The New Testament of our Lord and Saviour Jesus Christ
1 He tah Jesuh Khrih kah Patuer thli thoepna ni. Ahih tah Devid cadil la awm tih Devid tah Abraham cadil la awm. 2 Abraham capa Isak, Isak capa Jakob, Jakob capa Judah oen a boenhui, Judah capa Perez oen Zerah (a manu tah Tamar), Perez capa Hezron, Hezron capa Ram, Ram capa Amminadab, Amminadab capa Nahshon, Nahshon capa Salmon, Salmon capa Boaz (a manu Rahab), Boaz capa Obed (a manu Ruth), Obed capa Jesi, Jesi capa Devid Sengpahrang. 6 Devid dung kalawng Israel thlaangphun Babilon ram ah tamnaa la a khuen toe Patuer hue tah adangkah angla awm: Devid capa Solomon (a manu tah Uriah kah a yu te), Solomon capa Rehoboam, Rehoboam capa Abijah, Abijah capa Asa, Asa capa Jehoshafat, Jehoshafat capa Joram, Joram capa Uzziah, Uzziah capa Jotham, Jotham capa Ahaz, Ahaz capa Hezekiah, Hezekiah capa Manasseh, Manasseh capa Amon, Amon capa Josiah, Josiah capa Jehoiakhin oen a boenhui. 12 Babilon ah tamnaa la a awm coeng kalawng Jesuh a cuun toe tah adangkah angla awm. Jehoiakhin capa Shealtiel, Shealtiel capa Zerubbabel, Jerubbabel capa Abiud, Abiud capa Eliakim, Eliakim capa Azor, Azor capa Zadok, Zadok capa Akhim, Akhim capa Eliud, Eliud capa Eliazar, Eliazar capa Matthan, Matthan capa Jakob, Jakob capa Josep, Josep lawng Meri a yuna tih Meri lawng Messiah a ti u Jesuh te a cuun. 17 Tedawngah Abraham kalawng Devid toe dung thlailii, Devid kalawng Babilon ah tamnaa la a awm toe dung thlailii, tamnaa la a awmna kalawng Messiah a cuun toe ah dung thlailii awm. 18 Jesuh Khrih a cuunna tah hetila ni. A manu Meri te Josep ham a kang pe, tede yuvaa la a awm haih hih thlan ah Ciim Muithla rang oen camaw ka cuun ai tila a ming, 19 Josep tah thaihu adoengla aka sai thlaang la awm tih Meri te thlaang lak ah yah lawh sak ham ngaih nawh tih ahuepla toeng ham kamthlah. 20 He kawng he a poek lii vengah Bawipa kah vanthlaang pakhat lawng ahih tengla a mang ah a pho pe tih “Devid cadil Josep, Meri te yuna ham rih boel, Metihtiah a bung a vawn he Ciim Muithla rang oen ni. 21 Ahih lawng capa a cuun vetih a miing ah Jesuh tila na sak ai, metihtiah a thlaang thli te a thawlhna kalawng a thlawn ai.” a tina. 22 Bawipa lawng tawngha hawna oen a thui oepsoeh te a soepna hamla he thaihu boeih he va thoeng hang. 23 Hulaa cuem pakhat tah vawn vetih capa a cuun ai, a miing tah Immanu-el a sak u ai” (Immanu-el thuingaihna tah “Pathen mami tengah tengah awm” tina ni.) 24 Josep tah a ihna kalawng tho tih Bawipa kah vanthlaang lawng a thui pe angla Meri te a yuna. 25 Tede a capa a cuun thlan ah tengcehna nawh. Josep lawng a capa te Jesuh tila miing a sak.
1 Herod he Sengpahrang la a awm vengah Judia ram Bethlehem khawpui ah Jesuh tah thang, Adiw raih thlan ah aisi aka noek thai thlaang khatsut khawlaw ben kalawng Jerusalem la law u tih. 2 “Judah sengpahrang la aka awm ham camawca te meah a awm? Ahih kah aisi khawlaw ben ah a thoeng te ka huh u tih ahih te bok hamla ka law” tila a doet u. 3 Herod sengpahrang lawng he awl he a yaak vengah lakueng tangkiik, Jerusalem khaw kah thlaang boeih khaw lakueng u. 4 Herod lawng khawsoeih ahaamca boeih oen phungawl cangpueikung boeih te a khue tun tih, “me ah nuem Messiah te a thang?” tila ahimi te a doet. 5 Ahimi lawng, “Judia ram Bethlehem khawpui ah thang ai “tila a thui pe u.” Tawngha lawng a thut oepsoeh tah he tila awm. 6 “Judah ram kah Bethlehem khawpui, nang tah Judah ram khawpui thli la kah ayiit koek la na awm roe nawh, na khui kalawng uktemkung pakhat law vetih ka thlaang Israel thli te a uk ai,” ti. 7 Tedawngah Herod lawng khawlaw thlaangcuih thli te ahuepla a khue tih aisi a thoengna atue atang te acek aneh la a doet. 8 Tecoengah Herod lawng ahimi te Bethlehem la a tuih tih, “Cet u lang camawca te atheenla tlap uh, na huh u atah van thui uh, kai khaw ka cet silang ahih te ka bok van ai,” tila awl a uen. 9 Herod lawng a tina angla cet u tih khawlaw benkah a huh u aisi te a huh koep u vengah awmngaih u tangkiik. Ahimi haiah aisi lawng cet tih camawca a awmna huen a pha ah duem. 11 Im khuila kuun u tih camawca oen a manu Meri te a huh u vengah khuklu oen cuengkueng u tih buekuep ruila ahih te a bok u. A khuen u kutdo khawhbu te a awng u tih sui, frankinsen oen mura te a peek u. 12 Pathen lawng ahimi te Herod tengla mel koep nawh ham a mang ah ngaithuen awl a thui pe dawngah lawngpui tloe kalawng amah ram la voei koep u. 13 Ahimi a ceh coengah, Bawipa kah vanthlaang pakhat Josep mang ah a tueng pe tih, “Herod lawng camawca te ngawn hamla a tlap poen ai. Tedawngah tho lang camawca oen a manu te lo langtah Iyipt ram la pooeng puei loeih, kai lawng mel koep ham kavan thui thlantoe te ah awm uh,” a tina. 14 Josep lawng tho tih camawca oen a manu te a lawh tih yiinthuem ah Iyipt ram la a pooeng puei, 15 Herod a duek thlantoe Iyipt ram ah awm u. He tila a awmna he tah, Bawipa lawng tawngha hawna oen a thui oepsoeh, “Ka Capa te Iyipt ram kalawng ka khue koep” a ti te asoepna ham ni. 16 Khawlaw thlaangcuih thli lawng a thai a latna te Herod lawng a ming vengah caalla a thin sa. Khawlaw thlaangcuih thli lawng a thui aisi a thoengna tue kalawng a tuemtang heet tih Bethlehem khawpui oen khaaw teng khaaw vai kah camaw tawngpaca kumhih hui boeih te ngawn hamla awl a peek. 17 He tila tawngha Jeremiah lawng a thui oepsoeh awl te soep. A thui oepsoeh awl tah,: 18 “Ramah khaaw ah awl a yaak u, thinphat lungnat rungrahna awl ni. Rachel lawng a ca thli te a rah, A ca thli a duek boeih poen dawngah rap tih a reemhalna ham thloepthloei thai la awm tlaih nawh.” 19 Herod a duek coengah, Bawipa kah vanthlaang pakhat tah Iyipt ram ah aka awm Josep mang ah a tueng pe tih, 20 “Tho langtah camaw oen a manu te Israel ram la meel puei koep loeih, camaw ngawn ham aka tlap hue te duek boeih poen,” a tina. 21 Tedawngah Josep lawng tho tih Camaw oen a manu te a lawh tih Israel ram la a mel puei. 22 Tede Arkhelas lawng ana pa Herod yuengla Judia ram ah Sengpahrang a bi tite Josep lawng a yaak vengah te huen la ceh ham a rih. A mang ah a thuituen angla Galili peng la te cet, 23 Nazaret a ti u khawpui ah te poe awm. “Ahih te Nazaret thlaang ti u ai,” tila tawngha thli lawng a thui oepsoeh te soep.
1 Teveng tue ah Baptisma pekung Johan tah Judia ram ramhum huhang la law tih phungthui a tong. 2 “Vaan ram ayoeii poen dawngah na thawlhna yut u loeih,” tila a thui. 3 Tawngha Isaiah lawng, “Thlaang pakhat lawng ramhum huhang ah paang tih, ‘Bawipa hamla lawngpui te roekbah uh, A cehna ham lawngpui te adoengla sai uh,” tila a thui. oepsoeh te tah Johan he poen ni. 4 Johan lawng kala-uk mul oen a tah hiacuu te a buen a naak tih, a hingcen ah saphaw cihin a naak, khaurang oen khawitui te buh la a caak. 5 Jerusalem kah thlaang thli Judia ram tawm kah thlaang thli oen Jordan tuiva tengvaai ram tawm kah thlaang thli a tengla law u. 6 Ahimi lawng a thawlhna boeih te a phawng u tih, Jordan tuiva ah ahimi te Johan lawng Baptisma a peek. 7 Farasi thlaang oen Sadusi thlaang thli Baptisma dang ham a law u te Johan lawng a huh vengah ahimi te, “Ruul hue, aka law ham koei Pathen kah dantatna kalawng na loeih u thai ai tila a-u lawng avan thui u? 8 Na thawlhna na yut u te athaih theen oen tueng sak uh. 9 Abraham tah cuunkung patuer ni tila thui mailai oen dantatna kalawng ka loeih ai tila poek hau u boel. Pathen lawng he kah lungto thli he a lawh vetih Abraham cadil la a sai thai ti he kavan thui u. 10 Thingkung boeih te ayung ah vungna hamla haica tah a toen sut poen. Thaih theen aka thaih nawh thingkung boeih te a vung vetih hai dawngah a phuum ai. 11 Thawlhna na yut poen tite tuengna ham kai lawngtah tui oen Baptisma kan peek u. Tede kai hu ah aka law thlaang lawngtah Ciim Muithla oen hai oen ah Baptisma m'peek u ai. Ahih tah kai lak ah lenduet tih kai tah ahih kah khawmuek pawm ham pateng ka koeih nawh. 12 A kut dawngah caang yahna raa a pawm vetih caang te aciimla a yah ai, caangtak te thaidi dawng a khueh ai, tede caanghii te tah aka duek thai tlaih nawh hai dawngah a phuum ai,” a tina. 13 Teveng tue ah Jesuh tah Jordan tuiva ah Baptisma dang hamla Galili kalawng Johan tengla va law. 14 Tede Johan lawng a thana tih, “Kai he man nang lawng Baptisma nan peek sui, kai tengla nang na law lat oh kai,” a tina. 15 Tede Jesuh lawngah, “tahe ah sai hawn, “Pathen lawng khuek te sai hawn sih,” a tina. Tedawngah Johan lawng a roei. 16 Jesuh tah Baptisma a huh coeng khoeng ah tui dawng kalawng tho hang. Tevengah ahih ham vaan te awng u tih, Pathen kah Muithla tah akhuu angla rum thuk tih ahih sawah a cuuk te a huh. 17 Tecoengah vaan kah awl lawng, “He tah ka lungvatna ka Capa ni, ahih sawah ka kaw hoe tangkiik.” tila a thui.
1 Tecoengah Muithla lawng Jesuh te Seitan kah suek-halhna tawng ham ramhum huhang la a ceh puei. 2 Khawhin sawmlii yiin daai buh a mueh dawngah Jesuh tah a bung pawng poen. 3 Tecoengah Seitan lawng ahih tengla law tih, “Nang he Pathen Capa tangtang la na awm atah, lungto thli he buh la coeng sak lah” a tina. 4 Tede Jesuh lawng, “Caciim lawngah, ‘thlaang he buh bueng oen hing thai nawh, tede Pathen huikaa khui kalawng aka thoeng awl oen ni a hing’ ti;” a tina. 5 Tecoengah Seitan lawng Jesuh te aciim Jerusalem khawpui kah Tempal bok-im imphu ah a ceh puei tih. 6 Ahih tengah, “Nang he Pathen Capa la na awm tang atah sungpung thuk lah, metihtiah Caciim dawngah, ‘Pathen lawng amah kah vanthlaang hue te nang ham awl a peek vetih na khow pateng lungto dawngah na khuek nawh ham nang te a kut oen n'dawm u ai,’ tila awm” a tina. 7 Jesuh lawngah, “Caciim lawng, ‘Bawipa na Pathen te noekdak boel, ti de lah koen,’ a tina. 8 Tecoengah Seitan lawng Jesuh te a sanghlang tlaangsawm pakhat la a luui puei tih, dilai dawngkah ram boeih oen te ram kah a bawilenna boeih te a huh sak. 9 Seitan lawngah, “Khuklu oen na cuengkueng tih kai he nan bok atah he thli boeih he kan pe ai,” a tina. 10 Tevengah Jesuh lawng, “Seitan, atloela cet! Caciim lawngah, ‘Na Bawipa Pathen bueng te bok lang, amah kah bii bueng te bi peh,’ ti” a tina. 11 Tecoengah Seitan lawng Jesuh te a ceh taak, vanthlaang thli law-u tih Jesuh te a bawm a ceem u. 12 Johan thawngim ah a thlaak u tite Jesuh lawng a yaak vengah Galili peng la cet. 13 Ahih lawng Nazaret ah awm ohla Kapernaum khaaw ah awm hamla cet. Kapernaum khaaw tah Zebulun oen Naptali thlaangphun kah ram khui Galili tuilii keeng ah awm. 14 He tila a awm he tah Tawngha Isaiah lawng a thui oepsoeh te asoepna ham ni. A thui oepsoeh tah, 15 “Zebulun oen Naptali ram Tuitunlii la cehna lawngpui, Jordan tuiva khatben rall, Gental thli kah ram Galili! 16 Yiinna khuiah aka awm thlaang boeih lawng aang abohlang a huh u ai. Duekna yiin khuiah aka awm thlaang boeih sawah aangna va pai ai,” tila a thui te ni. 17 Teveng tue kalawng ah Jesuh lawng, “Vaan ram tah ayoeica poen dawngah, na thawlhna yut u loeih,” tila phungthuina a tong cuek. 18 Jesuh lawng Galili tuiliikeeng ah a yingyawi vengah tui aka hawi boeinau rawi Simon (Piter a ti u te) oen a manau Andru, tuilii ah lok oen nga a heeng hih te a huh. 19 Jesuh lawng te rawi te, “Ka hu ah bang hih lah, thlaang tukung la kan coengg sak hih ai,” a tina. 20 Ahih rawi lawng lok te a voeih pak tih a hu ah bang pahoei hih. 21 Te kalawng cet phai tih thlaangtloe boeinau rawi Zebedi capa Jeem oen Johan te a huh. Te rawi boeinau tah ana pa Zebedi oen lowng khuiah awm haih tih lok a baw u. Te rawi te Jesuh lawng a khue; 22 Te rawi lawng ana pa oen lowng te a ceh tak tih a hu ah bang pahoei hih. 23 Jesuh tah Galili peng tawm ah cet tih Sinakok bok-im ah a cang puei, Vaan ram kawng Awlthang Theen a thui, thlaangtlo oen natna soeprep aka tlo thli te a hoeih sak. 24 Ahih kawng awlthang te Siria ram pum ah thaang khok tih aka tlo thli, tlawhnatna oen patang raina soeprep aka khang, raaithe lawng a kuun thil thlaang thli, raaihum tlawhna aka tlo, aka khawn thli boeih te avan law puei u tih Jesuh lawng a hoeih sak boeih. 25 Galili peng oen Dekapolis peng (khaaw paha a ti u peng), Jerusalem Judia peng oen Jordan tuiva khatben rall kah thlaangping broe lawng ahih hu ah bang u.
1 Jesuh lawng thlaangping hue te a huh vengah, tlaangsawm la luui hang tih te ah te ngawl. A hubang hue lawng ahih te a veel u. 2 Tecoengah ahimi te riingtuuk thaihoen hamla a tong: 3 “Thlaang soep nawh la ka awm tila aka ming tah yotheen kam-awmna aka dawng thlaang la awm; Vaan ram tah ahimi kah ni! 4 “Kawthe oen aka rung aka rap thli tah yotheen kam-awmna aka dawng thlaang la awm; Pathen lawng ahimi te a thloep a hoelh ai! 5 “A kaw aka daw thlaang tah yotheen kam-awmna aka dawng thlaang la awm; Pathen lawng a kam pe tangte te a paang ai! 6 “Pathen kawngaih te amami ngaihna bo koek la sai ham aka khueh tah yotheen kam-awmna aka dawng thlaang la awm; Pathen lawng ahimi kah kawngaihna te a soep pe sak ai! 7 “Thlaang reenna kaw aka poek tah yotheen kam-awmna aka dawng thlaang la awm; Pathen lawng ahimi te a reen van ai! 8 “Thinkaw lungbui aka ciim tah yotheen kam-awmna aka lawng thlaang la awm; Ahimi lawng Pathen te a huh u ai! 9 “Roeproeina aka sai tah yotheen kam-awmna aka dawng thlaang la awm; Pathen lawng ahimi te ka ca a tina ai! 10 “Pathen kawngaihna a sai dawngah heemtekna aka ming thli tah yotheen kam-awmna aka dawng thlaang la awm; Vaan ram tah ahimi kah ni! 11 “Kai kah hubang la na awm u dawngah nangmi te thlaang lawng thuitheetna, heemtekna, athe thaihu soeprep oen hoem awl n'peel u vengah yotheen kam-awmna na dawng u. 12 “Awmngaih u langtah na kaw hoe sak uh, nangmi ham vaan ah kutdo abohlang awm, he tila ni nangmi na awm thlan vengkah tawngha thli khaw aheem atek u roe poen. 13 “Nangmi tah thlaangphun boeih ham lungkeh la na awm u. Tede lungkeh he a aalna a moelh atah aal sak koep ham coengg thai tlaih nawh, apoeila awm poen, tedawngah ram la voeih tih thlaang lawng a caawt mailai ham ni a awm poen. 14 “Nangmi tah dilai pum boeih ham aangna la na awm u. Tlaangsawm ah a phueng u khawpui tah n'tu lawngkhaw thlipdah thai nawh. 15 A-u lawngkhaw hai a vaang vengah beelphai oen muek khoep vai nawh, haivangna dawngah a vaang tih im khuiah aka awm boeih te a thue. 16 Tetihvan la nangmi kah aangna te thlaang haiah aang sak ham awm, te tila thaihu theen na sai u te ahimi lawng a huh u vetih vaan ah aka awm nangmi na Pa te a thangpawm u thai ai. 17 “Mosi kah phungawl oen tawngha thli kah cangpueina te phe hamla kai he va law tila poek u boel. Te thli te phe hamla ka law nawh tih soep sak ham ni ka law. 18 He he poek khuep uh. Vaan oen Dilai aboet thlantoe phungawl dawngah ayiitkoek awllung pakhat mai te khaw ha-ata manawh. Te phungawl dawngah aka awm boeih te soep ai. 19 Tedawngah a-u khaw phungawl dawngkah ayiitkoek te khaw vai ohla awm tih thlaangtloe te khaw vai nawh ham a cang puei atah Vaan Ram ah ayiitkoek la awm van ai. Tede a-u khaw Phungawl te a vai tih thlaangtloe te khaw vai hamla a cang puei atah Vaan Ram ah abokoek la awm van ai. 20 Tecoengah kavan thui u, Pathen kawngaih saina dawngah phungawl cangpueikung thli oen Farasi thli lak ah uep-awm ngaai la na awm u nawh atah Vaan ram khuiah na kuun thai manawh. 21 “Thlaang ngawn boel, na ngawn atah awlcekbawi haiah na pha ai,” tila yan vengkah awl te na yaak u poen. 22 Tede tahe ah kavan thui u, “A-u khaw a maya manau tengah a thin a sa atah awlcekna ah a pha ai. A-u khaw a maya manau te tula na thuum nawh a tina atah awlcekna yung a pha ai, a-u khaw a maya manau te thlaangngau paathuu a tina atah rih awmna hell hai khuiah a thlaak ai. 23 Tedawngah Pathen tengla bokna-thaang dawngah na kutdo te ka pe ai na ti vengah na maya manau pakhat khat lawng na sawah thinsana a khueh te na ming atah, 24 Bokna-thaang haiah na kutdo te khueh de langtah, aloela cet lang na maya manau oen roeproeina sai, tecoengah law koep langtah na kutdo te Pathen tengah peh. 25 “Thlaang pakhat khat lawng taya n'cawi tih awlcekna yung la n'ceh puei atah yung na pha thlan atue a awm vengah ahih oen roepna sai. Te huen na pha atah nang te awlcekbawi tengah m'peek vetih awlcekbawi lawng palik tengah patoeng m'peek vetih thong ah n'thlaak ai. 26 Atak tang kavan thui u, sah ham koei laiba na sah boeih thlantoe thong khuiah na awm ai. 27 “Hutaa tawngpa thawlhna sai boel tila a thui te na yaak u poen;’ 28 Tede kai lawng tahe kavan thui u, A-u khaw hutaa te samphaih ngaihna mik oen a dan atah a thinkaw oen hutaa te a samphaih puei poen. 29 Tedawngah na bantang mik lawng n'thawlh sak atah koeih lang voei hawn! na pum boeih hell la atlaak lak atah na mik na taal te nang hamla theen ngaai. 30 Na bantang kut lawng n'thawlh sak atah, tloek poet lang voei hawn! na pum boeih hell la a tlaak lak atah na kut na khow pakhat khat a taal te nang hamla theen ngaai. 31 “A-u lawngkhaw a yu te a thlaak atah yu thlaakna ca te pe seh! tila a thui te na yaak u poen,” 32 Tede tahe ah kavan thui u, a-u lawngkhaw a yu te acuk ahalh nawh maiah a thlaak tih te hutaa lawng vaa a sak koep atah ahih lawng a yu te a samphaih sak. Te hutaa aka yuna thlaang te khaw thlaang yu sawah samphaih poen. 33 “Na awlkam te phe boel, Tede Bawipa tengah na awlkam angla sai uh, tila yan vengkah thlaang thli lawng a thui te na yaak u poen. 34 Tede tahe ah kavan thui u, awl na kam u vengah tapvoepna oen awl kam u boel, vaan phoei oen tapvoep boel. Metihtiah vaan tah Pathen kah ngawlhcoen ni. 35 Dilai miing phoei oen khaw tapvoep boel,’ dilai tah Pathen kah khowtloengna huen ni. Jerusalem phoei oen khaw tapvoep boel, metihtiah aka lenduet Sengpahrang kah khawpui ni. 36 Na luu phoei oen khaw tapvoep boel, metihtiah na luu dawngkah samthaam pakhat pateng abawk oen amuuem la na sai thai u nawh. 37 Soeng, soeng nawh ti bueng mah te thui uh, te voel tah Seitan tengkah awl poen ni. 38 “Mik yuengah mik van, naw yuengah naw van,” a ti te na yaak u poen. 39 Tede tahe ah kavan thui u, “Nangmi sawah athe aka sai te thung u boel. Thlaang pakhat khat lawng bantang ben na beeng te avan bel atah banvoei ben na beeng te khaw bel sak. 40 Thlaang pakhat khat lawng na angki te lawh ham a ngaih tih awlcekna yung ah m'pha puei atah, na khawtt-angki oen tawm pe baal de. 41 Thlaang pakhat khat lawng nang te amangkhak la thalrih te meng khat m'phueih sak atah meng hih toe phueih pe hawn uh. 42 Thlaang lawng thaihu avan bih atah pe uh, thaihu pu ham aka ngaih te pu uh. 43 “Na paya thli lungna uh, na raal thli thina uh! a ti awl te na yaak u poen. 44 Tede kavan thui u, Na raal thli te lungna lang nangmi aka thekhana thlaang thli ham thangthui pe uh. 45 Te atah Vaan ram ah aka awm na Pa kah a ca la na awm u ai. Ahih lawng atah thlaangthe thlaang theen sawah avan at la khaw a see sak, atheen aka sai oen athe aka sai sawah avan at la khaw a tlan sak. 46 Nang aka lungna bueng te na lungna atah metila Pathen lawng kutdo m'peek ai? Mangmu cawikung hue lawng pateng te tila a sai u van! 47 “Nang lawng na paya bueng te na voemtoei atah thlaang mailai lak ah athloeila na sai n'tu aka awm? Pathen aka bok nawh thlaang thli lawng pateng te ang te a sai van! 48 Vaan kah na Pa a soep van angla nangmi khaw na soep u van ham awm.”
1 “Thaihu theen na sai u boeih te thlaang yahawh lawng hu seh tila rangpui haiah sai nawh ham ngaithuen uh. He ang thli he rangpui haiah na sai u atah vaan ah aka awm na Pa tengkah kutdo n'tu khaw na dang u manawh. 2 Tedawngah thlaang kah angoe angaih thaihu te na do na dan vengah thlaangthaipalat hue lawng sinakok oen lawngpui cumruum ah oekthloen ruila a sai u angla nangmi lawng na sai boeih te tueng sak u boel. Ahimi lawng thlaang kah koeh ngaih ah a sai ni. Atak tang kavan thui u, ahimi lawng a ngaih te asoepla a dang poen. 3 Tede thlaang lawng angoe angaih te nangmi lawng na peek u vengah na paya theenkoek lawng pateng te kawng te ming boel seh. 4 Namah bueng lawng ming ham sai u lang, te tila ahuepla na sai boeih aka hukung na Pa lawng kutdo m'peek u badai. 5 “Na thangthui u vengah thlaangthai-palat hue angla thangthui u boel! Ahimi lawng thlaang boeih kah huhna koei sinakok oen lawngpui cumruum ah pai tih thangthui ham a ngaih u tangkiik. Atak tang kavan thui u, a sai phu dang ham koei te asoepla a dang u poen. 6 Tede nangmi lawng na thangthui u vengah im khuila kuun uh, thawh khai u lang mik oen huh nawh na Pa tengah thangthui uh. Ahuepla na sai boeih hukung na Pa lawng kutdo m'peek u badai. 7 “Na thangthui u vengah Pathen aka ming nawh hue angla awl mailai yahawh thui u boel, ahimi lawngtah asanhlang thangthui dengah Pathen lawng a yaak ai” tila a poek u. 8 Ahimi angla sai u boel; Nangmi lawng na ngoe boeih te na bih thlan ah na Pa lawng a ming boeih poen. 9 Tedawngah na thangthui u vengah: ‘Vaan ah aka awm kaimi na Pa, Na miing ciim tah hinyah la awm hawn seh; 10 Na ram va pai hawn seh! Vaan ah na kawngaih a sai u angla dilai dawngah na kawngaih sai u van hawn seh, 11 Tihin kah angoe caak awkk te kaimi m'pe lah. 12 Thlaangtloe lawng kaimi sawah a saithawlh te khawdawp ka ngaai u angla, Kaimi kah saithawlh he khawdawp van ngaai lah. 13 Noekdakna aka rai hlang kaimi sawah pha sak ohla, Seitan kut khui kalawng n'deem sak u lah, tila thangthui uh.’ 14 “Nangmi sawah thlaangtloe lawng a sai thawlh te khawdawp na ngaai u atah vaan ah aka awm na Pa lawng na saithawlh te khawdawp avan ngaai van ai. 15 Tede thlaangtloe kah saithawlh te khawdawp na ngaai nawh atah vaan kah na Pa lawng na saithawlh te khawdawp van ngaai manawh. 16 “Buh na yeh u vengah thlaang-thaipalat hue angla haithelatt la awm u boel. Ahimi lawng buh a yeh u te thlaang lawng ming seh a ti u dawngah haithelatt la awm u. Atak tang kavan thui u, ahimi lawng kutdo te asoepla a dang poen. 17 Buh na yeh u vengah na mik-hai khaw sil u lang na sam khaw thiik uh, 18 Te tila buh na yeh u te a-u lawngkhaw ming nawh vetih mik huh nawh na Pa bueng lawng a ming ai. Ahuepla saina boeih hukung na Pa lawng kutdo m'peek u badai. 19 “Kuum-akett oen thii-ekk lawng a caak thai; thlaanghuuen lawng a muk tih a huen thaina dilai ah na kaawn tung u boel; 20 Kuum-akett oen thii-eek lawng a caak thaina nawh thlaanghuuen lawng a muk tih a huuen thaina nawh vaan ah na kaawn te tung uh. 21 Na kaawn a awmna huen ah na kawpoek khaw awm van ai. 22 “Mik he tah pum boeih kah haithoei la awm. Na mik acaih atah na pum boeih aangna oen be ai; 23 Tede na mik a theen nawh atah na pum boeih yiinna khuiah awm ai. Tedawngah na khuikah aangna lawng a yiin khoep boeih atah te yiinna tah metila rih ham a awm tangkiik ai. 24 “A-u lawngkhaw bawi pahih kah bii te bi thai manawh. Pakhat te a thina vetih pakhat te a lungna ai. Pakhat te a hinyah vetih pakhat te a huhsit ai. Pathen oen tangka kah bii te pahih bokla na bi thai manawh. 25 Tedawngah kavan thui u; Na hingna ham caak awkk oen na pum ham himbai hinaak poek oen lakueng u boel. Atak tang atah; caak awkk lak ah hingna he awlpui ngaai nawh aw? Himbai hinaak lak ah pum he awlpui ngaai nawh aw? 26 Vaan ah aka sawng va thli ke bueh u lah! ati amu khaw tue u nawh; caang khaw aat nawh tih thaidi khuiah khaw tung u nawh. Tede vaan ah aka awm nangmi na Pa lawng te thli te a cawm acah! Va lak ah nangmi he awlpuila na awm u nawh aw? 27 Nangmi lawng lakuengna oen na hingna na cot sak u thai bet aw? 28 “N'tu ah himbai hinaak kawngah na lakueng u? Bueh u lah! ramhum kah raipai ke metila a roeng hang: bii khaw bi u nawh; Himbai hinaak khaw tak u nawh. 29 Tede, kavan thui u, bawilenkoek Solomon sengpahrang kah a bawilenna oen himbai hinaak lawngah raipai pakhat kah a theenna te pha nawh. 30 Tihin ah po tih thangvuen ah tlumtloei, hai dawngah phuum ham aka awm ramhum ah aka po mailai sul-aram Pateng khaw thoekcaukung tah Pathen ni; Ahih lawng nangmi tare te thoekcau muehla awm ai aw? Na oengna yawl tangkiik u nawh pai he! 31 “Tedawngah n'tu nuem ka caak vetih n'tu nuem ka awkk ai, n'tu ka bai ka naak ai tila lakueng u boel? 32 He ang thaihu he Pathen aka bok nawh hue kah thoehtham thaihu ni, he ang thaihu na ngoe boeih te vaan kah nangmi na Pa lawng a ming boeih. 33 Tedawngah thaihu tloe boeih lak ah Pathen Ram oen Pathen lawng sai sak ham a ngaih te lamhacuekla tlap u lang tecoengah na ngoe thaihu tloe boeih te Pathen lawng avan tawm badai. 34 Tedawngah thangvuen ham lakueng u boel; thangvuen lawng amah ham khoekla lakueng badai. Hin at kah arai acaangna sawah atloe thap patoeng ngoe nawh.
1 “Pathen lawng awl n'cekna nawh hamla thlaangtloe te awl cek boel, 2 Thlaangtloe awl na cek van angla Pathen lawng nang te awl n'cek van ai, Thlaangtloe sawah nuehtahna na hawna van angla na sawah Pathen lawng a hawna van ai. 3 N'tu ah namah mik ah thingboeng aka awm te huh ohla na maya manau mik ah aka awm muenmawi adiikca mai te na huh. 4 Namah mik ah thingboeng a awm lal maiah metila na maya manau mik ah aka awm muenmawi te kavan lo ai na tina mai lauh? 5 Nang thlaangthaipalat Namah mik kah thingboeng te lamhala lo de langtah tecoengah na maya manau mik kah muenmawi adiik te aciimcala na huh vetih na lawh pe thai ai. 6 “Aciim thaihu te ui pe boel. Te thli lawng va meel vetkat vetih namah te ng'ngeh ai. Awk haiah latha te tloeng pe boel. A khow oen ni a caawt mailai poen ai. 7 “Bih lah m'peek ai, tlap lah na huh ai, khooek lah thawhka avan awng ai. 8 A-u khaw aka bih tah a peek ai, aka tlap lawngtah a huh vetih thawhka aka khooek tah a awng pe ai. 9 Na ca lawng buh avan bih vengah lungto aka pe thlaang pakhat mai khaw na awm ai aw? 10 Nga avan bih vengah ruul na peek ai aw? 11 Thlaangthe la na awm u de na ca thli te thaihu theen peek ham na ming u atah van ah aka awm nangmi na Pa lawng aka bih thli tengah metihtlukla thaihu theen te a peek tare ai. 12 “Thlaangtloe lawng na sawah thaihu theen sai seh tila na ngaih van angla thlaangtloe tengah sai van lah; He tah Mosi Phungawl oen tawngha thli kah thuituen ngaihna tangtang ni. 13 “Thawhka ceek khuiah kuun u lah, metihtiah hell thawhka tah kau tih cehna lawngpui khaw yoei koek doek la a awm dawngah thlaang yahawh lawng a vai u. 14 Tede hingna thawhka tah ceek tih a cehna lawngpui khaw rai tangkiik tih thlaang ayawlca bueng lawng a huh. 15 “Tawngha rawlrap hue te ngaithuen uh; Ahimi lawngah nangmi tengla te ahan huhna atah tuu angla law u vetih a thinkaw khui atah metaang tluung angla awm u ai. 16 Nangmi lawng ahimi te athaih oen na noek ai. Thliingkung lawng misur thaih nooek nawh tih thliingkung dawngah thaidut khaw thaih nooek nawh. 17 Thingkung theen lawng athaih theen thaih tih thingkung the lawng athaih the thaih van. 18 Thingkung theen lawng athaih the thaih nooek nawh tih thingkung the lawngkhaw athaih theen thaih nawh. 19 Athaih theen aka thaih nawh thingkung boeih te a vung tih hai dawngah a phuum u. 20 Tedawngah nangmi lawng tawngha rawlrap hue te a saina oen na noek u ai. 21 “Bawipa, Bawipa tila ka tengah aka ti thlaang boeih lawng Vaan ram khuiah kuun boeih manawh, tede Vaan ah aka awm a Pa kawngaih aka sai thli bueng lawngah kuun ai. 22 Awlcekna Khawhin apha vengah thlaang yahawh lawng ka tengah Bawipa, Bawipa! na miing oen ah Pathen awl ka thui u, na miing oen ah raaithe thli ka hek u tih kawpoekraina ka sai u! ti ai. 23 Tevengah ahimi te, “kan ming nawh, atloela cet uh, thlaangthe thli!” ka tina ai. 24 “Tedawngah a-u khaw ka awl a yaak tih aka vai tah lungnu dawngah im aka sa thlaangcuih oen lo u. 25 Rawnu tlanthiim, tuiphu tho tih thlipui lawng im te a linglok, tede im te lungnu dawng acakla a sak tih tlim nawh. 26 “Tede a-u khaw ka awl a yaak tih aka vai nawh tah divin dawngah im aka sa thlaangngau oen lo u. 27 Rawnu tlanthiim, tuilet tho tih thlipui lawng im te a linglok vengah tlim. Te kah im a tlim te metila rih ham a awm tangkiik. 28 Jesuh lawng he awl ha thui boeih coengah thlaang yahawh tah a cangpueina dawngah a kawpoek rai u. 29 Ahih lawng phungawl cangpueikung hue angla cang puei nawh tih saithaina aana aka khueh hue angla a cang puei.
1 Tlaangsawm kalawng Jesuh a rum thuk vengah, thlaangping yahawh lawng a hu ah a vai u. 2 Tevengah haibe aka na thlaang pakhat a tengla law tih khuklu oen cuengkueng tih buekuep ruila, “Bawipa, na kawngaih atah nan hoeih sak thai.” a tina. 3 Jesuh lawng a kut a phawh tih a tek coengah, “Ka kaw tla; Ciim hawn loeih!” a tina. Kawlkalh ah haibe natna hoeih pahoei. 4 Tecoengah Jesuh lawng ahih nala te, “Hutung lah! a-u tengah khaw thui boel, khawsoeih tengla cet phaat langtah na pum te nueh, tecoengah thlaang rangpui tengah ka hoeih poen tila tuengsakna ham Mosi phungawl angla luciik thawthuengna te nawn lah” a tina. 5 Jesuh tah Kapernaum khaw a pha vengah Rom raalbawi pakhat lawng a tengah reenna a bih. 6 “Bawipa, ka tuihyoeihthlaang tah tlo tih im ah ral sut, a tlawh nauh tangkiik tih tat khaw tat thai nawh” a tina. 7 Jesuh lawng, “ka law silang ka hoeih sak ai” a tina. 8 Raalbawi lawng, ‘Bawipa, tih mai boel seh; Kai tah thlaangkoeih pavaih nawh dawngah ka im la nang na law ham tah ka koeih nawh. Awl bueng mah m'pe mai, ka tuihyoeihthlaang te hoeih badai” a tina. 9 “Kai khaw ka sawkah Bawihaam thli kut huiah ka awm tih kai kut huiah raalkap thli awm patoeng van baal. Pakhat khat te kai lawng cet lah! ka tina atah cet tih atloe pakhat te law lah’ ka tina atah va law, ka tamnaa te he he sai lah ka tina atah a sai.” a tina. 10 He awl he Jesuh lawng a yaak vengah, a kawpoek la rai tih a hu ah aka vai thlaangping hue tengah, “Atak tang kavan thui u, he ang oengcakna he Israel thlaang tim ah khaw ka hu nawh hun” a tina. 11 Nangmi tengah kavan thui u, khawlaw khawtlaak ben kalawng thlaang yahawh law u vetih, Abraham, Isak, Jakob mi oen Vaan ram kah poei buh veelna ah ngawl u haih ai. 12 Tede Vaan ram aka paang ham koei thlaang hue te Vaan adau ben rungrahna oen naw tahna huen yiinna khuila a voeih ai. 13 Tecoengah Jesuh lawng raalbawi te, “im la meel loeih,” na oengna angla coengg hawn seh” a tina. Raalbawi kah tuihyoeihthlaang tah teveng tue roe ah hoeih pahoei. 14 Piter im la Jesuh a ceh vengah Piter mase hutaa te tlo tih ihkhun dawngah a ralh te a huh. 15 Jesuh lawng a kut ah a phoeih tih a tlawhna hoeih pahoei. Tho hang tih Jesuh te a do a dan. 16 Thlemben tue a pha vengah, a kaw ah raaithe oen aka be thlaang thli te Jesuh tengla avan law puei u. Jesuh lawng a awl kam-at oen raaithe thli te a hek tih thlaangtlo boeih te khaw a hoeih sak. 17 Ahih lawng tila a sai he tah, “Amah lawng mami kah natna te a lawh tih mami kah tlawhthe te a phueih” tila tawngha Isaiah lawng a thui oepsoeh awl te asoepna ham ni. 18 Jesuh lawng a teng-avai kah thlaangping te a huh vengah Galili tuilii khatben rall la ceh ham a hubang hue te awl a peek. 19 Phungawl cangpueikung pakhat a tengla law tih, ‘Saya,’ na cehna roekk ah ka law van ai” a tina. 20 Jesuh lawng, “Metaang lawngkhaw a awmna ham ungrawm a khueh tih, va lawngkhaw bu a khueh, tede Thlaanghing Capa lawngtah ihna huen oen duemdawngna kangna khaw khueh nawh.” a tina. 21 Atloe hubang pakhat lawng atah, “Bawipa, im la ka cet de silang tah a pa rawkk te ka kuem de ai,” a tina. 22 Jesuh lawng, “Ka hu ah bang hawn, thlaangduek lawng amami thlaangduek puei te kuem noen seh,” a tina. 23 Jesuh tah lowng khuila kuun tih, a hubang hue khaw ahih oen cet haih u. 24 Kawlkalh ah tuilii dawngah thlipui tho tih lowng te tuilet lawng a khup dalh. Tede Jesuh tah ditdit ip. 25 A hubang hue a tengla cet u tih a thawh u. Bawipa, kaimi he, n'thlawn lah, ka duek u poen ai he, a tina u. 26 Jesuh lawng, “N'tu ah tila na rih u aih? Na oengna yawl tangkiik u nawh pai he!” a tina. Tecoengah ahih lawng tho tih thlipui oen tuilet te duem ham awl a peek; kawlkalh ah thlipui oen tuilet te duem tih tuilii te dipsipla awm. 27 Thlaang boeih lawng a kawpoek la rai u tih, “He thlaang he me ang thlaang kai? khawthlii oen tuilet lawngkhaw a awl a ngaai pe mai!” ti u. 28 Jesuh tah tuilii khatben rall kah Gadara ram la a law vengah thlaang a upna lungkaw khui kalawng raaithe oen aka be thlaang pahih Jesuh tengla va law. Te rawi tah a kaw khuiah raaithe awm tih a tluung thakbat dawngah te kah lawngpui benla a-u lawngkhaw ceh ham a rih. 29 Ahih rawi lawng, “Nang Pathen Capa, kaihih sawah n'tu sai ham na ngaih? Atue akhoek thlan ah kaihih he dantat hamla na law aw?” tila paang hih. 30 Te huen kalawng ceh hot athlana ah awk yahawh a vuelh u. 31 Raaithe hue lawng Jesuh tengah, “Kaimi he kan hek ai na ti oh atah awk kaw khuiah n'kuun sak u hawn” tila a bih u. 32 Jesuh lawng, “Cet uh,” a tina. Tedawngah ahimi lawng co u tih awk kaw khuila kuun u. Awk boeih te cehthleeng ah plit tih tuilii ah tla tih duek boeih. 33 Awkdoen hue lawng aloela heeng u tih khawpui khuila kuun u, raaithe aka be thlaang pahih kawng oen a huh thli boeih te a thui u. 34 Tedawngah khawpui khuikah thlaang boeih tah Jesuh te huh ham cet u; Jesuh te a huh u veng atah te ram kalawng atloela ceh ham reenna a bih u.
1 Jesuh te lowng khuila kuun, tuilii ah kat tih khatben tuirall amah khaw la te meel koep phai. 2 Te huen ah aka khawn thlaangtlo pakhat te ihphah dawngah avan kawh u tih Jesuh tengla avan khuen u. Jesuh lawng ahimi kah oengna te a huh vengah, aka khawn thlaang te, “Ka capa, na ngai mawng sak! na thawlhna boeih khawdawpngaai la awm poen” a tina. 3 Tevengah Mosi phungawl cangpueikung khatsut hue lawng amami kaw khuiah, “He kah thlaang lawng Pathen thekhana awl a thui nawh pai he!” ti u. 4 Jesuh lawng ahimi kah kawpoek te a ming tih, “N'tu kawngah te ang thaihu the te na poek u? 5 Na thawlhna boeih khawdawp ngaai la awm poen ti he aw aka yoeii bet, tihnawhtah, tho lang cet loeih! ti he aw aka yoeii bet? 6 Thlaanghing Capa lawng dilai sawah thawlh khawdawp ngaai thaina a khueh ti he kan ming sak u ai,” a tina tih aka khawn thlaang te “Tho lah, na himbai te lo lang im la cet loeih!” a tina. 7 Te thlaang lawng tho tih im la cet. 8 Thlaangping lawng te tila a sai te a huh vengah a ngai hang u tih te ang saithaina thlaanghing tengah aka pe Pathen te a thangpawm u. 9 Te huen kalawng Jesuh te cet phai tih Matthai a ti u mangmu cawikung amah yungim ah aka ngawl te a huh. Jesuh lawng, “Ka hu ah va bang lah” a tina. Matthai lawng tho tih a hu ah bang. 10 Jesuh te Matthai im ah buh a caak vengah mangmu cawikung thli oen atloe thlaangthawlh broe lawng Jesuh oen a hubang hue te buh haih a veel puei u. 11 Farasi khatsut lawng te tila buh a veel haih u te a huh vengah a hubang hue te, “N'tu ah na saya lawng mangmu cawikung oen thlaangthawlh hue oen ah buh haih a caak? tila a doet. 12 Jesuh lawng ahimi kah awldoetna te a yaak tih, “Sading thlaang lawng sibawi ngoe nawh, tede thlaangtlo bueng lawng ni angoe,” a tina. 13 Va cet u lang, “Ramsa oen thawthuengna lak ah reenna lungbui te ni ka ngaih,” tila caciim lawng a thuingaihna te poek u lah! Thlaangdoeng khue ham ka law nawh tih thlaangthawlh khue ham ni ka law” a tina. 14 Tecoengah Baptisma pekung Johan kah hubang hue Jesuh tengla law u tih, “N'tu ah kaimi oen Farasi hue lawng atah buh ka yeh u tih nang kah hubang hue lawngtah buh a yeh u nawh?” tila a doet u. 15 Jesuh lawng, “Yuluipoei ah yulokung a awm khuiah poei aka bur kamyin thli te a kaw the u ai aw? Tede ahimi teng kalawng yulokung te athlala a khuenna khawhin apha vengah ahimi lawng buh a yeh u badai. 16 A-u lawngkhaw angki pawn te hisa athaai oen baw vai nawh, hisa athaai oen a baw atah angki ruem te a doek vetih a puut kau tare ai. 17 Te tih van angla a-u lawngkhaw, misurtui athaai te saphaw yuukhap ruem dawngah thloen nawh, athloen atah saphaw te puut ai, misurtui khaw ceu thloep vetih saphaw te khaw pawn ai. Tedawngah misurtui athaai te saphaw yuukhap athaai dawngah a thloen, te atah pahih bok la sueng ai, a tina. 18 He awl he Jesuh lawng a thui lii vengah Judah bawi pakhat te a tengla va law, a haiah khuklu oen cuengkueng tih, “Ka canu tapekca roe ah duek; va law lang a sawah na kut tloeng pe lah, ahih tah hing koep badai,” a tina. 19 Tedawngah Jesuh lawng tho tih a hu ah a vai, a hubang hue khaw ahih oen cet haih u. 20 Kum thlaihih khui thi suntlaak tlawhna oen aka tlo hutaa pakhat Jesuh kah a hu ben kalawng va law tih ahih kah baidung te a tek. 21 Te hutaa lawng, “A baidung hmoi bueng mah ka tek mai kawinih ka hoeih sui de,” tila a thinkaw ah a poek. 22 Jesuh lawng a hu benla mang tih hutaa te a huh vengah, “Ka canu na ngaai mawng sak; na oengna lawng n'hoeih sak poen,” a tina. Teveng tue roe ah hutaa te hoeih pahoei. 23 Tecoengah Jesuh lawng Judah bawi im khuila kuun. Rawkk im ah riingding aka tum hue oen curumngang la aka awm hue te a huh vengah, 24 “Cet u lah! hutaaca he a duek moenih, aka ip ni!” a tina. Ahimi lawng Jesuh te a nuihna u. 25 Thlaangping te a ceh boeih coeng khoeng ah Jesuh lawng hutaaca kah akhann khuila kuun, a kut ah a phoeih tih a thawh vengah hutaaca te tho. 26 He awlthang he a teng avaai kah ram pum boeih ah thaang khok. 27 Jesuh lawng te huen te a thawh taak tih a ceh phai vengah mikpum thlaang pahih lawng a hu ah a vai hih tih, “Devid Capa, kaihih he n'reen lah!” tila paang hih. 28 Jesuh te im khuila a kuun vengah mikpum rawi te a tengla va law hih. Jesuh lawng. “Kai lawng kan hoeih sak thai ti he na oeng hih aw?” tila a doet. “Oeih, Bawipa! kan oeng” a tina hih. 29 Tecoengah Jesuh lawng ahih rawi kah mik te a tek pe tih, “Na oeng hih angla coengg hawn seh,” a tina. 30 Ahih rawi kah mik tah tueng koep. Jesuh lawng te rawi te “He he a-u tengah khaw thui roe roe boel,” a tina. 31 Tede te rawi lawng cet hih tih Jesuh kah awlthang te ram pum boeih ah a heh khonghak. 32 Te kah thlaang pahih te a mel vengah, thlaangvaang hue lawng raaithe aka khueh awlmueh thlaang pakhat te Jesuh tengla avan law puei u. 33 Jesuh lawng raaithe te a hek pe coeng khoeng ah te thlaang lawng cal thai koep tih te kah thlaang boeih tah a kawpoek rai u. “Israel thlaang tim ah he ang he n'hu vai u nawh” ti u. 34 Tede Farasi hue lawngtah, “Raaithe hek thaina huham Jesuh aka pekung he Raaibawi ni,” ti u. 35 Jesuh lawng khawpui oen vangca boeih la cet tih a hiil. Sinakok bok-im ah a cang puei. Vaan ram kawng Awlthang Theen a phawng, tlawhnatna soeprep oen ah aka tlo thlaang boeih te a hoeih sak. 36 Jesuh lawng thlaang yahawh te a huh vengah doenkung aka awm nawh tuu angla, bawmkung taal tih lakueng rihna oen khawdeng ming ruila a awm u te a huh vengah a reen tangkiik. 37 Tedawngah a hubang hue tengah tila a thui, “Caang ah ham yahawh hlang de aka aat ham thlaang yawlca, 38 Caang aka aat thlaang yahawh avan tuihna ham lotoenkung tengah thangthui uh,” a tina.
1 Jesuh lawng a hubang paha thlaihih hue te a khue tun tih, raaithe hek thaina, tlawhna oen natna soeprep hoeih sak thaina te a peek. 2 A hubang paha thlaihih hue kah a miing tah, “lamhacuekla Simon (Piter a ti u te) oen a manau Andru; Zebedi ca rawi Jeem oen a manau Johan; 3 Filip oen Bartalomiu, Tawmas oen mangmu cawikung Matthai, Alfias capa Jeem, oen Tadias; 4 Phunkuup Simon oen Jesuh sawah paipi thleepkung Judah Iskariot, he hue ni. 5 Jesuh lawng a hubang paha thlaihih hue te he tila awl a uen tih a tuih u; “Gental ram oen Samaria ram khawpui boeih ah cet u boel. 6 Te lak ah Israel thlaangphun aka auh tuu tengah cet uh.” 7 Cet u lang, “Vaan ram tah yoeiica poen” tila phawng uh. 8 Thlaangtlo hoeih sak uh, thlaangduek thawh sak koep uh, haibe natna hoeih sak u lang raaithe thli te hek uh. Ayoela na dang u te ayoela pe u van. 9 Sui, ngun oen ruhum tangka khaw na angkithlep dawngah khuen u boel; 10 Yin cehna sawngsa khaw, Angki, khawmuek oen cawnghol khaw ahoei khuen u boel. Bii aka bi tah angoe boeih te peek la awm badai. 11 Khawpui khaw vangca vangnau khaw na pha u vengah awmngaihcala n'do tih aka pah sak ham koei im te tlap u lang na voei thlantoe te im ah cam uh. 12 Im khuila na kuun u vengah, “Nangmi tengah ngaimawngna awm hawn seh,” tina uh. 13 Te imkhuikaw lawng nang te n'do tih m'pah sak atah na voemtoeina awl ngaimawngna tah te im khuiah awm hawn seh!; tede nangmi te n'do nawh tih m'pah sak nawh atah na voemtoeina awl ngaimawngna te lat koep uh. 14 Khatsut imkhuikaw, tihnawhtah khaaw pakhat khat lawngah nangmi te n'do nawh tih na awl thui te khaw a hutung nawh atah ceh taak lang na khow dawngkah laidiik te khoek pe uh, 15 Atak tang kavan thui u, “Awlcekna khawhin ah te khaaw kah thlaang thli lak ah Sodom oen Gomorrah khaaw kah thlaang thli te Pathen lawng a reen ngaai ai,” a tina. 16 “Hutung u lah! metaang tim ah tuu angla nangmi he kan tuih u. Tedawngah ruul angla na cuih khueh u lang akhuu angla na kaw daw sak uh. 17 Ngaithuen uh, nangmi te tuuk hamla thlaang va law ai, awlcekna yung la n'khuen u vetih sinakok bok-im ah khaw m'bawh u ai. 18 Kai kawng dawngah awlcek ham ukkung thli oen sengpahrang haiah n'khuen u vetih ahimi oen Gental hue tengah Awlthang Theen na phawng u ai. 19 Nangmi te awlcek ham n'khuen u vengah n'tu ka thui ai, metila ka thui ai tila lakueng u boel, atue a pha vengah na thui ham koei te m'peek badai. 20 Na thui ham koei awl te tah nangmi awl nawh ni. Te awl tah Pa Pathen Muithla lawng nangmi dawng kalawng a thui ai. 21 “Thlaang lawngah a maya manau te duek sak hamla thlaang kut ah a peek u ai, te tih van angla ana pa lawng a ca thli tengah a sai van ai; a ca thli lawngkhaw a manu oen ana pa te a raalna vetih ngawn sak hamla thlaangtloe kut ah a peek u ai. 22 Kai kawng dawngah thlaang boeih lawng nangmi te n'thina ai; tede a-u khaw aboettoe ueh atah Pathen lawng a thlawn ai. 23 Khaaw pakhat ah nangmi te n'heemtek tih ng'ngawn u atah khaw tloe la heeng uh. Atak tang kavan thui u! Thlaanghing Capa a law thlan ah Israel ram boeih ah bii na coeng u manawh. 24 “Sengcamoe lawng saya sawah awm nawh. Bawi sawah tamnaa lawngkhaw awm nawh. 25 Tedawngah sengcamoe lawng saya angla, tamnaa lawng a bawi angla a awm atah a kaw a tluep ham awm mai. Imkhuikaw kah a luu koek te Beelzebul tila a khue u atah, a cakaw hue tare tah te lak ah anauh ngaai miingthe oen a khue u ai!” a tina. 26 Tedawngah thlaang te rih u boel. Tahe ah thuh elh la aka awm boeih he phumpho vetih awlhuep boeih te ming la awm ai. 27 Yiin samangting ah kavan thui he hingthun khawse ah thui koep uh; ahuepla na yaak te imphu kalawng phawng uh. 28 Pum bueng a ngawn thai tih muithla aka ngawn thai nawh thlaang te rih u boel. Pum oen muithla pahih bokla hell khuiah aka ngawn thai Pathen te rih uh. 29 Pheksa seen pakhat oen variit pahih na lai thai. Tede variit pakhat Pateng na Pa lawng ming ohla dilai ah tla tih duek nawh. 30 Nangmi tare tah na luu dawngkah samthaam Pateng khaw a toek boeih. 31 Tedawngah rih u boel, nangmi tah variit yahawh lak ah na phu awm ngaai.” 32 “A-u khaw kai kah thlaang la a awmna te thlaangping haiah a pai puei khak atah vaan kah a Pa haiah ahih te ka pai puei van ai. 33 Tede a-u khaw thlaangping haiah kai aka hoett tah vaan kah a Pa haiah ahih te ka hoett van ai. 34 “Kai he dilai dawngah roepna awm sak hamla va law tila poek u boel, roepna awm sak ham ka law nawh, samsen ni kavan khuen. 35 Kai tah a capa oen ana pa, a canu oen a manu, a la-nga oen a manii raal u sak ham ni ka law. 36 Thlaang pakhat ham aka nauh koek raal tah amah cakaw ni. 37 “A-u khaw kai lak ah a manu oen ana pa te a thintlawhna ngaai atah kai kah hubang la koeih nawh: A-u khaw kai lak ah a capa oen a canu te a thintlawhna ngaai atah kai kah hubang la koeih nawh. 38 A-u khaw amah kah thinglam te a kawh tih ka hu aka vai nawh tah kai kah hubang la koeih nawh. 39 A-u khaw a hingna dang ham aka yawm tah a hingna a thlawng ai; a-u khaw kai kawng dawngah a hingna te a thlawng atah hingna te a dang ai. 40 “A-u khaw nangmi aka do thlaang tah kai aka do thlaang la awm tih a-u khaw kai aka do tah kai aka tuihkung te a do. 41 A-u khaw Pathen kah celtuih aka do tah Pathen kah celtuih a do dawngah celtuih hue kah kutdo te a dang van ai. A-u khaw thlaangdoeng pakhat te thlaangdoeng la a awm dawngah a do atah ahih kah kutdo te a dang van ai. 42 Atak tang kavan thui u; A-u lawngkhaw ka hubang thli yingkah huhsitkoek pakhat te kai kah hubang la a awm dawngah tuiding boengloeng khui at mai khaw a tuul atah kutdo a dang ngaai ai” a tina.
1 Jesuh lawng a hubang thlaangha thlaihih tengah he awl he a thui pe coengah te huen kalawng tho tih cang puei ham oen awlthang phawng ham a teng-avai kah khawpui boeih ah cet. 2 Baptisma pekung Johan lawng Jesuh Khrih kah thaihu a sai kawng te thongim kalawng a yaak vengah a hubang khatsut hue te Jesuh tengla a tuih. 3 “Aka law ham koei thlaang he nang poen aw? tih nawh atah thlaangtloe aw ka lamtoen u huen ai? van thui lah!” tila Jesuh te a doet sak. 4 Jesuh lawng, “Meel koep u lang, na yaak boeih oen na huh boeih te Johan tengah thui pe uh: 5 Mikpum lawng a mik tueng poen, Khawkheem lawng cet thai poen, haibe aka na lawng hoeih poen, haapang lawng awl a yaak, thlaangduek thli lawng tho tih khawdeng harah thli tengah Awlthang Theen phawng la awm poen. 6 Kai kawng dawngah uepvoetna aka khueh nawh tah yotheen kam-awmna aka dawng thlaang la awm!” 7 Johan kah a hubang hue a ceh coengah, Johan kawng he Jesuh lawng thlaangping tengah a thui pe: “Ramhum huhang Johan tengla na ceh u vengah n'tu huh ham na ngaiuep u? Yilh lawng a yawng tih aka tat mailai capuu aw huh na ngaih u? 8 N'tu bueh hamla na ceh u? Bai-naak theen oen aka thoeicam u thlaang te huh ham aw? Te ang bai-naak aka buen te sengpahrang im ah ni a awm! 9 Van thui u lah, n'tu huh ham na ceh u? Tawngha aw? Oeih! tawngha na huh u; tede na bueh u te tawngha lak ah aka lenduet ni. 10 Johan he tah caciim dawngah: ‘Pathen lawng, nangmi hamla lawngpui roekbahkung ka laipai nangmi haiah kavan tuih ai,’ tila a thui te ni. 11 Atak tang kavan thui u, hutaa lawng a cuun thlaang tim ah Baptisma pekung Johan lak ah aka lenduet a-u khaw awm nawh. Tede Vaan ram ah huhsit koekla aka awm te Johan lak ah lenduet. 12 Johan lawng phungthui a tongcuek veng kalawng tihin toe Vaan Ram he raalna oen thekhana angaihhlangla a ming tih aka raalna thli lawng taa hamla tha a huer u. 13 Johan dung toe tawngha boeih oen Mosi kah Phungawl lawng Vaan ram kawng te a thui u. 14 Nangmi lawngah ahimi kah awl te tangna ham na ngaih u atah Johan he tah va law ai tila a thui oepsoeh u Elijah poen ni. 15 Tedawngah yaakna haa aka khueh lawng ya u hawn seh! 16 “Tahe san kah thlaang thli he n'tu oen nuem ka nuehtah lah ai? Ahimi tah thaihu yoeihna huen ah aka ngawl camaw thli oen lo u. 17 ‘Thlaangvaang lawngah a tloe hue te, nangmi hamla yuluina riingding kavan tum u, tede na laam u nawh! duek laa kavan sak u, tede na rap u nawh! tila a paang thil u.’ 18 Johan a law vengah, ahih lawng buh a yeh tih misurtui khaw a awkk nawh dawngah thlaang boeih lawng ahih tah raaithe oen be!’ na ti u. 19 Thlaanghing Capa a law vengah ahih lawng a caak a awkk dawngah thlaang boeih lawng, “He thlaang he bueh u lah! caruut awlam thlaang ni, mangmu cawikung hue oen thlaangthawlh hue kah a paya ni” na ti u. Tede Pathen cuihna tah soeng tila a saina oen a tueng sak” a tina. 20 Jesuh lawng kawpoekraina yahawh hlang a saina khawpui thli kah thlaang hue lawng thawlhna a yut u nawh dawngah te khawpui thli te a toel atham. 21 Korazin, nang hamla khawmap tangkiik nawh pai he! Betsaida, nang ham khaw khawmap tangkiik nawh pai he! nangmi tengkah kawpoekraina ka sai thli he Taiar oen Sidon ah ka sai kawinih te kah thlaang hue lawng a thawlh yutna tueng sakna ham tlamhi oen a thiing u coengah amah oen amah haiphu oen phull u vetih a thawlhna yut u poen sui de. 22 Atak tang kavan thui u; Awlcekna Hin ah Pathen lawng nangmi lak ah Taiar oen Sidon khaaw kah thlaang hue te a reen bet ai. 23 Nang Kapernaum namah oen namah vaan la pawmsang u ham na ngaih aw? Hell ah thlaak la na awm ai! Nangmi khaaw kah kawpoekraina ka sai he Sidon khaaw ah ka sai kawinih tihin toe ah te khaaw te awm hun sui de! 24 Atheenla ming uh! Awlcekna Hin ah Pathen lawng nang lak ah Sidon khaaw te a reen bet ai!” a tina. 25 Tevengah Jesuh lawng, “Apa, dilai oen vaan kah Bawipa! Thlaangcuih oen aka thoemthai hue tengah na thuh te aka thoemthai nawh hue tengah na tueng sak dawngah kan uem tangkiik. 26 Oeih, Apa, he ang he nang lawng coengg sak hamla na ngaih roe ni.” tila a thui. 27 “Apa lawng thaihu soeprep boeih m'peek poen. Apa nawh tah a-u lawngkhaw Capa te ming nawh. Capa oen amah te m'ming seh tila Capa lawng a tueng sak thlaang thli teng bueng nawh atah a-u lawngkhaw a Pa te ming u manawh. 28 “Thalrih aka phuei tih tha aka hoengg thli boeih ka tengla law u lah, kai lawngah duemdawngna kan pe u ai. 29 Kai kah hawphueih he lo lang phuei u lah, kai tah kawdaw oen boe-ngaaina thinkaw ka khueh dawngah kai tengah cang u lah; ngaimawngna kan pe ai. 30 Kai lawng kan phueih sak hawphueih tah a phueih khaw nep tih thalrih khaw yaanghoep,” a tina.
1 Tecoeng adiw aih thlan ah Jesuh tah sabbath hin ah lo lak kalawng pat cet. A hubang thli buh a pawng u dawngah caangvui te a yuun u tih a caak u. 2 Farasi thli lawng a huh vengah, Jesuh nala “Bueh lah, na hubang hue lawng sabbath hin ah he tila a sai u he kaimi kah Phungawl a phe,” a tina u. 3 Jesuh lawng, “Devid oen a thlaang hue lawng a bung a pawng u vengah n'tu a sai tite na tae u nooek nawh aw? 4 Devid lawng Pathen im khuila kuun tih, Pathen tengah a peek u takawi, khawsoeih hue bueng lawng a caak koei takawi te Devid oen a thlaang hue lawng a caak u teta ahimi lawng Mosi phungawl eek u nawh aw? 5 Te bueng ohla sabbath hin takuem ah khawsoeih hue lawng Tempal khuiah sabbath phung a eek u poepa de thawlhna la awm nawh tite na tae u nawh aw? 6 Tempal lak ah aka lenduet he ah awm.” 7 Caciim lawng, “Kai tah boiava oen thawthueng lak ah reenna te ka ngaih ngaai a tite a thuingaihna awltak na ming u kawinih aka thawlh nawh thlaang thli te thawlh na peel u nawh sui de. 8 Metihtiah Thlaanghing Capa tah Sabbath Bawi ni” a tina. 9 Jesuh tah te huen kalawng cet tih sinakok bok-im la kuun. 10 Te kah sinakok bok-im ah kutkheem thlaang pakhat awm. Te ah te Jesuh thawlh peel ham aka ngaih thlaang khatsut awm. Ahimi lawng Jesuh te, “Sabbath hin ah thlaang hoeih sak ham mami kah Phungawl lawng a ngaih kai aw?” tila a doet u. 11 Jesuh lawng, “Nangmi timkah thlaang pakhat lawng tuu pakhat a khueh tih Sabbath hin ah ungrawm dung khuila tla kawinih tuu te doek tih lawh ohla na awm ai aw? 12 Thlaanghing he tuu lak ah a phu tlo. Tedawngah Sabbath hin ah thlaang bawmcem ham mami kah Phungawl lawng a ngaih” a tina. 13 Tecoengah te kah kutkheem thlaang te, “na kut yueng lah” a tina. Ahih lawng a kut te a yueng vengah khatben kut angla theen koep. 14 Tecoengah Farasi hue lawng cet u tih Jesuh te ngawn hamla a teeng u. 15 Jesuh amah ngawn ham a teeng u te a yaak vengah te huen kalawng ah cet. Tevengah thlaangping lawng a hu ah bung a vai u. Jesuh lawng thlaangtlo boeih te a hoeih sak. 16 Amah kawng te thlaangtloe tengah thui nawh ham a khaang pe. 17 He tila a sai he tah Pathen lawng tawngha Isaiah hawna oen: a thui oepsoeh te asoepna ham ni. 18 Isaiah lawng “He tah ka lungna, ka thinkaw aka deng ka tuihyoeihthlaang ka tuek te ni. Ahih sawah ka Muithla te ka khueh vetih, doengna phung te thlaangphun boeih tengah a phawng ai. 19 Ahih lawngtah thlaang te oelhtaih nawh vetih paang manawh. Lawngpui ah a awl a kaa te a-u lawngkhaw ya manawh. 20 Doengna lawng taana te a khueh thlantoe toeng ohla a sai ai. Ahih lawngtah aka tlot tawm caapu thing te khaw khemtlot nawh vetih aka duek tawm hai-im te khaw thih yip manawh. 21 Ahih te thlaangphun boeih lawng a uepna ai,” tila a thui te a soepna ham ni. 22 Tecoengah thlaang khatsut lawng raaithe a khueh dawngah a mik pum tih awl aka mueh thlaang pakhat te Jesuh tengla avan law puei u. Jesuh lawng te thlaang te a hoeih sak dawngah awl khaw a thui thai tih a mik khaw tueng koep. 23 Jesuh kah a saina dawngah thlaang broe lawng a kawpoek rai u tih, “Ahih he Devid Capa tangtang cawini!” ti u. 24 Farasi hue lawng he awl he a yaak vengah ahimi lawng;” Ahih lawngah raaithe a hek thai he tah ahimi ukkung Beelzebul lawng raaithe hek thaina huham tharana a peek dawngah ni,” a tina u. 25 Ahimi kah poekna te Jesuh lawng a ming tih ahimi tengah, “Ram pakhat ah a kawpoek vai u nawh tih athloekla pek u tih raal u kawinih asanhlang cak manawh. Tih van angla khawpui pakhat tihnawhtah imkhuikaw pakhat ah pek bo u tih raal u kawinih pai thai manawh. 26 Tedawngah Seitan ram khuiah bu pakhat oen pakhat raal u kawinih te ram te bu la pek u poen dawngah kawlkalh ah rawk ai. 27 Nangmi lawngah Beelzebul lawng huham tharana a peek dawngah kai lawng raaithe a hek thai na ti u. Tetih atah nangmi kah hubang hue te raaithe hek thaina huham tharana a-u lawng a peek kai? Nangmi kah sai thawlh he namami kah hubang hue lawng a tueng sak! 28 Raaithe hek thaina huham he Beelzebul kah nawh ni, tede kai he raaithe hek thaina huham tharana pekung tah Pathen Muithla ni, raaithe hek thaina lawng he nangmi sawah Pathen ram avan pha poen tite a tueng sak. 29 “A tha aka ra thlaang te a piin lamha nawh atah a-u lawngkhaw a im te a muk tih a kaawn te lawh pe thai nawh; amah te a piin coengah a kaawn te a lawh pe thai ai. 30 A-u khaw kai aka pai puei nawh tah kai aka raalna thlaang ni. A-u khaw kai lawng thlaang ka caawi vengah aka caawi puei nawh tah pekbokung ni. 31 Tedawngah kavan thui u, thlaanghing lawng me ang thawlhna khaw a sai tih Pathen thekhana awlthe awlkha phoei mai cakhaw a sawah khawdawp a ngaai pe ai, tede a-u khaw Ciim Muithla thekhana awl a thui atah a sawah khawdawp ngaai pe manawh. 32 A-u khaw thlaanghing Capa raalna awlthe thui mai cakhaw a sawah khawdawp a ngai ai, tede a-u khaw Ciim Muithla raalna awlthe aka thui tah tahe ah khaw, hailam ben toe meveng khaw a sawah khawdawp ngaai pe tlaih manawh.” a tina. 33 “Athaih theen dang ham thingkung theen khueh a ngoe. Thingkung the na khueh atah athaih the van ai. Ame ang thingkung tite athaih rang oen m'ming thai ai. 34 Nangmi ruul hue; Na the u lal maiah metila awltheen na thui u thai ai? Lungbui khuiah aka awm te kaa dawng kalawng va thoeng. 35 Thlaangdoeng lawngtah thaihu theen a kuem khuikah thaihu theen te a pho sak; Thlaangthe lawngtah thaihu the a kuem khuikah thaihu the te a pho sak van. 36 Atak tang kavan thui u; “Awlcekna Hin atah thlaang boeih lawng awlpoei a thuina dawngah awlcekna a yawkk ai. 37 Na dok oen na tangna te mingna ham namah kah awlthui te awlcekna ham a hawna ai.” 38 Tecoengah Phungawl cangpueikung khatsut oen Farasi khatsut hue lawng,” Saya! kawpoekraina na sai te huh ham ka ngaih u” a tina. 39 Jesuh lawng “Tahe san kah thlaangthe oen Pathen n'tu la aka sak nawh thlaang hue nangmi lawng kawpoekraina sai ham nan ceel u? Ka sai manawh! Atloe kawpoekraina nawh tih Tawngha Jonah kah kawpoek-raina bueng te ni na huh u ai. 40 Jonah tah nga bung khuiah yiin daai hin thum a awm angla Thlaanghing Capa khaw yiin daai hin thum dilai khuiah awm van ai. 41 Nineveh khawpui kah thlaang thli lawng Jonah kah phungthui awl a yaak u dawngah a thawlhna yut u, Awlcekna Hin ah ahimi lawng pai vetih nangmi te thawlh n'peel u ai. Atak tang kavan thui u, Jonah lak ah aka lenduet he ah awm. 42 Sheba sengpahrang Nu lawng Solomon kah cuihna awl hutung ham athlahlang amah ram kalawng va law; Awlcekna Hin ah ahih lawng pai vetih nangmi te thawlh n'pup ai. Atak tang kavan thui u, Solomon lak ah aka lenduet he ah awm” a tina. 43 “Thlaang pakhat kaw khui kalawng raaithe te a co vengah, ramhum huhang a hiil tih a awmna huen a tlap: a awmna huen a dang nawh vengah, 44 Ka im la ka meel koep ai, tila a poek. Tedawngah a meel koep phai vengah im aciimbiitla awm tih atheenla thaihu akuem te a huh. 45 Tecoengah cet koep tih amah lak ah aka the ngaai raaithe pasarih te avan law puei tih te im ah awm u. Tedawngah a hukhueng ah te thlaang tah acuek veng lak ah nauh tare. He tih van angla tahe san kah thlaangthe thli tengah awm van ai” a tina. 46 Jesuh lawng thlaangping tim ah awl a thui lii vengah, a manu nucahui law u tih ahih oen awl thui a ngaih u dawngah im adau ben ah pai u. 47 Tedawngah thlaangping timkah thlaang pakhat lawng Jesuh te “Bueh lah! na nu nucahui nang oen awl thui a ngaih u tih adau ben ah pai u” a tina. 48 Jesuh lawng, “A nu te a-u nuem? ka manau hue te a-u nuem?” a tina. 49 Tecoengah a hubang hue te a khi tih, “Bueh u lah! a nu oen ka manau hue tah ahimi he ni! 50 A-u khaw vaan ah aka awm a Pa kawngaih aka sai tah ka maya, ka manau, ka ngannu oen a nu ni,” a tina.
1 Te hin ah Jesuh lawng te im te a thawh taak tih Galili tuiliikeeng la cet; cang puei ham te ah te ngawl. 2 Ahih aka veel thlaangping a yahawh aih dawngah Jesuh tah lowng khuila kuun tih ngawl; thlaangping hue tah tuilii-keeng ah pai u. 3 Jesuh lawng thuidoetna awl oen ahimi te thaihu moen a thui pe. “Voei khat ah caangti hehkung thlaang pakhat tah caangti heh hamla cet. 4 Ahih lawng caangti te lo khuiah a heh vengah khatsut tah lawngpui ah tla tih va lawng a ruh boeih. 5 Caangti khatsut tah lungrawng sawkah dilai ah tla, dilai apam dawngah kawlkalh ah caangti tah po. 6 Tede khaw a ling hang atah caangpawk te khawling lawng a kaang, a yung te a dung la a thlak nawh dawngah kawlkalh ah yai tih reu. 7 Caangti khatsut tah thliing tim ah tla, thliingkung tah roeng hang tih caang te malh a telh. 8 Tede caangti khatsut tah laitheen dawngah tla tih a vui a thaih thaawn. Khatsut tah apueh yakhat, sawmruk, sawm thum toe la nawl.” 9 Jesuh lawng, “Yaakna haa aka khueh lawng ya hawn seh” a tina. 10 Tecoengah a hubang hue Jesuh tengla law u tih, “Thlaangping tengah awl na thui vengah n'tu hamla thuidoetna awl na hawna?” tila a doet u. 11 Jesuh lawng, “Vaan ram kawng awlhuep mingna te nangmi tengah kan peek poen, tede ahimi tah ka pe thlan. 12 A-u khaw aka khueh te tah a taawm pe vetih a ngoena lak ah a khueh tare ai; tede aka khueh nawh te tah a khueh duen te a lawh pe ai. 13 Ahimi tengah awl ka thui vengah thuidoetna ka hawna he tah ahimi lawng a bueh u, tede hu u nawh, a hutung u, tede ya u nawh, yaakming khaw yaakming u nawh. 14 Tedawngah Tawngha Isaiah lawng a thui oepsoeh awl te ahimi tengah soep. Te awl tah: “He thlaang hue lawng a hutung tah a hutung u de, yaakming u nawh; a bueh tah a bueh u de hu u nawh, 15 Metihtiah a kawpoek biing sut tih a haa a buem khoep u, a mik te a yiin khoep u, tih nawh kawinih ahimi mik lawng a huh vetih a haa lawng a yaak coengah a thinkaw lawng a yaakming vetih ka tengla va meel u ai, ahimi te kai lawng ka hoeih sak sui de” tila Pathen lawng a thui te ni. 16 “Nangmi tah na yotheen phoeih. Na mik lawng a huh tih na haa lawng a yaak u. 17 Atak tang kavan thui u, nangmi lawng na huh u he tawngha hue oen Pathen kah thlaang hue lawng huh ham a ngaih u tangkiik de hu u thai nawh; nangmi lawng na yaak te yaak ham a ngaih de ya u nawh,” a tina. 18 Tedawngah caangti hehkung thuidoetna awl thuicaihna he hutung u lang yaakming u lah. 19 A-u khaw Vaan ram kawng awlthang a yaak de aka yaakming nawh te tah lawngpui ah aka tla caangti oen lo u. Ahimi thinkaw ah a heh u caangti te Seitan lawng law tih a rot pe. 20 Lungrawng sawkah dilai apamna ah aka tla caangti tah Vaan ram kawng a yaak vengah awmngaihcala aka do koeloe thlaang oen lo u. 21 Tede, ahimi kah thinkaw lungbui ah Vaan ram kawng a thlengyung a thlaak nawh dawngah asan hlang hing nawh. Tedawngah Vaan ram kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei. 22 Thliing tim ah aka tla caangti thui-ngaihna tah Vaan ram kawng tah a yaak de dilai khawsakna dawngah lakueng tih dilai han bawilen ngaihna lawng akang ahalh khoep tih caangvui caangthaih aka thaawn nawh oen lo u. 23 Laitheen dawngah aka tla caangti tah Vaan ram kawng te a yaak tih aka yaakming thlaang te a thuingaihna, ahimi tah a vui athaih thaawn tih apueh yakhat, apueh sawmruk, apueh sawmthum la thaawn. 24 Jesuh lawng ahimi tengah atloe thuidoetna pakhat a thui pe: “Vaan ram tah amah lo ah caangti theen aka heh thlaang pakhat oen lo u. 25 Yiin at atah, thlaang boeih a ih coengah raal pakhat law tih caang tim ah varaamcaang a heh tih a ceh taak. 26 Caangkung tah roeng tih avui arai hang atah varaamcaang khaw pho van. 27 Lokhuehkung kah a tuihyoeihthlaang hue lawng a tengla law u tih, Bawipa! na lo khuiah caangti theen ni na heh de, ame kah varaamcaang he a po oh kai?” a tina u. 28 Ahih lawngah, “Te ngoen tah raal thli lawng a heh ni,” a tina. Ahimi lawng, “Ka cet u silang varaamcaang te ka phuk u ai aw?” tila a doet u. 29 Lokhuehkung lawng “Phuk u boel,” varaamcaang te na phuk u kawinih caangkung oen na phuk renten u hau ai” a tina. 30 Caang ah tue a pha thlantoe caangkung oen varaamcaang te roeng haih hawn seh. Caang ah tue a pha vengah cang-aat hue te lamhala varaamcaang te phuk, tuum u langtah hai dawngah phuum uh, te coengah caang te aat uh! caawi u langtah ka thaidi khuiah sang uh, ka tina badai.” a tina. 31 Jesuh lawng atloe thuidoetna pakhat ahimi tengah a thui pe: “Vaan ram tah he tila awm. Thlaang pakhat lawng antammu a lawh tih a lo khuiah a heh. 32 Antammu tah amu-ati boeih lak ah a yiitkoek la awm. Tede po tih a roeng hang atah akung boeih lak ah aka bo koek la awm. Thingkung pakhat la pai, va thli law tih a beek dawngah bu a tuk.” 33 Jesuh lawng ahimi tengah atloe thuidoetna pakhat a thui pe baal: “Vaan ram tah he tila awm. Hutaa pakhat lawng tawlru a lawh tih taa-eek hawl at dawng a phull atah a raawi sak boeih oen lo u” tila Jesuh lawng a tina. 34 Jesuh lawng he thaihu boeih thlaangping tengah a thui vengah thuidoetna a hawna. Thuidoetna hawna ohla n'tu khaw thui nawh. 35 He tila a thui he tah Tawngha lawng, “Ahimi tengah awl ka thui vengah thuidoetna ka hawna ai; Dilai a suen cuek kalawng ming nooek nawh awlhuep te ka thui ai,” tila a thui te a soepna ham ni. 36 Jesuh lawng thlaangping te a ceh taak tih im khuila a kuun vengah a hubang hue a tengla law u tih, “Lo khuikah varaamcaang thuidoetna te acaihla van thui lah” a tina u. 37 Jesuh lawng, “Caangti theen aka heh tah Thlaanghing Capa ni; 38 Lo tah he dilai ni; caangti theen tah Vaan ram aka paang thlaang hue ni; varaamcaang tah Seitan kah thlaang hue ni; 39 Varaamcaang aka heh raal tah Seitan ni; caang ah tue tah dilai a boetna; caangaatkung tah vanthlaang hue ni. 40 Varaamcaang te a caawi tih hai dawng a phuum angla dilai aboet tue atah te tila awm van ai. 41 Thlaanghing Capa lawng vanthlaang thli te avan tuih vetih thawlhna ben la thlaang aka ceh sak boeih oen thaihu the aka sai boeih te amah Ram khuiah a caawi sak vetih, 42 Vanthlaang lawng ahimi te haialh dawngah a phuum ai, te huen ah rap vetih a naw a rueng u ai. 43 Tevengah thlaangdoeng thli tah ana pa Pathen kah Ram ah khaw angla see u ai. Tedawngah yaakna haa aka khueh lawng ya u lah!” a tina. 44 “Vaan ram tah he oen lo u. Thlaang pakhat lawng lo ah khawh-arang a thuh te a huh. Ahih lawng atheenla a up koep tih awmngaihla im la cet. A khueh thaihu boeih te a yoeih coengah meel koep tih te kah lohuen te a lai. 45 “Tecoengah Vaan ram tah he oen lo u. Thlaang pakhat lawng latha theen a tlap, 46 A hih lawng latha theen te a huh vengah cet tih a khueh thaihu boeih te a yoeih coengah te kah latha te a lai. 47 “Tecoengah Vaan ram tah he oen lo u. Tui aka hawi khatsut hue lawng tuilii khuiah lok te a heeng u tih nga phun soeprep te a tuuk u. 48 Lok dawngah nga a be atah lan la a doek u tih nga te pekbo hamla ngawl u: nga atheen te busui dawngah a sang u tih nga athe te tah a voeih u. 49 Dilai aboet tue atah he tila awm van ai: vanthlaang lawng law vetih thlaang theen timkah thlaangthe te a tuek coengah, 50 Ahimi te haialh dawngah a phuum ai. Te huen ah ahimi lawng rap vetih a naw a rueng u ai,” tila a thui pe u. 51 Jesuh lawng, “He thaihu boeih he na yaakming u aw?” tila ahimi te a doet. Ahimi lawngah, “Oeih! ka yaakming u poen” a tina. 52 Tedawngah Jesuh lawng, “Phung-awl cangpueikung timkah thlaang pakhat, Vaan ram ah hubang pakhat la aka awm tah kaawn a khuehna im khui-kah thaihu aruem oen athaai aka sat oen lo u,” a tina. 53 Jesuh lawng thuidoetna he a thui boeih coengah, te huen te a ceh taak tih, 54 Amah awmna Nazaret la meel koep. Sinakok ah a cang puei tih ahih kah awl aka ya thlaang boeih a kawpoek rai u. “He ang cuihna he me kah a huh kai? He ang kawpoekraina he metila a sai thai kai?” tila te doet u patoeng. 55 “Ahih he lettama capa nawh aw? Meri he ahih kah a manu nawh aw? Jeem, Josep, Simon oen Judah he ahih kah a manau thli nawh aw? 56 He kah aka awm he a ngannu thli nawh aw? He ang thaihu boeih he me kah a dang kai?” ti u. 57 Tedawngah ahimi lawng Jesuh te hinyah u nawh. Jesuh lawng ahimi te, “Tawngha tah amah awmna khawpui oen a imkhuikaw nawh atah huen tloe boeih ah a hinyah u,” a tina. 58 Metihtiah ahimi lawng oengna a khueh nawh dawngah Jesuh lawng te huen ah kawpoekraina yahawh sai nawh.
1 Teveng tue ah Galili peng ukkung Herod lawng Jesuh kawng te a yaak. 2 Herod lawng, “Ahih tah aka hing koep baptisma pekung Johan tang tang ni, tedawngah kawpoekrai saithaina huham a khueh,” tila a kut hui kah bawi hue te a thui pe. 3 Teveng thlan ah Herod lawng Johan te a tuuk sak tih thong khuiah a thlaak. Ahih lawng tila a sai he tah a manau Filip kah a yu Herodias kawng dawngah ni. 4 Voei khat ah Baptisma pekung Johan lawng Herod te, “Herodias he na yuna ham tuueng nawh,” a tina. 5 Herod lawng ahih te ngawn ham a ngaih. Tede, Judah thlaang thli lawng Johan te tawngha pakhat ni a ti u dawngah ahimi te a rih. 6 Herod a cuunna hin ah Herodias canu lawng kamyin thlaang yahawh haiah laam. Herod tah a kaw hoe tangkiik tih, 7 Hutaaca tengah, “Na van bih boeih te kan pe ai,” tila a taap tih awl a kam. 8 Hutaaca lawng a manu kah ceemtuh angla a bih tih, “Baptisma pekung Johan kah a luu te beelphai dawngah tahe ah m'peh,” a tina. 9 Sengpahrang tah a kawthe, tede ahih lawng kamyin boeih haiah awl a kam poen dawngah hutaaca kah a bihna angla peek ham Herod lawng awl a peek. 10 Tedawngah thongim khuikah Johan luu te a tloek sak. 11 A luu te beelphai dawngah avan khuen u tih hutaaca te a peek u, hutaaca lawng a manu tengla a khuen. 12 Johan kah hubang thli law u, a rawkk te a khuen u tih a up u, tecoengah ahimi lawng cet u tih Jesuh tengah a thui pe u. 13 Jesuh lawng Johan kawng awlthang te a yaak vengah te huen kalawng thlaang a awmna nawh a dingruena huen la lowng oen amah bueng cet. Te kawng te thlaang yahawh lawng a yaak. Tedawngah a awmna khaaw roekk kalawng law u tih lanloeih lawngpui kalawng Jesuh te a hu ah a vai u. 14 Jesuh te lowng dawng kalawng lan la rum tih thlaangping te a huh vengah ahimi te caalla a reen tih thlaangtlo boeih te a hoeih sak. 15 Thlemben tue apha veng atah a hubang hue a tengla law u tih, “Khaw thlem poen, he huen tah thlaang a awmna nawh huen la awm, thlaangping he khaaw khui la tuih lang a mami ham caak awkk lai u seh,” a tina. 16 Jesuh lawng, “Ahimi ceh ham ngoe nawh,’ “Nangmi lawng caak koei pe uh,” a tina. 17 A hubang hue lawng, “Takawi cuun ngaa oen nga pahih bueng ni ka khueh u,” a tina. 18 Jesuh lawng, “Ka tengla van khuen u lah,” a tina. 19 Thlaangping te pompih dawngah ngawlh ham awl a peek; tecoengah takawi cuun ngaa oen nga pahih te a lawh, vaan la maang tih Pathen tengah awmngaih awl a thui. Jesuh lawng takawi te a eh coengah a hubang hue te a peek tih a hubang hue lawng thlaangping tengah a ree pe. 20 Thlaang boeih lawng a caak tih a bung hah. Tecoengah a caak coeih te a hubang hue lawng vawhphueih paha thlaihih la a caawi u. 21 Buh aka ca boeih tah hutaa oen camaw toek ohla tawngpataang hawng ah thlaang thong ngaa yunyan awm ai. 22 Jesuh lawng thlaangping te a mel sak veng te ah a hubang hue te lowng khuila a kuun sak tih lamhala tuilii khatben rall la a tuih. 23 Thlaangping te a tuih boeih coengah Jesuh tah thangthui ham amah bueng tlaang la luui. Khaw athlem atah Jesuh amah bueng te huen ah awm. 24 Lowng te tuirall kalawng athlana tuiluung a pha vengah thlipui tho tih lowng te a maam khak dawngah, tuilet lawng dalh a khup. 25 Cinghuetaang atah Jesuh lawng a hubang hue tengla tui sawah cet. 26 Tui sawah a ceh te ahimi lawng a huh u vengah let u tih, “Muithla ni,” ti u tih paang u. 27 Jesuh lawng ahimi te a voem pahoei tih, “Lakueng u boel! Kai ni; rih u boel,” a tina. 28 Tecoengah Piter lawng, “Bawipa, nang tang tang atah na teng la tui sawah ka lawna ham awl m'pe lah,” a tina. 29 Jesuh lawng, “Va law lah!” a tina. Tedawngah Piter te lowng khui kalawng rum tih Jesuh tengla tui sawah cet. 30 Tede Piter lawng khawthlii a tlawh hlang te a huh vengah a rih tih tui khuiah dalh buekk. “Bawipa n'thlawn lah!” tila paang. 31 Jesuh lawng a kut a phawng pahoei tih ahih te a phoeih coengah, “Na oengna yawl tangkiik! n'tu dawngah uepvoetna na khueh?” a tina. 32 Ahih rawi te lowng khuila a kuun hih coeng atah khawthlii dip. 33 Tecoengah lowng khuiah a hubang hue lawng Jesuh te a bok u. Ahimi lawng, “Nang tah Pathen Capa tang tang ni!” a tina u. 34 Ahimi lawng tuilii ah te kat u tih Gennesaret ram te a pha u. 35 Te kah thlaang hue lawng Jesuh te a noek u. Tedawngah a teng-avai kah thlaangtlo boeih te a khue u tih Jesuh tengla avan law puei u. 36 Thlaangtlo thli lawng Jesuh kah himbai hmoi te tek ham a bih u tih aka tek boeih tah hoeih u.
1 Tecoengah Farasi khatsut oen Phungawl cangpueikung khatsut te Jesuh tengla Jerusalem kalawng law u tih, 2 “N'tu dawngah na hubang hue lawng mami patuer thli kah cang puei awl te a eek u? Ahimi lawng buh caak thlan ah kut sil u nawh!” tila a doet. 3 Jesuh lawng, “N'tu dawngah, Pathen kah awlpeek te na vai u nawh tih namami kah cang puei bueng na vai u?” a tina. 4 Pathen lawng, na nu oen na pa te hinyah uh! a-u khaw a manu oen ana pa te a tap avoep atah duek sak ham awm” ti. 5 Tede nangmi kah cang puei tah thlaang pakhat mai lawngah a manu oen ana pa bawmna hamla thaihu pakhat mai khaw a khueh te, “He tah Pathen koe ni,” a ti atah, 6 ‘A manu oen ana pa te hinyah ham ngoe tlaih nawh,” na ti u. He tila namami kah cangpueina bueng te na vai u tih Pathen kah awlpeek te n'tu la na sak u nawh. 7 Nangmi thlaangthaipalat hue! Isaiah lawng nangmi kawng a thui oepsoeh te soeng tang tang! 8 Isaiah lawng, “He thlaang hue lawng awlhong oen kai ng'hinyah u, tede a thinkaw lungbui tah kai oen thla tangkiik. 9 Ahimi lawng thlaanghing kah sai coplap phung te kai kah awlpeek angla a cang puei dawngah, kai m'bok u he khaw a poei ni; tila Pathen lawng ti,” a tina. 10 Tecoengah Jesuh lawng thlaangping hue te a tengla a khue tih ahimi te, “Hutung u lang yaakming u lah! 11 Thlaang aka ciimcaih sak nawh thaihu he tah kaa khui kalawng aka kuun he nawh ni, kaa khuikah aka thoeng lawng ni thlaang he a ciimcaih sak nawh” a tina. 12 Tecoengah a hubang hue ahih tengla law u tih, “Na awlthui lawngah Farasi hue a thin a sa sak he na ming aw?” a tina. 13 Jesuh lawng, “Vaan a Pa kah thingliing nawh thingkung boeih tah a phuk ai; 14 “Ahimi kawngah lakueng u boel! ahimi tah mikpum aka mawt mikpum hue ni, mikpum pakhat lawng atloe mikpum te a mawt atah ungrawm khuila bok tla hih ai,” a tina. 15 Piter lawng, “Te thuidoetna awl te kaimi tengah aciimla van thui lah!” a tina. 16 Jesuh lawng ahimi tengah, “Nangmi he tahe toe thlaangtloe lak ah na cuih u thlan nawh pai he! 17 “Na yaakming u nawh aw? Thlaang kaa khuiah aka kuun thaihu boeih tah a bung khui a pha tih te kalawng naatceh la thoeng. 18 Tede kaa khuikah aka thoeng hang thaihu tah thinkaw lungbui khui kalawng law tih te thaihu lawng thlaang ciimcaih sak nawh. 19 Thlaang ngawnna, samphaihna, hutaa tawngpa thawlhna, atheen nawh thaihu saina, huuenna, hoemna, thlaang thaang the sakna, poekna atloe boeih he tah lungbui khui kalawng ni a law. 20 He ang thli lawng thlaang a hawt a aih, tede ahimi kah a thui angla kut silh ohla buh caakna lawng thlaang he a hawt a aih moenih,” a tina. 21 Jesuh lawng te huen te a thawh taak tih Taiar oen Sidon peng la cet. 22 Te peng kah aka awm Kanaan nu pakhat a tengla law tih, “Devid Capa!” Kai he n'reen lah, ka canu tah raaithe lawng a tuuk tih nauh tangkiik,” tila angaihhlangla paang. 23 Tede Jesuh lawng kam at khaw voem nawh. A hubang thli a tengla law u tih, “Ahih he tuih loeih, mami hu ah bang tih thlaangngeu palaawn la paang khiing,” a tina u. 24 Tecoengah Jesuh lawng, “Israel thlaang aka auh tuuca ham bueng ni ka law,” a tina. 25 Tevengah te kah hutaa lawng Jesuh khow kungah buekuep tih, “Bawipa! kai he n'reen mai hawn lah,” a tina. 26 Jesuh lawng, “Camaw kah buh te lawh tih ui m'peek pe atah soeng nawh,” a tina. 27 Te hutaa lawng, “Bawipa, na thui te soeng tak tak, tede ui lawngkhaw a Bawipa kah caboi dawng kalawng aka tla buhdik anhaai te a caak van ta,” a tina. 28 Tedawngah Jesuh lawng, “Nang tah oengcakna aka khueh hutaa ni! na ngaihna angla coengg hawn seh,” a tina. Teveng tue roe ah a canu te hoeih pahoei. 29 Jesuh lawng te huen te a thawh taak tih, Galili tuiliikeeng ah cet. Tecoengah tlaang la luui hang tih ngawl. 30 Thlaangping lawng ah khawkheem thli, mikpum thli, aka khawn thli, awlmueh oen atloe thlaangtlo te avan law puei u tih, Jesuh kah a khow kungah a khueh u tih ahimi boeih te Jesuh lawng a hoeih sak. 31 Awlmueh lawng cal thai, aka khawn thli lawng theen, khawkheem lawng cet thai, mikpum lawng a mik a tueng koep te thlaangping lawng a huh u vengah a kawpoek rai u tih Israel Pathen te a thangpawm u. 32 Jesuh lawng a hubang hue te a tengla a khue tih, “Thlaangping he kai oen hin thum ka awm haih u poen tih tahe ah buh caak ham a khueh u tlaih nawh dawngah ka reen tangkiik, lawngpueng ah tawnba u hau ai ka ti dawngah ahimi he buh cah ohla im la tuih ham ka ngaih nawh,” a tina. 33 A hubang hue lawng, “He thlaangping he yoeh kok ham he ramhum ah ame kah buh caak khoek kaimi lawng ka dang ai?” tila Jesuh te a doet u. 34 Jesuh lawng, “Takawi meyoeh na khueh u?” a tina. Ahimi lawng “Takawi cuun rih oen nga ayawlca tah awm,” a tina u. 35 Jesuh lawng thlaangping hue te dilai dawngah a ngawlh sak. 36 Tecoengah takawi cuun rih oen nga te a lawh tih Pathen tengah uemna awl a thui coengah takawi oen nga te a eh tih a hubang hue te a peek. A hubang hue lawng thlaangping tengah a ree pe. 37 Ahimi lawng ahah la a caak u. A caak coeih te a hubang hue lawng vawh phueih pasarih dawngah abecala a kawh u. 38 Aka ca boeih te hutaa oen camaw toek ohla tawngpataang hawng ah thawnglii law. 39 Jesuh lawng thlaangping hue te a tuih coengah lowng oen Makadan ram la cet.
1 Farasi oen Sadusi khatsut te Jesuh tengla law u tih a thawlhna tlap ham a ngaih u dawngah, Pathen kah thlaangtuih la na awm ti he mingna ham kawpoekraina van sai lah tila a ceel u. 2 Tede Jesuh lawng, “thlemben ah khaw a pang yuuk atah, khaw theen ai na ti u! 3 ‘Mincang ah khaw pang tih khaw a mai atah khaw tlan ai na ti u.’ Nangmi lawng vaan na dan u rang oen khaw theen ai, khaw tlan ai, tila na thui u thai, tede tahe kah atue noekna he tah na ming u thai nawh! 4 Tihin hang kah thlaang hue he me tih aihla na the tangkiik u tih Pathen khaw na ming u nawh! Nangmi lawng kawpoekraina na van bih u? Ka sai manawh! Nangmi ham kawpoekraina tah Jonah kah kawpoekraina bueng te ni na huh u ai,” a tina. Tedawngah ahimi te a thawh taak tih atloela cet. 5 A hubang hue lawng tuilii khatben ral la a kat phai u vengah ahimi lawng buh khuen ham a hilh u. 6 Jesuh lawng ahimi tengah, “Dalra u boel; Farasi oen Sadusi hue kah tawlru te anepla ngaithuen uh,” a tina. 7 Tevengah amami pakhat oen khat te, “Mami lawng buh ng'khuen u nawh tih he awl he a thui cawini,” ti u. 8 Jesuh lawng ahimi kah awl thui te a ming tih ahimi te, “Buh na khuen u nawh kawng te n'tu la na thui khiing u? Na oengna yawl tangkiik u nawh pai he! 9 Tahe toe ah na yaakming u thlan aw? Kai lawng takawi cuun ngaa ka eh tih thlaang thong ngaa ka cah te na hilh u poen aw? Acoeih te vawh meyoeh dawngah a be? 10 Tecoengah takawi cuun rih thlaang thong lii ka cah te na hilh u poen aw? Acoeih te vawh meyoeh dawngah a be? 11 Nangmi tengah kavan thui he buh kawng nawh ni ti he n'tu ah na yaakming u nawh? Farasi oen Sadusi hue kah tawlru te ngaithuen uh,” a tina. 12 Tevengah a hubang hue lawng, ngaithuen uh, ati he takawi dawngah a hawna tawlru nawh tih Farasi oen Sadusi hue kah cangpueina ni tila a yaakming u. 13 Jesuh lawng Sisaria Filipi khawpui tengvaai ah cet tih te huen ah a hubang hue te, “Thlaang thli lawng Thlaanghing Capa he a-u a ti u? tila a doet. 14 Ahimi lawng, “Khatsut lawng Baptisma pekung Johan,” ti u, atloe hue lawng, “Elijah,” ti u, atloe khatsut lawng, “Jeremiah nawh atah atloe tawngha pakhat khat cawini ti u,” a tina. 15 Jesuh lawng, “Nangmi lawng ta, kai he a-u na ti u?” tila a doet. 16 Simon Piter lawng, “Nang tah aka hing Pathen Capa Messiah ni,” a tina. 17 Jesuh lawng, “Johan capa Simon, na yo theen phoeih,” He awltak he thlaanghing teng kalawng na tengla law nawh, tede vaan ah aka awm a Pa kah peek ni. 18 Tedawngah na tengah kavan thui, Piter: nang tah lungto ni! He lunghiim lungdangsuem dawngah ka Khrihcabu ka pai sak ai, duekna lawng Pateng taa thai manawh. 19 Vaan ram caabi na tengah kan pe ai; dilai dawngah thawhka na khaih boeih te tah vaan ah khaw khaih la awm van ai, dilai dawngah thawh na awng pe te tah vaan ah khaw a awng pe van ai,” a tina. 20 Tecoengah Jesuh lawng a hubang hue tengah amah te Messiah ni tila a-u tengah khaw thui nawh ham awl a uen u. 21 Teveng tue kalawng ah Jesuh lawng a hubang hue tengah, “Jerusalem la ka cet vetih Judah ahaamca thli oen khawsoeih ahaamca thli oen ah phungawl cangpueikung thli lawng patang n'khang sak ai, kai he ng'ngawn u ai, tede athum hin ah thawh sak koep la ka awm vetih ka hing ai,” tila acairaula a thui pe. 22 Piter lawng Jesuh te atloela yawp a ceh puei tih a siim. “Bawipa he ang thaihu he Pathen lawng thoeng sak boel seh, te ang te mevengah khaw na sawah van pha roe boel seh,” a tina. 23 Jesuh lawng Piter te a mang thil ket tih, “Seitan! Ka teng kalawng cet lah, na poekna he Pathen teng kah law nawh tih thlaanghing ben kalawng a law dawngah, ka cehna lawngpui kanghalhkung la na awm,” a tina. 24 Tecoengah Jesuh lawng a hubang hue te, “A-u khaw ka hu ah law ham a ngaih atah amah kawngaih te hoett selang amah kah thinglam kawh ruila ka hu ah bang seh. 25 A-u khaw a hingna thlawn ham aka ngaih tah a hingna te a thlawng ai. Tede a-u khaw kai kawng dawngah a hingna te a sung atah hingna a dang ai. 26 Thlaang pakhat lawng dilai pum he pang mai cakhaw a hingna a thlawng atah n'tu nuem aphu aka awm? Aphu awm nawh! A hingna dang koep ham n'tu oen khaw thaw thai manawh. 27 Thlaanghing Capa tah ana Pa kah ruep-awmna oen amah kah vanthlaang thli oen ah va rum thuk vetih thlaang boeih te bii a bina taring ah kutdo a peek ai. 28 Atak tang kavan thui u, Thlaanghing Capa lawng Sengpahrang angla a law te na huh u thlantoe aka duek nawh ham koei thlaang khatsut tah he ah na awm u,” a tina.
