrit ah kutlam tung ah mawng ka pyein cu, thüigen nak vai kä om khai nei. 12 Nangmi ning cängvawn sak gui ci gui cu, vun ah bäng ah kä kyasei, ami mät naw ami mät ah k'ci ami k'phyet ung phi bä khai nei. 13 Ka phäi nau gui aw, nami ng'päizee khai ah Khanpughi naw ning khü gui pyi ci nei. Cun ung phi cun ah ng'päizee nak awn pumsa ah ng'zak hlü kä nami läk-en vai nei. M'hni nak awn tumat la tumat nami ng'chaan tu vai nei. 14 äNa paw chang cu na mät awn m'täng ne nam hni vai, ä ciah thukhän läk ci cu, thukhän avan läk ciah kyak ci. 15 Cun ung phi kawng, khawm gui ami ng'tohpah ah mäih ah nami kyak ung, tumat la tumat nami dishum nak ah kyak khai nei. 16 Kei naw ka pyein hlü cu; Mumcha ah m'shüm thein ah mäih ah nami om vai nei, hnicim chang ah ng'zak hlü cu kä nami läk-en vai nei. 17 A i ah kya sei ciung Hnicim chang ah ng'zak hlü cu Mumcha ah ng'zak hlü awn hnu ng'tuk ci, Mumcha ah ng'zak hlü cun phi hnicim chang ah ng'zak hlü awn hnu ng'tuk ci. Shin ah hnih goi cu ng'gaa na tuk ci goi. Cun ah kyasei nangmi cu nami mät ah ng'zak hlü ah kä nami bi hlawt ci. 18 Mumcha naw lam a ning m'shüm gui ah a kyak ung nangmi cu thukhän ah kaa ah kä nami om ba ci. 19 Hnicim chang ah ng'zak hlü gui cu dang ge ci. Cun gui cu ng'zawpawm nak, shemshai nak, gän düt ah kyak nak; 20 agup khawihnah nak, ng'pluh nak, kawng gaa nak, ng'tuk ah nak, vamneng nak, m'lung she nak, ei hlä-mang k'phya nak; ng'khoikhei nak, ng'phyek ng'pai nak; 21 ng'u ng'hneit nak, awktat nak, ei awk ng'nauk naam nak gui la ahei shetkat nak gui ah kyak ci. Kei naw ka ning m'cäi gui hlü cu, a shin ah mäih ah om ih ciah chang naw Khanpughi ah uk nak kho cu kä khäm tu hlawt khai. 22 Cun ung phi Mumcha ah m'theih tak läi cu, m'hni nak, zeikiai nak, dimdeeih nak, hnimgei nak, ng'awi ng'gi nak, ni kiom nak, bekhüt nak; 23 Hniphnoi nak, la küikyang htingling nak gui ah kyak ci. Shin gui hnu ng'tuk püi khai ah a i ng'thukhän phi kä om ci nei. 24 Bawi Khrit Jesuh khäm pyi ciah chang gui phung naw hnicim chang nak la ng'zak hlü nak avan cu, kutlam tung ung sih püi pyi ci gui nei. 25 Mumcha naw ghin nak na pe gui pyi ci, ani naw mi ghin nak cu na kut shum gui khai nei. 26 Mik mi cu chang ah kä ng'shei vai, tumat la tumat kä ngetngawng vai, kä m'thüikhang vai.
1 Ka Phäi nau gui aw, chang tumat cu a cheishoh ah a kyak ung, Mumcha k'thamah nak om ci gui naw, m'cäi ne nami ng'düng ba sak vai. Cun cu om ni nak awn nami bi vai. Nami mät phi tüihtok nak ung kä nami gawk vai ah nami geing nak vai. 2 Nami phuih kawh nami ng'phuih kawh tu püi vai, a cun ah bi ne Bawi Khrit ah thukhän cu nami läk vai. 3 Amät bä ciah ngai ci cu, amät kä bä ciah a kyak law ung, amät naw amät m'hleei ciah kyak ci. 4 Ak chang sing naw amät ah bi cu amät naw am htei vai. Abi cu nik ciah a kyak ung, chang hei ah bi awn kä m'tumtäng-en ne, amät ah bi ung amät ang zum vai. 5 A i ah kyasei ci ung ak changsing naw amät ah phuih phäh phäh a phuih vai ah kyak ci. 6 Khrihta thuni ng'theithang tuk ciah chang naw, m'thei tuk ci-am ngui ghui khawh chaam cu a peit taak vai nei. 7 Ang lih ng'lat ah kä nami om men vai, a u chang naw phi Khanpughi kä m'hleei hlawt khai. Chang cu amät ah geit bä bä amät naw khäm ba khai. 8 M'dek chang ah ng'zak hlü ah m'dek ung geit ci naw, sih nak ah a vuipai cu khäm ba khai; Mumcha ah ng'zak hlü ah ng'lei ung geit ci naw, ang tüi ghin nak ah a vuipai cu khäm ba khai. 9 Cun ah kyasei kä cämbawng ne ak ni ah mi om ih khai; mik mi naw kä mi hnu ng'hlah taak ah a kyak ung, akhin a gawk law hnüüp ung a vuipai cu mi khäm khai. 10 Cun ah kyasei mik mi naw akhin mi gah päng ung, chang ah hmawk ah ak ni cu mi bik khai, zum ci gui ah kyong khui ah hmawk ah ak tung pi ah mi bik khai. 11 Ka mät naw ka kut awn, a i hlawk ah däm ciah calung gui gu ne ka ning m'khäh law gui cu, teng vä! 12 Nang mi naw vun ah nak nami bi vai ah ning ling na gui ci gui cu, ak pung bi nak awn khähghah hlük ci gui ah kyak ci nei. Ngahmi cun ah ami ling cu, Bawi Khrit ah kutlam tung ah hmawk ah k'dudeiu nak ami aut vai ami kyih su ah kyak ci nei. 13 Vun ah vai ah ling ciah chang gui ge naw, thukhän cu kä läk ci gui nei. Vun ah nak nami bi nak awn khähghah hlü u netah, ami ning bi sak gui ah kyak ci. 14 Kei läi cu mi Bawipa Jesuh Khrit ah kutlam tung ah hmawk bäng ah ka khähghah khai nei. Bawi Khrit ah kutlam tung ah hmawk ah khomdek cu kei ah phäh ah sik ci, kei cun phi khomdek ah phäh ah ka sik ci. 15 Chang tumat vun ah vai la kä ah vai cu ak tung ah kä kyak ci, ak thai ah ang tüi vai cu ak tung ah kyak ci. 16 Shin ah mawng gui läk ne ghin püi ciah chang gui la Khanpughi ah chang gui ah khan ah dimdeeih nak la m'gein nak cu om sä! 17 Khäm nak ah; cän kawn ah a u naw phi kä na k'shedam men ah ba sä, a i ah kyasei ci ung ka pumsa ung om ciah kang'gaai gui naw, kei cu Bawi Jesuh ah khlei htein ah ka kyak cu m'dang ci nei. 18 Phäi nau gui aw, mi Bawipa Jesuh Khrit ah m'gein nak cu nami khan ah om sä. Amen.
1 Khanpughi ah ang zak hlü ah Bawi Jesuh Khrit ah ang düihpüi ah kyak ciah kei Paul naw, Ephesus gawnu ung Khanpughi ah chang gui, bekhüt ciah khrihta gui-am ca ning peit law gui nei. 2 Mipa Khanpughi la Bawipa Jesuh Khrit ah m'gein nak la dimdeeih nak cu nami khan ah om sä! 3 Mi Bawip a Jesuh Khrit ah Pa Khanpughi cu mi m'kümto khai nei! Mik mi cu Bawi Khrit ung mi kawng ät nak awn, ani naw khankho ah mumcha zoushen nak cu nam shumphyuk gui ci. 4 Khanpughi naw khomdek kä a tüi pian pha ge ung, mik mi cu Bawi Khrit ung kawng ät nak awn, a ma ah shetkat nak kä om sei theingcim ciah mi kyak vai ah a na ghü gui pyi ah kyak ci. 5 Khanpughi naw mik mi cu, am'hni nak awn Bawi Khrit ung a hta gui ah mi kyak khai ah a na k'bäi gui pyi ah kyak ci. Cun cu Khanpughi ah ng'bä nak la ang zak hlü ah kyak ci. 6 Am hni pi ah Ahtapa awn anam cümhnah gui ah, Khanpughi ah bämang ciah am gein nak cu mi m'kümto khai nei! 7 Bawi Khrit naw ng'ap ne a sih nak awn mik mi cu mi k'phiawn pyi ci, cun cu küikyang ciah Khanpughi ah m'gein nak ah kyak ci. 8 Khanpughi naw mik mi am kä ng'vangca ne anam shumphyuk gui ah, am gein nak cu, küikyang aih ci nei. 9 Khanpughi naw acäivai nak la alulang nak awn, ang bä nak cu dang khai ah bi bik ci. Bawi Khrit ung akümbe sak ah thuuk ne ng'kau ciah amawng gui cu mik mi am na hmat sak gui ci. 10 Cun ah Khanpughi naw akümbe sak vaiah ang bä nak cu, akhin aküm law hnüüp ung khankho la khomdek ung a tüisho gui avan cu Bawi Khrit ah lam ma nak awn ang cut sak gui vai ah hmawk ah kyak ci. 11 Apäng avan cu Khanpughi naw am hnüt ak bäi ah mäih ah om kyak ci gui. Khanpughi naw cäu ä ge tän ne a mät ah k'bäi ah ng'bä nak awn, mik mi cu Bawi Khrit ung na kawng ät sak gui ne ak chang ah ana ghü gui hnga ah kyak ci. 12 Cun ah kyasei ak htük ung Bawi Khrit ging ne mi ngai ciah mik mi naw, Khanpughi ah bämang nak cu mi m'kümto khai nei! 13 Nangmi chang pakhui hei gui cun phi, hun nak ah mawng, Thu Ni ah kyak ciah, düng ciah Thu cu ngai ng'za tu u ne, Khanpughi ah chang ah nami kya lawk ci. Nangmi naw Bawi Khrit nami zum lawk ci, cun ah kyasei, Khanpughi naw a shaitaak ah mäih ah Mumcha Theing cu ning m'shumphyuk gui ne, amät ah chang ah ning tüi m'hnüt gui ci. 14 Cun ah Mumcha Theing cu Khanpughi naw ak chang gui-am apeit ah shaitaak cu mi gah vai ah ang kyän nak ah kyak ci. Cun ah kyasei Khanpughi naw, amät ah chang gui-am kümbe ciah phiawn nak, na pe gui ci, ci cu ngaih gep vai kyak ci. A bämang nak cu mi m'kümto khai nei! 15 Cun ah kyasei Bawi Jesuh nami zum ah manwg la Khanpughi ah chang gui nami m'hni ah mawng ng'za netah, 16 nangmi ah hmawk ah ang tüi ah Khanpughi kam hlüngtai ci, ning shäm gui ne ka ning taigü pe gui ci. 17 Nangmi naw Khanpughi nami hmat nak vai ah cäivai nak la lulang nak ah kyak ciah Mumcha cu nami gah vai ah, mi Bawipa Jesuh ah Khanpughi, bämang ciah mi Pa ah ka ning zoih thäh pe gui ci. 18 Kei naw ani ah ak dei cu nami m'lung awn nami hmuh vai ah ka ning k'thäh pe gui ci, cun ah kyasei, a i nami ngaih u vai ah a ning khü gui ah mawng, ak chang gui-am a peit ah shaitaak cu a i hlawk ah cäicat vai ah abü nak ah mawng, 19 Ani zum ciah chang gui ung gawklawk ciah ahlüngtai nak cu a i hlawk ah küikyang ciah nami hmat vai ah kyak ci. Nangmi ung gawklawk ciah cun ah hlüngtai nak cu, 20 Bawi Khrit sih nak ung ka thawh ba sak ne khankho ah ak pat lam ung angoh sak zah ung a mang te ah kiak ci. 21 Bawi Khrit naw cun ah kho ah khankho uk ci gui, huham mah gui, hlüngtai ci gui, la bawi gui cu uk gui ci. Ani ah ming cu tuhbäi la lawk khai ah khin ung huham ah ci gui phung ah küikyang pi ci. 22 Khanpughi naw ang nüng nüng cu Bawi Khrit ah khaw ka ah chah ne, khrihtabum ung phi avan ah chunglu Bawipa ah ngoh sak ci. 23 Khrihtabum cu Bawi Khrit ah pumsa ah kia ci kia sei apäng avan cu amät ah kümbe nak awn kümbe sak ci.
1 Zanä nang mi cu ngaih she nak la shetkat nak ung mumcha aksi ah nami kiak ci. 2 Khomdek khan ah cheishoh nak lam cu nami läk ci, kho k'hääung ka, mumchashe ah hlüngtai nak ah uk nak cu nami läk ci, a cun naw tuhbäi Khanpughi kä ngai ciah chang gui cu shum gui ci. 3 Zanä mik mi phi ngami ah mäih ah mi kia man ci. Pumsa ah ng'zak hlü ah mi om ne, pumsa la m'lungngaih ah ni vai düt ah mi bilo man ci. Mik mi cun phi pumsa lam ung, a hei chang gui ah mäih ah Khanpughi ah m'lungshe nak gah khin ciah mi kiak ci. 4 Cun ung phi Khanpughi ah m'gein nak cu däm aih ne am hni nak cu hlüng aih khü tah, 5 ang thu kä ngaih nak awn mi mumcha a sih nak ung ka, Bawi Khrit awn atäng ah na ghin ba sak gui ci. Nang mi cu Khanpughi ah a gein nak bäng awn hun nak nami gah ciah kiak ci. 6 Mik mi cu Bawi Khrit ung mi kawng ät nak awn, sih nak ung ka atäng ah na thawh ba püi gui ne, ani awn atäng ah khankho uk nak vai phi na pe gui ci. 7 Cun ah a bi ah mawng cu, mik mi-am am hni nak cu Bawi Khrit awn am dang nak ung, ani ah am gein nak a i hlawk ah adäm ah mawng cu, ngawi zä chang gui naw ami hmat vai ah hmawk ah kiak ci. 8 Khanpughi ah m'gein nak ung zum nak awn hun nak nami gah ci. Nami mät ah ni kiom nak la k'tha nak awn ah kä kiak ci, Khanpughi ah m'gein nak ah kiak ci. Cun ah kia sei a u naw a khäh ghah nak vai kä kiak ci. 10 Bawi Khrit awn kawng ät ne, Khanpughi naw am hnüt bäi ah om k'ni nak ah mäih ah mi om ih vai ah, Khanpughi naw a na tüi sho gui ah kiak ci. 11 Azan ä nang mi cu pumsa awn bi vai kä nami bi tuk ciah kia sei, chang khui hei ah ami ning khü gui cu nami shäm ba vai nei. Pumsa awn bi ah vun ah nak bik ci ah Jew chang gui naw, nangmi cu vun ah nak kä nami bi tuk ciah ning khei gui ci gui. 12 Cun zah ung nang mi cu Bawi Khrit awn nami ng'shawng ci. Nangmi cu a kho hei chang gui ah kia u ne, Khanpughi ah ghü ah chang ah kä nami kia tuk ci. Khanpughi naw ak chang gui ah hmawk ah shai a taak ah ng'thukhän ung phi, nangmi cu kä nami ng'khämtuk ci, khomdek khan ung Khanpughi kä hmu ne, ngaih u vai kä om ciah chang ah nami kia man te ci. 13 Cun ung phi tuhbäi Bawi Khrit Jesuh ung nami kawng ät pyi ci kia sei, Khanpughi awn nami ng'shawng te ciah nang mi cu, Bawi Khrit a sih nak awn nami ng'et pyi ci nei. 14 Bawi Khrit amät naw Jew chang gui la chang khui hei gui cu, chang pakhui ät ah na piang gui ne, dimdeeih nak na pe gui ci. A pumsa a peit nak awn chang pakhui goi ah ng'tukgen khoikhei nak phi gäi ne m'shet pyi ci nei. 15 Cun kawn ah Jew chang gui ah thukhän shaitaak gui cu nawng-en ne, Jew chang gui la chang khui hei gui cu, amät ung kawng ät sak gui ne, pakhui thai ah kiak sak gui ci. A cuncha ah dimdeeih nak cu a peit gui ah kiak ci. 16 Bawi Khrit naw kutlamtung ung a sih nak awn, chang gui ah thüigen nak cu m'dim netah, chang pakhui hnih cu kawngüt sak ne, Khanpughi ah law püi ci. 17 Cun ah kia sei, Khanpughi awn nami ng'shawng te ciah chang khui hei gui la, Khanpughi awn ng'et ci gui ah Jew chang gui, nami van ah ma ah Bawi Khrit cu kium law ne, dimdeeih nak ah Thu Ni cu shäu ne pyein ci. 18 A cun nak awn chang khui hei gui la Jew pakhui mi van cu Bawi Khrit awn Mumcha tumat ung mi kium ne, Pa Khanpughi ah ma ah mi gawk lawk ciah kiak ci. 19 Cun ah kia sei nangmi chang khui hei gui cu, chang heinu, thämnu m'donghman ah kä nami kia ba ci; keimi awn atäng ah Khanpughi ah chang, Khanpughi ah kiong khui chang ah nami kia pyi ci. 20 Nangmi cun phi Angdüih püi gui la purofet gui naw ami k'süm ah lung ung ng'lin ah nami kia pyi ci. Cun ah lung k'tung cu Bawi Khrit Jesuh amät ah kiak ci. 21 Ani naw cun ah imlo cu shum ne han chang sei, cun cu Bawipa-am ap ah bum im theing ah kia lawk ci. 22 Nangmi cun phi, Bawi Khrit ung kawng ät nak awn, chang khui hei gui awn atäng ah cawhkyan nak nami gah pyi ci kia ne, Mumcha awn Khanpughi ah om nak ah hmun ah nami kia lawk ci.
1 Shin ah a mawng ung Bawi Khrit ah thawng kium ah ka kiak ciah kei Paul naw, nangmi chang khuihei gui ah hmawk ah Khanpughi ah ka taigü ci nei. 2 Nangmi ah hmawk ah shin ah bi bi vai ah, Khanpughi naw am gein nak awn kei-am a na ap ah mawng cu, nangmi naw akcang ah nami ng'zak pyi ah kiak ci. 3 Khanpughi naw thuuk ciah a pawngpäi gui cu kei-am nam thein ci. (Shin ah mawng cu ak tawi ah kei naw ka gu pyi ci, 4 Nangmi naw cun ah ka guk cu nami phat ah a kiak ung, Bawi Khrit ah mawng ak thuuk cu kei naw ka hmat ah mawng cu nami hmat khai nei. ) 5 Cäu läi Khanpughi naw thuuk ciah a mawng cu chang ah hta-am kä m'thein man ci, cun ung phi tuhbäi theingcim ciah ang düihpüi gui la purofet gui-am, Mumcha awn m'thein gui ci nei. 6 Cun ah thuuk ciah a mawng ung, Thu Ni awn chang khuihei gui naw, Jew chang gui ah mäih ah Khanpughi ah zoshen nak cu gah tuk ci gui. Jew chang gui la khuihei chang gui cu, pumsa tumat ung ka, ang phyeek pai gui ah kia ne, Bawi Khrit Jesuh ung Khanpughi ah shaitaak cu ng'kähzah ci gui. 7 Ahlüngtai nak ah abilawh nak awn Khanpughi naw ana peit ah ak küikyang ah m'cümhnah nak cu, Thu Ni shäu ciah ak chang shäm ah ana pian ah kiak ci. 8 Kei cu Khanpughi ah chang gui ung ak chui pi bäih ah ka kiak ci. Cun ung phi Khanpughi naw, Bawi Khrit ah kä khei tai vai ah bühmang nak ah mawng Thu Ni cu chang khuihei gui am m'thein gui vai ah, 9 Khanpughi ah thuuk ciah ng'bä nak cu, a i cha dang lawk khai ci cu, chang gui naw ami hmuhmat vai ah m'thein m'kaan nak vai ah a khin ni cu kei am na pek ci nei. Ang tüi avan täipian ciah Khanpughi naw cau pui pui ung cun ah ak thuuk kau gui cu, a thuh te ah kiak ci. 10 Cun ah abi ah mawng cu Khan uk ci gui la hlüngtai ci gui naw Bawipa ah cäivai nak a hlühlü cu, tuhchü Krihtabum awn ami hmat sak nak vai ah kiak ci. 11 Khanpughi naw ng'tüi ciah ang bä nak awn, mi Bawipa Khrit Jesuh ung dang khai ah abi ah kiak ci. 12 Mik mi cu Bawi Krih ung mi kawngüt nak la ani mi zum nak awn, Khanpughi ah ma ah m'lung p thamah ne mi gawk pyi ci. 13 Cun ah kia sei kä nami ng'zochaw vai, nangmi ah hmawk ah kei cu geinvai nak ka gah ci, cun cu nangmi ah ng'läh nak vai ah kiak ci, cun ah kia sei kä nami ng'zochaw vai nei. 14 Kei cu Pa Khanpughi ah ma ah m'kuukdong ne kang hui ci, 15 Ani cu Khankho la khomdek ung kyongkhui mah phung avan naw ming akcang ami gah nak ah kiak ci. 16 Khanpughi cu bämang ci kia sei, nami m'lung kyong a khüighaat vai ah, ang Mumcha awn hlüngtai nak a ning peit gui vai ah, kei cu ka taigü ci nei. 17 Nami zum nak awn nami m'lung kyong ung Bawi Khrit naw im ak säm vai ah ka taigü ci nei. Nangmi cu m'hni nak ung ng'zungpyaa ne nami khän htek vai ah ka taigü ci nei, 18 Cun ung nangmi cu Khanpughi ah chang gui awn atäng ah, Bawi Krih ah m'hni nak cu a i hlawk ah azun, akdang, alu, alawng kiak ci cicu nami hmat lawk khai. 19 Ani ah m'hni nak cu nami hmat lawk khai, cun ung phi kümbe khai ah a i zah ung phi kä nami hmat hlawt khai—cun ah kia sei Khanpughi ung zungpyaa ne khänghtek vai ah ng'hläm ne nami ngaih gep vai nei. 20 Mik mi ah m'lung kyong ung ahlüngtai nak awn bi bik ci naw, mik mi naw mi ngaih tüh mi ng'zoih thäh ahtah, däm pi sei na pe gui hning ci nei; 21 Cun ah Khanpughi ah bäkhäk nak cu, khrihtabum ung la Bawi Khrit ung a kho phlät ah ng'shü ne om sä! Amen.
1 Cun ah kia sei Bawipa ah khuut ka bi hmawk ah thawng ka kyum ciah kei naw ka ning m'tholet gui ci nei. Nangmi cu Khanpughi naw khü ne a ning m'düih nak gui awn ng'mäi khai ah, hnu m'khin, ma m'hlawi ne nami ghin vai nei. 2 Ang tüi sei nami m'lung neim sak ne, ng'awi ng'gi ne, hnimgei ne nami om vai nei. Tumat la tumat Lung gei, ngaih ni nak awn, nami m'hni cu dang sak vä. 3 Kawngüt nak om khai ah ak ni pi ah nami hnün thawh vai nei, cun cu dimdeeih nak ung nami lukyum khai ah, Mumcha naw a ning pek gui ah kiak ci. 4 Khanpughi naw a ning khü nak gui awn, ngaih u nak tumat bäng a om ah mäih ah pumsa tumat Mumcha tumat bäng om ci. 5 Bawipa tumat, zumnak tumat, tui hnim nak tumat; 6 Hnicim chang avan ah Pa, Khanpughi tumat bäng om ci, Ani cu ang tä a van ah Bawipa, van ung bi bi ne, van ung om ci. 7 Bawi Khrit naw a nam shumphyuk gui ah mäih ah, mik mi tumat ci cu küikyang ciah m'cümhnah nak mi gah ci. 8 Cacim theing ung lawk ci cu; Bawipa cu ahlüng nakpi ah hang kai ne, Thawng kyum chang khli cu kai püi gui ci; Hnicim chang van am m'cümhnah nak, pek cik. 9 Tuhbäi, hang kai ci, ä ci cu, a i a pyein hlü ang? Bawipa cu ang neim nak pi bäih ah khomdek ung kyum law ma ci, ciah kiak ci. 10 Kyum lawk ciah Bawipa cu, a hlüngtai huham awn khopuui be sak khai ah mawpi khankho ah hang kai ba ciah Bawipa ah kiak ci. 11 Hnicim chang am m'cmhnah nak m'shumphyuk gui ci cun phi, acun ah Bawipa ah kiak ci. Ani naw am shah cu ang düihpüi gui ah, am shah cu profet gui ah, am shah cu thu shäü ci gui ah, am shah cu pastor gui ah, am shah cu saza gui ah, m'düih gui ci. 12 Cun ah abi cu Bawi Khrit ah pumsa cawh kyan vai ah, Khanpughi ah chang khli naw, krihta khuut bi vai ah, pawng m'hteim ge vai hmawk ah kaik ci. 13 Cun ah kia sei Khanpughi ah Htapa mi hmuhmat nak ung, mi zum nak tumat ah a kiak nak awn, mi van cu atäng ah mi kyumsawm khai nei. Mik mi cu Bawi Khrit ah küm ciah khüt nak ah mäih ah, ang htei ah a hlüng nak ah, cäivai lulaang ciah mi kia lawk khai nei. 14 Mik mi cu ak hmawhta ah kä mi kia ba ci, cun ah kia sei, ami mät ah m'lung hnga täidawng düt awn, chang gui lam hma khai ah lam shäm ne thuvi theileh ci gui ah, m'theithang nak khokhni naw kä ning zon shäi shäi en gui sä. 15 Mik mi cu m'hni nak ah m'lung htek ung, thu thuuk mi pyein nak awn, chunglu ah kiak ciah Bawi Khrit ung ng'phaa vai ah, amawng alam avan ung mi hlüngtai tuk khai nei. 16 Bawipa ah kut shum nak ah kaa ung a phäh phäh ah om ci gui ah pumsa ung ming bäng bäng ci gui cu a mi van kyumsawm zawp ci gui, pumsa tumat ung ng'gui ng'phaa zawp ci gui. Cun ah kia sei pumsa ung ming phäh phäh ci gui naw ami mät ah bi phäh phäh ami bi law ung, pumsa avan cu, m'hni nak awn däm ng'ghaw sak ci gui. 17 Cun ah kia sei nang mi cu kä zum ci gui ah mäih ah, kä nami om ih ngaih tüh ba lä vai ah Bawipa ming ung ka ning khän gui ci nei. 18 Kä zum ci gui ah m'lung ngaih cu hnäp khui ah kiak ci. Ngahmi cu lulang nak maih ne cäivai nak kä om sei, ami m'lung ling ne, Khanpughi ah peit ah ghin nak awn api ah phi käng phaa ci. 19 Ngahmi cu lä ng'aa nak api phi kä om ba sei, ami m'hni hni ah m'gu plet sheka u ne, shungshet nak kä om sei, shemshai ci gui. 20 Nangmi naw nami ng'theithang ah Bawi Khrit ah mawng cu cun ah kä kiak ci nei. 21 Bawipa ah mawng cu akcang ah nami ng'za pyi ci nei. A hnu läk ciah ak chang gui nangmi naw Bawi Jesuh ung Thu thuuk ah mawng cu nami theithang pyi ci nei. 22 Cun ah kia sei ghin cu om düt ah ghin nak man, ak phyim cu lim ne nawng shüt vä. Mät ah ng'zak hlü hlimtui nak awn didap thei ciah, ghin nak phyim cu hnu nah vä. 23 Nami m'lung la nami ngaih avan cu ak thai ah nami ng'pian sak vainei. 24 Nangmi cu chang thai ah nami kiak vai nei, cun cu Khanpughi naw a mäi ah a tüisho la ghin nak akcang ah ang dang sak ah dängdau ci la theingcim ciah kiak ci nei. 25 Cun ah kia sei kä nami hleeihlak-en ba vai, mik mi cu Bawi Khrit ah pumsa ung atäng ah mi lukyum zawp ci kia sei, zum ciah chang gui tumat la tumat düng ciah thu bäng nami pyein vai nei. 26 Nami m'lung a shet law ah a kiak ung phi, nami m'lung she nak cu cheishoh nak ung kä gawk en sä, nami m'lung she nak cu hni naw kä luh-en püi sä. 27 Khoshe-am akhin kä nami peit-en vai nei. 28 M'gu man ciah chang phi küm gu-en ba ne, khüighaat ne hnüntho ne, amät ah hnun m'ghin ne, pyamtham ci phi am hteihtang tu hning vai ah tha na sä. 29 Thu she shaikaa api phi nami shai ung kä lut-en law sä, m'gein nak ah thu bäng lut law sä. Ng'awi gi nak, thamah nak la m'shümthein nak ah thu bäng nami pyein vai nei, cun ung vah ngai zak ci gui ah chang ah phäh ah ni kiom nak om khai. 30 Khanpughi ah Mumcha Theing cu kä nami m'thüi-en vai; a i ah kia sei ci ung Mumcha Theing cu Khanpughi naw nangmi a ning khäm gui ah mawng m'hnüt nak ah kiak ci, ak hnu bäih ah Hnüüp ung nangmi aning phiawn nak gui vai ah, a kyän ah phi kiak ci. 31 Thäisei nak, ngetngawng nak, m'lungshe nak gui cu nawng ge vä. Käng li ng'lai kä ng'plah ng'taang ba vä, küm thüikhang kä ng'gen hteet ba vä. 32 Tumat la tumat hnip hnoi ne ng'awi gi tu vä, Khanpughi naw Bawi Khrit ung a ning m'geinsei gui ah mäih ah tumat la tumat m'geinsei tu vä.
1 Nangmi cu Khanpughi ah hta nau gui ah nami kiak ci, ani ah mäih ah om vai ah nami tha nak vai. 2 Bawi Khrit naw mik mi cu nam hni gui ne, Khanpughi ah zumhni ah ng'ui ciah m'käi khän nak la peit nak ah a hnun gui cu a peit ah mäih ah nami ghin nak cu m'hni nak naw ning kut shum gui sä. 3 Nangmi cu Khanpughi ah chang ah nami kiak ci kia sei, pletbeng nak, shetkat nak a hlü hlä la ng'zak hlü aih nak gui ah mawng cu, a pyein pang ah phi kä nami pyein vai nei. 4 Ng'li ng'pyaan nak, ng'plahtaang nak, shaila lalei nak ah ng'thu phung kä nami pyein vai nei. Cun ah mäih ah thu nak vai sä ung Khanpughi bäng nami m'kümto vai nei. 5 Pletbeng ci gui, shekhak ci gui, ng'zak hlü aih nak om ciah chang gui phung cu, Khanpughi la Bawi Khrit ah uk nak kho ung chang ah kä kia tuk khai gui ci cu akcang ah nami hmat ci nei. (Ng'zak hlü aih nak cu agup khawihnah nak ah kiak ci nei). 6 Kä ng'laang ciah ng'thu awn a u naw nang mi cu kä ning k'phiui hnawk-en gui sä, cun ah mäih gui ah hmawk ah, thu kä läk ci gui ah khan ah Khanpughi ah m'lungshe nak om khai nei. 7 Cun ah kia sei cun ah mäih chang gui awn api ah phi kä nami ng'ce ng'cäk en vai. 8 Nangmi nami mät cun phi hmüp khui ung nami om te ci, cun ung phi Bawipa ah chang ah nami kyak awn ah, nangmi cu akdei ung nami om ci. Cun ah kia sei akdei ung om ciah chang ah mäih ah nami om vai. 9 Akdei naw nikiom nak a hlühlü, kümbe htingling nak la dängdau nak gui cu dang sak ci. 10 Bawipa ah a zei kiai nak cu nami theithang vai nei. 11 Hnäp khui ung om ciah chang gui ah bi, kä ak ni gui cu, kä nami bi en tu vai, cun gui cu nami dang sak vai nei. 12 (Chang gui naw m'zih m'thuh ne ami bilawh gui cu, pyein tu vai ah phi lä ng'aa vai kiak ci nei). 13 Akdei ung dangsak ah a mawng ama phung cu ang zung a pyaa ng'laat ne dang ci nei. 14 Cun ah dang law ci phung phung cu akdei ah kia lawk ci nei. Cun ah kia sei cacim theing ung; Ip ci gui let law vä, Sih nak ung kaa tho law vä, Nami khan ah Bawi Khrit ng'shü lawk khai nei. ciah om ci. 15 Cun ah kia sei nami ghin nak cu nami geing nak vai nei, chang gu k'aang ah mäih ah kä om u ne, chang lunglaang ah mäih ah nami om vai nei. 16 Tuhchü cu shekak ciah a khin ah kiak ci, cun ah kia sei, nami gah ah akhin k'ni phung cu, ak ni pi ah nami mang vai nei. 17 Cun ah kia sei ak gu k'aang ah kä nami om men vai, Bawipa naw nami bi vai ang zak hlü cu k'tha nah ne nami shui vai nei. 18 Ning m'gämce sak gui khai ah zu cu kä nami awktat vai, Mumcha awn nami kümbe vai nei. 19 Tumat la tumat nami thu ng'htau nak ung hlim ciah ng'äi gui, m'hlüngtai nak ng'äi gui, theingcim ciah ng'äi gui awn nami thu ng'htau vai nei; nami m'lung kyong ah Bawipa cu m'hlüngtai ne, hlim ciah ng'äi gui la m'hlüngtai nak ng'äi gui cu nami m'cu vai nei. 20 Mi Bawipa Jesuh Khrit ah ming awn, amawng ama avan ung, Pa Khanpughi cu nami m'käito vai nei. 21 Bawi Khrit nami chang m'sui nak ah tumat la tumat nami ng'nei ng'aan vai nei. 22 Hnumi gui, Bawipa nami kyih aa ah mäih ah nami cei cu nami kyih aa vai nei. 23 Krihtabum ah khan ah Bawi Khrit ah huham a om ah mäih ah ak chu ah khan ah a cei ah huham om ci nei. Bawi Khrit cu amät ah pumsa ah kiak ciah Krihtabum ah Hunbawipa ah kiak ci. 24 Cun ah kia sei krihtabum naw Bawi Khrit ah kutshum nak a dou ah mäih ah hnumi gui naw phi nami cei ah kutshum nak cu ak be ah nami dou vai nei. 25 Pami gui, Bawi Khrit naw a hnun gui pe ne krihtabum cu am hni ah mäih ah, nami chu cu nami m'hni vai nei. 26 Bawipa naw a hnun gui a peit nak cu, krithtabum theing sak ne, ang thu awn Khanpughi am ap sei; 27 Krihtabum naw ani ung ang ap law ba ung, ak kiom zäm zäm ah, alelawi, ak shekha kä om sei akümbe athangpai vai ah hmawk ah kiak ci. 28 Pami gui naw ami chu cu ami mät ah pumsa ami m'hni ah mäih ah ami m'hni vai. Ak chu m'hni ciah chang cu a mät naw amät phi m'hni ciah kiak ci. 29 (A u chang naw phi amät ah pumsa cu kä gen ci, tu m'bei ne m'hteihtang ci, Bawi Khrit naw krihtabum am hteihtang ah mäih ah kiak ci; 30 mik mi cu apumsa ah ang phyeekpaai gui ah mi kiak ci). 31 Cacim theing ung a pyein ah mäih ah, Pami cu anu la apa nawng shüt ne, ak chu awn ng'puikhap ni sei, ngahni hnih cu tumat ah kia lawk khai goi nei, ä ci cu bä ci. 32 Shin cu ang htei ah thuuk ne ng'kau ciah thuciim ah kia sei, Bawi Khrit la krihtabum ah hmawk ah kiak ci, ciah ka pyein ci. 33 Cun ung phi nangmi tumat ci ah hmawk ah phi kiak ci; a cei phung naw ak chu cu amät awn m'täng ne am hni vai, ak chu phung naw phi a cei cu ak chang m'sui vai.
1 Hta hmaw gui, nami nupa ah thu cu nami läk vai, cun cu khrihta gui ah bi vai ah kiak ci. 2 äNa nu la na pa cu nak chang m'sui vai, Cun ung nang cu bämang ne khoding ung ak shou na ghing khai, ä ciah cacim ung om ci, cun cu shaitaak nak ah ak htük bäih ah thukhän ah kiak ci. 4 Nupa gui , nami hta hmaw gui cu ami m'lung thüi khai ah kä nami bi en vai. Cun ung phi Khanpughi ah ng'zak hlü ah khrihta hläkhäm nak awn nami m'shümthein vai. 5 Changshüm gui, Bawi Khrit ah khuut nami bi ah mäih ah kyih-aa ne, khüighaat ne nami chang bawi ah thu cu nami läk vai. 6 Nami bawi gui naw ami ning zum gui vai ah, ami ma bäng ah ami thu nami läk ciah kä kia ne, Bawi Khrit ah changshäm ah nami kiak ciah kia sei, Khanpughi ah ang zak hlü ah nami m'lung ngaih avan nawn nami hnün thawh vai nei. 7 Chang ah changshäm ah mäih ah kä kiak ciah Bawipa ah khuut bi ah mäih ah zeikiai ne nami bilawh vai nei. 8 Nami shäm vai cu, changshäm ah a kiak ung phi, ng'päi om chang ah a kiak ung phi, ak ni bik ciah chang phung cu Bawipa naw m'cümhnah nak pek khai nei. 9 Bawi mang gui, nangmi naw phi nami changshäm cu a cun ah mäih ah nami om püi vai nei. Nami m'kyihkyawk nak gui cu nami m'däm vai nei. Nangmi la nami chang shäm gui cu, khankho ah Bawipa tumat bäng naw ning khäm gui ne, zodäm pyammang küm hnga ne atäng ah m'khoi chaa nak bik ci ci cu nami shäm vai nei. 10 Ak hnu bäih ah ka ning m'cäi gui cu, Bawipa ung kawngüt nak la küikyang ciah a hlüngtai nak ung thamah ne khüighaat vä. 11 Khoshe ah thuvi tüihtok nak nüng m'khüt nak vai ah, Khanpughi ah ning peik gui ah likhim k'be cu nami awi k'bah vai nei. 12 Mik mi cu hnicim cang awn ng'tuk mi bik ciah kä kiak ci, khankho ah om ciah mumcha she gui la shin ah kho hmüp nak kho ung, uk ci gui, huham mah gui, la hlüngtai nak om ci gui awn ng'käükneet ne ng'tuk mi bik ciah kiak ci. 13 Cun ah kia sei Khanpughi ah likhim k'be cu nami awi k'bah vai nei! cun ung vah shekat geinvai nak ah hnüüp a gawk law ung, gaa ah tuk nak cu nami nüng hlawt khai nei. Ng'tuk lu küm sei nami ng'tuk kawn ah nangmi cu nami kho ng'lei ung khüi ne nami ng'düi lawk khai nei. 14 Cun ah kia sei khüi ne nami ng'düih ge vai nei, thu thuuk ah kiak ciah m'ciu vawp u ne, dängdau nak ah kiak ciah saphaw k'bah u ne, 15 dimdeih nak ah Thu Ni shäu nak ah kiak ciah phahnak cu nami ng'cum vai nei. 16 Zum htek nak ah kiak ciah shawiphaw cu ang tüi sei nami kawh vai nei, cun ung khoshe naw a shunkah law ah mei ah düi ciah li k'htei cu nami m'diim hlawt khai nei. 17 Hun nak ah kiak ciah m'si lukhu cu kutshum ne, Mumcha ah m'shumphyuk ah Khanpughi ah ng'Thu ah kiak ciah khimgan cu nami kawh vai nei. 18 Khanpughi ah m'hteihtang nak gah vai ah ng'zoi thäh ne, taigü nak awn shin gui cu nami bi vai nei. Mumcha ah lam shäm ah mäih ah amawng ama avan ung nami taigü vai nei. Cun ah kia sei nami cimgang cäivai vai, kä nami pyai phung vai, Khanpughi ah chang gui ah hmawk ah ang tüi sei nami taigü vai nei. 19 Kei thu ka pyein zah ung Khanpughi naw thu m'gawng thei nak ana peit vai ah nami na taigü peit vai nei. Cun ung kei naw Thu Ni ah a thuuk nak ah mawng cu dang ne ng'hmat khai ah ka pyein thei khai nei. 20 Kei cu thawng ka cum pang ung phi, shin ah Thu Ni ah hmawk ah ng'shü ah ka kiak ci nei. Shin ah Thu Ni ka pyein khai ah kang düi ci kia sei, khüighaat ne ka shäu vai ah nami na taigü peik vai nei. 21 Tichikus, mi m'hni bekhüt ciah mi nau, Bawipa ah khuut bik ciah changshäm naw, kei ah mawng avan cu ning m'thein gui khai nei. Cun nung kei a i ah kia ne ka om cu nami hmat khai nei. 22 Cun ah kia sei ani nang mi ah om nak ah ka tüih law cu, keimi ah mawng a ning m'thein gui vai la k'tha mah nak a ning peit gui vai ah hmawk ah kiak ci. 23 Pa Khanpughi la Bawipa Jesuh Khrit naw khrihta phäi nau nami van am, dimdeeih nak, la zum nak awn m'hni nak cu ning pe gui sä. 24 Kä si hlawt ciah m'hni nak awn mi Bawipa Khrit m'hni ciah chang gui ah khan ah Khanpughi ah m'geinsei nak cu kümbe ne om sä.
1 Bawi Khrit Jesuh ah chang shäm ah kyak ciah Paul la Timohti naw Philippi gawnu ung Khrihtabum uk ci gui la bi püi gui ci gui ni, Bawi Khrit Jesuh ung kawng ät ci gui ah Khanpughi ah chang gui ni am, ca guk law ci goi nei. 2 Mi Pa Khanpughi la Bawipa Zesuh Khrit naw m'geinsei nak la dimdeeih nak cu ning pe gui sä. 3 Nangmi ah mawng ka ngaih tüh päng ung Khanpughi cu kam hlüngtai ci; 4 ang tüi sei nami van ah hmawk ah ka taigü ci. 5 A htük ung tän ne tuh bäi ung khüt khai ah Thu Ni shäu ne bilawh nak ung atäng ah nami na bilawh püi ah hmawk ah ka taigü päng ung ka zeikyai ci nei. 6 Cun ah kya sei nang mi ung bi ak ni tän ne bik ciah Khanpughi naw Bawi Khrit Jesuh ah kyum law nak vai ah hnüüp kä a gawk phaa ung, cun ah bi cu ng'pyi khai ah bik khai ah ka zum ci nei. 7 Kei naw cun ah nangmi ah mawng ka ngaihtüh cu ng'düng ci, a i ah kya sei ci ung, nangmi naw kei cu nami m'lung awn nami na k'pan na phäh ah kyak ci. Tuk bäi thawng ung ka kyum zah ung la Thu Ni cu a kho k'ding ah pyeinsa ne, ka k'süm pian zah ung nangmi cu, Khanpughi naw ana peit ah akhin k'ni ung, nami bilawh tu ah hmawk ah phi kyak ci. 8 Bawi Khrit Jesuh ah m'gein nak awn, nangmi ang htei ah ka ning khaih nak gui ah mawng pyein ung, Khanpughi cu saksi ah kyak ci. 9 Kümbe ciah m'khoichaa nak la ng'düng ciah hmuhmat nak awn atäng ah nami zumhni nak cu ang ghotai law pi pi vai ah kei ka taigü ci nei. 10 cun ah kya sei nangmi naw ak ni pi cu nami ghü hning khai nei. Cun ung vah nangmi cu Bawi Khrit a law ba hnüüp ung, m'kat nak kä om ciah kä theingthap nak cu nami phiawn nak khai. 11 Khanpughi ah bämang nak la m'hlüngtai nak vai ah hmawk ah Bawi Jesuh Khrit ung lawk ciah düng ciah ni kiom naknaw, nami ghin nak cu ning kümbe sak gui khai nei. 12 Phäi nau gui aw, kei naw ka buitang law gui naw, Thu Ni ka shäu nak ung ak cang ah, a na zu chaan ah mawng cu ka ning hmat sak gui hlük ci nei. 13 Bawi Khrit ah changshäm ah ka kyak ah hmawk ah thawng ung ka kyum ah mawng cu, mang im ngäng ciah gaakap gui ami van la chang akda naw hmat ci gui nei. 14 Kei cun ah thawng ung ka kyum ah hmawk ah phäi nau gui akda pi naw, Bawipa ami zum nak cu khängtek law pi ci. Cun ah kya sei ng'thu, am shah ung Khanpughi ah ng'thu ami pyein nak ung ngahmi cu kä kyikyawk ne k'thamah law pi ci gui. 15 Chang am shah gui naw m'thüikhang nak ah m'lung ng'tukvook nak hlü ah m'lung awn Bawi Khrit ah mawng cu pyeinsak ci gui, cun ung phi chang am shah naw m'lung ngaih k'ni awn pyeinsak ci gui. 16 Cun ah chang gui cu, Thu Ni küikyan ne ka pyeinsak khai ah Khanpughi naw anam düih ah mawng cu, hmat u netah, zumhni nak awn pyeinsak ciah chang gui ah kyak ci. 17 Chang am shah gui naw Bawi Khrit ah mawng cu m'lung ngaih k'ni awn ah kä kyak ciah ami mät ami m'hlüngtai nak hlü awn pyeinsak ci gui. Ngahmi naw thawng ka kyum ci ah kei cu ka zaica nak pi vai ah ami bi ah kyak ci. 18 Thu pyein cu kä küikyang hnga ci, m'lung ngaih k'ni awn pyein ung phi, m'lung ngaih she awn pyein ung phi, Bawi Khrit ah mawng pyein ah kya sei, ka zeikyai ci, m'tüi ne ka zeikyai lä khai. 19 Nang mi ah taigü nak la Bawi Jesuh Khrit ah Mumcha ah nam hteihtang nak awn cun cu kei ah phyawn law nak vai ah kyak ci. 20 Kei naw ak tung ah ka ng'zak hlü la ka ngaih u nak cu, kei naw a i zah ung phi ka bi mawng cu kä ka nawng khai, a i khin ung phi, a tuh bäi chü phi, kei cu khüighaat nak awn be ne, ka sih ung phi, ka ghin ung phi, ka ghin nak avan awn Bawi Khrit kam taamkhah khai, ciah kyak ci. 21 Ghin nak ci cu a i ang! Kei ah hmawk ah, ka ghin nak cu Bawi Khrit ah kyak ci, ka sih nak cu ka bä nak pi ah kyak ci. 22 Cun ung phi kei cu ka ghin lä ung bi ak däm pi ka bi ba khai a kyak ung, sih nak la ghin nak ung kaa a i ka ghü khai ang! 23 Kei naw hnih ah ka ngaih nak om ci, kei cu shih ah ghin nak nawng shüt ne Bawi Khrit ung ang htei ah ka om hlük ci, cun cu kei ah hmawk ah bä pi ci. 24 Cun ung phi nang mi ah hmawk ah kei ghing ne ka om vai cu ak küikyang pi ah kyak ci. 25 Cun ah a mawng cu ka hmat ci kya ne, kei cu nang mi awn atäng ah ka om khai nei. Nami bühmang nak vai la zum nak ung nami zeikyai vai ah hmawk ah kei cu namg mi awn atäng ah ka om khai nei. 26 Cun ah kya sei nami om nak ah ka gawk law ba hnüüp ung, Bawi Khrit Jesuh ung nami ghin nak awn, kei ah hmawk ah nami khäghah nak pi vai kyai khai nei. 27 Tuk bäi ak küikyang pi cu Bawi Khrit ah Thu Ni awn ng'mäi khai ah nami ghin om vai ah kyak ci. Cun ah kya sei kei ka law ba hlawt ung phi, kä ka law ba hlawt ung phi, Thu Ni zum nak ung, tumat ah khäng khai ah m'lung ngai u ne, ng'bä nak ung tumat ah htek khai ah ng'düi u ne, khüighaat ne nami kyak ah mawng cu ka ng'za hlük ci nei. 28 Nami gaa gui cu kä nami kyih en vai; ang tüi sei nami lingtha vai, Cun cu nami gaa gui ah dawng nak vai la nang mi ah nüng nak vai ah mawng m'dang nak ah kyak ci, a i ah kya sei ci ung nangmi am nüng nak ning pe gui ci cu Khanpughi ah kyak ci. 29 Nang mi cu ani nami zum nak bäng awn ah kä kyak ciah ani ah hmawk ah zaica nak nami gah nak awn Bawi Khrit ah khuut bi nak vai ah a khin k'ni cu nami gah ci. 30 Tuh bäi nang mi cu kei awn atäng ah ng'tuk nami bi hning pyi ci nei. Azan pui tüi ne kei naw ng'tuk ka bi cu nang mi naw nami hmuk ci. Tuh bäi phi nami ng'zak ah mäih ah kei cu ng'tuk ka bi gäkgäk ci nei.
1 Bawi Khrit ung nami ghin nak naw ning khüighaat sak gui ne, ani ah m'hni nak naw nami m'lung ning p sak gui ci. Nang mi cu Mumcha awn ng'geicam nak om ci; tumat la tumat chimgein nak la m'hteihtang nak tu phi om ci. 2 Cun ah kya sei atäng ah nami ngaih tüh nak, nami zum hni nak la nami m'lung ngaih a kawng ät nak awn, kei cu kümbe khai ah nami na zeikyai sak vai ah ka pyein hlük ci. 3 Khäghah nak hlü la mät ah ng'zak hlü shui nak awn a i phi kä nami bi vai, chang cu mät ah mä, bä tu ba ci, ciah ngaih tüh ne, nami m'lung nami ng'neim sak vai nei. 4 Nami mät ah hmawk bäng ah kä ng'ä ne, nami pawchang ah hmawk ah phi nami ng'ä vai nei. 5 Bawi Khrit ung om ciah m'lung ngaih cu nang mi ung phi om sä; 6 Ani cu ang tüi sei Khanpughi nupuk nak ci, Cun ung phi Khanpughi ah mäih ah ka kyak khai ciah ling ne kä k'tha nak ci. 7 Cun ah a kyak nak vaisä ung amät ah bämang nak cu a bä ah nawng shüt ne, changshäm cu nupuk nak ci. Ani cu chang ah mäih ah law ne, ak hnicim chang nak cu m'dang ci. 8 Ani cu am lung neim sak ne kutlam tung ung asih nak ung khüt sei, Khanpughi ah ng'thu cu läk ci. 9 Shin ah a mawng ung Khanpughi naw Bawipa cu, thawh ba sak ne, Ak hlüng pi k'bäih ah Khankho hmun ung, ming thang ni ci ah hlüngtai pi ciah, ming cu pek ci. 10 Cun ah kia sei khankho la khomdek ung om ci nüng ni, khomdek ah ka ah om ci nüng ni naw, Bawi Zesuh ah ming cu m'tamkhah u ne, 11 M'khuukdoong ne bawihma u netah, Ak ghing om avan naw, Zesuh Khrit cu Bawipa nei, ä ci ne shäu u ne, Pa Khanpughi ah bämang nak cu m'dang khai gui. 12 Cun ah kya sei teihpüi gui aw, kei ka om zah ung ka ng'thu nakmi ngaih ah mäih ah, tuh bäi kei kä ka om zah ung ka ng'thu nami ngaih vai cu ak küikyang pi ah kyak ci. Nangmi naw hun nak ak be ah nami gah nak vai ah kyih aa nak awn nami bilawh vai, 13 A i ah kya sei ci ung Khanpughi naw ang zak hlü ah nami bi vai la ng'thu nami läk nak hning vai ah nang mi ung ang tüi sei bi bik ci. 14 Nami bi vai om ci phung cu kä ng'sutsi kä ng'cuhcan ne nami bi vai nei. 15 Cun ung nangmi cu cheishoh ne kat nak bik ci gui ah om nak ah khaw ung Khanpughi ah kümbe ciah hta gui ah kya ne, kat nak kä om ne theingthap ciah chang gui ah nami kyak khai. 16 Nangmi naw ang tüi ghin nak ah mawng ng'thu cu pyein u ne, cun ah chang gui ah ng'lung ah khomik ung aisi ah ng'shü ah mäih ah nami khang khai nei. Cun ah nami bi ah akyak ung kei naw k'tha na ne ka bilawh gui cu a kholä ah kä kya sei, Bawi Khrit a kyum law Hnüüp ung, nangmi ung kei ah khäghah nak vai cu om khai nei. 17 Nami zum nak awn Khanpughi am nami peit ah khawihnah nak ah khan ah, kei ah ka hnun si cu kam soi ah a kyak ung phi kei cu ka zei ci nei, nangmi phi ka ning zei sak gui ci nei. 18 Cun ah mäih ah nang mi phi nami zeikyai vai nei, nang mi awn atäng ah kei phi nami na zeikyai sak vai nei. 19 Bawipa naw ang zak hlü a om ung kä shou pha sei, Timothi cu nangmi ah ka tüi lawk khai ah ka ngai ci nei. Cun ung kei naw nangmi ah mawng ng'za ne k'thamah nak ka gah khai nei. 20 Ani bäng cu kei awn kani m'lung ngaih kawng ät sei, nang mi ah hmawk ah bi bi hlük ciah chang ah kyak ci nei. 21 A hei chang gui läi cu ami mät ah hmawk bäng ngaih tüh u ne Bawi Jesuh Khrit ah bi cu kä k'tha nak ci gui nei. 22 Nang mi naw Timothi ah hnün thawh la kei ni naw ng'pahta goi ah mäih ah Thu Ni shäu ne kani bilawh cu nangmi naw nami hmat ci nei. 23 Cun ah kya sei kei ah ka mawng cu a i ah kyak ciah ka hmat vai am, ani cu nang mi ah ka tüi lawk khai ka ngai ci nei. 24 Kei ka mät cun phi kä shou pha sei nang mi ah ka law hning vai ah Bawipa ung ka ng'ap ci nei. 25 Kei awn atäng ah kani bik ci, kei awn atäng ah ng'düi ne ng'khüi ci, kei nam hteihtang khai ah nami tüih law ah, mi nau Epaphroditus cun phi nang mi ah ka tüih law vai ah hlü ciah ka ngai ci nei. 26 Ani naw nang mi cu ning khaih na gui ci, ani ah gawpai ah mawng nami ng'zak ah hmawk ah ani cu am lung kä ni ngai ngai ci nei. 27 Ani cu akcang ah si ghepghep ne gawpai te ci nei. Cun ung phi ani cu Khanpughi naw m'htei ci nei, ani bäng ah kä kyak ci kei phi nam htei ci nei. Cun ah kya sei kei cu thüisei nak kä ka buitang ba ci. 28 Cun ah kya sei nang mi naw ani cu hmu ba ne nami zeikyai nak vai la kei ah thüi sei nak gui ang kawn nak vai ah, kei naw ani cu nang mi ah ak zä ah ka tüi law hlük ci nei. 29 Nangmi naw ani cu Bawipa ung phäinau ah zeikyai ne nami dou vai nei. Ani ah mäih ah chang phung cu nami chang m'sui vai nei. 30 Ani naw Bawi Khrit ah khuut cu a sih -aung ah k'tha nah ne bik ci nei. Cun cu nang mi naw kä nami peit hlawt ah bi cu kei am ana pei vai ah hmawk ah a bi ah kyak ci nei.
1 Phäi nau gui aw, ak hnu ah ka pyein hlü cu, Bawipa ung zeikiai vä. Ka guk pyi te ka pyein ba cu kei ah phäh ah zaica nak vai kä kyak ci nei, cun cu nangmi ah m'lung p nak vai ah kyak ci nei. 2 Chang shekha gui, ui ah mäih gui, pumsa-ah vai cik ci gui cu nami geing nak gui vai nei. 3 Vun-ah nak bik ci gui ah chang cu ngahmi ah kä kyak ci, mik mi ah kyak ci. A i ah kya sei ci ung mik mi cu Mumcha awn Khanpughi cu mi khawihna u ne, Bawipa Jesuh Khrit awn mi kawng ät u ne, zeikiai nak mi gah ciah kyak ci. Mik mi cu a hei a i baw düt kä mi ngaih u ci. 4 A i baw düt ngaih u vai a hlü ung cun cu kei ung om ci. Ak pung ah kiomsang nak ngaih u ciah chang a om ah a kyak ung phi, cun ah chang cu kei aü om man hlawk ah kä kyak khai nei. 5 Kei cu khaw hnüüp chih ka law zah ung vun-ah nak ka gah ci. Kei cu Israel chang, Benjamin pakhui, Hebru nupa nah ne ka ng'tüi lawk ci. Jew gui ah thukhän läk nak pyein law ung kei cu Pharisee tumat ah ka kyak ci. 6 Kei cu ang htei ah m'thüikhang ne Khrithabum phi ka k'dukdei na man ci. Thukhän awn ng'düng vai ci ne, thukhän läk nak pyein law ung kei cu pyein vai kä om khai ah ka läk ci. 7 Cun ung phi ka mät ah hmawk ah aungtang ciah ka ngaih man phung cu Bawi Khrit ah hmawk ah a kholä ah ka hmat ci. 8 Cun bäng ah kä kyak ciah Bawipa Khrit Jesuh ka hmat nak tu cu apäng avan ah küikyang pi ci kya sei, azan kaa gui cu kei na ghawi sak ci gui ah ka hmat ci. Kei naw Bawipa ah hmawk ah apäng avan cu ka ghawt shüt ci. Bawi Khrit kei ung a gawk law vai la 9 Bawipa awn kawng ät nak vai ah hmawk ah, apäng avan cu ap ah mäih ah ka hmuk ci. Kei naw thukhän ka mät ah läk nak awn chang düng ah kä ka kya ba ci nei. Kei cu tuh bäi Bawi Khrit ka zum nak awn chang düng ah ka kyak ci, cun ah chang düng ah kyak nak cu Khanpughi ung kaa law ne, zum nak ung phung ci. 10 Kei naw ka ng'zak hlü cu Bawi Khrit hmat vai, sih nak ung kaa a thawh nak ba ah hlüngtai nak gah vai la ani awn atäng ah zaica nak gah ne, ani ah sih ah mäih ah sih tu vai bäng ah kyak ci. 11 Cun ung vah kei cu sih nak ung kaa ka tho ba khai ciah m'lung p nak om khai. 12 Kei naw cun a ng'cheng cu ka gah pyi ci, ka kümbe pyi ci ciah pyein ah kä kyak ci. Cun ung phi cun ah ng'chuh cu na pek khai ah Bawi Khrit naw kei cu na k'pang pyi ci kya sei, cun ah m'kawt ung gawk ne ng'chuh cu ka dou vai ah kei naw ka k'tha nak ci nei. 13 Phäi nau gui aw, kei naw cun kä dou pha cu ka hmat ci nei; tumat kei naw ka k'tha nak cu ka hnu ah kaa gui phung cu m'hnih shüt ne, ka ma ah ng'dang lawk ci ung ka gawk vai ah kyak ci. 14 Cun ah kya sei kei cu ng'chuh dou vai ah m'kawt bä ne ka dawng ci nei. Cun ah ng'chuh cu khankho ah ghin nak vai ah Bawi Khrit Jesuh ung Khanpughi ah ng'khä nak ah kyak ci. 15 Mik mi mi van ung Mumcha lam ah k'thamah lawk ci phung naw a shikchaa a ngaih vai nei. Cun ung phi am shah ung a hei ah ngaih nak a om ah a kyak ung, cun cu Khanpughi naw ng'tei khai ah m'dang khai nei. 16 A i ah a kyak ung phi, mik mi naw tuh bäi ung khüt khai ah ng'cäi nak mi läk ah mäih ah mi läk lä khai nei. 17 Phäi nau gui aw, kei cu na thei vä. Nang mi ah hmawk ah kei mi ah m'dang, na thei tu gui ciah chang cu nami m'hteihtang vai nei. 18 Shin ah a mawng cu kei naw akda vei ka pyein pyi ci nei, tuh bäi phi leng ba ne ka ng'plitui awn ka pyein ba khai nei; Bawi Khrit Jesuh kutlam tung ung asih nak ah mawng cu hnu ng'tuk püi ne ani ah gaa ah kya ne ghing ciah chang akda om ci nei. 19 Cun ah chang gui cu m'htei kho khüt ne hteit ci gui ah kyak ci. Ngahmi ah Khanpughi cu pumsa a ng'zak hlü ah om ih nak ah kyak ci. Ngahmi cu thui ng'aa nak vaisä ung khähghah ci gui, ami m'lung kyong ung phi khomdek khan ah amawng ama bäng be ci. 20 Mik mi cu khan im gaw chang ah mi kya u ne, khankho ah kaa mi Hunbawi Jesuh Khrit a kyum law vai cu mi ngäng ci. 21 Bawipa naw amät ah uk nak kaa ah, ang tüi avan a gawk nak sak ah, ahlüngtai nak awn shetka thei ciah pumsa cu bämang ciah amät ah pumsa ah mäih ah na ng'thawng sak gui khai nei.
