The New Testament of our Lord and Saviour Jesus Christ
1 Jesuh Khrih suahkehnak cu hi bangtuk in a si. Amah cu Abraham ih cithlah David ih tesinfa a si. 2 Abraham ih fapa cu Isaak a si. Isaak ih fapa cu Jakob a si. Jakob ih fapa cu Judah le a unau pawl an si. 3 Judah ih fapa cu Perez le Zerah an si (an nu cu Tamar a si), Perez ih fapa cu Hezron a si, Hezron ih fapa cu Ram a si, 4 Ram ih fapa cu Amminadab a si, Amminadab ih fapa cu Nahshon a si, Nahshon ih fapa cu Salmon a si, 5 Salmon ih fapa cu Boaz a si (a nu cu Rahab a si), Boaz ih fapa cu Obed a si (a nu cu Ruth a si), Obed ih fapa cu Jesse a si. Jesse ih fapa cu siangpahrang David a si. 6 David san ihsin Israel mi pawl Babilon ram sal an taan tiang an pupa pawl cu a tanglam vekin an si. David ih fapa cu Solomon a si (a nu cu Uriah nupi a rak si.) 7 Solomon ih fapa cu Rehoboam a si, Rehoboam ih fapa cu Abijah a si, Abijah ih fapa cu Asa a si. 8 Asa ih fapa cu Jehoshafat a si, Jehoshafat ih fapa cu Joram a si. Joram ih fapa cu Uzziah a si. 9 Uzziah ih fapa cu Jotham a si, Jotham ih fapa cu Ahaz a si, Ahaz ih fapa cu Hezekiah a si, 10 Hezekiah ih fapa cu Manasseh a si, Manasseh ih fapa cu Amon a si, Amon ih fapa cu Josiah a si. 11 Josiah ih fapa cu Jehoiakhin le a unau pawl an si. 12 Babilon saltaannak ihsin Bawi Jesuh suah tiang a tanglam vek an si. Jehoiakhin ih fapa cu Shealtiel a si, Shealtiel ih fapa cu Zerub-babel a si, 13 Zerub-babel ih fapa cu Abiud a si, Abiud ih fapa cu Eliakim a si, Eliakim ih fapa cu Azor a si, 14 Azor ih fapa cu Zadok a si, Zadok ih fa pa cu Akhim a si, Akhim ih fapa cu Eliud a si, 15 Eliud ih fapa cu Eleazar a si, Eleazar ih fapa cu Matthan a si, Matthan ih fapa cu Jakob a si, 16 Jakob ih fapa cu Josef a si, Josef cu Mari ih pasal a si, Mari in Messiah timi Jesuh a hring. 17 Curuangah Abraham ihsin David tiang san hleili, David ihsin Babilon i sal an taan tiang san hleili, sal an taan ihsin Messiah a suah tiang san hleili a si. 18 Jesuh Khrih suahnak cu hiti in a si. A nu Mari cu Josef thawn an ham aw ih an ṭhit-awk hlanah Thlarau Thianghlim ih fa ka nei ding ti a thei. 19 A hamtu Josef cu mi ṭha a si ruangah Mari kha mi hmaiah ningzak ih umter a duh lo ih an hamawknak cu a thupte ih phelh saal a tum. 20 Cumi thu a ruah rero laiah a mang ah Bawipa ih vancungmi pakhat a hnenah a lang ih, "David tefa sin Josef, Mari hi na nupi ih ṭhit dingah ṭih hlah. Ziangahtile fa a vunnak hi Thlarau Thianghlim thawngin a si. 21 Amah in fapa a hring ding ih a hmin ah Jesuh tiah na sak pei, ziangahtile a minung pawl kha an sualnak ihsin a run suak ding a si," tiah a ti. 22 Bawipa in profet hnen in, 23 "Fala him pakhat in fa a vun ding ih fapa a hring ding, a hmin ah Immanuel tiah an ko ding," tiih a rak sim ciami a kimnak dingah hi bangtuk in thil a hungcang a si. (Immanuel ti mi cu, "Pathian kan hnenah a um," tinak a si.) 24 Josef cu a hung ṭhang ih, Bawipa ih vancungmi ih a fial vekin Mari cu a ṭhit. 25 Asinain fapa a hrin hlantiang a ihpi lo. Fapa a hring ih a hmin ah Jesuh tiah a sak.
1 Jesuh cu Herod in Judea ram ah siangpahrang a ṭuan laiah, Judea ram Bethlehem khua ah a suak. A rei hlanah nisuahnak lam ihsin arsi zohthiam pawl Jerusalem khawpi ah an ra ih, 2 "Judah mi pawl ih Siangpahrang dingah a suakmi naute khuiah so a um? Nisuahnak lamah a arsi kan hmu ih amah biak dingah kan ra a si," tiah an ti. 3 Cuih thu cu siangpahrang Herod in a theih tikah a thin a har ngaingai. Jerusalem khua ih a ummi midang hmuahhmuah khal an thin a har ve. 4 Curuangah Herod in puithiam upa pawl le Daanthiam pawl a kokhawm ih, "Messiah cu khuiah so a suah ding?" tiah a sut. 5 Cutikah annih in, "Judea ram Bethlehem khua ah a suak ding," tiah an let. Profet ih ngantami cu: 6 "Judah ram sungih a ummi Bethlehem, Judah ram khawpi pawl lakah hin a fate bik cu na si hrimhrim lo. Ziangahtile na sung ihsin hruaitu pakhat a suak ding ih, Ka minung Israel mi pawl a hruai ding," ti a si. 7 Curuangah Herod in nisuahnak lamih mifim pawl cu a thupte in a ko ih, ziangtik teu-ah arsi a suak, ti kha feltein a sut. 8 Cule Bethlehem khua ah a thlah ih, "Va feh uhla naute cu ṭhatein va hawl uh; nan hmuh asile kei khal i sim uhla amah biak dingah ka feh ve ding," tiah thu a cah hai. 9 Herod ih sim vek cun an feh ih nisuahnak lamih an hmuhmi arsi cu an hmu sal. Cuih arsi an hmuh sal tikah an lung a awi ngaingai. An hmaiah a feh vivo ih naute umnak tlunah cun a cawl. 11 Inn sungah an vung lut ih naute cu a nu Mari thawn an vung hmuh tikah khukbil in an biak. An laksawng kenmi sui, frankincense rimhmui le mura zihmui an suah ih an pek. 12 Cule mifim pawl cu Pathian in an mang ah Herod hnenih kir sal nawn lo dingin a sim ruangah lamzin dangin an ram ah an tlung. 13 Nisuah lam mifim pawl an feh hnuah Bawipa ih vancungmi pakhat cu Josef ih mangah a lang ih, "Hi naute hi Herod in thah dingah a hawl ding. Curuangah tho awla naute le a nu thawn Izipt ramah tlan uh. Kir sal ding i ka lo sim hlan lo cutawkah nan um pei," tiah a ti. 14 A ti bangtuk in Josef cu a tho ih naute le a nu thawn a zanzan in Izipt ram ah an tlan. 15 Herod ih thih tiang cutawkah an um. Hi bangtuk ih a sinak cu Bawipa in profet kaa in, "Ka Fapa cu Izipt ram ihsin ka ko suak," tiah a rak timi kha kimternak dingah a si. 16 Nisuah lam mifim pawl in in bum ngah ti kha Herod in a theih tikah a thin a heng ngaingai. Cule mifim pawl ih simmi arsi suah caan thawn a vun tuat ih Bethlehem le a kiangkap khua ih a ummi mipa nauhak kum hnih le a hnuailam hmuahhmuah that ṭheh dingin thu a pek. 17 Cuticun profet Jeremiah ih a rak sim ciami kha a kim. A rak sim ciami cu: 18 "Ramah khawsung in aw a thang, ṭahnak le aihramnak aw a si. Rachel in a faate pawl a ṭah; An thih ṭheh ruangah a ṭap ih, Leem khal a theih nawn lo," ti a si. 19 Herod a thih hnuah Izipt ramah cun Bawipa ih vancungmi pakhat Josef ih mangah a lang ih, 20 "Tho awla naute le a nu kha Israel ram ah kirpi aw, ziangahtile naute thah a tumtu pawl an thi zo a si," tiah a ti. 21 A ti bangtuk in Josef cu a tho ih naute le a nu cu a hruai ih Israel ram ah kir dingin an feh. 22 Asinain Arkhelaus in a pa Herod ih can-ai ah Judea siangpahrang a ṭuan ti Josef in a theih tikah cutawkah cun a feh ngam lo. A mangih thu an sim bet vekin Galilee peng ah a feh ih, 23 Nazareth timi khua ah a um. Cuticun profet pawl ih an rak sim ciami, "Amah cu Nazareth mi ti a si ding," timi cu a kim a si.
1 Cuih tikcu hrawngah baptisma petu Johan cu Judea peng ramṭhing ah a ra thleng ih thu a sim. 2 "Vancung Uknak a nai zo a si. Nan sual sir aw uh," tiah a ti. 3 Profet Isaiah in, "Mi pakhat cu hramlakah a au ih, 'Bawipa ih hrangah lamzin sial uh, A fehnak ding lamzin kha dingter uh,' a ti," tiih a rak timi kha a rak simsan duhmi cu Johan hi a si. 4 Johan ih hnipuan cu kalauk hmulih tahmi a si, a taikhap cu savun ih tuahmi a si ih a rawl cu kharbok le hramlak khuaitizu a si. 5 Jerusalem in siseh, Judea ram khuazakip in le Jordan tiva kiangkap hmuahhmuah in siseh, a hnenah mi an ra. 6 An sualnak an phuang ih Jordan tiva ah baptisma a rak pek hai. 7 Johan in Farasi pawl le Sadusi pawl a hnenah baptisma la dingih an rat kha a hmuh tikah, "Maw rul hrin hrokhrawl pawl, a ra thleng dingmi Pathian ih hremnak sung ihsin nan luat thei ding, tiah zoso a lo sim? 8 Nan sual nan sir awknak kha nan rah in langter uh. 9 "'Abraham cu ci in thlahtu kan pu a si,' ti tahrat in hremnak ihsin kan luat ding, tiah va ruat hlah uh. Thungai in ka lo sim: Pathian cun hi lungto pawl hman hi Abraham tesinfa ah a tuah thei a si. 10 Thingkung tawhram ah hreitlung ret cia in a um zo. Rah ṭha a rah lomi thingkung hmuahhmuah cu hau tahratin meisa sungah paih an si ding. 11 Nan sualnak nan sir-aw ti theihnak ah kei cun tidai thawn baptisma ka lo pek, asinain keimah hnu ih a ra dingmi pa cun Thlarau Thianghlim le meisa thawn baptisma a lo pe ding. Amah cu kei hnakin a tum deuh ngaingai; kei cu a kedam kengtu hmanah ka tlak lo. 12 A kut sungah fang seepnak ṭangṭa a keng. Fang ngai cu a cuam sungah a khum ding ih a hivai pawl cu a mit dah lomi meisa sungah a paih ding a si," tiah a ti. 13 Cuih caanah Jesuh cu Galilee ihsin Jordan Tiva ah Johan ih baptisma la dingin a ra. 14 Asinain Johan in a hnenah, "Keimah sawn hi na hnen ihsin baptisma la ding ka si, ziangtinso nangmah riangri ka hnenih na rat?" tiah a sut. 15 Sikhalsehla Jesuh in, "Atu cu hiti in tuah si ko seh. Ziangahtile Pathian in tuah dingih in fialmi cu hiti hin kimter thluh ding a si," tiah a ti. A ti vek cun Johan khal a lung a kim. 16 Jesuh cu baptisma a tuah ngah vete in tidai sung ihsin a hung suak. Cutikah van khi a ong-aw ih Pathian ih Thlarau cu thuro bangin a rung ṭum ih a parih a fut kha a hmu. 17 Cule van ihsin aw pakhat in, "Hi pa hi ka duh zetmi ka Fapa a si, a parah ka lung a kimzet," tiah a ti.
1 Cule Jesuh cu Satan ih hniksak dingah Thlarau in ramṭhing ah a fehpi. 2 Ni sawmli le zan sawmli rawl loih a um hnuah Jesuh cu a ril a rawng ngaingai. 3 Cutikah Satan a hnenah a ra ih, "Pathian Fapa ngaingai na si ahcun hi lungto pawl hi saang ah cang dingin thu pe aw," tiah a ti. 4 Asinain Jesuh cun, "Ca Thianghlim in 'Milai nunnak cu rawl lawngin a si lo. Pathian hmurka in a suakmi ṭongkam in a si sawn,' a ti," tiah a let. 5 Cule Satan in Jesuh cu Jerusalem Khawpi Thianghlim ih Biakinn zim ah a fehpi ih, 6 a hnenah, "Pathian Fapa na si ahcun hitawk ihsin dawp aw, ziangahtile Ca Thianghlim ah, 'Pathian in na kiangih a ummi vancungmi pawl thu a pe ding, An kut in an lo dom ding ih na ke cu lungto thawn a khawng aw lo ding,' tin a um," tiah a ti. 7 Asinain Jesuh cun, "Ca Thianghlim in 'Bawipa na Pathian cu na hniksak lo pei,' a ti a si," tiah a let. 8 Cule Satan in Jesuh kha tlang saangpi parah a fehpi ih leilung tlun ram hmuahhmuah kha an maksaknak thawn a hmuh ṭheh. 9 Cuih hnuah Satan cun, "Na khuk bilh tahratin i biak ahcun hi hmuahhmuah hi ka lo pe ding," tiah a ti. 10 Cutikah Jesuh in, "Satan, tlan aw, ziangahtile Ca Thianghlim in 'Bawipa na Pathian na biak pei ih amah lawng na rian pei,' a ti a si," tiah a let. 11 Cule Satan cun a tlansan; cuih hnuah vancungmi pawl in an rung tuamhlawm. 12 Johan kha thawng ah an thlak ti a theih tikah Jesuh cu Galilee ah a feh. 13 Nazareth ah um loin Kapernaum khua ih um dingin a feh. Kapernaum khua cu Zebulun le Naftali phun pawl ram sung Galilee Tili kapih a ummi khua a si. 14 Hitiih a umnak cu profet Isaiah ih a rak sim ciami kimternak dingah a si. Isaiah cun: 15 "Zentail mi pawl ih umnak Galilee ram sung, Jordan tiva ral khatih um, Tipi lamah, Zebulun le Naftali ram, 16 Khawthim sungih a ummi pawl in, Tleunak maksak an hmu ding. Thihnak ram thim sungih a ummi pawl parah tleunak a suak ding," tiah a rak ti. 17 Cuih tikcu ihsin Jesuh in, "Nan sual sir uh, ziangahtile vancung Uknak a nai zo," tiah thusim hram a thok. 18 Jesuh cu Galilee Tili kapih a feh rero laiah ngakaitu unau pahnih, tili sungah sur vorh in nga an kaih rero kha a hmu. Cuih unau pahnih cu Simon (Piter tiih kawhmi) le a nau Andru an si. 19 Jesuh cun, "Ka hnenah ra uhla mikaitu ah ka lo tuah ding," a ti. 20 Hmakhatteah an sur pawl cu an tanta ih amah cu an thlun. 21 A feh vivo ih Zebedi fapa pahnih Jeim le Johan teih unau a hmu. Anmah cu an pa Zebedi thawn an lawng sungah an um ih an sur pawl an tholh rero. Jesuh cun a vun ko ih, 22 hmakhatte ah an lawng le an pa tanta in Jesuh cu an thlun. 23 Jesuh cu Galilee peng khuazakip ah a feh ih sinakok kipah thu a zirh vivo. Vancung Uknak Thuthang ṭha a sim vivo ih natnak a phunphun a tuartu pawl kha a damter vivo. 24 A thuhla cu Siria ram hmuahhmuah tiangin a thang thluh; curuangah cun natnak le harsatnak a phunphun a tuartu, khawsia-ih polhmi pawl, merainat nei pawl le a zengmi pawl kha a hnenah an ratpi ih an zate in a damter ṭheh. 25 Galilee le Dekhapolis peng, Jerusalem le Judea peng le Jordan tiva ral ihsin mi tampi an ra ih amah cu an thlun.
1 Jesuh in mipi a hmuh tikah tlangpar ah a hung kai; cutawkah cun a to ih a dungthluntu pawl a hnenah an ra. 2 Cule a kam a kau ih hiti in thu a zirh: 3 "Thlarau lamah ka farah ti a thei awtu pawl cu mi thluasuak an si; Ziangahtile vancung Uknak cu anmah ih ta a si. 4 Ninghang lungsia pawl cu mi thluasuak an si; Ziangahtile Pathian in a hneem hai ding. 5 Lungnemmi pawl cu mi thluasuak an si; Ziangahtile Pathian ih kam ciami an co ding. 6 Pathian ih duhnak tuah dingih a hiarhaaltu pawl cu mi thluasuak an si; Ziangahtile Pathian in an lung di a riamter ding. 7 Mi zaangfah thiamtu pawl cu mi thluasuak an si; Ziangahtile Pathian in anmah a zaangfah ve ding. 8 Thinlung a thiangmi pawl cu mi thluasuak an si; Ziangahtile Pathian an hmu ding. 9 Remnak a tuahtu pawl cu mi thluasuak an si; Ziangahtile Pathian ih fahniang tiah kawh an si ding. 10 Pathian duhnak tuah ruangih hremnak a tuartu pawl cu mi thluasuak an si; Ziangahtile vancung Uknak cu anmah ih ta a si. 11 "Keimah ih dungthluntu nan si ruangah mi in an lo hmuhsuam, an lo hrem ih thuphan a phunphun an lo puh tikah mi thluasuak nan si. 12 Nan lungawi in nan aipuang uh, ziangahtile nan hrangah tuarman tampi vancung ah ret a si. Nan hlanih profet pawl khal cu bangtuk in hrem an tuar zo. 13 "Nannih cu mi phunkip hrangah cite nan si. Sihmansehla cite cu a alnak a ziam asile alter sal a theih nawn lo. Òhathnemnak zianghman a neih nawn lo ruangah hlon ding le pal men ding lawng a si. 14 "Nannih cu leilung pumpi hrangah tleunak nan si. Tlangpar ih tohmi khua cu thuh a theih lo. 15 Zohman in mei-inn an van tikah khengkuum an khuh dah lo. Mei-inn vannak tung parah an vang. Cutiin inn sungih a ummi zate hrangah tleunak a si. 16 Cubangtuk in nan tleunak cu mi hmaiah tleuter ding nan si. Cuticun thil ṭha nan tuahmi cu mi in an hmu ding ih vanih a ummi nan Pa kha an thangṭhat ding. 17 "Moses Daan pawl le profet pawl ih thuzirhmi siatsuah dingah a ra, tiah i ruat hlah uh. Cupawl siatsuah dingah ka ra lo, an zirhmi pawl kimter dingah ka ra sawn a si. 18 Hihi cing ṭha uh: lei le van a um sung cu Daan sungih daan terek bik pakhat hman a hlo lo ding, ziang hmuahhmuah a kim ṭheh hlan cu pakhatte hman a hlo lo ding. 19 Curuangah zokhal sisehla thukham sungih a thupi lo bik pakhatte hman kha a thlun lo ih mi dang khal thlun lo dingin a zirh ve a si ahcun amah cu vancung Uknak ah mi tenau a si ding. Cule zokhal sisehla Daan kha a thlun ih mi dang khal thlun ve dingih a zirh a si ahcun amah cu vancung Uknak ah mi thupi a si ding. 20 Fiangtein ka lo sim: Pathian duhmi tuahnak ah Daanthiam pawl le Farasi pawl hnakih nan fel sawn lo ahcun vancung Uknak ah nan lut thei lo ding. 21 "Hlanlaiah cun 'Mi va that hlah, mi a thattu cu thuṭhennak a tuar ding a si,' an rak timi nan thei zo. 22 Asinain kei cun: a unau parah a thin a hengtu cu thuṭhennak a tuar ding; zokhal sisehla a unau kha 'Zianghman ih ṭhahnem lo,' a titu cu thuṭhentu hmaiah suahpi a si pei ih a unau kha, 'Mi aa,' a titu cu hell meisa sungah a tla ding tiah phan a um a si, tiah ka ti. 23 Curuangah biakṭheng ah laksawng Pathian hnenih pek na tum laiah na unau pakhatkhat na parah thinhengnak a nei ti na thei a si ahcun, 24 biakṭheng hmaiah na laksawng cu taanlawk awla zamrang zetin na unau hnenah feh tahratin remnak va tuah aw; cule ra sal awla na laksawng cu Pathian hnen ah pe aw. 25 "Mi pakhatkhat in a lo khiing ih zungih a lo thlenpi a si ahcun, zung nan thlen hlan a tikcu um laiah amah thawn remnak va tuah aw. Zung a lo thlenpi hnuah cun thuṭhentu kut ah a lo pe ding ih thuṭhentu in palik hnenah a lo pe lala ding ih thawng ah thlak na si ding. 26 Fiangtein ka lo sim: an lo cawhmi tangka na kuan ṭheh hlan lo thawng sungah na um ding. 27 "ṭaangṭawm sualnak nan tuah lo pei, an ti ṭheumi nan thei. 28 Asinain kei cun: nunau kha hahio mit in a zohtu cu a thinlung in cu nu thawn ṭaangṭawm sualnak a tuah zo, tiah ka lo ti. 29 Curuangah na vorhlam mit in a lo sualter asile phorh awla hlon aw. Na ruangpi hell sungih hlon tuar hnak cun na taksa ṭhen pakhatkhat na sun cu na hrangah a ṭha sawn. 30 Na vorhlam kut in a lo sualter le sattan awla hlon aw. Na ruangpi hell sungih hlon tuar hnak cun na kutke pakhatkhat tan a si cu na hrangah a ṭha sawn. 31 "Zokhal in a nupi a maak asile maaknak ca ken seh, timi nan thei. 32 Asinain kei cun: mi pakhat in a nupi kha, mipa dang thawn sualnak ruangah siar lo, a maak asile, a nupi cu pasal a neih tikah ṭaangṭawm sualnak tuahtu a siter. Curuangah cupa cu mi sual a si. Cutiih a maak minu a ṭhitu pa khal ṭaangṭawm sualnak tuahtu a si ve. 33 "Khuahlan laiah cun 'Nan thukam pelhter hlah uh, Bawipa hnenih thu nan kammi cu tuah suak uh,' an ti ṭheumi nan thei. 34 Asinain kei cun hiti in ka lo sim: thukamnak nan tuah tikah ziangtik hmanah siatcam in tuah hlah uh. Vancung hmin saal in thu kam hlah uh, ziangahtile Pathian tonak a si. 35 Leilung hmin saal khal in thu kam hlah uh, ziangahtile Pathian ke retnak a si. Jerusalem hmin saal khal in kam hlah uh, ziangahtile Siangpahrang maksak umnak khawpi a si. 36 Nan lu saal khal in thu kam hlah uh, ziangahtile nan lu parih sam phangkhat hman kha nan dumter thei lo ih nan rangter thei fawn lo. 37 'A si,' 'asilo,' ti lawng hi sim uh; cuih hlei cu mi ṭha lo Khawsia hnen ihsin a suakmi an si. 38 "Mit ai ah mit, ha ai ah ha, tiih an simmi cu nan thei. 39 Sikhalsehla kei cun hiti in ka lo sim. A lo tisiattu parah phulei va sam hlah uh; mi pakhatkhat in na vorhlam biang ah a lo beeng asile na kehlam biang khal tun lawlaw aw. 40 Cule mi pakhatkhat in na angki duh ah thuṭhennak zung tiang a lo thlenpi asile na kawt angki khal pe lawlaw aw. 41 Cun a lo uktu ralkap pakhatkhat in a thilri peng khat phur dingin a lo fial a si ahcun peng hnih tiang va phurhsak aw. 42 Mi pakhatkhat in thil pakhatkhat a lo dil a si ahcun va pe aw; na thil cawi a duhtu hnenah va coih aw. 43 "Nan rualpi nan duhdawt pei ih nan ral pawl nan hua pei," timi cu nan thei zo. 44 Asinain kei cun hiti in ka lo sim: nan ral pawl duhdaw uhla a lo hremtu pawl hrangah thla cam uh; 45 cuticun vancungih a ummi nan Pa ih fa nan si ding. Ziangahtile Pathian in mi ṭha le mi ṭha lo tlunah bangrep in ni a tlangter ih thil ṭha a tuahtu le thil sia a tuahtu tlunah bangraan in ruah a surter. 46 A lo duhtu lawng nan duh a si ahcun ziangah so Pathian in laksawng a lo pek ding? Siahkhongtu hman in cu bangtuk cun an tuah ve a si! 47 Nan rualpi ṭha pawl lawng nan biak ṭhat a si ahcun mi dang nan hleihnak ziangso a um cuang? Pathian bia lomi hman in cuvek cu an tuah a sisi! 48 Vancung ih a um nan Pa a famkim vekin nannih khal nan famkim ve pei.
1 "Biaknak lamih thil ṭha nan tuahmi hi mi in in hmu hai seh tiin mizapi hmaiih tuah lo dingin ralring uh. Cutiih mipi hmaiih nan tuah ahcun vancungih a ummi nan Pa hnen ihsin ṭhatman ziang hman nan ngah lo ding. 2 "Curuangah mi tlasam hnenah thil pakhatkhat nan ṭhen tikah mititeraw pawl in sinakok le zalamzin ih an tuah vekin tawtawrawt tum in uang aw hlah uh. Annih cun mipi pawl ih lom dingah an tuah. Fiangtein ka lo sim: an ngah dingmi cu an ngah ṭheh zo. 3 Sikhalsehla nannih cun mi tlasam nan bawm tikah nan vorhlam kut ih tuahmi kha nan kehlam kut khal in theih lo dingin va tuah uh. 4 Cuticun a thupte ih nan tuahmi a hmutu nan Pa in ṭhatman a lo pek ding. 5 "Thla nan cam tikah mititeraw pawl vekin cam hlah uh. Annih cun mi hmuahhmuah in in hmu hai seh tiin sinakok le zalampi ah ding tahratin thlacam an duh ngaingai. Fiangtein ka lo sim: an ngah dingmi an ṭhatman cu an ngah ṭheh zo. 6 Sikhalsehla nannih cu thla nan cam tikah nan innkhaan sungah lut uhla sangka nan khar hnuah mithmuh lomi nan Pa hnenah thla cam uh. Cule a thupte ih nan tuahmi a hmutu nan Pa in nan ṭhatman a lo pe ding. 7 "Thla nan cam tikah Pathian thei lomi pawl ih sullam nei tuk lomi ṭong tampi an ṭong vekin va tuah hlah uh. Annih cun reipi thla an cam tikah Pathian in a thei cuang ding tiah an ruat. 8 Anmah vek va si hlah uh. Nan ṭulmi cu nan dil hlan ihsin nan Pa in a thei cia zo. 9 Curuangah hi bangtuk in thla nan cam pei: 'Vancung ih a ummi kan Pa, na hmin thianghlim cu upat si ko seh; 10 Na Uknak thleng hram seh; Vancung i na duhnak tuah a si bangin leitlun khalah tuah si ve seh. 11 Nitin kan ṭulmi rawl in pe aw. 12 Mi in kan parah sualnak an tuah ih kan ngaidam bangtuk in, Kanmah ih sualnak khal in ngaidam ve aw. 13 A harmi hniksaknak tuarter loin, siatnak ihsin in hum hram aw.' 14 "Nan parah sualnak a tuahtu pawl nan ngaidam a si ahcun vancungih a ummi nan Pa in a lo ngaidam ve ding. 15 Sikhalsehla midang sualnak nan ngaidam lo a si ahcun nan sualnak cu nan Pa in a lo ngaidam ve lo ding. 16 "Rawl nan ulh tikah mititeraw pawl vekin riahsia mithmai in um hlah uh. Mihrek in rawl an ulh kha mi hmuahhmuah in in thei hai seh tiah an mithmai in an langter. Fiangtein ka lo sim: an ngah dingmi an ṭhatman an ngah ṭheh zo a si. 17 Nannih cu rawl nan ulh tikah nan hmai phiah in nan sam tla ṭhatein hriat uh. 18 Cuticun zohman in rawl nan ulh kha an lo thei lo ding ih mithmuh lo nan Pa lawng in a lo thei ding. A thupte ih nan tuahmi a hmutu nan Pa in ṭhatman a lo pek ding. 19 "Tlap le nget ih a siatsuah theinak le rukru pawl in an bauh ih an ruk theinak hi leitlun ah nan sumsaw khawl hlah uh. 20 Tlap le nget ih a siatsuah thei lonak le rukru pawl in an bauh ih an ruk thei lonak vancung ah nan sumsaw cu khawl sawn uh. 21 Ziangahtile nan sumsaw umnak ah nan thinlung khal a um ve ding. 22 "Mit cu taksa ruangpi hrangah mei-inn a si. Nan mit a fim le nan taksa ruangpi cu a tleu ṭheh ding. 23 Sikhalsehla nan mit a ṭhat lo ahcun nan ruangpi cu thimnak sungah a um ding. Cuti a si ruangah nan sungih tleunak cu thimnak a si ahcun ziangtluk ṭihnungza so thimnak cu a si ding! 24 "Zokhal in bawi pahnih a rian thei lo. Pakhat a duh ding ih pakhat a hua ding. Pakhat hnenah rintlak zetin a um ding ih pakhat cu a hmuhsuam ding. Pathian le tangka nan rian tlang thei lo ding. 25 "Cuti a si ruangah ka lo sim: nan nunnak hrangih nan ṭulmi ti le rawl le nan ruangpi hrangih hnipuan pawl thu ruat le donhar in um hlah uh. Thungai ih ti ahcun, nunnak hi rawl hnakin a thupi sawn lo maw? Hnipuan hnak khal in taksa ruangpi hi a thupi sawn lo maw? 26 Van ih a zuangmi vate khi zohhnik uh; annih in thlaici an tuh lo, rawl khal an khawm lo ih cuam sung khalah an khawl lo. Asinain vancungih a ummi nan Pa in a cawm thluh a si. Vate hnakin tampi nan sunglawi sawn a si lo maw? 27 Nan donhar ruangah nan nunnak caan tawite tal nan sauter thei maw? 28 "Cun ziangah so hnipuan thu ah nan don a har? Hramlakih pangpar khi zohhnik uh; hna an ṭuan lo, pathnuk in thiam an tak fawn lo. 29 Asinain atu-ah ka lo sim: siangpahrang Solomon hman, kha tlukin a lian na'n, a lennak le a hnipuan in hi pangpar ih mawinak a tluk lo a si. 30 Tuihsun ah a nung ih thaisun ah meisa sungih paih ding hrampi hman a ceimawitu Pathian cun cuih pawl hnakin nannih cu a lo thuam sawn lo ding maw? Nan zumnak a va mal lawmmam so! 31 "Curuangah 'Ei in ding le sinfen ding tla khui-in so ka ngah ding,' tiin donhar in um hlah uh. 32 Hi pawl cu Pathian thei lo khawvel pawl ih an helhkam ringring mi an si. Vancung ih a ummi nan Pa in hi thil pawl nan ṭulzia cu a thei a si. 33 Cuhnakin Pathian Uknak le a felnak hawl hmaisa sawn uhla thil dang hmuahhmuah cu a lo pebeet ding a si. 34 Curuangah thaisun hrangah donhar in um hlah uh; thaisun in donharnak amah tawkin a nei ve ding. Ni ni khat ih a phurhmi harsatnak tlunah a dang beetcih ding a si lo.
1 "Mi va soi hlah; cuticun Pathian in a lo soi ve lo ding. 2 Ziangahtile mi na soi vekin nangmah khal Pathian in a lo soi ve ding ih midang parih na hmanmi tahfung in Pathian in a lo tah ve ding. 3 Na mit sungih thingtum hman poisa loin na unau mit sungih mithnawm fate kha ziangah so na poisat? 4 Na mit sungah thingtum a um nacingin ziangtinso na unau cu 'Na mithnawm ka lo coihsak ding,' tiih na ti thei? 5 Mititer aw pa! Na mit sungih thingtum kha suah hmaisata awla cuticun na unau mit sungih mithnawm cu fiangtein na hmu thei ding ih na coihsak thei ding. 6 "A thianghlimmi thil kha uico va pe hlah uh; her tahratin nanmah riangri sawp seksek in a lo keu ding. Nan keplung mankhung pawl cu vok hmaiah thlak hlah uh; a ke in a pal lak men ding a si. 7 "Dil uh, nan ngah ding; hawl uh, nan hmu ding; king uh, nan hrangah sangka on a si ding. 8 Ziangahtile a diltu hmuahhmuah cun an ngah ding, a hawltu hmuahhmuah cun an hmu ding ih a kingtu hmuahhmuah hrangah sangka cu on sak an si ding. 9 Nan faate pawl in saang an lo dil asile, nannih pale pawl in lungto nan pe ding maw? 10 Nga lo dil hai sehla rul nan pe ding maw? 11 Mi ṭha lo zet nan si na'n nan faate pawl hrangah cun a ṭhami thil pek nan thiam a si ahcun vancungih a ummi nan Pa in a diltu hnenah cun ziangtinso thil ṭha pek loin a um ding. 12 "Mi in kan parah tuah hai seh ti nan duh vekin mi dang parah tuah ve uh. Himi hi Moses Daan le profet pawl thuzirhnak ih sim duhmi taktak cu a si. 13 "A fiakmi kotka sungin feh uh, ziangahtile hell fehnak kotka cu a kau ih a lamzin khal a ol; curuangah a zawhtu khal an tam a si. 14 Sikhalsehla nunnak sungih luhnak kotka cu a fiak ih a fehnak lamzin khal a har; curuangah a thleng suaktu cu mi malte an si. 15 "Profet deu pawl khi ralring uh; an lenglam cun tuu bangin nan lakah an tlang; asinain an sunglam cu cinghnia hrang vek an si. 16 Mi ziangvek an si ti cu an tuahmi in nan thei ding. Hling kung ihsin sabit a rah dah lo; lenhling khal in theipi a rah dah keel lo. 17 A harhdammi thingkung ṭha cun rah ṭha a rah ih thingkung ṭha lo cun rah sia a rah. 18 A harhdammi thingkung cun rah sia a rah thei lo ih thingkung ṭha lo cun rah ṭha a rah thei ve lo. 19 Cule rah ṭha a rah lomi thingkung cu an hau ih meisa sungah an paih ṭheu. 20 Cuvekin profet deu pawl cu an tuahmi in nan theithiam ding. 21 "'Bawipa, Bawipa,' tiih i kotu hmuahhmuah in vancung Uknak an thleng thluh lo ding; vancungih a ummi ka Pa ih duhnak a tuahtu lawnglawng an thleng ding a si. 22 Thuṭhen Ni a thlen tikah mi tampi in 'Bawipa, Bawipa, na hmin in thu kan sim, na hmin in khawsia tampi kan dawi suak ih mangbangza tampi kan tuah,' tiah ka hnenah an ti ding. 23 Asinain kei cun, 'Ka lo thei dah lo! Ka hnen ihsin tlan uh, nannih mi ṭha lo pawl!' tiah ka ti hai ding. 24 "Curuangah hi ka ṭongmi a thei ih a thluntu cu lungpi parih inn saktu mifim pa bangtuk a si. 25 Ruah napi in a sur, ti a lian ih thlipi in a nuai ciamco na'n lungpi parih sakmi inn a si ruangah a sawn lo. 26 "Sikhalsehla hi ka ṭongmi a thei na'n a thlun lotu cu vunnel parih inn saktu mi-aa bangtuk a si. 27 Ruah napi in a sur, ti a lian ih thlipi in a nuai tikah a sawn mai; a tlu ih a siatbal thluh a si," tiah a ti. 28 Jesuh in hi thu hmuahhmuah a sim ṭheh tikah misenpi pawl cu a thuzirhmi kha an mang a bang ngaingai. 29 Anih cun Daanthiam pawl vek si loin thunei zetin thu a zirh a si.
1 Jesuh cu tlangpar ihsin a rung ṭum ih mitampi in an thlun. 2 Cule miphaar pakhat a hnenah a ra ih a hmaiah a khukbil in a kun ih, "Bawipa, na duh ahcun i damter thei a si," tiah a ti. 3 Jesuh cun a hei dawh ih a tham hnuah, "Ka lo damter ding, atu ihsin thiang thlang aw," tiah a ti. Hmakhatteah cupa cu a dam. 4 Cule Jesuh in, "Ngai aw, hi thu hi zohman sim hlah; asinain puithiam hnenah va feh vurvo awla amah in rak lo zohseh. Cun na dam zo a si ti ih mizapi theih dingah Moses thupekmi vekin thawinak va pe aw," tiah a ti. 5 Jesuh cu Kapernaum khua a thlen tikah Rom ralbawipa pakhat in a ra tong ih bomnak a ra dil. 6 "Bawipa, ka hnen-umpa cu besia zetin a na ih caang thei loin inn ah a it ringring a si," tiah a ti. 7 "Ka ra pei ih ka damter pei," tiah Jesuh in a ti. 8 Ralbawipa in, "Bawipa, cuticun si hlah seh; nang ka inn tiangih ratter dingah kei ka tlak lo. Damnak thu pe awla ka hnen-umpa cu a dam ko ding. 9 Keimah khal ka tlunlam bawi pawl ih ukmi ka si ih ka kut hnuai khalah ralkap an um. Ka kut hnuai ralkap pakhatkhat cu, 'Feh aw,' ka tile a feh; 'Ra aw,' ka tile a ra. Ka hnen-um khal, 'Himi tuah aw,' ka tile a tuah a si," tiah a ti. 10 Cumi cu Jesuh in a theih tikah a mang a bang ngaingai ih amah a thluntu mizapi pawl hnenah, "Thungai in ka lo sim: Israel mi lak hmanah hi pa ih zumnak bangtuk ka hmu hrih lo. 11 Fiangtein ka lo sim: nisuahnak le nitlaknak ihsin mi tampi an ra ding ih vancung Uknak rawl einak puai ah Abraham le Isaak le Jakob thawn an to tlang ding. 12 Asinain vancung Uknak co ding a si mi pawl sawn kha ṭahnak le hacang rialnak hmun khawthim sungah hlon an si ding," a ti. 13 Cule Jesuh in ralbawipa hnenah, "Inn ah va tlung awla na zumnak vekin tuah sak na si ding," tiah a ti. Ralbawipa ih hnen-um cu cuih caan cekci ah a rak dam. 14 Jesuh cu Piter inn ah a feh ih cutawkah Piter ih pizon cu khurhnat in a na ih ihkhun ah a rak it kha a hmu. 15 Jesuh cun a kut a vun tham ih a khurhnat cu a dam. Cule a tho ih Jesuh kha a tuamhlawm thei. 16 Zanlam a si tikah khawsia ih polhmi pawl kha Jesuh hnenah an ratpi. A ṭong kam khat in khuavang pawl cu a dawi ih mina mi pawl cu a damter ṭheh. 17 Hitiih a tuahnak cu profet Isaiah in, "Amah rori in kan natnak cu a lak ih kan dam lonak pawl cu a phurhlo a si," tiah a rak simmi kimternak dingah a si. 18 Jesuh in a kiangkapih misenpi a hmuh tikah a dungthluntu pawl kha tili khatlam ralih feh dingah thu a pek. 19 Daanthiam saya pakhat a hnenah a ra ih, "Sayapa, na fehnak hmun kipah ka lo thlun ding," tiah a ti. 20 Cutikah Jesuh in, "Cinghnia in kua an nei ih vate in bu an nei; asinain Milai Fapa cun riahnak hmun hman a nei lo," tiah a ti. 21 A dungthluntu dang pakhat in Jesuh hnen ah, "Bawipa, ka va kirta hrih ding ih ka pa ka va phumta pei," tiah a ti. 22 Jesuh in, "I thlun sawn aw, mithi pawl in mithi cu phum ko hai seh," tiah a sawn. 23 Jesuh cu a dungthluntu pawl in an thlun ih lawng sungah an lut. 24 Rinlopi-ah thlipi a huk ih lawng cu a pil zik. Asinain Jesuh cu a itthat. 25 Dungthluntu pawl in an va ṭhang ih, "Bawipa, in run aw! Kan thizik thlang a si," tiah an ti. 26 Cutikah Jesuh cun, "Ziangah so cuticun nan ṭih? Nan zumnak a va mal so!" tiah a ti. Cule a tho ih thli le tilet cu dai dingin thu a pek; hmakhatte ah tili cu daitein a um sal. 27 Mi hmuahhmuah an mang a bang ih, "Hi pa hi ziang bangtuk minung so a si? Thlipi le tilet hman in a thu an ngai!" tiah an ti. 28 Jesuh cu tili khatlam ral Gadara an timi ramah a thleng ih cutawkih thlaan lungkua sung ihsin a ra suakmi pahnih in an rak tong. Himi pahnih cu khawsia polhmi an si ih ṭihnung ngaingai an si ruangah cuih lamzin cu zohman in an zawh ngam lo. 29 Hmakhatteah an au ih, "Maw Pathian Fapa, nang le kannih ziangso kan seng aw? A tikcu a kim hlanah kanmah hrem dingah maw na rat?" tiah an ti. 30 Cutawk ihsin hla nawn ah rawl a ei reromi vok rual an um. 31 Khawsia pawl in Jesuh cu an dil ih, "In dawisuak ding a si ahcun khitawk ih vok pawl sungah khin in lutter aw," an ti. 32 Jesuh cun, "Va lut uh," tiah a ti. Khawsia pawl cu cuih mi pahnih sungin an suak ih vok pawl sungah an va lut. Vok rual cu cutawk khaamhraap ihsin an dawp ciamco ih tili sungah an tlathat ṭheh. 33 Vok kiltu pawl cu khawsungah an vung tlan ih cuih thuhla pawl le khawsia polhmi pahnih parih thil a cangmi pawl cu kimtein an sim ṭheh. 34 Curuangah khawsungmi hmuahhmuah cu Jesuh tong dingah an feh; Jesuh an hmuh tikah an ram ihsin hmun dangih feh dingah zaangfah an dil.
1 Jesuh cu lawng sungah a lut ih tili khatlam ralih a khua Kapernaum ah a kir sal. 2 Cule mizeng pakhat cu a ihkhun thawn Jesuh hnenah an rak zawn. Zumnak an neihzia kha Jesuh in a hmuh tikah, mizengpa hnenah cun, "Ka fapa, zianghman phang hlah. Na sualnak cu ngaidam a si zo," tiah a ti. 3 Cule Daanthiam saya ṭhenkhat pawl in, "Hi pa hi Pathian thangsiat in a ṭong a si," tiah an ti aw. 4 Cutiih an ruah cu Jesuh in a thei ih, "Ziangah so hi bangtuk thil ṭha lo hi nan ruat? 5 'Na sualnak cu ngaidam a si zo,' ti maw 'Tho awla feh aw,' ti so a ol sawn? 6 Milai Fapa in leilung parah mi sual ngaidam theinak thu a nei, tihi nan hmaiah ka langter ding," tiah a ti ih mizengpa hnenah cun, "Tho aw, na ihphah la awla inn ah va tin aw," tiah a ti. 7 Mizengpa cu a tho ih a inn ah a tin. 8 Cumi cu mipi in an hmuh tikah an thin a phang ih cubangtuk thuneihnak cu milai hnenah a pek ruangah Pathian an thangṭhat. 9 Cuih hmun ihsin Jesuh cu a suak ih a feh rero laiah siahkhongtu pakhat Matthai an timi pagen 41,31 a zung sungih a to kha a hmu ih, "I thlun aw," tiah a ti. Matthai cu a tho ih Jesuh a thlun. 10 Jesuh cu Matthai inn ih zanriah a ei laiah siahkhongtu dang tampi le misual an si ti ih hnonmi pawl in Jesuh le a dungthluntu pawl cu rawl an eipi. 11 Farasi ṭhenkhat pawl in cumi cu an hmuh tikah a dungthluntu pawl kha, "Nan sayapa hi ziangah so hibangtuk minung pawl thawn rawl an ei tlang?" tiah an sut. 12 Cumi cu Jesuh in a theih tikah an hnenah, "A harhdammi in sibawi an hai lo, mina lawngin an ṭul a si. 13 Va feh uhla, 'ṭilva in thawinak pek ka ṭul lo, mi zaangfahnak thinlung a si ka duh,' tiah Ca Thianghlim ih a timi hi a tican va ruathnik uh. Miding pawl ko dingah ka ra lo, misual pawl ko dingah ka ra a si," tiah a ti. 14 Cule baptisma petu Johan ih dungthluntu pawl Jesuh hnenah an ra ih, "Kannih le Farasi pawl cu rawl kan ul ṭheu na'n ziangah so na dungthluntu pawl hmuah rawl an ulh dah lo?" tiah an sut. 15 Jesuh in, "Mo lomnak puai ih sawmmi pawl cu ziangah so mopa a um sungah cun riahsia in an um ding? Riahsia in an um lo ding! Sikhalsehla an hnen ihsin mopa lakhlo a si tikcu a thleng leh ding ih cutikah rawl cu an ul leh ding. 16 "Zohman in angki hlun tlek parah puan thar an belh dah keel lo, ziangahtile belhmi thil thar kha a com ding ih angki a tlekmi kha a kau sinsin ding. 17 Cuvek thotho in zohman in savun thawl hlun sungah sabitti thar an thun dah lo; an thun asile savun thawl cu a kuai ding ih sabitti kha a zun hlo ṭheh ding ih savun thawl cu a siatralta ding a si. Cu hnakin savun thawl thar sungih sabitti thar thun a si ahcun siatnak ziang hman um loin an pahnih in an him ding," tiah a ti. 18 Cuih thu Jesuh in a sim rero laifangah Judah mi lakih bawi pakhat Jesuh hnenah a ra ih khukbil in, "Tubaite ah ka fanu a thi. Asinain nangmah na rat ih a parih na kut na suan ahcun a nung sal ding," tiah a ra ti. 19 Jesuh cu a tho ih cu pa cu a thlun ih a dungthluntu pawl khal cun an thlun ve. 20 Culai ah nunau nu pakhat kum hleihnih sung besia zetih thidok natnak a tuartu Jesuh dunglam ihsin a ra ih Jesuh ih puanzim kha a tham. 21 "A puan zimte tal ka tham thei a si ahcun ka dam ko ding," tiah a thinlungte in a ruat. 22 Cutikah Jesuh cu a her ih cu nu cu a hmu. "Ka fanu, na thinphang hlah! Na zumnak in a lo damter zo," tiah a ti. Cuvete in cu nu cu a dam. 23 Cule Jesuh cu Judah hotupa ih inn sungah a lut. Mithi topinak khuangdar tumtu pawl le minung hnok ceelceel ih an um a hmuh tikah, 24 "Nan zatein suak ṭheh uh! Hi nauhak nu cu a thi lo, a itthat a si," tiah a ti. Cutikah an hnihsan ṭheh. 25 Asinain mi an suah thluh vete in Jesuh cu nauhak nu ih umnak khaan sungah a lut ih a kut a vun kaih vete in nauhak nu cu a hung tho. 26 Cuih thu cu a kiangkap ram sung hmuahhmuah ah a thang thluh. 27 Jesuh cu cuih hmun ihsin a suak ih a feh rero laiah mitcaw pahnih in an dawi ih, "Maw David Fapa, in zaangfah hram aw," tiah an au. 28 Jesuh cu inn sungah a lut ih mitcaw pahnih cu a hnenah an ra ih Jesuh cun, "Ka lo damter thei ding tiin nan zum maw?" tiah a sut. "Asi, Bawipa, kan zum," tiah an ti. 29 Cutikah Jesuh in an mit a tham ih, "Nan zumnak vekin cang seh," a ti ih, 30 khua an hmu thei sal. Jesuh cun an hnenah, "Hi thu hi zohman nan sim lo pei," tiah fek zetin a tiam. 31 Asinain an feh ih Jesuh ih thuhla cu cuih kiangkap khuazakipah an than. 32 Mipi an inn ih an tin rero laiah midang pawl in khawsia in a polh ruangah a ṭong thei lomi mipa pakhat Jesuh hnenah cun an rak hruai. 33 Jesuh in khawsia a dawi suak sak vete in cupa cu a ṭong thei sal ih mi hmuahhmuah an mang a bang ṭheh. "Israel mi lakah hi bangtuk cu kan hmu dah hrih lo," tiah an ti cio. 34 Sikhalsehla Farasi pawl cun, "Khawsia dawihlo theinak huham cu khawsia bawi in a hnenah a pek a si," tiah an ti. 35 Cuticun Jesuh cu khual a tlawng ih khawpi siseh, khawte siseh, a pal phah vivo. Sinakok ah thu a zirh, vancung Uknak Thuthang ṭha a sim ih natnak le damlonak phunphun a neitu pawl a damter vivo. 36 Misenpi pawl a hmuh tikah khaaltu nei lo tuu bangtuk in rethei le awloksong ih an um ruangah an parah zaangfahnak tampi a nei. 37 Curuangah a dungthluntu pawl hnen ah, "Rawl khawm ding tampi a um na'n a khawmtu ding minung an malte a si. 38 Curuangah rawl lak ding neitu bawi hnen ah rawl khawmtu ding milai tampi thlah dingah thlacam uh," tiah a ti. te
1 Jesuh in a dungthluntu hleihnih kha hmun khatah a ko ih thlarau ṭha lo dawihlo theinak le natnak le dam lonak a phunphun damter theinak huham a pek. 2 Tirhthlahmi hleihnih ih hmin pawl cu, hmaisabik ah Simon (Piter timi) le a nau Andru; Zebedi ih fapa Jeim le a nau Johan; 3 Filip le Bartholomeo; Thomas le siahkhongtu Matthai; Alfias ih fapa Jeim le Tadias; 4 Phunṭan Simon le Jesuh a zuartu Judas Iskariot tla an si. 5 Hi hleihnih pawl cu Jesuh in a thlah ih ṭhatein thu a cah hai. "Zentail ram ah va feh hlah uhla Samaria khawsung ah va lut hlah uh. 6 Cuhnakin a hlomi tuu run Israel mi pawl hnenah nan feh pei. 7 Feh uh la, 'Vancung Uknak a nai zo,' tiah va sim uh. 8 Mina damter uh, mithi thoter sal uh, phaarnat a neimi pawl damter uhla khuavang pawl dawihlo uh. Man loin nan ngahmi kha man loin va pe uh. 9 Nan kordip ah sui tangka siseh, ngun tangka le dar tangka siseh, pai hlah uh. 10 Nan khualtlawnnak lamzin hrangah rawl dilnak ah cawdip siseh, angki hlei siseh, kedam le kianghrol siseh, keng hlah uh. Hnaṭuantu pa cu a sammi hmuahhmuah pek thluh a si ding. 11 "Khawpi siseh, khawte siseh nan thlen tikah lungawite ih tlun-inn a lo ontu inn ah lut uhla nan feh sal hlan tiang cuih inn ah va cam uh. 12 Inn sungih nan luh tikah 'Nan hnenah daihnak um hram seh,' tiah va ti uh. 13 Cuih inn sung mi pawl in tlun-inn an lo on asile daihnak hrang mal nan sawm sakmi cu cuih inn ah umseh. Asinain tlun-inn an lo on lo asile daihnak malsawmnak cu la kir sal uh. 14 Cule zokhal in tlun-inn an lo on lo ih nan thu khal an ngai duh lo asile cuih hmun cu tlansan uhla nan ke ih leivut cu thingthlata uh. 15 Thungai in ka lo sim: thuṭhennak Ni ah Pathian in cuih khua mi pawl hnakin Sodom le Gomorrah khua mi parah zaangfahnak tam deuh a nei ding a si," tiah a sim. 16 "Ngai uh! Cinghnia hraang rual lakih tuu thlah bangtuk in ka lo thlah a si. Curuangah rul vekin fimkhur uhla thuro vekin nan nun nem uh. 17 Ralring uh, ziangahtile nanmah a lo kaitu dingah mi an suak ding; zungah an lo thlenpi ding ih sinakok ah an lo vuak ding. 18 Keimah ih ruangah uktu le siangpahrang pawl hmaiah an lo thlenpi ding ih anmah le Zentail mi pawl hnenah ka thu thantertu nan si ding. 19 Thuṭhennak hmunih thlenpi nan si tikah ziangso ka sim ding ti le ziangtinso ka sim ding, tiin nan donhar hlah uh. A tikcu a kim tikah nan sim dingmi cu theihter nan si leh ding. 20 Ziangahtile a ṭongtu ding cu nanmah si loin nan sung ihsin a ṭongtu nan Pa ih Thlarau ṭongkam a si ding. 21 "Mi in anmah ih unau lala kha that dingah midang kut ah an thlengter ding. Pale pawl khal in an faate tlunah cu bangtuk ṭhiamṭhiam in an tuah ding. Faale pawl khal in an pale pawl an ral ding ih midang kut ah an thlen ding. 22 Keimah ruangah mikip in an lo hua ding. Sikhalsehla a netnak ni tiang a ṭang theitu cu runsuak an si ding. 23 Khua pakhat ah an lo hrem asile khua dangah va tlan uh. Fiangtein ka lo sim: Milai Fapa a ra thlen hlanah Israel ram sung khua hmuahhmuahih nan hnaṭuanmi cu nan ṭheh man lo ding. 24 "A saya hnakin a tum sawnmi tlawngta zohman an um lo. A bawipa hnakin a tum sawnmi sal zohman an um lo. 25 Curuangah tlawngta pakhat cu a saya tluk a si ahcun lungkim ding a si ko; sal khal a bawipa tluk a si ahcun lungkim ding a si ko. Innsang ih lu bik kha khawsia bawi Beelzebul tiih kawh a si ahcun innsang sung um midang pawl cu cuhnakih hmin sia deuh in kawh an si ding. 26 "Curuangah milai ṭih hlah uh. Atuih thuh-mi hi on ṭheh a si ding ih thuthup hmuahhmuah khal phuan ṭheh a si leh ding. 27 Khawthim lakih ka lo simmi hi sun khawvang ah sim sal uhla a thup ih nan theihmi hi innpar ihsin phuang uh. 28 Taksapum a that thei na'n thlarau a that thei lotu pawl cu va ṭih hlah uh. Takpum le thlarau a pahnih in hell sungih a that theitu Pathian kha va ṭih sawn uh. 29 Paisasen pakhat in sunṭam pahnih nan lei thei a si lo maw? Asinain cuih sunṭam pakhat hman cu nan Pa ih thu loin leilung ah a tla lo. 30 Nannih sinsin cu nan samphang hman a siar ṭheh a si. 31 Curuangah nan thin phang hlah uh. Sunṭam tampi hnakin nan man a khung sawn a si. 32 "Mi pakhat in mipi hmaiah ka minung a sinak kha a ṭanpi ngam a si ahcun vancung ka Pa hmaiah amah kha ka ṭanpi ve ding. 33 Sikhalsehla mipi hmaiih i hnongtu cu vancung ka Pa hmaiah ka hnong ve ding. 34 "Leilung tlunah remnak thlentertu ah a ra tiah i ruat hlah uh. Remnak tuahtu ah ka ra lo, ralnam kengin ka ra sawn a si. 35 Pa le fapa, nu le fanu, ni le vah pawl ral awter dingah ka ra a si. 36 Mi pakhat ih ral ṭihnung bik cu amah ih innsang mi an si ding. 37 "Zokhal sisehla, keimah hnakin a nu le a pa a duh sawntu cu i thluntu dingah a tlak lo. Keimah hnakin a fanu siseh, a fapa siseh, a duh sawntu cu i thluntu dingah a tlak lo. 38 Zokhal sisehla amah ih thinglamtah phur tahratin ka dungih i thlun lotu cu ka minung si dingah a tlak lo. 39 Amah ih nunnak hum a tumtu cu a nunnak a sung ding, asinain keimah ruangih a nunnak a liamtu cu a nunnak a hum ngah ding. 40 "Nanmah tlun-inn a lo ontu cu keimah tlun-inn ontu a si ve; keimah tlun-inn i ontu cun keimah thlahtu khal a on ve a si. 41 Pathian thusimtu tlun-inn a ontu cu Pathian thuphurtu tlun-inn a on ruangah a thusimmi ṭhatman a ṭawm ve ding. Miṭha pakhat kha mi ṭha a si ruangih tlun-inn a ontu cu cuih miṭhapa ih ṭhatman a ṭawm ve ding. 42 Fiangte in ka lo sim: ka dungthluntu pawl lakih nauta bik kha ka dungthluntu a si ruangih tidai khuat khat a petu cu ṭhatman a ngah tengteng ding," tiah a ti.
1 Jesuh in a dungthluntu hleihnih pawl hnenah thu a sim ṭheh tikah cutawk hmun ihsin a suak ih a kiangkap khawsungah thuzirh ding le thuphuang dingah a feh. 2 Thawng sung ihsin baptisma petu Johan in Khrih hnaṭuanmi thuhla kha a theih tikah amah thluntu ṭhenkhat pawl a thlah ih, 3 "A ra ding, an timi cu nangmah hi na si maw, a si lole midang kan hngak hrih ding maw?" tiah Jesuh cu an sut. 4 Cutikah Jesuh in, "Va feh uhla nan hmuhmi le nan theihmi hi Johan hnenah cun va sim uh: 5 mitcaw in khua an hmu, ke-awl pawl an feh thei, miphaar pawl tla an thiang, hnaset pawl an hna a ong, mithi thawhter sal an si ih mifarah hnenah Thuthang ṭha phuan a si. 6 Keimah ih thuhla ah hin thinlung ṭhukṭhunnak a nei lotu cu mi thluasuak an si," tiah a ti. 7 Johan ih dungthluntu pawl an feh sal hnuah Jesuh in misenpi hnenah Johan ih thu cu a sim. "Johan hnenah nelrawnih nan va feh tikah ziang hmu dingin so nan ruah awk? Thli in a sem ruangih a kur reromi phaikung maw? 8 Ziang zoh dingah so nan feh? Hnipuan mawi zetzet a hrukmi pa zoh dingah maw? Cubangtuk hnipuan a hruktu cu siangpahrang innih ummi an si. 9 I sim hnik uh, ziang hmu dingin so nan feh? Profet zoh dingah maw? Asi, profet nan hmu. Asinain nan hmuhmi hi profet hnakin a tum sawn a si. 10 Ziangahtile Johan thuhla hi Ca Thianghlim in, 'Pathian in na hrangih lamzin sialtu dingah na hmaiah ka palai ka thlah ding a si, a ti,' tiah a ngan. 11 Fiangtein ka lo sim. Nunau ih hrinmi lakah baptisma petu Johan tlukih a tummi zohman an um dah lo. Sikhalsehla vancung Uknak ih mitenau bik hman khi Johan hnakin a tum sawn lai a si. 12 Johan ih thusim caan thokin atu tiang vancung Uknak cu dodalnak nasa zet a tong ih mi hel-hlong pawl in hramhram in laak an tum. 13 Khuahlan ihsin Johan san tiang profet pawl le Moses Daan pawl in hi vancung Uknak thu hi an sim. 14 An thu simmi nan zum duh a si ahcun Johan hi a ra ding tiih rak sim ciami Elijah kha amah hi a si. 15 Curuangah theihnak hna a neitu in thei uh. 16 "Tuih san minung pawl hi ziang thawn so ka tahṭhim ding? Anmah cu thil zuarnak hmunih a tomi nauhak pawl an bang. Nauhak bur khat in a dang nauhak bur khat hnenah, 17 'Mopuai khuangdar kan lo tumsak na'n nan laam duh lo! Mithi phumnak hla kan sak khalle nan ṭap duh cuang lo,' an ti. 18 Johan a rat tikah rawl a ul ih sabitti khal in loin a um tikah mi hmuahhmuah in 'A sungah khawsia a lut a si,' an ti. 19 Cun Milai Fapa a ra ih a ei le a in an hmuh tikah mi hmuahhmuah in, 'Hi pa hi zohhnik uh! Mi hrong dang le rawlpham zu-in pa hi; siahkhongtu pawl le misual pawl ih rualpi a si,' an ti. Asinain Pathian ih fimnak cu a dik a si ti kha a hnaṭuannak in a langter," tiah a ti. 20 Jesuh ih mangbangza tam bik a tuahnak khuami pawl in an sualnak an sir awk cuang lo ruangah a kawk hai. 21 "Maw Khorazin khua, na van a va duai ve! Maw Bethsaida khua, na van a va duai ve! Nan sungih mangbangza ka tuahmi pawl hi Tai-ar khua le Sidon khua ah rak tuah sisehla cuih khawsungmi pawl cun an sualsirnak langternak ah khumdip hnipuan hrukin vutcam an phulh awknak a reipi zo ding. 22 Fiangtein ka lo sim: Thuṭhennak Ni ah Pathian in nannih hnakin Tai-ar le Sidon khuami pawl parah zaangfahnak tam sawn a nei ding. 23 Cun nang Kapernaum khua! Van tiangih hlirso awk na duh maw? Hell sungah hlon na si ding! Na sungih tuahmi mangbangza pawl hi Sodom khua ah tuah rak sisehla siat loin tuihsun tiang hi a hmun hrih ding! 24 Fiangtein ka lo sim: Thuṭhen Ni ah nang hnakin Sodom khua parah Pathian in zaangfahnak tam sawn a nei ding a si," tiah a ti. 25 Culai ahcun Jesuh in, "Maw Ka pa, lei le vanih Bawi! Mifim le mithiam hnen ihsin na rak thuh ringringmi kha atu-ah zianghman a thiam lomi hnenih na langter ruangah ka lo lawm a si. 26 Asi, Ka pa, hi bangtuk ih si ding hi na duhmi a rak si. 27 "Ka Pa in ka kut sungah ziang hmuahhmuah i pek ṭheh zo. Pa siar lo zohman in Fapa an thei lo; cule Fapa le Fapa in thei ve hai seh tiih a hrilmi pawl siar lo, zohman in Pa an thei lo. 28 "Thilrit a phurmi le zonzaih a tuartu pawl, ka hnenah ra uh, colhdamnak ka lo pe ding. 29 Ka kawn hi phurhnik uh. Kei cu nunnem le tangdornak thinlung neimi ka si. Ka hnen ihsin zir uhla colhdamnak nan ngah ding. 30 Ziangahtile keiih kawn phurh cu a nuam ih ka thil khal a zaang a si," tiah a ti.
1 Cuih hnu reilote-ah Sabbath ni ah Jesuh cu sangvut lo lakin a feh. A dungthluntu pawl an ril a rawn ruangah sangvut an zuut ih a fang kha an ei. 2 Cumi kha Farasi pawl in an hmuh tikah Jesuh hnenah, "Zohhnik, na dungthluntu pawl in Sabbath ni ah hiti ih an tuah hi Daan an buar a si," tiah an ti. 3 Jesuh in, "David le a rualpi pawl an ril a rawn laiah David in ziang a rak tuah ti kha nan siar dah lo maw? 4 David cu Pathian inn sungah a lut ih Pathian hnenih pekmi saang a rualpi pawl thawn an ei a si kha! Cutiih an ei cu Daan ih duh lomi a si, ziangahtile cuih saang cu puithiam pawl lawngih ei theimi saang a si. 5 Cuih tlunah Sabbath tinte Biakinn sungah puithiam pawl in Sabbath daan an buar ringring ti kha Moses Daan sungah nan siar dah lo maw? Asinain mi sual ah ruah an si ual lo. 6 Thungai in ka lo sim: hitawk ah hin Biakinn hnakih tum sawn a um a si. 7 Ca Thianghlim in, 'ṭilva thawn raithawinak pek si loin mi zaangfahnak sawn ka duh a si,' tiah a timi hi a tican ngaingai thei ngah uhla a sual lomi pawl kha nan sual a si, tiin nan ti lo ding. 8 Ziangahtile Milai Fapa hi Sabbath tlunih Bawi a si," tiah a ti. 9 Cutawk ihsin Jesuh cu a feh ih sinakok sungah a lut. 10 Cutawkah kutzeng pa pakhat a rak um. Jesuh sualpuh a duhtu pawl tla an rak um ve ih, "Sabbath ni ih mi damter hi kan Daan ih duhmi a si maw?" tiah Jesuh kha an sut. 11 Cutikah Jesuh in, "Thuṭhimnak ah nanmah lakih mi pakhat in a tuu Sabbath ni ah khur thukpi sungah tla sehla suah loin maw a um ding? 12 Minung cu tuu hnakin a let tampi in a sunglawi sawn a si. Curuangah Sabbath ni ah a ṭhami tuah cu kan Daan ih duhmi a si," tiah a ti. 13 Cun kutzeng pa hnenah cun, "Na kut hawi aw," tiah a ti. A kut cu a hawi ih a khatlam kut vekin a dam sal. 14 Cule Farasi pawl cu an feh ih Jesuh that dingah thu an ruat khawm. 15 Phiar an tum kha Jesuh in a theih tikah cutawk ihsin a suak. Cule miburpi in an thlun vivo. Mina hmuahhmuah a damter ih, 16 amah ih thuhla kha midang zo hnen hmanih sim lo dingin thu a pek. 17 Hitiih a tinak cu profet Isaiah kaa in Pathian in: 18 "Ka hrilmi i riantu cu hinah a um; Ka duhdawtmi a si ih a parah ka lung a awi. A parah ka Thlarau ka re ding ih, Ka thuṭhennak cu miphun hmuah hmuah hnenah a than ding. 19 Mi thu eltu a si lo ding ih a au ciamco fawn lo ding. Lamzin ah ring zetin thu a sim lo ding. 20 A derdaimi hnenah a thinlung a nem ding ih, Bawmtu nei lo hnenah zaangfahnak a nei ding. Dingnak kha nehtu a siter lai hlan lo taimak a suah ding. 21 Cule a parah mi hmuahhmuah in ruahsannak an nei ding," tiih a timi kimternak dingah a si. 22 Cun Jesuh hnenah khawsia ih polh ruangah a mit a cawmi le a ṭong thei lomi pa pakhat an ratpi. Jesuh cun a damter ih a ṭong thei sal ih khua khal a hmu thei sal. 23 Cutikah misenpi an mang a bang ih, "Hi pa hi David fapa a si ngai pei maw?" tiah an ti. 24 Cumi cu Farasi pawl in an theih tikah, "Khawsia a dawi theinak cu khawsia bawi Beelzebul in huham a pek ruangah a si," an ti. 25 An thinlung ih ruahmi kha Jesuh in a thei ih an hnenah, "Khui ram khal sisehla ṭhen aw ih mah le mah a do awmi cu reipi an awh lo ding. Cun khua siseh, innsang siseh, ṭhen aw ih mah le mah a do awmi cu an ṭeekdarh thluh ding a si. 26 Cuvek thotho in Satan in Satan lala a dawisuak a si ahcun mah le mah do aw a si ruangah ziangtinso a ram cu a hmun thei ding? 27 Nannih in, 'Khawsia a dawi theinak cu Beelzebul in huham a pek ruangah a si,' tiah in ti. Cuti a si ahcun a lo thluntu pawl hnenah khawsia dawi theinak huham kha zo in so a pek? Nanmah a lo thluntu pawl ih tuahmi lala hin nan palh a si ti kha a langter. 28 Pathian ih pekmi Thlarau thawn khawsia ka dawi thei a si ruangah Pathian Uknak cu nan hnenah a thleng zo tinak a si. 29 "Mi cakzet pa cu amah ṭem hmaisa lo cun zohman in a inn bauh tahrat in a thilri an laksak thei lo ding. Amah an ṭem ngah hnu lawngah a thilri an ram thei ding a si. 30 "Ka hnenih a ṭang lotu cu i dodaltu an si. I finkhawmpi lotu cu a ṭhekdarhtu an si. 31 Fiangtein ka lo sim: milai in ziangvek sualnak an tuah ih ziangvek ṭong siava an ṭong khalle ngaithiam theih an si. Asinain Thlarau Thianghlim a thangsiattu cu ngaithiam an si lo ding. 32 Milai Fapa a relsiatu cu ngaithiam theih an si ding. Asinain Thlarau Thianghlim a relsiatu cu atuih sanah siseh, hmailam sanah siseh, ngaithiam an si lo ding. 33 "Thingrah ṭha nei dingah thingkung ṭha neih a ṭul. Thingkung sia na neih ahcun a rah an sia ding. Thingkung cu a rah in theih a theih. 34 Rul hrin pawl! Mi siava nan si ih ziangtinso ṭong ṭha cu nan ṭong thei ding? Kaa cun thinlung sungih a ummi a ṭong a si. 35 Mi ṭha cun thil ṭha a khawlmi sungin thil ṭha a suahter ih mi ṭha lo cun thil ṭha lo a khawlmi sungin thil ṭha lo a suahter a si. 36 "Thungai in ka lo sim: zokhal sisehla ralring loih a ṭongmi kha Thuṭhennak Ni ah ziang ruangah cutiin a ṭong ti a simfiang a ṭul leh ding. 37 Nangmah ih ṭong lala hi na mawh le mawh lo thuṭhennak ah hman a si ding," tiah a ti. 38 Cule Daanthiam ṭhenkhat le Farasi ṭhenkhat pawl in, "Sayapa, hmuhsaknak pakhatkhat kan mit hmuh ahhin tuah cila kan duh," tiah an ti. 39 Cutikah Jesuh in, "Tuih san milai hi mi ṭha lo le Pathian ṭihzah lo pawl nan va si so! Hmuhsaknak tuah maw in fial? Ka tuah lo ding. Profet Jonah ih hmuhsaknak siar lo hmuhsaknak dang nan hmu lo ding. 40 Jonah cu ngapi pum sungah ni thum le zan thum a um vekin Milai Fapa khal leilung sungah ni thum le zan thum a um ve ding. 41 Thuṭhennak Ni ah Nineveh khuami pawl an ding pei ih an lo mawhthluk ding, ziangahtile Jonah thusimmi an theih tikah an sual an sir aw a si. Thungai in ka lo sim: Jonah hnakih tum sawn hinah a um. 42 Thuṭhennak Ni ah Sheba Siangpahrang bawinu a ding pei ih a lo mawhthluk ding, ziangahtile Siangpahrang Solomon fimnak theih duh ah lam hlapi ihsin a hung. Fiangtein ka lo sim: Solomon hnakih tum sawn hinah a um. 43 "Thlarau thiang lo cu mi pakhat sung ihsin a suah tikah ramṭhing ah colhnak hmun hawl in a vak vivo. Asinain colhnak hmun a hmuh lo tikah, 44 'Ka tlansan mi ka inn ah ka kir sal pei,' tiah a ruat. Cutiin a kir sal ngaingai ih a inn cu a lawngin faite ih phiahmi a rak si kha a hmu. 45 Cule a suak sal ih amah hnakih a siava sawnmi thlarau pasarih a sawm ih cuih inn ahcun an ra um; cutiin a hlan hnakin cupa cu a luar sinsin. Cu bangtuk in tuihsan mi ṭha lo pawl parah hin a thleng ding," tiah a ti. 46 Jesuh cu misenpi hnenih a ṭong rero laiah a nu le a nau pawl an ra. Amah ton duh ah a lengah an ding. 47 Cutawkih a um vemi mi pakhat in, "Na nu le na nau pawl a lengah an ding, nangmah an lo biak duh a si," tiah a sim. 48 Cutikah Jesuh cun, "Zoso ka nu cu a si? Zoso ka naule pawl cu an si?" a ti hnuah, 49 a Dungthluntu pawl kha a khih ih, "Zohhnik uh! Hinah ka nu le ka naule pawl cu an um. 50 Zokhal sisehla vancungih a ummi ka Pa ih duhnak a tuahtu hmuahhmuah cu ka unau, ka farnu le ka nu an si," tiah a ti.
1 Cuih sun thotho ah Jesuh cu inn ihsin a suak ih tili kapah a va feh ih a to hnuah thu a zirh. 2 A kiangkapih a ra khawmmi misenpi pawl an tam tuk ruangah lawng sungah a lut ih a to. Misenpi pawl cu tili kapah cun an ding. 3 Thuṭhimnak hmangin thu tampi a zirh: "Voikhat ah mi pakhat cu thlaici vorh dingah a feh. 4 Thlaici cu lo sungih a vorh tikah ṭhenkhat cu lamzin parah an tla ih cu pawl cu vate in an ei ṭheh. 5 A ṭhenkhat cu leilung malnak lungsedaap lakah an tla ih leilung a sah lo ruangah thlaici cu hmakhatte ah an ṭo. 6 Asinain ni a sat tikah a ṭo pekte pawl cu an thi sal; an hram in leilung thukpi ih hram a thlak thei lo ruangah an car lohli. 7 Thlaici a ṭhenkhat cu hlingbur lakah an tla ih an kho na'n hlingbur cun a zaap ruangah an ṭhang thei lo. 8 Sikhalsehla thlaici ṭhenkhat cu leilung ṭhatnak ah an tla ih ṭhenkhat cu a let zakhat, ṭhenkhat cu a let sawmruk, ṭhenkhat cu a let sawmthum in rawl a suak," tiah a sim. 9 Jesuh cun, "Theihnak hna a neitu in thei uh," tiah a ti. 10 Cun dungthluntu pawl a hnenah an ra ih, "Mipi hnenih thu na sim tikah ziangah so tahṭhimnak na hman ṭheu?" tiah an sut. 11 Jesuh in an hnenah, "Vancung Uknak thuthuuk theih theinak cu nan hnenah pek a si zo. Asinain mipi hnenah cun pek a si lo. 12 Ziangahtile a neimi hnenah a hleifuan ih a neih tiangin pek beet a si ding ih a nei lomi hnen ihsin a neihsunte hman kha lak sak a si hrih ding. 13 Ziang ruangah an hnenih ka ṭong tikah thuṭhimnak ka hmang tile annih cun an zoh na'n an hmu thei lo, an ngai na'n an thei thei lo. 14 Curuangah profet Isaiah ih simmi kha an parah a kim a si. Profet Isaiah cun: 'Hi minung pawl in an ngai rero ding na'n an thei thei lo ding. An zoh rero ding na'n an hmu thei lo ding. 15 Ziangahtile an thinlung a pit tuk, an thutheihnak hna a pit ih an mit khal an meng lo a si. Cu bangtuk in rak si hlah hai sehla an mit in an hmu ding, an hna in an thei ding ih, an thinlung khal in an thei thiam ding. Cuticun ka lamah an her ding ih ka damter hai ding a si, tiah Pathian in a ti,' tiah a sim. 16 "Asinain nannih cu ziangtluk mi vannei so nan si! Nan mit in a hmu ih nan hna khal in a thei. 17 Fiangtein ka lo sim: nan hmuhmi le nan theihmi hi profet tampi le Pathian minung tampi in hmuh le theih an rak duhzet ve na'n an rak hmu thei lo ih an rak thei thei fawn lo. 18 "Curuangah hi thlaici vorh tahṭhimnak ih tican hi ngai uhla thei uh. 19 Lamzin tluan ih a tlami thlaici pawl cu vancung Uknak thu a thei na'n a tican a thei thei lotu pawl an si. An thinlung sungih tuhmi kha Miṭha lo pa in a laksak sal a si. 20 Lungsedaap lakih a tlami thlaici cu vancung Uknak thu an theih vete in lungawi zetin a pomtu an si. 21 Lungawi zetin an pom na'n an sungah thukpi a pil lo ih rei an daih lo. An pommi thu ruangah harsatnak le hremnak a ra thlen tikah an let sal lohli. 22 Hlingbur lakih a tlami thlaici pawl cu vancung Uknak thu a thei na'n hi leilung tlun nunnak thuhla ah donhar ih a ummi pawl an si. Sum le saw an duhnak in cuih thu cu a tuam ih rah an nei thei lo. 23 Leilung ṭha ih a tlami thlaici pawl cu vancung Uknak thu a hna in a thei ih a tican tla a thei thiamtu pawl an si. Annih cun rah an nei ih a ṭhen cu a let zakhat, a ṭhen cu a let sawmruk, a ṭhen cu a let sawmthum tiang an rah a si," tiah a sim. 24 Jesuh in tahṭhimnak dang pakhat a sim lala ih, "Vancung Uknak cu hi bangtuk hi a si. Mi pakhat in a lo sungah thlaici ṭha a vorh. 25 Zan khatah mi hmuahhmuah an ihthat sungah a ralpa a ra ih rawl ci lak ahcun hrampi ci a vorhta ih a tlanhlo. 26 Thlai kho cu an hung ṭhang ih an vuih tikah hrampi khal cu an lang ve. 27 Cule a hnen-um pawl a hnenah an ra ih, 'Bawipa, na lo sungih na vorhmi cu thlaici ṭha an si lo maw? Khuiinso hrampi hi an rat?' tiah an sut. 28 Anih in, 'Himi a tuahtu cu kan ralpa a si,' tiah a sawn. Annih cun, 'Hrampi cu kan va bawt pei maw?' tiah an sut sal. 29 Cutikah anih in, 'Bawt hlah uh, ziangahtile hrampi nan bawt zawng ah rawl kung tla nan bawtcih pang ding. 30 Rawl laak a cut hlan lo rawl kung le hrampi cu ṭhang tlang ko hai seh. Cule rawl latu pawl kha hmaisabik ah hrampi bawt uhla nan tom hnuah ur uh; cuih hnuah rawl cu khawm uhla ka cuam sungah thun uh,' ka ti hai ding," tiah a sim. 31 Jesuh in tahṭhimnak dang pakhat a sim sal. "Vancung Uknak cu hi bangtuk a si. Mi pakhat in anṭam ci a lak ih a lo sungah a vorh. 32 Thlaici hmuahhmuah lakah a fate bikmi thlaici a si. Asinain a kho ih a ṭhan tikah cun rawl kung lakah a tum bikmi a si. Thingkung bangtuk a si ih vate pawl tla an ra ih a hnge lakah bu an sak," tiah a ti. 33 Jesuh in tahṭhimnak pakhat an hnenah a sim sal. "Vancung Uknak cu nunau pakhat in thilnu malte a lak ih sangphut reel khat sungih a rawimi bangtuk a si. Cuih thilnu malte cun saang bawm khat cu a zatein a thoter ṭheh a si," tiah a ti. 34 Jesuh in hi bangtuk thu pawl hi misenpi hnenih a sim tikah tahṭhimnak a hmang ṭheu. Tahṭhimnak hmang loin an hnenah ziang hman a sim dah lo. 35 Hi vekih a simnak cu profet ih simmi kha a kim theinak dingah a si. Profet ih sim mi cu: "An hnenih ka ṭong tikah tahṭhimnak ka hmang ding; Leilung hramthok ihsin theih dah lomi thil kha an hnenah ka phuang ding," ti a si. 36 Jesuh cun misenpi kha a fehsan ih inn sungah a lut. Cutikah a dungthluntu pawl a hnenah an ra ih, "Lo sungih hrampi tahṭhimnak kha a tican in sim aw," tiah an ti. 37 Jesuh in, "Thlaici ṭha a vorhtu cu Milai Fapa a si. 38 Lo cu hi leilungpi hi a si; thlaici ṭha cu vancung Uknak a cotu minung pawl an si ih hrampi cu Mi ṭha lo pa ih milai pawl an si. 39 Hrampi ci a vorhtu kan ral cu Satan a si. Rawlkhawm caan cu san cemnak caan a si ih rawlkhawmtu pawl cu vancungmi an si. 40 Hrampi cu an khawm ih meisa in an ur ṭheh; cu bangtuk in san cemnak caanah cun a si ve ding. 41 Milai Fapa in a Uknak sung ihsin mi a sualtertu le thil ṭha lo a tuahtu pawl a lengih suahhlo dingah a vancungmi pawl a thlah ding. 42 Cumi pawl cu meisa sungah an paih ding ih cutawkah ṭap-ai in an hacang an rial ding. 43 Cun Pathian ih minung pawl cu an Pa Pathian ih Uknak sungah ni bangin an tleu ding. Theihnak hna a neitu in thei uh," tiah a ti. 44 "Vancung Uknak cu lo sungih thuhmi hlawnthil bangtuk a si. Cuih hlawnthil cu mi pakhatkhat in a hmuh tikah ṭhatein a khuhta ih lungawi aipuang in innih a neihmi hmuahhmuah kha a zuar ih cuih lo cu a lei," tiah Jesuh in a sim. 45 "Vancung Uknak cu hi bangtuk a si. Sum tuahtu pakhat in keplung mankhung a hawl. 46 A man a khung taktakmi keplung a hmuh tikah a neihmi dang hmuahhmuah kha a zuar ih cuih lung cu a lei," tiah a sim. 47 "Vancung Uknak cu tili sungih vorhmi sur bangtuk a si. Nga kaitu hrekkhat in an sur cu tili sungah an vorh ih nga phunkim an awk. 48 An sur a khah tikah ti kapah an hnuk ih an tohmun in nga cu an hril; nga ṭha pawl cu an bawm sungah an san ih nga ṭha lo cu an hlon. 49 Cu bangtuk in san cemnak caanah cun a si ding; vancungmi pawl an feh ding ih mi ṭha pawl lak ihsin mi ṭha lo pawl cu an khawm ding ih, 50 meisa sungah an hlon ding. Cutawkah an ṭap an raak ding ih an hacang an rial ding a si," tiah a ti. 51 Misenpi pawl cu Jesuh in, "Hi thu hmuahhmuah hi nan thei thei maw?" tiah a sut. Annih in, "Kan thei," tiah an sawn. 52 Cutikah Jesuh in, "Cu a si ahcun vancung Uknak thu a zir zomi Daan zirhtu pohpoh cu a thilri retnak inn sung ihsin thil hlun le thil thar a hun suahtu, inn neitu pa bangtuk a si," tiah a sim. 53 Jesuh in hi tahṭhimnak pawl a sim ṭheh tikah cutawk ihsin a suak ih, 54 a khua ah a tlung. An sinakok ah thu a zirh hai ih a thu a theitu pawl cu an mang a bang ngaingai. "Hi bangtuk fimnak hi khuitawk in so a lak?" tiah an sut aw. "Hi bangtuk mangbangza hi ziangtinso a tuah thei? 55 Lettama fapa a si lo maw? Mari kha a nu a si lo maw? Jeim, Josef, Simon le Judas kha a naule an si lo maw? 56 A far le tla hitawk ah an um ṭheh a si lo maw? Khui-inso hi bangtuk hi a lak?" tiah an ti. 57 Cuti cun Jesuh cu an hnong. Jesuh in an hnenah, "Profet cu amah ih suahnak khua le innsang siar lo hmun dangah cun upatnak a tong a si," tiah a ti. 58 Zumnak an neih lo ruangah cutawkah cun mangbangza tampi a tuah lo.
1 Cuih tikcu ah Galilee ram uktu Herod in Jesuh thuhla a thei. 2 Herod in, "Hi pa hi baptisma petu Johan a nung salmi a si ko. Cu ruangah a si hiti ih mangbangza a tuah thei," tiah a kut hnuai bawi pawl kha a sim. 3 Cuih hlanah Herod in Johan kaih ding thu a pek; cule an kai ih thirhri in an khih hnuah thawng ah an thlak. Ziangah cutiin a tuah tile a naupa Filip ih nupi Herodias ruangah a si. 4 Tihnimtu Johan in Herod cu, "Herodias na ṭhit hi a dik lo," tiah a rak ti ṭheu ruangah, 5 Herod in Johan cu thah a duh, asinain Judah mi pawl a ṭih, ziangahtile Johan cu profet a si tiah an ruahmi a si. 6 Cule Herod suah ni ah Herodias fanu cu mizapi hmaiah a laam ciamco. Herod cu a lung a kim ngaingai ih a hnenah, 7 "I dil mi pohpoh ka lo pe ding tiin ka lo kam a si," tiah a ti. 8 A nu ih ruahnak a pek vekin Herod hnenah, "Hitawk hmun rori ahhin baptistma petu Johan ih lu cu darkheng in i pe aw," tiah a fanu cun a ti. 9 Cutikah Siangpahrang bawipa cu a riah a sia ngaingai. Sikhalsehla a sawmmi pawl hmai rori ih thukamnak a tuah zo ruangah a dil vekih tuah dingah thu a pek. 10 Curuangah Johan cu thawng sung rori ahcun a lu a tanter. 11 Johan ih lu cu darkheng in an run keng ih Herodias fanu cu an pek; anih in a nu Herodias hnenah a fehpi. 12 Cun Johan dungthluntu pawl cu an ra ih a ruak an lak ih an phum; cuih hnuah Jesuh cu an va sim. 13 Jesuh cu Johan thuhla a theih tikah a suak ih lawng a to ih a ṭhinnak hmun ah amah lawng a feh. Cuih thu cu mipi in an theih tikah an khua cio in an pok ih lei par in an feh ih amah cu an thlun. 14 Jesuh cu lawng ihsin a suak ih misenpi kha a hmuh tikah a thinlung cu zaangfahnak in a khat ih cutawkah mina tampi tla a damter. 15 Cuih ni zanlam ah a dungthluntu pawl cu a hnenah an ra ih, "Khua a siim thlang, hitawk hi hmun ṭhing a si fawn. Mipi hi kiangkap khua ah fehter awla anmah ih hrangah rawl va lei hai seh," tiah an ti. 16 Jesuh in, "An feh a ṭul lo ding; nanmah in an ei ding rawl ziangtal pe uh," a ti. 17 Annih in, "Hitawkih kan neihmi zate cu sanghlom nga le nga pum hnih lawng an si," an ti. 18 Cutikah Jesuh in, "Ka hnenah rak keng uh," a ti. 19 Misenpi pawl cu hrampi parih to dingah thu a pekta ih saang hlom nga le nga pum hnih cu a lak hnuah van lam hoi in Pathian hnenah lungawi thu a sim. saang cu a phel ih a dungthlun pawl hnenah a pek; a dungthlun pawl in misenpi hnenah an zem sin. 20 Mi hmuahhmuah in an ei ih an khopzet. Cuih hnuah an hlahmi kha dungthluntu pawl in an sar ih bawm hleihnih a khat. 21 Rawl a eitu pawl cu nunau le nauhak pawl siar cih loin pacang hlir thawng nga tluk an si. 22 Cule Jesuh in misenpi pawl cu a tlunter. A dungthluntu pawl cu lawng sungah a luhter ih tili khatlam kapah a fehter hai. 23 Misenpi a tlunter hnuah amah lawng thlacam dingah tlang parah a hung kai. Khua a siim thlang na'n cutawkah Jesuh cu amah lawng a um. 24 Long cu tili parah hlat nawn a thleng zo ih thli a hmaiton in a hraan ruangah tilet in lawng cu suk le so ah a den ciamco. 25 Zinglam nazi pathum le paruk karah Jesuh cu tidai parah a feh ih a dungthluntu pawl hnen pan in a ra. 26 A dungthluntu pawl in tidai parih a feh rero an hmuh tikah an ṭih ngaingai. "Muthla a si lo maw?" tiah an ti ih thinphang in an raak ciamco. 27 Jesuh in hmakhatte ah, "ṭih hlah uh! Keimah ka si! Zianghman phan ding a um lo," tiah a ti. 28 Cule Piter in, "Bawipa, nangmah na si ngaingai ahcun na hnenah tidai parin i fehter ve aw," tiah a ti. 29 Jesuh in, "Ra aw he," tiah a ti. Curuangah Piter cu lawng sung ihsin a suak ih tidai par in Jesuh hnenah cun a feh. 30 Asinain thli na pi ih a hran kha a hmuh tikah a ṭih ih ti sungah cun a pil deuhdeuh. Cutikah, "Bawipa, i run aw!" tiah a au. 31 Hmakhatteah Jesuh in a hei dawh ih a hei kaih ngah hnuah, "Na zumnak a va mal so! Ziangah so na zum lo lawmmam?" tiah a ti. 32 An pahnih cun lawng sungah an lut ih thli cu a dai. 33 Cule dungthluntu pawl in lawng sungah Jesuh cu an biak ih,"Nang cu Pathian Fapa ngaingai na si," tiah an ti. 34 Tili cu an tan ih Gennesaret peng an va thleng. 35 Cutawk minung pawl khal in Jesuh cu an rak thei thiam. Curuangah kiangkapih a ummi mina hmuahhmuah an ko ih Jesuh hnenah an ratpi. 36 A dam lomi pawl in a puanzim tetal tham thei dingin an dil ih a puanzim a thamtu hmuahhmuah cu an dam thluh.
1 Cule Farasi hrekkhat le Daanthiam ṭhenkhat pawl cu, Jerusalem ihsin Jesuh hnenah an ra ih, 2 "Ziangah so na dungthluntu pawl in kan pupa pawl ih in zirhtami daan an buar? Rawl an ei hlanah a daan vekin an kut an kholh lo," tiah an ti. 3 Jesuh in, "Cuti asile ziangah so nannih teh nanmah ih thuzirhmi lawng nan thlun ih Pathian thukham sawn nan buar? 4 Pathian in, 'Nan nu le nan pa upat uh,' a ti. 'A nu siseh, a pa siseh a camsiattu cu thah a si pei,' tiin a ti. 5 Asinain nannih ih nan zirhmi cu: mi pakhatkhat in a nu maw, a pa maw bomnak dingah thil a neihmi kha, 'Himi cu Pathian ta a si,' a ti ahcun, 6 a nu siseh, a pa siseh a bawm a ṭul nawn lo, tiah nan ti. Cu bangtuk in nanmah ih thuzirhmi nan thlun ih Pathian thukham sawn ziang hmanah nan siar lo. 7 Nannih titer-aw pawl! Profet Isaiah in nanmah ih thuhla a rak simmi hi a va dik lawmmam so! Isaiah in, 8 'Himi pawl hin an kaa lawng in in upat ih an thinlung ngaingai cun in hlat zet a si. 9 Milai ih tuahcopmi daan kha, Pathian pekmi daan vekin an zirh ruangah, Keimah in biak rero khal hi ṭhathnemnak zianghman a nei lo, tiah Pathian in a ti,' tiah a sim," a ti. 10 Cule Jesuh in mi tampi a hnenah a ko ih, an hnenah, "Ngai uhla theihnik uh! 11 Minung a baaltertu hi a kaa ihsin a lutmi thil an si lo, a kaa ihsin a hung suakmi in mi a baalter sawn a si," tiah a ti. 12 Cule a dungthluntu pawl a hnenah an ra ih, "Na ṭongmi in Farasi pawl an thin a natter, ti hi na thei maw?" tiah an ti. 13 Jesuh in, "Vancung i a ummi ka Pa in a phun lomi kung cu bawt ding a si ko. 14 Anmah ruangah nan hnaihnok hlah seh! Annih tla cu hotu mitcaw pawl an si; mitcaw in mitcaw a hruai ahcun an pahnih in khursungah an tla ding," a ti. 15 Piter in, "Cuih na ṭongmi cu fiangtein in sim aw," tiah a ti. 16 Jesuh in an hnenah, "Midang pawl hnakin nan fim deuh cuang lo maw si? 17 Nan thei thei lo maw? Mi kaa sungin a lutmi thil cu a pumpi ah a thleng ih cuticun a lengah a lansuak. 18 Asinain a kaa in a suakmi cu a thinlung sung ihsin a hung suakmi a si ruangah cumi in minung a baalter a si. 19 Ziangahtile mi a thattertu, ṭaangṭawm sualnak a tuahtertu, nupa sualnak a tuahtertu, ruk a rutertu, thuphan a pertertu, le mi a thangsiattertu ruahnak siava hmuahhmuah cu a thinlung sung ihsin a suakmi an si. 20 Hi pawl in milai cu a baalter a si. Sikhalsehla rawl ei hlanih kut kholh lo cun mi a baalter lo," tiah a ti. 21 Jesuh cu cutawk ihsin a suak ih Tai-ar le Sidon khua kiangkap ah a feh. 22 Cuih ramih a ummi Kanaan nunau pakhat in Jesuh hnenah a ra ih, "Maw David fapa, i zaangfah aw. Ka fanu cu khawsia in a polh ih vansaanglam in a um," tiah a ra ṭahhnawh. 23 Asinain a hnenah Jesuh in kam khat hman a sawn lo. A dungthluntu pawl an ra ih, "Hi nu hi dawihlo aw! In thlun ringring ih in auh ciamco," tiah Jesuh cu an dil. 24 Cutikah Jesuh in, "Israel mi tuu hlo pawl hrang lawngah thlah mi ka si," tiah a ti. 25 Cutikah cuih nunau nu cu Jesuh ke hramah a ra bok ih, "Bawipa, i zaangfah hramhram ko aw!" tiah a ti. 26 Jesuh in, "Nauhak rawl lak tahratin uico pek cu a dik lo a si," tiah a sawn. 27 Nunau nu in, "Asi, bawipa, na timi cu a dikmi a si. Sikhalsehla bawi pawl ih cabuai ihsin a tlami rawl ṭilfuan cu uico tla in an ei ṭheu ko a sisi!" tiah a let. 28 Cutikah Jesuh in, "Minu, na zumnak cu a nasa a si. Na duhmi cu tuahsak na si pei," tiah a ti. Culaifang ah a fanu cu a rak dam. 29 Jesuh cu cutawk ihsin a suak ih Galilee Tili kapin a feh. Tlang parah a hung kai ih cunah a to. 30 Mi tam ngaingai in amah cu an pan. Ke-awl, mitcaw, mizeng, ṭong thiam lo le a na mi tampi Jesuh ke hramah an rak hruai. Jesuh in an zatein a damter. 31 Òong thiam lomi an ṭong thei, mizeng an dam, ke-awl pawl ṭhatein an feh thei ih mitcaw tla in khua an hmuh sal kha mipi in an hmuh tikah an khawruah a har ngaingai ih Israel Pathian an thangṭhat. 32 Jesuh in a dungthlun pawl kha a hnenah a ko ih, "Hi miburpi hi ka hnenah ni thum sung an um zo ih rawl ei ding zianghman an neih lo ruangah ka zaang an fak ngaingai. Rawl do ta loih tlunter cu ka duh lo, lamzin ah an ṭaamsawl ṭheh ding," tiah a ti. 33 Dungthluntu pawl cun, "Milai hizat daar dingah hi ramṭhing ahhin khuitawk rawl so kan va lak ding?" an ti. 34 Jesuh in, "saang hlom ziangzatso nan neih?" tiah a sut. Annih in, "saang hlom sarih le nga fatete malte lawng a um," tiah an ti. 35 Jesuh in misenpi cu leilung ah a toter. 36 Cun saang hlom sarih le nga malte cu a lak ih Pathian hnenah lungawi thu a sim hnuah a phel ih a dungthlun pawl a pek. Dungthluntu pawl in mipi hnenah an zem sin. 37 An zatein an ei ih an khopzet. Cule an hlahmi kha dungthluntu pawl in an sar ih bawm sarih a khat. 38 A eitu pawl cu nunau le nauhak siarcih loin pacang hlir thawngli an si. 39 Cuih hnuah Jesuh in mipi cu a tlunter ih amah cu lawng sungah a lut ih Magadan peng ah a feh.
1 Sadusi le Farasi ṭhenkhat cu Jesuh hnenah an ra ih, a sual hawl duh ah, "Pathian ih umpi mi na si ahcun hmuhsaknak tuah hnik aw," tiah an ti. 2 Asinain Jesuh cun, "Ni a tlak tikah 'Van a sen le nikhua a ṭha ding,' tiah nan ti. 3 Cun zing thlapit ah 'Van kam a sen ih a dup asile khua a dur ruangah ruah a sur ding,' nan ti. Van zoh tahratin ni khua ṭhat le siat ding nan sim thei, asinain tuih caan khihhmuhtu pawl hi nan theithiam fawn lo! 4 Tuih san minung hi mi ṭha lo le Pathian poisa lo pawl nan va si so! Mangbangza tuah dingah in fial, asinain ka tuah lo ding. Nan hrangah Jonah thu siar lo mangbangza dang a um lo ding," tiah a ti. Cutiin a suak ih a feh. 5 Dungthluntu pawl cu tili an tan ih khatlam ral an thleng; annih in saang ken an hngilh. 6 Jesuh in an hnenah, "Daithlang hlah uh! Farasi le Sadusi pawl ih thilnu khi ralring uh," tiah a ti. 7 "Sang kan ken lo ruangah hi bangtuk in a sim a si pei," tiah pakhat le pakhat an ti aw. 8 Cutiih an rel ruri cu Jesuh in a theih tikah, "saang nan neih lo thu cu ziangah so nan rel duh rero? Nan zumnak a va mal so! 9 Nan thei thei hrih lo maw? Mi thawng nga hrangah saang hlom nga ka phel kha nan thei nawn lo maw? An hlah mi bawm ziangzat nan sar ti nan cing nawn lo maw? 10 Mi thawngli hrangih saang hlom sarih kha nan cing lai maw? An hlah mi bawm ziangzatso nan sar kha? 11 Nan hnenih ka simmi hi saang thu a si lo tihi ziangah so nan theih thei lo? Farasi le Sadusi pawl ih thilnu hi ralring uh," tiah a ti. 12 Cutikah a dungthlun pawl in, "Ralring uh," tiah a timi kha saangih rawimi thilnu si loin Farasi le Sadusi pawl ih zirhnak thilnu a si sawn, ti kha an thei thiam sal. 13 Jesuh cu Sisaria Filipi peng ah a feh ih cu tawkah a dungthlun pawl kha, "Mi in Milai Fapa hi zo a si in ti so?" tiah a sut. 14 Annih in, "Mi ṭhenkhat in baptisma petu Johan a si an lo ti, mi ṭhenkhat in Elijah a si an lo ti. A ṭhenkhat cun Jeremiah, a si lole profet pakhatkhat a si ding an lo ti," tiah an let. 15 Jesuh in, "Nannih in teh! Kei hi zo a si in ti so?" tiah a sut. 16 Simon Piter in, "Nang cu a nungmi Pathian ih Fapa Messiah na si," tiah a ti. 17 Cutikah Jesuh in, "Johan fapa Simon, mi vannei na si! Ziangahtile hi thu cu minung hnen ihsin na ngahmi a si lo, vancung i a um ka Pa in na hnenih a phuanmi a si. 18 Ka lo sim Piter, nang cu lungto na si; hi lungpi parah hin ka kawhhran ka din ding ih thihnak hman in a neh thei dah lo ding. 19 Vancung Uknak tawhfung ka lo pe ding ih leilung tlunih na khammi cu vancungah kham a si ve ding ih leilung tlunih na onmi cu vancung khalah on a si ve ding," tiah a ti. 20 Cule Jesuh in a dungthlun pawl kha Messiah a si ti zohman sim lo dingin thu a pek. 21 Cuih caan thokin Jesuh in a dungthluntu pawl hnenah, "Jerusalem ah ka feh ding ih hotu pawl, puithiam upa pawl le Daan zirhtu pawl ih kut ah harnak ka tong ding. In that ding, asinain ni thum hnuah thawhter sal ka si ding," tiah fiangtein a sim. 22 Piter in Jesuh cu a dang deuhah a hruai ih a mawhthluk. "Bawipa, Pathian in duh hram hlah seh. Hi bangtuk cu na parah thleng hram hlahseh," tiah a ti. 23 Jesuh cu a her ih Piter hnenah, "Nang Satan, ka hnen ihsin tlan aw! Ka fehnak lamzin khamtu na si, ziangahtile hi bangtuk na ruahnak hi Pathian hnen ihsin a rami a si lo, milai hnenin a rami a si," tiah a ti. 24 Cun Jesuh in a dungthluntu pawl hnenah, "Zokhal keimah thlun a duhtu cu amah ih duhnak kha taan in a thinglamtah phur in i thlun seh. 25 Ziangahtile zokhal mah nunnak hum a duhtu cu a nunnak a sung ding; asinain keimah ruangah a nunnak a liamtu cun a nunnak a hum ngah ding. 26 Mi pakhat in leilung pumpuluk co khalsehla a nunnak a hloh ahcun ziang ṭhathnemnak so a um? Zianghman a ṭhahnem lo! A nunnak kha zianghman in a lei thei sal nawn lo ding. 27 Milai Fapa hi a Pa ih sunlawinak le vancungmi pawl thawn a ra cing ding ih mi hmuahhmuah kha an hnaṭuanmi vekin ṭuanman a pek ding. 28 Fiangtein ka lo sim: Milai Fapa hi Siangpahrang vekin a rat nan hmuh hlan lo nanmah lakah a thi lo dingmi nan um," tiah a ti.
1 Ni ruk hnuah Jesuh in Piter le Jeim le a nau Johan kha tlang saangpi parah a kaipi ih anmah lawng an um. 2 Cule an mithmuh rori ah Jesuh cu a hmuihmel a thleng aw; a hmai cu ni bangin a tleu ih a hnipuan cu mi tlet thei khopin a raang. 3 Cuih hnuah dungthluntu pathum cun Moses le Elijah kha Jesuh thawn thu ruah aw rero in an hmu. 4 Cule Piter in, "Bawipa, hitawk ih kan um hi a ṭha tuk; na duhmi a si ahcun riahbuk pathum in ka sak ding; pakhat cu na hrangah, pakhat cu Moses hrangah, pakhat cu Elijah hrangah," tiah Jesuh hnenah a ti. 5 Cutiih a ṭong rero laiah a tleu zetmi mero in a run zeel hai ih mero sungin aw pakhat in, "Hi pa cu ka duhdawt zetmi ka Fapa a si; a parah ka lung a kimzet, a thu ngai uh," tiah a ti. 6 Cuih aw cu dungthluntu pawl in an theih tikah an ṭih tuk ih leilung ah an bok. 7 Jesuh cu a ra ih a tham hai. "Tho uh, ṭih hlah uh," a ti. 8 Cutikah an hun zoh ih Jesuh lawng a si kha an hmu. 9 Tlangpar ihsin an rung ṭum tikah Jesuh in, "Hi nan hmuhmi hi Milai Fapa thihnak ihsin thawhter a si hlan cu zohman nan sim lo pei," tiah feltein a cah. 10 Cule dungthluntu pawl in Jesuh cu, "Ziangah so Daanthiam pawl in Elijah a ra hmaisa ding tiah an ti?" tiah an sut. 11 Jesuh in, "Elijah cu a ra hmaisa taktak ding ih ziang hmuahhmuah amah in a rak timtuah cia ding a si. 12 Asinain ka lo sim: Elijah cu a ra thleng zo ih mi in zo a si ti an theih lo ruangah an duhtawk in an tuahsiat a si. Cuvek thotho in Milai Fapa khal hi an tuahsiat ve ding," a ti. 13 Cutikah dungthluntu pawl in a simmi hi baptisma petu Johan ih thuhla a si, ti kha an thei thiam. 14 Misenpi hnenih an kir sal tikah mi pakhat cu Jesuh hnenah a ra ih a hmaiah khukbil tahratin, 15 "Bawipa, ka fapa hi zaangfah hram aw. Merai a nei ih a nat a thawh tikah cun awloksong ngaingai a si; meisa sung le tidai sung tla ah a paih aw ṭheu. 16 Na dungthluntu pawl hnenah ka ratpi na'n an damter thei lo," tiah a ti. 17 Jesuh in, "Maw zumnak mal le misual mipalh pawl! Ziangtik tiangso ka lo umpi hrih ding? Ziangtik tiangso ka lo zawi hrih hai ding? Nauhak pa cu ka hnenah ratpi uh," tiah a ti. 18 Jesuh in khawsia cu suak dingin a kawk ih nauhakpa ih sung ihsin khawsia cu a suak; cu ihsin nauhak pa cu a dam. 19 Cun dungthluntu pawl cu zohmanih theih loin Jesuh hnenah an ra ih, "Ziangah so kannih hmuah in kan dawi suak thei lo?" tiah an sut. 20 Jesuh in, "Nan zumnak a mal ruangah a si. Fiangtein ka lo sim: anṭam ci tia zumnak nan neih ahcun hi tlang hi 'Hitawk ihsin khi tawkah ṭhawn aw,' nan ti ahcun a ṭhawn ding. Ziang hmuahhmuah nan tuah thei ding a si," tiah a ti. 22 Dungthluntu pawl cu an zatein Galilee ih an tonkhawm awk tikah Jesuh in an hnen ah, "Milai Fapa hi milai kutah pek a si cing ding ih an that ding. 23 Asinain ni thum ni ah thawhter sal a si ding," tiah a sim. Dungthluntu pawl cu an riah a sia ngaingai. 24 Jesuh le a dungthluntu pawl cu Kapernaum khua an thlen tikah biakinn ngunkhuai khongtu pawl Piter hnenah an ra ih, "Nan Sayapa hin biakinn ngunkhuai a pe maw?" tiah an sut. 25 Piter in, "Asi, a pe," tiah a ti. Piter cu inn sungih a luh tikah Jesuh a ṭong hmaisa ih, "Simon, ziangtin na ruat? Hi leitlun siangpahrang hnenah zo in so ramdang ihsin thil luhpi man, a si lole ngunkhuai an pek? Ramsung mi in maw, ramdang mi in so?" tiah a sut. 26 Piter in, "Ramdang mi in," tiah a let. Jesuh in, "A ṭha, cuti a si ahcun ramsung mi cun pek a ṭul lo tinak a si cu! 27 Asinain hi mi pawl thinhengter kan duh lo. Curuangah tili ah va feh awla sio va thlak aw. Na awh hmaisa bikmi nga kaa sungah nang le kei hrangah biakinn ngunkhuai pek ding tawkin tangka na hmu ding. Cumi cu la awla va pe aw," tiah a ti.
1 Cuih caanah dungthluntu pawl cu Jesuh hnenah an ra ih, "Vancung Uknak ah zoso a tum bik?" tiah an sut. 2 Cutikah Jesuh in nauhakte pakhat a ko ih an hmaiah a dinter hnuah, 3 "Fiangtein ka lo sim: nan thinlung nan thleng ih hi nauhakte bangtuk nan si lo ahcun vancung Uknak sungah nan lut dah lo ding. 4 Mi tangah a dor ih hi nauhak bangtuk a si mi cu vancung Uknak sungah a tum bikmi a si. 5 Cun ka hmin in hi bangtuk nauhakte a cohlangtu cu keimah a cohlangtu a si. 6 "Zokhal in hi nauhakte pakhatkhat keimah i zumnak ihsin a pialtertu cu a hngawng ah fangcang rialnak lungtum thlaih tahratin tifinriat sungah thlak sisehla amah ih hrangah a ṭha sawn. 7 Leilung tlunah hin zumnak pialtertu thil tampi an um hi a poi ngaingai. Cubangtuk cu a um ringring ko ding; cutiih mi a pialtertu pawl cu an hrangah a poimawh bik miangmo a si. 8 "Nan kut in siseh, nan ke in siseh, nan zumnak a lo pialter a si ahcun tan uhla hlon uh. Kut pahnih le ke pahnih thawn kumkhua meisa sungih nan tlak hnak cun kut lo le ke loin nunnak sungih nan luh a ṭha sawn. 9 Cule nan mit in nan zumnak a hlohter a si ahcun phorh uhla hlon uh. Mit pahnih thawn hell meisa sungih tlak hnak cun mit pakhat lawng thawn nunnak sungih luh a ṭha sawn. 10 "Hi bangtuk nauhakte nan zawmtai lonak dingah ralring uh. Fiangtein ka lo sim: anmah kilvengtu vancungmi pawl cu vancungih ka Pa ih hmaiah an um ringring a si. 11 Milai Fapa cu a hlomi hawl dingah a ra. 12 "Tuu zakhat a nei mipa in a tuu pakhat a hloh le ziang a tuah ding tiah nan ruat? Tlang parih hrampi a piat reromi a tuu sawmkua le pakua cu a taanta ding ih a hlomi tuu pakhat hawl dingah a feh ding. 13 Fiangtein ka lo sim: a hmuh tikah a hlo lomi sawmkua le pakua hnakin a hlomi tuu pakhat parah a lung a awi sawn a si. 14 Cubangtuk ṭhiamṭhiam in vancungih a ummi nan Pa in hi nauhaktete lakih pakhat hman hlo dingah a siang lo a si. 15 "Nan unau pakhat nan parih a sual ahcun va feh uhla a sualnak va sim uh. Asinain zohmanih theih loin nanmah lawng tong aw uh. Nan thu a lo ngai a si ahcun nan unau nan ngah sal a si. 16 Asinain nan thu a ngai lo a si ahcun theihpitu pakhat maw pahnih maw fehpi uh. Ca Thianghlim in, "Sual puh awknak hmuahhmuah cu theihpitu pahnih maw, cuhnak tam maw um hai seh," a ti vekin na fehpi mi cu thutheitu an si ding. 17 Cule nan thu a ngai lo a si ahcun a thuhla pawl kimtein kawhhran hnenah nan sim pei. A netnak ah kawhhran ih thu khal a ngai lo a si ahcun amah cu khawvelmi a si lo ah siahkhongtu tlukah va ruat uh. 18 "Cun nan zatein ka lo sim: leilung tlunih nan khammi cu vancung khalah kham a si ve ding; cule leilung tlunih nan thlahmi cu vancung khalah thlah a si ve ding. 19 "A dang ka lo sim hrih ding: leitlun ah thlacam in nan dil mi thu ah mi pahnih nan lungkim tlang in thla nan cam a si ahcun vancungih a ummi ka Pa in a lo tuahsak ding. 20 Ziangahtile ka hmin in mi pahnih siseh, pathum siseh, nan pumkhawm tikah nan hnenah ka um ve a si," tiah a ti. 21 Cun Jesuh hnenah Piter cu a ra ih, "Bawipa, ka unau pakhatkhat ka parih a sual ahcun voi ziangzat tiangso ka ngaidam ding? Voi sarih tiang maw?" tiah a sut. 22 Jesuh in, "Si hlah ee, voi sarih tiang lawng a si lo; voi sawmsarih ih let sarih tiang na ngaidam pei; 23 ziangahtile vancung Uknak cu hi bangtuk in a si. Voi khatah Siangpahrang pakhat a um ih a hnen-um pawl ih hnaṭuan daan kha zingzoi a tum. 24 A zingzoi pekte ah tangka thawng tampi a baaktu a hnen-um pakhat a hnenah an run hruai. 25 Cuih hnen-um pa cun leiba samnak tangka ziang hman a nei lo. Cu ruangah siangpahrang in cupa cu a leiba kuannak dingah a nupi le a faate pawl le a neihmi hmuahhmuah thawn salih zuar ṭheh dingin thu a pek. 26 Siangpahrang hmaika ah hnen-um pa cu a bok ih, 'I zaangfah awla i hngak hrih hram aw. Ka lo kuan ṭheh ko ding,' tiah a dil ciamco. 27 Siangpahrang cun a zaangfah ih a leiba cu a olh ih a thlah. 28 "Cule cupa cu a feh ih amah leiba malte a rak baaktu a hawipi hnen-um pa pakhat a tong. Cupa cu a kai ih a hngawng in a deek ih, 'I baakmi i pe aw,' tiah a ti. 29 Cuih hnen-um pa cu a bok ih, 'I zaangfah awla i hngak hrih hram aw. Ka lo kuan ko ding,' tiah a dil ciamco. 30 Asinain a ngaidam duh lo. A leiba a kuan ṭheh hlan lo thawngah a thlak. 31 Cumi cu hnen-um dang pawl in an hmuh tikah an thin a nuam lo ngaingai ih siangpahrang hnenah an feh ih cuih thuhla cu an va sim ṭheh. 32 Cutikah siangpahrang in cuih hnen-um pa cu a ko ih, 'Nang sal ṭha lo. I dil ciamco ruangah i baakmi hmuahhmuah ka lo olh a si. 33 Na parih zaangfahnak ka neih vekin na hawipi parah zaangfahnak nei ve ding mawi na si,' tiah a ti. 34 Siangpahrang cu a thin a heng ngaingai ih cupa cu a leiba zate ih a sam ṭheh hlan lo thawngah a thlak," a ti. 35 Cule Jesuh in, "Zokhal nan unau kha nan thinlung ngaingai in nan ngaidam lo a si ahcun vancungih a ummi ka Pa in cuih hnen-um pa bangtuk in a lo tuah ve ding a si," tiah a sim.
1 Cuih thu pawl cu Jesuh in a sim ṭheh tikah Galilee ihsin a suak ih Judea ram, Jordan tiva khatlam ralah a feh. 2 Mi tampi in an thlun ih cutawkah mina tampi a damter. 3 Farasi mi hrekkhat a hnenah an ra ih a sual hawl duh ah, "Ziangvek thu khalah mipa in a nupi maak dingah kan Daan in a thlah maw?" tiah an sut. 4 Jesuh in, "A hramthokah Seemsuahtu in nu le pa a tuah, ti kha Ca Thianghlim sungah nan siar dah lo maw? 5 Cutawkah Pathian in 'Cu a si ruangah mipa in a nu le a pa a taanta pei ih a nupi thawn an kom aw ding; cuti cun annih pahnih cu pakhat ah an cang pei,' a ti. 6 Curuangah annih cu pahnih an si nawn lo, pakhat an si. Pathian ih a kommi cu zohman in ṭhen hlah hai seh," tiah a ti. 7 Farasi pawl in, "Cuti asile ziangah so Moses in 'Mipa in a nupi kha maaknak ca pe-aw sehla fehter seh,' tiah daan in pek?" tiah an sut. 8 Jesuh in, "Thuzirh nan har tuk ruangah Moses in nupi maak theinak thu a lo pekmi a si. Asinain a hlanah cun cuvek a rak si lo. 9 Fiangtein ka lo sim: mi pakhat in a nupi kha mipa dang thawn zum tlak loin a um ti siar lo, a maak ih nupi dang a ṭhit asile cupa cu ṭaangṭawm sualnak tuahtu a si," tiah a ti. 10 Dungthluntu pawl in, "Nupi le pasal karlakah hi bangtuk si ding a si ahcun ṭhi aw loin um lawlaw hai sehla a ṭha sawn," tiah Jesuh cu an ti. 11 Cutikah Jesuh in, "Cuih nan timi cu mi hmuahhmuah hrangah a si lo; Pathian ih vo zemmi pawl hrang lawngah a si. 12 Mipa in nupi an ṭhit lonak san cu a thu a phunphun a um; mi hrek cu cutiih um dingah an suahpimi a si; mi hrek cu nupi ṭhi lo dingah tilpermi an si ih mi hrek cu vancung Uknak ih ruangah nupi ṭhi loin an um. Cubangtuk ih a thlun theitu pawl cun hi thuzirhnak hi thlun ko hai seh," tiah a ti. 13 Mi ṭhenkhat in an faate pawl kha Jesuh in an lu parah kut suangin thla camsak dingah an rak hruai; asinain dungthluntu pawl in an rak kawk. 14 Jesuh in, "Nauhak pawl cu ka hnenah ra ko hai seh, dawn hlah uh; ziangahtile vancung Uknak cu hi bangtuk pawl hrangah a si," tiah a ti. 15 An lu parah a kut a suan hnuah cutawk ihsin a feh. 16 Voikhat ah mi pakhat Jesuh hnenah a ra ih, "Sayapa, kumkhua nunnak co dingah ziang thil ṭha so ka tuah ding?" tiah a sut. 17 Jesuh in, "Thil ṭha thu ah ziangah so i sut? Miṭha Pakhat lawng a um. Nunnak co na duh ahcun thukham pawl thlun aw," tiah a ti. 18 Tlangvalpa cun, "Ziangbangtuk thukham so?" tiah a sut. Jesuh in, "Mi that hlah; ṭaangṭawm sualnak tuah hlah; ruk ru hlah, a dik loin mi sual puh hlah; 19 na nu le na pa upat aw; na inn hnen kha nangmah na duhdawt awk vekin duhdaw aw," tiah a ti. 20 Tlangvalpa in, "Hi thukham pawl cu ka thlun thluh zo. Ziang so ka tuah hrih ding?" tiah a sut. 21 Jesuh in a hnenah, "Mi famkim si na duh ahcun va feh awla na neihmi hmuahhmuah zuar tahratin na ngahmi tangka cu mi farah pawl va ṭhen aw; cuticun vancung ah hlawnthil na nei ding. Cuih hnuah i thlun aw," tiah a ti. 22 Cumi cu tlangvalpa in a theih tikah riah sia in a kir, ziangahtile milian zet a si. 23 Cutikah Jesuh in a dungthluntu pawl hnenah, "Fiangtein ka lo sim: milian hrangah vancung Uknak sungih luh cu a har ngaingai a si. 24 Ka lo sim sal: Kalauk pakhat ṭhim hnakua sungih luh hnakin milian pakhat Pathian Uknak sungih luh a har sawn," tiah a ti. 25 Cumi cu dungthluntu pawl in an theih tikah an mang a bang ngaingai ih, "Cuti asile zoso runnak a ngah thei ding," tiah an sut. 26 Jesuh cun hmaitontein a zoh hai ih an hnenah, "Himi hi minung hrangah cun a si thei lomi a si, sikhalsehla Pathian hrangah cun ziang hmuahhmuah a cang thei," tiah a ti. 27 Cule Piter in, "Ziangtinkim taan in nangmah kan lo thlun zo. Ziang so kan ngah ding?" tiah a sut. 28 Jesuh in an hnenah, "Fiangtein ka lo sim: San Thar a thlen ih Milai Fapa cu a tokham sunglawi parih a to tikah cun nannih ka dungthluntu hleihnih hi Israel miphun hleihnih uktu si ve dingah tokham parah nan to ve ding. 29 Cule zokhal keimah ih hrangah nu le pa siseh, faate siseh, unau siseh, farnu siseh, inn siseh, lo siseh, a taantatu cu a let zakhat in a ngah sal ding ih kumkhua nunnak pek a si ding. 30 Sikhalsehla atuih hmaisa bik a si mi pawl hi neta bik an si leh ding; atuih neta bik a si mi pawl hi hmaisa bik an si ding," tiah a ti.
1 Jesuh in, "Vancung Uknak cu hi bangtuk hi a si. Mi pakhat cu a sabit hmuan sungih hnaṭuantu hawl dingah zingthlapit in a feh. 2 Nikhat hlawhman ngun tangka fangkhat pe dingin a lung a kim ih a hmuan ah hnaṭuantu pawl cu a thlah. 3 Zinglam nazi pakua ah dawr hmunah a va feh ih mi-umlak ṭhenkhat a va hmu. 4 Cupawl hnenah, 'Nannih tla sabit hmuanah va feh uhla hna va ṭuan ve uh; nan nihlawh a tawkzawn in ka lo pe ding,' tiah a ti. 5 Cuticun an feh. Cuvek ṭhiamṭhiam in nazi hleihnih ah le zanlam nazi pathum ah a dang a thlah lala. 6 Zanlam nazi panga zikte ah dawr hmun ah a feh sal ih minung ṭhenkhat an rak ding hrih kha a hmu. 'Ziangah so zianghman tuah lo in sun nihlawh nan ding ih nan tikcu nan cemter?' tiah a sut. 7 Annih in, 'Zohman in hnaṭuan in pek lo ruangah a si,' tiah an sawn. Anih in, 'Cuti a si ahcun sabit hmuan ah feh uhla va ṭuan ve uh,' tiah a ti. 8 "Zanlam a hung si tikah hmuan neitu pa in hmuan uktu pa cu 'Hmuan hnaṭuantu pawl cu ko hai awla an nihlawh pe aw, a neta bikih a ṭuantu pawl in thok awla a hmaisa bikih a ṭuantu pawl tiang,' tiah a ti. 9 Zanlam nazi panga-ih hnaṭuan a thoktu pawl cu an hlawhman ah ngun tangka fangkhat ciar pek an si. 10 Cuhrangah hmaisa bikih hnaṭuan fialmi pawl hlawhman la dingih an rat ve tikah tam deuh kan ngah ding tiah an zum; asinain annih khal ngun tangka fangkhat ciar pek an si ve. 11 Tangka cu an lak ih hmuan neitu bawi parah cun an phunzai. 12 'Himi pawl neta bikih hna a ṭuantu pawl hi nazi pakhat sung lawng an ṭuan; kannih cu nisasen lakah sunvu kan ṭuan, asinain kanmah zat thotho ni hlawhman na pek,' tiah an ti. 13 "Cutikah hmuan neitupa in pakhat pa hnenah, 'Ka rual, ngaihnik! Ka lo bum lo a si. Ni khat hlawhman cu ngun tangka fangkhat si dingin na lung a rak kim a si lo maw? 14 Nan hlawhman cu la uhla inn ah tlung uh. Neta bikih hnaṭuan ka fialmi pa khal hi nan ngahzat a ngah ve ding cu ka duhmi a si. 15 Ka tangka cu ka duh vekih hman theinak thu ka nei a si lo maw? An parih tirh ka sian ruangah nan nahsiik maw si?' a ti," tiah a sim. 16 Cule Jesuh in,"Curuangah neta bik pawl cu hmaisabik ah an cang ding ih hmaisa bik pawl cu neta bikah an cang ding," tiah a ti. 17 Jesuh cu Jerusalem lamih a feh laiah khan dungthluntu hleihnih kha a dangte ah a hruai ih an mahte lawng, an feh phah ah, thu a ruah hai. 18 "Ngaihnik uh! Jerusalem ah kan hung feh ding ih cutawkah Milai Fapa hi puithiam upa pawl le Daanthiam pawl kut ah an thlen ding ih that dingin an rel ding. 19 Cuih hnuah Zentail mi pawl kut ah an thlen ding. Cun Zentail mi pawl in an hmuhsuam ding, an vuak ding ih thinglamtah ah an kheng ding. Sikhalsehla ni thumnak ah thawhter sal a si ding," tiah a ti. 20 Cule Zebedi nupi cu Jesuh hnenah a fapa pahnih thawn an ra; Jesuh hmaiah cun a kun ih zaangfah a dil. 21 "Ziang so na duh?" tiah Jesuh in a sut. Anih in, "Siangpahrang na si tikah ka fapa pahnih hi na vorhlam le na kehlamih an to theinak dingah thu i kam aw," tiah a ti. 22 Jesuh in, "Nan dilmi hi ziang kan dil ti nan thei lo. Ka in ding mi tuarnak khuathai hi nan in thei ding maw?" tiah a sut. A fapa pahnih cun, "Kan in thei ding," an ti. 23 Jesuh cun, "Ka in dingmi khuathai cu nan in thei ve ngai men ding. Asinain ka vorhlam le ka kehlam ah zo a to ding ti a hriltu cu kei ka si lo. Hi tonak tla cu ka Pa in a timtuah sak ciami pawl hrangah a si," tiah a ti. 24 Cuih thu cu dungthluntu dang pahra in an theih tikah cute unau hnih parah an thin a heng ngaingai. 25 Curuangah an zatein Jesuh in a ko khawm ih, "Nan theih vekin leilung tlunih uktu pawl cun an ukmi pawl kha an lal-hnawh hai ih hotu pawl khal in thu an nei ngaingai. 26 Asinain nannih lakah cun cu bangtuk cu si hlah seh. Nanmah lakah pakhatkhat in mi dang hnakih thupit a duh ahcun midang pawl ih hnen-um a ṭuan a ṭul; 27 nanmah lakah pakhatkhat in hmaisa bik si a duh asile nan sal a si hmaisa a ṭul. 28 Milai Fapa cu rianmi si loin mi riantu si dingah le mi tampi tlen dingah a nunnak pe dingin a ra a si," tiah a ti. 29 Jesuh le a dungthluntu pawl kha Jerikho ihsin an suah laiah mi tampi in an thlun. 30 Lamzin kiangih a rak tomi mitcaw pahnih in Jesuh an kiangte ihsin a feh ti kha an theih tikah, "Maw David fapa, in zaangfah hram aw," tiah an au. 31 Mi senpi pawl in daiteih um dingin an kawk. Asinain an dai cuang lo. "David fapa, in zaangfah hramhram aw," tiah ring sinsin in an au. 32 Jesuh cu a ding ih an pahnih in a ko. "Ziang tuah sak so nan duh?" tiah a sut. 33 Annih in, "Bawipa, khua in hmuter hram aw," tiah an ti. 34 Jesuh in a zaangfah hai ih an mit cu a tham. Hmakhatteah khua an hmu thei sal ih amah cu an thlunta.
1 Jesuh le a dungthluntu pawl cu Jerusalem an naih vivo thlang. Olif tlang ih Bethphage khua an thleng. A dungthluntu pahnih hmaiah a hei thlah ih, 2 hiti in thu a cah. "Nan hmaiih khua ah va feh uhla laakpi an hrenmi a faate thawn nan hmu lohli ding. A hri phoih uhla ka hnenah rak hruai uh. 3 'Mi in ziangah so nan hruai,' an lo tile, 'Bawipa in a ṭul a si,' va ti uh. Cuticun hmakhatte ah an lo thlah ko ding," tiah a ti. 4 Himi cu profet ih a rak sim ciami kimternak dingah a si. Profet cun: 5 "Zion khawpi khi sim uh, Na siangpahrang cu na hnenah a ra lai; Amah cu mi lungnem a si ih laak parah a to. Laak note parah a to a si, ti uh," tiah a ti. 6 Curuangah dungthluntu cu an feh ih Jesuh simmi vekin an tuah. 7 Laak le a faate cu an rak hruai ih an zaang ah an puan an dam ih Jesuh cu a to. 8 Mi tampi in Jesuh fehnak ding lamzin ahcun an puan an rak phah ih mi dang pawl in hnahsawl an lak ih lamzin ahcun an phah ve. 9 Jesuh hmaiih a fehmi pawl siseh, a dunglam ihsin a thluntu pawl siseh, an zate in: "Hosanna! David Fapa cu thangṭhat uh! Bawipa ih hmin in a rami cu Pathian in thlawsuah pe ko seh! Hosanna! Pathian cu van a saangbik ah thangṭhat uh!" tiah an au ciamco. 10 Jesuh cu Jerusalem khawsungih a luh tikah a khua pumpuluk in an au celcel ih, "Hi pa hi zoso a si?" tiah khua mi pawl in an sut. 11 Cutikah misenpi pawl cun, "Hi pa cu Galilee ram Nazareth khuami profet Jesuh a si," tiah an ti. 12 Jesuh cu Biakinn sungah a lut ih cutawkih thil a zuartu le a leitu pawl kha a dawi ṭheh. Tangka thlengtu pawl ih cabuai pawl le laileng zuartu pawl ih tokham pawl cu a linglet ṭheh. 13 Cule an hnenah, "Ca Thianghlim sungah Pathian in, 'Ka Inn cu thlacamnak inn ti a si ding,' tiah a ti. Asinain nannih cun fifir relhnak kua ah nan tuah," tiah a ti. 14 Mitcaw le kebai pawl Biakinn sungah cun a hnenah an ra ih a damter. 15 Thil maksak a tuahmi le Biakinn sungih nauhak pawl in, "David Fapa cu thangṭhat uh," tiih an aumi cu puithiam upa pawl le Daanthiam pawl in an hmuh tikah an thin a heng ngaingai. 16 Curuangah Jesuh kha, "An au reromi hi na thei maw?" tiah an sut. Jesuh in, "Thei tuk e! Ca Thianghlim sungah, 'Nauhak le naute pawl sungin thangṭhatnak famkim na suakter,' tiih nganmi kha nan siar dah lo maw?" tiah a ti. 17 Jesuh cun a tlansan hai ih Jerusalem khawpi sung ihsin a suah hnuah Bethani khua ah a feh ih cunah a riak. 18 A thaizing zingpitah Jesuh cu Jerusalem khawpi lamah a feh sal ih lamzin ah a ril a rawngzet. 19 Lamzin kiangah theipi kung pakhat a hmu ih a hei pan; asinain a hnah siar lo ziang hman a hmu lo. Curuangah theipi cu, "Ziangtik hmanah rah nawn hlah," tiah a ti. Hmakhatteah theipi kung cu a ro ṭheh. 20 Cumi cu a dungthluntu pawl in an hmuh tikah an mang a bang ngaingai. "Ziangtin so cutluk zamrangin a ro ṭheh?" tiah an sut. 21 Jesuh in, "Fiangtein ka lo sim: rinhmainak nei lo tein nan zum taktak ahcun hi theipi kung parih ka tuahmi hi nannih khal in nan tuah thei ve ding. Himi lawng si loin hi tlang hman hi 'ṭhawn awla tifinriat sungah dawp aw,' nan ti le nan ti vekin a cang ding. 22 Nan zum ngaingai ahcun thlacamnak thawn nan dilmi hmuahhmuah cu nan ngah ding," tiah a ti. 23 Jesuh cu Biakinn sungah a ra sal ih thu a zirh rero laiah puithiam upa pawl le hotu pawl a hnenah an ra ih, "Ziangah so hi bangtuk thil hi na tuah? Zo in so thu a lo pek?" tiah an sut. 24 Jesuh in, "Thu pakhat ka lo sut ve ding ih in let thei a si ahcun zo ih thu in hi bangtuk thil hi ka tuah ti ka lo sim hai ding," tiah a ti. 25 "Johan in baptistma a pek kha Pathian thu in maw minung thu in so a pek," tiah a sut. Cutikah anmah lakah pakhat le pakhat el awknak a um ih, "Ziangtin so kan ti ding? Pathian thu in kan ti asile, 'Ziangah so Johan cu nan zum lo,' in ti ding. 26 Asinain minung thu in kan ti lala khalle Johan cu mi hmuahhmuah in profet a si tiah an zum fawn ih misenpi pawl in kanmah lehlam ziangmaw tiin in ti pang ding, ti phan a um fawn!" an ti. 27 Curuangah, "Kan thei lo," tiah Jesuh cu an let. Cule Jesuh in, "Cuti a si ahcun kei khal in ziangthu in hi bangtuk thil hi ka tuah, ti ka lo sim ve lo ding," tiah a ti. 28 Jesuh in, "Ziangtin nan ruat? Voikhat laiah mi pakhat in fapa pahnih a rak nei. A fapa upa hnenah a feh ih, 'Ka fa, tuihsun ah sabit hmuan ah va feh awla hna va ṭuan aw,' tiah a fial. 29 A fapa cun, 'Ka duh lo,' tiah a el; asinain nehhnu ah a sir-aw sal ih sabit hmuanah cun a feh. 30 Cule a fapa nauta pa hnenah a feh sal ih sabit hmuan feh a fial ve. Cupa cun, 'E law, ka pa,' tiah a ti; asinain a feh lo. 31 Hi fapa pahnih lakah hin zo in so an pa ih duhnak a tuah?" tiah a sut. Annih in, "A fapa upa," tiah an let. Cutikah Jesuh in, "Fiangtein ka lo sim: siahkhongtu le hlawhhlang pawl hi nan hlanah Pathian Uknak sungah an lut ding. 32 Ziangahtile baptistma petu Johan cu a dikmi lamzin hmuh dingah nan hnenah a ra na'n nan zum lo; sikhalsehla ngunkhuai khongtu le hlawhhlang pawl cun an zum. Cumi nan hmuh hnu hmanah nan thinlung nan thleng cuang lo, zum khal nan zum cuang lo," tiah a ti. 33 Jesuh in, "Hi tahṭhimnak thu hi ngai hrih uh. Voikhat ah ram neitu pakhat a um ih sabit hmuan a tuah. Cuih a hmuan cu hawi in a kulh, sabit sawrnak ah khur a laih ih a kilnakah parthlam a sak. Cuih hnuah sabit hmuan ṭuantu pawl hnenah a saan ih amah cu khual tlawn ah a feh. 34 Sabit rah lawh caan a cut tikah a covo hlam dingah a hmuan a saangtu pawl hnenah cun a sal pawl a thlah. 35 Sabit hmuan a saangtu pawl in a sal pawl cu an kaih ih pakhat an vuak, pakhat an that ih a dang pakhat cu lungto in an deng. 36 Lo neitu pa cun a sal pawl tam deuh in a thlah lala; asinain hmuan saangtu pawl cun a hlan vek thotho in an rak tuahsiat. 37 A netnak ah a fapa a thlah, "Ka fapa hi cu an hmaisong rori ding," tiah a ruat. 38 Asinain hmuan saangtu pawl cun a fapa an hmuh tikah, "Hi pa hi hmuan neitu ih fapa a si. Ra uh, kan that pei ih a thilri kan co pei," tiah an ti aw. 39 A fapa cu an kai ih hmuan lengah an dirsuak ih an that. 40 "Hmuan neitu pa a rat tikah cuih hmuan saangtu pawl cu ziangtin a tuah ding tiah nan ruat?" tiah a sut. 41 Annih in, "Cubangtuk mi ṭha lo pawl cu a that ding ih a covo hman teih a pe theitu ding midang hnenah a hmuan cu a san ding," tiah an sawn. 42 Jesuh in an hnenah, "Ca Thianghlim ih a timi hi nan siar dah lo maw? Ca Thianghlim in: 'Inn saktu pawl in santlai lo tiih an hnonmi lungto cu A thupi bikmi lungto ah a cang riangri; Himi cu Bawipa ih tuahmi a si, kan mithmuh ah a mawi zetmi a si,' a ti. 43 "Fiangtein ka lo sim: Pathian Uknak hi nan hnen ihsin lak a si ding ih rah ṭhateih a suahtertu ding pawl hnenah pek a si ding," tiah a ti. 44 "Zokhal hi lungto parih a tlami cu a kuai ṭheh ding ih hi lungto ih a rialmi poh cu leivut bangin an dip ṭheh ding," tiah a ti. 45 Jesuh simmi tahṭhimnak pawl cu puithiam upa le Farasi mi pawl in an theih tikah anmah ih thuhla a sim ti kha an thei. 46 Curuangah Jesuh cu kaih an tum. Asinain mipi in Jesuh cu profet a si tiah an ruah ruangah mipi pawl an ṭih ih an kai ngam lo.
1 Jesuh in mipi pawl cu tahṭhimnak thawn a zirh. 2 "Vancung Uknak cu hi bangtuk a si. Voikhat ah siangpahrang pakhat in a fapa ih nupi ṭhitnak puai a tuah. 3 Cuih rawl einak puai ih ra tel dingah a sawmmi hmuahhmuah va sim dingin a hnen-um pawl a thlah; asinain zohman an ra lo. 4 Curuangah a sawmmi hnenah a hnen-um dang pawl a thlah sal ih hiti in thu a cah. 'Rawl ei kan man zo. Ka cawcang pawl le ṭilva thau zetzet pawl kan that zo ih ziang hmuahhmuah kan timtuah ṭheh zo. Rawl ei tlang dingah ra thlang uh, tiah va ti uh,' a ti. 5 Sikhalsehla sawm ciami pawl cun zianghman ah an siar lo ih an hnaṭuan keel an ṭuan; pakhat cu a lo ah a feh, a dang pakhat cu a dawr tuahnak ah a feh; 6 mi hrekkhat pawl in a hnen-um pawl cu an kai ih an thawi hnuah an that hai. 7 Siangpahrang cu a thin a heng ngaingai. Curuangah a ralkap pawl a thlah ih cuih mithat pawl cu an va that ih an khua tla an ur ṭheh. 8 Cuih hnuah a hnen-um pawl a ko ih, 'Mopuai ka tuahmi cu ziang hmuahhmuah a kim ṭheh zo na'n ka sawmmi pawl sawmtlak an rak si lo. 9 Curuangah zalamzin ah va feh uhla nan sawm thei zat poh hi mopuai ah rak sawm uh,' tiah a ti. 10 Cuticun hnen-um pawl cu an feh ih lamzinih an tonmi pohpoh miṭha misia ti loin an khawm ih puai tuahnak innpi cu an khat ṭheh. 11 "A sawmmi pawl zoh dingah siangpahrang cu a vung lut ih mopuai hnipuan a hruk lomi pakhat a hmu. 12 Siangpahrang cun, 'Ka rual, mopuai hnipuan hruk loin ziangtinso hitawk hmunah na luh thei,' tiah a sut. Asinain anih cun zianghman a sim thei lo. 13 Cule Siangpahrang in a hnen-um pawl kha, 'A kutke ṭem uhla khawleng thimnak ah hlon uh. Cutawkah ṭap raak le hacang rial in a um ding,' a ti," tiah a sim. 14 Cuih hnuah Jesuh in, "Sawmmi cu an tam na'n hrilmi an mal," tiah a netnak ah a sim. 15 Farasi mi pawl cu an feh ih Jesuh sual hawl theinak dingah thu suh ding an pol. 16 Cule anmah thluntu hrekkhat pawl le Herod milai hrekkhat kha Jesuh hnenah an thlah ih, "Sayapa, nang cu thudik na sim, ti kan thei. Pathian duhmi thudik khal mi mithmai zoh loin na zirh. Ziangahtile nang cu mi an sinak zoh tahratin mi na thleidang lo. 17 Curuangah na ruahnak in sim hnik. Rom Siangpahrang hnenah ngunkhuai pek hi kan Daan in a duh maw duh lo," tiah an sut. 18 Tumtahnak ṭha lo an neihmi kha Jesuh in a theih ruangah an hnenah, "Mi depde pawl! Ziangah so thang ih awk in tum? 19 Ngunkhuai pek dingmi tangka i hmuhhnik uh," a ti. Tangka cu an hun pek ih Jesuh in, 20 "Zo ih hmuihmel le hmin so a cuang?" tiah a sut. 21 Annih in, "Siangpahrang bawipa ih hmuihmel le hmin!" tiah an ti. Cutikah Jesuh in, "Cuti asile Siangpahrang ta a si mi cu siangpahrang pek uh; Pathian ta a si mi cu Pathian pek uh," tiah a let. 22 Cumi an theih tikah an mang a bang ngaingai ih an fehsan. 23 Cuih sun thotho ah Saddusi mi ṭhenkhat cu Jesuh hnenah an ra. Annih tla cu thawhsalnak a um nawn lo, a titu an si. 24 Jesuh cu, "Sayapa, Moses ih in zirhnak ah, 'Mi pakhat fa nei loih a thih ahcun a naupa in a nupi cu a ṭhi hrimhrim pei. Cuti a ṭhit ih fa an neih a si ahcun mithi pa ih fa ah an cang pei,' a ti. 25 Hitawkih a rak um dahmi unau pasarih an um. Upa bik cu nupi a ṭhi ih fa nei loin a thihsan; a nupi cu a naupa in a run co. 26 Pahnihnak pa khal cu a thi lala ih a pathumnak pa in a nupi a run co lala. Cuticun an unau zate ih nupi a si hnuah an thi ṭheh. 27 Neta bikah cu nu khal cu a thi ve. 28 An pasarih in an nupit ciar ruangah thawhsalnak ni ah zo ih nupi bik so a si ding?" tiah an sut. 29 Jesuh in, "Nan va palh thei lawmmam so! Hi tlukih nan palhnak cu Ca Thianghlim le Pathian cahnak huham nan theih lo ruangah a si. 30 Ziangahtile mithi an thawhsal tikah cun vanih a ummi vancungmi bangtuk an si ding ih ṭhitawknak ti a um nawn lo ding. 31 Mithi thawhsalnak thu-ah Pathian ih a lo simmi nan siar dah lo maw? Pathian in, 32 'Kei cu Abraham ih Pathian, Isaak ih Pathian, Jakob ih Pathian ka si,' a ti. A nungmi ih Pathian a si, a thimi ih Pathian a si lo," tiah a ti. 33 Cumi cu misenpi in an theih tikah a thuzirh daan kha an mang a bang ngaingai. 34 Jesuh in Saddusi mi pawl cu ṭong ding thei nawn loin a tuah ti kha Farasi mi pawl in an theih tikah an tong khawm aw ih, 35 anmah lakih mi pakhat, Daanthiam pa in Jesuh kha a sual hawl duh ah thu a sut. 36 "Sayapa, Daan sungah hin khui thukham so a tum bik?" tiah a ti. 37 Jesuh in, "'Bawipa na Pathian cu na thinlung zate, na nunnak zate le na ruahnak zate in na duhdawt pei,' 38 timi hi a tum bik le a pakhatnak thukham a si. 39 Pahnihnak ih a thupi bikmi thukham cu pakhatnak vek thotho a si: 'Na innhnen kha nangmah na duhdawt awk vekin na duhdawt ve pei,' ti hi a si. 40 Moses Daan hmuahhmuah le profet pawl ih zirhmi hmuahhmuah cu hi thukham pahnih in a huap ṭheh a si," tiah a ti. 41 Farasi pawl hmun khatih an pumkhawm awk tikah Jesuh in, 42 "Messiah hi ziangtinso nan ruat? Zo ih tesinfa so a si?" tiah a sut. "David ih tesinfa a si," tiah an ti. 43 Jesuh in, "Cuti a si ahcun ziangah so Thlarau in David kha, 'Messiah hi Bawipa ti aw,' tiah a fial? David in: 44 "Bawipa in ka Bawipa hnenah, Na ral pawl na ke hnuai ih ka ret hlan lo, Ka vorhlam kapah to aw,' a ti. 45 David in Bawipa a ti ahcun ziangtinso Messiah cu David tesinfa a si thei ding?" tiah a sut. 46 Jesuh ih thusuhmi cu zohman in an let thei lo ih cuih ni thokin zohman in thu an sut ngam nawn lo.
1 Jesuh cu misenpi le a dungthluntu pawl hnenah thu a sim. 2 "Daanthiam pawl le Farasi pawl hi Moses pekmi Daan a sim fiangtu dingmi an si. 3 Curuangah an lo simmi hmuahhmuah cu nan tuah le nan thlun dingmi an si, sikhalsehla an thil tuahmi cu cawng hlah uh; ziangahtile an simmi vekin anmah in an tuah lo a si. 4 Mi ih zaang parah thilrit zetzet an suang, asinain anmah cun cuih thilrit phurh bawm dingah an kutzim hman in an dai duh lo. 5 Mi ih hmuh ding lawnglawngah ziang hmuahhmuah an tuah. An lu le an baan ih an khih awkmi parih Ca Thianghlim an nganmi lu khih le baan khih pawl tla khi zohhnik uh! Ziangtluk in so a tum! An puanfeem tla khi zohhnik uh! Ziangtluk in so a sau. 6 Puai tuahnak hmun le sinakok ah a ṭhat biknak hmun le upatnak hmun ah to an duh. 7 Dawr tluan mipi hmun ah mi ih upat pek an duh ih, 'Sayapa, Sayapa,' tiih kawh an duh. 8 Sikhalsehla nannih cu, 'Sayapa,' ti kha va duh hlah uh! Ziangahtile nannih tla cu unau fingfing nan si ih Sayapa ti dingmi cu pakhat lawng nan nei a si. 9 Cule leilung tlunah hin zohman, 'Ka Pa,' tiah nan ko lo pei, ziangahtile vancung i a ummi nan Pa lawnglawng Pa nan nei a si. 10 Cuih tlunah zohman, 'Hotu,' ti kawh ding kha va cuh hlah uh, ziangahtile hotu pakhat lawng nan nei ih amah cu Messiah hi a si. 11 Nanmah lakih a tum bik mi cu nan hnen-um a si ding. 12 Zokhal amah le amah a tum awtertu cu ṭhum a si ding ih mi hnuai ih a dormi cu cawisan a si ding. 13 "Daanthiam pawl le Farasi pawl, nan hmakhua a va pit so! Nannih mi depde pawl! Vancung Uknak sangka cu mi lut thei lo dingin nan khar ih nanmah le nan lut duh fawn lo; midang luh a duhmi hrangah nan ong duh fawn lo. 14 ("Daanthiam pawl le Farasi pawl, nan hmakhua a va pit so! Nannih mi depde pawl! Nuhmei pawl kha nuhmei an si ruangah nan hmuhsuam ih an inn tiangin nan lawng; cule mizapi hmuh ahcun rei zetzet thlacam nan uar. Hiti nan si ruangah hremnak nasazet nan tong ding.) 15 "Daanthiam pawl le Farasi pawl, nan hmakhua a va pit so! Nannih mi depde pawl! Mi pakhat thinlung thlengter dingah tifinriat ah lawng in nan feh ih ram tampi ah nan vak. Mi pakhat nan ngah tikah hell tla dingah nanmah hnakih let hnih tuar dingin nan tuah. 16 "Nannih hruaitu mitcaw pawl, nan hmakhua a va pit so! 'Mi pakhat in Biakinn hmin saal in siat a cam ahcun a siatcammi in a kaihreng lo, asinain Biakinn sungih a ummi sui hmin saal in siat a cam ahcun a siatcammi in a kaihreng a si,' tiah mi nan zirh. 17 Mitcaw le mi aa pawl! Khuiso a thupi deuh? Sui maw, a si lole sui kha thianghlim ko ih a tuahtu Biakinn so? 18 Cuih tlunah, 'Mi pakhat in biakṭheng hmin saal in siat a cam ahcun a siatcammi in a kaihreng lo; asinain biakṭheng parih a ummi thilhlanmi saal in siat a cam ahcun a siatcammi in a kaihreng a si,' tiah nan sim. 19 Khua nan va hmu thei lo lawmmam so! Khuiso a thupi sawn? Thilhlanmi maw, thilhlanmi a thianghlimtertu biakṭheng so? 20 Curuangah mi pakhat in biakṭheng saal in siat a cam tikah biakṭheng le biakṭheng parih a ummi thilhlanmi hmuahhmuah thawn siat a cam a si. 21 Biakinn saal in siat a cam tikah biakinn le a sungih ummi Pathian hmin in siat a cam a si. 22 Cule vancung saal in siat a cam a si ahcun Pathian tokham le a parih a totu hmin in siat a cam a si. 23 "Daanthiam pawl le Farasi pawl, nan hmakhua a va pit so! Nannih mi depde pawl! Hmeh ih rawimi puṭinan, remhmui le aithing pawl kha Pathian hnenah ṭhenhra ṭhenkhat nan pek; asinain Daan sungih a thupi zetmi dingnak, zaangfahnak le rintlaknak pawl cu nan thlun lo ih zianghman ah nan siar fawn lo. Òhenhra ṭhenkhat cu nan pek ding hrimhrim a si. Asinain Daan sungih a ummi a dang pawl khal nan daithlan lo pei. 24 Hotu mitcaw pawl! Nan inmi sungih thothe cu nan hap, asinain kalauk riangri nan dolh fawn! 25 "Daanthiam pawl le Farasi pawl, nan hmakhua a va pit so! Nannih mi depde pawl! Nan khuat le nan pakan pawl a lenglam lawng fai lengleng in nan kholh ih a sung cu midang thil nan lonmi le hamṭamnak in nan ngahmi thil in a khat. 26 Farasi mitcaw pawl! Nan khuat a sunglam pawl kha kholh hmaisa uhla cuticun a lenglam khal a fai ve ding a si. 27 "Daanthiam pawl le Farasi pawl, nan hmakhua a va pit so! Nannih mi depde pawl! Nannih cu si raang hnihfaimi thlaan vek nan si; a lengah a mawi na'n a sungah cun ruh le a thu a ṭoih mi ruak in a khat. 28 Cubangtuk in nan lenglam ih zoh ahcun mi hmuahhmuah hrangih mi ṭhazet vek nan bang, asinain nan sunglam ahcun depdetnak le sualnak a phunphun in nan khat a si. 29 "Daanthiam pawl le Farasi pawl, nan hmakhua a va pit so! Nannih mi depde pawl! Profet pawl phumnak ah thlaan ṭhaṭha nan tuah ih mi ṭha pawl ih lungphun cu nan mawiter. 30 Nannih in, 'Hi kan pupa pawl ih san ahhin rak nung ve nungna thil an tuahmi pawl hi kan tuah lo ding ih profet pawl khal an thi hrimhrim lo ding,' tiah nan ti. 31 Cuti nan ti tikah hin profet pawl a rak thattu pawl ih tesinfa kan si, tiah nan ti awknak nan langter a si. 32 Curuangah nan pupa pawl ih an rak thok ciami thil cu nannih pawl hin kimtein tuah ṭheh lawlaw uh! 33 Nannih rul pawl, tur nei rulih faale pawl! Hell sung tla dingih hnonmi nan sinak ihsin ziangtinso nan luat thei ding? 34 Fiangtein ka lo sim: nan hnenah profet le mifim le zirhtu saya pawl ka thlah ding; ṭhenkhat cu nan that ding, ṭhenkhat cu thinglamtah parah nan that ding ih ṭhenkhat cu sinakok ah nan thawi hai ding ih khua khat ihsin khua dangah nan dawi vivo ding. 35 Cubangtuk in mawh nei lomi thihnak nan tuarter ruangah hremnak nan parah a tla ding. Mawh nei lo Abel ihsin thokin Biakinn le biakṭheng karlakih nan thahmi Berakhiah ih fapa Zekhariah tiang, an thisen a suah man cu nan parah a tla ṭheh ding a si. 36 Thungai in ka lo sim: himi pawl nan thah ruangih hremnak cu tuihsan minung pawl parah a thleng ṭheh ding," tiah a ti. 37 Jesuh in, "Jerusalem, Jerusalem! Na hnenah Pathian in a thlahmi profet pawl na that ih a palai pawl kha lungto in na deng. Arpi in ar faate pawl a thla hnuai ih a uap vekin na minung pawl cu ka kut in ka hum tum rero na'n na duh lo! 38 Curuangah na Biakinn cu a lawng ding ih a ṭhing ding. 39 Ka lo sim cia: 'Bawipa ih hmin in a rami cu Pathian in thlawsuahnak pe hram seh,' tiih na ti thei hlan lo atu ihsin thok in i hmu nawn lo ding," tiah a ti.
1 Jesuh cu a tho ih Biakinn ihsin a feh laiah a dungthluntu pawl a hnenah an ra ih Biakinn an rak sak daan a makzia kha an relpi. 2 Jesuh in, "Asi, hipawl hi zohhnik uh. Fiangtein ka lo sim: hi lungto pakhat hman hi a umnak keel ah a um nawn lo ding; a zate in balthlak ṭheh an si ding," tiah a ti. 3 Jesuh cu Olif tlang parih a to laiah a dungthluntu pawl a thupte in a hnenah an ra ih, "Hi thil hi ziangtikah so a can ding? Cun na rat salnak caan le san cemnak langtertu ziang thil so a um ding, in simhnik?" tiah an sut. 4 Jesuh in, "Ralring uh, zohman in lo bum hlah hai seh. 5 Mi tampi ka hmin in an ra ding ih, 'Keimah hi Messiah cu ka si,' tiah an ti ding ih mi tampi an bum ding. 6 Lam naite ah siseh, lam hlapi ah siseh, raldonak thawmvang nan thei ding, asinain va phang hlah uh. Cubangtuk thil cu a um ding, asinain a netnak a thleng tinak a si hrih lo. 7 Ram khat le ram khat, peng khat le peng khat an do aw ding. Leilung tlun hmun kipah paam le linghnin a um ding. 8 Cubangtuk thil pawl cu nauhrin nat thok bangtuk a si. 9 "Cun an lo kai ding ih hrem ding le thah dingah mi kut ah an lo thlen ding. Keimah ruangah miphun kip in an lo hua ding. 10 Cutikah mi tampi in an zumnak an bansan ding. Pakhat le pakhat an zuar aw ding ih an hua aw ding. 11 Cule profet deu tampi an suak ding ih mi tampi an bum ding. 12 Sualnak a karh ding ih mi tampiih duhdawtnak cu a ṭumsuk ding. 13 Sikhalsehla a netnak tiang a dinghnget theitu cu rundam a si ding. 14 Cun miphun hmuahhmuah ih theih ṭheh dingah hi vancung Uknak Thuthang ṭha hi leilung tlun khuazakip ah phuan a si ding. Cuih hnuah a netnak cu a si ding. 15 "Profet Daniel in a rak sim ciami, 'Tuksumza Thil-borhhlawh,' cu nan hmu ding. Cuih Thil-borhhlawh cu hmun thianghlim ah a ding ding. (Hi ca a siartu: a sim duhmi hi theithiam aw.) 16 Cule Judea ramih a ummi pawl cu tlangpar ah tlan hai seh. 17 A inn parih a ummi cu innsung thilri lak dingah ṭum hlah seh. 18 Lo ih a ummi pa cu a puan lak dingah kir hlah seh. 19 Cuih caan le cuih ni ah nunau favun le naukai neimi nunau pawl hrangah ziangtlukin so a har ding. 20 Thlatang caan le Sabbath ni ngelcel ih thinphang in nan tlan ciamco lonak dingah Pathian hnenah thlacam uh! 21 Ziangahtile leilung hramthok ihsin tuih ni tiang a thlengmi ṭihnungza harsatnak hnakin a ṭihnung sawnmi a thleng ding ih cuvek ṭihnungzet harsatnak cu tuih hnu khalah a thleng nawn lo ding. 22 Cuih tikcu caan cu Pathian in tawiter loin rak um sehla zohman an luat lo ding. Asinain Pathian in a hrilmi pawl hrangah a caan cu a tawiter ding. 23 "Cule mi pakhatkhat in, 'Zoh uh, hinah Messiah a um,' a si lole 'Khinah a um,' tiah an lo ti le va zum hlah uh. 24 Ziangahtile Messiah deu le profet deu pawl an suak ding ih khawruahhar le hmuhsaknak mak ngaingai an tuah ding ih a cang thei tawkin Pathian ih hrilciami pawl hman an bum ding. 25 Ciing ringring uh! A hlankhan in ka lo simcia a si. 26 "Mi in, 'Zoh uh, ramṭhing ah a um,' tiah an lo ti a si ahcun va feh hlah uh. 'Hi tawkah hin a thup aw,' an ti khalle va zum hlah uh. 27 Ziangahtile nisuahnak ihsin ni tlaknak tiang hmakhat ih a tleu zukzomi nimthlakau vekin Milai Fapa cu a ra ding a si. 28 "Miruak umnak kipah langta an khawm aw ding. 29 "Cuih harsat caan a cem hnuah cun ni a thim ding, thlapi a vang nawn lo ding, van ihsin arsi pawl an tla ding ih vanih a ummi cah-nak huham pawl cu an fehnak lamzin ihsin an pial ding. 30 Cutikah Milai Fapa rat ding theihthiamnak van ah a lang ding; Milai Fapa cu vancung mero parin cah-nak huham le sunlawinak tumpi thawn a rat kha an hmu ding ih leilung tlun miphun zakip an ṭap ding. 31 A ringzetmi tawtawrawt an tum ding ih leilung kil li ah a vancungmi pawl a thlah ding; vanhram khatlam deng ihsin khatlam deng tiangih ummi hrilciami pawl a finkhawm ding. 32 "Theipi kung thuhla in fim lo zirhseh. Theipi cu a hnge pawl an hung hring ih a hnah no tete tla an hung cerh tikah ṭhal tikcu a nai a si ti nan thei. 33 Cuvekin hi thil hmuahhmuah nan hmuh tikah a tikcu a naizet thlang ih a thleng cing ding ti nan thei pei. 34 Ciing ṭha uh: atu sanih a nunglai mi hmuahhmuah an thih ṭheh hlanah hi thil hmuahhmuah hi an kim ṭheh ding. 35 Lei le van cu an cemral ding na'n ka ṭongkam cu a cem dah lo ding. 36 "Cuih ni le caan cu vanih a um mi vancungmi in siseh, Fapa in siseh, zohman in an thei lo; Pa lawng in a thei. 37 Noah san laiih thil a cangmi vekin Milai Fapa ratnak caanah cun a cang ve ding. 38 Tilik a tlun hlanah cun minung pawl cun an ei an in ih nupi an ṭhi, pasal an nei; Noah lawng sung a lut ni tiang nuam zetin an um. 39 Cutiin tilik in a fen hlo ṭheh hlan tiang ziang a cang ding ti zohman in an thei lo. Cuvek ṭhiamṭhiam in Milai Fapa a rat tik khalah a si ding. 40 Cuih caan a thlen tikah lo ah mi pahnih hna an ṭuan ding ih pakhat cu lakhlo a si ding ih pakhat cu taanta a si ding. 41 Nunau pahnih sum an deng ding; pakhat cu lakhlo a si ding ih pakhat cu taanta a si ding. 42 "Curuangah ralring in um uh; ziangahtile ziang tikah nan Bawipa a ra ding ti nan thei lo. 43 Inn neitu pa in fifir a ratnak ding tikcu a theih ahcun it loin a kil ding ih fifir pa cun a inn bauh in a lut thei lo ding, ti cu nan theihmi a si. 44 Curuangah ralring tein um uh, ziangahtile Milai Fapa cu nan rin lo laifangah a ra ding a si. 45 "Cuti asile zo bik so rintlak le a fimmi hnen-um cu a si ding? Rintlak le a fimmi hnen-um cu a bawipa in hnen-um dang pawl hotu ah ṭuanvo a pek ih a tikcu hmantein hnen-um dang pawl rawl a pe theitu pa kha a si ding. 46 Òhateih a hna a ṭuan rero laifangah a bawipa a ra kir a si ahcun ziangtluk in so cuih hnen-um pa cu a lung a awi ding? 47 Thungai in ka lo sim: cuih hnen-um pa cu a bawipa in a thilri hmuahhmuah kilkhawitu ah a ret ding. 48 Sikhalsehla hnen-um fel lomi a si ahcun, ka bawipa cu a ra tlung hrih lo ding, a rei lai paam ding tiah a ti ding ih 49 hnen-um dang pawl kha a hmuhsuam, a thawi pei ih zuri pawl thawn ei le in in an um ding. 50 Cule a bawipa cu a rin lo ni le a theih lo caanah ruah lopi in a ra kir ding. 51 A bawipa in cupa cu a dawi ding ih mititeraw pawl umnak hmunah a kuat ding; cutawkah ṭap-ai in a hacang a rial ding a si," tiah a ti.
1 Jesuh in, "Cuih caanah cun vancung Uknak cu mopa hmuak dingah an mei-inn thawn a fehtu fala pahra bangtuk a si ding. 2 Cuih fala pahra sungah panga cu an aa ih a dang panga cu an fim. 3 Fala aa pawl cun mei-inn an keng na'n zinan an keng lo. 4 A fimmi pawl cun an mei-inn khattein zinan an keng. 5 Mopa cu a thlen a tlai ruangah fala pawl cu an sing ih an itthat. 6 "Zanṭim a si tikah, 'Mopa a ra! Tho uhla va hmuak uh,' tiah au thawm a thang. 7 Fala pahra cu an ṭhang ih an mei-inn cu an timtuah. 8 Cule fala aa pawl cun fala fim pawl hnenah, 'Kan mei-inn an mit cuahco thlang, nan zinan in ṭhen ve uh,' tiah an dil. 9 Fala fim pawl cun, 'A cang lo ding, nannih ceem in zinan kan keng lo. Dawr ah va feh uhla va lei uh,' tiah an ti. 10 Curuangah fala aa pawl cu zinan lei dingah dawr ah an va feh; an feh sungah mopa cu a rak thleng. Ralringte in a rak um ciami fala panga pawl cu mopa thawn nupiṭhit rawldarnak puai sungah an lut ih sangka an khar. 11 "Cuih hnuah fala dang pawl cu an ra thleng ih 'Bawipa, bawipa, sangka in rak on hram aw,' tiah an au. 12 'Thungai in ka lo sim: nannih ka lo thei hai lo,' tiah mopa in a ti," tiah a sim. 13 Jesuh in, "Cutiin a ni le a caan nan theih lo ruangah ralringte in hngak uh," tiah a netnak ah a ti. 14 Jesuh in, "Cuih caanah vancung Uknak cu hi bangtuk in a si ding. Voikhat ah mipa pakhat a um ih khual tlawn a tum. A feh hlanah a hnen-um pawl a ko ih a thilri pawl a kilkhawiter. 15 An thil titheinak zat ciarin an hnenah a pek: pakhat pa hnenah sui tangka thawng nga a pek, a dang pakhat hnenah thawng hnih a pek ih a dang pakhat pa hnenah thawng khat a pek. Cuih hnuah khual a tlawng. 16 Sui tangka thawng nga a ngahtu hnen-um pa cu hmakhatte ah a feh ih sum a tuah ih a miat thawng nga a ngah. 17 Cubangtuk in thawng hnih a ngahtu pa khal in a miat thawng hnih a ngah ve. 18 Sikhalsehla tangka thawng khat a ngahtu pa cu a feh ih khur a laih hnuah a bawipa ih tangka cu a phum. 19 "Caan reipi hnuah an bawipa cu a ra kir ih an tangka hman daan thuhla fianter dingah an rel khawm. 20 Sui tangka thawng nga a ngahtu pa cu a ra ih a miat thawng nga a ra pek. 'Bawipa sui tangka thawng nga i pek. Zohhnik! Hinah a miat thawng nga ka ngahmi khal ka lo pe,' tiah a ti. 21 A bawipa in 'Hnen-um ṭha, rintlak zet hnen-um na si! Malte parah rinsantlak na si ruangah tampi kilkhawitu-ah ka lo tuah ding. Ra awla na bawipa lungawinak sungah hin ra tel ve aw,' tiah a ti. 22 Cule thawng hnih pekmi pa a ra lut ih 'Bawipa i pekmi kha sui tangka thawng hnih a si. Zohhnik! Hinah a miat ka ngahmi a dang thawng hnih khal a um,' tiah a ti. 23 A bawipa in 'A ṭha, hnen-um ṭha le rinsantlak hnen-um na si. Malte parah rinsantlak na si ruangah tampi kilkhawitu-ah ka lo tuah ding. Ra awla na bawipa lungawinak sungah hin ra tel ve aw,' tiah a ti. 24 Cule thawng khat a ngahtu pa a ra lut ih 'Bawipa, nang cu mi tifekfek na si ti ka thei; na tuh lonak ah a rah na la ih na vorh lonak khalah rawl na khawm. 25 Cuti a si ruangah ka lo ṭih ih na tangka cu leilung sungah ka phum. Zohhnik! Hinah a um ko,' tiah a ti. 26 Cutikah a bawipa in 'Nang hnen-um ṭha lo, mi zee pa! Thlaici ka tuh lonak ah ka aat ih ka vorh lonak ah ka khawm cu na thei taktak maw si? 27 Cuti a si ahcun ziangah so ka tangka cu ka ra kir tikih tangka ṭhang thawn ka ngah theinak dingah tangka retnak ah na rak ret lo? 28 Hiti a si ruangah hi pa hnenih tangka cu la uhla thawng hra a neitu pa hnenah pek uh. 29 Ziangahtile a neitu pawl cu pek belh an si ding ih a hleifuan in an nei ding. Asinain zianghman a nei lo pa hnen in a neihsunte hman kha lak sak a si ding. 30 Hi ṭhathnemnak nei lo hnen-um pa hi a leng khawthimnak ah hlon uhla cutawkah ṭap-ai in a hacang rial seh,' tiah a ti. 31 Jesuh in, "Milai Fapa cu Siangpahrang vekin a sunlawinak le vancungmi hmuahhmuah thawn a rat tikah siangpahrang tokham parah a to ding. 32 Miphun hmuahhmuah a hmaiah khawm ṭheh an si ding. Cule tuukhal in tuu le me a ṭhen bangin mi hmuahhmuah cu a ṭhen ding. 33 Mi ṭha pawl cu a vorhlam ah a ret ding ih mi ṭha lo pawl cu a kehlam ah a ret ding. 34 Cule Siangpahrang cun a vorhlamih a ummi pawl hnenah 'Ra uh, ka Pa ih a thlawsuahmi pawl! Ra uhla leilung seemtir ihsin nan hrangih rem ciami vancung Uknak hi ra co uh. 35 Ziangahtile ka ril a rawn tikah ei ding rawl in pek; ka ti a haal tikah in ding tidai in pek; mikhual ka si laiah nan inn ah in tlunter; 36 hnipuan nei lo ka si tikah hnipuan in pek; ka nat laiah in tuamhlawm; thawng ka tlak laiah in veh,' tiah a ti ding. 37 Cule miding pawl cun, 'Bawipa ziangtikah so na rilrawn kan lo hmuh ih rawl kan lo pek; na ti a haal kan lo hmuh ih tidai kan lo pek? 38 Ziangtikah so mikhual na si kan lo hmuh ih kan innih kan lo tlunter; hnipuan na neih loih hnipuan kan lo pek? 39 Ziangtikah so na nat le thawng na tlak kan lo hmuh ih kan lo veh?' tiah an ti ding. 40 Siangpahrang in, 'Thungai in ka lo sim: hi ka unau pawl lakah nauta bik parih nan tuahmi cu ka parah nan tuah a si,' a ti ding. 41 "Cule a kehlam ih a ummi pawl hnenah cun 'Nannih Pathian ih camsiatmi pawl, ka hnen in tlanhlo uh. Satan le a dungthlun pawl hrangih ngaihtuahmi a mit dah lomi meisa sungah vung feh uh. 42 Ziangahtile ka ril a rawng na'n rawl in pe lo; ka ti a hal na'n in ding tidai in pe lo; 43 mikhual ka si laiah nan inn ah in tlungter lo; hnipuan nei lo ka si laiah hnipuan in pe lo; ka naa ih thawng ka tlak laiah in tuamhlawm lo,' tiah a ti ding. 44 Cule annih in 'Bawipa, ziangtikah so na ril a rawn, na ti a haal, mikhual na si, hnipuan nei lo in na um, na nat i thawng na tlak kan lo hmuh ih kan lo bom duh lo?' tiah an ti ding. 45 Siangpahrang in, 'Thungai in ka lo sim: mi nauta bik pakhat nan bom duh lo kha, keimah in bawm duh lo a si,' a ti ding. 46 Cuih hnuah cupawl cu kumkhua hrem hmun ah an feh ding ih mi ding pawl cu kumkhua nunnak ah an feh ding," tiah a ti.
1 Hi thu pawl Jesuh in a zirh ṭheh tikah a dungthluntu pawl hnenah, 2 "Nan theih vekin tuih hnu ni hnih ah Lantak Puai a si ding ih Milai Fapa cu thinglamtah parih khencih dingah pek a si ding," tiah a ti. 3 Cule puithiam upa pawl le upa dang pawl cu Puithiam Saang Kaiafas inn ah an tong aw ih, 4 Jesuh kha kai ih that dingah a thupte in an tawlrel. 5 "Puai sungah cun kan that lo pei, mipi an buai pang ding," an ti. 6 Jesuh cu Bethani khua, phaarnat a rak tuartu Simon inn ah a um ih, 7 rawl a ei laiah nunau pakhat a hnenah a ra ih alabaster thawl khattein mankhung zet zihmui a kenmi kha Jesuh lu ah a toih. 8 Cumi cu dungthluntu pawl in an hmuh tikah an thin a heng ih, "A va pamhmai ve! 9 Hi zihmui cu tangka tampi ah zuar in a man kha mifarah pek ding sawn a si na'n," an ti. 10 Cutiih an ti kha Jesuh in a theih tikah an hnenah, "Ziangah so hi nunau nu cu nan hnaihnok rero? Ka hrangih a tuahmi hi thil ṭha le thil mawi zet a si. 11 Mifarah cu nan hnenah an um ringring ding, asinain kei cu nan hnenah ka um ringring lo ding. 12 Ka parih zihmui a toihmi hi ka ruak phum dingih a timtuahnak a si. 13 Thungai in ka lo sim: Thuthang ṭha an simnak leilung tlun khuazakip ah hi nu ih a tuahmi hi amah hngilh lonak dingah sim a si ringring ding," tiah a ti. 14 Cule dungthluntu lakih pakhat a si mi Judas Iskariot an timi cu puithiam upa pawl hnenah a feh ih, 15 "Nan hnenah Jesuh ka lo pek asile ziangso in pek ding?" tiah a sut. Annih in tangka sawmthum an siar ih Judas cu an pek. 16 Cuih ni thokin Jesuh zuar theinak dingah Judas cun tikcu ṭha lawng a hngak. 17 Thilnu rawi lo sangreu Puai ni hmaisa bik ni ah dungthluntu pawl cu Jesuh hnenah an ra ih, "Khuitawkah so Lantak Puai rawl ei tlaangnak cu kan lo tuah sak ding?" tiah an sut. 18 Anih in, "Khawpi sung mi pakhat pa ih inn ah va feh uhla 'Sayapa in ka tikcu a kim zo; ka dungthluntu pawl thawn na inn ah Lantak Puai kan tuah ding, a ti,' va ti uh," tiah a ti. 19 Jesuh sim vek cun dungthluntu pawl cun Lantak Puai zanriah cu an tiimlaam. 20 Zanlam ah Jesuh le a dungthluntu pawl cu rawl ei dingah an to khawm. 21 Zanriah an ei rero laiah Jesuh in, "Fiangtein ka lo sim: nanmah lakah pakhat in i zuar ding," tiah a ti. 22 Dungthluntu pawl cu an riah a sia ngaingai ih pakhat hnu pakhat in, "Bawipa, keimah ka si maw?" tiah an ti fingfing. 23 Jesuh in, "Keimah thawn khengkhat sungih saang a hnimtu in i zuar ding a si. 24 Ca Thianghlim ih a simcia vekin Milai Fapa cu a thi ding, asinain Milai Fapa a zuartu pa cu a hmakhua a va pit so! Cupa cu a nu ih pum sungin suak loin rak um sawnta sehla amah ih hrangah a ṭha sawn ding na'n!" tiah a ti. 25 Mi zuartu Judas in, "Sayapa, na ti sanmi cu kei ka si maw?" tiah a sut. Cutikah Jesuh in, "Nangmah in na sim zo," tiah a let. 26 Rawl an ei laiah Jesuh in saang cu a lak ih thla a cam hnuah a phel ih a dungthluntu pawl hnenah a pek. "Lak uhla ei uh; himi hi ka taksa a si," tiah a ti. 27 Cuih hnuah khuathai a lak ih Pathian hnenah lungawi thu a sim hnuah an hnenah a pek. "Nan zatein in uh; 28 himi hi ka thisen a si. Pathian thukam hngettertu le mitampi sual ngaithiamnak hrangih ka thletmi thisen a si. 29 Fiangtein ka lo sim: ka Pa ih Uknak sungah nanmah thawn sabit thar ka in sal hlan lo hi sabit cu ka in nawn lo ding," tiah a ti. 30 Cule hla an sak ih Olif Tlangah an feh. 31 Cule Jesuh in an hnenah, "Tuih zan rori ah nan zatein nan tlanhlo ding ih keimah lawng in tan ding; ziangahtile Ca Thianghlim in 'Pathian in tuukhal kha a that ding ih tuurual cu ṭhekdarh ṭheh an si ding,' a ti a si. 32 Asinain thihnak ihsin thawhter sal ka si tikah Galilee ah nan hmaiah ka feh ding," tiah a ti. 33 Piter in Jesuh hnenah, "Midang tlan ṭheh hman hai sehla kei cu ka tlan lo ding," tiah a ti. 34 Jesuh in Piter hnenah, "Thungai in ka lo sim: tuih zan ar a khuan hlanah 'Amah cu ka thei lo a si,' tiah voi thum tiang i phatsan ding," tiah a ti. 35 Piter in, "Na hnenih thi ve ding ka si hmanah ka lo phatsan dah lo ding," a ti. Dungthluntu dang pawl khal in cuti cun an ti ciar. 36 Cule Jesuh cu a dungthluntu pawl thawn Gethsemane an timi hmuan ah an feh ih an hnenah, "Khitawk ih thla ka va cam sungah hinah rak to uh," tiah a ti. 37 Piter le Zebedi fapa pahnih kha a fehpi. A riah a sia ih a thinlung a nuam lo ngaingai. 38 Cule an hnenah, "Ka thinlung hi riahsiatnak in a khat tuk ih a kuai ṭheh ding a bang. Hinah um uhla itthat loin i hngak uh," tiah a ti. 39 Hlat deuh ah a va feh ih leilung ah a bok ih, "Ka Pa, a cang thei a si ahcun hi tuarnak khuathai hin i luatter hram aw! Asinain ka duh vekin si hlah seh, na duh vekin si ko seh," tiah thla a cam. 40 Cun dungthluntu pathum hnenah a ra kir tikah an pathum in an itthat kha a hmu ih Piter hnenah, "Ziangtin so it loin nazi pakhat sung hman in hngak thei lo? 41 Sualforhnak sungih tla lo dingin itthat loin thlacam uh. Thinlung cun a duh na'n taksa cu a thazaang a der a si!" tiah a ti. 42 Jesuh cu a feh sal ih thla a cam lala. "Ka Pa, hi khuathai hin luat a theih lo ih ka in tengteng a ṭul a si ahcun na duh vekin si ko seh," a ti. 43 Dungthluntu pathum hnenah a ra kir sal ih an rak itthat thotho; an mit an meng thei hrimhrim lo. 44 Jesuh cun a taanta hai ih a cam keel in voithumnak thla a cam. 45 Cule dungthluntu pathum hnenah cun a ra kir ih, "Nan itthat ih nan cawl lai hrih maw si? Zoh uh! Milai Fapa cu misual pawl kut sungih thlenter a sinak tikcu a thleng zo. 46 Tho uhla feh uhsi. Zoh uh, i zuartupa cu hinah a thleng zo," tiah a ti. 47 Jesuh a ṭong rero laiah dungthluntu hleihnih lakih a tel ve mi Judas cu a ra thleng. Amah thawn hmun khatah puithiam upa pawl le Judah mi upa dang pawl ih thlahmi miburpi kha ralnam le talhtum pawl keng in an ra. 48 Mi phiartu cun misenpi kha theihthiamnak a rak simcia ih, "Ka hnam dingmi pa cu nan kaih duhmi pa a si ih nan kai pei!" tiah a ti. 49 Judas in Jesuh cu a pan vurvo ih, "Sayapa, na parah daihnak um ko seh," a ti phah in a hnam. 50 Jesuh in, "Ka rual, na tummi cu tuah zaang sawn aw," tiah a ti. Cule miburpi an ra thleng ih Jesuh cu an kaih hnuah fektein an ṭem. 51 Jesuh thawn a ummi lakah pakhat pa in a ralnam a zuuk ih Puithiam Saang ih salpa kha a hna a sah thlak. 52 Cutikah Jesuh in, "Na nam cu a kawm sungah khum sal aw. Ralnam a hmangtu cu ralnam in an thi ve ding. 53 Ka Pa hnenah bomnak ka dil a si ahcun hmakhatte ah vancungmi ralkap bur hleihnih hnakih tam a run thlah thei ti hi na thei lo maw? 54 Asinain cu bangtuk in sisehla Ca Thianghlim in a cang ding tiih a sim ciami cu ziangtinso a kim thei ding?" tiah a ti. 55 Cule Jesuh in miburpi hnenah cun, "Kei hi rukru maw ka si, ralnam le talhtum thawn keimah kai dingih nan rat ciamco? Nitinte Biakinn ah ka to ih thu ka lo zirh ṭheu laiah zohman in in kai fawn lo. 56 Sikhalsehla profet pawl in Ca Thianghlim sungih an nganmi a kim theinak dingah hi bangtuk in a cang a si," tiah a ti. Cuihsin dungthluntu pawl cun an taan ih an tlansan ṭheh. 57 A kaitu pawl in Jesuh cu Puithiam Saang Kaiafas inn ah an fehpi ih cutawkah cun Daanthiam pawl le Judah upa pawl an tong aw khawm. 58 Piter in a hlat nawn ihsin Puithiam Saang ih tual tiang a thlun. Tual ah a vung lut ih ziang bangtuk in thil a cang ding ti zoh duh ah ralvengtu pawl hnenah a to. 59 Puithiam upa pawl le Khonsil upa pawl in Jesuh cu an thah theinak dingah an zatein a sual an hawl. 60 Thuphan per tahratin a mawhnak hawltu tampi an ra suak na'n a sualnak an hmu thei cuang lo. A netnak ah mi pahnih an ra suak ih, 61 "Hi pa hin 'Pathian Biakinn hi ka bal ding ih ni thum ah ka sak thei sal ding,' a ti," tiah an ra ti. 62 Cutikah Puithiam Saang a ding ih Jesuh cu, "Hitiin sual an lo puh hi a leh ngaihnak na thei lo maw?" tiah a sut. 63 Asinain Jesuh cu daitein a um. Cule Puithiam Saang cu a hung ṭong sal ih, "A nungmi Pathian hmin saal in siatcam in ka lo ti: Pathian fapa Messiah na si maw si lo so, sim hnik," tiah a ti. 64 Jesuh in, "Nangmah in na sim zo! Asinain thungai in ka lo sim: tuih thokin Milai Fapa hi Ziangkimtithei ih vorhlam ah to in nan hmu pei ih vancung mero par ihsin a rat khal na hmu ding," tiah a ti. 65 Cuvete in Puithiam Saang cun a hnipuan a thlek ih, "Cumi cu Pathian thangsiat a si! Thutheitu dang kan ṭul nawn lo. Pathian a thangsiat daan cu atu nan thei zo! 66 Ziangtin nan ruat?" tiah a sut. Annih in, "A mawh rori, thah ding a si," an ti. 67 Cule a hmaiah cil an phui ih an thawi ih an beng. Cule a bengtu pawl in, 68 "Maw Messiah, profet bangin in sim hnik he! Zoso a lo bengtu!" tiah an ti. 69 Piter cu innleng tual ih a to laiah Puithiam Saang ih hnen-um nunau pakhat a ra ih, "Nangmah khal hi Galilee mi Jesuh thawn a pawl-awmi na si," tiah a ti. 70 Asinain Piter in mizapi hmaiah cun a el ih, "Na ṭongmi hi ziang thu a si ti ka thei lo," tiah a let. 71 Cule Piter cu kotka lamah a va feh. Hnen-um nunau dang in a hmu ih, "Hi pa hi Nazareth mi Jesuh thawn a ummi a si," tiah cu tawkih a rak ummi mipi pawl hnenah a ti. 72 Piter cun a el sal ih, "Siatcam in ka sim: hi pa hi ka theihmi a si lo," a ti. 73 Caan malte hnuah cutawkih a dingmi pawl in Piter cu, "Phat duh hlah, nang khal an hnenih telmi na si ko. Na aw cawi in a lang a si," tiah an ti. 74 Cule Piter in, "Siatcam in thudik ka sim a si. Thudik lo ka sim a si le Pathian in i hrem seh! Hi pa hi ka thei hrimhrim lo," tiah a ti. Cuṭheh vete in ar a khuang ih, 75 Piter in Jesuh ih a rak sim ciami, "Ar a khuan hlanah ka thei lo a si, tiah voithum tiang i phatsan ding," a timi kha a vun mang sal. Piter cu khawlengah a suak ih thinlung na zetin a ṭap.
1 Zingthlapit ah puithiam upa pawl hmuahhmuah le Judah upa pawl in Jesuh cu that dingah an tawlrel. 2 Thir cikcin in an khih hnuah an hruai ih Rom Acozah bawi Mangki Pilat kut ah an pek. 3 Mi phiartu Judas in Jesuh cu thu an ṭhen ih mawh an pek ti kha a theih tikah a sir-aw ih tangka sawmthum kha puithiam upa le Judah upa hnenah a va khirh sal. 4 "Mawhnak nei lo pa thihnak thleng tiangin ka phiar ruangah ka sual tuk a si," tiah a va ti. Annih in, "Cucu ziangso kannih kan poisat? Na duhnak in va tuah ko," tiah an ti. 5 Judas in tangka sawmthum cu Biakinn sungah a hlonta ih a suak. A va feh ih amah le amah a hngawng in a awk that aw. 6 Puithiam upa pawl in cuih tangka cu an sar ih, "Hi tangka hi thisen tangka a si ruangah biakinn tangka retnak sungih ret ding cu kan Daan in a duh lo," tiah an ti. 7 A thuhla an rel ih zate lungkimnak in cuih tangka cu Beel Tuahtu ih lo leinak ah an hmang ih cuih lo cu ramdangmi pawl phumnak thlaanmual ah an hmang. 8 Curuangah cuih lo cu tuih ni tiangin, "Thisen Lo," tiah kawh a si lai. 9 Cuticun profet Jeremiah ih a rak simmi cu a kim. Profet Jeremiah in, "Israel mi pawl in cupa leinak ah an lungkim in an khiahmi tangka sawmthum cu an lak ih, 10 Bawipa in thu i pekmi vekin beel tuahtu lo leinak ah an hmang," tiah a rak ti. 11 Jesuh cu Rom Acozah Mangki bawi hmaiah cun a ding ih Mangki bawipa cun, "Judah mi pawl ih Siangpahrang na si maw?" tiah a sut. Jesuh in, "Nangmah in na ti si!" tiah a sawn. 12 Asinain puithiam upa le Judah mi upa dang pawl ih sual an puhmi pawl cu zianghman a let lo. 13 Curuangah Pilat in, "Sual an lo puhmi hmuahhmuah hi na thei lo maw?" tiah a ti. 14 Asinain Jesuh cun kam khat hman a sawn duh lo; curuangah Mangki bawipa cu a khawruah a har ngaingai. 15 Lantak puai tinte in Mangki bawipa cun, misenpi in suakseh tiah an ngenmi thawngtla pakhat kha a suahter daan a si. 16 Culai ah mi kipih theihmi thawngtla pakhat a um ih a hmin cu Jesuh Barabbas a si. 17 Misenpi an tonkhawm awk tikah Mangki bawi Pilat cun, "Zoso lo thlah sak ningla nan duh? Jesuh Barabbas maw Messiah timi Jesuh so?" tiah a sut. 18 Judah upa pawl in an nahsiik ruang meenah Jesuh cu a kut ah an thlenter a si, ti kha Pilat in fiangtein a thei. 19 Pilat cu thuṭhennak innpi sungih a to laiah a nupi in, "Mawhnak zianghman a nei lo pa kha a parah zianghman rak tuah hlah. Ziangahtile tuihsun ka mang ah amah ih ruangah tuarnak tampi ka tong a si," tiah thu a rak cah. 20 Puithiam upa pawl le a dang upa pawl in misenpi kha an forh hai ih misenpi in Barabbas thlah ih Jesuh that dingah Pilat kha an dil. 21 Asinain Pilat cun, "Himi pahnih lakah zoso thlah ningla nan duh?" tiah misenpi kha a sut lala. Misenpi in, "Barabbas," tiah an ti. 22 "Cuti asile Messiah timi Jesuh hi ziangtin ka tuah pei?" tiah Pilat in a sut. "Thinglamtah parah that aw!" tiah an zatein an ti. 23 Asinain Pilat in, "Ziang sualnak so a tuah?" tiah a sut hai. Cutikah, "Thinglamtah ah khenbet aw!" tiah an au thei patawp in an au ciamco. 24 Pilat in cutiih suh rero kha a ṭhathnemnak a um lo ih misenpi in hnaihnawhnak riangri an suakter pang ding ti a hmuh ruangah tidai lak tahratin mizapi hmaiah a kut a kholh ih, "Hi mawh nei lo pa thihnak ah hin kei ka tel lo! Nanmah ih tuahmi a si," tiah a ti. 25 Cutikah misenpi cun, "Hi pa thihnak ih thisen cu kanmah le kan tesinfa pawl parah thleng ko seh," tiah an ti. 26 Cuticun Pilat in an hrangah Barabbas cu a thlah sak; cule Jesuh cu a thawiter hnuah thinglamtah parih that dingin an kut ah a pek. 27 Cule Pilat ih ralkap pawl in Jesuh cu Mangki bawipa ih inn ah an fehpi ih misenpi pawl cu a kiangah an ra khawm. 28 A hnipuan an hlit ih puansen an sinter. 29 Cule hlingih tuahmi lukhuh a lu ah an khumter; cun a vorhlam kut ah fung an kenter. A hmaiah an khuk bilh tahrat in hmuhsuamnak thawn, "Judah Siangpahrang a nun khua sau hram seh," an ti. 30 An cil an phui, funghreu an lak ih a lu ah an vuak. 31 Cutiin an hmuhsuam ṭheh hnuah a puan cu an hlit ih amah ih hnipuan an hrukter sal. Cule thinglamtah parih thah dingah an hruai. 32 Cutiih an feh laiah Sairin khua mi Simon kha an tong ih ralkap pawl in Jesuh thinglamtah kha hramhram in Simon an putter. 33 Golgotha an timi hmun an thleng. Golgotha ti cu, "Luruh Hmun," tican a si. 34 Cutawkah Jesuh cu hnitkha vekih a khami thawn rawimi sabitti an pek; a tep ih a in duh lo. 35 Jesuh cu thinglamtah ah an khen ih a hnipuan cu camcawhfung zuukin an zem aw. 36 Cuih hnuah an to ih amah cu an kil. 37 "Hi pa cu Judah Siangpahrang Jesuh a si," tiah sual an puhnak kha an ngan ih a lu tlunah an tar. 38 Cun mi ṭha lo damiah pahnih Jesuh thawn thinglamtah parah an khen ve; pakhat a vorhlam ah, a dang pakhat a kehlam ah an thlai. 39 A kiangkapih a suksotu pawl tla in an diriam in an lu an sut hnawh ih, 40 "Biakinnpi bal tahratin ni thum sungah ka sak sal ding na ti a si lo maw! Pathian Fapa na si ahcun nangmah le nangmah run awla thinglamtah par ihsin rung ṭum aw he!" tiah an dekcok. 41 Cubangtuk in puithiam upa pawl le Daanthiam pawl le Judah upa pawl in an hmuhsuam ih, 42 midang cu a hum thei, asinain amah le amah cu a hum aw thei lo! Israel Siangpahrang a si lo maw si? Atu rori ah hin thinglamtah par ihsin a rung ṭum a si ahcun kan zum ding a si! 43 Pathian a rinsan ih Pathian Fapa ka si a ti si! Pathian in a hum duh maw kan zoh hnik pei cu!" tiah nautat ṭong in an ti. 44 Amah thawn an khenbetmi damiah pawl tla in cu bangtuk cun an nautat ve. 45 Sun laitak fangah ramsung pumpuluk ah thimkhawzing a tlung ih nazi pathum sung a thim. 46 Zanlam nazi pathum ah Jesuh cu napi in a au ih, "Eli, Eli, lema sabakthani?" a ti; a tican cu, "Ka Pathian, Ka Pathian, zianghrangah i tlansan?" ti a si. 47 Cutawkih a dingmi hrekkhat pawl in an thei ih, "Elijah a ko a si," tiah an ti. 48 An lakah pakhat pa cu a va tlan vurvo ih tidai a hawp thei zetmi puan a va lak ih sabit sungih a hnim hnuah funghreu parah a ṭemcih ih Jesuh cu a inter zik. 49 Asinain midang in, "Um hrih, amah run dingah Elijah a rat le rat lo kan zohhnik pei," tiah an ti. 50 Jesuh cu napi in a au sal ih a hnuk a cat. 51 Cule Biakinn puanzar cu a tlunlam ihsin a hnuailam tiang ṭhen hnih ah a tlek. Leilung a hnin ṭheh, lungpi an kuai ṭheh, 52 thlaan pawl an ong aw ih a rak thi ciami Pathian mithiang pawl an tho sal. 53 An thlaan ihsin an suak ih Jesuh cu thlaan in a thawhsal hnuah Khua Thianghlim sungah an lut ih mi tampi hmaiah an lang. 54 Ral bawipa pakhat le amah thawn Jesuh a kiltu ralkap pawl in linghnin le thil dang a cangmi hmuahhmuah kha an hmuh tikah an tuk a sum ih, "Hi pa hi Pathian Fapa taktak a si," tiah an ti. 55 Galilee ram ihsin Jesuh a rak thluntu le a rak bawm ṭheutu nunau tampi an um ih a hlat nawn in an rak cuan. 56 Cuih nunau lakah cun Mari Magdalene, Jeim le Josef ih nu Mari le Zebedi nupi tla an tel. 57 Zanlam a hung si tikah Arimathea khua ihsin milianpa pakhat a ra thleng. A hmin cu Josef a si ih Jesuh dungthluntu pakhat a si ve. 58 Pilat a va tong ih Jesuh ruak kha a dil. Jesuh ruak cu Josef hnenih pek dingah Pilat in thu a pek. 59 Cuticun Josef in Jesuh ruak cu a lak ih puan thar nemtein a tuam ih, 60 amah ih thlaan dingih lungkhermi thlaan thar sungah a phum. Cuih hnuah lungphengpi in thlaan kaa cu a kharta ih a fehsan. 61 Mari Magdalene le a dang Mari cu cutawk ahcun thlaanlam hoi in an to. 62 A thaisun Sabbath ni ah puithiam upa le Farasi pawl in Pilat an tong ih, 63 "Bawipa, hi thuphanpertu pa hin a nun laiah 'Nithum hnuah ka tho sal ding,' tiah a rak ti. 64 Curuangah a thlaan kha ṭhatein ni thumnak ni tiang kilter aw; culole a dungthluntu pawl in a ruak kha an fir pei ih misenpi pawl kha thihnak ihsin a tho sal zo a si, tiah an bum ding. Hi neta bumnak hi a hmaisa bumnak hnakin a poimawh sawn ding a si," tiah an ti. 65 Pilat cun, "A kiltu Rom ralkap pawl ret uhla thlaan kha a him thei tawkin tuah uh," tiah a ti. 66 Curuangah an feh ih thlaan cu a him thei tawkin an tuah; thlan khar lungpheng kha tacik an khen ih a lengin ṭha zetin an kilter.
1 Sabbath ni a liam ih a thaizing zingthlapit ah Mari Magdalene le a dang Mari cu thlaan zoh dingah an feh. 2 Hmakhatteah nasa zet in ling a hnin. Bawipa ih vancungmi pakhat cu vancung ihsin a rung ṭum ih thlaan sangka khar lungphengpi cu a ṭhawn ih a parah a to. 3 A hmuihmel cu nimthla bangtuk a si ih a hnipuan cu vur bangin a vaar. 4 Thlan kiltu pawl cu an ṭih tukah an khur ih mithi bangtuk an si. 5 Vancungmi cun nunau pawl hnenah, "ṭih hlah uh; thinglamtah parih an thahmi Jesuh nan hawl ti ka thei. 6 Hinah a um lo, a rak simcia bangtuk in thihnak ihsin thawhter sal a si zo. An phumnak hmun hi ra zohhnik uh. 7 Zamrang in va feh uhla a dungthluntu pawl kha 'Thihnak ihsin thawhter a si zo; nan hmaiah Galilee ah a feh ding ih cutawkah nan hmu ding!' tiah va sim uh. Ka lo simmi hi hngilh hlah uh," tiah a ti. 8 Curuangah zamrang zetin thlaan ihsin an tlung; an ṭih phah, an lung a awi phah, cuticun dungthluntu pawl sim dingah an tlan. 9 Rinlopi-ah Jesuh in a tong hai ih, "Nan hnenah daihnak um hram seh," tiah a ti. An va pan ih a ke an va pom ih an biak. 10 Jesuh in an hnen ah, "Nan thinphang hlah uh. Ka unau pawl kha Galilee ih feh dingin va sim uh. Cutawkah in tong ding!" tiah a ti. 11 Cutiih nunau pawl an feh laiah, thlaan kiltu ralkap hrekkhat pawl cu khawpi sungah an feh ih puithiam upa pawl hnenah thlaan ih thil a cangmi hmuahhmuah kha an sim. 12 Puithiam upa pawl le Judah mi upa pawl an tong aw ih thu an ruatkhawm. Ralkap pawl kha nawhthuh paisa tampi an pek ih, 13 "Kan ihthat sungah zanah a dungthluntu pawl an ra ih a ruak kha an fir a si, nan ti pei. 14 Cumi cu Mangki bawipa in a theih khalle nan phan ding zianghman a um lo, mawhnak an nei lo tiah kan lo simsak ding," tiah an ti. 15 Thlan kiltu ralkap pawl in paisa cu an lak ih an simmi vekin an tuah. Cuih thu cu Judah mi pawl cun tuihsun tiangin an rel ṭheumi a si. 16 Dungthluntu hleikhat pawl cu Jesuh ih a fial bangtuk in Galilee tlang parah an feh. 17 Amah cu an hmu ih an biak, asinain a hrek cun an zum lo. 18 Jesuh cun a pan hai ih an hnenah, "Lei le vanih thuneihnak hmuahhmuah cu ka hnenah pek a si zo. 19 Curuangah feh uhla miphun hmuahhmuah ka dungthluntu va siter uh; Pa le Fapa le Thiang Thlarau hmin in baptisma va pe uh. 20 Cule ka thupekmi hmuahhmuah thlun dingin va zirh uh. Hngilh hlah uh, san a cem lai hlanlo nan hnenah ka um ringring ding," tiah a ti.