1 Hinruk a diw raih coengah Jesuh lawng Piter, Jeem oen Johan te tlaangsawm la a luui puei tih amami bueng te huen ah awm u, 2 Tevengah ahimi mik huh ah Jesuh kah a muei te thawleng u: a mik-hai tah khawmik angla aang tih a bai a naak khaw bawk tih aang rawngtheng. 3 Tecoengah Mosi oen Elijah tah Jesuh oen ah awl a thui u te a hubang pathum hue lawng a huh. 4 Tedawngah Piter lawng Jesuh nala “Bawipa, he huen ah mami awm ham theen tangkiik. Na kawngaih atah im pathum: nang ham pakhat, Mosi ham pakhat, Elijah ham pakhat he ah ka sa u ai,” a tina. 5 Piter lawng awl a thui lii vengah ahimi te aka bawk tangkiik muui lawng a thiing khoep u tih muui khuikah awl lawng, “He tah ka lungvatna ka Capa ni, ahih sawah ka kaw hoe, a awl ngaai pe uh,” tila a thui. 6 Te awl te a hubang hue lawng a yaak vengah a rih tangkiik u dawngah dilai ah a mik-hai a buengkhuem tih kawpp u. 7 Jesuh lawng ahimi tengla law tih ahimi te a tek. “Tho u loeih, rih u boel!” a tina. 8 Tedawngah ahimi lawng a bueh vengah, Jesuh bueng nawh tah a-u khaw hu u tlaih nawh. 9 Tlaangsawm kalawng a rum thuk u vengah, ahimi te, “He kah na huh u huhthlaam he Thlaanghing Capa duekna kalawng a thawh thlantoe thui u boel,” tila awl a uen. 10 Tecoengah a hubang hue lawngah, “N'tu dawngah phungawl cangpueikung thli lawng Elijah he lamhacuekla law ai a ti u kai? tila Jesuh te a doet u. 11 Jesuh lawng, “Elijah tah lamhacuekla law tangtang vetih soeprep boeih te aroek abah oepsoeh ai. 12 Tede kavan thui u, Elijah tah law coeng poen de thlaang lawng a ming u nawh dawngah amami ngaikhuekla ahih te a thena u. Tetih van angla Thlaanghing Capa he khaw a thekhana u ai,” a tina. 13 Tecoengah a hubang hue lawng Baptisma pekung Johan kawng ni ahimi tengah avan thui tila a yaakming u. 14 Ahimi lawng thlaangping tengla a mel koep u vengah, Jesuh tengla thlaang pakhat law tih a haiah khuklu oen cuengkueng tih, 15 “Bawipa, ka capa he van reen lah! Ahih tah raaihum tlawhna a khueh tih patang a khang tangkiik. Hai dawngah khaw, tui dawngah khaw tlim taitu. 16 Na hubang hue tengah ka khuen de, ahimi lawng hoeih sak thai u nawh,” a tina. 17 Jesuh lawng, “Oengna aka khueh nawh nangmi thlaangthe hue! Metuek toe nangmi he kan awm puei u hun ai? Meveng tue toe kan nueh u hun ai? Camaw te ka tengla van khuen u lah,” a tina. 18 Jesuh lawng raaithe te awl a peek tih camaw kaw khui kalawng raaithe te co, kawlkalh ah ahih tah hoeih pahoei. 19 Tecoengah a hubang hue amami bueng Jesuh tengla law u tih, “N'tu dawngah kaimi lawng raaithe ka hek thai u nawh?” tila a doet u. 20 Jesuh lawng, “Nangmi lawng oengcakna na khueh u nawh dawngah ni, Atak tang kavan thui u, antammu teh maimah oengna na khueh u kawinih nangmi lawng he tlaang he, he kalawng ke la thoeih lah na tina u a tah thoeih ai, nang mi lawng soeprep boeih na sai u thai ai. 21 Tede, he ang raaithe tah thangthuina oen buh yehna bueng nawh atah atloe n'tu oen khaw hek thai la awm nawh,” a tina. 22 A hubang hue Galili la a law boeih u vengah Jesuh lawng ahimi tengah, “Thlaanghing Capa he thlaang kut dawngah a peek u ai. 23 Ahih te a ngawn u ai, tede athum hin ah tho koep ai,” tila a thui. A hubang hue tah a kaw the u tangkiik. 24 Jesuh oen a hubang hue Kapernaum a pha u vengah, Tempal bok-im kah mangmu cawikung hue Piter tengla law u tih, “Na saya lawng Tempal bok-im kah mangmu a peek van aw? tila a doet u. 25 Piter lawng, “Oeih, a peek,” a tina. Piter te im khuila a kuun vengah Jesuh lawng a voem lamha tih, “Simon, metila na poek? A-u lawng he dilai sengpahrang tengah ram tloe kah thaihu khuen phu oen mangmu a peek? Ram khuikah thlaang lawng aw? Tihnawhtah ram tloe thlaang lawng aw?” a tina. 26 Piter lawng, “Ram tloe thlaang lawng a peek ai,” a tina. Jesuh lawng, “Theen, ram khuikah thlaang lawngtah peek ham ngoe nawh,” a tina. 27 Tede he thlaang hue he a thinsa sak ham ka ngaih nawh. Tedawngah tuilii la cet lang nga vaih lah. Lamhacuek la na tuuk nga kah a kaa khuiah nang oen kai ham Tempal mangmu peek khoek tangka na dang ai. Te tangka te lo langtah mahih kah mangmu la ahimi te pe hawn, a tina.
1 Teveng tue ah a hubang hue Jesuh tengla law u tih, “Vaan ram ah a-u aka lenduet?” tila a doet u. 2 Tedawngah Jesuh lawng camaw pakhat te a khue, ahimi haiah a pai sak tih, 3 “Atak tang kavan thui u, nangmi lawng na kaw na thaw tih camaw hue angla na awm u nawh atah Vaan ram khuiah na kuun u thai manawh,” a tina. 4 Vaan ram ah aka lenduet ham thlaang tah boe a ngaai tih he camaw angla kawpoek aka khueh he ni. 5 A-u khaw ka miing oen he ang camaw pakhat he a do atah kai aka do thlaang ni. 6 “Kai aka oeng camaw pakhat kah a oengna te a phelhna ham a-u lawng-khaw a suek atah caang neetna lungto sum bohlang a awi tih tuilii ah tla kawinih ahih ham theen bet ai. 7 Dilai dawngah thlaanghing kah oengna aka phelh sak thaihu yahawh hlang a awm dawngah rih ham awm tangkiik. Te ang thaihu te awm ngaikhoek ai, tede te tila thlaang kah oengna aka phelh sak thlaang ham tah caalla khawmap tangkiik! 8 “Na kut tihnawhtah na khow lawng na oengna te avan phelh sak atah tloek langtah voei vik hawn! Kut soep khow soep oen dungyan hai khuila na tlaak lak ah kut oen khow muehla hingna khuiah na kuun te theen ngaai. 9 Tecoengah na mik lawng na oengna te avan phelh sak atah na mik te koeih lang voei hawn! Mik pahih oen hell hai khuiah na tlaak atah mik pakhat bueng oen hingna khuila na kuun te theen ngaai. 10 “Nangmi lawng he ang camaw pakhat Pateng khaw huhsit nawh ham ngaithuen uh. Atak tang kavan thui u, ahimi doenkung vanthlaang tah Vaan kah a Pa haiah awm yoeyah u. 11 (Metihtiah Thlaanghing Capa tah aka auh thlawn ham va law.) 12 “Tuu yakhat aka khueh thlaang lawng tuu pakhat a auh atah n'tu a sai ai tila na poek? Ahih lawng ramtliim saino a awmna tlaangsawm ah atloe sawmkua pakua hue te a ceh taak vetih aka auh tuu pakhat te tlap ham cet ai. 13 Atak tang kavan thui u, aka auh tuu te a dang vengah, aka auh nawh tuu sawmkua pakua lak ah aka auh tuu pakhat te a uem ngaai. 14 Tih van angla vaan kah nangmi na Pa lawng he ang camaw pakhat Pateng khaw auh sak ham ngaih nawh,” a tina. 15 “Na boenhui pakhat lawng na sawah a thawlh atah a tengla cet lang a thawlhna te thui peh. Tede ahuepla namahih bueng thui hih. Na awl a ngaai atah na boenhui oen na roep hih poen. 16 Tede na awl te a ngaai nah atah, Caciim lawng,” thawlh peelna boeih te aka mingpueikung pahih tihnawhtah te lak ah yahawh awm seh! ati angla thlaangtloe pakhat khaw, pahih khaw ceh puei. 17 Tecoengah ahimi kah awl te a ngaai nawh atah, awlkaa boeih te khrihcabu tengah thui uh. Aboetna ah khrihcabu awl te a ngaai nawh toeng toeng atah ahih te lukih thlaang tihnawhtah mangmu cawikung hue angla poek uh. 18 “Tedawngah nangmi tengah kavan thui u, dilai dawngah na piin boeih te vaan ah khaw a piin vetih dilai dawngah na thlam boeih te vaan ah khaw a thlam pe van ai. 19 Tecoengah atloe pakhat kavan thui u: Dilai dawngah nangmi tim kah thlaang pahih lawng me ang thaihu dawngah khaw thin-at kaw-at la na thangthui hih atah vaan kah a Pa lawng nangmi ham avan sai ai. 20 Thlaang pahih, pathum kai kah miing oen a tunna huen ah ahimi oen kai ka awm haih,” a tina. 21 Tecoengah Piter lawng Jesuh tengla law tih, “Bawipa, ka boenhui thli lawng ka sawah a thawlh atah, voei meyoeh toe ahih sawah khawdawp ka ngai ai? Voei sarih toe aw? tila a doet. 22 Jesuh lawng, “Nawh ni, voei sarih bueng nawh ni, voei sawmsarih let sarih khawdawp na ngaai ai. 23 Metihtiah vaan ram tah he tila awm. Voei khat ah sengpahrang lawng a tuihyoeihthlaang kah biibina te soepsa ham a ngaih. 24 Atong cuek vengah, ahih kah tangka laiba aka khueh thli khuikah tangka athong asang aka ba te a tengla avan law puei u. 25 A tuihyoeihthlaang lawng laiba sahna khoek tangka khueh nawh, tedawngah sengpahrang lawng amah oen a yu, a ca oen a khueh thaihu boeih laiba sahna ham yooei seh! tila awl a peek. 26 Te kah tuihyoeihthlaang lawng sengpahrang haiah khuklu oen cuengkueng ruila a bok tih, “N'reen hawn de! Laiba boeih te kan sah badai,” a tina. 27 Sengpahrang lawng a reen dawngah ahih kah laiba boeih te a yoe pe sak tih a tuih. 28 Tecoengah te kah tuihyoeihthlaang lawng cet tih ahih kah tangka ayawlca aka ba tuihyoeihthlaang a paya te a huh. Te thlaang te a tuuk tih a khak. Laiba te, “N'sah loeih!” a tina. 29 A tuihyoeihthlaang a paya lawng khuklu oen cuengkueng ruila, “N'reen hawn de, kan sah badai,” a tina. 30 Tede ahih lawng a thana. Laiba a sah boeih thlantoe a paya te thong ah a thlaak. 31 Atloe tuihyoeihthlaang hue lawng te tila a sai te a huh vengah a reen u tangkiik tih Sengpahrang tengah cet u tih te tila thaihu a sai thli boeih te a thui pe u. 32 Tedawngah Sengpahrang lawng a tuihyoeihthlaang te a khue tih, “Nang tuihyoeihthlaang, thlaangthe koek! Ka tengah reenna navan bih dawngah na laiba boeih te kavan yoe sak. 33 Kai lawng kan reen van angla tuihyoeihthlaang na paya te na reen van ham awm,” a tina. 34 Sengpahrang tah a thinsa tangkiik tih te kah tuihyoeihthlaang lawng laiba boeih a sah thlantoe thong ah a thlaak. 35 Tecoengah Jesuh lawng, “Nangmi lawng thinkaw lungbui tang oen na maya manau tengah khawdawp na ngaai u nawh atah vaan kah a Pa lawng nangmi sawah khawdawp ngaai van manawh,” tila a boetna ah a thui pe.
1 Jesuh lawng he awl boeih he a thui boet coengah, Galili te a thawh taak tih Jordan tuiva khatben ral Judia ram la cet. 2 Thlaangping yahawh hlang lawng a hu ah a vai u tih ahih lawng te huen ah thlaangtlo boeih te a hoeih sak. 3 Farasi khatsut lawng a tengla law u tih a thawlhna tuuk pe ham a ngaih u dawngah, “A me ang kawng dawng maiah a khaw tawngpa pakhat lawng a yu thlaak ham mami kah phungawl lawng a ngaih aw?” tila a doet u. 4 Jesuh lawng, “Acuekca ah Saikung lawng thlaang hutaa oen tawngpa a sai,” tila caciim lawng a thui te na tae u nawh aw? 5 Tedawngah Pathen lawng, “He kawng dawngah tawngpa lawng a manu oen ana pa te a ceh taak vetih a yu oen awm haih ai, ahih rawi tah pumsa pakhat la coeng ai,” ti. 6 Tedawngah ahih rawi tah pahih tlaih nawh ni, pumsa pakhat poen ni. Pathen lawng a tun sak haih poen te tah thlaanghing lawng pek boel seh,” a tina. 7 Farasi thli lawng, “Te atah n'tu dawngah Mosi lawng thlaang pakhat lawng a yu te thlaakna ca pe selang tuih seh, tila phungawl a peek kai?” tila Jesuh te a doet u. 8 Jesuh lawng, “Nangmi tah thuituen ham na rai u tangkiik dawngah Mosi lawng na yu thlaak ham awl m'peek u. Tede acuekca vengah te tila awm nawh. 9 Tedawngah atak tang kavan thui u, “A-u lawngkhaw a yu te thlaangtloe oen a samphaih nawh maiah a thlaak tih yu tloe a lawh atah te thlaang lawng a yu han ah samphaih poen,” a tina. 10 A hubang hue lawng, “Yuvaa laklaw ah he tila a awm ham koei atah a yuvaa hih nawh ah theen ngaai ai,” tila Jesuh te a tina u. 11 Jesuh lawng, “He kah kan cang puei he thlaang boeih ham nawh ni. Tede Pathen lawng a peek thlaang hue bueng ham ni. 12 Thlaang lawng a yu a lawh thai nawh he akawng atloetloe la awm: khatsut tah a yu lawh thai nawh ham a thang puei, atloe thlaang khatsut tah yu lawh thai nawh ham a sai u tih atloe khatsut hue tah Vaan Ram kawng dawngah a yu lo u nawh. He cangpueina he aka yaakming lawngtah vai hawn seh!” tila a thui pe u. 13 Thlaang khatsut lawngah camaw hue kah a luu dawngah Jesuh lawng a kut tloeng tih thangthui pe ham a tengla avan law puei u. Tede a hubang hue lawng thlaangping te a tlung. 14 Jesuh lawng, “Camaw hue te kanghalh u boel, ka tengla law u seh! metihtiah Vaan ram tah he ang thlaang thli kah ni,” a tina. 15 Jesuh lawng ahimi kah luu sawah a kut a tloeng coengah atloela cet. 16 Voeikhat ah thlaang pakhat Jesuh tengla law tih, “Saya! Dungyan hingna dang hamla me ang thaihu theen ka sai ai?” tila a doet. 17 Jesuh lawng, “Me ang thaihu theen ti he n'tu dawngah nan doet? Thlaang-theen pakhat bueng ni a awm. Dungyan hingna dang ham na ngaih atah awlpeek te vai,” a tina. 18 Ahih lawng, “Me ang awlpeek,” a tina. Jesuh lawng, “Thlaang ngawn boel, hutaa tawngpa thawlhna sai boel, huen boel, a soeng nawh la thlaang thawlh peel boel, 19 Na nu oen na pa te hinyah lang, namah pum na lungna angla na imbe te lungnah,” a tina. 20 Cadawng lawng, “He awlpeek thli he ka vai boeih poen, n'tu sai ham a ngoe hun?” tila a doet. 21 Jesuh lawng, “Thlaang soep la awm ham na ngaih atah cet lang na koeva thli te yooei boeih langtah tangka te khawdeng harah thli van peh. Te atah vaan ah kaawn theen na khueh badai, tecoengah law lang ka hu ah va bang,” a tina. 22 Te cadawng tah kuirang la a awm dawngah te awl a yaak vengah a kawthe tih meel. 23 Tevengah Jesuh lawng a hubang hue tengah, “Atak tang kavan thui u: Kuirang ham tah Vaan ram ah kuun ham rai tangkiik. 24 Kavan thui koep he; Kala-uk pakhat phaimeet khui a kuun lak ah kuirang pakhat lawng Pathen Ram khuiah kuun ham rai bet!” a tina. 25 A hubang hue lawng te awl a yaak u vengah a kawpoek rai tangkiik u tih. “Te atah a-u lawng thlawnna a dang ai,” tila a doet u. 26 Jesuh lawng ahimi te ahaitang heet tih, “He ang he thlaanghing ham coeng thai nawh, tede Pathen ham tah thaihu boeih he coeng thai,” a tina. 27 Tevengah Piter lawng, “Bueh lah! Kaimi lawng thaihu boeih ka ceh taak u tih na hu ah ka bang u poen, n'tu ka dang u ai?” tila a doet. 28 Jesuh lawng ahimi tengah, “Atak tang kavan thui u; San thai a pha tih Thlaanghing Capa lawng Bawi ngawlhcoen dawngah Ruep-awmna oen a ngawlh vengah nangmi ka hubang thlaihih hue nang khaw Israel thlaangphun thlaihih te uk ham bawi-ngawlhcoen dawngah na ngawl u van ai. 29 Tecoengah a-u khaw kai kawng dawngah a im oen a lo, a maya manau, ngannu nganca, a manu ana pa oen a ca te aka ceh taak thlaang tah te yueng te a pueh yakhat la a dang u vetih dungyan hingna te a dang baal ai. 30 Tede tahe ah lamhacuekla aka awm hue he hukhuengla awm lat vetih tahe ah hukhuengla aka awm hue he lamhacuekla awm dai ai,” a tina.
1 Jesuh lawng, “Vaan ram tah he tila awm. Dumkhuehkung pakhat lawng misur dum ah bii bi sak ham thlaang aka tlap hamla mincanghi ah cet. 2 Thapang a peek nooek angla hin-at kutphu ngun tangka pheek at peek ham biibithlaang thli oen a kaw vai u tih ahimi te dum la a tuih. 3 Mincang khawnoek pakua ah dawr la cet koep tih n'tu khaw bi ohla aka pai thlaang khatsut te a huh. 4 Tevengah ahimi te, “Nangmi khaw misur dum la cet u langtah bii bi uh, na thapang te ating atawkk la kan pe ai,” a tina. 5 Tedawngah ahimi tah cet u. Te-coengah hingthun khawnoek thlaihih vengah khaw, khawnoek pathum vengah khaw a sawkah angla a sai. 6 Thlemben khawnoek pa-ngaa tawm ah ahih lawng dawr la a ceh koep vengah thlaangtloe khatsut te huen ah a pai hun te a huh. “Ahimi te n'tu ah biibi ohla khawyung khun he ah na pai u?” tila a doet. 7 Ahimi lawng, “Kaimi he a-u lawngkhaw bii m'bi sak u nawh dawngah ni,” a tina u. Dumkhuehkung lawng, “Theen, nangmi khaw misur dum la cet u lang bii bi uh,” a tina. 8 Thlemben tue apha vengah dumkhuehkung lawng dumtoetkung tengah, “Bii aka bi thli te khue u lang a thapang te pe uh. Hukhueng koek bii aka bi kalawng tong langtah lamhacuek bii aka bi toe a thapang kutphu te peh,” a tina. 9 Thlemben khawnoek pa-ngaa kalawng bii aka bi thli te thapang ngun tangka pheek at rip a peek. 10 Lamhacuek la bii aka bi thli thapang lawh ham a law u vengah thapang yahawh ka dang ai, tila a poek u. Tede ahimi khaw thapang ngun tangka pheek at rip a dang u. 11 Tangka te a lawh u tih dumkhuehkung tengah caitoek u. 12 Ahimi lawng, “Hukhueng koek la bii aka bi thlaang thli he tah khawnoek pakhat khui bueng a bi u. Kaimi tah khawyungkhun khawling khawlai khuiah ka bi u. Tede ahimi na peek yoeh van te kaimi nan peek u,” a tina u. 13 Tevengah dumkhuehkung lawng ahimi timkah thlaang pakhat te, “Ka puei, hutung lah! Kan thaina moenih, hin at kutphu ngun tangka pheek at peek ham awl n'thui u nawh aw? 14 Na tangka te lo langtah im la cet loeih! A hukhueng koek aka bi he khaw nangmi kah dang yoeh van te peek ham ka ngaih. 15 Ka mah tangka te ka kawngaih angla ka hawna thai nawh aw? Kai ka moeihoeih dawngah nang na lungoe aw?” a tina. 16 Tecoengah Jesuh lawng, “Tedawng-ah hukhueng koek te lamhacuekla awm vetih lamhacuek te hukhueng koek la awm ai,” a tina. 17 Jesuh lawng Jerusalem la a ceh vengah a hubang thlaihih te ahuep ahelna ah a ceh puei tih amami bueng noenoe ceh ruila ahimi tengah awl a thui pe. 18 “Hutung u lah,” “Mami tah Jerusalem khawpui la n'cet u ai. Te huen ah Thlaanghing Capa tah khawsoeih ahaamca hue oen Phungawl cangpueikung hue kut ah peek la awm ai. Ahimi lawng Thlaanghing Capa te ngawn hamla thawlh a peel u vetih, 19 thlaangphun tloe kut dawngah a peek u ai. Thlaangphun tloe hue lawng ahih te nuihbu kamring la a khueh u ai, athe akhana u ai, a bawh u coengah a ngawn u ai. Tede athum hin ah tho koep ai,” a tina. 20 Tecoengah Zebedi kah a yu te a capa rawi oen Jesuh tengla va law. Jesuh haiah khuklu oen cuengkueng tih buekuep ruila a tengah a kawngaih te a bih. 21 Jesuh lawng ahih te, “N'tu na ngaih,” tila a doet. Ahih lawng, “Sengpahrang la na law vengah ka ca rawi he na bantang ben ah pakhat, na banvoei ben ah pakhat a ngawlh hih thaina hamla awl van pe lah.” a tina. 22 Jesuh lawng, “Na van bih he na ming hih nawh! Kai lawng ka awkk ham koei patang khangna boengloeng he na awkk thai hih ai aw? tila te rawi boeinau te a doet. A hih rawi lawng, “ka awkk thai hih ai,” a tina. 23 Jesuh lawng, “Nanghih lawng ka boengloeng dawngkah na awkk thai tang tang ai. Tede ka bantang ben ah ahih ngawl seh, ka banvoei ben ah ahih ngawl seh tila kai lawng ka tuek thai nawh tih te huen tah a Pa lawng a nuuen tangte thlaang hue ham ni,” a tina. 24 He kawng he atloe hubang paha hue lawng a yaak u vengah te rawi boeinau sawah a thin sa u tangkiik. 25 Tedawngah Jesuh lawng a khue tun u tih, “Pathen aka ming nawh ukkung bawi hue lawng a uk thlaang thli sawah huham a khueh u tih mawtkung ahaamca hue lawngkhaw atlawh ngaaila aana a khueh u. 26 Tede nangmi tah tila na awm u manawh. Nangmi timkah pakhat lawng alenduet la awm a ngaih atah nangmi boeih kah tuihyoeihthlaang la awm seh; 27 nangmi timkah thlaang pakhat lawng pakhatna ah awm ham a ngaih atah nangmi kah sal la awm seh. 28 Te tila ni Thlaanghing Capa khaw thlaangtloe te bii bi sak ham law nawh tih thlaang kah bii bi ham oen thlaang yahawh te tlang ham oen ah hingna peek ham ni a law,” a tina. 29 Jesuh oen a hubang hue tah Jeriko khaaw kalawng a ceh u vengah thlaangping yahawh hlang lawng a hu ah a vai u. 30 Lawngteng ah aka ngawl mikpum pahih lawng Jesuh kah a ceh tuen awl te a yaak hih vengah, “Devid Capa! Kai hih he n'reen lah, Bawipa!” tila paang hih. 31 Thlaangping lawng te rawi te a ho u tih duem awm hih a tina u, Tede ahih rawi lawng, “Devid Capa! n'reen lah, Bawipa!” tila angaihla paang tare hih. 32 Jesuh lawng pai tih te kah mikpum rawi te a tengla a khue tih, “Nanghih ham n'tu sai sak na ngaih?” tila a doet. 33 Ahih rawi lawng, “Bawipa! Ka mik na van tueng sak ham ka ngaih hih” a tina. 34 Jesuh lawng mikpum rawi te a reen tangkiik tih a mik te a tek pe. Teveng roe ah a mik tueng pahoei hih tih Jesuh te a hu ah a vai hih.
1 Jesuh oen a hubang hue tah Jerusalem pha tawm kah Olif tlaang tengah aka awm Betfat khaaw te a pha u atah Jesuh lawng a hubang pahih te a tuih tih, 2 he tila awl a uen, “Na hai kah khaaw la cet hih langtah la pakhat a kiing te na huh hih pahoei vetih a tengah a ca awm ai. Rui te thlam pe hih lang la te ka tengla bok van mawt hih. 3 A-u lawngkhaw n'kaana atah, ‘Bawipa lawng angoe’ tina hih. Te atah ahih lawng avan thlah pahoei badai” a tina. 4 He awl tah tawngha Isaiah lawng, Zaion khawpui te thui pe uh, Bueh lah, na sengpahrang tah law lii poen! Ahih tah boe-ngaaina oen Lacano pakhat te a cit vetih law ai” tila a thui oepsoeh te asoepna ham ni. 6 Tedawngah a hubang rawi lawng cet hih tih Jesuh kah a thui angla a sai. 7 La oen a cano te avan khuen hih tih la pum ah a himbai te a dawk u tih Jesuh te a cit sak u. 8 Thlaangping lawng lawngpui ah a himbai a phaih pe u tih thlaangtloe khatsut lawngtah thingbuuk te a kawi u tih lawngpui ah thinghu a phaih pe u. 9 Jesuh kah a haiah aka cet hue oen a hu ah aka vai thli lawng, “Devid capa te thangpawm uh! Bawipa miing oen aka law te Pathen lawng yotheenna pe hawn seh! Pathen te thangpawm uh,” tila paang u. 10 Jerusalem khawpui la Jesuh a kuun phai vengah a khaaw pum hinghuen tih “He thlaang he a-u kai,” tila a doet u. 11 Tevengah thlaangping lawng, “He thlaang he tah Galili ram Nazaret khaaw kah tawngha Jesuh ni,” a tina u. 12 Jesuh lawng Tempal khuila kuun tih te huen kah thaihu aka yooei oen aka lai thli te boeih a hek. Tangka aka thaw thli oen akhuu aka yooei hue kah caboi oen ngawlhna boeih te a plet pe tih, 13 ahimi tengah, “Caciim dawngah Pathen lawng, ‘Ka Tempal bok-im he thangthuina im ni ti u ai’ tila a thui. Tede nangmi lawng thlaanghuuen yingreelna a huen la na hawn u.” a tina. 14 Mikpum oen khawkheem Tempal khuiah Jesuh tengla law u tih ahimi te a hoeih sak. 15 Kawpoekrai thaihu a saina thli oen Tempal khuiah camaw thli lawng, “Devid capa tah thangtheen sak uh!” tila a paang u te khawsoeih ahaamca thli oen Phungawl cangpueikung hue lawng a yaak a vengah a thin sa tangkiik u. 16 Tedawngah Jesuh te, ahimi kah a paang awl he na yaak aw? tila a doet u. Jesuh lawng, “Ka yaak ta, Caciim dawngah ‘Camaw oen nauseen hue teng kalawng thangtheenna awl na thoeng sak’ tila a thut u te na tae vai nawh aw?” a tina. 17 Jesuh lawng ahimi te a ceh taak tih Jerusalem kalawng Bethani la cet tih te ah te ip. 18 Avuen mincanghi ah Jesuh tah Jerusalem khawpui ben la a mel koep vengah lawngpueng ah a bung pawng. 19 Lawngteng kah thaidut thing te a huh tih a kung la cet, a thing dawngah a ram hawng te a huh. Tedawngah thaidut thing te. “Meveng khaw na thaih koep thaih manawh,” tila a tap. Kawlkalh ah thaidut thing te duek rup tih reu pahoei. 20 Te tila a awm te a hubang hue lawng a huh u vengah a kawpoek rai tangkiik u tih, “Metila kawlkalh ah thaidut thing a duek rup tih a reu pahoei mai?” tila a doet u. 21 Jesuh lawng, “Atak tang kavan thui u, uepvoetna khueh ohla, na oeng u tang tang atah he thaidut thing sawah ka sai he nangmi lawngkhaw na sai thai u van ai. He bueng ohla he kah tlaang Pateng, ‘Thoeih lang tuilii khuila tla lah,’ na tina atah tla thai ai. 22 Na oeng u tangtang atah thangthuina rang oen na bih u boeih te na dang u ai,” a tina. 23 Jesuh te Tempal bok-im la law koep tih a cang puei lii vengah khawsoeih ahaamca thli oen Judah ahaamca thli a tengla law u tih, “Mekah saithaina aana oen he ang he na sai? A-u lawng saithaina aana he m'peek?” tila a doet u. 24 Jesuh lawng ahimi te, “Awl pakhat kan doet u vetih awl nan thung thai u atah ame kah saithaina aana oen he ang thaihu ka sai tite kavan thui u ai,” a tina. 25 “Johan lawng Baptisma a peek te ame kalawng a law! Pathen ben kalawng aw? Thlaanghing ben kalawng aw? tila a doet. Ahimi lawng, ‘Pathen ben kalawng va law n'ti kawinih n'tu ah Johan te na oeng u nawh,’ ti ai. 26 “Thlanghing ben kalawng ni a law n'ti kawinih Johan te thlaang boeih lawng tawngha ni a ti u dawngah thlaangping he mami lawng rih ham awm,” ti u. 27 Tedawngah, “Ka ming u nawh,” a tina u. Tedawngah Jesuh lawng, “Te atah kai lawngkhaw ame kah saithaina aana oen he ang thaihu ka sai ti he kavan thui van manawh,” a tina. 28 Jesuh lawng, “Metila na poek u? Thlaang pakhat lawng capa pahih a khueh. A capa ahaamca tengla cet tih, Ka ca! tihin ah misur dum la cet langtah bii bi lah’ a tina. 29 A capa ahaamca lawng, ‘Ka ngaih nawh, ka cet manawh’ a tina tih a thana de a kaw a poek koep tih dum la cet. 30 Tecoengah a capa ano tengla cet tih misur dum ah bii bi ham a tuih. A capa lawng, ‘Oeih, a pa! ka cet ai’ a tina. Tede cet nawh. 31 He kah a capa pahih khuiah a-u lawng ana pa kah awl a ngaai?” tila a doet. Ahimi lawng, “A capa ahaamca lawng,” a tina u. Tedawngah Jesuh lawng ahimi tengah, “Atak tang kavan thui, mangmu cawikung thli oen thlaanghalhnu thli lawng nangmi te n'khall vetih Vaan ram la ng'kuun taak u poen ai,” a tina. 32 Metihtiah Baptisma pekung Johan tah nangmi tengla law tih lawngdoeng te n'huh sak u poen de nangmi lawng na tangna u nawh. Tede mangmu cawikung thli oen thlaanghalhnu thli lawngtah a tangna u. Te te nangmi lawng na huh u poen de na kawpoek khaw na thaw u nawh, ahih te na tangna u nawh,” a tina. 33 Jesuh lawng “Atloe thuidoetna he hutung u lah, misur dum khuehkung pakhat awm tih dum te vawng khoep a thung, misurtui a suina ham ungrawm a to, misurdum toetna ham paw a sak. Tecoengah misur dum te tah bii aka bi thli te a vat tih amah tah khawlawng thla la cet. 34 Misur thaih bit tue veng atah dum aka vat thli tengah a tamnaa thli a tuih tih a dang ham koei dum khang la misur thaih te a bih sak. 35 Dum aka vat thli lawng dum khuehkung kah a tamnaa thli te a tuuk u tih pakhat te a bawh u, pakhat te a ngawn u tih pakhat te tah lungto oen a de u. 36 Dum khuehkung lawng lamha kah lak ah a tamnaa yahawh ngai a tuih koep. Dum vatkung thli lawng ahimi te lamhacuek vengkah angla a sai u. 37 A hukhueng ah dum khuehkung lawng a capa te ahimi tengla a tuih ‘Ka capa he tah a hinyah u ngai badai’ tila a poek. 38 Tede dum aka vat hue lawng a capa te a huh u vengah “He tah dum khuehkung kah capa, ro aka pang ham ni. Law uh, ngawn silang a ro thaihu lawh pe u sih.” ti u. 39 Tedawngah a tuuk u tih dum adaubenla a khuen u tih a ngawn u. 40 Jesuh lawng, “Tetih atah dum khuehkung a law vengah dum aka vat thli te metila a tina ai?” tila a doet u. 41 Ahimi lawng, “Te ang thlaangthe thli te a ngawn vetih misur thaih bit tue a pha vengah dum khang atheenla aka pe thai te a vat ai,” a tina u. 42 Jesuh lawng ahimi te, “Caciim lawng: ‘Imsakung thli lawng aphu aka awm nawh angla a hoett u lungto te, aphu aka awm koek imkil lungto la awm, he tah Bawipa lawng a sai tih mami mik huh ah kawpoekrai la awm,’ tila a thui te na tae vai u nawh aw?” a tina. 43 Tedawngah atak tang kavan thui u, “Pathen Ram tah nangmi teng kalawng a lawh vetih thaih theen aka thaih sak koei thlaangphun tloe tengah a peek ai,” a tina. 44 “A-u khaw he lungto dawngah aka tla tah adiik anuui la rek vetih he lungto lawng a neet te tah adiik avaai la coengg ai,” a tina. 45 Jesuh kah thuidoetna awl he khawsoeih ahaamca thli oen Farasi thli lawng a yaak vengah ahimi kawng ni a thui tila a ming u. 46 Tedawngah Jesuh te tuuk ham kamthlah u. Tede thlaangping lawng Jesuh he tawngha ni a ti u dawngah thlaangping te a rih u.
1 Jesuh lawng thlaangping te thuidoetna awl koep a thui pe. 2 “Vaan ram tah he tila awm. Voeikhat ah Sengpahrang pakhat lawng a capa kah yului poei sai ham kamthlah. 3 A hih lawng a ceel thlaang thli te poei ah law ham a tuihyoeihthlaang thli te a tuih tih a khue sak. Tede ahimi lawng law ham ngaih u nawh. 4 Tecoengah poei bur ham a ceel thlaang thli te khue ham atloe tuihyoeihthlaang thli te koep a tuih tih, “Poei buh veel ham coekroek la awm poen; vaitawtaal thli oen boiava a thau thau thli khaw ka ngawn boeih poen, thaihu soeprep khaw coekroek la ka sai poen. Yului poei la law u loeih, tina uh,” a tina. 5 Tede a ceel thlaang hue lawng n'tu la sak ohla amami ngaih la cet u. Khatsut tah lo la cet u, khatsut tah dawr la cet u tih, 6 khatsut lawng a tuihyoeihthlaang thli te a tuuk tih a bawh u, a ngawn u. 7 Sengpahrang tah a thin sa soeh tih a raalkap thli te a tuih tih thlaang aka ngawn thli te a thup sak boeih coengah khaaw te hai oen a dawi sak. 8 Tecoengah a tuihyoeihthlaang hue te a khue tih, “Yului poei tah coekroek la awm poen de ka thlaangceel thli he hinyahna dang ham koeih u nawh. 9 Tahe ah lawngpui cumruum ah cet u lang poei ah thlaang a yahawhna ham na huh thlaang boeih te van ceel uh,” a tina. 10 Tecoengah a tuihyoeihthlaang hue lawng lawngpui boeih ah cet u tih a huh sarui thlaangthe thlaang theen boeih te a cawi tih yuluina im ah thlaang be-toet sut. 11 A ceel thlaang thli te bueh ham sengpahrang lawng a law vengah yului poei himbai bai ohla aka awm thlaang pakhat te a huh. 12 Sengpahrang lawng, “Ka puei, yului poei himbai bai ohla metila he poei khuiah na kuun thai? tila a doet. Tede ahih lawng n'tu khaw thui thai nawh. 13 Tecoengah sengpahrang lawng a tuihyoeihthlaang thli te, ‘Ahih he a kut, a khow te piin pe u lang adau ben yiinna khuila voei uh. Te huen ah rap vetih a naw a tah ai,’ ti” tila a thui pe u. 14 Tecoengah Jesuh lawng, “A thlaangceel tah yahawh de a tuek thlaang tah yawlca,” tila hukhueng koek ah a thut. 15 Farasi hue lawng Jesuh tengla cet u tih awldoetna oen a thawlhna tuuk pe ham kamthlah u. 16 Tecoengah amami kah hubang khatsut hue oen Herod kah thlaang khatsut hue te Jesuh tengla a tuih u tih, ahimi lawng,” Saya, nang lawngtah awl doeng na thui tila ka ming u. Pathen kah kawngaihna a kawng he khaw thlaang lawng metila a poek ti khaw rih ohla na cang puei tih a-u kah mik-hai khaw na bueh nawh. 17 Tedawngah na poekna van thui lah, Rom Sengpahrang tengah mangmu peek he mami kah Phungawl lawng a ngaih aw, ngaih nawh aw?” tila a doet u. 18 Ahimi kah kamthlahna athe khawkhan te Jesuh lawng a ming dawngah ahimi te, “Thlaangthaipalat hue, n'tu dawngah kai he kamah awl dawngah tuuk ham na ngaih u? 19 Mangmu peek ham tangka te n'nueh u lah,” a tina. Ahimi lawng tangka te a tengla a khuen u tih Jesuh lawng, 20 “A-u kah a mueime oen a miing aka awm?” tila a doet u. 21 Ahimi lawng, “Sengpahrang kah a muei oen a miing awm,” ti u. Tedawngah Jesuh lawng, “Tetih atah sengpahrang koe te sengpahrang pe u langtah Pathen koe te Pathen pe uh,” a tina. 22 Te awl te a yaak u vengah a kawpoek rai tangkiik u tih Jesuh teng kalawng atloela cet u. 23 Te khawhin vengah te duek coengah thawhkoepna awm tlaih nawh aka ti Sadusi thlaang khatsut Jesuh tengla law u tih awl a doet u. (Ahimi lawngtah thawhkoepna awm nawh ti u). 24 Ahimi lawng, “Saya, Mosi kah cangpueina dawngah thlaang pakhat a ca cuun ohla a duek atah a manau lawng a yu te a yuna roe roe ai. Te tila a yuna tih a ca a cuun hih atah aka duek tangte a maya kah a ca la awm ai,” ti. 25 Tahe ah boenhui pasarih awm u. Aham koek lawng a yu a lawh de a ca cuun ohla duek, a yu te a manau lawng a paang. 26 A manau pabe khaw, a pathumna te khaw duek. Te tila boenhui pasarih te duek boeih. 27 Ahukhueng atah te hutaa khaw duek van. 28 Boenhui pasarih lawng a yuna dawngah thawhkoepna hin ah a-u kah a yu la a awm ai?” tila a doet u. 29 Jesuh lawng, “Na poek thawlh u! Nangmi lawng Caciim oen Pathen kah huham tharana na ming u nawh dawngah ni. 30 Metihtiah thlaangduek a thawh koep vengah tah vaan ah aka awm vanthlaang angla awm vetih yuvaa tila awm tlaih manawh. 31 Thlaangduek thawhkoepna kawngah Pathen lawng a thui awl te vai khat khaw na tae u nawh aw? 32 Pathen lawng, ‘Kai tah Abraham Pathen, Isak Pathen, Jakob kah Pathen la ka awm! ti. Aka hing thli kah Pathen la awm tih aka duek thli kah Pathen nawh ni,’ tila a thui. 33 Te awl te thlaangping hue lawng a yaak vengah ahih kah cangpueina dawngah te a kawpoek rai u tangkiik. 34 Sadusi thlaang hue awl thui thai nawh la Jesuh lawng a voem te Farasi hue lawng a yaak vengah ngawl tun u tih, 35 Ahimi timkah Phungawl aka ming thlaang pakhat lawng Jesuh kah a thawlhna tuuk pe a ngaih dawngah, 36 “Saya, Phungawl dawngah me ang awlpeek he aka lenduet?” tila a doet. 37 Jesuh lawng, “Na Bawipa Pathen te na thinkaw lungbui boeih, na hingna boeih oen na thoemna, na tharana boeih oen ah lungnah.’ 38 Tete aka lenduet oen awlpuikoek awlpeek mi. 39 Pahihna awlpeek aka lenduet tah pakhatna angla, “Na imbe te namah pum na lungna angla na lungna ai.’ 40 Mosi kah Phungawl boeih oen tawngha hue kah cangpueina thli boeih te he awlpeek pahih dawngah cui boeih poen” a tina. 41 Farasi hue thik-at la a ngawlh tun u vengah Jesuh lawng. 42 “Messiah kawng he metila na poek u? A-u kah cadil la a awm? tila ahimi te a doet. Ahimi lawng, “Devid cadil ni,” ti u. 43 Tecoengah Jesuh lawng, “Tetih atah n'tu dawngah Ciim Muithla lawng Devid nala Messiah te ka Bawipa ni,” tila na thui ai, a tina kai?” Devid lawng, 44 “Bawipa lawng ka Bawipa tengah, Na raal thli na khowtang ah ka khueh thlantoe Ka bantang ben ah ngawl lah,” a tina, ti. 45 Devid lawng, “Bawipa” a tina atah metila Messiah te Devid cadil la a awm thai ai? tila a doet u. 46 Jesuh kah awl doet te a-u lawng-khaw a thung u thai nawh dawngah te hin kalawng a-u lawngkhaw awl doet ha u tlaih nawh.
1 Tecoengah Jesuh lawng thlaangping hue oen a hubang hue tengah awl a thui. 2 “Phungawl cangpueikung oen Farasi hue he tah Mosi kah Phungawl aka thuicaih thlaang hue ni. 3 Tedawngah avan thui boeih tah na sai u ham oen na vai u ham koei ni, tede ahimi kah sai te oett u boel, ahimi lawng a thui angla te sai u nawh. 4 Thlaangtloe ham tah thalrih te a tloeng pe u tih arih tangkiik la a phueih sak u, tede amami lawngtah thlaangtloe kah thalrih bawm ham a kutdawn oen Pateng dawm u nawh. 5 Thlaang kah huh theenna ham bueng thaihu soeprep a sai u. A luu oen a baan dawngah a yeen u Caciim bu ke bueh u lah! metihtlukla a bo tih a himbai hmoi metila a san. 6 Poei saina oen sinakok atah atheenkoek huen ah ngawlh a ngaih u tih ngawlhna te a kam oepsoeh u. 7 Thlaang yahawh a awmna dawr ah thlaang kah hinyahna oen koehna te a ngaih u tih ‘Saya’ tila khue ham a ngaih u. 8 Tede nangmi tah, ‘Saya’ tila khue ham ngaih u boel, nangmi tah boenhui la na awm u dawngah, ‘Saya’ tila khue ham pakhat bueng ni na khueh u. 9 Tecoengah Vaan ah aka awm Pa pakhat bueng na khueh u dawngah he dilai han ah a-u khaw ‘Apa’ tila khue u boel. 10 Nangmi lawng ‘Ukkung’ tila khue khaw ngaih u boel. Ukkung pakhat bueng na khueh u te tah Messiah ni. 11 Nangmi timkah aka lenduet te nangmi kah tuihyoeihthlaang la awm ai. 12 A-u khaw amah oen amah aka pawmsang u tah adangla a thlaak vetih a-u khaw boe ngai la aka awm tah aka lenduet la a pawmsang ai,” a tina. 13 “Phungawl cangpueikung hue oen Farasi hue! nangmi ham khawmap tangkiik! Nangmi thlaangthaipalat hue, nangmi lawng Vaan ram thawhka te thlaang kuun thai nawh ham na khaih khoep u tih namami khaw na kuun u nawh; kuun aka ngaih thli ham khaw awng ham na ngaih u nawh. 14 (“Nangmi Phungawl cangpueikung oen Farasi hue, nangmi ham khawmap tangkiik! Nangmi thlaangthaipalat hue, huhai thli te na thai na latna u tih a im te na lawh pe u. Thlaang huh atah asanhlangla na thangthui u. He tila na awm u dawngah Pathen kah dantatna a tlawh ngaai la na dang u ai.”) 15 “Phungawl cangpueikung hue oen Farasi hue! Nangmi ham khawmap tangkiik. Nangmi thlaangthaipalat hue! Thlaang pakhat thinkaw thaw sak hamla tuitunlii ah lowng oen na cet u tih ram pum na hiil u. Thlaang pakhat na dang u vengah namami angla hell ah arepla patang khang ham na sai u. 16 “Nangmi mawtkung mikpum hue! Nangmi ham khawmap tangkiik. Nangmi lawng, ‘Thlaang pakhat lawng Tempal bok-im a phoei tih awl a taap atah ahih kah awltaap te cak nawh, tede Tempal bok-im khuikah sui te a phoei tih awl a taap atah a awl taap te cak.’ tila na cang puei u. 17 Mikpum thlaangngau hue! N'tu awlpui ngaai? Sui aw! Tihnawhtah sui aka ciim sak Tempal bok-im aw? 18 Tecoengah nangmi lawng, ‘Thlaang pakhat lawng bokna a phoei tih awl a taap atah ahih kah awltaap te cak nawh; tede thaang dawngkah kutdo te a phoei tih awl a taap atah cak,’ tila na cang puei u. 19 Na mik pum u tangkiik nawh pai he! N'tu awlpui ngaai? Kutdo aw, kutdo aka ciim sak bokna te aw? 20 Tedawngah a-u khaw boknathaang te a phoei tih awl a taap poen atah boknathaang dawngah kah kutdo te khaw a phoei haih poen tih, 21 Tempal bok-im te a phoei tih awl a taap poen atah Tempal bok-im oen a khuiah aka awm Pathen te khaw a phoei haih poen. 22 Tecoengah thlaang pakhat lawng vaan te aphoei tih awl a taap atah Pathen kah ngawlhcoen oen te ngawlhcoen dawngah aka ngawl te khaw a phoei haih poen. 23 “Phungawl cangpueikung hue oen Farasi hue! Nangmi thlaangthaipalat hue! Nangmi ham khawmap tangkiik. Nangmi lawng cuenruek-an, sawngsing, sungii, oen tawian thli Pateng Pathen te paha ah pakhat na peek u; tede Phungawl lawng awlpui la n'cang puei doengna, thlaang reenna oen ueppang, koei la awmna te tah na hadalhna u. He ang thli he na sai hamla awm tih atloe te khaw dalrana ohla sai ham awm. 24 Nangmi mawtkung mikpum hue! Nangmi lawng pildiik pakhat mai Pateng awkk hau nawh ham tui te na cii u, tede kala-uk tah na doelh u. 25 “Phungawl cangpueikung oen Farasi hue, nangmi ham khawmap tangkiik. Nangmi thlaangthaipalat hue! Nangmi lawng boengloeng oen beel te asaw ahan tah na silh u tih akhui tah athe thaihu, mah kawngaih saina oen betoet. 26 Mikpum Farasi hue! Boengloeng te akhuiben sil lamha uh, te atah adauben khaw ciim badai. 27 “Phungawl cangpueikung oen Farasi hue! Nangmi ham khawmap tangkiik. Nangmi thlaangthaipalat hue! Nangmi tah ahan kah a bawk oen a thluk u thlann oen na lo u; ahan ben atah dan theen tangkiik, tede akhuiben atah arong athaang duekrawkk oen ah betoet. 28 Tih van angla nangmi khaw asaw ahan atah thlaangdoeng angla na awm u, tede na kaw khui atah thailatna, thawlna soeprep oen ah na betoet u. 29 “Phungawl cangpueikung oen Farasi hue! Nangmi ham khawmap tangkiik! Nangmi thlaangthaipalat hue! Tawngha hue ham thlann te atheen theen la na sai pe u tih thlaangdoeng thlaangciim hue kah lungsuem te atheenla na thoei na cam pe u. 30 Tecoengah nangmi lawng ‘Yan kah nu haam pahaam thli san vengah mami ng'awm u kawinih ahimi kah a sai angla n'sai u nawh vetih tawngha thli khaw ng'ngawn u nawh sui de,’ na ti u. 31 Tedawngah namami roe lawng tawngha thli aka ngawn hue kah cadil la na awm te na tueng sak u poen. 32 Tedawngah na patuer hue kah a sai thaihu thli te nangmi lawng sai langtah coeng ngala u hawn. 33 Nangmi ruul hue, ruul kah cadil hue! Metila hell khui tlaakna kalawng ka loeih u thai ai tila na ngaiuep u? 34 Tedawngah kavan thui u: nangmi tengah tawngha oen thlaangcuih hue oen ah cangpueikung kavan tuih ai; nangmi lawng khatsut te na ngawn u ai, khatsut te sinakok bok-im khuiah na bawh u vetih ahimi te khaaw tloe la na vai reroe u ai. 35 Tedawngah, thawlhna aka khueh nawh hue na ngawn u dawngah dantatna nangmi tengah avan pha ai. Thlaangdoeng Abel kalawng Tempal bok-im oen bokna-thaang laklaw ah na ngawn u Berikhiah capa Zekhariah toe te na ngawn u dawngah thisen phu dantatna nangmi tengah avan pha ai. 36 Atak tang kavan thui u: thlaangdoeng hue na ngawn u dawngah thisen phu dantatna te tahe san kah thlaang hue tengah avan pha ai. 37 Jesuh lawng, “Aw, Jerusalem, Jerusalem! Tawngha hue te na ngawn u tih nangmi tengla Pathen lawng avan tuih celtuih hue te lungto oen na de u, Aainu lawng a ca thli a phe thlip ah a yiing sak angla kan thlip kan dah ham ka cai de na ngaih u nawh. 38 Tedawngah na Tempal bok-im te a hoett vetih ahong ahii dingrak la awm ai. 39 Kavan thui u: tahe kalawng hailam toe, ‘Bawipa miing oen aka law te Pathen lawng yotheenna pe hawn seh,’ na ti u thlantoe kai he nan hu koep u tlaih manawh,” a tina.
1 Jesuh lawng tho tih Tempal bok-im kalawng a ceh vengah a hubang hue a tengla law u tih Tempal bok-im oen ah tuhkai u la a sak thli te a nueh u. 2 Jesuh lawng, “Oeih, nangmi lawng he ang thli boeih he na huh u. Atak tang kavan thui u; he Tempal bok-im kah lungto pakhat maikhaw a awmna huen ah awm manawh; apum boeih la a dawng u ai,” a tina. 3 Jesuh lawng amah bueng Olif tlaangsawm ah a ngawlh vengah a hubang hue amami bueng ahuepla a tengah law u tih, “He ang thli he metuek vengah a thoeng ai? Van thui lah!” Na lawna ham atue oen tahe kah san a boetna yoeii poen ti he mingna ham me ang miknoekna a awm ai?” tila a doet u. 4 Jesuh lawng, “A-u lawngkhaw n'thaina u nawh ham ngaithuen uh. 5 Thlaang yahawh lawng ka miing oen law u vetih ‘Kai he Messiah ni,’ ti ai, thlaangping yahawh hlang te a thai alatna ai. 6 Ayoeica kah raal kahna awl oen athla hlang kah ceemraal thawhna awlthang te na yaak u ai, tede lakueng u boel. Te ang thaihu thli te a thoeng ham roe ni, tede aboetna a pha poen tila thuingaihna nawh ni. 7 Ram pakhat oen pakhat kaap u ai, thlaangphun pakhat oen pakhat thekyak u ai. Dilai pum ah khawkha vetih likluei hinghuen ai. 8 He ang thli boeih he camoe awm tawm tamtuencuek bung-tlawh angla ni a awm. 9 “Tecoengah nangmi te thekhana ham oen ngawn hamla n'tuuk u vetih thlaangtloe kut ah nangmi te n'peek ai. Kai kawng dawngah thlaang boeih lawng n'thina u ai. 10 Tevengah thlaang broe lawng a oengna te a hoett u ai. Ahimi lawng pakhat oen pakhat sawah paipi a thleep u vetih pakhat oen pakhat thi u patoeng ai. 11 Tecoengah tawngha rawlrap thli yahawh hlang pho vetih thlaang thli te a thai alatna u ai. 12 Thawlhna puung tare vetih thlaang yahawh kah lungna thinkaw khaw dingreel poen ai. 13 Tede a-u khaw aboettoe acakla aka pai tah thlawn la awm ai. 14 Tecoengah thlaangphun boeih kah sausi la a awmna ham Vaan Ram kawng Awlthang Theen he dilai pum kah thlaangphun boeih tengah a phawng u vetih tecoengah aboetna te a pha ti. 15 “Tawngha Deniel lawng a thui oepsoeh ‘Rih koei tuiilehkap thaihu,’ lawng huenciim ah a pai te na huh u ai. (Caciim aka tae lawng he kah a thuingaihna he yaakming uh) 16 Tevengah Judia ram kah thlaang thli lawng tlaangsawm la heeng u seh. 17 Imphu ah aka awm lawng im khuikah thaihu thli lawh ham rum boel seh. 18 Lo ah aka awm lawng himbai hinaak lawh ham im la meel re boel seh. 19 Te kah atue khawhin tah hutaa bungpum tattloel oen cacuun naukem thli ham metila khaw amap sut ai. 20 Nangmi lawng na heengna atue he sikding tue oen Sabbath khawhin ah a thoengna nawh ham Pathen tengah thangthui uh! 21 Metihtiah dilai suen cuek kalawng tihin toe ah aka awm, me ang patangraina boeih lak ah teveng tue ah aka awm te rih ham awm ngaai. Te ang patangraina te a awm khaw awm koep tlaih manawh. 22 Tede Pathen lawng te kah atue te a toi sak poen; te tila atue toi sak nawh kawinih a-u khaw deem manawh. Tede Pathen lawng a thlaang tuek hue hamla atue a toi sak ai. 23 “Tevengah a-u lawngkhaw nangmi te ‘Bueh lah, Messiah tah he ah awm, ke ah Messiah awm,’ a ti vengah tangna u boel. 24 Metihtiah Messiah rawlrap oen tawngha rawlrap thli pho u vetih a coengg thai atah Pathen kah thlaangtuek Pateng thailatna ham kawpoekrai miknoekna oen kawpoekrai thaihu a lentloe a sai u ai. 25 Hutung u lah! Atue atang a pha thlan ah kavan thui oepsoeh u poen he. 26 “Thlaang lawng ‘Bueh lah, Messiah tah ramhum huhang ah awm,’ a ti u vengah cet u boel. ‘Bueh lah, he huen ah thuh u,’ a ti vengah khaw tangna u boel. 27 Metihtiah khawlaw ben kalawng khawtlaak toe mik patap ah khaw thlap apha angla Thlaanghing Capa tah law ai. 28 “Duek rawkk awmna huen roekk ah langta lawng tun van ai. 29 “Te tila raina khawhin akhum coeng khoeng atah khaw yiin khoep ai, thla lawngkhaw hop ai, vaan kalawng aisi tla ai, vaan kah huham tharana thli boeih lawng hinghuen ai. 30 Tevengah Thlaanghing Capa kah miknoekna vaan ah tueng ai; Thlaanghing Capa lawng tharana huham “oen ruep-awmna oen ah” muui dawng a rum thuk te a huh u vengah dilai thlaang boeih lawng rap ai. 31 Pengsara angaihhlangla a tum vetih dilai a kil palii ah vanthlaang thli te a tuih ai, dilai a boetna kalawng khatben toe kah a thlaangtuek thli te ahimi lawng a cawi ai. 32 “Thaidut thing dawngah cuihna lo uh. Thaidut thing tah a ke hingsuep tih a ram thaai a cawn hang vengah khawhaal tue yoeii poen tila na ming u. 33 Te tih van angla he thaihu boeih na huh u vengah a lawna atue tah yoei poen tila ming uh. 34 He he hilh u boel: tahe kah aka hing hue a duek boeih thlan ah he kah thaihu boeih he thoeng ai. 35 Vaan oen dilai tah khum boeih ai, tede ka awl tah meveng khaw khum manawh. 36 “Te khawhin oen atue te a-u lawng-khaw ming nawh; vaan kah aka awm vanthlaang oen a Capa lawngkhaw ming nawh; A Pa bueng lawng ni a ming, 37 Noah dung vengkah angla Thlaanghing Capa a law vengah awm van ai. 38 Tuiliw a law thlan, Noah te lowng khuila a kuun hin toe thlaang thli lawng a caak a awkk u tih awmtheen a boenn u. 39 Te tila tuiliw lawng a khuk u thlantoe n'tu aka thoeng ai tite ahimi lawng ming u nawh. Tetih van la Thlaanghing Capa a law vengah awm van ai. 40 Teveng tue ah lo ah thlaang pahih lawng bii a bi hih ai. Tevengah pakhat te a lawh vetih pakhat te a ceh taak ai. 41 Hutaa pahih lawng sum a deng hih ai. Pakhat te a lawh vetih pakhat te a ceh taak ai. 42 “Bawipa a lawna atue khawhin te na ming u nawh dawngah ngaithuen oepsoeh uh. 43 Imkung lawng thlaanghuuen a lawna atue te ming kawinih atheenla a toet huertue vetih thlaanghuuen lawng im te muk thai manawh tite na ming u. 44 Tedawngah nangmi lawng ngaithuen oepsoeh uh, metihtiah nangmi lawng na poek nawh atue vengah Thlaanghing Capa tah law ai. 45 “Te tih atah a-u uep-awm tih aka cuih tuihyoeihthlaang la aka awm ai? Te tah a bawi lawng a tuihyoeihthlaang thli cawmcah ham oen ah atue atang vengah ahimi caak awkk pekung la a khueh te ueppang koei aka cuih tuihyoeihthlaang la awm ai. 46 Ahih lawngah bii atheenla a bi lii te a bawi lawng a law vengah a huh atah metihtlukla te tuihyoeihthlaang tah a awmngaih ai? 47 Tedawngah atak tang kavan thui u: te kah tuihyoeihthlaang te a bawi lawng a koeva boeih te khoembelkung la a khueh ai. 48 Tede ahih lawng uepvoet koei tuihyoeihthlaang la a awm atah, ka bawi he law yue thlan hun ai ti vetih, 49 atloe tuihyoeihthlaang te a bawh apai vetih, yuuruui buh hah hue oen a caak a awkk haih u ai. 50 Tecoengah ahih lawng a poek a sam nawh khawhin oen a ming a tung nawh atue ah a bawi tah law koep ai. 51 A bawi lawng ahih te ram la a voeih vetih thlaangthaipalat thli lawng a dang koei te a dang sak van ai. Te huen ah rap vetih a naw a rueng ai.
1 “Vaan ram tah yulokung cadawng do hamla haiim a khuen tih aka cet hulaa paha oen lo u. 2 Te thli timkah hulaa pa-ngaa hue tah cuih tih pa-ngaa hue tah cuih nawh. 3 Aka cuih nawh hutaa pa-ngaa he lawng haiim tah a khuen u de haitui ahoei akai khuen u nawh. 4 Aka cuih hulaa hue lawngtah hai-im dawngah haitui abepirla a thloen u coengah haitui ahoei akai a khuen u. 5 Yulokung cadawng te a law yue nawh dawngah hulaa hue tah ip muelh u. 6 “Yiinthuem veng atah ‘Yulokung cadawng law poen! Tho u lang do uh,’ tila paang awl a yaak. 7 Hulaa paha hue te tho u tih haiim vaang ham kamthlah u. 8 Tevengah hulaa aka cuih nawh hue lawng aka cuih hulaa hue tengah ‘Kaimi kah hai duek poen ai, haitui van thloen thoem u lah,’ a tina u. 9 Hulaa aka cuih he lawng ‘Coengg thai manawh, kaimi ham oen ah nangmi ham haih tah haitui khoek manawh. Dawr la cet u lang namami ham lai uh,’ a tina u. 10 Tedawngah hulaa aka cuih nawh hue lawng haitui lai ham dawr la a cehna ruet ah yulokung tah va pai parak. Ngaithuen oepsoeh la aka awm hulaa hue lawngtah yulokung oen yului poei khuila kuun u tih thawh a khaih khoep u. 11 Tecoengah hulaa atloe hue te avan pha u tih ‘Bawipa, Bawipa kaimi ham thawh van awng u de lah!’ a tina u. 12 Yulokung lawng ‘Kavan awng manawh, nangmi te kan ming nawh,’ a tina. 13 Jesuh lawng, “Te tila khawhin oen atue te na ming u nawh dawngah ngaithuen oepsoeh lang ring uh,” tila ahukhueng ah a tina. 14 Jesuh lawng “Vaan ram tah he tila awm. Thlaang pakhat lawng athlahlang la yin ceh ham kamthlah tih a ceh thlan vengah a tuihyoeihthlaang thli te a khue tih a thaihu boeih te a kuem sak u. 15 Amami kah sai thai khoek ah pakhat rip te tangka thong ngaa a peek, atloe pakhat te thong hih a peek, atloe pakhat te thong khat a peek tih yin la a ceh taak. 16 Tangka thong ngaa aka dang tuihyoeihthlaang lawngtah cet pahoei tih tangka te bii a bina tih apueh thong ngaa a dang. 17 Tih van angla tangka thong hih aka dang lawngkhaw apueh thong hih a dang. 18 Tede tangka thong khat aka dang te lawngtah dilai a to tih a bawi kah tangka te a up. 19 “Atue sanhlang a awm coeng atah a bawi te va meel koep tih ahimi kah tangka hawna te cayin a sai u. 20 Tangka thong ngaa aka dang te va kuun tih apueh thong ngaa a peek. ‘Bawipa tangka thong ngaa nan peek. Bueh lah! Apueh thong ngaa ka dang tih kan peek,’ a tina. 21 A bawi lawng ‘Nang tah, ueppangna koei tuihyoeihthlaang la na awm! Thaihu yoehca dawngah ueppang koei la na awm dawngah thaihu yahawh kuemkung la kan khueh ai. Law langtah ka awmngaihna khuiah kuun van,’ a tina. 22 Tecoengah tangka thong hih aka dang tuihyoeihthlaang lawng law tih ‘Bawipa nang lawng tangka thong hih nan peek. Bueh lah! Tahe ah apueh thong hih ka dang tih kan peek,’ a tina. 23 A bawi lawng ‘Theen tangkiik, Nang khaw tuihyoeihthlaang ueppang koei la na awm. Thaihu yoehca dawngah ueppang koei la na awm dawngah thaihu yahawh kuemkung la kan khueh ai. Law lang ka awmngaihna khuiah kuun van lah,’ a tina. 24 Tecoengah tangka thong khat aka dang te kuun tih ‘Bawipa nang tah amangkhak thlaang la na awm tite kan ming; na tuhna nawh huen ah na ah tih na hehna nawh huen ah na cawi tite kan ming. 25 Tedawngah kan rih tangkiik tih tangka te dilai khuiah ka up. Bueh lah! He he namah koe tangka ni,’ a tina. 26 Tevengah a bawi lawng ‘Nang aka thekoek tuihyoeihthlaang thayong bi ngak! Caangti ka tuhna nawh huen ah ka ah tih ka hehna nawh huen ah a thaih ka yuun tite na ming tang tang aw? 27 Na ming atah n'tu dawngah ka tangka te ka meel koep vengah apuehla dangna ham tangka khuehna bengh ah na khueh nawh? 28 Tahe ah ahih tengkah tangka te lo u lang tangka thong ha aka khueh te pe uh. 29 Metihtiah aka khueh moek thlaang tengah a tawm athap pe vetih apueh la a khueh ai. Tede aka khueh nawh thlaang tengkah a khueh duen te a lawh pe ai. 30 He kah tuihyoeihthlaang n'tu la aka thuum nawh he adauben yiinna khuila daawng u langtah te huen ah rap selang a naw cak cak rueng seh,’ a tina. 31 Jesuh lawng “Thlaanghing Capa tah Sengpahrang angla vanthlaang thli boeih oen law vetih a bawi ngawlhcoen dawngah ngawl ai. 32 Thlaangphun boeih lawng a haiah tun u ai. Tecoengah tuudoen lawng me-ee timkah tuu te a pekthlee angla ahih lawngkhaw thlaang thli te bu hih la a pek abo ai. 33 Ahih lawng thlaangdoeng hue te a bantang ben ah a khueh vetih thlaangthawlh hue te a banvoei ben ah a khueh ai. 34 Tecoengah Sengpahrang lawng a bantang ben ah aka awm hue te, ‘Law uh, nangmi a Pa kah yotheenna aka paang hue! Law u lang dilai suen cuek veng kalawng nangmi ham a roek abah sut Vaan ram te paang u lah. 35 Metihtiah ka bung a pawng vengah buh nan cah u; tui ka halh vengah tuiding nan tuul u; kamyin la ka awm vengah na im ah nan luui sak u; 36 hinaak himbai ka taal vengah nan bai nan naak sak u; Ka tlawh ka nat vengah nan khuut nan ceem u; thongim ka tlaak vengah nan hip u;’ a tina ai. 37 Tevengah thlaangdoeng hue lawng, ‘Bawipa, mevengah na bung a pawng te kan huh u tih buh kan cah u; tui na halh te mevengah kan huh u tih tui kan tuul u? 38 Mevengah kamyin la na law tih im ah kan pah sak u; mevengah hinaak himbai na taal te kan huh u tih kan naak kan bai sak u? 39 Mevengah na tlawh na nat, mevengah thongim ah na awm te kan huh u tih kan hip u?’ tila a tina u ai. 40 Sengpahrang lawng, ‘Atak tang kavan thui u; He kah ka boenhui huhsit koek pakhat tengah na sai u te ka sawah na sai u poen ni,’ a tina ai. 41 “Tecoengah Sengpahrang lawng a banvoei benkah aka awm hue tengah ‘Nangmi Pathen lawng a kawsina’ thlaang thli ka teng kalawng atloela cet uh. Seitan oen a hubang hue ham aroek abah pe sut dungyan haialh khuila cet uh. 42 Metihtiah ka bung a pawng vengah buh nan cah u nawh; tui ka halh vengah tui nan tuul u nawh; 43 Kamyin la ka awm vengah na im ah nan pah sak u nawh; hinaak himbai ka taal vengah nan bai nan naak sak u nawh; ka tlawh ka nat vengah khaw, thongim ka tlaak vengah khaw nan khuut nan ceem u nawh,’ a tina ai. 44 Tevengah ahimi lawng ‘Bawipa, mevengah na bung a pawng, tui na halh, kamyin la na awm, hinaak himbai na taal, na tlawh na nat tih thongim ah na awm tih atliingla na awm te kan huh u tih kan khuut kan ceem u nawh,’ a tina u ai. 45 Sengpahrang lawng ‘Atak tang kavan thui u: He thlaang huhsit koek timkah pakhat bawm ham na ngaih u nawh te kai nan bawm nan ceem u nawh poen ni,’ a tina ai. 46 Tecoengah ahimi te dungyan patang raina huen ah a tuih vetih thlaangdoeng hue te tah dungyan hingna ah cet u ai,” a tina.
1 Jesuh lawng he awl a thui boeih coengah a hubang hue tengah, 2 “Na ming u angla he coeng kalawng hin hih ah Kaantaak Poei awm vetih Thlaanghing Capa te thinglam dawngah ngawn hamla thlaang kut ah a peek ai,” a tina. 3 Tecoengah khawsoeih ahaamca hue oen Judah ahaamca hue lawng Khawsoeih Bawi Kaiafas kah impui ah tun u tih, 4 Jesuh te ahuepla tuuk tih ngawn ham khaw a khan u. 5 “Poei khawhin khui atah tu boel sih, thlaangping lawng awl puung vetih cumplaam la tho ai,” tila ahimi lawng a thui u. 6 Jesuh tah Bethani khaaw kah haibe aka na Simon im ah te awm. 7 Buh a caak lii vengah hutaa pakhat Jesuh tengla law tih riimtuui phutlo alabasta uum dawngah abepirla avan khuen tih Jesuh te a luu ah a suep. 8 Te tila a sai te a hubang hue lawng a huh u vengah a thinsa u tih, “N'tu ham he tila apoeih alak he! 9 He riimtuui he tangka yahawhla a yoeih vetih khawdeng harah a peek makawi!” ti u. 10 Te tila a hubang hue lawng a thui u te Jesuh lawng a yaak vengah ahimi nala “N'tu hamla he hutaa he na lawl na la u? Ka sawah ahih lawng thaihu theen a sai poen ni, 11 Khawdeng harah thli tah nangmi tengah awm poepa ai, tede kai tah nangmi tengah ka awm poe manawh. 12 He kah hutaa lawng ka pum riimtuui oen avan suep he ka rawkk kuem ham a kamthlahna ni. 13 Atak tang kavan thui u: dilai saw peng tawm ah he awlthang a thuina huen roekk atah ahih kah thaihu sai he amah hilhna nawh ham a thui yoeyah u van ai. 14 Tecoengah a hubang thlaihih tim kah Judas Iskariot aka miingna te khawsoeih ahaamca hue tengla cet tih, 15 “Jesuh he a sawah paipi ka thleep tih nangmi kut ah kan pe kawinih n'tu nan peek u ai?” tila a doet. Ahimi lawng tangka sawmthum te a toek u tih Judas te a peek u. 16 Teveng kalawng Judas lawng Jesuh te ahimi kut ah peek thai ham atue theen a ring. 17 Tawlru thuum mueh Takawi Poei acuek hin ah a hubang hue Jesuh tengla law u tih, “Nang hamla Kaantaak buh he ame huen ah ka sai u ai? tila a doet u. 18 Jesuh lawng, “Khawpui khuikah thlaang pakhat im la cet u lang ‘Saya lawng: Kai ham atue a pha poen; ka hubang hue oen na im ah Kaantaak buh veelna ka ca sai u ai, ti’ tila thui pe uh,” a tina. 19 A hubang hue lawng Jesuh kah a thui angla Kaantaak buh te aroek abah u. 20 Khaw a thlem veng atah Jesuh oen a hubang thlaihih hue buh a veel u. 21 Thlem buh a caak u lii vengah Jesuh lawng, “Atak tang kavan thui u: nangmi timkah pakhat lawngah ka sawah paipi a thleep ai,” a tina. 22 A hubang hue tah a kawthe u tangkiik tih pakhat coengah pakhat lawng, “Bawipa, kai aw?” tila a doet u. 23 Jesuh lawng, “Kai oen buh beel aka puei haih lawng ka sawah paipi a thleep ai. 24 Thlaanghing Capa tah duek ai tila Caciim lawng a thui angla ahih tah duek ai, tede Thlaanghing Capa sawah paipi’ aka thleep thlaang ham tah khawmap! Te thlaang te cuun ohla awm kawinih ahih ham theen bet sui de!” a tina. 25 Paipi thleepkung Judah lawng, “Saya, kai aw” tila a doet. Tevengah Jesuh lawng, “Na thui angla soeng,” a tina. 26 Buh a caak u lii vengah Jesuh lawng takawi pheel at te a lawh tih a thangthui coengah takawi te a eh tih a hubang hue te a peek. “He tah ka pum ni; lo u langtah ca uh,” a tina. 27 Tecoengah boengloeng te a lawh tih Pathen teng awmngaih ciil a thui coengah a hubang hue te a peek. “Nangmi boeih lawng aw uh,” a tina. 28 “He tah ka thi ni. Pathen kah awlkhueh thaai acakna oen thlaang boeih kah thawlh khawdawp ngaaina hamla ka hok ka thisen ni. 29 Atak tang kavan thui u: A Pa Ram ah nangmi oen haih misurtui a thaai awkk ham khawhin a pha thlantoe tahe kalawng misurtui he ka aw koep tlaih manawh,” a tina. 30 Tecoengah laa raawl at a sak u tih Olif tlaang la luui u. 31 Tecoengah Jesuh lawng ahimi te, “Caciim lawngah, ‘Pathen lawng tuudoen te a ngawn vetih tuu boeih tah pathengg payaangla awm ai’ tila a thui angla, ‘N'tu yiin roe ah nangmi lawng kai he nan heng taak u vetih nan ceh taak u ai.’ 32 Tede duekna kalawng ka thawh koep coengah Galili la nangmi haiah ka cet ai,” a tina. 33 Piter lawng, “Thlaangtloe boeih lawng nang te n'hoett sut tih ng'heng taak cakhaw kai lawngtah kan heng taak roe manawh,” tila Jesuh te a tina. 34 Jesuh lawng Piter tengah “Atak tang kavan thui: n'tuu yiin ah aai a khaawk thlan vengah nang lawng kai he ka ming nawh’ tila voeithum toe na basa ai,” a tina. 35 Piter lawng, “Nang oen duek haih ham toe awm mai cakhaw kan ming nawh tila ka thui roe manawh,” a tina. A hubang atloe hue lawngkhaw te tila a thui u van. 36 Tecoengah Jesuh tah a hubang hue oen Ketsaman a ti u ahuen la cet u tih ahimi te, “Ke huen la ke ka cet silang ka thangthuina ruet ah he ah he anna ngawl uh!” a tina. 37 Jesuh lawng Piter oen Zebedi capa rawi te a ceh puei. A kaw caalla the tih lakueng sut. 38 Tecoengah ahimi nala “Ka kaw a the uett ah ka duek kaw la hut. He ah awm u lang n'hak puei’ u lah,” a tina. 39 Jesuh lawng ahimi oen athla betna huen la cet, dilai ah buekuep tih “A Pa, acoengg thai atah he kah patang khangna boengloeng he van khoe mai hawn! Tede kai kah kawngaih angla awm boel selang nang kah kawngaih angla awm hawn seh,” tila thangthui. 40 Tecoengah a hubang pathum tengla ava mel vengah ahimi a ih muelh u te a huh tih Piter tengah, “Metila nangmi pathum hue he khawnoek pakhat khui maikhaw na hak u thai nawh aw? 41 Suek-halhna na taa thaina ham hak u lang thangthui uh.Thinkaw lawngtah a ngaih de pumsa tah a tha yoek sut” a tina. 42 Jesuh tah cet koep tih “A Pa, he kah patang khangna boengloeng he awkk ohla khoe thai koeila a awm nawh atah, na kawngaih angla awm hawn seh,” tila thangthui. 43 A hubang hue tengla Jesuh a mel koep vengah ahimi a ih muelh te a huh; a mik khaw daai u thai nawh. 44 Jesuh lawng ahimi te a ceh taak tih apathumna ah a thangthui nooek angla thangthui koep. 45 Tecoengah a hubang hue tengla mel koep tih “Na ip tih na duem u huen aw? Bueh u lah! Thlaanghing Capa tah thlaangthawlh thli kut ah peekna atue tah a pha poen. 46 Tho uh, Cet u poen sih. Bueh lah, ka sawah paipi aka thleep thlaang te avan pha poen he,” a tina. 47 Jesuh lawng awl a thui pe vengah te a hubang paha thlaihih tim ah aka thuum van Judas te avan pha. Ahih lawngah khawsoeih ahaamca hue oen Judah ahaamca hue lawng a tuih u thlaangping, samsen oen boelhoen aka pawm thli te avan law puei. 48 Paipi thleepkung lawng thlaangping tengah miknoekna te a thui pe oepsoeh tih, “Kai lawng ka mok thlaang te nangmi lawng tuuk ham na ngaih thlaang te ni, ahih te tu uh,” a tina. 49 Judas lawng a paipuek ah Jesuh tengla cet pahoei tih “Saya, na sawah ngaimawngna awm seh,” a tina tih a mok. 50 Jesuh lawng, “Ka puei, na sai ham koei te aloela sai hawn,” a tina. Tecoengah ahimi lawng Jesuh te a tuuk tih a khih u. 51 Jesuh oen aka awm haih thlaang pakhat lawng a samsen te tiingim dawngkah a suh tih Khawsoeih Bawi kah a tamnaa haa te pat a tloek. 52 Jesuh lawng, “Na samsen te tiingim khuila sang koep. Samsen aka hawna tah samsen oen duek van ai. 53 Kai lawng a Pa tengah bawmna ka bih kawinih raalkapbu paha thlaihih lak ah yahawh ngaai vanthlaang te ka tengla avan tuih pahoei ai ti he na ming nawh aw? 54 Tede te tila awm kawinih, he ang thaihu a awm ham Caciim lawng a thui te metila a soep thai ai?” a tina. 55 Tecoengah Jesuh lawng thlaangping hue te, “Nangmi lawng kai he thlaanghuuen angla tuuk ham pawmcunghaiha, samsen oen boelhoen na pawm u tih na law u? Khawhin roekk Tempal bok-im ah ka ngawl tih kan cang puei u vengah a-u lawngkhaw nan tu u nawh. 56 Tede he tila thaihu boeih a awm he tah tawngha hue lawng Caciim dawngah a thut te asoepna ham ni,” a tina u. Tevengah a hubang boeih lawng Jesuh te a ceh taak tih a heeng taak u. 57 Jesuh aka tu thlaangping lawng Jesuh te Khawsoeih Bawi Kaiafas im la a ceh puei u. Te huen ah Phungawl cangpueikung hue oen Judah ahaamca boeih tun u. 58 Piter lawngah a thla bet ngai kalawng Khawsoeih Bawi kah a talawng vawng-up khui toela Jesuh te a hu yut tih a vai. Metila nuem a sai u lah ve tite ming ham a ngaih dawngah ahih lawng talawng vawng-up khuila kuun tih raaltoeng thli oen haih ngawl. 59 Khawsoeih ahaamca hue oen Khonsil ah aka thuum boeih lawng Jesuh te ngawn thai ham a thawlhna a tlap pe u; 60 tede a thawlhna pakhat khaw hu u nawh. Hoem awl oen thawlh aka peel tah awm moen mai de a thawlhna tehca khaw hu thai nawh. Ahukhueng atah thlaang pahih law hih tih. 61 “He thlaang lawng ‘Pathen kah Tempal bok-im te ka phe vetih hin thum ah ka sak koep ai,’ ti” tila a thui hih. 62 Khawsoeih Bawi lawng pai hang tih, “He rawi lawng thawlh n'peel he na oelh ham koei awm nawh aw?” tila Jesuh te a doet. 63 Tede Jesuh lawng n'tu khaw thui nawh. Khawsoeih Bawi lawng pai koep tih, “Aka hing Pathen miing ka phoei tih kan doet: Nang he Pathen Capa Messiah tang aw thui lah?” a tina. 64 Jesuh lawng, “Na thui angla soeng! Tede nangmi boeih tengah kavan thui u; tahe kalawng Thlaanghing Capa tah Thara koek bantang ben ah ngawl vetih vaan kah muui dawngah a rum thuk te na huh u ai,” a tina. 65 Tevengah Khawsoeih Bawi lawng a himbai te a pheuh tih, “Pathen thekhana poen ni! Atloe sausi ngoe tlaih nawh. Pathen thekhana awl na yaak u boeih poen! 66 Metila na poek u?” tila a doet. Ahimi lawng, “A thawlh dawngah duek ham awm,” ti u. 67 Tecoengah ahimi lawng Jesuh te a mik-hai ah a tumthoeih u tih a bawh u; a bel u. Tecoengah aka bel hue lawng, 68 “Messiah! Nang a-u lawng m'bel; van thui lah,” a tina u. 69 Piter lawng talawng adauben vawng-up khuiah a ngawlh vengah Khawsoeih Bawi im kah tuihyoeihnu pakhat a tengla law tih, “Nang khaw Galili thlaang Jesuh oen aka awm haih van ni,” a tina. 70 Tede Piter lawng ahimi boeih haiah basa tih, “N'tu kawng nuem na thui, ka ming moenih,” a tina. 71 Tecoengah Piter tah talawng thawhka ben la te cet. Atloe tuihyoeihnu pakhat lawng a huh tih te kah thlaang thli tengah, “He thlaang he Nazaret khaaw kah Jesuh oen aka awm haih thlaang ni,” a tina u. 72 Piter lawng basa koep tih, “Awl ka taap, te thlaang te ka ming nawh,” a tina. 73 Raih a awm coengah te huen kah aka pai thlaang hue lawng Piter tengla law u tih “Nang khaw ahimi timkah thlaang van ni, na awlcal thingkaa dawngah ming u poen,” a tina u. 74 Tecoengah Piter lawng “Awl ka taap tih awltak ka thui. Ka thui awl he a soeng nawh atah Pathen lawng dan m'pe seh! Te thlaang te ka ming roeroe nawh,” a tina. Te tila a thui coeng khoeng atah aai khawk pahoei. 75 Jesuh lawng, “Aai a khawk thlan vengah voeithum toe kan ming nawh nan tina ai,” a tina awl te Peter lawng a poek lot vengah adaubenla te cet, a kawsi la dung tih rap.
1 Mincanghi atah Khawsoeih ahaamca hue oen Judah ahaamca hue boeih lawng Jesuh te ngawn ham khaw a khan u. 2 Ahih te thiirui oen a khih coengah a ceh puei u tih Rom ram ukbawi Pilat kut ah a peek u. 3 Paipi thleepkung Judas lawngah, Jesuh te ngawn hamla khaw a khan u te a yaak vengah yut tih tangka sawmthum te Khawsoeih ahaamca hue oen Judah ahaamca hue tengah a baal koep. 4 “Ka thawlh tangkiik, thawlhna aka khueh nawh te duek sak hamla a sawah paipi ka thleep hau poen,” a tina. Ahimi lawng, “Kaimi lawng n'tu ka tina ai? Namah ngaih poen ni,” a tina u. 5 Judas lawng tangka sawmthum te Tempal bok-im khuiah a voeih sut tih cet, te coengah kaiawk tih duek. 6 Khawsoeih ahaamca hue lawng tangka te a ruh u tih, “He kah tangka he thisen phu tangka la a awm dawngah Tempal bok-im kah tangkakong khuiah khueh ham mami kah Phungawl lawng ngaih nawh,” ti u. 7 Te kah tangka kawng te a thui u tih kawtlaakna a khueh coeng atah thlaangphun tloe kah phuel la khueh ham ah Ambawpkung kah Lohuen te laina ham tangka te a hawna u. 8 Tedawngah te lohuen te, “Thisen huen” tila tihin toe ah a thui u. 9 Te tila tawngha Jeremiah lawng a thuisut awl te soep poen. Tawngha Jeremiah lawng, “Israel thlaang thli lawng ahih kah phu ting la kawtlaakna oen aphu a kheh u tangka sawmthum te ahimi lawng a lawh u tih, Bawipa lawng awl n'peek angla, 10 Ambawpkung kah lohuen te laina ham tangka te a hawna u,” tila a thui te ni. 11 Rom ram ukbawi haiah Jesuh a pai vengah ram ukbawi lawng, “nang he Judah sengpahrang tang aw?” tila a doet. Jesuh lawng, “Na thui angla ka awm,” a tina. 12 Tede Khawsoeih ahaamca hue oen Judah ahaamca hue lawng thawlh a peel u te Jesuh lawng khat khaw thung pe nawh. 13 Tedawngah Pilat lawng, “Nang he ahimi lawng thawlh he yoeh m'peel u he na ya nawh aw?” tila a doet. 14 Tede Jesuh lawng kaam at khaw a thung pe nawh dawngah ram ukbawi tah a kawpoek rai tangkiik. 15 Rom ram ukbawi lawng Kaantaak Poei veng roekk ah rangpui lawng loeih sak ham a ngaih thongtla pakhat te a thlah pe. 16 Tevengah a thaang aka the soeh thlaangthe Jesuh Barabbas aka miingna thongtla pakhat awm. 17 Thlaang rangpui a tun soep vengah Pilat lawng, “A-u thlah sak ham na ngaih u? Jesuh Barabbas aw, tih nawh atah Messiah a ti u Jesuh aw?” tila a doet. 18 Ahimi lawng Jesuh he a uett u dawngah aana aka khueh Judah hue lawng ka kut ah avan pha sak u tite ahih lawng atheenla a ming. 19 Awlcekna yung ah Pilat a ngawlh vengah a yu lawng, “Thawlhna aka khueh nawh te kah thlaangdoeng sawah n'tu khaw sai boel. Ahih kawngah tiyiin ka mang ah ka patang tangkiik,” tila awl a tah. 20 Khawsoeih ahaamca hue oen Judah ahaamca hue lawng Barabbas te thlah tih Jesuh te ngawn hamla Pilat tengah bih ham ah rangpui te a ceemtuh. 21 Pilat lawng “He rawi pahih khuiah a-u thlah sak ham na ngaih u?” tila rangpui te a doet. Ahimi lawngah, “Barabbas” ti u. 22 Pilat lawng ahimi te, “Te atah Messiah a ti u Jesuh he metila ka sai ai?” tila a doet. Ahimi boeih lawng, “Thinglam dawngah ngawn” a tina u. 23 Tede Pilat lawng, “N'tu thawlhna a sai?” tila a doet koep u. Tevengah te thli lawng, “Thinglam dawngah ngawn!” tila angaihhlangla paang u. 24 Pilat lawng he tila awl doett khiing he coeng thai manawh, cumplaam la tho tih so tare poen ai tite a huh vengah tui a lawh tih rangpui haiah a kut te a silh. “He thlaangdoeng kah duekna kawngah kai ka thuum nawh! Namami kah sai ni!” a tina. 25 Tevengah rangpui lawngah, “Ahih kah duekna kawngah dantatna tah kamami oen ka cadil thli sawah tla hawn seh,” ti u. 26 Tecoengah Pilat lawng ahimi ham Barabbas te a thlah pe tih; Jesuh te cungpoelh oen a bawh sak u tih thinglam dawngah ngawn ham ahimi kut ah a peek. 27 Tecoengah Pilat kah raalkap hue lawng Jesuh te ram ukbawi kah impui la a khuen u tih raalkap bu khat lawng a voel khoep. 28 Ahimi lawng a himbai te a pit pe u tih himbai ling a bai sak u. 29 Tecoengah thliing lumuek te a muek sak u, a bantang kut ah cawnghol a pawm sak u; tecoengah a haiah buekuep u tih a the akhana u, “Judah sengpahrang na hinglung vaang seh,” tila a the akhana u. 30 Ahimi lawng Jesuh te a tumthoeih u, cawnghol te a lawh pe u tih a luu ah a bawh u. 31 He tila a thena u coengah himbai ling te a pit pe tih amah kah himbai te a bai sak koep tih thinglam dawngah ngawn ham a ceh puei u. 32 Te tila a ceh u vengah Sairin khaaw kah Simon te a huh u tih raalkap hue lawng amangkhakla Jesuh kah thinglam te a kawh sak u. 33 Golgota a ti u huen te a pha u. Golgota ti he tah, “Luuruh Huen,” ti ngaihna ni. 34 Te huen ah Jesuh te misurtui oen tuikha a pawlh te a tuul u. Jesuh lawng a teng doek tih aw nawh. 35 Jesuh te thinglam dawngah a tai u, tecoengah talcung a suh u tih a hinaak himbai te rek ra u. 36 Tecoengah ngawl u tih Jesuh te a toet u. 37 Thawlh a peel te a thut u tih a luu sawah a tai pe u. “He tah Judah Sengpahrang Jesuh ni,” tila a thut pe u. 38 Tevengah thlaanghuen pahih khaw Jesuh oen haih bantang ben ah pakhat, banvoei ben ah pakhat thinglam dawngah a tai u. 39 Te kah aka cet paitai thli lawng a luu halh a voeih u tih a tamdeng kawkhahna u. 40 Tempal bok-im te aka phe tih hin thum ah aka sa koep ham koei! Pathen Capa la na awm atah namah oen namah thlawn u lah saw! Thinglam dawng kalawng rum thuk lah!” a tina u. 41 Tetih van angla khawsoeih ahaamca hue oen Phungawl cangpueikung hue oen ah Judah ahaamca hue lawngkhaw a tamdeng u van tih, 42 “Ahih lawng thlaangtloe tah a thlawn thai de, amah oen amah tah thlawn u thai nawh! Israel sengpahrang la awm nawh aw? Tahe roe ah thinglam dawng kalawng a rum atah mami lawng ahih he n'tangna ai ta! 43 Pathen a uepna tih Pathen Capa la ka awm ti, Pathen lawng tahe ah a thlawn ai aw bueh u lah sih!” ti u. 44 Jesuh oen thinglam dawngah a tai haih thlaanghuen rawi lawng pateng khaw ahimi angla a tamdeng hih van. 45 Hingthun ah ram pum boeih te yiinna lawng a thiing khoep tih khawnoek pathum khui yiin khoep. 46 Khawvaang ben khawnoek pathum yun atah Jesuh lawng, “Eli, Eli, Lama sabaktani?” tila angaihhlangla paang. A thuingaihna tah, “Ka Pathen, Ka Pathen, n'tu ah kai nan hoett sut?” ti ngaihna ni. 47 Te huen kah aka pai thlaang khatsut lawng a yaak u vengah, “Ahih lawng Elijah ni a khue,” ti u. 48 Ahimi tim kah thlaang pakhat lawng thlat cet tih himbaipeen te a lawh, misurtui ah a nuem tih cungkui dawngah a piin tih Jesuh te awkk sak ham kamthlah. 49 Tede atloe hue lawng, “Awm de lah! ahih thlawn hamla Elijah law ai nuem, bueh de lah sih,” ti u. 50 Jesuh lawng angaihhlangla paang, tecoengah a mal pat yip. 51 Tevengah Tempal bok-im khuikah himbaiyan te asaw kalawng adang toe pahih la poet pheuh u. Dilai hinghuen tih lungnu thli boeih rek. 52 Thlann thawhka boeih awng u tih aka duek tangte Pathen thlaang thli boehoeng mai te tho u. 53 Phuel te a ceh taak u tih duekna kalawng Jesuh a thawh koep coengah Aciim Khawpui khuila kuun u tih thlaang broe haiah tueng u. 54 Raalbawi oen Jesuh aka toet raalkap hue lawng likluei hinghuen tih atloe thaihu thli te tila a awm te a huh u vengah lakueng rih oen thuen u tih, “Ahih he Pathen Capa tang tang ni” ti u. 55 Galili kalawng Jesuh hu ah aka bang tih amah te aka bawmcem hutaa broe nawh te ah te awm u tih ahih te athla kalawng a toet tih a dan u. 56 Ahimi tim-ah Meri Makdalin, Jeem oen Josep manu Meri oen Zebedi yu khaw awm u. 57 Thlemben apha atah Arimatia khaaw kah kuirang pakhat Josep aka miingna te avan pha. Ahih khaw Jesuh kah a hubang pakhat la awm van. 58 Ahih lawng Pilat tengla cet tih Jesuh kah a rawkk te a bih. Jesuh kah a rawkk te Josep kut ah peek ham Pilat lawng awl a peek. 59 Josep lawng Jesuh rawkk te a lawh tih himbai bawk athaithik oen a yaawl tih, 60 amah ham lungkaw a thuk heet thlann thaai ah te a up. Tecoengah lungto bo hlang oen thlann thawhka te a khaih tih a ceh taak. 61 Meri Makdalin oen atloe Meri mi khaw te ah te thlaan ben la mang tih ngawl u. 62 Avuen Sabbath hin ah khawsoeih ahaamca hue oen Farasi thlaang thli tah Pilat oen huh u tih, 63 “Bawipa hoem thui thlaang ahih lawng te a hing vengah, ‘Kai tah duekna kalawng ka tho koep ai’ tila a thui te ka ming u. 64 Tedawngah athum hin toe thlann te atheenla a khaih tih a toet u ham awl van pe lah, te nawh kawinih a hubang hue lawng cet u vetih a rawkk te a huuen u coengah ahih tah duekna kalawng tho koep poen tila thlaang tengah a thui u ai. Hukhueng kah thailatna he acuek kah thailatna lak ah the-eep ngaai ai,” tila a thui pe u. 65 Pilat lawng “Raalkap bu khat aka toet la na khueh u te ta: cet u langtah thlann te a toet thai khui anepla toet sak uh,” a tina. 66 Tecoeng atah ahimi lawng cet u tih thlann khaihna lungto dawngah miknoekna a khueh u tih thlann te anepla a toet sak.
1 Sabbath hin boeih tih yarh khat khuikah lamhacuek khawhin khawthaih tawm ah Meri Makdalin oen atloe Meri te thlann bueh hamla cet. 2 Tevengah te bawtbet khawlai ah likluei tho tih angaihhlangla hinghuen. Bawipa kah vanthlaang pakhat te vaan kalawng va rum tih thlann khaihna lungto te a thoeih tih a sawah ngawl. 3 Ahih kah a muei asam tah khawpha angla awm tih a himbai tah rawsawng angla bawk. 4 Thlann aka toet raalkap thli let u tih a rih u dawngah thuen u tih thlaang duek angla awm u. 5 Vanthlaang lawng hutaa rawi nala “Rih boel; thinglam dawngah a ngawn u Jesuh te na tlap te ka ming. 6 Ahih tah he ah awm tlaih nawh; a thui angla tho poen. Law langtah a ralhna huen te bueh lah. 7 Tahe ah aloela cet langtah a hubang hue tengah, ‘Ahih tah duekna kalawng tho koep poen; nangmi haiah Galili la cet vetih te ah ahih te na huh u ai!” tila thui pe uh. Kavan thui he hilh boel,” a tina. 8 Hutaa rawi lawng a rih hih de awmngaihna oen phuel kalawng ah aloela cet tih a hubang hue tengah thui pe ham heeng. 9 Tevengah Jesuh te ahih rawi tengah law parak tih “Nanghih sawah ngaimawngna awm hawn seh.” a tina. Ahih rawi lawng a tengla cet, a khow ah a phoeih tih a bok. 10 Jesuh lawng ahih rawi nala te “Rih boel, cet langtah ka maya manau thli te Galili la ceh ham thui pe hih, te ah te ahimi lawng kai he n'huh u ai” a tina. 11 Hutaa hue Phuel kalawng a meel u vengah, thlann toet raalkap khatsut lawng khawpui khuila cet u tih khawsoeih ahaamca hue tengah thlann kah a huh boeih te a thui pe u. 12 Khawsoeih ahaamca hue lawng Judah ahaamca hue oen huh tun u tih khaw a poek u; ahimi lawng raalkap thli te tangka yahawh a peek u tih, 13 “A hubang hue khawyiin ah law u tih kaimi ka ihna ruet ah a rawkk te a huuen u tila thui uh. 14 He kawng he ram ukbawi lawng a yaak atah kaimi lawng ka thloep u vetih nangmi te he kawngah lakueng ham awm manawh,” a tina u. 15 Thlanntoet raalkap hue lawng tangka te a lawh u tih ahimi lawng a uen angla a thui u. Raalkap hue kah a thui awl te tahe toe Judah hue lawng a thui khuep u. 16 A hubang paha thlaikhat hue tah Galili ram la cet u tih Jesuh lawng a thui pe tlaang la te luui u. 17 Ahimi lawng Jesuh te a huh u vengah a bok u, tede ahimi timkah khatsut lawngtah tangna u nawh. 18 Jesuh lawng ahimi tengla cet phai tih. “Dilai oen vaan kah saithaina aana boeih kai m'peek poen. 19 Tedawngah dilai dawngkah thlaangphun boeih tengah cet u langtah ahimi te ka hubang la van coeng sak uh; Pa, Capa, Ciim Muithla miing ah baptisma pe uh. 20 Kai lawng awl kan peek boeih te a vaina u ham cang puei uh. Dilai tue aboettoe nangmi oen haih ka awm poe ai,” a tina.
1 He tah Pathen Capa Jesuh Khrih kawng Awlthang theen ni. 2 A tongcuek vengah tawngha Isaiah lawng: “Pathen lawng ‘Nang hamla lawngpui tukkung Kamah kah laipai na haiah kavan tuih ai, ti.’ 3 Thlaang pakhat tah ramhum huhang ah paang tih, “Bawipa ham lawngpui te roekbah uh, a cehna ham lawngpui te doeng sak uh,” tila a thut. 4 Tedawngah Johan tah ramhum huhang ah va law, baptisma a peek tih phung a thui. Thlaangping thli te, “Na thawlhna yut u langtah baptisma dang uh. Te dengah ni Pathen lawng na thawlhna sawah khawdawp avan ngai u ai.” a tina. 5 Judia peng oen Jerusalem kah thlaang thli lawng Johan kah phungthui te hutung hamla cet u. A thawlhna a phawng u tih Jordan tuiva ah ahimi te Johan lawng baptisma a peek u. 6 Johan lawng Kala-uk mul oen a tah himbai te a baai tih a hingcen ah saphaw cihin a naak. Ahih lawngah khaurang oen khawitui te buh la a caak. 7 Ahih lawng thlaangping nala te, “Kai coengah aka law ham koei thlaang te tah kai lak ah aka lenduet ni. Kai tah ahih kah khowmuek rui thlam ham Pateng ka ting ka tawkk nawh. 8 Kai lawngtah nangmi he tui oen ni baptisma kan peek u. Tede ahih lawngtah Ciim Muithla oen baptisma m'peek ai,” a tina. 9 Tecoeng kalawng a awm raih thlan ah Jesuh tah Galili peng Nazaret khaaw kalawng va law tih Jordan tuiva ah Johan lawng baptisma a peek. 10 Jesuh te tui dawng kalawng a thawh hang khoeng vengah vaan te awng u tih ahih sawah Muithla akhuu angla a cuuk te a huh. 11 Vaan kalawng aka law awl lawngah, “Nang tah kan thintlawhna ka Capa ni, na sawah ka kaw tluep, tangkiik” a tina. 12 Tecoeng atah Muithla lawng ahih te ramhum huhang la a tuih pahoei tih, 13 Te ah te khawhin sawmlii awm tih Seitan lawng a suek a halh. Ramsatlung thli khaw te ah te awm, tede vanthlaang thli law u tih Jesuh te a bawm acem u. 14 Johan te thong a tlaak coengah Jesuh tah Galili ram la cet tih Pathen tengkah Awlthang Theen te a phawng. 15 “Atue atang tah avan pha khuek poen! Pathen ukna tah yoeii poen! Na thawlhna yut u langtah Awlthang Theen he tangna uh!” tila a thui. 16 Galili tuikeeng ah Jesuh a ceh phai vengah tuihawi thlaang pahih Simon oen a manau Andru lok a heeng hih te a huh. 17 Jesuh lawng ahih rawi nala, “Ka hu ah bang hih lah, thlaang tukung la kan coengg sak hih ai,” a tina. 18 Tevengah lok te pak a tloeng hih tih Jesuh hu ah bang hih pahoei. 19 Ahih tah cet hot phai tih Zebedi ca rawi Jeem oen Johan boeinau te a huh. Ahih rawi tah lowng khuiah lok te a baw hih. 20 Jesuh lawng a huh pahoei oen te rawi te a khue. Ahih rawi lawng ana pa Zebedi oen a bii aka bi pe thlaang thli te lowng khuiah a ceh taak hih tih Jesuh hu ah bang hih pahoei. 21 Jesuh oen a hubang hue Kapernaum khawpui la law u tih Sabbath hin ah Jesuh te Sinakok la cet tih cang puei ham a tong. 22 Jesuh lawngtah Phungawl cangpueikung hue angla cang puei nawh tih sai thaina aana aka khueh angla a cang puei dawngah ahih kah cangpueina aka ya boeih lawngtah a kawpoek rai u. 23 Tevengah te a kaw khuiah raaithe aka awm thlaang pakhat sinakok bok-im khuila law tih rih oen thuen ruila paang, 24 “Nazaret Jesuh, kaimi he metila sai ham na ngaih? Kaimi he phe ham aw na law? Nang he me ang thlaang ti he kan ming: Nang tah Pathen kah laipai thlaang ciim ni” a tina. 25 Jesuh lawng raaithe te, “Awm duem lah, te thlaang kaw khui kalawng co loeih!” tila awl a peek. 26 Raaithe lawng te thlaang te a ngaih hlang la a thuen sak, rih oen thuenn doe ah paang tih te thlaang kah a kaw khui kalawng co. 27 Thlaang boeih te a kawpoek rai u tih khat oen khat te, “He he me ang kai? Cangpueina a thaai phun tloe kai aw? He thlaang lawng raaithe te aana oen awl a peek tih ahimi lawng awl a ngaai pe,” ti u. 28 Tedawngah Jesuh kawng awlthang te kawlkalh maiah Galili peng khaaw tawm ah thaang khonghak. 29 Jesuh oen a hubang hue, Jeem oen Johan mi khaw, sinakok kalawng tho u tih Simon oen Andru im la poe cet u. 30 Simon kah a mase hutaa te tlo tih ral. Jesuh te a paipuek ah ahih kah sading nawh kawng te a thui pe u. 31 Jesuh lawng a tengla cet tih ahih te a kut ah a phoeih tih a thawh hang. A sa ding pahoei tih ahimi te a do a dan. 32 Khaw a tlaak coeng thlem khup atah thlaangping lawngah thlaangtlo boeih oen raaithe aka khueh thli te Jesuh tengla avan law puei u. 33 Te khawpui khuikah thlaang boeih tah im haiah tun u boeih. 34 Jesuh lawng tlawhnatna soeprep boeih oen aka tlo thli te a hoeih sak tih raaithe thli khaw boeih a hek. Jesuh he me ang thlaang tite raaithe thli lawng a ming u dawngah Jesuh lawng raaithe thli te awl kam at khaw thui sak u nawh. 35 Avuen khawhin mincanghi khaw a thaih thlan ah Jesuh tah tho tih khawpui adauben ading asuekna huen la te cet tih te ah te thangthui. 36 Simon oen a paya thli lawng ahih te a tlap tih, 37 a huh u vengah, “Thlaang boeih lawng nang he n'tlap u ta,” a tina u. 38 Tede Jesuh lawngah, “He kah atloe khaaw teng khaaw vai la cet u sih. Ahimi tengah khaw phung ka thui ham awm. Te ham ni kai ka law roe ta,” a tina. 39 Tedawngah Jesuh tah Galili peng tawm ah cet, sinakok bok-im boeih ah te phung a thui tih raaithe thli khaw a hek. 40 Haibe aka tlo thlaang pakhat Jesuh tengla law tih khuklu oen cuengkueng ruila, “Na kawngaih atah nan hoeih sak thai,” tila reenna a bih. 41 Jesuh lawng a reen tangkiik dawngah a kut a thueng tih a tek, “Hoeih sak ham ka ngaih ta, hoeih loeih,” a tina. 42 Kawlkalh ah haibe natna te hoeih tih ciim pahoei. 43 Tecoengah Jesuh lawng ahih te he tila awl ceet ceet a uen tih a tuih pahoei. 44 Hutung lah! He kawng he a-u tengah khaw thui boel. Tede khawsoeih tengla cet phaat langtah na pum te nueh lah; tecoengah nang na hoeih poen tite thlaang boeih lawng a mingna ham Mosi kah awlpeek angla thawthuengna te sai,” a tina. 45 Tede te kah thlaang lawng cet tih amah aciimna kawng te a thui tih khaaw tawm ah thaang khonghak. Ahih lawng he kawng he yahawh la a thui lat dawngah Jesuh tah khawpui khuila langya ah cet thai tlaih nawh poen. Khawpui adauben adingruena huen ah awm tih te la te khaw tawm kah thlaang thli te a tengla law u.