1 Phäi nau gui aw, ang htei ah ning m'hni gui ne ka ning khaih na gui ci nei. Nang mi ah hmawk ah ang htei ah ka zeikiai ci nei. Kam hni ah phäi nau gui aw, Bawipa ung nami ghin nak khäng htek khai ah nami ng'düih vai nei. 2 Euodia la Sintiche, nang ni cu Bawipa ung ng'pai nau goi ah kya ne, m'lung ngaih a kawng ät vai ah ka ning pyein na goi ci nei. 3 Ka ngaih u, ka ning paw nang naw, cun ah hnumi gui cu nam hteihtang tu gui vai nei. Ngah mi cu Thu Ni shäu ne pyein nak ung kei awn atäng ah k'tha nah ne bilo ci gui ah kyak ci. Cun ah bi nak ung Clement la Khanpughi ah ghin nak cauk ung a ming om pyi ciah, a hei bilo tuk ciah chang gui phi om ci gui. 4 Nang mi cu Bawipa ung nami ghin nak awn zeikiai vä, ka pyein ba mä cu zeikiai vä! 5 Nami hniphnoi ng'awi ng'gi nak cu chang avan am hmuh sak vä. Bawipa a kyum law nak vai ng'et law pyi ci nei. 6 A i amawng ama ung phi kä nami ng'ä ai vai, ang tüi sei m'hlüngtai nak ah m'lung awn k'taigü u ne, nami ng'zak hlü gui cu Khanpughi ah nami ng'zoih vai. 7 Cun ah nami bi ung, hnicim chang naw ngaitüh ne kä k'phaa ah Khanpughi ah dimdeeih nak naw, Bawi Khrit Jesuh ung nami kawng ät nak awn, nami m'lung la nami ngaih avan cu ning m'htei gui khai nei. 8 Phäi nau gui aw, khäm nak ah ka pyein hlü cu, ni kiom nak, bäkhäk nak, cang nak, käika nak, ng'düng nak, theingcim nak, zumhni nak la m'tamkhah nak awn nami m'lung kyong cu be sak vä. 9 Kei ah ka ng'thu ung nami theithang la kei ah ka bilawh nami hmuhteng ah mäih ah nami bilawh vai nei. Cun ung dimdeeih nak na pe gui ciah Khanpughi cu nangmi awn atäng ah om khai nei. 10 Akhin shou hta khütah kei nami nam hteihtang nak cu nami m'dang law ba mä ah hmawk ah, Bawi Khrit ung ka ghin nak awn ang htei ah ka zeikiai ci nei. Cun cu nang mi naw kei nami nam hteihtang nak kä om ba ciah ah ka pyein ah kä kyak ci, cun ah nami nam hteihtang nak vai ah khin kä om te ciah ka pyein ah kyak ci. 11 Kei nami na nawng düt ciah ngai ne shin ka pyein ah kä kyak ci nei, kei cu ka mät ung om ci awn, ka ng'bäh vai ah ka thei pyi ciah kyak ci. 12 Kei cu ka phä ung phi ka cawi ung phi, apihta a om ung phi, akdäm nu a om ung phi, ; a i a khin ung, a hawi ka om ung phi, a i ah mäih ah ka kyak ung phi, ng'bäh thei ne ka om vai ah ka ng'thei pyi ci nei. 13 Bawipa Jesuh Khrit ah na peit ah k'thagui awn kei naw ang'tüi avan kam khüt hning ci nei. 14 Cun ung phi kei ka zaica zah ung nang mi naw nami nam htei cu ang htei ah bä ci nei. 15 Nang Philippian chang gui, Kei cu Macedonia kho ung pawng ne Thu Ni cu shäu ne ka pyein law htük zah ung, nang mi ah Khrithabum tumat hta bäng naw nam hteihtang ci, nang mi bäng naw van shin ah bi ung, a ghawi law, abü law ung phi, kawng ät ne, nami na bi püi cu na mi mät naw nami hmat ci nei. 16 Thessalonika gawnu ung ka om zah ung kei ung hlü ci gui cu nang mi naw, hngä ät bäng ah kä kyak ciah nami nam khäh lawk ci nei. 17 Cun cu kei naw m'cümhnah ng'za hlü ne ka pyein ah kä kyak ci, nang mi ah camhnüt ung a tang law pi vai ah ka pyein ah kyak ci. 18 Nang mi naw nami nam khäh law avan ka gah ah manwg cu shin ung kam dang ci nei. - cun gui cu kei ung hlü ciah mä däm pi ci nei! Nang mi ah m'cämhnaä tu Epaphroditus ah law püi gui cu kei ung däm pui khai ah ka gah ci nei. Cun cu tuihlim ne ng'ui ciah Khanpughi bawihma nak la Khanpughi naw m'hni häihhäih ne a dou ah khawihnah nak ah mäih ah kyak ci nei. 19 Cun ah kya sei kei ah ka Khanpughi cu bühmang nak la bäkhäk nak awn kümbe ciah kya ne, nangmi am Bawi Khrit Jesuh awn, nami ng'zak hlü avan cu ning pe gui khai nei. 20 Mi Pa Khanpughi ung abü khäk nak cu ang tüi sei om sä! Amen. 21 Khanpughi ah chang gui ah kyak ciah Bawi Jesuh Khrit zum ci gui avan cu ka ning zavaih na gui ci nei. Kei awn atäng ah om ciah phäi nau gui naw phi ning zavaih gui ci gui nei. 22 Khanpughi ah chang gui ami van naw ning zavaih gui ci gui nei; Ghangpughang ah mang im kyong ah om ci gui ah Khritha gui naw ak tung pi ah ning zavaih na gui ci gui nei. 23 Bawipa Jesuh Khrit ah m'geinsei nak cu nami van ah khan ah om sä.
1 Paul, Khanpughi ah ang zak hlü ah Bawi Khrit naw ang düihpüi la mi nau Timothi naw - 2 Bawi Khrit ung kawng ät nak awn bekhüt ci ah phäi nau ah kiak ciah Kolose gawnu ah Khanpughi ah chang gui-am, ca ami guk law nei. Mipa Khanpughi naw am gein nak la dimdeeih nak cu ning m'shum phyuk gui sä. 3 Nangmi ah hmawk ah kami taig päng ung mi Bawipa Jesuh Khrit ah Pa Khanpughi cu kami m'hlüngtai ci nei, 4 Bawi Khrit ung nami zum nak ah mawng la Khanpughi ah chang avan nami m'hni nak ah mawng cu, kami ng'zak ci nei. 5 Thudäng, thuni a gawk law htük zah ung ng'shut lawk ciah ngaih u nak cu nami ng'za pyi ci nei. Cun ah kia sei nami zum nak la nami m'hni nak cu khankho ah gim ah ngaih u nak ung ng'zung ci nei. 6 Thu Ni naw phyutheh nak cu law püi sei, khomdek khan avan ung gawk ci nei. Acun ah mäih ah nangmi ung akhtük ah mäih ah gawk ciah Khanpughi ah m'gein nak cu ng'za u ne, ani ah mawng akcang cu nami hmat law ah kiak ci. 7 Nangmi naw Khanpughi ah am gein nak cu Epaphras ah nami ng'thei ci. Ani cu mi changshäm, mik mi ah hmawk ah bekhüt ciah Bawi Khrit ah khuut bik ciah kiak ci. 8 Ani naw ana pyein nak gui ah m'hni nak cu, Mumcha naw ning pe gui pyi ci nei. 9 Shin ah mawng ung nangmi ah mawng kami ng'zak phung ung, nangmi ah hmawk ah kami taigü ci nei. Khanpughi naw ang zak hlü ah mäih ah Mumcha naw a peit ah kiak ciah, hmuhmat nak, cäivai nak la lunglang nak gui awn a ning be sak gui vai ah, kami k'thäh ci nei. 10 Cun ah kia sei, nangmi cu Bawipa ah ng'zak hlü ah ghing u ne, ani ah zei nak vai ah nami bilo khai nei. Nami ghin nak naw ni kiom nak bäng bäng cu dang sak sei Khanpughi ung nami hmuhmat nak cu, ng'ghotai khai nei. 11 Amät ah bämang hlüngtai nak ung kaa lawk ciah khüighaat nak naw ning k'thamah sak gui sä, cun ung apäng avan cu hniimgei nak awn nami nüng khai nei. Zeikiai nak awn Pa Khanpughi cu m'hlüngtai vai, ani naw akdei ah uknak kho ah, chang ah hmawk nak cu nangmi naw ng'mäi ne nami chaw nak tu vai ah ning piang gui ci nei. 13 Ani naw mähmüp ah huham ung kaa, na k'plawk gui ne, Ahtapa ah uknak kho ung phiawng ne gawk vai ah na hteh püi gui ci nei. 14 Ani ung phiawn nak mi gah ci, cun cu mi cheishoh nak ana m'gein gui ah kiak ci. 15 Bawi Khrit cu kä hmuh thei ah Khanpughi ah, hmuh thei vai ah a mäi ah kiak ci. Ani cu atäisho avan ah hlüngtai pi ciah, ng'tüi htük ciah Htapa ah kiak ci. 16 Ani awn Khanpughi naw, khankho la khomdek ung om ciah ang tüi avan, hmuh thei la kä hmuh thei, mumcha hlüngtai nak gui, bawi gui, uknak gui la huhamah gui cu, tüisho ci. Khanpughi naw, khophlät avan cu ani awn, ani ah hmawk ah tüisho ci. 17 Angtüi avan kä a om pha ung Bawi Khrit cu om pyi ci. Ani ung kawng ät nak awn ang tüi avan cu ami om nak vai om sek sek ci. 18 Ani cu apumsa ah kiak ciah Khrihtabum ah lukhu ah kiak ci. Ani cu pumsa ah ghin nak ah ang zung ah kiak ci. Ani cu sih nak ung kaa tho ba ciah ng'tüi htük ciah Htapa ah kiak ci, ani bäng cu avan ung a om nak htük vai hmun om ci. 19 Cun cu amät Khanpughi ah m'hnütbäi ah kia sei, amät Khanpughi ah kümbe ciah a mäi cu Ahtapa ung om ci. 20 Ahtapa awn khophlät avan cu amät ung gawk law ba sak zawp khai ah Khanpughi naw k'bäi ci. Khanpughi naw Ahtapa kutlamtung ung ap ne asih nak awn dimdeeih nak bi ne khomdek la khankho ung om ci avan cu amät ah ng'khäm ba sak ci. 21 Azan nangmi cu Khanpughi awn ng'shawng u ne akshe nami bilawh nak la nami ngaih tüh nak awn aga ah nami kia te ci. 22 Cun ung phi Ahtapa pumsa awn asih nak awn Khanpughi naw a teihpüi ah ning piang gui ci, amät ma ah theingciim nak la kümbe nak awn ning hteh püi gui ci. 23 Nangmi cu bekhüt khenggeng ne, khüi khai ah ng'leh u ne, Thu Ni nami ng'zak zah ung nami ngaih u nak cu nami mät naw kä nami thängphyong sak-en vai. Kei Paul cu shin ah Thu Ni awn changshäm ah ka kiak ci. shin ah Thu Ni cu m'dek ah khan ah chang päng ung gawk khai ah shäu ne pyein ah kiak ci. 24 Tuhbäi nangmi ah hmawk ah ka zaica ah hmawk ah ka zei ci nei. Bawi Khrit naw apumsa ah kiak ciah Khrithabum ah hmawk ah azaica ah mäih ah a gawk güt ung ka pumsa zaica nak awn ka ning m'htei gui khai nei. 25 Khanpughi naw kei cu khrithabum ah changshäm ah na piang pyi ci nei, cun cu nangmi ah ni kiom nak vai ah kei-am ana peit ah kiak ci. Cun cu Thu Ni kümbe khai ah shäu ne pyein nak vai ah kiak ci. 26 Cun ah Thu Ni cu hta ng'shon ung chang avan ung ng'zih te ciah kiak ci, cun ung phi tuhbäi ak chang gui-am phawn ne m'dang gui ci. 27 Khanpughi ah ng'bä nak cu, ng'zih ci cu ak chang gui-am hmat sak gui vai ah kiak ci. Cun ah ng'zih ciah bä nak la mang nak cu, ak chang gui ah hmawk ah kiak ci. Cun ah ng'zih ci cu, Bawi Khrit nangmi ung om ci, ciah kia ne, amawng cu nangmi naw Khanpughi ah bämang nak nami ng'pai tuk khai, ciah kiak ci. 28 Cun ah kiak sei Bawi Khrit ah mawng cu chang nüng-am kami m'thein ci. Bä ciah cäivai nak awn kami m'cäi nak la kami m'thei nak cu, Bawi Khrit ung kawng ät nak awn ak chang sing theek-hai ne, Khanpughi ah ma ah ami gawk law vai ah kiak ci. 29 Shin pyi phleh nak vai ah Bawi Khrit naw anam khüt nak la ka m'lung kyong ung a hnün thawh nak awn, küikyang ciah thagui cu mang ne, k'tha na k'cang ne, ng'khüi ne ka bik ci nei.
1 Nangmi ah hmawk, laodica chang gui ah hmawk la kei ka changsing kä na hmat ciah chang gui ah hmawk ah, kei naw a i hlawk ah k'tha na ne kabi cu ka ning m'thein gui ci nei. 2 Kei naw shin ka bi cu, ngami ami k'tha abe nak vai la m'hni nak ung ami m'lung ngaih a ät nak vai ah kiak ci. Cun ah kia sei ngami cu akcang ah lunglang nak law püi ciah bämbe ciah ngaih gep nak cu gah ci gui. Ashin ah lam awn ngami naw Khanpughi naw am zih ah Bawi Khrit amät cu hmat ci gui. 3 Ani cu thup ne m'küm ah Khanpughi ah cäivai nak la lunglang nak avan k'hmawn nak ah kiak ci. 4 Kei naw ka ning m'thein gui cu hleei pyein ne a u naw a i kä ning ng'cuh-en püi gui sä. Ngami naw a i hlawk ah nik ciah ami pyein ung phi kä nik khai nei. 5 Ka pumsa awn atäng ah kä mi om pang ung phi, ka Mumcha awn atäng ah ka ning om püi gui ci nei. Bawi Khrit ung nami zum nak awn ng'düi ghawm u ne, khäng ne nami htek cu ning hmu gui ne ka zei ci nei. 6 Khrit Jesuh cu Bawipa nei, ci ne nami dou ah a kiak ung ani awn kawng ät ne nami ghin vai. 7 Ani ung ak thuuk ah nami ng'zung vai. Ani ung nami ghin nak nami m'shän vai. Ning m'theithang gui ah mäih ah nami zum nak cu a khüighaat law pi vai. Cun kawn ah m'hlüngtai nak awn nami be vai. 8 Geing na vä, Bawi Khrit ung kaa ah kä kiak ci, khophlät sei uk ciah Mumcha gui la, chang naw dou ne am theithang nak ung lawk ciah chang läma, gui ah cäivai nak awn, a u chang naw phi kä ning khlei-htein-en nah gui sä. 9 Khanpughi ah ang zung amawng akümbe nak cu, Bawi Khrit ung om ne dang ci nei. 10 Mumcha uknak la huhamah nak avan cu uk ciah acun ah Bawi ung nami om nak awn nangmi cu kümbe nak nami gah ci. 11 Bawi Khrit ung nami kawng ät nak awn nangmi cu kyoon hnah pyi ah nami kiak ci, cun cu chang ah kyoon ah kä kiak ci. Bawi Khrit ah kyoon ah kiak ci. Cun cu cheishoh nak ah, hlüngtai nak ung kaa phiawn nak ah phi kia tuk ci. 12 Tui nami ng'hniim cu Bawi Khrit awn nami ng'ciim nak ah kiak ci. Tui nami ng'hniim nak ung Bawi Khrit awn nami tho ba ciah kiak ci. Cun cu ani sih nak ung kaa thawh ba sak ciah Khanpughi ah tholet ciah hlüngtai nak nami zum nak awn ah kiak ci. 13 Nangmi cu azan, thukhän kä om ciah chang khui hei la cheishoh ciah chang ah nami kiak nak awn nami mumcha cu si te ci. Cun ung phi tuhbäi Khanpughi naw nangmi cu Bawi Khrit awn nami ghing khai ah ning khü ba gui ci nei. Khanpughi naw mi kat nak gui avan cu, nam gein gui pyi ci nei. 14 Ani naw, thüilä nak vai ah ng'taang ciah mi puu gui cu, am küm nak ah kutlamtung ung asih nak awn thung pyi ci. 15 Acun ah kutlamtung khan ah Bawi Khrit naw amät cu, Mumcha uknak ah hlüngtai nak la huham nak gui ung kaa phiawn sak ci. 16 Cun ah kia sei, ei awk nak ah mawng, hnüüp theing ah mawng, chaa lum la kyin nak ah mawng gui pyein ne, a u -am phi thukhän kä bi-en sak vä. 17 Cun gui avan cu ngawi ah kaa vai ah apäpääi gui düt ah kiak ci. Cun ung phi akcang cu Bawi Khrit ah kiak ci. 18 Khankho chang khawihnah u ne, chang k'ni ah ng'hlawk u ne, ami mik hmuh ah phäh ah aktung ah hlüngtai ciah ng'shei ci gui ah, m'kat nak cu kä nami zuun en vai nei. Amawng hei kä om ci, chang tumat cu khomdek chang ah mawng lam ang ngaih tüh nak awn, am lung kyong cu mei ah khu zawp ci. 19 Pumsa ah lukhu ah kiak ciah Bawi Khrit akpan cu, chah ne ng'hlah tak ciah kiak ci. Bawi Khrit ah kut shum nak ah kyong ung pumsa cu ng'ghotai ne, thagui khingthang awn ng'khihkaih kawng ät zawp ci; Cun cu Khanpughi naw adäm ng'gho vai ang zak hlü ah mäih ah däm ng'gho lawk ci. 20 Nangmi cu Bawi Khrit ung nami sih nak awn kho ak kaa ah om ciah mumchaa ah uknak ung kaa nami phiawng pyi ci nei. A i ah kia sei khomdek khan cu khäm ne nami om ba hlü ang? A i ah kia sei, 21 äShin kä pan vai, cän kä nüm vai, shin kä tawn vaiä ciah thukhän gui cu nami läk ba hlü ang? 22 Azan nami mang man te gui cu tuhbäi mang ba vai ah kä kia ba ci nei. Cun gui cu chang ah pian ah thukhän la m'theithang nak gui ah kiak ci. 23 Akcang ah pyein ung cun gui cu, khankho chang düt nami khawihnah nak ah cäivai nak ung ng'zung ne dang lawk ciah kiak ci. Chang ah ng'zak hlü ah thuvi nak, pumsa ah m'hni kümbe sak nak, gui ah kiak ci. Cun ung phi cun gui naw, pumsa mawngma ami kut shum nak ung akcang ah aphuma kä dang ci.
1 Nangmi cu Bawi Khrit awn nami ghing khai ah nami tho pyi ci, Cun ah kia sei, nami m'lung cu khankho ding ung nami ng'lin vai. Cun ah kho cu Bawi Khrit naw a ghui mang kiang ung a ngoh nak ah Khanpughi ah k'patlam ah kiak ci. 2 Khankho ding ung nami m'lung cu nami ng'mäi sak vai, khomdek ng'lei ung kä nami ng'mäi sak vai. 3 Nangmi nami sih ung nami hnun gui cu Bawi Khrit awn Khanpughi ung ng'thup ciah kiak ci. 4 Akcang ah nami ghin nak cu Bawi Khrit ah kiak ci nei, ani ang dang law ba ung ani awn atäng ah nami dang tu ba khai, abäkhäk nak phi nami gah tuk khai. 5 Nangmi naw sihnak ung nami ap vai cu, nami m'lung kyong ung bi bik ciah khomdek khan ng'zak hlü nak gui ah kiak ciah, ng'zawng'pawm nak, om shet nak, htukhtik nak, cheishoh nak, humhlam nak (Humhlam nak cu a gup khawihnah nak ah kiak ci). 6 A shin ah a mawng gui awn Khanpughi ah m'lung she nak cu, thukhän ng'zak ciah chang gui ah khan ah gawk lawk khai. 7 Azan nangmi cu ashin ah ng'zak hlü gui awn nami ghing om man ci. Cun zah ung nami ghin nak cu acun gui naw ning shum gui ci. 8 Tuhbäi nangmi naw m'lungshe nak, beishet nak la thüigen nak ah amawng gui cu avan nami phiawn nak vai. Ashekha la amsheshai cu nami m'gawng m'lei ung kä lut-en law sä. 9 Tumat naw tumat kä am hleeihlak-en vai, nami ghin nak k'phyim cu sut ne nawng shüt ne, 10 ghin nak akthai awn nami ng'thoon vai. cun cu akthai ah ghin nak la, tüisho ciah Khanpughi naw, kümbe ciah amät ah lunglang nak ning m'shum phyuk gui ne a mät ah mäi bä bä ah aning pian ba thai gui ah kiak ci. 11 Ak hnu ah chang khui hei la Jew chang, kyon la kä kyon, ngetngawng ci la m'ghämce ci, changshäm la ng'päize chang ciah khoikhei nak la ng'lakmah nak kä om ba ci, Bawi Khrit cu avan ah kia ne Bawi Khrit cu avan ung om ci. 12 Nangmi cu Khanpughi ah chang ah nami kiak ci, Khanpughi naw ning m'hni gui ne amät ah chang ah ning ghü gui ci. Cun ah kia sei nami ng'thon nak vai cu m'hteihtang nak, chimgein nak, mät hnga ngaih nak, hniphnoi nak la hniimgei nak ah kiak ci. 13 Tumat mat awn nami ng'cuh vai a om law ah a kiak ung phi tumat la tumat nami ng'cang nak tu vai, tumat la tumat nami ng'gein tu vai, Bawipa naw a ning m'gein gui ah mäih ah tumat la tumat nami ng'gein tu vai. 14 Shin ah ang baan gui avan cu m'hni nak ung phung ci, cun ah m'hni nak naw avan shum ne kümbe kawng ät sak ci. 15 Bawi Khrit ah ning peit gui ah ding gei nak cu, nami ng'ki ng'phian nak ung a ning m'shumhlawi nak gui ah kiak ci. Cun ah ding gei nak cu kawng ät ne pumsa tumat ah nami kiak vai ah Khanpughi naw aning khü nak gui ah kiak ci. Cun ah kia sei nami m'hlüngtai lä vai nei. 16 Apäng ah bämang pi k'bäih ciah Bawi Khrit ah ng'thu cu nami m'lung kyong ung khäng ne om sä. Cäivai lunglang nak avan nawn tumat naw tumat cu m'theithang m'cäi ä sei om vä. Nik ciah ng'äi gui, hlim ciah ng'äi gui, theing ciah ng'äi gui m'cu ne, nami m'lung kyong kui ne, Khanpughi cu m'hlüngtai vä. 17 Nami bi nüng nami ng'thu nüng cu Bawipa Jesuh ah ming awn nami bi vai, Cun cu ani ah ming awn Pa Khanpughi nami m'hlüngtai ah kia ci. 18 Hnumi gui aw, nami cei ah ng'thu nami ngaih vai nei, cun cu khritha ah nami kiak nak awn nami bi vai ah kiak ci, 19 Pami guiaw, nami chu nami m'hni vai, kä nami shedam nak vai, 20 Hta hmaw gui aw, nami nupa ah ng'thu nami ngaih vai, cun cu khritha ah nami kiak nak awn nami bi vai ah kiak ci. Cun cu Khanpughi naw a zei nak ah kiak ci. 21 Nupa gui nami hta gui cu, ami m'lung thüi ne, ami k'tha maih khai ah kä nami om päi-en gui vai. 22 Changshüm gui aw, hnicim chang nami bawi cu, apäng avan ung nami ngaih vai nei, aning täk gui la aning m'cäi gui ah nami kiak bäng ah kä kia sei, Bawipa nami kyih aa nak awn m'lung theing awn nami hnünthawh peit vai. 23 Nami bi phung phung cu chang ah bi bi ah mäih ah kä kiak ciah Bawipa ah bi bi ah mäih ah nami m'lung kyong avan awn nami bi vai. 24 Nami shäm vai cu Bawipa naw akchang gui-am a gim peit gui ah m'cümhnah nak cu nangmi -am ning pe gui khai nei, ciah kiak ci. Akhuut nami bi peit ah Bawipa akcang cu Bawi Khrit ah kiak ci nei. 25 Shetkat nak bik ciah chang phung naw, amät ah bi cu k'chaw nak khai nei. A i ah kia sei ci ung Khanpughi naw akchang sing cu amät ah bi phäh phäh awn m'khoichak ci nei.
1 Bawi gui aw, nami changshäm gui cu nami täkphan nak ung hmai kiang nak la düng nak om sä. Nami mät phi khankho ah nami Bawi a om cu nami shäm ba vai nei. 2 Taigü nak ung kä nami m'lung-k'si en vai. Lunglang nak awn taigü ne Khanpughi cu nami m'hlüngtai vai. 3 Keimi ah hmawk ah phi nami taigü vai. Cun ung Khanpughi naw keimi-am a khin k'ni cu na pe gui sei, keimi naw ng'zih ciah Bawi Khrit ah mawng, ng'Thu Ni cu kami shui khai. A cun ah hmawk ah kei cu tuhbäi chü thawng ung ka kium ci nei. 4 Na k'taigü pe vä, cun ung ka pyein vai ah ng'thu phung cu ang hteiing ah ka pyein hning khai nei. 5 Kä zum ci gui ah chang gui ah ng'lung ah nami hnünthawh ung nami cäivai lunglang vai nei. Akhin nami gah phung cu akni pi ah nami mang thei vai nei. 6 Nami ng'thu pyein phung cu zeikiai nak vai la ngaih hlü vai ah kia sä. Chang nüng ah ng'thu a i chaa ah ng'düng khai ah m'hlan ba thei vai ci cu nami hmat kheng geng vai nei. 7 Mi nau Tichikus, bekhüt ciah khuut bi, khäghaat ciah Bawipa ah changshäm naw, kei ah mawng avan cu ning m'thein gui khai nei. 8 Ani nang mi ah om nak ah ka tüih law cu, keimi a i hawkcha ah kami om ih ah mawng ning m'thein gui ne, aning thawhlet sak gui vai ah hmawk ah kiak ci nei. 9 Ani awn atäng ah bä ne bekhüt ciah mi nau nami chang Onesimus phi law tuk ci nei. Ngami naw, shi ah a i i ah a kiak ah mawng gui cu ning m'thein gui khai gui nei. 10 Kei awn atäng ah thawng kani kium ciah Aristarchus la Barnabas ah ang nam nau Maku ni naw phi ning zavaih na gui ci gui nei. (Maku cu nangmi ah a law ung nami na dou vai ah ning m'cäi gui pyi ah kiak ci nei. ) 11 Justus ami ciah Joshua naw phi ning zavaih na gui ci nei. Acun ah ng'thu gui cu zum ciah Jew chang gui ah kia u ne, Khanpughi ah uknak kho ah hmawk ah kei awn atäng ah bi bi u ne, kei cu aktung ah nam hteihtang ci gui nei. 12 Bawi Khrit Jesuh ah akchang shüm, nami chang ah kiak ciah Epaphras naw phi ning zavaih na gui ci nei. Khäng sei nami ng'düih vai, kä nami pängheiu vai, be ciah khritha ah nami kiak vai, Khanpughi ah ng'zak hlü küm khai ah ang thu nami ngaih vai ah, ani naw akni ah ning taigü pe gui ci nei. 13 Nangmi ah hmawk la Laodicae la Hierapolis ah chang gui ah hmawk ah k'thana ne abi ah mawng cu ng'kheing sei ka ning m'thein gui hning ci nei. 14 Luka, mi seibawi la Demas naw phi ning zavaih na gui ci nei. 15 Laodicea kho ah phäi nau gui la Nimpha la ani ah im ah pum ci gui ah khrihtabum gui-am zeikiai nak thu ka ning m'khäh gui ci nei. 16 Shin ah ca nami phat zawp kawn ah Laodicea khithabum gui-am phi nami phat tu sak gui vai nei. Cun bäng ah kä kiak ciah Laodicea kho ah phäi nau gui naw, ami ning guk law gui ah ca phi nami phat vai om khai nei. 17 Cun kawn ah Bawipa ah khuut nami bi cu pyi hlah ne nami bi vai nei ci ne Archippus-am nami m'thein vai nei. 18 äPaul ah zavaih nakä ciah shin ah ca cu ka mät ah kut kheng awn ka guk nei. M'si gui awn ami na khih nak cu kä nami m'hnih-en vai nei. Khanpughi ah m'gein nak cu nami khan ah om sä, Amen.
1 Paul, Silas la Timothi ni naw—- Pa Khanpughi la Bawipa Jesuh Khrit ah chang gui ah kiak ciah, Thessalonika Khrithabum-am ca kami pe lawk ci nei. M'geinsei nak la dimdeeih nak cu nangmi ah khan ah om sä. 2 Nangmi nami van ah hmawk ah ang tüi sei Khanpughi kami m'hlüngtai ci, nangmi ah hmawk ah ang tüi sei kami taigü ci. 3 Mi Pa Khanpughi ah ma ah nami zum nak cu akcang ah dang khai ah, a i hlawk ah nami om ih ah mawng, nami m'hni nak naw a i hlawk ah a ning khäghat sak gui ah mawng la Bawipa Jesuh Khrit ung nami ngaih u nak a i hlawk ah a khänhtek ah mawng cu kami shäm hmat ci nei. 4 Phäi nau gui aw, Khanpughi naw nangmi cu ning m'hni gui ne, ak chang ah a ning ghü gui cu keimi naw kami hmat ci nei. 5 Keimi naw ng'Thu Ni ka mi ning thak law gui cu, thu m'gawng bäng awn ah kä kiak ci, hlüngtai nak, Mumcha Theing la düng nak kümbe ciah zum nak awn ah kiak ci. Keimi cu nangmi awn atäng ah kami om zah ung a i ah kami om cu nami hmat ci; cun cu nang mi ah ni kiom nak vai ah kiak ci. 6 Nangmi naw keimi la Bawipa cu nami na ng'thei nak gui ci; nangmi cu zaica geinvai ne nami kia pang ung phi, Mumcha Theing awn lawk ciah Thu Ni cu zeikiai ne nami gah ci. 7 Cun ah kia sei nangmi cu Macedonia la Achaia ung zum ciah chang van naw aning thei nak gui vai ah nami kiak ci. 8 Bawipa ah mawng Thu Ni nangmi ung dang ci cu Macedonia la Achaia kho avan ung gawk ci, cun bäng ah kä kiak ciah Khanpughi ung nangmi ah zum nak cun phi kho nüng ah gawk ci. Cun ah kia sei keimi naw a i kami pyein vai kä om ci. 9 Keimi kami law ah mawng la a i cha nami na dou gui ah mawng, düng ne ghing ciah Khanpughi ah a khuut bi vai la khankho ah ka kyum law ba khai ah Ahtapa ngäng vai ah hmawk ah agup gui nawng shüt ne Khanpughi ah nami ng'hlah law ba ah mawng gui cu, cun ah chang gui naw pyein sak ci gui nei. 10 Cun ah Ahtapa Jesuh cu Khanpughi naw sih nak ung kaa thawh ba sak sei, gawk law ge ciah Khanpughi ah m'lungseh nak ung kaa nak phiawn gui ciah Bawipa ah kiak ci nei.
1 Phäi nau gui aw, nangmi ah om nak ah keimi kami law cu a kholä düt ah kä kiak ci, ciah nami mät naw nami hmat ci nei. 2 Nangmi ah om nak Thessalonika ah kä kami law pha ung, Philippi ah a i hawk cha ah shedam dukdeiu nak kami gah cu nami hmat ci nei. Cun hlawk ah hnu ng'tuk püi nak a om tu pang ung phi, Khanpughi naw amät ung kaa lawk ciah Thu Ni cu, ning m'thein gui vai ah thamah nak na pe gui ci nei. 3 Keimi naw hmakat nak, kä ng'cim ciah m'lung ngaih la kä ng'düng ciah ng'bä nak awn kami ning m'cäi gui ciah kä kiak ci. 4 Khanpughi naw ang zak hlü ah ana ng'thu sak gui ah mäih ah keimi ang tüi sei thu kami pyein ci; a i ah kia sei ci ung ani awn ng'mäi ne ng'Thu Ni awn ng'ap vai ah a nam khoi m'cha gui pyi ah hmawk ah kiak ci. Keimi cu chang naw ana zei nak gui vai ah kä kami k'tha nak ci, kami m'lung kyong nam nüm gui ciah Khanpughi naw ana zei nak gui vai ah kami tha nak ci. 5 Nangmi naw nami hmat ah mäih ah keimi cu chang m'tam khah ne kä kami ng'thu ci, kami mät ah hmawk ah kä kami ng'thu ci nei. Shin ah amawng ung Khanpughi cu kami saksi ah kiak ci nei. 6 Nangmi naw phi bäi, chang hei naw phi bäi, a u naw phi nami nam kümto gui ah kä kami tha na man ci. 7 Cun ung phi keimi cu Bawi Khrit ah ng'düihpüi ah kami kiak nak awn nangmi ah khan ah a i phi kami k'thäh hning ci. Cun ung phi anu naw ahta am htei ah mäih ah, nangmi awn atäng ah mi om zah ung kami ning k'däk gui ci. 8 Nangmi, kami ning m'hni nak gui awn, Khanpughi ah Thu Ni ning teipai gui vai bäng ah kä kiak ciah, kami mät ah ghin nak hnun gui phi, ning teipai gui vai ah kami ng'düi ci nei. Nangmi cu ang htei ah kami ning m'hni gui ci. 9 Phäi nau gui aw, keimi naw a i hlawk ah cämbawng ne, kami bilawh cu nangmi naw akcang ah nami hmat ci nei. Khanpughi ah Thu Ni kami pyein nak ung nangmi ah khan ah zaica nak kä a om vai ah, amä ak hnüüp bi kami bik ci nei. 10 Nangmi cu keimi ah saksi ah nami kiak ci, Khanpughi phi saksi ah kiak ci; a i ah kia sei ci ung keimi cu zum nak om ciah nangmi awn mi ng'hmuhteng nak ung shetkat nak kä om ne ci cim nak la düng nak om ci. 11 Apa naw ahta am htei ah mäih ah keimi naw ak chang sing kami ning m'htei gui cu, nami hmat ci. 12 Thamah nak kami ning pe gui ci, m'lung p ngaih gep nak kami ning pe gui ci, amät ah uk nak kho kyong ung lut tu ne, abämang nak nami gah tu vai ah, ning khü gui ciah Khanpughi ah ang zak hlü ah nami ghin vai ah kami ning thawhlet sak gui ci. 13 Cun kawn ah keimi naw ang tüi sei Khanpughi kami m'hlüngtai nak ah mawng a hei tumat om ba ci. Cun cu, Keimi naw Khanpughi ah Thu Ni kami ning m'thein gui cu, chang ah ng'thu ah mäih ah kä kiak ciah Khanpughi ah ng'thu akcang ah ngai ng'zak ne nami dou nak ah kiak ci. Cun cu Khanpughi ah ng'thu akcang ah kiak ci. A i ah kia sei ci ung Khanpughi cu zum ciah chang gui ah kyong ah hnüntho ne om ci. 14 Phäi nau gui aw, nangmi ah bui awt ah mäih ah Bawipa Jesuh Khrit ung om ci gui ah Judea kho ah Khrithabum gui cun phi, bui awt tuk ci gui nei. Nangmi cu nami mät ah kho chang gui naw ami ning k'dukdeiu nak gui ah mäih ah, ngami cun phi Jew chang gui naw dukdeiu na gui ci gui nei. 15 Cun ah Jew chang gui cu Bawipa Jesuh la profet gui ngawn u ne, keimi nak dukdeiu na gui ci gui ah kiak ci. 16 Keimi naw hun nak ah mawng chang pakhui hei gui-am ng'thu kami m'thein phi tha na ne na ma na gui ci gui. Cun ah ami kiak cu ang tüi sei ami cheishoh nak ami kümbe sak nak ah kiak ci. Cun ah kia sei tuhbäi ak hnu ah Khanpughi ah m'lungshe nak cu ngami ah khan ah gawk pyi ci nei. 17 Phäi nau gui aw, keimi cu nangmi awn a shäng hta nei ng'shawng ne kami om. Cun ah pumsa awn mi ng'shawng pang ung phi, kä kami ning m'hnih gui phung ci nei. Nangmi cu ang htei ah ning khaih na gui ne, ning hmuh ba gui vai ah kami tha nak ci nei. 18 Nangmi ah om nak ah keimi kami law ba hlük ci. Kei mät phi nangmi ah om nak ah law vai ah hnih thum vei kak tha nak ci, cun ung phi Satan naw na ma nak ci. 19 Bawipa Jesuh a kyum law ba hnüüp ung, Bawipa ah ma ah nangmi ah mawng nüng nak bäng pyein ne keimi kami ng'düng nak vai om ci. Cun kawn ah nangmi cu chang a hei gui ah kä nami ng'neim pi ci, nangmi cu keimi ah ngaih u nak la lüngtang nak ah nami kiak ci. 20 Akcang ah nangmi cu keimi ah khähghah nak la lüngtang nak ah nami kiak ci.
1 Ak hnu ah keimi naw kä ging law ba hning u netah, Athens ung om shüt vai ah kami k'bäi kawn ah; 2 Bawi Khrit ah mawng Thu Ni pyein nak ung keimi awn atäng ah Khanpughi ah khuut bik ciah kami nau Timothi cu kami tüi lawk ci nei. Ani naw nangmi-am thagui ning pe gui ne, nami zum nak ning hnünthawh püi gui khai ah kami tüih law ah kiak ci nei. 3 Cun ah kia sei shin ah dukdeiu nak gui awn nangmi ung kaa a u chang phi a hnu täng ah kä ng'hlat ba khai nei. Cun ah dukdeiu nak gui am shah cu mik mi ah hmawk ah Khanpughi ah ang zak hlü ah kiak ci, ci cu nangmi nami mät naw nami hmat ci. 4 Keimi dukdeiu nak kami gah law vai ah mawng cu nangmi awn atäng ah kami om zah ung ka ning m'thein gui pyi ah kiak ci. Kei naw ka pyein ah mäih ah tuhbäi akcang ah a kiak law cu nangmi naw nami hmat ci. 5 Cun ah kia sei Timothi cu ka tüih law ah kiak ci. Akcang ah nangmi khoshe ah tüihtok nak ung nami gawk ah khoi ung, keimi ah bilawh nak cu akholä ah kiak khai kiak ci. 6 Tuhbäi Timothi cu law ba ne nangmi ah zum nak la m'hni nak ah mawng akbä akni ah pyein law ba ci. Nangmi naw keimi cu na shäm gui kheng geng u ne, keimi naw kami ning hmuh gui hlü ah mäih ah nami na hmuh gui hlü cu, nam thein law gui ci nei. 7 Cun ah kia sei phäi nau gui aw, keimi naw zaica nak la geinvai nak kami gah zah ung nangmi ah mawng ng'za u ne, kami k'thamah ba ci nei. Nangmi ah zum nak naw keimi cu k'thagui na be sak gui ci nei. 8 Nangmi ah ghin nak Bawipa ung kawng ät ne ngaih gep vai ah a kiak ung keimi cu tuhbäi akcang ah kami ghing ciah kiak ci nei. 9 Tuhbäi nangmi ah hmawk ah kami Khanpughi cu kami m'hlüngtai hning pyi ci nei. Nangmi ah mawng ung Bawipa ah ma ah keimi ah zeikiai nak a om ah hmawk ah kami m'hlüngtai ci nei. 10 Ak chang sing ming hmuh vai ah nami zum nak ung hlü ci gui cu kami ning so chan nak gui hning vai ah kami m'lung kyong avan naw amä ak hnüüp kami taigü ci nei. 11 Mipa Khanpughi la Bawipa Jesuh Khrit naw, nangmi ah om nak ah kami law nak vai ah lam cu na pian pe gui sä. 12 Nangmi tumat la tumat nami ng'hni nak tu la chang hei nami m'hni nak cu, keimi naw nangmi kami ning m'hni gui hlawk ah a hlüngtai law vai ah Bawipa naw ning piang m'tham gui sä. 13 A cu cha ah Bawipa naw ning k'thamah sak gui khai nei. Bawipa Jesuh cu ak chang theing gui awn a kyum law ba hnüüp ung, nangmi cu mi Pa Khanpughi ah ma ah, kümbe ne theingcim ciah chang ah nami kiak khai nei.
1 Phäi nau gui aw, Khanpughi ah m'hni ah ghin nak ah mawng cu, keimi ah nami ng'thei tu pyi ci nei. Keimi naw kami ning m'thein gui ah mäih ah nami ghing ciah a kiak ung phi, cun natah bä pi sei nami ghin om thei vai ah Bawipa Jesuh ah ming ung ka ning m'cäi gui ci nei. 2 Keimi naw kami ning m'shüm thein gui cu, Bawipa Jesuh ah huham awn ah kiak ci, ci cu nami hmat pyi ci nei. 3 Khanpughi naw nangmi cu nami theingcim vai lah ng'zakhlä m'gukplet nak kä a om-en vai ah ang zak hlü om ci nei. 4 Pami phung cu amät ah chu awn ak theingcim ah, chang m'sui tu vai ah a om vai nei. 5 Khanpughi kä zum ci gui ah mäih ah pumsa ng'zak hlü düt ah kä nami om ih-en vai nei. 6 Shin ah mawng ung khritha gui nami mät kä nami cheishoh-en vai, kä nami ei-hlä mang-k'phya vai. A cun ah mäih ah om ciah chang cu Bawipa naw m'kat khai nei, ciah khän ne ka ning m'thein gui ci nei. 7 Khanpughi naw m'gukplet humhlam vai ah a na khü gui ah kä kiak ci, ak theingcim ah om vai ah ana khü gui ah kiak ci. 8 Shin ah m'theithang nak hnu ng'tuk püi ciah chang cu, chang hnu ng'tuk püi ciah kä kiak ci, Mumcha Theing na pe gui ciah Khanpughi cu hnu ng'tuk püi ciah kiak ci. 9 Zum ci gui nami mät nami ng'hni tu vai ah mawng cu ca guk vai kä hlü ci. Nami mät gui nami ng'hni tu vai ah nami mät cu Khanpughi naw ning m'thein gui pyi ci. 10 Nangmi naw Mecedonia ah om ciah Khritha phäi nau gui cu nami m'hni gui ci nei. Phäi nau gui aw, cun ah bä pi sei nami bi vai ah ka ning m'cäi gui ci nei. 11 Azan ä ka mi ning m'cäi gui ah mäih ah dimdeeih sei nami ghin om thei vai, chang kä khuihphaa ne nami mät ah bi ung nami khän htek vai, nami mät ah hnun nami mät naw nami m'ghin hning vai ah nami tha nak vai nei. 12 Cun ung nangmi cu Khritha gui ah kä kiak ciah chang hei gui ah, chang m'sui nak nami gah khai. A u ung ng'zung phya ne nami kiak vai phi kä hlü khai nei. 13 Phäi nau gui aw, sik ciah chang gui ah mawng akcang cu kami ninghmat sak gui hlük ci nei. Cun ung vah nangmi cu ngaih u nak kä om ciah chang gui ah mäih ah thüisei nak kä om khai. 14 Bawipa Jesuh cu sih nak ung kaa tho ba ci, ci cu mi zum ci; a cun ah mäih ah Bawipa Jesuh azum kawn ah sik ciah chang gui cu Khanpughi naw, Bawipa awn atäng ah khäm ba gui khai ci cu mi zum ci. 15 Tuhbäi kami ning m'thei gui cu Bawipa ah ning m'thei gui ah kiak ci; Bawipa a kyum law hnüüp ghing ne om ciah mik mi cu sih pyi ci gui ah mä kä mi hlüngtai pi hnga khai. 16 Khanpughi ah thukhän, khanchang ang vaipi ah thu k'aw, Khanpughi ah phyungheng, ang thang law hnüüp ung, khankho ah kaa Bawipa amät cu kyum lawk khai nei. Bawi Khrit ami zum kawn ah sik ciah chang gui cu tho ba htük khai gui. 17 Cun ah akhin ung ghing ne ana om ciah mik mi cu tho ba ci gui awn atäng ah Bawipa hmuh vai ah khomei bawk awn m'hleim ne khankho mik ung na kai püi gui khai. Cun ung mik mi cu ang tüi sei Bawipa awn mi om khai. 18 Cun ah kia sei shin ah ng'thu awn tumat la tumat k'thagui nami ng'peit tu vai nei.
1 Phäi nau gui aw, shin gui a gawk law nak vai a khin la a mawng gui cu ca awn guk vai kä hlü ci nei. 2 A i ah kia sei ci ung Bawipa ah kho Hnüüp cu khomü ah m'guk-ei a law ah mäih ah gawk lawk khai nei, ci cu nangmi nami mät naw nami hmat pyi ah kiak ci. 3 äChang gui naw apäng avan cu ding gei ne, om phyak ci nei, ä ci ne pyein khai gui. Cun zah ung käü-mah ciah hnumi cu ang ghit ah anau poi am neh law ah mäih ah geinvai nak cu ang hgit ah gawk lawk khai nei. Cun cu chang gui naw kä phiawn ah hlawt khai gui. 4 Cun ung phi phäi nau gui aw, nangmi cu hmüp khui ung nami om ba ciah kä kia sei, cun ah hnüüp cu m'guk-ei ah mäih ah nangmi ah kä gawk lawk khai nei. 5 Nangmi nami van cu akdei ung ng'len pyi ne, kho hnüüp khäm pyi ciah chang ah nami kiak ci. 6 Cun ah kia sei mik mi cu chang hei gui ah mäih ah ip düt ne kä mi om khai nei, cim'gang tholet ne mi om khai nei. 7 Chang gui cu mä ah ip ci gui; mä ah awktat ci gui. 8 Cun ung phi mik mi cu akdei ah chang ah mi kiak ci, cim'gang ne mi om khai nei. Mik mi cu zum nak zih sui ne, m'hni nak ah shawi kawt ne, mi ngaih u ah kiak ciah hun nak m'si lukhu cu mi ng'bäng khai nei. 9 Khanpughi naw mik mi cu am lung she nak awn zaica vai ah ana ghü gui ah kä kiak ci, Bawipa Jesuh Khrit ung hun nak mi gah vai ah a ghü gui ah kiak ci. 10 Ani a kyum law ba hnüüp ung, sih ung phi bäi, ghin ung phi bäi, ani awn atäng ah om vai ah Bawipa cu mik mi ah hmawk ah si pyi ci nei. 11 A cun ah kia sei tuhbäi nami bi ah mäih ah tumat la tumat k'thagui nami ng'peit tu vai, nami ng'hteihtang tu vai nei. 12 Kami ning m'cäi gui ci nei, phäi nau gui aw, nangmi ung khuut bik ci gui, khritha ghin ah mawng lam ning m'shüm gui ne ning m'cumcäi gui ci gui cu nami chang m'sui gui vai nei. 13 Ami khut bi ah hmawk ah ak hlüngtai säih ah m'hni nak la chang m'sui nak awn nami m'tamkhah gui vai nei. Nami mät ah kyong ungphi ding gei nak om sä. 14 Phäi nau gui aw, ning m'cäi gui nei; a om shek ci gui khän ne m'cäi vä, kyikyawk ci gui thamah nak pe vä, zoken ci gui m'hteihtang tu vä, chang nüng ah khan ah hnimgei nak awn om vä. 15 Akshe cu akshe awn kä nami thung ba vai nei, nami mät gui ah ni kiom nak vai ah, chang avan ah ni kiom nak vai cu, ang tüi sei shui ne nami tha nak vai nei. 16 Ang tüi sei zeikiai vä, 17 ak phlät ah taigü vä, 18 amawng ama avan ung Khanpughi cu m'hlüngtai vä. Bawipa Jesuh Khrit ung kawng ät ne nami ghin nak awn cun ah nami bi vai ah Khanpughi naw ng'za hlük ci nei. 19 Mumcha Theing cu kä nami ng'zom sak vai, 20 Mumcha Theing awn ak phyutheh ah küikyang ciah thu cu kä nami päipih vai. 21 Apäng avan m'nüm ne k'tä netah, nik ci phung cu kut shum u ne, 22 akshe phung cu nami nawng vai nei. 23 Dimdeeih nak ah a phung Khanpughi naw, amawng alam avan ung ning theingcim sak gui sä! Bawipa Jesuh Khrit a kyum law ba ung ng'ä vai kä om khai ah, nami mumcha, nami m'lung ngaih, nami pumsa avan cu Khanpughi naw ning kut shum gui sä. 24 Nangmi ning khü gui ci cu bekhüt ciah kia ne cun gui cu akcang ah bik khai nei. 25 Phäi nau gui aw, keimi ah hmawk ah phi nami taigü vai nei. 26 Khrihta phäi nau avan cu zum nak awn ng'ui ne zavaih nah vä. 27 Shin ah ca cu zum ciah chang avan-am phat ne nami m'thien vai ah Bawipa ah na peit ah huham awn ka ning m'thien gui ci nei. 28 Mi Bawipa Jesuh Khrit ah m'gein nak cu nami van ah khan ah be ne om sä.
1 Paul, Silas la Timothi ni naw Mi Pa Khanpughi la Bawipa Jesuh Khrit ung om ci gui ah Thessalonika khrihtabum gui-am ca guk law gui nei; 2 Mi Pa Khanpughi la Bawipa Jesuh Khrit naw m'gein nak la dimdeeih nak cu ning pe gui sä. 3 Phäi nau gui aw, nangmi ah hmawk ah ang tüi sei Khanpughi cu kami m'kümto ci nei. Cun ah kami bi cu bä ci nei, a i ah kia sei ci ung, nami zum nak cu ng'ghotai law pi ne, nami ng'hni nak tu phi abäkhäk law pi ah hmawk ah kiak ci. 4 Cun ah kia sei keimi naw nangmi ah mawng cu Khanpughi ah khrihtabum gui ung khähghah ne kami pyein ci nei. Nangmi cu k'dukdeiu nak la zaica nak bui awt pang u ne phi nami m'khütnäng nak la nami zum nak ah hmawk ah kami lüngtang ci nei. 5 Shin ah abi nak gui ung Khanpughi ah m'khoichaa nak gui cu düng sei, nangmi cu Khanpughi ah kho awn khinkha ciah nami kia lawk khai, a cun ah kho ah hmawk ah nangmi cu nami zaica ci. 6 Khanpughi naw düng nak cu bik khai; ning zaica sak gui ci cu, zaica nak pe gui khai. 7 Nami zaica ciah nangmi gui la keimi gui ah khan ah hüizang nak na pe gui khai. Bawipa Jesuh Khrit cu bämang ciah khanchang gui awn, 8 mei m'lei ah tawt ne ang dang law zah ung Khanpughi naw cun gui cu bik khai. Cun ung Khanpughi hnu ng'tuk püi ci gui la Bawipa Jesuh ah mawng Thu Ni kä ngai ci gui cu Khanpughi naw shetkat sak gui khai. 9 Ngami cu ang tüi sei geinvai nak ah shetkat nak ung zaica khai gui, cun cu Bawipa awn ng'pai nak la abawimang nak awn ng'shawng nak ah kiak ci. 10 Cun gui cu ak chang gui ah m'hlüngtai nak la zum ciah chang gui ah m'tamkhah nak gah khai ah a kyum law nak ah kho Hnüüp ung ah kiak khai. Nangmi cun phi keimi ah ning m'thein gui ah ng'thu nami zum ci kia sei, cun ah Hnüüp ung Bawipa cu nami m'hlüngtai m'tamkhah tuk khai. 11 Cun ah amawng ung nangmi ah hmawk ah keimi ang tüi sei kami taigü ci. Khanpughi naw a ning khü gui ah mäih ah nami ghin om hning vai ah keimi naw Khanpughi ah kami ning zoih thäh pe guici nei. Ni kiom nak vai ah nami ng'zak hlü avan cu a hlüngtai nak awn ning kümbe sak gui ne, zum nak awn nami bilawh gui nüng phi ning kümbe sak gui sä. 12 A shin ah mawng ung mi Bawipa Jesuh ah ming cu nangmi awn bämang nak gah khai, nangmi phi ani awn bämang nak nami gah khai nei. Cun cu mi Pa Khanpughi Bawipa Jesuh Khrit ah m'gein nak awn ah kiak ci nei.
1 Bawipa Jesuh Khrit a kyum law ah mawng la ani awn atäng ah om vai ah mi bum law ah mawng cu ka ning m'thein gui ci nei, Phäi nau gui aw. 2 Bawipa ah kyum law nak ah hnüüp gawk lawk ci nei, ä ci ne ami pyein nami ng'zak ung a cun vai-am cäicat thängphyong ne kä nami kiak vai. Shin ah a mawng cu kami ng'cää bang nak ung phi bäi, thu kami pyein nak ung phi, ca kami guk nak ung phi bäi, dang ci nei, ci ne chang gui naw ngai hngaw khai gui. 3 A i ah kia sei phi chang gui naw hleeihlak ne ami pyein cu kä nami zum-en vai nei. Ak hnubäih ah Khanpughi hnu ng'tuk kätnet püi nak la m'htei ah hteit khai ah akshekha säih kä gawk law pha ah chuih, Bawipa ah hnüüp cu kä gawk lawk khai nei. 4 A cun ah akshekha säih naw Khanpughi nei ci ne chang gui naw ami khawihnah gui phung cu hnu ng'tuk püi gui ne, avan ah khan ah kei ka hlüngtai pi ci nei, ä ci ne, pyein khai nei. Ani cu Khanpughi ah pum im kyong pui ah hteit ne ngo netah, amät cu Khanpughi ah pyein ne shäu khai nei. 5 Nangmi awn atäng ah ka om zah ung shin gui avan cu ka ning m'thein gui ci nei, kä nami shäm ba ne ma? 6 Tuhbäi shin gui kä a gawk law pha cu kutshum ci a om ah hmawk ah kiak ci, cun cu nangmi naw nami hmat ci. Akhin a küm law ung cun ah akshekha säih cu dang lawk khai nei. 7 Ang thuh ah om ciah shetkat nak cu tuhbäi hnüntho pyi ci nei. Cun ung phi cun gui cu kutshum ci naw kä a chah pha ah chuih, a i phi kä kia law cang khai nei. 8 Cun kawn ah akshekha säih cu dang lawk khai nei. Cun ung phi Bawipa Jesuh a kyum law ung am gawng ung lut lawk ciah ang ghi m'äm la a pyü vai nak awn cun ah akshekha säih cu, ngawn ne m'di khai nei. 9 Cun ah akshekha säih cu Satan ah hlüngtai nak awn law ne, ak cang ah kä kiak ciah cäicat gui vai la cäi aih gui vai cu m'dang khai nei. 10 Di maih khai gui ah khan ah shetkat nak a hlü hlä cu bik khai. Cun ah chang gui cu di maih khai gui, a i ah kia sei ci ung ngami naw hun phiawn nak ah cacim cu kä m'hni u ne kä ami dou ah hmawk ah kiak ci. 11 Cun ah kia sei Khanpughi naw hmakat nak ah hlüngtai nak cu cun ah chang gui ah ng'lung ah bi bik khai ah tüi law sei, ngami naw akshekha cu akcang ah ngai ne zum ci gui. 12 Cun ah kia sei cacim kä zum ne cheishoh nak ung ng'len ciah chang phung cu m'shetkat nak gah khai nei. 13 Phäi nau gui aw, Keimi naw Bawipa naw aning m'hni gui ah nang mi ah hmawk ah ang tüi sei Khanpughi cu kami m'kümto khai nei. Khanpughi naw nangmi ak htük bäih ah hun nak nami gah khai ah a ning khü gui cu, Mumcha Theing ah hlüngtai nak awn theingcim ciah akchang ah nami kiak ah hmawk la cacim nami zum ah hmawk ah kiak ci. 14 Khanpughi naw, keimi ah Thu Ni pyein nak awn nangmi cu a ning khü gui ah kiak ci. Cun ah aning khü gui cu, mi Bawipa Jesuh Khrit awn atäng ah abämang nak nami gah tu vai ah hmawk ah kiak ci. 15 Cun ah kia sei phäi nau gui aw, khäng sei ng'düi u ne ng'thu nami pyein nak la ca nami guk nak ung, kami ning m'thein gui ah cacim cu nami kutshum vai nei. 16 Mi Bawipa Jesuh Khrit amät la nam hni gui ne am gein nak awn khüi ghaat nak la khäng ciah ngaih u nak na pe gui ciah mi Pa Khanpughi naw, 17 nik ciah thu pyein ne nik ciah bi nami bi nak vai ah thagui, thamah nak cu ning pe gui sä.