1 Pathian Fapa Jesuh Khrih ih Thuthang ṭha cu hiti in a si. 2 A thokah profet Isaiah in: "Pathian in 'Na hmaiah ka palai ka thlah ding; Na hrangih lamzin sialtu dingah,' 3 Mi pakhat cu ramṭhingah a au ih, 'Bawipa ih hrangah lamzin sial uh, A fehnak ding lamzin kha dingter uh,' a ti," tiah a ngan. 4 Curuangah Johan cu ramṭhing ihsin a ra ih baptisma a pek hai ih thu tla a sim phah vivo. Mipi pawl kha, "Nan sualnak sir uhla baptisma lak uh. Cuticun Pathian in nan sualnak a lo ngaithiam ding," tiah a ti. 5 Judea peng le Jerusalem khawpi ihsin mi tampi Johan ih thusimmi ngai dingah an ra. An sualnak an phuang ih Jordan tiva ah baptisma a pek hai. 6 Johan cu kalauk hmulih tahmi hnipuan a hruk ih a taai ah savun taikhap a khap. A rawl eimi cu kharbok le hramlak khuaitizu an si. 7 Mipi hnenah, "Ka dungih a ra dingmi pa cu keimah hnakin a nasa sawn a si. Kun tahrat in a kedam hri phoih saktu ding hmanah kei cu ka tlak lo. 8 Kei cun tidai in baptisma ka lo pek. Asinain anih cun Thlarau Thianghlim in baptisma a lo pek hai ding," tiah a ti. 9 Cuih hnu rei loteah Galilee peng Nazareth khua ihsin Jesuh cu a ra ih Jordan tiva ah Johan in baptisma a rak pek. 10 Jesuh cu ti sung ihsin a hung suah vete in van a ong aw ih Thlarau cu thuro bangin a parih a rung fut kha a hmu. 11 Van ihsin aw pakhat a rung thang ih, "Nangmah cu ka duhdawtmi ka Fapa na si. Na parah ka lung a kim ngaingai," tiah a run ti. 12 Hmakhatteah Jesuh cu ramṭhing ah Thlarau in a fehter ih 13 cutawkah ni sawmli a um ih Satan in a hniksak. Ramsa pawl thawn an um. Asinain vancungmi pawl in an rung tuamhlawm. 14 Johan kha thawngih an thlak hnuah Jesuh cu Galilee ah a feh ih Pathian ih Thuthang ṭha a sim. 15 "Tikcu a kim zo ih Pathian Uknak a nai zo. Nan sualnak pawl sir uhla Thuthang ṭha cu zum uh," tiah a ti. 16 Jesuh cu Galilee Tili kapih a feh laiah ngakaitu pahnih Simon le a nau Andru kha sur in nga an kaih rero laifang a hmu. 17 Jesuh in an hnenah, "I thlun uhla milai kaitu ah ka lo tuah ding," a ti. 18 Hmakhatteah an sur an taan ih amah cu an thlun. 19 Hla deuh a va feh ih Zebedi ih fapa Jeim le Johan te unau hnih a hmu. Anmah cu an lawng sungah an um ih an sur an tholh rero. 20 Jesuh in a hmuh vete in an pahnih in a ko. Cuticun an pa Zebedi le an hlawhfa pawl cu lawng sungah cun an taan ih Jesuh cu an thlun. 21 Jesuh le a dungthluntu pawl cu Kapernaum khua ah an ra ih a thaisun Sabbath ni ah Jesuh cu pumkhawmnak inn Sinakok ah a feh ih thu a zirh. 22 A thuzirh daan a theitu pawl cu an mang a bang ngaingai, ziangahtile Daanthiam pawl vek a si lo, anih cun thunei zetin a zirh a si. 23 Cuih caanah khawsia in a polhmi mipa pakhat cu Sinakok ahcun a ra ih, 24 "Nazareth mi Jesuh, ziangso kannih in hai? Kanmah siatsuah dingah maw na rat? Zo na si ti ka lo thei: Pathian ih thlahmi Mi Thianghlim na si," tiah a au ciamco. 25 Jesuh in khawsia cu, "Daite in um aw! Kha pa sung in suak aw!" tiah thu a pek. 26 Khawsia in cupa cu nasa zetin a thin ih ring zetin a auter hnuah a suak. 27 Mipi cu an mang a bang ngaingai ih pakhat le pakhat, "Ziangvek thu so a si? Zirhnak thar phun khat maw a si? Hi pa hi khawsia parah thu a nei ih 'Suak uh!' a tile an suak fawn," tiah an ti aw. 28 Cuticun Jesuh thuhla cu Galilee peng khuazakip ah zamrang zetin a thang. 29 Jesuh le a dungthlun pawl cu Jeim le Johan tel in, sinakok ihsin an feh ih Simon le Andru inn lam pan in an feh. 30 Simon ih pizon kha khurhnat in a na ih a tho thei lo; Jesuh a thlen vete in a nat thuhla cu an sim. 31 Mina hnenah cun a feh ih a kut a kai ih a thawhter. A khurhnat cu a reh lohli ih anmah a tuamhlawm thei. 32 Ni a tlak ih zanlam a si tikah mipi in mina hmuahhmuah le khawsia ih polhmi pawl kha Jesuh hnenah an rat pi. 33 Cuih khua ih mi hmuahhmuah cu cuih inn hmai ahcun an ra tong khawm aw ṭheh. 34 Jesuh in an natnak phunphun kha a damter ih an sungih khawsia pawl tla a dawisuak ṭheh. Khawsia pawl cu kam khatte hman a ṭongter lo; ziangahtile zo a si ti kha an thei. 35 A thaizing, zingthlapit ni suah hlanah, Jesuh cu a tho ih inn ihsin a suak. Hnarpawn ah a suak ih mi um lonak ah thla a cam. 36 Asinain Simon le a rualpi pawl cu amah hawl ah an feh ih, 37 an va hmuh tikah a hnenah, "Mi hmuahhmuah in an lo hawl," tiah an sim. 38 Asinain Jesuh in, "Hi kiangkap khua pawl khalah kan feh vivo ding, an hnenah thu ka sim ve ding, ziangahtile cucu ka rat hnawhsanmi a si," tiah a ti. 39 Curuangah Galilee peng pumpuluk tlawng in sinakok ah thu a sim vivo ih khawsia pawl a dawi suak vivo a si. 40 Phaarnat in a na mipa pakhat cu Jesuh hnenah a ra ih a khuk bilh in, "Na duh a si ahcun i thiangter thei ko," tiah bomnak a dil. 41 Jesuh cun a zaangfah ngaingai ih a kut in a hei dawh hnuah a tham ih, "Ka lo thiangter duh zet a si, thiang thlang aw," tiah a ti. 42 Hmakhatteah a phaarnat cu a dam ih a thiang. 43 Cule Jesuh in cupa cu a fehter ih, fektein thu a tiam, 44 "Ngai aw! Hi thu hi zohman na sim lo pei. Puithiam hnenah va feh vurvo awla rak lo zohseh; cule mi hmuahhmuah in a dam a si ti an lo theihnak dingah Moses thupekmi vekih thawinak va pe aw," tiah fektein thu a tiam. 45 Asinain cupa cu a feh ih a damnak thu cu hmunkip ah a than vivo. Cuih thu a rel tamtuk ruangah Jesuh cu khawsungah mi hmuhhngan in a feh thei nawn lo. Hnarpawn fianhrial sawnah amah lawng a um ih cutawkah hmunkip ihsin mi in an ra pan.
1 Ni malte a rei hnuah Jesuh cu Kapernaum khua a ra thleng sal ih inn ah a um ti thu kha a thang ciamco. 2 Mi tamtuk an rat ruangah inn sung cu a lawngnak pakhat hman a um lo; sangka kiang a leng tiangin an khat ṭheh. An hnenah Jesuh in thu a sim; 3 cuti ih a sim laifangah mi pali in mizengpa pakhat Jesuh hnenah an rak zawn. 4 Milai an tam tuk ruangah Jesuh hnenah cun an thlenpi thei lo. Curuangah Jesuh umnak zawn diphun kha an bauh ih mizengpa cu a ihphah parah it in an vun thlak. 5 Zumnak an neih zia kha Jesuh in a hmuh tikah mizengpa hnenah cun, "Ka fapa, na sualnak cu ngaithiam a si zo," tiah a ti. 6 Cutawkih a to vemi Daanthiam hrekkhat pawl in, 7 "Ziangtin so hi vekin a ṭong ngam? Pathian thangsiat a sisi. Pathian siar lo zoso mi sualnak a thlah thei?" tiah an thinlung tein an ti. 8 An thinlung cu Jesuh in hmakhatte ah a thei ih an hnenah, "Ziangah so hi bangtuk in nan ruat? 9 Hi mizengpa hnenah hin 'Na sualnak cu ngaithiam a si zo,' ti maw, 'Tho awla na ihphah lak awla va feh aw,' tiso a ol sawn? 10 Milai Fapa in leilung parah mi ih sual ngaithiam theinak a nei a si, ti hi nan hnenah ka langter duh a si," tiah a ti. Curuangah mizengpa hnenah, 11 "Tho aw; na ihphah la awla na inn ah va tin aw, ka lo ti," tiah a ti. 12 An zatein an zoh ih cu laifangah mizengpa cu a tho; a ihphah a lak ih zamrang zetin a feh. An zatein an mang a bang tuk lawmmam ih "Hi bangtuk cu kan hmu dah lo," an ti ih Pathian an thangṭhat. 13 Jesuh cu Galilee Tili kapah a va feh sal. Mi tampi a hnenah an ra ih thu a zirh. 14 A feh phahah siahkhongtu, Alfias ih fapa Levi a zungkhaan sungih a to kha a hmu. Jesuh in, "I thlun aw," a ti. Levi cu a tho ih a thlun. 15 Cuih hnuah Jesuh cu Levi inn ah rawl a ei. Siahkhong le misual tiih hnonmi tampi in Jesuh cu an thlun ih cu pawl ṭhenkhat cu Jesuh le a dungthluntu pawl thawn rawl an ei tlang. 16 Farasi mi Daanthiam hrekkhat pawl in Jesuh cu hi bangtuk hnonmi misual le siahkhong pawl thawn rawl a ei kha an hmuh tikah a dungthluntu pawl kha, "Ziangah so hi bangtuk mi pawl thawn rawl a ei?" tiah an ti. 17 Cuih thu cu Jesuh in a thei ih, "Mi harhdam pawl in sibawi an hai lo; a na mi lawng in an hai a si. Miding pawl ko dingah ka ra lo, misual pawl ko dingah ka ra a si," tiah a ti. 18 Voikhat ah baptisma petu Johan thluntu pawl le Farasi mi pawl rawl an ul. Mi ṭhenkhat pawl Jesuh hnenah an ra ih, "Ziangah so baptisma petu Johan dungthluntu pawl le Farasi thluntu pawl cu rawl an ul na'n nang a lo thluntu pawl cu rawl an ulh lo?" tiah an sut. 19 Jesuh in, "Mopuai ih sawmmi pawl khi rawl an ul tiin nan ruat maw? An ul lo! Mopa an hnenih a um sungah cun rawl cu an ul lo ding. 20 Sikhalsehla an hnen ihsin mopa lak hlo a si ni a thleng ding ih cutikah rawl cu an ul ve leh ding. 21 "Angki hlun belhnak ah zohman in puan tharte an hmang dah lo; ziangahtile belhnak puan thar cu a com ding ih hnipuan hlun sawn kha a tlekter ding ih a ong ciami kha a kau sinsin ding. 22 Cun sabitti thar kha savun thawl hlun sungah an than dah lo, ziangahtile sabitti thar in savun thawl hlun cu a kuaiter ding ih sabit le a thawl cu an cemral ding. Curuangah sabitti thar cu savun thawl thar sungah than sawn ding a si," tiah a ti. 23 Jesuh cu Sabbath ni ah sangvut lo sungin a feh. Amah thawn hmun khatah a dungthluntu pawl tla an feh ve ih sangvut vui kha an zuut phah. 24 Farasi pawl in Jesuh cu, "Zohhnik, na dungthlun pawl Sabbath ni ah hi bangtuk thil an tuah hi kan Daan ih duh lomi a si," tiah an ti. 25 Jesuh in, "David in ei ding zianghman a neih lo tikah ziang a tuah ti cu nan siar dah lo maw si? Amah le a rualpi pawl an ril a rawng zet ih, 26 Pathian inn sungah lut tahratin Pathian hnenih hlanmi sang kha a ei. Culai ih Puithiam sang cu Abiathar a si. Kan Daan sung vek a si ahcun cuih sang cu puithiam lawngih eithiang a si. Asinain David in a ei ih cuih tlunah a rualpi pawl tla a pek," tiah a ti. 27 Cule Jesuh in, "Sabbath cu minung hrangih tuahmi a si; minung hi Sabbath hrangih tuahmi a si lo. 28 Curuangah Milai Fapa cu Sabbath tlun khalah Bawi a si," tiah a sim.
1 Cule Jesuh cu sinakok ah a va feh sal ih cutawkah kut zengpa pakhat a rak um. 2 Jesuh kha sualpuh a duhtu pawl tla an rak um ih curuangah Sabbath ni ah a damter ding maw damter lo ding tiah ṭhatein an zoh. 3 Jesuh in cupa cu, "Hmailam ah hin ra suak hnik," tiah a ti. 4 Cule mipi cu, "Kan Daan in Sabbath ni ah ziang tuah ding so in on? Mi bawm ding maw harsatnak pek ding so? Mi nunnak runsuah ding maw siatsuah ding so?" tiah a sut. Asinain annih cu kam khat hman an ṭong lo. 5 Jesuh cun a thinheng in a zoh vivo hai ih an thinlung a ruh zia kha a hmuh tikah a riah a sia zet fawn. Cule mi pa cu, "Na baan hawi aw," a ti. A baan cu a hawi ih a dam ngaingai. 6 Cutikah Farasi mi pawl cu sinakok ihsin an suak ih Herod ih milai pawl thawn Jesuh thah theinak dingah thu an ruatkhawm. 7 Jesuh le a dungthluntu pawl cu Galilee Tili ah an va feh; miburpi in Jesuh cu an thlun. Anmah tla cu Galilee peng, Judea peng, 8 Jerusalem khua, Idumea peng, Jordan tiva ihsin nisuahnak lam ram, Tai-ar le Sidon kiangkap ram pawl tiang in a rami an si. Jesuh ih thil tuahmi pawl an theih ruangih a rami an si. 9 Milai an tamtuk lawmmam ih in ciil ciamco pang ding ti a phan ruangah dungthluntu pawl kha lawng pakhat timtuah cia in a retter. 10 Mi tampi a damter ih mina hmuahhmuah in an tham ngah theinak dingah an nor ciamco. 11 Cun khawsia polhmi pawl in an hmuh tikah a hmaiah an bok ih, "Nangmah cu Pathian Fapa na si," tiah an au ciamco. 12 Jesuh in cuih khawsia polhmi pawl cu amah kha zo a si ti an rel lonak dingah thu a pek. 13 Cule Jesuh cu tlangpar ah a hung kai ih a hnenah a mi duhmi pawl a ko. A hnenah cun an ra ih, 14 minung hleihnih a hril ih 'Tirhthlah pawl,' tiah a ko. "Ka hnenih um dingah ka lo hril. Cule thusim dingah ka lo thlah ding ih, 15 khawsia dawihlo theinak thu tla nan nei ding," tiah a ti. 16 Hleihnih a hrilmi pawl cu hihi an si. Simon (Piter tiih hmin a pekmi), 17 Zebedi ih fapa Jeim le a nau pa Johan (Jesuh in Boanerges tiah hmin a pek hai, a tican cu 'Khawri Fa,' tinak a si), 18 Andru, Filip, Bartholomeo, Matthai, Thomas, Alfias ih fapa Jeim, Thaddaeus, Phunṭan Simon, le 19 Jesuh a zuartu Judas Iskariot tla an si. 20 Cule Jesuh cu inn ah a tlung. A hmaisa vek thotho in mi tam ngaingai an ra ih Jesuh le a dungthluntu pawl cu rawl ei caan hman an nei lo. 21 Cuih thu cu a sungte pawl in an theih tikah, "Jesuh cu a aa zo," tiah mi in an ti fawn ruangah amah kilkhawi dingin an feh. 22 Jerusalem ihsin a rami Daanthiam hrekkhat pawl in Jesuh cu "Beelzebul in a kai zo a si. Khawsia uktu bawi ih huham in khawsia pawl a dawi thei a si," tiah an ti. 23 Curuangah Jesuh cun a ko hai ih an hnenah tahṭhimnak thawn thu a sim. "Ziangtin so Satan in Satan lala cu a dawi thei ding? 24 Ram pakhatkhat cu ṭhen tampi ah a ṭhen aw ih anmah le anmah an do awk ahcun cuih ram cu an ṭekdarh ding. 25 Innsang pakhat sungah pakhat le pakhat an to aw ih an thawi awk a si ahcun cuih innsang cu an ṭeekdarh ding. 26 Cubangtuk in Satan in Satan lala a dawisuak a si ahcun an ṭhenṭhek awk ruangah an ram cu rei a awh lo ding ih a cemral ding a si. 27 "Micak pa cu amah an ṭem hmaisa lo ahcun zohman in a inn bauh tahratin a thilri an lak sak thei lo ding. 28 "Thungaite in ka lo sim: minung hi ziangvek in an sual ih ṭong siava tiang an ṭong hmanah ngaihthiam an si ding. 29 Sikhalsehla Thlarau Thianghlim a thangsiattu cu ngaidam a si lo ding, ziangahtile kumkhua daih sualnak a tuah a si," tiah a ti. 30 Jesuh kha "Khawsia a sungah a lut," tiah an ti ruangah Jesuh in hiti ih a ṭongnak hi a si. 31 Cule Jesuh ih nu le a naule pawl an ra. Inn lengah an ding ih inn sungah mi an vun tirh. 32 A kiangah mi tampi an rak to ih annih in, "Zohhnik, na nu le na naupa pawl le na farnu pawl leeng ah an um, nangmah an lo poi," tiah an ti. 33 Jesuh in, "Zoso ka nu cu a si? Ka naule tla cu zoso an si?" a ti. 34 A kiangkapih a totu mipi pawl khi zoh phah in, "Hinah ka nu le ka naule tla cu an um ko a si. 35 Zokhal sisehla Pathian duhnak a tuahtu hmuahhmuah cu ka unau, ka farnu le ka nu an si," tiah a ti.
1 Jesuh in Galilee Tilikap ah thu a zirh sal. A kiangih a ra khawmmi minung pawl cu an tam tuk lawmmam ruangah lawng sungah a lut ih a to. Long cu tipar hlatnawn ah a um ih misenpi pawl cu tili kap tidai ri tiangin an ding. 2 Tahṭhimnak hmangin thu tampi a zirh. 3 Jesuh cun, "Ngaihnik uh: Voikhat ah mipa pakhat a um ih thlaici vorh dingin lo ah a feh. 4 Lo sungih thlaici a vorh tikah a hrekkhat cu lamzin tluanah an tla ih vate in an ra sar thluh. 5 A hrekkhat cu leilung malnak lungsedaap lakah an tla. Leilung a sah lo ruangah thlaici cu hmakhatte ah an kho. 6 Asinain ni a hung sa ih thlaikho a ṭo pekte pawl cu a hun sat. An hram a thuk lo ruangah thlaikho cu an caar cing ṭheh. 7 A hrekkhat cu hlingbur lakah an tla; hlingkung pawl cu an ṭhang ih thlaikho cu an zaap ih vuirah nei thei loin an um. 8 Asinain thlaici hrekkhat cu leilung ṭhatnak ah an tla, ṭhatein an kho ih an ṭhang ih vui an nei. A hrek cu a let sawmthum, a hrek cu a let sawmruk, a hrek cu a let zakhat tiangin thlai thar an suak," tiah a sim. 9 A netnak ah, "Theihnak hna a neitu cun thei uh," tiah a ti. 10 Jesuh cu amah lawng a um tikah a thusimmi a rak theitu hrekkhat pawl le dungthluntu hleihnih pawl a hnenah an ra ih a tahṭhimnak pawl simfiang dingah an ra dil. 11 Jesuh in, "Pathian Uknak thuthup cu nan hnenah pek a si zo. Sikhalsehla lenglamih a ummi pawl cu tahṭhimnak lawng in sim an si; 12 curuangah, 'An zoh rero ding na'n an hmu lo ding; An ngai rero ding na'n an thei thei lo ding. Ziangahtile an hmuh thei ih an theih thei ahcun, Pathian hnenah an kir ding ih Ngaithiam an si ding,'" tiah a ti. 13 Cule Jesuh in, "Hi thlaici vorh tahṭhimnak hi nan thei thei lo maw? Cu a si ahcun ziangtinso tahṭhimnak dang teh nan theih thiam ding? 14 Thlaici vorhtu in Pathian thu a vorh. 15 Mi hrekkhat cu lamzin tluan ih a tlami thlaici bangtuk an si. Pathian thu cu an thei, asinain an theih vete in Satan a ra ih an sungih tuh mi thu cu a laksak. 16 Mi hrekkhat cu lungsedaap lakih a tlami thlaici bangtuk an si. Pathian thu an theih vete in lungawi zetin an pom. 17 Sikhalsehla an sungah thukpi a pil lo ih rei a daih lo. Cu ruangah Pathian thu ruangih harsatnak le hremnak a thlen tikah hmakhatte ah an leet sal. 18 Mi hrekkhat cu hlingbur lakih a tla mi thlaici bangtuk an si. Pathian thu cu an thei ngah, 19 asinain hi leilung tlun nunnak thu ih donharnak, len duhnak le a dang duhnak le helhkamnak dangdang in a ṭem ih a khuh ruangah rah an rah thei lo. 20 Mi dang cu leilung ṭhatnak ih a tlami thlaici bangtuk an si. Pathian thu cu an thei, an pom hnget ih rah an rah. Let sawmthum, let sawmruk le let zakhat tiangin an rah a si," tiah a sim. 21 Jesuh in, "Zotal in mei-inn cu kho hnuai ah siseh, ihkhun hnuai ah siseh nan re dah maw? Mei-inn vannak tung parah nan ret ṭheu a si lo maw? 22 A kelkawmih thuhmi pawl kha mipi hmuh ah langter a si ding ih a thupte ih tuahmi pawl kha phuan ṭheh a si ding. 23 Theihnak hna a neitu cun thei uh," tiah a ti. 24 Jesuh in an hnenah, "Nan theihmi kha ṭhatein ruat uh. Midang tahnak ih nan hmanmi kha Pathian in nanmah tahnak ah a hmang ve ding, cu hnakih nasa sawn hman in a hmang ding a si. 25 A neimi cu pek beet a si ding ih a nei lomi cu a neihsunmi hman kha lak sak a si ding," tiah a ti. 26 Jesuh in, "Pathian Uknak cu hi bangtuk a si. Mi pakhat in a lo ah thlaici a vorh. 27 Zan ah a it, zingah a tho ih sunah hna a ṭuan, cuih sungah thlaici cu an rak kho ih an ṭhang. Asinain ziangtin cuvekin a cang, ti a thei lo. 28 Leilung in thlaici kho cu a ṭhangter ih rah a rahter, hmaisabik ah hnah no an suak, cuih hnuah an vui ih neta bikah a fang an um. 29 A fang a cut tikah hnaṭuantu pa in fang ah caan a cut ruangah fangahnak favah in a fang cu a at," tiah a sim. 30 Jesuh in, "Pathian Uknak cu ziang bangtuk a si tiin so kan ti ding? Simfiangnak ah ziang tahṭhimnak so kan lak ding? 31 Anṭam ci bangtuk a si. Mi pakhat in leilung tlunih thlaici fate bik anṭam ci cu a lak ih leilung ah a vorh. 32 Tikcu malte hnuah a kho ih rawl kung dang hnakin a tum bikah a cang. Hnge le ṭeek tumpipi tla a nei thei ih vate tla cu a hnah hneem ah bu tla an sak," tiah a ti. 33 Hi bangtuk tahṭhimnak dangdang tla hmangin an hnenah an theih theinak ding tawpin thu a sim. 34 Tahṭhimnak hmang loin an hnenah thu a sim dah lo. Asinain a dungthlun pawl thawn anmah lawngih an um tikah ziang hmuahhmuah fiangtein a sim. 35 Cuih sun zanlam ah Jesuh in a dungthluntu pawl cu, "Tili ih khatlam ralah va feh uh si," tiah a ti. 36 Curuangah misenpi pawl cu an taan ih dungthluntu pawl cu lawng sungah an lut. Cuih lawng sungah Jesuh cu a rak to zo ih lawng cun an fehpi. Cunah lawng dang pawl tla an um. 37 Rinlopi ah thlipi nasa zetin a hrang ih tilet tho cu lawng sungah a lut vivo ih lawng sungah cun tidai a khat zik thlang. 38 Jesuh cu lawng ih mei lamah a um ih tokham parah a rak itthat. Dungthluntu pawl cun an ṭhang ih, "Sayapa, kan hlohral thluh ding hi na poisa lo maw si?" tiah an ti. 39 Jesuh cu a hung tho ih thlipi cu, "Hrang nawn hlah!" tiah thu a pek ih tilet cu, "Dai aw!" tiah a ti. Cutikah thli cu hrang nawn loin a um ih tilet khal a dai khepkhep. 40 Jesuh in a dungthluntu pawl hnenah, "Ziangah so cuti lawmmam ih nan ṭih? Zumnak nan nei hrih lo maw si?" tiah a ti. 41 Cumi cu a mak tuk an ti ih an mang bangin pakhat le pakhat, "Hi pa hi zo bik so a si pei? Thlipi le tilet hmanin a thu an ngai hi!" tiah an ti aw rero.
1 Jesuh le a dungthluntu pawl cu Galilee Tili khatlam ral Gerasene peng ah an va thleng. 2 Jesuh cu lawng sung ihsin a suah vete in cutawkah thlaan lungkua sungih a ummi pa a ra suak ih Jesuh a ra tong. Cupa cu khawsia ih polhmi a si ih, 3 thlaan lakih a ummi a si. Zohman ih hreen thei lomi pa a si. 4 Voi tampi thir cikcin rori in a kutke an ṭem ṭheu na'n an ṭem tinte in thirhri cu a ticat ih a ke ṭemnak thirhri tla cu a botcat ṭheh, zohman a kaihrem theitu an um lo. 5 A sun a zan ih thlaan lak le tlang lakah a vak ih a au phahphah ih amah le amah lungto in a sun, a at aw phah ṭheu. 6 Hla nawn ihsin Jesuh cu a hei hmu; a va tlan ih a hmai ah a khuk a bilh ih, 7 a aw neih patawp in, "Maw Jesuh, Cungnungbik Pathian ih Fapa! Nang le kei ziangso kan seng aw? Pathian hmin in ka lo dil, i hrem hramhram hlah aw!" tiah a au ciamco. 8 Hi bangtuk ih a aunak cu Jesuh in, "Thlarau siava, hi pa sung ihsin suak aw," a rak ti ruangah a si. 9 Cule Jesuh in, "Na hmin zoso a si?" tiah a sut. Cupa cun, "Ka hmin cu 'Burpi,' a si, ziangahtile kan tam ngaingai a si," tiah a let. 10 Cupa cun thlarau siava pawl cu cuih ram ihsih dawihlo lo dingah Jesuh cu a dil ciamco. 11 Cutawk kiangkap tlangmual ah vok rual tampi an tlang. 12 Thlarau siava pawl cun Jesuh cu, "Vok hnenah in thlah awla an sungah in lutter hram aw," tiah an dil. 13 A dil vek ih a fehter hai ih thlarau siava pawl cu cupa sung ihsin an suak ih vok sungah cun an lut. Cule vok rual cu thawnghnih hrawng an si ih khaamhraap ihsin an vung dawp ciammam ih tili sungah an tla that ṭheh. 14 Vok khaaltu pawl cu an tlan ih cuih thuhla cu khawsung ah le lo lakah an sim ciamco. Mipi pawl cu thil cangmi zoh dingah an va feh. 15 Jesuh hnenih an thlen tikah khawsia 'Burpi,' ih a rak polh mipa khal an va hmu. Cutawkah cun a to ih hnipuan hruk in le lungfim in an va hmu. Curuangah an thin a phang ngaingai. 16 Cuih thil a hmutu pawl in khawsia polhmi pa le vok rual parah ziang vek thil a cang ti kha mipi pawl an sim. 17 Cule an ram tlansan dingah Jesuh cu an dil ciamco. 18 Jesuh cu lawng sungih a luh zawng ah khawsia ih rak polh dahmi pa cun, "Na hnenah ka feh ve pei," tiah a dil. 19 Asinain Jesuh in a duh lo. "Na inn ah va tlung sawn awla na sungte pawl hnenah Bawipa ih a lo tuah sakmi le a lo zaangfahnak thuhla pawl cu va sim aw," tiah a ti. 20 Cuticun cupa cu Dekhapolis ram sung hmuahhmuah ah a feh ih Jesuh ih a tuah sakmi thuhla cu a sim. Cuih thu a theitu hmuahhmuah cu an mang a bang ṭheh. 21 Jesuh cu Tili khatlam ral ah a va feh sal. Cutawk Tilikap ahcun mi tampi Jesuh kiangkap ah an khawm aw. 22 Sinakok uktu pakhat a si mi Jairas cu a ra ih Jesuh a hmuh tikah a ke hramah a bok ih zaangfahnak a dil. 23 "Ka fanute besia zetin a na. Ra hram awla a parah na kut ra suang aw, cule a dam ding ih a nung ding a si," tiah a dil. 24 Cule Jesuh cu Jairas hnenah feh dingin a pok. Mitampi in Jesuh an thlun ruangah a kilkip in an run eng cupco. 25 Mitampi lakah cun thidok nat in kum hleihnih a na zomi nunau pakhat a um. 26 Sibawi tampi in an tuah zo na'n a dam cuang lo. A neihmi tangka hmuahhmuah a hmang zo na'n a ṭha lam si loin a besia deuhdeuh. 27 Cunu cun Jesuh thu a rak thei ih miburpi lakin Jesuh dunglam in a ra. 28 "A puan ka tham thei ahcun ka dam ko ding," tiah a ruat. 29 Curuangah Jesuh puan cu a tham. Cutiih a tham vete in a thisuak cu a reh ih ka natnak ihsin ka dam zo ti kha a thei. 30 Jesuh in a sung ihsin a huham a suah kha a thei lohli ih miburpi lamah her in, "Zoso ka puan a tham?" tiah a sut. 31 A dungthlun pawl in, "Miburpi in an lo nor cupco hi na hmu ko. Ziangtin so 'Zoso ka puan a tham?' na ti," tiah an ti. 32 Sikhalsehla Jesuh cun ka puan a thamtu cu zo bik so a si, tiah a zoh rero. 33 Cutiih thil a cangmi cu nunau nu in a theih tikah ṭih le ṭhia phah in a ra ih Jesuh kehram ah a khuk a bilh ih thudik kha a sim. 34 Jesuh in a hnenah, "Ka fanu, na zumnak in a lo damter zo. Dai tein va feh aw, na natnak cu damta seh," tiah a ti. 35 Jesuh cutiih a ṭong rero laiah cun Jairas inn ihsin thlahmi zualko an ra thleng ih Jairas cu, "Na fanu a thi zo. Ziangah so Sayapa cu na hnaihnok duh nawn rero," tiah an ti. 36 Jesuh in cuih thu an simmi cu ziang hmanah a siar lo ih Jairas hnenah cun, "Zianghman phang hlah, a zum lawng zum aw," tiah a ti. 37 Cule Jesuh in Piter le Jeim le a nau Johan siar lo zohman amah a thlunter siang nawn lo. 38 Jairas inn cu an va thleng ih ṭapraak le hnok ceelceel ih an um kha Jesuh in a hmu. 39 An hnenah a vung lut ih, "Ziangah so hnok ceelceel ih nan um? Ziangah so nan ṭah nan raak! Hi nauhak nu hi a thih ual lo; a itthat a si," tiah a ti. 40 Annih in Jesuh cu an hnihsan meen. Curuangah an zatein khawlengah a suahter ṭheh. Nauhak nu ih nu le pa le a dungthlun pathum cu a ko ih nauhak nu an retnak khaan sungah cun an vung lut. 41 Nauhak nu cu a kut in a vun kai ih, "Talitha koumi," tiah a ti. Cumi cu, "Nute tho aw ka lo ti," tican a si. 42 Hmakhatteah nauhak nu cu a tho ih a feh thei. (Amah cu kum hleihnih mi a si.) Cumi an hmuh tikah an mang a bangtuk lawmmam. 43 Sikhalsehla Jesuh in zohman sim lo dingin thu a pek ih, "Ei ding ziangmaw tal pek uh," tiah a ti.
1 Jesuh cu cutawk ihsin a feh ih a khua ah a dungthlun pawl thawn an kir. 2 Sabbath ni ah an sinakok sungah thu a zirh. Cunah mi tampi an um ih a thuzirhmi an theih tikah an mang a bang ngaingai. "Hi hmuahhmuah hi khuiinso a lak? Hi bangtuk fimnak hi khuiinso a ngah? Ziangtin so mangbangza hi a tuah thei? 3 Mari fapa lettama, Jeim le Josef le Judas le Simon teih u kha a si lo sawm? A farnu pawl tla hinah an um lai a si lo maw?" an ti. Cuticun Jesuh cu zianghman ah an rel lo. 4 Jesuh in ah hnenah, "Profet cu amah ih suahnak khua le ram, a sungkhat le a innsang siar lo hmun dangah cuh upatnak a tong a si," tiah a ti. 5 Cutawkah cun mina malte parah a kut a suang ih a damter; cumi siar lo mangbangza zianghman a tuah lo. 6 Zumnak an neih lo ruangah Jesuh cu a mang a bang ngaingai. Cule Jesuh cu kiangkap khua ah a feh ih thu a zirh vivo. 7 Dungthluntu hleihnih kha a ko ih pahnih pahnih in a thlah. Ramhuai neh theinak thu a pek ih, 8 "Khual nan tlawnnak ah kianghrol siar lo a dang zianghman nan keng lo pei: rawl siseh, cawdip siseh, nan kordip ah tangka siseh nan keng lo pei. 9 Kedam cu dam uh, asinain angki a hlei in keng hlah uh. 10 Tlun-inn a lo ontu ih inn ah khua dangih nan feh sal hlan lo caam uh. 11 Nan thlennak khua pakhat in, tlun-inn an lo on duh lo ih nan thu khal an ngai duh lo a si ahcun, tlansan uhla nan ke ih leivut kha thinta uh. Cumi cu an hrangah ralrin peknak a si ding," tiah thu a pek. 12 Cuticun an feh ih mi hmuahhmuah an sualnak sir aw dingah thu an sim. 13 Ramhuai tampi an dawi ih mina tampi tla olif hriak an culh ih an damter. 14 Jesuh thuhla cu khuazakipih a than ruangah Siangpahrang Herod tla in cuih thu cu a thei ve. Mi hrekkhat cun, "Baptisma petu Johan kha a nung sal a si! Curuangah hi bangtuk in mangbangza tuah theinak huham a nei," tiah an ti. 15 Mi dang cun, "Elijah a si," an ti. Mi dang cun, "Khuahlan laiih profet pawl vek profet pakhat a si ko," an ti. 16 Cumi cu Herod in a theih ve tikah, "Baptisma petu Johan a si! A lu ka rak tanter zomi a si na'n a nung sal a si hi!" tiah a ti. 17 Johan cu kaih ih thirhri in khit tahratin thawng thlak dingah Herod amah rori in thu a rak pek dahmi a si. Ziangah cutin a tuah tile, Herod in a nau Filip ih nupi Herodias a ṭhit hrangah, 18 Johan in, "Na naupa ih nupi na ṭhit cu a dik lo a si," tiah Herod kha a ti ringring ruangah a si. 19 Cuti a si ruangah Herodias in Johan cu a mitkem in a ngiar ringring ih thah tiangin a duh; a sinan Herod a um ruangah zianghman a ti ngam lo. 20 Herod in Johan cu a ṭih ngaingai, ziangahtile Johan cu mi ṭha le mi thianghlim a si ti a thei. Curuangah a hum ṭheu. Johan ih thusimmi a ngaitinte a thin a nuam dah lo, asinain a thusimmi ngai cu a duh thotho. 21 Neta bikah Herodias cu caan ṭha a ngah. Herod suahcam a hung kim ih a suahcam lomnak ah Herod cun Acozah bawi upa pawl, a ralkap uktu ralbawi pawl le Galilee rammi upa pawl hrangah rawl darnak puai a tuah. 22 Herodias fanu cu a rung lut ih a laam tikah Herod le a sawmmi upa pawl cu an lung a awi ngaingai. Curuangah Siangpahrang bawipa in falanu hnenah cun, "Ziang so na duh? Na duh mi hmuahhmuah ka lo pe ding," tiah a ti. 23 "Na dilmi pohpoh ka lo pe ding; ka ram ukmi a hrek tiang hman ka lo pe ding," tiah siatcam in thu a kam. 24 Cule falanu cu a feh ih a nu hnenah, "Ziang so ka dil ding?" tiah a va sut. A nu in, "Baptisma petu Johan ih lu dil aw," tiah a rak ti. 25 Falanu cu zamrang tein a kir ih Siangpahrang bawipa cu, "Atu ah hitawk rori ah hin baptisma petu Johan ih lu cu darkheng in i pe cila ka duh!" tiah a dil. 26 Cumi a theih tikah Siangpahrang cu a riah a sia ngaingai, asinain a sawmmi bawi le upa pawl hmaiih siatcam in thu a kam awk zo ruangah falanu ih a dilmi cu a el thei nawn lo. 27 Curuangah hmakhatte ah ralkap pakhat a thlah ih Johan ih lu rak keng dingin thu a pek. Ralkap pa cu a suak ih thawnginn ahcun a feh ih Johan ih lu cu a va tan. 28 Cuih hnuah darkheng in a rak keng ih falanu cu a pek, falanu cun a nu hnenah a pek sin. 29 Cuih thu cu Johan ih dungthluntu pawl in an theih tikah a ruak an ra lak ih an phum. 30 A thlahmi pawl cu an ra tlung ih Jesuh cu an tong ih an tuahmi hmuahhmuah le an zirhmi hmuahhmuah an sim. 31 A hnenih a rami le a kirmi, mi sukso pawl cu an tamtuk ruangah Jesuh le a dungthluntu pawl cu rawl einak caan hman an nei lo. Cu hrangah an hnenah, "Kan feh pei ih kanmah lawng hlimphirte ih kan um theinak hmunah va um uh si; cule malte tal nan cawl thiam ding," tiah a ti. 32 Cuticun anmah lawng hlimphirte ih um theinak hmun feh dingah lawng in an pok. 33 Asinain an feh kha mi tampi in an hmu ih zo an si ti kha hmakhatte ah an thei. Curuangah khua hmuahhmuah ihsin an pok ih an ke in an rak tlan ih Jesuh le a dungthluntu pawl cu an colhnak ding hmunah an rak thlen khelh vivo. 34 Jesuh cu lawng sung ihsin a suah tikah miburpi cu a hmu ih a thinlung cu anmah zaangfahnak in a khat, ziangahtile khaaltu nei lo tuurual bangtuk an si. Curuangah thu tampi a zirh hai. 35 Zanlam khua a hung siim tikah a dungthluntu pawl cu a hnenah an ra ih, "Khua a siim zo; hitawk hi hmunṭhing a si fawn. 36 Miburpi pawl hi thlah awla ziang lo ei ṭha an lei theinak dingah kiangkap khua pawl le lo tla ah va feh hai seh," tiah an ti. 37 Jesuh cun, "Nanmah in an ei ding cu pek uh," tiah a ti. Cutikah annih in, "Tangka zahnih man rawl va lei tahratin himi pawl hi rawl daar uh, ti in duh maw si?" tiah an sut. 38 Jesuh in, "sang ziangzat so nan neih? Va zohhnik uh," tiah a ti. An va zoh ih, "sang hlom nga le nga pum hnih a um," tiah an ti. 39 Cule Jesuh in a dungthluntu pawl hnenah mipi pawl kha hram hring parah a bur a bur in toter dingah thu a pek. 40 Cutiin misenpi cu zakhat tlar le sawmnga tlar in an to khawm. 41 Cun Jesuh in sang hlom nga le nga pum hnih cu a lak ih vanlam hawi in Pathian hnenah lungawinak thu a sim. Sang cu a phel ih mipi pawl zem dingah a dungthluntu pawl hnenah a pek. Nga pum hnih khal cu an zate hnenah a zem. 42 An zatein an ei ih an khopzet. 43 Sang le nga an hlahmi cu dungthluntu pawl in an sar ih bawm hleihnih an ngah. 44 Rawl a eitu cu mipa lawnglawng siar in thawng nga an si. 45 Cuih hnuah zamrangte in Jesuh in a dungthluntu pawl cu lawng sungah a luhter ih tili khatlam ral Bethsaida ah a hmaiah rak feh sung dingin a thlah. Cule misenpi pawl cu a tlunter. 46 Cibai a buk hai hnuah tlang parah thlacam dingah a feh. 47 Khua a thim tikah lawng cu tili laifang a thleng ih Jesuh cu amah lawng tlang parah a um lai. 48 Thli kha anmah lamih a hran ruangah a dungthluntu pawl in lawng an hlau tikah harnak tampi an tong ti kha a hei hmu. Curuangah zinglam khawvang deuh hlanah an hnenah cun ti parin a va feh. An kiang a thlen tikah lansan a tum, 49 asinain ti parih a feh kha an hmu. Mithla ah an ruat ih an thin phangin an raak ciamco. 50 An hmuh tikah an zatein an ṭih ngaingai. Hmakhatteah Jesuh in, "Nan thinphang hlah uh! Keimah ka si," tiah a ti. 51 Cule lawng sungah an hnenah a vung lut ih thli cu a dai. Dungthluntu pawl cu an mang a bangzet, 52 ziangahtile mi thawng nga rawl a daarnak kha a sullam an thei thei lo, an thinlung in a ruat ban lo. 53 Tili an tan hnuah Gennesaret ah an va thleng ih cuih hmunah an lawng cu an hreng. 54 Long sung ihsin an suah vete in mipi in Jesuh cu an theithiam lohli. 55 Curuangah cutawk ramah cun zamrangin an feh ih a umnak an theihnak hmun poh ah mina pawl cu laang in an rak zawn. 56 Cun Jesuh a fehnak pohpoh ah khawte ah siseh, khawpi ah siseh, lo lak khalah siseh, an mina pawl cu dawrhmun khalah an rak thlenpi hai ih, "Na puanfeem tal lo tham hai seh," tiah an dil; cule a puanfeem a tham ngahtu cu an dam.
1 Jerusalem ihsin a rami Farasi ṭhenkhat le Daanthiam ṭhenkhat pawl cu Jesuh hnenah an va leng. 2 A dungthluntu hrekkhat pawl cu kut kholh loih rawl an ei kha an hmu; rawl ei hlanah nan kut nan kholh ding, timi vekin an kut an kholh lo, tinak a si. 3 Ziangahtile Farasi mi siseh, Judah mi dangdang pawl siseh, an zatein an pupa pawl ih thuzirhnak kha an thlun; a daan vekin an kut an kholhta lo ahcun rawl an ei lo; 4 cule dawrih an leimi thil khal a daan vekih an kholhta lo ahcun an ei duh lo. Cun an pupa pawl ih thuzirhmi khuathai kholh daan, beel kholh daan, darkheng kholh daan le ihkhun kholh daan ti pawl tla an thlun. 5 Curuangah Farasi mi pawl le Daanthiam pawl in Jesuh cu, "Ziangah so na dungthluntu pawl in kan pupa pawl ih in zirhta mi daan vekin nung loin kut kholh lo pi thawn rawl an ei?" tiah an sut. 6 Jesuh in, "Profet Isaiah in nanmah ih thuhla a rak sim tikah a va dik lawmmam so! Nannih mititeraw pawl, nan thu cu hiti in a ngan: Pathian in 'Hi minung pawl hin an ṭongkam lawngin in upat; An thinlung cu ka hnen ihsin a hlat ngaingai a si. 7 Keimah in biak hi a lak a si, Ziangahtile milai ih tuahcopmi daan kha Pathian ih pekmi daan vekin an zirh a si,' a ti. 8 Pathian thupekmi cu nan taan ih milai ih zirhmi sawn cu nan thlun a si!" tiah a ti. 9 Cule Jesuh in a peh ih, "Nanmah ih thuzirhmi fekter ih Pathian pekmi daan hnon zia cu nan va thiam so! 10 Ziangahtile Moses thupekmi sungah 'Nan nu le nan pa upat uh,' tile 'A nu siseh, a pa siseh, a camtu cu thah a si ding,' tiah a um. 11 Sikhalsehla nannih cun 'Mi pakhat in a nu le a pa kha: nanmah bomnak hrangah ka timi ka thilri hi Korban a si, a ti ahcun, (Korban ti cu Pathian ta a si tican a si) 12 cupa cu a nu le a pa bomnak ihsin a luat,' tiah nan ti. 13 Cutiih mi nan zirhmi in Pathian ṭongkam cu a phiat ṭheh a si. Cule cu bangtuk ih nan tuahmi dangdang tla tampi a um," tiah a ti. 14 Cule Jesuh in misenpi kha a ko sal ih an hnenah, "Nan zatein ka thusimmi hi ngai uhla thei uh! 15 Minung hi lenglam ihsin sung lamah a lutmi thil in a baalter lo. A sunglam ihsin a ra suakmi in a baalter sawn a si," tiah a ti. 17 Jesuh in misenpi pawl cu a fehsan ih inn sungih a luh tikah a dungthluntu pawl cu cuih a ṭongmi sullam sut dingah an ra. 18 Jesuh in, "Midang pawl hnakin nan fim cuang lo a sihi! Nan thei lo ngaingai maw? Lenglam ihsin minung sungah a lutmi in mi a baalter thei lo, 19 ziangahtile cuih thil cu a thinlung sungah feh loin a pumpi sungah a feh ih cuticun zunpawng ah a suak sal a si," tiah a ti. (Hitiin Jesuh ih a sim tikah ziang bangtuk rawl hman hi ei thiang an si ṭheh ko, tiah a ti duhnak a si.) 20 Cule Jesuh in, "Mi a baaltertu ngaingai cu a sunglam ihsin a suakmi an si. 21 Ziangahtile ṭhatlonak a tuahtertu ruahnak ṭha lo pawl cu minung sunglam ihsin a suakmi an si: nupa sualnak, rukruk, mithah, 22 Òaangṭawm sualnak, duhham, thil siava dangdang tuah, mibum, a mawi lo zetmi thilsual tuah, iksiik, misimsiat, puarthau le aat-thlakza thil tuahnak, 23 hi thil siava pawl hi minung thinlung sung ihsin a suakmi an si ih hi pawl hin mi an baalter a si," tiah a ti. 24 Cule Jesuh cu a feh ih Tai-ar khua kiang a hung thleng. Inn pakhat sungah a lut ih cutawkah a um ti zohman theihter a duh lo; asinain a thup aw thei cuang lo. 25 Cu ngaingai in, a fanu ramhuai ih a kaihmi nunau pakhat in Jesuh a um ti kha a thei ih hmakhatte ah Jesuh kehram ah a bok. 26 Cuih nunau nu cu Zentail nu a si ih Siria ram Fonisia pengih a suakmi a si. Ramhuai kha a fanu sung ihsin dawisuak dingah a dil. 27 Asinain Jesuh cun, "Rawl cu faale pawl kan pek hmaisa pei. Faale pawl ih rawl uico pek cu a dik lo a si," tiah a ti. 28 Cu nu cun, "A si ko, Bawipa! Sikhalsehla faale pawl ih hlahtakmi rawl ṭilfuan cu cabuai hnuai ih uico pawl in an ei ve ṭheu ko a sisi!" tiah a ti. 29 Cutikah Jesuh in, "Cutiih i leh thei ruangah inn ah va tlung awla na fanu sung ihsin ramhuai cu a suak zo ti na va hmu ding," tiah a ti. 30 Inn ah a tlung ih a fanu cu ihkhun parih a rak ih kha a va hmu. Ramhuai cu a sung ihsin a rak suak zo ngaingai. 31 Cule Tai-ar peng ihsin Jesuh cu a pok ih Sidon ram pal phah in Dekhapolis ram laifang a hruut ih Galilee Tili a thleng. 32 Mi ṭhenkhat in a hnenah hnaset ṭong thiam lo pa pakhat an rak keng ih a parah Jesuh in a kut suang dingin an dil. 33 Curuangah Jesuh in cupa cu mipi hnen ihsin hmun dangdeuh ah a hruai ih a kut zungin a hna pahnih cu a tawhsak; cil a phui ih a lei a thamsak. 34 Cule vanlam hoi in Jesuh cu a hruum ih cupa hnen ahcun, "Effatha," tiah a ti. Atican cu "Ong aw thlang aw," tinak a si. 35 Hmakhatteah cupa cu a hna a vaang, a lei a naal ih har lotein a ṭong thei. 36 Cuih thu cu zo hnen hmanah sim lo dingin Jesuh in mipi pawl cu a dawn. Asinain tam deuh a dawn hai tikah tam deuhdeuh in an sim. 37 Cule cuih thu a theitu hmuahhmuah in an mang a bang ngaingai ih, "A tuahmi hmuah in an va ṭha lawmmam so! Hnaset mi an hna a vaang ih ṭong thiam lo tla an ṭong thei," tiah an fak ciamco.
1 Cuih hnu rei lote-ah mi tampi an pumkhawm aw lala. Mipi cu rawl ei ding an neih lo tikah Jesuh in a dungthluntu pawl kha a ko ih, 2 "Hi mi pawl hi ni thum sung ka hnenah an um zo ih atu-ah ei ding zianghman an nei nawn lo; ka zaang an fakzet a si. 3 Rawl ziang hman ei loih ka tlunter a si ahcun mi hrekkhat cu lam hlapi feh ding an si ruangah lamzin ah an ṭamsawl ding a si," tiah a ti. 4 A dungthluntu pawl cun, "Hi bangtuk ramṭhing ah hin zo in so milai hi zat hrangah rawl cu a hawl thei ding?" tiah an ti. 5 Jesuh in, "sang hlom ziangzatso nan neih?" tiah a sut. Annih in, "Hlom sarih," tiah an ti. 6 Jesuh in misenpi cu lei parah to dingin thu a pek. Cule sang hlom sarih cu a lak ih Pathian hnenah lungawithu a sim hnuah a phel ih mipi zem dingah a dungthluntu pawl a pek; a dungthluntu pawl cun an zem. 7 Nga fatete khal malte lai an nei. Jesuh in Pathian hnenah lungawithu a sim hnuah nga khal zem dingin a dungthluntu pawl a fial. 8 An zatein an ei ih an khopzet, minung cu thawngli tluk an si. 9 Cule an hlahmi kha dungthluntu pawl in an sar ih bawm sarih a ti. Jesuh in mipi pawl cu a tlunter ih, 10 hmakhatte ah lawng sungah a dungthluntu pawl thawn an lut ih Dalmanutha pengah an feh. 11 Farasi mi hrekkhat pawl Jesuh hnenah an ra ih thu an el aw. Jesuh ih sual hawl an duh ruangah, "Pathian hrilmi na si le si lo langternak ah mangbangza tuahhnik," tiah an ti. 12 Jesuh cu lungkim lo zetin a hruum ih, "Ziangah so tuihsan minung pawl in mangbangza tuah in fial? Thungai in ka lo sim: cubangtuk mangbangza cu tuihsan minung hnenah pek a si lo ding," tiah a ti. 13 A fehsan ih lawng sungih a luh hnuah tili khatlam ralah a feh. 14 Dungthluntu pawl in sang ken an hngilh ih lawng sungah sang hlom khat lawng a um. 15 Jesuh in an hnenah, "Farasi mi le Herod ih thilnu kha ralring uh," tiah a sim. 16 Annih in, "sang kan neih lo ruangah a si, hiti ih in ti," tiah pakhat le pakhat an ti aw. 17 Cumi cu Jesuh in a thei ih an hnenah, "sang nan neih lo thu cu ziangah so nan rel rero? Nan thei thei hrih lo maw? Cutluk in maw nan ruah ban lo? 18 Mit nan neih si, nan hmu thei lo maw? Hna nan neih si, nan thei thei lo maw? Mi thawng nga hrangih, 19 Sang hlom nga ka phel kha nan cing nawn lo maw? An hlahmi sang bawm ziangzat so nan sar kha?" a ti. Annih in, "Bawm hleihnih," tiah an ti. 20 Jesuh in, "Cun minung thawngli hrangah sang hlawm sarih ka phel tikah an hlahmi bawm ziangzat so nan sar kha?" tiah a sut. Annih in, "Bawm sarih," tiah an ti. 21 Jesuh in, "Cuih hnu khalah nan thei thei hrih lo maw?" tiah a ti hai. 22 Bethsaida khua an thleng ih cutawkah mitcawpa pakhat Jesuh hnenah an rak hruai ih Jesuh ih tham dingin an dil. 23 Jesuh in mitcawpa cu a kut in a hruai ih hnarpawn ah a fehpi. A mit ah a cil a vun phui hnuah a parah a kut a suang ih, "Ziangtal na hmu thei maw?" tiah a sut. 24 Mitcawpa cu vantau in khua a hun zoh ih, "A si, mi ka hmu thei; asinain thingkung feh rero vek an bang," tiah a ti. 25 Jesuh in cupa ih mit ahcun a kut a suang lala. Mitcawpa cun napiin khua a hun zoh ih a mit cu a vaan ngah ruangah ziang hmuahhmuah fiangtein a hmu thei. 26 Jesuh in innah a tlunter ih, "Khawsungah va lut nawn hlah," tiah a ti. 27 Jesuh le a dungthluntu pawl cu Sisaria Filipi kiang khawte pawl tlawng dingah an feh. Lamzin ah dungthluntu pawl cu, "Mi in zo in ti so, in simhnik uh?" tiah a sut. 28 Annih in, "Mi hrekkhat in baptisma petu Johan a si, an lo ti. Mi hrek in Elijah a si an lo ti. Midang in profet pakhatkhat a si, an lo ti," tiah an ti. 29 Jesuh in, "Nannih in teh, zo in ti so?" tiah a sut. Piter in, "Nang cu Messiah na si," tiah a ti. 30 Cutikah Jesuh in, "Cuih thu cu zohman va sim hlah uh," tiah a tiam. 31 Cule Jesuh in a dungthluntu pawl a zirh ih, "Milai Fapa cu tuarnak nasazet a tong ding ih upa pawl, puithiam upa pawl le Daan thiam pawl in an hnong ding; an that ding, asinain ni thum hnuah a tho sal ding," tiah a ti. 32 Cuih thu cu an hnenah fiang zetin a sim. Curuangah Piter in Jesuh cu a dang deuh ah a pialpi ih a mawhthluk. 33 Sikhalsehla Jesuh cu a her ih a dungthluntu pawl zoh phah in Piter cu, "Satan, ka hnen ihsin tlan aw! Na ruahdan hi Pathian hnen ihsin rami a si lo, milai hnen ihsin rami a si," tiah a kawk. 34 Cule Jesuh in mipi le a dungthluntu pawl cu a hnenah a ko ih, "Zokhal keimah i thlun duhtu cun amah ih duhnak taanta sehla a thinglamtah pu in i thlunseh. 35 Ziangahtile zokhal amah ih nunnak hum a duhtu cu a nunnak a sung ding; asinain keimah ih hrang le Thuthang ṭha ruangah a nunnak a liamtu cu a nunnak a hum ngah ding a si. 36 Mi pakhat in leilung pumpuluk co hmansehla amah ih nunnak a sun ahcun ziangso a ṭhahnem? Zianghman a ṭhahnem lo! 37 A nunnak kha zianghman in a lei thei sal nawn lo ding! 38 Tuihsan, Pathian zianghman ih siar lo san, hi san ṭha lo ah hin mi pakhatkhat in keimah siseh, ka thuzirhmi siseh, a zahpi ahcun Milai Fapa in a Pa ih sunlawinak le vancung mithiang pawl thawn a rat tikah a zahpi ve ding," tiah a ti.
1 Thungai in ka lo sim: hi tawkih a ummi mi ṭhenkhat pawl hi Pathian Uknak huham thawn a ra thlen an rak hmuh hlan lo an thi lo ding," tiah a ti. 2 Ni ruk hnuah Jesuh in Piter le Jeim le Johan cu a fehpi ih tlang parah anmah lawng a kaipi. An mit hmuhah Jesuh cu a hmuihhmel a thleng aw; 3 a hnipuan cu a tleu in a tleu ih milai in ziangtluk hmanin sawp hai sehla cutluk cun a vaar thei dah lo ding. 4 Cule dungthluntu pathum cun Elijah le Moses thawn Jesuh cu bia aw rero in an hmu. 5 Piter in Jesuh hnenah, "Sayapa, hitawk kan um cu a va ṭha so! Deubuk pathum in kan sak pei; na hrangah pakhat, Moses hrangah pakhat, cule Elijah hrangah pakhat," tiah a ti. 6 Ziangahtile Piter le a rualpi pawl cu an thin a phang tuk ih ziang ṭong ding dang an theih lo ruangah a si. 7 Cuih hnuah mero a ra zaam ih an tlun ihsin a run khuh ṭheh, cule mero sung ihsin, "Himi cu ka duhdawtmi ka Fapa a si, amah ih thu nan ngai pei," tiah a ti. 8 A dungthluntu pathum cun an kiangkap an zoh rero na'n zohman an hmu lo; Jesuh lawng an kiangih a um kha an hmu. 9 Tlangpar ihsin an rung ṭum laiah Jesuh in, "Milai Fapa hi thihnak ihsin ka thawhsal hlan cu nan hmuhmi hi zohman nan sim lo pei," tiah thu a pek. 10 Cuih a thupekmi cu an thlun; asinain, "Thihnak ihsin thawhsal," timi cu ziang a si pei? tiah pakhat le pakhat an sut aw rero. 11 Cule Jesuh cu, "Ziangah so Daanthiam pawl in Elijah a ra hmaisa ding, an ti?" tiah an sut. 12 Jesuh cun, "Ziang hmuahhmuah timtuah ṭheh dingah Elijah cu a ra taktak ding. Asinain ziangah so Ca Thianghlim in 'Milai Fapa cu nasa zetin a tuar ding ih a hnon tla an hnong ding,' tiah a ti? 13 Thungai in ka lo sim: Elijah cu a ra zo ih, Ca Thianghlim ih a sim vekin minung in an duhduh in an tuah zo," tiah a ti. 14 Dungthluntu dang pawl hnen an vung thlen tikah an kiangkap in mitampi in an kulhvel ih Daanthiam hrekkhat pawl le dungthluntu cu thu an el awk rero kha an hmu. 15 Misenpi in Jesuh kha an hmuh tikah an mang a bang ngaingai ih va hmuak dingah an tlan ciamco. 16 Jesuh in a dungthluntu pawl cu, "Anmah thawn ziangthu so nan el awk rero?" tiah a sut. 17 Misenpi lakih mi pakhat in, "Sayapa, ka fapa na hnenah ka rak hruai sokhaw; ziangahtile ramhuai in a polh ih ṭong khal a ṭong thei lo. 18 Ramhuai in a polh tikah cun, leilung ah a hlon aw ih a cil buanra a suak ih a hacang rial tahratin a pumpuluk a ṭhong ṭheh ṭheu. Cuih ramhuai dawisuak dingah na dungthluntu pawl ka sim na'n zianghman an ti thei lo," tiah a ti. 19 Jesuh in an hnenah, "Maw zumnak nei lo minung pawl! Nan hnenah ziangtik tiangso ka um hrih ding? Ziangtik tiangso ka lo zawi hrih hai ding? Nauhakpa cu ka hnenah rak keng uh," tiah a ti ih 20 Jesuh hnenah cun an ratpi. Ramhuai in Jesuh a hmuh vete in nauhakpa cu a dirhcaih ih leilung ah a tlu, a let aw tualto ih a ka ihsin buanra a suak ciamco. 21 Jesuh in, "Hitiih a sinak hi a rei zo maw?" tiah a pa cu a sut. A pa in, "A seentet lai ihsin a si zo. 22 Voi tampi ramhuai hin that dingin meisa lak le tidai sungah a paih ṭheu. Na tuah theimi a si ahcun in zaangfah awla in bawm hram aw," tiah a ti. 23 Jesuh in, "Na tuah theimi a si ahcun, na ti. A si! Zumnak neitu hrangah cun ziang hmuahhmuah a cang thei a si," a ti. 24 Cupa cun hmakhatte ah, "Ka zum a si; ka zum kim lonak i bawm aw," tiah a au ciamco. 25 Jesuh cun misenpi in a kiangah an ra fuk vivo ti a hmuh tikah ramhuai kha thu a pek ih, "Hnaset le ṭong thiam lo thlarau siava, hi nauhak pa sung ihsin suak awla lut sal nawn hlah, tiah thu ka lo pek," tiah a ti. 26 Ramhuai cu a hruum ih nauhak pa kha dircai phah in a thlukta ih a sung ihsin a suak. Nauhak pa cu mithi a bang ih mi tampi in, "A thi zo," tiah an ti. 27 Asinain Jesuh in nauhak pa cu a kut in a vun dirh ih a hung ding. 28 Jesuh cu inn sungah a lut ih dungthluntu pawl in a thupte in, "Ziangah so kannih hmuah in kan dawi thei lo?" tiah an sut. 29 Jesuh in, "Thlacamnak dah ti lo, thildang zianghman in hi bangtuk cu a dawi thei lo ding," tiah a sim. 30 Jesuh le a dungthluntu pawl cu cutawk ihsin an pok ih Galilee peng tan phah in an feh. Jesuh in a dungthluntu pawl thu a zirh vivo ruangah midang zohman in a umnak thei dingah a duh lo. 31 Ziangtin a zirh tile: "Milai Fapa hi mi kut ah an thlen ding ih an that ding. Asinain ni thum hnuah a tho sal ding," tiah a ti. 32 Sikhalsehla cuti ih a zirhmi cu an thei thei lo. A suh le an sut ngam fawn lo. 33 Kapernaum khua an thleng ih inn sungih an luh hnuah Jesuh in a dungthluntu pawl cu, "Lamzin ah ziangthu so nan el awk rero kha?" tiah a sut. 34 A thu suhmi cu zohman in an let lo, ziangahtile lamzinih an el awkmi cu anmah lakah zoso a tum bik ti a si. 35 Jesuh cu a to ih dungthluntu hleihnih a ko ih an hnenah, "A tum bik si a duhtu cu mi nauta bik a si hmaisa ding ih mi hmuahhmuah riantu a si pei," tiah a ti. 36 Cule nauhak pakhat a ko ih an hmaiah a dinter. Nauhak pate cu Jesuh in a kuah ih an hmaiah a dinter hnuah, 37 "Zokhal sisehla ka hmin in hi bangtuk nauhak a cohlangtu cu keimah i cohlang a si; cule keimah i cohlangtu cu keimah i thlahtu khal a cohlang a si," tiah a ti. 38 Johan in, "Sayapa, na hmin in khawsia a dawisuaktu mi pakhat kan hmu ih kan lak ih tel vemi a si lo ruangah kan khamta," tiah a ti. 39 Jesuh in, "Kham hlah uh! Ziangahtile ka hmin in mangbangza a tuahtu cun i simsia lo ding. 40 Ziangahtile in dodal lotu cu kanmah lam ṭang a si. 41 Thungaite in ka lo sim: Ka minung nan si ruangih tidai khuat khat a lo petu cu ṭhatman a ngah tengteng ding," tiah a ti. 42 Jesuh in, "Zokhal sisehla hi bangtuk nauhakte pawl pakhatkhat keimah i rinsannak ihsin a pialtertu cu a hngawng ah fangcang rialnak lungtum thlaih tahratin tifinriat sungih thlak a hrangah a ṭha sawn a si. 43 Curuangah na kut in na zumnak a lo pialter a si ahcun na kut cu tan aw! Na kut pahnih thawn a mit dah lomi hell meisa sungih na tlak hnak cun kut pakhat lawng thawn nunnak sungih na luh a ṭha sawn. 45 Cule na ke in na zumnak a lo pialter a si ahcun na ke cu tan aw. Na ke pahnih thawn hell sungih tlak hnak cun ke pakhat lawng thawn nunnak sungih na luh a ṭha sawn. 47 Cule na mit in na zumnak a lo pialter a si ahcun na mit cu phorh suak aw. Mit pahnih thawn hell sungih tlak hnak cun mit pakhat lawng thawn Pathian Uknak sungih na luh a ṭha sawn. 48 Cutawkah 'anmah a eitu tholung pawl cu an thi dah lo ih anmah kangtu meisa khal a mit dah lo a si.' 49 "Thawinak sa cu ci in thianfaiter a si vekin mi hmuahhmuah cu meisa in thianfaiter thluh an si ve ding. 50 "Ci cu a ṭha. Sikhalsehla a alnak a ziam asile ziangtinso na alter sal thei nawn ding? "Ci bangtuk in a ṭha mi pawlkomnak nei uhla pakhat le pakhat rualremte in um uh," tiah a ti.
1 Cule Jesuh cu cutawk hmun in a suak ih Judea peng ah a feh ih Jordan Tiva a tan. Tiva ral khat ahcun miburpi in an pan thotho ih a zirh keel vekin thu a zirh. 2 Farasi mi hrekkhat a sual hawl duh ah an ra; annih in, "In sim hnik! Mipa in a nupi maak dingah kan Daan in a thlah maw?" tiah an sut. 3 Jesuh in, "Ziangbangtuk daan so Moses in a lo pek?" tiah a sut. 4 Annih in, "Moses cun nupi maaknak ca nan ngan pei ih nan maak thei ding in ti," tiah an let. 5 Jesuh in an hnenah, "Nan thinlung a ruh tuk ih zirh theih nan si lo ruangah Moses in hi bangtuk daan cu a lo pek a si. 6 Asinain a hramthok, lei le van seemsuah a si laiah cun Ca Thianghlim ih a sim vekin 'Pathian in mipa le nunau a tuah. 7 Curuangah mipa in a nu le a pa a taanta ding ih a nupi thawn an kom aw ding ih pumkhat ah an cang ding,' tiah a ti a si. 8 Cu a si ruangah annih cu pahnih an si nawn lo, pakhat an si zo. 9 Pathian ih a kommi cu zohman in ṭhen hlah hai seh," tiah a ti. 10 Inn sungih an luh sal tikah a dungthluntu pawl in cuih thu cu an sut. 11 Jesuh cun an hnenah, "Mi pakhat in a nupi a maak ih nunau dang a ṭhit asile a nupi par ihsih nunau dang thawn ṭaangṭawm sualnak a tuah a si. 12 Cuvek thotho in nunau in a pasal a taan ih mipa dang a neih ahcun ṭaangṭawm sualnak a tuah a si," tiah a ti. 13 Mi ṭhenkhat in an faate pawl kha Jesuh in thlawsuah pe dingah an rak hruai. Asinain cu pawl cu a dungthluntu pawl in an rak kawk. 14 Cuih thu cu Jesuh ih a theih tikah a thin a heng ih a dungthluntu pawl hnenah, "Nauhak pawl cu ka hnenah ra hai seh, dawn hlah uh. Ziangahtile Pathian Uknak cu hi bangtuk nauhak pawl hrangah a si. 15 Fiangtein ka lo sim: zokhal sisehla nauhak bangtuk in Pathian Uknak an cohlang lo ahcun cuih Pathian Uknak sungah an lut thei dah lo ding," tiah a ti. 16 Cule nauhak pawl cu a pom ih an parah a kut a suang fingfing ih thlawsuah a pek. 17 Jesuh cu khual tlawng dingih a pawh zawng ah mi pakhat a hnenah a ra tlan ih a khuk bilh tahrat in, "Zirhtu ṭha, kumkhua nunnak ka co theinak dingah ziangso ka tuah ding?" tiah a sut. 18 Jesuh in, "Ziangah so zirhtu ṭha i ti? Pathian siar lo zohman mi ṭha an um lo. 19 Thukham pawl cu na thei a sisi. 'Mi that hlah; ṭaangṭawm sualnak tuah hlah; rukru hlah; a dik loin midang sual puh hlah; mi va bum hlah; na nu le na pa upat aw,' ti an si kha," tiah a ti. 20 Cupa cun, "Sayapa, hi thukham pawl cu ka nauhak lai ihsin ka thlun ṭheh ciami an si," tiah a ti. 21 Jesuh in cupa cu duhdawtnak thawn a zoh hliah ih, "Thil pakhat na sam lai. Va feh awla na neihmi hmuahhmuah zuar in tangka na ngah mi kha mifarah va pe awla vancung ah hlawnthil tampi na nei ding. Cuih hnuah i ra thlun aw," tiah a ti. 22 Cuih thu a theih tikah mithmai sia le riahsia in a feh; ziangahtile amah cu milian ngaingai a si. 23 Jesuh in a dungthluntu pawl cu a zoh vivo hai ih, "Milian pawl hrangah Pathian Uknak sungih luh cu ziangtlukin so a har ding!" tiah a ti. 24 Cumi an theih tikah dungthluntu pawl cu an mang a bang ngaingai; asinain Jesuh cun a sim beet ih, "Ka faale tla, Pathian Uknak sung luh ding hi ziangtlukin so a har! 25 "Pathian Uknak sungih milian pa a luh ding hnak cun ṭhimte hnakua sungih kalauk a luh a ol sawn ding," tiah a ti. 26 Cuih thu an theih tikah dungthluntu pawl cu an mang a bang sinsin ih, "Cuti a si ahcun zoso runnak a ngah thei ding?" tiah pakhat le pakhat an ti aw. 27 Jesuh in a dungthluntu pawl cu hmaiton tein a zoh ih, "Himi hi milai hrangah cun a cang thei lo; Pathian hrang lawngah a cang thei. Ziangahtile Pathian hrangah cun a cang thei lomi zianghman a um lo," tiah a ti. 28 Cutikah Piter in, "A si ahcun kannih hi ziang hmuahhmuah kan tlansan ih nangmah kan lo thlun zo," tiah a ti. 29 Jesuh in, "A si, thungai in ka lo sim: zokhal sisehla a inn siseh, a lo siseh, a unau siseh, a farnu siseh, a nu le a pa siseh, a faate pawl siseh, keimah le Thuthang ṭha ruangah a tlansantu cu, 30 tuihsan hrimhrim ah hin tam sinsin a ngah ding. Inn siseh, lo siseh, unau siseh, farnu siseh, nu siseh, faate siseh, a let zakhat in a ngah ding; cuih tlunah hremnak khal a ngah ve ding. Cule a ra dingmi sanah kumkhua nunnak a ngah ding a si. 31 Sikhalsehla atuih hmaisa bik a si mi tampi cu neta bik an si ding, cule atuih neta bik a si mi tampi cu hmaisa bik an si leh ding," tiah a ti. 32 Jesuh le a dungthluntu pawl cu Jerusalem lam ah an feh laiah Jesuh cu an hmaiah a rak feh; a dungthluntu pawl cu an thin a nuam lo. An dung ihsin a thluntu midang pawl khal an thin a phangzet. Dungthluntu hleihnih pawl cu hmun dang deuh ah a hruai ih a parih a ra thleng dingmi thil pawl cu a sim sal. 33 Anih in, "Ngaihnik uh! Jerusalem khua kan thleng ding ih cutawkah Milai Fapa hi puithiam upa pawl le Daanthiam pawl kut ah pek a si ding. Annih in thah dingin thu an relcat ding ih cuih hnuah Zentail mi pawl kut ah thlenter a si ding. 34 Hnihsuahsainak ah an hmang ding, cil an phui ding, an vuak ding ih an that ding. Asinain ni thum hnuah a tho sal ding," tiah a ti. 35 Cule Zebedi ih fapa Jeim le Johan cu Jesuh hnenah an ra ih "Sayapa, thil pakhat in tuahsak hram dingah kan duh," tiah an ti. 36 Jesuh in, "Ziang so nan duhmi cu a si?" tiah a sut. 37 Annih in, "A sunglawimi na Uknak sungih na bawi tokham parih na to tikah na kiangah in toter ve hram aw; pakhat na vorhlam ah, pakhat na kehlam ah," tiah an ti. 38 Jesuh cun an hnenah, "Ziang kan dil tihi nan thei lo. Ka in dingmi tuarnak khuathai hi nan in thei ding maw? Baptisma ka lak vek rori in nan lak thei ve ding maw?" tiah a sut. 39 Annih in, "Kan ti thei ding," tiah an let. Jesuh in an hnenah, "Ka in dingmi khuathai hi nan in thei ngai ko ding ih baptisma ka lak vekin nan lak thei ve ko ding. 40 Sikhalsehla ka vorhlam le ka kehlam ih totu ding hril theinak cu keiih thu a si lo. Pathian in hi hmun cu a timtuah sak ciami pawl hnenah a pe ding a si," tiah a ti. 41 Cuih thu cu dungthluntu dang pahra pawl in an theih tikah Jeim le Johan parah an thin a heng ngaingai. 42 Curuangah Jesuh in an zatein a kokhawm ih, "Leitlun ram uktu pawl cu an ukmi pawl kha an lal-hnawh ih an hotu pawl tla cu thu an nei nasa ti cu nan thei. 43 Asinain nannih lakah cun hi bangtuk cun a si lo pei. Nanmah lakah pakhat in a tum bik si a duh ahcun nan zate riantu a si pei. 44 Nanmah lakah pakhatnak si a duhtu cun nan zate sal a si pei. 45 Ziangahtile Milai Fapa hman hi rianmi si loin miriantu si dingah le mi tampi tlen dingah a nunnak pe dingin a ra a si," tiah a ti. 46 Jesuh le a dungthluntu pawl le miburpi cu Jerikho khua an thleng. Cule Jerikho khua ihsin an pawh zawng ah Timia ih fapa Bartimia an timi mitcaw kutdawh cu lamzin kiangah a to. 47 Nazareth mi Jesuh a si ti kha a theih tikah, "David Fapa Jesuh! I zaangfah hram aw," tiah a au. 48 Mi tampi in an kawk ih, "Daite in um aw," tiah an ti. Asinain a dai duh cuang lo. "David Fapa, i zaangfah hram aw," tiah ring sinsin in a au. 49 Jesuh cu a cawl ih, "Hei ko hnik uh," a ti. Mitcaw pa cu an ko ih, "Na lung awi aw, tho aw, a lo ko so khaw," tiah an ti. 50 A puan sin laimi hlon duak in amah cu Jesuh hnenah a pet vurvo. 51 "Ziang lo tuah sak ding so na duh?" tiah Jesuh in a sut. Mitcaw pa in, "Sayapa, khua hmuh thei sal ka duh," tiah a ti. 52 Jesuh cun, "Va feh aw, na zumnak in a lo damter zo," tiah a ti. Hmakhatteah khua a hmu thei ih cuih sin Jesuh cu a thlun.
1 Jerusalem khua an naih rero thlang ih Bethfath le Bethani khua kiang Olif tlang an thleng. Jesuh in a dungthluntu pahnih hmaiah a thlah ih, 2 an hnenah, "Nan hmaiih a ummi khawsungah va feh uh. Nan thlen tikah zohman ih to dah lomi laak note hreenmi nan hmu ding. A hri phoih uhla rak hruai uh. 3 Mi pakhat in, 'Ziangah so nan phoih?' a lo ti le, 'Bawipa in a hai, a lo khirh sal cing ding,' va ti uh," tiah a ti. 4 Cuticun an feh ih khawsung lamzinpi ah, inn pakhat sangka ah laak note pakhat hreenmi kha an hmu. A hri an phoih zawng ah, 5 cutawkih a dingmi mi hrekkhat in, "Ziangah so laak note cu nan phoih rero," tiah an ti. 6 Annih in Jesuh ih a sim cia vek cun an sim ih hmakhatte ah an fehter. 7 Jesuh hnenah laak cu an rak hruai ih a parah an puan an dam hnuah Jesuh cu a to. 8 Mi tampi in a fehnak ding lamzin ah an puan an phah; mi hrek in sawl an khiak ih an phah ve. 9 A hmaiih a fehmi in siseh, dunglamih a thluntu pawl in siseh: "Hosanna! Bawipa hmin in a rami cu Pathian in thlawsuah hram seh! 10 Kan pu David Siangpahrang uknak a ra dingmi cu Pathian in thlawsuah ko seh! Hosanna! A saangbik vanah khin Pathian cu thangṭhat si ko seh," tiah an au ciamco. 11 Jesuh cu Jerusalem ah a lut ih Biakinn sungah a feh ih ziang hmuahhmuah kimtein a zoh thluh. Asinain tikcu a tlai zo ruangah a dungthluntu hleihnih thawn Bethani khua ah an va feh. 12 A thaisun Bethani khua ihsin an rat sal laiah Jesuh cu a ril a rawng. 13 Lamhlat nawnah a hnah niim ciaiciai in theikung pakhat a hmu ih a rah hawl dingah a pan. Sikhalsehla theikung kiang a thlen tikah a hnah lawng a hmu; ziangahtile theipi rah tikcu a si lo. 14 Jesuh in, "Zohman in na rah lo ei nawn hlah hai seh," tiah theikung cu a ti. A dungthluntu pawl in cuih ṭong cu an thei. 15 Jerusalem an thlen tikah Jesuh cu Biakinn ah a feh ih thil a leitu le a zuartu pawl kha a dawihlo ṭheh. Paisa thlengtu pawl ih cabuai le laileng zuartu pawl ih tohkham pawl khal a lingleh sak thluh. 16 Cule Biakinn tualih thil phurih vak sukso pawl khal a kham ṭheh. 17 Mipi pawl cu hiti in a sim: "Ca Thianghlim sungah Pathian in 'Ka inn cu miphun hmuahhmuah hrangih thlacamnak inn ti a si ding,' a timi a um. Sikhalsehla nannih in rukru relhnak lungpuk ah nan tuah a si," tiah a ti. 18 Puithiam upa pawl le Daanthiam pawl in cuih thu an theih tikah Jesuh thah theinak lamzin an hawl. Annih in Jesuh cu an ṭih ngaingai, ziangahtile Jesuh thuzirhmi in misenpi pawl ih thinlung a ton tuk ruangah a si. 19 Zanlam a si tikah Jesuh le a dungthluntu pawl cu khawpi sung ihsin ah suak. 20 A thaizing zingpit lamzinih an feh laiah theikung cu an hei hmu. A zim ihsin a hram tiang a ro ṭheh. 21 Piter in a vun mang sal ih Jesuh hnenah, "Zohhnik, Sayapa! Na cammi theikung kha a thi zo!" tiah a ti. 22 Jesuh in an hnenah, "Pathian rinsan uh! 23 Fiangtein ka lo sim: zokhal sisehla a thinlung sungah rinhmainak nei loin a sim vekin a cang tengteng ding tiah a zumfek ahcun, 'Hi tlang hi thawn awla tifinriat sungah va tla aw,' a ti khalle tuah sak a si ding. 24 Curuangah hiti in ka lo sim: thla nan cam ih thil pakhatkhat nan dil tikah ka ngah zo tiin zum uhla nan dil mi hmuahhmuah cu nan ngah ko ding. 25 Cun thlacam dingih nan din tikah mi pakhatkhat parih duh lonak nan neihmi kha va ngaithiam uh; cutikah vancungih a ummi nan Pa in nan sualnak kha a lo ngaithiam ve ding," tiah a ti. 27 Jesuh le a dungthluntu pawl cu Jerusalem khua sungah an ra thleng sal. Jesuh cu Biakinn sungih a feh laiah puithiam upa, Daanthiam pawl le upa dang pawl an ra ih, 28 Jesuh cu, "Ziangvek thuneih theinak in so hi bangtuk thil hi na tuah? Zo in so hi thuneihnak hi a lo pek?" tiah an sut. 29 Cutikah Jesuh in, "Thu pakhat ka lo sut dingih in let thei a si ahcun ziangvek thuneihnak in so hi bangtuk thil hi ka tuah, ti ka lo sim hai ding. 30 I simhnik uh: Johan ih baptisma a pek theinak thu hi zo ih hnen in so a ngah? Pathian hnen in maw, milai hnen in so?" tiah a ti. 31 Anmah le anmah an el aw ih, "Ziangtin so kan ti ding? 'Pathian hnen ihsin,' kan ti ahcun 'Cuti asile ziangah so Johan cu nan zum lo?' tiah in ti ding. 32 Asinain, 'Milai hnen ihsin,' kan ti ahcun misenpi ṭih a um fawn, ziangahtile misenpi in Johan cu profet a si ti kha an thei thluh fawn," an ti. 33 Curuangah Jesuh hnenah, "Kan thei lo," tiah an let. Jesuh in an hnenah, "Kei khal in ziangvek thuneihnak in so hi bangtuk thil hi ka tuah, ti ka lo sim ve lo ding," tiah a ti.
1 Cuih hnuah Jesuh in an hnenah tahṭhimnak thawn thu a sim. "Hlanlaiah mi pakhat a um ih sabit hmuan a tuah; hawi a kulh, sabit sawrnak ah khur a lai ih rit kilnakah parthlam a sak. Cule thlawhhlawh a duhmi pawl hnenah a pekta ih amah cu khual a tlawng. 2 Sabit rah lawh a cut tikah a covo la dingin a sal pakhat a thlah. 3 Hmuan thlotu pawl cun a salpa cu an kai ih an vuak ih kut lawngin an kirter. 4 Cun sal dang pakhat a thlah sal. Hmuan thlotu pawl in a lu ah an vuak ih mualpho le ningzak in an tuah. 5 Hmuan neitu pa cun sal dang a thlah lala, a sinan an rak that; sal dang tampi tla cuvek cun an tuah. Òhenkhat an vuak ih ṭhenkhat cu an that. 6 Thlah dingih a taangmi cu a duhdawt zetmi fapa lawng a si thlang. Neta bikah hmuan thlotu pawl hnenah a fapa cu a thlah ih, "Ka fapa cu an upat ding," tiah a ti. 7 Asinain cuih hmuan thlotu pawl cun, "Hi pa hi hmuan neitu ih fapa a si. Ra uh kan that pei ih a thil hmuahhmuah kan ta a si ding," tiah pakhat le pakhat an ti aw. 8 Cuti cun a fapa cu an kaih ih an thah hnuah a ruak cu hmuan lengah an hlon. 9 "Cuih hnuah hmuan neitu in ziangso a tuah ding?" tiah Jesuh in a sut hai. "Hmuan neitupa a ra ding ih a hlawhfa pawl cu a that ṭheh ding ih a hmuan cu hlawhfa dang kut ah a pe ding. 10 Ca Thianghlim sungah: 'Inn saktu pawl in santlai lo tiih an hnonmi lungto cu, A thupi bikmi lungto ah a cang riangri. 11 Cumi cu Bawipa ih tuahmi a si; Ziang tlukih zoh mawi so a si,' tiih ngan ciami kha nan siar dah lo maw?" tiah a ti. 12 Judah mi upa pawl cun cuih tahṭhimnak cu anmah a ṭongsanmi a si, ti an theih ruangah Jesuh kha a kaih an tum. Asinain misenpi pawl an ṭih ruangah an suak ih Jesuh cu an fehsan sal. 13 Farasi mi hrekkhat le Herod minung pawl hrekkhat cu Jesuh kha thusuhnak in awk ngah dingah an thlah. 14 Jesuh hnenah an ra thleng ih, "Sayapa, nang cu mi in ziangtin in ti pei ti khal ruat loin thudik na sim ti kan thei. Mi mithmai na zoh lo ih upa nauta thleidannak thinlung na nei lo. Pathian duhnak thudik lawng mi hnenah na sim. Curuangah fiangtein in sim hnik. Rom siangpahrang hnenah ngunkhuai pek hi kan Daan in a thlah maw thlah lo? Kan pe ding maw pe lo ding?" tiah an sut. 15 Asinain an depdetnak kha Jesuh in a hmu ih, "Ziangah so thangih awh in tum? Ngun tangka rak keng hnik uh, ka zoh pei," tiah a ti. 16 An rak keng ih Jesuh in, "Hihi zo ih hmuihmel le hmin so a si?" tiah a sut. Annih in, "Rom siangpahrang ih hmuihmel le hmin," tiah an ti. 17 Curuangah Jesuh in, "Cuti a si ahcun siangpahrang ta a si mi cu siangpahrang pek uhla Pathian ta a si mi cu Pathian hnenah pek uh," tiah a ti. Cumi an theih tikah an mang a bang ṭheh. 18 Cule Sadusi ṭhenkhat, thih hnuah cun zohman an thosal lo ding, tiah a zumtu pawl Jesuh hnenah an ra ih, 19 "Sayapa, Moses in daan in ngan sakmi ah 'Mipa pakhat a thih ih faate nei loin nupi a taan ahcun faate nei ih a can salnak dingah a thihsan mi a nupi cu a naupa in a ṭhi pei,' tiah a um. 20 Voikhat ah unau pasarih an um; upa bik pa cu nupi a ṭhi ih faate nei loin a thi. 21 A pahnihnak pa in cu nu cu a ṭhi ih faate nei loin a thi ve. Cuvek ṭhiamṭhiam in a pathumnak in cu nu cu a ṭhi na'n a thihsan lala. 22 An zatein fa nei loin an thi ṭheh. An pasarih in cu nu cu an ṭhi ih faate nei loin an thi ṭheh a si. Neta bikah nunau nu khal a thi ve. 23 Curuangah thawhsal caan mithi an thawhsal ni ah cu nu cu zo ih nupi bik so a si ding? An pasarih in an ṭhi fingfing fawn," tiah an sut. 24 Jesuh in, "Nan va palh lawmmam so? Ziangah kan palh ti nan thei maw? Ca Thianghlim siseh, Pathian cahnak huham siseh, nan theih lo ruangah a si. 25 Ziangahtile mithi pawl an thawhsal tikah vancungih vanmi bangtuk an si ding ruangah ṭhit awk ti a um nawn lo ding. 26 Mithi thawhsalnak thu-ah cun Moses Cabu sungih hrambur a kangmi thu kha nan siar dah lo maw? Cutawkah Pathian in Moses hnenah, 'Keimah cu Abraham ih Pathian, Isaak ih Pathian, le Jakob ih Pathian ka si,' a ti. 27 Pathian cu a nungmi pawl ih Pathian a si, a thi mi pawl ih Pathian a si lo. Curuangah nan palh nasa a si," tiah a ti. 28 Cutawkah an thu relmi a thei vetu Daanthiam pakhat a rak um. Jesuh in Sadusi pawl ih thusuhnak kha a let thiam zet ti a theih tikah Jesuh hnenah a ra ih, "Khuimi thukham so a thupi bik?" tiah a ra sut. 29 Jesuh in, "A thupi bikmi thukham cu 'Maw Israel mi pawl ngai uh! Bawipa kan Pathian lawng hi Bawipa a si. 30 Bawipa nan Pathian cu nan thinlung zate, nan nunnak zate, nan ruahnak zate le nan thazaang zate thawn nan duhdaw pei,' tihi a si. 31 Cun a pahnihnak ih a thupimi thukham cu, 'Na innhnen kha nangmah na duh awk vekin na duhdaw pei,' tihi a si. Hi thukham pahnih hnakih a thupi sawnmi thukham a um nawn lo," tiah a ti. 32 Daanthiam pa cun Jesuh hnenah, "Sayapa, na timi cu a ṭha ngaingai. Na sim bangtuk in Bawipa lawng hi Pathian a si ih pathian dang an um nawn lo, ti cu a dik ngaingaimi a si. 33 Cu ruangah milai in Pathian cu a thinlung zate, a ruahnak zate le a cahnak zate thawn a duhdaw pei ih amah ih pum a duhdawt vekin a innhnen cu a duhdaw ve pei. Hi thukham pahnih thlun cu mei-ur thawinak le thawinak dangdang pawl pek hnakin a thupi sawn a si," tiah a ti. 34 Jesuh in a thu lehmi cu a felzet a si ti kha a hmu ih a hnenah, "Nangmah cu Pathian Uknak thawn nan hlat aw lo," tiah a ti. Cuih hnuah cun Jesuh cu zohman in thu an sut ngam nawn lo. 35 Biakinn sungih thu a zirh laiah Jesuh in hiti in thu pakhat a sut, "Ziangtin so Daanthiam pawl in Messiah cu David tesinfa a si ding, tiah an ti thei? 36 Amah David lala cu Thlarau Thianghlim in a simter ih, 'Bawipa in ka Bawipa hnenah, Na ral pawl na ke hnuai ih ka ret ngah hlan lo, Ka vorhlam kapah to aw,' tiah a ti. 37 "Amah David hman in Messiah cu 'Bawipa,' tiih a ko asile ziangtinso David ih tesinfa cu a si thei ding," tiah a ti. Mi tampi in Jesuh thuzirhmi cu lungawi aipuang zetin an ngai. 38 Cutiih thu a zirh tikah Jesuh in, "Daanthiam pawl hi ṭhatein ralring uh. Annih cun an puanfualpi thawn tawihvah an duh ih mipi tamnak dawr tluan ah mi in upatnak thawn cibai in buk hai seh ti an duh. 39 Sinakok ah tonak ṭha bik an ham cia ih puai tuahnak hmun ah hmun ṭha bik an hril. 40 Nuhmei pawl kha a miat hawlnak ah an hmang ih an inn tiangin an lawng. Cule mi in in hmu hai seh tiah rei zetzet in thla an cam. Hrem an ton dingmi cu midang tonmi hnakin a nasa sawn ding," tiah a ti. 41 Jesuh cu Biakinn tangka retnak kiangah a to ih mi in thawhlawm tangka an pek lai rero kha a zoh. Milian tampi in tangka tampi an san. 42 Cule a farah zetmi nuhmei pakhat a ra ih daar tangka pia hnih a san ve. 43 A dungthluntu pawl kha hmunkhat ah a ko ih an hnenah, "Fiangtein ka lo sim: hi farah nuhmei nu in thawhlawm sannak kuang sungah midang hmuahhmuah hnakin tam bik a san a si. 44 Ziangahtile midang pawl cun an neihmi sungin a hleifuan an pek; asinain hi nuhmei nu cun a farah zet na'n a neihmi hmuahhmuah a san; a pumcawmnak ih a hman dingmi hmuahhmuah a pek ṭheh a si," tiah a ti.
1 Jesuh cu Biakinn ihsin a feh zawng ah a dungthluntu pakhat in, "Sayapa, zohhnik! Hi inn le lungpipi pawl cu an va mak so!" tiah a ti. 2 Jesuh in, "Hi a nasa zetmi inn pawl hi na hmu a si lo maw? Hi lungpipi pawl hi pakhat hman an umnak keel ah an um nawn lo tikcu a thleng ding, an zatein an cim ṭheh ding a si," tiah a ti. 3 Jesuh cu Olif Tlang, Biakinn ihsin ralden ih a ummi Tlangah cun a to; cutawkah Piter, Jeim, Johan le Andru a thuptein an ra ih, 4 "Hi bangtuk caan cu ziangtikah so a si ding? In sim hnik! Cuih caan a ra thleng cing ding ti theihthiamnak ah ziang hminsinnak so a um ding?" tiah an sut. 5 Jesuh in an hnenah, "Ralring uh! Zohman in lo bum hlah hai seh. 6 Mi tampi keimah ih hmih in an ra ding ih 'Amah ka si,' tiah an ti ding ih mi tampi an bum ding. 7 Lam naite ih raldonak thawm le lam hlapi ih raldonak thawmvang pawl nan theih tikah thinphang in um hlah uh. Cubangtuk thil cu a thleng ding, asinain caan netnak a si hrih lo. 8 Ram khat le ram khat, uknak pakhat le pakhat, an do aw ding. Khawzakip ah ling a hnin ding ih paam a tlung ding. Cubangtuk cu nauhrin zikih pumnat thok vek a si. 9 "Nanmah hrimhrim nan ralring pei. An lo kai ding ih khonsil zung tampi ah an lo suahpi hai ding; Sinakok tla ah an lo thawi ding; keimah ruangah hotu le siangpahrang hmaiah an lo dingter ding. Cuih caan cu ka Thuthang ṭha nan simnak ding caan a si. 10 Sikhalsehla caan a net hlanah Thuthang ṭha cu miphun hmuahhmuah hnenah sim a si ding. 11 Cule an lo kai ih zungih an lo suahpi tikah ziangso kan sim ding tiah a hlankhan in va phang hlah uh. Tikcu a ra thlen tikah nan sim dingmi cu theihter nan si ding. Ziangahtile nan simmi ṭong cu nanmah ih ṭong a si lo ding; Thlarau Thianghlim ih simmi ṭong a si ding. 12 Unau le unau kha thihnak tiangin an phiar aw ding; cuvek ṭhiamṭhiam in pale in an faale parah an tuah ding. Faale in an nu le an pa pawl an dodal ding ih thihnak tiang an thlenter ding. 13 Mi hmuahhmuah in keimah ruangah an lo hua ding. Sikhalsehla a netnak tiang a tuarsuak theitu cu rundam an si ding. 14 "Tuksumza Thil-borhhlawh cu a din lonak ding hmunih a din kha nan hmu ding." (Hi ca a siartu: a sim duhmi hi theithiam aw.) "Cule Judea pengih a ummi pawl an zatein tlang parah tlan hai seh. 15 A inn tlun diphun ih a ummi in a ken dingmi thil lak dingah inn sungah vung lut hlah seh. 16 Lo ih a ummi in a puan lak dingah a inn ah tlung hlah seh. 17 Favun le nau-awkkai neimi hrangah cun a har ngaingai ding. 18 Cuih harsatnak pawl cu thlatang lai ngelcel ih a thlen lonak dingah Pathian hnenah thlacam uh. 19 Ziangahtile hi thil a thleng dingmi hi Pathian ih leilung a seemsuah thokin atu tiangah a um dah keel lomi harsatnak a si ding. Hmailam ziangtik khalah a um dah nawn fawn lo ding. 20 Bawipa in cuih ni cu a malter zo; malter loin um sehla zovek milai hman an taang lo ding. Asinain a hril ciami pawl hrangah cuih ni khua cu a tawiter zo a si. 21 "Mi pakhatkhat in 'Zohhnik uh, hinah Messiah a um,' 'Zohhnik uh, khinah Messiah a um,' tiah an lo ti khalle va zum hlah uh. 22 Ziangahtile Messiah deu le profet deu tampi an ra ding. Pathian hril ciami pawl hman an bum thei tawk bum dingah hmuhsaknak mak le khawruahhar tampi tla an tuah ding. 23 Ralring uh! A hlankhan in ziang hmuahhmuah ka lo sim cia zo a si. 24 "Cuih harsatnak caan hnuah cun ni a thim ding ih thlapi tla a vang lo ding. 25 Van ihsin arsi pawl an tla ding ih van tlolak ih a ummi pawl ih cahnak le huham pawl cu an lamzin keel ihsin an pial ding. 26 Cule Milai Fapa cu a lang ding ih cahnak le sunlawinak thawn mero lakin a rung ding. 27 Leilung khatlam deng ihsin khatlam deng tiangih a ummi Pathian ih hril ciami pawl khawm dingah leilung kil li ah vancungmi pawl a thlah ding. 28 "Theikung ihsin ralrinnak zir uh. A hnge pawl an hring ih a ziik tla a mum ih hnah note an cerh tikah ṭhal tikcu a nai thlang ti nan thei. 29 Cuvekin hi bangtuk thil a thlen vivo tikah tikcu a nai zo, a ra thleng zik thlang, ti kha nan thei ding. 30 Hitawkih a ummi pawl an thih ṭheh hlanah hi thil hmuahhmuah a thleng ṭheh ding, ti hi hngilh hlah uh. 31 Van le leilung hi a cemral ding na'n ka ṭongkam hi cu an cemral dah lo ding. 32 "Sikhalsehla ziangtikah cuih ni le caan a ra thleng ding, ti cu zohman in an thei lo; vanih vancungmi in an thei lo, Fapa khal in a thei lo, Pa lawng in a thei. 33 Ziangtikah a tikcu a thleng ding ti nan theih lo ruangah ralringte le fimkhur tein um uh! 34 Ziang thawn a bangrep tile mi pakhat khual tlawng dingin a pok ih a hnen-um pawl kha an ṭuanvo felte le kimtein a pekta ih sangka kiltu pa tla it lo siing loih sangka kil dingah a tiamtatu inn neitupa bangtuk a si. 35 Inn neitu bawi cu ziang tikah a ra thleng ding, ti nan theih lo ruangah ralring zetin um uh. Zanlam ah a si thei, zanṭim ah a si thei, khawvang hlan khalah a si thei ih nisuak zawng khalah a si thei. 36 Rinlopi ih a ra thlen a si ahcun na ihthat lai lo tong pang hlah seh. 37 Nan hnenih ka simmi hi mi hmuahhmuah hnen khalah ka sim a si: Ralring in um uh," tiah Jesuh in a ti.
1 Lantak puai le Thilnu telh lo sang puai a kimnak dingah ni hnih lawng a duh. Puithiam upa pawl le Daanthiam pawl in Jesuh kha a thupte in kai ih thah theinak lamzin an hawl. 2 Asinain, "Puai tikcu lai ahcun kan tuah lo pei, misenpi pawl in hnaihnawhnak an suahter pang ding," tiah an ti. 3 Jesuh cu Bethani khua, phaarnat a rak tuartu Simon inn ah a um ih rawl a ei laiah nunau nu in alabaster thawl pakhat in a mankhung zetmi rimhmui a khatin a rak keng. Cuih thawl cu a khuai ih rimhmui cu Jesuh lu ah a toih. 4 Cutawkih a ummi mi ṭhenkhat pawl cu an thin a heng ih, "A va pamhmai ve! 5 Rimhmui cu ngun tangka zathum hnakih tam ah zuar in cuih tangka cun mifarah bawm sehla a ṭha sawn lo maw?" tiah pakhat le pakhat an ti aw ih cu nu cu an mawhthluk ciamco. 6 Cutikah Jesuh in, "Zianghman ti hlah uh! Ziangah so nan buaipi rero? Hi nu hin thil ṭha le thil mawi a tuah a si. 7 Mifarah cu kumkhua nan hnenah an um ding ih nan duh ahcun ziangtik khalah nan bawm thei. Asinain kei cu nan hnenah ka um ringring lo ding. 8 A tuah thei tawk a tuah zo. Ka taksa pum parah rimhmui a toihmi hi keimah vuinak dingah a hlankhan in a timtuah ciami a si. 9 Fiangtein ka lo sim: leilung pumpuluk Thuthang ṭha an simnak kipah hi a tuahmi hi amah theihnak ah an sim ringring ding," tiah a ti. 10 Cule dungthluntu hleihnih lakih pakhat Judas Iskariot cu Jesuh zuar dingah puithiam upa pawl hnenah a feh. 11 An hnenih a ṭongmi pawl an theih tikah an lung a awi ngaingai ih tangka pe dingin thu an rak kam. Cule Judas cun Jesuh a zuar ngah ih an kut sung a thlenter theinak dingah caan ṭha a bawh. 12 Thilnu rawi lo Sang Puai ni khatnak ni, Lantak Puai rawldonak hrangih tuu faate pawl an thah ni ah dungthluntu pawl in, "Khuiah so Lantak Puai zanriah kan lo timtuah sak ding na duh?" tiah Jesuh kha an sut. 13 Cule Jesuh in mi pahnih a thlah ih hiti in thu a cah, "Khawsung ah va feh uhla tithawl in tidai a phurtu pa thawn nan tong aw ding. Amah cu thlun uhla, 14 a luhnak innih inn neitupa hnenah 'Sayapa in amah le a dungthluntu pawl Lantak Puai zanriah an hil tlaangnak ding inn khaan khuiso a si? tiah va sut uh, in ti,' va ti uh. 15 Cule anih in tlunta khaan tumpi a lo hmuh ding. Ziang hmuahhmuah ṭhate le kimteih timtuah ciami khaan a si ding ih cunah cun zanriah ei tlaangnak ding cu va tuah uh," tiah a ti. 16 Dungthluntu pawl cu an pok ih khawsung an thlen tikah Jesuh ih sim ciami bangtuk in ziang hmuahhmuah an hmu. Cunah Lantak Puai zanriah cu an tuah. 17 Zanlam a si tikah Jesuh cu a dungthluntu hleihnih thawn an ra thleng. 18 Cabuai ih rawl an ei laiah Jesuh cun, "Fiangtein ka lo sim: Nanmah lakah pakhat, keimah thawn rawl a ei tlangtu pa in i zuar ding," tiah a ti. 19 Dungthluntu pawl cu an thin a nuam lo ngaingai ih pakhat hnu pakhat in, "Na tisanmi hi kei ka si lo, ti aw?" tiah an ti fingfing. 20 Jesuh in, "Nanmah hleihnih lakah a telmi, keimah thawn kheng khat sungih sang a hnimtu pa a si ding. 21 Milai Fapa cu thihnak a tuar ding, tiah Ca Thianghlim ih a ti vekin a thi ko ding. Asinain hi Milai Fapa a zuartu hrangah cun a hmakhua a pit a si! Suak lo lawlaw in rak um sehla amah ih hrangah cun a ṭha sawn ding na'n!" tiah a ti. 22 Zanriah an ei laiah Jesuh in sang a lak ih thla a cam hnuah sang cu a phel ih a dungthluntu pawl hnenah a pek. "Hi hi ka taksa a si; Lak uhla ei uh," tiah a ti. 23 Cuih hnuah hai a lak ih Pathian hnenah lungawinak thla a cam hnuah an hnenah a pek ih an zatein an in. 24 Jesuh in, "Himi hi mi tampi hrangih ka thletmi ka thisen a si; Pathian thukamnak a nemhngettu ka thisen a si. 25 Fiangtein ka lo sim: Pathian Uknak sungih sabit thar ka in hlanlo hi sabit cu ka in sal nawn lo ding," tiah a ti. 26 Cule hla an sak hnuah an suak ih Olif Tlangah an feh. 27 Jesuh in an hnenah, "Nan zatein in taan ding ih nan tlanhlo ṭheh ding; ziangahtile Ca Thianghlim sungah 'Pathian in tuukhal cu a that ding ih tuu pawl cu ṭhekdarh an si ṭheh ding,' tiah ngan cia in a um. 28 Sikhalsehla thihnak ihsin thawhtersal ka si hnuah cun nan hmaiah Galilee ah ka feh ding," tiah a ti. 29 Piter in, "Midang in lo tlansan ṭheh hman hai sehla kei cun ka lo tlansan hrimhrim lo ding," tiah a ti. 30 Jesuh in Piter cu, "Fiangtein ka lo sim: tuihzan ar voi hnih a khuan hlanah voi thum tiang 'Ka thei lo a si,' tiah i phatsan ding," a ti. 31 Piter cun nasa sinsin in, "Na hnenih thi ding ka si ve hmanah cu vek cun ka ṭong hrimhrim lo ding," tiah a ti. Dungthluntu dang khal in cuvek ṭhiamṭhiam in an ti ve. 32 Gethsemane timi hmun an thleng ih Jesuh in a dungthluntu pawl hnenah, "Ka thlacam sung hinah rak um uh," tiah a ti. 33 Piter, Jeim le Johan kha a hruai. Thinhar le awloksong in a um ih, 34 an hnenah cun, "Ka thinlung hi riahsiatnak in a khat tuk ih a kuai ṭheh ding a bang. Hinah rak um uhla it loin i rak hngak uh," tiah a ti. 35 Hmaiah malte a va feh ih leilung ah a bok ih thla a cam. A can thei ahcun cuih harsatnak cu tong lo dingin a dil. 36 "Abba, Ka pa! Na hrangah cun ziang hmuahhmuah a cang thei ṭheh. Hi tuarnak khuathai hi ka hnen ihsin la hram aw. Asinain ka duh vekin si hlah seh, na duh vekin si sawnseh," tiah a ti. 37 Cun a ra kir ih dungthluntu pathum an ihthat kha a hmu. Piter hnenah, "Simon, na rak itthat maw si? Nazi pakhat sung hman itthat loin i hngak thei hrimhrim lo maw si?" tiah a ti. 38 Cule an hnenah, "Itthat loin hngak uhla sualforhnak sungih tla lo dingin thlacam uh. Thinlung cun a duh na'n taksa cu a thazaang a mal a si," tiah a ti. 39 Jesuh cu a feh sal ih a hmaisa vekin thla a cam lala. 40 Cun a ra kir ih dungthluntu pawl an itthat ṭheh kha a hmu; an mit an meng thei hrimhrim lo. Ziangtiih rak son ding ti khal an thei lo. 41 A voithumnak a ra kir sal tikah an hnenah cun, "Nan itthat hrih maw si? Nan cawl thei hrih lai maw si? Tawk seh! A tikcu a thleng zo! Zoh uh! Milai Fapa cu misual pawl kut sungah pek a si ding hi! 42 Tho uhla feh uhsi! Zoh uh, i zuartu pa a ra thleng!" tiah a ti. 43 Jesuh cu a ṭong rero laiah dungthluntu hleihnih lakih a tel vemi Judas cu a ra thleng. Judas thawn hmun khatah, puithiam upa pawl, Daanthiam pawl le Judah mi upa pawl ih thlahmi miburpi cu ralnam le talhtum pawl kengin an ra. 44 Mizuartu pa cun mipi pawl cu hminsinnak a rak pek cia zo ih, "Ka hnam mipa cu kaih nan duhmi pa a si ding. Amah cu kai uhla ṭhatein kil uhla fehpi uh," tiah a ti. 45 Judas cun a ra thlen vete in Jesuh cu a pan ih, "Sayapa!" tiah a ti ih a hnam. 46 Cutiin Jesuh cu an kai ih fektein an khit. 47 Culai ah an kiangih a dingmi pakhat in a ralnam a zuk ih Puithiam sang hnen-um pa ih hna a sah thlak. 48 Cule Jesuh cun, "Keimah hi rukru maw ka si, ralnam le talhtum thawn nan rat ciamco? 49 Nitinte Biakinn ah thu ka lo zirh ṭheu laiah zohman in in kai fawn lo. Asi, Ca Thianghlim sung thu cu a kim a ṭul a si," tiah a ti hai. 50 Cule a dungthluntu hmuahhmuah in an tlansan ṭheh. 51 Mino pakhat, puan paate lawng a sinmi pa in Jesuh cu a thlun. Amah khal cu a kaih an tum ve; 52 asinain a puan taan in a tak lawngin a tlanhlo. 53 Jesuh cu Puithiam sang inn ah an hruai ih cutawkah puithiam upa pawl, upa dang pawl le Daanthiam pawl an tong aw khawm. 54 A hlat nawn ihsin Piter in a thlun ih Puithiam Saang ih tual ah a lut. Tual ah ralvengtu pawl hnenah a to ih meisa a ai. 55 Puithiam upa pawl le thuṭhentu Khonsil upa pawl in Jesuh cu thah duh ah a sual an hawl rero na'n an hmu thei lo. 56 Mi tampi in thuphan per in Jesuh cu sual an puh, asinain an thu a rual aw thei lo. 57 Cun mi ṭhenkhat, a dik lo thutheitu si in an ding ih, 58 "Hi pa hin 'Milai sakmi hi Biakinn hi ka bal ṭheh ding ih ni thum sungah milai ih tuah lomi Biakinn ka sak ding,' a ti, kan thei," tiah Jesuh cu thuphan an puh. 59 Sikhalsehla annih khal cu an thu a rual aw thei cuang lo. 60 An zate hmaiah Puithiam Saang cu a ding ih Jesuh cu thu a sut. "Sual an lo puh hi na let thei lo maw?" tiah a ti. 61 Sikhalsehla Jesuh cu daitein a um ih ṭong kam khat hman a let lo. Cule Puithiam Saang cun, "Sunloih mi Pathian ih Fapa Messiah cu na si maw?" tiah a sut sal. 62 Jesuh in, "Ka si! Milai Fapa hi Ziangkimtithei ih vorhlam kapah to in vancung mero thawn a rat khal nan hmu leh ding," tiah a ti. 63 Cutikah Puithiam Saang cun a puan a thlek ih, "Thutheitu dang kan ṭul nawn lo. 64 Pathian a nautat zia cu nan thei thluh zo! Ziangtin nan ruat?" tiah a ti. An zatein Jesuh cu misual a si ih thah tlak a si, tiah an lung a kim ṭheh. 65 Mi hrek in Jesuh cu cil an phui; a mit an huh ih an thawi. "A lo thawitu hi zoso a si, simhnik!" tiah an ti. Cule ralkap pawl in an fehpi ih an beng phahphah. 66 Piter cu Puithiam Saang ih tualih a um laiah Puithiam Saang ih hnen-um nu pakhat a ra. 67 Piter cu meisa a ai kha a hmuh tikah hmaitontein a zoh ih, "Nangmah khal hi Nazareth mi Jesuh thawn a rak um tlangmi na si," tiah a ti. 68 Asinain Piter cun a phatsan ih, "Ka thei lo. Na ṭongmi hi ziangthu a si ti ka thei lo," tiah a ti. Cule kotka zin lamah a ṭhawn. Cuvete in ar a khuang. 69 Hnen-um nu cun a va hmu lala ih a kiangkap mi pawl hnenah, "Hi pa khal hi an lakah a tel sokhaw!" tiah a sim lala. 70 Asinain Piter cun a phat thotho. Reilote ah a kiangkap ih a dingmi pawl in Piter cu, "Nangmah khal an lakih tel na si hrimhrim ko, ziangahtile Galilee mi na sisi!" tiah an ti. 71 Cun Piter in, siatcam in thu a kam ih, "Nan timi pa hi zo a si ti ka thei hrimhrim lo," tiah thlalet cam in a ti. 72 Cuvete in a voihnihnak ar a khuang ih Piter cun Jesuh in, "Ar voi hnih a khuan hlanah voi thum tiang 'Ka thei lo a si,' tiah i phatsan ding," a rak timi kha a vun mang sal ih napi in a ṭap.
1 Zingpitte ah Puithiam upa pawl cu upa dang pawl le Daanthiam pawl le thuṭhentu Khonsil upa pawl thawn zamrangin an tong ih thu an ruat khawm. Jesuh cu thir cikcin thawn khit in an hruai ih Pilat kut ah an pek. 2 Pilat in, "Judah siangpahrang na si maw?" tiah a rak sut. Jesuh in, "Nangmah in na ti si!" tiah a let. 3 Puithiam upa pawl in Jesuh cu sual a phunphun an puh. 4 Curuangah Pilat in, "An thu hi na let lo ding maw? Sual an lo puhnak hmuahhmuah hi ngaihnik," tiah a ti lala. 5 Jesuh cu a ṭong duh thotho lo ih Pilat cu a mang a bang ngaingai. 6 Lantak Puai poh ah kum tinte Pilat in thawngtla mi lakin mipi ih dilmi kha a thlah ṭheu. 7 Culai ah Barabbas an timi, ralthawh laiah mi a rak thattu pa cu ral a thotu dang pawl thawn thawng ah an thlak. 8 Misenpi pawl cu an ra suak ih kumtin an tuah ṭheu vekin thawngtla suah ding cu Pilat hnenah an sut. 9 Pilat in, "Judah Siangpahrang hi lo thlah sak ningla nan duh maw?" tiah a sut. 10 Pilat in a hnenah Jesuh an peknak cu Puithiam upa pawl in Jesuh an nahsiik ruangah a si ti cu a thei keukeu. 11 Asinain Pilat in Barabbas sawn thlahter dingah puithiam upa pawl in misenpi cu an rak forhcia. 12 Pilat in a sut lala ih, "Cuti asile Judah siangpahrang nan timi pa hi ziangti in tuah so nan duh?" tiah a ti. 13 Annih in, "Thinglamtah parah that aw!" tiah an au. 14 "Ziang sualnak so a tuah?" tiah Pilat cun a sut lala. Annih in, "Thinglamtah parah that ko aw!" tiah na sinsin in an au. 15 Pilat in misenpi lungkimnak tuah a duh ruangah an hrangah Barabbas a thlah. Cule Jesuh cu a thawiter ih thinglamtah parih that dingin an kut ah a pek. 16 Ralkap pawl in Jesuh cu Mangki bawipa ih tual ah an luhpi ih mipi dang pawl tla an ko. 17 Jesuh cu puan sen an sinter; hling in lukhuh an tuah ih a lu ah an khumter. 18 Cule salaam an pek ih, "Judah Siangpahrang, a nunkhua sau hram seh!" tiah an au. 19 A lu ah fungfek in an thawi, cil an phui, an ṭhilhṭhuam ih a hmai ah atu le atu an lu an kuun. 20 Cutiih an hmuhsuam ṭheh hnuah puansen an sintermi kha an hlit ih amah ih hnipuan an hrukter sal. Cule thinglamtah parih khenbet dingah an hruai. 21 Lamzin ah Simon an timi pa an tong. Amah cu khawte ihsin khawpi ah a rami a si ih ralkap pawl in Jesuh thinglamtah kha hranhram in an putter. Simon cu Sairin khua mi a si ih Alexander le Rufus ih pa a si. 22 Jesuh cu Golgotha timi hmun ah an thlenpi. Golgotha ti cu "Luruh hmun," tican a si. 23 Cutawkah sabitti, mura an timi sii thawn an rawimi kha an pek, asinain Jesuh cun a in duh lo. 24 Cuih hnuah thinglamtah ah an khen ih camcawhfung zuukin a hnipuan an zem aw. 25 Cutiih an khen cu zinglam nazi pakua a si. 26 A sual an puhnak cataar cu, "Judah Siangpahrang," ti a si. 27 Amah thawn hmun khatah fifir pahnih, a vorhlam ah pakhat, a kehlam ah pakhat an that ve. 29 A vak suksotu pawl tla in cimseh tiah an diriam in an lu an sut ih an hmuhsuam. "Nangmah cu Biakinn bal tahratin ni thum sungah sak sal a tumtu pa kha na si lo maw? 30 Atu thinglamtah par in rung ṭum awla nangmah le nangmah run aw hnik!" tiah an ti. 31 Cuvek thothoin Puithiam upa pawl le Daanthiam pawl in Jesuh cu an hnihsan ih, "Midang a runsuak na'n amah cu a runsuak aw thei lo. 32 Israel Siangpahrang, Messiah cu thinglamtah par ihsin atu rori ah a rung ṭum kha hmu uhsila cu kan zum ko ding," tiah pakhat le pakhat an ti aw. Cule amah thawn thinglamtah parih khenbet mi pahnih tla in an hmuhsuam ve. 33 Sun laifangah cuih ram pumpuluk ah nazi pathum sung thimkhawzing a tlung. 34 Zanlam nazi pathum ah Jesuh cu, "Eloi, Eloi, lema sabakthani!" tiah napi in a au. A tican cu, "Ka Pathian, ka Pathian, ziangah so i tlansan?" tinak a si. 35 Cutawkih a ummi ṭhenkhat in an thei ih, "Ngaihnik uh, Elijah a ko a si hi!" tiah an ti. 36 Mi pakhat a va tlan vurvo ih puansia kha sabitti thur sungah a va ciah ih fung parah a ṭemcih hnuah Jesuh ih kaa ah a hun hnih; "Hngak hrihhnik uh! Thinglamtah par ihsin ṭhum dingah Elijah a rung maw rung lo kan zoh pei," tiah a ti. 37 Jesuh cu napi in a au ih a hnuk a cat. 38 Cuvete in Biakinn puanzar cu a tlunlam ihsin a hnuailam tiang ṭhen hnih ah a tlek. 39 Thinglamtah hmai zawnih a dingtu ralbawipa in Jesuh a thih kha a hmuh tikah, "Hi pa hi Pathian Fapa ngaingai a si!" tiah a ti. 40 Cutawkih nunau hrekkhat pawl cun lamhlat nawn in an cuan. Anmah tla cu Mari Magdalene, Jeim nauta sawn le Josef ih nu Mari, le Salome an si. 41 Jesuh kha Galilee ram a um laiah a rak thluntu pawl le a rak bawmtu pawl an si. Jesuh thawn Jerusalem ah a ra thlengmi nunau dang tampi tla an um ve. 42 Zanlam a si thlang; sabbath ni thlen hlan Timtuah Ni a si. 43 Cule Arimathea khuami Josef a ra thleng. Amah cu thuṭhentu Khonsil upa pawl lakah upat zetmi sungtel a si ih Pathian Uknak a ra thlen ding kha a hngakhlap zettu a si. Josef cu ralṭha zetin Pilat hnenah a lut ih Jesuh ruak kha a dil. 44 Pilat in Jesuh a thi zo, ti a theih tikah a mang a bang ngaingai. Ralbawipa a ko ih, "Jesuh a thihnak a rei zo maw?" tiah a sut. 45 Jesuh a thi thla zo ti kha ralbawipa hnen ihsin a theih tikah Pilat in Jesuh ih ruang cu Josef a lakter. 46 Josef in puan nemte a lei ih Jesuh ruak cu thinglamtah par ihsin a ṭhum ih puan in a tuam hnuah lungkhermi thlaan ah a phum. Cule lungphengpi in thlaan ka cu a kharta. 47 Mari Magdalene le Josef nu Mari tla in a kiangin an zoh ve ih Jesuh ruak a retnak cu an hmu.
1 Sabbath ni a cem hnuah Mari Magdalene, Jeim nu Mari le Salome in Jesuh ruak va culh dingah zihmui an lei. 2 Nipi zing, nisuak zawng ah thlaan ah an va feh. 3 Lamzin an feh phah ah, "Thlankhar lungphengpi teh zo in so in ṭhawn sak ding?" tiah pakhat le pakhat an sut aw. 4 Cuih lung cu lungpheng hlaipi a si. Cule an hun zoh tikah lungphengpi cu a rak ṭhawn aw zo kha an hmu. 5 Thlan sungah an vung lut ih tlangval pakhat puan rang sin in vorhlam kapih a to kha an hmu ih an phang ngaingai. 6 Anih in, "Nan thin phang hlah uh! Thinglamtah ih an thahmi Nazareth Jesuh nan hawl ti ka thei. Hinah a um nawn lo, a thosal zo. An retnak hmun hi ra zoh hman uh. 7 Va feh uhla a dungthluntu pawl le Piter kha 'Nan hmaiah Galilee ah a feh ding. Cutawkah a lo sim cia vekin nan hmu ding,' tiah va sim uh," tiah a ti. 8 Cutiin an suak ih thlaan ihsi cun thinphang le tuksum in an tlan. An ṭih tuk ruangah zo hnen hmanah ziang hman an sim lo. 9 Nunau pawl cu Piter le a rualpi pawl hnenah an feh ih an theihmi thuhla cu a tawinak in an sim. 10 Cuih hnuah Jesuh amah rori in kumkhua rundamnak thu, thu nung le thu thianghlim cu nisuahnak ihsin nitlaknak tiang a dungthluntu pawl hmangin a than a si.] 11 "Jesuh a nungsal zo, ka hmu a si!" tiah a sim tikah an zum lo. 12 Cuih hnuah Jesuh cu dungthluntu pahnih khawte lamih an feh laiah phun dangin an hnenah a lang. 13 An kir ih midang pawl tla an sim, asinain annih khal in an zum lo. 14 Neta bikah Jesuh cu dungthluntu hleikhat rawl an ei laiah an hnenah a lang. Zumnak an neih lo ruangah le amah a nungin a hmutu pawl an zum lo ih thinlung ruh an neih ruangah a kawk hai. 15 Cule an hnenah, "Leilung khuazakip ah va feh uhla mi hmuahhmuah hnenah Thuthang ṭha va sim uh. 16 Zokhal sisehla a zum ih baptisma a co ahcun rundam a si ding. Asinain a zum lotu cu hnon a si ding. 17 A zumtu pawl cu mangbangza tuah theinak huham pek an si ding; ka hmin in ramhuai an dawi thei ding; ṭong thar in an ṭong ding; 18 rul an kaih ah siseh, thihsii an in hmanah siseh, an zianghman a poi lo ding; mina parah an kut an suang ding ih mina cu an dam ding," tiah a ti. 19 Bawipa Jesuh cu an hnenih thu a sim ṭheh hnuah vancungah laakso in a um ih Pathian vorhlam kapah a to. 20 Cule dungthluntu pawl cu an feh ih khuazakip ah thu an sim; Bawipa cu an hnenah hna a ṭuan ih mangbangza an tuahmi in an thusim mi a dik a si, ti kha a langter.] [
1 Bawipa Theofilas, Mi tampi in kan lakih a cangmi thu pawl hi a ṭha thei tawpin an ngan. 2 An ngan tikah cuih thil a cangmi a hramthok ihsin mit in a hmutu pawl le cuih thu a simtu ih simmi vekin nganmi a si. 3 Cuti a si ruangah kei khal in hi thuhla pawl hi a hramthok ihsin feltein ka zingzoi ṭheh zo ruangah a sangsangte in na hrangah ka ngan le a ṭha ding tiah ka ruat. 4 An lo sim le an lo zirh ciami thu hi tlamtlingzet le dikzet ih na theihnak dingah hi ca hi ka ngan a si. 5 Herod cu Judea Ram ih siangpahrang a si laiah, Abijah puithiam phun sungih a tel vemi puithiam Zekhariah a rak um. A nupi cu Elizabeth a si ih anih khal puithiam phun a si ve. 6 An pahnih in Pathian mithmuh ah nuncan ṭha in an nung ih Bawipa ih daan le thupekmi pawl kha kimtein an thlun thluh. 7 Elizabeth cu a cin ruangah faate an nei lo; an nupa in an tarzet thlang. 8 Voikhat ah Zekhariah cu nitin a hnaṭuan caan a kim ih Biakinn sungah puithiam hna a ṭuan. 9 Puithiam pawl ih an thlun ṭheumi daan bangtuk in biakṭheng parih rimhmui ur dingah camcawhfung zuukin Zekhariah cu an hril. Curuangah Bawipa ih Biakinn sungah cun a vung lut. 10 Culai ahcun rimhmui ur caan a si ih senpi pawl cu Biakinn lengah thla an cam ciamco. 11 Vancungmi pakhat cu a hnenah a rung lang ih rimhmui urnak biakṭheng vorhlam kapah a ding. 12 Zekhariah in a hmuh tikah a thin a phang ih a ṭih. 13 Asinain vancungmi in, "Zekhariah, ṭih hlah! Pathian in na thlacamnak cu a thei zo ih na nupi Elizabeth in fapa a lo hrin ding. A hmin ah Johan na sak pei. 14 Cuih na fapa a suah tikah na lung a awi ngaingai ding ih midang tampi tla an lung a awizet ding. 15 Amah cu Bawipa ih mithmuh ah mi maksak ngaingai a si ding. Sabitti siseh, zu siseh a in lo ding. A suahthlak vete in Thlarau Thianghlim thawn a khat ding ih, 16 Israel mi tampi tla Bawipa an Pathian hnenah a kirter sal ding. 17 Bawipa ih hmaiah a rak feh sungtu palai a si ding ih profet Elijah vekin a cakmi le hmual nei zetmi a si ding. Pale pawl ih thinlung tla an faale lamah a mer awter sal ding ih thu-ngai lomi pawl khal miding pawl ih thuruahdan lamzin ah a hruai kir sal ding. Bawipa ih hrangah Bawipa ih minung pawl a timtuah sak ding a si," tiah a ti. 18 Zekhariah in vancungmi hnenah, "Na sim vek in a cang ngaingai ding ti ziangtinso ka theih ding? Kei hi patar ka si zo ih ka nupi khal a tarzet zo a si," tiah a ti. 19 Cutikah vancungmi in, "Kei hi Gabriel ka si. Pathian hmaiih a ding ringringtu ka si ih Amah in hi thuṭha na hnenih rung sim dingah i thlah. 20 Sikhalsehla ka thu simmi na zum lo khalle a tikcu a kim tikah cun ka thu simmi cu a kim ko ding. Hitiih na zum lo ruangah ṭong thei loin na um ding. Na hnenih ka thukammi a kimnak ni a thlen hlan lo kam khatte hman na ṭong thei nawn lo ding," tiah a ti. 21 Cuih caan sung hmuahhmuah misenpi pawl in Zekhariah cu an hngak ringring ih ziangah Biakinn sungah cutik tiang lawmmam a rei a si pei tiah an khawruah a har. 22 Biakinn sung ihsin a ra suah tikih a ṭong thei lo kha an hmuh tikah Biakinn sungah langnak hmuhmi a nei a si, ti an thei. Kam khatte hman a ṭong thei lo ruangah a kut in a hmuh. 23 Biakinn sungih a hnaṭuan tikcu a cem tikah Zekhariah cu inn ah a tlung. 24 Tawkfang a rei tikah a nupi Elizabeth cu fa a vun ih thla nga sung cu lengah a suak lo. 25 Elizabeth in, "Neta bikah Bawipa in i bawm ih misenpi hmaiah ka ningzahnak cu i laksak zo a si," tiah a ti. 26 Elizabeth ih favun a thlaruknak ah Pathian in vancungmi Gabriel cu Galilee ram Nazareth an timi khua ah a thlah. 27 Siangpahrang David ih tesinfa a si mi Josef thawn ṭhi aw dingih thukamnak a neimi fala hnenah thu pakhat sim dingin a thlah. Cuih fala hmin cu Mari a si. 28 Vancungmi cu a hnenah a ra ih, "Na parah daihnak um ko seh! Bawipa na hnenah a um ih thlawsuahnak tampi a lo pek a si," tiah a ti. 29 Cuih vancungmi ih thusimmi a theih tikah Mari cu a don a har ngaingai ih a ṭongmi ih tican cu ziang a si pei tiah khawruahhar in a um. 30 Cule vancungmi in, "Mari, ṭih hlah! Pathian mithmai ṭha na co a si. 31 Fa na vun ding ih fapa na hring ding. A hmin ah Jesuh na sak ding. 32 Mi maksak a si ding ih Cungnungbik Pathian ih Fapa tiah kawh a si ding. Amah cu Bawipa Pathian in a pu David bangtuk in siangpahrang ah a tuah ding ih, 33 Jakob tesinfa pawl ih tlunah a kumkhua in siangpahrang a si ding. A uknak cu a cem dah lo ding," tiah a sim. 34 Mari in vancungmi hnenah, "Kei cu fala him ka si. Cubangtuk cu ziangtinso a si thei ding?" tiah a ti. 35 Vancungmi in, "Thlarau Thianghlim cu na hnenah a ra thleng ding ih Cungnungbik ih cahnak huham cu na parah a um ding. Curuangah na hrin dingmi fa cu fapa thianghlim a si ding ih Pathian Fapa tiah kawh a si ding. 36 Na sungkhat Elizabeth kha na thei a si lo maw? Fa a nei thei nawn lo tiah simrelmi a si na'n a tarzet hnuah fa a vun ih atu-ah thlaruk a si zo. 37 Ziangtin a si tile Pathian ih tuah thei lomi zianghman a um lo," tiah a ti. 38 Mari in, "Kei cu Bawipa ih salnu ka si. Na sim vek cun ka parah si ko seh," tiah a ti. Cule vancungmi cun a fehsan. 39 Cuih hnuah Mari cu a tim a tuah ih Judea peng tlangpar khua ah zamrangte in a hung feh. 40 Cutawk a thlen tikah Zekhariah inn ah a lut ih Elizabeth cu cibai a buk. 41 Mari ih ṭongkam cu Elizabeth in a theih vete in a pum sungih naute cu a caang. Elizabeth cu Thlarau Thianghlim in a khat ih, 42 ringzet in, "Nang cu nunau hmuahhmuah lakah a thlawsuak bikmi nunau na si. Na hrin dingmi fa khal hi thlawsuahmi fa a si! 43 Ziangah so ka Bawipa ih nu in kei vek tla hi i hung leen duh? 44 Ziangahtile na ṭong ka theih vete in ka pum sungih naute hi lungawi aipuang in a khir a si. 45 Bawipa in na hnenih a simmi thu hi na parah a kim taktak ding ti na ruat ih na lungawi daan ding hi a va mak ve!" tiah a ti. 46 Mari in, "Ka thinlung in Bawipa cu a thangṭhat; 47 Pathian i Runtu parah ka nunnak cu a lung a kimzet; 48 Ziangahtile mi nauta a salnu hi hngilh loin i thei ringring a si. Atu thokin mi hmuahhmuah in mi thluasuak in ti ding, 49 Ziangkimtithei Pathian in ka hrangih thil maksak a tuah zo ruangah hin. Amah ih hmin cu a thianghlim, 50 Sankhat hnu sankhat amah a a ṭihzahtu pawl cu a zaangfah a si. 51 A baan thacak a hawi ih mi puarthau pawl cu an tumtahnak thawn a ṭhekdarh ṭheh. 52 Siangpahrang cakzet pawl kha, an lal tokham ihsin a ṭhum ih, mi nauta pawl a khaisaang a si. 53 Rilrawngmi pawl cu thil ṭha in a cawm ih, milian pawl cu kut lawngin a kirter. 54 Kan pupa pawl hnenih a thukamnak cu a kimter ih, a siahhlawh Israel bawm dingah a ra zo a si. 55 Abraham le a tesinfa pawl parah a kumkhua in zaangfah dingah a ciing ringring!" tiah a ti. 56 Mari cu Elizabeth hnenah thla thum hrawng a um hnuah a inn ah a tlung. 57 Elizabeth cu a hrin nithla a kim ih fapa a nei. 58 Elizabeth parih a makmi Bawipa ih zaangfahnak cu a sungkhat le innhnen pawl hmuahhmuah in an thei ih an zatein an lungawipi. 59 Naute cu a suah hnu ni sarih ah a serhtan dingah an ra ih a pa hmin suangin Zekhariah tiah a hmin sak an tum. 60 Asinain a nu in, "A si lo, a hmin cu Johan a si ding," tiah a ti. 61 Annih in, "Nan sungte lakah cuvek hmin a neitu zohman an um si lo!" tiah an ti. 62 Cule a pa cu kutzung hmuh in an biak ih a fapa hmin sak a duhmi kha an sut. 63 Zekhariah in ca ngannak cahnah a dil ih, "A hmin cu Johan a si," tiah a ngan. An zatein an lau ih an mang a bang ngaingai. 64 Cu ṭheh vete in Zekhariah ih hmur le lei cu an nung sal ih ṭong thei sal in Pathian a thangṭhat. 65 An innhnen pawl cu an thin a phang zet; cuih thu cu Judea tlangpar ram hmuahhmuah ah a thang ṭheh. 66 Cuih thu a theitu hmuahhmuah in an thinlung ciar in an rak ngaihtuah fingfing ih, "Hi naute cu ziangbangtuk minung ah hung cang pei maw!" tiah an ti cio. Ziangahtile Bawipa ih huham cu naute parah a um ti kha a fiangin an thei. 67 Johan ih pa Zekhariah cu Thlarau Thianghlim in a khat ih hiti in Pathian thu a sim: 68 "Israel ih Pathian Bawipa cu thangṭhat uhsi; A minung pawl bawm dingah le, luatter dingah a ra zo. 69 Kan hrangah a mak zetmi Runtu a suakter zo; Amah cu Bawipa ih siahhlawh David ih tesinfa a si. 70 Khuahlan a profet thianghlim pawl sung ihsin thu in kam cia zo; 71 In huatu pawl kut sungin le kan ral pawl kut sung ihsin humhim dingah. 72 Kan pupa pawl hnenah 'Zaangfah thinpemnak ka nei ding ih, ka thukamnak thianghlim cu ka hngilh lo ding,' tiah a ti. 73 Kan pu Abraham hnenah, 'Nan ral pawl kut ihsin ka lo run ding; ṭihnak zianghman um loin ka hna nan ṭuan ding; 75 Nan nunsung hmuahhmuah ka hmaiah mi ding le Mi thianghlim nan si ding,' tiah siatcam in thukamnak a rak tuah. 76 "Ka fa, nang cu a saang bik Pathian ih profet tiah kawh na si ding. Nang cu Bawipa ih lamzin rak sial saktu dingah a hmaiah na rak feh ding; 77 A minung pawl cu an sual ngaidamnak in rundamnak an ngah ding a si, tiih simtu dingah. 78 Kan Pathian cu mi zaangfahtu le mi nunnem a si ruangah, Rundamnak zing khawtleu cu kan parah a tlaangter ding; 79 Thimnak le thihnak phenthlam hnuai ih a ummi pawl hrangah Vancung ihsin a tlaang ding ih, remnak lamzinah in fehter ding," tiah a ti. 80 Naute cu taksa in siseh thlarau in siseh a ṭhang ih a cak vivo. Israel mi hnenah zapi hmuh ih a lang hlansung cuih ramṭhing ahcun a um.
1 Cuih caanah Siangpahrang Augustas a um ih a ukmi Rom ramsung hmuahhmuah ah mipum siar ih hmin lak thluh dingin thu a pek. 2 Hi mipum siarnak hmaisa bik caanah hin Kuirinias cu Siria ram uktu a si. 3 Curuangah zozo khal mipum siar ih hminkhum dingah anmah ih suahnak khua ciarah an feh. 4 Josef cu Galilee ram Nazareth khua ihsin Siangpahrang David suahnak Judea ram Bethlehem khua ah a feh. Josef cu David tesinfa a si ruangah cutawk khua ih a fehnak cu a si. 5 Mipum siar hminkhum dingah cun ṭhit dingih a ham ciami Mari thawn an feh. Mari cu nau a pai ih, 6 Bethlehem khua an um laiah nau hrin tikcu a kim. 7 A fatir ah fapa a hring ih puan in an tuam hnuah rannung rawl einak kuang sungah an hlum; ziangahtile riahbuk ah riahnak khaan an co lo. 8 Cutawk ram sungah cun tuukhal ṭhenkhat pawl cu zanah an tuu pawl kil in an um. 9 Bawipa ih vancungmi pakhat cu an hnenah a lang ih Bawipa ih sunlawinak cu an parah a rung tleu. An ṭih ngaingai; 10 asinain vancungmi cun, "ṭih hlah uh! Nan hrangah thuthang ṭha ka run keng; cuih thuthang ṭha cu mi hmuahhmuah hrangah lungawinak ngaingai a si. 11 Tuih zan rori ah David khawsungah nanmah Runtu Bawi Khrih a suak zo. 12 Cumi hminsinnak ah hiti in a si ding: naute cu puan in an tuam ding ih rannung rawl einak kuang sungah an hlum nan hmu ding," tiah a ti. 13 Hmakhatteah cuih vancungmi thawn hmun khatah vancung ihsin vancungmi burpi an rung lang ih Pathian thangṭhatnak hla an sak. 14 "A saang bik vanah khin Pathian cu thangṭhat si ko seh; A duhdawtmi minung pawl umnak leilungah hin remnak leeng ko seh," tiah an ti. 15 Vancungmi cu vanih an kirsal tikah tuukhal pawl in, "Bethlehem khua ah va feh in Bawipa ih in simmi cu va zohhnik uhsi," tiah pakhat le pakhat an ti aw. 16 Cuticun manhlap zetin an feh ih Mari le Josef le rannung rawl einak kuang sungih a itmi naute cu an va hmu. 17 Tuukhal pawl in naute an hmuh tikah vancungmi in cuih naute thuhla an simmi cu an hnenah an sim. 18 Tuukhal pawl ih simmi thu a theitu hmuahhmuah cu an mang a bang ngaingai. 19 Mari in hi thu hmuahhmuah cu ṭhazet in a ciing ringring ih thuk zetin a ruat. 20 Cule tuukhal pawl cu an kir ih an hmuhmi le an theihmi pawl ruangah Pathian thangṭhatnak hla sak phah in an tlung. Vancungmi ih a rak sim cia vekin a kim ṭheh a si. 21 Zarh khat hnuah naute cu a serhtan caan a kim tikah Jesuh tiah a hmin an sak. Cuih hmin cu a nuih a vun hlan ihsin vancungmi in a rak sim ciami hmin a si. 22 Moses daan sungih a um bangtuk in thianter awknak hrangih tuah ṭulmi pawl kha Josef le Mari in an tuah ding tikcu a thleng. Curuangah naute cu Bawipa hnenih hlan dingin Jerusalem ah an fehpi. 23 Bawipa ih daan cabu sungah, "Fatir mipa pohpoh cu Bawipa ih hnenah nan hlan pei," tiah ngan ciami a um. 24 Cuih tlunah Bawipa ih pekmi daan sungih a um vekin thuro khuah khat a si lole laileng note pahnih thawn thawinak pe dingah an fehpi. 25 Cule Simeon an ti mipa pakhat cu Jerusalem khua ah a rak um. Amah cu mi ṭha le Pathian a ṭihzahtu a si ih Israel mi hneemnak an ngahnak ding kha a hngak ringringtu a si. Thlarau Thianghlim a hnenah a um ih, 26 "Bawipa ih tiammi Messiah na hmuh ngah hlanah cun na thi lo ding," tiah fiangtein a phuan. 27 Thlarau hruainak in Simeon cu Biakinn sungah a feh tikah daan vekin a hrangih tuah dingah Jesuh cu a nu le a pa in Biakinn sungah an ratpi. 28 Simeon in naute cu a ṭaangah a cawi ih Pathian a thangṭhat, 29 "Bawipa, tuihsun ah hin na thukammi cu na kimter ih, Na salpa cu daitein a nunnak ni na liamter thei thlang a si. 30 Na rundamnak cu ka mit rori in ka hmu zo; 31 Mi hmuahhmuah mit hmuh ih na timtuahmi rundamnak cu! 32 Cuih rundamnak cu Zentail mi hnenah na lamzin langtertu tleunak a si ih, Na minung Israel mi pawl hnenah sunlawinak thlengtertu a si," tiah a ti. 33 Simeon ih ṭongmi cu naute nu le pa in an theih tikah an mang a bang ngaingai. 34 Cutikah Simeon cun thlawsuah a pek hai ih a nu Mari hnenah, "Hi naute cu Israel mi lakah mi tampi tluknak dingah le mi tampi tungdingtu dingah Pathian ih hrilmi a si. Amah hi mitampi in an engtaimi le Pathian hnenin a rami hmuhsaknak mak a si ding ih, 35 cutiih an relsiat ruangah anmah thinlung sungih thuthup pawl an neihmi langtertu ah a cang ding. Cule nangmah khal a hriammi ralnam ih sun vekin riahsiat ninghannak in na thinlung a lo sun ding a si," tiah a ti. 36 Anna an timi nunau profet pakhat a um ih amah cu nuhmei a si ih Asher hrin Fanuel ih fanu a si. Kum sarih sung lawng pasal a nei ih, 37 amah cu kum sawmriat le kum li a si. Nitin Biakinn ah a um ih a sun a zan in Pathian a biak ih rawl-ul in thla a cam ringringtu a si. 38 Culaifang ah a ra thleng ve ih Pathian a thangṭhat ngaingai. Cule Pathian in Jerusalem a luatter ding a si ti ih a hngaktu pawl hmuahhmuah hnenah naute thu cu a sim ciamco. 39 Josef le Mari in Bawipa ih daanih a fialmi vekin tuah ṭulmi pawl an tuah ṭheh hnu ah Galilee ram Nazareth khua an inn ah an tlung. 40 Naute cu a ṭhang vivo ih a cak ngaingai. Amah cu fimnak in a khat ih Pathian thlawsuahnak a parah a um. 41 Jesuh ih nu le pa cu kumtinte Lantak Puai ah Jerusalem ah an feh ṭheu. 42 Jesuh kum hleihnih a kim tikah an daan vekin puai ahcun an feh. 43 An puai a cem tikah inn ah an tlung, asinain nauhak pa Jesuh cu Jerusalem ah a taangta. A nu le a pa in cumi cu an thei lo; 44 mizapi lakah a tlung ve hmang tiah an ruat. Sun nihlawh an feh hnuah an sungkhat le rualpi pawl lakah an hawl vivo. 45 Asinain an hmu thotho lo; curuangah amah hawl in Jerusalem ah an kir sal. 46 A ni thumnak ah Biakinn sungah an hmu. Judah mi zirhtu saya pawl an tokhawm ih an thu ngai phah in thu khal a sut phah rero. 47 Thu a theih daan le fim zetih a thu leh daan an hmuh tikah a theitu pawl cu an mang a bangzet. 48 A nu le a pa in cutawkih Jesuh an hmuh tikah an lau an khawruah a har ngaingai ih a nu in, "Ka fapa, ziangah so hi bangtuk hin in tuah? Na pa thawn awloksong in kan lo hawl rero!" tiah a ti. 49 Jesuh in, "Ziangah so in hawl duh rero? Ka Pa ih inn ah um ding ka si, ti nan thei lo maw?" tiah a ti. 50 Asinain cutiih a thu lehnak cu a tican an thei lo. 51 Cuih hnuah Jesuh cu a nu le a pa thawn Nazareth ah an kir ih an thu ngai in a um. A nu in hi thuhla hmuahhmuah cu a thinlung ah feltein a ciing ringring. 52 Jesuh cu taksa in siseh, fimnak in siseh a ṭhang vivo ih Pathian hmai le minung hmaiah mithmai ṭha a ngah.
1 Rom siangpahrang Tiberias ih ram a uknak kum hleinga kumah Pontius Pilat cu Judea ram uktu Mangki bawi a si ih Herod cu Galilee ram uktu a si. Cule Herod ih u Filip cu Iturea le Trakhonitis ram uktu a si; Lisanias cu Abilene ram uktu a si ih, 2 Annas le Kaiafas cu Puithiam Saang an si. Cuih tikcu caan hrawngah ramṭhing ih um Zekhariah ih fapa Johan hnenah Pathian ṭongkam a thleng. 3 Curuangah Johan cu Jordan Tiva kiangkap ram hmuahhmuah a tlawng vivo ih, "Nan sual sir uhla baptisma lak uh; cule Pathian in nan sualnak a lo ngaidam ding," tiah thu a sim vivo. 4 Profet Isaiah ih ṭong cu cabu sungah ngan in a um. Cuih cabu sungah: "Mi pakhat cu ramṭhing ah a au ih, 'Bawipa ih lamzin kha rem uh, a fehnak lamzin cu ngilter uh. 5 Horkuam hmuahhmuah silhkhat uhla, tlang le mual hmuahhmuah in rawnter uh; Lam kel hmuahhmuah dingter uhla, a bingbo mi hmuahhmuah in rualter uh. 6 Miphun zakip in Pathian ih runnak an hmu ding,' tiah a ti," 7 Mitampi cu Johan ih baptisma lak dingah a hnenah an ra. Johan cun, "Nannih rul pawl! A ra thleng cing dingmi Pathian ih hremnak ihsin nan luat thei ding tiah zoso a lo sim? 8 Nan sualnak nan sir awk ahcun nan thil tuahmi in langter uh. Abraham kha kan pu a si pam tiah ti rero hlah uh. Fiangtein ka lo sim: Pathian in hi lungto hman hi Abraham ih tesinfa ah a cangter thei a si. 9 Thingkung pawl a hram ihsin haunak dingah hreitlung retcia a si zo. Rahṭha a rah lomi thingkung cu an hau ding ih meisa sungah an paih ding a si," tiah a ti. 10 Cutikah mipi in, "Cuti asile ziangtinso kan um ding?" tiah an sut. 11 Anih in, "Angki zun hnih a neitu in zun khat cu a nei lotu hnenah ṭhen seh; rawl a neitu in a nei lotu kha hlawm seh," tiah a ti. 12 Siahkhongtu ṭhenkhat pawl Johan ih baptisma lak dingah an ra ih, "Sayapa, kannih pawl ziangso kan tuah ding?" tiah an sut. 13 Anih in, "Nan khon ding zat hnakih tam deuh in va la hlah uh," a ti. 14 Ralkap ṭhenkhat pawl khal in, "Kannih teh? Ziangtin so kan tuah ding?" tiah an ra sut ve. An hnenah cun, "Zo ih hnen hmanin hranhram in paisa va lak hlah uh; thuphan in zohman sual va puh hlah uh. Nan thlahlawh zatah nan lungkim uh," tiah a ti. 15 Mi hmuahhmuah in ruahsannak an nei ciamco ih Johan cu Messiah a si pei maw, tiah an mangbangin an ruat fingfing. 16 Curuangah Johan in, "Kei cun tidai in baptisma ka lo pek. Asinain mi pakhat kei hnakih tum sawn a ra ding. Kei cu a kedam hri phoih saktu ding hman ka tlak lo. Anih cun Thlarau Thianghlim le meisa in baptisma a lo pek ding. 17 Fang seepnak ṭangṭa a keng ih fang pawl a seep ding. Fangngai cu a cuam sungah ṭhatein a ret thluh ding, asinain a hii pawl cu a mit dah lomi meisa sungah a ur ding," tiah a ti. 18 Johan cun Thuthang ṭha cu mipi hnenah a phunphun in a sim ih an ziaza thleng dingah a forh vivo. 19 Asinain Mangki bawi Herod cu a naupa ih nupi Herodias a ṭhit ih thil ṭha lo dangdang tla a tuah ruangah Johan in a kawk ṭheu. 20 Cutikah Herod in Johan cu thawngah a thlak ih cuticun thil ṭha lo sinsin a tuah. 21 Mi hmuahhmuah baptisma an lak ṭheh hnuah Jesuh khal a lak ve. Thla a cam laifangah van a ong aw ih, 22 Thlarau Thianghlim cu a tlunah thuro bangtuk in a rung fu. Cule vancung ihsin aw a thang ih, "Nangmah cu ka duhdawtmi ka Fapa na si. Na parah ka lung a awizet," tiah a ti. 23 Jesuh cu hnaṭuan a thok tikah kum sawmthum hrawng a si. Mipi in Josef fapa a si tiah an ruat. Josef cu Heli fapa a si, 24 Heli cu Matthat fapa a si, Matthat cu Levi fapa a si, Levi cu Melkhi fapa a si, Melkhi cu Jannai fapa a si, Jannai cu Josef fapa a si, 25 Josef cu Mattathias fapa a si, Mattathias cu Amos fapa a si, Amos cu Nahum fapa a si, Nahum cu Esli fapa a si, Esli cu Naggai fapa a si, 26 Naggai cu Maath fapa a si, Maath cu Mattathias fapa a si, Mattathias cu Semein fapa a si, Semein cu Josef fapa a si, Josef cu Joda fapa a si. 27 Joda cu Joanan fapa a si, Joanan cu Rhesa fapa a si, Rhesa cu Zerubbabel fapa a si, Jerubbabel cu Shealtiel fapa a si, Shealtiel cu Neri fapa a si, 28 Neri cu Melkhi fapa a si, Melkhi cu Addi fapa a si, Addi cu Kosam fapa a si, Kosam cu Elmadam fapa a si, Elmadam cu Er fapa a si, 29 Er cu Joshua fapa a si, Joshua cu Eliezer fapa a si, Eliezer cu Jorim fapa a si, Jorim cu Matthat fapa a si, Matthat cu Levi fapa a si, 30 Levi cu Simeon fapa a si, Simeon cu Judah fapa a si, Judah cu Josef fapa a si, Josef cu Jonam fapa a si, Jonam cu Eliakim fapa a si, 31 Eliakim cu Melea fapa a si, Melea cu Menna fapa a si, Menna cu Mattatha fapa a si, Mattatha cu Nathan fapa a si, Nathan cu David fapa a si, 32 David cu Jesse fapa a si, Jesse cu Obed fapa a si, Obed cu Boaz fapa a si, Boaz cu Salmon fapa a si, Salmon cu Nahshon fapa a si, 33 Nahshon cu Amminadab fapa a si, Amminadab cu Admin fapa a si, Admin cu Arni fapa a si, Arni cu Hezron fapa a si, Hezron cu Perez fapa a si, Perez cu Judah fapa a si, 34 Judah cu Jakob fapa a si, Jakob cu Isaak fapa a si, Isaak cu Abraham fapa a si, Abraham cu Terah fapa a si, Terah cu Nahor fapa a si, 35 Nahor cu Serug fapa a si, Serug cu Reu fapa a si, Reu cu Peleg fapa a si, Peleg cu Eber fapa a si, Eber cu Shelah fapa a si, 36 Shelah cu Kainan fapa a si, Kainan cu Arphaksad fapa a si, Arphaksad cu Shem fapa a si, Shem cu Noah fapa a si, Noah cu Lamek fapa a si, 37 Lamek cu Methuselah fapa a si, Methuselah cu Enok fapa a si, Enok cu Jared fapa a si, Jared cu Mahalaleel fapa a si, Mahalaleel cu Kenan fapa a si, 38 Kenan cu Enosh fapa a si, Enosh cu Seth fapa a si, Seth cu Adam fapa a si, Adam cu Pathian fapa a si.
1 Jesuh cu Thlarau Thianghlim thawn khat in Jordan ihsin a ra kir ih Thlarau in ramṭhing ah a hruai. 2 Cutawkah ni sawmli sung Satan in a hniksak. Cuih sung hmuahhmuah zianghman a ei lo ruangah a netnak ahcun a ril a rawng ngaingai. 3 Satan in Jesuh cu, "Pathian Fapa na si ahcun hi lungto hi sang ah cangter aw," tiah a ti. 4 Jesuh in, "Ca Thianghlim in 'Milai nunnak hi rawl lawngin a si lo,' a ti," tiah a sawn. 5 Cule Satan in a hun fehpi ih mitṭhepkar ah leilung tlun ram hmuahhmuah a hmuh. 6 "Hi leilung parih thuneihnak le lennak hmuahhmuah hi nangmah ka lo pe ding. Ka ta an si ṭheh ih ka duhmi hnenah ka pe thei. 7 Ka hmaiah kuun in i biak ahcun a zatein na ta an si ṭheh ding," tiah a ti. 8 Jesuh in, "Ca Thianghlim in 'Bawipa na Pathian na biak pei ih Amah lawng na rian pei,' a ti," tiah a sawn. 9 Cule Satan in Jesuh cu Jerusalem ah a fehpi ih Jerusalem Biakinn zim ah a ret ih, "Pathian Fapa na si ahcun hitawk ihsin dawp aw. 10 Ziangahtile Ca Thianghlim in, 'Nangmah a lo kilkhawitu dingah Pathian in a vancungmi pawl a fial ding,' a ti a si. 11 Cuih tlunah Ca Thianghlim sungah, 'An kut in an lo cawi ding ih na ke lungto ah na khawng aw lo ding,' ti khal in a um a si," tiah a ti. 12 Asinain Jesuh cun, "Ca Thianghlim in 'Bawipa na Pathian cu va hniksak hlah,' a ti," tiah a let. 13 Satan in Jesuh cu a phunphun in sual a forh ṭheh hnuah caan malte sung a feh santa. 14 Jesuh cu Galilee ah a kir ih Thlarau Thianghlim huham cu a hnenah a um. Cuih ram hmuahhmuah ah a hmin a thang ṭheh. 15 Sinakok ah thu a zirh ih mi hmuahhmuah in an thangṭhat. 16 Jesuh cu a rak tuallennak hmun Nazareth khua ah a feh ih amah ih daan vekin Sabbath ni ah sinakok ah a feh. Ca Thianghlim siar dingah a ding ih, 17 profet Isaiah cazual kha an pek. Cuih cazual cu a pharh ih: 18 "Bawipa ih Thlarau cu ka parah a um, Ziangahtile mifarah hnenih Thuthang ṭha sim dingah hriakculh in i hril zo. Sal taangmi pawl hnenih luatnak thu sim dingah le Mitcaw in khua an hmuh thei salnak dingah i thlah. Hremmi pawl luatter dingah le, 19 Bawipa in a minung pawl a runnak ding tikcu a ra thleng zo, ti than dingah i thlah a si," tiih ngannak hmun kha a siar. 20 Jesuh in a siarmi cazual cu a zual sal ih a kiltu ih kutah a pek ih a to. A ra pumkhawmmi hmuahhmuah in Jesuh cu mitṭhep loin an zoh. 21 Cule anih in, "Ka siarmi nan rak theih vekin hi Ca Thianghlim sungih nganmi cu tuihsun ah a kim a si," tiah a ti. 22 Hmualnei zet ih a ṭongmi kha an theih tikah an thinlung ah a lutzet ih mak an ti ngaingai. "Hi pa hi Josef fapa a si lo maw si?" an ti. 23 Jesuh in an hnenah, "ṭongṭhimnak ih 'Sibawipa, nangmah le nangmah damter aw he!' timi kha in ṭongsan ding ti fiangtein ka thei. Cuih tlunah 'Kapernaum khua ih na tuahmi thil pawl tla na khua ah hin tuah ve aw,' tiah in ti ding. 24 Fiangtein ka lo sim: Profet cu amah ih khua ah sunloih a si dah lo. 25 "Ka simmi hi ngai uh: Elijah sanah kum thum le a hrek sung ruah a sur lo ih ram pumpuluk ah paampi a tlun laiah khan Israel ram sungah nuhmei an tamzet a si. 26 Asinain cuih nuhmei pawl hnenah Elijah cu thlah a si lo; Sidon ram Zarefath khua ih nuhmei nu hnen lawngah thlah a si. 27 Cule profet Elisha san laiah khan Israel ram sungih a ummi mitampi cu phaarnat in an na; asinain midang zohman damnak an ngah lo; Siria mi Naaman lawng a dam a si," tiah a ti. 28 Cumi cu sinakok ih a ra pumkhawmmi pawl in an theih tikah an thin a heng ngaingai. 29 An zatein an pok ih Jesuh cu an khua ihsin an dirhsuak hnuah an khua ih tlangzim tiang an hruai ih khaam ihsin tuul thlak an tum. 30 Asinain Jesuh cu miruul lak ihsin a feh hlo. 31 Cun Jesuh cu Galilee peng Kapernaum khua ah a feh ih Sabbath ni ah thu a zirh. 32 A thuzirh zia an hmuh tikah hmualnei zetih a zirh ruangah an mang a bang ngaingai. 33 Cuih sinakok ah ramhuai ih polh mi, ramhuai thlarau neitu, pakhat a um. Cupa cu ring zetin a au ih, 34 "Nazareth Jesuh, ziangti ih tuah so in duh? Kanmah siatsuah dingah maw na rat? Zo na si ti ka lo thei: Pathian tirhfung thianghlim na si," tiah a ti. 35 Jesuh in, "Daite in um! Hi pa sung ihsin suak aw," tiah thu a pek. Ramhuai cun mizapi hmaiah mipa cu a thluk ih a parah zianghman siatsuahnak tuah lo tein a suak. 36 Cutikah mipi pawl cu an mang a bang tuk lawmmam ih pakhat le pakhat, "Hi pa ih ṭongka cu a va mak so! Thu neizet le huham nei zetin ramhuai pawl tla thu a pek ih a suahter," tiah an ti aw. 37 Cule Jesuh thuhla cu cuih ramsung khuazakipah a thang ṭheh. 38 Jesuh cu sinakok ihsin a suak ih Simon inn ah a feh. Simon ih pizon cu khawsiknat in a rak na ih cuih thu cu Jesuh an sim. 39 Cule Jesuh cu a ihkhun kiangah a ding ih a khawsiknat cu dam dingin thu a pek. Hmakhatte-ah a dam; a tho ih anmah pawl cu a tuamhlawm. 40 Ni a tlak hnuah natnak phunphun a tuartu pawl cu an rualpi pawl in Jesuh hnenah an rak hruai. A nami pawl ih lu parah a kut a suan ih an natnak ihsin a damter thluh. 41 Mitampi sung ihsin khawsia pawl cun, "Nang cu Pathian Fapa na si!" tiah au phah in an suak. Sikhalsehla Jesuh in khawsia pawl cu ṭong lo dingin thu a pek, ziangahtile Messiah a si kha an thei. 42 Khua a hung vang ih Jesuh cu khawsung ihsin a pok ih ramṭhing ah a va feh. Mi in an hawl ciamco ih an hmuh tikah, "In fehsan hram hlah aw," tiah an leem. 43 Asinain an hnenah, "Pathian Uknak Thuthang ṭha cu khua dangdang khal ah ka sim a ṭul hrimhrim a si, ziangahtile cumi tuah dingah Pathian ih thlahmi ka si," tiah a ti. 44 Cutiin Judea ram sungih sinakok ahcun thu a sim vivo.
1 Voikhat ah Jesuh cu Gennesaret Tili kapah a ding ih culaiah Pathian thu a simmi ngai duh ah misenpi cun amah naih an cuh aw ciamco. 2 Culai ah Jesuh in titlang ih lawng pahnih an hrenmi kha a hmu. Ngakaitu pawl cu lawng sung ihsin an suak ih an sur pawl an kholh rero. 3 Jesuh cu lawng pakhat deuh sungah a lut; cuih lawng cu Simon ih ta a si; cule lawng cu titlang ihsin a hlatnak deuh ah ṭhawn dingin a fial. Cuih lawng sungah Jesuh cu a to ih misenpi pawl cu a zirh hai. 4 Thusim a ṭheh tikah Simon hnenah, "Ti thuknak lamah na lawng hi ṭhawn awla na rualpi pawl thawn nan sur cu vun vorhhnik uh," tiah a ti. 5 Simon in, "Bawipa, taima zetin zanvarte kan vorh na'n zianghman kan awk lo. Sikhalsehla vorh uh, in ti a si ahcun kan vorh a si pei cu," tiah a ti. 6 Sur cu an vun vorh ih nga tam ngaingai an awk ih an sur tiangin a tlek ṭhehzik. 7 Cutikah lawng dangih an rualpi pawl kha, "In ra bawm uh," tiah an kut an hei zaap. An ra ih an lawng pahnih cu nga khattein an ret ih an lawng cu a pil zikte. 8 Cumi cu Simon in a hmuh tikah Jesuh ih khuk kiangah a khuk a bilh ih Jesuh hnenah cun, "Bawipa, i fehsan hram aw; ziangahtile kei hi misual ka si!" tiah a ti. 9 Amah le a rualpi pawl cu nga tam ngaingai an awh ruangah an mang a bang ngaingai. 10 Cuvek thotho in amah thawn nga a kaitu Zebedi ih fapa Jeim le Johan khal an mang a bang ve. Jesuh in Simon cu, "Na thin phang hlah; atu thokin minung kaitu na si ding," tiah a ti. 11 An lawng pawl cu ti kapah an dinter ih an thil hmuahhmuah fehsan in Jesuh cu an thlun. 12 Voikhat ah Jesuh cu phaarnat a tuartu pa pakhat ih umnak khua ah a thleng. Cupa cun Jesuh a hmuh tikah a hmaiah a bok ih, "Bawipa, na duh ahcun i thiangter thei a si," tiah a dil. 13 Jesuh in a kut in a tham hnuah, "Ka lo thiangter duh, thiang thlang aw," tiah a ti. Hmakhatteah a natnak cu a dam. 14 Jesuh in, "Zohman va sim hlah, asinain va feh vurvo awla puithiam in lo zohseh; cule na dam ti kha mi hmuahhmuah ih an lo hmuhnak dingah Moses daan vekin thawinak va pe aw," tiah a ti. 15 Asinain Jesuh thuhla cu hmun kipah a thang sinsin, mi in an pan sinsin ih a thu simmi an ngai; cule an natnak khal a damter. 16 Cuih hnuah misenpi hnen ihsin feh tahratin hlimphirnak hmunah amah lawng thla a cam ṭheu. 17 Nikhat ah Jesuh cu thu a zirh rero laiah Jerusalem khua le Judea ram le Galilee ramih khawkip ihsin a rami Farasi le Daanthiam ṭhenkhat pawl khal an ra to ve. Mina damter theinak Bawipa ih huham cu Jesuh parah a um. 18 Culai ah mizengpa pakhat cu a ihphah thawn laangin an rak zawn ih Jesuh hmaiih vun ret dingah inn sungah luhpi an tum. 19 Sikhalsehla mi an tamtuk ruangah an fehpi theinak ding lamzin a um lo. Curuangah inn parah an kaipi ih diphun bauh hnuah misenpi lak Jesuh hmai rori-ah cun a ihphah thawn an vun thlak. 20 Zumnak an neihzia kha Jesuh in a hmuh tikah mizengpa hnenah cun, "Ka rual, na sualnak cu ngaithiam a si zo," tiah a ti. 21 Daanthiam pawl le Farasi pawl cun, "Pathian thangsiatnak hi bangtuk a ṭong theitu milai cu ziangvek milai so a si? Pathian pakhat lawng sual ngaithiam theitu a si," tiah pakhat le pakhat an ti aw. 22 Jesuh in an ruahmi cu a thei ih an hnenah, "Hi bangtuk in ziangah so nan ruah? 23 'Na sualnak hi ngaithiam a si zo,' ti maw, a si lole 'Tho awla feh aw,' tiso a ol sawn? 24 Mi Fapa hi leilung tlunah hin sualnak a ngaithiam thei a si, ti nan hnenah ka langter ding," tiah a ti. Cule mizengpa cu, "Ka lo sim: Tho aw! Na ihphah la awla na inn ah tlung aw," tiah a ti. 25 Hmakhatteah mizengpa cu mipi hmaiah cun a tho ih a ihphah cu a lak ih Pathian thangṭhat phah in a inn ah a tlung. 26 Mipi cu an mang a bang ngaingai! ṭih phah in Pathian cu an thangṭhat ih, "Ziangbangtuk khawruahharza thil so tuihsun ih kan hmuh mi hi!" tiah an rel ciamco. 27 Cuih hnuah Jesuh cu a feh ih siahkhongtu Levi an timi pa a zung sungih a to kha a hmu. Jesuh in a hnenah, "I thlun aw," tiah a ti. 28 Levi cu a tho ih ziang hmuahhmuah taanta in Jesuh cu a thlun. 29 Cule Levi in a inn ah rawl einak puai tumpi Jesuh hrangah a tuah ih a sawmmi pawl lakah cun siahkhongtu pawl le midang tampi an tel. 30 Farasi mi ṭhenkhat le Daanthiam ṭhenkhat anmah ih bu sungtel pawl cu Jesuh dungthluntu pawl hnenah an phunzai. "Ziangah so siahkhongtu le misual tla thawn rawl nan ei ih ti nan in tlang?" tiah an sut. 31 Jesuh in, "A harhdammi pawl in sibawi an ṭul lo, a nami pawl lawngin an ṭul. 32 Miding pawl ko dingah ka ra lo; misual pawl an sual sir awter dingah ka ra a si," tiah a ti. 33 Mi ṭhenkhat in Jesuh hnenah, "Johan dungthluntu pawl cu rawl an ul ṭheu ih thla khal an cam ṭheu; cule Farasi pawl ih dungthluntu pawl tla in cuvekin an tuah ve ṭheu. Asinain na dungthluntu pawl cu an duhduh in an in an ei," tiah an ti. 34 Jesuh in, "Mopuai a ra zawhtu pawl cu mopa an hnenih a um sungah rawl loin an um ding maw?" tiah a sut. "An um lo ding! 35 Sikhalsehla mopa an hnen ihsin laak a si caan a ra thleng ding ih cutikah rawl cu an ul leh ding," tiah a ti. 36 Cuih hnuah Jesuh in an hnenah hiti in thuṭhimnak a sim, "Zohman in hnipuan hlun belhnak dingah hnipuan thar an thlek dah keel lo. An thlek a si ahcun hnipuan thar cu a tlek laklawh ding ih hnipuan hlunih an belh tikah a kaih aw fawn lo ding. 37 Cule zohman in sabitti thar cu savun thawl hlun sungah an thun lo ding, ziangahtile sabitti thar in thawl hlun cu a pahkuai ding ih sabitti cu a bung lak ding ih thawl khal cu a siat ṭheh ding. 38 Cu hnak cun sabitti thar kha savun thawl thar sungah thun sawn ding a si. 39 Cun sabitti hlun an in hnuah zohman in sabitti thar an in duh lo. 'A hlunmi a ṭha sawn,' an ti," tiah a sim.
1 Jesuh cu Sabbath ni ah lo lakin a feh. A dungthlun pawl in sangvut vui an zuut phah ih an zaphak sungih an nuai hnuah a fang cu an ei. 2 Farasi mi ṭhenkhat pawl in, "Kan Daan in Sabbath ni ah tuah lo ding, timi cu ziangah so nan tuah?" tiah an sut. 3 Jesuh in an hnenah, "David le a ralkap pawl an ril a rawn tikah David in ziang a tuah ti kha nan siar dah lo maw? 4 Pathian inn sungah lut tahratin Pathian hnenih pekmi sang a lak ih a ei; cule a ralkap pawl tla a pek a si. Puithiam pawl siar lo cuih saang ei cu kan Daan in a duh lo a si kha!" tiah a ti. 5 Cule Jesuh in a netnak ah, "Milai Fapa cu Sabbath ih Bawi a si," tiah a ti. 6 Voikhat ah Sabbath ni ah Jesuh cu sinakok ah a feh ih thu a zirh. Cunah cun a kut vorhlam a zengmi pa pakhat a um. 7 Farasi mi ṭhenkhat pawl le Daanthiam ṭhenkhat pawl in Jesuh ih sual hawl an duh ruangah Sabbath ni ahhin a damter pei maw, tiah cat loin an zoh. 8 An ruahnak cu Jesuh in a theih ruangah mipa cu, "Tho awla hmailam ahhin ra suak aw," tiah a ti. Kutzeng pa cu a tho ih hmaiah cun a ra ding. 9 Cule Jesuh in an hnenah, "Thu ka lo sut hai ding: Kan Daan in Sabbath ni ih tuah dingah ziangso in on? Mi bom ding maw, mi tuahmawh ding so? Mi nunnak humhim ding maw, siatsuah ding so?" tiah a ti. 10 Cule cu pawl cu a zohhliah vivo hnuah kutzeng pa hnenah cun, "Na kut hawi aw," a ti. A kut cu a hawi ngaingai ih a dam ngah. 11 Farasi le Daanthiam pawl cu an thin a heng tuk ih Jesuh an siatsuah theinak dingah thu an ron aw ciamco. 12 Culai ah Jesuh cu thlacam dingin tlang parah a kai ih Pathian hnenah zanvar thla a cam. 13 Khua a hung vaan tikah a dungthlun pawl a ko khawm ih anmah sungin mi hleihnih a hril; cupawl cu 'Tirhthlah pawl' tiah a ko. 14 An hmin cu Simon (Piter tiah a kawhmi) le a nau Andru, Jeim le Johan, Filip le Bartholomeo, 15 Matthai le Thomas, Alfias ih fapa Jeim le Simon (Phunṭantu tiih kawhmi), 16 Jeim ih fapa Judas le Jesuh phiar lehtu Judas Iskariot tla an si. 17 Jesuh cu a dungthlun pawl thawn tlangpar ihsin an rung suk ih a thluntu tampi pawl thawn hmun rawn ah an ding. Mitampi cutawkah cun an ra; Judea ram pumpuluk ihsin siseh, Jerusalem khua in siseh, tipikap ih a ummi Taiar le Sidon khawpi tla in an ra. 18 Jesuh thusimmi ngai duh ah le an natnak tla dam duh ah an ra. Thlarau thiang lo pawl ih zonzaihtermi pawl tla a damter. 19 Mi hmuahhmuah in amah kha tham an duh; ziangahtile a sung ihsin huham a suak ih a damter ṭheh hai ruangah a si. 20 Jesuh in a dungthluntu pawl a zoh hai ih, "Mi farah pawl cu mi thlawsuak nan si, Pathian Uknak cu nanmah ih ta a si! 21 "Atu laiih rilrawng pawl cu mi thlawsuak nan si, nan khopkham leh ding a si! "Atu laiih mitthli a tlami pawl cu mi thlawsuak nan si, nan lungawiin nan hni leh ding. 22 "Mi in an lo hua, an lo hnong ih Milai Fapa ruangah an lo hmuhsuam, an lo relsiat asile mi thlawsuak nan si! 23 Cubangtuk a si tikah nan thin nuam in um uhla lungawiin laam uh; ziangahtile nan hrangah tuarman tampi vancungah retcia in a um zo. Cubangtuk cu an pupa pawl khal in profet pawl parah an rak tuah zomi a si. 24 "Atuih milian pawl cu zaangfakza nan si; nunnuam nan comi a cem zo! 25 "Atuih a khopkham pawl cu zaangfakza nan si; rilrawngin nan vakvai leh ding. "Atuih a hni rero pawl cu zaangfakza nan si; nan ṭap nan ai leh ding. 26 "Mikip ih porh le fakmi cu zaangfakza nan si; Ziangahtile an pupa pawl khal in cuvekin profet deu pawl kha an rak porh dah a si. 27 "Sikhalsehla ka thu a theitu nannih pawl: Nan ral duhdaw uh; a lo huatu pawl parah ṭhatnak tuah uh; 28 a lo camtu pawl khi thlawsuah pe uhla a lo hremtu pawl hrangah thla cam uh. 29 Mi pakhatkhat in na biang a lo beng asile khatlam khal tun hrih aw; mi pakhatkhat in na kawt angki lenghruk a lak ahcun na angki sunghruk khal pe cih aw. 30 Na thilri pakhatkhat a lo diltu an um ahcun va pe aw; cule mi pakhatkhat in na thil an lak le va dil sal nawn hlah. 31 Na hrangah tuah hai sehla ti na duhmi kha midang hrangah va tuah aw. 32 "Nangmah a lo duhdawtu lawng na duhdawt a si ahcun ziangah so thlawsuah malsawm ngah ding cu na zum? Misual pawl khal in anmah a duhdawtu cu an duhdawt ve a sisi! 33 Nangmah parah ṭhatnak a tuahtu hrang lawngah ṭhatnak na tuah ve ahcun ziangah so thlawsuah malsawm ngah ding cu na zum? Misual pawl hman in cuvek cu an tuah ve a sisi! 34 Ka ngah sal ding tiih na zummi hnen lawngih na coih ahcun ziangah so thlawsuah malsawmnak ngah ding cu na beisei? Misual pawl hman in an ngah sal ding ahcun misual dang pawl hnenah an coih ve a sisi! 35 Cutiin a si lo! Nan ral pawl duhdaw uhla an parah ṭhatnak tuah uh. Coih uhla ngah sal ding ruat duh hlah uh. Cuticun ṭhatman tampi nan ngah ding ih Cungnungbik Pathian ih fa nan si ding. Ziangahtile amah cu miṭha lo le lungawi hna hman a thiam lomi par khalah a ṭha a si. 36 Nan Pa cu mi zaangfah thiam a si vekin nannih khal mi zaangfah thiam va si ve uh," tiah Jesuh in a ti. 37 Mi va soisel hlah, Pathian in a lo soisel ve lo ding. Midang va hnong hlah, Pathian in a lo hnong ve lo ding. Midang ngaidam awla Pathian in a lo ngaidam ve ding. 38 Midang hnenah thil ṭhen aw, Pathian in a lo ṭhen ve ding. Tamzet in, liam thluahthlo in, na kut sungah pek na si ding ih na zawi thei nawn lo tiangin burh na si ding. Midang parih na hmanmi tahnak khi Pathian in na parah a hmang ve ding," tiah a ti. 39 Cule Jesuh in hi tahṭhimnak hi a sim: "Mitcaw pakhat in a dang mitcaw a hruai thei lo ding. A hruai asile an pahnih in korhrum sungah an tla ding. 40 Tlawngta cu a saya hnakin a thiam sawn dah lo; asinain tlawngta cu a zirnak a ṭheh tikah cun a saya bangtuk a si ding. 41 "Nan mit sungih thingtum a ummi sawn hman ruat loin ziangah so na unau mit sungih mit-hnawm fate lehlam na zoh? 42 Na unau hnenah 'Unau, zaangfahte in na mit sungih mithnawm kha ka lo coih sak pei,' tiah ziangtinso na ti thei? Nangmah mit sungih thingtum hman na hmuh thei si lo! Mi titer aw pawl! Hmaisabik ah nan mit sungih thingtum kha suahta uhla cuih hnuah nan unau mit sungih mithnawm kha coih dingah ṭhatein nan hmu ding," tiah a ti. 43 Thingkung ṭha in rahsia a rah dah lo; thingkung ṭha lo in rah ṭha khal a rah thei ve lo. 44 Thingkung hmuahhmuah khi an rah in theih thei an si: hlingkung par ihsin thei rah nan lo dah lo; cuvekin theihmu kung ihsin sabit rah nan lo fawn lo. 45 Mi ṭha in a thinlung sungih a ummi thil ṭha kha a suahter; mi ṭha lo in a thinlung sungih a ummi thil ṭha lo pawl kha a suahter ve. Ziangahtile minung cu a thinlung sungih a ummi kha a kaa in a suak a si," tiah a ti. 46 Jesuh in, "Ziangah so 'Bawipa, Bawipa,' tiah in ti ih ka lo sim mi cu nan tuah fawn lo? 47 Ka hnenah ra in ka thusimmi a ngai ih a thluntu pawl cu mi ziangvek an si, ti ka lo hmuhhnik ding. 48 Cupa cu lungpi parah khur thukpi lai in ṭhuam a bun ih inn a saktu pa bangtuk a si. Tiva a hung lian ih cuih inn cu a sawh ciamco na'n a hnin thei lo; ziangahtile fekteih sakmi inn a si. 49 Sikhalsehla ka thusimmi a thei na'n a thlun lotu pa cu ṭhuam ṭhateih phun loin leilung meen ih inn a saktu pa vek a si. Tilian in a cuih inn cu a run pah tikah hmakhatte ah inn cu a tlu ih ziangtluk ṭihnungza so a si!" tiah a ti.
1 Jesuh cu hi thu hmuahhmuah a sim ṭheh tikah Kapernaum khua ah a feh. 2 Cutawkah Rom ralbawi pakhat a um ih hnen-um pakhat a nei; cuih a hnen-um cu a duh ngaingai; asinain a na ih a thi zik thlang. 3 Cuih ralbawipa cun Jesuh thuhla a theih tikah a hnen-um ra damter dingin va dil dingah Judah mi upa pawl a thlah. 4 Jesuh hnenah an va thleng ih thungai thlak in an va dil. "Hi pa cu na bom ding a tlak ngaingai a si. 5 Kan miphun a duhdawtu a si ih amah rori in kan hrangah sinakok a sak a si," tiah an ti. 6 Curuangah Jesuh in anmah cu a hei thlun. A cuih inn an naih vivo tikah ralbawipa cun a rualpi pawl a rak thlah ih, "Bawipa, har rero in ra duh hlah. Ka inn hi nangih luhnak ah a tlak lo a si. 7 Cun na hnenah keimah ka ra ding ka ti khalle ka tlak thotho lo tiah ka ruat aw. Curuangah thu pe mai awla ka hnen-um cu a dam ko ding. 8 Keimah khal bawi upa kut hnuai ih um ka si ih keimah ih kuthnuai khalah ralkap pawl an um. Ralkap pakhatkhat hi 'Feh aw,' ka ti ahcun a feh; a dang pakhat hi 'Ra aw,' ka ti ahcun a ra. Cun ka hnen-um cu 'Hihi tuah aw,' ka ti ahcun a tuah a si," tiah a ti. 9 Cumi cu Jesuh in a theih tikah cupa ih zumnak cu a mang a bang ngaingai. A thluntu misenpi pawl lam ahcun a her ih, "Thungai in ka lo sim: Israel mi lak hmanah hi bangtuk zumnak cu ka tong dah lo!" tiah a ti. 10 A thlahmi pawl cu ralbawipa ih inn ah an kir ih a hnen-um pa a rak dam zo kha an hmu. 11 Cuihhnu reilote-ah Jesuh cu Nain an timi khua ah a feh ih a dungthlun pawl le mitampi in an thlun. 12 An khuahnar a thlen tikah mithi phum dingah miruunpi an ra suak. A thimi cu nuhmei nu ih fapa neihsun a si ih khawsungmi tampi in a nu cu an thlun. 13 Bawipa in cu nu cu a hmuh tikah a zaangfah ngaingai ih, "ṭap nawn hlah," tiah a ti. 14 Cule Jesuh cu a va feh ih ruakkuang cu a tham; cule a zawntu pawl cu an ding. Jesuh in, "Tlangval pa, tho aw ka lo ti!" tiah a ti. 15 Mithi pa cu a tho ih a ṭong thei; cule Jesuh in a nu ih hnenah a hruai. 16 An zatein an thin a phang ih Pathian an thangṭhat. "Kan lakah a maksakmi profet a suak; a minung pawl run dingah Pathian a ra thleng zo," tiah an ti. 17 Jesuh ih thuhla cu cuih ram hmuahhmuah le a kiangkap ah a thang ṭheh. 18 Cuih thu hmuahhmuah cu Johan dungthluntu pawl in Johan hnenah an sim. Cule Johan in a dungthlun pahnih a ko ih, 19 "Johan in a ra ding tiah a timi cu na si maw, a si lole a dang kan hngak hrih ding maw?" tiin Bawipa va sut dingah a thlah. 20 Jesuh hnen an thlen tikah annih in, "Baptisma petu Johan in 'a ra ding a timi cu nangmah hi na si maw, a si lole midang kan hngak hrih ding so?' tiah sut dingah in thlah a si," tiah an ti. 21 Culai fangah cun Jesuh in mi tampi an dam lonak le an natnak a phunphun a damter ih khawsia ih polhmi tla a damter ih mitcaw tampi tla khua a hmuhter sal. 22 Cuih hnuah Jesuh in Johan dungthlun pawl cu, "Va kir uhla nan hmuhmi le nan theihmi hi Johan cu va sim uh: mitcaw in khua an hmu thei, ke-awl pawl ṭhatein an feh thei, phaarnatih a nami pawl tla an thiang sal; hnaset mi in thawmvang an thei thei, mithi pawl an thosal ih mi farah pawl hnenah Thuthang ṭha cu sim a si zo. 23 Keimah ih thuhla ah thinlung rinhmainak a nei lotu cu mi thlawsuak an si," tiah a sawn. 24 Johan ih thlahmi palai pawl an kir hnuah Jesuh in Johan ih thuhla cu mipi hnenah hiti in a sim: "Ramṭhing ih nan feh tikah ziang hmu dinginso nan feh? Thli in a sem ruangah a kuur reromi hrampi maw? 25 Ziang hmuh duh ah so nan feh? Hnipuan mankhung a hrukmi zoh duh ah maw? Cubangtuk hnipuan mankhung a hrukih nuamzetin a umtu pawl cu siangpahrang inn lawngah an um a si. 26 I sim hnik uh: Ziang zoh duh ah so nan feh? Profet zoh duh ah maw? Asi, profet zoh duh ah nan feh ngai; asinain nan hmuhmi hi profet hnakih nasa sawn a si. 27 Ziangahtile Johan thuhla hi Ca Thianghlim sungah, 'Pathian in na hrangih lamzin sialtu dingah na hlanah ka palai ka thlah ding a ti,' tin a um. 28 Fiangtein ka lo sim: minung ih hrinmi hmuahhmuah lakah Johan hnakih a tum sawn le a nasa sawnmi zohman an um lo. Sikhalsehla Pathian Uknak sungih mi nautabik cu Johan hnakin a tum sawn a si," tiah a ti. 29 Cutiih a simmi cu mipi in an thei. Anmah le siahkhongtu pawl tla cu Pathian ih dingnak a pomtu an si ih Johan ih baptisma latu an si. 30 Sikhalsehla Farasi pawl le Daanthiam pawl cun an hrangih Pathian tumtahmi kha an pom lo ih Johan ih baptisma a la duh lotu an si. 31 Cule Jesuh in, "Tuihsan milai pawl hi ziangthawn so ka ṭhim ding? Ziang bangtuk so an si? 32 Dawr tuahnak hmunih a tomi nauhak pawl bangtuk an si. Nauhak bur khat in a dang bur khat hnenah: 'Mopuai hla kan lo saksak na'n nan laam duh lo; Mithi hla kan lo saksak na'n nan ṭap duh fawn lo,' a ti awmi nauhak pawl bangtuk an si. 33 Baptisma petu Johan a ra ih rawl ul le sabitti in loin a um tikah 'Ramhuai in a polh,' nan ti. 34 Milai Fapa a ra thleng ih a ei a in tikah nannih in 'Hi pa hi zohhnik uh! Rawl phaam le sabitti phaam pa hi; siahkhongtu le misual pawl ih rualpi a si!' in ti. 35 Asinain Pathian fimnak a dik zia cu a pomtu pawl in an langter a si," tiah a ti. 36 Farasi mi pakhat in Jesuh cu zanriah eitlang dingah a sawm. Jesuh cu a va feh ih rawl ei dingah cun a to. 37 Cuih khua ah nunsual ih a nungmi nunau pakhat a rak um. Cunu in Jesuh cu Farasi pa innah rawl a ei ding ti a theih tikah alabaster timi lungih tuahmi thawl pakhat in zihmui a rak keng ih, 38 Jesuh dunglam, a ke hramah ding tahratin a ṭap ih a mitthli in Jesuh ih ke cu a tlak ruangah a ciar. Cule Jesuh ih ke cu a sam in a hnawt hul ih a hnam hnuah zihmui a toih. 39 Cumi cu Farasi pa in a hmuh tikah a thinlungte in, "Hi pa hi profet taktak a si ahcun a tham rerotu nunau nu hi zo a si ti a thei ding ih ziangvek nuncan sual in a nung ti khal a thei ding," tiah a ruat. 40 Jesuh in Simon hnen ahcun, "Simon, thu ka lo sim duhmi a um," tiah a ti. Simon in, "Sayapa, i sim aw he!" tiah a ti. 41 Jesuh in, "Tangka coihtu pa hnen ihsin tangka a cawitu mi pahnih an um. Pakhat pa in ngun tangka zanga a cawi ih a dang pakhat in sawmnga a cawi. 42 An pahnih in an sam thei lo veve. Curuangah an pahnih in a olh. Cute pahnih lakah zo deuh in so tangka coihtu cu an duhdawt deuh ding?" tiah a ti. 43 Simon in, "Tangka tam deuh a olh mipa in a duhdawt deuh ding tiah ka ruat," tiah a ti. Cutikah Jesuh in, "A dik a si," a ti. 44 Cule nunau nu lam ih a her hnuah Simon hnenah cun, "Hi nunau nu hi na hmu maw? Na inn sungah ka runglut; nang in ka ke kholhnakah tidai i pe lo, asinain hi nu in ka ke cu a mitthli in a kholh ih a sam in a hnawt hul a si. 45 Nang cun hnamnak in i rak hmuak lo, asinain hi nu cun ka ra thlen vete in cat loin ka ke a hnam a si. 46 Nang cun ka lu ih culh dingah olif hriak i pe lo, asinain anih cun ka ke hi zihmui in a toih a si. 47 Ka lo sim: a mi duhdawtnak tumpi a langtermi hin a sualnak tampi cu ngaithiam a si zo ti kha a langter a si. Sikhalsehla a sualnak malte lawng ngaithiam a si mi cun duhdawtnak malte lawng a langter ve a si," tiah a ti. 48 Cule Jesuh in nunau nu hnenah, "Na sualnak pawl cu ngaithiam a si zo," tiah a ti. 49 Rawl einak cabuai ih a totu midang pawl cun an thinlungte in, "Sualnak hman a thlah sak theitu, hi pa hi zo vek mi so a si?" tiah an ti aw. 50 Asinain Jesuh in nunau nu cu, "Na zumnak in a lo run suak zo; hnangamte in va tlung aw," tiah a ti.
1 Tawkfang a rei hnuah Jesuh cu Pathian Uknak Thuthang ṭha sim in khawpi le khawte a tlawng vivo. Dungthluntu hleihnih tla an tel. 2 Cule natnak a phunphun le khawsia ih polhmi pawl a damtermi nunau tla an tel ve: a sung ihsin ramhuai pasarih a dawi suakmi Mari (Magdalene ti tla in kawhmi), 3 Herod zung ah bawi a si mi Khuza nupi Joanna, Susanna le an neihmi thilri thawn Jesuh le a dungthluntu pawl a bawmtu nunau pawl tla an si. 4 Khua khat hnu khua khat in Jesuh hnenah mi an ra; mi tam ngaipi a hnenih an ratkhawm tikah hiti in tahṭhimnak a sim. 5 "Voikhat ah mi pakhat cu thlaici vorh dingah a feh. Lo sungih thlaici a vorh tikah a ṭhenkhat cu lamzin tluanah an tla ih cu pawl cu mi in an pal, vate in an sar ṭheh. 6 Òhenkhat cu lungsedaap lakah an tla ih thlaici cu an kho na'n leilung a hnawng lo ruangah an caar ṭheh. 7 Thlaici hrekkhat pawl cu hlingbur lakah an tla ih hlingkung thawn an ṭhang tlang ih hlingkung in a zaap ṭheh. 8 Cule ṭhenkhat cu leilung ṭhatnak ah an tla ih an kho ih an vui; fang zakhat fingfing an nei. Theihnak hna a neitu cun thei uh," tiah a ti. 9 Cuih tahṭhimnak ih tican ziang a si, tiah a dungthluntu pawl in Jesuh an sut. 10 Jesuh in, "Pathian Uknak ih thuthup theih theinak cu nan hnenah pek a si zo; asinain midang hnenah cun tahṭhimnak thawn lawngin sim a si ding. Curuangah an zoh rero ding na'n an hmu thei lo ding, an ngai rero ding na'n an thei thiam lo ding. 11 "Hi tahṭhimnak ih tican cu hiti in a si: thlaici cu Pathian ih ṭongkam a si. 12 Lamzin tluan ih a tlami thlaici cu Pathian ṭongkam an thei na'n Satan a ra ih an zum lonak ding le runmi an si lonak dingah an thinlung sung ihsin Pathian ih thu cu a lak hlosak mi pawl an si. 13 Lungsedaap lakih a tlami thlaici cu Pathian ṭongkam cu an thei ih lungawi zetin an pom. Asinain an thinlung sung thukpi ah a pil lo. Tikcu tawite sung an zum ih hniksaknak caan a thlen tikah a tlu salmi pawl an si. 14 Hlingbur lakih a tlami thlaici cu Pathian ṭongkam cu an thei; sikhalsehla leilung tlun donharnak, len duhnak le taksa nomnak in a khuh ih ziangtik hmanah a rah cu a hmin dah lomi pawl an si. 15 Leiram ṭha ih a tlami thlaici cu Pathian ṭongkam an thei ih thinlung ṭha le zawnlungte ih a cem tiang rah nei ko a pom hngettu pawl an si," tiah a sim. 16 Cule Jesuh in, "Zohman in mei-inn vang tahratin kho an khuh dah lo, ihkhun hnuai khal ah an ret keel lo. Inn sungih mi an luh tikah tleunak an hmuh fiang theinak dingah mei-inn vannak tung parah an ret a si. 17 "A thupte ih thuhmi hmuahhmuah cu langter thluh sal a si dingih khuhmi thil hmuahhmuah cu khawtleu ah suahter sal ṭheh an si ding. 18 "Curuangah thu nan ngaidan ah hin ralring uh; ziangahtile thil tawkfang a neitu cu peksin a si ding ih zianghman a nei lotu cu malte ka nei tiih a ruahmi hman kha laksak a si ding," tiah a ti. 19 Jesuh ih nu le a nau pawl kha a hnenah an ra, asinain mi an tamtuk ruangah an tong thei lo. 20 Mi pakhat in Jesuh hnenah, "Na nu le na naule pawl lenglam ah an ding ih an lo tong duh," tiah a ti. 21 Jesuh in mipi hnenah, "Ka nu le ka naule pawl cu Pathian thu a thei ih a thluntu pawl an si," tiah a ti. 22 Voikhat ah Jesuh cu a dungthluntu pawl thawn lawng sungah an lut ih an hnenah, "Tili khatlam ral ah feh uhsi," tiah a ti. A ti vek cun an feh. 23 Long in an feh rero laiah cun Jesuh cu a it that! Rinlopi-ah thlisia a rung hrang ciamco; an lawng sungah tidai a lut ih a khah zik thlang tikah cun an phang ngaingai. 24 Dungthluntu pawl in Jesuh cu an va ṭhang ih, "Bawipa, Bawipa! Kan thi thluh zik thlang sokhaw," tiah an ti. Jesuh cu a hung tho ih thlisia le tilet cu thu a pek. Thlisia cu a reh ih zianghman thawthaang um loin a dai khepkhep. 25 Cule a dungthluntu pawl cu, "Nan zumnak khui-ah so?" tiah a ti. Sikhalsehla annih cu an mang a bang ih an ṭihzet; cule pakhat le pakhat, "Hi pa hi zoso a si? Thlisia le tilet tla thu a pek ih a thu an ngai hi!" tiah an ti aw. 26 Jesuh le a dungthluntu pawl cu lawng in Galilee tili ralkhat Gerasene timi peng ah an thleng. 27 Jesuh cu tikap ih a suah zawng ah khawsia pawl ih polhmi pakhat in a rak tong. Cupa cu caan reipi inn ah um loin le hnipuan hruk loin a tawivak vivo ih mithi phumnak lungkua sungah a um sawn ṭheu. 28 Jesuh a hmuh tikah napi in a raak ih Jesuh ke hramah a hlon aw ih ringzet in, "Jesuh, Cungnungbik Pathian Fapa! Nang le kei ziangso kan seng aw? I hrem hram aw hlah, tiah ka lo dil!" tiah a au. 29 Ziangah cuvekin a au tile Jesuh in khawsia kha cupa sung ihsin suak dingin thu a pek ruangah a si. Voi tampi cu khawsia cun a tuah tikah thawnginn ah a kut le a ke thir cikcin in an ṭem khalle thir cikcin cu a phihcat thluh ih khawsia cun ramṭhing ah a hlohter ṭheu a si. 30 Jesuh in, "Na hmin zoso?" tiah a sut. Anih in, "Ka hmin cu burpi ka si," tiah a sawn. Ziangahtile khawsia burpi a sungih an um ruangah a si. 31 Khawsia pawl in Jesuh cu, "Khur thukpi sungah in thlak hram hlah aw," tiah an dil. 32 Cutawk kiangkap tlang parah vok rual tampi an tlang rero. Khawsia pawl in Jesuh cu, "Vok sungah in lutter hram aw," tiah an dil ih an dil vek cun vok sungah a thlah hai. 33 Cupa ih sungin an suak ih vok rual sungah cun an lut. A cuih vok rual cu khaamsaangpi ihsin an vung dawp ih tili sungah an pil that thluh. 34 Cuih vok rual a khaaltu pawl in ziang a cang ti kha an hmu thluh in zamrangin an tlan ih cuih thu cu khawsung le lo lakah an than ciamco. 35 Ziang a cang ti zoh dingah mi tampi an va feh. Jesuh hnen an thlen tikah a sung ihsin khawsia a suak mipa cu Jesuh kehram ah a to ih hnipuan hrukin le thinlung fimin a um kha an va hmu ih an ṭih ngaingai. 36 Ziang bangtuk in a dam ti a hmutu pawl in a thuhla cu an sim. 37 Cuih ram sungih a ummi hmuahhmuah in an ṭih ngaingai ih an zatein Jesuh cu hmun dangih feh dingin an dil. Curuangah Jesuh cu lawng sungah a lut ih a feh. 38 A sungih khawsia tampi a dawi mipa cun, "Na hnenah i fehter ve aw," tiah a dil ciamco. Sikhalsehla Jesuh in, 39 "Inn ah va tlung awla Pathian in na hrangih a tuahmi thu hi va sim aw," tiah a ti ih a tlunter. Cupa cu khawsungah a tlung ih Jesuh in a hrangih a tuahmi cu mi hnenah a sim ciamco. 40 Jesuh cu tili ral khatlam a thlen tikah mi tampi in an rak hmuak, ziangahtile caan reipi amah kha an rak hngak zo. 41 Cule Jairas an timi pa a ra thleng. Jairas cu sinakok uktu a si. Jesuh ke hramah a bok ih a innih ra dingin a dil, 42 ziangahtile a fanu neihsun, kum hleihnih a si mi cu, a na ih a thi zik thlang. Jesuh cu a va feh ih cutiih a feh laiah cun miburpi in a kilkip in an fuuk ih an thlun luihlo. 43 Cumi lakah nunau pakhat, kum hleihnih sung thidok natnak a tuartu a tel ve. A neihmi hmuahhmuah cem ṭheh in sibawi pawl hnenah a tuamhlawm aw na'n zohman in an damter thei lo. 44 Mipi lakah cun Jesuh dunglam ihsin a hung ih Jesuh ih puanzimte kha a tham; cule a thidok cu hmakhatte ah a reh. 45 Jesuh in, "Zoso i thamtu?" tiah a sut. "Zohman in kan lo tham lo," an ti. Cule Piter in, "Bawipa, na kimvel ah mipi in an lo kulh ih an lo naih cupco a sisi!" tiah a ti. 46 Asinain Jesuh in, "Mi pakhatkhat in i tham a si, ziangahtile ka sung ihsin huham a suah kha ka thei," tiah a ti. 47 Nunau nu in keimah ka si ti i thei zo, tiah ṭhia rero in a ra ih Jesuh ke hramah a ra bok. Cutawkah mizapi hmuh ahcun ziang ruangah Jesuh cu a tham ih ziang vekin hmakhatte-ah a dam ti thu tla a sim ṭheh. 48 Jesuh in, "Ka fanu, na zumnak in a lo damter zo; hnangamte in va tlung aw," tiah a ti. 49 Cutiih Jesuh a ṭong rero laiah Jairas inn ihsin mi an rak thlahmi a ra thleng ih Jairas kha, "Na fanu a thi zo; Sayapa cu hnaihnok nawn hlah," tiah a ra ti. 50 Jesuh in cumi cu a thei ih Jairas hnenah, "Na thin phang hlah! Zum ringring aw; cule na fanu cu a dam ko ding," tiah a ti. 51 Jesuh cu Jairas ih inn a thlen tikah Piter, Johan, Jeim le nauhak nu-ih nu le pa siar lo zohman inn sungah a luhter lo. 52 Cutawk mithi hmunih a ummi hmuahhmuah cu riahsia in an ṭap rero. Jesuh in, "ṭap hlah uh; hi nauhak nu hi a thi lo, a itthat a si," tiah a ti. 53 Nauhak nu a thi ti cu zokhal in an theih ruangah Jesuh cu an hnihsan. 54 Sikhalsehla Jesuh in a kut in a vun kaih ih, "Ka fanu, tho aw," tiah a ti. 55 A hung nung sal ih hmakhatte ah a hung tho. "Rawl ei ding pe uh," tiah Jesuh in a ti. 56 A nu le a pa pawl cun mak an ti ngaingai. Jesuh in cuih thu cu zohman sim lo dingin a tiam.