1 Khawhin yahawh hlang a awm raih thlan ah Jesuh te Kapernaum khaaw la meel koep tih im ah awm tila awlthang a yaak u. 2 Tedawngah thlaang yahawh hlang va tun u tih im khuiah ahoengna roe awm muehla thawhka keeng adauben ah Pateng khaw be khawk. Ahimi tengah te Jesuh lawng phung a thui pe. 3 Tevengah thlaang palii lawng aka khawn thlaang pakhat te Jesuh tengla avan kawh u. 4 Tede thlaang yahawh aih tih Jesuh tengla te pha puei u thai nawh. Tedawngah Jesuh a awmna tuueng kah imphu te a phe u, thlaangtlo te a himbai dawngah a ralh sak tih a thlaak thuk u. 5 Ahimi kah oengna te Jesuh lawng a huh vengah aka khawn thlaangtlo te, “Ka ca, na thawlhna boeih te khawdawp kavan ngaai poen,” a tina. 6 Te kah aka ngawl Phungawl cangpueikung khatsut lawng, 7 “N'tu ah he tila a thui ngam kai? Pathen thekhana poen ni, Pathen bueng nawh atah a-u lawng thawlhna khawdawp a ngaai thai! tila a kaw khuiah a poek u. 8 Ahimi kah kawpoek te Jesuh lawng a ming tih ahimi nala te, “N'tu kawng ah he ang thaihu he na poek u? 9 He kah aka khawn thlaang he, ‘Na thawlhna khawdawp ngaai la awm poen,’ tina aw aka yoei bet, tihnawhtah ‘Tho loeih, na himbai te lo langtah cet loeih,’ tina aw aka yoei bet? 10 Thlaanghing Capa lawng dilai han ah thawlhna khawdawp ngaai thaina aana a khueh ti he nangmi tengah ka tueng sak ai,” a tina. Tedawngah aka khawn thlaang nala. 11 “Tho lah, na himbai te lo langtah im la cet loeih kan tina he!” a tina. 12 Ahimi boeih kah mik huh ah te thlaang lawng tho hang, a himbai te a lawh tih aloela cet. Ahimi boeih tah a kawpoek rai u tih, “He ang thaihu he n'hu vai u nawh!” ti u tih Pathen te a thangpawm u. 13 Jesuh tah Galili tuiliikeeng la cet koep. Thlaangping broe lawngah a tengla a law u dawngah Jesuh lawng ahimi te a cang puei. 14 Jesuh lawng a ceh phai vengah Alfias capa mangmu cawikung amah yungim ah aka ngawl Levi te a huh. Jesuh lawng ahih nala, “Ka hu ah va bang lah,” a tina. Levi lawng tho tih a hu ah bang pahoei. 15 Tecoeng atah Jesuh te Levi im ah buh a caak. Mangmu cawikung thli oen atloe thlaangthawlh thli lawng Jesuh te a hu ah bung a vai u tih khatsut lawngah Jesuh oen a hubang hue te buh a veel puei u. 16 Te tila Jesuh lawng thlaangthawlh thli oen mangmu cawikung hue oen ah buh a veel haih u te Phungawl cangpueikung khatsut oen Farasi thli lawng a huh u vengah, “N'tu dawngah he ang thlaang thli oen ahih lawng buh haih a caak u?” tila a hubang hue te a doet u. 17 Jesuh lawng ahimi kah awldoet te a yaak tih, “Sading thlaang lawng Siibawi ngoe nawh tih thlaangtlo bueng lawng ni a ngoe. Hinyah koei thlaangdoeng khue ham ka law nawh tih thlaang thawlh khue ham ni ka law” a tina. 18 Hin at atah Baptisma pekung Johan kah hubang hue oen Farasi thli buh a yeh u. Thlaang khatsut Jesuh tengla law u tih “Baptisma pekung Johan kah a hubang hue oen Farasi thli lawng buh a yeh u, nang kah hubang hue lawngtah n'tu kawngah buh a yeh u van nawh?” tila a doet u. 19 Jesuh lawng, “Yului poei ah a khue kamyin thli lawng buh a yeh u ai tila na poek aw? Yeh u manawh! Yulokung a awm vengah ahimi lawng buh yeh u manawh. 20 Tede ahimi teng kalawng yulokung a khuena khawhin a pha ai, tevengah ahimi lawng buh a yeh u badai. 21 A-u lawngkhaw a himbai ruem te bawna ham hisa athaai te hawna nawh; a bawna atah hisa athaai lawng aruem te a doek vetih a puut kau tare ai. 22 A-u lawngkhaw misurtui athaai te saphaw-yuukhap athaai dawngah thloen nooek nawh, thloen kawinih misurtui lawng saphaw-yuukhap te a pawkk sak vetih pahih bok la misurtui te yut boeih ai, saphaw-yuukhap te khaw paw poen ai. Tedawngah misurtui athaai te saphaw-yuukhap athaai dawngah thloen ham awm,” a tina. 23 Sabbath khawhin ah Jesuh te caangthliw kalawng cet. A hubang hue khaw amah oen cet haih u tih ahimi lawng ceh doe ah caangvui a yuun u. 24 Tedawngah Farasi hue lawng Jesuh nala, “Bueh lah! na hubang hue lawng Sabbath khawhin ah he ang thaihu a sai u he mami kah Phungawl lawng ngaih nawh” a tina u. 25 Jesuh lawng ahimi nala te, “Devid lawngah caak koei khat khaw a khueh nawh vengah n'tu a sai tite na tae u vai nawh aw? Amah oen a paya thli a bung pawng u tangkiik, 26 Devid lawng Pathen im khuila kuun phaat tih Pathen tengah a nawn u takawi te a caak. Khawsoeih bawi Abiatha dung vengah te tila a sai. Mami kah Phungawl angla kawinih Khawsoeih hue bueng lawng ni te takawi te a caak. Tede Devid lawng a caak tih a puei thli Pateng khaw a peek” a tina. 27 Tecoengah Jesuh lawng awlcuina ah, “Thlaanghing theenna hamla ni Sabbath he a sai; Sabbath hamla thlaanghing he sai nawh. 28 Tedawngah Thlaanghing Capa he Sabbath Bawi la khaw awm” a tina.
1 Tecoengah Jesuh tah sinakok bok-im la te cet koep. Te ah te kut kheem thlaang pakhat awm. 2 Jesuh kah sai thawlhna dawngah thawlh peel ham aka ngaih thlaang khatsut te ah te awm u; tedawngah Sabbath khawhin ah Jesuh lawng thlaang a hoeih sak ai aw, hoeih sak nawh ai aw ti u tih ahimi lawng ayoeirepla huh ham a doen u. 3 Jesuh lawng te kah kut kheem thlaang te, “Hai benla law lah,” a tina. 4 Tecoengah thlaangping te, “Mami kah Phungawl lawng Sabbath hin ah n'tu sai sak ham a ngaih? Thlaang bawmcem ham aw, tihnawhtah patang khang sak ham aw?” tila a doet. Tede ahimi lawng awl kam at khaw thui u nawh. 5 Jesuh te a thin sa, a teng avai ah te maang tih ahimi te a bueh, ahimi a thin len tih a thawlh u te a huh vengah khatvaang atah a kaw khaw the. Tecoengah kut kheem thlaang nala te, “Na kut te yueng lah” a tina. A kut te a yueng tih theen koep. 6 Tecoengah Farasi hue tah Sinakok bok-im kalawng cet u tih Herod kah a thlaang thli oen huh u pahoei tih ahimi lawng Jesuh te ngawn ham khawkhanna a khueh u. 7 Jesuh oen a hubang hue tah Galili Tuilii la cet u. Thlaangping broe lawngah a hu ah bung a vai u. Te kah thlaangping te tah Galili peng, Judia peng, 8 Jerusalem khawpui, Idumia peng, Jordan tuiva khawcuuk ben ramri kah Taiar oen Sidon khawpui teng kalawng aka law thlaang thli ni. Jesuh kah thaihu sai te a yaak u tih ahimi boeih lawng a tengla te law u. 9 Thlaang a yahawh aih dawngah thlaangping lawng a tiil hau nawh ham lowng pakhat te amah hamla roekbah oepsoeh ham a hubang hue te a thui pe. 10 Thlaangtlo yahawh hlang te a hoeih sak dawngah thlaangtlo boeih lawng Jesuh te tek hamla tulh u the. 11 Raaithe aka khueh thlaang boeih lawng ahih te a huh u vengah a haiah buekuep u tih thuen ruila, “Nang tah Pathen Capa ni.” tila paang u. 12 Jesuh lawng amah te me ang thlaang tite a-u tengah khaw thui nawh ham raaithe thli te awl a peek. 13 Tecoengah Jesuh tah tlaangsawm la luui hang tih amah kah a ngaih thlaang thli te a khue. Ahimi lawng ahih tengla law u, 14 thlaang thlaihih a tuek tih ahimi te, “Celtuih” tila miing a sak. “Ka tengah awm ham kan tuek u, phung aka thui la kan tuih u vetih, 15 Nangmi lawng raaithe hek thaina aana khaw na khueh u ai,” a tina. 16 Celtuih thlaihih a tuek hue te tah, Simon (Piter a ti u te), 17 Zebedi ca rawi Jeem oen a manau Johan (Jesuh lawng he rawi he Boanerzi tila miing a sak, a thuingaihna tah khawhumm ca rawi tina ni). 18 Andru, Filip, Bartalomiu, Matthai, Tawmas, Alfias capa Jeem, Taddias, Phunkuup Simon oen 19 Jesuh sawah paipi thleepkung Judas Iskariot, he hue ni. 20 Tecoengah Jesuh te im la meel. Thlaangping lawng tun u koep tih Jesuh oen a hubang hue tah buh caak ham atue Pateng awm nawh. 21 Te kawng te a cakaw hue lawng a yaak u tih ahih te khuutcem ham cet u. Metihtiah thlaang thli lawng “Jesuh tah ngau poen” tila a thui u dawngah ni. 22 Jerusalem kalawng aka law Phung-awl cangpueikung khatsut lawng, “A kaw khuiah Beelzebul awm! te tah raaithe hek thaina huham aka pe rai bawi ni” tila a thui u. 23 Tedawngah Jesuh lawng ahimi te amah tengah a khue tih thuidoetna awl oen a thui pe: “Metila Seitan lawng Seitan te a hek thai ai? 24 Ram pakhat ah amah oen amah athloekla pek u tih pakhat oen pakhat kaap u the kawinih te kah imkhuikaw tah pai thai manawh. 25 Imkhuikaw pakhat ah amah oen amah athloekla pek u tih pakhat oen pakhat raal u the kawinih te kah imkhuikaw tah pai thai manawh. 26 Tetih van angla Seitan kah ram khaw athloekla pek u kawinih aboet toe caak manawh, thek yak u vetih boet poen ai. 27 Thlaang a tha aka ra te a piin lamha nawh atah a-u lawngkhaw a im te muk tih a kaawn-ava te lawh pe thai manawh; amah te a piin coengah ni a kaawn-ava te a lawh pe thai ai. 28 Ataktang kavan thui u, thlaang he a thawlhna boeih oen awlthe awlkha a thui boeih te khawdawp a ngaai pe thai ai. 29 Tede a-u khaw Ciim Muithla te thekhana awlthe aka thui tah mevengah khaw khawdawp ngaai pe thai manawh, metihtiah dungyan thawlhna te a sai poen.” a tina. 30 (Thlaang khatsut lawng, “Raaithe te Jesuh kaw khuiah kuun” a ti u dawngah Jesuh lawng he tila a thui pe ni.) 31 Tevengah Jesuh kah a manu oen a manau thli avan pha u. Im adauben ah pai u tih im khuila thlaang a tuih tih ahih te a khue sak. 32 Thlaangping lawng Jesuh te a veel u tih ngawl u. Ahimi lawng, “Bueh lah, na manu oen na manau thli oen ah na ngannu thli lawng nang n'tlap u tih adauben ah awm.” a tina u. 33 Jesuh lawng, “A-u nuem ka manu? Ka manau hue te a-u nuem?” a tina. 34 A tengah amah aka veel tih aka ngawl thlaangping te a bueh tih, “Bueh lah! He ah he ka manu oen ka manau thli tah awm! 35 A-u khaw Pathen lawng sai sak ham a ngaih te aka sai boeih tah ka manau, ka ngannu oen a nu ni.” tila a thui pe.
1 Jesuh lawng Galili Tuilii keeng ah te cang puei koep ham a tong. A tengah aka tun thlaangping te ayahawh aih dawngah lowng khuila kuun tih te ah te ngawl. Lowng te tuiluung ah awm tih thlaangping tah tuiliikeeng tui tengah pai u. 2 Ahimi te thaihu yahawh hlang cang puei ham thuidoetna te a hawna tih ahimi nala te; 3 “Hutung u lah! Voei khat ah lo khuehkung thlaang pakhat tah caangti tuh hamla cet. 4 Ahih lawng lo khuiah caangti te a tuh vengah khatsut tah lawngpui ah tla, va thli law tih kang a ruh boeih. 5 Caangti khatsut tah Lungrawng sawkah dilai a pamna ah tla, dilai a pam dawngah kawlkalh ah caangti te po. 6 Tede khaw a ling hang atah caangkung te khawling lawng a kaang, a yung a phooeng dawngah kawlkalh ah yai tih reu. 7 Caangti khatsut tah thliing tim ah tla, thliingkung te roeng hang, caangkung te a diik khoep tih a vui athaih awm nawh. 8 Tede caangti khatsut tah laitheen dawngah tla tih po, roeng hang tih a vui athaih thawn. Khatsut tah a pueh sawmthum, atloe hue te tah sawmruk, yakhat toela puung. 9 Jesuh lawng awlcuina ah, “Hutung uh, yaakna haa aka khueh lawngtah ya seh” a tina. 10 Jesuh te amah bueng a awm vengah a awlthui aka ya thlaang khatsut lawng a hubang thlaihih hue oen a tengla haih law u tih thuidoetna awl te thuicaih pe ham a ceel u. 11 Jesuh lawng, “Pathen Ram kah awlhuep tah nangmi tengah m'peek poen. Tede adauben ah aka awm thlaangtloe lawngtah thuidoetna awl bueng oen ni thaihu he a yaak u, 12 tedawngah, ‘Ahimi lawngah a bueh khing u de hu u nawh; Ahimi lawngah a hutung khiing u de yaakming u nawh. Metihtiah ahimi lawng hu tih yaakming u kawinih Pathen tengla meel u vetih khawdawp a ngaai pe ai.” tila a thui angla awm ai” a tina. 13 Tecoengah Jesuh lawng ahimi nala te, “He kah thuidoetna awl he na yaakming u nawh aw? Te tih atah metila atloe thuidoetna thli te na yaakming u thai ai? 14 Caangti tuhkung lawng Pathen awl te a tuh, 15 Thlaang khatsut tah lawngpui ah aka tla caangti oen lo u; Ahimi lawng awl a yaak pek vengah te Seitan lawng law tih a kaw khuiah a tuh awl te a rot pe. 16 Atloe thlaang thli tah dilai a pamna lungrawng sawah aka tla caangti oen lo u. Pathen awl te a yaak u vengah awmngaih la pahoei a do u. 17 Tede ahimi kah thinkaw lungbui ah a thlengyung a thlaak nawh dawngah asan hlang awm nawh. Tedawngah Pathen awl kawng dawngah thekha raina oen heemtekna soeprep a law vengah ahimi lawng kawlkalh ah a hoett pahoei u. 18 Atloe thlaang thli tah thliing tim ah aka tla caangti oen lo u. He thli lawng Pathen awl te a yaak u, 19 tede he dilai khawsakna dawngah lakuengna, bawireng ham ngaihna soeprep lawng kuun tih Pathen awl te a tleng khoep dawngah ahimi tah a vui athaih awm nawh. 20 Tede atloe thlaang thli tah lai theen dawngah a tuh caangti oen lo u. Ahimi lawng Pathen awl te a yaak u vengah a do u tih a vui athaih thawn. Khatsut tah a pueh sawmthum, khatsut tah a pueh sawmruk, khatsut tah a pueh yakhat toela thawn.” a tina. 21 Jesuh lawngah, “A-u lawngkhaw haiim te a khuen tih beeldung oen a muek khoep aw? Tih nawh atah ihkhun huiah khaw a khueh u aw? 22 Ahuep ahel ah a thuh boeih te a tuengna huen ah pho boeih vetih muek dah la aka awm boeih te khaw a daih boeih ai. 23 Tedawngah yaakna haa na khueh u atah ya uh” a tina. 24 Tecoengah Jesuh lawng ahimi nala, “Na yaak u te anepla poek uh! Thlaangtloe awlcekna ham na hawna a taring van te nang awlcekna ham Pathen lawng a hawna van ai, te lak ah anauh ngaai la a hawna tare ai. 25 A-u khaw aka khueh moek te a tawm athap pe vetih aka khueh nawh te a khueh duen Pateng khaw a lawh pe ai.” a tina. 26 Tecoengah Jesuh lawng, “Pathen Ram tah he oen lo u. Thlaang pakhat lawng a lo khuiah caangti a heh. 27 Khaw a yiin atah ip, mincang ah tho tih hingthun ah bii a bi, tevengah caangti tah po tih roeng hang. Tede caangti te metila a po hang tih a roeng hang tite ming nawh. 28 Dilai lawng akung te a roeng sak tih a thaih sak. Lamhacuek-la a raaidueng thoeng, tecoengah caangvui te thoeng tih hukhueng ah caangvui dawngah a cang te a awm sak. 29 Caang te hiin tih caang ah tue apha vengah thlaang lawng vin oen caang te a ah,” tila a thui pe. 30 Jesuh lawng, “Pathen Ram he n'tu oen a lawh u tila n'thui lah ai? Thuicaihna ham me ang thuidoetna n'hawna u lah ai? 31 Te tah he oen lo u. Thlaang pakhat lawng dilai dawngkah amu-ati boeih lak ah aka yiit koek antammu thaam at te a lawh tih a tue. 32 Tecoengah po tih a roeng hang atah tawitlim anno thing boeih lak ah aka bo koek la awm. A beek thli te abo hlang la cawn, va thli law u tih a khuup ah bu a tuk u,” a tina. 33 Jesuh lawng ahimi kah yaakming thai khoek ah he ang thuidoetna atloe khaw a hawna tih Pathen awl a thui pe. 34 Ahih lawng thuidoetna hawna muehla ahimi tengah awl thui pe nawh, tede Jesuh he a hubang hue oen amami bueng a awm u vengah soeprep thaihu boeih te a thuicaih pe. 35 Te khawhin thlemben ah Jesuh lawng a hubang hue nala, “Tuilii khatben rall la cet u sih,” a tina. 36 Tedawngah ahimi lawng thlaangping te a ceh taak u tih Jesuh a ngawlhna lowng khuila a hubang hue te kuun u tih Jesuh te a ceh puei u. Lowng atloe thli khaw teah te awm. 37 Poek mueh maila, thlipui tho khuengdeng tih tuiphu te lowng khuila a kuun dawngah lowng khuiah tui be tawm. 38 Jesuh tah lowng a mai ben ah te awm tih luudoelh dawngah te muelh ip. A hubang hue lawng a thawh u tih, “Saya, mami n'duek boeih poen ai he, n'tu la na sak nawh aw?” a tina u. 39 Jesuh lawng tho hang tih thlipui te awl a peek, “Thli tlaih boel, duem loeih!” a tina. Tevengah thlipui lawngkhaw duem tih dipsiditla awm. 40 Tecoengah Jesuh lawng a hubang hue nala te, “N'tu ah he tila na rih u aih? Tahe toe oengna na khueh u nawh hun aw?” a tina. 41 Tevengah ahimi lawng caalla a rih u tih, “He thlaang he a-u kai? Thlipui oen tuilet lawng Pateng awl a ngaai pe mai!” tila khat oen khat ti u.
1 Jesuh oen a hubang hue tah Galili tuilii khatben rall ah aka awm Kerasa peng te a pha u. 2 Jesuh te lowng dawng kalawng a suntlaak khoeng vengah te kah phuel lungkaw khuikah thlaang pakhat lawngah Jesuh te avan pan. Te thlaang te tah a kaw ah raaithe kuun tih, phuel ah aka awm roe ni. 3 A-u lawngkhaw thiirui oen khit u thai tlaih nawh. 4 A kut a khow ah a khih taitu u poen de a piin u vengah thiirui te khaw a bot tih a thlam. Ahih tah a tha ra soeh tih a-u lawngkhaw taa thai nawh. 5 Yiin daai phuel oen tlaangsawm yun ah yingyo, paang tih amah oen amah te lungto hatt oen phom u tih aat u. 6 Ahih lawng Jesuh te a huh vengah te ahih tah athlala awm; tedawngah heeng tih Jesuh haiah khuklu oen a cuengkueng pe, 7 angaihhlangla paang tih, “Sawsang Koek Pathen Capa Jesuh, kai he metila sai ham na ngaih? Pathen rang oen reenna kavan bih, dan n'tat mai boel!” a tina. 8 Jesuh lawng, “Nang Raaithe, he thlaang kah a kaw khui kalawng co loeih!” a tina dawngah ni he tila a paang. 9 Tedawngah Jesuh lawng, “A-u na miingna?” tila a doet. Te kah thlaang lawngah, “Kaimi tah ka piing aih u dawngah, ‘Mob’ ka miingna” tila a thui. 10 Te kah ram kalawng te tila raaithe thli te hek nawh hamla Jesuh tengah a bih mangkhak. 11 Te kalawng ayoeiina tlaangthleep ah awk hui at a vuelh u te awm. 12 Raaithe thli lawng Jesuh tengah, “Kaimi he awk thli tengla n'ceh sak langtah te thli kah a kaw khuila n'kuun sak u lah!” tila a bih u. 13 Jesuh lawng ahimi te a ceh sak, raaithe thli tah te kah thlaang kaw khui kalawng co u tih awk kaw khuila kuun u. Te kah awk thli te apum boeih la thong hih yun awm. Awk thli te cehthleeng ah plit u tih tuilii ah buekk dingkang. 14 Awk aka vuelh hue lawng heng u tih khawpui oen lo yun ah te kah awlthang te a thui soeh u. Thlaangping lawng te tila aka awm te huh hamla cet u. 15 Jesuh teng a pha u vengah Mob raaithe thli aka khueh thlaang lawngah himbai a bai tih lungcuih la teah a ngawlh te a huh u tih ahimi boeih lawng a rih u. 16 Te kah thaihu aka hu boeih lawngah raaithe lawng a tuuk thlaang tengah aka thoeng thaihu oen awk thli kawng te thlaang thli tengah a thui pe u. 17 Tedawngah ahimi ram te Jesuh lawng a ceh taak na ham Jesuh tengah reenna a bih u. 18 Jesuh te lowng khuila a kuun vengah te raaithe aka khueh thlaang lawngah, “Na hu ah ka bang van ai” a tina. 19 Tede, Jesuh lawng bang sak nawh. “Im la cet koep langtah na cakaw thli tengah Bawipa lawng nang ham metila thaihu avan sai tih metila reenna avan khueh tite thui peh,” a tina. 20 Tedawngah te thlaang lawng cet tih Khawpui Paha a ti u te a hiil tih Jesuh lawng a sai pe thaihu te a thui. Tedawngah aka ya thlaang boeih tah a kawpoek rai u. 21 Jesuh te tuilii khatben rall la koep cet. Tuilii keeng ah thlaangping te tun u tih ahih te a veel khoep u. 22 Sinakok bok-im kah bawi pakhat Jairu te law tih Jesuh te a huh vengah a khow kungah khuklu oen cuengkueng tih, 23 lunghoeih la reenna a bih, “Ka canu tlo tih nauh tangkiik. Reenna oen law langtah a sawah na kut tloeng pe lah, te atah hoeih vetih a sa ding ai,” a tina. 24 Jesuh te ahih oen haih cet. Thlaang ping lawng Jesuh te a hu ah a vai u tih khatben khat bang kalawng Jesuh te a nen u. 25 Te ah te kum thlaihih khui thisuntlaak tlawhna a ka tlo hutaa pakhat awm. 26 Siibawi yahawh hlang lawng a tuui ahai tih a khueh tangka boeih khaw a khok poen de hoeikhang nawh tih nauh tare. 27 Ahih lawng Jesuh kawng te a yaak van, tedawngah ahih lawng thlaangping tim ah Jesuh kah a hu benla te law tih, 28 “A himbai mah ka tek mai kawinih ka hoeih ngai suide,” tila a poek. 29 Ahih lawng Jesuh kah himbai te a tek, tevengah thisuntlaak te khap dip pahoei tih a tlawhna hoeih poen tila a kaw khuiah a ming. 30 Jesuh lawng a pum dawngkah huham tharana thoeng tite a ming pahoei vengah thlaangping tengla te maang dak tih, “A-u lawng ka himbai a tek?” tila ahimi te a doet. 31 A hubang hue lawng, “Thlaangping lawng nang n'nen u te na huh lal maiah n'tu ah ‘A-u lawng n'tek na ti?” a tina u. 32 Tede Jesuh lawngtah a himbai a-u lawng a tek tite ming hamla a teng-avai te a bueh. 33 Te hutaa lawng ahih sawah thaihu aka thoeng te a ming, tedawngah rih oen thuen ruila law tih Jesuh khow kungah khuklu oen cuengkueng tih asoengla boeih a thui pe. 34 Jesuh lawng, “Ka canu, na oengna lawng n'hoeih sak poen. Ngaimawng la cet loeih, na tlawhna hoeih loeih seh.” a tina. 35 Jesuh lawng te tila awl a thui lii vengah te, Jairu im kalawng puencawn thli law u tih Jairu nala te, “Na canu duek poen. N'tu ah saya he kawhuet cakbat la na khueh khiing?” a tina u. 36 Jesuh lawng ahimi kah awl thui te n'tu la khaw sak nawh, Jairu nala te, “Lakueng boel, oeng mah oeng mai lah” a tina. 37 Tecoeng atah Piter, Jeem oen a manau Johan te a ceh puei tih thlaangtloe tah a-u khaw ceh puei nawh. 38 Jairu im te a pha u atah curumngang la awm u tih lungphit laithai oen aka rungrap thli te Jesuh lawng a huh. 39 Im khuila Jesuh te kuun tih ahimi nala te, “N'tu ah curumngang la na awm u? N'tu ah na rung na rah u? Camaw he a duek moenih, aka ip mai ni!” a tina. 40 Ahimi lawng Jesuh te a nuihna u. Te kah aka awm thlaang thli te adauben la a ceh sak u. Camaw kah a manu oen ana pa oen ah a hubang hue pathum te a ceh puei tih camaw a helhna akhann khuila te kuun u. 41 Camaw te a kut ah a phoeih tih, “Talitha, koum” a tina. A thuingaihna tah, “Hutaaca tho lah! kan tina.” tina ni. 42 Hutaaca te tho pahoei tih yingyawi. (Te kah hutaaca tah kumha thlaihih law). Te kah aka awm boeih te a kawpoek rai u tangkiik. 43 Tede a-u tengah khaw thui nawh ham ahimi te Jesuh lawng awl ceet ceet a uen tih, “Caak awkk pe uh,” a tina.
1 Jesuh lawng te huen te a ceh taak tih amah khaaw la te meel koep. A hubang hue lawng a hu ah a vai u. 2 Sabbath khawhin ah sinakok bok-im ah te cang puei ham a tong. Te ah te thlaang yahawh hlang awm tih ahih kah awlthui aka ya boeih tah a kawpoek rai u tangkiik. “He ang thli boeih he ame kah a dang kai? Ahih lawng a dang cuihna he me ang cuihna kai? metila kawpoek-raina he a sai kai? 3 Ahih he Meri capa, Jeem, Josep, Judas oen Simon kah a maya lettama te nawh aw? A ngannu thli khaw he ah aka awm u te nawh aw?” ti u. Tedawngah ahimi lawng Jesuh te hinyah u nawh tih n'tu la sak u nawh. 4 Jesuh lawng ahimi nala, “Tawngha he amah awmna khawpui oen amah kah huiakaw oen ah amah imkhuikaw thui muehla huen tloe boeih atah a hinyah u” a tina. 5 Te ah te thlaangtlo ayawl sawah kut a tloeng tih a hoeih sak, te bueng nawh atah atloe kawpoek raina n'tu khaw sai nawh. 6 Thlaangping lawngah Oengna a khueh u nawh dawngah Jesuh tah a kawpoek rai sut. Tecoeng atah Jesuh lawng te kah vangca vangnau te a hiil tih thlaang thli te a cang puei. 7 A hubang thlaihih te a khue tun tih pahih, pahih ah a bok u sak tih a tuih u. Ahimi te raaithe hek thaina aana te a peek, 8 “Yin cehna ah cawnghol bueng nawh tah atloe n'tu khaw khuen u boel; caak awkk khaw, sawngsa khaw, na angki thlep ah khaw keel u boel. 9 Khowmuek tah muek uh, tede angki a hoei khuen u boel.” a tina. 10 Tecoengah ahimi nala te, “Nang aka pah sak im ah te khaaw tloe la na ceh thlantoe te ah te awm uh. 11 Na phana khaaw pakhat ah pahna im m'pe u nawh tih na awlthui khaw a hutung u nawh atah na khow dawngkah laidiik te khoek pe uh. Te tah ahimi hamla ngaithuen peekna la awm ai,” a tina. 12 Tedawngah ahimi lawng cet u tih thlaang boeih lawng a thawlhna kalawng a meel koepna ham phung a thui pe u. 13 Raaithe thli te a hek u, thlaangtlo thli te Olif situi a koelh u tih boeih a hoeih sak u. 14 Jesuh kawng awlthang te ram pum ah thaang khok tih Herod sengpahrang lawngkhaw te kawng te boeih a yaak. Thlaang khatsut lawngah, “Baptisma pekung Johan ni aka hing koep! Tedawngah he tila kawpoek rai saithaina he a khueh,” ti u. 15 Thlaangtloe hue lawngtah, “Elijah ni,” ti u. Thlaang vang lawngtah yan veng kah tawngha thli angla tawngha pakhat van ni,” ti u. 16 Te awl te Herod lawng a yaak vengah, “Ahih te baptisma pekung Johan ni! A luu ka tloek pe poen de hing koep!” tila a thui. 17 Herod amah roe lawngah tuuk sak tih thiirui oen khih coengah thongim ah thlaak ham awl a peek. He tila a sai he tah Herod lawng a manau Filip yu Herodias te a rot pe dawngah ni. 18 Baptisma pekung Johan lawng Herod nala, “Na manau yu na rot pe he soeng nawh,” a tina. 19 Tedawngah Herodias lawng Johan te a huhhuett tih ngawn ham a ngaih. Tede Herod lawng a oelh ataih tih ngawn thai nawh. 20 Herod lawngtah Johan te thlaangdoeng oen thlaang ciim ni tila a ming dawngah a rih tih ading apuek cala a khueh. Herod lawng ahih kah awlthui te hutung ham a ngaih. Tede a awlthui te a yaak veng roekk ah awmngaih thai nawh. 21 Hukhueng atah Herod a cuunna khawhin ah atue theen te Herodias lawng a dang. Herod lawng amah a awmna khawhin ah ukkung bawi thli, raalbawi thli oen Galili ram kah hinyah koei ahaamca thli hamla poei a sai pe. 22 Herodias canu lawng kuun tih laam, Herod oen a ceel bawi thli oen kamyin thli tah a kaw hoe u tangkiik. Tedawngah sengpahrang lawng hutaaca nala, “N'tu na ngaih? Na ngaih boeih te kan pe ai,” a tina. 23 “Navan bih boeih te kan pe ai, ka ram he keekvaang Pateng kan pe ai,” tila awl a kam. 24 Tedawngah hutaaca lawng cet tih a manu nala te, “N'tu ka bih ai?” tila a doet. A manu lawng, ‘Baptisma pekung Johan luu te bih.” a tina. 25 Hutaaca lawng sengpahrang tengla te aloela meel koep phai tih, “Baptisma pekung Johan luu te tahe roe ah beelphai dawngah nan peek ham ka ngaih.” a tina. 26 Sengpahrang te a kaw caalla the, tede a kamyin thli haiah awl a kam poen dawngah hutaaca lawng a bih te oelh tlaih nawh. 27 Tedawngah raltoeng aka pai raalkap pakhat te a tuih pahoei tih Johan kah luu te tloek tih avan khuen hamla awl a peek. 28 Tecoengah beel phai dawngah Johan luu te avan khuen tih hutaaca te a peek, hutaaca lawng a manu te a peek patoeng van. 29 Johan kah a hubang thli lawng he kawng he a yaak u vengah law u, a rawkk te a lawh u tih phuel ah a up u. 30 Celtuih hue te koep va meel u tih Jesuh oen huh u, ahimi lawng a saina oen a cangpueina boeih te a thui pe u. 31 Te ah te aka cet oen aka law thlaang ayahawh aih dawngah Jesuh oen a hubang hue te buh caak ham atue Pateng khaw khueh u nawh. Tedawngah ahimi nala te, “Ading asuekna huen la cet u silang tah mami bueng awm u lah sih, te ah te kawlkalh khaw na duem u thai ai,” a tina. 32 Tedawngah ading asuekna huen la amami bueng lowng oen cet u. 33 Ahimi a ceh u te thlaangping lawng a huh u tih Jesuh oen a hubang hue ni tila a ming u, tedawngah khawpui boeih kah thlaang cet u tih lanloeih kalawng anna khall u, Jesuh oen a hubang hue a phana koei a huen te ahimi haiah anna pha doen u. 34 Lowng khui kalawng Jesuh a suntlaak vengah thlaangping te a huh, ahimi te doenkung aka awm nawh tuu angla a awm u te a huh vengah a reen tangkiik. Tedawngah thaihu yahawh hlang a cang puei. 35 Khaw athlem veng atah a hubang hue a tengla law u tih, “Khaw thlem poen, he huen he thlaang a awmna ahuen nawh ni. 36 Thlaangping he tuih langtah he kah a teng-avai lo yun ah khaw, vang khuiah khaw amami ham caak awkk lai u seh,” a tina u. 37 Jesuh lawng, “Nangmi lawngah ahimi te caak awkk pe uh,” a tina. A hubang hue lawngah, “Tangka yahnih phu caak koei ka lai u silang tah ahimi he ka kok u ai aw?” tila a doet u. 38 Tedawngah Jesuh lawng ahimi nala te, “Takawi meyoeh na khueh u? Cet langtah bueh u lah” a tina. Ahimi lawng cet tih a huh u tah, “Takawi cuun ngaa oen nga phih awm,” a tina u. 39 Tecoengah Jesuh lawng a hubang hue nala, thlaangping te athloep athloepla pompih saihiim dawngah ngawlh sak ham a thui pe. 40 Tedawngah thlaangping hue te yakhat ah thloep at, sawmngaa ah thloep at athaanla khok ngawl u. 41 Tecoengah Jesuh lawng takawi cuun ngaa oen nga pahih te a lawh, vaan la maang hang tih Pathen tengah awmngaih awl a thui. Takawi te a eh tih thlaangping te rek ra ham a hubang hue tengah a peek. Nga lunghih te khaw ahimi tengah a ree pe. 42 Thlaang boeih lawng ahahcala a caak u. 43 Tecoengah takawi oen nga a caak coeih te a hubang hue lawng vawhphueih paha thlaihih dawngah abetoetla a cawi u. 44 Takawi aka ca te tawngpataang mah thlaang thong ngaa law u. 45 Jesuh lawng thlaangping te a ceh sak veng te ah a hubang hue te lowng khuila a kuun sak pahoei tih tuilii khatben rall kah Betsaida khaaw la te lamhala a tuih. 46 Thlaangping te sadingla meel uh a tina coengah amah tah thangthui hamla tlaang la cet. 47 Khaw athlem vengah a hubang hue kah lowng te tuiluung ah te awm, tevengah Jesuh tah amah bueng lan ah awm hun. 48 Yilh lawng a maam khak tih lowng te a hubang hue lawng a kaih tloel u te Jesuh lawng a huh. Tedawngah mincang khawnoek pathum oen paruk laklaw yun atah ahimi tengla te tui sawah cet tih ahimi te a khall tawm, 49 tevengah tui sawah Jesuh a law te ahimi lawng a huh u. Ahimi lawngtah, “Muithla ni tila a poek u dawngah lakueng u tih paang u. 50 Ahimi boeih lawng ahih te a huh u vengah a rih u. Jesuh lawng ahimi te a voem pahoei tih, “Lakueng u boel! Kai ni, rih u boel.” a tina. 51 Tecoengah ahimi tengah lowng khuila kuun, teveng dengah yilh law te dip. A hubang hue tah a kawpoek la rai u tangkiik, 52 thlaang thong ngaa Jesuh lawng buh a kok te a thuingaihna tangtang te yaakming u nawh, a kawpoek lawngkhaw pha u thai nawh. 53 Tuilii khatben rall la te cet u tih Gennesaret khaaw te a pha u tih te ah te lowng te a kiing u. 54 Lowng dawng kalawng a suntlaak u vengah thlaangping lawng Jesuh te a noek u. 55 Tedawngah te kah ram pum ah aloela cet u tih thlaangtlo thli te paa dawngah a kawh u tih Jesuh a awmna ah avan law puei u. 56 Tecoengah Jesuh a cehna ahuen roekk ah vangca oen vangpui kah khaw, lo yun kah khaw, dawr yun kah khaw thlaangtlo thli te avan law puei u tih a himbai mah tek sak hamla reenna a bih u, aka tek boeih tah hoeih u.
1 Jerusalem kalawng aka law Farasi khatsut oen Phungawl cangpueikung khatsut te Jesuh tengah tun u. 2 A hubang khatsut lawng kut muen la buh a caak u te ahimi lawng a huh u; a thuingaihna tah Farasi thlaang thli lawng amami siing ah kut silh ham awm a ti angla te a kut sil u nawh tina ni. 3 Farasi boeih oen Judah thlaang boeih lawng patuer hue kah cangpueina te a vai u; amami kah siing angla kut a silh u nawh atah buh ca u nawh; 4 dawr kah a lai thaihu khaw a silh lamha nawh atah ca u nawh. Te tila te patuer hue kah cangpueina siing atloe tloe, boengloeng, um-am oen ruhum beel oen ah ihkhun silhna boeih khaw a vai u. 5 Tedawngah Farasi thli oen Phungawl cangpueikung hue lawngah Jesuh nala te, “N'tu kawngah na hubang hue lawng patuer hue kah cang puei patoeng te a vai u nawh tih kutmuen la buh a caak u?” tila a doet. 6 Jesuh lawng ahimi nala te, “Nangmi kawng he Isaiah lawng a thui oepsoeh te soeng tangtang! Nangmi thlaang-thaipalat kawng he he tila a thut: Pathen lawngah, he kah thlaang thli lawng a awl hong oen kai n'hinyah u, tede ahimi kah thinkaw lungbui tah kai oen ah thla tangkiik. 7 Kai m'bok u he apoei mai ni, metihtiah ahimi lawng thlaanghing kah sai Coplap phung alam te Pathen kah phungawl angla a cang puei u!’ 8 Pathen kah awlpeek te nangmi lawng na hoett u tih thlaanghing kah cangpueina te na vai u.” a tina. 9 Tecoengah Jesuh lawng, “Namami kah cangpueina acak thaina ham Pathen kah Phungawl hoett ham tah na thoem u lauh! 10 Mosi kah awlpeek dawngah, “Na nu oen na pa te hinyah uh’ ti oen ah, ‘A-u khaw a manu oen ana pa te aka tapvoep boeih tah ngawn ham awm’ tila awm. 11 Tede nangmi lawngtah ‘Thlaang pakhat lawngah a manu oen ana pa bawmcemna ham hawna thai koei thaihu a khueh te Korban a ti atah 12 te thlaang te a manu khaw, ana pa khaw bawmcemna kalawng loeih poen, tila na cang puei u. 13 He tila nangmi lawng thlaangtloe te na cang puei patoeng dawngah Pathen awl te a hoett u. Tecoengah te ang thaihu tloe na sai u yahawh hlang awm hun,” a tina. 14 Tecoengah Jesuh lawng thlaangping te amah tengla a khue koep tih ahimi nala, “Nangmi boeih lawng ka awlthui he hutung u langtah yaakming u lah! 15 Thlaanghing he adauben kah aka kuun thuk thaihu lawngah bokna phung ah aciim acaih nawh la a sai moenih, akhuiben kah aka thoeng hang thaihu lawng ni thlaang he aciim acaih sak nawh dai. 16 (A-u khaw yaakna haa aka khueh lawngtah ya u seh),” a tina. 17 Jesuh lawng thlaangping te a ceh taak tih im khuila a kuun vengah a thui awl te thuicaih pe hamla a hubang hue lawng a ceel u. 18 Jesuh lawng ahimi nala te, “Thlaangtloe lak ah na cuih thloei u nawh den he! Na yaakming u roe nawh aw? Adauben kalawng akhuila aka kuun thuk thaihu lawng thlaanghing he ataktang la aciim acaih sak nawh moenih, 19 n'tu ah ti atah te thaihu te a thinkaw khuiah kuun nawh tih a bungpui khuila a kuun dawngah pum khui kalawng naatceh la thoeng,” a tina. (He tila Jesuh lawng a thui he me ang caak awkk khaw caak koei boeih tila a thuingaihna ni. 20 Jesuh lawng koep a thui pe tih, “Thlaanghing kaw khuikah aka thoeng hang thaihu lawng ni thlaang he aciim acaih sak nawh. 21 Thlaang kah thinkaw lungbui khui kalawng athe-arana aka sai sak athe poekna thaihu thli, huencaanna, thlaang ngawnna, 22 Cuk-halhna, apueh ngaihna, boethena, thailatna, asoeng nawh saina, uett-eena, thlaang thuitheetna, oekthloenna oen ngau-athuuna, 23 he ang athe thaihu boeih he thlaang kaw khui kalawng thoeng tih thlaang he ciimcaih sak nawh,” a tina. 24 Tecoengah Jesuh lawng te huen te a thawh taak tih Taiar ram la te cet. Im pakhat ah kuun tih teah ahih a awm te a-u khaw ming sak ham ngaih nawh, tede thuh u thai nawh. 25 A canu raaithe lawng a tuuk pe hutaa pakhat lawng Jesuh kawng te a yaak, a tengla law pahoei tih a khowkung ah a buekuep pe. 26 Ahih tah Gental nu la awm tih Siria ram Fonicia peng ah a cuun thlaang ni. A canu pum dawngkah raaithe te hek pe hamla Jesuh tengah a bih. 27 Tede Jesuh lawng, “Lamhala camaw thli te buh cah u sih. Camaw thli kah buh te lawh pe tih ui peek vik he soeng nawh,” a tina. 28 Ahih lawng, “Bawipa, tetih de mah ta! Camaw thli kah caakdik caboi huikah te ui lawngkhaw a caak van de ta!” a tina. 29 Tedawngah Jesuh lawng ahih nala te, “Te tila awl na thung dawngah im la meel loeih, na canu raaithe lawng a co taak te na huh ai,” a tina. 30 Ahih tah im la meel tih ihkhun dawngah a canu aka ral te a huh; raaithe lawng ahih te a co taak tangtang poen. 31 Tecoengah Jesuh lawng Taiar peng te a ceh taak, Dekapolis peng ah pat cet tih Sidon kalawng ah Galili Tuilii la te cet. 32 Thlaang khatsut lawng haapang awlmueh thlaang pakhat te a tengla avan law puei u tih ahih sawah kut tloeng pe ham Jesuh tengah reenna a bih u. 33 Tedawngah Jesuh lawng ahih bueng te thlaangping tim kalawng atloe la a ceh puei tih te thlaang kah a haa khui te a kutdawn oen a pueih pe, tumtui a tha tih a laai te khaw a koelh pe. 34 Tecoengah Jesuh te vaan la maang hang, adung hlang la hill a sang tih te thlaang nala te, “Effatha,” a tina. A thuingaihna tah, “Awng u loeih.” tina ni. 35 Kawlkalh ah te thlaang lawng awl a yaak thai, ahih kah awlthui kanghalhna te khaw ha-ata tih raina khat khaw awm muehla awl cal. 36 Tecoengah a-u tengah khaw thui nawh ham thlaangping te Jesuh lawng awl a uen; tede te thli tengah a khang pe tare vengah ahimi lawng a thui u tare ngaai. 37 Tecakhaw aka ya boeih tah a kawpoek rai u. Ahimi lawngah, “A sai thaihu soeprep boeih he theen tangkiik mah aw! Haapang khaw haa a khui sak tih awlmueh khaw awl a cal sak!” tila a thui u.
1 Tecoeng adiw thlan ah atloe thlaangping te khaw tun u. Thlaangping hue te caak ham a khueh u nawh dawngah Jesuh lawng a hubang hue te a khue tih, 2 “He kah thlaang thli he kai oen hin thum awm puet u poen tih tahe ah caak ham n'tu khaw khueh u tlaih nawh, he kah thlaangping hue he ka reen tangkiik aih poen. 3 Ahimi he buh cah ohla im la ka tuih u kawinih thlaang khatsut tah khaw thla kalawng a law u dawngah lawngpueng ah tawnba u hau ai,” a tina. 4 A hubang hue lawng, “He kah ramhum huhang ah thlaang he yoeh ham caak khoek a-u lawng a dang thai ai?” a tina u. 5 Jesuh lawng, “Takawi meyoeh na khueh u?” a tila. Ahimi lawng, “Takawi cuun rih tah awm,” a tina u. 6 Jesuh lawng thlaangping te dilai dawngah ngawlh ham awl a peek. Tecoengah takawi cuun rih te a lawh tih Pathen tengah awmngaih awl a thui coengah takawi te a eh tih thlaangping tengah rek ra pe hamla a hubang hue te a peek, a hubang hue lawng patoeng arek ara u. 7 Ahimi lawng nga a yawl a khueh u baal. Jesuh lawng Pathen tengah awmngaih awl a thui coengah nga te khaw a hubang hue te arek ara sak. 8 Thlaang boeih lawng a caak tih hah u. Aka ca boeih tah thlaang thong lii yun awm. 9 A caak coeih te vawh phueih pasarih dawngah abela a hubang hue lawng a cawi u. Jesuh lawng thlaangping te a ceh sak tih, 10 amah khaw a hubang hue oen lowng khuila kuun u pahoei tih Dalmanutha peng la te cet u. 11 Farasi thlaang khatsut Jesuh tengla law u tih Jesuh oen oelhtaih u. Ahimi lawng a thawlhna tuuk pe ham a ngaih u dawngah, “Pathen kah thlaang tuih la na awm tang aw, na awm nawh aw tite mingna hamla kawpoekrai-miknoek pakhat ah sai lah,” a tina u. 12 Tede Jesuh lawng adung hlang la a hill a sang tih, “N'tu ah tihin hang kah thlaang lawng he kawpoekrai-miknoek a kuek u kai aw? Ka sai manawh, atak tang kavan thui u! Te ang te tihin hang kah thlaang thli tengah ka sai manawh,” a tina. 13 Ahimi te a ceh taak tih lowng khuila te a kuun coengah tuilii khatben rall la te cet. 14 A hubang hue lawng takawi te amami ham khoek khuen hamla a hilh u tih lowng khuiah ahimi tengah takawi cuun at bueng a khueh u. 15 Jesuh lawng ahimi nala, “Farasi thlaang thli kah tawlru oen Herod kah tawlru dawngah ngaithuen uh,” a tina. 16 Ahimi lawng, “Mami lawngah takawi n'khueh u nawh dawngah ni ahih lawng he tila a thui,” ti u. 17 Ahimi lawng te tila a thui u te Jesuh lawng a ming tih ahimi nala te, “N'tu ah takawi khat khaw na khueh u nawh kawng te na thui khiing u? Na ming u nawh tih na yaakming u thlan hun aw? Na kaw hang sut u aw? 18 Mik na khueh u lal maiah na hu u nawh aw? Haa na khueh u lal maiah na ya u nawh aw? 19 Thlaang thong ngaa ham takawi cuun ngaa ka eh pe te na hilh u poen aw? Acoeih te vawhphueih meyoeh dawngah abela na cawi u te?” a tina. Ahimi lawng, “Vawh phueih paha thlaihih,” a tina u. 20 Tecoengah Jesuh lawng, “Thlaang thong lii ham takawi cuun rih ka eh pe vengah acoeih te vawhphueih meyoeh dawngah abecala na cawi u?” tila a doet. Ahimi lawngah, “Vawhphueih pasa-rih,” a tina u. 21 Jesuh lawng ahimi nala, “Tahe toe na yaakming u nawh hun aw?” a tina. 22 Ahimi tah Betsaida khaaw te a pha u, teah te thlaang khatsut lawng mikpum thlaang pakhat Jesuh tengla avan law puei u tih ahih te tek hamla Jesuh tengah reenna a bih u. 23 Jesuh lawng mikpum te a kut ah a mawt tih te khaaw kah adauben la a ceh puei. Te thlaang kah a mik te tumtui oen a phuh pe coengah ahih sawah Jesuh lawng a kut te a tloeng pe tih, “Thaihu khat mai khaw na huh thai aw?” tila a doet. 24 Te thlaang lawng maang hang tih, “Oeih, thlaang thli ka huh thai, tede ahimi tah thingkung thli aka cet angla awm,” a tina. 25 Jesuh lawng te thlaang kah a mik dawngah a kut te koep a tloeng. Tevengah ahih lawng a mik a daai heet tih a bueh vengah a tueng pe koep tih soeprep boeih te aciimphanla a huh. 26 Jesuh lawng ahih nala, “Vang khuila cet koep tlaih boel,” a tina tih im la a tuih. 27 Tecoengah Jesuh oen a hubang hue tah Sisaria Filipi tengvaai kah vangca vangnau la te cet u. Lawngpueng ah ahimi nala te, “thlaang thli lawng kai he a-u a ti u, van thui u lah?” tila a doet. 28 Ahimi lawngah, “Khatsut lawng nang he Baptisma pekung Johan ni ti u, atloe hue lawngtah nang he Elijah ni, ti u tih thlaang vang lawngtah nang he tawngha pakhat khat ni ti u,” tila a thui pe u. 29 Jesuh lawng ahimi nala te, “Nangmi ta, kai he a-u na ti u?” tila a doet. Piter lawngah, “Nang tah Messiah ni,” a tina. 30 Jesuh lawng ahimi nala te, “Kai kah kawng he a-u tengah khaw thui u boel.” tila te awl a uen. 31 Tecoengah Jesuh lawng a hubang hue te cang puei ham a tong: “Thlaang-hing Capa lawng patang a khang vetih ahaamca thli, khawsoeih ahaamca thli oen Phungawl cangpueikung thli lawngah a hoett u ai. Ahih te a ngawn u ai, tede hin thum coengah tho koep ai a tina. 32 Jesuh lawng he kawng he ahimi tengah acairaula a thui pe. Tedawngah Piter lawng ahih te atloe ngaai bet la a ceh puei tih a siim. 33 Tede Jesuh lawng maang dak tih a hubang hue te a bueh, Piter te a tlung tih, “Seitan, ka teng kalawng cet lah. Na poekna he Pathen benkah nawh ni, thlaanghing benkah poekna ni!” a tina. 34 Tecoengah Jesuh lawngah thlaangping oen a hubang hue te amah tengla a khue tih ahimi nala te, “A-u khaw ka hu ah bang hamla aka ngaih tah amah kaw ngaih te hoett selang amah kah thinglam te kawt selang tah ka hu ah bang seh. 35 A-u khaw a hingna thlawn ham aka ngaih tah a hingna te sung ai, tede a-u khaw awlthang theen oen kai kawng dawngah a hingna te a sung atah a hingna a thlawn ai. 36 Thlaang pakhat lawng dilai pum he amah koe la khueh mai cakhaw a hingna te a sung atah aphu awm aw? Aphu awm tlaih nawh! 37 A hingna te dang koep ham a peek thai n'tu khaw awm nawh. 38 Thlaang pakhat lawng tihin hang kah Pathen n'tu la aka sak nawh san the vengah he kai kah cangpueina oen kai aka yahna tah, Thlaanghing Capa lawngkhaw ana Pa kah ruep-awmna oen aciim vanthlaang thli oen a law thuk vengah a yah puei van ai.
1 Tecoengah Jesuh lawng awl a thui pe koep tih, “Ataktang kavan thui u, he kah aka awm thlaang khatsut hue he Pathen Ram huham tharana oen a law te a huh u thlantoe duek u manawh,” a tina. 2 Hinruk a awm coengah Jesuh lawng Piter, Jeem oen Johan mi te a ceh puei, tlaangsawm la a luui puei tih te ah te amami bueng awm u. Ahimi kah mik huh ah Jesuh kah a mueime te thawleng u, 3 a himbai te abawkla aang rawngtheng tih tetih aihla abawk ham tah dilai dawngkah a-u lawngkhaw suk thai manawh. 4 Tecoengah Elijah, Mosi oen Jesuh mi awl a thui u te a hubang hue lawng a huh. 5 Piter lawng Jesuh nala, “Saya, he ah mami ng'awm u he theen tangkiik! Riim-im pathum ah ka sa u silang tah pakhat te nang ham seh, pakhat te Mosi ham seh, akhat te tah Elijah ham seh,” a tina u. 6 Ahih oen atloe rawi lawngah a rih tangkiik u tih thui ham koei khaw ahih lawng ming sut nawh. 7 Tecoengah muui yaal tih ahimi te a thiing khoep. Muui dawng kalawng ah, “He tah ka thintlawhna Ka Capa ni, a awl hutung pe uh!” tila awl kam at va law. 8 Ahimi lawng a teng avai ah a bueh u de a-u khat khaw hu u nawh tih Jesuh bueng te ahimi tengah awm. 9 Tlaangsawm kalawng a rum thuk u vengah Jesuh lawng ahimi nala te, “Thlaanghing Capa he duekna kalawng a thawh koep thlantoe na huh u thaihu he a-u tengah khaw thui u boel,” tila awl a uen. 10 Ahimi lawng te awl uen te a vai u, tede amami oen amami mai te, “Duekna kalawng thawhkoepna ti he n'tu kai?” tila he kawng he a thui khiing u. 11 Tecoengah ahimi lawng Jesuh te, “N'tu ah Phungawl cangpueikung thli lawng ‘Elijah he lamhala law ai’ a ti u kai?” tila a doet u. 12 Jesuh lawng, “Soeprep boeih he roekbah oepsoeh hamla Elijah tah law tangtang ai. Te tih atah n'tu ah Caciim lawngah Thlaanghing Capa lawng patang a khang vetih ahih te a hoett u ai tila a thui kai? 13 Tede kavan thui u, Elijah tah law poen tih Caciim lawng ahih kawng te a thui angla thlaang thli lawng amami ngaih la a sawah a sai u poen,” a tina. 14 Ahimi lawng atloe a hubang hue tengah a pha vengah thlaangping lawng te thli te a veel khoep u tih Phungawl cangpueikung thli khatsut oen a hubang hue a oelh u te a huh. 15 Thlaangping lawng Jesuh te a huh u vengah a kawpoek rai tangkiik, a tengla cet u tih a voemtoei u. 16 Jesuh lawng a hubang hue te, “Nangmi he ahimi oen ah n'tu kawng na oelh u khiing te?” tila a doet. 17 Thlaangping tim kah thlaang pakhat lawng, “Saya, ka capa raaithe lawng a tuuk tih awl khaw a cal thai nawh dawngah nang tengla kavan law puei. 18 Raaithe lawng a tuuk vengah dilai dawngah tlim kut tih a kaa dawng kalawng a tilhawm thoeng, a naw te a tah tih a pum boeih keuhkhang la awm. Na hubang hue tengah raaithe hek hamla reenna ka bih de hek u thai nawh. 19 Jesuh lawng ahimi nala te, “Nangmi oengna aka khueh nawh thlaang hue! Nangmi he metuek toe kan awm puei ai? Nangmi he meyoeh toe nuem kan reen u lah ai? Camaw te ka tengla van law puei uh,” a tina. 20 Ahimi lawngah camaw te Jesuh tengla avan law puei u. Raaithe lawng Jesuh te a huh pahoei vengah camaw te rap rap a doek, dilai dawngah tlim tih savaih, a kaa dawngah tilhawm a peem. 21 Jesuh lawng, “Meveng kalawng he tila a awm?” tila ana pa te a doet. Ana pa lawng, “A camoe veng kalawng awm poen. 22 Raaithe lawng camaw he ngawn hamla a teeng tih hai dawngkhaw, tui khuiah khaw a tulh poepa. Na sai thai koeila a awm atah n'reen langtah m'bawm lah,” a tina. 23 Jesuh lawngah, “Na sai thai koei la a awm atah na ti aw!, Oeih! Oengna aka khueh thlaang ham tah soeprep boeih he coengg thai ta,” a tina. 24 Tevengah camaw kah ana pa lawng, “Oengna ka khueh ta, tede khoek nawh, m'bawm lah!” tila angaih hlang la paang. 25 Jesuh lawng thlaangping amah tengla voeh ava yoeii phai te a huh vengah raaithe nala, “Awlmueh oen haapang raaithe nang awl kan peek, Camaw kaw khui kalawng co langtah mevengah khaw kuun koep tlaih boel!” a tina. 26 Raaithe te angaihhlangla paang tih Camaw te langlang a thuen sak tih co. Camaw te duek rawkk angla awm tih thlaang boeih lawngah, “Duek poen” ti u. 27 Tede Jesuh lawng camaw te a kut ah a phoeih tih a thawh vengah ahih te pai hang. 28 Jesuh te im khuila a kuun coeng atah a hubang hue lawng ahuepla, “N'tu kawngah kaimi lawngtah raaithe ka hek thai u nawh kai?” tila a doet u. 29 Jesuh lawngah, “Thangthuina bueng oen ni he ang he hek thaina a awm, atloe hek thaina tah awm nawh!” a tina. 30 Jesuh oen a hubang hue tah te huen kalawng tho u tih Galili peng kalawng poe cet u. Jesuh lawng a hubang hue te a cang puei hun dawngah amah a awmna te a-u khaw ming sak hamla ngaih nawh, 31 A cangpueina tah, “Thlaanghing Capa he thlaang kut ah a peek u vetih a ngawn u ai. Tede hin thum coengah tho koep ai,” a tina. 32 Tede ahih kah cangpueina te a hubang hue lawng a thuingaihna yaakming u nawh. Ahih te doetdap ham khaw birih u. 33 Ahimi tah Kapernaum khaaw te a pha u tih im khuila a kuun u coengah Jesuh lawng a hubang hue te, “Lawngpueng ah n'tu kawng na oelh u khiing te?” tila a doet. 34 Tede ahimi lawng, mami tim ah a-u nuem bawilen koek tila lawngpueng ah a oelh u khiing dawngah ahih kah awl doet te thung pe u nawh. 35 Jesuh lawng ngawl tih a hubang paha thlaihih te a khue tih ahimi nala, “A-u khaw asangkoek la awm ham aka ngaih tah nangmi boeih lak ah aheem koek oen tuihyoeihthlaang la awm seh,” a tina. 36 Tecoengah camaw pakhat te a khue tih ahimi haiah a pai sak. Camaw te a lengawi tih ahimi nala te, 37 “A-u khaw he ang camaw thli he ka miing oen pakhat khaw aka do tah kai aka do ni; a-u khaw kai aka do tah kai bueng he n'do nawh tih kai tuihkung te khaw a do,” a tina. 38 Johan lawng, “Saya, Nang kah miing oen raaithe aka hek thlaang pakhat ka huh u tih mami tim kah thlaang nawh dawngah sai tlaih nawh ham ka khang pe u,” a tina. 39 Jesuh lawng ahimi nala te, “Khang pe u boel! ka miing oen kawpoekrai-miknoek aka sai thlaang lawngah kai he athela aka thui pahoei a-u khaw awm nawh. 40 A-u khaw mami aka oelhtaih nawh tah mami ben ah aka awm ni. 41 Atak tang kavan thui u: Kai kah thlaang la na awm u dawngah nangmi te tuiding boengloeng khui at khaw aka tuul tah kutdo a dang ngaikhoek ai,” a tina. 42 “A-u khaw he ang camaw thli timkah pakhat mai te khaw, kai a oengna te phelh sak ham aka suek tah caang neetna sum lungto te a rawn ah a awi tih tuiliidung ah sungpung kawinih ahih ham theen bet ai. 43 Tedawngah na kut lawng na oengna te a phelh sak atah tloek poet hawn! Na kut pahih oen aka duek tlaih nawh hell hai khuiah na tlaak lak atah na kut pakhat bueng oen hingna khuiah na kuun te theen ngai. 44 Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh. 45 Na khow lawng na oengna te a phelh sak atah na khaw te tloek poet hawn! Na khow pahih oen hell khuiah na tlaak lak atah na khow pakhat bueng oen hingna khuiah na kuun te theen ngaai. 46 Te huen atah ahimi aka ca ami te khaw duek tlaih nawh tih ahimi aka ung sak hai te khaw duek tlaih nawh. 47 Na mik lawng na oengna te a phelh sak atah na mik te koeih pak hawn! Mik pahih oen hell khuiah ne tlaak lak atah mik pakhat bueng oen Pathen Ram ah na kuun te theen ngaai. 48 Te huen atah ahimi aka ca ami khaw duek tlaih nawh tih ahimi aka ung sak hai khaw duek tlaih nawh. 49 Luciik sa boeih te lungkeh oen aciim sak boeih angla thlaang boeih he hai oen aciim sak van ai. 50 Lungkeh tah theen; tede a aalna te a moelh atah metila na aal sak koep thai ai? Nangmi lawng paya laikoeina lungkeh te khueh u langtah pakhat oen khat roeproeicala awm uh” a tina.
1 Tecoengah Jesuh lawng te huen te a thawh taak, Judia peng la cet tih Jordan tuiva ah te kat. Thlaangping te a tengah tun koep baal tih a cang puei nooek angla ahimi te a cang puei. 2 Farasi thlaang khatsut hue lawng a thawlhna tuuk pe ham a tengla law u tih, “Mami kah Phungawl lawngah thlaang pakhat lawng a yu te thlaak hamla lawngpui a awng pe aw? tila a doet u. 3 Jesuh lawng, “Mosi lawng me ang phungawl nangmi te m'peek u?” tila a doet. 4 Ahimi lawngah, “Mosi lawngtah, 'thlaang pakhat lawng a yu te pekna ca a peek atah a maa thai' ti,” tila a thui pe u. 5 Jesuh lawng ahimi nala te, “Nangmi he cang puei ham na rai u tangkiik dawngah nangmi ham he phungawl he Mosi lawng a thut. 6 Tede acuekca ah dilai a suen vengah te caciim lawng a thui angla Pathen lawng tawngpa oen hutaa a sai. 7 Tedawngah tawngpa lawng a manu oen ana pa te a ceh taak vetih a yu oen ah awm haih ai, 8 ahih rawi tah pakhat la coengg poen ai. Tedawngah ahih rawi tah pahih tlaih nawh tih pakhat poen ni. 9 Tedawngah Pathen lawng a mulbet poen te tah thlaanghing lawng pek boel seh,” a tina. 10 Im khuila a kuun koep u vengah he kawng he a hubang hue lawng Jesuh te a doet u. 11 Jesuh lawngah ahimi nala te, “A yu aka thlaak thlaang lawngah hutaa tloe te a yuna atah a yu sawah samphaih. 12 Tetih van angla a vaa aka maa hutaa lawngah tawngpa tloe te a vaana atah ahih khaw samphaih,” a tina. 13 Thlaang khatsut lawngah, camaw hue kah a luu dawngah Jesuh lawng a kut tloeng pe tih yotheen peek sak ham a tengla avan law puei u, tede a hubang hue lawng thlaangping te a ho u. 14 Tete Jesuh lawng a ming vengah a thinsa tih a hubang hue nala, “Camaw hue te ka tengla law u seh, ahimi te kanghalh u boel, metihtiah Pathen Ram tah he ang thlaang hue kah ni. 15 Ataktang kavan thui u, a-u khaw Pathen Ram he camaw angla aka do nawh tah te ah te kuun thai manawh” a tina. 16 Tecoengah camaw te a lawh tih a pawm, ahimi pakhat rip sawah a kut te a tloeng tih ahimi te yotheen kam-awmna te a peek. 17 Jesuh tah khawlawng la yin ceh ham a ceh khoeng vengah te thlaang pakhat a tengla law tih a haiah khuklu oen cuengkueng ruila, “Aka theen saya, dungyan hingna ka dangna ham n'tu ka sai ai,” tila a doet. 18 Jesuh lawng ahih te, “N'tu dawngah kai he saya theen nan tina? Pathen bueng nawh tah aka theen a-u khaw awm nawh. 19 Awlpeek boeih te na ming ta: “Thlaang ngawn boel; hutaa tawngpa thawlh boel; huen acaan boel; thlaang te thawlh peel boel; Thlaang thai-alatna boel, na nu oen na pa te hinyah, a ti teta” a tina. 20 Te thlaang lawng, “Saya, he awlpeek boeih he ka camaw veng kalawng ka vai boeih poen,” a tina. 21 Jesuh lawng ahih te a lungna tih a bueh rangpatang, “Thaihu khat bueng ni na voet. Cet langtah na khuehtoen boeih te yooei lang tangka te khawdeng harah thli van peh, te atah vaan ram ah ro thaihu na khueh ai, tecoengah law langtah ka hu ah va baang,” a tina. 22 Te thlaang lawng he awl he a yaak vengah a mik-haai muelh a khueh tih kawthe ruila te cet. Metihtiah ahih tah a kuirang tangkiik dawngah ni. 23 Jesuh lawng a hubang hue tengla maang tih, “Kuirang thli ham Pathen ram khuiah kuun hamla rai tangkiik mah aw! a tina. 24 He awl dawngah a hubang hue tah a ngaihang u, tede Jesuh lawng, “Ka ca ka nau thli, Pathen Ram khuiah kuun hamla rai tangkiik! 25 Kuirang thli Pathen Ram ah kuun lak ah phaimeet haa khuiah kala-uk a kuun te yoei bet ai,” a tina. 26 A hubang hue lawng he awl he a yaak u vengah a kawpoek rai u tangkiik tih, “Te atah a-u thlawn la aka awm thai ai?” tila khat oen khat doet u. 27 Jesuh lawng ahimi te a haitang heet hih “He he thlaanghing ham tah coengg thai nawh, tede Pathen hamla tah soeprep boeih he coengg thai” a tina. 28 Tevengah Piter lawng, “Kaimi lawng soeprep boeih ka ceh taak u tih na hu ah ka bang u poen” a tina. 29 Jesuh lawng ahimi nala te, “Oeih, ataktang kavan thui u, a-u khaw a im a lo, a maya manau, ngannu nganca, a manu oen ana pa, ca anau khaw awlthang theen oen kai kawng dawngah aka ceh taak tah, 30 tahe san roeroe ah a yahawh ngaaila a dang ai. Im khaw, maya manau khaw, ngannu khaw, a manu khaw, ca anau oen lo khaw a pueh yakhat la a dang ai, tecoegah heemtekna khaw a dang van ai. tecoengah aka law ham koei san ah dungyan hingna te a dang ai. 31 Tede tahe kah lamhacuek thlaang thli he hukhueng la awm u vetih tahe ah hukhueng la aka awm thlaang thli he lamha u dai ai.” a tina. 32 Jesuh oen a hubang hue tah Jerusalem benla cet u. A hubang hue kah a haiah Jesuh te lamhala cet; a hubang hue tah lakueng u; a hu ah aka vai thlaang thli lawngkhaw a rih u. Jesuh lawng a hubang thlaangha thlaihih hue te atloela koep a ceh puei tih amah sawah aka thoeng ham koei te a thui pe. 33 Ahimi nala te, “Hutung u lah! Jerusalem khaw te m'pha u vetih te ah te Thlaanghing Capa he khawsoeih ahaamca thli oen Phungawl cangpueikung thli kut ah peek la awm ai. Ahimi lawngah ahih te duek sak hamla awl a tloek u vetih tecoengah Gental thli kut ah a peek ai, 34 nuihbu kamring la a sai u ai, a tumthoeih u ai, a bawh u vetih a ngawn u ai; tede athum hin ah tho koep ai,” a tina. 35 Tecoengah Zebedi ca rawi Jeem oen Johan te Jesuh tengla law hih tih, “Saya, thaihu pakhat navan sai hamla ka ngaih,” a tina. 36 Jesuh lawng ahih rawi te, “N'tu kavan sai ai?” tila a doet. 37 Ahih rawi lawngah, “Na bawilenna Ram ah na bawi ngawlhcoen dawng na ngawlh vengah kai hih he banvoei ben ah pakhat, bantang ben ah pakhat namah oen haih nan ngawlh sak ham ka ngaih hih,” a tina. 38 Jesuh lawng ahih rawi nala, “Navan bih he na ming hih nawh. Ka awkk ham koei patang khangna boengloeng he na awkk thai hih ai aw? Kai lawng ka dang ham koei baptisma angla te nanghih lawng baptisma na dang thai ai aw?” a tina. 39 Ahih rawi lawng, “Ka sai thai hih ai,” a tina. Jesuh lawng te rawi boeinau te, “Kai lawng ka awkk ham boengloeng khaw na awkk thai hih vetih ka dang ham koei baptisma te khaw na dang thai hih tangtang ai. 40 Tede ka bantang ben ah ahih ngawl seh, ka banvoei ben ah ahih ngawl seh tila kai lawng ka tuek thai nawh. He huen tah Pathen lawng a hooep a tlaang tangte thlaang hue te a peek ai,” a tina. 41 He kawng he atloe hubang paha hue lawng a yaak u vengah Jeem oen Johan sawah a thinsa u. 42 Tedawngah Jesuh lawng ahimi te amah tengla boeih a khue tun tih, “Pathen aka ming nawh ukkung bawi hue lawng a uk thlaang thli sawah huham tharana a khueh u tih mawtkung hue lawngkhaw anauh ngaai la aana a khueh u. 43 Tede nangmi tah te tila na awm u manawh. Nangmi timkah pakhat lawng aka lenduet la awm ham a ngaih atah nangmi boeih kah tuihyoeihthlaang la awm seh; 44 Nangmi timkah pakhat lawng lamhacuek la awm a ngaih atah nangmi boeih kah sal la awm seh. 45 Metihtiah Thlaanghing Capa lawng Pateng khaw a bii te thlaang bi sak ham law nawh; thlaang kah bii te bi ham tih thlaang yahawh hlang hamla a hingna te peek ham ni a law” a tina. 46 Jesuh oen a hubang hue oen ah thlaangping hue tah Jeriko khaaw te a pha u. Jeriko kalawng a law vengah Timas capa kutduen buh bih mikpum pakhat Bartimias te lawngteng ah ngawl. 47 Nazaret khaaw kah Jesuh va law tila a yaak vengah, “Devid Capa Jesuh! Kai he n'reen lah! tila paang. 48 Thlaangping lawng a ho u tih duem awm, a tina u. Tede angaihhlangla paang tare tih, “Devid Capa, kai he n'reen lah!” a tina. 49 Jesuh te cot pai tih, “Ahih te khue u lah,” a tina. Tedawngah ahimi lawng mikpum thlaang te a khue u tih, “Na tha thlue sak, tho loeih! nang n'khue poen te” a tina u. 50 Tedawngah himbai te a voeih pak tih cungpet ruila Jesuh tengla te va law. 51 Jesuh lawng, “Nang ham n'tu sai sak na ngaih?” tila a doet. Ahih lawng, “Saya, ka mik a tueng koep ham ka ngaih,” a tina. 52 Jesuh lawng, “Cet loeih, na oengna lawng avan tueng sak poen,” a tina. Kawlkalh maiah ah a mik tueng koep tih te lawngpui ah te Jesuh hu ah baang pahoei.
1 Jesuh oen a hubang hue tah Jerusalem a pha tawm u tih Betfat oen Bethani khaaw teng kah Olif tlaang te a pha u atah Jesuh lawng a hubang pahih te hai la a tuih tih. 2 he tila awl a uen: “Na hai kah khaw khuila cet hih. Na pha hih khoeng ah a-u lawngkhaw a cit nooek thlan lacano a kiing u te na huh hih ai. Thlam hih langtah he la van khuen hih. 3 A-u lawng mai khaw, n'tu hamla te tila na sai hih tila n'doet atah, Bawipa lawng a ngoe, kavan thak koep badai tina hih,” tila awl a uen. 4 Tedawngah cet hih tih lawngteng kah im pakhat vawng thawhka tengah lacano a kiing u te a huh. Rui a thlam hih vengah te, 5 a tengah aka pai thlaang khatsut lawngah te, “N'tu ham lacano a khihna rui te na thlam hih?” tila a doet u. 6 Ahih rawi lawng Jesuh kah awl uen angla a thui pe tih, te kah thlaang thli lawng lacano te ahi rawi a khuen sak u. 7 Lacano te Jesuh tengla avan khuen hih tih la te amami kah himbai oen a khuk u tih Jesuh te a cit sak u. 8 Thlaangping lawng amami kah himbai te lawngpui ah a phaih u, thlaangvaang lawngtah lawngteng lawngvai kah thingbuuk te a kawi u tih lawngpui ah thinghu a phaih pe u. 9 Jesuh kah a haiah aka cet hue oen a hu ah aka cet thli lawng, “Hosanna! Bawipa miing oen aka law te Pathen lawng yotheenna pe hawn seh! 10 Pahaam Devid kah ukna aka law lii te yotheenna awm hawn seh! Asangkoek vaan ah ke Pathen tah thangtheenna awm hawn seh! Hosanna!” tila pang u. 11 Jesuh tah Jerusalem khaaw la te cet, Tempal bok-im khuila kuun tih thaihu thli te boeih a bueh. Tede khaw a thlem poen dawngah a hubang thlaihih oen Bethani khaaw la te cet koep u. 12 Avuen khawhin ah Bethani khaw kalawng a mel u koep vengah Jesuh te a bung pawng. 13 Athla hlang kalawng, thaidut thing kung at a ram lawng a diik khoep te a huh tih, athaih awm mai kai aw a ti dawngah a kung la te a pan; Tede a pha vengah, thaidut te a thaih tue nawh dawngah a ram hawng la a awm te a huh. 14 Jesuh lawng thaidut thing te, “Na thaih he a-u lawngkhaw ca koep tlaih boel seh!” a tina. Te tila a tina te a hubang hue lawngkhaw a yaak u. 15 Jerusalem te a pha u vengah, Jesuh tah Tempal bok-im la cet tih thaihu aka yooei thli oen aka lai thli te boeih a hek. Tangka thawlengkung thli kah caboi oen akhuu aka yooei thli kah ngawlhna te a plet boeih tih, 16 A-u khaw Tempal bok-im talawng vawngup khui kalawng thaihu khat khaw khuen sak tlaih nawh. 17 Tecoengah thlaangping te a cang puei tih, “Caciim khuiah Pathen lawng, “Kai kah Tempal bok-im he thlaangphun boeih kah thangthuina im ni ti ai,” tila a thut. Tede nangmi lawngtah thlaanghuuen thli kah thuh-elhna lungkaw la na sai u poen,” a tina. 18 Khawsoeih ahaamca thli oen Phung-awl cangpueikung hue lawng he awl he a yaak u tih Jesuh te ngawn hamla along a-im a tlap u. Jesuh kah cangpueina te thlaangping rangpui tah a kawpoek rai u tih ahimi lawng Jesuh te a rih u. 19 Thlemben atah Jesuh oen a hubang hue khawpui khui kalawng atloela cet u. 20 Avuen mincanghi ah Jesuh oen a hubang hue lawngpueng a ceh u vengah thaidut thing te a huh u. Te thaidut thing te athingpum la ayung toe duek rup. 21 Piter lawng thaidut thing Jesuh lawngah a taap te a poek lot vengah Jesuh nala te, 'Saya, bueh lah, nang lawng na taap thaidut thing te duek rup poen!“ a tina. 22 Jesuh lawng ahimi nala te, “Pathen te mah oeng u lah. 23 Atak tang kavan thui u, a-u lawngkhaw a kaw khuiah uepvoetna khueh muehla amah kah a thui angla coengg ngai ai tila a oeng atah he tlaang he, ‘thoeih langtah tuitunlii khuila tla lah,' a tina atah a thui angla ahih ham coengg vetih a sai pe ai. 24 Tedawngah ka van thui u: Nangmi lawng thangthuina oen na bih thaihu pakhat khat te ka dang poen tila tangna uh, te atah na bih sarui te m'peek ai. 25 Nangmi lawng na pai tih na thangthui u vengah thlaangtloe sawah na kaw a lawna nawh na khueh te khawdawp ngaai pe uh, te atah vaan ah aka awm nangmi na Pa lawng na sai thawlh te khawdawp avan ngaai van ai. 26 Nang lawng thlaangtloe sawah khawdawp na ngaai nawh atah vaan kah na Pa lawngah na sai thawlhna dawngah khawdawp van ngaai van manawh”. a tina. 27 Ahimi lawngah Jerusalem te koep a pha u. Tempal bok-im ah Jesuh a yingyawi vengah te khawsoeih ahaamca thli oen Phungawl cangpueikung hue oen ahaamca thli a tengla law u tih, 28 “Ame kah saithaina aana oen he thaihu he na sai? A-u lawng sai thaina aana he m'peek?” tila a doet u. 29 Jesuh lawng ahimi awl te a thung pe tih, “Nangmi he kam at ah awl kan doet u lah ai, awl navan thung u atah he thaihu he ame kah saithaina aana oen ka sai tite kavan thui van ai. 30 Johan kah baptisma peek saithaina aana he ame kalawng a law: Pathen teng kalawng aw? tih nawh atah thlaanghing teng kalawng aw a law?” tila a doet. 31 Amami oen amami mai te oelh u khiing tih: “Metila n'ti u lah ai? Pathen teng kalawng ni a law n'ti kawinih, n'tu ah Johan te na oeng u nawh? ti ai. 32 Tede, ‘Thlaanghing teng kalawng ni a law n'ti kawinih thlaangping he rih ham awm” ti u. (Metihtiah thlaang boeih lawng Johan he tawngha tila a ming u.) 33 Tedawngah ahimi lawng Jesuh nala, “Ka ming u nawh” a tina u. Jesuh lawng ahimi nala te, “Kai lawngkhaw ame kah saithaina aana oen he ang thaihu ka sai he kavan thui u manawh” a tina.
1 Jesuh lawng ahimi te thuidoetna oen a thui pe. Jesuh lawngah, ‘Vaikhat ah misur dum aka sai thlaang pakhat awm tih dum te vawng oen khoep a thung, misurtui suina ham ungrawm a to tih a toetna ham paw a sak. Tecoengah dum te thlaang a vat tih amah tah khawlawng thla la te cet. 2 Misur thaih bit tue veng atah dum aka vat thlaang thli tengah a sal pakhat te a tuih tih a dang ham koei dum khang te a lawh sak. 3 Dum aka vat hue lawng a salpa te a tuuk tih a bawh u, thaihu khat khaw peek ohla atliingla a mel sak u. 4 Tecoengah dum khuehkung lawng atloe sal pakhat te a tuih; dum aka vat hue lawng a luu ah a bawh u tih yarau yahdeng la a khueh sut u. 5 Dum khuehkung lawng atloe sal pakhat te a tuih koep de a ngawn pe u; atloe sal thli te khaw te tila a sai u, khatsut te a bawh u tih atloe hue te a ngawn u. 6 Dum khuehkung lawng a tuih ham tah a lungduet amah capa khat bueng te ni a awm poen. Hukhueng atah, ka capa he tah dum aka vat hue lawng a hinyah ai a ti dawngah a capa te a tuih. 7 Tede dum vat hue lawng, ‘Ahih he dum khuehkung kah a capa ni. Law uh, ngawn u sih, ahih kah ro thaihu he mami kah koeva la awm ai,” ti u. 8 Tedawngah ahimi lawng a capa te a tuuk u, a ngawn u tih a rawkk te misur dum adau benla a voeih u. 9 “Tetih atah dum khuehkung lawng ahimi te metila a tina ai?” tila Jesuh lawng a doet. “Ahih lawng law vetih dum aka vat hue te a ngawn ai, misur dum te thlaangtloe a vat ai. 10 “Caciim lawng: Imsakung thli lawng aphu aka awm nawh angla a hoett u lungto te atloe boeih lak ah aphu aka awm koek Lungto la awm. 11 He tah Bawipa lawng a sai ni. Mami mik huh ah kawpoek rai la awm', tila a thui te na tae noek u nawh aw?” a tina. 12 Judah ahaamca hue lawng he thuidoetna he amami te ni a thui ee-tla thil tite a ming u dawngah Jesuh te tuuk hamla kamthlah u, tede thlaang rangpui te a rih u dawngah a ceh taak u. 13 Farasi khatsut hue oen Herod kah thlaang khatsut hue Jesuh te awl doet tih a awl thui dawng teah a thawlhna tuuk pe hamla te a tuih u. 14 A tengla te law u tih, “Saya, nang tah awltak na thui yoeyah, thlaang kah poekna khaw n'tu la na ngaai nawh. Nang lawngtah thlaang mik-hai khaw na dan nawh tih Pathen kawngaih awltak te thlaang na cang puei tite ka ming u. Rom Sengpahrang Sangluel tengah mangmu peek he mami kah Phungawl oen kalh u kai aw? Ahimi he mangmu peek ham tueng aw, peek tueng nawh aw? van thui lah,” a tina u. 15 Tede Jesuh lawng ahimi kah thailatna te a ming tih, “Me tih ti kawngah kai he kamah awl thui dawngah thawlhna tuuk ham na ngaih u? Ngun tangka pheek at ah van khuen u lah, ka bueh lah ai,” a tina. 16 Ahimi lawng ngun tangka pheek at avan khuen pe u tih, “A-u kah muei-ame oen miing aka awm?” tila Jesuh lawng a doet. Ahimi lawng, “Rom Sengpahrang Sangluel kah muei-ame oen a miing awm,” a tina u. 17 Tedawngah Jesuh lawng, “Tetih atah Sengpahrang kah koeva te Sengpahrang pe u langtah Pathen koe te Pathen pe uh,” a tina. Te tila te ahimi tah Jesuh sawah a kawpoek rai sut u. 18 Tecoengah Sadusi thlaang khatsut, duek coengah thawhkoepna awm nawh aka ti hue te Jesuh tengla law u tih, 19 “Saya, kaimi ham Mosi lawngah he tila phungawl a thut: ”Thlaang pakhat lawng a ca cuun muehla duek tih a yu te a ro sut oh atah, aka duek kah ca anau la a ca sak pe ham huhainu te a manau lawng yuna seh,’ ti. 20 Vai at tah boenhui thlaang pasarih awm u; ahaam koek lawngah a yu a lawh de a ca sak mueh la duek. 21 Tecoengah apabena lawngah a maya yu te a pang de ahih khaw a ca sak muehla duek. Te tila te apathumna te khaw awm tih, 22 atloe hue khaw te tila awm u boeih. Boenhui pasarih lawng te hutaa te a yuna u de a ca sak ohla duek boeih u. Hukhueng atah te hutaa khaw duek. 23 Te hutaa te boenhui boeih lawng a yuna u dawngah thawhkoepna khawhin, thlaangduek boeih a thawh vengah, te hutaa te a-u kah yu la a awm ai?” tila a doet u. 24 Jesuh lawng ahimi nala te, “Na poek thawlh u nawh pai he! N'tu ah ka poek thawlh u ti he na ming u aw? Nangmi lawng Caciim khaw, Pathen kah tharana khaw na ming u nawh dawngah ni. 25 Metihtiah thlaangduek a thawh koep veng atah vaan kah vanthlaang thli angla awm u vetih yuvaa ti he awm manawh. 26 Thlaangduek thawhkoepna kawng: Mosi kah cabu dawngah tangpuem a ungna kawng awl te na tae noek u nawh aw? Te cabu dawngah a thut tah Pathen lawng Mosi nala, “Kai tah Abraham Pathen, Isak Pathen, oen Jakob Pathen la ka awm,” a tina te ta. 27 Ahih tah aka hing thlaang thli kah Pathen la awm tih aka duek thlaang thli kah Pathen nawh ni. Nangmi lawng na poek thawlh u tangkiik” a tina. 28 Te tila awl a thui u te aka ya Phungawl cangpueikung pakhat teah te awm. Jesuh lawng Sadusi hue kah awldoetna atheencala a thung pe te a huh vengah awl doet ham a tengla law tih, “Awlpeek boeih boeih ah ame ang awlpeek nuem awlpui koek?” tila a doet. 29 Jesuh lawng, “Awlpui koek pakhatna tah he ni: “Israel thlaang thli hutung u lah! Mami kah Bawipa Pathen bueng ni Bawipa la a awm. 30 Bawipa na Pathen te na thinkaw lungbui boeih oen na hingna boeih oen, na kawpoek boeih oen, na tharana boeih oen ah lungnah”. 31 A pabena awlpui koek awlpeek tah, “Namah oen namah te na lungna van angla na imbe te lungnah” a ti he ni. He rawi pahih lak-ah awlpui ngai atloe awlpeek awm tlaih nawh”. a tina. 32 Phungawl, cangpueikung lawng Jesuh nala te, “Saya, Boehoeng theen! Bawipa bueng he Pathen la awm tih ahih bueng nawh tah Pathen tloe awm nawh. 33 Tedawngah thlaanghing lawng Pathen te thinkaw lungbui boeih oen kawpoek boeih oen tharana boeih oen ah lungna ham awm tih m'mah kah pum n'lungna van angla imbe te khaw lungna ham awm. He awlpeek pahih n'vai he tah Pathen tengah boknathaang dawngah boiava thawthuengna oen atloe thawthuengna lak-ah awlpui ngaai la awm” a tina. 34 Ahih lawng cuihna oen awl a thung pe te Jesuh lawng a yaak vengah ahih nala te, “Nang tah Pathen ram oen na thla nawh”, a tina. He coeng kalawng tah Jesuh he a-u lawngkhaw awl doet ha tlaih nawh. 35 Jesuh Lawng Tempal bok-im khuiah a cang puei vengah he tila awl a doet, “Metila Phungawl cangpueikung hue lawng Messiah tah Devid kah cadil nauha la awm ai tila a thui u thai kai? 36 Aciim Muithla kah bawnghorhna rang oen Devid amah lawng: “Bawipa lawng ka Bawipa tengah: Na raal thli te na khowpha huiah ka khueh thlantoe ka bantang ben ah ngawl” a tina. 37 Devid amah lawng ahih te, “Bawi-pa”; tila a khue atah metila Messiah te Devid kah cadil nauha la a awm thai ai?” a tina. Thlaangping hue lawng Jesuh awl te awmngaihcala a hutung u. 38 Jesuh lawng te tila a cang puei vengah te, “Phungawl cangpueikung hue he ngaithuen uh, ahimi lawng himbai dunghlang oen yingyawi a ngaih u tih dawr yun ah khaw thlaang lawng hinyahna oen n'voem n'toei lah sui tila a ngaih u, 39 sinakok bok-im ah athloekla ahooep atlaang ngawlhna oen poei saina ah huen theen ngawlhna te a tuek u. 40 Huhai tumtee thli kah a ruemm thaihu ralring capau te a lawh pe u tih ahimi kah a im thli te a rot pe u, tecoengah thlaang kah yaak theen la asanhlangla thangthui u. Ahimi te a the-eepla dan a tat ai. 41 Jesuh tah tempal bok-im kah tangka bawm tengah te ngawl tih thlaang thli kah tangka a sang u te a doen. Kuirang thlaanglen thli lawng tangka yahawh hlang a sang u te a huh; 42 Tevengah te huhainu khawdeng pakhat law van tih ruhum tangka pheksaseen pahih te a sang. 43 Tecoeng atah a hubang hue te a khue tih, “Atak tang kavan thui u, he kah huhainu khawdeng lawng thlaangtloe boeih lak ah tangka bawm khuiah yahawh ngaai a sang poen. 44 Metihtiah atloe hue lawngtah a khuehtoen khuikah acoeih aphe te ni a sang u; tede he huhainu tah khawdeng de a khueh duen te a peek kik poen,” tila a thui pe.
1 Tempal bok-im kalawng Jesuh a suntlaak vengah a hubang pakhat lawng, “Saya, Bueh lah! he lungto oen impui he metihtlukla kawpoek rai ham a awm!” a tina. 2 Tevengah Jesuh lawng, “He kah impui imlen thli he na huh aw? He kah lungto thli he pakhat maikhaw a awmna huen ah awm manawh; a pum boeih la a dawng kang ai,” a tina. 3 Jesuh tah Olif Tlaangsawm ah amah bueng ngawl tih Tempal bok-im benla te mang phai, tevengah Piter, Jeem, Johan oen Andru mi ahuepla ahih tengla te law u. 4 Ahimi lawngah, “He ang thli he metuek vengah a thoeng ai? He thaihu boeih he thoeng poen ai tila miknoekna awm ai aw, van thui lah,” tila a doet u. 5 Jesuh lawng ahimi nala te, “Nangmi he a-u lawngkhaw thai-alatna nawh ham ngaithuen uh. 6 Thlaang yahawh lawng ka miing oen law u vetih, “Kai tah ahih poen ni,” ti ai, thlaang yahawh te a thai alatna ai. 7 Nangmi lawng ayoeica kah raalkahna awl na yaak u ah khaw, athlathloei kah raalkahna awlthang na yaak u ah khaw lakueng u boel. Te ang thli te awm ai, tede aboetna a pha poen ti ngaihna nawh ni. 8 Ram pakhat oen khat kap u vetih, peng pakhat oen khat teek u ai. Dilai peng boeih ah likluei hinghuen vetih khawthe khawkhana awm ai. He ang thli boeih he tah camoe awm tawm tamtuen cuek bungtlawh angla awm ai. 9 Nangmi lawng ngaithuen oen awm uh. Metihtiah nangmi te n'tuuk u vetih awlcekna yung la n'khuen u ai. Sinakok bok-im ah nangmi te m'bawh u ai; Nangmi lawng kai kawng dawngah ukkung thli oen sengpahrang thli haiah ahimi te Awlthang Theen thui pe hamla na pai u ai. 10 Tede atue boetna a pha thlan ah awlthang theen te thlaang boeih tengah phawng la awm ai. 11 Nangmi te n'tuuk tih awlcekna yung la n'khuen u atah n'tu nuem ka thui ai tila lakueng oepsoeh u boel; atue a pha vengah thui hamla m'peek te thui hawn. Metihtiah nangmi lawng na thui ham awl te tah nang kah awl nawh ni, Ciim Muithla teng kah awl ni. 12 Thlaang lawngah amah kah maya manau kheet te duek sak ham a peek ai, tetih van angla ana pa lawngkhaw ca anau thli te a sai u van ai. Ca anau thli lawngkhaw a manu oen ana pa te a raalna u vetih a ngawn sak ai. 13 Kai kah kawng dawng maiah nangmi te thlaang boeih lawng n'thina ai. Tede a-u khaw aboet toe aka cak tah thlawn la awm ai. 14 “Rih koei tuiileh kap lawngah a awmna nawh koei a huen ah a awm te nangmi lawng na huh u ai,” (ca aka tae thli lawng thuingaihna he ming uh) “Tevengah Judia ram ah aka awm lawng tlaangsawm la te heng u seh. 15 Imphu ah aka awm lawng a khuen ham koei thaihu te lawh ham im khuila kuun re tlaih boel seh; 16 Lo ah aka awm lawngkhaw hi-acuu lawh hamla im la cet re tlaih boel seh. 17 Te kah atue khawhin te hutaa vawn-um oen cacuun naukem thli hamla metihtlukla mueirihtamyiin la a awm ai. 18 He thaihu thli he sikding tue ah avan pha nawh ham Pathen tengah thangthui uh! 19 Metihtiah te khawhin kah patangraina te tah Pathen lawng dilai a suen tih a tongcuek veng kalawng tahe toe ah khaw ming noek nawh athe koek raina poen ni. Hailam ah te ang te awm koep tlaih manawh. 20 Bawipa lawng te kah atue khawhin te toi sak nawh kawinih; a-u khaw loeih deem manawh. Tede, amah kah a thlaang tuek hue hamla tah te atue khawhin te a toi sak poen. 21 “Tedawngah thlaang pakhat khat lawng, ‘Bueh u lah! he ah Messiah awm a ti ah khawseh,’ ‘Bueh lah! ke ah Messiah awm,’ a ti ah khaw ahimi te tangna u boel. 22 Metihtiah Messiah rawlrap thli oen tawngha rawlrap thli va thoeng ai. Ahimi lawngah a coengg thai atah Pathen thlaangtuek thli Pateng khaw thailatna ham kawpoekrai miknoekna oen kawpoek rai thaihu broela a sai ai. 23 Ngaithuen uh! Te kah atue atang te apha thlan ah thaihu soeprep te nangmi tengah kavan thui oepsoeh poen he” a tina. 24 “Te kah patang raina atue khawhin coeng atah khawmik lawng yiin khoep ai, thla lawngkhaw vang tlaih manawh. 25 Vaan kalawng aisi tla vetih khawhi ah aka awm aisicumrii lawng amami kah huham tharana along a-im te a thawveel boeih ai. 26 Tevengah thlaang capa lawng va pho vetih huham tharana oen ruep-awmna oen ah muui khui kalawng va law ai. 27 Ahih lawngah dilai atoe khit kalawng khatben atoe kah Pathen thlaangtuek thli te cawi hamla dilai a kil palii ah vanthlaang thli te a tuih ai. 28 Thaidut thing dawngah cuihna cang u lah, Thaidut thing kah a beek-athleeng thli te hingsuepla awm tih a dawn a voeih, a ramno a cawn hang atah nangmi lawng khawhaal tue yoeii poen tila na ming u. 29 Tetih van angla he ang thaihu thli a thoeng hang atah atue yoeii poen, law tawm poen tila ming uh. 30 Tahe ah aka hing thlaang hue he a duek boeih thlan ah he thaihu boeih he va thoeng ai ti he hilh u boel. 31 Vaan oen dilai tah auh ai, tede kai kah awl tah mevengah khaw ha-ata manawh. 32 “Te cakhaw te kah atue oen khawhin te mevengah a thoeng ai tite a-u lawngkhaw ming nawh; vaan kah vanthlaang lawngkhaw ming nawh; Pa bueng lawng ni a ming. 33 Te kah atue te mevengah avan pha ai tite na ming u nawh dawngah a huertue la awm u lang ring oepsoeh uh. 34 N'tu oen a lawh u ti atah, thlaang pakhat tah khawlawng thla la yin cet tih a tuihyoeihthlaang thli te bii a peek, ahimi pakhat rip te a sai ham koei bii te a peek coengah thawhka toetkung te khaw ngaithuen cala a toet ham a uen a tawn heet oen lo u. 35 Imkung manghai bawi te mevengah a law ai tite nangmi lawng na ming u nawh dawngah ngaithuen lang ring uh. Thlemhah ah khaw, yiinthuem ah khaw, tihnawhtah cinghue ah khaw, khawthaih ben ah khaw law thai mai. 36 Poek muehla ahih te a law parak atah nangmi ih siing ih rawi la na awm u te n'hu boel seh. 37 Nangmi teng ka thui he thlaang boeih teng khaw ka thui: Ngaithuen oen ring uh!” a tina.