1 Phäi nau gui aw, akhnu ah ka ning m'cäi gui hlü cu, Bawipa ah ang thu cu nangmi ah a gawk law ah mäih ah kho nüng ung gawk sei m'tamkhah nak a om vai ah keimi ah hmawk ah nami taigü vai nei. 2 Khanpughi naw chang ghingshe gui la chang shekha gui ah tüihtok nak ung anak phiawn gui vai ah nak taigü pe gui vä. A i ah kia sei ci ung chang nüng naw Thu Ni cu kä a zum hmawk ah kiak ci. 3 Cun ung phi Bawipa cu bekhüt ciah kia ne, thagui ning pe gui ne, akshekha ah tüihtok nak ung ning phiawn gui khai. 4 Bawipa naw keimi naw nangmi kami ning ngaih gep nak gui vai cu na pe gui ci. Keimi naw kami ning m'cäi gui ah mäih ah tuhbäi nami hnün om ci, ngawi ah phi a cun ah nami hnün om khai ah kami ning ngaih gep gui ci nei. 5 Khanpughi ah am hni nak nami hmuhmat law pi vai la Bawi Khrit ah a kyum law nak ba vai m'lung sau awn nami ngäng nak vai ah Bawipa naw nangmi cu lam ning m'shüm gui sä. 6 Phai nau gui aw, Bawipa Jesuh Khrit ah ming awn thukhän kami ning peit gui cu, damduh ciah khrihta phäi nau gui la, keimi ah m'shümthein nak kä läk tuk ciah chang gui cu, kä nami kawng ät püi gui vai. 7 Keimi ah bilawh ah mäih ah nami bilawh tu vai cu, nangmi nami mät naw nami hmat ci. Keimi cu nangmi awn atäng ah mi om zah ung kä kami damduh ci. 8 Kami sui-ei vai, kä kleih ne chang ah kaa kami ng'zoihthäh nak a i kä om ci. Nangmi tumat naw phi keimi ah hmawk ah kungkap nak kä a om vai ah, keimi cu amä ak hnüüp cämbawng ne bi kami bik ci nei. 9 Cun ah kami bi cu, keimi ung nangmi ah m'hteihtang nak kami k'thäh nak hning, kä a om su ah kä kiak ci, nangmi naw nami na theileh gui vai ah kami bi ah kiak ci. 10 Keimi cu nangmi awn atäng ah kami om zah ung, Bi kä bik hlük ci naw ei kä ah ei-en vai, ä ci ne kami ning m'thei gui ci. 11 Nangmi ung kaa bi kä bi hlük ne dam ne om netah, chang hei ah bilawh mawngma düt, lawilik ng'kähzah tuk ciah chang om ci, cicu kami ng'zak ci nei. 12 Cun ah mäih ah chang gui cu, akni ah om u ne, ami mät ah hnun m'ghin nak vai ami mät naw ami bilawh vai ah, Bawipa Jesuh Khrit ah ang ming awn kami m'cäi gui ci nei. 13 Cun ung phi phäi nau gui aw, akni nami bi nak ah hmawk ah kä nami cämbawng phung vai nei. 14 Shin ah kami ning m'khäh law gui ah ca ung ning m'cäi nak gui ah ng'thu kä läk tuk ciah chang cu, m'hnüt u netah, kä ng'gui ng'pha püi ne nami nawng vai nei, cun ung ani cu lä ng'aa khai nei. 15 Cun ung phi cun ah chang cu ga ah mäih ah kä nami ngaih vai, phäi nau ah mäih ah nami m'cäi vai nei. 16 Dimdeeih nak ah a phung ah kiak ciah Bawipa amät naw, akhin avan la amawng ama avan ung dimdeeih nak ning pe gui sä. Bawipa naw nangmi nami van cu ang tüi ah ning om püi gui sä. 17 Shin cu kamät naw ka kut awn ka guk nei, Kei Paul naw ka ning zavaih na gui ci nei. Ca guk phung ung a shin ah mäih ah ka guk ci nei. Shin cu kei ah ca guk ah mawng ah kiak ci. 18 Mi Bawipa Jesuh Khrit ah m'gein nak cu nami van ah khan ah gawk sä.
1 Mi Hunbawi Khanpughi la mi ngaih u Jesuh Khrih ah m'hnüt nak awn Bawi Khrih ah düih püi ah ka kia ciah kei Paul naw - 2 Zum nak ung ka hta akcang ah kia ciah Tomithi-am ca ka guk law ci nei; Mi Pa Khanpughi lah Bawi Khrih Jesuh ah geinsei nak, chimhnat nak la dimdeih nak cu nang ung om sä. 3 Macedonia ah ka hteh law vai ung ka ning m'cäi ah mäih ah Ephesus ah na om cang vai ka ng'za hlük ci. Chang am shah gui naw thuvi ne m'theithang ci gui nei, cun gui cu, ami ng'däm vai ah na khän gui vai. 4 Ng'cu can düt vai ah kiak ciah pumah-awi m'cu ne ng'shon lam düt khei ci gui cun phi, cun ah kä ami kiak ba vaiah nam cäi gui vai nei. Cun gui cu Khanpughi ah ng'bä nak ah kä kia ci, zum nak kawn vah cun gui hmat vai kiak ci. 5 Cun ah khäntam nak ah a mawng cu, theing ciah nikiom nak, ciim ciah lung ngaih la ng'khän ciah zum nak cu, thawhlet sak nak hlü ah kia ci. 6 Chang am shah gui cu shin ah lam hma u ne, shetkat nak düt ng'cuhcan pyeinsak ci gui. 7 Ngahmi cu Khanpughi ah thukhän saza ah kia hlük ci gui, cun ung phi ami mät ah thu m'kha la ami thu ah a mawng gui cu kä hmat ci gui. 8 Thukhän cu akni ah mang ung nik ciah mi hmat ci. 9 Mik mi naw mi shäm hmat vai cu, thukhän m'hnüt cu chang k'ni gui ah hmawk ah kä kia ci, thukhän m'shet ci gui, om shet ci gui, Khanpughi kä hmat ci gui la cheishoh ci gui, zum nak kä om ne mumcha lam kä shing ci gui, ami nupa ngawn ci gui, chang nagawn ci gui, 10 Pa la pa nu la nu ng'zawpawm düt ne pletbeng ci gui, chang phak ci gui, hleihlak ci gui, kä düng khai ah saksi ci gui la düng ciah zum nak hnu ng'tuk püi ci gui ah hmawk ah kia ci. 11 Shin ah theithang nak cu Thu Ni ung hmu ah Khanpughi ah bämang nak la phruhtheh nak ung ka lawk ciah Thu Ni, Kei naw ka shäu vai ah Khanpughi naw a na ap ah kia ci. 12 Shin ah bi ka bi nak vai ah thamah nak na pek ciah mi Bawipa Khrih Jesuh cu kam hlüngtai ci nei. Kei naw zanä Bawipa cu ak she ah pyein ne, dukdeu na ne, zoshe na ne, ka kiak man pang ung phi, Bawipa naw kei cu na khinkha sak ne, abi ka bi vai ah nam hnüt sei Bawipa cu kam hlüngtai ci nei. Cun sang ung kei cu zum nak kä om sei, akni akshe phi kä ka hmat ci, cun ah kia sei Bawipa naw kei cu na chimgein ci. 14 Mi Bawipa naw küikyang ciah am gein nak cu nam shum phruk ne, mi Bawi Khrih ung kawng ät nak awn zum nak la m'hni nak phi na pek ci. 15 Bawi Khrih Jesuh cu cheishoh ci gui hun khai ah khmodek khan ah kium lawk ci, ä ciah thu cu düng ciah thu ah kia sei, ak be ah dou ne zum vai ah kia ci. Kei cu ak shekha pi ah ka kiak ci, 16 Cun ung phi Khanpughi naw kei cu nam gein ci, cun ah a nam gein ah mawng cu, ngawi ah Bawi Khrih zum ne ghin nak gah ci gui naw ami thei tu vai ah Bawi Khrih naw a hnimgei nak ah a mawng cu, shekak ciah kei awn am dang ah kiak ci. 17 Ang tüi ah ghing ciah Ghangpughang, sih nat nak kä om ci, mik awn kä hmuh thei, tumat bäng ah Khanpughi cu - m'tam khah nak la bämang nak awn hta ng'shon ung om sä! Amen. 18 Kahtapa Timothi, cau profet gui naw nang ah mawng ami pyein man ah mäih ah, kei naw shin ah bi cu khän ne ka ning ap ci. Cun ah thu cu, ng'tuk nüng nak ah li la khim ah na mang vai nei. 19 Na zum nak htek ne nam lung ngaih theing ciim sä. Chang am shah gui naw ami lung ung ciim sei kä ngai zäi u ne, ami zum nak cu shet sak ci gui. 20 A cun gui ung Himenaeus la Alexander phi om tuk ci goi. Shin ah mawng naw m'theithang gui sei, nangmi naw Khanpughi ami shetkat nak ami nawng vai ah, kei naw ngahmi cu Satan ah kut ung ka ap gui ci.
1 Cun ah kia sei ah htük bäih ah chang gui ah hmawk ah Khanpughi huipaa nak, taigü nak, zoih thäh nak, la m'hlüngtai nak gui cu nami bi vai ah ka ning m'cäi gui ci. 2 Mik mi cu Khanpughi ung ding gei nak la dimdeih nak awn a htingling ah ghing ne mi om vai ah ghangpughang gui la huham om ciah bawimang gui ah hmawk ah nami taigü vai nei. 3 Cun cu nik ciah kia sei mi Hunbawi Khanpughi ah am hni ah kia ci. 4 Chang nüng cu hun nak gah ne thu düng ami hmat vai ah Khanpughi naw ng'za hlük ci. 5 Khanpughi tumat bäng om ci, Khanpughi la chang ah ng'lak ung geilam piang ciah, Bawi Khrih Jesuh phi tumat bäng ah kiak ci. 6 Cun ah Bawi naw hnicim chang gui phiawn khai ah a pumsa ap ci. Cun cu chang nüng hun vai ah, a khin ni ah a kiak ah mawng, Khanpughi ah ang zak hlü cu am dang nak ah kiak ci. 7 Cun ah kia sei, kei cu ang düih püi ah nam düih ne chang khui hei gui ah saza ah kia ne, zum nak thu düng cu ka shäu khai ah na tüi ci. Kei ka hleei ah kä kia ci, thu düng ka pyein na kiak ci. 8 Khritha gui ah bum nak phung ung, pami ng'vai gui ami taigü vai, ngahmi cu Khanpughi ah ng'ap pyi ci gui ah kia ne, m'lung she nak la cuhcan nak kä om men sei, ami kut chang ne ami taigü vai ah ka ng'za hlük ci nei. 9 Hnumi gui cun phi mäisa ne nei aan khai ah ami suisak vai nei; lu m'kin ne, ghui shawi mo sawng, h awi ne, akäi kyang ah, hnün thang binglawh ne kä ami kiak vai. 10 Ngahmi cu zum ciah chang gui ah mäih ah ni kiom ciah om ih awn ami bilawh vai nei. 11 Hnumi gui cu ng'awi gi ne, a däm hta ah ami theithang tu vai nei. 12 Hnumi gui naw ami m'theithang vai la pami ah khan ah ami huham mah vai cu, kei naw kä ka zum ci nei; ngah mi cu kä chawkchek ne ami om vai nei. 13 Khanpughi naw Adam cu tüi sho ma netah Eve cu tüi sho ci. 14 Hmähma nak gah law ma ci cu Adam ah kä kiak ci, hnumi ah kiak ci, Ani naw Khanpughi ah thukhän cu shetkat sak ci. 15 Cun ung phi hnumi gui cu, a htingling ah om ne, zum nak, m'hni nak la theingciim nak awn ami be ah a kiak ung, ami hta nau nak awn hun nak gah khai gui nei.
1 äKrithabum ung tahnga khai ah ng'bä ciah chang cu, ni kiom hlimtui ciah bilawh ng'za hlük ciah kiak ci, ä ci cu küikyang ciah thu ah kiak ci. 2 Krithabum ung tahnga ciah chang cu, m'kat vai ah kä om khai, tumat bäng chu nak khai, ciimvai lunglang khai, htingling khai, a om ih ni kiom khai, khin chang m'htei khai; m'theithang thei khai; 3 Ani cu zu kä aw ne, ng'tuk vook kä lup ne, ng'awi gi ne, dimeih nak ng'zak hlük ciah chang ah kiak khai; ngui m'hni aih ciah chang ah kä kia khai; 4 ani cu ak kyong khui uk m'khüt sei ak chu ahta gui naw ami chang m'sui ah kiak khai. 5 A mät ah kyong khui am htei htang vai pang kä hmat ciah chang naw, a i cha ah Khanpughi ah Krithabum m'hteihtang hlawt khai zaw? 6 Ani cu zum nak khäng htek pyi ciah a kiak vai, kä cun ung ani cu ta-äh law aih ne khoshe ah mäih ah m'khoichaa nak gah khai nei. 7 Ani cu Khrithabum ah ak pung ah chang hei gui naw phi ami chang m'sui tu ah kiak khai, cun ung vah khoshe ah kut ung phi kä gawk hlawt khai. 8 Krithabum ung bikbi gui cun phi, ami om ih ni ne, ami m'lung ngaih ng'ciim ciah kiak khai. Ngah mi cu kä khleei ne, kä ei awk tat ne, ngui kä ng'za hlü aih ciah kiak khai gui. 9 Ngahmi cu zum nak ah thu düng ah mawng, ci theing sei ngaih gep ne kut shum ci gui ah kiak khai. 10 Ngahmi cu ak htük ung tüihtok nak aut ma u sä, tüihtok nak ami nüng ah a kiak ung, ngahmi cu khuut bi tu u sä. 11 Ami chu gui cun phi akni ah m'lung ngaih om ih ci gui ah a kiak vai, khleei khlam ci gui ah kä kiak en sä. ciimvai lunglang ne, ngaih gep vai ah chang ah ami kiak vai. 12 Khritha bikbi cu tumat bäng chu nak ciah kiak khai, ak chu, ahta, ak kyongkhui uk m'khüt ne, m'hteihtang hlawt ciah kiak khai. 13 Ami mät ah bilawh vai m'khüt nüng ci gui ah khritha bikbi gui cu, hlüngtai u ne, Khrih Jesuh ung ami zum nak ah mawng cu pyein sa hning ci gui nei. 14 Kei naw shin ah ca ka guk sang ung kä sho pha sei, nang ah ka lawk khai ah ka ngaih tüh ci nei. 15 Cun ung phi kei cu ka shokshä ei ah a kiak ung, Khanpughi ah kyongkhui ung om ci gui naw, a i ah om ih vai cu nami hmat vai ah, shin ah ca ka guk law ah kiak ci nei. Cun ah kyongkhui cu ghing ciah Khanpughi ah krithabum ah kiak ci, cun ah Krithabum cu thu düng ah a tung ah kiak ci. 16 Mik mi ah zum nak ah küikyang nak cu a u naw kä häängtaa hlawt khai nei, cun ah mawng cu; Bawipa cu chang ah mäi ah ng'tüi ne kyum lawk ci nei, Ani ah theingciim nak cu Mumcha naw m'dang pyi ci nei, Khan chang gui naw phi hmu pyi ci gui nei, Ani ah mawng cu kho nüng ung shäu pyi ci gui nei, M'dek ah khan ung chang gui naw phi Ani cu zum pyi ci gui nei, Ani cu khan kho ah hang kai ba pyi ci nei.
1 Ngawi ah chang am shah gui cu, hleeihlak ciah mumcha ah thu ngai u ne, khoshe ah m'theithang cu läk u ne, ami zum nak cu nawng lawk khai gui nei ci ne Mumcha naw ang dang ah pyein ci. 2 Cun cu m'si m'hling awn m'khih ah mäih ah ami m'lung ngaih sik ciah, hleeihlak ciah chang gui ah m'theithang ah kiak ci. 3 Cun ah chang gui naw, käng chung la vai, ei am shah cu hlawi vai, ciah m'theithang ci gui. Cun ung phi zum ne Thu düng hmat ciah chang gui naw, m'hlüngtai ne taigü u netah, cun ah ei cu ami ei vai ah Khanpughi naw a tüi pian ah kiak ci. 4 Khanpughi ah tüi pian phung cu nik ciah kia sei, a i ei phi kä hlawi vai, ei vai phung cu m'hlüngtai ne taigü nak awn dou vai kiak ci, 5 A i ah kia sei ci ung, Khanpughi ah ng'thu la taigü nak naw, cun ah ei cu a theing sak pyi ah kiak ci. 6 Nang naw shin ah m'cäi nak cu na phäi nau gui-am na peit law vai zung, na mät ah zum nak thu la na mät ah läk ah düng ciah m'theithang nak cu, läk ne Khrit Jesuh ah changshäm k'ni ah na kiak vai nei. 7 Pyein ah kä ni ne zum nak kä om ciah puma awi gui cu nami hlawi vai nei. Zum nak ung nami ghin vai ah nami mät naw nami mät nami m'thei vai nei. 8 Pumsa lam ung thei nak cu bä kung ci, cun ung phi mumcha lam ung thei nak cu, a mawng avan ung, tuhbäi la ngawi zä ghin nak vai ah bä pi bäih ci. 9 Shin cu bekhüt ciah thu ah kia sei, ak be ah dou ne zum vai ah kiak ci. 10 Mik mi naw tha na ne mi bilawh ah mawng cu, chang nüng ah Hunbawi, ak tung pi ah zum ci gui ah Hunbawi ah kia ne ghing ciah Khanpughi cu mi ngaih u ah hmawk ah kiak ci. 11 Shin ah m'cäi nak gui la m'theithang nak gui cu chang gui am nami peit gui vai nei. 12 Nang cu na hmaw ci kia sei a u naw kä a ning kahta nak-en vai ah na om vai nei, nang'thu, na om, m'hni nak zum nak la ciimvai nak ung, zum ciah chang gui ami thei tu vai ah na om vai nei. 13 Kei kä ka law pha ah chuih chang gui ah ma ah caciim phat ne, thu pyein ne m'theithang ne, k'tha na ne na bi vai nei. 14 Profet gui ah thu awn, ak tahnga gui naw, na khan ah ami kut taih ne ami ning m'shumphyuk ah mumcha m'cümhnah nak cu, a i baw düt ah kä na ngaih-en vai nei. 15 Chang van naw na bämang law cu ami ning hmuh vai ah, shin ah a mawng gui cu m'shiin püi ne na bi vai nei. 16 Geik na ne om ne nam theithang vai nei. Shin ah a mawng gui cu k'tha na ne na bilawh vai nei, cun ung na mät la na thu ngai zak ciah chang gui cu hun nak gah khai gui nei.
1 Na mät ah ng'vaipi ci cu m'zeek ne kä nang thu püi vai, na pa ah mäih ah na chang m'sui vai. Na mät ah hmaw pi ci gui cu na nau gui ah mäih ah, 2 na mät ah ng'vaipi ciah hnumi gui cu, na nu gui ah mäih ah, a mät ah hmawpi ciah hnumi gui cu na be gui ah mäih ah, theingcim ciah m'lung awn na om ih püi gui vai. 3 A mät om ciah hnumi gui cu nami m'hteihtang tu vai nei, 4 Cun ung phi cun ah hmeinu ung a hta gui, atu gui, a om ah a kiak ung ngahmi cu ami mät ah kyongkhui ung ami zum nak ah mawngma la tu m'bei m'ghinsei gui ciah ami nupa pupi gui, ami m'hteihtang tuba vai ah mawngma gui cu ami theithang ma vai nei, cun cu Khanpughi ah ng'zak hlü ah kiak ci. 5 A mät om ciah hmeinu cu m'hteihtang khai a u kä om sei, Khanpughi ngaih u ne, amä ak hnüüp taigü ne ng'zoi thäh ci nei. 6 Cun ung phi a om shek ciah hmeinu läi cu a ghin ung phi ak si ah kiak ci nei. 7 Hmeinu gui cu chang naw kä am kat gui vai ah shin ah m'cäi nak gui cu nami m'thein m'kan gui vai nei. 8 A paw chang, ak tung pi ah ak kyongkhui chang kä m'hteihtang ci cu, zum nak hnu nak ciah kia ne, kä zum ciah mä sheka tuba ci nei. 9 A khokum chuk-kip kä be phak ciah hmeinu cu, hmeinu ah kä k'bäi cang vä. Ani cu hnäät bäng ceimah ciah kiak khai, 10 a om ani ah mawng ngaih gep nak om khai, ahta gui ak ni ah m'htei ci, khin chang m'htei ci, zum ciah chang gui ni kiom püi gui ci, zaica ciah chang gui m'htei gui ci, nik ciah bi phung tha na ne bik ciah kiak khai. 11 Hmaw ciah hmeinu gui cu hmeinu ah kä nami k'bäi cang vai, a i ah kia sei ci ung ngahmi cu, kä ami htingling law hlawt ung, ceimah law ba hlü netah Bawi Khrit cu hnu nah ci gui ah kia ci. 12 Cun ah kia sei ngahmi cu, ak htük ung Bawipa ah ma ah ami shaitaak cu m'cheishoh ci gui ah kiak ci. 13 Cun kawn ah ngahmi cu a im tung päng ung hteit shäi shäi ne akhin maih sak ci gui, cun bäng ah kä kiak ciah kä pyein vai pyein u neh, chang ah mawng pyein sah hlük ci gui. 14 Cun ah kia sei hmaw sang ciah hmeinu gui cu ceimah ba u ne, hta nau u ne, ami kyong khui m'htei ne om u sä, cun ung mi ga gui naw mik mi ah mawng ak she ami pyein vai a i kä om khai. 15 Am shah hmeinu gui cu lam hma u ne, Satan ah hnu ah läk pyi ci gui nei. 16 Zum ciah hnumi tumat cu a mät ah mätzah kyong khui ung hmeinu a om ah a kiak ung, am hteihtang vai nei. Ngahmi ah phäh ah khrithabum cu kä zaica en sak sä. Cun ung vah khrithabum naw a ngaih u vai kä om ciah hmeinu gui cu m'hteihtang hning khai kiak ci. 17 Khanpughi ah khuut bik ciah ak tahnga gui cu, ng'cheng a goi thum ah gah khin ci gui ah nami hmat vai nei. Thu Ni shäu ci gui la m'theingthang bilo ci gui cu ak tung pi ah gah khin ci gui nei. 18 A i ah kia sei ci ung cacim theing naw, Htang nami leh sak ah seipat cu am gawng kä nami k'bääp-en vai; cun kawn ung bi bik ciah chang phi abi cheng gah khin ci nei, ä ciah pyein ci. 19 Saksi hnih thum kä a om ung ak tahnga m'kat nak vai ah mawng cu kä nami ngaih tüh en vai nei. 20 Shetkat nak bik ciah chang cu, chang a hei gui ami kyihkyawk vai ah phäh ah, chang khli ah lung ah nami m'cäi vai nei. 21 Khanpughi ah ma, Bawi Khrit Jesuh ah ma la Theingcim ciah khankho chang gui ah ma ah, kei naw thukhän ka ning peik cu, nang naw shin ah m'cäi nak gui cu läk netah ng'daut ne a i kä nam khoichaa düt en vai, chang ah hmai teng ne a i kä na bi vai. 22 Bawipa ah khuut bik ci am kut taih nak peit nak cu kä nami bi ghet ghet vai, chang ah shetkat nak ung kä nami ng'caw zah tu vai, nami mät theingcim ne nami om vai. 23 Nang cu a shäng shäng na gawpyam thei ci kia sei, tui bäng kä aw ne, na theek nak vai ah sapyit tui phi na awk vai nei. 24 Chang am shah gui ah cheishoh nak cu dang ge sei, ngahmi m'khoichaa nak cun phi gawk law ge ci. Cun ung phi chang am shah gui ah cheishoh nak läi cu a ngawi ah vah dang lawk ci. 25 A cun ah mäih ah am shah ah nikiom nak gui cu dang ge ci, kä dang ge ciah nikiom nak gui cun phi a i naw kä shungshet hlawt ci.
1 Khleihtein gui naw ami bawimang ami chang m'sui vai cu ami hmat vai. Cun ung vah Khanpughi ah ming la khritha ah m'theithang nak cu a u naw kä päipih kä pyeinsak khai. 2 Khritha bawimang gui ung khleihtein chang shäm a om ah a kiak ung, kä ami shedam nak gui vai, phäi nau gui ah kiak ci, ciah ami ngaih vai. Ami hnün thawh peit gui cu, ami m'hni gui ah khritha gui ah kia sei, ngahmi naw k'tha nah pi ne ami hnün thawh peit gui vai ah kiak ci. Shin ah a mawng gui cu nang naw nam theithang na pyeinsak vai. 3 Hngihnga ciah zum nak m'theithang ne, Bawipa Jesuh Krih ah thu düng la mi zum nak ah m'theithang nak, 4 kä ng'mäi sak ci cu, chang ah ng'shei aih ne a i ng'hlui kä hmat ciah kiak ci. Ani cu ng'vook shan vai, ng'käük neet vai ng'zak hlü ciah kiak ci. Cun naw vamneng nak, cuhcan nak, m'thüikhang nak, shedam nak, 5 gui cu ng'lih pyou sak ci. Cun ah om ih ciah chang gui cu ami lung ngaih hnga sei, thu düng caciim kä hmat ci gui ah kiak ci. Ngahmi naw zum nak ah lam cu bühmang nak ah lam ah ngai ci gui. 6 A mät ung om ci awn bä khai ah ngaih gep ciah chang cu, a zum nak naw bühmang nak pek ci. 7 Khomdek khan ah mi law sang ung a i nei mi law päi? Khomdek khan ung kaa mi hteh law ba ung mä a i nei mi hteh püi kaw? 8 Cun ah kia sei mik mi ung ei vai la sui vai a om ah khoi ung a cun awn mi ng'bäh vai nei. 9 Bähmang hlük ciah chang gui cu tüihtok nak gah thei ci gui nei, ngahmi cu m'ghämce ne shetkat nak ah ng'zak nak hlü naw pha gui thei ci nei, cun ah zak hlü nak naw ngahmi cu didap sak gui thei ci nei. 10 A i ah kia sei ci ung ngui zak nak hlü cu, shetkat nak nüng nüng ah ang zung ah kiak ci. Chang am shah gui cu ngui zak hlü aih u netah ami zum nak phi ng'hlah tak ci gui. Cun kawn ah ngahmi cu zaica nak naw ami m'lung shetkat sak sei geinvai ci gui. 11 Nang läi cu Khanpughi ah chang ah na kiak ci kia ne, shin ah shekha gui avan na hlawi vai nei. Dängdau nak, zum thei nak, zumnak, m'hni nak, hnimgei nak, ng'awigii nak gui awn kümbe vai ah nak tha nak vai nei. 12 Zum nak ah dawng nak ung na nüng vai ah dawng ne, ang tüi ghin nak cu nak pan vai nei; cun ah ghin nak na gah vai ah nang cu Khanpughi naw a ning khü zah ung, saksi ciah chang khli ah ma ah, Bawipa na zum ah mawng cu ak küikyang ah nang kiaa pyi ci nei. 13 A päng avan am ghin nak pek ciah Khanpughi la Pontius Pilate ah ma ah a zum nak a kheng geng ah m'dang ciah Khrit Jesuh ah ma ah kei naw thukhän ka ning pek ci, 14 Shin ah khäntam nak gui cu läk ne, Bawipa Jesuh Khrit kä a dang law ba pha ah chuih bekhüt ne bi na bi vai nei. 15 Tumat bäng ah kia ne, phyuhtheh ne uk ciah ghangpughang nüng ah Ghangpughang, bawi nüng ah Bawipa, Khanpughi naw, a khin a küm nak ung Bawipa cu dang law ba sak khai nei. 16 Khanpughi bäng naw sih nak phiawn nak ci; Ani cu chang naw kä ak et hlawt vai ah pyü ne ng'shü ci ung om ci. Ani cu a u naw kä hmu man ci; Ani cu a u naw kä hmu hlawt ci; Bawipa ung m'tamkhah nak la ang tüi sei hlüngtai nak cu om sä! Amen. 17 Khomdek khan ah bühmang ci gui cu kä ami khähghah lüngtang aih vai ah nam cäi gui vai nei. Ngahmi cu kä khäng lä khai ah khawhcham kä ngaih u ne, mi gah taang vai ah, ang nüng nüng cu, ang khaai nak awn nam shumphyuk gui ciah Khanpughi cu ami ngaih u vai nei. 18 Ak ni ami bilawh vai, ni kiom nak ung ami plämshau vai, ami khaailaang vai, la chang am ami peiktaak thei vai ah nam cäi gui vai nei. 19 Cun ung vah ngahmi cu ngawi ah lawk ciah ghin nak vai ah hmawk ah ak küikyang ah m'kümtho ci gui ah kiak khai. Cun ah a kiak ung vah ngahmi cu ghin nak akcang dou hlawt khai gui. 20 Timothi, kei naw ka ning ap gui cu ngaih na ne nam htei vai nei, ak she ah thu nak la chang am shah naw cheishoh nak lam ami Hmuhmat nak, ä ah ami ngaih ah, ng'cuhcan käükneet nak cu na hlawi vai nei. 21 Chang am shah gui cu hmuhmat ci gui ah ami ngaih nak awn, zum nak ah lam cu hma ci gui nei. Nami van ah khan ah Khanpughi ah chimgein nak om sä.
1 Kei Paul, Khanpughi ah zak hlü ah Bawi Khrit Jesuh ah ang düihpüi ah kia ne, Bawi Khrit Jesuh ung kawng ät nak awn, mi gah vai ah shaitaak om ciah ghin nak ah mawng, ka shäu ci naw- 2 Kam hni ah ka hta Timothi am ca ka ning guk lawk ci nei; Pa Khanpughi la Hunbawi Khrit Jesuh ah m'gein nak, chihnaa nak la dimdeih nak cu nak khan ah om sä. 3 Pupa gui ah mäih ah m'lung ngaih theing awn a khuut ka bi ah Khanpughi cu kam kümto ci nei. Amä angawi ka taigü nak ung nang cu ning shäm ne Khanpughi cu kam kümto ci nei. 4 Nang phlitui ali cu shäm ba ne ang htei ah ka ning hmu hlük ci nei. Nang ka ning hmuh ung kei cu zei nak awn ka be khai nei. 5 Na pighi Lois la na nu Eunice ah mäih ah ng'ciim ciah zum nak cu ka shäm ba ci nei. Ngahni ah mäih ah na zum ciah ka ngaih gep ci nei. 6 Cun ah kia sei kei naw na khan ah kut taihnak ka ning peik zah ung Khanpughi naw a ning peit ah m'cümhnah nak cu ghing khai ah na shum vai ah ka ning m'shümthein ci nei. 7 Khanpughi ah nam shumphyuk gui ah Mumcha naw mik mi cu kä na ng'zawm sak gui ne; cun ah Mumcha naw hlüngtai nak, m'hni nak la htingling nak cu na pe gui ci. 8 Cun ah kia sei mi Bawipa mawng saksi vai ah kä na lä ng'aa vai. Bawi Khrit ah chaw ah thawng ka kium ciah kei phi kä na na ng'aa nak vai. Khanpughi ah ning peit ah k'thagui awn geinvai nak cu na dou tu vai nei. 9 Na hun gui ne amät ah chang ah anam hnüt gui cu, mi mät ah bilawh nikiom nak awn ah kä kiak ci, amät ah ng'bä nak la m'gein nak awn ah kiak ci nei. Khanpughi naw kho kä ang tän pha ge ung cun ah m'gein nak cu, Bawi Khrit Jesuh ung na pe gui ci. 10 Cun ung phi tuhchü, mi Hunbawi Khrit Jesuh a kyum law kawn ah, cun ah m'gein nak cu, mik mi ung dang lawk ci. Bawipa naw sih nak ah hlüngtai nak cu m'shiu netah, Thu Ni awn käng khuk hlat ciah ang tüi ghin nak cu dang sak ci nei. 11 Khanpughi naw kei cu Thu Ni shäu ciah ang düihpüi la saza ah anam düih ah kiak ci. 12 A cun ah mawng ung kei cu geinvai nak ka gah ciah kiak ci. Cun ung phi kei ung lung nak akbe ah om lä ci. A i ah kia sei ci ung kei a u ung kang ap cu ka hmat ci, kei naw ka ap gui cu ak hnu bäih ah Hnüüp güt ung kut shum khai ci cun phi, kei naw akcang ah ka hmat ci. 13 Kei naw ka ning m'theithang ah thu düng cu, thei nak vai ah ak htek ah kutshum ne, Bawi Khrit Jesuh ung kawng ät nak awn mi gah ah zum nak la m'hni nak cu na läk vai nei. 14 Nang am ning ap ah ak nikiom gui cu, mik mi ung om ciah Mumcha Theing ah hlüngtai nak awn na kutshum vai nei. 15 Na hmat pyi ah mäih ah Asia khopäng, Phigelus la Hermogenes gawnu gui ung chang gui naw kei cu na hnu na pyi ci gui nei. 16 Onesiphorus ni ah kyongkhui ung Bawipa ah chimgein nak om sä, ani naw akda vei kei ah lung cu na hüizang sak ci nei. Kei cu thawng 'kium ah ka kiak ung phi, ani naw kei cu kä na ng'aa nak ci nei, 17 Ani cu Rom gawnu ung a gawk law vai am, kä a na hmuh pha ah chuih kei cu na shui ci nei. 18 Ephasus gawnu ah ani naw kei a i hlawk ah anam htei cu nang naw na hmat ci nei. Cun ah Hnüüp ung ani ah khan ah Bawipa ah chimgein nak om sä.
1 Ka hta, Bawi Khrit Jesuh ung kawng ät nak awn mi gah ah m'geinsei nak awn k'thamah ne om . 2 Saksi gui akda ah ma ah kei naw ka shäu ah m'theithang nak gui cu, nang naw na ng'za pyi ci nei, cun cu la netah, chang hei gui m'theithang tu ba hning khai ah ngaih gep ah chang gui am, nam thei tu ba gui vai nei. 3 Bawi Khrit Jesuh ah bekhüt ciah gakaap ah kia ne geinvai nak cu na dou vai nei. 4 A bilawh mawng ung hnüntho ciah gakaap tumat cu, a bawi naw azum vai ah bilo ciah kiak ci, a hei a mawng ama ung käng cawngcam, kä hnün tho ci. 5 Thu m'hnüt kä läk ah gänglah ciah chang phung naw, a i zah ung phi gänglah nak ung nüng nak ng'chuh kä gah khai. 6 Khäghaat ne kholo ciah chang naw väi lawk ciah geit cu, khäm ba ma khai ah kiak ci. 7 Kang thu pyein cu nangaih tüh kheng vai nei, cun ung Bawipa naw hmuhmat nak thei ning pak khai nei. 8 David ah ng'shon, sih nak nüng ne tho ba ciah Bawi khrit Jesuh cu na shäm kheng vai nei, cun cu kam theithang nak ah Thu Ni ung ka pyein ah kiak ci nei. 9 Kei cu Thu Ni ka pyein ah phäh ah ka geinvai ci, m'si gui awn phi ami na khih nak ah kiak ci. Cun ung phi Khanpughi ah Thu läi cu khih pawn nak kä om ci. 10 Cun ah kia sei kei cu, Khanpughi ah a ghü ah chang gui ah hmawk ah a i phi ka buiaut ci nei. Cun cu ngahmi naw phi Bawi Khrit Jesuh ung hun nak ami gah tu vai la ang tüi ah bäkhäk nak a gawk law vai ah hmawk ah kiak ci. 11 Shin cu thu düng ah kiak ci; Ani awn atäng ah mi sih ah a kiak ung, Ani awn atäng ah mi ghing ba khai. 12 Mik mi ung khüighaat nak a om ah a kiak ung, Mik mi phi ani ung uk nak mi gah tuk khai. 13 Mik mi kä mi bekhüt ung phi, Bawipa cu bekhüt ci, a i ah kia sei ci ung Ani cu amät naw amät cu küm shet phung ci. 14 Shin ah a mawng ung nak chang gui nam cäi gui vai nei, thu awn ng'vawngshang käütneet ne kä ami kiak vai ah, Khanpughi ah ma ah akheng ah khän ne nam cäi gui vai nei. Cun ah mäih naw ni nak kä pyang ci, zak ciah chang gui ah ngaihdam ah kia ne shetkhat nak ah kiak ci. 15 Bi bi ah hmawk ah kä lä ng'aa ciah khuutbi la Khanpughi ah thu thuuk düng khaiah m'thei ciah nang cu, Khanpughi ah ng'zak hlü vai ah k'tha na pi bäih ne na bi vai nei. 16 Zum nak kä om ciah hmähma ne thu shai cu na hlawi vai, Cun ah mäih thushai naw chang cu Khanpughi awn ng'shawng sak pi ci nei. 17 Cun ah mäih m'theithang nak cu pumsa keing khai ah ei ciah kheipung awn täng ci. Himenaeus la Philetus cun phi a cun ah mäih ah m'theithang ci goi nei. 18 Ngahmi cu cacim ah düng nak ung kaa lam hma u ne, 'sih nak ung ka mi thawh nak ba cu gawk law pyi ci nei, ' ci u ne zum ciah chang gui ah zum nak cu ng'lat sak ci gui. 19 Cun ung phi Khanpughi naw ak khäng ah ling ne ak säm cu kä thäng hlawt ci nei. Cun ah khan ah, Khanpughi naw a mät ah chang gui cu hmat gui ci nei, ci la Bawipa ung khäng pyi ciah pyein ciah chang phung naw cheishoh nak cu a phiawn nak vai nei, ä ci ah ca cu guk ah kiak ci nei. 20 Mang im ng'ki ah kyong ah ghui la ngui awn pian ni, Sing la m'dek la m'dek awn pian ni ah khlüng la k'am gui om ci. Am shah cu akäi kyang ah kiak ci, am shah cu ang neng düt ah kiak ci. 21 Cun ah ak shekha gui phung ung kaa theingcim ciah chang cu a bawi ah hmawk ah bä ne, ak ni phung bi ge khai ah om ciah kia ne, ak küikyang ah kiak ci, a käi kyang nak ung mang hlü vai ah kiak ci. 22 Ak hmaw chang gui ah häithaw nak cu hlawi ne, Bawipa ah m'lungtheing awn taigü ci gui awn atäng ah dängdau nak, zum nak, m'hni nak la dimdeih nak gui cu na shui vai nei. 23 Hmähma nak la ak ang ah ng'cuhcan nak gui cu na hlawi vai, Cun gui naw ng'tukvook nak a pian cu na hmat ci nei. 24 Bawipa ah bikbi cu ng'tukvook lup ciah kä a kiak en vai, chang ng'nä m'gein ne, hniimgei thei ci ah saza k'ni ah a kiak vai. 25 Ani hnu ng'tuk püi ciah chang gui cu ang awi gi ah m'cäi thei ciah kiak khai. Cun ah chang gui cu ng'za ba u ne, thu thuuk ami hmat tu vai ah Khanpughi naw akhin k'ni pe gui khai nei. 26 Cun ung ngahmi cu düng nak hmu law u ne, ang zak hlü phung läk khai gui ah pha ne shum gui ciah khoshe ah kut ung kaa phiawng khai gui nei.
1 Ak hnubäih ah hnüüp gui cu ang cet khengkheng ah kia lawk khai ci cu nami hmat vai nei. 2 Chang gui cu ami mät hnga kä ngai u ne, ngui bäng za hlü u ne, khäghah lüngtang ne, ng'hawhshaak m'ghämce ne kiak khai gui nei. Ngahmi cu ngetngawng u ne, nupa ah beit kä ngai ne, m'gein nak kä om ci, zum nak kä om ciah kiak khai gui nei. 3 Ngahmi cu m'gein nak kä om ci, chihna nak kä om ci, chang ah ming m'shet ci, m'gäi m'cik ci, hlawhlang ciah kiak khai gui nei; ak ni phung cu thüi nak khai gui nei. 4 Ngahmi cu ng'lihlak u ne, häipai u ne, ta-äh ne chang ah ng'shei khai gui nei; Khanpughi ah mä hlimtui nak düt cu m'hni pi khai gui nei. 5 Ngahmi cu ami khan shai awn ami zum tu ung phi, ak-cang ah hlüngtai nak ah mawng cu hnu ng'tuk püi khai gui nei. Cun ah mäih ah chang gui cu na hlawi gui vai nei. 6 Cun ah chang gui ung kaa am shah gui cu, chang gui ah im ung lut u ne, ami thuvi nak awn, ami shetkat nak ung geinvai u ne, ng'zak hlü nak nüng ah tüihtok nak ung om ciah hnumi gui cu, ami kut ung gawk khai ah cik ci gui nei. 7 Cun ah hnumi gui cu ang tüi sei k'tha nah ne ng'thei tu u ne phi, thu thuuk cu kä hmat hlawt ci gui ah kiak ci. 8 Jannes la Jambres naw Moses cu ani hnu ng'tuk püi ah mäih ah, cun ah chang gui naw thu thuuk cu hnu ng'tuk püi ci gui nei. Ngahmi cu lulang cäivai nak kä om sei ami zum nak she pyi ciah chang gui ah kiak ci. 9 Ngahmi ah nüng nak cu kä i güt khai, a i ah kia sei ci ung Jannes la Jambres ah mäih ah ngahmi ah shetkha m'thüikhang nak cu chang naw hmu lawk khai gui ah kiak ci nei. 10 Cun ung phi nang cu kei ah m'theithang om ih, la ka ghin nak ung kang bä nak gui cu hmat ne na läk ciah kiak ci nei. Ka zum nak, ka hnimgei nak, kam hni nak, ka khüighaat nak, 11 ka dukdeiu nak, la ka geinvai nak gui cun phi nak shing pyi ci nei. Antioch, Iconium, Listra gawnu gui ung, kei naw a i hlawk ah dukdeiu nak ka buiaut gui cu na hmat ci nei. Cun ung phi Bawipa naw cun gui ung kaa nak phiawn pyi ci nei. 12 Bawi Khrit Jesuh ung kawng ät ne zum nak ung länlawi hlük ciah ah chang phung cu dukdeiu nak gah khai nei. 13 Chang shekha chang thuvi gui cu, shekha m'thüikhang law pi k'täi khai gui, chang naw phi phiui hnawk gui khai, chang phi phiui hnawk khai gui. 14 Cun ung phi nang läi cu theithang ne na dou ah thu thuuk cu ak kheng ah na zum vai. A u chang gui ah nang theithang tu te cun phi na hmat vai. 15 Na hmaw sang ung tän ne, cäivai nak ning pe ne, Bawi Khrit Jesuh zum nak awn hun nak gah vai ah lam shäm ciah, Cacim Theing na hmat ah mawng cu na shäm ba vai nei. 16 Cacim Theing avan cu Khanpughi naw Mumcha hlüngtai nak awn ak be ah kia sei, thu thuuk m'theithang nak, m'cäi m'ä nak, cheishoh m'dang nak, sheitkat pian nak, la düng sei ghin nak vai ah m'shümthein nak gui ah mawng ah kiak ci. 17 Cun ah kia sei Khanpughi ah khuut bik ci cu, nikiom nak a hlühlü abi lawh nak vai ah ng'sheitawn vai cu hlü ci, hmuhhmat Lulang nak awn kümbe vai ah phi kiak ci nei.
1 Khanpughi ah ma la aksi ak ghing avan m'khoicha khai ah Bawi Khrit Jesuh ah ma ah kei naw khen ne ka ning m'thein cu, Bawipa cu Ghanpughang ah kia ci, kia ne uk khai ah kyum lawk ci nei. 2 Cun ah kia sei akhin a om ung phi, kä a om ung phi Thu Ni cu na pyein vai nei. Na thu ngai zak ci gui cu ami kat nak dang sak gui , m'cäi gui , thagui pe gui , hnimgein nak awn m'theithang gui . 3 Chang gui naw düng ciah zum nak cu kä ngai za hlü ne, amät ah ng'zak hlü düt läk ne, ami mät ah ng'zak hlü bä bä ah thu m'gawng khai ah, m'theithang ci gui cu k'tä ne ami shui nak ah akhin gawk lawk khai nei. 4 Ngahmi cu Thucim kä ngai u ne, pumah awi düt ngai lawk khai gui nei. 5 Cun ung phi nang läi cu, a i chü ah amawng ama na buiaut ung phi, na mät ngaihmah ne na om vai, geinvai nak na nüng vai, Thu Ni cu shäu ne na pyein vai, Khanpughi ah chang shäm ah kia ne bi vai phung cu m'khüt nüng ne na bi vai. 6 Kei läi cu ng'ghuthaa nak ah ka kiak nak vai ah akhin gawk law pyi ci nei, shin ah ghin nak kang kawn taak vai ah a khin phi ng'et lawk ci nei. 7 Kei cu ng'käükneet ne dawng nak ung ak ni pi bäih ah ka bi pyi ci nei, m'hnüt nak ung khüt sei ka dawng pyi ci nei, zum nak phi ka shum pyi ci nei. 8 Tuhbäi ung Khanpughi ung düng ciah chang gui am ap vai ah nüng nak lukhu naw kei cu na ngäng ci nei. Cun cu düng nak awn m'khoichak ciah Bawipa naw, m'khoichaa nak Hnüüp ung kei am na ap khai nei. Kei bäng ah kä kiak ciah, Bawipa a kyum law ba m'hni ne ngäng ciah chang gui phung am, cun na lukhu cu ap gui khai nei. 9 Kei ah na law ge vai ah nak tha nak vai nei. 10 Demas cu m'dek khan am hni nak awn, kei na nawng ne, Thessalonika ah hteit ci nei. Creseens cu Kalatia ah, Titus cu Dalmatia ah hteit ci gui nei. 11 Luka bäng kei awn kani om ci nei. Maku cu khü ne khah law püi baä, Ani cu kei ah bi nak ung na hun shawih hning khai nei. 12 Tichikus cu Ephasus ah ka tüih nei. 13 Nang na law ung Troas gawnu ah Karpus am ka ap shüt ah suinu la cauk gui, ak tung pi ah mehvun ung guk ah cakchaw gui cu na law püi vai nei. 14 Kyeei sheh ciah Alexander naw kei cu ak kaa ah na kiak na tuk ci nei, amät ah bi ah khan ah Khanpughi naw a gah vai cu pek khai nei. 15 Nang naw phi ani cu na ngaih nak vai nei, ani cu mik mi ah thu pyein, hlinghling ah hnu ng'tuk püi ne, thu pyein ciah chang ah kiak ci nei. 16 Kei cet ne ami na ng'shi sang ung, kei na hunshawih khai ah a u phi kä ng'düi lawk ci, van naw kei cu na nawng ci gui nei. Khanpughi naw ngahmi ah bi nak cu kä ngaihdam men pe gui sä! 17 Cun ung phi Bawipa cu kei ung om ne k'thagui na pe sei, chang pakhui hei gui am Thu Ni cu shäu ne kam thein gui hning ci, sih vai ah ami na k'bäi nak ung kaa phi ka phiawng ci nei. 18 Bawipa naw kei cu shetkat nak phung ung nak phiawn ne, amät ah Khan mawpi uk nak ah ngaih gep vai ah na hteh püi khai nei. Ani ung bämang nak cu ngawizä khäng ne om sä! Amen. 19 Priscilla la Akuila ni, Onesiphorus ah kyongkhui ni gui cu ka zavaih na gui ci nei. 20 Erastus cu Korin ah om shüt ci, Trophimus cu Miletus ah gaw sei ka nawng shüt nei. 21 Kho kä ak sik pha ung na law vai ah nak tha nak vai nei. Eubulus, Pudens, Linus, la Klaudia ni gui la Krihta phäi nau avan cu ka zaivaih na gui ci nei. 22 Bawipa cu na mumcha awn atäng ah om sä, Khanpughi ah chimgein nak cu nami van ah khan ah om sä.
1 Kei Paul, Khanpughi ah changshäm la Jesuh Khrit ah ng'düihpüi naw ca ka gu lawk ci nei. Khanpughi naw a ghü ah chang gui ah zum nak shawihkhem gui vai la mi zum nak ah düng ciah m'theithang nak lam shäm gui vai ah kei cu ghü ne ana tüih ah kiak ci. 2 Cun ah zum nak cu ang tüi ghin nak ah mawng ngaih u nak ung phung ci. Kä hleeihlak ciah Khanpughi naw cau akhin kä a ng'tüi pha ge ung, ang tüi ghin nak cu na pe gui khai ah shai a taak nak om ci. 3 Akhin küm law khütah, cun ah ang tüi ghin nak cu, ang thu awn dang law sak ci. Cun ah Thu Ni cu kei am ana ap ah kia sei, mi Hunbawi Khanpughi ah k'bäi nak awn kei naw ka shäu ci nei. 4 Kei awn zum nak täng ne ka hta akcang ah kiak ciah Titus am ca ka guk lawk ci nei. Pa Khanpughi la mi Hunbawi Khrit Jesuh naw geinsei nak la dimdeeih nak cu ning pe sä. 5 Kei naw Crete ung ka ning nawng shüt cu, bi vai om ba ci gui avan ang khän khai ah na bi vai la api gaw päng ung khritha k'tahnga gui nam düih vai ah hmawk ah kiak ci. Tuhbäi ka ning m'shüm thein gui cu na shäm vai nei; 6 Khritha k'tahnga cu m'kat vai ah kä om ciah chang ah kiak khai, tumat bäng chu nak khai, ahta gui cu zum ciah chang gui ah kiak khai, Om she m'gäi m'cik ci gui, beit kä ng'zak ci gui ah kä kiäen khai. 7 Khritha k'tahnga cu Khanpughi ah khuut kutshum ne bik ciah kia sei m'kat vai kä om-en ciah chang ah kiak khai. Ani cu m'ghämce ci, m'lungshe ci, awktat ci, ng'tuk ghäh ci, ngui ng'za hlü aih ciah kä kia-en khai. 8 Ani cu khin m'htei ci, ak ni m'hni ciah chang ah kiak khai. Ani cu htingling ci, düng ci, theingcim ci, pyein ah om ci—ah chang ah kiak khai. 9 Ani cu bä ciah thu, zum nak awn ät ci cu, khäng khai ah kutshum ciah chang ah kiak khai. Cun ung vah ani naw düng ciah m'thei thang nak awn chang hei gui cu m'hläm gui hlawt khai, hnu ng'tuk püi ci gui ah cheishoh nak phi tawk pe hlawt khai. 10 A i kä ami hmat su ah cun ah thu cu hnu ng'tuk püi ne, chang gui k'fikfaih ciah chang ak da om ci nei, ak tung pi ah Judah zum nak ung ka ng'lat lawk ci gui ung da pi ci. 11 Ngahmi cu thu kä ami pyein ba vai ah khin lawk ci nei, a i ah kia sei ci ung ngahmi cu kä m'theithang khin vai m'theithang u ne, kyongkhui gui cu shetkat sak ci gui, lä ng'aa nak vai kiak ciah ngui ng'zak nak hlü awn ami bi ah kiak ci. 12 Cretan chang ami mät ah profet tumat naw, Cretan chang gui cu ang tüi sei hleeihlak ci gui, ngetngawng m'ghämce ci gui, damduh ci gui, ä nei ci ne pyein ci. Cun ah kia sei ak ghaat ah nami m'cäi gui vai, cun ung ami zum nak khänghtek lawk khai. 14 Cun kawn ah Jew chang gui ah puma la düng nak hnu ng'tuk püi ciah chang gui ah thukhän cu kä ami kutshum men ba vai nei. 15 Amät ah m'lung kyong theingcim ciah chang ah hmawk ah a i phi avan theingcim ci; cun ung phi amät kä theingcim ne a zum nak kä om ciah chang ah hmawk ah a i phi kä theingcim ci. A i ah kia sei ci ung ngahmi ah lung kyong la ami ngaih tüh nak cu kä ah theingcim nak awn ah kiak ci. 16 Ngahmi naw Khanpughi kami hmat ci nei ami ci ung phi ami hnün thawh naw maa na gui ci. Ngahmi cu thüi nak vai kia u ne, thu kä ngai u ne, akni phung api phi, kä bi tu hning ciah chang gui ah kiak ci.
1 Cun ung phi nang naw bä ciah thu m'hnüt awn ng'mäi khai ah nam theithang vai nei. 2 Pami ng'vai ba gui cu ami lunglang vai, ami käikaa vai, ami htingling vai la bä ciah zum nak, m'hni nak la khüighaat nak ami kümbe vai ah nam cäi gui vai nei. 3 A cun ah mäih ah hnumi ng'vaiba gui phi theingcim ciah ghin nak a om vai ah nam cäi gui vai nei. Ngahmi cu chang ah thang m'shet ci gui, kä cun ung zu ah khleihtein gui ah kä ami kiak en vai nei. Akni phung m'theithang ba thei ciah ami kiak vai nei. 4 Cun ung vah ak hmawba gui ah hnumi gui cu, ami cei la hta ami m'hni vai, 5 Ami htingling vai, ami theingcim vai; kyongkhui m'htei ciah hnumi ah ami kiak vai, a cei ah beit ng'zak ciah hnumi ah ami kiak vai cu, m'shümthein gui thei khai gui nei. Cun ah a kiak ung Khanpughi ung kaa lawk ciah thu cu a u naw ak she ah kä pyein ba khai nei. 6 A cun ah mäih ah ak hmaw chang gui cun phi ami htingling vai ah nam cäi gui vai nei. 7 Na mät cun phi amawng ama avan ung chang ah ning thei nak vai ah na hnün om vai nei. Htinling ne ak küikyang ah nam theingthang vai nei. 8 A u naw kä a täitawk-en thei vai ah bä ciah thu lung gui na pyein vai nei, cun ung na ga gui naw mik mi ah khan ah a i ung phi kat nak kä hmu u netah lä ng'aa khai gui nei. 9 Changshüm gui cu ami bawi ah ng'thu ami ngaih vai, amawng avan ung ami bawi ami zei sak vai, ling ne kä ami thu en tu ba vai, 10 kä ami m'guuk-en vai. Cun ah kä kia ne, ami nikiom nak la ami bekhüt nak ah mawng ami dang sak vai. Cun ung vah ngahmi cu ami bilawh nak phung ung, Hunbawipa Khanpughi ah mawng m'theithang nak cu dang law sak pi khai gui. 11 Khanpughi naw hnicim chang avan, hun nak a gah nak vai ah am gein nak cu dang sak pyi ci nei. 12 Cun ah m'gein nak naw kä zum ne ghin nak la m'dek khan ng'zak hlü nak cu, nüng nak vai nam shümthein gui ne, a htingling ah ghin nak, düng nak, la m'dek khan ung zum ne ghin nak vai gui phi nam shäm gui ci. 13 Cun cu hlüngtai säih Khanpughi la Mi Hunbawipa Jesuh Khrit ah bämang nak adang law nak vai ah, mi ngaih u ah zeikiai nak ah Hnüüp mi ngäng nak ah kiak ci. 14 Ani naw amät cu mik mi ah hmawk ah pek ci, cun cu shetkat nak phung ung anak phiawn nak gui vai la amät khäm ciah ak chang theing ah mi kia ne, ak ni kiom ah mi hnün thawh nak thei vai ah hmawk ah kiak ci. 15 Shin ah a mawng cu m'theithang gui ne, thagui na peit nak gui la nam cäi m'ä nak gui ung, na huham cu ak be ah na mang vai nei. A u chang naw phi nang cu kä ning zokshe en ah sä.
1 Kho uk ci gui la huham ah gui cu kyih aa ne, ami ng'thu ami ngaih vai la nik ciah bi phung bi ge vai ah ami om vai ah nak chang gui cu nam cäi gui vai nei. 2 Ak she ah kä ng'thu phung ne, dimdeih nak la khawtsheng nak awn om u ne, ang tüi sei ng'awi gi ne ami om vai ah nam cäi gui vai nei. 3 Azan ä mik mi mi mät phi mi gu aang ne, thu kä ngai ne, mi cheishoh ne mi om man te ci. Ng'zak nak hlü hlä la hlim tui nak a hnga hnga ah khleihtein ah mi kia man ci. Mi ghin nak cu m'thüi m'khang nak la vamneng nak awn mi ng'pyi sak ci; chang naw phi na gen gui ci, chang phi mi gen man ci. 4 Cun ung phi mi Hunbawi Khanpughi ah chihna nak la m'gein nak cu a dang law ah a kiak ung, 5 mik mi cu hun nak mi gah ci. Cun cu mik mi naw mi bi ah nikiom nak awn nah kä kiak ci, ak thai ah ng'tüi nak la tui hnim nak awn ghin nak thai nak pe gui ciah Mumcha Theing ung amät ah chihna nak awn ana hun gui ah kiak ci. 6 Khanpughi naw mi Hunbawi Jesuh Khrit awn, Mumcha Theing cu mik mi ah khan ah be ne pleip khai ah na zuk m'kyum gui ci nei. 7 Cun ah kia sei mik mi cu am gein nak awn Khanpughi ung düng nak mi gah ne, mi ngaih u ah ang tüi ghin nak cu mi gah vai ah kiak ci. 8 Shin cu ng'düng ciah thu ah kiak ci. Shin ah a mawng gui cu nang naw ak tung ah nam thein gui vai ah kei naw ka ng'za hlük ci nei. Cun ung Khanpughi ngaih u ci gui cun naw, ak ni ah hnün thawh nak vai ung akhin pe u ne, chang phung ah phäh ah nik khai la bä khai cu, bi thei khai gui nei. 9 Cun ung phi shekhak ciah ng'cuhcan nak, ng'shon lam ang sau ah guh ne pian nak, ng'tuk vok nak, thukhän ah mawng ng'cuhcan nak gui cu na hlawi vai nei. Cun gui cu ei mang vai kä kia ne, a i phi kä ak pawih ciah a mawng gui ah kiak ci. 10 Ng'phyeek ng'pai nak bik ciah chang cu, hnih vei nami m'cä kawn ah, api ah phi kä nami ng'gui ng'phaa püi ba vai nei. 11 Cun ah mäih chang cu hnu ng'hlat ma pem thei ciah nang naw na hmat ci nei, ani ah shetkat nak ani ah cheishoh nak cu dang sak ci nei. 12 Artemas baw, Tichikus baw ka tüih law ung, Nikopolis gawnu ah na law vai ah nak tha nak vai nei, a cu ah kho sik kho pum ka om khai ah kak bäi ci nei. 13 Thukhän bawi Zenas la Apollos ah htehhton nak vai cu k'tha nah ne m'hteihtang goi , a ni ng'zak hlü gui cun phi küm khai ah teng m'kein goi . 14 Mi chang gui naw sui ei vai ng'zak hlü gah nak vai ah, ak ni bi nak ung akhin cu mang thei vai ah, ng'thei sak gui . Ngahmi cu akholä düt ah kä ghing om men u sä. 15 Kei awn atäng ah kami om ciah chang gui naw ning zavaih nak ci gui nei. Zum nak ung teihpüi gui-am ning zavaih nak ah mawng m'thein tu ba gui . Khanpughi ah m'gein nak cu nami van ah khan ah omsa.