1 Jesuh in a dungthluntu hleihnih pawl cu hmun khatah a ko ih khawsia dawi theinak le natnak a phunphun damter theinak huham a pek hai. 2 Cule Pathian Uknak thu sim ding le mina damter dingah a thlah hai. 3 An hnenah, "Khual nan tlawn tikah zianghman keng hlah uh: kianghrol siseh, zaal siseh, rawl siseh, paisa siseh, angki hlei khal keng hlah uh. 4 Nan tlun-inn ah hmun dang nan feh sal hlan lo va caam uh. 5 An lo khirnak khua cu tlansan uhla anmah ralrin peknak ah nan ke ih leidip kha thingta uh," tiah a ti. 6 Dungthluntu pawl cu an feh ih khawte an tlawng vivo; Thuthangṭha an sim ih khuazakip ah mina an damter vivo. 7 Galilee ram uktu bawi Herod in cu bangtuk ih thil a cangmi cu a theih tikah a awlok a song ngaingai, ziangahtile baptistma petu Johan a nung sal a si tiah mi ṭhenkhat in an ti. 8 Midang in, "Elijah a lang a si hi," an ti ih midang ṭhenkhat cun khuahlan laiih profet pakhatkhat a nung sal a si, an ti. 9 Herod in, "Johan ih lu ka tanter zo; asinain a thuhla ka theih reromi hi pa hi zo a si pei?" tiah a ti. Cule Jesuh cu hmu suak rori dingin a tum. 10 A thlahmi a dungthluntu pawl cu an ra tlung ih an tuahmi hmuahhmuah cu Jesuh an sim. Cule a hruai hai ih Bethsaida an timi khua ah anmah vial lawng an feh. 11 Cuih thu cu mipi in an theih tikah an thlun. Jesuh cun cibai a buk hai ih an hnenah Pathian Uknak thu a sim ih damnak a ṭulmi pawl tla a damter. 12 Ni a tlak zik tikah a thlahmi hleihnih cu a hnenah an ra ih, "Hitawk hi ramṭhing a si; curuangah misenpi pawl hi fehter aw, khua le lo lakah va feh hai sehla rawl le riahnak inn tla va hawl hai seh," tiah an ti. 13 Sikhalsehla Jesuh in, "Nanmah in an ei ding rawl cu pe uh," tiah a ti. Annih in, "Kan neihmi hmuahhmuah cu a zatein saang hlom nga le nga pum hnih lawng a si. Minung hi zat hrang rawl kan lei cawk ding maw?" tiah an ti. 14 Cutawkah pacang lawnglawng thawng nga tluk an um. Jesuh in, "Mipi hi sawmnga bur ciar in toter uh," tiah dungthluntu pawl cu a sim. 15 Cutiin dungthluntu pawl in an tuah hnuah, 16 Jesuh cun saang hlom nga le nga pum hnih cu a lak ih van a hun zoh ih Pathian hnenah lungawinak thawn thla a cam hnuah a phel ih mipi zem dingin dungthluntu pawl hnenah a pek. 17 An zatein an ei ih an khop hnuah an hlahmi kha dungthluntu pawl in an rutkhawm ih bawm hleihnih a ti. 18 Nikhat ah Jesuh cu amah lawng thla a cam laiah dungthluntu pawl an ra ih, "Mipi in zo in ti so?" tiah a rak sut hai. 19 Annih in, "Mihrek in baptisma petu Johan a si, an lo ti. Òhenkhat in Elijah a si, an lo ti. Cule midang in khuahlan laiih profet pakhatkhat a nungsal a si, an lo ti," tiah an ti. 20 Jesuh in, "Nannih in teh! Zo a si tiah so in ruat?" tiah a sut. Piter in, "Nangmah cu Pathian ih Messiah na si," tiah a ti. 21 Cuih thu cu zohman sim lo dingin Jesuh in a tiam hai. 22 Cule an hnenah, "Milai Fapa hi a tuar nasa ding ih upa pawl, puithiam upa pawl le Daanthiam saya pawl in an hnong ding. Amah cu an that ding; asinain ni thumnak ah thawhter sal a si ding," tiah a ti. 23 Cule an zate hnenah, "Zokhal sisehla i thlun duh ahcun mah zawnruahnak kha tlansan sehla nitinte a thinglamtah phur in i thlun seh. 24 Ziangahtile zokhal siseh amah ih nunnak a hum duhtu cu a nunnak a sung ding; sikhalsehla keimah ih hrangah a nunnak a sungtu cu a nunnak a hum ngah ding. 25 Mi pakhat in leilung pumpi hi co ṭheh hmansehla amah ih nunnak a sun, a si lole a hloral a si ahcun ziangso hlawhmi a neih? Hlawhmi zianghman a nei lo. 26 Mi pakhat in keimah le ka thu zirhmi a zahpi ahcun Milai Fapa khal in a sunlawinak le a Pa le vancung mithiang pawl ih sunlawinak thawn a ra thlen tikah a zahpi ve ding. 27 Fiangtein ka lo sim: hitawk ih a ummi lakah hin, Pathian Uknak a rung thlen an hmuh hlan lo, a thi lo dingmi nan um a si," tiah a sim. 28 Hi thu pawl a sim hnu zarh khatah Jesuh in Piter le Johan le Jeim a ko ih thlacam dingah tlangpar ah an kai. 29 Thla a cam rero laiah Jesuh cu a hmelpian a thleng aw ih a hnipuan cu a vaar tukah a tleu in a tleu. 30 Hmakhatteah mi pahnih an rung lang ih an bia aw. Cuih mi pahnih cu Moses le Elijah an si. 31 Vancung sunlawinak thawn an rung lang ih Jerusalem khua ih a thihnak in Pathian tumtahmi a kimternak ding thu kha Jesuh thawn an ruah aw. 32 Piter le a rualpi pawl cu ih-hmuh thaw zetin an rak itthat; asinain an hung ṭhang ih Jesuh ih sunlawinak le Jesuh thawn a ding tlangmi mi pahnih kha an hmu. 33 Cuih mi pahnih ih Jesuh an fehsan zawng ah Piter in, "Bawipa, hitawk ih kan um hi a ṭha ngaingai a si! Buuk pathum in kan sak pei; nangmah hrangah pakhat, Moses hrangah pakhat, Elijah hrangah pakhat," tiah a ti. Amah cun ziang ka ṭong ti hman a thei ngah ngaingai lo. 34 Cutiih a ṭong rero laiah mero a hung zaam ih a thlaam in a run phen; cutiih mero in a run tuam ruangah dungthlun pawl cun an ṭih ngaingai. 35 Cule mero sung ihsin aw pakhat in, "Hi pa hi ka hrilmi ka Fapa a si, a thu ngai uh," tiah a run ti. 36 Cuih aw a reh tikah Jesuh amah lawng an hmu. Dungthlun pawl cu daitein an um; an hmuhmi thuhla cu cuih caanah cun zo ih hnen hmanah an sim lo. 37 A thaisun ah Jesuh le a dungthlun pathum cu tlang ihsin an rung suk ih mipi tamzet in Jesuh kha an rak hmuak. 38 Cule mipi lak ihsin mi pakhat a au ih, "Sayapa, ka fapa neihsun hi i ra zoh sak hram aw," tiah a dil. 39 "Khawsia in a polh ih rin lopi in a au a kio ih a tlu ṭheu; a kaa in cilbuanra a suak ih harzet koin a tuah, a thlah duh hrimhrim lo! 40 Khawsia dawisuak dingah na dungthluntu pawl ka dil rero na'n an ti thei lo," tiah a ti. 41 Jesuh in, "Nannih pawl hi ziangtluk zumnak nei lo le mi sualral phun so nan si! Ziangtik tiangso nan hnenah ka um ding? Ziangtik tiangso ka lo tuar hrih hai ding?" tiah a ti. Cule mi pa hnenah cun, "Na fapa cu hinah rak hruai aw," tiah a ti. 42 Cutiin Jesuh hnenih nauhakpa a rat laiah khawsia in leilung ah nauhakpa cu a thluk ih zianghman thei loin a dirhcaih ciamco. Jesuh in khawsia cu a kawk ih nauhakpa cu a damter; cule nauhakpa cu a pa ih hnenah a pek. 43 Pathian cahnak huham an hmuh tikah mipi cu an mang a bang ngaingai. Jesuh ih thil tuahmi hmuahhmuah an hmuh tikah mipi cun mak an ti zet; cutiih an um laiah a dungthluntu pawl hnenah, 44 "Thu ka lo sim ding ih cumi cu ziangtik hmanah hngilh hlah uh. Milai Fapa hi an phiar ding ih thuneitu kut ah pek a si ding," tiah a ti. 45 Sikhalsehla a dungthluntu pawl in a simmi tican an thei lo. An theih thei lonak dingin thuhmi thu a si ruangah an thei thei lo ih an sut ngam fawn lo. 46 Dungthluntu pawl cun anmah lakah zoso a tum bik, timi thu-ah an el aw. 47 An ruahmi kha Jesuh in a theih ruangah nauhakte pakhat a hruai ih a kiangah a dinter. 48 Cule an hnenah, "Ka hmin in hi nauhakte a cohlangtu cu keimah i cohlang a si; keimah i cohlangtu cu i thlahtu a cohlang a si. Ziangahtile nanmah lakih mi nautabik cu a tum bik a si," tiah a ti. 49 Johan in, "Bawipa, mi pakhat cu na hmin in ramhuai pawl a dawi rero kan hmu ih kan dawn; ziangahtile kan bu sungtel a si lo," tiah a ti. 50 Jesuh in, "Dawn hlah uh; ziangahtile zokhal sisehla a lo dodal lotu cu a lo bawmtu an si," tiah Johan le dungthluntu dang hnenah a ti. 51 Jesuh vancungih laak a sinak ding caan a nai cuahco thlang tikah Jerusalem ih feh hrimhrim dingin a ruatcat ih a pok. 52 A hmaiah palai a thlah sung ih cupawl cu ziang hmuahhmuah rak timtuah sungtu dingah Samaria khua pakhat ah an lut. 53 Sikhalsehla cuih khawsungmi pawl in an duh lo, ziangahtile Jerusalem khua ah a lan ding ti an theih fiang ruangah a si. 54 Cumi cu a dungthlun Jeim le Johan in an hmuh tikah Jesuh hnenah, "Bawipa, hi pawl siatral ṭheh dingah vancung ihsin meisa tlakter sehla na duh lo maw?" an ti. 55 Jesuh cu an lamah a her ih a kawk hai. 56 Cuih hnuah Jesuh le a dungthluntu pawl cu khawte dangah an feh. 57 Cutiih a feh vivo laiah mi pakhat in Jesuh cu, "Na fehnak kipah ka lo thlun ding," a ti. 58 Jesuh in, "Cinghnia pawl in kua an nei ih vate tla in bu an nei; sikhalsehla Milai Fapa cun riahnak le lu hngauhsannak hmun khal a nei lo," tiah a ti. 59 Mi pakhat hnenah Jesuh in, "I thlun aw," a ti. Asinain cupa cun, "Bawipa, ka pa ka va phumta hmaisa pei," tiah a ti. 60 Jesuh in, "Mithi cu mithi pawl in phum ko hai seh. Nang cu feh awla Pathian Uknak thu phuang sawn aw," a ti. 61 A dang pakhat in, "Bawipa, ka lo thlun ding; asinain hmaisabik ah ka sungte pawl ka va biakta pei," a ti. 62 Jesuh in a hnenah, "Zokhal dunglet hoi phah ih lei a lettu cu Pathian Uknak hrangah santlai lo a si," tiah a ti.
1 Cuih hnuah Bawipa in midang sawmsarih le pahnih a hril ih amah a fehnak ding khawkip le hmunkip ah khan pahnih pahnih in a rak thlah sung. 2 An hnenah cun, "Rawl khawm ding a tamzet na'n a khawmtu ding an malte a si. Curuangah rawl khawmtu ding tam sinsin a thlahnak dingah lo neitu hnenah thla cam uh. 3 Va feh uh! Cinghnia rual lakih tuu faate thlahmi bangin ka lo thlah hai a si. 4 Cutiih nan feh tikah paisa bawm siseh, zaal siseh, kedam siseh keng hlah uh; lamzin ih nan tonmi pawl biak dingah cawlta hlah uh. 5 Inn pakhatkhat sungih nan va luh tikah a hmaisabik ah, 'Hi inn sungah daihnak um hram seh,' tiah va ti uh. 6 Daihnak a duhtu a si ahcun daihnak na parah um hram seh, tiah cibai nan buknak cu a parah a umta ding; cuti a si lo ahcun nan hnenah daihnak cu kir salseh. 7 Cuih innah cun um uhla an lo pekmi poh kha in uhla ei uh; ziangahtile hnaṭuantu in a hlawhman cu a ngah a ṭul a si. Inn pakhat ihsin inn dangah ṭhawn duldo hlah uh. 8 Khua pakhat nan thlen ih tlun-inn an lo on a si ahcun an lo pekmi pohpoh cu ei uh; 9 cuih khawsungih mina pawl tla damter uhla cuih khuami pawl cu, 'Pathian Uknak a nai zo,' tiah sim uh. 10 Sikhalsehla khua pakhat nan thlen ih an lo tlunter lo asile khawsung lamzin ah feh uhla, 11 'Kan ke ih a kopmi nan khua ih leivut khal nanmah engtainak ah kan thingfai ṭheh a si. Asinain Pathian Uknak cu nan kiangah a ra thleng zo, ti ciing ringring uh,' nan ti pei. 12 Thungai in ka lo sim: Thuṭhennak Ni ah cuih khuami hnakin Sodom khuami hnenah Pathian in zaangfahnak a nei sawn ding," tiah a ti. 13 "Maw Khorazin khua, na hmakhua a va pit so! Maw Bethsaida khua, na hmakhua a va pit so! Na sungih mangbangza ka tuahmi pawl hi Tai-ar khua le Sidon khua ah tuah rak sisehla, cuih khawsungmi pawl cun an sualsir langternak dingah buri hnipuan hrukin vutcam an phulh awknak a reipi zo ding! 14 Thuṭhennak Ni ah Pathian in nang hnakin Tai-ar le Sidon khuami pawl parah zaangfahnak tam sawn a nei ding. 15 Cun nang Kapernaum khua! Van tiangih hlirsan awk na duh maw si? Hell sungah hlon na si ding!" tiah a ti. 16 Cule Jesuh in a dungthluntu pawl hnenah, "Nan thu a ngaitu pawl cu ka thu a ngaitu an si. A lo hnongtu cu keimah i hnongtu an si. Cule keimah i hnongtu cun keimah i thlahtu khal an hnong a si," tiah a ti. 17 Sawmsarih le pahnih thlahmi pawl cu lungawi zetin an ra kir sal ih, "Bawipa, na hmin in ramhuai pawl kan dawi tikah kan thu an ngai a si," tiah an ti. 18 Cutikah Jesuh in, "Nimthlakau bangin vancung ihsin Satan a tlak kha ka hmu. 19 Ngai uh! Huham neihnak ka lo pek hai: rul le varngen-meipir pawl parah nan feh thei ding; nan ral neh theinak huham khal ka lo pek ih zianghman in a lo tuahmawh thei lo ding. 20 Sikhalsehla thlarau ṭha lo in nan thu an ngai ruangah nan lungawi hlah uh; nan hmin vancungih ngan cia a si ruangah nan lungawi sawn uh," tiah a ti. 21 Cutikah Jesuh cu Thlarau Thianghlim in lungawinak thawn a khatter ih, "Maw ka Pa, lei le vanih Bawipa, mifim le mithiam pawl hnenih sim dah lomi thil cu fimthiamnak a nei lomi hnenah na langter ruangah na parah ka lung a awi. A si ka Pa, hiti ih a cangmi hi na duhzawng ih a cangmi a si. 22 "Ka Pa in ziang hmuahhmuah ka hnenah i pe zo. Fapa hi zo a si ti Pa siar lo zohman in an thei lo; cule Pa hi zo a si ti khal Fapa le, Pa ih thu Fapa in an hnenih a phuan ciami pawl siar lo zohman in an thei lo," tiah a ti. 23 Cule Jesuh cu a dungthluntu pawl lamah a her ih anmah lawngih theih dingin, "Nan hmuhmi thil pawl nan hmuh hi ziangtluk vannei so nan si! 24 Fiangtein ka lo sim: profet tampi le siangpahrang tampi in nan hmuhmi hi hmuh ve an duh na'n an hmu thei lo; theih ve an duh na'n an thei ngah lo a si," tiah a ti. 25 Daanthiam saya pakhat a ra ih a sualnak hawl dingin Jesuh hnenah, "Sayapa, kumkhua nunnak ka ngah theinak dingah ziangso ka tuah ding?" tiah a sut. 26 Jesuh in, "Ca Thianghlim in ziangtinso a ti? A timi cu na pomdan ziangtinso a si?" tiah a ti. 27 Cupa cun, "Bawipa na Pathian cu na thinlung hmuahhmuah, na nunnak hmuahhmuah, na cahnak hmuahhmuah le na ruahnak hmuahhmuah thawn na duhdaw pei ih na innhnen cu nangmah na duh awk vekin na duh hai ve pei, a ti," tiah a ti. 28 Cutikah Jesuh in, "Na simmi cu a dik a si; cu bangtuk in va tuah awla na nung ding," tiah a sawn. 29 Sikhalsehla Daanthiam pa cun amah le amah thiam coter awk a duh ruangah Jesuh kha, "Zoso ka innhnen cu a si?" tiah a sut. 30 Cutikah Jesuh in, "Voikhat ah mi pakhat cu Jerusalem ihsin Jerikho ah a vung feh. Cutiih a feh laiah suamhmang pawl in an kai ih a hnipuan an hliit hnuah thizikte in an thawi ih an tlansan. 31 Culai ah puithiam pakhat cu cuih lamzin ah a vung feh ngelcel; asinain cupa a hmuh tikah khatlam kam in a hrial ih a fehsan. 32 Cuvek ṭhiamṭhiam in Levi mi pakhat khal a va feh ve ih mina pa cu a hei zohhliahta ih khatlam kapin a hrial ih a fehsan ve. 33 Asinain Samaria mi pakhat cu cutawk lamzin ah khual a tlawng ve ih cuih mina pa hnen a thleng ih a hmuh tikah a zaangfah ngaingai. 34 A hei fuuk ih a hma cu siti le sabitti a hnih ih ṭhatein a tuam sak. Cule a hruaimi rannung parah toter in khualbuk ah a fehpi ih cunah ṭhatein a tuamhlawm. 35 A thaisun ah ngun tangka fanghnih a suah ih riahbuk kiltupa cu a pek ih, 'Hi pa hi ṭhatein run tuamhlawm awla hi lam ih ka ra kir sal tikah hi pa na zohnak hrangih na cemmi hmuahhmuah cu ka lo ruul sal thluh ding,' a ti," tiah a sim. 36 Cuih hnuah Jesuh in, "Suamhmang ih an kaih mipa ih innhnen cu himi pathum lakah hin zo hi so a si, tiah na ruat?" tiah a sut. 37 Daan zirhtu saya in, "Amah a zaangfahtu pa hi a si," tiah a let. Jesuh in, "Feh awla cubangtuk in va tuah ve aw," tiah a ti. 38 Jesuh le a dungthluntu pawl cu khual an tlawng vivo ih khua pakhat an thleng. Martha timi nu in Jesuh cu a inn ah a tlunter. 39 Martha ih naunu cu Mari a si. Mari cu Jesuh ih kehram ah a to ih a thusimmi kha a ngai. 40 Martha cu hnaṭuan tampi nei in a buai ih a thin a ṭeu ruangah Jesuh hnenah, "Bawipa, ka naunu in hnaṭuan hmuahhmuah i tun ṭheh hi na poisa lo maw si? Sim aw, i ra bawm seh!" tiah a ti. 41 Cutikah Jesuh in, "Martha, Martha! Nang cu thil tampi parah helhkam le awloksong in na um; 42 a ṭul ngaingaimi cu pakhat lawng a si. Cumi cu Mari in a hril ngah ih zohman in an lawng nawn lo pei," tiah a ti.
1 Ni khatah Jesuh cu hmun pakhat ah thla a cam. A ṭheh tikah a dungthlun lakih pakhat in, "Bawipa, Johan in a dungthlun pawl thlacam a zirh vekin thlacam in zirh ve aw," tiah a ti. 2 Jesuh in an hnenah, "Thla nan cam tikah hiti in nan ti pei: 'Kan Pa, Na hmin thianghlim cu upat si ko seh, Na Uknak thleng hram seh. 3 Nitin kan ṭulmi rawl in pe aw. 4 Kan parih sualnak a tuahtu pawl kan ngaithiam bangin, kan sualnak in ngaithiam ve aw. A harmi hniksaknak ah in thlengter hlah aw,' tiah nan ti pei," tiah a ti. 5 Cule Jesuh in a dungthlun pawl hnenah, "Thuṭhimnak ah nanmah lakih pakhat in na rualpi inn ah zanṭim ah feh tahratin 'Ka rual, sang hlom thum in i coih hram aw. 6 Ka rualpi pakhat khualtlawnnak ihsin ka inn a ra thleng ih rawl pek ding zianghman ka nei lo,' tiah na va ti. 7 Cule thuṭhimnak ah a innsung ihsin na rualpi cun 'I hnaihnok hlah. sangka ka khar zo ih ka faale thawn kan it zo; thil pe dingin ka tho paih nawn lo,' tiah ti bang sehla, 8 ziangtinso na tuah ding? Thungai in ka lo sim: a rualpi na si ruangah hung tho in na dilmi saang cu lo pe lohli lo hmansehla ningzak loin na dil rero hrat ahcun a tho pei ih na ṭulmi cu a lo pe ko ding. 9 "Curuangah hiti in ka lo sim: dil uh, nan ngah ding; hawl uh nan hmu ding; king uh, nan hrangah sangka on a si ding. 10 Ziangahtile a diltu hmuahhmuah in an ngah ding, a hawltu cun an tong ding ih a kingtu hrangah sangka cu onsak a si ding. 11 Nannih pale pawl lakah na fapa in ngasa lo dilsehla rul a petu nan um pei maw? 12 Asilole arti a dil tikah varngen-meipir a petu nan um pei maw? 13 Mi ṭha lo nan si ko na'n nan faale hnenah cun thil ṭha pek nan thiam a si ahcun vancung nan Pa in ziangtlukin so a diltu hnenah Thlarau Thianghlim cu a pek sinsin ding!" tiah a ti. 14 Jesuh in a ṭong thei lo mipa hnenin ramhuai pakhat a dawi suak; cutiih a dawi suak hnuah a polh mipa cu a ṭong thei. Cule misenpi cu an mang a bang ngaingai. 15 Asinain mi ṭhenkhat cun, "Hitiih ramhuai pawl a dawi theinak cu ramhuai uktu bawi Beelzebul in huham a pek ruangah a si," tiah an ti. 16 Midang pawl in Jesuh sualnak hawl an duh ve; curuangah, "Pathian ih lungkim mi na si le si lo theihnak ah hmuhsaknak tuah aw," tiah an fial. 17 Sikhalsehla Jesuh in an ruahnak kha a thei ih an hnenah, "Ram pakhatkhat ṭhen tampi ah a ṭhen aw ih ṭhenkhat le ṭhenkhat a do awmi ram cu rei a awh lo ding; a rem aw lomi innsang cu an ṭhenṭhek aw ṭheh a si. 18 Cubangtuk ṭhiamṭhiam in Satan uknak sung khalah bu tampi ah um in bu khat le bu khat an do awk le ziangtinso cuih Satan uknak cu rei a awh thei ding? 'Beelzebul in huham a lo pek ruangah ramhuai na dawi thei,' tiah in ti. 19 Cuti vekin Beelzebul ruangah ramhuai ka dawi thei ngai ti bang sehla, nanmah a lo thluntu pawl in teh ziangtinso ramhuai an dawi thei? A lo thluntu pawl lala hi nanmah parih thuṭhentu an si ding. 20 Sikhalsehla kei cun Pathian cahnak thawn ramhuai ka dawi thei a si sawn; cutiin a si ruangah Pathian Uknak cu nan hnenah a ra thleng zo, ti a lang a si. 21 "Mi cakzet pakhat in a hriamnam neihmi hmuahhmuah thawn a inn a kilven ahcun a thilri pawl cu an him. 22 Sikhalsehla a cak deuh sawn pa in cupa cu a do ih a neh ahcun a rinsan zetmi a hriamnam pawl cu a lawng ṭheh ih a lonmi thilri pawl cu mi a zemdarh ṭheh a si. 23 "Keimah i ṭan lotu hmuahhmuah cu i dodaltu an si; a khawm i bawm lotu hmuahhmuah cu a ti darhdaitu sawn an si," tiah a ti. 24 "Thlarau pakhat cu mi pakhat sung ihsin a suah tikah colhnak hmun hawl in ramcaar le ramṭhing ah a vak vivo. Colhnak hmun a ton lo tikah 'Ka tlansan zomi ka inn ah ka kir sal ding,' tiah amah tein a ruat. 25 Cuticun a kir sal ngaingai tikah a inn cu faizet le umnak dingah duhnungza zetin a va hmu. 26 Cuih hnuah a feh ih amah hnakih a siava deuhmi ramhuai pasarih a va sawm ih cutawkah an ra um. Cule a netnak ahcun cupa cu a hlan hnakin a besia sinsin a si," tiah a ti. 27 Jesuh in hi thu a sim ṭheh tikah misenpi lakih nunau nu pakhat in Jesuh cu, "A lo hringtu le a lo tuamhlawmtu nunau cu mi thlawsuak a va si so!" tiah a ti. 28 Jesuh cun, "Pathian thu a thei ih a thlun taktaktu pawl cu mi thlawsuak an si sawn," tiah a ti. 29 Mitampi in Jesuh cu an pan ih an fuuk cupco laiah Jesuh in, "Tuih san minung hi an va ṭha loso! Hmuhsaknak tuahsak ding an dil, sikhalsehla Jonah hmuhsaknak siar lo hmuhsaknak dang zianghman tuahsak an si lo ding. 30 Profet Jonah cu Nineveh minung pawl hrangah hmuhsaknak a rak si bangtuk in Milai Fapa hi tuih san minung pawl hrangah hmuhsaknak a si ve ding. 31 Thuṭhen Ni ah Siangpahrangnu Sheba cu a tho ding ih tuih san minung pawl hi sual a puh ding, ziangahtile Siangpahrang Solomon fimnak thuzirhmi ngai dingah lamhlapi ihsin a ra thleng; asinain thungai in ka lo sim: Solomon hnakih tum sawn hinah a um. 32 Thuṭhen Ni ah Nineveh khawsung mi pawl an tho ding ih sual an lo puh ding, ziangahtile Jonah in an hnenih thu a sim laiah an sualnak an sir aw a si; thungai in ka lo sim: Jonah hnakih tum sawn hinah a um a si. 33 "Zohman in mei-inn vang tahratin an thup dah lo, a si lole kho an khuh dah keel lo; mei-inn vannak tung parah an ret ih cuticun a ra luttu pawl in khua ṭhatein an hmu a si. 34 Nan mit tla cu nan pum hrangah mei-inn bangtuk a si. Nan mit a fim ahcun nan pumpuluk in a tleu ding, asinain nan mit a ṭhat lo ahcun nan pumpuluk in a thim ṭheh ding. 35 Cuti a si ruangah nan sungih tleunak hi thimnak a si sal lonak dingah ralring uh. 36 Nan taksa pumpuluk cu malte hman thimnak sungah um loin a tleu ṭheh a si ahcun mei-inn in nan taksa a tlet vekin a tleuzet ding a si," tiah a ti. 37 Thu a sim ṭheh tikah Jesuh cu Farasi mi pakhat in rawl ei a sawm; cuhrangah Jesuh cu a feh ih rawl ei dingah a to. 38 Jesuh cu rawl a ei hlanih a kut a kholh lo kha Farasi pa cun a hmuh tikah a lau ngaingai. 39 Cutikah Bawipa in a hnenah, "Nannih Farasi pawl cun nan khuat le pakan pawl a lenglam lawng nan kholhfai ṭheu, asinain nan sunglam cu duhhamnak le ṭhat lonak in nan khahter a si. 40 Mi aa pawl! A lenglam a tuahtu Pathian in a sunglam tla a tuah a si lo maw? 41 Curuangah nan khuat le nan pakan pawl sungih a ummi kha mi farah pawl pe uhla ziang hmuahhmuah nan hrangah a thiang ding a si. 42 Farasi pawl, nan hmakhua a va pit so! Hanghnah hangrah sungin puṭinan le remhmui le aithing le a dangdang tla cu ṭhenhra ṭhenkhat nan pek ko na'n dingnak le Pathian duhdawt ding cu nan daithlan. A dang khal daithlang cuang loin hi pawl cu nan tuah dingmi an si. 43 Farasi pawl, nan hmakhua a va pit so! Sinakok ah tokham ret sak ciami parih to cu nan duh tuk lawmmam ih sumdawrnak tluan ih upatnak an lo pek tla cu nan sunsak bik. 44 Nan hmakhua a va pit so! Nannih cu hminsinnak a nei lomi thlaan, mi in an theih thiam lo ruangah an pal ṭheu mi thlaan bangtuk nan si," tiah a ti. 45 Cutikah Daanthiam saya pakhat in, "Sayapa, hiti ih na ṭong tikah kannih khal in hmuhsuam ve a si!" tiah a ti. 46 Jesuh in, "Daanthiam saya pawl, nannih hrang tla-ah nan hmakhua a pit a si! An phurh thei lo ding thilrit khi mi ih zaang parah nan suang ih nanmah cun phurh bawm dingah nan kut zimte hman nan suah zuam lo. 47 Nan hmakhua a pit a si! Nan pupa pawl ih an rak thahmi profet pawl hrangah thlaan ṭhaṭha nan tuah. 48 Cuticun nan pupa pawl ih thil tuahmi cu nan lungkimpi a si ti nan langter; annih in profet pawl an that ih nannih in an thlaan nan tuah. 49 Curuangah Pathian ih Fimnak in 'An hnenah profet le tirhthlah pawl ka thlah ding; ṭhenkhat an that ding ih a ṭhen an hrem ding,' a ti. 50 Cuti a si ruangah tuih san mi pawl hi leilung hramthok ihsin profet pawl an thah ruangah hrem an si ding. 51 Fiangtein ka lo sim: Abel thah a tuarnak ihsin thokin biakṭheng le Hmun Thianghlim karlakih an thahmi Zekhariah tiang, thisen a suah ruangah tuih san mi pawl in hrem an tuar ding a si. 52 Nannih Daanthiam saya pawl, nan hmakhua a va pit so! Fimnak inn luhnak sangka tawhfung cu nan keng; cule nanmah nan lut duh lo ih tlunah luh a duhmi pawl nan kham fawn a si," tiah Jesuh in a ti. 53 Cutawk ihsin Jesuh cu a feh tikah Daanthiam saya pawl le Farasi pawl in nasa zetin an engtai ih thil tampi thu ah thu tampi an sut; 54 pakhatkhat ṭong sualmi a neih ahcun amah ih ṭong lala ih awk aw dingin thu tampi an suhnak cu a si.
1 Miburpi a thawngthawng in an tong aw ih an pal awk cupco laiah Jesuh cun a dungthlun pawl hnenah a hmaisa ah hiti in a sim: "Farasi pawl ih thilnu hi ralring uh; an titer awknak thilnu hi! 2 Ziangkhalsiseh khuhmi pohpoh cu on thluh an si ding ih thuthup hmuahhmuah cu phuan ṭheh an si ding. 3 Cuticun khawthim lakih nan simmi thuthup pohpoh kha sun khawvang lakah theihter thluh an si ding ih inn kharhkhumin thupte ih nan simmi cu inn tlun luanglu ihsin aupi a si ding," tiah a ti. 4 Jesuh in, "Ka rualle uh, ka lo sim hai: taksa pum lawng a that thei ih cuhnakih besia dang a tuah thei lotu cu va ṭih hlah uh. 5 Zoso ṭih ding sawn, ti ka lo sim hai ding: a thah lawng si loin hell sungih thlak theinak khal thu a neitu Pathian lawng ṭih uh. Fiangtein ka lo sim: Amah hi nan ṭih dingmi cu a si! 6 Sunṭam panga kha pia hnih ah an zuar a si lo maw? Asinain pakhat hman Pathian in a hngilh lo a si. 7 Nan lu parih samphang hman a siar ṭheh. Curuangah nan thin phang hlah uh; sunṭam tamzet hnakin nan sunglawi sawn a si. 8 "Hitiin ka lo sim: zokhal sisehla keimah ih ta a sinak kha mi hmaiah a phuang ngamtu cu Milai Fapa in Pathian ih vancungmi pawl hmaiah cubangtuk in a phuang ve ding. 9 Sikhalsehla mi hmaiah i hnongtu cu Milai Fapa in Pathian ih vancungmi pawl hmaiah a hnong ve ding. 10 "Zokhal siseh Milai Fapa a simsiatu cu ngaihthiam an si pei; sikhalsehla Thlarau Thianghlim a simsiatu cu ngaihthiam a si lo pei. 11 "Sinakok ah siseh, ram uktu a si lole hotu bawi hmaiah siseh khiing dingih an lo hruai tikah ziangtinso ka ṭan ding ih ziangso ka ṭong ding tiah va helhkam hlah uh. 12 Ziangahtile a cuih caan ah nan ṭong dingmi cu Thlarau Thianghlim in a lo sim ding a si," tiah a ti. 13 Misenpi lakih mi pakhat in, "Sayapa, ka pa ih in roh tami rothil in zem ve dingah ka u in sim sak aw," tiah Jesuh kha a ti. 14 Cutikah Jesuh in, "Ka rual, nan karlakih thuṭhentu si dingah le nan rothil zemsaktu dingah zo in so thu i pek?" tiah a let. 15 Cule mi zapi hnenah cun, "Duhhamnak a phunphun kha ralring uhla fimkhur zetin um uh; ziangahtile mi pakhat ih nunnak taktak cu, ziangtluk milian a si hmanah, a thilri neihmi ahhin a um lo," tiah a ti. 16 Cuih hnuah Jesuh in hi tahṭhimnak hi a sim: "Voikhat ah milian pakhat a um ih a ram sung ihsin rawl tampi a suak. 17 Cutikah a thinlung tein 'Ka lo sungsuak rawl retnak ka nei nawn lo. Ziang ka tuah ah so a ṭhat ding? 18 Hitiin ka tuah pei: Ka rawl-inn pawl ka bal pei ih tum deuh in ka sak pei. Cunah ka rawl le ka thilri hmuahhmuah ka ret pei. 19 Cule keimah le keimah cu: Mi vannei pa! Kum tampi sung na ṭul dingmi thilri na nei zo. Na duhduh in nung huahho aw; ei aw, in awla nuam zetin nung aw, ka ti aw ding,' tiah a ruat. 20 Sikhalsehla Pathian in a hnenah, 'Mi-aa pa! Tuih zan rori-ah na nunnak hi a cem ding; cule na hrangih na khawlcia mi na thil hmuahhmuah hi zo in so a co ding?' a ti," tiah a sim. 21 Cun Jesuh in, "Anmah ih hrangah thilri an khawl ih an lianzet na'n Pathian mithmuh ah a lian lomi cu himi pa bangtuk an si," tiah a netnak ah a sim. 22 Cuih hnuah Jesuh in dungthluntu pawl hnenah, "Cu a si ruangah nan ei dingmi rawl hrangah siseh, nan sinfen ding hnipuan hrangah siseh, donhar in um hlah uh, tiah ka lo sim. 23 Ziangahtile nunnak cu rawl hnakin a thupi sawn ih taksapum cu hnipuan hnakin a thupi sawn a si. 24 Tlangak khi zohhnik uh; annih in thlaici an tuh lo ih rawl khal an khawm fawn lo. Rawl-inn le cuam khal an nei lo. Asinain Pathian in a cawm hai. Nannih tla cu vate hnakin a let tampi in nan sunglawi sawn a si. 25 Nanmah lakah zotal in ei-in le sinfen thu a helhkamnak in a nunnak malte a sauter theitu nan um maw? 26 Cutluk thil fate hman nan tuah thei lo a si ahcun ziangah so thil dangdang thu cu nan helhkam duh rero? 27 Hramlak pangpar tla khi ziangvekin an ṭhang ti zohhnik uh: hna an ṭuan lo, sinfen an zaal fawn lo. Sikhalsehla thungai in ka lo sim: Siangpahrang Solomon ih lennak le sunlawinak hmuahhmuah hman in hi pangpar pakhat ih mawinak hi a tluk lo. 28 Tuihsun ah a um na'n thaisun ahcun a um nawn lomi, meisa sungih paih-mi hramlak hrampi hman khi a thuamtu cu Pathian a si. Nannih tla cu a lo thuam sinsin lo ding maw si? Nan zumnak a mal tuk lawmmam! 29 "Ei ding le in ding thu lawng ruat le helhkam ringringin um hlah uh. 30 Ziangahtile leilung tlunih khawvel mi pawl in cubangtuk thil cu an ruah ringringmi a si. Nan Pa in hi bangtuk thil nan ṭul ti cu a thei. 31 Curuangah nan Pa ih Uknak kha helhkam in hawl sawn uhla thil dang pawl cu a lo pe leh ding," tiah a ti. 32 Tuurun tete tla, nan thinphang hlah uh; ziangahtile nan hnenah Uknak pek cu nan Pa ih lungawi zawng a si. 33 Nan neihmi thilri pawl zuar ṭheh uhla nan ngahmi tangka cu mifarah pawl ṭhen uh. A siat thei lomi tangka bawm nan hrangah ngaihtuah uhla vancung ah nan sumsaw pawl khawl uh. Cutawkah cun fifir in an dai thei lo ding ih a tlap thei fawn lo ruangah ziangtik khalah a hloral dah lo ding. 34 Ziangahtile nan sumsaw umnak ah nan thinlung khal a um ve ding," tiah a ti. 35 Ziangbangtuk thil a ra thlen khalle ralring ciain um uhla nan mei-inn vangin timlaam ciain um uh. 36 Mopuai ihsin a ra kir dingmi an bawipa a hngaktu hnen-um pawl bangin ralring zetin um uh. An bawipa cu a rat ih sangka a king tikah hmakhatte ah sangka cu an ong ding. 37 An bawipa a ra kir tikah itthat loteih ralrinnak a neimi hnen-um pawl cu ziangtluk lungawiza so an si. Thungai in ka lo sim: a tim a tuah hnuah a toter ding ih amah rori in a tuamhlawm hai ding. 38 Zanṭim ih a ra kirah siseh, cuhnak tlai ih a kir khalah siseh, ralrinnak nei ih a ra hmuhmi pawl cu an hrangah ziangtluk lungawiza so a si! 39 Cule hihi ciing uh: inn neitu pa in fifir ratnak ding tikcu kha a theih cia ahcun a inn kha a bauhter hrimhrim lo ding. 40 Cuvekin nannih khal ralringte in um uh, ziangahtile a ra ding tiih nan zum lo laiah Milai Fapa cu a ra thleng ding a si," a ti. 41 Piter in, "Bawipa, hi tahṭhimnak hi kanmah ih hrangah na timi a si maw, asilole misenpi hrangah so?" tiah a sut. 42 Bawipa in, "Zoso rinsan tlak le a fimmi hnen-um cu a si? Rinsan tlak le a fimmi hnen-um cu a bawipa in a innpi kilkhawitu dingah le a dang hnen-um pawl kha a tikcu caan te ih an covo rawl pe dingah a ret dingmi hnen-um kha a si. 43 A bawipa innih a ra kir tikah hna a rak ṭuan rerotu hnen-um cu ziangtluk lungawiza so a si! 44 Thungai in ka lo sim: cuih hnen-um cu a bawipa in a thilri hmuahhmuah kilkhawitu-ah a ret ding. 45 Sikhalsehla cuih hnen-um in, 'Ka bawipa cu a rei hrih ding,' a tiih hnen-um dang nunau siseh mipa siseh a thawi vivo ih a ei a in ih a riit a bah ahcun, 46 cuih hnen-um in a ra ding ti a zum lo caan le a theih lo ni ah a bawipa cu a ra thleng ding. A bawipa in a satcip seksek ding ih thulung lo le rintlak lo pawl lakah a re ding. 47 A bawipa in tuahter a duhmi hnaṭuan a thei na'n tiimlaam a tuah lotu hnen-um cu nasa zetih vuak a tong ding. 48 Asinain a bawipa in tuahter a duhmi a thei lo na'n thil pakhatkhat a tuahtu hnen-um cu vuak tlak a si khalle dimte deuh ih vuak a tong ding. Tampi a ngahtu hnen ihsin tampi dil sal a si ding. Tam ngaingai pek a si mi hnen ihsin tam ngaingai dil sal a si ve ko ding," a ti. 49 Jesuh in, "Leilung tlunah hin meisa kangter dingah ka ra thleng; atu-ah hin alh thlang sehla ka va duh so! 50 Baptisma lak ding ka nei ih cumi tuah ṭheh a si hlan cu ka thinlung a baangzet. 51 Leilung tlun ahhin remnak a run keng tiah maw si in ruat? A si lo, remnak si loin ṭhenṭheknak sawn ka run keng a si. 52 Atu thok ihsin innsungsaang pakhat ih mi panga a ummi pawl cu an ṭhen aw ding; pathum in a dang pahnih kha an engtai ding ih pahnih in pathum kha an engtai ve ding. 53 Pale in an fapa pawl an engtai ding ih fapa pawl in an pale pawl an engtai ve ding. Nule in an fanu pawl an engtai ding ih an fanu pawl in an nule pawl an engtai ve ding. Nile pawl in an vahle pawl an engtai ding ih an vahle pawl in an nile pawl khal an engtai ve ding," a ti. 54 Jesuh in misenpi hnenah, "Nitlaknak lam ihsin khawdur a suah tikah hmakhatte ah 'Ruah a sur ding,' nan tiih a sur ngaingai. 55 Cule thlanglam ihsin thli a hran nan theih tikah 'Thaw a sa ding,' nan tiih a sa ngaingai. 56 Nannih titer awk thiam pawl! Van le leilung nan zoh ih ni khua ṭhat ding le siat ding nan sim thei! Cuti asilekhaw ziangah so tuih sanih thu-umzia nan theih thiam lo?" tiah a ti. 57 Ziangah so thil dik tuah dingah nan thinlung nan ṭhen cat thei lo? 58 Mi pakhat in a lo khiing ih zung a lo thlenpi tum a si ahcun zung a lo thlenpi ngah hlanah amah thawn remnak tuah dingah va zuam aw. Cuti na tuah lo ahcun thuṭhentu hmai tiang a lo dir ding ih thuṭhentu in palik kut ah a lo pe ding ih cuticun thawng ah thlak na si ding. 59 Fiangtein ka lo sim: na kuan dingmi a neta bik pia khat tiang na kuan ṭheh hlan lo cutawk ihsin na suak hrimhrim lo ding," tiah a ti.
1 Culai ahcun mi ṭhenkhat in Jesuh hnenah, Galilee mi pawl in Pathian hnenih thawinak an pek laifangah Pilat ih a thahmi pawl thu kha an sim. 2 Jesuh in an hnenah, "Cuih Galilee mi pawl cutiih thah an si ruangah midang Galilee mi hnakin an sual sawn, tiah nan ruat maw si? 3 An sual deuh cuang lo! Fiangtein ka lo sim: Nan sual nan sir ih nan nun daan nan ṭhin lo ahcun anmah vekin nan thi ṭheh ve ko ding. 4 Siloam hmunih donhleisang a tluuk tikah minung hleiriat a nenthatmi pawl thu kha teh ziangtinso nan ruat? Cutiih an thih ruangah Jerusalem ih a ummi midang pawl hnakin an sual cuang a si ti a langter tiah nan ruat maw si? 5 A si hrimhrim lo! Fiangtein ka lo sim: Nan sual nan sir ih nan nun daan nan thleng lo ahcun anmah vekin nan thi ṭheh ve ding," tiah a ti. 6 Jesuh in an hnenah hiti in tahṭhimnak a sim: "Hlanlaiah mi pakhat in a hmuan sungah theipi kung pakhat a cing. A rah le rah lo a va zoh ṭheu ih a rah a hmu dah lo. 7 Curuangah hmuan kiltu hnenah, 'Zohhnik, hi theipi hi! Kum thum tiang rori a rah maw rah lo, tiah ka ra veh ṭheu na'n a rah zianghman ka hmu lo. Hau mai aw! Ziangah so leiram ṭha a ei rero ding?' a ti. 8 Sikhalsehla hmuan kiltu in 'Bawipa, kum khatte cu zuah hrih ko aw! A kimvel in leilung ka lai ding ih dawm ka burh hrih ding. 9 Cule a hnakum ah rah a rah asile lungawiza a si ding; a rah thotho lo asile hauter leh siseh,' a ti," tiah a sim. 10 Voikhat ah Sabbath ni ah Jesuh in sinakok ah thu a zirh. 11 Cutawkah khawsia ih polhmi nunau pakhat a um. Cuih khawsia cun kum hleiriat sung a ngorter; a el tla a kuun ṭheh ih dingtein a um thei hrimhrim lo. 12 Cunu cu Jesuh in a hmuh tikah a hei auh ih, "Nunau nu, na natnak ihsin na luat zo!" tiah a ti. 13 A parah a kut a suang ih hmakhatte ah dingtein a um thei ih Pathian kha a thangṭhat. 14 Sinakok kiltu upa pakhat cu Sabbath ni ah Jesuh in mi a damter ruangah a thin a heng ih mipi hnenah a ṭong ih, "Hnaṭuannak dingah ni ni ruk a um; cuih ni ruk sungah cun ra uhla damter aw uh; Sabbath ni ahcun si hlahseh," tiah a ti. 15 Cutikah Bawipa in, "Titer aw pawl! Zokhal si uhla Sabbath ni ah nan caw le nan laak pawl an hri nan phoih ih tidai innak ah nan fehpi ciar a si. 16 Atu hitawk ah hin Abraham tesinfa Satan in kum hleiriat sung ṭemhrennak a tuartu a um; anih hi a ṭemhrennak ihsin Sabbath ni ah luatter a si lo ding maw?" tiah a ti. 17 A thulehnak cun a ral pawl cu an ningzak koin a tuah; cule mipi pawl cu khawruahhar thil tampi a tuah ruangah an lung a awi ngaingai. 18 Jesuh in, "Pathian Uknak cu ziang bangtuk so a si? Ziang thawn so ka ṭhim ding? 19 Mi pakhat in anṭam ci a lak ih a lo sungih a vorhmi bangtuk a si. A vorhmi cu a kho, a ṭhang ih thingkung ah a cang ih a ṭeek parah vate tla in bu an tuah a si," tiah a sim. 20 Cule Jesuh in, "Pathian Uknak cu ziang thawn so ka tahṭhim ding? 21 Nunau pakhat in thilnu malte a lak ih sangphut bawm khat sungah a phulh ih sangphut cu a zatein a thoter ṭhehtu thilnu bangtuk cu a si," tiah a ti. 22 Jesuh cu Jerusalem lam pan ih a feh laiah khua pakhat hnu pakhat pal phahin thu a zirh vivo. 23 Mi pakhat in, "Bawipa, runnak a ngahtu hi mi malte lawng maw an si ding?" tiah a sut. Jesuh cun hiti in a let. 24 "A fiakmi sangka ihsin luh zuam uh; ziangahtile mi tampi in cuih sung luh cu an zuam rero ding na'n an ti thei lo ding. 25 Inn neitu bawi a pok ding ih sangka cu a khar ding; cule a lengah dingin sangka cu nan king ding ih 'Bawipa, sangka in rak on hram aw,' nan ti khalle 'Khuitawk ihsin nan rat ka thei lo,' a lo ti ding. 26 Cule nannih in, 'Nangmah thawn rawl kan ei tlang ih tidai khal kan in tlang a si kha! Kan khawsungah tla thu in zirh rero kha!' tiah nan ti ding. 27 Sikhalsehla anih cun 'Khuitawk ihsin a rami nan si ka thei lo. Nannih miṭha lo pawl, ka hnen ihsin tlan ṭheh uh,' tiah a lo ti ding. 28 Nannih pawl cu a lengah hlonhlo nan si ding ih Abraham, Isaak le Jakob le profet hmuahhmuah tla cu Pathian Uknak sungih an um kha nan hmu lai ding; cutikah nannih cu nan ṭap nan raak ding ih nan hacang nan rial ciamco ding a si. 29 Nisuahlam le nitlaklam in siseh, saklam le thlanglam khal in siseh, mi an ra ding ih Pathian Uknak rawl ei puai ah an tokhawm ding. 30 Cutikah cun atu-ih a neta bik hi hmaisa bik an si ding ih hmaisa bik hi neta bik an si leh ding," tiah a ti. 31 Cuih caanah Farasi mi ṭhenkhat pawl Jesuh hnenah an ra ih, "Herod in thah a lo duh ruangah hitawk in suak awla hmun dangah feh aw," tiah an ti. 32 Jesuh in an hnenah, "Va feh uhla cuih cinghnia pa cu 'Tuihsun le thaisun cu khawsia pawl ka dawisuak pei ih mina pawl ka damter lai ding. Cule a ni thumnak ah ka hnaṭuan cu ka ṭheh ding a ti,' tiah va sim uh. 33 Curuangah tuihsun, thaisun le tipsun cu ka feh vivo hrih ko ding. Jerusalem khawsung siar lo hmun dangah profet thah ding cu a cang lo a si. 34 "Maw Jerusalem, Jerusalem! Profet pawl na that ih na hnenah Pathian in palai a tirhthlahmi pawl tla lungto in na deng. Arpi in a thla hnuai ah a faate pawl a huh vekin na minung pawl cu voi tampi ka kut in hum ka duh na'n in sen dah lo! 35 Curuangah nan Biakinn cu hmun ṭhing ah a cang ding. Fiangtein ka lo sim: 'Bawipa ih hminin a rami cu Pathian in thlawsuah hram seh,' tiah nan sim thei caan a thlen hlan cu ka hmel in hmu nawn lo ding a si," tiah a ti.
1 Voikhat cu Sabbath ni ah Jesuh cu Farasi hotu lakih pakhat ih inn ah rawl zawh dingin a feh; cule misenpi cun ṭhatein an rak thlir ringring. 2 Mi pakhat a kut le a ke a thling thluhmi mina cu Jesuh hnenah a ra ih, 3 Jesuh in Daanthiam pawl le Farasi mi pawl kha, "Kan Daan in Sabbath ni ah mina damter ding a on maw on lo so?" tiah a sut. 4 Sikhalsehla annih cun zianghman an ṭong lo. Jesuh in mina pa cu a hruai ih a damter ih a thlah. 5 Cule Jesuh in an hnenah, "Nanmah lakah mi pakhat cu a fapa maw a caw si maw Sabbath ni ah tikhur sungah tla pang sehla Sabbath ni a si ruangah suah loin maw nan um ding?" tiah a sut. 6 Hi thu-ah zianghman an sawn thei lo. 7 Rawl zawhnak hmunah mi ṭhenkhat pawl in tonak ṭha bik an hril ṭheu kha Jesuh in a hmuh ruangah hi tahṭhimnak hi an zate hnenah a sim: 8 "Mopuai ah an lo kawh asile tonak ṭha bik cuh hlah uh. Nangmah hnakih mi upa sawn an sawm khal a si thei; 9 nan pahnih a lo sawmtu innteek pa in na hnenah ra tahratin, 'Na tonak hi kian aw,' tiah a lo tiih hmun niam bikih na vung to sal tikah cun na ning a zakzet ding. 10 Cuhnak cun an lo sawm tikah hmun niam bikah va to awla a lo sawmtu innteek pa a ra ding ih, 'Ka rual, tonak ṭha deuhah hin hung to aw,' tiah a lo ti ding. Cutikah sawmmi misenpi hmaiah mithmaiṭha na ngah ding. 11 Ziangahtile amah le amah a uang awtu cu mi nauta ah tuah a si ding ih, lungnem tangdor ih a umtu cu hmaizahnak ngahtu upa-ah a cang ding," tiah a ti. 12 Cule Jesuh in innteek pa hnenah cun, "Thaithawh siseh zanriah siseh, eitlang dingih mi na sawm tikah na rualpi pawl, na unau pawl, a si lole na sungkhat pawl le na innhnen milian pawl kha va sawm hlah; ziangahtile annih pawl cun nangmah kha an lo sawm thei leh ve ding ih na thil tuahmi kha an lo samsaal thei ding. 13 Sikhalsehla rawl na daar tikah farah zonzai pawl, a zengmi pawl, ke-awl pawl le mitcaw pawl kha va sawm hai aw; 14 annih pawl cun an lo samsaal thei lo ding hrangah malsawm dongtu na si ding. Miṭha pawl thihnak ihsin an thawhsal ni ah Pathian in a lo samsaal leh ding a si," tiah a ti. 15 Cuih thu cu rawl ei-nak cabuai ih an sawm vemi pakhat in a theih tikah Jesuh hnenah cun, "Pathian Uknak sung rawldarnak puai ih a telmi pawl cu an lung a va awi ding so!" tiah a ti. 16 Jesuh in cupa hnenah cun, "Voikhat ah mi pakhat a um ih rawl daarnak puai tumpi a tuah ih mi tampi a sawm. 17 Rawl ei caan a cut tikah a sawm ciami pawl hnenah a hnen-um a thlah. 'Ra thlang uh, ziang hmuahhmuah timtuah a si zo,' tiah a ti. 18 Sikhalsehla pakhat hnu pakhat 'Ka man lo,' tiin puhmawh ding an hawl fingfing. Pakhat pa in 'Lo pakhat ka lei ih ka va zohta a ṭul a si. I rak ngaithiam aw,' tiah hnen-um pa cu a ti. 19 A dang pakhat pa in 'Cawcang khuah nga ka lei ih atu-ah an ṭha maw ṭha lo ka hniksak ding. I rak ngaithiam hram aw,' a ti ve. 20 A dang pakhat pa in 'Tubaite ah nupi ka ṭhi ngelcel ih ka ra thei lo ding,' a ti lala. 21 Hnen-um pa cu a kir ih cuih thu pawl cu a bawipa ih hnenah a sim ṭheh. A bawipa cu a ai a thok ih a hnen-um pa hnenah cun, 'Zamrang zetin khawsung lamzinpi le innlak zinte ah va feh awla mi farah, mi zonzai, kutzeng kezeng, mitcaw le ke-awl pawl rak hruai aw,' tiah a fial. 22 Rei lote-ah hnen-um pa cun 'Bawipa, na thu pekmi vekin ka tuah ṭheh zo; asinain umnak tampi a lawng lai,' tiah a ti. 23 Curuangah a bawipa cun, 'Khua pakhat le pakhat karlak lamzinpi le lamzinte hmuahhmuah ah va feh awla ka inn a khah ṭheh hlan lo mi rak hruai hai aw. 24 Fiangtein ka lo sim: Ka rak sawm ciami pawl sungin zohman in ka zanriah daarmi an tep lo pei,' a ti," tiah a sim. 25 Voikhat ah mi tamzet in Jesuh cu an thlun vivo laiah an lamah Jesuh cu a her ih, 26 "Zokhal siseh ka hnenah a ra ih a nu le pa, a nupi le faate pawl, a unau le a farnu pawl le amah le amah khal keimah hnakih a duh deuh a si ahcun ka dungthluntu a si thei lo ding. 27 Zokhal sisehla amah ih thinglamtah phur tahratin ka dungih i thlun lotu cu ka dungthluntu a si thei lo ding. 28 "Nanmah lakah pakhatkhat in inn saangpi sak a tum a si ahcun hmaisabik ah tote ciamciam in a inn sak ṭhehnak dingah tangka kimtein a neih le neih lo kha a tuak ṭhehta a si lo maw? 29 Cutiin a tuak ṭheh hmaisa lo a si ahcun a hnaṭuan dingmi cu a thok ngah hnu-ah sak ṭheh loin a taang ding ih a rak hmutu hmuahhmuah in an hnihsan ding. 30 'A hei thok ve na'n a ṭheh thei si lo!' an ti ding. 31 "Ralkap thawnghra a neimi siangpahrang pakhat in siangpahrang dang pakhat ralkap thawngkul thawn amah do dingih a rami kha, a do tum a si ahcun hmaisabik ah to ciamciamin cuih siangpahrang dang do theinak ding thazaang a neih le neih lo a ruat hmaisa a ṭul a si. 32 Do theinak thazaang a neih lo a si ahcun cuih siangpahrang dang hnenah, lam hlapi ih a um laiah, remnak tuah dingah a palai pawl a thlah ding a si. 33 Cuvek thotho in nannih tla nan neihmi hmuahhmuah nan tanta lo ahcun keimah ih dungthluntu nan si thei lo pei," tiah Jesuh in a sim. 34 "Cite cu a ṭhazet, asinain a alnak a ziam asile alter sal ngaihnak a um nawn lo. 35 Leilung hrangah san a tlai lo ih dawm hrang hmanah a ṭhahnem nawn lo. A lakih hlonhlo ding men a si thlang. Hi thu hi theihnak hna a neitu in thei uh," tiah Jesuh in a ti.
1 Voikhat ah siahkhongtu pawl le misual tiih hnonmi pawl tampi cu Jesuh thusimmi ngai dingah a hnenah an ra. 2 Cutikah Farasi mi pawl le daanthiam pawl cu an phunzai ih, "Hi pa hin hnonmi misual tla a rak kom ih an hnenah rawl tla a ei a si!" tiah an ti. 3 Curuangah Jesuh in a tanglam tahṭhimnak hi a sim. 4 "Thuṭhimnak ah nanmah lakah mi pakhat in tuu zakhat nei in tuu pakhat hlo bang sehla ziangsi a tuah ding? Tuu sawmkua le pakua kha hramlak ah a tanta ding ih a hlomi a ngah sal hlan lo a hawl ciamco ding. 5 A hmuh tikah a lung a awi tuk ih liangpulut tahratin, 6 inn ah a tlunpi. Cule a rualpi le a innhnen pawl ko khawm in 'A hlomi ka tuu ka hmu sal ih ka lung a awi ngaingai. Curuangah lungawi in lawm uhsi,' tiah a ti. 7 Cubangtuk in sual sirnak a ṭul lomi miṭha sawmkua le pakua hnakin a sual a sirmi misual pakhat hrangah vancungah lungawinak a tamsawn ding a si," tiah a ti. 8 "Cu a si lole, nunau pakhat in tangka fang hra nei sehla fang khat a thlau ahcun ziangso a tuah ding? Mei-inn vang tahratin a inn kha a phiat ih a hmuh sal hlanlo a kel le a kawm tiangin a hawl ṭheh. 9 A hmuh sal tikah a rualpi pawl le innhnen pawl a ko khawm ih 'Ka thlaumi tangka ka ngah sal zo; curuangah lungawi in lawm uhsi,' tiah a ti ding. 10 Cubangtuk in sual sirnak a neimi misual pakhat hrangah Pathian ih vancungmi pawl an lung a awizet a si," tiah a ti. 11 Jesuh in hiti in a sim. "Voikhat ah mi pakhat a um ih fapa pahnih a nei. 12 A nauta sawn cun a pa hnenah, 'Ka pa, ka co dingmi rothil atu-ah i pe aw,' tiah a dil. Curuangah an pa cun a ro thil hmuahhmuah cu a ṭhen ih a fapa pahnih cu a zem. 13 Ni rei loteah fapa nauta sawn cun a comi thilri cu a zuar ṭheh ih a ngahmi tangka thawn inn ihsin a suak. Ram hlapi ah a feh ih tenrennak zianghman um loin a tangka cu a duhduh in a thehvorh ṭheh. 14 A neihmi hmuahhmuah cu a hmang ral ṭheh. Cule cuih ram sungah paampi a tlung ih neihmi zianghman a nei nawn lo. 15 Curuangah cuih ramih mi pakhat hnenah a hna ṭuansak dingah a feh ih cupa cun vok kilkhawi dingin a lo ah a fehter. 16 Vok ih an eimi be-hawng kha puar zetin ei sehla a duh zet na'n zohman in ei ding zianghman an pe fawn lo. 17 A neta bikah a thinlung a hung fim ih, 'Ka pa ih hlawhfa pawl cun ei cawk loin rawl ei ding an nei; asinain kei cu hinah ei ding zianghman nei loin ka thi cuahco thlang! 18 Ka tho pei ih ka pa hnenah ka feh ding. Ka pa, Pathian parah le na parah ka sual zo. 19 Na fapa si dingah ka tlak nawn lo; na hnaṭuantu na sal pakhat ah i tuah hram aw, tiah ka va ti pei,' tiah a ruat. 20 Curuangah a pa ih hnen kir dingin a pok. "Lam hlatpi ih a rat rero lai kha inn ihsin a pa in a hei hmu. A zaangfah ngaingai ih va tlan tahratin a fapa cu a kuah ih a hnam. 21 A fapa cun, 'Ka pa, Pathian parah le na parah ka sual zo. Na fa tiih kawh ding ka tlak nawn lo,' tiah a ti. 22 Sikhalsehla a pa cun a hnen-um pawl a ko ih, 'Zamrang in ra uh! Hnipuan ṭha bik rak keng uhla hrukter uh. A kutah zunghruk hrukter uhla a ke ah kedam dam uh. 23 Cule caw faate a thau bik kha va that uhla lungawinak puai tuah uhsi! 24 Ziangahtile hi ka fapa cu a thizo na'n a nung sal; a hlozo na'n hmuhsal a si,' tiah a ti. Cuticun lungawi puai cu an tuah. 25 "Cu laifangah fapa upa sawn cu lo ah a rak feh. Lo ihsin a ra tlung ih inn kiang a ra thlen tikah hlasak thawm le laam thawm a thei. 26 Cuhrangah hnen-um pakhat a ko ih 'Ziang so an tuah ciamco?' tiah a sut. 27 Cuih hnen-um cun, 'Na naupa a ra kir sal zo, himdamte ih a ra kir sal ruangah na pa in a thaumi caw faate a thah,' tiah a ti. 28 "A fapa upa sawn cu a thin a heng tuk ih innsung hmanah a lut duh lo. Curuangah a pa a ra suak ih innsungih rung lut dingin a leem. 29 Asinain a fapa cun, 'Vun ruat hnik! Kum hizat liangluang sal bangin na hna ka ṭuan ih na thu voikhat hman ka lo el dah lo. Ziang so kei i pek? Ka rualpi pawl thawn nomnak puai tuahnak ah me pakhat hman i pe dah lo! 30 Sikhalsehla hi na fapa cu hlawhhlang pawl thawn nomnak ah na thilri hmuahhmuah a thehvorh ṭheh ih na hnenih a ra kir sal tikah a thaumi caw faate na thah sak!' tiah a pa cu a ti. 31 A pa cun, 'Ka fapa, nang cu ka hnenah na um ringring ih ka neihmi thil hmuahhmuah hi nangmah ih ta an si. 32 Asinain na naupa cu a thi ih atu-ah a nung sal; a hlozo na'n atu cu ka hmu sal; cuhrangah lungawi aipuang in puai tuah tlak hrimhrim a si,' a ti," tiah Jesuh in a sim.
1 Jesuh in a dungthluntu pawl hnenah, "Voikhat ah milianzet pakhat a um ih a thilri kilkhawitu dingah siahhlawh pakhat a nei. Cuih a siahhlawh pa cun na tangka a thehvorh a si, tiah a bawipa cu an sim. 2 Cuhrangah a hnenah a ko ih 'Na thu ka theihmi hi ziangtinso a si? Ka thilri na kilnak cazin kimtein i pe aw; ziangahtile ka thilri kilkhawitu na si thei nawn lo ding,' tiah a ti. 3 Cutikah a siahhlawh pa cun 'Ka bawipa in ka hnaṭuan ihsin i dawi tum a si hi! Ziang so ka tuah pei? Leilung lai ding le ka ti thei lo; mi thil dil ih um ding le ka ning a zak fawn. 4 Asinain thil pakhat tuah ding ka thei! Ka hnaṭuan a cem tikah an innih i umter siangtu rualpi ṭha ka neih a ṭul ding,' tiah a thinlung in a ruat. 5 Cuhrangah a bawipa hnenih leiba a neitu hmuahhmuah a ko khawm. Pakhatnak pa cu 'Ziangzat so ka bawipa na baak?' tiah a sut. 6 Anih in 'Olif hriak pung zakhat,' tiah a let. Thilri kilkhawitu pa cun 'Hihi na cazin a si ding: to awla pung sawmnga, tiah ngan aw,' tiah a ti. 7 Cule a dang pakhat pa cu, 'Nangteh ziangzatso na baak?' tiah a sut. Anih in, 'sangvut dip thawngkhat,' tiah a let. Thilri kilkhawitu pa cun, 'Hihi na cazin a si ding: dip zariat, tiah ngan aw,' tiah a ti. 8 Hi mihrokhrawl thilri kilkhawitu pa hi cubangtuk in fimvar zetih thil ti a thiam ruangah a bawipa in a porhzet, ziangahtile hi leilungtlun mi pawl hi anmah ih thu tawlrelnak ahcun tleunak sungih a ummi pawl hnakin an fimvar sawn a si," tiah a ti. 9 Cule Jesuh in, "Cuti a si ruangah hiti in ka lo sim: leilung tlunih sumsaw hmangin rualpi tuah uh, ziangahtile leilung thilri a cem tikah kumkhua a hmunmi inn ah luhter nan si ding. 10 Thil fate ih rintlak a si mi cu thil tumpi khalah rintlak a si ding; thil fate thu-ah zumtlak lo a si mi cu thil tumpi thu khalah zumtlak lo a si ding. 11 Leilung thilri nan tawlrelnak hmanah rintlak lo nan si ahcun ziangtinso lennak taktak cu nan hnenah pek nan si thei ding? 12 Cule midang thilri par hmanah rinsantlak nan si lo ahcun nanmah ih co dingmi ngaingai cu zo in so a lo pek duh ding? 13 Mi pakhat cu bawi pahnih ih sal a si thei lo. Pakhat a hua ding ih pakhat kha a duh ding; pakhat hnenah rinsantlak in a nung ding ih pakhat tu cu a nautat ding. Pathian le sumsaw cu nan rian tlang thei lo," tiah a ti. 14 Cuih thu pawl cu Farasi mi pawl in an theih tikah tangka duh tuk pawl an si ruangah Jesuh kha an hnihsan. 15 Jesuh in an hnenah, "Miseenpi hmaiah cun miding bikah nan lang awter; asinain Pathian cun nan thinlung a thei ṭheh. Ziangahtile minung in man nei zetih nan ruahmi cu Pathian mithmuh ahcun zianghman a si lo. 16 "Moses ih Daan le profet ih canganmi pawl cu baptisma petu Johan san tiang hrang lawngah a si. Cuihhnu cun Pathian Uknak Thuthang ṭha cu phuan a si ih zozo khal hranhram ih luh an tum. 17 Sikhalsehla Daan sungih cafang fate bik hloh hnakin van le leilung hloh ṭheh a ol sawn. 18 "Zokhal a nupi a ma ih nunau dang a ṭhitu cu ṭaangṭawm sualnak a tuah; cule maakmi nu a ṭhitu cu ṭaangṭawm sualnak a tuah ve a si," tiah a ti. 19 "Voikhat ah milianzet pakhat a um ih hnipuan mankhung bik in a thuam aw ih nitin rawl thawthaw ei in nuam zetin a nung. 20 Lazaras an timi mi farahzet pakhat a um ve ih a pumpuluk in hma a khat ṭheh. 21 Milian pa ih cabuai ihsin a tlami rawl ṭilfuan sar dingah milian pa ih sangka ah an hruai ṭheu. Uico an ra ih a hma cu an ra liak ṭheu. 22 Mifarah pa cu a thi ih vancungih rawl ei-nak puai ah Abraham kiangih to dingah vancungmi pawl in an fehpi. Milian pa cu a thi ve ih an phum; 23 cule Hell sungah a tla ih harzet in a tuar. Cuphah in tlunlam a hun zoh ih lamhlatzet ah Abraham le a kiangih Lazaras kha a hun hmu. 24 Cule a au ih, 'Ka pa Abraham, i zaangfah hram aw. Lazaras kha fial awla a kutzung kha tidaiah hnim sehla ka lei daiter dingah ti i run forhseh; ziangahtile hi meisa sungah ka tuar a har tuk a si!' tiah a ti. 25 Sikhalsehla Abraham in, 'Ka fapa, vun ruat hnik! Na nun sungah khan thil ṭha hmuahhmuah na ngah ṭheh zo ih Lazaras cun thil ṭha lo lawnglawng a co. Asinain atu-ah cun anih cu hitawk ah hin nunnuam in a um ih nang cu harnak na tuar a si! 26 Cuih tlunah kan karlakah Kawhrum tluan thukpi a um ih curuangah hitawk ihsin na hnenah rat a duhmi zohman an ra thei lo ih na umnak ihsin kan umnak khalah hin rat duhtu an um khalle an ra thei lo a si,' a ti. 27 Cutikah milian pa cun 'Cuti a si ahcun, maw ka pa Abraham, ka pa ih inn ah Lazaras kha hei thlah hram aw. 28 Cutawkah unau panga ka nei. Lazaras kha va feh sehla annih tal cu hitawk tuarnak hmunah hin an ra thlen lonak dingah ralrinnak va pe seh, tiah zaangfah ka dil a si,' a ti. 29 Abraham cun, 'Na unau pawl ralrinnak petu dingah Moses le profet pawl an um a si. An simmi kha rak ngai hai seh,' a ti. 30 Milian pa cun, 'Ka pa Abraham, cuti lawng cun a tawk lo. Mi pakhat thihnak ihsin a tho ih an hnen a thlen ahcun an nunsualnak cu an ṭhin ding,' tiah a ti. 31 Sikhalsehla Abraham cun, 'Moses le profet pawl ih thu an ngai duh lo a si ahcun mi pakhat thihnak ihsin tho hmansehla an lung duh cuang lo ding,' a ti," tiah Jesuh in a sim.
1 Jesuh in a dungthluntu pawl hnenah, "Sualnak sungih mi a tlatertu thil cu a ra thleng ringring ko ding; asinain cuih thil a thlentertu ih hrangah cun tuksumza a si. 2 Hi nauhak pakhatkhat a sualter hnak cun a hngawng ah fang rialnak lungtumpi kha thlaih tahratin tifinriat sungah hlon sehla amah hrangah a ṭhasawn. 3 Curuangah thil nan tuahmi ah ralring uh. Na unau a sual ahcun nunsim aw; a sir awk ahcun ngaithiam aw. 4 Na parah ni khat sungah voi sarih tiang sual hmansehla na hnenah ra tahratin 'Ka sual ka sir aw a si,' a ti ahcun ngaithiam aw," tiah a ti. 5 Dungthluntu pawl in, "Kan zumnak hi ṭhangter sin aw," tiah an Bawipa cu an ti. 6 An Bawipa cun, "Nannih in anṭam ci tia zumnak nan neih ahcun hi thingtheihmu kung hi 'Na hram in phong aw awla tifinriat sungah va phun aw aw,' nan ti thei ding ih nan ti vekin a cang ngaingai ding. 7 "Thuṭhimnak ah nanmah lakah pakhatkhat in hnen-um pakhat a nei tibang sehla, cuih hnen-um cu lei a let, a si lole tuu a khal ti sehla, innih a ra tlun tikah 'Zamrang awla na rawl ei aw,' nan ti ding maw? 8 Nan ti lo ding! Cuhnakin amah cu 'Ka hrangah zanriah i suan sak aw; cule na rawl suannak thuam hruk awla rawl ka ei sung i kil aw; cuih hnu lawngah nang cu rawl na ei leh ding,' nan ti ding. 9 Hnen-um pa cu thu nan pekmi a tuah ṭheh ruangah lungawinak ṭongkam a parah nan ṭong dah maw si? 10 Cuvek thotho in nanmah par khal ah a si ve: tuah uh, tiih an lo timi nan tuah ṭheh tikah 'Kannih cu lom tlak lo hnen-um men kan si. Kan ṭuanvo a ṭuantu lawng kan si,' tiah ti uh," tiah a sim. 11 Jesuh cu Jerusalem lam a pan zawng ah Samaria le Galilee ramri a pal phah vivo. 12 Khua pakhat a va thleng ih cuih khawsungih phaarnat in a nami pahra in an rak tong. Lamhlat nawnah an ding ih, 13 "Maw Jesuh, Bawipa, in zaangfah hram aw," tiah an au. 14 Jesuh in a hmu ih an hnenah, "Va feh uhla puithiam pawl in lo zoh hai seh," tiah a ti. An feh laifangah cun an dam ṭheh. 15 Anmah lakih pakhat pa in a dam ṭheh zo ti kha a hmuh awk tikah a kirsal ih aw ring zetin Pathian a thangṭhat. 16 Hmakhatteah Jesuh kehram leilungah cun a bok ih Jesuh hnenah lungawi thu a sim. Cupa cu Samaria mi pa a si. 17 Jesuh in, "Damnak a ngahtu cu mi pahra an si. Pakua teh khui-ah so an si? 18 Ziangah so hi ramdang mi pakhat lawng Pathian hnenih lungawinak pe dingah a rat?" a ti. 19 Cule Jesuh in, "Tho awla feh aw. Na zumnak in a lo damter zo," tiah a ti. 20 Farasi mi ṭhenkhat in, "Ziang tikah so Pathian Uknak a ra thlen ding?" tiah Jesuh cu an sut. Jesuh in, "Pathian Uknak cu mithmuh in a ra lo. 21 Zohman in 'Zohhnik uh! Hinah a um hi! Khinah a um khi!' tiah an ti lo ding. Ziangahtile Pathian Uknak cu nan sungah a um a si," tiah a ti. 22 Cule a dungthluntu pawl hnenah, "Milai Fapa ih caan ni khat tal hmu ve thei sehla tiah saduh nan thah tikcu a ra thleng ding, asinain nan hmu lo ding. 23 Nan hnenah 'Zoh uh! Khinah a um! Zoh uh! Hinah a um!' tiah a lo titu an um ding. Sihmansehla zoh dingah va feh hlah uh. 24 Nimthlakau in van khatlam kap ihsin khatlam tiang a hrawh ih a tlet ṭheh vekin Milai Fapa cu amah ih ni ahcun a si ve ding. 25 Asinain hmaisabik ah amah in tuarnak nasazet a tong ding ih tuihsan minung pawl in an hnong ding. 26 Noah sanlai ih a rak can zo bangin Milai Fapa san khalah a cang ve ding. 27 Noah a lawng sungah a lut ih tilik a tlung ih mi hmuahhmuah an thih ṭheh hlan tiangin mizapi cu an nuam, an ei an in ih an ṭhi aw rero lai. 28 Lot sanih a rak si zo bangtuk in a si ve ding. Zozo khal zu an in, sa an ei; thil an lei, thil an zuar; thlai an ciing ih inn an sak. 29 Lot in Sodom a tlansan ni ah van ihsin meisa le kaat ruahpi bangin a rung sur ih mi hmuahhmuah an thi ṭheh. 30 Milai Fapa a rung lang ni ahcun cuvek in a si ve ding. 31 Cuih ni ahcun a inn diphun ih a umtu cun a innsungih a ummi thilri la dingah ṭum hlah seh. Cuvek thothoin lo ih a rak umtu cu inn ah tlung hlah seh. 32 Lot ih nupi kha nan ciing lai maw? 33 Zokhal amah ih nunnak hum a tumtu cu a nunnak a sung ding; a nunnak a liamtu cun a nunnak a hum ngah ding. 34 Thungai in ka lo sim: cuih zaan ah ihkhun pakhat ah mi pahnih an ittlang ding; pakhat cu a lak ding ih pakhat cu a taanta ding. 35 Nunau pahnih sum an deng tlang ding; pakhat cu lak hlo a si ding ih pakhat cu taanta a si ding," tiah a ti. 36 ("Mi pahnih lo ah hna an ṭuan tlang ding: pakhat cu lak hlo a si ding ih pakhat cu taanta a si ding," tiah a ti.) 37 Dungthluntu pawl cun, "Bawipa, khui tawkah so?" tiah an sut. Jesuh in, "Ruak a umnak hmun ahcun langta an khawm aw ding," tiah a sim.
1 Jesuh in a dungthlun pawl kha thinnau loih thla an cam ringring a ṭulzia zirh duh ah tahṭhimnak pakhat a sim. 2 An hnenah cun, "Khua pakhat ah Pathian a ṭih loih milai khal a hmaizah lotu thuṭhentu pakhat a um. 3 Cuih khua thotho ah nuhmei nu pakhat a um ih nuhmei nu cun, 'I raltu thawn thu kan neihmi ahhin i bawm hram aw,' tiah atu le atu a ra dil ringring. 4 Thuṭhentu in cuih thu cu caan reipi relsak duh loin a um; asinain a netabik ahcun 'Pathian ka ṭih lo ih mi khal ka hmaizah lo na'n, 5 hi nuhmei nu in i hnaihnok ringring ruangah a thu cu ka relsak pei. Ka relsak lo a si ahcun catbang loin a ra ringring ding ih a netnak ahcun keimah lehlam thinlung baangin i tuah ding,' tiah a ruat," tiah a sim. 6 Cule an Bawipa cun an hnenah, "Hi a dik lomi thuṭhentu ih ṭongkam cu nan thei! 7 Cuti a si ahcun Pathian in amah ih bomnak dilin sun zan a au rerotu a minung pawl cu an thu ṭhensak loin a um pei maw? Anmah bawm dingah a khul a fung pei maw? 8 Fiangtein ka lo sim: zamrang zetin a relsak ding ih thuding a coter ding a si. Sikhalsehla Milai Fapa hi leilungih a rat tikah zumnak neitu a hmu pei maw?" tiah a ti. 9 Jesuh in hi tahṭhimnak cu, miṭha ngaingai ih a ruat awmi le midang hmuahhmuah a hmuhsuamtu pawl hnenah a simmi a si. 10 "Voikhat ah mi pahnih cu thlacam dingah Biakinn ah an feh. Pakhat cu Farasi a si ih pakhat cu siahkhongtu a si. 11 Farasi pa cu hlat nawnah amah lawng a ding ih hiti in thla a cam. 'Maw Pathian, kei cu midang vekin ka duhham lo, thuphan ka per lo ih ṭaangṭawm sualnak tla ka tuah lo ruangah ka lo thangṭhat. Khi tawkih a ummi siahkhongtu vek ka si lo ruangah ka lo lawm. 12 Zarhkhat ah voihnih rawl ka ul, ka ngahmi hmuahhmuah sungin ṭhenhra ih ṭhenkhat ka lo pek,' a ti. 13 Sikhalsehla siahkhongtu pa cu a hlat nawn ah a ding ih vanlam hman hoih ngam loin a ṭaang a cuum aw ih 'Maw Pathian, i zaangfah hram aw; kei cu misual ka si,' tiah a ti. 14 Fiangtein ka lo sim: Farasi mi pa si loin siahkhongtu pa sawn kha inn ih a tlun tikah Pathian hmaiah thuding cotu a si. Ziangahtile zokhal amah le amah a khaisang awtu cu namthlak a si ding ih tangdortu cu khaisan a si ding," tiah a ti. 15 Mi hrekkhat in an faate pawl ih parah Jesuh in a kut suangseh ti duh ah Jesuh hnenah an faate pawl cu an rak hruai. Cutiih an tuah cu a dungthluntu pawl in an hmuh tikah an kawk. 16 Asinain Jesuh in nauhak pawl cu a ko ih, "Nauhak cu ka hnenah ra hai seh, dawn hlah uh; ziangahtile Pathian Uknak cu hi bangtuk mi pawl ih ta a si. 17 Hihi ciing ṭha uh! Zokhal Pathian Uknak kha nauhak pawl ih an cohlan bangtuk in a cohlang lotu cu cuih Uknak sungah an lut thei dah lo ding," tiah a ti. 18 Judah mi hotu pakhat in Jesuh cu, "Zirhtu ṭha, kumkhua nunnak co dingah ziangso ka tuah ding?" tiah a sut. 19 Jesuh in, "Ziangah so miṭha, tiah i ti? Pathian pakhat siarlo miṭha dang zohman an um lo. 20 Thukham pawl na thei ko a si lo maw: ṭaangṭawm sualnak tuah hlah; lai that hlah; ruk ru hlah; thuphan per hlah; na nu le na pa kha upat aw,' ti tla an si kha!" tiah a let. 21 Cupa in, "Ka seentet lai ihsin hi thukam pawl hicu ka thlun thluh zo a si," tiah a ti. 22 Cumi cu Jesuh in a theih tikah a hnenah cun, "Na tuah ṭulmi pakhat a um lai. Na neihmi hmuahhmuah zuar ṭheh awla na ngahmi tangka kha mifarah pawl va pe aw; cule vancung ah sumsaw na nei ding. Cuih hnuah ra awla i thlun aw," tiah a ti. 23 Asinain cuih thu cu cupa in a theih tikah a riah a sia ngaingai, ziangahtile amah cu milianzet a si. 24 Jesuh in a riahsiat kha a hmuh tikah hiti in a sim: "Milian hrangah cun Pathian Uknak sungih luh cu ziangtluk in so a har! 25 Milian pakhat Pathian Uknak sungih luh hnakin kalauk pakhat ṭhim hnakua sungih luh khi a ol sawn a si," tiah a ti. 26 Cumi cu mipi in an theih tikah, "Cuti asile zoso runmi a si thei ding?" tiah an sut. 27 Jesuh in, "Minung hrangih a cang thei lo timi hi Pathian hrangah cun a cang thei a si," tiah a ti. 28 Cutikah Piter in, "Zohhnik! Kan innsang taanta in nangmah kan lo thlun hi!" tiah a ti. 29 Jesuh in, "Asi, na simmi a dik a si; fiangtein ka lo sim: zokhal a inn siseh, a nupi siseh, a unau siseh, a nu le a pa siseh, a faate pawl siseh, Pathian Uknak hrangah a tlansan a si ahcun, 30 tuih san ahhin a let tampiin ngahmi a nei ding ih a ra dingmi san ah kumkhua nunnak a ngah ding," tiah a sim. 31 Jesuh in a dungthlun hleihnih pawl kha hmun dangte ah a fehpi ih an hnenah, "Ngaihnik uh! Jerusalem ah kan feh ding ih Milai Fapa ih thu profet pawl ih an rak simmi hmuahhmuah kha a kim ding. 32 Zentail mi pawl ih kut ah thlenpi a si ding ih annih in hnihsuahsainak ah an hmang ding, an dekcok ding ih an cil an phui ding. 33 An vuak ding ih an that ding, asinain ni thumnak ah a tho sal ding," tiah a ti. 34 Sikhalsehla cupawl cu a dungthluntu pawl cun an thei thei lo; a ṭong ih sullam kha thuhsak a si ruangah Jesuh ih ṭongmi kha a tican an thei lo. 35 Jesuh cu Jerikho khua lamah a feh ih a thlen zik zawng ah mitcaw pakhat cu lamzin kiangah kutdawh in a rak to. 36 A kiangin mi tampi an lan kha a theih tikah, "Ziang so a si?" tiah a rak sut. 37 Annih in, "Nazareth mi Jesuh a ra a si," tiah an ti. 38 Cupa cun, "Maw David Fapa Jesuh, i zaangfah hram aw," tiah a au ciamco. 39 Hmaiih a ummi misenpi pawl in an kawk ih daiteih um dingah an sim. Sikhalsehla anih cun, "David Fapa, i zaangfah hrawm aw," tiah a au sinsin. 40 Cuhrangah Jesuh cu a ding ih, "Mitcaw pa kha hinah rak hruai uh," tiah thu a pek. A hnenih a ra thlen tikah Jesuh in, 41 "Ziang tisak dingso na duh?" tiah a sut. "Bawipa, khua hmu thei sal ningla ka duh," a ti. 42 Jesuh in a hnenah, "Cuti asile khua hmu aw! Na zumnak in a lo damter zo," tiah a ti. 43 Hmakhatteah khua a hmu thei ih Jesuh kha a thlun ih Pathian a thangṭhat vivo. Cumi cu misenpi in an hmuh tikah an zatein Pathian kha an thangṭhat.
1 Jesuh cu Jerikho khua a thleng ih khawsung in a feh vivo. 2 Cutawkah siahkhongtu upa pakhat, a lianzetmi, Zakia timi a um. 3 Jesuh kha zo a si ti hmuh a duhzet na'n amah cu mi niamte a si ih tlunah mi an tamzet ruangah a hmu thei hrimhrim lo. 4 Curuangah mipi hmaiah a tlan ih cutawk lamih a feh vivotu Jesuh hmuh duh ah theipi kung parah a kai. 5 Jesuh cutawk hmun a thlen tikah a tlunlam a hun zoh ih, "Zakia, zamrangin rung ṭum aw, tuihsun na inn ah ka tlung ding," tiah a ti. 6 Zakia cu zamrangin a ṭum ih Jesuh kha a inn ah lungawi zetin a tlunter. 7 Cumi a hmutu hmuahhmuah cu an phunzai hmurhmo ih, "Hi pa hi misual pa ih inn ah a tlung ual!" tiah an ti. 8 Zakia cu a ding ih Bawipa ih hnenah cun, "Bawipa, i ngaihnik! Ka neihmi ih hrek cu mifarah ka pe ding; cule ka bummi an um ahcun a let li in ka sam sal ding," tiah a ti. 9 Jesuh in a hnenah, "Tuih sun hi pa ih inn ah rundamnak a ra thleng zo, ziangahtile hi pakhal hi Abraham ih tesinfa a si ve. 10 Milai Fapa cu a hlomi hawl ding le rundam dingah a ra," tiah a ti. 11 Cutiih a simmi a rak ngaitu mipi hnenah Jesuh in tahṭhimnak pakhat a sim. Amah cu Jerusalem a thleng zik thlang ih mipi cun Pathian Uknak a ra thleng zik thlang tiah an ruat. 12 Curuangah hiti in a sim: "Voikhat ah bawi pakhat a um ih amah cu ram hlapi ah feh tahratin siangpahrang ih canter a si hnuah innih ra tlun sal a tum. 13 Cutiih a feh hlanah a hnen-um pahra kha a ko ih sui tangka fang khat fingfing a pek hnuah, 'Himi thawn sum rak tuah hnik uh; ka ra kir tikah ziangzat nan ngah, kan zohhnik pei,' tiah a ti. 14 A ram sungmi pawl in cuih an bawipa cu an hua ih curuangah 'Hi pa hi cu kan siangpahrang dingah kan duh lo,' tiah a simtu dingah palai an thlah. 15 "Cupa cu siangpahrang a can hnuah a ra tlung sal. A thlen vete in sum ziangzat an ngah ti theih duh ah a hnen-um pahra cu a hnenah a ko. 16 Pakhat pa cu a ra ih, 'Bawipa, sui tangka fang khat i pekmi in sui tangka fang hra a miat ka ngah,' tiah a ra ti. 17 A bawipa in, 'A ṭha, nang hi hnen-um ṭha na si. Thil fate parih rintlak na si ruangah khawpi pahra uktu-ah ka lo re ding,' tiah a ti. 18 Pahnihnak pa a ra ih, 'Bawipa, sui tangka fang khat i pekmi in fang nga a miat ka ngah,' tiah a ti. 19 Cupa cu 'Khawpi panga uktu-ah ka lo ret ding,' tiah a ti. 20 "A dang hnen-um pakhat a ra ih, 'Bawipa, hinah na sui tangka cu a um. Pavua in ka tuam ih ka ret. 21 Nang cu mi tifekfek na si ruangah ka lo ṭih. Na ta a si lomi tla na lak ṭheu ih thlaici na vorh lomi khal na khawm ṭheu,' tiah a ti. 22 Cutikah a bawipa in, 'Hnen-um ṭha lo! Nangmah hnonnak dingah hin nangmah ih ṭong lala ka hmang ding! Mi tifekfek ka si cu na thei ih ka ta a si lomi tla ka lak ih ka vorh lomi khal ka khawm cu na thei. 23 Cuti asile ziangah so ka tangka cu tangka retnak zung ah na rak ret lo? Rak ret cila ka ra kir sal tikah tangka ṭhang thawn ka ngah ding a sisi!' tiah a ti. 24 Cule cutawkih a dingmi pawl hnenah, 'A sui tangka cu la uhla sui tangka fang hra a neitu hnen-um hnenah pe uh,' tiah a ti. 25 Asinain annih in, 'Bawipa, anih cun fang hra a nei zo si!' an ti. 26 An bawipa cun, 'Fiangtein ka lo sim: thil a neitu hnenah a dang khal belh a si ding; asinain thil a nei lotu hnen ihsin a neihsun malte hman kha laksak hrih a si ding. 27 Cun an siangpahrang dingih i duh lotu ka ral pawl cu hinah ratpi uh la ka mithmuh ah hin that uh,' a ti," tiah Jesuh in a sim. 28 Jesuh in hi thu a sim hnuah an hmaiah Jerusalem ah a feh. 29 Cule Olif tlang ih Bethphage le Bethani khua kiang a thlen tikah a hmai ah a dungthluntu pahnih kha a thlah ih, 30 hiti in thu a cah. "Nan hmaiih a ummi khawsungah khin va lut uhla zohman ih an to dah hrih lomi laak note pakhat hri in an khihmi kha nan hmu ding. A hri phoih uhla hinah rak hruai uh. 31 Zokhal in ziangah so nan phoih, tiah an lo sut asile Bawipa in a hai tiah va sim uh," a ti. 32 An va feh ih Jesuh in a sim vek cekci-in ziang hmuahhmuah cu an hmu. 33 Laak note cu an phoih rero laiah a neitu pawl in, "Ziangah so nan phoih?" tiah an ti. 34 Annih in, "Bawipa in a hai," tiah an let. 35 Cule laak cu Jesuh hnenah an hei hruai. Cun laak parah cun an puan an dam ih Jesuh cu an toter. 36 Laak par cun a feh ih a fehnak lamzin ahcun mipi in an puan an phah vivo. 37 Jerusalem khua kiang lamzin Olif Tlang ihsin a vung suhnak zawn an thlen tikah a thluntu miburpi pawl cun Pathian an thangṭhat ih, thil mak zetzet tampi an hmuh ruangah cun an aw neih patawp in an au ciamco. 38 "Bawipa'i hmin in a rami siangpahrang parah Pathian thlawsuahnak um ko seh! Van ah daihnak um sehla Pathian hnenah sunlawinak cu um ko seh!" tiah an ti. 39 Cule miburpi lakih a ummi Farasi ṭhenkhat pawl in Jesuh cu, "Sayapa, na dungthlun pawl hi daite'n um hai seh, sim aw!" tiah an ti. 40 Jesuh in, "Fiangtein ka lo sim: Annih pawl daiteih an um asile hi lungto pawl hi an hung au ciamco ding a si," tiah a ti. 41 Jerusalem khawpi cu a hei naih vivo ih a hmuh ngah tikah Jesuh cu a ṭap: 42 "Tuihsun ah hin daihnak hrangah ziangso a ṭul, tihi thei thei cila maw! Asinain cucu na hmuh thei lo dingin thuh a si! 43 Nan ral pawl in an lo kulh ṭheh ding ih an lo kham ṭhehnak le khuazakip in an lo fuuknak caan a ra thleng ding. 44 Nangmah siseh, na phar dawlmi sungih a ummi na minung pawl siseh, an that ṭheh ding. Nangmah rundam dingih Pathian a rat tikcu na theih lo ruangah lungto pakhat hman suang aw-in a taangmi an um lo ding a si!" tiah a ti. 45 Cun Jesuh cu Biakinn sungah a feh ih thil zuartu pawl kha a dawi ṭheh. 46 "Ca Thianghlim sungah Pathian in ka Biakinn cu thlacamnak inn tiah kawh a si ding a ti. Asinain nannih cun fifir pawl relhnak kua ah nan canter!" tiah a kawk hai. 47 Nitinte in Jesuh cun Biakinn sungah thu a zirh. Puithiam upa pawl, Daanthiam pawl le hotu pawl in Jesuh cu thah an duh. 48 Asinain an thah theinak ding lamzin an hawl thei lo, ziangahtile mi hmuahhmuah in a thu simmi cu ṭongfang pakhat hman hrelh loin ngai an duh.
1 Nikhat ah Jesuh cu Biakinn sungah thu a zirh ih Thuthangṭha a sim rero laiah puithiam upa pawl, Daanthiam pawl le khawsung upa pawl a hnenah an ra ih, 2 "In simhnik! Zo ih thu in so hi bangtuk thil hi na tuah? Zo in so thu a lo pek?" tiah an sut. 3 Jesuh in, "Thu ka lo sut ve hnik pei. I simhnik uh. 4 Johan in baptisma pek theinak thu a neihmi hi Pathian hnen ihsin a ra maw, minung hnen ihsin so?" tiah a ti. 5 Annih pakhat le pakhat, "Ziangtin so kan sim ding? 'Pathian hnen ihsin a ngah,' kan ti asile anih in, 'Cuti asile ziangah so Johan cu nan zum lo?' in ti ding. 6 Asinain 'Minung hnen ihsin a ngah,' kan ti fawn asile hi misenpi pawl hin lungto in in deng ding, ziangahtile Johan cu profet a si tiah an zum ṭhehmi a si fawn," tiah anmah le anmah an el aw. 7 Curuangah annih in, "Zo hnen ihsin a ngah ti kan thei lo," tiah an let. 8 Cule Jesuh in, "Kei khal in zo hnen ihsin hi thil tuah theinak thu hi ka ngah, ti ka lo sim lo ding," tiah a let ve. 9 Cun Jesuh in hi tahṭhimnak hi misenpi hnenah a sim: "Voikhat ah mi pakhat in sabit hmuan a nei ih midang hnenah man pek in a hmuan cu a san hnuah caan reipi sung khual a tlawng. 10 Sabit rah lawh caan a cut tikah hmuan saangtu pawl hnenah cun a covo va la dingin a sal pakhat a thlah. Sikhalsehla hmuan saangtu pawl in a salpa cu an rak vuak hnuah a kut lawngin an kirter. 11 Curuangah a sal pakhat a thlah sal; cupa khal cu hmuan saangtu pawl cun an vuak ih ningzak koin an rak tuah hnuah kut lawngin an kirter lala. 12 Cule a sal dang pakhat a thlah sal. Hmuan a saangtu pawl cun an rak tuahmawh ih hmuan lengah an hlon. 13 Cun sabit hmuan neitu pa cun, 'Ziangtin so ka ti ding? Ka duhdawtmi ka fapa hi ka thlah pei; amah cu an rak upat ko ding,' tiah a ti. 14 Asinain hmuan saangtu pawl in a fapa cu an rak hmuh tikah pakhat le pakhat, 'Hi pa hi hmuan neituih fapa ngaingai a si. Kan that pei ih a co ding hmuahhmuah cu kan ta ah a cang ding!' tiah an ti aw. 15 Curuangah hmuan leengah an hlon ih an that. "Cuti a si ruangah hmuan saangtu pawl parah hmuan neitu in ziangso a tuah ding? 16 Amah cu a ra ding ih cupawl cu a thah hnuah hmuan saangtu dang hnenah a hmuan cu a saan ding a si," tiah a ti. Cumi cu misenpi in an theih tikah, "Cuticun a ti hrimhrim lo ding," tiah an ti. 17 Jesuh in a zohhliah hai ih an hnenah, "Asile, Ca Thianghlim sungah 'Inn saktu pawl in santlai lo ti ih an hnonmi lungto cu a thupi bikmi lungto ah a cang riangri,' tiih nganmi kha a tican ziangso a si? 18 Zokhal cuih lungto parih a tlami cu an kuai seksek ding ih cuih lungto in a tlakmi cu a zaam ṭheh ding a si," tiah a ti. 19 Daanthiam pawl le puithiam upa pawl in cutawk rori ahcun kaih an tum, ziangahtile a tlunih tahṭhimnak hi anmah ṭongsan in a simmi a si, ti kha an thei; asinain mipi kha an ṭih fawn. 20 Curuangah an kaih theinak dingah tikcu remcaang an hawl. Mi ṭhenkhat cu Jesuh thlingthlatu dingah nawhthuh an pek ih, "Mi ṭhazet vekin um uh. Jesuh hi Rom Acozah ih thu neitu Mangki bawi hnenih kan thlenpi theinak dingah thu nan sut pei ih amah ih ṭong lala kha thang ah hmangin a awh nan zuam pei," tiah an ti. 21 Thlingthlatu pawl in Jesuh cu, "Sayapa, na simmi le na zirhmi hi a dik a si tiah kan thei. Mi na thleidang lo ih minung hrangih Pathian duhnak thudik kha felte'n na zirh ti tla kan thei. 22 Cuti a si ruangah thu pakhat in simhnik: Rom Siangpahrang hnenah ngunkhuai pek hi kan Daan in a on maw, on lo so?" tiah an sut. 23 Jesuh in an depdetnak kha a thei ṭheh ih an hnenah, 24 "Ngun tangka fang khat i hmuhhnik uh. A parah zo ih zuk le hmin so a cuang?" tiah a sut. Annih in, "Rom Siangpahrang zuk le hmin," tiah an sawn. 25 Curuangah Jesuh in, "Cuti a si ahcun Rom Siangpahrang ta cu siangpahrang pe uh; Pathian ta cu Pathian pe uh," tiah a ti. 26 Cuti cun misenpi hmaiah a kaih an tum na'n ziangti hmanin an kai ngah thei lo; thu an suhmi a lehnak an theih tikah an lau ih daiziar in an um. 27 Cun Sadusi mi ṭhenkhat, minung hi thihnak ihsin thawhsal a um nawn lo, a titu pawl Jesuh hnenah an ra ih, 28 "Sayapa, Moses in hiti in daan a nganta: 'Mi pakhat cu faate nei loin a nupi a thihsan ahcun a unau pakhatkhat in a cuih nupi cu a ṭhi pei ih faate an neihmi kha an u mithi pa ih faate-ah ruah a si pei,' tiah a ti. 29 Voikhat ah unau pasarih an um. Upabik cu nupi a nei na'n faate nei loin a thi. 30 Pahnihnak pa in cunu cu a ṭhit ih faate nei loin a thi ve. 31 A pathumnak pa khal in a ṭhit ih fa nei loin a thi ve thotho. An unau pasarih in cu nu cu an ṭhina'n faate nei loin an thi ṭheh. 32 A neta bikah cuih nunau nu khal cu a thi ve. 33 Cutiin a si ih a thi ciami pawl an thawhsal tikah cunu cu zo ih nupi so a si ding? An pasarih in an ṭhi ciar fawn si!" tiah an sut. 34 Jesuh in an hnenah, "Tuihsan minung pawl cu nunau le mipa an ṭhi aw. 35 Sikhalsehla thihnak ihsin thawhter sal dingah siseh, a ra lai dingmi san ih nung dingah siseh, a tlakmi pawl cu cuih caan ahcun an ṭhi aw nawn lo ding. 36 Vancungmi bangtuk an si ding ih an thi thei lo ding. Thihnak ihsin an thawhsal zo ruangah annih tla cu Pathian ih faate an si. 37 Cule Moses in, a thimi pawl cu thawhter sal an si ti cu fiangte'n a langter a si. Hrambur a kaangmi thuhla sungah khan Bawipa cu 'Abraham ih Pathian, Isaak ih Pathian, le Jakob ih Pathian,' tiah a ti. 38 Pathian cu a thimi ih Pathian a si lo, a nungmi ih Pathian a si; ziangahtile mi hmuahhmuah cu a hnenah cun a nungmi hlir an si," tiah a ti. 39 Daanthiam ṭhenkhat pawl in, "Sayapa, na thu lehmi a ṭha zet!" tiah an hun ti. 40 Cutiin Jesuh cu thu an sut ngam nawn lo. 41 Jesuh in, "Ziangtin so Messiah cu David tesinfa a si, ti theih a si ding? 42 Ziangahtile David amah rori in Saam Hlabu sungah, 'Bawipa in ka Bawipa hnenah, Na ral pawl hmuahhmuah cu na ke hnuaiah, 43 Ke pal dingih ka ret thluh hlan lo ka vorhlam ah to aw,' tiah a ti. 44 David in 'Bawipa,' tiah a ti ahcun ziangtinso Messiah cu David tesinfa cu a si thei ding?" tiah a ti. 45 Mi hmuahhmuah in a thusimmi an ngai laiah khan Jesuh in a dungthlun pawl hnenah, 46 "Daanthiam pawl hi ralring uh! Annih tla cu an angki fualpi thawn vah sukso an uar ih dawrtluan ah khin upatnak thawn mi ih cibaibuk an duh; sinakok le puai tuahnak hmun ah khin tonak ṭhabik an hril ringring. 47 Nuhmei pawl an hmuhsuam ih an inn tiangin an lawng, asinain mi hmai ahcun sau zetzet in thla an cam fawn! Hremnak an tuar dingmi cu a luar cuang ding a si!" tiah a ti.
1 Jesuh in a kiangkap kha a zoh ih, milian pawl in Biakinn tangka kuang sungah an thawhlawm an thlak rero kha a hmu; 2 cule nuhmei farah zet pakhat in paisa pia hnihte a thlakmi tla kha a hmu. 3 Jesuh in, "Fiangtein ka lo sim: hi nuhmei nu hin midang hmuahhmuah hnakin tam sawn a pek a si. 4 Ziangahtile midang pawl cun an neihmi sungih a hleifuan kha an pek; sikhalsehla hi nuhmei nu cu farahte asinain a nunnak dingih a neihmi kha a zatein a pek a si," tiah a ti. 5 A dungthlun ṭhenkhat cun Jerusalem Biakinn thu, lungto ṭha zetzet ih an dawlmi mawizia le Pathian hnenih laksawng an pekmi thu pawl an rel ciamco. Jesuh in, 6 "Himi hi nan hmu ṭheh; asinain hi lungto pawl hi pakhat hman an umnak keel ah um nawn loin hlon thlak ṭheh an si caan a thleng ding," tiah a ti. 7 Annih in Jesuh cu, "Sayapa, cuih caan cu ziangtikah so a si ding? Cun a tikcu a ra thleng zo, ti theihthiamnak ah ziangbangtuk hminsinnak so a um ding?" tiah an sut. 8 Jesuh cun, "Mi in an lo bum thei lonak dingah ralring uh; mi tampi ka hmin in an ra ding ih 'Keimah hi Amah cu ka si,' tiin le 'A tikcu a kim zo,' tiah an sim ding. Sikhalsehla va thlun hlah uh. 9 Ral le do awknak thawmvang nan theih tikah ṭih hlah uh; cu bangtuk pawl cu a ra thleng hmaisa ding, asinain a netnak a thok zo tinak a si lo. 10 "Ram khat le ram khat an do aw ding; Acozah pakhat in a dang Acozah kha a siim ding. 11 Leilung tlun ah ṭihnungza linghnin mangṭam, le pulhnatsia a phunphun khuazakipah a tlung ding. Thil lamdang zetzet le hmuhsaknak mak zetzet van ihsin an lang ding. 12 "Cubangtuk thil a thlen hlanah nannih tla cu kaihnak le hremnak nan tuar ding; sinakok i nan thu rel dingin le thawngthlak dingin midang pawl ih kut ah pek nan si ding. Keimah ih ruangah siangpahrang le uktu bawi pawl ih hmaiah suahpi nan si ding. 13 Cucu nan hrangah Thuthang ṭha simnak caan ṭha a si ding. 14 Ziangtin so kan hum awknak dingah kan ṭan ding tiah a hlankhan ihsin nan donhar lo dingin nan thinlung rak timtuah cia uh. 15 Ziangahtile ṭongkam thiamnak le fimnak nasa zetin ka lo pe ding ih nan ral pawl zohman in nan ṭongmi kha an el thei lo ding ih nan palh a si, a ti theitu khal an um lo ding. 16 Nan nu le nan pa, nan u le nan nau, nan sungkhat le nan rualpi pawl in an lo phiar ding ih mi ṭhenkhat cu thah tla nan tong ding. 17 Keimah ih ruangah mi hmuahhmuah in an lo hua ding. 18 Sikhalsehla nan lu parih samphang pakhat hman a tlong lo ding. 19 Hnget zetin ding ko uh; cuticun nan run aw ngah ding a si," tiah a ti. 20 Jesuh in, "Ralkap pawl in Jerusalem an kulh ṭheh nan hmuh tikah a siat cing ding ti kha nan thei ding. 21 Cutikah Judea ih a ummi pawl cu tlang parah nan tlan pei; khawpi sungih a ummi pawl cu khawpi nan taanta pei ih khawpi leeng hramlak ih a ummi pawl khal khawpi sungah nan lut lo pei. 22 Ziangahtile himi cu 'Hremnak Ni,' a si ding ruangah Ca Thianghlim ih a rak sim ciami hmuahhmuah kha a kimnak tikcu a si ding. 23 Cuih caan cu nunau favun pawl le naukai nei nunau pawl hrangah cun an hmakhua a pit a si! Hi leilung parah ṭihnungza harsatnak a ra thleng ding ih Pathian hremnak cu hi minung pawl parah a tlung ding. 24 Mi ṭhenkhat cu ralnam in an thi ding ih mi ṭhen cu leitlun ramkipah salah hruai an si ding. Jerusalem cu Pathian thei lotu Zentail pawl in an tikcu a cem hlanlo an ke hnuai ah an pal ding," tiah a ti. 25 Jesuh in, "Ni le thlapi le arsi pawl parah khin thil lamdang zetzet a um ding. Leitlun pumpi ah vansaannak a um ding, ziangahtile tifinriat a awnmi le tilet a thomi kha an ṭih ding ih an thinlung a hnok ṭheh ding. 26 Leitlun pumpi parah a ra thleng dingmi thil an ruah tikah mi tampi cu an thinpit in an tlu ding, ziangahtile vanih cahnak huham pawl cu a pingpeng ah an feh ṭheh ding. 27 Cutikah Milai Fapa cu mero lakin sunlawinak le a nasa zetmi huham thawn a lang ding. 28 Hi bangtuk thil a ra thlen vivo tikah ding uhla tlunlam zoh uh, ziangahtile nan luatnak a nai zo a si," tiah a ti. 29 Cule Jesuh in hi tahṭhimnak hi a sim: "Theipi kung siseh, thingkung dang thu khal siseh, ruathnik uh. 30 Hnah note a cerh tikah khuaṭhal caan a nai zo ti nan thei. 31 Cu bangtuk in hi thil pawl a tlun ih a kim vivo tikah Pathian Uknak cu a thleng zik thlang a si, ti thei uh. 32 Atuih a nungmi pawl an thih ṭheh hlanah hi thil hmuahhmuah cu a thleng kim ṭheh ding ti kha ciing ṭha uh. 33 Van le lei cu a hloral leh ding na'n ka thu cu a hloral dah lo ding," tiah a ti. 34 Jesuh in, "Ralring in um uh! Puai tuah ih zu in le sa ei in siseh, nun khuasaknak helhkam in siseh, va um hlah uh; nan um asile rin lopi ah cuih Ni cu a ra thleng ding ih, 35 thang bangin a lo awk ding. Ziangahtile cuih Ni cu leilung tlun mi hmuahhmuah parah a ra thleng ding. 36 Ralring zetin um uhla, a ra thleng dingmi thil hmuahhmuah hi himte ih nan pahsuak theinak dingah thazaang nei dingin le Milai Fapa hmaiih nan din theinak ding ah cat loin thla cam uh," tiah a ti. 37 Cuih caan hrawngah Jesuh cu Biakinn ah thu a zirh ih zanlam a si tikah a suak ih Olif tlang ah a va riak ṭheu. 38 Mi hmuahhmuah in a thu zirhmi ngai duh ah zingpitte in Biakinn ah an feh ṭheu.
1 Lantak Puai an timi, thilnu tel lo sang puai cu a thleng zik thlang. 2 Puithiam upa pawl le Daanthiam pawl cu misenpi kha an ṭih ruangah Jesuh kha a thupte ih an thah theinak ding lamzin an hawl rero. 3 Cule dungthluntu hleihnih sungih a telmi Iskariot an timi Judas sungah Satan a lut. 4 Curuangah Judas cu a va feh duak ih Jesuh an hnenih a zuar thei ding thu puithiam upa pawl le Biakinn kiltu bawi pawl hnenah a va sim. 5 Annih khal cu an lung a awizet ih tangka pe dingin an lung a kim. 6 Judas khal a lung a kim ve ih misenpi theihter lo tein an kut sungah Jesuh a pek theinak ding tikcu remcaang a hngak. 7 Thilnu tel lo saang Puai tuah ni a thleng ih Lantak Puai hrangih tuu note pawl thahnak tikcu a kim. 8 Jesuh in Piter le Johan a thlah ih, "Va feh uhla Lantak Puai rawl kan ei tlaangnak ding va tawlrel uh," tiah a ti. 9 Annih in, "Khui-ah so va tuah dingin in duhsak?" tiah an sut. 10 Anih in, "Khawpi sungih nan va luh tikah tibeel in tidai a khaitu pa nan tong ding. Cupa cu a luhnak inn tiang va thlun uh; 11 cule cuih inn neitu hnenah cun 'Keimah le ka dungthlun pawl Lantak zanriah kan einak ding khaan khui-ah so a um tiah kan Sayapa in a lo ti,' tiah va ti uh. 12 Tlunta khaan ah tokham le cabuai pawl kimteih an retmi khaan tumpi a lo hmuh ding ih cutawkah cun ziang hmuahhmuah va tawlrel uh," tiah a ti. 13 An feh ih Jesuh ih a sim vek cekci in ziang hmuahhmuah cu an hmu ih cutawkah cun Lantak zanriah cu an timtuah. 14 A tikcu a kim tikah Jesuh cu cabuai ah a dungthluntu pawl hnenah a to. 15 An hnenah cun, "Hi Lantak zanriah hi harsatnak ka tuar hlanah nanmah thawn eitlang dingah ka duhzetmi a si. 16 Ziangahtile fiangtein ka lo sim: Pathian Uknak sungah hi Lantak zanriah ih tican taktak kimter a si hlanlo ka ei nawn lo ding," tiah a ti. 17 Cule Jesuh in khuathai a lak ih Pathian hnenah lungawi thu a sim hnuah, "Himi hi lak uhla hlawm aw uh. 18 Fiangtein ka lo sim: Pathian Uknak a ra thlen lai hlanlo hi sabitti hi ka in nawn lo ding," tiah a ti. 19 Cun saang hlom khat a lak ih Pathian hnenih lungawi thu a sim hnuah a phel ih a dungthluntu pawl hnenah cun a pek. "Himi hi nan hrangih ka pekmi ka taksa a si. Keimah in theih ringringnak dingah run tuah uh," tiah a ti. 20 Cuvek thotho in zanriah an ei ṭheh tikah khuathai cu an hnen ah a pek ih, "Hi hai cu nan hrangah ka thletmi ka thisen thawn nemhngetmi Pathian thukam thar a si. 21 "Sikhalsehla zohhnik uh! I zuartupa cu atu-ah hi cabuai ahhin keimah thawn kan umtlang. 22 Pathian lairel cia bangtuk in Milai Fapa cu a thi ding, sikhalsehla Milai Fapa a zuartu pa hrangah cun a hmakhua a pit a si!" tiah a ti. 23 Cutikah cubangtuk thil cu zo bikin so a tuah pei, tiah anmah le anmah an sut aw. 24 Dungthluntu pawl lakah zoso a tum bik ih ruah ding a si, tiin thu-el awknak a um. 25 Jesuh in an hnenah, "Leitlun siangpahrang pawl in misenpi pawl kha lal zetin huham thawn an uk ih cuih uktu bawi pawl cun 'Miseenpi ih Rualpi,' tiah an ti aw. 26 Sikhalsehla nannih cu cubangtuk nan si lo ding; nanmah lakih upa bik cu nauta bik bangtuk in a um ding ih hotu bik cu hnen-um bangin a um ding. 27 Zoso a tum deuh: To in rawl a eitu maw, rawl petu so? A totu kha a tum sawn a si lo maw? Sikhalsehla kei cu nan lakah a lo riantu vekin ka um a si. 28 "Harnak ka tuar sung hmuahhmuah ah i umpitu cu nanmah nan si. 29 Ka Pa in uk theinak thu i pek vekin kei khal in uk theinak thu ka lo pe ve ding. 30 Ka Uknak sungih ka cabuai ah nan ei nan in ding ih Israel phun hleihnih uktu dingah bawi tokham parah nan to ding," a ti. 31 Jesuh in, "Simon, Simon, ngaihnik! Lothlo pa in fang cu a fangngai le a hii a thiatdan ṭheu vekin Satan in nanmah lakah thiatdang dingah le nan zatein hniksak dingah thu a ngah zo. 32 Sikhalsehla Simon, na zumnak a tlaksam lonak dingah na hrangah thla ka cam. Cule ka hnen lam na hoikir sal tikah na unau pawl kha thazaang na pe pei," tiah a ti. 33 Piter in, "Bawipa, nangmah thawn thawng tlatlaang dingah le thitlaang dingah ka tiar a si," tiah a ti. 34 Jesuh in, "Piter, fiangtein ka lo sim: Tuihzan ah ka thei hrimhrim lo tiah voithum tiang i phatsan hlanlo ar a khuang lo ding," tiah a ti. 35 Cule Jesuh in a dungthluntu pawl kha, "Tangka bawm le zaal le kedam keng loin ka lo thlah laiah khan ziangtal tlaksammi nan nei maw?" tiah a sut. Annih in, "Tlaksammi zianghman kan nei lo," tiah an ti. 36 Jesuh in, "Sikhalsehla tuih ṭum cu tangka bawm a nei mi in tangka bawm keng uh, zaal a nei mi in zaal keng uh. Ralnam a nei lo mi in a korfual zuar in ralnam pakhat leiseh. 37 Ziangahtile fiangtein ka lo sim: Ca Thianghlim in 'Amah cu misual lakah a tuar ve a si,' tiah keimah ih thu an nganmi kha a kim ding; ziangahtile keimah ih thu nganmi hmuahhmuah kha a kim vivo zo a si," tiah a ti. 38 Dungthluntu pawl in, "Bawipa, zohhnik! Hinah ralnam pahnih a um!" tiah an ti. Anih in, "Cu vial a tawk!" tiah a ti. 39 Jesuh cu khawpi lengah a suak ih a feh ṭheunak Olif tlang ah a hung feh; dungthluntu pawl khal an feh ve. 40 Cuih tlang a thlen tikah an hnenah, "Sualforhnak sungih nan luh lonak dingah thla cam uh," tiah a ti. 41 Cule lungden ban tluk a hlatnak ah a va feh ih a khuk bilh in thla a cam. 42 "Ka Pa, na lungkimmi a si ahcun hi tuarnak hai hi i lak sak hram aw. Sikhalsehla keimah ih duhnak si loin nangmah ih duhnak vekin si ko seh," tiah a ti. 43 Van ihsin vancungmi a rung lang ih thazaang a rung pek. 44 A thinlung a baangzet ih taimak sinsin in thla a cam; a suakmi a thlan cu thifor bangin leilung ah a tla. 45 A thlacamnak ihsin a tho ih a dungthluntu pawl hnenih a va kir tikah an rak itthat ṭheh kha a hmu; an thinhar in an baangzet ruangah a si. 46 An hnenah, "Ziangah so nan ihthat? Sualforhnak sungih tla lo dingin tho uhla thla cam uh," tiah a ti. 47 Jesuh a ṭong rero laiah dungthluntu hleihnih lakih pakhat a si mi Judas ih a hruaimi miburpi pawl an ra thleng. Jesuh hnam dingah Judas cun a hun fuuk. 48 Asinain Jesuh in, "Judas, Milai Fapa hi hnamnak in maw na zuar?" tiah a rak ti. 49 Jesuh hnenih a ummi dungthlun pawl in ziang a cang ti kha an hmuh tikah Jesuh cu, "Bawipa, kan ralnam hi kan hmang ding maw?" tiah an sut. 50 Cule anmah lakih pakhat in Puithiam Saang ih salpa a vun saat ih a vorhlam hna a saat thlak. 51 Sikhalsehla Jesuh cun, "Tawk seh!" a ti ih an tuahmawh mipa ih hna cu a tham ih a damter. 52 Cule Jesuh in amah kai dingih a ra thlengmi puithiam upa pawl le biakinn kiltu bawi pawl le khua upa pawl hnenah cun, "Kei hi suamhmang maw ka si, ralnam le talhtum thawn nan rat? 53 Nitinte in nan hnenah Biakinn sungah ka um na'n zohman in in kai lo! Sikhalsehla atu hi khawthim huham a cah lai caan a si ih nannih nan hnaṭuan caan a si," tiah a ti. 54 Jesuh cu an kai ih Puithiam Sang ih innah an fehpi; cule Piter in a hlat nawn in a thlun. 55 Tual laifangah meipual an sep ih mei a aitu pawl hnenah cun Piter khal a to ve. 56 Hnen-um nu pakhat in Piter meisa kiangih a to kha a hmuh tikah hmaiton-in a zohhliah ih, "Hi pa hi Jesuh hnenih a tel vemi a si," tiah a ti. 57 Asinain Piter in, "Nunau nu, cupa cu zo a si ti hman ka thei lo," tiah a ti. 58 Malte a rei hnuah mi pakhat in a hmu ve ih, "Nang tla na tel ve ko," tiah a ti. Asinain Piter in, "Mi pa, kei ka tel lo," a ti. 59 Cule nazi pakhat tluk a rei hnuah midang pakhat in, "Hi pa hi Jesuh hnenah a tel ve, ti cu zum lo ding ṭha a si lo; ziangahtile amah khal hi Galilee mi a si ve ko," tiah fiang zetin a ti. 60 Asinain Piter cun, "Maw mipa, ziang nan ṭong ti hman ka thei lo," tiah a ti thotho. Cutiih a ṭong rero laiah cun ar a khuang. 61 Bawipa cu a her ih Piter kha a zohhliah; cule Piter cun Bawipa in, "Tuihzan ar a khuan hlanah voithum tiang ka thei lo tiah i phatsan ding," a timi kha a vun mang sal. 62 Piter cu a suak ih ninghang zetin a ṭap. 63 Jesuh a kiltu pawl in amah cu an dekcok ih an thawi. 64 A hmai puan in an tuam ih, "Zoso a lo thawi? Simhnik!" tiah an ti. 65 Cule nautatnak ṭongkam tampi khal an ṭong. 66 Khua a hung vang ih upa pawl, puithiam upa pawl le Daanthiam pawl an tongkhawm aw ih Jesuh cu khonsil hmaiah an suahpi. 67 Annih in, "Messiah na si maw? In simhnik!" tiah an sut. Jesuh in, "Ka lo sim hmanah in zum lo ding. 68 Cule thu ka lo sut khalle in let fawn lo ding. 69 Sikhalsehla atu thokin Milai Fapa cu Cungnungbik Pathian ih vorhlam kapah toter a si ding," tiah a ti. 70 An zatein, "Cuti asile Pathian Fapa maw na si?" tiah an ti. Anih in, "Ka si kha nanmah in nan sim!" tiah a let. 71 Cule annih pawl in, "Theihpitu dang kan ṭul nawn lo. Amah ih awkam rori kan thei zo," tiah an ti.
1 An zatein an pok ih Jesuh cu Pilat hmaiah an hruai. 2 Cutawkah cun sual an puh ih, "Hi pa hin kan misenpi a hruai sual ih kan kai a si; Rom Siangpahrang hnenah ngunkhuai nan pe lo ding, tiah a sim ih, 'Messiah ka si, Siangpahrang ka si,' a ti," tiah an ti. 3 Pilat in, "Judah siangpahrang na si maw?" tiah a sut. Jesuh in, "Nangmah in na sim zo!" tiah a ti. 4 Cule Pilat in puithiam upa le misenpi hnenah cun, "Himi pa hi a sualnak ka hmu lo," a ti. 5 Asinain an ṭangṭha sinsin ih, "A thu zirhnak ruangah Judea peng pumpi-ah hnaihnawhnak a khat. Galilee in a thawh ih atu hitawk a thleng zo," tiah an ti. 6 Pilat in cumi cu a theih tikah, "Hi pa hi Galilee mi a si maw?" tiah a sut. 7 Pilat in Jesuh cu Herod ih ukmi ram sungmi a si ti kha a theih tikah Herod hnenah Jesuh cu a kuat. Culai fangah Herod cu Jerusalem khawsungah a rak um ngelcel. 8 Herod in Jesuh kha a hmuh tikah a lung a awi ngaingai, ziangahtile a thu kha a thei ringring ṭheu ih hmuh a duhnak a rei zet zo. Jesuh ih a tuahmi hmuhsaknak kha hmu ve sehla a saduhthah a si. 9 Curuangah Herod in Jesuh kha thu tampi a sut, asinain Jesuh cun kam khat hman a let lo. 10 Puithiam upa pawl le Daanthiam pawl cu hmailamah an ra suak ih Jesuh cu nasazet in sual an puh. 11 Herod le a ralkap pawl in Jesuh cu hnihsuahsainak ah an hmang ih an dekcok. Cule puan mawizet an sinter ih Pilat hnenah an kuat sal. 12 A cuih ni rori-ah cun Herod le Pilat cu rualpi ṭha ah an cang; cuih hlanah cun a hua aw zetmi an si. 13 Pilat in puithiam upa pawl, hotu pawl le mipi pawl cu a kokhawm ih, 14 an hnenah cun, "Hi pa hi ka hnenah nan rak hruai ih misenpi a hruai sual a si, tiah nan ti. Asinain hitawk nan mithmuh ah ka zingzoi na'n sual nan puh mi hmuahhmuah ahhin a sualnak zianghman ka hmu lo. 15 Herod khal in a sualnak a hmuh lo ruangah ka hnenih a rak kuat salnak a si. Thihnak tlak ih a tuahmi thil pakhat hman a um lo. 16 Curuangah ka vuak pei ih ka thlah pei," tiah a ti. 17 (Lantak Puai tuah tinte in an hrangah Pilat in thawngtla pakhat a thlah ṭheu.) 18 Pilat ih ṭong an theih tikah misenpi cu an au ciammam ih, "Amah that aw! Barabbas in thlahsak sawn aw!" tiah an ti. 19 (Barabbas cu khawpi sungah buainak a suahpitu le mithat a si ruangah thawngih an thlakmi a si.) 20 Pilat in Jesuh cu luatter a duh ruangah misenpi hnenah thu a sim sal. 21 Sikhalsehla annih cun, "Thinglamtah ah that aw! Thinglamtah ah that aw!" tiah an au thotho. 22 Pilat cun voithumnak tiang a sim sal ih, "Ziang sualnak so a tuah? Thihnak tlak ih a tuahmi sualnak ka hmu hrimhrim lo. Ka vuak ding ih ka thlah ding," tiah a ti. 23 Sikhalsehla an aw neih patawp in an au ih Jesuh cu thah ding hrimhrim a si, tiih an au sinsin ruangah a netnak ahcun an au-nak in a neh. 24 Curuangah an dil vekin Pilat in Jesuh cu thah dingin a relcat. 25 Misenpi in suak seh tiih an duh mipa, thubuai ruang le mi thah ruangih thawngih an thlak mipa cu Pilat cun a suah; cule misenpi saduhthah vekin Jesuh cu an duhduh ih tuah dingah an kut ah a pek. 26 Ralkap pawl in Jesuh cu an hruai ih an feh laiah cun Sairin khua mi Simon, khawte lam ihsin khawpiih a rami pa an tong. Cupa cu an kai, thinglamtah an putter ih Jesuh dungin an thlunter. 27 Mi tampi in Jesuh an hruaimi cu an thlun ih cu lakah an ṭaang cuum in a raak kio rerotu nunau ṭhenkhat an um. 28 Cule Jesuh cun dunglet a hoih ih an hnenah, "Maw Jerusalem nunau pawl, ka hrangah cun ṭap hlah uh; nanmah ih hrang le nan faate pawl hrangah ṭap sawn uh. 29 Ziangahtile 'Naute a nei dah lomi, fa a vun dah lomi le voikhat hman naute pawhte a fawh dah lomi nunau pawl hi an van a va ṭha so!' tiih an ti caan a thleng ding. 30 Cuih caan cu mi in tlang sangpi hnenah 'In run nen aw,' tiin le mual hnenah 'In run khuh aw,' tiih an ti caan a si ding. 31 Ziangahtile thing a hrin lai hmanah hi bangtuk thil an tuah a si ahcun thing a ro tik sinsin ahcun ziang a bang pei maw?" tiah a ti. 32 Jesuh thawn hmun khatih thah dingah misual pahnih khal an hruai ve. 33 "Luruh," an timi hmun an thlen tikah cutawk hmunah cun Jesuh cu thinglamtah parah an thlai ih misual pahnih khal cu a vorhlam ah pakhat, a kehlam ah pakhat an thlai ve. 34 Jesuh in, "Ka pa, an sualnak run ngaithiam aw. Ziang kan tuah ti an thei lo," tiah a ti. Cule amah a thattu pawl cun camcawhfung zuukin a hnipuan cu an zem aw. 35 Misenpi pawl in an cuan ih an zoh ringring laiah Judah mi hotu pawl cun nautatnak thawn, "Midang hmuah a run ngah ṭheu; Pathian ih hrilmi Messiah a si ngaingai ahcun amah le amah khal run aw seh," tiah an ṭongsan. 36 Ralkap pawl khal in an hnihsan ve ih amah va fuuk tahratin a man olmi sabitti thur an pek ih, 37 "Judah siangpahrang na si ahcun nangmah le nangmah run aw aw he!" tiah an ti. 38 A lu tlun ah, "Hi pa hi Judah Siangpahrang a si," tiah nganmi ca an taar. 39 Thinglamtah parih an khenmi misual pa pakhat cun nautatnak ṭong thawn, "Nangmah hi Messiah na si lo maw? Nangmah le nangmah run aw awla kannih tla hi in run ve aw he!" tiah a ti. 40 Asinain misual pakhat pa cun, "Pathian na ṭih lo maw si? Kan parih thuṭhennak an tuahmi hi a bangrep ṭheh. 41 Sikhalsehla kannih pahnih parih an tuahmi thuṭhennak hi cu a dikmi a si, ziangahtile kan thil tuah ruangih kan tuar tlakmi kan tuar a si. Asinain hi pa hi cu sualnak zianghman a tuah lo," tiin a mawhthluk. 42 Cule Jesuh hnenah, "Maw Jesuh, Siangpahrang ih na rat tikah i hngilh hram hlah aw," tiah a ti. 43 Jesuh in cu pa ih hnenah cun, "Thu ka lo kam a si: tuihsun ah keimah thawn Paradis ah na um ding," tiah a ti. 44 Sun nazi hleihnih hrawngin cuih ram pumpuluk ah zanlam nazi pathum tiang thimkhawzing a tlung. 45 Cule Biakinn ih zaarmi puanzar cu a tlek ih ṭhen hnih ah a ṭhen aw. 46 Jesuh cu napi in a au ih, "Ka pa, ka thlarau na kut sungah ka lo pe," tiah a ti. Cutiih a sim ṭheh hnuah a thaw a cem. 47 Cumi cu ralbawi pa in a hmuh tikah Pathian kha a thangṭhat ih, "Hi pa hi cu sualnak nei lo miṭha a si!" tiah a ti. 48 Cuih thil hmuahhmuah zoh dingah a rami mipi pawl in cuih thil a cangmi pawl an hmuh ngah tikah ninghang in an ṭaang an cuum ih riahsia in innah an tlung. 49 Pumpak in Jesuh a theitu hmuahhmuah le Galilee ihsin a rak thluntu nunau pawl tla cun a hlat nawnah an ding ih an cuan. 50 Judea ram Arimathea timi khua ah Josef an timi mi pakhat a um. Amah cu miṭha le upat hmaizah tlakmi a si ih Pathian Uknak a ra cing ding, tiah a hngaktu a si. Amah cu khonsil sungtel pakhat a si ve na'n khonsil thurelnak le thiltuahmi cu a lung a kim lo. 52 Cupa cu Pilat hnenah a feh ih Jesuh ih ruak cu a va dil. 53 Cule Jesuh ruak cu thinglamtah par ihsin a ṭhum ih puan neemte in a tuam hnuah zohman ih hman hrih lo, lung an khermi thlaan thar sungah a phum. 54 Cumi cu tlawngkai ni nga ni a si ih Sabbath ni a thok zik thlang. 55 Galilee ihsin Jesuh a rak thluntu nunau pawl cu Josef an thlun ih thlaanah cun an feh ve. A thlaan le a sungih Jesuh ruak an vui daan khal cu an hmu ṭheh. 56 Cule an inn ah an kir ih Jesuh ruak culh dingah rimhmui le zihmui pawl an ngaihtuah. Sabbath ni-ah cun an Daan ih a fial vekin an cawl.
1 Nipi ni zing thlapit ah nunau pawl cu an timtuah ciami rimhmui pawl kengin thlaan ah an feh. 2 Thlankhar lung phengpi a rak ṭhawn aw zo kha an hmu; 3 cu hrangah an vung lut, asinain Bawipa Jesuh ih ruak cu an hmu lo. 4 An mang a bang ih an ding; culai fangah hmakhatte ah hnipuan tleuzet hrukin mi pahnih an kiangah an rung ding. 5 An ṭih ngaingai ih leilungah an bok; cutikah mi pahnih cun, "Ziangah so a thimi lakah a nungmi cu nan hawl? 6 Hinah a um nawn lo; a tho sal zo. Galilee-ih a um laiah nan hnenih a simmi kha nan ciing lo maw? 7 'Milai Fapa hi misual pawl kut sungah pek a si ding; thinglamtah parah an khen ding ih ni thum hnuah a tho sal ding,' a ti kha!" tiah an ti. 8 Cule nunau pawl cun a ṭong kha an vun mang sal ih, 9 thlaan ihsin an kir hnuah dungthluntu hleikhat le midang pawl hnenah an sim. 10 Nunau pawl cu Mari Magdalene, Joanna le Jeim ih nu Mari tla an si. Anmah le nunau dang an hnenih a telmi pawl in a dungthluntu pawl kha an sim. 11 Sikhalsehla a dungthluntu pawl cun nunau pawl ih simmi cu thulolak ah an ruat ih an zum lo. 12 Asinain Piter cu a pok ih thlaanah cun a va tlan. Kuun tahratin a vun bih ih ruak tuamnak puan neemte lawng a hmu; a dang zianghman a hmu lo. Cule cutiih a cangmi cu a mangbang zetin inn ah a tlung sal. 13 Cuih ni thotho ah Jesuh a rak thluntu mi pahnih cu Jerusalem ihsin peng sarih hrawng a hlami Emmaus timi khua ah an feh. 14 Cule tubaite ih thil a cangmi pawl cu an ruah aw vivo. 15 Cutiin an ṭong ih an relkhawm rero laiah cun Jesuh amah rori in a hun fuuk hai ih an feh tlang. 16 Amah cu an hmu na'n an thei thiam lo. 17 Jesuh in an hnenah, "Nan feh phahah ziang thu so nan rel rero?" tiah a sut. Cule an riahsia mithmai thawn an ding. 18 Pakhat pa, Kleopas an timi pa in, "Jerusalem khua a ra tlawngtu mi hmuahhmuah lakah nangmah lawng hi maw tuih ni hnih thum sungah Jerusalem khawsungih thil a cangmi pawl a thei lotu hi na si?" tiah a ti. 19 Anih in, "Ziang thil maw?" tiah a sut. Annih in, "Nazareth Jesuh parih thil a cangmi pawl!" tiah an let. "Himi pa cu Pathian hmai le misenpi hmaiah zozo khal in profet a si ih a ṭongmi ah siseh, a tuahmi ah siseh, huham a nei ngaingai tiih an ruah ṭhehmi a si. 20 Kan puithiam upa pawl le in hotu pawl in a thihnak rel dingah mi kut ah an pek ih cuticun thinglamtah parah an that. 21 Cule amah cu Israel mi tlentu a si ding, tiah ruahsannak kan rak neih zetmi a si. Cuih tlunah cubangtuk thil a can hnu tuih ni hi a ni thumnak ni a si. 22 Kan lakih nunau ṭhenkhat in kan mang in bangter fawn; tuihzing zingthlapit ah thlaan ah an va feh; 23 asinain a ruak an va hmu lo. An ra kir ih 'Vancungmi kan hmu ih Anih cu a nungsal zo, tiah in sim,' tiah an ti. 24 Kan lakih mi ṭhenkhat thlaanah an va feh ve ih nunau pawl sim vek cekci in an va hmu ve; asinain amah cu an hmu thotho lo," tiah an ti. 25 Cule Jesuh cun an hnenah, "Nannih hi nan va aa so! Profet pawl ih an rak sim ciami nan va zum har lawmmam so! 26 Messiah hrangah hi thil pawl hmuahhmuah hi a tuarta ṭheh hnuah a sunlawinak sungih luh ding cu a ṭul lo maw si?" tiah a ti. 27 Cule Jesuh in Ca Thianghlim sung Moses cauk pawl ihsin thokin profet pawl ih nganmi tiang, amah ih thu an ngannak hmuahhmuah kha an hnenah a simfiang. 28 An feh tumnak khua an thlen zik zawng ah Jesuh cu a feh hrih ding vekin a um awter. 29 Asinain annih in, "Kan hnenah riak ve ko aw! Khua a tlai zo ih a thim thlang fawn," tiah an kai. Curuangah an hnen riak dingin a thlun. 30 An hnenah cun a to ih rawl an hil tlang. Sang a lak ih thla a cam hnuah a phel ih a zem hai. 31 Cutikah an mit a hung vaang ih Amah a si kha an thei thiam; asinain an mithmuh ah a hlo sal. 32 Anmah le anmah cu, "Lamzin kan feh tlang laiih kan hnenih a ṭong le Ca Thianghlim a simfiang rero laiah khan kan sungah meisa kang vekin a um tho lo maw kha?" tiah an ti aw. 33 Hmakhatteah Jerusalem ah an kir sal ih dungthlun hleikhat le a dang pawl an rak tonkhawm lai kha an va hmu ih, 34 "Bawipa cu a tho sal taktak a si! Simon hnenah a lang!" tiih an rak sim awk rero kha an thei. 35 Annih pahnih khal in lamzin ih thil a cangmi thu le sang a phel zawng ih Bawipa a si ti an theihthiamnak thu pawl kha an sim ve. 36 An pahnih in lamzin ih thil a cangmi pawl thu kha dungthluntu hnenih an rel rero laiah hmakhatte ah an lakah Bawipa cu a rung ding ih, "Nan hnenah daihnak um seh," tiah a ti. 37 Mithla kan hmu tiah an ruat ih an ṭih ngaingai. 38 Asinain anih in, "Ziangah so nan thin a phan? Ziangah so nan thinlung sungah rinhmainak a um ciamco? 39 Ka kut le ka ke tla hi zohhnik uh! Keimah sokhaw ka si! I tham uhla nan thei ding; ziangahtile mithla cun ruh le titsa a nei lo, kei cu ka nei ti in hmu a si!" tiah a ti. 40 Cutiin a sim ih a kut le a ke tla cu a hmuh hai. 41 An zum thei thotho lo; an lung a awi tukih an mang tla a bang tuk fawn. Curuangah anmah cu, "Hinah ei ṭha ziangtal nan nei maw?" tiah a sut. 42 Annih in nga pum khat suan cia an pek ih, 43 a lak ih an hmuh hnganah cun a ei. 44 Cule an hnenah cun, "Nan hnen ka um laiah ka sim reromi cu hi thil pawl hi sokhaw an si: Moses Daan cabu sung, profet pawl ih nganmi cabu sung le Saam cabu sungih keimah ih thu an rak nganmi pawl cu a kim ṭheh a ṭul a si," tiah a ti. 45 Cun an thinlung mit a vangter ih Ca Thianghlim ih simmi kha an thei thei. 46 An hnenah, "An nganmi cu hihi a si: Messiah cu a tuar pei ih a thih hnu ni thumnak ah a tho sal ding. 47 Cule Jerusalem ihsin thokin miphun hmuahhmuah hnenah amah hmin ih sualsirnak le sualngaidamnak thuthang cu phuan a si ding. 48 Nannih cu hi thil cangmi pawl ih thutheitu nan si. 49 Cule ka Pa ih a lo tiam ciami kha keimah rori in nan parah ka run thlah ding. Asinain tlunlam ihsin huham nan hnenih a rung thlen hlanlo khawpi sungin nan hngak pei," tiah a ti. 50 Cun khawpi ihsin a hruai suak hai ih Bethani khua tiang an feh. Cutawkah a ban a pharh ih thlawsuah a pek hai. 51 Cutiih thlawsuahnak a pek laiah an hnen ihsin a suak ih vancungah a kai. 52 Amah cu an biak ih lungawi zetin Jerusalem ah an kir. 53 An tikcu hmuahhmuah cu Biakinn sungah Pathian thangṭhatnak ah an hmang.
1 A hramthokah Thu a rak um. Cuih Thu cu Pathian thawn a um ih Pathian a si. 2 A hramthok ihsin cuih Thu cu Pathian thawn a um zo. 3 Amah sung ihsin Pathian in ziang hmuahhmuah a seemsuah; seemsuah mi thil hmuahhmuah sungah hin amah tel loih tuahmi pakhatte hman a um lo. 4 Cuih Thu cu nunnak ih hram a si ih cuih nunnak cun minung hnenah tleunak a run thlen. 5 Tleunak cu khawthim sungah a tleu ih thimnak in a hmit thei dah lo. 6 Pathian in a palai Johan a thlah ih, 7 Johan cu mi hnenah cuih tleunak thu sim dingin a ra. A simmi hmuahhmuah in an theih ih an zumnak dingah a ra a si. 8 Anih cu tleunak a si lo; tleunak thu sim dingah a rami a si sawn. 9 Cuih tleunak cu tleunak taktak a si. Cuih tleunak cu leitlun ah a ra ih mi hmuahhmuah tlettu a si. 10 Cuih Thu cu leitlun ah hin a um ih amah sung ihsin Pathian in leilung hi a tuah na'n leilung in amah cu a thei lo. 11 A ram sungah a ra na'n a minung pawl in an rak saang lo. 12 Mi ṭhenkhat cun an saang ih an zum; curuangah Pathian ih faate cantheinak thu a pek. 13 Pathian ih faate an cannak cu leilung daan, minung ih thi le sa in hrinmi in a si lo; Pathian amah rori kha an Pa a si. 14 Cuih Thu cu minung ah a cang ih kan lakah a um; zaangfahnak le thutak in a khat. A sunlawinak kan hmu ih a Pa in a fapa neihsun hnenih a pekmi sunlawinak a si. 15 Johan in cupa ih thu cu hiti in a sim: "'Amah cu ka hnuah a ra; asinain kei hnakin a tum sawn, ziangahtile amah cu ka suah hlanah a rak um zo,' tiih ka lo simmi kha amah ih thu hi a si," tiah a ti. 16 A famkim zetmi a zaangfahnak thawn kannih cu in thlawsuah zo ih a thlawsuah cu pakhat hnu pakhat in pek a si. 17 Pathian ih Daan cu Moses hnen ihsin in pek; asinain zaangfahnak le thutak cu Jesuh Khrih sung ihsin a ra. 18 Zohman in Pathian cu an hmu dah lo. A Pa ih Fapa neihsun, a ṭaang sungih a pommi, Pathian a si mi in a langter zo a si. 19 Jerusalem ih Judah hotu pawl in puithiam ṭhenkhat pawl le Levi mi pawl kha Johan hnenah cun an thlah ih, "Nang hi zoso na si?" tiah an va sut. 20 Johan cun an thusuhmi cu pheh lotein a let ih, "Kei hi Messiah ka si lo," tiah fiangtein zapi theih ah a sim. 21 Annih in, "Asile zoso na si? Elijah na si maw?" tiah an sut. Johan in, "Ka si lo," a ti. Annih in, "Profet na si maw?" an ti lala. "Ka si lo," a ti thotho. 22 Annih in, "Cuti asile zoso na si, in simhnik. Na thu lehmi cu in thlahtu hnenah kan va sim sal a ṭul. Zo ka si, tiin so na ti awk?" tiah an sut. 23 Johan in Profet Isaiah ih simmi kha a vun lak ih, "Kei cu 'Bawipa ih fehnak lamzin kha dingter uh,' tiih ramṭhingih a au-mi aw kha ka si," tiah a ti. 24 Farasi pawl ih an thlahmi palai pawl cun, 25 Johan cu thu an sut sal ih, "Messiah na si lo ih Elijah le Profet khal na si lo ahcun ziangah so baptisma na pek?" tiah an ti. 26 Johan in, "Kei cun tidai in baptisma ka pek, asinain nan lakah nan theih hrih lomi mi pakhat a um. 27 Amah cu ka dungah a ra lai; sikhalsehla kei cu a kedam hri phoihtu hmanah ka tlak lo," tiah a ti. 28 Hitiih an suh awknak hmun cu Johan in baptisma a peknak Jordan tiva ihsin nisuah lamih a ummi Bethani khua ah a si. 29 A thaisun ah Johan in Jesuh a hnenih a rat lai kha a hmu ih, "Leilung sualnak a phurtu Pathian Tuufa khi zohhnik uh! 30 'Ka dungin mi pakhat a ra, asinain kei hnakin a tum sawn, ziangahtile ka suah hlanah anih cu a rak um zo,' tiih a thuhla ka sim rero zo mipa cu amah hi a si. 31 Amah hi zo a si ding ti ka rak thei lo. Asinain amah hi Israel mi pawl ih an theihnak dingah tidai in baptisma ka pek rero sannak a si," tiah a ti. 32 Johan in, "Thlarau cu vancung ihsin thuro bangin a rung ih a parah a rung fut kha ka hmu. 33 Amah teu a si tihi ka rak thei thotho cuang lo, sikhalsehla tidai in baptisma pe dingih i thlahtu Pathian in 'Thlarau a rung ding ih mi pakhat parih a fut kha na hmu ding; cupa cu Thlarau Thianghlim in baptisma petu ding a si,' tiah i sim. 34 Cupa cu ka hmu ngah zo. Fiangtein ka lo sim: Amah cu Pathian Fapa a si," tiah a hmuhmi le a theihmi kha a sim. 35 A thaisun ah Johan le a dungthluntu pahnih cu cutawk ah an ding sal ih, 36 Jesuh a rat kha an hmuh tikah, "Pathian Tuufa khi zohhnik uh," tiah Johan in a ti. 37 Cutiih a timi cu a dungthluntu pahnih cun an thei ih Jesuh hnenah cun an feh ve. 38 Jesuh cu a dunglet a her ih an rak thlun kha a hmuh tikah, "Ziang so nan hawl?" tiah a sut. Annih in, "Rabbi, khui-ah so na um?" tiah an let. Rabbi ticu zirhtu Sayapa tinak a si. 39 Jesuh in, "Ra uhla ra zohhnik uh," tiah a ti. Cuih tikcu cu zanlam nazi pali hrawng a si. An feh ih a umnak cu an va hmu ih cuih ni cu a hnenah an caam ta. 40 Cuih mi pahnih lakah pakhat cu Simon Piter ih naupa Andru a si. 41 Hmakhatteah a u-pa Simon kha a va hawl ih a hmuh tikah, "Messiah cu kan hmu zo," tiah a ti. Messiah timi cu Khrih tinak a si. 42 Cule Simon cu Jesuh hnenah a fehpi. Jesuh in amah cu a zoh ih, "Na hmin cu Johan fapa Simon a si; sikhalsehla Sefas tiah kawh na si thlang ding," a ti. Sefas ticu Piter ti thawn a bang aw ih a tican cu 'lungto,' tinak a si. 43 A thaisun ah Jesuh cu Galilee feh a tum. Filip kha a hmu ih a hnenah, "I thlun aw," tiah a ti. 44 Filip cu Andru le Piter umnak Bethsaida khua mi a si. 45 Filip in Nathanael a tong ih a hnenah, "Moses in Daan cabu sungah a thuhla a nganmi le profet pawl khal in a thuhla an ngan mipa kha kan tong zo. Amah cu Josef fapa Jesuh, Nazareth khuami a si," tiah a ti. 46 Nathanael in, "Nazareth khua in thil ṭha a suak thei pei maw?" tiah a ti. Filip in, "Ra zohhnik awla!" tiah a ti. 47 Jesuh in Nathanael a rat kha a hmuh tikah, "Israel mi taktak hi zohhnik uh! A thinlung ah zianghman hrawhhrawlnak a um lo," tiah a ti. 48 Nathanael in, "Ziangtin so i theih?" tiah a sut. Jesuh in, "Filip ih a lo kawh hlan theipi kung hnuai ih na to lai ah khan ka lo hmu zo," tiah a ti. 49 Nathanael in, "Sayapa, nang cu Pathian Fapa na si! Israel Siangpahrang na si!" tiah a ti. 50 Jesuh in, "Theipi kung hnuai ih na to lai ka lo hmu, ka ti ruangah i zum a si maw? Hi hnakih thil maksak tampi na hmu lai ding!" tiah a ti. 51 Cule an hnenah, "Thungai in ka lo sim: vancung khi a ong aw ding ih Milai Fapa parah hin Pathian ih vancungmi an ṭum le an kai kha nan hmu ding," tiah a ti.
1 Ni hnih hnuah Galilee peng Kana khua ah nupi ṭhit puai a um. Jesuh ih nu khal cunah a um ih, 2 Jesuh le a dungthluntu pawl kha an sawm ve. 3 An sabitti a cem tikah a nu in Jesuh hnenah, "Sabitti an nei nawn lo," tiah a ra sim. 4 Cutikah Jesuh in, "Ka nu, i sim duh hlah; ka tikcu a kim hrih lo," tiah a ti. 5 A nu cun hnen-um pawl hnenah, "A lo simmi poh tuah uh," tiah a ti. 6 Cutawkah Judah daanih a um vekin an kut kholhnak hrangah tidai ralca beel tumpi beel ruk an ret. Beel khat in galan kul ihsin sawmthum tiang a dawl thei. 7 Jesuh in hnen-um pawl hnenah cun, "Hi beel pawl hi tidai khat tein than uh," a ti. Liam thluahthlo in an than ih, 8 an hnenah cun, "Beel sung tidai cu vun suak uhla puaituahnak a tawlreltu pa hnenah hei pek uh," tiah a ti. Tidai cu an hei pek. 9 Cuih tidai cu sabitti ah a cang ih cumi cu a tep. Khuitawkin cuih sabitti cu a ra ti a thei lo; tidai a suaktu hnen-um pawl cun an thei ko. Curuangah nupi ṭhitu pa cu a ko ih, 10 a hnenah cun, "Zozo khal in sabitti thaw bik kha a hmaisabik ah an pe ṭheu ih mi tampi an khawh deuh hnuah sabitti menmen kha an pe ṭheu; asinain nang cun sabitti thaw bik kha a netnak tiang na pe thei," tiah a ti. 11 Jesuh in hi mangbangza hmaisa bik hi Galilee peng Kana khua ah a tuah. Cuticun a sunlawinak a langter ih a dungthluntu pawl in an zum. 12 Cuih hnuah Jesuh le a nu, a naule pawl le a dungthluntu pawl cu Kapernaum khua ah an feh ih cutawkah ni malte sung an cam. 13 Lantak Puai tikcu a kim zik thlang ih Jesuh cu Jerusalem ah a feh. 14 Biakinn a thlen tikah cutawkih caw le tuu le laileng pawl a zuartu le tangka a thlengtu pawl an cabuai ih an to kha a hmu. 15 Curuangah hri kha vuaknak fung ai-ah a merh ih, tuu siseh caw siseh an zuarmi pawl cu a vuak ih Biakinn sung ihsin a dawi ṭheh; tangka thlengtu pawl ih cabuai pawl khal a linglet ṭheh ih an tangkanawi pawl a thehdarh ṭheh. 16 Laileng a zuartu pawl cu, "Hitawk ihsin nan laileng pawl kha tlanpi ṭheh uh! Ka Pa ih inn cu nan dawr tuahnak ah hmang nawn hlah uh!" tiah thu a pek. 17 Cutikah a dungthluntu pawl in, "Maw Pathian, na inn ka tlaihsannak cu ka lung sungah meisa bangin a alh," tiah Ca Thianghlim ih a rak timi kha an vun mang sal. 18 Judah mi hotu pawl cu an ra sal ih, "Hi bangtuk thil tuah theinak thu ka nei, ti na langternak ah ziang hmuhsaknak so in hmuh ding?" tiah an sut. 19 Jesuh in, "Hi Biakinn hi bal uhla ni thum sungah ka sak sal thei ding," tiah a ti. 20 Annih in, "Ni thum sungah na sak sal thei ngai pei maw? Hi Biakinn saknak ah hin kum sawm li le kum ruk a rei a si," tiah an ti. 21 Sikhalsehla Jesuh ih a sim duhmi Biakinn cu amah ih taksa ruangpi kha a si. 22 Curuangah Jesuh thihnak ihsin a thawhsal tikah a dungthluntu pawl in amah ih taksa ruangpi thu a sim ti kha an thei sal ih Ca Thianghlim simmi le Jesuh simmi kha an zum. 23 Jesuh cu Lantak Puai sung Jerusalem khawsungih a um laiah mi tampi in mangbangza a tuahmi an hmuh ruangah amah kha an zum. 24 Asinain Jesuh cun a thinlung zatein a zum hai lo, ziangahtile minung cu ziangvek an si ti kha a thei ṭheh. 25 An thuhla cu midang ih sim a ṭul lo, ziangahtile an thinlung ziangvek a si ti cu amah in a thei ṭheh a si.
1 Judah mi hotu pa pakhat, a hminah Nikodemas an timi a rak um; amah cu Farasi mi a si. 2 Zan khat cu Jesuh hnenah a va feh ih Jesuh cu, "Rabbi, nang cu Pathian ih run thlahmi saya na si, ti kan lo thei. Mangbangza na tuahmi pawl hi Pathian tel lo cun zohman in an tuah thei lo ding," tiah a ti. 3 Jesuh in, "Thungaite in ka lo sim: zokhal hrin sal a si lo ahcun Pathian Uknak a hmu thei lo ding," tiah a ti. 4 Nikodemas in, "Ziangtin so patling cia cu hrin sal a si thei ding? A nuih pum sungah lut tahratin voihnih hrin sal cu a si thei hrimhrim lo ding," tiah a sawn. 5 Jesuh in, "Thungaite in ka lo sim: zokhal tidai le Thlarau in hrin sal a si lo ahcun Pathian Uknak sungah a lut thei lo ding. 6 Minung cu taksa lam cun a nu le a pa sung ihsin hrinmi a si; sikhalsehla thlarau lamah cun Thlarau ih hrinmi a si. 7 Hrin salmi na si a ṭul ka ti tikah na mangbang hlah. 8 Thli cu a duhnak poh ah a hrang; a thawm na thei, asinain khuitawk ihsin a ra ih khuilamah a feh ding ti na thei lo. Thlarau ih hrinmi khal cu cubangtuk in an si," tiah a ti. 9 Nikodemas cun, "Ziangtin so cumi cu a si thei ding?" tiah a sut. 10 Jesuh in, "Nang cu Israel mi lakah zirhtu saya pakhat na si ih himi hman na thei thei lo maw? 11 Thungaite in ka lo sim: kannih cu kan theihmi kan sim ih kan hmuhmi kha kan than; asinain zokhal in kan thu simmi nan pom duh lo. 12 Hi leitlun thuhla ka lo sim ih i zum lo; cuti asile ziangtinso vancung thuhla ka lo sim tikah na zum thei ding? 13 Vancung ihsin a rung ṭummi Milai Fapa siarlo zohman vancungah a kaitu an um lo," tiah a ti. 14 "Moses in nelrawn ah fung parih dar rul a thlai bangtuk in Milai Fapa khal thlai a si ve ding; 15 cuti cun amah a zumtu hmuahhmuah cu kumkhua nunnak an ngah ding. 16 Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding. 17 Ziangahtile leilung tlunah Pathian in a Fapa a run thlah tikah leilung thuṭhentu dingah a thlah lo, leilung runtu dingah a thlah a si. 18 Zokhal Fapa a zumtu cu thuṭhennak a tong lo ding; sikhalsehla a zum lotu cu Pathian ih Fapa neihsun a zum lo ruangah thuṭhennak a tong zo. 19 Thuṭhennak timi cu hiti in a si: leilung tlunah hin tleunak a ra thleng, asinain mi in tleunak hnakin thimnak an duh sawn; ziangahtile an tuahnak a ṭhat lo ruangah a si. 20 Zokhal thil ṭha lo a tuahtu cun tleunak a hua ih tleunak sung khal ah a ra lo ding, ziangahtile a thil ṭha lo tuahmi kha a lang pang ding ti a phang. 21 Sikhalsehla a dikmi a tuahtu cu tleunak sungah a ra ih a tuahmi cu Pathian duhmi thlunin a tuah a si ti kha cuih tleunak cun a langter," tiah a ti. 22 Cuih hnuah Jesuh cu a dungthluntu pawl thawn Judea peng ah an feh ih an hnenah malte sung a um ih baptisma tla a pek. 23 Johan khal Aenon timi, Salim ihsin a hlat lonak hmun ah, baptisma a pek ve, ziangahtile cutawkah cun tidai tampi a um. Mi tampi a hnenah an ra ih baptisma a pek hai. 24 Himi cu Johan thawng an thlak hlanih a cangmi thil a si. 25 Johan dungthluntu ṭhenkhat pawl le Judah mipa pakhat cu thianfaiter awknak thu ah thu an el aw. 26 Curuangah Johan hnenah an feh ih, "Sayapa, Jordan tiva ihsin nisuah lamih nangmah thawn a rak um dah pa kha na ciing lai a si lo maw? A thu na rel ṭheu mi kha! Atu-ah baptisma a pek rero ve ih mi tampi a hnenah an feh a si," tiah an ti. 27 Johan in, "Pathian pekmi ti lo cun zohman in zianghman comi an nei thei lo ding. 28 Keimah rori in, 'Kei cu Messiah ka si lo; a hlanih a rak thleng sungmi ka si,' tiah ka simmi theitu cu nanmah nan si. 29 Òhitmi mothar cu a ṭhitu tlangval pa ih ta a si; asinain nupi ṭhitu tlangval pa ih rualpi, a ding ih aw thawm a ngaitu pa cu, tlangval pa ih aw a theih tikah cun a lung a awi ngaingai. Cuih lungawinak cu ka ta a si ih ka lungawinak cu a famkim a si. 30 Amah cu a ṭhangso ding ih kei cu ka ṭumsuk ding," tiah a ti. 31 Tlunlam ihsin a rungmi cu mi hmuahhmuah hnakin a tum sawn. Leilung ih a ummi cu leilung ta a si ih leilung tlun thuhla a sim; asinain vancung ihsin a rami cu ziang hmuahhmuah tlunah a um. 32 Amah cun a hmuhmi le a theihmi thuhla pawl a sim na'n zohman in a thu cu an pom lo. 33 Sikhalsehla zokhal a thu simmi a pomtu cu cutiih a pomnak in Pathian cu a dik a si, ti kha a hngetter. 34 Pathian ih a thlahmi cun Pathian ih thu a phuang, ziangahtile Pathian in a Thlarau famkim in a hnenah a pek. 35 A pa in a Fapa cu a duhdawt ih ziang hmuahhmuah a kut sungah a pek. 36 Fapa a zumtu cun kumkhua nunnak a nei; Fapa-ih thu a eltu cun nunnak a nei lo ding ih Pathian ih thinhengnak a tuar ding.
1 Jesuh cu Johan hnakin dungthluntu tam deuh a nei ih baptisma tla tam deuh a pek, tiah Farasi mi pawl in an thei. 2 A ngaingai ahcun Jesuh amah cun zohman baptisma a pek lo; a dungthluntu lawng in an pek. 3 Cutiih an rel ruri mi cu Jesuh in a theih tikah Judah ram ihsin a suak ih Galilee ah a kir sal. 4 A kir phahah Samaria ram a pal phah. 5 Samaria ramih a feh laiah Saikhar an timi khua pakhat a thleng. Cuih Saikhar khua cu Jakob in a fapa Josef hnenih a pekmi loram ihsin a hlat lo. 6 Cutawkah cun Jakob tikhur a um. Jesuh cu a khual tlawnnak ah a bang zet ih cuih tikhur kiangah cun a to. A tikcu cu sun hrawng a si. 7 Samaria nunau nu pakhat cu tidai khai dingah a ra ih Jesuh in a hnenah, "Tidai in ding i pe aw," tiah a dil. 8 A dungthluntu pawl cu rawl lei dingah khawsung ah an feh. 9 Cuih nunau nu cun, "Nang cu Judah mi na si ih kei cu Samaria mi ka si; ziangtinso tidai in ding i dil?" tiah a ti. Judah mi pawl cun Samaria mi pawl ih hmanmi khokheng pawl an hmang duh lo. 10 Jesuh in, "Pathian ih a lo pekmi laksawng hi ziang a si, ti le tidai a lo diltu hi zo a si, ti thei cila amah sawn na dil ding ih anih in nunnak tidai a lo pe ding na'n!" tiah a ti. 11 Cuih nunau nu in, "Bawipa, balṭin na nei lo ih tikhur hi a thuk zet fawn. Khuitawk in so cuih nunnak tidai cu na lak ding? 12 Kan pu Jakob in hi tikhur hi in pek; amah le a fapa pawl siseh, a tuu rual le a caw rual pawl siseh, hi tikhur ihsin tidai an ngah. Jakob hnakin ka tum sawn tiah na ruat aw maw si?" tiah a sut. 13 Jesuh in, "Zokhal siseh hi tidai a intu cu a ti a haal sal ding. 14 Sikhalsehla ka pek dingmi tidai a intu cu a ti a haal nawn lo ding. Ka pek dingmi tidai cu amah sungah cirhti ah a cang ding ih cumi cun nunnak tidai le kumkhua nunnak a pe ding," tiah a ti. 15 Nunau nu in, "Bawipa, cuih tidai cu i pe aw! Cuticun ka ti a haal nawn lo ding ih hitawk ah tidai khai ding khalah ka rat a ṭul nawn lo ding," tiah a ti. 16 Jesuh in, "Na pasal va ko awla ra sal aw," tiah a ti. 17 Anih in, "Pasal ka nei lo," tiah a let. Jesuh in, "Pasal ka nei lo na ti cu thudik na sim a si. 18 Pasal panga na nei zo ih atu na umpi mi pa hi na pasal ngaingai a si lo. Thudik i sim a si," tiah a ti. 19 Nunau nu in, "Bawipa, profet na si ti ka lo thei. 20 Kannih Samaria mi kan pupa pawl cun hi tlang parah hin Pathian an rak biak; sikhalsehla nannih Judah mi cun Pathian cu Jerusalem ah biak ding a si, nan ti," tiah a ti. 21 Jesuh cun a hnenah, "Nunau nu, ka lo simmi hi zum aw: Mi in Pathian cu hi tlang ah siseh, Jerusalem khal ah siseh, an biak lo can a ra thleng ding. 22 Nannih Samaria mi cun nan biakmi nan thei ngaingai lo; asinain kannih Judah mi cun kan biakmi kan thei, ziangahtile rundamnak cu Judah mi hnen ihsin a ra. 23 Sikhalsehla Pathian Thlarau hruainak thawngin Pathian a bia taktaktu in Pa cu thlarau le thutak thawn an biak caan a ra thleng ding; a si, cuih caan cu atu-ah a ra thleng zo. Cutiih biak cu Pathian in a duhmi a si. 24 Pathian cu Thlarau a si ih a biatu pawl in thlarau le thutak in an bia ding," tiah a ti. 25 Nunau nu in a hnenah, "Messiah cu a ra ding ih a rat tikah cun ziang hmuahhmuah amah in in sim leh ding," tiah a ti. 26 Jesuh in, "Na hnenih a ṭong rerotu hi amah cu ka si," tiah a ti. 27 Culai fangah Jesuh dungthluntu pawl cu an ra kir ih nunau nu thawn an biak awk rero kha an hmuh tikah an mang a bang ngaingai. Sikhalsehla zohman in cu nu cu, "Ziang so na duh?" tiah an sut lo. Jesuh khal cu, "Ziangah so hi nu cu na biak?" tiah an sut ve lo. 28 Cule nunau nu cu a tithawl a tanta ih khawsungih a vung feh hnuah mi senpi hnenah, 29 "Hlanih thil ka tuah ciami hmuahhmuah i sim theitu pa hi ra zohhnik uh! Amah hi Messiah cu a si pei maw?" tiah a ti. 30 Cuticun khawsung in an suak ih Jesuh hnenah cun an feh. 31 Culai ah dungthluntu pawl in Jesuh cu, "Sayapa, rawl ei aw," tiah an fial. 32 Anih in, "Nan theih lomi rawl ei ding ka nei," tiah a ti. 33 Cule a dungthluntu pawl cun, "Pakhatkhat in rawl an rak pek a si pei maw?" tiah pakhat le pakhat an sut aw. 34 Jesuh in an hnenah, "Kei ka rawl cu i thlahtu-ih duhnak tuah le hnaṭuan i fialmi ṭuan ṭheh hi a si. 35 Òongṭhimnak ah 'Thla li hnuah rawl khawm caan,' tiah nan ti. Sikhalsehla thungai in ka lo sim: lo sung khi hei zohhnik uh! Lorawl an thar zo ih rawl lak caan a cu zo a si. 36 Rawl a latu pa cu a hlawhman kha pek a si ih rawl cu kumkhua a nunnak hrangah a khawm. Cuticun thlaici a tuhtu le rawl a latu cu hmun khatah an lung a awi tlang ding. 37 Ziangahtile ṭongṭhimnak ih 'Mi pakhat in a tuh; a dang pakhat in a at,' timi cu a dikzet a si. 38 Nan rak ṭuan dah lonak lo sungah fang at dingin ka lo thlah hai. Cutawkah midang ih an rak ṭuan cianak ihsin midang hnaṭuan ruangah a miat nan ngah a si," tiah a ti. 39 Nunau nu in, "Ka rak tuah ciami hmuahhmuah i sim sal ṭheh," tiah a ti hrangah cuih khawsungih a ummi Samaria mi tampi in Jesuh cu an zum. 40 A hnenah Samaria mi pawl an ra ih, "Kan hnenah cam hrih aw," tiah an ra sawm ih ni hnih a cam. 41 Jesuh thusimmi an thei ih mi tam sinsin in an zum. 42 Cule nunau nu hnenah cun, "Atu cu nangmah ih thusimmi ruangah si loin kanmah rori in a thu simmi kan thei ih kan zum; amah hi leilung Runtu a si taktak ti khal kan thei," tiah an ti. 43 Cutawkah ni hnih a cam hnuah Jesuh cu a suak ih Galilee ah a feh. 44 Ziangahtile amah rori in, "Profet cu amah ih ramah cun upatnak a ngah lo," tiah a rak ti. 45 Galilee-ih a thlen tikah cutawkih mipi pawl in an rak hmuak, ziangahtile Jerusalem khua Lantak Puai ah a feh ih cuih puai sungih a thil tuahmi hmuahhmuah an rak hmuh zo ruangah a si. 46 Cule Jesuh cu tidai kha sabitti ih a rak canternak Galilee peng Kana khua ah a feh sal. Cutawkah acozah bawi pakhat a rak um ih a fapa pakhat Kapernaum khua ah a na. 47 Jesuh cu Judea ihsin Galilee a ra thleng ti a theih tikah a hnenah cun a va feh ih, Kapernaum khua ah va feh in a thizikmi a fapa damter dingah zaangfah a dil. 48 Jesuh in, "Hmuhsaknak le khawruahhar thil tla nan hmuh dah ti lo ahcun zohman in nannih pawl cun nan zum lo ding," tiah a ti. 49 Cuih acozah bawipa cun, "Bawipa, ka fapa a thih hlanah ra hram aw," tiah a dil. 50 Jesuh in a hnenah cun, "Va tlung aw, na fapa cu a nung ding," tiah a ti. Cupa in Jesuh ih ṭong cu a zum ih a tlung. 51 A tlunnak lamzin ihsin a hnen-um pawl in an rak hmuak ih, "Na fapa cu a nung ding," tiah an ti. 52 Anih in, "Ziangtik caanah so ka fapa cu a dam deuh?" tiah a sut tikah annih in, "Mizan sun zanlam nazi pakhat ah a khurhnat a reh," tiah an ti. 53 Cuih caan cu Jesuh in 'Na fapa a nung ding,' tiih a rak ti caante kha a si, tiah a pa cun a hun thei sal. Cuticun amah le a innsang zatein an zum. 54 Himi hi Jesuh cu Judea ihsin Galilee-ih a rat hnuah a voihnihnak mangbangza a tuahmi a si.
1 Cuih hnuah Jesuh cu Jerusalem ah Judah biaknak puai pakhat a um ih a feh. 2 Jerusalem khua ahcun Tuu Kotka an timi kiangah tili pakhat a um ih a kapah deu suanmi panga a um. Cuih tili cu Hebru ṭong in Bethzatha tiah an ti. 3 Cuih deusuan sungah cun mina tampi an it teptep. Òhenkhat cu mitcaw, ṭhenkhat cu ke-awl le ṭhenkhat cu a zengmi tla an si. 4 (A caancaan ah Bawipa ih vancungmi a rung ṭum ih tidai kha a cangter ṭheu. Cutiih tidai a cang vete in tili sungih a dawp hmaisa bik kha an natnak ihsin an dam ṭheu. Curuangah mina pawl cun tidai caang ding kha an hngak.) 5 Cutawkah mipa pakhat kum sawm thum le kum riat sung a nami a um. 6 Cutawkih a ih ringring kha Jesuh in a hmu ih kum reipi a na zo ti tla a thei. Curuangah Jesuh in, "Dam na duh maw?" tiah a sut. 7 Cupa in, "Bawipa, tidai a caang tikah tili sungih i hnimtu ding zohman an um lo. Tili sungah ka vung ṭum ding ka ti laifangah midang in in rak khelh ringring ṭheu," tiah a ti. 8 Jesuh in, "Tho awla na ihphah la in feh aw," tiah a ti. 9 Hmakhatteah cupa cu a dam; a ihphah cu a lak ih a feh. Cuih ni cu Sabbath ni a si. 10 Curuangah Judah mi hotu pawl in damnak a ngahtu pa cu, "Tuih sun hi Sabbath ni a si ih na ihphah na fehpi hi kan Daan in a duh lo a si," tiah an ti. 11 Anih in, "Keimah i damtertu pa in na ihphah la awla feh aw, i ti si!" tiah a ti. 12 Annih in, "Cutiih a lo titu cu zo so a si?" tiah an sut. 13 Asinain damnak a ngahtu pa cun Jesuh cu zo a si ti a thei lo, ziangahtile cutawkah miburpi an um ih an lakin Jesuh cu a rak feh zo. 14 Neh hnuah cupa cu Jesuh in Biakinn sungah a tong ih, "Zohhnik! Atu cu na dam zo; curuangah va sual nawn hlah. Culole na parah thil ṭha lo sinsin a thleng ding," tiah a ti. 15 Cule cupa cu a feh ih Judah mi hotu pawl hnenah, "I damtertu cu Jesuh a si," tiah a va sim. 16 Sabbath ni ih mi a damter ruangah cun Jesuh cu an ralsan ih harsatnak an pek. 17 Jesuh in an hnenah, "Ka pa cu hna a ṭuan ringring ih kei khal hna ka ṭuan ve a ṭul a si," tiah a ti. 18 Cutiih a ti ruangah Judah mi hotu pawl cu an thin-ai a thok ih amah kha thah an tum sinsin; Sabbath a buar lawng si loin Pathian cu ka Pa a si, a ti ruangah Pathian tlukah a tuah aw tiah an ruat. 19 Curuangah Jesuh in an hnenah, "Thungai in ka lo sim: Fapa cun amah tein zianghman a tuah thei lo. A Pa ih tuahmi a hmuhmi lawng kha a tuah a si. Pa in a tuahmi kha Fapa khal in a tuah ve. 20 Ziangahtile Pa in a Fapa kha a duhdawt ih a tuahmi hmuahhmuah kha a hmuh ṭheh. Himi hnakin tuah ding a nasa sawn mi kha a hmuh hrih ding ih nan mang a bang ding. 21 Pa in mithi a thawhter ih nunnak a pek vekin Fapa khal in a duhmi poh hnenah nunnak a pe ve a si. 22 Pa in zo ih par hmanah thuṭhennak a tuah lo. Fapa hnenah thuṭhen theinak a pe zo. 23 Curuangah Pa a upattu hmuahhmuah in Fapa khal an upat ve pei. Zokhal Fapa a upat lotu cun a thlahtu a Pa khal a upat ve lo a si. 24 Thungaite in ka lo sim: zokhal ka simmi a thei ih i thlahtu a zum ahcun kumkhua nunnak a nei. Thuṭhennak a tong lo ding; cutiin thihnak ihsin nunnak ah a lut zo. 25 Thungaite in ka lo sim: mithi in Pathian Fapa ih aw an thei ding; a theitu hmuahhmuah in nunnak an ngahnak caan a ra ding ih atu khalah a thleng rero zo. 26 Pa amah rori cu nunnak ih hrihram a si; cuvek thotho in Fapa khal cu nunnak ih hramhri a siter zo. 27 Cule Fapa cu Milai Fapa a si ruangah thuṭhennak thu a pek. 28 Hiti a si ruangah nan mangbang hlah uh; mithi hmuahhmuah in a aw an theih ih, 29 an thlaan sung ihsin an suahnak tikcu a ra thleng ding: thil ṭha a tuahtu pawl cu nung dingah an tho sal ding; cule thil ṭha lo a tuahtu pawl cu hnon dingah an tho sal ve ding," tiah a ti. 30 Jesuh in, "Keimah ih thu in zianghman ka tuah thei lo. Thuṭhennak ka tuah asile Pathian ih i simmi vekin ka tuah; curuangah ka thuṭhennak cu a dik a si, ziangahtile ka duhmi tuah ka tum lo, i thlahtu ih duhmi lawng tuah ka tum a si. 31 Keimah in keimah ih thu lawng ka rel a si ahcun ka thusimmi cu a dik ngaingaimi a si, ti a theih lo ding. 32 Sikhalsehla ka ai-ah keimah ih thu a simtu ding midang pakhat a um ih ka thu a simmi cu a dik a si, ti ka thei. 33 Johan hnenah nan palai pawl nan thlah ih amah in thutak a rak sim hai. 34 Hitiih ka ti tikah theihpitu minung ka neih a ṭul ka tinak a si lo; rundamnak nan ngah theinak dingah ka simmi a si. 35 Johan cu a alh ih a tleumi mei-inn vek a si; a tleunak sungah caan malte sung lawng nan lung a awi. 36 Asinain ka ai-ah ka thuhla i theihpitu a um ih Johan ih thutheihpinak hnakin a tum sawn; cumicu Pa in i pekmi ka thil tuahmi pawl hi an si. Cuih ka thil tuahmi cun Pa in i thlah ti a langter. 37 Cule i thlahtu ka Pa khal hi ka ai-ah ka thu i theihpitu a si. A aw nan thei dah lo, a hmuihmel khal nan hmu dah lo; 38 cule a thu simmi khal nan thinlung sungah nan ret lo, ziangahtile a thlah mipa hi nan zum lo. 39 Ca Thianghlim sung nan hawl; cutiih nan hawlnak cu hi Ca Thianghlim sungah hin kumkhua nunnak kan hmu ding, tiah nan ruah ruangah a si. Hi Ca Thianghlim cu keimah ih thu a simtu a si. 40 Sikhalsehla nunnak ngah dingah ka hnenah nan ra duh cuang lo. 41 Minung hnen ihsin thangṭhatnak ngah ding ka hawl lo. 42 Sikhalsehla mi ziangvek nan si ti ka lo thei ih nan thinlung sungah Pathian duhdawtnak zianghman a um lo. 43 Ka Pa ih hmin thawn ka ra na'n in saang duh lo; asinain mi pakhat amah ih hmin lawng in a ra asile amah sawn cu nan rak pom ding. 44 Pakhat le pakhat hnen ihsin porh le lomnak ngah nan duh zet, asinain amah lawng Pathian a si mi hnen ihsi cun thangṭhatnak ngah nan tum lo; cuti a si ahcun ziangtinso kei cu in zum thei ding? 45 Keimah hi Pathian ih hmaiah in mawhthluktu a si ding, tiah i ruat hlah uh. A parih ruahsannak nan neih bikmi Moses rori hi a lo mawhthluktu a si ding. 46 Moses nan zum ngah ngaingai rak sisehla keimah khal hi in zum ve ding; ziangahtile Moses in ka thu a rak ngan a si. 47 Sihmansehla amah ih nganmi nan zum lo a si ahcun, ka simmi hi ziangtinso nan zum thei ding?" tiah a ti.
1 Cuih hnuah Jesuh cu Galilee Tili khatlam ral ah a va feh. Cuih Tili cu Tiberias Tili ti tla in an ko. 2 Hmuhsaknak a tuahnak in mina tampi a damtermi kha an rak hmuh zo ruangah miburpi in amah cu an thlun. 3 Jesuh cu tlangpar ah a hung kai ih cunah a dungthluntu pawl thawn an to. 4 Lantak Puai timi Judah mi pawl ih puai cu a nai thlang. 5 Cule Jesuh in a kiangkap kha a zoh tikah miburpi in amah an pan luailo kha a hmu ih Filip hnenah, "Minung hi-hmuah ei dingah khui tawkin so rawl kan lei ding?" tiah a sut. 6 Hitiih a suh cu Filip hniksaknak ah a si; a ngaingai ti ahcun ziang ka tuah ding ti kha a thei cia zo. 7 Filip in, "Mi pakhat in malte fingfing co ding hmanah mi hizat ih ei ding ahcun ngun tangka za hnih man lei hmanah a daih lo ding," tiah a ti. 8 A dungthlun a si vemi midang pakhat, Simon Piter ih nau Andru in, 9 "Hinah hin nauhak pakhat a um ih barli saang hlom nga le nga pum hnih a nei. Asinain minung hizat hrangah cun zianghman a si tham lo," tiah a ti. 10 Jesuh in, "Mi senpi pawl cu toter hai uh," tiah a dungthluntu pawl cu a sim. Cutawkah cun hrampi a tamzet. Cuti cun mipi cu an to ih an zatein thawng nga tluk an si. 11 Jesuh in sang cu a lak ih Pathian hnenah lungawi thu a sim hnuah a tomi pawl hnenah cun a zem. Nga khal cutivek ṭhiamṭhiam in a zem ih misenpi cun an ei thei tawkin an ei. 12 Rawl an ei khawh tikah a dungthluntu pawl hnenah cun, "An hlahmi kha sar ṭheh uh; malte hman hlon lak hlah uhsi," tiah a ti. 13 Cutiin an hlahmi cu an sar khawm tikah barli sang hlom nga sungin mipi ih an ei hnuah a taangmi bawm hleihnih an sar. 14 Jesuh ih tuahmi hmuhsaknak cu mipi in an hmuh tikah annih in, "Leilung ah a ra ding, timi profet cu amah rori hi a si," tiah an ti. 15 Misenpi in an siangpahrang ih tuah dingah hranhram in in ra kai ding, ti kha Jesuh in a thei; curuangah tlangpar ah amahte lawng a feh. 16 Zanlam khua a rung tlai tikah Jesuh ih dungthluntu pawl cu tili lamah an vung ih, 17 lawng sungih an to hnuah tili khatlam ral, Kapernaum khualam ahcun an va kir sal. Zan a si zo ih an hnenah Jesuh cu a ra thleng hrih lo. 18 Culai fangah thli nasa zetin a hung hrang ih tilet a tho ciamco. 19 Long cu an hlau ih peng thum peng li tluk an feh tikah Jesuh cu tidai parah feh tahratin anmah lamih a rat vivo kha an hmu ih an ṭih ngaingai. 20 Sikhalsehla Jesuh in, "ṭih hlah uh; Keimah ka si!" tiah a ti. 21 Cule lungawi zetin Jesuh cu an lawng sungah an kaiter ih an feh duhnak hmun ah reilote-ah an va thleng. 22 A thaizing ah tili khatlam ralih a ummi misenpi pawl in cutawkah lawng pakhat lawng a um, cuih lawng sungah Jesuh a um lo ih a dungthluntu pawl lawng an feh a si, ti kha an thei. 23 Tiberias ihsin a rami lawng dangdang tla cu Bawipa in lungawi thu a sim hnuah misenpi in saang an einak hmun kiang tili kapah an ra thleng. 24 Cutawkah Jesuh le a dungthluntu pawl an um lo tikha misenpi in an hmuh tikah cutawkih lawng pawl to in Jesuh hawl duh ah Kapernaum ah an feh. 25 Jesuh cu tili khatlam ralih an va hmuh tikah mipi pawl cun, "Sayapa, ziangtikah so hitawk ih na thlen?" tiah an sut. 26 Jesuh in, "Thungaite in ka lo sim: in ra hawl hi hmuhsaknak ka tuahmi nan theihthiam ruangah a si lo, sang khop zetih nan ei ruangah a si. 27 A siat theimi rawl hrangah hna ṭuan hlah uh; sikhalsehla kumkhua a daihmi nunnak rawl hrangah ṭuan uh. Cuih rawl cu Milai Fapa ih a lo pek dingmi a si, ziangahtile Pa Pathian in a parah a lungkimnak tacik a khen zo," tiah a ti. 28 Curuangah annih in, "Pathian in ṭuan hai seh ti in duh sakmi tuah dingah ziangso kan tuah ding?" tiah an sut. 29 Jesuh in, "Pathian in ṭuan hai seh ti a lo duh sakmi cu a thlahmi pa zum kha a si," tiah a ti. 30 Annih in, "Kan hmuh ih kan lo zum theinak dingah ziangvek hmuhsaknak so na tuah ding? Ziang si na tuah dingmi cu? 31 Ca Thianghlim sungih 'An ei dingah vancung ihsin sang a pek,' tiih a um vekin kan pupa pawl cun nelrawn ramṭhing ah khan manna sang an ei a si," tiah an ti. 32 Jesuh in, "Thungaite in ka lo sim: Moses ih a lo pekmi cu vancung saang ngaingai a si lo. Ka Pa in vancung saang ngaingai cu a lo pek a si. 33 Ziangahtile Pathian ih a pekmi saang cu vancung ihsin a rungṭum ih leilung mi nunnak a petu pa hi a si," tiah a ti. 34 Annih in, "Bawipa, cuih saang cu in pe ringring aw," tiah an dil. 35 Jesuh in an hnenah cun, "Keimah hi nunnak sang ka si. Ka hnenih a rami cu a ril a rawng dah lo ding; keimah i zumtu cu a ti a haal dah lo ding. 36 Cule ka lo sim hai zo vekin a hmuh cu in hmu zo na'n in zum duh lo. 37 Ka Pa ih i pekmi pohpoh cu zokhal ka hnen ah an ra ding. Ka hnenih a rami cu zohman ka khir lo ding, 38 ziangahtile vancung ihsin ka rung ṭum tikah hin keimah ih duhmi tuah dingah ka rung lo, i thlahtu ih duhmi tuah dingah ka rung a si. 39 Cule i thlahtu ih duhmi cu hihi a si: I pekmi hmuahhmuah kha pakhat hman hloter loin, ni neta bik ni-ah an zate ih ka thawhter sal ṭheh ding kha a si. 40 Ziang hrangah tile ka Pa ih duhmi cu Fapa kha a hmu ih a zumtu hmuahhmuah cu kumkhua nunnak an ngahnak ding kha a si. Cule ni neta bikah nunnak ah ka thoter ding a si," tiah a ti. 41 "Keimah hi vancung ihsin a rungmi saang ka si," a ti ruangah Judah mi senpi pawl cu an phunzai ruri. 42 Curuangah, "Hi pa hi Josef fapa Jesuh a si lo maw? A nu le a pa tla cu kan theih thluhmi an si ko! Ziangtin so 'Vancung ihsin ka rung,' tiah a ti rero thei?" tiah an ti. 43 Jesuh in, "Phunzai ruri nawn hlah uh! 44 I thlahtupa in ka hnenih a kuat lo ahcun zohman ka hnenah an ra thei lo ding; cutiih ka hnenih a rami cu ni neta bikah nunnak ah ka thoter ding. 45 Profet pawl in, 'Zokhal Pathian in a zirh hai ding,' tiah an rak ngan. Zokhal Pa a thei ih a hnen ihsin a zirtu cu ka hnenah a ra. 46 Hiti ka ti tikah zokhal in Pa cu an hmu zo, tinak a si lo; Pathian hnen ihsin a ra mipa lawng hi Pa hmutu cu a si. 47 Thungaite in ka lo sim: a zumtu cun kumkhua nunnak a nei. 48 Keimah hi nunnak saang ka si. 49 Nan pu le nan pa pawl cu nelrawn ramṭhing ah manna saang an ei na'n an thi thotho. 50 Sikhalsehla vancung ihsin a rung ṭummi saang hi a eitu hmuahhmuah cu an thi lo ding. 51 Keimah hi vancung ihsin a rung ṭummi saang nung ka si. Hi saang a eitu cu kumkhua in a nung ding. Ka pek dingmi saang cu hi leilung in nunnak a ngah theinak dingih ka pekmi ka taksa hi a si," tiah a ti. 52 Cutiih a ti ruangah cun an lakah thinheng thu-el awknak tiang a suak ih, "Ziangtin so hi pa hin kan ei dingah a taksa cu in pek thei ding?" tiah an ti ciamco. 53 An hnenah Jesuh in, "Thungaite in ka lo sim: Milai Fapa taksa nan ei lo ih a thisen tla nan in lo ahcun nan sungah nunnak nan nei lo ding. 54 Zokhal ka taksa a ei ih ka thisen a intu cu kumkhua nunnak a nei ih ni neta bikah nunnak ah ka thoter ding. 55 Ziangahtile ka taksa hi rawl taktak a si ih ka thisen cu in dingmi taktak a si. 56 Zokhal ka taksa a ei ih ka thisen a intu cu ka sungah a nung; cule keimah khal a sungah ka nung a si. 57 A nungmi Pa in i thlah ih amah ih ruangah kei khal ka nung a si. Cubangtuk thotho in keimah i eitu cu keimah ih ruangah a nung ve ding. 58 Vancung ihsin a rungmi saang timi cu himi hi a si; nan pu le nan pa pawl cun saang an ei ih malte a hung rei cun an thi thotho; vancung ihsin a rungmi saang cu cuvek a si lo. Hi saang a eitu ih piang cu kumkhua in an nung ding," tiah a ti. 59 Himi cu Kapernaum khua sinakok sungih thu a zirh laiih a simmi pawl an si. 60 Amah a thluntu tampi in cuih thu cu an thei ih, "A thu zirhmi hi a hartuk ual! Zoso a thei thei ding?" tiah an ti. 61 An sim lo na'n cuih thu-ah an phunzai ciamco ti kha Jesuh in a thei ih an hnenah, "Himi hin nan thinlung ah buainak a suahter maw si? 62 Thuṭhimnak ah Milai Fapa hi hlanih a rak umnak hmunih a hung feh sal kha hmu uhla ziangtinso nan ti ding? 63 Nunnak taktak a petu cu Thlarau a si; milai-ih taksa cu san a tlai lo. Nan hnenih ka simmi ṭongkam hi nunnak le Thlarau petu a si. 64 Asinain mi ṭhenkhat cun nan zum lo," tiah a ti. Jesuh in a hramthokte ihsin zoso i zum lotu ding, tile zoso i zuartu ding ticu a thei ṭheh zo. 65 Cule Jesuh in, "Hiti a si ruangah sokhaw Pa in ka hnenih a ratter lo ahcun zohman ka hnenah an ra thei lo ding, tiah ka lo simnak kha a si cu!" tiah a ti. 66 Curuangah Jesuh dungthluntu misenpi cun kir in an tlansan. 67 Curuangah a dungthluntu hleihnih kha, "Nannih teh tlan nan duh ve maw?" tiah a sut. 68 Simon Piter in, "Bawipa, zo ih hnenah so kan feh cuang ding? Kumkhua nunnak petu ṭongkam a neitu cu nangmah na sisi! 69 Cule atu cun Pathian hnen ihsin a rami Mi Thianghlim na si ti kha kan zum ih kan thei ngah a si," tiah a ti. 70 Jesuh in, "Nannih hleihnih hi keimah ih hrilmi nan si, a si lo maw? Asinain pakhat cu satan a si," tiah a ti. 71 Hitiih a ti sanmi cu Simon Iskariot ih fapa Judas kha a si. Ziangahtile Judas cu dungthluntu hleihnih lakih a telmi a si na'n Jesuh zuartu ding a si.
1 Cuih hnuah Jesuh cu Galilee peng sungah khual a tlawng; cule Judea ram Judah mi hotu pawl in a thah an tum ruangah Judea peng ahcun a tlawng duh lo. 2 Puanthlam Puai a nai zo ih, 3 curuangah a naule pawl in Jesuh cu, "Na thil tuahmi tla hi a lo thluntu pawl in an hmuh dingah hi hmun ihsin suak awla Judea peng ah feh aw. 4 Mi tampiih theihmi si a duhtu cun a thil tuahmi cu a thup dah keel lo. Hi bangtuk thil hi na tuah ruangah leilung pumpi in lo thei thluh hai seh!" tiah an ti. 5 Amah ih naule pawl hman in Jesuh cu an zum lo. 6 Jesuh in an hnenah, "Ka tikcu a kim hrih lo. Nannih hrangah cun ziangtik khal hi nan tikcu a si ko. 7 Leilung in nannih cu a lo hua lo, sikhalsehla kei cun a thil tidan a ṭha lo a si tiih ka sim ringring ruangah leilung in i hua a si. 8 Puai tuahnak ahcun va feh uh. Kei cu ka tikcu a kim hrih lo ruangah ka feh lo ding," tiah a ti. 9 Cutiin a sim ih Galilee ahcun a umta. 10 Puai ah a naule pawl cu an feh ih cuih hnuah Jesuh khal a feh ve; asinain langhngan tukih feh loin a thup deuh in a feh. 11 Puai hmun ahcun Judah hotu pawl cun an hawl ih, "Khui-ah so a si?" tiah an sut vivo. 12 Mipi pawl in amah ih thuhla cu an rel ih an phun supso rero. Òhenkhat in, "Miṭha sokhaw a si!" an ti. Midang in, "Si hlah e, misenpi a hruai sual a sisi!" an ti. 13 Zohman in langhngan in an ṭong ngam lo, ziangahtile Judah mi hotu upa pawl kha an ṭih. 14 Cuih puai tuah caan a hrek tlukah Jesuh cu Biakinn ah a feh ih thuzirh a thok. 15 Judah mi hotu pawl cu an mang a bang ngaingai ih, "Hi pa hi khui hmanah zirnak a neih dah ual lo; ziangtinso hi zatzat thu a theih thei?" tiah an ti. 16 Jesuh in, "Ka thuzirhmi hi keimah palungih zirhmi a si lo; i thlahtu hnen ihsin a rami a si. 17 Pathian duhnak tuah a tumtu zokhal in ka thuzirhmi hi Pathian hnen ihsin a ra maw, keimah palung in so ka sim, ti cu a thei ding. 18 Zokhal sisehla amah ih thuneihnak lawngin a ṭongtu cun amah hrangah thangṭhatnak a hawl a si. Sikhalsehla amah a thlahtu hrangih thangṭhatnak a hawltu cun a sungah hrawhhrawlnak zianghman a nei lo ih zumtlak in a um a si. 19 Moses in Daan a lo pek a si lo maw? Sikhalsehla zohman in cuih Daan cu nan thlun lo. Ziangah so a thah lehlam in tum rero?" tiah a ti. 20 Mipi in, "Na sungah khuavang a um a si! Zoso thah a lo tum?" tiah an ti. 21 Jesuh in, "Hmuhsaknak pakhat ka tuah ih nan khawruah a har ṭheh. 22 Moses in nan fapa pawl an serh tan dingah thu a lo pek, (hi serhtannak a thoktu cu Moses a si lo, nan pupa pawl an si); cule nan fapa cu Sabbath ni ah a serh nan tan. 23 Moses Daan buar lonak dingah tiah nan fapa Sabbath ni ah a serh nan tan a si ahcun ziangah so kei in Sabbath ni ih mi pakhat ka damter ruangah ka parah nan thin a heng? 24 A lenglam zohnakin thu ṭhen hlah uh; thudik a sinak zoh in thu ṭhen uh," tiah a ti. 25 Jerusalem khawsungmi ṭhenkhat in, "Judah mi hotu pawl ih thah an tummi pa cu hi pa hi a si lo maw? 26 Zohhnik uh! Mi zapi theihhngan ah duh tawkin thu a sim ih zianghman an ti lo. Hi pa hi Messiah a si tiah an thei ngah ngaingai teh a si pei maw? 27 Sikhalsehla Messiah a rat tikah cun khuitawkin a ra, ti kha zohman in an thei lo ding; asinain hi pa hi cu khuitawk in a ra ti cu kan zatein kan theih ṭheh mi a si fawn," tiah an ti. 28 Jesuh in Biakinn sungah cutiih thu a zirh rero laiah cun, aw ring zetin, "Keimah hi in thei ngaingai maw? Khuitawk ihsin ka ra ti hi nan thei ngah ngaingai maw? Keimah ih thu in ka ra lo. Asinain i thlahtu cu zumtlak ngaingai a si. Nannih in i thlahtu cu nan thei lo, 29 asinain kei cun ka thei, ziangahtile amah in i thlah ih a hnen ihsin ka ra," tiah a ti. 30 Cutikah amah kha kaih an tum, asinain zohman in an kai ngaingai lo; ziangahtile a tikcu a kim hrih lo. 31 Sikhalsehla misenpi sungih mi tampi in an zum ih, "Messiah a rat ngaingai tikah hi pa ih a tuahmi hnakin hmuhsaknak tam deuh a tuah pei maw?" tiah an ti. 32 Jesuh thuhla misenpi in an rel ruri kha Farasi pawl in an theih tikah puithiam upa pawl thawn Jesuh kaitu dingah biakinn kiltu palik pawl an thlah. 33 Jesuh in, "Nan hnenah tikcu malte sung ka umta hrih ding ih cuih hnuah i thlahtu hnenah ka feh ding. 34 In hawl ding na'n in hmu thei lo ding, ziangahtile ka umnak ahcun nan feh thei lo ding," tiah a ti. 35 Judah mi hotu pawl in pakhat le pakhat hnenah, "Kan hmuh thei lonak hmun khuitawkah so feh a tum? Kan minung pawl an umnak Grik khua pakhatkhat ah feh tahratin Grik mi pawl a zirh tum a si pei maw? 36 'In hawl ding na'n in hmu lo ding. Ka umnak ahcun nan feh thei lo ding,' tiah in ti. A sim duhmi ziang a si pei?" tiah an ti aw. 37 Puai tuah ni neta bik le ni sunglawi bik ni ah Jesuh cu a ding ih aw ring zetin, "Zokhal ti a haal mi cu ka hnenah ra sehla ra in seh. 38 Ca Thianghlim in 'Zokhal keimah i zumtu cu a thinlung sung ihsin nunnak tiva a put ding,' tiah a ti vekin a si ding," tiah a sim. 39 Hitiin Jesuh in a sim tikah amah a zumtu hmuahhmuah in Thlarau an ngahnak ding thu kha a sim duhnak a si. Cuih caan ahcun Thlarau kha pek a si hrih lo, ziangahtile Jesuh kha sunlawinak ah thlenter a si hrih lo. 40 Cutiih a ṭongmi kha miburpi lakih ṭhenkhat in an theih tikah, "Hi pa hi profet ngaingai a si," tiah an ti. 41 A dang ṭhenkhat in, "Messiah a si," an ti. Midang in, "Messiah cu Galilee in ra ding a si ual lo! 42 Ca Thianghlim in 'Messiah cu Siangpahrang David tesinfa a si ding ih David a rak umnak Bethlehem khua ah a suak ding,' a ti kha!" tiah an ti. 43 Cutiin Jesuh ih ruangah cun mizapi lakah ṭhenṭhek awknak a um. 44 Mi ṭhenkhat in a kaih an duh, asinain zohman in an kai ngaingai lo. 45 Biakinn kiltu palik pawl an ra kir tikah puithiam upa pawl le Farasi pawl in, "Ziangah so nan ratpi lo?" tiah an sut. 46 Palik pawl cun, "Hi pa bangtuk in zohman an ṭong dah lo," tiah an sawn. 47 Cutikah Farasi pawl in, "Nannih khal a lo bum ngah ve maw si? 48 Judah hotu lakah pakhat tal, a si lole Farasi lakah pakhat tal amah zumtu nan theihmi an um dah maw? 49 Hi misenpi sawh lam cu Moses ih Daan an theih lo ruangah Pathian ih camsiatnak hnuai ah a ummi an si!" tiah an ti. 50 Cutawkih a ummi Farasi mi lakah Nikodemas an timi, Jesuh a rak tong dah zotu kha a um ve. Anih in an hnenah cun, 51 "Kan Daan vekih kan rel a si ahcun mi pakhat cu amah ih hmurka kan theih hlan le a tuahmi kan hmuh ngah hlan ahcun kan hnong thei lo ding," tiah a ti. 52 Cutikah annih in, "Nang khal Galilee mi na si ve maw si? Ca Thianghlim kha siar awla Galilee ihsin profet an suak dah lo, ti kha na thei ko ding," tiah an ti.