1 Kaantaak Poei oen Tawlru thuum nawh Takawi poei te pha ham hin hih angaih vengah khawsoeih ahaamca hue oen Phungawl cangpueikung thli lawng Jesuh te ahuepla tuuk tih ngawn ham lawngpui a tlap u. 2 Ahimi lawngah, “Mami lawng poei hin veng atah sai u boel sih, thlaangping he cumplaam la tho ai,” ti u. 3 Jesuh tah Bethani khaaw ah aka awm haibe natna aka tlo noek Simon im ah te awm. Jesuh te buh a caak lii vengah, hutaa pakhat riimtuui phutlo alabasta um dawngah abepirla avan khuen tih va law. Te hutaa lawng alabasta um te a bawh ngoelh tih riimtuui oen Jesuh luu te a suep. 4 Te kah aka awm thlaang khatsut tah a thinsa u tih, “N'tu la riimtuui ke a poeih a lak kai? 5 Riimtuui he ngun tangka yathum lak ah yahawhla yoeih tih khawdeng thli te tangka m'pe kawinih theen ai ta!” ti u tih a theet soeh u. 6 Tecoengah Jesuh lawng, “Toeng u loeih! N'tu ham ahih te na lawl na la u? Ahih lawng kai hamla thaihu theen aroep acap la avan sai poen. 7 Khawdeng thli tah nangmi tengah awm poepa ai ta, nangmi lawng na ngaih veng roekk ah ahimi te na bawm thai. Tede kai tah nangmi tengah ka awm poe manawh. 8 Ahih lawng a sai thai khoek te a sai poen; Ka pum dawngah riimtuui avan suep he tah ka rawkk vuina ham a kamthlah oepsoehna ni. 9 Tahe ah ataktang kavan thui, dilai peng tawm ah awlthang theen a thuina huen roekk ah amah hilhna nawh ham a sai thaihu he a thui poepa u van ai. 10 Tecoengah a hubang thlaihih khuiah aka thuum van Judas Iskariot lawngah Jesuh te a raal thli kut ah peek ham khawsoeih ahaamca thli tengla te cet. 11 Ahimi lawngah ahih kah awl thui te a yaak u vengah a kaw hoe tangkiik u tih tangka peek ham awl a kam u. Tedawngah Judas lawng Jesuh te ahimi kut ah peek ham atue theen te a tlap. 12 Tawlru phull nawh Takawi Poei hin at na, Kaantaak poei buhkokna ham tuuca ngawnna khawhin ah Jesuh te a hubang hue lawng, “Nang hamla Kaantaak poei buhkokna te ame huen ah kaimi sai sak ham na ngaih?” tila Jesuh te a doet u. 13 Tecoengah Jesuh lawng ahimi tim kah a hubang pahih te he tila awl a uen tih a tuih: “Khawpui khuila cet hih langtah tuium dawng tui aka thaan thlaang pakhat lawng nanghih te n'hum ai. 14 Ahih te a kuunna im toe la a hu ah vai hih langtah te imkung nala: “Saya lawng, ka hubang hue oen Kaantaak poeibuh caakna akhann te ame ah nuem? ti' ti nah. 15 Tecoeng atah ahih lawng im han kah akhann kau hlang, anep anoeila soeprep aroek abah heet te n'nueh hih ai, te huen ah te thlembuh veel ham sai hih,” a tina. 16 A hubang rawi lawng khawpui khuila cet hih tih Jesuh lawng a thui pe angla soeprep boeih te a huh tih Kaantaak poeibuh te a roek abah hih. 17 Thlemhah atah Jesuh oen a hubang paha thlaihih te va law u. 18 Caboi dawng buh a caak u lii vengah Jesuh lawng, “Ataktang kavan thui u, Nangmi timkah kai oen buh aka ca haih pakhat lawng kai sawah paipi a thleep ai,” a tina u. 19 A hubang hue tah a kaw caalla the u tih, “Kai nan ti ngaihna ngoen nawh macawi?” tila pakhat coeng pakhat lawng Jesuh te a doet u. 20 Jesuh lawng, “Nangmi thlaihih tim kah pakhat van tih kai oen beel dawngah takawi aka nok haih ni. 21 Thlaanghing Capa tah duek ai tila Caciim lawng a thui angla duek ai; tede Thlaanghing Capa sawah paipi aka thleepkung ham tah khawmap tangkiik! Te thlaang te cuun ohla awm kawinih ahih ham theen bet sui de ta,” a tina. 22 Ahimi lawng thlembuh a caak u lii vengah te Jesuh lawng takawi a lawh tih awmngaih thangthuina a khueh coengah takawi te a eh tih a hubang hue te a peek. “Lo uh, he tah ka pum ni” a tina. 23 Tecoengah boengloeng te a lawh tih Pathen tengah awmngaih ciil a thui coengah a hubang hue te a peek tih ahimi boeih lawng a awkk u. 24 Jesuh lawng, “He tah thlaang yahawh hamla ka hok ka thi ni, Pathen awlkam acakna ka thi ni. 25 Ataktang kavan thui u, Pathen ukna khuiah misurtui athaai awkk ham khawhin apha thlantoe he misurtui he ka aw koep tlaih manawh', a tina. 26 Tecoengah ahimi lawng laa raawl at a sak u tih Olif Tlaangsawm la te luui u. 27 Jesuh lawng ahimi nala te, “Caciim dawngah, “Pathen lawng tuudoen te a ngawn vetih tuu boeih tah thek u khonghak ai,” a ti angla nangmi boeih lawng kai he nan heng taak vetih nan ceh taak sut ai. 28 Tede, duekna kalawng thawh sak koep la ka awm coengah nangmi haiah Galili la kan cet ai.” a tina. 29 Piter lawngah, “Thlaangtloe hue lawng nang te n'ceh taak cakhaw, kai lawng tah nang he kan ceh taak sut roe manawh,” a tina. 30 Jesuh lawng Piter nala te, “A taktang kavan thui, n'tuu yiin aai voeihih a khaawk thlan ah nang lawngah kai he voeithum toe ka ming roe nawh tila na basa khak ai,” a tina. 31 Piter lawng, ”Nang oen ah duek haih koeila awm cakhaw nang he kan ming roe nawh tila ka thui manawh,” a tina. Atloe a hubang hue lawngkhaw te tila te a thui u van. 32 Ahimi tah ketsaman a ti u a huen te a pha u tih, Jesuh lawng a hubang hue nala te, “Kai ka thangthui ruet vengah he ah he an ngawl u de,” a tina. 33 Piter, Jeem oen Johan te a ceh puei. Jesuh tah lakueng malcal tih a kaw moet sut; 34 ahimi nala te, kawthena lawng thinkaw lungbui avan yaawl khoep tih ka peeng phuk ai a ti angla awm. He ah he awm u lang ih mueh la n'ring uh” a tina. 35 Ahih lawng cet hot tih, dilai ah buekuep tih acoengg thai atah patang khangna kalawng loeihna ham thangthui. 36 “A Pa, a Pa! Nang ham tah soeprep boeih he coeng thai. Kai tengkah patang khangna boengloeng he lo hawn lah. Tede kai kah kawngaih angla awm boel seh, namah kah kawngaih angla coengg hawn seh”. tila thangthui. 37 Tecoengah va meel tih a hubang pathum a ih muelh u te a huh. Piter nala te, “Simon, na ip muelh aw? Nang lawngah khawnoek pakhat mai khaw na hak thai nawh aw?” a tina. 38 Tecoengah ahimi te, “Nangmi lawng suek-halhna khuiah na tlim u nawh ham thangthui langtah hak u lah. Na thinkaw lawngtah a ngaih de na pumsa tah a tha yoek sut.” a tina. 39 Ahih tah cet koep tih acuek kah angla koep thangthui. 40 Tecoengah a hubang hue tengla meel koep tih ahimi a ih muelh u te a huh; a mik khaw daai u thai nawh tih n'tu thui ham khaw ming u nawh. 41 A pathumna a meel koep veng atah, ahimi nala te, “Tahe toe ah na ip tih na duem u hun aw? Khoek poen seh! Atue a pha poen! Bueh lah, tahe ah Thlaanghing Capa tah thlaang thawlh thli kut ah a peek poen. 42 Tho uh, cet u sih. Bueh lah, kai sawah paipi thleepkung te he ah avan pha poen!” a tina. 43 Te tila Jesuh lawng awl a thui lii vengah te Judas avan pha. Ahih lawng-ah Khawsoeih ahaamca thli, Phungawl cangpueikung thli, Judah thlaang ahaamca thli kah thlaang tuih, samsen oen boelhoen aka pawm thlaangping te avan law puei. 44 Paipi thleepkung lawng thlaangping te miknoekna a peek oepsoeh: “Kai lawng ka mok thlaang te tah nangmi lawng na ngaih u thlaang te ni. Ahih te tu u langtah anepla rep tamena lang khuen uh”. a tina. 45 Judas lawng a paipuek ah Jesuh tengla cet pahoei tih, “Saya!” a tina tih a hih te a mok. 46 Te atah ahimi lawng Jesuh te a tuuk u tih a khih u. 47 Tevengah te kah aka pai thlaang pakhat lawng a samsen te a phong tih Khawsoeih Bawi kah sal te a bawh tih a haa pat a tloek pe. 48 Tevengah Jesuh lawng ahimi te a voem tih, “Kai he thlaanghuuen la ka awm dawngah aw tuuk hamla samsen oen boelhoen oen ah nangmi lawng na law u? 49 Khawhin roekk ah nangmi tengah ka awm tih Tempal bok-im ah kan cang puei u yoeyah ta, nan tu u nawh. Tede Caciim lawng a thui te tah asoep ham awm” a tina. 50 Tevengah a hubang hue boeih lawng a ceh taak sut u tih a heng taak khongphaat u. 51 Tlamhi himbai aka bai cadawng tawngpang pakhat lawng Jesuh te a hu ah a vai. Ahih te khaw ka tu ai ti u, 52 Tede a himbai te a pit sut tih atliing ayaalla heng phaat. 53 Tecoeng atah Jesuh te Khawsoeih Bawi impui la te a ceh puei u, te huen ah khawsoeih ahaamca boeih, Judah ahaamca thli oen Phungawl cangpueikung thli tun u. 54 Piter lawngah athla ngaai bet kalawng a hu yut tih Khawsoeih Bawi kah impui vawngup khuila te cet. Teah te raaltoeng thli oen haih ngawl u tih hai a aawm. 55 Khawsoeih ahaamca boeih, awlcekna khonsil ah aka thuum boeih lawng Jesuh te ngawn thaina ham a thawlhna te a tlap u, tede ahimi lawng khatca khaw dang u nawh. 56 Sausi la aka pai thlaang broe lawngah Jesuh te hoem a pup u de ahimi kah awl thui te khat khaw tuhkai u nawh. 57 Tecoeng atah thlaang khatsut lawng pai tih Jesuh te he tila hoem a peel u: 58 “Ahih lawngah, ‘He Tempal bok-im thlaanghing kah a sak he ka phe vetih, thlaanghing lawng a sak nawh pakhat te hin thum khuiah ka sak ai,’ tila a thui te ka yaak u”, ti. 59 Tede ahimi kah awl thui khaw tuhkai u nawh. 60 Ahimi boeih kah a haiah te Khawsoeih Bawi tah pai tih Jesuh nala te, “He kah thlaang thli lawngah hoem awl a thui u tih nang thawlh n'peel te awl thung ham koei awm nawh aw?” tila a doet. 61 Tede Jesuh lawng a hill a phah duem tih awl kam at khaw thui nawh. Khawsoeih Bawi lawngah, “Nang he Theenduet Pathen Capa Messiah aw?” tila koep a doet. 62 Jesuh lawng, 'Kai tah Messiah ni, Thlaanghing Capa lawng Thara koek kah bantang ben ah ka ngawlh te khaw, vaan kah muui dawngah ka law te khaw nangmi lawng na huh u ai!” tila awl a thung pe. 63 Khawsoeih Bawi lawngah a himbaidung te a doek thok tih, “Mami ham atloe sausi angoe hun baal aw!. 64 Pathen a sal aphaamna awl a thui te nangmi lawng na yaak u poen. Metila awltloekna na khueh u ai?” tila a doet. Ahimi boeih lawngah: ahih tah thlaangthawlh ni, ngawn ham awm tila awl a khueng u. 65 Thlaang khatsut lawng Jesuh te a tumthoeih, a mik te a yeen pe khoep tih a tam u, “Nang he a-u lawng m'bawh thui lah,” a tina u. Raalkap thli lawng a khuen u tih a bel u. 66 Khawsoeih Bawi kah talawng vawng-up khuiah Piter a awm vengah te, Khawsoeih Bawi kah tuihyoeihthlaang hutaa pakhat te va law. 67 Piter hai a aawm te a huh vengah a bueh rangpatang tih, “Nang khaw Nazaret khaaw kah Jesuh oen aka awm haih thlaang van ni”. a tina. 68 Tede Piter lawng basa tih, “Ka ming nawh; Nang lawng na thui akawng-alam he ka yaakming moenih,” a tina tih vawngup thawhka la te cet. Teveng roe ah te aai khaawk pahoei. 69 Tuihyoeihthlaang hutaa lawng Piter te a huh koep tih a tengah aka pai thli te, “Ahih he ahimi timkah pakhat van ni” toekloek a tina. 70 Tede Piter tah basa toengtoeng. Kawlkalh a awm bawt atah, a teng kah aka pai thlaang thli lawng Piter te, “Nang lawng ahimi tim ah aka thuum van ti he na basa thai manawh, nang khaw Galili thlaang van ni.” a tina u. 71 Tede Piter lawng, “Awl ka taap tih awltak ka thui! Kai lawng awltak ka thui nawh atah Pathen lawng dan n'tat seh! Nangmi lawng na thui u thlaang te ka ming nawh!” a tina. 72 Tecoeng khoeng ah apabe la aai khaawk tih Piter lawng Jesuh awl “Aai voeihih a khaawk thlan ah, kai he kan ming roe nawh, voei thum toe na ti ai” a tina awl te a poek lot tih rap.
1 Mincanghi ah khawsoeih ahaamca thli tah Judah ahaamca thli, Phungawl cangpueikung thli, awlcekna khonsil ah aka thuum boeih oen ah tun huh u tih khaw a khan u. Jesuh te thiirui oen a khih u, a ceh puei u tih Pilat kut ah a peek u. 2 Pilat lawngah, “Nang he Judah sengpahrang tang aw?” tila awl a doet. Jesuh lawng, “Na thui angla soeng,” a tina. 3 Khawsoeih ahaamca thli lawngah Jesuh te thawlh broela a peel u. 4 Tedawngah a doet koep tih, “Awl na thung pe nawh ai aw? Ahimi kah thawlh peel boeih he hutung lah!” a tina. 5 Jesuh lawng awl kam at khaw thui nawh toeng toeng tih Pilat tah a kawpoek la rai. 6 Kaantaak Poei apha veng roekk ah thawngtla pakhat rangpui lawng a bih te Pilat lawng a thlah poepa. 7 Tevengah raal la aka tho thli oen thong haih aka tla, raal la a thawh u vengah thlaang aka ngawn Barabbas a miingna thongtla thlaang pakhat te awm. 8 Thlaangping lawngah law u tih poei vengah thongtla pakhat thlah noek angla te thlah sak ham Pilat tengah a bih u. 9 Pilat lawng ahimi te, “Nangmi lawngah Judah sengpahrang he thlah sak ham na ngaih u aw?” tila a doet. 10 Pilat lawng, ka kut dawngah Jesuh avan pha sak u he khawsoeih ahaamca thli lawng a uett u dawngah ni tite atheencala a ming. 11 Tede khawsoeih ahaamca thli lawng thlaangping te a ceemtuh tih Barabbas dai lat te thlah sak ham Pilat tengah a bih u. 12 Pilat lawng thlaangping te, “Tetih atah Judah sengpahrang he ta metila sai sak ham na ngaih u?” tila koep a doet. 13 Ahimi lawngah, “Thinglam dawng-ah ngawn!” tila paang u. 14 Pilat lawng, “Ahih lawngah n'tu thawlhna a sai?” tila a doet. Ahimi lawngah, “Thinglam dawngah ngawn!” tila angaihhlangla paang tare u. 15 Pilat lawng thlaangping te ngaitluep sak ham a ngaih dawngah Barabbas te a thlah pe. Tecoengah Jesuh te cungpoelh oen a bawh tih ngawn hamla ahimi kut ah a peek. 16 Raalkap thli lawngah Jesuh te ram ukbawi kah impui talawng vawngup khuila te a ceh puei u tih raalkap bu khat te a khue tih tun kueng u. 17 Ahimi lawng Jesuh te himbaidung lingduuk te a bai sak u tih thliing oen a veh bawilen lumuek te a muek sak u. 18 Tecoengah thekha thangpawmna la: “Judah Sengpahrang a hinglung vaang hawn seh!” ti u. 19 A luu ah cungpoelh oen a bawh u tih a tumthoeih u, a haiah khuklu oen cuengkueng u, a luu a khun u tih a bok u. 20 Te tila nuihbu kamring la a sai u coengah himbailing te a dul pe u tih amah kah himbai te a bai sak koep u. Tecoengah ahimi lawng thinglam dawngah ngawn hamla te a khuen u. 21 Lawngpueng ah khaawte ben kalawng khawpui la aka law Simon aka miingna thlaang pakhat a hum u tih raalkap thli lawng Jesuh kah thinglam te amangkhak la a kawh sak u. (Simon he Sairin khaaw kah Alekzandar oen Rutas kah ana pa ni.) 22 Jesuh te Golkota huen ben la te a ceh puei u. Golkota ti he tah “Luuruh huen” ti ngaihna ni. 23 Te huen ah te mura oen a pawlh haih misurtui te a tuul u, tede Jesuh lawng aw nawh. 24 Tecoengah ahimi lawng Jesuh te thinglam dawng a tai u, ahimi lawngah talcung a suh u tih a himbai te rek ara u. 25 Ahimi lawng mincang khawnoek pakua vengah Jesuh te thinglam dawng a tai u. 26 Ahih thawlh peelna thinglam dawng a tai u te tah, “Judah sengpahrang” tila a thut. 27 Ahih oen thlaanghuuen pahih khaw a bantang ben ah pakhat, a banvoei ben ah pakhat a tai haih u. 28 He tila te caciim lawngah, “Thlaangthawlh tim ah ahih te a thuum sak” a ti awl te soep. 29 Te kah aka cet paitai thli lawngkhaw, a luu te halh a voeih u tih Jesuh te a tamdeng kawkhahna u: “Aw! Nang aw, Tempal bok-im te ka phe vetih hin thum khuiah ka sak koep ai na ti!. 30 Thinglam dawng kalawng tahe ah rum thuk langtah namah oen namah thlawn u lah! ” a tina u. 31 Tetih van la te khawsoeih ahaamca hue oen Phungawl Cangpueikung hue lawngkhaw Jesuh te a nuihna u, “Thlaangtloe tah a thlawn de amah oen amah tah thlawn u thai nawh he ta!. 32 Israel sengpahrang Messiah te thinglam dawngkah a rum thuk te tahe ah hu u lah sih, te atah mami lawng n'tangna ai ta! ti u. Jesuh amah oen a tai haih thlaang pahih te lawngkhaw ahih te athe akhana hih van. 33 Hingthuntaang ah ram pum boeih te khawnoek pathum khui yiinna lawng a thiing khoep. 34 Thlemben khawnoek pathum tue vengah Jesuh lawng, “Eloi, Eloi, Lama sabaktani?” tila angaih hlang la paang. A thuingaihna tah, “Ka Pathen, ka Pathen, n'tu kawngah nan hoett sut?” ti ngaihna ni. 35 A teng kah aka pai thlaang khatsut lawng ahih kah paang awl te a yaak vengah, “Hutung lah! Ahih lawng Elijah a khue! ti u. 36 Ahimi tim kah thlaang pakhat lawng palh cet tih him baipeen te a lawh, misurtui thuii dawngah a nuem tih rawkuih dawngah a piin. Jesuh te a kaa ah a tuh tih “Ring de lah! thinglam dawngkah thlawn hamla Elijah va rum ai nuem, bueh u lah sih,” ti u. 37 Jesuh lawng angaihhlangla paang, tecoengah duek. 38 Tevengah Tempal bok-im khuikah baiyaan te asaw kalawng adang toe pahih la poet pheuh u. 39 Thinglam haiah aka pai raalbawipa lawng metila Jesuh a duek tite a huh vengah, “He thlaang he tah Pathen Capa tangtang ni!” tila a thui. 40 Te kah aka awm hutaa khatsut lawngtah athla kalawng a dan u. Ahimi tim ah Meri Makdalin, anoca Jeem oen Josep kah a manu Meri oen ah Salome mi khaw thuum u. 41 Galili ah Jesuh a awm vengah ahimi lawng a hu ah baang u tih a bawm a ceem u. Atloe hutaa hue lawngkhaw Jerusalem la te law u tih ahimi oen ah te awm u van. 42 Khaw a thlem atah Arimatia khaaw kah Josep te va law. (Ahih avan pha vengah te khawthlem poen.) Ahih tah awlcekna Khonsil ah aka thuum hinyah koei thlaang pakhat van tih Pathen a law te aka ring thlaang ni (Te Khawhin tah rueng-aphongna Huet hin, Sabbath pha thlan khawhin ni.) Tedawngah Josep lawng tawng-aa ohla Pilat tengla cet tih Jesuh rawkk te a bih. 44 Pilat lawng Jesuh duek poen tila a yaak vengah a kawpoek la rai. Ahih lawng raalbawi te a khue tih Jesuh a duekna san poen aw tila a doet. 45 Raalkap bawi kah awl thui te a yaak coeng atah, Pilat lawng Jesuh rawkk te Josep a lawh sak. 46 Josep lawng rawkk yaawlna himbai a lai, a rawkk te thinglam dawngkah a lawh tih himbai oen te a yaawl coengah thel a thuk heet thlann lungkaw khuiah te a up. Tecoengah lungto bohlang a plet u tih phuel thawhka te a tleng. 47 Meri Makdalin oen Josep manu Meri mi khaw awm van tih Jesuh kah a rawkk upna huen te a huh hih.
1 Sabbath hin aboeih coengah Meri Makdalin, Jeem manu Meri oen Salome mi lawng Jesuh rawkk a thlukna hamla riimtuui a lai u. 2 Hin rih khuiah lamhacuek khawhin, khaw a thoeng cuek ah ahimi tah phuel la cet u. 3 Lawngpueng a ceh u vengah ahimi lawng, “Thlann thawhka kah lungto te a-u lawng a plet ai?” ti u. (Te tah lungto bo hlang ni.) Tecoengah ahimi lawng a bueh vengah, te lungto plet tangte la a awm te a huh u. 5 Ahimi lawng thlann khuila a kuun u vengah cadawng tawngpang pakhat himbai bawk a bai tih bantang ben ah aka ngawl te a huh tih let u. 6 Ahih lawngah, “Let u boel, nangmi lawngah thinglam dawng a ngawn u Nazaret khaw kah Jesuh na tlap u te ka ming. Ahih tah he ah awm tlaih nawh, tho poen! Ahih a khuehna huen he bueh lah. 7 Tahe ah cet u langtah a hubang hue oen Piter te, he awlthang he thui pe uh: “Ahih tah nangmi haiah Galili la cet; nangmi tengah avan thui angla te ah te na huh u ai,” tila van thui pe uh,” a tina. 8 Tedawngah ahimi tah cet tih lakueng oen thuen ruila heng u. Ahimi lawng a rih u tangkiik dawngah a-u tengah khaw thui u nawh. 9 Hutaa hue lawng Piter oen a paya thli tengla cet u tih vanthlaang lawng ahimi tengah a thui pe awl te atawila a thui pe u. 10 He coengah Jesuh amah lawng a hubang hue rang oen khawcuuk ben kalawng ah khawtlaak ben toe aka hing yoeyah tih aka ciim dungyan thlawnna awlthang te a thui. 11 “Jesuh tah hing koep tih ka huh poen tila a thui te ahimi lawngah tangna u nawh. 12 He coengah hubang pahih vangca la a ceh vengah Jesuh lawng muei ame phuntloe ngai bet la ahih rawi tengah a phumpho pe. 13 Ahih rawi lawng meel koep hih tih atloe hue tengah a thui pe hih de ahimi lawng tangna u nawh. 14 Hukhueng koek ah a hubang paha thlaikhat buh a caak u lii vengah Jesuh te a phumpho pe. Ahimi lawng oengna khueh nawh tih Jesuh te a hing la aka hu thli kah awlthui khaw tangna ham thinkaw aniing khaklal u dawngah ahimi te a siim. 15 Jesuh lawng ahimi nala te, “Dilai peng tawm ah cet u lang thlaangphun boeih tengah, awlthang theen he thui pe uh. 16 A-u lawngkhaw a tangna tih baptisma a huh atah thlawn la awm ai; A-u khaw a tangna nawh atah awlcekna a dang ai. 17 Aka oeng thli tah kawpoek rai saina huham te a peek ai; ahimi lawngah ka miing oen raaithe thli te a hek ai; awl thaai la cal u ai; 18 ahimi lawng asue aka awm ruul tu cakhaw, duekna sue aw cakhaw nganbawh ya manawh, ahimi lawng thlaangtlo thlaangnaa thli sawah kut a tloeng atah te thli lawng hoeih ai.” a tina. 19 Bawipa Jesuh lawng ahimi te awl a thui pe coengah vaan la luui tih Pathen bantang ben ah te ngawl. 20 A hubang thli lawng cet u tih peng tawm ah awlthang a thui u, Bawipa tah ahimi tengah bii a bi tih ahimi lawng a thui he soeng tite kawpoekrai saina oen a tueng sak u.
1 Hinyah koei Tiofilas: Mami tengah thaihu aka awm he atheen koek la thut ham thlaang yahawh lawng a yawm u poen. 2 He thaihu thli he acuekca veng kalawng aka hu tih awlthang aka phawng thli lawng mami tengah avan thui te ahimi lawng a thut u. 3 Tedawngah kai lawngkhaw he thaihu boeih he akungcuek kalawng ah acek aneh la ka rui ka hiim coengah Tongmang nang tengah ca thut ham theen ai tila ka poek. 4 Nang tengah avan thui u tangte soeprep boeih kawng te ataktang ni tila na mingna hamla kavan thut. 5 Judia ram ah Herod he sengpahrang la a awm vengah Abijah khawsoeih bu ah Zekhariah aka miingna khawsoeih pakhat awm. A yu tah Elizabet a miingna, ahih khaw khawsoeih imkhuikaw ah aka thuum van ni. 6 Ahih rawi tah Pathen mik huh ah thlaangdoeng la bok awm hih tih Bawipa kah phungawl oen awlpeek boeih te asoepcala a vai hih. 7 Elizabet tah a ca yaa tih ca-anau khueh hih nawh, ahih rawi tah patawng aih hih poen. 8 Hin at atah Zekhariah he khawhin roekk ah bii a sai ham koei te sai hamla atue a pha van tih Tempal bok-im khuiah khawsoeih biibi a sai koei te a sai. 9 Khawsoeih boeih lawng a vai u phung alam van angla bokna-thaang dawngah riimtuui huihthlut ham talcung a suh u tih a hih te a tuek u. Tedawngah Bawipa kah Tempal bok-im khuila te cet, 10 Tevengah riimtuui huihthlutna atue la awm tih rangpui thlaangping tah adauben ah thangthui u. 11 Bawipa kah vanthlaang pakhat ahih tengah phumpho tih rimtuui huihthlutna bokna-thaang bantang ben ah te pai. 12 Zekhariah lawng ahih te a huh vengah let uekcuek tih a rih. 13 Tede vanthlaang lawngah ahih nala te, “Zekhariah, rih boel! Nang kah thangthuina te Pathen lawng a yaak tih na yu Elizabet lawng na ca tawngpa avan cuun ai. Nang lawngah Johan tila miing na sak ai. 14 Ahih te a awm veng atah na kaw hoe tangkiik ai, thlaangtloe hue khaw awmngaih tangkiik u ai! 15 Ahih tah Bawipa mik huh ah aka lenduet la awm ai. Ahih lawngtah misurtui oen yuu khaw aw roe manawh. Ahih tah a thang pek kalawng Ciim Muithla oen be poen ai. 16 Ahih lawng Israel thlaangphun yahawh hlang te amami kah Bawipa Pathen tengla a mel puei koep ai. 17 Ahih tah Bawipa kah puencawn la awm vetih tawngha Elijah angla a tha awm vetih a tha ra ai. Ahih lawng ana pa oen ca-anau thli te koep a roep u sak ai; Ahih lawngah awl aka ngaai nawh thlaang thli te thlaangdoeng thli kah poekna lawngpui la te a mawt koep ai; Ahih lawngtah Bawipa kah thlaang thli te Bawipa amah ham oepsoeh la arueng aphong sak ai,” tila a thui pe. 18 Zekhariah lawng vanthlaang nala te, “Te tila awm tangtang ai tite metila ka ming ai? Kai tah ka patawng poen tih ka yu khaw hutawng van poen” a tina. 19 Vanthlaang lawngah, “Kai he Gabriel ni, he awlthang theen he nang tengah thui pe ham tuihkung Pathen haiah ka pai. 20 Tede nang lawng ka awl he na tangna nawh, atue akhoek vengah atakla thoeng ai. Nang lawng na tangna nawh dawngah awl na cal thai manawh; ka awlkam he atakla na tengah a thoeng thlantoe awlmueh la na awm ai.” a tina. 21 Teveng khui puet ah te thlaangping lawng Zekhariah te a ring u tih n'tu ah ahih he Tempal bok-im khuiah atue san hlang adiw aih oh kai ti tih a kawpoek rai u. 22 A law veng atah ahimi tengah awl thui thai nawh, tedawngah Tempal bok-im khuiah huhthlaam a huh tila ahimi lawng a ming u. Awl kam at khaw thui thai nawh, ahimi tengah te a kut oen ah miknoekna te a sai pe. 23 Tempal bok-im khuiah biibina atue te a boeih coeng atah Zekhariah te im la koep meel. 24 Tecoeng adiw raih coeng atah a yu Elizabet te vawn tih thla ngaa khui im khuiah awm roep. 25 Ahih lawng, “Tahe aboetna ah kai he Bawipa lawng n'bawm poen, thlaang rangpui haiah yaraula ka awm te avan lawh poen,” tila a thui. 26 Elizabet te tattloella a awmna thla ruk vengah Pathen lawng vanthlaang Gabriel te Galili ram kah khawpui Nazaret la te a tuih. 27 Sengpahrang Devid cadil la aka awm Josep aka miingna thlaang pakhat lawngah yuna hamla awl a khueh hulaa tengah awl thui pe ham a tuih. Te hulaa tah Meri a miingna. 28 Vanthlaang lawng a tengla law tih, “Na tengah ngaimawngna awm seh! Bawipa tah na tengah awm tih yotheen kam-awmna yahawh hlang la m'peek!” a tina. 29 Vanthlaang kah awlthui dawngah Meri tah a ngaai hang tih ahih kah awl he n'tu a thui ngaihna kai tila a kawpoek rai. 30 Vanthlaang lawng, “Meri! Rih boel; Nang tah mik-hai theenna Pathen lawng m'peek poen. 31 Nang tah na vawn ai, capa pakhat na cuun vetih a miing tah Jesuh tila na sak ai. 32 Ahih tah bawilen vetih Tloeng Khoelh Pathen Capa ti u ai. Bawipa Pathen lawngah ahih te patuer Devid angla te sengpahrang la a khueh ai, 33 ahih tah Jakob cadil thli kah dungyan sengpahrang la awm ai; ahih kah ram tah meveng khaw boet manawh!” a tina. 34 Meri lawng vanthlaang nala te, “Kai tah hulaa cuem la ka awm. Metila he he acoengg thai ai? a tina. 35 Vanthlaang lawng, “Ciim Muithla te na tengla law vetih Pathen kah huham tharana tah na sawah awm ai. Tedawngah aciim camaw te Pathen Capa ti u ai. 36 Namah kah cakaw Elizabet te poek lah. Ahih lawngah ca ka cuun tlaih manawh tila a thui, ahih tah hutawng poen de tahe ah tattloella a awmna thla ruk awm poen. 37 Metihtiah Pathen lawng a sai thai nawh khat khaw awm nawh. 38 Meri lawngah, “Kai he Bawipa kah salnu ni; na thui angla ka sawah awm seh.” a tina. Tecoengah vanthlaang lawng Meri te a ceh taak. 39 Tecoeng adiw thlan ah Meri tah kamthlah tih Judia ram tlaang ah aka awm khawpui pakhat la te cet. 40 Meri lawng Zekhariah im la cet tih Elizabet te a toei. 41 Elizabet lawng Meri kah toeina awl te a yaak vengah a bung khuikah camoe te tat. Elizabet tah Ciim Muithla oen be tih, 42 Ahih lawng angaihhlangla, “Nang tah hutaa boeih lak ah yo aka theen koek hutaa ni, na cuun ham koei na ca te khaw a yo theen phoeih! 43 He ang aka lentloe thaihu he n'tu kawngah ka teng avan pha tih ka Bawipa kah a manu he ka tengla a yingyawi kai? 44 Metihtiah nan toeina awl ka yaak pahoei oen ah ka bung khuikah camoe yawngdiik he awmngaihna oen tat. 45 Bawipa kah awlthang te na tengah ataktangla thoeng ai tila na tangna dawngah na yo theen phoeih,” tila a thui. 46 Meri lawngah, “Ka lungbui lawng Bawipa a koeh; 47 ka hingna khaw thlawnkung Pathen tengah awmngaih, 48 Metihtiah huhsit koek kai a salnu he amah lawng n'hilh nawh! Tahe kalawng tah cadil nauha thlaang boeih lawng yotheen aka dawng hutaa ni ti u poen ai, 49 metihtiah Thara koek Pathen lawng kai hamla alentloe thaihu avan sai poen. Ahih kah miing tah ciim; 50 Amah te aka hinyah thlaang boeih tengah cadil nauha khat coeng khat toe reenna te a tueng sak. 51 Ahih lawngah a thara baan te a thueng a thleng tih amami kah ahuep khawkhanna oen aka oekk u thlaang boeih te a thek a yak boeih. 52 Ahih lawngtah thara sengpahrang thli te amami kah ngawlhcoen dawng kalawng adangla a thlaak boeih tih thlaang la a toeh u nawh thli te a pawmsang. 53 Buh mueh buhpawng thli te caak awkk atuui tuui oen bung a hah sak tih kuirang thlaanglen thli te kut pingpuei oen atliingla a meel sak. 54 Ahih lawngtah mami kah patuer thli tengah awlkamna a sai te thlauh nawh tih amah kah tuihyoeihthlaang Israel thlaangphun te bawmcem hamla law poen. 55 Ahih lawngah Abraham oen a cadil nauha boeih tengah dungyan toela reenna tueng sak ham te hilh nawh!” tila a thui. 56 Meri tah Elizabet tengah thla thum yunyan awm tih tecoengah amah im la koep meel. 57 Elizabet tah camoe awm ham atue atang khoek tih capa pakhat a cuun. 58 Bawipa lawng ahih sawah kawpoek raina atheen tangkiik a sai te a imbe lovaai oen a cakaw thli lawng a yaak vengah boeih a awmngaih puei u. 59 Camawca te hinreet a cuung atah yahhuivuen rett pe ham law u tih ana pa miing Zekhariah miingna seh ti u. 60 Tede a manu lawngah, “Nawh ni! Johan miingna seh” a tina. 61 Ahimi lawngah Elizabet nala, “Tetih atah na cakaw khuiah he ang miing he a awm moenih ta! a tina u. 62 Tecoengah ahimi lawng, camoe he ana pa lawng a-u miingna seh a ti kai ti u tih kut oen miknoekna a sai pe u tih a doet u. 63 Zekhariah lawng cathutna lungpeel a bih tih, “A miing tah Johan ni,” tila a thut. Ahimi boeih tah a kawpoek rai u. 64 Teveng ruetca maiah Zekhariah tah cal thai koep tih Pathen te a thangpawm pahoei poen. 65 Imbe lovaai boeih lawngtah lakueng u, he thaihu kawng awlthang he Judia ram tlaang ah aka awm, khaaw boeih ah te thaang khok. 66 He kawng he aka ya tih aka poek thlaang boeih lawng doet u the tih, “He camaw he metila nuem a awm lah ve!” ti u. Metihtiah Bawipa kah huham tharana tah a sawah awm tite atheenla tueng. 67 Johan kah ana pa Zekhariah tah Ciim Muithla oen be tih Pathen awl te a thui: 68 “Israel Pathen Bawipa te koeh u lah sih! Ahih tah a thlaang thli te bawmcem ham oen ah loeih sak hamla law poen. 69 Ahih lawngah amah kah tuihyoeihthlaang Devid cadil tha aka ra Thlawnkung avan tuih poen. 70 Ahih lawng suenyan veng kalawng amah kah aciim tawngha thli oen awl a kam poen, 71 ahih lawngtah mami he raal kut khui kalawng ah, mami aka thina thlaang boeih kah tharana huham dawng kalawng n'thlawn ai. 72 Ahih lawng mami kah patuer thli tengah reenna ka tueng sak vetih amah kah aciim awlkam te ka hilh manawh” ti. 73 Mami he raal kut khui kalawng loeih sak ham oen ah rihsakna awm ohla amah bii te bi hamla mami kah patuer Abraham tengah awltaap oen awl a kam, 75 te tah mami lawng hing khuiah amah haiah ciim acaih tih adoengla awmna ham ni. 76 Ka ca, nang tah a Tloeng Khoelh Pathen kah tawngha ni ti u ai. Nang tah ahih ham amah kah lawngpui te roekbah hamla Bawipa haiah na cet oepsoeh ai. 77 A thlaang thli nala te nangmi kah thawlhna te khawdawp avan ngai vetih thlawnna na dang u ai tila na thui pe ai. 78 Mami kah Pathen tah thlaang reenkung oen thintlawhnakung la awm. Ahih lawngah thlawnna khawse theen te mami sawah avan aang sak vetih, 79 duekna thlip yiinna khuiah aka awm thlaang boeih te vaan kalawng avan thue ai, ngaimawngna lawngpui ah mami he m'mawt ai” tila a thui. 80 Camaw te pumtaksa oen muithla ben ah puer tih roeng hang. Israel thlaang thli tengah langyala a pho thlan vengah ramhum huhang ah te awm.
1 Tevengah te Sengpahrang sangluel Awkastas lawng Rom ram pum ah thlaangmi soep hamla awl a peek. 2 He kah lamhacuek thlaangmi soepna a sai vengah Kuirinias tah Siria ram ukkung bawi la awm. 3 Tedawngah thlaang boeih lawng thlaangmi soepna ah miing peek hamla amami awmna khawpui la te rip cet u. 4 Josep tah Galili ram Nazaret khawpui kalawng ah Devid sengpahrang a cuunna huen Judia ram Bethlehem khawpui la te cet. Josep tah Devid cadil la a awm dawngah tela te cet. 5 Josep lawng yuna ham amah thlaang kang Meri oen te cet hih. Meri tah tattloel la awm tih, 6 Bethlehem ah a awm hih vengah te camoe awm ham atue te a pha. 7 Meri lawng a capa camiing awmthang te a cuun, ahih te poehlaa oen a yaawl tih awkkhawng dawngah te a helh, ahih rawi pahna ham kamyin pahna-im ah ahuen awm nawh. 8 Te ram khui pengpang yun kah tuudoen khatsut tah ramhum ah reh u tih amami kah tuu thli te a doen u. 9 Bawipa kah vanthlaang pakhat te ahimi tengah tueng tih Bawipa kah ruep-awmna lawng ahimi te a thue. Ahimi lawng caalla a rih u; 10 tede vanthlaang lawngah ahimi nala te, “Rih u boel! Nangmi ham awlthang theen kavan khuen, te awlthang theen lawngah thlaang boeih tengah awmngaihna abo hlang avan khuen ai. 11 Tihin ah Devid khawpui khuiah nangmi kah thlawnkung Khrih Bawipa tah thang poen! 12 Nangmi lawng na noekna ham tah he tila awm ai: camaw te poehlaa oen a yaawl vetih vaitaw buh beel awkkhawng dawngah a helh te na huh ai,” a tina. 13 Kawlkalhca maiah vaan kah vanthlaang raalkap bu tah vanthlaang thli oen va pho u tih Pathen te laa sak oen a thangpawm u: 14 “Vaan asang koek ah Pathen thangpawm u hawn seh, a lungna thlaang thli a awmna dilai dawngah roepna awm hawn seh,” tila a thui u. 15 Vanthlaang thli ahimi teng kalawng vaan la a mel koep u veng atah tuudoen hue lawng amami pakhat oen khat te “Bethlehem la cet u silang tah Bawipa lawng mami tengah avan thui thaihu aka thoeng te bueh u sih.” ti u. 16 Tedawngah aloela cet u tih vaitaw awkkhawng dawngah a helh camawca oen ah Meri oen Josep te a huh u. 17 Tuudoen thli lawng camaw te a huh u coeng atah vanthlaang thli lawng camaw kawng a thui pe te thlaang thli tengah a thui patoeng u. 18 Tuudoen thli lawng a thui te aka ya boeih tah a kawpoek rai u. 19 Meri lawng he thaihu boeih he hilh nawh tih te kawng te adung hlangla a poek. 20 Tuudoen thli lawng meel koep u tih a yaak boeih oen a huhna boeih dawngah te Pathen thangpawmna laa a sak u; ahimi tengah vanthlaang lawng a thui pe angla te thoeng tak tak. 21 Hinreet cuung tih camaw te yahhuivuen reet ham atue apha veng atah, Jesuh tila miing a sak u. Te tah a manu bung khuiah a suen thlan vengah vanthlaang lawng a sak sut poen ni. 22 Mosi kah awlpeek Phungawl angla Josep oen Meri lawng Ciim-acaihna te sai hamla atue te a pha. Tedawngah ahih rawi lawng camaw te Bawipa tengah nawn ham Jerusalem la te a ceh puei. 23 Bawipa kah phungawl dawng: “Camiing tawngpaca boeih tah Bawipa tengah na nawn ai,” tila a thut. 24 Bawipa kah phung awl lawng a kuek angla akhuu bawh at tinawh tah imvuelh akhuu puer pek pheek hih te luciik la thawthueng ham ahih rawi tah cet hih. 25 Tevengah te Simeon aka miingna thlaang pakhat te Jerusalem ah awm. Ahih tah thlaangdoeng, Pathen aka rih thlaang la awm tih Israel thlaangphun thlawn la a awmna tue te a ring khuep. Ahih te ciim muithla lawng a awm puei tih, 26 Bawipa kah awlkam Messiah te na huh thlan atah na duek manawh tila Ciim Muithla lawng a thui pe rapcaat. 27 Ciim Muithla kah mawtna rang oen Simeon tah Tempal bok-im la cet. Phungawl lawng a kuek te sai hamla a manu oen ana pa lawng camaw Jesuh te Tempal bok-im la avan khuen vengah, 28 Simeon lawng camaw te a kut oen a pawm tih Pathen tengah awmngaih awl a thui: 29 “Bawipa, tahe ah na awlkam te na soep sak poen tih na salpa he ngaimawng ngaitoe la nan ceh sak poen ai. 30 Nang kah thlawnna te ka mik oen ka huh poen, 31 te tah thlaang boeih haiah namah kah roekbah te ni: 32 Gental thlaangphun tengah na kawngaihna aka tueng sak aangna la awm tih na thlaangphun Israel thlaang thli tengah ruep-awmna avan khuenkung la awm.” tila a thui. 33 Simeon lawng ahih kawng te tila a thui dawngah te a manu oen ana pa tah a kawpoek rai hih. 34 Simeon lawng ahimi te a phueh asawm tih a manu Meri nala te, “He camaw tah Israel thlaangphun khuiah thlaang yahawh lawng a rawkna ham oen thlawnna hamla Pathen lawng a tuek poen ni. Ahih tah Pathen kah miknoek la awm tih thlaang lawngah athela a thui u ai, 35 te tila a thui u dawngah amami kah ahuepla poekna boeih te tueng ai. Tecoengah samsen aka hatt angla na kawthena lawng na lungbui te avan thun ai.” a tina. 36 Asher phun, Fanu-el canu, Anna aka miingna huhainu tawngha pakhat awm. Ahih tah kumsarih bueng a vaa oen awm haih hih tih tahe tah a kum sawmreet kumlii awm poen. Ahih lawng Tempal bok-im he nawng aner taak nawh; Khawyiin khawthaih Pathen a bok, buh a yeh tih thangthui yoeyah. 38 Ahih khaw tevengah te avan pha van tih Pathen tengah awmngaih awl a thui, Pathen lawng Jerusalem a loeih sak ai tila aka lamtoen thlaang boeih tengah camawca kawng te a thui pe. 39 Josep oen Meri lawng, Bawipa kah phungawl lawng akuek boeih a sai coeng atah a awmna Galili ram Nazaret khawpui la te meel koep hih. 40 Camaw te roeng hang tih a tha awm hang; cuihna oen be tih Pathen yotheenna te a sawah awm. 41 Kaantaak Poei bur hamla Jesuh a manu oen ana pa he kum roekk ah Jerusalem la cet hih. 42 Jesuh he a kum kumha thlaihih vengah a ceh nooek u angla Poei bur ham cet u. 43 Poei a boeih coeng atah amah khaw la voei u, tede camaw Jesuh tah Jerusalem ah te awm. Te tila a awm te a manu oen ana pa lawng ming hih nawh; 44 ahih rawi lawngtah aka voei haih thlaang thli oen cet haih cawini tila a poek, tedawngah hin at puet lawngpueng cet u, tecoeng atah a cakaw thli oen a paya thli tim ah te a tlap hih. 45 Ahih rawi lawng a huh nawh dawngah Jerusalem la meel koep hih tih a tlap hih. 46 Athum hin atah ahih te Tempal bok-im khuiah a huh hih. Ahih tah Judah thlaang thli cangpueikung thli oen ngawl haih u, ahih kah awlthui te a hutung u tih awl a doet u. 47 Ahih lawng cuihna oen awl a thung pe te aka ya thlaang boeih tah a kawpoek rai u. 48 A manu oen ana pa lawngkhaw a huh hih vengah a kawpoek rai hih van tih a manu lawngah, “Ka ca, n'tu ah kai hih he tila nan sai? Na pa oen kai lawngtah lakueng lalapla nang he kan tlap hih ta.” a tina. 49 Jesuh lawng ana pa yuvaa te, “N'tu ham kai he nan tlap hih! Kai he a Pa im ah ka awm ti he na ming hih nawh aw?” a tina. 50 Tede ahih kah awlthungna te ahimi lawng yaakming u nawh. 51 Tecoengah Jesuh tah ana pa yuvaa oen haih Nazaret la te meel koep u, te ah te poe awm tih a manu oen ana pa awl te a ngaai pe. A manu lawngah he thaihu boeih he a kaw khuiah a khueh. 52 Jesuh tah pumtaksa oen cuihna ben ah roeng hang tih Pathen oen thlaanghing haiah mik-hai theen a dang.
1 Sengpahrang sangluel Teberias lawng a ram a ukna kum thlaingaa a law vengah te Pontias Pilat tah Judia ram ukkung la awm, Herod tah Galili ram ukkung la awm tih a manau Filip tah Ituria oen Trakhonitis ram ukkung la awm; Lisanias tah Abilen ram ukkung la awm tih, 2 Annas oen Kaiafas tah khawsoeih bawi la awm hih. Tevengah ramhum huhang ah aka awm Zekhariah capa Johan tengah Pathen awl te a pha. 3 Tedawngah Johan tah Jordan tuiva tengvaai kah ram tawm boeih ah cet tih, “Na thawlhna yut u langtah baptisma dang u lah, te ah ni na thawlhna te Pathen lawng khawdawp avan ngaai ai,” tila a thui. 4 Tawngha Isaiah kah cabu dawngah a thut angla, “Thlaang pakhat ramhum huhang ah paang tih: ‘Bawipa ham lawngpui te oepsoeh la roekbah u lah; a cehna lawngpui te adoengla sai uh! 5 Longhoi boeih te et uh, khawcung rammawl boeih te avan at la sai uh, cehkel lawngken te adoengla sai u lang lawngthe lawnghu te hal thlaula sai uh: 6 Thlaangphun boeih lawng Pathen kah thlawnna te a huh ai! tila a thui.” a tina te soep. 7 Thlaangping lawngah baptisma dang ham Johan tengla te law u. Johan lawng ahimi nala te, “Nangmi ruul hue, aka law ham koei Pathen kah dantatna kalawng na loeih u thai ai tila a-u lawng avan thui u? 8 Na thawlhna na yut u te thaihu theen saina oen tueng sak uh. Abraham tah mami cuunkung patuer ni tila nangmi lawng thui u mailai tlaih boel. Pathen lawngah he lungto he a lawh vetih Abraham kah cadil la a sai thai ti he kavan thui u! 9 Thingkung boeih te ayung ah vung hamla haica te a toen oepsoeh poen; Athaih theen aka thaih nawh thingkung boeih te a vung vetih hai dawngah a phuum ai.” a tina. 10 Thlaangping lawngah, “Te tih atah kaimi lawng n'tu ka sai ai?” tila a doet u. 11 Ahih lawngah, “Angki yung hih aka khueh lawngah aka khueh nawh thlaang te yung at ah pe seh, caak awkk aka khueh lawngah aka khueh nawh thlaang thli te pe thoem seh.” a tina. 12 Mangmu cawikung thli khatsut tah baptisma dang ham law u tih, “Saya, kaimi ta n'tu ka sai u ai?” a tina u. 13 Ahimi nala te, “Mangmu te cawi ham tuueng lak ah apuehla cawi boel,” a tina. 14 Raalkap khatsut lawngah khaw, “Kaimi ta, n'tu ka sai u ai?” tila ahih te a doet u. Ahih lawngah, “A-u tengkah khaw tangka te rot boel, a-u khaw asoeng nawh la ngah ngah thawlh peel boel. Namami kah thapang oen na ngaai tluep sak uh.” a tina. 15 Thlaang yahawh lawng Messiah a ngaiuepna te pho koep tih Johan amah he Messiah poen kai aw ti u tih a kawpoek rai u. 16 Tedawngah Johan lawng ahimi nala te, “Kai lawngtah tui oen ah baptisma kan peek u, tede thlaang pakhat kai lak ah aka lenduet te law ai. Kai tah ahih kah khawmuek rui Pateng thlam pe hamla ka mueinai nawh. Ahih lawngtah nangmi te Ciim Muithla oen hai oen ah baptisma m'peek ai. 17 Ahih lawngah caang yahna raa te a pawm, Caangthaih boeih te a yah vetih caangtak te thaidi khuiah a khueh ai; tede caanghii te tah aka duek tlaih nawh hai dawngah a phuum ai.” a tina. 18 Johan lawng aphunphun la Awlthang Theen te thlaangping tengah a phawng tih a thawlhna te yut u hamla a thuituen. 19 Tede ukkung bawi Herod lawngah a manau yu Herodias te a rot tih a yuna dawngah khawseh, atloe athe thaihu broela a sai dawngah Johan lawng ahih te a siim. 20 Tecoengah Herod lawng athe-eep ngaai thaihu te a sai. Johan te thong ah a thlaak. 21 Thlaangping lawng baptisma a dang u coeng atah, Jesuh khaw baptisma a dang van. A thangthui vengah te ahih ham vaan te awng u tih, 22 Ciim Muithla tah pumtaksa la akhuu angla te ahih sawah va law thuk. Tecoengah vaan kah awl lawng, “Nang tah kan lungna ka Capa ni. Na sawah ka ngaai tluep ti.” tila a thui. 23 Jesuh lawng amah kah bii a tong vengah te a kum sawm thum yunyan law poen. thlaang thli lawngtah ahih he Josep capa tila a poek u. Josep tah Heli capa la awm. 24 Heli tah Matthat capa, Matthat tah Levi capa, Levi tah Melkhi capa, Melkhi tah Jannai capa, Jannai tah Josep capa, 25 Josep tah Mattathias capa, Mattathias tah Amos capa, Amos tah Nahum Capa, Nahum tah Esli capa, Esli tah Nakkai capa, 26 Nakkai tah Maath capa, Maath tah Mattathias capa, Mattathias tah Semin capa, Semin tah Josek capa, Josek tah Joda capa, 27 Joda tah Joanan capa; Joanan tah Resa capa; Resa tah Jerubbabel capa; Jerubbabel tah Shealtiel capa; Shealtiel tah Neri capa; 28 Neri tah Melkhi capa; Melkhi tah Addi capa, Addi tah Kosam capa, Kosam tah Elmadam capa, Elmadam tah Er capa, 29 Er tah Joshua capa, Joshua tah Elizer capa, Elizer tah Jorim capa, Jorim tah Matthat capa, Matthat tah Levi capa; 30 Levi tah Simeon capa, Simeon tah Judah capa, Judah tah Josep capa, Josep tah Jonam capa, Jonam tah Eliakim capa, 31 Eliakim tah Melia capa, Melia tah Menna capa, Menna tah Mattatha capa, Mattatha tah Nathan capa, Nathan tah Devid capa, 32 Devid tah Jesi capa, Jesi tah Obed capa, Obed tah Boaz capa, Boaz tah Salmon capa, Salmon tah Nashon capa, 33 Nashon tah Amminadab capa, Amminadab tah Admin capa, Admin tah Arni capa, Arni tah Hezron capa, Hezron tah Perez capa, Perez tah Judah capa, 34 Judah tah Jakob capa, Jakob tah Isak capa, Isak tah Abraham capa, Abraham tah Terah capa, Terah tah Nahor capa, 35 Nahor tah Seruk capa, Seruk tah Riu capa, Riu tah Pelek capa, Pelek tah Eba capa, Eba tah Shelah capa, 36 Shelah tah Kainan capa, Kainan tah Arpaksad capa, Arpaksad tah Shem capa, Shem tah Noah capa, Noah tah Lamek capa, 37 Lamek tah Metuselah capa, Metuselah tah Enok capa, Enok tah Jared capa, Jared tah Mahalaleel capa, Mahalaleel tah Kenan capa, 38 Kenan tah Enos capa, Enos tah Seth capa, Seth tah Adam capa, Adam tah Pathen Capa ni.
1 Jesuh tah Ciim Muithla oen ah betoetla Jordan tuiva kalawng va meel, tecoengah Muithla lawng ramhum huhang la te a ceh puei, 2 te ah te Raaibawi lawng khawhin sawmlii khui puet ah ahih te a suek ahalh. Teveng khui puet ah n'tu khaw ca nawh, tedawngah atloeih lam atah a bung pawng. 3 Raaibawi lawng ahih nala te, “Nang he Pathen Capa tangtang atah he lungto he takawi la a coenggna ham awl thlaw lah.” a tina. 4 Tede Jesuh lawngah, “Caciim lawngah, ‘Thlaanghing he buh bueng oen ah hing thai nawh?’ tila a thui” a tina. 5 Tecoengah Raaibawi lawng a ceh puei tih apabe atah dilai dawngkah ram boeih te a huh sak. 6 Raaibawi lawng, “Huham tharana boeih oen he kah bawi areng kuirangna boeih he nang kan pe ai, he ang thli boeih he ka kut dawngah peek la awm poen tih kai lawng ka tuek thlaang te ka peek thai. 7 Tedawngah nang lawng kai he nan bok atah he ang thli boeih he nang ham poen ni,” a tina. 8 Jesuh awng, “Caciim lawngah, “Bawipa na Pathen bueng te ni na bok vetih ahih bueng kah bii te ni na bi ai,’ tila a thui,” a tina. 9 Tecoengah Raaibawi lawng Jerusalem la te a ceh puei, Tempal bok-im kah imphu ah te a khueh tih, “Nang he Pathen Capa tang atah he kalawng ah sungpung thuk lah. 10 Metihtiah Caciim lawng, ‘Nang te khoemdoen hamla Pathen lawng amah kah vanthlaang thli te avan tuih ai,’ ti. 11 ‘Na khow Pateng khaw lungto dawng na khuek nawh ham ahimi lawng a kut oen te m'pawm ai,’ tila a thui.” a tina. 12 Tede Jesuh lawng, “Caciim lawngah, ‘Bawipa na Pathen te noekdak boel’ tila a thui,” a tina. 13 Jesuh te Raaibawi lawng soeprepla a suek a halh coeng atah kawlkalh tah a nawng taak. 14 Tecoengah Jesuh tah Galili la meel tih Ciim Muithla kah huham tharana tah ahih sawah awm. Ahih kawng awlthang te te kah pengpang boeih ah thaang khonghak. 15 Ahih lawng sinakok ah a cang puei tih thlaang boeih lawng a koeh u. 16 Tecoengah Jesuh te amah apuer ayawngna Nazaret khawpui la cet tih Sabbath hin atah a ceh nooek angla Sinakok la te cet. Caciim te tae hamla ahih te pai hang, 17 tawngha Isaiah kah cayaawl te a peek u, ahih lawng cayaawl te a thlam tih he tila a thutna hue te a huh, 18 “Bawipa kah Muithla tah ka sawah awm, metihtiah khawdeng lungma thli tengah awlthang theen thui hamla ahih lawng kai he n'tuek poen. Sal la a khawh khaklal thlaang thli tengah loeihna te thui hamla, mikpum haiying thli a mik a tueng koepna ham; Heemtekna patang khang thlaang thli a loeihna ham, 19 Bawipa lawng a thlaang thli a thlawnna tue tah avan pha poen, tila phawng hamla kai he n'tuek poen,” tila a thut te a tae. 20 Jesuh lawng cayaawl te a yaawl tih aka khoemkung kut ah te a peek koep tih ngawl. Sinakok khuikah thlaang boeih lawng mikkhah ohla ahih te ringg a bueh u, 21 ahimi nala te, “Caciim dawngkah ka tae awl te tihin ah soep poen.” a tina. 22 Ahih kah awl thui lawng ahimi boeih kah thinkaw khuek adeng tih ahih lawng awl theen kaa theen a thui te a kawpoek la rai u tangkiik. Ahimi lawngah, “Ahih he Josep capa nawh aw?” ti u. 23 Ahimi nala te, “Tatuk awl dawngah, ‘Siibawipa, namah oen namah te tuui-ahaai u lah,” tila a thui awl te kamah he nan tina u lettat ai tite ka ming. Kapernaum khaaw ah na sai tila ka yak u thaihu te ang van te kamah khaaw ah he sai van lah,’ tila nan tina u ai. 24 He he kavan thui u, “Tawngha he amah a awmna khaaw ah do u nooek nawh. 25 Ka thui he hutung u lah; Elijah dung vengah kum thum coengah kum vangg ah khaw kaang tih ram pum ah khawthe khawkha vengah te Israel ram khuiah huhai tumtee broela awm tang tang. 26 Elijah he Israel ram kah a-u huhai khat tengah khaw tuih nawh, tede Sidon ram kah Zarefat khaaw ah aka awm huhai teng bueng ah ni a tuih. 27 Tawngha Elisha dung vengah te Israel ram kah thlaang yahawh tah lungkiit haibe natna a khueh u; ahimi timkah a-u khat khaw hoeih nawh de Siria ram kah Naaman pakhat bueng tah hoeih.” a tina. 28 Sinakok ah aka awm thlaang thli lawng a yaak vengah a thin toek u. 29 Ahimi lawngah tho u tih Jesuh te khawpui khui kalawng adaubenla a mawt u tih pu-ngaw pathleng ah tulh voek ham khawpui a phuengna tlaangpoer la te a khuen u, 30 tede ahih tah thlaangping tim ah te yingyelh tih cet vik. 31 Tecoengah Jesuh tah Galili ram, Kapernaum la te cet, te ah te Sabbath hin ah thlaangping te a cang puei. 32 Ahih lawng saithaina aana oen a thui dawngah ahih kah cangpueina te ahimi boeih a kawpoek la rai u. 33 Sinakok khuiah te raaithe lawng a kuun thil thlaang pakhat awm; ahih lawng angaihhlangla paang tih, 34 “Aah! Nazaret Jesuh, kaimi he metila kan tina ai na ti? Kaimi he phe ham aw na law? Nang he a-u tite kan ming: nang tah Pathen kah aciim laipai ni!” a tina. 35 Jesuh lawng raaithe nala te, “Awl muehla te kah thlaang kaw khui kalawng cet loeih!” tila awl a peek. Raaithe lawngah te kah thlaang te ahimi haiah te a tlim sak tih nganbawh peek muehla ahih kah a kaw khui kalawng cet. 36 Thlaang boeih te a kawpoek la rai tih pakhat oen pakhat, “He awl he me ang awl kai? He thlaang lawngah ahu-aham oen raaithe thli awl a peek tih ahimi tah cet khonghak u mai!” ti u. 37 Tecoeng atah te kah pengpang ram pum ah Jesuh kawng te thaang khonghak poen. 38 Jesuh tah sinakok kalawng suntla tih Simon im la te cet. Simon kah a mase hutaa te tlo malcal tih ahih kawng te Jesuh tengah a thui pe u. 39 Jesuh lawng cet tih ahih tengah te pai tih tlawh anatna kalawng hoeih loeih a tina. Tevengah a sanat te hoeih, tho pahoei tih ahimi te a do adan. 40 Khaw a tlaak thuk coeng atah tlawh natna soeprep oen aka tlo thli te a paya thli lawngah Jesuh tengla avan law puei u; ahimi pakhat rip sawah te a kut a tloeng pe tih ahimi boeih te a hoeih sak. 41 Raaithe thli lawngkhaw thlaang yahawh hlang kah a kaw khui kalawng co u tih, “Nang tah Pathen Capa ni,” tila paang u. Raaithe thli lawng ahih te Messiah ni tila a ming u dawngah ahimi te awl cal nawh ham Jesuh lawng awl a peek. 42 Khaw athaih khoeng atah ading apuekna huen benla te khawpui khui kalawng ah cet. Thlaangping lawng ahih te a tlap u tih a huh u veng atah ahimi te ceh taak nawh hamla a thlawh u. 43 Tede ahimi nala te, “Pathen kah Ram kawng Awlthang Theen he atloe khawpui ah khaw ka phawng ham awm, te tila aka thui ham ni Pathen lawng Kai he n'tuih.” a tina. 44 Tedawngah ram pum kah sinakok bok-im ah te phung a thui.
1 Hin at ah Jesuh tah Kenisaret Tuilii-keeng ah a pai vengah te thlaangping lawng Pathen awl hutung hamla ahih tengah te toklekla la law u. 2 Tevengah tuikeeng ah lowng pahih a kiing u te a huh; tuihawi thli lawng lowng te a ceh taak u tih amami kah lok thli te a suk u. 3 Jesuh lawng Simon kah lowng khuiah te kuun tih tuikeeng kalawng tuilii benla lowng te a thoeih sak. Jesuh te lowng khuiah ngawl tih thlaangping te a cang puei. 4 Ahih lawng awl a thui coeng atah Simon nala te, “Tuilii dung benla lowng te tulh langtah na paya thli oen lok te voei u lah.” a tina. 5 Simon lawng, “Bawipa, khawyiin puet ah lok ka heeng khiing u poen de nga khat khaw ka tu u nawh. Tede nang awl ah ka heeng u de lah ai,” a tina. 6 Lok te a heeng u atah nga yahawh khuengdeng te a tuuk u tih lok te thok pawn tawm. 7 Tedawngah atloe lowng dawngah aka awm a paya thli te a kut oen a yavaih u tih law u lang m'bawm uh a tina. Ahimi te law u tih lowng pahih dawngah nga te abetoet la a sang u tih tui dawngah lowng te buekk dalh. 8 Simon Piter lawng tete a huh vengah Jesuh haiah khuklu oen cuengkueng tih, “Bawipa, Kai he thlaangthawlh ni, n'ceh taak mai hawn!” a tina. 9 Nga te yahawh khuengdeng a tuuk u dawngah Piter amah oen aka awm haih thli tah a kaw poek rai u. 10 Simon oen nga aka tu haih Zebedi ca rawi Jeem oen Johan a puei rawi te khaw a kawpoek rai hih van. Jesuh lawng, “Rih boel; tahe kalawng tah thlaang tukung la na awm ai.” a tina. 11 Ahimi lawngah lowng te tuikeeng la a doek u coeng atah soeprep boeih te a ceh tak u tih Jesuh hu ah bang u. 12 Vaikhat ah Jesuh tah haibe natna lawng a caak kawlsawp thlaang pakhat a awmna khaw ah te awm. Ahih lawng Jesuh te a huh vengah dilai dawngah buekuep tih reenna a bih, “Bawipa na kawngaih atah haibe natna he navan ciing sak thai!” a tina. 13 Jesuh lawng a kut a thueng tih ahih te a tek, “Ka ngaih ta, hoeih hawn loeih.” a tina. Kawlkalh ah te thlaang te haibe natna hoeih pahoei. 14 Jesuh lawng ahih nala te, “A-u tengah khaw thui boel, tede khawsoeih tengla cet phaat langtah ahih lawng nang he n'yutt n'yam seh; tecoengah na hoeih poen tite thlaang boeih lawng a mingna ham Mosi kah awlpeek angla luciik thawthuengna te sai.” a tina. 15 Tede Jesuh kawng te tah thaang tare tih rangpui thlaangping lawng ahih kah awl thui te yaak hamla law u tih ahimi kah tlawhnatna te a hoeih pe sak. 16 Tede ahih tah ading asuekna huen la te cet tih te ah te thangthui. 17 Hin at ah Jesuh lawng a cang puei u lii vengah te Galili oen Judah ram kah khawpui boeih oen Jerusalem kalawng aka law Farasi thlaang khatsut oen phungawl cangpueikung thli te ngawl u. Thlaangtlo hoeih sakna hamla Bawipa kah huham tharana tah Jesuh tengah awm. 18 Thlaang khatsut lawngah aka khawn thlaang pakhat te a himbai phaih dawngah avan kawh u, ahih te Jesuh haiah khueh pe ham im khuila khuen hamla te a yawm u. 19 Thlaang ayahawh aih dawngah im khuila khuen u thai nawh. Tedawngah ahih te imphu la a khuen u tih imphu te a bauh u, tecoengah thlaangping lakli Jesuh haiah thlaangtlo te himbai phaih dawngah a thlaak thuk u. 20 He tih aih la ahimi lawng oengna a khueh u te Jesuh lawng a huh vengah aka khawn thlaang nala te, “Ka puei, na thawlhna boeih khawdawp ngaai la awm poen.” a tina. 21 Phungawl cangpueikung thli oen Farasi thlaang thli lawng, “Pathen thekhana awl aka thui he kah thlaang he a-u? Pathen pakhat bueng lawng ni thawlhna khawdawp a ngaai thai ta!” tila ahimi lawng a poek u. 22 Jesuh lawng ahimi kah poekna te thiim a ming tih ahimi nala te, “N'tu ah te ang thaihu te na poek u? 23 ‘Na thawlhna boeih khawdawp ngaai la awm poen,’ tihnawhtah, ‘Tho lang cet loeih’ tila thui he aw aka yoei bet kai? 24 Tedawngah Thlaanghing Capa lawng dilai dawng thawlh khawdawp ngaai thaina aana a khueh tite nangmi kan ming sak u ai.” a tina. Tedawngah aka khawn thlaang te, “Tho loeih, namah kah himbaiphaih he lo langtah namah im la cet loeih, kan tina he!” a tina. 25 Te thlaang lawngah ahimi boeih haiah pai pahoei, a ralhna himbai phaih te a lawh koeloe, Pathen te a tih koeh im la te cet. 26 Ahimi boeih tah a kawpoek rai u tangkiik! Ahimi lawng rih oen thuen ruila Pathen te a thangpawm u, “Tihin atah kawpoek rai tangkiik thaihu te mami lawng n'huh u poen,” tila a thui u. 27 He coengah te cet tih mangmu cawikung Levi aka miingna amah kah yung im ah aka ngawl te a huh. Jesuh lawng ahih nala te, “Ka hu ah baang lah” a tina. 28 Levi lawng tho tih soeprep boeih te a ceh taak tih a hu ah koe a vai. 29 Tecoengah Levi lawng amah im ah buh veelna poei Jesuh ham a sai pe tih kamyin kamlai tim ah mangmu cawikung thli oen atloe thlaang thli te awm u. 30 Farasi thlaang khatsut oen amami bu khuiah aka thuum van Phungawl cangpueikung khatsut lawng Jesuh kah hubang thli tengah te caitoek u tih, “N'tu ah nangmi lawng mangmu cawikung hue oen thlaangthawlh thli oen ah buh te na caak na awkk haih u?” a tina u. 31 Jesuh lawng ahimi nala te, “Sading thlaang lawngah siibawi ngoe nawh, tede thlaangtlo bueng lawng ni angoe a tina. 32 Kai tah thlaangdoeng thli te khue ham oen ah thawlh yut sak ham ka law nawh tih thlaangthawlh thli te khue ham oen ah thawlh yut sak ham ni ka law.” a tina. 33 Thlaang khatsut lawng Jesuh nala, “Johan kah hubang thli lawngtah buh a yeh u poepa tih thangthui u, tecoengah Farasi hue kah hubang thli lawngkhaw te tila te a sai u van; tede nang kah hubang thli lawngtah a caak a awkk u mai nawh pai he.” a tina u. 34 Jesuh lawngah, “Yuluipoei ah poei aka bur thlaang thli te yulokung oen a awm haih khuiah ahimi te buh a yeh sak ai tila na poek u aw? Buh yeh sak manawh! 35 Tede yulokung te ahimi teng kalawng athlala a khuenna khawhin te a pha ai, tevengah ahimi lawng buh a yeh u badai” a tina. 36 Jesuh lawng ahimi tengah he kah thuidoetna he khaw a thui pe: “A-u lawngkhaw angki aruem te hisa athai oen ah baw nawh, angki aruem te hisa athaai oen a baw atah hisa athaai te angki aruem oen ah roepcap manawh. 37 A-u lawngkhaw misurtui athaai te saphaw yuukhap aruem dawngah thloen nooek nawh, metihtiah misurtui athaai lawngah saphaw yuukhap te a pawkk sak vetih misurtui khaw ceu thloep ai, saphaw te khaw pawn ai. 38 Te lak atah misurtui athaai te saphaw yuukhap athaai thik dawngah thloen ham awm! 39 A-u lawngkhaw misurtui aruem te a awkk coeng atah misurtui athaai te ngaih tlaih nawh. Misurtui aruem te tah tuui ngaai.” tila a thui pe.
1 Sabbath khawhin ah Jesuh lawng loha lakli kalawng ah te cet. A hubang hue lawngah caangvui te a yuun u, a kut oen a nawi u tih a caak u. 2 Farasi thlaang khatsut lawngah, “Mami kah Phungawl lawng Sabbath khawhin ah sai nawh hamla a thui te n'tu ah nangmi lawng na sai u?” tila a doet. 3 Jesuh lawng ahimi nala te, “Devid oen a thlaang thli lawng a bung a pawng u vengah n'tu a sai tite ca na tae nooek u nawh aw? 4 Ahih lawng Pathen im khuila cet tih, Pathen tengah a nawn u takawi te a lawh tih a caak, tecoengah amah kah thlaang thli te khaw a peek. Khawsoeih hue bueng lawng a caak thai takawi, ahimi lawng a caak te mami kah Phungawl oen kalh u teta!” a tina. 5 Tecoengah awlcuina ah Jesuh lawng, “Thlanghing capa tah Sabbath Bawi ni” a tina. 6 Atloe Sabbath khawhin ah Jesuh tah Sinakok bok-im la te cet tih a cang puei. Te ah te a bantang kut aka kheem thlaang pakhat awm. 7 Khatsut Phungawl cangpueikung thli oen Farasi thlaang vaang hue lawngah Jesuh kah a sai he soeng nawh tila thawlh peel ham a ngaih u, tedawngah Sabbath khawhin ah kut kheem te a hoeih sak lah ai nuem tite huh hamla rep a doen u. 8 Tede Jesuh lawng ahimi kah poekna te a ming tih kut kheem thlaang nala te, “Pai langtah hai benla he law lah,” a tina. Te thlaang lawng tho hang tih pai. 9 Tecoengah Jesuh lawng ahimi nala te, “Awl kan doet u lah ai: Mami kah Phungawl lawng Sabbath khawhin ah mami he n'tu sai sak ham a ngaih? Thlaang bawm ham aw, tihnawhtah nganbawh peek ham aw? Thlaang kah hingna thlawn ham aw, tihnawhtah phe ham aw?” a tina. 10 Jesuh lawng a teng-avai ah te mang tih a dan; tecoengah te thlaang nala te, “Na kut te thueng lah” a tina. A hih lawng a thui angla a sai tih a kut te koep theen. 11 Ahimi te a thin sa soeh u tih Jesuh he metila n'sai lah ai tite a thui u. 12 Tecoengah Jesuh te thangthui hamla tlaang la cet tih te ah te yiin at puet Pathen tengah thangthui. 13 Khaw athaih atah a hubang thli te a tengla a khue tih ahimi timkah paha thlaihih te a tuek, te thli te Celtuih tila miing a sak: 14 Ahimi hue kah a miing tah, Simon (Piter tila khaw a thui u) oen a manau Andru; Jeem oen Johan, Filip oen Bartalomiu; 15 Matthai oen Tawmas, Alfias capa Jeem oen Simon (Phunkuup a ti u te), 16 Jeem capa Judas oen paipi thleepkung Judas Iskariot, he hue he ni. 17 Jesuh tah celtuih thli oen tlaang kalawng rum thuk u tih dilai avan at na ah a hubang thlaang broe oen ah te pai u. Te kah thlaangping yahawh hlang te tah Judia peng pum oen Jerusalem kalawng ah, tuivakeeng kah khawpui Taiar oen Sidon kah aka law thlaang thli ni; 18 ahimi lawngah a awl thui te yaak ham oen ah a tlawhna te hoeih sak ham a ngaih u dawngah law u. Raaithe lawng khawdeng a peek thlaang thli khaw law u tih hoeih u. 19 Ahih kah huham tharana te a pum dawng kalawng pooeng tih ahimi te a hoeih sak dawngah thlaang boeih lawng ahih te tek ham a yawm u. 20 Jesuh lawng a hubang thli te a bueh tih, “Nangmi khawdeng thlaang thli tah yotheen kam-awmna na dawng u; Pathen Ram tah nangmi ham ni! 21 “Tahe ah buh mueh buhpawng la aka awm thli tah yotheen kam-awmna na dawng u; Nangmi tah na bung hah ai! Tahe ah aka ruungrap nangmi hue tah yotheen kam-awmna na dawng u; nangmi nuihcalna te awm badai! 22 Thlaanghing Capa kawngah nangmi te thlaang lawngah n'thina u tih n'hoett sut u, n'sal aphaam tih athela n'thui u atah nangmi tah yotheen kam-awmna na dawng u! 23 “Te tila n'sai u atah na kaw hoe sak lang awmngaih oen laam u lah, metihtiah vaan ah nangmi ham kutdo alentloe te avan khueh poen. Metihtiah tetih van la te ahimi kah patuer thli lawng tawngha thli te a sai u roe poen. 24 “Tede tahe ah nangmi kuirang thlaanglen thli ham tah khawmap tangkiik mai mah aw; nangmi tah hingkhui awmtheenna na boenn u poen! 25 Tahe ah bung aka hah thlaang thli ham tah khawmap tangkiik mai mah aw; nangmi tah buhmueh buhpawng la oen na van ai! Tahe ah nangmi aka nui aka cal thlaang thli ham khawmap tangkiik mah aw; nangmi tah lungnat yaak oen na rap u ai! 26 Thlaang lawng nangmi te n'koeh u vengah te khawmap tangkiik mah aw; ahimi kah patuer thli lawng te tila ni tawngha rawlrap thli te a koeh u van. 27 “Tede ka awl he aka hutung nangmi tengah kavan thui u: Na raal te lungna u lah, nangmi aka thina thlaang thli hamla theenna te sai pe uh, 28 Nangmi aka tapvoep thli te yotheenna pe u langtah nangmi thekhana thlaang thli ham thangthui pe uh. 29 Thlaang lawngah na beeng khatben te avan bel atah khatben te khaw bel sak baal; pakhat lawngah asawkah na buen angki te avan lawh atah adangkah na buen angki te khaw pe hawn. 30 Na tengah thaihu aka bih thlaang te pe u langtah pakhat khat lawng na thaihu te a lawh atah bih koep boel. 31 Thlaang lawng na sawah van sai seh tila na ngaih van angla thlaangtloe sawah khaw sai van. 32 Nang aka lungna thlaang bueng te na lungna atah metila yotheen kam-awmna te dang hamla na poek? Thlaangthawlh thli lawngkhaw ahimi aka lungna te a lungna van ta! 33 Tecoengah nang ham theenna aka sai thlaang bueng sawah theenna te na sai atah n'tu ah yotheen kam-awmna te dang ham na poek? Thlaangthawlh thli lawng Pateng te tila a sai u van ta! 34 Aka sah thai koep ham na ngaaiuep thlaang bueng tengah thaihu te na pu atah n'tu ah yotheen kam-awmna te dang hamla na poek? Thlaangthawlh thli lawng Pateng ataring ah dang koep hamla thlaangthawlh thli te thaihu a pu van ta! 35 Nangmi lawngtah te tila sai boel! Na raal thli te lungna langtah ahimi sawah theenna te sai peh; thaihu te pu u lah, dang koep ham ngaiuep hanlan tlaih boel. Nangmi lawng alentloe kutdo na dang u vetih Tloeng Khoelh Pathen kah ca anau la na awm u ai. Metihtiah ahih tah lungvatna aka ming nawh oen thlaangthaipalat thlaang thli sawah theenna te a sai pe. 36 Nangmi kah na Pa lawng thlaang reenna kaw a poek van angla nangmi lawngkhaw thlaang reenna kaw te poek uh. 37 “Thlaangtloe te awl cek boel, tetih atah Pathen lawng nangmi te awl n'cek van manawh; thlaangtloe te sal-aphaam boel, tetih atah Pathen lawng nangmi te n'sal-aphaam van manawh; thlaangtloe sawah khawdawp ngaai u lah, tetih atah Pathen lawng na sawah khawdawp a ngaai van ai. 38 Thlaangtloe te do a dan u lah, Pathen lawng nangmi te n'dodan van ai: Atak tang ni, abetoet la avan loeng ai, apueh asawm la te na dang ai, na kut dawngah avan lun vetih na phueih tloel toela m'peek ai. Nang lawng thlaangtloe ham na hawna loengkhong te ang van te Pathen lawng nang ham a hawna van ai” a tina. 39 Tecoengah Jesuh lawng he tila thuidoetna awl a thui pe: “Mikpum pakhat lawng atloe mikpum pakhat te mawt thai nawh; a mawt atah pahih bok la ungrawm khuiah tla ai. 40 Sengcamoe he cangpueikung saya lak ah thoem soeh aih nawh; tede sengcamoe boeih lawng amami kah cangna te a coeng boeih atah a saya angla awm ai. 41 Namah mik khuiah thingboeng aka awm te poek ohla n'tu ah na boenhui thli mik dawngkah muenmawi te na bueh? 42 Namah mik khuiah aka awm thingboeng Pateng khaw na huh thai nawh maiah na maya manau nala te, ‘Na mik dawngkah muenmawi te kavan lo ai ne?’ na tina. Nangmi thlaangthaipalat hue! Lamhacuek la namah mik dawngkah thingboeng te lo, tecoengah na maya manau mik khuikah muenmawi te lawh pe ham atheenla na huh thai ai.” a tina. 43 Thingkung theen lawng athaih the te thaih nawh, thingkung the lawngkhaw athaih theen te thaih nawh. 44 Thingkung boeih he athaih apai oen ming thai la awm; nangmi lawngah thliingkung dawngkah thaidut thaih te na bit u nooek nawh, thliingkung dawng-kah misur thaih khaw na bit u nawh. 45 Thlaang theen lawngtah a thinkaw lungbui khuikah thaihu theen a tung asep khui kalawng atheen thaihu te a thoeng sak; thlaangthe lawngtah thaihu the a tung asep te a thoeng sak. Metihtiah thinkaw khuiah abetoet te hui a kaa lawng a thui. 46 “Kai lawng kavan thui te tah na sai u nawh maiah, n'tu ah nangmi lawng, ‘Bawipa, Bawipa’ nan tina u? 47 A-u khaw ka tengah law tih ka awl thui a hutung tih aka vai tah n'tu oen a lawh u tite kan huh sak u ai. 48 Ahih tah tuungrawm te adungla a to tih lungnu dawngah tuung acakla aka liing im sakung oen lo u. Tuivatui te alen atah te kah im te tui lawng a liw tih a linglok, tede im te acakla a sak dawngah im tah hinghuen nawh. 49 Tede a-u khaw ka awl he a yaak tih aka vai nawh thlaang te tah tuungrawm te adungla to nawh tih imtuung acakla aka sut nawh, im aka sa coplap thlaang oen lo u; tuiliw lawngah te im te aningnoek vengah tlim pahoei; metihtlukla rih ham a awm!” a tina.
1 Jesuh lawng he awl boeih he thlaangping tengah a thui boet coengah Kapernaum khaaw la te cet. 2 Te kah aka awm Rom raalbawi lawngah a lungna tangkiik tuihyoeihthlaang pakhat a khueh. Te thlaang te tlo tih duek tawm. 3 Te kah raalbawi lawng Jesuh kawng te a yaak vengah Judah ahaamca thli te a tuih tih a tuihyoeihthlaang te hoeih sak hamla a ceel sak. 4 Ahimi te Jesuh tengla law u tih reenna te caalla a bih u, “He thlaang he na bawm roeroe hamla angoe. 5 Ahih lawngah mami phun he a lungna tih kaimi ham sinakok pakhat avan sak.” a tina u. 6 Tedawngah Jesuh te ahimi oen cet haih u tih, im te a pha tawm u atah raalbawipa lawngah a paya thli te avan tuih tih, “Bawipa, patang palai tlap boel. Ka im la nang na law ham ka koeih ka vaih nawh, 7 na tengla kamah law hamla khaw ka ting ka tawkk nawh tila ka poek u. Na awl mah thlaw doek mai, kai kah tuihyoeih-thlaang he hoeih mai badai. 8 Kai khaw ka sawkah bawi haam thli kut huiah ka awm tih kai kah kut huiah raalkap thli awm patoeng van baal. Kai lawngah pakhat khat te, “Cet lah!” ka tina atah cet tih atloe pakhat te, ‘Law lah!’ ka tina atah va law, ka salpa te he he sai lah ka tina atah a sai,” tila te a thui sak u. 9 Jesuh lawng he awl he a yaak vengah a kawpoek la rai, amah huvai thlaangping tengla te maang dak phai tih, “Ataktang kavan thui u, he ang oengna he Israel thlaang thli tim ah Pateng khaw ka hu thlan hun!” a tina. 10 A thlaangtuih thli te raalbawipa im la meel u tih a tuihyoeihthlaang sadingla a awm te a huh u. 11 Tecoeng adiw thlan ah Jesuh te Nain a ti u khawpui la te cet, a hubang thli oen thlaangping lawngah a hu ah a vai u. 12 Khawpui vawngka te a pha khoeng vengah rawkk aka thak thlaangping te law u. Aka duek thlaang te tah huhainu kah a capa pakhatca bueng la a awm dawngah khawpui khuikah thlaang yahawh hlang te huhainu oen haih law u. 13 Bawipa lawng te kah huhainu te a huh vengah a reen tangkiik tih ahih nala te, “Rap tlaih boel” a tina. 14 Tecoengah Jesuh te cet phai tih repp te a tek, tevengah rawkk aka kawt thlaang thli te cot pai u. Jesuh lawng, “Cadawng tawngpang! Tho hang lah, kan tina he!” a tina. 15 Thlaangduek te ngawl tih awl a thui, tecoengah Jesuh lawng ahih te a manu tengah koep a peek. 16 Ahimi boeih lawng rih ruila Pathen te a thangpawm u. “Aka lenduet tawngha tah mami tim ah thoeng poen, Pathen tah a thlaang thli thlawn hamla law poen!” tila te ahimi lawng a thui u. 17 He awlthang Jesuh kawng he Judah ram pum oen a teng-avai ram boeih ah thang khonghak. 18 He thaihu boeih kah akawng alam he a hubang thli lawng Johan tengah a thui pe u, tedawngah ahimi timkah laipai pahih te a khue tih, 19 Bawipa te doet sak hamla a tuih, “Nang he Johan lawngah aka law ham koei thlaang a tite nang poen aw, tihnawhtah kaimi lawng thlaangtloe te ka ngaiuep u hun ai aw?” tila te a doet sak. 20 Jesuh teng apha hih vengah ahih rawi lawng, “Johan lawngah aka law ham koei thlaang a tite nang he poen aw, tihnawhtah kaimi lawng thlaangtloe ka ngaiuep u hun ai aw,’ tila doet sak hamla kaihih he n'tuih” a tina. 21 Tevengah te Jesuh lawng thlaang-thli kah a tlawhna, natna oen raaithe lawng a kuun thil thlaang thli te a hoeih sak tih mikpum thlaang broe te khaw mik a tueng sak koep. 22 Jesuh lawng Johan kah thlaangtuih laipai rawi nala te, “Cet koep hih langtah na huh boeih oen na yaak boeih he Johan tengah thui pe hih: mikpum thli a mik tueng poen, khowkheem khowbai thli cet thai poen, lungkiit haibe natna aka tlo thli anatna ciing boeih poen, haapang lailot thli lawng awl a yaak poen, thlaangduek tho koep poen, Awlthang Theen he khawdeng lungma thlaang thli tengah a thui u poen. 23 Kai kah kawng alam dawngah ngaithliwhna aka khueh nawh tah yotheen aka dawng thlaang ni! tila thui pe” a tina. 24 Johan kah laipai rawi te a mel koep coeng atah, Jesuh lawng Johan kawng te thlaang rangpui tengah a thui: “Nangmi lawng ramhum huhang ah Johan tengla na ceh u te, n'tu huh hamla na ngaiuep u? Yilh lawng a yawng mailai caapu thing te huh ham aw na ngaiuep u? 25 Nangmi lawng n'tu huh hamla na ceh u? Hinaak himbai atheen theen oen aka thoekcau u te huh hamla aw? Te tila hi-acuu atheen theen phutlo oen thloeih cah u tih thayoeidoh la aka awm tah sengpahrang impui ah ni a awm u! 26 Nangmi lawng n'tu huh ngaih ah na ceh u, van thui u lah? Tawngha te huh ngaih ah aw? Tetih tangtang pai ni, tede nangmi lawngah tawngha lak ah aka lenduet na huh u poen he ta. 27 Metihtiah Johan he tah caciim lawngah, “Pathen lawng nang hamla lawngpui roekbahkung na haiah laipai kavan tuih ai,’ tila a thui thlaang te ni.” a tina. 28 Jesuh lawng, “Johan lak ah aka lenduet a-u khat khaw awm nawh hun tila kavan thui u. Tede Pathen ram khuiah ayiit koek la aka awm thlaang te Johan lak ah lenduet ngai.” a tina. 29 Te tila a thui te thlaang rangpui lawng a yaak u: ahimi oen ah, awlpui ngaaila mangmu cawikung thli tah Pathen lawng a kuek doengna te aka vai thlaang la awm u tih Johan lawng baptisma te a peek u. 30 Tede Farasi thlaang thli oen Phungawl cangpueikung hue lawngtah ahimi ham Pathen kah kamthlahna te a hoett u tih Johan kah baptisma te dang hamla te a thana u. 31 Jesuh lawng a awlthui te a tom koep tih, “Tahe san kah thlaang thli he n'tu oen ah ni ka nuehtah lah ai? Ahimi he n'tu oen a lawh u? 32 Ahimi he tah thaihu yoeihna huen ah aka ngawl camaw thli oen lo u. Thloep at la aka awm hue lawngah atloe thloep at hue nala te, “Kaimi lawngah yuluina riingding kavan tum u, tede na laam u nawh! Kaimi lawng rawkktoetna laa khaw kavan sak u de na rap u nawh!’ aka ti u the camaw hue oen na lo u. 33 Baptisma pekung Johan te law tih buh a yeh, misurtui khaw aw nawh, tevengah nangmi lawng, ‘Johan te raaithe lawng a kuun thil!’ na ti u. 34 Thlaanghing Capa lawngah law tih a caak, a awkk, tevengah nangmi lawng, ‘He thlaang he bueh u lah! caruut aw lam thlaang ni, mangmu cawikung thli oen thlaangthawlh thli kah paya ni!’ na ti u. 35 Tecakhaw, Pathen kah cuihna tah soeng tangtang tila aka do thlaang boeih lawng a tueng sak” a tina. 36 Farasi thlaang pakhat lawng thlem buh veel haih hamla Jesuh te a khue, Jesuh te ahih im la cet tih buh caak hamla te ngawl thuk. 37 Te kah khawpui khuiah te aka thawlh tangkiik hutaa pakhat awm. Te kah hutaa lawngah Farasi thlaang kah im ah Jesuh buh a caak tite a yaak, tedawngah alabasta um at dawngah riimtuui abepirla avan khuen tih, 38 Jesuh kah a hu ben a khowkung ah te pai, rap tih a mikphitui te Jesuh khow dawngah a cip sak. Tecoengah a khow te a sam oen a thuut pe, a mok tih riimtuui oen a khow te a suep pe. 39 Farasi thlaang lawng te kah hutaa lawng te tila a sai te a huh vengah a kaw khuiah te, “He thlaang he tawngha tangtang kawinih amah aka tek hutaa he a-u te ang thlaang ti te a ming vetih metila a thawlh ti khaw a ming ai,” tila a poek. 40 Tevengah Jesuh lawng, “Simon, na tengah thui ham pakhat awm” a tina. Ahih lawngah, “Oeih, Saya, van thui lah,” a tina. 41 Jesuh lawngah, “Tangkapu thlahkung thlaang tengah tangka aka pu thlaang pahih awm. Pakhat lawngah ngun tangka ya-ngaa a ba tih atloe pakhat lawng ngun tangka sawm-ngaa a ba. 42 Te rawi lawng laiba te sah thai hih nawh, te rawi pahih bok kah laiba te a yoe pe sak. Te atah te rawi pahih khuiah a-u lawng tangkapu thlahkung te a lungna ngaai ai? tila a doet. 43 Simon lawng, “Ka poekna maiah laiba yahawh hlang a yoe pe sak tih khawdawp a ngaai pe thlaang lawngah te a lungna ngaai ai,” tila a thui pe. Jesuh lawng, “Soeng tangtang” a tina. 44 Tecoengah te kah hutaa benla te maang tih Simon nala te, “He hutaa he na huh aw? Na im la ka law de khow silhna tui nan pe nawh, tede he hutaa lawngtah mikphitui oen ka khow he avan silh tih a sam oen avan thuut. 45 Nang lawngtah nan mok nawh, tede ahih lawngtah avan pha pek kalawng ka khow avan mok he toeng nawh. 46 Nang lawngah ka luu suepna ham olif situi khaw nan pe nawh, tede ahih lawngtah riimtuui oen ka khow avan suep poen. 47 Tedawngah, “Lungna aka lenduet lawng a thawlhna yahawh hlang te khawdawp a ngaai pe poen tite a tueng sakna ni. Tede a-u khaw a thawlhna tehca te khawdawp ngaai pe la aka awm thlaang lawngtah lungna tehca bueng te a tueng sak van” a tina. 48 Tecoengah Jesuh lawng hutaa nala te, “Na thawlhna boeih te khawdawp ngaai la awm poen.” a tina. 49 Caboi dawngah thlembuh aka veel haih thlaangtloe hue lawngah, “Thawlhna Pateng khawdawp aka ngaai thlaang he a-u kai? tila a thui u. 50 Tecoengah Jesuh lawng hutaa nala te, “Na oengna lawng n'thlawn poen: ngaimawng ngaitoe la cet loeih” a tina.
1 Tecoeng adiw raih atah Jesuh lawng vangpui oen vangca boeih te a hiil tih Pathen Ram kawng Awlthang Theen te a phawng. A hubang hue paha thlaihih khaw ahih oen cet haih u tih, 2 tlawhnatna oen raaithe lawng a tuuk tih aka hoeih hutaa khatsut khaw a hu ah te bang u: a kaw khuikah raaithe pasarih co tih aka hoeih Meri (Makdalin a ti u te) oen ah 3 Herod sengpahrang kah imkhuikaw ukkung Khusa kah a yu Joanna; tecoengah Susanna oen atloe hutaa thli a hu ah bang u tih a khuehtoen thaihu oen ah Jesuh oen a hubang thli te a bawmcem u. 4 Khawpui pakhat coeng pakhat kah thlaang thli te Jesuh tengla law u tih a tun kueng u vengah te he kah thuidoetna awl he Jesuh lawng a thui pe: 5 “Voei khat ah thlaang pakhat tah caangti heh hamla cet. Lo khuiah caangti a heh vengah te caangti khatsut tah lawngpui ah tla, thlaang lawng a caawt tih va lawngah boeih a ruh. 6 Caangti khatsut tah lungrawng sawkah dilai apamna ah te tla tih caangti a po hang veng atah dilai te nuem poe nawh tih caangkung te reu boeih. 7 Caangti khatsut tah thliing ahaang tim ah tla, thliing te roeng hang tih caangkung te malh a diik. 8 Caangti khatsut tah dilai atheenna ah tla; caangkung te roeng hang tih let yakhat la a vui athaih te rip thaawn.” a tina. Tecoengah Jesuh lawng, “Yaakna haa na khueh u atah ya uh.” a tina. 9 A hubang hue lawngah, he thuidoetna awl thuingaihna te Jesuh a doet u tih, 10 Jesuh lawng, “Pathen Ram awlhuep mingna te nangmi m'peek poen, tede thlaangtloe hue lawngtah a bueh u de huh nawh ham, a hutung u de yaakming nawh ham thuidoetna oen ni thui pe ham a awm.” a tina. 11 “Thuidoetna awl thuingaihna tah he tila awm: Caangti tah Pathen kah awl te ni. 12 Lawngpui ah aka tla caangti tah Pathen awl aka ya thlaang thli te thuingaihna ni; ahimi lawng oengna oen thlawnna te a dangna nawh ham Seitan lawngah law tih ahimi thinkaw khuikah awlthang te a lawh pe. 13 Lungrawng sawah aka tla caangti te tah awlthang theen te a yaak tih awmngaih kawhoe la aka do thlaang te thuingaihna ni. Tede ahimi kaw khuiah ayung te caa khuek nawh. Kawlkalh ham bueng te a oeng u tih noekdakna tue a law veng atah tlim boeih u. 14 Thliing ahaang tim ah aka tla caangti te thuingaihna tah: Pathen awl te a yaak u de he dilai khawsakna kah lakueng raina oen kuirangna oen ah awmtheenna lawng a khuk tih ahinghoek dawngah a vui athaih ahii la aka awm thlaang thli te ni. 15 Lai theen dawngah aka tla caangti thuingaihna tah: awlthang theen te a yaak tih thinkaw khuiah hinyahna, doengna oen a khoem tih a vui athaih toela uehna oen aka awm thlaang thli te thuingaihna ni,” a tina. 16 “A-u lawngkhaw haiim te a vaang tih beeldung oen muek khoep nawh, ih-khun huiah khaw khueh nawh. Imkhui la thlaang a kuun vengah haiang te a huhna ham haivangna dawngah haiim te a khueh. 17 Thuh-elh la aka awm boeih te pho biit vetih muekdah la aka awm boeih te tueng pheng vetih huh thai la awm ai. 18 Tedawngah metila awl he na hutung tite ngaithuen uh; metihtiah, a-u khaw thaihu a khueh te a tawm athap pe ai, tede a-u khaw a khueh nawh te ayawl akaai tah ka khueh tila a poek te Pateng khaw a lawh pe ai.” a tina. 19 Jesuh kah a manu oen a manau thli te a tengla law u, tede thlaang ayahawh aih dawngah huh u thai nawh. 20 Thlaang pakhat lawng Jesuh nala te, “Na nu oen na manau thli nang huh ham a ngaih u tih adauben ah pai u.” tila a thui pe. 21 Jesuh lawng ahimi boeih nala te, “Pathen awl te a yaak tih aka vai thlaang boeih tah ka manu oen ka manau la awm.” a tina. 22 Hin at ah Jesuh tah a hubang thli oen lowng dawngah ngawl u tih ahimi nala te, “Tuilii khatben rall la cet u sih.” a tina tih cet u. 23 Lowng oen ah a ceh u phai vengah Jesuh tah ditdit ip. Kawlkalh maiah tuilii dawngah te khaw thlii tih lowng dawngah tui te be dalh poen, tedawngah ahimi boeih te lakueng u. 24 A hubang thli te Jesuh tengla cet tih a thawh u, “Bawipa, Bawipa! Mami n'duek boeih u poen ai he!” a tina u. Jesuh lawng tho tih khawthlii oen tuilet te awl a peek; thlipui thliphoe te duem tih dipsiditla awm. 25 Tecoengah a hubang thli nala te, “Na oengna te mela na khueh u?” a tina. Tede ahimi te a kawpoek rai u tih a rih u, amami khat oen khat te, “He kah thlaang he a-u kai? Ahih lawngtah khawthlii oen tuilet he awl a peek tih a awl khaw a ngai pe mai!” ti u. 26 Jesuh oen a hubang thli tah Galili tuilii khatben rall ah aka awm Kerasa peng benla lowng oen ah cet u. 27 Jesuh te lan a pha khoeng veng atah te khaaw kah thlaang raaithe lawng a kuun thil pakhat te a tengla va law. Ahih tah atliing ayaalla asanhlang awm puet poen, im ah khaw awm nawh tih thlaangduek a upna lungkaw khuiah te awm. 28 Ahih lawng Jesuh te a huh vengah angaihhlangla paang tih a khowkung ah te a buekuep pe tih, “Tloeng Khoelh Pathen Capa Jesuh! Kai he metila sai ham na ngaih? Kai he dan n'tat mai boel, reenna kavan bih!” tila te paang. 29 Jesuh lawng raaithe te ahih kaw khui kalawng ram la ceh ham awl a peek dawngah ni te tila a tina. Ahih kaw khuiah te raaithe kuun poepa tih a kut a khow te thiirui oen rap a piin tih a khawh khaklal u de thiirui te a bot tih ramhum huhang la raaithe lawng a viil puei. 30 Jesuh lawng ahih te, “A-u na miingna? tila a doet. Ahih lawngah, “Ka miing tah ‘Mob’ ka miingna” a tina. Metihtiah ahih kaw khuiah raaithe moen a awm dawngah ni. 31 Raaithe thli lawngah Jesuh nala te kaimi he aboetna aka awm nawh ungrawm dung khuila te n'thlaak mai boel a tina u tih reenna a bih u. 32 Te kah tlaangthleep ah te awk piing hui at a vuelh u te awm. Tedawngah raaithe thli lawng ahimi te awk thli kah a kaw khuila kuun sak ham Jesuh tengah a bih u tih a kuun sak u. 33 Ahimi tah te kah thlaang kaw khui kalawng co u tih awk thli kah a kaw khuila te kuun u. Tevengah awk hui at te apum boeih la cehthleeng ah plit dingkang, tuilii ah tla tih duek boeih. 34 Awkdoen hue lawng te tila a awm te a huh u dawngah heeng u tih khawpui khui oen vangca boeih ah te kah awlthang te a thui u. 35 Thlaangping lawngah te tila a awm te huh hamla cet u tih Jesuh teng a pha u atah raaithe lawng a ceh taak thlaang lawngah te hinaak himbai a buen a naak tih lungcuih la Jesuh khow kungah a ngawlh te ahimi lawng a huh u vengah te a rih u. 36 Te tila a awm te aka hu thlaang thli lawngah te kah thlaang te metila hoeihna a dang tite thlaangping hue tengah patoeng a thui pe u. 37 Tecoeng atah te kah peng paang ah aka awm thlaang boeih lawngah te a rih tangkiik u tih ahimi boeih lawng Jesuh nala te atloela cet mai hawn a tina u. Tedawngah Jesuh tah lowng dawngah luui hang tih atloela cet. 38 Raaithe lawng a ceh taak thlaang lawngah te, “Na hu ah m'bang sak van.” a tina tih reenna a bih. Tede, Jesuh lawng ahih nala te. 39 “Im la cet koep langtah Pathen lawng nang ham avan sai he thui,” a tina. Te thlaang lawngah khawpui khuila te cet tih Jesuh lawng ahih sawah a sai pe te a thui. 40 Jesuh te thlaang broe lawngah a ring khiing u poen dawngah tuilii khatben rall kalawng a meel phai veng atah thlaangping lawng ahih te a do u. 41 Tevengah Jairu aka miingna thlaang pakhat te khaw va law, ahih tah te kah sinakok bok-im ukkung pakhat van ni. Ahih lawng Jesuh kah a khow kungah te buekuep tih amah im ah law van hamla Jesuh tengah reenna a bih, 42 metihtiah a canu khatca bueng kum thlaihih aka law te a duek tawmca dawngah ni. Jesuh te a ceh phai vengah khatben khat bang kalawng thlaangping lawngah muelh a yaawl u. 43 Te kah thlaangping tim ah te kum ha thlaihih khui puet ah thisuntlaak tlawhna aka tlo hutaa pakhat te awm; ahih lawng a khuehtoen boeih thapang la siibawi te a peek tih a tuui ahaai u van de a-u khat lawngkhaw hoeih sak thai nawh. 44 Ahih lawngah thlaangping lakli ah Jesuh kah a hu ben ah te law tih ahih kah himbaidung ahmoi te duem a tek, tevengah thisuntlaak tlawhna te hoeih pahoei. 45 Jesuh lawng, “Kai he a-u lawngah n'tek?” tila a doet u. Thlaang boeih lawng kan tek nawh a tina u, Piter lawngah, “Bawipa, thlaangping lawngah khatben khat bang kalawng n'veel khoep tih n'yaawl u he ta” a tina. 46 Tede Jesuh lawng, “Thlaang pakhat lawngah kai he n'tek, metihtiah ka pum dawngkah huham tharana a thoeng te ka ming.” a tina. 47 Te kah hutaa lawngah kai lawng ka tek te a ming poen a ti dawngah thuen ruila law tih Jesuh kah a khow kungah te a buekuep pe. Te kah thlaang boeih haiah te n'tu kawngah ahih te a tek tih metila a hoeih pahoei tite biit a thui. 48 Jesuh lawng ahih te, “Ka canu, na oengna lawng n'hoeih sak poen. Ngaimawng la cet loeih” a tina. 49 Jesuh lawng awl a thui lii vengah te Jairu im kalawng thlaang pakhat rawkk-thenn va law tih, “Na canu duek poen, saya he kawhuet cakbat la khueh khiing tlaih boel,” tila Jairu tengah a thui pe. 50 Tede Jesuh lawng tete a yaak vengah Jairu nala, “Lakueng boel; oeng mah oeng doek mai lah, ahih te theen badai,” a tina. 51 Im te a pha u veng atah, Piter, Johan, Jeem oen ah camaw kah a manu oen ana pa bueng nawh atah amah oen haih a-u khaw im khuila kuun sak nawh. 52 Te kah aka awm thlaang boeih lawng camaw te a rah u tih reeng u. Jesuh lawng, “Rap u boel, camaw he a duek moenih, aka ip mai ni!” a tina. 53 Ahimi lawngah camaw te duek tila a ming u dawngah Jesuh te a nuihna u. 54 Tede Jesuh lawng a kut ah camaw te a phoeih tih, “Ka canu, tho lah!” a tina. 55 Hutaaca te hing koep tih pahoei tho hang, Jesuh lawng ahimi nala te ‘Caak koei pakhat khat pe uh’ a tina. 56 Ana pa oen a manu tah a kawpoek rai tangkiik hih, tede Jesuh lawng he tila aka awm thaihu he a-u tengah khaw thui nawh ham awl a uen.