1 Bawipa Jesuh Khrit ah hmawk ah thawng ung kium ciah kei Paul la mi nau Timothi naw- Kami teihpüi la atäng ah kami bilaw ciah Philimon ni, 2 nang mi awn pum ci gui ah khrithabum ni, mi be Apphia la gakap mi teihpüi Archippus ni awn ca ka ning guk law gui ci nei. 3 Mi Pa Khanpughi la Bawipa Jesuh Khrit naw m'geinsei nak la dimdeeih nak cu ning pe gui sä. 4 Phäihta Philimon, kak taigü päng ung nang ah ming ning pyein ne Khanpughi kam hlüngtai ci nei. 5 Khanpughi ah chang gui nam hni gui ah mawng la Bawipa Jesuh Khrit na zum ah mawng cu kang zak ci nei. 6 Kei ah taigü nak cu, zum ciah chang ah kia ne, nang awn mi kawngüt nak naw, Bawi Khrit ung phi ghin nak awn a hrilham phung cu thuuk law pi sei mi hmat law pi vai ah kiak ci. 7 Kam hni ah phäihta, nam hni nak naw kei cu ang htei ah na zeikiai sak ne, nak thamah sak ci nei. Khanpughi ah chang gui phung cu phi ami m'lung na thawh sak gui ci nei. 8 Shin ah a mawng ung Bawi Khrit ung na phäi ah kiak ciah kei naw, na bilawh gui vai mawng cu khän ne ka ning bi sak hning ci nei. 9 Cun pang ung phi Bawi Khrit ah ng'shü tüih, ani ah hmawk ah thawng ung ka kium ciah kei Paul naw ka ning m'hni nak ung ng'paa nak awn ka pyein ci nei. 10 Cun ah kiasei Bawi Chrit ung ka hta ah kiak ciah Onesimus ah hmawk ah kei naw ka ning pa nak ci a i ah kia sei ci ung, thawng ka kium nak ah kei cu, mumcha lam ung ani ah pa ah ka kiak lawk ci. 11 A zan läi nang ah phäh cu a i ah kä mawng mei mante ci, tuhbäi nang la kei ah hmawk ah mawngmei lawk ci nei. 12 Kei naw ani cu nang ah ka tüi law ba ci, ani naw kei ah m'lung ngaih cu law püi ci nei. 13 ThuNi ah hmawk ah thawng ung ka kium zah ung, nang ah hnün ung om ne nam htei khai ah, ani cu ka om sak hlü te ci nei. 14 Cun ung phi kei naw nang ning hnem ne, nak püi vai ah kä ka ng'za hlük ci, na mät naw nam hni ah na bilawh vai ah ka zum ci. Cun ah kia sei nang naw kä na zum tu cu kei naw api phi kä ka bik khai. 15 Onesimus naw nang cu a shäng hta a ning pai püi ah kiak ci, cun ah kia sei nang naw ani cu khü ba ne ang tüi sei na om püi vai nei. 16 Tuhbäi ani cu changshäm düt ah kä kia ba ci, changshäm ah mä taai ba pi ne, Bawi Khrit ung phäi nau ah kia lawk ci nei. Chang shäm ah a kiak nak la Bawipa ung kam hni ah phäi nau ah a kiak nak awn kei ah hmawk ah ang htei ah bäi ci. Nang ah hmawk ah cun ah tah bä pi khai nei. 17 Cun ah kia sei kei cu na na püipaw ah na na ngaih ung kei na na dou ah mäih ah ani cu na dou vai nei. 18 Ani naw nang ah khan ah kat nak abi ung phi bäi, aning puhnih nak ung phi bäi, a om ah a kiak ung kei naw ka ning thung khai nei. 19 Shin ung kei ka mät naw ka kut awn ka guk ci nei, cun cu Kei Paul ka mät naw ka ning thung khai nei. (Nang naw kei ah khan ah na puhnih om ci cu, kei naw ka pyein vai ah kä hlü ciah na hmat ci). 20 Cun ah kia sei phäihta aw, Bawipa ah hmawk ah na bä nak awn cun ah na bi vai nei, Bawi Khrit ung phäi nau ah na kiak nak awn kei cu na thawlet sakä. 21 Shin ah ca ung ka guk ah mäih ah nang naw na bik khai ci la cun ah däm pi püi sei na bik khai ci cu, kei naw akcang ah ka hmat ci nei. 22 Cun kawn ah ka om nak vai na na shui peit vai nei. Khanpughi naw nangmi ah taigü nak cu ngai ne, kei cu nangmi ah om nak ah na law ba sak khai ah ka ngaih u ci nei. 23 Bawi Khrit Jesuh ah hmawk ah kei awn atäng ah thawng ung kium ciah Epaphras naw, zeikiai ne zavaih nak ning m'shäk law gui ci nei. 24 Kei naw atäng ah kami bi ghawm ciah Maku, Aristakas, Demas la Luka gui naw phi a cun ah zeikiai ne zavaih nak pyein ci gui nei. 25 Bawipa Jesuh Khrit ah m'geinsei nak cu nami van ah khan ah om sä.
1 Caü Phanpughi naw, akda vei, amawng a hei hei awn, profet gui ung, mi pupa gui am thu m'shäk law man ci. 2 Cun ung phi shin ah ak hnubäih hnüüp gui ung läi Ahtapa ung thu m'shäk lawk ci nei. Ahtapa awn khopuui cu tüisho ne, kho ah kaa avan cu khäm khai ah Khanpughi naw Ahtapa cu ghü ne m'düih ci. 3 Ahtapa cu Khanpughi ah bämang nak awn pyü ne ng'shü ci, ani cu Khanpughi ah mäi akcang aü a kia nak ah hlüngtai ciah ang thu awn, khopuui avan cu khän sak ci. Hnicim chang ah shekat nak gui avan m'gein ne ak phiawn gui kawn ah, khan mawpi ah ahlüngtai säih ah Khanpughi ah k'pat lam ah ngok ci nei. 4 Ahtapa cu khanchang gui ah küikyang pi khai ah tüi m'hnüt ne, aming cun phi küikyang pi khai ah Khanpughi naw pek ci. 5 Khanpughi naw a u khanchang am phi, Nang cu ka ning Htapa nei; tuhngawi kei cu nang ah Pa ah ka kia lawk ci, äci ne kä pyein man ci. A i khanchang ah mawng ung phi Khanpughi naw, Kei cu ani ah Pa ah ka kiak khai, ani cu kei ah Htapa ah kiak khai, ä ci ne kä pyein man ci. 6 Cun ung phi Khanpughi naw ng'tüi htük ciah Ahtapa cu m'dekhan ah a tüih law vai ung, Khanpughi ah khanchang avan naw, Ani cu ami khawihnah vai nei, ci ne pyein ci. 7 Cun ung phi khanchang gui ah mawng a pyein nak ung, Khanpughi naw ak khanchang gui cu, khokhi ah piang gui ne, ak changshäm gui cu meidüi ah piang gui ci, ä ci ne pyein ci. 8 Cun ung phi Ahtapa ah mawng a pyein nak läi ung Khanpughi naw, O Khanpughi, na uk nak ah kho cu, ang tüi sei khäng khai nei! Nang naw na chang gui cu ng'mäi khai ah Na uk gui ci nei. 9 Nang naw akcang cu m'hni ne, cheishoh ci cu na thüi nak ci nei. Cun ah kia sei Khanpughi, na Khanpughi naw, nang cu ning ghü ne, Na paw gui ah tah küikyang pi khai ah, ning m'tamkhah ne, zeikiai nak cu ning pek cik, cik ci. 10 Cun kawn ah Khanpughi naw, Nang Bawipa naw ak htük bäih ah Khomdek cu na tüisho ci, Khan mawpi phi na mät ah kut awn na piang ci. 11 Cun gui cu ng'kawn zawp khai gui, Cun ung phi nang cu na om lä khai; Ngahmi cu suisak ah mäih ah kheei lawk khai gui. 12 Nang naw zihphak cho ah mäih ah ngahmi cu na cho gui khai, Ngahmi cu suisak ah mäih ah ng'lat zawp khai gui. Cun ung phi nang cu kä na khukhlat ci, Na ghin nak cu kä ng'pyi hlawt ci nei. 13 Khanpughi naw, a u khanchang am phi, Na gaa gui avan na kho kaa ah, Kä ka gawk sak gui zawp pha ah chuih, Ka k'pat lam ah na ngoh vai nei, ä ci ne kä kiak na man ci. 14 Cun ung khanchang gui cu, a i gui ang? Ngahmi cu hun nak gah ciah chang gui m'hteihtang gui khai ah Khanpughi naw a tüih gui ah, Khanpughi ah khuut bik ciah mumcha gui ah kiak ci.
1 Mik mi naw mi ng'zak pyi ah thu düng cu khäng khai ah mi shum khai, cun ung mik mi cu lam kä mi hma khai. 2 Mi pupa gui am khankho chang gui awn a zuk peit law ah ng'thu cu akcang ah kia sei, cun ah thu kä läk ne kä ngai ciah chang cu m'kat nak gah khai ah a kiak ung, 3 küikyang ciah hun nak cu, a i ah kä mi sui ung, mik mi naw m'kat nak cu a i ah kia ne phi kä mi phiawn ah hlawt khai nei. Shin ah hun nak cu Bawipa a mät naw a shäu law ma ah kiak ci, ng'zak ciah chang gui naw cun cu akcang ah a kiak ah mawng keimi ah ma ah saksi ci gui. 4 A cun ah khin ung Khanpughi a mät naw cäi aih vai gui, cäicat vai gui am dang nak awn la a mät ah ng'zak hlü ah Mumcha Theing am shum phyuk nak awn saksi cu dang sak ci. 5 Khanpughi naw khanchang gui am lawk ciah khomdek thai cu uk nak vai kä pe gui ci. Cun ah mawng cu mi pyein ah kiak ci. 6 Cacim theing am shah ung; Chang cu a i ah kia sei, nang Khanpughi naw na shäm lä ang; Chang cu a i ah kia sei na teng khen lä ang? 7 Nang naw chang cu khanchang ah mä apihta ng'neim ba pi khai ah na tüisho ah kiak ci; Nang naw ani cu bäkhäk nak la m'tamkhah nak awn be sak ne, 8 A päng nüng nüng uk khai ah na tüi sho ah kiak ci, ä ciah om ci. Cacim theing naw, Khanpughi naw chang cu apäng nüng nüng uk khai ah a tüi nei. ä chang ah kä uk a i kä om ci ciah a pyein ah kiak ci. Cun ung phi chang naw avan a uk cu tuhbäi mik mi naw kä mi hmuk ci. 9 Cun ung phi mik mi ah hmuh cu, Khanpughi ah m'gein nak awn chang van ah hmawk ah sik khai ah, khanchang gui ah mä a shänghta ng'neim sak nak gah ciah, Bawipa Jesuh ah kiak ci. A ni cu sih nak a aut ah hmawk ah bäkhäk nak la m'tamkhah nak awn be sei tuhbäi mi hmuk ci. 10 Apäng avan tüisho ngäng bom ciah Khanpughi naw, ahta akda gui am abäkhäk nak, a teipai nak gui ah, geinvai nak a aut sak nak awn Bawipa Jesuh cu kümbe sak ci. Cun ah Khanpughi naw a bi cu düng ci, a i ah kia sei ci ung cun ah chang gui hun nak ah hteh püi gui ci cu, Bawipa Jesuh ah kiak ci. 11 Bawipa Jesuh naw chang gui cu ami shektkat nak ung kaa theingcim sak gui ci, amät la a theing sak pyi ah chang gui cu tumat pa nak ci gui, cun ah kia sei cun ah chang gui cu, phäinau ah a khü gui vai ah, Bawipa Jesuh cu kä lä ci. 12 äKei naw nang ah bi cu ka phäinau gui am kam thein gui khai nei; Kei naw ngahmi ah ng'bum nak ung Nang cu ka ning m'kümto khai nei, ä ci ne pyein ci. 13 Cun kawn ah Bawipa naw, Kei cu Khanpughi ung kang ap khai nei, ä cik ci, cun kawn ah, shin ung Khanpughi ah na peit ah hta gui awn atäng ah kami om ci nei, ä ci ne pyein ba mä ci. 14 Cun ah a pyein ah hta gui cu si la sa awn om ci gui ah kia sei, Bawipa Jesuh cu si la sa om ciah hnicim chang ah zu kyum lawk ci. Cun ah a bi cu, khoshe ah hlüngtai nak ah kiak ciah sih nak cu, a sih nak awn am di ah kiak ci. 15 A cun ah bi ne, sih nak kyih ne, ami ghin ah chuih khleihtein ah kiak ci gui ah chang gui cu hun gui ci. 16 Ani naw khanchang gui am hteihtang gui ah kä kiak ci; cacim theing ung, Ani naw Abraham ah hta shon cu m'htei gui ci nei, ä ciah mäih ah am htei gui ah kiak ci. 17 Cun ah ani cu a mawng avan ung a phäinau gui ah mäih kia ne, ak chang gui shetkat nak ung m'gein gui khai ah, bekhüt nak la chimgein nak awn be ne Khanpughi ah khuut bik ciah Taigü Tung ah kiak ci. 18 Tuhbäi ani naw tüihtok nak gah ciah chang gui cu m'htei gui hning ci, a i ah kia sei ci ung, ani amät cu tüihtok nak la geinvai nak gah pyi ciah kiak ci.
1 Khanpughi naw a khü gui ah khrihta phäunau gui aw, ngai shäm vä! Bawipa Jesuh Mi zum nak ung Taigü Tung ah kiak khai ah Khanpughi naw a tüih law ah kiak ci nei. 2 Mose cu Khanpughi ah im ung a bi lawh nak ung abekhüt ah mäih ah, Bawipa cun phi shin ah bi bik khai ah ghü ne m'düih ciah Khanpughi ah ma ah bekhüt ci. 3 Im co ciah chang tumat cu a im cawh ah mä däm pi khai ah m'tamkhah nak gah khin ci nei. 4 Im phung phung cu chang naw co ci cun ung phi apäng avan cu Khanpughi naw co ci. 5 Mose cu Khanpughi ah im kyong ah ak changshäm ah kia ne bekhüt ne om ne, ma lam ah Khanpughi ah thu law vai gui cu, ana pyein law ma ci. 6 Bawi Khrit läi cu Khanpughi ah im uk ciah Ahtapa ah kia ne, bekhüt ne om ci. Mik mi cu käighaat ne, mi ngaih u nak ah khan ah m'lung p nak a om ah a kiak ung, Khanpughi ah im ah mi kiak ci. 7 Cun ah kia sei Mumcha Theing naw a pyein cu, Khanpughi ah k'aw Nangmi naw tuhngawi nami ng'zak ah a kiak ung kä nami ling keng vai, 8 Nami pupa gui cu Khanpughi ng'käükneet püi u ne, pui kiang ma ah phawtcam ci gui, ngahmi ah mäih ah kä nami lingkeng vai. 9 Nami pupa gui cu kum phli-kip ah kiong ung kei naw ka bi cu hmu lang u ne, na phawtcam ci gui, 10 Cun ah kia sei, kei cu ngahmi ah khan ah m'lung she netah, Ngahmi cu ang tüi sei pyai ba ci gui, Ka thukhän phi kä läk hlük ci gui, ci ne pyein cik. 11 Kei cu m'lung she netah, ami ng'däm nak vai ah kei naw ka peit gui ah kholei ung, ngahmi cu a ngawi ah phi kä lut tuk khai gui, ä ci ne shaita ne ka k'phyun gui ci, ä ciah kiak ci. 12 Zum ciah ka phäi nau gui, ghing ciah Khanpughi nawng nak vai u-awng ah am lung kiong shekhak ciah chang, nangmi ung kä om en khai ah nami geing nak vai nei. 13 Nangmi cu cheishoh nak ung kä thuvi ne kä nami lingkheng-en vai ah, cacim theing naw tuhngawiä ciah thu anam thein nak gui - a om ah chuih, ak hnüüp tä sei tumat la tumat anmi hteinghtang tu vai nei. 14 Mik mi cu ak htük ah mäih ah a khüt nak ung khüt sei, khäng ciah ngaihgep a om ah a kiak ung Bawi Khrit awn bilo ghawm ciah chang ah mi kiak ci. 15 Cacim Theing naw, Nangmi cu tuhngawi Khanpughi ah k'aw nami ng'zak ah a kiak ung kä nami lingkeng vai, nami pupa gui naw khanpughi ami käükneet püi zah ung ami om ah mäih ah kä nami om vai, ä ci ne pyein ci. 16 Khanpughi ah k'aw cu ng'za lang ne, ng'käükneet püi ciah chang gui cu a u gui ang? Cun gui cu Egip kho ah kaa Mose naw ang khah law püi ba gui ah chang gui nei. 17 Khokum phli-kip ung Khanpughi naw am lung she nak gui cu a u gui ang? Cheishoh nak bi ne pui kiang ma ah kiu ne sik ci gui ah kiak ci nei. 18 Khanpughi naw shaita ne ak phyun nak gui ung, Häi ne däm nak vai ah kei naw ka peit gui ah kholei ung, ngahmi cu a ngawi ah phi kä lut tuk khai gui, ä a ci nak gui cu a u gui ang? A ni ng'käükneet püi ciah chang gui a pyein ah kä kia ne ang? 19 Ngahmi cu cun ah kholei ung kä lut tu hlawt khai gui ah mi hmu gui pyi ci, a i ah kia sei ci ung ngahmi cu kä zum tuk ci gui ah kiak ci.
1 Khanpughi naw mik mi am ang thu ah shaitak cu mi gah vai ah na pe gui ci. Cun ah ng'däm nak vai ah shaitaak cu phlawi düt ci tumat phi kä om men khai ah nami geing nak vai nei. 2 Cau ng'vai gui ah mäih ah mik mi naw ThuNi cu mi ng'zak ci nei. Ngahmi naw ThuNi cu ng'zak ci gui, cun ung phi ngahmi ah phäh ah a bäkhäk nak kä om ci. A i ah kia sei ci ung ngahmi naw ng'zak u ne phi zum nak awn kä ami dou ah hmawk ah kiak ci. 3 Mi zum ciah mik mi läi naw Khanpughi ah shaitaak ah bämang nak cu mi gha ci nei. Kei naw m'lung k'she netah, Ka m'hnüt ah shaitaak cu, Kei naw ka peit gui vai ah, häi nak ah khonglei ung ngahmi cu kä lut tu hlawt khai gui nei, ä ci ne a pyein ah mäih ah kiak ci. Khomdek khan a tüisho sang ung a bi lawh gui vai ng'pyi pang sei phi, shin ah thu cu a pyein ah kiak ci. 4 Cacim theing ung ak hnüüp chih hnüüp ah mawng a pyein nak ung, Khanpughi cu ak hnüüp chih hnüüp ung abi gui avan ung ng'däm ci, ä ciah om ci. 5 Cun ung phi a pyein ba hei ah cacim cu, Kei naw ka peit gui vai ah häi nak ah khonglei ung ngahmi cu kä lut tu hlawt khai gui nei. ciah om ci. 6 Cun ah ThuNi ng'za law htük ciah chang gui naw cun ah häi nak cu kä gah ci gui, a i ah kia sei ci ung ngahmi naw kä ami zum ah hmawk ah kiak ci. Cun ah kia sei cun cu a hei gui naw gah ci gui nei. 7 Cun ah ami gah mawng cu, Khanpughi naw Tuhngawiä ciah ming khai ah am hnüt ah hnüüp naw dang sak ci nei. Khokum ak sho lüng khütah, a cun ah mawng cacim theing ung, David am, am thein cu; Tuhngawi nangmi naw Khanpughi ah k'aw cu nani ng'zak ah a kiak ung, Nami m'lung kä ling-en sä, ä ciah kiak ci. 8 Joshua ah peit ah häi nak cu Khanpughi ah shaitaak ah a kiak vai sä ung Khanpughi naw ak hnüüp hei cu kä pyein ba khai sä te. 9 Cun ah kia sei ak hnüüp chih hnüüp Khanpughi ang däm ah mäih ah, Khanpughi ah chang gui ami däm nak vai hnüüp om ba ci. 10 A i ah kia sei ci ung Khanpughi ah shaitaak ah däm nak gah ciah chang cu, Khanpughi ah mäih ah amät ah bi a bi ung däm nak gah ci nei. 11 Cun ah kia sei däm nak gah vai ah mik tha nak khai nei. Cun ung kä a mi zum ah hmawk ah däm nak kä gah ci gui ah Israel chang gui ah kä mi kiak khai nei. 12 Khanpughi ah Thu cu ghing ne hnüntho ne, hmän ne ghaat ciah m'htakhim ah tah ghaat pi ci. Cun ah khim naw, ghin nak la mumcha ah ng'chum nak, khlingthang ah kyum nak ung khüt sei, aat pit pit ci. A cun naw chang ah m'lung ung zaak hlü ngaih tüh gui cu m'khoi chak ci. 13 Khanpughi ah ng'thuh haih ci a i kä om ci a tüi sho phung phung cu a mik ah hmuh ah dang zawp ci. A cun ah kia sei mi bilawh, ngaih tüh gui phung cu Khanpughi-am mi ap khai nei. 14 Cun ah kia sei mi zum nak cu m'htek ne mik pang khai nei. A i ah kia sei ci ung, mik mi ung Khanpughi ah ma ah düi ciah Khanpughi ah Htapa, hlüngtai ciah Taigü Tung, Bawipa Jesuh cu om pyi ci. 15 Mik mi ah Taigü Tung cu mik mi ah shetkat nak kä nam gein gui hlawt ciah kä kiak ci. Mik mi ah Taigü Tung cu, mik mi ah mäih ah tüihtok nak aut ci, cun ung phi cheishoh nak ung kä gawk ci. 16 Cun ah kia sei mik mi cu mi khüighaat ne, m'gein nak ah hmun Khanpughi ah mang kiang ung mi hteit khai nei. Cun ah hmun ung chik-hna nak la gein nak cu, mi ng'zak hlü phung ung mi gah khai nei.
1 Taigü Tung nak ci cu cheishoh nak ah hmawk ah phiawn nak vai la küikyan nak vai, chang van ah hmawk ah phyuhteh ne Khanpughi ah khuut bik khai ah ghü ne ami m'düih ah kiak ci. 2 Ani amät cu kä a kümbe nak da ci kia sei, lam hma ciah chang, cheishoh ciah chang gui cu chimgein gui ci. 3 Amät cu kä kümbe ciah kia ne, chang ah phäh bäng ah kä kiak ci, amät ah phäh ah phi küikyan nak vai ah phyutheh ciah kiak ci. 4 A u naw phi amät naw amät cu taigü tung ah küm düih hning ci. Khanpughi naw Aaroä khü ne am düih ah mäih ah, Khanpughi naw khü ne am düih cun vah Taigü tung ah kia hning ci. 5 A cun ah mäih ah Bawi Khrit naw amät naw amät cu Taigü Tung ah küm düih ci. Khanpughi naw Bawi Khrit-am; Nang cu Ka Htapa ah na kiak ci, Tuhngawi kei cu nang ah Pa ah ka kiak cik. cik ci. 6 Cun kawn ah mä a hei ung, Nang cu Melchizedek ah hnün ung ngoh ciah Ang tüi ah Taigü ah na kiak khai, ä ci ne pyein ba ci. 7 Bawipa Jesuh cu khomdek khan ung a om zah ung, sih nak ung hun ciah Khanpughi ah ma ah ng'hui ne kyap ne taigü ci. Neim nak la ng'ap nak awn ak taigü cu Khanpguhi naw phi ngaih pek ci. 8 Ani cu Khanpughi ah Htapa ah a kiak tupang ung phi, Khanpughi ah thu a läk thei vai ah zaica ne theithang ci. 9 Bawipa cu kümbe nak a gah kawn ah, ang thu ngai ciah chang gui-am, ang tüi hun nak pe gui ciah ang zung ah kia lawk ci. 10 Khanpughi naw Bawipa cu Melchizedek ah hnün ung ngok ciah Taigü tung ah ming sak ci. 11 Shin ah a mawng ung ning m'thein gui vai akda om ci, cun ung phi nangmi cu kä nami cäivai ngai ci kia sei, pyeinsak cu kä zäi ci. 12 Nangmi cu nami m'theithang thei khai ah a khin ah kia law pyi ci, cun ung phi nangmi cu Khanpughi ah thu ak tän nak ung tän ne, chang naw a ning theithang gui vai hlü ba laih laih ci nei. Nangmi cu buh nami ei vai khin law sei phi suuktui laih laih nami awk ci nei. 13 Suuk awk ci cu hta zät nau sen akni akshe kä hmuhmat phak ciah kiak ci. 14 Guh ciah buh ei ci cu ang vai pyi ah kiak ci, khrihta ak ni ak she bui aut ne m'khoi chaa thei pyi ciah kiak ci.
1 Cun ah kia sei mik mi cu, khrihta ah ng'tän nak a mawng ama gui cu hmuhmat zawp ne, thuuk ciah m'theithang nak ma lam ah mi hteit khai nei. Tän nak ah a mawng gui cu kami ning m'thein gui pyi ah kia sei, leng ne ng'thei ba vai kä hlü ci, kä bä ci cu nawng ne Khanpughi zum vai cu nami hmat pyi ah kiak ci. 2 Tui hnim nak ah mawng, kut taih ah mawng, sih nak ung kaa thawh ba ah mawng la ak hnu bäih ah m'khoichaa nak ah mawng gui cu ning m'thei gui pyi ah kiak ci. 3 Ma lam ah mi hteit khai nei! Cun cu Khanpughi naw ang zak hlü a om ung mik mi naw mi bi vai ah kiak ci nei. 4 Lam hma ne ami zum nak ng'phleng pyi ciah chang gui cu a i chaa ah ng'zu ba sak gui thei vai ang? Ngah mi cu Khanpughi ah akdei ung, khankho m'cümhnah nak phi m'nüm tu shäm u ne, Mumcha Theing phi gah man ci gui ah kiak ci. 5 Ngahmi cu Khanpughi ah Thu ani ah mawng la gawk lawk khai ah akhin ah hlüngtai nak gui cu hmat pyi ci gui ah kiak ci. 6 Cun ung phi, ngahmi cu zum nak ung lam hma pyi ci gui nei! Ngahmi cu kä ng'zu ba sak gui hlawt vai nei, a i ah kia sei ci ung ngahmi cu Khanpughi ah Htapa kutlam tung ung ngawm ba mä u ne, thui ng'aa sak ciah kiak ci gui nei. 7 A khin ung aa ciah kho aa naw m'hlawh sei, lo bik ci gui ah geit thawh sak ciah m'dek ni cu Khanpughi naw m'shumphyuk ci nei. 8 Cun ung phi cun ah m'dek cu m'ghaw la ng'hling bäng a thawh sak ah a kiak ung, mang vai ah kä kia ba ci kia sei, Khanpughi naw k'phyun ne mei awn m'khih ne m'di khai. 9 Cun ung phi teihpüi gui awi, cun ah thu pyein ung phi kami ning ngaih gep gui ci nei. Nangmi ung bä pi ciah m'shumphyuk nak om sei, hun nak nami khäm cu kami hmat ci nei. 10 Khanpughi cu käng kuktak ci. Ani naw nami bilawh la, nami m'hni nak ang dang vai ah cau tän ne tuhbäi ung khüt sei, krihta tumat nami ng'theithang nak tu cu küm hnih khai nei. 11 Keimi naw kami ng'zak hlü pi bäih cu, nangmi ak chang sing naw ak hnu baih aü gawk ung khüt khai ah, nami thawhlet nak cu, nami khän htek sak vai, cun ung nami ngaih u nak cu akcang ah dang lawk khai, ciah kiak ci. 12 Kä nami dam men vai, zum ne hnimgei nak awn, Khanpughi ahshaitaak nak gah ciah chang gui ah mäih ah nami om vai ah kami ng'za hlük ci nei. 13 Khanpughi naw Abraham-am shaitaak nak a peit zah ung a shaitaak bä bä ah bik khai ah ng'phyun ci. Cun ung amät ah hlüngtai pi ci a u kä om ci kia sei, amät ah ming awn ng'phyun ne pyein ci. 14 Khanpughi naw, Kei ah ka shaitaak cu, ka ning m'shumphuk khai, pyiing ne ka ning ng'shon sak khai, ä cik ci. 15 Abraham cu hniimgei ne om ne, Khanpughi ah shaitaak cu gah ci. 16 Chang tumat cu ang phyun ah a kiak ung, a mät ah hlüngtai pi ciah ming awn ng'phyun ci. Cun ah ng'phyun nak naw ng'cuhvah nak avan cu dim sak ci. 17 Khanpughi naw amä ah ng'bä nak kä am thawnghlai phung vai ah mawng cu, a shaitaak nak gah ciah chang gui ang hteiing ah m'dang gui hlük ci. Cun ah kia sei ng'phyun ne shai a taak ah kiak ci. 18 Shin ah shaitaak la ng'phyun nak cu, käng thawnghlai hlawt ci la Khanpughi ah hleeihlak nak kä om hlawt ciah amawng hnih ah kiak ci. Cun ah kia sei ani ung mi ng'zi ciah chang gui cu, ana peit gui ah ngaih u nak htek sei pan vai ah mi thamah lawk ci. 19 Cun ah ngaih u nak cu mik mi ah ghin nak ung lung hling ah mäih ah kia ci, cun cu ng'htei ne ng'kheing ne, khankho im kyong ah, ang cim nak pi säih ung gawk ci. 20 Taigü tung Melchizedek ah hnün ung ngoh ne, ang tüi ah Taigü tung ah kiak ciah Bawipa Jesuh cu, mik mi ah hmawk ah cun ah mang im ah lut pyi ci nei.
1 Shin ah Melchizedek cu Salem ghangpughang ah kia ne, ahlüngtai säih Khanpughi ah taigü ah kiak ci. Abraham naw ghangpughang paphli tu ne nüng ne a law ba ung, Melchizedek naw dou ne phyuhtheh nak pek ci. 2 Abraham naw agah avan ah bum ghaa bum ät cu pek ci. (Melchizedek ah aming cu Däng nakah Ghangpughang, ä ciah kiak ci. A i ah kia sei ci ung ani cu Salem ghangpughang ah kiak ci. Cun kawn ah Dimdeeih nak ah ghanpughangä ngah phi ming cik). 3 Melchizedek ah anu apa, apu api gui la, ang tüi nak, asih nak ah mawng gui cu, ca ung ami guk kä om ci. Ani cu Khanpughi ah Htapa ah mäih ah kia ne, ang tüi sei taigüpa ah kiak ci. 4 Mi pughi Abraham naw ng'tuk bi ne a gah ah bum ghaa bum ät a peit cu mi teng ung, ani a i hlawk ah hlüngtai ci, ci cu mi hmat khai nei. 5 Taigü kyong ah kiak ciah Levi pakhui shon gui naw, Abraham ah hta ng'shon, ami mät ah hta nau gui ah kiak ciah, Israel chang gui ah bum-gha bum ät cu, thukhän ah ng'shui ah, look hning ci gui nei. 6 Melchizedek cu Levi pakhui ah kä kiak ci, cun ung phi Khanpughi ah shaitaak gah ciah Abraham ah bum ghaa bum ät cu look ne, phyuhtheh nak pek ci nei. 7 Phyuhtheh nak pek ci cu, phyuhtheh nak gah ciah chang ah mä hlüngtai pi ci, ci cu ngaih khit vai kä om ci nei. 8 Taigü gui naw bum ghaa bum ät ami loh cu, si thei ciah chang gui naw ami loh ah kiak ci; cun ung phi Melchizedek naw a loh cu, cacim ah mäih ah ghing ci naw a loh ah kiak ci. 9 Abraham naw a peit cu, Levi naw Abraham ung a peit ah phi pyein hning vai kiak ci nei. 10 A i ah kia sei ci ung Abraham la Melchizedek ani ng'hmuh zah ung, Levi cu kä ng'tüi pha ne, Abraham ah pukhui ah om zah ciah pyein vai ah a kiak ah hmawk ah kiak ci nei. 11 Israel chang gui-am thukhän a peit gui zah ung, Levi pakhui taigü gui ung ng'zung ne a peit gui ah kia ci. Tuhbäi Levi pakhui taigü gui ah bilawh cu a kümbe vai sä ung, Aaron ah a hnün ung Melchizedek ah khui m'däng khai ah taigü ang dang lawvai kä hlü khai sä te. 12 Taigü pakhui ang thawng ah akiak ung thukhän phi ang thawng vai a hlü ah hmawk ah kiak ci. 13 Shin ah a mawng gui ung ami pyein ah Mi Bawipa läi cu, Levi pakhui taigü kyong ung kaa ah kä kiak ci, a pakhui hei ung kaa ah kiak ci. 14 Bawipa Judah pakhui ung ang tüi law cu ak dei ang dang ah kiak ci. Mose naw taigü gui ah mawng a pyein nak ung, Judah pakhui cu kä pyein man ci. 15 Melchizedek ah mäih ahei taigü dang law seä taigü ahei hei a om vai ah mawng ng'htei law pi ci. 16 Ani taigü ah a kiak law cu, chang ah thukhän thungzo awn ah kä kiak ci, käng pyii hlawt ciah ah ghin nak ah hlüngtai nak awn ah kiak ci. 17 Cacim theing ung, Nang cu Melchizedek ah hnün ung ngok ciah ang tüi ah Taigü ah na kiak khai, ä ciah mäih ah kiak ci. 18 Azan thukhän cu kä küm ne a kholä ah kia sei, ami nawng ah kiak ci. 19 Mose ah thukhän naw a i phi kä kümpäng sak hlawt ci. Tuhbäi mik mi cu bä pi ciah ngaih u nak mi gah pyii ci kia sei, cun ah ngaih u nak awn Khanpughi ah pei ah mi ng'et lawk ci. 20 Cun kawn ah phi Khanpughi ah phyun nak cu om ci. Ahei gui taigü ah ami kiak sang ung cun ah mäih phyun nak cu kä om man ci. 21 Cun ung phi cun ah phyun nak awn, Bawipa Jesuh Taigü ah a kiak law sang ung Khanpughi ah thu pyein cu; Bawipa naw küikyang ciah shaitaak nak bik ci, Cun cu kä ng'hlah püi ba düt khai; Nang cu ang tüi sei Taigü ah na kiak khai nei, ä ciah kiak ci. 22 Cun ah kä atäng nak awn Bawipa Jesuh cu bä pi ciah thukhän küikyan ciah kia lawk ci. 23 Cun kawn ah kä atäng nak cu; ahei taigü akda gui cu sik ci guiah kia ne, ami bi kä bi ba hlawt ci gui. 24 Cun ung phi Bawipa Jesuh cu ang tüi ghing ci kia ne, Taigü ah kia ne khuut abi cun phi ahei ah kut ung kä gawk hlawt ci. 25 Cun ah kia sei ani ah ang ming ung Khanpughi ah lawk ciah chang gui phung ang tüi sei hun gui ci. A i ah kia sei ci ung Bawipa cu cun ah chang gui ah hmawk ah Khanpughi ah ng'coi ng'pak khai ah, ang tüi ah a ghin ah hmawk ah kiak ci. 26 Cun ah kia sei Bawipa Jesuh cu mik mi ung hlü ci awn ng'mäi ciah Taigü Tung ah kiak ci. Ani cu theingcim ci, shetkat nak ani ung kä om ci. Ani cu shetkat nak ung kaa m'chah ne, khan mawpi ah a thawh ba sak ah kiak ci. 27 Ani cu ahei taigü tung gui awn kä täng ci, Amät ah cheishoh nak la chang hei gui ah cheishoh nak ah hmawk ah ak hnüüp tä sei küikyan nak vawihpeh vai kä hlü ci. A i ah kia sei ci ung amät naw amät apeit sang ung hnä ät ge ang bäng ah ang ap ah hmawk ah kiak ci. 28 Moses ah thukhän naw kä kümbe ciah chang gui cu, Taigü ah m'düih gui ci; cun ung phi thukhän a om kawn ah, ang tüi sei kümbe ciah Ahtapa cu Taigü Tung ah phyun ne m'düih ci.
1 Mi pyein nak ah mawng avan ung ak tung pi cu, mik im ung cun ah Taigü Tung a om pyi ah mawng ah kiak ci. Ani cu Khankho Ghangpughang ah Mang kiang k'pat lam ung ngok ci. 2 Bawipa cu a theingcim nak säih ung Taigü Tung ah kia ne bi bik ci, cun ah hmun cu chang ah cawh ah kä kiak ci, Khanpughi ah pian ah phung akcang ah kiak ci. 3 Taigü Tung phung cu Khanpughi am peit vai gui vawihpeh khai ah m'düih ah kiak ci. Cun ah kia sei mik mi ah Taigü Tung cun phi a vawihpeh vai tumat mat om khai ah kiak ci. 4 Ani cu m'dek khan ung a om ah a kiak ung taigü ah kä kia hlawt khai, a i ah kia sei ci ung, thukhän awn, peit vai gui cu, ap ciah taigü gui ami om pyii ah hmawk ah kiak ci. 5 Taigü gui ah bilawh nak cu khankho ah khawihnah nak ah a mäi ah ang hniim ah kiak ci. Mose ah bilawh gui cun phi a cun ah mäih ah kiak ci. Mose naw thukhän kho phung a cawh law vai ung, Khanpughi naw, M'htung khan ah ka ning m'hnuh ah mäih ah apäng avan cu küm hnih en ne, na pian vai nei, ä ci ne am cäi ah hmawk ah kiak ci. 6 Cun ung tuhbäi Khanpughi la ak chang gui ah ng'lak ung Bawipa Jesuh naw a pian ah thukhän cu, bä pi ciah shaitaak ung ng'zung ci kia ne, thukhän gui ah tah a bä pi ah mäih ah, Taigü ah kia ne Bawipa Jesuh ah bilawh gui cun phi, cun ah taigü gui ah bilawh gui ah mä bä pi ci nei. 7 Ak htük bäih ah thukhän ung cheishoh nak kä a om vai sä ung ak hnih nak thukhän kä hlü khai sä te. 8 Cun ung phi Khanpughi naw ak chang gui ah cheishoh nak hmuh netah; Judah chang gui la Israel chang gui ung, thukhän thai ka bi vai ah a khin cu gawk lawk ci nei. 9 Cun cu ami pupa gui Egypt kho ah kaa ami kut ung pang gui ne, Kak plawk ba gui sang ung, ka peit gui ah thukhän awn kä täng ba khai nei. Cun ung ka peit gui ah thukhän cu m'shet u sei, Ngahmi cu kei naw ka nawng gui ci, ä ci ne Bawipa naw pyein ci. 10 Ngawi ah Israel chang gui awn ka bi vai ah thukhän läi cu, Kei naw ka thukhän cu ngahmi ah m'lung ung thun ne, Ami m'lung ung ka guk khai. Kei cu ngahmi ah Khanpughi ah ka kiak khai, Ngahmi cu kei ah chang ah kiak khai gui. 11 A u chang naw phi amät ah pakhui chang la a im ng'gi lo ng'phei am, Khanpughi a hmat tu vai ah m'theithang vai kä hlü ba khai, Ak hmaw pi ung kaa, ang vai pi ung khüt sei, Chang avan naw kei cu na hmat khai gui nei. 12 Kei naw ami shetkat nak gui cu kam gein gui khai, Ngahmi naw ami cheishoh nak gui kä shäm ba khai gui, ä ci ne pyein ci. 13 Khanpughi naw cun ah thukhän thai ah mawng a pyein nak awn, ak htük ah thukhän cu kheei sak ciü cun ah kheei ci gui phung cu kä shou pha sei ng'kawn ne maih ci gui nei.
1 Ak htük ah thukhän ung khawihnah nak ah thumzo la chang ah pian ah khawihnah nak ah hmun hlü ci. 2 Khophung ah ama lam cu, piang hnga ne Hmun Theing, ä ci ne k'bäi ci gui. Cun ah kyong ah meidüi taih nak la Khanpughi am vawihpeh vai ah m'htut taih nak ah tawnglaai cu om ci. 3 A cun ah hnu lam zihdung awn shung nak, khophung ah ma bäih ah, AkTheing Säih Hmun, ä cu om ci. 4 A cun ah kyong ah ang ui gui mei awn ami m'khih nak ah ghui mangkiang la, ghui bäng awn pian ah Thukhän m'küm om ci. Cun ah m'Käm khui ah manna m'htut ah om nak ah ghui-am, lim ne hnah ciah Aaron ah ng'shopawng la thukhän gui guk ah lung k'paang hnih om ci. 5 Cun ah m'küm khan ah cherubim ah gup gui om u ne, cun gui naw cun ung Khanpughi a om ah mawng m'dang ci gui, ami ng'phiaa gui naw shetkat m'gein nak ah kiang cu küm ci gui. Tuhbäi cun gui apäh akheh ah pyein vai kä kiak ci nei. 6 Cun ah ami pian kawn ah taigü gui cu bi bik khai gui ah, phung ah ak caw lam ah ak hnüüp tä sei hteit ci gui. 7 Cun ung phi Taigü tung tumat bäng vah phung ah ak kyong ah vah lut ci. Ani cun ah aluh cun phi kum ät ung hngä ät ah kiak ci. Cun ah aluh ung amät ah hmawk la chang gui naw kä hmat ne ami cheishoh ah hmawk ah, khawihnah nak vai ah si cu hteh püi ci ci. 8 Shin ah a mawng ung Mumcha Theing naw ang dang ah am theithang nak cu, ak pung ah phung a om ah chuih Hmun Theing Säih ah hteh nak vai ah lam kä ng'hmawng ci, ciah kiak ci. 9 Shin gui cu tuhchü tawk ne dang sak ciah amawng gui ah kiak ci. Cun cu peit taak nak la ghuthaa nak gui naw khawihnah ciah chang gui ah m'lung cu kä k'umbe sak hlawt ci ciah kiak ci. 10 Cun gui cu ei awk la theingcim nak ahlühlü bilawh nak gui ung phung ci. Shin gui cu ak pung lam m'hnütbäi nak gui ah kia ne, Khanpughi naw khokthai a pian nak kä phaa sei ng'pyi khai gui. 11 Cun ung phi Bawi Khrit cu om pyii ciah nikiom nak gui ah Taigütung ah kia ne gawk law pyii ci nei. Ani ah khuut bi nak ah phung cu hlüngtai ne kümbe pi ci nei; cun cu chang ah cawh ah kä kiak ci, atäi pian ah khomdek ung kaa ah kä kiak ci. 12 Bawi Khrit cu Hmun Theing Säih ah hnä ät ge ang bäng ah aluh sang ung, vawihpeh vai ah me ah si, sei ah si cu kä hteh püi ci; Amät ah si hlui cu hteh püi ne, mik mi ah ang tüi hun nak cu na pe gui ci. 13 Mesi seisi la seipat hta awn m'kümbawh ne phyuhtheh nak naw, kä theing cim ci gui ah kat nak cu, m'si ne, theingcim sak gui ciah a kiak ung, 14 Bawi Khrit ah si naw a i hlawk ah theingcim sak pi khai aw! Bawi Khrit naw ng'tüi ciah Mumcha awn amät cu, kat nak kä om ciah küikyan nak ah kia ne Khanpughi ah ng'ap pyii ci nei. Ani ah sihlui naw, alä däät ah kiak ciah mi m'lung ngaih cu na theingcim sak gui khai, cun ung mik mi naw ang tüi ghing ciah Khanpughi cu mi khawihnah khai nei. 15 Cun ah kia sei Khanpughi naw a khü ah chang gui naw, Khanpughi ah a shaitaak ah ang tüi m'shumphyuk nak ami gah vai ah, Bawi Khrit naw thukhän thai cu piang ci. Cun ah abi cu, ak htük ah thukhän ah kaa ah ami om sang ung chang gui ah ami cheishoh nak gui cu, phiawn khai ah, sih nak tumat a om ah hmawk ah kiak ci. 16 sih hnuthu ca küm khai ah guk ci cu, akcang ah si pyii ci ci cu, dang pyii ci nei. 17 Sih hnuthu cu guk ciah chang kä a sih phaa ung kä kümbe ci; cun cu asih kawn ah vah kümbe ci. 18 Cun ah kia sei ak htük bäih ah thukhän cun phi si awn ah kümbe nak om ci. 19 Akhtükbäih ung Mose naw thukhän om ci gui phung cu chang gui-am shäu ne m'thein gui ci. Cun kawn ah me ah si la sei ah si cu la ne tui awn k'caw netah, hissop singban la htomu a sen awn, thukhän cauk la chang gui cu k'peh gui ci. 20 Cun kawn ah Mose naw, shin ah si cu nangmi naw nami läk vai ah Khanpughi naw am hnüt ah thukhän cu, kümbe sak ci nei, ä cik ci. 21 Cun ah mäih ah Mose naw, thukhän phung la khawihnah nak ung mangca gui phung cu si awn k'peh yawp ci. 22 Akcang ah thukhän ah pyein ah, apäng avan cu si awn vah theingcim ci. Si huk nak awn cheishoh nak cu phiawng hlawt ci. 23 A shin ah mawnglam awn khankho ung phungpawng ciah amäi gui cu theingcim sak ah kiak ci. Khankho mäi gui theingcim nak sak ung küikyang pi ciah küikyan nak cu bi vai kiak ci. 24 Bawi Khrit cu Hmun Theing akcang ah mäi ah chang ah pian ah Hmun Theing ung kä lut ci. Ani cu Khankho akcang ung lut ne, tuhbäi mik mi ah hmawk ah Khanpughi ah ma ah gawk ci nei. 25 Jew chang gui ah Taigü Tung cu, a kum tä sei, sei me gui ah si hteh püi ne, Hmun Theing Säih pi ung hteit ci ci. Cun ung phi Bawi Khrit läi cu ng'ap khai ah akda vei kä lut ci. 26 Akda vei lut khai ah akiak vai sä ung Khanpughi naw kho akhan atäi pian ung tän ne akda vei sih nak aut khai sä ah kiak ci. Tuhbäi kho a khüt law vai khin ung ang bäng ge ah hnä ät kium law ne, a hnun gui pe ne, cheishoh nak cu nawtpet zawp pyii ci. 27 Chang cu hnä ät bäng si ne, cun kawn ah Khanpughi ah m'khawichaa nak cu gah ci. 28 A cun ah mäih ah Bawi Khrit cun phi, chang gui ah cheishoh nak phiawn khai ah, hnä ät bäng küikyan ne ng'ap ci. Ani cu cheishoh nak nawt täm ba khai ah kä kiak ciah, ngäng ci gui ah chang gui hun gui khai ah ak hnih vei nak ah kyum law ba khai nei.
1 Jew thukhän gui cu be ci la bekhüt ciah akcang gui ah kä kiak ci; gawk lawk khai ah nikiom nak gui ah päpäi gui ah kiak ci. Thukhän ah ci ah akum tüi sei küikyan nak cu bi ah kiak ci. Cun ung a i hawkcha ah thukhän naw, Khanpughi ah lawk ciah chang gui cu, kümbe sak gui khai aw? 2 A vai sä ah Khanpughi khawihnah ciah chang gui ah ami cheishoh nak cu, thukhän naw akcang ah theing cim sak ciah a kiak ung, cun ah chang gui naw ngahmi ung cheishoh nak kä om ba ciah ngai u ne, küikyan nak kä bi ba khai gui ah kiak ci. 3 Cun ah a kum tä sei küikyan nak vai ami bi nak naw chang gui ah cheishoh nak cu m'shüm thein ba gui ci. 4 A i ah kia sei ci ung sei ah si la me ah si naw cheishoh nak cu kä nawtpet hlawt ci nei. 5 Cun ah kia sei Bawi Khrit naw khomdek khan ung a kyum law sangung Khanpughi ah ma ah; Nang naw küikyan ghutha nak la peittaak nak cu kä na ng'za hlük ci nei, Cung ung phi kei ah hmawk ah pumsa nam hnüt pyii ci nei. 6 äNang naw sei me awn m'khih ne ghuthaa nak la Zo kyaang ung vawihpeh nak awn cheishoh nak nawtpet ci cu kä nam hni ci nei. 7 Cun ah kia sei thukhän ung kei ah mawng ami guk ah mäih ah, O Khanpughi, Na ng'zak hlü ka bik khai ah, shin ung ka om ci nei, ci ne ka pyein ci, ä ciah kiak ci. 8 Akhtük bäih ah Bawipa naw, Ghuthaa nak, peittaak nak, sei me m'khih ne kiang ung vawihpeh nak gui la cheishoh nak gui cu ghuthaa nak awn nawtpet nei, ci gui cu, thukhän ah ng'shui ah bi ah kia pang sei phi, Khanpughi naw kä am hni, kä ang zak hlü ah kiakci nei. 9 Cun kawn ah ani naw, O Khanpughi nang zak hlü ka bik khai ah, shin ung ka om ci nei, ä ci ne pyein ci. Cun ah kia sei Khanpughi naw, cäu ghuthaa nak man gui phung ghu shüt netah, Bawi Khrit naw ng'ap ne a küikyan nak awn am thon ah kiak ci. 10 Bawipa Jesuh Khrit naw Khanpughi ah ang zak hlü läk ne, amät ah pumsa cu, ang bäng ge ah ap ne a peit ah kia sei, mik mi cu theingcim nak mi gah ci. 11 Jew taigü pängpäng naw ak hnüüp tä sei, apeitaak vai la am ghuthaa vawihpeh vai cu bik ci; cun ung phi cun ah ghuthaa nak naw cheishoh nak cu kä nawtpet hlawt ci. 12 Cun ung phi Bawi Khrit naw hnä ät ang bängah küikyan nak bi ne, cheishoh nak cu nawtpet ci. Hta ng'shon ung ng'tüi ciah ng'ap nak phi bik ci, cun kawn ah Khanpughi ah k'pat lam ung kai ne ngok ci. 13 A cun ung agaa gui avan a kho kaa ah, Khanpughi naw a gawk sak güt ung ngäng ci nei. 14 Hnä ät ang bäng ah a küikyan nak awn, theingcim nak gah ci gui cu, ang tüi sei kümbe sak gui ci. 15 Cun kawn ah Mumcha Theing naw phi saksi ana peit nak gui ung ak htükbäih ah, 16 äBawipa naw, Shin cu lawk ciah kho hnüüp ung ngahmi awn shaitaak nak ka bi vai kiak ci nei; Kang thukhän cu ami m'sin ung chum ne, Ami m'lung ung ca awn ka guk khai nei, ä ci ne pyein ci. 17 Cun kawn ah Bawipa naw, Ngahmi ah cheishoh nak la shetkat nak gui phung cu kä ka shümba khai nei, ä ci ne pyein ci. 18 Cun ah cheishoh nak ung kaa, m'geinsei nak a om kawn ah, cheishoh ah hmawk ah ghuthaa vawihpeh vai cu kä hlü ba ci nei. 19 Cun ah kia sei ka phäinau gui aw, Bawipa Jesuh a sih nak awn mik mi cu kümbe ciah pängze ne Hmun Theing Säih ung mi gawk ci. 20 Bawipa naw amät ah pumsa ah kiak ciah zihdung cu lim ne, lam thai, ghin nak ah lam cu nak hmawn pe gui ci. 21 Mik mi ung Khanpughi ah mang im uk ciah küikyang ciah taigü om ci. 22 Cun ah kia sei mik mi cu mi m'lung ngaih theingcim sak ne, mi pumsa tuikci awn m'si netah, ng'cim ciah m'lung, ng'htei ciah zum nak awn, Khanpughi ah pei ah ming et khai nei. 23 Mik mi cu Khanpughi ah shaitaak kutshum ne mi ng'ap hning pyi ciah kia sei, mi zum la mi ngaih u nak cu khäng khai ah mi kut shum khai nei. 24 Mik mi cu tumat la tumat mi ng'tengkhen tu u neh, mi ng'hteihtang tu u neh, mi ng'zumhni tu u ne, ni kiom ne mi om khai nei. 25 Mi ng'hmuhteng kyumbom nak cu chang m'shah gui ah mäih ah kä mi nawng nüt ten neh, tumat la tumat k'thamah nak ming pe tuk khai, nami hmat ah mäih ah Bawipa ah Hnüüp phi ng'et law pi ci kia sei, tha ng'pe tu ne mi om khai nei. 26 Mik mi cu düng nak mi hmat kawn ah a guih ah mi cheishoh ba ah a kiak ung kat nak küikyan nak vai a i kä om ba khai nei. 27 Mik mi naw m'khoichaa nak la Khanpughi hnungtuk püi ciah chang gui m'khih gui khai ah meiksam cu kyih en väih väih ne mi ngäng khai ah kiak ci nei. 28 Mose ah thukhän kä läk ciah chang tumat cu hnih thum saksi sei, akat nak ang dang ah a kiak ung, m'gein nak kä om sei sih nak pek ci gui nei. 29 Khanpughi ah Htapa cu päipih ne, kat nak theing sak ne Khanpughi ah thukhän thai ah kiak ciah si ng'hlui cu gaih m'gin ne, m'gein nak m'kyum lawk ciah Mumcha shetkat nak ci naw, a i hlawk ah nuipai ciah shetkat nak gah khai ci cu nami ngaihtüh shäm vai nei. 30 äKei naw phu phi ka tuk khai, pu phi ka thung khai, ci ne, Khanpughi naw ak chang gui cu m'khoicha gui khai nei, ciah Bawipa cu mi hmat ci nei. 31 Ghin ciah Khanpughi ah kut khui ung kyumkiak cu kyihkyawk aih vai ah kiak ci nei. 32 Zan ä kho hnüüp gui cu ngai ne shäm ba vä, cun zah ung nangmi cu Khanpughi ah ak dei nami hmuh kawn ah zaica nak akda nami gah ung phi, cun naw kä ning m'dimshum gui hlawt ci. 33 Nangmi cu chang ah ma ah päipih shedam nak nami gah ci, cun ung phi päipih shedam nak gah lawk ci a om ung nami m'gein tuk ci. 34 Nangmi naw thawng ung cum ci gui cu nami chimgein ci, nami khawhcham avan ami ning khäm peit gui ung phi zei ne nami om düt ci, a i ah kia sei ci ung nangmi ung cun ah khawh chaam gui ahtah küikyang pi ne, käng pyii hlawt ciah khawh a om cu nami hmat ah hmawk ah kiak ci. 35 Cun ah kia sei khüighaat ne om vä, cun ung m'cümhnah nak ak bä pi nami gah khai. 36 Khanpughi ah ang zaak hlü bi hning vai la a shaaitaak gah hning vai ah hnimgei ne om vä. 37 Cacim theing ung; Kä shou pha sei kium lawk khai ah Bawipa cu lawk khai nei; Ani cu kä shokshä khai nei. 38 Ng'däng ciah kakchang gui cu zum ne ghing khai gui nei; Cung ung phi ng'hlat ba ciah chang läi cu, kei naw kä ka zei nak khai nei, ä ciah om ci. 39 Mik mi cu hnu ah ng'hlat ba ne chükmaih ciah chang ah kä mi kiak ci, zum ne hun nak gah ciah mi kiak ci.