1 asinain Jesuh cu Olif Tlang parah a hung feh. 2 A thaisun zingthlapit ah Biakinn ah a feh sal. Mi tampi in an pan, cule Jesuh cu a to ih thu a zirh. 3 Culai fangah Daanthiam saya pawl le Farasi mi pawl in ṭaangṭawm sualnak a tuah laifang rori an kaihmi nunau nu kha an hruai ih zapi hmaiah an dinter. 4 Jesuh hnen ahcun, "Sayapa, hi nunau nu hi ṭaangṭawm sualnak a tuah laifang rori-ih kaihmi a si. 5 Kan Daan sungah Moses ih thupekmi vekin cubangtuk nunau cu lungto in denthat ding a si. Nang ziangti in so na ruah?" tiah an sut. 6 Hitiih an suhnak cu Jesuh kha sual an puh theinak dingih thang an kammi a si. Asinain anih cu a kun ih leilung ah a kutzung in ca a ngan. 7 Cutiin thu an sut rero ruangah cun Jesuh cu dingtein a hung to ih an hnenah, "Nanmah lakah sualnak a tuah dah lomi in hmaisabik ah lungto in deng uh," tiah a ti. 8 Cule a kun sal ih leilung ah ca a ngan sal. 9 Cumi an theih tikah an zatein pakhat hnu pakhat an tlan ṭheh: Upa upa in an tlan hmaisa. Cule Jesuh lawng a taang ih a hmaiah cuih nunau nu lawng a ding. 10 Dingte in a hung to sal ih a hnenah, "Khui ah so an si ṭheh? Mawh a lo phurhtu dingah zohman an taang nawn lo maw?" tiah a sut. 11 Nunau nu cun, "A si Bawipa, zohman an taang lo," tiah a ti. Jesuh in, "Cuti asile kei khal in mawh ka lo phurh lo ding, va tlung awla va sual nawn hlah," tiah a ti.] 12 Jesuh cun Farasi mi pawl hnenah, "Kei cu leilungih tleunak ka si. Zokhal keimah i thluntu cu a nunnak ah tleunak a nei ding ih khawthim sungah a feh dah lo ding," tiah a ti. 13 Farasi pawl cun a hnenah, "Na sinak thu cu nangmah in na sim. Curuangah na simmi hi zianghman lak tlak a si lo," tiah an ti. 14 Jesuh in, "A si lo; keimah ih thu cu keimah in ka sim hmanah ka simmi cu a dikmi a si, ziangahtile khuitawk ihsin ka ra ti le khuitawkah ka feh ding ti ka thei. Nannih cun khuitawk ihsin ka ra ti le khuitawkah ka feh ding ti nan thei lo. 15 Nannih cun minung ih tisa daan in thu nan ṭhen ṭheu; kei cun zo ih par hmanah thuṭhennak ka tuah lo. 16 Asinain thu ka ṭhen hman va sisehla ka thuṭhennak cu a dik ding, ziangahtile hi thuṭhennak ah hin keimah lawng ka si lo, i thlahtu pa khal ka hnenah a um a si. 17 Nan Daan cabu sungah 'Thu theitu pahnih an lung a kimtlang a si ahcun an simmi cu a dik a si,' tiah a um. 18 Keimah ih thu cu keimah in ka sim ih i thlahtu ka Pa khal in ka thu cu a sim ve," tiah a ti. 19 Annih in, "Khuitawkah so na Pa cu a um?" tiah an sut. Jesuh in, "Keimah siseh, ka Pa siseh, in thei lo. Keimah in theih ahcun ka Pa khal nan thei ding," tiah a ti. 20 Hi thu pawl a simnak cu Biakinn sungih thu a zirhnak thawhlawm kuang pawl an retnak khaan ah a simmi a si. Cule zohman in an kai lo, ziangahtile a tikcu a kim hrih lo. 21 Jesuh in an hnenah, "Kei cu ka feh ding; in hawl ding na'n nan sualnak sungah nan thi ding. Ka fehnak ahcun nan feh thei lo ding," tiah a ti. 22 Curuangah Judah mi hotu pawl cun, "Ka fehnak ah nan feh thei lo ding, tiah in ti. Amah le amah thah awk a tum a si pei maw?" tiah an ti. 23 Jesuh in, "Nannih cu hnuailam mi nan si; asinain kei cu tlunlam mi ka si. Nannih cu hi leilung ihsin nan si, kei cu hi leilung ihsin ka si lo. 24 Curuangah a si nan sualnak sungah nan thi ding, ka lo tinak cu! Cule 'Keimah cu Keimah a si mi ka si,' tihi in zum lo a si ahcun nan sualnak sungah nan thi rori ding a si," tiah a ti. 25 Cutikah annih in, "Zoso na si?" tiah an sut. Jesuh in, "A hramthok ihsin ka lo simmi kha a si ko. 26 Nan thuhla hi sim ding tampi ka nei; mawhthluk tlak nan sizia khal hi tampi rel ding ka nei. Asinain i thlahtu cu zumtlak a si ih a hnen ihsin ka theihmi lawng kha hi leilungah hin ka than," tiah a ti. 27 Jesuh in an hnenah Pa ih thu a sim kha an thei lo. 28 Curuangah an hnenah, "Milai Fapa hi nan thlai tikah 'Keimah cu Keimah a si mi ka si,' ti kha nan thei ding. Cule keimah ih thuneihnak in zianghman ka tuah lo; Pa in sim dingih i fialmi lawng ka sim a si ti nan thei ding. 29 Cule i thlahtu cu ka hnenah a um ih keimah lawng i tanta dah lo; ziangahtile amah ih lungkimmi lawnglawng ka tuah a si," tiah a ti. 30 Hi thu a simmi a theitu tampi in Jesuh cu an zum. 31 Curuangah Jesuh in amah a zumtu pawl hnenah, "Ka thu zirhmi nan thlun ahcun keimah ih dungthluntu ngaingai nan si ding; 32 thutak cu nan thei dingih cuih thutak cun a lo luatter ding," tiah a ti. 33 Annih in, "Kannih cu Abraham ih tesinfa kan si ih zo ih sal hman kan si dah lo. 'Miluat nan si ding,' na ti tikah hin ziangso na ti duh san?" tiah an ti. 34 Jesuh in an hnenah, "Thungaite in ka lo sim: zokhal sisehla sualnak a tuahtu cu sualih sal a si. 35 Sal cu innsang sungah kumkhua in a um thei lo; asinain fapa cu innsang sungah kumkhua in a um. 36 Fapa in a lo luatter a si ahcun miluat taktak nan si ding. 37 Abraham ih tesinfa nan si cu ka thei. Asinain a thah in tum thotho, ziangahtile ka thu zirhmi nan pom thei lo. 38 Ka Pa ih i hmuhmi thu ka lo sim; sikhalsehla nannih cun nan pa ih a lo simmi kha nan tuah," tiah a ti. 39 Annih in, "Kan pa cu Abraham a si," tiah an ti. Jesuh in "Abraham ih faate nan si ngaingai ahcun a tuahmi vek nan tuah ding. 40 Ziang hmuahhmuah ka tuahmi hi Pathian hnen ihsin thutak ka theihmi pawl ka lo simnak a si; asinain nannih cun a thah lawnglawng in tum. Abraham in cubangtuk thil zianghman a tuah lo! 41 Nannih nan tuahmi hi cu nan pa ih tuahmi a si," tiah a ti. Annih in, "Pathian amah lawng hi kan Pa cu a si ih kannih hi a fa taktak kan si," tiah an ti. 42 Jesuh in an hnenah, "Pathian hi nan Pa si taktak sehla keimah hi in duh ding; ziangahtile Pathian hnen ihsin ka ra ih atu hinah ka um. Keimah ih thu in ka ra lo; amah ih thlahmi ka si. 43 Ka simmi hi ziangah so nan theih thei lo? Ka thu simmi hi nan tuar thei lo ruangah a si. 44 Nannih cu nan pa Satan ih fa nan si; nan pa ih duhnak nan thlun duh ve a si. A hramthok ihsin anih cu mithat a si ih thutak lam ahcun a ṭang dah lo, ziangahtile anih cu a sungah thutak a um lo. Anih in thuphan a per tikah amah ih si daan a thlun vemi a si, ziangahtile anih cu thuphan pertu a si ih thuphan hmuahhmuah ih pa a si. 45 Asinain kei cun thutak ka sim ih curuangah nannih cun in zum duh lo. 46 Nanmah lakah hin sualnak na tuah a si, tiah i hmuh theitu pakhat tal nan um maw? Thutak ka sim na'n ziangah so in zum duh lo? 47 Pathian hnen ihsin a rami cun Pathian ih ṭongkam a ngai. Sikhalsehla nannih cu Pathian hnen ihsin a rami nan si lo ruangah a thu nan ngai duh lonak hi a si," tiah a ti. 48 Judah mi pawl cun Jesuh cu, "Nang cu Samaria mi na si ih na sungah khuavang a um, kan lo ti tikah kan dik a si lo maw?" tiah an ti. 49 Jesuh in, "Khuavang ka nei lo; kei in ka Pa cu ka sunloih, nannih in kei cu in nautat. 50 Keimah ih hrangah hminthannak ka hawl lo. Asinain sunlawinak a hawltu pakhat a um ih amah cu ka lam ṭangin thuṭhentu a si. 51 Thungaite in ka lo sim: zokhal ka thu a thluntu cu a thi dah lo ding," tiah a ti. 52 Annih in Jesuh cu, "Atu-ah cun khuavang na nei a si, ti kan theifiang sinsin! Ziangtin tile Abraham cu a thi zo, profet pawl khal an thi ṭheh zo; asinain nang in na thu a thluntu cu an thi lo ding, tiah na ti. 53 Kan Pa Abraham cu a thi zo; Abraham hnakih tum sawnah na ruat aw maw si? Cule profet pawl tla an thi zo; zo ka si tiin so na ruah awk?" tiah an ti. 54 Jesuh in, "Keimah ih hminthannak ka hawl a si ahcun cuih hminthannak cu zianghman a si lo ding. Kei i sunloihtu cu ka Pa a si ih 'Kan Pathian a si' nan timi rori hi a si. 55 Nannih cun nan thei dah lo; asinain kei cun ka thei. Amah cu ka thei dah lo ka ti ahcun nanmah vek thotho in thuphan pertu ka si ding. Sikhalsehla amah cu ka thei taktak ih a thu khal ka thlun. 56 Nan pa Abraham cu ka ratnak ding tikcu caan hmuh duh in a hngakhlap zet; a hmu ngah ngaingai ih a lung a awi zet a si," tiah a ti. 57 Annih in, "Kum sawmnga hman na kim hrih lo sikhawh ziangtinso Abraham cu na hmuh?" tiah an ti. 58 Jesuh in, "Thungaite in ka lo sim: Abraham a suah hlan khalah Keimah a si mi ka si," tiah a ti. 59 Cule lungto an sar ih den an tum, asinain Jesuh cu a relh ih Biakinn ihsin a feh hlo.
1 Jesuh cu cutiih a feh rero laiah a suah ihsin a mit a cawmi pa pakhat a hmu. 2 A dungthluntu pawl in, "Sayapa, zo ih sualnak ruangah so mitcaw in a suah? Amah ih sualnak ruangah maw, a nu le a pa ih sualnak ruangah so?" tiah an sut. 3 Jesuh in, "A mit a cawtnak hi amah ih sualnak ruangah a si lo, a nu le a pa ih sualnak ruang khalah a si lo. Pathian thil ti theinak hi hi pa damternak ihsin a langnak ding ah a si. 4 Sun a si sung ahcun i thlahtu ih hna kan ṭuan rero a ṭul. Zan a ra thleng cing ding ih zohman hna an ṭuan thei nawn lo ding. 5 Leilung tlunih ka um sungah cun keimah hi leilung tleunak ka si," tiah a ti. 6 Cutiih a ti hnuah Jesuh in leilungah cil a phui ih cuih a cil in leivut a beekter hnuah cu pa ih mit ahcun a man. 7 Cu hnuah, "Va feh awla Siloam Tili ah na hmai va phiah aw," tiah a ti. Siloam timi cu Tirhthlah tican a si. Cuti cun cupa cu a feh ih a hmai cu a phiah, khua a hmu thei sal ih a ra kir. 8 A innhnen pawl le tuih hlanih rawl dil in a hmu ṭheutu pawl in "Hi pa hi to hmun in tangka a dil ṭheutu kha a si lo maw?" tiah an ti. 9 Mi ṭhenkhat in, "Amah a si ko," tiah an ti. Midang in, "Amah a si lo; amah vek midang a si," tiah an ti. Cupa amah rori in, "Nan timi pa cu ka si," tiah a ti. 10 Annih in, "Ziangtin so atu-ah khua na hmuh thei sal?" tiah an sut. 11 Anih in, "Jesuh an timi pa in ciarbek malte a tuah ih ka mit ah i man hnu ah Siloam ah va feh awla na hmai va phiah aw tiah i ti. A ti vekin ka feh ih ka hmai ka phiah vete in khua ka hmu thei sal a si," tiah a ti. 12 Annih in, "Cupa cu khui-ah so a um?" tiah an sut. Anih in, "Ka thei lo," a ti. 13 Cule annih in mitcaw dah pa cu Farasi pawl hnenah an fehpi. 14 Jesuh in ciarbek a tuah ih a mitcawtnak a damter ni cu Sabbath ni a si. 15 Curuangah Farasi mi pawl cun a mit khua a hmuhnak thu cu an sut sal. Anih in, "Ka mit ah ciarbek a run hnih, cule ka hmai ka phiah ih ka hmu thei a si ko," tiah a ti. 16 Farasi mi ṭhenkhat in, "Hi bangtuk thil a tuahtu pa cu Pathian hnen ihsin a rami a si thei lo ding, ziangahtile Sabbath daan a thlun lo a si," tiah an ti. Midang pawl in, "Misual a si ahcun hi bangtuk hmuhsaknak cu ziangtinso a tuah thei ding?" tiah an ti ve. Cutiin an lakah ṭhenawknak a um. 17 Curuangah Farasi mi pawl in cupa cu thu an sut sal ih, "Na mit a lo vangter sikhawh cupa cu ziangti in na ruat?" tiah an sut. Anih in, "Profet a si tiah ka ruat," tiah a ti. 18 Judah mi hotu pawl cun mitcaw pa thu cu a nu le a pa an sut ngah hlanah cun mitcaw in a suak ih atu-ah khua a hmu thei ticu an zum duh hrimhrim lo. Curuangah a nu le a pa cu an ko ih, 19 "Hi pa hi nan fa a si maw? Mitcaw in a suak tiah nan ti; cuti asile ziangtinso atu-ah khua a hmuh thei?" tiah an sut. 20 A nu le a pa cun, "Amah hi kan fapa a si ti kan thei; cule mitcaw in a suak ti kan thei. 21 Sikhalsehla ziangti in atu-ah khua a hmu thei ti le a mitcawtnak hi zo in a damter ti khal kan thei lo. Amah sut uh; upa a si ve thlang ih amah in a lo let thei ko hai ding," tiah an ti. 22 A nu le a pa cun cutiin an sim, ziangahtile Judah mi hotu pawl an ṭih ruangah a si. Judah mi hotu pawl cun: zokhal Jesuh hi Messiah a si tiah ka zum a timi poh cu sinakok ihsin suah siseh, tiah lungkimnak an rak nei zo. 23 Curuangah a nu le a pa in, "Upa a si ve thlang ih amah sut uh," tiah an tinak cu a si. 24 Mitcaw pa cu a voihnihnak an ko sal ih, "Thudik ka sim ding tiah Pathian hmaiah thu kam aw! A lo damtertu pa hi misual a si hrimhrim ti kan thei," tiah an ti. 25 Cupa cun, "Misual a si le si lo kei ka thei lo. Asinain pakhat cu ka thei: ka mit a rak caw na'n atu cu khua ka hmu thei zo," tiah a ti. 26 Annih in, "Ziangtin so a lo tuah?" tiah an sut. "Na mit cawtnak cu ziangtinso a lo damter?" tiah an ti. 27 Anih in, "Ka lo sim zo hai na'n nan ngai duh lo. Ziangah so a theih sal cu nan duh? Nannih tla amah thluntu si nan duh ve maw si?" tiah a ti. 28 Cutikah annih in cupa cu an camriam ih, "Nangmah sawn hi cupa ih dungthluntu na si. Kannih cu Moses thluntu kan si. 29 Pathian in Moses hnenah thu a sim, ti kan thei; sikhalsehla kha pa cu khuitawkin a ra ti hman kan thei dah lo!" tiah an ti. 30 Cupa cun, "Hi thil cu a va mak so! Nannih cun khuitawk ihsin a ra ti nan thei lo, asinain kei cu ka mitcaw i vanter! 31 Pathian in misual pawl ih ṭongkam a ngai dah lo ti kan thei; asinain amah a upattu le a duhnak a tuahtu pawl ih ṭongkam cu a ngai a si. 32 Mitcaw ciaih a suakmi khua a hmuter theitu an um ti hi leilung hramthok ihsin zohman in kan thei dah lo. 33 Hi pa hi Pathian hnen ihsin rami a si lo ahcun zianghman tuah theimi a nei lo ding," tiah a ti. 34 Annih in, "Sualnak sungah a suak ih sualnak lakih a ṭhang mi pa nang lamlam in maw thuzirh in tum ve?" tiah an ti ih sinakok inn ihsin an dawihlo. 35 Cubangtuk thil hmuahhmuah cu Jesuh in a theih tikah cupa cu a hmu ih, "Milai Fapa hi na zum maw?" tiah a sut. 36 Cupa cun "Bawipa, cupa cu zoso a si? Amah ka zum theinak dingah i simhnik aw!" tiah a ti. 37 Jesuh in, "Amah cu na tong zo ih atuih a lo bia rerotu hi a si!" tiah a ti. 38 Cupa in, "Bawipa, ka zum!" ti phah in Jesuh hmaiah cun a khuk a bilh ih a biak. 39 Jesuh in, "Hi leilungah hin thuṭhen dingah ka ra; cumicu mitcaw in khua an hmu ih khua a hmumi pawl in an mit a cawtnak dingah a si," tiah a ti. 40 Farasi mi ṭhenkhat cutawkah an um ih cutiih a simmi a theitu pawl in, "Kannih khal hi mitcaw nan si ve in ti duhnak a si maw?" tiah an sut. 41 Jesuh in, "Mitcaw rak si uhcila mawhthluk nan si lo ding; sikhalsehla khua kan hmu thei nan ti ruangah hin mawhthluk nan si ih nan sualnak cu a taanglai a si," tiah a ti.
1 Jesuh in, "Thungaite in ka lo sim: tuu inn sungah sangka in lut loin hmun dang in a kai ih a luttu cu rukru le suamhmang an si. 2 sangka in a luttu cu tuu a khaaltu a si. 3 sangka kiltu pa in a hrangah sangka cu a on sak. A tuu pawl cu an hminin a ko ih a aw cu an thei ih lengah a suahpi. 4 Cutiih a suahpi hnuah a tuu pawl hmaiah a feh ih a tuu in an thlun; ziangahtile a aw kha an thei. 5 Midang cu zohman an thlun lo ding; ziangahtile a aw an theih thiam lo ruangah a hnen ihsin an tlan hlo sawn ding," tiah a ti. 6 Jesuh in hi tahṭhimnak hi a sim, asinain a sim duhmi ih tican cu an thei thei lo. 7 Jesuh in hiti in a sim sal, "Thungaite in ka lo sim: Kei cu tuu hrangah sangka ka si. 8 Ka hlan ih a ratu hmuahhmuah cu rukru le suamhmang an si ruangah tuu in an aw an ngai lo. 9 Kei cu sangka ka si. Keimah ih sungin a luttu cu rundammi a si ding. An lut an suak ding ih hrampi a hningmi an hmu ding. 10 Rukru cu ru ding, that ding le siatsuah ding lawnglawngah a ra. Kei cu nunnak an ngah ih tlamtling zetih an neihnak dingah ka ra a si. 11 Kei cu tuukhal ṭha, tuu hrangih a nunnak a pe siangtu ka si. 12 Tuukhal ngaingai a si lomi, a man phalh in fialcop mipa, amah in tuu a nei dah ve lomi cun cinghnia a rat kha a hmuh tikah tuu kha a tanta ih a tlan hlohsan. Cutiin cinghnia in a tuu cu a deh ih a ṭhekdarh ṭheh. 13 Manphalh ih fial mipa cu a tlan hlo, ziangahtile man phalhcop menmi a si ih tuu zawn a ruat ngaingai lo. 14 Kei cu tuukhal ṭha ka si. Ka Pa in i thei ih kei khal in ka Pa cu ka theih vekin ka tuu pawl cu ka thei ih annih khal in in thei ve. Cule an hrangah ka nunnak tiangin ka pe siang a si. 16 Hi tuurual sungih a tel lomi tuu dang ka nei. Annih khal ka finkhawm ve hai ding. Ka aw an thei ding ih tuukhal pakhat hnuai-ah tuuruun pakhat ah an cang ding! 17 Pa in i duhdawt, ziangahtile ka nunnak hi lungtho tein ka pek siang a si; cutiih ka pek siannak cu ka lak sal theinak dingah a si. 18 Ka nunnak cu zohman in in lak sak thei lo. Keimahte siang zetin ka pekmi a si. Keimah in pek theinak thu ka nei ih lak sal theinak thu khal ka nei. Cumi cu ka tuah dingah ka Pa in thu i pek zomi a si," tiah a ti. 19 Cutiih a ṭong ruangah mipi pawl cu an ruahnak a ṭhen aw lala. 20 Mi tampi in, "Khuavang a nei. A aa thla a si! Ziangah so a thu nan ngai?" tiah an ti. 21 Asinain mi ṭhenkhat in, "Khuavang nei cun hi bangtuk in a ṭong lo ding! Ziangtin so khuavang nei in mitcaw cu a damter thei ding?" tiah an ti ve. 22 Khawsik laifang a si ih Biakinn Apnak Puai kha Jerusalem ah an tuah rero laifang a si. 23 Biakinn sungih Solomon Hulhliap timi ah Jesuh a feh laiah, 24 Judah mi an ra ih, "Ziangtik tiangso awloksong in in ret ding? Thufel in simhnik: Messiah na si maw?" tiah an sut. 25 Jesuh in, "Ka lo sim zo na'n in zum duh lo. Ka Pa ih thu in ka tuahmi thil pawl hin ka thuhla hmuahhmuah cu an langter ṭheh a si. 26 Asinain ka tuurual nan si lo ruangah nan zum lo. 27 Ka tuu pawl cun ka aw an ngai; keimah in ka thei hai ih annih in in thlun. 28 An hnenah kumkhua nunnak ka pek ih ziangtik hmanah an thi nawn lo ding. Zohman in in lawng thei fawn lo ding. 29 Anmah ka hnenih i petu ka Pa cu ziangzongza hnakin a tum ih amah ih kut sung ihsin zohman in an lawng thei lo ding. 30 Ka Pa le keimah cu pakhat kan si," tiah a ti. 31 Cun mipi in amah deng dingah lungto an sar lala. 32 Jesuh in an hnenah, "Nan mit hmuh rori ah ka Pa in tuah dingih i fialmi thil ṭha tampi ka tuah zo; khuimi bik ruangah hin so lungto ih den in tum?" tiah a sut. 33 Annih in, "Lungto ih kan lo den duhnak cu thil ṭha na tuahmi ruangah a si lo, Pathian na hmuhsuam ruangah a si sawn! Nang cu milai menmen na si, asinain Pathian tlukah na tuah aw!" tiah an ti. 34 Jesuh in an hnen ah, "Nan Daan cabu sungah Pathian in 'Nannih cu pathian nan si,' ti in nganmi a um. 35 Ca Thianghlim ih simmi cu kumkhua in a dikmi a si ti kan thei; cule Pathian in a thu a simmi minung pawl kha 'pathian,' tiin a ko hai. 36 Kei cu ka Pa ih hrilmi le leilung ah i thlahmi ka si. Cuti asile ziangtinso keimah hi Pathian Fapa ka si ka ti ruangah Pathian hmuhsuamtu na si, in ti thei? 37 Ka Pa ih duhmi thil pawl ka tuah lo a si ahcun i zum duh hlah uh! 38 Sikhalsehla ka tuah a si ahcun keimah in zum duh lo hmanah ka tuahmi tal cu nan zum dingah a mawi a si; cuticun Pa cu ka sungah a um ih Pa sungah kei ka um a si, ti nan theih ringringnak dingah a si," tiah a ti. 39 Cutikah Jesuh cu a kaih an tum lala, asinain an kaih ngah hlanah a suak hlo. 40 Cun Jesuh cu Jordan tiva khatlam ral, Johan in baptisma a rak peknak hmunah khan a va kir sal ih cunah a caam. 41 Mi tampi a hnenah an ra ih, "Johan in hmuhsaknak zianghman a tuah lo. Asinain hi pa ih thuhla a simmi hmuahhmuah cu a dik ṭheh a si," an ti. 42 Cutawkah mi tampi in amah cu an zum.
1 Bethani khua ih a ummi Lazaras an timi pa cu a na. Bethani cu Mari le a u Martha an umnak khua a si. 2 Hi Mari cu Bawipa ih ke ah zihmui a toih ih a sam in a hnawttu nu kha a si. A na mi Lazaras cu a ṭa a si. 3 An unau in Jesuh hnenah, "Bawipa, na duhdawtmi na rualpa a na a si," tiah thu an hei cah. 4 Cumi cu Jesuh in a theih tikah, "Hi natnak cu Lazaras ih thihnak ding natnak a si lo. Hi natnak cu Pathian sunlawinak langter dingah le Pathian Fapa in sunlawinak a ngahnak ding khalah a si," tiah a ti. 5 Jesuh in Martha le a nau nu le Lazaras cu a duhdawt zet. 6 Asinain Lazaras a na ti thu a theih hnuah cuih a umnak ahcun a hlei in ni hnih a caam ta. 7 Cule a dungthluntu pawl hnenah, "Judea ah va feh sal uhsi," tiah a ti. 8 Dungthluntu pawl cun, "Sayapa, kan dung rei lote ah mipi in cutawkah lungto in den an lo tum zo; atu na va feh sal ding maw?" tiah an ti. 9 Jesuh in, "Ni khatah nazi hleihnih a um a si lo maw? Zokhal sun vangih a fehtu cu a bah dah lo, ziangahtile leilungih a ummi tleunak a hmu. 10 Sikhalsehla khawthim sungih a feh ahcun a bah, ziangahtile tleunak a nei lo a si," tiah a ti. 11 Cumi a sim ṭheh in Jesuh cun, "Kan rual Lazaras cu a itthat zo; asinain ka feh ding ih ka va ṭhang ding," tiah a ti. 12 Dungthluntu pawl in, "Bawipa, a it a si ahcun a dam ko ding," an ti. 13 Jesuh ih sim duhmi cu Lazaras a thi, tinak kha a si ih dungthluntu pawl cun itthat menmen a ti si hmang, tiah an ruat. 14 Curuangah Jesuh in fiangtein a sim ih, "Lazaras cu a thi zo; 15 asinain nan hrangah nan zum theinak dingah a hnenih ka rak um lo cu ka lung a awi a si; tho uhla a hnenah kan feh pei," tiah a ti. 16 Thomas (Faphir an timi pa) in dungthluntu a rualpi pawl hnenah, "Sayapa thawn thi tlang dingah feh uhsi," tiah a ti. 17 Jesuh a va thlen tikah Lazaras an phumnak ni li a si zo. 18 Bethani cu Jerusalem ihsin peng hnih kim deuh lo a si ih, 19 Judah mi tampi cu an ṭapa ih thih sanmi Martha le Mari topi dingah an ra. 20 Jesuh a ra lai rero ti kha Martha in a theih tikah amah hmuak dingah a feh, asinain Mari cu inn ah a um. 21 Martha cun Jesuh hnenah, "Bawipa, hinah rak um ta cila ka ṭapa cu a thi lo ding na'n! 22 Sikhalsehla atu hmanah hin Pathian in na dilmi cu a lo pe ko ding ti ka thei," tiah a ti. 23 Jesuh in, "Na ṭapa cu a nung sal ding," tiah Martha cu a ti. 24 Martha in, "A si, ni neta bikah cun a tho sal leh ding ti cu ka thei," tiah a let. 25 Jesuh in a hnenah, "Kei cu thawhsalnak le nunnak ka si. Zokhal keimah i zumtu cu thi hmansehla an nung ding. 26 Zokhal keimah sungah a nungmi le i zumtu cu an thi nawn lo ding. Himi hi na zum maw?" tiah a sut. 27 Martha in, "A si Bawipa, nang cu leilung ah a ra dingmi Pathian ih Fapa Messiah na si ti ka lo zum," tiah a ti. 28 Cutiih a sim hnuah Martha cu a vung kir ih a thupte in a nau Mari kha a ko. "Sayapa hinah a um ih a lo hlam a si," tiah a ti. 29 Cumi cu Mari in a theih tikah a pok ih hmuak dingah zamrangin a va feh. 30 Jesuh cu khawsungah a ra thleng hrih lo; Martha ih a tonnak hmun ah khan a um lai hrih. 31 Mari a topitu le a hnemtu pawl cu Mari a pok ih zamrangin a feh kha an hmuh tikah amah cu an thlun ve. Thlaan ah a va ṭap hmang ding tiah an ruat. 32 Jesuh umnak ahcun Mari cu a va thleng ih Jesuh a hmuh vete in a ke hramah cun a khuk a bilh ih, "Bawipa, hitawk ah rak umta cila ka ṭapa a thi lo ding na'n!" tiah a ti. 33 Jesuh in Mari le a topitu mipi pawl tla an ṭah kha a hmuh tikah a thin a na ih a lung a hno. 34 "Khuitawkah so nan phum?" tiah a sut. Annih in, "Bawipa, ra awla ra zoh aw," tiah an ti. 35 Cule Jesuh cu a ṭap. 36 Mipi in, "Lazaras cu a va duhdawt lawmmam so!" tiah an ti. 37 Asinain mi ṭhenkhat in, "Mitcaw pa mit a vangter a si lo maw? Lazaras hi thi loin ziangah so a tuah ve lo?" tiah an ti. 38 Jesuh cu a ning a hang ngaingai ih thlaan ah a va feh. Cuih thlaan cu lungkua a si ih a ka cu lungpheng pakhat in an khar. 39 Jesuh in, "Lungpheng hi ṭhawn uh," tiah thu a pek. Mithi pa ih farnu Martha in, "Bawipa, a nam zo ding. Kan phumnak ni li a si zo!" tiah a ti. 40 Jesuh in a hnenah, "Na zum taktak a si ahcun Pathian sunlawinak na hmu ding, tiah ka lo sim zo a si lo maw?" tiah a ti. 41 Cule lungpheng cu an ṭhawn. Jesuh in tlunlam a hun zoh ih, "Ka Pa, ka simmi i ngai ruangah na parah ka lung a awi. 42 Ka ṭong i theih sak ringring ti ka thei, asinain hitawk ih a ummi pawl hin nangmah thlahmi ka si kha an zum theinak dingah anmah ruangah hiti ih ka lo simnak hi a si," tiah a ti. 43 Cutiih a sim hnuah aw ring zetin, "Lazaras, ra suak aw!" tiah a au. 44 Lazaras cu, a kut le a ke ruaktuamnak puan in an tuam ih a hmai tla an tuam; cutiih an ṭemnak thawn a ra suak ngaingai. Jesuh in, "Phoih uhla feh seh!" tiah a ti. 45 Mari topi dingih a rami Judah mi tampi in Jesuh ih thil tuahmi cu an hmuh tikah amah cu an zum. 46 Asinain mi ṭhenkhat cu Farasi pawl hnenah an kir ih Jesuh ih thil tuahmi cu an sim ṭheh. 47 Curuangah Farasi pawl le puithiam upa pawl cu Khonsil pawl thawn an tong aw ih, "Ziangtin so kan tuah ding? Hi pa ih hmuhsaknak a tuah vivomi hi zohhnik uh! 48 Hitiih kan zoh men ringring a si ahcun mi hmuahhmuah in amah hi an zum ding ih cutikah Rom Acozah thuneitu pawl in kan Biakinn le kan miphun an siatsuah ṭheh ding a si," tiah an ti. 49 Anmah lakih mi pakhat, Kaiafas an timi, cuih kumah Puithiam Saang a ṭuantu in, "Nan va aa so! 50 Mi tampi ai-ih mi pakhat thih cu miphun phunkhat a pumpi ih siatral ṭheh hnak cun a ṭha deuh a si, ti nan thei lo maw si?" tiah a ti. 51 A ngaingai ti ahcun cutiih a ṭong cu a palungih ṭongmi a si lo; cuih kum cu amah Puithiam Saang a si vekin Judah miphun ai-ah Jesuh cu a thi ding, tiah profet bangin a rak simsungmi a si. 52 A thihnak ding cu anmah hrang lawngah si loin hmun kipih a ṭhekdarh awmi Pathian minung pawl pumkhat ih finkhawmnak ding khalah a si. 53 Cuih ni thok ihsin Judah mi hotu pawl cun Jesuh that dingah thu an phiar. 54 Curuangah Judea pengah Jesuh cu zapi hmuh in khual a tlawng nawn lo; cutawk ihsin a suak ih ramṭhing kiangih a ummi Efraim an timi khua ah a feh ih cunah a dungthluntu pawl thawn an um. 55 Judah mi pawl ih Lantak Puai caan a nai thlang ih mi tampi cu puai tuah hlan thianfaiter awknak tuah dingah an khawte ihsin Jerusalem ah an feh ciamco. 56 Annih in Jesuh cu an hawl; Biakinn sungih an tonkhawm awk tikah pakhat le pakhat, "Ziangtin nan ruat? Puai tuahnak ahcun a ra ngai pei maw?" tiah an sut aw. 57 Puithiam upa le Farasi pawl in, "Jesuh umnak a theitu nan um ahcun kan kaih theinak dingah in sim pei," tiah thu an than.
1 Lantak Puai hlan ni ruk ah Jesuh cu Bethani ah thihnak ihsin a thawhter sal mi Lazaras te ih inn ah khan a va feh. 2 Cutawkah a hrangah zanriah an suang ih Martha in rawl pek a bawm. Jesuh thawn cabuai ih rawl a eitu lakah Lazaras cu a tel ve. 3 Cule Mari in a phun a ṭha zet le a man a khung zetmi zihmui thawl khat a lak ih Jesuh ih ke ah a toih hnuah a sam in a hnawtsak. Cuih zihmui rim cu inn sung a khat ṭheh. 4 Jesuh dungthluntu lakih pakhat, Jesuh a zuartu ding Judas Iskariot in, 5 "Ziangah so hi zihmui cu tangka zathum ah zuar in cuih tangka cu mi farah an ṭhen sawn lo?" tiah a ti. 6 Hitiih a sim tikah mi farah pawl zawn a ruah ruangah a si lo; rukru a si ruangah a si sawn. Tangka bawm kha amah in a keng ih cuih tangka cu amah hrangah a hmang ṭheu. 7 Sikhalsehla Jesuh in, "Hi nu hi mawhthluk hlah uh! Ka ruak phum ni hrangih a tuah dingmi cu tuah ko seh. 8 Mifarah cu nan lakah an um ringring ko ding; asinain kei cu nan lakah ka um ringring lo ding," tiah a ti. 9 Judah mi tampi in Bethani ah Jesuh a um ti an theih tikah cutawkah cun an feh. Jesuh hmuh duh lawngah si loin Jesuh in thlaan ihsin a thawhter salmi Lazaras hmuh duh hrimhrim ah an feh. 10 Curuangah puithiam upa pawl in Lazaras khal thah ve dingah thu an ruat. 11 Ziangahtile Judah mi tampi in Lazaras ruangah hin anmah puithiam upa pawl cu hnon an tong ih Jesuh sawn kha an zum ruangah a si. 12 A thaisun ah Lantak Puai ih a rami miburpi in Jesuh cu Jerusalem ah a ra ding, ti kha an thei. 13 Cuhrangah tuum hnah an lak ih amah hmuak dingah feh phah in, "Pathian cu thangṭhat uh! Bawipa ih hminin a ratu cu Pathian in thlawsuahnak pe hram seh! Pathian in Israel Siangpahrang cu malsawm hram seh!" tiah an au ciamco. 14 Jesuh in laak note pakhat a hmu ih a parah a to; Ca Thianghlim in: 15 "Maw Zion khawpi, Na thinphang hlah; Na Siangpahrang cu laak note parah to-in a ra lai a si," tiah a ti bangtuk in a kim a si. 16 A dungthluntu pawl in culaiah cun hi thu ih tican hi an rak thei lo. Asinain Jesuh kha sunlawinak ih thawhter sal a si tikah amah thu-ah hin Ca Thianghlim in hi bangtuk in a rak sim ih amah hrangah hi bangtuk in an tuah a si, ti kha an vun mang sal. 17 Jesuh in Lazaras kha thlaan ihsin a ko suak ih thihnak ihsin a thawhter laiih a rak hmu vetu mi tampi in cuih thu cu midang tampi an sim sin. 18 Cubangtuk hmuhsaknak a tuah a si ti kha an theih ruangah miburpi in an rak hmuahnak a si. 19 Cutikah Farasi pawl cun, "Kan ti tho lo maw; kan kham thei nawn lo hi! Zohhnik uh, leilung pumpi in a thlun zo hi!" tiah pakhat le pakhat an ti aw. 20 Cuih puai ih Pathian bia dingah Jerusalem ih a hung fehtu mi tampi lakah cun Grik mi tla an tel ve. 21 Filip hnenah an feh ih, "Sayapa, Jesuh hmuh kan duh," tiah an va ti. Filip cu Galilee peng Bethsaida khuami a si. 22 Filip cu Andru hnenah a feh ih a va sim; cule an pahnih in Jesuh hnenah an va feh ih an va sim. 23 Jesuh in an hnenah, "Milai Fapa in sunlawinak a ngahnak caan a ra thleng zo. 24 Thungaite in ka lo sim: sangvut ci fangkhat cu lei lung sungah tuh ih a thihta lo ahcun amah keel in a taang ringring. A thihta hnu lawngah ci tampi a suahter. 25 Cubangtuk in zokhal amah ih nunnak a duhtu cun a nunnak cu a sung ding; asinain zokhal hi leilung ah amah ih nunnak a huatu cun kumkhua hrangin a nunnak cu a neita ding. 26 Zokhal keimah i rian duhtu cun i thlun hrimhrim a ṭul ding ih ka umnak ah a um ve ding. Cule zokhal keimah i riantu cu ka Pa in upatnak a pe ding," tiah a ti. 27 Jesuh in, "Ka thinlung a baang tuk; ziangso ka sim ding? 'Ka Pa, hi caan hi ka parah thlenter hram hlah aw,' ka ti ding maw? Asinain hi tuarnak sungih thleng dingah leilung tlunih ka rat sannak cu hihi a si fawn! 28 Ka Pa, na hmin cu sunloih ko aw," tiah a ti. Cule van ihsin aw a rung thang ih, "Ka sunloih zo ih ka sunloih sal hrih ding," tiah a ti. 29 Cuih aw cu cutawkih a dingmi miburpi in an theih tikah mi ṭhenkhat in, "Khua a ri," tiah an ti; a ṭhen in, "Vancungmi in a run bia a si," an ti. 30 Sikhalsehla Jesuh in an hnenah, "Hi aw a rung than hi keimah ih hrangah a si lo, nanmah ih hrangah a si sawn. 31 Hi leilung hi thuṭhennak a ton caan a kim zo; atu-ah hi leilung uktu cu dawi hlo a si ding. 32 Leilung ihsin khai ka si tikah mi hmuahhmuah ka hnenah ka hiip thluh ding," tiah a ti. 33 Hitiih a ti tikah ziangbangtuk thihnak a tuar ding ti kha a langternak a si. 34 Miburpi in, "Kan Daan in Messiah cu kumkhua in a nung ding, tiah in sim. Cuti asile ziangtinso Milai Fapa cu khai a si ding tiah nang in na ti? Hi Milai Fapa hi zoso a si?" tiah an ti. 35 Jesuh in, "Tleunak cu nan hnenah tikcu malte sung a um hrih ding. Tleunak nan neih sungah nan fehnak lamzinah cun feh hrih ko uh; cuti cun thimnak in a lo man lo ding; ziangahtile khawthim sungih a feh pawl cun khuilamah kan feh ti an thei lo. 36 Cuhrangah tleunak nan neih laiah cun, tleunak ih minung nan si theinak dingah, tleunak cu zum uh," tiah a ti. Cutiih Jesuh in a sim hnuah a suak ih an hmuh thei lonak hmun ah a relh. 37 An mithmuh rori ah hmuhsaknak tampi a tuah na'n amah cu an zum lo. 38 Cumi cu profet Isaiah in: "Bawipa, kan thu simmi cu zo in so an zum? Zo hnenah so Bawipa in a huham a langter?" tiah a rak timi a kimnak dingah a si. 39 Cule an zum thei thotho lo, ziangahtile Isaiah thotho in: 40 "Pathian in an mit a cawtter ih, An thinlung khal a pitter. Cuti a si lo ahcun an mit in an hmu pang ding ih, An thinlung in an thei pang ding; Ka lam an hoi pang ding ih, A dam tla ka damter pang ding, tiah Pathian in a ti," tiin a rak sim fawn. 41 Isaiah in hiti a simnak cu Jesuh sunlawinak kha a rak hmu cia zo ih a thu khal a rak sim zo ruangah a si. 42 Cutiin a si ruangah Judah mi hotu tampi in Jesuh cu an zum; Sikhalsehla Farasi pawl in sinakok ihsin in suah pang ding ti phan ah Jesuh an zumnak cu langhngan in an sim ngam lo. 43 Pathian hnenih sunlawinak ngah hnakin minung hnenih sunlawinak ngah an duh sawn. 44 Jesuh cun aw ring zetin, "Zokhal keimah i zumtu cu keimah i zum lawng a si lo, i thlahtu khal a zum a si. 45 Zokhal keimah i hmutu cu i thlahtu khal a hmu a si. 46 Zokhal keimah i zumtu cu khawthim sungih a um lonak dingah hi leilung tlunah hin tleunak in ka ra zo. 47 Zokhal ka thu simmi a thei ih a thlun lotu cu kei cun a thu ka ṭhen lo ding. Leilung thuṭhen dingah ka ra lo, rundam dingah ka ra. 48 Zokhal i hnongtu le ka thu simmi a pom lotu cu thuṭhentu pakhat a nei. Ka ṭongmi hi ni neta bik ni ah a thuṭhentu ah a cang ding! 49 Ziangahtile keimah thuneihnak huham ih ka simmi a si lo, i thlahtu ka Pa in ka ṭong ding le ka sim ding kha thu i pek vekin ka sim a si. 50 Cule a thupekmi cu kumkhua nunnak a si ti ka thei. Curuangah ka simmi hi ka Pa in sim dingih i fialmi a si," tiah a ti.
1 Lantak Puai ni a thlennak ding ni khat lawng a duh thlang. Jesuh in hi leilung fehsan in a Pa hnenih a fehnak tikcu a ra thleng zo ti kha a thei. Leilung tlunih a ummi amah ih ta a si mi pawl cu a duhdawt zet ringring ih a netnak tiangin a duhdawt. 2 Jesuh le a dungthluntu pawl cu zanriah an hil tlang. Satan in Jesuh zuarnak ding ruahnak cu Simon Iskariot ih fapa Judas thinlung sungah a umter zo. 3 Ka Pa in thuneihnak hmuahhmuah i pe zo ti kha Jesuh in a thei; Pathian hnen ihsin ka ra ih Pathian hnenah ka feh sal ding ti khal a thei. 4 Curuangah cabuai ihsin a tho ih a angki fual a phoih hnuah taaingerh puante a taai ah a vel. 5 Cule kheng kuumpi sungah tidai a thlet hnuah a dungthlun pawl ih ke a kholhsak ih a taai ih a velmi puante in a hnawt vivo. 6 Simon Piter hnen a thlen tikah anih in, "Bawipa, ka ke i kholh ngaingai ding maw?" tiah a sut. 7 Jesuh in, "Hitiih ka tuahmi hi atu ahcun a sullam na thei lo, asinain neh hnuah na thei sal leh ding," a ti. 8 Piter in, "Ka ke cu ziangtik khalah i kholhsak hrimhrim lo ding," a ti. Jesuh in, "Na ke ka lo kholh lo a si ahcun ka hnenah na tel thei nawn lo ding," tiah a ti. 9 Simon Piter in, "Bawipa, cuti a si ahcun, ka ke lawng i kholh hlah! Ka kut le ka lu khal i kholh aw," tiah a ti. 10 Jesuh in, "Zokhal tikholh cia a si mi cu a pumpuluk in a fai zo; a ke dah ti lo cu a kholh awk sal a ṭul lo. Nan zatein nan fai ṭheh zo, pakhat siar lo cu!" tiah a ti. 11 Jesuh in zo in so i zuar ding, ti a thei cia. Curuangah nan zatein nan thiang a si, pakhat siar lo cu, tiah a tinak a si. 12 Jesuh cu a dungthluntu pawl ih ke a kholhsak hnuah a angki fual cu a hruk sal ih a tonak cabuai ah a to sal. "Atu nan parih ka tuahmi thil hi a tican nan thei maw? 13 Nannih in, 'Sayapa,' tile 'Bawipa,' tiin in ko ih nan dik a si, ziangahtile in ti vekin ka si ngaingai. 14 Nan Bawipa le nan Sayapa keimah in nan ke ka lo kholh zo. Curuangah nannih khal pakhat le pakhat nan ke nan kholh aw ve pei. 15 Nan hrangih thil ka tuahmi vek cekci in nan tuah venak dingah nan mithmuh ah zohṭhim ding ka tuah zo. 16 Thungaite in ka lo sim: sal cu a bawipa hnakin a tum sawn lo; tirhthlahmi khal thlahtu hnakin a tum sawn dah lo. 17 Hi thu pawl nan thei zo ih nan thlun ngaingai a si ahcun ziangtluk mi lungawi so nan si ding? 18 "Hitiih ka ṭong tikah nan zate ih thu ka rel lo. Ka hrilmi pawl cu keimah in ka thei. Sikhalsehla Ca Thianghlim in 'Keimah thawn rawl a ei tlangtu pa in i dodal a si,' a timi cu a kim a ṭul a si. 19 Hi thil cu a kim hlanah ka lo sim: cutiin a hung kim ngaingai tikah 'Keimah cu Keimah a si mi ka si' tihi nan zum leh ding. 20 Thungaite in ka lo sim: Keimah ih ka tirhthlahmi zokhal a rak pomtu cu keimah khal i pom a si; cule keimah i pomtu cu keimah i thlahtu khal a pom ve a si," tiah a ti. 21 Cutiin Jesuh in a sim hnuah a thin a nuam lo ngaingai ih langhngan in, "Thungaite in ka lo sim: nanmah lakah pakhat in i zuar ding," tiah a ti. 22 Dungthluntu pawl cu pakhat le pakhat an zoh aw ih a tisanmi hi zo a si pei tiah mangbang awloksong in an um. 23 Dungthluntu lakih pakhat, Jesuh ih a duh zetmi pa cu Jesuh kiang ah a to. 24 Simon Piter in cupa cu a kut a hei zaap ih, "A tisanmi zo a si, sut hnik," tiah a ti. 25 Curuangah dungthluntu cun Jesuh a hei naih deuh ih, "Na tisanmi hi zoso a si, Bawipa?" tiah a sut. 26 Jesuh in, "Sang hi kheng sungah ka hnim pei ih ka pek dingmi pa hi a si," tiah a ti. Cutiin Jesuh in saang hlom khat a lak ih a hnim hnuah Simon Iskariot ih fapa Judas hnenah a pek. 27 Judas in cuih sang a lak vete in a sungah Satan a lut. Jesuh in a hnen ah, "Na tuah dingmi cu zamrangin tuah hmen!" tiah a ti. 28 Cabuai kiangih a totu dang zokhal in ziang ruangah Judas hnenah cutiin a sim ti an thei lo. 29 Judas cu tangka dip kengtu a si ruangah dungthluntu ṭhenkhat pawl cun Jesuh in puai hrangih a ṭulmi kha lei a fial a si hmang, a si lole mi farah hnenah ziang lo thil pek a fial a si hmang, tiah an ruat. 30 Judas in Jesuh pekmi sang cu a lak ih hmakhatte ah a suak. Cuih tikcu cu zan a si. 31 Judas a tlansuak hnuah Jesuh in, "Atu-ah Milai Fapa ih sunlawinak cu a lang zo; cule amah ih sungin Pathian sunlawinak khal a lang a si. 32 Cule a sungin Pathian sunlawinak langter a si ahcun Pathian in Milai Fapa ih sunlawinak cu amah sung rori in a langter ve ding. Cumi cu rei lote-ah a tuah ding a si. 33 Ka faale pawl, nan hnenah reipi ka um nawn lo ding. Keimah hi in hawl ding; sikhalsehla Judah mi hotu pawl hnenih ka sim vekin nan hnen khalah ka sim: 'Ka fehnak ah nan feh thei lo ding.' 34 Cule nan hnenah thukham thar ka lo pek: Pakhat le pakhat duhdaw aw uh! Keimah ih ka lo duhdawt vekin pakhat le pakhat nan duhdaw aw ve pei. 35 Pakhat le pakhat tlunah duhdawtnak nan neih ahcun zokhal in keimah ih dungthluntu nan si kha an lo thei ding a si," tiah a ti. 36 Simon Piter in, "Bawipa, khui-ah so na feh ding?" tiah a sut. Jesuh in, "Ka fehnak ahcun i thlun thei hrih lo ding, asinain neh hnuah i thlun leh ding," tiah a ti. 37 Piter in, "Bawipa, ziangah so atu-ah ka lo thlun thei lo? Na hrangah thih ka ngam a sisi!" tiah a let. 38 Jesuh in, "Ka hrangah thih na ngam ngaingai maw? Thungaite in ka lo sim: ar a khuan hlanah anih ka thei lo, tiah voi thum tiang i phatsan ding," tiah a ti.
1 Jesuh in a dungthluntu pawl hnenah, "Thinlung har le beidong in um hlah uh. Pathian zum uhla keimah khal i zum uh. 2 Ka Pa ih inn ah innkhaan tampi a um ih nan hrangih umnak rem dingah ka feh ding. Cutiin si hlah sehla hiti in ka lo sim lo ding. 3 Cule ka feh ih nan umnak ka rem ngah hnuah ka ra sal ding ih ka hnenah ka lo hruai ding; cuticun ka umnak ah nan um ve ding. 4 Ka fehnak ding hmunih lamzin cu nan thei ko," tiah a ti. 5 Thomas in, "Bawipa, khuiah na feh ding ti kan thei lo; curuangah ziangtinso na fehnak lamzin cu kan theih ding?" tiah a sut. 6 Jesuh in, "Keimah cu lamzin le thutak le nunnak ka si. Keimah hnenin siarlo zohman ka Pa hnenah an thleng thei lo. 7 Atu-ah cun zo ka si, ti in thei zo ih ka Pa khal nan thei ding; atu ihsin amah cu nan thei ih a hmuh khal nan hmu zo," tiah a ti. 8 Filip in Jesuh hnenah, "Bawipa, na Pa cu in hmuh aw; cule kan lung a kim ding," a ti. 9 Jesuh in, "Nan hnenah caan reipi ka um zo na'n atu tiang in thei hrih lo maw, Filip? Zokhal keimah i hmutu cu ka Pa a hmu zo. Ziangtin so 'Na Pa in hmuh aw,' tiah i sut hrih. 10 Filip, keimah hi ka Pa sungah ka um ih ka Pa khal ka sungah a um, tihi na zum lo maw? Nan hnenih ka ṭongmi hi keimah palung in a suakmi a si lo; ka sungih a ummi ka Pa ih hnaṭuannak in a si. 11 Keimah hi ka Pa sungah ka um ih ka Pa khal keimah ih sung ah a um, tiih ka timi hi zum uh. Cumi nan zum thei lo asile thil ka tuahmi ruang tal in zum uh. 12 Thungaite in ka lo sim: Keimah i zumtu cun ka tuahmi hi a tuah ve ding; a si, ka Pa hnenih ka feh ding ruangah hi hnakih thil mak sawn hman a tuah ding. 13 Cule ka Pa ih sunlawinak cu Fapa sung ihsin a langnak dingah ka hmin in nan dilmi hmuahhmuah cu ka lo tuahsak ding. 14 Ka hmin in nan dilmi pohpoh cu ka tuah ding a si," tiah a ti. 15 Jesuh in, "Keimah in duhdawt ahcun ka thukham pawl nan thlun ding. 16 Pa hnenah ka dil ding ih nan hnenih kumkhua a um dingmi Bawmtu dang a lo pe ding. 17 Amah cu Pathian thutak a langtertu Thlarau a si. Leilung in Amah cu a hmu thei lo ih a theih thei fawn lo ruangah a pom thei lo. Sikhalsehla nannih cun nan thei, ziangahtile amah cu nan hnenah a um ih nan sungah a caam ding a si. 18 Ka feh tikah nanmahte lawngin ka lo tanta lo ding; nan hnenah ka ra sal ding. 19 A rei hlanah leilung mi cun in hmu thei nawn lo ding, sikhalsehla nannih cun in hmu ding; cule kei cu a nungmi ka si ruang ah nannih khal nan nung ve ding. 20 Cuih ni a thlen tikah keimah nan sungih ka um vek hin ka Pa ih sungah ka um ti le nannih khal ka sungah nan um ve ti kha nan thei ding. 21 Zokhal ka thukham pawl a pom ih a thluntu cu i duhdawtu a si. Keimah i duhdawtu poh cu ka Pa in a duhdawt ding; keimah khal in ka duhdawt ding ih a hnenah ka lang ding," tiah a ti. 22 Judas Iskariot a si lomi Judas in, "Bawipa, ziangtinso leilung mi hnenah si loin kan hnen sawnah na lang awkter ding?" tiah a sut. 23 Jesuh in, "Zokhal keimah i duhtu cun ka thu zirhmi a thlun ding. Ka Pa in a duhdawt ding ih ka Pa le keimah kan ra ding ih a hnenah kan um ding. 24 Keimah i duh lotu cun ka thuzirhmi khal a thlun lo. Cule ka thuzirhnak nan theihmi pawl hi keimah ih thusuak an si lo, i thlahtu ka Pa hnen ihsin a rami an si. 25 Nan hnenih ka um laiah hi thu cu ka lo sim zo. 26 Ka hmin in ka Pa in a run thlah dingmi Bawmtu Thlarau Thianghlim in ziang hmuahhmuah a lo zirh ding ih ka lo sim ciami hmuahhmuah khal a lo cinkenter ding. 27 Nan hnenah hnangamnak ka lo tanta. Keimah ih hnangamnak ka lo pek a si. Leilung mi ih pek vekin ka lo pe a si lo. Donhar le vansaang in um hlah uh; nan thin khal phang hlah uh. 28 Nan hnenah, 'Ka feh ding, a si na'n ka ra kir sal ding,' tiih ka timi nan thei. In duh ngaingai a si ahcun Pa hnenih ka feh ding hi nan lung a awi ding; ziangahtile Amah cu keimah hnakin a tum sawn. 29 Ka sim vekin a hung can ngaingai tikah nan zum theinak dingah atu a can hlan ihsin ka lo sim cia a si. 30 Nan hnenah reipi thu ka sim thei nawn lo; ziangahtile hi leilung uktu pa a ra zo a si. Ka parah thuneihnak zianghman a nei lo, 31 sikhalsehla ka Pa ka duhdawt kha leilung mi in an theih a ṭul; cutiih an theih theinak dingah Amah in thu i pekmi hmuahhmuah ka tuah ṭheh a si. Ra uh, hitawk hmun ihsin feh uhsi," tiah a ti.
1 Jesuh in, "Keimah cu sabit hri ngaingai ka si ih ka Pa cu hmuan neitu a si. 2 Ka sungih rah a rah lomi hnge tla cu a tan ṭheh ih a rahmi hnge kha a thiannak dingah le rah tam sinsin a rahnak dingah a hnge ṭha lo pawl kha a tansak. 3 Nannih tla cu thu ka lo zirhmi thawngin nan thiang zo. 4 Keimah thawn pehzom uhla kei khal nanmah ka lo pehzom ve ding. sabit hnge cu amahte lawngin rah a rah thei dah lo; sabit hripi thawn a pehzom awk lawngah a rah thei a si. Cubangtuk in keimah thawn nan pehzom awk lo ahcun nan rah thei hrimhrim lo ding. 5 Keimah cu sabit hri ka si ih nannih cu a hnge nan si. Zokhal ka sungah a um ih kei khal a sungih ka umcilh mi cun rah tampi a rah ding; ziangahtile keimah tel lo cun zianghman nan tuah theimi a um lo. 6 Zokhal keimah sungih a um lomi cu sabit hnge an hlon ih a carmi bangtuk a si ding. Cubangtuk hnge pawl cu an khawm ih meisa sungah an hlon ih a kang ṭheh. 7 Keimah sungah nan um ih ka thu hi nan sungih a um ve ahcun nan duhmi pohpoh nan dil tikah nan ngah ding. 8 Rah tampi nan rahnak hin ka Pa ih sunlawinak nan langter ih cuti cun ka dungthluntu nan can theinak a si. 9 Ka Pa ih i duhdawt vekin nannih khal ka lo duhdawt ve; ka duhdawtnak sungah um ringring uh. 10 Ka Pa ih thukham ka thlun ih cuti cun amah ih duhdawtnak sungih ka um vekin ka thukham nan thlun a si ahcun ka duhdawtnak sungah nan um ve ding. 11 Ka lungawinak cu nan sungah a um ih nan lungawinak cu lungawi famkim a sinak dingah hi thu hi ka lo sim. 12 Ka thukham cu hihi a si: Keimah ih ka lo duhdawt vek hin nannih khal pakhat le pakhat duhdaw aw ve uh! 13 Mi pakhat in a rualpi pawl hrangah duhdawtnak tum bik a neihmi cu an hrangih a nunnak pek hi a si. 14 Cule ka thupekmi nan tuah ahcun ka rualpi nan si. 15 Nannih tla cu hnen-um tiah ka lo ti nawn lo, ziangahtile hnen-um cun a bawipa ih tuahmi kha a thei lo. 'Hnen-um,' ti nawn loin 'Rualpi,' tiah ka lo ko: ziangahtile ka Pa hnen ihsin ka theihmi hmuahhmuah cu ka lo sim ṭheh zo a si. 16 Nannih in in hril lo; keimah in ka lo hril hai ih kumkhua ih a hmunmi rah nan va rah theinak dingah ka lo fial a si. Ka hmin in Pa hnenih nan dilmi hmuahhmuah cu a lo pe ding. 17 Cule ka thupekmi cu hihi a si: pakhat le pakhat duhdaw aw uh. 18 Nannih hi leilung in a lo hua a si ahcun keimah i hua hmaisa zo ti kha cing ringring uh. 19 Leilung ih ta si uh cila leilung hin ka ta tiah a lo duhzet hai ding. Sikhalsehla leilung ihsin ka lo hril zo ih a ta nan si nawn lo; curuangah leilung in a lo huatnak cu a si. 20 'Sal cu a bawipa hnakin a tum sawn lo,' tiah ka lo timi kha cing ringring uh. Keimah in hrem ahcun nannih khal an lo hrem ve ding; ka thu an thlun ahcun nan thu an thlun ve ding. 21 Sikhalsehla atu cu ka milai nan si ruangah hi thil hmuahhmuah hi nan parah an tuah ding. Ziangahtile keimah i thlahtu zo a si ti an thei lo. 22 An hnenah ra loin le thusimnak nei loin um ningla an tlunah sualnak a um lo ding; asinain atu vek a si ahcun an sualnak ruangah puhmawh ding dang zianghman an nei lo. 23 Keimah i huatu cun ka Pa khal a hua ve a si. 24 An lakah zohmanih an tuah dah keel lomi thil pawl tuah loin um ningla an tlunah sualnak a um lo ding; sikhalsehla atu vek a si ahcun ka thil tuahmi an hmu ṭheh zo na cingin ka Pa thawn in hua a si. 25 Hi vekih a can a ṭul, ziangahtile an Daan cabu sungah 'Ziang thuhla hman um loin in hua,' tiah rak nganmi a um ih cumi a kimnak dingah a si. 26 Ka Pa hnen ihsin Bawmtu Thlarau a ra ding ih amah cu Pathian thutak langtertu a si ding. Ka Pa hnen ihsin ka run thlah ding ih keimah ih thuhla simtu a si ding. 27 Nannih khal a hramthok ihsin ka hnenih nan um zo ruangah ka thuhla nan sim ve ding.
1 "Nan zumnak ihsin nan tluksawn lonak dingah hi thu hi ka lo sim. 2 Sinakok ihsin an lo dawi ding; zozo khal in nanmah thah hi Pathian hnaṭuan ih an ruah caan a ra thleng ding. 3 Mi in cuti vek cun nan parah an tuah ding, ziangahtile Pa an thei lo ih keimah khal in thei lo. 4 Asinain atu ihsin ka lo sim cia, ziangahtile nan parih an tuah ngaingai tikah in rak sim cia zo ti kha nan thei ding. "Nan hnenih ka um ruangah a hramthok ihsin hi thu hi ka lo sim lo. 5 Atu cu i thlahtu hnenah ka feh thlang ding; sikhalsehla zohman in khuiah na feh ding tiah in sut hrih lo. 6 Hitiih ka lo sim hai ruangah nan thinlung cu riahsiatnak in a khat. 7 Asinain thungaite in ka lo sim: ka feh ahcun nan hrangah a ṭha sawn, ziangahtile ka feh lo ahcun nan hnenah Bawmtu a ra lo ding. Asinain ka feh ahcun amah cu nan hnenah ka run thlah ding. 8 Cule a rat tikah leilung mi pawl hnenah sualnak thu an ruahdan a palhzia, thudik an ruahdan a palhzia le Pathian thuṭhennak thu an ruahdan a palhzia pawl kha a langter ding. 9 Sualnak thu an ruahdan a palh, ziangahtile keimah in zum lo ruangah a si. 10 Thudik an ruahdan a palh, ziangahtile ka Pa hnenah ka feh ding ih in hmuh nawn lo ding ruangah a si. 11 Cun thuṭhennak thuhla khalah an ruahdan a palh, ziangahtile leilung uktu bawi hi thuṭhen cia zo a si ruangah a si. 12 "Nan hnenah sim ding tampi ka nei, asinain atu-ah cun nan ciing thei cawk lo ding. 13 Sikhalsehla Thlarau a run tikah cun Pathian thutak langtertu a si ruangah thutak hmuahhmuah ah a lo hruai ding. Ziangahtile amah ih thuthu in zianghman a ṭong lo ding; asinain a theihmi kha a sim ding ih a ra thleng leh dingmi thu tla kha a phuang ding. 14 Amah in sunlawinak i pe ding, ziangahtile ka sim ciami kha a lak ding ih nan hnenah a phuang ding. 15 Ka Pa ih neihmi hmuahhmuah cu ka ta a si, curuangah Thlarau in ka pekmi cu a la ding ih nan hnenah a phuang ding, tiah ka lo tinak a si. 16 "Tikcu rei lote-ah in hmu nawn lo ding; cule caan malte hnuah in hmu sal ding," tiah Jesuh in a ti. 17 A dungthluntu ṭhenkhat pawl cun, "Cumi cu a tican ziang a si pei? Tikcu rei lote-ah in hmu nawn lo ding; cule caan malte hnuah in hmu sal ding, tiah in ti. Cule 'Pa hnenih ka feh ding ruangah,' ti tla in a ti fawn. 18 'Rei lote-ah,' timi hi ziang a ti duhnak a si pei? A sim duhmi hi kan thei thei hrimhrim lo!" tiah pakhat le pakhat an ti aw. 19 A hnenah thusuh an duh kha Jesuh in a thei ih an hnenah, "Kei in 'Tikcu rei lote-ah in hmu nawn lo ding; cule caan malte rei hnuah in hmu sal ding,' ka ti ruangah maw nannih pakhat le pakhat thu nan sut awk rero? 20 Thungaite in ka lo sim: nannih cu nan ṭap nan ai ding na'n leilung cu a lung a awi ding; nan riah a sia ding, asinain nan riahsiatnak cu lungawinak ah a cang leh ding. 21 Nunau in nau a hrin zik tikah natnak a tuar, ziangahtile nauhrin nat a ra thleng zo; sikhalsehla naute a suak ngah tikah cun lei tlunah naute thar pakhat a suah ruangah a tuarnak hmuahhmuah cu a hngilh ṭheh. 22 Cubangtuk in nannih tla nan si ve ding: atu-ah cun nan riah a sia, sikhalsehla ka lo hmu sal ding ih nan thinlung cu lungawinak in a khat ding; cuih lungawinak cu zohman in an lo lawng thei nawn lo ding. 23 Cuih ni a thlen tikah cun zianghman in sut nawn lo ding. Thungai in ka lo sim: ka hmin in nan dilmi hmuahhmuah cu ka Pa in a lo pe ding. 24 Atu tiangah ka hmin in zianghman nan dil dah lo. Dil uh nan ngah ding; cuticun nan lungawinak cu a kim ding. 25 "Atu tiang cu hi thu pawl ka sim tikah tahṭhimnak lawnglawng ka hmang. Sikhalsehla tahṭhimnak hmang nawn loin lailan in ka Pa ih thu ka simnak tikcu a ra thleng ding. 26 Cuih ni a thlen tikah a hnenah ka hmin in nan dil ding; nanmah ih ai-ah ka lo dilsak ding tiah ka sim lo; 27 ziangahtile ka Pa amah rori in a lo duhdawt a si. Nannih in in duhdawt ih Pathian hnen ihsin ka rat kha nan zum zo ruangah ka Pa in a lo duhdawt a si. 28 Pa hnen ihsin ka ra ih leilungah ka ra thleng. Atu cu leilung ka tlansan ding ih Pa hnenah ka feh ding," tiah a ti. 29 Cun a dungthluntu pawl in a hnenah, "Atu-ah cun tahṭhimnak telh loin lailante in in sim ruangah, 30 ziang hmuahhmuah theitu na si, ti kan thei zo; curuangah thu kan lo suh rero a ṭul nawn lo. Cumi in Pathian hnen ihsin a rami na si, ti kha in zumter zo," tiah an ti. 31 Jesuh in, "Atu-ah in zum ngaingai maw? 32 Nan zatein ṭhendarh ṭheh nan si ding ih nan inn ciarah nan tlung ding; keimahte lawng in taan tikcu a ra thleng ding; a si, atu a ra thleng zo. Sikhalsehla Pa ka hnenih a um ruangah keimah lawng ngaingai cu ka si lo. 33 Keimah thawn nan pehzom awknak thawngin hnangamnak nan ngah theinak dingah hi thu hi ka lo sim. Leilung in harsat tuarnak a lo pe ding. Sikhalsehla nan ral ṭha uh; Leilung cu ka neh zo!" tiah a ti.
1 Jesuh in hi thu a sim ṭheh hnuah vanlam a zoh ih, "Ka Pa, a tikcu a ra thleng zo. Fapa in sunlawinak a lo pek theinak dingah na Fapa hnenah hin sunlawinak run pe hram aw. 2 Fapa hnenih na pek zomi mi hmuahhmuah hnenih kumkhua nunnak a pek theinak dingah leilung tlun miphun hmuahhmuahih tlunah thuneihnak na pek zo. 3 Cuih kumkhua nunnak timi cu nangmah lawng Pathian taktak na sizia theih le na thlahmi Jesuh Khrih theih hi a si. 4 Hnaṭuan i pekmi ka ṭuan ṭheh zo ih na sunlawinak cu leilung ah ka langter zo. 5 Curuangah maw ka Pa, leilung seemsuah a si hlanih nangmah thawn sunlawinak ka rak neihmi kha atu na mithmuh ah hin i pe hram aw! 6 "Leilung ihsin na kawhsuakmi pawl hnenah na hmin cu ka langter zo. Cupawl cu na ta an si ih ka hnenah i pekmi an si. Na thu an thlun ih, 7 atu cu ka hnenih i pekmi hmuahhmuah hi na hnen ihsin a rami an si ti tla an thei. 8 I pekmi na thu kha ka sim hai ih annih in an pom zo. Na hnen ihsin a rami ka si ti thutak hi an thei taktak ih i thlahmi ka si ti khal hi an zum zo. 9 "Anmah hrangah thla ka cam. Leilung hrangah thla ka cam lo, asinain i pekmi pawl hrangah ka cam; ziangahtile na ta an si. 10 Ka neihmi hmuahhmuah hi na ta an si ih na neihmi hmuahhmuah khal hi ka ta an si; cule an sung ihsin ka sunlawinak a lang. 11 Cun atu-ah na hnenah ka ra ding; kei cu leilungah ka um nawn lo ding, asinain annih cu leilungah an um hrih ding. A Thiangmi ka Pa, nangmah le keimah cu pakhat kan si vekin leilungih a um hrihmi pawl cu pumkhat an si theinak dingah i pekmi na hminih huham in humhim hai aw. 12 An hnenih ka um laiah nangmah ih i pekmi na hminih huham in ka hum hai. Ca Thianghlim sungih a ummi a kimnak dingah a hloral ding a rak si ciami pakhat dah ti lo cu mi pakhat hman an hloral lo; ka humhim ṭheh hai a si. 13 Atu cu na hnenah ka ra thlang ding; leilung tlunah hi thu pawl ka simnak cu ka lungawinak kha an thinlung sungah famkim zetih an neih theinak dingah a si. 14 Keimah cu hi leilungih ta ka si lo vek hin annih khal hi leilungih ta an si ve lo; curuangah na thu cu an hnenih ka sim tikah leilung in anmah a huatnak cu a si. 15 Anmah kha leilung ihsin lasuak aw tiah ka lo dil lo, asinain Miṭha lo pa ih hnen ihsin humhim hai aw tiah ka lo dil a si. 16 Kei cu leilungih ta ka si lo vekin annih khal leilungih ta an si ve lo. 17 Annih cu thutak in na ta siter hai aw; na ṭongkam cu thutak a si. 18 Kei cu leilungah i thlah vekin annih khal ka thlah ve a si. 19 Anmah tla thutak ih thianter an si theinak dingah keimah khal ka thiangter aw a si. 20 "Anmah hrang lawngah thla ka cam a si lo; an thusimmi a thei ih keimah i zumtu ding pawl hrang khalah thla ka cam. 21 An zatein pakhat an si theinak dingah thla ka cam. Ka Pa, nangmah cu ka sungah na um ih kei khal na sungih ka um vekin annih khal kan sungah um ve hram hai seh. Nangmah in i thlah hi leilung in an zum theinak dingah annih cu pakhat ah cang hram hai seh. 22 Nangmah le keimah cu pakhat kan si vekin annih khal pakhat ih an can theinak dingah nangmah ih i pekmi sunlawinak kha anmah khal ka pek ve a si. 23 Annih pawl cu pakhat taktak an si ih cuticun leilung in nangmah ih thlahmi ka si ti a theihnak dingah le keimah i duhdawt vekin annih khal na duhdawt ti an theihnak dingah kei cu anmah ih sungah ka um ih nang cu ka sungah na um a si. 24 "Ka Pa, nangmah ih i pekmi ka sunlawinak hi annih in an hmuh theinak dingah nangmah in annih cu ka kut sungah i pe zo. Anmah cu keimah ka umnak poh-ah um ve hai seh ti ka duh; ziangahtile leilung seemsuah hlan ihsin i duhdawt zo. 25 A dingmi ka Pa, nang cu leilung hin a lo thei lo, sikhalsehla kei cun ka lo thei ih annih in nangmah ih i thlah hi an thei. 26 An hnenah na hmin cu ka phuang zo ih, ka parih duhdawtnak na neihmi hi an sungih a um venak dingah le keimah khal an sungih ka um venak dingah na hmin cu ka phuang vivo hrih ko ding," tiah thla a cam.
1 Hitiin Jesuh in thla a cam ṭheh hnuah dungthluntu pawl thawn an pok ih Kidron an timi tivate ral ah an feh. Cutawkah hmuan pakhat a um ih Jesuh le a dungthluntu pawl cu cuih hmuan sungah an lut. 2 Cuih hmuan cu Jesuh le a dungthluntu pawl an ton awk ṭheunak a si ruangah a zuartu Judas in khuitawkah a um ti a thei. 3 Curuangah cuih hmuan ahcun Judas cu Rom ralkap bur khat, puithiam upa le Farasi pawl ih thlahmi Biakinn kiltu palik pawl thawn, hriamnam an keng ih mei-inn le meifar thawn an feh. 4 Jesuh in a parah ziangbangtuk thil a ra thleng ding ti kha a theih ṭheh ruangah hmaiah a va suak ih, "Zoso nan hawl?" tiah a rak sut. 5 Annih in, "Nazareth mi Jesuh," an ti. Jesuh in, "Keimah hi amah cu ka si," a ti. A zuartu Judas cu an kiangah cun a ding. 6 Jesuh in, "Keimah hi amah cu ka si," a timi an theih tikah dunglamah ah siip ih leilungah an tlu. 7 Jesuh in, "Zoso nan hawl?" tiah a sut lala. Annih in, "Nazareth mi Jesuh," tiah an ti thotho. 8 Jesuh in, "Keimah hi amah cu ka si, tiah ka lo sim zo. Keimah in hawl a si ahcun midang hi cu fehter uh," tiah a ti. 9 Hitiih a tinak cu, "Ka Pa, ka kut sungih i pekmi cu pakhat hman ka hlohtermi an um lo," a timi kha kimternak dingah a si. 10 Simon Piter in ralnam a kenmi cu a vun zuk ih Puithiam Saang salpa ih vorhlam hna a sat thlak. Cuih salpa ih hmin cu Malkhas a si. 11 Jesuh in Piter hnenah, "Na ralnam cu a kawm ah thun sal aw! Ka Pa ih i pekmi tuarnak hai hi ka in lo dingah maw si na ruat?" tiah a ti. 12 Cule Rom ralkap cun an hotu ralbawi le Judah mi palik pawl thawn Jesuh cu an kai; an ṭem hnuah, 13 hmaisabik ah Annas hnenah an fehpi. Annas cu cuih kumih Puithiam Saang a ṭuantu Kaiafas nupi ih pa a si. 14 Kaiafas cu mizapi ai-ah mi pakhat thih a ṭha sawn tiih Judah hotu pawl hnenih ruahnak petu kha a si. 15 Simon Piter le a dang dungthluntu pakhat in Jesuh kha an thlun. Cuih dungthluntu cu Puithiam Saang thawn a thei aw zetmi an si ih Jesuh cu a thlun ih Puithiam Saang ih tual ah a vung feh. 16 Asinain Piter cu kotka lengah a rak um. Cule cuih dungthluntu cu a kir ih kotka kiltu nu cu a va biak hnuah Piter a run luhpi. 17 Kotka kiltu nu in, "Khi pa a thluntu lakah na tel ve a si lo maw?" tiah Piter kha a ti. Piter in, "Ka si lo," tiah a ti. 18 Khua a sih ruangah hnen-um pawl le kiltu palik pawl in meihol in meipual an sep ih dinhmunin meisa an ai. Piter khal cu a va feh ve ih an hnenah dingin meisa a ai ve. 19 Puithiam Saang in Jesuh cu a dungthluntu pawl ih thu le a thuzirhmi thu pawl a sut ciamco. 20 Jesuh in, "Langhnganin mizapi hnenah thu ka sim ringring. Mi tampi an ra khawmnak sinakok ah le Biakinnpi ah thu ka zirh ringring. A thup in ziang thu hman ka sim dah lo. 21 Cuti asinain ziangah so thu i sut? Ka thusimmi i theitu pawl kha sut sawn aw. Ka simmi an thei ṭheh ko," tiah a ti. 22 Cutiih a ti tikah cutawkih a ummi palik pakhat in Jesuh kha a beng ih, "Puithiam Saang hnenah ziangtinso cutiin na ṭong ngam?" tiah a ti. 23 Jesuh in, "Ka ṭongsual mi a um ahcun cuih ka ṭong sualmi cu hitawk ih a ummi hmuahhmuah hnenah hin simhnik! Asinain ka ṭongmi hi a dikmi a si ahcun ziangah so i beng?" tiah a sawn. 24 Cutiin Annas in a ṭemnak phoih sak cuang loin Jesuh cu Puithiam Saang Kaiafas hnenah a kuat. 25 Piter cu cutawkah meisa ai-in a ding lai. Culai ah midang pawl in, "Nang khal hi a dungthluntu lakah pakhat na si ve a si lo maw?" tiah an ti. Piter in, "Ka si lo," a ti. 26 Puithiam Saang hnen-um lakih pakhat, Piter in a hna a sahtan mi pa ih sungkhat pa in, "Hi Jesuh thawn hmuan sungah ka lo hmu a si lo maw?" tiah a sut. 27 Asinain Piter cun, "Kei ka si lo," a ti thotho. Cutikah ar a khuang. 28 Zingpit ah Jesuh cu Kaiafas inn ihsin Mangki bawi innah an hruai. Judah mi hotu pawl cu an daan vekin thianghlimte ih Lantak Puai rawl ei an duh ruangah Mangki bawi inn sungah cun an lut lo. 29 Curuangah Pilat cu a va suak ih an hnenah, "Hi pa hi ziang sualnak so a neih?" tiah a sut. 30 Annih in, "Sualnak nei lo sisehla na hnenah hin kan rak hruai lo ding," tiah an sawn. 31 Pilat in an hnenah, "Cuti asile nanmah in hruai uhla nanmah ih daan vekin a thu cu va rel uh," tiah a ti. Annih in, "Kannih cun mithah theinak thu kan nei lo," tiah an ti. 32 Jesuh in ziangbangtuk thihnak so ka tuar ding ti ih a rak sim ciami ṭongkam kimnak dingah hi vekih a cannak cu a si. 33 Pilat cu a inn sungah a lut sal ih Jesuh cu a ko. "Judah Siangpahrang na si maw?" tiah a sut. 34 Jesuh in, "Hi thu i suhmi hi nangmah ih palung a si maw, midang in ka thu an lo sim ruangah so a si?" tiah a sut. 35 Pilat in, "Judah mi ah maw si i ruat? Ka hnen a lo thlentu hi na miphun le puithiam upa pawl sokhaw an si! Na tuahmi thil cu ziangso a si?" tiah a ti. 36 Jesuh in, "Kei ka uknak ram cu hi leilung tlunah a si lo; hi leilung tlunah sisehla Judah mi hotu pawl kut sungih thleng lo dingin ka dungthluntu pawl in an do ding. Ka uknak ram cu hi leilungah a si lo," tiah a ti. 37 Cutikah Pilat in, "Siangpahrang cu na si ngai maw?" tiah a sut. Jesuh in, "Nang cun Siangpahrang na si i ti. Leilung ih ka suahsanmi le ka ratsanmi cu thu pakhat lawng a si: cumi cu thutak sim ding hi a si. Thutak sungih a ummi hmuahhmuah cun ka thu simmi an ngai a si," tiah a ti. 38 Cutikah Pilat in, "Thutak cu ziang so a si?" tiah a sut. Cun Pilat cu misenpi hnenah a va suak sal ih an hnenah cun, "A parah mawhnak thu ka hmu lo. 39 Curuangah daan nan neihmi vekin Lantak Puai ah thawngtla pakhatkhat ka lo thlah sak ṭheu. Judah siangpahrang hi lo thlah sak ningla nan duh maw?" tiah a sut. 40 Annih in, "Anih thlah kan duh lo! Barabbas thlah kan duh!" tiah an au ciamco. Barabbas cu suamhmang a rak si.
1 Cule Pilat in Jesuh cu a hruai ih ralkap pawl a vuakter. 2 Ralkap pawl in hling a neimi thinghnge in lukhuh an phiar ih an khumter. Cule puan sen an sinter. 3 A hnenah an feh ih, "Judah Siangpahrang hi a nunkhua sau hram seh," tiah an ti ih an beng. 4 Pilat cu a va suak sal ih mipi hnenah, "Ngaihnik uh! A parah thah tlak sualnak ka hmu lo, ti langternak ah nan hnenah ka rak hruai ding," tiah a ti. 5 Cuti cun hling lukhuh khumin le puan sen sinin Jesuh cu a ra suak. Pilat in an hnenah, "Zoh uh! Mi pa cu hi pa hi a si!" tiah a ti. 6 Puithiam upa pawl le Biakinn kiltu palik pawl in an hmuh tikah, "Thinglamtah ah that aw! Thinglamtah ah that aw," tiah an auh. Pilat in an hnenah, "Nanmahte in hruai uhla thinglamtah ah va that uh! Kei cun a parah sualnak ka hmu lo," tiah a ti. 7 Cule Judah mi pawl cun, "Daan kan nei ih cuih daan vek cun a thih a ṭul a si, ziangahtile Pathian Fapa ka si a ti," tiah an let. 8 Cumi cu Pilat in a theih tikah a thin a phang deuhdeuh. 9 A inn sungah a vung lut sal ih Jesuh cu, "Khuiinso na rat?" tiah a sut. Asinain Jesuh cun a sawn lo. 10 Pilat in, "I sawn lo ding maw si? Nangmah thlah theinak le thah theinak thu ka neih hi na thei maw?" tiah a ti. 11 Jesuh in, "Ka tlunih thu na neih theinak hi Pathian ih a lo pek ruangah a si. Curuangah nang hnakin na kutih i thlengtertu pa hi a sual sawn a si," tiah a ti. 12 Cumi cu Pilat in a theih tikah Jesuh thlah theinak lamzin kha a hawl. Asinain mipi cun, "Hi pa na thlah asile Rom Siangpahrang ih rualpi na si lo. Zokhal Siangpahrang ka si a ti awtu cu Rom Siangpahrang ih ral an si," tiah an au ciamco. 13 Cuih ṭong cu Pilat in a theih tikah Jesuh cu lengah a hei suahpi ih, "Lungphah Tual," timi hmunih thuṭhentu tonak ah a to. Cuih hmun cu Hebru ṭong in "Gabbatha," an ti. 14 Lantak Puai ding ni khat a duh ni a si ih sunlai hrawng a si. Pilat in mipi pawl cu, "Nan Siangpahrang hi zohhnik uh!" tiah a ti. 15 Annih in, "That aw! That aw! Thinglamtah parah that aw!" tiah an au ciamco. Pilat in, "Nan Siangpahrang hi maw thinglamtah parah ka thah ding?" tiah a sut. Puithiam upa pawl in, "Sizar siarlo Siangpahrang dang kan nei lo," tiah an ti. 16 Cule Pilat in Jesuh cu thah dingah an kut sungah a pek. Cutiin Jesuh cu an fehpi. 17 A thinglamtah pu in a suak ih "Luruh Hmun," an timi hmunah a thleng. Cuih hmun cu Hebru ṭong in "Golgotha," an ti. 18 Cutawkah Jesuh cu thinglamtah ah an khen. A dang mipa pahnih tla an khen ve ih an karlak ah Jesuh cu an thlai. 19 Pilat in ca a ngan ih thinglamtah parah a taarter. Cuih ca a nganmi cu, "Nazareth mi Jesuh, Judah Siangpahrang," ti a si. 20 Jesuh an thlainak hmun cu khawpi ihsin a hlat lo ruangah cuih ca cu mi tampi in an siar. Hebru ṭong, Latin ṭong le Grik ṭong in nganmi a si. 21 Puithiam upa pawl in Pilat cu, "'Judah Siangpahrang,' ti si loin 'Judah Siangpahrang ka si, a ti,' tiah ngan aw," an ti. 22 Pilat in, "Ka ngan zomi cu ka ngan vekin um seh," tiah a ti. 23 Ralkap pawl in Jesuh cu thinglamtah parih an khen ṭheh hnuah a hnipuan cu an lak ih pakhat ciar co dingah ṭhen li ah an ṭhen. Cule zungṭhit nei lo ih tahmi a korfual khal cu an lak. 24 Ralkap pawl cun, "Hi korfual cu kan thlek lo pei. Zo in a co ding ti theihnak ah camcawhfung kan zuk sawn pei," tiah an ti. Hitiih thil a cannak cu Ca Thianghlim sungih, "Ka hnipuan cu an ṭhen aw ih, Ka kor hrangah camcawhfung an zuk," timi a kimnak dingah a si. Cubangtuk cekci cun ralkap pawl in an tuah. 25 Jesuh ih thinglamtah kiangah cun a nu le a nu ih naunu le Klopas nupi Mari le Mari Magdalene pawl an ding. 26 Jesuh in a nu le a duhdawtmi dungthluntu pa cutawkih an din kha a hmu ih a nu hnenah cun, "Amah kha na fapa a si," tiah a ti. 27 Cule a dungthluntu pa hnenah cun, "Anih kha na nu a si," tiah a vun ti. Cuihsin thokin dungthluntu pa in Jesuh ih nu cu a innah a umter. 28 Jesuh in ziang hmuahhmuah a kim ṭheh zo ti kha a thei; Ca Thianghlim sungih a ummi kimnak dingah, "Ka ti a haal," tiah a ti. 29 Cutawkah sabitti thur beel khat a um ih cuih sabitti thur sungah puansia an hnim ih hissop fung zimah ṭemcih tahratin Jesuh cu a kaa-ah an hun hnih. 30 Jesuh in cuih sabitti thur cu a tep ih, "A kim ṭheh zo," a ti. Cule a lu a kuun ih a thaw a cem. 31 Cule Judah mi hotu pawl cu Pilat hnenah an feh ih thinglamtah parih an thahmi pawl ih ke khiak dingah le an ruak pawl la dingah an va dil. An dil ni cu Tlawngkai Ninga a si, ziang ruangah an dil tile an thahmi ruak pawl cu Sabbath ni-ah thinglamtah parih an thlai awk hrih ding kha an duh lo; cuih Sabbath cu a thianghlim cemi ni a si fawn. 32 Curuangah ralkap pawl an va feh ih Jesuh thawn hmunkhatih an thahmi pakhat pa ih ke an khiak ih cuih hnuah a pahnihnak pa ih ke khal an khiak. 33 Asinain Jesuh hnen an thlen tikah a thi ngah zo ti kha an hmu ih anih cu a ke an khiak lo. 34 Ralkap pakhat in Jesuh ih hnak kha a feipi in a hun sun ih hmakhatte ah thi le tidai a suak. 35 Cuih thil a hmutu pa amah rori in a ṭongmi a si ih nan zum theinak dingah a si. A simmi hi a dikmi a si ih amah khal in thudik ka sim a si ti hi a thei. 36 Hitiih thil a cannak cu Ca Thianghlim sungah, "A ruh pakhatte hman an khiak lo ding," tiih a ummi kha a kimnak dingah a si. 37 Cule Ca Thianghlim hmun dangah, "An sunmi kha an zoh ding," ti tla in a um. 38 Cuih hnuah Arimathea khuami Josef in Jesuh ruak lak dingah Pilat hnenah a va dil. Josef cu Jesuh dungthluntu pakhat asinain Judah hotu pawl kha a ṭih ruangah a thupte in a rak thlun vivo. Pilat in Jesuh ruak kha na la thei, a ti ruangah Josef cun a va lak. 39 Jesuh tong dingah zanih a rak feh dahtu Nikodemas khal Josef hnenah a feh ve ih zihmui pawng zakhat tluk, mura zihmui le cing thling rawimi kha a keng. 40 An pahnih in Jesuh ruak kha an lak ih Judah pawl ih mithi phum daan vekin zihmui thawn puanrang nemtein an tuam. 41 Jesuh an thahnak hmunah cun hmuan pakhat a um ih cuih hmuan sungah cun zohman an phum dah hrih lonak thlaan thar pakhat a um. 42 Sabbath ni a si zik thlang ih cuih thlaan cu a naite fawn ruangah Jesuh ih ruak cu cutawkah an phum.
1 Nipi Ni zingpit khua a van hlanah, Mari Magdalene cu thlaan ah a va feh ih thlaankhar lungpheng ṭhawn cia-in a um kha a hmu. 2 Simon Piter le Jesuh ih a duhdawtmi dungthluntu hnenah a va tlan ih, "Thlaan ihsin Bawipa an thiar hlo zo; khuitawkih an ret ti kan thei lo!" tiah a sim. 3 Cun Piter le a dang dungthluntu cu an pok ih thlaan ah an va feh. 4 An pahnih in an tlan ih a dang dungthluntu cu Piter hnakin tlan a cak deuh ruangah hmaisa deuh ah thlaan ah a thleng. 5 Thlaan sung cu a vun bih ih ruak tuamnak puan nemte cu a hmu, asinain a vung lut lo. 6 A dungin Simon Piter cu a ra thleng ih thlaan sung ahcun a vung lut mai. Ruak tuamnak puan nemte le, 7 Jesuh ih lu ṭemnak puan kha a hmu. Asinain a lu ṭemnak puan cu ruak tuamnak puan nemte umnak ah a um lo; amah dangte in zual aw in a um. 8 Cule dungthluntu dang, thlaan a thlengtu hmaisa deuhtu pa khal cu thlaan sungah cun a lut ve ih a hmu ih a zum. 9 Thihnak ihsin a thosal ding tiih Ca Thianghlim ih a timi kha a tican an thei thiam hrih lo. 10 Cule dungthluntu cu an inn ah an tlung. 11 Mari cu thlaan lengah a ding ih a ṭap rero. Cutiih ṭah phah in a kuun ih thlaan sung cu a vun bih ih, 12 vancungmi pahnih puanrang thawn thuam aw in Jesuh ruak an rak retnak ah khan a lu lamah pakhat, a ke lamah pakhat an to kha a hmu. 13 Vancungmi cun, "Ziangah so na ṭah rero?" tiah Mari cu an sut. Anih in, "Ka Bawipa zo in si maw an lak ih khuitawkah an ret ti ka thei lo," tiah a sawn. 14 Cule Mari cu a her ih cutawkih Jesuh a din kha a hmu; asinain Jesuh a si kha a thei lo. 15 Jesuh in, "Nunau nu, ziangah so na ṭah rero? Zoso na hawl?" tiah a sut. Cutiih a biatu cu hmuan kiltu a si tiin a ruat ih Mari cun, "Bawipa, nangmah in na lak a si ahcun na retnak kha i sim awla ka feh ding ih ka va la ding," tiah a ti. 16 Jesuh in, "Mari!" tiah a vun ko. Mari cun Jesuh lam a hoi ih Hebru ṭong in "Rabboni!" tiah a ti. Rabboni ti cu Sayapa tican a si. 17 Jesuh in Mari cu, "I kai hlah! Ziangahtile Pa hnenah ka thleng hrih lo. Asinain ka unau pawl hnenah va sim awla 'An Pa a si vemi ka Pa, an Pathian a si vemi ka Pathian hnenah ka feh ding a ti,' tiah va sim aw," a ti. 18 Cuti cun Mari Magdalene cu a feh ih Bawipa a hmuhnak thu le a hnenih a ṭongmi pawl hmuahhmuah cu dungthluntu pawl hnenah a sim. 19 Cuih Nipi ni zanlam ah dungthluntu pawl cu hmunkhatah an tong aw. Judah mi hotu pawl an ṭih ruangah sangka hmuahhmuah an khar ṭheh. Cule Jesuh cu a ra lang ih anmah lakah a ding ih, "Nan hnenah daihnak um ko seh," tiah a ti. 20 Cumi a ṭong ṭheh in an hnenah a kut le a hnak a hmuh. Dungthluntu pawl cu an Bawipa an hmuh tikah an lung a awi ngaingai. 21 Jesuh in an hnenah cun, "Nan hnenah daihnak um ko seh! Ka Pa in i thlah vekin nannih khal ka lo thlah ve a si," tiah a ti. 22 Cutiih a ṭong hnuah an parah a thaw a thawt ih, "Thlarau Thianghlim rak co uh! 23 Mi an sualnak nan ngaidam ahcun ngaidam an si ding; nan ngaidam lo a si ahcun ngaidam lo an si ding," tiah a ti. 24 Dungthluntu hleihnih lakah pakhat a si mi (Faphir an timi) Thomas cu Jesuh a lang laiah an hnenah a um lo. 25 Curuangah dungthluntu dang pawl in, "Bawipa kan hmu sokhaw!" tiah an sim. Thomas in an hnenah, "A kut thir in an khennak hma si ka hmuh ih ka kut in cuih hma si le a hnak kha ka tham ngah hlanah cun ka zum lo ding," tiah a ti. 26 Zarhkhat hnuah dungthluntu pawl cu innkhaan sungah an um ih Thomas khal a um ve. sangka an khar ṭheh na'n Jesuh cu a ra lang ih an lakah a ding in, "Nan hnenah daihnak um ko seh!" tiah a ti. 27 Cule Thomas hnenah cun, "Hinah na kutzung rak re hnik awla ka kut hi zohhnik aw; na kut rak dawh awla ka hnak hi tham aw. Zum loin um nawn hlah; zum thlang aw!" tiah a ti. 28 Thomas in, "Ka Bawipa le ka Pathian!" tiah a ti. 29 Jesuh in, "I hmuh ruangah na zum a si maw? Keimah i hmu lo na'n a zumtu cu mi thlawsuak an si," tiah a ti. 30 A dungthluntu pawl ih mit hmuhah Jesuh in hmuhsaknak tampi a tuahmi, hi cabu sungih ngan lomi tampi a um. 31 Sikhalsehla hi hmuah hi ka ngan ih ka ngannak sullam cu nannih in Jesuh cu Messiah, Pathian Fapa a si ti nan zum ih amah nan zumnak thawngin le amah ih hminin nunnak nan neihnak dingah a si.
1 Cuih hnuah Jesuh cu a dungthluntu pawl hnenah Tiberias Tili ah a lang sal. A lang daan cu hiti in a si. 2 Simon Piter, Faphir timi Thomas, Galilee peng Kana khuami Nathanael, Zebedi fapa pawl le Jesuh dungthluntu pahnih tla hmunkhat ah an tong khawm aw. 3 Simon Piter in, "Kei cu sur ka vorh ding," tiah a ti. Midang khal cun, "Kan ra tel ve ding," an ti fingfing. Cutiin lawng pakhat in an feh; asinain cuih zan cu zianghman an kai lo. 4 Ni a hung suah zawng ah Jesuh cu tikapte-ah a ding, asinain Jesuh a si ti kha dungthluntu pawl cun an thei lo. 5 Jesuh in, "Naule uh, ziangtal nan kai lo maw?" tiah a sut. Annih in, "Zianghman kan kai lo," an ti. 6 Jesuh in, "Nan lawng ih vorhlam kamah khan nan sur hei vorh uhla malte tal cu nan kai ding," a ti. Cuti cun an sur cu an hei vorh ngaingai ih tamzet an awk ngah ruangah an sur hman cu an dir sal thei nawn lo. 7 Jesuh ih a duhdawtmi dungthluntu cun Piter hnenah, "Bawipa sokhaw a si!" tiah a ti. Piter in Bawipa a si ti kha a theih tikah (a hnipuan a rak phoih cia ruangah) a kor lenghruk kha a hruk lohli ih ti sungah a dawp. 8 Dungthluntu dang pawl in nga a khatmi an sur cu an dir vivo ih tikap an thleng. Leilung ihsin a hla lem lo, pi zathum tluk lawng a rak si. 9 Tikap ih an hung kai tikah meiling parah nga le saang em ciami kha an hmu. 10 Cule Jesuh in an hnenah, "Nan kaihmi nga cu rak keng uh,"tiah a ti. 11 Simon Piter cu lawng sungah a hung kai ih nga tumpipi a khatmi sur cu tikap ah a dirh. Nga cu pum za le sawmnga le pum thum a si; cutluk tam a si na'n sur cu a tlek lo. 12 Jesuh in an hnenah, "Ra uhla thawhhlam ra ei uh!" a ti. Dungthluntu lakah zohman in, "Zoso na si?" tiah an sut ngam lo; ziangahtile Bawipa a si ti an thei. 13 Jesuh cu a va feh ih saang kha a lak ih a pek; nga khal a pek hai. 14 Himi cu Jesuh thihnak ihsin a thawh hnuah dungthluntu hnenih a lang voithumnak a si. 15 An ei ṭheh hnuah Jesuh in Simon Piter cu, "Johan fapa Simon, hi midang pawl ih in duhdawt hnakin nang in i duhdaw sawn maw?" tiah a sut. Simon in, "A si Bawipa, ka lo duhdawt cu na thei," tiah a ti. Jesuh in a hnenah, "Ka tuunote pawl kilkhawi aw," tiah a ti. 16 A voihnihnak ah Jesuh in, "Johan fapa Simon, i duhdaw maw," tiah a sut sal. Simon in, "A si Bawipa, ka lo duhdawt cu na thei," tiah a let. Jesuh in, "Ka tuu pawl kilkhawi aw," tiah a ti. 17 Jesuh in, "Johan fapa Simon, i duhdaw maw?" tiah voithumnak a sut lala. Cutiin voithum tiang Jesuh in, "I duhdaw maw?" tiih a sut ruangah Piter cu a riah a sia ih Jesuh hnenah cun, "Bawipa, nang cun ziang hmuahhmuah na thei ṭheh. Ka lo duhdawt ti khal na thei ṭheh ko a sisi!" tiah a ti. Cule Jesuh in, "Ka tuu pawl kilkhawi aw. 18 Thungaite in ka lo sim: na no laiah cun na tim na tuah ih na duhnak hmun poh ah na feh; asinain na tar tikah cun na ban na pharh ding ih midang in an lo ṭem ding ih na duh lonak hmunah an lo fehpi ding," tiah a ti. 19 Hiti'n a ṭong tikah Piter hi ziangbangtuk thihnak a tuar ding ih ziang bangtuk in Pathian hnenah sunlawinak a pe ding, ti kha Jesuh in a langternak a si. Cule Jesuh in, "I thlun aw," tiah a ti. 20 Piter cu a her ih a dunglamah Jesuh ih a duhdawtmi dungthluntu kha a hmu. Hi dungthluntu pa cu rawl an ei laiah Jesuh a hei naih ih, "Bawipa, a lo zuartu ding cu zoso a si?" tiih a suttu kha a si. 21 Piter in cupa kha a hmuh tikah, "Bawipa, hi pa hi teh ziangti in so a si ding?" tiah Jesuh cu a sut. 22 Jesuh in, "Ka rat tiang nung dingih ka duhmi a si ahcun na hrangah ziangso a poinak a um? I thlun sawn aw!" tiah a ti. 23 Curuangah hi dungthluntu cu a thi lo ding tiah Jesuh ih dungthluntu pawl lakah thu a thang. Sikhalsehla Jesuh in a thi lo ding, a timi a si lo: "Ka rat tiang nung dingih ka duhmi a si ahcun na hrangah ziangso a poinak a um?" a timi a si. 24 Hi dungthluntu cu hi thu pawl a simtu le a ngantu khal a si; cule a simmi cu a dik a si ti kan thei. 25 Jesuh ih a tuahmi thil dang tampi a um hrih. Pakhat hnu pakhat ngan vivo sehla nganmi cabu pawl cu leilung pumpi hmanah hin a tlem cawk lo ding tiah ka ruat.
1 Bawipa Theofilas, Ka cabu hmaisa sungah khan Jesuh in hnaṭuan hram a thawh ihsin vancungih lakso a si ni tiang, 2 a thil tuahmi hmuahhmuah le a thuzirhmi hmuahhmuah kha ka ngan. Vancung ih lakso a si hlanah Amah ih a hrilmi a tirhthlah pawl cu Thlarau Thianghlim cahnak huham thawn ṭhatein thu a zirhta hai. 3 A thih hnuah ni sawmli sung an hnenah voi tampi a lang ih a nungsal a si ti kha zohmanih el thei lo dingin phun tampi in a langter. Amah an hmu ih anih in Pathian Uknak thu kha an hnenah a sim. 4 Cule hmun khatih an tonkhawm awk laiah, an hnenah hiti in thu a pek: "Jerusalem ihsin khuihmanah feh hlah uh. Ka Pa in laksawng a lo pe ding tiah ka lo sim ciami kha hngak sawn uh. 5 Johan cun tidai in baptisma a pe; asinain ni malte sungah Thlarau Thianghlim thawn baptisma pek nan si ding," tiah a ti. 6 Tirhthlah pawl cu Jesuh thawn an ton awk tikah annih in, "Bawipa, atuih caanah hin Israel mi hnenah Uknak cu na pe sal ding maw?" tiah an sut. 7 Jesuh in an hnenah, "A cuih tikcu le nithla cu ka Pa ih thuneihnak ih khiah-mi a si ih nannih theih ṭulmi a si lo. 8 Sikhalsehla nan hnenih Thlarau Thianghlim a rung thlen tikah cahnak huham thawn nan khat ding ih Jerusalem le Judea ram le Samaria ram hmuahhmuah le leilung tlun a deng tiang keimah ih theihpitu nan si ding," tiah a ti. 9 Cutiih a sim ṭheh tikah Jesuh cu an mithmuh rori-ah vanah laakso a si ih mero in a phen ih an hmu thei nawn lo. 10 Cutiih a hung kainak van cu an zoh cuahco laiah puanvaar sinin mi pahnih hmakhatte-ah an kiangah an rung ding ih, 11 "Galilee mi pawl, ziangah so van zoh in nan din cuahco? Nan hnen ihsin vanih a kaimi Jesuh hi vanih a kai lai nan hmuh vek cekci in a rakir sal leh ding," tiah an ti. 12 Cule Jesuh ih tirhthlah pawl cu Olif Tlang ihsin Jerusalem ah an kir. Olif Tlang cu Jerusalem ihsin peng hrek tluk a hlat. 13 Khawpi sungah an vung feh ih an umnak tlunta khaan ah an hung lut. Piter le Johan, Jeim le Andru, Filip le Thomas, Bartholomeo le Matthai, Alfias ih fapa Jeim, phun ṭantu Simon, le Jeim ih fapa Judas tla an si. 14 Hmun khatih thlacam tlang dingah an tongkhawm ṭheu ih nunau pawl le Jesuh ih nu Mari le Jesuh ih naule pawl tla an tel. 15 Ni malte a rei hnuah zumtu pawl an tongkhawm aw ih minung za le kul hrawng an si. Piter cu a ding ih, 16 "Ka u le ka nau pawl, Thlarau Thianghlim in David ih hmurka hmangin a sim ciami Jesuh a kaitu pawl hruaitu Judas ih thu cu Ca Thianghlim sungih an ngan vekin a kim a ṭul a si. 17 Judas cu kan hnaṭuanpi sungih tel ve dingah hrilmi a si ruangah kan pawl sungah sungtel a rak si ve," tiah a ti. 18 (Judas in thilsual a tuahmi manih a ngahmi tangka in lo pakhat a lei ih cuih lo sungah a bah ih a thi; a pum a kuai ih a sungril hmuah a pawt ṭheh. 19 Cuih thu cu Jerusalem ih a ummi hmuahhmuah in an thei ih anmah ih ṭong in cuih lo cu Akeldama an ti; a tican cu, "Thisen Lo," tinak a si.) 20 Piter in, "Ziangah tile Saam cabu sungah, 'A inn cu lawng sehla A sungah zohman um hlah hai seh,' tiah ngan ciami a um. Cule hmun dangah, 'Midang in a hnaṭuan cu la hai seh,' tiin a um fawn. 21 "Cuti a si ih Bawipa Jesuh thawhsalnak thutheitu-ah pakhatkhat cun in telpi a ṭul a si. Amah cu Bawi Jesuh kan hnenih khual a tlawn vivo sung hmuahhmuah kanmah lakah a tel ih, Johan in baptisma thu a simnak ihsin thokin Jesuh kan hnenin vanih laakso a si ni tiang, kanmah lakah a tel vemi a si ding," tiah a ti. 23 Curuangah mi pahnih ih hmin an pek. Anmah cu Barsabbas ti ih kawhmi Josef, (Justus ti tla in an kawhmi) le Matthias an si. 24 Cule thla an cam ih, "Bawipa, nang cun mi thinlung sung na thei ṭheh; himi pahnih lakah zo deuh na hril ti run langter aw; 25 a co dingmi hmunah in fehsantu Judas ih ai-awhtu ah na tirhthlah pawl lakih ṭuanvo la dingah na hrilmi cu run fiangter aw," tiah an ti. 26 Cule an pahnih sungah zoso tirhthlah a si ding ti theihnak ah camcawhfung an zuuk ih Matthias in a ngah. Matthias cu tirhthlah hleikhat pawl hnenah an betcih.
1 Pentikos ni a thlen tikah zumtu hmuahhmuah cu hmun khatah an um. 2 Hmakhatte-ah van ihsin thlipi hrang bangin thawmvang a rung ih an tonak khaan cu a khat ṭheh. 3 Cule lei bangtuk a si mi meisa hliau an rungsuak zohzo ih cuih khaan sung ummi hmuahhmuah cuih meisa hliau cun a run dai fingfing. 4 An zatein Thlarau Thianghlim in an khat ih Thlarau in ṭong theinak a pek vekin ṭong dangdang in an ṭong ciamco. 5 Jerusalem khua sungah leilung tlun khuazakip ihsin a rami Judah mi an um laifang a si ih biaknak lam khalah a zuam ngaingaimi pawl an si. 6 Cuih ṭong dangdang ih an ṭongnak thawmvang an theih tikah miburpi an ra khawm aw. Zumtu pawl ih ṭongmi cu a rami pawl in anmah ih ṭong ciarin an theih tikah an mang a bangzet. 7 Mangbang le khawruahhar in, "Hitiih a ṭong reromi pawl hi Galilee mi an si ko lo maw? 8 Ziangtin so kanmah ih ṭong cio ih ṭong in kan theih thei? 9 Kannih cu Parthia ram, Media ram, Elam ram, Mesopotamia ram, Judea ram, Kappadosia ram, Pontas ram, Asia ram, 10 Frizia ram, Pamfilia ram, Izipt ram le Libia ramsung Sairin khua kiang tla in a rami kan si. Mihrek cu Rom khua in a rami kan si ih, 11 Judah mi le Zentail mi Judah biaknak ih a lutmi pawl kan si. Mihrek cu Krete tikulh le Arabia ram in kan ra. Asinain Pathian in a huham thawn thil mak zetzet a tuahmi thu anmah ih ṭong ih an simmi kha kanmah ih ṭong ciarin kan thei a si," tiah an ti. 12 Mangbang le awloksong in, "Himi hi a tican ziang a si pei?" tiah pakhat le pakhat an sut aw rero. 13 Asinain midang cun zumtu pawl cu an hnihsan ih, "Hi pawl hi zu an ri a si hi!" tiah an ti. 14 Cule Piter cu a dang tirhthlah hleikhat hnenah a ding ih aw ring zetin misenpi hnenah thu a sim: "Ka phunpi Judah mi le Jerusalem ih a ummi pawl, nan zatein in ngai uhla, hi thil ih a tican ka lo sim hai ding. 15 Nan ruah bangtuk a si lo; hipawl hi zu an ri lo; zinglam nazi pakua lawng a si lai. 16 Ziang so a si ti ahcun profet Joel ih a rak sim ciami a kimnak sawn a si. Profet Joel ih sim ciami cu: 17 'Pathian in, ni netnak lamah cun hiti in ka tuah ding; Mi hmuahhmuah parah ka Thlarau ka burh ding; Nan fapa pawl le nan fanu pawl in ka thu an phuang ding; Nan tlangval pawl in langnak an hmu ding; Nan patar pawl in mang an man ding; 18 Asi, ka salnu le ka salpa pawl tlun khalah cuih ni ahcun Ka Thlarau ka burh ding ih, ka thu an sim ding. 19 Tlunlam vanah hmuhsaknak mak ka tuah ding ih, Hnuailam leilung par khalah khawruahhar ka tuah ding. Thisen le meisa le meikhu sahzet a um ding. 20 Ni a thim ding ih, thlapi khi thisen bangin a sen ding; Bawipa ih Ni - ni maksak le ni sunglawi a thlenhlan deuh ah, 21 Bawipa hnenah bomnak dil in a autu cu rundam an si ding,' a ti. 22 "Ka phunpi Israel mi pawl, hi thu ka simmi hi ngaihnik uh! Nazareth mi Jesuh cu minung asinain Pathian ih thuneihnak a nei a si, ti cu amah hnenin Pathian in a huham thawn thil khawruahhar le hmuhsaknak mak zetzet a tuahmi pawl ihsin a langter zo. Himi cu nanmah rori ih nan theihmi a si, ziangahtile nan lakih a cangmi thil an si. 23 Pathian amah ih khawkhannak vekin nan kut sungah Jesuh pek ding kha a rak ruahcat ciami a si. Misual pawl ih forhfialnakin Jesuh cu thinglamtah ah nan khenbet ih nan that. 24 Sikhalsehla Pathian in thihnak ihsin a thoter sal ih thihnak huham sung ihsin a luatter zo, ziangahtile amah cu thihnak ih kaitar theihmi a si lo. 25 David in amah ih thuhla cu hiti in a sim: 'Bawipa cu ka mithmai ah ka hmu ringring; Ka kiangah a um ih ka phang lo ding. 26 Curuangah ka lung a awi ih, ka ṭongkam cu nomnak in a khat. Curuangah kei hi a thi theimi milai ka si na'n, ruahsannak sungah hnangam zetin ka cawl ding. 27 Ziangahtile mithi khua-ah cun i taanta lo ding ih, rintlak na salpa hi thlankhur sungah ziamralta dingah cun i siang lo ding. 28 Nunnak thlen theitu lamzin cu i hmuh zo ih i umpi ruangah lungawinak in ka khat ding,' a ti. 29 "Ka u le ka nau pawl, mi hminthang kan pu Siangpahrang David ih thu cu nan hnenah fiangtein ka sim duh. David cu a thi ih an phum; a thlaan tla tuihsun tiang kan lakah a um. 30 Amah cu profet a si ih Pathian ih a kam ciami thu a thei; David bangtuk in David ih tesinfa pakhatkhat kha siangpahrang si dingah Pathian in thu a kam. 31 Pathian in hmailam caanah ziang a tuah ding ti cu David in a hmu cia; curuangah Messiah a thawhsalnak ding thu cu hiti in a sim: 'Mithi khua ah amah cu a taanta lo ding ih, a taksa ruangpi cu thlaan sungah a ziamta lo ding,' tiah a ti. 32 Pathian in hi Jesuh rori hi thihnak ihsin a thoter sal ih cumi theihpitu cu kanmah hi kan si. 33 Pathian a Pa ih vorhlam kapah sunglawi zetin thlenter a si zo ih a kam cia bangtuk in Thlarau Thianghlim cu a Pa hnen ihsin a ngah zo. Atuih nan hmuhmi le nan theihmi cu kan parih a burhmi amah ih laksawng a si. 34 Ziangahtile vancungih a thlengtu cu David a si lo; David amah in: 'Bawipa in ka Bawipa hnenah, na ral pawl na ke hnuai ah, 35 Na kepal-ih ka canter hlantiang Ka vorhlam kapah hin to aw, a ti,' tiah a ti. 36 "Israel mi pawl, thinglamtah parih nan thahmi Jesuh hi Pathian in Bawipa le Messiah ah a tuah zo a si, tihi fiangtein nan theih ṭheh dingah a ṭul hrimhrim a si," tiah a ti. 37 Cuih thu an theih tikah an thinlung a khoih zetih Piter le a dang tirhthlah pawl cu, "U le nau pawl, ziangso kan tuah ding?" tiah an sut. 38 Piter in an hnenah, "Nan zatein nan sual sir fingfing uhla Jesuh Khrih hmin in baptisma lak uh; cuticun nan sualnak ngaidam nan si ding ih Pathian laksawng Thlarau Thianghlim nan ngah ding. 39 Ziangahtile Pathian thukamnak cu nanmah le nan faate pawl hnenah le Pathian thawn a hlat awmi an si na'n Bawipa kan Pathian in a kawhmi pawl hmuahhmuah hnenah a si," tiah a ti. 40 Piter in thu tampi a zirh ih a forh hai. "Hi miṭha lo parih a thleng dingmi hremnak ihsin luat dingah zuam aw uh," tiah a ti. 41 Piter ih simmi cu mi tampi in an zum ih baptisma an lak; cuih ni ni khatah an pawl cu mi thawngthum tlukin an karh. 42 An zatein tirhthlah pawl hnen ihsin an zir ih, tirawl eitlangnak le thlacam tlangnak thawn pawlkomnak an nei ringring. 43 Tirhthlah pawl in khawruahharza le hmuhsaknak mak zetzet thil tampi an tuah ruangah mi hmuahhmuah ih thinlung sungah ṭihnak le hmaizahnak in a khat. 44 Zumtu pawl hmuahhmuah cu an pawlkom aw ih thurual zetin an thil neihmi tla an ṭawm aw. 45 An thilri neihmi le an hlawnthil pawl tla an zuar ih an ngahmi tangka cu an ṭulnak vekin an zem aw. 46 Ni khat hnu ni khat Biakinn sungah an tongkhawm aw; an inn ah rawl an ṭawm aw ih tangdornak le lungawi thanuam in an ei tlang. 47 Pathian an thangṭhat ih mi hmuahhmuah hnenin mithmai ṭha an ngah. Cule nitinte in Bawipa in an pawlah rundamnak ngahtu a bet vivo.
1 Nikhat ah Piter le Johan cu thlacam tikcu zanlam nazi pathum ah Biakinn ah an feh. 2 Cutawkih Kotka Mawi an timi ah suahkeh kezeng pa pakhat a rak um. Nitinte Biakinn ih a fehtu pawl hnen ihsin tangka dil dingah cuih kotka-ah cun an hei ret ṭheu. 3 Piter le Johan an luh kha a hmuh tikah thil pakhatkhat pe dingah a dil hai. 4 Òhatein an zoh fel ih Piter in, "In hun zohhnik!" tiah a ti. 5 Ziangtal ka ngah pei maw, tiah beisei zetin a zoh hai. 6 Cule Piter cun, "Tangka lo pek ding zianghman ka nei lo; asinain ka neihmi ka lo pe: Nazareth mi Jesuh Khrih hmin in tho awla feh aw," tiah a ti. 7 Cule a vorhlam kut in a kaih ih a vun dirh. Hmakhatteah cupa ih ke le kebeu pawl cu an cak sal. 8 A hung tho lohli ih amahte in a ding ih a feh thei. Cule Piter le Johan hnenah Biakinn sungah a lut ve. A feh, a khir a zuang ih Pathian a thangṭhat. 9 Cutiih a feh thei le Pathian a thangṭhat cu mipi in an hmu ih, 10 Kotka Mawi ah tangka dil in a um ringringtu a si kha an theih tikah a parih thil a thlengmi ruangah an khawruah a har ih an mang a bang ngaingai. 11 Cupa cu Solomon Hulhliap timi ahcun Piter le Johan hnenah a um kha an hmuh tikah mipi cu an khawruahhar in an hnenah an va tlan. 12 Cumi cu Piter in a hmuh tikah an hnenah, "Ka phunpi Israel mi pawl, ziangah so hi thu ah nan khawruah a har ih kanmah lehlam mitṭhep loin in zoh? Hi pa a feh thei hi kanmah ih cahnak le Pathian duhzawng in a nung theitu kan si ruangih a cangmi ah maw si nan ruat? 13 Abraham le Isaak le Jakob ih Pathian, kan pu le kan pa pawl ih Pathian in amah ih sunlawinak cu a Siahhlawh Jesuh hnenah a pek zo. Asinain nannih in amah cu thuneitu pawl ih kut sungah nan pek. Pilat in thlah dingih thu a rel ciami hman amah ih mithmuh rori-ah nan hnong zo a si. 14 Jesuh hi mi thianghlim le mi ṭhazet asinain nannih in nan hnong; cuih tlunah Pilat kha zaangfah nan dil ih laithattu kha thlah sawn dingah nan fial. 15 Nannih cun nunnak ih mi a hruaitu kha nan that; asinain Pathian in thihnak ihsin a thoter sal ih kanmah hi cumi a theihpitu kan si. 16 Hi Jesuh hminih huham ruangah hi kezeng pa hin damnak a ngah thei. Nan hmuhmi le nan theihmi hi a hmin zumnak thawngin tuahmi a si. Nan zate ih nan hmuh ṭheh vekin Jesuh zumnak in hi pa hi a damter a si. 17 Curuangah ka u le ka nau tla, nanmah le nan hotu pawl in Jesuh parih nan rak tuahmi hi nan theih lo ruangih tuahmi a si ti ka thei. 18 Pathian in khuahlan laipi ah a hrilmi Messiah cu harsatnak a tuar ding tiah profet pawl hnenin a rak phuang zo; cumi kha atu-ah hiti in a kim a si. 19 Sir aw uhla Pathian hnenah kir sal uh. Cuti asile nan sualnak a lo ngaithiam ding. Cutiin nan ti asile, 20 Bawipa hnen ihsin tharthawhnak tikcu a rathleng ding ih nan hrangih a hrilcia mi Messiah timi Jesuh cu nan hnenah a lo pe ding. 21 Pathian in khuahlan laipi ih a profet thianghlim pawl hnen ihsin a phuan cia vekin, ziang hmuahhmuah siam thar tikcu a kim hlanlo Jesuh cu vancungah a um ding. 22 Ziangahtile Moses in, 'Bawipa nan Pathian in keimah i thlah vekin nan miphun a si mi profet pakhat nan hnenah a thlah ding. Amah ih a lo simmi hmuahhmuah cu nan thlun ṭheh a ṭul. 23 Cuih profet a thlun duh lotu cu Pathian miphun sung ihsin dawihlo a si ding ih siatsuahnak a tong ding,' a ti. 24 Cule thuthan ding a neitu profet hmuahhmuah, profet Samuel le amah hnu ih a rami profet pawl khal in, an zatein tuih hrawngih a cangmi hi an rak than cia zo. 25 Profet pawl hnen ihsin Pathian ih thukamnak cu nanmah ih hrangah a si ih Pathian in nan pu le nan pa pawl hnenih a tuahmi thukamnak a ṭawm vetu nan si. Pathian in Abraham hnenah, 'Na tesinfa sung ihsin leilung tlunih mi hmuahhmuah cu thluasuahnak ka pe ding,' tiah a ti. 26 Cuti a si ruangah Pathian in zovek khal nan ṭhat lonak ihsin nan kir ih a lo thlawsuah theinak dingah a hrilmi a Siahhlawh cu a hmaisabik ah nan hnenah a thlah a si," tiah a ti.
1 Piter le Johan in mipi hnenih thu an sim rero laiah puithiam ṭhenkhat le biakinn kilvengtu hotu bawi le Sadusi hrekkhat an ra thleng. 2 Mithi pawl an nung sal ding ti fiangternak ah Jesuh cu thihnak ihsin a tho sal tiah tirhthlah pahnih ih an phuan ruangah annih pawl cu an thin-ai a thok ngaingai. 3 Curuangah cuih tirhthlah pahnih cu an kai ih khua a sim zo ruangah thawngah a thaisun tiang an thlak. 4 Sikhalsehla an thusimmi a theitu tampi cun an zum; a zumtu pawl cu an karh sinsin ih thawngnga tluk an ti. 5 A thaisun ah Judah mi hotu pawl, upa pawl le Daanthiam pawl cu Jerusalem ah an tongkhawm aw. 6 Cutawkah Puithiam Saang Annas an tong; cule Kaiafas le Johan le Alexander le Puithiam Saang ih sungkhat dang pawl tla thawn an tongkhawm aw. 7 Tirhthlah pahnih cu an hmaiah an dinter ih, "Hi thil cangmi hi ziangtinso nan tuah? Ziang huham so nan neih ih zo ih hmin so nan hman?" tiah an sut. 8 Piter cu Thlarau Thianghlim in a khat ih an hnenah, "Mipi hotu pawl le upa pawl, 9 tuihsun ahhin hi kezeng pa a damnak thu le a parih thil ṭha tuah a si thu hi in sut a si ahcun, 10 nan theih dingmi le Israel mi hmuahhmuah in an theih ṭheh dingmi cu hihi a si: nan hmaiih a dingmi pa a damfelnak hi Nazareth mi, thinglamtah parih nan thahmi, thihnak ihsin Pathian in a thawhter salmi Jesuh ih hmin thawngin a si, tihi a si. 11 Jesuh thu ahhin Ca Thianghlim in: 'Inn saktu pawl in nan hnonmi lungto cu a thupi bik lungto ah a cang zo,' tiah a ti. 12 Rundamnak cu amah ih sung lawngah a um; ziangahtile Pathian ih rundammi kan sinak dingah leikhawvel pumpuluk ah hin minung hnenih pekmi hmin dang zohman an um lo," tiah a ti. 13 Khonsil upa pawl in Piter le Johan cu fimnak le thiamnak a nei lomi mi menmen an si na'n ziangtlukin an ral a ṭha ti kha an hmuh tikah an mang a bang ngaingai. Cule annih cu Jesuh ih rualpi an si ti kha an mang sal. 14 Sikhalsehla an damtermi pa cu Piter le Johan kiangih a din ringring ruangah an ṭong theimi zianghman a um fawn lo. 15 Curuangah an thurelnak khaan ihsin lengah an suahter hai ih anmah lawng in khaan sungah cun thu an rel. 16 Pakhat le pakhat cu, "Ziangtin so kan tuah ko sawh ding? Zohman ih an tuah thei lomi hmuhsaknak thilmak an tuah ti cu Jerusalem khawsung ih a ummi hmuahhmuah in an thei ṭheh zo ih zohman ih el theimi a si nawn lo. 17 Sikhalsehla hi thu hi mipi hnenih a zai lonak dingah Jesuh hmin in zohnen hmanah thu sim nawn hlah uh, kan ti pei," tiah an ti. 18 Cule an ko kir hai ih, Jesuh hmin in zohman zirh lo ding le zohnen hmanah thu sim hrimhrim lo dingin an dawn. 19 Asinain Piter le Johan in, "Nanmah ih thu thlun maw Pathian ih thu thlun so Pathian hmaiah a dik sawn, nanmahte in ṭhen hnik uh. 20 Ziangahtile kanmah rori in kan hmuhmi le kan theihmi cu sim loin kan um thei lo," tiah an ti. 21 Curuangah Khonsil upa pawl cun nasa sinsin in ralrinnak an pek hnuah an thlah. Mi hmuahhmuah in an lakih thil a cangmi an hmu ih Pathian an thangṭhat ruangah tirhthlah pawl hrem cu a cang thei lo ti kha an hmu. 22 Hmuhsaknak ah damnak a ngahtu pa hi kum sawmli tlun a si. 23 Piter le Johan cu an luat vete in an rualpi pawl hnenah an kir ih puithiam le upa pawl ih an simmi thu pawl cu an ruah hai. 24 Cumi cu zumtu pawl in an theih tikah hmunkhatte ah Pathian hnenah thla an cam ih, "Maw Cungnungbik Bawipa, van le lei le tipithuanthum le a sungih ummi hmuahhmuah a Tuahtu Bawipa, 25 Na Thlarau Thianghlim hmangin na siahhlawh kan pu David hnenin thu na sim ih: 'Ziangah so Zentail mi pawl hi an ai a thawh? Ziangah so milai hin a ṭhahnem lomi mi phiarnak an tuah? 26 Bawipa le Messiah dodal dingah, leilung siangpahrang pawl an tim an tuah ih, Uktu bawi pawl thawn hmun khatah an tongkhawm aw,' tiin na rak ti. 27 Ziangahtile Herod le Pontius Pilat in Messiah ih na hrilmi na Siahhlawh Thianghlim Jesuh dodal dingah hi khawpi sungah hin Zentail mi pawl le Israel mi pawl thawn an tongkhawm aw ngaingai. 28 Na huham le na tumtahnak in a hung cang leh ding tiih na rak khiah ciami kimter ṭheh dingah an tong aw khawm a si. 29 Maw Bawipa, atuih in hro reromi tla hi nangmah in run thei hram awla kannih na sal pawl tla hin na thu cu ralṭha zetih kan sim theinak dingah in bawm hram aw. 30 Mi damnak dingah na baan run pharh awla na Siahhlawh Thianghlim Jesuh hmin in hmuhsaknak le khawruahhar thil pawl tuah theinak in run pe hram aw," tiah an ti. 31 Thla an cam ṭheh vete in cutawkih an tonkhawmnak inn cu a hnin thluh. Thlarau Thianghlim in an khat ih Pathian thu cu ralṭha zetin an sim. 32 Zumtu pawl cu thinlung le ruahnak rual aw zetin an umtlang. Zohman in a neihmi thilri kha, 'Ka bulta a si,' a ti lo; an neihmi hmuahhmuah kha pakhat le pakhat an ṭawm aw. 33 Bawi Jesuh thawhsalnak thu cu tirhthlah pawl in a nasa zetmi huham thawn an sim ih Pathian in an zate parah thlawsuah tampi a run burh. 34 An lakah zohman a tlasam mi an um lo. Lo a neitu le inn a neitu pawl in an lo le an inn pawl cu an zuar ih an ngahmi tangka cu, 35 tirhthlah pawl kutah an rak pek. Cule cuih tangka cu a ṭulnak vekin an zem vivo. 36 Cubangtuk in Saipras tikulh ih a suakmi Levi mi Josef in, 37 a lo kha a zuar ih a ngahmi tangka cu tirhthlah pawl ih kut sungah a pek. Josef cu tirhthlah pawl in Barnabas tiah an ti. (Barnabas ti cu "Thazaang Petu," tinak a si.)
1 Asinain Ananias an timi pa le a nupi Sapfira cun an neihmi thilri kha an zuar ih, 2 a nupi ih lungkimnak thawn tangka ṭhenkhat cu anmah ih hrangah an ret ih a taangmi cu tirhthlah pawl kut sungah an pek. 3 Cutikah Piter in, "Ananias, ziangah so Satan in a lo neh ih na thil zuarnak ih na ngahmi tangka a hrek cu suup tahrat in Thlarau Thianghlim na bum? 4 Na thilri cu na zuar hlanah nangmah ih ta a si; na zuar hnu khalah na ngahmi tangka cu na ta thotho a si. Sikhalsehla ziangah so hi bangtuk tuah ding hi na thinlung hrimhrim in na ruah? Milai na bum a si lo, Pathian na bum a si," tiah a ti. 5 Cumi cu Ananias in a theih vete in a tlu ih a thi; cule cuih thu a theitu hmuahhmuah cu an tuk a sum ṭheh. 6 Tlangval pawl an rung ih a ruak cu an tuam ṭheh hnuah lengah an zawn ih an phum. 7 Nazi pathum hnuah ziang a cang ti thei loin a nupi a ra ve. 8 Piter in, "Hi tangka hi nan thil nan zuarmi ihsin nan ngahmi tangka zate a si maw? I sim hnik!" tiah a sut. Sapfira in, "Asi, kan ngahmi zate a si," tiah a sawn. 9 Cutikah Piter in, "Ziang hrangah so na pasal thawn nan pahnih in Bawipa ih Thlarau hniksak dingah nan lung a kimtlang? Na pasal a phumtu tlangval pawl cu sangka kiangah an um lai; nangmah khal an lo zawn suak ve ding," tiah a ti. 10 Hmakhatte-ah anih khal Piter kehram ah a tlu ih a thi ve. Tlangval pawl cu an rung lut ih a thi zo ti kha an hmuh tikah a lengah an zawn ih a pasal thlaan kiangah an va phum ve. 11 Kawhhran pumpi le cuih thu a theitu hmuahhmuah cu tuksum in an um. 12 Mipi lakah cun tirhthlah pawl in hmuhsaknak le khawruahhar thil tampi an tuah. Zumtu pawl hmuahhmuah cu Solomon Hulhliap timi ah an tong khawm aw. 13 Anmah cu midang in an porh zet na'n a lenglam mi cu an lakah an tel ngam lo. 14 Sikhalsehla nunau siseh mipa siseh Bawipa a zumtu pawl cu an pawl ah tam sinsin in an lut. 15 Tirhthlah pawl ih thil an tuahmi an hmuh ruangah mina tampi cu khawsung lamzin ah an zawn ih Piter a feh zawng ah mi ṭhenkhat tal a thlaam in hliap seh tiah ihkhun le pher parah an hlum vivo hai. 16 Cule mi tampi cu Jerusalem kiangkap khua ihsin an ra ih mina siseh, khawsia polh mi pawl siseh, an rak zawn ih an zatein an dam thluh. 17 Puithiam Saang le a rualpi pawl hmuahhmuah le cutawk hrawngih a ummi Sadusi pawl cun tirhthlah pawl kha an halhsik tuk ruangah thil pakhatkhat tuah an tum. 18 Tirhthlah pawl kha an kai ih mipi thawng ah an thlak. 19 Sikhalsehla cuih zanah cun Bawipa ih vancungmi in thawnginn sangka pawl cu a ong ih tirhthlah pawl cu a suah hnuah an hnenah, 20 "Va feh uhla Biakinn sungah dingin misenpi hnenah hi nuntharnak thuhla hi kimten va sim uh," tiah a ti. 21 A sim vekin tirhthlah pawl cun an tuah ih zing thlapit ah Biakinn sungah an lut ih thuzirh an thok. Puithiam Saang le a rualpi pawl in Khonsil thurelnak thupi zet nei dingah Judah mi upa hmuahhmuah kimtein an ko khawm. Tirhthlah pawl thawnginn ihsin an hmaiih rak hruai dingah mi an hei thlah. 22 Sikhalsehla thawnginn bawi pawl an va thlen tikah thawnginn sungah tirhthlah pawl an hmu nawn lo; curuangah an kir ih Khonsil pawl an sim: 23 "Thawnginn kan va thlen tikah tawh ṭhatein a hren aw ih a kiltu pawl khal in sangka ṭhatein an kil ko; asinain sangka kan ong tikah a sungah zohman an um lo," tiah an ti. 24 Cumi cu puithiam upa le Biakinn kiltu bawi in an theih tikah tirhthlah pawl ziang an cang, tiah khawruahhar in an um. 25 Cule mi pakhat a rung lut ih, "Ngaihnik uh! Thawng ih nan thlakmi pawl kha Biakinn ah an um ih mi an zirh rero a si," tiah a ti. 26 Curuangah Biakinn kiltu ralbawi le a kuthnuai milai pawl cu an va feh ih tirhthlah pawl cu an va hruai kir. Hranhram in an hruai lo, ziangahtile misenpi in lungto in in deng pang ding ti an phang. 27 Tirhthlah pawl cu an run luhpi ih Khonsil hmaiah cun an dinter. Cule Puithiam Saang in thu a sut. 28 "Hi pa hmin in thu nan zirh nawn lo pei, tiah fek zetin thu kan lo pe zo ti nan thei lo maw? Asinain nan tuah thotho. Nan thuzirhmi cu Jerusalem nan khahter zo ih a thihnak thu khalah kanmah hi mawhphurtu ah in tuah a si," tiah a ti. 29 Piter le a dang dungthlun pawl in, "Milai thu hnakin Pathian thu kan ngai sawn ding. 30 Nanmah in Jesuh cu thinglamtah parah nan khen that; asinain kan pupa pawl ih Pathian in thihnak ihsin a thoter sal zo. 31 Pathian in a thoter sal ih Israel mi pawl sualsirnak tikcu an neih ih an sualnak tla ngaidam a sinak dingah Amah cu Pathian in Hruaitu le Rundamtu ah a vorhlamah a toter zo. 32 Hi thil hmuahhmuah a theihpitu cu kanmah hi kan si; kanmah lawng kan si lo, Pathian in amah ih thu a ngaitu pawl hnenah laksawngih a rak pekmi Thlarau Thianghlim tla hi thu theihpitu a si ve," tiah an ti. 33 Cutiih an timi cu Khonsil sungtel pawl in an theih tikah an thin a heng tuk lawmmam ih tirhthlah pawl cu thah ṭheh an duh. 34 Sikhalsehla anmah lakah mi hmuahhmuah ih upatmi Daanthiam pa Farasi mi Gamaliel cu Khonsil hmaiah a hung ding ih tirhthlah pawl cu a lengih malte sung suahter dingah thu a pek. 35 Cule Khonsil upa hnenah cun, "Israel mi pawl, himi pawl parih thil nan tuahmi ah hin ralring uh. 36 Kan dung laiah Theudas an timi pa a hungsuak ih keimah hi mi menmen ka si lo, a ti ih mi zali in an thlun. Asinain amah cu an that ih a thluntu pawl cu an ṭekdarh ṭheh; cule a hnaṭuannak cu a cem ve. 37 Cuih hnuah mipum siar laiah Galilee mi Judas a hungsuak lala ih mi tampi in an thlun hluarhlo; asinain thah a si ve ih a dungthluntu pawl cu an ṭekdarh ṭheh lala. 38 Atuih thu khalah hin fiangtein ka lo sim, himi pawl tlunah hin zianghman tuah hlah uh. Umsan men uh! An tumtahmi le an tuahmi hi milai ih thokmi a si ahcun a hloral ko ding. 39 Sikhalsehla Pathian ih tuahmi a si ahcun nan neh thei cuang lo ding. Pathian dodaltu riangri ah nan cang thei," tiah a ti. Curuangah Khonsil upa pawl cun Gamaliel ih ruahnak pekmi cu an thlun. 40 Tirhthlah pawl cu an ko ih fungfek in an vuak ih Jesuh hmin in thu sim nawn lo dingah thu an pek hnuah an thlah. 41 Tirhthlah pawl cu Khonsil upa pawl hnen ihsin an suah tikah Jesuh hrangah ningzah mualpho tuar dingin ruah an si ruangah an lung a awizet. 42 Cule nitinte in Messiah Jesuh ih Thuthang ṭha cu Biakinn ah siseh mi inn ah siseh catbang loin an zirh ih an sim vivo.
1 Caan malte a rei deuh tikah dungthluntu pawl an tam vivo ih Judah mi pawl le Grik ṭong in a ṭongtu Judah mi pawl karlak ah thubuai a um. Grik ṭong a hmangtu Judah mi pawl in nitin a ṭulmi leinak ih tangka zem tikah an nuhmei pawl in an co ding zat an co lo a si, tiah thu a um. 2 Curuangah tirhthlah hleihnih pawl in zumtu pawl hmuahhmuah cu hmun khatah an kokhawm ih, "Tangka thuhla tawlrelnak ah Pathian thusim kan daithlang a si ahcun a dik lo ding. 3 Curuangah u le nau pawl, nanmah lakah Thlarau Thianghlim le fimnak in a khatmi mi pasarih hril uhla anmah pawl cu hi thuhla tawlreltu ah kan ret ding. 4 Kannih cu kan tikcu zatein thlacamnak le thusimnak ah kan hmang ding," tiah an ti. 5 Tirhthlah hleihnih pawl ih ruahnak an suahpi mi parah an zatein an lung a awi ih cuticun zumnak le Thlarau Thianghlim in a khatmi Stefen, Filip, Prokhoras, Nikanor, Timon, Parmenas, le Antiok khua ihsin Judah biaknak ih a luttu Zentail mi Nikolaus tla an hril. 6 An pasarih in tirhthlah pawl hnenah an fehpi ih tirhthlah pawl in an lu parah an kut an suang ih thla an cam sak. 7 Cule Pathian thu cu a zai vivo. Dungthluntu pawl tla Jerusalem khua sungah an karh vivo ih puithiam tampi in an zumnak cu an pom ve. 8 Pathian in a thlawsuah zetmi le cahnak huham thawn a khatmi Stefen in misenpi lakah khawruahharza le hmuhsaknak mak tampi a tuah. 9 Asinain Salsuak pawl sungin Stefen thawn thu-el awknak a suak ih acuih Stefen thu eltu lakah cun Sairin khua le Alexandria khua ihsin a rami Judah pawl tla an tel. Cun Silisia le Asia ram ih Judah pawl khal an tel ve. 10 Asinain Stefen cu Thlarau in fimnak a pek ih a ṭong tikah cun zohman in an el thei lo. 11 Curuangah mi ṭhenkhat kha, "Moses le Pathian thangsiat in a ṭong kan thei a si," tiah ti dingah nawhthuh an pek. 12 Cuti cun misenpi, upa pawl le Daanthiam pawl kha thinheng koin an forh. Stefen cu an kai ih Khonsil upa hmaiah an suahpi. 13 Cule thuphan puhtu ding pawl cu an rak hruai ih annih in, "Hi pa in kan Biakinn Thianghlim le Moses Daan tla hi nautat hmuhsuam in a ṭong ringring. 14 Hi Nazareth mi Jesuh in hi Biakinn hi a bal ṭheh ding ih Moses san ihsin kanmah ih san tiang a ummi kan pupa daan khal a thleng ṭheh ding a si, tiah a ṭong lai kan thei," an ti. 15 Khonsil pumkhawmnak sungih a telmi hmuahhmuah in Stefen cu an hei zoh ih a mithmai cu vancungmi ih mithmai bangtuk in an hmu.
1 Puithiam Saang in Stefen cu, "Hitiih an timi hi a si ngaingai maw?" tiah a sut. 2 Stefen in, "U le nau, nu le pa pawl, i ngaihnik uh! Kan pu Abraham cu Haran um dingih a feh hlanah Mesopotamia ah Pathian sunlawinak a hnenah a rung lang ih, 3 'Na sungkhat le na ram taanta awla ka lo hmuh dingmi ramah feh aw,' tiah a ti. 4 Cuti cun Khaldea ram ihsin a suak ih Haran khua ah a um. A pa thih hnuah atu nan umnak ramah hin Pathian in a certer. 5 Culai ah hi ram hi Pathian in Abraham hnenah a bulta si dingah a fiakte hman a pe lo; asinain a hnenah pe dingin thu a kam ih hi ram hi nangmah le na tesinfa pawl ih ta a si ding, tiah a ti. Pathian in hiti ih thukamnak a tuah laiah Abraham cu faate a nei lo. 6 Pathian in a hnenah, 'Na tesinfa pawl cu ramdang ah an um ding; cuih ramah sal an cang ding ih kum zali sung zonzaih an tuar ding. 7 Sikhalsehla an renmi miphun parah cun thuṭhennak ka nei ding ih cuih hnu lawngah cuih ram ihsin an suak ding ih hi hmunah hin keimah in bia ding,' tiah a ti. 8 Cule Pathian in Abraham hnenah serhtannak daan kha a thukam hminsinnakah a pek. Curuangah Abraham in a fapa Isaak a suah hnu zarh khatah a serh a tansak. Isaak in a fapa Jakob ih serh a tansak ih Jakob in a fapa hleihnih an serh a tansak. A fapa hleihnih cu kan phun cithlahtu kan pupa hminthang pawl an si. 9 "Jakob ih fapa pawl in an naupa Josef cu an nahsuah ih Izipt ramah salah an zuar. Sikhalsehla Pathian a hnenah a um ih, 10 a harsatnak sung ihsin himte in a hruai suak. Izipt siangpahrang hmaiih a din tikah Pathian in Josef cu ziaza mawi le fimnak a pek ih Izipt siangpahrang in a ram pumpi le a innsang tlunah uktu bawi a ṭuanter. 11 Izipt ram le Kanaan ram sungih mangṭam a tlun tikah mipi hrangah harsatnak tampi a thleng. Kan pupa pawl khal in rawl an ngah thei lo. 12 Jakob in Izipt ah rawl a um ti a theih tikah a fapa pawl, kan pu le kan pa pawl cu a thlah; himi cu Izipt an thlennak hmaisa bik a si. 13 A voihnihnak ih Izipt an thlen tikah a u le hnenah Josef cu a phuang aw ih Izipt siangpahrang in Josef ih sungkhat pawl cu a thei ngah. 14 Curuangah Josef in a pa Jakob le a sungkhat pawl hnenah Izipt ramih rung vai dingin thu a cah. An zatein minung sawmsarih le panga an si. 15 Cule Jakob cu Izipt ah a vung feh; cutawkah amah le a fapa pawl cu an thi. 16 An ruak cu Shekhem ah an fehpi ih Abraham in Hamor miphun hnen ihsin tangka in a rak leimi thlaan ah an phum. 17 "Pathian in Abraham hnenih thu a kammi a kimnak tikcu a nai vivo tikah Izipt ramih a ummi kan phunpi pawl cu an tam sinsin. 18 Neta bikah Josef ih thuhla a thei dah lotu siangpahrang pakhat in Izipt ram cu a uk. 19 Kan pu le kan pa pawl cu a bum ih a hrem; an faate pawl tla thi hai seh tiah an innsung ihsin inn lengah a hlonter. 20 Culai caanah naute mawi zet Moses timi cu a suak. Moses cu inn ah thla thum sung ṭhatein an cawm. 21 Pawnleng ih hlon a si ve tikah siangpahrang ih fanu in a lak ih a fapa ah a tuah ih cutiin a kilkhawi. 22 Izipt mi ih fimnak hmuahhmuah an zirh thluh ih a ṭongkam le a tuahnak in mi nasazet a si ti a langter. 23 "Moses cu kum sawmli a ti tikah a phunpi Israel mi pawl ziang bangtuk in an nung, ti hmuh duh ah a leng. 24 Culai ah a phunpi Israel mi pakhat cu Izipt pa in a rak hrem kha a hmu tikah a va bawm ih phuba la in Izipt pa cu a that. 25 (Pathian in anmah luattertu dingah i hmang ding ih ka phunpi khal in an theithiam ding, tiah a ruat na'n an rak theithiam lo.) 26 A thaisun ah Israel mi pahnih an sual awk lai kha a hmu ih va rem a tum. 'Unau pawl, i ngai uh! Nannih cu mi phunkhat Israel mi veve nan si! Ziangah so hiti in nan sual awk rero?' tiah a ti. 27 Sikhalsehla a phunpi a hmuhsuamtu pa in Moses cu a tulpet ih, 'Zo in so kan tlunah uktu le thuṭhentu ah a lo tuah? 28 Mizan ih Izipt pa na thah vek khan thah ve i duh maw si?' tiah a ti. 29 Cumi cu Moses in a theih tikah Izipt ram ihsin a tlan ih Midian ramah a va um. Cutawkah fapa pahnih a nei. 30 "Kum sawmli a liam hnuah Sinai Tlang kiang ramṭhing ah hrambur alh sung ihsin Moses hnenah vancungmi pakhat a lang. 31 Cuih mei alh cu Moses in a hmuh tikah a mang a bang ih zohhliah dingah hrambur alh-mi kiangah cun a va feh. Asinain Bawipa ih aw a thei ih, 32 'Keimah hi nan pupa pawl ih Pathian, Abraham ih Pathian, Isaak le Jakob ih Pathian ka si,' tiah a ti. Moses cu thinphang in a khur ih a zoh hman a zoh ngam lo. 33 Bawipa cun, 'Na kedam phuak aw, ziangahtile na dinnak hmun hi hmun thianghlim a si! 34 Izipt ramih ka minung pawl an tuarmi le an zonzaihnak ka hmu. An aihramnak ka thei ih anmah luatter dingah ka rung. Ra aw, Izipt ah ka lo thlah ding,' tiah a ti. 35 "Moses cu Israel mi pawl ih hnon dahmi pa a si. 'Zo in so kan tlunah uktu le thuṭhentu-ah an lo tuah?' tiah an rak ti. Hrambur alh sung ihsin a hnenih a langmi vancungmi ih bomnak thawngin Pathian in Israel mi uktu dingah le luattertu dingah a thlahmi a si. 36 Izipt ram ihsin Israel mi pawl cu a hruaisuak ih Izipt ram le Tipi Sen le ramṭhing lakah kum sawmli sung thil khawruahhar le hmuhsaknak mak tampi a tuah. 37 Moses cu Israel mi hnenah, 'Pathian in nan hnenah keimah i thlah bangtuk in profet a thlah ding ih cupa cu nanmah ih miphun sung ihsin a si ding,' tiah a rak titu pa a si. 38 Amah cu Israel mi pawl ramṭhingih an um laiah an lakih a tel ringringtu pa a si; kan pu le kan pa pawl lakah a rak um ih Sinai Tlangah vancungmi ṭongkam a rak sangtu le misenpi hnenih a rak umtu a si; cule Pathian thunung kan hnenih a thlen theinak dingah a rak cohlangtu a si fawn. 39 "Sikhalsehla kan pu le kan pa pawl in amah cu an thlun duh lo. An hnong ih Izipt ram ah vung kirsal an duh sawn. 40 Curuangah Aaron hnenah, 'In hruaitu dingah khawzing tampi in in tuahsak aw. Izipt ram ihsin in hruaisuaktu Moses parah ziang a cang ti kan thei nawn ual lo,' tiah an ti. 41 Cuti a si ruangah cawcang hmuihmel cuangin caw lem an tuah ih rai an thawi ih an kutih an tuahcopmi hrangah upatnak puai an tuah ciamco. 42 Curuangah Pathian in a dungtun ih profet pawl cabu sungih ngan a si vekin vanih arsi pawl a biakter hai. Cuih cabu sungah cun: 'Israel mi pawl, kum sawmli sung ramṭhing ah ṭilva nan that ih Raithawinak nan pekmi kha ka hnenah nan tuahmi a si lo. 43 Nan phurhmi thlam cu Molek khawzing puanthlam a si. Nan kenmi milem cu nan khawzing Refan ih arsi lem a si. Annih tla cu biak dingih nan tuahmi khawzing lem an si. Curuangah nannih cu Babilon lan ah ka lo dawihlo ding,' tiah a um. 44 "Kan pu le kan pa pawl in Thukamnak Puanthlam cu nelrawn ramṭhing ah an nei ringring. Cuih Puanthlam cu Pathian in Moses hnenih a langtermi pianhmang vekih sakmi a si. 45 Neh hnuah kan pu le kan pa pawl in cuih puanthlam cu an pu pa hnen ihsin an lak ih Joshua thawn an feh tikah an fehpi vivo; hmai an nor ih Pathian in a rak um ciami miphun pawl kha a dawisak ih cuih ram pawl cu an lak vivo. Puanthlam cu cutawkah David san tiang a um. 46 David cu Pathian hmaiah mithmai ṭha a ngah ih Jakob ih Pathian umnak hrangah inn pakhat sak thei dingah Pathian hnenah a dil. 47 Sikhalsehla inn a saktu ngaingai cu Solomon a si. 48 "Asinain Cungnungbik Pathian cu minung kutih tuahmi inn sungah a um lo; Profet pawl in hiti in an sim: 49 'Vancung hi ka tokham a si ih Leilung hi ka kepal a si, tiah Bawipa in a ti. Ka hrangah ziangbangtuk inn so sak nan tum? Ka um duhnak hmun cu khuitawk so a si? 50 Hi thil hmuahhmuah a tuahtu hi Keimah ka si lo maw?' a ti. 51 "Nan lung a va ruh lawmmam so! Nan thinlung cu Pathian thei lo thinlung a va si lai so! Pathian thu ngai dingah nan hna a va set lawmmam ve! Nannih hi nan pupa pawl vek thotho nan si: Thlarau Thianghlim nan dodal ringring! 52 Nan pupa pawl ih an hrem lomi profet pakhat tal an um maw? Pathian ih Siahhlawh fel a ra ding tiah khuahlan lai ihsin a rak phuangtu Pathian ih palai pawl an rak that. Atu-ah cuih a felmi a Siahhlawh cu nanmah in nan zuar ih nan that! 53 Vancungmi in an run kenmi Pathian ih daan a saangtu cu nanmah nan si; asinain cuih daan a thlun lotu cu nanmah thotho nan si," tiah a ti. 54 Khonsil upa pawl in Stefen thusimmi an theih tikah an thin a heng tuk ih an hacang an rial hnawh. 55 Sikhalsehla Stefen cu Thlarau Thianghlim in a khat ih vancung a hun zoh tikah Pathian sunlawinak le Pathian vorhlamih a dingmi Jesuh kha a hun hmu. 56 Cutikah, "Zohhnik uh! Van a ong aw ih Pathian vorhlamah Milai Fapa a ding ka hmu!" tiah a ti. 57 Cutikah Khonsil upa pawl cu an hna an kut in an phit ih an aw neih patawp in an au ih Stefen cu an zon! 58 Khawpi sung ihsin an dirhsuak ih lungto in an deng. A dengtu pawl in an puan pawl cu Saul an timi tlangvalpa hnenah an retta. 59 Lungto in an den rero laiah Stefen cun Bawipa a ko ih, "Bawipa Jesuh, ka thlarau run la hram aw!" tiah a au. 60 A khuk a bilh ih, "Bawipa, an sualnak hi ciing ringring hram hlah aw!" tiah napi in a au. Cutiih a au ṭheh vete in a hnuk a cat.
1 Cuih ni ihsin thokin Jerusalem ih kawhhran cu hremnak nasa zet an tuar. Tirhthlah pawl siarlo a dang zumtu pawl hmuahhmuah cu Judea ram le Samaria ram sungah an ṭhendarh aw ṭheh. 2 Stefen cu Pathian a ṭihzahtu ṭhenkhat in an vui ih nasa zetin an ṭah. 3 Asinain Saul cun kawhhran pawl siatsuah a tum; inn khat hnu inn khat a feh ih nunau mipa tilo zumtu hmuahhmuah an inn ihsin a dirsuak ih thawng ah a thlak hai. 4 A ṭekdarhmi zumtu pawl cu khuazakipah an thleng ih an thlennak hmunkipah Thuthang ṭha an sim. 5 Filip cu Samaria khawpi ah a feh ih cuih khuami hnenah Messiah ih thuhla a sim. 6 Mi tampi in a thusimmi cu ṭhatein an ngai ih hmuhsaknak a tuahmi tla an hmu. 7 Miburpi sung ihsin khawsia pawl ringpi ih au phah in an suak ih mizeng le ke-awl pawl tla an dam. 8 Curuangah cuih khawpi sungah lungawinak tampi a um. 9 Cutawk khua ah Simon an timi pa a rak um. Caan rei nawn a mitkher thiamnak in Samaria mi pawl cu an thinlung let ko in a tuah. Keimah ka si bik tiin a ruat aw ve. 10 Khawpi sungih a ummi hmuahhmuah a tum a seen in a thu an ngai. Annih in, "Amah hi, 'A Maksak mi Huham,' timi Pathian ih cahnak a si hi!" tiah an ti. 11 Caan reipi a mitkher thiamnak in an lung let ṭheh ko in a tuah ruangah a thu an thlun duhnak a si. 12 Sikhalsehla Filip ih thusimmi Pathian Uknak Thuthang ṭha le Jesuh Khrih ih thuhla an theih tikah an zum ih nunau siseh mipa siseh baptisma an lak. 13 Simon khal cun a zum ve; baptisma a lak hnuah Filip cu a thlun ih khawruahhar le hmuhsaknak thil tampi Filip ih tuahmi kha a hmuh tikah anih khal a mang a bang ngaingai. 14 Jerusalem ih a ummi tirhthlah pawl in Samaria mi khal in Pathian thu an pom ve thlang ti an theih tikah an hnenah Piter le Johan an thlah. 15 An hnen an thlen tikah zumtu pawl in Thlarau Thianghlim an ngahnak dingah an hrangah thla an cam. 16 Ziangahtile Thlarau Thianghlim kha zo ih hnen hmanah a rung thleng hrih lo; Bawi Jesuh hminih baptisma latu lawng an si lai. 17 Cule Piter le Johan in an parah kut suangin thla an cam ih Thlarau Thianghlim an ngah. 18 Tirhthlah pawl in an kut an suan tikah zumtu pawl in Thlarau Thianghlim an ngah kha Simon in a hmu. Curuangah Piter le Johan hnenah, 19 "Kei khal in an tlunih ka kut ka suanmi hmuahhmuah Thlarau Thianghlim an ngah theinak dingah hi cahnak huham i pe ve uh," tiah ti phah in tangka a pek hai. 20 Sikhalsehla Piter in, "Pathian ih pekmi laksawng hi tangka thawn lei thei dingih na ruah ruangah nangmah cu na tangka thawn va hloral uh! 21 Pathian mithmuh-ah na thinlung a dik lo ruangah kan hnaṭuanmi sungah na tel lo, covo khal na nei lo. 22 Hi bangtuk thil ṭha lo na ruah sualnak ihsin siir aw awla a lo ngaithiamnak dingah Bawipa ih hnenah thlacam aw. 23 Ziangahtile nahsuahnak in a khatmi le sualnak thawng sungih a tlami na si, tihi ka hmu a si," tiah a ti. 24 Cutikah Simon in Piter le Johan hnenah, "Zaangfahnak in hi nan ṭongmi pawl hi ka parih a thlen lonak dingah Pathian hnenah thla i cam sak hram uh," tiah a dil. 25 Pathian thu an phuang ih an hmuhmi le an tonmi an sim hnuah Piter le Johan cu Jerusalem ah an kir sal. An kir phahah Samaria peng khawte tampi sungah Thuthang ṭha cu an sim vivo. 26 Bawipa ih vancungmi in Filip hnenah, "Na timtuah awla thlanglam ah Jerusalem ihsin Gaza fehnak lamzin ah vung feh aw," tiah a ti. (Atu-ah cun hi lamzin cu an hmang nawn lo.) 27 A ti vekin a tim a tuah ih Filip cu a feh. Culai ah Ethiopia mi pakhat an khua lamih a tlungmi a tong. Cupa cu tilpermi a si ih Ethiopia siangpahrang nu ih neihmi sumsaw hmuahhmuah a kilkhawitu bawi a si. Amah cu Jerusalem ah Pathian bia dingin a feh. 28 A ra tlunlam ah a rangleng parah to in profet Isaiah cabu a siar. 29 Thlarau Thianghlim in Filip hnenah, "Feh awla khi rangleng khi va naih aw," tiah a ti. 30 Filip cun a hei dawi ih profet Isaiah cabu a siar ti a thei. Filip in, "Na siarmi hi a tican na thei maw?" tiah a sut. 31 Cupa cun, "Zotal ih in simfiang lo ahcun ziangtinso ka theih thei ding?" tiah a sawn. Cule Filip cu a rangleng parah to ve dingin a sawm. 32 A siarmi Ca Thianghlim cu a tanglam vek hin a si: "Amah cu thah dingmi tuu bangin an hruai ih, Tuu faate a hmul an met laiah ai loih a um bangin, ṭong loin daitein a um. 33 Hmuhsuam nautatnak a tuar, ṭantu zohman a nei lo; Leitlun ihsin a nunnak an laksak ruangah, A ci thlahmi pawl sim ding zohman an um lo," tiin a um. 34 Cupa in Filip cu, "I sim hnik! Profet Isaiah ih a ṭongmi hi zo ih thu so a si? Amah ih thu maw, midang ih thu so?" tiah a sut. 35 Cutikah Filip in cuih Baibal caang ihsin thokin Bawi Jesuh Thuthang ṭha cu a sim ṭheh. 36 Cutiin an vung feh vivo ih tidai a umnak hmun an thleng. Cupa cun, "Hinah tidai a um. Baptisma co dingah ziangso i dawntu a um?" tiah a ti. 37 (Filip in, "Na thinlung zatein na zum ahcun baptisma co ding na si," a ti. Cupa cun, "Ka zum; Jesuh Khrih cu Pathian Fapa a si tiah ka zum," a ti.) 38 Cuih Ethiopia pa cun a rangleng cu a dinter ih Filip thawn tidai sungah an vung ṭum ih Filip in baptisma a pek. 39 Tidai sung ihsin an hung suah tikah Bawipa ih Thlarau in Filip cu a lak hlo. Cuih bawi in Filip cu a hmu nawn lo; asinain lungawi zetin a inn lamah a tlung. 40 Filip cu Ashdod a va thleng; Sisaria ah a feh ih lamzin tluan khua kipah Thuthang ṭha cu a sim vivo.
1 Cuih caan hrawngah Saul cun Bawipa ih dungthlun pawl kha that dingah a hringhro rero. Puithiam Saang hnenah a va feh ih, 2 Damaskas khua ih sinakok inn uktu pawl in amah kha an rak theihnak dingah ca ken ding a va dil. A tumtahmi cu cutawkah Bawipa ih Lamzin a thluntu an um asile nunau mipa tilo kai tahratin Jerusalem ih hruai ding kha a si. 3 Saul cu Damaskas khua a thlen zikah hmakhatte ah van ihsin tleunak in a kimvelin a run tlet. 4 Saul cu a tlu ih, "Saul, Saul, ziangah so i hrem?" tiah aw pakhat a thei. 5 Saul in, "Bawipa, zoso na si?" tiah a sut. Cuih aw cun, "Na hrem reromi Jesuh ka si. 6 Tho awla khawpi sungah va feh aw; na tuah ṭulmi kha an lo sim ding," tiah a ti. 7 Saul thawn khual a tlawngmi pawl cu an cawl ṭheh ih kam khat hman an ṭong lo; aw cu an thei na'n zohman an hmu lo. 8 Saul cu leilung ihsin a hung tho ih a mit a hun meng, asinain zianghman a hmu thei lo. Curuangah a kut in an hruai ih Damaskas khua sungah cun an fehpi. 9 Ni thum sung khua a hmu thei lo; cuih ni thum sungah zianghman a ei lo, tidai khal a in lo. 10 Damaskas khawsungah Ananias timi dungthluntu pakhat a um. Langnak hmuhmi a nei ih cumi sungin Bawipa in, "Ananias!" tiah a ko. Anih in, "Bawipa, hinah ka um," a ti. 11 Bawipa in, "Na tim tuah awla Lamzin Ding timi ah va feh aw. Judas inn ah Tarsas khuami Saul timi pa a um maw, tiin va sut aw. Amah cu thla a cam lai rero; 12 anih khal in langnak a hmu ih cumi langnak sungah cun a mit khua a hmuh thei salnak dingah Ananias an timi pa a rung lut ih a lu parah kut a ra suan kha a hmu," tiah a ti. 13 Ananias in, "Bawipa, mi tampi in himi pa ih thuhla hi in sim zo ih Jerusalem ih na minung pawl parih thil ṭha lo a tuahmi pawl khal in sim. 14 Cule atu-ah puithiam upa pawl ih thuneihnak thawn nangmah a lo biatu pawl hmuahhmuah kai dingah Damaskas ah a ra thleng a si," tiah a ti. 15 Bawipa in a hnenah, "Va feh aw! Ziangahtile amah cu Zentail mi hnen le siangpahrang pawl hnen le Israel mi pawl hnenah ka hmin thangter dingin le ka hnaṭuan dingin ka hril zo. 16 Cule keimah in ka hrangih a tuar dingmi pawl cu ka hmuh ding a si," tiah a ti. 17 Curuangah Ananias cu a feh ih Saul umnak innah cun a va lut. Saul ih lu parah a kut suang tahrat in, "Unau pa Saul, hitawk lam na rat laiih lamzinah na hnenih a langmi Jesuh Bawipa amah rori in na hnenah i thlah. Khua na hmuh sal theinak dingah le Thlarau Thianghlim thawn na khahnak dingah na hnenah i thlah a si," tiah a ti. 18 Hmakhatte-ah Saul ih mit ihsin ngakep bangtuk a si mi a tla ih khua a hmu thei sal. A tho ih baptisma an pek. 19 Cule rawl a ei ih thazaang a nei sal. Saul cu Damaskas khua ih dungthluntu pawl hnenah ni malte sung a um. 20 An pumkhawmnak sinakok inn pawlah a va feh ih Jesuh cu Pathian Fapa a si, ti thu kha a sim. 21 A theitu hmuahhmuah cu an mang a bang ngaingai ih, "Jerusalem ah Jesuh a zumtu pohpoh a siatsuahtu cu amah hi a si lo maw? Cuvek thothoin hitawk khalah hin cubangtuk mi cu kai tahratin puithiam upa pawl hnenih thlenpi dingah a ra thleng a si lo maw?" tiah an sut aw ruri. 22 Sikhalsehla Saul thusimmi cu hmual a nei deuhdeuh; Jesuh cu Messiah rori a si tiah a simmi kha mi thinlung sungah fiangtukin a luh ruangah Damaskas khua ih a ummi Judah mi pawl in a thu cu an let thei lo. 23 Ni tam nawn a rei tikah Judah mi pawl an tongkhawm aw ih Saul that dingah khua an khang. 24 Asinain cutiih an khawkhanmi cu a simtu an rak um ih Saul in a thei. Amah thah duh ah a sun a zan in khawpiih kotka pawl cu an kil. 25 Sikhalsehla Saul a thluntu pawl in zan khatah Saul cu bawm sungah an ret ih khawpi kulhnak hauhruang ong in a lengah an vun ṭhum. 26 Saul cu Jerusalem ah a feh ih dungthlun pawl lakah tel ve a tum. Asinain annih pawl cun dungthlun a si ve thlang ti kha an zum lo ih an zatein amah kha an ṭih riangri. 27 Cule Barnabas in a ṭanpi ih tirhthlah pawl hnenah a fehpi. Barnabas in an hnenah cun Damaskas lamzin ih Bawipa a tonnak le Bawipa in a hnenih a ṭongmi pawl kha fiangtein a sim. Cule Saul in Jesuh ih hmin kha Damaskas khua ah ralṭha zetin thuthang.tha a phuannak thu tla a sim. 28 Curuangah Saul cu an hnenah a um ih Jerusalem khawsung hmunzakip ah a feh ih ralṭha zetin Jesuh hmin in thu a sim. 29 Grik ṭong a hmangtu Judah mi pawl hnen tla-ah thu a sim ih thu tla an el aw, asinain annih cun a thah an tum. 30 Cumi cu zumtu pawl in an theih tikah Saul cu Sisaria ah an hruai ih Tarsas ah an thlah. 31 Cuti cun Judea ram, Galilee ram le Samaria ram sung kawhhran pawl cu hnangamte in an um. kawhhran cu Thlarau Thianghlim bomnak in a cak deuhdeuh ih mi khal an karh vivo. Pathian ṭihzah in an um. 32 Piter cu khuazakipah a tlawng ih voikhat cu Lidda khua ih ummi Pathian awi pawl tlawng dingah a feh. 33 Cutawkah Aenias an timi pa a tong. Aenias cu mizeng a si ih kum riat sung ihkhun ihsin a tho thei dah lomi a si. 34 Piter in, "Aenias, Jesuh Khrih in a lo damter a si. Tho awla na ihphah zual aw," tiah a ti. Hmakhatte-ah Aenias cu a tho. 35 Lidda le Sharon-ih a ummi hmuahhmuah in Aenias cu an hmuh ruangah Bawipa lamah an hoikir. 36 Joppa khua ahcun Tabitha an timi nu a um ih Jesuh zumtu a si. (A Grik hmin cu Dorkas a si ih a tican cu "Zukneng," tinak a si.) A tikcu hmuah cu thil ṭha tuahnak ah le mifarah bomnak ah a hmang. 37 Cuih caanah cu nu cu besia zetin a na ih a thi. A ruak cu an kholh ih tlunta khaan ah an ret. 38 Joppa khua cu Lidda khua in a naite a si. Cule Joppa ih a ummi zumtu pawl in Lidda ah Piter a um ti kha an theih tikah mi pahnih an thlah ih, "Zamrang in kan hnenah ra hram aw," tiah an cah. 39 Curuangah Piter cu a tim a tuah ih anmah a thlun. A va thlen tikah Piter cu tlunta khaanah cun an hruai. Cutawkah cun nuhmei pawl in an pan ciamco ih an ṭap ih Dorkas damlai-ih angki le kawtkor a tahmi pawl kha an hmuh. 40 Piter in khaan sung ihsin mi pawl cu a suahter ṭheh ih, a khukbil in thla a cam; cule Dorkas ruak lam a hoi ih, "Tabitha, tho aw!" tiah a ti. Dorkas cun a mit a hun meng ih Piter a hmuh tikah a hung to. 41 Piter in a hei dawh ih a dinter. Cule nuhmei pawl le zumtu pawl hmuahhmuah cu a kawh ih a nungzo tiin an hnenah a hmuh. 42 Cuih thu cu Joppa khawsung hmuahhmuah ah a thang ih mi tampi in Bawipa an zum. 43 Piter cu Joppa khua ah savun tuahtu Simon inn ah ni tampi sung a caam.
1 Sisaria khua ah Kornelias an timi pa a um. Amah cu, "Italy Ralkap Burpi," timi Rom ralkap bu uktu ralbawi bothum a si. 2 Amah cu Pathian a ṭihzah zettu a si; a innsungsang in Pathian a bia ringringtu an si. Judah mi mifarah pawl tampi a bawm ih cat loin Pathian hnenah thla a cam ringringtu a si. 3 Voikhat cu zanlam nazi pathum tlukah langnak a hmu; cuih a hmuhmi ahcun Pathian ih vancungmi pakhat a hnenah a ra ih, "Kornelias!" tiah a ko. 4 Cuih vancungmi cu ṭih phah in a zoh ih, "Ziang so a si, Bawipa?" tiah a sut. Vancungmi cun, "Pathian cu na thlacammi le mifarah na bomnak parah hin a lung a awi ih na dilnak a thei a si. 5 Curuangah Joppa khua ah Simon Piter an timi pa ko dingin mi thlah aw. 6 Simon Piter cu Tipi kapih a ummi savun in thil tuahtu Simon ih innah a caam," tiah a ti. 7 Cule vancungmi cu a feh; cuih hnuah Kornelias in a innih a ummi hnen-um pahnih le ralkap pakhat a ko. Ralkap pa cu biaknak lamah a taimazet le a felzetmi a si ih amah a kilvengtu lakah pakhat a si. 8 Thil a cangmi pawl hmuahhmuah kha a sim ṭheh hnuah Joppa khua ah a thlah hai. 9 A thaisun ahcun an feh vivo ih Joppa khua an thlen zik zawng sunlaifang hrawngah Piter cu thlacam dingin inn parah a hung kai. 10 Piter cu a ril a rawng ih rawl ei a duh; rawl an tuah rero laiah langnak a hmu. 11 Van khi a ong aw ih puan hlaipi bangtuk a si mi thil pakhat a kil pali in leilung ah an run ṭhummi a hmu. 12 A sungah ke li nei ramsa a phunphun, bokvak ramsa le vate a phunphun an um. 13 Aw pakhat in a hnenah, "Piter, tho aw; that awla ei aw!" tiah a ti. 14 Asinain Piter in, "Bawipa, a si lo! A thiang lomi le a borhhlawhmi ka ei dah hrimhrim lo," tiah a ti. 15 Aw cun a run sim sal ih, "Pathian in a thiang a timi cu a thiang lo-ah ruat hlah," tiah a ti. 16 Cumi cu voithum tiang a rung lang ih cuih hnuah cuih thil cu vanah lak kir a si. 17 Cuih langnak ih a tican cu Piter in a ruah rero laifangah Kornelias ih thlahmi pawl cu Simon ih inn an thleng ih kotka lengah an ding. 18 "hittawk ah Simon Piter timi mikhual a um maw?" tiah an vun auh. 19 Piter cun a hmuhmi ih tican a ruah rero laifangah Thlarau in, "Ngaihnik, mi pathum in an lo hawl! 20 Na timtuah awla vung feh aw; cule an hnenih feh ding cu ṭhukṭhun in um hlah; keimah ih thlahmi an si," tiah a ti. 21 Curuangah Piter cu a vung ṭum ih a ra hawltu hnenah cun, "Nan hawlmi cu keimah ka si. Ziang so nan ṭul?" tiah a sut. 22 Annih in, "Ralbawi Kornelias in in thlah. Amah cu miṭhazet a si. Pathian a bia ih Judah mi pawl in an upat zetmi a si. Sim ding na neihmi kha thei seh tiah a inn ah nangmah lo sawm dingin Pathian ih vancungmi in a fial," tiah an ti. 23 Piter in cuih zan cu a hnenih riak hrih dingin a sawm hai ih an riak. A thaisun ah Piter cu a tim a tuah ih anmah thawn a feh; Joppa khua ih Khrih zumtu hrekkhat pawl tla an tel ve. 24 A tipsun ah Sisaria ah a thleng ih Kornelias cun a sungkhat pawl le a sawmmi a rualpi pawl thawn an rak hngak ringring. 25 Piter cu inn ih a vung luh zawng ah Kornelias in a rak hmuak ih a hmaiah a kuun ih a kehram ah a bok. 26 Asinain Piter in a dinter ih, "Ding aw! Kei khal minung sokhaw ka si ve," tiah a ti. 27 Inn sungih an luh phahah Piter in Kornelias cu a biak phah vivo; inn sungah cun mi tampi an tong-aw khawm. 28 Piter in an hnenah, "Kan biaknak daan vek a si ahcun Judah mi in Zentail mi leen ding le pawl ding cu khammi a si, ti cu nan thei ṭheh. Sikhalsehla zohman mi thiang lo le mi borhhlawh-ah ruah ding a si lo ti kha Pathian in i hmuh zo. 29 Curuangah mi nan thlah ih in ra kawh tikah kam khat hman el loin ka ra. Ziangah in ko ti atu-ah hin i sim hnik uh," tiah a ti. 30 Kornelias in, "Kan dunglam ni thum laiah, tuih tikcu hrawng zanlam nazi pathum ah ka innah thla ka cam. Hmakhatte-ah hnipuan tleu zet hrukin mi pakhat ka hmaiah a ding ih, 31 'Kornelias, Pathian in na thlacamnak a thei ih mifarah na bomnak khal a hminsin ṭheh. 32 Joppa ah Simon Piter an timi pa ko dingin mi thlah aw. Joppa ahcun Tipi kapih a um mi savun in thil tuahtupa Simon ih inn ah a riak,' tiah i ti. 33 Curuangah hmakhatte-ah ka lo ko; cule nangmah khal in i zaangfah ih na ra. Atu-ah hitawk ah hin Pathian hmaika-ah kan zatein kan um ih Bawipa in sim dingih a lo fialmi kha ngai dingah kan lo hngak a si," tiah a ti. 34 Piter cun a thok ih, "Pathian cun zozo khal bangraan tein mi a zoh a si, ti thudik kha ka thei. 35 Ziangbangtuk miphun a si khalle Pathian a ṭihzah ih a hmaiah thildik a tuah a si ahcun Pathian ih pom tlak a si. 36 Mi hmuahhmuah ih Bawipa a si mi Jesuh Khrih hnenin daihnak Thuthang ṭha cu Pathian in Israel mi hnenah a pek, ti cu nan thei. 37 Johan in baptisma thuthang a sim hnu Galilee ihsin thokin Israel ramsung hmunzakip ah thil maksak a cangmi khal cu nan thei ṭheh. 38 Nazareth mi Jesuh parah ziang bangtuk in Pathian in Thlarau Thianghlim le huham a burh ti tla nan thei ṭheh. A hnenah Pathian a um ruangah hmunzakip ah feh tahrat in thil ṭha a tuah vivo ih Satan ih tuahsiatmi pawl hmuahhmuah a damter thluh. 39 Israel ram sungah le Jerusalem ih a tuahmi hmuahhmuah a hmutu le a theitu kanmah hi kan si. Cule amah cu thinglamtah parah an khen ih an that. 40 Sikhalsehla ni thumnak ni ah Pathian in thihnak ihsin a thoter sal ih kan hnenah a langter. 41 Mi hmuahhmuah hnenah si loin a thu theitu dingih in hrilmi pawl hnenah a langter. Thihnak ihsin a thawhsal hnuah amah thawn kan ei kan in tlang a si. 42 Cule mi hnenah Thuthang ṭha sim dingah le amah cu Pathian in a nungmi le a thimi parah thuṭhentu ih a tuah kha simtu dingah in fial a si. 43 Profet hmuahhmuah in amah ih thu cu an sim ih amah a zumtu hmuahhmuah in a hmin thawngin an sualnak ngaidam a si ding, tiah an ti," tiah a sim. 44 Cutiih Piter a ṭong rero laiah a thusimmi a ngaitu hmuahhmuah parah Thlarau Thianghlim a rung thleng. 45 Joppa ihsin Piter thawn a rami Jesuh zumtu Judah mi pawl cu Zentail mi hnen khalah Pathian in a laksawng Thlarau Thianghlim a burh ti kha an hmuh tikah an mang a bang ngaingai. 46 Ziangahtile cute pawl cu ṭong phun dang in an ṭong ih Pathian ih maksak zia an thangṭhat kha an theih ruangah a si. Piter in, 47 "Kanmah ih kan ngah zo vekin himi pawl khal in Thlarau Thianghlim an ngah ve a si. Curuangah tidai ih baptisma la ding kha zo in so a dawn thei ding?" tiah a ti. 48 Curuangah Jesuh Khrih hmin in baptisma lak dingah thu a pek. Cule an hnenih caam hrih dingin Piter cu an sawm.
1 Tirhthlah pawl le Judea ram sungih a ummi zumtu hmuahhmuah in Pathian ih thu cu Zentail mi pawl khal in an pom ngah zo, ti an thei. 2 Piter cu Jerusalem ih a thlen tikah Zentail mi pawl serhtanter a duhtu pawl in an soisel ih, 3 "Serhtan lo Zentail pawl innah na riak ih an hnenah rawl tiangin na ei," an ti. 4 Cuti a si ruangah Piter in thil a cangmi umtudan hmuahhmuah kha a hramthok ihsin a sim hai. 5 "Joppa khua ih thla ka cam laiah langnak hmuhmi ka nei. Van ihsin kil li nei puan hlaipi bangtuk a si mi thil pakhat ka kiangte-ah an run ṭhum. 6 A sung ṭhatein ka vun bih ih ramsa le innzuat ṭilva le a bokvak thiammi thilnung le hramlakih vate pawl ka hmu. 7 Cule aw ka thei ih cuih aw cun, 'Piter, tho aw, that awla ei aw,' tiah i ti. 8 Asinain kei in, 'Bawipa, a si lo! Biaknak lamin a thiang lo timi le a borhhlawhmi rawl ka kaa sungah an lut dah kel lo,' tiah ka ti. 9 Cutikah van ihsin aw ka thei sal ih, 'Pathian in a thiang, a ti ciami kha nang in a thiang lo tiah ruat hlah,' tiah a ti. 10 Cuti cun voithum tiang rori a cang ih neta bikah a zatein vanah an lak kir sal. 11 Cuti a si laiah Sisaria ihsin an rak thlahmi mi pathum kha ka riahnak inn ah an ra thleng. 12 Cule zianghman nuarnak um lotein feh dingah Thlarau in i fial. Hi Joppa khua mi kan unau paruk, Jesuh zumtu pawl khal hin Sisaria ahcun in thlun ve ih kan zatein Kornelias ih inn ah kan va feh. 13 Kornelias in vancungmi a rung ih a innih a dinnak thu kha in sim. Cuih vancungmi cun Kornelias hnenah, 'Joppa ah mi thlah awla a hmin ngai Simon Piter an timi pa koter aw. 14 Amah in thu a sim ding ih cuih a thusimmi thawngin nangmah le na innsang rundamnak nan ngah ding,' tiah a ti. 15 Cule thusim ka hun thawh ih a hramthok ih kan parih Thlarau Thianghlim a rung thlen vekin an parah Thlarau Thianghlim cu a thleng ve. 16 Cutikah Bawipa in, 'Johan cun tidai thawn baptisma a lo pek; asinain nannih cu Thlarau Thianghlim thawn baptisma pek nan si ding,' tiah a rak timi ka vun mang sal. 17 Pathian in Bawipa Jesuh Khrih kan zum ih kan hnenah Thlarau Thianghlim cu laksawngih in rak pek bangtuk in hi Zentail mi hnen khalah cuih laksawng cu a pek ve a si, ti cu a fiang zetmi a si. Ziangtin so kei taak ko hin Pathian cu ka kham thei ding!" tiah a ti. 18 Cumi an theih tikah an soiselnak cu an baang ih Pathian thangṭhat in, "Pathian in Zentail mi hnen khalah sualsir awknak le nunnak caan a pek ve a si cu!" tiah an ti. 19 Stefen an thah hnu hremnak a um ruangah Jesuh zumtu pawl ṭhenkhat cu khuazakip ah an ṭekdarh ṭheh. Mi tampi cu Fonisia, Saipras le Antiok tiang an thleng ih Judah mi hnen lawngah Thuthang ṭha cu an sim. 20 Sikhalsehla zumtu ṭhenkhat cu Saipras le Sairin khua ihsin Antiok khua ah an feh ih Bawi Jesuh Khrih ih Thuthang ṭha cu Zentail mi hnen khalah an sim. 21 Bawipa ih huham an hnenah a um ih mi tampi in an zum ih Bawipa ih lam an pan. 22 Cuih thuhla cu Jerusalem khua a thleng ih Jerusalem ih kawhhran in Antiok khua ah Barnabas an hun thlah. 23 Barnabas cu Antiok khua a thlen tikah Pathian in mipi hnenih thlawsuah a pekzia a hmuh tikah a lung a awi ngaingai ih an thinlung zatein Bawipa an zum ih rinsantlak zumtu an si theinak dingah thazaang a pek hai. 24 Barnabas cu miṭhazet a si ih Thlarau Thianghlim le zumfeknak thawn a khatmi a si. Cule mi tampi Bawipa ih hnenah a hruai. 25 Cule Barnabas cu Saul hawl dingah Tarsas ah a feh. 26 Saul a hmuh tikah Antiok ah a fehpi ih kum khat sung an pahnih in kawhhran minung pawl kha an pumkhawmpi ih mi tampi an zirh. Hi Antiok khua ah hin a si dungthlun pawl cu "Khristian" tiin an kawh hmaisa bik. 27 Cuih caan hrawngah profet ṭhenkhat pawl cu Jerusalem ihsin Antiok ah an feh. 28 An lakih profet pakhat Agabas an timi pa a ding ih Thlarau huham thawn, "Leilung pumpuluk ah mangṭam a tlung ding a si," tiah a sim. (Cuih mangṭam cu Klaudius in Rom siangpahrang a ṭuan laiah a thleng.) 29 Dungthluntu pawl cun an tithei tawk ciar in Judea ramih a ummi zumtu unau pawl bomnak pe dingah an tawlrel. 30 An tawlrel vekin an ngahmi tangka kha Barnabas le Saul kut in kawhhran upa hnenah an kuat.
1 Hi caan hrawngah Siangpahrang Herod in kawhhran sungih Khristian ṭhenkhat pawl hrem a thok. 2 Johan unau Jeim kha ralnam hmang-in a thahter ih, 3 cumi cun Judah mi pawl an lung a awiter ti a hmuh tikah Piter khal a kaihter. (Himi cu Thilnu tello Sang Puai tuah laifangah a si.) 4 Piter cu an kai ih thawngah an thlak; thawnginn kiltu ralkap bur li an um ih bur khatah ralkap pali fingfing an um; cu pawl ih kil dingin an kut sungah an pek. Lantak puai ṭheh tikah zapi hmaiah a thu cu rel dingin Herod ih tumtahmi a si. 5 Cuti cun Piter cu thawng sungah an ret, asinain a hrangah kawhhran pawl in Pathian hnenah napi in thla an camsak. 6 Herod in a thaisun mipi hmaiah Piter ih thu ka rel ding a ti ni zanah Piter cu thawnginn kiltu ralkap pahnih karlakah a it. Thir cikcin pahnih in an khih ih thawnginn kotka khal an kil ṭheh. 7 Rinlopi-ah Bawipa ih vancungmi a rung ding ih an ihnak khaan cu tleunak in a run tleuter. Vancungmi in Piter cu a liang in a hnin ih, "Zamrang in tho aw!" tiah a ṭhang. Hmakhatte-ah Piter ih kut ihsin thir cikcin cu an poihtla. 8 Cule vancungmi in, "Na taikhap khap awla na kedam dam aw," tiah a ti. A tivek cun Piter in a tuah ih vancungmi in, "Na puan sin awla i thlun aw," tiah a ti. 9 Piter cun a thlun ih thawnginn lengah an suak; vancungmi in cuti ih a tuah cu thungai a si dingah a ruat lo; langnak ka hmu a si ding, tiah a ruat aw. 10 Ralkap ih an kilnak kotka pakhatnak cu an lan, cule a pahnihnak tla an lan thotho. A netnak ah khawpi sung thawn a peh-awmi thir kotka an thleng. Cuih kotka cu an hrangah amahte in a ong aw ih an pahnih in an suak. Lamzin an vun zawh ih rinlopi ah vancungmi cun a hlohsan ih Piter lawng a taang. 11 Cutikah a parih a cangmi thil pawl cu fiangtein a hun thei ngah ih, "Atu cu a cangmi ngaingai a si ka thei zo! Herod thuneihnak sungin le Judah mi pawl in ka parih cang dingin saduh an thahmi hmuahhmuah sung ihsin runsuak dingah Bawipa in a vancungmi a run thlah a si hi!" tiah a ti. 12 Thil a cangmi a theih ngah hnuah Johan Marka ih nu Mari ih inn ah a feh; cutawkah mi tampi an khawm aw ih thla an cam rero. 13 Piter cun a leng ihsin sangka a vun king ih Roda timi hnen-um nu cu sangka ong dingin a ra. 14 Piter ih aw a si ti a theih tikah a lung a awi tuk ih sangka hman ong loin, "Inn lengah Piter a ding a si!" tiah a au. 15 Annih in, "Na aa maw si?" tiah an ti. Sikhalsehla, a si ngaingai sokhaw, a ti ringring ruangah, "A vancungmi a si pei cu!" an ti thotho. 16 Piter in sangka cu cat loin a king rero. A net-ah sangka cu an ong ih Piter a si kha an hmuh tikah an mang a bang ngaingai. 17 Piter cun daiteih um dingin a zaa a zaap ih, Bawipa in thawng sung ihsin a suahnak thuhla kha an hnenah a sim. "Hi thu hi Jeim le a dang zumtu pawl sim uh," tiah a ti ih a suak ih hmun dangah a feh. 18 Zinglam khua a van tikah thawnginn kiltu ralkap pawl cu, Piter ziang a cang a si pei, tiah an buai nasa. 19 Piter hawl dingah Herod in thu a pek; asinain an hmu lo. Curuangah thawnginn kiltu pawl cu an thu a zingzoiter ih that dingin thu a pek. Cuih hnuah Judea ram ihsin Herod cu a suak ih Sisaria khua ah caan tawkfang a hmang. 20 Herod cu Tai-ar le Sidon mi pawl parah a thin a heng ngaingai; curuangah cuih khuami pawl cu Herod tong dingah a bur in an feh. A hmaisabik ah siangpahrang innih hotu bik Blastas kha an hnenih ṭang dingin an sawm. Cule Herod hnenah cun an va feh ih daihnak le remnak tuah dingin an va dil. Ziangah cutiin an dil tile an rammi pawl ih rawl an ngahmi cu Herod siangpahrang ukmi ram sung ihsin a rat ruangah a si. 21 An ni tinh ni ah Herod cu a siangpahrang thilthuam in a thuam aw ih a tokham ah a to ih mipi hnenah thu a sim. 22 Cutikah mipi in, "Hitiih a ṭongtu hi milai a si ual lo, pathian a sisi!" tiah an au. 23 Hmakhatte-ah Bawipa ih vancungmi in Herod cu natsiava in a natter, ziangahtile Pathian kha upatnak a pek lo ruangah a si. Herod cu a rulkhuk in a sunglam an ei thluh ih a thi. 24 Pathian ih thu cu a zai ih a ṭhang vivo. 25 Barnabas le Saul cu an hnaṭuan dingmi an ṭuan ṭheh ruangah Jerusalem ihsin Johan Marka an hruai ih an kir.
1 Antiok khua kawhhran sungah profet le saya ṭhenkhat an um. Anmah tla cu Barnabas, Simeon (Midum ti tla in an ti), (Sairin khua mi) Lusias, (Mangki Herod thawn a ṭhang tlangtu) Minian le Saul an si. 2 Anmah pawl cu Pathian bia in rawl an ulh laiah Thlarau Thianghlim in, "Barnabas le Saul hi ka thiahmi hnaṭuan lawng ṭuan dingah thiadang uh," tiah a ti. 3 Rawl ul in thla an cam hnuah an lu parah an kut an suang ih Barnabas le Saul cu an hei thlah. 4 Thlarau Thianghlim in a thlah hai bangtuk in Barnabas le Saul cu Seleusia ah an feh ih cutawk ihsin tangphawlawng in Saipras tikulh ah an lan. 5 Salamis khua an thlen tikah Judah mi pawl ih sinakok ah Pathian thu an sim. An hnaṭuan bawmtu dingah Johan Marka an hruai. 6 Saipras tikulh sung an tlawng vivo ih Pafos khua tiang an thleng. Cutawk ah mitkher thiam Bar-Jesuh an timi an tong. Amah cu Judah mi, profet a ti awmi a si. 7 Amah cu Saipras tikulh uktu Mangki Serzias Paulas ih rualpi a si. Serzias Paulas cu mifim zet a si. Pathian thu theih a duh ruangah Barnabas le Saul cu a hnenah a ko. 8 Asinain mitkher thiam Elimas in a ngaih lo; (Elimas ti cu a Grik hmin a si.) Serzias Paulas kha an simmi zum lo dingin a forh ciamco. 9 Cule Saul, Paul ti tla in an kawhmi, cu Thlarau Thianghlim in a khat ih Paul in mitkher thiam pa cu hmaiton tein a zoh ih, 10 "Nang Satan fapa! Thilṭha hmuahhmuah a dodaltu cu nangmah na si. Mi bumnak ṭha lo a phunphun in na khat ih Bawipa ih thudik hi thuphan ih canter ding lawnglawng na zuam a si. 11 Atu rori-ah hin Bawipa ih kut cu na parah a rung thleng ding, na mit a caw ding ih tawkfang sung cu sun khawvang na hmu lo ding," tiah a ti. Hmakhatte-ah Elimas ih mit cu mero dum in a khuh ih amah hruaitu ding hawl ah mitcaw cingin a vak rero. 12 Cutiih a cangmi cu Mangki bawipa in a hmuh tikah zumtu-ah a cang; ziangahtile Bawipa ih thuhla an zirhmi ah a mang a bang ngaingai. 13 Paul le a rualpi pawl cu tangphawlawng in Pafos ihsin an feh ih Pamfilia ram Perga khua an thleng. Cutawk ihsin Johan Marka in a kirsan ih Jerusalem ah a tlung. 14 Perga ihsin an feh sal ih Pisidia ram Antiok khua an thleng. Cutawkah Sabbath ni ah sinakok ah an feh ih an to. 15 A khawmmi pawl in Moses Daan cabu le profet pawl ih nganmi cabu an siar hnuah sinakok hotu pawl in, "Unau pawl, kan mipi hrangah thapeknak ṭongkam sim ding nan neih asile in sim uh," tiah an ti. 16 Paul cu a ding ih a kut hawi phah in thusim a thok: "Ka phunpi Israel mi le hitawk ih Pathian a ra biami Zentail mi hmuahhmuah tla, i ngai uh! 17 Israel ih Pathian in kan pu le kan pa pawl a hril ih Izipt ramih an um laiah miphun tumpi ah a tuah. Cuih Pathian cun Izipt ram ihsin a maksak mi a huham thawn a suah hai ih, 18 nelrawn ramṭhing lakah kum sawmli sung a zoh, a kilkhawi hai a si. 19 Kanaan ramih a rak ummi miphun phun sarih kha a siatsuah ṭheh ih amah ih miphun Israel mi cu ram luahtu ah a tuah. 20 Hitiih thil a cangmi hi kum zali le sawmnga sung a rei. Cuih hnuah profet Samuel san a thlen hlan sung Thuṭhentu pawl a ret. 21 Cule Israel mi pawl in siangpahrang an dil ih Pathian in kum sawmli sung an siangpahrang si dingah Benjamin hrin sungin Kish ih fapa Saul a pek hai. 22 Cun Saul a dawihlo hnuah Pathian in David kha an siangpahrang ah a tuah. David thu cu Pathian in hiti in a ti: 'Jesse ih fapa David cu ka mi duhzawng a si. Ka tuahter duhmi hmuahhmuah kha a tuah ding a si,' tiah a ti. 23 Cule David ih tesinfa Jesuh cu a rak kam cia vekin Pathian in Israel mi pawl Rundamtu dingah a tuah. 24 Jesuh ih hnaṭuan a thok hlan deuh ah, Johan in Israel mi hmuahhmuah hnenah an sual sir aw ding le baptisma la dingah thu a sim. 25 Cule Johan in a hnaṭuan a ṭuan ṭheh zik zawng ah mipi hnenah, 'Zo a si tiin so in ti?' tiah a sut. 'Nan hngak reromi cu kei ka si lo! Asinain ngai uh! Amah cu keimah hnuah a ra ding ih kei cu a kedam hri phoihtu ding hmanah ka tlak lo,' tiah a ti. 26 Ka phunpi Israel mi, Abraham ih tesinfa pawl le hitawk ih Pathian a ra biatu Zentail mi pawl, hi rundamnak Thuthang hi kan zate hrangih pekmi a si. 27 Ziangahtile Jerusalem ih a rak ummi mipi pawl le an hotu pawl in Jesuh cu Rundamtu a si tiah an rak thei lo. Profet pawl ih rak nganmi thu Sabbath tinte in an siarmi khal a tican an thei lo. Asinain Jesuh an thahnak in profet pawl ih ṭongkam kha an kimter a si. 28 Cule annih in Jesuh an thah theinak dingah thuhla an hawl rero na'n, an hawl thei lo ruangah Pilat hnenah thahnak thu pe ding in an dil. 29 Cun Ca Thianghlim in a thuhla a rak sim ciami hmuahhmuah kha an tuah ṭheh hnuah thinglamtah par ihsin an ṭhum ih thlaan ah an phum. 30 Sikhalsehla Pathian in thihnak ihsin a thoter sal ih, 31 amah thawn Galilee ihsin Jerusalem tiang khual a tlawngtu pawl hnenah ni tampi sung a lang. Atu-ah Amah ih ai-ah cupawl cu Israel mi hnenah thutheitu an si. 32 Cuih Thuthang ṭha cu atu-ah nan hnenah kan rak keng. Pathian in kan pupa pawl hnenih thu a rak kammi cu atu an tesinfa kannih hnenah hin Jesuh thihnak ihsin a thoter salnak thawngin a kimter zo a si. Cumi cu Saam pahnihnak sungah: 'Nangmah cu ka Fapa na si, tuihsun ah na Pa ka si zo,' tiin a um. 34 Cule Jesuh cu thlaan sungah a thu-ralta lo ding ih a thosal ding ti thu-ah Pathian in hiti in a sim cia. 'David hnenih kam ciami a thianghlimmi thluasuahnak cu nanmah hnenah ka lo pe ding,' tiah a ti. 35 Cule hmun dang khalah, 'A thianghlimmi na siahhlawh cu thlaan sungah na ziamralter siang lo ding,' tiah a ti. 36 Ziangahtile David cu amah ih san sungah Pathian duhmi hna a ṭuan ve na'n, a thih tikah a pu le a pa hnenah an phum ih a taksa cu thlaan sungah a ziamta a si. 37 Sikhalsehla Pathian in thlaan ihsin a thawhter mipa-ih parah cun cubangtuk in a si lo. 38 Ka phunpi Israel pawl, nan zatein fiang zetih nan theih a ṭul mi cu: Jesuh hmin in sual ngaidamnak thuthang nan hnenah phuan a si; nan sualnak sung ihsin Moses ih Daan in a lo luatter thei lo, asinain Jesuh a zumtu hmuahhmuah cu an sualnak sung ihsin an luat a si, tihi nan theih a ṭul. 40 Cuti a si ruangah ralring uh, a tanglamih profet pawl ih an rak simmi hi nan parah a kim pang ding. Profet pawl in: 41 'Zohhnik uh! Nannih mi hnihsan hmang pawl: Mangbang thinphang uhla thi ta uh! Ziangahtile tuihsun ih ka tuahmi hi, mi in nan hnenih an simfiang hmanah nan zum duh lo dingmi thil an si,' tiin an sim," tiah a ti. 42 Paul le Barnabas cu sinakok ihsin an suak ih mipi pawl cun hmai Sabbath ni ih ra sal dingin le cuih Thuthang ra sim sal dingin an sawm. 43 Mipi pumkhawmnak ihsin an ṭiak hnuah Paul le Barnabas cu Judah mi tampi le Judah biaknak ih a lutmi Zentail mi tampi in an thlun. Tirhthlah pawl in an hnenah thu an sim ih Pathian zaangfahnak sungih nung ringring dingin thazaang an pek hai. 44 A hmaizarh Sabbath ni ah mi tampi, khawsung mi hmuahhmuah titlak in Pathian thu theih duh ah an ra suak. 45 Cumi cu Judah mi pawl in an hmuh tikah an nahsuak ih Paul ih thusimmi cu an el ih an hmuhsuam. 46 Sikhalsehla Paul le Barnabas cun ralṭha sinsin in thu an sim. "Pathian thu nan hnenih sim hmaisa ding cu a ṭulmi a si. Sikhalsehla nannih in nan duh lo, nan el ih kumkhua nunnak ngah ding tlak ih nan ruat awk lo ruangah kan lo tlansan ding ih Zentail mi hnenah kan feh ding. 47 Ziangahtile Bawipa ih thukham in pekmi cu hiti in a si: 'Leilung pumpuluk hi rundam a sinak dingah, nannih cu Zentail mi hrangah tleunak ah ka lo tuah zo a si,' a ti," tiah an ti. 48 Cuih thu cu Zentail mi pawl in an theih tikah an lung a awi ngaingai ih Bawipa ih Thuthang ṭha cu an sunloih zet. Cule kumkhua nunnak hrangih hrilmi pawl cu zumtu-ah an cang. 49 Bawipa ih thu cu cuih ramsung hmunkipah a thang. 50 Sikhalsehla Judah mi pawl in khawsungih upa pawl le Pathian awitu upat tlak Zentail nunau pawl kha an tokhrok ih cu pawl cun Paul le Barnabas cu an hrem ih an peng sung ihsin an dawihlo. 51 Paul le Barnabas cun an parih lungkim lonak langternak ah an ke ih leidip kha an thingta ih Ikoniam ah an feh. 52 Antiok khua ih dungthlun pawl cu lungawinak le Thlarau Thianghlim in an khat.