1 Jesuh lawng a hubang thlaihih te a khue tun tih, ahimi lawng raaithe boeih te hekna ham, tlawhnatna te hoeih sak hamla huham tharana oen saithaina aana te a peek. 2 Tecoengah Pathen ram kawng thui ham oen ah thlaangtlo hoeih sak hamla ahimi te a tuih. 3 Ahimi nala te, “Kamyin la na cehna ah n'tu khaw khuen u boel; cawnghol khaw, sawngsa khaw, caak awkk khaw, tangka khaw, angki ahoei yung at khaw khuen u boel. 4 Nangmi na pahna im ah te khawpui khui kalawng na ceh thlantoe ah awm uh; 5 Nangmi impahna aka pe nawh khaaw te ceh taak u langtah ahimi te ngaithuen peekna la na khow dawngkah laidiik te van khoek pe uh.” a tina. 6 A hubang hue lawngah cet u tih vangca vangnau boeih te a hiil u, Awlthang Theen te a phawng u tih khaaw tawm ah thlaangtlo te a hoeih sak u. 7 Galili ram ukkung Herod lawngah he tila thaihu aka thoeng hang kawng he a yaak vengah, thlaang khatsut lawng Baptisma pekung Johan he hing koep tila a thui u dawngah a ngaai hang sut. 8 Thlaangtloe hue lawngtah Elijah ni aka pho koep tila a thui u tih thlaangtloe lawngtah yan vengkah tawngha pakhat khat ni aka hing koep ti u. 9 Herod lawngah, “Kai lawng Johan kah a luu te ka tloek pe poen, tede he kah thaihu thli akawng alam, ka yaak thlaang he a-u kai?” tila a thui. Tedawngah Jesuh te huh hamla a yawm. 10 A hubang thli te va meel koep u tih amami kah a sai boeih te Jesuh tengah a thui pe u. Jesuh lawng ahimi te a khue tih amami bueng Betsaida khawpui la te cet u. 11 Te kawng te rangpui lawng a yaak vengah a hu ah bung a vai u. Jesuh lawng ahimi te a uem tangkiik tih Pathen Ram kawng te a thui pe, sadingna aka ngoe thlaang thli te sa a ding sak. 12 Thlemben khaw a tlaak tawm atah hubang thlaihih hue te a tengla law u tih, “Thlaangping he tuih loeih, he hue yunyan kah khaaw oen lo ah he cet u selang tah caak awkk oen pahna tlap u seh, he kah ahuen amawl he ramhum rammawl ni,” a tina u. 13 Tede Jesuh lawng ahimi nala te, “Nangmi lawngah he kah thlaang thli he caak awkk pe uh a tina. Ahimi lawngah, “Kaimi lawng takawi cuun ngaa oen nga pahih bueng ni ka khueh u. Thlaang rangpui ham caak awkk lai sak hamla na ngaih aw?” a tina u. 14 (Te ah te thlaang tawngpataang hawng ah thong ngaa yun awm.) Jesuh lawng a hubang hue nala, “Thlaangping sawm ngaa yun maiah athloepla rip ngawlh sak.” a tina. 15 Te tila a hubang hue lawng a sai coengah, 16 Jesuh lawng takawi cuun ngaa oen nga pahih te a lawh tih vaan la maang hang; Pathen tengah awmngaih awl a thui, takawi oen nga te a eh tih a hubang thli tengah te a peek tih thlaangping hue tengah takawi te a ree pe u. 17 Ahimi boeih lawng a hah khuek la a caak u, acoeih aphe te a hubang hue lawng a cawi u tih vawhphueih paha thlaihih dawngah te betoet. 18 Hin at ah Jesuh amah bueng a thangthui vengah a hubang thli te ahih tengla law u. Jesuh lawng ahimi te, “thlaang thli lawng kai he a-u a ti u?” tila a doet. 19 Ahimi lawngah, “Khatsut lawngtah nang he Baptisma pekung Johan ti u. Thlaangtloe khatsut lawngtah Elijah ni ti u tih atloe khatsut lawngtah yan veng kah tawngha pakhat khat aka hing koep ni, ti u” tila a thui pe. 20 Jesuh lawng ahimi nala te, “Nangmi lawng ta, Kai he a-u na ti u?” tila a doet. Piter lawngah, “Nang tah Pathen kah Messiah ni,” a tina. 21 Tecoengah he kawng he ahimi lawngah a-u tengah khaw thui nawh ham Jesuh lawng a khang pe. 22 Jesuh lawng, “Thlaang hing capa lawng patang palai a khang doetthloet vetih Judah ahaamca thli, khawsoeih haam thli oen Phungawl Cangpueikung thli lawngah te a hoett u ai. Ahih te a ngawn u ai, tede hin thum coengah tho koep ai.” tila a thui pe. 23 Tecoengah ahimi boeih tengah te, “A-u khaw ka hu ah baang ham a ngaih atah, amah kawngaih te hoett seh, amah kah thinglam te hin roekk ah kawt selang tah ka hu ah bang seh. 24 Metihtiah a-u khaw amah kah hingna te thlawn ham aka ngaih tah a hingna te a thlawng ai, tede a-u khaw kai kawngah a hingna te a thlawng atah a hingna te a thlawn ai. 25 Thlaanghing lawng dilai pum he amah koe la khueh mai cakhaw a hingna te a thlawng tih a sung atah n'tu nuem hoeikhangna a awm? Hoeikhangna roe awm nawh! 26 Kai he khaw seh, kan cang puei he khaw seh a-u lawngkhaw a yah puei atah Thlaanghing Capa lawng a ruep-awmna oen, ana Pa oen aciim vanthlaang thli kah ruep-awmna oen a law vengah ahih te khaw a yah puei van ai. 27 Atak tang kavan thui u, he kah aka awm thlaang khatsut lawngah Pathen Ram te na huh thlantoe na duek u manawh” a tina. 28 He kah awl he a thui coeng yarh khat yunyan a awm atah Piter, Johan, oen Jeem mi te Jesuh lawng a ceh puei tih thangthui u ham tlaang la luui u. 29 A thangthui lii vengah a mik-hai te thawleng u tih alakloe la awm, a hinaak himbai te bawk rawngtheng. 30 Kawlkalh maiah thlaang pahih te ahih oen awl a thui. Ahih rawi te tah Mosi oen Elijah ni. 31 Ahih rawi tah vaan ruep-awmna oen law hih tih Jerusalem ah Jesuh kah duekna rang oen Pathen kawngaihna adiw thlaan ah asoep ham kawng te Jesuh oen a thui u. 32 Piter oen a paya rawi tah ip muelh u, tede a hinghang u veng atah Jesuh kah ruep-awmna te khaw, a tengah thlaang pahih aka pai te khaw a huh u. 33 Te kah thlaang pahih lawng Jesuh te ka ceh taak hih ai a ti veng atah Piter lawng Jesuh nala te, “Bawipa, he ah mami n'awm u he theen tangkiik! Kaimi lawng riim-im pathum ah ka sa u ai, pakhat te nang ham seh, pakhat te Mosi hamla, pakhat te tah Elijah ham seh.” a tina. (Ahih lawng n'tu ka thui tite ming heet nawh.) 34 Ahih lawng awl a thui lii vengah muui va yaal tih ahimi te a yaawl khoep; ahimi muui lawng a thiing khoep vengah te a hubang hue lawngtah caalla a rih u. 35 Muui dawngkah awl pakhat lawngah, “Ahih he tah Ka Capa ni, Kai lawngah ka tuek te ni, a awl thui te ngaai pe uh!” tila a thui. 36 Te kah awl te a thui boet atah Jesuh te amah bueng la awm. Hubang hue lawng he kah akawng alam boeih te a phah u tih te vengkah ahimi lawng thaihu a huh u te a-u tengah khaw thui u nawh. 37 Avuen khawhin atah Jesuh oen a hubang pathum hue te tlaang kalawng a rum thuk u vengah thlaangping lawng Jesuh te avan pan u. 38 Thlaangping tim kah thlaang pakhat te paang tih, “Saya! Reenna kavan bih, ka capa khueh duen he van bueh lah! 39 Raaithe lawng a tuuk tih ploeng ploeng paang, a thuen sak tih tlup tlup a tlim sak, a kaa dawngah tilhawm khaw nomnom a peem; a ngawn a theh poepa tih thlah tlaih nawh! 40 Na hubang thli tengah raaithe hek hamla reenna ka bih de ahimi lawng hek u thai nawh” a tina. 41 Jesuh lawngah, “Nangmi oengna khueh nawh thlaang oen lawnghang thlaang thli! Meveng toe nangmi he kan awm puei ai? Meveng toe nuem kan ruemm khiing u lah ai?” a tina. Tecoengah te kah thlaang nala te, “Na capa te he la van law puei lah.” a tina. 42 Tawngpaca te a law phai vengah raaithe lawng ahih te a thuen sak tih dilai dawng tlup a tlim sak. Jesuh lawng raaithe te awl a peek, tawngpaca te a hoeih sak coengah ana pa tengah koep a peek. 43 Thlaang boeih tah Pathen kah lenna huham tharana dawngah te a kawpoek rai u. Jesuh kah a sai thaihu boeih dawngah thlaangping a kawpoek a rai u lii vengah te a hubang hue nala, 44 Kai lawng kavan thui he hilh u boel! Thlaanghing Capa he aana aka khueh thlaang thli kut ah a peek u ai,” a tina 45 Tede a hubang hue lawngah a thui ngaihna te ming u nawh. Ahimi lawng a yaakmingna nawh ham thuingaihna te awlpaveel oen a thui pe. Te kawng alam te doet ham khaw birih sut u. 46 A hubang thli lawngah amami khuiah te a-u nuem aka lenduet ti u tih awl puung u. 47 Ahimi lawng te tila a poek u te Jesuh lawng a ming, tedawngah camaw pakhat te a khue tih amah tengah a pai sak, 48 a hubang hue nala te, “A-u khaw he camaw he ka miing oen ah a do atah kai he ni n'do; a-u khaw kai he aka do tah kai aka tuihkung te a do. Metihtiah nangmi tim kah ayiit koek te aka lenduet la awm.” a tina. 49 Johan lawngah, “Bawipa, nang kah miing oen ah raaithe aka hek thlaang pakhat ka huh u tih mami timkah thlaang nawh dawngah sai tlaih nawh ham ka khang pe u.” a tina. 50 Jesuh lawng Johan oen atloe hubang hue nala te, “Khaang pe u boel, metihtiah nangmi te aka oelhtaih nawh thlaang te tah na puei na paw ni.” a tina. 51 Jesuh te vaan la luui ham atue a khoek tawm poen dawngah Jerusalem la ceh ham kaw a poek tih kamthlah. 52 Samaria khaaw ah soeprep boeih oepsoeh la aka sai ham ahih lawng thlaang a tuih. 53 Tede Jerusalem la te ceh poe ham a kamthlah u dawngah te khaw kah thlaang thli lawng Jesuh te pah sak u nawh. 54 He tila a awm te hubang Jeem oen Johan lawng a huh vengah ahih rawi lawng Jesuh te, “Bawipa he kah thlaang thli he phe hamla vaan kah hai te kaimi lawng tlaak sak ham na ngaih aw?” tila a doet hih. 55 Jesuh lawng maang dak tih ahih rawi te a ho. 56 Tecoengah Jesuh oen a hubang thli tah khaw tloe la cet u. 57 Ahimi te lawngpueng a ceh u vengah thlaang pakhat lawng Jesuh nala, “Na cehna roekk ah na hu ah ka baang van ai.” a tina. 58 Jesuh lawng ahih nala te, “Metaang lawngkhaw a awm na lungkaw thingkaw a khueh tih va lawngkhaw a bu a khueh, tede Thlaanghing Capa lawngtah duemdawngna oen ihna ahuen kangna khaw khueh nawh.” a tina. 59 Jesuh lawng thlaangtloe pakhat nala te, “Ka hu ah baang lah.” a tina. Tede te thlaang lawngah, “Bawipa, im la ka cet de silang a pa rawkk te ka kuem lamha de ai.” a tina. 60 Jesuh lawng, “Thlaangduek lawng amami thlaangduek te vui u noen seh. Nang tah cet langtah Pathen Ram kawng te thui lah.” a tina. 61 Thlaangtloe pakhat lawngah te, “Bawipa na hu ah ka baang van ai, tede ka cet silang tah ka cakaw thli te ka phih ka ra de ai,” a tina. 62 Jesuh lawng ahih nala te, “A-u khaw laithawl sai ham a tongnan tih a hu benla aka maang khiing te tah Pathen Ram oen ah tingtawkk nawh.” a tina.
1 He coengah Bawipa lawng thlaang sawmsarih pahih te a tuek, ahimi te pahih pahih ah a bok u sak tih amah a cehna koei khaaw oen ahuen amawl boeih ah te a tuih. 2 Jesuh lawng ahimi nala te, “Caang ah hamla tah yahawh tangkiik mai de, aka aat ham biibikung tah yawlca. Lo khui-kah caang aka aat la biibikung thlaang yahawh avan tuihna ham lokhuehkung tengah thangthui uh. 3 Nangmi va cet u lah! Metaang timkah tuuca angla nangmi he kan tuih u. 4 Nangmi lawng tangka bawm khawseh, sawngsa khawseh, khawmuek khaw khuen u boel; a-u thlaang khaw voemtoei hamla lawngpueng ah cot pai boel. 5 Nangmi lawng im khui pakhat ah na kuun veng roekk ah lamhacuekla, “He im khuiah he ngaimawngna awm hawn seh.” tina uh. 6 Te kah im khuiah ngaimawngna aka ngaih thlaang te a awm atah nangmi kah ngaimawng toeina te ahih sawah awm seh; a awm u nawh atah namami tengah va meel koep ai. 7 Te kah im ah te awm u langtah ahimi lawng m'peek boeih te ca uh, metihtiah bii aka bi lawngtah a bi phu te a dang ham awm. Imlui te khat coeng khat pong thiikthuek u boel. 8 Khawpui pakhat khuila na kuun veng roekk ah nangmi te n'do u atah na haiah avan toen te ca uh, 9 te khawpui khuikah thlaangtlo thli te hoeih sak uh, te kah aka awm thlaang thli nala te, ‘Pathen Ram tah nangmi tengah avan pha poen’ tila thui pe uh. 10 Tede khawpui pakhat khuila na kuun veng roekk ah nangmi te n'do u nawh atah lawngpui tawm ah cet u langtah, 11 ‘Kaimi kah ka khow dawngah aka kap na khaw khuikah laidiik nangmi ngaithuen he peekna hamla kavan khoek u poen. Tede he tah van hilh u boel, ‘Pathen Ram tah nangmi tengah avan pha poen!’ tila thui pe uh. 12 Atak tang kavan thui u, Awlcekna Khawhin ah te kah khaaw lak ah Sodom khaaw te Pathen lawng a reen ngaai bet ai!” a tina. 13 “Nang Korazin khawpui, nang hamla khawmap tangkiik mah aw! Nang Betsaida nang hamla khawmap sut! nangmi tengah kawpoek raina ka sai he Taiar oen Sidon ah ka sai kawinih n'cui vengah ni te kah thlaang thli lawng amami kah thawlh yutna te tueng sak hamla ngawl u vetih tlamhi oen a khuk u coengah amah oen amah te haiphu oen a phull u poen ai! 14 Awlcekna Khawhin ah te nangmi lak ah Taiar oen Sidon khaw te Pathen lawng a reen ngaai bet ai. 15 Nang Kapernaum! Namah oen namah te vaan la pawmsang u ham na ngaih aw? Hell ah thlaak thuk la na awm ai!” a tina. 16 Jesuh lawng a hubang thli nala te, “A-u khaw nangmi kah awl a hutung u atah kai kah awl ni a hutung u; a-u khaw nangmi kah awl te a hutung nawh atah kai kah awl ni a hutung nawh poen; a-u khaw kai he aka hoett tah kai tuihkung te ni a hoett poen.” a tina. 17 A thlaangtuih sawmsarih pahih hue te awmngaih kawhoe la va meel koep u tih ahimi lawngah, “Bawipa, kaimi lawng nang kah miing oen ah awl ka peek u vengah raaithe thli lawng Pateng khaw awl a ngaai u!” a tina. 18 Jesuh lawng ahimi nala te, “Khaw thlap apha angla vaan kalawng Seitan a tlaak thuk te ka huh. 19 Hutung u lah! Nangmi lawng ruul oen celkhui ta-ai tim ah na ceh thaina ham, Raal kah huham tharana te taana thai ham, nangmi te thaihu khat lawngkhaw nganbawh peek nawh ham saithaina aana te kan peek u poen. 20 Tede raaithe thli lawng nangmi awl te a ngaai u dawngah awmngaih u boel; vaan ah nangmi kah miing a thut u dawngah te awmngaih uh.” a tina. 21 Tevengah te Ciim Muithla lawng Jesuh te awmngaihna oen a betoet sak tih, “A Pa, vaan oen dilai kah Bawipa! Nang lawng thlaangcuih oen thoemthaina aka khueh thlaang thli tengah na tueng sak nawh tih na thuh te thoemthaina aka khueh nawh thlaang thli tengah na tueng sak poen dawngah kan uem tangkiik. A Pa, he tila coengg sak ham namah lawng na ngaih roe ni.” tila a thui. 22 “A Pa lawng thaihu soeprep boeih m'peek poen. Capa he a-u ti khaw Pa nawh atah a-u lawngkhaw ming nawh. Amah te tueng sak hamla Capa lawng a tuek thlaang oen Capa amah lawng nawh atah Pa te a-u lawngkhaw ming u nawh. 23 Tecoengah Jesuh tah a hubang hue benla te maang tih ahimi nala te, “Nangmi lawng na huh u thaihu he na huh thloem u dawngah na yo theen phoeih u! 24 Nangmi tengah kavan thui he tawngha yahawh hlang oen sengpahrang thli lawngah nangmi lawng na huh u he huh hamla a ngaih u de hu u thai nawh, nangmi lawng na yaak u he yaak ham a ngaih u de ya u thai nawh.” a tina. 25 Phungawl cangpueikung pakhat law tih Jesuh kah a thawlhna tuuk pe ham a yawm. Ahih lawngah, “Saya, dungyan hingna ka dangna ham n'tu ka sai ai?” tila a doet. 26 Jesuh lawng ahih nala te, “Caciim lawng n'tu a thui? Avan thui thli te metila nang lawng na yaakmingna a awm?” a tina. 27 Te kah thlaang lawngah, “Na Bawipa Pathen te na thinkaw lungbui boeih oen na hingna boeih oen, na tharana boeih oen, na kawpoek boeih oen ah lungna lah,’ ti. Tecoengah ‘namah oen namah te na lungna u van angla na imbe lovaai te khaw lungna van’ ti” a tina. 28 Jesuh lawng ahih nala te, “Awl navan thung he tah soeng poen, te tila te sai, te tih atah na hing ai.” a tina. 29 Tede Phungawl cangpueikung lawng amah oen amah te thlaangdoeng la a poek u dawngah, “Ka imbe lovaai te a-u nuem?” tila Jesuh te a doet. 30 Jesuh lawngah, “Voei khat ah thlaang pakhat tah Jerusalem kalawng Jeriko khaw la a ceh thuk vengah ahih te thlaanghuen thli lawng a bawh u, hinaak himbai te a pit pe u, a bawh doetthloet u tih a duek dalh la a ceh taak sut u. 31 Te tila a awmna kah lawngpui ah te khawsoeih pakhat te cet thuk van; tede ahih lawng te kah thlaang te a huh vengah khatben kalawng a reel aram tih a ceh taak. 32 Te tih van la te Levi thlaang pakhat khaw te kah lawngpui ah poe cet thuk van tih te kah thlaang te a huh, ahih lawngkhaw khatben kalawng areel aram tih a ceh taak van. 33 Tede Samaria thlaang pakhat, te kah lawngpui kalawng ah kamyin la aka cet lawng atah te kah thlaang tengla te a pha tih a huh vengah a reen tangkiik. 34 A tengla te cet tih boengha te situi oen misurtui oen ah a thluk pe tih boengha thli te a yeen pe; tecoengah te kah thlaang te amah kah lacano dawngah a ngawlh sak tih yinpahna im la te a ceh puei; te ah te ahih lawng te kah thlaangtlo te a buul athlawng. 35 Avuen ah ka cet ai a ti veng atah ngun tangka pheek hih te a lawh tih yinpahna imtoetkung te a peek tih ahih nala te, “Nang lawngah ahih he khuutcem mai de, ahih hamla na hawna avak asah boeih te ka meel koep vengah kan pe ai,’ a tina.” tila te a thui pe. 36 Tecoengah Jesuh lawng awlcuina ah, “He kah thlaang pathum khuiah he thlaanghuuen thli lawng a bawh thlaang kah imbe lovaai te a-u tila na poek?” tila te a doet. 37 Phungawl cangpueikung lawngah, “Ahih aka reen thlaang te a imbe lovaai la awm.” a tina. Jesuh lawng, “Te atah nang khaw cet langtah te tila te sai van.” a tina. 38 Jesuh oen a hubang thli te kamyin la cet u tih khaw pakhat a pha u, te ah te Marta aka miingna hutaa pakhat lawng a im ah a pah sak. 39 Meri aka miingna a manau pakhat awm. Ahih lawngtah Bawipa kah a khow kungah ngawl tih a hih kah cangpueina te a hutung. 40 Marta tah bii toklek tih hoeng atoeih nawh, tedawngah law tih, “Bawipa, kamah bueng pawng athawh ham ka manau lawng n'ceh taak sut he, n'tula khaw na ngaai nawh aw? Kai he bawm hamla van thui pe lah!” a tina. 41 Bawipa lawng, ahih nala te, “Marta! Nang lawngtah thaihu yahawh hlang dawngah na lakueng tih na patang, 42 tede angoe tangtang tah pakhat bueng ni. Meri lawngtah asoeng thaihu te a tuek poen tih ahih tengkah te a-u lawngkhaw rot pe tlaih manawh.” a tina.
1 Hin at vengah Jesuh tah ahuen pakhat ah thangthui. A thangthui coeng atah a hubang pakhat a tengla law tih, “Bawipa, Johan lawng a hubang thli a cang puei van angla thangthuina te kaimi n'cang puei u van lah,” a tina. 2 Jesuh lawng ahimi nala te, “Nangmi lawng na thangthui u vengah tila thui uh: ‘A Pa: Na miing ciim tah hinyahna awm hawn seh; na Ram va pai hawn seh. 3 Kaimi lawng ka ngoe caak awkk te hin at coeng hin at m'pe lah. 4 Kaimi sawah thawlhpalhna aka sai boeih te khawdawp ka ngaai u van angla kaimi kah thawlhna he khawdawp van ngaai van lah. Aka rai tangkiik noekdakna te kaimi tengah van pha sak boel’ tila thangthui uh.” a tina. 5 Tecoengah Jesuh lawng a hubang thli tengah, “Thuina maiah, nangmi pakhat khat lawng yiinthuem ah na paya im la na cet tih ahih nala te, Anaang nang, takawi cuun thum ah m'pe de lah. 6 Ka paya pakhat khawlawng cet tih tapekca ah ka im avan pha tih ka cah ka awh ham caak koei khat khaw ka khueh nawh!’ na tina. 7 Tevengah na paya lawngah im khui kalawng, ‘Thlaang kawhuet cakbat la khueh boel! Thawh ka khaih poen, ka ca thli oen ka ip u poen. Nang te thaihu peek ham ka tho thai tlaih manawh.’ ti. 8 Te atah metila a awm ai? Kavan thui u, ahih te na paya la a awm dawngah tho nawh tih takawi te m'pe nawh de nang lawng yah ohla na bih mangkhak atah ahih lawng tho vetih na ngoe thaihu boeih te m'peek ai. 9 Tedawngah he he kavan thui u: Bih u lah, m'peek ai; tlap u lah na dang ai, Thawh te khooek u lah, nang ham avan awng ai. 10 Metihtiah aka bih boeih te a peek ai, aka tlap boeih lawng adang ai, thawh aka khooek boeih ham a awng pe ai. 11 Na ca lawng nga avan bih vengah ruul aka pe papa nangmi khuiah khat khaw na awm u aw? 12 Aaidui avan bih vengah celkhuita-ai na peek ai aw? 13 Thlaangthe la na awm u de ta, na ca thli te thaihu theen peek ham na ming u. Te atah vaan ah aka awm Pa lawng atah Ciim Muithla te aka bih boeih tengah a peek tare ai ta!” a tina. 14 Raaithe lawng akuun tih awl aka mueh thlaang pakhat kah a kaw khui kalawng raaithe te Jesuh lawngah a hek tih te thlaang te raaithe lawng a ceh taak coeng atah awl cal. Thlaangping tah a kawpoek la rai sut u, 15 tede, thlaang khatsut lawngtah, “Raaithe thli hek thai hamla huham tharana he raaithe thli kah a bawipa Beelzebul lawng ni a peek,” ti u. 16 Thlaangtloe lawngtah Jesuh kah a thawlhna te tuuk ham a ngaih u dawngah ahih kah a sai te Pathen ben-kah aka law ni tite tuengsakna ham kawpoek raina sai ham te a bih u. 17 Tede Jesuh lawng ahimi kah poekna te thiim a ming tih ahimi nala te, “Ram pakhat he amah oen amah athloekla pek u the tih thek u kawinih asan pai thai manawh; imkhuikaw khaw pek u the tih a roep u nawh atah khawsak paw. 18 Tedawngah Seitan kah ram khaw pakhat oen khat raal u the kawinih metila asan a pai thai ai? Nangmi lawng atah kai lawngah raaithe ka hek he Beelzebul lawngah raaithe hek thaina te kai he a peek na ti u. 19 Kai lawng Beelzebul rang oen raaithe ka hek atah nangmi kah hubang thli lawng ta metila a hek u? Nangmi na soeng u nawh tite namami kah hubang thli lawng a tueng sak! 20 Tetih nawh ni, kai lawngah Pathen kah huham tharana oen raaithe ka hek tih, te lawngah te Pathen Ram nangmi teng avan pha poen tite a tueng sak. 21 Thara thlaang pakhat lawng amah kah aw-vaa boeih oen a im te a toet atah a khueh a toen boeih te sueng. 22 Tede tha aka ra ngaai bet pakhat lawng a teek tih a taa atah ahih lawng a uepna awva boeih te a lawh pe vetih thaihu thaiha te a rek a ra pe ai. 23 A-u khaw kai he aka pai puei nawh tah kai he aka raalna thlaang ni; a-u khaw thlaang ka cawitun vengah kai he aka bawmcem nawh tah thlaang aka thekyak thlaang ni.” a tina. 24 “Raaithe pakhat, thlaang pakhat kah a kaw khui kalawng co tih a ceh vengah, ramhum huhang te a hiil tih a awmna ham ahuen amawl te a tlap. Pakhat khaw a huh nawh veng atah, ‘Ka ceh taak kamah im la te ka meel koep hawn ai.’ tila a poek. 25 Tedawngah meel koep tih im te aciimbiit la awm tih thaihu thaiha atheenla a kuem heet u te a huh. 26 Tecoengah cet tih amah lak ah athe eep ngaai atloe raaithe pasarih te avan law puei tih te ah te awm u. Tedawngah te thlaang te tah acuek veng kah lak ah nauh tare ngaai.” a tina. 27 Jesuh lawng tila a thui coengah thlaang tim kah hutaa pakhat lawngah paang tih ahih nala te, “Nang he aka cuunkung oen cawmcahkung tah metihtlukla a awmngaih ai te!” a tina. 28 Tede Jesuh lawngah, “Pathen awl te a yaak tih aka vai tah metihtlukla a awmngaih tare ai!” a tina. 29 Thlaangping lawngah Jesuh te a veel khoep u vengah te Jesuh lawng, “Tihin hang kah thlaang thli he the-akk tangkiik! Ahimi lawng kawpoekraina te a bih u, tede Jonah kah kawpoekraina nawh atah atloe khat khaw ka sai manawh. 30 Nineveh khaaw kah thlaang thli hamla tawngha Jonah te noekna la a awm van angla Thlaanghing Capa he khaw tihin hang kah thlaang thli ham miknoek la awm van ai. 31 Sheba sengpahrang Nu lawng Solomon kah cuihna awl hutung ham athla hlang amah ram kalawng va law; Awlcekna Khawhin ah ahih lawng pai vetih tihin hang kah thlaang thli he thawlh a peel poen ai; ataktang kavan thui u, Solomon lak ah aka lenduet ngaai he ah he awm. 32 Nineveh khaaw kah thlaang thli lawng Jonah kah phung thui awl a yaak u dawngah a thawlhna yut u, Awlcekna khawhin ah ahimi lawng pai vetih nangmi te thawlh m'peel poen ai; ataktang kavan thui u, Jonah lak ah aka lenduet ngaai he ah he awm.” a tina. 33 A-u lawng haiim te a vaang tih thlip khoep nawh, beeldung oen khaw dah khoep nawh; im khuila aka law thlaang thli lawng aangna te a huh thaina ham haivangna dawngah te a khueh. 34 Pum hamla tah mik he haiim angla awm. Na mik rawi te acaih vengah na pum te aangna oen be; tede na mik rawi te atheen nawh veng atah na pum te yiinna khuiah awm. 35 Tedawngah na pum dawngah aka awm aangna te yiinna la a coengg nawh ham ngaithuen uh. 36 Haiim a aangna oen nang te n'thue vengah na pum te aangna oen be tih ame huen maiah khaw yiinna a awm nawh angla na pum boeih te aang ai.” a tina. 37 Jesuh te awl a thui coeng atah Farasi thlaang pakhat lawng buh ca la ahih te a khue; tedawngah cet tih buh caak hamla te ngawl. 38 Jesuh lawng buh caak thlan ah kut a silh nawh te Farasi thlaang lawng a huh u vengah a kawpoek rai. 39 Tedawngah Bawipa lawng ahih nala te, “Nangmi Farasi thlaang thli lawngtah boengloeng oen beel te adauben tah na silh u, tede akhui ben tah tluung-athangna, athe thaihu oen betoet. 40 Nangmi thlaangngau paathuu thli! Adauben aka sai Pathen lawngah akhuiben te khaw sai nawh aw? 41 Tede nangmi kah boengloeng oen beel dawngah aka awm te khawdeng thlaang thli te pe u lah, tetih atah soeprep boeih te nangmi ham ciim ai. 42 Nangmi Farasi thlaang thli ham khawmap tangkiik! Nangmi lawng cuenruek-an, sawngsing oen tawitlim anno Pateng khaw paha ah pakhat te Pathen na peek u, tede nangmi lawngah doengna, Pathen lungna te tah na hadalhna u. He ang thli he na sai hamla awm tih atloe te khaw dalrana ohla sai ham awm. 43 Nangmi Farasi thlaang thli ham khawmap tangkiik! Nangmi lawng sinakok bok-im ah athloekla ahooep atlaang ngawlhcoen dawngah ngawlh ham oen ah thaihu yoeihna huen ah thlaang kah hinyahna oen voemtoeina te na ngaih u. 44 Nangmi ham khawmap tangkiik mah aw! Nangmi tah thlaang lawng ming nawh tih asawah a cehna miknoekna aka awm nawh thlam oen na la u.” a tina. 45 Phungawl cangpueikung pakhat lawng ahih nala te, “Saya he tila na thui he kaimi khaw nan sal nan phaam haih poen!” a tina. 46 Jesuh lawng, “Nangmi Phungawl cangpueikung thli ham khaw khawmap tangkiik! Nangmi lawngah phueih ham aka rai tangkiik thalrih te thlaang na phueih sak u, tede namami lawngtah thalrih te na kutdawn oen Pateng na tek nawh. 47 Nangmi ham khawmap tangkiik mah aw! Nangmi lawngah tawngha thli ham thlann te atheen theenla na sai pe u, te kah tawngha thli te namami kah patuer thli lawng a ngawn u te ni. 48 Tedawngah nangmi lawng namami kah patuer thli lawngah a sai te na kawtlaak puei u tite na tueng sak u; ahimi lawng tawngha thli te a ngawn u tih nangmi lawng thlann te na sai pe u. 49 He kawngah he Pathen kah Cuihna lawng, ‘Ahimi tengah tawngha thli oen laipai thli te ka tuih ai; ahimi lawngah khatsut te a ngawn u vetih atloe hue te tah a heem a tek u ai? tila a thui. 50 Tedawngah Abel a ngawn u veng kalawng boknathaang oen Huen Ciim laklaw ah a ngawn u Zekhariah toe ah, dilai suen cuek veng kalawng tawngha boeih te a ngawn u dawngah tahe san kah thlaang thli he dan a tat ai. Teveng kah thlaang thli boeih ham te tahe san kah thlaang thli he dan a tat ai tila kavan thui u! 52 Nangmi Phungawl cangpueikung thli ham khawmap tangkiik! Nangmi lawng cuihna im kah thawhka awngna caabi te na kuem khak u; namami khaw na kuun u nawh, kuun ham aka yawm thlaang thli ham khaw na khang pe u!” a tina. 53 Te kalawng Jesuh te a ceh coeng atah, Phungawl cangpueikung thli oen Farasi thli lawng ah teveng kalawng tah ahih te a huhhuett tangkiik u poen tih, 54 a cal thawlhna oen awl a thuina dawngah a thawlhna te tuuk pe ham thaihu kawng alam yahawh hlang te a doet u.
1 Tevengah thlaangping toeklek nawh te tun u tih amami pakhat oen pakhat te tiil u the; tevengah Jesuh lawng lamhacuekla a hubang hue nala te, ‘Farasi thlaang thli kah tawlru te atheenla ngaithuen uh, ka thui ngaihna tah ahimi kah thailatna te ni. 2 Muekdah khoep la aka awm thaihu boeih te pho vetih ahuep ahel boeih te a ming sak ai. 3 Tedawngah yiinna khuiah na thui u te hingthun khawthaih ah a yaak u ai, thawh na khaih khoep u tih ahuepla im khuiah awltuemm na thui u te imphu kalawng a paang puei u ai.” a tina. 4 “Ka puei thli, kavan thui u, pum bueng he a ngawn thai doek tih atloe athe-eep khat khaw aka sai thai nawh thlaang thli te rih boel. 5 Nangmi lawng a-u rih ham a awm tite kavan tueng sak ai; Pum he a ngawn coengah hell khuiah thlaak thaina aana aka khueh Pathen te rih uh. Nangmi lawng ahih te ni na rih u ham a awm, kai lawng kavan thui he tangna u lah! 6 Variit pa-ngaa te pheksaseen pahih la yooei u nawh aw? Pathen lawngtah variit te pakhat khaw hilh nawh. 7 Na luu dawngkah sam Pateng a toek boeih. Tedawngah rih u boel; nangmi tah variit yahawh hlang lak ah na phu awm ngaai!” a tina. 8 “Atak tang kavan thui u, a-u khaw kai kah thlaang la ka awm tila langya ah aka thui tah, Thlaanghing Capa lawng ahih te Pathen kah vanthlaang thli haiah ka thlaang ni a tina van ai. 9 Tede a-u khaw seh langya ah kai he aka hoett tah Thlaanghing Capa lawngah ahih te Pathen kah vanthlaang thli haiah a hoett van ai. 10 A-u khaw Thlaanghing Capa te oelhtaihna awl aka thui te khawdawp a ngaai pe ai, tede a-u khaw Ciim Muithla te a oelh ataih tih athela aka thui tah khawdawp ngaai pe manawh. 11 Ahimi lawngah nangmi te sinakok ah khaw, ram ukbawi oen ukkung thli haiah khaw n'khuen u vengah namah oen namah te metila ka phungtu u vetih me ang awl ka thui ai ti khaw lakueng a boel. 12 Metihtiah nangmi lawng na thui ham koei te Ciim Muithla lawng n'cang puei ai.” a tina. 13 Thlaangping tim kah thlaang pakhat lawng Jesuh nala te, “Saya, a pa lawng kaihih boeinau hamla avan ceh taak ro te kai ham thoem avan pek van ham ka maya tengah thui pe lah” a tina. 14 Jesuh lawng ahih nala te, “Ka puei, nanghih te awl cek ham oen ah ro pek pe hamla a-u lawng kai he n'khueh?” a tina. 15 Tecoengah ahimi boeih nala te, “Apueh ngaihna soeprep dawngah kuemsuem u lang tloeng u lah; metihtiah thlaang kah hingna tak tak he bawirengna, khueh toen thaihu dawngah pangtung nawh.” a tina. 16 Tecoengah Jesuh lawng ahimi teng ah he kah thuidoetna he a thui pe: “Voei khat ah kuirang pakhat lawng lo pakhat a toen tih caang theen tangkiik. 17 Ahih lawngah tila a poek, ‘Caang ka khuehna ham awm tlaih nawh. Me tih ni ka ti lah ai?’ ti. 18 Tecoengah tila a poek tih, ‘He tila ka sai ai, thaidi boeih te ka phe silang pakhat la kang abo ngaai la ka sai ai, tecoengah te kah thaidi dawngah te caang oen atloe thaihu boeih te ka khueh ai. 19 Tecoengah kamah oen kamah te nang yotheen kam-awm thlaang! Kum san hlang ham na ngoe thaihu theen boeih te na khueh poen! Thayoeidoh la awm lah, Ca langtah aw lah, ngaimawng ngaitoe la awm lah, ka ti ai’ ti. 20 Tede Pathen lawng ahih nala te, ‘Nang thlaangngau paathuu! N'tu yiin ah na hingna te boet poen ai; tedawngah namah ham na tung na sep thaihu thli he a-u lawng a paang ai?” a tina. 21 Tecoengah awlcuina ah Jesuh lawng, “Amah hamla kaawn aka tung aka sep thlaang tah Pathen kah mik huh atah kuirang la awm nawh.” a tina. 22 Tecoengah Jesuh lawng a hubang hue nala te, “Tedawngah nangmi lawng na hingna ham angoe caak awkk khaw, na pum ham angoe hinaak himbai khaw lakueng u boel kan tina u. 23 Hingna he caak awkk lak ah awlpui ngaai tih pum he khaw hinaak himbai lak ah awlpui ngaai ni. 24 Vang-aak thli ke bueh u lah; ahimi lawng ruk khaw tuh u nawh tih caang khaw aat u nawh. Ahimi lawng khaai khaw khueh u nawh tih caangpai khaw holh u nawh; Tede Pathen lawng a cah a awh! Nangmi he va lak ah na phu tlo ngaai! 25 Nangmi timkah a-u lawng mai khaw lakuengna rang oen a hingna te bet a cot sak thai ai aw? 26 He ang thaihu tehca mai Pateng khaw na sai thai u nawh atah, n'tu ham ah atloe thaihu kawngah na lakueng u? 27 Ramhum kah raipai thli lawng metila a roeng hang tite bueh u lah: ahimi lawng bii khaw bi nawh, amami ham hinaak himbai khaw tak u nawh. Tede nangmi tengah kavan thui tah Solomon sengpahrang Pateng khaw a bawilen hi-acuu a khueh moek de, raipai angla aka theen khat khaw khueh nawh. 28 Tihin ah hing tih thangvuen ah aka duek pahoei, hai dawngah phuum hamla aka awm sul-aram Pateng khaw Pathen lawng a thoei acaam. Ahih lawngah nangmi te thoei acaam tare nawh ai aw? Nangmi na oengna yawl tangkiik nawh pai he! 29 Tedawngah nangmi lawng caak awkk kawng te poek khuep oen lakueng u boel. 30 (Metihtiah Pathen aka ming nawh dilai thlaang thli lawng ni he ang thaihu thli he a thoeh a tham.) Nangmi kah na Pa lawng he ang thaihu na ngoe boeih te a ming. 31 Amah kah a Ram te awlpuila poek u lah, te atah he thaihu boeih he nangmi m'peek ai.” a tina. 32 “ Rih u boel, metihtiah nangmi te na Pa lawng Vaan Ram peek ham a ngaih. 33 Nangmi lawng na khueh na toen te yooei u langtah tangka te khawdeng thlaang thli pe uh. Aka pawn thai nawh tangkabawm te namami ham khueh u langtah vaan ah namami ham kaawn te tung asep uh, te huen atah thlaanghuuen lawngkhaw huuen thai nawh tih kuum-akett lawngkhaw a caak thai nawh dawngah metuek khaw boeih manawh. 34 Metihtiah na thaihu a awmna huen ah te na thinkaw khaw awm yoeyah van ai.” a tina. 35 “Me ang thaihu a thoeng veng-kah ham khaw oepsoehla awm uh, hinaak himbai te oepsoehla bai-ana u langtah haiim te oepsoehla vaang uh, 36 yuluipoei kalawng aka meel koep ham koei a bawipa lawng thawh a khooek pe vengah thawhka te pahoei awng pe ham aka ring oepsoeh tuihyoeihthlaang thli angla huertuela awm uh. 37 A bawipa a law koep vengah huertuela a toet tih oepsoehla aka ring tuihyoeihthlaang thli te tah a yo theen phoeih! Atak tang kavan thui u, ahih lawng amah angki te a pit vetih a tuihyoeihthlaang thli te a ngawlh sak coengah ahimi te a do adan ai. 38 Yiinthuemtaang ah a law ah khaw, cinghue ah a law ah khaw, ahimi oepsoeh la a awm te a huh atah a yo theen phoeih u! 39 Tecoengah he he ming u lah, Im khuehkung lawng thlaanghuuen a lawna atue te ming kawinih a im te thlaanghuuen muk sak manawh. 40 Tedawngah nangmi khaw oepsoehla awm uh, metihtiah nangmi lawng na ngaiuep nawh vengah Thlaanghing Capa tah law ai.” a tina. 41 Piter lawngah, “Bawipa, he thuidoetna he kaimi ham aw na van thui, tihnawhtah thlaang boeih ham aw?” tila a doet. 42 Bawipa lawngah, “Tetih atah, a-u nuem uep-awm tih aka cuih tuihyoeihthlaang la aka awm? Ahih tah a bawi lawng tuihyoeihthlaang thli cawmcah ham, atue atang vengah ahimi caak awkk pekung la a khueh te ueppang koei aka cuih tuihyoeihthlaang la awm ai. 43 A bawipa a law vengah te tila bii a bi te a huh atah te kah tuih-yoeih thlaang te tah a yotheen phoeih! 44 Atak tang kavan thui u, te kah tuihyoeihthlaang te amah kah khuehtoen boeih uktemkung la a bawipa lawng a khueh ai. 45 Tede ‘ka bawipa he law yue tang manawh’ tila a poek tih atloe tuihyoeih-thlaang hutaa khaw, tawngpa khaw a bawh apai tih a caak a awkk tih yuu a ruui atah, 46 ahih lawng a ngaiuep nawh tih a ming nawh atue atang hin at veng atah a bawipa te a law pe ai. A bawipa lawng ahih te pat a tloek vetih awl ngaai nawh thlaang thli kah paang koei te a paang sak van ai. 47 A bawipa lawng sai sak ham a ngaih te a ming de aka sai nawh tih oepsoehla aka awm nawh tuihyoeihthlaang te tah dan a tat vetih a bawh doetthloet ai. 48 Tede a bawipa kah kawngaih ming nawh tih bawh ham koei te aka sai tuihyoeihthlaang tah adoem aphoe ngaai la a bawh ai. Yahawh hlang a peek thlaang tengkah te yahawh hlang a bih van ai; apueh ngaai la a peek thlaang tengkah te apueh la a bih van ai.” a tina. 49 “Kai tah dilai he hai oen ung sak ham ni ka law, tahe vengah khaw ung poen kawinih ka ngaih! 50 Kai lawng ka dang ham koei baptisma pakhat awm hun, tete ka coeng thlantoe tah ka kawpoek patang tangkiik mah aw! 51 Nangmi lawngah kai he dilai dawngah roepna peek hamla va law tila na poek u aw? Nawh ni, roepna nawh tih pekbona peek ham ni ka law. 52 Tahe kalawng tah imkhuikaw pakhat ah aka awm thlaang pa-ngaa te pek u ai, pathum lawng pahih te a raalna vetih pahih te lawngah pathum te a raalna van ai. 53 Ana pa thli lawng a capa thli te a raalna vetih a capa thli lawng ana pa thli te a raalna van ai; a manu thli lawng a canu thli te a raalna vetih a canu thli lawngkhaw a manu thli te a raalna van ai; a manii lawng a la-nga te a raalna vetih a la-nga lawngah a manii te a raalna van ai.” a tina. 54 Jesuh lawng thlaangping tengah tila a thui pe, “Nangmi lawng khawtlaak ben kalawng ah muui a yaal hang te na huh u vengah khawtlan ai tila pahoei na thui u tih tlan khoet. 55 Tecoengah ahot ben-kah yilh a law atah khaw ling ai na ti u tih ling tangtang. 56 Thlaangthaipalat hue! Nangmi lawng vaan oen dilai he na dan u tih khawtue tah na thui thai u; tetih atah, n'tu ah tahe vengkah atue he tah na ming u thai nawh?” a tina. 57 Asoeng thaihu te sai ham n'tu ah namami lawngkhaw kaw na poek u nawh? 58 Thlaang pakhat khat lawng nang te tayacawi ham a ngaih tih awlcekna yungim la n'ceh puei atah, awlcekna yungim na pha thlan vengah ahih oen roeproeina sai. Te tila na sai nawh atah ahih lawng nang te awlcek bawi haiah m'mawt poen ai, awlcekbawi lawng nang te palik kut ah m'peek vetih thongim ah n'thlaak ai. 59 Ataktang ni kavan thui u, laiba te na sah boeih thlantoe thongim khuiah na awm ai” a tina.
1 Tevengah te kah aka awm thlaang khatsut lawng Galili thlaang thli Pathen tengah Luciik thawthuengna a sai u vengah Pilat bawi lawng a ngawn kawng te a thui pe u. 2 Jesuh lawng ahimi nala, “Te kah Galili thlaang thli, te tila a ngawn u te atloe Galili thlaang thli lak ah aka thawlh ngaai ni tila na poek u aw? 3 Thawlh koek aih nawh! Atak tang kavan thui u, nangmi khaw na thawlhna te na yut u nawh atah nangmi boeih khaw ahimi angla na duek u van ai. 4 Siloam kah imtloensang a tlim vengah thlaang paha thlaireet a namm darek tih aka duek hue te ta? Jerusalem ah aka awm thlaangtloe boeih lak ah the koek tila nangmi lawng na poek u aw? 5 The koek aih nawh! Atak tang kavan thui u, nangmi khaw na thawlhna te na yut u nawh atah nangmi boeih khaw ahimi angla na duek u van ai.” a tina. 6 Tecoengah Jesuh lawng he kah thuidoetna he ahimi tengah a thui pe: “Thlaang pakhat lawngah misurdum khuiah thaidut thing kung at a liing. Ahih lawng cet tih thaidut te thaih aw, thaih nawh aw ti tih a bueh de athaih pakhat khaw hu nawh. 7 Tedawngah ahih lawng amah kah dumtoetkung nala te, ‘Bueh lah, kum thum puet ah he la he ka law tih thaidut thing he ka bueh de a thaih khat khaw ka hu nawh. Vung hawn loeih! N'tu ah laitheen apoei apit la a vak asah sak?” a tina. 8 Tede dumtoetkung lawng, “Bawipa kum at tah awm mai de seh; a teng-avai he dilai ka voe pe silang tah laimeen oen ka vui de lah ai. 9 Cangthok ah a thaih atah theen badai; athaih nawh atah vung mai hawn; a tina.” tila a thui pe. 10 Sabbath khawhin hin at vengah Jesuh lawng sinakok bok-im ah a cang puei. 11 Teah te kum ha thlaireet khuiah raaithe lawng a tlawh sak hutaa pakhat te awm; ahih te a uen khuun roepsoet tih doeng sak thai tlaih nawh. 12 Jesuh lawng ahih te a huh vengah a khue tih, “Hutaa nang, na tlawhna hoeih poen!” a tina. 13 Ahih lawng a kut te hutaa sawah a tloeng tih hutaa te amah poek ah yauh doeng pahoei tih Pathen te a thangpawm. 14 Sabbath khawhin ah Jesuh lawng thlaangtlo a hoeih sak dawngah sinakok bok-im ukkung te a thin sa; tedawngah thlaangping nala te, “Mami lawng bii bina ham khawhin hinruk awm; te khawhin ah te law u langtah thlaangtlo hoeih sak uh, tede Sabbath khawhin atah sai u boel!” a tina. 15 Bawipa lawng ahih nala te, “Nangmi thlaangthaipalat hue! Nangmi lawng Sabbath khawhin ah na vaitaw khaw, lacano khaw seh, a kiingna rui te na thlam pe u tih tui awkk sak ham na mawt u de lah koen. 16 Tahe ah Seitan lawng kum ha thlaireet khui a piin tih a khawh mangkhak Abraham cadil he ah awm he ta; Sabbath khawhin ah ahih he piin ayeenna kalawng n'loeih sak nawh ai aw? a tina. 17 Ahih kah awl thungna lawng a raal thli te a yah sak, thlaangping tah ahih kah kawpoekrai thaihu a saina dawngah te awmngaih u. 18 Jesuh lawngah tila a doet, “Pathen kah Ram he n'tu oen a lawh u? N'tu oen ah ka nuehtah lah ai? 19 Te tah he oen lo u. Thlaang pakhat lawng antammu te a lawh tih amah dum ah te a heh. Antammu te roeng hang tih thingkung la pai, te atah va thli te law u tih abeek thli dawngah a bu a tuk u.” a tina. 20 Jesuh lawng “Pathen Ram he n'tu oen ah ka nuehtah lah ai? tila koep a doet. 21 Te tah he oen lo u. Hutaa pakhat lawng tawlru te a lawh tih ta-ekk hawl thum oen a thoekk haih tih ta-ekk te a rawi sak boeih.” a tina. 22 Jesuh lawng Jerusalem la a ceh vengah te khawpui boeih oen vangca vangnau ah te cet tih thlaang thli te a cang puei. 23 Thlaang pakhat lawng ahih nala, “Bawipa, thlaang a yawlca lawng aw thlawnna he a dang ai?” tila a doet. 24 Jesuh lawng ahimi nala, “Thawhka ceek ah te kuun ham yawm u lah; thlaang yahawh lawng kuun ham a yawm u ai, tede kuun thai u manawh. 25 Imkung lawng tho vetih thawh a khaih ai; tevengah adauben ah na pai u vetih thawh te na khooek u ai, “Bawipa, thawh van awng de lah!’ na tina u ai. Ahih lawngah, “Ame kalawng nangmi na law u, kan ming kan tung u moenih.’ ti ai. 26 Tevengah nangmi lawng, ‘Kaimi he nang oen ah buh aka ca haih ni; kaimi khaw ah nan cang puei u teta!? na tina u ai. 27 Tede tila koep a thui ai, ‘Nangmi he ame kalawng na law, kan ming nawh. Nangmi thlaangthe thli; atloela cet uh’ n'tina ai. 28 Nangmi lawng Pathen Ram khuiah Abraham, Isak, Jakob oen tawngha thli te na huh u ai. Nangmi tah adauben ah na rap vetih na naw te cakcak na rueng u ai! 29 Khawcuuk, khawtlaak, aluen ben akakk ben kalawng thlaang law u vetih Pathen Ram khuiah poei buh a veel haih u ai. 30 Tevengah te tahe ah hukhueng la aka awm he lamhacuekla awm vetih tahe ah lamhacuekla aka awm he hukhueng la awm ai.” tila a thui pe. 31 Tevengah te Farasi thlaang khatsut a tengla law u tih Jesuh nala te, “Herod lawng nang he ngawn ham a ngaih dawngah he kalawng atloela cet loeih” a tina u. 32 Jesuh lawng ahimi nala te, “Tihin ah khaw, thangvuen ah khaw, kai lawng raaithe thli te ka hek vetih thlaangtlo te ka hoeih sak hun ai, a thum hin ah bii ka coeng ai.” tila cet u langtah metaang tengah te thui pe uh.” a tina. 33 Me tih khaw seh, kai ngoen tah tihin ah khaw, thangvuen ah khaw, awmvai ah khaw ka sai nooek te ka sai toengtoeng hun ai; metihtiah tawngha pakhat he Jerusalem khawpui khui nawh atah atloe ame huen ah khaw ngawn ham theen nawh. 34 “Jerusalem, Jerusalem! Nang lawng tawngha thli te na ngawn, Pathen lawng na tengah avan tuih laipai thli te khaw lungto oen na de u! Aainu lawng a ca thli te a phe oen a khuk adah angla na thlaang thli te ka pooem hamla voei yahawh hlang ka ngaih de nang lawng ah na thana. 35 Tedawngah nangmi kah Tempal bok-im te a hoett poen ai. Atak tang kavan thui u, ‘Bawipa miing oen aka law te Pathen lawng yotheenna pe hawn seh’ tila nangmi lawng na thuina atue te apha thlantoe kai he nan hu u tlaih manawh.” a tina.
1 Sabbath khawhin hin at vengah Jesuh tah Farasi thlaang thli mawtkung pakhat im la te buh pan la cet; tevengah thlaang thli lawng Jesuh te rep a doen u. 2 Thlaang pakhat a kut a khaw aka phiing te Jesuh tengla va law, 3 tevengah Jesuh lawng Phungawl cangpueikung thli oen Farasi thlaang thli te, “Mami kah Phungawl lawng Sabbath khawhin ah thlaangtlo hoeih sak ham a ngaih aw, ngaih nawh aw?” tila a doet. 4 Tede ahimi te awlmueh la awm u. Jesuh lawng thlaangtlo te a khue, a hoeih sak tih a tuih. 5 Tecoengah ahimi nala te, “Nangmi timkah thlaang pakhat kah a ca mai khaw, tihnawhtah vaitaw khaw, Sabbath khawhin ah ungrawmdung ah tla kawinih nangmi lawng doek pahoei ohla na awm ai aw?” a tina. 6 Tede he kawngah he ahimi lawng awl thung pe u nawh. 7 Kamyin khatsut lawngah huen theen koek a tuek u te Jesuh lawng a huh, tedawngah he kah thuidoetna he ahimi boeih tengah a thui pe: 8 ‘Thlaang pakhat khat lawng yuluina poei ah n'ceel vengah huen theen koek ah ngawl u boel. Nang lak ah awlpuila aka awm hinyah koei ngaai thlaang khaw a ceel thai mai, 9 tevengah nang hih te aka ceelkung lawngah na tengla law vetih nang nala te, ‘He ah he ahih ngawl seh.’ n'tina ai. Tevengah nang tah yah laat la ahemkoek huen ah te na ngawl ai. 10 Tedawngah nang te thlaang lawng n'khue vengah cet langtah ahemkoek huen ah te ngawl mai hawn, te atah nang te imkung lawng na tengla law vetih, ‘Ka puei, huen theen ngaai dawngah ngawl.’ ti ai. He tila te nang tah atloe kamyin boeih haiah hinyahna na dang ai. 11 A-u khaw amah oen amah a pawm sang u atah adangla tla ai, a-u khaw amah oen amah adangla aka awm tah a pawmsang u ai. 12 Tecoengah Jesuh lawng imkung nala te, “Nang lawngah hingthun buh khaw, thlembuh khaw, buh pan la thlaang na khue vengah na paya thli khaw, na imbe kuirang thlaanglen thli khaw khue boel. Metihtiah ahimi lawng nang te n'khue u van vetih te tila nang lawng na sai te avan thung van ai. 13 Nang lawng poei na sai vengah khawdeng thlaang, kut ngun khaw-ngun thlaang thli, kutkheem khowkheem thlaang thli oen mikpum thlaang thli te khue; 14 ahimi lawngtah nang te n'thung koep thai nawh vetih nang lawng yotheenna na dawng ai. Thlaangdoeng thli duekna kalawng a thawhna khawhin ah Pathen lawng nang te n'thung badai.” a tina. 15 Te kah buh veelna ah aka ngawl thlaang pakhat lawng he awl he a yaak vengah Jesuh nala te, “Pathen Ram khuikah buhlawi poei ah aka thuum van tah yotheen aka dawng ni!” a tina. 16 Jesuh lawng ahih nala te, “Thlaang pakhat lawng buhlawi a thawng tih thlaang yahawh thlaang te a ceel. 17 Buhlawi tel ham atue te a khoek veng atah kamyin thli te khue hamla amah kah tuihyoeihthlaang te a tuih tih, “Law u loeih, soeprep boeih te coekroek la awm poen!” a tina. 18 Tede ahimi boeih pakhat coeng pakhat lawngah peelnangna awl te a thui u. Lamhacuek kah thlaang lawngah tuihyoeihthlaang te tila a thui pe, “Lo ka lai tih ka cet silang ka bueh de ai; ka law thai manawh n'reen mai hawn.” a tina. 19 Thlaang pakhat lawngah, ‘Vaitaw bawh ngaa ka lai tih ka phep hamla awm; ka law thai manawh, n'reen mai hawn.’ a tina. 20 Thlaangtloe pakhat lawngtah, ‘Ka yu ka lawh pek tih ka law thai manawh.’ a tina. 21 “Tuihyoeihthlaang te meel koep tih he ang thli boeih he a bawi manghai tengah a thui pe. Bawi manghai tah a thin sa tih a tuihyoeihthlaang nala te, ‘Khawpui khuikah lawngpui boeih oen imkep imvaai ah aloela cet langtah khawdeng thli, mikpum haaiying thli, kutngun, khowngun thli, kut kheem khow kheem thli te van law puei.’ a tina. 22 Bawt a awm atah tuihyoeihthlaang lawngah, ‘Bawipa, na awlpeek angla ka sai poen, tede awmna ham ahuen hoeng hun.’ a tina. 23 Tedawngah a bawi manghai lawng a tuihyoeihthlaang nala te, ‘Ka im khuiah thlaang abetoetna ham manglai lawngpui oen lawnglak boeih ah cet langtah thlaang boeih te van law puei. 24 Atak tang kavan thui, acuek kah thlaangceel thli a-u khat lawngkhaw ka buh ka aan he teng alai manawh.’ a tina” tila a thui pe. 25 Voei khat vengah thlaangping yahawh hlang lawng Jesuh oen a ceh haih u vengah ahimi benla te maang tih tila a thui pe. 26 “A-u khaw ka tengla aka law thlaang thli lawngah a manu oen ana pa te a lungna lak ah khaw, a yu oen a ca thli te a lungna lak ah khaw, a maya manau thli oen a ngannu thli te a lungna lak ah khaw, amah oen amah te a lungna u lak ah khaw kai he aka lungna ngaai nawh tah ka hubang la awm thai ma-nawh. 27 A-u khaw amah kah thinglam te kawh ruila ka hu ah aka law nawh tah ka hubang la coengg thai manawh. 28 Nangmi tim kah thlaang pakhat lawng imtloensang sak ham a kamthlah atah, bii coengna hamla tangka khoek ai aw tite ming ham lamhala ngawl vetih me yoeh aboeih ai tite a nai anawng ai. 29 Te tila a nai anawng lamha nawh atah bii a tong tih lungdang a suem coengah imtloensang a sak te coeng thai nawh vetih thlaang lawngah a nuihna ai. 30 ‘He thlaang lawngah he imtloensang tah a sak de bii khaw coeng thai nawh!’ ti u ai. 31 Sengpahrang pakhat ahih te teek ham raalkap thongkul oen aka law atloe sengpahrang pakhat te a raalkap thong ha oen kah hamla a ceh atah ahih lawng ngawl lamha vetih te sengpahrang te ka taa thai ai aw tite a poek ai. 32 A taa thai koei nawh atah ahih te teek ham aka law sengpahrang te athla hlangla a awm vengah laipai a tuih vetih roeproeina awl te a thui sak ai.” tila a thui pe. 33 Jesuh lawng awlcuina ah, “Tetih van angla nangmi timkah pakhat lawngah soeprep boeih te a hoett nawh atah ka hubang la coengg thai manawh.” a tina. 34 “Lungkeh tah theen, tede a aalna te a moelh atah aal sak koep ham sai thai la awm tlaih nawh. 35 Laitheen la khaw, laimeen la khaw sai ham theen tlaih nawh; voeih ham ni a awm poen. Yaakna haa aka khueh lawngtah ya seh!” a tina.
1 Hin at ah mangmu cawikung thli oen thlaangthawlh thli tah Jesuh kah awl thui hutung hamla law u, 2 Farasi thlaang thli oen Phungawl cangpueikung thli tah caitoek u tih, “He thlaang lawngah he thlaangthawlh thli khaw a do tih ahimi oen buh Pateng khaw a caak haih u nawh pai he!” ti u. 3 Tedawngah Jesuh lawng ahimi tengah he kah thuidoetna he a thui pe; 4 Nangmi khuikah thlaang pakhat lawngah tuu yakhat khueh mai tih tuuping timkah pakhat te auh mai kawinih n'tu a sai ai? Ahih lawng tuu sawmkua pakua te ramtliim saino a awmna ramhum ah te a ceh taak vetih tuu aka auh te a dang thlantoe a tlap. 5 A dang koep veng atah awmngaih tangkiik tih a lengpang dawngah a kawh tih im la meel. 6 Tecoengah a paya thli oen a imbe kah thlaang thli te a khue tun tih ahimi nala te, “Ka awmngaih tangkiik, tuu aka auh vik te ka dang koep poen, n'awmngaih puei u lah!’ a tina. 7 Atak tang kavan thui u, tetih van angla thawlhna yut ham aka ngaih nawh thlaangdoeng sawmkua pakua lak ah thlaangthawlh pakhat lawng thawlhna a yut dawngah vaan ah awmngaihna yahawh ngaai awm ai.” a tina. 8 “Hutaa pakhat lawngah ngun tangka pheek ha a khueh ti mai lah sih, te khuikah pakhat te a auh atah n'tu a sai ai? Ahih lawng haiim te a vaang coengah im te a tell tih a huh thlantoe im khui tawm ah a tlap. 9 A huh koep veng atah a paya thli oen a imbe kah thlaang thli te a khue tun tih ahimi nala te, ‘Ka awmngaih tangkiik, ngun tangka aka auh te ka dang koep poen, ng'awmngaih puei u lah! a tina. 10 Atak tang kavan thui u, tetih van angla thlaangthawlh pakhat lawng a thawlhna a yut dawngah Pathen kah vanthlaang thli tah awmngaih u.” a tina. 11 Jesuh lawng awl thui a tom koep tih, “Voei khat ah capa pahih aka khueh thlaang pakhat awm. 12 A capa anoca lawngah te, ‘A Pa, ka paang ham koei ro te tahe ah m'pe mai hawn’ a tina. Tedawngah te kah thlaang lawngah a capa pahih ham ro te a pek pe. 13 Hin hih, hin thum coeng atah a capa anoca lawng te amah kah thaihu thli te a yoeih, tangka te a khuen tih atloela te cet. Ahih tah athlahlang ram la cet, te ah te awmtheen awmyaal aboen tih tangka a pooek ayak. 14 A khueh boeih te thloep a hawna. Tecoeng atah te kah ram pum ah te khawthe khawkha tih te vengah te ahih tah n'tu khat khaw khueh tlaih nawh. 15 Tedawngah te ram kah thlaang pakhat tengah bii bi hamla te cet, te kah thlaang lawng ahih te lo la a tuih tih awk a doen sak. 16 Ahih te a-u khat lawngkhaw caak koei a peek nawh dawngah awkbuh dawngkah maicik maidawn cang te a naai poen. 17 Hukhueng atah a lungcuih pan tih tila ti, ‘A pa kah bii aka bi thlaang thli lawng caak lek awkknaa nawh la buh a khueh u, kai tah he ah he ka lamlum tawm poen! 18 Ka tho silang a pa tengla ka cet ai, tecoengah tila ka tina ai, ‘A pa, Pathen oen nang sawah ka thawlh tangkiik poen. 19 Na ca ti hamla ka koeih tlaih nawh; namah kah bii aka bi thlaang la khaw n'khueh mai hawn, ka tina ai, tila a poek. 20 Tecoengah tho tih ana pa tengla te koep meel. “Im kalawng athlana ah a law vengah te ana pa lawng a huh dinn tih a reen tangkiik, heeng phai tih a capa te koe a kop tih a mok. 21 A capa lawng, ‘A pa, Pathen oen nang sawah ka thawlh tangkiik oh poen. Na capa ti ham ka koeih tlaih nawh.’ a tina. 22 Tede ana pa lawng a tuihyoeihthlaang thli te a khue tih, ‘Angki theen koek te aloela van khuen u lang buen sak uh. Kutcabuen te buen sak u langtah khawmuek te khaw muek sak uh. 23 Tecoengah cet u langtah vaitaw sak-awm paduuk te van khuen u langtah ngawn uh, poei sai u sih! 24 Metihtiah ka capa he duek poen de tahe ah hing koep; ahih tah vi vik poen de tahe ah phumpho koep.’ a tina. Tecoeng atah poei te a sai u. 25 “Te veng ah te a capa ahaamca te lo ah awm. Lawngpueng a law phai veng im a pha tawm atah riingding tum awl oen laa sak laam awl te a yaak. 26 Ahih lawngah a tuihyoeihthlaang pakhat te a khue tih a doet, ‘N'tu a sai u?’ a tina. 27 Tuihyoeihthlaang lawng ah, ‘Na nau te im la law koep tih sading ngaimawng la avan pha koep dawngah na pa lawng vaitaw sak-awm paduuk te a bawh pe.’ a tina. 28 A capa ahaam te a thin sa soeh tih im khuila kuun nawh; Te atah ana pa te law tih im khuila kuun ham a capa te a thloep ahoelh. 29 Tede a capa lawng ana pa nala te, “Bueh lah, kum san hlang sal angla nang ham bii ka bi, na awl te ngaai ohla vai khat khaw ka awm nawh. Kai ta n'tu nan peek? Ka paya thli oen awmtheenna poei sai ham me-ee pum at Pateng khaw nan pe nawh! 30 Tede nang kah koe-ava te poeihcaih mai la thlaanghalhnu oen aka hawna na capa he im la a law koep atah vaitawca sak-awm te na bawh pe!’ a tina. 31 Ana pa lawng, ‘Ka ca, nang tah kamah tengah na awm tih ka toen thaihu boeih he nang kah thaihu ni. 32 Tede na nau he tah duek poen de tahe ah hing koep; ahih tah vi poen de tahe ah phumpho koep, tedawngah ka awmngaih tih poei ka sai u,’ tila a thui pe.” a tina.
1 Jesuh lawng a hubang hue tengah, “Vai khat ah kuirang pakhat awm tih thaihu kuemkung tuihyoeihthlaang pakhat a khueh. Thaihu kuemkung lawngah a bawipa kah tangka apoei-oepla a hawna tila kuirang tengah a thui pe u, 2 Tedawngah ahih te a khue tih, ‘Nang kah kawng alam ka yaak he metila a awmna? Ka thaihu boeih na kuemna cayin te m'pe loeih, nang tah thaihu kuemkung la na awm tlaih manawh.’ a tina. 3 Te kah tuihyoeihthlaang lawng a kaw khuiah, ‘Ka bawipa lawng kai he bii n'toeng sak poen ai. Metila ka ti lah ai? Tuilong to ham khaw ka tha lawng noeng koek nawh, Buh bih kutduen ham tah ka yak. 4 N'tu ka sai ai tite ka ming poen! Te tila ka sai atah ka bii he aboet ah khaw a im ah aka awm sak ham paya thli ka khueh poen ai.’ ti. 5 Tedawngah a bawipa kah laiba aka khueh thli te a khue. Lamhacuek kah thlaang te, ‘Ka bawipa kah lai meyoeh na ba pe?’ tila a doet. 6 Ahih lawngah, ‘Olif situi pung yakhat ka ba pe’ a tina. Thaihu kuemkung lawng, ‘He he nang kah cayin seh, ngawl thuk, sawm ngaa la mah thut mai hawn.’ a tina. 7 Tecoengah atloe pakhat te, ‘Nang ta, lai meyoeh na ba?’ tila a doet. Ahih lawngah, ‘Caanghum suum thong khat ka ba,’ a tina. Thaihu kuemkung lawng, ‘He he nang kah cayin seh, yareet la thut mai.’ a tina. 8 Te kah thaihu kuemkung lawng cuihna oen te tila thaihu a sai dawngah a bawipa lawng a koeh; metihtiah he dilai thlaang thli lawng amami kah thaihu a sai vengah aangna khuiah aka awm thlaang thli lak ah cuih u ngai.” a tina. 9 Tecoengah Jesuh lawng, “Tedawngah kavan thui u: dilai bawilenna koeva oen paya laikoei sai uh, bawilenna koeva aboeih coeng dengah ni dungyan im ah nangmi te n'khueh ai. 10 A-u khaw thaihu tehca dawngah uep-awm la a awm atah thaihu bo hlang dawngah khaw uep-awm la awm van ai; a-u khaw thaihu tehca dawngah uep-awm nawh atah thaihu bohlang dawngkhaw uep-awm van manawh. 11 Tecoengah dilai bawilenna koeva khoembelna dawngah uep-awm nawh atah metila bawilenna koeva tang tang te nangmi m'peek ai? 12 Tecoengah thlaang kah koeva thaihu dawngah uep-awm nawh atah namami kah thaihu te a-u lawng m'peek tang ai? 13 “Me ang tuihyoeihthlaang lawngkhaw bawi manghai pahih kah sal la awm thai manawh, ahih lawng pakhat te a thina vetih a khat te a lungna ai; pakhat teng atah a ciil cak vetih a khat te tah a hel acal ai. Nangmi lawng Pathen oen tangka kah bii te pahih bok la na bi renten thai manawh” a tina. 14 Tangka aka ngaih soeh Farasi thlaang thli lawng he kah awl boeih he a yaak u vengah Jesuh te a nuihna u. 15 Jesuh lawng ahimi nala te, “Nangmi lawng thlaangtloe kah mik huh atah thlaangdoeng la na sa u, tede nangmi kah thinkaw lungbui te Pathen lawng a ming. Metihtiah thlaang lawngah phutlo tangkiik la a poek thaihu thli he Pathen mik huh atah a phu awm nawh. 16 Mosi kah Phungawl oen tawngha thli kah cathut te tah Baptisma pekung Johan dung toe ah ni a cak; tecoeng kalawng tah Pathen Ram kawng Awlthang Theen te a phawng u tih thlaang boeih lawng toklekla kuun u. 17 Phungawl dawngkah a yitt koek a dek yet te a auh lak atah vaan oen dilai a auh te yoei ngaai. 18 “A-u lawngkhaw a yu te a ma tih yu tloe a lawh atah samphaih poen; tecoengah yu thlaak hutaa te khaw aka yuna thlaang tah samphaih poen ni,” a tina. 19 Voei khat tah kuirang thlaang pakhat awm tih hinaak himbai phutlo oen thoekcau u tih hin roekk ah awmtheen a boenn. 20 Khawdeng thlaang pakhat Lazaruh aka miingna te awm van tih apum araw boeih ah vueihacang-ing lawng a yaawl, kuirang thlaang kah thawhka toela te avan law puei u, 21 kuirang thlaang kah caboi dawng kalawng aka tla buhdik anhaai te caak hamla a ngaiuep. Ui Pateng khaw law tih ahih kah vueihacang-ing te a leh pe. 22 “Khawdeng thlaang te a duek atah vaan kah poeipui ah Abraham tengah ngawlh sak hamla vanthlaang thli lawng a ceh puei u. Kuirang thlaang te khaw duek van tih a up u. 23 Ahih tah Hell khuiah patang a khang, athlahlangla a dan hang vengah Abraham tengah Lazaruh aka ngawl te a huh. 24 Te atah paang tih a khue, ‘A pa, Abraham! Kai he n'reen mai langtah Lazaruh te van tuih lah, a kutpue te tui dawngah nuemm selang ka daang he van suul lah seh, he kah hai khuiah he patang ka khang sut oh poen!’ a tina. 25 Tede Abraham lawngah, ‘Ka capa, na hing khui puet ah thaihu theen boeih te m'peek poen, Lazaruh lawngtah athe thaihu boeih adang te ming lah saw. Tede, tahe ah ahih tah he ah he awmtheen a boenn tih nang tah patang na khang poen. 26 Tecoengah mami kah laklaw ah longhoi dung pakhat awm, tedawngah he kalawng ah he nang na awmna benla laan hamla aka ngaih thli khaw laan thai nawh, nang na awmna kalawng kaimi benla he a-u khatca khaw laan thai nawh? a tina. 27 Kuirang thlaang lawngah, ‘Tetih atah, A pa Abraham, reenna kavan bih, Lazaruh te a pa im la tuih lah, 28 te ah te ka manau thli pa ngaa awm hun. Lazaruh te tuih langtah ahimi khat lawngah khaw he kah patang khangna ahuen he avan phana u nawh ham ahimi tengah ngaithuenna awl van thui pe lah seh.’ a tina. 29 Abraham lawngah, ‘Na manau hue te ngaithuen awl thui pe ham Mosi oen tawngha thli awm ta,’ ahimi kah awl thui te na nau hue lawng hutung ngoen seh,” a tina. 30 Kuirang thlaang lawngah, ‘A pa Abraham, tete khoek nawh! Thlaang pakhat khat he duekna kalawng tho tih cet kawinih ahimi lawngah a thawlhna te yut ai,’ a tina. 31 Tede Abraham lawngah, ‘Ahimi lawngah Mosi oen tawngha thli kah awl te a hutung u nawh atah thlaang pakhat khat duekna kalawng tho mai cakhaw ahimi lawng tangna manawh,’ tila a thui pe,” a tina.
1 Jesuh lawng a hubang hue tengah, “Thawlhna khuiah thlaang aka tlaak sak thaihu thli awm ngai khoek ai, tede te ang tlaakna te aka sai thlaang thli ham tah khawmap tangkiik! 2 He camaw tim kah pakhat mai khaw thawlh sak lak atah caang neetna lungto bohlang a rawn a awi tih tuitunlii khuiah tla kawinih ahih ham theen bet ai. 3 Tedawngah na sai ham koei te ngaithuen uh! Na boenhui te a thawlh atah ahih te toel athaam, a yut alawi atah a sawah khawdawp ngaai peh. 4 Ahih lawng hin at ah voei sarih na sawah thawlhna a sai tih voei sarih van na tengah law tih, ‘Ka yut oh poen,’ a ti atah a sawah khawdawp van ngaai peh,” a tina. 5 Celtuih thli lawng Bawipa nala, “Kaimi kah oengna he van roeng sak lah,” a tina u. 6 Bawipa lawngah, “Nangmi lawng antammu teh mai mah oengna te na khueh u atah he kah songlet thing he, ‘Na yung oen haih ah namah poek ah phuk u langtah tuitunlii ah namah poek ah liing u lah,’ na tina atah nangmi awl te avan ngaai ai,” a tina. 7 “Nangmi tim kah thlaang pakhat lawngah laithawl aka sai mai khaw, tuudoen mai khaw seh tuihyoeihthlaang pakhat na khueh ti mai lah sih. Ahih te lo kalawng law tih a paipuek ah, ‘Aloela buh ca loeih’ na tina u ai aw? 8 Na tina u manawh! Te tila na tina lak ah nang lawng, ‘Kai hamla thlembuh van lo de lah, tecoengah rangkhukna angki te buen langtah buh ka caak vengah kai he n'toet de lah; tecoengah buh te na caak badai,’ na tina ai. 9 Te kah tuihyoeihthlaang lawng awl a ngaai dawngah te awmngaih awl thui pe ham ngoe nawh de lah koen? 10 Nangmi khaw te tila na awm u van, sai hamla avan thui boeih te na sai u coengah, ‘Kaimi tah tuihyoeihthlaang mai ni; kamami kah sai ham koei te ni ka sai u’ ti u mai hawn,” tila a thui pe. 11 Jerusalem khaw benla Jesuh a ceh phai vengah Samaria oen Galili laklaw ramri ah te cet. 12 Vangca pakhat la ahih te a kuun vengah haibe aka na thlaang paha a tengla law u. Ahimi lawngah athlala hoer pai u tih, 13 “Bawipa Jesuh! Kaimi he n'reen lah!” tila paang u. 14 Jesuh lawng ahimi te a huh vengah, “Cet u langtah nangmi te khawsoeih thli lawngah n'yutt n'yam u seh.” a tina. Lawngpueng a ceh phai u vengah ahimi tah boeih hoeih u. 15 Ahimi tim kah pakhat lawngah ka hoeih poen tila a ming vengah, meel koep tih angaihhlangla Pathen te a koeh. 16 Jesuh kah a khowkungah dilai dawng buekuep tih Jesuh tengah uemna awl a thui. Te thlaang te tah Samaria thlaang ni. 17 Jesuh lawng, “Thlaang paha hoeih u de lah koen ni, atloe pakua hue teta mela oh kai? 18 N'tu ah he kah thlaangphun tloe pakhat bueng lawngah Pathen thangpawm ham a va meel koep?” a tina. 19 Jesuh lawng ahih nala te, “Tho lang cet loeih; na oengna lawng n'hoeih sak poen,” a tina. 20 Farasi thlaang khatsut lawng Jesuh nala te, “Pathen Ram he mevengah avan pha ai,’ tila a doet u. Ahih lawng awl a thung pe tih, ‘Pathen Ram he tah huh thai koeila law manawh. 21 A-u lawngkhaw, ‘Bueh lah he ah awm he! tihnawhtah, te ah awm te!’ tila thui thai manawh, metihtiah Pathen Ram tah namami khuiah ni a awm.” a tina. 22 Tecoengah a hubang hue te, “Thlaanghing Capa kah Khawhin hin at te nangmi lawng huh hamla na ngaihna atue law ai, tede nangmi lawng na hu u manawh. 23 Nangmi tengah, ‘Bueh lah, ke ah awm ke!’ tihnawhtah, ‘Bueh lah, he ah awm he!’ tila aka thui thlaang awm ai. Tede tlap hamla cet u boel. 24 Thlaanghing Capa kah khawhin tah khaw thlap apha vengah khawhi-mikboet akhatben kalawng khatben toe ah a aangna lawng a thue rawngtheng angla te awm ai. 25 Tede ahih lawngah lamhala patang palai a khang vetih tihin hang kah thlaang thli lawng ahih te a hoett u ai. 26 Noah dung vengkah a awm angla te Thlaanghing Capa kah khawhin vengah khaw awm van ai. 27 Noah te lowng khuila a kuun khawhin toe ah thlaang thli lawng a caak a awkk u tih hutaa tawngpa lawng yu a lawh u tih vaa a sak u, tuiliwpui law khuengdeng tih ahimi te boeih a khuk. 28 Lot dung vengah a awm angla te awm van ai. Thlaang boeih lawng a caak a awkk u, thaihu a lai u tih a yoeih u, thingkung rawkung a liing u tih im a sak u. 29 Lot lawng Sodom khaaw te a thawh taak hin vengah vaan kalawng hai oen kat hai te, khaw angla tlan tih ahimi boeih te a ngawn. 30 Thlaanghing Capa kah khawhin a thoeng vengah khaw te tila awm van ai. 31 Te khawhin ah amah kah imphu ah aka awm lawng a thaihu thli te lawh hamla im khuila kuun re tlaih boel seh; te tila te lo ah aka awm thlaang lawngkhaw im la meel koep tlaih boel seh. 32 Lot kah a yu te hilh u boel! 33 A-u khaw a hingna te thlawn hamla a yawm atah a hingna te sung ai; A hingna te a sung atah hingna te a dang ai. 34 Nangmi tengah kavan thui u, te kah khawhin ah ihkhun dawngah aka ip haih thlaang pahih khuiah pakhat te a lawh vetih a khat te a ceh taak ai, 35 Sum deeng haih hutaa pahih khuiah pakhat te a lawh vetih pakhat te a ceh taak ai. 36 Lo ah bii aka bi haih thlaang pahih khuiah pakhat te a lawh vetih pakhat te a ceh taak ai.” a tina. 37 A hubang hue lawng ahih te, “Bawipa, te tila te me tuek ah a awm ai?” tila a doet u. Jesuh lawngah, “Duek rawkk a awmna roekk ah langta thli tun ai,” a tina.
1 Tecoengah Jesuh lawng a hubang hue te thathe muehla thangthui poepa ham awm tite cangpueina hamla thuidoetna pakhat ahimi tengah a thui pe. 2 Ahih lawngah, “Khawpui pakhat ah Pathen khaw rih nawh tih thlaang khaw aka hinyah nawh awlcekbawi pakhat awm. 3 Te kah khawpui khuiah te huhai pakhat awm van, ahih lawngah awlcekbawi tengla law tih, ‘Ka raal te a dokna ham n'bawm de lah!’ tila a bih poepa. 4 Awlcekbawi lawng a thana khiing de aboet lam atah, ‘Kai lawng Pathen Pateng ka rih nawh tih thlaang khaw ka hinyah nawh, 5 he kah huhainu lawng he n'lawn khiing aih poen dawngah awl ka tloek pe mai poen ai. Te tih nawh kawinih law poepa vetih hukhueng atah kamah he patang m'peek lat ai!? ti.” a tina. 6 Tecoengah Bawipa lawng, “Adoengla awl aka cek nawh awlcekbawi kah awl te hutung u lah. 7 Te atah amah tengah khawyiin khawdaai paang tih bawmna aka bih thlaang thli ham ah Pathen lawng adoengla awl te cek nawh ai aw? Ahimi te bawm hamla a tat loe nawh ai aw? 8 Nangmi tengah kavan thui, ahih lawngah ahimi kah ngaihna angla awl a cek vetih aloela a sai pe ai. Tede Thlaanghing Capa lawng a Law vengah dilai sawah he oengna te a huh ai aw?” a tina. 9 Amah kah theenna te a uepna tih thlaang boeih te tula aka sak nawh thlaang thli tengah he kah thuidoetna he Jesuh lawng a thui pe. 10 “Voei khat ah thlaang pahih tah thangthui hamla Tempal bok-im la cet hih: Pakhat te tah Farasi thlaang la awm tih a khat te tah mangmu cawikung la awm. 11 Farasi thlaang lawngtah amah bueng pai tih, “Aw, Pathen, kai tah ngaihmoekna aka khueh thlaang, hoem thui thlaang, samphaih thlaang, he ang thlaang thli angla ka awm nawh dawngah kan uem tangkiik. He kah mangmu cawikung angla khaw ka awm nawh dawngah kan uem baal 12 Kai tah yarh khat ah hin hih buh ka yeh tih, tangka ka dang boeih khuikah paha ah pakhat te nang kan peek.” tila thangthui. 13 Tede mangmu cawikung tah athlala pai tih vaan benla Pateng maang ha nawh, a raang te a tum tih, ‘Aw Pathen, kai thlaangthawlh he n'reen lah,’ tila thangthui. 14 Nangmi tengah kavan thui u, mangmu cawikung lawng Pathen haiah doengna te a huh tih im la meel. Farasi thlaang lawng atah doengna te hu nawh. A-u khaw amah oen amah a pawmsang u atah adangla tla vetih a-u khaw amah oen amah te adangla aka awm tah a pawmsang u ai. 15 Thlaang khatsut lawng a ca camaw thli te Jesuh lawngah a sawah a kut tloeng pe selang tah thangthui pe seh a ti u dawngah Jesuh tengla avan law puei u. A hubang hue lawng a huh u tih ahimi te a ho u, 16 tede Jesuh lawng camaw thli te amah tengla a khue tih, “Camaw thli te ka tengla law seh, ahimi te kanghalh u boel, metihtiah Pathen Ram tah he ang camaw thli kah ni. 17 He he hilh u boel! A-u lawngkhaw Pathen Ram te camaw angla a do nawh atah te Ram ah kuun manawh.” a tina. 18 Judah thlaang mawtkung pakhat lawng Jesuh te, “Cangpueikung Saya Theen, dungyan hingna ka dangna ham n'tu ka sai ai? tila a doet. 19 Jesuh lawng ahih te, “N'tu ah kai he thlaang theen nan tina? Pathen pakhat bueng nawh atah a-u khat khaw theen nawh.” a tina. 20 Awlpeek thli te na ming te ta: ‘Hutaa tawngpa thawlhna sai boel; thlaang ngawn boel; huuen boel; asoeng nawh la thlaang te thawlh peel boel; na nu oen na pe te hinyah;’ ti de lah koen.” a tina. 21 Te thlaang lawngah, “He kah awlpeek boeih he ka camaw veng kalawng ka vai boeih poen.” a tina. 22 Jesuh lawng he awl he a yaak vengah ahih nala te, “Nang lawng na sai ham pakhat a ngoe toengtoeng hun. Na khueh boeih te yooei langtah tangka te khawdeng thli te peh, te atah nang lawng vaan ram ah koeva thaihu na dang ai; tecoengah law langtah ka hu ah bang lah.” a tina. 23 Tede te kah thlaang lawng he awl he a yaak vengah a kaw la the malcal, metihtiah ahih tah broela a bawi alen dawngah ni. 24 Jesuh lawng ahih kah kawthe te a huh vengah, “Kuirang thlaanglen ham tah Pathen Ram khuiah kuun hamla rai tangkiik oh he! 25 Kala-uk pakhat phaimeet khuiah a kuun lak ah kuirang thlaang pakhat lawng Pathen Ram khuiah kuun ham rai tangkiik,” a tina. 26 Ahih kah awlthui te aka ya boeih lawngah, “Tetih atah a-u lawng thlawnna te a dang ai,” tila a doet. 27 Jesuh lawng, “Thlaanghing ham aka coengg thai tlaih nawh te Pathen ham tah coengg thai.” tila a thui pe. 28 Tecoengah Piter lawng, “Bueh lah! Na hu ah bang hamla kaimi lawngtah ka im khaw ka ceh taak u poen he.” a tina. 29 Jesuh lawng ahimi nala te, “Oeih, atak tang kavan thui u, a-u khaw Pathen Ram kawngah a im khaw, a yu a ca thli khaw, maya manau khaw, a manu oen ana pa khaw, ca-anau thli khaw aka ceh taak tah, 30 tahe san ah khaw, a pueh alawila a dang vetih aka law ham koei san ah khaw dungyan hingna te a dang ai.” a tina. 31 Jesuh lawng hubang thlaihih te ahuep ahelna ah a ceh puei tih, “Hutung u lah! Mami he Jerusalem la n'cet u ai, te ah te tawngha thli lawng Thlaanghing Capa kawng a thut oepsoeh boeih te soep ai. 32 Ahih te Gental thlaang thli kut ah a peek u vetih nuihbu la a sai u ai, a sal aphaam u vetih a tumthoeih u ai. 33 Ahimi lawngah a bawh u vetih a ngawn ai, tede athum hin ah tho koep ai.” tila a thui pe. 34 Tede a hubang hue lawng he ang thli he khat khaw yaakming u nawh; ahimi ham tah he kah awl thuingaihna he thuhphah la awm tih Jesuh lawng a thui pe akawng alam he ming u nawh. 35 Jesuh tah Jeriko khaaw te a pha tawm, tevengah lawngteng ah mikpum thlaang pakhat ngawl, kut a duen tih buh a bih. 36 Ahih lawngah thlaangping kah ceh tuen awl te a yaak vengah, “He he n'tu muuem ca?” tila thlaang thli te a doet. 37 Ahimi lawngah, “Nazaret khaaw kah Jesuh va law” a tina u. 38 Ahih lawngah paang tih, “Devid capa, Jesuh! Kai he n'reen lah.” a tina. 39 Hai ben kah aka cet thlaangping lawngah ahih te a tlung u tih duem awm ham a thui pe u. Tede ahih lawngah angaihhlangla paang tare tih, “Devid capa, kai he n'reen lah!” a tina. 40 Tevengah Jesuh te cot pai tih te kah mikpum te a tengla te van law puei uh a tina. A teng avan pha atah Jesuh lawngah, 41 “Nang hamla n'tu kavan sai ai?” tila a doet. Ahih lawng, “Bawipa, ka mik he a tueng koep ham ka ngaih.” a tina. 42 Jesuh lawng, “Na mik tueng koep seh! Na oengna lawng na mik avan tueng sak poen.” a tina. 43 Ahih te a mik tueng pahoei, Jesuh hu ah bang tih Pathen tengah awmngaih awl a thui. Te tila a awm te thlaangping lawng a huh vengah ahimi boeih lawng Pathen te a thangpawm u veng.
1 Jesuh tah Jeriko khaw la kuun tih te kalawng poe cet. 2 Te ah te Zakia aka miingna mangmu cawikung bawi pakhat awm tih ahih tah bawireng tangkiik. 3 Jesuh he a-u kai ti tih huh hamla a yawm, tede ahih tah thlaang hemm la awm tih thlaangping lawng a thlip khoep dawngah Jesuh te hu thai nawh. 4 Tedawngah Jesuh a cehna koei ben ah thlaangping kah hai benla heeng phai tih ahih te a huhna ham thaihba thing dawngah luui. 5 Jesuh lawng te huen te a pha atah asaw benla maang hang tih Zakia nala te, “Zakia, aloela rum thuk, tihin ah nang im ah ka pah ai.” a tina. 6 Zakia tah aloela rum thuk tih awmngaih cala ahih te a pah sak. 7 Te tila a awm te thlaang thli lawng a huh u vengah, “He kah thlaang he thlaang-thawlh im ah pah hamla a ceh maica!” ti tih caitoek u. 8 Zakia lawng pai hang tih Bawipa nala te, “Bawipa, hutung lah! Ka khueh thaihu avaang athal ah khawdeng thlaang thli ka pe ai, thlaang ka thai ka latna tih thaihu ka lawh pe atah apueh asawm let lii la ka sah ai.” a tina. 9 Ahih te Jesuh lawng, “He kah im ah thlawnna ti hin ah a pha poen, metihtiah ahih khaw Abraham kah cadil van ni. 10 Thlaanghing Capa tah thlaangha paataam tlap ham oen ah thlawn ham ni a law.” a tina. 11 Thlaangping hue lawng awl a hutung u lii vengah he kah thuidoetna pakhat he a thui pe. Jerusalem te a pha tawm u poen tih ahimi lawngtah Pathen Ram he tueng pahoei poen ai tila a poek u. 12 Tedawngah tila a thui pe, “Voei khat ah areng aka sang thlaang pakhat awm tih sengpahrang la coengg ham khaw thla la cet, tecoeng atah im la meel koep hamla te kamthlah. 13 A ceh thlan ah tuihyoeihthlaang paha te a khue, ahimi te sui tangka pheek at rip a peek tih, “Khawlawng la ka ceh ruet ah, he kah tangka oen thaihu thaiha yooei uh.” a tina. 14 Tede ahih te a ram khuikah thlaang thli lawng a thina u dawngah laipai a tuih u tih, “He kah thlaang he kaimi lawngah sengpahrang la ka ngaih u nawh.” tila te a thui sak u. 15 Te kah thlaang te sengpahrang la a awm coeng atah koep meel. A tuihyoeihthlaang thli lawng tangka apuung ataai meyoeh a dang kai tite ming a ngaih tih ahimi te pahoei a khue. 16 Lamhacuek kah thlaang te law tih, ‘Bawipa! Nang lawng nan peek tangka pheek at oen thaihu thaiha ka yoeih tih apuung ataai sui tangka pheek ha ka dang,’ a tina. 17 Tevengah ahih lawng, ‘Theen! Nang tah aka theen tuihyoeihthlaang ni! Nang tah thaihu tehca dawngah uep-awm la na awm tih khawpui paha ukkung la kan khueh ai.’ a tina. 18 Tecoengah a pahihna tuihyoeihthlaang te law tih, ‘Bawipa, nang lawng nan peek tangka pheek at oen thaihu thaiha ka yoeih tih apuung ataai sui tangka pheek ngaa ka dang,’ a tina. 19 Ahih te khawpui pa-ngaa ukkung la na awm ai,’ a tina. 20 Atloe tuihyoeihthlaang te law tih, ‘Bawipa, nang kah tangka te awm ngoen he; baipeen oen ka cuun tih ka kuem mangkhak ta.’ a tina. 21 Nang tah amangkhak thlaang la na awm tih kan rih tangkiik. Nang lawngtah namah kah thaihu nawh khaw na lawh tih caangti na tuh nawh te khaw na ah mai? a tina. 22 Ahih nala te, ‘Nang thlaangthe tuihyoeihthlaang! Na awlthui te namah awlcekna ham ka hawna ai! Kai he amangkhak thlaang, kamah kah thaihu nawh khaw ka lawh tih caangti ka tuh nawh te khaw ka ah te na ming ta. 23 Theen, te atah, n'tu ah tangka kuemna bengh ah ka tangka te na khueh nawh? Ka meel koep vengah tangkaca oen acingrang la ka dang ai ta.’ a tina. 24 Tecoengah te kah aka pai thlaang thli nala te, “Ahih tengkah sui tangka te lo u langtah tangka pheek ha aka khueh tuihyoeihthlaang te pe uh.’ a tina. 25 Tede ahimi lawng, ‘Bawipa, ahih tah tangka pheek ha a khueh poen ta!’ a tina u. 26 Ahih lawng awl a thung pe tih, ‘Kavan thui u, yahawh hlang aka khueh te yahawh ngaai a peek ai; tede aka khueh nawh te a khueh duen Pateng khaw a lawh pe ai. 27 Kai he amami kah sengpahrang la awm sak ham aka ngaih nawh ka raal thli te van law puei u langtah ahimi te ka hai ah ngawn uh!’ a tina” tila a thui pe. 28 Jesuh lawng he kah thuidoetna awl he a thui coengah ahimi haiah Jerusalem la te cet. 29 Olif Tlaang tengkah Betfat oen Bethani khaaw te a pha u tawm atah a hubang pahih te hai la a tuih tih tila awl a uen: 30 ‘Na hai kah khaaw la ke an cet hih langtah khaaw khuila na kuun hih vengah a-u lawngkhaw a cit thlan lacano pakhat a kiing u te na huh pahoei hih ai. A kiingna rui te thlam hih langtah he la he van khuen. 31 Thlaang pakhat khat lawngah n'tu ham rui te na thlam a ti atah, Bawipa lawng a ngoe tila thui peh.” a tina. 32 Ahih rawi lawng cet hih tih Jesuh lawng a thui pe angla soeprep boeih te a huh. 33 Ahih rawi lawng lacano a khihna rui te a thlam hih lii vengah la khuehkung lawngah ahih rawi nala te, “N'tu hamla rui te na thlam hih?” a tina. 34 Te rawi lawngah, “Bawipa lawng a ngoe,” a tina hih tih, 35 Jesuh tengla lacano te a khuen pe. Tecoengah ahimi lawngah amami kah himbai te lacano kah a uen dawngah a phaih u tih Jesuh te a ngawlh sak u. 36 Jesuh lawng lacano te a cit tih a ceh phai vengah thlaangping lawng amami kah himbai te lawngpui ah a phaih u. 37 Jerusalem te a pha tawm tih Olif Tlaang tengkah singlingla lawngpui a rum thukna ahuen kalawng tah a hubang thli thlaangping lawngah kawpoek rai thaihu thli te a huhna dawngah Pathen te a uem u tih angaih-hlangla a thangpawm u: 38 “Bawipa miing oen aka law sengpahrang tah Pathen lawng yotheen kam-awmna pe hawn seh! Vaan ah roepna awm selang Pathen tengah ruep-awmna awm hawn seh!” tila paang u. 39 Tevengah thlaangping timkah Farasi thlaang khatsut lawng Jesuh nala te, “Saya, na hubang thli he awl a phahna ham thui pe lah,” a tina u. 40 Jesuh lawngah, “Kavan thui u, ahimi lawng awl phah sap kawinih lungto thli lawng amah poek ah paang ai ta.” a tina. 41 Jerusalem khawpui te a pha tawm tih, Jerusalem te a huh atah rap. 42 “Tihin ah ngaimawngna hamla n'tu angoe ti bueng mah te na ming u mai kawinih! Tede nang lawng tahe ah na hu thai nawh! 43 Nang he na raal thli lawngah raalvawng oen ceemraal oen ah n'duum khoep vetih khatben khatbang kalawng n'khaih khoepna khawhin te a pha ai. 44 Ahimi lawngah nang te m'phe phengvel vetih na vawngup khuiah na thlaang thli te a ngawn dingkang poen ai. Ahimi lawng lungto khatca khaw khupthal ohla awmna huen ah ceh taak u manawh, metihtiah nang thlawn hamla Pathen a lawna atue atang te na ming nawh dawngah ni!” a tina. 45 Tecoengah Jesuh tah Tempal bok-im khuila kuun tih thaihu aka yooei thlaang thli te pheng a vai, 46 ahimi nala te, “Caciim dawngah, Pathen lawng, ‘Kai kah Tempal bok-im tah thangthuina im tila a thui u ai.’ tila a thut te ta. Tede nangmi lawngtah thlaanghuuen pa caan thli kuepyingna la na sai u poen.” a tina. 47 Jesuh lawng khawhin roekk ah Tempal bok-im khuiah a cang puei u. Khawsoeih ahaamca thli, Phung-awl cangpueikung thli oen thlaangping mawtkung thli lawng ahih te ngawn ham a ngaih u, 48 tede thlaang boeih lawng ahih awl te a thung u tih lung at khaw thlauh ham a ngaih u nawh dawngah ahimi lawng te tila te sai ham along a-im hu u nawh.