1 Zum nak ci cu ngaih u nak gui akcang ah dang lawk khai, kä hmuh hning gui akcang om ci gui, ciah ngaih gep nak ah kiak ci. 2 Cau chang gui cu ami zum nak awn Khanpughi am tamkhah nak gah man ci gui. 3 Kä hmuh hning ung kaa naw hmuh hning ah dang lawk khai ah Khanpughi naw ang thukäi awn Khopuui atäisho cu, zum nak awn mi hmat ah kiak ci. 4 Abelah naw Kain ah mä bä pi khai ah pe ne akhawihnah cu a zum nak awn ah kiak ci. A zum nak awn ani cu Khanpughi naw chang düng ah k'bäi ci, ä i ah kia sei ci ung Khanpughi naw ani ah khawihnah nak cu zei ne adou ah hmawk ah kiak ci. Abelah cu asih tu pang ung phi a zum nak awn tuhgüt thu pyein ci. 5 Khanpughi naw Enok akghing ah a kai püi cu, a zum nak awn ah kiak ci. Ani cu Khanpughi naw akghing ah akai püi ah kia ne a u naw shui ne kä hmu ba ci. Khankho ah kä a kai pha ung Enok cu Khanpughi naw zei na aih ci, ciah cacim theing ung om ci. 6 Zum nak kä om ci naw Khanpughi kä zei nak ci. Khanpughi om ci, ci ne Khanpughi shui ci naw m'cümhnah nak gah ci. 7 A ngawi ah gawk lawk khai ah kä hmu hning ah a mawng gui, Khanpughi naw khän ne am cäi nak Noah naw ang zak cu a zum nak awn ah kiak ci. Ani naw Khanpughi ah thu ngai ne amät ah kiong khui ah phiawn nak ah hteinpaw im cu co ci. Cun ah khomdek chang gui ah shetkat nak cu dang sak ne, ani cu a yum nak awn Khanpughi ung düng nak cu gah ci. 8 Abraham naw Khanpughi ah khü i ne ang htukhä nak ah kho ah, düi ne a hteh cu a zum nak awn ah kiak ci. Ani cu a hawi ahteh vai kä hmat pang ne phi amät ah kho cu nawng shüt ci. 9 Ani cu Khanpughi ah shaitaak nak ah kho hei chang ah mäih ah a zum nak awn om tuk ci. Ani cu amät ah mäih ah Khanpughi ahshaitaak gah ciah Isaak la Jakob ah mäih ah phung tu ne om ci. 10 A i ah kia sei ci ung Khanpughi naw pawngpäi ne a cawhkyan ah hta ng'shon ung khäng ciah mang im cu ngaih u ne a ngäng ah hmawk ah kiak ci. 11 Abraham cu ghi law pyii ci, Sarah cun phi hta khai ah kä kia ba pyii ci, cun ung phi amät ah zum nak awn, Abraham cu ahta om sei pa ah kiak ci. Khanpughi cu a shaitaak ah mäih ah bekhüt ciah ani naw yum ci. 12 Abraham cu ak si ah mäih ah a kiak te ung phi, ani ah hta ng'shon gui cu, Khankho mik ah aisi chü ah mäih, tuinu kem ah käk khei tai vai ah laigin chü ah mäih ah da ci nei. 13 Cun ah chang gui ami van cu zum nak awn sik ci gui. Ngahmi cu Khanpughi ah shaitaak kä gah tuk ci gui, cun ung phi a shou nak ah kaa naw hmuh u ne ana dou tuk ci gui, ngahmi cu khomdek khan ung akho hei chang, geinvai chang ah ami kiak ah mawng cu ng'kiaa ne pyein ci gui. 14 Cun ah ng'kiaa ci ah chang gui cu, ami mät ah k'chaw vai ah kho shui hnga ci gui ah ng'dang ci nei. 15 Ngahmi cu ami nawng shüt ah kho kä vang ngaih tüh ba ling ci gui; cun ah kho ah ami hteh ba hlü ah a kiak ung phi hteit ba hning khai gui ah kiak ci. 16 Cun ung phi ngahmi cu cun ak kho ahtah bä pi ciah khankho ghui kho cu ngaih u ci gui ah kiak ci. Cun ah kia sei Khanpughi cu ami Khanpughi ah ami khü ah hmawk ah Khanpughi cu kä lä ng'aa ci, a i ah kia sei ci ung Ani naw ngahmi ah hmawk ah mang gaw cu a sak pyii ah kiak ci nei. 17 Khanpughi naw Abraham ah zum nak am nüm nak ung, Abraham naw ahta Issak küikyan nak ah a ap cu zum nak ah kiak ci. Abraham cu Khanpughi naw a shaitaak püi ah chang tumat ah a kiak ung phi, tumat bäng ah ahtapa cu ap ge khai ah pawng ci. 18 Khanpughi naw, Abraham, Kei naw shai ka taak ah nang ah hta shon cu, Issak ah ng'shon ah kiak khai nei, ä ci ne kiak nak ci. 19 Abraham naw, Issak cu sik nak ung kaa Khanpughi naw akcang ah thawh ba sak hning ci, ci cu akcang ah zum ci. Akcang ah pyein ung Issak cu sih nak ung kaa Abraham naw a gah ba ah pyein vai ah kia ci. 20 Issak naw Jacob la Isau-am ngawi ah kaa vai m'shumphyuk nak shaitaak a peit goi cu zum nak ah kiak ci. 21 Jacob naw a sih law vai ung Josef ah hta gui-am m'shumphyuk nak a peit gui cu zum nak ah kiak ci. Ani cu ang shopawng awn ng'däh netah Khanpughi cu khawihnah ci. 22 Josef naw asih law vai ung, Israel chang gui Egypt kho ah kaa ami phiawn law vai ah mawng pyein ne, apumsa ah a mawng a pyein cu a zum nak ah kiak ci. 23 Moses cu ami hta nak kawn ah cha thum ah kyong ung anu la apa naw ani thuh cu ani zum nak awn ah kiak ci. Ngahni naw kyom ciah ak hmawhta cu hmu ni netah, ghangpughang ah thu cu k'phleng vai ah kä kyik ci goi. 24 Moses naw ang vai law kawn ah ghangpughang ah hta hnumi ah hta ah kä ka kiak ci nei, ci ne a maa cu a zum nak awn ah kiak ci. 25 Ani naw shetkat nak ung a shäng ng'len ne om ah k'dam, Khanpughi ah chang gui awn atäng ah zaica nak gah cu bä pi khai ah ngai ci. 26 Messiah Bawipa ah hmawk ah lä ng'aa nak gah cu, Egypt kho ah khawcham avan ah tah bä pi ciah k'bäi ci, a i ah kia sei ci ung ani naw ngawi ah gah law vai ah m'cümhnah nak cu a hmuh ah hmawk ah kiak ci. 27 Moses naw ghangpughang ah m'lungshe nak cu kä kyih ne, Egypt kho ung kaa ang düih law ba cu, a zum nak awn ah kiak ci. Ani naw mik awn kä hmuh ah Khanpughi cu hmuk ciah mäih ah hnu ah ng'hlah ba vai cu maa khenggeng ci. 28 Ani naw phiawn nak ah pawi bi ne, m'kawt gui si awn ak peh sak gui cu a zum nak awn ah kiak ci, cun ah kia sei Israel chang gui ah ami hta htük gui cu, sih nak ah Khanchang naw kä ngawn gui ci. 29 Israel chang gui naw tuisen tuinu, kho kawng ah hteh ah mäih ah ami kah cu zum nak awn ah kiak ci. Cun ung phi Egypt chang gui naw, ami ak kah vä tu sangung ngahmi cu tuinu naw hteh gui zawp ci. 30 Israel chang gui naw Jericho gawnu, kho hnüüp chih ung 'khai u sei, ng'vong nak avan ng'gäi ne a kiak cu, ami zum nak awn ah kiak ci. 31 Hlawhhlangnu Rahab cu ng'däät ciah chang gui dou gui ne ang khawt püi gui ah hmawk ah, Khanpughi kä zum ci gui awn atäng ah kä a mi ngawn tu cu a zum nak awn ah kiak ci. 32 Kei naw k'täi ne ka pyein ba vai ang? Gidean, Barak, Samsan, Jephthah, David, Samuel la profet gui ah mawng ka pyein nak vai a khin kä ng'bäh ci nei. 33 Ngahmi cu ami zum nak awn kho ak khan avan ung tuk bi u ne, nüng nak gah ci gui. Ngahmi cu düng nak awn om u ne, Khanpughi ah ä shaitaak cu gah ci gui, kawng hlui ah shai phi m'ghu ci gui. 34 M'gäi ne lawk ciah mei k'hlaw phi m'dim ci gui, khim awn ami sih nak vai ung phi phiawng ci gui. Amik tha ken pang sei phi ak thagui k'ghaat ah mäih ah kiak ci gui, ng'tuk nak ung khüi ghaat u ne a kho hei ah gakap gui phi tu ne nüng ci gui. 35 Hnumi gui cun phi ami zum nak awn sih nak ung kaa ghing ba ciah ami pawchang gui cu gah ba ci gui. Am shah gui cu ng'pängze nak gui maa-en u ne, bä ci ciah ghin nak ung thawh ba vai ah, dukdei nak awn sih zawp ci gui. 36 Am shah gui cu k'shedam nak la tukthah nak gah ci gui, am shah gui cu m'si gui awn khit ne thawng ung ami chum gui ah kiak ci. 37 Ngahmi cu lung awn ami vawih gui, m'si awn ami m'chün gui, khim awn ami ngawn gui ah kiak ci. Ngahmi cu pyamthaam u ne, dukdei nak la m'lung ah geinvai nak gah u ne, htome la me ah vun suisak ci gui. 38 Khomdek khan cu ngahmi ah hmawk ah kä bä ci nei! Ngahmi cu khokhäu, kiang maa la kho m'htung zung ah geinvai chang ah mäih ah hteit shäi shäi u ne, lung khui m'dek khui ung va om väk ci gui. 39 Ngahmi cu ami zum nak awn m'hlüngtai nak gah ci gui. Cun ung phi ngahmi cu Khanpughi ah shaitaak kä gah tuk ci gui. 40 A i ah kia sei ci ung, Khanpughi naw mik mi ah hmawk ah bä ba pi ciah ng'bä nak am hnüt pyi ah hmawk ah kiak ci. Cun ah ang bä nak cu, cun ah chang gui mik mi awn mi kawng ät u ne, kümbe nak ung mi gawk vai ah hmawk ah kiak ci.
1 Mik mi ah hmawk ah saksi khai ah chang akda naw nak koi gui ci. Cun ah kia sei mik mi na tüihtook gui ci phung la na shum gui ne mik mi ung kawp ciah shetkat nak phung cu nawtpet netah malam ah ng'bä nak ung gawk vai ah k'tha nak cang ne mi dawng khai nei. ä 2 Tän nak ung kaa naw pyii nak ung khüt sei, mi zum nak ah ang zung ah kiak ciah Bawipa Jesuh cu ng'kheing sei mi teng khai nei. Ani cu kutlamtung ah mawng ung küm lung k'si phung ci, Bawipa cu ani ung gawk lawk khai ah zeikiai nak ah hmawk ah kutlam tung ung käng zocho phung ne sih nak aut netah Khanpughi ah mang kiang k'patlam ung ngok ci. 3 Chang shekhaa gui naw a i hlawk ah ami thüigen nak cu ngaih tüh u netah, käng zocho küm lungksi phung ne nami om vai nei. 4 Nangmi cu shet kat nak ung ng'tuk nami bi nak ung, sih nak ah m'lawi ung kä nami gawk pha hnga ci nei. 5 Khanpughi naw ahta ah ning k'hmoh gui ne, k'thamah nak pe ne a ning thu püi gui cu, nami m'hnih ei ci maa? Cun ah thu cu; Ka hta aw, Bawipa naw aning m'däng ung, Ngai ne na läk vai nei, A ning m'cäi ung kä na thüisei en vai nei, 6 A i ah kia sei ci ung, Bawipa naw am hni ah Chang phung cu m'däng ne, A hta ah k'bäi ne a dou phung cu M'kyuk ci nei, ä ciah kiak ci. 7 Zaica geinvai nak nami gah cu kami pa naw kami hma anam kyuk nak gui ah kiak ci, ciah nami zum vai nei, nami zaica geinvai nak naw, Khanpughi naw ahta ah aning k'bäi gui cu dang sak ci. A kat nak m'kyuk ne apa naw kä a m'cäi man ah hta a u om ne ang? 8 Nangmi cu ahta akcang ah nami kiak ci kia sei, kat m'kyuk ne m'cäi nak kä ah om ah a kiak ung, nangmi cu hta akcang ah kä nami kiak ci, hta ng'bah ah nami kiak ci. 9 Hnicim chang mi pa naw hma m'kyuk ne nam cäi gui sei, mik mi naw phi mik chang m'sui ci. Cun ah kia sei mumcha lam ung mi pa ah nam cäi nak gui läi cu ak tung pui ah ngai ne mi ghin püi vai ah kiak ci nei. 10 Akhin ak tawi hta ah kyong ung hnicim chang mi pa naw bä ciah ang ngaih ah nam cäi gui ci; Cun ung phi Khanpughi naw mik mi ah mi kiom nak vai hmawk ah amät ah mäih ah mi theingcim vai ah nam cäi gui ci. 11 Hma m'kyuk nak mi gah cu zeikiai vai ah kä kiak ci, thüisei vai ah kiak ci. Cun ung phi cun ah hma m'kyuk nak naw ang shung sak pyii ah chang cu chang k'ni ah kia ne dinggei ciah ghin nak gah ci nei. 12 Cun ah kiasei cääm ciah nami kut cu m'cän u ne, gho ciah nami m'khuuk cu khüi sak vä. 13 Däng ciah lam ung k'tha nah ne hteit vä, cun ung ng'khem ciah nami kho cu gai om khai nei. 14 Chang päng awn dimdeeih sei nami om vai ah k'tha nah vä, theing cim sei nami ghin vai phi k'tha nah vä, cun ah kä om ciah chang naw a u naw phi Bawipa cu kä hmuk khai nei. 15 Khanpughi ah chimgein nak cu a u naw Kä noi maa-en sä. Khak ciah sing naw am m tui awn chang akda cu zaica sak ci, a cun ah mäih ah a u phi kä ah kiak-en vai nei. 16 A u chang phi om k'she ne, mumcha kä cimvai ciah Esau ah mäih ah kä nami kiak-en vai, ani naw hta k'tak-hnga ah a kiak nak cu, ei m'ka ät ah zoi ci nei. 17 Nami hmat ah mäih ah, ani cu a ngawi ah apa ah m'shumphyuk nak cu ng'za ba hlük ci. Cun ung phi kä gah ba hlawt ci, a i ah kiasei ci ung, ani naw chei khai ah abi pyii, a pian nak ba vai ah lam cu, ang phli tui lut law sei shui ne phi kä hmu hlawt ci nei. 18 Nangmi cu Israel chang gui ah mäih ah tawnzap thei ah Sinai kho m'htung ung nami gawk ciah kä kiak ci. Cun ah m'htung cu mei m'lei tawt ne, kho m'than ne, puikho khi ne, 19 phyungheng tum k'aw la khankho k'aw ang thang law nak ah kiak ci. Chang gui naw cun nah k'aw ng'zah u netah, cun kawn ah kä ami ng'zak-en ba vai ah ng'coi ng'paa ci gui. 20 A i ah kiasei ci ung, Cun ah m'htung cu khisa naw phi a tawn ah a kiak ung lung awn vawi ne ngawn vai, ä ciah thukhän cu ami kyih ah hmawk ah kiak ci. 21 Cun ah hmuh teng gui cu ang htei ah cäicat vai kia khütah, Moses naw, Kei cu ng'khlet ne ka kyik ci nei, ä ci ne pyein ci. 22 Cun nak vaisä ung nangmi cu Zion m'htung la ang tüi ghing ciah Khanpughi ah mang gaw, Khankho Jerusalem, kä khei tai vai ah khanchang gui ah om nak ah nami gawk ci nei. 23 Nangmi cu Khankho ah ang ming ami guk ah Khanpughi ah hta ak tahnga gui ami ng'bum nak ah zeikiai ne nami gawk pyii ci nei. Nangmi cu hnicim chang avan m'khoichak ciah Khanpughi la kümbe ciah chang gui ah mumcha gui ah om nak ah nami gawk pyii ci nei. 24 Nangmi cu thukhän k'thai piang ciah ah Bawipa Jesuh la Abelah ah si ah mä bä pi ciah shaitaak nak om ciah si ng'hlui ah ng'peh nak ung nami gawk pyii ci nei. 25 Nangmi cu thu k'aw ng'zak vai noi mak ciah chang ah kä nami kiak vai ah nami geing nak vai nei. Khomdek khan ung khankho thu ngaih zak vai ah mak ciah chang gui cu kä phiawng ci gui nei. Cun ah kiasei mik mi naw Khankho ah kaa ng'thu pyein lawk ci cu, mi hnu nak ah a kiak ung a i ung phi kä mi phiawng hlawt khai nei. 26 Cun sang ung Khanpughi ah ng'thu naw khomdek cu thäng sak ci nei. Cun bäng ah kä kiak ciah, tuk bäi, Bawipa naw, Kei naw hnä ät mä, khomdek bäng ah kä kia ciah, khankho phi ka thäng sak khai nei, ä ci ne shai a taak om ci. 27 äHnä ät mä, ä ciah thu m'kha naw ang dang sak cu, a tüi sho gui avan ng'tum sei thäng sak gui netah, m'hnawng gui khai, cun ung kä thäk tuk ci gui cu k'pawih shüt khai gui, ciah kiak ci. 28 Mik mi cu kä thäng hlawt ciah uk nak kho mi gah pyii ciah kia sei, Khanpughi mi m'hlüngtai khai nei. Mik mi naw kyih aa nak la m'tamkhah nak awn, Khanpughi cu mi khawihnah khai nei. 29 A i ah kiasei ci ung mik mi ah Khanpughi cu m'khih ne ui ciah mei akcang ah kiak ci nei.
1 Krihta ah kia ne tumat la tumat nami zumhni tu vai nei. 2 Nami im kyong ah khin nami m'kai vai cu nami shäm vai nei. Cun ah khin m'htei ci gui cun naw kä ami hmat ah khankho chang cu khin nak ci gui nei. 3 Thawng kium ci gui cu ngahmi awn atäng ah thawng nami kium tuk ciah mäih ah ngai ne nami shäm gui vai nei. Zaica geinvai ci gui cu ngahmi awn atäng ah zaica geinvai ah mäih ah ngai ne, nami shäm gui vai nei. 4 Chungla nak cu chang avan naw ahtingling ah ang ngaih vai nei, Chu la cei cu tumat la tumat bekhüt ne ani om vai. Khanpughi naw cheishoh ci la hlawhlang ciah chang gui cu zuk m'khoichaa gui khai nei. 5 Ngui ng'za hlü aih ne kä nami ghin vai, nami mät ung om ci awn nami ng'bäh vai. A i ah kiasei ci ung Khanpughi naw, Kei naw nang cu kä ka ning hteh ta phung khai, kä ka ning nawng phung khai, ä ci ne a pyein ah hmawk ah kiak ci. 6 Cun ah kia sei, Bawipa cu kei nam htei ciah Bawi ah kiak ci, Kei cu kä ka kyikyawk khai. A u naw kei ah khan ah a i bi hlawt khai ang? 7 Khanpughi ah ng'thu ning m'thein law gui te ciah nami ng'vai gui cu, nami shäm gui vai nei. Ami ghin nak la ami sik nak cu vang ngai ba u netah, ami zum nak cu nami thei leh gui vai nei. 8 Bawipa Jesuh Khrit cu zanta, tuhngawi, ngawi zä, käng khukhlat phung ci. 9 Lam ng'düng ung kaa lam hma vai ah a hlü hlä ah ami m'theithang nak cu kä nami läk-en vai nei. Ei ei vai ah mawng läk nak vai ah thukhän ah kä kiak ciah, Khanpughi ah m'gein nak awn gah ah thamah nak cu bä ci; a cun ah thukhän läk ciah chang gui cu a i sang ung phi kä bä hlawt ci gui. 10 Khawihnah nak ah Jew chang gui ah kho phung ung bi bik ciah Taigü gui naw, mik mi ah ng'zokiang ung sonkiän phung api ah phi kä ei hning ci gui nei. 11 äJew chang gui ah Taigü Tung naw, sei me gui ah asi gui cu cheishoh nak küikyan nak vai ah, a Theingcim nak pi Säih ah a law püi ung phi; sei me gui ah pum cu phung ah ak pung ah mei awn m'khih ci ci gui. 12 Cun ah kia sei Bawipa Jesuh Khrit cu a si ng'hlui awn chang gui ah, cheishoh nak m'si khai ah, mang gaw ah k'pung ah sik nak aut ci. 13 Cun ah kiasei mik mi cun phi gaw ah k'pung ah hteit ne, Bawipa ah lä ng'aa nak cu, mi ng'pai tuk khai nei. 14 A i ah kia sei ci ung mik mi ah hmawk ah khomdek khan ung ng'tüi hnga ciah mang gaw kä om ci; ngawi ah dang lawk khai ah mang gaw cu mi shui shäi zah ci nei. 15 Cun ah kia sei mik mi naw Bawipa Jesuh cu, Bawipa nei ciah ng'kiaa nak ah m'gawng awn, ani ah ming ung mi m'kümto nak cu ang tüi sei Khanpughi am mi ap khai nei. 16 Akni bi vai lah tumat la tumat ng'hteihtang tu vai cu kä nami m'hnih-en vai nei, cun gui cu Khanpughi naw ng'zak hlü ah vawihpeh nak ah kiak ci nei. 17 Nami ng'vaihta gui ah ng'thu cu ngai u ne ami pyein ah nami om vai nei. Ngahmi naw ami bi lawh cu Khanpughi-am m'thein ba khai gui kia sei, kä ng'däm phung ne nangmi cu ning m'htei gui ci gui nei. Nangmi mi naw ami ng'thu cu nami ngaih ah akiak ung ngahmi cu zeikiai ne bilo khai gui nei, Kä nami ngaih ah a kiak ung ngahmi cu thüisei u sei, nangmi ah hmawk ah a i phi a bä nak kä om khai nei. 18 Keimi ah hmawk ah ang tüi sei nami taigü vai nei. Keimi naw kami m'Lung kyong theingcim ciah akcang ah kami hmat ci. A i ah kia sei ci ung keimi cu ang tüi sei ng'düng ci bäng kami bi nak hlü ah hmawk ah kiak ci. 19 Khanpughi naw kä shou pha sei, kei cu nangmi ah om nak ah, ana tüih law vai ah nami taigü vai ah ka ning m'cäi gui ci nei. 20 Sih nak ung khüt sei ng'ap ne, ng'tüi ciah thukhän m'hnüt ne k'bäi ciah Htoshüm Bawi ah kiak ciah, Bawipa Jesuh cu Khanpughi naw, sih nak ung kaa thawh ba sak pyi ci nei. 21 Nangmi naw dimdeeih nak ah Bawi, Khanpughi ah ang zak hlü nami läk nak hning vai ah, nik ci phung avan ning m'shumphyuk gui sä. Bawipa naw a mät ah ng'zak hlü ah mäih ah mik mi cu, Bawipa Jesuh Khrit awn na piangtham gui sä. Bawi Khrit cu Ngawizä ang'tüi sei Bawi mang ne om sä, Amen. 22 Phäi nau gui aw, shin ah k'tha peit nak cu hnimgei ne nami ngaih vai ah ka ning paa nah gui ci nei. Tuhbäi ca ka ning guk law gui cu kä ng'sau aih hnga ci nei. 23 Mi nau Timothi cu thawng ung kaa phiawng law pyii ci nei ciah ka ning hmat sak gui hlük ci nei. Ani cu agawk law zät ah a kiak ung, nangmi awn ming hmuk khai ah ka law ung, ka khah law püi khai nei. 24 Nami ng'vai gui la Khanpughi ah chang gui avan cu kami zavaih nah gui ci nei. Itali ah kaa phäi nau gui naw phi ning zavaih nah gui ci gui nei. 25 Khanpughi ah chimgein nak cu nami van ah khan ah om sä.
1 Kei James, Khanpughi la Bawipa Jesuh Khrit ah chang shäm naw, khomdek khan avan ung om ci gui ah Khanpughi ah chang gui-am, zeikiai nak thu ka ning m'khäh gui ci nei. 2 Ka phäi nau gui aw, nami lam ung tüihtok nak a hlühlü a gawk law ung, zeikiai nak vai nei, ciah nami zum vai. 3 Cun ah mäih tüihtok nak cu zum nak awn m'khüt nüng kawn ah khüighaat ne thamah nak cu dang lawk ci, ci cu nami hmat ci nei. 4 Nami khüighaat nak naw, zu kiak nak kä om khai ah, ning chaang gui sei, ng'laklo nak kä om ne, nangmi cu küm nak la be nak awn nami om khai nei. 5 Nangmi ung chang tumat mat cu cäivai nak ang laklo ah a kiak ung Khanpughi ah taigü sä, Khanpughi naw cäivai nak pek khai nei; a i ah kia sei ci ung, Khanpughi naw ng'khai ne pek ci, chang van-am ng'khai ne pek ci. 6 Cun ung phi nami taigü ung zum nak awn ngaih kä pai ne nami taigü vai. Ang ngaih pai ci cu kho naw khi sei ng'hnawk ciah tui hnawk ah mäih ah kiak ci. 7 Cun ah mäih ah chang cu, am lung pai ci, a i kä phupit kaizawih thei ciah changah kia ne Bawipa ah ang zoih cu gah khai ah kä ang ngaih en vai nei. 9 Pyamtham ciah khritha tumat cu Khanpughi naw a zu chaan tu ah a kiak ung zeikiai sä, 10 bühmang ciah khritha tumat cu Khanpughi naw a zuk neim sak ung zei kiai sä. Bähmang ci gui cu cheipai ah mäih ah thuum ne ng'kawn khai gui nei. 11 Hni liing naw aghing cu chawng sak ne, apai cu kiawi sak ci, cun ah kia sei akiom nak cu dimaih ci. Acun ah mäih ah bühmang ciah chang cu, amät ah bi abi zah chung ung dimaih nak om khai nei. 12 Tüihtok nak om pang sei phi bekhüt ciah chang cu, zeikiai nak om ci, a i ah kia sei ci ung cun ah mäih m'nüm nak nüng ciah chang cu Khanpughi naw, m'hni ciah chang ah khan ah a shaitaak ah, ghin nak ah m'cümhnah cu gah khai nei. 13 Chang tumat cu, cun ah mäih tüihtok nak a aut law ah a kiak ung, Khanpughi ah tüihtok nak nei, ä ci ne kä a pyein-en vai. Akshe naw Khanpughi cu kä tüihtok hlawt ci, Khanpughi amät phi a u kä tüihtok ci. 14 Cun ung phi chang tumat tüihtok nak a gah nak cu, amät ah shekak ciah ang zak hlü nak lam ah a läk nak ah kiak ci. 15 Cun ah shekak ciah ng'zak hlü nak cu tüisho law ne cheishoh nak cun phi däm ng'vai law ne, sih nak ah hta lawk ci. 16 Ka phäi nau gui aw, kä nami ng'laklo-en vai nei! 17 Nikiom ciah m'shumphyuk nak la kümbe ciah m'cümhnah nak cu, khankho ah kaa lawk ci; Cun cu käng khukhlat ci, hmüp nak kä law püi ci, khankho dei tüisho ciah Khanpughi ung kaa lawä ciaü kia ci. 18 Khanpughi naw amät ah ng'zak hlü ah, ang thudäng awn chang ghing ah nang dang sak gui ci, cun ah kia sei mik mi cu a tüisho gui nüng ung ak bä pi ah mi kiak ci. 19 Phäi nau gui aw! nami shäm ba vai cu, ngaihzak nak ung nami zangkhai vai nei, ng'pyeinsak nak la m'lung she nak läi ung, nami shokshä vai nei. 20 Chang ah m'lung she nak naw, Khanpughi ah düng nak kä m'däng thei ci. 21 Cun ah kia sei, kä nik ciah om ih la shekak ciah hnünthawh nak cu nami ng'cim sak vai nei. Khanpughi cu dou ne, Khanpughi naw nami m'lung kyong ah a geit ah thu cu nami kutshum vai, acun naw nangmi cu ning hun gui hning ci. 22 Thucim nami ngaihzak nak tu düt awn kä nami hleeihlak-en vai nei; cun ah thu cu akcang ah nami mang thei vai nei. 23 Thucim cu ngaizak tu netah akcang ah dang khai ah kä mang ciah chang cu, hman ung a mäi teng netah, a mäi bäbä hmuk ciah chang awn täng ci. 24 Hman a teng zah ung amäi kiom ciah ngai ci, cun ung phi, a hei ah a hteh ba kawn ah amäi cu kä shäm ba ci. 25 Cun ung phi chang gui phiawn sak gui ne, kümbe ciah thukhän cu tengkhen ne ngaizak ciah chang cu, ngai tu netah m'hnih ba düt ciah kä kia ne, akcang ah mang thei ciah kia sei; cun ah chang cu abilawh nak päng ung Khanpughi naw m'shumphyuk khai nei. 26 Chang tumat cu amät naw amät azum nak om ciah a pyein ung phi, am gawng kä ah khäm ah a kiak ung, azum nak cu akholä ah kia ne, amät naw amät m'hleei ciah kiak ci. 27 Pa Khanpughi ah ma ah theing ne ciim ciah azum nak om ciah chang cu; geinvai ciah hmeihta nausen gui la hmeinu gui cu, m'theithang ne, m'dekhan shetkat nak gui phiawn nak vai ah, ahtingling ah om ciah chang ah kiak ci.
1 Phäi nau gui aw, nangmi cu Bämang ciah Bawipa Jesuh Khrit cu nami zum ciah kia sei, chang ah zodäm pyam mang teng ne kä nami om ih vai nei. 2 A vaisä ah nami ng'bum nak ung, bühmang ciah chang tumat cu ghui shawi awi ne sui k'ni sui ne law tuk khai; pyamtham ciah chang tumat cu, sui she sui ne law tuk khai; 3 Nangmi naw sui k'ni sui ne lawk ci cu chang m'sui u ne, ngoh nak nami nam hnawn khai; sui she sui ne lawk ci cu a cän ung düi , kä cun ung kami kho pei ah ngoh law , ä ci ne nami kiak nak ung, 4 nangmi cu chang khinkhawn ne, akshe nami m'lung ngai ciah kä kiak khai aw! 5 Ngai vä phäi nau gui aw! Khanpughi naw ani m'hni ci gui ah khan ah a shaitaak ah mäih ah, zum nak ung bühmang vai la Khanpughi ah uk nak kho khäm vai ah, pyamtham ci gui cu, ghü gui ci nei. 6 Cun ung phi nangmi naw pyamtham ci cu chang ah kä nami ngai ci, bühmang ci gui naw nangmi cu ning zoshe na gui u ne, zung ah m'kawt mang ah khlaak ung ning hteh püi gui ciah kä kia ne ang? 7 Ngahmi cu nangmi naw nami dou ah ming k'ni cu sawngkhei ci gui nei. 8 Khanpughi ah uk nak ah thukhän cu nami läk ciah a kiak ung düng ci cu nami bi vai nei; Cun ah thukhän cacim ung om ci cu; Na chang paw cu na mät awn m'täng ne nam hni vai nei, ä ciah kiak ci. 9 Cun ung phi chang ah zodäm düt nami teng ah a kiak ung, cheishoh nak nami bik ci kia ne, thukhän nami m'shet ah phäh ah m'khoichaa nak nami gah khai nei. 10 Thukhän tumat m'shet ciah chang cu thukhän avan m'shet ciah kiak ci nei. 11 äChang ah chu hta kä kat püi vai, ä ciah thukhän cu pe ne, Chang kä ngawn vai, ä ciah thukhän phi a peit ah kiak ci. Chang ah chu hta kä nami kat püi ung phi, chang nami ngawn ah a kiak ung, thukhän nami m'shet ciah kiak ci. 12 Cun ah kia sei phiawn nak ah thukhän awn, m'khoichaa nak gah khai gui ah, chang gui ah mäih ah, nami om ih vai nei. 13 Chimgein nak kä om te ciah chang ah khan ah, Khanpughi naw m'khoichaa nak abi hnüüp ung, chimgein nak kä m'dang khai nei, Cun ung phi m'khoichaa nak ah khan ah chimgein nak ah m'khütnäng nak om ci nei. 14 Chang tumat cu ka zum ci nei, ci ne thu akni ah a pyein ung phi a hnünthawh nak ung kä ang dang ung, bä tuk khai ang? Cun ah zum nak naw ani hun hning khai ang? 15 Sui vai, ei vai kä om ciah phäi hta, pai hta gui cu; 16 äKhanpughi ning m'shumphyuk gui sä, awh ci sui ne, phä ne ei vä, ä ci ne akni ah thu püi gui düt ne, a i kä peit taak gui ung, bä khai ang? 17 Zum nak cun phi a cun ah mäih kiak ci, hnünthawh bilawh nak ung kä dang ciah zum nak cu ak si ah kiak ci. 18 Cun ung phi chang tumat mat naw, Chang tumat ung zum nak om ci, ahei tumat ung hnünthawh nak om ci, ä ci ne, a kiak law ung, Kei naw Hnänthawh nak kä om ciah zum nak cu nam hnuh vä, kei naw ka hnünthawh nak awn ka zum nak cu ka ning m'hnuh gui khai nei, ä ci ne ka pyein khai. 19 Khanpughi tumat bäng om ciah nami zum ci, bä ci! Khoshe gui naw phi a cun ah zum ne, kyi ne ng'khlet ci gui. 20 Chang k'aang aw! Hnänthawh nak kä om ciah zum nak cu akholä ah a kiak ah mawng na hmat hlük ci ang? 21 Mi pughi Abraham naw Khanpughi ung düng nak cu a i hawkchaa ah ang a gah tu? Ani naw ahtapa Isaak cu kiang ung taih ne a khawihnah nak ah, a hnünthawh nak awn ah kiak ci nei. 22 A zum nak la a hnünthawh nak ang cawih cu kä nami hmuhmat ci maa? A hnünthawh nak naw a zum nak cu kümbe sak ci nei. 23 äAbraham cu Khanpughi zum ci, azum nak awn ani cu, Khanpughi naw chang düng ah k'bääi ci, ä ciah cacim lawk ci cu akcang ah kiak ci. Cun ah kia sei Abraham cu Khanpughi ah teihpüi ah khü ci gui. 24 Chang cu azum nak bäng awn ah kä kiak ci, a hnünthawh nak awn, Khanpughi ung düng nak a gah cu nami hmat ci nei. 25 A cun ah mäih ah hlawhlaang ciah Rahab ah mawng cu kiak ci. Ani naw Israel chang säbäk ci gui cu, dou gui netah phiawng ne alam hei ung ami hteh ba vai ah m'thei gui ci. Cun ah a hnünthawh nak awn ani cu Khanpughi ung düng nak gah ci. 26 Cun ah kia sei, mumcha kä om ciah pumsa cu ak si ah a kiak ah mäih ah, hnünthawh nak kä om ciah zum nak cu aksi ah kiak ci.
1 Ka phäinau gui aw, saza hlük ciah chang kä da-en sä. Nami hmat ah mäih ah mik mi saza gui cu, chang hei gui ah mä, ng'cet pi khai ah m'khoichaa nak mi gah khai nei. 2 Mik mi cu ashäng shäng mi sheka thei ci nei. A i zah ung phi hmakat nak kä om khai ah thu thei ciah chang cu, kümbe ciah kiak ci, apumsa avan shum ne htingling ciah chang ah phi kiak ci. 3 Mik mi naw ng'se cu mi m'hnep ne mi m'zein ci, mi ng'zak hlü nak ah mi hteh sak hning ci. 4 Ang htei ah däm ciah htinpaw im nu cu, khokhi ne ang pheet ung phi, k'pyä ci naw kyeep ne pang ne, ang zak nak hlü ah ng'hlah sak ci. 5 M'lei cun phi a cun ah mäih ah kiak ci, m'lei cu aläm hta ah akiak ung phi, abi nak hning cu dämduh ci. Ang htei ah däm nu ciah bungpuk nu phi, mei m'ghi apihta naw ui zawp hning ci, ci cu ngaih tüih shäm vä. 6 M'lei cu mei awn täng ci, cheishoh nak ah phung ah kiak ci; m'lei cu pumsa ah ang pai tumat ah kia ne, shetkat nak cu pumsa avan ung gawk sak ci. M'lei cu mei ah ng'düi ne, mi ghin nak avan cu m'htei mei awn, na uih sak gui thei ci. 7 Chang naw kawng khawm, phiu kha, k'phyukphyai, ngak'ai gui cu m'hnep hning ci, am hnep phi akda om ci. 8 Cun ung phi, m'lei cu a u chang naw phi kä m'hnep hlawt ci, cun cu chang naw kä am dip hlawt vai ah shetkat nak om ne, sih nak ah m'äm tui awn be ci. 9 Mik mi naw Khanpughi Bawipa mi m'hlüngtai nak ung m'lei cu mi mang ci, Khanpughi naw amäi ah a tüi ah mi chang paw mi zäihgen nak ung phi, m'lei bä mi mang ci. 10 M'hlüngtai nak ah thu la zäihgen nak ah thu cu, m'gawng tumat ung lut lawk ci nei. Phäinau gui aw, cun cu kä bä ci nei! 11 Tui khawng tumat ung tui k'tui la tui kha lut law man ne ang? 12 K'thei cu m'kaang ah m'theih man ne ang? K'htui cu k'thei ah m'theih man ne ang? A cun ah mäih ah tui kha ah khawng ung tui k'tui kä lut lawk ci nei. 13 Nangmi ung kaa cäivai ne hmuhmat ciah chang tumatmat a om ah akiak ung, akni ah aghin nak la akni ah a om ih nak cu m'lung neim nak la Lulang nak awn dang sak sä. 14 Cun ung phi nami m'lung kyong ah m'thüikhang nak, khaa nak, m'zawmhau nak gui om khütah nami cäivai nak awn nami khähghah ah a kiak ung, thudäng cu nami hnu ng'tuk püi ciah kiak ci nei. 15 Cun ah mäih cäivai nak cu khankho ah kaa ah kä kiak ci, khomdek khan ah kaa, mumcha lam ah kä kiak ciah, khoshe ah mawng ah kiak ci. 16 M'thüi m'khang nak la m'zawmhau nak cun naw, kä ng'käkhtäng nak la shetkat nak a hlü hlä om sak ci, 17 Cun ung phi Khankho ah kaa cäivai nak läi cu ak htük bäiä ah theingcim netah dimdeeih nak, ng'awigi nak la khawtsheng nak gui cu dang sak ci. Cun cu chimgein nak awn kümbe ne, nikiom nak cu vuipai sak ci, m'khoi m'hnga nak kä om ci, thuvi nak kä om ci. 18 Dimdeeih nak bik ci gui naw dimdeeih nak ung ami geit ah, geit m'shi ah am theihpai cu nikiom nak ah kiak ci.
1 Nangmi ung ng'tuk ah nak la ng'vookshan nak cu a hawi ah kaa gawk lawk ci ang? Cun gui cu nami m'lung kyong ung phu ne ng'kiah ciah länlawi nak vai, ng'zak nak hlü aih ung kaa lawk ci nei. 2 Nangmi cu nami ng'zak hlü phung kä gah hlawt u netah chang nami ngawn ge khai ah nami pawng ci. Nami ng'zak hlü aih cu kä nami gah law ah a kiak ung ng'tuk nami ghäh ci, ng'vook nami lup ci. Nami ng'zak hlü kä nami gah ah mawng cu, Khanpughi ah kä nami ng'zoih ah hmawk ah kiak ci. 3 Nami ng'zoih ung phi kä nami gah ah mawng cu, akshe ah nami ng'bä nak la nami mät ah hlimtui nak vai düt ah nami mang nak hlü ah hmawk ah kiak ci. 4 Kä bekhüt ciah chang gui! Khomdek ng'zak hlü ah teihpüi cu, Khanpughi ah gaa ah kiak ci nei, ci cu kä nami hmat ci maa? 5 äKhanpughi naw mik mi ah kyong ah a thunthan ah mumcha cu, kyihkyawk vai ah ng'zak nak hlü awn be ci nei, ä ciah cacim ung om ci cu kä bä khai ah kä nami ngaih en vai nei. 6 Cun ung phi Khanpughi ah na peit gui ah chimgein nak cu khüighaat ba pi ci nei. Cacim theing naw, Khanpughi naw chang ah ng'shei ci gui cu hnu nah gui ne, m'lung neim sak ci gui cu, chimgein nak pe gui ci nei, ä ciah a pyein ah bä nak ah kiak ci. 7 Cun ah kia sei Khanpughi ah ng'zak hlü cu läk ne khoshe cu nami k'täm vai nei, cun ung nangmi ung kaa dawng khai nei. 8 Khanpughi ah pei ah nami law vai, cun ung nangmi ah pei ah Khanpughi lawk khai. Cheishoh ciah chang gui! nami kut m'si vä. Thuvi ciah chang gui nami m'lung theing sak vä! 9 Thäisei vä, kyap m'lau vä; nami gaih nak cu, kyah nak ah ng'lat sak vä! nami zei nak cu thüi nak ah ng'lat sak vä! 10 Bawipa ah ma ah nami m'lung neim sak vä, cun ung ning m'hlüngtai gui khai nei. 11 Phäinau gui aw, tumat la tumat kä ng'tüitawk tu vä. A khritha phäinau täitawk ne m'khoichak ciah chang cu, thukhän täitawk ne m'khoichak ciah kiak ci nei. Thukhän nami m'khoichaa ah a kiak ung nangmi cu thukhän läk ciah kä kia ne, m'khoichak ciah nami kiak khai. 12 Khanpughi tumat bäng cu thukhän pek ci la m'khoichak ciah kiak ci nei. Ani bäng naw vah hun hning ci, m'di hning ci. Nang cu a u chang ah kia ne, nak chang paw cu nam khoichaa tu ang? 13 Tuhbäi na ngai vä, Tuh ngawi baw, ngawi ung baw, mang gaw tumat ah hteit ne, kho kum ät kami om khai. A cu ah sumlei ne ngui akda kami gah khai, ä ci ne, nangmi am shah naw nami pyein ci. 14 Nami ghin nak ngawi ung a i ah a kiak vai ah kä nami hmat ci! Nangmi cu a shäng hta thawk ne khu netah maih ba ciah meikhu awn nami täng ci. 15 Nangmi naw nami pyein vai cu, Khanpughi naw ang zak hlü ah akiak ung keimi cu ghing ne, kami bilo hnüntho, ä ciah kiak ci. 16 Cun ung phi nangmi tuhbäi chang ah ng'shei ne nami khähghah ci, cun ah khähgha nak phung cu cheishoh nak ah kiak ci 17 Cun ah kia sei akni hmat lang ne kä bik ciah chang cu, shetkat nak bik ciah kiak ci.
1 Bähmang ciah chang gui kei ah thu cu na ngai vä! Nami khan ah gawk lawk khai ah geinvai nak vai ah hmawk ah thüi ne kyap vä! 2 Nami bühmang nak cu hoce pyi ci nei, nami suisak gui phi ca naw ei zawp pyi ci nei. 3 Nami ghui ngui gui ung phi hnai kai pyi ci nei, cun ah hnai cu nangmi ning hnu ng'tuk püi gui ciah saksi ah kia ne, nami sa cu mei ah uih ah mäih ah ui ne, ning ei gui khai nei. Shin ah ak hnu bäih ah hnüüp gui ung nang mi cu, m'cun m'hnai ne, bühmang vai nami tha na ba ci maa? 4 Nangmi naw nami lo bik ciah chang gui ah ng'cheng cu kä nami pek ci nei. Ngahmi ah ng'cheng shan cu ngai vä! Ngahmi naw ng'cheng shang ne ami m'lau ah k'aw cu, a hlüngtai säih Bawipa, Khanpughi naw ng'zak ci nei. 5 Nangmi cu khomdek khan ung ng'päi ng'ze, hlimtui ne nami om ci. Nangmi cu ami ning ngawn nak gui vai ah kho hnüüp ah hmawk ah nami ng'htah ng'awh ciah kiak ci. 6 Nangmi naw shetkat nak kä om ciah chang gui m'khoicha ne nami ngawn ci, cun ung phi ngahmi naw kä ning ci tuba gui ci gui. 7 Ka phäinau gui aw, Bawipa a law ba güt hnimgei ne om vä. Lo bik ciah chang tumat naw, a lo ung, ak küikyang ah a geitkaw gui am theih tak law vai ah, kho k'aa htük ung kaa naw, kho k'aa ang pyi güt ung, hnimgei ne ging ci nei. 8 Nangmi phi hnimgei ne nami om vai nei. Nami ngaih u nak cu khäng htek sä, Bawipa a kyum law nak vai ah hnüüp ng'et lawk ci nei. 9 Ka phäinau gui aw, tumat la tumat shetkat nak kä nami ng'lon nen tu vai, cun ung Khanpughi naw kä ning m'khoichaa gui khai. Thu m'chak khai cu gawk law ne ng'düi law pyi ci nei. 10 Ka phäinau gui aw, Bawipa ah ming awn thu pyein man ci gui ah profet gui cu shäm ba gui vä. Zaica geinvai nak a gawk law ung, hnimgei ne ami khüighaat nak cu nami thei tu vai nei. 11 Ngahmi cu khüighaat ci gui ah kia sei zeikiai ci gui ah khü gui ah kiak ci. Job ung a i hlawk ah hnimgei nak a om cu nami ng'za pyi ci, ak hnu ah Khanpughi naw a i hlawk ah am hteihtang cun phi nami hmat ci. A i ah kia sei ci ung Khanpughi cu chimgein nak la chihna nak awn be ciah Bawipa ah kiak ci. 12 Ka phäinau gui aw, thukhän shaitaak nami bi ung kä nami ng'gun ng'hta en vai. Khankho khüi ne, khomdek khü ne kä nami ng'gun nen vai, a i phi khü ne kä nami ng'gun nen vai. Nami ng'thu cu hleei ah a kiak ung hleei ah, cang ah a kiak ung cang ah dang khai ah, nami pyein vai nei. Cun ung nangmi cu Khanpughi ah m'khoichaa nak kä nami gah khai 13 Nangmi ung kaa zaica nak ung gawk ciah chang cu, taigü sä, zeikiai ciah chang naw ng'äi m'cu sä. 14 Gawpyam ciah chang naw khrithabum ung ang vaihta gui cu khü gui sä. Ngahmi naw ak gaw cu khitui awn hluk ne Bawipa ah ming ung taigü pe u sä. 15 Cun ah zum nak awn taigü nak naw ak gaw cu gai sak khai nei, Bawipa naw gaigawng nak cu zuk pe ne, a cheishoh nak gui phi m'geinsei khai nei. 16 Nami shetkat nak tumat la tumat ng'kiaa ne ng'paa na tu u ne, tumat la tumat nami ng'taigü tu peit vai nei, cun ung gai nak nami gah khai nei. Chang k'ni ah taigü nak cu hlüngtai küikyang nak om ci nei. 17 Elijah cu mik mi ah mäih ah chang ah hta ah kiak ci. Ani naw kho kä ah aa vai ah ak küikyang ah taigü khütah, khomdek khan ung kho kum thum la avang ung kho kä aa ci. 18 Cun kawn ah Elijah cu taigü ba mä sei, khan ah kaa kho aa law ba ne, khomdek ung geitkaw gui cu ni ne bä ci. 19 Ka phainau gui aw, nangmi ung kaa chang tumat cu, thudäng nawng ne lam hma khütah, a hei tumat naw lam düng ung a khü law tu ba ah a kiak ung; 20 Cun ah cheishoh ciah chang lam a hma nak ung kaa khü ne law püi ba ciah chang cu, cheishoh ciah chang ah mumchaa sik nak ung kaa phiawn sak ne, a cheishoh nak gui phung m'geinsei nak a gah vai ah m'hteihtang ciah kiak ci, ci cu nami hmat vai nei.
1 Peter, Bawi Jesuh Khrit ah ang düihpüi naw, Pontus, Kalatia, Kappadocia, Asia, la Bithinia kho gui ung, püi u ne, om k'tu ah kia ne om tuk ci gui ah, Khanpughi ah ghü ah chang gui-am ca ka guk lawk ci nei. 2 Nangmi cu Pa Khanpughi naw amät ah ng'bä nak awn ning ghü gui ne, ang Mumcha awn chang theing ah ning piang gui ci. Cun cu Bawi Khrit ah thu nami läk nak vai la asi awn nami theingcim nak vai ah kiak ci. M'geinsei nak la dimdeeih nak cu nangmi ung kümbe ne om sä. 3 Mi Bawipa Jesuh Khrit ah Pa Khanpughi cu mi m'kümto khai nei! Khanpughi naw küikyang ciah ak chimgein nak awn, Bawipa Jesuh Khrit cu sih nak ung kaa thawh ba sak ne, mik mi am ghin nak ak thai cu na pe gui ci. A cun naw ghing ciah ngaih u nak awn na kümbe sak gui ci. 4 Cun ah kia sei Khanpughi naw ak chang gui ah hmawk ah m'küm ne a gim ah ng'bähmang nak cu khäm vai ah mi ngaih u nak om ci. Cun gui cu nang mi ah hmawk ah kä chükmaih kä didam hlawt khai ah, Khanpughi naw khankho ah m'küm ci. 5 Nangmi nami zum ci cu ak hnu bäih ah a khin ung dang law ge khai ah hun nak, nami gah khai ah Khanpughi naw, ahlüngtai nak awn ning m'htei gui ci nei. 6 Nangmi cu zaica geinvai nak a hlü hlä om sei tuhbäi nami thüisei ung phi, ak khan ah amawng gui cu ngai ne zeikiai vä. 7 Cun ah zaica geinvai nak cu nami zum nak a khän la kä cun ah m'nüm nak ah kiak ci. Didap thei ciah ghui cu mei awn m'nüm ah kiak ci, ghui ah mä küikyang pi ciah nami zum nak cun phi m'nüm vai ah kiak ci, Cun ung vah khän htek nak om sei, Bawi Jesuh Khrit a kyum law ba hnüüp ung m'hlüngtai nak, bämang nak la chang m'sui nak cu nami gah khai. 8 Nangmi naw kä nami hmuh man ung phi Bawi Khrit cu nami m'hni ci, tuhbäi kä nami hmuh ung phi, ani cu nami zum ci. Cun ah kia sei nangmi cu ng'thu awn kä pyein hlawt vai ah länlawi zeikiai ne nami om ci. 9 A i ah kia sei ci ung ani nami zum nak ah a phung ah kiak ciah, hun nak cu nami m'lung ung gawk sei nami gah pyi ah hmawk ah kiak ci. 10 Profet gui naw shin ah hun nak ah mawng cu geing nah ne shuilei k'täkiau man ci gui. Nangmi am Khanpughi naw a ning peit gui vai ah shin ah m'gein nak ah mawng cu pyeinsa man ci gui. 11 Cun ah m'gein nak cu a i ah khin ung, a i chaa ah gawk lawk khai ci cu ami hmat vai ah k'tha na man ci gui. Ngahmi ung om ciah Bawi Khrit ah Mumcha naw, cun ah khin ung a geinvai nak vai ah mawng la, cun kawn ah agawk nak vai ah bämang nak ah mawng cu ng'daut ne dang sak ci. 12 Ngahmi naw cun ah mawng ami pyeinsak cu, ami mät ah hmawk ah kä kiak ci, nangmi ah hmawk ah kiak ci, ci cu Khanpughi naw, ngahmi ung dang sak ci. Nangmi ah om nak ah Bawi Khrit ah mawng Thu Ni law püi ci gui naw, cun ah profet gui naw ng'daut ne ami pyein ah a mawng gui cu, Khankho ah kaa a tüih law ah Mumcha Theing ah hlüngtai nak awn, nangmi ah khan ah shäu law u sei nangmi naw nami ng'za pyi ci nei. Cun ah a mawng gui cu Khan chang gui naw phi hmuhmat hlük ci gui nei. 13 Cun ah kia sei nangmi cu ng'düihthawh ge vai ah om vä. Bawi Jesuh a kyum law ba hnüüp anam shum phyuk gui vai cu kümbe sei ngaih u ne lunglaang ne om vä. 14 Khanpughi ah thu ngai u ne, kä nami hmuhmat pha ung nami om ih ng'zak hlü man ah mäih ah kä nami ghin om ba vai nei. 15 Ning khü gui ciah Khanpughi cu theingcim ci kia sei, nami bilawh phung cu theingcim sä. 16 Kei cu ka theingcim ci kia sei, nangmi phi nami theingcim vai nei, ä ciah cacim naw pyein ci. 17 Chang ah zodäm kä teng ah, chang ah bilawh phäh phäh ah khan ah m'khoichaa nak bik ciah, Khanpughi ah nami taigü ung, Kapa ci ne khü ne nami taigü ci; cun ah kia sei khomdek khan ung nami ghin om zah ak chuih Khanpughi cu nami kyih aa vai nei. 18 Nami pupa gui ah pakhui nami m'däng ah kä shichah ciah ghin nak ung kaa, a i naw a ning phiawn sak gui cu nami hmat ci. Cun cu ghui ngui ah mäih ah dimaih thei ciah kä kiak ci. 19 Htome hta ah mäih ah shetkat nak kä om ciah Bawi Khrit ah hnun gui ap nak ng'pän nak ah kiak ci. 20 Shin ah khomdek kä ang tüi pha ge ung ani cu Khanpughi naw ghü ne, shin ah ak hnu ah kho hnüüp ung, nangmi ah hmawk ah ang dang sak ah kiak ci. 21 Sih nak ung kaa thawh ba sak ne, bämang nak pek ciah Khanpughi cu ani ah ming awn nami zum ci. Cun ah kia sei nangmi cu Khanpughiung ng'kheing ciah nami zum nak la ngiah u nak om ci. 22 Nangmi cu thucim nami läk nak awn, nami m'lung kyong cu theing sak u ne, zum ciah nami chang paw phi ak cang ah nami m'hni pyi ci nei. Cun na kia sei tumat la tumat nami m'lung kyong avan nawn nami ng'zum hni tu vai nei. 23 Nangmi cu ghing ci la ang tüi om ciah Khanpughi ah ang thucim awn, ng'tüi ba ne, sih nak kä om ciah ang tüi ghing ciah Khanpughi ah hta ah nami kiak ci nei. 24 Cacim theing naw, Hnicim chang avan cu khuktaa ah mäih lawk ci, Ami bämang nak avan cu taapai ah mäih lawk ci. Khuktaa cu chawng ne si thei ci, a pai cun phi thuum ne kiawi thei ci. 25 Cun ung phi Bawipa ah thucim cu ng'shon päng ung khäng ci, ä ciah pyein ci. Cun ah thucim cu nangmi am shäu ne ning m'thein gui ah Thu Ni ah kiak ci.
1 Nami shetkat nak avan ng'hlah ta u ne, kä hleeihlak ne, kä thuvi ne, küm thüi m'khang ne, kä nawmpang kä ng'plah taang ne nami om vai nei. 2 Htanak thai ah ak hmawhta cu, suuktui a gha ah mäih ah, ang tüi sei mumcha suuktui ah nami gha vai nei. Cun ung vah cun ah suuktui nami awk nak awn, däm ng'vai u ne, hun nak nami gah khai. 3 Cacimtheing naw, Bawipa naw a i hlawk ah anam hni gui cu, nami hmu pyi ci nei, ä ci ne pyein ci. 4 Bawipa ah law vä, Bawipa cu ghing ciah k'toulung ah kiak ci. Ani cu chang gui naw lung düt ci ne nawng pang u sei phi, Khanpughi naw a ghü ah ak küikyang ah kiak ci. 5 Toulung ghing ah kia ne law vä, mumcha bum im cawh nak ung mang vai ah kia vä, cun ah bum im ung nangmi cu, Khanpughi ah dou hlü ah, mumcha küikyan nak cu, Bawi Jesuh Khrit ah ming ung khawihnah ciah theingcim ciah taigü ah nami kiak khai nei. 6 Cacim theing naw, Kei naw küikyang ciah k'toulung tumat cu ghü ne, Zion m'htung ah m'kiungtung ah Kang ling ci nei; Ani zum ciah chang phung cu Kyihkyawk nak kä om khai nei, ciah pyein ci. 7 Cun ah k'toulung cu nami zum ci gui ah phäh ah, ak küikyang ah kiak ci, kä zum ciah chang phäh ah; Lung im co ci naw a ghawh ah lung cu, Ak küikyang pi ah k'toulung ah kia lawk ci. ä 8 A hei cacim ung, Cun ah lung cu chang gui ah m'thuihshawng nak vai la, Chang gui ah ng'vawn ng'täät nak vai ah kiak cik, ciah om ci. Ngahmi cu thucim kä zum ci gui ah kia ne, thuihshawng ci gui, cun cu ngahmi ah hmawk ah Khanpughi naw am'hnüt ah kiak ci. 9 Cun ung phi nangmi cu Khanpughi naw a ghü ah pahta, Ghangpughang ah taigü, theingcim ciah pakhui, Khanpughi ah chang, la Khanpughi naw cäicat vai ah a bilawh ah mawng shäu khai ah a ghü ah nami kiak ci. Khanpughi naw hmüp khui ung kaa, cäicat vai ah ak dei ung a ning khü gui ah kiak ci. 10 Zanä nangmi cu Khanpughi ah chang ah kä nami kia man ci, tuhbäi ak chang ah nami kiak ci; zanä nangmi cu Khanpughi ah chimgein nak kä nami hmat man ci, tuhbäi ak chimgein nak nami gah pyi ci. 11 Teihpüi gui aw, mik mi cu khomdek khan ung om k'tu ah mi kiak ci kia sei, ang tüi sei ng'käükneet ne, nang tuk püi gui ciah pumsa ah ng'zak hlü ah kä m'lung k'si en ne, nami thamah vai ah ka ning m'cäi gui ci nei. 12 Bawipa kä zum ci gui naw nangmi cu ak she nami bik ciah ami ning k'bän gui ung phi, kä zum ciah chang gui ah lung ah akni ah nami om vai. Bawipa a kyum law ba hnüüp ung nangmi ah nikiom nak cu hmu u ne, Khanpughi ami m'hlüngtai vai ah cun ah nami bi vai nei. 13 Bawipa ah hmai teng nak awn huham om ciah chang ah uk nak phung cu nami läk vai; Ghangpughang cu huham mah ci, 14 Bawi gui cu akshe bik ci gui m'kat gui khai la akni bik ci gui m'kümto gui khai ah, ghangpughang naw am düih gui ci cu nami zum vai nei. 15 Akni ah nami om ih nak awn chang k'gu k'aang gui ah thu m'gawng cu nami shungshet vai ah Khanpughi naw ng'za hlük ci nei. 16 Ng'pääi om chang ah kia ne nami om vai, nami ng'pääizee nak cu akshe thuh nak vai ah kä nami mang-en vai, Khanpughi ah changshäm ah kia ne nami om vai. 17 Chang phung cu nami chang m'sui vai, khritha phäinau cu anmi m'hni vai, Khanpughi cu nami m'tamkhah vai, ghangpughang cu nami kyih aa vai. 18 Changshüm gui nami bawi ah pyein ah nami om vai, m'gein thei ci bäng ah kä kia ne, ngetngawng ci phi nami kyih aa vai nei. 19 Nangmi cu Khanpughi ah ng'zak hlü nami hmat ci kia sei, kä khinkhaa ciah geinvai nak nami gah ah a kiak ung, cun ah hmawk ah Khanpughi ah m'shumphyuk nak nami gah khai nei. 20 Nangmi cu nami cheishoh nak ah hmawk ah ng'läm ne geinvai nak nami aut ah phäh ah ning m'hlüngtai gui vai, a i kä om ci nei, cun ung phi düng nak nami bi ah hmawk ah geinvai nak cu ng'läm ne nami aut läi ung, Khanpughi naw bä nak ning m'shumphyuk gui khai nei. 21 A cun ah mäih ah nami bi vai ah Khanpughi naw a ning khü gui ah kiak ci. Bawi Khrit amät nangmi ah hmawk ah a geinvai nak awn, nami thei tu vai cu dang sak ci. Cun ah kia sei a kho neh cu nami läk vai kiak ci. 22 Bawipa kä sheka man ci, a hleei a pyein phi u naw kä ng'za man ci. 23 Shedam nak ci phi kä shedam na tu ba ci, a geinvai zah ung phi, a u kä ng'vanglaak na ne, düng sei m'khoichak ciah Khanpughi ung, ang ngaih u nak cu ap ci. 24 Bawi Khrit amät naw mi cheishoh nak cu apumsa awn phui ne kutlam tung ung kai püi ci. Cun ah kia sei mik mi cu cheishoh nak awn mi sik khai säte, düng nak ung mi ghing ci. Mik mi cu Bawipa ah ak hmaleim awn gai nak mi hmuk ci. 25 Nangmi cu lam hma ne maih ciah htome ah mäih ah nami kiak ci, cun ung phi nami m'lung ning shum gui ciah Htoshüm ah ma ah nami gawk law ba pyi ci nei.