1 Cubangtuk thotho in Ikoniam khua khalah Paul le Barnabas cu sinakok ah an va feh ih nasa zetin thu an sim. Judah mi le Zentail mi tampi zumtu-ah an cang. 2 Asinain a zum duh lotu Judah mi pawl in Zentail mi pawl kha an tokhrok ih zumtu pawl kha an dodalter. 3 Tirhthlah pahnih cu cutawkah reipi an um ih ralṭha zetin Bawipa ih thu an sim rero. Bawipa ih zaangfahnak thu an simmi a dik a si, ti langternak ah Bawipa in hmuhsaknak mak le khawruahhar thil tuah theinak huham a pek hai. 4 Khawsung mi pawl cu an ṭhen aw ṭheh. Mihrek in Judah mi an ṭan ih mihrek in tirhthlah pawl an ṭan. 5 Cule Zentail mi ṭhenkhat le Judah mi ṭhenkhat in an hotu pawl thawn tirhthlah pawl tuahsiat ding le lungto in deng dingah thu an relcat. 6 Cumi cu tirhthlah pawl in an theih tikah Likaonia ram sungih Listra khua, Derbe khua le a kiangkap ram pawl ah an tlan. 7 Cutawkah Thuthang ṭha cu an sim. 8 Listra khua ah mizeng pakhat, suahkeh ke-awl ih voikhat hman a feh thei dah lo pa a um. 9 Paul thusimnak ahcun a to ih a thusim cu a ngai. Paul in a thusimmi kha cupa in a zum ih damnak a ngah thei ti a hmuh tikah hmaitontein a zoh ih, 10 ringzet in, "Tho awla dingtein hung ding aw!" tiah a ti. Cupa cu a hung khir ih a feh thei! 11 Cutiih Paul ih a tuahmi cu mipi in an hmuh tikah anmah Likaonia ṭong in, "Khawzing pawl minung bangtuk ah an cang ih kan hnenah an rung a si hi!" tiah an au ciamco. 12 Barnabas kha an khawzing Zeus hmin an pek ih Paul cu a ṭong biktu a si ruangah an khawzing Hermes hmin an pek. 13 An khuahnar ah an khawzing Zeus ih biakinn a um; cutawkih puithiam in cawcang pawl le pangpar pawl kotka ah a run keng, ziangahtile amah le mipi pawl in tirhthlah pawl hnenah raithawinak pek an duh ruangah a si. 14 Cutiih tuah an tummi cu Barnabas le Paul in an theih tikah an hnipuan an thlek ih mipi lakah au phah in an tlan vivo. 15 "Hitiin ziangah so nan tuah tum? Kannih hi nanmah bangtuk milai kan si ve! A ṭhahnem lomi thil nan tuahnak ihsin lei le van le tipithuanthum le a sungih ummi hmuahhmuah a tuahtu Pathian nung hnenih nan kirnak dingah Thuthang ṭha sim dingin kan ra a si. 16 Hlanlaiah cun Pathian in zozo khal an duhmi lamzin thlun dingin a on. 17 Sikhalsehla thilṭha a tuahmi in amah a um ti kha a langter ringring a si: van ihsin ruah a surter ih a tikcu caan ah thlaici kho a umter; tirawl a lo pek ih nan thinlung hnangam in a tuah a si," tiah an ti. 18 Cutiin an sim hnu hmanah raithawinak tuah lo dingah tirhthlah pawl in misenpi cu har zetin an kham thei ceu. 19 Judah mi ṭhenkhat Pisidia ram Antiok khua in le Ikoniam khua ihsin an ra ih miburpi kha anmah lam ṭang dingin an sawm ngah hnuah Paul cu lungto in an deng; a thi zo tiah an ruat ih hnarpawn ah an hnuk ih an taan. 20 Sikhalsehla dungthluntu pawl a kiangah ding in an tonkhawm awk tikah a tho ih khawsungah a feh sal. A thaisun ah Barnabas thawn Derbe khua ah an feh. 21 Paul le Barnabas in Thuthang ṭha cu Derbe khua ah an sim ih dungthluntu tampi an ngah. Cuih hnuah Listra khua, Ikoniam khua le Pisidia peng Antiok khua ah an kir. 22 Zumtu pawl kha tha an pek phah vivo ih zumnak sungah rintlak zetin um dingin an forh vivo. "Pathian Uknak sung lut ding kan si ahcun harsatnak tampi kan ton ding hrimhrim a si," tiah an zirh vivo. 23 Kawhhran umnak poh ah kawhhran upa an ret vivo ih thlacam le rawl-ul in an rinsanmi an Bawipa hnenah hlannak an tuahta vivo. 24 Pisidia ram an lan ṭheh hnuah Pamfilia ram an thleng. 25 Thuthang ṭha Perga khua ah an sim ih cuih hnuah Attalia khua ah an vung feh. 26 Cutawk ihsin lawng in Antiok khua ah an kir. Antiok khua cu atu-ih an ṭhehmi an hnaṭuan ṭuan dingah Pathian hnenih an rak pek awknak khua kha a si. 27 Antiok khua an thlen tikah kawhhran senpi pawl an kokhawm ih Pathian in anmah a hmanzia le Zentail mi pawl Pathian thu zum dingih lamzin a on sakzia pawl an sim. 28 Cutawkah zumtu pawl thawn reipi an um tlang.
1 Mi ṭhenkhat Judea ram ihsin Antiok khua ah an ra ih, "Moses Daan ih in fial bangtuk in serh nan tan lo ahcun rundamnak nan ngah thei lo ding," tiah zumtu unau pawl an zirh ciamco. 2 Cuih thu cu Paul le Barnabas in nasa zetin an el; cule a netnak ah hi thu-ah hin tirhthlah pawl le kawhhran upa pawl thawn Jerusalem ih vung tong aw dingin Paul le Barnabas le Antiok khua ih upa dang pawl an fial. 3 An feh zawng ah kawhhran pawl in an thlah. Cule Fawnisia le Samaria ram an pal phah ih cutawkah Zentail mi pawl ziang bangtuk in Pathian lamah an lung an thleng zo ti kha an theihter phah vivo. Cuih thu an theih tikah zumtu pawl cu an lung a awi ngaingai. 4 Jerusalem an thlen tikah kawhhran le tirhthlah pawl le kawhhran upa pawl in an rak hmuak ih a rak hmuaktu pawl hnenah cun Pathian ih hnaṭuannak kha kimtein an sim. 5 Sikhalsehla Farasi pawl sungih a telmi zumtu hrekkhat pawl cun, "Zentail mi pawl cu serh an tan hrimhrim a ṭul ih Moses Daan thlun dingin kan sim a ṭul a si," tiah an ti. 6 Curuangah tirhthlah pawl le kawhhran upa pawl cu cuih thu ruat dingah an tong aw khawm. 7 Caan reipi an el awk hnuah Piter a ding ih, "Ka u le ka nau tla, nan theih zo vekin kei hi nanmah lak ihsin Zentail mi pawl in Thuthang ṭha an theih ih an zum thei venak dingah Thuthang ṭha an hnenih sim dingah Pathian in i hrilnak a rei zo. 8 Cule mi hmuahhmuah ih ruahnak a thei ṭhehtu Pathian in Zentail mi pawl khal a pom a si; cuih a pomnak cu kan hnenih Thlarau Thianghlim in pek vekin an hnen khalah Thlarau Thianghlim a peknak in a langter zo. 9 Pathian in anmah le kanmah karlakah thleidannak zianghman a nei lo; an zum ruangah an sualnak khal a ngaidam a si. 10 Cuti a si ruangah ziangah so kan pu le kan pa pawl in siseh, kanmah khal in siseh kan phurh thei lomi thilrit cu zumtu pawl ih zaang parah suang tahratin Pathian cu hniksak nan duh? 11 Asilo! Kannih hi anmah vek thotho in zumnak kan nei ih Bawipa Jesuh ih zaangfah thinpemnak thawngin rundamnak kan ngah a si," tiah a ti. 12 Paul le Barnabas khal in Pathian in anmah hmangin Zentail mi lakah hmuhsaknak mak le khawruahhar a phunphun a tuahmi hmuahhmuah kha an sim tikah an zatein dai khepkhep in an ngai. 13 An sim ṭheh tikah Jeim a ding ih, "Ka u le ka nau tla, i ngaihnik uh! 14 Simon in atute ih a ṭong zomi cu nan thei. Zentail mi pawl khal Pathian in an zawn a ruat ih anmah lak ihsin minung hrekkhat cu Amah ih ta si dingah a hril a si, tiah a simfiang zo. 15 Profet pawl khal in hivek thothoin an rak sim zo. Ca Thianghlim in: 16 'Bawipa in, himi hnuah, Ka ra kir sal ding ih A tlu zomi David ih uknak cu ka tung sal ding. A siatbal mi cu ka sak ding ih ka cakter sal ding. 17 Cuti cun leilung tlun miphun hmuahhmuah ka hnenah an ra ding; Ka hril ciami Zentail mi hmuahhmuah khal an ra ding. 18 Khuahlan lai ihsin hi thu a theitertu Bawipa in a ti,' tiah a ti. 19 Curuangah kei ka ruahnak ahcun: Pathian a pantu Zentail mi pawl hi hnaihnawhnak pe hlah uhsi. 20 Cuhnakin an hnenah milem biaknak rawl thiang lo ei lo dingin le nupa sualnak tuah lo dingin le hngawngrek-ih thahmi sa le sathi pohpoh ei lo dingin ca kuat sawn uhsi. 21 Ziangahtile Sabbath tinte in sinakok ah Moses Daan cu kum reipi sung siar a si zo ih Pathian thu khal khawkip ah sim a si zo," tiah a ti. 22 Cule tirhthlah pawl, kawhhran upa pawl le kawhhran zate in anmah sung ihsin mi ṭhenkhat hril tahratin Paul le Barnabas thawn Antiok khua ih thlah dingah an rel. Anmah lakah zumtu pawl in an upat zetmi pahnih, Barsabbas ti khal in an kawhmi Judas le Silas an hril ih, 23 a tanglamih ca kuat hi an kut ah an pek: "Nan unau a si mi kannih tirhthlah pawl le kawhhran upa pawl in Antiok le Siria le Silisia ih a ummi Zentail unau pawl nan zate hnenah cibai kan lo buk. 24 Hitawkih kan pawl sung ihsin nan hnen a ra thlengmi ṭhenkhat in an ṭongkam in harsatnak an lo pek ih an lo buaiter ti kan thei. Hitiih an ra ṭong tikah kannih ih kan fialmi an si lo. 25 Curuangah kan tong-aw khawm ih kanmah sung ihsin hrilmi palai nan hnenah kan hun thlah. 26 Kan Bawipa Jesuh Khrih hnaṭuannak hrangah nunnak tiangin a pe ngamtu kan duhdawtmi Paul le Barnabas thawn an hung ding. 27 Cuti cun Judas le Silas nan hnenah kan hun thlah ih anmah in hi ca sungih kan nganmi hi an lo sim ding. 28 Thlarau Thianghlim le kannih lungkim tlangnak kan nei ih hi a tanglam ih a ṭulmi daan pawl siarlo a dang thilrit nan parih ret ding kan duh lo: 29 Milem biaknak rawl nan ei lo pei; sathi nan ei lo pei; hngawngrek-ih thahmi sa nan ei lo pei; cule nupa sualnak nan tuah lo pei. Himi pawl tuah loin nan hrial thei a si ahcun a ṭha thluh ding. Damte in um hram uh," tiah an ngan. 30 An thlahmi an palai pawl cu an feh ih Antiok an thleng. Cutawkih zumtu pawl hmuahhmuah cu an ko khawm ih an kenmi cakuat cu an pek. 31 Cumi an siar tikah mipi thapeknak ca a si ruangah an lung a awi ngaingai. 32 Judas le Silas anmah khal cu profet an si ih mipi hnenah ralṭhatnak le thacahnak thu reipi an sim. 33 Cutawkih tawkfang an um hnuah zumtu pawl in hnangamte in an thlah ih anmah a hun thlahtu kawhhran hnenah an kir sal. 34 (Sikhalsehla Silas cu cunah a taangta.) 35 Paul le Barnabas cu tawkfang sung Antiok ah an um ih midang tampi thawn Pathian thu an zirh ih an sim. 36 Malte a rei deuh hnuah Paul in, "Bawipa ih thu kan rak simnak ah khan feh sal uhsila khawkip ih unau pawl kan va tlawng sal pei ih an umtlandan kan va zoh sal pei," tiah Barnabas cu a ti. 37 Barnabas in Johan Marka kha an hnenah fehter a duh. 38 Asinain Paul in Johan Marka hruai ding cu a ṭha tiin a ruat lo, ziangahtile Johan Marka cun an khualtlawnnak a net tiang thlun loin Pamfilia ihsin a kirsan hai ruangah a si. 39 Cuih thu-ah cun Paul le Barnabas cu napi-in an el aw ih an ṭhen aw. Barnabas in Marka cu a hruai ih Saipras ah lawng in an feh. 40 Paul in Silas a hruai ih zumtu pawl in Bawipa ih zaangfahnak thawn va feh hram uhlaw tiah an thlahta. 41 Paul le Silas cu Siria ram le Silisia ram sung an pal phah ih kawhhran pawl kha tha an pek phah vivo.
1 Paul cu Derbe khua le Listra khua a va thleng; cutawkah dungthlun a si mi Timote a um. A nu cu Judah mi a si ih Khristian a si ve, a pa cu Grik mi a si. 2 Listra khua le Ikoniam khua ih a ummi zumtu pawl in Timote cu an porhzet. 3 Paul in Timote cu hruai a duh ruangah a serh a tanter. Ziangahtile cutawk khawsungih a ummi Judah mi pawl in Timote ih pa cu Grik mi a si ti kha an theih ṭheh ruangah a si. 4 Khua pakhat hnu pakhat an thleng vivo ih Jerusalem khua ih tirhthlah pawl le kawhhran upa pawl in an relcatmi daan pawl kha zumtu pawl hnenah an sim vivo ih thlun ding khalah an forh. 5 Curuangah kawhhran pawl cu zumnak lamah an cak deuhdeuh ih ni khat hnu ni khat minung an tam sinsin. 6 Asia ram sungih Thuthang ṭha sim dingah Thlarau Thianghlim in a on lo ruangah Frizia le Kalatia ram sungah khual an tlawng. 7 Misia ramri an thleng ih Bithinia ramsung luh an tum, asinain Jesuh ih Thlarau in a on lo. 8 Curuangah Misia ram cu an lan ih Troas khua ah an feh. 9 Cuih zanah Paul in langnak a hmu ih cuih a hmuhmi ahcun Masidonia mi pakhat ding tahratin, "Masidonia ah ra awla in ra bawm aw," tiah zaangfah a dil. 10 Paul ih langnak a hmuh ṭheh vete in Masidonia ih feh dingah kan tim kan tuah, ziangahtile cutawk mi pawl hnenih Thuthang ṭha sim dingah Pathian in in ko a si tiah kan zum. 11 Troas ihsin lawng in kan feh ih Samothrace ah dingtein kan feh; cule a thaisun ah Neapolis kan thleng. 12 Cutawk ihsin leilung in Filipi khua kan thleng. Filipi khua cu Masidonia ram sungih peng pakhatnak ih khawpi a si. Rom ih ukmi khua a si fawn. Cutawkah ni tampi kan caam. 13 Sabbath ni ah khawpi ihsin tivakap ah kan feh; cutawkah Judah mi pawl hmun khatih thlacamnak hmun a um ding tiah kan ruat. Kan to ih cutawkih a rami nunau pawl thawn, thu kan ruah aw. 14 An lakih pakhat, kan thu a ngaitu cu Thiatira khuami Lydia a si ih amah cu puan sendup zuartu a si. Amah cu Pathian a biatu a si ih Paul thusimmi kha ṭhateih ngai dingah Bawipa in Lydia ih thinlung sangka a on. 15 Amah le a innsungsang pawl baptisma an lak ṭheh hnuah, Lydia in, "Bawipa a zum taktak tiih in ruat asile ka inn ah ra caam ve hram uh!" tiah in sawm. Cutiin in sawm suak ih kan va feh. 16 Ni khatah thlacamnak hmunih kan feh laiah, khawsia polhmi hmailam thu a simsung theitu sal nunau pakhat in in rak hmuak. Hmailam thu a simsungnak in a bawi pawl hrangah tangka tampi a ngah. 17 Paul le kanmah cu in thlun vivo ih, "Himi pawl hi Cungnungbik Pathian ih sal an si! Rundamnak thu nan hnenah an phuang a si!" tiah a au vivo. 18 Cuti cun ni tampi sung a tuah ih a netnak ah Paul cu a thin-ai a thok ih a dunglet hoi tahratin a khawsia hnenah cun, "Hi nu sung ihsin suak dingah Jesuh ih hmin in thu ka lo pek!" tiah a ti. Hmakhatteah a khawsia cu a suak. 19 Amah a neitu pawl in tangka an ngah theinak lamzin a um nawn lo ti kha an theih tikah Paul le Silas cu an kaih ih thuneitu bawi pawl hnenah miburpi tonkhawmnak hmunah an dirh. 20 Rom Acozah bawi thuṭhentu pawl hmaiah an hruai ih, "Himi pawl hi Judah mi phun an si ih kan khawsungah buainak an suahter. 21 Kan daan thawn a kaih-aw lomi daan an zirh; kannih cu Rom Acozah minung kan si ih hi an zirhmi daan hi kan pom thei lo, a thlun khal kan thlun lo," tiah an ti. 22 Cule misenpi pawl khal Paul le Silas a huatu ah an tel ve. Cuih hnuah Acozah bawi thuṭhentu pawl in Paul le Silas ih hnipuan cu an dirhthleksak ih vuak dingah thu an pek. 23 Besiazet ih an vuak hnuah thawng sungah an khum ih thawnginn uktu pa cu ṭhateih tawh hren dingin thu an pek. 24 Cuih thupekmi a ngah vekin thawnginn uktu pa in Paul le Silas cu thawnginn sungta khaan sungah a vun khum ih a rit zetmi thingtum pahnih in hreng a sut. 25 Zanṭim hrawngah Paul le Silas cu thla an cam ih Pathian thangṭhatnak hla an sak; cule thawngtla dang pawl in an rak ngai. 26 Rinlopi-ah nasa zetin ling a hnin ih thawnginn cu a tawhram tiangin a hnin ṭheh. Hmakhatte-ah sangka pawl an ong aw ṭheh ih thawngtla pawl hmuahhmuah ih kut khihnak thir cikcin cu an phoih aw ṭheh. 27 Thawnginn uktu cu a ṭhang ih thawnginn sangka pawl a ong ṭheh ti a hmuh tikah thawngtla pawl an tlan thluh zo tiin a ruat ih, a ralnam zuuk tahratin amah le amah thah awk a tum. 28 Sikhalsehla Paul cu a aw neih patawp in a au ih, "Nangmah le nangmah tuahmawh aw hlah! Kan zatein kan um thluh ko," tiah a ti. 29 Thawnginn kiltu pa cun meisa rak keng uh, a ti ih thawnginn sungah zamrangin a lut ih khur phah rero in Paul le Silas kehram ah a bok. 30 Cule lengah a hruai hai ih, "Ka bawipale pawl, rundamnak ngah dingah ziangso ka tuah ding?" tiah a sut. 31 Annih in, "Bawi Jesuh zum awla nangmah le nan sungte in rundamnak nan ngah ding," tiah an ti. 32 Cule Pathian thu cu amah le a innsang zate hnenah an sim. 33 Cuih zan rori-ah cun thawnginn uktu pa in a fehpi hai ih an hmaa pawl cu a buah sak; cule cuvete in amah le a innsang zatein baptisma an lak. 34 Cun Paul le Silas cu a inn ah a hruai ih rawl ei ding a pek. Amah le a innsang zatein Pathian an zum ngah ruangah lungawinak in an khat. 35 A thaizing ah Rom Acozah bawi thuṭhentu pawl in palik bawi pawl an hei thlah ih, "Kha pawl kha thlah hai uh," tiah thu an pek. 36 Curuangah thawnginn uktu pa in Paul cu, "Thuṭhentu bawi pawl in nangmah le Silas thlah dingin thu an rak pe. Curuangah suak uhla, daitein feh uh," tiah a ti. 37 Sikhalsehla Paul in palik bawi pawl hnenah cun, "Sualnak zianghman kan nei lo na'n mizapi hmai rori-ah in thawi; Rom Acozah minung kan si ve! Cuih tlunah thawngah in thlak. Cule atu-ah a thupte in fehter in tum maw si? Feh naisai hlah! Rom Acozah bawi pawl anmah rori hinah ra hai sehla in ra suah hai seh!" tiah a ti. 38 Cutiih a timi cu palik bawi pawl in Rom Acozah bawi thuṭhentu pawl hnenah an va sim; cule Paul le Silas cu Rom mi an si ti an theih tikah an thin a phang! 39 Curuangah Paul le Silas hnenah cun an va feh ih ngaithiamnak an va dil; cule thawnginn ihsin an suah ih khawsung ihsin hmun dangah feh uh, tiin an dil. 40 Paul le Silas cu thawnginn ihsin an suak ih Lydia ih inn ah an feh. Cutawkah zumtu unau pawl an tong ih thazaang peknak thu an sim hnuah cuih khua ihsin an suak.
1 Paul le Silas cu Amfipolis le Appollonia an tlawng ih Thesalonika khua an thleng. Cutawkah Judah mi pawl ih sinakok a um. 2 Amah ih tuah keel vekin Paul cu Sinakok ah a feh. Cutawkah Sabbath ni ni thum sung rori mipi thawn thu an el aw ih, 3 Messiah cu thihnak a tuar ding ih a thosal ding a si ti kha Ca Thianghlim sung ihsin a langter ih a simfiang vivo. "Nan hnenih ka phuanmi Jesuh hi Messiah cu a si," tiah Paul in a ti. 4 Mi ṭhenkhat cu an thinlung a fiang ngah ih Paul le Silas kha an kom. Cuvekin nunau hotu pawl le Pathian a biatu Grik mi tampi a burpi in Paul le Silas hnenah an kom ve. 5 Sikhalsehla Judah mi pawl in an nahsiik ih lamzin ih a vak lakmi mi hlothlau ṭhenkhat pawl kha an khawm ih miburpi ah an cang. Khawsungah an au an kio ih nasa zetin buainak an suahpi. Jason an timi pa ih inn an va kulh ih cutawkah Paul le Silas kha kai ih mipi hmai ah hnuk an tum. 6 Sikhalsehla cutawk inn ah Paul le Silas cu an hmu lo ih Jason le zumtu ṭhenkhat pawl sawn kha khawsung upa hmaiah an hruai ih, "Hmunzakipah buainak a suahtertu pawl, atu-ah kan khawsung an ra thleng ih, 7 Jason in a inn sungah a umter hai. An ṭongmi cu 'Jesuh timi siangpahrang dang pakhat a um,' an tiih cuti cun Rom siangpahrang ih daan an buar a si," tiah an au ciamco. 8 Cutiih an aunak ruangah miburpi le khawsung upa pawl cu an buaiter ṭheh. 9 Thuneitu pawl in Jason le a rualpi pawl cu anmah thlah dingih a ṭul zat tangka an lak ih cuih hnuah an thlah sal. 10 Khua a thim vete in zumtu pawl in Paul le Silas cu Berea khua ah an thlah. Berea khua an thlen tikah sinakok ah an feh. 11 Cutawkih mipi pawl cu Thesalonika mi pawl hnakin an thinlung a tluangtlam deuh. An thusimmi pawl cu an thinlung taktein an ngai ih, nitinte in Paul ih simmi cu a si ngaingai maw, si ngaingai lo tiah Ca Thianghlim an siar ih an zohṭhim. 12 Mi tampi in an zum; upat tlak Grik nunau pawl le Grik mipa pawl khal in an zum ve. 13 Asinain Thesalonika ih ummi Judah mi pawl in Berea khua khalah Paul in Pathian thu a sim ti an theih tikah Berea khua ahcun an ra ih mipi kha an tokhrok ih an buaiter ciamco. 14 Hmakhatte-ah zumtu pawl in Paul cu tifinriat lamah an tlanter; asinain Silas le Timote cu Berea ah an taangta. 15 Paul a thlahtu zumtu pawl in Paul cu Athens khua tiang an thlun; cule a thluntu pawl cu an kir ih Silas le Timote in a zamrang thei tawkih amah hei dawi dingah Paul in thu a cah hai. 16 Paul in Silas le Timote kha Athens khua ihsin a hngak laiah cuih khawpi cu milem zuk in a khat ti kha a hmu ih a thin a nau ngaingai. 17 Curuangah Judah mi pawl le Pathian a biatu Grik mi pawl thawn an pumkhawmnak inn sinakok ah thu an el aw ṭheu; mizapi ton awknak hmun khalah a rami pawl thawn an el aw ringring. 18 Epikurian thuzirhtu saya ṭhenkhat le Stoik thuzirhtu saya hrekkhat pawl thawn khal thu an el aw. Mi hrekkhat in, "Zianghman thei sii lo, hi pa hin mi hmaiah lang duh zetin ziangso rel a tum rero?" tiah an ti. Mihrek in, "Ramdang pathian pawl ih thuhla a sim a bang," an ti. Ziangah cutin an ti tile Paul in Jesuh le a thawhsalnak thu a sim ruangah a si. 19 Curuangah Paul cu Areopagas an timi an khua ih khonsil hnenah an suahpi ih, "Thuthar na zirhmi hi ziangso a si, ti kan thei duh. 20 A hrekkhat na simmi kan theihmi cu a lamdang zet ih a tican ziang a si ti kan thei duh," tiah an ti. 21 (Ziangah cutin an ti tile Athens khua mi hmuahhmuah le hi khua ih a ummi ramdang mi tla cu thu thar le thil thar kha an tikcu zate hmangin theih rero le sim rero a duh bikmi pawl an si.) 22 Paul cu an khua khonsil Areopagas timi upa hmaiah cun a ding ih an hnenah, "Nannih Athens mi pawl hi biaknak lam pohpoh ahcun nan taimazet ti ka hmu. 23 Ziangahtile nan khawpi sungih ka toihvah tikah Pathian nan biaknak hmun pawl tla ka zoh ih biakṭheng pakhat parah 'Kan Theih Lomi Pathian Hnenah,' tiih nan nganmi ka hmu. Cutiin nan thei lo na-cingih nan biakmi Pathian cu atu nan hnenih ka phuanmi hi a si. 24 Leilung le a sungih a ummi hmuahhmuah a tuahtu Pathian cu lei le vanih Bawi a si ih milai kutih sakmi biakinn sungah a um lo. 25 Cuih tlunah Pathian cu mi hmuahhmuah hnenah nunnak le thaw le thildang hmuahhmuah a petu Pathian a si ruangah milai in a hrangih kan tuahmi kha a ṭulmi zianghman a um lo. 26 Minung pakhat sung ihsin leilung miphun hmuahhmuah a tuah ih leilung pumpuluk ah a umter ṭheh. A hlankhan in ziangtik caanah an um ding ih khuitawk hmun tiang an um thei ding, ti kha a relcia ṭheh. 27 Ziangah hiti in a tawlrel cia tile Pathian an hawl ih an hmuh suak theinak dingah a si. Sikhalsehla a ngaingai ti-ah cun Pathian cu zo thawn hman a hlat lo. 28 Mi pakhat ih a rak sim cia vekin, 'Amah ih sungah kan nung, kan tlangleng ih khua kan sa!' tiah nan hla phuahtu ṭhenkhat pawl ih an tivek in, 'Kannih khal hi a faate kan si ve.' 29 Cutiih Pathian ih faate kan si ruangah thilthiam pawl le zuk suaithiam pawl in sui milem le ngun milem le lungto milem an tuahmi hi Pathian ah kan ruah ding a si hrimhrim lo. 30 Minung in Pathian thei lo bembem ih an rak um caan kha cu Amah Pathian in hmu lo vekin a um san meen; sikhalsehla atu-ah cun an nuncan ṭha lomi ihsin sualsir dingah mi hmuahhmuah kha a fial a si. 31 Ziangahtile a hril ciami mi pakhat in leilung pumpuluk hi dingnak thawn thuṭhen cat dingah ni a tin zo. Cuih thu cu thudik a si, ti kha mi hmuahhmuah hnenah langternak ah cupa cu thihnak ihsin a thoter sal zo," tiah a ti. 32 Mithi thawhsalnak thu Paul ih a simmi an theih tikah mi hrek in an hnihsan; asinain midang in, "In sim sal hrih cila kan duh," tiah an ti. 33 Cuih hnuah Paul cu an khawmnak ihsin a feh. 34 Mi hrekkhat in an thlun ih an zum. A zumtu lakah cun Khonsil upa Dionisias tla a tel. Damaris an timi nunau pakhat le midang ṭhenkhat khal an tel.
1 Cuih hnuah Paul cu Athens ihsin a feh ih Korin khua a thleng. 2 Cutawkah Pontus ramih a suakmi Judah mi Aquila a tong. Aquila cu a nupi Prisilla thawn Italy ihsin a ra tlanmi an si. Ziangahtile Rom siangpahrang Klaudius in Judah mi hmuahhmuah cu Rom khua ihsin a dawi ruangah an tlan. Paul cun a va tong hai ih, 3 an hnenah a caam ih anmah thawn hna a ṭuan. Aquila le Prisilla cu puanthlam tuah in pumcawmmi an si ih anmah vekin Paul khal puanthlam tuah in a pum a cawm aw ve. 4 Sabbath nitinte in sinakok ah Judah mi le Grik mi pawl an thinlung fiangter dingah thu an ruah aw, an el aw ṭheu. 5 Masidonia ihsin Silas le Timote an ra thlen tikah Paul cu a tikcu neihmi hmuahhmuah in Pathian thusimnak ah a hmang ih Jesuh cu Messiah taktak a si tiah Judah mi hnenah a sim ciamco. 6 Annih in Paul cu an engtai ih ṭong siava tla in an leh tikah Paul in a lungkimlonak langternak ah a hnipuan ih leivut kha a thinta ih, "Nan hloral a si ahcun nanmah ih mawh a si ding! Kei i mawhthluk hlah uh! Atu ihsin Zentail mi hnenah ka feh ding!" tiah a ti. 7 Curuangah a feh ih Zentail mi Titias Jastas an timi pa inn ah a um; Titias Jastas cu Pathian a biatu a si ih a inn cu sinakok kiangte ah a um. 8 Sinakok uktu upa bik Krispas khal a sungkhat pawl thawn Bawipa an zum; cule Korin khuami tampi tla in Pathian thu cu an thei ih an zum ruangah baptisma an lak. 9 Zankhat ah Paul in langnak a hmu ih cuih sung ihsin Bawipa in, "Paul, ṭih hlah! Sim rero ko aw, na bei dong hlah! 10 Na hnenah ka um a si. Zohman in harnak an lo pe thei lo ding, ziangahtile hi khawsungih mi tampi cu ka minung an si," tiah a ti. 11 Curuangah Paul cu kum khat le a hrek sung a um ih mipi hnenah Pathian thu a zirh ringring. 12 Gallio in Akhaia ram uktu Rom Mangki a ṭuan laiah Judah mi pawl an tongkhawm aw ih Paul cu an kai ih zungah an suahpi. 13 "Hi pa hin mi tampi hnenah kan daan thawn a kaih aw lomi Pathian biak daan a zirh a si," tiah an ti. 14 Paul a hung ṭong zik zawng ah Gallio in Judah mi hnenah, "Thil ṭha lo le thil sual pakhatkhat tuah ruangah a si ahcun Judah mi pawl nan parah thinlung sau zetin ka um ding. 15 Sikhalsehla atu cu nan biaknak ih ṭong fang le hmin le nan daan ruangih thu el aw nan si ruangah nanmah tein va relcat uh! Cubangtuk thu-ah cun thuṭhentu ka si thei lo ding," tiah a ti. 16 Cule a zung ihsin Judah mi pawl cu a dawi ṭheh. 17 Sinakok inn uktu Sosthenes kha an zatein an kai ih zung hmai rori ah an vuak. Asinain Gallio cun zianghman ah a siarsak lo. 18 Paul cu Korin khua ih zumtu pawl thawn ni tampi sung an um hnuah Prisilla le Aquila thawn lawng in Siria ah an feh. Kenkhria ihsin lawng in an feh hlanah thu tiamkamnak a rak tuah zo bangtuk in Paul cu a lu a meet. 19 Efesa khua an thleng ih cutawk ah Prisilla le Aquila cu a taan. Sinakok ah a lut ih Judah mi pawl thawn thu an ruah aw. 20 Rei deuh um dingin an sawm na'n a lung a kim lo. 21 A feh zawng ah thu a cahta ih, "Pathian lungkimnak a si ahcun nan hnenah ka ra sal leh ding," tiah a ti. Cule Efesa ihsin lawng in a feh. 22 Sisaria a thlen tikah Jerusalem khua ah a lan ih cutawkih kawhhran kha a tongta ih Antiok ah a hung feh sal. 23 Cutawkah tawkfang sung a um hnuah a pok sal ih Kalatia le Frizia ram a tlawng ih zumtu hmuahhmuah an thazaang a cakter. 24 Culai ah Alexandria khua ih suak, Apollos timi Judah pa cu Efesa khua ah a ra thleng. Amah cu ṭong a thiam zet ih Ca Thianghlim tla a thei ngaingaimi a si. 25 Bawipa ih Lamzin thuhla ah zirh zomi a si ih, thinlung thozet le felzetin Jesuh ih thuhla cu a sim ih a zirh. Asinain a theihmi cu Johan ih baptisma thu lawnglawng a si. 26 Ralṭha zetin sinakok ah thu a sim. A thusimmi cu Prisilla le Aquila in an theih tikah an inn ah an sawm ih Pathian Lamzin thuhla kha felfai deuh in an sim. 27 Cule Apollos cu Akhaia peng ih feh a tum ruangah Efesa khua ih zumtu pawl in an bawm ih Akhaia khua ih dungthluntu pawl hnenah Apollos an rak mikhual theinak dingah ca an ngansak. Akhaia khua a thlen tikah Pathian zaangfahnak thawngin zumtu a rak si mi pawl hrangah bawmtu ṭhazet ah a cang. 28 Ziangahtile mi thu el a thiamzet ih Jesuh cu Messiah taktak a si, tiah Ca Thianghlim sung ihsin la tahrat in a fiangter ih cuticun zapi hmaiih thu el awknak ah Judah mi pawl kha a neh thei ringring.
1 Apollos cu Korin khua ih a um laiah Paul cu cuih ram sungah khual a tlawng ih Efesa ah a thleng. Cutawkah dungthluntu ṭhenkhat pawl a tong ih, 2 Paul in, "Zumtu nan si zo ih Thlarau Thianghlim nan ngah maw?" tiah a sut. Annih in, "Thlarau Thianghlim a um ti hman kan theih ual lo," tiah an sawn. 3 "Cuti asile ziangvek baptisma so nan lak?" tiah Paul in a sut. Annih in, "Johan ih baptisma," tiah an ti. 4 Cutikah Paul in, "Johan ih baptisma cu sual a sir awmi pawl hrangah a si ih amah Johan in ka dungih a ra ding pa kha Israel mi pawl in an zum dingmi a si. Cumi cu Jesuh a si," tiah a ti. 5 Cumi an theih tikah Bawi Jesuh hmin in baptisma an lak. 6 Paul in an parah a kut a suang ih an parah Thlarau Thianghlim a rung thleng; ṭong phun dangdang in an ṭong ih Pathian thu cu profet bangin an phuang. 7 Anmah cu pacang hlir hleihnih tluk an si. 8 Paul cu sinakok ah a feh ih thla thum sung ralṭha zetin mipi hnenah thu a sim. Anmah thawn thu an el aw ih Pathian Uknak thu kha an thinlung ah lut ngah dingin a zuam. 9 Sikhalsehla mi ṭhenkhat cu an thinlung a ruhzet ih an zum duh lo; curuangah miburpi hmaiah Bawipa ih Lamzin thuhla kha an relsiat ciamco. Curuangah Paul in a tlansan ih zumtu pawl kha a fehpi ih Tirannas timi thusimnak innpi ah nitinte in thu a zirh. 10 Cuti cun kum hnih sung a ṭuan ih Asia ram sungih a ummi Judah mi siseh, Zentail mi siseh, an zatein Bawipa ih thu cu an thei. 11 Pathian in Paul kha a hmang ih lamdang zet, mangbangza pawl a tuah. 12 A pavua le a taaingerh puan pawl hman kha mina pawl hnenah an ken tikah an natnak a dam ih an sung ihsin khuasia pawl an suak. 13 Hmunkipah vak tahratih khuasia a dawitu Judah mi ṭhenkhat tla in Bawi Jesuh hmin in Paul vekih tuah ve an tum. Annih in khuasia pawl hnenah, "Paul ih a simmi Jesuh ih hmin in ka lo dawi," tiah an ti. 14 Judah mi Puithiam Saang a hmin Skeva an timi pa ih fapa unau pasarih in cubangtuk cun an tuah ciamco. 15 Sikhalsehla khawsia in an hnenah cun, "Jesuh ka thei; Paul thuhla khal ka thei. Sikhalsehla nannih hi zoso nan si?" tiah a ti. 16 Khuasia polhmi pa cun unau pasarih pawl cu a zon ih a sual hai ih a neh thluh. Hmapu le hnipuan tlek ṭheh-in a inn ihsin an tlan. 17 Cuih thuhla cu Efesa khua ih a ummi Judah mi le Zentail mi hmuahhmuah in an theih tikah an ṭih ngaingai ih Jesuh hmin cu upatnak an pek sinsin. 18 Zumtu sung ihsin mi tampi an ra ih zapi hmaiah thil an rak tuah ṭheumi pawl kha an phuang ciamco. 19 Mitkherh thiam tampi tla in an mitkher cabu pawl cu hmun khatah an khawm ih zapi mithmuh ah an ur. Cutiih an urmi mitkher cabu pawl cu a man an kom tikah ngun tangka thawng sawmnga a si. 20 Cuti cun Bawipa ih thu cu nasa zetin a zai ih a cak sinsin. 21 Cubangtuk in thil a um hnuah Paul in Masidonia ram le Akhaia ram hrawng tlawn ih Jerusalem ih lanta ding kha a thinlung in a ruat. "Cutawk ka thlen hnuah Rom khal ka hmuh a ṭul," tiah a ti. 22 Curuangah amah a bawmtu lakih pahnih Timote le Erastas kha Masidonia ah a thlah ih amah cu Asia ram sungah tikcu tam deuh a hmang. 23 Cuih tikcu hrawngah Efesa khua ah Bawipa ih Lamzin thuhla ah thubuai tumpi pakhat a um. 24 Ngun in sosertu Demetrias an timi pa in khawzingnu Artemis ih biakinn zuk kha ngun in a ser ih a hnaṭuantu pawl hrangah tangka tampi a ngah. 25 Curuangah a hnaṭuantu pawl le anmah vekih hnaṭuantu dangdang pawl kha a kokhawm ih an hnenah, "U le nau pawl, hi kan hnaṭuanmi ruangah hin neinungin kan um ti cu nan theih ṭhehmi a si. 26 Asinain atu-ah Paul an timi pa in ziang bangtuk in hna a ṭuan ti cu nanmah rori-in nan hmuhmi le nan theihmi a si. 'Milai ih tuahcopmi pathian cu pathian an si lo,' tiah a ti ih Efesa khawsung le Asia ram zate ti ding tlak in mi tampi thinlung ah a simmi cu a lut ngah a si. 27 Cuti a si ruangah hi kan hnaṭuanmi hi a hmin a sia thlang ding tihi phan a umzet. Cuih tlunah Asia ram le leilung tlun pumpuluk ah mikip miza in an biakmi a ropi zetmi khawzingnu Artemis ih biakinn hi mi in zianghman ah an siar nawn lo ding ih a ropitnak hi a cemralta ding a si," tiah a ti. 28 Cumi cu mipi in an theih tikah an thin a hengzet ih, "Efesa khua ih Artemis cu a ropi a si," tiah an au ciamco. 29 Cutiih an au cu khawsungah a khat ṭheh. Mipi cun, Masidonia mi pahnih Paul thawn khual a tlawng tlangmi Kaias le Aristarkas kha an kai ih puai zohnak bualrawn ah an suahpi. 30 Mipi hmaiah cun Paul amah rori suah a duh na'n zumtu pawl in an kham. 31 Cuih peng sungih thuneitu a rualpi pawl hrekkhat in cuih bualrawn ih va feh hrimhrim lo dingin thu an cah fawn. 32 Cutiin bualrawn ahcun an buai rero; mihrek in pakhat thu an au, midang in thudang thu an rak au ve; mi tam sawn cun cutawkah ziangah kan ra suak ti hman an thei lo. 33 Judah mi pawl in Alexander kha hmaiih an suahter ruangah mi tampi cun hi thubuai a suahtertu hi amah a si hmang tiah an ruat. Cule Alexander cun dai uh, tiah a kut in mipi cu a hun hmuh hai ih amah ih dinhmun ṭan in thusim a tum. 34 Sikhalsehla Judah mi a si kha mipi in an theih tikah an au keel in an au hluarhlo sal ih, "Efesa khua ih Artemis cu a ropi a si," tiah nazi pahnih sung an au. 35 A netnak ah cuih khua ih thuneitu lakih sungṭuantu pa in mipi cu a daihter deuh ih an hnenah cun, "Efesa khuami pawl, Efesa khua cu a ropimi Artemis ih biakinn le vancung ihsin a rung tlami milem umnak hmun a si ti cu mi hmuahhmuahih theih ṭhehmi a si. 36 A el theitu zoso a um? Zohman in an el thei lo ding. Curuangah daitein um uhla ruatta ciamciam loin zianghman tuah hlah uh. 37 Himi pawl hin biakinn sung thilri an ruk lo, kan khuavangnu khal an relsiat lo na'n hinah nan rak suahpi. 38 Demetrias le a hnaṭuantu pawl in zo ih tlun khalah sual mawhthluk ding an neih a si ahcun tazacuai theinak zung kan nei ko; thuṭhen ni le thuṭhentu upa tla kan nei ko. Cunah thukhiin theih a si. 39 Cuhnakih thupi deuh nan duh asile kan daan vekin khawsungmi zate ih pumkhawmnak ah relcat ding a si. 40 Ziangahtile tuihsun ih thil a cangmi ruangah hin buainak nan suahpi tiin mawhthluk kan tong pang ding ti phan a um. Hi tluk lawmmam ih buainak thu-ah hin puhmawh ding a um lo; cule ziangah nan buai tiah in ti hai sehla ṭan kan la thei lo ding," tiah a ti. 41 Cutiih a ti hnuah a ra khawmmi pawl cu a ṭiakter hai.
1 Cuih thubuai cu a dai ih Paul in a zumtu pawl cu hmun khatah a kokhawm ih thapeknak ṭongkam in a forh hnuah cibai a bukta hai ih Masidonia ramah a feh. 2 Cuih ram cu a tlawng vivo ih thapeknak thu a sim vivo. Cule Akhaia a thleng ih, 3 cutawkah thla thum a caam. Siria ah feh a tum na'n, a tim a tuah rero laiah Judah mi pawl ih an zuar tum thu a theih ruangah Masidonia lam in feh sal a tum. 4 Berea khuami Pirhas ih fapa Sopater le Thesalonika khuami Aristarkas le Sekundas, Derbe khuami Kaias, Asia ram in Taikhikas le Trofimas, le Timote tla in Paul cu an fehpi. 5 An rak feh sungih Troas ihsin in rak hngak. 6 Thilnu tello Sang Puai a cem hnuah Filipi ihsin lawng in kan feh ih ni nga hnuah Troas ah kan man hai. Troas ahcun zarh khat kan caam. 7 Zarhte ni zanlam ah pawlkomnak zanriah hil tlang dingin kan tongkhawm aw. A ra khawmmi hnenah Paul in thu a sim ih a thaizing feh ding a si ruangah zanṭim tiang thu a sim. 8 Tlunta khaan ah kan khawm aw ih mei-inn tampi an vang. 9 Tlangval pakhat Zutikhas an timi cu saangkate ah a to ih Paul in reipi thu a sim tikah cun a ih a rak hmu deuhdeuh ih a netnak ahcun a ihthat ngah ruangah cuih inn dot thumnak ihsin leilung ah a tla. An vung sar tikah a rak thi zo. 10 Sikhalsehla Paul a vung ṭum ih cuih tlangvalpa cu a bawhhnawh ih a pom. Paul in, "Nan thinphang hlah uh, a nunglai a si," tiah a ti. 11 Cule Paul cu tlunta khaanah cun a hung kai sal ih sang kha a phel ih an ei. Paul cu reipi, zinglam nisuak tiang thu a sim hnuah a feh. 12 Cuih tlangvalpa cu a nungin a inn ah an fehpi ih an hna a ngam zet. 13 Lawng parah kan va feh ih cuih lawng in Assos ah kan feh; Assos ahcun Paul sawm phah ding kan si. Cutiih sawm phah ding cu in sim ciami a si, ziangahtile lei lamzin in anih cu a rak feh. 14 Assos ah Paul cu kan tong ih kan lawng parah kan toter ih Mitilene ah kan feh. 15 Mitilene ihsin kan suak ih a thaisun ah Khios zawn kan thleng. A tipsun ah Samos kan thleng ih a thiamsun ah Miletas kan thleng. 16 Paul cun Asia ramih caam rei ding cu a duh lo ruangah Efesa lansan mai a tum. A cang thei a si ahcun Pentikos ni kheel in Jerusalem ih thlen lohli a duh. 17 Paul in Miletas ihsin mi a thlah ih Efesa khua kawhhran upa pawl in amah rak tong dingin thu a cah. 18 An rat tikah Paul cun, "Asia ram ka ra thlen ih a ni khatnak ni ihsin ka tikcu hmuahhmuah cu nan hnenah ziangvekin ka hmang ti cu nan thei ṭheh ko. 19 Tangdornak le mitthli thawn Bawipa ka rian ih Judah mi pawl ih in phiarnak khal har fualfo-in ka tuar. 20 Zapi hmaiah siseh, nan innsung khalah siseh, thusimnak caan ka neih tikah nan hrangih bawmtu a si ding hmuahhmuah in zianghman suup loin ka sim ti khal nan thei. 21 Judah mi hnenah siseh, Zentail mi hnenah siseh, an sualnak tlansan in Pathian hnenah an kir ih kan Bawi Jesuh an zum a ṭul hrimhrim tiah ka sim tlunah feltein ralrinnak khal ka pek hai a si. 22 Cule atu-ah Thlarau Thianghlim ih hruainak thlunin Jerusalem ah feh ka tum; cutawkah ziang ka cang ding ti zianghman ka thei lo. 23 Khawkip ah thawngtlak le harsatnak lawnglawng in in hngak a si ti lawng kha Thlarau Thianghlim ih ralrin peknak thawngin ka thei. 24 Sikhalsehla ka hrangah ka nunnak hi zianghman ah ka siar lo; Bawipa Jesuh in ṭuan dingih i pekmi Pathian ih zaangfahnak Thuthang ṭha phuan ding ṭuanvo hi famkim zetih ṭuan thluh thei ding lawng hi ka saduhthah a si. 25 Nan zate hnenah a suk a so ah ka vak ih, Pathian ih Uknak thu ka lo sim. Asinain atu cu zohman in in hmu sal nawn lo ding, tihi ka thei. 26 Curuangah tuihsun ah hin fiangtein nan hnenah ka phuang: nanmah lakah pakhatkhat nan hloral asile kei in mawhthluk hlah uh. 27 Ziangahtile Pathian ih tumtahmi kha suupmi zianghman nei loin a zatein nan hnenah ka phuang ṭheh a si. 28 Cuti a si ruangah nanmah le nanmah kilkhawi awk thiam uhla Thlarau Thianghlim in tuurual kilkhawitu dingih a lo ret vekin nan tuurual kha ṭhatein kilkhawi uh. Pathian in a Fapa thisen thawn Amai' ta ih a tuah zomi a kawhhran khaaltu va si uh! 29 Kei ka feh hnuah ṭihnungza cinghnia hraang an ra ding ih tuuruun pawl hi an zoh meen lo ding, ti ka thei. 30 Nanmah ih sung ihsi hin mihrek cun anmah lamih hruai duh ah thuphanper tahratin zumtu pawl hi an hruaisualnak tikcu caan a ra thleng ding. 31 Curuangah ralring uhla sun tilo zan tilo in mitthli thawn kum thum sung nan zatein ka lo zirhmi kha hngilh hlah uh. 32 Atu cu Pathian kilkhawinak le a zaangfahnak thu sungah ka lo ap zo. Amah in a lo ṭhansoter ding ih a minung pawl hrangih a ret ciami thlawsuahnak kha a lo pek ding. 33 Zo ih tangka, sui le hnipuan khal ka daw dah lo. 34 Ka kut rori hin hna ka ṭuan ih keimah le ka rualpi pawl ih kan ṭulmi thil tla kha ka suahpi ve ti cu nan thei ṭhehmi a si ko. 35 Ziang hmuahhmuah ah napi in ṭuan tahratin santlai lomi pawl kan bawm ding a si ti kha ka lo hmuh zo; Bawipa Jesuh khal in, 'Ngah lam hnakin pek lamah lungawinak a tam sawn,' a timi ṭongkam kha ciing ringring uh," tiah thu a cah. 36 Paul in cutiin a sim ṭheh tikah a khuk a bil ih an zatein thla an cam tlang. 37 Paul cu an pom an hnam ih damte in vung feh aw, ti phahin an zatein an ṭap ciamco. 38 Zohman in in hmu sal nawn lo ding, a ti ruangah an riah a siat cuangnak a si. Cule lawng umnak tiang an hei thlah.
1 Kannih khal in cibai kan buk ih kan feh. Long in khui hmanah taang phah loin kan feh ih Kos kan thleng; a thaisun ah Rhodes tikulh kan thleng ih cutawk ihsin Patara ah kan lanta. 2 Cutawkah Fonisia ih a feh dingmi lawng kan tong ih cuih lawng ah kan ceer ih kan feh. 3 Saipras tikulh a lang theinak hmun kan thleng ih cutawk ihsin thlanglam ah kan her ih Siria lamah kan lan. Tai-ar khua ah kan ṭum ih cutawkah lawng thil phurhmi pawl an suahta. 4 Cutawkah dungthluntu ṭhenkhat an um ih an hnenah zarh khat kan um. Thlarau ih simnak thawngin Paul cu Jerusalem ih feh lo dingin an dawn. 5 Sikhalsehla anmah thawn kan umtlang tikcu a cem tikah kan suak ih kan feh. Annih khal in an zatein an nupi le an faate pawl thawn tipikap tiang in thlah. Cutawkah kan zatein khukbil in thla kan cam tlang. 6 Cule pakhat le pakhat cibai kan buk aw ih kannih lawng parah kan kai ih annih inn ah an tlung. 7 Tai-ar khua ihsin lawng in kan feh vivo ih Ptolemais kan thleng. Cutawkah zumtu unau pawl kan tong phah ih an hnenah ni khat kan caam. 8 A thaisun kan pok lala ih Sisaria kan thleng. Cutawkah Jerusalem ih upa pasarih hrilmi lakih pakhat a si mi Pathian thusimtu Filip ih inn ah kan riak. 9 Pasal nei hrih lo fanu fala pali a nei ih Pathian thu a phuangtu profet an si. 10 Ni tam nawn kan um hnuah Judea ram ihsin profet pakhat Agabas an timi a ra thleng. 11 Kan hnenah a ra ih Paul ih taikhap a lak hnuah a kut le a ke kha cuih taikhap cun a ṭeem aw ih, "Thlarau Thianghlim in hiti in a ti: hi taikhap a neitu pa hi Jerusalem khua ah Judah mi pawl in hi bangtuk in an ṭeem ding ih Zentail mi pawl ih kut sungah an pe ding," tiah a ti. 12 Cumi kan theih tikah kanmah in siseh, midang khal in siseh, Paul cu Jerusalem ih feh lo dingin kan dawn ciamco. 13 Sikhalsehla anih cun, "Ziangah so hiti ih nan um! Hiti nan ṭah ruangah ka lung in hnoter sinsin a si! Bawipa Jesuh hrangah cun Jerusalem khua sungah ṭeem le ṭawn lawng hman si loin thih ding tiang hman ka tiar a si," tiah a ti. 14 Ziangti hmanih kan don thei lo ruangah, "Bawipa ih duhnak vekin si ko seh," tiah kan ti. 15 Cutawkah tikcu tawkfang sung kan um hnuah kan tim kan tuah ih Jerusalem ah kan feh. 16 Sisaria ih a ummi dungthlun ṭhenkhat pawl cun in thlun ve ih kan riahnak ding Mnason ih inn ah in fehpi. Mnason cu Saipras mi a si ih a hlan ihsin dungthluntu a rak si ringring. 17 Jerusalem kan vung thlen tikah zumtu unau pawl cun lungawi zetin in rak hmuak. 18 A thaisun ah Jeim tong dingin Paul thawn kan feh ih kawhhran upa pawl tla an kim ṭheh. 19 Paul in cibai a buk hai hnuah an parih a lungawinak thu a sim ih a hnaṭuannak hmangin Pathian in Zentail mi lakih a tuahmi hmuahhmuah kha famkim zetin a sim. 20 Cumi an theih tikah an zatein Pathian kha an thangṭhat. Cule annih in, "Kan u pa Paul, Judah mi pawl sungin mi thawng ziangzatso zumtu an cang zo ih Daan an thlunnak ah ziangtlukin taimak an suah ti cu na hmuh ṭhehmi a si. 21 Zentail ram sungih a ummi Judah mi hmuahhmuah hnenah Moses Daan dungtun dingin le an faate pawl serhtan nawn lo dingin le Judah daan pawl thlun nawn lo dingin Paul in a zirh a si, tiah hitawk ummi pawl hin thu an thei. 22 Atu-ah hitawk ih nan thlen zo hi an thei ding a si ih ziangtinso kan tuah ding? 23 Hitiin tuah cila a ṭha ding tiah kan ruat. hittawk ah hin thukamnak a tuah zotu mi pali an um. 24 Anmah thawn va feh awla thianfainak ih tuah ṭheumi daan vekin va tuahpi ve awla an cemmi tangka tla va pek sak hai aw; cule an lu an meet thei ding. Cuti cun nangmah rori in Moses Daan kha na thlun ih na thuhla an rak theih ciami pawl hi thudik zianghman a um lo, ti kha an thei ṭheh ding. 25 Zentail mi pawl zumtu ih a cangmi pawl thuhla ahcun kanmah in ca kan kuat zo. Kan cakuatmi sungah cun milem hnenih pekmi tirawl ei lo ding, sathi ei lo ding, hngawngrek-ih thahmi sa ei lo ding, le nupa sualnak tuah lo ding, tiah kan relcatmi kha kan kuat zo a si," tiah an ti. 26 Cuhrangah Paul in a thaisun ah cuih mi pali cu a fehpi ih anmah thawn an daan vekin thianfainak cu an tuah. Cuih hnuah Biakinn sungah an lut ih thianfainak caan hi ziangtik ni ah a cem ding tile ziangtikah thawinak an pek fingfing a ṭulnak ding thu tla kha a sim. 27 Ni sarih ni a kim zik tikah Asia ram ihsin a rami Judah mi ṭhenkhat pawl in Biakinn sungah Paul kha an hmu. Mipi pawl kha an tokhrok ih Paul cu an kai. 28 "Israel mi pawl, in bawm uh! Hi pa hi hmunzakipah feh tahratin Israel mi pawl siseh, Moses Daan siseh, hi Biakinn siseh, relsia in thu a zirh vivotu a si. Atu-ah hi Biakinn sungah hin Zentail mi pawl hman a ratpi ih hi hmun thianghlim hmuah a borhhlawhter thluh zo!" tiah an au. 29 (Hitiih an aunak cu Efesa khuami Trofimas kha Paul thawn Jerusalem khawsungah an hmuh ruangah Biakinn sungah a luhpi a si, tiin an ruah ruangah a si.) 30 Khawpi sung cu a zatein buainak in a khat ih misenpi cu an tlan ih Paul cu kai tahratin Biakinn sung ihsin an dirh suak. Cule hmakhatte-ah Biakinn sangka pawl cu an khar. 31 Misenpi in Paul cu thah an tum rero laiah Jerusalem khawpi an khawpum in ral an tho a si tiah Rom ralkap hotu ralbawipa hnenah thu an than. 32 Hmakhatte-ah cuih ralbawipa cu ralbawi dang le ralkap pawl thawn an va tlan. Mipi in ralkap pawl thawn cuih ralbawipa an hmuh tikah Paul an vuak kha an baang. 33 Ralbawipa cu Paul hnenah a va feh ih a kaih hnuah thir cikcin pahnih in khit dingah thu a pek. Cule mipi cu, "Hi pa hi zoso a si? Ziang sualnak so a tuah?" tiah a sut. 34 Mipi sungih mi ṭhenkhat cu phunkhat in an au, mi hrekkhat cu phundang in an au ve. Thu a buaituk lawmmam ih, ralbawipa in ziang a cang ti a theih fiang lo ruangah a ralkap pawl kha Paul cu ṭankulh sungih luhpi dingin thu a pek. 35 An fehpi tikah kailawn tiang lawng an thlenpi thei; cuih hnu cun misenpi pawl an neh thei lo ruangah Paul cu ralkap pawl in a zawn in an zawn. 36 An dungin an rak nor vivo ih, "That uh," tiah an au phah vivo. 37 Ralkap pawl in Paul cu ṭankulh sungih an luhpi zik zawng ah Paul in ralbawipa cu, "Thu pakhatte ka lo sim thei pei maw?" tiah a sut. Ralbawipa in, "Grik ṭong na thiam maw si? 38 Cuti a si ahcun kan dung rei nawnah ral a tho ih hriamnam thawn mi thawngli ramṭhingih a tlanpitu Izipt pa kha cu na si lo ti aw?" tiah a sut. 39 Paul in, "Keimah cu Judah mi ka si. Silisia ram Tarsas khua ih a suakmi, khawpi hminthangih um ka si. Misenpi hnenah thusimnak tikcu i pe hram aw," tiah a dil. 40 Ralbawipa cun thusimnak tikcu a pek ih, curuangah Paul cu kailawn parah ding tahrat in mipi pawl cu dai dingin a zaa a zaap. Mipi pawl an daih tikah Paul in Hebru ṭong in an hnenah thu a sim.
1 Paul cun, "U le nau, nu le pa pawl, nan hmaiah hin ka ṭannak thu ka sim ve tikah hin i ngaihnik uh!" a ti. 2 Hebru ṭong ih a ṭong ruangah mipi cu an dai ṭhepṭhep. Cule Paul cun a hun peh sal ih: 3 "Keimah cu Silisia peng Tarsas khua suak Judah mi ka si. Asinain Jerusalem khua ah a ṭhanglian mi ka si ih Gamaliel ih zirhmi ka si. Kan pupa pawl ih daan felzet le fekzet ih zirhmi ka rak si. Tuihsun hitawk ih a rami nanmah vekin Pathian hnenah pum petu ka rak si ve. 4 Bawipa ih Lamzin thluntu pawl hi thi ko in ka rak hrem hai. Nunau tilo, mipa tilo in ka kai ih thawngah ka thlak. 5 Puithiam Saang le Khonsil upa pawl cu thudik ka simmi hi a theitu an si. Cuih upa pawl hnen ihsin Damaskas khua ih Judah unau pawl hnen pek ding ca ka keng ih Bawipa ih Lamzin thluntu pawl hi kai tahratih thir cikcin thawn khit in Jerusalem khua ih rak hruai dingin le hrem dingin Damaskas khua ah ka rak feh a si. 6 "Cutiin ka feh ih Damaskas ka thlen zikah, sunlai hrawngah van ihsin a tleuzetmi tleunak in ka kimvel kha hmakhatte ah i run tlet. 7 Leilung ah ka tlu ih aw pakhat in, 'Saul, Saul, ziangah so i hrem?' tiah i ti kha ka thei. 8 'Bawipa, zoso na si?' tiah ka hun sut. Anih in, 'Na hremmi Nazareth mi Jesuh ka si,' tiah i ti. 9 Ka hawipi pawl in tleunak cu an hmu na'n i biatu-ih aw cu an thei lo. 10 'Ziang so ka tuah ding, Bawipa?' tiah ka sut. Bawipa in, 'Tho awla Damaskas khawsungah va feh awla na tuah dingah Bawipa in a tumtah ciami hmuahhmuah kha an lo sim ding,' tiah a ti. 11 A tleu tuk ruangah ka mit a caw ih ka rualpi pawl in ka kutin Damaskas khawsungah in hruai. 12 Cuih khawpi ah Ananias cu daan thluntu saakhua-mi le cutawk ih um Judah mi hmuahhmuah ih upatmi a si. 13 Ananias cu ka hnenah a ra ih ka kiangah ding tahratin, 'Unau pa Saul, khua hmu sal aw,' tiah a ti. Cuvete in khua ka hmu sal ih amah cu ka hun zoh. 14 Amah in, 'Kan pu le kan pa pawl ih Pathian in amah ih duhnak a theitu dingah le Miding pa hmutu dingah le amah ih aw rori a theitu dingah a lo hril zo a si. 15 Ziangahtile na hmuhmi le na theihmi hi mi hmuahhmuah hnenih simtu dingah Amah ih thutheitu na si ding. 16 Cuti a si ruangah reipi hngak nawn hlah! Tho awla amah ih hmin ko phah in baptisma lak awla na sualnak thiangfaiter aw," tiah i ti. 17 "Cuih hnuah Jerusalem ah ka kirsal ih Biakinn sungih thla ka cam laiah langnak ka hmu. 18 Cuih langnak ahcun Bawipa ka hmu ih ka hnenah, 'Tho awla zamrangte in Jerusalem ihsin suak aw, ziangahtile hi khuami pawl in ka thuhla na phuanmi hi an pom lo ding,' tiah a ti. 19 Kei in, 'Bawipa, sinakok ah ka feh ih nangmah a lo zumtu pawl kha kai in ka vuak rero ṭheu kha an theih ṭhehmi a si. 20 Cule na thutheitu Stefen an thah tikah keimah rori ka um ih an thah kha ka lungkimpi tlunah a thattu pawl ih puan pawl a rak kensaktu ka si,' tiah ka ti. 21 Bawipa cun, 'Feh ko aw; lam hlapi Zentail mi pawl hnenah ka lo thlah ding,' i ti," tiah Paul in a sim. 22 Cumi a sim tiang cu mipi pawl in ṭhatein an ngai. Asinain cuih hnu cun an aw neih patawp in, "Kha pa kha hloral seh! That uh! Nung ding a tlak lo!" tiah an au ciamco. 23 An zatein an au, an kio, an hnipuan an zaap ih leivut kha vanah an khirh ciamco. 24 Rom ralbawipa in a ralkap pawl kha Paul hi ṭankulh sungah fehpi uhla ziang ruangah mipi pawl in hitlukin an hua ih an au hnawh ti theihnak dingah fung in vuak uh, tiah thu a pek. 25 Sikhalsehla fung in vuak dingih an ṭem ṭheh tikah Paul in cutawkih a dingmi bawi pakhat hnenah, "A sual thu ṭhen hrih lo Rom mi pakhat hi vuak daan a si pei maw?" tiah a sut. 26 Cuih thu a theih tikah cuih bawi cu ralbawipa hnenah a feh ih, "Ziang so na tuah? Khi pa khi Rom ih minung sokhaw a si!" tiah a ti. 27 Curuangah Paul hnenah a va feh ih, "Rom mi na si maw? I sim hnik?" tiah ralbawipa cun a sut. "Ka si," tiah Paul in a ti. 28 Ralbawipa in, "Kei khal tangka tampi ka pek hnuah ka si ve," tiah a ti. Paul cun, "Kei cu ka suahkeh ihsin Rom mi ka si," tiah a sawn. 29 Cuvete in Paul thusuh a tumtu pawl cu dungah an siip ṭheh. Ralbawipa khal cu Paul kha Rom mi a si ti a theih tlunah Rom mi thir cikcin thawn a khih kha a theih sal tikah a thin a phangzet. 30 Ralbawipa cun Judah mi pawl in Paul parih sual an puhmi hi ziang bik so a si, ti theihfiang a duh ruangah a thaisun ah Paul ih thir cikcin cu a phoihter ih Puithiam upa pawl le Khonsil upa an zatein tongkhawm aw dingah thu a pek. Cule Paul cu a hruai ih an hmaiah a dinter.
1 Paul in Khonsil upa pawl cu hmaiton tein a zoh hai ih, "Ka phunpi Israel mi pawl, tuihsun tiang Pathian hmaiih ka nunzia ahhin phuhrun awknak malte hman ka nei lo," tiah a ti. 2 Puithiam Saang Ananias in Paul kiangih a dingmi pawl hnenah Paul kha a kaa ah hei beng dingin thu a pek. 3 Cutikah Paul in, "Nang siirang hnihmi phar, Pathian in nangmah a lo beng ding a si. Daan vekih ka thu rel dingah kha tawkah na to; asinain 'Hei beeng uh,' tiih thu na peknak in cuih Daan cu na buar a si!" tiah a sawn. 4 Paul kiangih a ummi pawl in, "Pathian ih Puithiam Saang na hmuhsuam a si!" tiah Paul cu an ti. 5 Paul cun, "Israel mi u le nau pawl, Puithiam Saang a si ti ka thei lo! Ca Thianghlim sungah, 'Na miphun a uktu na relsiat lo pei,' tiin a um a si," tiah a ti. 6 Paul in a rami pawl lakah a hrek cu Sadusi an si ih a hrek cu Farasi an si, ti kha a hmuh tikah Khonsil upa hmaiah cun a au ih, "Ka phunpi Israel mi pawl, kei hi Farasi ka si, Farasi pawl ih fapa ka si. A thimi pawl an nung sal ding, tiih ruahsannak ka neih ruangah atu hitawk ah hin tazacuainak ka tong," tiah a ti. 7 Cutiih a sim ṭheh vete in Farasi le Sadusi pawl cu an to aw ih cutawkih a ummi pawl lakah ṭhenṭhek awknak a suak. 8 (Ziangahtile Sadusi pawl cun minung hi an thih hnuah cun an thosal nawn lo ding; vancungmi khal an um lo, thlarau khal an um lo, tiah an ti. Asinain Farasi pawl cun a pathum tein a um tiah an zum.) 9 An au cu a ring deuhdeuh ih Farasi a si mi Daanthiam hrekkhat pawl an ding ih nasa zetin an au ve: "Hi pa sualnak hi malte hman kan hmu lo. Thlarau a si lole vancungmi in a hnenah a sim ngaingai a si thei meen sokhaw!" tiah an ti. 10 Nasa tukih an tawh awk ruangah Paul kha an bauhthlek thluh ding tiah ralbawipa a thin a phang. Curuangah mipi lak ihsin Paul kha vung hruai ih ṭankulh ih fehpi dingin a ralkap pawl thu a pek. 11 Cuih zanah cun Bawipa cu Paul kiangah a ding ih, "Paul, zianghman ṭih hlah! Hitawk Jerusalem khua ah ka thu theihpitu na si zo, hivek thotho in Rom khua khalah na si hrih ding," tiah a ti. 12 A thaizing ah Judah mi ṭhenkhat pawl an tongkhawm aw ih khua an khang. Paul an thah thei hlanah cun rawl ei lo ding le tidai khal in lo dingin thu an kam aw. 13 Hitiin hmun khatih khua a khangtu hi minung sawmli leng lo an si. 14 Cutiin Puithiam upa le upa dang pawl hnenah an feh ih, "Paul kan thah thei hlanah cun zianghman ei lo le in lo dingin thu kan kam aw zo. 15 Curuangah nanmah le Khonsil pawl in Rom ralbawipa hnenah thu hei cah uhla, Paul thuhla kim deuh in theih kan duh, tiin ti awter uhla, Paul kha hitawk ah run hruaiter uh. Cule kannih in kan rak bawh pei ih hitawk a thlen man hlanah kan rak that pei," tiah an ti. 16 Sikhalsehla Paul farnu-ih fapa in cutiih an phiarthupmi cu a theih ruangah ṭankulh-ah cun a feh ih Paul kha a va sim. 17 Cule Paul in ralbawi pakhat kha a ko ih a hnenah, "Hi tlangvalpa hi ralbawipa hnenah hei hruai aw; thuruah ding pakhat a nei," tiah a ti. 18 Cuih ralbawi cun a hruai ih an hotu ralbawipa hnenah a fehpi ih, "Thawngtla pa Paul in i ko ih hi tlangvalpa hi na hnenih ratpi dingah i fial, ziangahtile thu pakhat lo sim ding a nei," tiah a ti. 19 An hotu ralbawipa cun tlangvalpa cu a kut in a hruai ih anmah pahnih lawng an feh ih, "Ziang so i ruah duh?" tiah a sut. 20 Tlangvalpa cun, "Judah mi hotu upa pawl in Paul thuhla-ah Khonsil pawl in famkim deuh in thu theih an duh tiah an ti-awter ding ih thaisun ah Paul kha Khonsil upa hnenah run hruai dingin lo dil dingah lungkimnak an nei zo. 21 Sikhalsehla an thu cu ngai hlah aw; ziangahtile minung sawmli leng lo in Paul kha an rak bawh ding. Paul an thah hlanah cun zianghman ei lo le in lo dingin thu an kam aw. Atu-ah an ralring aw thluh zo ih nangmah ih thurelcat dingmi lawng an hngak lai," tiah a sim. 22 Ralbawipa cun, "Ka hnenih na simmi hi zo ih hnen hmanah va phuang hlah," tiah a ti ih tlangvalpa cu a tlunter. 23 Cule ralkap hotu ralbawipa cun a kuthnuai ralbawi pahnih a ko ih, "Sisaria ih feh dingah ralkap zahnih timtuah uh. Cule rang ralkap sawmsarih le feipi ralkap zahnih khal timtuah uhla tuihzan nazi pakua ih suak thei dingin ralring hai seh. 24 Paul ih to dingah rang tla ngaihtuah uhla Mangki bawi Felix hnenah himte in thlenter uh," tiah a ti. 25 Cule ralbawipa in a tanglam vekin ca a kuat. 26 "Klaudius Lisias in Mangki Bawipa Felix hnenah cibai bukin ca ka lo kuat. 27 Na hnenih ka hun kuat mipa hi Judah mi pawl in an kai ih a thah an tum. Rom mi a si ti ka thei ih ka ralkap pawl thawn kan va run suak. 28 A sual an puhmi hi ziang a si bik ti theih duh ah Khonsil upa hnenah ka fehpi. 29 Ka theih ngah tikah a tuahmi cu thah tlak sualnak a si lo ih thawng thlak tlak sualnak khal a si lo; sual an puhmi cu anmah ih daan thuhla men khi a si. 30 Cule amah thah duh ah khua an khang ti ka theih ruangah hmakhatte ah na hnenah ka hun kuat. Sual a puhtu pawl khal cu na hnenah ra in na hmai rori ih tazacuai dingin ka sim hai a si," tiah a ti. 31 Ralbawipa ih thupekmi vekin ralkap pawl cun an tuah. Paul cu an hruai ih cuih zanah Antipatris tiang an fehpi. 32 A thaizing ah lei ralkap pawl cu an kir ih rang ralkap pawl in an thlun. 33 Sisaria khua an thlenpi ih Mangki Bawipa kutah cakuat cu an pek hnuah a kut sungah Paul cu an ap. 34 Mangki Bawipa in cakuat cu a siar ih, "Khuitawk pengin so na rat?" tiah Paul kha a sut. Silisia pengin a si, ti a theih tikah a hnenah, 35 "Thu a lo khingtu pawl an thlen tikah na thu cu ka rel leh ding," tiah a ti. Cule Paul cu Siangpahrang Herod ih a rak sakmi innpi Mangki Bawipa ih zung sungah ralkap ih kil dingin thu a pek.
1 Ni nga hnuah Puithiam Saang Ananias cu upa ṭhenkhat le sih-ni Tertullas thawn Sisaria ah an feh. Mangki Bawipa Felix hmaiah an suak ih Paul taza an cuainak cu an sim. 2 Cule Paul cu an ko ih sih-ni Tertullas cun Paul sual an puhnak thu cu hiti in a sim: "Mangki Bawipa, fimnak thawn nangmah in in hruai ruangah caan reipi daihnak kan ngah ih kan ram ṭhatnak hrangah rem ṭulmi pawl tampi rem a si zo. 3 Himi kan hmuh tikah na tuahmi pawl hi khuazakipah mi in an pom ih na parah kan lung a awi ngaingai. 4 Na tikcu tamtuk ka lo laksak pang ding ti ka phan ruangah kan sim duhmi kha a tawi thei sungin kan hun sim pei ih zaangfahte in in ngaisak hram aw. 5 Himi pa hi mi buaiter theizet le ṭihnungza a si tiin kan hmu. Leilung tlun hmun kipih Judah mi pawl a buaiter ringring ih Nazareth bu an timi pawl sungah hruaitu amah hi a si. 6 Kan Biakinn borhhlawhter a tum ih culai ah kan kai. (Cule kan daan vekin a thu rel kan tum; 7 asinain ralbawipa Lisias a ra ih hranhram in in ra long. 8 Cuih hnuah Lisias in Paul tazacuai a duhtu pawl cu na hnenah hin feh hai seh, tiah thu a pek.) Nangmah in hi pa hi thu na sut ahcun amah ih hnen ihsin sual kan puhmi pawl hi nangmah rori in na thei ko ding," tiah a ti. 9 Cutiih a simmi cu Judah mi pawl in an bawm ih a simmi hi a zatein a dik ṭheh a si an ti. 10 Mangki Bawipa in Paul cu thu sim dingah a kut in a zaap ih Paul in Mangki Bawipa hnen ah: "Nangmah cu hi ram sungah hin kum reipi thureltu a ṭuantu na si ti ka thei ih atu-ah na hmaiah ka ṭanhmun sim dingin caan ka neih ruangah ka lung a awizet. 11 Jerusalem ah Pathian bia dingin ka hung fehnak hi ni hleihnih hnakin a tam hrih lo, ti cu na thei ko ding. 12 Biakinn sungah zo thawn hman thu kan el aw lo, ti cu Judah mi in an thei ṭheh. Sinakok ah siseh, khawpi sung hmun dangdang khalah siseh, misenpi ka tokhroknak an hmu hrimhrim lo ding. 13 Cule atu-ah na hmaiih sual in puhmi pawl hi a dik taktak a si tiah an lo hmuh thei fawn lo ding. 14 Ka tuah taktak tiin na hmaiah ka ti duhmi cu hihi a si: Kan pupa pawl ih Pathian ka biaknak ah hin Lamzin kan timi ka thlun; annih in cuih Lamzin cu a dik lo an ti. Sikhalsehla Moses Daan sungih nganmi hmuahhmuah le profet pawl ih nganmi cabu sung ummi hmuahhmuah khal ka zummi an si ṭheh. 15 Anmah vek thothoin keimah khal Pathian hnenah ruahsannak ka nei ve. Cuih ruahsannak cu, mi hmuahhmuah in, miṭha khal misia khal, thihnak ihsin an tho sal ding, timi a si. 16 Cuti cun Pathian hmai le minung hmaiah phuhrun awknak nei lo dingin ka zuam thei tawk ka zuam ringring. 17 "Kum reipi sung Jerusalem khua ka thlen nawn lo ruangah ka miphun pawl bomnak ah tangka pe ding le thawinak pe dingin Jerusalem ah ka hung feh. 18 A daan vekin thianfainak ka tuah ṭheh hnuah a tlunih ka simmi pawl ka tuah rero laiah Biakinn sungah in hmu. Culai ah ka hnenah miburpi an um lo; buainak khal a um lo. 19 Asinain cutawkah cun Asia ram ihsin a rami Judah mi hrekkhat an um. Cupawl cu ka parah lungkimlonak an neih a si ahcun na hmai rori-ah hin anmah ra in mawhthluknak cu ra sim ve ding an si. 20 Asilole hitawk ih a um pawl hin Khonsil upa pawl hmaiih ka din laiah ka sual tiih an hmuhmi lo sim hai seh. 21 An hmaiih ka din laiah thil pakhat lawng ka aupi mi a um: 'Mithi pawl cu nunnak ah an tho sal ding,' tiin ka zum ruangah tuihsun ah hin thu in khiing a si," tiah a sim. 22 Cule Felix cu cuih Lamzin thuhla ṭha zetih a theitu a si ruangah an thu rel cu a cawlter ih, "Ralbawipa Lisias a ra thlen tikah nan thu cu ka rel leh ding," tiah a ti. 23 Paul a kiltu ralbawi cu, "Paul hi ṭhatein kilveng uhla, malte in luatter deuh uhla a ṭul a haimi pawl cu a rualpi pawl in pe hai seh," tiah a ti. 24 Ni malte a rei hnuah Felix cu a nupi Drusilla thawn an ra. Drusilla cu Judah mi a si. Paul kha a ko ih Paul in Jesuh Khrih zumnak thuhla kha a sim ih cumi cu an ngai. 25 Sikhalsehla Paul in ṭhatnak thu, mah le mah suup awknak thu le a ra thleng dingmi Thuṭhennak Ni thu pawl a sim tikah Felix cu a thin a phang ih, "Tu cu va kir hrih aw. Tikcu ka neih tikah ka lo ko sal leh ding," tiah a ti. 26 Felix cun Paul in tangka i pe sehla tiah ruahsannak a nei. Curuangah Paul cu a ko leuhleuh ih thu a ruahpi ṭheu. 27 Kum hnih a rei hnuah Mangki Felix cu Porsius Festas in a hnaṭuan a thleng. Judah mi pawl hnen ihsin mithmai ṭha ngah a duh ruangah Felix in Paul cu suah loin thawng sungah a taanta.
1 Festas cu cuih ram a thlennak ni thum hnuah Sisaria ihsin Jerusalem ah a feh. 2 Cutawkah Puithiam upa pawl le Judah mi hotu pawl in Paul parih sual an puhnak thuhla pawl cu an rak sim. 3 Paul cu lamzin ih thah an duh ruangah Jerusalem ah run hruai dingin Festas cu an dil. 4 Festas in, "Paul cu Sisaria khua ih thawngtlami a si ih keimah khal Sisaria ah ka kir cing ding. 5 Nan hotu pawl cu keimah thawn Sisaria ah ra hai sehla himi pa in sualnak a neih a si ahcun ra sim hai seh," tiah a ti. 6 Festas cu an hnenah ni riat a si lole ni hra hrawng a caam hnuah Sisaria ah a tlung. Inn a thlen ih thaisun ah Festas cu a thurelnak zung sungah a to ih Paul cu rak hruai dingin thu a pek. 7 Paul cu a ra thleng ih Jerusalem ihsin a rami Judah mi pawl cu a kiangkap ah an ding vialvial ih nasa zetin sual an puh; asinain sual an puhmi cu a dik taktakmi a si tiah an langter thei lo. 8 Sikhalsehla Paul cu a ṭang ve ih, "Judah mi daan thu-ah siseh, Biakinn thu-ah siseh, Rom siangpahrang ih thu-ah siseh, sualnak zianghman ka tuah lo," tiah a ti. 9 Asinain Judah mi hnen ihsin mithmai ṭha ngah a duh ruangah Festas in Paul cu, "Jerusalem ah feh in cutawkah ka hmaiah taza lo cuai hai sehla na lung a kim pei maw?" tiah a sut. 10 Paul in, "Rom Siangpahrang ih thurelnak hmaiah atu hi ka ding ih hitawk ah taza in cuai hai seh. Nangmah ih na theih vekin Judah mi hnenah thilsual zianghman ka tuah lo. 11 Daan ka buar ih thihnak tlak thilsual ka tuahmi a um ahcun luat ningla tiah ka dil lo. Sikhalsehla sual in puhmi ah hin thudik zianghman a um lo a si ahcun zohman in Judah mi pawl kut sungah in thlenpi thei lo ding. Rom Siangpahrang hnenah azu ka khan a si!" tiah a ti. 12 Cule Festas in amah ruahnak petu pawl thawn an tonkhawm awk hnuah Paul cu, "Rom siangpahrang hnenih azu na khan vekin a hnenah na feh ding," tiah a ti. 13 Cuih hnu caan tawkfang a rei hnuah Siangpahrang Agrippa le Bernis cu Festas cibai buk ih biata dingin Sisaria ah an ra tlawng. 14 Ni rei nawn an caam hnuah Festas in Paul ih thuhla cu siangpahrang Agrippa hnenah cun a sim. "Felix in thawngih a thlakta mipa pakhat Sisaria ah hin a um. 15 Jerusalem ih khual ka vung tlawn laiah Judah mi puithiam upa pawl le upa dang pawl in taza an cuai ih amah cu thah dingah in dil. 16 Asinain ka sim mi cu: Kannih Rom mi pawl cun mi pakhatkhat taza an cuai tikah tazacuaitu thawn hmaiton tein amah a ṭannak thu simnak caan a neih ve hlanah cun tazacuai mipa kha an kut sungih pek cu kan daan a si lo, tiah ka ti. 17 Hitawkih an rat tikah ni khat hman hngak loin a thaisun rori-ah thurelnak zungah ka to ih cupa cu rak hruai uh tiah thu ka pek. 18 Amah a duh lotu pawl cu an ding ih thu an sim, asinain sual an puh hmang ding tiih ka ruah tlukin an puh lo. 19 An biaknak thu le Jesuh an timi pa a thi ih Paul in, 'A nungsal,' tiih a simmi ruangah thu el awknak an rak nei a si. 20 Hi thuhla-ah hin ziangtinso thufiang ka theih thei ding, tiah ka thinlung ka ṭhen aw thei lo; curuangah Paul cu Jerusalem ah feh in sual an lo puhmi thu hi cutawkah rel sehla na lung a kim pei maw?" tiah ka sut. 21 Sikhalsehla Paul cun azu a khan ih amah khal kil hrih ding le Rom Siangpahrang ih a thu rel leh ding in a dil. Curuangah amah kha Rom siangpahrang hnenih ka kuat thei hlan cu ralkap pawl ih kil dingah thu ka pek a si," tiah a ti. 22 Agrippa in Festas cu, "Cupa ih thusimmi cu keimah rori in theih ve ka duh," tiah a ti. Festas in, "Thaisun ah na thei ding," a ti. 23 A thaisun ah Agrippa le Bernis cu sunglawi zet le ropi zetin, tonkhawmnak khaan sungah cun an vung lut ih ralbawi upa bik pawl le khawsung tlangsuak upa pawl in an thlun. Cule Festas ih thupeknak vekin Paul cu an vun hruai. 24 Festas in, "Siangpahrang Agrippa le hitawk ih a rami pawl: Hi nan hmuh mipa hi Judah mi hmuahhmuah in, hitawk ah siseh Jerusalem ah siseh, an duh lonak thu ka hnenih an thlentermi a si. Nung tlak a si lo ti tiangin an au. 25 Sikhalsehla thah tlak sualnak a tuahmi ka hmu thei lo. Cule amah in Rom siangpahrang hnenih azu a khan ruangah cutawkih kuat dingin thu ka relcat zo. 26 Asinain Rom siangpahrang hnenih a thuhla ngan ding felfai-in ka thei tuk lo. Curuangah atu-ah nan hmaiah hin ka rak hruaiter. Siangpahrang Agrippa, nangmah ih hmai rori-ah ka hun suahpi. A thuhla ka zingzoi hnuah ngan ding ziangtal ka nei pei maw, ti duh ah a si. 27 Ziangahtile keimah ih hrang hrimhrim ah thawngtla pakhat thu an khiinnak thuhla zianghman fiangtein ngan loih kuat cu a mawi lo a si," tiah a ti.
1 Agrippa in Paul hnenah, "Na thuhla cu na sim thei," tiah a ti. Paul in a kut a hun thlir ih a ṭannak thu cu hiti in a sim: 2 "Siangpahrang Agrippa, tuihsun nangmah ih hmaiah Judah mi pawl ih sual in puhmi thu pawl let ve theinak caan ka ngah ruangah mi vanṭha ngaingai ka si tiah ka ruat aw. 3 Judah mi daan hmuahhmuah le thu an el awknak pawl a thei ṭhehtu na si ruangah mi vanṭha ih ka ruah awk cuangnak cu a si. Thinsautein i ngai hram aw, tiah zaangfah ka lo dil. 4 "Judah mi pawl hmuahhmuah in ka nuncan daan cu ka nauhak lai ihsin in thei ṭheh. Ka nuncan khuasaknak thuhla pawl, a hmaisa-ah keimah ih miphun hnenah, a neta-ah Jerusalem ah, a zatein an theih ṭhehmi a si. 5 Ka thuhla cu sim an duh a si ahcun an sim pei, an theih ringring mi a si. A hramthok ihsin kei cu kan biaknak lamah cun a fektukmi Farasi pawl ih sungtel ka si. 6 Tuihsun hitawk ah ka thu rel dingin ka dinnak khal hi Pathian in kan pu le kan pa pawl hnenih thukamnak a tuahmi kha ruahsannak ka neih ruangah a si. 7 Cutiih ruahsannak ka neihmi cu kan miphun phun hleihnih pawl in Pathian kha a sun a zan in an rak biak laiih ruahsannak an rak neih mi thotho a si. Cuih ruahsannak ruangah cun Siangpahrang Bawipa, Judah mi pawl in taza in cuainak hi a si! 8 Hitawkih a rami pawl, Pathian in mithi a thawhter tihi ziangah so a cang thei lomi thilah nan ruat? 9 "Nazareth mi Jesuh ih thuhla cu ka do thei tawkin ka do ding, tiah keimah rori in ka rak ruah dahmi a si. 10 Cumi cu Jerusalem khua ih ka rak tuah rero dahmi a si. Puithiam upa pawl hnen ihsin thuneihnak ka ngah ih Pathian minung pawl tampi thawngah ka thlak. Thah dingih thurel an si tikah ka lungkimnak langternak ah ka kut ka rak tung ve ṭheu. 11 Voi tampi sinakok sung rori-ah ka hremter hai ih an zumnak bansan hai seh tiah ka zuam thei tawkin ka rak zuam. An parah ka thin a heng tuk ih anmah hrem dingin ramdang khua pawl tiang ka thleng dah a si. 12 "Cutiin anmah hrem duh rori-ah cun Puithiam upa pawl hnen ihsin thuneihnak ca ka lak ih Damaskas khua ah ka feh. 13 Maw siangpahrang Bawipa, sun laifangih Damaskas lamzinih ka feh rero laiah ni hnakin a tleu deuhmi tleunak van ihsin a rung thleng ih keimah le ka fehpi mi pawl ih kimvel kha a run tlet. 14 Kan zatein leilungah kan tlu ih Hebru ṭong in aw pakhat ka thei ih, 'Saul, Saul, ziangah so i hrem rero? Cawcang in a neitu pa ih fung a saih tikah amah a natter awk sawn vekin nangmah na nater aw sawn a si,' tiah a ti. 15 'Bawipa, zoso na si?' tiah ka sut. Cule Bawipa in, 'Na hremmi Jesuh ka si. 16 Tho awla na ke in ding aw. Keimah i rian dingin ka lo hril duh ruangah na hnenah ka lang a si. Tuihsun ih kei i tonnak thu le hmailamih ka lo hmuh dingmi thu pawl hi midang hnenah na sim pei ih ka thutheitu na si pei. 17 Nangmah cu Israel mi le Zentail mi hnenah ka lo thlah ding ih an kutsung ihsin ka lo runsuak ding. 18 An mit na mengter ding ih thimnak sung ihsin tleunak ah, Satan cahnak sung ihsin Pathian hnenah na kirter hai ding. Cuti cun keimah in zumnak thawngin an sualnak tla cu ngaidam an si ding ih Pathian ih thianhlimtermi pawl lakah an tel ve ding,' tiah i ti. 19 "Cuti a si ruangah, Siangpahrang Agrippa, van ihsin langnak ka hmuhmi ih thu cu ka el thei lo. 20 Hmaisabik ah Damaskas khua ah, cule Jerusalem khua ah, cuih hnuah Judea ramsung hmuahhmuah le Zentail mi hnen khalah ka feh ih, 'Nan sual siir aw uhla Pathian hnenah kir uh; cule nan sualsirnak langtertu hnaṭuan kha ṭuan uh,' tiah thu ka sim vivo. 21 Cutiih ka ti ruangah Judah mi pawl in Biakinn sungah in kai ih a thah tiangin in tum a si. 22 Sikhalsehla tuihsun tiangah hin Pathian in i bawm ih atu-ah, nanmah a tum a seen ti loin nan zate hmaiah ka hmuhmi thu cu ka sim a si. Ka simmi thu hi Moses in siseh, profet pawl in siseh a cang ding tiih an rak sim ciami an si. 23 Cutiih an simmi cu ziang a si tile: tleunak rundamnak thu cu Judah mi le Zentail mi pawl hnenih than dingah Messiah in tuarnak a tong ding ih, cuih hnuah thihnak ihsin a nungsaaltu hmaisa bik a si ding, ti a si," tiah a ti. 24 Paul in a ṭannak thuhla cutiin a sim tikah Festas in, "Paul, na aa zo a si! Na zir tamtuknak in a lo aatter zo a si hi!" tiah a hei auh. 25 Cutikah Paul in, "Bawipa Festas, ka aa lo sokhaw! Lungfim tein thutak ka lo sim a si! 26 Maw Siangpahrang Agrippa, na hnenah cun suupmi nei lo ralṭha zetin ka ṭong; ziangahtile nang cu hi thu pawl hmuahhmuah hi a thei ṭhehtu na si. Pakhat hman hrelh loin na hminsin ṭheh ko ding tiah ka zum, ziangahtile hiti ih ka simmi pawl hi zo ih theih lomi, a kelkawm-ih thuhmi pawl an si lo. 27 Siangpahrang Agrippa, profet pawl na zum maw? Na zum a si, ti ka thei!" tiah a ti. 28 Agrippa in Paul cu, "Hi tikcu tawite sungah Khristian canter i tum maw si?" tiah a ti. 29 Paul in, "A caan tawite ah siseh, caan saupi ah siseh, nangmah le tuihsun hitawk ih ka thu a ngaitu hmuahhmuah hi nan zatein, hi ka kutih thir cikcin siarlo, keimah vek si ṭheh uhla tihi Pathian hnenih ka thlacamnak a si," tiah a ti. 30 Cule Siangpahrang Bawipa, Mangki Bawipa, Bernis le midang pawl tla an tho ih, 31 an feh hnuah pakhat le pakhat, "Hi pa hi thah tlak le thawng thlak tlak sualnak a tuahmi a um ual lo," tiah an ti aw. 32 Cun Agrippa in Festas hnenah, "Rom siangpahrang hnenah azu khan hlah sehla, hi pa hi thlah theih mai a si ko ding na'n!" tiah a ti.
1 Italy ah lawng ih feh dingin thu relcat a si tikah Paul le thawngtla dang pawl cu Rom ralkap "Siangpahrang Ralkap Burpi," timi a hotu ralbawi Julius kutah an pek. 2 Asia ram tangphawlawng colhnak hmun pawl a pal phah vivo ding mi Adramittium khua ihsin a rami tangphawlawng to in kan feh. Masidonia ram Thesalonika khuami Aristarkas khal kan hnenah a tel ve. 3 A thaisun ah Sidon kan thleng. Julius cu Paul parah zaangfahnak thinlung a nei ih Paul cu a ṭulmi thilri pawl a ngah theinak dingah a rualpi pawl va leen le va ton theinak tikcu tla a pek. 4 Cutawk ihsin kan feh ih thli kanmah lam lawnglawngih a hran ruangah Saipras tikulh thli-upnak lam in kan feh. 5 Tifinriat kha Silisia le Pamfilia zawn ihsin kan tan ih Lisia ram Mira khua kan thleng. 6 Cutawkah ralbawipa cun Alexandria ihsin Italy ih a feh dingmi tangphawlawng a hmu ih cuih tangphawlawng ahcun in fehter. 7 Nuamtete in kan feh ih ni tampi kan rei hnuah a netnak ah harzet in Snidas khua zawn kan thleng. Cutawklam zawh in feh ding thli in in kham ruangah Krete tikulh leilung phen thli-upnak lam ihsin kan feh ih Salmon ram-forhlei kiang ihsin kan lan. 8 Tifinriat kap naih in kan feh vivo ih harzet in Himnak Longcolh Hmun an timi kan thleng. Cumi cu La sia khua ihsin a hlat lo. 9 Cutawkah cun reipi kan cawl ih Sualtlennak Ni a luan zo ih tangphawlawng in khualtlawn cu ṭihnung a si thlang. Curuangah Paul in hiti in an hnenah ruahnak a pek: 10 "U le nau pawl, hi tawk ihsin kan lamzin cu ṭihnungza a si ding. Nan phurhmi thilri le tangphawlawng hi siatralnak a tong ding ih kan nunnak khal a cemral ding a si," tiah a ti. 11 Sikhalsehla Paul ih simmi hnakin tangphawlawng neitupa ih simmi sawn kha ralbawipa ih thinlung sungah a lut. 12 Cuih an tangphawlawng colhnak cu thlatang tikcu ahcun umnak a ṭhat lo ruangah mi tam sawn cun a cang thei a si ahcun Finiks thleng feh lawlaw ih cutawkih thlatang sung um kha an duh. Finiks cu Krete tikulh ih tangphawlawng colhnak a si ih thlanglam nitlaknak lam le saklam nitlaknak lam hoi in a um. 13 Thlanglam ihsin simthli neemte a hung hrang ih an tumtah vekih feh thei dingin an ruat. Curuangah tangphawlawng hrennak thirkawn kha ti sungin an hnuk ih Krete tikap naih vivo in kan feh. 14 Asinain rei lote-ah, "Nisuah Saklam Zothlipi," cak zetin Krete lam ihsin a rung hrang. 15 Kan tangphawlawng cu a run deen ih cuih thli cu kan pah thei nawn lo ruangah beidong in kan um ih kan tangphawlawng cu thli in a duhnak poh ah a fehpi vivo. 16 Kauda tikulh ih thlanglam kan thlen tikah cun thli in phen deuh ruangah a zia a um deuh. Cutawkah cun harsa zetin tangphawlawng ih a kenmi vokkuanglawng cu rem deuhin kan ret. 17 Tangphawlawng parah vokkuanglawng cu an vun hnuk ih hri in tangphawlawng ahcun fektein an ṭemcih. Libia ram tikap kiangih ti sungih vunnel tlangtluan pah ding an phan ruangah tangphawlawng cu a puanzar an ṭhum ih thli in a duhduhnak ah a so ih. 18 Thlipi a hrang thotho ih a thaisun ahcun tangphawlawng ih phurhmi thilri hrekkhat cu ti sungah an hlon. 19 A tipsun ah tangphawlawng ih thilthuam hrekkhat an hlon. 20 Ni tampi sung, ni le arsi pawl kan hmu thei lo; thli cu nasa zetin a hrang ringring. A netnak ahcun kan nung ding ti ruahsannak malte hman kan nei nawn lo. 21 Tangphawlawng parih mi pawl cu rawl loin ni tampi an um hnuah an hmaiah Paul a ding ih, "Unau pawl, ka thusimmi in ngai uhcila Krete tikulh ihsin feh loin um nungla hi bangtuk cemnak le ralnak hi kan tong lo ding. 22 Sikhalsehla atu-ah nan thinphang hlah uh, tiah ka lo sim. Tangphawlawng hi cu kan sung ding na'n kanmah cu kan hloral lo ding. 23 Ziangahtile mizanah i neitu le ka biakmi Pathian ih vancungmi ka hnenah a rung ih, 24 'Paul, ṭih hlah aw! Rom siangpahrang ih hmaiah na din a ṭul a si! Pathian na parih a ṭhat ruangah nangmah thawn a fehmi pawl hi pakhat hman thi lotein an nunnak a zuah ṭheh ding,' tiah i ti. 25 Curuangah unau pawl, phang hlah uh! Ziangahtile Pathian ka rinsan ih i sim cia vek cekci in a si ko ding. 26 Asinain tikulh pakhatkhatah thli in in soih ding," tiah a ti. 27 Zan hleilinak a si zo, Mediterranean Tifinriat ahcun thlipi in in hrual ciamco. Zanṭim hrawngah tangphawlawng kiltu pawl in leilung kan naih thlang hmang tiah an zum deuh. 28 Curuangah hri in thirtum an khih ih an vun thlak ih tidai cu pi zakhat le pi kul a thuuk. Malte hnuah an thlak sal ih pi sawmkua a si. 29 Tangphawlawng in lungpi a sawh pang ding ti an phan ruangah a dunglam ihsin a hrennak thirkawn pali an thlak ih thlacam phahin khuavan ding an hngak. 30 Cule lawng hnaṭuan pawl cu tlan an tum; vokkuanglawng kha ti sungah an vun ṭhum ih a hmailam ihsin a hrennak thirkawn ṭhenkhat thla ding vekin an um awter. 31 Sikhalsehla ralbawipa le ralkap pawl hnenah cun Paul in, "Tangphawlawng kiltu pawl tangphawlawng parih an um lo asile nan nun ding ruahsannak zianghman a um lo," tiah a ti. 32 Curuangah vokkuanglawng a kaitu hri pawl cu ralkap pawl in an satcat ih vokkuanglawng cu an fen hloter. 33 Khua a van deuh hlanah Paul in rawl ei dingin a fial hai: "Ni hleili sung lungphangin nan um zo ih hi sung hmuahhmuah ah zianghman nan ei lo. 34 Zaangfah ka lo dil: rawl malte tal ei thlang uh. Nan nunnak dingah a ṭul a si. Nan lu parih samphang pakhat hman a hloral lo ding," tiah a ti. 35 Cutiih a ti hnuah Paul in saang malte a lak ih an zate hmaiah Pathian hnenah thlacam in saang cu a phel ih a ei. 36 Midang khal an thinlung a hung cak deuh ih rawl malte an ei fingfing. 37 Tangphawlawng parih a ummi cu kan zatein zahnih le sawmsarih le paruk kan si. 38 Tawkfang an ei ṭheh hnuah sangvut hmuahhmuah kha tifinriat sungah an hlon ṭheh ih cuti cun tangphawlawng kha zaang deuh in an tuah. 39 Khua a vang tikah tangphawlawng kiltu pawl in tikap an hmuh tikah khui ram a si ti an thei thei lo. Asinain tikel ih tikap pakhat an hmu ih a cang thei asile cutawkih an tangphawlawng colhter kha an tum. 40 Curuangah an tangphawlawng hrennak hri cu an satcat ih a thirkawn cu tifinriat sungah an pilter; cule tangphawlawng hlaunak hri in an ṭemmi an phoih. Cun tangphawlawng hmailam bikah a puanzar kha an zaar ih thli in hmailam ah a sem ih tikap lamah cun kan feh. 41 Asinain tangphawlawng cun vunnel pawng a sawh ih a taang. A hmailam cu vunnel sungah a dawt aw ih a phuak aw thei nawn lo; a dunglam cu tisuar in a hrual ciamco ih a phel kuai thluh. 42 Ralkap pawl cun thawngtla pawl kha ti an leuh ding ih titlang an thlen tikah an tlanhlo thluh ding ti an phan ruangah thah ṭheh hai an tum. 43 Asinain ralbawipa in Paul kha a hum duh ruangah a kham hai. Cule ti a leuh thei pawl cu tangphawlawng ihsin dawp dingah le tikap ah leuh dingin thu a pek. 44 A taangmi pawl in thingpheng maw, tangphawlawng a kuaimi thingphel maw, an pom ih an thlun. Cuti cun kan zatein tikap ah himte in kan thleng.
1 Himteih tikap kan thlen tikah cuih tikulh cu Malta tikulh a si ti kan thei. 2 Cutawkih a rak ummi minung pawl cu kan parah an ṭhazet. Ruah a sur ih a daih tuk ruangah kan hrangah meipi in tih sak ih ṭhazet in in zoh. 3 Paul in thinghreu a va khawm ih meipi-ah cun a thlak. Mei a sat ruangah thing sung ihsin rul a hung suak ih Paul ih kut kha a cuk ih a thlai aw niarniar. 4 Paul ih kut parih rul a thlai awk niarniar an hmuh tikah cutawk tikulh ih minung pawl cun, "Hi pa hi laithat a si ding, tifinriat sung ihsin a luat na'n laireltu a khawzing in a nunter lo ding a si hi!" tiah an ti. 5 Sikhalsehla Paul in rul cu meisa sungah a thinthlak ih amah cu a zianghman a poi lo. 6 Ziangtikah so a hung thlin uun-o ding, a si lole ziangtikah so a sawn ruangro ding, ti kha cutawkih mi pawl cun an hngak. Asinain reizet an hngak ih ziangti hmanih a um lo kha an hmuh tikah an thinlung an thleng sal ih, "Amah hi pathian a si ding!" tiah an ti. 7 Cutawk ihsin a nai nawn ah loram a kau nawn a um ih a neitu cu cuih tikulh ih lalpa Publias a si. Publias cun ṭhazet in in zoh ih ni thum sung a mikhual ah kan cang. 8 Publias ih pa cu khurhnat le thisen sungdok in a na ih ihkhun ah a it ringring. A ihnak khaan sungah Paul a lut ih a parah a kut suangin thla a cam ih a dam. 9 Cuih thu an theih tikah cuih tikulh ih midam lo hmuahhmuah an ra ih an dam ṭheh ve. 10 Laksawng tampi in pek ih tangphawlawng in kan feh tikah lamzin hrangih kan ṭul dingmi pawl tla tangphawlawng parah in ret sak. 11 Thla thum hnuah Alexandria ihsin a rami, "Faphir Khawzing," an timi tangphawlawng kha kan to. Cuih tangphawlawng cu thlatang sung cuih tikulh ih a rak ummi a si. 12 Sirakus khawpi kan thleng ih cutawkah ni thum kan caam. 13 Cutawkin kan suak sal ih Rezium an timi khua kan thleng. A thaisun ah thlanglam ihsin thli a hung hrang ih ni hnih hnuah Puteoli khua kan thleng. 14 Cutawkah zumtu unau pawl an rak um ih an hnenah zarh khat caam dingin in dil. Cule cutawk ihsin Rom khua kan thleng. 15 Rom ih a ummi zumtu unau pawl in kan thawmvang an theih tikah Appius Dawr an timi khua le Riahbuk Pathum an timi khua tiang in ra hmuak. Paul cu anmah a hmuh tikah Pathian a lawm ih a lungtho in thazaang a ngah ngaingai. 16 Rom khua kan thlen tikah Paul cu amahte in an umter ih ralkap pakhat an kilter. 17 Ni thum hnuah Paul in cutawk hrawngih a ummi Judah upa pawl kha tongkhawm dingah a sawm. An rat tikah Paul in an hnenah, "Ka phunpi Israel mi pawl, kan Israel miphun le kan pupa pawl hnen ihsin kan ngahmi kan nun daan parah zianghman siatsuahnak ka tuah lo na'n Jerusalem ah thawng in thlak ih tlunah Rom pawl ih kutah in pe. 18 Thu in sut hnuah thih tlak sualnak zianghman ka tuah lo ti kha an hmu ih Rom pawl cun a thlah in duh. 19 Sikhalsehla cumicu Judah mi pawl in an el tikah ka phunpi parah zianghman mawhthluk ding ka nei lo na'n Rom siangpahrang hnenih azu khaan lo a theih nawn lo. 20 Curuangah nanmah ton le nan hnenih thusim ka duhnak a si. A ngaingai ti ahcun hiti ih thir cikcin ih khih ka sinak cu Israel mi in an ruahsan ringringmi pa ih ruangah a si," tiah a ti. 21 Annih in Paul hnenah, "Na thuhla ah hin Judea ram ihsin cakuat zianghman kan ngahmi a um lo. Na thuhla a sia a ṭha simtu dingah khilam ihsin a ra thlengtu kan milai zohman an um fawn lo. 22 Sikhalsehla na ruahnak cu a theih kan duhzet, ziangahtile nan pawl thu hi hmunzakipah mi in an relsia a si ti kan thei," tiah an ti. 23 Curuangah Paul thawn ni an tin aw ih Paul umnak ahcun an ni tin ni ah mi tampi an ra suak. Zing ihsin zan tiang, Pathian Uknak thu cu a simfiang ciamco ih, Moses Daan cabu sung ihsin le profet pawl ih canganmi sung ihsin la tahratin Jesuh ih thu kha an thinlung sungah lut dingin a sim. 24 A simmi in mihrek cu an thinlung a fiangter, asinain mihrek cun an zum lo. 25 Paul in thu pakhat a sim ih cuih thu ruangah an lung a rual thei lo ih an ṭiakdarh aw ṭheh. A simmi cu, "Thlarau Thianghlim in, Profet Isaiah hmangin, nan pu le nan pa pawl hnenih a simmi thu cu a dikzet a si. 26 A rak simmi cu: 'Hi minung pawl hnenah va feh awla va sim aw; Nan ngai rero ding na'n nan thei lo ding; Nan zoh rero ding na'n nan hmu lo ding. 27 Ziangahtile an thinlung a pit, an hna a set ih an mit a caw. Cutin a si lole an mit in an hmu ding; An hna in an thei ding ih, an thinlung in an theithiam ding. Ka lam an hoikir ding ih ka damter hai ding a si, tiah Pathian in a ti,'" tihi a si. 28 Cule Paul in a netnak ah, "Pathian ih rundamnak Thuthang cu Zentail mi hnenah thlenter a si zo, tihi nan theih a ṭul a si. Annih in cuih Thuthang cu an ngai ding!" tiah a ti. 29 (Paul in cutiin a sim ṭheh hnuah Judah mi pawl cu an ṭiak ih anmah le anmah nasa zetin cuih thu-ah an el aw ciamco.) 30 Paul cu amahte a saanmi innah kum hnih sung a um. Amah ton duhih a rami hmuahhmuah kha ṭhatein a rak tong. 31 Ralṭhazet le zalen zetin Pathian Uknak thu kha a sim ih Bawi Jesuh Khrih ih thu khal a zirh.
1 Khrih Jesuh ih siahhlawh le a tirhthlahmi, Pathian in a Thuthang ṭha phuangtu dingah a hril ih a kawhmi keimah Paul in ca ka lo kuat. 2 Ca Thianghlim sungih ngan vekin cuih Thuthang ṭha cu Pathian in a profet pawl hnenih a tiam ciami a si. 3 Cuih Thuthang ṭha cu Amah ih Fapa, kan Bawipa Jesuh Khrih thuhla a si: minung a sinak lamah cun amah cu David tesinfa sung ihsin suakmi a si. 4 Pathian a sinak le a thianhlimnak lamah cun, thihnak ihsin thawhter a si ruangah Pathian Fapa a sinak cu a nasa zetmi huham thawn langter a si zo. 5 Khrih hrangah le Amah thawngin mi hmuahhmuah in an zum ih an thlun theinak dingah Pathian in a tirhthlahmi sinak cu covo ah i pek. 6 Cu mi hmuahhmuah sungah cun nannih Rom khua ih a ummi khal Jesuh Khrih ta si dingah Pathian ih kawhmi ah nan tel ve a si. 7 Curuangah Rom khua ih a um, Pathian ih a duhdawtmi le a minung si dingih a kawhmi nan zate hnenah hi cakuat hi ka ngan. Kan Pathian le Bawipa Jesuh Khrih ih zaangfahnak le daihnak nan hnenah um hram seh. 8 Leitlun pumpi ah nan zumnak thu a than ruangah nan zapi hrangah Jesuh Khrih thawngin ka lungawinak thu Pathian hnenah ka sim hmaisa a si. 9 Amah Fapa ih Thuthang ṭha cu ka thinlung hmuahhmuah in ka sim ih a hna ka ṭuanmi Pathian in cuih ka simmi thu cu a dik a si ti i theihpi. Ka thlacam tinte in ka lo hngilh dah lo ti cu Amah Pathian in a thei. 10 Pathian remruat asile voikhat khat tal cu ra lo tlawng thei dingin Amah hnenah ka dil ringring. 11 Ziangahtile nanmah caktertu dingah Pathian thlarau lam laksawng lo ṭawm dingah ka duhzet a si. 12 Cuti ka ti tikah ka zumnak in nanmah ih zumnak thazaang a cakter ih nan zumnak khal in ka thazaang a cakter ve ding ka tinak a si. 13 U le nau tla, himi hi ciing ringring uh: voi tampi nanmah tlawng dingah ka tum zo; asinain ra tlawng suak thei lo dingin i khawkhartu ziangsimaw a um ringring. A dang Zentail mi lakah lungthlengmi ka neihter thei bangin nanmah lak khalah lungthlengmi um thei ding cu ka duhzet a si. 14 Ziangahtile mi hmuahhmuah hnenah ṭuanvo leiba ka nei: mifim le mi-aa hnenah siseh, cathiam le zianghman thiam lomi hnenah siseh, leiba ka nei. 15 Curuangah Rom khua ih a ummi nannih hnen khalah Thuthang ṭha phuan cu ka hiar ngaingai a si. 16 Thuthang ṭha hi ka zahpi hrimhrim lo: ziangahtile a zumtu hmuahhmuah rundamnak an ngahnak dingah Pathian ih huham a si. A hmaisa ah Judah mi hrangah a si ih Zentail mi hrang khalah a si ve. 17 Ziangtiin a si tile, Pathian in Amah le minung karlakah remnak ziang bangtuk in a tuah, ti kha a langter: cumi cu a hramthok ihsin a netnak tiang zumnak thawngin a si. Ca Thianghlim khalin, "Zumnak thawngih thiamcotermi cu an nung ding," a ti. 18 Pathian ih thinhengnak cu minung sualmawhnak le ṭhat lonak hmuahhmuah parah vancung ihsin a rung lang; cuih minung ṭhat lonak cu thudik theih thei lonak dingih dawntu an si. 19 Curuangah Pathian ih hremnak an tong; ziangahtile Pathian Amah in a fianter zo bangin minung ih Pathian theih theinak cu fiang zetin a lang a si. 20 Pathian in hi leilung a sersiam thok ihsin hmuh theih lomi a nunzia siseh, kumkhua ih a neihmi huham le Pathian a sizia siseh, fiangtein hmuh theimi an si. Pathian ih thil tuahmi pawl parah hmuh theih an si. Curuangah zokhal in puhmawh ding an nei lo. 21 Pathian cu an thei ko; sikhalsehla upat hmaizah tlak asinain upat hmaizahnak an pe lo; a parah lungawi thu khal an sim lo. An ruahnak sawn kha thulolak ah a cang ṭheh ih an thinlung kawlawngpi cu thimnak in a khat. 22 Kan fim an ti aw na'n an aa a si. 23 Kumkhawnung Pathian bia sawn loin a thi theimi minung le vate le ramsa le a bokih a vakmi ramsa pawl vekih tuahmi zuk sawn kha an biak. 24 Curuangah cubangtuk minung pawl cu an thinlung ih an hiarmi thil ningsinza hurnak pawl tuah dingah Pathian in kham duh loin a thlahthlam. Cule pakhat le pakhat parah ningzakza thil an tuah aw. 25 Pathian ih thudik thuhla cu thuphan in an thleng; Siamtu Pathian bia loin le rian loin siammi thilri sawn an rian ih an biak. Siamtu sawn kha kumkhua in thangṭhat ding a si. Amen. 26 Hi thil an tuah ruangah Pathian in minung cu ningzakza a si mi an taksa hiarnak thlun lawlaw dingin a hnonta hai. Nunau hmanin nunau an sinak thil a daan vekih hmang loin cin le daan nei loin nu le nu an sualpi aw. 27 Cuvek thotho in mipa khal in nunau thawn pawl awk daan an tlansan ih an taksa hiarnak ruangah mipa le mipa an sualpi aw. Mipa in pakhat le pakhat cubangtuk ningzakza thilsual an tuah ruangah an thilsual tuah ruangih an hlawhman cu an parah a thleng. 28 Hi minung pawl in Pathian theihnak ngaingai cu an thinlung sungah caamter an duh lo ruangah thinlung borhhlawhnak thlun lawlaw dingin Pathian in a hnonta hai. Curuangah tuah lo ding thil pawl kha an tuah. 29 Annih cu siatnak le ṭhat lonak a phunphun, hamṭamnak le sualralnak a phunphun in an khat; nahsiiknak, mithahnak, sualawknak, mi bumnak le depdet hrokhrawlnak tla in an khat. An kaa a tam ih, 30 pakhat le pakhat an relsia aw. Pathian mitkem zawng in an nung, an hngal, an puarthau, anmah le anmah an porh aw, ṭhat lonak tuah dingah lamzin a phunphun an hawl, an nu le an pa thu an ngai lo; 31 a ṭha le a sia thleidan thiamnak thinlung an nei lo, an thukam mi an thlun dah lo ih midang hrang zaangfahnak le zawnruahnak zianghman an nei lo. 32 Hi bangtuk ih a nungmi pawl cu thi tlak hrimhrim an si, tiih Pathian daan pekmi a um ti tla an thei ko. Cuih tlunah hibangtuk thil ṭha lo anmah in an tuah lawng si loin midang in an tuah tik khalah an lungkimpi a si.
1 Curuangah ka rual, zokhal na sile mi dang na soisel tikah misual na si ve hi pheh theinak na nei lo. Ziangahtile midang thu a ṭhentu cu thilsual tuahtu vek thotho in misual an si ruangah mi thu na ṭhennak in nangmah lala misual na cang awter a si. 2 Hi bangtuk thil ṭha lo a tuahtu pawl parah Pathian in an thu a ṭhen tikah thil dik a tuah, ti kan thei. 3 Curuangah ka rual, midang in thil ṭha lo an tuah ih an thu na relnak in nangmah cu anmah lala vek na si. Pathian ih thurelnak ka luat ding tiah na ruat aw maw si? 4 Culole Pathian zaangfahnak le mi a zawi theizia le a thinsaunak pawl a nasa ngaingaimi hi zianghman ah na siar lo a si maw? Pathian zaangfahnak cu na sual sir dingih a lo hruaitu ah a si, ti cu fiangte in na thei. 5 Asinain nang cu na thinlung a hak ih a khoh remrem; curuangah Pathian in a thinhengnak le a dikmi thuṭhennak Ni ah na ton dingmi hremnak cu tam sinsin dingin nangmah tein na khawl a si. 6 Ziangtin tile Pathian in zozo khal an tuahmi vekin tuahman a pe ding. 7 Mi ṭhenkhat in thil ṭha an tuah ringring ih sunlawinak, hminṭhatnak le kumkhua nunnak an hawl. Cupawl cu Pathian in kumkhua nunnak a pe ding. 8 Mi ṭhenkhat cu mahih zawn lawng an ruat ih a ṭha lomi thlun duh ah a ṭhami kha an hnong. Cupawl parah Pathian in a thinhengnak cu meiling bangin a burh ding. 9 A ṭha lomi a tuahtu hmuahhmuah in harsatnak le aihramnak an tuar ding; a hmaisa a tuartu ah Judah mi an si ding ih a neta ah Zentail mi an si ve ding. 10 Asinain thil ṭha a tuahtu hmuahhmuah hnenah Pathian in sunlawinak, hminṭhatnak le daihnak a pe ding; a hmaisa a cotu cu Judah mi an si ding ih a neta ah Zentail mi an si ding. 11 Ziangahtile Pathian cun zozo khal bangrep in mi thu a ṭhen a si. Zohman a thleidang lo. 12 Zentail mi pawl cu Moses Daan an nei lo; an sual tikah Daan nei loin an hloralta ding. Judah mi pawl cun Moses Daan an nei; an sual tikah Daan vekin thuṭhennak an tuar ding. 13 Pathian hmaiih miding timi pawl cu Daan sungih a ummi pawl an hna ih theih lawngin a si lo; Daan ih a fialmi tuahnak in a si sawn. 14 Zentail mi cu Daan an nei lo; asinain an suahkeh theihfimnak in Daan ih thupekmi vekin an tuah tikah Daan cu nei lo hman hai sehla suahkeh theihfimnak an neihmi cu an hrangah an daan a si ve. 15 An tuahmi ziaza in Daan ih fialmi thukham cu an thinlung sungah ngan in a um, ti a langter. Cumi cu a dik a si ti kha sia le ṭha an thleidan thiamnak in a langter; ziangahtile voikhat khatah an thinlung lala in a mawhthluk hai ih voikhat khatah thiam a coter hai a si. 16 Curuangah ka phuanmi Thuthang ṭha vekin hi bangtuk thinlung umdaan hi Pathian in milai ruahnak thup thu a ṭhen ni ih a umdaan ding a si. 17 Cuti asile nannih pawlteh? Judah mi kan si nan ti aw maw? Moses Daan cu nan rinsan hleenhleen ih Pathian thu ahcun nan uar awzet. 18 Pathian in tuah hai seh a lo timi cu nan thei thluh ih a ṭhami hril ding khal Daan sung ihsin nan zir zo. 19 Mitcawmi lam hruaitu kan si ih thimnak sungih a ummi hrangah tleunak kan si, tiah nan zumzet. 20 A aa mi pawl zirhtu kan si ih zianghman thei bembem lo pawl hrangah zirhtu kan ṭuan nan ti. Daan sungah theih kimnak le thudik famkim zetin kan nei tiah nan zumzet. 21 Zirhtu saya pawl, midang cu nan zirh ih ziangah so nanmah nan zirh awk lo? "Rukru hlah," tiah nan zirh; nanmah teh nan ru maw? 22 "ṭaangṭawm sualnak tuah hlah," nan ti; nanmah teh nan sual maw? Milem cu a fih in nan fih; asinain milem biakinn thilri teh nan ru maw? 23 Pathian ih Daan kan nei tiah nan uar awzet, asile cuih daan buar tahratin Pathian hnenah ningzahnak nan thlenter maw? 24 Ca Thianghlim sungah, "Nanmah Judah mi ruangah hin Zentail mi in Pathian an thangsiat," tiah a um. 25 Daan nan thlun a si ahcun nan serhtannak hi man a nei; sikhalsehla Daan nan buar a si ahcun serhtan dah lo thawn nan bangrep thotho a si. 26 Serhtan lo Zentail mi in Daan sung ummi thukham a thlun ahcun an serhtan lonak kha serhtannak ah Pathian in a ruahsak lo ding maw? 27 Curuangah nannih Judah mi pawl, serhtanmi nan si ih Daan khal cu ca ngan fekfekin nan nei na'n cuih Daan nan buar ruangah taksa in serh an tan lo na'n Daan a thluntu Zentail mi pawl ih thurel mawhthluknak nan tong ding a si. 28 Thungai in kan ti asile, zoso Judah mi taktak, serhtan ngaingaimi cu an si? A lenglam lawngin Judah mi si ih serhtannak kha taksa parih tuahmi thil lawng a si ahcun Judah mi taktak a si lo. 29 A sunglam sawn in Judah mi, thinlung serhtantu pawl kha Judah mi ngaingai an si. Cumi cu nganmi Daan ih tuahmi a si lo, Pathian Thlarau ih tuahmi a si. Cubangtuk minung cu milai hnen ihsin si loin Pathian hnen ihsin thangṭhatnak ngahtu a si.
1 Cuti asile Judah mi pawl hi Zentail mi tlunah an cuan hleinak a um maw? Serh an tan hi ziangtal man a nei maw? 2 A phunphun in an cuan hleinak a um. Hmaisabik ah Pathian in a thu cu Judah mi pawl a kilter. 3 Asinain Judah mi ṭhenkhat rintlak lo an si ah teh, ziang a cang ding? Pathian khal an parah rintlak lo a si ve ding maw? 4 Si hrimhrim hlah! Minung zokhal thuphan pertu an si ṭheh khalle Pathian cu a dikmi le rintlak a si ko ding. Ca Thianghlim in, "Na ṭong tikah, Na ṭongmi cu a dik a si ti langter a si ding ih, Na thu an ṭhen tikah, thu na neh ding," a ti. 5 Sikhalsehla kan thil tuah dik lomi hin Pathian ih thil dik a tuahzia fiangtein a langter a si ahcun, ziangso kan sim nawn ding? Pathian in in hrem tikah a palh a si, kan ti ding maw? (Minung daan in ka sim.) 6 Ti naisai hlah! Pathian cu a dik a si; a dik lo ahcun ziangtinso leilungpi thu a ṭhen thei ding? 7 Asinain ka dik lonak hin Pathian sunlawinak sawn ah hna a ṭuan ih a diknak kha a langfiangter sawn a si awk ah ziangtin a si ding? Ziangah so kei sawn cu misual tiah mawhthluk ka co thotho? 8 Ziangah so, "A ṭhami lang dingin a ṭha lomi tuah uhsi," tiah kan ti lo? A si ngai; mi hrekkhat in cu tivek cekci hi na sim a si tiah thu in puh ih in hmuhsuam. Cubangtuk mi pawl cu mawhphurh tlak an si vekin mawh an phur ding. 9 Cuti asile, Judah mi kan si hi Zentail mi hnakin ṭhathnemnak a um cuang lo maw? Um hrimhrim hlah! Fiangtein ka langter zo vekin Judah mi siseh Zentail mi siseh, kan zatein sualnak huham hnuai ah kan um ṭheh a si. 10 Ca Thianghlim in: "A dingmi zohman an um lo, 11 A fimmi pakhat hman an um lo, Pathian biatu khal an um lo. 12 An zatein Pathian hnen ihsin an pial thluh ih, zinpeng an zawh ṭheh zo. Zohman thildik a tuahtu an um lo, pakhatte hman an um lo. 13 An ṭongkam cu thihpi tlakmi bumnak hlir a si; An lei ihsin ṭihnungza thuphan pernak a suak; An hmur ihsin thihsii, rul tur bangtuk a suak. 14 An ṭong cu mi camsiatnak hlir in a khat. 15 Mi tuahmawh ding le mi phil dingah cun an zamrang zet; 16 An fehnak kipah siatsuahnak le cemralnak in a thlun hai. 17 Daihnak lamzin cu an thei dah lo; 18 Pathian ṭihzahnak khal an zir dah lo," a tivek kha a si. 19 Atu-ah cun Daan sungih thupekmi hmuahhmuah cu Daan hnuai ih a ummi pawl hrangah a si, ti kan thei. Cumi cu zohman in an phet thei lonak dingah le leikhawvel pumpuluk hi Pathian thuṭhennak hnuai ih thlenpi dingah a si, tinak a si. 20 Ziangahtile zohman in Daan thlun tahratin Pathian hmaiah thiamconak a ngah thei lo ding. Daan ih hnaṭuanmi cu minung an sual theihternak lawng a si. 21 Atu cu Pathian in Amah le minung karlakah rualremnak lamzin a langter zo. Cuih remnak lamzin thu-ah Moses Daan le profet pawl kha theihpitu an si na'n Daan thawn zianghman a seng aw lo. 22 Jesuh Khrih an zumnak thawngin Pathian in minung thawn remnak a tuah. Khrih a zumtu hmuahhmuah hrangah cuti cun Pathian in a tuah a si; curuangah dan awknak zianghman a um lo; 23 kan zatein misual kan si ṭheh ih Pathian sunloihnak kan co baan lo. 24 Sikhalsehla atu-ah cun in luattertu Khrih Jesuh ih tlennak zaar ah Pathian in a zaangfahnak laksawng cu in pek ih Amah thawn rualremnak in tuahsak zo. 25 Pathian in Jesuh Khrih ih thisen thawngin misual ngaidamnak kha a tumtahmi a si ih, cuih ngaidamnak cu amah an zumnak thawngin an ngah ding. Pathian in hi bangtuk thil a tuah cu amah ih dingnak langternak dingah a si. Hlanah cun Pathian cu a thin a sau ih minung ih sualnak kha poisa lem loin a rak umsan. 26 Sikhalsehla atu-ah cun Amah ih dingnak kha langfiangter dingah minung ih sualnak cu a umsan meen nawn lo; cutiin a dingnak a langter ih Jesuh a zumtu hmuahhmuah cu Amah thawn rualremnak a coter hai. 27 Cuti asile ziangtal kan porh awk ding a um maw? Um hrimhrim hlah! Ziangih ruangah so? Daan kan thlun ruangah maw? Si hlah! Kan zum ruangah a si. 28 Ziangahtile Daan ih thupekmi thlun ruangah si loin zumnak thawng lawngin minung cu Pathian thawn rualremnak a um a si, tihi kan thu netnak a si. 29 Culole Pathian cu Judah mi pawl ih Pathian lawng a si maw? Zentail mi pawl ih Pathian tla a si ve lo maw? A si, Zentail mi pawl ih Pathian khal a si. 30 Pathian cu pakhat a si ih Judah mi pawl cu an zumnak thawngin Pathian thawn remawknak a um ding ih Zentail mi pawl khal an zumnak ruangah Amah thawn a rem awter hai ding. 31 Cuti asile hi zumnak ruangah Daan cu kan hlonta, tinak a si maw? Si hrimhrim hlah! Daan kan hngetter a si sawn.
1 Kan phun cithlahtu Abraham thu teh ziangti in so kan ruah ding? A hmuhton mi ziang bangtuk so a si? 2 Thil a tuahmi thawngin Pathian thawn rualremnak a co ti sehla porh awk ding tawkfang cu a nei ding! Sikhalsehla Pathian hmaiah cun porh awk ding zianghman a nei lo. 3 Ca Thianghlim in, "Abraham in Pathian a ring ih cuih a rinnak ruangah Pathian in miding ah a ret a si," tiah a ti. 4 Mi pakhat hna a ṭuan tikah a hnaṭuan man cu an pek; cumi cu laksawngah ruah ding a si lo. Amah ih a hlawhmi a si. 5 Sikhalsehla ṭuannak si loin zumnak a neitu, mawh-nei mi kha mawh-nei lo ah a tuahtu Pathian a rinsantu ih zumnak cu Pathian in amah thawn rualremternak hrangah a co sakmi a si. 6 Pathian in mi pakhat ṭuannak malte hman tel lotein miding bangin a cohlan sakmi pa ih lungawinak David in a rel tikah himi hi a si a sim duh mi cu: 7 "An ṭhatlonak ngaithiam a si mi le an sualnak thlahsak a si mi pawl cu milungawi an si. 8 Bawipa in an mawhnak a siarsak lomi le an sualnak cazin ih a khumsak lomi pawl cu milungawi an si," a ti. 9 David ih a relmi lungawinak hi serhtanmi pawl lawngih ngah theimi a si maw? Si hrimhrim hlah! Hi lungawinak cu serhtan lomi pawl ih comi khal a si ve. Ziangahtile kan sim zomi Ca Thianghlim in, "Abraham in Pathian cu a ring ih cuih a rinnak ruangah Pathian in miding ah a cohlang a si," tiah a ti. 10 Cumi cu ziangtikah so a si? Abraham in serh a tan hlanah maw, serh a tan hnuah so? Serh a tan hnuah a si lo, a tan hlanah a si. 11 Miding ih cohlan a si hnuah Abraham in serhtannak cu a tuah. Pathian in serh a tan hlan hmanah a rinnak ruangah miding ah a siar ih cumi hminsinnakah serhtannak cu a tuah. Cuti a si ruangah serhtan lomi pawl an zumnak ruangih Pathian in mi dingah a cohlan mi pawl hrangah cun Abraham cu thlarau lamih an pa bik a si. 12 Cule serhtanmi pawl ih pa khal a si thotho; ziangahtile serhtanmi pawl cu serh an tan lawng si loin, kan pa Abraham serh a tan awk hlanih a nun bangin rinnak thawn a nungmi pawl an si. 13 Pathian in Abraham le a tefa pawl cu, hi leilung hi na ta a si ding, tiah thu a kam tikah Abraham in Daan a thlun ruangah a timi a si lo, sikhalsehla Abraham in a ring ih Pathian in miding ih a cohlan ruangah a si. 14 Pathian ih thukamnak a co theitu pawl cu Daan a thluntu pawl hnen lawngah pek sibang sehla minung ih zumnak cu thulolak meen a si ding ih Pathian ih thukam cu man nei lo ah a cang ṭheh ding. 15 Daan cun Pathian thinhengnak a thlenter; asinain Daan um lonak ahcun daan buar sualnak khal a um ve lo. 16 Curuangah thukamnak cu zumnak parih a dingmi a si ih Abraham tesinfa hmuahhmuah hnenah Pathian velneihnak laksawng a si tiah aamahkhan in thukamnak a si. Daan a thluntu pawl hrang lawngah si loin Abraham bangin a zumtu pawl hrang khalah a si. Ziangahtile Abraham cu thlarau lam in kan zate ih pa a si. 17 Ca Thianghlim khal in, "Nangmah cu miphun tampiih pa ah ka lo tuah zo," tiah a ti. Curuangah cuih thukamnak cu Abraham ih a zummi Pathian hmaiah a hngetmi thukamnak a si. Cuih Abraham ih zummi Pathian cu mithi a nuntertu le a thu in a um lomi kha a umter theitu Pathian a si. 18 Abraham cun a zum ih beisei ding zianghman a um nawn lo hnu hmanah a beisei thotho hrih ruangah, "Miphun tampiih pa," ah a cang. Ca Thianghlim in, "Na tesinfa pawl cu arsi zat an si ding," a timi kha a kim. 19 Culai ah Abraham cu kum zakhat zikte a si; asinain a thi tuan dingmi a taksa pum zoh tikah siseh, Sarah nau a neih thei lo thu a ruah tik khalah siseh, a zumnak cu a ṭum cuang lo. 20 Pathian ih thukammi khal zum loin a um cuang lo; a zumnak in cahnak a pek sawn ih Pathian kha a thangṭhat. 21 Pathian cun thu a kam ciami cu a tuahsuak ding ti kha a ring nasa. 22 Curuangah rinnak thawngin Abraham cu, "Pathian in miding ah a cohlang," a si. 23 Cule, "miding ah a cohlang," timi ṭongfang hi amah ih hrang lawngih nganmi a si lo. 24 Jesuh kan Bawipa thihnak ihsin a thosaltertu Pathian kan zumnak thawngin miding ih cohlanmi kannih hrang khalah nganmi a si ve. 25 Kan sualnak ruangah thihnak ah thlenter a si ih Pathian thawn kan rualrem awknak dingah le thiam coter ka sinak dingah nunnak ah thawhter sal a si.
1 Atu cu zumnak in thiam cotermi kan si zo ih kan Bawipa Jesuh Khrih ruangah Pathian thawn kan rem aw zo. 2 Zumnak ruangih kan comi Pathian ih zaangfahnak sungah Amah in in thlenpi ih cuih zaangfahnak sungah cun atu hi kan um. Curuangah Pathian ih sunlawinak kan ṭawm aw ding tiah ruahsannak kan nei ih kan thin a nuam. 3 Cule harnak kan tuar tik khalah hin kan lung a awi thotho; ziangahtile harsatnak in tuartheinak a suahter, 4 tuartheinak in Pathian lungkimnak a suahter, cule amah ih lungkimnak in ruahsannak a suahter, ti kha kan thei. 5 Cule hi ruahsannak in kan bei dong loin in tuah, ziangahtile Thlarau Thianghlim sung ihsin Pathian in a duhdawtnak cu kan thinlung sungah a burh zo. Cuih Thlarau Thianghlim cu Pathian ih in pekmi laksawng a si. 6 Zianghman ti theimi kan neih lo laifangah Pathian ih khiah mi tikcu caanah Khrih cu misual pawl hrangah a thi. 7 Miding hrang hmanah mi pakhatkhat thih ding cu a olmi thil a si lo. Miṭha hrangah cun thih a ngamtu pakhatkhat an rak um khal a si thei. 8 Sikhalsehla Pathian in ziangtlukinso in duhdawt ti cu a langter: misual kan si hrih na cingin kan hrangah Khrih cu a thi! 9 A thisen thawng in kannih cu Pathian thawn kan rem awk zo ruangah ziangtlukinso Pathian thinhengnak ihsin Amah in in runsuak sinsin ding! 10 Hlanlaiah cun Pathian ih ral kan rak si, sikhalsehla atu cu a Fapa thihnak ruangah a rualpi ah in tuah zo. Pathian ih rualpi kan si zo ruangah Khrih ih nunnak in ziangtlukin so in runsuak sinsin ding. 11 Hi lawng hi a si hrih lo; Pathian rualpi ah in cantertu kan Bawipa Jesuh Khrih ruangah Pathian ih thil tuahmi ahhin kan lung a awi ngaingai a si. 12 Sualnak cu mi pakhat ruangah leilungah a ra ih cuih a sualnak cun thihnak a thlenpi. Curuangah thihnak cu mi hmuahhmuah hnenah a thleng, ziangtin tile zozo khal an sual ṭheh. 13 Daan pekmi a um hlan ihsin sualnak cu leilung tlunah hin a rak um zo; sikhalsehla Daan a um lonak hmunah cun sual cu sual ah siar a si lo. 14 Adam san thok ihsin Moses ih san tiang mi hmuahhmuah cu thihnak in a uk ṭheh; Adam in Pathian thupekmi a thlun loih a sual bangtuk ih an sual ve lo hmanah thihnak cun a uk thotho hai. Adam cu nehhnu ih a ra dingmi pa ih hmuithlam a si. 15 Asinain cute pahnih cu an bang aw lo, ziangahtile Pathian ih laksawng cu Adam ih sualnak vek a si lo. Mi pakhat sualnak ruangah mi tampi thihnak an tong, ti cu thudik a si. Sikhalsehla Pathian ih zaangfahnak cu cu hnakin a tum deuh; Jesuh Khrih amah pakhat ih in zaangfahnak Pathian ih laksawng cu mi tampi hnenah a tum sinsin a si. 16 Cule Pathian ih laksawng le mi pakhat ih sualnak cu an dang aw zet. Cuih voikhat sualnak hnu ih a ra thlengmi thuṭhennak cu "Nan mawh," tihi a si. Sikhalsehla sualnak tam zet hnuah kan hlawh lo cingih a ra thlengmi laksawng cu, "Nan mawh lo," tiih thuṭhennak a si. 17 Mi pakhat Adam ih sual ruangah thihnak in mi a uk ṭheh; sikhalsehla mi pakhat Jesuh Khrih ih a tuahmi thawngin Pathian zaangfahnak tlamtling a ngahtu le Amah thawn rem awknak laksawng a cotu hmuahhmuah hnenah cun ziangtluk tam sinsin in so dingnak in a uk hai ding. 18 Cuti a si ruangah sualnak pakhat tuahmi in mi hmuahhmuah cu sual a phurh bangtuk in dingnak pakhat tuahmi in mi hmuahhmuah cu a luatter ih nunnak a pek. 19 Cule mi pakhat ih thu-ngaih lonak ruangah mi hmuahhmuah misual ih canter an si bangtuk in mi pakhat ih thungainak thawngin mi hmuahhmuah cu Pathian thawn an rem aw ding. 20 Daan a ra thlen tikah sualnak karhtertu ah a cang. Sikhalsehla sual a karhnak hmunah cun Pathian ih zaangfahnak khal a karh sinsin ve. 21 Curuangah sualnak in thihnak thawn minung in uk vekin Pathian ih zaangfahnak in dingnak thawn minung cu in uk ve; cuticun kan Bawipa Jesuh Khrih zaar in kumkhua nunnak sungah in hruai a si.
1 Asile ziangtinso kan ti ding? Pathian ih zaangfahnak karh sinsin seh tiah sual kan tuah vivo hrih ding maw? 2 Tuah naisai hlah! Sualnak ah kan thi zo ih ziangtinso a sungah kan um thei nawn ding? 3 Khrih Jesuh thawn kan pehzom awknak in a sungih hnimmi kan si tikah a thihnak sung khalah hnimmi kan si tihi nan hngilh maw si? 4 Baptisma kan lak tikah amah thawn phummi kan si ih a thihnak ah khal kan ṭawm ve; cuvek thotho in Pa ih sunlawinak huham in Khrih kha thihnak ihsin a thawhter bangtuk in kannih khal a thar in kan nung ding. 5 A thihnak ah khan amah thawn a thi tlang mi kan si ruangah thihnak ihsin thawhter a sinakah khan kannih khal kan tel ve ding. 6 Kan nun hlun cu Khrih thawn thinglamtah parah khencih a si zo ti kan thei; cumi cu sual in a khatmi kan nunnak hlunih pum cu a siatral ṭheh ding tinak a si. Cutiin sualnak ih sal kan si nawn lo. 7 Ziangahtile mi pakhat cu a thih tikah sualnak in a parah thu a nei nawn lo. 8 Khrih thawn kan thih tlang ruangah a nun khal amah thawn kan nung tlang ding tiah kan zum. 9 Khrih cu thihnak ihsin thawhter a si zo ih a thi sal nawn lo ding, ti kan thei; thihnak cun a parah thu a nei nawn lo. 10 Cule sual thu-ah cun kumkhua daih in a thi ih atu a nun hi cu Pathian ah a nung a si. 11 Cuvek ṭhiamṭhiam in nannih khal sual thu-ah cun mithi kan si tiin siseh, nunnak thu-ah cun Khrih Jesuh zaar in Pathian thawn pawlkom in kan nung tiin siseh, ruat aw uh. 12 Taksa hiarnak kha nan thlun lonak dingah a thi theimi nan taksa pum cu sualnak in uk nawn hlah seh. 13 Nan taksaṭhen ziangkhal thil ṭha lo sual tuahnak ah nan hmang lo pei. Cuhnakin thihnak ihsin nunnak ih thawhtermi bangin nan ziangzongza Pathian hnenah pe aw sawn uhla nan nunnak zate thawn thil ṭha tuahnak ah hmang sawn uh. 14 Sualnak cu a lo uktu bawi si nawn hlah seh; ziangahtile daan hnuai ah nan nung nawn lo, Pathian zaangfahnak hnuai ah nan nung zo a si. 15 Cuti asile ziangtinso a si ding? Daan hnuai ih um loin Pathian zaangfahnak hnuai ih kan um ruangah sual kan tuah hrih ding maw? Tuah hrimhrim hlah! 16 Nannih in mi pakhatkhat hnenah a sal si dingin le a thu ngai dingin nan pe aw a si ahcun, cuih a thu nan ngaimi cu nan bawi a si ih nannih cu a sal nan si ko; cucu fiang zetin nan thei zo a si. Sualnakih thu nan thlun asile sualnak ih a suahpimi cu thihnak a si ruangah thihnak nan tuar ding; asinain Pathian ih thu nan thlun ahcun Pathian thu thlunih a suahpimi cu remnak a si ruangah Pathian thawn rualremnak nan co ding. 17 Sikhalsehla Pathian hnenah thangṭhatnak um ko seh! Ziangahtile nannih tla cu sualnak ih sal nan rak si dah na'n atu-ah cun zirhnak nan ngahmi sungih thudik kha nan thinlung zatein nan thlun zo. 18 Sualnak ihsin luattermi nan si ih dingnak salah nan cang zo a si. 19 (Nan thei thei deuh ding tiah nitin hmanmi ṭong ka hman hi!) A hlanah cun a ṭha lomi tuahnak ah nan taksaṭhen cu a baalmi le a ṭha lomi ih salah nan pe aw. Cuvek ṭhiamṭhiam in atu-ah cun a thianghlimmi tuahnak ah nan taksaṭhen cu a zatein dingnak ih sal si dingin pe aw uh. 20 Sualnak ih sal nan rak si laiah cun dingnak ih ukmi nan si lo. 21 Cutiih sualnak sal nan si ruangah ziangtal hlawknak nan ngah maw? Nan ngahmi cu kha vek thil sual nan tuah ruangah atu ningzakih nan um hi a si. Cubangtuk thil ih hlawhman cu thihnak a si! 22 Sikhalsehla atu-ah cun sualnak ihsin luattermi nan si zo ih Pathian ih salah nan cang zo. Nan hlawkmi cu Pathian hnenih hlanmi nunnak thiang a si ih cumi in a suahpimi cu kumkhua nunnak a si. 23 Ziangahtile sualnak ih hlawhman cu thihnak a si; sikhalsehla Pathian ih laksawng cu kan Bawipa Khrih Jesuh thawn kan pehzom awknak thawngin kumkhua nunnak a si.
1 U le nau pawl, nannih tla cu nan zatein daan thu a theitu nan si ruangah atu nan hnenih ka sim dingmi hi nan theih ciami a si ko. Minung cu an nunsung lawnglawng daan in a uk, ti nan thei ko a si lo maw? 2 Tahṭhimnak ah, pasal nei nunau pakhat cu a pasal a nunsung lawnglawng daan in a uk; a pasal a thih asile ṭhit-umnak daan ihsin a luat a si. 3 Curuangah a pasal a nung cingin mipa dang thawn an umtlang a si ahcun ṭaangṭawm sualnak tuahtu a si; sikhalsehla a pasal in a thihsan a si ahcun midang a pasal khalle ṭaangṭawm sualnak tuahtu a si nawn lo. 4 Ka u le ka nau tla, nanmah ih thuhla khalah hin cuvek ṭhiamṭhiam in a si. Daan thu ka rel a si ahcun, nannih cu Khrih ruangpum ih taksa ṭhen nan si zo ruangah a thimi nan si. Asinain atu-ah cun Pathian hrangih rah ṭha nan rah theinak dingah thihnak ihsin thawhter sal a si mi pa ih ta nan si. 5 Ziangtin tile, kan milai si daan vekih kan rak nun laiah cun kan taksa ih sualhiarnak cu Daan in kan taksa sungah a cangvaiter ih a rah kan ngahmi cu thihnak a si. 6 Sikhalsehla atu-ah cun Daan ihsin kan luat zo; ziangtin tile salih in rak tuahtu Daan hrangah cun mithi kan si zo. Ca in nganmi Daan hlun hnuai ah si loin Thlarau lamzin tharah Pathian kan rian a si. 7 Cuti asile ziangtinso kan ti ding? Daan hrimhrim hi sual a si, kan ti ding maw? Ti naisai hlah! Sualnak hi sual a si ti in theitertu cu Daan hi a si. Daan in, "Midang thil daw hlah," i rak ti hlah sehla midang ih thil dawt cu ziang a si ti ka rak thei lo ding. 8 Asinain sualnak in cuih thukham cu hmang tahratin ka pumsa sungah duhhiarnak a phunphun a thoter. Daan a um lonak ahcun sualnak cu a thi a si. 9 Keimah khal hi daan tel loin a nungmi ka rak si; asinain thukham a ra thlen tikah sualnak cu a nung ih kei cu ka thi. 10 Nunnak petu dingah timi thukham cu ka hrangah cun thihnak a si. 11 Sualnak in tikcu ṭha a ngah ih thukham cu a hriamhrei ah hmang tahratin i bum ih i that a si. 12 Cutiin Daan amah ngaingai cu a thianghlim ih thukham khal a thianghlim, a dikmi a si ih a ṭhazet. 13 Cuti asile a ṭhami cu kei ka thihnak riangri ah a cang, a si maw? Si hrimhrim hlah! Thihnak tuahtu ngaingai cu sualnak a si. Sualnak in sualnak a sizia taktak kha fiangteih langter dingah ṭhatnak kha hmang tahratin thihnak cu ka parah a thlenter. Curuangah thukham in sualnak cu tuksumza sualnak a sizia hi a langter a si. 14 Daan cu thlarau lamih thil a si ti kan thei; asinain kei cu tisa mi ka si ih sualnak ih sal si dingah zuarmi ka si. 15 Thil ka tuahmi hi a tican ka thei ṭheu lo, ziangahtile tuah ka duhmi kha ka tuah lo ih ka duh lomi sawn kha ka tuah. 16 Tuah ka duh lomi ka tuah ruangah Daan cu a dik tiin ka lungkimpi ti a lang. 17 Curuangah hiti ih a tuah rerotu ngaingai hi keimah ka si lo; ka sungih a ummi sualnak a si sawn. 18 Minung ka sinak taktak sungah ṭhatnak zianghman a um lo ti cu ka thei. Ziangahtile a ṭhami tuah duhnak thinlung cu ka sungah um hmansehla a ṭhami ka tuah thei hrimhrim lo. 19 Ka tuah duhmi thil ṭha kha tuah loin ka tuah duh lomi thil sia riangri sawn kha ka tuah a si. 20 Tuah ka duh lomi ka tuah a si ahcun a sullam cu a tuahtu kha keimah ka si lo ih ka sungih a nungmi sualnak a si sawn, tinak a si. 21 Curuangah ka sungih thil a can daanzia cu ka thei - a ṭhami tuah ka duh tikah ka hrilsuakmi cu a ṭha lomi hlir a si. 22 Ka sung muril in Pathian ih daanah cun ka lung a awi. 23 Sikhalsehla ka taksa sungah hna a rak ṭuan vetu daan dang a um; cuih daan cu ka thinlung sungin a ṭha a timi kha a rak dotu daan a si. Cumi cun ka taksa sungih hna a ṭuanmi sualnak ih daan hnuai ah sal bangin i taanter. 24 Mi lungrethei ka va si so! Thihnak lamzin a pantu hih taksa pum ihsi hin zoso i runsuak ding? 25 Pathian hnenah thangṭhatnak um ko seh: Pathian Amah in kan Bawipa Jesuh Khrih thawng in i runsuak a si. Ka si daan ngaingai cu hiti in a si - Keimahte cun ka thinlung lawngin Pathian daan cu ka thlun; asinain minung ka sinak taktak cun sualnak daan ka thlun a si.
1 Atu cu Khrih Jesuh thawn a pehzom awmi hrangah cun sual thuṭhennak in an luat zo. 2 Ziangahtile Khrih Jesuh thawn pehzomnak thawngin nunnak in petu Thlarau ih daan in sualnak le thihnak daan sung ihsin in luatter zo. 3 Minung sinak hi a ṭonṭaih tuk ruangah Daan ih a tuah thei lomi kha Pathian in a tuah suak. Amah ih Fapa run thlah tahratin minung sinak sungih a ummi sualnak kha a hnonsak; cuih a Fapa cu sualnak siatralterta dingin minung sinak thawn a ra. 4 Hi bangtuk in Pathian in hna a ṭuannak cu minung sidaan thawn nung loin Thlarau duhnakih a nungmi kannih sungah hin Daan ih in fialmi a dik le a dingmi pawl cu kimternak ding hrangah a si. 5 Minung sinak in a fialmi vekih a nungmi pawl thinlung cu minung sinak ih duhmi in a uk. Thlarau fialmi vekih a nungmi pawl thinlung cu Thlarau ih duhmi in a uk ve. 6 Minung sinakih a ukmi pawl ih ton dingmi cu thihnak a si; Thlarau ukmi pawl ih co dingmi cu nunnak le daihnak a si. 7 Curuangah mi pakhat minung sinakih a ukmi cu Pathian ih ral a si, ziangahtile Pathian ih daan a thlun lo; a thlun duh lo lawng si loin a thlun thei lo. 8 Minung sinakih daan a thluntu pawl cun Pathian lung an awiter thei lo. 9 Sikhalsehla nannih cu nan minung sinakih duhmi vekin nan nung lo; Pathian ih Thlarau cu nan sungih a um taktak a si ahcun Thlarau ih fialmi vekin nan nung sawn a si. Zokhal Khrih ih Thlarau a nei lotu cu Khrih ta a si lo. 10 Khrih nan sungih a nun ahcun Thlarau cu nan hrangah nunnak a si; ziangahtile sualnak ruangah nan ruangpi cu a thi ding na'n nannih cu Pathian thawn remtermi nan si zo. 11 Thihnak ihsin Jesuh a thawhtertu Pathian ih Thlarau nan sungih a nun ahcun thihnak ihsin Khrih a thawhtertu Pathian in nan sungah a Thlarau a umternak thawngin a thi theimi nan taksa ruangpi cu nunnak a pe ve ding a si. 12 Curuangah ka u le ka nau tla, minung kan sinak daanih duhzawng in nung ding kan si lo. 13 Minung nan sinak daan duhzawng ih nan nun asile nan thi ding; sikhalsehla sualnak nan tuah ṭheumi pawl kha Thlarau bomnak in nan thah asile nan nung ding. 14 Pathian Thlarau ih hruaimi pawl cu Pathian ih fa an si. 15 Ziangahtile Pathian in a lo pekmi Thlarau cu salah a lo tuahtu ding Thlarau a si lo ih ṭihphang in a lo tuahtu khal a si fawn lo. Cuih Thlarau cun Pathian ih fa ah a lo canter ih Pathian hnenah, "Abba, Ka Pa," tiih kan au theinak thazaang in petu khal cu Thlarau a si. 16 Hitiih kan au ahhin Pathian ih Thlarau in kan thlarau a pehzom ih Pathian ih fa kan sinak kha a fiangter. 17 Fa kan si ruangah Pathian in a minung hrangih a retciami thlawsuah a cotu ding kan si; cule Pathian in Khrih hrangih a retciami khal Khrih thawn kan co tlang ding. Ziangahtile Khrih tuarnak a tuar vetu kan si ahcun a sunlawinak khal kan ṭawm ve ding a si. 18 Atuih caanih harsatnak kan tuar mi hi kan hnenih a lang lai dingmi sunlawinak thawn cun tahṭhim tlak ah ka ruat hrimhrim lo. 19 Pathian in a faale pawl a langternak ding caan kha sersiammi hmuahhmuah in an hngakhlap ngaingai. 20 Ziangahtile sersiammi thil hmuahhmuah hi tumtahmi um loih hloral meen dingah lairel cia a si. Cumi cu anmah ih duh thu si loin Pathian ih duhnak in a si. Asinain ruahsannak a um lai. 21 Nikhat khat ah sersiammi hmuahhmuah hi a ziamral dingmi saltaannak ihsin luatter ṭheh an si ding ih Pathian faale pawl ih comi a sunglawi luatnak cu an ṭawm ve leh ding. 22 Atuih caan tiang sersiammi hmuahhmuah cun nauhrin natih hrum-ai bangin an hrum an ai a si ti kan thei. 23 Sersiammi lawng si loin Pathian laksawng hmaisa bik Thlarau a co ih a teptu kanmah khal hi kan taksa ruangpi luatnak ding le Pathian fa cannak ding hngakin kan pumsa sunglam in kan hrum kan ai ve a si. 24 Ziangahtile ruahsannak in rundammi kan si. Kan ruahsanmi kha kan hmu thei a si ahcun ruahsannak a si ngaingai lo. Zoso a mit in a hmuh theimi cu a ruahsan dah? 25 Sikhalsehla kan hmuh lomi kan ruahsan a si ahcun thinsau tein kan hngak a si. 26 Cuti vek ṭhiamṭhiam in kannih cu a ṭawnṭaimi kan si ruangah kanmah bawm dingah Thlarau a ra. Ziangtin so thla kan cam ding ti hman kan theih lo laiah, hmurka hmanin simsuak thei lomi hrum-ainak thawn Thlarau in kan hrangah Pathian hnenah in dil sak. 27 Cule kan thinlung a hmutu Pathian in Thlarau ih ruahmi cu ziang a si ti a thei; ziangtin tile Pathian duhzawng in a mithiang pawl hrangah Thlarau in Pathian hnenah in dil sak a si. 28 Ziangtinkim ahhin Pathian cun amah a duhdawtu le amah ih tumtahmi vekih a kawhmi hrangah cun an ṭhatnak ah hna a ṭuan a si, ti kan thei. 29 Pathian in a hril ciami pawl cu a Fapa hmuihmel keng dingah a thleidang cia hai; cuti cun unau tampi lakah a Fapa cu upa bik a sinak dingah a si. 30 Curuangah Pathian in a thleidan ciami pawl cu kawh khal a ko. Cule a kawhmi pawl cu thiam a coter ih a sunlawinak khal a hlawm hai a si. 31 Hi hmuahhmuah kan theih hnuah ziangso kan sim hrih ding? Pathian kan lamih a ṭan ahcun zoso in dodal thei ding? 32 In dodaltu cu Pathian a si lo, a Fapa neihsun hman zuah loin kan zate hrangah in pe zo! Amah ih Fapa rori hman in pek a si ahcun thil dangdang khal a lakin in pe lo ding maw? 33 Pathian ih hrilmi a minung pawl cu zo in so sual a puh thei ding? Pathian amah in thiam a coter sawn hai a sisi! 34 Zo in so mawh a phurh hai ding? Khrih Jesuh in mawh a phurh lo ding; anih cu an hrangah a thi ih thawhter sal a si hnuah Pathian vorhlam kapah a um ih kan hrangah Pathian hnenah a dil. 35 Cuti a si ahcun zo in so Khrih ih duhdawtnak cun in ṭhen thei ding? Harsatnak siseh, tuarnak siseh, hremnak siseh, rilrawnnak siseh, hnipuan neilo farahnak in siseh, ṭihphannak le thihnak khal siseh, cupawl in in ṭhen thei ding maw? ṭhen thei hlah! 36 Ca Thianghlim sungah, "Nangmah ih ruangah sun nihlawh thahnak kan tong; Thah dingih ruahmi tuu bangtuk kan si," tiah a um. 37 Hi bangtuk a si ko na'n kannih in duhdawtu ih thawngin hi thil hmuahhmuah tlunah kannih cu nehtu hnakin kan uak deuh a si. 38 Ziangahtile amah ih in duhdawtnak ihsi cun zianghman in in ṭhensuak thei lo ding, tihi fiangtein ka zum a si; thihnak in siseh, nunnak in siseh, vancungih a ummi vanmi le uktu le huham neitu pawl in siseh, atu san in siseh, hmailam san in siseh, thuneitu 39 leitlun ummi in siseh, leihnuai ummi in siseh, sersiammi thil hmuahhmuah in siseh, in ṭhen thei lo ding. Kan Bawipa Khrih Jesuh sungin kan ta a si mi Pathian ih duhdawtnak ihsi cun in ṭhen theitu ding zianghman a um lo.
1 Ka simmi hi thudik a si. Khrih ta ka si ih thuphan ka per lo. A sia le a ṭha thleidan thiamnak, Thlarau Thianghlim ih ukmi ka thinlung hin thuphan ka per lonak cu fiangtein i sim. 2 Ka riahsiatnak cu a nasa ngaingai; ka phunpi ka thi le ka sa a si mi pawl hrangah, 3 ka thinnatnak cu cem ti a nei dah lo. Anmah ih ruangah keimah sawn hi Khrih ihsin ṭhensuakmi le Pathian camriamnak hnuai ih a ummi si sawn ningla ka va duh so! 4 Annih tla cu Israel mi an si; Pathian in a faale ah a canter ih a sunlawinak cu an hnenah a langter; anmah thawn thukamnak tla a tuah ih an hnenah Daan a pek; anmah in a dikmi biaknak an nei ih Pathian ih thutiamnak a cotu an si. 5 Anmah cu kan pupa Hebru mi hminthang zetzet ihsin a rung suakmi an si; cule minung sinak lamih kan ruat asile Khrih khal an phunpi a si. Ziang hmuahhmuah uk ṭhehtu Pathian cu kumkhua-in thangṭhat si ko seh, Amen. 6 Israel mi an zatein Pathian ih minung an si ṭheh lo; asinain Pathian ih thukamnak cu a kim suak lo ka ti duhnak a si lo. 7 Abraham tesinfa khal an zatein Pathian ih fa an si ṭheh lem lo. Pathian in Abraham hnenah, "Tefa ka lo kammi pawl cu Isaak sungsuak an si ding," tiah a ti. 8 Himi ih a tican cu: minung daan vekih hrinmi tefa pawl hi Pathian fa an si tinak a si lo; Pathian ih thukamnak thawngin hrin a si mi faale pawl lawng kha tefa taktak ih siar dingmi an si, tinak a si. 9 Ziangahtile Pathian ih thukamnak cu hiti in a um: "A cam a kim tikah ka ra sal ding ih Sarah in fapa a nei ding," a ti. 10 Hi lawng hi a si hrih lo. Ziangtin tile Rebekka ih fapa pahnih in pa an nei ih amah cu kanmah in hringtu kan pu Isaak a si. 11 Sikhalsehla hrilmi fapa pakhat in Pathian ih tumtahmi a kimter theinak dingah Pathian in Rebekah hnen ahcun, "A u in a nau a rian ding," tiah a ti. Pathian in hi thu hi an suah hlanah a rak sim zo a si; a ṭha siseh, a sia siseh, zianghman an tuah hlanih a simmi a si. Curuangah Pathian in mi a hril tikah an thil tuahnak thawngin si lo in Amah in a kawh ruangah a si sawn. 13 Ca Thianghlim khal in, "Jakob cu ka duhdaw, asinain Esau cu ka hua," a ti. 14 Cuti a si ahcun Pathian hi a ding lo a si, kan ti pei maw? Ti hrimhrim hlah! 15 Ziangahtile Moses hnenah, "Zaangfah ka duhmi parah ka zaangfah ding; zawnruahnak neih ka duhmi parah an zawn ka ruat ding," a ti. 16 Curuangah ziangtinkim ahhin minung ih duhnak le tuahnak ruangah si loin Pathian ih zaangfahnak a um ruangah a si ṭheh a si. 17 Izipt ram Faro siangpahrang thu khalah Ca Thianghlim in, "Nangmah cu siangpahrang ah ka lo tuah ih leilung hmuahhmuah ah ka cahnak huham na langter ih ka hmin na thanternak dingah ka lo hril a si," a ti. 18 Curuangah Pathian in a duhmi poh kha a zaangfah ih a duhmi poh kha an lung a ruhter a si. 19 Asinain nanmah lakih pakhatkhat in ka hnenah, "Hiti a si ngaingai ahcun, ziangtinso Pathian in mi a mawhthluk thei ding? Pathian ih duhmi le tummi cu zoso a el thei ding?" tiah in sut ding. 20 Asinain, ka rual, cutiin Pathian a sawn ngamtu cu zoso na si? Beel in a tuahtu hnenah, "Ziangah so hiti in i tuah?" tiah a sawn dah maw? 21 Thungai in kan ti asile beel tuahtu cun tlak leilung kha a duhduh ih tuah theinak thu a nei: a duh asile tlak hlom khat ihsin beel pahnih a tuah thei; pakhat cu tikcu sunglawi caan ih hman dingah, a dang pakhat cu nitin hman men dingah, a tuah a si. 22 Cuvek ṭhiamṭhiam in Pathian ih thil tuahdan khal ah a si. A thinhengnak langter ding le zokhal in a huham an hmuhnak ding kha a duh. Sikhalsehla a thinhengnak a tuartu ding le siatsuahnak a tongtu ding pawl ih parah cun a thin a sauzet ih mi a zawi theizet fawn. 23 Cule a famkimmi a sunlawinak khal cu langter a duh ih a cotu dingih tin ciami kan si ruangah a zaangfahnak dongtu kannih parah a sunlawinak cu a run burh. 24 Ziang ruangah tile kannih cu amah ih kawhmi a minung kan si; Judah mi sung ihsin kawhmi lawng si lo in Zentail mi sung khalin kawhmi kan si. 25 Hosea cabu sungah Pathian in, "Ka minung a si lomi pawl kha 'Ka minung,' tiah ka ko ding. Ka duh lomi miphun khal 'Ka duhdawtmi,' tiah ka ko ding. 26 'Nannih hi ka minung nan si lo tiah a rak tinak hmunah khan, 'A nungmi Pathian ih faale pawl' tiah annih cu kawh an si ding," a ti. 27 Cule profet Isaiah in Israel ih thu ah, "Israel mi pawl cu tifinriat kapih vunnel zat in tam hman hai sehla mi malte lawnglawng rundam an si ding; 28 ziangahtile rei lote-ah hi leikhawvel thu hi Pathian in a ṭhen ding," tiah a ti. 29 A hlan deuh ah Isaiah thotho in, "Cungnungbik Bawipa in tefa ṭhenkhat pawl zuah loin um sehla Sodom bangtuk ah kan cang zo ding ih Gomorrah vek kan si zo ding," tiah a rak ti bangtuk kha a si. 30 Cuti a si ruangah, hiti in kan sim: Pathian thawn rualremnak tuah a tum dah lomi Zentail mi pawl cu an zumnak thawngin Pathian thawn an rem aw zo. 31 Asinain Pathian ih minung pawl, Pathian thawn rualrem duh ah daan a hawl rerotu pawl cun cuih remnak cu an tong lo. 32 Ziangruangah so cutin a si? Zumnak rinsan loin an tuahmi an rinsan sawn ruangah a si. Cuti cun, "Bahnak lungto," parah an bah a si. 33 Cuih Lungto thu ah Ca Thianghlim in: "Zohhnik, Zion ah lung pakhat ka ret; Cumi ruangah mi tampi an bah an sawn ding; Cuih lungpi cun mi a tluter hai ding. Sikhalsehla cumi a zumtu cu, an mualpho lo ding," tiah a ti.
1 Ka u le ka nau tla, ka phunpi pawl hi rundamnak ngah hram hai sehla ti cu ka thinlung neihmi zatein ka duhmi a si. An hrangah ziangtlukin so thla ka cam ṭheu! 2 Pathian hrangah cun an ṭang ngaingai, ti cu theihpitu ka si; sikhalsehla an ṭanzia hi a dik lo. 3 Pathian in amah le minung karlakah ziang bangtuk in rualremnak lamzin a tuah ti kha an thei lo; anmahte in an lamzin an sialcop. curuangah Pathian in minung thawn rualremnak a tuahmi lamzin sungah an lut duh lo. 4 Khrih in Daan cu a cemter zo ruangah zo khal zumnak a neitu pohpoh cu Pathian thawn rualremnak a ngah a si. 5 Moses in Pathian thawn rem awknak cu Daan thlunnak thawngin a si, tiah a ngan ih, "Zokhal Daan ih thupekmi a thluntu cu a nung ding," a ti. 6 Asinain Ca Thianghlim in zumnak thawngin Pathian le minung karlakah remnak a um, ti thu-ah cun hiti in a ti: "Zoso vancungah a kai ding? tiah mah le mah sut awk ding a si lo." (Cucu Khrih kha van in run ṭumpi ding, tican a si.) 7 "Lei hnuai ah zoso a vung ṭum ding? tiin khal sut aw hlah." (Cucu Khrih kha thihnak ihsin hun suahpi ding, tican a si.) 8 A simmi taktak cu, "Pathian ih phuanmi thu cu na kiangah a um, na hmur ah a um ih na thinlung sung khalah a um," ti a si. Cumi cu kan phuanmi zumnak ih thu cu a si. 9 Jesuh cu Bawipa a si tiah na hmurka in na phuang ih Pathian in thihnak ihsin a thawhter sal, tiah na thinlung in na zum ahcun rundam na si ding. 10 Ziangahtile kan zumnak thawngin Pathian thawn rualremnak kan co; kan phuannak thawngin rundamnak kan ngah. 11 Ca Thianghlim in, "Amah a zumtu poh cu an mualpho lo ding," tiah a ti. 12 Hiti'n 'A zumtu poh cu,' a ti tikah zozo khal an tel ṭheh, ziangahtile Judah mi le Zentail mi karlakah thleidannak a um nawn lo. Pathian cu mi hmuahhmuah ih Bawi a si ih Amah ih hmin a kotu hmuah hnenah siang zetin thlawsuah a pek a si. 13 Ca Thianghlim in, "Zokhal Bawipa ih hmin a kotu hmuah in rundamnak an ngah ding," a timi a kim a si. 14 An zum lomi cu ziangtinso a hmin an hlam thei ding? A thuhla an theih lo ahcun ziangtinso an zum thei ding? A thu phuan a si lo ahcun ziangtinso an theih ding? 15 Palai thlahmi an um lo ahcun ziangtinso thu an phuan thei ding? Ca Thianghlim in, "Thuthang ṭha a phuangtu pawl ih ke cu ziang tlukin so a mawi!" a ti. 16 Sikhalsehla mi hmuahhmuah in Thuthang ṭha cu an cohlang lo. Isaiah amah khal in, "Bawipa, zoso kan thuthang phuanmi cu a zum?" a rak ti. 17 Curuangah zumnak cu thuthang theihnak ihsin a ra ih thuthang cu Khrih kan phuannak ihsin a ra. 18 Sikhalsehla thusuh ka duhmi cu: "Thuthang phuan mi hi an thei dah lo ngaingai maw?" ti hi a si. An thei ko; ziangahtile Ca Thianghlim in: "An aw thawng cu leikhawvel hmunkip ah a thang; An ṭong cu leilung netnak tiang a thleng," a timi kha a dikmi a si. 19 Pakhat ka sut duh hrih: "Israel mi pawl in teh an thei lo maw?" Moses amah rori kha hi thusuhnak a lettu hmaisa bik a si ih hiti in a let. "Ka minung pawl iksiiknak neitertu ah, 'Miphun ih siar tlak lo,' timi pawl ka hmang ding. Ka minung pawl thinhengtertu ah, mi aa phun pawl ka hmang hai ding," a ti. 20 Hi hnakih ralṭha sinsin in Isaiah cun, "I hawl lotu riangri in in tong, Ka thu i sut lotu hnenah ka lang," a ti. 21 Sikhalsehla Israel mi pawl thu-ah cun: "Thu a ngai lo le mi dodaltu Israel hnenah sun nihlawh ka zaa ka saan," a ti.
1 Cuti asile Pathian in a minung pawl a hnongta ding maw si? Hnong ta hrimhrim hlah! Keimah khal hi Israel mi, Abraham ih tesinfa, Benjamin phun sungtel ka si. 2 Pathian in a hramthok ihsin a rak hrilmi a minung pawl cu a hnong lo a si. Ca Thianghlim sungih nganmi, Israel mi pawl mitkem ah Elijah in Pathian hnenih a simmi kha nan thei a si lo maw? Elijah in, 3 "Bawipa, na profet pawl an that ih na biakṭheng tla an bal ṭheh; keimah pakhat lawng ka taang ih keimah hman a thah in tum a si!" a ti kha. 4 Cutikah Pathian in ziangtinso a leh? "Keimah ih bul hrangah Baal khawzing a bia hrih lomi minung thawng sarih ka nei lai," a ti a si. 5 Cuvek ṭhiamṭhiam in atu khalah hin a si - a zaangfahnak ruangah Pathian in a rak hrilmi minung pawl sung ihsin a taangsun an um lai hrih a si. 6 Hitiih a rak hrilnak cu an hnaṭuanmi ruangah si loin a zaangfahnak ruangah a si. Ziangahtile Pathian ih a hrilmi pawl hi an ṭuanmi ruangih hrilmi an si ahcun a zaangfahnak timi hi zaangfahnak taktak a si lo ding. 7 Cule ziangtinso a si? Israel mi pawl in an hawlmi cu an hmu lo. A hmutu cu Pathian ih hrilmi mi malte lawng an si. Midang pawl cu an thinlung a ruh. 8 Ca Thianghlim in, "Pathian in an thinlung mit a malhter, Tuihsun tiangah an hmu thei lo ih an thei thei lo," a ti vekin a si ngaingai. 9 Cule David in, "An puai sungah kaihmi le thangih awkmi si hai seh; Ril in bah hai sehla hremmi si hram hai seh. 10 An hmuh thei lonak dingah an mit cu cawtter sisehla, An harsatnak thilrit hnuai ah, an eel cu cat loin kun hram seh," tiah a ti. 11 Cuti asile Judah mi an rilhbah tikah hin an bah siatralta ding maw si? Siatta hrimhrim hlah! Anmah an rilhbah ruangah rundamnak cu Zentail mi hnenah a ra thleng. Cumi cu Zentail mi parah Judah mi in iksiknak nei hai seh, ti duhnak a si. 12 Judah mi pawl ih sualnak in leilung tlunah thlawsuahnak tampi a thlenter; an thlarau lam farahnak in Zentail mi hnenah thlawsuah bawngmal tampi a sawm. Cule Judah mi pawl cuzat tiih khiah mi mipum famkim zetih an tel ve tikah cun ziangtluk thlawsuahnak tam sinsin so a si ding! 13 Atu cu Zentail mi nan hnenah thu ka sim: Zentail mi hnenih tirhthlahmi ka si sungah cun ka hnaṭuanmi ah mithmai ṭhatnak ka nei ding a si. 14 Ka phunpi pawl nahsiiknak neihter tahratin mi ṭhenkhat tal ka rundam thei na hman maw tinak ah a si. 15 Ziangahtile Judah mi pawl hnon an si tikah leitlun khawvel mi cu Pathian ih ral ihsin a rualpi ah an cang a si. Annih Judah mi pawl cohlan an si ve tikah ziang a bang ding? Mithi hrangah nunnak a si ding! 16 A hmaisa bik a si mi sang ah khat kha Pathian hnenih hlan a si ih a thianghlim a si ahcun a zawl pumpi in amah ih ta a si ih a thianghlim a si. Thinghram pawl Pathian hnenih pek a si ih an thianghlim a si ahcun a hnge pawl khal an thianghlim ve a si. 17 An cin mi olif kungih hnge ṭhenkhat cu an tan ih hramlakih a kho mi olif kung hnge thawn cuih cinmi olif kung cu peh an si. Nannih Zentail mi pawl hi cuih hramlakih a khomi olif kung bangtuk nan si ih Judah mi pawl ih thlarau lam nunnak le thazaang nan ṭawm aw a si. 18 Curuangah olif hnge tanmi bangtuk a si mi pawl kha nan hmuhsuam lo pei. Ziangtin so nan puarthau thei ding? A hnge lawng nan si ih a hram kha nannih in nan cawm lo; a hram in a lo cawm sawn a si. 19 Nannih cun, "Kanmah pawl hrang umnak lawngter dingah a hnge pawl an sattan a si," tiah nan ti ding. 20 Cumi cu a dik a si. Annih Judah mi pawl cu an zum lo ruangah tan an si; nannih cun nan zum ruangah hi hmun hi nan luah. Cumi ruangah cun puarthau in hngal pang hlah uh! A ṭih in ṭih sawn uh. 21 A hram thawn a peh-aw ih a hnge ngaingai a si mi Judah mi pawl hman a zuah lo ahcun, nannih tla cu zuah dingah nan ruat aw maw si? 22 Hi zawn ah hin Pathian cu zaangfah lainatnak a neizet na'n a thu a khoh zet thotho ti cu ka hmu a si. A bah a rilmi pawl hnenah cun a thu a khoh zet, asinain nannih hnenah cun zaangfahnak a neizet. Cuih zaangfahnak sungih nan um ringring a si ahcun a lo zaangfah ringring ding; asinain nan um lo ahcun khiah-hlo nan si ve ding. 23 Cule Judah mi pawl in zum loih an umnak dinhmun kha an tlansan a si ahcun a hlanih an rak umnak ah khan ret sal an si ding, ziangahtile Pathian cu pehsal theinak thu a nei a si. 24 Nannih Zentail mi pawl cu hramlakih a khomi olif kungih hnge bangtuk nan si ih nannih cu tan tahratin, a daan a si lo na'n, ciin-mi olif kuang thawn peh cihmi men nan si. Judah mi pawl cu cin-mi olif kung an si ruangah tan ciami hnge hman si hai sehla a kung hlunih peh sal cu Pathian hrangah a ol deuh ngaingai ding. 25 Ka u le ka nau tla, a dikmi thuthup a um ih cumi cu nan theih dingah ka duhmi a si. Cumi nan theih asile mifim ah nan ruat aw lo ding. Ziang a si tile, Israel mi pawl an thinlung a ruh hi kumkhua in a si lo ding; Pathian hnenah Zentail mi a thleng ding zat an thlen hlan sung lawng a si ding. 26 Cule Israel mi hmuahhmuah rundammi an sinak ding cu hiti in a si ding. Ca Thianghlim in, "Zion ihsin Runtu a ra ding ih Jakob tesinfa pawl ih ṭhatlonak hmuahhmuah cu a hlonhlo ṭheh ding. 27 An sualnak ka laksak tikah cun, anmah thawn hi thukamnak hi ka tuah ding," a ti bangtuk in a si ding. 28 Thuthang ṭha an hnon ruangah Judah mi pawl cu Pathian ih ral ah an cang; cumi cu nanmah Zentail mi hrangah a si. Sikhalsehla an pupa pawl ih ruangah annih cu Pathian ih hrilmi rualpi an si. 29 Ziangahtile a hrilmi le a thlawsuahmi thu-ah cun Pathian in a thinlung a ṭhin dah lo. 30 Nannih Zentail mi pawl, a liam cia caan sungah cun Pathian thu thlun lotu nan rak si; asinain atu-ah cun Judah mi in Pathian thu an ngai lo ruangah nannih in Pathian ih zaangfahnak nan ngah. 31 Cuvek ṭhiamṭhiam in Pathian zaangfahnak nan ngahmi kha annih khal in an ngah venak dingah Judah mi pawl cu Pathian thu ngai loin an um. 32 Ziangahtile, mi hmuahhmuah hnenah zaangfahnak a neih theinak dingah Pathian in zozo khal thu-ngai lonak sungah thawngtla bangin a taanter ṭheh a si. 33 Pathian zaangfahnak cu a va tum so! A fimnak le a theihnak hi an va thuk lawmmam so! A thu relcatmi pawl hi zoso a hrilhfiah thei ding? A fehnak lamzin hi zoso a zong thei ding? 34 Ca Thianghlim in, "Bawipa ih thinlung cu zo in so a thei? Ruahnak a pe theitu an um maw? 35 Amah ih rulh sal leh dingah zo in so thil a pe dah?" tiah a timi bangtuk a si. 36 Ziangahtile ziang hmuahhmuah cu Amah ih sersiammi, Amah ruangih ummi le Amah hrangah an si ṭheh. Pathian hnenah kumkhua-in sunlawinak cu um ko seh! Amen.
1 Cuti a si ruangah ka u le ka nau tla, a tam zetmi Pathian ih in zaangfahnak ruangah hin nan ruangpumpi cu a thiangmi le cohlan tlak raithawinak bangtuk in Pathian hnenah pe uh, tiah ka lo dil. Cumi cu Pathian hnenih nan pek dingmi biaknak taktak cu a si. 2 iHi khawvel daanah hin kop nawn hlah uh; cuhnak in nan thinlung kha tharthawh tahratin thleng aw sawn uh. Cutiin Pathian ih duhnak cu nan thei ding ih Pathian ih hmaiah ziangso a ṭha, ziangso a lungawi mi a si tile ziangso a famkimmi a si ti nan thei ding. 3 Pathian in a zaangfahnak laksawng i pekmi ruangah pumpak ciar nan hnenah hiti in ka sim: Nan ruah awk ding hnakih saang deuh in ruat aw hlah uh. Ziangvek teu so ka si ti kha thei aw sawn uhla Pathian in zumnak a lo pekzat ciar in nan ruah awk daan cu siseh. 4 Kan ruangpi hi pakhat asinain taksa ṭhen tampi an um ih cuih taksa ṭhen pawl ih hnaṭuannak cu an bang aw lo. 5 Cu bangtuk in kannih khal mi tampi kan si na'n Khrih thawn kan pehzom awknak ahcun pum khat kan si. Kan ruangpi ih taksa ṭhen pawl an peh awk thluh vekin kan peh aw thluh ve a si. 6 Curuangah laksawng phun dangdang kan ngahmi cu Pathian zaangfahnak kan cozat ciarin hmang uhsi. Kan ngahmi laksawng cu Pathian thu phuan ding a si ahcun zumnak kan comi zat in phuang uhsi; 7 cubangtuk ṭhiamṭhiam in midang riantu ding kan si ahcun rian uhsi; zirhtu ding kan si ahcun zirh uhsi; 8 midang thazaang petu ding kan si ahcun pe uhsi. Kan neihmi thilri kha midang hlawm ding kan si ahcun siang zetin hlawm uhsi. Hotu ding kan si ahcun taimazet in ṭuan uhsi; midang hnenah zaangfahnak langtertu ding kan si ahcun lungawi soparte in langter uhsi. 9 Duhdawtnak kan ti tikah thinlung taktak thawn duhdawt ding a si. A ṭha lomi cu hua uhla a ṭhami kha kai hnget uh. 10 Khristian unau nan si ruangah pakhat le pakhat sunsak awzet tein duhdaw aw ton uh. Pakhat le pakhat hmaizah awknak thiam uh. 11 Zaangzel hlah uh; napi in hnaṭuan uh. Nan thinlung zate pe in Bawipa ih hna cu ṭuan uh. 12 Nan beiseinak in nan lung lo awiter seh; harsatnak nan ton tikah thinsau in um uh; cat loin thlacam uh. 13 A tlasam mi Khristian unau pawl thawn nan neihmi kha hlawm aw uh. Cule mikhual pawl hrangah nan sangka ong uh. 14 A lo hremtu pawl hrangah camriamnak si loin thlawsuahnak kha Pathian hnenah dilsak sawn uh. 15 Lungawimi pawl thawn lungawi tlang uhla a ṭapmi pawl thawn ṭap tlang uh. 16 Nanmah ih zawn nan ruat vekin midang zawn khal ruat ve uh. Keimah ka si bik, tiin ruat aw hlah uh; hnaṭuan ṭukṭak tete ṭuan duhnak thinlung nei uh. Ka fim a si tiah ruat aw hlah uh. 17 Mi pakhatkhat in nan parah ṭhat lonak an tuah tikah an parah ṭhat lonak thawn leh-rul hlah uh. Zozo khalih a ṭha a mawi an timi kha tuah zuam uh. 18 Mi hmuahhmuah thawn remte ih um ding kha a cangthei tawkin zuam uh. 19 Ka duhdawtmi pawl, ziangtik khalah phulak tum hlah uh; Pathian thinhengnak sawn in cumi cu tuahseh. Ziangahtile Ca Thianghlim sungah, "Keimah in phu ka la ding; Keimah in ka leh-rul ding, tiah Bawipa in a ti," tiah a um. 20 Cule Ca Thianghlim in, "Na ral a ril a rawng asile rawl pe aw; a ti a haal asile tidai pe aw; cutiih na tuah asile a lu-thlungah meiling na ret a si ding," a ti. 21 Òhat lonak in lo neh hlah seh; ṭhat lonak kha ṭhatnak in neh sawn aw.
1 Ram uktu bawi pawl kha an thu ngai uh; ziangahtile Pathian ih lungkimnak loin zohman thuneitu an um thei lo; cule atuih thuneitu pawl hi Pathian ih retmi an si. 2 Zokhal thuneitu a dotu cu Pathian ih a retmi kha a do a si. Cu bangtuk in a dotu cu amah lala parah thuṭhennak a thlenter ding. 3 Uktu bawi pawl hi thil ṭha a tuahtu pawl cun ṭih ding an si lo; ṭhat lonak a tuahtu pawl lawngin ṭih ding an si. Thuneitu bawi pawl kha ṭih loin um cila na duh maw? Na duh asile thil ṭha tuah awla mithmai ṭha na ngah ding; 4 ziangahtile nangmah ih ṭhatnak tuahtu dingah Pathian ih siahhlawh a si. Sikhalsehla a ṭha lomi na tuah ahcun thuneitu cu va ṭih aw; ziangahtile mi hrem theinak a nei taktak a si. Amah cu Pathian ih siahhlawh a si ruangah thil ṭha lo a tuahtu pawl parah Pathian ih hremnak a thleng suaktertu a si. 5 Curuangah Pathian hremnak ruang lawngah si loin sia le ṭha thleidan thiamnak ruang khal ah thuneitu bawi pawl khi an thu ngai uh. 6 Cumi ruang khalah a si ngunkhuai nan pek cu; thuneitu bawi pawl in an ṭuanvo an ṭuansuak tikah Pathian hrangah an ṭuan a si. 7 Curuangah nan pek ding a si mi cu pe uh; pumpak ngahmi sungih pek dingmi ngunkhuai siseh, thilri hrangih pek dingmi ngunkhuai siseh pe uh. Hmaizah tlak a si mi cu hmaizahnak pe uh; upat tlak a si mi cu upatnak pe uh. 8 Zohnen hmanah baakmi nei hlah uh. Nan baakmi cu pakhat le pakhat duhdawt awknak lawng kha siseh. Duhdawtnak a neitu cu Daan thluntu a si. 9 Thukham pekmi, "ṭaangṭawm sualnak tuah hlah; mi that hlah; rukru hlah; mi ih thil va daw hlah," timi pawl le a dang thukham pawl hmuahhmuah cu, "Nangmah le nangmah na duhdawt awk bangin na innhnen khal duhdaw aw," timi thukham sungah a kim ṭheh. 10 Mi pakhatkhat na duhdawt asile amah hrang a ṭha lomi cu na tuah dah lo ding. Curuangah Daan kimteih thlun thei timi cu duhdawt awk hi a si. 11 Himi cu nan tuah hrimhrim a ṭul, ziangahtile nan ihthatnak ihsin nan ṭhang caan a thleng zo, ti nan thei. Rundam kan sinak ding caan cu hmaisa kan rak zum pek lai hnakin atu-ah a nai sinsin thlang a si. 12 Zan a cem zik thlang ih sun a ra thleng zik thlang. Khawthim sungih hnaṭuannak pawl cu bansan uhla khawtleu sungih raldo dingah hriamnam lak uhsi. 13 Sun khawvang ih a ummi kan si bangtuk in kan nun ziaza cu mawiter thlang uhsi: awn-au celcel le zuri sabah in um hlah uhsi; nupa sual tuah le zoh mawi loin um hlah uhsi; sual aw le nahsik aw khalin um nawn hlah uhsi. 14 Kan Bawipa Jesuh Khrih kha ralthuam vekin hruk uh; tisa duhnak le hiarnak pawl cu bansan thlang uh.
1 Zumnak lamih a derdaimi kha cohlang ko uh; a pumpak zumnak pawl kha eel rero duh hlah uh. 2 Mi pakhat cun ziang hmuahhmuah ei theih a si, tiah a zum; asinain zumnak lamih a derdaimi pa cu hanghnah hangrah lawng a ei. 3 Ziangkhal a duh poh a eitu in a ei lotu kha a nautat ding a si lo; cuvek thotho in hanghnah hangrah lawng a eitu in ziang hmuahhmuah a eitu kha a soisel ding a si ve lo; ziangahtile amah cu Pathian ih cohlan mi a si ve. 4 Mi pakhat ih hnen-um thu-ah ziangah so thuṭhentu na ṭuan duh rero? A hnen-um a hlawhtling maw a hlawhsam ti thuṭhentu ding cu a bawipa a si. Cule a hlawhtlingmi khal a si ko ding, ziangahtile Bawipa in hlawhtling in a tuah thei a si. 5 Mi pakhat in ni dang tampi lakah ni ni khat cu a thupibik ah a ruat; cule midang pakhat cun ni hmuahhmuah cu an bangrep ṭheh tiah a ruat. Anmah ciar in an thinlung sungah fiangterta hai seh. 6 Mi pakhat in ni ni khat cu a sunglawi ce in a ruah ahcun cu mi cu Bawipa upatnak ih a tuahmi a si; ziang hmuahhmuah a ei theitu khal in Bawipa upatnak ah a tuah a si; ziangahtile a ei mi rawl ruangah Pathian hnenah lungawinak a langter. Ei lomi a neitu khal in Bawipa upatnak ih a tuahmi a si ve ih Pathian hnenah lungawinak a langter ve. 7 Zohman kanmah ih hrang lawngah kan nung lo; zohman kanmah ih hrang lawngah kan thi lo. 8 Kan nun asile Bawipa ih hrangah kan nung; kan thih khalle Bawipa ih hrangah kan thi. Kan thih ah siseh, kan nun ah siseh Bawipa ih ta kan si. 9 Ziangahtile a nungmi le a thimi ih Bawipa si dingah Khrih cu a thi ih a nungsal zo. 10 Curuangah nannih hanghnah hangrah lawng eitu pawl, nan unau pawl ziangah so nan soisel? Cule nannih ziang hmuahhmuah eitu pawl, ziangah so nan unau pawl nan nautat? Kan zatein Pathian hmaiah kan ding ding ih Amah in kan thu in ṭhen ding a si. 11 Ca Thianghlim sungah, "A nungmi Pathian Keimah ih hmaiah mi hmuahhmuah in, an khuk an bil ding; Mi hmuahhmuah in Pathian ka si kha an phuang ding tiah Bawipa in a ti," tiah a um. 12 Curuangah zozo khal kan zatein kan nunnak le kan ṭuannak thu cu Pathian hmaiah kan simfiang ciar leh ding. 13 Curuangah pakhat le pakhat kan soisel awk ṭheu cu baang thlang uhsi. Cuhnakin na unau sualnak ih a tlukrilh lonak ding kha na ruat cia sawn pei. 14 Ei thiang lomi rawl zianghman a um lo ti kha Bawipa Jesuh thawn kan pehzom awknak thawngin ka thei fiang a si. Sikhalsehla rawl hrekkhat cu ei thiang lo an si tiah mi pakhat in a zum ahcun cutiih a zumtu hrangah cun cuih rawl cu a thiang lomi a si. 15 Pakhatkhat na ei ruangah na unau thinlung na natter a si ahcun cumicu duhdawtnak thawn a nungmi na si lo. Rawl na ei mi in Khrih thisen ih tlenmi mi pakhat kha siatsuahnak tongter hlah. 16 Thil ṭha tiih na ruahmi kha hminsiatnak phurtu ah canter hlah. 17 Ziangahtile Pathian Uknak cu ei le in ah a si lo; Thlarau Thianghlim ih pekmi dingnak, daihnak le lungawinak ah a si sawn. 18 Cutiin mi pakhatkhat in Khrih hna a ṭuan asile Pathian lung a awiter ih minung khal in an lawm. 19 Cuti a si ruangah, daihnak a suahpitu thil le pakhat le pakhat karlakah thacah ṭhansonak a suahpitu thil pawl cu kan hmuitin ringring dingmi an si. 20 Rawl ruangah Pathian ih a tuah ciami kha siatsuah hlah uh. Rawl hmuahhmuah cu ei ṭha an si ko, sikhalsehla mi pakhatkhat sualnak ih a tluktertu rawl cu ziang rawl khal ei ding a si lo. 21 Nan unau rilhbahnak a suahtertu cu ziang bangtuk thil a si hmanah tuah lo a ṭha sawn; sabit zu in lo le sa khal ei loih um a ṭha sawn. 22 Hi bangtuk thu-ah cun nangmahte thinlung nei aw la nangmah le Pathian karlakih thu-ah ret aw. A dik tiin a ruahmi a tuah ih sirawknak a nei lotu cu mi lungawi a si! 23 Sikhalsehla phuhrung aw cingih a ei a si ahcun Pathian in a hnong ding, ziangahtile a tuahmi kha zumnak thawn a tuah lo a si. Ziangkhal zumnak parih bun loin tuah cu sual a si.
1 Zumnakih thazaang a cakmi kannih in zumnak a derdai pawl ih thilrit kha kan phurh bawm ding a si. Kanmah ih nomnak kha ruat sawn ding kan si lo. 2 Cuhnakin kan unau pawl zumnak ih ṭhansoter ding kha thil ṭha a si ruangah an lung kan awiter sawn pei. 3 Ziangahtile Khrih cun amah hrangah nomnak a hawl lo. Ca Thianghlim in, "A lo dekcoktu pawl ih an lo hmuhsuamnak cu ka parah a tla ṭheh," tiah a timi kha a kim a si. 4 Ca Thianghlim ih in simmi thinsaunak le thinlung cahnak thawngin ruahsannak kan neihnak ding hrangah Ca Thianghlim sungih ngan ciami hmuahhmuah cu kanmah thuzirhnak hrangah an si. 5 Khrih Jesuh kha zohṭhim in nan lakah thinlung rual in nan um theinak dingah thinsaunak le thinlung cahnak hram a si mi Pathian in lo bawm hram seh. 6 Cuti cun nan zatein thinlung hmunkhat in kan Bawipa Jesuh Khrih ih Pathian le Pa cu nan thangṭhat ding. 7 Khrih in a lo cohlan vekin Pathian sunlawinak hrangah nannih tla pakhat le pakhat cohlang aw uh. 8 Ka lo sim duhmi cu himi a si: Pathian ih thutak ai-awh ah Khrih cu Judah mi pawl ih siahhlawh ah a cang; cumi cu Pathian in an pupa pawl hnenih a thukammi kimternak dingah le Pathian cu rinsan tlak a si ti langternak ah a si. 9 Cuih tlunah Pathian cu zaangfahnak neitu a si ti kha Zentail mi tla in an thei ih an thangṭhatnak ding khalah a si. Ca Thianghlim sungah: "Zentail mi lakah na hmin cu ka phuang ding ih, Nangmah thangṭhatnak cu hla in ka sak ding," tiah a timi kha a kim a si. 10 Cuih tlunah, "Zentail mi nannih tla, Pathian ih miphun pawl thawn nan lungawi tlang uh," a ti. 11 Cule, "Zentail mi nan zatein Bawipa cu thangṭhat uh; Mi hmuahhmuah in Amah cu lawm uh," timi le 12 Profet Isaiah in, "Jesse ih tefa pakhat a ra dingih Zentail mi pawl uktu-ah a cang ding; Annih in amah ah ruahsannak an nei ding," a ti vekin a si. 13 Ruahsannak hram a si mi Pathian in, amah nan zumnak thawngin, lungawinak le daihnak phunkim thawn lo khatter sehla, cuticun Thlarau Thianghlim in amah ih cahnak thawngin ruahsannak cu nan hnenah lo burh hram seh. 14 Ka u le ka nau tla, nannih cu mi ṭhazet nan si ih thu nan theizet ih pakhat le pakhat nan zirh aw theizet, ti kha keimah hrimhrim in fiangtein ka thei. 15 Sikhalsehla hi ca ka lo kuatmi sungah ka lo theihter sal duh mi cu thu ṭhenkhat ahcun ralṭhazetin ka ngan a si. Ka ralṭhatnak cu Pathian in Zentail mi pawl hrangih hnaṭuan dingah covo pekmi, 16 Khrih riantu ka si ruangah a si. Zentail mi pawl cu Pathian hnenah cotlakmi raithawinak bangtuk an sinak dingah le Thlarau Thianghlim thawngin Pathian hnenih hlanmi an sinak dingah Pathian hnen in a rami Thuthangṭha ka phuan tikah hin puithiam bangtuk in ka ṭuan a si. 17 Khrih Jesuh thawn kan pehzom awknak thawngin Pathian hna ka ṭuanmi ah hmaiṭhatnak ka nei. 18 Zentail mi pawl Pathian thu an thlunnak dingah Khrih in i hmang ih hna a ṭuanmi lawng hi ralṭhazetin ka sim ding. Hi bangtuk a tuahmi hi ṭongkam in siseh tuahnak in siseh, 19 hmuhsaknak thilmak tuahnak le khawruahhar a cahnak huham in siseh, Pathian Thlarau ih cahnak huham in siseh a tuahmi a si. Cuti cun Jerusalem ihsi thokin Illirikum tiang khual ka tlawnnak ah hin Khrih ih Thuthang ṭha cu tlamtling zetin ka phuang. 20 Ka tumtah ringringmi cu Khrih an theih dah lonak hmunah Thuthangṭha phuan kha a si, ziangahtile midang in a hram an rak bun cianak hmunah khan va sak beet ding cu ka duh lo. 21 Ca Thianghlim in, "Amah ih thu a thei dah lo pawl in an hmu ding, A thei dah lo pawl in an thei ding," a ti bangtuk in a si. 22 Curuangah lo tlawng suak thei loin voi tampi dawntu ka neih ṭheunak cu a si. 23 Sikhalsehla atu cun hi ram hrawngih ka hnaṭuan ka ṭheh zo ruangah le nanmah ra lo hmuh ding hi kum tampi sung ka duhmi a si bangtuk in, 24 tuihṭum cu nanmah lo tongsuak ding ka beiseimi a si. Spain ramih ka feh zawng ah lo tong phah ningla ka duh ih nan hnenah caan malte ka hman hnuah cutawkih fehnak khal cu in bawm leh uhla ka duh. 25 Sikhalsehla atu cu Jerusalem ah ka vung feh ding ih Pathian ih miphun pawl ka vung bawmta ding. 26 Ziangahtile Masidonia ram le Akhaia ramih a ummi kawhhran pawl in Jerusalem ih a ummi Pathian miphun farah pawl bomnak ah lungthote ih an pekmi thawhlawm a um. 27 Cutiih an pek cu anmah ih ruahthiamnak in a si; hiti ih mi an bom cu an ṭuanvo a si ve. Judah mi pawl in thlarau lam thlawsuahnak an comi kha Zentail mi an hlawm vekin Zentail mi khal in thilri lam thlawsuahnak an comi cu Judah mi pawl bomnak ah hlawm ve ding an si. 28 Hi hnaṭuan ka ṭheh ih an hrang pekmi thawhlawm kimtein an kutsungah ka ap ṭheh tikah Spain ram feh dingah ka pok ding ih cunah ka lo pal phah hai ding. 29 Nan hnen ka thlen tikah Khrih ih thlawsuahnak famkim cu ka lo sum thei ding, ti ka thei. 30 U le nau pawl, ka hrangah Pathian hnenah thla rak cam ringring ve dingah kan Bawipa Jesuh Khrih le Thlarau ih in pekmi duhdawtnak thawn ka lo forh a si. 31 Judea ramih a ummi Khrih a zum lotu pawl ih kut in harsatnak ka tonlonak dingah le Jerusalem ih ka hnaṭuan dingmi cu Pathian ih mithiang pawl hnenah cotlak si dingin thla in rak cam sak uh. 32 Cuti cun Pathian ih lungkimnak a um ahcun lungawi zetin nan hnenah ka ra thleng thei ding ih colhdamnak caan ṭha khal ka ngah ding. 33 Kan hnenah daihnak in petu Pathian cu nan zate hnenah um hram seh. Amen.