1 Hin at ah Jesuh lawng Tempal bok-im khuiah thlaang thli te a cang puei tih Awlthang Theen te a phawng, khawsoeih ahaamca thli oen Phungawl cangpueikung thli, bokna ben kah ahaamca thli thik at la haih law u tih, 2 ahih nala te, “He thaihu thli sai hamla ame ang saithaina na khueh? Saithaina aana he a-u lawng m'peek? van thui lah” a tina u. 3 Jesuh lawng ahimi nala, “Nangmi he tahe ah awl khat ah kan doet u van lah ai. 4 Johan lawng baptisma peek ham saithaina aana he Pathen tengkah a huh aw, tihnawhtah thlaanghing tengkah aw? Van thui u lah,” a tina. 5 Ahimi lawngah amami oen amami te oelhtaih khiing u tih, “Metila n'thui u lah ai? ‘Pathen tengkah a dang,’ tila n'thui pe kawinih ahih lawngah, ‘N'tu ah Johan te na tangna u nawh ti ai ta. 6 Tede mami lawng, “Thlaanghing tengkah ni,’ n'tina u kawinih he kah thlaang boeih lawngah Johan he tawngha tangtang ni tila a oeng u dawngah lungto oen n'de ai,” ti u. 7 Tedawngah ahimi lawng, “Ame kah nuem ka ming u nawh.” a tina u. 8 Te atah Jesuh lawng ahimi te, “Tetih atah kai lawngkhaw he kah thaihu thli he ame kah saithaina aana oen ka sai ti he ka thui van manawh” a tina. 9 Tecoengah Jesuh lawng thlaangping hue te he kah thuidoetna awl he a thui pe: “Thlaang pakhat lawngah misurdum a sai tih dum te thlaang a vat, tecoengah amah tah khawlawng thla la cet tih asan hlang awm. 10 Misur thaih bit tue a pha veng atah a salpa pakhat te dum vat thlaang thli tengla a tuih tih amah lawng ahimi tengkah dang ham koei te a lawh sak. Tede dum aka vat thlaang hue lawng a salpa te a tam doetthloet u tih atliing saloella a meel sak u. 11 Tecoengah atloe a salpa pakhat te a tuih koep; tede dum aka vat thlaang thli lawng ahih te khaw a bawh doetthloet u tih athe akhana u, yah a bai u tih atliing saloella te a meel sak u. 12 Tecoengah a pathumna a salpa te a tuih; dumvat thlaang thli lawngah ahih te khaw boengha a caak sak u tih dum adaubenla a voeih u. 13 Tecoeng atah dumkhuehkung lawng, ‘Metila ka sai lah ai? Ka lungna duet ka capa he man nih ka tuih mai poen sui, ahih ngoen tah a hinyah u ngai badai!’ ti. 14 Tede dum vat thlaang thli lawng ahih te a huh u vengah, ‘Ahih he tah dum khuehkung kah a capa ni. Ngawn u sih, ahih lawng a paang ham koei ro he mami ham awm seh!’ tila a thui u. 15 Tedawngah ahimi lawng a capa te dum adaubenla a khuen u tih a ngawn u. Tetih atah misurdum khuehkung lawng dum vat thlaang thli te metila a sai?” 16 Ahih te law vetih te kah thlaang thli te a ngawn coeng atah misurdum te thlaangtloe a vat ai.” tila a thui pe. Thlaangping lawng he awl he a yaak u vengah, “Te tila te awm roe mai boel seh!” ti u. 17 Jesuh lawng ahimi te he tila a doet, “Caciim dawngah, im aka sa thlaang thli lawng aphu aka awm nawh angla a hoett u lungto te atloe boeih lak ah awlpui koek la coengg,’ tila a thui te ta n'tu a thuingaihna? 18 A-u khaw te kah lungto dawngah aka tla boeih tah adiik anuui la rek vetih te kah lungto lawng a tlaak thil thlaang te khaw adiik avaai la a neet ai.” a tina. 19 Phungawl cangpueikung thli oen khawsoeih ahaamca hue lawng he kah thuidoetna awl he amami ni a thuingaihna tite a ming u dawngah Jesuh te tuuk pahoei ham a ngaih u; tede ahimi lawngah thlaangping te a rih u. 20 Tedawngah ahimi lawng atue theen te a ring u. Tedawngah saithaina aana aka khueh Rom acoyah kah ram ukbawi kut ah Jesuh te peek thai ham, thlaang khatsut te thlaangdoeng la aka sa u ham tangka kutsuh a peek u tih Jesuh te awl kaa doetdapna oen thawlhna te thuep aka doen la a tuih u. 21 He kah raalyam thlaang hue lawngah Jesuh nala te, “Saya, nang lawng na thui tih na cang puei thli he soeng tila ka ming u. Nang lawngtah thlaang mik-hai khaw dan muehla Pathen kah kawngaihna akawng awltak te na cang puei tila ka ming u. 22 Kaimi lawngah Rom sengpahrang sangluel tengah mangmu peek hamla mami kah Phungawl oen kalh u the aw, kalh u nawh aw? van thui lah.” a tina u. 23 Tede Jesuh lawng ahimi kah thailatna te thiim a ming tih, 24 “Ngun tangka pakhat ah n'huh sak u lah. Tangka dawngah a-u kah muei-ame oen a miing a awm?” a tina. Ahimi lawngah, “Sengpahrang sang-luel kah mueime oen a miing awm,” a tina u. 25 Tedawngah Jesuh lawng, “Tetih atah Sengpahrang sangluel kah koe te sengpahrang sangluel te pe uh, Pathen kah koe te Pathen pe uh” a tina. 26 Ahimi lawng thlaangping hai ah te a thawlhna khat khaw tu u thai nawh, ahih kah awlthungna te a kawpoek la rai u tih awl mueh thuep la awm u. 27 Tecoeng atah, thlaang he duekna kalawng ah tho koep nawh tila aka thui Sadusi thlaang khatsut te Jesuh tengla law u tih ahimi lawng, 28 “Saya, Mosi lawngtah kaimi ham phungawl tila avan thut: ‘Thlaang pakhat lawng a ca sak muehla a yu te a duek taak atah a manau lawng a maya yu te paang seh, ca-anau cuun selang tah aka duek a maya kah ca-anau ti u seh,’ tila a thut. 29 Voei khat ah boenhui pasarih awm; ahaam koek lawng te yu a lawh de ca sak muehla duek. 30 Tecoengah apabena lawngah te kah hutaa te a yuna tih ca sak muehla a duek taak van. 31 Tecoengah apathumna a manau lawng a yuna de ca sak muehla a duek taak baal. Te tila te boenhui pasarih lawng ca sak muehla boeih a duek taak u. 32 Hukhueng atah te kah hutaa khaw duek van. 33 Boenhui thlaang pasarih lawng ahih te a yuna u, tetih atah thlaangduek thawhkoepna khawhin ah a-u kah a yu la a awm ai?” tila a doet u. 34 Jesuh lawng ahimi te, “Hutaa oen tawngpa lawngah hingkhui vengah ni yu vaa la a awm ai, 35 tede duekna kalawng aka tho ham koei hutaa oen tawngpa hue tah aka law ham koei hingna dawngah yuvaa la awm tlaih manawh. 36 Ahimi tah vanthlaang angla awm u vetih duek thai manawh. Ahimi tah duekna kalawng tho koep u poen tih Pathen kah ca-anau la ni a awm u poen. 37 Thlaangduek tho koep ai ti he Mosi lawng aciimphanla a thui. A boeih tangte tangpuem ungna kawng a thuina dawngah Bawipa te, ‘Abraham Pathen, Isak Pathen oen Jakob kah Pathen,’ tila a thui. 38 Ahih tah aka hing hue kah Pathen la awm tih aka duek thli kah Pathen nawh ni, ahih dawngah thlaang boeih tah hing.” tila a thui pe. 39 Phungawl cangpueikung khatsut hue lawngah, “Saya, awl na thung pe he theen!” a tina u. 40 Tedawngah ahimi lawng Jesuh te awl kam at khaw doet ha u tlaih nawh. 41 Jesuh lawng ahimi nala te, “Messiah tah Devid cadil la awm ai tila te metila a thui thai u kai? 42 Metihtiah Devid amah lawng Saam cabu dawngah, ‘Bawipa lawng ka Bawipa tengah, 43 Na raal thli te na khowtloeng la ka sai thlantoe Ka bantang ben ah he ngawl lah,’ tila a thui. 44 Devid lawng ahih te, ‘Bawipa’ a ti atah metila Messiah te Devid cadil la a awm thai ai?” tila a doet. 45 Thlaangping lawngah ahih kah awl te a hutung u lii vengah Jesuh lawng a hubang hue te, 46 “Phungawl cangpueikung thli tengah he ngaithuen u lah, ahimi lawngah himbaidung bai oen yingyawi ham a ngaih u, thaihu yoeihna huen ah thlaang kah voemtoeina oen hinyahna te a ngaih u; sinakok ah ngawlhna athloekla a hooep u te a tuek u tih poei saina ah ngawlhna atheen koek te a tuek u; 47 huhai tumtee kah thaihu oen a im te a rot pe u tih thlaang kah yaak ngaih la asanhlangla thangthui u! Ahimi lawngah athekoek dantatna te a dang u ai!” a tina.
1 Jesuh lawng maang tih a teng avai te a dan vengah Tempal bok-im kah tangkakong khuiah kuirang thli lawng tangka a sang u te a huh, 2 Khawdeng tangkiik huhai pakhat lawng ruhum pheksa pahih a sang te khaw a huh. 3 Tevengah ahih lawng, “Atak tang kavan thui u, thlaangtloe boeih lak ah he kah khawdeng koek huhai lawng yahawh ngaai te a sang poen. 4 Metihtiah thlaangtloe hue lawngtah amami kah khuehtoen bawi alenna dawngkah acoeih aphe te ni a peek u, tede he hutaa he tah khawdeng de amah kah hingna ham a khueh duen te a peek kik poen” a tina. 5 A hubang khatsut hue lawngah Tempal bok-im lungto theen theen oen dan ngaih danthluela thoekcauna oen Pathen tengah kutdo peekna akawng te a thui u. 6 Tevengah Jesuh lawngah, “He kah na huh boeih he, lungto khatca khaw ceh taak ohla apum boeih la a voeih dingkangna atue te avan pha ai.” a tina. 7 Ahimi lawngah, “Saya, metuek vengah he tila a awm ai? Atue apha poen tite noekna ham n'tu aka thoeng ai?” tila a doet u. 8 Jesuh lawng, “Ngaithuen uh; a-u lawngkhaw n'thaina boel seh. Thlaang broe lawngah ka miing oen law ai, ‘Kai tah ahih poen ni! Atue a pha poen!’ ti ai. Tede ahimi hu ah te bang u boel. 9 Nangmi lawng raal thawhna oen ceemtloekna te na yaak u vengah rih u boel; te ang thaihu te lamhacuek ah va thoeng ai, te ang thli te aboetna tah yoeii poen ti ngaihna nawh ni.” a tina. 10 Tecoengah a awl thui te a tom tih, “Ram pakhat oen khat kaap u the ai; thlaangphun khat oen khat thekyak u the ai. 11 Khaaw yat ram yat ah rih-awm likluei hinghuen ai; khawthe khawkha oen tlawhtahaw awm ai; vaan kalawng miknoekna oen rih-awm thaihu thoeng ai. 12 He kah thaihu boeih he a thoeng thlan ah nangmi te n'tuuk u vetih n'heemtek u ai; nangmi te sinakok ah awlcek ham n'ceh puei u vetih thongim ah n'thlaak ai; kai kawngah sengpahrang thli oen ukkung bawi thli haiah n'khuen ai. 13 He tah Awlthang Theen phawngna ham ah nangmi hamla atue theen la awm ai. 14 Namah oen namah te metila ka phungtu u ai tite lakueng u boel, thincak la awm oepsoeh uh, 15 metihtiah na raal thli a-u khatca lawngkhaw oelhtaih thai nawh tih taa thai nawh hamla nangmi lawng na thui ham koei awl oen cuihna te kan peek ai. 16 Nangmi te na nu oen na pa lawngkhaw, na boenhui lawngkhaw, na paya lawng-khaw raal kut ah m'peek u vetih nangmi timkah khatsut te tah a ngawn u ai. 17 Kai kawngah nangmi te thlaang boeih lawng n'thina ai. 18 Tede na luu dawngkah sam te thaam at mai khaw ha ata manawh. 19 Acakla pai lah, tetih atah namah oen namah te na thlawn u ai. 20 “Jerusalem khawpui te raal thli lawng a veel khoep te na huh u vengah adiw thlan ah rawk poen ai tila te ming uh. 21 Tevengah Judia ram khuiah aka awm thlaang thli lawng tlaang sawm la heeng u seh; khawpui khuiah aka awm thlaang thli lawng khawpui te co taak u seh, khaaw teng khaaw vai ah aka awm thlaang thli lawng khawpui khuila kuun u boel seh. 22 Metihtiah te hin te tah, ‘Dantatna Khawhin’ la a awm dawngah Caciim lawng a thui te soep ai. 23 Te khawhin tah bungpum vawn-um oen cacuun naukem hutaa thli ham tah khawmap sut maimah aw! He kah ram khuiah rih-awm mueirihtamyiin te thoeng vetih he kah thlaang thli sawah Pathen kah dantatna te thoeng ai. 24 Thlaang khatsut te samsen oen a ngawn u vetih atloe hue te tah ram tawm ah saltamnaa la a khuen ai; thlaangphun tloe lawng amami kah atue atang te aboet thlantoe Jerusalem te a khow huiah a khueh ai. 25 “Te atah khawmik, thla oen aisi thli dawngah, noekna alakloe te thoeng ai. Dilai sawkah ram boeih lawng tuitunlii kah tuisambaak awl oen tuilet thawh awl te a rih u vetih ngaihang khawbing la awm ai. 26 Dilai pum ah aka law ham koei te thlaang thli lawng a poek doen u vengah a rih u vetih thuen ai, metihtiah vaan kah huham tharana te hinghuen ai. 27 Tecoengah thlaanghing capa tah ruep-awmna oen bawilen tharana oen muui dawngah a rum thuk te a huh u ai. 28 He thaihu thli a thoengna ham atong poen atah pai u langtah na luu te thawh u lah, metihtiah nangmi thlawnna ham tah yoeii poen” a tina. 29 Tecoengah Jesuh lawng ahimi tengah he kah thuidoetna he a thui pe: “Thaidut thing oen atloe thingthaih boeih te poek u lah. 30 A dawn thaai a cawn hang te nangmi lawng na huh u vengah khawhaal hungkang tue tah yoeii poen tila na ming u. 31 Tetih van angla he kah thaihu thli a thoeng te nangmi lawng na huh u vengah Pathen Ram tah law poen ai tila ming uh. 32 He he hilh u boel, tahe ah aka hing thlaang thli he a duek boeih thlan ah he kah thaihu thli he va thoeng ai. 33 Vaan oen dilai tah khum ai, tede ka awl he tah mevengah khaw khum manawh. 34 “Ngaithuen u lah! Nangmi lawng awmtheen awmyaal poeibuh caak awkk oen dilai han khawsak lakuengna te poek u aih boel, te tila na awm u veng bawtbet khawlai ah te kah Khawhin lawng nangmi teng avan pha ai. 35 Metihtiah te tah dilai saw khaaw tawm ah aka awm thlaang boeih sawah thoeng ai. 36 He kah aka law ham koei thaihu thli he ading asuekla pooeng ahana ham, tharana khueh tih Thlaanghing Capa haiah paina thai ham ahuertuela awm u langtah thangthui yoeyah uh.” a tina. 37 Jesuh lawng khawdaai atah Tempal bok-im ah thlaang thli te a cang puei, thlemben atah Olif Tlaang la cet tih khawyiin atah te ah te ip yoeyah. 38 Thlaang boeih lawngah ahih awl te hutung hamla mincanghi ah Tempal bok-im la te cet u.
1 Kaantaakpoei, Tawlru aka thuum nawh Takawi Poei tah atue yoeii poen. 2 Khawsoeih ahaamca thli oen Phungawl cangpueikung thli lawng thlaangping te a rih u dawngah Jesuh te ahuepla ngawn ham along a-im tlap hamla a yawm u. 3 Tevengah hubang paha thlaihih khuiah aka thuum Iskariot a ti u Judas kaw khuila Seitan te kuun. 4 Tedawngah Judas tah khawsoeih ahaamca thli oen tempal bok-im aka toet raal bawi thli tengla cet tih Jesuh te ahimi kut ah peek thaina ham koei akawng te a thui u. 5 Ahimi tah a kaw hoe soeh u tih ahih te tangka peek ham awl a khueh u. 6 Te tila te Judas khaw a kaw tla van tih thlaangping lawng he kawng he ming ohla Jesuh te ahimi kut ah peek ham atue theen te tlap ham a tong. 7 Tawlru thuum mueh Takawi Poei vengkah Kaantaak poeibuh hamla tuuca ngawn ham khawhin te a pha. 8 Jesuh lawng Piter oen Johan te he tila awl a uen tih a tuih: “Cet hih langtah mami kah caak ham Kaantaak Poei te roekbah hih” a tina. 9 Ahih rawi lawngah, “Ame huen ah roekbah sak ham na ngaih?” tila a doet. 10 Ahih lawng, “Nanghih lawng khawpui khuila na kuun vengah tuithaan thlaang pakhat oen na hum u ai. Ahih a kuunna im khuila te vai poe hih langtah, 11 Imkung nala te, ‘Saya lawng, me kah akhann khuiah nuem Kaantaak Poei buh te ka hubang hue oen ka caak ai?’ ti, tila thui peh. 12 Ahih lawngah im han kah akhann kau hlang thaihu a cungkuem la aka awm te n'huh sak ai, te ah te thaihu soeprep te roekbah hih,” a tina. 13 Ahih rawi tah cet hih tih Jesuh lawng a thui pe angla soeprep te a huh tih Kaantaak Poei buh te a roekbah hih. 14 Atue a khoek vengah Jesuh lawng caboi te a hubang hue oen haih a veel u. 15 Ahimi nala te, “Kai lawngah patang palai ka khang thlan ah Kaantaak Poei buh he nangmi oen veel haih hamla ka ngaih tangkiik! 16 Nangmi tengah kavan thui u, metihtiah Pathen Ram khuiah he kah poei buh lawng thuingaihna tangtang te a tueng sak thlantoe tah ka ca tlaih manawh.” a tina. 17 Tecoengah Jesuh lawng boengloeng te a lawh tih Pathen tengah awmngaih awl a thui, “He he lo u langtah nangmi khat oen khat rekra u lang aw uh. 18 Kavan thui u, tahe kalawng ah Pathen Ram a pai thlantoe misurtui he ka aw tlaih manawh.” a tina. 19 Tecoengah takawi te a lawh tih Pathen tengah awmngaih awl a thui coeng atah takawi te a eh tih ahimi te a peek, “He tah ka pum ni, nangmi ham kan peek te ni. Nangmi lawng kai he nan poek khuepna ham he tila sai uh.” a tina. 20 Tetih toengtoeng la thlembuh caak coengah boengloeng te ahimi a peek tih, “He kah boengloeng he tah nangmi ham ka hok ka thi oen ah ka cak sak Pathen kah awlkam thaai ni. 21 Tede, bueh lah! Ka sawah paipi aka thleepkung tah caboi tengah ka awm haih. 22 Pathen kah awltloek angla Thlaanghing Capa tah duek ai, tede ka sawah paipi aka thleep thlaang ham tah khawmap tangkiik mah aw!” a tina. 23 Tecoeng atah ahimi khat oen khat te a-u lawngah he kah thaihu he a sai ai tila doet u. 24 A hubang hue lawng amami tim ah a-u nuem aka lenduet la poek ham aka awm ti u tih awl puung u. 25 Jesuh lawng ahimi te, “Pathen aka oeng nawh sengpahrang thli lawng thlaang rangpui sawah aana a khueh u tih ukkung bawi thli lawngkhaw amami te ‘Thlaang rangpui te aka lungvatkung ni’ ti u. 26 Tede nangmi tah te tila awm ham nawh ni; nangmi timkah aka lenduet lawngtah anoca koek angla awm ham ni, mawtkung lawngah tuihyoeihthlaang angla awm ham ni. 27 A-u aka lenduet, buh caak ham aka ngawl thlaang aw, tihnawhtah buhteemkung aw? Aka ngawl thlaang te lenduet ta. Tede, kai tah nangmi tim ah buh teem an teem angla ka awm. 28 “Nangmi lawngtah suek-halhna ka tawngna boeih ah nan awm puei u; 29 a Pa lawng ka tengah ukna aana m'peek van angla nangmi khaw kan pe van ai. 30 Nangmi lawngtah ka Ram khuiah kamah kah caboi dawng na caak na awkk u vetih Israel phun paha thlaihih te uk hamla bawi ngawlhcoen dawngah na ngawl u ai. 31 Jesuh lawng, ‘Simon, Simon! Hutung lah! Lotoenkung lawng caangtak oen caanghii a pekthlee angla athe khui kalawng atheen te thloeng ham, nangmi boeih te noekdak hamla Seitan lawng saithaina nawl a dang poen. 32 Tede Simon, na oengna te a tlaakna nawh ham ah nang ham ka thangthui. Tecoengah ka tengla koep na maang phai vengah na maya manau thli te tha van ra sak.” a tina. 33 Piter lawng, “Bawipa, nang oen thong tlaak haih ham khaw, duek haih ham khaw oepsoeh la ka awm poen” a tina. 34 Jesuh lawngah, “Piter, kavan thui, n'tu yiin ah, kai he ka ming ka tung nawh tila voei thum toe na thui thlan atah aai khawk manawh.” a tina. 35 Tecoengah Jesuh lawng a hubang thli nala te, “Kai lawng nangmi te tangkabawm, sawngsa oen khowmuek khaw khuen sak ohla kan tuih u vengah te avoetna awm aw?” tila a doet. Ahimi lawngah, “Khat khaw voet mai nawh” a tina u. 36 Jesuh lawng, “Tede, tahe atah tangkabawm khaw, sawngsa khaw khuen uh, a-u khaw samsen te a khueh nawh atah angki te yooei selang lai seh. 37 Kavan thui u, metihtiah caciim lawngah, ‘Ahih tah thlaangthawlh la a toek haih poen’ tila kai kah kawng alam a thut te asoep ham awm, metihtiah kai kah kawng alam a thut sut te noenoe soep poen. 38 A hubang hue lawng, “Bawipa, bueh lah! He ah samsen pahih awm!” a tina u. Ahih lawngah, “Te mah khoek poen” a tina. 39 Jesuh lawng a sai nooek angla khawpui te a thawh taak tih Olif Tlaang la te cet, a hubang hue khaw ahih oen haih cet u. 40 Te huen ah a pha u veng atah ahimi nala te, “Suek-halhna khuiah na tlaak thawlh nawh ham thangthui uh.” a tina. 41 Tecoengah ahimi teng kalawng lungto kutdi daawng khoek athlana ah cet tih khuklu oen cuengkueng tih thang-thui. 42 “A Pa, na kawngaih atah he kah patang khangna boengloeng he ka teng kalawng khoe hawn. Tede kai kah kawngaihna boel selang na kaw-ngaih angla sai hawn.” tila thangthui. 43 Vaan kah vanthlaang pakhat a tengah phumpho tih ahih te tha a peek. 44 Thin thiip uett ah kawsi dung tangkiik la thangthui tih a sotui te thisen angla dilai ah cip. 45 A thangthuina kalawng tho hang tih a hubang hue tengla te cet phai, ahimi tah kawthe uett ah tawnba sut u tih a ih muelh u te a huh. 46 Ahimi nala te, “N'tu ah na ih muelh u? Suekna khuiah na tlaak thawlh nawh ham tho lang thangthui u lah.” a tina. 47 Jesuh te awl a thui lii vengah thlaangping te avan pha, hubang thlaihih khuiah aka thuum Judas lawngah te avan law puei. Ahih lawng Jesuh te mok hamla a tengla tang va law. 48 Tede Jesuh lawng, “Judas, nang lawngah mokna oen aw Thlaanghing Capa he na thak ai? a tina. 49 Jesuh tengah aka awm a hubang hue lawngah te tila thaihu aka thoeng te a huh u vengah ahimi lawng, “Bawipa, samsen oen ka tloek u ai aw?” a tina. 50 Ahimi timkah thlaang pakhat lawng Khawsoeih Bawi kah a sal te a bantang haa pat a tloek pe. 51 Tevengah Jesuh lawng, “Yoeh mah seh!” a tina. Ahih lawng te thlaang kah a haa te a tek tih a hoeih pe sak. 52 Tecoengah Jesuh lawng khawsoeih ahaamca thli oen tempal bok-im aka toet thli kah a bawi hue oen ah a tengla aka law ahaamca boeih nala te, “Kai he thlaanghuuen la ka awm dawngah aw nangmi lawng samsen oen boelhoen oen ah nan law thil u? 53 Kai he khawhin roekk ah Tempal bok-im ah nangmi oen n'awm u ta, tevengah te nan tu u nawh. Tede yiin tharana lawng a uk lii tahe vengah he nangmi kah saina hamla a tue theen ni.” a tina. 54 Ahimi lawng Jesuh te a tuuk u tih Khawsoeih Bawi im la te a ceh puei u; Piter lawngah athla ngaai kalawng soei soei a vai. 55 Talawng luung ah hai a toeih u, hai te a aawm u tih ngawl u, Piter khaw te ah te ngawl van. 56 Hai kungah Piter a ngawlh te tuih-yoeihthlaang hutaa pakhat lawng a huh vengah a bueh rang patang tih, “He kah thlaang he khaw Jesuh oen aka awm haih ni!” ti. 57 Tede Piter lawng a oelh tih, “Hutaa nang, ahih te ka ming moenih” a tina. 58 Tecoeng a awm bawt ah thlaang pakhat lawng Piter te a huh nooek dawngah, “Nang khaw, ahimi timkah thlaang pakhat van ni” a tina. Tede Piter lawng, “Kai he ahimi timkah thlaang nawh ni” a tina. 59 Tecoengah khawnoek pakhat yunyan a diw raih coeng atah thlaangtloe pakhat lawng, “Ahih he khaw Jesuh oen aka awm haih ni, uepvoetna tehca khaw awm nawh, metihtiah ahih he Galili thlaang la khaw awm!” tila rapcaat la a thui. 60 Tevengah Piter lawng, “Nang lawng na thui akawng alam he ka ming moenih!” a tina. Awl a thui lii vengah aai te khawk pahoei. 61 Bawipa tah dak maang tih Piter te rangpatang la a bueh heet, tevengah Piter lawng, “N'tu yiin aai a khaawk thlan ah kai he kan ming nawh tila voei thum toe na basa ai” tila Bawipa lawng a thui pe te lot a poek. 62 Piter te adaubenla cet, a kawsi la dung tih rap. 63 Jesuh amah te aka toet raalkap thli lawngah thekha la a sai u tih a bawh u. 64 Ahimi lawngah a mik te khoep a yeen pe u tih a doet u, “A-u lawng nang n'bawh? Thui lah!” a tina u. 65 Te tila te ahimi lawngah thekhana awl tloe broela a thui u. 66 Khaw a daai veng atah Judah thlaang ahaamca thli, khawsoeih haam thli oen Phungawl cangpueikung thli te tun huh u tih Jesuh te awlcekkung thli khonsil haiah avan law puei u. 67 Ahimi lawngah, “Nang he Messiah aw, van thui lah?” a tina u. Ahih lawngah, “Kai lawngah ka thui cakhaw na tangna u manawh; 68 awl kan doet u cakhaw navan thung tang u manawh. 69 Tede tahe kalawng tah Thlaanghing Capa he Thara koek Pathen bantang ben ah ka ngawl poen ai.” a tina. 70 Ahimi boeih lawngah, “Te atah nang he Pathen Capa aw?” tila a doet u. Ahih lawng ahimi nala, “Na thui u angla Pathen Capa ni.” a tina. 71 Tevengah ahimi lawngah, “Aka mingkung sausi khat khaw ngoe tlaih nawh! Amah awlthui te mami lawng n'yaak rep poen!” ti u.
1 Ahimi boeih lawng tho u tih Pilat haiah Jesuh te a khuen u, 2 Te ah te ahimi lawng thawlh a peel u, “He kah thlaang lawngah thlaangping he a mawt thawlh, Sengpahrang sangluel tengah mangmu peek nawh ham a thui pe tih amah oen amah te Messiah a ti u sengpahrang ni tila a thui.” a tina u. 3 Pilat lawngah, “Nang he Judah sengpahrang aw?” tila a doet. Jesuh lawng, “Na thui angla ka awm.” a tina. 4 Tecoengah Pilat lawng khawsoeih ahaamca thli oen thlaangping te, “He thlaang he a thawlhna ka hu nawh.” a tina. 5 Tede ahimi lawngah anauh ngaai la awl a huer u tih, “He kah thlaang lawngah amah kah cangpueina oen awlpuungna a sai. Ahih lawng Galili kalawng a tong tih tahe ah he la he avan pha.” tila thawlh a pup u. 6 He awl he Pilat lawng a yaak vengah, “Ahih he Galili thlaang aw?” tila a doet. 7 Jesuh te Herod uk khuikah thlaang ni tila a ming vengah Herod tengla te a tuih, te vengah Herod khaw Jerusalem ah awm. 8 Herod lawng Jesuh te a huh vengah a kaw hoe tangkiik, metihtiah ahih kawng te a yaak poen tih huh hamla a ngaih te san poen. Jesuh lawng kawpoek rai a sai te huh hamla a ngaiuep. 9 Tedawngah Herod lawng Jesuh te awl yahawh hlang a doet de Jesuh lawng thung pe nawh. 10 Khawsoeih ahaamca thli oen Phungawl cangpueikung thli lawng hai benla cawh u tih anauh ngaai la Jesuh te thawlh a pup u. 11 Herod oen a raalkap thli lawng Jesuh te nuihbu la a sai u tih tula sak ohla a nuihna u; tecoengah ahimi lawng himbaidung atheen te a bai sak u tih Pilat tengla koep a tuih. 12 Te khawhin ah te Herod oen Pilat he koep roep hih, he veng thlan atah ahih rawi he raal la awm hih. 13 Pilat lawng khawsoeih ahaamca thli, mawtkung thli oen thlaangping te a khue tun tih, 14 ahimi nala te, “Nangmi lawng he kah thlaang lawngah thlaang a mawt thawlh na ti u dawngah ka tengla navan law puei u. Tahe nangmi haiah ahih he awl ka khee poen, nangmi lawng thawlh na pup angla ahih lawng lumlai a thawh sak te khat khaw ka hu nawh. 15 Herod lawngkhaw a thawlhna hu nawh, tedawngah namami tengla avan tuih koep. He kah thlaang lawng duekna yawkk ham koei a sai te awm nawh. 16 Tedawngah cungpoelh oen ka tam silang ka thlah hawn ai.” a tina. 17 (Kaantaak Poei veng roekk ah thongtla thlaang pakhat te Pilat lawng a thlah pe ham awm.) 18 Thlaangping rangpui lawngah, “Ahih te ngawn! Barabbas te van thlah!” tila paang u. 19 (Barabbas tah khawpui khuiah thlaang a ngawn tih kawsi a pawkk sak dawngah thongim ah a thlaak u.) 20 Pilat lawngtah Jesuh te a hoerpoengla thlah ham a ngaih dawng-ah thlaangping tengah lunghoeih awl koep a thui. 21 Tede ahimi lawngah, “Thinglam dawngah ngawn! Thinglam dawngah ngawn!” tila koep paang u. 22 Pilat lawng a pathumna atah ahimi nala te, “Tetih atah n'tu thawlhna ahih lawngah a sai? Duekna yawkk ham koei a sai khat khaw ka hu nawh! Cungpoelh oen ka tam silang ka thlah hawn ai.” a tina. 23 Tede ahimi lawngah Jesuh te thinglam dawng ngawn ham ah awl ue la paang tare u tih aboetna atah ahimi kah paang awl lawng a taa. 24 Tedawngah ahimi lawng a bih khiing u awltloekna te Jesuh sawah Pilat lawng a sai pe. 25 Ahimi kah a ngaih, thlaang a ngawn tih kawsi aka pawkk sak thongtla te a thlah pe tih Jesuh te amami kawngaih la sai ham ahimi kut ah a peek. 26 Jesuh te raalkap thli lawng a khuen tih a ceh u vengah te vangca vangnau ben kalawng khawpui khuila aka law Sairin khaaw kah Simon aka miingna te a hum u tih ahimi lawng ahih te a tuuk u, thinglam te amangkhak la a kawh sak u tih Jesuh hu ah te a ceh sak u. 27 Rangpui thlaangping lawngah a hu ah a vai u, ahimi timkah khatsut hutaa thli lawng a raang te a tum u tih ahih te aka rah hutaa khaw awm. 28 Jesuh lawng ahimi benla maang tih, ‘Jerusalem kah hutaa thli! Kai ham rap u boel, namami ham oen ah na ca na nau thli ham mah rap uh. 29 Metihtiah thlaang lawngah, “ca-anau aka khueh nooek nawh, camoe aka cuun nooek nawh, suuktui aka tuul nooek nawh hutaa thli tah a yo theen tih a kam awm phoeih” tila a thuina khawhin te avan pha ai! 30 Thlaang lawngah tlaang sang nala te, ‘Kaimi sawah tlim rup lah!’ khawcung nala te, ‘Kaimi he n'thuh lah!’ tila a thuina tue te a pha ai. 31 Metihtiah thing he a hing vengah he ang thaihu he, he tila a sai u atah thing he a koh atah metila nuem a awm lah ve?” a tina. 32 Thlaangtloe pahih thlaangthawlh rawi te khaw Jesuh oen ngawn haih ham a ceh puei u. 33 Ahimi lawngah “Luu Ruh” huen a ti u te a pha u vengah Jesuh te thinglam dawng a tai u tih thlaangthawlh pahih te a bantang ben ah pakhat, a banvoei ben ah pakhat a tai u. 34 Jesuh lawng, “A Pa, Ahimi sawah khawdawp ngaai hawn! Ahimi lawng a sai he a ming u nawh dawngah ni.” a tina. Ahimi lawng talcung a yueh u tih ahih kah hi-acuu thli te a rek ara u. 35 Judah thlaang mawtkung thli lawng: “Ahih lawng thlaangtloe tah a thlawn; Pathen lawng a tuek Messiah tang tang atah amah oen amah thlawn u seh!” tila a nuih ariingna u vengah te thlaangping lawngah pai tih a dan u. 36 Raalkap thli lawngkhaw a nuihna u, ahimi te law u tih misurtui thuii te a tuul u tih, 37 “Nang he Judah sengpahrang atah namah oen namah thlawn u lah,” a tina u. 38 Asawkah ca a tai tah: “Ahih tah Judah sengpahrang ni.” tila a thut u. 39 Te kah a tai u thlaangthawlh pakhat lawngah ahih te asal aphaam tih: “Nang he Messiah nawh aw? Namah oen namah thlawn u langtah kaihih he khaw n'thlawn lah saw!” a tina. 40 Tede atloe pakhat te lawngtah ahih te a siim tih, “Pathen na rih nawh aw? Nang lawng ahih angla awlkhuengna avan at te na dang. 41 Tecakhaw mahih ham tah awlkhuengna he aka soeng ni, metihtiah mahih lawngtah n'sai phu yawkk ham koei te ni n'yawkk; tede ahih tah thawlhpalhna sai nawh.” a tina. 42 Tecoengah Jesuh nala te, “Jesuh, Sengpahrang la na law vengah kai he n'hilh boel ne!” a tina. 43 Jesuh lawng ahih nala te, “Na sawah awl ka kam, Paradis ah kai oen haih tihin ah na awm ai.” a tina. 44 Hingthun khawnoek paha thlaihih yun vengah khawmik lawng aang tlaih nawh tih yiinna lawngah ram pum te thlemben khawnoek pathum toe a khuk; 45 Tempal bok-im kah baiyaan te pahih la poet pheuh u. 46 Jesuh lawng angaihhlangla paang tih, “A Pa! Na kut dawngah ka muithla kavan tloeng!” tila a thui coengah te duek. 47 Te tila a awm te raalbawi lawng a huh vengah Pathen te a thangpawm tih, “Ahih he tah thlaangdoeng tangtang ni!” tila te a thui. 48 Te tila thaihu aka thoeng hang te huh hamla te ah aka tun thlaang thli lawng te tila thaihu a awm te a huh u vengah kawthe uett ah a raang a tum u tih im la meel u. 49 Jesuh te pumpak la aka ming boeih oen Galili kalawng ahih hu ah aka baang hutaa thli lawngkhaw athla la soei pai u tih a dan u. 50 Judah peng Arimatia khaaw kah Josep aka miingna thlaang pakhat awm. Ahih tah hinyah koei thlaangdoeng pakhat la awm tih Pathen Ram a lawna tue te a ring. 51 Ahih tah awlcekna khonsil ah aka thuum thlaang pakhat van de ahih lawngah amami khonsil kah awltloekna oen thaihu sai te ngaih nawh. 52 Ahih lawng Pilat tengla cet tih Jesuh rawkk te a bih. 53 Tecoengah a rawkk te a lawh tih himbai athaaithik oen a yaawl, lungkaw thuk tangte, vai khat khaw hawna nooek nawh thlann khuiah te a up. 54 Te khawhin te Huet hin la awm tih Sabbath khawhin te a pha tawmca poen. 55 Jesuh hu ah aka bang Galili kah hutaa hue lawng Josep oen haih cet u tih thlann te khaw, akhuiah Jesuh rawkk te metila a khueh tite khaw ahimi lawng a huh u. 56 Tecoeng atah ahimi te im la meel u tih riimtuui oen baw aka tuui thaihu thli te rawkk hamla a roek a bah u. Ahimi tah Phungawl dawngkah awlpeek angla Sabbath khawhin ah te duem u.
1 Khawhin hin rih khuikah lamhacuek khawhin mincanghi ah hutaa thli lawng amami kah roek abah riimtuui te a khuen u tih phuel la cet u. 2 Thlann thawhka kah lungto atloela a thoeih te a huh u tih akhuila te kuun u, 3 tede ahimi lawng Bawipa Jesuh kah a rawkk te tah hu u nawh. 4 He kawngah ngaihangla a pai sut u vengah te himbai bawk aka bai thlaang pahih te ahimi tengah parak a pai pe. 5 Hutaa hue lawng a rih soeh u tih dilai ah buekuep u, te kah thlaang rawi lawng ahimi nala te, “N'tu ah nangmi lawng aka hing thlaang te thlaangduek tim ah na tlap u? 6 Ahih tah he ah awm tlaih nawh! tho poen. Galili a awm vengah nangmi tengah avan thui awl te poek uh: 7 ‘Thlaanghing Capa he thlaangthawlh thli kut ah a peek u vetih thinglam dawng a ngawn u ai, athum hin ah tho koep ai.’ tila a thui teta” a tina. 8 Tecoeng atah hutaa hue lawng Jesuh awl thui te lot a poek u, 9 phuel kalawng meel u tih a hubang thlaikhat oen atloe hue tengah he kah thaihu boeih he a thui pe u. 10 Te kah hutaa hue tah Meri Makdalin, Joanna oen Jeem manu Meri, he hue he ni; te kah aka awm haih atloe hutaa hue lawngkhaw, he thaihu he celtuih hue tengah a thui pe u. 11 Tede celtuih hue lawngah hutaa thli kah a thui te ahong la a poek u tih tangna u nawh. 12 Tede Piter tah tho thlat tih poe heeng; ahih lawng buekuep thuk tih thlann khui te a bueh vengah rawkk yaawlna himbai tah a huh de atloe n'tu khaw hu nawh. Tecoeng atah he tila aka awm thaihu dawngah te a kawpoek rai tih im la koep meel. 13 Te hin vengah te Jesuh kah hubang rawi pahih tah Emmau a ti u khaw la te cet hih. Te khaw tah Jerusalem khawpui kalawng meng sarih yun thla. 14 Ahih rawi lawngah thaihu aka thoeng hang kawng alam te a thui hih. 15 Ahih rawi lawng te tila a thui hih veng te ah, Jesuh lawng te rawi te a kee tih ahih rawi oen haih cet; 16 ahih rawi lawng a huh de metila nuem noek hih nawh. 17 Jesuh lawng ahih rawi nala te, “Nanghih lawng lawngpueng puet ah n'tu kawng nuem na thui hih” a tina. Te rawi te haithe-latt la pai hih. 18 Kleopas aka miingna thlaang pakhat lawng, “Jerusalem la aka law kamyin khuiah thlemvai pekca ah te kah aka thoeng hang thaihu te aka ming nawh he tah nang bueng mai kai aw?” a tina. 19 Ahih lawng, “N'tu thaihu muuem?” tila a doet. Ahih rawi lawngah, “Nazaret khaaw kah Jesuh tengah aka thoeng teta. Ahih tah tawngha pakhat la awm tih Pathen oen thlaang boeih haiah a thuina oen a saina thaihu boeih dawngah ahu aham awm tila a poek u. 20 Mami kah khawsoeih ahaamca thli oen ukkung bawi hue lawng ngawn hamla awl a khueng u tih thinglam dawng a ngawn u. 21 Kaimi lawngtah ahih lawng ni Israel thlaangphun he a loeih sak ai tila ka ngaiuep u! Te tila a awmna kalawng tihin he tah a thum hin poen ni. 22 Kaimi timkah hutaa khatsut lawngtah kaimi he kawpoek avan rai sak u; Ahimi lawngah mincanghi ah cet u tih thlann te a bueh u de a rawkk te hu u nawh. 23 Ahimi te va meel koep u tih ahih tah tho poen tila aka thui vanthlaang te khaw ka huh u tila a thui u. 24 Kaimi timkah thlaang khatsut khaw phuel la cet u tih hutaa hue kah a thui angla boelh a huh u, tede ahih te tah hu u nawh.” tila a thui pe hih. 25 Tevengah Jesuh lawng te rawi nala te, “Metila na ngau hih aih! Tawngha thli lawng a thui boeih te tangna hamla na kawpoek yaai hih aih he! 26 Messiah lawng amah kah ruep-awmna ah a kuun thlan ah he ang thli he a yawkk hamla ngoe nawh aw?” a tina. 27 Tecoengah Jesuh lawng Mosi kah cabu dawng kalawng a tong tih tawngha boeih kah cathut toe ah Caciim boeih dawngah amah kah kawng alam a thut te a hih rawi tengah a thuicaih pe. 28 A cehna koei khaw te ahimi lawng a pha tawm atah Jesuh lawng ka cet phaat ai a ti angla te a sa pe; 29 tede terawi lawng ahih te a tuuk tih, “Kaihih tengah pah van mai; khaw tla thuk poen tih khaw yiin tawm poen.” a tina. Tedawngah te rawi oen pah haih hamla te cet. 30 Ahih lawngah te rawi oen buh caak haih hamla ngawl, takawi te a lawh tih awmngaih awl a thui, tecoengah takawi te a eh tih te rawi te a peek. 31 Tecoeng atah te rawi kah a mik te tueng pan tih ahih te a noek, tede ahih rawi kah mik huh ah pahoei a auh pe poen. 32 Ahih rawi lawngah te, “Lawngpueng ah ahih lawng awl avan thui tih Caciim te a thuicaih vengah mahih kah lungbui ah hai aka alh angla awm ta?” tila a thui hih. 33 Ahih rawi te tho pahoei hih tih Jerusalem la meel koep hih, te ah te hubang thlaikhat oen thlaangtloe thli a tun haih u te a huh tih, 34 “Bawipa tah tho tangtang poen! Ahih tah Simon tengah phumpho poen!” tila te a thui u. 35 Tecoengah te kah thlaang pahih lawngkhaw lawngpueng ah thaihu aka thoeng te oen Bawipa lawng takawi a eh vengah a noekna kawng te a thui hih. 36 He kawng he ahimi tengah a thui hih lii vengah Bawipa amah te ahimi tengah pai parak tih ahimi nala te, “Nangmi sawah ngaimawngna awm hawn seh,” a tina. 37 Ahimi lawngah muithla ni ka huh tila a poek u tih a rih u. 38 Tede ahimi nala te, “N'tu kawngah na lakueng u akcak aih? N'tu kawngah he ang uepvoetna he nangmi kaw khuiah a law? 39 Bueh lah, ka kut rawi oen ka khaw rawi he, Kamah ni nan huh u. N'tek u lah nan ming u badai, metihtiah muithla lawngtah thi-asa oen ruh te khueh nawh, nan huh u angla kai ngoen tah ka khueh ta.” a tina. 40 Te tila a thui coengah a kut oen a khow te ahimi a huh sak. 41 Ahimi tah awmngaih tih kawpoek rai oen awm u de ahimi lawng tangna u thlan hun, tedawngah ahimi nala te, “Nangmi lawng caak koei khat mai khaw na khueh aw?” a tina. 42 Ahimi lawng nga haai tangte keekvaang te a peek u, 43 a lawh tih ahimi mik huh ah a caak pe. 44 Tecoengah ahimi tengah, “Mosi kah Phungawl khuiah khaw, tawngha thli kah ca thut dawngah khaw, Saam laabu dawngah kai kah kawng alam a thut boeih te asoep ham awm tila nangmi teng ka awm vengah kavan thui u te he kah thaihu thli he ni.” tila a thui pe. 45 Tecoeng atah caciim te a yaak ming thaina ham ahimi kah thinkaw te a awng pe tih, 46 Ahimi te, “He tila a thut sut te awm: Messiah lawng patang a khang vetih a thum hin ah duekna kalawng tho koep ai, 47 amah miing oen thawlh yutna kawng thawlh khawdawp ngaaina kawng awlthang te Jerusalem kalawng a tong vetih thlaangphun boeih tengah a phawng ai. 48 Nangmi tah he kah thaihu he aka mingkung sausi la na awm u. 49 Kamah roe lawngah a Pa lawng avan kam te nangmi tengah kavan tuih ai. Tede asawben kah tharana te nangmi tengah a law thlantoe tah khawpui khuiah te ring uh.” a tina. 50 Tecoengah Jesuh lawng a hubang hue te khawpui adauben athla hlang Bethani khaw la te a ceh puei, te ah te a kut a thueng tih ahimi te a phueh a sawm. 51 Ahimi te aphueh asawm tih yotheenna a peek veng te ah ahimi teng kalawng hooep u tih vaan benla te pawm u hang. 52 Ahimi lawng ahih te a bok u tih awmngaih tangkiik la Jerusalem la te koep meel u, 53 ahimi lawng atue atang khueh boeih te Tempal bok-im khuiah Pathen thangpawmna hamla a hawna u.
1 Dilai suen thlan ah, awl tah awm oepsoeh poen; ahih tah Pathen oen awm haih tih ahih te tah Pathen ni. 2 Acuek veng kalawng te awl te tah Pathen oen ah awm haih. 3 Ahih rang oen ah Pathen lawng thaihu boeih he a sai; Ahih rang oen ah a sai mueh thaihu khat khaw awm nawh. 4 Te awl te tah hingna kungpui la awm tih te kah hingna lawngah thlaanghing tengla aangna te avan khuen. 5 Te kah aangna lawng yiinna khui te a thue tih, yiinna lawng metuek vengah khaw thih thai manawh. 6 Pathen lawng amah kah laipai Johan te avan tuih, 7 thlaang boeih lawng awlthang te a yaak tih a tangna u ham, aangna kawng te aka thui ham ahih te va law. 8 Amah tah aangna nawh ni; aangna kawng te thui hamla aka law thlaang ni. 9 Te kah aangna tah dilai la law tih thlaanghing boeih aka thue aangna tangtang ni. 10 Te awl te tah dilai ah awm, ahih rang oen Pathen lawng dilai he a sai de ahih te dilai lawng ming nawh. 11 Ahih tah amah ram la law de amah kah thlaang thli lawng do u nawh. 12 Tecakhaw khatsut lawngtah ahih te a tangna u tih a do u; tedawngah ahimi te Pathen kah ca-anau la coenggna te a dang u. 13 Ahimi lawng thlaanghing phung angla Pathen kah ca-anau la coengg nawh, ahimi te thlaanghing ana pa kah ca-anau angla a cuun moenih; ahimi kah ana Pa tah Pathen amah ni. 14 Te awl te tah thlaanghing la coengg tih lungvatna oen awltak oen ah betoet, mami tim ah he awm. Mami lawng amah kah ruep-awmna te n'huh u, te ruep-awmna te tah ana Pa kah khuehduen pakhat bueng Capa la a awm te ni. 15 Johan lawngah ahih kawng te a thui vengah, “Ahih tah kai coengah aka law ni, tede ahih tah kai lak ah aka lenduet ni, metihtiah kai ka awm thlan ah ahih tah awm poen tila akawng ka thui te tah ahih he poen ni” tila paang tih a thui. 16 Amah kah abetoet lungvatna khui kalawng yotheen kam-awmna khat coeng khat te mami m'peek. 17 Pathen lawng Phungawl te Mosi rang oen m'peek, tede awltak oen lungvatna tah Jesuh rang oen ni a law. 18 Pathen he a-u khat lawngkhaw hu u vai nawh. Pathen amah oen van at la haih, ana Pa tengah aka awm a capa khat bueng lawngah he ana Pa te a tueng sak poen. 19 Jerusalem kah aana khuehkung Judah thlaang thli lawng Levi thlaangphun oen khawsoeih khatsut te Johan tengla a tuih tih, “Nang he a-u nuem?” tila a doet sak u. 20 Johan lawng thana ohla, “Kai tah Messiah nawh ni” tila phah ohla aciimla a thui pe. 21 Ahimi lawngah, “Tetih atah nang he a-u? Nang he Elijah aw?” tila a doet u. Johan lawngah, “Kai he Elijah nawh ni” tila awl a thung pe. Ahimi lawngah, “Nang he tawngha aw?” tila koep a doet u tih, “Kai he tawngha nawh ni” a tina. 22 Ahimi lawngah, “Tetih atah nang he a-u? Kaimi aka tuihkung hue tengah awl khuen ham a awm dawngah namah oen namah ta a-u na ti? van thui lah,” a tina u. 23 Johan lawng awl a thung pe tih: “Kai tah, tawngha Isaiah lawng, ‘Bawipa a cehna ham lawngpui te adoengla sai uh’ tila ramhum huhang ah aka paang te ni” tila a thui pe. 24 Farasi thlaang thli lawng a tuih laipai hue lawngah, 25 Johan nala te, “Nang he Messiah nawh, Elijah nawh tih tawngha nawh atah n'tu ah nang lawng baptisma na peek?” tila a doet u. 26 Johan lawng, “Kai lawngtah tui oen ah baptisma te ka peek, tede nangmi lawng na ming u nawh, nangmi tim ah aka pai pakhat te awm. 27 Ahih tah kai ka law coengah va law, tede kai tah ahih kah khowmuek rui pateng thlam pe ham ka ting ka tawkk moenih” a tina. 28 He kah thaihu boeih a coenggna he tah Johan lawng baptisma a peekna Jordan tuiva rall kah khawcuuk ben ah aka awm Bethani khaaw ah ni. 29 Avuen khawhin atah amah tengla Jesuh a law te Johan lawng a huh tih, “Dilai thawlhna aka phuei Pathen kah Tuuca ke bueh u lah! 30 Kai coengah thlaang pakhat va law, tede ahih tah kai lak ah bawilen ngaai, metihtiah kai he n'cuun thlan ah ahih tah awm poen.’ tila akawng ka thui te tah a hih poen ni. 31 Kai lawngah ahih he a-u ti khaw ka ming nawh, tede kai lawng tui oen ah baptisma ka peek he tah ahih te Israel thlaang thli lawng a mingna ham ni.” tila a thui. 32 Tecoengah Johan lawng, “Vaan kalawng Muithla te akhuu angla va rum thuk tih ahih sawah a cuuk thuk te ka huh. 33 Ahih te a-u ti khaw ka ming nawh, tede tui oen ah baptisma peek hamla tuihkung Pathen lawngah ‘Muithla te va rum thuk vetih thlaang pakhat sawah a cuuk te na huh ai; ahih te tah Ciim Muithla oen baptisma pekung ni tite na ming ai,’ ti. 34 Te tah kamah lawng ka huh tih ahih tah Pathen Capa ni tila nangmi tengah kavan thui u,” tila Johan lawng a thui. 35 Avuen hin ah Johan te a hubang pahih oen haih a pai u vengah, 36 Jesuh a yingyawi te a huh tih, “Pathen kah Tuuca ke bueh hih lah!” a tina. 37 He tila a thui te a hubang rawi lawng a yaak tih Jesuh te a hu ah a vai hih. 38 Jesuh te a hu la dak maang, te vengah ahih rawi lawng a hu ah a vai hih te a huh tih, “N'tu na tlap hih” tila a doet. Ahih rawi lawngah, “Rabbi, me ah na awm?” a tina hih. (He kah awllung he tah, “Cangpueikung” ti ngaihna ni.) 39 Ahih lawng, “Law hih langtah bueh lah,” a tina. (Te veng te tah thlemben khawnoek palii yunyan ni.) Tedawngah ahih rawi lawng cet hih, a awmna te a bueh hih tih khawyiin toe ahih oen awm u. 40 Te rawi khuikah pakhat te tah Simon Piter kah a manau Andru ni. 41 Vaikhat atah a maya Simon nala te, “Kaimi tah Messiah te ka huh poen” a tina. (Messiah ti he tah ‘Khrih’ ti ngaihna ni.) 42 Tecoengah Jesuh tengla Simon te a ceh puei. Jesuh lawng ahih te a bueh tih, “Nang tah Johan capa Simon na miingna, tede Sifas na miingna poen ai.” a tina. (He tah Piter tina oen lo hih tih “Lungto” tila thui ngaihna ni.) 43 Avuen atah Jesuh te Galili la ceh ham kamthlah. Filip te a huh tih, “Ka hu ah bang lah!” a tina. 44 (Filip he tah Andru oen Piter a awmna Betsaida khaw kah van ni.) 45 Filip lawng Nathanael te a huh tih, “Mosi lawng Phungawl cabu dawngah akawng alam a thut tih tawngha thli lawngkhaw akawng alam a thut thlaang te kaimi lawng ka huh poen. Ahih tah Nazaret khaw kah Josep capa Jesuh te ni” a tina. 46 Nathanael lawng, “Nazaret khaw kalawng thaihu theen pakhat mai khaw thoeng thai ai aw?” tila a doet. Filip lawng, “Law langtah bueh lah.” a tina. 47 Jesuh lawng Nathanael a tengla a law te a huh vengah, “Israel thlaangphun tak tak he ah awm he; ahih tah thawlhpalhna roe awm nawh!” tila ahih lawng a thui. 48 Nathanael lawng ahih nala te, “Metila nan ming?” tila a doet. Jesuh lawng, “Filip na khue thlan ah thaidut thing phung kaak ah na awm vengah te kan huh poen” a tina. 49 Nathanael lawngah, “Saya, Nang tah Pathen Capa ni! Nang tah Israel Sengpahrang ni!” a tina. 50 Jesuh lawng, “Thaidut thing phungkaak ah na awm vengah kan huh poen tila ka thui dawngah na tangna aw? Nang lawngah he lak ah aka bo ngaai thaihu na huh hun ai!” a tina. 51 Tecoengah ahih rawi te, “Awltak tang kavan thui: Vaan te awng u vetih Thlaanghing Capa sawah Pathen kah van thlaang thli a rum thuk oen a luui hang te na huh u ai” a tina.
1 Hin hih a awm coengah Galili peng Kanaa khawpui ah yuluipoei awm. Jesuh kah a manu khaw te ah te awm tih, 2 Jesuh oen a hubang hue khaw yuluipoei ah te a khue u van. 3 Misurtui te a boeih dawngah Jesuh te a manu lawng, “Misurtui khueh u tlaih nawh.” a tina. 4 Jesuh lawngah, “Nang lawng sai koei te van thui boel, kai lawng sai hamla atue pha thlan.” a tina. 5 Tecoeng atah Jesuh kah a manu lawng tuihyoeihthlaang thli nala te, “Ahih lawng a thui boeih te sai uh” a tina. 6 Judah thlaangphun lawngah khaw-niingtuikaa ah ciimcaihna kawng phung alam a khueh u tih, te ham ah te tuitang pakul kuun awikaw paruk te ah te a hawlh u. 7 Jesuh lawng tuihyoeihthlaang thli nala, “He kah awikaw dawngah tui thloen uh.” a tina. Ahimi lawngah awikaw rai toe ah tui te abecala a thloen u, 8 tecoengah ahimi nala te, “Tui te thoem duekk u langtah poei uktemkung tengla khuen pe uh” a tina. Ahimi lawng tui te a khuen u, 9 misurtui la aka coengg tui te a teng-alai. Ahih lawngah misurtui he ame kah tite ming nawh, (tede tuithaan tuihyoeihthlaang thli lawngtah a ming u); tedawngah yulokung te a khue tih, 10 ahih nala te, “Thlaang boeih lawngtah kamyin thli te lamhala misurtui ahuemm te a tuul tih ahahla a awkk u coengah misurtui adu te a tuul. Tede nang lawngtah misurtui ahuemm te tahetoe na khueh hun nawh pai he!” a tina. 11 Jesuh lawng lamhacuek kawpoek rai thaihu he Galili peng Kanaa khaw ah a sai; te ah te a ruep-awmna a tueng sak tih a hubang hue lawng ahih te a tangna u. 12 He coeng atah Jesuh oen a manu, maya manau oen ah a hubang hue tah Kapernaum la cet u tih te ah te khawhin ayawlca awm u. 13 Judah hue kah Kaantaak Poei te a pha tawm vengah Jesuh te Jerusalem la cet. 14 Tempal bok-im vawngup khuiah thlaang thli lawng vaitaw, tuu oen akhuu aka yooei thli, amami kah caboi dawngah ngawl u tih tangka aka thaw-leeng thlaang thli te a huh. 15 Tedawngah rui-akhau te ruicungpoelh la a holl tih boiava boeih vaitaw oen tuu khaw ruicungpoelh oen a tam tih Tempal bok-im adaubenla kang a vai; tangka thawlengkung thli kah caboi te boeih a plet pe tih a tangka thli te heh u khonghak; 16 tecoengah akhuu aka yoei thlaang thli te, “He ang thli he khuen uh! A Pa kah im he thaihu yoeihna huen la sai u tlaih boel!” a tina. 17 Caciim lawngah, “Aw, Pathen, na im ka thintlawhna he ka kaw khuiah hai angla alh.” tila a thui te a hubang hue lawng lot a poek u. 18 Aana khuehkung Judah thlaang thli lawng, “Nang lawngah he tila na sai he ame kah sai thaina aana oen na sai ti he tueng sak ham kawpoek raina n'tu navan sai ai?” a tina u. 19 Jesuh lawng, “He kah Tempal bok-im he phe uh, hin thum khuiah ka sak koep ai.” a tina. 20 Ahimi lawngah, “He kah Tempal bok-im he sawm lii kumruk khui puet ah a sak u, nang lawng hin thum khuiah na sak koep ai aw? a tina u. 21 Tede Jesuh lawng Tempal bok-im tila a thui te amah pum ni a thuingaihna. 22 Tedawngah duekna kalawng a thawh koep vengah ahih lawng Te tila a thui te a hubang thli lawng koep a ming u tih Caciim khaw, Jesuh awl thui te khaw a tangna u. 23 Jesuh lawng Kaantaak Poei khui, Jerusalem ah a awm vengah kawpoekrai a sai te a huh u tih thlaang broe lawngah ahih te a tangna u. 24 Tede Jesuh lawng ahimi boeih te a ming dawngah tangna nawh. 25 Ahimi kah akawng alam te a-u khat lawngkhaw a tengah thui pe ham ngoe mai nawh, metihtiah amah lawng thlaang kah thinkaw te boeih a ming.
1 Nikodemu aka miingna Judah thlaang mawtkung pakhat awm, ahih tah Farasibu khuikah thlaang ni. 2 Yiin at atah ahih te Jesuh tengla cet tih, “Rabbi, nang tah Pathen kah thlaangtuih cangpueikung pakhat ni tila ka ming u. Pathen kah awmpueina nawh atah kawpoek rai na sai he a-u khat lawngkhaw sai thai manawh.” a tina. 3 Jesuh lawng ahih nala te, “Awltak kavan thui: a-u khaw a thang koep nawh atah Pathen Ram te hu manawh.” tila a thui pe. 4 Nikodemu lawngah “Metila thlaang haam la aka awm te a thang koep thai ai, ahih te a manu kah ca-im khuila kuun vetih apabe la thang koep thai manawh!” a tina. 5 Jesuh lawng, “Awltak tang kavan thui, a-u khaw tui oen muithla oen ah a thang nawh atah Pathen Ram khuiah kuun thai manawh. 6 Thlaang he nu oen pa kah pumsa ben ah aka thang tah pumsa la awm, tede muithla ben ah aka thang tah Muithla la awm. 7 Kai lawngah na thang koep ham awm kan tina dawngah na ngaai hang sak boel. 8 Khaw lawngah amah ngaihna benla thlii mai; khawthlii awl te na yaak, tede ame kalawng a law tih me benla a ceh tite na ming nawh. Muithla oen aka thang thlaang boeih khaw te tila ni a awm.” a tina. 9 Nikodemu lawng, “He he metila a coeng thai ai?” tila a doet. 10 Jesuh lawngah, “Nang he Israel thlaangphun khuiah aka lentloe cang-pueikung la na awm de, he he na ming nawh aw? 11 Awltak kavan thui, “Kaimi lawngtah ka ming te ka thui u tih ka huh rep te ni ka thui pantau, kaimi kah awl he a-u khat lawngkhaw na do u nawh. 12 Kai lawng he dilai thaihu kawng kavan thui vengah Pateng nangmi lawng nan tangna u nawh; vaan kah thaihu kawng kavan thui vengah metila nan tangna u pai ai? 13 Vaan kalawng aka law thuk Thlaanghing Capa nawh atah a-u khat khaw vaan la luui nawh. 14 Mosi lawng ramhum huhang ah ruhum ruul te cungkui dawngah a tai van angla Thlaanghing Capa khaw a tai ai, 15 amah te aka tangna thlaang boeih lawng dungyan hingna a khuehna ham ni. 16 Pathen lawng dilai he a lungna tangkiik dawngah a Capa khat bueng khueh duen te a peek, ahih te aka tangna boeih tah duek manawh, dungyan hingna te a khueh ai. 17 Metihtiah Pathen lawng dilai he awl cek ham a Capa he van tuih nawh, dilai thlawnkung la awm ham ni avan tuih. 18 A-u khaw Capa te aka tangna boeih tah awl cek manawh; tede a-u khaw aka tangna nawh tah awl cek la awm poen, metihtiah ahih lawngah Pathen Capa khuehduen khat bueng te a tangna nawh dawngah ni. 19 Awlcekna biibi tah he tila ni: aangna tah dilai la law poen, tede thlaang he athe aih dawngah aangna lak ah yiinna te a lungna ngaai. 20 Athe thaihu aka sai boeih lawngtah cangna te a thina tih aangna ah law ham te ngaih u nawh, metihtiah athe thaihu a sai te tueng sak ham ngaih u nawh. 21 Tede a-u khaw asoeng thaihu theen aka sai tah aangna ah law tih a sai thaihu te Pathen kawngaih ni tite aangna lawng a tueng sak.” a tina. 22 Tecoengah Jesuh oen a hubang hue tah Judia peng la cet u, te ah te ahimi oen awm u tih baptisma a peek. 23 Aenon ah te tui yahawh a awm dawngah te ah te Jesuh lawngkhaw baptisma a peek van. Aenon tah Salim khaw kalawng yoeii. Thlaangping lawng ahih tengla cet u tih ahimi te baptisma a peek. 24 (He vengah Johan he thongim ah tla thlan hun.) 25 Johan kah hubang khatsut hue tah bokna benkah ciimcaihna kawngah te Judah thlaang pakhat oen awl puung u. 26 Tedawngah ahimi lawng Johan tengla cet u tih, “Saya, Jordan tuiva rall kah na tengah aka awm akawng na thui thlaang te na ming aw? Ahih lawng tahe ah baptisma a peek van tih ahih tengla thlaangping broela cet u!” a tina. 27 Johan lawngah, “A-u khaw Pathen lawng a peek nawh atah n'tu khat khaw khueh thai nawh. 28 ‘Kai tah Messiah nawh ni, ahih hai kah a tuih thlaang mai ni.” tila ka thui te aka mingkung tah nangmi ni. 29 Vaa aka sa tuemnu hulaa te tah yulokung cadawng kah thlaang ni; tede yulokung kah paya tah a tengah pai tih awl a hutung, yulokung kah awl te a yaak vengah awmngaih. Kai kah awmngaih soepna khaw te tila ni a awm. 30 Ahih tah roeng hang ai, tede kai tah ka tla thuk ai.” a tina. 31 Saw benkah aka law thlaang tah atloe boeih lak ah lenduet. Dilai dawng-kah aka law tah dilai thlaang la awm tih dilai kawng te a thui, tede vaan benkah aka law tah soeprep boeih sawah awm. Ahih lawngtah amah kah a huh oen a yaak te a thui de a-u lawngkhaw ahih awl te do u nawh. 32 Ahih lawngtah a huh tih a yaak te a thui de a-u khat lawngkhaw ahih awl te tangna u nawh. 33 Tede a-u khaw ahih kah awl te aka do tah te tila a dona rang oen Pathen tah ataktang ni a thui tila a cak sak. 34 Pathen lawng a tuih thlaang te tah Pathen amah Muithla te betoetla a peek dawngah Pathen awl te a thui. 35 A Capa te ana Pa lawng a lungna tih soeprep boeih te ahih kut ah kang a peek. 36 A-u khaw a Capa te aka tangna boeih tah dungyan hingna a khueh; a-u khaw a Capa awl te aka ngai nawh tah hingna te khueh nawh vetih Pathen thinsana te a sawah poe awm ai.
1 Jesuh lawngah Johan lak ah hubang yahawh adang tih baptisma a peek tite a yaak u. 2 (Atak tang atah Jesuh amah lawngtah a-u khat khaw baptisma pe nawh; a hubang hue lawng ni a peek.) 3 Tedawngah te tila a thui u te Jesuh lawng a yaak vengah Judia peng te a ceh taak tih Galili la te koep meel; 4 te vengah te Samaria peng kalawng te a ceh hamla awm. 5 Samaria peng khuikah Saika khaaw te a pha, Te khaaw te Jakob lawng a capa Josep a peek lohuen kalawng ah thla aih nawh. 6 Te ah te Jakob kah tuikhur te awm, Jesuh tah lawngpueng ceh ah bawngg malcal tih tuikhur tengah te ngawl. Te veng te tah hingthun yunyan ni. 7 Samari nu pakhat te tui thaan la law tih Jesuh lawng ahih nala te, “Tui n'awkk sak lah.” a tina. 8 (A hubang hue tah caak awkk lai ham khawpui khuila cet u.) 9 Te kah hutaa lawngah, “Nang he Judah thlaang la na awm, kai tah Samaria thlaang ni; metila kai tengah tui navan bih mai lauh?” a tina. (Judah thlaang phun lawngah Samari thlaang thli kah a hawna boengloeng oen beel thli te hawna u nawh.) 10 Jesuh lawng, “Pathen kah peek lungvatna tila doek na ming mai tih nang tengah tui aka bih he a-u tite na ming kawinih, ahih tengah te na bih vetih ahih lawng hingna tui te m'peek ai.” a tina. 11 Te kah hutaa lawngah, “Bawipa, tuium khaw na khueh nawh, tuikhur khaw dung tangkiik. Nang lawng ame kah hingna tui te na dang ai? 12 He kah tuikhur he patuer Jakob lawng kaimi m'peek ni; amah lawngkhaw a ca anau thli lawngkhaw, a boiava lawngkhaw he kah tui he ni rip a awkk u. Nang he Jakob lak ah na lenduet ngaai aw? a tina. 13 Jesuh lawng, “A-u khaw he kah tui aka aw tah tui hall koep ai, 14 tede, a-u khaw kai lawng ka peek tui te aka aw tah tui hall koep tlaih manawh.” a tina. 15 Te kah hutaa lawng, “Bawipa, te tih atah kai lawngah tuihalh la koep ka awm tlaih nawh ham khaw, he la he tui thaan la ka law koep tlaih nawh ham te tui te kai m'pe lah!” a tina. 16 Jesuh lawng ahih nala te, “Cet langtah na vaa te khue, tecoengah koep va lawh.” a tina. 17 Ahih lawngah, “Kai he ka vaa awm nawh.” a tina. Jesuh lawng, “Ka vaa awm nawh na ti te soeng. 18 Nang lawng thlaang pa-ngaa na vaana poen, tahe ah na awm puei thlaang te na vaa tangtang nawh ni. Atak tang ni na thui.” a tina. 19 Te hutaa lawngah, “Bawipa, nang he tawngha ni tila kan ming. 20 Kaimi Samari thlaang thli kah patuer hue lawngtah he kah tlaangsawm ah he Pathen a bok u, tede nangmi Judah thlaang lawngtah Jerusalem ah ni Pathen he bok ham awm na ti u.” a tina. 21 Jesuh lawng ahih nala, “Hutaa nang, ka awl thui he tangna lah, he kah tlaangsawm ah khaw, Jerusalem ah khaw, Pa te thlaang lawngah a bokna nawh atue te a pha ai. 22 Nangmi Samari thlaang lawngah a-u ka bok u tite na ming u taktak nawh; tede kaimi Judah thlaang lawngtah a-u ka bok u tite ka ming u, metihtiah Judah thlaang teng kalawng ni thlawnna tah a law. 23 Tede Pa tah ataktangla a awm van angla aka bok thlaang thli lawngkhaw Pathen kah Muithla tharana oen awltak oen ah a bokna atue te avan pha poen tih he ah he awm poen. Te tila aka bok te ni Pathen lawngah a ngaih. 24 Pathen tah Muithla la a awm dawngah ahih te aka bok thlaang lawngkhaw Muithla oen awltak la a bok ham awm.” a tina. 25 Hutaa lawng ahih nala, “Messiah law ai tite ka ming, ahih te a law veng atah soeprep boeih te kaimi tengah avan thui ai.” a tina. 26 Jesuh lawng awl a thung pe tih, “Nang oen awl aka thui kai he tah ahih poen ni.” a tina. 27 Tevengah te Jesuh kah a hubang thli koep va meel u tih hutaa pakhat oen awl a thui te a huh u vengah ahimi tah a kawpoek rai u tangkiik. Tede ahimi khat lawngkhaw te hutaa te, “N'tu na ngaih?” te tila doet u nawh tih Jesuh te khaw, “N'tu ah ahih oen awl na thui?” tila khaw doet u nawh. 28 Tecoeng atah hutaa lawng tuium te a ceh taak tih khaw khuila cet koep, te kah aka awm thlaang thli nala te, 29 “Kai lawng ka sai thaihu boeih aka thui thlaang he law u langtah bueh u lah. Ahih he Messiah kai aw?” tila a thui pe. 30 Tedawngah khaw khuikah thlaang thli te law u tih Jesuh tengla cet u. 31 Teveng ruet ah te a hubang hue lawng Jesuh nala te, “Saya, buh ca de saw!” a tina u. 32 Tede ahih lawng, “Akawng alam na ming u nawh buh te caak hamla ka khueh.” a tina. 33 Tedawngah hubang hue lawng doet u the tih, “thlaang pakhat khat lawng buh avan peek kai aw?” ti u. 34 Jesuh lawng ahimi nala te, “Kai kah buh tah kai aka tuihkung kah kawngaih te vai ham oen ah sai ham bii m'peek te coeng pe ham ni. 35 Nangmi lawngtah, ‘he coengah thla lii a awm atah caang ah ham khoek poen ai’ na ti u. Tede kavan thui u, loha thli ke a theenla dan u lah; tahe ah caang hiin poen tih caang ah ham khoek poen! 36 Caang aat thli lawng thapang a dang u tih dungyan hingna hamla caangvui te a cawi u; tedawngah caang aka tuhkung oen caang aatkung tah awmngaih bok ai. 37 ‘Thlaang pakhat lawng a tuh tih thlaangtloe pakhat lawng a ah” tila a thui awl te soeng tangtang. 38 Nangmi lawng na bina nawh lohuen ah caang aat la kan tuih u; te ah te thlaangtloe lawng bii a bi tih ahimi kah biibina dawngah te nangmi lawng athawn na dang u” a tina. 39 Te kah hutaa lawngah te, “Kai lawng thaihu ka sai boeih te ahih lawngah avan thui” tila te a thui pe dawngah, te khaw kah aka awm Samari thlaang broe lawng Jesuh te a tangna u. 40 Tedawngah Samari thlaang thli lawng Jesuh tengla avan pha u vengah te kaimi tengah cam mai de a tina u tih Jesuh tah te khaw ah te khawhin hin hih cam. 41 Amah kah awl thui a yaak u dawngah thlaang broe lawng a tangna u tih, 42 ahimi lawng te kah hutaa nala te, “Nang lawng na thui dawngah nawh tih, kamami roe lawng amah awl thui ka yaak u poen dawngah ahih tah he dilai thlawnkung ni tila ka ming u tih tahe ah ka tangna u poen.” a tina. 43 Te ah te hin hih a cam coengah Jesuh tah Galili la te cet. 44 Metihtiah Jesuh amah lawngah te, “Tawngha he amah ram khuiah thangpawm u nooek nawh.” tila a thui u. 45 Galili te a pha veng atah te kah thlaang thli lawng a do u, metihtiah ahimi tah Jerusalem ah Kaantaak Poei vengah cet u van tih te poei ah ahih kah a sai thaihu boeih te a huh u dawngah ni. 46 Tecoengah tui te misurtui la a coeng sakna Galili peng kah Kanaa khaaw la te koep cet. Te ah te ukkungbawi pakhat awm, Kapernaum khaaw ah aka awm a capa te tlo. 47 Ahih lawngah Judia kalawng Galili la Jesuh va law tite a yaak vengah a tengla cet tih a capa aka duek tawm te hoeih sak ham ah Kapernaum la poe ceh hamla reenna a bih. 48 Jesuh lawngah ahih nala te, “Nangmi lawngah kawpoekraina oen kawpoekrai thaihu te na huh u nawh atah mevengah khaw na tangna u manawh” a tina. 49 Te kah bawi lawngah, “Bawipa, ka ca a duek thlan ah law mai de.” a tina. 50 Jesuh lawng ahih nala te, “Cet loeih, na ca te hing badai.” a tina. Te kah thlaang lawng Jesuh awl te a tangna tih cet. 51 Lawngpueng a ceh phai vengah te a tuihyoeihthlaang thli oen hum u tih, “Na capa te theen badai” a tina awlthang oen avan voekk u. 52 Ahih lawngah a capa te mevengah a hoeih tila a doet tih ahimi lawngah, “N'thlem hingthun khawnoek pakhat ah a sanat lawng a thlah” tila a thui pe u. 53 Tevengah ana pa lawngah, “Na Capa te theen badai” tila Jesuh lawng a tina atue ni tite a ming. Tedawngah amah oen a imkhuikaw boeih lawng a tangna u. 54 He tah Judia kalawng Galili la a law coengah Jesuh lawng apabe kawpoekraina miknoek a sai ni.
1 He coengah Judah hue kah bokna poei a awm dawngah Jesuh te Jerusalem la cet. 2 Jerusalem kah Tuu Thawhka tengah te tuilii pakhat awm, te tuilii tengah savang pa-ngaa a sak u, te kah tuilii te Hebru awl la Betzatha tila a thui u. 3 Te kah savang ah te thlaangtlo thli, mikpum, khowkheem oen kutkheem thli broela ral u. 4 (Pathen kah vanthlaang pakhat lawng metuek tue vengah nuem tah tuilii ah te law tih tui te a phuul sak. Tui te a phuul coengah Lamhacuekla tuilii khuiah aka sungpung thlaangtlo tah me ang tlawhnat khaw a hoeih pe dawngah ahimi lawng tui aka phuul te a ring u.) 5 Te ah te sawmthum kum reet aka tlo puet thlaang pakhat awm. 6 Jesuh lawngah ahih te ah a ralh te a huh, te thlaang te tah a san hlang tlo puet poen tite ahih lawng a ming; tedawngah ahih nala te, “Hoeih ham na ngaih aw?” tila a doet. 7 Te kah thlaangtlo lawngah, “Bawipa, tui a phuul vengah, tuilii dawng kai aka tulh ham thlaang awm nawh; tuilii dawngah ka cet ai ka ti vengah thlaangtloe lawng n'khall poen.” a tina. 8 Jesuh lawng ahih nala te, “Tho lah, na ihphah te lo lang cet loeih.” a tina. 9 Kawlkalh ca ah te thlaang te hoeih; a ihphah te a lawh tih cet. Te hin te tah Sabbath khawhin ni 10 tedawngah aana khuehkung Judah thlaang thli lawng aka hoeih thlaangtlo nala te, “Tihin he Sabbath khawhin la awm tih ihphah na kawh te mami kah Phungawl lawng ngaih nawh.” a tina u. 11 Ahih lawngah, “Kai aka hoeih sak lawngah na ihphah te lo langtah cet loeih ti ta” a tina. 12 Ahimi lawngah, “He tila sai ham aka thuikung te a-u?” tila a doet u. 13 Tede aka hoeih thlaang te lawngah Jesuh te a-u ti khaw ming nawh, metihtiah te kah aka awm thlaangping tim ah Jesuh tah cet valh poen. 14 Tecoeng atah Jesuh lawng ahih te Tempal bok-im khuiah a huh tih, “Hutung lah, tahe tah na hoeih poen; thawlhna sai tlaih boel, toeng loeih, tetih nawh kawinih athe-eep ngaai na sawah pakhat khat va thoeng ai.” a tina. 15 Tecoengah te kah thlaang lawng cet tih ahih aka hoeih sak te Jesuh ni tila aana khuehkung Judah thlaang thli tengah te a thui pe. 16 Sabbath khawhin ah Jesuh lawng thlaangtlo a hoeih sak dawngah ahimi lawng Jesuh te heem-atek hamla a tong u poen. 17 Jesuh lawng ahimi nala te, “A Pa lawng bii a bi yoeyah dawngah kai lawngkhaw ka bi van ai.” a tina. 18 Ahih lawng Sabbath phung te a phe bueng muehla Pathen te amah kah ana Pa la a thui tih amah te Pathen oen van at la a khueh, a awl thui lawngah aana khuehkung Judah thlaang boeih te a thin a phawh pe tare tih ahih te ngawn hamla a teeng u. 19 Tedawngah Jesuh lawng ahimi te, “Awltak kavan thui u; Capa lawngah amah ngaih ah thaihu khat khaw sai thai nawh; ana Pa lawng a sai thaihu a huh te ni a sai. Ana Pa lawng a sai te Capa lawngkhaw a sai van. 20 Metihtiah ana Pa lawng Capa te a lungna dawngah amah lawng a sai boeih te a Capa a huh sak. He lak ah aka lenduet thaihu te a huh sak vetih nangmi boeih tah na kawpoek rai u ai. 21 Ana Pa lawng thlaangduek a thawh sak tih hingna a peek angla Capa lawngkhaw amah lawng a ngaih thlaang thli te hingna a peek. 22 Ana Pa amah lawng a-u khaw awl cek nawh. Ahih lawng a Capa tengah awl cek thaina te asoepla a peek poen, 23 Ahimi lawng ana Pa te a hinyahna van angla thlaang boeih lawng a Capa te a hinyahna van ham ni. A-u khaw Capa te a hinyah nawh atah ahih tuihkung ana Pa te hinyah nawh. 24 “Awltak kavan thui u: a-u khaw ka awl a yaak tih kai aka tuihkung te a tangna atah dungyan hingna te a khueh. Ahih te awl cek tlaih manawh, metihtiah duekna kalawng hingna ah kuun poen. 25 Awltak kavan thui u: Pathen Capa awl te thlaangduek thli lawng a yaakna atue te law ai, te kah atue te avan pha poen, te awl aka ya boeih tah hing ai. 26 Ana Pa amah te hingna kungpui la awm, tetih van la a Capa te hingna kungpui la awm ham a sai poen. 27 Tecoengah a Capa tah Thlaanghing Capa la a awm dawngah awl cek thaina te a peek poen. 28 He dawngah he na kawpoek rai sak aih boel, thlaangduek thli lawng ahih awl a yaakna atue te law lii poen; 29 ahimi tah thlann khui tho kalawng u ai, theenna aka sai thlaang thli tah tho u vetih hing ai; athe aka sai thlaang thli khaw tho u van ai, tede dan a tat ai. 30 “Kai lawngah kamah rang oen thaihu khat khaw ka sai nawh; Pathen lawng avan thui angla ni awl ka cek, tedawngah kai kah awlcekna tah doeng, metihtiah kai lawng kamah ngaih te sai ham ka yawm nawh, tede kai aka tuihkung kah kawngaih te ni ka sai. 31 Kai lawngah kamah kawng te sausi ka deng atah ka thui he aka soeng taktak nawh ni. 32 Tede kai yueng la sausi dengkung pakhat awm tih ahih lawng kai kawng alam a thui te soeng tila ka ming. 33 Nangmi lawng Johan tengla laipai na tuih u tih ahih lawng awltak avan thui. 34 Kai lawngah thlaang kah sausi deng he ka ngaih dawngah nawh ni; he tila ka thui he nangmi lawng thlawnna na dangna ham ni. 35 Johan he tah haialh aka aang haivang oen lo u tih nangmi lawngah ahih kah aangna khuiah kawlkalh ni awmtheen ham na ngaih u. 36 Tede Johan kah sausideng lak ah alentloe sausideng ham ka khueh: te tah a Pa lawng sai ham m'peek bii ka sai te ni, te lawng atah kai yuengla awl a thui vetih a Pa lawng kai he a tuih tila a tueng sak ai. 37 Tecoengah tuihkung Pathen lawngkhaw kai yuengla sausi a deng ai. Nangmi lawng ahih awl te na ya nooek u nawh, a mik-hai te na huh nooek u nawh dawngah 38 nangmi lawng ahih awl te na thinkaw lungbui ah na khoem u thai nawh, metihtiah amah lawng avan tuih thlaang te nangmi lawng na tangna u nawh dawngah ni. 39 Nangmi lawng Caciim khuiah dungyan hingna ka huh ai tila na poek u tih Caciim na thoel na laang u. Caciim lawngah he kai kah kawng alam ni a thui. 40 Hingna khueh hamla ka tengah law ham tah na ngaih u nawh. 41 Kai lawngah thlaang kah koeh awl te ka tlap nawh, 42 Tede nangmi he me ang thlaang tite kan ming u tih nangmi lawng thinkaw lungbui oen Pathen na lungna u nawh ti khaw ka ming. 43 Kai tah a Pa rang oen ni ka law, tede kai he nangmi lawng nan do u nawh; tede thlaangtloe pakhat khat amah kah saithaina aana oen a law vengah ahih te na do u badai. 44 Nangmi lawngtah khat oen khat tengkah koehna awl te na ngaih u, tede Pathen pakhat bueng tengkah koehna dang ham tah na yawm u nawh; tetih atah metila kai he nan tangna u pai ai? 45 Tede kai lawngah nangmi he a Pa haiah thawlh m'peel ai tila poek u boel. Nangmi lawng na uep na pangna Mosi lawng ni thawlh m'peel u ai. 46 Nangmi lawng Mosi he na tangna u tak tak kawinih kai he nan tangna u suide ta; metihtiah ahih lawngah kai kah kawng alam ni a thut. 47 Tede ahih kah cathut te na tangna u nawh poen atah kai lawng ka thui he metila na tangna u pai ai.” a tina.
1 He coeng atah Jesuh te Galili Tuiliipui ah te kaa phai. (Tiberias Tuiliipui tila khaw a thui u). 2 Ahimi lawngah thlaangtlo a hoeih sak kawpoekrai noekna te a huh u tih thlaangping lawng a hu ah bung a vai. 3 Jesuh te tlaangsawm la luui tih a hubang thli oen haih ngawl u. 4 Kaantaak Poei atue tah yoeii poen. 5 Jesuh lawng a teng avai te a dan vengah thlaangping yahawh hlang a tengla a law te a huh, tevengah Filip te a doet tih, “He kah thlaang he yoeh hamla caak khoek buh he ame ah n'lai thai ai?” a tina. 6 (He tila a doet he tah Filip te noekdak ham a ngaih; amah lawngtah metila ka sai ai tite a ming poen). 7 Filip lawngah, “Thlaang boeih lawng ayawlca ah yeen a caak ham Pateng takawi laina ham ngun tangka yahnih khoek manawh.” a tina. 8 A hubang atloe pakhat, Simon Piter kah a manau, Andru lawngah, 9 “He ah he baalii takawi cuun ngaa oen nga pahih aka khueh camaw tawngpaca pakhat awm” a tina. Tede he kah thlaang he yoeh hamla te ang ca mai te khoek manawh.” a tina. 10 Jesuh lawng ahimi nala te, “Thlaangping te ngawlh sak lah,” a tina. (Te ah te pompih moen awm). Te ah te thlaang boeih te ngawl u; te kah thlaang te thong ngaa yun awm. 11 Jesuh lawng takawi te a lawh tih Pathen tengah awm-ngaih awl a thui, tecoengah te kah aka ngawl thlaangping tengah te a ree. Nga te khaw te tila te a sai tih ahimi lawngah ahahla a caak u. 12 Ahimi boeih lawng ahahla a caak u coeng atah a hubang hue nala te, “Acoeih aphe te cawi uh; baw-are sak boel.” a tina. 13 Tedawngah ahimi lawng a cawi u tih baalii takawi cuun ngaa dawngkah thlaangping lawng a caak coeih te vawhphueih paha thlaihih dawngah abela a cawi u. 14 Jesuh lawng a sai kawpoekrai miknoekna he aka hu thlaang boeih lawngah, “Ahih he tah dilai dawngah aka law ham koei Tawngha taktak te ni” tila a thui u. 15 Ahimi lawngah law u vetih amangkhakla amah te sengpahrang la n'khueh u ai tite Jesuh lawng a ming tih; tedawngah tlaangsawm la te amah bueng koep cet. 16 Khaw athlem thuk veng atah Jesuh kah a hubang hue te tuiliipui la cet thuk u, 17 Lowng dawngah ngawl u tih Kapernaum khaw benla te tuiliipui ah kaa u phai tih cet u. Khaw tah yiin poen de ahimi tengla Jesuh tah pha thlan hun. 18 Tevengah khaw thlii khuengdeng tih tuilet tho. 19 A hubang hue lawng meng thum, meng lii yunyan lowng te a kaih u coeng atah tui sawah Jesuh te law phai tih lowng a awmna benla ayoeii rep te a huh u veng atah ahimi lawng a rih u. 20 Jesuh lawng ahimi nala te, “Rih u boel, kai ni” a tina. 21 Tecoengah lowng dawngah te awmngaihcala a ngawlh sak u, tecoeng atah ahimi lawng pha ham a ngaih ahuen te kawlkalh ah a pha u. 22 Avuen khawhin atah tuiliipui khatben rall ah aka awm thlaangping lawng, te huen ah lowng pakhat bueng a awm te a ming u. Te kah Lowng dawngah Jesuh cet nawh tih a hubang hue bueng ni a ceh u tite a ming u. 23 Tiberias kalawng aka law atloe lowng thli te, Bawipa lawng awmngaih awl a thui coengah thlaangping lawng takawi a caakna huen tuikeeng ah te avan pha u. 24 Thlaangping lawngah te huen ah te Jesuh oen a hubang hue khaw awm u nawh tite a ming u vengah te kah lowng dawngah te luui u tih ahih te tlap hamla Kapernaum khaw la te cet u. 25 Thlaangping lawng tuiliipui khatben rall ah Jesuh te a huh u vengah, “Saya, me vengah he la he na pha?” a tina u. 26 Jesuh lawng, “Awltak kavan thui u; nangmi lawngah kawpoekrai miknoekna te na yaakming u dawngah kai he nan tlap u moenih, takawi te a hah toett la na caak u dawngah ni nan tlap u. 27 Aka awm poe nawh caak awkk ham bii bi u boel; te lak ah dungyan aka awm caak awkk ham bii te bi uh. Thlaanghing Capa lawng caak awkk te m'peek ai; metihtiah Pa Pathen lawngah ahih sawah amah kah ngaikhuekna miknoek a khueh poen.” a tina. 28 Te atah ahimi lawngah, “Pathen lawng kaimi sai sak ham a ngaih te ka bina u thai ham n'tu ka sai u ai?” tila a doet u. 29 Jesuh lawng ahimi nala te, “Pathen lawng nangmi sai sak ham a ngaih te tah amah lawng avan tuih thlaang te tangna ham lawngah ni” a tina. 30 Ahimi lawng, “Kaimi lawngah na sai te ka huh u tih nang te kan tangna u hamla kawpoekrai miknoek n'tu na sai ai? Nang lawng n'tu navan sai ai? 31 Caciim lawngah a thui angla, ‘Ahih lawngtah ahimi kah caak hamla vaan kah takawi a peek’ a ti van angla kaimi kah patuer hue lawngtah ramhum huhang ah manna te a caak u.” a tina. 32 Jesuh lawngah, “Awltak kavan thui u, Mosi lawng nangmi m'peek te vaan kah takawi nawh ni; vaan kah takawi tangtang te nangmi aka pe tah a Pa ni. 33 Metihtiah Pathen kah peek takawi tah vaan kalawng law thuk tih dilai he hingna a peek.” a tina. 34 Ahimi lawngah, “Bawipa, te takawi te yoeyahla kaimi m'pe lah.” a tina u. 35 Jesuh lawng ahimi nala te, “Kai tah hingna takawi ni, a-u khaw ka tengah aka law tah meveng khaw a bung pawng manawh; a-u khaw kai he aka tangna tah meveng khaw tui hall manawh. 36 Tede kavan thui u, tahe ah nan huh u poen de nan tangna u nawh. 37 A Pa kah peek boeih tah ka tengla law ai. A-u khaw ka tengah aka law boeih tah ka hek manawh. 38 Metihtiah kamah kawngaih sai hamla vaan kah ka law nawh tih kai aka tuihkung kah kawngaih te sai ham ni ka law. 39 Kai he aka tuihkung kah kawngaih tah ka tengah amah kah peek boeih te pakhat khaw ha-ata sak ham nawh ni, tede aboetna khawhin ah ahimi boeih te thawh sak tih hing sak ham ni. 40 Metihtiah Capa te a huh tih aka tangna boeih lawngtah dungyan hingna te khueh hamla a Pa lawng a ngaih. Tecoengah aboetna khawhin ah ka thawh vetih ka hing sak ai.” a tina. 41 Ahih lawngah, “Kai tah vaan kalawng aka rum thuk takawi ni” tila a thui dawngah te kah thlaangping hue te caitoek u. 42 Tedawngah ahimi lawng, “He thlaang he Josep capa Jesuh nawh aw? Mami lawng ana pa oen a manu khaw m'ming u ta. Metila vaan kalawng ka rum thuk a ti mai?” ti u. 43 Jesuh lawng, “Nangmi lawng caitoek khiing u boel, toeng u loeih. 44 Kai he aka tuihkung a Pa lawngah ka tengla avan mawt nawh atah a-u khat khaw ka tengah law thai manawh; aboetna khawhin ah ahih te ka thawh vetih ka hing sak ai. 45 Tawngha thli lawng, “Thlaang boeih te Pathen lawng a cang puei ai” tila a thut. A-u khaw Pa awl te a yaak tih aka cang tah ka tengla law u. 46 He tah a Pa te aka hu thlaang awm ti ngaihna nawh ni; Pathen tengkah aka law bueng lawng ni Pa te a huh. 47 Awltak tang kavan thui u: ahih te aka tangna tah dungyan hingna a khueh. 48 Kai tah hingna takawi ni. 49 Nangmi kah patuer hue lawng ramhum hu hang ah manna te a caak u de ahimi boeih tah duek u. 50 Tede, a-u khaw vaan kah aka rum thuk takawi te aka ca boeih tah duek manawh. 51 Kai tah vaan kalawng aka rum thuk hingna takawi ni. A-u khaw he takawi he aka ca tah yoeyahla hing poen ai. Kai lawng ka peek ham koei takawi tah ka thi ka sa he ni, dilai lawng a hingna ham ka peek ni.” a tina. 52 He awl lawngah ahimi tim ah te thinso kawsa a thawh sak tih, “He kah thlaang lawngah he mami kah caak hamla metila a thi asa te mami m'peek thai ai?” tila doet u. 53 Jesuh lawng ahimi nala te, “Awltak kavan thui u: nangmi lawngah Thlaanghing Capa kah a ngan te na ca u nawh tih a thi te na awkk u nawh atah hingna te na khuiah awm manawh, 54 A-u khaw ka ngan he a caak tih ka thi he a awkk atah dungyan hingna a khueh tih ahih te aboetna khawhin ah ka thawh vetih ka hing sak ai. 55 Metihtiah ka ngan he tah caak ham tangtang tih ka thi he tah awkk ham koei tangtang ni. 56 A-u khaw ka ngan he a caak tih ka thi he aka aw tah kai dawngah hing tih kai khaw ahih dawngah ka hing. 57 Aka hing a Pa lawngah kai he n'tuih tih ahih rang oen ah kai khaw ka hing. Tetih van angla a-u khaw kai he aka ca tah kai rang oen ah hing ai. 58 Tecoengah he tah vaan kalawng aka law takawi ni; he takawi he aka ca tah yoeyahla hing poen ai. He tah nangmi kah patuer hue lawng a caak takawi oen lo u nawh, te kah takawi te aka ca tah duek u.” a tina. 59 Jesuh lawng he awl he Kapernaum khaw Sinakok bok-im ah a cang puei. 60 He awl he a huvai thlaang broe lawng a yaak u vengah, “He kah cangpueina he rai tangkiik aih, a-u lawng a yaakming thai ai?” ti u. 61 He kawngah ahimi caitoek u tite a-u lawngkhaw thui pe muehla Jesuh lawngah a ming tih tedawngah ahimi te, “He awl lawngah he na kaw avan boet sak u aw? 62 Thlaanghing Capa he acuek vengkah a awmna huen la a luui koep hang te na hu u mai kawinih me tih ni na ti u oh ai? 63 Hingna pekung tah Pathen Muithla ni; thlaanghing tharana tah a poei ni. Nangmi tengah kavan thui awl lawngah hingna aka pe Pathen Muithla te avan law puei. 64 Tede nangmi khatsut lawngtah na tangna u nawh.” a tina. (Jesuh lawngah thlaang pakhat lawngtah tangna nawh vetih amah sawah paipi a thleep ai tite acuekca kalawng a ming poen.) 65 Tecoengah a thui pe tih, “He kawngah ni a Pa lawng avan tuih nawh atah a-u khaw ka tengla law thai manawh tila acuekca ah kavan thui u teta.” a tina. 66 He kawngah he Jesuh kah a huvai thlaang broe te meel koep u tih a hu ah te bang u tlaih nawh. 67 Tedawngah a hubang thlaihih hue te, “Nangmi khaw kai he ceh taak ham na ngaih u van aw?” tila a doet. 68 Simon Piter lawngah, “Bawipa, a-u tengla ka ceh u ai? Nang lawng ni dungyan hingna na khueh. 69 Tahe atah nang he Pathen tengkah aka law Thlaang Ciim tila kan tangna tih kan ming u poen.” a tina. 70 Jesuh lawng, “Nangmi thlaihih hue he kai lawng kan tuek u nawh aw? Nangmi khuikah pakhat tah raaithe la awm!” a tina. 71 Ahih lawng Simon Iskariot capa Judah kawng ni a thui. Metihtiah Judah khaw hubang paha thlaihih khuikah pakhat van de ahih sawah te paipi a thleep.
1 He coengah Jesuh tah Galili peng la te kamyin la cet; Judia peng khuiah aka awm aana khuehkung Judah thlaang thli lawng ahih te ngawn ham a ngaih u dawngah tela te yin ceh ham ngaih nawh. 2 Judah thlaangphun kah Riim-im Poei atue te yoeii poen, 3 tedawngah Jesuh te a manau hue lawngah, “He kalawng Judia la cet langtah nang lawng na sai thaihu thli te na huvai thli lawng hu u van seh. 4 A-u lawngkhaw miing thang te a ngaih atah a sai thaihu te thuh elh thai nawh. Nang lawng he ang thaihu thli he na sai dawngah na kawng he dilai pum lawng ming lah seh!” a tina u. 5 (Amah kah a manau hue lawngkhaw tangna u nawh.) 6 Jesuh lawng ahimi nala te, “Kai ham atue atang pha thlan hun. Nangmi ham tah me ang atue atang khaw theen mai ta. 7 Dilai lawng nangmi n'thina moenih, kai ni n'thina, metihtiah kai lawngah ahimi kah athe te ka poer pe dawngah n'thina u. 8 Te kah poei la te nangmi cet uh, kai ham tah atue a pha thlan dawngah te poei la te kai tah ka cet manawh.” a tina. 9 He tila a thui pe tih Galili ah te awm. 10 Te kah Poei la te a manau thli a ceh coeng atah Jesuh khaw cet van; tede langya ah cet nawh tih ahuepla cet. 11 Aana khuehkung Judah thlaang thli lawng ahih te poei khuiah a tlap u tih, “Ahih he mela a awm kai?” ti u. 12 Thlaangping tim ah ahih kawng te tuemtuem a thui u. Thlaang khatsut lawng, “Ahih te thlaang theen ni,” ti u tih khatsut lawng, “Thlaangthe ni.” ti u. 13 Tede aana khuehkung Judah thlaang thli te a rih u dawngah ahih kawng te a-u lawngkhaw langya ah thui u nawh. 14 Te kah Poei te tentanrak a boeih tawm veng atah Jesuh te Tempal bok-im la cet tih a cang puei. 15 Aana khuehkung Judah thlaang thli tah a kawpoek rai u tangkiik tih, “He thlaang he sengim khaw kai nooek nawh de, thoemthaina he yoeh he metila a ming kai?” ti u. 16 Jesuh lawng, “Kai lawng kan cang puei u he kamah kah cangpueina nawh ni, tede kai aka tuihkung Pathen tengkah aka law ni. 17 A-u khaw Pathen kawngaih te sai ham aka ngaih lawngtah kan cang puei u he Pathen tengah aka law aw, tihnawhtah kamah kah saithaina aana oen ka thui aw ti he a ming ai. 18 Amah kah saithaina aka thui thlaang tah amah ham ruep-awmna dang ham aka yawm thlaang ni. Tede ahih te aka tuihkung kah ruep-awmna aka tlap thlaang tah boe a ngaai tih ahih dawngah thawlhpalhna khat khaw awm nawh. 19 Mosi lawng Phungawl te nangmi m'peek u. Tede a-u khat lawngkhaw Phungawl te na vai u nawh. Nangmi lawng n'tu dawngah kai he ngawn ham nan teeng u?” a tina. 20 Thlaangping lawngah, “Nang he raaithe na khueh! A-u lawngah nang he ngawn ham n'teeng u?” a tina u. 21 Jesuh lawng, “Kai lawng kawpoek rai miknoekna pakhat ka sai tih nangmi boeih na kawpoek rai u. 22 Mosi lawng na capa thli te yahhuivuen reet ham avan thui u, (te te Mosi lawng sai nawh tih na patuer hue lawng ni a tong u.) tedawngah nangmi lawng Sabbath khawhin ah na capa thli te yahhuivuen na reet pe u. 23 Tecoengah Mosi kah Phungawl te phe nawh ham ah Sabbath khawhin ah camaw tawngpaca te yahhui-vuen na reet u atah kai lawng Sabbath khawhin ah thlaang te aciimthlaula ka hoeih sak dawngah he n'tu ah na thin a sa u? 24 Asaw ahan kah alan atang oen awltloek mailai he toeng u loeih, asoeng akam taktak la awl tloek uh.” a tina. 25 Jerusalem ah aka awm thlaang khatsut lawng, “Aana khuehkung thli lawng ngawn hamla a teeng u te ahih he nawh aw? 26 Bueh lah! Ahih lawng langya ah awl a thui, ahimi lawng me tih khaw a tina u nawh kai? Ahih he Messiah ni tila ahimi lawng a ming u tangtang aw? 27 Messiah te a law vengah ahih te ame kalawng a law tite a-u lawngkhaw ming manawh. Tede mami boeih lawng he kah thlaang he ame kalawng a law tite m'ming u.” tila a thui u. 28 Jesuh lawng Tempal bok-im khuiah a cang puei vengah, awl a huer tih, “Nangmi lawng kai he nan ming u taktak tih ame kalawng ka law ti khaw na ming u aw? Kai he kamah rang oen ka law nawh. Tede kai aka tuihkung tah soeng tangtang, ahih te nangmi lawng na ming u nawh, 29 tede, kai lawngtah ka ming, metihtiah kai tah ahih teng kalawng ka law tih kai he ahih lawng n'tuih dawngah ni.” a tina. 30 Te vengah te ahimi lawng ahih te tuuk ham a yawm u de ahih kah atue a pha thlan dawngah a-u khat lawngkhaw tu u nawh. 31 Tede thlaang rangpui khuikah akuum ngaai lawngah ahih te a tangna tih, “Messiah te a law atah ahih lawngah he kah thlaang lak ah he kawpoekrai miknoek yahawh a sai ai aw?” ti u. 32 Jesuh kawng te thlaangping lawng-ah te tila tuemtuem a thui u te Farasi thlaang thli lawng a yaak u, tedawngah ahimi oen khawsoeih ahaamca thli lawng ahih te tuuk sak hamla raalkap a tuih u. 33 Jesuh lawngah, “Kai he nangmi tengah kawlkalh ni ka awm ai, tecoeng atah kai aka tuihkung tengla ka cet ai. 34 Nangmi lawng nan tlap u ai, kai ka awmna ham koei ahuen la te na cet thai u nawh vetih kai he nan hu u manawh.” a tina. 35 Aana khuehkung Judah thlaang thli lawngah amami khat oen khat te, “Mami lawng huh nawh ham mela a ceh vik ai? Mami phun Judah thlaang thli a awmna Krik khawpui la cet vetih Krik thlaang thli te a cang puei ai aw? 36 ‘Nan tlap u suide nan hu u manawh, tecoengah ka awmna ham koei ahuen la te na law u thai manawh’ a tite n'tu a thuingaihna kai?” ti u. 37 Te kah poeipui aboetna khawhin ah te Jesuh lawng pai tih, “A-u khaw tui aka hall tah ka tengla law selang tah tui aw lah seh. 38 Caciim lawngah, “A-u khaw kai aka oeng tah a thinkaw khui kalawng hingna tui te phuet ai’ a ti angla awm ai” tila angaih hlang la pang tih a thui. 39 Jesuh lawng amah te aka tangna thlaang thli lawng a dang ham koei Muithla kawng te ni he tila a thui. Te kah atue vengah ahih te Muithla pe thlan hun, metihtiah Jesuh te ruep-awm la thawh sak thlan hun. 40 He tila a thui te thlaangping timkah khatsut lawng a yaak u vengah, “He kah thlaang he tawngha tangtang ni!” ti u. 41 Thlaangtloe lawngtah, “Ahih he Messiah ni!” tila a thui u. Tede thlaangtloe lawngtah, “Messiah he Galili kalawng law manawh! 42 Caciim lawng a thui tah, “Messiah he Sengpahrang Devid kah cadil la awm vetih Devid amah a awmna Bethlehem khawpui khuiah ni a thang ai.” tila a thui u. 43 Tedawngah thlaangping hue tah Jesuh kawngah a kaw poek vai u nawh. 44 Thlaang khatsut lawngtah tuuk hamla a ngaih u de a-u lawngkhaw tu u nawh. 45 Raalkap hue te a meel u koep veng atah khawsoeih ahaamca thli oen Farasi hue lawng ahimi nala te, “Ahih te n'tu ah navan khuen u nawh.” tila a doet. 46 Raalkap hue lawng, “A-u khat lawngkhaw te kah thlaang angla awl thui nooek u nawh!” a tina u. 47 Farasi hue lawng, “Nangmi khaw n'ngau sak u poen aw? 48 Aana khuehkung khaw, Farasi thlaang khaw ahih te aka tangna pakhat mai khaw na ming u aw? 49 He kah thlaangping lawngah Mosi kah Phungawl ming u nawh, tedawngah ahimi lawng Pathen kah kawsi te a yawkk u poen!” a tina. 50 Farasi thlaang pakhat, he veng thlan ah Jesuh te huh ngaih ah aka cet Nikodemu te awm. Ahih lawng thlaangtloe hue nala te, 51 “Mami kah Phungawl ning ah, thlaang pakhat te amah awl thui n'yaak thlan ah, a sai thaihu khaw huh thlan ah awl khueng thaina awm nawh.” a tina. 52 Ahimi lawngah, “Nang khaw Galili thlaang van aw? Caciim te thoel alang lah, Galili kalawng tawngha khat khaw thoeng vai nawh tite na ming ai.” a tina u.