1 A cun ah mäih ah, hnumi gui, nami cei ah pyein ah nami om vai nei. Cun ung vah nami cei naw Khanpughi kä ah zum tu te ah a kiak ung phi, nami om ih hnünthawh naw thu m'kha ät kä nami pyein ung phi, zum law tu sak khai nei. 2 A i ah kia sei ci ung nami m'lung ah theing nak la nami chang m'sui nak cu ngahmi naw hmu lawk khai gui. 3 Pumsa ah kiomsang nak ah kiak ciah, luhmai nak, h awi nak, suisak nak düt awn kä ng'bi ng'lawh u ne; 4 nami m'lung kyong ung akcang ah ng'awi ng'gi nak la hniphnoi nak cu om sä, cun cu Khanpughi ah ma ah ak küikyang ah kiak ci nei. 5 Cau Khanpughi ung ng'ap u ne, Khanpughi zum ciah hnumi gui cu, a cun ah mäih ah ng'bi lawh u ne, ami cei ah thu cu ngai ci gui nei. 6 Sarah cu Abraham ah ng'thu ngai ne, a cei cu, Ka bawi zoi, ä ci ne khü ci. Nangmi cu kyihkyawk nak kä om sei, ak ni ah nami om ah a kiak ung, ani ah hta gui ah nami kiak khai. 7 A cun ah mäih ah nangmi pami gui naw phi nami chu gui cu, ami thagui ken ci kia sei, ami m'lung ngaih hmat ne nami k'däk gui vai. Ngahmi cu Khangpughi ah nam shumphyuk gui ah ghin nak, nangmi awn atäng ah gah tuk khai gui ah kia sei, chang m'sui ne nami om püi gui vai nei. Cun ah nami bi ung vah nami taigü nak hnaihnawk nak a i kä om khai. 8 Ak hnu ah ka pyein hlü cu, nangmi cu m'lung t, ngaih ät ne nami om vai; phäi nau ah mäih ah ng'zumhni tu u ne, m'lung neim nak la chimgein nak awn nami om vai. 9 Akshe cu akshe awn kä thung ne, ak kaa cu ak kaa awn kä nami sah vai, cun nak vai sä ung m'shumphyuk nak nami peit vai, a i ah kia sei ci ung, m'shumphyuk nak cu, Khanpughi naw a ning khü gui zah ung aning peit gui vai ah a shaitaak ah kiak ci. 10 Cacim theing ung, Ak ding ak gei ah ghing ne, akni ak kiom ah om hlük ciah chang naw, ang thu m'gawng cu a khäm vai, am leidang ung hleeihlak nak kä a om men vai. 11 Ani cu akshe ng'hlah tah ne akni a bi vai; Dimdeeih nak a om vai ah am lung kiong avan nawn Ak tha nak vai. 12 A i ah kia sei ci ung Bawipa naw chang k'ni chang k'veih gui cu, Ngäng gui ne, ami taigü cu ngai gui ci. Cun ung phi akshe bik ci gui cu ng'hlah ta gui ci. 13 Akni nami bi ung a u naw nangmi cu kä ning kawng gaa na gui khai nei. 14 Cun ung phi akni nami bi ah hmawk ah ning shedam nah gui ci a om ung, zeikiai vä, kä kyikyawk en vä, kä ng'ä ng'ai en vä. 15 Nami m'lung kyong ung Bawi Khrit cu kyih aa u ne, Bawipa nei ci ne m'tamhkah vä, Ani zum ne nami ngaih u ah mawng ning shi gui ci a om ung, nami m'thein tu ge thei vai ah nami om vai nei. 16 Cunung phi ng'awi ng'gi nak la chang m'sui nak awn nami bi vai nei. Nami m'lung cu theing sak vä, cun ung bawi Khrit ah chang ah kia ne, akni nami bi lawh, ning päipih gui ciah chang gui cu, thui ng'aa khai gui nei. 17 Khanpughi naw ang zak hlü a om ung, akni bi netah gein vai nak cu, akshe bi netah geinvai nak ah mä bä tu ba ci. 18 A i ah kia sei ci ung chang khli van ah hmawk ah Bawi Khrit naw ang bäng ah a sih nak cu, chang she gui ah hnün ung chang k'ni naw ak chaw ah kiak ci. Cun cu Khanpughi ah lam a ning m'shüm nak gui ah kiak ci. Bawipa cu pumsa awn sih nak a gah ung phi, Mumcha awn ghing ne tho ba ci. 19 Mumcha awn a ghin nak awn thawng kium ci gui ah mumcha ah hteit ne thu pyein ci. 20 Cun ah mumcha gui cu Noah naw hteinpaw im a cawh zah ung, hnimgein nak awn ngäng gui ciah Khanpughi ah ng'thu cu kä läk ci gui ah kiak ci. Cun ah tui ung hteinpaw kyong ah om ciah chang sing cheit htabäng cu hun nak gah ci gui. 21 Tui ci cu tuhbäi nangmi ning hun gui ciah tuihniim nak ah kiak ci. Tuiniim nak ci cu pumsa alelawi m'sipyou ah kä kiak ci, m'lung ngaih ni awn Khanpughi ah shaitaak nak bi ah kiak ci. Bawipa Jesuh Khrit sih nak ung kaa a thawh nak ba awn, tuiniim nak awn hun nak nami gah ci. 22 Ani cu Khan mawpi ah hteit ba ne, Khanpughi ah k'patlam ah om ne, khanchang gui la khankho ah huham la hlüngtai nak gui cu avan uk ne om ci.
1 Bawi Khrit cu pumsa awn geinvai nak aut pyi ci, acun ah kia sei nangmi cu Bawi Khrit ah m'lung ngaih ah mäih ah nami thamah vai. A i ah kia sei ci ung pumsa awn geinvai nak gah ciah chang cu, cheishoh nak naw kä k'phaa ba ci. 2 Tuhbäi khomdek pumsa awn nami ghin nak ba ah a khin ung, chang ah ng'zak hlü ah kä ghing ne, Khanpughi ah m'hni ah nami ghin vai. 3 Ng'pyi pyi ciah akhin ung nangmi cu, khritha ah kä kiak ci gui ah om ih ah mäih ah ak shou nami om pyi ci. Kä zum hmat nak, hlawhlaang nak, awktat nak, hlimtui nak, zu ng'kawi nak, la ang htei ah m'shemshai ciah agup khawihhnah nak ung, nami ghin nak cu ng'pyi te ci. 4 Tuhbäi nangmi cu ngahmi awn kä ng'cawng phyoot kä hlimtui ba uk ci sei, ngahmi cu cäicat u netah, ning päipih, ning sawngkhei gui ci gui. 5 Cun ah ami om ah hmawk ah ngahmi cu, aksi la skghing m'khoichak khai ah om ge ciah Khanpughi ah ma ah m'khoichaa nak cu gah khai gui. 6 Cun ah kia sei Thu Ni cu aksi gui ah om nak ah phi pyein ah kiak ci, cun ah aksi gui cu chang van ah mäih ah pumsa awn m'khoichaa nak gah pyi ci gui ah kiak ci; Thu Ni m'thein gui cu Khanpughi ah mäih ah mumcha awn ami ghin vai ah hmawk ah kiak ci. 7 Kho ah khüt nak vai ng'et lawk ci. Nami taigü nak hning vai ah htingling ne cäivai ne nami om vai. 8 A mawng ama avan ung akcang ah nami ng'zumhni tu vai, a i ah kia sei ci ung m'hni nak naw, cheishoh nak avan cu aküm ah hmawk ah kiak ci. 9 Kä puhceh en ne, tumat la tumat nami choh nami ng'hmawn tu vai. 10 Nangmi tumat tüi cu Khanpughi ah m'shumphyuk nak a hnga hnga nami gah ci. Cun ah Khanpughi ah m'shumphyuk ak küikyang ah gah ci naw a paw chang ah ni kiom nak vai ah a mang vai nei. 11 Thu pyein ci phung naw Khanpughi ah ng'thu shäu ne pyein ah mäih ah a pyein vai; khuut bik ci phung naw Khanpughi ah peit ah k'thagui awn abi vai. Cun ung vah a mawng a ma avan ung, Bawi Jesuh Khrit ung Khanpughi cu m'kümto hlawt vai. Cun ah Bawipa ung bämang nak la hlüngtai nak cu ngawizä khäng ne om sä. Amen. 12 Ka teihpüi gui aw, nami geinvai nak vai ah ng'hlo ng'ei nak ah m'nüm nak nami khan ah a gawk law ah hmawk ah kä nami cäicat vai, cun gui cu nangmi ah phäh ah ak küikyang ah kä kyak ci. 13 Nangmi cu Bawi Khrit ah geinvai nak nami ng'pai püi ciah kia sei, nami zeikiai vai nei, cun ung vah Bawipa bämang nak awn a kyum law ba hnüüp ung, nangmi cu zeikiai nak awn nami kümbe khai. 14 Bawi Khrit ah chang ah nami kiak ah hmawk ah päipih nak nami gah ung zeikiai nak om ci, a i ah kia sei ci ung, a cun ah khin ung, bämang ciah Mumcha, Khanpughi ah Mumcha cu, nangmi ah khan ah ang leen ah hmawk ah kiak ci. 15 Nangmi ung kaa chang tumat phi ngawn sih nak, m'guuk nak, kiawi m'sau nak, pigaw k'bou pahta m'chaa nak ah hmawk ah geinvai nak kä gah en sä. 16 Cun ung phi Khritha ah na mi kiak ah hmawk ah geinvai dukdeiu nak a gawk law ung kä na mi thui ng'aa vai nei, Bawi Khrit ah ming ung nami om pyi ci kia sei Khanpughi nami m'hlüngtai vai nei. 17 M'khoichaa nak ah a khin cu gawk law pyi ci nei, Khanpughi amät ah chang gui cu m'khoichaa nak gah ma khai gui nei. Cun cu mik mi ung a tän ah a kiak ung, Khanpughi ah Thu Ni kä zum ciah chang gui ah khan ah akhüt ung a i cha ah kiak khai ang? 18 Cacim Theing ung, Chang k'ni gui hngaw hun nak ami gah vai ah A khak ah a kiak ung, Khanpughi kä hmat ciah chang shekha gui cu, A i ah kiak khai gui ang? ä ciah om ci. 19 Cun ah kia sei Khanpughi ah ang zak hlü ah geinvai nak gah ciah chang gui cu, akni ah hnüntho u ne, ang tüi sei a shaitaak küm ciah Pushihpi ah ami ghin nak avan ng'ap u sä.
1 Kei ka mät ah mäih ah khrithabum ung ang vaihta gui cu ka ning m'cäi gui ci nei. Bawi Khrit ah geinvai nak ah mawng saksi ci la dang lawk khai ah abämang nak ng'pai tuk ciah chang ah ka kiak nak awn ka ning m'cäi gui ci nei. 2 Khanpughi naw a ning ap gui ah htomebum cu, htomeshüm ah kia ne nami ngäng vai nei. Bi vai kia sei bi ah kä kiak ciah, Khanpughi ah khuut ah kia sei ng'zak hlü nak awn nami bi vai nei. Nami bi cu ng'cheng gah hlü ah m'lung awn kä kiak ciah, bi nak hlü ah m'lung cang awn nami bi vai nei. 3 Nami kut ung ng'ap ci gui uk vai ah kä nami tha nak vai, htomebum ah thei tu vai ah nami om vai. 4 Ang vaipi säih Htome uk ciah Bawipa ang dang law ung, ang tüi ah pyü ne ng'shü ciah abämang nak ah ghui lukhu cu nami gah khai nei. 5 A cun ah mäih ah nang ak hmawk chang gui naw phi ang vai gui ah thu cu nami ngaih vai. Tumat la tumat nami ng'hteihtang nak tu ung, nami van naw m'lung neim nak ah sui cu nami sui vai. Cacim theing naw, Khanpughi naw chang ah ng'shei ci cu hnu nah ne, am lung neim sak ci cu, chang m'sui ci nei, ä ciah om ci. 6 Khanpughi ah hlüngtai säih ciah a kut kaa ah nami mät naw nami mät ng'neim sak ne om vä, cun ung Khanpughi naw ni pi ciah akhin ung ning zu chang gui khai nei. 7 Nami cäicat ng'ä ai nak phung avan ap vä, Khanpughi naw ngaih nah ne ning m'htei gui ci nei. 8 Cäivai vä, geing nah ne ngai vä! Na mi gaa, Khoshe cu, m'ngawk ciah kawnghlui ah mäih ah, a u ka bai khai ang ci ne ng'shui shäi shäi ci nei. 9 Nami zum nak khänhtek sak ne khüighaat ne om vä, a i ah kia sei ci ung, na mi hmat pyi ah mäih ah, m'dek ah khan ung khritha gui cu, geinvai nak ung ami zaica ah hmawk ah kiak ci. 10 Cun ung phi nangmi cu cun ah geinvai nak a shänghta nami aut kawn ah, M'Gein nak ah Khanpughi, Bawi Khrit ung ning kawng ät sak gui ne, ng'tüi ciah abämang nak ning k'pai tu gui khai ah ning khü gui ciah Bawipa naw, nangmi cu ning kümbe sak gui ne, ng'khäntaang nak, k'thamah nak la khüighaat nak ung ning khanhtek sak gui khai nei. 11 Ani ah khan ah hlüngtai nak angtai ah om sä! Amen. 12 Shin ah ca k'tawi hta cu Silas ah nak khüi vong nak awn ka ning guk law gui nei. Ani cu bekhüt ciah khritha phäunau ah, kei naw ka zum ah kiak ci nei. Shin ah ca cu kei naw k'tha gui ka ning peit nak gui hlü la, shin cu Khanpughi ah m'gein nak akcang ah kiak ci, ci cu ka saksi nak ah kiak ci nei. Cun ah m'gein nak ung khäng sei ng'düi vä. 13 Nangmi ah mäih ah Khanpughi naw a ghü gui ah Babilon khrithabum gui naw phi ning zavaih nah gui ci gui nei, ka hta Makuh naw phi ning khaih na gui ci nei. 14 Tumat la tumat khritha zumhni nak awn ng'ui hnam tu ne, ng'khaih na tu vä. Bawi Khrit ah chang ah nami kiak ciah, nami van ah khan ah dimdeeih nak om sä.
1 Simon Peter, Bawi Jesuh Khrit ah ak changshäm la ang düihpüi naw, Mi Khanpughi la Hunbawipa Jesuh Khrit ah peit ah, mik mi ah mäih ah küikyang ciah zum nak om ciah chang gui-am ca ka guk law ci nei. 2 Khanpughi la Hunbawipa Jesuh Khrit cu hmuhmat cäivai nak awn, m'geinsei nak la dimdeeih nak cu na mi khan ah kümbe ne om sä. 3 Khanpughi naw akcang ah zum nak awn mi ghin vai ah, khankho hlüngtai nak awn mi ng'zak hlü phung cu, na pe gui ci, cun cu Bawipa hmuhmat Lulang nak awn, amät ah bämang nak la nikiom nak mi gah vai ah na khü gui ciah Bawipa ung a na peit gui ah kiak ci. 4 A cun ah ang htei ah hlüngtai ci la küikyang ciah m'shumphyuk shaitaak cu na pe gui ci. Cun ah m'shumphyuk nak awn nang mi cu, khomdek khan ah shetkat dimaih nak cu phiawn nah u ne, Khanpughi ung nami ng'zung tu ba ci. 5 Cun ah kia sei nami zum nak cu nikiom nak awn, nami nikiom nak cu Lulang nak awn, 6 nami Lulang nak cu htingling nak awn, htingling nak cu khüighaat nak awn, khüighaat nak cu Khanpughi ung bä nak awn, 7 Khanpughi ung bä nak cu ng'phäi nau nak awn, ng'phäinau nak cu zum hni nak awn akümbe vai ah nami tha nak pi bäih vai nei. 8 Cun ah hlü ci gui cu nangmi ung dämda ne a om ah a kiak ung, a cun gui naw Bawipa Jesuh Khrit nami hmuhmat Lulang nak ung ghing ne ning hnünthawh sak gui sei ak cang ah awngtang nak phi om khai. 9 Cun ung phi cun ah hlü nak gui kä om ciah chang cu, ak tawi ah ngai ne, a i kä hmuk ci. Ani cu azanä ashetkat nak ung kaa theingcim nak agah cu kä shäm ba ciah kiak ci. 10 Cun ah kia sei phäinau gui aw, nangmi Khanpughi naw khü ne ning ghü gui ciah, ang tüi sei ngaih gep ne, nami tha law nak pi tüi ah a kiak ung, a i sang ung phi nami zum nak cu kä nami ng'hlah ta hlawt khai nei. 11 Cun ah kia sei nangmi cu, Hunbawi Jesuh Khrit ah ng'tüi ciah Uknak Kho ung luh nak vai ah ng'düng nak cu nami gah khai nei. 12 Cun ah kia sei nangmi cu shin ah a mawng gui hmuhmat ne, nami zum nak ah thu thuuk ung nami khäng htek pyi ciah a kiak pang ung phi, kei naw ang tüi sei ka ning m'shümthein ba gui khai nei. 13 Kei ghing ne ka om zah ah chuih shin ah a mawng gui ka ning m'shümthein ba gui lä khai ah ka ngai ci nei. 14 Kei cu kä shou pha sei, shin ah sheka thei ciah pumsa cu ka nawng shüt lawk khai ah ka hmat ci nei, cun cu Bawipa Jesuh Khrit naw ang dang ah anam thein pyi ah kiak ci. 15 Kei ka sih kawn ah shin ah a mawng gui cu, nami shäm ba lä vai ah k'tha na pi bäih ne ka bik khai nei. 16 Bämang nak awn Bawipa Jesuh Khrit a kyum law ba vai ah mawng ning m'thein gui cu, kami mät ah ngaih tüh ah kami pyein ah pumah awi ah kä kiak ci. Keimi cu ani ah hlüngtai nak kami mik awn kami hmuk ciah chang ah kami kiak ci. 17 Pa Khanpughi naw m'tamkhah nak la bämang nak a peit zah ung keimi phi kami om ci, cun sang ung hlüngtai säih ciah bämang nak awn ng'shan lawk ciah thu k'aw cu, Shin cu kei ah Htapa nei, ani awn kei ka zei ci nei, ä ci ah kiak ci. 18 Cun zah ung keimi cu khomhtung theing ung Bawipa awn atäng ah om u ne, khan mawpi ah kaa cun ah k'aw cu kami ng'zak ci. 19 Cun ah kia sei keimi naw profet gui ah shäu ah ng'thu cu kami zum law pi ci. Cun cu nami ngaih tüh kheng vai nei, a i ah kia sei ci ung cun cu hmüp khui ung mei m'düi ah mäih ah, kho a thaih law güt nami m'lung kyong ung khäng ciah thaihke aisi ah kiak ci. 20 Cun ung phi cacim cu a u chang naw phi amät ah ngaih ah kä k'phlan thei ci, ci cu nami shäm vai nei. 21 A i ah kia sei ci ung, a i thu thuuk phi chang ah ng'zak hlü düt ah dang lawk ciah kä kiak ci, Mumcha Theing ah lamshüm nak awn vah chang gui naw, Khanpughi ah thuthuuk cu ami pyein ah kiak ci.
1 Thuvi ciah profet gui caä ami dang man ah mäih ah, thuvi ne m'theithang ci gui cu nangmi ah ng'lung ah dang lawk khai nei. Ngahmi naw dimaih nak vai la känä ne düng ciah zum nak cu law püi u ne, na hun gui ciah Bawipa phi mak khai gui nei, Cun gui cu a shänghta dimaih nak ung gawk khai gui nei. 2 Cun ung phi chang akda naw shekak ciah ami lam cu läk khai nei. a i ah kia sei ci ung ngahmi ah bilawh nak awn chang a hei gui naw thucim ah lam cu päipih khai gui nei. 3 Cun ah thuvi ciah saza gui cu ng'zak nak hlü aih awn khän ne düng ciah thu pyein u ne, ami mät ung tang khai ah bik khai gui nei. Cäu ä tän ne ngahmi m'khoicha gui khai cu om pyi ci nei, ngahmi m'di gui khai phi tho pyi ci nei! 4 Khanpughi naw cheishoh ciah khanchang gui phi küm däm gui ci, ngahmi cu m'hteikho ah zuk chah gui ne, M'khoichaa nak ah Hnüüp güt m'si gui awn k'pawng gui ci. 5 Khanpughi naw cäu chang gui phi küm däm gui ci, kä zum ci gui ah chang ah khan ah tuizin mä sak ci; düng nak ah mawng pyein ciah Noah la ahei chang pachih bäng phiawn sak ci. 6 Khanpughi naw Sodom la Komorrah cu mei awn m'khih ne m'di ci, cun cu kä zum ci gui ah chang khan ah gawk lawk khai ah mawng am dang nak ah kiak ci. 7 Cun ung phi chang shekha gui ah om ah cheishoh ciah chang k'ni Lot cu phiawn sak ci. 8 Cun ah chang k'ni cu chang shekha gui ah ng'lung ah om tu ne, ak hnüüp tä sei, ami cheishoh nak cu hmu ne ang htei ah zaica ci. 9 Zum ciah chang gui ami kium nak ung kaa k'phiawn gui vai, chang shekha gui la, 10 pumsa ah ng'zak hlü düt läk ne, Khanpughi ah huham päipih ci gui cu, m'khoichaa nak ah hnüüp ung, m'shetkat gui vai cu Khanpughi naw hmat ci. Cun ah thuvi m'theithang ci gui cu lingkeng ne taäh u ne, bäkhäk ciah khan bawi gui phi a i ah kä sui ne päipih ci gui. 11 Thuvi saza gui ah tah khüighaat pi ne hlüngtai pi pui ci gui ah khanchang gui hngaw naw Bawipa ah ma ah ngahmi cu kä päipih guici gui. 12 Cun ah chang gui cu phaa vai, ngawn vai ah ng'tüi ciah k'pyamasa ah mäih ah kiak ci gui, a i kä ami hmat su ah päipih nak om ci. Ngahmi cu a i kä hmat ciah k'pyamasa ah mäih ah dimaih khai gui. 13 Ngahmi cu chang ami nat sak ah mäih ah ami mät phi nat nak gah khai gui. Ngahmi cu hnüüp lunglai ung ei aw läma u ne, ami pumsa ng'zakhlä cu dap sak ci gui. Ngahmi cu nangmi awn atäng ah ngoh om ei aw u ne, om shek ci gui, hleeihlak nak awn zeikiai ci gui. 14 Ngahmi cu hlahhlawng ciah hnumi bäng teng hlü u ne, a i awn käng bäh hlawt ci gui. Ngahmi naw azum nak kä htek ci cu m'vam ung kiak sak ci gui, ami m'lung naw a i baw m'hni aih ci, Ngahmi cu Khanpughi ah k'phyun nak gah ci gui! 15 Ngahmi cu lam düng nawng ne lam hma pyi ci gui, ngahmi cu Balaam ah htapa Beor ah lam läk pyi ci gui. Balaam cu cheishoh nak awn gah ah ngui cu m'hni ci kia ne, 16 a shetkat ah hmawk ah k'shedam nak gah ciah kiak ci. Ang se cu chang ah mäih ah ng'thu ne, cun ah profet she ah bilawh cu ng'däm sak ci nei. 17 Cun ah chang gui cu tui ket ciah hmawilawng ah mäih, khokhi naw k'phyit ne a zon ah khong mei ah mäih ah kiak ci gui. Khanpughi naw ngahmi ah hmawk ah ak hmüp nak pi bäih ah hmun cu taak pe gui ci. 18 Ngahmi naw shetkat nak ung kaa phiawng law thai ciah chang gui cu, khähghah ne thuvi nak ah ng'thu la pumsa ah ng'zak hlü hlimtui nak gui awn k'däk ne lam hma sak gui ci gui. 19 Ngahmi naw chang-am ng'päize nak shai ami taak ung phi, ami mät cu didap nak ah khleihtein ah kiak ci gui. A i ah kia sei ci ung, chang cu ani uk ciah khleihtein ah kiak ci. 20 Chang gui cu mi Hunbawipa Jesuh Khrit ami hmuhhmat nak awn, dek khan shetkat nak ami phiawn nak awn ah, cun ah shetkat nak ah khleihtein ah ami kiak ba ah a kiak ung, ak htük ah mä ak hnu ami ghin nak cu, sheka pi bäih ci. 21 Ng'däng ciah lam hmat ve ve ne Bawipa ah thu theing ng'hlah tak ciah dam ah ta, cun ah lam ng'düng kä hmat tu ling cu bä tu ba ci. 22 äUi naw am lauk cu ei ba ci, ä ci la Vawk cu tui awn m'si ung phi ng'än ung ng'hlawk ba ci, ä ciah thu thuuk cu ngahmi ah hamwk ah kiak ci.
1 Teihpüi gui aw, shin ah ca cu ak hnih vei nak ka ning guk law gui ah kiak ci nei. Shin ah caguk ani nik hnih ung, shin ah mawng gui cu shäm ba ne, nami m'lung ngaih theing sei, 2 cau pui profet theing gui ah ng'thu pyein la Hunbawipa naw ang düihpüi gui awn a ning peit gui ah thu khän cu nami shum vai ah ka ng'za hlük ci nei. 3 Ak htük ah, ak hnubäih hnüüp ung, amät ah ng'zak hlü düt ah ghing ciah chang gui dang lawk khai ci cu, nami hmat vai nei. Nghami naw nangmi cu ning gaih m'gin gui ne, 4 äAni lawk khai ah shaitak ci, kä law ne ma? A hawi ang ani? Kami pupa gui cu si zawp pyi ci gui, cun ung phi apäng avan cu, khomdek ang tüi law sang ung kaa ah mäih bä ah om ci gui nei, ä ci ne ning kiak na gui khai gui. 5 Khanpughi naw khan mawpi la khomdek cu ang thu käi awn atäi pian la khomdek cu tui ung kaa tui awn apian ah mawng, 6 khomdek phyim cu tui bä awn am di ah mawng gui cu, ngahmi naw a guih ah m'hnih he ci gui. 7 Cun ung phi khawnmawpi la khomdek cu mei awn kä am di pha ah chuih, Khanpughi ah ng'thu bä awn om lä khai. Khanpughi kä zum ci gui m'khoicha ne am di gui hnüüp ung ngahmi cu dimaih khai gui. 8 Cun ung phi teih püi gui aw, tumat kä nami m'hnih vai cu, Bawipa ung kho hnüüp ät la khokum phia-ghaa cu ang lak kä om ci, atäng ah kiak ci. 9 Chang am shah ah ngaih ah mäih ah, Bawipa cu a shaitaak ah mäih ah bi abi vai ah kä shokshä ci, chang tumat hta phi kä dimaih ne, chang avan cu cheishoh nak ung kaa ami ng'hlah law ba vai ah ng'za hlü ne, hnimgei ne om ci. 10 Bawipa ah hnüüp cu m'guk ei a law ah mäih ah gawk lawk khai nei. Cun ah hnüüp ung khanmawpi cu viik ne ng'pyaang ne maih khai, khankho pumsa avan mei naw m'khih sei dimaih zawp khai, m'dek la m'dek khan ung om ci avan kä om ba khai. 11 Cun ah apäng avan a dimaih zawp ah a kiak ung, nangmi cu a i mäih ah chang ah kia ne nami om khai ang? 12 Khankho cu mei naw m'khih sei dimaih ne, khankho pumsa a phiäp nak vai ah Khanpughi a hnüüp gawk lawk khai ci ne, k'tha nah ne nami ngäng zah ung, nami ghin nak cu theing cim sak ne Khanpughi ah nami ng'ap vai nei. 13 Cun ung phi Khanpughi ah shaitaak ah ng'düng nak ah hmun ah om nak, khankho thai la khomdek thai cu, mi ngäng ci nei. 14 Cun ah kia sei teihpüi gui aw, cun ah hnüüp cu nami gin zah ung, Khanpughi ah ma ah, theing ne shetkat nak kä om sei, dimdeeih nak a om vai ah nami tha nak vai nei. 15 Kami nau Paul naw Khanpughi ah peit ah cäivai nak awn ca a ning guk law gui ah mäih ah Bawipa ah hnimgei nak cu, hun nak nami gah vai ah lam aning m'awng peit gui ah mawng cu, nami hmat vai nei. 16 Shin cu Paul naw a guk ah ca ung ang dang sak ah mawng ah kiak ci. Cun ah ca ung kä hmat zäi vai am shah om ci. Kä hmuhmat la lawklak ciah chang gui naw ang lihlat ah, khei ne pyein ci gui. A hei cacim gui cun phi a cun ah mäih ah m'ki m'hlat u sei, ami mät ah dimaih nak vai ah kiak ci. 17 Cun ung phi teihpüi gui aw, shin ah mawng cu nami hmat pyi ah kiak ci. Chang shekha gui ah lam k'she ung kä nami läk en tu vai ah, khäng sei nami ng'düih nak ung kaa kä nami zung kiak en vai ah geing nah ne nami om vai nei. 18 Mi Hunbawi Jesuh Khrit ah m'gein nak la hmuhmat nak ung nami ng'ghotai law pi vai nei. Cun ah Bawi ah bämang nak cu tuh ngawi tän ne ngawi zä om sä. Amen.
1 Ghin nak ah Thu ah mawng ca kami ning guk lawk ci, cun ah Thu cu ak htük ge ung om ciah kiak ci. Cun ah Thu cu mi ng'zak ci, mi mik awn mi hmuk ci, mi kut awn mi tawn ci. 2 Cun ah ghin nak mik awn hmuh vai ah a om zah ung mi hmuk ci, ani ah mawng phi mi pyein sak ci. Pa Khanpughi awn atäng ah om ciah ang tüi ghin nak cu keimi ah khan ah dang sei, a cun ah mawng cu kami pyein ci. 3 Keimi naw kami hmuh la kami ng'zak cu nangmi am kami ning shäu gui ci. Cun ah kia sei keimi cu Pa Khanpughi la Ahtapa Bawi Jesuh Khrit awn kami pui m'ca ah mäih ah nangmi cu kei mi awn atäng ah nami pui m'ca tuk khai nei. 4 Keimi naw zeikiai nak kümbe sei kami gah nak vai ah shin ah ca kami guk law nei. 5 Tuhbäi keimi naw Ahtapa ung hmu ng'za ne kami shäu ba ah thu cu, Khanpughi cu akdei ah kiak ci, ani ung hmüp nak api phi kä om ci, ä ciah kiak ci. 6 Bawipa awn kami pui m'ca ci nei, ci netah hmüp khui ung mi om ah a kiak ung, mi om ih la mi thu m'gawng van awn mi hleeihlak ciah kiak khai. 7 Cun ung phi ani cu akdei ung a om ah mäih ah, mik mi cu ak dei ung mi om ah a kiak ung, mik mi cu tumat la tumat pui m'ca nak om ci. Khanpughi ah Htapa Bawi Jesuh naw asi ng'hlui awn mi kat nak nüng cu m'si ne ana theing sak gui pyi ah kiak ci. 8 Kei ung shetkat nak kä om ci mi ci ah kiak ung, mi mät naw mi mät mi m'hleei ciah kiak ci, mik mi ung düng nak la cang nak cu kä om ci. 9 Khanpughi cu a shaitaak küm sak ne, düng nak bäng bik ci, mik mi cu mi kat nak ng'kiaa ne, mi ng'paa ah akiak ung, mi kat nak nam gein gui ne, mi cheishoh nak nüng phi theingcim sak ci. 10 Kei shetkat nak kä ka bik ci, mi ciah a kiak ung, Khanpughi cu hleeihlak thei ciah mi pian ah kiak ci, mik mi ung ani ah thu cu kä om ciah kiak ci.
1 Ka hta nau gui awi, nangmi kä nami cheishoh vai ah shin ah ca ka ning guk law gui ci nei. Cun ung phi chang tumat mat cu a cheishoh law ah a kiak ung mik mi ah hmawk ah nang paa pe gui khai, düng ciah Bawi tumat om ci nei, cun cu Bawi Jesuh Khrit ah kiak ci. 2 Mi cheishoh nak nam geinsei gui ci cu Bawi Khrit amät ah kiak ci, mik mi bäng ah kä kiak ci, hnicim chang avan cu m'gein ne ana k'phiawn gui ah kiak ci. 3 Khanpughi ah thukhän cu mi läk ah akiak ung ani mi hmat ciah akcang ah mi hmat khai. 4 Khanpughi ka hmat ci nei ci netah ang thukhän kä läk ciah chang cu, hleehlak ciah kiak ci, ani ung düng nak, cang nak ä om ci. 5 Cun ung phi ani ah thu läk ciah chang cu, Khanpughi am hni nak kümbe sak ci, Mik mi Khanpughi ung mi kawngüt cu, a cun naw ak cang ah dang sak ci. 6 Kei Khanpughi ung ka ghing ci nei, cik ciah chang cu, Bawi Jesuh Krit ah mäih ah a ghin om vai nei. 7 Teihpüi gui awi, tuhbäi kei naw ka guk law ah thukhän cu ak thai ah kä kiak ci; cau ak htük ge ung nangmi naw nami ng'zak pyi ah thukhän phyim ah kiak ci. Thukhän phyim cu nangmi naw nami ng'zak pyi ah thu ah kiak ci. 8 Cun ung phi tuhbäi ka guk law ah thukhän cu ak thai ah kiak ci, a i ah kia sei ci ung, a cun ah düng nak cu Bawi Khrit la nangmi ah ghin nak ung hmuh ah kiak ci. Cun cu ak hmüp nak ng'kawn pyi ne akdei akcang cu a gawk law pyi ah hmawk ah kiak ci. 9 Akdei ung ka om ci nei ci netah, a phäi nau gen ciah chang cu, a tuhchü hmüp khui ung om ciah kiak ci. 10 A phäi nau m'hni ciah chang cu akdei ung ghing ciah kiak ci, ani ung chang shetkat nak sak vai a i phi kä om ci. 11 Cun ung phi a phäi nau thüi nak ciah chang cu hmüp khui ung om ciah kiak ci; ani cu hmüp khui ung lula ci, cun ung phi a hawi lam a hteh kä hmat ci, a i ah kia sei ci ung hmüp nak naw ani ah mik cu m'dauh sak ci. 12 Ka hta nau gui aw, nangmi cu Bawi Khrit ah mawng ung shetkaä m'gein sei nak nami gah pyi ci kia sei, ca ka ning guk law gui ci nei. 13 Pa gui aw, nangmi cu ak htük ge ung om ciah Bawipa cu nami hmat ci kia sei, ca ka ning guk law gui ci nei. Hmaw chang gui aw, nangmi cu khoshe tu ne nami nüng ci kia sei, ca ka ning guk law gui ci nei. 14 Ka hta nau gui, nangmi cu Pa Khanpughi nami hmat ci kia sei ca ka ning guk law gui ci. Pa gui, nangmi cu ak htük ge ung om ciah Bawipa cu nami hmat ci kia sei ca ka ning guk law gui ci. Hmaw chang gui, nangmi cu nami khüighaat ci kia sei ca ka ning guk law gui ci; Khanpughi ah ng'thu cu nangmi ung om sei, nangmi naw khoshe cu tu ne nami nüng pyi ci nei. 15 Nangmi cu m'dek khan ng'zak hlü la m'dek khan ng'zak hlü ah khäm phung phung kä nami m'hni vai nei. M'dek khan ng'zak hlü m'hni ci naw Pa Khanpughi küm hni hlawt ci. 16 M'dek khan ng'zak hlü gui ah kiak ciah shetkat nak awn ng'zak hlü nak, mik awn hmu ne zak hlü nak, khähghah läma nak gui cu Pa Khanpughi ung ka lawk ciah kä kiak ci, khomdek khan ung kaa lawk ciah kiak ci. 17 Khomdek khan la khomdek khan ah chang ah ng'zak hlü gui cu, ng'pyi lawk ci gui nei; cun ung phi Khanpughi ah ang zak hlü ah hnüntho ci gui cu, ang tüi sei ghing khai gui nei. 18 Ka hta nau gui aw, kho ah khüt nak vai cu ng'et lawk ci nei! Bawi Khrit ah Gaa a gawk law vai ah mawng ning m'thein gui pyi nei; tuhbäi Bawi Khrit ah gaa akda cu dang law pyi ci gui nei, cun ah kia sei kho ah khüt nak vai ng'et lawk ci, ci cu mi hmat ci nei. 19 Cun ah chang gui cu a i zah ung phi mik mi awn kä pui m'ca ci gui ah kia ne, na hteh tah gui ci gui nei. Ngahmi cu mik mi awn atäng ah pui m'ca ci gui ah mi chang ah ami kiak ung mik mi awn atäng ah om khai gui sä te nei. Cun ung phi ngahmi ami hteh cu, ngahmi ung kaa a u chang phi, mik mi awn kä ng'gui ng'phaa ba ci, ci cu akdei ah ang dang nak ah kiak ci nei. 20 Cun ung phi Bawi Khrit naw nangmi ah khan ah Mumcha Theing cu ning m'kyum gui pyi ci kia sei, nangmi naw thu thuuk cu nami hmat pyi ci nei. 21 Ca ka ning guk law gui cu, thu thuuk kä nami hmat su ah kä kiak ci, thu thuuk hmat u ne, thu thuuk ung kaa hleeihlak nak cu kä law phung ci, ci cu nami hmat ah hmawk ah kiak ci. 22 Cun ah kia sei, hleeihlak ciah chang cu a u ang? Bawi Jesuh cu Messiah ah kä kiak ci, cik ciah chang cu hleeihlak ciah kiak ci. Cun ah chang cu Bawi Khrit ah Gaa ah kiakci—-ani cu Apa la Ahta ani nik hnih hnu ng'tuk püi ciah kiak ci. 23 Ahtapa hnu ng'tuk püi ci cu, Apa hnu ng'tuk püi ciah kiak ci; Ahtapa dou ciah chang cu Apa dou ciah kiak ci. 24 Ak htük bäih ung nami ngaihzak ma ah thu Ni cu, nami m'lung kyong ung khäng khai ah nami shum vai nei. Cun ung Apa la Ahtapa ung ang tüi sei kawng ät ne nami ghing khai nei. 25 Cun cu Bawi Khrit amät naw shaitaak nak ana peit gui ah ang tüi ghin naä cu gah ah kiak ci. 26 Nangmi ning m'hleeihlak ning k'fifaih gui ciaü a mawng cu, shin ah ka guk ah kiak ci nei. 27 Cun ung phi nangmi läi cu Bawi Khrit naw ang Mumcha ning m'kyum gui pyi ci nei. Nangmi ung Mumcha cu ghing ne om pyi ci kia sei, nangmi cu a u naw a ning m'theithang ba gui vai kä hlü ci nei. Cun ah Mumcha naw apäng avan ning m'thei gui ci, ani ah ning m'thei gui cu düng nak cang nak ah kiak ci, thuvi hleeihlak ah kä kiak ci. Cun ah kia sei Mumcha ah m'theithang cu nami läk vai, Bawi Khrit awn kawng ät ne nami om vai. 28 Ka hta nau gui aw, Bawipa awn kawng ät ne nami om vai, cun ung mik mi cu Bawipa a kyum law ba Hnüüp ung, lä ng'aa ng'thuh thaw vai kä hlü sei, ama ah thagui ak be awn mi ng'düi khai nei. 29 Nangmi naw Bawi Khrit cu ng'düng ciah nami hmat ci; a cun ah mäih ah düng nak bik ciah chang phung cu Khanpughi ah hta ah kiak ci, ci cu nami hmat vai kiak ci.
1 Pa Khanpughi ah anam hni nak gui cu a i hlawk ah däm ciah teng shäm vä! Anam hni nak gui cu däm aih sei, mik mi cu Khanpughi ah htanau ah mi ming tuk ci, akcang ah phi a htanau ah mi kiak ci. Cun ung phi khomdek chang gui naw cun ah mik mi kä ami na hmat gui ah mawng cu, ngahmi naw Khanpughi kä ami hmat ah hmawk ah kiak ci. 2 Ka püi gui aw, mik mi cu tuhbäi Khanpughi ah htanau gui ah mi kiak ci nei, cun ung phi ngawi ah a i ah mi kiak law vai cu kä ng'hmat pang sei phi, Bawi Khrit a kyum law ba hnüüp ung, ani awn täng ne mi om khai, amää akcang cun phi mi hmuk khai, ci cu mi hmat ci. 3 Bawi Khrit ung cun ah ngaih u nak om ciah chang phung cu, Bawi Khrit a theingcim ah mäih ah theingcim nak om ci nei. 4 Cheishoh nak cu thukhän m'shet nak ah kia sei, cheishoh ciah chang gui cu Khanpughi ah thukhän m'shet ci gui ah kiak ci. 5 Bawi Khrit cu cheishoh nak theek sak khai ah kyum lawk ci, ci cu nami hmat ci; Bawi Khrit ung cheishoh nak kä om ci. 6 Cun ah kia sei Bawi Khrit ung kawng ät ne ghing ciah chang cu, cheishoh nak kä bi ba ci, cheishoh nak bi ba ci cu ani kä hmuhmat ciah chang ah kiak ci. 7 Ka htanau gui aw, a u naw kä ning zoshe-en ah gui sä! Bawi Khrit ang dängdau ah mäih ah düng nak bik ciah chang cu dängdau ci. 8 Cheishoh nak bi lä ciah chang cu Khoshe ah paw ah kiak ci, a i ah kia sei ci ung Khoshe cu ak htük ge ung cheishoh ciah kiak ci. Khanpughi ah Htapa a kyum law nak ah amawng cu, Khoshe ah bilawh phung m'di ne m'siu vai ah kiak ci. 9 Khanpughi ah htanau ah kiak ci cun naw cheishoh nak kä bi ba ci, ani ung Khanpughi ah ng'zung om pyi ci. A i ah kia sei ci ung Khanpughi cu Apa ah kia sei, ani naw cheishoh nak kä bi ba hlawt ci. 10 Ashin ah mawng awn Khanpughi ah htanau la Khoshe ah htanau ah ng'lakmah nak cu ng'htei ne dang ci. Ng'däng nak kä om ciah chang, a phäinau kä m'hni ciah chang cu Khanpughi ah htanau ah kä kiak ci. 11 Cau ak htük ge ung mi ng'zak ah thu Ni cu, Mik mi cu tumat la tumat mi ng'hni tuk khai nei, ä ciah kiak ci. 12 Mik mi cu Kain ah mäih ah kä mi kia en vai nei. Ani ung khoshe om sei, a nau Abelah cu ngawn ci nei. Kain naw a i ah kia sei a ngawn ang? Ani ah bilawh gui cu cheishoh ne a nau ah bilawh gui cu ang düng ah hmawk ah kiak ci. 13 Cun ah kia sei ka phäi nau gui aw, khomdek chang gui naw ami ning gen gui ung kä nami ng'ä vai nei. 14 Mik mi cu mi phäi nau gui mi m'hni ah hmawk ah sih nak nawng shüt ne ghin nak ung mi gawk pyi ci, ci cu mi hmat ci. A phäi nau küm hni ciah chang cu sih nak ah kaa ah om lä ciah kiak ci. 15 A phäi nau thüi nak ciah chang cu chang ngawn ciah kiak ci, Chang ngawn ciah chang naw ang tüi ghin nak kä gah hlawt khai ci cu nami hmat ci. 16 Bawi Khrit naw mik mi ah hmawk ah a hnun gui cu a peit ah kia sei, mik mi naw m'hni nak akcang cu mi hmat ci. Mik mi phi mi phäi nau ah phäh ah mi hnun gui mi peit vai hlü ci. 17 Bämang ciah chang ah kia lang ne, a phäi nau tumat mat geinvai sei hmu netah am lung choh khai ciah chang cun naw, a i hawk chaa ah Khanpughi kam hni ci nei, a ci thei vai ang? 18 Ka hta nau gui aw, mik mi ah m'hni nak cu thu la m'gawng düt ah kä kia ne, hnün thawh nak ung dang ciah m'hni nak akcang ah kiak vai nei. 19 Cun ung mik mi cu Thu thuuk cu mi khäm ne, Khanpughi ah ma ah ngaih gep sei mi om khai. 20 Mi m'lung ngaih naw anam shet m'kat law gui ung phi, Khanpughi cu mi m'lung ngaih ah mä hlüngtai pi ne, apäng avan hmat zawp ci, ci cu mi hmat ci. 21 Cun ah kia sei teihpüi gui aw, mi m'lung ngaih naw kä a nam shetkat gui ah a kiak ung, Khanpughi ah ma ah thamah ne mi om ci nei. 22 Mik mi cu ang thukhän läk ne, ang zak hlü ah mi bilo ci kia ne, ani ah mi ng'zoih thäh phung cu mi gah ci. 23 Ani ah thukhän cu, Ahtapa Bawi Jesuh Khrit cu mi zum vai, Bawi Khrit ah thukhän ah mäih ah tumat la tumat mi ng'hni tu vai ah kiak ci. 24 Khanpughi ah thukhän läk ciah chang cu Khanpughi ung ghing ci, Khanpughi phi ani ung ghing ci. Mik mi awn kawng ät ne Khanpughi a ghin ah mawng cu Khanpughi ah nam shumphyuk gui ah Mumcha awn mi hmat ci.
1 Ka teihpüi gui aw, Mumcha Theing ka gah ci cik ci phung kä nami zum men vai nei. Ngahmi ah gah ah Mumcha cu Khanpughi ung kaa lawk ciah a kiak la kä a kiak cu ng'nüm ne nami teng kheng vai nei. A i ah kia sei ci ung profet hleeihlak gui cu kho nüng ung hteit shäi shäi ci gui nei. 2 Khanpughi ah Mumcha ah a kiak la kä a kiak nami hmat nak vai ah mawng cu; Bawi Jesuh Khrit cu hnicim chang ah ng'tüi ne zu kyum lawk ci, ciah ng'kiaa ne zum ciah chang phung cu, Khanpughi ah Mumcha gah ciah kiak ci. 3 Cun ung phi cun ah kä ng'kiaa ne Bawi Jesuh ung Khanpughi ah Mumcha kä om ci, ciah lingkeng ciah chang gui cu, Khanpughi ah Mumcha kä gah ci ah kiak ci. Cun ah chang ung om ci cu Bawi Khrit ah Gaa ah mumcha ah kiak ci. Bawi Khrit ah Gaa cu gawk lawk khai ah nangmi naw nami ng'zak ci, ani cu khomdek khan ah gawk law pyi ci nei. 4 Cun ung phi ka hta nau gui aw, nangmi cu Khanpughi ung nami khäng ci kia ne, thuvi ciah profet gui cu nami nüng ci nei, a i ah kia sei ci ung nangmi ung om ciah Mumcha cu khomdek chang gui ung om ciah mumcha ah mä hlüngtai ba pi ci. 5 Hleeihlak ciah profet gui cu khomdek khan ah mawnglam bäng pyeinsak ci gui, khomdek chang gui naw phi ngai ng'zak hlük ci gui, a i ah kia sei ci ung ngahmi cu khomdek khan ma nak ciah chang ah kiak ci gui. 6 Cun ung phi mik mi läi cu Khanpughi ah chang ah mi kiak ci, Khanpughi hmat ciah chang naw mi ng'thu ngai ci, Khanpughi ah chang ah kä kiak ci naw mik mi ah thu cu kä ngai ci. Cun ah kia sei mik mi naw Mumcha thucim la mumcha she ah bilawh nak cu mi m'khoichaa thei ci. 7 Teihpüi gui aw, tumat la tumat mi ng'hni tuk khai nei, a i ah kia sei ci ung m'hni nak cu Khanpughi ung kaa lawk ci. M'hni nak om ci cu Khanpughi ah hta ah kiak ci, Khanpughi phi hmat ci. 8 M'hni nak kä om ciah chang naw Khanpughi cu kä hmat ci, a i ah kia sei ci ung Khanpughi cu hni nak ah kiak ci. 9 Ahtapa awn ghin nak mi gah vai ah Khanpughi naw tumat bäng ah Ahtapa cu khomdek khan ah zuk m'kyum lawk ci, A cun ung Khanpughi naw anam hni nak gui cu dang ci. 10 M'hni nak ci cu mi mi naw Khanpughi mi m'hni nak ah kä kiak ci, Khanpughi naw nam hni gui ne, mi shetkat nak nak phiawn gui khaiah, Ahtapa a zuk m'kyum law cu m'hni nak ah kiak ci. 11 Teihpüi gui aw, Khanpughi naw cun hlawk ah a nam hni gui ah a kiak ung, mi mät phi mi ng'zum hni tuk khai nei. 12 Khanpughi cu a u naw kä hmu man ci, cun ung phi tumat la tumat mi ng'zum hni tu ah a kiak ung, Khanpughi cu mik mi ung om ci, Am hni nak cu mik mi ung kümbe ci. 13 Khanpughi naw ang Mumcha cu nam shumphyuk gui ci ah kia sei, mik mi cu Khanpughi ung mi om ci, Khanpughi cu mik mi ung om ci, ci cu akcang ah mi hmat ci. 14 Khomdek chang gui ah Hunbawi ah kiak khai ah Khanpughi naw Ahtapa am kyum law cu mi hmu ne mi shäu ah kiak ci nei. 15 Bawi Jesuh cu Khanpughi ah Htapa nei, ci ne ng'kiaa ciah chang cu, Khanpughi ung om ciah kiak ci, Khanpughi phi ani ung om ci. 16 Khanpughi naw anam hni nak gui cu mi mät naw mi hmat ne mi zum ci. Khanpughi cu m'hni nak ah kiak ci, m'hni nak ung om ci cu Khanpughi ung om ciah kiak ci, Khanpughi phi ani ung om ci. 17 M'hni nak cu mik mi ung kümbe ci kia sei, m'khoichaa nak ah Hnüüp ung mik mi cu k'thamah nak om khai nei. Cun ah a om ah mawng cu, mik mi cu khomdek khan ah mi ghin nak ung Bawi Khrit ah mäih ah mi ghin ah hmawk ah kiak ci. 18 M'hni nak ung kyih nak kä om ci, kümbe ciah m'hni nak naw kyih nak avan nüng ci. Kyih nak naw m'shetkat nak bik ciah kia sei, kyih nak om ciah chang ung m'hni nak kä kümbe hlawt ci. 19 Khanpughi naw nam hni gui ma sei, mik mi naw ani cu mi m'hni ci. 20 Kei Khanpughi kam hni ci nei, ci netah a phäi nau thüi nak ciah chang cu hleei ciah kiak ci. A mik awn a hmuh ah a phäi nau hngaw kä m'hni hlawt ci naw, amik awn kä a hmuh ah Khanpughi cu küm hni hlawt khai nei. 21 Bawi Khrit ah na peit gui ah thukhän cu; Khanpughi m'hni ci naw, a phäi nau phi am hni vai nei, ciah kiak ci.
1 Bawi Jesuh cu Messiah nei ci ne zum ciah chang phung cu, Khanpughi ah hta ah kiak ci. Pa Khanpughi m'hni ciah chang naw Ani ah ahta cun phi m'hni ci. 2 Mik mi naw Khanpughi cu mi m'hni ne, ang thukhän cu mi läk nak awn, Khanpughi ah hta gui mi m'hni nak cu mi hmat ci. 3 Khanpughi m'hni nak ci cu ang thu khän läk nak ah kiak ci. Ang thu khän läk cu mik mi ah phäh ah phuih gih ah kä kiak ci. 4 A i ah kia sei ci ung Khanpughi ah hta phung cun naw khomdek khan cu m'khüt nüng ci. Mdek khan ung m'khüt nüng nak mi gah cu mi zum nak awn ah kiak ci. 5 Khomdek khan cu a u naw m'khüt nüng khai ang? Bawi Jesuh cu Khanpughi ah Htapa ah zum ciah chang bäng naw m'dekkhan cu m'khüt nüng ci. 6 Bawi Jesuh Khrit cu tui awn ang hnim nak la asi huk ne asih nak awn kyum lawk ciah Bawipa ah kiak ci. Ani cu tui bäng awn kyum lawk ciah kä kiak ci, tui la si awn kyum lawk ciah kiak ci. Cun ah düng ciah a mawng cu düng ciah Mumcha naw damg sak ci. 7 Saksi thum om ci; 8 Cun gui cu Mumcha, tui la Si ah kiak ci; cun ah thum naw tumat ah saksi dang sak ci gui. 9 Mik mi naw chang ah saksi cu mi zum ci, cun ung phi Khanpughi ah saksi cu m'khungpang pi bäih ci. Ani naw saksi nak ana peit gui cu Ahtapa ah mawnglam ah kiak ci. 10 Khanpughi ah Htapa zum ciah chang phung naw shin ah saksi cu am lung kyong ung shum ci. Cun ung phi Khanpughi kä zum ci läi cu, Khanpughi naw Ahtapa ah mawng a pyeinsak cu kä zum ci kia ne, Khanpughi hleeihlak ciah mäih ah ng'lat sak ciah chang ah kiak ci. 11 Saksi ah ang dang nak ah mawng cu; Khanpughi naw ang tüi ghin nak cu na pe gui ci, cun ah ghin nak cu Ahtapa ung phung ci. 12 Antapa gah ciah chang cu ghin nak gah ci; Khanpughi ah Ahtapa kä gah ciah chang cu, ghin nak kä gah ci. 13 Kei naw shin ah ca ka ning guk law gui ah mawng cu, nangmi cu Khanpughi ah Htapa nami zum ci kia sei, ang tüi ghin nak nami gah ah mawng cu, nami hmat vai ah hmawk ah kiak ci nei. 14 Amät ah ng'zak hlü ah mi ng'zoih thäh phung cu na ngaih pe gui ciah ngaih gep nak om sei, mik mi cu Khanpughi ah ma ah mi k'thamah ci. 15 Mi ng'zoih thäh phung cu Khanpughi naw na ngaih pe gui ci; cun cu düng sei mi hmat ah a kiak ung, mi ng'zoih thäh phung na pe gui ciah phi mi hmat ci. 16 Na phäi nau tumat cu a cheishoh ung phi sih nak ah kat nak ah kä ah kiak ah khoi ung, Khanpughi ah nak taigü peit vai, Khanpughi naw ani am ghin nak cu pek khai nei. Cun cu sih nak ung kä gawk nak hnga vai ah cheishoh ciah chang gui ah mawng ah kiak ci. Cun ung phi sih nak ung gawk nak ah cheishoh nak om ci, cun ah hmawk ah nami taigü vai ah ka pyein ah kä kiak ci. 17 Shetkat nak nüng nüng cu cheishoh nak ah kiak ci, cun ung phi sih nak ah kä gawk nak ah cheishoh nak om ci. 18 Khanpughi ah hta cun naw cheishoh nak kä bi ba ciah mi hmat ci, ani cu Khanpughi ah Htapa naw ngaih gep vai ah a shungvawng pyi ah kia sei, khoshe naw api ah phi kä tawklaih hlawt ci. 19 Khomdek khan avan cu khoshe ah uk nak kaa ah om pang sei phi, mik mi cu, Khanpughi ah chang gui ah mi kiak cu, mi hmat ci. 20 Khanpughi ah Htapa cu kyum law ne, Lulang nak cu na pe gui sei, Khanpughi akcang mi hmat tu cun phi, mik mi naw mi hmat ci. Mik mi cu Ahtapa Bawi Jesuh Khrit awn mi kawng ät nak awn, Khanpughi akcang awn phi kawng ät ne mi ghing ci. Shin cu Khanpughi akcang ah kiak ci, ani ung mi gah cu angtäi ghin nak ah kiak ci. 21 Ka hta gui aw, Khanpughi kä akcang cu nami phiawn nak vai a nami om vai nei!
1 A ng'vaihta kei naw, akcang ah kam hni ah hnumi nu la ahta gui am ca ka guk lawk ci nei. Kei bäng ah kä kiak ciah thu thuuk ung m'hni nak hmat ci phung naw, nang cu ning m'hni ci nei. 2 A i ah kia sei ci ung thu thuuk cu keimi ung om ne, ngawi zä khäng khai ah a kiak ah hmawk ah kia ci. 3 Pa Khanpughi la ah Ahtapa Bawipa Jesuh Khrit ah m'geinsei nak, chihna nak la dimdeeih nak cu, thu thuuk shing ne m'hni nak om ciah mik mi ah khan ah om sä. 4 Na hta am shah gui cu, Khanpughi ah thukhän ah mäih ah, thudäng ung ami ghin cu hmat ne, ang htei ah ka zei ci nei. 5 Cun ah kia sei kam hni ah hnumi, mik mi cu mi van mi ng'zumhni tuk khai nei. Shin ah ca ka guk law shi thukhän thai ah kä kiak ci, ak htük bäih ge ung nangmi ung om ciah thukhän ah kiak ci. 6 Kei naw ka pyein ah m'hni nak ah mawng cu, mik mi naw Khanpughi ah thukhän läk ne mi ghin nak vai ah kiak ci nei. Nangmi nami van naw ak htük ge ung nami ng'zak ah thukhän cu, nangmi nami van cu m'hni nak ah kyong ung nami om vai nei, ciah kiak ci. 7 Bawi Jesuh Khrit cu hnicim chang ah zung tüi lawk ci, ci cu kä zum ciah chang thuvi gui akda m'dek khan ah gawk lawk ci gui nei. Cun ah mäih thuvi theileh ciah chang gui cu, Bawi Khrit ah gaa gui ah kiak ci nei. 8 Geing na ne nami om vai nei, cun ung nangmi ah hmawk ah keimi ah bi cu akholä ah kä kiak khai, nangmi phi m'cümhnah nak ak be nami gah khai. 9 Bawi Khrit ah m'theithang nak ah kyong ah kä om ne, ak pung ah om ciah chang ung Khanpughi kä om ci. Bawi Khrit ah m'theithang nak kyong ung om ciah chang cu Apa la Ahtapa ani nik hnih ah om nak ah kiak ci. 10 Shin ah m'theithang ah mäiä ah kä m'theithang ciah chang a gawk law ah a kiak ung, nami im ah kä nami dou en vai, Nang ung dimdeeih nak om sä, ä ci ne phi kä nami pyein en vai. 11 Ani ana dou ciah chang cu ani ah paw ah kia law ne, shetkat nak bi tuk ciah chang ah kiak ci. 12 Kei naw ka pyein vai akda om pang sei phi, ca awn kä ka gu ba hlük ci nei. Mi van kümbe sei mi zeikiai nak vai ah, nami om nak ah ka mät law ngä sei, ng'hmuh ne mi ng'thu vai ka zum ci nei. 13 Nam hni ah nabe ah hta gui naw ning khaih na u ne, ning zavaih nak ci gui nei.