1 Kenkhria khua kawhhran ih hnaṭuantu kan farnu Fibi hi nan theihthiammi siseh ti ka duh. 2 Pathian zumtu pawl ih tuah dingmi a si vekin Bawipa ih hmin in amah cu rak cohlang uhla bomnak a ṭul ahcun rak bawm uh. Amah hi mi tampi hrangah siseh, keimah hrang khalah siseh, rualpi ṭha, mi ṭhahnem zet a si. 3 Khrih Jesuh hnaṭuannak ah ka hnaṭuanpi a si mi Prisilla le Aquila cibai ka rak buk hai. 4 Annih cu ka hrangah thih a ngamtu an si. An parah lungawinak tampi ka nei; keimah lawng hman ka si lo, Zentail kawhhran pawl an zatein an parah an lung a awi ngaingai a si. 5 An innih a khawm awmi kawhhran khal cibai ka rak buk a si. Asia ram sungih Khrih a zum hmaisa biktu ka duhdawtmi ka rualpi Epenetas khal cibai ka rak buk. 6 Nan hrangah hnaṭuan khung zetzet a ṭuantu Mari khal cibai ka buk. 7 Ka Judah phunpi le keimah thawn thawng a tla vemi Andronikas le Junias khal cibai ka rak buk. Annih cu dungthluntu pawl ih theihthiam zetmi an si ih keimah hlanah Khristian an rak cang zo. 8 Bawipa ih pawlkomnak sungah ka rualpi ṭha a si mi Ampliatas cibai ka rak buk. 9 Khrih hrang hnaṭuannak ah kan ṭuanpi Urbanas khal kha cibai ka rak buk; ka rualpi ṭha Stakis tla cibai ka rak buk. 10 Khrih zumnak ah rintlak ngaingai a si mi Apelles kha cibai ka buk. Aritobulas innsang ih ummi pawl cibai ka rak buk. 11 Ka Judah phunpi, Herodian le Narsissas innsang ih a ummi Khristian unau pawl khal cibai ka rak buk a si. 12 Bawipa hrang ih hnaṭuannak ah hna a ṭuantu Traifena le Traifosa kha cibai ka buk; cule Bawipa hrangah ih tamzet hna a ṭuantu ka rualpi ṭha Persis khal cibai ka rak buk. 13 Bawipa hrang ih hnaṭuannak ah ṭha cuangih hna a ṭuantu Rufus le a fapa ngaingai vekin i zohṭhatu Rufus ih nu khal cibai ka rak buk. 14 Asinkhritas, Flegon, Hermes, Patrobas, Hermas le an hnenih Khristian unau dangdang pawl khal cibai ka rak buk. 15 Filologas le Julia, Nereus le a farnu, Olimpas le anmah thawn a ummi Pathian ih minung pawl khal cibai ka rak buk a si. 16 Pakhat le pakhat hnamnak thianghlim thawn cibai buk aw uh. Khrih ih kawhhran hmuahhmuah in cibai an lo buk a si. 17 U le nau pawl, ṭhenṭhek awknak a suahpitu le zumnak a buaitertu le nan pom ciami zirhnak a dodaltu pawl kha ralring uh tiah ka lo forh. Annih cu pawl hlah uh. 18 Cubangtuk thil a tuahtu pawl cu kan Bawipa Khrih hrang hnaṭuantu an si lo; an pumpi hrang ṭuantu an si. An ṭong naal le an mi porhthiamnak in zaaraan pawl cu an bum ṭheh a si. 19 Mi hmuahhmuah in Thuthang ṭha thu ahcun rinsan tlak nan si kha an thei ṭheh zo; curuangah keimah khal nan parah ka lung a awi. A ṭhami thu ahcun mifim si uhla a ṭha lomi ahcun ziang thei lo si uh ti ka lo duh. 20 Cule kan daihnak a si mi Pathian in nan ke hnuai ah Satan cu a rialdip cing ding a si. Kan Bawipa Jesuh ih zaangfahnak cu nan hnenah um ko seh. 21 Ka hnaṭuanpi Timote in cibai a lo buk. Cubangtuk ṭhiamṭhiam kan Judah phunpi, Lusias, Jason le Sosipater in cibai an lo buk a si. 22 Hi ca a ngantu keimah Tertius in Bawipa ih sung in cibai buknak ka lo kuat ve. 23 Kawhhran pumkhawmnak ih a inn an hman ṭheumi ka innteek pa Gaius in cibai a lo buk ve. Hi khawpi tangka kiltu Erastas le kan unau Quartes in cibai an lo buk. 25 Pathian hnenah thangṭhat sunlawinak pe uhsi. Amah cu Jesuh Khrih ih Thuthang ṭha ka aupimi le a liam ciami san tampi sungah thuh in a um na'n atu-ah phuan a si mi thuthuk thawngin nan zumnak sungah hngetkhoh zetih a lo dintertu a si. 26 Atu-ah cun cuih thutak cu profet pawl ih cangannak thawngin mi hmuahhmuah ih hmaiah langter a si zo; cule kumkhua a nungmi Pathian ih thupekmi thawngin cuih thu cu zozo khal in an zum ih an thlunnak dingah miphun hmuahhmuah hnenah phuan a si zo. 27 Thu hmuahhmuah ah a fim ih amah lawng Pathian a si mi hnenah Jesuh Khrih thawngih thangṭhatnak cu a kumkhua in um hram seh, Amen.
1 Khrih Jesuh ih a tirhthlah si dingah Pathian lungkimnak in kawhmi keimah Paul le kan unau Sosthenes in, 2 Pathian mithiang si dingih kawhmi le Khrih Jesuh thawn nan pehzom awknak thawngin amah ih ta a si mi, Korin khua ih um Pathian kawhhran le an Bawipa le kan Bawipa Jesuh Khrih a biatu hmunkipih a ummi hnenah ca kan lo kuat a si. 3 Pathian kan Pa le Bawipa Jesuh Khrih in zaangfahnak le daihnak lo pe hram seh. 4 Khrih Jesuh thawngin zaangfahnak cu nan hnenih pek a si zo ruangah ka Pathian cu ka thangṭhat ringring. 5 Ziangahtile Khrih thawn nan pehzom awknak thawngin ziang hmuahhmuah ah tlamtling in pek nan si zo, thusim thiam le theihnak khalah nan famkim ih, 6 Khrih thuhla kan phuanmi khal nan sungah a hngetkhoh zo ti a lang a si. 7 A lang dingmi Jesuh Khrih kan Bawipa nan hngah laiah hin nan ngah hrih lomi thlarau lam laksawng pakhatte hman a um lo. 8 A netnak tiang Amah in a lo kilkhawi hai ding ih cuticun kan Bawipa Jesuh Khrih ih Ni ah mawh nei lo nan si ding. 9 A Fapa Jesuh Khrih kan Bawipa thawn pawlkomnak nei dingah a lo kotu Pathian cu rinsantlak a si. 10 Ka u le ka nau tla, nan lakih ṭhenṭheknak a um lonak dingah nan thinlung rual awtein um hram uh tiah kan Bawipa Jesuh Khrih hmin in ka lo dil a si. Rualrem zetin, thinlung khat le tumtahnak bangrep in um uh. 11 Ka u le ka nau tla, nan lakah tawh awknak a um ringring ti kha Khlawi ih sungkhat pawl in fiangtein in sim. 12 Ka sim duhmi cu, mi hrekkhat in, "Kannih cu Paul ih lamṭang kan si," nan ti; mi hrekkhat in, "Kannih cu Apollos ih lamṭang kan si," nan ti; mi hrekkhat in, "Kannih cu Piter ih lamṭang kan si," nan ti ih mi hrekkhat in, "Kannih cu Khrih ih lamṭang kan si," tiah dangdang ciarih nan timi hi a si. 13 Khrih cu a ṭhenṭhek awmi a si maw? Nan hrangah thinglamtah parih an thahmi cu Paul maw a si? Paul hmin in maw baptisma nan lak? 14 Nanmah lakah Khrispas le Kaias siarlo zohman baptisma ka pek hai lo ruangah Pathian ka lawm. 15 Curuangah zohman in, "Kei cu Paul hmin in baptisma ka la," nan ti thei lo ding. 16 (Asi, Stefanas le a innsang baptisma ka pe ngai; midang ka pek cu ka thei lo.) 17 Khrih in midang baptisma pe dingah i thlah lo, Thuthang ṭha sim dingah i thlah ih cutiih ka sim tikah milai fimnak ṭongkam hmang in a si lo; ziangahtile leilung fimnak ṭongkam hmang tahratin ka sim ahcun Khrih thinglamtah parih a thihnak hi hmual a nei lo pang ding. 18 Thinglamtah parih Khrih thihnak thu hi a hloral cuahcomi pawl hrangah cun aat-hna meen a si; sikhalsehla rundam lai reromi kannih hrangah cun Pathian ih cahnak hmual a si. 19 Ca Thianghlim in, "Mifim pawl ih fimnak cu ka siatsuah ding ih, Mithiam pawl ih thiamnak cu ka hnong ding," a ti. 20 Curuangah mifim pawl khuiah so an um? Mithiam pawl khuiah so an um? Leilung tlun thu-el thiam pawl khuilamah so an si? Leilung tlunih fimnak hi aat-hna a si, ti kha Pathian in a langter zo a si lo maw? 21 Minung in anmah ih fimnak in Pathian an theih thei lonak dingah amah Pathian in a fimnak in a rak tuah cia zo a si. Sikhalsehla kan phuan mi "aat-thu," an timi Thuthang ṭha hi hmang tahratin a zumtu pawl rundam dingah Pathian ih tuahmi a si. 22 Judah mi pawl in a dik le dik lo theih theinak dingah hmuhsaknak mak hmuh an duh; Grik mi pawl cun fimnak sawn in an hawl. 23 Asinain kannih cun thinglamtah ih an khenmi Khrih kan phuang ih cuih thu cu Judah mi pawl hrangah rilhbahnak a si ih Grik mi hrangah cun aat-hna a si. 24 Sikhalsehla Pathian ih a kawh ciami pawl hrangah cun Judah mi siseh Zentail mi khal sisehla, cuti kan phuan mi cu Khrih a si ih Khrih cu Pathian cahnak le Pathian fimnak a si. 25 Ziangahtile Pathian aatnak cu minung ih fimnak hnakin a fim sawn; cule Pathian ih ṭonṭaihnak cu minung ih cahnak hnakin a cak sawn. 26 Ka u le ka nau tla, Pathian in a lo kawh laiah khan ziang bangtuk minung nan rak si kha ciing ringring uh. Milai mit ih kan zoh ahcun mifim le thuneitu le hmaizah tlak cu mi malte ngaingai nan si. 27 Sikhalsehla mifim pawl ningzahter dingah leilungih mi-aa timi kha Pathian in a hril hrim a si; micak le thiltithei pawl ningzahter dingah leilungih mi ṭawnṭai timi kha Pathian in a hril hrim a si. 28 Leilung mi in thupizet ih an ruahmi kha siatsuah dingah an hmuhsuammi, an nautatmi le zianghman ih an siar lomi kha Pathian in a hril hrim a si. 29 Cuti a si ruangah Pathian hmaiah cun zohman an uang aw thei lo ding. 30 Khrih Jesuh thawn pehzom aw ih nan nunnak ahhin a hram a thoktu cu Amah Pathian a si ih Amah hnen ihsin Khrih cu kanmah ih fimnak ah a tuah a si. Khrih thawngin kannih cu Pathian thawn kan rem aw zo; Pathian ih mithiang ah kan cang zo ih a luatmi kan si zo. 31 Curuangah Ca Thianghlim in, "Zokhal a uar awtu cun Bawipa ih tuahmi lawngah uar aw seh," tiah a ti
1 Ka u le ka nau tla, nan hnenah ra in Pathian thuthup ka phuan tikah ṭongkhun le minung fimnak ka hmang lo. 2 Ziangahtile nan hnenih ka um laiah Jesuh Khrih le thinglamtah parih a thihnak siarlo thildang zianghman ngaihtuah ding ka rak tum lo. 3 Cutiin nan hnenih ka ra thlen tikah ṭawnṭaizet le ṭih le ṭhia phahin ka ra thleng; 4 ka thuzirhnak le ka thuphuannak ah nan thinlung lut dingin milai thiamnak le fimnak ṭongkam a tel lo, sikhalsehla Pathian Thlarau le a cahnak langternak lawng a si. 5 Curuangah nan zumnak cu minung fimnak parih bunmi si loin Pathian cahnak parih bunmi a si sawn. 6 Asinain thlarau lamih pitling ciami hnenah cun fimnak thu ka lo sim. Sikhalsehla cuih fimnak thu ka lo simmi cu hi leilungih fimnak a si lo, hi leilung a uktuih cahnak khal a si lo; cuih cahnak pawl cu a cem reromi cahnak lawng an si. 7 Kei ih ka phuanmi fimnak cu Pathian thuthup fimnak, milai zohman ih theih lomi, leilung seem hlan ihsin Pathian in kanmah sunlawinak dingih a rak tumtah ciami fimnak a si. 8 Hi leilung a uktu pawl zohman in cuih fimnak cu an thei lo. An rak thei sisehla sunloihmi Bawipa cu thinglamtah parah an rak that lo ding. 9 Asinain Ca Thianghlim in, "Milai zohman in an hmuh dah lomi, Zohman in an theih dah lomi, A cangthei ding tiah zohman in an ruah dah lomi, Cumi cekci cu Pathian in Amah a duhdawtu hrangah A tumtahmi a si," a ti. 10 Cuih a thuthup cu Pathian in kan hnenah a Thlarau in a phuang. Ziangtin a si tile Thlarau in ziang hmuahhmuah kha a hawlsuak ih Pathian ih tumtahmi thuk bik hman a pur ngah a si. 11 Minung hi a sungih a ummi a thlarau lawng in a thinlung sungih thu cu a thei. Cuvek thotho in Pathian Thlarau lawng in Pathian ih sung thu cu a thei a si. 12 Kan ngahmi thlarau cu leilungih thlarau a si lo; Pathian ih thlahmi Thlarau a si sawn. Pathian ih in pekmi laksawng hmuahhmuah kha kan theih theinak dingah Pathian Thlarau cu kan ngah zo a si. 13 Curuangah Thlarau a neimi pawl hnenih thlarau lam thudik kan simfiang tikah milai fimnakih zirhmi ṭongkam hmangin kan sim lo. Thlarau ih zirhmi ṭongkam kan hmang a si. 14 Thlarau minung a si lomi pawl cun Pathian Thlarau hnen ihsin a rami laksawng cu an co thei lo; a theih khal an thei thei lo. Ziangahtile cuih laksawng pawl ih sunlawizia cu thlarau thinlung lawngih theih theimi a si ih cumicu annih hrangah cun aat-hna a si. 15 Thlarau a neitu cun ziang hmuahhmuah kha a ṭhat a siat vekin an thleidang thiam; sikhalsehla amah cu zohman in an mawhthluk thei lo. 16 Ca Thianghlim in, "Bawipa ih thinlung cu zo in so a thei? Zo in so ruahnak a pe thei ding?" a ti. Sikhalsehla kannih cu Khrih thinlung neitu kan si.
1 Ka u le ka nau tla, thungai in kan ti asile nannih hnenah cun Thlarau mi pawl hnenih ka sim vek cun ka sim thei lo. Hi leilungih tisa mi bangtuk le Khristian zumnak lamih nauhakte bangtuk in nan hnenah ka sim a ṭul a si. 2 Rawl ngai nan ei thei hrih lo hrangah cawhnawi ka lo pek a si. Atu khalah rawl ngai nan ei thei hrih lo, 3 ziangahtile atu khalah tisa nun in nan nung lai. Pakhat le pakhat nan iksiik aw ih nan tawh-awk tikah hin leilung tisa ta nan si ih tisa daan in nan nung, ti kha a lang a si lo maw? 4 Nannih lakah pakhat in, "Kei cu Paul ih milai ka si," a ti ih a dang pakhat in, "Kei cu Apollos ih milai ka si," a ti ve tikah hi leilungih milai nan sinak nan langter a si lo maw? 5 Thungai ti ahcun Apollos cu zoso a si? Paul cu zoso a si? Kannih cu zumtu nan sinak dingah Pathian riantu lawng kan si. Bawipa ih ṭuanvo in pekmi kha kan ṭuan fingfing a si. 6 Kei in a ci ka tuh ih Apollos in ti a toih, asinain a ṭhantertu cu Pathian a si. 7 Thlaici a tuhtu le tidai a toihtu cu an thupi lo. A thupi bik cu Pathian a si, ziangahtile thlaikho a ṭhantertu cu Amah a si. 8 A tuhtu le tidai a toihtu cu an dan awknak a um lo; an hnaṭuanmi vekin Pathian in ṭuanman a pe hai ding. 9 Ziangahtile kannih cu Pathian hrangah hnaṭuan tlang kan si ih nannih cu Pathian hnaṭuannak loram nan si. Pathian ih inn tla nan si. 10 Pathian ih i pekmi ka covo laksawng hmang tahratin inn sak thiamzet bangtuk in innhram ka ṭoh ih midang in cuih tlunah an sak. Sikhalsehla ziangtinso kan sak ti kha zozo khal kan ralrin fingfing a ṭul a si. 11 Ziangahtile Pathian in Jesuh Khrih cu innhram thupi bik dingah a ret zo ih innhram dang ṭoh beet a theih lo. 12 Cuih innhram phunmi parih sak dingah mi hrekkhat in sui a si lole ngun a si lole lungmankhung an hmangih midang in zanthing maw, hrampi maw, a si lole fangcang kung pawl maw an hmang. 13 Cun an hnaṭuanmi fingfing kha ziangbangtuk an si ti cu Khrih Ni ah a lang leh ding. Ziangahtile cuih Ni ah an hnaṭuanmi cu meisa in a langter ding; ziangbangtuk hnaṭuan so a si ti kha meisa in a hniksak ding ih a fiangter ding. 14 Innhram phun mi parih inn sakmi kha meisa in a siatsuah thei lo a si ahcun a saktu in ṭuanman a ngah ding. 15 Sikhalsehla meisa in a kang ṭheh a si ahcun a sung ding; asinain meisa sung ihsin a luatmi vekin a nunnak cu humsuak a si ding. 16 Nannih cu Pathian biakinn nan si ih a Thlarau nan sungih a um kha nan thei lo maw? 17 Curuangah zokhal hih Pathian biakinn a siatsuahtu cu Pathian in a siatsuah ve ding. Ziangahtile Pathian biakinn cu a thianghlim ih a biakinn cu nanmah hi nan si. 18 Zokhal amah le mah bum aw hlah seh. Nanmah lakah pakhatkhat in ka fim tiah leilung daan in a ti awk a si ahcun mifim taktak si dingah mi-aa ah cang hmaisata seh. 19 Ziangahtile leilung in fimnak a timi cu Pathian mithmuh ahcun aat-hna a si. Ca Thianghlim in, "Mifim pawl cu Pathian in an fimnak lala in a awk awter," a ti. 20 Cuih tlunah Ca Thianghlim sungah, "Mifim pawl ih ruahnak cu man nei lo men a si tiah Pathian in a thei," tiah a ngan. 21 Curuangah zohman in minung ih tuahmi parah uar awknak nei hlah seh. Thungai ih ti ahcun ziang hmuahhmuah hi nan ta an si ṭheh; 22 Paul siseh, Apollos siseh, Piter siseh, hi leilung siseh, nunnak le thihnak siseh, tuihsan le hmailam san khal siseh, a zatein nan ta an si ṭheh! 23 Cule nannih cu Khrih ta nan si ih Khrih cu Pathian ta a si.
1 Kannih cu Khrih riantu, Pathian thuthup kiltu a siahhlawh-ah in ruah dingmi kan si. 2 Cubangtuk thil kiltu hrangah a thupi bik cu a bawipa ih rintlak si ding kha a si. 3 Atu-ah nanmah in siseh, mi dang in siseh, minung daan in ka thu nan ṭhencat ding ka phang lo. Keimah le keimah khal thu ka ṭhen aw lo. 4 Ka thinlung muril hi a thiang a si; sikhalsehla a thiang ka ti tikah ka sual lo tinak a si lo. Ka parih thuṭhennak a tuahtu ding ngaingai cu Bawipa a si. 5 Curuangah a tikcu a kim hlanah zohman an thu rel hlah uh. A netnak thuṭhennak cu Bawipa a rat tikah a si ding. Amah in khawthim sungih thuhmi thil pawl kha tleunak sungah a suahpi ding ih minung thinlung ih tumtahmi pawl kha a phuanglang ṭheh ding. Cutiin zozo khal Pathian hnen ihsin an co ding tlak covo thangṭhatnak an ngah ding. 6 Ka u le ka nau tla, nanmah ṭhathnemnak hrangah hi thu hmuahhmuah cu keimah le Apollos tahṭhimnak hmangin ka lo sim. Hitiih ka sim tikah, "Ngan ciami lan hlah," timi ṭongṭhimnak nan theihnak dingah a si. Zo nan si khalle mi pakhat kha uar tahratin a dang kha nan hmuhsuam lo pei. 7 Zo in so midang hnakih cuang deuh dingin an lo tuah? Nan neihmi tinkim hi Pathian pekmi an si ṭheh lo maw? Cutiin laksawng ih nan ngahmi an si ṭheh asile ziangtinso nan uar awk thei? 8 Nan duhmi hmuahhmuah nan ngah ṭheh zo maw? Nan lianzet zo maw? Siangpahrang teh nan si zo maw? Kannih cu kan si lo! Siangpahrang si taktak uhla ka va duh so! Cuticun hmun khatah kan uk tlang ding na'n! 9 Kannih tirhthlah pawl hi Pathian in nauta bikah in ret tiah ka ruat; puai zohnak hmun mizapi hmaiih thah ding tlak minung, vancungmi pawl le leilungmi hmaiah hnihsuahsainak meenih hmanmi minung kan si. 10 Kannih cu Khrih hrangah mi-aa kan si; nannih cu Khrih sungah mifim nan si! Kannih cu kan ṭawnṭai; nannih cu nan cakzet! Kannih cu hmuhsuammi kan si; nannih cu upat zetmi nan si! 11 Atu caan khal ahhin rilrawng le tihal in kan um. Kan hnipuan cu belhcopmi a si; hmunkhat ihsin hmundang ah kan tawivak; thawi le vuak kan tong; 12 Kan thitha ih daih nawn lo tiangin kan kut in hna kan ṭuan. In cam in riam tikah thlawsuah bawngmal kan sawmsak hai; hremnak kan ton tikah kan tuar cuahco ko; 13 hmuhsuamnak kan ton tikah hmurka neem in kan biak hai. Kannih cu leilungih hnawmhne tluk fang kan si; tuihsun tiang hin mi ih duh lotaak hnonmi kan si. 14 Hitiin nan hnenih ka ngan tikah nan ningzak seh ti duh ah a si lo; sikhalsehla ka duh zetmi ka faale bangtuk in nunsim ka lo duh hai. 15 Ziangahtile Khrih sungih nundaan ahcun zirhtu thawng tampi hman nei uhla pa ngaingai cu pakhat lawng nan nei a si. Thuthang ṭha nan hnenih ka phuan ruangah Khrih Jesuh thawn nan pehzomnak ahcun nan pa ka si. 16 Curuangah ka nun daan hi i thlun uh, tiah ka lo forh. 17 Cumi ruangah Timote khal nan hnenih ka rak thlahnak a si. Amah cu Bawipa sungah ka duhdawtmi le ka rinsanmi ka fapa a si. Amah in Khrih Jesuh sungih ka thlunmi nunnak lamzin le khuazakip kawhhran hmuahhmuah hnenah cutiih nunnak lamzin ka zirhmi pawl cu a lo sim ding. 18 Mi hrekkhat cun, "Kan hnenah a ra nawn lo ding," tiah in ruat ih nan puarthau ciamco. 19 Bawipa ih lungkimnak a si ahcun ka ra thleng cing ding ih hi mipuarthau pawl hin huham an neihzia an hmurka ih an phuanmi lawng si loin ziangbangtuk so an tuah thei taktakmi a si ti kha keimah rori in ka ra hmu suak ding. 20 Ziangahtile Pathian Uknak cu ṭongkam men a si lo, cahnak huham a si. 21 Cuhrangah khuimi so nan hril? Fungfek thawn ka ra ding maw, a si lole duhdawtnak le nemnak thinlung thawn so ka rat ding?
1 Khawvel mi pawl hmanih ningzakza an timi nupa sualnak le hurnak cu nan lakah a um an ti ka thei. Mi pakhat tla cu a nu-ei thawn an pawl-aw tiah in sim. 2 Nanmah cu nan va puarthau hrih lai sapbai! Riahsia in um ding nan si sawn lo maw? Cubangtuk milai cu nan bu sung ihsin nan suah dingmi a si. 3 Ka taksa pumpi cu lamhla ah ka um na'n ka thinlung cu nan hnenah a um ih cubangtuk thilsual a tuahtu parah cun, nanmah lakih a um taktakmi vekin Bawipa Jesuh hmin in thu ka ṭhen zo a si. 4 Hmun khatih nan pumkhawm tikah kan hnenih a ummi kan Bawipa Jesuh ih huham thawngin nan lakah ka thinlung in ka lo umpi ve ih, 5 hi pa cu Bawipa ih Ni ah a thlarau rundam suak a si theinak dingah a pumsa cu siatsuah si dingin Satan hnenah pe uh. 6 Mihngal nan si hi a dik hrimhrim lo. Òongṭhimnak ih, "Thilnu malte in sanghlom zate in a thoter ṭheh," ti nan thei dah a si lo maw? 7 A thiangfaimi si dingah nan lakih a ummi thilnu hlun sualnak cu hlon ṭheh uh. Cuticun thilnu tel loin rawh tharmi sanghlom ah nan cang ding; nannih cu thilnu tel lo sanghlom nan si ti ka thei. Kan Lantak Puai tuufa a si mi Khrih cu raithawinak ih pek a si zo ruangah kan Lantak Puai cu a thok zo a si. 8 Curuangah kan Lantak Puai cu thilnu hlun sualnak le ṭhatlonak thawn rawicih mi sanghlom thawn si loin thilnu tel lo thianhlimnak le thutak sanghlom thawn tuah uhsi. 9 Nan hnenih ka rak nganmi ca sungah nupa sualnak tuah ih mi sualral pawl thawn kom aw hlah uh, tiah ka lo sim zo. 10 Cuti ka lo ti hai tikah khawvel mi: mi sualral pawl, hamṭam pawl, rukru pawl le milem bia pawl kha kom hlah uh, ka ti duhmi a si lo. Annih pawl thawn kom awk lo ding ti a si ahcun hi leilung hi nan taansan lawlaw a ṭul ding a sisi! 11 Zokhal zumtu ti aw si ih nupa sualnak tuahtu pawl, hamṭam pawl, milem bia pawl, mi thangsiat duh pawl, zuri pawl le rukru pawl ka ti duhnak a si. Cubangtuk mi sualral pawl thawn cun rawl ei dingah a to hman to tlang hlah uh. 12 Thungai in tile a lenglam mi thuṭhensak ding cu ka hnaṭuan a si lo. A lenglam mi cu Pathian in an thu a ṭhen ding. 13 Sikhalsehla nan bu sungmi pawl cu an thu nan ṭhensak ding a si lo maw? Ca Thianghlim in, "Nan bu sung ihsin mi sualral pawl cu suah uh," a ti.
1 Nannih Khristian pakhat le pakhat nan tawh awk tikah nan thu cu Pathian minung pawl relter loin ziangtinso khawvel minung thuṭhentu hmaiah nan fehpi ngam? 2 Pathian mi mithiang pawl in leilungih thu hi an ṭhen leh ding tihi nan thei lo maw? Cutiin leilung thuṭhentu nan si ding ruangah cun nanmah lakih thunepnawi, thuterek tete cu nanmahte in nan relcat thei lo maw? 3 Vancungmi pawl hman an thu kan ṭhen leh ding tihi nan thei lo maw si? Cuti a si ruangah hi leilung kan nunnak ih thu pawl cu kan rel thei a ṭul a si. 4 Cubangtuk thu a um tikah kawhhran sung thuhla zianghman a thei lotu hnenah maw, "Kan thu in rel sak uh," tiah nan va suahpi ding? 5 Nan hrangah ningzakza a va si so! Nanmah sungah nan thu a ṭhen theitu ding mifim thuruat thiam, Khristian unau thurel saktu dingah pakhatte tal an um lo maw? 6 Khristian pakhat le pakhat thukhiing aw in zum lotu pawl ih hmaiah thuṭhen sak dingin suak ding nan si lo! 7 Nan karlakah thu nan neih ringring ruangah nan tlasamzet ti cu a langfiang a si. A dik lo zetin tuahsiatmi hman si uh cila cumi cu nan hrangah a ṭha sawn lo ding maw? Nan thil an lo lon ṭheh hmanah nan hrangah a ṭha sawn lo ding maw? 8 Cuti lamlam si loin nannih cu nanmah pakhat le pakhat zumtu unau nan si khalle nan tisiat aw ih pakhat le pakhat nan thil nan long aw. 9 Miṭha lo cun Pathian Uknak a co thei lo ding, ti cu fiang zetin nan thei ko. Nanmah le nanmah bum aw rero hlah uh: nupa sualnak a tuahtu, milem a biatu, ṭaangṭawm sualnak a tuahtu, mipa hlawhhlang ṭuantu, nunau le nunau, mipa le mipa sualnak a tuahtu, 10 rukru, hamṭam pawl, zuri le mi thangsiattu pawl le suamhmang pawl, cubangtuk pawl cu Pathian Uknak an co thei lo ding. 11 Mi hrekkhat cu cubangtuk minung nan rak si. Sikhalsehla nannih cu sualnak ihsin thiantermi nan si zo; Pathian hnenih apmi nan si zo; Bawipa Jesuh Khrih le kan Pathian ih Thlarau thawngin Pathian thawn remtermi nan si zo. 12 Mihrek in, "Ziang hmuahhmuah tuah thei a si," nan ti. Asi, tuah thei a si; sikhalsehla ziang hmuahhmuah kha nan hrangah a ṭha lo. Kei khal in, "Ziang hmuahhmuah tuah a thiang ko," ka ti ve ding; sikhalsehla ziangih sal hmanah ka pe aw duh lo ding. 13 Mihrek in, "Rawl cu pumpi hrangah a si ih pumpi cu rawl hrangah a si," nan ti; a dikzet. Sikhalsehla a pahnih in Pathian in a cemter ding. Nan ruangpum cu nupa sual tuahnak ah hman ding a si lo, Bawipa ih hnaṭuannak hrangah hman ding a si sawn; Bawipa khal cu ruangpum hrangah a si. 14 Pathian in Bawipa cu thihnak ihsin a thoter zo ih kannih khal a cahnak huham in in thoter ve ding. 15 Nan ruangpum hi Khrih ih ruangpum taksa ṭhen a si ti nan thei lo maw? Khrih ih taksa ṭhen cu la tahratin hlawhhlang ih taksa ṭhen ah kan tuah ding maw si? Tuah lamlam hlah! 16 Asilole mi pakhat in hlawhhlangnu thawn an kom awk tikah cu nu thawn pum khatah an cang ti nan thei lo maw? Ca Thianghlim in, "An pahnih in taksa khatah an cang ding," tiah fiangtein a sim. 17 Asinain Bawipa thawn a peh awmi cu thlarau lamin Bawipa thawn pum khat an si. 18 Nu le pa sualnak kha hrial uh. Sualnak dangdang cun milai taksa hi a siatsuah tuk lo; sikhalsehla nu le pa sualnak a tuahtu cun amah ih taksa par hrimhrim ah sualnak a tuah a si. 19 Nan ruangpum cu Thlarau Thianghlim biakinn a si ti nan thei lo maw? Cuih Thlarau cu nan sungah a um ih Pathian ih pekmi a si. Nannih cu nanmah ih ta nan si lo, Pathian ta nan si. 20 Man pek ih leimi nan si. Curuangah nan taksa cu Pathian sunlawinak ah hmang uh.
1 Atu cu ca thawn in rak sutmi thu ka sim ding. Mipa cu nupi ṭhi loin a um le a ṭha. 2 Asinain nupa sualnak a tam ruangah mipa in amah ih nupi lawng nei sehla, nunau khal in amah ih pasal lawng nei seh. 3 Mipa in pasal a sinak ṭuanvo cu kimter sehla nunau khal in nupi a sinak ṭuanvo cu kimter ve seh; an pahnih in an ṭulnak fingfingah diriamter ton-aw hai seh. 4 Nupi in amah ih taksa ruangpi hi a uk lo, a pasal in a uk; cuvek thothoin pasal in amah ih taksa ruangpi hi a uk lo, a nupi in a uk a si. 5 Caan tawite sung thlacamnak ka duh tiah nan lung a kim tlaang hmasa ti dah lo ahcun khat le khat nan duh hiarnak kha el aw hlah uh. Cu ṭheh hnuah nupa in um sal uh. Cuti a si lole suup awk thei lo ruangah Satan sual thlemnak sungah nan tla pang ding. 6 Hitiin ka ti tikah thukham ka lo pek hai a si lo, nanmah ruah ah ka timi a si. 7 Thungai ih ti ahcun nan zatein keimah vek hin um uhla ka duh; sikhalsehla Pathian hnen ihsin kan ngahmi laksawng cu an dang aw fingfing a si. 8 Cule atu cu nupi le pasal nei hrih lo le nuhmei pahmei pawl hnenah ka sim duhmi cu: keimah vek hin nanmah lawngte in hmei uhla ka duh. 9 Sikhalsehla nan duhnak nan suup thei lo ahcun nupi pasal nei ko uh: nupi pasal neih cu taksa hiarnak thawn um ringring hnakin a ṭha sawn. 10 Nupi pasal a neitu pawl hnenah keimah ih thupekmi si loin Bawipa ih thukham ka lo pek hai: nupi in a pasal kha a taan lo pei. 11 A taan asile amah lawngin hmei seh; cutiin a si lole a pasal thawn rem-aw sal seh. Cule pasal in a nupi maak hlah seh. 12 A dang pawl hnenah (Bawipa ih thupekmi si loin keimah ih timi) ka sim duhmi cu: Khristian in Pathian zum lo nupi a ṭhit ih cuih a nupi cun amah thawn umtlang ding a duh ko a si ahcun maak hlah seh. 13 Cule Khristian nunau pakhat in Pathian zum lo pasal a nei ih cuih a pasal in amah thawn umtlang ding a duh ko a si ahcun a taan lo pei. 14 Ziangahtile a nupi thawn an kom awk ruangah cuih Pathian thei lo pasal cu Pathian hnenah cotlakmi ah a cang; cuvek thotho in Khristian pasal thawn an pehzom awk ruangah Pathian thei lo nupi cu Pathian hnenah cotlakmi ah a cang. Cutiin si lo sehla an faale pawl cu khawvel faale ah an cang ṭheh ding; sikhalsehla atu-ah cun Pathian cotlakmi an si. 15 Cule Pathian zum lo nupi maw pasal maw in Khristian nupi maw pasal maw kha a ṭhen duh a si ahcun ṭhen-aw ko hai seh. Cuvek ahcun Khristian nupi maw pasal maw cu a luat, kham ding zianghman a um lo. Remte ih um dingah Pathian in a lo ko a si. 16 Khristian nunau, ka pasal ka runsuak thei hrimhrim lo ding tiah ziangtinso na ti thei? Khristian mipa, ka nupi ka runsuak thei hrimhrim lo ding, tiah ziangtinso na ti thei? 17 Zokhal Pathian laksawng nan ngahmi vekin le a lo kawh laiih nan sidaan vekin um ko uh. Cubangtuk in kawhhran dangdang khal ka zirh. 18 Pathian kawhnak kha serhtanmi pa in a pom a si ahcun a serhtannak hmaphe kha hlo dingin ngaihtuah duh hlah seh. Pathian kawhnak kha serhtan lomi pa in a pom a si ahcun a serh kha tan duh hlah seh. 19 Ziangahtile serhtan le tan lo kha a thupi nawn lo; a thupimi cu Pathian thukham thlun kha a si. 20 Zozo khal Pathian kawhnak nan rak cohlan laiih nan sidaan vek khan um ko uh. 21 Pathian ih a lo kawh laiah sal nan si maw? Nan va si taak khalle poisa duh hlah uh! Asinain miluat sinak caan ṭha nan ngah ahcun luat tum ve mai uh! 22 Ziangahtile Bawipa ih kawhmi sal cu Bawipa ih miluat a si. Cuvek thotho in miluat cia Khrih ih a kawhmi cu Khrih sal a si. 23 Man pekin Pathian ih leimi nan si; curuangah milai ih salah cun cang nawn hlah uh. 24 Ka u le ka nau tla, Pathian in a lo kawh laiih nan umdaan vek thotho in Pathian thawn pawlkomnak sungah um ko uh. 25 Nupi pasal a nei hrih lomi pawl thu-ah cakuat in in sutmi thu-ah cun Bawipa ih thupekmi ka nei lo; asinain Bawipa ih zaangfahnak thawngin rinsantlak a si mi keimah in ka pumpak ruahmi ka lo sim hai. 26 Atuih harsat caan ruah tikah hin mipa cu tuihhlan a um keel vekin um sehla a ṭha tiah ka ruat. 27 Nupi na nei zo maw? Na nei zo asile maak tum hlah. Nupi nei hrih lo na si maw? Na si le nupi hawl duh hlah. 28 Sikhalsehla nupi na nei a si ahcun na sual lo; fala khal in pasal a neih le sualnak tuah a si lo. Asinain nupi pasal nei pawl ih nitin an ton mi phurrit ihsin nan luat ding ka duh a si. 29 Ka u le ka nau tla, ka sim duhmi cu hihi a si: caan a rei nawn lo ding ruangah atu ihsi thokin nupi nei pawl in a nei lo vekin nung hai seh; 30 a ṭapmi pawl in riahsia lo vekin um hai seh; a hni pawl in lungawi lo vekin um hai seh; thil lei pawl in an leimi kha anmah ih ta si lo vekin um hai seh; 31 leilung thilri a ngaihtuahtu pawl in leilung thilri lawng a buaipi lo vekin um hai seh. Ziangahtile hi leilung hi atu vek a si ahcun rei a awh nawn lo ding. 32 Thinlung donharnak in luat uh ti ka lo duhsak a si. Nupi nei lo pa cun Bawipa ih lungawinak lawng kha a tummi a si ruangah Bawipa ih hnaṭuannak lawng kha a ngaihtuah. 33 Asinain nupi nei pa cun a nupi lungawinak kha a duh ruangah leilung thilri thu kha a ngaihtuah; 34 cuticun amah cu kap hnih ah a dir-aw a si. Pasal nei lo nunau, a si lole fala pawl cun Bawipa ih hnenah an taksa le an thinlung pek an duh ruangah an thinlung taktein Bawipa ih hna cu an ṭuan; asinain pasal nei nunau cun a pasal lungawiter a duh ruangah leilung thilri ah a buaipi a si. 35 Hitiih ka tinak cu nan hrangih ṭhathnemnak ka duh ruangah a si. Kham ka lo duh ciamco hai ruangah a si lo. A ṭhami le a mawimi nan tuah dingah ka duh ih zianghman suupmi nei loin Bawipa ih hnaṭuannak ah nan ziangzongza pe thluh uhla ka duh a si. 36 Òhi aw dingin a ham aw ciami fala kha kan ṭhi aw sal lo ding, a titu-ih thu ahcun hiti in um hai seh: mipa in a fala parah zoh rem loin ka um, tiah a ruat aw ih a taksa duhnak kha a cah tuk ruangah kan ṭhi aw sawn pei tiah a ruah a si ahcun a duh vek cun ṭhi-aw ko hai seh. Sualnak a si lo. 37 Sikhalsehla mipa in zohmanih hneek loin, a ruat ciamciam hnuah ṭhi lo dingin a thinlung a ṭhen ngah ih a duhnak thinlung ṭhatein a uk aw thei ih a tuah dingmi le a thlun dingmi pawl ṭhatein a ruahcat ngah a si ahcun a fala cu ṭhi loin a um le a ṭha ko. 38 Curuangah nupi a ṭhitu in thil ṭha a tuah; asinain a ṭhi lotu in thil ṭha sinsin a tuah a si. 39 Pasal nei nunau cu a pasal a dam sungah cun a luat lo. Asinain a pasal a thih a si ahcun a duhmi pasal nei dingah miluat a si; sikhalsehla Bawipa ih hmin lawngin tuah ding a si. 40 Hi khal ahhin amah lawngte in um sehla a nuam deuh ding tiah ka ruat; hiti in ka ti tikah Pathian Thlarau ka nei ve tiah ka ruat aw.
1 Milem hnenih pekmi tirawl thuhla ca in kuatmi ah: zokhal in, "Kan thei ciar a si," an ti ṭheu bangin kan thei fingfing ngai a si. Sikhalsehla cubangtuk theihnak cun mi a puarthauter ih duhdawtnak cun mi a tungding a si. 2 Ka thei ve ko, a titu poh in a theih dingmi zat in a thei dah lo. 3 Asinain Pathian a duhtu cu Pathian in a thei a si. 4 Milem hnenih hlanmi rawl ei le ei lo thu-ah cun hiti in ka ruat: milem cu a um taktak lomi thil pakhat ai-awh ih retmi a si; cule Pathian cu pakhat lawng a um, ti kan thei. 5 Van ah siseh leilungah siseh, "khuavang pawl," va um hman hai sehla, cule "khawzing," tampi le "bawi," tampi khal um ko hman hai sehla, 6 kannih hrangah cun ziang hmuahhmuah semsuahtu le kan nunsanmi pa Pathian pakhat lawng a um; cule Bawipa pakhat Jesuh Khrih lawng a um ih Amah ih ruangah ziang hmuahhmuah seemsuah a si ih Amah ih zaarah a nungmi kan si. 7 Sikhalsehla hi thudik hi mi hmuahhmuah in an thei lo. Mi hrekkhat cu milem thawn an ciah awk tuk ruangah tuihsun ni tiangah hin milem hnenih hlanmi rawl an ei tikah cuih rawl cu milem ta a si, tiah an zum lai a si. An sia le ṭha thleidannak thinlung cu a derdai lai hrih ruangah cuih ti le rawl cun in borhhlawhter tiin an ruat. 8 Ti le rawl in Pathian thawn kan pehzom awknak cu a ṭhatter cuang ngai lo ding. Kan ei lo khalle kan sunnak a um cuang lo; kan ei khalle kan hlawkmi a um cuang lo. 9 Sikhalsehla ralring uh: miluat nan sinak kha zumnak lamih a derdaimi pawl sualnak sungih an bahnak ah cangter hlah uh. 10 Theihnak a neitu nannih in milem biaknak hmunih rawl nan ei kha sia le ṭha thleidannak a derdai hrihmi pakhat in a lo hmu tibang sehla, cupa cu milem hnenih hlanmi rawl ei a poi lo tiih a forhtuah a cang ding a si lo maw? 11 Cutiin cuih na theihnak cun zumnak ih a derdai hrihmi, Khrih ih a nunnak a pek sanmi na unau kha a hloralter ding! 12 Cuticun a derdaimi an siaṭha thleidannak nan siatter ruangah le Khristian unau parih nan sual ruangah Khrih parah sualnak nan tuah a si. 13 Cuti a si hrangah rawl ka eimi in ka unau a sualter a si ahcun cuih ka unau cu sualnak sungih ka tlakter lonak dingah ziangtik hmanah cuvek rawl cu ka ei nawn lo ding.
1 Miluat ka si lo maw? Tirhthlahmi ka si lo maw? Kan Bawipa Jesuh ka hmu zo a si lo maw? Cule nannih tla cu Bawipa ih hrang ka hnaṭuanmi ih rah nan si lo maw? 2 Midang in tirhthlah ih in ruah lo hmanah nannih cun in ruat, ziangahtile Bawipa thawn nan pehzom awk ruangah tirhthlah ka sinak kha nemhngettu nan si. 3 Midang in in simsiat tikah hiti in ka ṭang ṭheu: 4 Kan hnaṭuanmi hrangah hin ti le rawl hlawh tlak kan si ve lo maw? 5 Tirhthlah dang pawl, Bawipa ih naule pawl le Piter ih tuahmi thlunin an nupi pawl an hruai vivo vekin ka khualtlawnnak ah kei khal in zumtu nupi hruai theinak thu ka nei ve lo maw si? 6 Asilole Barnabas le keimah lawng maw pumcawmnak ih hnaṭuan ciamco ṭul kan si? 7 Zoso mahih paisa hmangin ralkap a ṭuan dah? Lothlo pa in a lo sung ihsin a suakmi sabit kha ei loin a um dah maw? Tuukhal pa in a tuuhnawi kha in loin a um dah maw? 8 Nitin kan nunnak ih kan tonmi lawng ihsin tahṭhimnak a lak theih ti hlah uh. Daan khal in hiti thotho in a sim. 9 Moses Daan sungah, "Fang a ciil rerotu cawcang cu a hmur ṭem hlah," ti a um a si. Hiti a um tikah Pathian hi cawcang ih zawn a ruat a si maw? Asilole kanmah zawnruat ih a rak timi so? 10 Asi, a sim sanmi cu kanmah hi kan si. Lei lettu siseh, fang attu siseh, fangcang covo nei ve ding ruatin an ṭuan fingfing. 11 Nanmah lakah kannih in thlarau thlaici kan vorh. Thilri lamin comi kan neih ve tikah hin a tamtuk tiah nan ruat maw si? 12 Midang pawl in nan hnen ihsin hibangtuk ngah ding an beisei a si ahcun kannih cun tam deuh in beisei ding kan si sawn lo maw? Sikhalsehla cutiin kan lo ti loih tlunah Khrih ih Thuthang ṭha hi khamtu a nei pang ding ti phan ah ziang hmuahhmuah cu a tuarin kan tuar lam sawn a si. 13 Nanmah khal in Biakinn ih hnaṭuantu pawl cun Biakinn ihsin rawl an ngah ih biakṭheng ih thawinak a petu pawl khal in covo an nei, ti nan thei ṭheh ko. 14 Cuvek thotho in thuthang a phuangtu pawl khal an thuthang phuannak ihsin an pumcawmnak ngah hai seh, ti cu Bawipa ih thupekmi a si. 15 Sikhalsehla atu tiang cu hibangtuk ka co theimi pawl hi ka la duh lem lo; hiti ih ca ka ngan khal hi ka co theimi co duh ah a si lo. Cutiih ka tuah ding hnak cun thih ka duh sawn. A dik zawng ih ka uan awknak hi zohman in thulolak ih an canter ding cu ka duh lo. 16 Thuthang ṭha ka phuan ruangah hin uan awk theinak ka nei ka ti lo. Ziangahtile phuutmi ka sisi! Thuthang ṭha phuang loih ka um ahcun ka hmakhua a pit a si. 17 Ka hnaṭuanmi hi keimah duhih ka hrilmi sisehla ṭuanman ngah ding ka ruat meen ding; sikhalsehla atu cu ka ṭuanvo ih retmi a si, ziangahtile Pathian in ka hnenih i pekmi hnaṭuan a si. 18 Ziang so ṭuanman comi le ngahmi ka neih? Ka ṭuanman comi cu a man la loin Thuthang ṭha ka phuan theimi le hlawhman la loih Thuthang ṭha hrangih ka ṭuanmi hi a si sawn. 19 Kei cu miluat ka si; zo ih sal hman ka si lo. Sikhalsehla mi a tam thei tawkih hruai ngah dingah mi hmuahhmuah ih sal ah ka cang. 20 Judah mi pawl lakih hna ka ṭuan tikah Judah mi hruai ngah dingah Judah mi vekin ka um; keimah cu Moses Daan hnuai ah ka um nawn lo na'n Daan hnuai ih a ummi pawl hruai ngah dingah Daan hnuai ih a nung vekin ka um. 21 Cubangtuk ṭhiamṭhiam in Zentail mi pawl lakih hna ka ṭuan tikah Zentail mi pawl hruai ngah dingah Judah Daan thlun loin Zentail mi pawl vekin ka um. Hitiih ka um tikah Pathian daan ka thlun lo, tinak a si lo; Khrih ih daan hnuai ah ka um a si. 22 Zumnak a derdaimi pawl lakah cun anmah hruai ngah dingah zumnak a derdaimi vekin ka nung. Cuticun ziangti kongzawng a va si khalle anmah ka hruai ngah theinak ding a si ahcun mikip hnenah ziangkim ah ka cang vivo. 23 Hi hmuahhmuah hi Thuthang ṭha hrangih ka tuahmi a si ih a thlawsuahnak kha ṭawm ve dingin ka duhmi a si. 24 Tlan zuamnak ah mi tampi an tel ṭheu na'n pakhat lawngin tlan zuamman a ngah ti cu nan theih ṭhehmi a si. Curuangah zuamman ngah suak dingin tlan uh. 25 Leh zuamnak ih a teltu hmuahhmuah in an zir laiah cun daan fekzet an thlun ih an taksa an sawizoi. Cutiih an zuam rero cu a vuai theimi pangpar kual lukhuh men ngah duh ah a si. Sikhalsehla kannih cu a vuai thei lomi pangpar lukhum ngah duh ah daan fektein kan thlun ih kan sawizoi aw ve. 26 Curuangah hmuitin thleng suak dingin ka tlan ih thli lak a thong meentu pa vek ka si lo. 27 Leh zuamnak hmunah tel ciar uh tiah midang ka sawm rero hnuah keimah riangri hnonmi ka si pang ding, ti phan ah ka taksa cu ka hrem ih ka uk a si.
1 Ka u le ka nau tla, Moses a thluntu kan pupa pawl parah ziang a thleng, ti kha ciing ringring uh, ti ka lo duh sak. Annih cu mero in a hum hai ih an zatein Tipi Sen an tansuak. 2 Moses thluntu an si bangtuk in mero sung le tipi sungah baptisma la in an um. 3 An zatein thlarau rawl phunkhat an ei ih, 4 an zatein thlarau ti phunkhat an in. An hnenih a tel ringringmi thlarau lungpi ihsin tidai an in ih cuih lungpi cu Khrih a si. 5 Cutiin sihmansehla mi tam sawn cun Pathian ih lung an awiter lo ruangah an ruak pawl cu nelrawn ramṭhing ah ṭhekdarh ṭhehmi ah an cang. 6 Hi hmuahhmuah hi kan hrangih zohṭhim dingah an si: Anmah bangtuk in thil ṭha lo duhih kan um ve lonak dingah le, 7 mihrek khat in milem an biak bangtuk ih bia ve lo dingah ralrinnak in petu an si. Ca Thianghlim in, "Cuih minung pawl cu zu le sa thawn an laam ih an nuam aw ciamco," a ti. 8 Mi ṭhenkhat pawl in nupa sualnak an tuah bangin tuah ve ding kan si lo; cuti an tuah ruangah ni khat sungah minung thawngkul hluanthum an thih kha! 9 Mi ṭhenkhat in Bawipa cu an hniksak bangtuk in kannih in kan hniksak ve ding a si lo; cutiih an ti ruangah rul in a cuk that hai a si. 10 Mi ṭhenkhat an phunzai ciamco bangtuk in kannih kan phunzai ve ding a si lo; cutiih an phunzai ruangah Siatsuahtu Vancungmi in a siatsuah thluh hai a si. 11 Hi bangtuk in an parih thil a thlengmi hi midang ih zohṭhim dingah kan ralrinnak dingih nganmi an si. Ziangahtile san neta bik caanah kan um zo. 12 Mi pakhatkhat in hngetzet in ka ding tiah a ruat aw asile a tluksawn lonak dingah ralring seh. 13 Hniksaknak nan tonmi pawl hi midang hnen khalah a thleng ṭheumi sualforhnak a si ko. Sikhalsehla Pathian cun a thukammi a kimter ih nan tuar thei lo ding tiangin hniksaknak a thlenter lo ding. Hniksaknak nan ton tikah nan tuar theinak dingah thazaang a lo pe ding ih cuticun nan luatnak dingah lamzin a lo sial sak ding. 14 Curuangah duhdawtmi rualpi pawl, milem biak cu hrial uh. 15 Thu ruatthiam nan si ruangah nan hnenah hiti in ka sim. Ka sim mi hi nanmahte a thleidan thiam uh. 16 Bawipa Zanriah ih kan hman tlaangmi lungawinak khuathai hrangah thla kan cam tikah Khrih ih thisen kan ṭawm-aw a si lo maw? Cule sang kan phel tikah Khrih ih ruangpi kan ṭawm-aw a si lo maw? 17 Sanghlom pakhat ruangah kan zate hin mi tampi kan si na'n pumkhat kan si, ziangahtile sanghlom pakhat a ṭawm awmi kan si. 18 Israel mi pawl thu khi ruat hnik uh: raithawinak ih an pekmi sa a eitu poh cu Pathian hnenah biakṭheng parih a petu pawl thawn an ṭawm-aw ve tinak a si lo maw? 19 Hiti ka ti tikah hin milem siseh, milem hnenih pekmi rawl siseh, tican an nei ve sokhaw tinak a si maw? 20 Si hrimhrim hlah! Ka sim duhmi cu: khawvel mi biakṭheng parih raithawinak an pekmi khi Pathian hnenah an pek a si lo, khuavang hnenih an pekmi a si, tihi a si. Cule khuavang thawn rualpi nan si ding cu ka duh lo. 21 Bawipa ih khuathai le khuavang ih khuathai cu intlaang hlah uh. Bawipa ih cabuai le khuavang cabuai khal hmang tlaang hlah uh. 22 Bawipa in in thiik vaang seh tiah kan tok hrim ding maw? Amah hnakin kan cak sawn tiah kan ruat-aw maw? 23 Mi in, "Ziang hmuahhmuah kan tuah thei ko," an ti. Asi, an tuah thei ko; asinain ziang hmuahhmuah hi an ṭha ṭheh lo. "Ziang hmuahhmuah kan tuah thei ko," sikhalsehla ziang hmuahhmuah hi bawmtu an si ṭheh lo. 24 Zohman in mah ih ṭhathnemnak lawng ruah ding a si lo; midang ṭhathnemnak ruah ding a si sawn. 25 Sazuarnak ih an zuarmi cu ziangkhal ei ding a si ko; ka lung a nuam lo, tiah a thuhla va sut duh hlah. 26 Ziangahtile Ca Thianghlim in, "Leilung le a sungih um hmuahhmuah hi Bawipa ih ta an si," tiah a ti. 27 Pathian zum lomi in rawl ei an lo sawm ih na feh tikah na hmaiih retmi rawl cu ei ko aw; siaṭha thleidannak thinlung ruangah thu va sut hlah. 28 Sikhalsehla mi pakhatkhat in, "Hi rawl hi khawsia hnenih pekmi sokhaw," a lo ti le a lo titu zawnruat in le siaṭha thleidannak thinlung ruangah ei loin um sawn aw. 29 Sia ṭha thleidannak ka ti tikah nangmah ih thinlung a si lo; midang thinlung ka ti duhnak a si. Mi hrekkhat in, "Cutiin asile ziangah so midang ih thinlung ruahnak in ka luatnak cu a hnaihnok rero ding? 30 Pathian hnenah lungawinak pe tahrat in rawl ka ei sikhawh, lungawinak pek hnu ih rawl ka eimi ruangah ziangah so mi in in relsiat duh rero?" an ti. 31 Curuangah nan ei ah siseh, nan in ah siseh, ziangthil nan tuahmi kipah Pathian sunlawinak hrangah tuah uh. 32 Feltein nung uhla Judah mi hnenah siseh, Zentail mi hnenah siseh, Pathian kawhhran hnen khalah siseh, buainak suahter hlah uh. 33 Ka tuah vekin tuah ciar uh. Keimah ih hrangah ṭhathnemnak ruat loin mizapi ṭhathnemnak kha ka ruat ih rundamnak an ngah theinak dingah mi hmuahhmuah lungawinak tuah kha ka zuam a si.
1 Khrih nun daan ka cawn vekin nannih khal in i cawng ve uh. 2 Ka lo zirhsinmi thuzirhnak nan thlun ih keimah khal in hngilh lo ruangah ka lo lawm a si. 3 Asinain nan theih dingih ka duhmi cu: mi hmuahhmuah ih lu cu Khrih a si; nupi ih lu cu a pasal a si ih Khrih ih lu cu Pathian a si, timi hi a si. 4 Cuhrangah misenpi hmaiah thla a cam, a si lole profet bangin thu a phuan tikah a lu a khuhtu mipa cu Khrih mualpho tertu a si. 5 Sikhalsehla misenpi hmaiah lukhuh loin thla a cam, a si lole profet bangin thu a phuangtu nunau cu a pasal mualpho tertu a si ve. Cuvek nunau cu a lu met ṭhehtu nunau bangtuk a si, an dang aw lo. 6 Nunau in a lu a khuh lo ahcun a sam tan ṭheh lawlaw seh. Nunau hrangah cun lukolh le samtan ṭheh cu ningzakza a si ruangah a lu khuh sawn seh. 7 Mipa cun a lu khuh a ṭul lo, ziangahtile Pathian ih hmuihmel le sunlawinak langtertu a si. Asinain nunau cu mipa sunlawinak langtertu a si. 8 Ziangahtile mipa cu nunau ihsin tuahmi a si lo, nunau sawn kha mipa ihsin tuahmi a si. 9 Mipa cu nunau hrangih tuahmi a si lo, nunau sawn kha mipa hrangih tuahmi a si. 10 Curuangah le vancungmi pawl ih ruangah nunau cun a lu khuh seh, cuticun thuneihnak hnuai ah a um ti kha a langter ding. 11 Asinain Bawipa sungih kan pawlkomnak ahcun nunau cu amah bul in um ding a si lo; mipa khal a dangtein um ding a si cuang lo. 12 Ziangahtile nunau cu mipa ihsin tuahmi a si vekin mipa khal nunau sung ihsin a suakmi a si ve. Cule Pathian in ziang hmuahhmuah a seemsuah ṭheh a si. 13 Misenpi hmaiah lu khuh loin nunau in Pathian hnenih thlacam cu a mawi nan ti maw? Nanmah tein ruat hnik uh. 14 Leilung tlun thil umdan ahhin mipa in sam saupi zuah cu ningzakza a si ti a lang; 15 asinain nunau hrangah sam sau cu a sunlawinak a si. A sam cu a lu khuhnak hrangah a si. 16 Sikhalsehla pakhatkhat in hi thu a el duh asile kam khat lawng ka sim ding: kanmah lakah siseh, Pathian ih kawhhran pawl lakah siseh, cumi siarlo nunphung dang zianghman kan nei lo. 17 A tanglam ih ka lo zirh dingmi thu ahcun ka lo lom thei lonak a um: ziangahtile pumkhawmnak ih nan tonkhawm caan hi thil ṭha hnakin thil ṭha lo sawn a si. 18 A hmaisabik ah nan pumkhawm tikah bur khat le bur khat rem-aw loin an um tiah mi in in sim. Himi hi a diknak zawn a um ding tiah ka zum. 19 (Thudik theihnak ah a dikmi le dik lomi bur dangdang ih um cu a ṭhathnemnak a um ve.) 20 Asinain hmun khatih nan pumkhawm tikih nan ei in mi cu Bawipa Zanriah a si nawn lo. 21 Ziangahtile cuti nanmah ih bul rawl nan ei ciar tikah mi hrekkhat cu rilrawngin an um ih mihrek cu nan ei in tamtuk ih a riit tiangin nan ri. 22 Einak le innak ah inn nan nei lo maw? Asilole Pathian ih kawhhran hmuhsuam ih mi farah pawl mualpho in umter hi nan duh sawn maw si? Hi bangtuk thu-ah hin ziangtin in ti ding, tiah so in zum? Ka lo lawm hai ding maw? Lawm lamlam hlah! 23 Ziangahtile ka lo zirhsinmi thu hi Bawipa ih hnen ihsin ka ngahmi a si. Bawipa Jesuh in Amah an zuar zanah sanghlom pakhat a lak ih, 24 Pathian hnenih lungawi thu a sim hnuah a phel ih, "Himi hi nan hrangih ka pekmi ka taksa a si. In theih ringringnak dingah ei uh," tiah a ti. 25 Cubangtuk ṭhiamṭhiam in, zanriah an ei ṭheh hnuah khuat khal a lak ih, "Hi hai cu ka thisen ih nemhngetmi Pathian ih thukam thar a si. Nan in tinte keimah in theih ringringnak ah tuah uh," tiah a ti. 26 A tican cu hi sang nan ei tin le hi hai nan in tinte Bawipa a rakir lai hlanlo a thihnak thu nan phuang tinak a si. 27 Cuti a si ruangah zozo khal Bawipa ih hmin siatnak dingah zoh mawi loin Bawipa ih sang a ei ih a hai a intu cu Bawipa ih taksa le thisen parah sualnak a tuah a si. 28 Curuangah zokhal hi sang a ei hlan le hi hai a in hlanah amah le mah cek-awta seh. 29 Zianghrangah tile hi sang a ei tik le hi hai a in tikah Bawipa ih taksa ih tican a theih lo ahcun a ei a in tikah thuṭhennak a parah a tuahcih a si. 30 Hiti nan si ruangah nanmah lakah mi tampi cu nan na, nan ṭawnṭai, cule mihrek cu thihnak tiang nan tong. 31 Hmaisabik ah kanmah le kanmah kan cekfel-awta a si ahcun Pathian thuṭhennak kan parah a thleng lo ding. 32 Sikhalsehla Pathian thuṭhennak kan parah a thleng ih Amah ih in simhrin hi leikhawvel thawn siatral tlangta lo dingih in duhsaknak ruangah a si. 33 Curuangah ka u le ka nau tla, Bawipa ih Zanriah hmang tlang dingih nan pumkhawm tikah pakhat le pakhat hngak aw uh. 34 Zokhal a ril a rawn ahcun a inn ah eita seh. Cuti vekih nan pumkhawm ahcun Pathian thuṭhennak nan tong lo ding. Cule thuhla dang pawl cu ka ra thlen tikah kan ruat tlang leh ding.
1 U le nau tla, Thlarau Thianghlim ih pekmi laksawng thu thawn peh aw in ca nan rak nganmi ih thuhla ah thudik nan theih dingah ka lo duhsakmi a um. 2 Khawvel mi nan rak si laiah cun zinpeng nan zawh ih nunnak nei lo milem pawl nan rak biak. 3 Asinain Pathian Thlarau ih hruaimi pawl cun, "Jesuh cu siatserh si ko seh," an ti thei lo ding ih Thlarau Thianghlim ih hruaimi pawl lawng in, "Jesuh cu Bawi a si," an ti thei ding. 4 Thlarau laksawng cu a phunphun a um, asinain cuih laksawng pawl hmuahhmuah a petu cu Thlarau Amah lawng a si. 5 Bawipa ih hnaṭuan hi a phunphun a um, asinain kan renmi Bawipa cu Amah pakhat lawng a si. 6 Hnaṭuan theinak hi a phunphun a um, asinain cuih hnaṭuan theinak cu zozo hnen khalah an tawkzawn ciar in a petu cu Pathian Amah thotho a si. 7 Kan hnenih Thlarau a um kha phunkhat khat in a lang ih cumi cu misenpi ṭhathnemnak hrangah a si. 8 Thlarau in mi pakhat cu fimnak thawn simthiamnak a pek ih a dang pakhat cu cuih Thlarau in theihnak thu simfiang thiamnak a pek. 9 Cuih Thlarau thotho in mi pakhat cu rinnak a pek ih midang pakhat cu mina damter theinak a pek. 10 Thlarau in mi pakhat hnenah mangbangza tuah theinak a pek ih a dang hnenah profet bangin thusim thiamnak a pek; a dang pakhat hnenah Thlarau laksawng thleidan thiamnak a pek. Cuvek thotho in mi pakhat hnenah theih lo ṭong ih ṭong theinak a pek ih midang hnenah cutiih an ṭongmi simfiang theinak a pek. 11 Hi hmuahhmuah a petu cu Thlarau pakhat lawng a si; Amah ih duh vekin laksawng dangdang kha pumpak hnenah a pek fingfing. 12 Khrih cu taksa ruangpum bangtuk a si. Taksa ruangpum cu pakhat asinain taksa ṭhen cu tampi an si. 13 Cubangtuk in kannih khal hi Judah mi le Zentail mi, miluat le sal tiin um hman nungla kan zate hin cuih ruangpum pakhat sungah cun Thlarau pakhat ih baptisma lami kan si ih kan zate hin cuih Thlarau pakhat cu intlaang dingah tuahmi kan si. 14 Ruangpum hi taksa ṭhen pakhat lawng a si lo, taksa ṭhen tampi a si. 15 Ke in, "Kei cu kut ka si lo hrangah ruangpum ih ta ka si lo," tibang sehla, cutiih a ti ruangah taksa ṭhen a si lo ngaingai ding maw? 16 Cule hna in, "Kei cu mit ka si lo hrangah ruangpum ih ta ka si lo," ti sehla, cutiih a ti ruangah taksa ṭhen si loin a um ngaingai ding maw? 17 Ruangpum hi mit va si thluh bangsehla ziangtinso thu a theih ding? Cule hna lawng sibang sehla ziangin so rim a hnim ding? 18 Sikhalsehla atuih thil umdaan vek hin, Pathian in taksa ṭhen dangdang cu an umnak ding hmun ciarah Amah ih duh vekin a ret a si. 19 Ruangpum hi taksa ṭhen pakhat lawng sisehla ruangpi a si lo ding! 20 Asinain atuih thil umdaan ahcun taksa ṭhen tampi an um na'n ruangpum cu pakhat lawng a si. 21 Curuangah mit in, "Nang cu ka lo ṭul lo," tiah kut kha a ti thei lo ding. Cule lu in ke khal kha, "Ka lo ṭul lo," tiah a ti thei ve lo ding. 22 Thungai ti ahcun kan ruangpum ih taksa ṭhen ṭawnṭai bik hman um loin kan cang thei hrimhrim lo a si. 23 A thupi lem lo kan timi taksa ṭhen kha ralring deuh in kan tuamhlawm ih kan ruangpi parih a mawi lem lomi taksa ṭhen kha ṭha deuh in kan thuam ṭheu a si. 24 Kan taksa parih zoh a mawi deuhmi cu thom rero a ṭul lo. Cawimawinak a sam bikmi taksa ṭhen in cawimawinak a ngah cuangnak dingah Pathian in kan ruangpum cu a remkhawm a si. 25 Cuticun ruangpum parah ṭhenṭhek awknak zianghman a um lo; taksa ṭhen pakhat le pakhat parah zawnruahnak an nei sawn a si. 26 Taksa ṭhen pakhat a tuar ahcun taksa ṭhen dang khal in an tuarpi ve. Taksa ṭhen pakhat sunloihnak a ngah ahcun a dang tla in an lungawipi ve a si. 27 Nan zatein Khrih ih ruangpi nan si ih pumpak ciarin a taksa ṭhen nan si fingfing. 28 Cuhrangah Pathian in kawhhran sungah minung cu an sinak ding hmun ciarah a ret: a hmaisabik ah a tirhthlah pawl a ret; a pahnihnak ah profet pawl, a pathumnak ah zirhtu pawl, cule mangbangza tuahtu pawl, a sangtuah damter theinak pek a si mi pawl, a si lole midang bom theinak pek a si mi pawl, a si lole mi hoha thiamnak pek a si mi pawl, a si lole theih lo ṭong in ṭong theinak pek a si mi pawl an si. 29 An zatein tirhthlah an si ṭheh lo, profet khal an si ṭheh lo, zirhtu khal an si ṭheh lo. Mangbangza tuahtu an si ṭheh lo, 30 natnak damtertu khal an si ṭheh lo; theih lo ṭong ih ṭongtu khal an si ṭheh lo ih cutiih ṭongmi a lettu khal an si ṭheh lo. 31 Cuti a si ruangah a thupi deuhmi laksawng pawl kha ngah tum sawn uh. Cule hi pawl hnakih a ṭha bik miangmo ka lo hmuh ding.
1 Milai ṭong a phunphun le vancungmi ṭong khal thiam hman ningla duhdawtnak ka neih lo ahcun ka ṭong cu a ring meenmi darkhuang le a awn rurimi darsumsel bangtuk a si. 2 Profet thusim thiamnak laksawng siseh, fimthiamnak a phunphun le thuthuuk a phunphun theih theinak khal siseh, tlang ṭhawn thei zumnak tiang khal nei hman ningla duhdawtnak ka neih lo ahcun zianghman ka si lo. 3 Ka neih hmuahhmuah mi pe ṭheh in ka ruangpi hi meisa ih ur dingah pe hman ningla duhdawtnak ka neih lo ahcun ka hrangah zianghman a ṭhahnem lo. 4 Duhdawtnak cu a thin a sau ih mi zaangfah a thiam; duhdawtnak cu mi a iksiik lo, tluang a khawng lo ih a puarthau fawn lo. 5 Duhdawtnak cu nun hel-hlong in a nung lo, amah ih zawn lawng a ruat lo, a thin a tawi lo, cule tisual mi parah thinciin a nei lo. 6 Duhdawtnak cu thil ṭha lo parah a lung a awi lo, asinain thutak parah a lung a awi. 7 Duhdawtnak cu a bei a dong dah lo; ziangkim a zum, ziangkim a beisei ih ziangkim a tuar thei. 8 Duhdawtnak cu cem ni a nei lo. Sikhalsehla profet thusim thiamnak pawl cu a reh ding; theih lo ṭong ih ṭong theinak khal a cem ding. Thiamnak le theihnak tla an hloral ding. 9 Ziangahtile thiamnak laksawng kan ngahmi le profet thusim thiamnak kan comi pawl hi a ṭhen a hrekte lawng an si. 10 Sikhalsehla a famkimmi a ra thlen tikah cun a famkim lomi pawl cu an hlo ṭheh ding. 11 Nauhak ka rak si laiah cun ka ṭong daan, ka thil hmuhdan le ka thuruahdan cu an nauhak ngaingai. Asinain atuah cun ka upa thlang ih nauhak daan cu ka thlun duh nawn lo. 12 Atuih thil kan hmuhdan cu thlalang sungah fiang lem loih a thlam kan hmuh vek khi a si; sikhalsehla cutikah cun hmaitontein kan hmu ding. Atuih thil ka theihmi cu a kim lo; asinain cutikah cun kim zetin ka thei ding. Pathian ih i theihnak a kimzet bangin ka theihnak khal a kimzet ve leh ding. 13 Atu-ah cun a hmun ringringmi thil pathum an um ih zumnak, ruahsannak le duhdawtnak an si; himi lakah a tum bikmi cu duhdawtnak a si.
1 Nan tumtah bik dingmi cu duhdawtnak hi a si. Asinain Thlarau laksawng dangdang khal nan tumtah dingah an um ih culak ih nan duh bik dingmi cu profet thusim thiamnak laksawng a si. 2 Theih lo ṭong ih a ṭongtu cun minung hnenah a ṭong lo, Pathian hnenah a ṭong a si, ziangahtile a ṭongmi kha zohman in an theihsak lo. Thlarau thawngin zohmanih theih lomi thu a ṭong a si. 3 Sikhalsehla profet thu a simtu cun minung hnenah a ṭong, cule mi bawmtu ah a cang ih tha-thawhnak le hnangamnak an ngah. 4 Theih lo ṭong ih a ṭongtu cun amah le amah lawng a bawm aw; asinain profet vekih thu a simtu cun kawhhran pumpi kha a cawmdawl. 5 Nan zatein theih lo ṭong ih nan ṭong ding cu ka duh ko; asinain profet bangtuk thusimnak laksawng nan ngah ding cu ka lo duhsak sinsin. Ziangahtile theih lo ṭong ih ṭong hnakin profet vekih thusim cu man a nei deuh ngaingai. An ṭongmi kha a let theitu an um ih kawhhran pumpi kha a cawmdawl ti dah lo ahcun theih lo ṭong cun profet thusim thiamnak cu a tluk lo a si. 6 Curuangah u le nau tla, nan hnenih ka rat tikah theih lo ṭong in ra ṭong ningla nan hrangah ziangtal a ṭhahnem ding maw? ṭhahnem hlah! Pathian hnen ihsin thuphuanmi maw, a si lole theihnak pakhatkhat maw, a si lole profet thusimnak maw, a si lole zirhnak pakhatkhat maw, ka rak ken thei lo ahcun nan hrangih ka ṭhathnemnak ding zianghman a um lo ding. 7 Nunnak a nei lo na'n a aw a suakmi awnmawi lemlawi siseh, ṭingṭang khal siseh, vun ruat hnik uh; an tummi aw kha fiangfai zetih a suah lo ahcun zo in so ziang aw an tum ti a theih thei ding? 8 Raldo timtuahnak tawtawrawt a phawtu pa in a tawtawrawt kha fiangteih a phawt lo ahcun zoso ral do dingah a tim a tuah ding? 9 Cuvek thotho in nan ṭongmi kha theih lo ṭong a si ih zianghman a fiangmi a um lo ahcun zo in so an theih ding? Nan ṭongmi cu thli lakah a hlota meen a si. 10 Leilung pumpuluk ah ṭong dangdang tampi an um; asinain tican nei lo ṭong pakhat hman a um lo. 11 An ṭongmi aw kha a tican ka theih thei lo ahcun cutiih a ṭongtu cu ka hrangah ṭong theih lo mikhual a si ih kei khal a hrangah ṭong theih lo mikhual ka si ve. 12 Thlarau laksawng co ding cu nan duhzet ruangah ziang dang hnakin kawhhran a tungdingtu laksawng kha nan duh cuang dingmi a si. 13 Theih lo ṭong ih a ṭongtu in a ṭongmi a leh theinak dingah thla cam seh. 14 Cubangtuk theih lo ṭong in thla ka cam ahcun ka thlarau cu thla a cam ko na'n ka thinlung cu cutawkah a tel lo. 15 Cuti asile ziangtinso ka tuah ding? Thla ka cam tikah thlarau in ka cam ding ih ka thinlung khal in ka cam ding. Hla ka sak tikah thlarau in ka sak ding ih ka thinlung khal in ka sak ding. 16 Na thlarau lawng thawn Pathian hnenah lungawi thu na sim tikah ziangtinso khawmnak ih a rami mimenmen in na lungawi thusimmi ahcun "Amen" tiah an lo ti sak thei ding? Na ṭongmi cu a tican zianghman an theih ual lo. 17 Pathian hnenih na lungawi thusimmi cu a ṭhazet ko ding na'n midang bawmtu cu a si hrimhrim lo. 18 Nanmah hnakin theih lo ṭong tam sawn ka ṭong ruangah Pathian ka lawmzet a si. 19 Sikhalsehla Pathian biaknak hmunah cun midang zirhnak hrangah theih lo ṭong ih ṭongkam thawnghra ṭong hnakin theihmi ṭongfang panga ka ṭong sawn ding. 20 Ka u le ka nau tla, nan thuruahnak ahhin nauhak bangtuk in um hlah uh. Thil ṭha lo tuahnak lamah cun nauhak bangtuk si uh; sikhalsehla nan thuruahdanah cun mi pitling si uh. 21 Ca Thianghlim sungah, "Ka minung pawl hnenah ṭong phun dangdang a ṭongtu pawl hmang tahratin ka ṭong ding; Ramdang mi pawl ih hmurka hmang tahratin an hnenah ka ṭong ding; Sikhalsehla ka minung pawl cun ka thu an ngai cuang lo ding; tiah Bawipa in a ti," tiah ngan in a um. 22 Cuti a si ruangah theih lo ṭong ih ṭong theinak laksawng cu zum lotu pawl hrangah hmuhsaknak a si. Profet thusim thiamnak laksawng cu a zum lotu pawl hrang si loin a zumtu pawl hrangah theihthiamnak a si. 23 Cun kawhhran mi nan pumkhawm tikah a khawmmi pawl nan zatein theih lo ṭong in nan ṭong ṭheh tibang sehla culaifang ah minung hrekkhat, a si lole Pathian zum lotu pawl rung lut hai sehla an aa a sihi an lo ti lo ding maw? 24 Asinain nan zatein profet bangin Pathian thu nan phuang ih culaifang ah mi pakhatkhat, a si lole Pathian zum lotu rung lut sehla nan thusimmi in a thinlung a khoih ding ih a sualnak khal a thei aw ding. 25 A thupte ih a ruahmi thil pawl an lang deuhdeuh ding ih anih khal a cuih hmun in Pathian a bia ve ding; cule "Nan hnenah Pathian a um ngaingai a si," tiah a ti ding. 26 Ka u le ka nau tla, ka sim duhmi cu hiti in a si: Nan khawm-awk tikah mi pakhat in hlasak a duh ding, a dang in thuzirh a duh ding, a dang pakhat in Pathian hnenin thuphuanmi a nei ding, a dang pakhat in theih lo ṭong in ṭong a duh ding ih a dang pakhat lala in theih lo ṭong ih ṭongmi kha a tican leh a duh ding. Ziangbangtuk a si khalle kawhhran cawmdawlnak hrang lawngah tuah siseh. 27 Mi in theih lo ṭong in an ṭong duh a si ahcun a tam bikah mi pahnih asilole pathum tiang lawng ṭong hai seh; cu khalah a sangsang in ṭong hai sehla an ṭongmi a lettu um hai seh. 28 Sikhalsehla ṭong lettu zohman an um lo a si ahcun theih lo ṭong ih a ṭongtu cu daitein um sehla amah le Pathian hnen lawngah ṭong seh. 29 Profet bangin thusim thiamnak a ngahtu pahnih thum sawn in thusim hai sehla midang in an thusimmi a ṭhat le ṭhat lo rak ngai hai seh. 30 Asinain a khawmmi lakih pakhatkhat in Pathian hnen ihsin thusim ding a ngah a si ahcun thu a sim rerotu cu cawl hrih seh. 31 Nan zate hman in Pathian thu cu a sangsang in nan sim thei; cuticun zozo khal an zir fingfing ding ih thacahnak an ngah fingfing ding. 32 Profet thusim thiamnak laksawng a ngahtu in a simmi thu cu luanter loin a uk thei a ṭul a si, 33 ziangahtile Pathian cu buainak le hnahnawhnak Pathian a si lo; remnak le daihnak Pathian a si. Pathian kawhhran in hmun kipih an tuah ciarmi a si bangtuk in, 34 pumkhawmnak ah nunau pawl cu daitein um hai seh. Thusim theinak thu an nei lo; Judah Daan ih a ti vekin hotu khal an si lo pei. 35 Thu pakhatkhat an thei duh asile an inn ah an pasal sut hai seh. kawhhran an pumkhawmnak ah nunau ih thusim cu ningzakza a si. 36 Pathian ih thu hi nan hnen ihsin a thok maw si? Nanmah ih hnen lawngah Pathian thu hi a thleng maw si? A si lo! 37 Mi pakhatkhat in Pathian ih profet ka si tiah a ruat aw, a si lole thlarau laksawng ka ngah tiah a ruat aw a si ahcun, hiti in nan hnenih ka ngan mi hi Bawipa ih thupek a si, ti kha a theih ṭulmi a si. 38 Sikhalsehla himi hi zianghman ih a siar lo a si ahcun amah cu zianghman ah siar ve hlah uh. 39 Curuangah u le nau tla, profet thusim thiamnak cu duh uh; asinain theih lo ṭong ih ṭong khal kham hlah uh. 40 Ziang hmuahhmuah cu rualremte le zoh mawite in tuah ding an si.
1 Ka u le ka nau tla, nan hnenih ka rak phuanmi Thuthang ṭha kha atu-ah lo theihter sal ka duh. Cuih Thuthang ṭha cu nan pom ciami le nan zumnak hnget zetih a dinnak hmun a si. 2 Nan hnenih ka phuan ciami Thuthang ṭha a si ih hnget zetin nan pom a si ahcun rundammi nan si. Nan pom hnget lo a si ahcun nan zumnak hi a lak a si ding. 3 Ka pom ngahmi atu nan hnenah a thupi bik tiah ka phuan sinmi cu hiti in a si: Ca Thianghlim sungih nganmi vekin Khrih cu kan sualnak ruangah a thi; 4 an phum ih, Ca Thianghlim sungih nganmi vekin, ni thumnak ah thawhtersal a si. 5 Piter hnenah a lang ih a tirhthlah hleihnih hnenah a lang. 6 Cuih tlunah ṭum khatah zumtu u le nau zanga lenglo hnenah a lang; cupawl cu mi hrekkhat an thi zo na'n a tam sawn cu an nung lai. 7 Cule Jeim hnenah a lang ih cuih hnuah a tirhthlahmi zate hnenah a lang. 8 A netnak ah, nithla kim loih suakmi vek ka si ko na'n ka hnen khalah a lang ve. 9 Kei cu a tirhthlah lakah a tenau bik miangmo, a tirhthlah ti tlak hman ka si lo; ziangahtile Pathian ih kawhhran hremtu ka rak si. 10 Sikhalsehla Pathian zaangfahnak thawngin atu vek hin ka si thei ve ih ka parih zaangfahnak a neihmi cu a lak a si lo. A tirhthlah dang pawl hnakin nasa sawn in hna ka ṭuan; asinain cumi cu keimahih ṭuanmi ti ding a si lo; ka hnenih a ummi Pathian zaangfahnak ih ṭuanmi a si sawn. 11 Cuti cun Thuthang ṭha cu nan ngah ih ka hnen ihsin nan ngah ah siseh, an hnen ihsin nan ngah ah siseh, kan zatein kan phuang ih nannih khal in nan zum zo. 12 Kan thu phuanmi cu: Khrih cu thihnak ihsin thawhtersal a si zo, tihi a si ih atu-ah ziangtinso mihrek khat in mithi thawhter salnak a um lo tiah nan ti thei? 13 Cutiih nan timi cu a dik sibang sehla Khrih thawhter sal a si lo, ti a cang ding. 14 Cule thihnak ihsin Khrih thawhter lo a si ahcun thuthang phuan ding zianghman kan nei loih zum ding khal zianghman nan nei lo. 15 Cuih tlunah Pathian ih thu-ah thuphan perah kan cang ding, ziangahtile thihnak ihsin Khrih cu Pathian in a thoter zo tiah kan sim ringring a sisi. Asinain a thimi pawl nunnak ah thawhter lo an si ngaingai ahcun Pathian in Khrih khal a thawhter lo a si ding. 16 Ziangahtile a thimi thawhter an si lo ahcun Khrih khal thawhter a si ve lo. 17 Cule Khrih thawhter a si lo ahcun nan zumnak hi a kawlawngpi a si ding ih nan sualnak sungah a taang hrihmi nan si ding. 18 Cuih tlunah Khrih a zum ih a thimi pawl khal an hloral ve ding. 19 Khrih sungah ruahsannak kan neih mi hi khuitawk hman thleng loin hi leilung tlun kan nunnak hrang lawnglawng a si ahcun leitlun khawvel minung lakah hin zaangfakza bik kan si ding. 20 Sikhalsehla thudik cu hiti in a si: Khrih cu thihnak ihsin thawhtersal a si zo ih a thi ciami pawl thawhter an si ve ding ti theihnak ah rah hmaisa bik aamahkhan a si. 21 Mi pakhat ruangah thihnak a um bangtuk in mi pakhat thawngin thawhsalnak a thleng ve. 22 Adam thawn an pehzom awknak ruangah mi hmuahhmuah thihnak an ton bangtuk in Khrih thawn an pehzom awknak thawngin mi hmuahhmuah nunnak ah thawhter an si ve ding. 23 Sikhalsehla a sangsang tein thawhter an si ding: a hmaisa bik ah Khrih, cule a ratsal tikah Amah ih minung pawl an si ding. 24 Cuih hnuah a netnak caan a ra thleng ding. Khrih in thlarau lam uktu pawl, thuneitu pawl le huham neitu pawl hmuahhmuah a neh ṭheh hnuah Uknak cu Pa Pathian hnenah a pe ding. 25 Ziangahtile Pathian in ral hmuahhmuah cu a neh ṭheh ih a ke hnuai ih a ret ṭheh hlan lo Khrih in a uk ding. 26 Ral neta bik a neh dingmi cu thihnak a si. 27 Ziangahtile Ca Thianghlim in, "Pathian in ziangzongza a ke hnuai ah a ret ṭheh ding," tiah a ti. "Ziangzongza," ti tikah Pathian Amah cu a tel lo, ti cu sim ṭul lo a si. Pathian in thil hmuahhmuah cu Khrih ih hnuai ah a ret ṭheh ding. 28 Sikhalsehla ziang hmuahhmuah cu Khrih uknak hnuai ih ret ṭheh a si tikah Fapa Amah khal cu thil hmuahhmuah a hnuai ih a retsaktu Pathian ih hnuai ah a re aw ve ding ih Pathian cu ziangzongza ih tlunah uktu a si ding. 29 Cule a thimi pawl ai-awh in ziangah so hrekkhat pawl in baptisma an lak? An tumtahmi ziangso a si? A thimi pawl thawhter an si ngaingai lo ahcun ziangah so himi pawl hin mithi pawl ai-awh ih baptisma an lak duh rero? 30 Kanmah lala vun ti sehla: thinphannak lakah cat loin ziangah so kan um duh rero? 31 U le nau tla, nitin tein ka thi a si. Khrih Jesuh thawn kan pehzom awknak thawngin nanmah cu ka porh awknak nan si ih hiti ih ka ṭong theinak khal hi a si. 32 Cule hitawk Efesa khua ah "Sahrang" thawn kan sual aw, ti tlak a si mi kha milai tumtahnak lawngih ka tuahmi a si ahcun ka hlawknak ziangso a um? A thimi thawhter an si ngaingai lo ahcun ṭongṭhimnak ih, "Thaisun ih thi ding thamtham, kan ei kan in mai pei cu!" an ti vekin kan si ding sisi. 33 Bummi si hlah uh. Òongṭhimnak ah "Rualpi ṭha loin ziaza ṭha a siatter," ti a si. 34 Nan thinlung vun fimter sal uhla nan sualnak cu bang thlang uh. Mi ṭhenkhat cu Pathian khal nan theih lo ruangah nan ningzak seh tiah ka timi a si. 35 Mihrek in, "Ziangtin so mithi pawl cu thawhter an si ding? Ziangvek ruangpum so an neih ding?" tiah nan sut ding. 36 Mi-aa pawl! Leilung sungih thlaici nan tuh tikah a thih hmaisa lo ahcun a kho dah maw si. 37 Cule thlaici nan tuh tikah sangvut ci siseh, thlaici dang siseh, a ci lawng si nan tuh, a hung kho dingmi a kung nan tuh dah maw si. 38 Pathian in cuih thlaici hrangah a duhmi kung a pek, thlaici hmuahhmuah hrangah kungko a pek fingfing a sisi. 39 Nunnak a neimi hmuahhmuah in an neihmi taksa a bang aw ciar lo. Milai taksa cu phunkhat a si ih ramsa ih taksa cu phundang a si; vate taksa cu a dang ih nga ih taksa tla a dang lala. 40 Cule vancung ruangpum a um ih leilung ruangpum a um. Vancung ruangpum sunlawinak le leilung ruangpum sunlawinak cu an dang aw. 41 Ni in amah ih sunlawinak a nei ih thlapi khal in sunlawinak phundang a nei. Arsi khal in sunlawinak an nei fingfing ih an sunlawinak cu a dang aw ciar a si. 42 Mithi pawl thihnak ihsin thawhter an si tikah cubangtuk in a si ve ding. Taksa pum cu phum a si tikah a thi theimi a si; thawhter a si tikah a thi thei lomi a si ding. 43 Phum a si tikah a mawi lo ih a ṭawnṭaizet; thawhter a si tikah a mawizet ding ih a cak zet ding. 44 Phum tikah taksa pum a si; thawhter a si tikah thlarau pum a si ding. Taksa pum a um bangtuk in thlarau pum khal a um a si. 45 Ziangahtile Ca Thianghlim in, "Adam hmaisa cu a nungmi milai a si," tiah a ti; asinain Adam neta cu nunnak petu Thlarau a si. 46 A ra thleng hmaisami cu thlarau a si lo, taksa a si; cuih hnuah thlarau a ra thleng. 47 Leilung ih tuahmi Adam hmaisa cu leilung ihsin a ra; asinain Adam neta cu van ihsin a ra. 48 Leilung ta a si mi pawl cu leilungih tuahmi bangtuk an si; vancung ta a si mi pawl cu van ihsin a rami bangtuk an si. 49 Leilung in tuahmi minung ih hmuihmel kan ken vek hin van ihsin a ra Mi ih hmuihmel kan keng ve ding. 50 Ka u le ka nau tla, ka simmi cu hiti in a si: thi le sa ih tuahmi cun Pathian Uknak a co thei lo ding; cule a thi theimi in a thi thei lomi cu a co thei fawn lo ding. 51 A dikmi thuthup hi ngaihnik uh: kan zatein kan thi ṭheh lo ding, sikhalsehla neta bik tawtawrawt an tum tikah mitṭhep karah kan thleng aw ṭheh ding. Ziangtin tile tawtawrawt awthawng a than tikah mithi pawl thawhter an si ding ih annih cu an thi nawn lo ding; cule kannih pawl cu thleng ṭheh kan si ding. 53 Ziangahtile a thi theimi cu a thi thei nawn lomi ah thleng a si ding; a thi dingmi cu a thi lo dingmi ah thleng ṭheh an si ding. 54 Cubangtuk in a thi theimi cu a thi thei nawn lo ih thleng an si tikah cun Ca Thianghlim in: "Thihnak cu siatralter ṭheh a si, Nehnak cu a famkim zo a si," a timi cu a kim ding. 55 "Maw thihnak, na mi nehnak khuiah so a si? Maw thlankhur, na tur cu khuiah so a si?" 56 Thihnak ih tur cu sualnak a si ih sualnak ih huham cu Daan hi a si. 57 Sikhalsehla kan Bawipa Jesuh Khrih hmangin nehnak in petu Pathian cu thangṭhat si ko seh. 58 Curuangah ka duhdawtmi u le nau pawl, tlu lo dingin hnget zetin ding uh. Pathian hna cu taima zetin ṭuan ringring uh; Bawipa ih hnaṭuan cu a lak a si dah lo, ti nan thei.
1 Judea ramih a ummi Pathian zumtu pawl hrang paisa thawh ding thu ca nan nganmi thu-ah cun: Kalati kawhhran pawl hnenih thu ka cahmi vekin rak tuah uh. 2 Nipi ni tinin nan ngahmi a tam le a mal thlunin paisa rak thawh fingfing uhla rak khawl cia uh; cuticun ka ra thlen tikah paisa thawh a ṭul nawn lo ding. 3 Ka ra thlen hnuah nan hrilmi pawl kha an kutah ca ka ken ding ih cutiin Jerusalem ah nan laksawng cu an vun phur ding. 4 Ka feh man a um ding a si ahcun kan feh tlang leh ding. 5 Masidonia ramsung feh phah ding ka si ruangah, cutiih ka feh hnuah nan hnen ka ra thleng leh ding. 6 Nan hnenah tikcu tawkfang ka ra hmang ding; thlatang sung hmuahhmuah tla a si thei meen; cuih hnuah khual ka tlawnnak ding cu khuitawk lam a va si hmanah in ngaihtuah bawm leh ding. 7 Rak pal phah meen si loin, Bawipa ih khawkhannak a si ahcun, nan hnenah tikcu tawkfang hman ka duh. 8 Hitawk Efesa khua ah hin Pentikos ni tiang ka um ding. 9 Dodaltu tampi an um na'n hitawk ahhin a ṭhahnemmi hnaṭuan theinak a um. 10 Nan hnenah Timote a ra thlen asile ṭihnak nei lo dingin rak zoh uh, ziangahtile anih khal keimah vekin Pathian hrangah hnaṭuantu a si. 11 Zohman in rak nautat hlah uh; hnangamte in ka hnenih a ra thlen theinak dingah a khualtlawnnak ah khan rak bawm uh. Hitawkih a ra thlen ding cu zumtu unau pawl thawn kan hngakhlap zet a si. 12 Kan unau Apollos ih thu-ah cun: unau dang pawl thawn nan hnen ra tlawng dingin ka forh ciamco ṭheu na'n atuih rat ding cu a lung a kim thei hrih lo. A remcaan deuh tikah a ra leh ding. 13 Fimkhurte in um uh, nan zumnak sungah hngetzet in ding uh; ral ṭha le cakzetin um uh. 14 Thil nan tuahmi hmuahhmuah kha duhdawtnak thawn tuah uh. 15 Stefanas le a innsang pawl cu nan theihmi an si. Anmah cu Akhaia peng sungah Khristian hmaisa bik an si ih Pathian minung pawl hrangah an thinlung le an thazaang zatein an pek. Ka u le ka nau tla, 16 anmah siseh, an hnaṭuanpi pawl siseh, mi an hruai daan hi thlun hram uh tiah ka lo forh. 17 Stefanas le Fortunatas le Akhaikas an ra thlen ruangah ka lung a awi; nanmah nan um lo khal ka thei tuk lo. 18 Nan thin an lo nomter vekin kei khal ka thin in nuamter ve. Hi bangtukmi cu lom tlak an si. 19 Asia ramih kawhhran pawl in cibai an lo buk; Aquila le Prisilla le an inn ih a khawm-awmi kawhhran in Khristian duhdawtnak thawn cibai an lo buk. 20 Hitawkih unau pawl in cibai an lo buk a si. Pakhat le pakhat hnamnak thianghlim thawn cibai buk aw uh. 21 Hitiin Keimah Paul in cibai ka lo buk a si timi hi ka kut rori in ka ngan a si. 22 Zokhal Bawipa a duhdaw lotu cu a parah siatcamnak thleng seh. Maranatha: Kan Bawipa, ra thlang aw. 23 Bawipa Jesuh ih zaangfahnak cu nan hnenah um hram seh. 24 Khrih Jesuh thawngin ka duhdawtnak cu nan zate parah um ko seh. Amen.
1 Pathian lungkimnak in hrilmi Khrih Jesuh ih tirhthlah keimah Paul le kan unau Timote in Korin khua ih a ummi Pathian kawhhran le Akhaia peng khuazakipih a ummi mithianghlim hmuahhmuah nan hnenah ca kan lo kuat. 2 Kan Pa Pathian le Bawipa Jesuh Khrih ih zaangfahnak le daihnak cu nan tlunah um hram seh. 3 Kan Bawipa Jesuh Khrih ih Pa le a Pathian, mi zaangfahtu kan Pa, ziangtinkim ah bomnak in petu Pathian cu lawm uhsi! 4 Harsatnak a phunphun lakah in bawmtu cu Amah a si; cutiin Pathian hnen ihsin kan comi bomnak cu hmang tahratin harsat mangbangnak a phunphun a tongtu pawl kha kan bawm thei ve a si. 5 Ziangtin tile Khrih tuarnak a phunphun sungih a teltu kan si vekin Pathian ih bomnak sung khalah Khrih thawngin kan tel ve. 6 Harnak kan tonmi cu nanmah ih hnemnak ding le rundamnak hrangah a si. Kannih bomnak kan ngah a si ahcun harsatnak kan tuarmi kha thinsaunak thawn nannih tla nan tuar thei venak dingah bomnak le thazaang a ngahtu nan si ve. 7 Cuti a si hrangah nan parih ruahsannak kan neihmi cu a cem dah lo. Ziangahtile kan tuarnak in ṭawmpi vekin hnemnak kan comi khalah in ṭawmpi ve, ti kan thei. 8 U le nau pawl, Asia ramih harnak kan tuarmi lo theihter kan duh. Kan parih suanmi thilrit cu a tum ngaingai ih tlunah a rit zet fawn ih nung ding hmanah kan ruat aw nawn lo. 9 Thi dingih thurel ciami kan si, tiin kan ruat aw. Sikhalsehla hi bangtuk ih thu a rak um cu kanmah le kanmah rinsan aw loin thihnak ihsin mi a thoter saaltu Pathian kan rinsannak dingah a rak si sawn. 10 Cubangtuk ṭihnungza thihnak sung ihsin Pathian in in runsuak ih hmailam khalah in runsuak ko ding. Thlacamnak in in rak bom ruangah, 11 in runsuak sal ko ding, tiah Pathian parah rinsannak kan nei. Cuticun kan hrangih nan thlacamnak pawl cu Pathian in a thei ding ih Amah in in thlawsuah ding. Cule kan ai-ah mi tampi in Pathian hnenah lungawi thu an sim ding. 12 Kan hmaihngalmi pakhat a um; cumicu ziang a si tile: hi leikhawvel ih kan nundaan le a hleice in nanmah thawn kan pehzom awknak ah hin minung fimnakih ukmi si loin Pathian zaangfahnak huham in in uk ih, Amah Pathian ih in pekmi ṭong lailan le thinlung taktein kan nunzia kha kan thinlung siaṭha thleidan thiamnak in in theihpimi hi a si. 13 Nan hnenih ca ka ngan tikah hin nan siar theimi le nan theih theimi lawnglawng kan ngan. Atu-ah cun in theihnak hi a ṭhen a hrek lawng a si; sikhalsehla famkim zetin in thei leh ding tiah beiseinak ka nei; 14 cuticun Bawipa Jesuh ih Ni ah kanmah hi nan hmaihngalnak kan si ding ih nannih khal kan hmaihngalnak nan si ve leh ding. 15 Hi thu hi fiangzet ih ka theih ruangah voihnih thlawsuahnak co hai seh tiah a hmaisa ahcun nanmah ra tlawng dingin ka tum lawk a si. 16 Ka tumnak ahcun Masidonia ka tlawn zawng ah ka lo pal phah ding ih ka kir lam tla-ah ka lo pal phah ding tiah ka tum; Judea peng ka vung thlen theinak dingah bomnak tla in pe thei ding, tiah ka ruahmi a si. 17 Hitiih timtuahnak ka neih tikah hin nan hnenah thinlung reprai lo minung ka bang maw? Ka khualtlawnnak ding ka tawlrel tikah mah ih zawn lawng ruat tahratin, "A si, a si," ti hnu ih "Si lo, si lo," tiah thu a thleng leuhleuhtu ka si maw? 18 Pathian cu thudik phuangtu a si bangtuk in nan hnenih ka thukammi cu "A si," ti le "Si lo," ti a ceemcih lo. 19 Ziangahtile nan hnenah, Silas, Timote, le keimah in kan phuanmi Pathian ih Fapa Jesuh Khrih cu "Asi," tile "Silo," ti a ceemcihtu a si lo. Pathian ih "Asi," tiih lungkimmi fapa a si. 20 Ziangahtile Jesuh Khrih cu Pathian thukammi hmuahhmuah hnenah "Asi," timi hi a si. Curuangah Jesuh Khrih thawngin Pathian sunloihnak ah "Amen," tiih kan ti ṭheunak cu a si. 21 Kanmah siseh, nanmah siseh, hmun khatah Khrih thawn pumkhat kan si, ti in theih fiangtertu cu Pathian Amah a si. Pathian in Amah ih bulta si dingah in thiadang zo. 22 Amah ih bulta kan sinak cu kan parah hminsinnak a ret zo ih kan hrangih ret ciain a ummi hmuahhmuah kan ngah ding ti aamahkhannak ah kan thinlung ah Thlarau Thianghlim in pe zo. 23 Hi thu theituah Pathian ih hmin ka saal: ka thinlung theitu Amah a si. Korin khua ra lo dingih ka ruatcatnak cu nanmah ih zawnruah ruangah a si. 24 Nan zumnak thu-ah hihi zum uh, hihi zum hlah uh tiin thuneih kan tum lo. Nan zumnak ahcun nan hngetzet ti kan thei. Curuangah nan lungawi thanuamnak hrangah nanmah thawn hnaṭuan tlang ih kan umnak a si.
1 Curuangah nanmah riahsiatter sal ding hnak cun ra tlawng loin ka um sawn pei tiah ka ruatcat zo a si. 2 Ziangahtile nan riah ka lo siatter asile zo so ka lungawinak tuahtu a taang nawn ding? Nanmah lawng hi ka lungawinak a tuah theitu nan si. 3 Curuangah ka cakuatmi sungah khan ka lung i awitertu nanmah in ka riah in siatter riangri ding hnakin ka ra lo sawn pei, tiah ka ngannak a si. Ziangahtile keimah ka lung a awi tikah nannih khal nan zatein nan lung a awi ve, ti ka zum. 4 Nan hnenih ca ka rak ngan ah khan thinlung ritzet le awloksong in ka mitthli thawn ka ngan. Khatiih ka ngan tikah nanmah riahsiat ternak dingah a si lo; nan parah ziangtlukin duhdawtnak ka nei tihi nan theihnak dingah a si sawn. 5 Mi pakhatkhat in midang parih riahsiatnak a thlenter tikah keimah parah a thlenter ti a si lo, tawkfang cu nan zate parah a thlenter sawn a si. (Hitiin neemdeuh ih ka ṭongnak cu a parah khoh tuk ka duh lem lo ruangah a si.) 6 Hi bangtuk ih riahsiatnak a suahtertu ih parah mi tam sawnih nan hremnak cu tawkfang a tuar zo. 7 Atuih thokin rak ngaithiam uhla thazaang rak pe thlang uh; a riah a siat tuk lawmmam ahcun a bei a dong tata pang ding. 8 Nan duhdawtnak kha a parah langter uh tiah ka lo dil hai a si. 9 Nan hnenih khami cakuat ka ngannak cu ka thu hi an thlun ngaingai maw, ziangvek teu so an si ti theih duh ah ka lo hniksaknak a si. 10 Mi pakhatkhat thil a ti sualtu nan ngaithiam tikah kei khal in ka ngaithiam ve. Ziangahtile mi ka ngaithiam tikah (ka ngaithiam ṭulmi an um ngaingai ahcun) nanmah ih ruang bikah Khrih hmaiah ka ngaithiam a si. 11 Cutiin ka ngaithiamnak cu Satan in kanmah hi in neh pang hlah seh ti ka duh ruangah a si. Satan ih tumtahmi le kan thei ṭheh fawn. 12 Khrih Thuthang ṭha phuang dingin Troas khua ka thlen tikah Bawipa in cutawkih hnaṭuan dingin sangka i on sak tiah ka hmu. 13 Sikhalsehla kan unau Titas cutawkih ka hmuh lo tikah ka thin a har nasa. Curuangah anmah cu cibai bukta in Masidonia lamah ka feh. 14 Pathian hnenah thangṭhatnak um ko seh! Ziangahtile Khrih thawn kan pehzom awknak thawngin Khrih ih nehnak puai sungih a fehtu ah Pathian in in hruai vivo. Khrih thuhla cu khuazakip ah rimhmui bangin zaiter dingah Pathian in kannih cu in hmang a si. 15 Ziangahtile kannih cu Khrih in Pathian hnenih a pekmi zihmui rimthaw bangtuk kan si. Cuih zihmui cu rundamnak lamzinih a feh rero laimi hnenah le hlohralnak lamzinih a feh rero laimi hnen khalah a thleng ṭheh a si. 16 A hloral cuahcomi pawl hrangah cun hi rimhmui cu an thihnak rimsia a si ih, rundamnak a ngah lai rerotu pawl hrangah cun nunnak petu rimthaw a si. Cubangtuk hnaṭuan khung cu zoso a ṭuansuak thei ding? 17 Kannih cu Pathian thu kha man olte meenih a zuartu pawl bangtuk kan si lo. Pathian ih thlahmi kan si ruangah Khrih riantu kan si ti thei in a mithmuh ah thinlung taktein a thu kan phuang a si.
1 Hitiih kan ti tikah mah le mah porh-aw kan bang sal pei maw? Mi ṭhenkhat vekin nan hnenah siseh, a si lole nan hnen ihsin siseh, lungkimpinak caken kan ṭul ve a si pei maw? 2 Caken dang kan ṭul lo, nanmah hi kan ca nan si; mi hmuahhmuah theih ding le siar dingin kan thinlung ih nganmi ca nan si. 3 Hi ca a ngantu cu Khrih amah a si ih kannih hi a phurtu kan si. Cuih ca cu cati in nganmi a si lo, a nungmi Pathian ih Thlarau in nganmi a si; lungpheng parih nganmi a si lo, milai thinlung sungih nganmi a si. 4 Hitiih kan phuannak cu Khrih ih zaarah Pathian lamah ralṭhatnak kan neih ruangah a si. 5 Hi hnaṭuan hi a ṭuan theitu kan si tiih phuan ngamnak kanmah taksa parah zianghman a um lo. Kan ṭuan theinak hmuahhmuah cu Pathian hnen ihsin a rami a si. 6 Thukam thar a riantu kan si theinak cu Amah in thazaang in pek ruangah a si. Cuih thukam thar sungah ca in nganmi Thukham a um lo; Thlarau sawn a um a si. Thukham cun thihnak a thlenter, sikhalsehla Thlarau cun nunnak a pe. 7 Thukham cu cafang pakhat hnu pakhat lungpheng parah nganmi a si ih cuih thukham pek a si laiah Pathian ih sunlawinak a lang. Moses mithmai parih a tleumi cu zamrangih a ziammi a si ko na'n a tleumi a tleuzet ruangah Israel mi pawl in a mithmai cu hmaiton in an zoh ngam lo. Thihnak a thlenpitu thukham hman cubangtuk sunlawinak thawn a ra asile, 8 Thlarau hnaṭuannak cu ziangtluk sunglawi sinsin in so a ra ding? 9 Minung mawhphurh thuṭhennak thu hmanah cutluk sunlawinak a um ahcun, minung rundamnak a thlenpitu thu-ah cun ziangtluk in so a sunlawinak a tum sinsin ding? 10 Hlanlaipi ih a rak tleuzet vemi sunlawinak cu atuih a tleu sinsinmi sunlawinak ruangah a tleunak a ziam zo ti ding a si thlang. 11 Tikcu tawite sung a tleumi kha a sunglawizet kan ti a si ahcun kumkhua a awhmi cu ziangtlukin so a sunglawi sinsinmi a si ding? 12 Hi bangtuk ruahsanmi kan neih ruangah kan ral a ṭhazet. 13 Kannih cu Moses vek kan si lo. Moses cun a mithmai tleu a ziam vivo kha Israel mi pawl in hmu thei hlah hai seh tiah a hmai cu puan in a khuh aw. 14 Ziangti a si khalle an thinlung sangka cu a pit thotho a si. Tuihsun tiangin thukham hlun cabu an siar tinin an thinlung cu puan in a khuh lai a si. Minung cu Khrih thawn an pehzom awk tik lawngah cuih puan cu a hawk aw a si. 15 Tuihsun tiangin Moses Thukham an siar tikah an thinlung cu puan in a khuh thotho lai. 16 Sikhalsehla cuih puan cu hlonhlo a theih; Ca Thianghlim khal in, "Moses cu Bawipa lamih a her tikah a puan cu a hawk aw," tiah a ti. 17 Hitawk ih, "Bawipa," a timi hi Thlarau a ti duhnak a si. Cule Bawipa ih Thlarau umnak kipah cun zalennak a um. 18 Kannih tla cu kan zatein kan hmai puanih tuammi kan si nawn lo ruangah Bawipa ih sunlawinak hi thlalang bangin a langtertu kan si. Cuih sunlawinak cu Thlarau a si mi Bawipa hnen ihsin a rat ruangah kan nunnak hi sunglawi sinsin in le Amah bang sinsin in in thleng vivo a si.
1 Pathian in in zaangfah ih hi hnaṭuan hi Amah in in ṭuanter ruangah kan thin a nau lo. 2 Kan tuah ṭheumi thilthup le ningzakza thil pawl kha kan hlon ṭhehta zo; mi bum in kan nung lo, Pathian ih thuhla khalah kanmah ih duhzawng in kan merh lo. Thutak cu lailan le tluangtlam zetin kan phuang ih cuticun ziangbangtuk minung kan si ti kha mi in an thinlung in thleidang thiam hai seh tiah Pathian hmaiah kan nung. 3 Cuti a si ruangah Thuthang ṭha kan phuanmi hi thuh a si ahcun a hloral lai reromi hrang lawngah thuh in a um a si. 4 Cupawl cun an zum duh lo, ziangahtile hi leikhawvel ih khawzing in an thinlung cu thim lakah a ret ringring ruangah a si. Thuthang ṭha ih tleunak, Khrih sunlawinak ihsin a rami tleunak cu hmu hlah hai seh tiah cuih leikhawvel khawzing cun a phen ringring. Cule Khrih cu Pathian hmuihmel taktak a si. 5 Kan simmi hi kanmah ih thuhla a si lo; Jesuh Khrih cu Bawipa a si ih Jesuh ih hmin hrangah kannih hi nan sal kan si, ti sawn hi kan simmi a si. 6 "Khawthim sung ihsin tleunak suak seh," tiah a titu Pathian cu Jesuh Khrih ih mithmai parih Pathian sunlawinak kha kan theih theinak dingah kan thinlung sungah a tleunak in run petu cu Pathian amah thotho a si. 7 Sikhalsehla hi thlarau rothil a cotu kannih cu leilung in tuahmi beel bangtuk lawng kan si; ziangtin tile a saang bik thuneihnak cu kannih ta si loin Pathian ih ta a si, ti langternak ah a si. 8 Kil kipin in rial nasa na'n kan kekzaam lo; a caancaan ah awloksong in kan um, asinain kan bei a dong lo. 9 Hrem kan si na'n taansan kan si lo; tuahmawh kan si na'n siatsuah kan si lo. 10 Jesuh ih nunnak cu kan taksa parah lang hrimhrim seh tiah catbaang loin a thi theimi kan ruangpum parah hin Khrih thihnak kan phur ringring a si. 11 A thi theimi kan ruangpum parah hin Jesuh ih nunnak lang hrimhrim seh tiah nitinte thihnak tong ringring in Jesuh ih ruangah kan nung. 12 Hihi a tican cu kan sungah thihnak hna a ṭuan na'n nannih sungah cun nunnak hna a ṭuan tinak a si. 13 Ca Thianghlim in, "Ka zum ruangah ka sim," a ti. Cubangtuk zumnak thinlung kengin kan zum ruangah Pathian Thuthang kan phuang ve. 14 Bawipa Jesuh kha thihnak ihsin nunnak ah a thotertu Pathian cun kannih khal Jesuh thawn in thoter ve ding ih nanmah thawn hmun khatah amah ih umnak ah in la ding a si, ti kha kan thei. 15 Himi hmuahhmuah hi nanmah ih ruangah a si ṭheh. Cule Pathian zaangfahnak cu mi tam deuh hnenih a thlen ruangah, Pathian sunlawinak cu mi tampi in an thangṭhat sinsin ding. 16 Hiti a si ruangah beidong ih kan um dah lonak cu a si. A lenglam kan taksa ruangpi hi ṭumsuk vivo hmansehla kan sunglam nun cu nitinte tharsuah ringringin a um a si. 17 Cule harsatnak caan tawite sung kan tonmi tete hin a let tampi in kumkhua sunlawinak in pe ding. 18 Curuangah hmaitonte ih kan hoithlat reromi cu kan hmuh theimi thilri pawl hi an si lo; kan hmuh thei lomi thil an si sawn. Hmuh theimi cu caan tawite sung lawng a awh; sikhalsehla hmuh thei lomi cu kumkhua a daih a si.
1 Kan umnak hi leithlam kan ruangpum hi bal ṭheh hmansehla milai kutih sak lomi Pathian in kan hrangih a tuahmi kumkhuadaih vancungah inn kan nei ti kan thei. 2 A tu ahcun baangzet in kan hui rero; vancung kan inn thawn in thuam hai sehla ti kan hiar tuk ruangah cutiih kan huinak a si. 3 Cutiih vancung thuam hruktermi kan si tikah taksa ruangpi nei loin kan si lo ding. 4 Hi leilung puanthlam sungih kan um sungah cun kan zin a fee ih kan hrum kan ai. Cutiih kan hrum-ainak cu hi kan leithlam hi hlonhlo kan duh ruangah a si lo; sikhalsehla kan ruangpum hi vancung thuam hruktermi si nungla cuticun a thi theimi hi nunnak hi a thi thei lomi in dolh ṭheh sehla ti kan duh tuk ruangah a si. 5 Hi bangtuk thleng awknak hrangah in timtuah saktu cu amah Pathian a si. Cule kan hrangah a khawlciami hmuahhmuah kan ngah ding ti ih aamahkhan ah amah ih Thlarau in pek. 6 Curuangah thinlung hngetkhoh in kan um ringring. Leilung taksa thawn hnangam ih kan um sungah cun Bawipa ih inn thawn kan hla aw a si, ti kan thei. 7 Kannih cu rinnak in kan nung ih hmuhnak in kan nung lo. 8 Ralṭhatnak in kan khat; cule mah ih duh vekin cang thei sehla hi kan leilung taksa hi taanta in Bawipa ih inn ih um kan hril sawn ding. 9 Ziangkhal sisehla leilung kan inn ih kan um ah siseh, khitawk kan inn ih kan um ah siseh, ziang hmuahhmuah hnakin amah kan lungawiter ding kha a thupi bik a si. 10 Ziangahtile thuṭhen dingah kan zate in Khrih hmai ah kan ding leh ding. Zozo khal a ṭha siseh, a sia siseh a nunsung ih a tuahmi vek cekci in a ngah ding. 11 Pathian ṭih cu a tican ziang a si ti kan theih ruangah midang tla kan sawm vivo. Pathian in kan thinlung cu a thei ṭheh. Cubangtuk in nannih khal in nan thinlung cun in thei ve ding tiah ruahsannak ka nei. 12 Nan hnenah kan ṭhatnak langter kan duh sal ruangah a si lo; kanmah ih ruangah hmaihngalnak nan conak dingah a tikcu ṭha nan hnenih pek ding kan zuammi a si sawn. Cuticun mi ṭhenkhat sunglam ziaza zoh loin a lenglam hmuh theimi thu-ah a porh awmi pawl kha an thu nan let thei ding a si. 13 Miaa kan si ngaingai maw? Kan va si khalle Pathian ih ruangah a si. Mifim teh kan si maw? Kan si a si ahcun nanmah ruangah a si. 14 Mi pakhat cu mi hmuahhmuah aiah a thi ih cuih a thihnak sungah cun zozo khal kan tel ih kan ṭawm ve a si, ti kan theih ngah hnu-ah cun Khrih ih duhdawtnak in in uk a si. 15 Khrih cu mi zate hrangih a thih ruangah zozo khal mahih bul hrang lawngah nung ding an si nawn lo; an aiah a thi ih a nungsal mipa hrang lawngah nung ding an si sawn. 16 Atu-ah cun milai sinak zoh in zohman thu kan rel nawn lo. Caan khat khatah Khrih cu milai sinak zoh in a thu rak rel hman nungla atu-ah cun kan rel nawn lo a si. 17 Zozo khal Khrih thawn an pehzom awk tikah cun mithar a si; a nun hlun cu a cem ih nun thar a thok zo. 18 Hi hmuahhmuah hi Pathian ih tuahmi an si ṭheh; a ral a si mi kannih cu Khrih thawngin Amah thawn in remter zo ih midang khal Amah thawn remter dingah ṭuanvo in pek. 19 Kan phuanmi thu cu: Khrih thawngin leilung mi hmuahhmuah cu Pathian in Amah thawn a remter zo, ti a si. Pathian in an sual khumnak cazin a ret nawn lo; cule cuih rualremnak thuthangṭha sim dingah ṭuanvo in pek. 20 Curuangah kannih cu Khrih palai kan si. Pathian amah rori kanmah sungin thu a sim vek khin thu kan sim. Khrih ih hmin in kan lo sawm: Pathian thawn rem-aw uhla a ral sinak in a rualpi ah cang hram uh. 21 Sikhalsehla kanmah ih ruangah Pathian in sualnak zianghman a nei lomi Khrih kha sual ah a canter ih cuticun amah ih zaarah Pathian ih dingnak kan ṭawm venak dingah a si.
1 Pathian thawn hnaṭuan tlaangmi kan si ruangah Amah ih zaangfahnak nan comi cu a lakah canter hram lo dingin kan lo dil. 2 Pathian ih simmi hi ngaihnik uh: "Nan hnenih ka mithmai ṭha ka langter caanah cun nan aw ka thei; Nanmah ka lo rundamnak ni a thlen tikah ka lo bawm hai," a ti. Ngaihnik uh! Pathian mithmai ṭha ngah caan cu tuih caan hi a si; rundamnak co ni cu tuih ni hi a si. 3 Kan hnaṭuanmi hi zohmanih soisel ding kan duh lo ruangah zo ih lamzin hmanah rilhbahnak kan ret lo. 4 Thinlung sau zetin hnaihnawhnak, zinfetnak le harsatnak a phunphun kan tuar ih cuticun Pathian riantu kan sinak kan langter a si. 5 Vuaknak, thawngtlaknak le misenpi ih tuahsiatnak tla kan tong. Kan taksa ih tuar thei nawn lo tiangin hna kan ṭuan; it lo le rawl loin kan um. 6 Kan ziaza thiannak in siseh, thudik theih theinak in siseh, thinsaunak le zaangfah kan neihnak in siseh, thlarau thianhlimnak le duhdawtnak taktak in siseh, 7 thutak kan phuanmi le Pathian huham a langmi in siseh, Pathian ih hnaṭuantu kan sinak kan langter a si. Dingnak cu kan ral hriamhrei a si ih kanmah hum awknak ah siseh, kan hmai nornak ah siseh kan hmang; 8 upatnak kan tong ih mualphonak khal kan tuar; zomtaihmi kan si tawk a um ih thangṭhatmi kan si tawk khal a um. Thuphanper in puh na'n thutak kan sim. 9 Zohman ih theih lomi ah in ruat, sikhalsehla mi hmuahhmuah ih theihmi kan si fawn. Mithi vekah in ruat, asinain in hmuh vekin kan nungzet ko. Hremmi kan si na'n in that lo. 10 Kan riah in siatter ṭheu na'n kan lung a awi ringring. Kan farahzet na'n mi tampi milian kan siter. Zianghman nei lo kan si na'n ziang hmuahhmuah neitu kan si. 11 Korin khua ih rualṭha le uh, nan hnenah lailan in kan ṭong; kan thinlung cu tluangtlam zetin kan ret. 12 Kan thinlung sangka kan lo kharsan lo; nanmah sawn sokhaw in kharsantu! 13 Ka sungsuak faale bangin ka lo sim. Nan parih thinlung tluang kan neih vekin nannih khal in nei ve uh. Nan thinlung cu kauzetin ong uh! 14 A zum lotu pawl thawn kom-aw hlah uh. A cang thei lomi a si. Ziangtin so dingnak le siatnak cu an pawl awk thei ding? Ziangtin so tleunak le thimnak cu an umtlang thei ding? 15 Ziangtin so Khrih le khuavang cu an thinlung a bang awk thei ding? A zumtu le zum lotu ziangtal an pomtlaang theimi a um maw? 16 Ziangtin so Pathian ih biakinn le khawvel pawl ih milem pawl cu an rem awk thei ding? Ziangahtile kannih cu a nungmi Pathian ih biakinn kan si. Pathian amah rori in: "Ka minung lakah ka umnak inn ka sak ding ih an hnenah ka um ding. An Pathian ka si ding ih annih cu ka minung an si ding," a ti. 17 Cule Bawipa in: "Annih pawl tlansan uhla, an hnen ihsin ṭhen aw uh. A thiang lomi cu a dai in dai hlah uh; Cutin ka lo cohlang hai ding. 18 Kei cu nan Pa ka si ding ih, Nannih cu ka fanu le ka fapa tla nan si ding, tiah Cungnungbik Bawipa in a ti," tiah a ti.
1 Ka duhdawtmi u le nau, hi thukamnak hmuahhmuah hi kanmah hnenih kammi an si. Curuangah kan taksa pum siseh, kan thlarau siseh a balhtertu pohpoh cu hlon in thianghlim tein um uhsi; Pathian upat ṭihzahnak thawn nung uhsi. 2 Kan hrangah nan thinlung lawngter hram uh. Zohman kan bum lo, zohman kan siatsuah lo, zohman kan hmuhsuam in kan nautat lo. 3 Himi hi ka lo hnon hai ruangah ka timi a si lo; ziangahtile a hlanih ka ṭong zo vekin nannih hi kan lo duhzet ruangah nun khalah a nung tlang ding, thih khalah a thi tlang dingmi kan si. 4 Ka uar zetmi nan si. Ka mithmai a ṭhattertu khal nanmah nan si. Harsat mangbangnak kan ton khalah ruahsannak ka nei thotho. Ka lungawinak hi a liam thluahthlo! 5 Masidonia kan thlen hnu khalah daiteih colhnak caan kan nei lo. Khawzakip ah hnaihnawhnak a um: midang thawn tawh awknak a lenglamah a um ih kan thinlung sungah ṭihphannak a um fawn. 6 Sikhalsehla thinnaumi pawl thinlung khohnak petu Pathian in Titas ra thlennak thawngin kan thinlung in khohter. 7 Titas a ra thlen ruangah kan thin a nuam lawng si loin amah thazaang nan rak pekmi kan theih tikah kan tha a tho ngaingai. Ziangtluk in so keimah hmuh in duhzia, nan sir awkzia le keimah lamih nan ṭanzia pawl kha in ra sim; curuangah tuihhlan hnakin ka lung a awizet a si. 8 Ziangahtile khati ih ka cakuatmi ruangah nan riah a siat khalle ka sir aw lo. Tikcu malte sung hman va sisehla, khati ih ka cakuatmi in nan riah a lo siatter ti ka hmuh tikah cun ka thin a nuam lozet ve. 9 Sikhalsehla atu cu ka lung a awizet thlang; nan riahsiat ruangah ka lung a awi si loin nan riahsiatmi in nan nuncan a thleng ruangah a si. Khati ih nan riahsiatnak kha Pathian in a hman ruangah kan thil tuahmi in zianghman a lo siatsuah lo. 10 Pathian in riahsiatnak cu thinlung thlengnak ah a hmang ih rundamnak a suahter. Curuangah cuih riahsiatnak ruangah sir awknak zianghman a um lo. Sikhalsehla milai riahsiatnak menmen a si ahcun thihnak a suahter. 11 Pathian in nan riahsiatnak a hmanzia hi zohhnik uh: ziangtlukin so taimak suahnak ah a lo tuah; nan mawh lonak langter dingih nan ṭanzia hi! Thil sualral tuahmi nan hmuh tikah nan thin a lo tok, nan thla a phang, nan thin a heng, nan pum nan pe ih thil tisualmi cawh dingah nan tiar aw ṭhepṭhep. Hi thu hmuahhmuah ahhin mawhnak nan nei lo ti kha nan langter a si. 12 Curuangah khati ih ca ka ngan kha thilsual a tuahtu a um ruangah le thilsual tuahnak a tuartu a um ruang bikah a si lo. Thungaite ih ti ahcun kan hrangih nan pumpeknak hi ziangtluk ngaiso a si, tiah Pathian mithmuh ih lang dingah ka nganmi a si. 13 Curuangah a si kan thin a nuam ih kan tha a tho. Kan tha a tho ti lawng a si hrih lo. Nan zatein Titas nan rak bawm ih a thin nan nomternak thu Titas in in sim tikah kan lungawinak kan sim cawk lo a si. 14 Titas hnenah cun nanmah ih ruangah ka porh aw rero. Nannih khal in ka tha in siatter lo. Nan hnenah thudik kan sim ringring; cubangtuk in Titas hnenih kan porh awknak khal cu thudik ah a cang. 15 Cule Titas in a lo simmi nan zatein tuah nan duh daan le upatnak le ṭihzahnak thawn nan rak hmuah daan pawl a ruahsal vivo tikah a lo duhdawtnak hi nitin in a ṭhang vivo. 16 Ka thinlung zatein ka lo rinsan thei hi ka lung a va awi so!
1 U le nau pawl, Masidonia peng kawhhran pawl lakah Pathian ih zaangfahnak in thil a tuahsuakmi pawl hi nan theih ve dingah kan duhzet. 2 Harsatnak a phunphun an tong ih hniksaknak an tuar nasa; sikhalsehla lungawinak an neihmi hi a rak nasa ve ih anmah cu an farahzet na'n siang zetin thawhlawm an pe. 3 An pek thei zat tiang an pe a si tihi nan hnenih ka sim duhmi a si; an pek thei dingmi ih tlun hman an pe hrih lai a si. 4 Judea pengih Pathian mi pawl bomnak ṭuanvo in zem ve uh tiah anmah ih palung in in ra dil. 5 Himi hi kan thinlung hman in kan ruah ban lomi a si. A hmaisa ah Pathian hnenah an pum an pe aw; cule Pathian lungkimnak in kan hnen khalah an pe aw. 6 Curuangah hnaṭuan a rak thoktu Titas hi a hnaṭuan pehzom dingah le hih duhdawtnak hna hi pehzom ih ṭhehsuak dingah kan fial a si. 7 Nannih cu zumnak, thusimnak, theihnak, midang bom duhnak le kanmah in duhdawtnak pawlah nan lian ngaingai a si. Curuangah hi duhdawtnak hnaṭuan khalah hin mi nan hleih dingah kan lo duhsak a si. 8 Nan hrangah daan thlun ding ka tuahmi zianghman a um lo. Mi nan duhdawtnak ziangvek teu so a si, ti theih duh ah midang ih mibom an duhzia ka lo hmuhsaknak a si. 9 Kan Bawipa Jesuh Khrih ih mi a zaangfah zia cu nan thei: Amah cu a lianzet na'n nanmah ih ruangah mi farah ah a cang; cuticun a farahnak thawng in milian ih nan cannak dingah a si. 10 Kan dungkum ih nan rak thokmi ṭuanvo hi atu-ah ṭheh uhla a ṭha tiah ka ruahnak a si. Hi hnaṭuannak ahhin a ṭuan lawngah si loin a ṭuan duhnak khalah a hmaisa bik nan si. 11 Nan hnaṭuan cu cawl loin ṭuan uhla ṭheh uh. A hramthok ih nan hngakhlapzet vekin a ṭheh lam khalah thinlung hiarzetin nan hnaṭuan cu ṭheh tum uh; nan neihmi poh pek uh. 12 Siannak thinlung nan neih ahcun nan pekmi Pathian in a co ding; Pathian in nan neih lomi a lo dil lo. 13 Midang bomnak pek duh ruangah nan parih thilrit suan ka tum lo. Asinain tulaifangah cun neinungin nan um ruangah a farahmi pawl nan bom ding cu a mawi paam lo maw? Cule nannih nan farah pang ih annih an lian asile an lo bawm leh ve thung ding. Cutiin bangraan ih cohlanmi nan si ding. 15 Ca Thianghlim sung khalah, "Tampi a khawmtu in tamtuk a nei lem lo; malte a khawmtu in maltuk a nei cuang lo," tiah a um. 16 Nanmah bawm ding kan hiar vekin Titas khal nanmah bawm dingah a hiarzet ve ih Pathian hnenah kan lung a awi ngaingai. 17 Kan fialmi a lung a kim lawng si loin a lo bom ding cu a hiar tuk ih amah ih palung in nan hnen rathleng dingin a ruat aw zo. 18 Amah thawn hmun khatah kawhhran kipin a Thuthang phuannak ah an hmaizah zetmi kan unau pakhat kan rak thlah cih ding. 19 Culawng si loin amah cu Bawipa ih sunlawinak hrangih mi zawnruahnak hna kan ṭuannak ah le a bom kan lo duhnak kan langternak ah kanmah thawn khual tlawng tlang dingah amah cu Khristian mi pawl in an hrilmi le hnaṭuan an thiahmi a si. 20 Hi bangtuk siangzet ih pekmi laksawng kan tawlrelnak ah hin soiselnak zianghman um pang lo dingin kan ralringzet a si. 21 Kan tumtahmi cu Bawipa ih mithmuh lawngah si loin milai mithmuh khalah thildik tuah ding kha a si. 22 Cule anmah thawn kan unau dang pakhat khal kan thlah cih. Amah cu voi tamzet kan hniksak zo ih mi bom a duhzet ti kan hmu. Atu tla cu nan parah rinsannak a nei ngaingai ih lo bom ding cu a hiar sinsin. 23 Titas kan tile kan hnaṭuanpi a si ih nanmah bawm dingah kan ṭuan tlang ringring; amah thawn kan thlah tlangmi kan unau pawl khal kawhhran ai-awhtu an si ih Khrih hnenah sunlawinak thlentertu an si. 24 An parah nan duhdawtnak rak langter uh; cule kawhhran pawl in cuih thu cu an thei fiang ding ih nan hrangih kan porh awknak khal hi thudik a si tiin an thei ding.
1 Judea peng Pathian zumtu pawl hnenih bomnak nan kuatmi thu-ah hin nan hnenah cakuat ṭul in ka hmu lem lo. 2 Mi bom nan duh ti cu ka thei zo ih Masidonia ih a ummi pawl hnen tla ahcun nanmah ih thu-ah ka porh-aw rero zo. "Akhaia pengih a ummi kan unau pawl cu mi bom dingah kan dung kum ihsin an ralring cia zo," ka ti hai. Nanmah ih lungthawhnak ruangah mi tampi an thin a tho ve. 3 Hi kan unau pawl ka rak kuatnak san bik cu nanmah thu-ih kan porh-awk reronak hi sullam nei lo porhawknak ṭongkam meenah cang pang hlahseh ti ka duh ruangah a si. Asinain ka sim zo vekin bomnak pek dingih nan tummi thawn timtuah ciain rak um uh. 4 Cuti si loin ziangtin maw, Masidonia mi pawl keimah thawn an ra ih ralrinnak zianghman nan nei lo ti kha an hmuh pang a si ahcun nanmah ih ningzah ding cu um hrihseh; kanmah hrimhrim hitluk kan lo rinsan hnuah cun kan ning a zak nasa ding a si. 5 Curuangah keimah ka thlen hlanah hi kan unau pawl hi ka rak thlah; cule pek ding tiih nan ti ciami laksawng pawl timtuah ciaih um dingin tawlrel a ṭul tiah ka ruahmi an si. Cuticun ka ra thlen tikah tawlrel ciain a um dingih nan pek a ṭul ruangah nan pe si loin pek nan duh ruangah nan pe a si ti kha a langter ding. 6 Thlaici malte a vorhtu in rawl malte a khawm ding; tampi a vorhtu in tampi a khawm ve ding, tihi ciing ringring uh. 7 Zozo khal a thinlung a ṭhencat ngah hnuah pe seh; sir awknak thawn pe hlah seh; ka ṭuanvo a si, ti khalin pe hlah seh. Lungawi aipuangte ih a petu lawng Pathian in a duh a si. 8 Cule Pathian cu nan ṭulmi hnakih hlei in a lo pe theitu a si ih nan hrangih a ṭulmi poh khopkhamin nan nei ding ih thil ṭha nan tuahmi parah a hlei in nan ngah ding. 9 Ca Thianghlim in: "Siangzetin mi farah pawl cu a pek hai; A zaangfahnak cu kumkhua in a hmun," a ti. 10 Cule vorh ding thlaici a petu le ei ding rawl a petu Pathian in nan ṭulmi thlaici hmuahhmuah a lo pe ding; cun siang zetih nan pek ruangah nan thlaikho khal a ṭhanter ding ih nan paṭha ding. 11 Pathian in siang zetih petu si ringring dingah khopkhamin a lo nungter ding; cutiin nan laksawng pekmi cu kan hnen ihsin an ngah tikah mi tampi in Pathian an thangṭhat ding. 12 Ziangahtile hi nan hnaṭuanmi in Pathian zumtu pawl ih tlaksamnak tampi a bom lawng si loin minung thinlung ihsin Pathian cawimawinak tampi a suahter a si. 13 Hi nan hnaṭuanmi in a lang fiangter ruangah Khrih ih Thuthang nan pom ih hngetkhoh zetih nan din theinak ruangah siseh, nan bommi le midang pawl thawn nan neihmi siang zetih nan hlawm awknak ruangah siseh, mi tampi in Pathian hnenah lungawi thu an sim ding. 14 Pathian ih zaangfahnak a tam cuang hleice nan parih a thlen ruangah lo duhzet phah in nan hrangah thla an cam ding. 15 Sim cawk loin a sunglawimi Pathian laksawng hrangah lungawi thu a hnenah sim uhsi.
1 Hmun khatih kan umtlang tikah cun a nun a ṭha, a ṭongkam a neem in ti ih kan ṭhen-awk hnu ahcun a ti remrem tuk aw, in timi keimah Paul in Khrih zaangfahnak le nunneemnak thinlung thawn, 2 ka lo dil hai: Nan hnen ka thlen tikah ti remrem ih ka um ding ṭul in um hram hlah uh. Ziangahtile an hnaṭuannak hi leilung duhhamnak thinlung thawn an ṭuan ko lo maw, in titu pawl hnenah cun hak remrem in ka ti thei ve hai a si. 3 Leilung parah a ummi kan si taktak ko; sikhalsehla leilung duhnak thinlung thawn ral kan do lo. 4 Raldonak ih kan hmanmi cu leilung hriamnam an si lo; a cak zetmi Pathian ih hriamnam sawn an si ih ral hauhruang khoh zetzet siatbalnak ih kan hmanmi hriamnam an si. A dik loih thu el awknak cu kan siatsuah ṭheh, 5 Pathian kan theihnak dingah puarthaunak thawn an dawlmi khamtu hmuahhmuah kan bal ṭheh; minung ih ruahnak cu sal bangin kan kai ih Khrih thu ngaitu-ah kan canter. 6 Khrih thu ngaitu nan sinak famkim zetih nan langter hnuah thu ngai lo pawl cu kan hrem thei ding. 7 Nannih cun thil khi a lenglam hmuihmel lawngin nan zoh. Zotal in cutawkah kei cu Khrih ta ka si tiah a phuangtu an um maw? Cubangtuk an um asile anmahte ruat-awta hai seh; ziangahtile Khrih ta a si tlukin kannih khal kan si ve. 8 Bawipa ih i pekmi thuneihnak cu a luan deuhin ka porhawknak ih ka hman khalle ka ning a zak lo; cuih thuneihnak cu nanmah siatbalnak hrangah a si lo, nanmah tundinnak hrangah a si sawn. 9 Hitiih ka cakuatmi in nanmah ṭhihphaih tum rero a bang ding cu ka duh lo. 10 Mihrek in, "Paul ih cakuat pawl hi an khoh ih hmual an neizet fawn; asinain a minung ngaingai in kan hnenih a um tikah cun zianghman a si cuca lo, a ṭongmi khal hmual a nei lo," nan ti. 11 Cubangtuk minung pawl cun a lang hlat ih kan nganmi ca le nanmah thawn kan um tikih kan tuah dingmi an dang aw lo tihi an theihthiam a ṭul a si. 12 Cubangtuk a saang zetih a ret-awmi pawl thawn cun kan ret-aw tlang ngam lo ding ih a ṭhim khal kan tahṭhim aw ngam lo ding. Thungai ti-ah cun an aa a si! Anmah le anmah tah awknak ah anmahte tahfung an tuah ih cuih tahfung in anmah le anmah thu an ṭhen aw. 13 Sikhalsehla kannih cu kan porh awk khalle a hleifuan lo ding; Pathian in hnaṭuan in pekmi ri-khiah sung lawngah a um ding ih cuih kan hnaṭuannak rikhiah sungah cun nanmah lakih kan hnaṭuanmi hi a tel a si. 14 Cule nannih cu cuih rikhiah sungih a ummi nan si ruangah Khrih Thuthang ṭha kengin nan hnen kan rathlen tikah rikhiah lengih a fehmi kan si lo. 15 Pathian in kan ṭuan dingih a retmi rikhiah lengih hna a ṭuantu pawl ih hnaṭuannak ah porh awk ding zianghman kan nei lo. Cuhnakin Pathian in hnaṭuannak rikhiah in pekmi sungah ṭuan in cuticun nanmah sungah a tum le a kau sawn in hna kan ṭuan thei ding ih cutiin nan zumnak a ṭhang sinsin ding ti sawn hi kan ruahsanmi a si. 16 Cuticun midang lo sungih hna an rak ṭuan ciami parah porh aw loin hmundang sawnah Thuthangṭha kan sim ding a si. 17 Sikhalsehla Ca Thianghlim ih a ti zo vekin: "Zokhal porh awk a duh asile Bawipa ih a tuahmi lawngah porh-aw seh." 18 Ziangahtile mah le mah ṭha a ti awtu si loin Pathian ih ṭha a timi sawn kha cohlan a si.
1 Ka aat deuh hmanah a zawizia in thiam dingah ka duh! I zawi hrih hram uh! 2 Pathian in a lo thiik bangin kei khal in ka lo thiik ve a si. Nannih cu Khrih amah thawn lawng ṭhi-aw dingah ka ham ciami fala thiang bangtuk nan si. 3 Ka phan mi cu: rulpi in a depdetnak in Evi a thlem ngah bangin nan thinlung ṭhat lonak in a lo thlem ding ih kimzet le thiang zetih Khrih nan thlunnak hi nan tanta pang ding tihi a si. 4 Ziangahtile kannih ih kan phuanmi Jesuh si loin Jesuh dang deuh thu a phuangtu nan hnenih an rat khalah lungawi thatho zetin nan rak zawi thei. Kan hnen ihsin nan ngah ciami Thlarau le Thuthang ṭha si loin thlarau dangpi le thuthang dangpi an ra sim tik khalah nan rak pom vivo fawn ruangah a si. 5 Nannih in, "Tirhthlahmi hleice" tiah nan timi pawl hnakin malte hman niam cuangin ka ruat aw ve lo. 6 Thusim lamah cun a thiam lo khal ka si ding; sikhalsehla theihnak lamah cun ka niam cuang hrimhrim lo. Ziangtik khalah le zo hnen khalah hi thu cu fiang zetin kan lo sim a si. 7 Pathian Thuthang ṭha nan hnenih ka sim tikah sim man zianghman ka la lo. Nanmah sawn thupitter duh ah kei cu hnuai ah ka thla aw. Cutiih ka um cu ka mawh maw? 8 Nan hnenih hna ka ṭuan laiah khan kawhhran dangdang in in cawm. Nanmah bomnak ah an thilri ka long ka ti pei cu! 9 Cule nan hnenih ka um sungah khan paisa hman ding ka ṭulzet khalle nannih cu ka lo hnaihnok lo; Masidonia ihsin a rungmi kan unau pawl in ka poihaimi hmuahhmuah in run suum ṭheh a si. Tuihhlan vek thothoin hmailam khalah nan phurh lo rittertu cu ka si lo ding. 10 Hitiih ka porh awknak hi Akhaia peng sung khuazakip ah zohman in an daiter lo ding tiin ka sungih a ummi Khrih ih thutak in ka kam a si. 11 Ka lo duhdawt lo ruangah hiti in ka ṭong a si maw? Ka lo duhdawt ti cu Pathian in a thei ko. 12 Tirhthlah kan si ve a ti awmi pawl in, "Anmah vek thothoin hna kan ṭuan ve a si," tiah an porh awk thei lonak dingah atu ka tuahmi hi pehzom in ka tuah vivo ding. 13 Annih tla cu tirhthlah taktak an si lo, tirhthlah deu an si. An hnaṭuanmi thu-ah thuphan an per ih Khrih tirhthlah ngaingai bangin an ti awter. 14 Cumi cu mangbang ding zianghman a um lo; Satan hmanin tleunak vancungmi bangtuk in a tuah aw thei a si. 15 Curuangah Satan hnaṭuantu a hnen-um pawl khal in dingnak hnaṭuantu pawl vekin an tuah awkter a si khalle an hrangah thil olte a si. A netnak ahcun an hnaṭuan daan vekin an tuar leh ko ding. 16 Ka nolh sal ding: zohman in miaa ah i ruat hlah hai seh. Asinain nannih in in ruat asile mi aa vekin i cohlang uhla malte tal ka porh aw thei ve ding. 17 Hi bangtuk ih ka ṭongmi hi Bawipa in i ṭongter duhmi an si lo; porh awknak thu-ah cun mi aa vekin ka ṭong a si. 18 Sikhalsehla milai tisa thu-ah a porh awmi an tamzet ruangah hin kei khal ka porh aw ve ding. 19 Nannih cu mifim zet nan si ruangah mi aa pawl nan zawi thei! 20 Amah ih thuthu in nunter a lo duhtu, a lo bum ih a lo hlawktu, thang in a lo awktu, a lo hmuhsuamtu le nan biang a lo bengtu pawl khal nan zawi thei! 21 Kannih pawl cu kan ṭih a hrut tuk ih cubangtuk cun kan tuah ngam ve lo tiih phuan ding hi ka ning a zak. Sihmansehla zokhal thil pakhatkhat thu-ah a porh awk ngam a si ahcun, kei khal mi aa bangin ka ṭong ding, amah tluk tein ka ral a ṭha ve ding. 22 Hebru mi an si maw? Kei tla ka si ve. Israel mi an si maw? Kei khal ka si ve. Abraham ih tefa sin an si maw? Kei khal ka si ve. 23 Khrih riantu an si maw? Kei hi miaa ka bang, asinain thungaite in annih hnak cun Khrih riantu ṭha ka si sawn. Annih hnakin ka hnaṭuan a khung sawn; voi tam sawn thawng thlakmi ka si; voi tamsawn vuak ka tong, cule voi tampi thi dok nungngaan in ka tuar. 24 Judah pawl in voi sawmthum le voikua in ṭum nga rori in thawi. 25 Rom mi pawl in voithum in thawi, cule lungto dennak voikhat ka tuar. Tangphawlawng siat voithum ka tong, voikhat tla cu nazi kul hluanli sung tifinriat parah ka taang. 26 Voi tampi khual ka tlawnnak ah tilik le suamhmang ruangah thinphannak ka tong ih ka phunpi Judah mi hnen in le Zentail mi hnen khalin ṭihnungza ka tong. Òihnungza a phunphun khawpi sungah le hramlakah siseh, tifinriat parah le rualpi deu ka neihmi hnenin siseh ka tong ringring. 27 Hnaṭuan khung cat loin a um ih voi tampi ihnak caan nei loin ka um; rilrawng le tihal in ka um; voi tampi beunak nei lo, ei ding rawl khopkham nei lo le hnipuan nei loin ka um. 28 Cule thildang thu rel loin kawhhran zawn ka ruahnak hrimhrim in nitin thilrit bangin i nen. 29 Mi pakhatkhat a ṭawnṭai asile kei khal ṭawnṭai in ka thei aw ve; pakhatkhat sualnak sungih a bah asile thinharnak in ka khat. 30 A porh aw ding ka si ahcun ka derdainak a langtertu thil parah ka porh aw ding. 31 Bawipa Jesuh ih Pa le a Pathian kumkhua in a hmin cu thangṭhat si ko seh; Amah in thuphan ka per lo ti a thei. 32 Damaskas khawsungih ka um laiah Siangpahrang Aretas kuthnuai ih mangki bawi in khawpi kulhnak kotka kipah keimah kai dingin palik a ret. 33 Sikhalsehla ong pakhat ihsin a lengah bawm in in thlak ih cutin ka luat.
1 Zianghman ṭhathnemnak a um lo khalle ka porh awk a ṭul. Sikhalsehla atu cu Bawipa ih i pekmi langnak le thuphuan thu pawl ka sim ding. 2 Kan dung kum hleili laiah ka theihmi Khristian pakhat cu van dot thumnak ah cawi in a um. (A ruangpum rori in a si maw, si lo ti ka thei lo; Pathian lawng in a thei.) 3 Ka nolh sal ding; himi pa cu Paradis ah cawi a si, ti ka thei. (Ka ti zo bangin, a taksa in a cang ngaingai maw, langnak a ngahmi a si maw, ka thei lo; Pathian lawng in a thei.) Cutawkah cupa cun minung ih sim le rel theih lomi le simrel siansak lomi thu a thei. 5 Curuangah hi pa ih thuah ka porh aw ding; ka derdainak langtertu thil dah tilo keimah ih thu-ah cun ka porh aw lo ding. 6 Ka va porh awk ngaingai hmanah mi aa ka si lem lo ding, ziangahtile thudik ka sim ding ruangah a si. Asinain ka porh aw lo ding, ziangahtile ka tuahmi a hmutu le ka ṭongmi a theitu in ka sinak taktak an theihmi hnakih sangdeuh in zokhal ih in zoh ding kha ka duh lo. 7 Sikhalsehla khawruahharza thil tampi ka hmuh ruangah ka puarthau lonak dingah ka taksa sungah hling i pek. Cuih hling cu Satan palai bangin hna a ṭuan ih ka puarthau lonak dingah i vuaktu le i khawngtu a si. 8 Voithum tiang Bawipa ih hnenah thla ka cam ih hi thil hi hlonhlo dingin ka dil. 9 Asinain i run let ih, "Ka zaangfahnak cu na hrangah a tawk a si; ziangahtile na ṭonṭaih caan hi ka cah bik caan a si," a ti. Curuangah Khrih cahnak le humhimnak cu ka hnenih a umnak dingah ka ṭonṭaihnak khalah hin hmaihngal zetin ka lung a awi. 10 Cuticun Khrih ruangah ka ṭonṭaih tikah siseh, hmuhsuam nautatnak, mangbang vansaannak, hremnak le harsatnak ah siseh, lungkim zetin ka um thei zo. Ziangahtile ka ṭonṭaih caan hi ka cah laitak a si. 11 Mi aa nundaan in ka nung; nanmah in cutiih nung dingin in tuah a si! Ka parih lungkimnak a langtertu ding cu nanmah nan si. Zianghman ka va si lo hmanah, "Tirhthlahmi hleice," pawl hnak cun malte hman ka niam cuang lo. 12 Thinsaunak thawn nanmah lakah khawruahhar le hmuhsaknak mak tampi ka tuah ih cumi cun tirhthlah taktak ka si kha an langter. 13 Kawhhran dang pawl hnakin ziang vekin so sia cuangin ka lo tuah? Paisa bomnak dilin ka lo hnaihnok lo lawng hi a si ko lo maw? Ka palhnak hi in ngaidam hram uh. 14 Atu hi nanmah lo tlawn ka tum a voithumnak a si, zianghman ka lo dil lo ding. Ka duhmi cu nan paisa a si lo, nanmah nan si. Thungai ti ahcun faale in mahih nu le pa cu cawm ding a si leem cuang lo; nu le pa sawn in faale cu cawm ding a si. 15 Nanmah bomnak ah hin ka neihmi hmuahhmuah le ka taksa pum hi hman ṭheh ka duh. Hi bangtuk ih ka lo duhdawt zet ruangah in ngaih lo sawn ding maw? 16 Nan hrangah thilrit ka si lo ti cu nanmah khal in a dik nan ti ko ding. Asinain mi ṭhenkhat in, mi depde a si, bumnak thang in in awk, nan ti. 17 Cucu ziangtinso a si thiam? Nan hnenih palai ka thlahmi pawl kha bumnak thawn hlawknak hawl duhih ka hmanmi an si maw? 18 Titas cu nanmah ra tlawng dingin ka dil ih amah thawn fehtlang dingah kan Khristian unau pakhat tla ka thlah. Titas in amah ih hlawknak ah in hmang nan ti ding maw? Amah le keimah cu thinlung khat nei in hna kan ṭuantlang ih kan nundaan tla a bang aw, a si sawn lo maw? 19 Nan hmaiah hin kan sinak ṭan in a ṭong ringringtu kan bang thei meen. Cumi cu a dik lo! Pathian ih mithmuh ah Khrih in ṭongter in duhsakmi kha kan ṭong a si. Ka duhdawtmi u le nau, ziang hmuahhmuah kan tuahmi hi nanmah bomnak hlirih kan tuahmi an si. 20 Asinain nan hnen ka thlen tikah cuvek si hai sehla ti ka saduhthah mi vek nan si lo pang ding tihi ka phang ih, kei khal cuvek sisehla ti in duhsak vekin ka si lo pang ding ti khal ka phangzet ve. Nan lakah tawh awknak, iksiknak, thintawinak, mahih zawnruahnak, hmuhsuamnak le relsiat awknak, puarthaunak le buai rurinak thawn um in ka lo hmu pang ding tihi ka phang a si. 21 Nan hnen ka ra thlen sal tikah hin ka Pathian in nan mithmuh ah ningzak in i tuah ding ti ka phang; cutin kan dunglam caanih sualnak a tuahtu pawl, thil borhhlawh a phunphun, tisa hiarnak le nu pa sualnak an tuahmi sir awknak an neih lo ruangah ka ṭap rero ding ti ka phang a si.
1 Atuih ṭum hi ka lo tlawn a voithumnak a si ding. Ca Thianghlim in, "Sual puh awknak a um tikah theihpitu pahnih maw, pathum maw in an dinpi lawngah a dik ti ding a si," tiah a ti. 2 Kan dungih sualnak a tuahtu pawl hnenah siseh, midang pawl hnenah siseh, hi thu hi ka sim duh. Kan dung a voihnihnak ka lo tlawn laiah ka sim zo; asinain lamhla ih ka um caan khalah hin ka sim sal ding; nan hnen ka rathlen sal tikah cun zohman ka dimdoih lo ding. 3 Cuticun Paul ih ṭongmi hi Khrih ih ṭongkam ngaingai a si maw? tiah nan ti ṭheumi cu nan hmu fiang thluh ding. Khrih in nan parih hna a ṭuan tikah a ṭawnṭai lo sokhaw; nanmah lakah a cahnak a langter a si. 4 Ziangahtile ṭawnṭai zetin thinglamtah parah an that na'n atu cu Pathian ih cahnak in a nung. Amah thawn kan pehzom awk tikah kan ṭawnṭai ve na'n nanmah thawn kan pawlkomnak ahcun a nunnak sungah Pathian ih cahnak kan ṭawm aw ding. 5 Zumnak sungah kan um maw um lo ti theih fiangnakah nanmah le nanmah cek aw uh. Jesuh Khrih kan sungah a um taktak nan ti thei maw? A um taktak lo a si ahcun nan cek awk tikah mi hlawhtling lo nan si. 6 Asinain kannih cu kan hlawhtling tihi nan thei ding ka zum. 7 Kannih kan hnaṭuannak ah kan hlawhtling a si ti langternak ah si loin, kannih hi a tlasammi kan bang hmanah nannih cun a dik lomi tuah loin a dikmi sawn nan tuahnak dingah Pathian hnenah thla kan cam. 8 Ziangahtile thutak cu kan dodal thei lo ding; a ṭanpi lawng kan ṭanpi thei. 9 Kannih cu kan ṭawnṭai na'n nannih cu nan cah ruangah kan lung a awi. Curuangah mi famkim nan sinak dingah kannih khal in thla kan cam. 10 Curuangah a langhlat khalin nan hnenah hi ca ka ngannak a si; ziangahtile Bawipa in thuneihnak i pek mi hi nanmah siatbalnak dingah si loin tundinnak dingah a si ih nan hnen ka ra thlen tikah khoh tukin nan parah ka hman ṭul lo dingah ka tummi a si. 11 Atu cu u le nau tla, damte'n rak um hram uh. Famkim dingin zuam aw uh. Ka lo dilnak kha rak ngai uh; pakhat le pakhat thinlung rualtein um uh; remte le daitein um uh. Cule duhdawtnak le daihnak Pathian cu nanmah thawn a um ding. 12 Pakhat le pakhat a thianghlimmi hnamnak thawn cibai buk aw uh. Pathian mithiang hmuahhmuah in cibai buknak an lo kuat a si. 13 Bawipa Jesuh Khrih ih zaangfahnak, Pathian ih duhdawtnak le Thlarau Thianghlim ih pawlkomnak cu nan zate hnenah um hram seh.
1 Galati kawhhran pawl hnenah tirhthlah Paul in ca ka lo kuat. Thuthang ṭha phuang dingih tirhthlah si dingah hin milai ih hrilmi le thlahmi ka si lo; Jesuh Khrih thihnak ihsin a thotertu Pa Pathian le amah Jesuh Khrih ih hrilmi le thlahmi ka si. 2 Hitawkih a ummi unau pawl tla thawn Galati ih kawhhran pawl cibai kan lo buk a si. 3 Kan Pa Pathian le Bawipa Jesuh Khrih in zaangfahnak le daihnak cu lo pe hram seh. 4 Tuihsan sansia sung ihsin kannih luatter dingah Khrih cun Pa Pathian duhnak thlun in kan sualnak ruangah a nunnak a pe zo. 5 Pa Pathian hnenah sunlawinak cu a kumkhua in um camcin hram seh! Amen. 6 Ziang kar lote sungah Khrih zaangfahnak thawn a lo kotu cu nan dungtun ih Thuthang ṭha dang nan pan lohli ka hmuh tikah ka mang a bang ngaingai. 7 'Thuthang ṭha dang,' a um ngaingai ruangih ka timi a si lo; nan thinlung a lo hnaihnoktu le Khrih Thuthang ṭha thleng a tum rerotu minung an um ruangih ka timi a si. 8 Kanmah siseh, vancungmi khal siseh, nan hnenih kan phuan ciami Thuthang ṭha si loin thuthangṭha dang simtu an um a si ahcun camsiat si ko seh! 9 Kan lo sim zo na'n atu-ah ka sim sal ko pei: nan pom ciami Thuthang ṭha siarlo thuthangṭha dang simtu cu camsiat si ko seh. 10 Hitiih ka ti tikah milai lungkimnak hawl rero ka bang maw? Ka tummi cu milai ih lungkimpinak a si lo; Pathian ih lungkimpinak a si sawn. Milai ih thangṭhatnak ka hawl maw? Mi hmaiih hminṭhatnak ka hawl a si ahcun Khrih ih hnaṭuantu ka si lo ding. 11 Ka u le ka nau tla, Thuthang ṭha ka phuanmi hi minung ih thokmi a si lo, tihi nan hnenah ka langter duhmi a si. 12 Minung hnen ihsin ka ngahmi a si lo; milai zohmanih in zirhmi khal a si fawn lo. Jesuh Khrih amah in ka hnenih a phuanmi a si. 13 Ka rak nuncan ṭheu daan cu nan thei thluh ko. Judah biaknak ka thlun laiah cun Pathian ih kawhhran pawl ka hremsiat ih cihmit dingah ka rak zuam ciamco. 14 Judah biaknak thlun lamah cun ka khukṭhi lakah a fel bikmi ka si. Kan pupa daan thlun lamah cun a hleice in rinsan tlak taktak ka si. 15 Sikhalsehla Pathian cun a zaangfahnak thawngin ka suah hlan hmanin i hril ih amah ih hnaṭuantu si dingah i ko. 16 A Thuthang ṭha Zentail mi hnenih phuang dingah, a Fapa ka hnenih a run langter tikah milai zohman thuron dingah ka pan lo. 17 Jerusalem ih a ummi ka hlanih tirhthlah a rak si zomi pawl khal ka pan lo. Zamrang in Arabia sawn ah ka feh ih Damaskas ah ka ra kir sal. 18 Kum thum hnu lawngah Piter tong dingin Jerusalem ah ka feh ih a hnenah zarh hnih ka caam. 19 Kan Bawipa ih naupa Jeim siarlo, tirhthlah dang zohman ka tong lo. 20 Hitiih ka nganmi hi thudik a si; thuphan a si lo ti cu Pathian Amah in a thei. 21 Cuih hnuah Siria le Silisia ramah ka feh. 22 Culai ahcun Judea ram Khristian pawl cun pumpak in in thei hrih lo. 23 "In rak hrem rerotu in atu-ah cun siatsuah a rak tummi kan zumnak thuhla cu a phuang ciamco a si," tiin mi ih an simmi an thei ih, 24 cutiin keimah ruangah Pathian an thangṭhat.
1 Kum hleili hnuah Barnabas thawn Jerusalem ah ka feh sal. Titas khal ka fehpi ve. 2 Pathian in i fial ruangah ka feh a si. Pumpak in Khristian hotu pawl ka tong ih Zentail mi hnenah Thuthang ṭha ka phuan thu an hnenah ka sim. Ka rak ṭuan ciami siseh atuih ka ṭuan rero laimi khal siseh thulolak ih cang ṭheh ding cu ka duh lo. 3 Ka hnaṭuanpi Titas cu Grik mi asinain serhtan dingah zohman in kan hneek lo; 4 serhtan seh titu khal an um. Mi ṭhenkhat zumtu ngaingai vekin an umter-aw ih kan lakah lutthup tahratin Khrih Jesuh thawn kan pehzom awknak ruangih zalennak kan conak thu hi thlingthlatu an um. Kanmah pawl hi salih cang sal dingah an duhmi a si. 5 Sikhalsehla nan hrangah Thuthang ṭha felfai teih humhim kan duh ruangah kar khatte hman dung kan sip lo. 6 Hotu bangtuk ih ruahmi pawl in ruahnak thar zianghman in pe lo. Pathian cun a lenglam thil a zoh lo ruangah cuih hotu pawl cu ziangbangtuk an si khalle ka hrangah cun a lamdangnak a um cuang lo. 7 Ruahnak thar petu lam si loin Judah mi hnenah Thuthang ṭha phuang dingah Piter cu Pathian in ṭuanvo a pekmi an hmuh vekin, kei khal Zentail mi hnenah Thuthang ṭha phuang dingin Pathian in ṭuanvo i pek kha a hmutu an si. 8 Ziangtin tile, Pathian ih huham thawngin Judah mi hnenah Piter cu tirhthlah a si vekin kei khal Zentail mi hnenah tirhthlah ka si ve. 9 Hotu ih ruahmi Jeim, Piter le Johan pawl in hi hnaṭuan sunglawi hi Pathian in i pe ti kha an thei thiam; curuangah hnaṭuan tlang kan si ti langternak ah Barnabas thawn kan kut in kai. Cule keimah le Barnabas cu Zentail mi lakih hnaṭuan dingah le annih cu Judah mi pawl lakih hnaṭuan dingah lungkim tlangnak kan nei. 10 In dilmi pakhat cu an lakih mifarah pawl hngilh lo ding kha a si ih cumicu taimak suah ih ṭuan rero kan duhmi a rak si ko. 11 Cule Antiok khua ih Piter a ra tlawn tikah misenpi hmaiah langhngan in ka mawhthluk, ziangahtile a mawh a si ti a fiang. 12 Jeim ih a rak thlahmi pawl an ra thlen hlanah cun Zentail unau pawl thawn rawl an ei tlang ṭheu; asinain cu pawl an ra thlen hnu cun serhtan a ṭanpitu pawl a ṭih ruangah Zentail mi pawl cu a hrial ih an hnenah rawl a ei duh nawn lo. 13 Judah mi kan unau pawl khal Piter vekin an ral a hrut ih dungah an siip. Barnabas tiangin an ralhruh cu an suan ve. 14 Thuthang ṭha ih in hmuhsakmi lamzin ding vekin an thlun lo ti ka hmuh tikah Piter cu misenpi hmaiah, "Nang cu Judah mi na si na'n Judah nundaan vekin nung loin Zentail mi vekin na nung. Cutiin asile ziangtinso Zentail mi pawl cu Judah daan vekin nung dingin na hnek thei ding?" tiah ka ti. 15 Thungaite ih kan ti a si ahcun kannih cu kan suahthlak ihsin Judah mi kan si ih, 'Zentail misual pawl,' kan si hrimhrim lo. 16 Sikhalsehla minung cu Jesuh Khrih rinnak ruang lawngin Pathian hmaiah thiamcoter a si; Daan thlunnak in a si dah lo, ti kan thei. Curuangah kannih khal Khrih kan rinnak thawngin Pathian hmaiah thiamcotermi kan sinak dingah Khrih Jesuh cu kan zum. Ziangtin tile Daan thlunnak thawngin milai zohman Pathian hmaiah thiamcoternak an ngah lo. 17 Cule Khrih thawn kan pehzom awknak ruangin Pathian hmaiah thiamcotermi si dingih kan zuam rero tikah hin Zentail mi vekih 'Misual pawl!' tiih kawh kan co a si ahcun Khrih hi sualnak ih in fehpitu a si, ti a theih ding maw? Theih hrimhrim hlah! 18 Ka bal ciami daan kha ka thlun sal a si ahcun Daan a buartu cu keimah ka si, ti ka langter a si. 19 Daan thuhla ahcun kei cu mithi ka si; Pathian ah nung dingin daan in kei cu i that zo a si. A thinglamtah parah kei cu Khrih thawn thahmi ka si zo. 20 Curuangah a nungtu cu kei ka si nawn lo; ka sungih a nungtu Khrih sawn a si. Atuih ka nun hi cu i duhdaw ih ka hrangah a nunnak a petu Pathian Fapa rinnak in ka nung a si. 21 Pathian ih zaangfah thinpemnak cu ka el thei lo. Minung cu Daan thlunnak ruang ih thiamcoter a si ahcun Khrih thihnak cu man nei lo ah a cang a si.
1 Galati mi-aa rual! Zoso a lo polhtu? Jesuh Khrih thinglamtah parih a thihnak cu nan mit ah fiang zetin a cuang a sisi! 2 Hi thil hi i simhnik uh: Pathian Thlarau nan comi hi Daan ih a lo fialmi nan tuah ruangah maw, a si lole Thuthang ṭha nan theihnak le nan rinnak in so nan ngah? 3 Hi tluk lawmmam in nan aa maw si! A hram nan thok laiah cun Thlarau thawn nan thok; a net lam atu ahcun nanmah ih cahnak thawn netter nan tum maw si? 4 Nan nunnak ih nan ton ciami hmuahhmuah thuphan ah maw a can ṭheh? Thuphan cu an si ṭheh lo ding na'n! 5 Pathian in Thlarau a lo pek ih nanmah lakah mangbangza a tuahmi kha Daan ih a lo fialmi nan tuah ruangah maw a si? a si lole Thuthang ṭha nan thei ih nan zum ruangah so a si? 6 Abraham ih thu kha ruathnik uh. Ca Thianghlim ah, "Abraham in Pathian a zum ih cutiih a zumnak ruangah Pathian in miding ah a co," tiah a um. 7 Nan theih dingmi cu, Abraham ih tefa ngaingai cu zumnak neimi hi an si. 8 Ca Thianghlim in, "An zumnak ruangah Zentail mi pawl cu Pathian in miding ah a co ding a si," tiah a rak ti cia zo. Curuangah Abraham hnenah, "Nangmah thawngin mi hmuahhmuah Pathian in a thlawsuah ding," tiah Ca Thianghlim in Thuthang ṭha cu a rak than. 9 Abraham in a zum ruangah thlawsuahnak a co. Cubangtuk in zumtu hmuahhmuah cu thlawsuahnak an co ve ding. 10 Daan thlunnak a rinsantu cu camsiatnak hnuai ih a ummi an si. Ziangahtile Ca Thianghlim in, "Zozo khal Daan cabu sungih nganmi vek rori ih a thlun ringring lotu cu Pathian ih camsiatnak hnuai ah an um a si," tiah a ti. 11 Ca Thianghlim in, "Zumnak ruangih Pathian thiamcotermi lawng an nung ding," a ti ruangah Daan thlunnak in zohman thiamcoter an si lo, ti cu a fiang zo. 12 Curuangah Daan le zumnak cu pehtlaih awknak an nei lo. Ca Thianghlim in, "Daan ih fialmi vek rori ih a tuah ṭhehtu cu a nung ding," a ti. 13 Sihmansehla Khrih cu kan hrangih camsiatmi a si ruangah Daan ih a thlenpimi camsiatnak ihsin in runsuak zo. Ziangahtile Ca Thianghlim in, "Zokhal thing parih thlai a si mi cu Pathian camsiatnak cotu a si," tiah a ti. 14 Cuticun Khrih Jesuh ih zaarah Pathian in Abraham hnenih a tiammi thlawsuah cu Zentail mi in an conak dingah le zumnak thawngin Pathian ih tiam ciami Thlarau kan conak dingah a si. 15 U le nau pawl, nitin kan hmuh kan tonmi ihsin tahṭhimnak ka la ding: thu pakhatkhatah mi pahnih an lungkim in lungkimnak an tuah tikah zohman in an phiat thei lo ih an beet thei fawn lo. 16 Cuvekin Pathian in Abraham le a tefa hnenah thutiamnak a tuah. Ca Thianghlim in, "Tefa pawl," ti ṭongfang a hmang lo, "Tefa," ti lawng a ti ih a sim duhmi cu mi pakhat a si ih cucu Khrih a si. 17 Ka sim duhmi cu, Pathian in Abraham thawn thukamnak a tuah ih cumi cu thlunsuak dingah a tiam aw. Kum zali le sawmthum hnu-ih pekmi Daan cun Pathian thukam cu a phiat thei lo. A thutiammi khal a lakah a cangter thei fawn lo. 18 Ziangahtile Pathian ih laksawng cu Daan ruangah a si, ti a si ahcun Amah ih thutiamnak thawngin a si lo, tiah a cang ding. Sikhalsehla Abraham hnenah Pathian in laksawng a peknak san cu a hnenah thutiamnak a tuah zo ruangah a si. 19 Cuti asile Daan ih ṭhathnemnak ziangso a si? Daan cu sualnak timi hi ziangso a si ti langternak ah a si ih Pathian ih tiam ciami Abraham ih tefa a ra thlen tiang um ringring dingih pekmi a si. Daan cu vanmi pawl ih pekmi a si ih vanmi le minung karlakah palai pakhat a rak um. 20 Asinain mi pakhat lawng hna a ṭuannak ahcun palai um a ṭul lo; Pathian cu pakhat lawng a si. 21 Cuti asile Daan le Pathian ih thutiam cu an kalh-aw maw si? Kalh-aw hrimhrim hlah! Ziangahtile minung hnenah nunnak pe theitu daan rak um sehla, cuih daan thlunin Pathian hmaiah thiamcoter an si ṭheh ding. 22 Sikhalsehla Ca Thianghlim in, "Leilung pumpuluk hi sualnak huham hnuai ah a um," a ti. Curuangah Jesuh Khrih rinsannak thawng lawngih tiam ciami Pathian ih kammi laksawng cu a zumtu hnen lawngah pek a si. 23 Asinain zumnak tikcu caan a thlen hlanah cun Daan in thawngtlami bangin in hrengtaar; cumicu rinnak a suah hlan sung a si. 24 Curuangah rinnak thawngin Pathian hmaiih thiamcotermi kan si leh-nak dingah, Daan cu Khrih a rat hlan sung in khortu a si. 25 Atu cu rinnak a ra thlen zo ruangah Daan cu in khortu a si nawn lo. 26 Rinnak thawngin nan zatein Pathian ih fa nan si ih Khrih Jesuh thawn nan pehzom aw zo. 27 Khrih thawn pehzom awknak sungih hnimmi nan si zo ih atu ahcun Khrih nunzia thawn nan thuam aw a si. 28 Curuangah Judah mi le Zentail mi tiah thleidannak a um nawn lo; sal le miluat karlakah siseh, nunau le mipa karlak khalah siseh, thleidannak a um nawn lo. Nan zatein Khrih Jesuh thawn nan pehzom awknak sungah pakhat nan si. 29 Khrih ta nan si ahcun Abraham ih tefa nan si ih Pathian thutiam cia vekin a ro cotu nan si.
1 Ka sim duhmi cu hiti in a si: fa pakhat cu a pa ih ro co ṭhehtu ding le ziang hmuahhmuah a neitu ding va si hmansehla nauhak a si laiah cun sal bangtuk in tuah a si. 2 Nauhak a si sungah cun a pa ih tikcu a tinmi a kim hlanah cun a kilkhawitu le a thilri a tawlrel saktu an um. 3 Cuvekin kannih khal thlarau lamih pitling kan si hlanah cun lei le vanih thuneitu thlarau pawl ih sal kan si. 4 Sikhalsehla tikcu tinmi a thlen tikah Pathian in a Fapa a run thlah. Nunau sung ihsin a suak ih Judah daan hnuai ah a nung. 5 Cumi cu Daan hnuai ih a ummi pawl tlen dingah le Pathian fa ih kan can theinak dingah a si. 6 Cule a faale nan si langternak ah Pathian in a Fapa ih Thlarau cu kan thinlung sungah a run thlah. Kan thinlung ihsin, "Abba, ka Pa," tiah a autu cu cuih Thlarau cu a si. 7 Cuti a si ruangah sal nan si nawn lo; fa nan si zo! Cutiin a fa nan si ruangah Pathian in a rocotu ah a lo tuah zo. 8 Hlanah cun Pathian nan rak thei lo; curuangah Pathian a si ngaingai lomi ih sal nan rak si. 9 Sikhalsehla atu-ah cun Pathian nan thei ngah zo, a si lole Pathian in a lo thei ngah zo, kan ti pei; cuvek hnuah ziangtinso kha bangtuk thlarau ṭawnṭai le ṭhathnemnak nei lo pawl hnenih kir nan duh sal? An sal si sal ding cu ziangah so nan duh? 10 Nannih cun ni hleice, thla hleice, caan hleice, le kum hleice nan nei ih ulh nan hmang. 11 Nanmah zawn ruat na-ah ka thin a baang. Nan hrangah zonzai ih kan ṭuanmi hmuahhmuah cu thulolak ah a cang ṭheh ding tihi ka phang a si. 12 Ka u le ka nau tla, nanmah bangin ka um zo; nannih khal Daan ih thu ahcun keimah bangin um ve uh, tiah ka lo dil. Atu tiang ka parah siatnak nan tuah hrih lo. 13 Nan hnenah a hmaisa bik Thuthang ṭha ka phuan ah khan ziangruangah a si ti cu nan ciing lai ding; ka nat ruangah a si kha! 14 Ka harhdam lonak cu nan hrangah thilrit zet a si ko na'n nannih in in hmuhsuam lo ih in dungtun siang lo. Cu ai-ah vanmi bangin siseh, Khrih Jesuh bangin siseh, in tlunter ih ṭha zetin in zoh. 15 Culai ahcun nan lung a rak awizet hngin! Atu-ah cun hlanvek nan si nawn lo. Ziang nan cang ṭheh? A cang theimi sisehla nan mitmu hman phorh tahratin in pe siang ding ti cu keimah rori in ka sim ngammi a rak si. 16 Atu-ah cun thudik ka lo sim ruangah nan ralah ka cang riangri maw si? 17 Midang pawl in nan hrangah an lo ruatzet a bang na'n an tumtahmi ngaingai cu a ṭha lem lo. An tummi cu keimah le nanmah hi ṭhenter ih nan hrangih zawnruahnak an neih vekin nannih khal in an hrangah zawnruahnak nei in anmah ṭantu si uhla tihi a si. 18 Cubangtuk zawnruah awknak neih cu tumtahnak a ṭhat ahcun a ṭha zetmi a si. Nan hnenih ka um sung hrang lawngah si loin ziangtik khalah a ṭha ringringmi a si. 19 Ka duhdawtmi ka faale pawl, nunau in nauhrinnat a tuar vekin Khrih hmuihmel nan sungih a seem hlanlo ka tuar sal hrih ding a si hi! 20 Atu-ah hin nanmah thawn umtlang sehla ka va duh so; cule ka aw-ka tla a dang deuh ding na'n! Ka mang nan bangzet a si. 21 Nanmah lakah Daan hnuai ih um duh hrih pawl thu ka lo sut hnik pei: Daan ih a timi hi nan thei ngah ngaingai lo maw? 22 Daan cabu cun, Abraham in fapa pahnih a nei; pakhat cu a salnu in a hrinsak ih a dang pakhat cu a luatmi nunau in a hrinsak a si, a ti. 23 Salnu ih hrinmi pa cu fa dang hrin keel vekih hrinmi a si; sikhalsehla a luatmi nu ih hrinmi fapa cu Pathian thukamnak ruangih neihmi a si. 24 Hi pahnih thu hi tahṭhimnak ih hman theimi an si. Nunau pahnih hi thukamnak pahnih can-ai an si. Saltannak ih fa a neitu Hagar cu Sinai tlang ih pek mi thukam a si. 25 Arabia ram Sinai tlang ai-ih a dingtu Hagar cu Jerusalem khawpi ai-awhtu a si ih a faale pawl cu saltannak sung ummi an si ṭheh. 26 Sikhalsehla vancung Jerusalem cu a luatmi nu a si ih amah cu kan zate ih nu khal a si. 27 Ca Thianghlim in, "Nang nucing, na lungawi aw! Nauhrinnat a tuar dah lo nu, lungawi aipuang in au aw! Ziangahtile tlansan zomi nu in a pasal thawn a umtlang ringring mi nu hnakin faate tam sawn a nei ding," a ti. 28 Ka u le ka nau tla, atu-ah cun Isaak bangin Pathian thukamnak thawngih hrinmi Pathian ih faate nan si. 29 Culai ahcun minung daan vekih hrinmi fapa in Pathian Thlarau thawngih hrinmi fapa cu a hrem. Atu khalah cuvek thotho in a si. 30 Asinain Ca Thianghlim sungah ziangtinso a um? "Salnu le a fapa cu dawihlo aw; ziangahtile salnu ih fapa le a luatmi nu ih fapa cu an pa ih roco tlangtu an si thei lo ding," tin a um. 31 Curuangah ka u le ka nau tla, kannih cu salnu ih fa kan si lo, a luatmi nu ih fa kan si.
1 Khrih in in luatter zo ih miluat kan si zo. Curuangah fektein ding uhla sal cang sal nawn hlah uh. 2 Ka simmi ngaihnik uh: serh nan tanter awk a si ahcun Khrih cu nan hrangah zianghman ṭhathnemnak a nei hrimhrim lo, tinak a si. 3 Ralrinnak thu ka nolh sal ding: zokhal serh a tanter awk a si ahcun Daan a zatein a thlun ṭheh a ṭul. 4 Nanmah lakah Daan thlun tahratin Pathian hmaiah thiamcotermi si a tumtu cu Khrih thawn nan pehzomnak hri nan saattan zo a si. Culawng a si lo, Pathian zaangfahnak ih lenglamah nan thleng zo. 5 Asinain kannih kan ruahsanmi cu Pathian Amah in thiam in coter ding, tihi a si. Cumi cu kan rinnak thawngin Pathian Thlarau ih huham in a tuahsuak ding tiah kan hngakhlap ṭiaṭiami cu a si. 6 Ziangahtile Khrih Jesuh thawn kan pehzom awk ahcun serhtan siseh tan lo khal siseh a dang nawn lo. A thupi mi cu duhdawtnak thaw-ih hna a ṭuantu zumnak lawng a si. 7 Nan fehdaan a rak ṭhazet ko. Thutak thlun cu zo in so a lo leem ih nan bansan? 8 A lo bansan tertu cu Pathian a si ual lo. Anih cu nanmah a lo kotu sawn a sisi. 9 "Thilnu fate in sanghlom zate a thoter," an ti ṭheumi a kim ngaingai a si hi! 10 Asinain nan hrangah ka bei a dong lo. Kan Bawipa sungih kan pehzom awknak ruangah hin nan thinlung a lamdang lo ding ti cu ka zumzet ko. A lo tuaitamtu cu, zo a va sihmanah, Pathian ih hremnak a tong ding a si. 11 Ka u le ka nau tla, serhtan a ṭul a si tiin thu ka sim ngai sisehla ziangah so hremnak hi ka tuar hrih? Cutiin thu ka sim ngai sisehla, Khrih thinglamtah thu ka sim mi hi mi rilhbahnak ah a cang lo ding. 12 A lo hnaihnoktu pawl hi an lamzin zawh lawlaw in an til tla per-aw lawlaw hai sehla ka va duh so! 13 Asinain ka u le ka nau tla, nannih cu miluat si dingah kawhmi nan si. Sikhalsehla cuih luatnak cu nan taksa diriamternak ah canter hlah uh. Cuhnakin duhdawtnak thawn pakhat le pakhat rian aw in bawm aw ton uh. 14 Ziangahtile Daan hmuahhmuah cu, "Nangmah na duh awk vekin na innhnen na duhdaw pei," timi thukham pakhat sungah hin a kim ṭheh a si. 15 Asinain hramlak ramsa bangin nan nung ih pakhat le pakhat nan keeu nan deh aw a si ahcun ralring uh, nan cemral leh ding a si. 16 Ka sim duhmi cu hiti in a si: Thlarau in nan nunzia a uk a si ahcun minung tisa hiarnak cu a di nan riamter lo pei. 17 Ziangahtile minung tisa duhnak le Thlarau duhnak cu an ral aw. Minung tisa ih duhmi kha Thlarau in a hua ih Thlarau ih duhmi kha tisa in a hua ve. Hi te pahnih cu an hua aw. Curuangah a si na duhmi kha na tuah thei lo. 18 Thlarau ih a lo hruai ahcun Daan ih ukmi na si nawn lo. 19 Cule minung tisa ih a tuahmi pawl tla cu a langfiang ko: nupa sualnak, a thiang lomi ziaza, a mawi lomi thil tuahnak, 20 milem biaknak le dawi le cam tla hi an si. Pakhat le pakhat ral awknak le sual awknak, iksiknak le thinhengnak, tawh awknak, hamṭamnak le rem aw loin ṭhenṭhek awknak; 21 nahsuahnak, zuritnak, zoh mawi loin laam le awn-aunak le hi bangtuk a dangdang tampi an tuah vivomi pawl hi an si. Ralrinnak thu hmaisa ih ka lo sim zo vekin ka nolh sal ding: cubangtuk a tuahtu pawl cu Pathian Uknak an co thei lo ding. 22 Sikhalsehla Thlarau ih a rahsuahmi cu duhdawtnak, lungawinak, hnangamnak, lungsaunak, mi zaangfahnak, ṭhatnak, rintlak sinak, 23 nunnem tangdornak le suup theinak tla an si. Cubangtuk rah umnak ahcun daan cu a ṭul nawn lo. 24 Cule Jesuh Khrih ih ta a si mi pawl cun an taksa hurnak le hiarnak pawl cu thinglamtah ah an khenthat zo. 25 Thlarau in nunnak in pek zo ruangah kan nunnak khal hi Thlarau amah in a uk ding a si. 26 Puarthau ding kan si lo; pakhat le pakhat thinṭeuter aw ding kan si lo; iksiik aw ding khal kan si lo.
1 Ka u le ka nau tla, nanmah lakah pakhatkhat in sualnak a tuah pang nan hmuh tikah nanmah sungih a thlaraumi deuh pawl in lamzin dikah hruai kir uh. Cuti nan tuah tikah thinneemnak thawn nan tuah pei. Cule nanmah lala khal cuih sualnak ih tla ve pang lo dingin ralring uh. 2 Pakhat le pakhat nan thilrit sawng aw uhla cuticun Khrih ih daan cu nan kimter ding. 3 Mi pakhatkhat zianghman a si lem lo na'n mi-ngai zetih a ruat awtu cu amah le amah a bum aw a si. 4 Zozo khal nanmah ih ziaza cio parah thuṭhen aw ding nan si. A ṭha asile midang ih nun daan thawn tahṭhim awk ṭul rero loin nanmahte nan lung a hmui ding. 5 Ziangahtile zokhal mahih thil ciar an phur fingfing ding a si. 6 Pathian thu zirh cia a si mi in thil ṭha a comi pawl cu amah a zirhtu kha hlawm ve seh. 7 Nangmah le nangmah bum aw hlah. Zokhal in Pathian an dekcok thei lo. Milai cun an tuhmi vek cekci in an khawm ding. 8 Tisa duhnakih a tuhtu cun thihnak a khawm ding; Thlarau duhnakih a tuhtu cun kumkhua nunnak a khawm ding. 9 Curuangah thil ṭha tuah hi ning hlah uhsi; ning lo teih kan ṭuan ahcun a caan a kim tikah rawl kan khawm ding a si. 10 Curuangah a remcaan tik poh-ah zo hnen khalah thil ṭha cu tuah uhsi. A hleice in zumnak lamih kan sungte hnenah tuah uhsi. 11 Hi cakuat hi nan hnenah keimah kut rori in ka ngan ih cafang tum zetzet in ka ngan hi rak zohhnik uh! 12 Nan serh tan uh tiah a lo hneek rerotu pawl cu a lenglam thil parih a uar awtu le a porh awtu an si. Cutiih an tinak cu ziang dang ruangah a si lo, Khrih thinglamtah ruangih hremnak an tuar ngam lo ruangah a si. 13 A ngaingai ti ahcun serhtannak a thluntu pawl lala hman in Daan cu an thlun cuang lo. Nan serh tanter an lo duhnak cu serh nan tan ruangah taksa lamin anmah thluntu nan can ruangih an uar awk theinak dingah a si. 14 Kei hrangah cun kan Bawipa Jesuh Khrih thinglamtahnak siarlo uar ding dang zianghman ka nei lo. Ziangahtile Khrih thinglamtah ruangah leilung hi ka hrangah khenbet a si zo ih kei khal leilung hrangah khenbet ka si ve. 15 Mi pakhatkhat serhtanmi a si le si lo cu a thupi lo; a thupi mi cu siamtharmi sinak kha a si. 16 Cuih thu nitinte a nuncihtu pawl cu Pathian daihnak le zaangfahnak co hram hai seh; Pathian ih minung zate Israel hnen khalah um hram seh. 17 A netnak ah ka sim duhmi cu: zohman in hnaihnawhnak i pe nawn hlah hai seh; ziangahtile ka taksa parih hmasi a ummi hin Jesuh ih sal ka sinak a langter zo. 18 Ka u le ka nau tla, Bawipa Jesuh Khrih ih zaangfahnak cu nan hnenah um hram seh. Amen.
1 Pathian lungkimnak vekin Khrih Jesuh ih tirhthlah keimah Paul in Efesa khua ih a ummi Pathian mi pawl, Khrih Jesuh thawn nan pehzom awknak ah rintlak ih a nungmi, nan hnenah hi ca hi ka lo kuat. 2 Kan Pa Pathian le kan Bawipa Jesuh Khrih in zaangfahnak le daihnak lo pe hram seh. 3 Kan Bawipa Jesuh Khrih ih Pa le a Pathian cu thangṭhat si ko seh! Ziangahtile Khrih thawn kan pehzom awknak thawngin kan thlarau hrang van thlawsuahnak a phunphun kan hnenah in pe. 4 Khrih thawn kan pehzom awknak thawngin Pathian in kannih cu Amah ih hmaiah mi thianghlim le mawh nei lo si dingin leilung a sersiam hlan hman in Amah ih ta-ah in rak hril zo. In duhdawt ruangah, 5 Pathian in Jesuh Khrih thawngin a faale ah in canter ding cu a lungawi zawng le a duh zawng in rem a rak ruat cia a si. 6 A sunglawimi a zaangfahnak le a duhdawtmi a Fapa thawngin laksawng in pekmi ruangah Pathian cu thangṭhat si ko seh! 7 Ziangahtile Khrih a thihnak thawngin kan sualnak cu ngaidam a si zo ih a luatmi kan si zo. Pathian in a zaangfahnak cu kan hnenah tam zetin in pek ruangah, 8 a zaangfahnak cu a va tum lawmmam so! 9 Pathian cun a fimnak le a thuukmi a thutheihnak in a tumtah ciami cu a tuahsuak ih Khrih sungin kimter a duhmi a thuthup cu kan hnenah a langter zo. 10 Tikcu caan a kim tikah Pathian in famkim tein a tumtah mi cu: vanah siseh, leilungah siseh siammi thil hmuahhmuah hi finkhawm ṭheh ih Khrih kha lu bikih ret ding khi a si. 11 Ziang hmuahhmuah hi Pathian amah ih tumtahmi le ruahciami vekin a kim ṭheh. Khrih thawn kan pehzom awknak thawngin a minung si dingah Pathian in in hril zo; cumicu amah ih tumtahmi a si ih a hramthok ihsin a rak khaukhih ciami a si. 12 Curuangah Khrih sungin ruahsannak a nei hmaisa biktu kannih in Pathian hnenah sunlawinak pe uhsi. 13 Nan hnenah rundamnak a thlentertu Thuthang ṭha a dikmi thuthang cu nan theih tikah nannih khal Pathian minung nan si ve. Khrih nan zum ih Pathian in amah ih ta nan sinak langternak ah hminsinnak cu nan parah a khen; cuih hminsinnak cu pe dingin a lo tiam ciami Thlarau Thianghlim kha a si. 14 Pathian in a minung hnenah a kam ciami kan ngah tengteng ding ti langternak ah cuih Thlarau Thianghlim cu aamahkhan a si ih a minung hnenah cun luatnak tlamtling in a pe ding ti kan theih fiangnak tla a si fawn. A sunlawinak cu thangṭhat si ko seh. 15 Bawi Jesuh nan zumnak le Pathian minung parih duhdawtnak nan neih zia ka theih thok vete ihsin, 16 nanmah ruangah Pathian hnenih lungawi thusim ka cawl dah lo. Ka thlacamnak in ka lo ciing ringring. 17 Cule kan Bawipa Jesuh Khrih ih Pathian, a sunglawimi kan Pa in, nan hnenah Thlarau lo pe hram dingin ka dil. Cuih Thlarau cun a lo fimter ding ih Pathian nan hnenah a langter fawn ding; cuticun Pathian cu nan thei ding. 18 Ziangbangtuk ruahsannak nei dingah so a lo kawh ih a minung pawl hrangah a tiamkam ciami cu ziangtluk mangbangza so a si. 19 Amah a zumtu pawl sungah a hnaṭuan theinak huham cu ziangtlukin so a tum, ti tla khi hmu thei dingin le a tleunak tla nan hmuh theinak dingah nan thinlung run ongter hram seh, tiah a hnenah thla ka cam a si. Kan sungih a ummi cahnak cu, 20 Khrih thihnak ihsin a thawhter hnuah vancung khua a vorhlam kapih a totertu Pathian ih cahnak huham thotho kha a si. 21 Cutawkah Khrih cu uktu a si ih vancungih uktu dangdang siseh, thuneitu dangdang siseh, bawi dangdang a ummi pawl tla siseh, an tlunah Khrih cu uktu bawi a si. Hi leikhawvel tlunah siseh, a ra leh dingmi leilung tlunah siseh, thuneitu pawl hmuahhmuahih tlunah Bawi bik a si. 22 Pathian in Khrih ke hnuai ah ziangzongza a ret thluh ih ziang hmuahhmuah ih tlunah Bawi a si tiin kawhhran ih lu ah Khrih cu a ret. 23 Kawhhran cu ziang hmuahhmuah a famkimtertu Khrih ih ruangpum a si.
1 Hlanah cun nan ṭhatlonak le nan sualnak ruangah thlarau lamin mithi nan si. 2 Culai ahcun khawvel daan sia siseh, van tlolak le lei khawvel karlakih thlarau lam huham neitu, Pathian thu ngai duh lomi pawl ih lakah hna a ṭuan rerotu thlarau siava ih thu siseh, nan rak thlun. 3 Thungai in kan ti le kan zatein anmah vek thotho kan rak si; kan taksa hurnak thlunin kan rak nung, kan tisa le thinlung ih hiarmi poh kan rak tuah. Kanmah si daan te cekci ih kan rel ahcun kannih khal midang vek thotho in Pathian thinhengnak a tuartu ding kan si. 4 Sikhalsehla Pathian ih in zaangfahnak cu a tlamtling ngaingai ih in duhdawtnak khal a tumzet ruangah, 5 kan sualnak sungah thlarau lamin mithi cia kan si ko na'n Khrih thawn nunnak ah in thoter sal zo. Pathian ih zaangfahnak thawngin rundammi nan si. 6 Khrih Jesuh thawn kan pehzom awknak thawngin Pathian in Khrih thawn vancung ramih uk tlang dingah amah thawn in thoter sal zo. 7 Hi bangtuk ih a tuahnak cu ziangdang ruangah a si lo; Khrih Jesuh sung ihsin kannih in duhdawtnak a tumzia kha kumkhua daih in langter a duh ruangah a si. 8 Ziangahtile nannih cu Pathian zaangfahnak zaarah zumnak in rundam nan si. Hi rundamnak cu nan ṭuannak ruangih nan ngahmi a si lo, Pathian ih laksawng a si. 9 Cuhrangah zo hman porh awk ding a si lo. 10 Pathian in kan ṭuan ding hrangih a rak timtuah ciami hnaṭuan ṭha ṭuantu dingah Khrih Jesuh sungin kannih cu siamtharmi kan si. 11 Nan suahkehnak ihsin Zentail mi nannih tla cu Judah mi pawl in, "Serhtan lo phun," tiih kawhmi nan si; anmah le anmah cu, "Serhtan pawl," an ti aw. (Cumi cu an taksa par lala ah an langter mi khi a si.) Nannih Zentail mi pawl hlanlai ah ziangvek nan si, ti kha hngilh hlah uh. 12 Culai ahcun Khrih thawn pehzom awknak nan nei lo. Mikhual nan si ih Pathian ih hril miphun lakah nan tel lo. Pathian in a minung pawl hnenah tiamkamnak a rak tuah ciami parah bun tahratih tuahmi thukamnak sungah covo zianghman nan nei lo. Hi leilung tlunah hin ruahsannak nei lo le Pathian nei loin nan rak tlang meen. 13 Sikhalsehla atu-ah cun Khrih Jesuh thawn pehzom awknak ruangah a hlatzet ih a ummi nannih tla cu Khrih thisen luannak ruangah a naizetah kawh khawmmi nan si zo. 14 Ziangahtile Judah mi le Zentail mi cu pumkhat ah in tuah zo ruangah Khrih amah cu kan remnak a si. Judah mi le Zentail mi pawl a ṭhentertu le ralih a tuahtu pharsonmi cu amah ih taksa pum rori in a bal ṭheh zo. 15 Judah daan cu thukham le thupekmi pawl thawn a phiat ṭheh. Cutiih a tuahnak cu amah Khrih thawn an pehzom awknak ruangah miphun phunhnih cu miphun thar pakhat ih canter tahratin remnak umter a duh ruangah a si. 16 A thihnak thawngin Khrih in an ral awknak kha a cemter ih a thinglamtah in miphun phunhnih cu phun khatah a kom ih Pathian hnenah a hruai kir. 17 Cuticun Khrih in Pathian thawn a hlat zetmi nannih Zentail pawl hnenah siseh, Pathian thawn a naih zetmi nannih Judah mi hnen khalah siseh, remnak Thuthang ṭha a lo sim hai. 18 Khrih ruangah Judah mi siseh, Zentail mi siseh, kan zatein Thlarau pakhat thawngin Pa kan nei thei. 19 Cuti a si ruangah nannih Zentail mi pawl ramdangmi le khuatluang nan si nawn lo; Pathian ih miphun pawl thawn laikhat le Pathian innsang ih sungtel nan si zo. 20 Nannih cu tirhthlah le profet pawl in a hram an phun suakmi parih sakmi inn nan si ve zo ih a kiilih lungphum cu Khrih Jesuh a si. 21 Amah cu inn pumpuluk a kaikhawmtu a si ih Bawipa ih biakinn thiangah cangsuak tiangin a ṭhantertu a si. 22 Amah thawn nan pehzom awknak thawngin nannih khal amah zumtu dang pawl thawn Pathian in a Thlarau a umnak dingih innah a sak cihmi nan si.
1 Cuti a si ruangah nanmah Zentail pawl hrangah Khrih Jesuh hmin in keimah Paul cu thawngtlapa ka si. 2 Pathian in nan ṭhatnak dingah himi hnaṭuan hi a zaangfahnak in i pek zo ti cu nan thei ṭheh zo ko ding. 3 Pathian in a thuthup cu a phuang ih ka hnenah a langter zo. Hi thu cu a tawizawng in ka ngan zo ih, 4 cuih ka nganmi nan siar a si ahcun Khrih ih thuthup ka theih daan cu nan thei thei ko ding. 5 Hlanah cun cuih thuthup cu milai hnenah phuan a si dah lo; sikhalsehla atu-ah cun Pathian in a thiangmi a tirhthlah le a profet pawl hnenah a Thlarau in a phuang zo. 6 Cuih a thuthup cu hi bangtuk in a si: Thuthang ṭha a um ruangah Zentail mi khal Judah mi thawn Pathian ih thlawsuah cotu an si ve thlang; pumkhat sungih a telmi an si ih Khrih Jesuh thawngin Pathian thukamnak sungah covo an nei a si. 7 Cuih Thuthang ṭha riantu ka si hi Pathian ih i pekmi laksawng a si. Cuih laksawng cu a cahnak huham ih hnaṭuanmi a si. 8 Kei cu Pathian minung pawl lakih mi nauta bik hnak hmanin ka nauta sawn. Asinain sim cawk lo tiangin a tummi Khrih ih lennak Thuthang ṭha cu Zentail mi hnenah thlenpi dingah le, 9 Pathian ih tumtahmi a thuthup cu ziangvekin a lang zo ti kha mi hmuahhmuah ih hmu thei dingin an mit vaangter dingah Pathian in ṭuanvo i pek. Ziangzongza Siamtu Pathian in kan dunglam san sung hmuahhmuah a thuthuuk cu a thup. 10 Ziangah cutiin a thup tile a kawhhran thawngin vancungih vanmi uktu le thuneitu pawl in Pathian ih fimnak phunzakim kha tuihsan ah hin an theih famkim theinak dingah a si. 11 Cumi cu kumkhua tumtahnak a neihmi vekin Pathian in kan Bawipa Khrih Jesuh sungin a kimter a si. 12 Khrih thawn kan pehzom awknak ruangah le Amah kan zumnak thawngin Pathian umnak hmunah ralṭha zet le ngamzet in luh theinak kan nei. 13 Curuangah nan hrangih zonzaihnak ka ton tikah hin nan thin nau hram hlah uh, tiah ka lo dil; nan hrangih a ṭhami lawnglawng an si. 14 Cumi ruangah kan Pa ih hmaiah khukbil in thla ka cam. 15 Amah cu innsungsaang kipih a ummi le lei le van ih a ummi hmuahhmuah in an hmin an laknak hram a si. 16 Sim cawk lo a sunlawi lennak sungin nan sunglam ih minung nan sinak kha a Thlarau thawngin cahnak huham lo pe dingah Pathian ka dil ih, 17 nan zumnak thawngin nan thinlung cu Khrih in a umnak inn ah tuah hram seh, tiah thla ka cam. Thla ka cam beet hrih mi cu: nan hram le nan hramṭohnak cu duhdawtnak sungah bun uhla, 18 cuticun Pathian ih minung pawl thawn thinlung khatin Khrih ih duhdawtnak a thuk ih a sanzia le, a sau ih a kauhzia kha theih theinak nan nei ding, tihi a si. 19 Minung fimthiamnak ih a theih thluh thei lomi a duhdawtnak cu nan thei ko ding ih a famkimmi Pathian a sinak thawn nan nunnak cu a khat ding. 20 Kan sungah a huham in hna a ṭuantu cun kan dil theimi le kan ruah theimi hnak hmanih let tampi in a ṭuan thei a si. 21 Kawhhran sung le Khrih Jesuh sungin amah Pathian hnenah thangṭhatnak cu kumkhua um camcin ko seh! Amen.