1 Tecoeng atah thlaang boeih te im la meel u, tede Jesuh tah Olif Tlaang la te cet. 2 Avuen mincanghi ah Tempal bok-im la te koep cet. Thlaangping lawng ahih te a veel khoep u, ngawl thuk tih ahimi te a cang puei. 3 Phungawl cangpueikung thli oen Farasi thlaang thli lawng a samphaih vengah a tuuk u hutaa pakhat te avan khuen u tih ahimi boeih haiah te a pai sak u. 4 Ahimi lawng Jesuh nala te, “Saya, he kah hutaa he a samphaih lii veng roe ah a tuuk u. 5 Mami kah Phungawl dawng Mosi lawngtah he ang hutaa he a duek toela lungto oen de mat ham awm tila awl a khueng. Nang lawng ta, metila na thui ai? a tina u. 6 Ahimi lawng he tila a thui u he tah, Jesuh te amah awl thui dawngah a thawlh tuuk pe ham oen ah ahimi lawng thawlh a peel thaina ham ni. Tede ahih lawng buekuep tih a kutdawn oen dilai dawngah ca a thut. 7 Te kah aka pai thlaang thli lawng a doet khiing u dawngah adoengla ngawl tih ahimi nala te, “Nangmi tim kah thawlhna aka sai vai nawh lawngah lungto oen de lamha seh.” a tina. 8 Tecoengah koep buekuep thuk tih dilai dawngah ca a thut. 9 Ahimi lawng he awl he a yaak u vengah, ahaamca kalawng a tong tih pakhat coeng khat ahimi boeih te cet u khongphaat. Te kah aka pai khiing hutaa oen Jesuh bueng te a ceh taak u. 10 Ahih tah adoengla ngawl tih hutaa nala te, “Mela a ceh kang u? Nang kah thawlhna khee hamla khat khaw awm u nawh aw?” a tina. 11 Te hutaa lawngah, “Bawipa khat khaw awm u nawh.” a tina. Jesuh lawngah, “Tetih atah theen, kai lawngkhaw kan khee van manawh. Cet loeih,tede thawlh koep tlaih boel.” a tina. 12 Jesuh lawngah Farasi thlaang thli nala te, “Kai tah dilai aangna ni, a-u khaw ka hu ah aka bang tah hingna aangna te a khueh vetih yiinna khuiah yingyawi tlaih manawh. 13 Farasi thlaang thli lawng, “Nang lawng namah kawng ni na thui; na awlthui te khaw a poei-oep ni.” a tina u. 14 Jesuh lawngah, “Tih nawh ni, kai lawng kamah kawng he ka thui cakhaw aka soeng ni ka thui, metihtiah kai lawngah ame kalawng ka law tih mela ka ceh ai tite ka ming. Nangmi lawngtah kai he ame kalawng ka law tih mela ka ceh ai ti khaw na ming u nawh. 15 Nangmi lawngtah thlaanghing siing la awl na cek u; Kai lawngah a-u khat khaw awl ka cek nawh. 16 Tede kai lawng he tila ka sai mai cakhaw kamah bueng lawng awl ka tloek moenih; kai aka tuihkung a Pa te ka tengah a awm dawngah kai kah awltloekna tah soeng ai. 17 Namami kah Phungawl dawngah, sausi thlaang pahih lawng a pai puei atah a thui te soeng tila a thut. 18 Kai lawng kamah kawng ka thui, kai aka tuihkung a Pa lawngkhaw ka kawng alam he a thui.” a tina. 19 Ahimi lawngah, “Na Pa te mela a awm?” a tina u. Jesuh lawng, “Nangmi lawng kai he khaw nan ming u nawh, a Pa khaw na ming u nawh. Nangmi lawng kai he nan ming u kawinih a Pa khaw na ming u van ai” a tina. 20 Jesuh lawng he kah awl boeih he Tempal bok-im khuikah tangka khuehna kong tengah a cang puei u vengah te a thui. Tede amah kah atue te a pha thlan dawngah a-u lawngkhaw a hih te tu u nawh. 21 Jesuh lawng ahimi tengah te a thui pe koep tih, “Kai tah athlala ka cet ai; nangmi lawng nan tlap u ai, tede nangmi tah namami kah thawlhna dawngah na duek u ai. Ka cehna ahuen la te nangmi na cet thai u manawh” a tina. 22 Tedawngah aana khuehkung Judah thlaang thli lawng, “Ahih lawngah ka cehna huen ah nangmi na cet thai manawh tila a thui he amah oen amah te ka ngawn u ai a ti ngaihna aw?” tila a thui u. 23 Jesuh lawngah, “Nangmi tah adang ben dilai thlaang la na awm u, tede kai tah asawben kah aka law ni. Nangmi tah dilai thlaang ni, tede kai tah dilai thlaang nawh ni. 24 Tedawngah ni nangmi tah na thawlhna dawngah na duek ai kan tina u. Tecoengah, “Kai Tah Ka Awm Tih Ka Awm’ tila aka thui te na tangna u nawh atah namami thawlhna dawngah na duek ai.” a tina. 25 Ahimi lawngah, “Nang he a-u?” tila a doet u. Jesuh lawng awl a thung pe tih, “Acuekca veng kalawng kavan thui u poen. 26 Nangmi kawng he ka thui hamla moen awm, nangmi he sal-aphaam hamla moen awm. Tede kai aka tuihkung tah soeng tangtang tih kai lawng ahih tengkah ka yaak te ni dilai tengah ka thui.” a tina. 27 Jesuh lawng ana Pa kawng te a thui vengah ahimi lawng yaakming u nawh. 28 Tedawngah ahimi nala te, “Nangmi lawng thlaanghing Capa te na tai u vengah, “Kai Tah Ka Awm Tih Ka Awm” tila aka thui te na ming u badai, tecoengah kai lawngah kamah kah saithaina aana oen khat khaw ka sai nawh, tede kai lawng thui hamla a Pa amah kah thuituenna bueng te ni ka thui tite na ming u ai. 29 Tecoengah kai aka tuihkung te tah ka tengah awm; metihtiah kai lawngah ahih kah kawhoena te ka sai poepa dawngah kamah bueng n'ceh taak sut nawh.” a tina. 30 Jesuh lawng he kah thaihu thli a thui he aka ya thlaang broe lawngah ahih te a tangna u. 31 Tedawngah Jesuh lawng amah aka tangna thlaang thli tengah, “Kai lawng kan cang puei u he nangmi lawng na tangna u atah nangmi tah kai kah hubang tangtang la na awm u; 32 awltak te na ming u vetih te kah awltak lawng nangmi te n'loeih sak ai.” a tina. 33 Ahimi lawngah, “Kaimi tah Abraham cadil la ka awm u tih a-u khat kah saltamnaa la khaw ka awm u nawh. ‘Nangmi tah na loeih ai’ tila na thui te n'tu na thuingaihna?” tila a doet u. 34 Jesuh lawng ahimi nala te, “Awltak kavan thui u: a-u khaw thawlhna aka sai boeih tah thawlhna sal la awm. 35 Sal lawngtah imkhuikaw pakhat ah akaanla poe awm nawh, tede a capa tah yoeyahla poe awm. 36 Nangmi te Capa lawng n'loeih sak atah na loeih u tangtang ai. 37 Nangmi he Abraham cadil tite ka ming ngoen ta. Kai lawng kan cang puei he nangmi lawng na do u nawh dawngah kai he ngawn ham nangmi lawng na yawm u. 38 A Pa lawngah kai n'huh sak akawng alam te ni kai lawngah ka thui, tede nangmi lawngtah na pa lawng avan thui te na sai u.” a tina. 39 Ahimi lawngah, “Abraham tah kaimi na pa ni.” a tina u. Jesuh lawng awl a thung pe tih, “Nangmi he Abraham kah ca anau taktak atah ahih lawng a sai thaihu te ang te na sai u van ai ta. 40 Nangmi tengah he Pathen tengkah ka yaak te ni kavan thui, tede nangmi lawngtah kai he ngawn ham nan teeng u. Abraham lawngtah he tila a sai moenih! 41 Nangmi lawngtah na pa kah kah a sai te ni na sai u van” a tina. Ahimi lawngah, “Kaimi lawng a Pa pakhat bueng Pathen amah te ni ka khueh u; kaimi he ahih kah aca anau thli taktak ni.” a tina u. 42 Jesuh lawngah ahimi nala, “Pathen he nangmi kah na Pa tangtang kawinih kai he nan lungna u suide, metihtiah kai tah Pathen teng kalawng ka law tih tahe he ah he ka awm. Kamah kah aana oen ka law nawh, ahih lawng ni n'tuih. 43 Kai lawng kavan thui he n'tu ah na yaakming u nawh? Awl kavan thui he na hutung u thai nawh dawngah ni. 44 Nangmi tah na pa Raaibawi kah ca-anau la na awm u tih na pa kah kawngaih te vai hamla na ngaih u. Acuek veng kalawng ahih tah thlaang ngawnkung la awm tih awltak ben ah metuek veng khaw awm nooek nawh, metihtiah ahih ah awltak te a awm roe nawh dawngah ni. Hoem awl a thui vengah a sai nooek bueng te ni a sai, metihtiah ahih tah hoemthuikung la awm tih hoem thui thlaang boeih kah ana pa la awm. 45 Tede kai lawngtah awltak kavan thui dawngah nangmi lawng nan tangna u nawh. 46 Nangmi khuiah ka thawlhna aka thui thai thlaang pakhat khaw na awm u aw? Kai lawng awltak ka thui atah n'tu ah kai he nan tangna u nawh? 47 Pathen tengkah aka law thlaang lawngtah Pathen awl te a hutung u. Tede nangmi tah Pathen teng kalawng na law u van nawh dawngah ni hutung ham na ngaih u nawh.” a tina. 48 Ahimi lawngah Jesuh nala te, “Nang tah Samari thlaang la na awm, tecoengah na kaw khuiah raaithe awm” kan tina u he soeng nawh aw?” a tina u. 49 Jesuh lawng awl a thung pe tih, “Kai tah raaithe ka khueh nawh, kai lawng a Pa ni ka thangpawm, tede nangmi lawngtah kai he nan sal nan phaam u. 50 Kai lawng kamah ham ruep-awmna ka tlap nawh. Tede kai hamla ruep-awmna aka tlap awlcekkung pakhat awm. 51 Awltak kavan thui u; a-u khaw kai lawng kan cang puei he aka vai tah mevengah khaw duek manawh.” a tina. 52 Ahimi lawngah ahih nala te, “Nang he raaithe na khueh tite tahe atah acaihla ka ming u poen! Abraham tah duek poen tih tawngha hue khaw duek boeih poen, tede nang lawngtah, ‘a-u khaw kai lawng kan cang puei he aka vai tah mevengah khaw duek manawh’ na ti. 53 Kaimi kah pahaam Abraham tah duek poen; nang he Abraham lak ah ka lenduet na ti aw? Tawngha thli khaw duek poen. Namah oen namah te a-u la na ngaai u?” a tina u. 54 Jesuh lawng awl a thung tih, “Kai lawng kamah oen kamah ka thangpawm u atah te thangpawmna te aphu awm nawh. Kai he thangpawmkung tah a Pa ni, nangmi lawng namami kah Pathen na ti u te ni. 55 Nangmi lawngah a hih te na ming u nawh, tede kai lawngtah ka ming. Ahih te ka ming nawh ka ti kawinih nangmi angla kai he hoemthuikung la ka awm ai. Tede kai lawngtah ahih te ka ming tih a awl ka ngaai pe. 56 Nangmi kah na pa Abraham lawngah kai ka lawna atue he huh a ngaih tih awmngaih; ahih lawng a huh tih a kaw hoe.” a tina. 57 Ahimi lawngah, “Nang he na kum sawmngaa pateng khaw a law thlan maiah, Abraham te na huh tangtang aw?” a tina u. 58 Jesuh lawng awl a thung pe tih, “Awl tak kavan thui u, Abraham a awm thlan ah Kai Ka Awm poen.” a tina. 59 Tecoeng atah ahih te de ham ah lungto a ruh u, tede Jesuh lawng a thuh u taak tih Tempal bok-im kalawng ah suntla.
1 Jesuh te a ceh phai vengah a awm pek veng kalawng mikpum thlaang pakhat te a huh. 2 A hubang hue lawngah, “Saya, a-u kah thawlhna lawng ahih he mikpum la a thang sak? Amah kah thawlhna lawng aw, tihnawhtah ana pa yuvaa kah thawlhna lawng aw?” tila a doet u. 3 Jesuh lawngah, “Ahih he amah kah thawlhna lawngkhaw, ana pa yuvaa kah thawlhna lawngkhaw a mik pum sak nawh. Ahih kah mik a pum he Pathen kah huham thara biibina te ahih sawah a tuengna ham ni. 4 Khawthaih vengah he kai aka tuihkung kah bii te mami lawng bi ham awm; a-u lawngkhaw bii a bi thaina nawh khawyiin te law ai. 5 Dilai ka awm vengah he kai tah dilai ham aangna la ka awm” a tina. 6 Te tila a thui coengah Jesuh lawng dilai dawngah tumtui a tha tih tumtui oen taknawng te a sai; taknawng te a mik dawngah a thluk pe, 7 tecoengah, “Cet langtah Siloam Tuilii ah na mik-hai te sil lah” a tina. (Siloam he tah, ‘Tuih’ ti ngaihna ni.) Tedawngah te thlaang lawngah cet tih a mik-hai te a silh tih a mik te koep tueng. 8 He veng thlan ah ahih lawng kutduen buh bih la a awm te aka hu thlaang thli oen a imbe lovaai hue lawng, “Ahih he aka ngawl kutduen thlaang nawh aw?” ti u. 9 Thlaang khatsut lawngtah, “Ahih ni” ti u tih atloe hue lawngtah, “Ahih nawh ni; ahih oen aka lo u ni.” ti u. Tedawngah amah lawng, “Te thlaang te tah kai he poen ni” tila a thui. 10 Ahimi lawngah, “Tetih atah metila na mik te a tueng thai?” tila a doet u. 11 Ahih lawng, “Jesuh a ti u thlaang lawngah te taknawng a sai tih ka mik dawngah avan thluk tih, “Siloam la cet langtah na mik-hai te sil.’ n'tina. Tedawngah ka cet tih ka silh vengah te tueng pahoei poen.” a tina. 12 Ahimi lawngah, “Ahih te mela a awm?” tila a doet u. Ahih lawngah, “Ka ming moenih” a tina. 13 Tecoengah mikpum aka hoeih thlaang te Farasi thlaang thli tengla a ceh puei u. 14 Jesuh lawng taknawng a sai tih ahih kah mik a hoeih pe sak khawhin te tah Sabbath hin ah ni. 15 Tecoengah Farasi hue lawngah te thlaang te metila a mik a tueng tite koep a doet u. Ahimi nala te, “Ahih lawng ka mik dawngah taknawng avan thuk; ka mik ka silh tih tahe ah ka mik tueng” a tina. 16 Farasi thlaang khatsut lawngtah, “He tila aka sai thlaang lawngah te Sabbath phung a vai nawh dawngah Pathen tengkah aka law thlaang nawh ni.” tila a thui u. Tede thlaangtloe lawngtah, “Thlaang thawlh pakhat lawng he ang kawpoekrai miknoekna he metila a sai thai ai?” ti u. Tedawngah ahimi tim ah pekbona te awm. 17 Tedawngah Farasi hue lawng te thlaang te a doet koep u, “Nang lawngtah ahih lawngah na mik te avan hoeih sak tila na thui, tetih atah ahih te a-u na ti?” a tina u. Te kah thlaang lawngah, “Ahih tah tawngha ni.” a tina. 18 Tede aana khuehkung Judah thlaang thli lawng te thlaang te a mik pum tih tahe ah a mik tueng koep tite ana pa yuvaa te doet thlan atah tangna hamla ngaih u nawh, 19 tedawngah ana pa yuvaa te a khue u tih, “Ahih he nanghih yuvaa kah na capa aw? A thang pek kalawng a mik pum na ti u, tetih atah metila tahe ah a mik he a tueng koep thai?” tila a doet u. 20 Ana pa yuvaa lawng, “Ahih he kai hih yuvaa kah capa ni, a awm pek kalawng a mik pum poen. 21 Tede tahe ah metila a mik a tueng thai ti khaw, ahih kah mik te a-u lawng a tuui ahaai pe ti khaw ka ming hih nawh. Amah te doet uh; a kum haam van poen, amah lawng avan thui thai ai ta!” tila a tina hih. 22 Ahih rawi yuvaa lawngah aana khuehkung Judah thlaang thli te a rih hih dawngah te tila te a thui pe, Jesuh tah Messiah ni tila a tangna tih aka thui boeih te sinakok bok-im kalawng hek sih tila aana khuehkung Judah thlaang thli lawng a thui u dawngah ni. 23 Tedawngah ni ana pa yuvaa lawng, “Ahih te a kum haam van poen; amah te doet uh!” a tina. 24 Ahimi lawngah mikpum la aka thang thlaang te apabela a khue koep u tih, “Awltak na thuina ham Pathen haiah awl kam lah! Nang kah mik aka hoeih sak te thlaangthawlh ni tila ka ming u.” a tina u. 25 Te thlaang lawngah, “Ahih te thlaangthawlh aw, thlaangdoeng aw ti khaw ka ming nawh. Kai lawng ka ming pakhat tah: Kai tah ka mik pum tih tahe ah ka mik a tueng koep he ni ka ming.” a tina. 26 Ahimi lawngah, “Ahih lawng n'tu avan sai? Na mik aka pum te metila avan hoeih sak? tila a doet u. 27 Ahih lawngah, “Kavan thui poen teta, nangmi lawng na hutung u nawh. N'tu hamla yaak koep na ngaih u? Nangmi khaw ahih kah hubang la coengg ham na ngaih u van aw?” tila awl a thung pe. 28 Ahimi lawng te thlaang te a tap avoep u coengah, “Nang he ahih kah hubang ni he; tede kaimi tah Mosi kah hubang ni. 29 Kaimi lawngtah Pathen lawng Mosi tengah awl a thui pe te ka ming u, tede nang lawng a hu ah na vai thlaang te tah ame kalawng a law ti khaw ka ming u nawh!” a tina u. 30 Te thlaang lawngah, “Ahih lawngah, ka mik he avan tueng sak lal maiah ame kalawng a law khaw ka ming nawh na ti u te kawpoek rai ham awm! 31 Kaimi lawng ka ming tah Pathen lawng thlaangthawlh awl te hutung pe nawh tih amah te a hinyah tih a kawngaih aka sai thlaang thli kah awl te a hutung pe tila ka ming u. 32 Dilai suen cuek veng kalawng mik aka pum te thlaang pakhat khat lawng a hoeih sak ti he a-u lawngkhaw ya nooek nawh. 33 Te kah thlaang te Pathen teng kalawng a law nawh atah ahih lawng thaihu khat khaw sai thai manawh. 34 Ahimi lawng, “Nang thawlhna dawngah aka thang tih aka roeng hang, nang lawngah aw kaimi he cangpuei ham na yawm van.” a tina u. Tecoeng atah ahih te sinakok bok-im kalawng a hek u poen. 35 Jesuh lawng ahih te a hek u tite a yaak tih a huh veng atah, “Nang lawng Thlaanghing Capa he na tangna aw?” tila a doet. 36 Te thlaang lawngah te, “Bawipa, ahih te a-u, ka tangna hamla van thui lah saw!” a tina. 37 Jesuh lawng ahih nala te, “Nang lawng ahih te na huh poen, ahih tah tahe ah nang oen awl aka thui hih he ni.” a tina. 38 Te thlaang lawngah, “Bawipa, kan tangna poen” a tina tih Jesuh haiah te khuklu oen cuengkueng. 39 Jesuh lawng, “Dilai la kai ka law he tah mikpum thlaang thli lawng mik a tuengna ham, miktueng thlaang thli lawng mik a pumna ham ah awl cek hamla ni ka law.” a tina. 40 Te kah aka awm Farasi thlaang khatsut thli lawng he tila ahih tengah a thui te a yaak u vengah, “Kaimi khaw na mik pum u van, na ti ngaihna aw?” tila a doet u. 41 Jesuh lawng, “Nangmi he na mik pum u kawinih na thawlhna awm manawh; tede ka mik he tueng na ti u dawngah tahe toe ah na thawlhna awm mangkhak hun.” a tina.
1 Jesuh lawngah, “Awltak kavan thui u: Tuu im khuila thawhka kalawng kuun ohla atloe abang kalawng luui tih aka kuun tah thlaanghuuen thli oen raal thli ni. 2 Thawhka kalawng aka kuun thlaang te tah tuu thli te khawlcuikung tuudoen ni. 3 Thawhka toetkung lawng ahih hamla thawh a awng pe; amah kah tuu thli te a miing oen a khue vengah ahih awl te tuu thli lawng a yaak pe tih ram la a ceh puei. 4 Ahih lawng tuu thli te a khuen vengah te thli kah a hai ben ah a ceh pe tih tuu thli lawng a hu ah a vai u, metihtiah ahih awl te a noek u dawngah ni. 5 Thlaangtloe hu tah vai u nawh, ahih kah awl te noek u nawh vetih te ang thlaang te tah a heng taak khongphaat dai ai.” a tina. 6 He kah thuidoetna he ahimi tengah Jesuh lawng a thui pe de thuingaihna te ming u nawh. 7 Tedawngah Jesuh lawng koep a thui pe tih, “Awltak kavan thui: Kai tah tuu thawhka ni. 8 Kai ka law thlan veng kah atloe boeih aka law te tah thlaang huen oen raal thli ni; tede ahimi kah awl te tuu thli lawng hutung pe nawh. 9 Kai tah thawhka ni. A-u khaw kai dawng kalawng ah a kuun atah thlawnna a dang ai, ahih tah kuun thuk, cet hang vetih ramtliim sainona te a dang ai. 10 Thlaanghuuen lawngtah huuen ham, ngawn ham oen ah phe ham bueng ni a law. Kai tah nangmi lawng hingna te na khueh thaina hamla, asoepbir hingna te na khuehna u thai ham ni ka law. 11 Kai tah tuudoen theen ni. Tuudoen theen lawngtah tuu hamla a hingna te a peek. 12 Tuudoen la aka awm nawh, thlaangvat tuudoen lawngtah amah kah tuu khaw khueh nawh, metaang a law te a huh vengah tuu thli te a ceh taak tih a heeng taak; tedawngah metaang lawng tuu te a ngeh tih a thek ayak boeih. 13 Thlaangvat tuudoen tah thlaangvat la a awm dawngah tuu thli te doen acang nawh. 14 Kai tah tuudoen theen ni. A Pa lawng kai he m'ming angla A Pa te kai lawngkhaw ka ming, tetih van la kai lawng ka tuu thli te ka ming tih ahimi lawngkhaw kai he m'ming u van. Kai lawngtah tuu thli ham hingna ka peek. 16 He kah tuu-im khuiah aka awm nawh ka tuu thli atloe khaw awm hun. Te thli te khaw kavan khuen hun ai; te thli lawngah ka awl he a ngaai ai; tuu huui at la coengg vetih tuudoen pakhat oen awm u ai. 17 Kai lawngtah hingna te ka dang koep hamla a awm dawngah hingna te peek ham ka ngaih tih a Pa lawng n'lungna. 18 Ka hingna he a-u lawngkhaw van rot nawh. Kamah kawthawh oen ni ka peek. Kai lawngah peek thaina ka khueh tih lawh thai koepna khaw ka khueh. He tah kai lawngah sai ham a Pa kah awlpeek ni.” a tina. 19 He kah awl dawngah he thlaangping tim ah pekbona te koep awm. 20 Ahimi a kuum ngaai lawngtah, “Ahih he raaithe a khueh! Angparawt thlaang ni! N'tu la a awl he na hutung pe u?” tila a thui u. 21 Tede atloe hue lawngtah, “Raaithe aka khueh thlaang lawngah he tila awl thui manawh! Metila raaithe lawng mikpum thlaang te mik a tueng sak ai?” ti u. 22 Jerusalem ah Tempal bok-im Nawnna Poei te awm. Te tah sikca sikding tue ni. 23 Jesuh tah Tempal bok-im kah Solomon Imcoen ah te yingyawi. 24 Thlaangping lawngah a veel khoep u tih, “Kaimi he meveng toe ah ngaihang khawbing la nan khueh khiing ai? Awlceet van thui loeih: Nang he Messiah aw?” tila a doet u. 25 Jesuh lawngah, “Kavan thui poen ta, tede kai he nan tangna u nawh. A Pa kah aana oen ah ka sai thaihu thli lawng kamah kawng he a thui; 26 tede nangmi he kamah kah tuuca la na awm u nawh tih nan tangna u nawh. 27 Kamah kah tuuca lawngtah ka awl he a hutung; tuu thli te ka ming tih ka hu ah va bang u. 28 Te thli te dungyan hingna ka peek tih meveng khaw duek u tlaih manawh. A-u lawngkhaw ahimi te van rot u manawh. 29 Ka tengah a Pa kah peek te tah soeprep lak ah aka lenduet ni, a Pa kah khoemdoenna khui kalawng rot manawh. 30 A Pa oen kai he tah pakhat ni.” a tina. 31 Tecoeng atah ahih te dena hamla lungto a ruh u. 32 Jesuh lawng ahimi nala te, “Kai lawng sai hamla a Pa kah peek thaihu theen te nangmi hai ah moen ka sai poen; he thaihu thli khuiah me ang kawng dawngah kai he lunghawh oen de hamla na ngaih u?” a tina. 33 Ahimi lawngah, “Thaihu theen na sai dawngah nang he lungto oen de ham ka ngaih u moenih, tede Pathen thekhana awl na thui dawngah ni! Nang he thlaangthoet mailai ni, tede namah oen namah te Pathen la na sa u.” a tina u. 34 Jesuh lawng, “Namami kah Phung-awl dawngah Pathen lawng ‘Nangmi tah pathen thli ni” tila, a thui te a thut. 35 Caciim lawngah a thui he yoeyahla soeng tite ka ming; Pathen lawng amah kah awl a peek thlaang thli te pathen a tina. 36 Kai he a Pa lawng n'tuek tih dilai la n'tuih. Tetih atah kai tah Pathen Capa ni ka ti dawngah Pathen thekhana awl na thui tila metila nangmi lawng na thui thai ai? 37 A Pa lawng sai sak ham a ngaih thaihu te kai lawng ka sai nawh atah kai he n'tangna u boel. 38 Tede te thli te ka sai atah, nangmi lawng kai he nan tangna u nawh mai cakhaw, a Pa tah kai ah awm tih kai khaw a Pa ah ka awm te na mingna u hamla ka sai thaihu thli he tah na tangna u ham awm.” a tina. 39 Ahimi lawngah Jesuh te tuuk hamla koekthoek a yawm u de ahih lawng a thuh u taak vik tih ahimi kah kut dawng kalawng loeih. 40 Tecoengah Jesuh tah Jordan tuiva ah te kaa phai, Johan lawng baptisma a peekna huen la te cet tih te ah te awm. 41 Thlaang yahawh hlang a tengla te law u. Ahimi lawngah “Johan lawng kawpoek rai miknoek khat khaw sai nawh, tede ahih kawng a thui boeih boeih te tah soeng.” ti u. 42 Te kah aka awm thlaang broe lawngah ahih te a tangna u.
1 Bethani khaw ah aka awm Lazaruh aka miingna thlaang pakhat te a sa ding nawh. Bethani he tah Meri oen Marta boeinau a awmna khawpui ni. 2 (Meri he Bawipa kah a khow te riimtuui oen a suep tih a sam oen aka thuut te ni; sa aka ding nawh Lazaruh te tah ahih kah nganpa ni.) 3 A ngannu rawi lawngah Jesuh tengah “Bawipa na lungna na paya he a sa ding nawh.” tila awl a tah hih. 4 Tete Jesuh lawng a yaak vengah, “He tlawhna he Lazaruh kah duekna toela coengg aih manawh; he ngoen tah Pathen kah ruep-awmna a tuengna hamla awm vetih he tlawhna rang oen Pathen Capa lawng ruep-awmna a dang ai.” tila a thui. 5 Jesuh lawng Marta oen a manau oen ah Lazaruh te a lungna. 6 Lazaruh kah sadingna nawh awlthang te a yaak de a awmna huen ah te hin hih awm hun. 7 Tecoeng atah a hubang hue nala te, “Judia la cet koep u sih.” a tina. 8 A hubang hue lawngah, “Saya, thlemvai pekca ah thlaangping lawng nang te lungto oen de a ngaih u teta, ceh koep ham na kamthlah aw?” a tina u. 9 Jesuh lawng, “Hin at ah khawnoek thlaihih awm de lah koen? Tedawngah a-u khaw khawthaih ah a yingyawi atah he dilai aangna he a huh dawngah ploeng nawh. 10 Tede khawyiin ah a yingyawi atah aangna te a khueh nawh dawngah ploeng.” a tina. 11 Jesuh lawng he awl he a thui coengah, “Mami kah paya Lazaruh tah ip muelh poen, tede ka cet silang ahih te ka thawh ai.” a tina. 12 A hubang hue lawngah, “Bawipa, ahih te a ih muelh atah a sa ding badai.” a tina u. 13 Jesuh lawngtah Lazaruh duek poen tila a thuingaihna ni, tede ahimi lawngtah amah poek ah ip mai cawini tila a poek u. 14 Tedawngah Jesuh lawng ahimi te, “Lazaruh duek poen.” tila a thui pe angtau. 15 “Tede ahih tengah ka awm nawh te nangmi hamla ka awmngaih, te dengah ni nangmi lawng na tangna u hun ai. Cawh, ahih tengla cet u sih.” a tina. 16 Tevengah Tawmas (Caphee a ti u te) lawng a paya hubang hue nala te, “Mami khaw ahih oen duek haih van hamla, Saya oen cet haih u sih!” a tina. 17 Jesuh te a pha vengah Lazaruh a up u te khawhin hin lii awm poen tite a ming. 18 Bethani he Jerusalem kalawng ah meng hih vet ni a thla, 19 Ahih rawi boeinau kah a nganpa a duek dawngah reem ahaalna ham ngawlh puei hamla Judah thlaang thli te broela law u. 20 Jesuh va law tite Marta lawng a yaak vengah do hamla te cet, tede Meri tah im ah awm. 21 Marta lawng Jesuh nala te, “Bawipa, he ah nang na awm kawinih ka nganpa he duek nawh sui! 22 Tede, tahe Pateng khaw Pathen tengah na bih boeih te nang m'peek ai tite ka ming.” a tina. 23 Jesuh lawng ahih nala te, “Na nganpa he tho koep ai,” a tina. 24 Ahih lawngah, “Aboetna khawhin ah tho ai ti ngoen tah ka ming ta.” a tina. 25 Jesuh lawng Marta nala te, “Kai tah thawhkoepna oen hingna ni. A-u khaw kai he aka tangna tah duek mai cakhaw hing ai; 26 a-u khaw kai he aka tangna tih khaw aka sa tah duek roe manawh. He he na tangna aw?” a tina. 27 Marta lawng, “Bawipa! Oeih, ka tangna, nang tah dilai la aka law ham Pathen Capa Messiah tite kan tangna.” a tina. 28 Marta lawng he tila a thui coengah cet koep phai tih a manau Meri te ahuepla duem a khue. Ahih nala te, “Saya te he ah awm, nang he n'tooem ta.” a tina. 29 Meri lawng a yaak vengah tho thlat tih ahih te huh hamla aloela cet. 30 (Jesuh te khaaw khui pha thlan, Marta oen a humna hih ah te awm hun.) 31 Reem ahaalna awl aka thui hamla Meri oen im ah aka awm haih thlaang thli lawng Meri lawngah tho thlat tih aloela a ceh te a huh u vengah a hu ah bung a vai u. Ahimi lawngtah Meri he phuel la ni aka rap hamla a ceh tila a poek u. 32 Meri lawng Jesuh a awmna te a pha atah, ahih te a huh pahoei oen a khowkung ah buekuep tih, “Bawipa, he ah nang na awm kawinih ka nganpa he duek nawh sui!” a tina. 33 Jesuh lawng ahih kah rah te khaw, ahih oen aka awm haih hue kah rah te khaw a huh, a thinkaw a phoel pe tih a kawsi la dung. 34 Ahimi nala te, “Ame ah na up u?” tila a doet. Ahimi lawng “Bawipa law langtah bueh lah saw,” a tina u. 35 Jesuh rap. 36 Te kah thlaang thli lawng, “Bueh u lah, a lungna tangkiik den he!” ti u. 37 Tede ahimi tim kah khatsut lawngah, “Mikpum haaiying khaw, mik aka tueng sak thlaang lawngah he Lazaruh khaw duek nawh hamla sai thai nawh ai aw?” ti u. 38 Jesuh tah kawsi la dung tih thlann la te cet, phuel te lungkaw la awm tih thlann te lungpeel oen a tleng u. 39 Jesuh lawng, “Lungpeel te khoe u lah.” a tina. Thlaangduek ngannu Marta lawngah, “Bawipa, a baw the poen cawi ni. A up u he khawhin hin lii awm poen!” a tina. 40 Jesuh lawngah, “Nang lawng na tangna atah Pathen ruep-awmna na huh ai, kan tina de lah koen?” a tina. 41 Ahimi lawng lungpeel te a khue u. Jesuh te vaan la maang hang tih, “A Pa, ka awl na hutung tih ka awmngaih tangkiik. 42 Ka awl na hutung yoeyah he ka ming, te cakhaw kavan thui he tah, he kah aka awm thlaang thli ham ni, ahimi lawngah kai he nang lawng nan tuih tite a tangna u ham ni.” a tina. 43 He tila a thui coengah angaihhlangla a khue tih, “Lazaruh law lah!” a tina. 44 Ahih tah a kut, a khow kah rawkk yaawlna himbai oen, a mik-hai yeenna himbai oen te va law. Jesuh lawng ahimi nala, “Thlam pe u langtah ceh sak uh.” a tina. 45 Meri te hip hamla aka law thlaang yahawh hlang lawngah Jesuh kah a sai te a huh u tih ahimi lawng ahih te a tangna u. 46 Tede khatsut tah meel koep u tih Jesuh kah a sai te Farasi thlaang thli tengah a thui pe. 47 Tedawngah Farasi thlaang thli oen khawsoeih ahaamca thli lawng awlcekna khonsil huhtunna te a sai u tih, “Me tih ni n'ti u lah ai? He kah thlaang lawngah kawpoek rai miknoek boehoeng la a sai poen! 48 Mami lawng he tila n'thlahphaam sut kawinih thlaang boeih lawng a tangna u poen ai, aana khuehkung Rom thlaang thli lawng law u vetih mami kah Tempal bok-im he a phe u vetih mami Judah thlaangphun he khaw a thup poen ai!” ti u. 49 Ahimi timkah thlaang pakhat, te kum ah Khawsoeih Bawi la aka awm Kaiafas aka miingna lawngah, “N'tu khaw na ming u nawh! 50 Thlaangphun a thup rup tih thlaang boeih a duek lak atah thlaang pakhat a duek te theen ngaai ti he na ming u nawh aw?” a tina. 51 Atak tang atah, he awl he amah kawthawh oen a thui moenih; te kum ah ahih te Khawsoeih Bawi la a awm van angla Jesuh he Judah thlaangphun ham duek ai tite a thui oepsoeh ni, 52 ahimi ham bueng nawh tih khawyat ah aka darh khonghak Pathen thlaang boeih pumkhat la cawi tunna hamla khaw a thui haih ni. 53 Te khawhin kalawng tah aana khuehkung Judah thlaang thli lawng Jesuh te ngawn hamla khawkhanna a sai u poen. 54 Tedawngah Jesuh tah langya ah Judia la te yin cet tlaih nawh, tede divinlangre tengkah Efarim khawpui la tah cet tih te ah te a hubang hue oen awm u. 55 Kaantaak Poei atue te yoeii tih poei a pha thlan ah aphung angtoekla bokna ben kah ciimcaihna te sai ham ram pum kah thlaang akuum ngaai tah Jerusalem la cet u. 56 Tempal bok-im ah ahimi lawng a tun u veng atah Jesuh te a tlap u tih, amami khat oen khat te doet u, “Metila na poek? Poei ah he law nawh ai aw?” ti u. 57 Khawsoeih ahaamca thli oen Farasi thlaang thli lawng ahih te a tuuk thaina u ham, “A-u lawngkhaw Jesuh a awmna te na ming u atah van thui uh.” tila awl a uen u.
1 Kaantaak Poei a phana ham hinruk a ngaih vengah duekna kalawng aka tho koep Lazaruh a awmna khaaw, Bethani la Jesuh te cet. 2 Te ah te ahih hamla thlembuh veelna a sai pe u tih Marta lawngah bii te a bawm. Jesuh oen caboi dawng buh aka veel haih thlaang thli tim ah Lazaruh khaw thuum van. 3 Tevengah Meri lawng naadu riimtuui phutlo boengloeng khui at te avan khuen, Jesuh khow te a suep tih a sam oen a thuut pe. Te kah riimtuui baw lawngah im khui te a hu thulh. 4 Jesuh kah hubang pakhat Judas Iskariot, ahih sawah paipi aka thleep ham koei lawngah te, 5 “N'tu ah riimtuui he ngun tangka yathum la a yoeih tih khawdeng thlaang thli te a peek nawh?” tila a thui. 6 Ahih lawng tila a thui he khawdeng thlaang thli te a poek tang tih a thui moenih, thlaanghuuen la a awm dawngah ni a thui. Ahih tah tangka kuemkung la a awm dawngah tangka te amah hamla thoem a hawna poepa. 7 Tede Jesuh lawng, “Ahih te lawl ala u boel! Ka rawkk kuemna khawhin veng kah ham khaw sai mai seh. 8 Khawdeng thlaang thli tah nangmi oen awm u poepa ai, tede kai tah nangmi oen ka awm poe manawh.” a tina. 9 Bethani khaw ah Jesuh awm tite a yaak u vengah tela te thlaangping broela cet u. Te ah te Jesuh a awm dawng bueng ah nawh tih duekna kalawng Jesuh lawng a thawh sak Lazaruh khaw a awm dawngah ni. 10 Tedawngah khawsoeih ahaamca thli lawng Lazaruh te khaw ngawn hamla a teeng u, 11 metihtiah ahih kawng dawngah Judah thlaang broe lawng ahimi te a hoett u tih Jesuh te a tangna u dawngah ni. 12 Avuen hin ah Kaantaak Poei la aka law thlaangping lawngah Jerusalem la Jesuh law ai tila a yaak u. 13 Tedawngah ahimi lawng samtoe te a khuen u tih ahih te do hamla cet u, “Pathen te thangpawm uh! Bawipa miing oen aka law te Pathen lawng yotheenna pe seh! Israel Sengpahrang te Pathen lawng yotheen kam-awm pe seh!” tila te paang u. 14 Caciim lawngah, “Zaion khawpui, nang lawng rih roe boel! 15 Na sengpahrang lawng lacano te a cit tih law lii hun,” tila a thui angla Jesuh lawng lacano pakhat te a huh tih a cit. 16 Tevengah te a hubang hue lawng he kah thaihu he yaakming u thai nawh; tede Jesuh he ruep-awm la a thawh coeng veng atah Caciim lawng ahih kawng a thui tih ahih hamla ni ahimi lawng a sai pe u tite a yaakming u. 17 Jesuh lawng Lazaruh te thlann khuikah a khue tih duekna kalawng a thawh sak vengah Jesuh tengah aka awm thlaang thli lawng te kawng te a thui patoeng u. 18 Ahih lawng he ang kawpoekrai miknoekna a sai te a yaak u dawngah ahih te huh hamla thlaangping law u. 19 Tedawngah Farasi thlaang thli lawng amami khat oen khat te, “Mami lawng n'taa thai nawh poen ti he na ming u aw! Bueh lah, dilai pum lawng ahih hu ah bang u poen!” ti u. 20 Poei vengah Pathen bok ham Jerusalem la aka cet thlaang tim ah te krik thlaangphun khatsut khaw awm u. 21 Ahimi lawngah Galili peng Betsaida khaw kah Filip tengla te cet u tih, “Saya, Jesuh huh hamla ka ngaih u.” a tina. 22 Filip lawng Andru tengla cet tih a thui pe coengah ahih rawi te Jesuh tengla cet tih a thui pe hih. 23 Jesuh lawng ahih rawi nala te, “Thlaanghing Capa lawng aka lenduet ruep-awmna dang hamla tahe ah atue a pha poen. 24 Awltak kavan thui u; caangthaam thaam at te dilai la tla nawh tih a duek nawh atah amah moepoe la awm. A duek atah caangthaam yahawh la a thoeng sak. 25 A-u lawngkhaw amah kah hingna te a lungna atah sung ai; a-u khaw he dilai ah amah kah hingna te a thina atah dungyan hingna te a dang ai. 26 A-u khaw kai kah bii he bi hamla a ngaih atah ka hu ah bang seh, te dengah ni kai kah tuihyoeihthlaang thli lawngah ka awmna ah a awm u van ai. Kai kah bii aka bi te tah a Pa lawng a thangpawm ai.” a tina. 27 Jesuh lawng, “Ka kawpoek patang tangkiik mah aw, n'tu ka thui lah ai? ‘A Pa, he kah atue he ka sawah van pha sak mai boel,’ tila aw ka thui lah ai? Tede patang khangna atue he tawng ham ni ka law roe. 28 A Pa, na miing te ruep-awmna pe lah!” tila a thui. Tecoengah vaan kah awl lawngah, “Ruep-awmna te ka peek poen, ka peek koep hun ai” tila a thui. 29 Te kah aka pai thlaangping lawngah te awl te a yaak u tih thlaang pakhat lawngtah khawhumm awl ni ti u, thlaangtloe lawngtah, “Vanthlaang lawng awl avan thui pe.” ti u. 30 Tede Jesuh lawng ahimi nala te, “He awl he kai hamla van thui nawh, nangmi ham ni. 31 Tahe ah dilai he awlcek ham atue apha poen; tahe ah he dilai ukkung thli te atloela a khoe poen ai. 32 Kai he dilai dawng kalawng tai la ka awm vengah thlaang boeih he ka tengla ka doek ai.” a tina. 33 (Te tila a thui te amah kah patang khang duekna te ni a thui ngaihna.) 34 Thlaangping lawngah, “Kaimi kah Phungawl lawngah Messiah tah yoeyahla hing ai tila a thui. Tetih atah Thlaanghing Capa te a tai u ai tite metila na thui thai? Thlaanghing Capa te a-u? tila a doet u. 35 Jesuh lawng, “Aangna he nangmi tengah kawlkalh ni a awm poen ai. Yiinna te nangmi sawah avan pha nawh ham aangna a awm vengah he cet u lah; metihtiah yiinna khuiah aka cet lawngtah meben la ka ceh tite ming nawh. 36 Nangmi lawng aangna thlaang la na awmna u ham aangna na khueh vengah he aangna te tangna u lah,” a tina. He awl he a thui coeng atah ahimi te a ceh taak tih thuh u poen. 37 Ahimi kah mik huh ah kawpoekrai miknoekna boeih he a sai pe de ahimi lawng tangna u nawh, 38 he tah tawngha Isaiah lawng: “Bawipa, kaimi lawng awl ka thui he a-u lawng a tangna? Bawipa lawng a-u tengah huham tharana te a tueng sak? tila a thui te asoepna ham ni. 39 He dawngah ni ahimi lawng a tangna u nawh, metihtiah Isaiah amah toengtoeng lawngah, 40 “Pathen lawng ahimi mik te a pum sak tih lung among sak, ‘Tetih atah ahimi mik lawng hu nawh vetih, ahimi kah thinkaw lawng ming nawh vetih ahimi te hoeih sak hamla ka tengla a law u nawh ai’ tila Pathen lawngah ti” tila te a thui. 41 Isaiah lawng Jesuh kah ruep-awmna te a huh dawngah ni ahih lawng te tila a thui. 42 Te tila a awm ah Pateng khaw aana khuehkung Judah thlaang broe lawngah Jesuh te a tangna u; tede Farasi thlaang thli lawngah sinakok bok-im kalawng n'hek hau ai tite a rih u dawngah te kawng te langyala thui u nawh. 43 Ahimi lawng Pathen kah koehna lak ah thlaanghing kah koehna te a ngaih ngai u dawngah ni. 44 Jesuh lawng awl a huer tih angaihhlangla paang tih, “A-u khaw kai he aka tangna tah kai bueng he tangna nawh tih kai tuihkung te khaw a tangna. 45 A-u khaw kai he aka hu tah kai tuihkung te khaw a huh. 46 A-u khaw kai aka tangna tah yiinna khuiah a awmna nawh ham kai tah dilai ah aangna la ka law poen. 47 A-u khaw ka awl he a yaak tih aka vai nawh te kai lawng awl ka cek manawh. Dilai he awl cek ham ka law nawh tih thlawn ham ni ka law. 48 A-u khaw ka awl he aka do nawh tih kai aka hoett te awl aka cek hamla thlaang awm. Aboetna khawhin vengah ka awl thui lawngah awl a cek ai. 49 He tah soeng tak tak; metihtiah kai lawng kamah rang oen ka thui nawh, tede kai he tuihkung a Pa kah awlpeek rang oen ni ka thui. 50 Tecoengah ahih kah awlpeek lawngtah dungyan hingna te avan khuen tila ka ming. Tedawngah a pa kah thui sak te ni kai lawng ka thui.” a tina.
1 Te tah Kaantaak Poei apha tawm Khawhin poen ni. Jesuh lawng he dilai he ceh taak tih Pa tengla ceh hamla atue apha poen tite a ming. Ahih lawngah he dilai kah a hubang hue te a lungna tih aboet toela a lungna. 2 Jesuh oen a hubang hue thlembuh a veel u vengah Seitan lawngah Simon Iskariot capa Judas thinkaw khuiah te Jesuh sawah paipi thleep hamla kawpoek te a khueh pe poen. 3 Jesuh lawngah tharana cungkuem ana Pa lawng a peek te a ming; ahih lawngah Pathen tengkah ka law tih Pathen tengla ka cet ai ti khaw a ming. 4 Tedawngah caboi dawng kalawng tho hang tih asawkah himbaidung a bai te a pit, bailoeng oen a hingcen te a yeen. 5 Tecoengah beeldung dawngah tui a thloen tih a hubang thli kah a khow te a silh pe, a hingcen ah a yeen bailoeng oen te a thuut pe. 6 Simon Piter tengah a pha veng atah ahih lawng, “Bawipa, nang lawng ka khow navan silh aw?” a tina. 7 Jesuh lawng, “Kai lawng ka sai he tahe ah na yaakming thlan hun, tede tahe kalawng ah na yaakming badai.” a tina. 8 Piter lawngah, a thana tih, “Ka khow he meveng khaw navan sil boel!” a tina. Jesuh lawngah, “Na khow he kavan sil nawh kawinih ka hubang la na awm tlaih manawh.” a tina. 9 Simon Piter lawng, “Te tih atah, Bawipa, ka khow bueng he van sil boel! ka kut oen ka luu he khaw van sil!” a tina. 10 Jesuh lawng, “Tui aka thlu tangte tah ciim poen tih thui thluk ham awm tlaih nawh, a khow bueng te ni silh ham angoe. Nangmi boeih tah na ciim u, pakhat ni aka ciim nawh.” a tina. 11 (Jesuh lawng amah sawah paipi aka thleep koei te a ming, tedawngah, “Nangmi boeih na ciim u, pakhat ni aka ciim nawh.” a tina.) 12 Jesuh lawng ahimi khow te a silh coengah himbaidung te a bai koep tih a ngawlhna caboi dawngah te koep ngawl. Kai lawng ka sai he na yaakming u aw? tila a doet. 13 Nangmi lawngah kai he Saya tila khaw, Bawipa tila khaw nan khue u, te tila ka awm dawngah nan tina te soeng. 14 Nangmi kah Bawipa oen Saya kai lawngah nangmi kah khow te kavan silh. Tedawngah nangmi lawng khat oen khat kah khow te patoeng na silh u van ham awm. 15 Kai lawng ka sai van angla nangmi lawngkhaw na sai u van ham, na oett ham koei te kavan sai poen. 16 Awltak kavan thui: Sal he a bawipa lak ah lenduet nawh, laipai he khaw aka tuihkung lak ah lenduet nawh. 17 Tahe tah awltak he na ming u poen, ataktangla aka sai tah metihtlukla a awmngaih ai! 18 Nangmi boeih he ka thui ngaihna nawh ni; ka tuek te tah ka ming. Tede caciim lawng, “Kamah kah buh aka ca lawng raal la coeng poen” a tite asoep ham awm. 19 He ang thli he a thoeng thlan ah kavan thui u, te dengah ni a thoeng tak tak vengah, “Kai Tah Ka Awm Tih Ka Awm” a tite na tangna ai. 20 Awltak kavan thui u, kai lawng ka tuih thlaang te aka do tah kai he khaw n'do van, kai he aka do tah kai tuihkung te khaw a do van.” a tina. 21 Jesuh lawng he awl he a thui coeng atah, thinphat uett ah, “Awltak kavan thui u, nangmi tim kah pakhat lawng ka sawah paipi a thleep ai.” a tina. 22 A hubang hue lawngah a-u thui-ngaihna kai ti u tih khat oen khat te aletla bueh u the. 23 A hubang thli khuikah thlaang pakhat, Jesuh lawng a lungna te Jesuh tengah ngawl. 24 Simon Piter lawng ahih nala te, “A-u nuem a thuingaihna doet lah.” a tina. 25 Tedawngah te kah hubang te Jesuh tengla thoeih rep phai tih, “Bawipa a-u lawng paipi a thleep ai? a tina. 26 Jesuh lawng, “Kai lawngah takawi kaam at caak te antui dawngah ka nuemm vetih ka peek thlaang te ahih ni.” a tina. Tedawngah takawi kaam at caak te a lawh tih a nuem, tecoengah Simon Iskariot capa Judah te a peek. 27 Judah lawng takawi te a lawh khoeng vengah Seitan tah a kaw khuiah kuun. Jesuh lawng ahih nala, “Na sai koei te aloela sai loeih!” a tina. 28 Jesuh lawng ahih tengah n'tu ah te tila a thui tite caboi dawngah aka ngawl khat lawngkhaw yaakming u nawh. 29 Judah tah tangka kuemkung la awm tih Jesuh lawngah ahih te poei veng ham ah amami kah angoe, tihnawhtah khawdeng thlaang thli te thaihu pakhat khat peek ham te lai hamla a thui pe cawini tila a hubang khatsut lawngtah a poek u. 30 Judah lawng takawi te a do tih cet pahoei poen. Teveng te tah khawyiin thlemkhuep poen ni. 31 Judah te a ceh coengah Jesuh lawng, “Tahe ah Thlaang Capa kah ruep-awmna tah tueng poen; ahih rang oen Pathen kah ruep-awmna tah tueng poen. 32 Tecoengah ahih rang oen Pathen kah ruep-awmna te a tueng atah Pathen lawng Thlaanghing Capa amah dawngah ruep-awmna te a tueng sak vetih avan sai pahoei poen ai. 33 Ka ca thli, nangmi tengah asan ka awm tlaih manawh. Nangmi lawng kai he nan tlap u ai; tede aana khuehkung Judah thlaang thli tengah ka thui te tahe ah nangmi tengah kavan thui u, ‘Kai ka cehna ah nangmi na cet thai manawh.’ 34 Tahe ah awlpeek thaai kan peek u: pakhat oen khat te lung u lah. Kai lawng nangmi kan lungna u van angla nangmi khat oen khat na lung u ham awm. 35 Nangmi khat oen khat na lung u atah thlaang boeih lawng nangmi he kai kah hubang hue ni tila a ming u ai.” a tina. 36 Simon Piter lawng, “Bawipa, mela na ceh ai?” a tina. Jesuh lawng, “Kai ka cehna ah tahe na law thai manawh, tede ahula na law badai” a tina. 37 Piter lawng, “Bawipa, n'tu ah tahe ah ka law thai nawh ai? Nang hamla tah duek khaw ka maa nawh” a tina. 38 Jesuh lawng, “Kai hamla tah duek khaw na maa nawh tang tang aw? Awl-tak kavan thui: aai a khawk thlan ah, kai he ka ming nawh tila voei thum toe na thui ai.” a tina.
1 Jesuh lawng a hubang hue nala te, “Nangmi lawngah ngaihang khawbing la awm u boel, Pathen khaw oeng u langtah kai khaw n'tangna u lah. 2 A Pa im ah ahuen yahawh hlang awm tih nangmi ham ah ahuen roekbah hamla ka cet ai. Awm nawh kawinih nangmi tengah kavan thui nawh mue. 3 Kai lawng ka cet vetih nangmi hamla ahuen te ka roekbah coengah ka law koep vetih kai ka awmna ah nangmi awm van ham kan lawh ai. 4 Kai ka cehna ahuen la aka pha sak lawngpui te na ming u.” a tina. 5 Tawmas lawng ahih nala te, “Bawipa, mela na ceh ai tite ka ming u nawh, te kah ahuen ah phana lawngpui te metila ka ming u ai?” tila a doet. 6 Jesuh lawng awl a thung pe tih, “Kai tah lawngpui oen awltak oen ah hingna la ka awm. Kai rang nawh atah a-u khaw Pa tengla cet thai manawh. 7 Tahe ah kai he nan ming u poen, nangmi lawng a Pa te khaw na ming u; tahe veng kalawng ah nangmi lawng ahih te na ming u poen tih na huh u poen” a tina. 8 Filip lawng, “Bawipa, na Pa te kaimi n'huh sak lah, te ni kaimi lawng ka ngoe u.” a tina. 9 Jesuh lawngah, “Nangmi tengah asan hlang ka awm poen, nan ming thlan aw, Filip? A-u khaw kai he aka hu tah a Pa te a huh poen. Tetih atah n'tu ah, “Na Pa te kaimi n'huh sak lah na ti. 10 Filip, kai tah a Pa khuiah ka awm tih a Pa te ka khuiah awm tite na tangna nawh aw? Nangmi tengah awl kavan thui he kamah awl nawh ni. Ka khuiah aka awm a Pa kah bii bina ni. 11 Kai lawngah, kai tah a Pa khuiah ka awm tih ka khuiah a Pa awm tila ka thui he tangna lah. Na tangna nawh atah ka sai thaihu te tangna uh. 12 Awltak kavan thui u, a-u khaw kai he aka tangna lawngtah kai lawng ka sai he a sai van ai, thaihu alentloe Pateng khaw a sai ai, metihtiah kai tah Pa tengla ka ceh ham a awm poen dawngah ni. 13 Capa rang oen ah Pa kah ruep-awmna te a tuengna ham ka miing oen na bih boeih te kavan sai ai. 14 Ka miing oen ah thaihu khat khat navan bih te kavan sai ai” a tina. 15 “Kai he nan lungna u atah, ka awlpeek he na vai ham awm. 16 A Pa tengah ka bih vetih nangmi te dungyan aka awm puei hamla ahih lawngah atloe Bawmkung te nangmi m'peek ai. 17 Pathen kawng awltak aka tueng sak Muithla te m'peek ai. Dilai lawng ahih te hu thai nawh, ming thai nawh vetih ahih te do manawh. Tede ahih tah nangmi tengah awm tih na khuiah a awm dawngah nangmi lawngtah na ming u. 18 “Kai lawng ka ceh atah namami bueng te kan ceh taak sut manawh; Nangmi tengla koep ka law ai. 19 Kawlkalh a awm coeng atah dilai lawng kai he n'hu tlaih manawh, tede nangmi lawngtah nan huh ai; kai tah ka hing dawngah nangmi khaw na hing u van ai. 20 Te khawhin te apha atah, kai he a Pa khuiah ka awm tih nangmi khuiah ka awm van angla nangmi khaw ka khuiah na awm te na ming u ai. 21 A-u lawngkhaw ka awlpeek he a do tih aka vai tah kai he aka lungna thlaang ni. Kai he aka lungna boeih tah a Pa lawng a lungna ai; Kai lawngkhaw ahih te ka lungna vetih a tengah ka phumpho pe ai.” a tina. 22 Judas lawng (Judas Iskariot nawh ni), “Bawipa, kaimi teng atah na phumpho tih dilai teng atah na phumpho nawh te metila a awm ai?” a tina. 23 Jesuh lawng, “A-u khaw kai aka lungna tah kan cang puei he a vai ham awm. Ahih te a Pa lawng a lungna ai, kai oen a Pa te a tengla ka law vetih ahih tengah te ka awm hih ai. 24 A-u khaw kai he aka lungna nawh tah ka cang puei he vai manawh. Nangmi lawng na yaak u cangpueina he kamah tengkah nawh ni, tede kai tuihkung a Pa teng kalawng ni a law. 25 Nangmi teng ka awm vengah he kah awl he kavan thui u. 26 A Pa lawng ka miing oen avan tuih ham koei Bawmkung Ciim Muithla lawngah soeprep boeih te nangmi m'cang puei vetih kavan thui boeih he nangmi m'ming sak ai. 27 Ngaimawngna kavan ceh taak u, te tah kamah kah ngaimawngna te ni kan peek u. Dilai kah peek te ang te kan pe nawh. Ngaihang lakueng oen khawthe boepla awm u boel; rihsakna khaw khueh u boel. 28 ‘Kai tah ka cet ai, tede nangmi tengla ka law koep ai, kan tina te na yaak u poen.’ Kai he nan lungna u atah a Pa tengla ka cet ai ka ti he na awmngaih ham awm; metihtiah ahih tah kai lak ah aka lenduet ni. 29 He he a thoeng taktak vengah nangmi lawng na tangna u hamla tahe veng a thoeng thlan ah he kavan thui u poen. 30 He dilai ukkung te law poen ai, tedawngah nangmi oen awl asan hlang la n'thui u tlaih manawh. Ahih lawng ka sawah huham tharana te khueh thai manawh, 31 tede kai lawng a Pa ka lungna tih ahih kah awl peek angla soeprep boeih ka sai te dilai lawng a ming ham awm. “Law uh, cawh, he huen kalawng cet u poen sih.” a tina.
1 Jesuh lawng, “Kai tah misurkung tangtang la ka awm tih a Pa tah Dum khuehkung ni. 2 Ahih lawngah, dawngah athaih aka thaih nawh a beek-athleeng thli te a haih boeih tih athaih aka thaih nawh te khaw athaih ciil te athaihna ham a beek-athleeng thli te a coei pe. 3 Nangmi tah kai kah cangpueina oen aciimthlaula na awm u poen. 4 Kai dawngah he tuhkai u lang awm poe u lah, kai khaw nangmi oen ka tuhkai u vetih ka awm poe van ai. Misur kah a beek-athleeng lawng amah poek ah thaih thai nawh; misurkung oen poe a tuh u dengah ni a thaih thai. Te tih van angla nangmi khaw kai dawngah poe na tuhkai u nawh atah na thaih u thai manawh. 5 Kai tah misurkungpui la ka awm tih nangmi tah a beek a thleeng thli ni. A-u khaw kai dawngah awm tih kai khaw ahih dawngah ka awm atah yahawh hlang la thaih ai; kai rang nawh atah n'tu khaw na sai thai u manawh. 6 A-u khaw kai dawngah aka awm nawh tah misur kah a beek-athleeng angla a voeih vetih reu ai; te ang a beek-athleeng te a cawi vetih hai dawngah a phum ai, te ah te ung boeih ai. 7 Kai dawngah na awm u tih nangmi khuiah ka awl he a awm atah nangmi lawng na bih thaihu te na dang u ai. 8 Nangmi lawng yahawh hlangla athaih thaihna rang oen a Pa kah ruep-awmna te na tueng sak u vetih te tila te ka hubang la na coengg u ai. 9 A Pa lawng kai n'lungna van angla nangmi khaw kan lungna. 10 A Pa kah awlpeek te ka vai tih a lungna khuiah ka awm van angla ka awlpeek thli he na vai u atah kai kah lungna khuiah na awm u. 11 Ka awmngaihna te nangmi khuiah awm tih na awmngaihna te asoepna ham he awl he kavan thui u. 12 Ka awlpeek tah he ni: kai lawng nangmi kan lungna van angla nangmi khat oen khat lung u van. 13 Thlaang lawngah he a paya hamla a lenduet lungna a khueh thai tah ahimi ham hingna a peek te ni. 14 Nangmi lawng ka awlpeek he na sai u atah ka paya la na awm u. 15 Nangmi te tuihyoeihthlaang kan tina tlaih nawh, metihtiah tuihyoeihthlaang lawngtah a bawipa kah a sai te ming nawh. A Pa tengkah ka yaak boeih te kavan thui poen dawngah nangmi he ka paya kan tina u poen. 16 Nangmi lawngah kai he nan tuek nawh; nangmi lawng na cet u vetih yoeyahla aka cak a thaih te na thaihna u hamla kai lawng nangmi he kan tuek tih bii kan peek u. Tedawngah nangmi lawng ka miing oen na bih boeih te a Pa lawng m'peek ai. 17 Tecoengah he tah kai kah awl peek ni: pakhat oen pakhat lung u lah.” a tina. 18 Dilai lawng nangmi n'thina atah lamhacuekla kai he ni n'thina tite poek uh. 19 Nangmi lawngah dilai koeva la na awm u kawinih dilai lawng amah koeva angla te n'lungna u van ai. Tede nangmi he dilai dawng kalawng kan tuek u poen tih dilai koeva la na awm u tlaih nawh dawngah dilai lawng nangmi n'thina. 20 ‘Sal he tah a bawipa lak ah lenduet nawh’ kan tina te hilh u boel. Ahimi lawng kai he n'heem atek atah nangmi te khaw n'heem atek van ai; ahimi lawng kai kah cangpueina he a vai u atah nangmi kah cangpueina te khaw a vai u van ai. 21 Tede nangmi he kai kah thlaang la na awm u dawngah ahimi lawng te ang thli boeih te nangmi sawah avan sai ai; metihtiah ahimi lawng kai aka tuihkung te ming u nawh. 22 Kai he ka law nawh tih ahimi tengah te ka thui pe nawh kawinih ahimi lawng thawlhna khueh u nawh sui; tede tahe tah ahimi lawng amami thawlhna peelnangna ham n'tu khaw khueh u tlaih nawh. 23 A-u khaw kai he aka thina tah a Pa te khaw a thina van. 24 A-u lawngkhaw a sai nooek nawh te ahimi tim ah ka sai nawh kawinih ahimi te thawlh u nawh sui; kai lawng ka sai te ahimi lawng a huh u tih a Pa oen kai he n'thina u poen. 25 Tede, he tah amami kah Phungawl dawngah, ‘N'tu kawng nawh maiah ahimi lawng kai he n'thina u poen,’ tila a thut te asoepna ham ni. 26 A Pa teng kalawng aka law Bawmkung, Pathen kawng awltak aka phawng Muithla te law ai. Kai lawng a Pa tengkah kavan tuih vetih kamah kawng he a thui ai. 27 Nangmi khaw acuekca veng kalawng ka tengah na awm u dawngah kamah kawng he na thui u van ai.
1 Nangmi lawng na oengna te na hoett u nawh ham he awl he kavan thui u. 2 Nangmi te sinakok bok-im khui kalawng n'hek u vetih nangmi te aka ngawn thlaang thli lawng Pathen bii ni ka bi u tila a poekna atue te law ai. 3 Ahimi lawngah kai he khaw, a Pa khaw a ming u nawh dawngah he ang thli he nangmi sawah a sai u ai. 4 He ang thaihu thli he ahimi lawng sai hamla atue apha vengah kavan thui he na hilh u nawh ham ah awl kavan thui. Nangmi tengah ka awm dawngah he kah thaihu thli he acuekca ah kavan thui u nawh. 5 Tahe atah kai aka tuihkung tengla ka cet poen ai, tede a-u khat lawngkhaw mela na ceh ai tite nan doet u nawh. 6 Tahe ah kavan thui dawngah na kaw the u. 7 Tede awltak kavan thui: kai he ka ceh atah nangmi ham theen bet ai, metihtiah ka cet nawh kawinih nangmi tengah Bawmkung te law manawh. Tede ka cet kawinih ahih te nangmi tengla kavan tuih ai. 8 Ahih te a law veng atah thawlhna kawng, oengna kawng oen Pathen kah awlcekna kawng te ahih lawngah dilai thlaang thli tengah a thui pe ai. 9 Ahimi lawng kai he n'tangna u nawh dawngah thawlh u ti khaw a thui pe ai; 10 Kai tah a Pa tengla ka cet poen vetih nan hu u tlaih manawh, tedawngah doengna kawng te a thui ai. 11 He dilai ukkung thli he awl a cek poen dawngah awlcekna kawng te a thui ai. 12 Nangmi tengah thui ham moen ka khueh, tede tahe ah he nangmi lawng na harukna lek aih manawh. 13 Tede Muithla te a law veng atah ahih lawng Pathen kawng awltak te avan phawng vetih awltak khuila te m'mawt u ai. Ahih lawng amah aana oen thui manawh, tede ahih lawng a yaak te a thui vetih aka law ham koei thaihu te avan thui ai. 14 Ahih lawng kai he ruep-awmna te m'peek ai, metihtiah ahih lawngtah kai lawng ka thui te nangmi tengah avan thui ai. 15 A Pa kah a khueh boeih te tah kai kah ni; tedawngah Muithla lawngtah kai lawng ka peek te a lawh vetih nangmi tengah avan thui ai tila kavan thui u.” a tina. 16 “Kawlkalh a awm coeng atah kai he nan hu u tlaih manawh, tede kawlkalh a awm coengah kai he koep nan huh u ai” a tina. 17 A hubang khatsut lawngah amami oen amami te, “He he n'tu a thuingaihna kai? Kawlkalh a awm coengah nan hu tlaih manawh ti tih, tecoengah kawlkalh a awm coengah nan huh u koep ai’ ti; tecoengah ‘a Pa tengla ka cet ai’ tila khaw a thui. 18 ‘Kawlkalh ah’ a ti he n'tu a thui ngaihna kai? N'tu kawng nuem a thui; ka ming u moenih!” ti u. 19 Ahimi lawngah doet hamla a ngaih u te Jesuh lawng a ming tih ahimi nala, “Kai lawngah, ‘kawlkalh a awm coengah nan hu u tlaih manawh, tecoeng kawlkalh a awm coengah nan huh u koep ai’ ka ti te aw namami oen namami na doet u khiing te? 20 Awltak kavan thui, nangmi lawng kopaang oen na rap u ai, tede dilai tah awmngaih ai; nangmi tah na kaw the ai, tede nangmi kah kawthena te awmngaihna la coengg ai. 21 Hutaa lawngah camoe a cuun vengah, patang khangna tue lawng a pha tih a kaw the; tede dilai dawng camoe pakhat te a cuun veng atah ahih lawng awmngaih tih patang palaina te a hilh. 22 Te tila te nangmi khaw na awm u van ai: tahe ah na kaw the u, tede nangmi te koep kan huh u vetih na awmngaih tangkiik u ai; te tah a-u khat lawngkhaw a lawh thai nawh awmngaihna ni. 23 “Te khawhin te a law vengah nangmi lawng n'tu khaw navan bih u manawh. Awltak kavan thui: nangmi lawng ka miing oen na bih boeih te a Pa lawng m'peek ai. 24 Tahe toe ah he nangmi lawng n'tu khaw ka miing oen na bih u thlan hun; nangmi kah awmngaihna te asoepna ham bih u lah na dang ni. 25 He thaihu thli he nangmi tengah thui hamla nuehtahna awl bueng te ka hawna. Tede kai lawng nuehtahna awl ka hawna nawh atue te a pha vetih a Pa kawng te aciimbiitla nangmi tengah avan thui ai. 26 Te khawhin te a pha vengah ka miing oen ah ahih tengah te na bih u ai; ahih tengah nangmi yuengla kavan bih ai tila ka thui nawh, 27 Metihtiah a Pa amah lawng nangmi te n'lungna. Nangmi lawng kai he nan lungna u tih kai he Pathen teng kalawng ka law ti he na tangna u dawngah nangmi te n'lungna. 28 Kai tah a Pa teng kalawng dilai dawngla ka law, dilai he ka ceh taak vetih a Pa tengla ka cet ai.” a tina. 29 Tecoengah a hubang hue lawng, “Tahe tah nang lawng nuehtahna awl thui tlaih ohla aciimthlaula na thui poen. 30 Nang lawng soeprep boeih na ming tila tahe tah ka ming u poen; nang lawngah thlaangtloe te doet ham na ngoe nawh. Tedawngah nang he Pathen tengkah na law tila kaimi lawng ka tangna.” a tina u. 31 Jesuh lawngah, “Tahe ah na tangna u poen aw? 32 Nangmi he phang na pek u ai, namah im la na cet u khongphaat vetih kai he kamah bueng nan ceh taak sut atue te law lii tih tahe ah avan pha poen. Tede kai tah kamah bueng tangtang aih nawh ni, metihtiah a Pa lawngah ng'awm puei. 33 Nangmi lawng kai oen ah tuhkaina rang oen ngaimawngna na khuehna ham he he kavan thui. Dilai lawng nangmi raina m'peek ai. Tecakhaw na thin cak sak uh! Kai lawng dilai ka taa poen!” a tina.
1 Jesuh lawng he awl he a thui coengah ahih tah vaan benla maang hang tih, “A Pa, atue tah a pha poen. Na capa kai lawng nang te ruep-awmna kan peekna ham na capa he ruep-awmna m'pe lah. 2 Nan peek boeih te dungyan hingna ka peek thaina ham thlaang boeih sawah sai thaina aana te nan peek poen. 3 Tecoengah dungyan hingna ti he tah nang lawng na tuih Jesuh Khrih he ming tih Pathen taktak nang te ming he ni. 4 Dilai sawah na ruep-awm na te ka tueng sak poen; kai lawngah ka sai hamla nan peek bii te ka coeng poen. 5 A Pa! Dilai sai thlan ah namah oen awm haih vengkah ruep-awmna te ang van te tahe namah haiah ruep-awmna te m'pe lah. 6 Dilai dawngkah nan peek thlaang thli tengah na miing te ka tueng sak poen. Ahimi te nang kah thlaang la awm tih ahimi te kai nan peek. Ahimi lawng na awl te a ngaai u tih, 7 soeprep boeih nan peek he nang teng kah aka law ni tite tahe tah a ming u poen. 8 Nang lawng nan peek awl te ahimi ka peek tih ahimi lawng a do u; kai he nang teng kalawng ka law ti he soeng tangtang tila a ming u tih kai he nang lawng nan tuih ni tila a tangna u. 9 “Ahimi hamla ka thangthui. Dilai ham ka thangthui nawh tih nang lawng nan peek thlaang thli te nang kah thlaang la a awm dawngah ahimi ham ka thangthui. 10 Kai lawng ka khueh boeih he nang kah ni, nang lawng na khueh boeih te khaw kai kah ni; ahimi rang oen kai kah ruep awmna he tueng. 11 Tahe tah na tengla ka law poen ai; dilai ah ka awm tlaih manawh, tede ahimi tah dilai ah awm ai. Aka ciim a Pa! nang oen kai tah pumkhat la n'awm van angla ahimi khaw pumkhat la a awm u van ham nang lawngah nan peek huham tharana namah miing oen ah te ading asuekla thlipdah lah. 12 Ahimi oen ka awm vengah he nang lawng nan peek huham tharana namah miing oen ah te ahimi he ading asuekla ka thlip ka dah tih ka khoem. Thlaangha pataam la nuen tangte thlaang pakhat te thui muehla tah pakhat khaw ha-ata nawh. 13 Tahe ah kai tah na tengla ka law poen ai, ahimi lawngah ka awmngaihna he a thinkaw khuiah aboet toela a khuehna u ham dilai ka awm veng he ah, he ang thaihu thli he ka thui pe. 14 Nang kah awl te ahimi ham ka thui pe, kai he dilai koeva la ka awm van nawh angla ahimi khaw dilai koeva la awm u nawh tih ahimi he dilai lawng a thina u. 15 Dilai dawng kalawng ahimi he na lawh hamla kavan bih nawh, tede Thlaangthe Puei teng kalawng ading asuekla thlipdah ham ni kavan bih. 16 Kai he dilai koeva la ka awm van nawh angla ahimi khaw dilai koeva la awm u nawh. 17 Ahimi he awltak oen namah hamla pum peek sak lah; awltak tah na awl te ni. 18 Kai he dilai ah nan tuih van angla ahimi te dilai ah ka tuih van. 19 Ahimi lawngah ataktang la na tengah pum a peek u van ham kai khaw ahimi hamla pum ka peek. 20 Ahimi ham bueng ah ka thangthui nawh, ahimi kah awl thui rang oen ah kai he aka tangna thlaang thli ham khaw ka thangthui. 21 Ahimi boeih lawng pumkhat la a awmna u ham ka thangthui. A Pa, Nang khuiah kai ka awm tih kai khuiah nang na awm van angla ahimi te mami khuiah awm van lah seh. Kai he nang lawng ni nan tuih tite dilai lawng a tangna ham ahimi he pumkhat la awm sak lah. 22 Nang oen kai he pumkhat la n'awm van angla ahimi khaw pumkhat la a awmna u ham nang lawng nan peek ruep-awmna te ang van te ahimi ka peek. 23 Ahimi khuiah kai ka awm tih kai khuiah nang na awm, ahimi lawng pum khat la a awmna rang oen nang lawng kai nan tuih tih nan lungna van angla ahimi khaw na lungna tite dilai lawng a ming ai. 24 “A Pa! Dilai suen thlan vengah nan lungna tih ruep-awmna nan peek, te kah ruep-awmna te nang lawng ka tengah nan peek thlaang thli lawng a huhna u ham kai ka awmna ah ahimi te awm sak ham ka ngaih. 25 Aka doeng a Pa! Dilai lawng nang m'ming nawh de kai lawngtah kan ming tih nang lawngah kai he nan tuih tite he thli lawng a ming u. 26 Kai nan lungna te ahimi khuiah awm tih kai khaw ahimi khuiah ka awmna ham nang te ahimi ka ming sak poen, ka ming sak baal hun ai.” tila thangthui.
1 Jesuh lawng he tila a thangthui coengah a hubang hue oen ah cet u tih Kidron sawkpui ah te kat phai u. Te ah te dum pakhat awm tih te la te Jesuh oen a hubang hue te cet u. 2 Jesuh oen a hubang hue tah tela te a ceh poepa u dawngah paipi thleepkung Judas lawng dum te a ming. 3 Tedawngah Judas lawng Rom raalkap bu khat oen ah Farasi thlaang thli oen khawsoeih ahaamca hue lawng a tuih tempal bok-im aka toet thlaang vang te dum la a ceh puei. Ahimi lawng pawmcunghaiha oen oep u tih haiim oen haithoei te a khuen u. 4 Jesuh lawng amah tengah aka thoeng ham koei soeprep boeih te a ming, tedawngah hai-la te cawh phai tih ahimi nala te, “A-u na tlap u?” tila a doet. 5 Ahimi lawng, “Nazaret Jesuh ka tlap” a tina u. Ahih lawngah, “Kai he ahih poen ni.” a tina. Paipi thleepkung Judas tah te ah te ahimi oen haih pai u. 6 Jesuh lawng, “Kai he ahih poen ni.” a ti vengah te hu benla nawng u tih dilai dawngah tlim drek u. 7 Jesuh lawng ahimi nala te, “A-u na tlap u?” tila koep a doet. Ahimi lawng, “Nazaret khaw kah Jesuh” a tina u. 8 Jesuh lawng, “Kai he ahih poen ni, kan tina u teta, nangmi lawng kai he nan tlap u atah atloe hue he tah ceh sak uh.” a tina. 9 (He tila a thui he tah, “A Pa, nang lawng nan peek thli te tah pakhat khaw ka ha sak nawh” tila a thui te asoepna ham ni.) 10 Simon Piter lawng samsen a khuen te tiingim dawngkah a phong tih Khawsoeih Bawi kah tamnaa, a bantang haa te pat a tloek pe. Te kah tamnaa te Malkhas a miingna. 11 Jesuh lawng Piter nala, “Na samsen te tiingim khuiah sang koep! A Pa kah peek patang khangna boengloeng he kai lawngah aw manawh tila na poek aw? a tina. 12 Tecoengah Rom raalkap thli oen raalbawi thli oen ah Judah hue lawngah Jesuh te a tuuk u tih a khih u, 13 Lamhacuekla Annas tengla a khuen u. Ahih tah te kum ah Khawsoeih Bawi la aka awm Kaiafas kah a mase la awm. 14 Kaiafas he tah, ‘thlaang yahawh hamla thlaang pakhat a duek he theen bet,’ tila Judah thli te poekna aka pe aana khuehkung ni. 15 Simon Piter oen atloe hubang pakhat lawng Jesuh te a hu ah a vai hih. Te kah hubang pakhat te Khawsoeih Bawi oen ming u, tedawngah ahih lawng Jesuh oen Khawsoeih Bawi kah impui vawngup khuila te cet, 16 tevengah Piter tah vawngthawhka adauben ah te awm. Atloe hubang lawngah te adaubenla koep cet, thawhka aka toet hutaaca te a thui pe tih Piter te a khuila a ceh puei. 17 Thawhka aka toet hutaaca lawng Piter nala te, “Nang khaw te thlaang kah a hubang van nawh aw?” a tina. Piter lawng, “Kai he ahih kah hubang nawh ni.” a tina. 18 Khaw a sik dawngah tuihyoeih-thlaang thli oen raalkap thli lawng haihol hai a toeih u, a veel u tih pai ruila hai te a aawm u. Piter lawng cet van tih pai ruila hai te a aawm van. 19 Khawsoeih Bawi lawngah Jesuh te a hubang thli kawng oen amah kah cangpueina kawng te a doet. 20 Jesuh lawng, “Kai lawng thlaang tawm tengah langyala ka thui poepa poen; cangpueina boeih te thlaang boeih a tunna sinakok bok-im oen Tempal bok-im ah ni ka sai, kai lawng ahuepla khat khaw ka sai nawh. 21 Tedawngah n'tu hamla kai he nan doet? Ka awl thui te aka ya thlaang thli te man na doet sui. Kai lawng ka thui te a ming u, ahimi te doet.” a tina. 22 He awl he Jesuh lawng a thui vengah te kah raalkap pakhat lawng ahih te a bel tih, “Metila Khawsoeih Bawi tengah tila awl na thui aih mai!” a tina. 23 Jesuh lawng ahih nala te, “Kai lawng ka thui te asoeng nawh atah he kah thlaang thli he asoeng nawh te thui peh saw. Tede ka thui he asoeng atah n'tu ah kai he nan bawh?” a tina. 24 Tecoengah Annas lawng Jesuh te a khihna rui thlam pe ohla Khawsoeih Bawi Kaiafas tengla a tuih. 25 Piter tah te ah te pai khiing tih hai a aawm. Tedawngah thlaangtloe hue lawng ahih nala te, “Nang khaw te thlaang kah a hubang pakhat van nawh aw?” a tina. Tede Piter lawng basa tih, “Kai he ahih kah hubang nawh ni,” a tina. 26 Khawsoeih Bawi kah tamnaa pakhat, Piter lawng a bantang haa a tloek pe thlaang kah a cakaw pakhat lawng, “Nang he dum khuiah ahih oen kan huh haih de lah koen?” a tina. 27 Piter lawng koekthoek ah, “Kai nawh ni” tila a thui tih tevengah aai khawk pahoei. 28 Mincanghi ah Jesuh te Kaiafas im kalawng ukkung bawi impui la te a khuen u. Aana khuehkung Judah thlaang thli lawngah Kaantaak poei buh te caak thaina ham amami te bokna phung angla ciimcaih ham a ngaih u dawngah ukkung bawi impui khuila kuun u nawh. 29 Tedawngah Pilat lawng adauben la cet tih ahimi te a doet, “He thlaang lawngah n'tu thawlhna a sai dawngah navan khuen u?” a tina. 30 Ahimi lawngah, “He thlaang lawng he lumlai lo nawh kawinih nang tengla kavan khuen u nawh mue.” a tina u. 31 Pilat lawng ahimi nala te, “Te atah ahih he namami lawng khuen u langtah namami kah phungawl angla awl cee uh.” a tina. Ahimi lawngah, “Kaimi lawng a-u khat khaw ngawn thaina ka khueh u nawh.” a tina u. 32 (Jesuh lawng amah he me ang duekna oen ka duek ai tila a thui te asoepna ham ni tila he a thoeng hang.) 33 Pilat bawi lawngah impui khuila koep kuun tih Jesuh te a khue, “Nang he Judah Sengpahrang aw?” tila a doet. 34 Jesuh lawng, “He awl he namah poek ah aw nan doet, tihnawhtah thlaangtloe lawng aw kai kah kawng he avan thui?” a tina. 35 Pilat lawng, “Nang lawng kai he Judah thlaang la aw nan poek? Kai kut dawngah nang aka pe thlaang thli he namah thlaangphun oen khawsoeih ahaamca thli ni. Lumlai na huh aw?” a tina. 36 Jesuh lawng, “Kai kah pengram tah he dilai he nawh ni; he dilai he ka ram mai kawinih aana khuehkung Judah thlaang thli tengah a pha nawh ham ka hubang thli lawng a teek u poen ai. Kai kah ram tah he dilai he nawh ni.” a tina. 37 Tedawngah Pilat lawng koep a doet tih, “Tetih atah nang he sengpahrang aw?” a tina. Jesuh lawng, “Na thui angla kai tah sengpahrang ni. Kai lawng awltak thui ham ka ngaih pakhat dawng maiah ni he dilai ah ka law tih ka thang. A-u khaw awltak dawngah aka awm lawngtah ka awl he a ngaai u. 38 Pilat lawng, “Awltak he n'tu?” tila a doet. Tecoegah Pilat lawng adauben kah thlaangping tengla koep cet tih ahimi nala te, “Kai lawngtah a duekna koei thawlhna khat khaw ka hu nawh. 39 Tede namami kah phung angla Kaantaak poei vengah kai lawng thongtla thlaang pakhat ka thlah poepa. Nangmi lawng Judah sengpahrang he thlah sak ham na ngaih u aw?” tila a doet. 40 Ahimi lawngah paang u tih, “Ahih te van thlah boel! Barabbas te van thlah!” ti u. (Barabbas tah thlaanghuuen ni.)
1 Tecoengah Pilat lawng Jesuh te a khue tih cungpoelh oen a tam sak u. 2 Raalkap thli lawng thliing lumuek te a sai u tih a luu ah a muek sak u, tecoengah himbai ling te a bai sak u, 3 a tengla te yoeii u tih, “Judah Sengpahrang na hinglung vaang seh!” a tina u tih a bel u. 4 Pilat lawng koekthoek cet tih thlaangping nala te, “Bueh u lah! Ahih he duek sak ham akawng alam ka hu nawh tite na huhna u ham nangmi tengah kavan khuen ai.” a tina. 5 Tecoeng atah Jesuh lawng thliing lumuek te a muek tih bailing bai oen va law. Pilat lawng ahimi nala te, “Ahih he bueh u lah!” a tina. 6 Khawsoeih ahaamca thli oen tempal bok-im aka toet raalkap thli lawng a huh u vengah paang u tih, “Thinglam dawngah ngawn! Thinglam dawngah ngawn!” tila a thui u. Pilat lawng ahimi nala te, “Nangmi lawng khuen u langtah thinglam dawng ngawn uh. Kai lawngtah ahih he duek sak ham akawng alam ka hu nawh.” a tina. 7 Thlaangping lawngah, “He kah thlaang lawng amah oen amah te Pathen Capa a ti dawngah kamami kah phungawl lawng a thui angla a duek ham awm.” tila awl te koep a thung pe u. 8 He tila a thui u te Pilat lawng a yaak vengah tare a rih. 9 Ahih lawngah impui khuila cet koep phai tih Jesuh te, “Nang he ame kalawng na law?” tila a doet. Tede Jesuh lawng awl thung pe nawh. 10 Pilat lawng, “Kai he nan voem ngaih nawh aw? Kai lawngah nang he thlah thaina khaw, thinglam dawng ngawn thai ham khaw aana ka khueh ti he na ming nawh aw?” a tina. 11 Jesuh lawngah, “Nang lawng ka sawah aana na khueh he Pathen lawng m'peek dawngah ni. Tedawngah na kut dawngah kai aka pekung te a thawlhna bo tare ngai,” a tina. 12 He tila a thui te Pilat lawng a yaak vengah Jesuh thlah ham oen ah loeih sak ham along a-im te a tlap. Tede thlaangping lawngah paang koep u tih, “Nang lawng ahih te na loeih sak atah nang tah Sengpahrang sangluel kah paya tlaih nawh ni! A-u khaw amah oen amah te sengpahrang ni aka ti boeih tah Sengpahrang sangluel te aka raalna thlaang poen ni!” ti u. 13 Pilat lawng he awl he a yaak vengah Jesuh te adaubenla avan law puei tih, “Lungpeel Phaih” a ti u ahuen kah awlcekna ngawlhcoen dawngah te ngawl. (Lungpeel Phaih a tite Hebru awl la “Gabbatha” ti u.) 14 Teveng te tah Kaantaak Poei huet hin hingthun tawm poen ni. Pilat lawngah thlaangping nala te, “Na sengpahrang he bueh u lah!” a tina. 15 Ahimi lawngah paang koep u tih, “Ahih te ngawn! Ahih te ngawn! Thinglam dawngah ahih te ngawn!” ti u. Pilat lawng ahimi nala, “Nangmi kah sengpahrang he thinglam dawng ngawn sak ham na ngaih u aw?” tila a doet. Khawsoeih ahaamca thli lawngah, “Sizar Sengpahrang sangluel nawh tah atloe sengpahrang ka khueh u nawh.” a tina u. 16 Tecoeng atah Pilat lawng Jesuh te thinglam dawngah ngawn hamla ahimi kut ah a peek. Tecoeng atah ahimi lawng Jesuh te a ceh puei u. 17 Amah thinglam te kawh ruila cet tih, “Luuruh Huen” a ti u te a pha. (Hebru awl la tah, “Golgota” ti u.) 18 Ahimi lawng te ah te thinglam dawng a ngawn u; thlaangtloe pahih khaw khatben khat bang ah a ngawn u tih Jesuh te a lung ah a ngawn u. 19 Pilat lawng noekna ca a thut tih thinglam dawngah a tai sak. Ahih lawng, “Nazaret khaaw kah Jesuh, Judah Sengpahrang” tila a thut. 20 Thinglam dawngah Jesuh a taina huen te khawpui khui kalawng athla aih nawh dawngah thlaang tawm lawngah noekna ca te a tae u. Noekna ca te Hebru, Latin oen Krik awl la a thut. 21 Khawsoeih ahaamca hue lawngah Pilat nala te, “Judah Sengpahrang tila thut boel, te lak atah amah awl thui angla, ‘He kah thlaang lawng kai tah Judah sengpahrang ni’ a ti ang la te thut” a tina u. 22 Pilat lawng awl a thung pe tih, “Ka thut tangte he tah ka thut angla awm seh.” a tina. 23 Raalkap thli lawng Jesuh te thinglam dawngah a tai coeng atah ahimi lawng hi-acuu te a lawh pe u tih amami pakhat rip hamla thloep lii la a pek u. Ahimi lawngah a himbaidung te khaw a lawh u, te himbaidung te tah aduul la a tah dawngah a huina a-ngawhaa awm nawh. 24 Raalkap thli lawng, “He tah pheuh u boel sih; a-u lawng nuem a dang ve, talcung sutt u sih” tila a thui u. He kah Caciim lawngah, “Ahimi lawngah, kai tah hi-acuu te pek u the tih ka himbaidung te tah talcung a yueh u” tila a thui te asoepna hamla tila he awm. Raalkap thli lawng te tila te a sai u. 25 Jesuh kah thinglam tengah te a manu oen a manu kah manau Klopas yu Meri oen Meri Makdalin hue he ayoeiila rep pai u. 26 Jesuh lawng a manu oen te ah aka pai a lungna a hubang te a huh tih a manu nala te, “Ahih te na capa ni.” a tina. 27 Tecoengah te kah hubang nala te, “Ahih te na nu ni” a tina. Te kalawng atah a hubang lawngah amah im ah awm sak ham a ceh puei. 28 Jesuh lawngah, tahe tah thaihu cungkuem soep boeih poen tite a ming tih Caciim lawng a thui te asoepna ham, “Tui ka hall” tila a thui. 29 Te ah te misurtui thuii abecala a thloen u tuium pakhat awm; te kah misurtui dawngah baipeen te a nok tih hissop thing cungkui dawngah a kek, tecoengah Jesuh te a kaa ah a tuh. 30 Jesuh lawng misurtui te a yawn tih, “Coeng boeih poen!” ti. Tecoeng atah a luu te a khun a hingna boet. 31 Tecoengah aana khuehkung Judah thlaang thli lawng Pilat tengla cet u tih thinglam dawng a tai thlaang thli kah a khow thli te tlot khem pe ham, ahimi kah rawkk te thinglam dawngkah lawh hamla a bih u. Ahimi lawng tila a bih u he tah te khawhin te huet hin la awm tih Sabbath khawhin ah rawkk thli te thinglam dawng awm sak ham ahimi lawng ngaih u nawh, Sabbath khawhin tah aciim khawhin la a awm dawngah ni. 32 Tedawngah raalkap thli lawng cet u tih thinglam dawng Jesuh oen a ngawn haih thlaang kah a khow te lamhacuek ah a khem pe, tecoengah atloe pakhat kah a khow te a khem pe u. 33 Tede, ahimi lawngah Jesuh teng a pha u veng atah duek tangte la a awm te a huh u, tedawngah ahih kah a khow te tah khem pe u nawh. 34 Raalkap pakhat lawngah Jesuh te a vee ah cai oen a thun tih tevengah thisen oen tui te pahoei thoeng. 35 (He tila a awm he aka hukung lawng tila a thui he tah nangmi lawngkhaw na tangna u van hamla ni. Ahih lawng atak tang a thui te amah lawng a ming.) 36 Caciim lawngah, “A ruh te pakhat Pateng tlot manawh” tila a thui te asoepna hamla tila he awm. 37 Tecoengah atloe Caciim dawngah khaw, “Ahimi lawng cai oen a thun u te a bueh u ai” tila a thui te awm. 38 He coeng atah Arimatia khaaw kah Josep lawng Jesuh rawkk te lawh hamla Pilat tengah a bih. (Josep lawng aana khuehkung Judah thlaang thli te a rih tih ahuepla Jesuh kah hubang la thuep aka awm ni.) Pilat lawng a rawkk te na lawh thai a tina dawngah cet tih a lawh. 39 Jesuh te huh hamla khawyiin ah aka cet Nikodemu khaw Josep oen haih cet tih mura oen aloes a pawlh heet riimtuui pawng yakhat tluk te a khuen. 40 Ahih rawi lawng Jesuh rawkk te a khuen hih tih Judah phung rawkk vui siing angla Jesuh rawkk oen riimtuui te himbai haldoel oen ah haih a yaawl. 41 Jesuh a ngawnna huen ah te dum pakhat awm tih te ah te a-u khat khaw a upna nawh thlann lungkaw a thai pakhat awm. 42 Te khawhin te tah Judah thlaang thli kah huet hin la awm tih thlann lungkaw te khaw ayoeica dawngah te ah te Jesuh te a up u.
1 Yarh khat khuikah lamhacuek khawhin mincanghi khaw a thaih suisai vengah Meri Makdalin te phuel la cet, thlann thawhka tlengna lungto ana khoe u te a huh. 2 Ahih lawngah Jesuh lawng a lungna atloe hubang thli oen Simon Piter tengla te heeng tih, “Thlann khuikah Bawipa te a lawh u poen, mela nuem a khueh u kai, ka ming nawh!” tila a thui pe. 3 Tecoengah Piter oen atloe hubang lawng phuel la cet hih. 4 Ahih rawi te heeng hih de atloe hubang te loe bet tih lamhala thlann te a pha. 5 Ahih lawng buekuep thuk tih a bueh vengah rawkk yaawlna himbai te a huh, tede a khuila tah kuun nawh. 6 Ahih hu ah aka law Simon Piter tah thlann khuila te kuun thuk. Te ah himbai a awm te khaw, 7 Jesuh kah a luu yaawlna himbai yaawl tangte athloekcala a awm te khaw a huh. 8 Tecoeng atah lamhala thlann aka pha atloe hubang te khaw a khuila kuun van; ahih lawngkhaw a huh tih a tangna. 9 (Caciim dawngah ahih tah duekna kalawng tho koep ai tila a thui te yaakming hih nawh toengtoeng hun.) 10 Tecoengah a hubang rawi te im la meel koep hih. 11 Meri te thlann tengah pai tih rap. Ahih lawng rah ruila te buekuep thuk tih thlann khui te a bueh, 12 tevengah himbai bawk aka bai vanthlaang pahih Jesuh kah rawkk a helhna ah te a khow ben ah pakhat, a luu ben ah pakhat aka ngawl hih te a huh. 13 Ahih rawi lawngah, “Hutaa nang, n'tu ah na rah khiing?” a tina hih. Ahih lawngah, “Ka Bawipa he a khuen u poen, mela nuem a khueh u ka ming nawh he!” a tina. 14 Tecoengah a hu benla a mang phai veng atah te ah Jesuh aka pai te a huh; tede ahih lawng Jesuh tila noek nawh. 15 Jesuh lawngah, “N'tu ah na rah khiing oh ca? Nang lawng a-u nuem na tlap de?” a tina. Ahih te dumtoetkung la a poek tih,” Saya, ahih te na lawh oh atah van thui lah, mela nuem na khueh, ka cet silang tah ka lo ai” a tina. 16 Jesuh lawngah, “Meri!” tila a khue. Meri lawngah ahih benla te maang tih Hebru awl la, “Rabboni!” a tina. (Thuingaihna tah, ‘Saya’ tina ni.) 17 Jesuh lawngah, “Kai he n'tu khaklal boel de lah, a Pa tengla ka cet thlan hun, tede ka manau thli tengla cet langtah, ‘ahimi oen kai kah a pa, kai kah Pathen oen ahimi kah Pathen tengla ka cet poen ai ti’ tila thui peh.” a tina. 18 Tedawngah Meri Makdalin lawng a hubang thli tengla te cet, Bawipa a huhna oen ahih tengah awl a thui pe te ahimi tengah a thui pe. 19 Thawh koep hin thlemben atah a hubang hue te thik at la tun u. Ahimi lawng aana khuehkung Judah thlaang thli te a rih u tih thawh a khaih tih khak a kalh u. Tevengah Jesuh te law tih ahimi tim ah te a pai pe. “Nangmi sawah ngaimawngna awm seh.” a tina. 20 He tila a thui coengah ahimi te a kut rawi oen a vee te a huh sak. A hubang hue lawng Bawipa te a huh u tih awmngaih u. 21 Jesuh lawng ahimi nala te, “Nangmi tengah ngaimawngna awm seh, a Pa lawng kai n'tuih van angla nangmi he kan tuih u.” tila koep a thui pe. 22 Tecoengah ahimi sawah a hill te pho a hut tih, “Ciim Muithla he lo u lah. 23 Nangmi lawng thlaang kah thawlhna te khawdawp na ngaai pe u atah ahimi te khawdawp ngaai la awm ai; nangmi lawng ahimi kah thawlhna te khawdawp na ngaai pe nawh atah ahimi tah khawdawp ngaai nawh la awm ai” a tina. 24 Jesuh a law vengah te hubang thlaihih khuikah pakhat van Tawmas (Caphee a ti u te) tah awm nawh. 25 Tedawngah atloe hubang hue lawng, “Kaimi tah Bawipa te ka huh u poen!” a tina u. Tawmas lawng ahimi nala te, “Kai tah, a kut dawngkah thiicung henna boengha te kutdawn oen ka tek nawh tih a vee te khaw ka kut oen ka yuh ka yam nawh atah ka tangna manawh” tila a thui. 26 Yarh khat a awm coeng atah a hubang hue te im khuiah koep tun u. Tawmas khaw ahimi oen awm u. Thawh te khak a kalh u, tede Jesuh te law tih ahimi tim ah pai tih,” Nangmi tengah ngaimawngna awm seh” a tina. 27 Tecoengah Tawmas nala te, “Na kutdawn thli te ka kut dawngah khueh langtah ka kut he bueh lah; na kut te yueng langtah ka vee he yutt yam lah. Uepvoet tlaih boel, tangna loeih!” a tina. 28 Tawmas lawng, “Ka Bawipa oen ka Pathen” a tina. 29 Jesuh lawng ahih nala te, “Nang lawng nan huh dawngah nan tangna aw? Kai he huh muehla aka oeng thlaang thli tah yotheenna a dawng u!” a tina. 30 Jesuh lawngah a hubang thli tengah kawpoekrai miknoekna yahawh hlang a sai te he cabu dawngah thut nawh la moen awm hun. 31 Tede Jesuh tah Messiah, Pathen Capa ni tite nangmi lawng na tangna u tih ahih te na oengna rang oen hingna te na khuehna u ham he ang thli he thut la awm.
1 He coengah Jesuh lawng Teberias Tuiliipui ah a hubang thli tengah te koep a phumpho pe. A phumphona tah tila ni. 2 Simon Piter, Tawmas (caphee a ti u te), Nathanael (Galili peng Kanaa khaw kah), Zebedi ca rawi oen ah Jesuh kah hubang atloe pahih te haih awm u. 3 Simon Piter lawng atloe hue nala te, “Kai nga ka heeng de lah ai.” a tina. Ahimi lawng, “Kaimi khaw ka law u van ai” a tina u. Lowng dawngah cet u tih nga a heeng u, tede yiin at puet ah nga khat khaw tu u nawh. 4 Khaw a thoeng hang atah Jesuh te tuikeeng ah pai, tede a hubang thli lawng Jesuh te noek u nawh. 5 Tecoengah ahimi nala te, “Cadawng thli, nga khat khaw na tu u nawh aw?” a tina. Ahimi lawngah, “Khat khaw ka tu u nawh” a tina u. 6 Te atah ahimi nala te, “Lowng kah bantang ben ah lok te heeng u lah, ayawl akai tah na tuuk u khawming.” a tina. Tedawngah ahimi lawng lok te a heeng u tih nga yahawh hlang a tuuk khuengdeng u tih lok te koep doek u thai tlaih nawh. 7 Jesuh lawng a lungna hubang pakhat lawngah Piter nala te, “Bawipa ni!” a tina. Piter lawng, Bawipa ni tite a yaak vengah a himbaidung a dul sut te a hingcen ah a yeen tih tui dawngah sungpung thuk. 8 Atloe hubang hue lawngtah nga aka be poek lok te a doek u tih tuikeeng la te lowng oen law u. Ahimi te tah lan kalawng ah thla hlang aih nawh, pe yathum yun ni athla. 9 Ahimi lawng tuikeeng te a pha u vengah haialh dawngah nga a haai tangte te khaw a huh u, takawi khaw awm. 10 Tecoengah Jesuh lawng, “Nga na tuuk u te thoem van khuen lah,” a tina. 11 Simon Piter lawngah lowng dawng la cet tih nga abobo oen aka be poek lok te tuikeeng la a duek, nga te, yakhat coeng sawmngaa pathum law mai de lok te pawn nawh. 12 Jesuh lawng ahimi nala te, “Law uh, ca u loeih,” a tina. Bawipa ni tite a ming u poen tih a hubang khatca lawngkhaw, “Nang he a-u?” tila te doet re u tlaih nawh. 13 Te atah Jesuh lawng cet tih takawi te a lawh tih ahimi te a peek; te tila te nga khaw ahimi te a peek. 14 He tah duekna kalawng a thawh coengah a hubang hue tengah Jesuh a phumphona a pathumna ni. 15 Ahimi lawng a caak u coeng atah Jesuh lawng Simon Piter nala, “Johan capa Simon, he hue lawngah kai n'lungna lak ah nang lawng nan lungna ngaai aw?” tila a doet. Simon lawngah, “Oeih, Bawipa, kan lungna he na ming.” a tina. Jesuh lawng, “Ka tuu thli he atheenla van doen.” a tina. 16 Avoeihihna ah Jesuh lawng, “Johan capa Simon, kai he nan lungna aw?” a tina. Ahih lawngah, “Oeih, Bawipa, kan lungna te na ming.” a tina. Jesuh lawngah, “Ka tuu thli he van doen ne.” a tina. 17 Apathum na ah Jesuh lawng, “Johan capa, Simon, kai he nan lungna aw?” tila a doet. Jesuh lawng voei thum toe ah nan lungna aw tila a doet dawngah Piter tah a kaw the malcal tih, “Bawipa soeprep he na ming; kai lawng kan lungna te na ming!” a tina. Jesuh lawngah, “Ka tuu thli he van doen. 18 Awltak kavan thui: Na thawh thuem veng atah huertuela na awm tih na ngaihna ah te na cet; tede na patawng atah baan na lam vetih nang te thlaang lawngah n'piin ai, na ceh ngaihna nawh ahuen la te n'khuen u ai.” a tina. 19 (He tila a thui he tah Piter he me ang duekna oen a duek vetih Pathen ruep-awmna te a tueng sak ai tite thuinuetna ni.) Tecoengah Jesuh lawng, “Ka hu ah baang lah!” a tina. 20 Piter lawng maang tih a bueh vengah Jesuh lawng a lungna atloe hubang te a huh, te thlaang te tah thlembuh a veel u vengah Jesuh pum dawngah hangdang tih, “Bawipa, na sawah a-u lawng paipi a thleep ai?” tila aka doet te ni. 21 Piter lawng ahih te a huh vengah, Jesuh nala, “Bawipa, ahih he ta metila a awm ai?” tila a doet. 22 Jesuh lawngah, “Kai ka law toe ah ahih te hing sak hamla ka ngaih mai kawinih nang lawng n'tu na tina ai? ka hu ah va bang ngoen lah!” a tina. 23 Tedawngah te kah a hubang te duek manawh tila Jesuh kah a hubang hue tengah te a thui pe u. Tede Jesuh lawngtah ahih te duek manawh tila thui nawh: “Kai ka law toe ah ahih te hing sak hamla ka ngaih mai kawinih nang lawng n'tu na tina ai?” tila ni a thui. 24 Ahih te tah he ang thaihu thli aka thuikung oen cathutkung hubang pakhat la awm tih ahih lawng a thui te soeng tila ka ming u. 25 Jesuh lawng atloe thaihu thli a sai te moen awm hun. Te ang thli te pakhat coeng pakhat thut boeih mai sih ti kawinih te ang thli thutna cabu te khuehna ham dilai pumpui he Pateng khoek mai manawh tila ka poek.