1 Ang vaihta kei naw akcang ah kam hni ah Kaius-am ca ka guk lawk ci nei. 2 Kam hni ah ka pui, apäng avan ung na bämang vai la na gaigawng vai ah ka ning taigü pek ci nei. Nang cu Mumcha ung na k'thamah ciah ka ning hmat ci nei. 3 Am shah khritha gui ami law päng ung, nang cu thu thuuk ung na bekhüt ah mawng pyein law u sei, ang htei ah ka zei ci, nang cu thudäng ung akcang ah na ghing ciah kiak ci nei. 4 Ka hta gui thudäng ung nami ghin ah mawng cu ng'za ne ka zei ah kawn ah, kei na zei sak ci a i kä om ba ci nei. 5 Kam hni ah ka pui, nang naw kä ng'hmuhmat pang man ah Khritha gui ah khan ah bekhüt ne bi na bi cu bä ci nei. 6 Ngahmi naw nang ah m'hni nak ah mawng cu khrithabum ung pyein lawk ci gui nei. Ngahmi naw Khanpughi naw a zei nak ah, a khuut cu ma lam ah ami bi lä thei vai ah, nam theithang gui vai nei. 7 Ngahmi cu kä zum ci gui ah m'theithang nak kä dou u ne, Bawi Khrit ah khuut bi vai ah ng'düi lawk ci gui ah kiak ci nei. 8 Mik mi khritha gui naw cun ah mäih chang gui cu mi m'htei gui vai ah kiak ci nei. Cun ung vah ngahmi ah thudäng ah mawng bilawh nak cu mi hunshawih gui ciah kiak khai. 9 Kei naw khrithabum-am ca gu ne ka pek ci, cun ung phi ami ng'vaihta Diotrephes naw kei ah thu cu kä ngai ci nei. 10 Kei ka law ung ani ah bilawh gui phung cu ka ning m'thein gui khai nei. Ani naw mik mi cu kä na zei nah gui ne, nam hleei gui ne thu pyein ci nei. Cun bäng ah kä kiak ciah, Khritha phäi nau gui ami law ung kä dou gui ci, dou gui hlük ciah chang gui phi maa nah gui ne, khrithabum ung kaa k'täm gui vai ah phi k'tha nak ci nei. 11 Ka püi gui aw, akshe cu kä nami thei tu vai, akni cu nami thei tu vai nei. Akni bilo ciah chang ung Khanpughi om ci, akshe bilo ciah chang naw Khanpughi kä hmuk ci. 12 Chang nüng naw Demetrius ah ni nak cu pyein ci nei, thudäng mät naw phi ani ah ni nak cu dang sak ci nei. Keimi naw ani ah ni nak cu kami be sak hlük ci, Keimi ah thu ang düng ah mawng cu, nangmi naw nami hmat ci nei. 13 Kei naw ka ning m'thein gui vai akda om pang sei phi, ca awn kä ka gu ba hlük ci nei. 14 Kei cu kä shou pha sei gawk law ngäh sei, nangmi awn ng'hmuh ne mi ng'thu khai ah ka ngai ci nei. 15 Nangmi ung dimdeeih nak om sä, na teih püi gui ami van naw ning zavaih nak ci gui nei. Na teihpüi gui ami van m'thein tu ba gui .
1 Jesuh Khrit ah changshäm, James ah nau Jude naw, Khanpughi naw a khü gui, Pa Khanpughi ah m'hni nak ung om ci gui, Bawipa Jesuh Khrit ah ngäng bom gui ah chang gui am ca ka ning guk law gui ci nei. 2 Chimgein nak, dimdeeih nak la zumhni nak cu nangmi ung kümbe ne om sä. 3 Kam'hni ah Teihpüi gui aw, kei naw nangmi am mi van naw zum ne mi dou ah hun nak ah mawng, ca ka ning guk gui vai ah ka k'tha na te ci. Cun ung phi Khanpughi naw ak chang gui am m'khäm ne a ap gui ah zum nak cu khäng htek khai ah nami ghunkhawn vai ah ang ghit ah ca gu ne, nangmi am k'thagui ning peit gui vai cu hlü lawk ci. 4 A i ah kya sei ci ung Khanpughi kä zum ci gui cu nami ng'lung ah lut ne om ci gui nei. Ngahmi naw mi Khanpughi ah m'gein nak ah ng'thu cu, khawdek pumsa ami ng'zak hlü lam düt ah m'hlat u ne, tumat khläm om ciah mi Bawi, mi Mang Jesuh Khrit cun phi hun ng'tuk püi ci gui nei. Cun ah chang gui cu cau pui ge, shetkat nak gah khai gui ah m'hnütbäi gui ah kyak ci. 5 Bawipa naw Israel chang gui cu k'phyawn gui ne, Egypt khaw ung kaa k'plawk ba gui netah, kä zum ciah chang gui adimaih sak gui cu, nami hmat pyi ah kya pang sei phi ka ning shäm ba sak gui hlük ci nei. 6 Ami mät ah gah ah hrilham ah kyong ung kä om u ne, ami om nak ah hmun nawng shüt ci gui ah Khankhaw chang gui ah mawng cu nami shäm ba khai nei. Ngahmi cu Khanpughi naw am khoichaa nak vai ah hnüüp ung am shetkat gui vai ah m'htei khaw hnüüp khui ung, kä k'phyan ba hlawt ah m'si gui awn khit ne k'pawng gui ci nei. 7 Sodom la Komorrah la ani pei ung ah gawnu gui cu ngaih tüh ba shäm vä, cun ah gawnu gui ung om ciah chang gui cu, a cun ah khan chang gui ah mäih ah ng'zawng'pawm häithaw düt ne mupyei ci gui. Chang avan a khäntam nak ah ngahmi cu ang tüi ah düi ciah mei awn m'shetkat nak gah ci gui. 8 A cun ah mäih ah Khanpughi kä zum ciah chang gui cu kyak ci gui. Ngahmi cu ami mät ah muimang awn ami pumsa cu shetkat sak ci gui. Khanpughi ah huham cu a i ah kä sui u ne, hlüngtai ciah khan chang cu päipih ci gui. 9 Khan chang gui ah bawi Michael naw phi shin ah mäih cu kä bik ci, Mose ah pumsa a u naw lak khai ciah mawng Khoshe awn ani ng'cuh nak ung, Michael naw Khoshe cu kä k'shedam na zäi netah, Khanpughi naw khän ne ning m'cäi sä cin kyak nak ci. 10 Cun ung phi shin ah chang gui naw ami mät ah kä hmuhmat phung cu ng'zo m'sho ci gui. K'pyamaa khisa gui ah mäih ah, ami nupuk m'lung ngaih awn ami hmuhmat naw phi ami mät cu dimaih sak gui ci. 11 Ngahmi ah hmawk ah thüi sei aih vai kyak ci nei. Ngahmi cu Kain ah lam läk ci gui nei. Ngui ami ng'zak nak hlü awn Balaam ah shetkat ah mäih ah chishoh pyi ci gui nei. Korah ah mäih ah Khanpughi ng'tuk püi u ne, ani ah mäih ah dishum ci gui nei. 12 Ngahmi cu kä lä ng'aa neh, ei aw plawihnai u ne, nami mang ei küikyang cu thang m'shet ci gui nei. Ngah mi cu ami mät ah hmawk bäng teng ci gui. Ngahmi cu khaw ah phi kä aa hlawt ciah, khawkhi naw a zon shäishäi ah khaw ng'mei awn täng ci gui. Kä m'theihpai sei, Khaw cingkhaw ah ang zung ah mawi ne m'shän ung chawng ne sik ciah singghing awn phi täng ci gui. 13 Ngahmi cu m'naw ne ng'hnauk ciah tuinu awn phi täng ci gui, tuinu ng'hnauk ah am vom ah mäih ah, ngahmi ah lä ng'aa nak vai ah ami om ih cu dang ci nei. Ngahmi cu a hteh nak vai ah lam kä om ciah aisi awn phi täng ci gui. Ngahmi ah hmawk ah Khanpughi naw thuuk ne ak hmüp nak pi k'bäih ung, ang tüi sei ami om nak vai ah hmun cu m'hnüt pe gui ci. 14 Adam ung kaa naw ang shon chuk nak Enok naw, cun gui ah a mawng k'cä ne a pyein cu, Bawipa cu tämkäp phyaa khak ah ak khan chang theing gui awn kyum law ne, 15 chang ah hta avan cu m'khoichak khai nei. Hnicim chang avan cu ami cheishoh shetkat nak ah hmawk la Khanpughi kä zum ne shekak ciah chang gui naw, Khanpughi ah kä ng'zak hlü ah ami ngetngawng ng'plahtang ah ng'thu gui ah khan ah Khanpughi naw m'shetkat gui khai nei! 16 Cun ah chang gui cu ang tüi sei nawmpang u ne, kat nak phi chang am m'suh m'noh ci gui; ngahmi naw ami mät ah ng'zak hlü ah ak shekha cu läk ci gui; ami mät ah mawng pyein ne khäghah u ne, ami mät hmawk ah chang phi m'hlüngtai ci gui. 17 Teihpüi gui aw, Mi Bawipa Jesuh Khrit ah ang düihpüi gui naw ami ning m'thein m'kan gui cu shäm tu ba vä. 18 Ngahmi naw, Ak hnu k'bäih ah khaw hnüüp gui ung ning päipih ciah chang gui, Khanpughi kä shäm hmat ne ami mät ah ng'zak hlü ah om ih ciah chang gui dang lawk khai gui nei. ä ci ne pyein ci gui. 19 Cun ah chang gui cu, khrihthabum k'pyeekpai ciah chang gui, ami nupuk ng'zakhlä ah läk ciah chang gui, Mumcha kä om ciah chang gui ah kyak ci. 20 Cun ung phi ka teihpüi gui, nami mät ah theingcim pi k'bäih ciah zum nak ung cokyang khänghtek ne nami om vai nei. Mumcha Theing ah hlüngtai nak ah kyong ung nami k'taigü vai nei, 21 Khanpughi ah zumhni nak cu nami zii hnei vai nei, mi Bawipa Jesuh Khrit naw ak chimgein nak awn ang tüi ghin nak aning peit nak gui ah hnüüp cu nami ngäng vai nei. 22 Ngaih gep nak kä om ciah chang gui cu nami chimgein gui vai nei; 23 Mei k'cang ung lut ciah chang gui phi nami khui tu ba gui vai nei. Chang am shah gui cu kyihkyawk nak awn nami chimgein vai, cun ung phi ami ng'zaw ng'koh shetkat nak kawpkai ciah ami suisak läi cu m'shemshai ci nei. 24 Kä nami kyuk ng'täät vai ah ning venk'pang gui ne, ning theingcim sak gui ne, zeikyai nak awn abü khäk nak ah amaa ah ning gawk sak gui ne; 25 Jesuh Khrit Bawipa awn na hun k'phyawn gui ciah tumat bäng nak ciah Khanpughi cu cau puzinpamthak ung tüi ne, tuhbäi akhin, ngawi zä hta ng'shon ung, bämang hlüngtai, kuikyang huham ne om sä! Amen.
1 Shin ah cauk cu Bawi Khrit ah m'dang ah muimang thu phlaan gui guk ah kiak ci. Khanpughi naw shin ah Thu Phlaan a peit ah mawng cu, ak changshäm gui-am kä shou pha sei gawk law ge khai ah amwang gui am thein nak gui ah kiak ci. Bawi Khrit naw ak khankhaw chang cu Johan ah om nak ah tüi law netah, shin ah Thu phlaan cu a hmat sak ah kiak ci. 2 Johan naw Khanpughi ah ng'thu la Jesuh Khrit ah m'dang ah düng nak cu a hmuh ah mäih bä bä ah a guk ba ah kiak ci. 3 Shin ah mawng gui aküm law nak vai ng'et law pi ci kiasei, shin ah ca phat ciah chang phung la shin ah ng'cäi nak ah ng'thuthuuk ngai ng'zak ciah chang phung ni, shin ung guk ah thuthuuk läk ciah chang gui phung cu, zeikiai nak om ci nei. 4 Johan naw Asia khaw gawnu pachih ung khrihtabum gui-am ca aning guk law gui cu; Zanta, tuhngawi, ngawi zä ang tüi sei om ciah Khanpughi, amang kiang ah maa ah ng'tän ciah mumcha pachih la; 5 bekhüt ne saksi ne, sih nak ung kaa tho ba htük ne, mdek la khan ghangpughang nüng nüng uk ciah Bawipa Jesuh Khrit ah m'geinsei nak la dimdeeih nak cu nangmi ung om sä. Mik mi na m'hni gui ne, asi huk ne asih nak awn, mi kat nak ung nak phiawn gui netah; 6 Apa Khanpughi ah khuut bi vai ah a uknak khaw ung Taigü ah na m'düih gui ciah Bawipa Jesuh Khrit cu, hta ng'shon ung bämang ne hlüngtai ne om sä! Amen. 7 Teng tu vä, Bawipa cu khawmei ung cum ne kyum lawk ci nei, chang nüng nüng naw hmuk khai gui nei, amät k'htei awn shun te ci gui naw phi hmu tuk khai gui nei. Khomdek ah khan ung chang ah hta avan cu haala zawp khai gui nei. Cun cu akcang ah kia sä!. 8 Kei cu Alpha la Omeka, tän nak la khäm nak ah ka kiak ciü ci ne zanta, tuhngawi ngawi zä angtäi sei om ne hlüngtai pi säih ciah Bawipa Khanpughi naw pyein ci. 9 Kei cu a khaw päng ciah chang gui naw ami bui awt ah geinvai nak awt ciah nami paw, Bawipa Jesuh ah chang, nami phäi Johan ah ka kiak ci. Kei cu Bawi Khrit ah düng nak la Khanpughi ah ng'thu ka shäu ah hmawk ah, patmos ng'lei ung ami na äp ah kiak ci. 10 Bawipa khawihnah nak hnüüp ung Mumcha cu kei ah khan ah kyum law khütah, k'phyungheng tum ah mäih ah ng'thu k'aw cu ka hnu lam ah ng'shan law sei ka ng'zak ci. 11 A cun ah k'aw naw, Na hmuh ng'zak gui phung cu ca ung guh ne, Ephesus, Smina, Pakamos, Thiara, Sadis, Philadephia, Laodicea gawnu gui ung Khrithabum gui-am na peit gui vai nei ci ne pyein ci. 12 Cun ah na ng'thu püi ci cu a u ah a kiak ah ng'hlat ne va teng ba netah, ghui mei ng'düi pachih la; 13 cun ah mei-im gui ah ng'lung ah hnicim chang ah mäih tumat cu ka hmuk ci. Ani cu akhawphaa zuk pha khai ah suinu sui ne, ghui m'ciu vawp ci. 14 Alusam cu htome ah mu ah mäih, khläi toi mäih ah bawk ne, amik cu meidüi ah mäih ah ng'shü ci. 15 A khaw cu mei ung m'hling ne m'tui ah kyeicee ah mäih ah tui ne ak aw cu tuinu gaai ne ang hüüt ah mäih ah ng'hmum ci. 16 Ani cu akpat lam ah aisi pachih kawt ne, am gawng ung vangah-vei ghaat ciah khim lut lawk ci. A hmai cu hnüüp lunglai ung hni ng'liing ah mäih ah ng'shü ci. 17 Ani ka hmuh vai-am kei cu chang k'sii ah mäih ah a khaw pei ah kiu ne ka ng'zän ci. Ani naw ka khan ah akpat lam akut taih netah, ä Kä kyikyawk! Kei cu tän nak la khäm nak ah ka kiak ci. 18 Kei cu ghing ne om ciah ka kiak ci, kei cu ka si te ci, cun ung phi tuhbäi hta ng'shon ung ghing ne ka om ci. Sih nak la sihnak ah khaw ah khan ah kei ah huham cu om ci. 19 Tuhbäi kaa gui la ngawi ah gawk lawk khai gui na hmuh phung avan cu, na guk vai nei. 20 Ka k'pat lam ka kut ung om sei na hmuh ah aisi pachih la ghui mei ng'düi pachih ah thuuk ciah a mawng cu; mei ng'düi pachih cu khrihtabum gawnu pachih ah kiak ci, aisi pachih cu khrihtabum gawnu pachih ngäng ciah khanchang pachih ah kiak ci.
1 Ephesus khrihtabum ah khankhaw chang-am ca peit law nei; shin ah ca cu akpat lam ah aisi pachih kawt ne, ghui mei ng'düi pachih ah ng'lung ah hteit shäi shäi ciah m'cäi nak ah kiak ci. 2 Nang ah bilawh cu ka hmat ci, nang naw a i hlawk ah nak tha nak, a i hlawk ah na ling k'tha la hniimgei nak a om cu kei naw ka hmat ci. Nang naw chang she gui kä na hniim gei nak gui hlawt la ang düihpüi ah kä kia lang ne, ana ng'düihpüi nei cik ci gui ah chang gui cu, ami hleeihlak dang khai ah nami k'tä gui cun phi kei naw ka hmat ci. 3 Nang cu hniimgei nak om ci, kei ah hmawk ah ang htei ah na zaica ci, kä nam lungksi ci, 4 Cun ung phi ak htuk ung kaa ah mäih ah nang naw kei cu kä na na m'hni ba ci kia sei, ning pyein m'sheet vai om ci. 5 A i hlawk ah na zu kiak vä cu ngaih tüh ba shäm , na kat nak ung kaa ng'zu ba ne, ak htük ung na bi ah mäih ah na bi ba vai nei. Na kat nak ung kaa kä na ng'zu ba ah a kiak ung na om nak ah kei cu law netah, na mei ng'düi cu a hei ah ka ning hen pek khai nei. 6 Cun ung phi Nikolaitan ah chang gui ah bilawh cu kei naw ka thüi nak ah mäih ah nang naw phi thüi na tuk ci sei, ka ning zei nak ci nei. 7 äKhrihtabum gui-am Mumcha naw am thein gui cu nami hnga a om ung ngai ne nami ng'zak vai nei. Näng nak gah ciah chang-am Khanpughi ah chaam kyong ah phung ciah, ghin nak sing ah aktheih ei nak hning cu ka pek khai nei. 8 äSmirna Khrithabum ah khankhaw chang-am ca peit law nei; Shin ah ca cu tän nak la khäm nak ah kia ne, sihnak ung ka tho ba ciah m'cäi nak ah kia ci. 9 Kei naw na zaica nak la na geinvai nak cu ka hmat ci, cun ung phi nang cu akcang ah na ng'bähmang ci. Keimi Jew chang nei cik ci gui naw ning m'kat gui ne ami ng'thu cu ka hmat ci, ngami cu Jew chang ah kä kiak ci gui, Satan ah chang ah kiak ci gui. 10 Zaica nak na awt vai ah api ah phi kä na kyih-en vai nei. Nangmi am shah gui cu khawshe naw thawng ung ning chum gui netah, ning k'cet gui khai nei, hnüüp gha ah kyong ung zaica ne na om khai nei. Na sih ung khüt sei bekhüt ne om , kei naw nüng nak ah ng'cheng ghin nak ka ning pek khai. 11 äKhrihtabum gui-am Mumcha naw am thein gui cu nami hnga a om ung ngai ne nami ng'zak vai nei! Näng nak gah ciah chang gui cu akhnih vei nak sihnak phiawn nak khai gui nei. 12 äPerkamum Khrihtabum ah khankhaw chang-am ca gu ne peit law ne; Shin ah ca cu vang ah vei ghaat ciah khim shäm ci naw amcäi nak ah kiak ci. 13 Nang a hawi na om cu ka ning hmat ci, nang cu satan ah kiaang ung na om ci. Bekhüt ciah ka chang Antipas cu Satan ah om nak ung ami ngawn zah ung, nang cu kei ung ng'düng ne na zum nak kä na nawng ci. 14 Cun ung phi Balaam ah m'theithang läk ciah chang api cu pyein m'shet vai om ci nei; a gup-am sonkcan ah ei ei vai la, pletbeng vai ah Israel chang gui-am lam shäm gui ciah Balak khawshe cu Balaam naw am theithang ah kiak ci. 15 A cun ah mäih ah nangmi ung Nikolaitan ah chang gui ah m'theithang nak läk ciah chang gui phi om ci. 16 Tuhbäi nami kat nak ung ng'zu ba vä! Kä nami ng'zu ba ung kam gawng ung lut lawk ciah vang ah vei ghaat ciah khim awn ka ning tu gui khai nei. 17 äKhihtabum gui-am Mumcha naw am thein gui cu nami hnga a om ung ngai ne nami ng'zak vai nei! Näng nak gah ciah chang-am thup ne ghim ah manna m'htut cu ka pek khai, k'toulung bawk phi ka pek khai. Cun ah k'toulung bawk ung guk ah ming thai cu, a u naw kä hmat khai, a cun ah lung gah ci bäng naw hmat khai. 18 äThiatira Khrihtabum ah khankhaw chang-am ca gu ne peit law nei! Shin ah ca cu, a mik meidüi ah mäih ah ng'shü ne, kyei m'tui ah mäih ah pyü sei khaw nak ciah, Khanpughi ah Htapa ah m'cäi nak ah kiak ci. 19 Kei naw a i na bi cu ka hmat ci. Na m'hni nak, na bekhütnak, khuut na bi nak, la na hniimgei nak cu ka hmat ci. A htük ung na bi ah tah bä law pi ni law pi khai ah na bi cun phi ka hmat ci. 20 Cun ung phi nang ka ning pyein m'sheet nak cu, amät naw amät Khanpughi ah ng'shü ah pyein ciah hnumi nu Jezebel cu na dou ah hmawk ah kia ci. Ani naw kei ah chang gui cu ami pletbeng vai la a gup-am sonkcan ah ei nami ei vai ah m'theithang ne lam k'she m'shüm gui ci. 21 Kei naw ani ang zu ba vai ah akhin ka pek ci, cun ung phi ani ashet kat nak ung kä ng'zu ba hlük ci. 22 Cun ah kia sei ani cu a ih phak ung ng'zän sak ne ka geinvai sak khai nei, ani awn ng'zawng'pawm ciah chang gui phi ang htei ah zaica khai gui. Ngami cu cun ah hnumi awn ami shetkat ah hmawk ah kä ami ng'zu ba ah a kiak ung kei naw a tuhbäi ge ka zaica sak gui khai. 23 Ani läk ciah chang gui cu ka ngawn gui khai, cun kawn ah kei cu chang nüng ah m'lung ngaih la ng'zak hlü ka hmu hmat ciah, khrihtabum avan naw hmat khai gui nei. 24 Cun ung phi ngami ah kawn ah Thiatira ung chang gui naw cun ah shekak ciah m'thei nak cu kä läk ci gui. chang a hei gui naw Satan ah thuuk ciah a mawng gui ah ami pyein gui cun phi, nangmi naw kä nami m'thei tuk ci. Nangmi ah khan ah a hei phuih gih kä ka taih khai. 25 Kei kä ka law pha ah chuih nami kut ung om ci cu, htek sei nami shum vai. 26 Näng nak gah ne, kei ah ka ng'zak hlü ah khaw khüt sei om ciah chang-am Kapa ung ka gah ah huham cu ka pek khai. Cun ah huham cu, chang pakhui avan m'si k'hteipawng awn uk gui ne, m'sitawn awn m'dek k'am thah gep ah mäih ah dep nak ah kiak ci. Kei naw ngami-am thaihke aisi phi ka pe gui khai nei. 29 äKhrihtabum gui-am Mumcha naw am thein gui cu, nami hnga a om ung ngai ne nami ng'zak vai nei!
1 Sadis khrihtabum ah khankhaw chang-am ca gu ne peit law nei; Shin ah ca cu Khanpughi ah Mumcha pachih la aisi pachih ah om nak naw amcäi nak ah kiak ci. Nang ah bilawh cu kei naw ka hmat ci; Nang cu ghing ciah na ng'ming thang pang sei phi na sik ci. 2 Cun ah kia sei tho law , nang ung om ba ciah ghin nak kä a maih pha ung, nak tha be sak . Nang ah bilawh cu Kapa Khanpughi ah maa ah kä kümbe phak ciah kei naw ka hmuk ci nei. 3 Nami ng'thei tu la nami ng'zak tu gui cu shäm ba ne läk u ne, nami kat nak ung kaa ng'zu ba vä. Kä na thawh law ah a kiak ung m'gui-ei ah mäih ah na om nak ah kei ka lawk khai nei, kei ka law nak vai ah a khin cu nang naw kä na hmat khai. 4 Cun ung phi Sadis gawnu ung asui theing sak ci api om ci. Nangmi cu nami khin khaa ci kia sei, sui bawk sui ne kei awn, nami hteit hton tu ghawm khai nei. 5 Näng nak gah ciah chang gui cu sui bawk sui khai gui, kei naw ngami ah ming cu ghin nak cauk ung kaa kä ka heeng khai. Ani cu kei ah chang ah a kiak ah mawng, Kapa la ak khan chang gui ah maa ah kei naw ng'kiaa ne ka pyein khai nei. 6 äKhrihtabum gui-am, Mumcha naw am thein gui cu, nami hnga a om ung ngai ne nami ng'zak vai nei! 7 äPhiladelphia Khrihtabum ah khankhaw chang-am ca gu ne peit law nei; Shin ah ca cu ng'ciim ne ng'düng ciah ng'cäi nak ah kiak ci. Ani naw David ah m'kawt k'hnawn nak cu kawt ci, ani naw m'kawt ak hnawn ung a u naw kä khai hlawt ci, ani naw m'kawt a khai ung a u naw kä k'hnawng hlawt ci. 8 Nang ah na bi cu kei naw ka hmat ci, Nang ung hlüngtai nak api a om ung phi, kei ah m'thei cu läk ne kei ah khan ah na bekhüt cu kei naw ka hmat ci. Kei naw na maa ah m'kawt cu ka hnawng ci, cun ah m'kawt cu a u naw kä khai hlawt khai. 9 Ngai vä! Keimi cu Jew chang nei ci ne hleei ci gui ah Satan ah chang gui cu na khaw kaa ah kawp ne ka ng'phah sak gui khai. Kei naw ka ning m'hni gui cu ami van naw hmat khai gui. 10 A i ah kia sei ci ung nang naw ka ng'thu cu na k'pääi ne na khäm ci, m'dek ah khan ah chang gui phawtcam gui khai ah zaica nak a gawk law hnüüp ung, nang cu kei naw ka ning ngung khai nei. 11 Kei ka gawk law ge vai ci nei, nang ung om ci cu m'htek ne khäm ge , cun ung nang ah nüng nak ng'chuh cu a u naw kä ning gut hlawt khai. 12 Näng ciah chang cu Kapa Khanpughi ah pum im ung mang k'tung ah ng'düi khai, ani cu ngawi ah phi a cun ung kaa kä ng'nawn ba khai. Kapa Khanpughi ah ming la Kapa Khanpughi ah khankhaw ah kaa kia lawk khai ah Kapa Khanpughi ah manggaw, Jerusalem gawnu k'thai ah ming cu, kei naw ani ah khan ah ka guk khai. Ani ah khan ah kei ah ming thai cun phi ka guk khai. 13 äKhrihtabum gui-am Mumcha naw am thein gui cu nami hnga a om ung ngai ne nami ng'zak vai nei! 14 äLaodicea Khrihtabum ah khankhaw chang-am ca gu ne peit law nei; Shin ah ca cu Khanpughi ah tüisho gui ung om-maa ah kia ne, bekhüt ne, saksi akcang ah kiak ciah Amen ah m'cäi nak ah kiak ci. 15 Nang ah bilawh cu kei naw ka hmat ci, kei naw nang cu kä na ng'liing kä na khiing ciah ka ning hmat ci. Nang cu na ng'liing baw vai, na khiing baw vai, ah kei naw ka ng'za hlük ci. 16 Cun ung phi nang cu, kä ng'liing sagei, kä khing sagei ne, na awh pawlat ciah kia sei ka m'gawng ung kaa ka ning k'phäi lawk khai! 17 äKei cu ka ng'bähmang ci, kei ung a i phi kä hlü ciü na cik ci, cun ung phi nang cu a i hlawk ah dukhaih ne m'gein vai ah na kiak cu kä na hmat ci. Nang cu dukhaih ne a i kä suisa ne, a i kä hmuteng ne na om ciah chang nei. 18 Cun ah kia sei na bühmang nak vai ah kei ah ghui akcang cu na k'hleih law vai ah ka ning m'cäi ci nei. Na k'plui ci kia ne nang aa nak na shung nak vai ah sui k'theing la namik am dei nak vai ah mik m'tui nak cu kei ah na khleih law vai nei. 19 Kei naw kam hni ah chang phung cu akat nak m'kyuk ne ka mcäi ci. Cun ah kiasei kat nak ung kaa ng'hlat law ba ne, chang na ne na om vai nei. 20 Ngai! Kei cu m'kawt ung ng'düi ne shoh ka khäk ci, kei ah k'aw ng'za ne shoh ak hmawng ciah im ung, kei cu va lut ngä sei, ani awn atäng ah kani ei awk khai, ani phi kei awn atäng ah ei awk khai. 21 Kei cu nüng nak gah ne Kapa ah mang kiaang ung ani awn atäng ah kani ngoh ah mäih ah nüng nak gah ciah chang cu ka mang kiaang ung ka pei ah a ngoh nak vai ah a khin cu ka pek khai nei. 22 äKhrihtabum gui-am Mumcha naw am thein gui cu nami hnga a om ung ngai ne ng'za vä!
1 Cun kawn ah ka mang ung Khanmawpi ah m'kawt ng'hmawng sei ka hmuk ci. 2 Kei naw ka ng'zak htük ah phyungheng ah ng'gin ah mäih ah ng'ging ciah k'aw nawä, shin ung law , ngawi ah ng'dang lawk khai gui ah a mawng cu ka ning hmuh sak khaiä ci ne pyein ci. A cun vai-am Mumcha cu kei ah khan ah gawk lawk ci. Khanmawpi ah mang kiaang tumat om ci, Cun ah kiaang ung mang tumat ngok ci. 3 Ani ah hmai cu pyää m'htak vai ah mäih ah pyü ci. Mang kiaang ah ang veing ung cäi ne ng'kah ciah zapi pawk ci. 4 Cun ah mang kiaang ah ng'veing ung a hei mang kiaang m'ku-lei-phli om ci. Cun ah kiaang gui ung aghaampa sing m'ku-lei-phli ngok ci gui. Ngami cu a bawk bäng bäng sui u ne, ghui lukhu ng'bäng bäng bäng ci gui. 5 Mang kiaang ah kyong ung khaw lailäp ne ng'thüi ne ng'hmum kyeek ciah ak aw gui lut lawk ci. Mang kiaang ah maa ah Khanpughi ah Mumcha pachih ah kiak ciah mei im pachih cu düi ne khang ci. 6 A cun ah mang kiaang ah maa ung pyäälung ah mäih ah vai ci cu om ci. Mang kiaang ah ng'veing ak kit päng ung khikäi paphli om ci. Cun gui cu ami hnu ami maa ah mik bäng ah kia ci gui. 7 Ak htük bäih tumat cu phongkawng ah mäih lawk ci, ak hnih nak cu vantang ah mäih lawk ci; ak thum nak cu chang ah hmai ah mäih hmai nak ci, ak phli nak cu zong ciah vanbuk hmu ah mäih lawk ci. 8 Cun ah khikäi paphli cu, ami ng'phia pachuk ci lawk ci, ami pum akpung akyong avan ung mik bäng ah kiak ci. Amä ak hnüüp ngami cu kä ng'däm phung ne ng'äi m'cu u ne; Aktheing, aktheing, aktheing cu Bawipa nei, Hlüngtai pi säih ne, Zanta, tuhngawi, ngawi zä angtai ghing ciah Khanpughi nei, ä ci ne m'kümtou ci gui. 9 Mang kiaang ung ngo ne, angtäi sei ghing ne om ciah Bawimang ah bühmang nak, hlüngtai nak, küikyang nak gui cu, khikäi paphli naw ng'äi m'cu ne m'kümtou ci gui. A cun päng ung, 10 aghaampa m'ku-lei-phli naw angtäi ah ghing ne mang kiang ung ngok ciah, Bawimang ah maa ah m'khuukdong ne, khawihnah ci gui. Ngami naw mang kiaang ah maa ah ami lukhu gui cu m'shän u netah; 11 äKami Bawipa, Khanpughi, Nang naw ang tüi avan cu na tüisho ciah kia sei, Nang ah ng'zak hlü ah ang tüi cu ghing om ciah kia ci. Cun ah kia sei bühmang nak, küikyang nak, hlüngtai nak gui cu Nang awn khinkhaa ci nei ci ne pyein ci gui.
1 Mang kiaang ung ngok ciah akpat lam akut ung cakchaw cu ka hmuk ci; cun ah cakchaw cu vang ah vei ah ca be sei gu ne, m'hnüt nak chih awn m'hnüt ah kiak ci. 2 Cun kawn ah hlüngtai säih ciah khankhaw chang naw, A u chang naw, shin ah m'hnüt nak gui cu khawk ne, cakchaw cu k'phian hning khai ang? ci ne m'lau sei ka hmuk ci. 3 Cun ung phi khankhaw la khomdek, khomdek ah kaa avan ung cun ah cakchaw k'phian ne teng khai cu a u phi kä om ci. 4 Cun ah cakchaw cu k'phian khin khai, teng khin khai, a u kä om khütah, kei cu m'lau ne ka kyap ci. 5 Cun kawn ah aghaampa gui ung kaa tumat naw, Kä kyap ne teng , Judah pakhui ung kaa phongkawng ah mäih ah kiak ciah David ah hta ng'shon cu nüng nak gah pyi ci nei, ani naw m'hnüt nak chih cu khawk ne, cakchaw cu k'phian hning ci nei, ä ci ne pyein ci. 6 Cun kawn ah htomehta cu khikäi paphli la aghaampa gui ah ng'lung ah mang kiaang ah lai ung ng'düi sei ka hmuk ci. Ani cu küikyan nak vai ngawn pyi ah htomehta awn täng ci. Ani ung aki chih la amik chih om ci. Cun gui cu khomdek khan avan ung a tüih ah Khanpughi ah Mumcha chih ah kiak ci. 7 Cun ah htomehta naw law ne mang kiaang ung ngok ciah k'pat lam kut ung kaa cakchaw cu lak ci. 8 Cun ah a lak vai-am khikäi paphli la aghaampa m'ku-lei-phli cu, htomehta ah maa ah kawp zawp u ne, ak chang sing naw tingtäu bäng bäng la Khanpughi ah chang gui ah taigü nak ah kia ciah tui ng'uui awn be ciah ghui eikbei gui cu kawt sek sek u netah, 9 ami m'cu ah ng'äi k'thai cu; Nang cu shin ah cakchaw la ne, M'Hnüt nak gui khawk ne k'phian khai ah na khin ci nei, Nang cu ami ning ngawn nak la küikyan khai ah Na sih nak awn, khaw nüng ung thu a hlü hlä ah ng'thu ciah, Chang pakhui, ng'shon law phung cu, Khanpughi ah hmawk ah Na khleih ci nei. 10 Nang naw ngami cu Khanpughi ah khuut bik khai gui ah ngung nak ah taigü ah na k'hmoh gui ci. Ngami naw m'dek khan ah uknak cu gah khai gui nei, ä ciah kiak ci. 11 Cun kawn ah han teng ba netah tämkäp phiakhak da ciah khankhaw chang gui cu ka hmuk ci. Ngami cu mang kiaang koi ne, khikäi paphli la aghaampa guiä koi ne, ng'düi u netah, 12 m'lau ne ng'äi ami m'cu cu; Ami ngawn ah htomehta cu, Hlüngtai nak, bühmang nak, cäivai nak, khüighaat nak, Chang m'sui nak, bäkhäk nak, la m'kümtou nak, gui cu gah khai ah khin khaa ci nei ciah kiak ci. 13 Cun kawn ah khankhaw, khomdek, khomdek ah kaa la tuinu ung la khaw ah kaa, m'dek ah khan ung om ciah akghing ak'om nici naw; Mang kiang ung ngok ciah Bawimang la Htomehta cu, M'kümtou nak, chang m'sui nak, bämang nak, hlüngtai nak, cu ng'shon päng ung om sä ci ne ng'äi ami m'cu cu ka ng'zak ci. 14 Khikäi paphli naw, Amenä ci ne m'shang gui ci gui. A ghaampa gui naw, kawp ne khawihnah ci gui.
1 Cun kawn ah Htomehta naw mhnüt nak pachih ung kaa ak htük bäih cu khawk ne hmawng sei ka hmuk ci. Khikäi paphli ung kaa tumat naw khaw hmum ah mäih ah ng'shan ciah ak aw awn, Lawä a ci cu ka ng'zak ci. 2 Kei naw teng netah ng'se bawk tumat cu ka hmuk ci. Cun ah ng'se ung ng'cum ci cu li kawt ne lukhu gah ciah kiak ci. Ani cu nüng pyi netah nüng ba khai ah pawng ci. 3 Htomehta naw ak hnih nak ah mhnüt nak cu khawk ne hmawng khütah, ak hnih nak ah khikäi naw, Lawä a ci cu ka ng'zak ci. 4 Cun kawn ah ng'se asen tumat lut lawk ci. Cun ung cun ci-am chang gui tumat la tumat ngawn nak tu vai ah khomdek khan ung ng'tuk bi nak huham cu ami peit ah kiak ci. Ani-am khim asen lu ät phi ami peit ah kiak ci. 5 Htomehta naw ak thum nak ah mhnüt nak cu khawk ne hmawng khütah, ak thum nak ah khikäi naw, Lawä a ci cu ka ng'zak ci. Kei naw teng netah ng'se ale tumat cu ka hmuk ci. Cun ung ng'cum ci naw khiin nak tumat akut ung kawt ci. 6 Khikäi paphli ah ng'lung ung kaa lut lawk ciah k'aw tumat cu kei naw ka ng'zak ci. Cun ah k'aw naw, htang a them cu hnüüp ät ng'cheng nak, päm them thum cu hnüüp ät ng'cheng nak ah kiak ci. Cun ung phi olive sing chaam la sapyit chaam cu kä m'di en vä ci ne pyein ci. 7 Htomehta naw ak phli nak ah mhnüt nak cu khawk ne hmawng khütah, ak phli nak ah khikäi naw, Lawä a ci cu ka ng'zak ci. 8 Kei naw teng netah, ng'se amvaw tumat cu ka hmuk ci. Cun ung ng'cum ciah ang ming cu sihnak ah kiak ci. Ani ah hnu ah m'htei khaw naw läk lawk ci. Ngami naw khomdek ah khan, k'bum phli ung kaa k'bum ät ung om ci gui cu, ng'tuk nak, khaw ah zaw nak, lei ah sou nak, ng'plouh ah kiun nak, gui awn sihnak vai ah huham cu gah ci gui. 9 Htomehta naw ak hma nak ah mhnüt nak cu khawk ne hmawng khütah, Khanpughi ah ng'thu ami shäu ah hmawk la bekhüt ne ami saksi ah hmawk ah ami ngawn gui ah mumcha gui cu, sonkiaang ung om u sei ka hmu gui ci. 10 Cun ah mumcha gui naw, Ng'ciim ne, ng'düng ne, hlüngtai pi bäih ciah Bawipa, keimi ami na ngawn gui ah hmawk ah khomdek khan ah chang gui cu kä m'khoichaa, kä m'shetkat gui ah a i güt na om khai ang? ä ci ne m'lau ci gui. 11 Cun gui-am suinu a bawk bäng bäng pe gui netah, ngami ah mäih ah ami ngawn gui vai ah, ami teihpüi gui la ami phäi nau gui, ah ming a küm güt, a shäng hta ami ng'däm vai ah m'cäi gui ci. 12 Htomehta naw ak chuk nak ah mhnüt nak cu khawk ne hmawng khütah, khawhni cu, pyon ale ah mäih ah ng'lat ne le ci, chaa phi sisen ah mäih ah ng'lat ne sen ci, 13 Khankhaw ah aisi gui cu khinu ah khawkhi khütah, k'thei ang kang kiawi ne ang phlu ah mäih ah m'dek ung kia lawk ci gui. 14 Khankhaw mik cu cakchaw ah mäih ah ng'chaw ne maih ci. Mhtung käi la khawgui avan phi ami om nak ung kaa ng'nawn zawp ci gui. 15 Cun ah kia khütah, m'dek khan ung ghangpughang gui, uk ciah mang gui, gakaap bawi gui, bühmang ci gui, hlüngtai ci gui, la khleihtein gui, khuimah gui chang avan cu lung khui gui la khomhtung khan lung k'song gui ung ng'thup zawp ci gui. 16 Ngami naw khomhtung gui la lung k'song gui-am, Mangkiaang ung ngok ciah mik hmai kä kami hmuh vai la Htomehta ah m'lung k'she nak kä kami gah vai ah, kami khan ah kia law ne keimi cu na thup gui! 17 Ngami ah m'lungshe nak ah khaw hnüüp gawk law pyi ci nei, cun cu a u naw ng'düi ne awt hlawt khai zaw? ä ci ne ng'khä ci gui.
1 Cun kawn ah khankhaw chang paphli cu khomdek khocawi akit phli ung ng'düi u sei ka hmu gui ci. Ngami naw m'dek khan, tuinu ah khan la singghing gui cun phi khawkhi naw kä zon hlawt khai ah k'pang ci gui. 2 Cun kawn ah ghing ciah Khanpughi ah mhnüt nak cu law püi ciah khankhaw chang cu hnilaw lam ah kaa law sei ka hmuk ci. Ani naw m'dek khan la tuinu ung lei ng'hlui thawh sak hning khai ah Khanpughi naw huham a peit ah khankhaw chang paphli-am, 3 äKhanpughi ah chang gui cu ami m'calai ung kä mhnüt pha gui ah chuih, khomdek, tuinu la singghing gui cu, kä nami zaica sak-en gui cang vai nei ci ne m'lau ci gui. 4 Cun kawn ah Khanpughi ah mhnüt nak awn ami m'calai ung ami mhnüt gui cu 144, 000 lawk ci, ci cu ka ng'zak ci. Ngami cu Israel pakhui gha-lei-goi ung kaa ah kiak ci gui. 5 Cun ah pakhui gha-lei-goi ah kiak ciah Judah, Reuben, Kad, Asher, Naphtali, Manasseh, Simeon, Levi, Issachar, Zebulum, Josef la Benjamin gui ung kaa, pakhui ät ung täm ät la phia m'ku (12000) ciah am hnüt gui ah kia ci. 9 Cun kawn ah teng ba netah a u naw kä ak khei zawp hlawt vai ah maw ng'nään khli ng'peeih cu ka hmuk ci. Ngami cu akhui päng, apa päng, a khaw päng, ak chang päng ung kaa lawk ci gui ah kiak ci. Ngami cu suinu a bawk bäng bäng sui u ne, hliip ah ng'baan kawt sek sek u ne, mangkiaang la Htomehta ah maa ah ng'düi ci gui. 10 Ngami naw, Hun nak cu mangkiaang ung gok ciah mi Khanpughi la Htomehta ung kaa lawk ci nei ci ne m'lau ci gui. 11 Khankhaw chang gui ami van naw, mangkiaang ni, aghaampa gui ni, khikäi paphli ni gui cu, Kium na ne ng'düi ci gui. Cun kawn ah ngami cu mangkiaang ah maa ah kawp u ne, Khanpughi cu khawihnah u netah, 12 äAmen! Mi Khanpughi cu hlüngtai nak, bämang nak, cäivai nak, zeikiai nak, chang m'sui nak, m'kümtou nak la küikyang nak gui awn, ang shon päng ung kümbe ne om sä, Amen!ä ci ne m'lau ci gui. 13 Ahgaampa gui ung kaa tumat naw, suinu a bawk bäng bäng sui ci gui cu, a u gui ang? A hawi kaa lawk ci gui ang? ci ne nang shik ci. Kei naw, Bawipa aw, kei naw kä ka hmat ci nei, nang naw va na hmat ciü ci ne ka m'shang tu ba ci. 14 Ani naw, Ngami cu geinvai nak ah dukdeiu nak ung kaa phiawng lawk ci gui ah kiak ci nei. Ngami cu ami suinu gui avan Htomehta ah si ung bawk khai ah pheet pyi ci gui ah kiak ci. 15 Cun ah kia sei ngami cu Khanpughi ah mangkiaang ah maa ah ng'düi u ne, amä ak hnüüp pum im kyong ah om ne khawihnah ci gui. Mangkiaang ung ngok ci naw ngami cu ngung gui ne, käikyaan gui ci. 16 Ei ah cawi nak, tui ah gha nak, hni ah ng'liing nak, mei ah ng'kyeng nak, ngami ah khan ah kä om ba khai. 17 A i ah kia sei ci ung mangkiaang ah lai ung om ciah Htomehta naw, ngami cu ngung gui ne, ghin nak tui k'gei ah khawng nak ah khah püi gui khai. Khanpughi naw phi ngami ah mik ung kaa ng'phli tui phung cu ghu pe gui khaiä ci ne pyein ci.
1 Htomehta naw apachih nak ah mhnüt nak cu khawk ne hmawng khütah, khanmawpi ah shei-ä-kiawm vai ung ding ne kyiip ci. 2 Cun kawn ah Khanpughi ah maa ah ng'düi ci gui ah khankhaw chang pachih cu ka hmu gui ci. Ngami cu phyungheng pachih ami peit gui ah kiak ci. 3 Cun kawn ah ghui tawnglang kawt ciah, khankhaw chang a hei cu law ne, sonkiaang ah pei ah ng'düi lawk ci. Ani cu mangkiaang ah maa ah ng'düi ciah ghui sonkiaang ah khan ah Khanpughi ah chang gui naw ami taigü nak vai la m'khih ne ami sonkiaan nak vai ah tui ng'uui akda ami peit ah kiak ci. 4 M'khih ne ami sonkiaan ah ak khu cu, Khanpughi ah maa ah ng'düi ciah khankhaw chang ah kut ung kaa, Khanpughi ah chang gui awn atäng ah hang kai ci. 5 Cun kawn ah khankhaw chang naw, tawnglang cu la ne, sonkiaan ung kaa mei cu la ne m'khäp netah, khomdek khan ah zuk chah lawk ci. A cun vai-am khaw ng'thüi ne ng'hmum ne ng'kyeek ne, lailäp ne, shihpi thäng ne kia lawk ci. 6 Cun kawn ah phyungheng chih kawt ciah khankhaw chang pachih cu, tum ge vai ne pawng ci gui. 7 Ma lawk bäih ciah khankhaw chang naw ak phyungheng cu tum khütah, si awn ng'caw ciah mei la khawgoh gui cu m'dek khan ah kia lawk ci gui. Khomdek bumthum bum t, singghing bumthum bum ät ui zawp ne, khu m'kim gui avan chawng zawp khai ah ui ci. 8 Akhnih nak ah khankhaw chang naw ak phyungheng cu tum khütah, mei ah düi ciah khomhtung nu tuinu ah khan ah zuk chah law ah mäih ah kia law khütah tuinu bumthum bum ät cu si ng'hlui ah ng'lat ci. 9 Tuinu ung om ciah a hnun k'ghing bumthum bum ät cu si zawp u ne, hteinpaw bumthum bum ät cun phi di zawp ci gui. 10 Akthum nak ah khankhaw chang naw ak phyungheng cu tum khütah, ng'laam ne düi ciah mei m'lei ah mäih ah aisi nu cu khan ah kaa, tuinu bumthum bum ät la tuihta gui ah khan ah kia lawk ci. 11 (Cun ah aisi cu ak kha ming nak ci). Bumthum bum ät ah tui gui cu tui kha ah ng'lat zawp ci gui. Chang khli cu cun ah tui ak kha cu aw u ne si zawp ci gui. 12 Akphli nak ah khankhaw chang naw ak phyungheng cu tum khütah, hni ah bumthum bum t, chaa ah bumthum bum t, aisi gui ah bumthum bum t, cu ng'ziin zawp sei, ami dei nak ah bumthum bum ät cu ng'heiu zawp ci. Mä ah bumthum bum t, hnüüp ah bumthum bum ät ung akdei kä om ba ci. 13 Cun kawn ah kei naw han teng netah, khankhaw k'häu ung zong ne ng'väi ciah vanbuuk hmu cu ka hmuk ci. Cun ah hmu naw, A hei khankhaw chang pathum naw ami tum law vai ah phyungheng thum ah k'aw awn khomdek khan ah om ciah ak ghing gui cu, kyihkyawk nak, kyihkyawk nak, kyihkyawk nak om khai nei ci ne pyein sei ka ng'zak ci.
1 Cun kawn ah akhma nak ah khankhaw chang naw ak phyungheng cu tum khütah khomdek khan ah aisinu tumat kia law sei ka hmuk ci. Cun ah aisi cu m'htei lungkhui hmawn nak vai ami peit ah kia ci. 2 Cun ah aisi naw m'htei lungkhui cu hmawng khütah khawvah ng'ai m'khih ung akhu ah mäih ah meikhu tawt ne shung sei hnimik la khankhaw avan hmüp zawp ci. 3 Cun ah meikhu ung kaa khanpeh gui cu law u ne, khomdek khan ah kia lawk ci gui. Cun gui cu khawm-ai ah mäih ah ami m'äm om ci. 4 Ngami cu singghing khu m'sai kä plawhkheih khai gui, ami m'calai ung Khanpughi ah mhnüt nak kä om ciah chang gui bäng ami plawhsheh vai ah ami m'cäi gui ah kiak ci. 5 Khanpeh gui naw cun ah chang gui cu ami lawh gui vai ah kä kiak ci, chaa hma ah kyong bäng ung ami dukdeiu nak gui vai ah kiak ci. Khanpeh naw htui ne ak dukdeiu nak cu khawm-ai naw a htuih ah mäih ah m'so m'leik khai. 6 Cun ah chaa hma ah kyong ung chang gui naw sih nak vai shui khai gui, cun ung phi kä hmuk khai gui, ngami cu si hlük khai gui, cun ung phi sih nak naw lek gui khai. 7 Cun ah khanpeh gui cu ng'tuk bi ge khai pawng ciah ng'se ah mäih lawk ci gui. Ami lu ung ghui lukhu ng'bäng ci gui ah mäih lawk ci, ami hmai cu chang ah hmai ah mäih lawk ci, 8 Ami lusam cu hnumi ah lusam ah mäih lawk ci, ami haa cu phongkawng ah haa ah mäih lawk ci. 9 Ami ng'kyaang cu m'si shawiphaw k'bah ciah mäih ah kiak ci, ami ng'phia ami khääp cu ng'tuk bik khai ah ng'phäi lawk ciah ng'se gui ah mäih ah ng'hmum ci. 10 Ngami ung khawm-ai ah mäih ah ami ng'mei la ami mawng om ne, ami ng'mei ung chang gui chaa hma ung dukdeiu na gui khai ah huham om ci. 11 Ngami ah ghangpughang cu m'htei lungkhui ah khan chang ah kiak ci. Ani ah ming cu Hebrew ng'thu awn Abaddon, Karik ng'thu awn Apollyon ah kiak ci, (cun cu m'di ci, ciah kiak ci). 12 Kyihkyawk vai tumat ng'pyi pyi ci, cun kawn ah kyihkyawk vai hnih gawk law ba khai. 13 Akchuk nak ah khankhaw chang naw ak phyungheng tum khütah, Khanpughi ah maa ah ng'düi ciah ghui sonkiaang ah ak kit phli ung kaa, ng'thu k'aw cu gawk law sei ka ng'zak ci. 14 Cun ah k'aw naw akchuk nak ah khankhaw chang-am, Eupharatis tuinu pei ah khit ne ami k'pawn ah khankaw chang paphli cu k'phian tu ba gui vä ci ne kiak nak ci. 15 Cun ah kia sei khankhaw chang paphli cu k'phian tu ba gui ci gui. Ngami cu a i kum, a i chaa, a i hnääp, a i ah khin ung phi, hnicim chang avan ah bumthum bum ät cu ngawn ge vai ah om ci gui ah kiak ci. 16 Ng'tuk khai gui ah ng'se awn lawk ci gui ami van cu tämkäp phia goi lawk ci gui ah ka hmat ci. 17 Ka mang ung ka hmuh ah cun ah ng'se ng'cum ci gui ah ami awi k'bah ah shawiphaw gui cu, ak'ai amkim ah mei ah mäih ah sen ne zäi ci gui. Ng'se gui ah ami lu cu phongkawng ah lu ah mäih lawk ci, ami m'gawng ung mei k'düi, meikhu la ami m'äm gui lut lawk ci. 18 Cun ah ng'se gui ah m'gawng ung lut lawk ciah meikdüi, meikhu la m'äm gui naw, chang ah hta avan ah bumthum bum ät cu sih sak zawp ci. 19 Ng'se gui ah huham cu ami m'gawng la ami ng'mei ung om ci. Ami ng'mei gui ung k'phyu ah mäih ah ami lu om sei, acun naw chang gui cu m'so m'leik sak gui khai. 20 Cun ah lei ung kä si tu ne k'pawih ba ciah chang gui cu, ami kat nak ung kä ng'zu ba ci gui. Khawshe gui la ghui ni, kyei ni, lung ni, sing ni awn ami mät naw ami pian ah, kä hmu thei ci, kä ng'za thei ci, kä hteit thei ciah agup gui cu khawihnah lä ci gui. 21 Chang ami ngawn nak, ami ng'pluhkheih nak, ami m'guuk nak, ami plet nak ah phäh ah phi kä ng'zu ba ci gui.
1 Cun kawn ah khankhaw ah kaa m'gääi ciah khankhaw chang tumat kyum law sei ka hmuk ci. Ani cu khongmei sui ne ng'hlawp ci, alu cu zapi naw koi ci, a hmai cu khohni ah mäih lawk ci, akhaw gui cu mei ah düi ciah k'tung gui ah mäih lawk ci. 2 Ani cu k'phiaat pyi ah cakchaw hta akut ung kawt ci. Akpat lam a khaw awn tuinu ung ng'leh ne, ak eng lam a khaw awn khaw kawng ung ng'leh ne ng'düi netah; 3 phongkawng ah m'ngaw ah mäih ah thäng sei ng'khä ci. 4 Cun ah ng'hmumkyeek ciah ng'thu cu ka guk khai ah pawng ngütah, kä na guk-en vai nei, chih vei ng'hmumkyeek ciah ng'thu cu na m'zih vai nei ciah khankhaw ah k'aw cu ka ng'zak ci. 5 Cun kawn ah tuinu la khaw kawng ung ng'düi ciah khankhaw chang naw, ak pat lam akut khankhaw ah han shäng ne, 6 ng'shon päng ung ghing ne, khankhaw la khomdek, tuinu la apäng avan tüi sho ciah Khanpughi ah ming cu han be netah, Cän kawn ah kä shou shä ba khai nei! 7 akchih nak ah khankhaw chang naw pyungheng a tum law ung, Khanpughi naw ak chang, purofet gui amcäi gui ah mäih ah, thuuk ciah apawng püi gui cu pyi phleh sak gui khai nei, ä ci ne pyein ci. 8 Khankhaw ah ng'thu sei ka ng'zak ah k'aw naw kei-am, Hteit ne tuinu la khomdek ung ng'leh ne ng'düi ciah, khankhaw chang ah kut ung k'phiaat ah cakchaw cu na lak vai nei ci ne pyein ci. 9 Cun ah kia sei kei naw, cun ah khankhaw chang ah hteit netah, cakchaw hta cu ana peit vai ah ka k'thäh ci. Cun ah khankhaw chang naw, La netah ei , tui khai nei ci ne pyein ci. 10 Kei naw khankhaw chang ah kut ung kaa cakchaw cu la ne ka ei ci. Cun ah cakchaw cu ka m'gawng ung khawitui ah mäih ah tui pang ne phi, ka zuk däh kawn ah ka chikyong ah kha ne ng'liit ci. 11 Cun kawn ah khankhaw chang naw, Nang cu khaw akda ung, ahlä hlü ah ng'thu ciah khui päng pa päng la ghangpughang gui ah ma ah Khanpughi ah ng'thu cu shäu ne na pyein ba khai nei ci ne na kiak nak ci.
1 Khankhaw chang naw kei-am nüt nak vai htung tumat na pe netah, Hteit ne Khanpughi ah pum im la sonkiaang cu na nüt vai nei, pum im ung khawihnah ci gui phi na khei gui vai nei. 2 Cun ung phi pum im ah ak pung lam cu kä na nüt vai, a i ah kia sei ci ung, cun cu chang pakhui hei gui-am ap gui ah kiak ci. Ngami naw Manggaw Theing cu cha phlikip lei-goi ung ami khaw awn leh m'hnep khai gui nei. 3 Kei naw ka saksi pahnih ka tüi lawk khai nei. Ngani cu ng'zu nak sui sui ni ne, hnüüp 1, 260 ah kyong ung Khanpughi ah ng'thu cu shäu khai goi nei, ä ci ne pyein ci. 4 Cun ah saksi pahnih cu khomdek uk ciah ma ah ng'düi ciah olive singghing pahnih la mei im pahnih ah kiak ci. 5 Ngami cu plawsheh law gui ci a om ah a kiak ung, ami m'gawng ung mei lut law ne ami gaa gui cu m'khih zawp ci. A cun ah mäih ah ngami ci gui khai ah k'tha nak ci phung cu ngawn ghäm ghäm ci gui. 6 Khanpughi ah ng'thu ami pyein sangung khaw kä a aa vai ah khankhaw khai nak hning ah huham ngami ung om ci, tui cu si ah ami lat nak hning ah huham phi ngami ung om ci, ami ng'zak hlü ah khomdek khan ah khaw zaw tui shek khai ah ami bi nak hning ah huham phi ngami ung om ci. 7 Ngami ah ng'thu shäu ang pyi ah a kiak ung, m'htei lungkhui ung kaa khikäi lut law ne, ngami cu ng'tuk püi gui ne, nüng gui ne ngawn gui khai. 8 Ami gook cu ami Bawipa kutlamtung ung ami ngawn nak ah mang gaw, lam k'cawih ung ng'zän shüt khai. Cun ah mang gaw ah ming m'hlän cu Sodom, kä cun ung Egypt ah kiak khai. 9 A khaw päng ung kaa a hlü hlü ah ng'thu ciah khui päng pa päng naw law ne, ami gook gui cu kä m'cim düt vai ci ne, hnüüp thum la am cawt ung teng khai gui nei. 10 Cun ah purofet goi ani sih ah hmawk ah khomdek chang gui cu, zeikiai u ne, khawhchaam ng'khih ng'bah tu u ne, nüng nak bik khai gui nei. A i ah kia sei ci ung cun ah purofet goi naw, chang ah hta gui cu ang htei ah ani geinvai sak ah hmawk ah kiak ci. 11 Hnüüp thum la am cawt lüng khütah, Khanpughi ung kaa hnun ghin nak cu kyum law ne, ngani ung lut khütah, ngani cu tho law ne ng'düi ci goi. Cun hmuk ciah chang gui cu ang htei ah cäicat ci gui. 12 Cun kawn ah purofet goi-am, Shin ung kai law nä ciah khankhaw ah m'lau ne ng'khä ah k'aw cu thang lawk ci. Ngani cu gaa gui naw ami teng goi ah chung ung, khawmei ng'cum ne khankhaw ah kai ci goi. 13 A cun vai-am shihpi thäng ne ng'hmum law sei, mang gaw ah bumghaa ung bum ät cu di zawp ci, chang phia chih-kip phi si zawp ci gui. K'pawih ba ciah chang gui cu cäicat u ne, khanmawpi ah Khanpughi ah hlüngtai nak cu m'kümtou ci gui. 14 Akhnih nak ah kyuihkyawk nak cu ng'pyi pyi ci, akthum nak ah kyihkyawk nak cu gawk law ba ge khai. 15 Cun kawn ah akchih nak ah khankhaw chang naw ak phyungheng cu tum khütah, Khomdek uk nak ah hlüngtai nak cu mi Bawipa la a Messiah naw khäm pyi ci nei, ani naw ngawi zä uk lä khai nei ci ne khankhaw ah k'aw naw pyein ci. 16 Khanpughi ah maa ah mangkiaang gui ung ngok ci gui ah a ghaampa m'ku lei-phli naw, Khanpughi cu khawihnah u netah, 17 äZanta, tuhngawi, ngawi zä ghing ne om ciah Hlüngtai pi bäih ciah Bawipa Khanpughi Käikyang ciah na hlüngtai nak awn na uk pyi ciah kia sei, Kami ning zeikiai nak ci nei! 18 Na m'lungshe nak ah a khin cu gawk law ne, Si pyi ci gui m'khoichaa nak ah akhin cun phi gawk law sei, m'dek chang gui cu m'lungshe ci gui nei. Bawipa ah akchangshäm gui, purofet gui, nak chang gui la ning kyih aa ci gui naw, a zaw a däm ah ci ah, m'cümhnah nak ami gah nak vai ah khin gawk lawk ci nei. Khomdek shekat sak ciah chang gui, m'shet m'kat nak gui vai ah, a khin gawk lawk ci nei ci ne Khanpughi ah maa ah ng'thu pyein ci gui. 19 Cun kawn ah khanmawpi ah pum im cu ng'hmawng law khütah, Thukhän M'küm cu ka hmuk ci. A cun zah ung khaw lailäp ne ng'hmumkyeek ne, shipi thäng ne, gääi nu bawh ne khawshe ne aa lawk ci.