1 Bawipa ih hnaṭuannak ruangih thawng a tlami keimah in Pathian kawhmi nan si bangtuk in nan nunnak ah amah ih kawhmi nan sinak kha langter uh, tiah ka lo forh. 2 Thinlung neemnak nei uh; tangdor le thinsau in um uh. Duhdawtnak nan neihmi kha pakhat le pakhat nan zawiawk theinak in langter uh. 3 Thlarau in a lo pekmi pumkhat sinak kha ṭunghmun dingah hmun khatih a lo ṭemkhawmtu ih remnak in hmunter uh. 4 Pathian in a lo kawh tikah a lo kawh sanmi ruahsannak cu pakhat a si vekin ruangpum pakhat a um ih Thlarau khal pakhat a um. 5 Bawi pakhat a um, rinnak pakhat a um, baptisma pakhat a um. 6 Pathian pakhat a um ih mi hmuahhmuah ih Pa a si. Amah cu ziang hmuahhmuah ih tlunah Bawi a si; ziang hmuahhmuah sungin hna a ṭuan ih ziang hmuahhmuah sungah a um. 7 Kan zate pumpak ciar in covo laksawng kan nei fingfing ih cumi cu Khrih ih in pek ciarmi vekin a si. 8 Ca Thianghlim in, "A saannak bik hmun a hung thlen tikah ral kaihmi tampi a khor; minung hnenah laksawng a pek," a timi kha a kim a si. 9 Cule "A hung thleng," ti cu a tican ziangso a si? A tican cu a hmaisabik ah leilung hmun niam bikah a vung thleng tinak a si. 10 A rung ṭummi cu lei khawvel le van tlolak khat ṭheh dingah van leeng tiangih a hung thlengtu amah thotho kha a si. 11 "Minung hnenih laksawng a petu," khal cu amah a si. A laksawng pekmi cu: a hrek cu tirhthlah an si, a hrek cu profet an si, a hrek cu Thuthang ṭha phuangtu an si, a hrek cu pastor an si ih a hrek cu zirhtu an si. 12 Hi bangtuk in laksawng a peknak cu: Pathian minung pawl in Khristian hna an ṭuan thei ih Khrih ih pum an ṭhansoternak dingah a si. 13 Cuticun kan zumnak ah le Pathian Fapa kan theihnak pakhat sungah kan finkhawm aw ṭheh ding; pitling kan si ding ih Khrih ih patling a sinak a saannak bik hmun khal kan thleng ve ding. 14 Cutikah cun mi bumtu pawl thuzirhnak le zinpeng zawh hai seh tiih an phuahcopmi thuphan, tisuar le thlisia pawl in khuazakipih a seep a soihmi nauhak bangtuk kan si nawn lo ding. 15 Duhdawtnak thinlung kengin thudik kan sim kan rel sawn pei ih kan lu a si mi Khrih sungah a phunkim in ṭhang ding kan si. 16 Amah Khrih ih uknak hnuai ah taksa ruang parih ṭhen dangdang pawl cu remte in an peh khawm aw ṭheh. Hlikhlok ruhcaang pawl in taksa ruangpi cu hmun khatah an kaikhawm ṭheh. Curuangah taksa ruang parih ṭhen dangdang cu anmah ih hnaṭuan ding ciar an ṭuan tikah taksa ruangpi cu a zatein duhdawtnak in a ṭhangso a si. 17 Bawipa ih hmin in nan hnenah ralrinnak thu ka sim duh: Khawvel mi bangin nung nawn hlah uh. Annih pawl ih ruahnak cu thulolak a si ih, 18 an thinlung cu a thim. Pathian ih pekmi nunnak sungah covo zianghman an nei lo, ziangahtile zianghman theihmi an nei lo ih an thinlung a ruh remrem. 19 Ningzah khal an thei nawn lo. Sualnak sungah an paih aw ih suup awknak zianghman nei loin zoh mawi lomi thil a phunphun an tuah. 20 Khrih thu nan theihmi cu cubangtuk a si lo. 21 Khrih thu cu nan thei ngah zo; Amah thluntu nan si vekin Jesuh sungih thutak cu zirh nan si zo. 22 A hlan nan nun keel vekih a lo nuntertu nan nunhlun cu hlon thlang uh; cuih nan nun hlun cu mi bumtu titsa hiarnak in a thihter cuahco mi kha a si. 23 Nan thinlung le nan ruahnak a zatein siamtharmi si ṭheh uhla, 24 Pathian hmuihmel kengih tuahmi, a ding le a thianghlim ih a langmi nunnak dik, nan nun thar kha hruk uh. 25 Thuphan per nawn hlah uh. Pathian zumtu pakhat le pakhat thutak kan sim-aw fingfing ding; ziangahtile Khrih ruangpum sungah kan zatein sungtel ciar kan si. 26 Na thin a heng asile sualnak sungah na thinhengnak in lo luhpi hlah seh; na thinhengnak kha nitlakpi hlah. 27 Satan kha tikcu ṭha pe hlah. 28 Ruk a ru ṭheutu cun ru nawn hlah seh; amah nunnak hrangah felfainak thawn pumcawmtu si dingah le mifarah a cawmtu si dingah a kut rori in hnaṭuan seh. 29 Nan biak awk tikah ṭongkam hraang hmang hlah uh; nan ṭong a theitu pawl in ṭhathnemnak an ngah theinak dingin ṭongṭha le ṭongmawi hmang uh. 30 Pathian Thlarau Thianghlim kha riahsiater hlah uh; ziangahtile Thlarau cu Pathian ih ta nan si ti hminsinnak a si ih Pathian in a lo luatternak Ni a ra thleng ding ti theihnak aamahkhan a si. 31 Thinlung sungih mi huatnak le ral awknak, taksa hiarnak le thinhengnak pawl kha cemter uh. Pakhat le pakhat hauh awknak, zomtaihnak le huatnak thinlung malte hman nei nawn hlah uh. 32 Cupawl ai ah pakhat le pakhat zaangfah thinnemnak nei aw ton uhla, Khrih sungin Pathian in a lo ngaidam bangin pakhat le pakhat ngaidam aw uh.
1 Nannih tla cu Pathian duhdawtmi fahniang nan si ruangah amah bangtuk si dingin zuam uh. 2 Khrih in in duhdawt ih a nunnak kan hrangah a pek zo; cuih a pekmi a nunnak cu Pathian lungawitertu rimhmui pekmi le raithawinak ih pekmi a si. Curuangah nan nunnak cu duhdawtnak in lo uk seh. 3 Pathian minung nan si ruangah nupa sualnak, zoh mawi loih nunnak le hamṭamnak pawl cu nan lakah a rel hman rel nawn hlah uh. 4 Òong borhhlawh, ṭongsia le zahmawh ngainuam lo ṭong pawl cu nan ṭong dingah a mawi nawn lo. Cuhnakin Pathian hnenah lungawinak sim sawn uh. 5 Nan theihfel dingih a ṭulmi cu: nupa sualnak a tuahtu, zoh mawi loih a nungtu le hamṭam pawl cu (hamṭam besia cu milem biak thawn a bang awk ruangah) Khrih le Pathian Uknak sungah covo an nei lo ding. 6 Zohman in thudik lo le pom tlak lo thu in lo bum hlah hai seh. Cubangtuk cekci ruangah sokhaw Pathian thinhengnak cu a thu a ngai lotu pawl parah a thlen ding cu! 7 Cubangtuk mi pawl cu a pawl khal pawl hlah uh. 8 Hlanah cun nanmah hi khawthim sungah nan rak nung; asinain Bawipa ih minung nan si zo ruangah atu cu tleunak sungah nan um. Curuangah tleunak ih minung bangin nung uh. 9 Ziangahtile ṭhatnak phunkip, dingnak a phunphun le thudik a phunphun a suahtertu cu tleunak a si. 10 Bawipa ih lungawinak kha hawl uh. 11 Milai ih tuah ṭheumi santlai lo thil le khawthim sung thil pawl cu a dai in dai hlah uh. Cubangtuk thil pawl cu tleunak ah thlenpi sawn uh. 12 Thim sungah a thlithup ih tuahmi thil pawl cu ningzakza an si; a ṭong hman ṭong ngam ding an si lo. 13 Cule ziang hmuahhmuah cu tleunak ih thlenpi an si tikah an si daan taktak cu a lang ṭheh ding. 14 Ziangahtile ziang hmuahhmuah fiangteih langtermi cu tleunak ah a cang a si. Curuangah, "A itmi pawl, ṭhang thlang uhla, thihnak ihsin tho thlang uh. Cutiin nan parah Khrih cu a tleu ding," tiah an tinak cu a si. 15 Curuangah nan nundaanah hin ralring uh. Mi aa bangin nung hlah uh; a fimmi bangin nung uh. 16 Caan ṭha nan neih-mi kip kha man nei zetin hmang uh; ziangahtile kan san hi sansia a si. 17 Mi aa si hlah uh; Bawipa in tuahter a lo duhmi kha hawl tum sawn uh. 18 Zu ri hlah uh; zu cu a lo siatsuahtu lawng a si. Cuhnakin Thlarau in khat sawn uh. 19 Pakhat le pakhat Saam Hla, hlan awknak hla, thangṭhatnak hla, le hla thiang in bia aw uh. Bawipa cu ap awknak hla le thangṭhatnak hla thawn nan thinlung taktein cawimawi uh. 20 Ziang hmuahhmuah hrangah kan Bawipa Jesuh Khrih hminin Pa Pathian cu thangṭhat ringring uh. 21 Khrih nan upatnak ruangah pakhat le pakhat duhnak thlun aw uh. 22 Nupi pawl, Bawipa ih duhnak nan thlun bangin nan pasal duhnak thlun uh. 23 Ziangahtile Khrih cu kawhhran tlunih thu a neih vekin pasal khal in a nupi tlunah thu a nei ve. Khrih amah rori cu kawhhran Runtu a si ih kawhhran cu a ruangpum a si. 24 Curuangah kawhhran in Khrih hnuai ah tangdor ih a um vekin nupi pawl khal in ziangtinkim ah an pasal ih hnuai-ah tangdorin um hai seh. 25 Pasal pawl, Khrih in kawhhran cu a duhdawt ih a hrangah a nunnak tiang a pek vekin nan nupi pawl cu nan duhdawt pei. 26 Hitiih a tuahnak cu kawhhran hi ti sungih a kholhfainak ruangin a thianhlimter hnuah a thu in Pathian hnenih hlan dingah a si. 27 Cuticun kawhhran cu a mawinak zate a si mi: thiang le mawh nei lo, hnawihnihnak, soiselnak, a si lole famkim lonak dang um lo tein amah hnen lala ah a thlenter duh ruangah a si. 28 Mipa in an nupi pawl cu anmah ih takpum an duhdawt vekin duhdaw ve ding an si. A nupi a duhdawtu cu amah le amah a duhdaw awtu a si. 29 Zohman in amah ih takpum lala a hua dah lo. Khrih in kawhhran cu a cawm ih a kilkhawi vekin zozo khal in an takpum cu an cawm ih an kilkhawi fingfing a si. 30 Ziangahtile kannih cu a ruangpum ih taksa ṭhen kan si. 31 Ca Thianghlim in, "Hi thu ruangah mipa in a nu le a pa a taanta ding, a nupi a kom ding ih annih cu pumkhat an si ding," a ti. 32 Ca Thianghlimih simmi ah hin a thukmi thudik a lang ih cuih thudik cu Khrih le kawhhran thawn a pehtlai awmi a si, tiin ka thei. 33 Sikhalsehla nanmah thawn khal a pehtlai aw thotho; pasal hmuahhmuah in an nupi cu anmah ih takpum an duhdawt vekin an duhdawt pei ih nupi hmuahhmuah khal in an pasal cu an upat pei.
1 Nauhak pawl, Bawipa ih hmin in nan nu le nan pa upat uh. Nu le pa upat cu Khristian ṭuanvo a si ih a ṭhami a si fawn. 2 "Nan nu le nan pa upat uh," timi thukham hi, 3 "Na lam a tluang ding ih leitlunah na nun a sau ding," timi thutiamnak an beetmi thukam hmaisa bik a si. 4 Nu le pa pawl, nan faale pawl kha thinheng dingin tuah hlah uh. Cu ai-ah Khristian nundaan ziaza le zirh awknak thawn cawm uh. 5 Sal pawl, nan bawile pawl cu ṭih le ṭhia in upat uh. An hna nan ṭuan tikah Khrih hnaṭuan a si ti tlukin thinlung taktein ṭuan uh. 6 Cuti nan ṭuan tikah an mithmuh lawngah mithmaiṭha ngah duh ah ṭuan hlah uh. Khrih ih sal bangin Pathian duhmi cu nan thinlung zatein ṭuan uh. 7 Hna nan ṭuan tikah milai hrang meenah ka ṭuan ti ruat loin Bawipa ih hrangah ka ṭuan a si tiin ruat in thinnuam zetin ṭuan uh. 8 Bawipa cun sal siseh, miluat khal siseh, zozo khal thil ṭha a tuahmi ruangah ṭhatman a pe ding a si, ti kha ciing ringring uh. 9 Nannih bawi pawl tla, cuvek thotho in nan sal pawl hnenah tuah ve uhla hringhro nawn hlah uh. Nanmah siseh, sal le pawl khal siseh, vancungah bawi pakhat nan neih kha hngilh hlah uh. Cuih bawi in zohman thleidan a nei lo, ti kha ciing ringring uh. 10 A netnak ah, Bawipa thawn nan pehzom awknak le amah ih cahnak ruangah nan thazaang cu cakter sin uh. 11 Satan bumsiatnak do thei dingah Pathian ih a lo pekmi ralthuam kha hruk uh. 12 Ziangahtile kan domi pawl cu milai an si lo, vanih a ummi thlarau sia cahnak pawl, uktu pawl, thuneitu pawl, le hi a thimmi leikhawvel pumpi uktu pawl an si. 13 Curuangah atu ihsin Pathian ralthuam kha hruk uhla caansia a thlen tikah nan ral pawl cu nan do thei ding ih a net tiang nan do hnuah nan ṭanhmun cu nan hum ngah ding. 14 Curuangah khoh zetin ding cia uh: taikhap ai-ah thutak kha nan tai ah khap uh; ṭaangphaw ai-ah dingnak kha nan ṭaangah song uh; 15 kedam ai-ah daihnak Thuthang ṭha phuan hiarnak kha hruk uh. 16 Catbangloin thirphaw ai-ah zumnak kha keng ringring uh; ziangahtile Satan in meiling bangtuk a si mi thal ih a lo kah tikah cuih phaw cun nan hmit thei ding. 17 Cule lukhuh ai-ah rundamnak kha lak uhla Thlarau ih a lo pekmi ralnam ai-ah Pathian ṭongkam kha keng uh. 18 Himi pawl nan tuah tikah thlacam phah in tuah uhla Pathian hnenah bomnak dil uh. Thlarau ih a lo hruainak bangtuk in ziangtik caan pohah thlacam uh. Hi ruangah ralring cia in um uh la nan beidong hlah uh. Pathian minung pawl hrangah cat loin thlacam uh. 19 Cun kei khal thusim dingih ka timtuah awk tikah Pathian in ka sim dingmi thu i pe dingah le ralṭha zetin ka sim ih Thuthang ṭha ih thuthup kha ka phuansuak theinak dingah thla i cam sak ve uh. 20 Atuah cun thawng sungah ka um na'n cuih Thuthang ṭha phuangtu palai ka si. Thuthang ṭha cu ka phuan dingmi a si vekin ralṭha zetih ka phuan theinak dingah thla i rak cam sak uh. 21 Bawipa ih hnaṭuannak ah rintlak a si mi kan unau Taikhikas in ka thuhla cu famkim zetin a lo sim ding ih ka umtlandan cu nan rak thei ding. 22 Curuangah nan hnenah ka rak thlahnak a si. Kan umtlandan le kan khuasak daan a lo sim ding ih thazaang cahnak ah nan hmang ding. 23 Pa Pathian le Bawipa Jesuh Khrih in Khristian unau zate nan hnenah daihnak le duhdawtnak cu zumnak thawn lo pe hram seh. 24 A cat dah lomi duhdawtnak thawn kan Bawipa Jesuh a duhdawtu nan zate hnenah Pathian zaangfahnak cu hmun hram seh.
1 Khrih Jesuh ih sal a si mi Paul le Timote in, Khrih Jesuh thawn a pehzom awmi Filipi khua ih Pathian minung a ummi hnenah le nan kawhhran sungih hruaitu le upa pawl hnenah ca kan lo kuat. 2 Kan Pa Pathian le Bawipa Jesuh Khrih in zaangfahnak le daihnak lo pe hram seh. 3 Nanmah ka lo ruah tinte in ka Pathian parah ka lung a awi. 4 Nan zate hrang thla ka cam tinte in lungawinak thawn thla ka cam, 5 ziangahtile Thuthang ṭha hnaṭuannak ah hin a thokpekte ihsin tuihsun tiang nanmah cu i bawm ringringtu nan si. 6 Curuangah nanmah sungih hnaṭuan ṭha a thoktu Pathian in Khrih Jesuh ih Ni a ra thlen tikah cumicu a ṭuansuak ding tiah ka thei fiang. 7 Nanmah cu ka thinlung sungah nan caam ringring. Nan parih hi bangtuk thinlung ka neihmi hi nei ding mawi ka si. Ziangahtile atu thawng sungih ka um laiah siseh, luatzetin Thuthang ṭha ka ṭanpi ih cuih Thuthang ṭha hngetkhoh sinsin dingih ka ṭuannak ah siseh, Pathian zaangfahnak ruangih ka comi ṭuanvo ahhin nan zatein nan tel ringring ve a si. 8 Khrih Jesuh ih zaangfah thinpemnak sungah ziangtlukin ka lo ngai hai, timi thudik ka simmi i theihpitu cu Pathian a si. 9 Pakhat le pakhat nan duh awknak cu theihnak dik le thu thleidan thiamnak thawn a ṭhanso vivonak dingah thla ka cam a si. 10 Cuti in nan ṭhang asile a ṭha bikmi kha hril nan thiam ding. Cule Khrih Ni ahcun borhhlawhnak le mawhthluknak hmuahhmuah ihsin nan thiangfai ding. 11 Jesuh Khrih lawngih pek theihmi ziaza ṭha taktak cu nan nunnak ah a khat ding ih cumicu Pathian thangṭhatnak le sunlawinak ah a si ding. 12 Ka u le ka nau pawl, ka parih a ra thlengmi thil pawl hi Thuthang ṭha karhzaitertu riangri ah an cang, tihi nan theih dingah ka duh a si. 13 Hi thil ruangah hin, siangpahrang inn kilvengtu hmuahhmuah le hitawk ih midang pawl khal in Khrih sal ka si ruangah thawngah in thlak kha an thei ṭheh a si. 14 Cule thawng ka tlaknak hin kan unau tam sawn cu Bawipa an rinsannak a hngetkhohter ih an ral a ṭha sinsin ih ngamzetin thu an sim. 15 Mi ṭhenkhat cun in iksiik ruangah le thu-el duh pawl an si ruangah Khrih thu cu an sim ngai; sikhalsehla a hrek cu thinlung tluangtlammi an sinak in Pathian thu an sim. 16 Cupawl cu duhdawtnak an neih ruangah an sim, ziangahtile Thuthang ṭha a ṭantu dingah Pathian in ṭuanvo i zem hi an hmu. 17 Mi hrekkhat pawl cu thinlung tluang zetin Khrih thu sim loin anmah hamṭam zawnruahnak thinlung thawn an sim. Thawng ih a um laiah hin harsatnak betcih vivo uhsi tiin an ruat. 18 Zianghman a poi lo. Ka lung a awizet ko; thinlung ṭha lo thawn an simah siseh, thinlung tluangih an sim khalah siseh, Khrih thu an sim poh ahcun ka lung a awi thotho ko ding. 19 Ziangahtile nanmah ih thlacamnak le Jesuh Khrih ih Thlarau hnen ihsin a rami bomnak thawngin luatter ka si ding, ti ka thei. 20 Ka duh bikmi le ka hngakhlap zetmi cu ṭuanvo ka neihmi hi tuahsuak hram ningla, cule ziangtik caan khalah le a hleice in atu fang hrimhrim ahhin, ralṭhatnak thawn khat tahratin ka nunah siseh, ka thihah siseh, ka thinlung ka taksa zate thawn Khrih hi upat hmaihngalnak pe thei ningla, tihi a si. 21 Nun timi hi ziangso a si? Kei ka hrangah cun nun cu Khrih a si. Curuangah thih khalle a hlawk sinsin. 22 Sikhalsehla nungin thil man nei deuh ka tuah thei a si ahcun khuimi sawn ka hril ding ka thei lo. 23 Ka thinlung kaa hnih ah a feh. Hi nunnak hi tlansan ih Khrih thawn um cu ka duhzet; cumicu a ṭha deuh ngaingai. 24 Sikhalsehla ka nun hrih ding cu nan hrangah a rak ṭulzet fawn. 25 Cumi cu fiangtein ka theih ruangah ka nung hrih ko ding. Zumnak sungah nan ṭhansonak le nan lungawinak kha a lo betbawmtu si dingah nan hnenah ka nung rei hrih ding a si. 26 Cuticun nan hnenih ka ra thlen sal tikah, Khrih Jesuh thawn nan nunnak cu a pehzom awk ruangah, keimah parah hmaihngalnak tampi nan nei ding. 27 Atu laiah a thupimi cu Khrih Thuthang ṭha ih duhdan vekin nan nuncan cu si thei sehla, cuticun ka ra lo ton thei ah siseh, ton thei lo khalah siseh, tumtahmi pakhat nei in fektein nan ding ih Thuthang ṭha hrangah hmun khatah thinlung rualtein ral nan dotlang ti kha ka thei ding a si. 28 Nan ral pawl kha ṭih hlah uh. Ralṭha zetin um uh. Cumi cun annih an sung ding ih nannih nehtu nan si ding ti kha a langter ding; ziangahtile nehnak a lo petu cu Pathian a si. 29 Khrih nan zumnak lawngah si loin amah ih hrang nan tuarnak khalah covo zemmi nan si hi mi vannei nan si. 30 Curuangah atu cun raldonak sungah ka hnenah nan tel thei ve ding. Cumi ral cu kan dung khalah ka rak do zo ti nan hmu ih, atu khalah nan theih vekin ka do rero lai a si.
1 Khrih thawn nan pehzom awknak ruangah nan nunnak a hnget cuang ih a duhdawtnak in nan hna a lo ngamter. Thlarau thawn pawlkomnak nan nei ih pakhat le pakhat parah zaangfah lainatnak nan nei a si lo maw? 2 Cuti asile hiti in ka lo forh duh: nan ruahnak hmunkhat seh, duhdawtnak khalah pakhat le pakhat duhdaw aw ton uh; nan thinlung le nan tummi khal bangrep aw sehla cuticun lungawinak ka neihmi hi nan kimter sinsin ding a si. 3 Mi nahsuahnak nei in, mahih zawn lawng ruat ih, mahih hminṭhatnak lawng hawl in zianghman tuah hlah uh. Pakhat le pakhat tangdor awk tonnak thinlung nei uhla midang hnakin ka ṭha deuh tiah ziangtik hmanah ruat aw hlah uh. 4 Nanmah duhnak lawng si loin midang in an hrangah a thupi bikih an ruahmi kha a hmuhzia thiam ve uh. 5 Nan thinlung putdan cu Khrih Jesuh ih thinlung putdan vekin siseh. 6 Khrih cu Pathian sinak a nei ringring; Asinain Pathian bang dingah hranhram in a tum dah lo. 7 Cu ai-ah, Amah ih lungtho tein, a sinak hmuahhmuah a taansan ih, hnen-um sinak la tahratin, Minung ah a cang ih minung pianzia in a piang. 8 Tangdornak thinlung a nei ih, Pathian thu thlun in, Thinglamtah thihnak tiangin a tuar. 9 Curuangah a saang bik hmunah Pathian in a cawisaang ih, Hmin hmuahhmuah lakih cungnung bik hmin a pek. 10 Cuti a si ruangah, Jesuh hmin upatnak pekin, Vancung ih a ummi hmuahhmuah in siseh, Leitlun le leihnuai ih a ummi hmuahhmuah khalin siseh, an khuk an bilh ding ih, 11 Jesuh Khrih cu Bawi a si, tiah Pa Pathian sunlawinak ah an zate in an phuang ding. 12 Curuangah, ka duhdawtmi ka rualle uh, nan hnen ka um laiih ka thu nan thlun ringring vekin le, cu hnak hmanin a thupi sawn mi cu, nan hnenih ka um lo caan khalah ka thu nan thlun ding hi a si. Rundamnak famkim nan ngahnak dingah ṭihzah le ṭhia phah in ṭuan rero uh. 13 Ziangahtile amah ih tumtahmi duh dingah le nan tuahsuak dingah Pathian cu nan sungah hna a ṭuan a si. 14 Ziang nan tuah khalah phunzai rero lo le el-aw rero loin tuah uh. 15 Cuticun hi leilung tlun miṭha lo le misual pawl lakih a ummi nannih hi a famkim mi Pathian faate, mawh nei lo le mithiang ah nan cang ding. Van ih arsi tleu bangin leilung mi lakah tleu uh. 16 Nunnak thu nan phuan laiah hin cubangtuk in tleu uh. Cuticun Khrih Ni ah hmaihngalnak ka nei dingih ka hnaṭuannak le taimak ka suahnak pawl hmuahhmuah hi a lak an si lo, ti a langter ding. 17 Thahnak tuarin ka nunnak thisen hi nan zumnak Pathian hnenih raithawinak bangin nan pekmi parah toih a va si khalle cumi cu ka lungawinak a si ko ding ih nan zatein cuih ka lungawinak cu ṭawm ka lo duh hai a si. 18 Cuvek thotho in nannih khal in nan lungawinak cu in ṭawm ve uh. 19 Pathian in rem a ti ahcun, nan thuhla tla ka theihnak ihsin tha ka ngah ding tiah beiseinak ka neih ruangah a rei hlanah Timote nan hnenah rak thlah ka tum. 20 Amah lawnglawng hi ka thinlung i theitu le nanmah seherhnak taktak a neitu a si. 21 Midang cu anmah ih hrang lawnglawng an ruat ciar ih Jesuh Khrih hrang an ruat lem lo. 22 Anih cu ziangtluk rinsantlak a si ti cu nanmah rori in nan theihmi a si: keimah thawn pa le fa bangin Thuthang ṭha hrangah hna kan ṭuan tlang, ti kha nan hmu zo. 23 Curuangah ka thuhla ahhin ziangbangtuk in thil a cang ding ti a fian vete in amah cu ka rak thlah ding ih, 24 keimah rori nan hnenah ka ra thleng cing thei ding tiah Bawipa rinsannak thawn ka um. 25 Cule kan unau Epafroditas hi nan hnenah rak thlah a ṭul tiah ka ruat. Amah cu keimah thawn hnaṭuan tlang le raldo tlang kan si ih keimah bawm dingah nan rak thlahmi a si. 26 A nat thuhla nan rak theihmi kha a thin nuam lonak ah a cang ih nanmah ra ton ding a hngakhlap zet a si. 27 A na ti meen ding hman a si lo, thizik ngaingai in a na. Asinain Pathian in a zaangfah; amah a zaangfah lawng si loin keimah khal i zaangfah ih ka hnenih riahsiatnak tum sinsin a thleng dingmi ihsin i luatter. 28 Curuangah nan hnenih rak kuat ka duh cuangnak cu a si ih amah nan hmuh tikah nan thin a nuam sal ding ih kei khal ka riahsiatnak a cem ve ding a si. 29 Amah cu Bawipa ih sungah kan unau a si ih lungawi aipuangte in rak cohlang uh. Amah bangtuk minung cu hmaizahnak pe uh, 30 ziangahtile Khrih hrang hnaṭuannak le nanmah in in pek thei lomi bomnak kha pe dingah a nunnak hman ruat loin a ṭuan ih a nunnak tiangin a cem zik a si.
1 Thunetnak ih ka sim duhmi cu, u le nau pawl, Bawipa thawn nan pawlkomnak sungah nan lungawi uh. A hmaisa ih nan hnenih ka rak ngan ciami ngan sal ding cu poi ka ti lo. Thungai ti ahcun ngan sal hman hi nan hrangah a lo humhimtu a si sawn ding. 2 Uico pawl kha ralring uh; thil ṭha lo a tuahtu minung pawl kha ralring uh; serh a tantu pawl kha ralring uh. 3 Annih si loin kanmah sawn hi a dikmi serhtannak a cotu kan si; ziangahtile Thlarau in Pathian kan bia ih kan nunnak cu Khrih Jesuh thawn kan pehzom awknak ruangah lungawinak in a khat. A lenglamih tuahmi parah zianghman rinsannak kan nei lo. 4 Cubangtuk a lenglam thlunmi pawl rinsan duh ahcun a rinsan theitu ka si ve ko. Zozo khal in a lenglamih thlunmi thil ka rinsan a si tiin a ruah ahcun cumi pa hnakin tam sinsin ih ruat ding sawn ka si. 5 Zing riat ka kim ah serhtan mi ka si; suahkehnak lamih ti ahcun Israel miphun, Benjamin hrin, Hebru cit ka si. Judah Daan thlun lam ti ahcun Farasi mi ka si. 6 Cumi ah ka ṭangzet ih Khristian pawl ka hrem. Daan thlun tahratin miding si theinak lamah cun keimah cu mawh nei lo ka si. 7 Sikhalsehla hlawknak ih ka rak ruahmi hi bangtuk thil pawl hi atu-ah cun Khrih ruangah a zatein sunnak ah ka ruat ṭheh zo. 8 Hi thil pawl lawng an si lo; thildang ziangtinkim khal hi ziang hmuahhmuah hnakin a sunglawi sawnmi ka Bawipa Khrih Jesuh ka theih ruangah cun sunnak pittawp ah ka ruat a si. Amah ruangah ziang hmuahhmuah cu ka hlon ṭheh; Khrih ka co theinak dingah le, 9 amah thawn tlamtling ih kan pehzom awk theinak dingah ziangzongza cu hnawmhne meenah ka ruat a si. Keimah tein dingnak ka nei nawn lo; Daan thlun tahratih ngahmi dingnak pawl khal ka nei nawn lo a si. Atuih dingnak ka neihmi cu Khrih rinnak ruangih pekmi dingnak a si; rinnak sungin Pathian hnen ihsin kan ngahmi dingnak a si. 10 Ka duhmi cu Khrih le a thawhsalnak ih cahnak kha tep ve sehla, a tuarnak le a thihnak khalah tel ve sehla, 11 cutiin thihnak ihsin nunnak ah thawhter salmi si ve dingah ka ruahsanmi cu a si. 12 Hiti ka ti tikah, ka thlen tumnak hmun ka thleng zo, tinak a si lo; ka famkim zo ti khal a si lo. Khrih Jesuh in amah ih hrangah i kai ngah zo ruangah ka hrangih a retmi zuam man co dingah hmailamah ka nor rero a si. 13 Ka u le ka nau pawl, cumicu ka co ngah zo, tiin ka ruat hrimhrim lo. Ka tuahmi cu pakhat lawng a si: ka dunglamih a luan ciami thil kha hngilhsan tahratin ka hmailamih a ummi kha ban dingah ka dawh rero a si. 14 Curuangah hmuitinmi lamah zuam man ngah dingin dingtein ka tlan. Cuih zuam man cu Pathian in Khrih Jesuh sung ihsin kumkhua nung dingah in run kawhnak kha a si. 15 Thlarau lamih pitling kannih pawl kan zatein hi bangtuk thinlung nei ciar ding kan si. Sikhalsehla mi hrekkhat in thinlung putdan dang nan neih a si ahcun cumicu Pathian in fiangtein nan hnenah a langter ding. 16 Cuih hlan sung cu, tuih ni tiang kan thlunmi daan thlunin hmailamah feh tlang uhsi. 17 U le nau pawl, ka nundan hi i cawng ringring uh. Nan zoh dingah nan mithmai ah zohṭhim ding ṭhami kan ret zo ih cumi a thluntu pawl kha zoh ringring uh. 18 Mi tampi cu an nundan ruangah Khrih thinglamtah ih ral ah an cang ti kha ka rak lo sim ṭheu vekin atu khalah mitthli thawn ka lo sim sal a si. 19 Cupawl cu hell ah an thleng ding, ziangahtile an pathian cu an taksa duhnak lawng a si. An thil tuahmi hi zahpi tlak a si na'n an hmaihngalnak ah a cang riangri; hi leikhawvel thil pawl lawnglawng an ruat. 20 Sikhalsehla kannih cu vancung ram minung kan si ih, kanmah Runtu Bawipa Jesuh Khrih vancung ihsin a rat ding kha kan hngak. 21 Amah in a ṭawnṭai ih a thi theimi kan pumsa ruangpi hi a sunglawimi amah ih ruangpi bangtuk ah a thleng ding; cumi tuahsuaknak dingah ziang hmuahhmuah amah ih uknak hnuai ih ret theinak cahnak huham a neihmi kha a hmang ding a si.
1 Ka duhdawtmi ka u le ka nau pawl, ka lo ngaizet hai a si. Nannih cu i hnemtu nan si ih ka hmaihngalnak ka sui lukhuh khal nan si. Ka duhdawtmi unau pawl, hi bangtuk in Bawipa sungih nan nunnak ahcun hnget zetin ding ringring uh. 2 Euodia le Sintekhe, nan hnenah zaangfah ka lo dil: Bawipa ih duhnak thlunin nan thinlung hmunkhat dingah zuam uh. 3 Cule nang rintlak ka hnaṭuanpi, hi nunau pahnihte hi rak bawm aw, ti ka lo duh ve. Ziangahtile keimah thawn hnaṭuan tlang an si; Klement le Pathian nunnak cabu sungih hmin khummi ka hnaṭuanpi hmuahhmuah thawn Thuthang ṭha zaiter dingah keimah thawn napi ih hnaṭuantu an si. 4 Bawipa thawn nan pehzom awknak ah hin nan lung awi ringring hram uh; ka nolh sal hrih ding: nan lung awi hram uh! 5 Mi hmuahhmuah hnenah nan lungnem uh. Bawipa cu a ra cing ding. 6 Ziang thuhla hmanah donhar in um hlah uh; thla nan cam tinte in nan ṭulmi cu Pathian hnenah dil uhla lungawi aipuang tein dil uh. 7 Cuticun minung ruah ban lomi Pathian ih daihnak in nan thinlung le nan ruahnak cu Khrih Jesuh ah himte in a kilkhawi ding. 8 Thunetnak ah, ka u le ka nau pawl, a ṭhami, porhtlak a si mi, a taktak a si mi, upat tlak a si mi, a dikmi, a thianghlimmi, duhnungza a si mi le hminṭhatnak a petu thil pawl thawn nan thinlung cu khatter uh. 9 Ka hnen ihsin nan ngahmi le nan zirmi vekin thlun tum uh. Ka ṭongkam in siseh, ka tuahnak in siseh, ka lo hmuhmi cu thlun uh. Cutiin daihnak in petu Pathian cu nan hnenah a um ding. 10 Ka zawn in ruahnak cu caan reipi hnuah nan hun langter sal ih kan Bawipa thawn kan pehzom awknak ruangah ka lung a awi ngaingai. Hitiih ka ti tikah ka zawn in ruat nawn lo, ka ti duhnak a si lo; a langternak caan nan ngah lo ruangah a si sawn. 11 In dungtun zo a si hi, tiih ka ruah ruangah ka simmi a si fawn lo. Thungai ti ahcun ka neih zatte thawn lungkim zetih um ding ka thiam zo. 12 Tlasam ih nundaan ka thiam ih neinung zetih um khal ka thiam zo. Cutiih umdaan thupte cu ka zir ngah zo ruangah khuitawk hmun hmanah le ziangtik caan khalah ka pumpuar in siseh, ka rilrawng in siseh, malte ka neih ah siseh, tampi ka neih khalah siseh, thinlung nuamte ih um ka thiam zo. 13 Cahnak i petu Khrih sungin ziangkim ka ti thei. 14 Sikhalsehla harsatnak ka ton caanah in rak bom thei cu nan ti ṭha zet a si. 15 Nanmah Filipi khua mi pawl in nan theih ṭhehmi a si. Thuthang ṭha phuangin hnaṭuan ka rak thok pek hrawngah Masidonia peng ihsin ka pawh tikah i bawmtu kawhhran cu nanmah lawng nan si. Ka sunnak le ka hlawknak ah nanmah hi i theihpitu bik nan si. 16 Thesalonika khua ih bomnak ka ṭul tikah bomnak voikhat hnakih tam in hun kuat. 17 Ka duhmi cu nan laksawng ngah lawng hi a si bik lo; nan cazin sungah hlawknak um ve seh ti hi hmuh ka duh. 18 Atuah in pekmi hmuahhmuah ka ngah tinak ka ngan. In pekmi cu a ṭulmi hnakin a hlei tiangin in pek. Nan laksawng hmuahhmuah cu Epafroditas in i rak phurh ih atu ahcun ka poihaimi hmuahhmuah a kim ṭheh a si. Hi nan laksawng pawl cu Pathian ih lungawinak le a cohlanmi raithawinak, a rim a thawmi rimhmui bangtuk an si. 19 Cule ziang hmuahhmuah famkim in Khrih Jesuh sung ihsin ka Pathian in nan ṭulmi poh a lo pe ding. 20 Pathian kan Pa hnenah thangṭhat sunlawinak cu a kumkhua in um camcin seh. Amen. 21 Pathian minung pawl, Khrih Jesuh ih ta a si mi, pumpak ciar in cibai ka lo buk. Keimah thawn a ummi Khristian unau dang pawl khalin cibai an lo buk a si. 22 Hi tawkih a ummi Pathian minung pawl an zatein le, a hleice in siangpahrang innih a ummi pawl in cibai an lo buk. 23 Bawipa Jesuh Khrih zaangfahnak cu nan zate hnenah um hram seh.
1 Kolose khua ih a ummi Pathian minung, Khrih thawn nan pehzom awknak ruangah rinsan tlak a si mi Khristian unau pawl nan hnenah, 2 Pathian lungkimnak in Khrih Jesuh ih tirhthlah a si mi keimah Paul le Khrih sungah kan unau a si mi Timote in ca kan lo kuat. Pathian kan Pa in thlawsuahnak le daihnak lo pe hram seh. 3 Nan hrangih thla kan cam tik poh ah kan Bawipa Jesuh Khrih ih Pa le kan Pathian hnenah lungawinak thu kan sim ringring. 4 Ziangahtile Khrih Jesuh nan zumnak le Pathian minung pawl hmuahhmuah hnenah duhdawtnak nan neih kha kan rak theih ruangah a si. 5 A dikmi Thuthang ṭha nan hnenih a ra thlen pek ah ziang bangtuk in ruahsannak a lo pek ti cu nanmah in nan thei. Curuangah rinnak le duhdawtnak cu vancungah nan hrangah himte in a lo retsakmi nan ruahsannak parah hram an bun a si. 6 Pathian zaangfahnak nan rak theih hmaisa bik ni ihsin thokin atu tiang a si bangtuk in, Thuthang ṭha in thlawsuahnak cu nan hnenah a thlenpi ih leitlun khuazakipah a karh zaiter a si. 7 Pathian zaangfahnak cu Epafras hnen ihsin nan theihmi a si. Amah cu kan duhdawtmi kan hnaṭuanpi, kan ai-ah rinsan tlak zetin Khrih riantu khal a si. 8 Amah in Thlarau ih a lo pekmi duhdawtnak nan neihmi thu tla in sim. 9 Hi bangtuk in nan thuhla kan theih vete in nan hrangah thla kan cam ringring. Pathian in amah ih duhnak theih theinak le Thlarau ih pekmi fimnak le theihthiamnak in lo khatter dingah Pathian kan dil a si. 10 Cuticun Bawipa ih duhnak vekin nan nung thei ding ih amah lungtong zawng kha nan tuah ringring thei ding. Cule nan nunnak in rah ṭha a phunphun a rah ding ih Pathian nan theihnak ahcun nan ṭhang vivo ding. 11 Ziang hmuahhmuah kha thinsaunak thawn nan tuartheinak dingah Pathian sunlawinak ihsin a ra suakmi a thazaang in lo cakter hram seh. 12 Tleunak ram sungah Pathian in a mi thianghlim pawl hrangih a retmi kha a cotu si ve dingin a lo sersiamtu Pa Pathian cu lungawi in thangṭhat uh. 13 Amah in kannih in uktu thimnak huham sung ihsin in runsuak ih a Fahniang uknak sungah in luhpi zo; 14 a Fapa thawngin sual ngaidamnak kan ngah ih miluat kan si zo. 15 Khrih cu hmuh theih lomi Pathian ih hmuihmel langnak a si. Amah cu Fapa tir a si ih siammi thil hmuahhmuah hnakin a cungnung a si. 16 Ziangahtile Pathian in Khrih sung ihsin ziangzongza vancung le leilung tlunah siseh, hmuh theimi le hmuh thei lomi siseh, thlarau lam cahnak huham neitu le bawi le uktu pawl le thuneitu pawl siseh a tuah. Pathian in van le leilung ziang hmuahhmuah Khrih sungin a tuah ih Khrih hrangah finkhawm ṭheh dingin a tuah a si. 17 Khrih cu ziang hmuahhmuah hlanah a rak um zo ih amah thawn an pehzom awknak thawngin ziangzongza cu umnak hmun an nei cio. 18 Kawhhran cu Khrih ruangpum a si ih Khrih cu a lu a si. A pumsa ruangpi nunnak hram cu amah Khrih a si. Amah cu Fapa tir a si ih ziang hmuahhmuah lakah cungnung bik a si ringringnak dingah thihnak ihsin thawhter sal a si zo. 19 Fapa in amah ih sungah Pathian sinak famkimih a neihnak cu amah Pathian ih lairelnak in a si. 20 Cuticun a Fapa sung ihsin lei le van pumpuluk cu Pathian in a hnenah kirter sal a duh. Pathian in a Fapa thinglamtah parih a thihnak ruangin lei le vanih ummi thil hmuahhmuah thawn remnak a tuah ih cutiin a hnenah a hruaikir sal a si. 21 Hlanah cun thil ṭha lo nan tuah ruangah le nan ruah ruangah Pathian thawn nan rak hlaat aw ih a ral nan rak si. 22 Sikhalsehla atu-ah cun a Fapa taksa ruangpum rori in thihnak a tuarnak ruangah Pathian in a rualpi-ah a lo tuah zo. Cutiih remnak a tuahnak cu mi thianghlim, mawhnak nei lo le soiselnak um loin a hmaika ih thlenter a lo duh ruangah a si. 23 Cuti a si ruangah nan hramṭoh-nak a hngetmi parah khan fekzetin zumnak thawn ding ringring uh. Thuthang ṭha nan theihnak ihsin nan co ngahmi ruahsannak thawn zohman in lo ṭhen hlah hai seh. Hi Thuthang ṭha hrangah keimah Paul hi hnaṭuantu ka si ih, leilung tlun khuazakip mi hmuahhmuah hnenih simmi Thuthang ṭha a si. 24 Nan hrangah harsatnak ka tuarmi pawl ruangah hin lungawinak ka nei; ziangahtile ka taksa-ih ka tonmi tuarnak ruangah Khrih in a ruangpum a si mi kawhhran ai ah tuarnak a tonmi kha ka kimter ve a si. 25 Kei cu Pathian in kawhhran hnaṭuantu ah i tuah zo. Hi hnaṭuan i pekmi cu nanmah ih ṭhathnemnak dingah a si. Cumi cu Pathian thuthang famkim zetih phuan kha a si ih, 26 cuih thuthang cu san tampi sung zo miphun hnen hmanah phuang loin thuhmi a rak si ih atu lawngah a minung hnenah phuanmi Thuthang ṭha a si. 27 Pathian tumtahmi cu mi hmuahhmuah hrangah a rak ruah ciami a sunglawi le mangbangza a si mi thuthup cu atu-ah a minung pawl hnenih langter ding kha a si. Cule cuih thuthup cu nan sungih a ummi Khrih hi a ti duhmi a si ruangah Pathian sunlawinak kha nan ṭawm ve ding, tinak a si. 28 Curuangah zozo hnen khalah Khrih cu kan phuang a si. Mikip hnenah fimnak kan neihmi hmuahhmuah hmangin ralrinnak thu kan sim ih kan zirh. Cuti kan tuahnak cu zozo khal Khrih thawn an pehzom awknak sungin Khristian pitling si in Pathian hmaiih thlenpi kan duh ruangah a si. 29 Himi tuahsuak dingah amah Khrih in i pekmi, ka sungih nasa zetin hna a ṭuantu, cahnak hmangin ka ṭuan ciamco a si.
1 Nanmah hrangah siseh, Laodisia mi pawl hrangah siseh, pumpak in i thei lotu midang pawl hrangah siseh, ziangtlukin hnaṭuan khung ka ṭuan ti kha nan theih dingah ka duh. 2 Hi bangtuk in ka ṭuan sannak cu zozo khal ralṭhatnak in an khah ih duhdawtnak in pakhat le pakhat an komkhawm aw ih cuticun theihnak dik ruangih co ngahmi lunghmui hnangamnak cu famkim zetih an co theinak dingah ka duhmi a si. Cutiin asile Pathian ih thuthup a si mi Khrih amah cu an thei ngah ding. 3 Khrih cu hlawnthil sunglawi bangin thuhmi le khummi Pathian ih fimnak le theihnak hmuahhmuah on theinak tawhfung bangtuk a si. 4 Curuangah ka lo sim duh mi cu: ziangtlukih thuṭha a bang khalle, a dik lomi thu el-nak thawn zohman in lo bum hlah hai seh, tihi a si. 5 Ziangahtile ka ruangpum cun hmun dangah um hman ningla ka thlarau cun ka lo umpi hai a si; cule Khrih sungih rinsannak nan neihmi cu hmun khatah hnget zetin nan dintlang ka hmuh tikah ka lung a awizet. 6 Khrih Jesuh cu kan Bawipa a si tiih nan pom ngah zo ruangah amah thawn pehzom aw in nung uh. 7 Amah sungah nan hram cu thuuk zetin bun uhla nan nunnak cu amah parah inn bangin sak uh; zirh zomi nan si vekin nan zumnak ahcun cak sinsin uh; cule lungawinak in khat uh. 8 Ralring uh! Minung fimnak, zianghman santlaihnak nei lo, pakhat le pakhat bum awknak fimnak hmang tahratin zohman in sal ah lo tuah hlah hai seh. Cubangtuk fimnak cu Khrih hnen ihsin a rami a si lo; minung zirhnak in siseh, vantlolak le lei karlakih uktu thlarau siava pawl ih thuhla zirhnak in siseh, a rami a si. 9 Ziangahtile Pathian sinak cu Khrih a minung sinak sungah famkim zetin a um ih, 10 amah thawn nan pehzom awknak ruangah nunnak famkim nan hnenah pek a si zo. Khrih cu thlarau uktu hmuahhmuah le thuneitu hmuahhmuah tlunah cungnungbik Bawi a si. 11 Khrih thawn nan pehzom awknak ruangah serhtanmi nan si; cuih serhtannak cu minung tuahmi a si lo, Khrih ih tuahmi a si ih sualhiar tisa cahnak sung ihsin luat khi a si. 12 Ziangahtile baptisma nan ngah tikah Khrih thawn a thihnak sungah phum nan rak si bangtuk in thihnak ihsin a thawhtertu Pathian ih huham nan rinnak ruangah nannih cu Khrih thawn thawhtermi nan si ve. 13 Hlanlaiah nan sualnak ruangah le Daan lengih a ummi Zentail mi nan si ruangah thlarau lamah cun mithi nan rak si. Sikhalsehla atu cun Khrih thawn hmun khatah Pathian in a lo nungter zo. Pathian in kan sualmawhnak hmuahhmuah cu in ngaidam zo a si. 14 Kan sual leiba ngannak cazin cu a sungih ummi, mi a ṭemṭawntu daanterek pawl thawn thinglamtah parah khencih tahratin a phiatfai ṭheh zo. 15 Cule thlarau uktu pawl ih huham le cahnak tla cu thinglamtah ihsin a siatbal ṭheh ih mi hmuahhmuah hmuh dingah ralkaih-mi sal senpi hmaiih an hruai ṭheu bangin a hruai hai a si. 16 Cutin a si ruangah zohman in in le ei thu-ah siseh, ulh ding nithiang thu le thlathar puai thu-ah le Sabbath thu-ah siseh, daan lo tuahsak hlah hai seh. 17 Cubangtuk thlun ding le thlun lo ding timi pawl cu a rathleng leh dingmi ih thlam lawng an si. A taktak cu Khrih lawng a si. 18 Hmuhnak hleice ka nei ti tahratin midang hnakin a hleice cuangih a ruat awmi pawl in siseh, mi hmuhnak lawngah mi hnakin tangdor cuang vekih a ti awtertu pawl le vancungmi a biatu pawl in siseh, zohman in mawh lo phurh hlah hai seh. Cubangtuk mi cu zianghman sullam nei cuca loin minung ruahnak meen in thu an ruat ih an porh aw a si. 19 Cuticun taksa ruangpi bangtuk a si mi kawhhran ih lu Khrih cu hngauhsan nawn loin a colhsan. Lu a si mi Khrih hnen ihsin ruangpum cu nunnak rawl a ngah ih hlikhlok le thahri pawl in an kaikhawm. Cutiin ruangpum cu Pathian duhnak vekin a ṭhang a si. 20 Khrih a thih tikah nannih khal nan thi ve; curuangah vantlolak le leikhawvel uktu thlarau pawl kut sungin nan luat zo. Cuti si nacing in ziangah so hi leitlun khawvel mi bangin nan nun lai hrih? 21 Daan terek in, "Tham hlah," "Tep hlah," "Dai hlah," a timi pawl cu ziangah so thlun nan duh hrih? 22 Hi daan terek pawl cu voikhat ti suak ngah hnuah cun san a tlai nawn lomi thil pawl an si. Milai ih tuahcopmi daan le zirhnak lawng an si. 23 Vancungmi biak a ṭul an ti awknak le mi hmuhnak lawngah tangdor cuang vekin an umnak ah le anmah ih taksa lala an hrem awknak ahcun hi daan terek pawl cu mifim daan a bang ngai meen ding. Sikhalsehla taksa hiarnak neh theinak taktak ahcun zianghman ṭhathnemnak an nei lo.
1 Nannih cu nunnak ah Khrih thawn thawhter nan si zo ruangah Pathian vorhlam kap Khrih tonak vancung khua ih thil ah khin nan thinlung bun uh. 2 Leilung tlun thil pawl ruat loin vancung thil pawl khi ruat sawn uh. 3 Ziangahtile nan thi zo ih nan nunnak taktak cu Khrih thawn Pathian sungah thuh-in a um a si. 4 Cuih nan nunnak taktak cu Khrih kha a si ih amah a lang tikah nannih tla amah thawn nan langtlang ding ih a sunlawinak nan ṭawm ve ding a si. 5 Nan sungih hna a ṭuantu leilung pumsa duhnak: nupa sualnak le zoh mawi lo nuncan, taksa hiarnak le hurnak le hamṭamnak pawl tla cu nunter nawn hlah uh. (Hamṭamnak tla cu milem biak phunkhat a si.) 6 Hi bangtuk in thilsual an tuah ruangah Pathian thinhengnak cu cutiih a thu a thlun lotu pawl parah a ra thleng ding. 7 Tuih hlanah cun nanmah hrimhrim tla hi cubangtuk taksa duhnakih ukmi nan rak si ih tisa hiarnak sungih a nungmi nan rak si. 8 Sikhalsehla atu-ah cun cubangtuk taksa duhnak cu nan hlonfai ṭheh a ṭul: thinhengnak, aithawhnak le mi mitkemnak pawl cu hnong thlang uh. Mi hmuhsuamnak ṭong siseh, ṭongsia siseh, nan kaa sungin nan suahter lo pei. 9 Nan nun hlun nuncan ziaza cu nan phuak zo ruangah pakhat le pakhat bum aw nawn hlah uh; 10 cule nun thar ziaza nan hruk aw zo ih cuih nun thar cu a siamtu Pathian in amah ih hmuihmel keng sinsin vivo dingin cat loin a tharter ringring. Cutiih a tharternak cu amah famkim zetih nan theihsuaknak ding hrangah a si. 11 Cuti a si ruangah, Zentail mi le Judah mi tiin siseh, serhtan le tanlo ti in siseh, mi aa phun ti le ziangthu hman thei lo ramsa phun, sal pawl tile miluat pawl tiih thleidan awknak a um nawn lo; Khrih lawng hi ziangzongza a si ih ziang hmuahhmuah sungah a um a si. 12 Nannih cu Pathian ih minung nan si; a lo duhdawt hai ih amah ih hrangah a lo hrilmi nan si. Curuangah zawnruahnak, zaangfah thinpemnak, tangdornak, thinlung nemnak le thinsaunak pawl cu hnipuan bangtuk in hruk uh. 13 Pakhat le pakhat karah thinlung hmuh-awk lonak le phunzainak a um ahcun pakhat le pakhat zawi-awk theinak le ngaidamnak nei uh. Bawipa in a lo ngaidam vekin nannih tla pakhat le pakhat ngaidam aw ve uh. 14 Cule hibangtuk ziaza ṭha nan neihmi tlunah duhdawtnak beetcih uh; ziangahtile duhdawtnak cu ziangtinkim famkim zetih a finkhawmtu le rem ṭhepṭhep ih a tuahtu a si. 15 Khrih ih a lo pekmi daihnak cu thu nan ruah nan relcatnak kipah a lo hotu-ah tuah uh; ziangahtile hi daihnak sungih um dingah Pathian in taksa ruang pakhat sungah a lo kawhmi nan si. Cule lungawi aipuang in um uh. 16 Khrih Thuthang ṭha cu nan thinlung sungah a tlamtlinnak phunzakip thawn cam ringring seh. Fimnak phunzakip thawn pakhat le pakhat zirh-aw in nunsim aw uh. Hlanawknak hla, thangṭhatnak hla le hla thiang pawl sa uh. Nan lungawinak hla in Pathian kha thangṭhat uh. 17 Kan Pa Pathian cu Khrih sungin nan thangṭhat ruangah, ziang hmuahhmuah nan tuah ah siseh, nan simah siseh, Bawipa Jesuh hmin in tuah uhla sim uh. 18 Nupi pawl, nan pasal thu ngai uh; ziangahtile Khristian nan si vekin cumicu nan tuah dingmi a si. 19 Pasal pawl, nan nupi duhdaw uhla an hnenah awkam saang hmang hlah uh. 20 Nauhak pawl, Khristian nan si ruangah ziangtinkim ah nan nu le nan pa thu ngai uh. Cumi cu Pathian lungawitertu a si. 21 Nu le pa pawl, nan faale kha an thinhengter hlah uh; an thin a nau tata pang ding. 22 Salle pawl, ziangtinkim ah nan bawi pawl ih thu ngai uh. An mithmuh lawngah an lungkim seh tiin an thu ngai si loin, Bawipa nan ṭihzah ruang sawn ah nan thinlung taktein an thu cu ngai uh. 23 Ziang hmuahhmuah nan tuah tinkim ah milai hrangah si loin Bawipa hrangah kan ṭuan ti thinlung nei in nan thinlung taktein ṭuan uh. 24 Cule Bawipa in a minung pawl hrangih a ret ciami ṭuanman cu ro ah in pe ding, ti kha ciing ringring uh. Nan rianmi Bawi ngaingai cu Khrih lawng a si. 25 Cule zozo khal thilsual a tuahtu cu a thilsual tuahman a ngah ve ding; ziangahtile Pathian cun thu a rel tikah thleidannak zianghman a nei lo.
1 Bawi pawl, nan sal pawl kha dik le mawi in zoh uh. Nanmah tla vancungah Bawi nan neih ve kha hngilh hlah uh. 2 Taimak in thla cam uh; thla nan cam tikah, Pathian hnenih lungawi thu sim phahin thinlung fimtein cam uh. 3 Cuti nan cam tikah Khrih thuthup phuan theinak caan ṭha Pathian hnen ihsin kan ngah theinak dingah kannih hrang tla-ah in cam sak ve uh. Atu thawng sungih ka umnak khal hi cuih thu ka phuan ruangah a si. 4 Curuangah Khrih Thuthang ka phuan tikah fiangzetin le ka sim ding hrimhrim a si mi vekih ka phuan theinak dingah thla in cam sak uh. 5 Zumtu a si lomi lakah fimvartein tlangleng uhla caan ṭha nan neih mi poh kha man nei zetin hmang uh. 6 Nan ṭongkam cu ngainuam zet le a mawimi sisehla, mi kipih thusuhmi cu felfai zetih let thei dingah zuam uh. 7 Kan duhdawtmi kan unau Taikhikas in ka thuhla hmuahhmuah cu a lo sim ding. Amah cu Bawipa ih hnaṭuannak ah kan hnaṭuanpi a si ih rinsan tlakzetmi a si. 8 Curuangah nanmah tha petu dingah le ziang bangtuk in kan umtlandan a si ti a lo simtu dingah nan hnenah ka rak thlah a si. 9 Amah thawn hmun khatah Onesimas khal a ra ve. Onesimas cu kan duhdawtmi le kan rinsanmi kan unau, nan lakih sungtel a si. Hitawkih thil a cangmi hmuahhmuah cu anmah in an lo sim ding. 10 Keimah thawn thawngih a tla vemi Aristarkas in cibai a lo buk; Barnabas tupa Marka khal in cibai a lo buk ve a si. (Marka nan hnen a ra thlen le ṭhatein rak cohlang uh, ti cu thuthannak nan ngah zo.) 11 Justus ti khalih kawh mi Joshua in cibai a lo buk ve. Hi te pathum hi ka hnaṭuanpi Judah mi Khrih zumtu an si ih Pathian ram hrangih ka hnaṭuanpi, i bawmtu bik an si. 12 Epafras in cibai a lo buk. Amah cu nan pawl sungtel a si ih Khrih Jesuh riantu a si. A thinlung taktein nan hrangah thla a cam ringring ih hngetzet ih nan din theinak dingah, Khristian lamah pitling nan sinak dingah, nan zumnak thu nan theih fiang theinak dingah le a thu famkimih nan thlun theinak dingah Pathian hnenah a dil ṭheu a si. 13 Harsazet in nan hrangah siseh, Laodisia le Hierapolis khua mi pawl hrang tla-ah siseh, hna a ṭuannak cu pumpak rori in a theihpitu ka si. 14 Kan duhdawtmi sibawi Luka le Demas khal in cibai an lo buk a si. 15 Laodisia ih a ummi kan unau pawl le Nimfa le a innih a khawmmi Khristian pawl khal cibai kan buk a si; in rak sim sak uh. 16 Hi cakuat nan siar ṭheh hnuah Laodisia kawhhran khal in rak siar tengteng dingin rak tawlrel uh. Cule Laodisia ih kan unau pawl in kan cakuatmi an lo kuat sin ve ding ih nannih khal in cumicu rak siar ve uh. 17 Cule Arkhiphas kha, "Bawipa ih hnaṭuan an lo thiahmi cu ṭuansuak tengteng dingin tum aw," tiah rak sim uh. 18 Paul in cibai ka lo buk a si tihi keimah kut rori in ka nganmi a si. In ṭemṭawnnak thir cikcin hi hngilh hlah uh! Pathian zaangfahnak nan parah um hram seh.
1 Paul, Silas le Timote in, Thesalonika khua ih a ummi kawhhran, Pathian kan Pa le Bawipa Jesuh Khrih ih ta a si mi, nan hnenah ca kan lo kuat. Pathian zaangfahnak le daihnak cu nan hnenah um hram seh. 2 Nanmah ih ruangah Pathian cat loin kan thangṭhat ih kan thlacamnak in kan lo ciing ringring a si. 3 Ziangtin tile nan zumnak cu nitin nan nuncan daanih a langnak thu, duhdawtnak nan neih ruangah nasa zetih hna nan ṭuannak thu le kan Bawipa Jesuh Khrih sungih ruahsannak nan neihmi a hnget daan pawl thu thlacamnak in kan Pa Pathian hnenah kan sim ringring. 4 U le nau pawl, Pathian in a lo duhdawt ih amah ih minung si dingah a lo hril, ti kan thei a si. 5 Ziangahtile Thuthang ṭha nan hnen kan thlenpi tikah ṭongkam men lawng si loin cahnak huham le Thlarau Thianghlim le thutak a sinak theihfelnak thawn kan thlenpi a si. Nan hnenih kan um sungah ziangbangtuk in kan um kan tlang a si, ti cu nan thei; nanmah ih ṭhatnak hrangah a si. 6 Kan nundaan le kan Bawipa nundaan nan cawng ih harsatnak tampi nan tong na'n Jesuh Khrih ih thu cu Thlarau Thianghlim hnen ihsin a rami lungawinak thawn nan pom a si. 7 Curuangah nanmah cu Masidonia le Akhaia pengih a ummi zumtu Khristian pawl hrangah zohṭhim tlakmi nan si. 8 Ziangahtile Bawipa ih thu cu nanmah ih hnen ihsin Masidonia le Akhaia peng khuazakip ah a thlen lawng si loin Pathian nan zumnak thu cu khuaza ramkipah a thang a si. Kanmah ih sim rero hman a ṭul lo. 9 Nan zumnak thuhla a rak theitu pawl hmuahhmuah in kan lo tlawn laiih in rak cohlan zia, milem pawl nan tlansan ih Pathian nan pan zia, a dikmi le a nungmi Pathian rian dingih nan pan zia tla an sim ih, 10 vancung ihsin a Fapa a ratnak ding nan hngahnak khal an sim a si. A Fapa Jesuh cu thihnak ihsin a thawhtermi le a ra dingmi Pathian thinhengnak ihsin in runsuaktu a si.
1 U le nau pawl, nan hnen kan ra thlen cu a lak a si lo ti kha nanmah rori in nan thei. 2 Thesalonika khua ih kan ra thlen hlanah Filipi khua ah tisiatnak le dekcoknak kan tuar zia khal nan thei zo. Cubangtuk in dodalnak tampi a rak um na'n Pathian in ralṭhatnak in pek ih amah ih Thuthang ṭha cu nan hnenah kan phuang. 3 Kan lo simmi thu-ah hin palhnak a um lo, thinlung thiang lo sung ihsin a rami khal a si lo, mibum kan tum ruang khalah a si lo. 4 Pathian in simter in duhmi kan sim, ziangahtile Thuthang ṭha phuangtu dingah in hniksak ih rintlak in in hmu a si. Milai lungawiter kan tum lo, sikhalsehla kan thinlung in hmutu Pathian lungawiter kan tum a si. 5 Nan theih vekin nan hnen kan ra thlen laiah khan nanmah porhnak ṭongkam kan hmang lo; kan hamṭamnak khuhtu ding ṭongkam khal kan hmang lo; Pathian cu in theihpitu a si. 6 Nanmah ih hnenin siseh, midang hnen khalin siseh, thangṭhatnak ngah kan duhmi a si lo. 7 Khrih ih tirhthlah kan si vekin nan hnen ihsin cubangtuk cu a ngen ngamtu ding khal kan si ko na'n cumicu kan tum mi a si lo. Nu in a faale a cawm ih dimdoihnak thawn a tuamhlawm hai vekin nan hnenih kan um laiah khan thinnemnak thawn kan um a si. 8 Kan lo duhdawtzet ruangah Pathian Thuthang ṭha lawng hman si loin kan nunnak rori khal hi hlawm kan lo duh a si. Kan duhdawtzetmi nan si zo. 9 U le nau tla, baangzet le harzet in hna kan ṭuan ṭheu cu nan thei ko. Pathian Thuthang ṭha nan hnenih kan phuan tikah nan hrangih thilrit kan si lonak dingah sunzan hna kan ṭuannak a si. 10 Nannih a zumtu pawl lakih kan umtlandan cu a thiang le a dikmi, soiselnak um lomi a si. Hi thu ahcun nanmah rori hi in theihpitu nan si vekin Pathian khal in theihpitu a si ve. 11 Pa in a faale pawl a kilkhawi bangin nannih khal kan lo kilkhawi ti cu nan thei. 12 A Uknak le a sunlawinak lo hlawm dingih a lo kotu Pathian lungawiter dingih nung thei dingah cat loin kan lo forh, kan lo hnem ih tha kan lo pek a si. 13 Cule Pathian hnenih lungawi thu kan sim sannak dang a um lai. Pathian thu nan hnen kan thlenpi tikah khan minung ih thu si loin Pathian ih thu a si ti nan thei; cuti nan theihmi cu Pathian thu taktak a si ih nannih in cumi cu nan pom ngah zo. Ziangahtile zumtu pawl nan sungah cuih Pathian thu in hna a ṭuan a si. 14 U le nau tla, Judea ramsung Pathian kawhhran pawl le Khrih Jesuh minung pawl ih tonmi thil cu nannih khalin nan tong ve a si. Judah mi pawl in an rak hrem bangtuk in nannih khal nanmah ih ramsungmi lala in an lo hrem a si. 15 Judah mi cu Bawi Jesuh le profet pawl a thattu an si ih kanmah hremtu khal an si. Ziangtluk Pathian ninghangtertu so an si! Mi hmuahhmuah dodaltu an si! 16 Zentail mi hnenih rundamnak Thuthang ṭha sim ding hman in rak dawn. Cuticun an rak tuah ringring ṭheumi sualnak cu a pittawp an thlenter ih a netnak ah Pathian ih thinhengnak an parah a rung thleng. 17 U le nau tla, kan thinlung cun kan ṭhen aw lo na'n kan taksa in caan tawite sung nanmah thawn kan ṭhen awk tikah hin kan lo ngai zet ih nanmah lo ton sal ding lawng kan zuam rero a si. 18 Nanmah ra tlawn sal kan duh. Kei tla cu voi tam nawn nanmah ra tlawng dingah ka tum rero na'n Satan in kan lamzin in kham ṭheu. 19 Thungai ti-ah cun, midang niamter cuang loin, nanmah hi kan Bawipa Jesuh a ra thlen sal ih nehnak thawn a hmaiih kan din tikah, kan ruahsannak, kan lungawinak le kan hmaihngalnak nan si ding. 20 Nanmah hi kan hmaihngalnak le kan lungawinak taktak nan si.
1 A netnak ah kan um thei nawn lo ruangah kanmah lawng Athens khua ah taang in, 2 Timote hi nan hnenih hun thlah dingin kan rel. Timote cu Khrih Thuthang ṭha kan phuannak ah Pathian hnaṭuantu kan unau a si. Hremnak nan tonmi ruangah zohman dunglamih nan kir lonak dingah, 3 amah cu thazaang a lo petu dingah le nan zumnak a lo hngettertu dingah kan hun thlah a si. Hi bangtuk hremnak cu kan tuar dingmi hrimhrim a si ti cu nanmah rori in nan theihmi a si. 4 Ziangahtile nan hnenih kan um laiah a hlankhan ihsin hremnak kan tuar ding, tiah kan lo sim cia zo. Nan theih vekin, kan rak lo sim cia vek cekci in a cang ngaingai. 5 Curuangah Timote ka hun thlah. Nan thuhla zianghman thei loih um cu ka tuar thei nawn lo ruangah le nan zumnak thu theih ka duh ruangah ka hun thlahnak a si. Satan in a lo thlem ding ih kan hnaṭuanmi hmuahhmuah a lakah a cang ṭheh pang pei ti ka phang. 6 Asinain tubaite ah Timote a rung thleng ih zumnak le duhdawtnak nan neihnak thu ṭha in run sum. In relṭhatnak thu le kanmah in a lo hmuh kan duh vekin nannih khal in a hmuh in duhnak thu tla in sim. 7 Curuangah u le nau pawl, harsatnak le hremnak tong hman nungla nanmah ruangah kan thinlung cu a cakzet a si. Thazaang in petu cu nanmah ih zumnak hi a si. 8 Ziangahtile Bawipa thawn nan pehzom awknak ah nan hngetkhoh ti kan theih ruangah kan thaw kan thaw thei thlang a si. 9 Atu cu Pathian hnenah lungawi thu kan sim ding. Nanmah ruangah lungawinak Pathian mithmuh ih kan conak thu-ah Amah cu kan thangṭhat ngaingai. 10 Cule nanmah lo tlawng thei dingah le nan zumnak ih a sammi ra pe thei dingah a sun a zan in Pathian hnenah kan thinlung taktein kan dil. 11 Kan Pa Pathian le kan Bawipa Jesuh in nan hnen kan hung thlen theinak dingah lamzin in sialsak hram seh! 12 Kan Bawipa in pakhat le pakhat nan duhdawt awknak le mi hmuahhmuah nan duhdawtnak cu karhter sehla nanmah kan lo duhdawtnak a tum vekin tumter ve hram seh. 13 Cuticun amah in nan thazaang a khohter ding ih kan Bawipa Jesuh a mithiang pawl thawn a ratsal tikah kan Pathian hmaiah mi famkim le mi thianghlim nan si ding.
1 A netnak ah u le nau tla, Pathian duhzawng ih nan nun theinak dingah ziangtin nun ding a si ti cu kan hnen ihsin nan zir zo. Cuvek ih nan nun thei sinsinnak dingah Bawipa Jesuh hmin in kan lo forh a si. 2 Ziangahtile Bawipa Jesuh hnen ihsin a rami thupekmi vekin kan lo zirhmi a si cu nan thei. 3 Pathian in nannih cu nupa sualnak tuah hrimhrim loin thianghlim dingah a lo duh. 4 Mipa pawl, nan nupi thawn thianghlim le zoh mawi in um uh; 5 Pathian thei lo khawvel mi bangin taksa hiarnak thlun in nung hlah uh. 6 Hi thu-ah hin Khristian nan unau pawl hmuhsuam in zawmtai hlah uh. Hi bangtuk cu tuah lo dingah kan lo sim zo ih atu-ah napi in ralrinnak kan lo pe: hibangtuk a tuahtu pawl cu Bawipa in a hrem ding. 7 Pathian in nupa sualnak tuah dingah in ko lo, thianghlim dingah in ko sawn a si. 8 Curuangah hibangtuk thuzirhnak a thlun duh lotu cu minung ih thu a el a si lo, Thlarau Thianghlim a lo petu Pathian ih thu a el a si. 9 Zumtu unau pawl duhdawt ding thu-ah cun ca ngan a ṭul nawn lo. Pakhat le pakhat nan duhdaw aw pei, tiah Pathian in nanmah rori a lo zirh zo ih, 10 Masidonia ramih a ummi nan unau pawl parah cubangtuk in nan nungcang zo. U le nau tla, cu hnakih ṭha sinsin in nungcang dingah kan lo forhfial duhmi a si. 11 Kan lo sim cia zo vekin daiteih nun kha tumtah uhla nanmahte nan hnaṭuan fingfing kha ṭuan in nan pumcawmnak hlawh fingfing uh. 12 Cuticun Pathian a zum lotu pawl ih upat le zohsonak nan co ding ih nan ṭulnak ah midang rinsan rero a ṭul lo ding. 13 Ka u le ka nau tla, beiseinak zianghman nei lo ih riahsia-in a ummi pawl vekin nan um lonak dingah, a thi ciami pawl ih thuhla-ah thutak nan theih ding hi kan duh a si. 14 Jesuh cu a thi ih a thosal ti kan zum; curuangah Jesuh zum ih a thimi cu amah thawn hmun khatah Pathian in a thoter ding ti kan zum. 15 Atuih kan lo zirhmi hi kan Bawipa ih zirhmi a si: kan Bawipa a rat sal tikah kannih a nungmi pawl hi a thi ciami pawl ih hlanah kan feh hmaisa lo ding. 16 Van ihsin Bawipa ih thupeknak aw a thang ding, van ih vanmi upabik au-nak aw a si ding, Pathian ih tawtawrawt aw-thawng a thang ding ih Bawipa cu vancung ihsin a rung ṭum ding. Khrih a zumtu a thi ciami pawl an tho hmaisa ding; 17 cule kannih a nunglai mi pawl in vanah Bawipa cu a tho hmaisa pawl thawn mero lakah kan hmuak ding. Cuticun Bawipa thawn kumkhua in kan umtlang ding. 18 Curuangah hi thu in pakhat le pakhat hneem aw uh.
1 U le nau tla, Bawipa ih ratnak ding ni le caan, ziangtikah a si ding, ti thu ahcun nan hnenah ca kuat a ṭul lo. 2 Ziangahtile nanmah rori in Bawipa ih ratsalnak Ni cu zan ih fifir rat bangin a ra ding, ti fiangtein nan thei. 3 Mi in, "Daihnak le himnak a um," an ti laifangah nunau in nauhrinnat a tuar bangin rinlopi ah siatralnak an parah a thleng ding ih zohman an luat lo ding. 4 Sikhalsehla u le nau tla, nannih cu khawthim sung ummi nan si lo ruangah cuih Ni in zanih fifir bangin nan rin lo laiah lo man hlah seh. 5 Nannih cu nan zate in tleunak sung ummi nan si; sun minung nan si. Thimnak sungmi kan si lo; zanih minung khal kan si lo. 6 Curuangah midang pawl bangin itthat ding kan si lo; itthat loin fimhringtein a nung dingmi kan si. 7 Minung cu zanah an itthat; zanah zu an ri. 8 Sikhalsehla kannih cu sunih mi kan si ih fimvar zetih a um ding kan si. Curuangah zumnak le duhdawtnak cu ṭaangphaw ai-ah hmang in kan ruahsanmi rundamnak cu thirlukhuh ai-ah hmang uhsi. 9 Pathian in a thinhengnak tuarter dingah in hril lo; sikhalsehla kan Bawipa Jesuh Khrih sungin rundamnak co dingah in hril a si. 10 Kan Bawipa cu a ratsal tikah kan rak nunah siseh, kan rak thih zo khalah siseh, amah thawn umtlang dingah kan ai-ah a thi a si. 11 Curuangah atuih nan tuah rero zo bangin pakhat le pakhat thazaang pe aw-in bawm aw uh. 12 Ka u le ka nau tla, Khristian nitin nan nunnak ah a lo hotu le a lo zirhtu pawl, nan lakah hna a ṭuantu pawl kha upat hmaizahnak pe uh, tiah kan lo forh. 13 Nan hrangih hna an ṭuan ruangah hmaizahnak a saang bik le duhdawtnak pe hai uh. Nanmah lakah daite le rem-awtein um uh. 14 U le nau tla, zaangzel pawl kha ralrinnak pe uh, thinnau mi pawl an ral ṭhatter uh, a derdaimi pawl bawm uhla mikip parah thinsau in um uh, tiah kan lo forh. 15 Zohman in ṭhat lonak cu ṭhatlonak in lehrulh ding a si lo; sikhalsehla pakhat le pakhat parah siseh, mi hmuahhmuah parah siseh, ṭhatnak tuah tum ringring uh. 16 Cat loin nan lungawi uh; 17 thlacam ringring uh. 18 Ziangvek dinhmun khalah lungawi thu sim uh. Cucu Khrih Jesuh ah Pathian ih a lo duhsakmi a si. 19 Thlarau Thianghlim kha hmit hlah uh; 20 profet thusim thiamnak kha nautat hlah uh. 21 Ziang hmuahhmuah hniksak hmaisa uh; a ṭhami asile pom uhla, 22 a ṭha lomi hmuahhmuah in hnong uh. 23 Daihnak in petu Pathian amah in famkim zetin lo thianghlimter sehla, kan Bawi Jesuh Khrih a ratsal tikah nan thlarau, nan thinlung le nan taksa, nan ziangzongza in mawhnak nei lo ah lo tuah hram seh. 24 Nannih a lo kotu cu rinsan tlak a si ruangah cumicu a tuah ding a si. 25 U le nau tla, kannih hrang khalah thla in cam sak ve uh. 26 Zumtu unau pawl kha a thianghlimmi hnamnak thawn cibai buk uh. 27 Kan Bawipa ih thupeknak in hi cakuat hi zumtu hmuahhmuah hnenah rak siarsak uh tiah ka lo forh a si. 28 Kan Bawipa Jesuh Khrih zangfahnak cu nan parah um hram seh.
1 Paul, Silas le Timote in Thesalonika khua ih a ummi kawhhran, Pathian kan Pa le Bawipa Jesuh Khrih ta a si mi, nan hnenah ca kan lo kuat. 2 Pathian kan Pa le Bawipa Jesuh Khrih in zaangfahnak le daihnak lo pe hram seh. 3 Ka u le ka nau tla, nanmah ih ruangah Pathian hnenah kan lung a awizet. Cutiih Pathian kan thangṭhat cu a dikmi a si, ziangahtile nan zumnak a ṭhangzet ih pakhat le pakhat nan duhdawt awknak khal a ṭhang vivo a si. 4 Curuangah Pathian kawhhran pawl hnenah nanmah ih thu-ah kan porh-aw ih harsatnak le hremnak nan tong nacingin tuartheinak le zumnak nan neih thei ruangah kan hmai a hngalzet a si. 5 Himi hin Pathian thuṭhennak cu a dik a si ti a langter ih Pathian uknak ruangih a tuarmi nan si ruangah Pathian uknak thawn a tlak awmi nan si. 6 Pathian in a dikmi a tuah ding. Harsatnak a lo petu pawl ih parah harsatnak a thlenter ve ding; 7 harsatnak a tuartu nan hnenah colhdamnak a lo pek ding ih kannih hnen khalah in pe ve ding. Cumi cu kan Bawipa Jesuh le huham thawn a khatmi a vancungmi pawl an rat tikah a tuah ding; 8 Pathian a hnongtu le kan Bawipa Jesuh ih Thuthang ṭha a cohlang duh lotu pawl cu meisa hliau thawn a hrem hai ding. 9 Annih pawl cu kumkhua siatralnak an tuar ding. Bawipa cu a minung le a zumtu pawl hnen ihsin sunlawinak le upatnak co dingih 10 a rat Ni ah, a huham sunlawinak le Bawipa mithmai hmu lo dingin annih pawl cu hnon an si ding. Cule nannih cu nan hnenih kan phuan mi Thuthang ṭha nan zum ruangah Bawipa a sunloihtu le upatnak a petu pawl lakah nan tel ding. 11 Curuangah cat loin nan hrangih thla kan camnak a si. Kan Pathian ih a lo kawhsannak thawn mil-aw in nan nun theinak dingah kan dil ringring. A cahnak huham sungin nan duhmi hmuahhmuah cu ṭhatnak ah kimter in nan zumnak ih hnaṭuannak cu amah in tlamtlingter hram seh. 12 Cuticun kan Bawipa Jesuh hmin cu sunlawinak nan hnen ihsin a ngah dingih kan Pathian le Bawipa Jesuh Khrih zaangfahnak ruangah nannih khal in sunlawinak cu a hnen ihsin nan ngah ve ding.
1 Ka u le ka nau tla, kan Bawipa Jesuh Khrih a ratsalnak ding le amah thawn hmun khatih kan tonkhawm awknak ding thu-ah, 2 thinlung hnokin um hlah uh; cun Bawipa ih Ni cu a ra thleng zo a si, an timi khalah mangbangin um hlah uh, tiah ka lo dil. Cubangtuk ih a titu in kanmah lehlam, sim cianak an rak nei, a si lole thu an simnak ah an telh, a si lole an cakuat sungah an ngan, ti tla-in in ti ding. 3 Zohman in lo bum hlah hai seh. Ziangahtile neta bik Ralthawhnak a thlen hlan le hell ih tla dingmi Misualral pa a ra thlen hlanah cun Bawipa ih Ni cu a ra thleng lo ding. 4 Misualral pa cun midang in khawzing ih an ruahmi le biak dingih an ruahmi hmuahhmuah a dodal ding ih cu pawl ih tlunah a ret-aw ding. Pathian Biakinn sung khalah a lut ding ih to tahratin keimah hi Pathian ka si, a ti ding. 5 Nan ciing nawn lo maw si? Nan hnenih ka um laiah hi thu hmuahhmuah hi ka lo sim ṭheh zomi an si. 6 Asinain atu-ah cun a ra thleng hrih lo ding, ziangahtile dawntu a um. Cuih dawntu cu ziang a si ti nan thei. A tikcu a kim tikah Misualral pa cu a lang ding. 7 Misualral pa cu a thupte in hna a ṭuan rero zo; sikhalsehla a dawntu kha hmun dangih ṭhawn hlo a si hlanah cun a lang dingmi cu a lang thei hrih lo ding. 8 Tikcu a kim tikah Misualral pa cu a lang ding. Asinain Bawipa Jesuh a thlen tikah a kaa sung ihsin a suakmi a thaw in a that ding ih a tleumi a sunlawinak in a siatsuah ding. 9 Misualral pa cu Satan cahnak huham thawn a ra ding ih hmuhsaknak mak le khawruahharza a phunphun mi bumnak ah a tuah ding. 10 A hloral ding pawl hnenah cun a ṭha lo zetmi mibumnak phunphun a hmang ding. Cu pawl cu an hloral ding, ziangahtile rundamnak ngahnak ding a ummi thutak kha an duh lo ih an cohlang fawn lo. 11 Curuangah Pathian in an hnenih hnaṭuan dingah sualpalhnak huham a thlak ih a dik lomi kha an zum. 12 Cuticun thutak zum loin sualnak lam a hriltu pawl cu siatralnak ah an thleng ding. 13 Bawipa ih duhdawtmi u le nau tla, nanmah ruangah Pathian cu kan thangṭhat ringring ding. Ziangahtile Thlarau cahnak ruangah Pathian mi thianghlim ih canter dingah le thutak nan zumnak ruangah rundamnak ngah dingah Pathian ih hril hmaisa bikmi nan si. 14 Kan Bawipa Jesuh Khrih sunlawinak a cotu si dingah Pathian in nan hnenih kan phuanmi Thuthangṭha hmangin a lo ko zo. 15 Cuti a si ruangah u le nau tla, kan thusimmi in siseh, nan hnenih kan cakuatmi in siseh, kan lo zirhmi thutak pawl cu kaihnget uhla khohzetin ding uh. 16 Kannih in duhdawt ih in zaangfah ruangah cat loin ralṭhatnak le a hngetmi beiseinak in petu kan Bawipa Jesuh Khrih Amah le kan Pa Pathian in, 17 a ṭhami kha nan sim ih a tuah tla nan tuah theinak dingah ralṭhatnak le thazaang cahnak thawn lo khatter hram seh.
1 A netnak ah u le nau tla, Bawipa ih Thuthang cu nanmah lakih a karhzai bangtuk in zamrangin a karhzai vivonak dingah le sunloihnak thawn an cohlannak dingah thla in cam sak uh. 2 Bawipa ih Thuthang cu mi hmuahhmuah in an zum lo ruangah Pathian in miṭha lo le mi sualral pawl hnen ihsin in runsuak dingah thla in cam sak uh. 3 Sikhalsehla Pathian cu rintlak a si, amah in thazaang a lo pe ding ih Misualral pa hnen ihsin a lo humhim ding. 4 Kan lo zirhmi pawl hi nan thlun rero ih hmailam khalah nan thlun vivo ding ti Bawipa ah rinsannak kan nei. 5 Pathian duhdawtnak le Khrih ih a lo pekmi tuartheinak cu tam sinsin ih nan theih theinak dingah Pathian in lo hruai vivo hram seh. 6 U le nau tla, kan thuzirhmi bangtuk ih a thlun lotu unau pawl le mi zaangzel pawl cu hrial uh, tiah kan Bawipa Jesuh Khrih hmin in thu kan lo pe a si. 7 Kan tuahmi vekih tuah ding cu nan thei fiang a si. Nan hnenih kan um laiah khan zaangzel in kan um lo. 8 A man pek loin kan lakmi zianghman a um lo. Kanmah rori in kan ṭuan, kan cangvai ih zo hrang hmanih thilrit si lo dingin a sunzan in kan ṭuan a si. 9 Hitiih kan ṭuannak cu nanmah ih bom dingah dil theinak thu kan neih lo ruangah a si lo; nanmah ih cawn dingah kan ṭuanmi a si. 10 Nan hnenih kan um laiah khan, "Hna a ṭuan duh lotu cu rawl khal ei hlahseh," tiah kan lo sim ṭheu. 11 Hitiih kan lo simnak cu nanmah sungah mi hrekkhat zaangzel in an um ih hnaṭuan zianghman zuam loin midang hnaihnawh lawng an thiam. 12 Cubangtuk ih a nungmi pawl hnenah felfai teih nung dingah le mahih pumcawmnak hrang ṭuan ve dingah Bawi Jesuh Khrih hmin in kan forhfialmi le ralrinnak kan pek duhmi an si. 13 Sikhalsehla nannih u le nau tla, thil ṭha tuah cu ning hlah uh. 14 Hi cakuat sungih thu vekin a thlun duh lotu nanmah sungah an um meen ding. Cubangtuk mi cu zohman in pawl hlah uh, a ningzak seh. 15 Asinain ral vekin zoh hlah uh; unau bangtuk in nun sim uh. 16 Daihnak hram a si mi kan Bawipa in daihnak cu a phunphun in ziangtik caan khalah lo pe hram seh. Bawipa cu nan zate hnenah um hram seh. 17 Keimah Paul in cibai ka lo buk timi hi keimah ih kut rori in ka nganmi a si. Ca ka kuatmi kipah hiti in ka hmin ka khen ih ka ngan a si. 18 Kan Bawipa Jesuh Khrih zaangfahnak cu nan zate hnenah um hram seh.
1 In Runtu kan Pathian ih thupeknak in le kan ruahsannak a si mi Khrih Jesuh zaarin Khrih ih tirhthlah a si mi keimah Paul in, 2 kan rinnak sungah ka fapa ngaingai a si mi Timote na hnenah ca ka lo kuat. Kan Pa Pathian le kan Bawipa Khrih Jesuh in ngilneihnak, zaangfahnak le daihnak lo pe hram seh. 3 Masidonia peng ka feh zawng ih ka lo fial zo bangin Efesa khua ah um dingin ka lo duhsakmi a si. Efesa khua ih thurin dik lo a zirhtu kha cubangtuk ih zirh nawn lo dingin va kham rori aw ti ka duh. 4 El awknak lawng a suaktertu thuanthu menmen le cem thei lo ko ih rak nganmi an suahkehnak pupa hmin pawl uarnak khal hlon dingah sim hai aw. Ziangahtile cubangtuk pawl cun Pathian tumtahnak an kimter thei lo. Zumnak lawngin Pathian tumtahnak cu theih thei a si. 5 Hi bangtuk ih ka lo fial tikah ka tumtahmi cu, thinlung thiang sungin a rami duhdawtnak, le siaṭha thleidannak thinlung thiang le a felmi zumnak um seh ti duhnak ruangah a si. 6 Hi bangtuk hi mi hrekkhat cun an tlansan ih aat-thlak thu-el awknak sung an thleng. 7 Pathian ih daan thuhla ahcun zirhtu saya ṭuan an duh; asinain anmah ih simmi lala hman a tican an thei lo ih a theizet le lunghmuizet vekih an simmi thu khal an thei ngah ngaingai lo. 8 Daan cu a sinak ding vekih hmanah cun a ṭhami a si ti kan thei. 9 Asinain kan ciin ding a ṭulmi cu, daan timi cu miṭha hrangih tuahmi a si lo; daan a buartu, miṭha lo, Pathian upatnak nei lo le mi sualral pawl, biaknak siseh thlarau lam siseh zianghman ih a siar lotu pawl, an nu le an pa a thattu pawl, laithat pawl, 10 cin le daan nei loih a nung pawl, mihur pawl, sal zuarnak in sumtuah pawl, thuphan per pawl, thu theihpitu dik lo pawl, cule thurin dik kalhkih ih a nungtu pawl, cu pawl hrangih tuahmi a si. 11 Cubangtuk zirh awknak cu than dingih i fialmi Thuthang ṭha sungah a um ih cuih Thuthang ṭha cu sunloih le upatin a ummi Pathian hnen ihsin a rami a si. 12 Ka hnaṭuan ka ṭuan theinak ah thazaang i petu kan Bawipa Khrih Jesuh hnenah lungawi thu ka sim. Hlanah cun Amah cu ka simsia, ka hrem ih ka hmuhsuam ciamco na'n, 13 Amah riantu dingah i hril ih a hnaṭuantu ding tlak ih i ruah ruangah ka thangṭhat a si. Pathian cu i zaangfahtu a si, ziangahtile zumnak zianghman ka rak nei lo ih ka tuahmi hi ziang a si ti hman ka rak thei lo. 14 Bawipa in a tamzetmi a zaangfahnak thawn i run burh ih zumnak le duhdawtnak i pek. Cuih zumnak le duhdawtnak cu Khrih Jesuh thawn kan pehzom awknak thawngin kan ta an si zo. 15 Khrih Jesuh cu misual pawl rundamsuak dingah leilung ah a rung ṭum, timi hi a dikmi ṭong a si ih famkim zetin pom tlak le zum tlak a si. Cuih misual pawl lakah kei hi misual bik ka si. 16 Sikhalsehla Pathian cu ka parah zaangfahnak a nei ih Khrih Jesuh a thinsaunak le a lungnemnak ka parih a langnak dingah a si. Cubangtuk in Khrih Jesuh lungnem thinsaunak kei misual bik miangmo parih a thlennak cu neh hnuah mi in amah an zum ih kumkhua nunnak an ngahnak dingih zohṭhim dingah a si. 17 Kumkhua in Siangpahrang a si mi, thih ni nei lo, le mit-ih hmuh theih lo, amah lawng Pathian taktak a si mi, a hnenah upatnak le sunlawinak kumkhua in hmun camcin seh! Amen. 18 Timote, ka fapa, na tuah dingmi pawl na hnenah ka lo ap. Hitiih ka lo ap tikah a hlanah nangmah ih thu-ah profet ih a rak simmi thawn a kaih awmi a si. Cuih profet simmi pawl cu raldonak hriamnam ah hmang awla, 19 thinlung thiang nei in na zumnak fekter aw. Mihrek cu an siaṭha thleidan thiamnak thinlung an thlun duh lo ruangah an zumnak an siatter ṭheu. 20 Cubangtuk mi lakah Himenaias le Alexander tla an tel ih an pahnih in Satan kut sungah ka pek. Hi bangtuk ih ka tuahmi cu Pathian an simsiatnak reh seh tinak ah a si.
1 A hmaisa bikih ka lo fial duhmi cu mi hmuahhmuah hrangah Pathian hnenah thlacam uh, dil uh, midang ai-ah thlacam uhla lungawi thu sim uh, ti a si. 2 Daite le hnangamte ih kan um theinak dingah le Pathian ṭihzahnak thawn ziaza ṭha ih kan nun theinak dingah siangpahrang le ramsung hotu upa pawl hrangah thla cam uhla Pathian hnenah dil uh. 3 Cutiin nan tuah le a ṭha; cule mi hmuahhmuah thutak thei hai sehla, rundammi si hai seh ti a duhtu, 4 in Rundamtu Pathian a lung a awi ding. 5 Ziangahtile Pathian pakhat lawng a um ih minung le Pathian karlakah remnak tuahtu minung palai pakhat a um. 6 Cuih palai cu mi hmuahhmuah tlen dingah a nunnak a petu Khrih Jesuh a si. Cutiin a nunnak a pekmi cu Pathian in a tikcu a kim tikah mi hmuahhmuah rundamsuak a duh, ti langternak a si. 7 Curuangah a si zumnak thu le thudik phuangtu dingah Zentail mi hnenah tirhthlah le zirhtu-ah in thlah. Thuphan ka sim lo, thudik ka sim a si! 8 Pathian biaknak hmun kipah mipa in thla cam hai seh ti ka duh. Pathian hnenah a pum a pe awmi thinhengnak le thu-el awknak um lotein mipa in an kut thlir in thla cam hai seh. 9 Nunau khal a tawkzawn in um hai sehla zoh-mawi tawkin thuam aw hai seh. An sam an tom tikah a hleifuan in tom hlah hai seh; sui hlawnthil, lung mankhung le hnipuan mankhung zetzet thawn thuam aw hlah hai seh. 10 Cuhnakin biaknak lamih a zuammi nunau an si ahcun ziaza ṭha in thuam aw sawn hai seh. 11 Nunau cu a zirtu si hai sehla daite le tangdor tein zir hai seh. 12 Zirhtu an si ding cu ka duh lo; mipa tlun khalah thu nei hlah hai seh. Daite in um hai seh. 13 Ziangahtile a hmaisa bikih siammi cu Adam a si; neh hnuah Evi a si. 14 Cule bum a tongtu cu Adam a si lo, Evi a si ih Pathian daan a buartu khal nunau a si. 15 Sikhalsehla nunau cu thinlung nemin an nung ih zumnak le duhdawtnak le thianhlimnak sungih an hnget ahcun fa an neihnak thawngin rundam an si ding.
1 "Zo khal in kawhhran hruaitu si a duh ahcun hnaṭuan ṭha duhtu a si," timi hi thudik a si. 2 Kawhhran hruaitu cu soiselnak nei lomi a si ding. Nupi pakhat lawng a neitu, rit theinak thil ih a suup aw theimi, a uk aw theimi, felfai zoh rem in a nungmi, mikhual a zohthiamtu le mi zirh a thiamtu a si ding. 3 Zurit hmangmi a si lo ding ih, thinsuup aw thei lo, midang thawn a to aw ṭheumi khal a si lo ding. Sikhalsehla mi lungnem le daihnak a duhtu a si ding. Tangka duh tukmi a si lo ding. 4 A innsang ṭhatein a ho theitu a si ding ih a faate pawl cu mi thu a ngaimi le mi upat thiammi a si ding. 5 Amah ih innsang hman ṭhatein a kilkhawi thei lo ahcun ziangtinso Pathian ih kawhhran a kilkhawi thei ding. 6 Zumnak lamah lungthleng pekte a si lo ding; culo ahcun a zum aw sual pang ding ih Satan cu hnon a rak ton vekin anih khal hnon a tong ve pang ding. 7 Pathian awi lo misenpi pawl ih an upatmi a si ding; cubangtuk a si lo ahcun mi ih relsiat a tong ding ih Satan ih thang ah a awk aw ding. 8 Kawhhran Upa pawl cu ziaza ṭha a neimi le ṭong tam lo thinlung tluangtlammi si hai seh. Zu in le tangka a duh tukmi an si lo pei. 9 Pathian ih a run phuanmi thutak kha a siaṭha thleidannak thinlung thiangte in hngette ih a pomtu an si ding. 10 Upa ṭuan a duh pawl cu hniksak hmaisa an si pei ih soiselnak um lo an si le an ṭuan pei. 11 An nupi khal ziaza ṭhami an si ding ih mi relsia ih ṭong tammi an si lo pei. Zu in lomi an si ding ih ziangtinkim ah mifel an si ding. 12 Kawhhran Upa cu nupi pakhat lawng a neitu a si ding ih a innsang le a faate pawl ṭhatein a uk theitu a si ding. 13 An hnaṭuan felteih a ṭuan theitu upa cu upat an co ih Khrih Jesuh an zumnak thu kha ralṭha zetin an phuang ngam a si. 14 Na hnenih hi cakuat ka ngan laiah hin a rei hlanah ka ra lo tong cing ding tiin ka ruat. 15 Sikhalsehla ka tlai pang a si ahcun Pathian innsang a si mi kawhhran sungah ziang bangtuk in so kan umtlandan a si ding, ti kha hi ka cakuatmi in a lo sim ding. Pathian innsang cu kumkhua in a nungmi Pathian ih kawhhran a si ih cuih kawhhran cu thudik hramṭoh-nak le a dinhngettu ṭhuam a si. 16 Kan biaknak sungih thuthup hi a tum ngaingai a si, ti cu zokhal in an el thei lo ding: Amah cu minung taksa in a suak, a dikmi a si thu Thlarau in a langter; Cule vancungmi khal in an hmu; A thuhla cu miphun zakip hnenah phuan a si ih leilung khuazakipah an zum. Cule sunlawinak ah lakso a si.
1 Caan neta lamah cun mihrek in Khristian thurin hi an taan ding; bumtu thlarau an zum ding ih khawsia ih zirhnak an thlun ding, tiah fiangtein Thlarau in a sim. 2 Cubangtuk zirhnak cu thuphanper mibum thiam pawl in an zaiter. An siaṭha thleidannak thinlung cu thirling ih holh kangmi bangin a thimi a si. 3 Cuih pawl cun nupa ṭhit awk le rawl hrekkhat ei tla a ṭha lo tiin an zirh. Sikhalsehla Pathian in cuih rawl pawl cu ei dingah a tuah ih Pathian a zumtu le thutak a theitu pawl hrangah cun lungawi thlacamnak thawn ei dingah a ṭhami a si. 4 Pathian ih a tuahmi hmuahhmuah cu an ṭha ṭheh; zianghman hnon ding an um lo. Sikhalsehla ziang hmuahhmuah cu lungawi thlacamnak thawn cosaan ding a si; 5 ziangahtile Pathian ih thu le thlacamnak in a thiang ah a canter. 6 Hi zirh awknak hi Khristian kan unau pawl na sim a si ahcun Khrih Jesuh riantu ṭha na si ding. Nangmah khal na thlun rero zomi a dikmi thuzirhnak le zumnak ṭongkam ihsin thlarau lamah na cawm aw a si. 7 Asinain Pathian thu thawn pehtlaihnak zianghman a nei lomi simrel tlak lo thuanthu menmen pawl cu hrial aw. Pathian duhzawng ih nung dingin zirh-aw ringring aw. 8 Taksa harhdamnak ih zirmi cu man a nei ve ko na'n thlarau harhdamnak hrangih zirmi cu ziangtinkim in man a nei. Ziangahtile atu-ah siseh, hmailam hrang khalah siseh, in tiamkammi cu nunnak a si. 9 Hiti ka simmi hi a dikmi ṭong a si ih zumtlak le cotlak an si. 10 Rethei zet le harsa zetin hna kan ṭuan; ziangahtile kumkhua in a nungmi Pathian parah kan ruahsannak kan bun. Cuih Pathian cu mi hmuahhmuah Rundamtu a si ih amah a zumtu pawl hrangah a si hleice. 11 Hi thlun dingmi le thuzirhnak pawl hi sim awla zirh aw. 12 Mino na si ruangah zohman in lo nautat hlah hai seh. Sikhalsehla na hmurka na ṭong daan, na umtlan na ziaza, duhdawtnak le zumnak le thianhlimnak khalah zumtu dang pawl ih zohṭhim dingin nung aw. 13 Na hnen ka ra thlen hlan sung cu misenpi hnenah Ca Thianghlim siar awla, thusimnak le thuzirhnak in na tikcu le na thazaang rak hmang aw. 14 Profet pawl in thu an phuang ih upa pawl in na lu tlunih an kut an suan zawng ih na ngahmi thlarau laksawng kha thlahthlam hlah. 15 Na ṭhanso zia kha mi hmuahhmuah ih an hmuhnak dingah himi pawl hi na tikcu le na thazaang pe in hmang aw. 16 Na nundaan ralring awla na zirhmi tla ralring aw. Himi pawl hi cat loin tuah aw. Na tuah ringring thei a si ahcun nangmah le na thusimmi a theitu pawl kha na rundam ngah ding a si.
1 Upa pawl kha va kawk hlah; na pa vekah ruat in neemte in forh hai aw. Mino deuh kha na unau-ah ruat aw. 2 Nunau upa deuh cu na nu bangtuk ah ruat awla, nunau no deuh pawl cu thinlung thiangte in na farnu bangtuk ah ruat aw. 3 Mahte lawng khua a sami nuhmei pawl kha upat aw. 4 Sikhalsehla nuhmei nu in faate a si lole tu a neih ahcun a hmaisabik ah cuih tu le fa pawl cun an nu le an pa, a si lole an pi an pu pawl kha an daanih a fial vekin kilkhawi hai sehla cawm ve hai seh. Ziangahtile cumicu Pathian lungawitertu a si. 5 Mahte lawng khua a sami nuhmei cu, kilkhawitu zohman a neih lo ruangah, Pathian lawng a rinsan ih a sun a zanin thla a cam ih bomnak a dil. 6 Sikhalsehla tisa nomnak hrangih a taksa a hmangmi nuhmei cu a nung cingin a thi a si. 7 Nuhmei pawl cu zohmanih mawhthluk lomi an sinak dingah hi thuzirhnak pawl hi rak sim aw. 8 Sikhalsehla mi pakhat cu a sungkhat, amah ih innsang sung hman kilkhawi loin zianghman ah a siar lo a si ahcun a zumnak a dungtun a si ih zum lotu hnak hmanin a sual sawn a si. 9 Ziang bangtuk nuhmei hman kum sawmruk tlun a si lo ahcun nuhmei cazin sungah telh hlah. Cuih tlunah cuih nuhmei nu cu voikhat lawng pasal a neimi siseh. 10 Hnaṭuan ṭhatnak ah hmin a neimi siseh. Hnaṭuan ṭha timi ahcun: a faate a kilkhawi thiamtu, mikhual zoh thiamtu, hnaṭuan nauta bik kekholh khal Khristian unau parah a ṭuan zuamtu, harsat mangbang an ton caanah mi a bawmtu, le thilṭha tuah ah a tikcu le a thazaang a petu, timi pawl hi an si pei. 11 Sikhalsehla nuhmei no deuh pawl cu nuhmei cazin sungah rak telh hlah. Ziangahtile pasal neih an duh sal tikah Khrih kha dung an tun ṭheu. 12 Cuticun Khrih hnenih an thukammi an siatbal ih mawhthluk an tong. 13 Culawng si loin inn khat hnu inn khatah an vak ih a lakin an tikcu an cemter. Cu hnakih a sia sinsin cu: an ṭong a tam, mi an relsia, mi tinkim an tokhrok ih ṭong lo ding khal an ṭong. 14 Curuangah kum no deuh nuhmei pawl cu pasal nei hai sehla faate tla nei in an inn kilkhawi hai seh ti ka duh. Cuti asile kan ral pawl in kanmah thangsiatnak caanṭha an ngah lo ding. 15 Ziangahtile nuhmei hrekkhat cu Satan thlun duh ah in tlansan zo. 16 Sikhalsehla Khristian nunau in a innsang ah nuhmei a neih ahcun kawhhran phurh ritter lo dingin amah in cawm seh. Cuti cun cawmtu nei loih khua a sami nuhmei taktak pawl kha kawhhran in a zoh thei ding a si. 17 Kawhhran Hruaitu, hnaṭuan ṭha a ṭuantu cu ṭuan man a let hnih in ngah tlak an si. Cuih hruaitu lakah thusimnak le thuzirhnak ih a zuamzet pawl cun ngah tlak an si cuang. 18 Ziangahtile Ca Thianghlim in, "Fang a ciil rerotu cawcang a hmur ṭem hlah," a ti ih, "Hnaṭuantu cun a ṭuanman ngah ding a si," a ti. 19 Thutheitu a mal bik pahnih tal an um lo ahcun kawhhran hruaitu mawh an puhnak cu ngai duh hlah. 20 Sualnak a tuahtu pawl cu misenpi hmaiah kawk awla midang in an ṭih deuh ding. 21 Pathian le Khrih Jesuh le a thianghlim vancungmi hmaika-ah ka lo fial: ziang na tuah khalle zohman thleidannak le duhdannak um lotein hi thuzirhnak pawl hi rak thlun aw. 22 Bawipa ih hnaṭuantu dingah zo par hmanah nawt-sa-ling in kutsuannak va tuah hlah. Midang tuahmi sualnak ah va tel hlah; thianghlim tein um aw. 23 Tidai lawnglawng in loin na pum na le na nat dang nuam deuh dingah sabitti maltete in rak in aw. 24 Mi hrekkhat an sualnak cu fiangtein a lang ih thuṭhennak ah an sualnak cu anmah ih hlanah a thleng hmaisa; sikhalsehla midang sualnak cu neh hnupi lawngah a lang. 25 Cubangtuk in hnaṭuan ṭha cu fiangtein a lang ih a lang hrih lomi khal thuh-ralta a theih lo.
1 Sal in a bawi cu upat pek tlak a si, tiin ruat seh. Cutiin a tuah asile zohman in kan Pathian hmin le kan thuzirhnak hi an relsia lo ding. 2 An bawi pawl Khristian an si tikah sal pawl in, "Khristian kan unau an si ve paam," tiah hmuhsuam hlah hai seh. An hnaṭuan kha ṭha sinsin in an ṭuan ding sawn a si; ziangahtile an hnaṭuanmi ṭhathnemnak a cotu pawl cu an duhdawtmi zumtu pawl an si. Hi bangtuk in thu na zirh ding ih na sim ding. 3 Zokhal kan Bawipa Jesuh Khrih ṭong a dikmi le kan biaknak ih zirhmi thawn a mil-aw lomi thu mi a zirhtu cu, 4 zianghman thei hnai lo ih mi puarthau meen a si. Cupa cu ṭongfang pakhat thu khalah el awknak le tawh awknak a duh ih lungkim ti a nei lo. Cumi cun iksiiknak, thutamnak, mi nautatnak, mi zum lonak le, 5 thutak a pom thei lomi le thinlung in thu a ruat thei tuk nawn lomi pawl thawn cat loih thu el awknak a suahter. Biaknak hi lennak lamzin pakhat a si tiin an ruat. 6 Biaknak in minung cu a lianter taktak, a neihzat parih lungkimnak a neih phot ahcun! 7 Kan suah pek laiah hi leilung parah ziangso kan suahpimi a um? Zianghman a um lo! Hi leilung ihsin kan ken theimi ziangso a um? Zianghman a um lo! 8 Cuti a si ruangah ei ding rawl le hruk ding hnipuan kan neih ahcun kan hrangah a tawk a si. 9 Sikhalsehla len a duhtu pawl cu sualforhnak sungah an tla ih aat-thlak hna le ṭihnungza a si mi tisa duhnak thang sungah an awk aw. Cumi cun siatnak le hloralnak sungah a hnuk thla a si. 10 Ziangahtile paisa duhtuk cu sualnak phunkip thoktu hram a si. Mihrek cun paisa neih an duhtuk ruangah kan zumnak an tlansan ih riahsiatnak in voi tampi an thinlung a kuaiter. 11 Sikhalsehla nang cu Pathian minung na si ruangah himi pawl hi hrial aw. Dingnak, thianhlimnak, zumnak, duhdawtnak, tuartheinak le lungnemnak pawl nei dingah napi in zuam aw. 12 Zumnak hrangih do awknak ahhin na tha neih patawp suah aw. Theihpitu tampi mithmuh ah na zumnak felfai zetih na rak phuan tikah Pathian ih a lo kawhsannak a si mi kumkhua nunnak hi kai-hnget aw. 13 Ziang hmuahhmuah nunnak a petu Pathian le Pontias Pilat hmaiih a zumnak felfai zetih a phuang theitu Khrih Jesuh hmaika-ah ka lo fial: 14 Kan Bawipa Jesuh Khrih a lang sal Ni tiang hi ka thupek pawl hi famkim le felzetin thlun aw. 15 Cuih Ni cu, sunloih a si mi le amah pakhat lawng thil hmuahhmuah Uktu a si mi, siangpahrang lakih Siangpahrang bik, bawi lakih Bawi bik a si mi Pathian in, a khiah ciami caanah a kimter ding. 16 Amah lawng hi thih ni nei lo Pathian a si; a ceennak hmun cu a tleu tuk ih zohman in an naih thei lo. Amah cu zohman in an hmu dah lo; zohman in an hmu thei lo ding. Kumkhua cahnak huham le upatnak cu a hnenah um camcin seh! Amen. 17 Milian pawl kha, "Leilung thilri sumsaw nan neih ruangah puarthau ding a si lo," tiah thu sim aw. Rinsan tlak lo leilung tlun lennak ah an ruahsannak bun ding a si lo; kan nomnak hrangah ziang hmuahhmuah siangzet in in petu Pathian ah bun sawn hai seh. 18 Thil ṭha tuah dingah le hnaṭuan ṭhatnak ah milian si sawn dingah le tirhsiangmi an si ih an neihmi kha midang hlawm siang dingah ralrinnak pe aw. 19 Cu bangtuk in an thlun thei a si ahcun, hmailam hrangih hram ṭha a buntu an si ding ih ro sunglawi an khawl ding a si. Cuticun nunnak taktak cu an co suak ding a si. 20 Timote, na kilkhawi dingah na kut sungih apmi hmuahhmuah kha himte in kilkhawi aw. Upat hmaizahnak zianghman tel lo, aat-thlak thu-el awknak, mi hrekkhat in "Fimthiamnak," tiah a dik lo zawng ih an timi ṭong pawl cu hrial aw. 21 Ziangahtile mi hrekkhat in cumicu kan co ngah an ti ih zumnak lamzin ihsin an pial a si. Pathian zaangfahnak cu nan zate hnenah um hram seh.
1 Khrih Jesuh thawn kan pehzom awknak ruangih in tiam ciami nunnak thu phuang dingah Pathian lungkimnak in Khrih Jesuh ih tirhthlah keimah Paul in, 2 ka duhdawtmi ka fapa Timote na hnenah ca ka lo kuat. Pathian kan Pa le Khrih Jesuh kan Bawipa in ngilneihnak, zaangfahnak le daihnak lo pe hram seh. 3 Ka pu le ka pa ih an rak rianmi le thinlung thiangte ih ka rian vemi Pathian hnenah lungawi thu ka sim. A sun a zanih ka thlacamnak ih nangmah ka lo theihtinte in Pathian hnenah lungawi thu ka sim a si. 4 Na mitthli a tlak kha ka cing ringring ih ka lungawinak tlamtling dingin lo tong thei ningla ti ka duhzet. 5 Zumnak fel na neihmi kha ka ciing ringring. Cuih zumnak cu na pi Lois le na nu Zunis in an rak neihmi zumnak a si. Atu khalah cuih zumnak cu na nei lai a si, tiin ka zum. 6 Curuangah na lu parih kutsuannak ka tuah laiih Pathian ih a lo pekmi laksawng kha nung ringring dingin kilkhawi aw tiah ka lo theihternak a si. 7 Ziangahtile Pathian ih in pekmi Thlarau in ṭihhrutmi ah in tuah lo; cahnak huham, duhdawtnak le mah le mah uk-awk theinak in in khatter sawn a si. 8 Kan Bawipa ih thu cu mi sim dingah na ningzak hlah. Khrih hrangih thawng a tlami keimai hrang khalah na ningzak hlah. Pathian ih thazaang a lo pek vekin Thuthang ṭha hrangah zonzaihnak tuar ngam sawn aw. 9 Pathian in amah ih minung si dingah in ko ih in rundamsuak zo. Cutiih in rundam suaknak cu kanmah tuah theimi kan neih ruangah a si lo, a zaangfahnak le tumtahnak a neihmi ruangah a si sawn. Hi a zaangfahnak cu Khrih Jesuh hmangin caan hramthok hlan ihsin in rak pek zo. 10 Asinain in Runtu kan Bawipa Khrih Jesuh a ratnak sungin atu-ah kan hnenah a langter a si. Thihnak ih hmual cu a cemter ih Thuthang ṭha sungin kumkhua nunnak a langter zo. 11 Pathian in Thuthang ṭha phuang dingah tirhthlah le zirhtu ah i hril zo. 12 Hi bangtuk ih ka tuarnak cu cutiih in hrilnak ruangah a si. Sikhalsehla ka rinsan ngah-mi hi zo a si ti ka theih ruangah hnangam lunghmuinak ka nei. Curuangah a kut sungih ka kiltermi thil cu cuih Ni a thlen tiangin himte in amah in a kilkhawi ding tiah fiangtein ka thei. 13 Ka lo zirh ciami thudik cu hngetzet in kai ṭha awla na thlun ding le na zohṭhim dingah re ṭha aw. Khrih Jesuh thawn kan pehzom awknak ruangih kan ta a si mi zumnak le duhdawtnak sungah um ringring aw. 14 Kan sungih a nungmi Thlarau Thianghlim ih cahnak in na hnenih a lo pekmi thil ṭha pawl cu kil ṭha aw. 15 Asia peng sungih a ummi hmuahhmuah in in dungtun ih in tlansan ṭheh zo ti cu na thei. Cuih sungah Figelas le Hermogenes khal an tel. 16 Asinain Onesiforas cun voi tampi ka thin i nuamter ruangah Bawipa in a zaangfahnak cu a innsang sungah thlenter hram seh. 17 Thawng sungah ka um na'n i zahpi loih Rom khua a ra thlen vete in i hmuhsuak hlan lo i hawl ciamco. 18 Khi Ni ah Bawipa in zaangfahnak pe hram seh. Cule Efesa khua ah ziang tlukin ka hrangah hna a ṭuan ti khal fiangtein na theihmi a si.
1 Ka fapa, nang cu Khrih Jesuh thawn kan pehzom awknak le kan comi a zaangfahnak ruangah hngetkhoh-in um aw. 2 Theihpitu tampi hmaiih ka lo zirhmi thu tla cu midang a zirhsin theitu ding rinsantlak pawl hnenah va ap aw. 3 Khrih Jesuh ih rinsantlak ralkap na si bangtuk in tuar ding na covo cu tuar ve aw. 4 Ralkap a ṭuantu cun amah hotu bawi ih duhnak kha a thlun ih ralkap a si lomi mi menmenih thuhla sungah a cokkalh aw lo. 5 Tlan zuamnak sungih a teltu in daan a thlun duh lo ahcun laksawng a ngah thei lo ding. 6 Hnaṭuan khung a ṭuantu lothlotu in rawlkhawm caan a thlen tikah rawl thar ngahtu ding hmasa bik a si. 7 Hitiih ka simmi pawl hi rak ruat ṭha aw; ziangahtile Bawipa in ka simmi pawl theih theinak a lo pe ding. 8 Thuthang ṭha ka phuanmi sungih a um vekin David tesinfa, thihnak ihsin thawhter salmi Jesuh Khrih kha hngilh hlah. 9 Thuthang ṭha ka phuan ruangah harsatnak ka tuar ih misualral bangin thir cikcinih khih ka tong. Sikhalsehla Pathian thu cu thir cikcin in khih theih a si lo. 10 Curuangah Pathian ih hrilmi minung pawl in Khrih Jesuh hnenih a rami rundamnak an ngah ih kumkhua sunlawinak an conak dingah harsatnak hmuahhmuah ka tuar a si. 11 Hi thu hi rintlak a si: "Amah thawn kan thih ahcun, a nun khal amah thawn kan nung tlang ding. 12 Harsatnak kan tuar thei ahcun, amah thawn kan uk tlang ve ding. Amah kan hnon a si le, anih khal in in hnong ve ding. 13 Rintlak lo kan si hmanah, anih cu rintlak a si ringring; Ziangahtile amah le amah a el aw thei lo." 14 Òongfang meen parih thu-el awk rero cu baang thlang uh, tiah Pathian hmaika-ah na milai pawl ralrinnak pe awla an hngilh lonak dingah sim cingcing aw. Cubangtuk thu-el awknak in ziang ṭhathnemnak hman a suahpi lo; a ngaitu pawl a siatsuah sawn a si. 15 A hnaṭuan a zahpi lotu le Pathian thutak Thuthang ṭha cu dik zetih a simfiangtu si dingah Pathian lungkimnak ngah dingin zuam aw. 16 Pathian ṭihzah lonak ṭong le aat-thlak thu-el awknak cu hrial aw. Ziangahtile cubangtuk pawl cun Pathian hnen ihsin mi a hlatter sawn a si. 17 Cubangtuk zirh awknak cu kan taksa hi thuk vivo in a eitu hma vek a si. Cutiin a zirhtu saya cu Himeneas le Filetas an si ih, 18 an pahnih in a dikmi lamzin in an pial a si. Annih in, "Thawhter salmi kan si zo," an ti ruangah zumtu hrekkhat pawl ih zumnak an vaivuanter. 19 Sikhalsehla Pathian in hngetzet ih a bun zomi hrih le hram cu hnin a theih lo. Cuih hrih le hram parah cun, "Bawipa in amah ih ta a si mi a thei," tile, "Bawipa ih ta ka si a timi cun ṭhat lonak a hrial ding," tiin nganmi a um. 20 Inn tumpi sungah cun khokheng a phunphun an um. A hrek cu ngunih tuahmi an si ih a hrek cu sui ih tuahmi an si. A dang cu zanthing le tlak ih tuahmi an si. A hrek cu ni sunglawi caanih hman ding an si ih a hrek cu nitin hman menmen ding an si. 21 Zokhal a ṭha lomi hmuahhmuah a hrial ih thiangte in a um a si ahcun hnaṭuan sunglawi hrangah hman a si ding. Ziangahtile pum pe-mi a si ih hnaṭuan ṭha ṭuan dingah a tiar aw ṭhepṭhep-mi a si ruangah a Bawipa ih hman tlak a si. 22 No lai taksa hiarnak cu tlansan awla thinlung thiangin Bawipa ih bomnak a diltu pawl thawn hmun khatah dingnak, zumnak, duhdawtnak le daihnak ngah dingah napi in zuam aw. 23 Aatthlakza le zianghman thei cuca loih thu-el awknak cu hrial aw. Cubangtuk el awknak cun tawh awknak a suahter ti na theihmi a si. 24 Bawipa a riantu cu midang thawn a to-aw rerotu a si lo ding. Mikip hnenah zaangfah thiamtu, thinsau in mi zirh thiamtu le, 25 amah a dodaltu pawl nun a sim tikah thinnemte in mi a sim theitu a si sawn ding. Cutiin a tuah a si le annih pawl cu an lungthleng tahratih thudik an theihnak dingah Pathian in tikcu caan ṭha a pek khal a si thei. 26 Cuticun an thinlung a fim ding ih Satan in a duhnak thlun ding ih a kaihremnak thang sung ihsin an luat ding a si.
1 Ni neta lamah cun harsat caan tampi a thleng ding ti kha ciing ringring aw. 2 Mi tampi an tirh a fak ding, an hamṭam dingih an hngal an puarthau ding. Mi an hmuhsuam ding, an nu le an pa ih thu khal an el ding, lungawi hna an thiam lo ding ih biaknak khal ziangah an siar lo ding. 3 Mi zaangfah an thiam lo ding, mizawn ruahnak an nei lo ding, mi thangsiat duhtu an si ding, mithawi le mivelh duh an si ding ih ṭihnungza an si ding. A ṭhami an hua ding. 4 Mi zuarthlai le mi phiarhmang an si ding ih helhlong ih a nungmi an si ding; an uang aw hngialhngial ding ih Pathian hnakin an tisa nomnak an duh sawn ding. 5 Kan biaknak hi a lenglam cun an pom ding; asinain a sunglam ih a cahnak hmual ngaingai cu an hnong ding. Cubangtuk minung pawl cu kom hlah uh. 6 Cubangtuk hrekkhat pawl cu midang innah lut tahratin sualnak thilrit a phurtu nunau pawl, taksa hiarnak ih a neh duahdomi le, 7 thutak theih duh ah a zir rero na'n a thei thei lomi nunau ṭawnṭai pawl kha an va nehsawh, an va hmuhsuam ṭheu a si. 8 Jannes le Jambres cu Moses dodaltu an si vekin himi pawl cu thutak dodaltu an si. Hi pawl cu ṭhatein thu a ruat thei lomi thinlung dik lo le an zumnak ah a tlasammi an si. 9 An tumtahmi-ah hlapi an thleng lo ding; ziangahtile mi hmuahhmuah in an aatnak kha an thei mai ding. Jannes le Jambres khal cu vek rori an rak si ve. 10 Nang cu ka thuzirhnak, ka ziaza le ka nun sungih ka tumtahmi na hmu ih na thlun zo. Ka zumnak, ka thinsaunak, ka duhdawtnak le ka tuar theinak, 11 hremsiat ka tonnak le harsatnak ka tuarmi pawl tla na hmu zo. Antiok, Ikoniam le Listra khua ah hremsiatnak nasa zetih ka tuarmi pawl cu na theih ṭhehmi an si. Sikhalsehla Bawipa in cuih sung ihsin i hum suak. 12 Zovek khal Khrih thawn a pehzom awknak in Pathian duhzawng ih nun a tumtu cu hremnak a tong ko ding. 13 Cule miṭha lo le mi hrokhrawl pawl cu a sia lam an pan vivo ding; mi an bum vivo ding ih anmah khal bum an si ve ding. 14 Sikhalsehla nang cu na zir zomi le hngetkhoh zetih na zummi thutak pawlah khan hnget zetin ding ringring aw. A lo zirhtu saya pawl zo an si ti na thei ih, 15 Ca Thianghlim cu na nauhakte lai ihsin na thei zo ti kha hngilh hlah aw. Cuih Ca Thianghlim cu Khrih Jesuh na zumnak sungin rundamnak ah a lo thlentu, fimnak a lo petu a si. 16 Ca Thianghlim hmuahhmuah hi Pathian ih thawkhummi a si ih thutak zirhnak, zirhsual simhrinnak, a sualmi remsaalnak ah le dingteih nitin nunnak ih zirh awknak ah a ṭha. 17 Cutiih Pathian hna a ṭuantu cu mi tlamtling a si ding ih thil ṭha phunzakip tuah dingah thuam famkim neimi a si ding.
1 Mithi le minung an thuhla a ṭhentu Khrih Jesuh hmai le Pathian hmaiah a tanglam pawl hi tuah dingah napi in ka lo forh; ziangahtile Khrih cu Siangpahrang bangin uktu si dingah a rasal ding. 2 Curuangah Thuthang ṭha phuang aw, tikcu a rem khalah siseh, rem lo khalah siseh, phuang tengteng aw; an lung fiang ding in sim awla kawk a ṭul ahcun kawk awla forh a ṭul ahcun forh aw; cule thinsau in zirh aw. 3 Mi in a dikmi zirhnak kha thlun duh loin anmah ih duhmi sawn an thlun caan a ra thleng ding. Cule theih an duhmi lawng phuang dingah zirhtu saya tampi anmah ih hrangah an la ding. 4 Thutak kha ngai duh nawn loin an dungtun ding ih a dik lomi thuanthu menmen sawn an ngai duh ding. 5 Sikhalsehla nang cu ziang bangtuk hmun le tikcu khalah thusau ruatin uk awk thei zuam aw. Harnak tuar thei zuam awla Thuthang ṭha a phuangtu ih hnaṭuan kha ṭuan aw. Cule Pathian hnaṭuantu na si vekin na ṭuanvo kha kimtein ṭuan thluh aw. 6 Kei cu raithawinak ih hlan ding ka si caan a kim thlang. Hi leilung nunnak hi ka tlansan caan a cu zo. 7 Tlan zuamnak ah ka ti thei patawp in ka tlan zo; tlan zuamnak a netnak tiang ka tlan zo ih ka zumnak khal thlauthla lo tein ka pom hnget zo. 8 Atu cu ka Bawipa, a dingmi thuṭhentu Bawi in cuih Ni ih i pek dingmi nehnak laksawng ka hrangih in ret sakmi in i hngak. Cuih laksawng cu dingnak sui lukhuh a si ih keimah ih hrang lawngah a si lo; duhdawtnak thawn amah a langnak ding a hngaktu hmuahhmuah hrang khalah a si. 9 A cang thei tawkin ka hnenah rat cing zuam aw. 10 Demas cu hi leikhawvel a duh sawn ruangah i tlansan ih Thesalonika khua ah a feh zo. Kresen cu Kalati pengah a feh ih Titas cu Dalmatia pengah a feh. 11 Luka lawng ka hnenah a um. Marka tla rak sawm awla ratpi ve aw, hnaṭuannak ah i bawm theitu a si. 12 Taikhikas cu Efesa khua ah ka fehter. 13 Na rat tikah Troas khua Karpas hnenih ka taanmi ka kawrfual kha i rak phurh phah aw. Cabu pawl kha rak phur aw; saphaw ih tuahmi cazual pawl kha hngilh hrimhrim hlah. 14 Daar sertu Alexander in harsatnak tumpi i pek. Bawipa in a tuahnak vekin a ruul leh ko ding. 15 Nangmah khal ralring aw; ziangahtile anih cu kan Thuthang ṭha kha thih ngamih a eltu a si. 16 Thurelnak ih ka suah hmaisa bik ṭumah zohman in in ṭanpi lo. An zatein in tlansan ṭheh a si. Annih cu Pathian in mawhthluk hai hram hlah seh. 17 Asinain Pathian cu ka hnenah a um ih thazaang i pek; curuangah kan thuthang cu tlamtling zetin Zentail mi hmuahhmuah theih dingin ka sim thei. Cule thihnak sungin ka luat a si. 18 Bawipa cun siatnak hmuahhmuah lak ihsin i runsuak ding ih a vancung Uknak sungah himte in i luhpi ding. Amah ih hnenah sunlawinak cu kumkhua in um camcin hram seh. Amen. 19 Prisilla le Aquila le Onesiforas innsang pawl cibai ka buk hai a si. 20 Erastas cu Korin khua ah a um ih Trofimas cu a nat ruangah Miletas ah ka taan. 21 Thlatang hlanah rat thei zuam aw. Zubulas, Pudens, Linas le Klaudia in cibai an lo buk ih a dang Khristian unau pawl khal in cibai an lo buk. 22 Bawipa cu na thlarau hnenah um hram seh. Pathian zaangfahnak cu nan zate ih hnenah um hram seh.
1 Pathian hnaṭuantu le Jesuh Khrih ih tirhthlah keimah Paul in ca ka lo kuat. Pathian ih a hrilmi a minung pawl an zumnak fekter dingah le kan biaknak thutak sungih hruai dingah Pathian in ih hril ih ih thlah. 2 Cuih kan biaknak cu kumkhua nunnak ruahsannak sungah hram a bunmi a si. Thuphan a per dah lomi Pathian in hi nunnak cu leilung seem hlan ihsin in tiamkam zomi a si ih, 3 a tikcu a kim tikah cumicu a Thuthang sungin a hun langter. Cumi cu ka hnenah i pek ih in Runtu kan Pathian ih thupeknak bangtuk in ka phuang. 4 Zumnak bangrep kan neihmi sungah ka fa ngaingai a si mi Titas na hnenah hi ca hi ka ngan. Kan Pa Pathian le in Runtu Khrih Jesuh in zaangfahnak le daihnak lo pe hram seh. 5 Krete ah ṭuan ṭulmi pawl ṭuansuak dingah le khawkip ih kawhhran upa ret dingah Krete tikulh-ih ka lo taantanak cu a si. Ka thuzirhmi kha ciing ringring aw. 6 Kawhhran upa cu mawhthluknak nei lomi siseh; nupi pakhat lawng a nei mi siseh, a faale pawl cu zumtu si hai sehla puarthaunak le thu ngailonak lamih thangsia lomi si hai seh. 7 Kawhhran hruaitu cu Pathian hnaṭuan ah ṭuanvo neitu a si ruangah mawhthluknak um lomi a si pei. Mi puarthau le mi thintawi, zurit hmangmi, mi helhlong le paisa duhham mi a si lo pei. 8 Mikhual le mileng zohthiamtu a si pei ih thilṭha a ngaina pei. A uk-aw theitu a si pei; miding, mithiang le ziaza ṭhami a si pei ih suup theinak neimi a si pei. 9 Kan zumnak hram thawn a mil-awmi le rintlak a si mi kan Thuthang kha hnget zetin a pomtu a si pei. Cuticun midang pawl kan zirh awkmi thudik thawn thazaang a pe thei ding ih cuih thudik a eltu pawl ih palhnak khal a langter thei ding. 10 Uk theih lomi tamzet an um ih cumi pawl cu Judah biaknak ihsin Khristian biaknak ih a ra lutmi sungin an tam cuang. Cupawl cu ṭong tam pawl an si ih thuphan thu in mi tampi an bum. 11 Cupawl cu kham an ṭul; ziangahtile zirh lo dingmi an zirh ruangah innsang tampi an buaiter ih cutiih an zirhnak cu ningzakza a si mi paisa duhnak meen ruangah a si. 12 Anmah Krete mi lala profet a si vemi in, "Krete mi cu thuphan per an si, ramsa bangtuk miṭha lo, zaangzel le mihrong an si," a rak ti ih, 13 cuti a timi cu a dikmi a si. Curuangah annih cu napi in kawk awla cuticun zumnak dik an nei ding. 14 Culawng in Judah mi pawl ih neihmi thuanthu meenmeen le thudik a hnongtu pawl ih an rak kenmi milai ih thukham pawl kha zianghman ah an siar nawn lo ding. 15 Mithiang pawl hrangah cun ziang hmuahhmuah hi a thiang ṭheh; sikhalsehla miborhhlawh le a zum lotu pawl hrangah cun, an thinlung a borhhlawh ruangah zianghman a thiangmi a um lo. 16 Anmah cun Pathian theitu kan si an ti aw; sikhalsehla an ṭuan mi le an tuahmi in a zulhpeh lo. Mitkemza in an um, zianghman thu an ngai lo ih ziangvek thil ṭha tuahtu ding hmanah an tlak lo a si.
1 Asinain nang cun a dikmi thurin thawn a kaih awmi kha na zirh pei. 2 Patar deuh pawl kha zu ri hlah uh, thinlung felfai in um uh, nan thinlung uk thei uh; zumnak dik, duhdawtnak le harsat tuartheinak neimi si uh, tiah zirh aw. 3 Cubangtuk ṭhiamṭhiam in nutar deuh pawl kha nunau si ding daan te in nun thianghlim nei dingin zirh aw. Mi relsiat hmang an si lo pei ih zu-ih salah an tla lo pei. A ṭhami an zirh pei ih, 4 nutar deuh pawl in kum no deuh nunau pawl cu an pasal le an faale pawl duhdaw deuh dingin, 5 mah le mah uk-aw theitu si dingin, mithiang si dingin le an pasal thu ngai in tangdor thiammi nupi ṭha ih an cannak dingah zirh dingin sim aw. Cutiin Pathian hnen ihsin a rami thuthang cu zohman in an relsia lo ding. 6 Cubangtuk thothoin tlangval pawl khal mah le mah uk-aw theitu an sinak dingah forh aw. 7 Ziang hmuahhmuahah nangmah rori zohṭhim tlak in um aw. Rintlak mifel si awla thu na zirh tikah thungaithlak in zirh aw. 8 Zohman ih soisel thei lo dingin ṭongkam ṭha hmang awla kan ral pawl in soisel ding in thei lo ding ih an ning lehlam a zak sawn ding. 9 Sal pawl cu nan bawi pawl ih tangah dor uhla ziangtinkim ah an lungawiter uh, tiah sim aw. An thu sawnkir hlah hai seh. 10 Cule an thil khal ru hlah hai seh. Miṭha an sinak le rinsantlak an sinak kha langter sawn hai sehla, cuticun an tuahmi kipah in Runtu kan Pathian ih thu kan zirhmi parah thangṭhatnak an thlenter ding a si. 11 Ziangahtile Pathian in a zaangfahnak cu mi hmuahhmuah rundam dingah a langter zo. 12 Cuih zaangfahnak in Pathian ziaza thawn a mil-aw thei lomi nun daan le leilung taksa hiarnak pawl baansan dingah in zirh. Cule mah le mah a uk-aw theimi le dingnak le hi leikhawvel ah hin Pathian ih duhzawng thawn a mil-awmi ziaza ih kan nun theinak dingah in zirh fawn. 13 Cutiin a maksakmi kan Pathian le in Runtu Jesuh Khrih ih sunlawinak a lang ding tiin kan ruahsanmi Ni sunglawi cu kan hngak a si. 14 Amah ih nunnak rori kha kannih pawl ṭhatlonak ihsin runsuak dingah le thil ṭha tuah a hiartu si dingah le amah ih bulta mithiang ih in canternak dingah kan hrangah a pek zo. 15 Hi thu pawl hi zirh awla na thusim a ngaitu pawl thazaang na pek ah siseh, nun na sim tikah siseh, na thuneihnak kha famkim zetin hmang aw. Zohman in lo hmuhsuam hlah hai seh.
1 Uktu bawi le thuneitu upa pawl ih tangah dor in an thu nan ngai pei; cule thil ṭha tuah dingah timtuah ciain nan um ringring pei, tiah na milai pawl sim aw. 2 Zokhal nan relsia lo pei; daite le rualremte in nan pawl-aw niakno pei ih mi hmuahhmuah parah lungnemnak le umtlanzia thiamnak nan langter ringring pei, tiah sim aw. 3 Ziangahtile kanmah hman hi tuih hlanah cun kan rak aa, thu ngai lomi kan rak si ih kan rak palh a si. Taksa hiarnak le tisa nomnak a phunphun ih sal kan rak si. Mi nahsuahnak le mi thiiknak in kan tikcu kan rak hmang. Mi in in hua ih kannih khal in kan hua ve. 4 Sikhalsehla in Runtu kan Pathian ih zaangfahnak le duhdawtnak a rung lang tikah, 5 kannih cu in rundamsuak. Kanmah in thilṭha kan tuah ruangah si loin amah ih zaangfahnak ruangah in rundam suak ih hrintharnak le nun tharthawhnak in petu Thlarau Thianghlim ih kholhfainak ruangah a si. 6 In Runtu Jesuh Khrih sungin Thlarau Thianghlim cu kan parah famkin zetin Pathian in a run toih; 7 cumicu a zaangfahnak ruangih Pathian thawn kan rem awk theinak dingah le kan ruahsanmi kumkhua nunnak cu kan ta a si theinak dingah a si. 8 Hi thu cu thudik a si. Hi thu pawl hi thupi an si tiah a hleice ih na ruah dingah ka duhmi a si. Ziangahtile Pathian a zumtu pawl cun thilṭha tuahnak ah an tikcu hmang ding an si. Cumi cu mi hmuahhmuah hrangah a ṭhami le santlaimi an si. 9 Sikhalsehla aat-thlak thu-el awknak, pupa hmin cazin sau zetzet thu el awknak, tawh awknak le Daan thu-el awknak pawl cu hrial aw. Cumi pawl cu ṭhathnemnak le man neihnak ziang hman a um lo. 10 Òhenṭheknak a suahtertu kha ralrinnak a mal bikah voi hnih pe ta aw; cuih hnuah cun a pawl khal pawl nawn hlah. 11 Cubangtuk minung cu miborhhlawh le misual a si ti na thei ih a sualnak in hnonmi a siter. 12 Na hnenah Artemas, a si lole Taikhikas ka rak thlah vete in Nikopolis ah zamrangte in i ra tong aw. Ziangahtile cutawkah thlatang sung ka um ding. 13 Apollos le sih-ni Zenas khualtlawn an thawh tikah rak bawm awla an ṭulmi hmuahhmuah rak tawlrel sak aw. 14 Kan milai pawl cu thilṭha tuahnak ah an caan hmang hai seh; cutiin an tuah asile a ṭulnak ih kipah mi an bawm thei ding. Santlaihnak nei loih um meen ding an si lo. 15 Ka hnenih a ummi pawl in cibai an lo buk. Zumnak sungih in duhdawtu pawl kha cibai in rak buk sak aw. Nan zate hnenah Pathian zaangfahnak um hram seh.
1 Khrih Jesuh ruangah thawng a tlami keimah Paul le kan unau Timote in kan rualpi le kan hnaṭuanpi Filemon na hnenah le, 2 na innih a khawmmi Khristian unau pawl, kan farnu Apfia le kan ralkappi Arkhippas hnenah ca kan lo kuat. 3 Kan Pa Pathian le kan Bawipa Jesuh Khrih in zaangfahnak le daihnak lo pe hram seh. 4 Ka unau Filemon, thla ka cam tinte ka lo thei ih ka Pathian hnenah lungawi thu ka sim ringring. 5 Ziangahtile Pathian minung pawl na duhdawtnak le Bawipa Jesuh na zumnak thu ka thei. 6 Na rinnak thu cu midang na sim ve theinak dingah thla ka lo cah sak; cuticun Khrih ih kan neihmi thilṭha hmuahhmuah hi famkim zetin na theithiam ngah ding. 7 Duhdawtmi unau pa, duhdawtnak na neihmi in lungawinak le thazaang tampi i pe ih Pathian minung pawl an zatein an thinlung na nuamter ṭheh a si. 8 Cutiin Pathian minung pawl parih duhdawtnak na neih ruangah le Khrih sungih na unau ka si ruangah na tuah dingmi a si ti ih ka ruahmi cu ralṭha zetin thu lo pe ding ka si na'n cuticun ka lo ti lo ding. 9 Ziangahtile duhdawtnak na parih ka neih ruangah a dil lam sawn in ka lo dil. Khrih Jesuh ih palai, atu laifangah thawngih a tlami keimah Paul in, 10 Onesimas ai-awh in ka lo dil. Amah cu Khrih sungah ka fapa ngaingai a si; ziangtin tile thawng sungah thlarau lamin a pa ah ka cang a si. 11 Tuih hlanah cun na hrangah santlaihnak zianghman a nei lo. Sikhalsehla atu cu nangmah le keimah ih hrangah santlai zet a si thlang. 12 Atu-ah amah cu ka duhdawtnak thawn na hnenah ka rak kuat. 13 Thuthang ṭha ruangih thawng sungih ka um laiah hin, nangmah ai-ih i bawmtu dingah amah hi ka hnenih umter hrih ka duh. 14 Sikhalsehla ka umter lo ding; ziangahtile na duh lo cingih i bawm seh ticun ka ti lo ding. Na thinlung thote in le nangmah ih palung in na tuahmi kha ka duhmi a si. Curuangah na lungkimnak a um lomi zianghman ka tuah lo ding. 15 Onesimas thawn caan tawite sung nan ṭhen awk hi ṭhen aw nawn loin kumkhua nan umtlang theinak dingah a si meen ding. 16 Atu-ah cun sal ti meen ding a si nawn lo; sal hnakin a uak deuh ngaingai zo: Khrih sungah duhdawtmi unau a si zo. Ka duhzetmi a si. Nang khal in sal a si lawng si loin Bawipa ih sungih unau a si zo ruangah na duh sinsin ding. 17 Curuangah keimah hi na hnaṭuanpi ah i ruat a si ahcun keimah i cohlan vekin amah khal na rak cohlang ve dingah ka duh. 18 Thil a ti sualmi le a lo baakmi a um ahcun keimah ih sam dingin ret aw. 19 hittawk ah keimah ih kut rori in, Keimah Paul in ka kuan ding tiah ka ngan a si. (Tuih na nunnak khal hi keimah ih ruangah a si ti cu lo sim ṭul in ka ruat lo.) 20 Curuangah ka naupa, kan Bawipa ih ruangah hi ka lo dilmi hi i rak tuahsak hram aw; Khrih sungih unau suak khat kan si bangin ka thin i nuamter hram aw. 21 Hi ca ka ngan phah ahhin ka lo fialmi cu na tuah ding tiah ka zum ih ka lo fialmi hnakin tam sawn na tuah ding ti ka thei. 22 Cuih tlunah innkhaan pakhat a ciain i rak ret sak aw. Ziangahtile Pathian in nan zate ih thlacamnak cu a thei ding ih nan hnenah i thlengter ko ding tiin ruahsannak ka nei. 23 Khrih Jesuh ruangah ka thawngtlakpi Epafras in cibai a lo buk. 24 Cule ka hnaṭuanpi Marka le Aristarkas le Demas le Luka tla in cibai an lo buk ve. 25 Kan Bawipa Jesuh Khrih zaangfahnak cu nan zate hnenah um hram seh.
1 Hlanlaiah Pathian in kan pupa pawl hnenah voi tampi a phunphun in profet pawl hmangin thu a rak sim. 2 Sikhalsehla hi ni neta bik lamah cun kan hnenah a Fapa sungin a sim a si. Cuih a Fapa hmangin Pathian in lei le van a sersiam ih a netnak ah ziang hmuahhmuah nei ṭhehtu si dingin Amah cu a hrilmi a si. 3 Amah cu Pathian sunlawinak langtertu a si ih Pathian sinak famkim a nei. Huham a neimi a thu in leikhawvel le vantlolak pumpi cu a cawmdawl ih a fingkhawi. Minung pawl ih sual ngaidamnak le sual thianternak a tuah ṭheh hnuah vancungah Cungnungbik Pathian ih vorhlamah a to. 4 Pathian in a Fapa hnenih a pekmi hmin cu vanmi pawl ih hmin hnakin a cungnung sawn bangtuk in a Fapa cu vanmi pawl hnakih cungnung sawn in a ret. 5 Ziangahtile Pathian in ziangbangtuk vancungmi hman: "Nangmah cu ka Fapa na si; tuihsun ah na Pa ah ka cang zo," a ti dah lo. Cuih tlunah ziangbangtuk vancungmi thu khalah, "Keimah cu a Pa ka si ding ih, amah cu ka Fa a si ding," a ti dah lo. 6 Sikhalsehla Pathian in a fatir leilungih a run thlah tikah, "Pathian ih vancungmi hmuahhmuah in amah cu an biak ding," tiah a ti. 7 Sikhalsehla vancungmi pawl thu ahcun, "Pathian in a vancungmi pawl cu thli ah a tuah ih, A hnaṭuantu pawl cu mei-alh ah a tuah a si," a ti. 8 Cule a Fapa thu ah Pathian in, "Nangmah cu Pathian na si ih, na bawi tokham cu kumkhua in a hmun ding; Na minung pawl dingnak in na uk ding. 9 Dingnak na duh ih sualnak na hua. Curuangah a si Pathian, Na Pathian in a lo hril ih, Na rualpi pawl hnenih a pekmi hnakin a tum cuangmi upat lungawinak a lo pek," a ti. 10 "Cule Bawipa nangmah in a hramthokah leilung cu na seemsuah ih, Na kut rori in van tla khi na sersiam a si. 11 Cu pawl cu an hloral ding, sikhalsehla nang cu na hmun ding. Annih cu puan bangin an ṭet ding a si. 12 Angki bangin na bil ding ih hnipuan bangin an thleng aw ṭheh ding a si. Sikhalsehla nang cu nangmah keel na si ringring ih na nunnak cu cem ti a nei lo," a ti. 13 Pathian in a vanmi hnenah, "Na ral pawl cu na kephah ih ka ret hlan lo, ka vorhlamah to aw," a ti dah lo. 14 Cuti asile vancungmi pawl cu zo so an si? Annih cu Pathian a riantu thlarau an si ih rundamnak a ngahtu ding pawl bawm dingah Pathian ih thlahmi an si.
1 Cuti a si ruangah zinpeng zawh ih kan pial lonak dingah kan theih ciami thudik cu hnget sinsin ih kan pom a ṭul a si. 2 Vancungmi in kan pupa pawl hnenih an pekmi thu kha a dikmi a si tiin langter a si ih cuih thu a ngai lo le a thlun lotu cu hrem tlak an si vekin hremnak an tuar ding. 3 Cuti asile kannih in hi tlukih rundamnak maksak hi zianghman ih kan siar lo a si ahcun ziangtinso hremnak ihsin kan luat thei ding? Bawipa amah rori in hi rundamnak thu cu a hmaisabik ah a than ih amah a theitu hmuahhmuah in a dik zia kha kan hnenah an langter zo. 4 Cule annih ih an theihpinak a dik a si ti theihnak ah Pathian in khawruahhar le hmuhsaknak mak a phunphun a tuah ih Amah ih duhnak bangtuk in Thlarau Thianghlim ih laksawng kha a zem ciar a si. 5 Pathian in a ra thleng dingmi a thu kan relmi lei thar uktu dingah vancungmi a ret dah lo. 6 Cu hnakin, Ca Thianghlim in hmun khat khatah, "Maw Pathian, milai hi ziangso a si ih na seherh ringring? Mihring taak ko hi ziangso a si ih a zawn na ruah? 7 Vancungmi hnakih niam deuh ah caan tawite sung na tuah; Sunlawinak le upatnak lukhuh na khumter ih, 8 Ziang hmuahhmuah uktu-ah na tuah," a ti. Pathian in minung cu, "Ziang hmuahhmuah uktu-ah a tuah," a ti. Ziang hmuahhmuah timi sungah hin ziang tinkim a tel a si. Sikhalsehla atu-ah cun minung hi ziang hmuahhmuah uktu a si ti kan hmu hrih lo. 9 Asinain Jesuh cu, Pathian zaangfahnak ruangah mi hmuahhmuah ai-ih a thihnak ding hrangah, amah cu caan tawite sung vancungmi hnakin niam deuhah tuah a si ti kan hmu. Cule cutiih thihnak a tuar ruangah atu-ah cun sunlawinak le upatnak lukhuh khumin kan hmu. 10 Minung tampi in Pathian sunlawinak an co thei venak dingah ziangzongza a tuahtu le a nungtertu Pathian in harsat tuarnak sungin Jesuh kha mi famkimih a tuah cu a dikmi a si. Ziangahtile Jesuh cu rundamnak ah anmah a hruai haitu a si. 11 Amah in minung pawl cu an sualnak in a tlengfai ih Amah le a tlenfaimi hmuahhmuah in Pa pakhat an nei tlaang a si. Cuti a si ruangah Jesuh in annih pawl cu 'Ka unau,' tiih kawh dingah a ning a zak lo. 12 Amah in Pathian hnenah, "Na tuahmi cu ka unau pawl hnenah ka sim ding; An pumkhawmnak ah ka lo thangṭhat ding," a ti. 13 Cuih tlunah, "Pathian cu kan rinsan ding," a ti ih, "hittawk ah Pathian ih i pekmi nauhak pawl hnenah ka um," tiah a ti fawn. 14 Cutiin "Nauhak pawl," tiih a kawhmi a minung pawl cu thi le sa a neimi minung an si ruangah Jesuh khal cu anmah bangtuk in thi le sa nei-ah a cang ih milai sinak thawn a nung ve. Hitiin a tuah tikah a tumtahmi cu amah a thihnak ihsin thihnak parih thu neitu Satan kha a siatsuah ih, 15 cuticun an nun sung hmuahhmuah thih ṭih-ah sal bangin khua a sami pawl luatter dingah a si. 16 Ziangahtile a bommi pawl cu vancungmi an si lo, ti a fiang. Ca Thianghlim in a sim vekin, "Abraham tesinfa pawl a bawm," ti a si. 17 Cuti a si ruangah ziangtinkim ah a unau pawl vek a si ve a ṭul ih cuti a sinak cu minung pawl in sual ngaidamnak an co theinak dingah Pathian hna a ṭuannak ah hin rinsantlak le zaangfahnak neitu Puithiam Saang a si theinak dingah a si. 18 Amah rori in sualforhnak le harsatnak a tuar zo ruangah atu-ah sualforhnak a tongmi pawl a bawm thei a si.
1 Pathian ih kawh vemi Khristian unau pawl, kan zumnak hrangih Puithiam Saang si dingah Pathian ih a run thlahmi Jesuh thu hi ruathnik uh! 2 Moses cu Pathian inn sung hnaṭuan ah rintlak a si bangtuk in Jesuh khal hi hnaṭuantu si dingah a hriltu Pathian hnenah rinsan tlak a si. 3 Inn saktu in a sakmi inn hnakin upatnak tam sawn a ngah. Cubangtuk in Jesuh khal Moses hnakin upatnak tam sawn ngah tlak a si. 4 Inn hmuahhmuah cu mi pakhatkhatih sakmi a si; asinain ziang hmuahhmuah a saktu cu Pathian a si. 5 Moses cu Pathian hnaṭuantu a si bangin Pathian innsang sungah rintlak hnaṭuantu a si ih Pathian in hmailam caanih a sim leh dingmi khal a sim thei a si. 6 Sikhalsehla Jesuh cu Pathian innsang ah hotu rinsan tlak Pathian Fapa a si. Kanmah hi kan ruahsanmi kha thinlung hngetkhoh le ralṭha zetin kan kaihnget a si ahcun a innsang kan si. 7 Curuangah Thlarau Thianghlim in, "Tuihsun Pathian aw nan thei asile, 8 Mi lungruh va si hlah uh. Nan pupa pawl Pathian dodal ih an rak si vek cun si hlah uh; Hramlakih Pathian an hniksak Ni ih an rak um vek cun um ve hlah uh. 9 Pathian in, 'Kha tawkah nan pupa pawl in in dodal ih in hniksak a si; Kum sawmli sung an hrangih ka tuahmi an hmu na'n,' tiah a ti. 10 Curuangah an parah ka thin a heng ih, 'Annih cu rintlak lo an si ringring; Ka thupekmi an thlun duh lo,' tiah a ti. 11 Ka thin a heng ih, 'An colhnak ding hrangah ka timi ram cu an thleng hrimhrim lo ding, tiah thu ka tiam,' a rak ti," tiah a ti. 12 Zumtu u le nau pawl, a nungmi Pathian tlansan duh khop tiangih a ṭha lomi le, zum lonak thinlung nan neih lonak dingah ralring uh. 13 Cuhnakin sualnak ih bummi nan si lonak dingah le mi lungruh nan si lonak dingah Ca Thianghlim in "Tuihsun," a timi ṭongfang hi kan hrangah sullam neimi a si sung ahcun, nitinte pakhat le pakhat bawm aw sawn uh. 14 Ziangahtile a hramthok ihsin kan rak comi thinlung hnangamnak kha a netnak tiang kan kaihnget thei a si ahcun kan zatein Khrih ih hawipi kan si ding. 15 Ca Thianghlim in, "Tuih sunah, Pathian aw nan theih asile, Nan pupa pawl in Pathian an rak dodal vek cun nan lung ruhter hlah uh," a ti. 16 Zoso Pathian aw a thei ih a dotu cu an si? Izipt ram ihsin Moses ih a hruaisuakmi pawl an si. 17 Zo parah so Pathian kha kum sawmli sung a thin a heng? Nelrawn ramṭhing lakah a sual ih a thimi pawl parah a si. 18 Pathian in thu kam-aw in, "An colhnak dingah ka timi ram cu an thleng hrimhrim lo ding," a ti tikah a ti duh sanmi zo so an si? Amah Pathian a dodaltu kha an si. 19 Cutiin asile a kammi ram sungih an luh thei lonak cu an zum lo ruangah a si, ti kan hmu.
1 Cuih colhnak cu ngah thei dingah Pathian in thukamnak in pe zo. Cutiih in kammi colhnak sungah thleng thei loin kan um pang lonak dingah ralring zetin um uhsi. 2 Ziangahtile anmah ih an rak theih vekin kannih khal in Thuthang ṭha cu kan thei zo. Sikhalsehla Thuthang an theihmi cu an hrangah ṭhathnemnak zianghman a um lo, ziangahtile a theih lawng an thei ih zumnak thawn an pom duh lo. 3 Asinain kannih a zumtu pawl hi Pathian ih a kammi colhnak a cotu sawn kan si. Pathian in, "Ka thin a heng ih, 'An colhnak dingah ka timi ram cu an thleng hrimhrim dah lo ding,' tiah thu ka kam," a timi cu a kim a si. Leilung a rak tuah ihsin a hnaṭuan cu a ṭheh thluh na'n hi bangtuk in a sim. 4 Ziangahtile Ca Thianghlim in hmunkhat khatah ni sarih ni thu ah, "Ni sarih ni ah Pathian cu a hnaṭuannak ihsin a cawl," tiah a ti. 5 Himi thu ahhin a sim hrihmi a um, "An colhnak dingah ka timi ram cu an thleng hrimhrim dah lo ding," a ti. 6 Thuthang ṭha a thei hmaisatu pawl in cuih colhnak an ngah lo, ziangahtile Bawipa ih thu an thlun lo. Asinain a co ngahtu ding midang an um. 7 Himi cu Pathian in "Tuihsun," timi ni dang pakhat a retsalnak in a fiangter a si. Kum tampi hnuah a tlunih kan sim ciami Ca Thianghlim sungih a um vekin Pathian in David sungin, "Tuihsun Pathian aw nan theih asile mi lungruh va si hlah uh," tiah a sim. 8 Pathian ih kam ciami colhnak kha mipi hnenah Joshua in rak pe ngah sehla "Tuihsun," timi ni dangih thu kha Pathian in a sim nawn lo ding. 9 Atu vek a si ahcun Pathian cu ni sarih ni ih a colh vekin Pathian minung pawl hrangah colhnak ding a um lai. 10 Ziangahtile Pathian ih kammi colhnak ngahtu cu, Pathian a hnaṭuannak in a colh vekin, an hnaṭuannak in an cawl ve ding. 11 Curuangah Pathian ih tiammi colhnak kan co theinak dingah kan zuam thei patawp in zuam uhsi. Annih pawl in Bawipa ih thu an thlun lo ruangah an co thei lo vek cun kannih pawl pakhat hman si hram hlah uhsi. 12 Pathian ih thu cu a nungih a cak fawn. Kap hnih hriam ralnam hnakin a hriam sawn. Nunnak le thlarau an ton awknak le hlikhlok le thlik an peh awknak tiang a suntlang thei a si. Milai thinlung ih duhnak le ruahnak tla a thei thluh a si. 13 Pathian hmaika ah zianghman kan thuh theimi a um lo. Pathian ih sersiammi thil hmuahhmuah cu a hmaika ah on thluhmi le pharh thluhmi bangtuk in an lang. Ni khatkhat cu amah ih hnenah thuhla kan neihmi hmuahhmuah kan phuang thluh leh ding a si. 14 Curuangah kan zumnak hi khoh zetin kaihnget uh si. Ziangahtile Pathian Fapa Jesuh cu kan Puithiam Saang maktak a si ih amah cu Pathian umnak rori ah a thleng zo. 15 Kan Puithiam Saang cu kan ṭonṭaihnak in theihsak lotu a si lo. Kanmah vekin sualforhnak a phunphun a tong vemi a si; asinain anih cu a sual lo. 16 Cuti a si ruangah Pathian bawi tokham cu ralṭha zetin pan uhsi; cutawkah zaangfahnak a um. Cutawkah ngilneihnak kan co ding ih kan ṭul tik caanah zaangfahnak kan ngah ding a si.
1 Puithiam Sang pohpoh cu mipi lak ihsin hrilmi a si ih misenpi ai-awhtu ah Pathian hnaṭuantu dingih retmi a si. A hnaṭuan cu thawinak tuah le sualthlah thawinak pek tla an si. 2 Amah khal kim lonak a phunphun a neimi a si ruangah zianghman theihnak nei lo le a palhmi pawl parah lungnemnak a nei. 3 Cutiin tlaksamnak a neih ve ruangah cun midang sualnak hrang lawngah si loin amah ih sualnak hrang khalah raithawinak a pek a ṭul. 4 Zokhal anmah le anmah Puithiam Sangah hril aw in an khaisaang aw thei lo. Aaron cu Pathian in a ko ih Puithiam Sang ih a can vekin zokhal Pathian kawhnak lawngin Puithiam Sangah an cang thei. 5 Cubangtuk in Khrih khal in amah le amah Puithiam saangah a khaisaang aw lo. Pathian sawn in, "Nangmah cu ka Fapa na si, tuihsun ah na Pa ah ka cang zo," tiah a hnenah a ti. 6 Cule hmun dangah, "Nang cu kumkhua in Puithiam na si ding; Melkhizedek puithiam si daan in na si ding," tiah a ti lala. 7 Leilung tlunih a um laiah khan Jesuh in thihnak ihsin amah a runsuak theitu Pathian hnenah ringzet in a au ih mitthli tla-in thla a cam. Mi lungnem le pum pe-awmi a si ruangah Pathian in a theih sak. 8 Pathian ih Fapa a si ko na'n Pathian ih thungaitu si dingah harsat tuarnak ihsin a zir a si. 9 Cule mi famkimih tuah a si tikah a thu a ngaitu hmuahhmuah hrangah amah cu kumkhua rundamnak hramah a cang; 10 cule Pathian in, "Melkhizedek ih puithiam si daan thlun in Puithiam Saang na si," tiah a ti. 11 Hi thu ahhin sim ding tampi ka nei; sikhalsehla thu nan theihthiam har tuk ruangah nan hnenih fiangter a harzet. 12 Tucun zirhtu si ding hman nan cu zo; asinain Pathian thu a hramthok ihsin zirh nan ṭul lai. Rawl ngai ei nan cu na'n cawhnawi nan in lai. 13 Cawhnawi a intu cu nauhak a si lai; a ṭha le a sia theih theinak a nei hrih lo. 14 Sikhalsehla rawl ngai cu upa hrangah a si; annih cu thleidan thiamnak thinlung hmangin a ṭha le a sia an theithiam a si.
1 Cuti a si ruangah hmailamah nor uhsi; Khristian thuthang a hramthokih zirh awknak cu tanta in pitling zirh awknak ah feh uhsi. Òhathnemnak zianghman a nei lomi hnaṭuannak kan tlansan zomi cu a hram ihsin thok nawn hlah uhsi; Pathian kan zumnak khal a hram ihsin nolh sal hlah uhsi; 2 baptisma thu le kutsuannak thu pawl, mithi thawhsalnak thu le kumkhua ih thuṭhennak thu pawl tla a hram ihsin thok sal rero hlah uhsi. 3 Hmailam sawnah nor uhsi. Pathian lungkimnak asile cumi sawn a si kan tuah ding. 4 Zumnak a tlansantu pawl cu ziangtinso sualsir awknak ah an kir thei sal nawn ding? Annih cu Pathian tleunak sungih a um dahmi an rak si; vancung laksawng a teptu an si ih Thlarau Thianghlim a cotu khal an rak si. 5 Pathian ṭongkam a thawt zia a thei ngahtu an si ih a ra thleng dingmi sanih cahnak huham khal a teptu le a thei ngahtu an si. 6 Cucingin an zumnak cu an tlansan! Cumi pawl sualsir awknak ih kirter sal ding cu a cang thei hrimhrim lomi a si; ziangahtile Pathian Fapa kha thinglamtah parah an khenbet sal ih misenpi hmaiah ningzak mualpho in an tuah sal a si. 7 Ruahti a rak hawptu leilung le lo a thlotu pawl hrangih a ṭhahnemmi rawl kung pawl a khotertu leilung cu Pathian ih thluasuahmi leilung a si. 8 Sikhalsehla hling le hrampi lawnglawng a khotertu leilung cu ṭhathnemnak zianghman a nei lo; Pathian camsiatnak a tong thei ih meisa in ur ṭhehmi a si leh ding. 9 Ka duhdawtmi unau pawl, hi bangtuk in kan sim na'n nannih thuhla ahcun lunghmuinak kan nei. Nannih cu thlawsuahnak a ṭha deuhmi rundamnak nan nei, ti kha kan thei a si. 10 Pathian in mi a thleidang lo. Nan hnaṭuanmi siseh, Pathian nan duhdawtnak langter tahratin nan Khristian rualpi pawl nan rak bomnak le atu khalah nan bom reronak pawl hi siseh, Pathian in a ciing ringring ding. 11 Nan beiseimi cu a kim suak theinak dingah a net tiangin taimak suah fingfing uh, tihi kan saduhthah tum bik a si. 12 Mi zaangzel nan si ding cu kan duh lo; sikhalsehla Pathian ih in kam ciami a cotu si dingah zumnak a neitu le thinsaunak neitu pawl bangtuk ih cang dingah kan lo duhsak a si. 13 Pathian in amah hnakih a tum sawn hmin saal ding dang a um lo ruangah amah le mah hmin saal-aw in Abraham hnenah thutiamnak a tuah. 14 "Na hnenah thu ka lo tiam: thlawsuahnak ka lo pe ding ih tefa tampi na nei ding," tiah a ti. 15 Abraham cu a thin a sau ruangah Pathian ih a tiammi a co ngah a si. 16 Mi pakhatkhat in siat a serh tikah amah hnakih a tummi ih hmin saal in a tuah ahcun thu el awknak a um thei nawn lo. 17 Pathian cu a tumtahmi a ṭhin dah lo; cuih thu cu a thutiammi a cotu ding pawl hnenah fiangteih langter a duh ruangah a thutiammi tlunah amah ih hmin saal in thukamnak siatcam in a bet hrih a si. 18 Hi thu pahnih hi thleng theih lomi an si ih Pathian khal in hi thu parah thuphan a per lo. Cuti a si ruangah amah thawn humhimnak a ngahtu kannih pawl hi tamzet ralṭhatnak le thathawhnak kan nei ih kan hmaiih ret ciami beiseinak cu khoh zetin kan pomhnget a si. 19 Hi beiseinak hi kan nunnak hrangah lawng colhternak thirkawn bangtuk a si. Kan hrangah himnak le hnangamnak a si ruangah vancung biakinn puanzar kha lan tahratin a sungih hmun thianghlim bikah a thleng a si. 20 Jesuh cu cuih hmunah kanmah ih ai-awh in a rak thleng zo ih Melkhizedek puithiam a si daan in kumkhua Puithiam Saang a cang zo a si.
1 Melkhizedek cu Salem khua siangpahrang a si ih Cungnungbik Pathian ih puithiam a si. Abraham cu ral a do ih siangpahrang pali a nehnak hmun ihsin a ra kir tikah Melkhizedek in a rak hmuak ih thlawsuah a pe. 2 Cule Abraham in ral hnenih a lonmi thil ṭhenhra ṭhenkhat cu Melkhizedek a pek. (Melkhizedek hminih tican pakhatnak cu "Dingnak Siangpahrang," ti a si; cule amah cu Salem khua siangpahrang a si ruangah a hminih tican cu "Daihnak Siangpahrang," ti khal a si.) 3 Melkhizedek ih nu le pa thu le pi le pu ih thu nganmi zianghman a um lo. Amah ih suahnak siseh, a thihnak thu khal siseh, nganmi zianghman a um lo. Pathian Fapa bangtuk a si; curuangah kumkhua in puithiam a si. 4 Curuangah ziangtlukin mi tum a si, ti cu nan thei. Mi hminthang le kan phun cithlahtu Abraham in ral hnenih a lonmi thil hmuahhmuah ih ṭhenhra ṭhenkhat a pek. 5 Cule Levi miphun ih tesinfa puithiam a ṭuantu pawl cu Israel mipi hnen ihsin ṭhenhra ṭhenkhat lak dingin an Daan in a ti. Cuih Israel misenpi pawl cu Levi mi pawl vekin Abraham tesinfa an si ko na'n ṭhenhra ṭhenkhat an pe thotho. 6 Melkhizedek cu Levi tesinfa a si lo; asinain Abraham hnenin ṭhenhra ṭhenkhat a lak ih Pathian thutiamnak a cotu Abraham cu thlawsuah a pe. 7 Thlawsuah a petu cu thlawsuah pekmi a cotu hnakin a tum deuh ti cu a fiang a si. 8 Levi tesinfa puithiam a si mi thu-ah cun, ṭhenhra ṭhenkhat cu a thi leh dingmi minung in an lak; sikhalsehla Melkhizedek thu-ah cun, Ca Thianghlim ih a ti vekin, ṭhenhra ṭhenkhat cu a nungmi in a co a si. 9 Cule Abraham in ṭhenhra ṭhenkhat a pek tikah (Levi tesinfa pawl khal ṭhenhra ṭhenkhat a petu an si ih) Levi khal in a pek ve ti theih a si. 10 Ziangahtile Levi cu a suak hrih lo na'n amah a hringtu Abraham kha Melkhizedek in a ton tikah Abraham ih pum sungah a rak um zo, ti a theih a si. 11 Levi mi puithiam phun an sinak sirhsan in Daan cu Israel mi hnenah pek a si. Cule Levi mi pawl in puithiam hna an ṭuannak a famkimmi rak sisehla puithiam phun dang, puithiam Aaron hrin si loin puithiam Melkhizedek phun a suah a ṭul lo ding. 12 Puithiam sinak a thleng awk tikah daan khal a thleng awk a ṭul ve. 13 Hi thu hmuahhmuah in a sawh duhmi cu kan Bawipa cu a hrin a dang ih a phunpi sungin zohman biakṭheng ah puithiam a ṭuantu an um dah lo. 14 Amah cu Judah hrin sung ihsin a suakmi a si ti cu mi hmuahhmuah ih theih a si; cule Moses in puithiam thuhla a sim tikah hi Judah phun thu cu a telh dah lo. 15 Hi thu cu thufiang sinsin a si; Melkhizedek bangtuk puithiam phun dang pakhat a suak zo. 16 Amah cu milai ih tuahmi nunphung le daan in puithiam cangmi a si lo; cemti nei lo nunnak ih huham thawngin a cangmi a si. 17 Ziangahtile Ca Thianghlim in, "Nang cu Melkhizedek puithiam si daan vekin kumkhua puithiam na si ding," tiah a ti. 18 Curuangah daan hlun cu san a tlai lo ih a ṭhathnem nawn lo ruangah an hnong a si. 19 Ziangahtile Moses Daan in zianghman famkim in a tuah theimi a um lo; cule atu-ah cun Pathian kan naih theinak dingah a ṭha deuhmi ruahsannak in pek zo. 20 Cuih tlunah Pathian ih tiamkamnak a um hrih fawn. Midang puithiam an rak si laiah cubangtuk tiamkamnak cu a um dah lo. 21 Sikhalsehla Jesuh cu tiamkamnak thawn puithiam a cang ih a hnenah Pathian in, "Bawipa in thukamnak fek zetin a tuah ih a thu cu a ṭhin lo ding; 'Nangmah cu kumkhua-in puithiam na si ding,'" tiah a ti. 22 Hi bangtuk ih an dan awknak in Jesuh cu a ṭha deuhmi thukamnak ih aamahkhan ah a cangter fawn. 23 Cule an dan awknak phun khat a um lala: cumi cu ziang a si tile, puithiam dang cu tampi an um ih an thih ruangah an hnaṭuan an peh thei nawn lo. 24 Sikhalsehla Jesuh cu kumkhua in a nung ih kumkhua in puithiam a si ringring. 25 Curuangah atu le kumkhua in amah ih sungin Pathian a pantu pawl cu a rundam thei a si; ziangahtile kumkhua ih a nun ruangah Pathian hnenah a dil sak ringring. 26 Cuti a si ruangah Jesuh cu kan ṭulmi a kimter theitu Puithiam Sang a si. Amah cu a thianghlimmi a si; sualnak le mawhnak a nei lo; misual pawl hnen ihsin a hrante in ṭhen a si ih van tlunah cawisang a si zo. 27 Anih cu puithiam dang bangtuk a si lo; puithiam dang bangtuk in nitin amah ih hrangah hmaisabik ah sualthlah thawinak pek ih cuih hnuah misenpi hrangih thawinak pek ti a ṭul lo. Amah ih nunnak kha a pek tikah kumkhua daih in raithawinak voikhat lawng a pek a si. 28 Moses Daan in mi famkim lo pawl kha Puithiam Sangah a tuah. Sikhalsehla Moses daan hnu ih a rami tiamkamnak thawn tuahmi Pathian thukamnak in kumkhua in a famkimih tuahmi a Fapa kha Puithiam Sangah a hril a si.
1 Kan simmi ih a sawh duh bikmi cu: vancung Pathian tokham sunglawi vorhlam rori ah a to theitu Puithiam Saang kan nei, timi hi a si. 2 Hmun Thianghlim bikah Puithiam Saang cu a ṭuan ih cuih hmun cu minung ih sakmi puanthlam si loin Bawipa ih sakmi puanthlam ngaingai a si. 3 Puithiam hmuahhmuah ih hnaṭuan cu Pathian hnenih pekmi laksawng le thawinakih pekmi ṭilva ap ding kha a si; cubangtuk in kan Puithiam Saang khal in ziangtal pek ding a neih ve a ṭul. 4 Leilung parah um sehla puithiam a ṭuan lo ding, ziangahtile Judah daanin laksawng pekmi a aptu dingah puithiam dang an um. 5 Cuti leilungih puithiam an ṭuanmi cu vancungih puithiam ṭuannak ih a thluathlam lawng a si. Cuvek thothoin Moses ih thuhla khalah a si. Moses in thukamnak puanthlam a sak zik tikah Pathian in a hnenah, "Tlang parih zohṭhim ding ka lo hmuhmi vek cekci in nan sak pei," a ti. 6 Sikhalsehla annih ṭuanmi hnakin a ṭha deuhmi puithiam hnaṭuannak cu Jesuh hnenah pek a si zo. Pathian le a minung karlakih Jesuh in a tuahmi thukamnak cu a ṭha deuhmi kamawknak a si bangtuk in a puithiam hnaṭuannak khal cu a ṭha deuhmi a si. 7 A hmaisa thukamnak ah famkim lonak um hlah sehla a neta deuh ih thukamnak cu a ṭul lo ding. 8 Sikhalsehla Pathian in a minung pawl a mawhthluk ih, "Bawipa in hiti in a sim: Israel mi le Judah mi pawl thawn thukamnak a thar in ka tuah ding caan a ra thleng cing ding. 9 Sikhalsehla an pipu pawl an kutin ka hruai ih Izipt ram ihsin, ka suah laiih ka tuahmi thukamnak bangtuk cu a si lo ding. An hnenih ka rak tuahmi thukam cu an thlun duh lo ruangah kei khal in zianghman ah ka siar hai lo," a ti. 10 Cule Bawipa in: "A ra dingmi tikcu caanah Israel mi pawl thawn hi bangtuk in thukamnak ka tuah ding; Ka daan cu an ruahnak parah ka ret ding ih, an thinlung sungah ka ngan ding. Keimah hi an Pathian ka si dingih annih cu ka minung an si ding. 11 Zohman in an unau siseh an ramsungih an phunpi siseh, 'Bawipa thei uh,' an ti awk a ṭul nawn lo ding. Ziangahtile upa bik in nauta bik tiang an zatein in thei ṭheh ding. 12 An sualnak ka ngaidam ding ih, an mawhnak khal ka ciing nawn lo ding," tiah a ti. 13 Hi bangtuk in thukam thar thu Pathian in a sim ruangah a thukamnak a hmaisa cu a hlun ah a cang zo; cule a hlun zomi le a ṭet zomi pawl cu a rei hlanah an hloral ding a si.
1 Hmaisa bik Thukamnak in Pathian biak daan a nei ih milai ih tuahmi biakkhawmnak hmun khal a nei. 2 Biakinn cu puan in an sak ih a lenglam khaan cu Hmun Thianghlim an ti. Cutawkah mei-inn le cabuai le Pathian hnenih pekmi saang pawl an ret. 3 Puanzar pahnihnak ih dunglamah Hmun Thianghlim Bik timi khaan a um. 4 Cutawkah rimhmui urnak sui biakṭheng le sui ih khutmi Thukam Kuang tla an um. Cuih Thukam Kuang sungah manna saang an retnak sui beel le hnah-no a cerhmi Aaron ih kianghrol le thukham pawl an ngannak lungtlep pahnih khal an ret. 5 Cuih Thukam Kuang parah cun Pathian sunlawinak langtertu Cherub timi thlanei zuk an ret ih sual ngaithiamnak hmun tlunah an thla an pharh aw. Atu cu hi vek thu famkimih simnak tikcu a si lo. 6 Puanthlam sungih thil an tuah daan cu hiti in a si. Puithiam pawl cu an hnaṭuan ṭuan dingah nitinte a lenglam deuh khaan sungah an lut ih, 7 Puithiam Saang lawnglawng a sungta khaan sungah kum khat voikhat a lut. Amah ih sualnak le mi dang in thei loin sualnak an tuah pangmi sualnak hrangah thisen a keng ih Pathian a pek. 8 Hi bangtuk an tuahmi sungin Thlarau Thianghlim in fiang zetih a langter mi cu: puanthlam lengta deuh a um lai ahcun Hmun Thianghlim Bik fehnak lamzin a ong hrih lo, tican a si. 9 Himi cu tahṭhimnak a si ih atu kan san hi a sawh duhmi a si. A tican cu, Pathian hnenih pekmi laksawng le raithawinak ṭilva pawl in Pathian a biatu pawl ih thinlung famkim in a tlengfai thei lo, tinak a si. 10 Ziangahtile cuih raithawinak pawl cu rawl le tidai le thianfainak ih tuahmi thawinak thawn a pehtlai awmi an si. Cu pawl cu a lenglam daan lawnglawng an si ih Pathian in ziang hmuahhmuah a thar in a rem hlan sung lawngih hmanmi an si. 11 Sikhalsehla Khrih cu thil ṭha a um ciami pawl ih tlunah Puithiam Saang si dingin a ra zo a si. A hnaṭuannak puanthlam cu a tum sawn ih a famkim fawn. Milai ih tuahmi puanthlam a si lo ih hi leilung tuahmi thil sungih a telmi khal a si lo. 12 Khrih cu cuih puanthlam sungah a lut ih Hmun Thianghlim Bik ah kumkhua daihin a thlen tikah me thisen le cawcang thisen pawl kha raithawinak hrangah a keng lo; amah ih thisen sawn a keng ih kan hrangah kumkhua rundamnak a tuahsuak a si. 13 A thiang lo misenpi parah puithiam in me thisen le cawcang thisen le urmi cawla ih vutcam pawl kha a theh ih cumi cun biaknak lamih an thianfai lonak hmuahhmuah a thianfaiter a si. 14 Cubangtuk in thianfainak a um thei a si ahcun ziang tlukin so Khrih ih thisen cun a thianfaiter sinsin ding! Kumkhua ih a nungmi Thlarau sungin a famkimmi raithawinak ah amah le amah Pathian hnenah a pe aw a si. A nungmi Pathian hna kan ṭuan theinak dingah, santlai lo daan thlunnak ihsin kan siaṭha thleidannak thinlung kha a thisen in a tlengfai a si. 15 Cuti a si ruangah Pathian ih a kawhmi pawl in Pathian ih a kam ciami kumkhua thlawsuah an co theinak dingah thukam thar a ngaihtuahtu cu Khrih a si. Cumi a si theinak cu Khrih a thihnak thawngin a si. A thihnak in a hmaisa thukamnak thuai an um laiih an sualnak sung ihsin a luatter. 16 Ro cah thu kan ti ahcun ro cahtu a thih hnu lawngih thlun ding a si; 17 ziangahtile a nun lai ahcun a ro cahmi cu hman a theih lo; a thih hnu lawngah hman a si. 18 Curuangah a si thukamnak hmaisa deuh hrang hmanah thisen thawn lawngin sullam a neihnak cu! 19 Moses in a hmaisabik ah Daan cabu sungih a ummi thukam hmuahhmuah cu misenpi hnenah a than. Cuih hnuah cawcang thisen le me thisen kha a lak ih tidai thawn a rawi hnuah, hissop thinghnge fate le tuuhmul sen ṭemcihmi hmangin, Daan cabu le misenpi kha a theh hai ih, 20 "Nan thlun dingah Pathian ih thukamnak a lo pekmi a hngettertu cu hi thisen hi a si," tiah a ti. 21 Cuvek thotho in Moses in thisen cu Thukam Puanthlam le Pathian biaknak ih an hmanmi thilri pawlah a theh ṭheh. 22 Daan sungih a um vekin ziang hmuahhmuah cu thisen lawngin a tlengfai ih thisen a luan lonak ahcun sualngaidamnak a um lo. 23 Vancung ih a ummi thil an cawncopmi pawl cu cubangtuk ih thianfaiter an ṭul. Asinain vancungih ummi a ngaingai a si mi khal in thawinak ṭha sinsin a ṭul. 24 Cuih a ngaingai an cawncopmi thil, milai ih tuahmi Hmun Thianghlim sungah Khrih cu a lut lo. A luhnak cu vancung a si ih atu-ah kan ai-awh in Pathian hmaika ah a um. 25 Judah mi Puithiam Saang cu kumtinte ṭilva thisen keng tahratin Hmun Thianghlim Bik sungah a lut. Sikhalsehla Khrih cu amah le amah raithawinak ih pe-aw dingin voi tampi a lut lo; 26 cuti si lo sehla leilung seemtir ihsi cun voi tamzet a tuar a ṭul ding. Cubangtuk si loin atu san neta bik a cem zawng ah hin, amah le amah raithawinak ah pe-aw in sualnak a tlengfai theinak dingah kumkhua daih in voikhat lawng a lang. 27 Minung cu zokhal voikhat thih keel a si; cuih hnuah Pathian in thu a ṭhen ding. 28 Cubangtuk in Khrih khal minung sualnak tlengfai dingah raithawinak hrangah voikhat a pe-aw. Cule voihnihnak a lang sal dingih cutik ahcun sualnak thu-ah si nawn loin amah a hngaktu pawl rundam dingah a si ding.
1 Judah mi pawl ih Daan cun a ngaingai a si mi kha felte le kimtein a langter thei lo; a ra thleng dingmi thil ṭha ih thluathlam lawng a si. An tuah ṭheumi raithawinak kha kumtinte an tuah ringring. Cutiin asile ziangtinso Daan ih a fialmi hi bangtuk raithawinak pawl hmangin Pathian a pantu minung pawl cu mi famkimah a tuah thei ding? 2 Pathian a biatu pawl an sualnak ihsin thianfaitermi rak si ngaingai hai sehla an sual phuhrunawknak an nei nawn lo ding ih raithawinak hmuahhmuah a um nawn lo ding. 3 Sikhalsehla thil umdaan ngaingai ahcun kumtinte an sualnak an theihnak dingah raithawinak cu a rak si riangri. 4 Ziangahtile cawcang thisen le me thisen in sualnak cu a tlengfai thei dah lo. 5 Cubangtuk a si ruangah leilungih Khrih a rung lang zik tikah Pathian hnenah, "Raithawinak le peknak cu na duhmi an si lo; sikhalsehla ka hrangah taksapum na remruat zo. 6 Òilva pum ih pekmi mei-ur thawinak parah lungkimnak na nei lo. Sual thianfainak dingih raithawinak khalah lungawinak na nei cuang lo. 7 Cule Daan cabu sungih ka thuhla an nganmi vekin a hnenah, 'Maw Pathian, na duhmi tuah dingin hinah ka um,' ka ti," tiah a sim. 8 A hmaisa bikih a simmi cu, "Raithawinak le hlanmi ah siseh, biakṭheng parih ṭilva le sual thianfainak hrangih raithawinak ah siseh, na lungawi zawng le na duhmi khal an si lo," a ti. Hi raithawinak pawl cu Daan vekih tuahmi an si ṭheh ko na'n hi bangtuk in a sim thotho. 9 Cuih hnuah anih in, "Maw Pathian, na duhmi tuah dingah hinah ka um," tiah a ti. Curuangah Pathian in raithawinak hlun pawl cu a hnong thluh ih cuih ai-ah Khrih raithawinak a ret. 10 Ziangahtile Pathian in tuahter a duhmi cu Jesuh Khrih in a tuah ṭheh ruangah amah ih taksapum kumkhua daih in a pek awknak thawngin kan sualnak ihsin in tlengfai a si. 11 Judah puithiam pawl in an ṭuanvo cu nitinte an tuah ih an pek ṭheumi raithawinak cu voi tampi an pek. Sikhalsehla raithawinak in sualnak cu a tlengfai dah lo. 12 Asinain Khrih in sualnak hrangah raithawinak cu voikhat a pek ih cucu kumkhua daih a si; cuih hnuah Pathian vorhlam kamah a to. 13 Cutawk ihsin Pathian in a ral pawl a ke-phah ih a tuah hai hlan sung a hngak. 14 Voikhat raithawinak in sualnak ihsin a tlengfaimi pawl cu kumkhua mi famkimah a tuah a si. 15 Cule Thlarau Thianghlim khal in a theihpinak kan hnenah a langter. A hmaisabik ah Thlarau Thianghlim in, 16 "Himi hi Bawipa ih ṭongkam a si: Hmailam caanah anmah thawn kan tuah dingmi thukam cu hiti in a si; Ka daan pawl an thinlung sungah ka re ding ih an ruahnak parah ka ngan ding," a ti. 17 Cuih tlunah a sim sal ih, "An sualnak le an siatnak pawl cu ka ciing nawn lo ding," tiah a ti. 18 Cubangtuk in an sualnak ngaidam a si ahcun sualthawinak a ṭul nawn lo. 19 Curuangah u le nau pawl, Jesuh thihnak thawngin Hmun Thianghlim Bik sungih luh theinak luatnak famkim kan nei zo. 20 Amah in puanzar thlek tahratin lamzin thar, lamzin nung, in on sak zo. Cuih puanzar cu amah ih taksa pum kha a si. 21 Vancung ih Pathian innpi kilkhawitu dingah Puithiam Saang bik kan nei. 22 Curuangah thinlung tak ngai le zumnak fel thawn Pathian cu naih uhsi. Mawhnak thinlung thianfaitermi le tidai thiang thawn tlengfaimi kan taksapum thawn Pathian cu pan uhsi. 23 Ruahsannak kan nei tiih kan langtermi kha hngetkhoh zetin pom uhsi; ziangahtile a thukamnak a kimtertu Pathian cu rintlak a si. 24 Pakhat le pakhat zawnruahnak nei uhsi; pakhat le pakhat bawm aw in duhdawtnak le ṭhatnak khal langter ton uhsi. 25 Hmunkhatih kan pumkhawm ṭheumi kha baansan hlah uhsi. Mihrek cun an baansan na'n Bawipa ih Ni a nai vivo ruangah, kannih cu pakhat le pakhat thazaang pe-aw sinsin ding kan si. 26 Thudik kan theih ngah hnuah sualnak kha thei cingin kan tuah vivo thotho a si ahcun sual thianfai theinak dingah sual hrang raithawinak zianghman a um nawn lo. 27 An hrangih a taangmi an covo cu a thleng cing dingmi Pathian thuṭhennak le Pathian a dodaltu pawl a kaangfai ṭhehtu ding ṭihnungza meisa kha ṭih thlohthlo in an hngak ding lawng a si thlang. 28 Moses Daan thu a thlun lotu cu thutheitu pahnih pathum in a sual a si an tinak in a thu an relcatmi cu, zaangfahnak zianghman um loin thah a si. 29 Cuti asile, Pathian Fapa ziangih a siar lotu le sualnak ihsin mi a thianfaitertu Pathian thukamnak thisen nautattu le, zaangfahnak a neitu Thlarau a hmuhsuamtu pawl teh ziang bangtuk in tuah an si pei? Cubangtuk minung cu ziangtlukih a nasami hremnak an tuar ding tikha ruat hnik uh! 30 Ziangahtile, "Keimah in phu ka la ding, keimah in ka lehrul ding," a tiih tlunah, "Bawipa in a minung pawl cu an thu a ṭhen ding," a titu zo a si ti kan thei. 31 A nungmi Pathian kut sungih tlak cu tuksumza a si. 32 Hlanih nan um daan vun ruathnik uh. Culai ah Pathian tleunak nan hnenih a thlen pek ah khan tuarnak le harsatnak a phunphun nan tong na'n cuih harsatnak in a lo neh hai lo. 33 Voikhat khatah misenpi hmuhah hmuhsuamnak le hremnak nan tong ih voi dangah cuti vekih hmuhsuamnak le hremnak a tongtu pawl nan tuarpi ve a si. 34 Harsatnak a tongmi thawngtla pawl parah lainatnak nan nei. Nan neihmi thilri hmuahhmuah an lo lon ṭheh tikah nan sunnak cu lungawiin nan tuar thei, ziangahtile hi thilri hnakin a ṭha deuhmi le kumkhua in a hmun dingmi kan nei hrih a si, ti nan thei. 35 Curuangah nan thin nau hlah uh, ziangahtile ralṭhatnak nan neih ahcun laksawng tumpi nan ngah ding a si. 36 Pathian duhnak tuah thei dingah le a thukammi co thei dingah thinfual in um uh. 37 Ziangahtile Ca Thianghlim in, "Caan tawite hnuah a ra dingmi Amah cu a thleng ding, a rei lo ding. 38 A dingmi ka miphun in an zum ding ih an nung ding; Asinain dungsiptu an um ahcun, an parah ka lung a awi lo ding," a ti. 39 Kannih cu dungah a siip ih a hloral tami kan si lo. Rinnak nei in rundamnak a cotu sawn kan si.
1 Zumnak neih timi cu kan ruahsanmi kan ngah tengteng ding, ti zum le kan mit ih kan hmuh thei lomi a um rori a si, ti zum khi a si. 2 Cubangtuk zumnak an neih ruangah khuahlan minung pawl in Pathian ih lungkimnak an co ngah. 3 Zumnak kan neih ruangah leikhawvel le vantlolak hi Pathian ih ṭong in a tuah a si ti kan thei; curuangah Pathian in hmuh theimi tuahnak ah hmuh thei lomi a hmang. 4 Abel in Pathian a zum ruangah Pathian hnenih a pekmi raithawinak cu Kain ih raithawinak hnakin a ṭha deuhmi a si. A zumnak ruangah Pathian lunghmuinak a co ih miding ah cosaan a si, ziangahtile a laksawng pawl cu Pathian in a co sak. Abel cu a thi zo na'n a zumnak sungin mi hnenah thu a sim lai rero. 5 Enok kha thi loin Pathian hnenih cawiso a sinak cu a zumnak ruangah a si. Zohman in a ruangpi an hmu lo, ziangahtile Pathian in a cawi hlo a si. Ca Thianghlim sungah, "Pathian hnenih cawi hlo a si hlanah Enok in Pathian lung a awiter," tiin a um. 6 Zumnak locun zohman in Pathian lungawiter a theih lo; ziangahtile Pathian a pantu in Pathian a um, ti le amah a hawltu hnenah hawlman laksawng a pe, ti an zum a ṭul a si. 7 Noah kha hmailam thu-ah Pathian in ralrinnak a pekmi a theih theinak cu a zumnak ruangah a si. Pathian thu a ngai ih lawng a tuah ih cuih lawng sungah amah le a innsang himte in an luat. Curuangah leilung cu hnonnak a tong ih Noah cu a zumnak ruangah dingnak Pathian hnen ihsin a co. 8 Abraham cu Pathian in ka lo pe ding tiih a tiammi ram feh dingih kawh a si tikah Pathian duhnak a thlun theinak cu a zumnak ruangah a si. Khuitawk ramah ka feh ding ti hman thei loin a khua le a ram cu a fehsan. 9 Pathian in a tiam ciami ram sungah a zumnak in mikhual cangin a um. Pathian thutiamnak a co vemi Isaak le Jakob vekin thlam sungah a um ve. 10 Ziangahtile Pathian in kumkhua hmun dingih hram a bunmi, ruang a zingmi le a sakmi khawpi sung um dingah a hngak. 11 Abraham cu a tarzet zo ih Sarah khal fa nei thei nawn lo a si na'n, pa ih can theinak cah-nak cu a zumnak thawngin a si. Pathian in a thutiamnak cu a tuahsuak ko ding tiin a zum. 12 Abraham cu a thi cia zo tlukih ruahmi a si na'n amah sung ihsin tesinfa vanih arsi zat le tipikap ih siarcawk lo vunnel zat in an suak a si. 13 A tlunih kan simmi zumnak neitu pawl cu an thih tikah zumnak thawn an thi. Pathian ih a tiam ciami pawl cu an co ngah lo na'n a hlavaang ihsin an hmu ih an lung a awi thotho; leilung tlunah mikhual le mi vakvai an si kha langhngan in an phuang. 14 Cubangtuk ih a thei awtu pawl cun an ta a si dingmi an ram an hawl ti a lang. 15 An fehsanmi ram cu an seherh nawn lo; rak seherh hai sehla kirnak tikcu an nei ko ding. 16 Annih ih an ruahmi le an ngaimi cu ram ṭha deuh sawn, vancung ram a si. Curuangah Pathian cu annih in, "Kan Pathian," tiih an kawh tikah Pathian a ning a zak lo, ziangahtile an hrangah khawpi a tuah sak zo. 17 Abraham cu Pathian in a hniksak tikah Pathian hnenah a fapa Isaak kha raithawinak ah a pek theinak cu a zumnak ruangah a si. Pathian in thu a tiammi cu Abraham a si, sikhalsehla a fapa neihsun cu raithawinak ih pe dingah a ralring cia a si. 18 Pathian in Abraham hnenah, "Ka lo tiam ciami tesinfa pawl cu Isaak ih cithlahmi an si ding," tiah a ti. 19 Abraham ih ruahnak ahcun Pathian in Isaak cu thihnak ihsin a thoter sal ding tiin a ruat ih a ruah vekin a thi zo tlukih ruahmi Isaak cu a pa Abraham in a nungin a tong sal ngaingai. 20 Isaak in hmailamah thlawsuahnak nan ngah ding tiah Jakob le Esau thlua a suahnak cu a zumnak ruangah a si. 21 Jakob in a thih hlan deuhte-ah Josef fapa pawl kha thlawsuah a pek fingfingnak cu a zumnak ruangah a si. A kianghrol hngauhsan phahin Pathian a bia. 22 Josef cu a thih zik hmanah Israel mi pawl Izipt ram ihsin an suak leh ding tiah a simnak le a thih tikah a ruak kha ziangti ih tuah ding tiin thu a cahta ṭhehnak cu a zumnak ruangah a si. 23 Moses nu le pa in Moses a suah hnu thla thum sung an faate cu an thup ih duhnungza a si ruangah Siangpahrang ih thupekmi el hman an ṭih lonak cu an zumnak ruangah a si. 24 Moses cu a hung upat hnuah Izipt siangpahrang fanu ih fapa tiih kawh a duh lonak cu a zumnak ruangah a si. 25 Caan tawite sung sualnak sungah nunnuamih um hnakin Pathian minung pawl thawn harsatnak tuar a hril sawn. 26 Messiah hrangih nautatnak tuar cu Izipt ram sungih lennak hmuahhmuah hnakin a man sawn tiin a ruat; ziangahtile a hmuitin mi cu hmailamih ngah dingmi tuarman laksawng a si. 27 Moses cu Izipt ram siangpahrang thinhengnak hman ṭih loin Izipt ram a tlansan ngamnak cu a zumnak ruangah a si. Hmuh a theih lomi Pathian hmu vekin a zum ih a kir duh hrimhrim nawn lo. 28 Zumnak a neih ruangah lantak puai kha a tuah ih sangka parah thisen theh dingin thu a pek. Cubangtuk a tuahnak cu Israel mi fatir pawl kha Mithattu Vancungmi in that hai hlahseh tinak a si. 29 Zumnak thawngin Israel mi pawl in Tipi Sen cu leiro vekin an tan thei; asinain Izipt mi pawl in tan an tum ve tikah tidai in a khuh hai ih an thi ṭheh. 30 Israel mi pawl in ni sarih sung an vel hnuah Jerikho khawpi kulhnak phar a cim ṭhehtertu cu zumnak a si. 31 Israel mi thlingthlatu pawl a humthup ruangah Pathian thu ngai lo Jerikho khuami pawl lakah hlawhhlangnu Rahab a thih ve lonak cu a zumnak ruangah a si. 32 Ka sim vivo hrih ding maw? Gideon, Barak, Samson, Jefthah, David, Samuel le profet pawl ih thuhla sim ding tampi an um na'n simnak tikcu caan a um lo. 33 Zumnak thawn ram tampi an do ih an neh. A dikmi an tuah ih Pathian thutiammi an co. Kiosa pawl ih kaa an ciipter; 34 Òihnungza meisa an mit ih ralnam thahnak ihsin an luat. Mi ṭawnṭai an rak si na'n mi cakzet ah an cang. Raldo ah an cak ih ramdang ralkap tampi an neh. 35 Zumnak thawngin nunau pawl ih sungkhat pawl thihnak ihsin nunter saal an si. Midang pawl cu nunnak ṭha sawnih thawhter sal ding an duh ruangah luatnak hril loin hremnak sungih thih an hril sawn. 36 Mi hrek cu hmuhsuam le vuak an tong; mi hrek cu thir cikcin in an khit ih thawngah an thlak. 37 Lungto in denthat an si, hluah in tan hnih ih tan an tuar ih ralnam in thahnak an tong; tuuphaw le mephaw hruk tahratin hmun kipah an vakvai; an farah ih hremnak le tisiatnak an tuar. 38 An hrangah leilung tlun hi umnak ṭha a si nawn lo! Raltlanmi bangin hramlak le tlang lakah an vakvai ih lungpuk le leilung kua sungah an um. 39 Zumnak an neih ruangah himi pawl hmuahhmuah hi ziangtluk porh tlak so an si! Asinain Pathian ih a tiam ciami pawl an ngah hrih lo, 40 ziangahtile Pathian in kan hrangah khawkhanmi ṭha deuh a neih ruangah a si. A tumtah ngaingaimi cu kanmah thawn kan hmunkhat hnu lawngah famkimnak an ngah ding tihi a si.
1 Kannih khal hitlukin a tammi thutheitu pawl in mero bangin in kiil ruangah kan fehnak lamzinah in dawnkhamtu thil pawl kha hlonin in ṭawnhremtu kan sualnak thilrit cu tlansan tahratin kan hmaiih a ummi tlanzuamnak ah taimak suah in tlan uhsi. 2 Kan zumnak a thoktu le a famkimtertu Jesuh kha cat loin zoh uhsi. Hmailamih a co dingmi lungawinak kha a tumtahmi a si ruangah thinglamtah parih ningzah thihnak hman ziangah siar loin a tuar ih atu-ah cun Pathian tokham vorhlam kapah a to. 3 A tuarmi pawl ruathnik uh! Misual pawl ih huatnak a zawi thei zia kha! Curuangah nannih khal thinnau le beidong in um pang hlah uh. 4 Ziangahtile sualnak nan donak ah hin thihnak tiang ngaingai cun nan ṭang hrih lo sokhaw. 5 Pathian in a faate pawl nan hnenah thapeknak thu a lo simmi kha nan hngilh zo maw si? "Ka fapa, Bawipa in nun a lo sim tikah ziang siar loin um hlah aw. A lo kawk tikah na tha nau hlah. 6 Ziangahtile Bawipa in a duhdawtmi cu nun a sim ih, fa ih a cohlanmi cu a hrem ṭheu a si. 7 Harsatnak cu nan pa ih pekmi nunsimnak a si tiin tuar hram uh; ziangahtile harsatnak nan tonmi hin Pathian in a faate ah a lo ruat a si ti a langter. A pa ih nun a sim lomi fa a um dah keel maw? 8 A faate pawl a hrem ih nannih bul a lo hrem lo ahcun faate ngaingai nan si lo, fasawn nan si ti a sawh ding. 9 Leilung tlunih kan pale pawl ruathnik uh; in hrem na'n kannih in kan upat. Nunnak kan ngah theinak dingah Thlarau lam kan Pa ih thu cu ziangtluk in so thlun sinsin ding kan si? 10 Kan pale pawl cun a ṭha tiin an ruat ruangah caan tawite sung in hrem; sikhalsehla Pathian cun kanmah ih ṭhatnak hrangah le amah ih thianhlimnak kan ṭawm theinak dingah in hrem a si. 11 Hremnak kan tuar tikah kan tuar laiah cun kan lung in awitertu si loin kan riah in siattertu a si. Sikhalsehla a hnuah cun cubangtuk hremnak in nunsimnak a tongtu pawl cu an nunnak ah daihnak le dingnak laksawng an ngah ding. 12 A kham zetmi nan kut thlir uhla a ṭhiami nan khuk khohter uh. 13 A dingmi lamzin zawh vivo uhla cuticun nan ke-awl kha awl lanta loin a dam ṭheh sal ding. 14 Mi hmuahhmuah thawn rualremte in um zuam uhla nunnak thiangin nun tum uh, ziangahtile nunnak thiang neih locun zohman in Pathian an hmu thei lo ding. 15 Pathian lainatnak kha zohman in siipsan lo dingin ralring uh. A sia a khami thingkung, a hung tum ih a tur ṭha loin mi tampi zonzaihnak a pek bangtuk cu zohman si hlah uh. 16 Nu le pa sualnak tuah hlah uh; thlarau lam zianghman a siar lotu Esau bangtuk si hlah uh; anih cun fa upa rocotu sinak kha rawl voikhat ei-ah a zuar hlo meen a si. 17 Nan theih vekin neh hnuah a pa ih hnen ihsin thlawsuahnak ngah sal a duh na'n a ngah thei nawn lo a si kha! Ziangahtile mitthli thawn ngen rero hmansehla a tuah ciami cu a ṭhin thei nawn lo. 18 Nannih nan thlennak tlang cu Israel mi pawl an thlennak Sinai tlang bangtuk a si lo. Sinai tlang cu tham theimi, mei a alh hluahhlomi le khuadur thimnak le thlisia le, 19 tawtawrawt tummi le a ringzetmi aw kha hmuh thei le theih thei in a um a si. Israel mi pawl in aw an theih tikah cuih aw cu thei nawn lo dingin an dil, 20 ziangahtile Pathian ih thupekmi, "Tlang a daitu cu, ramsa a si khalle, lungto in denthat a si ding," timi aw kha an ngai ngam lo. 21 An hmuhmi cu ṭihnung rapthlakza a si ruangah Moses hman in, "Ka ṭih tuk ih ka khur thlohthlo," a ti. 22 Sikhalsehla nannih nan thlennak tlang cu Zion Tlang le a nungmi Pathian ih khawpi, vancungmi a thawng thawngin an umnak vancung Jerusalem a si. 23 Vancung ah an hmin ngan cia in a ummi Pathian ih fatir pawl lungawi aipuang ih an pumkhawmnak nan thleng zo a si. Mi hmuahhmuah thuṭhentu Pathian le famkimter zomi miding pawl ih thlarau hnenah nan thleng zo. 24 Thukam thar tuahtu palai Jesuh, Abel thisen hnakih ṭha sawn in thu a simtu, Jesuh ih thehmi thisen ah nan thleng zo. 25 Curuangah nan hnenih thu a simtu ih thu el lo dingin ralring uh. Pathian thuthang leilung tlunih an simmi hman a eltu cu an luat lo. Vancung ihsin a simtu ih thu sinsin tla cu kan ngai lo le ziangtlukin so kan luat lo sinsin ding! 26 Culai ahcun a aw in leilung a hnin ṭheh; atu-ah cun, "Lei lung lawng si loin vancung tiangin ka hnin ṭheh sal ding," tiah thu in tiam. 27 "Ka hnin ṭheh sal ding," timi ṭong in leilungih siammi thil hmuahhmuah hi hnin ṭheh le thawn ṭheh an si ding ih hnin a theih lomi cu a taang ding, tinak a langter a si. 28 Cuti a si ruangah lungawi aipuang in um uhsi. Ziangahtile hnin a theih lomi uknak kan co a si. Pathian hnenah kan lungawinak langter uhsila a lungawi zawng in Amah cu upatnak le ṭihzahnak thawn bia uhsi. 29 Ziangahtile kan Pathian cu mi a kaangral theitu meisa a si.
1 Khristian unau nan si bangtuk in pakhat le pakhat duhdaw aw ringring uh. 2 Nan innah mikhual tlunter uhla duhdaw uh. Cubangtuk a tuahtu pawl cu an theih loin an innah vancungmi an tlungter ṭheu. 3 Thawngtlami hngilh hlah uh; anmah thawn thawng a tla tlaang bangtuk in ruat aw uh. Harsatnak a tuartu pawl hngilh hlah uh; anmah thawn a tuar tlaang bangtuk in ruat aw uh. 4 Òhitawknak cu zokhal in upat hmaizah ding a si. Nupi le pasal cu zumtlak in um veve hai seh. Nupa sualnak a tuahtu le ṭang ṭawm sualnak a tuahtu pawl cu thu ṭhennak an tong ding. 5 Tangka duh tuk hlah uh; nan neihmi-ah nan lung kim uh. Ziangahtile Pathian in, "Ka lo tlansan lo ding ih ka lo hnong lo ding," in ti. 6 Cuti a si ruangah ralṭha in um uhsila, "Bawipa cu i bawmtu a si, ka thin a phang lo ding. Mi in ziangso ka parah an tuah thei ding?" tiah ti uhsi. 7 Pathian thu a lo simtu, hlanih nan hotu pawl kha ciing ringring uh. An nun sungih an umtlandan le an thihnak thuhla pawl kha ruat saal uhla an zumnak khal cawng ṭha uh. 8 Jesuh Khrih cu mizan, tuihsun le kumkhua in a hmun ringring a si. 9 Zirhnak phun dangdang in lamzin dik ihsin lo pialter hlah hai seh. Kan thinlung thazaang cahnak cu, rawl thuhla ah ei ding, ei lo ding tiih daan sung ihsin ngah loin, Pathian zaangfahnak sung ihsin ngah a ṭha sawn. Daan a thluntu pawl cu cuih an thlunmi daan in a bawm cuang lo. 10 Judah mi pawl Pathian an biaknak ih hna a ṭuantu puithiam pawl in kan biakṭheng parih raithawinak pekmi pawl kha an duhduh in an ei thei lo. 11 Òilva thisen cu Judah mi Puithiam Saang in sual raithawinak hrangah Hmun Thianghlim Bik sungah a luhpi; sikhalsehla cuih ṭilva ruangpum cu hnarpawn ah an ur a si. 12 Cuti a si ruangah Jesuh a thih tikah mipi an sualnak ihsin a thisen thawn tlengfai dingah Jesuh cu khawpi lengah a thi. 13 Curuangah kannih khal hnarpawn ah feh in a tuarmi ningzahnak tuar ve uhsi. 14 Ziangahtile hi leitlunah hin kumkhua a hmunmi khawpi kan nei lo; a ra lai dingmi khawpi lawng kan cuan a si. 15 Curuangah kan raithawinak ai-ah thangṭhatnak cu Pathian hnenah pe ringring uhsi; cuti kan pekmi cu kan kaa in Jesuh cu kan Bawipa a si tiih kan phuannak a si. 16 Òhatnak tuah kha hngilh hlah uhla, nan neihmi midang thawn hlawm-awk ding tla hngilh hlah uh; ziangahtile cumi cu Pathian lungawitertu raithawinak an si. 17 Nan hruaitu pawl thu ngai uhla an thu pekmi bangin thlun uh. An hnaṭuan daan cu Pathian hmaiah an phuan ṭheh leh ding ruangah cawl loin an lo kilkhawinak hi a si. An thu nan ngai asile lungawi aipuang in an hna an ṭuan ding; an thu nan thlun lo asile riahsiatnak thawn an ṭuan ding ih cumi cu nan hrangah zianghman ṭhathnemnak a um lo ding. 18 Kan hrangah thla cam ringring uh. A dikmi kha tuah kan duh ringringmi a si ruangah siaṭha thleidannak kan thinlung cu a thiang a si. 19 Nan hnenah Pathian in in thlenter sal cing hram dingin napi in thlacam uh, tiah ka lo dil a si. 20 Raithawinak ih a nun a peknak ruangah Tuukhal Tum kan Bawipa Jesuh cu Pathian in thihnak ihsin a thoter zo; cule a thihnak sungin kumkhua thukamnak cu a hngetter zo. 21 Daihnak Pathian in amah ih duhmi nan tuah theinak dingah nan ṭulmi thilṭha hmuahhmuah lo pe hram seh; cule Jesuh Khrih hmangin a duhmi cu kan sungah tuah hram seh. Kumkhua in kumkhua tiang Khrih cu sunloih si ko seh! Amen. 22 U le nau tla, ka cakuat hi a sau lem lo ruangah hiti in thapeknak thu ka lo simmi hi thinsau zetin rak ngai uh, tiah ka lo dil. 23 Kan unau Timote cu thawng sung ihsin a suak zo ti ka lo theihter duh a si. A thlen man asile nanmah tong dingih ka rat tikah ka rak hruai ding. 24 Nan hruaitu pawl le Pathian minung pawl an zate hnenah kan cibai buknak in rak sim sak uh. Italy ramih a ummi unau pawl khal in cibai an lo buk a si. 25 Pathian zaangfahnak cu nan zate hnenah um hram seh.
1 Pathian le Bawipa Jesuh Khrih ih siahhlawh a si mi keimah Jeim in leilung tlun khuazakipah a ṭeekdarhmi Pathian minung phun hleihnih nan hnenah cakuat in cibai ka lo buk. 2 U le nau pawl, nan hnenah hniksak harsatnak a phunphun a thlen tikah mi vannei kan si tiah ruat aw uh; 3 ziangahtile nan zumnak in cubangtuk hniksak harsatnak nan neh tikah tuar theinak a ra, ti nan thei. 4 Tlaksamnak zianghman um loin a famkim le pitlingmi nan si theinak dingah a net tiang a tuar theitu si dingah zuam uh. 5 Nanmah lakah fimnak a tlasammi nan um ahcun Pathian hnenah dil sehla Pathian in a pe ding. Ziangahtile zo hnen khalah Pathian cun siangzet le zaangfahnak thawn a pe a si. 6 Sikhalsehla cutiin a dil tikah thinlung ṭhukṭhunnak um lo tein a dil pei ih ka ngah rori ding tiin a zum pei. Thinlung ṭhukṭhunnak a neitu cu thli in hmun kipih a semmi tifinriat tisuar bangtuk a si. 7 Cubangtuk minung cu a thinlung a hmun lo ih a ṭhencat awk thei lo ruangah Bawipa ih hnen in zianghman ngah ding ring hlah seh. 9 A farahmi Khristian unau pakhatkhat Pathian ih bomnak in neinungih a um tikah a lung awi ko seh. 10 Cule a lianmi Khristian unau kha mi farahih a can asile a lung awi thotho seh. Ziangahtile milian pawl cu hramlak pangpar bangin an ziam ding. 11 Ni a suak ih pangpar kung cu niling in a em; pangpar cu a vuai ih a mawinak a ziam. Cubangtuk in milian pawl cu hnaihnok zetih an hna an ṭuan laifangah an hloral ding. 12 Hniksak harsatnak a tuar ih hngette ih a ding theitu cu mi thlawsuak a si. Ziangahtile cubangtuk hniksaknak a neh thei ruangah Pathian in amah a duhdawtu pawl hrangih a tiam ciami nunnak sui lukhuh a ngah ding. 13 Cubangtuk hniksaknak cu mi in an ton tikah, "Pathian in i hniksak a si," tiah zohman in ti hlah seh. Ziangahtile Pathian cu sualnak in a hniksak thei lo ih amah khal in zohman a hniksak hai lo a si. 14 Sikhalsehla minung cu sualforhnak a ton tikah amah ih taksa hiarnak in a thlem ih thang vekin a awh ṭheu. 15 Taksa hiarnak in fa bangih a vunmi le a hrinmi cu sualnak a si; cule sualnak cu a ṭhang ih rah a rah tikah thihnak a suahter. 16 Ka duhdawtmi u le nau, ruat sual pang hlah uh. 17 A ṭhami le a famkimmi laksawng hmuahhmuah cu vancung ihsin a rami an si. Vancung tleunak a tuahtu Pathian hnen ihsin a rami an si. A siammi thil pawl cu an thleng aw na'n Pathian cu a thleng aw dah lo; tikcu a her awk khalle Pathian hnen ahcun khawthim ti a um dah lo. 18 Amah ih lungkimnak in sersiammi kan si ih kanmah sersiamnak ah thutak ṭongkam a hmang. Hiti a si ruangah a siammi thil hmuahhmuah lakah kannih cu rah hmaisa bik kan si. 19 Ka duhdawtmi u le nau pawl, hi thu hi cing ringring uh: zokhal thu theih duhnak lam ahcun a zamrangmi si uhla ṭong ding le thinhennak lam ahcun khulfungmi si uh. 20 Milai ih thinhennak in Pathian ih tumtahnak a dingmi cu a hlensuah thei lo. 21 Curuangah fihnung le a balmi ziaza ṭha lo hmuahhmuah cu hlon ṭheh uh. Pathian hnenah hlan aw uhla nan thinlung sungih khum ciami nan thlarau runsuak theitu thu kha fektein pom uh. 22 A thu kan theih taakah a tawk ko ti meenin nanmah le nanmah bum aw hlah uh. Nan theihmi kha a tuahsuak tum uh. 23 A theih lawng a thei ih a tuahsuak lotu cu thlalang ah a hmel a zoh awtu bangtuk a si. Amah cu thlalang ah a hmel a zoh aw ih a si vek cekci-in a hmu aw. 24 Felzet in a zoh-awk hnuah a feh ih hmakhatte-ah a hmel ziangvek a si ti a thei nawn lo. 25 Sikhalsehla mi a luattertu, a famkimmi daan kha felzetih a zoh ringringtu cu a thei mentu le a hngilhtu si loin a tuahsuaktu a si; cutiin a tuahsuak ruangah Pathian ih thlawsuahmi a si ding. 26 Biaknak lamah ka taima a si a titu nan um maw? Nan hmurka nan uk thei lo ahcun nan zumnak parih nan taimaknak cu santlai lo a si ih nanmah le nanmah a bum awtu nan si. 27 Pathian kan Pa in a taktak le a thiangmi biaknak ih a ruahmi cu: farah zonzai le nuhmei an harsatnak le an tuarnak ah ṭhatein kilkhawi le khawvel sualnak sungih buahcihter aw lo dingin mah le mah fingkhawi awk kha a si.
1 U le nau pawl, sunlawinak Bawipa, kan Bawipa Jesuh Khrih a zumtu nan si ruangah ziangtik hmanah mi thleidannak nei hlah uh. 2 Thuṭhimnak ah mi pakhat cu sui zunghruk le hnipuan ṭha zetzet thawn nan pumkhawmnak ah a ra ih mifarah pa cu sinfen ṭet ṭiamṭiam thawn a ra ve. 3 Cutikah hnipuan ṭhazet a hruktu pa cu nan zohso ruangah a hnenah, "Hi tokham ṭha bikah ra to aw," nan ti; asinain mifarah pa cu, "Khi tawkah va ding aw; asilole ka ke kiang zial ahhin to aw," nan ti a si ahcun, 4 nanmah lakah thleidannak nan nei ih thinlung ṭha lo par ihsin thuṭhennak nan tuah a si. 5 Ka duhdawtmi u le nau pawl, ngaihnik uh. Pathian in leilung tlun mifarah pawl hi zumnak lamah milian si dingah le amah a duhdawtu pawl hnenih a kam ciami a Uknak cotu dingah a hril hai a si lo maw? 6 Sikhalsehla nannih cun mifarah nan nautat. Zoso a lo hmuhsuamtu le thureltu pawl hmaiih a lo dir ciamcotu kha an si? Milian pawl an si, a si lo maw? 7 Pathian in nan hnenih a lo pekmi hmin ṭha a relsiatu khal anmah an si lo maw? 8 Ca Thianghlim sungih a ummi, "Na innhnen cu nangmah na duhdawt awk bangtuk in na duhdaw pei," timi Pathian Uknak ih daan hi na thlun thei ahcun a dikmi na tuah a si. 9 Sikhalsehla a lenglamih hmuhnak in mi na thleidang a si ahcun na sual a si. Daan in daan buartu-ah a lo hmu. 10 Cule zokhal thukham pakhat a buar ahcun thukham zate buartu a si. 11 Ziangahtile, "ṭaangṭawm sualnak tuah hlah," a titu in, "Mi that hlah," a ti. Òaangṭawm sualnak na tuah lo khalle mi na thah a si ahcun daan a buartu na si. 12 Curuangah kannih luatnak in petu daanih thuṭhen dingmi bangin nan ṭong daan le nan thil tuahzia pawl cu siseh. 13 Mi hnenih zaangfahnak a nei lomi cu Pathian in a thu a ṭhen tikah a tlunah zaangfahnak a nei ve lo ding; sikhalsehla thuṭhennak cu zaangfahnak in a neh a si. 14 U le nau pawl, mi pakhatkhat in zumnak ka nei ti hmansehla a tuahnak ih a langter lo ahcun ziangso a ṭhathnem? Cuih zumnak in a runsuak thei ding maw? 15 Nan Khristian unau lakah mipa siseh nunau siseh hnipuan a tlasammi le ei-bar ding a nei lomi um bang hai sehla, 16 cu pawl hnenah, "Pathian in lo thlawsuah hram seh. Hlumtein um uhla rawl ṭhatein ei uh," tiah nan timi cu an nunnak ih an ṭulmi nan pek si lo ahcun ziangso a ṭhathnem? 17 Cu bangtuk in zumnak khal a si; tuahnak a tel lo ahcun zumnak cu a thi a si. 18 Sikhalsehla mi hrekkhat in, "Mi pakhat in zumnak a nei ih a dang pakhat in tuahnak a nei," an ti ding. Ka thulehnak cu, "Tuahnak um loih zumnak lawng a neimi i hmuh awla kei in ka tuahnak in ka zumnak ka lo hmuh ding," ti hi a si. 19 Pathian pakhat lawng a um, ti nan zum a si lo maw? Cuti nan zum cu a ṭhazet. Sikhalsehla khawsia pawl hman in Pathian pakhat a um ti an zum ve; asinain an ṭih ih an khur thlohthlo. 20 Ruahnak nei lo pawl! Tuahnak um lo cun zumnak cu santlai lo a si, ti hmuh nan duh maw? 21 Ziangtin so kan pu Abraham cu Pathian thawn rualremnak a co? A fapa Isaak biakṭheng parah Pathian hnen thawinak hrangah a pek ih cuih a tuahnak ruangin rualremnak a co a si lo maw? 22 Cucu nan thei lo maw? A zumnak le a tuahnak an feh tlaang. A tuahnak ruangah a zumnak a famkim a si. 23 Cule Ca Thianghlim in, "Abraham in Pathian a zum ih cuih a zumnak thawngin Pathian in miding ah a co a si," a timi a kim. Curuangah Abraham cu, "Pathian ih rual," tiah kawh a si. 24 Hiti a si ruangah minung cu a zumnak lawngin si loin a tuahnak ruangin Pathian thawn rualremnak a co ti nan thei a si. 25 Hlawhhlang nu Rahab thuhla khalah cuti thothoin a si. Thlingthlatu Israel mi pawl ṭhatein a tuamhlawm hnuah zin dangih an tlansuahnak dingah a bawm; cu bangtuk ih a tuah ruangah Pathian thawn rualremnak a co a si. 26 Cuti a si ruangah ruangpum cu thlarau lo cun a thih bangtuk in zumnak khal tuahnak lo cun a thi ve a si.
1 Ka u le ka nau tla, mi tamtuk in zirhtu ṭuan duh hlah uh. Ziangahtile nan theih vekin kannih zirhtu pawl hi midang hnakin luar deuhin thurelnak kan tong ding a si. 2 Kan zatein kan palh pang ṭheu. Sikhalsehla a ṭongkam in a palh lomi cu a taksa pumpi a uk aw theitu a si ih mifamkim a si. 3 Rang cu kan thu thlun dingah rang kakharh in a kaa kan kharh ih feh seh ti kan duhnakah kan fehter. 4 Asilole tangphawlawng khi ruathnik uh: a tumzetmi a si ih a cak zetmi thli in a fehter; asina in a uktu ngaingai cu a fate zetmi lawng-hernak a si ih cumi hmangin lawng mawngtu in a duhnak ah a fehter. 5 Kaa sungih lei khal hi cumi bangtuk a si; a fate na in thuhla tum zetzet in a porh thei. Thing le hrampi ziangtluk tupi kau a si khalle meici fate in a ur kang thluh ṭheu khi ruathnik uh. 6 Cuih meici bangtuk cu lei hi a si. Lei cu a ṭha lomi a si ih kan taksa sungah umnak hmun a rak nei ih cutawk ihsin ṭhat lonak cun kan ruangpum zate-ah a hrawh thluh. Kan nunnak hri le hram tiangin meisa in a ur ih cuih meisa cu hell hmun ihsin a thomi a si. 7 Minung in ramsa hmuahhmuah hrem thei lomi a nei lo; hramlak ramsa le vate pawl siseh, bokvak ih a vakmi ramsa le ti sung nga pawl siseh, a hrem thei ṭheh a si. 8 Sikhalsehla kaa sungih lei cu a hrem theitu ngaingai zohman an um lo. Lei cu a ṭha lomi a si ih uk theih lomi a si; mi that thei tur a nei. 9 Kan lei cu kan Bawipa le kan Pa Pathian thangṭhatnak ah kan hmang ih cule amah ih hmuihmel cuangih a tuahmi kan milaipi pawl camriamnak ah kan hmang lala. 10 Thangṭhatnak ṭongkam le camriamnak ṭongkam cu kan kaa pakhat sung ihsin a suak. Ka u le ka nau tla, hi bangtuk in si ding a si lo. 11 Cerh tipuut pakhat sungin ti thlum le ti kha an suak tlang dah lo. 12 Ka u le ka nau pawl, theikung ihsin olif rah a rah dah lo; sabit hri khal in theipi a rah dah lo. Cule cerh ti-al khal in tithlum a suah dah lo. 13 Nanmah lakah fimnak le theihnak a neitu nan um maw? Nan um a si le a nuncan ṭha in langter sehla, tangdornak le fimnak thawn a tuahmi a thil ṭha tuahnak in langter seh. 14 Sikhalsehla nan thinlung sungah iksiiknak le mi huatnak le mahih zawnruahnak lawng a khat asile ka fim tiin porh aw rero hlah uh; thutak parah sualnak nan tuah rero sawn a si. 15 Cubangtuk fimnak cu vancung ihsin a rami fimnak a si lo; khawvel fimnak a si; thlarau thawn a ral awmi fimnak a si ih khuavang fimnak sawn a si. 16 Iksiknak le hamṭamnak lawng a umnak hmunah cun buainak le ṭhat lonak a phunphun a um ve a si. 17 Sikhalsehla van ihsin a rami fimnak cu ziang dang hnakin a thiangmi fimnak a si; cuih tlunah daihnak in a khat, a lung a nem ih pawlkom a thiam. Zaangfah thinpemnak a nei ih hnaṭuan ṭha ih rah a suahter. Thleidannak a nei lo ih titer awknak khal a nei lo. 18 Cule remnak a tuahtu pawl ih daihnak thawn an tuh-mi thlaici ihsin an khawmmi rah cu ṭhatnak a si.
1 Pakhat le pakhat nan tawh awknak le nan thawi awknak hi khui-in so a rat? Tisa nomnak nan hiarnak ihsin an ra ih cumi cu nan taksa sungah cat loin an sual aw ringring a si. 2 Thil pakhatkhat nan duh ih nan co thei fawn lo tikah mi thah khal nan ngam thlang; nan dawt zetmi thil a um ih nan ngah thei lo ruangah nan to aw ih nan sual aw. Nan duhmi cu Pathian hnen ihsin nan dil lo ruangah nan ngah lo. 3 Cule nan dil tik khalah nan ngah lo, ziangahtile nan thinlung a ṭha lo; nan tisa nomnak hrang lawngah nan dil a si. 4 Rintlak lo milai pawl! Leikhawvel thawn rualpi ṭha si cu Pathian thawn ral awknak a si ti nan thei lo maw? Zokhal leikhawvel a kom ṭhatu cu Pathian ih ralah a tuah aw a si. 5 Ca Thianghlim in, "Pathian in kan sungih a retmi thlarau cu a duh zet ih a thiik ngaingai," tiah a timi hi tican nei lomi a si tiah ruat pang hlah uh. 6 Asinain Pathian in in pekmi zaangfahnak cu cu hnakin a cak sawn a si. Ca Thianghlim in a ti bangtuk in, "Pathian in mi puarthau a do ih lungnemmi a zaangfah a si." 7 Curuangah Pathian duhnak a thluntu si uh. Satan kha do uhla a tlan mai ding. 8 Pathian pan uhla a lo pan ve ding. Nannih misual pawl, nan kut kholhfai uh. Nannih mi-titer aw pawl, nan thinlung thiangter uh. 9 Riahsia in um uh; ṭap uhla aihram uh. Nan hnih-nak cu ṭahnak ah thleng uhla nan lungawinak cu riahsiatnak ah thleng uh. 10 Bawipa ih hmaiah tangdorin um uhla a lo khaisaang hai ding. 11 Ka u le ka nau tla, nannih pakhat le pakhat relsia aw hlah uh. Khristian unau dang a soiseltu le a mawhthluktu cu Daan a soiseltu le a hnongtu a si. Daan nan soisel asile Daan a thluntu nan si nawn lo ih a mawhthluktu nan si sawn. 12 Daan in petu le Daan tlunah thu a ṭhen theitu cu Pathian pakhat lawng a si. Amah lawnglawng mi a rundam suak theitu le a siatsuah theitu a si. Na milaipi mawhthluk tahratin an thu ṭhentu ih na tuah awk tikah zo ka si tiin so na ruah awk? 13 "Tuihsun a si lole thaisun khual kan tlawng ding ih khua pakhat kan thleng ding; cutawkah kum khat tluk kan um ding, sum kan tuah ding ih tangka tampi kan nei ding," tiah a timi pawl, ka simmi hi ngaihnik uh. 14 Nan nunnak cu thaisun ah ziang a cang ding ti nan thei lo. Nan nunnak cu caan tawite sung a zaam ih a hlo saalmi mero bangtuk a si. 15 Curuangah, "Bawipa ih lungkimnak a um asile kan nung hrih ding ih cumi, khami kan tuah ding," tiah ti ding sawn nan si. 16 Asinain atu vek a si ahcun nan puarthau nan hngal ih nan porh aw ciamco. Cubangtuk porh awk cu a ṭha lomi a si. 17 Curuangah thil ṭha tuah ding thei na cingih a tuah lotu cu misual a si.
1 Nannih milian pawl, ka simmi hi ngaihnik uh! Nan parih a thleng dingmi harsatnak ruangah hin ṭap uhla ai rero uh. 2 Nan lennak cu an hloral ṭheh ding ih nan hnipuan hlawnthil pawl hi an mawr ding ih nget in an ei ṭheh ding. 3 Nan sui le nan ngun pawl cu an tlap ṭheh ding ih cuih a tlapmi cu nan sual a lo phuangtu ah a cang ding ih meisa bangin nan taksa a lo ei-kaang ding. Tuih a netnak caanih cemral ve dingah nan sumsaw cu nan rak khawl cia a si hi! 4 Nan lo ih hnaṭuantu pawl an hlawhman nan pe lo. Curuangah nan rawl a khawmtu pawl ih an phunzainak le an aukhuannak cu Cungnungbik Bawipa Pathian in a thei zo. 5 Hi leitlunah hin nunnuamzet le duhdimzet in nan nung zo. Thah dingmi sa bangtuk in sa thah ni hrangah thauzet in nan rak cawm aw zo. 6 Sualnak a nei lomi pawl mawh nan phurhter tlunah an lo dodal thei lo hmanah nan that hai a si. 7 Cuti a si ruangah u le nau pawl, kan Bawipa a ra kir sal hlan tiang thinsaute in um uh. Lothlo pa khi ruathnik uh! A lo in thlairawl man nei a suah hlanlo thinsaute in a hngak a si. Òoruah le fur ruah rat ding khi thinsau in a hngak. 8 Cubangtuk in nannih khal thinsau in um uh. Nan ruahsannak cu khohter uh. Ziangahtile Bawipa a ra thlennak ni a nai zo. 9 U le nau pawl, pakhat le pakhat mawhthluk aw hlah uh. Cutiin nan tuah asile Pathian in a lo mawhthluk ve lo ding. Thuṭhentu cu a ra thleng zik thlang a si. 10 U le nau pawl, Pathian hminih thu a rak simtu profet pawl kha ciing ringring uh. Harsat caanah thinsau in a tuar theitu an si ruangah anmah cu nan zohṭhim dingmi an si. 11 An tuar thei ruangah mi lungawi an si, kan ti. Job ih thinsaunak kha nan thei zo ih Pathian in a netnak ah famkimin a pek ti khal kan thei. Ziangahtile Pathian cu zaangfahnak le lainatnak neitu a si. 12 U le nau pawl, ziangdang hnakin thu nan kam awk tikah siatcam hlah uh. Vancung siseh, leilung siseh, thil dangdang khal siseh, a hmin sal tahratin siatcam hlah uh. A si tiih na sim duhmi asile 'Asi,' ti awla, asilo tiih na sim duh asile 'Asilo,' ti aw. Cutiin na ti asile Pathian in a lo mawhthluk lo ding. 13 Nan lakah harsatnak a tongtu nan um maw? Nan um asile thla cam seh. Lungawimi teh nan um maw? Nan um asile thangṭhatnak hla sak seh. 14 Nan lakah a nami nan um maw? Nan um asile kawhhran upa ko sehla Bawipa ih hmin in hriak an hnih dingih thla an cam sak ding. 15 Zumnak thawn thlacamnak in mina cu a damter ding. Bawipa in harhdamnak a pek sal ding ih sualnak a tuahmi khal a ngaidam ding. 16 Cutiin a si ruangah nan sualnak cu pakhat le pakhat hnenah phuang ton aw uhla thlacam ton aw uh; cutiin harhdamnak nan ngah ding. Mi dingih thlacamnak cu a cak zet ih hmual a nei a si. 17 Elijah cu kanmah bangtuk milai a si ko. Sikhalsehla ruah sur lo dingin taimak suah in thla a cam ih an ramah kum thum le a hrek sung ruah a sur lo. 18 Cuih hnuah thla a cam sal ih ruah a sur sal. Cutiin leilung in ti le rawl a suah sal. 19 U le nau pawl, nanmah lakah pakhatkhat thutak ihsin a pial ih a dang pakhat in a hruaikir a si ahcun, 20 zinpeng ihsin misual a hruaikirtu in cuih misual thlarau cu thihnak ihsin a runsuak ding ih a sualnak khal tamzet hmansehla ngaidamnak a ngahter ding a si, ti hi ciing ringring uh.
1 Jesuh Khrih tirhthlah a si mi keimah Piter in Pontus, Galatia, Kappadosia, Asia le Bithinia pengih raltlaan bangin a ṭhekdarh awmi, Pathian ih hrilmi pawl, nan hnenah ca ka lo kuat. 2 Jesuh Khrih ih thu nan thlunnak dingah le amah ih thisen ih thiantermi nan sinak dingah nannih cu kan Pa Pathian tumtahnak bangtuk in hrilmi le amah ih Thlarau in mi thianghlim ih tuahmi nan si. Pathian zaangfahnak le daihnak cu nan hnenah tlamtlingte in um hram seh. 3 Kan Bawipa Jesuh Khrih ih Pa le a Pathian cu thangṭhat uhsi. In zaangfahnak a tum ruangah Jesuh Khrih cu thihnak in a thoter ih nunnak thar in pe zo. Cu ruangah a nungmi ruahsannak in kan khat ih, 4 Pathian in a minung pawl hrangih a retmi ro cu co dingah hngakhlap in kan um. Cuih ro cu nan hrangah vancungah a lo ret sak ih a siat thei lomi, zohmanih ruk thei lomi le a ziam thei lomi an si. 5 Ni neta bikih langter dingah atuih ret ciami rundamnak cu zumnak thawngin Pathian huham ih kilvenmi nanmah ih co ding ro a si. 6 Curuangah nan lungawi uh! Harsatnak a phunphun nan tonmi ruangah caan tawite sung riahsia in um hman uhla lungawi in um thotho uh! 7 Ziangahtile hi harsatnak nan tuarmi cu nan zumnak a ngai maw ngai lo ti theihnak dingah a si. A siat theimi sui hman meisa in hniksak a si ṭheu. Cu bangtuk in sui hnakih a sunglawi sawnmi nan zumnak cu harsatnak a tuar suak theitu si dingah hniksak a ṭul ve a si. Cule Jesuh Khrih a lang Ni ah thangṭhatnak le sunlawinak le upatnak nan ngah ding a si. 8 Amah nan hmu dah lo na'n nan duhdawt; nan hmu lo na'n nan zum. Curuangah kaa ih sim thei lomi, a maksakmi le a sunglawimi lungawinak nan nei. 9 Ziangahtile Jesuh Khrih sungih nan zumnak in tumtahnak nan neihmi nan thlarau rundamnak cu nan co ngah a si. 10 Hi rundamnak thu hi profet pawl in an hawlmi le an zingzoimi a rak si; Pathian in a lo pek dingmi hi zaangfahnak laksawng thuhla hi profet pawl in an rak sim sung ciami a si. 11 Ziang tikah so cuih caan cu a ra thlen ding tiah hawl suak an rak tummi a si. An sungih a ummi Khrih ih Thlarau in Khrih ih a tuar dingmi harsatnak le cuih hnu ih a co dingmi sunlawinak thu a rak sim cia tikah atuih caan hi a sawhmi caan cu a si. 12 Profet pawl an hnaṭuannak cu anmah ih ṭhathnemnak hrangah si loin nanmah ih ṭhatnak hrangah a si sawn ti kha Pathian in an hnenah a langter. Cutiin profet pawl ih an rak simmi cu atu-ah vancung ihsin run thlah a si mi Thlarau Thianghlim ih cahnak thawngin Thuthang ṭha a phuangtu palai pawl hnen ihsin nan theihmi hi a si. Hi thu hi vancungmi hmanin theih an duhmi thu a si. 13 Curuangah hnaṭuan thok dingah nan thinlung timtuah ciain um uh. Tiar ciain um uhla Jesuh Khrih a lang tikah nan ngah dingmi zaangfahnak parah nan ruahsannak zatein bun uh. 14 Pathian duhnak thlun uhla nan aat lai caanih nan rak neihmi tisa duhnakih nan nunnak in lo uk nawn hlah hai seh. 15 A lo ko tu Pathian cu Pathian thianghlim a si bangtuk in nitin nan nunnak ah thianghlim in nung ve uh. 16 Ca Thianghlim sungah, "Keimah ka thianhlim ruangah nannih khal thianghlim ve uh," tiin a um. 17 Pathian hnenih thla nan cam tikah kan Pa tiin nan ko. Cuih nan Pa cu mi hmuahhmuah thleidannak nei loin anmah an hnaṭuannak bangtuk ciarin thu a ṭhentu a si. Cuti a si ruangah hi leilung tlun nan nun sungah hin amah ṭihzahnak thawn amah ih hrangah nung uh. 18 Nan pu le nan pa ih an lo roh tami zianghman hlawknak um lo nan nundaan ihsin a lo tlensuaktu cu ziang a si ti nan thei ko. A siat theimi sui le ngun bangtuk a si lo. 19 A lo luattertu cu a sunglawimi Khrih thisen a si ih Khrih cu soiselnak um lo raitluan tuufa bangtuk a si. 20 Amah cu leilung seem hlanah Pathian ih hrilcia mi a si zo ih atu nanmah ih hrangah neta bik caanah hin Pathian in a langtermi a si. 21 Thihnak ihsin a thawhtertu le sunlawinak a petu Pathian kha Amah thawngin nan zum. Cuti cun nan zumnak le nan ruahsannak cu Pathian parih bunmi an si. 22 Atu-ah thutak nan thlunnak ruangin thianfaitermi nan si zo ih zumtu unau dang pawl tla nan thinlung taktein nan duhdawt. Curuangah nan thinlung zatein pakhat le pakhat duhdaw aw uh. 23 A nungmi le kumkhua in a hmunmi Pathian ih ṭongkam thawngin hrintharmi nan si zo; a thi theimi nu le pa-ih faate nan si nawn lo, a thi thei lomi ih faate nan si zo. 24 Ca Thianghlim in, "Mi hmuahhmuah hi hrampi bangtuk an si; An sunlawinak khal hramlak pangpar bangtuk a si. Hrampi cu an caar ih pangpar cu an ziam, 25 Sikhalsehla Bawipa ih thu cu kumkhua in a hmun," tiah a ti. Nan hnenih phuanmi Thuthang ṭha cu hi thu hi a si.
1 Curuangah ṭhat lonak hmuahhmuah cu hlon ṭheh thlang uh; thuphan per nawn hlah uh; titer aw nawn hlah uh; mi iksiik hlah uh; hmuhsuamnak ṭong hmang nawn hlah uh. 2 Naute suak pek bangtuk si uh; thlarau hnawiti duh uhla cuih hnawiti nan innak thawngin nan ṭhang ding ih rundam nan si ding. 3 Ca Thianghlim ih a ti bangtuk in, "Mi zaangfah thiamtu Bawipa a si zia cu nan tep ngah zo." 4 Bawipa ih hnenah ra uh; amah cu minung in santlai lo tiin hnong hman hai sehla Pathian in a sunglawi tiih a hrilmi a nungmi Lungto a si. 5 Nanmah khal ra uhla a nungmi lungto bangtuk in thlarau biakinn saknak hrangah Pathian ih hmanmi lungto si uh. Cutawkah puithiam thianghlim hnaṭuan nan ṭuan ding ih cohlan tlakmi thlarau raithawinak kha Jesuh Khrih sungin Pathian hnenah nan pe ding. 6 Ziangahtile Ca Thianghlim in, "A man khungmi lungto ka hril ih, Zion ih innkil lungphumah cuih lungto cu ka hmang. Amah a zumtu pohpoh cu ziangtik hmanah an mualpho lo ding," a ti. 7 A zumtu nannih pawl hrangah hi lungto hi a man a khung zetmi a si. Sikhalsehla a zum lotu hrangah cun, "Inn saktu pawl in santlai lo tiih an hnonmi lungto cu man nei bik lungto-ah a cang," timi kha a si. 8 Cule Ca Thianghlim sung hmun dangah, "Hi lungto hi mi an bahnak le, an tluknak lungpi ah a cang ding," tiin a um. An bah cu thuthang ṭha an zum lo ruangah a si; cuti an um cu Pathian ih tumtahmi a si. 9 Sikhalsehla nannih cu hrilcia miphun, Siangpahrang ih puithiam, miphun thianghlim, Pathian ih miphun bulce nan si. Khawthim sung ihsin mangbangza tleunak sungih a lo kotu Pathian in khawruahhar thil a tuahmi pawl tlang-aupi dingih hrilmi nan si. 10 Tuih hlanah cun Pathian ih minung nan si lo, sikhalsehla atu-ah cun amah ih ta nan si; tuih hlanah cun Pathian ih zaangfahnak nan thei lo; sikhalsehla atu-ah cun a zaangfahnak nan co zo. 11 Ka duhdawtmi ka rualle tla, hi leilung tlunah mikhual le raltlaanmi bangtuk nan si ih nan hnenah zaangfah ka lo dil a si. Thlarau thawn a ral aw ringringmi taksa hiarnak in lo neh hram hlah seh. 12 Pathian zum lomi lakah ziaza zohṭhim tlak in nung uhla ṭhat lonak a tuahtu tiin sual lo puh hman hai sehla, nan nuncan ṭhatnak an hmu ding ih Pathian a rat Ni ah amah cu an thangṭhat ding a si. 13 Kan Bawipa ih ruangah nan tlunih thuneitu bawi pawl cu an thu ngai uh; a saang bikih thuneitu Siangpahrang cu a thu ngai uh. 14 Cule peng le ram uktu bawi upa pawl khal, mi ṭha lo pawl hremtu dingah le ṭhatnak a tuahtu lawmtu dingih hnaṭuan pekmi an si ruangah an thu ngai uh. 15 Ziangahtile ziang hman thei loih a ṭongtu mi aa pawl ih ṭongnak hi thil ṭha nan tuahmi in tukdai seh tiah Pathian ih a lo duhsakmi a si. 16 A luatmi bangtuk in nung uh; sikhalsehla nan luatnak cu ṭhat lonak huptu-ah tuah hlah uh; cuhnakin Pathian ih sal bangin nung sawn uh. 17 Mi hmuahhmuah upat uh, zumtu unau pawl duhdaw uh; Pathian ṭihzah uhla Siangpahrang cu upat hmaizahnak pe uh. 18 Hnen-um pawl, nan bawi pawl ih thu ngai uhla upat hai uh; zaangfahnak le zawnruahnak a neitu lawng upat loin mipuar mihak remrem pawl ih thu khal ngai uh. 19 Pathian duhnak nan theih ruangah nan tuar ṭul lomi harsatnak nan tuar a si ahcun Pathian in thlawsuah a lo pe ding. 20 Sualnak nan tuah ruangih nan tuar tlakmi vuaknak nan tuar ahcun nan hrangah ziang ṭhathnemnak so a um? Asinain ṭhatnak nan tuah na cingih nan tuar a si ahcun Pathian in thlawsuah a lo pe ding a si. 21 Cu bangtuk harsatnak tuar dingah Pathian ih kawhmi nan si; ziangahtile Khrih amah rori in harsatnak nan hrangah a tuar ih a keneh nan thlun theinak dingah zohṭhim ding a lo taanta a si. 22 Khrih in sualnak zianghman a tuah lo; a hmurka in thuphan a per ti khal mi in an thei dah lo. 23 Mi in an hmuhsuam tikah a hmuhsuam ve lo; harsat a tuar tikah hro a suang lo. Sikhalsehla dingthluk lairelnak thawn thu a ṭhentu Pathian sawn a rinsan a si. 24 Khrih in amah ih taksa rori in kan sualnak cu thinglamtah ah a thlenpi zo ruangah kannih cu sualnak ahcun mi thi kan si ih dingnak sungah a nung dingmi kan si. Amah ih hmaa ruangah damnak nan ngah zo. 25 Zin a hlomi tuu bangtuk in nan rak hlota; sikhalsehla atu-ah cun nan thlarau Khaltu le Kilkhawitu thlun dingah nan zin hlohnak ihsin kirter salmi nan si zo.
1 Cubangtuk thothoin nupi pawl, nan pasal ih thu cu ngai uh; cutiin nan tuah asile Pathian thu a zum lotu nan pasal pakhatkhat an um a si ahcun nan ziaza ṭhatnak in zumtuah a canter ding. Kam khat hman nannih nan ṭong a ṭul lo ding, 2 ziangahtile, thianghlim le upatnak nei ih nan nun kha an hmu ding. 3 A lenglam mawinak: nan sam tuah daan, nan hlawnthil sui le ngun thawn nan thuam awk daan le nan hnipuan hruk daan in mawinak hawl hlah uh. 4 Pathian ih mithmuh ah a sunglawi bikmi mawinak taktak cu nan thinlung sungih a ummi a tar thei lomi lungnemnak le thindaihnak sawn an si. 5 Pathian a ṭihzahtu khuahlan nunau, Pathian ah ruahsannak a neitu pawl ih mawinak cu an pasal thu an ngainak ah a um a si. 6 Sarah cu cu bangtuk a rak si. Abraham a upat ih "Ka bawipa," tiin a ko. Nannih pawl tla thil ṭha nan tuah ih ṭih-mi zianghman nei loin nan um ahcun Sarah ih fanu nan si. 7 Cubangtuk thothoin nannih pasal pawl, nan nupi thawn nan umtlang tikah a derdai deuhmi an si ti thei thiam uhla upat uh, ziangahtile nanmah thawn hmun khatah Pathian ih pekmi nunnak laksawng ro cu an co ve ding. Nan thlacamnak cu ziang hmanih hnaihnawh thei lonak dingah cu bangtuk in tuah uh. 8 A netnak ih ka lo forh duhmi cu: ruahnak khat le thinlung khati'n um uh; unau bangin pakhat le pakhat duhdaw aw uhla zaangfahnak nei in thinlung nemin um uh. 9 Òhat lonak cu ṭhat lonak in lehrul hlah uh, siatcamnak khal siatcamnak in lehrul hlah uh; thlawsuahnak thawn lehrul sawn uh. Ziangahtile Pathian in a lo kawh tikah thlawsuahnak petu si dingin a lo ko a si. 10 Ca Thianghlim sungah, "Nunnom a duhtu le caan ṭha a duhtu cun ṭongsia ih ṭong sup sehla thuphan per nawn hlah seh. 11 "A ṭha lomi cu tlansan in ṭhatnak tuah seh. A thinlung zatein daihnak hrangah ṭuan seh. 12 Ziangahtile Bawipa in miding cu a zoh ṭha ih an thlacam a theihsak a si. Sikhalsehla ṭhat lonak a tuahtu cu a dodal a si," tiah a ti. 13 Òhatnak tuah a duhtu na si ahcun zo in so harsatnak a lo pek ding? 14 A ṭhami tuah ruangah harsatnak tong hman cila ziang tlukmi lungawi so na si! Zohman ṭih hlah; na don khal har hlah. 15 Nan thinlung in Khrih cu ṭihzah uhla Bawipa tiin upat uh. Nan thinlung sungih nan pommi nan ruahsannak kha a lo suttu pakhatkhat an um ahcun an thusuhmi let thei dingah ralring ciain um ring ring uh. 16 An thusuhmi nan leh tikah thinnemnak le upatnak thawn let uh. Thinlung thiang zetin um uh; cutiin nan tuah asile Khrih thluntu nan si bangtuk in nan ziaza ṭha kha mi in an lo soisel hmanah ziaza ṭha a si ti an hmu ding ih anmah riangri an ning a zak ding. 17 Òhat lonak tuah ruangih harsatnak tuar hnakin Pathian lungkim a si ahcun ṭhatnak tuah ruangih harsatnak tuar a ṭha sawn. 18 Ziangahtile Khrih cu minung sualnak ruangah kumkhua daih in a thi; nanmah Pathian hnenih hruaisuak dingah miṭha pa cu misual pawl ai ah a thi. A taksa in thihnak a tuar, sikhalsehla thlarau in nunter sal a si. 19 Cutiin thlarau in a nun sal ruangah thlarau thawngtla pawl hnenah a feh ih thu a sim. 20 Hitiih thu a simmi thlarau pawl cu Noah ih lawng a rak tuah laiah Pathian in thinsau in a hngak na'n a thu a ngai duh lotu an si. Long sungih a lutmi cu mi malte, an zatein minung pariat lawng an si; annih cu ti sung ihsin runsuakmi an si. 21 Cumi cu atuih nanmah a lo runtu baptisma hi a khihhmuhtu a si. Himi cu nan ruangpum a baalmi kholhfainak ah a si lo, siaṭha thleidannak thinlung thiang thawn Pathian hnenah thutiamnak nan tuah a si sawn. Cuih baptisma cu Jesuh Khrih a thawhsalnak thawngin nannih rundamnak a thlenpitu a si. 22 Amah cu vancungah a kai ih Pathian vorhlam kapah a um ih vancung mi hmuahhmuah le vanih thuneihnak le huham hmuahhmuah tlunah thuneitu a si.
1 Khrih cu a taksa in harsatnak a tuar ruangah nannih khal amah ih thinlung neihmi bangtuk nei in nan thinlung khohter uh. Ziangahtile taksa harsatnak a tuartu cu sualnak sungah a tel nawn lo a si. 2 Curuangah a tuih thok ihsin leilung tlun nunnak caan nan neih sung hmuahhmuahah minung duhnak si loin Pathian duhnak in lo uk seh. 3 Pathian awi lo khawvel pawl ih tuah an duhmi thil kha tikcu tawk fang nan rak tuah ve zo. Nan nunnak cu zoh mawi lo nunnak, taksa diriamnak, zuritnak, nun nuamin nupa sualnak, ei le in in puaituah nomnak, le fihnungza milem biaknak ah nan hmang zo. 4 Atu-ah cun Pathian awi lo khawvel pawl ih ziang hman suupnak nei loin an nunnak ah nan tel nawn lo tikah nan parah an khawruah a har ih an lo sulh ciamco a si. 5 Sikhalsehla annih cu minung le mithi thuṭhentu ding Pathian hmaiah an nun daan an phuang aw leh ding. 6 Curuangah a sisi mithi hnenah Thuthang ṭha phuan a si cu! Annih tla cu midang vek thothoin an nun laiah thuṭhennak an rak tong zo. Cule an hnenih Thuthang ṭha phuan a sinak cu thlarau ih an nunnak ah Pathian a nun vekin nung ve dingah a si. 7 Ziang hmuahhmuah hrangah a netnak tikcu caan a naizet zo. Curuangah ṭhateih thla nan cam theinak dingah suup awknak nei in thinlung fimvartein um uh. 8 Ziang hmuahhmuah hnakin pakhat le pakhat nan thinlung taktein duhdaw aw uh, ziangahtile duhdawtnak in sualnak tampi a khuh thei a si. 9 Phunzai lotein nan innah pakhat le pakhat tlungter aw uh. 10 Pathian laksawng dangdang kengtu ṭha nan si bangtuk in a hnen ihsin nan ngahmi laksawng cu midang ṭhatnak hrangah hmang fingfing uh. 11 Jesuh Khrih thawngin ziang hmuahhmuah ah Pathian in thangṭhatnak a ngahnak dingah thusimtu in Pathian thu cu Amah ih hmurka suak vek rori in sim uh; hnaṭuantu in Pathian hnen ihsin thazaang nan ngahmi thawn ṭuan uh; sunlawinak le cahnak hmuahhmuah cu kumkhuain amah ih ta an si. Amen. 12 Ka duhdawtmi ka rualle uh, a harsazet hniksaknak nan tuar ruangah hin mangbangin um hlah uh; zohman ih an ton dah lomi harsatnak kan parah a thlengce ti in ruat hlah uh. 13 Khrih ih tuarnak a hlawm-awmi nan si ruangah nan lung awi sawn uh. Cutiin nan ti asile a sunlawinak a lang tikah nannih cu lungawinak in nan khat ding. 14 Khrih thluntu nan si ruangah mi in an lo hmuhsuam a si ahcun nan lungawi uh; ziangahtile Pathian Thlarau, Thlarau sunglawi nan parah a um tinak a si. 15 Nanmah lakah pakhatkhat harsatnak nan tuar asile laithat, fifir, daan buartu a si ruangah le midang thuhla a tokhroktu a si ruangih tuar lawngte si hram hlah seh. 16 Khristian nan si ruangih nan tuar a si ahcun nan ningzak hlah uh; Khrih hmin a kengtu nan si ruangah Pathian hnenah nan lung awi sawn uh. 17 Thuṭhen thawhnak caan a ra thleng zo ih Pathian ih innsang sungtel pawl in thuṭhennak an tong hmaisa ding. Cutiin kan parih thok hmaisa a si ahcun Pathian Thuthangṭha a zum lotu pawl cu ziang vekin so an neet leh ding? 18 Ca Thianghlim sungih a um vekin: "Miṭha hrang hmanah rundamnak ngah hi a ol lo; Cuti asile Pathian bia lo misual pawl cu ziang an cang leh ding?" 19 Curuangah Pathian tumtahnak bangtuk in harsatnak a tuartu pawl cun thil ṭha an tuahnak ruangah Pathian hnenah an ziangzongza hlan aw ṭheh hai seh; Pathian cu anmah Siamtu a si ih a thukam a pelh dah lo.
1 Kawhhran upa pawl, kei khal kawhhran upa ka si ve ih, zaangfah ka lo dil. Khrih ih tuarnak a hmutu ka si ih a lang dingmi sunlawinak khal a ṭawmtu dingmi ka si ruangah ka lo dil a si. 2 Pathian ih a lo pekmi tuurual khaaltu si uh; nuar phahih a khaaltu si loin Pathian ih duhnak bangtuk in thinlung thote ih a khaaltu si uh. Hna nan ṭuan tikah hlawhman ngah duh ruangah si loin duhnak taktak thawn ṭuan sawn uh. 3 Nanmah ih kilkhawi dingih retmi tuurual kha a uk in uk tum hlah uh; an zohṭhim dingin nung sawn uh. 4 Cule Tuukhal Bawi Bik Khrih a lang tikah a tleunak a dal thei dah lomi bawi lukhuh sunglawi nan ngah ding. 5 Cubangtuk thothoin nannih mino deuh pawl in kum upa deuh pawl ih thu kha nan ngai pei. Nan zatein tangdornak thawn thuam aw uhla pakhat le pakhat bawm aw uh. Ziangahtile Ca Thianghlim in, "Mi hngal pawl cu Pathian in a dodal ih tangdormi cu mithmai ṭha a pek a si," tiah a ti. 6 Curuangah a cakmi Pathian ih kut hnuai ah tangdorte in um uhla amah in caan a kim a ti tikah a lo khaisaang leh ding. 7 Nan donharnak hmuahhmuah cu Amah ih hnenah ṭhum uh, ziangahtile Amah cu nan zawn a lo ruattu a si. 8 Fimvarte in um uh! Ralringte in um uh! Nan ral Satan cu deh ding hawl ah a huuk reromi kiosa bangin a tawi a vak zok rero a si. 9 Nan zumnak ah hngetkhoh uhla Satan cu do uh, ziangahtile leilung tlun khuazakipih a ummi Khristian unau pawl khal hi bangtuk in harsatnak hi an tuar rero ve a si ti kha nan thei. 10 Cule caan malte sung nan tuar hnuah zaangfahnak in a khatmi Khrih thawn nan pehzom awk ruangah amah thawn kumkhua sunlawinak hlawm aw dingih a lo kotu Pathian Amah rori in a lo famkimter ding ih hngetkhohnak le thazaang cahnak a lo pe ding. 11 A hnenah thuneihnak cu kumkhua in hmun hram seh. Amen. 12 Hi cakuat tawite hi rinsantlak Khristian unau tiih ka ruahmi Silas ih bomnak thawn nan hnenah ka ngan a si. Ka lo forh duhmi cu: hi cakuat sungih ka nganmi hi Pathian zaangfahnak taktak a si tiin a thei fiangtu ka si ih cuih zaangfahnak sungah hngette in ding uh, tihi a si. 13 Pathian ih a hrilmi Babilon ih a ummi nan unau kawhhran in cibai an lo buk. Ka fapa Marka khal in a lo buk ve a si. 14 Pakhat le pakhat cibai bukin Khristian duhdawtnak thawn hnam aw uh. Khrih ta a si mi nannih nan zate hnenah daihnak um hram seh.
1 Jesuh Khrih ih siahhlawh le tirhthlah a si mi keimah Simon Piter in kan Pathian le Runtu a si mi Jesuh Khrih ih dingnak ruangah hitluk a sunglawimi kan zumnak thawn bangrep in zumnak pek a si vemi nan hnenah hi cakuat hi ka ngan. 2 Pathian le kan Bawipa Jesuh nan theihnak thawngin zaangfahnak le daihnak cu famkim zetin co hram uh. 3 A sunlawinak le a ṭhatnak co ve dingah in kotu Khrih kan theihnak ruangin Pathian ṭihzahnak thawn kan nun theinak dingah kan ṭulmi hmuahhmuah cu Pathian ih cahnak huham in in pe zo. 4 Cutiin in tiamkam ciami a tum le a sunglawimi laksawng cu in pek ih cuih laksawng ruangah in siatsuah theitu leilung tisa hiarnak ihsin nan luat thei ding ih Pathian a sinakah khan nan ṭawm aw thei ve ding. 5 Himi ruang rori ahhin nan zumnak parah ṭhatnak bet tum uh; nan ṭhatnak parah theihnak bet tum uh; 6 nan theihnak parah suup awk theinak bet hrih uh; cule suup awk theinak parah tuar theinak bet uhla nan tuar theinak parah Pathian ṭihzahnak bet uh. 7 Pathian ṭihzahnak nan neihmi parah unau tlaihsannak bet uh; cule Khristian unau tlaihsannak parah duhdawtnak bet uh. 8 Hi ṭhatnak pawl hi nan ṭul zetmi an si ih famkimin nan neih a si ahcun kan Bawipa Jesuh Khrih nan theihnak ah hin a lo caktertu le hmual a lo neihtertu an si ding. 9 Sikhalsehla hi ṭhatnak pawl a nei lotu cu mitmalmi a si ih naite lawng a hmu theitu a si; hlanih a sualnak ihsin thianfaiter zomi a si hman kha a thei aw nawn lo. 10 Hiti a si ruangah u le nau pawl, Pathian ih a lo kawhnak le a lo hrilnak hi kumkhua ih fek dingah zuam sinsin uh. Cutiin nan tuah asile nan zumnak ihsin nan pial dah lo ding. 11 Cuticun kan Bawipa le in Runtu Jesuh Khrih ih kumkhua uknak sungah luh theinak thu nan ngah ding. 12 Hi thuhla pawl hi nan theih ciami le thutak nan theihmi sungah hngetkhoh zetih a ding ciami nan si ko na'n ka lo theihter sal ringring ding. 13 Ka nun sungah cun hi thu pawl lo theihter ringring hi a dikmi a si tiin ka ruat. 14 Kan Bawipa Jesuh Khrih in fiang zetih i theihter zo vekin hi a thi theimi ka ruangpum cu ka taan cing ding ti ka thei. 15 Curuangah hi thu pawl hi ka thih hnu khalah nan ciin ringring dingah ka ti thei tawkin ka zuam ding. 16 Kan Bawipa Jesuh Khrih cu huham thawn a ratnak ding thu kan lo theihter tikah phuahcopmi thuanthu ring in kan lo simmi a si lo. A sunlawi maksak zia cu kan mit rori in kan rak hmuhmi a si. 17 Sunglawi Cungnungbik hnen ihsin a rami aw in, "Himi hi ka duhdawtmi ka Fapa a si, a parah ka lung a awi," tiah a ti zawng ah kan Pa Pathian in upatnak le sunlawinak a peknak hmunah khan kanmah khal kan um ve! 18 Amah thawn tlang thianghlim parih kan um laiah vancung ihsin a thangmi cuih aw cu kan thei. 19 Curuangah profet pawl ih an rak simmi thuthang parah lunghmuinak hnget sinsin kan nei. Nannih khal cuih thu cu thupi zet a si tiin nan ruat le a ṭha ding; ziangahtile cuih thu cu Khrih ih Ni tleunak nan thinlung sungah vaangzawng deirel arsi tleu bangin a tleu hlan tiang khawthim sungih a vangmi mei-inn bangtuk a si. 20 Thil dang hmuahhmuah hnakin himi hi ciing ṭha uh: zokhal amah bul in Ca Thianghlim sungih profet thusimmi kha a fiangter thei lo ding. 21 Ziangahtile profet ih thusimmi cu milai duhnak meen ihsin a rami a si lo; Pathian hnen ihsin a rami thuthang an phuan tikah Thlarau Thianghlim forhfialnakin an phuanmi a si.
1 Hlanlai Israel mi lakah profet dik lo an rak um; cu vek thothoin atu nanmah lak khalah zirhtu dik lo an lang ding. Mi siatsuah theitu le a dik lomi thurin an tuh-lut dingih anmah a tlentu kan Bawipa hman an hnong ding; cuticun anmah ih par lala ah siatralnak cu rinlopi in an thlenter ding. 2 Cucingin tisa sualnak an ziaza ṭha lo cu mi tampi in an thlun thotho ding; cuih an tuahmi ruangah mi in thutak Lamzin cu an relsiat ding. 3 An duhham ruangah hi zirhtu dik lo pawl cun phuahcop thuanthu sim tahratin nanmah sung ihsin hlawknak an hawl ding. Sikhalsehla anmah Thuṭhentu cu a tiar awknak a reipi zo ih anmah a Siatsuahtu ding cu it loin a um a si. 4 Vancungmi a sualmi pawl cu Pathian in zuah loin hell sungah a hlonthlak ih cutawk khawthim sungah cun ṭemṭawnin an um ih Thuṭhennak Ni hngak fualfo in an um. 5 Khuahlan sanih leilung khal Pathian in a rak zuah cuang lo. Pathian ṭihzahnak a nei lo leitlun miphun parah tilik a tlunter ih a runsuakmi cu dingnak thu a simtu Noah le midang pasarih lawng an si. 6 Pathian in Sodom le Gomorrah khawpi cu a hnong ih meisa in a siatsuah; cumi cu Pathian ṭihzahnak a nei lotu pawl hrangah cinken dingih a tuahmi a si. 7 Asinain cin le daan nei lo, miṭha lo pawl in vansaanglam ih an tuahmi miṭha pa Lot cu Pathian in a runsuak. 8 Cuih miṭha pa cu miṭha lo pawl lakah um in khua a sa ih nitinte an ṭhat lo zia a hmu ih a theih tikah a thin a na zet. 9 Cutiin Bawipa cun amah a ṭihzahtu pawl harsat an tuarnak in runsuak a thiam ih miṭha lo pawl Thuṭhennak Ni tiang hremnak tuarter dingin a ret thiam. 10 Cutiin hremnak tuarih a retmi pawl cu Pathian thuneihnak nautat tahratin anmah ih tisa hiarnak le hurnak fihnungza a thluntu bik pawl an si. Hitiin mi a zirhsualtu pawl hi an puar ih an hngalzet; tlunlam vanih a ummi misunglawi pawl hman ziangah an siar lo; an hmuhsuam riangri a si. 11 Anmah hnakin a cak sawn le a tumsawn vancungmi hmanin Bawipa ih mithmuh ah cu pawl cu an hmuhsuam lo. 12 Sikhalsehla hi zirhsualtu pawl cu ziang hman ruahnak an nei lo, an thinlung ih a suak lokmi poh an tuah; kaih-ih thah dingmi ramsa bangtuk an si. An theih thei lomi poh cu nautatnak thawn an relsia. Curuangah ramsa bangin thahnak an tong ve ding. 13 Midang harsatnak an pek ruangah harsatnak an tuar ve ding. Annih hrangah nun nuam timi cu khawvan lai khalah an tisa hiarmi poh tuah ih diriamter khi a si. Mi bum cu nuam an ti ih nan hnenih rawl an ei tikah ningzahnak le mualphonak a suahtertu an si. 14 Nunau ṭha lo zoh dah ti lo an zoh duhmi ziang hman a um lo; sual tuah an hiarnak cu a riam thei dah lo. Zumnakih a derdai deuhmi pawl kha sualnak thang in an awk. Hamṭam lamah cun neh ding rual an si lo. Pathian ih camsiatnak hnuai ah an um a si. 15 Lamzin ding an pialsan ih zin an hlo zo. Beor fapa profet Balaam ih a rak thlunmi lamzin an thlun. Balaam cu thil ṭha lo tuah man ih a co dingmi paisa a duhtu a si ih, 16 a sualnak ruangah mawhthluk a tong. A laak in Balaam cu milai ṭong in a biak ih aatthlakza thil ṭha lo a tuahmi cu a baanter. 17 Hi minung pawl cu a caarmi cirh le thlisia in a semmi khawdur bangtuk an si. Pathian in an hrangah a thuk bik khawthimnak hmun timtuah ciain a ret zo. 18 Puarthaunak le ṭong ṭha lo an ṭong; sualpalhnak sung ihsin a ra luat pekmi pawl sualnak thang-ih awk sal dingah an taksa hiarnak kha an hmang. 19 Mi an tiamkammi cu luatnak a si, sikhalsehla anmah rori cu mi siatsuahtu ziaza ṭha lo ih sal an si; ziangahtile minung cu thil ziang khal in a neh ahcun cuih a nehtu thil ih sal a si. 20 Kan Bawipa le Runtu Jesuh Khrih pumpak in an theihnak ruangah hi leilung borhhlawh sualnak sung ihsin an luat ih cutiih an luat ngah hnuah cuih borhhlawh sualnak in a thlem sal ih a kaihtaar ngah ahcun a hmasa hnakin a neta deuh cu a besia sawn a si. 21 Dingnak lamzin an theih hnuah le thukham thianghlim an hnenih pek a si hnu ih an pialsan hnak cun ziang hman thei lo lawlaw in rak um hai sehla an hrangah a ṭha sawn. 22 Hi bangtuk in an parih thil a cangmi in, "Uico cun a luak a ei sal," tile, "Vok cu kholh hnu hmanah ciarbek sungah a bual aw kiir sal," tiih ṭongṭhimnak hi a dik a si ti a langter.
1 Ka duhdawtmi pawl, himi hi a voihnihnak nan hnenih ka nganmi cakuat a si. Ka cakuatmi a voihnih tein ka tummi cu nan thinlung sungah ruahnak thiang um thok seh tihi a si ih cumi cu ka lo theihter sal duhmi a si. 2 Hlanlaipi ah mithiang profet pawl in an rak sim ciami le kan Bawipa in Runtu in thukham a lo pekmi, nan hnenih tirhthlah pawl ih an phuanmi pawl kha ciing ringring uh, ti ka duhmi a si. 3 A hmaisabik ah nan theih dingmi cu: ni neta bik caanah mi ṭhenkhat an tisa hiarnak ih a ukmi pawl an ra suak ding, tihi a si. Cupawl cun hnihsuah ah an lo sai ding ih, 4 "Khrih in ka ra sal ding, tiin a lo tiam a si lo maw? Atu hi khuiah so a um? Kan pupa pawl cu an thihnak a rei zo, sikhalsehla leilung a seem pek ihsin atu tiang ziang hmuahhmuah anmah keel thotho an si," tiah an lo ti ding. 5 Hlanlaipi ah Pathian in a thu in lei le van hi a tuah a si ti an thei na'n a thei lo vekin an um ding. Leilung cu tidai sung ihsin le tidai thawn tuahmi a si. 6 Cule tidai thotho, tilik tidai in leilung hlun cu a siatsuah a si. 7 Asinain atuih a ummi van le leilung hi meisa-ih siatsuah dingah Pathian ih thupeknak thotho in zuah hrihmi an si. Pathian a hmuhsuamtu pawl thuṭhen an si ni le siatralnak an ton ni hrangah zuahmi an si. 8 Ka duhdawtmi pawl, thu pakhat hi hngilh hlah uh: Bawipa ih zoh daanah cun ni khat le kum thawngkhat an dang aw lo; amah ih hmaiah cun an bang aw a si. 9 Bawipa cu a thukammi kimter dingah a khul a fung a si tiah mihrek in ruat hman hai sehla, a khul a fung a si lo. Nan parah thinsaunak a neih ruangah a si sawn; ziangahtile pakhatte hman siatralnak tong lotein mi hmuahhmuah an sualnak ihsin an kir sal theinak ding a duh ruangah a si. 10 Sikhalsehla Bawipa ih Ni cu rinlopi ah fifir bangin a ra ding. Cuih Ni ah van pawl cu huuk celcel in an hloral ding ih vanih a ummi hmuahhmuah tla an kaang ding ih an siatral ṭheh ding. Cule leilung cu a parih a ummi thil hmuahhmuah thawn a hloral ding a si. 11 Hi bangtuk in ziang hmuahhmuah a siat ṭheh ding ruangah nan nun laiah hin ziang bangtuk i nung ding so nan si? Nan nunnak cu a thianghlimmi sisehla Pathian hnenih hlanmi siseh. 12 Van pawl an kaang ṭheh ih siatsuah ṭheh an si ni le vanih a ummi hmuahhmuah meisaling in a tiitter ṭheh ding ni Pathian ih Ni cu ra thleng zaang hram seh tiih nan hngah ṭiaṭia lai ah hin cubangtuk cun um uh. 13 Sikhalsehla kannih cu Pathian ih in tiamkammi van thar pawl le lei thar, dingnak a tlanleennak hmun cu kan hngak a si. 14 Curuangah ka duhdawtmi tla, cuih Ni nan hngah rero laiah hin Pathian hmaiah mawh nei lo le a thiangmi si dingah zuam uhla amah thawn a rem-awmi si uh. 15 Kan duhdawtmi kan unau Paul in Pathian ih a pekmi fimnak thawn nan hnenih a nganmi ca kuat sungih a um vekin Bawipa in kan parih a thinsaunak cu kanmah rundamsuak in duh ruangah a si, tiin ruat uh. 16 Hi thuhla a telhnak a cakuat nganmi hmuahhmuah sungah cu bangtuk in a ngan ṭheu a si. A cakuatmi sungih a nganmi thuhla hrekkhat cu a theih a harmi an si ruangah mi aa le mi hnget hngai lo pawl cun, Ca Thianghlim caang dangdangih sullam an hrilhfiah sual vek thothoin, a ping a peng hlirin an sim a si. Cuticun anmah ih par lala ah siatralnak an thlenter. 17 Sikhalsehla ka duhdawtmi tla, nannih hrangah cun himi cu nan theih ciami a si. Curuangah ralring zetin um uh! Cin le daan nei lomi pawl in an lo hruai sual lonak dingah le him zetin nan umnak hmun ihsin nan tlak lonak dingah ralringte in um uh. 18 Kan Bawipa le in Runtu Jesuh Khrih zaangfahnak le amah theihnak sungah ṭhang vivo uh. Amah hnenah sunlawinak cu atu le kumkhua in um camcin seh. Amen.
1 A hramthok ihsin a rak um ciami nunnak ih Thu nan hnenah ca in kan ngan. Cumi cu kan hna ih kan theihmi le kan mit in kan hmuhmi a si. Kan mit rori in kan rak hmuh ih kan kut rori in kan rak thammi a si. 2 Cuih nunnak cu hmuh theihmi ih a rung can tikah kannih in kan hmu a si. Curuangah cuih Thu cu nan hnenah kan rel ih Pa thawn a ummi kumkhua nunnak, kan hnenih theihter a si mi Thu kha nan hnenah kan sim a si. 3 Pa le a fapa Jesuh Khrih thawn pawlkomnak kan neihmi sungih nan tel venak dingah kan hmuhmi le kan theihmi cu nan hnenah kan phuang a si. 4 Kan lungawinak kim seh tiah hi ca hi nan hnenah kan ngan a si. 5 A Fapa hnen ihsin kan theihmi thu le nan hnenih kan phuanmi cu himi hi a si: Pathian cu tleunak a si ih a sungah thimnak zianghman a um lo. 6 Curuangah amah thawn pawlkomnak kan nei kan ti na'n thimnak sungih kan um a si ahcun kan ṭong in siseh, kan ṭuannak in siseh, thuphan kan per a si. 7 Sikhalsehla amah cu tleunak sungih a um vekin kannih khal tleunak sungih kan um ahcun pakhat le pakhat pawlkom awknak kan nei ih a Fapa Jesuh ih thisen in kan sualnak hmuahhmuah a tlengfai a si. 8 Sualnak kan nei lo kan ti ahcun kanmah le kanmah kan bum aw ih kan sungah thutak a um lo. 9 Sikhalsehla Pathian hnenah kan sualnak kan phuan ahcun zumtlak le a dingmi a si ruangah kan sualnak in ngaidam ding ih kan mawhnak hmuahhmuah a thiangfaiter ding. 10 Asinain sualnak kan tuah lo kan ti ahcun Pathian cu thuphanper ah kan canter ih a thu kan sungah a um lo a si.
1 Ka faale tla, sual nan tuah lonak dingah hi ca hi nan hnenah ka ngan a si. Sikhalsehla pakhatkhat in sualnak nan tuah a si ahcun a dingmi Jesuh Khrih, kan ai-awh in Pa Pathian hnenih thu in simsak theitu kan nei. 2 Cule Khrih amah ruangah kan sualnak cu in ngaithiam ih kanmah ih sualnak lawng si loin mi hmuahhmuah ih sualnak khal ngaithiam an si. 3 Pathian thupek kan thlun ahcun amah a theitu kan si ti a fiang a si. 4 Mi pakhatkhat in Pathian ka thei tiah a ti na'n a thupek a thlun lo ahcun thuphanper a si ih a sungah thutak a um lo. 5 Sikhalsehla Pathian thu a thluntu cu a sungah Pathian a duhdawtnak famkimin a um tinak a si. Pathian thawn pehzomnak kan nei ti kan theih fiangnak ding cu hiti in a si: 6 Zokhal Pathian thawn pehzomnak ka nei a titu cun Jesuh Khrih bangin a nung ding. 7 Ka duhdawtmi tla, nan hnenih ka nganmi thukham hi a thar a si lo; a hramthokin nan rak neihmi thukham hlun kha a si. Cuih thukham hlun cu nan theih ciami thu a si. 8 Sikhalsehla atu nan hnenih ka nganmi thukham hi thukham thar a si, ziangahtile hi thukham thar a dik zia cu Khrih sung le nanmah sungah hmuh theih a si. Ziangtin tile khawthim cu a reh vivo ih khawtleu taktak a lang zo. 9 Zokhal tleunak sungah ka um a ti na'n a unau a huatu cu khawthim sungah a um hrih lai tinak a si. 10 Zokhal a unau a duhdawtu cu tleunak sungah a um ih curuangah midang sualternak ding a sungah zianghman a um lo. 11 Sikhalsehla a unau a huatu cu khawthim sungah a um a si; khawthim sungah cun a tawivak ih thimnak in a mit a cawtter ruangah khuitawk lam ka pan ti hman a thei lo. 12 Ka faale tla, Khrih thawngin nan sualnak cu ngaithiam a si ruangah hi cakuat hi nan hnenah ka ngan. 13 Pale tla, a hramthok ihsin a rak um zomi Amah nan theih ruangah hi cakuat hi nan hnenah ka ngan. Tlangval pawl, Satan nan neh thei ruangah hi cakuat hi nan hnenah ka ngan a si. 14 Ka faale pawl, Pa Pathian nan theih ruangah hi cakuat hi nan hnenah ka ngan. Pale pawl, a hramthok ihsin a rak um zomi Amah nan theih ruangah hi cakuat hi nan hnenah ka ngan. Tlangval pawl, micak nan si ruangah hi cakuat hi nan hnenah ka ngan; Pathian thu nan sungah a um ih Satan khal nan neh zo a si. 15 Hi leilung le a sungih thilri hi tlaihsan hlah uh; hi leilung hi nan tlaihsan asile Pathian duhdawtnak nan nei lo a si. 16 Leilung ta a si mi thil hmuahhmuah: sualnak tisa in a hiar mi, milai in an hmuhmi le an duhmi thil, minung in hmaihngal porh awknak ih an ruahmi thil hmuahhmuah hi pakhatte hman Pa hnen ihsin a rami an si lo. A zatein leilung ihsin a rami an si ṭheh. 17 Leilung le a sungih a ummi thilri, milai ih an tlaihsanmi pawl hi an hloral vivo zo; asinain Pathian duhnak a tuahtu cu kumkhua in a nung ding. 18 Ka faale pawl, ni netnak a nai zo. Khrih ih Ral a ra ding ti nan thei; atu-ah Khrih ih ral tampi an lang zo ih curuangah neta bik caan a nai zo ti kan thei. 19 Himi pawl hi kanmah ih mi ngaingai an si lo ruangah in tlansan a si. Kanmah sungih a telmi taktak si hai sehla in pawl ringring ko ding. Hitiih in suahsannak hin kan pawl sungih minung ngaingai an rak si lo, ti a langter a si. 20 Asinain nannih cu Khrih in Thlarau Thianghlim a lo burh zo ruangah nan zatein thutak theitu nan si. 21 Nan hnenih cakuat ka ngan hi thutak nan theih lo ruangah a si lo; thutak nan thei ih thuphan cu thutak ihsin a ra dah lo ti khal nan theih ruangah a si sawn. 22 Cuti asile zoso thuphanpertu cu a si? Jesuh cu Messiah a si lo, a titu poh cu thuphanpertu a si. Cupa cu Khrih ih Ral a si ih Pa le Fapa a hnongtu a si. 23 Ziangtin tile, Fapa a hnongtu cun Pa khal a hnong a si. Zokhal Fapa a pomtu cu Pa khal a pom ve. 24 Cuti a si ruangah a hramthok ihsin nan theihmi thuthang cu nan thinlung sungah ṭhatein re uh. Cutiin ṭhateih nan ret asile Pa le Fapa thawn a pehzom aw ringringmi nan si ding. 25 Cuih kumkhua nunnak cu Khrih amah rori ih in tiamkammi a si. 26 Nanmah bum a lo tum rerotu pawl ih thu-ah hi cakuat hi nan hnenah ka ngan. 27 Nannih cu Khrih in a Thlarau nan parih a burh zo ruangah cuih a Thlarau nan sungih a um sungah cun midang ih zirh rero nan ṭul lo. Ziangahtile a Thlarau in ziang hmuahhmuah a lo zirh ih a lo zirhmi cu thuphan a si fawn lo, thudik a si sawn. Curuangah Thlarau ih zirhmi cu thlun uhla Khrih thawn pehzom aw ringring in um uh. 28 A si, ka faale pawl, amah thawn nan pehzom awknak ahcun hmun ringring ko uh; cuticun amah a rat tikah ralṭhatnak in kan khat ding ih a ra thlen Ni ah ningzakih a hmai-ihsin kan relh rero a ṭul lo ding. 29 Khrih cu a ding a si ti nan thei ko; curuangah zokhal a dingmi a tuahtu cu Pathian faate a si ti thei uh.
1 Pathian kan Pa-ih in duhdawt zia hi ruathnik uh! In duhdawtnak a maksak ruangah Pathian faale tiih kawh kan si hi; cutiih in ti vekin kan si taktak. Curuangah a si hi khawvelih in theih lonak cu! Pathian khal a thei lo. 2 Ka duhdawtmi pawl, atu cu Pathian faate kan si zo; asinain ziang bangtuk kan si lai ding ti cu a fiang hrih lo. Sikhalsehla Khrih a rat tikah cun amah bangtuk kan si ding ti kan thei; ziangahtile amah a si vek cekci in kan hmu ding. 3 Zokhal Khrih sungah hi bangtuk ruahsannak a neitu cu Khrih a thianhlim bangtuk in amah le amah a thianghlimter aw ve. 4 Zokhal a sualtu cu Pathian ih daan a buar a si, ziangahtile sual timi cu daanbuar khi a si. 5 Khrih cu minung sualnak thianfai sak dingah a ra ti cu nan thei ih a sungah ziang hman sualnak a um lo. 6 Curuangah Khrih sungih a ummi poh cun sualnak a tuah vivo lo. Sualnak a tuah ringringtu cu Khrih a hmu dah lo le a thei dah lomi an si. 7 Ka faale pawl, zohman in lo bum hlah hai seh. Khrih cu miding a si bangin zokhal dingnak a tuahtu poh cu miding a si ve. 8 Zokhal sual a tuah ringringtu cu Satan ih ta a si, ziangahtile Satan cu a hramthok ihsin sual a tuahtu a si. Pathian Fapa a langnak cu Satan hnaṭuannak siatsuah ṭheh ding rori ahhin a si. 9 Pathian fa zokhal in sual a tuah rero nawn lo, ziangahtile Pathian nunzia kha thlaici bangin a sungah a um. Cule Pathian cu a Pa a si ruangah sual in a nung nawn lo. 10 Pathian faate le Satan faate an dan awknak bik cu hihi a si: a dikmi a tuah lotu le a unau a duhdaw lotu cu Pathian faate an si lo. 11 A hramthok ihsin nan rak theih ringringmi thuthang cu pakhat le pakhat duhdaw aw uh, ti a si. 12 Kain bangtuk si hlah uh; amah cu Satan fa ah a cang ih a nau Abel a that a si. Ziangah so Kain in Abel cu a thah? Ziangahtile a thil tuahmi a dik lo ih a naupa ih tuahmi cu a dik ruangah a si. 13 Curuangah u le nau tla, khawvelmi in an lo huat asile nan mang bang hlah uh. 14 Kannih cu thihnak kan suahsan zo ih nunnak sungah kan lut zo, ti kan thei; cuti kan theihnak cu kan unau kan duhdawt ruangah a si. Duhdawtnak a nei lomi cu thihnak sungah a taang lai hrih a si. 15 A unau a huatu cu mithat a si ih mi thattu sungah cun kumkhua nunnak a um lo ti nan thei. 16 Duhdawtnak taktak ziang bangtuk a si ti kan theihnak cu hiti in a si: Khrih in kan hrangah a nunnak a pek. Cuvek thothoin kannih khal in kan nunnak cu kan unau pawl hrangah pe ve ding kan si. 17 Milian pakhat in a tlasam zetmi a unau a hmu na'n a thinlung in ziang hmanah siar loin a umsan meen a si ahcun Pathian ka duhdawt tiah ziangtinso a ti thei ding? 18 Ka faale tla, kan duhdawt awknak cu ṭongkam le awka men si ding a si lo; duhdawtnak taktak cu ṭuannak ah a lang dingmi a si. 19 Cuti a si ruangah thutak sungah kan um ti kan theihnak ding cu hiti in a si; cule Pathian hmaiah phuhrung aw loteih kan umnak ding cu hiti in a si. 20 Kan siaṭha thleidan thiamnak thinlung in in mawhthluk hman sehla Pathian cu kan thinlung hnakin a tum deuh ngaingai ih ziang hmuahhmuah theitu khal a si, ti kan thei. 21 Curuangah ka duhdawtmi tla, kan siaṭha thleidan thiamnak thinlung in in mawhthluk lo asile Pathian hmaiah ralṭhatnak kan nei a si ih, 22 a hnen ihsin kan dilmi pohpoh kan ngah, ziangahtile a thupekmi kan thlun ih a lungawimi kan tuah ruangah a si. 23 A thupekmi cu Khrih ih thupekmi bangtuk in, a Fapa Jesuh Khrih kan zum ih pakhat le pakhat kan duhdawt awknak ding kha a si. 24 Pathian thupekmi a thluntu pohpoh cu Pathian sungah a um ih Pathian khal a sungah a um ve. Cule Pathian ih in pekmi Thlarau ruangah Pathian cu kan sungah a um, ti kan thei.
1 Ka duhdawtmi tla, Thlarau ka nei a titu poh va zum hlah uh. An neihmi thlarau cu Pathian hnen ihsin a rami a si maw si lo tiah hniksak hmaisa uh. Ziangahtile profet dik lo pawl khuazakipah an thleng zo. 2 Pathian Thlarau a si le si lo hiti in nan thei thiam ding: zokhal Jesuh Khrih cu minung in a ra tiah a phuangtu cu Pathian hnen ihsin a rami Thlarau neitu a si. 3 Sikhalsehla zokhal cutiin a phuang duh lotu cu Pathian hnen ihsin a rami Thlarau neitu a si lo. A neihmi thlarau cu Khrih ih Ral hnen ihsin a rami a si. Khrih ih Ral cu a ra ding tiah nan thei zo ih atu hi leitlunah a ra thleng zo. 4 Sikhalsehla ka faale tla, nannih cu Pathian faate nan si; profet dik lo pawl tla nan neh zo, ziangahtile nan sungih a ummi Thlarau cu khawvel mi pawl sungih thlarau hnakin a cak sawn. 5 Profet dik lo pawl cun khawvel thuhla an sim ih khawvelmi in an thu cu an ngai, ziangahtile khawvelih ta an si. 6 Sikhalsehla kannih cu Pathian ta kan si. Pathian a theitu poh in kan thu an ngai; Pathian ta a si lomi cun kan thu an ngai lo. Cuticun thlarau dik le dik lo kan thleidan thiamnak cu a si. 7 Ka duhdawtmi tla, pakhat le pakhat duhdaw aw uh si, ziangahtile duhdawtnak cu Pathian hnen ihsin a rami a si. Mi a duhdawtu cu Pathian fa a si ih Pathian theitu a si. 8 Mi a duhdaw lotu cu Pathian a thei lo, ziangahtile Pathian cu duhdawtnak a si. 9 Pathian ih in duhdawtnak cu a Fapa neihsun hi leilungah hin run thlah in a langter ih amah thawngin nunnak kan conak dingah a si. 10 Duhdawtnak timi cu hiti in a si: Kanmah in Pathian kan rak duhdaw ti a si lo, amah sawn in in duhdaw ih a Fapa a run thlah; cumicu kan sualthlah raithawinak dingah a si. 11 Ka duhdawtmi tla, hi bangtuk in Pathian in in duhdawt a si ahcun kannih khal pakhat le pakhat duhdaw aw ve ding kan si. 12 Zohman in Pathian cu an mit in an hmu dah lo, sikhalsehla pakhat le pakhat kan duhdaw aw a si ahcun Pathian cu kan sungah a nung ih a duhdawtnak cu kan sungah a famkim a si. 13 A Thlarau kan hnenih in pek zo ruangah Pathian cu kan sungah a um ih kannih khal a sungah kan um, ti fiangtein kan thei. 14 Pa in a Fapa cu leitlun Runtu si dingah a run thlah, ti a hmutu le a simtu kanmah hi kan si. 15 Zokhal Jesuh cu Pathian Fapa a si ti a phuangtu cu Pathian sungah a um ih Pathian khal a sungah a um ve. 16 Cule kanmah rori in Pathian ih in duhdawtnak cu kan thei ih kan zum a si. Pathian cu duhdawtnak a si, cule duhdawtnak thawn a nungmi hmuahhmuah cu Pathian sungah a nungmi an si ih Pathian khal an sungah a nung ve. 17 Thuṭhennak Ni ah ralṭhatnak kan neihnak dingah duhdawtnak cu kan sungah a famkimter zo. Cule leilung tlunih kan nunnak cu Khrih nunnak bangtuk a si ruangah cuih ralṭhatnak cu kan nei rori ding a si. 18 Duhdawtnak sungah cun ṭihphannak a um lo; a famkimmi duhdawtnak in ṭihphannak cu a hlohter ṭheh. Curuangah ṭihphannak a neimi sungah cun duhdawtnak cu famkimin a um hrih lo, ziangahtile ṭihphannak cu hremnak thawn a pehtlai awmi a si. 19 Pathian kan duhdawt cu amah ih in duhdawt hmaisa ruangah a si. 20 Zokhal Pathian ka duhdaw ticing in a unau a huatu cu thuphanper a si. Ziangahtile a mit in a hmuhmi a unau hman a duhdawt lo a si ahcun a hmuh lomi Pathian cu a duhdaw thei hrimhrim lo ding. 21 Khrih ih in pekmi thukham cu hiti in a si: zokhal Pathian a duhdawtu cun a unau khal a duhdaw ve ding.
1 Zokhal Jesuh cu Messiah a si ti a zumtu cu Pathian fa a si. Cule zokhal sisehla an pa a duhdawtu cun a faale khal a duhdawt a si. 2 Pathian faale pawl kan duhdawt a si ti kan theihnak cu amah Pathian kan duhdawt ih a thupekmi kan thlunnak hin a si. 3 Ziangahtile Pathian kan duhdawt ti cu a thupekmi kan thlun tinak a si. A thupekmi cu kan hrangah thlun har a si lo, 4 ziangahtile Pathian fa a si mi poh in khawvel kha an neh thei. Cule kan zumnak thawngin kannih cu khawvel nehtu kan si. 5 Khawvel a nehtu cu zo so an si? Jesuh cu Pathian Fapa a si ti a zumtu pohpoh cu khawvel nehtu an si. 6 Ti le thisen thawn a rami cu Jesuh Khrih a si. Tidai thawn lawng in a ra lo, tidai le thisen ceem in a ra. Hitiin a ratnak cu a dikmi a si tiah Thlarau rori in a theihpi, ziangahtile Thlarau cu thutak a si. 7 Theihpitu pathum an um: 8 Thlarau le tidai le thisen an si ih an pathum in an theihpimi thu a bang aw a si. 9 Minungih thu theihpimi kan zum; cule Pathian ih theihpimi cu a thupi sinsin ih a Fapa thu a theihpimi cu amah rori in a langter zo. 10 Curuangah zokhal Pathian Fapa a zumtu cun amah ih thinlung sungah theihnak a nei a si; sikhalsehla Pathian a zum lotu cun, Pa in a Fapa thu a simmi a zum lo ruangah, Pathian kha thuphanper ah a canter. 11 Cutiih a theihtermi cu hiti in a si: Pathian in kumkhua nunnak in pe ih cuih nunnak cu a Fapa sungah a um. 12 Zokhal Fapa a neitu cu nunnak a nei; Pathian Fapa a nei lotu cu nunnak a nei lo. 13 Pathian Fapa a zumtu in kumkhua nunnak kan nei ti nan theihnak dingah hi cakuat hi nan hnenah ka ngan. 14 Kannih cu Pathian hmaiah ralṭhatnak kan nei, ziangahtile amah ih duhnak thawn mil-aw in kan dil ahcun kan dilnak kha in theih sak ṭheh a si, tihi fiangtein kan thei. 15 Amah kan dil tinten in theih sak; cule in theih sak ti kan theih ruangah kan dilmi hmuahhmuah in pe a si, ti khal kan thei. 16 Na unau pakhatkhat in thihpitlak a si lomi sualnak a tuah na hmuh ahcun Pathian hnenah thla cam sak awla Pathian in luatnak a pe ding. Himi cu thihpitlak a si lomi sualnak a tuahtu pawl hrangah a si. Sikhalsehla thihpitlak sualnak a um ih cumi a tuahtu pawl hrangah cun Pathian hnenah thla cam sak uh ka ti lo. 17 Thil tuah sualmi hmuahhmuah hi sualnak a si, sikhalsehla sualnak hmuahhmuah hi thihpitlak sualnak an si lo. 18 Pathian faate a si mi cu sualnak tuah vivo in a nung nawn lo ti kan thei, ziangahtile Pathian Fapa in a hum ih Satan in a siatsuah thei lo. 19 Leilung pumpi hi Satan kut hnuai ah a um; asinain kannih cu Pathian ta kan si ti kan thei. 20 Pathian Fapa cu a ra zo ih theihthiamnak in pek ruangah Pathian taktak kan thei, ti a fiang. A Fapa Jesuh Khrih thawn pehzomnak kan neih ruangah a dikmi Pathian thawn pehzomnak kan nei thei. Amah cu a dikmi Pathian a si ih kumkhua nunnak khal a si. 21 Ka faale tla, milem pawl cu va hrial uh.
1 Kawhhran upa keimah in ka duhdawtmi le upatmi Nu le a faale pawl nan hnenah hi ca ka lo kuat a si. Keimah lawng si loin thutak a theitu hmuahhmuah in an lo duhdawt a si. 2 Ziangtiin tile thutak cu kan sungah a um ih kumkhua in kan hnenah a um ding. 3 Pathian kan Pa le a fapa Jesuh Khrih, Pa ih Fapa, in zaangfahnak, ngilneihnak le daihnak cu in pe hram sehla thutak le duhdawtnak khal kan ta si ringring hram seh. 4 Kan Pa Pathian ih thu in pek bangtuk in na faale hrekkhat cu thutak sungah an um ti ka hmuh tikah ka lung a awizet. 5 Curuangah ka duhdawtmi le upatmi Nu, pakhat le pakhat duhdaw aw uhsi tiah ka lo dil. Hitiih ka nganmi hi thukham thar a si lo; a hramthok ihsin kan rak theihmi thukham a si. 6 Hi duhdawtnak ka timi cu Pathian thukham kan thlun a ṭul tinak a si. Cuih thukham cu, a hramthok ihsin nan rak theih zo bangtuk in, duhdawtnak thawn nan nung pei, ti a si. 7 Mibumtu tamzet leilung tlunah an thleng zo, Jesuh Khrih cu minung in a ra lo a si, a titu pawl an si! Cu bangtuk minung pawl cu mibumtu an si ih Khrih ih Ral an si. 8 Curuangah nan ṭuan sanmi nan hlohter lonak dingah le nan ṭuanman kha kimteih nan ngah theinak dingah ralringzet in um uh. 9 Zokhal Khrih thuzirhnak sungah um loin a hleifuan in a nungtu cu Pathian a nei lo. Sikhalsehla Khrih thuzirhnak sungih a umtu cu Pathian a nei ih a Fapa khal a nei a si. 10 Curuangah mi pakhatkhat nan hnenah a ra thleng ih hi thu zirhnak a keng lo a si ahcun nan inn ah thlenter hlah uh. "Na parah daihnak um seh," ti hman ti duh hlah uh. 11 Ziangahtile ṭhat lonak a tuahtu kha, "Daihnak na parah um seh," a titu cu ṭhat lonak a tuahmi sungah a tel ve a si. 12 Thu lo sim ding tamzet ka nei, sikhalsehla ca le cati cun ka lo sim lo pei. Kan lungawinak a famkim theinak dingah nan hnenah ra tlawng in pumpak in lo biak ka tum a si. 13 Nan duhdawtmi nan unau Nu ih faale in cibai an lo buk a si.
1 Kawhhran upa keimah in ka duhdawt zetmi Gaius na hnenah hi ca hi ka lo kuat. 2 Ka duhdawtmi ka rual, thlarau lamah damte in na um ti ka theih vekin ziang hmuahhmuahah harhdam le siarem ih na umnak dingah na hrangah thla ka cam; 3 Nang cu thutak sungah a um ringringmi na si bangtuk in thutak ah taimakin na um hrih ti thu Khristian unau pawl in in ra sim ih ka lung a awi ngaingai. 4 Ka faale pawl thutak sungah an nungcang ti ka theih hnakih ka lung i awitertu thu dang a um nawn lo. 5 Ka duhdawtmi ka rual, na Khristian unau hrang hna na ṭuan tikah, na theih dah lomi an si hmanah rin um zetin na ṭuan a si. 6 Duhdawtnak na neih zia cu hi tawk kawhhran hnenah an ra rel zo. Hmailam an feh hrihnak ding lamzin khalah Pathian lungtong zawng in rak bawm hrih aw. 7 Ziangahtile Khrih hnaṭuannak an lamzin an rak thok tikah zum lotu pawl hnen ihsin bomnak ziang hman la loin Khrih hnaṭuan an rak thok a si. 8 Curuangah thutak sungih an hnaṭuannak sungah kannih khal kan tel venak dingah kannih Khristian pawl in napi in kan bawm pei. 9 Kawhhran hnenah ca tawite ka ngan; asinain an hotu si a duhtu Diotrefes cun ka simmi cu ziang hmanah a siar lo ding. 10 Curuangah ka ra thlen tikah a tuahmi hmuahhmuah ka phuang thluh ding; kan thuhla siazet ih a relmi le thuphan a permi pawl ka langter ṭheh ding. Culawng a si hrih lo. Khristian unau pawl an ra tlawn tikah thlen-inn a on duh lo ih thlen-inn on a duhtu pawl hman kha a kham ih cupawl cu kawhhran sung ihsin phuar dingah a zuam ciamco a si. 11 Ka duhdawtmi ka rual, a ṭha lomi kha cawng hlah aw; a ṭhami cawng sawn aw. A ṭhami a tuahtu cu Pathian ta a si, a ṭha lomi a tuahtu cun Pathian a hmu lo. 12 Zozo khal in Demetrias an lawm; thutak hrimhrim khal in a lawm a si. Kanmah khal in cumi cu kan theihpi vemi a si ih kan simmi cu a dikmi a si ti na thei. 13 Thu lo sim ding tamzet ka nei, asinain cafung le cati thawn cun ngan ka duh lo. 14 Lo tlawn cing ka tum ih cunah hmaitonin ka lo sim leh ding. 15 Daihnak na parah um hram seh. Na rualpi pawl in cibai an lo buk. Kan rualpi pawl kha pumpak ciar in cibai in rak buksak aw.
1 Jesuh Khrih ih siahhlawh le Jeim ih nau keimah Juda in Pathian kawhmi, Pathian kan Pa ih duhdawtmi le Jesuh Khrih humhimnak sungih a ummi pawl nan hnenah hi ca ka lo kuat. 2 Pathian zaangfahnak le daihnak le duhdawtnak cu famkim zetin nan ta si hram seh. 3 Ka duhdawtmi unau tla, kan zatein kan pomtlaangmi rundamnak thu hi nan hnenah ca in ka thiam tawkin ka ngan; Pathian in a mithiang hnenah kumkhua daihin a pekmi zumnak thu ahhin taimak suah in ṭang uhla zuam uh tiah a hleice in ka lo forh duh a si. 4 Ziangahtile kan lakah Pathian ziangih a siar lotu pawl kan theih loin an lut ih an ziaza ṭha lomi thuh awknak ah Pathian zaangfahnak thuthang kha a pingpeng in an sim ih kan hrangah Bawi le Lal a si mi Jesuh Khrih kha an hnong. Hi bangtuk minung pawl cu siatralnak an tong ding tiah Ca Thianghlim in hlanlai ihsin a rak sim cia zo. 5 Bawipa in Israel mi pawl Izipt ram ihsin a suah ih neh hnuah a zum lotu pawl cu siatralnak ah a thlenter ti hi nan theih ṭheh ciami a si ko na'n nan theih sal dingah ka duhmi a si. 6 An thuneih theinak sungah um duh loin an umnak hmun a tlansantu vancungmi pawl kha ciing ringring uh. Annih cu leilung thuai khawthim sungah kumkhua in thir cikcin in khih an si ih a maksakmi Ni ah Pathian in an thu a ṭhen leh hai ding. 7 Cuih vancungmi vek thothoin Sodom le Gomorrah khua le a kiangkap khua pawl in nupa sualnak an tuah ih an tisa hiarnak an riamter ti kha hngilh hlah uh: annih pawl ih kumkhua meisa ih hremnak an tuarmi kha mi hmuahhmuah hrangah ralrin peknak a si ti a fiang a si. 8 Cubangtuk ṭhiamṭhiam in tuihsan minung pawl khal an si: hmuhnak kan nei an ti ih an taksa an borhhlawhter; Pathian thuneihnak kha an nautat ih vanih a ummi mi sunglawi pawl an zawmtai. 9 Vancungmi lakih a upa bik Mikhael hman in cubangtuk in a tuah lo. Moses ih ruak zo in a co ding tiah Satan thawn thu an el awk tikah nautatnak ṭongkam thawn Satan cu a camriam ngam lo; "Bawipa in a lo kawk!" tiah a ti meen a si. 10 Sikhalsehla hi minung pawl cun an theih thei lomi thu poh kha nautatnak thawn an relsiat. Cule ramsa bangtuk in an taksa duhnak in an theih theimi thil pawl cu anmah lala siatsuahtu ah an cang. 11 An hmakhua a va pit so! An thlunmi cu Kain ih a rak thlunmi lamzin a si. Paisa duh ruangah Balaam ih a rak tuahmi sualnak ah an taksa pum an pe aw. Korah vekin ral an tho ih Korah bangtuk in siatralnak ah an thleng ve a si. 12 Pawlkomnak rawl nan eitlaang tikah ningzahnak malte hman nei loin an ei an in ruangah a lo hmelsia tertu an si. Anmah ih zawn lawng an ruat. Thli in a zuanpi rero na'n ruahti a zawi lomi khawdur bangtuk an si. Fur hmanah rah a nei lomi thingkung bangtuk an si; a hramih phawi suak ih a thi ngahmi thingkung bangtuk an si. 13 Òihnungza tisumsuar bangtuk an si; ningzakza an ziaza ṭha lo cu tiphuul bangin an phuan burhbo; arsi zuang bangtuk an si ih a thuk bik khawthimnak hmunah kumkhua an umnak dingah Pathian in umnak a ngaihtuah sak zo. 14 Adam ihsin sanruknak a si mi Enok in himi pawl thuhla hi a rak sim cia zo. "Pathian cu a vancungmi, mithiang thawng tampi thawn, 15 mi hmuahhmuah thuṭhen dingah le Pathian ṭihzahnak zianghman nei loin thil a tuahtu hmuahhmuah le Pathian upatnak zianghman nei lo misual pawl in tuksumza ṭongsiava thawn Amah a relsiattu pawl an thu ṭhen dingah a ra ding a si," a ti. 16 Himi pawl cu an phunzai ringring ih catloin midang an relsia, a ṭha lomi an tisa duhnak an thlun; anmah le anmah an khaisaang aw ih an thuthu in ziang hmuahhmuah a feh theinak dingah midang an porh ciamco. 17 Sikhalsehla ka duhdawtmi tla, kan Bawipa Jesuh Khrih ih tirhthlah pawl in an rak lo zirhnak kha ciing ringring uh. 18 Nan hnenih an simmi cu, Ni netnak a thlen tikah nanmah a lo hnihsantu le Pathian ṭihzahnak nei loin anmah ih tisa duhnak a thluntu an suak ding," tihi a si. 19 Himi pawl cu ṭhenṭheknak a suahtertu le tisa duhnak ih a ukmi le Thlarau a nei lotu an si. 20 Asinain nannih ka duhdawtmi pawl cu a thianghlimmi nan zumnak parah ṭhangso vivo uh. Thlarau Thianghlim cahnak thawn thla cam uhla, 21 kan Bawipa Jesuh Khrih in a zaangfahnak thawn kumkhua nunnak a lo pek ding ni nan hngah laiah hin Pathian ih duhdawtnak sungah hmun ringring uh. 22 Rinhmainak a neimi parah zaangfahnak nei uh; 23 midang pawl kha meisa sung ihsin suah uhla rundam suak uh; cule a dang pawl parah zaangfahnak le ṭihnak langter uh, sikhalsehla an tisa hiar sualnak in a hnawihnihmi an hnipuan pawl cu hua uh. 24 Tlu suak loin a lo kilkhawi ih sualmawhnak nei loin lungawinak thawn a sunglawimi a umnak ah a lo thlenter theitu, 25 amah lawng kan Pathian le Runtu a si mi hnen ahcun, kan Bawipa Jesuh Khrih thawngin a cem ciami caan ah siseh, atu le hmailam caanah siseh, sunlawinak, thawmliannak, cahnak le thuneihnak cu kumkhua in kumkhua tiang um camcin hram seh. Amen.
1 Hi thu hi Jesuh Khrih ih a phuanmi a si. A ra thleng cing dingmi thil kha a siahhlawh pawl hnenih langter dingah Pathian in a hnenih a hmuhtermi a si. Cumi cu Khrih in a vancungmi pakhat thlah tahratin a siahhlawh Johan hnenih a theihtermi a si. 2 Cule Johan in a hmuhmi hmuahhmuah cu a sim ṭheh. Pathian hnen ihsin a rami thuthang le Jesuh Khrih ih a langtermi thutak cu Johan in hi bangtuk in a sim. 3 Hi cabu a siartu le profet thusimmi a theitu le hi cabu sungih a ummi a thluntu pawl cu mi lungawi an si. Ziangahtile hi thu pawl a kimnak tikcu a nai zo. 4 Asia peng sungih a ummi kawhhran pasarih hnenah keimah Johan in thu ka lo cah: Atuih canah a ummi le a rak um zomi le hmailam khalah a um lai dingmi Pathian le a bawi tokham hmaiih a ummi thlarau pasarih le, 5 rintlak a si mi thutheitu, hrin hmaisa bik a si mi Fapa, thihnak ihsin thawhtersal a si mi leilung siangpahrang pawl uktu Jesuh Khrih in zaangfahnak le daihnak lo pe hram seh. Kannih in duhdawt ih a thihnak thisen thawngin kan sualnak ihsin in luatter zo. 6 Puithiam bangin a siangpahrang uknak sungah Pathian le a Pa riantu si dingah kannih cu in tuah zo. Curuangah sunlawinak le huham cu Jesuh Khrih hnenah kumkhua in um ko seh. Amen. 7 Zoh uh! Khrih cu mero thawn a ra ding ih mi hmuahhmuah in an hmu ding; amah a suntu pawl khal in an hmu ding. Leilung tlun minung hmuahhmuah an ṭap-ai ding. Cutiin a si hrimhrim ding. Amen. 8 Bawipa Pathian in, "Keimah cu Alfa le Omega ka si," a ti; Amah cu atuih a ummi le a rak um zomi le hmailam khalah a um lai dingmi Ziangkimtithei a si. 9 Keimah cu nan unau Johan, Jesuh a thluntu ka si ih Khrih uknak sungih a telmi pawl parih a rathlengmi harsatnak nan tuarmi khal a tuar vemi ka si. Pathian thu le Jesuh ih phuanmi thutak ka sim ruangah Patmos tikulh ah in ret. 10 Bawipa Ni ah Thlarau in i zeel ih ka dunglam ihsin tawtawrawt vekin a ring zetmi aw thawm ka thei. 11 "Na hmuhmi hi ca sungah ngan awla Efesa, Smarna, Pergamum, Thiatira, Sardis, Filadelfia le Laodisia khua pasarih ih a ummi kawhhran pasarih hnenah kuat aw," tiah i ti. 12 Cutiih i titu cu zoso a si tiah ka her ih ka zoh tikah sui meisa vannak tung pasarih ka hmu. 13 Cuih meisa vannak tung pasarih lakah milai a bang zetmi pakhat a ding ih a kebeu tiang angki fual hrukin sui ṭaangkap a ṭaangah a kap ka hmu. 14 A sam cu tuuhmul le vur bangtuk in a rang. A mit cu meiling bangin a vaam. 15 A ke cu somei sungih an thianter hnuah an hnawtfaimi dar vekin a tle. A aw cu tipilian tlasuar thawm bangtuk a si. 16 A vorhlam kut in arsi pasarih a keng ih a ka sung ihsin kaphnih hriam ralnam pakhat a suak. A mithmai cu sun laitakih ni bangin a tleu. 17 Cutiin ka hmuh tikah mithi bangin a kehram ah ka ril. A vorhlam kut in i run tham ih, "Òih hlah aw! Keimah cu a hmaisa bik le a neta bik ka si. 18 A nungmi khal ka si. Ka rak thi na'n atu-ah kumkhua hrangin ka nung sal zo. Thihnak le mithi khua tlunah thuneitu ka si. 19 Curuangah na hmuhmi thil pawl, atuih a ummi le hmailamih a um lai dingmi thil pawl hi ngan aw. 20 Ka vorhlam kutih na hmuhmi arsi pasarih le sui mei vannak tung pasarih ih tican thuthup cu hi bangtuk in a si. Arsi pasarih cu kawhhran pasarih ih vancungmi an si ih mei vannak tung pasarih cu kawhhran pasarih an si," tiah a ti.
1 "Efesa kawhhran ih vancungmi hnenah hiti in ngan aw: A vorhlam kutah arsi pasarih kengin sui mei vannak tung pasarih lakih a tawivak rerotu ih thucahmi cu hi bangtuk in a si: 2 Na hnaṭuanmi ka thei; taima zetih hna na ṭuan zia le thinsau zetih na um zia khal ka thei. Cun miṭha lo pawl na zawi-eet thei lo zia le dungthluntu si lo cingih dungthluntu ka si a titu pawl na hniksak ih thuphanper an si zia na hmuhsuahnak thu pawl ka thei ṭheh. 3 Na thin a sau ih keimah ih ruangah na tuar; asinain na bei a dong lo. 4 Sikhalsehla mawhthluk ding pakhat ka lo nei: a hramthokih duhdawtnak na neihmi kha na nei nawn lo. 5 Na tlaknak a san zia hi ruathnik. Na sual sir awla a hmaisaih na tuahmi kha tuah sal aw. Na sualnak na tlansan lo a si ahcun ka ra ding ih na mei vannak tung hmun dangah ka ṭhawn ding. 6 Asinain porhtlak na sinak pakhat a um. Nikolas a thluntu pawl ih hnaṭuannak cu keimah ih ka huat tlukin na hua ve a si. 7 "Theihnak hna nan neih asile Thlarau in kawhhran hnenih a simmi hi ngai uh. "Nehtu a si mi hnenah Pathian Hmuan sungih a khomi nunnak thingrah ei theinak thu ka pe ding," a ti. 8 "Smarna kawhhran ih vancungmi hnenah hiti in ngan aw: a hmaisa bik le a neta bik a si mi, a thi ih a nung salmi ih thucahmi cu hi bangtuk in a si. 9 Harsatnak na tuarmi pawl ka thei. Mifarah na si khal ka thei: sikhalsehla na lian a si. Judah mi kan si an ti na'n a si ngaingai lomi pawl ih an lo relsiatnak ka thei. Annih cu Satan ta an si. 10 Harsatnak na tuar dingmi kha zianghman ṭih hlah. Ngaihnik! Satan in a lo hniksak ding ih ṭhenkhat cu thawngah thlak nan si ding. Cule nan harsatnak cu nihra a rei ding. Thihnak tuar ding a si hmanah ka hrangah rinsan tlak in um uhla nan neh man ah nunnak suilukhuh ka lo pe ding. 11 "Theihnak hna nan neih asile Thlarau in kawhhran hnenih a simmi hi ngai uh. "Nehtu pawl cu voihnih thihnak in a siatsuah lo ding," a ti. 12 "Pergamum kawhhran ih vancungmi hnenah hiti in ngan aw: ralnam kaphnih hriam a neituih thucahmi cu hi bangtuk in a si. 13 Na umnak hmun cu ka thei: Satan in a bawi tokham a retnak hmunah a si. Ka hrangah rintlak in na nung ih Satan umnak hmunah rintlak ka thu theitu Antipas an thah lai hmanah ka parih rinsannak na neihmi cu na ṭhin cuang lo. 14 Sikhalsehla na parah lungkim lonak malte ka nei: nanmah lakah Balaam thuzirhnak a thluntu mi ṭhenkhat an um. Milem hnenih pekmi rawl einak le nupa sualtuahnak in sualnak sungih Israel mi pawl luhpi dingah Balaam in Balak kha a rak fial. 15 Cuvek thothoin Nikolas a thluntu pawl ih thuzirhnak a pomtu khal nan lakah an um. 16 Cuti a si ruangah hi bangtuk sualnak ihsin kir sal uh. Nan kir sal lo asile nan hnenah zamrangin ka ra ding ih cumi pawl cu ka kaa sung ihsin a suakmi ralnam thawn ka do ding a si. 17 "Theihnak hna nan neih asile Thlarau in kawhhran hnenih a sim mi hi ngai uh. "Nehtu pawl cu thuh-mi Manna sang ṭhenkhat ka pe ding. Cuih tlunah lung raang pakhat fingfing in ka pe ding ih cuih lung raang parah cun a cotu lawngih theihmi an hmin thar ngan in a um fingfing ding," tiah a ti. 18 "Thiatira kawhhran ih vancungmi hnenah hiti in ngan aw: a mit meisa bangin a alh-mi le a ke cu hnawtfaimi daar vekin a tleumi Pathian Fapa ih thucahmi cu hi bangtuk in a si. 19 Na hnaṭuanmi ka thei. Duhdawtnak na neih zia, rinsantlak na si zia, hna na ṭuan zia le thinsaunak na neih zia ka thei ṭheh. A hmaisa hnakin atu-ah tam sawn in hna na ṭuan ti khal ka thei. 20 Asinain ka lo mawhthluknak pakhat a um: Pathian ih thlahmi profet ka si a ti awtu nunau Jezebel na zawi-eet theinak hi a si. Jezebel in ka minung pawl a hruaisual ruangah nupa sualnak an tuah ih milem hnenih pekmi rawl tla an ei. 21 Thinlung sir awknak tikcu ka pek, asinain a nunsualnak lamzin ihsin a kir duh lo. 22 Curuangah natnak thawn ihkhun ah ka thlenter ding ih nupa sualnak a tuahpitu pawl thawn tuksumza harsatnak an tuar ding. Amah thawn an tuahmi sualnak ihsin an sir awk lo ahcun hi tuarnak pawl hi atu rori-ah an parah ka thlenter ding. 23 Amah a thluntu pawl khal ka that ding ih cuticun kawhhran hmuahhmuah in minung ruahnak le tumtahmi a thei ṭhehtu ka si zia hi an thei ding. Cule zozo khal nan tuahmi vekin a man nan ngah ding. 24 "Sikhalsehla Thiatira khua ih a ummi midang pawl cun hi zirhnak ṭha lo hi nan thlun lo ih midang in, 'A thukmi Satan thuthup,' an timi cu nan thei lo. Nan hnenih ka sim duhmi cu: nan parah thilrit bet ka tum lo; 25 nan pom ciami hi ka rat hlan tiang thlah hlah uh, tihi a si. 26 Nehtu pawl le tuah hai seh tiih ka duhmi a net tiang a tuahtu pawl cu ka Pa hnen ihsin ka ngahmi thuneihnak kha an hnenah ka pe ve ding. Miphun dangdang tlunih uknak thu an hnenah ka pe ding; thirfung thawn uk theinak le tlak beel khuai bangih miphun dang pawl khuaiparh theinak thu an hnenah ka pe ding. Cun deirel arsi khal ka pe ding. 29 "Theihnak hna nan neih asile Thlarau in kawhhran pawl hnenih a sim mi hi ngai uh," tiah a ti.
1 "Sardis kawhhran ih vancungmi hnenah hiti in ngan aw: "Pathian ih thlarau pasarih le arsi pasarih a neituih thucahmi cu hi bangtuk in a si. Na hnaṭuanmi ka thei; a nungmi kawhhran tiah na hmin a thangzet na'n na thi a si. 2 Curuangah ṭhangharh awla na neih hrihmi kha a thih ngah hlanah thazaang a thar in la sal aw. Ziangahtile hna na ṭuan ciami hi Pathian hmaiah an famkim hrih lo tiin ka hmu. 3 Curuangah an lo zirhmi le na theih ciami pawl kha hngilh hlah aw; a thlun tum awla na sualnak ihsin kir sal aw. Na ṭhangharh lo a si ahcun rukru bangin na hnenah ka ra ding ih ka rat tikcu hman na thei lo ding. 4 Sikhalsehla Sardis khua ih a ummi lakah mi malte cun nan hnipuan thiangfai zetin nan re a si. Puan rang hrukin keimah thawn nan feh ding, ziangahtile cutiih feh tlak nan si. 5 Nehtu pawl cu cubangtuk in puan rang an hruk ding ih nunnak cabu sung ihsin an hmin ka phiat lo ding. Ka Pa le a vancungmi pawl hmaiah 'Ka ta an si,' tiah langhngan in ka sim ding. 6 "Theihnak hna nan neih asile Thlarau in kawhhran pawl hnenih a simmi hi ngai uh," tiah a ti. 7 "Filadelfia kawhhran ih vancungmi hnenah hiti in ngan aw: "A thianghlimmi le a dikmi-ih thucahmi cu hi bangtuk in a si. Amah cu David tawh a neitu a si ih sangka a onmi cu zohman in an khar thei lo ding; cule a kharmi cu zohman in an ong thei lo ding. 8 Na hnaṭuanmi ka thei; na thazaang a mal ti khal ka thei. Asinain ka thuzirhmi na thlun ih ka hmaiah rinsan tlak in na um. Na hmaiah sangka ka ong ih zohman in an khar thei lo ding. 9 Ngaihnik! Judah mi kan si, an ti na'n a si taktak lomi thuphanper pawl, Satan minung pawl cu na hnenah ka ratter dingih na hmaiah an kun ding. Ka lo duhdawt hi an zatein an thei ding. 10 Ka thupekmi bangtuk in thinsau in harsatnak na tuar thei ruangah leilungtlun mi hmuahhmuah hniksak dingah a ra thleng dingmi harsatnak sung ihsin ka lo humhim ding. 11 Ka ra cing ding. Nehtu na si ruangih na ngah dingmi laksawng cu zohmanih an lo lon theilonak dingah na neih ciami cu kil ṭha aw. 12 Nehtu cu ka Pathian ih biakinn sungih ṭhuam ah ka tuah ding ih cuih biakinn cu a tlansan nawn lo ding. Ka Pathian ih hmin cu a parah ka ngan ding; Jerusalem khua thar, ka Pathian ih khawpi hmin khal a parah ka ngan ding. Cuih khawpi cu vancung ihsin ka Pathian hnenin a rung ṭum dingmi a si. Cule ka hmin thar khal a parah ka ngan ding. 13 "Theihnak hna nan neih asile Thlarau in kawhhran pawl hnenih a simmi hi ngai uh," tiah a ti. 14 "Laodisia kawhhran ih vancungmi hnenah hiti in ngan aw: A hminah Amen a si mi, rinsantlak le theitudik a si ih Pathian ih siammi hmuahhmuah ih hramthawhnak a si mi-ih thucah cu hi bangtuk in a si. 15 Na hnaṭuanmi ka thei. A daih khal na dai lo, a sat khal na sa fawn lo, ti ka thei. Na daih asile dai lawlaw aw, na sat asile sa lawlaw aw, ti ka duh. 16 A daih le dai si lo, a sat le sa si lo; a hlum fangfang na si ruangah ka ka sung ihsin ka lo khak suak ding. 17 Nangmah cun, 'Ka lian ih mi neinung ka si; zianghman tlaksammi ka nei lo,' na ti aw. Sikhalsehla mizonzai le zangfakza na si zia na thei aw lo. Na farah, lawngfangkheh in na um ih na mit a caw. 18 Thu ka lo sim duhmi cu, sui ngaingai ka hnen ihsin lei awla cuticun na lian ding. Na thuam awknak ah hnipuan rang lei awla, ningzakza lawngfangkheh ih na um kha hup aw. Na mit hrangah mitna sii khal lei awla cuticun khua na hmu ding. 19 Ka duhdawtmi pawl cu ka kawk ih ka hrem a si. Curuangah taimak suah in um awla na sualnak sir aw. 20 Ngaihnik! sangka kiangah ka ding ih ka king. Zokhal ka aw a thei ih sangka i ontu cu a innah ka lut dingih a hnenah rawl ka ei ding; cule anih khal keimah thawn a ei ve ding. 21 Nehtu ka si zo ih atu-ah ka Pa ih bawi tokham parah ka Pa kiangih ka to vekin nehtu a si mi pawl cu ka bawi tokham parah ka kiangah to theinak thu ka pe ding. 22 "Theihnak hna nan neih asile Thlarau in kawhhran pawl hnenih a simmi hi ngai uh," tiah a ti.
1 Cuih hnuah ka hun zoh ih langnak dang ka hmu sal ih vancungah sangka a ong awmi pakhat ka hmu. Cule a hmaisa-ih ka theihmi tawtawrawt bangtuk ih a ringmi aw kha ka thei ih, "Hi tawkah hung awla himi ṭheh in a ra thleng dingmi ka lo hmuh ding," tiah cuih aw cun i ti. 2 Cule Thlarau in hmakhatte-ah i zeel. Vancung ahcun bawi tokham pakhat a um ih cuih tokham parah mi pakhat a to. 3 A mithmai cu a hringmi jasper lungmankhung le a senmi karnelian lungmankhung bangtuk in a tleu; a bawi tokham kiangkap cu a hringmi emerald lungmankhung bangtuk vangro in a kulh. 4 A bawi tokham kimvelah a dang bawi tokham kul hluanli an um ih cuih tokham parah puan vaar a sinmi le suilukhuh a khumtu upa kul hluanli an to. 5 Cuih bawi tokham ihsin nimthla a kau zukzo ih khawri thawm a thang durdo. Cule bawi tokham hmaiah cun meisa vanmi pasarih a um ih, cuih meisa vanmi pasarih cu Pathian ih thlarau pasarih an si. 6 Bawi tokham hmaiah cun tikhal bangin a tlemi thlalang tifinriat bangtuk khal a um. Cuih bawi tokham kimvelah thilnung pali an um ih dunglam hmailam in mit in an khat ṭheh. 7 Thilnung pakhatnak cu kiosa a bang; a pahnihnak cu cawcang a bang; a pathumnak cu minung mithmai a bang ih a palinak cu a zammi mupi a bang. 8 Thilnung pali cu thla paruk ciar an nei ih cuih thla cu a sunglam a lenglam in mit in an khat ṭheh. Sun le zan cat loin hla an sak ih, Thianghlim, thianghlim, thianghlim, Ziangkimtithei Bawipa Pathian; A rak um zomi le atu-ah a ummi le hmailam khalah a umlai dingmi a si, tiah an sak. 9 Thilnung pali in bawi tokham parah a to ih kumkhua in kumkhua tiang a nungmi hnenah sunlawinak le upatnak le lungawinak hla an sak. 10 Cubangtuk ih hla an sak tikah bawi tokham parih a totu hmaiah cun an kun ih kumkhua in kumkhua tiang a nungmi cu an biak. An sui lukhuh cu bawi tokham hmaiah cun an ṭhum ih: 11 "Kan Bawipa le kan Pathian, Nang cu sunlawinak le upatnak le huham co tlak na si. Ziangahtile nang cun ziang hmuahhmuah na tuah ih na thu in siam mi le nunter mi an si," tiah an ti.
1 Bawi tokham parih a tomi in cazual pakhat a vorhlam kut in a ken kha ka hmu. Cuih cazual cu a sunglam le lenglam in nganmi a si ih tacik pasarih ih khenmi a si. 2 Cule vancungmi pakhat a cak zetmi ka hmu ih aw ring zetin, "Hi tacik khenmi siatbal tahratin cazual ong dingah a tlakmi zoso a um?" tiah a au. 3 Asinain cuih cazual ong tahratin a sung a zoh theitu vancungah siseh, leitlunah siseh, leihnuai khalah siseh, zohman an um lo. 4 Cutiin cazual a ongtu ding tlak le a sung a zohtu ding tlak zohman an um lo ka hmuh tikah napiin ka ṭap. 5 Cutikah upa pakhat in, "Òap hlah. Zohhnik! Judah phun sung ihsin a rami Kiosa tiih kawhmi, David ih tefa misunglawi tiih kawhmi cu nehtu a si zo ih tacik pasarih cu a siatter dingih cazual cu a ong ding," tiah i ti. 6 Cule Tuufa pakhat, bawi tokham laifangah a ding ih thilnung pali le upa pawl in an kulh kha ka hmu. Cuih Tuufa cu thah ciami a bang. Ki pasarih le mit pasarih a nei ih cuih mit pasarih cu leilung tlun khuazakip ah a thlahmi Pathian ih thlarau pasarih an si. 7 Tuufa cu a va feh ih bawi tokham parih a tomi-ih vorhlam kut ihsin cazual cu a lak. 8 Cutiih a lak ṭheh vete in Tuufa hmaiah cun thilnung pali le upa kul hluanli cu an bok. Òingṭang pakhat ciar le rimhmui in a khat mi sui kheng pakhat fingfing an keng ih cuih rimhmui cu Pathian minung pawl ih thlacamnak a si. 9 Hla thar an sak ih: "Nangmah cu cazual latu dingah le tacik phoihtu dingah na tlak a si. Ziangahtile thahnak na tuar zo ih, na thihnak thawngin phunkip hnamkip le ṭongtin hrintin ihsin Mi tampi Pathian hrangah na lei zo a si. 10 Kan Pathian riantu dingah puithiam phun le siangpahrang uknak ah annih cu na tuah zo ih annih in lei tlun an uk ding," tiah an ti. 11 Ka zoh sal tikah a thawng sawm a thawng za, a siar ih siar cawk lo vancungmi pawl ih aw thawng ka thei. Bawi tokham le thilnung pali le upa pawl ih kimvelah an ding ih, 12 ring zetin hla an sak ih: "Thah a tuartu Tuufa cu huham le lennak, fimnak le cahnak, Hminthannak le sunlawinak le thangṭhatnak co tlak a si," tiah an ti. 13 Cule vancungah siseh, leitlun le leihnuai khalah siseh, ti sungih a ummi khal in siseh, lei le van ih nunnak thaw a neimi hmuahhmuah in: "Bawi tokham ih a totu le Tuufa hnenah thangṭhatnak le upatnak, Sunlawinak le cahnak cu a kumkhua in um ko seh," tiah hla an sak. 14 Cule thilnung pali in, "Amen," an ti tikah Upa pawl cun an bok ih an biak.
1 Cule Tuufa in tacik pasarih lakah pakhat a phoih kha ka hmu ih thilnung pali lakih pakhat in, a aw khuari thawm bangin, "Ra," tiah a ti ka thei. 2 Ka zoh ih rang raang pakhat ka hmu. A parih a totu cun li pakhat a keng ih bawi lukhuh khal an pek. Mi nehtu in neh dingih a feh bangin a feh. 3 Cule Tuufa in tacik pahnihnak a phoih ih thilnung pahnihnak in, "Ra," a ti kha ka thei. 4 Rang dang pakhat a ra suak ih rang sen a si. A parih a totu hnenah leilung tlunah pakhat le pakhat thah awknak ral thok dingin thu an pek. Ralnam tumpi khal an pek. 5 Cule Tuufa in tacik pathumnak a phoih ih thilnung pathumnak in, "Ra," a ti kha ka thei. Ka zoh ih rang dum pakhat ka hmu. A parih a totu in cuai thlainak zaazu pakhat a kut in a keng. 6 Thilnung pali lak ihsin aw bangtuk thawng ka thei ih, "Nikhat hlawhman ah sangvut pawng khat, ni khat hlawh manah barli pawng thum. Asinain olif thingkung le sabit hmuan cu siatsuah hlah," a ti. 7 Cule Tuufa in tacik palinak a phoih ih thilnung palinak in, "Ra," a ti kha ka thei. 8 Ka zoh ih rang a tisa a raammi pakhat ka hmu. A parih a totu cu a hminah Thihnak a si ih Hell in a dunglam naihte ihsin a thlun. Anmah tla cu leilung mi ih ṭhenli ṭhenkhat kha raldonak, paamnak, natnak le sahrang ih tuahmawhnak in thah dingah thu pekmi an si. 9 Cule Tuufa in tacik panganak a phoih. Pathian thu an sim ruangah le rintlak zetin an phuan ngam ruangih thah a tongtu pawl ih thlarau cu biakṭheng hnuai ah ka hmu. 10 Ring zetin an au ih, "A thianghlimmi le a dikmi Cungnungbik Bawipa, leilung tlun minung kan thisen a luantertu pawl hi ziangtik tiangso phuba la lo le hrem loin na zuah ding?" an ti. 11 Annih pawl cu puan rang pakhat ciar pek an si ih, "Nanmah bangin thah a tuar dingmi nan unau le nan siahhlawhpi pawl an kim hlan lo caan malte sung cawl hrih uh," tiah an sim. 12 Cule Tuufa in tacik paruknak a phoih khi ka hmu. Nasa zetin ling a hnin ih ni cu puansia dum vekin a dum ih thlapi cu thisen bangin a sen ṭheh. 13 Cule arsi tla cu thlipi in theikuh a sem thlak vekin leilung ah an tla. 14 Van cu cazual vekin a zual aw hlo ih tlang le tikulh hmuahhmuah cu an umnak hmun ihsin an ṭhawn ṭheh. 15 Cule leilung tlun siangpahrang pawl le ram uktu pawl le ralbawi pawl, milian le thuneitu pawl le midang hmuahhmuah, sal le miluat thawn, lungkua sung le tlangpar lungpuk hnuai ah an relh. 16 Tlang le lungpi pawl hnenah, "In nen uhla bawi tokham ih a totu mithmai le Tuufa thinhengnak ihsin in thup hram uh. 17 An thinhengnak a thlen ni, tuksumza ni a thleng zo ih zoso a tuar thei ding?" tiah an au.
1 Cuih hnuah leilung kil li ah a dingmi vancungmi pali ka hmu. Cuih vancungmi pali in leilung parah le tifinriat ah le thingkung ah thlipi hrang lo dingin an kham. 2 Nisuah lam ihsin a nungmi Pathian ih hminsinnak tacik a kengtu dang vancungmi pakhat a hung suah khi ka hmu. Pathian in leilung le tifinriat siatsuah theinak thu a pekmi vancungmi pali kha aw ring zetin a hei ko. 3 Vancungmi cun, "Kan Pathian ih siahhlawh pawl an cal ih hminsinnak tacik khen an si ṭheh hlan ahcun leilung le tifinriat le thingkung pawl siatsuah hrih hlah uh," tiah a ti. 4 Cule Pathian hminsinnak tacik in an cal ih khen ciami pawl cu thawng za le thawng sawmli le thawng li an si, tiah in sim. Cumi cu Israel miphun hleihnih sungin an si. 5 Judah hrin in thawng hleihnih, Reuben hrin in thawng hleihnih, Gad hrin in thawng hleihnih, 6 Asher hrin in thawng hleihnih, Naftali hrin in thawng hleihnih, Manasseh hrin in thawng hleihnih, 7 Simeon hrin in thawng hleihnih, Levi hrin in thawng hleihnih, Issakhar hrin in thawng hleihnih, 8 Zebulun hrin in thawng hleihnih, Josef hrin in thawng hleihnih, Benjamin hrin in thawng hleihnih an si. 9 Cuih hnuah ka hun zoh ih mipi tamzet ka hmu; zohmanih siarcawk lo miruunpi an si. Annih cu phun kip, hnam kip, le hrin kip ṭong kip ihsin a rami an si ih bawi tokham le Tuufa hmaiah an ding; puan rang an hruk ih an kut in ṭhulhfau hnah an keng fingfing. 10 "Rundamnak cu bawi tokham parih a totu kan Pathian le Tuufa hnen ihsin a ra," tiah ring zetin an au. 11 Vancungmi hmuahhmuah cu bawi tokham le upa pawl le thilnung pali kimvelah an ding. Bawi tokham hmaiah an bok ih Pathian an biak; 12 "Amen! Thangṭhatnak, sunlawinak, fimnak, lungawinak, upatnak, huham le cahnak cu kumkhua in kan Pathian ta si ko seh, Amen!" tiah an ti. 13 Upa kul hluanli lakih pakhat in, "Hi puan rang a sintu pawl hi zoso an si? Khuitawk in so an ra?" tiah i sut. 14 "Bawipa, ka thei lo. Nang na thei sawn ding," tiah ka ti. Cule anih in, "Himi pawl cu hremnak nasazet sung ihsin himdam in a ra suakmi an si. An puan cu Tuufa thisen sungah an sawp ih an vaar ter zo. 15 Curuangah Pathian ih bawi tokham hmaiah an ding ih biakinn sungah a hnaṭuan cu a sun a zan in an ṭuan. Bawi tokham parih a totu in a umpi ding ih cuih a umpinak cu an himnak a si ding. 16 An ril a rawng nawn lo ding ih an ti khal a haal nawn lo ding; ni in a ling hai lo ding ih vansaanglam thawsat khal an tuar lo ding. 17 Ziangahtile bawi tokham laifangih a ummi Tuufa cu anmah khaaltu a si ding ih nunnak petu cerhti umnak ah a hruai hai ding. Cule an mitthli hmuahhmuah cu Pathian in a hnul sak ṭheh ding a si," tiah a ti.
1 Tuufa in tacik pasarihnak a phoih tikah vancungah nazi hrek sung hrawng thawthaang zianghman um loin a dai ṭhepṭhep. 2 Cule Pathian hmaiih a dingtu vancungmi pasarih kha ka hmu ih an hnenah tawtawrawt pasarih an pek. 3 A dang vancungmi pakhat, rimhmui urnak kheng a kengtu, a ra ih biakṭheng kiangah a ding. Pathian minung pawl ih thlacamnak thawn pek cih dingah le bawi tokham hmaiih a dingmi sui biakṭheng parih pe dingah cuih vancungmi hnenah cun rimhmui tampi an pek. 4 Pathian hmaiih a dingtu vancungmi ih kut ihsin rimhmui urnak meikhu cu Pathian minung pawl ih thlacamnak thawn an kai tlaang. 5 Cule vancungmi in rimhmui urnak kheng cu a lak ih biakṭheng ih meisa vaam thawn a khahter hnuah leilungah a hlon. Cuvete in khua a ri, ṭeek a tla, nimthla a kau ih ling a hnin. 6 Cule vancungmi pasarih cu an tawtawrawt pasarih tum dingah an tiar aw cia. 7 Vancungmi pakhatnak in a tawtawrawt cu a tum ih thisen thawn a rawi awmi rial le meisa cu leilung ah ruah bangin a sur ciamco. Leilung ṭhenthum ṭhenkhat a kang ṭheh, thingkung ṭhenthum ṭhenkhat a kang ṭheh ih hrampi hring cu a zatein an kang ṭheh. 8 Vancungmi pahnihnak in a tawtawrawt a tum ih a alh hluahhlomi meitlang tumpi vek thil pakhat khi tifinriat sungah an vun hlon. Cutikah tifinriat ṭhenthum ṭhenkhat cu thisen ah a cang ṭheh. 9 Tifinriat sung thilnung ṭhenthum ṭhenkhat an thi ih tangphawlawng ṭhenthum ṭhenkhat an siat ṭheh. 10 Vancungmi pathumnak in a tawtawrawt a tum. Meifar bangin a alh hluahhlomi arsi tumpi pakhat cu van ihsin tiva le cerhti pawl ṭhenthum ṭhenkhat parah a tla. 11 Cuih arsi hmin cu, "A Kha," ti a si. Tidai ṭhenthum ṭhenkhat cu tikha ah a cang ih cutiih a khaat ruangah cuih ti a intu mi tampi an thi. 12 Cule vancungmi palinak in a tawtawrawt a tum ih ni ṭhenthum ṭhenkhat, thlapi ṭhenthum ṭhenkhat le arsi pawl ṭhenthum ṭhenkhat cu an siat ṭheh. Curuangah an tleunak ṭhenthum ih ṭhenkhat cu a hlo. Sun ṭhenthum ṭhenkhat ah siseh, zan ṭhenthum ṭhenkhat ah siseh, tleunak a um lo. 13 Cule ka hun zoh ih vansangpi-ah khin mupi pakhat a zam ih, "Òihnungza! Òihnungza! Vancungmi pathum in an tawtawrawt an tum tikah cun leilung parih a ummi hmuahhmuah hrangah ṭihnungza a va si so!" tiah ring zetin a ti ka thei.
1 Cule vancungmi panganak in a tawtawrawt a tum ih van ihsin leilungah arsi pakhat a tlak ka hmu. Cule cuih arsi cu tawpneilo khurih tawhfung a hnenah an pek. 2 Cuih arsi in tawpneilo khur cu a on tikah sosernak somei tumpi ihsin meikhu a suah vekin meikhu a hung suak luailo. Cuih meikhu in ni tleunak le thli lak khal a thimter ṭheh. 3 Kharbok tampi cu cuih meikhu lak ihsin leilung parah an rung tla ih varngen meipir neihmi huham vek kha an hnenah pek an si. 4 Cuih kharbok pawl cu hrampi, thingkung le a dang hramkung khal siseh, siatsuah lo dingin an sim. An siatsuah theimi cu an cal ah Pathian hminsinnak tacik a nei lomi lawng an si. 5 Hi minung pawl thah theinak thu an nei lo; thla nga sung hrem theinak thu lawng an nei. Mi an hrem tikih a nat zia cu varngen meipir in mi a hen ih a nat bangtuk khi a si. 6 Cuih thla nga sungah cun minung in thihnak an hawl rero ding na'n an tong lo ding; thih an duh ding na'n thihnak in a tlansan ding. 7 Cuih kharbok pawl cu raldo dingih a ralringmi rang bangtuk an si. An lu parah sui lukhuh a bangmi an khum; an hmai cu minung hmai an bang. 8 An lu-ih sam cu nunau sam bangtuk a si; an ha tla cu kiosa ha bangtuk a si. 9 An ṭaang cu raldonak ih tuahmi thir ṭaangphaw bangtuk a si mi in an khuh ṭheh ih an thla an khawn thawm cu raldonak hmunih a tlan ciamcomi rangleng tampi awn thawm a bang. 10 Mei an nei ih varngen meipir bangin mi an hen thei; thla nga sung mi an hrem theinak khal cu an mei ih huham neihmi ruangah a si. 11 Anmah uktu siangpahrang an nei ih cuih an siangpahrang cu tawpneilo khur uktu vancungmi a si. A hmin cu Hebru ṭong in Abaddon a si; Grik ṭong cun Apollion a si. 12 Òihnungza pakhatnak cu a cem; hi hnuah ṭihnungza pahnih an ra hrih ding. 13 Cule vancungmi paruknak in a tawtawrawt a tum. Pathian hmaiih a ummi sui biakṭheng ih kil li ihsin aw thawng ka thei. 14 Cuih aw in vancungmi paruknak hnenah, "Eufrates Tivapi kapih ṭemcih in a ummi vancungmi pali cu thlah thlang hai aw," tiah a ti. 15 Vancungmi pali cu thlah an si ih annih cu hi nazi, hi ni, hi thla le hi kum cekci-ah minung hmuahhmuah ih ṭhenthum ṭhenkhat that ṭhehtu dingih timtuahmi an rak si. 16 Rang ralkap pawl cu an zatein million zahnih an si. 17 Cule hmuhmi ka neihnak ahcun rang le rang totu pawl ka hmu. An raldonak ṭaangphaw cu meiling bangin a sen, safaira timi lungmankhung bangin mepian a si ih kaat bangin a aihre. An rang pawl lu cu kiosa lu bangtuk an si ih an kaa sung ihsin meisa, meikhu le kaat mei-alh bangtuk an suak zukzo. 18 Cuih rang ka sung ihsin a suak zukzo mi minung siatsuahtu phunthum: meisa, meikhu le kaat mei-alh in minung ṭhenthum ṭhenkhat an that ṭheh a si. 19 Rang pawl huham neihnak cu an kaa le an mei ah a si. An mei cu rul vek a si ih lu an nei; cuih an lu cu minung tuahmawhnak ah an hmang. 20 Hi minung siatsuahtu phunthum ih an thah ngah lomi minung pawl cun anmah ih tuahcopmi thil kha an tlansan cuang lo. Khawsia an biaknak, sui le ngun le daar le lungto le thing ih tuahmi, a hmu thei lo, a ṭong thei lo, a feh thei lo, an kutih tuahcopmi milem pawl an biaknak an baang cuang lo. 21 Culawng si loin mi an thahnak, dawi an hmannak, nupa sual an tuahnak le ruk an ruknak pawl cun an sir cuang fawn lo.
1 Cule a cak zetmi vancungmi pakhat vancung ihsin a rung ṭum ka hmu. Amah cu mero in a thuam aw ih a lu kimvelah vangro a lang. A hmai cu ni bangtuk a si ih a ke cu meisa ṭhuam bangtuk a si. 2 A kut in pharh ciami cazual a keng. A vorhlam ke in tifinriat a pal ih a kehlam ke in leilung a pal; 3 cule a au ih a aw rindan cu kiosa tampi aw bangtuk a si. Cutiih a au ṭheh vete in khuari pasarih in tlir durdo in an hun let. 4 Cutiin an ṭong ṭheh vete in ca in ngan ka tum. Asinain van ihsin aw ka thei ih, "Khawri pasarih ih simmi kha thuthup ah re aw; ngan hrih hlah," tiah i run ti. 5 Cule ka hmuh ciami vancungmi, tifinriat le leilungih a dingtu in van lamah a vorhlam kut a khai ih, 6 kumkhua-in kumkhua tiang a nungmi Pathian, van le leilung, tipi thuanthum le a sungih ummi hmuahhmuah a tuahtu Pathian ih hmin in siatcam in thukamnak a tuah. Cutikah vancungmi in, "A rei nawn lo ding. 7 Vancungmi pasarihnak in a tawtawrawt a tum tikah a siahhlawh a si mi profet pawl hnenih a rak than ciami a thupte ih a tumtahmi cu Pathian in a kimter ding," tiah a ti. 8 Cule vancung ihsin aw ka theihmi in, "Va feh awla tifinriat le leilungih a dingtu kut sungih a ummi pharh ciami cazual khi va la aw," tiah i run ti sal. 9 Vancungmi hnenah cun ka va feh ih cazual fate cu ka va dil. Anih in, "La awla ei aw; na pum sungah a kha ding na'n na kaa sungah cun khuaitizu bangin a thlum ding," tiah i ti. 10 I ti vekin cazual cu ka lak ih ka ei tikah ka kaa sungah khuaitizu vekin a thlum; asinain ka dolh tikah ka pum sungah cun a kha ngaingai. 11 Cule in sim sal ih, "Pathian in miphun tampi, hrin tampi, ṭong tampi le siangpahrang tampiih thu thawn peh aw in a simmi kha na phuan sal a ṭul ding," tiah i ti.
1 Tahfung a bangmi funghreu pakhat i pek ih, "Va feh awla Pathian biakinn le biakṭheng va tah aw; cule biakinn sungih Pathian a biatu pawl siar aw. 2 Asinain biakinn tual cu va tah hlah, ziangahtile Pathian thei lomi pawl hnenah pek a si zo ih cu pawl cun thla sawmli le thla hnih sung Khawpi Thiang cu an cilbal thluh ding. 3 I theihpitu pahnih, buri hnipuan thawn thuam aw in, ka thlah ding; annih in Pathian thu cu profet bangin ni thawngkhat ni zahnih le sawmruk sung an sim ding," tiah i ti. 4 Cuih theihpitu pahnih cu leilung Bawipa ih hmaiah a dingmi Olif thingkung pahnih le mei-inn pahnih an si. 5 Anmah a siatsuah tumtu an ral pohpoh cu an kaa sung ihsin a suakmi meisa in an siatsuah ding; cuti cun annih tuahmawh a tumtu cu thah an si ding. 6 Van pihter theinak thu an nei ih Pathian thu an phuan sung cu van ihsin ruah a sur lo ding. Tidai tlun khalah thu an nei ih cerhti pawl kha thisen ah an canter thei. Leilung hi an duh tik caan pohah natnak a phunphun in hrem theinak thu an nei. 7 An thusim an ṭheh tikah tawpneilo khur sung ihsin a suakmi sahrang in a do ding. A neh dingih a that ding. 8 Cule an ruak cu an Bawipa thinglamtah parih an thahnak khawpi lamzin ah an taanta ding. Cuih khawpiih hmin deu cu Sodom a si lole Izipt a si. 9 Miphun kip, hrin kip, ram kip le ṭong kipih mi hmuahhmuah in an ruak cu ni thum le a hrek sung an zoh ding ih a phum ding khal an kham ding. 10 Hi profet pahnih an thih ruangah leilung tlun minung cu an lung a awi ding. An lungawinak puai an tuah ding ih pakhat le pakhat laksawng an ṭhen aw ding, ziangahtile hi profet pahnih ruangah leilung mi harsatnak tamzet an rak tuar. 11 Asinain ni thum le a hrek hnuah Pathian hnen ihsin nunnak petu thaw a ra ih an sungah a lut ih annih cu an hung ding; cumi a hmutu hmuahhmuah cu an tuk a sum ṭheh. 12 Cule cuih profet pahnih cun van ihsin, "Hinah hung uh," tiah a run titu aw ringzet an thei. An ral pawl ih mithmuh rori-ah annih cu mero thawn vancungah an kai. 13 Cuih caan cekci-ah nasazet in ling a hnin ih khawpi ṭhenhra ih ṭhenkhat a siat ṭheh; minung thawng sarih an thi. Midang pawl cu ṭih le phangin an um ih vancung Pathian ih maksak zia an hmu ih an thangṭhat. 14 Òihnungza pahnihnak cu a cem, asinain pathumnak rei lote-ah a ra ding. 15 Cule a pasarihnak vancungmi in a tawtawrawt a tum ih vancungah a ring zetmi aw in, "Leilung tlun uk theinak huham cu kan Bawipa le a Messiah kut sungah a um zo ih kumkhua-in kumkhua tiang amah in a uk ding," tiah an ti. 16 Cutikah Pathian hmaiah an bawi tokham ih a totu upa kul hluanli pawl cu an bok ih Pathian an biak, 17 Annih in, "Ziangkimtithei Bawipa Pathian, atu-ah a ummi le hlan ihsin a rak um zomi! A nasami na huham na langter ih uknak hram na thok zo ruangah kan lo thangṭhat. 18 Na thinheng a langnak tikcu a thleng ih mithi pawl thuṭhen caan a kim ruangah, Pathian awi lo pawl an thin a ling in a ling. Na siahhlawh profet pawl le a lo upattu na minung pawl a tum a seen in ṭuanman an ngah caan a thleng a si. Leilung a siatsuahtu siatsuahnak an ton caan a thleng zo," tiah an ti. 19 Vancung ih a ummi Pathian biakinn an ong ih cutawkah Thukam Kuang a um. Cule nimthla a kau zukzo, khua a ri durdo, ling a hnin ih rial napi in a tla.
1 Cule vanah khawruahharza thil pakhat a lang. Nunau pakhat a lang ih a thuam cu ni a si; thlapi a ke thuaiah a ret ih arsi hleihnih ih tuahmi siangpahrang lukhuh a khum. 2 Fa a vun ih nau hrin caan a kim. Nauhrin natih a nat ruangah a ai rero. 3 Cule vanah a dang khawruahhar hmuhsaknak mak pakhat a lang. Rulhreng sen tumzet, lu pasarih le ki pahra a neimi a lang. A lu pawl cun siangpahrang lukhuh pakhat fingfing an khum. 4 A mei in vanih arsi ṭhenthum ṭhenkhat leilungah a vuak thlak. Nau nei ding nunau hmaiah a ding ih nau a suah vete in deh dingin a bawh. 5 Cule cuih nunau nu in miphun hmuahhmuah thirfung thawn a uktu dingah fapa a hring. Asinain naute cu an lak ih Pathian le a bawi tokham hnenah an tlanpi. 6 Nunau cu Pathian in hmun a remsak ciami hramlakah a tlan. Cutawkah ni thawngkhat zahnih le sawmruk sung an cawm ding. 7 Cule vanah raldo awknak a um. Mikhael le a vancungmi pawl in rulhreng cu an do; rulhreng le a vancungmi khal in an do ve. 8 Asinain rulhreng cu a sun ruangah a vancungmi pawl thawn vancungah an um thei nawn lo. 9 Rulhreng tumpi, khuahlan rulpi, Khawsia a si lole Satan tiih kawh mi, leilung pumpuluk mibumtu cu van ihsin an hlon. A vancungmi pawl thawn leilungah an vun thlak. 10 Cule vancungah aw ringzet ka thei ih, "Pathian ih rundamnak a thleng zo! Pathian in siangpahrang a sinak a huham a langter zo! Messiah ih huham a langter zo! Ziangahtile Pathian hmaiah dingin, a sunzan in kan unau sual a puhtu cu vancung ihsin hlon a si zo. 11 Kan unau pawl in Tuufa thisen le thutak an phuanmi thawngin nehnak an ngah zo. An nunnak an pe siang ih thih khal an ngam a si. 12 Curuangah vancung le vanih a ummi hmuahhmuah nan lungawi uh! Asinain leilung le tifinriat hrangah cun an hmakhua a va pit so! Ziangahtile Satan nan hnen a rung thleng zo ih, Caan reipi a nei nawn lo ti a theih ruangah a thin a heng ngaingai," tiah a ti. 13 Rulhreng in leilungah in thlak ti a theih vete in fapa a hringtu nunau cu dawi a thok. 14 Asinain nunau nu cu a hrangah rem ciami hramlakih zuannak dingah a tum zetmi mupiih thla pahnih an pek. Cutawkah rulhrengih siatsuah thei lo dingin kum thum le a hrek sung an kilkhawi ding. 15 Cule nunau nu cu tilian in fenseh tiah rulhreng in a kaa sung ihsin tidai a suahter ciamco. 16 Asinain nunau nu bawm dingah leilung cu a kaa a ang ih rulhreng kaa sungin a suakmi tidai cu a rak dolh ṭheh. 17 Rulhreng cu nunau nu parah a thin a heng tuk ih nunau tefa pawl Pathian thukham a thluntu le Jesuh ih phuanmi thutak a rinsantu hmuahhmuah do dingah a pok lala. 18 Cutiin tifinriat kapah rulhreng cu a ding.
1 Cule tifinriat sung ihsin sahrang a hung suak ka hmu. Ki pahra le lu pasarih a nei; a ki parah cun siangpahrang lukhuh pakhat fingfing an khum ih a lu parah Pathian hmuhsuamnak hmin pakhat fingfing an um. 2 Cuih sahrang cu tlavang a bang; a ke cu savom ke bangtuk a si ih a kaa cu kiosa kaa bangtuk a si. Rulhreng in a neihmi a huham, a siangpahrang tokham le a thuneihnak maksak cu a pek. 3 Sahrang ih lu pakhat cu thihpi tlak besia zetih hriammi a bang, asinain a cuih a hriamhma cu a dam. Leilung pumpuluk an mang a bang ih sahrang cu an thlun. 4 Rulhreng in a thuneihnak sahrang hnenih a pek ruangah mi hmuahhmuah in rulhreng cu an biak. Cule sahrang khal an biak thotho ih, "Sahrang a bangtu zoso a um? Zo in so a do thei ding?" an ti. 5 Sahrang cu Pathian hmuhsuamnak le hminsiatnak thu kha puarthau zetin rel thei dingah an on ih thla sawmli le thla hnih sung thuneih theinak khal on a si. 6 Cuticun Pathian le a hmin, a umnak hmun le vancungih a ummi hmuahhmuah kha sahrang cun a camriam ciamco. 7 Cuih tlunah Pathian ih minung pawl do dingah le neh dingah caan an on ih hrin kip, ram kip, ṭong kip, le phun kip tlunah thuneihnak an pek. 8 Cuticun leilungtlun mi hmuahhmuah in sahrang cu an bia ding; asinain leilung seem hlan ihsin nunnak cabu sungih hmin khum ciami pawl cun an bia lo ding; cuih nunnak cabu cu thah a si mi Tuufa-ih ta a si. 9 "Theihnak hna nan neih asile ngai uh! 10 Sal ih kaih ding ti ciami cu kaih an si ding ih ralnam ih thah ding ti ciami cu thah an si ko ding. Hi bangtuk caanah Pathian minung pawl in thinsau zetih tuar theinak le rintlak sinak an langter a ṭul ngaingai. 11 Cule sahrang dang pakhat leilung sung ihsin a hung suah ka hmu. Cuih sahrang in tuufa ki bangtuk ki pahnih a nei ih rulhreng bangin a ṭong. 12 Sahrang pakhatnak ih a neihmi a nasa zetmi thuneihnak kha a mithmuh rori-ah a hmang. Thihpi tlak hriamhma a pu na'n a hma a dam zomi a pakhatnak sahrang cu leilung le leilung tlunih a ummi hmuahhmuah in an bia dingah a hneek ciamco hai. 13 Hi sahrang pahnihnak in a mak ngaingaimi khawruahharza an tuah. Mi hmuahhmuah ih mithmuh ah van ihsin leilungah meisa a tlakter. 14 Cule pakhatnak sahrang mithmuh rori ih khawruahharza tuah theinak thu an pek ruangah leilung tlunih a ummi minung hmuahhmuah a bum thei a si. Ralnam hriamhma a pu na'n a nung thothomi sahrang upatnak ah amah ih zuklem tuah dingah thu a pek. 15 Sahrang pakhatnak lem sungah nunnak thaw thawlut dingah sahrang pahnihnak cu thu an pek ih cuticun a lem cu a ṭong thei ih tlunah amah a bia lotu pawl kha a that ṭheh. 16 Cuih sahrang in mi hmuahhmuah, mitum siseh mite siseh, milian siseh mifarah siseh, sal siseh, miluat siseh, an vorhlam kutah a si lole an cal ah hranhram in hminsinnak a tuah. 17 Cuih hminsinnak an neih lo ahcun zianghman an zuar thei lo ih an lei thei fawn lo; cuih hminsinnak cu sahrang hmin a si lole sahrang hmin ai-ih hmanmi nambat a si. 18 Hi zawn ah hin fimnak hman a ṭulzet. Fimnak a neitu in sahrang nambat ih tican cu an tuat thei, ziangahtile cuih nambat cu mi pakhat hmin ai-ih hmanmi a si ih, a nambat cu zaruk sawmruk le paruk a si.
1 Cule ka hun zoh ih Zion Tlangah Tuufa a din ka hmu; amah thawn hmun khatah mi thawngza le thawng sawmli le thawngli an um ih cu pawl cu amah ih hmin le a Pa ih hmin an cal ih nganmi an si. 2 Cule vancung ihsin aw pakhat ka thei ih cuih aw cu tilian tlasuar awn le khawri ringzet awn vek a si. Òingṭang tum thiammi pawl ih an ṭingṭang tum aw bangtuk khal a si. 3 Minung thawngza le thawng sawmli le thawngli pawl cu siangpahrang tokham le thilnung pali le upa pawl hmaiah an ding. Hla thar an sak ih cuih hla cu anmah lawngih zir theimi a si. Mi hmuahhmuah sung ihsin anmah lawng tlen ciami an si. 4 Anmah cu mi thianghlim an si, nunau thawn a pawl aw dah lomi an si ih a himmi an si. Tuufa fehnak kipah an thlun. Mi hmuahhmuah lak ihsin tlenmi an si ih, thlairah hmaisa bik bangtuk in, Pathian le Tuufa hnenah hlan hmaisa bikmi an si. 5 Thuphan an per dah lo; mawhnak zianghman an nei lo. 6 Cule vanah a zam reromi vancungmi pakhat ka hmu. Amah cu leilung tlun miphun kip, hrin kip, ṭong kip le ram kip hnenah kumkhua ih a hmunmi Thuthang ṭha thantu a si. 7 Aw ring zetin, "Pathian upat uhla a maksaknak thangṭhat uh! Ziangahtile miphun kip an thu rel caan a thleng zo. Van le leilung, tifinriat le cerhtiput hmuahhmuah a tuahtu kha bia uh!" tiah a ti. 8 Vancungmi pahnihnak in pakhatnak cu a thlun ih, "A nasa zetmi Babilon cu a siat zo, a siat ngah zo a si. A tisa hiarnak sabitzu kha mi hmuahhmuah a pek ih, a ritter ṭheh a si," tiah a ti. 9 Vancungmi pathumnak in a hmaiih a zammi vancungmi pahnih kha a thlun ih aw ring zetin, "Zokhal sahrang le milem a bia ih a hminsinnak a cal ah a si lo le a baan ah a neitu cu, 10 Pathian thinhengnak khuathai sungih thletmi a thinhengnak sabitzu hran cu a in ding. Cuih zu a intu cu vancung mithiang pawl le Tuufa hmaiah meisa le kaat mei-alh sungih hremnak an tuar ding. 11 Anmah hremnak meisa khu cu cat loin tlunah a kai ringring. Sahrang le a lem a biatu le a hmin hminsinnak a neitu hrangah cun sunah siseh zanah siseh hnangamte ih colhdamnak caan an nei nawn lo," tiah a ti. 12 Hi bangtuk caanah Pathian minung pawl, Pathian thukham a thluntu le Jesuh hrangah rintlak zetih a nungtu pawl in thinsau in tuar theinak an neihmi an langter a ṭul ngaingai. 13 Cule vancung ihsin aw pakhat ka thei ih, "Himi hi ngan aw. Bawipa zum cingte ih a thitu pawl cu mi lungawi an si," tiah a ti. Cutikah Thlarau in, "A si ngaingai! Annih cu an hnaṭuan khunghar ihsin an cawl thlang ding a si; ziangahtile an ṭuanmi in a thlun hai ding," tiah a ti. 14 Cule ka hun zoh ih a raangmi mero ka hmu; cuih mero parah cun a lu ah sui-ih tuahmi siangpahrang lukhuh a khum ih a kutah a hriam zetmi favah a kengtu Milai Fapa bangtuk ka hmu. 15 Biakinn sung ihsin vancungmi pakhat a ra suak ih mero parih a totu hnenah cun aw ring zetin, "Na favah cu fang ah-nak ah hmang aw, ziangahtile a caan a kim zo; leilung tlun rawlkhawm a cu zo," tiah a ti. 16 Cule mero parih a totu in leilung tlunah a favah cu a vun hawi ih leilung tlun fang cu a khawm. 17 Cule a dang vancungmi pakhat vancung biakinn ihsin a ra suak ka hmu; anih khal a hriam zetmi favah a nei ve. 18 Cule a dang vancungmi pakhat, meisa tlun thuneitu, biakṭheng ihsin a ra suak. Favah hriam zet a neitu vancungmi hnenah napi in a au ih, "Na favah hmang awla leilung tlun sabit hmuanih sabit pawl hlep thlang aw; ziangahtile sabit an hmin zo a si," tiah a ti. 19 Cutiin vancungmi in a favah cu leilungah a vun hawi ih sabit hri ihsin sabit rah a hlep ih Pathian thinhengnak sabit rialnak sungah a vun thlak. 20 Sabit rah cu khawpi lengih a ummi sabit rialnak ah an rial ih sabit rialnak sung ihsin thisen a luang; cuih thisen cu peng zahnih tiang a luang ih rang kakharh tiang a thuk.
1 Cule vanah a dang khawruahharza le a maksakmi hmuhnak ka nei lala. Vancungmi pasarih in natsia pasarih an keng; hi natsia cu a neta bik hremnak an si, ziangahtile Pathian thinhengnak a lang netnak a si. 2 Cule ka zoh ih meisa thawn a rawi awmi thlalang, tifinriat bangtuk a si mi ka hmu. Cuih tlunah sahrang le a lem siseh, a nambat ai-awhtu siseh, a nehtu pawl khal siseh ka hmu. Cuih nehtu pawl cu thlalang tifinriat kapah an ding ih Pathian pekmi ṭingṭang an keng. 3 Pathian riantu a si mi Moses ih hla le Tuufa ih hla cu hiti in an sak: "Bawipa, Ziangkimtithei Pathian, Na thiltuahmi hi ziangtluk mangbangza so an si. Miphun hmuahhmuahih Siangpahrang, Na lamzin cu ziangtluk a dingmi le a dikmi so an si. 4 Bawipa, nangmah a lo ṭihzah lotu zoso a um ding? Na maksak zia a phuang lotu zoso a um ding? Nangmah lawng na thianghlim a si. Miphun hmuahhmuah na hnenah an ra ding ih an lo bia ding. Ziangahtile a dikmi na thil tuahmi cu mi hmuahhmuah in an hmu zo." 5 Cuih hnuah vancungah a ong awmi biakinn ka hmu ih a sungah Puanthlam Thianghlim khal ka hmu. 6 Natsia pasarih a kengtu vancungmi pasarih cuih biakinn sung ihsin an ra suak; annih tla cu a tleu zetmi puanrang thawn an thuam aw ih sui ṭaangkhap thawn an ṭaang an khap aw. 7 Cule thilnung pali lakah pakhat in kumkhua in kumkhua tiang a nungmi Pathian ih thinhengnak in a khatmi sui kheng pasarih cu vancungmi pasarih hnenah a pek. 8 Biakinn cu Pathian huham le sunlawinak meikhu in a khat ih vancungmi pasarih in an kenmi natsia pasarih a reh hlanah cun zohman biakinn sungah an lut thei lo.
1 Cule biakinn ihsin aw ring ka thei ih vancungmi pasarih hnenah, "Feh uhla Pathian thinhengnak kheng pasarih kha leilungah vun thle uh!" tiah a ti. 2 Pakhatnak vancungmi a feh ih a kheng cu leilungah a thlet. Sahrang hminsinnak a neitu le sahrang lem a biatu pawl taksa parah ṭihnungza le a na zetmi hma sia a suak. 3 Cule vancungmi pahnihnak in a kheng cu tifinriat parah a vun thlet. Tidai cu miruak ihsin a suakmi thisen bangtuk ah a cang ih tifinriat sungih a nungmi hmuahhmuah an thi ṭheh. 4 Cule vancungmi pathumnak in a kheng cu tiva le cerhtiput parah a thlet ih tidai cu thisen ah an cang ṭheh. 5 Tidai tlunih thuneitu vancungmi in, "Hi na thuṭhennak pawl hi a dikmi an si, Maw a Thianghlimmi, atuih a ummi le hlan khalah a rak um zomi Pathian! 6 Mithiang pawl le profet pawl thisen an suahter ruangah an in dingah thisen na pekmi hi in tlak hrimhrim an si," tiah a ti. 7 Biakṭheng ihsin aw pakhat ka thei ih, "Bawipa, Ziangkimtithei Pathian! Na thu relcatmi hi a dikmi le a dingmi an si!" tiah a ti. 8 Cule vancungmi palinak in a kheng cu ni parah a thle ih minung kang dingah thu a pek. 9 Ni in a kang hai ruangah minung pawl in hi hremnak tlunih thuneitu Pathian ih hmin kha an camriam ciamco. Asinain an sualnak ihsin an sir lo ih Pathian khal thangṭhatnak an pe cuang lo. 10 Cule vancungmi panganak in a kheng cu sahrang ih bawi tokham parah a thlet. Sahrang ih uknak khuazakip ah thimkhawzing a tlung ih minung pawl cu an tuarmi a nat tuk ruangah an lei an keu ciamco. 11 An nat le an hma ruangah vancung Pathian cu an cam an riam. Asinain an thilsual tuahmi cu an sir aw cuang lo. 12 Cule vancungmi paruknak in a kheng cu Eufrates tivapi parah a thlet. Tiva cu a kang ṭheh; cumicu nisuahlam ihsin a ra dingmi siangpahrang pawl hrang lamzin ongtu a si. 13 Cule butlak bangtuk a si mi thlarau borhhlawh pathum ka hmu. Rulhreng kaa sung le sahrang kaa sung le profet deu kaa sung ihsin a suakmi an si. 14 Cupawl cu hmuhsaknak mak a tuahtu khawsia thlarau an si. Cuih thlarau pathum cu an feh ih leilung tlun siangpahrang hmuahhmuah hmun khatah an hruai khawm. Cutiih an hruai khawmnak cu Ziangkimtithei Pathian ih Ni sunglawi ni ah raldo dingah a si. 15 "Zohhnik! Fifir bangin ka ra ding. Misenpi hmaiah taklawng le ningzakih an um lonak dingah itthat lotein a meng ih a hnipuan a fingkhawitu cu mi lungawi an si," tiah Bawipa in a ti. 16 Cule thlarau pathum in siangpahrang pawl cu Hebru ṭong in Armageddon an timi hmunah an hruai khawm. 17 Cule vancungmi pasarihnak in a kheng cu thli lakah a thlet ih Siangpahrang tokham umnak biakinn sung ihsin aw pakhat a ra thang ih, "A cem zo," tiah a ti. 18 Cutikah nimthla a kau zukzo, khua a ri durdo, ṭeek a tla ciamco ih tuksumza ling a hnin. Minung um hramthok ihsin cubangtuk linghnin a um dah lo. Linghnin hmuahhmuah lakah a besia bikmi a si. 19 Khawpi tumzet cu ṭhenthum ah a kuai ih ram dangih khawpi hmuahhmuah khal a siatsuah ṭheh. Pathian in a nasami Babilon cu a hngilh loih a khuathaiih a thinhengnak sabitti a inter. 20 Tikulh hmuahhmuah an hlo ih tlang hmuahhmuah an cemral ṭheh. 21 Rial tum zetzet, pakhat ah pawng zakhat tiang a ritmi rial van ihsin minung parah an tla. Cutiin hremnak an tuar ruangah mi in Pathian an cam an riam, ziangahtile an tuarmi natsia cu tuksumza a si.
1 Cule kheng pasarih a kengtu vancungmi pasarih lakih pakhat ka hnenah a ra ih, "Ra awla tiva tampi kiangih toh-mi khawpi, hminthang hlawhhlangnu khi ziangvekin hremnak a tong ding, ti ka lo hmuh ding. 2 Leilung tlun siangpahrang pawl amah thawn nupa sualnak an tuah ih leilungtlun mi pawl khal in amah ih tisa diriam sualnak sabitti an in ruangah an ri ṭheh a si," tiah a ti. 3 Thlarau in i zeel ih vancungmi in hramlakah i feh pi. Cutawkah sahrang sen parah nunau pakhat a to ka hmu; cuih sahrang taksa pumpuluk ah Pathian hmuhsuamnak hmin tampi an ngan ih cuih sahrang cu lu pasarih le ki pahra a nei. 4 Cuih nunau cu mepian sen le puansen dup in a thuam aw ih hlawnthil sui le tikep lung le lungmankhung dangdang in a taksa cu a khat ṭheh. A kut in sui khuathai pakhat a keng ih cuih khuathai cu a tisa diriam sualnak thil zoh mawi lo le fihnungza thil in a khat. 5 A cal ah hmin pakhat an ngan ih tican thup a nei. "A maksak zetmi Babilon, hlawhhlang hmuahhmuah le misual borhhlawh hmuahhmuah ih nu," ti a si. 6 Cule cuih nunau cu Pathian mithiang pawl ih thisen le Jesuh an rinsan ruangih thah a tuartu pawl ih thisen a in ruangah a ri, ti ka hmu. Cuih nunau ka hmuh tikah ka mang a bang ngaingai. 7 Cutikah vancungmi pakhat in, "Ziangah so na mang a bang? Nunau ih tican thup le nunau nu a tonak sahrang lu pasarih le ki pahra a nei mi sahrang ih tican thup cu ka lo sim ding. 8 Hi na hmuhmi sahrang hi a rak nung dah na'n atu cu a nung nawn lo; tawpneilo khur sung ihsin a hung suak ding ih siatralnak ah a feh lan ding. Leilung siam hlan ihsin nunnak cabu sungih hmin ngan lomi pawl in cuih sahrang an zoh tikah an mang a bang ngaingai ding. A rak nung dah na'n atu cu a nung nawn lo; asinain a hung suak sal ding. 9 "Fimnak le theihnak neih a ṭul. Lu pasarih cu nunau a tonak tlang pasarih an si. Siangpahrang pasarih khal an si. 10 Cuih siangpahrang pasarih lakah panga cu an tlu zo; pakhat in a uk lai; a dang pakhat cu a ra hrih lo. A rat tikah tikcu tawite sung lawng a uk ding. 11 A rak nung dah na'n atu-ah a nung nawn lomi sahrang cu siangpahrang pariatnak a si; siangpahrang pasarih lakih a telmi a si ih siatralnak ih a thleng dingmi a si. 12 "Ki pahra na hmuhmi cu ram a uk thok hrih lotu siangpahrang pahra an si; asinain annih cu sahrang thawn nazi pakhat sung uk dingah thuneihnak pek an si ding. 13 An pahra in an huham le an thuneihnak cu sahrang hnenih pe ding cu an tumtah ciarmi a si. 14 Annih cu Tuufa an do ding; sikhalsehla Tuufa le amah ih a kawhmi, a hrilmi le amah a rinsantu pawl in an neh ding, ziangahtile Tuufa cu bawi hmuahhmuah lakih Bawi bik, siangpahrang hmuahhmuah lakih Siangpahrang sin a si," tiin i sim. 15 Cule vancungmi in, "Hlawhhlang nu ih tonak tidai na hmuhmi cu miphun kip, hrin kip, ram kip le ṭong kip an si. 16 Na hmuhmi ki pahra le sahrang in hlawhhlang nu cu an hua ding; a neihmi thil hmuahhmuah an long ding ih a taklawngin an taan ding; a sa an ei ding ih meisa in an ur ding. 17 Pathian tumtahmi an tuahsuaknak dingah Pathian in an thinlung sungah tuah duhnak thinlung a ret. Curuangah thinlung rualtein hna an ṭuan tlang ih Pathian thu a kim hlan sung an ram uknak huham cu sahrang hnenah an pek. 18 "Na hmuhmi nunau cu leilung tlun siangpahrang pawl a uktu khawpi tumpi a si," tiah i ti.
1 Hi hnuah vancungmi pakhat vancung ihsin a rung ṭum ka hmu. Amah cu thuneihnak huham tumzet a nei ih a tleunak in leilung pumpuluk a vangter ṭheh. 2 Ring zetin a au ih, "Nunau nu a tlu zo! Babilon maksak cu a siat zo! Khawsia le thlarau borhhlawh in an luah ih a sungah fihnungza le mitkemza vate a phunphun in an khat. 3 Ziangahtile miphun hmuahhmuah in a taksa hiar sualnak zu an in ih an ri ṭheh. Siangpahrang pawl thawn tisa sualnak an tuah ih sumtuahtu pawl khal supnak nei lo a taksa hiar nomnak thawngin milian ah an cang," tiah a ti. 4 Cule aw dang pakhat vancung ihsin ka thei ih, "Ra suak uh, ka minung pawl, Kha nu hnen ihsin ra suak uh. A sualnak sungah tel hlah uh, Hrem a tuarnak sung khalah tel hlah uh. 5 Ziangahtile a sualnak cu van a tiang ih, A ṭhatlonak cu Pathian in a ciing ringring a si. 6 Nanmah a lo tuah vek cekci-in a parah tuah ve uh. A tuahmi let hnih in phulei sam uh. Nan in dingih a rawimi hnakih let hnih cak in a in dingah a khuathai sungah rawi sak uh. 7 Sunlawinak le nunnomnak amah le amah a rak pek awk zat in, natnak le riahsiatnak pe ve uh. Ziangahtile a thinlungte in, 'Hinah ka to, siangpahrang bawinu ka si, nuhmei ka si lo, riahsiatnak ka tong dah lo ding,' a ti. 8 Hi vek a si ruangah ni khat sungah rinlopi in pulhnat in a tlun ding. Natnak, riahsiatnak le paampi a tong ding. Meisa ih ur a tong ding. Ziangahtile a thuṭhentu Bawipa Pathian cu Ziangkimtithei a si," tiah a ti. 9 A tisa sualnak le a taksa hiar nomnak sungih a teltu leilung siangpahrang pawl in Babilon khawpi meisa ih a kangnak meikhu an hmuh tikah an ṭap an ai ding. 10 Cutiih a tuarnak an hmuh tikah tuar ve pang ding an ṭih ruangah hlavaang ah an ding ih, "Ziangtluk ṭihnungza so a si! Ziang tluk tuksumza so a si! Khua maksak le a cakmi Babilon khawlipi! Nazi pakhat sungah hremsiatnak na ton hi!" tiah an ti ding. 11 Leilung tlun sumtuah pawl khal cu nu hremsiatnak a ton cu an ninghanpi ih an ṭap, ziangahtile zohman in an thilri an lei nawn lo. 12 Zohman in an sui, an ngun, an lungmankhung, an tikep lungmankhung le patzai in tahmi puanrang, mepian sendup puan, pu puan, puan sen le a ngah har zetmi thing ihsin tuah mi a phunphun, vuiho le thing mankhung ihsin tuahmi a phunphun, daar, thir, lungrang le, 13 thinghawng hmui, masala, rimhmui, mura rimhmui, frankinsens rimhmui le sabitti le hriak, vainim le sangvut, caw le tuu, rang le rangleng, sal le minung khal zohman in an lei nawn lo. 14 Sumtuah pawl in cu nuih hnenah, "Nei ningla tiih saduh na thahmi thil ṭha hmuahhmuah an hloral ṭheh zo; na lennak le na sunlawinak kha an cem thluh zo ih ziangtik hmanah na ngah sal nawn lo ding," an ti. 15 Cutawk khawpi sungah sumtuah tahratih a lianmi pawl in a tuarnak sungih tel ve pang ding an ṭih ruangah hlatzet ah an ding ding. An riahsia in an ṭap ding ih, 16 "ṭihnungza a si! Tuksumza a si! Babilon khawlipi cu! Patzai in tahmi puanrang, sendup puan le puan sen in a rak thuam aw ṭheu ih sui hlawnthil le lungmankhung le tikep lungmankhung in a cei-aw ṭheu a si. 17 Asinain nazi pakhat sungah a hlawnthil hmuahhmuah cu a cemral ṭheh a si," an ti ding. Tangphawlawng mawngtu bawi pawl le lawng a totu mi hmuahhmuah, lawng hnaṭuan pawl le tidai parih pumcawmnak a hawltu hmuahhmuah hlapi ah an ding ih, 18 khawpi a kangnak meikhu an hmuh tikah, "Hi khawlipi bangtuk khawpi ziangtik hmanah a um dah lo," tiah an au. 19 An lu ah leivut phulh aw in an ṭap an raak ih, "ṭihnungza le tuksumza a va si so, hi khawpi hrangah cun! Tangphawlawng a nei ih ti parah sum a tuahtu hmuahhmuah cu hi nunau ih lennak thawngin milian ih an cannak khawpi a si. Asinain nazi pakhat sungah a neihmi hmuahhmuah a cemfai ṭheh a si!" an ti. 20 Maw van, Babilon a siatral ruangah na lungawi aw! Maw Pathian mithiang pawl, tirhthlah pawl le profet pawl, lungawi aipuang in um uh! Ziangahtile nan parih a thiltuahmi ruangah Pathian hnen ihsin cawhkuan a tong zo. 21 Cule a cak zetmi vancungmi pakhat in lungto pakhat, fang rialnak lungtlep tumpi tia khi a khai ih tifinriat sungah a vun hlon ih, "Hi bangtuk in Babilon khawlipi cu vuakthlakmi bangin hlon a si ding ih zohman in an hmu sal nawn lo ding. 22 Babilon khawlipi ṭingṭang tum thawng le minung awzai, phirivau tum thiam pawl in phirivau an tum thawng le tawtawrawt tum thiam pawl ih an tawtawrawt tum thawng cu na sungah a thang nawn lo ding. Ziangbangtuk hnaṭuan a si khalle hnaṭuantu na sungah an um nawn lo ding. Fang rial awn thawng na thei nawn lo ding. 23 Ziangtik hmanah na sungah mei-inn a vang nawn lo ding. Nupi ṭhi tlangval aw siseh mothar aw siseh na sungah a leng nawn lo ding. Na sungih sumtuahtu pawl cu leilung tlunah huham nei bik an si, sikhalsehla na dawithiamnak in leilungtlun mi hmuahhmuah cu na bum ṭheh a si," tiah a ti. 24 Profet le Pathian mithiang pawl ih thisen a sungih a luan ruangah Babilon cu hrem a tong zo. A si, leilung tlunih thah a tuartu pawl ih thisen cu hi khawsungah a luang a si.
1 Cuih hnuah vancungah mi tampi-ih aw bangtuk ka thei ih, "Pathian cu thangṭhat si ko seh! Rundamnak le sunlawinak le huham cu kan Pathian ih ta an si! 2 A thuṭhennak cu a dik le a dingmi an si. Hlawhhlang nu, a taksa hiar sualnak thawn leilung a balhtertu cu hrem a si zo. Pathian riantu pawl a thah ruangah amah cu Pathian in a hremsuak zo a si," tiah an ti. 3 Cule ringzet in, "Pathian cu thangṭhat si ko seh! Khawlipi a kang ruangih meikhu cu kumkhua in vanah a kai a si," tiah an au lala. 4 Cutikah upa kul hluanli le thilnung pali cu an bok ih bawi tokham parih a totu Pathian cu an biak. Annih in, "Amen! Pathian cu thangṭhat si ko seh," tiah an ti. 5 Cule bawi tokham ihsin aw pakhat a ra thang ih, "Kan Pathian cu thangṭhat uh; a riantu pawl le a minung pawl, a tum a te ti loin amah a ṭihzahtu hmuahhmuah in thangṭhat uh," tiah a ti. 6 Cuih hnuah miburpi ih aw bangtuk, a hrual in a hrual awmi tisuar aw bangtuk, khua a ri durdomi aw bangtuk ka thei. Cuih aw in, "Pathian cu thangṭhat si ko seh! Ziangahtile Bawipa, Ziangkimtithei kan Pathian cu Siangpahrang a si! 7 Lungawi aipuang in um uhsi! A maksaknak cu thangṭhat uhsi! Ziangahtile Tuufa nupi ṭhit caan a thleng zo ih monu khal ṭhit awknak puai hrangah timtuah ciain a um zo. 8 A hruk dingah patzai in tahmi puanrang a tleu zetmi cu pek a si zo," tiah an ti ka thei. Cuih patzai ih tahmi puanrang cu Pathian minung pawl ih thilṭha tuahmi a si. 9 Vancungmi in, "Himi hi ngan aw: Tuufa nupi ṭhit puai ih sawmmi pawl cu mi lungawi an si. Hi thu hi Pathian thudik a si," tiah a ti. 10 Cutikah amah biak dingah a kehramah ka bok, asinain anih in, "Khatiin bok hlah! Kei khal nangmah bangtuk siahhlawh ka si ve; Jesuh in a phuanmi thutak a pomhngettu nan unau lakah pakhat ka si ve. Pathian lawng biak ding a si," tiah a ti. Jesuh ih a phuanmi thutak hi a si profet pawl thinlung a thotertu cu! 11 Cule vancung khi a ong aw ka hmu ih rang raang pakhat a lang. A parih a totu cu Rintlak le Midik tiah kawhmi a si. Thu a ṭhen tikah le ral a do tikah dingnak thawn a ṭhen ih a do a si. 12 A mit tla cu meisa bangtuk in a alh ih a lu parah bawi lukhuh tampi a khum. A parah a hmin ngan ciain a um, asinain amah siar lo zohman in cuih hmin cu an thei lo. 13 A hnipuan hrukmi cu thisen sungih hnimmi a si. A hmin cu, "Pathian Thu," ti a si. 14 Vancung ralkap pawl in patzai ih tahmi puanrang thiang hruk in le rang raang parah to tahratin amah cu an thlun. 15 A kaa sung ihsin a hriam zetmi ralnam pakhat a ra suak ih cumi thawn miphun tampi a neh ding. Thirfung thawn a uk ding ih Ziangkimtithei Pathian thinhengnak cu sabit rialnak sungih sabit an pal bangin a pal ding. 16 A puan parah le a kawng ah hmin an ngan ih, "Siangpahrang hmuahhmuah lakih Siangpahrang sin, bawi hmuahhmuah lakih Bawi bik," ti a si. 17 Cule vancungmi pakhat ni parih a din kha ka hmu. Van ih a zammi vate hnenah aw ring zetin a au ih, "Pathian ih puai tumpi a tuah dingmi kha ra zawh khawm uh. 18 Ra uhla siangpahrang pawl, ralkap hotu bawi pawl, ralkap pawl, rang le rang totu pawl, mi hmuahhmuah, sal siseh miluat siseh, mitum siseh mite siseh, cu pawl ih sa ra ei uh," tiah a ti. 19 Cule sahrang le leilung tlun siangpahrang pawl le an ralkap pawl cu rang parih a totu le a ralkap pawl do dingah hmun khatah an khawm aw. 20 Sahrang cu an kai ih a mithmuh ah hmuhsaknak mak tampi a tuahtu profet deu khal an kaih cih. Cuih khawruahhar a tuahnak in sahrang hminsinnak a kengtu le sahrang lem a biatu pawl cu a bum. Sahrang le profet deu cu hmun khatah kaatmei thawn a alh ringringmi meilipi sungah an nungcung in an hlon. 21 An ralkap pawl cu rang parih a totu pa ih kaa sung ihsin a suakmi ralnam in an that. Cule an sa cu vate hmuahhmuah in an ei thei zat in an ei.
1 Cule vancung ihsin vancungmi pakhat a rung ṭum ih a kut in tawpneilo khur onnak tawhfung le a rit zetmi thir cikcin a ken kha ka hmu. 2 Cuih vancungmi in khua hlanlai ihsin rulpi a si mi rulhreng cu a kaih ih thir cikcin in a khit ih tawpneilo khur ahcun kum thawngkhat sung a thlak. Cuih rulhreng cu Khawsia a si lole Satan timi cu a si. 3 Kum thawngkhat a kim hlanah cun zohman bum nawn hlah seh tiah cuih khur sungah cun tawh a hren ih hminsinnak tacik a khen cih. Cuih hnuah caan malte sung thlah sal a si ding. 4 Cule bawi tokham pawl le a parih a totu, thuṭhen theinak an hnenih pek a si mi pawl ka hmu. Jesuh ih a phuanmi thutak le Pathian thu an phuan ruangih thah a tuartu pawl ih thlarau pawl ka hmu. Annih pawl cun sahrang an bia lo, a lem khal an bia lo; sahrang ih hminsinnak cu an cal ah siseh an baan ah siseh an nei lo. An nung sal ih siangpahrang tokham parah to in Khrih thawn kum thawngkhat sung an uk. 5 A dang mithi pawl cu kum thawngkhat a cem hlanah cun an thosal hrih lo. Himi hi mithi thawhsalnak hmaisa bik a si. 6 Hi bangtuk in mithi thawhsalnak a hmaisa bikih a teltu cu mi lungawi le mi thluasuak an si. Voihnih thihnak in an tlunah thu a nei nawn lo. Pathian le Khrih hrangah puithiam an ṭuan ding ih amah thawn kum thawngkhat sung an uk ding. 7 Kum thawngkhat hnuah Satan cu a thawng tlaknak ihsin suah a si ding ih, 8 leilung tlun khuazakipah ṭeekdarhmi miphun pawl bum dingah a feh ding; cuih miphun pawl cu Gog le Magog ti an si. Raldo dingah Satan in hmunkhatah a finkhawm ding; anmah cu tifinriat kapih vunnel zat an si ding. 9 Leilung tlun khuazakipah an feh ih Pathian minung pawl umnak hmun le a duh zetmi khawpi kha an kulh ṭheh. Asinain van ihsin meisa a rung tla ih a kang that ṭheh hai. 10 Cule anmah bumtu Satan cu sahrang le profet deu an hlonnak, kaat meilipi sungah an hlon. Cutawkah a sun a zanin hrem ringring an si ding. 11 Cule a maksak zetmi bawi tokham raang le a parih a totu ka hmu. Bawi tokham parih a totu mithmuh ihsin van le leilung cu an tlan ih hmuh theih an si nawn lo. 12 A thi ciami pawl cu a tum a sen in bawi tokham hmaiah an ding ka hmu. Cabu pawl an kau; cuih hnuah nunnak cabu timi cabu dang pakhat an kau lala. Mithi pawl cu cuih cabu sungih an rak khum ciami an hnaṭuan vekin an thu ṭhen a si. 13 Cule tifinriat in a sungih ummi mithi pawl a hun suah. Thihnak le mithi khua khal in an hren cihmi mithi pawl an hun suah ve. An zatein an hnaṭuan ciami vekin thuṭhen an si ṭheh. 14 Cule thihnak le mithi khua cu tilipi vek a si mi meilipi sungah thlak an si. Hi meilipi cu voihnih thihnak kha a si. 15 Zokhal nunnak cabu sungih hmin ngan lomi cu meilipi sungah hlon an si.
1 Cuih hnuah van thar le lei thar ka hmu. A hmaisa ih a rak ummi van le leilung kha cu an hlota ih tifinriat khal a um nawn lo. 2 Cule Khawpi Thianghlim Jerusalem thar cu, a pasal dingmi tong dingah cei-aw in a timtuah awmi monu vekin Pathian hnen vancung ihsin a rung ṭum kha ka hmu. 3 Bawi tokham ihsin aw ringzet ka thei ih, "Pathian umnak inn cu minung hnenah a si zo. Amah cu an hnenah a um ding ih annih tla cu amah ih minung an si ding. Pathian Amah rori an hnenah a um ding ih an Pathian a si ding. 4 An mitthli hmuahhmuah a hnul sak ding. Thih a um nawn lo ding; ninghang riahsiat, aihram ṭahnak le natnak a um nawn lo ding. Ziangahtile thil hlun pawl cu an hlo ṭheh zo," tiah a ti. 5 Cule bawi tokham parih a totu in, "Zohhnik uh, thil hmuahhmuah a thar in ka tuah a si," tiah a ti. Ka hnenah, "Himi thu hi ngan aw, ziangahtile a dikmi le zumtlak thu a si," tiah i ti. 6 Cule, "Ziangkim ṭheh thluh a si zo. Keimah cu Alfa le Omega ka si, a thawhnak le a cemnetnak ka si. Zokhal ti a haaltu cu nunnak cerhti in dingah man loin ka pe ding. 7 Nehtu hmuahhmuah in himi hi an co ding. An Pathian ka si ding ih annih cu ka faale an si ding. 8 Sikhalsehla ṭihhrutmi, zumnak bansantu, fihnungza tuahtu, mi a that hrimtu, nupa sualnak a tuahtu, dawithiam pawl, milem a biatu le thuphanpertu pawl ih umnak ding hmun cu kaat meilipi sungah a si ding ih cumi cu voihnih thihnak a si," tiah i ti. 9 Vancungmi pasarih lakih a neta bik, natsia pasarih in a khatmi kheng pasarih a kengtu in ka hnenah, "Ra aw, Tuufa ih nupi ding Mo cu ka lo hmuh ding," tiah i ti. 10 Thlarau in i zeel ih vancungmi in a saang zetmi tlang parah i fehpi. Cule Jerusalem, Khawpi Thianghlim cu Pathian hnen vancung in a rung ṭum kha i hmuh. 11 Pathian sunlawinak thawn a tleumi Khawpi a si; Jasper timi lunghring mankhung bangin a tleu ih thlalang bangin a fai. 12 A kimvel in a saang zetmi phar in an kulh ih kotka hleihnih a nei; cuih kotka cu vancungmi hleihnih in an kil. Cuih kotka ahcun Israel miphun hleihnih ih hmin an ngan. 13 Siir khatah kotka pathum fingfing an um: nisuahnak lamah pathum, thlanglam ah pathum, saklam ah pathum le nitlaknak lamah pathum an um. 14 Khawpi kulhnak phar cu inn-hramṭohnak lungto hleihnih parih phunmi a si; cuih lungto parah cun Tuufa ih tirhthlah hleihnih pawl ih hmin an ngan. 15 Ka hnenah i simtu vancungmi in khawpi le a phar le a kotka pawl tahnak ah sui tahfung a keng. 16 Khawpi cu a kauhlam le a saulam le a saanlam a bangaw ṭheh. Vancungmi in a tahfung thawn cuih khawpi cu a tah: a saulam peng thawngkhat le zanga, a kauhlam peng thawngkhat le zanga a si ih a saanlam khal peng thawngkhat le zanga thotho a si. 17 Vancungmi in milai ih tahfung thawn phar khal a tah ih pi zahnih le hleiruk a saang. 18 Phar cu Jasper timi lunghring mankhung in an tuah ih khawpi cu thlalang bangin a fai mi sui hlir in tuahmi a si. 19 Khawpi hramṭohnak lungto cu lungmankhung a phunphun in mawitermi a si. A pakhatnak cu jasper timi lunghring mankhung a si, a pahnihnak cu safaira timi mepian lungmankhung a si, a pathumnak cu agate timi hring-eu lungmankhung a si, a palinak cu emerald timi hringdup lungmankhung a si; 20 a panganak cu onix timi lungsen mankhung a si, a paruknak cu karnelian timi a sendupmi lungmankhung a si, a pasarihnak cu aihre le sui pianzia rawimi quartz lungmankhung a si, a pariatnak cu beriil timi mepian le a hring rawimi lungmankhung a si, a pakuanak cu topaz timi aihre lungmankhung a si, a pahranak cu khalsidoni timi a pawlmi lungmankhung a si, hleikhatnak cu turquoise timi a sen le aihre rawimi lungmankhung a si ih hleihnihnak cu amethyst timi a eengmi lungmankhung a si. 21 Kotka hleihnih cu tikep lungmankhung hleihnih in tuahmi an si; kotka ih kipin tikep lungmankhung pakhat fingfingih tuahmi an si. Khawpi lamzin cu sui hlir in tuahmi a si ih thlalang bangin a fai. 22 Cuih khawpi ah biakinn a um lo, ziangahtile a biakinn cu Ziangkimtithei Bawipa Pathian le Tuufa a si. 23 Ni le thlapi ih tleunak khal a ṭul lo, ziangahtile Pathian sunlawinak cu cuih khawpi ah a tleu ih an mei-inn cu Tuufa a si. 24 Leilung tlun mi hmuahhmuah in cuih khawpi tleunak thawngin fehnak an hmu ding ih leilung tlun siangpahrang pawl in cuih khawpi sungah an lennak sumsaw an keng ding. 25 Cuih khawpi kotka pawl cu sun nihlawh in on an si ding; ziangtik hmanah an khar lo ding, ziangahtile cutawkah zan a um nawn lo. 26 Leilung miphun hmuahhmuah in an phun lennak le sunlawinak cu cuih khawpi ah an rak keng ciar ding. 27 Sikhalsehla cuih khawpi sungah a thiang lomi zianghman a lut lo ding; ningsinza thil a tuahtu le thuphanpertu khal an lut lo ding. Tuufa nunnak cabu sungih hmin nganmi lawng an lut ding.
1 Cule cuih vancungmi cun thlalang bangin a tleumi nunnak tiva i hmuh. Cuih tiva cu Pathian le Tuufa ih bawi tokham ihsin a puut ih, 2 khawpi lamzin laifang in a luang. Cuih tiva kap hnih ah nunnak thingkung a um ih thla khat voikhat in kum khatah voihleihnih an rah. Cule thinghnah cu mi phunkip hrangah damnak a si. 3 Pathian ih camsiat a tongtu zianghman cuih khawpi sungah a um thei lo ding. Pathian le Tuufa ih bawi tokham cu cuih khawpi ah a um ding ih a siahhlawh pawl in amah cu an biak ding. 4 Hmaiton in an hmu aw ding ih a hmin cu an cal ah ngan a si ding. 5 Cuih hmunah zan a um nawn lo ding; mei-inn siseh nitleu siseh an ṭul lo ding, ziangahtile Bawipa Pathian cu an tleunak a si ding ih siangpahrang bangin kumkhua in an uk lanta ding. 6 Cule vancungmi in ka hnenah, "Hi thu pawl hi a dikmi le zumtlak an si. Profet pawl hnenah a Thlarau a thlahtu Bawipa Pathian in a thleng cing dingmi thil kha Amah ih siahhlawh pawl theihter dingah a vancungmi a thlah a si," tiah i ti. 7 Jesuh in, "Ngai uh, ka ra cing ding. Hi cabu sungih nganmi profet ṭongkam a thluntu cu mi lungawi an si," tiah a ti. 8 Keimah Johan in hipawl hi ka hmu ih ka thei. Cutiin ka hmu ih ka theih hnuah hi bangtuk thil i hmuhtu vancungmi ih kehramah ka bok ih a biak ka tum. 9 Asinain anih in, "I bia hlah! Kei khal nangmah le na unau profet pawl le hi cabu sungih nganmi thu a thluntu pawl bangtuk in Pathian ih siahhlawh ka si ve! Pathian bia sawn aw!" tiah i ti. 10 Cule ka hnenah, "Hi cabu sungih nganmi profet ṭongkam hi thup hlah, ziangahtile hi thu pawl hi a kim cing ding. 11 Zokhal thil ṭha lo a tuahtu cu tuah hrih ko seh; fihnungza a si mi cu fihnungza in nung hrih ko seh; thil ṭha a tuahtu cu tuah hrih ko seh; cule a thianghlimmi cu thianghlim in um hrih ko seh," tiah a ti. 12 Jesuh in, "Ngai uh! Ka ra cing ding! An hnaṭuan vekih pe ciar dingah ṭuanman ka rak keng ding. 13 Keimah cu Alfa le Omega, a hmaisa bik le a neta bik, a thawhnak le a cemnetnak ka si," tiah a ti. 14 An hnipuan fai zetin an sawp ih nunnak thingkungih rah ei theinak thu le khawpi sungah kotka ihsin luh theinak thu a neitu cu mi lungawi an si. 15 Sikhalsehla uico bangtuk in a nungmi, dawithiam pawl, nupa sualnak a tuahtu, mi a thattu pawl, milem a biatu pawl le an ṭong in siseh, an tuahnak in siseh, thuphanper pawl cu khawpi lengah an um ding. 16 "Keimah Jesuh in hi thu hi kawhhran pawl hnenih than dingah ka vancungmi nan hnenah ka run thlah. Keimah hi David ih hram le tesinfa ka si; keimah hi deirel arsi tleu ka si," tiah a ti. 17 Thlarau le Mo cun, "Ra aw," an ti. Hi thu a theitu hmuahhmuah in, "Ra aw," tiah ti ciar hai seh. Tihal mi hmuahhmuah in ra uh; nunnak tidai a duhtu hmuahhmuah in man loin ra in uh. 18 Keimah Johan in, hi cabu sungih nganmi profet ṭongkam a theitu hmuahhmuah hnenah, ralrinnak ka lo pek; hi profet ṭongkam tlunah zokhal thudang a bettu cu Pathian in a parah hi cabu sungih nganmi natsia hremnak kha a bet ve ding. 19 Cule zokhal hi cabu sungih profet ṭongkam nganmi hi a phiat hlotu cu hi cabu sungih ngan ciami a co dingmi nunnak thingrah le Khawpi Thianghlim sungih luh theinak a co dingmi kha Pathian in a phiat hlosak ve ding. 20 Hi thu hmuahhmuah a phuangtu in, "A si! Ka ra cing ding," tiah a ti. Amen! Bawipa Jesuh, ra thlang aw! 21 Bawipa Jesuh ih zaangfahnak cu nan zate hnenah um hram seh.