1 Cun kawn ah khankhaw mik ung küikyang ciah ng'cä ng'bang nak dang law sei ka hmuk ci. A cun ung om ciah hnuminu cu hni liing sui ne, chaa ung ng'leh ne, aisi ghalei-goi kawp ciah lukhu ng'bäng ci. 2 Ani cu hta law ge khai kia ne, a nau poi m'neh ne m'lau ci. 3 Cun kawn ah khankhaw mik ung a hei ng'cä ng'bang nak dang law ba mä ci, cun cu shawk asennu tumat ah kiak ci. Ani cu alu chih, aki ghaa law sei, alu päng ung lukhu ng'bäng ci. 4 Ani naw khankhaw mik ah aisi gui bumthum bum ät cu ang mei awn hang kui ne m'dek ah zuk chah gui ci. Cun ah shawk sennu cu hnuminu ah maa ah ng'düi ne, ahta law nak ge vai ah ak hmaw cu, ei khai ah ngäng ci. 5 Cun kawn ah cun ah hnuminu naw, chang ah hta avan m'si hteipawng awn uk khai ah, htapa cu hta nak ci. Cun ah htapa cu anu ah k'coi ung kaa Khanpughi ah om nak amangkiaang ung zu chaang ci gui. 6 Hnuminu cu bunghmu ah Khanpughi naw a pian nak peitah hteit ci. A cu ah hnüüp 1, 260 ung ani cu ami m'hteihtang ah kiak ci. 7 Cun kawn ah khanmawpi ah ng'tuk bi nak om ci. Michael la ak khanchang gui naw, shawk cu ng'tuk püi ci gui. Shawk la ak khanchang gui naw phi ng'tuk tu ba püi ci gui. 8 Cun ung phi shawk la ak khanchang gui cu m'khüt gui u sei, khankhaw ah kä om tuba ci gui. 9 Khomdek chang gui m'zaw gui ciah khoshe, kä cun ung Satan ming nak ciah shawknu cu ak khanchang gui awn atäng ah khomdek khan ah ami zuk täm law gui ah kiak ci. 10 Cun kawn ah khanmawpi ah ng'shan ciah k'aw naw, Tuhbäi Khanpughi ah hun nak cu gawk law pyi ci nei! Tuhbäi Khanpughi naw Ghanpughang ah a kiak ah mawng dang sak pyi ci nei! Tuhbäi a Messiah naw ahuham dang sak pyi ci nei! Mi Khanpughi ah maa ah ng'düi netah, amä ak hnüüp mi phäi nau gui shetkat sak gui ci cu khankhaw ah kaa k'täm pyi ci gui nei. 11 Mi phäi nau gui naw Htomehta ah si awn la ami shäu ah ng'düng nak awn Satan cu m'khüt pyi ci gui nei. Ngami cu ami hnun gui apit ung phi kä ng'hlat khai gui nei. 12 Cun ah kia sei khanmawpi la khankhaw chang gui zeikiai vä. Khomdek la tuinu ah phäh ah thüisei vai ah kiak ci nei. A i ah kia sei ci ung khoshebawi cu amät ah akhin apihta bäng om ba ciah hmat netah, ang htei ah m'lungshe ne ngami ah om nak ah a gawk law pyi ah hmawk ah kiak ci nei ci ne a pyein cu ka ng'zak ci. 13 Shawk naw ani cu k'täm ne m'dek khan ah ami zuk gawt ah mawng cu hmat netah, pamihta ah hta ciah hnumi cu shui ne phak ci. 14 Cun ah hnumi cu khaw k'häu ung a zawn nak thei vai ah vanbuk hmu ah ng'phia hnih cu gah ci. Ani cu acu ah kum thum la avang ung shawk kphyunu ah gaa phiawn nak khai ah m'hteihtang khai gui ah kiak ci. 15 Shawk naw, cun ah hnumi cu tui naw ahteh vai ah am gawng awn tuinu ah ng'tat ne lawng khai ah muh ci. 16 Cun ung phi khomdek naw am gawng m'aan ne, shawk ah m'gawng ung lut lawk ciah tui avan cu m'zaw zawp netah hnuminu cu phiawn sak ci. 17 Cun kawn ah shawk cu ang htei ah m'lungshe netah, k'pawih ba ciah hnuminu ah ahta ng'shon gui ah kiak ciah Khanpughi ah ng'thukhän läk ci gui la, Bawipa Jesuh ah dang sak ah düng nak ung bekhüt ci gui cu, ng'tuk püi gui khai ah ng'düi law ne hteit ci. 18 Cun kawn ah shawk cu tuinu kem ah ng'düi ne om ci.
1 Cun kawn ah alu chih aki ghaa lawk ciah khikäi tumat cu tuinu ung kaa lut law sei ka hmuk ci. Aki päng ung lukhu bäng ne, alu päng ung Khanpughi ah thang shet sak ciah ming om ci. 2 A mäi cu pupi kawng ah mäih law ne, a khaw gui cu khawm ah khaw ah mäih lawk ci. Am gawng cu phongkawng ah m'gawng ah mäih lawk ci. Shawk naw ahlüngtai nak, amangkiaang la m'gäi nak ah a huham cu khikäi-am ap ci. 3 Khikäi ah lu tumat cu sih nak vai hlawk ah leim pang ne phi, khan ba pyi ci. Khomdek khan ah chang avan cu cäicat u ne khikäi ah hnu ah läk zawp ci gui. 4 Shawk naw a huham cu khikäi-am a ap pyi ah kia sei, chang avan naw shawk cu khawhnah ci gui. Chang gui naw khikäi cun phi khawihnah u ne, Khikäi ah mäih a u om khai ang? Ani ng'tuk püi hning ci a u om khai ang? ä ci ne pyein ci gui. 5 Khikäi cu m'ghämce ne Khanpughi ah thang shet sak nak vai la cha phlikip-lei-goi ung uk nak vai ah huham cu gah ci. 6 Ani naw Khanpughi ni, Khanpughi ah angming ni, a om nak ah khanmawpi ni gui cu tän ne shetkat sak pyi ci. 7 Ani cu Khanpughi ah chang gui tu ne nüng nak gui vai la akhaw päng ung ahlä hlü ah ng'thu ciah khui päng pa päng uk nak vai ah huham cu gah ci. 8 Ami ngawn ah Htomehta ah ghinnak cauk ung khomdek khan kä a tüisho pha ge ung a guk ah, ming gui ah kawn ah k'pawih ba ciah chang phung naw khikäi cu khawihnah ci gui. 9 Akhnga om ci phung naw ngai ne ang zak vai nei! 10 Ami phaa vai cu pha tuk cang khai gui, khim awn ami ngawn vai cu ngawn tuk cang khai gui, shin ah a mawng ung Khanpughi ah chang gui cu ng'düng ne bekhüt zawp ne ami om vai nei. 11 Cun kawn ah khikäi tumat cu m'dek ung kaa lut law sei ka hmuk ci. Ani cu htome ah mäih ah aki hnih om ne, shawk ah mäih ah ng'thu pyein ci. 12 Ani naw dang law htük ciah khikäi ah m'gäi nak huham cu amät ah ma ah mang zawp ci. Ani naw asih nak vai ah aleim khan ba ciah khikäi cu, khomdek la khomdek chang avan-am liing ne khawihnah sak gui ci. 13 Akhnih nak ah khikäi naw küikyang ciah cäi aih vai gui m'dang ci. Chang gui ah maa ah khankhaw ah kaa mei cu khomdek khan ah kiak law sak ci. 14 Ani naw ak htükbäih ah khikäi ah maa ah abi hning ah cäi aih vai gui cu m'dang ne khomdek chang gui cu hmähma sak gui ci. Ani naw khim awn leim ne phi kä si ne ghing ciah khikäi m'tamkhah nak ah agup cu pian sak gui ci. 15 Ak htük ung khikäi ah agup-am ghin nak peit nak hning cu akhnih nak ah khikäi ung om ci. Cun ah kia sei agup cu ng'thu ne ani kä khawihnah tuk ci gui cu m'sih gui hning ci. 16 Cun ah khikäi naw, zaw däm ci, pyam mang ci, khleihtein la khuimah chang avan cu ami k'pat lam kut ung, kä cun ung ami m'calai ung m'hnüt nak awn liing ne m'hnüt gui ci. 17 Cun ah m'hnüt nak ah kiak ciah khikäi ah ming, kä cun ung ang ming dang sak ciah khei nak, awn kä ami m'hnüt tu ah chang phung cu sumlei ng'dong'pe ne kä gah tuk ci. 18 Shin ah amawng ung cäivai vai hlü ci. Lunglang ciah chang naw acun ah khikäi ah khei nak gui ah mawng cu khei thei ci. Cun ah khei nak cu chang tumat ah ming ah phäh ah ng'düi ci. Cun ah khei nak cu 666 ah kiak ci.
1 Cun kawn ah han teng ba netah Zion khomhtung khan ah Htomehta ng'düi sei ka hmuk ci. Amät ah ming la Apa ah ming ami m'calai ung ami guk ah chang 144, 000 gui cu ani awn atäng ah om ci gui. 2 Khanmawpi ah ng'gäät ciah tuinu la khaw ng'hmum ah mäih ah ng'shan ciah k'aw cun phi ka ng'zak ci. 3 Cun ah chang 144, 000 gui cu mangkiaang ni, khikäi paphli ni, aghaampa ni gui ah maa ah ng'düi u ne ng'äi ak thai cu m'cu ci gui. Hniciim chang avan ung kaa ngami bäng cu a ghü gui ah kiak sei cun ah ng'äi cu ngami bäng naw m'cu thei ci gui. 4 Ngami cu hnumi awn kä ng'etsheng man ciah ng'piangmi hta gui ah kia ne, htomehta ah hteh nak päng ah läk tuk ci gui. Ngami cu chang ah hta avan ung kaa a ghü gui ah kia sei, Khanpughi la Htomehta ung ng'ap ma ci gui ah kiak ci. 5 Ngami cu a i sang ung phi kä hleei ci gui, m'kat nak gui vai a i kä om ci. 6 Cun kawn ah khankhaw ah khankhaw chang tumat cu zong shäi shäi sei ka hmuk ci. Ani naw mdek ah khan akhaw päng ung kaa ahlä hlü ah ng'thu ciah khui päng pa päng-am m'thein vai ah ang tüi ah om ciah Thu Ni cu law püi ci. 7 Cun ah khankhaw chang naw, Khanpughi cu m'tamkhah vä, a hlüngtai nak cu m'kümtou vä! Chang am khoichaa nak vai ah akhin cu gawk law pyi ci nei. Khankhaw khomdek, tuinu tuihta avan, tüisho ciah Khanpughi cu khawihnah vä ci ne m'lau ci. 8 Akhnih nak ah khankhaw chang naw ahnu ah läk law netah, Babilon gawnu di pyi ci nei! di pyi ci nei!Ani naw ng'zaw ng'pawm nak ah kiak ciah zu cu chang ah hta avan-am tu pyi ci nei!ä ci ne pyein ci. 9 Akthum nak khankhaw chang naw maa lawk ci goi cu läk law goi netah, Khikäi la ani ah gup khawihnah ne ani ah m'hnüt nak cu alu ung baw, akut ung baw gah ciah chang cu; 10 Khanpughi ah m'lungshe nak ah khap ung kaa, nuipi ciah am lungshe nak ah kiak ciah sapyit tui cu awk khai nei. Cun awk ciah chang cu theing ciim ciah khankhaw chang la Htomehta ah maa ah zaam mei awn huut ne dukdeiu nak gah khai gui nei. 11 Cun ah meidüi ung kaa meikhu cu ang tüi ah khu ne kai khai nei. Khikäi la agup khawihnah ne ani ah ming awn m'hnüt nak gah ciah chang gui cu, amä ak hnüüp dinggei nak kä om khai nei ci ne m'lau ci. 12 Khanpughi awn ng'thu k'bääi ne, Bawipa Jesuh ung bekhüt ciah Khanpughi ah chang gui cu, acun ah khin ung m'khüt nüng nak vai hlü ci nei. 13 Cun kawn ah khankhaw ah kaa k'aw naw, Tuhbäi ung tän ne Bawipa ah khuut bi netah, sik ci gui cu zeikiai nak om ci nei, cun cu na guk vai nei ci sei ka ng'zak ci. Mumchaa naw, ä! cun cu akcang nei! k'tha na ne bilo ciah chang gui cu zeikiai ne ng'däm khai gui nei, ami bi ah akchaw cu ami mät awn ng'khap ci nei ci ne pyein ci. 14 Cun kawn ah han teng ba netah, khongmei bawk tumat cu ka hmuk ci. Cun ah ng'mei bawk ung chang ah mäih lawk ci, tumat ngok ci. Ani cu alu ung lukhu ng'bäng ne, akut ung ghaat ciah sangsawn kawt ci. 15 Ahei khankhaw chang tumat cu pum im ung kaa lut law netah, ng'mei bawk ung ngok ci-am, Khomdek khan ah geit hmin pyi ci, khäm vai ah khin gawk lawk ci kia sei, na sangsawn awn aat ne khäm ä ci ne m'lau ne pyein ci. 16 Cun ah kiasei ng'mei bawk ung ngok ci naw, a sangsawn awn khomdek khan cu zuk pai ne geit cu khäm ci. 17 Cun kawn ah khanmawpi pum im ung kaa, ahei khankhaw chang cu lut lawk ci. Ani naw phi ghaat ciah sangsawn cu kawt ci. 18 Cun kawn ah mei ah düi ciah khankhaw chang tumat cu sonkiang ung kaa lut lawk ci. Ani naw sangnawn kawt ciah khankhaw chang-am, Na sangsawn awn khomdek khan ah sapyit gui cu zuk khäm , up zawp pyi ci gui nei ci ne m'lau ci. 19 Cun ah kia sei cun ah khankhaw chang naw, a sangsawn awn khomdek khan ah sapyit gui cu aat ne k'bit ne, am theih gui cu Khanpughi ah m'lungshe nak ah kiak ciah sapyit neen nak ah khui ung m'tawk zawp ci. 20 Sapyit cu manggaw ah akpung ah neen u sei, neen nak ah khui ung kaa si ng'hlui lut law ne long ci. Cun ah si cu mäng phiaa goi ung long ne, dawng hmaa ah thuuk ci.
1 Cun kawn ah kei naw, khankhaw ah küikyang ciah cäicat vai cu ka hmu ba ci. Cun cu leigaai mawng chih law püi ci gui ah khankhaw chang pachih ah kiak ci. Cun ah leigaai gui cu Khanpughi ah m'lungshe nak akhnubäih ah ang dang nak ah kiak ci, akhnubäih ah gawk lawk ciah lei ah kiak ci. 2 Cun kawn ah mei awn ng'caw ne k'tolung k'phlai nu ah mäih lawk ci cu ka hmuk ci. Khikäi ni, amät ah gup ni, ming khei nak khäm ci gui ni, ah khan ah nüng nak gah ci gui cun phi ka hmu gui ci. Ngami cu Khanpughi ah peit gui ah tingtäu kawt u ne, ktoulung k'phlai ah mäih tuinu pei ah ng'düi ci gui. 3 Ngami naw Khanpughi ah changshäm Mose ah ng'äi la Htomehta ah ng'äi cu m'cu ci gui. Cun ah ng'äi cu; Käikyang hlüngtai ciah Bawipa Khanpughi, Na bilawh gui cu hlüngtai ne cäicat vai kia ci nei! Khaw päng ung chang nüng ah Ghangpughang, Na lam cu düng ne cangnak ah kiak ci nei! 4 Nang cu kä ning kyih aa ne, A u kä om hlawt khai nei, Bawipa! Nang ah küikyang hlüngtai nak cu ng'hlahta ne, A u om hlawt khai ang? Nang bäng na theing ciim ci nei. Nang ah bilawh cu chang avan naw hmu pyi ciah kia sei, Khaw päng ung kaa chang nüng law ne, Ning khawihnah lawk khai gui nei ciah kiak ci. 5 Cun kawn ah khanmawpi ah om ciah pum im kawt cu ng'hmawng sei ka hmuk ci. 6 Leigaai mawng chih law püi ciah khankhaw chang pachih cu pum im ung kaa lut lawk ci gui. Ngami cu pä suinu a bawk sui u ne, ghui m'ciu bäng bäng vawp ci gui. 7 Khikäi paphli ung kaa tumat naw, hta ng'shon ung om ciah Khanpughi ah m'lungshe nak awn be ciah ghui khawk chih cu khankhaw chang pachih-am pe gui ci. 8 Pum im cu Khanpughi ah bämang nak la hlüngtai nak ah akkhuu awn be ci. Cun ah kiasei khankhaw chang pachih naw ami law püi ah leigaai mawng chih ang pyi güt ung, pum im kyong ah a u phi kä lut ba hlawt ci.
1 Cun kawn ah pum im ah kyong ung kaa naw khankhaw chang pachih-am Khanpughi ah m'lungshe nak be ciah eikbei chih cu khomdek khan ah zuk hukä ci ne ng'hawh ne a pyein cu ka ng'zak ci. 2 Akhtük bäih ah khankhaw chang naw a eikbei ung kaa cu m'dek khan ah zuk huk khütah ah m'hnüt nak gah ci gui la ani ah agup khawihnah ciah chang gui cu, ang htei ah ami m'neh m'awh vai ah hlut ne khei lawk ci gui. 3 Akhnih nak ah khankhaw chang naw a eikbei ung kaa cu tuinu ah khan ah zuk huk khütah, tuinu avan aksi ah si ah mäih ah ng'hlat zawp ne, cun ung om ciah akghing phung avan si zawp ci gui. 4 Akthum nak ah khankhaw chang naw a eikbei ung kaa cu tuinu tuihta avan ah khan ah zuk huk khütah, cun ah tui gui avan cu si ah ng'lat zawp ci. 5 Cun kawn ah tui ngäng ciah khankhaw chang naw tuhngawi la ngawi zä om ne, theingciim ciah Bawipa, nam khoichaa nak cu bä ne chün ci nei. 6 Ngami naw Khanpughi ah chang gui la purofet gui ah si cu huk sak ci gui nei, cun ah kiasei ami awk vai ah si cu na peit gui ah kiak ci nei. Ngami cu ami bi ah mäih ah gah ba ci gui ah kiak ci nei ci ne a pyein cu ka ng'zak ci. 7 Cun kawn ah sonkiaang ung kaa lut lawk ciah k'aw naw, A hlüngtai säih Bawipa, Khanpughi! Nang ah m'khoichaa nak cu ak cang ah ng'düng ne chün ci nei ci ne a pyein cu ka ng'za ba ci. 8 Akphli nak ah khankhaw chang naw a eikbei ung kaa cu khohni ah khan ah zuk huk khütah hnii cu mei ah ng'ai ne cang ne chang ui zawp khai ah kia lawk ci. 9 Chang gui cu cun ah ng'ling aih ci naw ui law gui khütah, leigaai gui ah khan ah a huham om ciah Khanpughi cu m'shetkat ne ng'thu ci gui. Cun ung phi ngami cu ami kat nak ung phi kä ng'zu ba u ne, Khanpughi phi kä m'kümto ci gui. 10 Akhmaa nak ah khankhaw chang naw a eikbei ung kaa cu khikäi ah mangkiaang ah khan ah zuk huk khütah, khikäi ah uknak khaw avan cu mä ne hmüp zawp ne, cun ung om ciah chang gui cu geinvai u ne, ami haa htui ne kawp zawp ci gui. 11 Cun ah ami hlut khei nak la ami m'neh m'awh nak ah hmawk ah mawpi Khanpughi cu m'shetkat ci gui. Cun ung phi ami mät ah cheishoh nak ung ka kä ng'hlat law ba ci gui. 12 Akchuk nak ah khankhaw chang naw a eikbei ung kaa cu Euphratis tuinu ah khan ah zuk huk khütah cun ah tuinu cu kawi ne ket sei, hnii law lam ah kaa ghangpughang gui ah law nak vai ah lam cu ng'hmawng lawk ci. 13 Cun kawn ah k'u ah mäih lawk ciah mumcha she pathum cu ka hmuk ci. Cun gui cu shawk, khikäi la purofet she gui ah m'gawng ung kaa lut lawk ci gui ah kiak ci. 14 Ngami cu khawshe ah mumcha gui ah kia ne cäi aih vai phi m'dang hning ci gui. Khaw nüng ung ghangpughang päng cu, hlüngtai pibäih ciah Khanpughi ah ng'tuk bi nak hnüüp ung ng'cut lawk khai gui ah khü gui vai ah ngami cu hteit ci gui. 15 äNgai vä, kei cu m'guk-ei ah mäih ah ka lawk khai nei! cii m'gang ne asui them ngäng ciah chang cu akplui ah kä om khai, chang ah hmu ah kä lüng'aa khai, zeikiai nak om khai nei. ä 16 Cun kawn ah mumcha gui naw ghangpughang gui cu khü gui zawp u ne, Hebrew ng'thu awn Armakeddon ami ci nak ah hmun ah k'bum gui ci gui. 17 Akchih nak ah khankhaw chang naw, a eikbei ung kaa cu khawkhi ung zuk huk khütah pum im kyong ah mangkiaang ung kaa Bi pyi ci nei ciah k'aw cu ng'shan lawk ci. 18 A cun ung khaw lailäp ne ng'hmum ne ng'kyeek ne, shihpi ng'thüi ne thäng lawk ci. Chang ah ng'tüi kawn ung shin ah mäih ah shihpi kä thäng man ci. Cun cu akshekha pibäih ah kiak ci. 19 Mang gawnu cu thum ah ng'pai ci. Khomdek ah khan ah mang gaw avan phi di zawp ci. Khanpughi naw Bibilon mang gaw cu shäm ba netah, a khap ung kaa, am lungshe nak ah sapyit tui cu awk sak ci. 20 Ng'lei avan piawn ne m'htung avan maih ci. 21 Khan ah kaa chuih vawh teih teih lawk ciah khawk'aa ng'ma gui kia lawk ci. Cun ah khawk'aa ung geinvai aih u netah, chang gui naw Khanpughi cu m'shetkat ne ng'thu ci gui.
1 Khankhaw chang pachih ung kaa eikbei chih kawt ciah khankhaw chang tumat cu kei ah law netah, Lawä! Tuinu gui ah pei ah ami sak ah mang gaw ah kiak ciah pletbeng ciah hnumi ami m'shetkat law cu ka ning hmuh sak khai nei. 2 Khomdek ah khan ah ghangpughang gui cu, ani awn ng'zaw ng'pawm lä ci gui nei. Chang ah hta gui avan cun phi ani awn ng'zaw ng'pawm nak ah kiak ciah zu cu awktat ci gui nei, ä ci ne pyein ci. 3 Cun kawn ah khankhaw chang naw mumchaa awn kei cu bung ah na hteh püi ci. A cu ah khikäi asen ung ngok ciah hnumi nu cu ka hmuk ci. Cun ah khikäi ah pum avan ung Khanpughi ah thang shetsak ciah ming cu be ne ng'guk ci, khikäi cu alu chih law ne aki ghaa lawk ci. 4 Hnumi nu cu asen la akshon ah kiak ciah sui cu sui ne, ghui ni, ng'mo ni, k'cänglung mi gui cu awi ci. Ani cu pletbeng nak ah kiak ciah m'shemshai nak awn be ciah ghui khap cu kawt ci. 5 Ani ah amcalai ung, Khaw ah kaa ung shemshai ne pletbeng ci gui ah nu, Babilon gawnuä ci ne thuuk ciah ng'thu awn ami guk ah kiak ci. 6 Cun ah hnumi nu naw Khanpughi ah chang gui ah si la Bawipa Jesuh ung bekhüt u sei, ami ngawn gui ah chang gui ah si cu aw ne, awktat sei ka hmuk ci. Ani hmu netah kei cu ang htei ah cäi ne ka tu ci. 7 Khankhaw chang naw, A i ah kiasei na cäi ang? Cun ah hnumi nu ah thuuk ciah amanwg la ang cum nak ah alu chih law ne aki ghaa lawk ciah khikäi ah manwg cu ka ning m'thein khai nei. 8 Cun ah khikäi cu, azan a ghin te ung phi tuhbäi kä ghing ba ci nei. Ani cu m'hteilung khui ung kaa lut law netah, m'di nak gah lawk khai nei. Khomdek khan kä a tüisho pha ge ung, ghin nak cauk ung ami ming kä guk tu ah khomdek chang gui naw, cun ah khikäi ami hmuh ah a kiak ung cäicat khai gui nei. Ani cu azan ghing te ci, tuhbäi kä ghing ba ci, cun ung phi ghing ne dang law ba khai. 9 äShin ah amawng ung cäivai vai la lunglang vai hlü ci. Lu chih cu hnumi nu ah ngoh nak ah m'htung chih ah kiak ci. Ghangpughang chih ah phi kiak ci. 10 Ghangpughang pahmaa cu sih pyi ci gui, tumat ghing ne om zah ci, tumat cu kä dang law phak ci, ang dang law ung phi a shänghta vah uk tuk khai. 11 Azan ghing te ci, tuhbäi kä ghing ba ciah khikäi cu akcheit nak ah ghangpughang ah kiak ci. Cun ung phi ani cu chih ung kaa tu ah kia ci, ani cu di law ge khai ah kiak ci. 12 äNang ah na hmuh ah aki ghaa cu, kä uk tu phak ci gui ah ghangpughang ghaa ah kiak ci. Ngami cu khikäi awn atäng ah nazi ät hta ung huham gah tuk khai gui ah kiak ci. 13 Cun ah ghaa gui cu ami ng'bä nak täng ci, Ngami naw ami hlüngtai nak la huham cu khikäi-am ap ci gui. 14 Ngami naw Htomehta cu ng'tuk püi khai gui. Cun ung phi Htomehta cu bawi nüng ah Bawi, mang nüng ah Mang (Ghangpughang nüng ah Ghangpughang) ah kiak ciah kia ne, ngami cu nüng gui khai. Bawipa ah a ghü gui la bekhüt ne läk ci gui cu ani awn atäng ah nüng nak gah khai gui, ä ci ne pyein ci. 15 Cun kawn ah khankhaw chang naw kei-am, Nang naw na hmuh ah pletbeng ciah hnumi ah ngoh nak ah tui cu khaw nüng ung ahlä hlü ah ng'thu ci gui ah khui päng pa päng, chang khli gui ah kiak ci. 16 Nang naw na hmu ah khikäi la aki ghaa naw pletbeng ciah hnumi nu cu thüi nak khai gui nei. Ngami naw cun ah hnumi cu asui sak avan suh pe u sei akplui ah om khai nei. Asa cu ei u ne, ani cu mei awn m'khih khai gui nei. 17 Ngami naw Khanpughi ah ng'thu düng a gawk law güt ami huham cu khikäi-am ami ap vai ah, Khanpughi naw ngami ah m'lung cu pian pe gui ne, amät ah ng'bä nak ah mäih ah bilawh sak gui ci. 18 äNang ah na hmuh ah hnumi nu cu khomdek khan ah ghangpughang gui uk gui ciah mang gawnu ah kiak ci, ä ci ne pyein ci.
1 Cun kawn ah khanmawpi ah kaa kyum lawk ciah khankhaw chang tumat cu ka hmuk ci. Ani ung küikyang ciah huham om sei, ani cu khomdek khan avan ung dei ne khang ci. 2 Ani naw m'lau ne Babilon mang gaw cu di pyi ci nei! Di pyi ci nei! Cun ah gawnu cu khawshe gui, mumchashe gui ah om nak, shemshai ciah khoshe gui ah ng'zi nak ah kiak ci nei. 3 A i ah kiasei ci ung chang pakhui akda naw acun ah gawnu awn ng'zaw ng'pawm nak ah kiak ciah zu cu awktat ci gui nei. Khomdek ah khan ah ghangpughang gui cun phi ani awn ng'zaw ng'pawm ci gui nei. Khomdek ah khan ah sumlei ci gui cun phi acun ah gawnu ah pletbeng nak awn ng'bähmang pyi ci gui nei ci ne pyein ci. 4 Cun kawn ah khanmawpi ah kaa k'aw ahei cu ka ng'za ba ci. Cun ah k'aw naw; Lut law ba vä! Kei ah chang gui, Ani ung kaa lut law ba vä! Ani awn atäng ah kä nami cheishoh tu vai, Ani awn atäng ah m'shetkat nak kä nami gah tu-en vai! 5 A i ah kiasei ci ung ani ah kat nak cu khanmawpi k'phaa ne hlüng ne, Ani ah cheishoh nak ah lam cu, Khanpughi naw a shäm hmat zawp pyi ah hmawk ah kiak ci. 6 Ngami ah khan ah abi ah mäih ah, Ani ah khan ah bi tu ba vä; Ani ah bi ah mä goi khai ah, Ani ah khan ah phu tu ba vä; Nangmi ah hmawk ah a ning pian peit gui ah mä, a goi ah kha pi khai ah a khap cu pian pe vä. 7 Ani cu amät bämang ne ang püi ng'ze awn khin khai ah, zaica nak la geinvai nak ung gawk sak vä. A i ah kiasei ci ung, ani naw, Kei cu mangnu ah ka kiak ci, hmeinu ah kä ka kiak ci, Kei ung a i zah ung phi thüisei nak kä om khaiä ci ne a kiak ah hmawk ah kiak ci. 8 A cun gui ah phäh ah leigaai gui, gawpai nak gui, thüisei nak gui, cawigha nak gui cu ani ah khan ah hnüüp ät ge awn gawk lawk khai nei. A i ah kiasei ci ung, ani m'khoichak ciah Bawipa Khanpughi cu, m'hlüngtai pi bäih ah hmawk ah kiak ci, ä ci ne pyein ci. 9 Ani awn ng'zaw ng'pawm lä mante ciah khomdek khan ung ghangpughang gui naw, ani ui ciah mei ah akhu cu ami hmuh ung kyap ne m'lau khai gui nei. 10 Ngami naw ani ah geinvai nak cu hmu u ne, ang htei ah kyikyawk u ne, asho nak ah ng'düi u netah, Hlüngtai küikyang ciah mang gaw, Babilon! Cäi aih vai thüi aih vai kiak ci nei. Nang cu nazi ät hta ah kyong ung m'shetkat nak na gah pyi ci nei ci ne kiak khai gui nei. 11 Sumlei ciah chang gui cun phi ami khawh khleih khai a u phi kä om ba sei, kyap ne thüi khai gui nei. 12 Ngami ah khawh gui cu ghui, ngui ng'mo, zih, pää, ng'hlo pyai, tui ng'ui ahlä hlä, m'vuihaa, sing ahlä hlä, cheeipai, m'si k'tolung; 13 Sing ng'ui, phakphai, phaknan, situi, mura, sapyit tui, khitui, päm, htang, sei, htome, ng'se zatha, khleihtein la chang hnun ghing gui ah kiak ci. 14 Sumlei ciah chang gui naw cun ah mang gaw-am, Nang naw na ng'zak hlü ah khawh gui cu kä om ba ci nei, bämang hlüngtai nak gui phi maih zawp pyi ci nei, cun gui cu nang naw ngawi ah phi kä na gah ba khai nei ci ne pyein ci gui. 15 Babilon mang gaw ung sumlei u ne bühmang lawk ci gui ah sumlei chang gui cu, cun ah gawnu ah dishum nak hmu u ne, kyikyawk u netah, asang ah ng'düi u ne, 16 äShin ah mang gaw ah hmawk ah cäi aih vai, thüi aih vai, kiak ci nei; Ani cu k'phla sui, ng'hlo sui, pää sui gui sui ne ghui, ng'mo la k'cänglung gui cu awi man ci nei. 17 A khawh chaam avan cu nazi ät ah kyong ung dishum zawp ci nei ci ne kyap ne m'lau khai gui nei. Hteinpaw keptain gui la hteinpaw ung ng'cum tuk ci gui, hteinpaw ung bi bik ci gui la sumlei ci gui cu a sho nak ah ng'düi u ne; 18 Cun ah mang gaw ui ciah meikdüi meikhu gui cu hmu u netah, Shin ah mang gaw ah mäih ahei mang gaw a i sang ung phi kä man khai nei ci ne m'lau ci gui. 19 Ngami cu m'vut kaw ne ami lu khan ah phiang u netah, Cäicat aih vai, thüi sei aih vai kiak ci nei, hteihpaw k'ta, sumlei chang phung bämang sak ciah mang gaw cu nazi ät hta ah kyong ung di ne maih ci nei ci ne kyap ne m'lau ci gui. 20 Khankhaw chang gui cun ah mang gaw adi ah phäh ah zei vä, Khanpughi ah chang gui ang düihpüi gui, purofet gui zeikiai vä! Ani naw nangmi ah khan ah abi phung phung ah hmawk ah Khanpughi naw ani cu m'kat pyi ci nei. 21 Cun kawn ah k'thamah pi ciah khankhaw chang naw lungsum teih lawk ciah lungnu cu, la ne tuinu ung zuk shum netah Babilon mang gaw cu a shin ah mäih ah tui ung zuk shum khai gui nei, a ngawi ah phi kä dang law ba khai nei. 22 Nang ung kaa tingtäu tum k'aw, phiphät phyungheng k'aw gui phi kä ng'zak ba vai nei. Bi bik ci gui phi kä hmuh ba vai, lungkhiing ah ng'ghin phi kä ng'zak ba vai nei! 23 Ngawi ah phi nang ung mei im ah dei cu kä hmuh ba vai nei. Ng'puui ng'khap khai ah ng'piangmi, ng'laami ah k'aw phi kä ng'zak ba vai nei. Nang ah sumlei chang gui cu khomdek ah khan ung hlüngtai pi ci gui nei. Nang naw chang ah hta avan cu ng'zo hleip nak awn na cheishoh sak pyi zawp ci nei, ä ci ne pyein ci. 24 Babilon mang gaw ah dishum nak ah mawng cu purofet gui ah si, Khanpughi ah chang gui ah si, m'dek khan ung ami ngawn gui ah si gui cu cun ah mang gaw ung ali ah hmawk ah kiak ci.
1 Cun kawn ah khanmawpi ah chang khli ah k'aw ah mäih cu ka ng'zak ci. Cun ah k'aw naw Khanpughi m'kümtou vä, Khanpughi cu hun nak, bämang nak la hlüngtai nak awn be ci nei. 2 Ani ah m'khoichaa nak cu ng'düng ne ng'khän ci nei. Ashetkat nak awn khomdek chang gui cheishoh sak gui ciah pletbeng ciah hnumi cu m'kat pyi ci nei. Ani naw Khanpughi ah chang gui a ngawn ah phäh ah Khanpughi naw am kat ah kiak ci nei ci ne m'lau ci gui. 3 Leng ba mä ne Khanpughi cu m'kümto vä, cun ah mang gaw ui ciah meikhu cu ang tüi sei khu ci nei ci ne m'lau ci gui. 4 A ghaampa m'kulei-phli la khikäi paphli naw, mangkiaang ung ngok ciah Khanpughi cu khawihnah u netah Amen, Khanpughi cu m'kümto vä ci ne m'lau ci gui. 5 Cun kawn ah mangkiaang ung ka lut lawk ciah k'aw naw, Khanpughi ah a shäm gui la ak chang gui avan, Khanpughi kyih aa ciah akhmaw ang vai avan naw Khanpughi cu m'kümto vä ci ne pyein ci. 6 Cun ung chang khli ng'nään ah k'aw, tuinu ah ng'hmum k'aw la kho ng'hmum ah mäih k'aw cu ka ng'zak ci. Cun ah k'aw naw, Khanpughi cu m'kümto vä, hlüngtai pi k'bäih ciah Bawipa mi Khanpughi cu Ghangpughang ah kiak ci nei. 7 Htomehta ah hta m'um nak gawk law pyi ciah kiasei, mi zeikiai ne ahlüngtai nak cu mi m'kümto khai nei. Ceimah khai ah ng'laamihta cu pawng ge ne om ci nei. 8 Ani cu a suisak vai ah theing ne ng'ciim ciah sui phi gah pyi ci nei. (Sui k'ni ci cu Khanpughi ah chang gui ah om ih k'ni ah kiak ci). 9 Cun kawn ah khankhaw chang naw, Shin cu na guk vai nei, Htomehta ah hta m'um nak ung ami khü gui ah chang gui cu zeikiai nak om ci nei. ä, ci netah leng ba mä ne, Shin ah ng'thu cu Khanpughi ah ng'thu akcang ah kiak ci nei ci ne na kiak nak ci. 10 Cun ah kiasei kei naw a khaw pei ah kawp ne ka khawihnah khai pawng ngütah, khankhaw chang naw, Kä na bi vai! kei cu nang ni, na phäi nau gui ni, Bawipa Jesuh ah m'dang ah ang thu düng läk ciah chang gui ni ah püipaw changshäm ah ka kiak ci, Khanpughi vah na khawhnah vaiä ci ne na kiak nak ci. Bawipa Jesuh ah m'dang ah ng'thu düng awn vah purofet gui cu hnün thawh nak gah ci gui. 11 Cun kawn ah khankhaw m'kawt ng'hmawng sei ka hmuk ci. Cun ung ng'se bawk tumat om ci. Cun ah ng'se bawk ung ng'cum ci cu bekhüt la ng'düng nak ming nak ci. Ani cu ng'düng khai ah ng'thu m'chaa ne, ng'düng khai ah ng'tuk bik ci. 12 Amik cu meidüi ah pying ne, alu ung lukhu akda ng'bäng ci. Amät kawn ah a u naw kä a hmat ah ang ming cu ani ah khan ah ng'guk ci. 13 Asuisak cu si ng'hlui ah kiak ci. Ani ah ming cu, Khanpughi ah ng'thuä ah kiak ci. 14 Khankhaw gakaap gui naw, ak theing bäng bäng sui u ne, ng'se bawk bäng bäng ng'cum u ne a hnu ah läk ci gui. 15 Khaw nüng chang päng a heem nak vai ah am gawng ung khim k'ghaat lut lawk ci. Ani naw chang gui cu m'si k'htei pawng awn uk gui khai. Ak hlüngtai pi k'bäih Khanpughi ah m'lungshe nak ah kiak ciah sapyit neen nak ah khui ung sapyit cu neen khai nei. 16 Ani ah asuinu la a phei khaw ung, Bawi nüng ah Bawi, mang nüng ah Mangä ciah ming cu ng'guk ci nei. 17 Cun kawn ah khohni ung khankhaw chang tumat ng'düi sei ka hmuk ci. Ani naw khan ah zawng ciah kha gui-am, Law vä, Khanpughi ah mang ei cu ei law vä! 18 Law u ne ghangpughang gui, gabawi gui la gakap gui ah ami sa, ng'se gui la ng'se ung ng'cum ci gui ah ami sa, khleihtein khuimah, akzaw akdam chang avan ah sa cu ei vä. ä ci ne m'lau ci. 19 Cun kawn ah khikäi ni, khomdek khan ung ghangpughang gui la, ami gakap gui ni naw, ng'se bawk ng'cum ci la a gakap gui cu ng'tuk vai ah ng'cut law u sei ka hmuk ci. 20 Khikäi la ani ah maa ung cäi aih vai m'dang ciah purofet cu pha ne chum ci gui. (Cun ah purofet she cu khikäi ah m'hnüt nak gah ci gui la ani khawihnah ci gui-am cäi aih vai m'dang gui ne, cheishoh sak gui ciah kiak ci). Khikäi la purofet she ani nik hnih cu, zam mei ah düi ciah meidüi ung zuk shum goi ci gui. 21 A gakap gui cu ng'se bawk ung ng'cum ciah m'gawng ung lut lawk ciah khim ghaat awn ngawn gui ci gui. Kha gui naw ami sa gui cu ami phä ah ei ci gui.
1 Cun kawn ah khankhaw chang tumat cu m'htei lungkhui k'hmawn nak la m'si guinu cu kawt ne khanmawpi ah kaa kyum law sei ka hmuk ci. 2 Ani naw shawk k'phyu ng'hlui cu pha netah, khawkum phiaa ghaa ung pin ne khit ci. Cun ah khawshe bawi kä cun ung Satan ah kiak ci. 3 Khankhaw chang naw shawk cu m'htei lungkhui ung zuk chah netah, khokum phiaa ghaa ang pyi güt ung chang gui kä ah cheishoh-en sak gui hlawt vai ah m'hnüt ne choh awn khai shi ci. Khokum phiaa ghaa ang pyi kawn ah ani cu a shäng hta k'hmawn tu ba khai. 4 Cun kawn ah mangkiaang gui cu ka hmuk ci. Cun ung ngok ci gui cu m'khoichaa nak vai ah huham ami peit gui ah kiak ci. Cun kawn ah Bawipa Jesuh ah m'dang ah düng nak la Khanpughi ah ng'thu ami pyein ah hmawk ah ami ngawn gui ah, ami mumcha gui cu ka hmuk ci. Ngami naw khikäi la ani ah gup cu kä khawihnah ci gui. Ami m'calai la ami kut ung phi khikäi ah m'hnüt nak cu kä la tuk ci gui. Ngami cu ghing ne tho law ba u ne, Bawi Khrit awn atäng ah khokum phiaa ghaa ung ghangpughang ah mäih ah uk tuk ci gui. 5 (Cun ung k'pawih ba ciah sik ci gui läi cu khokum phiaa ghaa ang pyi kawn ah ghing ne tho ba ci gui). Shin cu ak htük bäih ah sik ci gui ah thawh ba nak ah kiak ci. 6 Cun ah ak htük ung tho ba ci gui cu zeikiai nak la hlüngtai nak awn kümbe ci gui. Hnih vei sih nak naw ngami kä k'phaa tu ba gui khai. Ngami cu Khanpughi la Bawi Khrit ah k'taigüi ah kia u ne, Bawi Khrit awn atäng ah khokum phiaa ghaa ung uk tuk khai gui. 7 Khokum phiaa ghaa ang pyi kawn ah Satan cu lut law ba netah; 8 m'dek ah khan ung chang avan cu cheishoh sak ne, kok la Makok ah ming ciah ng'tuk bi vai ah ng'cut sak gui khai. Ngami cu tuinu kem ah laigin chü ah da ci gui. 9 Ngami cu khomdek khan avan ung püi u ne, Khanpughi ah chang gui ah ng'däm hmun la ani ah m'hni ah mang gaw cu khaai zawp ci gui. Cun ung phi khankhaw ah kaa meidüi kia law ne, ngami cu ui gui zawp ci. 10 Chang gui cheishoh sak gui ciah khoshe cun phi zam meidüi ung zuk shum ci gui. Acun ah mei ung khikäi la purofet she phi ami zuk shum pyi ah kiak ci. Ngami cu amä ak hnüüp hta ng'shon ung dukdeiu nak gah khai gui. 11 Cun kawn ah mangkiaang a bawknu la acun ung ngok ciah Bawimang cu ka hmuk ci. Acun ah Bawimang ah maa ung khankhaw la khomdek cu ng'kawn ne maih lawk ci. 12 Cun kawn ah sik ci gui cu ak zaw akdäm ah a ci ah mangkiaang ah maa ah ng'düi lawk ci gui. Cun ung cachaw gui phi ng'phian lawk ci gui, cun kawn ah ghin nak ah cauk ah kiak ciah ahei cachaw phi ng'phian lawk ci. Sik ciah chang gui cu, cun ah cauk gui ung gu ne ami m'hnüt gui ah ami mät ah om ih ah ci ah m'khoichaa nak gah ci gui. 13 Tuinu naw ani ung om ciah aksi gui cu ap lawk ci. Sik nak la sihnak ah khaw naw phi ngami ung om ciah aksi gui cu ap lawk ci gui. Aksi gui ami van cu ami mät ah bilawh a ci ah m'khoichaa nak gah ci gui. 14 Cun kawn ah sihnak la sihnak ah khaw avan cu meidüi ung zuk shum ci gui. (Cun ah meidüi cu akhnih vei nak sihnak ah kiak ci). 15 Ghin nak cauk ung ang ming kä ng'gu tuk ciah chang gui phung cu cun ah meidüi ung zuk shum gui zawp ci gui.
1 Cun kawn ah khamkhaw thai la khomdek thai cu ka hmuk ci. Zän nä khankhaw la khomdek cu maih pyi ci. Tuinu phi kä om ba ci. 2 Khanpughi ah khanmawpi ung kaa theingcim ciah Jerusalem mang gaw thai cu a cei awn ng'hmu lawk khai goi ah ng'laamihta ah ng'bilaw ah mäih ah kyum law sei ka hmuk ci. 3 Cun kawn ah mangkiaang ung kaa ng'shan sei m'lau ah k'aw cu ka ng'zak ci. Cun ah k'aw naw, Tuhbäi ung Khanpughi ah im cu hnicim chang ah im ah kiak ci. Ani cu ngami ung om sei ngami cu ani ah chang ah kiak ci gui. Khanpughi amät cu ngami awn atäng ah om ne, ngami ah Khanpughi ah kiak khai nei. 4 Ani naw ami ng'phli tui avan cu ghu pe gui khai nei. Cun kawn ah sihnak, thüisei nak, kyah nak, m'neh m'awh nak kä om ba khai nei. Akphyim gui avan cu maih zawp pyi ci nei ci ne pyein ci. 5 Cun kawn ah mangkiaang ung ngok ci naw, Tuhbäi ung apäng avan cu akthai ah ka piang ba ci nei ci ne pyein ci. Bawipa naw, A shin ah ng'thu cu ng'düng ne zum vai ah kiak ci kiasei gu ne nami m'hnüt vai nei ci ne pyein ci. 6 Ani naw leng ba mä ne, Bi ng'pyi ci nei, kei cu Alpha la Omeka, tän nak la khäm nak ah ka kiak ci, tui gha ciah chang-am ghin nak ah tui cu alä ah ka awk sak khai. 7 Näng ciah chang naw shin ah ng'thukhän cu gah khai, kei cu ani ah Khanpughi ah ka kiak khai, ani cu kei ah htapa ah kiak khai. 8 Cun ung phi kyik ciah chang, pyaai ciah chang, chang ngawn ciah chang, chang shemshai, chang om kaa, ng'pluh ciah chang, a gup khawihnah ciah chang la hleeihlak ciah chang gui cu zam mei cang ung lut zawp khai gui. Cun cu ak hnih vei nak sihnak ah kiak ciü ci ne pyein ci. 9 Leigaai mawng chih awn be ciah eikbei chih kawt ciah khankhaw chang pachih ung kaa tumat cu kei ah law netah, Law , Htomehta ah k'chu vai ah ng'laamihta cu ka ning m'hnuh khai nei ci ne pyein ci. 10 Ani naw mumcha awn kei cu ang htei ah hlüng ciah khomhtung khan ah na hteh püi netah, Khanpughi ah khanmawpi ah kaa kyum lawk ciah theingciim ciah Jerusalem mang gaw thai cu nam hnuh ci. 11 Cun ah mang gaw cu Khanpughi ah bämang nak awn pyü ciah lung, vai ng'mo ah mäih ah ng'shü ne khang ci. 12 Cun ah mang gaw chaam nak cu hlüngtai aih ne, m'kawt gha-lei-goi om ci. Cun ah m'kawt gui cu khankhaw chang gha-lei-goi naw ngäng u sei, m'kawt päng ah khan ah Israel pakhui gha-lei-goi ah ming cu guk ci gui. 13 Hni law lam ah m'kawt thum, hni kiaak lam ah m'kawt thum, htum lam ah m'kawt thum, siip lam ah m'kawt thum om ci. 14 Mang gaw k'chaam nak ung lung k'tung gha-lei-goi ng'ling ci gui. Cun ah lung k'tung gha-lei-goi ung Htomehta ah ng'düihpüi gha-lei-goi ah ming gui cu guk ah kiak ci. 15 Kei nang thu püi ciah khankhaw chang ah kut ung mang gaw ni, mang gaw m'kawt gui ni, la mang gaw päng gui nüt nak vai ah ghui ng'mui pum om ci. 16 Mang gaw cu azun akdang ng'cawih ne, ng'hniing ne ng'aai ci. Khankhaw chang naw ghui ng'mui pum awn cun ah mang gaw cu nüt khütah, azun akdang ahlüng ni cu mäng phiaa gha-lei-hmaa bäng bäng lawk ci. 17 Cun kawn ah khankhaw chang naw chaam k'pang nak cu nüt ba sei, chang gui ah nüt nak awn 216 pei hlüng ci. 18 Cun ah k'pang cu k'tolung pyü ci awn ami cawih ah kiak ci, mang gaw cu pääi dang ne vai khai ah ghui bäng awn ami cawih ah kiak ci. 19 Mang gaw chaam cu k'toulung ahlä hlü k'süm ne ami cawih ah kiak ci. Ami k'süm htük cu, k'tolung, akhnih nak cu k'toulung sen, akthum nak cu m'liu lung, akphli nak cu vailung; 20 Akhmaa nak cu m'silung, akchuk nak cu k'pyä lung, akchih nak cu ng'ailung, akcheit nak cu cäilung, akkaw nak cu ng'shülung, aghaa nak cu lungkyiing, agha-lei-ät nak cu lung m'kim, a hga-lei-goi nak cu zapilung ah kiak ci. 21 M'Kawt tumat cu zapi ng'mo tumat awn ami pian ah kia ne, m'kawt gha-lei-goi ung zapi ng'mo gha-lei-goi lawk ci. Mang gaw ah lam gui cun phi ghui bäng ah kia ne pääi dang ne vai ci. 22 Cun ah mang gaw ung pum im cu kä ka hmuk ci. A i ah kiasei ci ung, cun ah pum im cu hlüngtai pi bäih ciah Bawipa, Khanpughi la Htomehta ah kiak ci. 23 Cun ah mang gaw ah khan ah Khanpughi ah bämang nak cu dei ne Htomehta cu amei im ah kiak ci kisei a cun ah mang gaw ung hni la chaa ah akdei kä hlü ci. 24 Chang ah hta avan cu cun ah mang gaw ah akdei ung hteit-hton khai gui. M'dek ah khan ghangpughang gui naw ami ng'bähmang nak cu cun ah mang gaw ah law püi khai gui. 25 Mang gaw m'kawt gui cu hnüüp pum hmawngkhai gui. Cun ah mang gaw ah khaw amä nak kä om ci kia sei m'kawt cu a i zah ung phi kä khaai khai gui. 26 Chang avan naw ami hlüngtai nak la bühmang nak cu cun ah mang gaw ah avan law püi khai gui. 27 Cun ung phi kä theingcim ci phung api ah phi, cun ah mang gaw ah kä lut tuk khai. Thui ng'aa nak vai bik ci la hleeihlak ciah chang gui phi kä lut tuk khai gui. Htomehta ah ghin nak cauk ung angming guk ah chang gui bäng vah cun ah mang gaw ung lut tuk khai gui.
1 Khankhaw chang naw kei-am ghin nak tui ah lon nak ah tuinu phi na m'hnuh ci. Cun ah tui nu cu k'pyälung ah mäih ah vai ne, Khanpughi ah Htomehta ah mang kiaang ung kaa mang gaw ah gaw ng'lung lam nu ung zu long väk ci. 2 Cun ah tuinu ah tuikam vang veing ung ghin nak ah sing ghing om ci. Cun ah sing cu cha ät ung hnä ät m'theih ne, kum ät ung gha lei-goi vei m'theih ci. Cun ah hnah gui cu chang avan ah gai nak vai ah kiak ci. 3 Khanpughi ah m'shetkat nak gah ci phung cu api ah phi cun ah mang gaw ung kä hmuh vai nei. Khanpughi la Htomehta ah mangkiaang cu cun ah mang gaw ung om sei, ak chang gui naw khawihnah khai gui nei. 4 Ngami naw Bawipa ah hmai cu hmuk khai gui, ani ah ming cu ami m'calai ung guk pe gui khai. 5 Khaw amänak kä om ba khai. Mei im la hni ng'shü kä hlü ba khai, a i ah kiasei ci ung Bawipa Khanpughi cu ngami ah akdei ah kiak khai, ngami naw ghangpughang ah kia ne ngawi zä uk khai gui. 6 Cun kawn ah khankhaw chang naw kei-am, Shin ah ng'thu cu ng'düng ne ng'ciim ciah ng'thu ah kiak ci. Purofet gui cu ang mumcha awn be sak gui ciah Khanpughi naw kä shou pha sei kia lawk khai ah amawng gui cu, ak chang gui-am m'dang gui khai ah, khankhaw chang cu tüi law pyi ci nei ci ne pyein ci. 7 Bawipa Jesuh naw, Ngai vä, kei ka kyum lawk khai nei, shin ah cauk ung om ciah ng'cäi nak gui läk ciah chang cu zeikiai nak om ci nei ci ne pyein ci. 8 Shin ah amawng ama gui hmu ng'zak ci cu kei Johan ah ka kiak ci nei. Kei naw shin ah amawng gui ka hmuh ng'zak kawn ah kei cu khankhaw chang ka khawihnah khai ah a khaw pei ah ka kawp ci. 9 Khankhaw chang naw, Shik cha ah kä na bi vai, kei cu nang ah püipaw ah ka kiak ci, na phäi nau purofet gui la shin ah cauk ung om ciah cacim läk ciah chang gui ah püipaw ah phi ka kiak ci, Khanpughi bäng na khawihnah vai nei ci na kiak nak ci. 10 Cun kawn ah khankhaw chang naw, Shin ah a mawng gui a bä law nak vai ng'et law pyi ci kiasei, shin ah cauk ung kaa ng'cäi nak ah ng'thu gui cu kä na m'zih en vai nei. 11 Akshe bik ciah chang cu akshe bi lä sä, cheishoh ciah chang cu cheishoh lä sä, akni bik ciah chang cu akni bi lä sä, theingciim ciah chang cu theingciim lä sä ci ne na kiak nak ci. 12 Bawipa Jesuh naw, Ngai vä, kei ka kyum law ge ci nei. Chang gui-am ami mät ah bi ah ci ah peit gui vai ah m'cümhnah nak cu ka law püi khai nei. 13 Kei cu Alpha la Omeka, akhtük bäih la akhnu bäih, tän ka la khäm nak ah ka kiak ci. ä ci ne pyein ci. 14 Ami suisak theing khai ah m'suk ci gui cu zeikiai nak om ci, ngami cu ghin nak ah sing ah m'theih ei nak hning la mang gaw ah m'kawt ung luh nak hning cu gah khai gui. 15 Cun ung phi chang shekha gui, ng'plukheih ci gui, pletbeng ci gui, chang ngawn ci gui, agup khawihnah ci gui, hleeihlak cheishoh ci gui cu ami van Manggaw ah ak'pung ah om khai gui. 16 äKei Jesuh naw nangmi Khrihtabum gui-am shin ah amawng gui cu shäu ne ning m'thein gui khai ah ka khankhaw chang cu ka tüi lawk ci nei. Kei cu David ah hta ng'shon ah ka kiak ci, ng'shü ne khang ciah thaihke aisi ah phi ka kiak ci. ä 17 Mumcha Theing la Ceimah khai ah ng'laamihta naw, Law ä cik ci goi. Cun ah ng'thu ng'zak ciah chang nüng naw phi, Law ä ci ne pyein sä, Tui gha ciah chang cu law sä, ghin nak ah tui ng'za hlük ciah chang phung naw a lä ah dou sä! 18 Shin ah cauk ung ng'cäi nak ah ng'thu ng'zak ciah chang phung-am kei Johan naw khen ne ka pyein ci nei, a u chang phi shin ah caciim heikbe tuk ciah chang cu, Khanpughi naw shin ah cauk ung om ciah leigaai gui awn shetkat sak khai nei. 19 A u chang phi shin ah cauk ung kaa caciim heikpai tuk ciah chang cu, Khanpughi naw shin ah caciim ung guk ah ghin nak sing ah am theih ei nak hning la theingciim ciah mang gaw ung luh nak hning cu k'phleeng pek khai nei. 20 Shin ah amawng gui zuk pyein ciah Bawipa naw, Kei akcang ah ka kyum law ge vai ci nei, ä ci ne pyein ci. Cun cu akcang ah kia sä, Bawipa Jesuh zu kyum law! 21 Bawipa Jesuh am geinsei nak cu nami changsing ah khan ah om sä! Amen.