1 Ka Lungna Tiofilas; Lamhacuek kah cabu dawngah Jesuh lawng thaihu a sai boeih oen bii a tong cuek vengkah a cangpueina kalawng ah vaan la a luuina khawhin toe kah akawng alam te ka thut poen. 2 Vaan la a luui thlan vengah a thlaangtuek hubang hue te Ciim Muithla tharana oen a uen a tawn. 3 A duek coengah khawhin sawmlii khui puet ahimi tengah a phumpho pe tih ahih tah hing tite uepvoetna awm tlaih nawh. 4 Tecoengah ahimi a tun u vengah he tila awl a thui pe: “Jerusalem he ceh taak u boel, a Pa awlkam akawng alam kavan thui kutdo te ring uh. 5 Johan lawngtah tui oen baptisma te a peek, tede khawhin meyoeh khaw a awm aih thlan ah Ciim Muithla oen baptisma te na dang u poen ai.” tila a thui pe. 6 Jesuh oen a hubang thli a tun u vengah te ahimi lawng, “Bawipa, tahe vengah aw Israel thlaangphun thli he a Ram na peek koep ai? tila a doet u. 7 Jesuh lawng ahimi nala te, “A Pa lawng atue atang oen ari amawng a helh te nangmi lawng na ming ham ngoe mai nawh. 8 Tede nangmi sawah Ciim Muithla a law vengah nangmi tah tharana oen na betoet u vetih Jerusalem ah, Judia peng boeih oen ah Samaria peng ah, tecoengah dilai aboetna kheng toela kai kah sausi la na awm u ai. 9 He awl he a thui coengah ahimi kah mik huh roe ah te vaan la luui hang, muui lawng a yaawl khoep tih ahimi lawng hu u thai tlaih nawh. 10 Te tila vaan la a luui hang te ahimi lawng mik khah muehla vaan benla poe a dan u, tevengah himbai bawk aka bai thlaang pahih ahimi tengah a pai pe tih, 11 ahih rawi lawngah, “Galili thlaang thli, n'tu ah te ah te na pai u tih vaan benla na dan khiing u? Jesuh he nangmi teng kalawng vaan la luui poen, vaan la a luui hang na huh u van angla te a rum thuk koep te na huh u ai.” a tina. 12 Tecoengah a hubang thli tah Olif Tlaang kalawng Jerusalem la te koep meel u. Te tlaang te khawpui kalawng ah meng tentan yunyan ni a thla mai. 13 Ahimi tah khawpui khuila kuun u tih amami a awmna huen la te cet u: Ahimi hue te tah; Piter, Johan, Jeem oen Andru, Filip oen Tawmas, Bartalomiu oen Matthai, Alfias capa Jeem, Phunkuup Simon; oen ah Jeem capa Judas, he hue ni. 14 Ahimi tah Jesuh kah a manu Meri oen khaw, hutaa thli oen khaw, Jesuh kah a manu thli oen khaw huh u poepa tih thangthui u. 15 Khawhin meyoeh yun nuem a awm coeng atah oengca thli huhtunna awm tih thlaangmi te a pum boeih la ya pakul yun awm, Piter lawng pai tih awl a thui. 16 Ahih lawngah, “Maya manau thli, ‘Jesuh aka tu thlaang thli te lawngnuehkung Judas kawng Ciim Muithla lawng Devid kaa khui kalawng a thui oepsoeh tih Caciim khuiah a thut te asoep ham awm. 17 Judas tah mami bu khuiah aka thuum thlaang pakhat van tih mami oen bii aka bi haih hamla a tuek thlaang van ni,” tila a thui. 18 (Judas lawngah amah kah athe ara, saina oen a dang tangka te oen ah lo huen pakhat a lai, te ah te amah duek. A bung te pawkk phut tih a riil khaw boeih thoeng. 19 Jerusalem ah aka awm thlaang boeih lawng te kawng te a yaak u, tedawngah te kah lo huen te amami awl la ‘Akeldama’ tila a thui u, thuingaihna tah “Thisen lo huen.” ti ngaihna ni.). 20 “Saam cabu dawngah, ‘A im te imrongg dingratt la awm selang tah im khuiah a-u khaw awm boel seh’ tila a thut. Tecoengah, ‘Ahih kah bi yueng te thlaangtloe lawng bi seh’ tila a thut te khaw awm. 21 Tedawngah Bawipa Jesuh kah thawhkoepna te aka thui haih hamla thlaang pakhat khat lawng mami he bawngyawng ham awm. 22 Te thlaang te tah Bawipa Jesuh he mami oen ah khawlawng ceh poepa vengah te mami tengah aka thuum van tih Johan lawng baptisma awlthang a thui veng kalawng ah, mami teng kalawng Jesuh vaan la a luui toe ah mami tengah aka awm thlaang seh” tila a thui. 23 Tedawngah ahimi lawng thlaang pahih Josep a ti u Barsabbas (Jastas tila khaw a miingna) oen Mattias te a nuen u. 24 Tecoengah ahimi lawng thangthui u tih, “Bawipa, nang lawng thlaang boeih kah kawpoek te na ming. 25 Tedawngah Judas lawng a ceh taak Celtuih bii te ahih yuengla aka bi ham he kah thlaang pahih khuiah nang lawng na tuek te van tueng sak lah.” tila thangthui u. 26 Tecoengah ahimi lawng te thlaang pahih khuiah te tuek hamla talcung a yueh u tih Mattias te a tuek u, ahih te celtuih thlaikhat tim ah te a thuum sak u.
1 Pentikos hin a pha vengah oengca thli boeih te ahuen pakhat ah kang tun u. 2 Tevengah thlipui khawthlii tuen awl oen aka lo u awl te vaan kalawng bawtbet ah law tih ahimi a ngawlhna im khui te a hu thulh. 3 Tevengah ahimi lawng hailai oen ah aka lo u te a huh u, te kah hailai te pek u phang tih te kah aka awm thlaang pakhat rip sawah te awm. 4 Ahimi tah Ciim Muithla oen betoet u tih Muithla lawngah a thui sak angla awl tloe la cal u. 5 Tevengah te dilai saw ram tawm kah aka law, bokna ben ah thinkaw aka pe Judah thlaang thli te Jerusalem ah awm u. 6 He kah tuen apau awl he a yaak u vengah thlaangping te kueng tun u. Oengca thli lawng amah awl la a cal u te ahimi lawng amah awl la rip a yaak u vengah ahimi tah a kawpoek la rai u. 7 Ahimi lawng ngaihang kawpoek rai oen, “He tila awl aka thui hue he Galili thlaang boeih de lah koen! 8 Tetih atah metila ahimi awl thui he mami lawng mah awl mah kaa la rip n'yaak kai? 9 Mami he Patia ram, Media ram oen Elan ram kah aka law; Mesopotamia ram, Judia ram oen Kappadocia ram kah aka law; Pontias oen Asia ram kah aka law, 10 Frikia ram oen Pamfilia ram kalawng, Iyipt ram oen Sairin khaaw teng khaaw vai Libia ram khuikah aka law thlaang ni; khatsut tah Rom ram kalawng aka law; 11 Judah thlaangphun oen Judah phung aka vai Gental thlaang ni; Mami timkah khatsut tah Krik ram oen Arabia ram kah aka law thlaang ni; Pathen kah kawpoek rai thaihu sai kawng, ahimi lawng a thui u te mami lawng n'mah awl la n'yaak rip u mai!” tila a thui u. 12 Ahimi tah ngaihang cawm-am sut u tih amami khat oen khat te, “He he n'tu a thuingaihna kai?” tila doet u. 13 Tede thlaangtloe lawngtah oengca thli te a nuihna u tih, “He kah thlaang thli he yuu aka ruui thlaang hue ni!” tila a thui u. 14 Tevengah Piter te celtuih paha thlaihih oen pai haih u, angaih hlang la awl a huer tih thlaangping rangpui tengah awl a thui: “Ka puei - Judah thlaangphun thli oen Jerusalem ah aka awm boeih, he kah thuingaihna he kavan thui ai, hutung u lah. 15 He kah thlaang thli he nangmi kah poek angla yuu a ruui u moenih; Tahe ah mincang khawnoek pakua ni a pha hun. 16 He tah tawngha Jo-el lawng akawng alam a thui te ni. 17 Ahih lawngah, ‘Khawhin aboetna a pha atah, Pathen lawng: Thlaang boeih he ka Muithla oen ka toi ai. Na capa thli oen na canu thli lawngah ka awl he a phawng u ai; Thlaangno roeng thaai thli lawng huhthlaam a huh u vetih Ciya patawng hue lawngah mang a man ai. 18 Te khawhin ah kamah kah tuihyoeihthlaang thli hutaa oen tawngpa sawah ka Muithla ka toi vetih ahimi lawng ka awl te a phawng ai. 19 Vaan khawhi sawah kawpoek rai miknoek ka sai vetih dilai adang ben ah khaw kawpoek rai thaihu ka sai ai. Te tah thisen, hai-alh, aka thah muepkuep haikhu oen ah ka tueng sak ai; 20 Bawipa kah khawhin, ruep-awm oen alenduet te a pha thlan ah khawmik te yiin khup vetih thla lawngkhaw thisen angla lingduuk la awm ai. 21 Tevengah Bawipa te a khue tih reenna aka bih tah thlawnna a dang ai,’ tila a thui. 22 Ka puei Israel thlaangphun thli, ka awl he hutung u lah! Nazaret khaaw kah Jesuh lawng Pathen kah saithaina aana a khueh tite ahih rang oen Pathen lawng a sai kawpoekrai miknoekna oen kawpoekrai thaihu oen ah aciimphanla a tueng sak poen. Te ang thli te namami mik huh ah a sai dawngah nangmi lawng na ming u. 23 Pathen lawngah amah khawkhanna angla Jesuh te nangmi kut ah peek hamla awl a khueng oepsoeh poen; ahih te thinglam dawng na tai u tih thlaangthawlh thli kah kut oen na ngawn u poen. 24 Tede, Pathen lawngah ahih te duekna thara khui kalawng a loeih sak tih a thawh sak poen, metihtiah ahih te duekna lawngah thongtla angla tu khaklal thai nawh. 25 Devid lawngah ahih kawng te, ‘Bawipa te ka haiah ka huh poepa; Ahih tah ka tengah awm tih ka lakueng nawh 26 Tedawngah kawhoena oen ka betoet tih ka awl tah awmngaihna oen becoeih. Kai tah duek koei la ka awm de ngaiuepna oen ngaikhuek thindeeng la ka awm ai, 27 metihtiah nang lawngah celkhui-khaaw ah nan voei sut nawh vetih; namah kah uep-awm tuihyoeihthlaang te thlann khuiah rong athaang sak ham na ngaih nawh. 28 Nang lawngah hingna benla aka mawt lawngpui te nan huh sak poen, nan awm puei tih awmngaihna oen ka betoet.’ tila a thui. 29 Maya manau boeih, mami kah patuer miingthang Devid Sengpahrang kawng he acaihpanla kavan thui ai. Ahih tah duek tih a up u poen, ahih kah thlann te tahe toe mami mik huh ah awm hun. 30 Ahih tah tawngha la awm tih Pathen lawng ahih tengah awl a kam te a ming: Pathen lawng awl a kam tah Devid cadil pakhat te Devid amah angla sengpahrang la a khueh ai a ti te ni. 31 Pathen lawng hailam ben ah a sai ham koei te Devid lawng a ming tih tedawngah Messiah kah thawhkoepna kawng te a thui oepsoeh poen. Ahih lawngah, ‘Ahih tah celkhuikhaaw ah voei sut manawh; ahih kah a pum te thlann khuiah rong sut manawh.” tila a thui. 32 Pathen lawng Jesuh te duekna kalawng a thawh sak tite aka mingkung tah kaimi ni. 33 Ahih tah ana Pa Pathen kah bantang ben ah a ngawlh sak poen tih ana Pa kah awlkam angla Muithla te a dang poen. Tahe ah nangmi lawng na huh u tih na yaak he tah kaimi sawah avan toi amah kutdo ni. 34 Devid amah he vaan la luui nawh; Ahih lawng a thui tah, ‘Bawipa lawngah ka Bawipa tengah: Na raal thli te na khowtang ah khowtloeng la ka khueh thlantoe, ka bantang ben ah ngawl lah.” tila a thui. 36 Tedawngah Israel thlaang thli boeih, nangmi lawng thinglam dawng na ngawn Jesuh te Pathen lawngah Bawipa oen Messiah la a sai ni tite atak tang la ming u lah!” a tina. 37 He awl he thlaang thli lawng a yaak u vengah lakueng u tangkiik tih Piter oen atloe celtuih hue nala te, “‘Maya manau thli, kaimi lawng n'tu ka sai u ai?’ tila a doet u. 38 Piter lawng ahimi nala te, “Nangmi boeih lawngah na thawlhna yut u langtah na thawlhna boeih khawdawp ngaaina hamla Jesuh Khrih miing oen ah baptisma hu u lah; te atah Pathen kah kutdo Ciim Muithla te na dang u ai. 39 Te kutdo te peek ham Pathen kah awlkam tah namami oen na cadil thli ham khaw, athla hlang kah thlaang boeih ham khaw, Bawipa Pathen amah lawng a khue boeih thlaang thli ham ni.” a tina. 40 Piter lawng ahimi te awltloe khaw moen a thui pe tih, ‘He kah thlaangthe thli sawah aka law ham koei dantatna kalawng namami oen namami thlawn u lah!” a tina. 41 Ahih kah awl thui te thlaang broe lawngah a tangna u tih baptisma a huh u, te kah khawhin ah te ahimi bu khuiah thlaang thong thum yunyan lawngah a tawm a thap u. 42 Ahimi lawngah celtuih hue tengah cangna, khat oen khat pawlneengna, beroep lopaang buh veelna, thangthuina ah amami kah atue te a hawna u. 43 Celtuih hue lawngah kawpoek rai miknoekna oen kawpoek raina thli te broela a sai u tih thlaang boeih tah lakueng u. 44 Oengca boeih te khat la huui u tih a khueh thaihu thli te pakhat oen khat rek ara patoeng u. 45 Ahimi lawng amami kah thaihu khuehtoen thli te a yoeih u tih a voetna aka awm thlaang thli te a ngoena angla tangka te arek ara u. 46 Khawhin roekk ah Tempal bok-im ah te pum u, amami im ah buh veel haihna te a sai u tih lunghoeih lungpaih la awmngaihna thinkaw oen a caak u. 47 Pathen te a thangpawm u tih ahimi te thlaang boeih lawng a hinyah u. Tecoengah thlawnna aka dang thlaang thli te Bawipa lawngah khawhin roekk ah ahimi bu khuiah te a kuun pe sak.
1 Hin at ah Piter oen Johan tah thangthuina tue thlemben khawnoek pathum ah Tempal bok-im la te cet hih. 2 Te ah te Atheen Thawhka a ti u te awm tih a thangpek kalawng khow aka kheem thlaang pakhat te ah te awm. Tempal bok-im la aka cet thlaang thli tengah tangka bih hamla ahih te hin roekk ah te kah thawhka la te avan khuen u. 3 Ahih lawngah Piter oen Johan a law hih te a huh vengah tangka a bih. 4 Ahih rawi lawng a bueh rang patang tih Piter lawng, “Kai hih he n'bueh lah!” a tina. 5 Tevengah thaihu pakhat khat m'peek ai tite a ngaiuep tih ahih rawi te a bueh. 6 Tede Piter lawng ahih nala, “Tangka ka khueh thamhalh nawh, tede ka khueh te kan peek: Nazaret Jesuh miing oen ah awl kan peek, tho langtah cet lah!” a tina. 7 Tecoengah ahih te a bantang kut ah a phoeih tih a thawh hang. Te thlaang kah a khow oen khowcih te cak pahoei; 8 Ahih tah sawi tih pet, pai hang tih yingyawi. Tecoengah ahih rawi oen Tempal bok-im khuila te kuun, sawipet ruila cet tih Pathen te a thangpawm. 9 Ahih lawng ceh ruila sawipet tih Pathen a thangpawm te te kah thlaang thli lawng a huh u; 10 Ahih te Atheen Thawhka ah aka ngawl buh bih kutduen thlaang ni tite a ming u vengah ahih sawah thaihu aka thoeng dawngah te kawpoek la rai tih a ngaai hang u. 11 Te thlaang lawngah Piter oen Johan te a phoeih khak, thlaangping tah a kawpoek la rai u tih Solomon imthloeih a ti u te ah te ahimi tengla heeng u phai. 12 Piter lawng thlaangping te a huh vengah ahimi nala, “Ka puei Israel thlaang thli, n'tu kawngah he thaihu dawngah he na kawpoek a rai u tih kaihih he alet uekcuekla nan bueh u? Kaihih lawngah kamahih kah huham tharana oen Pathen haiah theenna oen ah he kah thlaang he a ceh sak tila na poek u aw? 13 Abraham, Isak oen Jakob Pathen, mami patuer hue kah Pathen lawngah amah kah tuihyoeih-thlaang Jesuh te aciim ruep-awmna te a peek poen. Tede nangmi lawng aana khuehkung thli kut ah na peek tih Pilat lawng ka thlah silang tah ka loeih sak ai tila awl a khueh coengah Pateng khaw Pilat haiah nangmi lawng na thana u. 14 Ahih tah thlaangciim, thlaangdoeng la awm de, ahih te nangmi lawng na hoett u tih thlaang aka ngawn dai te thlah sak ham Pilat tengah na bih u. 15 Nangmi lawngah hingna benla aka ceh puei thlaang te na ngawn u, tede Pathen lawng ahih te duekna kalawng a thawh sak poen, tite aka mingkung tah kaimi ni. 16 Ahih kah a miing huham tharana lawng he kah khowkheem thlaang he tharana te a peek. Nangmi lawng na huh tih na ming u he tah ahih kah a miing oengna rang oen ni sai la a awm; nangmi boeih lawng na huh u angla Jesuh oengna lawng ni ahih he a sa ading sak. 17 Tedawngah maya manau thli, nangmi boeih oen namami kah mawtkung thli lawng Jesuh sawah na sai u te na ming u nawh dawngah na sai u tite ka ming u. 18 Yan vengah Pathen lawng tawngha boeih tengah, amah kah Messiah lawngah patang a khang ai tila a thui oepsoeh te amah lawng te tila asoep sak. 19 Tedawngah nangmi kah thawlhna te khawdawp a ngaaina ham thawlhna yut u langtah Pathen tengla meel u lah. 20 Te tila na sai u atah, Bawipa teng kalawng muithla ben tharana a lawna tue te a pha vetih nangmi ham a tuek oepsoeh Messiah Jesuh te avan tuih ai. 21 Yan vengkah aciim tawngha thli hawna oen Pathen lawng a thui poen angla soeprep boeih he athaaila saina atue te a pha thlantoe ahih te vaan ah awm hun ai. 22 Mosi lawngah, ‘Bawipa na Pathen lawng nangmi khuikah thlaang kai angla tawngha pakhat te nangmi ham avan tuih ai. Nangmi lawng na sai u ham koei soeprep boeih avan thui te na hutung pe u ai. 23 A-u khaw tawngha lawng a thui te a ngaai nawh atah Pathen thlaang thli teng kalawng a thloeng vetih a phe boeih ai’ tila a thui. 24 Samu-el oen ahih coeng kah aka law tawngha boeih lawngkhaw tahe vengah aka thoeng ham koei thaihu thli he a thui u. 25 Pathen lawng amah kah tawngha thli rang oen ah awl a kam te tah nangmi ham ni, Pathen lawng namami kah patuer thli tengah awlkamna a sai te nangmi lawngkhaw na paang u van. Abraham tengah te, ‘Nang kah cadil nauha thli rang oen ah dilai thlaang boeih te yotheenna oen ka phueh ka sawm ai’ tila a thui. 26 Tedawngah Pathen lawng a Tuihyoeih-thlaang te a tuek tih nangmi lawng thawlhna te na ceh taak u tih nangmi boeih te yotheenna peek hamla nangmi tengah lamhacuekla avan tuih.” a tina.
1 Piter oen Johan lawng thlaangping tengah awl a thui hih lii vengah te khawsoeih khatsut thli oen tempal bok-im aka toet raalkapbawi thli oen ah Sadusi khatsut hue te avan pha u. 2 Celtuih pahih rawi lawngah thlaangping hue te duekna kalawng Jesuh tho koep tila a cang puei he tah thlaangduek thli tho koep tite a cak sak dawngah Sadusi hue tah a thin sa u. 3 Tedawngah ahimi lawng ahih rawi te a tuuk u, khaw athlem thuk poen dawngah avuen khawhin toe thong ah a thlaak u. 4 Tede ahih rawi kah awl thui te aka ya thlaang broe lawng a tangna u tih thlaang thong ngaa yun toela puung hang. 5 Avuen khawhin atah Judah thlaangphun mawtkung thli, ahaamca thli oen Phungawl cangpueikung thli te Jerusalem ah tun u. 6 Ahimi te Khawsoeih Bawi Annas oen Kaiafas, Johan, Alekzandar oen ah Khawsoeih Bawi kah atloe imkhuikaw thli oen huh u. 7 Ahimi lawngah celtuih rawi te amami haiah a pai sak tih a-u kah a miing na hawna? tila a doet u. 8 Tevengah Ciim Muithla oen aka betoet Piter lawng, “Thlaangping aka mawt thli oen ahaamca thli: 9 Khowkheem thlaang pakhat sawah thaihu theen saina kawng ahih he metila a hoeih tite tihin ah nan doet u, 10 Nangmi boeih oen ah Israel thlaang boeih lawng a ming ham tah he kah thlaang lawngah hoeih heet tih nangmi haiah a pai he tah, nangmi lawng thinglam dawngah na ngawn u tih duekna kalawng Pathen lawngah a thawh sak koep, Nazaret khaaw kah Jesuh Khrih kah a miing tharana rang oen ni. 11 Caciim lawngah, “Imsakung thli lawng a hoett sut lungto te awlpui koek lungto la coengg,’ tila a thui te tah Jesuh he ni. 12 Ahih rang bueng oen ni thlawnna he huh thai la a awm; dilai pum ah he Pathen kah peek ahih nawh atah mami aka thlawn thai a-u khat khaw awm nawh. 13 Awlcekna khonsil ah aka thuum thlaang thli lawngah Piter oen Johan he thoemthai cuihna aka khueh nawh thlaang mailai ni tite a ming u, tede ahih rawi lawng tong-aa ohla awl a thui te a huh u vengah a kawpoek rai u. Tede ahih rawi he tah Jesuh kah a paya beroep ni tite ahimi lawng a ming u. 14 Tede Piter oen Johan tengah khow-kheem thlaang aka hoeih te ahimi lawng a huh u dawngah n'tu khaw thui u thai nawh. 15 Tedawngah awlcekna khonsil im khui kalawng ahih rawi te kawlkalh a ceh sak u, tecoeng atah amami poek ah doet u tih awl a thui u. 16 Ahimi lawngah, “He rawi he metila n'sai lah ai? Jerusalem ah aka awm thlaang boeih lawngah ahih rawi kah miknoekna alakloe a sai he a ming u boeih poen tih mami lawngkhaw oelh thai la awm nawh. 17 Tede he thaihu he thlaangping tim ah apuung tare nawh ham, ahih rawi lawngah a-u tengah khaw Jesuh miing oen awl thui nawh ham khaang pe sih.” tila a thui u. 18 Tecoeng atah ahimi lawng te rawi te a khue koep u tih Jesuh miing oen a-u khaw cang puei nawh ham, a-u tengah khaw Jesuh miing oen awl thui nawh hamla a khaang pe u. 19 Tede Piter oen Johan lawng ahimi nala te, “Pathen haiah nangmi kah awl ngaai he aw aka soeng, tihnawhtah Pathen awl ngaai he aw aka soeng tite namami lawngah awl tloek uh. 20 Metihtiah kai hih lawngtah kamah mik oen ka huh tih ka haa oen ka yaak te thui hamla ka toeng manawh.” tila a thui hih. 21 Tedawngah awlcekna khonsil thlaang thli lawng ahih rawi te anauh ngaai la ngaithuenna a peek tih a tuih hih. He tila thaihu aka awm dawngah he thlaang broe lawng Pathen te a thangpawm u tih ahih rawi te dan peek hamla coengg thai nawh. 22 He kah kawpoekrai miknoekna a sai pe thlaang he tah a kum sawmlii thlai law poen. 23 Piter oen Johan he a thlah pahoei oen a paya hue tengla meel hih tih khawsoeih ahaamca thli oen Judah thlaang ahaamca thli kah awl thui te ahimi tengah a thui pe. 24 Te awl te oengca thli boeih lawng a yaak u vengah ahimi boeih lawng thik at la haawl u tih Pathen tengah thangthui u: “Vaan oen dilai, tuitunlii oen ah a khuiah aka awm boeih saikung Bawipa! 25 Nang kah tuihyoeihthlaang, kaimi kah patuer Devid teng kalawng Ciim Muithla oen awl na thui tih, ‘Gental thlaang thli lawng n'tu ah a thin a sa u tih, n'tu ah thlaang thli lawng ahuep khawkhanna te a sai u? 26 Bawipa oen Messiah te oelhtaih hamla, dilai saw kah sengpahrang thli lawng kamthlah u tih, ukkung thli lawng tun u.’ tila na thui. 27 Metihtiah Herod oen Pontias Pilat tah he khawpui khuiah Gental thlaang thli oen Israel thlaang thli oen ah nang kah aciim Tuihyoeihthlaang Messiah la na sai Jesuh te oel khak hamla tun u tangtang. 28 Nang lawngah namah kah huham tharana oen aka awm ham koei na thui sut soeprep boeih te sai hamla ahimi tah tun u. 29 Tedawngah tahe ah he Bawipa, ahimi kah helcalna he van poek lang namah kah tuihyoeihthlaang kaimi he namah kah awl te thin awm tangkiik la n'thui sak lah. 30 Thlaang tlo thli lawng a sa a dingna ham na kut te van thueng langtah aciim Tuihyoeihthlaang Jesuh miing oen ah kawpoekraina oen kawpoekrai miknoekna te sai lah.” tila thangthui u. 31 Ahimi lawng a thangthui coeng boet atah ahimi a tunna ahuen te hinghuen. Ahimi tah Ciim Muithla oen betoet u tih Pathen awl te thin awm tangkiik la a thui u. 32 Oengca thli lawngah thinkaw oen lungbui khat la kang a khueh u. A-u lawngkhaw a khueh thaihu te kamah kah thaihu ni ti u tlaih nawh tih ahimi lawng a khueh thaihu boeih te khat oen khat avanpila ree u. 33 Celtuih thli lawng Bawipa Jesuh kah thawhkoepna te huham tharana oen a phawng u tih Pathen lawng ahimi boeih sawah yotheen kam-awmna te yahawh hlang la a lun pe. 34 Ahimi kah bu ah te thlaang khat khaw a voetna awm nawh. Im khaw, lo khaw aka khueh hue lawngah boeih a yoeih u tih a huh tangka boeih te, 35 Celtuih hue kah kut ah kang a peek u; te tangka te pakhat rip tengah a voetna taring ah arek ara pe u. 36 Te ah te Caipras tuisanglak kah Levi thlaangphun Josep aka miingna thlaang pakhat awm tih Celtuih hue lawng Barnabas a tina u. (thuingaihna tah, “Thaphawhkung” tina ni.), 37 ahih lawngah amah lo huen te a yoeih, tangka te avan khuen tih celtuih hue kah kut dawngah te a tloeng pe.
1 Ananias aka miingna thlaang pakhat te awm tih a yu tah Safira a miingna, ahih rawi lawng a khueh thaihu te thoem a yoeih hih. 2 Tede a yu lawngkhaw a ngaih van tih tangka avaang athal te amahih ham a paih hih tih a paih coeih te celtuih hue kah kut ah te a peek. 3 Piter lawng ahih nala, “Ananias, n'tu ah na thinkaw te Seitan na uk sak, na khueh toen na yoeih thaihu phu te namah ham na paih thoem tih Ciim Muithla te na thai na lat na? 4 Na thaihu te na yoeih thlan ah namah thaihu la awm tih na yoeih coengah khaw tangka te namah koe la ni a awm. N'tu ham he ang thaihu he sai hamla thinkaw na poek? Thlaang na thai na latna nawh tih Pathen ni na thai na lat na!” a tina. 5 He awl he Ananias lawng a yaak pahoei oen tlim tih duek; he kawng he aka ya boeih lawngtah 6 Cadawng caloe thli law u tih a rawkk te himbai oen a yaawl u, a khuen u tih a up u. 7 Tecoeng khawnoek pathum yunyan a awm coengah a yu te va law, ahih lawngah te tila thaihu aka awm te ming nawh. 8 Piter lawng ahih te, “Nanghih yuvaa lawng na yoeih thaihu phu na dang te he yoeh poen aw, van thui lah?” a tina. Ahih lawngah, “Oeih, he yoeh poen ni.” a tina. 9 Tedawngah Piter lawng, “N'tu ah nanghih yuvaa lawng Bawipa kah Muithla he noekdak ham kaw na poek hih? Na vaa kah rawkk aka kuem thli thawhka ah tahe pai u te, ahimi lawng nang khaw n'khuen u van ai!” a tina. 10 Kawlkalh ah ahih te Piter kah a khowkung ah tlim pahoei tih duek. Cadawng caloe thli law u tih ahih te a rawkk la a thoel u, ahimi lawng a khuen u tih a vaa tengah te a up u. 11 He kawng he aka ya khrihcabu oen thlaangtloe boeih lawng atah caalla a rih u tangkiik. 12 Celtuih hue lawngah thlaangping tim ah kawpoekrai miknoekna oen kawpoekrai thaihu te broela a sai u. Oengca thli boeih tah Solomon Imthloeih ah te kueng tun u. 13 thlaang thli lawng ahimi te a koeh u de, amami bu khuikah thlaang nawh lawngtah ahimi oen tuhkai u ham te tong-aa haitawk u. 14 Tede, Bawipa te aka tangna hutaa, tawngpa thlaang broe lawngah ahimi bu te a tawm athap tare u. 15 Celtuih hue kah biibina rang oen a dang phu tah Piter te a law phai vengah a mueithlip lawngah thlaangtlo pakhat mai khaw thlipdah seh ti u tih, thlaangtlo thli te lawngpui la avan khuen u tih ihkhun dawngah khaw, phak dawngah khaw a ralh sak u. 16 Tecoengah Jerusalem khaawteng khaawvai kah thlaangping broe lawngah thlaangtlo thli khaw, a kaw khuiah raaithe aka awm thli te khaw avan khuen u; ahimi boeih te biit hoeih u. 17 Tecoengah Khawsoeih Bawi oen a paya boeih, te kah aka awm Sadusi thlaang boeih lawng celtuih thli te a uett aham u; tedawngah ahimi lawng thaihu pakhat khat sai hamla awl a khueng u. 18 Ahimi lawngah celtuih hue te a tuuk u tih rangpui kah thongim ah te athlaak u. 19 Tede khawyiin ah Bawipa kah vanthlaang lawng thongim thawh te a awng pe, celtuih thli te a ceh puei tih ahimi nala te, 20 “Cet u langtah Tempal bok-im khuiah te pai u lang he kah hingna a thaai kawng he thlaang boeih tengah thui uh” a tina. 21 Celtuih hue lawng ahih awl te a ngaai pe u, khaw a thaih atah Tempal bok-im khuila kuun u tih a cang puei u. Khawsoeih Bawi oen a paya thli lawngah awlcekna khonsil huhtunna sai hamla Judah thlaang ahaamca thli te a khue; te coengah celtuih thli te ahimi haiah van law puei ham thongim la thlaang a tuih u. 22 Tede a thlaangtuih thli lawng thongim a pha u vengah thongim khuiah celtuih thli te hu u tlaih nawh, tedawngah awlcekna khonsil thlaang thli tengla te meel u tih a thui pe u, 23 ‘Kaimi thongim ka pha u vengah thong thawhka a kalh khak tih a piin rap te khaw, aka toet thli thong thawhka ah a awm u te khaw ka huh u; tede thawhka te ka awng u vengah a khuiah a-u khat khaw ka hu u nawh!” ti u. 24 Khawsoeih ahaamca thli oen tempal bok-im aka toet raalkap bawi thli lawng te awl te a yaak u vengah celtuih thli he me tih ni a ti oh kai tite a kawpoek rai u. 25 Tevengah thlaang pakhat law tih ahimi nala te, “Hutung u lah! thong ah na thlaak u thlaang thli lawng Tempal bok-im ah thlaang thli te a cang puei!” a tina. 26 Tevengah tempal bok-im aka toet bawi lawng amah kah thlaang thli te a ceh puei tih celtuih hue te avan khuen koep u. Tede amami te thlaangping lawngah lungto oen n'de hau ai tite a rih u tih a mangkhakla tah sai u nawh. 27 Ahimi lawng celtuih thli te im khuila a kuun puei u tih khonsil thlaang thli hai ah te a pai sak u tih Khawsoeih Bawi lawng ahimi te awl a doet. 28 Ahimi lawngah, “Nangmi lawngah te kah thlaang miing oen ah cang puei nawh hamla kavan khaang khak u poen, tede na sai he bueh u lah! Nangmi lawng Jerusalem pum ah na cang puei u tih puung khonghak poen, ahih te kaimi lawng a duek sak tila sai hamla na ngaih u!” a tina u. 29 Piter oen atloe celtuih thli lawng awl a thung pe u tih, “Kaimi lawng Pathen awl ni ka ngaai u, thlaanghing awl ka ngaai u nawh. 30 Nangmi lawng ahih te thinglam dawng na tai u tih na ngawn u coengah mami patuer thli kah Pathen lawng Jesuh te duekna kalawng ah a thawh sak poen. 31 Israel thlaang thli te a thawlhna yut sak ham oen ahimi kah thawlhna te khawdawp ngaai pe ham ahih tah Pathen lawngah a bantang ben ah Mawtkung oen Thlawnkung la a pawmsang poen. 32 Kaimi tah he thaihu boeih he aka mingkung la ka awm u, Pathen lawngah amah awl aka ngaai thli kutdo la a peek Ciim Muithla te khaw mingkung sausi la awm” a tina u. 33 Awlcekna Khonsil ah aka thuum thlaang boeih lawng he awl he a yaak u vengah a thin sa soeh u tih celtuih thli te duek sak ham a ngaih u. 34 Tede ahimi timkah Farasi thlaang pakhat, thlaang boeih lawng a hinyah tangkiik, Phungawl cangpueikung Gamaliel aka miingna te awlcekna Khonsil ah pai tih, celtuih thli te adaubenla khuen kawlkalh ham awl a peek tih, 35 tecoengah awlcekna Khonsil kah thlaang thli nala te, “Ka puei Israel thlaang thli, he kah thlaang thli sawah na sai u he atheenla ngaithuen uh. 36 N'hu vengah Tudas aka miingna thlaang pakhat awm tih amah oen amah te thlaangtang van ni tila a hoe soeh tih thlaang yalii yunyan lawngah a hu ah bang u. Tede ahih te a ngawn u coeng atah a hubang thli te yan khonghak tih ahih kah biibi te khaw a duek roep te na ming u. 37 Tecoengah thlaangmi soepna atue vengah te Galili thlaang Judas te khaw awm tih ahih lawng thlaangping a hu ah a bang sak van, tede ahih te a ngawn u tih a hubang thli khaw pal u boeih. 38 Tedawngah kavan thui u, he kah thaihu dawngah, he kah thlaang thli he metila khaw sai u mai boel. Amami awm la te awm u mai seh! Ahimi kah khawkhanna oen biibi he thlaanghing benkah sai la a awm atah pal badai; 39 tede Pathen benkah biibina atah na taa u thai tang manawh. Nangmi lawng Pathen te ee-lena la awm hau ai!” a tina. Awlcekna Khonsil thlaang thli lawngah Gamaliel kah poekna te a vai u. 40 Ahimi lawng celtuih thli te a khuila a khue koep u tih cungpoelh oen a tam u, Jesuh miing oen awl thui tlaih nawh ham awl a peek u tih tecoengah ahimi te a thlah u. 41 Celtuih hue tah awlcekna Khonsil kalawng a ceh u vengah awmngaih u tangkiik, metihtiah ahimi te Jesuh kawngah yarau ming ham tueng roe la Pathen lawng a poek dawngah ni. 42 Khawhin roekk ah Tempal bok-im khuiah khaw, im ah khaw, Messiah Jesuh kawng Awlthang Theen te ahimi lawng a thui u tih a cang puei yoeyah u.
1 Teveng tue kalawng a awm raih coeng atah a hubang thli thlaangmi khaw puung tare hang tih Krik awl la aka cal Judah thlaang oen Judah awl la aka cal Judah thlaang thli te awlpuungna awm. Krik awl aka cal Judah thlaang thli lawng khawhin roekk bawmna fann tangka rekrana ah ahimi tengkah huhai tumtee thli tah navan thloeng bet u ti tih caitoek u. 2 Tedawngah celtuih paha thlaihih lawng oengca thli te a pum boeih la a khue tun tih, “Kaimi lawng tangka kawng thuikhanna dawngah Pathen kah awl thui ham thlahphaam sut atah soeng nawh. 3 Tedawngah maya manau thli, Cuihna oen Ciim Muithla oen ah aka betoet namami timkah thlaang pasarih ah tuek uh, ahimi te he kah thaihu kawng khawkhankung la ka khueh u ai. 4 Kaimi ngoen tah thangthuina oen Pathen awl thui biibina dawngah atue boeih he ka hawna u ai.” a tina u. 5 Celtuih hue kah awl thui te ahimi boeih a kaw tla u, tedawngah ahimi lawng Ciim Muithla oen oengna oen ah aka betoet Stefen, Filip, Prokoras, Nikanor, Timon, Parmenas, Antiok khaaw kah Gental thlaang, acuek ah Judah phung aka vai Nikolas te a tuek u. 6 Celtuih hue tengla a tuek thlaang thli te a ceh puei u tih ahimi sawah kut a tloeng pe u tih a thangthui pe u. 7 Te tila te Pathen kah awl tah puung tare hang Jerusalem khawpui khuiah a hubang thli khaw puung van tih khawsoeih thli broe lawngkhaw oengna te a do u van. 8 Pathen lawng yotheenna oen aphueh asawm tih huham tharana oen aka betoet Stefen lawng thlaang rangpui tim ah aka lentloe miknoekna oen kawpoekraina te a sai. 9 Tede ahih te thlaang khatsut lawngah a oelh ataih u, ahimi te tah Sairin oen Alekzandria khaaw kah Judah thlaang thli lawngkhaw a tunna van Sal loeih thli kah sinakok bok-im ah aka thuum thlaang thli van ni. Stefen he ahimi oen khaw, Asia oen Silicia peng kah atloe Judah thlaang thli oen khaw awl oelhtaih u. 10 Tede Stefen lawngah Muithla kah peek cuihna oen awl a thui dawngah ahimi lawng taa u thai nawh. 11 Tedawngah thlaang khatsut te, “Mosi oen Pathen thangthena awl ahih lawng a thui te kaimi lawng ka yaak u!” tila aka thui ham kutsuh a peek u tih a thui sak u. 12 Te tila te ahimi lawng thlaang rangpui oen ahaamca thli oen ah Phungawl cangpueikung thli te thinkaw a phawh pe u. Ahimi lawng Stefen te a tuuk u tih awlcekna Khonsil haiah a khuen u. 13 Tecoengah ahih kawng te ahong ahii la aka thui ham thlaang khatsut te avan law puei u. Ahimi lawngah, “Ahih lawng he mami kah aciim Tempal bok-im oen Mosi kah Phungawl te athela a thui poepa. 14 Nazaret khaaw kah Jesuh lawngah Tempal bok-im he a phe vetih Mosi kah peek phung boeih te a thaw pan ai tila a thui te kaimi lawng ka yaak u!” tila a thui u. 15 Awlcekna Khonsil ah aka ngawl thlaang boeih lawng Stefen te a bueh rangpatang u vengah ahih kah mik hai tah vanthlaang kah mik-hai angla a awm te a huh u.
1 Khawsoeih Bawi lawngah Stefen nala te, “Ahih lawng a thui he soeng aw?” tila a doet. 2 Stefen lawngah, “Maya manau oen a pa thli, ka awl thui he hutung u lah! Mami kah patuer Abraham he Haran ah awm hamla a ceh thlan ah Mesopotemia khaaw ah a awm vengah te ruep-awm Pathen te a tueng pe tih, 3 ahih nala te, ‘Na imkhuikaw oen na ram he ceh taak langtah kai lawngah kan nueh ham koei ram la te cet lah’ a tina. 4 Tedawngah ahih lawng amah ram te a ceh taak tih Haran khaaw ah awm hamla te cet. Abraham te ana pa a duek coeng atah tahe ah na awmna u ram la he Pathen lawng a pooeng sak. 5 Tevengah te Pathen lawng Abraham te amah hamla ram te avaang athal khaw pe nawh, pae khat mai khaw pe nawh, tede Pathen lawngtah te ram te ahih peek hamla amah oen a cadil nauha kah ram la awm ham awl a kam. Pathen lawng awl a kam vengah te Abraham tah ca-anau khueh nawh. 6 Ahih tengah Pathen lawng a thui tah: ‘Na cadil thli te ram tloe ah saltamnaa la awm u vetih kum yalii khuiah patang palai heemtekna te a ming u ai. 7 Tede sal la ahimi aka hawna thlaang thli te kai lawng awl ka cek ai; tecoeng atah ahimi lawng te kah ram kalawng law u vetih he kah ahuen ah kai he n'bok u ai.” tila a thui. 8 Tecoengah Pathen lawng Abraham te awlkam noekna hamla yahhuivuen reetna phung alam te a peek. Tedawngah Abraham lawng Isak te a cuun coeng yarh khat a awm atah yahhuivuen a reet pe; Isak lawngkhaw a capa Jakob te yahhuivuen a reet pe tih Jakob lawngkhaw mami phun miing thang patuer thli a capa paha thlaihih te yahhuivuen a reet pe. 9 Jakob ca thli lawng a manau Josep te a uett u tih Iyipt ram ah sal la a yoeih u. Tede Pathen lawng a awm puei tih, 10 patang raina boeih dawng kalawng ahih te a ding apuekla a loeih sak. Iyipt sengpahrang tengah Josep a pha vengah Pathen lawng mik-hai thlampaanna oen cuihna te a peek, tedawngah sengpahrang lawng Josep te ram ukkung oen sengpahrang im khui ukkung la a khueh. 11 Tecoengah Iyipt ram pum oen Kanaan ram ah khawthe khawkha tih khawdeng raina te awm. Mami kah patuer thli te caak awkk khueh u nawh, 12 Iyipt ram atah khawbuh ram sai tite Jakob lawng a yaak vengah mami kah patuer a ca thli te lamhacuek la tela te a tuih. 13 Apabe ah a ceh u veng atah Josep lawngah amah te a-u tite a maya hue tengah a thui pe, tecoeng atah Iyipt sengpahrang lawng Josep cakaw kawng te a ming. 14 Tedawngah Josep lawng ana pa Jakob tengah awl a tah tih a cakaw boeih thlaang sawm sarih pa-ngaa te Iyipt ram la law ham a thui pe. 15 Tecoengah Jakob tah Iyipt ram la cet tih amah oen a ca thli tah te ah te duek u. 16 Ahimi kah a rawkk thli te Shekhem la a khuen u tih Abraham lawng Hamor thlaangphun tengkah tangka oen a lai phuel ah te a up u. 17 Pathen lawng Abraham tengkah awlkamna te sai hamla atue ayoeii veng atah Iyipt ram ah te mami phun khaw puung khuengdeng poen. 18 Hukhueng atah Josep kawng aka ming nawh sengpahrang lawng Iyipt ram te a uk. 19 Ahih lawng mami kah patuer hue te a thai alatna tih ahimi te athe akhana u, a ca thli te amilh amoengna ham im adauben ah te amangkhakla ngah ngah a khueh sak u. 20 Te kah atue atang vengah a thlaang aka theen camaw Mosi te a cuun. Ahih te im ah thla thum bueng a poeh a pawm u tih, 21 amah im adauben ah a khueh u vengah sengpahrang canu lawng amah kah cacah la a lawh tih a cuun a cah. 22 Ahih lawng Iyipt thlaang thli kah cuihna boeih te a cang tih awlcal thingkaa ah khaw, thaihu saina ben ah khaw miing thaang thlaang la coengg hang. 23 Mosi he a kum sawmlii a law veng atah amah thlaang phun Israel thlaang thli te metihtlukla thekha hepna patang a khang u tite bueh hamla kamthlah. 24 Iyipt thlaang pakhat lawng thlaang pakhat a heem atek te a huh, cet tih a runn, Iyipt thlaang te a ngawn tih kut a thung. 25 (Ahimi te loeih sak hamla Pathen lawng ahih te a hawna ai tite a thlaangphun thli lawng a ming ai tila a poek, tede ahimi lawngah ming u nawh.) 26 Avuen khawhin atah Israel thlaang pahih a tawh asi hih te a huh tih ahih rawi te roeproei sak hamla a yawm. Ahih lawngah, “Hutung hih lah, nanghih he Israel thlaang ni; n'tu ah tila he na tawh na si hih?” a tina. 27 Tede atloe pakhat sawah khawboe aka the soeh thlaang te lawngah, Mosi te a tulh tih, “Kaimi he uk ham oen awl cek hamla a-u lawng nang he n'khueh? 28 Iyipt thlaang pakhat n'thlem ah na ngawn angla te kai hih he ngawn van ham na ngaih aw?” a tina. 29 Mosi lawng he awl he a yaak vengah Iyipt ram kalawng heeng vik, cet tih Midian ram ah te awm. Te ah te a ca pahih a cuun. 30 Kum sawmlii a awm coeng atah Sinai Tlaang tengkah ramhum huhang ah tangpuem aka ung hairawng haialh khui kalawng vanthlaang pakhat Mosi tengah a phumpho pe. 31 Mosi tah te kah a huh te a kawpoek rai tih atheen heet la huh rep ham tangpuem tengla te cet. Tede Bawipa awl te a yaak tih, 32 ‘Kai tah na patuer hue kah Pathen, Abraham, Isak oen Jakob mi kah Pathen ni.’ a tina. Mosi lawng a rih uuet ah thuen tih bueh ha nawh. 33 Bawipa lawng, “Na khowmuek te dul lah, nang lawng na paina ahuen te huen ciim ni. 34 Iyipt ram ah ka thlaang thli lawng khawdeng patang a khang u te ka huh poen. Ahimi kah khaw khah laise awl te ka yaak tih ahimi te thlah hamla ka law poen. Tahe ah law lah; Iyipt ram la kan tuih ai.’ a tina. 35 “Mosi he Israel thlaang pahih lawng a ngaih nawh thlaang te ni. Ahih rawi lawng, “A-u lawng nang he kaimi kah ukkung oen awlcekkung la n'khueh?” a tina. Ahih tah tangpuem aka ung hairawng haialh dawngah aka thoeng vanthlaang bawmna rang oen ahimi te loeih sak ham oen uk hamla Pathen kah thlaangtuih ni. 36 Ahih lawngah a thlaangphun thli te Iyipt ram kalawng a mawt tih, Iyipt ram ah khaw, Tuitunlii Seen ah khaw, ramhum huhang ah khaw kum sawmlii khui puet ah miknoekna oen kawpoek raina te a sai. 37 ‘Pathen lawngah namami khuikah thlaang tawngha pakhat te kai angla avan tuih ai’ tila Israel thlaang thli tengah aka thuikung te tah Mosi ni. 38 Ahih tah ramhum huhang ah Israel thlaang thli te aka tunsakkung, mami kah patuer hue oen khaw, Sinai Tlaang ah awl aka thui pe vanthlaang oen khaw awm haih tih Pathen kah hingna awl te mami tengah van phasakkung la awm. 39 “Tede mami kah patuer hue lawng ahih awl te ngaai u nawh; ahimi lawngah ahih te hoett sut tih Iyipt ram la mel koep ham te a ngaih u. 40 Tedawngah ahimi lawng Aaron nala, “Kaimi he aka mawt hamla pathen thli te kaimi ham van sai loeih. Iyipt ram kalawng mami mawtkung Mosi he metila a awm ti khaw m'ming u tlaih nawh poen.” a tina u. 41 Tecoeng atah ahimi lawng vaitaw ataalca muei asam te a sai u tih amami kah kutsaimuei tengah thaw a thueng u tih luciik a nawn u, amami kah kutsaimuei te hinyah peekna poei khaw a sai u. 42 Tedawngah Pathen lawng ahimi te a mangthawng taak tih vaan kah aisi thli te a bok sak u. Tawngha thli kah cabu dawngah a thut tah: ‘Israel thlaang thli; ramhum huhang ah kum sawmlii khui puet boiava na ngawn u tih thaw na thueng u te kai ham nawh ni. 43 Nangmi lawng na khuen u te tah, Molek pathen bokna-thaang ni, namami kah aisi pathen Rephan kah muei asam, namami lawng bok hamla na sai u kutsaimuei ni. Tedawngah nangmi he Babilon ram voel la te kan hek poen ai.’ tila a thut. 44 “Mami kah patuer hue lawng ramhum huhang ah Pathen tah ahimi tengah awm tite mingna hamla Pathen a awmna Riim-im te a khueh u. Mosi tengah Pathen lawng a thui pe angla a sak u tih Mosi tengah a huh sak amaw-aka angla te a sak u. 45 Hukhueng atah mami kah patuer hue lawng ana pa hue tengkah riim-im te a paang u tih Pathen lawng a hek thlaang thli kah ram te Joshua mi oen a lawh pe u vengah riim-im te a khuen u tih te ah te Devid dung toe awm. 46 Ahih tah Pathen haiah mik-hai theen a dang tih Jakob Pathen a awmna im te sak hamla Pathen tengah a bih. 47 Tede ahih ham imsakung tah Solomon ni. 48 Tede Tloeng Khoelh Pathen tah thlaanghing lawng a sak im dawngah te awm nawh; tawngha lawng a thui angla, 49 Bawipa lawngah, ‘Vaan tah Ka ngawlhcoen la awm tih, dilai he tah ka khowtloeng la awm. Nangmi lawng kai ham ah me ang im nuem navan sak ai? Kai lawng ka awmna ham ahuen te mela nuem? 50 He kah thaihu boeih he kamah lawng ka sai thaihu nawh aw?’ tila a thui. 51 Tecoengah Stefen lawng, “Nangmi he na thin thah tangkiik mai mah aw! Na kaw talh sut u tih Pathen awl yaak hamla na haa khaw pang malhtalh u! Nangmi he na patuer hue angla ni na awm u: Nangmi lawngkhaw Ciim Muithla te na hek khaklal poepa u! 52 Na patuer hue lawngah aheem atek nawh tawngha khat khaw awm aw? Amah kah thlaangdoeng Tuih-yoeih thlaang a lawna kawng, yan veng kalawng aka thui Pathen kah laipai thli te ahimi lawng a ngawn u. Tahe ah khaw nangmi lawng paipi na thleep u tih ahih te na ngawn u poen. 53 Vanthlaang teng kalawng peek patoeng Pathen kah phungawl te aka dang tah nangmi ni, te kah phungawl te nangmi lawng na vai u nawh!” a tina. 54 Awlcekna Khonsil ah aka thuum thlaang boeih lawng Stefen kah awl thui te a yaak u vengah a thin sa soeh u tih thinsa uuet ah a naw te cakcak a rueng u. 55 Tede Ciim Muithla oen aka betoet Stefen tah vaan a dan hang tih Pathen kah bantang ben ah aka pai Jesuh oen Pathen kah ruep-awmna te a huh. 56 Ahih lawngah, “Bueh lah! Vaan ke awng u tih Pathen kah bantang ben ah Thlaanghing Capa aka pai ke ka huh!” tila a thui. 57 Khonsil kah thlaang thli lawng angaihhlangla paang u tih a haa te khoep a buem u. Tecoengah ahimi boeih lawng pahoei a cuuk thil u tih, 58 ahih te khawpui adaubenla akhup athalla a mawt u tih lungto oen mat a de u. Sausi la aka awm thlaang thli lawngah amami kah himbaidung thli te cadawng pakhat Sawl aka miingna te a kuem sak u. 59 Ahimi lawng lungto oen a de u lii vengah te Stefen lawng Bawipa tengah, “Bawipa Jesuh, ka muithla he nang lawng lo mai loeih!” a tina. 60 Ahih lawngah khuklu oen cuengkueng tih, “Bawipa! He thli lawngah thawlhna a sai he van thung pe boel!” tila te angaihhlangla paang. He awl a thui coeng atah duek poen.
1 Ahih a ngawn u te Sawl lawngkhaw a kaw tlaak puei van. Te khawhin kalawng tah Jerusalem kah Khrihcabu ah heem-atek patang-khangna te tong u poen. Celtuih thli thui muehla oengca thli boeih tah Judia peng oen Samaria ram ah yan khonghak. 2 Bokna ben ah tlungmu thlaang khatsut lawngah Stefen rawkk te a kuem u, a kaw the u tih rap u. 3 Tede Sawl lawngtah khrihcabu te phe ham a yawm; im pakhat coeng pakhat ah cet tih oengca thli te hutaa khaw, tawngpa khaw akhup athalla a mawt tih ahimi te thongim ah a thlaak. 4 Aka yan khonghak oengca thli lawngah peng tawm ah cet u tih awlthang a thui u. 5 Filip tah Samaria ram kah khawpui la te cet tih te kah aka awm thlaang thli tengah Messiah kawng te a thui pe. 6 Filip kah awl thui dawngah thlaangping te a kaw thluembuek u, ahih lawng kawpoekrai a sai te a huh u tih atheenla awl te a hutung u. 7 Raaithe lawng a kuun thlaang thli kah a kaw khui kalawng raaithe thli te vupaang ruila co u tih, aka khawn thlaang thli oen khowkheem thlaang thli broela hoeih u. 8 Tedawngah khawpui khuikah thlaang thli tah awmngaih u. 9 Te khawpui khuiah Simon aka miingna thlaang pakhat awm tih amah kah caam thoemthaina oen Samaria thlaang thli te kawpoek a rai sak poepa. Ahih lawng amah te thlaang mailai nawh ni tila a thui tih, 10 te khawpui kah thlaangcawm thlaangcee, ahem asang boeih lawng ahih awl te a ngaai pe u tih ahimi lawng, “Ahih tah ‘Alen Duet Huham Tharana’ a ti u Pathen kah tharana ni” tila te a thui u. 11 Ahih lawngah amah kah caam thoemthaina oen asanhlangla ahimi te a thai alatna poen dawngah a thinkaw thluembuek u tih awl a ngaai pe u. 12 Tede Jesuh Khrih kawng oen Pathen Ram kawng awlthang theen Filip lawng awlthang a phawng te a tangna u tih hutaa tawngpa lawngkhaw baptisma te a dang u. 13 Simon lawngkhaw a tangna van tih baptisma a dang coeng atah Filip tengah te awm roep poen, ahih lawngah alentloe miknoekna oen kawpoekraina te a huh vengah a ngaai hang sut. 14 Jerusalem ah aka awm celtuih thli lawng Samaria khaaw kah thlaang thli lawngkhaw Pathen awl te a tangna u van poen tite a yaak u vengah Piter oen Johan te ahimi tengla a tuih u. 15 Ahih rawi lawng a pha atah ahimi lawngah Ciim Muithla te a dangna u hamla oengca thli ham te a thangthui pe hih. 16 Metihtiah Ciim Muithla te ahimi timkah a-u pakhat tengah khaw law thlan hun; ahimi lawngah Bawipa Jesuh miing bueng oen ah baptisma te a huh u hun dawngah ni. 17 Tecoengah Piter oen Johan lawng ahimi sawah a kut te a thueng hih tih Ciim Muithla te a dang u. 18 Celtuih rawi lawngah ahimi sawah kut a thueng tih oengca thli lawng Ciim Muithla a dang u tite Simon lawng a huh. Tedawngah ahih lawng Piter oen Johan te tangka a peek tih, 19 “A sawah ka kut ka thueng pe thlaang boeih lawng Ciim Muithla te a huhna u ham, huham tharana te kai m'pe van lah,” a tina. 20 Tede Piter lawng ahih nala te, “Pathen kah kutdo he tangka oen ka lai thai ai tila na poek dawngah namah oen na tangka te hell ah tla hih! 21 Pathen mik huh ah na thinkaw lungbui a doeng nawh dawngah kaihih kah biibina dawngah na thuumna ham koei avaang athal khaw awm nawh. 22 Tedawngah he ang na kamthlahna athe dawng kalawng yut langtah he ang thaihu na poek dawngah na sawah khawdawp avan ngaaina ham Bawipa tengah thangthui lah. 23 Metihtiah nang he uett-eena oen na betoet tih thawlh thongtla la na awm tite kan huh.” a tina. 24 Simon lawng Piter oen Johan nala te, “Nanghih lawng na thui te ka sawah pakhat khaw a thoengna nawh ham reenna oen Bawipa tengah thangthui hih lah” a tina. 25 Piter oen Johan lawng Bawipa kawng a mik huh thli te a thui hih tih Bawipa awl te a phawng hih coeng atah Jerusalem la koep meel hih. A meel lam ah Samaria peng kah vangca vangnau yahawh hlang ah te Awlthang Theen a phawng hih. 26 Bawipa kah vanthlaang pakhat lawng Filip nala te, “Tho lang kamthlah lah, akaak ben Jerusalem kalawng Gaza la cehna lawngpui ah cet lah.” a tina. (He kah lawngpui he tahe ah hawna u tlaih nawh.) 27 Tedawngah Filip tah tho tih cet. Lawngpueng ah im la aka meel Etiopia sengpahrang nu kah kaawn-ava kuemkung, awlpui koek bawi la aka awm Etiopia thlaang tiltleh a ti u pakhat te a hum. Ahih te Pathen bok hamla Jerusalem la cet tih amah kah maranglengg oen im la koep meel. Maranglengg a cit tih im la a meel vengah tawngha Isaiah cabu te a tae. 29 Ciim Muithla lawng Filip nala, “Maranglengg tengah ayoeii-repla cet lah.” a tina. 30 Filip lawngah heeng phai tih ayoeii rep veng atah ahih lawngah tawngha Isaiah kah cabu a tae awl te a yaak. Ahih nala te, “Nang lawng na tae te na yaakming aw?” tila a doet. 31 Te kah bawi lawng, “A-u lawng-khaw a thuicaih nawh maiah metila ka yaakming thai ai?” a tina. Te atah ahih lawng Filip te maranglengg dawngah luui ham oen ngawlh haih hamla te a ceel. 32 Ahih lawngah caciim awl a tae te tah: “Ngawn hamla a khuen tuuca angla a mawt u tih, a mul te a vawkk pe vengah awl kaa aka law nawh tuucano angla awm, ahih tah awl kam at khaw thui nawh. 33 Ahih te yaraula a sai u tih, asoeng akam nawh la awl a cek u, dilai dawngah a hingna aboet poen dawngah ahih kah cadil nauha kawng te a-u khat lawngkhaw thui thai u manawh.” tila a thut te ni. 34 Te kah bawi lawng Filip nala te, “Tawngha lawngah a-u kawng a thui kai? Amah kawng aw a thui, tihnawhtah thlaangtloe kawng aw a thui kai, van thui lah?” a tina. 35 Tecoeng atah Filip lawngah te kah caciim awl kalawng ah a tong pe tih Jesuh kawng Awlthang Theen te ahih tengah a thui pe. 36 Ahih rawi tah poe cet thuk hih, tui a awmna te a pha hih veng atah te kah bawi lawng, “He ah tui awm he. Baptisma dang ham n'tu lawng kai he n'kang khak ai?” tila a thui. 37 (Filip lawngah, “Na thinkaw lungbui boeih oen na tangna atah baptisma na dang ai ta” a tina. Ahih lawngah, “Jesuh Khrih tah Pathen Capa ni tite ka tangna” a tina. 38 Te kah bawi lawngah maranglengg te a pai sak, Filip oen te kah bawi te tui dawngla bok cet thuk hih tih Filip lawng ahih te baptisma a peek. 39 Ahih rawi te tui dawngkah a law hang hih vengah Bawipa kah Muithla lawng Filip te vik a ceh puei. Te kah bawi lawngah ahih te koep hu tlaih nawh, tede awmngaihna oen poe cet. 40 Filip lawng Asdod khaw ka pha tite a ming; ahih tah Sisaria la cet tih a pha thlantoe lawngpueng kah khaw roekk ah te Awlthang Theen a thui.
1 Teveng yun ah te Sawl lawngah Bawipa kah a huvai thli te heem-atek tih ngawn hamla a teeng mangkhak. Ahih lawng Khawsoeih Bawi tengla cet tih, 2 Bawipa kah lawngpui aka vai thlaang thli te a huh atah hutaa khaw, tawngpa khaw ahimi boeih te tuuk thaina ham, a tuuk thlaang thli te Jerusalem la avan khuen koep thaina hamla Damaskas khawpui kah sinakok bok-im kah ahaamca thli tengah a yaak sakna ca te a bih. 3 Sawl tah cet tih Damaskas khawpui te a pha tawm atah, vaan kah aangna pakhat lawng mikpatap ah a thue ploeng tih a teng-avai te aang rawngtheng. 4 Ahih te dilai ah tlim tih, “Sawl, Sawl! N'tu ah kai he nan heem nan tek aih?” tila awl kam at te a yaak. 5 Ahih lawngah, “Bawipa, nang te a-u?” tila a doet. Te kah awl lawngah, “Kai tah nang lawng nan heem nan tek Jesuh ni. 6 Tede tho langtah khawpui khuila te cet lah, te ah te na sai ham koei te avan thui ai.” a tina. 7 Sawl oen aka cet haih thlaang thli te pai ngangtang u, awl kam at khaw cal u nawh; ahimi lawng awl tah a yaak u de a-u khat khaw hu u nawh. 8 Sawl tah dilai dawng kalawng tho hang tih a mik te a daai, tede thaihu khat khaw hu nawh. Tedawngah ahimi lawng a kut ah a phoeih u tih Damaskas khawpui khuila a mawt u. 9 Khawhin hin thum khuiah ahih te a mik tueng nawh, teveng khuiah te caak awkk khaw ca nawh tih tui khaw aw nawh. 10 Damaskas khawpui ah Ananias aka miingna Khrihca pakhat awm. Ahih lawngah huhthlaam a huh tih te kah huhthlaam dawngah Bawipa lawng ahih te, “Ananias!” tila a khue. Ahih lawngah, “Bawipa he ah ka awm,” a tina. 11 Bawipa lawng ahih nala te, “Tho langtah Lawng Doeng ah aka awm Judas im la te cet lah, te ah te Tarsas khaw kah Sawl aka miingna thlaang pakhat te tlap lah. Ahih tah thangthui lii hun tih, 12 ahih lawng a mik a tueng koep na ham Ananias aka miingna thlaang pakhat law tih a sawah kut a tloeng pe te huhthlaam a huh poen.” a tina. 13 Ananias lawng, “Bawipa, thlaang yahawh lawngah he kah thlaang kawng khaw, Jerusalem kah na thlaang thli tengah rih-awm thaihu a sai boeih kawng te khaw avan thui u. 14 Tecoengah nang aka bok thlaang boeih tuuk hamla khawsoeih ahaamca thli tengkah aana oen ni a law.” a tina. 15 Bawipa lawng ahih nala te, “Cet mai hawn, metihtiah kamah kah bii aka bi hamla, Gental thlaang thli, sengpahrang thli oen Israel thlaang thli tengah ka miing aka tueng sak ham ahih te ka tuek poen. 16 Tecoengah kamah roeroe lawngah kamah kawngah patang a khang ham koei boeih te ka huh sak ai.” a tina. 17 Tedawngah Ananias lawng cet tih Sawl a awmna im khuila te kuun tih a sawah kut a tloeng pe. Ahih lawng, “Ka manau Sawl, he la na law vengah lawngpueng ah te namah tengah aka phumpho Bawipa Jesuh amah lawng kai he n'tuih. Na mik te a tueng koep na ham Ciim Muithla oen na betoet na hamla ni kai he n'tuih.” a tina. 18 Kawlkalhca maiah Sawl kah a mik dawng kalawng thaihu pakhat ngakher angla tla tih a mik te tueng koep. Ahih lawng tho tih baptisma te a dang; 19 tecoengah caak awkk te a caak coeng atah a tha awm koep. Sawl tah Damaskas khaaw ah te oengca thli oen khawhin yawlca awm kawlkalh. 20 Ahih lawng sinakok bok-im boeih ah te cet tih Jesuh tah Pathen Capa ni tite a thui. 21 Ahih kah awl thui te aka ya thlaang boeih tah a kawpoek rai u tih, “Ahih he Jerusalem ah Jesuh aka bok thlaang boeih aka ngawn te nawh aw he? Ahimi te tuuk hamla kamthlah tih khawsoeih ahaamca thli tengah khuen hamla ni he la a law de ca?” tila te doet u. 22 Tede Pawl kah awl thui tah huham tharana awm tare tih Jesuh tah Messiah ni tila a thui rapcaat tih Damaskas ah aka awm Judah thlaang thli lawng a awl te thung pe u thai nawh. 23 Khawhin yahawh thlaang a awm hang coeng atah Judah thlaang thli te tun huh u tih, Sawl te ngawn hamla khaw a khan u, 24 tede ahimi kah khawkhan te Sawl tengah a thui pe u. Ahimi lawng Sawl te ngawn a ngaih u dawngah khawpui kah vawng thawhka te khawyiin khawdaai a toet u. 25 Tede yiin at atah Sawl te a hubang hue lawng a khuen u tih pahaang dawng a sang u, vawngkulh bangbuerh kalawng duem a thlaak u. 26 Sawl tah Jerusalem la cet tih hubang thli tengah pawlneeng hamla a yawm. Tede ahih te hubang pakhat van ni tite tangna u nawh tih ahimi lawng a rih u. 27 Te atah Barnabas te ahih bawm ham law tih celtuih hue tengla a ceh puei. Ahih lawngah Sawl lawng lawngpueng ah Bawipa te a huh tih awl a thui pe kawng te ahimi tengah a thui pe. Sawl lawngah Jesuh miing oen raltheenla awl a thui te khaw ahimi tengah te a thui pe. 28 Tecoeng atah Sawl te ahimi oen awm haih u tih Jerusalem te a hiil adawng, Bawipa miing oen raltheenla awl a thui. 29 Krik awl la aka cal Judah thlaangphun hue oen khaw awl a thui u tih oelhtaih u, tede ahimi lawngkhaw ahih te ngawn ham a yawm u. 30 Oengca thli lawng te kawng te a ming u vengah Sawl te Sisaria la a ceh puei u tih Tarsas khaaw la te a tuih u. 31 Judia Tecoeng atah ram, Galili ram oen Samaria ram kah khrihcabu tah ngaimawngla awm u. Bawipa te hinyahna oen khaw a sak u tih Ciim Muithla kah bawmna rang oen a tha ra u tih puung tare u. 32 Piter tah khaw tawm ah yin la cet tih voei khat atah Lidda ah aka awm Pathen thlaang thli te hip hamla te cet. 33 Te ah te kum reet khuiah khawn roep tih ihkhun dawng kalawng aka tho thai nawh Anias aka miingna thlaang pakhat te awm. 34 Piter lawng ahih nala te, “Anias, Jesuh Khrih lawng na sa avan ding sak poen. Tho langtah na ihphah te yaawl.” a tina tih Anias te pahoei tho. 35 Lidda oen Sharon ah aka awm thlaang lawng a hih te a huh u tih Pathen ben ah kaw a thaw u. 36 Joppa khaaw ah Tabita aka miingna oengca pakhat awm. (Ahih te Krik awl la Dorkas a miingna tih thuingaihna tah, “Sayuk” ti ngaihna ni.) Ahih lawng thaihu theen saina oen khawdeng bawmna ah atue atang boeih te a hawna. 37 Tevengah te ahih tah tlo tih duek. A rawkk te tui a thluk u tih asaw dawtt im han ah te a helh u. 38 Joppa khaaw he Lidda khaaw kalawng thla aih nawh tih Lidda ah Piter awm tite Joppa khaaw kah oengca thli lawng a yaak u vengah thlaang pahih a tuih u tih, “Reenna oen kaimi tengah aloela law de lah.” tila awl a uen u. 39 Tedawngah Piter te kamthlah pahoei tih ahih rawi oen cet u. A pha veng atah asaw dawtt im han la te a luui puei u. Huhai thli lawng Piter te a veel khoep u tih rap u, Dorkas lawng a hing vengah a sai pe angki oen hinaak himbai thli te a huh sak u. 40 Piter lawng ahimi boeih te im han kalawng ram la a ceh sak coengah khuklu oen cuengkueng tih thangthui; tecoengah rawkk benla maang tih, “Tabita, tho lah!” a tina. A mik a daai tih Piter te a huh vengah tho tih ngawl. 41 Piter lawng a phoeih tih ahih te a thawh hang. Tecoengah Oengca boeih oen huhai thli te a khue tih ahimi tengah te a hing la a tloeng pe. 42 Te kawng awlthang te Joppa khaaw ah thaang khok tih thlaang broe lawng Bawipa te a tangna u. 43 Piter tah Joppa khaaw kah Simon aka miingna saphaw oen haw-apai thaihu aka sai thlaang oen ah khawhin yahawh hlang haih awm.
1 Sisaria khaaw ah Kornilias aka miingna thlaang pakhat awm. Ahih tah, “Itali Raalkapbu” a ti u Rom raalkapbu pakhat kah raalbawi ni. 2 Ahih tah bokna ben ah a tlungmu thlaang pakhat la awm tih amah oen a imkhuikaw boeih lawng Pathen a bok u. Ahih lawngkhaw Judah thlaang khawdeng thli te a bawm acem poepa tih Pathen tengah thangthui yoeyah. 3 Hin at atah khawvaang ben khawnoek pathum yunyan ah ahih lawng huhthlaam a huh tih te kah huhthlaam dawngah Pathen vanthlaang pakhat law tih “Kornilias!” tila khuekung te aciimphanla a huh. 4 Ahih lawng vanthlaang te rih doe ah a dan heet tih “N'tu nuem, Bawipa?” a tina. Vanthlaang lawngah, “Nang kah thangthuina oen reenna oen ah bawmcemna na sai lawngah te Pathen kah thinkaw a puem poen tih na thangthuina te thung hamla awm oepsoeh poen. 5 Piter aka miingna thlaang pakhat tengah te tahe ah Joppa khaaw la thlaang tuih lah. 6 Ahih tah tuitunlii tengah aka awm saphaw thaihu aka sai Simon im ah pah.” a tina. 7 Tecoeng atah vanthlaang te cet. Kornilias lawng amah im kah tuihyoeihthlaang pahih oen bokna ben ah tlungmu tih amah te pumpakla doenkung raalkap pakhat te a khue. 8 Ahimi tengah amah lawng a huh boeih te a thui pe tih Joppa khaaw la ahimi te a tuih. 9 Ahimi te cet u tih avuen khawhin Joppa a pha tawm vengah te, Piter tah thangthui hamla hingthun ah imphu la luui hang. 10 Ahih te a bung pawng tih pakhat khat caak hamla a ngaih; caak awkk te aroek abah pe u vengah ahih lawng huhthlaam pakhat a huh. 11 Te kah huhthlaam dawngah te, vaan awng u tih thaihu pakhat aka law thuk, a kil palii a thlingthlui tih himbai bohlang oen aka lo u, dilai la avan thlaak thuk te a huh. 12 Te kah a khuiah te ramsa phun soeprep boeih, aka colh aka vaan thai ramsa boeih oen va phun soeprep boeih te awm. 13 Awl pakhat lawngah, “Piter, tho lah; ngawn langtah ca lah!” a tina awl te a yaak. 14 Tede Piter lawng, “Ka ca nawh mue, Bawipa! phung alam ben ah aka acaih nawh tih aka ciim nawh thaihu te khatca khaw ka ca nooek nawh.” a tina. 15 Te kah awl lawng koep a thui pe tah, “Pathen lawng Ciim a ti coengthloeih te pakhatca khaw aciim nawh la poek boel.” a tina. 16 He tila voei thum toe awm tih tecoeng atah te kah thaihu te vaan la koep a doek hang poen. 17 Piter lawng he kah huhthlaam thuingaihna a kawng te a poek lii vengah, Kornilias kah thlaangtuih hue lawng Simon im te a pha u tih vawng thawhka haiah ahimi te pai u. 18 Ahimi lawngah, “Simon Piter aka miingna kamyin te awm aw?” tila a khue tih a doet u. 19 Piter lawng huhthlaam thuingaihna te yaakming ham a poek lii veng-ah Muithla lawngah, “Hutung lah! Thlaang pathum lawng nang he n'tlap u. 20 Tedawngah tho langtah rum thuk, ahimi oen haih cet, uelh boel, ahimi te kai lawng ni kavan tuih.” a tina. 21 Tedawngah Piter tah ahimi tengla cet thuk tih, “Nangmi lawng na tlap u te kai poen ni. N'tu navan lawh u?” a tina. 22 Ahimi lawng, “Raalbawi Kornilias lawng n'tuih u. Ahih tah Pathen aka bok thlaang theen pakhat la awm tih Judah thlaang boeih lawngah a hinyah tangkiik u. Nang lawng na thui thli te ahih lawng a yaakna hamla Pathen kah vanthlaang pakhat lawng nang te amah im ah ceh puei ham a thui pe.” a tina u. 23 Piter lawng ahimi te im khuila a khue tih yiin at tah ip u de a tina tih te ah te pah u. Avuen atah kamthlah tih ahimi oen cet haih; Joppa khaaw kah oengca thli khatsut tah ahih oen cet haih van. 24 Avuen khawhin ah Piter tah Sisaria khaaw te a pha, te ah te Kornilias lawng amah cakaw thli oen paya laikoei a ceel thlaang thli oen ahih te a ring u. 25 Piter te a law phai vengah Kornilias lawng a do tih a khowkung ah a buekuep pe. 26 Tede Piter lawng a thawh tih, “Pai hang lah, kai khaw thlaang mailai van ni” a tina. 27 Piter oen Kornilias tah awl noenoe a thui hih tih im khuila a kuun phai hih vengah thlaang broela a tun kueng te a huh. 28 Tevengah ahimi nala te, “Judah thlaang pakhat he Gental thlaang phun oen yingyawi paithle tih pawlneeng haih hamla a bokna phung lawng ngaih nawh tite atheencala namami lawngkhaw na ming u. Tede a-u khat khaw phung alam ben ah caih nawh tih ciim nawh tila poek nawh ham Pathen lawng n'huh sak poen. 29 Tedawngah nang lawng nan khue sak vengah oelhtaih tlaih ohla ka law poen. Tetih atah van thui u lah, n'tu hamla nan khue u?” a tina. 30 Kornilias lawng, “N'thlem vai vuen, he veng tue yunyan ah, khawvaang khawnoek pathum ah te kamah im khuiah ka thangthui. Kawlkalhca maiah himbai a bawk likthik aka bai thlaang pakhat ka haiah va pai tih, 31 ahih lawng: ‘Kornilias! Pathen lawng na thangthuina te a yaak tih reenna oen bawmcemna na sai te a ming poen. 32 Joppa khaaw la thlaang tuih langtah Simon Piter aka miingna thlaang te khue sak. Ahih tah tuitunlii tengah aka awm saphaw aka sai Simon im ah te pah” tila te a thui. 33 Tedawngah nang te pahoei kan khue sak, na law tih theen poen. Tahe ah Bawipa lawng nang n'thui sak awl te hutung hamla he ah he kaimi boeih Pathen haiah ka awm u.” a tina. 34 Tevengah Piter lawng awl a thui tih, “Pathen lawngah thlaang boeih he avan at la a khueh ti he tah soeng tangtang tila tahe atah ka ming poen. 35 A-u khaw amah te a bok tih doengna te aka sai boeih tah me ang thlaangphun khaw a hih lawng a do. 36 Thlaang boeih kah Bawipa la aka awm Jesuh Khrih rang oen ngaimawngna Awlthang Theen a thui tih Israel thlaang thli tengah Pathen lawng a peek te na ming u. 37 Johan lawng baptisma a peekna kawng awl te a thui coengah Galili kalawng a tong tih Israel ram pum ah thaihu alentloe aka thoeng te a ming u. 38 Nangmi lawng Nazaret khaaw kah Jesuh kawng oen ah ahih sawah Ciim Muithla oen tharana te metila Pathen lawng a lun pe tite a ming u. Ahih tah Pathen lawng a awm puei dawngah peng tawm ah te cet, theenna te a sai tih Raaithe bawi kah huham tharana kut khuiah aka awm boeih te a hoeih sak. 39 Israel ram pum oen Jerusalem khaaw ah ahih lawng a sai boeih te aka mingkung sausi la kaimi he ka awm u. Tecoengah ahih te thinglam dawng a tai u tih a ngawn u. 40 Tede hin thum coengah ahih te Pathen lawng a thawh sak koep tih a phumpho sak, 41 thlaang boeih tengah phumpho sak nawh tih Pathen lawng a tuek oepsoeh mingpueikung sausi la aka awm, duekna kalawng a thawh coengah amah oen caak awkk te aka ca, aka aw haih kaimi teng bueng ah ni a phumpho sak. 42 Thlaang boeih tengah awlthang theen thui hamla, thlaangduek oen thlaanghing awlcekkung la Pathen lawng ahih te a khueh te aka mingkung sausi la kaimi he awl m'peek u. 43 A-u khaw ahih te aka tangna boeih tah a miing huham tharana oen ah a thawlhna te khawdawp a ngaai pe ai tila tawngha boeih lawng ahih kawng te a thui u.” a tina. 44 Piter lawng awl a thui lii vengah te ahih kah awl thui aka hutung thlaang boeih sawah Ciim Muithla te va rum thuk. 45 Gental thlaangphun thli sawah khaw, amah kutdo Ciim Muithla te Pathen lawng a lun pe dawngah Joppa khaw kah Piter oen aka law haih Judah thlaangphun oengca thli tah a kawpoek rai u. 46 Metihtiah ahimi lawngah ming nawh awl la cal u tih Pathen kah bawilenna a thangpawm te a yaak u dawngah ni. Piter lawngah: 47 “Mami angla he kah thlaang thli lawngkhaw Ciim Muithla a dang u van. Te tih atah he thli he tui oen baptisma peek ham a-u lawng a khaang khak ai?” tila a thui. 48 Tedawngah ahimi te Jesuh Khrih miing oen ah baptisma dang hamla awl a peek. Tecoengah Piter te ahimi tengah khawhin ayawl khaw cam hamla a ceel u.
1 Judia ram pum kah atloe oengca thli boeih oen celtuih boeih lawng Gental thlaang thli lawngkhaw Piter te a do u van tite a yaak u. 2 Piter te Jerusalem la a ceh vengah Gental thlaang thli te yahhuivuen reet sak ham aka ngaih thlaang thli lawngah a cawtt-abauh u tih, 3 “Yahhuivuen aka reet nawh Gental thlaang im ah na pah tih caak awkk khaw na caak haih roe mai!” a tina u. 4 Tedawngah Piter lawng acuekca veng kalawng thaihu aka thoeng hang te asoepbirla biit a thui pe: 5 “Joppa khawpui ah ka thangthui lii vengah huhthlaam pakhat ka huh. Vaan kalawng thaihu pakhat aka law, a kil palii a thlingthlui himbai bo hlang oen aka lo u dilai la avan thlaak thuk te ka huh tih ka teng avan pha dengah a toeng. 6 Akhuiben te ka bueh heet vengah imvuelh boiava oen ramsa phun soeprep aka colh aka vaan thai ramsa boeih oen va phun soeprep boeih te ka huh. 7 Tecoengah awl pakhat ka tengah avan thui te ka yaak tih, ‘Piter, tho lah; ngawn langtah ca lah!’ tila avan thui. 8 Tede, kai lawngah, ‘Bawipa, ka ca nawh mue! Phung alam ben ah caih nawh tih aka ciim nawh caak awkk te ka kaa khuiah kuun nooek nawh” ka tina. 9 Vaan kalawng awl avan thui koep tih, ‘Pathen lawng ciim a ti coengthloeih te nang lawngah khatca khaw aciim nawh la poek boel,’ tila avan thui. 10 He tila voei thum toe awm tih tecoeng atah te kah thaihu boeih te vaan la koep a doek hang poen. 11 Teveng tue ca roe ah Sisaria khaaw kalawng avan tuih thlaang pathum te ka awmna im la te avan pha u. 12 Uelh re tlaih ohla ahimi oen ceh haih pahoei ham Muithla lawng avan thui. He kah ka puei oengca paruk hue khaw Joppa kalawng Sisaria la kai oen haih ka law u tih kaimi boeih he Kornilias im la ka cet u. 13 Ahih lawngah, amah im ah vanthlaang pakhat pai tih, ‘Joppa khaaw la thlaang tuih lang atah Simon Piter aka miingna thlaang te khue sak. 14 Ahih lawngtah nangmi tengah awl avan thui vetih te awl rang oen ah namah oen na imkhuikaw lawng thlawnna na dang u ai.’ tila a thui pe te kaimi tengah avan thui. 15 Tecoengah, awl ka thui pe vengah te acuek vengah mami sawah a awm van angla ahimi sawah khaw Ciim Muithla te va rum. 16 Tevengah Bawipa lawng, ‘Johan lawngtah tui oen ah baptisma te m'peek u, tede nangmi tah Ciim Muithla oen baptisma m'peek ai.’ tila a thui te lot ka poek. 17 Mami lawng Bawipa Jesuh te n'tangna vengah mami m'peek kutdo te ang van te Gental thlaang thli khaw Pathen lawng a peek van ti he tah ciim mai poen; tedawngah kai he a-u la ka awm aih tih Pathen te ka oel khak lal thai ai!’ tila a thui pe. 18 He awl he ahimi lawng a yaak u vengah cawttbauh awl te a toeng u, Pathen te a thangpawm u tih, “Pathen lawng, Gental thlaangphun thli khaw thawlh yut u tih hing van hamla atue theen a peek van poen!” ti u. 19 Stefen a ngawn u coeng kah heemtekna aka thoeng hang dawngah te oengca thli khatsut tah yan khonghak tih khatsut tah Fonicia, Saipras oen Antiok toela a pha u tih Judah thlaangphun thli bueng tengah awlthang te a thui u. 20 Tede Saipras oen Sairi khaw kah thlaang, atloe oengca thli te Antiok la cet u tih Gental thlaangphun thli tengah khaw, awlthang te a phawng pe u tih Bawipa Jesuh kawng Awlthang Theen te a thui pe u. 21 Bawipa kah huham tharana tah ahimi tengah awm tih thlaang toek lek nawh lawng a tangna u tih Bawipa benla a kaw a thaw u. 22 He kawng awlthang he Jerusalem kah khrihcabu teng a pha, tedawngah Barnabas te Antiok la a tuih u. 23 Ahih lawng a pha vengah Pathen lawng thlaang thli te metihtlukla yotheen a peek tite a huh vengah awmngaih tangkiik tih thinkaw lungbui tak oen Bawipa tengah thincak la a awmna u ham, uep-awm la a awmna u hamla ahimi te a thaphawh. 24 Barnabas tah thlaangdoeng pakhat la awm, Ciim Muithla oen oengna oen ah betoet tih thlaang yahawh hlang te Bawipa tengla avan law puei. 25 Tecoengah Barnabas tah Sawl te tlap hamla cet. 26 Ahih te a huh tih Antiok la avan law puei tih ahih rawi lawng kum at puet khrihcabu kah thlaang thli oen huh u tih thlaang boehoeng mai te a cang puei. Oengca thli he lamhacuek la Antiok ah Khrihca tila a thui cuek u. 27 Teveng yunyan ah tawngha khatsut te Jerusalem kalawng Antiok la cet u. 28 Akabas aka miingna ahimi timkah thlaang pakhat te pai tih dilai pum ah he khawthe khawkha awm ai tila Muithla kah huham tharana oen oepsoehla a thui. (Klaudias te sengpahrang sangluel la a awm vengah khawthe khawkhana te awm.) 29 A hubang thli lawngah amami kah sai thai khoek ah Judia ram ah aka awm oengca thli te bawmcemna peek hamla awl a thui u. 30 Ahimi lawng te tila a sai u coeng atah tangka te khrihcabu ahaamca thli tengah peek ham Sawl oen Barnabas kut ah a pat pe u.
1 He veng yunyan ah Herod seng-pahrang lawng khrihcabu khui-kah thlaang khatsut te heemtek hamla a tong poen. 2 Ahih lawngah Johan kah a manau Jeem samsen oen a ngawn sak. 3 He tila a ngawn dawngah Judah thlaang thli a ngaai khuek a ti u te a huh vengah Piter te khaw a tuuk sak u. (Te veng te tah Tawlru thuum mueh Takawi Poei ni). 4 Piter te a tuuk u coeng atah thongim ah a thlaak tih bu khat ah raalkap palii aka awm raalkap bu lii te a toet sak u. Herod lawngtah Kaantaak Poei a boeih coengah rangpui haiah awl cek ham kamthlah. 5 Tedawngah ni Piter te thong ah a thlaak, tede khrihcabu khuikah thlaang thli lawng ahih hamla te Pathen tengah thinkaw thluembuek tang oen thangthui u. 6 Herod lawng ahih te thlaangping haiah awl cek ham a pha tawm yiin ah Piter te raalkap pahih laklaw ah te ip. Ahih te thiirui pahih oen a khih tih thong thawhka ah khaw raaltoeng thli pai u. 7 Bawipa kah vanthlaang te bawtbet khawlai ah te ah te pai parak tih thongim te a thue pheng. Vanthlaang lawng Piter te a lengpang ah a hinghuek tih a thawh, “Aloela tho!” a tina. Tevengah Piter kut dawngkah thiirui te pahoei tla. 8 Tecoengah vanthlaang lawng, “Na cihin te na langtah na khawmuek te muek lah” a tina. A thui pe angla Piter lawng a sai coeng atah vanthlaang lawng, “Na himbai te bai langtah ka hu ah law lah.” a tina. 9 Piter lawng thongim adauben toela a vai. Tede vanthlaang lawng a sai te ataktang ni tila ming nawh; ahih lawng huhthlaam ni ka huh tila a poek. 10 Ahih rawi lawng lamhacuek raaltoeng a paina oen a pabena te a pooeng hih coeng atah khawpui khuila cehna thii thawhka te a pha hih. Thawhka te amah poek ah te rawi hamla awng u tih te kalawng ah te cet hih. Lawngpui ah poe a ceh hih vengah te bawtbet maiah Piter te vanthlaang lawng a ceh taak. 11 Tevengah Piter lawng a tengah aka thoeng boeih te a ming vengah cuih pan tih, “He tah ataktang ni tila ka ming poen! Bawipa lawng kai he Herod kah tharana oen Judah thlaang thli lawng ka sawah a sai thaihu boeih dawng kalawng loeih sak ham vanthlaang avan tuih.” tila a thui. 12 Amah kah awm ih boeih te a kaw a puk heet coeng atah Johan Mark kah a manu Meri im la te cet, te ah te thlaang broela tun u tih thangthui u. 13 Piter lawng adauben kalawng ah thawh te a khooek tih Roda aka miingna tuihyoeihthlaang hutaaca lawngah thawhka te awng hamla cet. 14 Ahih lawngah Piter awl te a noek tih awmngaih uett ah thawh te awng ohla im khuila cet koep tih thlaang thli tengah te ‘thawhka adauben ah Piter awm’ a tina. 15 Ahimi lawngah, “Na ngau aw!” a tina u. Tede ahih lawng atak tang ni tila a thui mang khak. Tedawngah ahimi lawng, “Ahih kah vanthlaang macawi.” a tina u. 16 Teveng ah Piter lawng thawhka te a khooek khiing. Ahukhueng ah ahimi lawng thawh a awng u tih Piter te a huh u veng atah a ngaai hang sut u. 17 Piter lawng ahimi te awm duem hamla a kut oen noekna a peek tih thongim khui kalawng ah metila Bawipa lawng a loeih sak tite ahimi tengah a thui pe. Ahih lawngah, “He he Jeem oen atloe oengca thli tengah thui pe uh.” a tina tih ahimi te a ceh taak coeng atah atloela poe cet. 18 Khaw athaih atah Piter he me tih ni a ti oh kai ti u tih raaltoeng thli tah ngaihangtalh la awm u. 19 Herod lawng Piter te tlap hamla awl a peek tih a tlap u de dang u nawh. Tedawngah raaltoeng thli te doet adap coengah ngawn hamla awl a peek. He coeng atah Herod he Judia ram kalawng cet tih Sisaria khaaw ah te kawlkalh awm. 20 Herod tah Turi oen Sidon khaaw kah thlaang thli sawah a thin sa tangkiik, tedawngah ahimi lawng tun huh u tih ahih oen huh u hamla te cet u. Lamhacuek ah ahimi lawng sengpahrang impui ukkung Blastas te ahimi pai puei ham a ceel u. Tecoengah ahimi tah Herod tengla cet u tih roeproei u hamla a bih u, metihtiah ahimi ram kah caak awkk dangna tah Herod sengpahrang kah ram uk khuiah a awm dawngah ni. 21 Awl tuentahna khawhin te a pha atah Herod lawng amah kah sengpahrang phawlip oen thoekcau u, a bawi ngawlhcoen dawngah te ngawl tih thlaangping tengah awl a thui pe. 22 Ahimi lawngah, “Awl aka thui he thlaang nawh ni, Pathen ni!” tila te paang u. 23 Herod lawng Pathen te a hinyah nawh dawngah Bawipa kah vanthlaang lawng ahih te a bawhtaal pahoei, yunghuut lawng a keuh tih duek. 24 Teveng ruetrat ah te Pathen awl tah puung tare tih roeng hang. 25 Barnabas oen Sawl tah amami kah biibi te a coeng hih tih Jerusalem la koep meel hih, Johan Mark te khaw a ceh puei hih.
1 Antiok khaaw kah khrihcabu khuiah tawngha thli oen cangpueikung thli khatsut tah thoem awm u: Te thli te tah, Barnabas, Simeon (Thlaangmuuem a ti u te), Lucias (Sairin khaw kah), Manaen (ukkungbawi Herod kah thawnpuei) oen ah Sawl, he hue ni. 2 Ahimi lawngah Pathen a bok u tih buh a yeh u vengah te Ciim Muithla lawngah ahimi nala te, “Kai lawng bii ka hoel ka paai te aka bi hamla ka khue Barnabas oen Sawl te kai ham van thloeng uh” a tina. 3 Ahimi lawng buh a yeh u tih thangthui u, ahih rawi sawah kut a tloeng pe u tih tecoeng atah ahih rawi te a tuih u. 4 Barnabas oen Sawl tah Ciim Muithla lawng a tuih van angla Silukia khaaw la cet hih tih te kalawng ah Saipras tuisanglak la te tuisangphaw oen cet hih. 5 Ahih rawi lawng Salamis khaaw a pha hih veng atah Pathen awl te sinakok bok-im ah a phawng hih. Ahih rawi lawng bii aka bawmkung la Johan Mark te a ceh puei. 6 Ahimi tah te kah tuisanglak kalawng cet poe u tih Paphos khaaw te a pha u, te ah te caam aka thoem Bar-Jesuh aka miingna thlaang te a huh u, ahih tah amah oen amah te tawngha ni tila aka thui soeh Judah thlaang pakhat van ni. 7 Ahih tah tuisanglak ukkung, Serkias Pawlas thlaangcuih kah paya la awm. Ukkungbawi lawng Pathen awl te yaak ham a ngaih dawngah Barnabas oen Sawl te amah tengla a khue. 8 Tede ahimi te caam aka thoem Elimas (he tah Krik miing ni) lawng a oelh ataih tih ukkung bawi lawngah oengna khueh boel seh tila a yawm mangkhak. 9 Tevengah Pawl a ti u Ciim Muithla oen aka betoet Sawl lawngah; caam aka thoem thlaang te a bueh rangpatang tih, 10 “Nang, Raaibawi capa! Nang tah doengna boeih boeih kah thunkha la na awm. Nang he thailatna soeprep oen na betoet tih Bawipa kah awltak he hoem awl la thawvel ham na yawm poepa! 11 Bawipa kut te na sawah tahe avan pha ai; na mik te pum khoep vetih kawlkalh khui atah khawthaih khawse te na hu manawh,” a tina. Kawlkalh maiah Elimas kah a mik te muui muuemtuut lawng a dah pe khoep tih amah te a kut ah aka mawt hamla thlaang te a pathoep poen. 12 Ukkung bawi lawng he tila thaihu aka thoeng te a huh vengah a tangna tih Bawipa kawng a cang puei te a kawpoek la rai tangkiik. 13 Pawl oen a paya thli tah Paphos kalawng tuisangphaw oen cet u tih Pamfilia ram kah Perka khawpui te a pha u, te ah te Johan Mark te a ceh taak u tih Jerusalem la amami tah koep meel u. 14 Ahih tah Perka kalawng poe cet tih Pisidia ram khui Antiok khaaw te a pha u. Sabbath khawhin atah sinakok bok-im la cet u tih ngawl u. 15 Mosi Phungawl oen tawngha thli kah cathut te a tae coeng atah sinakok bok-im ukkung thli lawngah ahimi nala te: “Maya manau thli, thlaang yahawh ham thaphawhna awl thui ham a awm atah na thui u ham ka ngaih u de” a tina u. 16 Pawl lawng pai tih a kut oen noekna a peek tih awl a thui: “Ka puei - Israel thlaang thli oen Pathen aka bok Gental thlaang thli: hutung u lah! 17 Israel thlaangphun kah Pathen lawngah mami kah patuer thli te a tuek tih Iyipt ram ah ram tloe thlaang angla a awm u vengah thlaangphun bo la te a sai. Pathen lawng amah kah alentloe huham tharana oen ahimi te Iyipt ram kalawng avan law puei tih, 18 ahimi lawngah khawkum Sawmlii khui puet ramhum huhang ah patang a kha ang u. 19 Ahih lawngah Kanaan ram kah thlaangphun phun sarih te a taa tih te ram kah hunkung huenmah la a thlaang thli te a sai. 20 He tila a awm khui boeih te kum yalii sawm ngaa yunyan awm. “He coengah tawngha Samu-el dung toe ah ahimi te awlcekkung thli te a peek. 21 Tecoengah ahimi lawng sengpahrang a bih u tih kum sawmlii khuiah ahimi kah sengpahrang la awm hamla Pathen lawngah Benjamin phun, Kish capa Sawl te a peek. 22 Pathen lawng ahih te a khoe pe coeng atah Devid te ahimi kah sengpahrang la a khueh pe. Pathen lawng ahih kawng a thui te tah: ‘Jesi capa Devid tah ka kaw aka tawng thlaang, kai lawng sai sak ham ka ngaih boeih te aka sai ham thlaang te ka huh poen” tila a thui. 23 Pathen lawngah amah awlkam angla Devid cadil Jesuh te Israel thlaang thli kah Thlawnkung la a sai poen. 24 Jesuh lawng amah kah bii te a tong thlan ah Johan lawngah Israel thlaangphun thli te na thawlhna yut u langtah baptisma dang u lah, a tina. 25 Tecoengah Johan lawng amah kah bii te a coeng tawm vengah thlaang rangpui nala te, ‘Kai he a-u tila na poek u? Kai tah nangmi lawng na ring oel khiing thlaang te nawh ni. Tede hutung u lah! Ahih tah kai hu ah va law tih kai tah ahih kah khowmuek te dul pe ham Pateng khaw ka koeih nawh.’ tila a thui. 26 “Abraham cadil, ka puei Israel thlaangphun thli oen Pathen aka bok Gental thlaangphun thli; thlawnna awlthang he mami tengah m'peek! 27 Metihtiah Jerusalem ah aka awm thlaang thli oen ahimi mawtkung thli lawngah ahih te Thlawnkung ni tila ming u nawh tih Sabbath khawhin roekk ah a tae u tawngha thli kah awl te khaw ahimi lawng yaakming u nawh. Tede Jesuh te a ngawn u tih tawngha thli kah awl thui te a soep sak u. 28 Ahimi lawngah ahih te ngawn hamla akawng alam hu u nawh de ahih te ngawn ham Pilat tengah a bih u. 29 Te tila ahih kawng Caciim lawng a thui boeih te a sai u coengah thinglam dawngkah a rawkk te ahimi lawng a lawh u tih thlann ah a up u. 30 Tede Pathen lawng ahih te duekna kalawng a thawh sak poen tih, 31 Galili kalawng Jerusalem la amah oen khawlawng aka cet haih nooek thli tengah khawhin broe nawh la a phumpho pe. Tahe ah ahimi te Israel thlaang phun ham aka mingkung sausi la awm u. 32 Tedawngah te Awlthang Theen te nangmi tengah thui hamla he la he ka law u: mami kah patuer thli tengah sai hamla Pathen lawng awl a kam te mami a cadil thli tengah Jesuh kah thawhkoepna rang oen tahe ah avan sai poen. Saam laa raawl hihna dawngah, Nang tah ka capa la na awm; tihin ah kai tah na Pa la ka awm poen,’ tila a thut. 34 Tecoengah thlann khuiah metuek khaw rong sut ohla duekna kalawng a thawhkoepna kawng te Pathen lawng a thui tah: ‘Devid teng awl ka kam tangte, aka ciim tih uepna koei tangtang yotheen kam-awmna te kan pe ai.’ tila a thui. 35 Tecoengah Saam laa atloe dawngah khaw, ‘Namah kah a congmang heet tuihyoeihthlaang te thlann khuiah na rong sak sut manawh.’ tila a thui. 36 Devid lawng a hing khuiah Pathen kawngaihna te a sai, tecoengah duek tih an patuer thli oen haih a up u de phuel khuiah a rawkk te rong. 37 Tede Pathen lawng duekna kalawng a thawh sak thlaang te tah he tila awm nawh. 38 Ka puei Israel thlaangphun thli, kaimi lawng ming sak hamla ka ngaih u tah, Jesuh rang oen ni thawlh khawdawp ngaaina kawng awl te nangmi tengah avan thui u; Ahih te aka tangna thlaang boeih tah Mosi kah Phungawl lawng a loeih sak thai nawh thawlhna kalawng a loeih sak tite ming u lah. 40 Tedawngah tawngha thli lawng a thui te nangmi sawah a thoeng nawh ham ngaithuen uh: 41 ‘Hutung u lah! Nangmi nuihbu la thlaang aka sai hue! Lakueng uekcuek lang duek uh! metihtiah tihin ah ka sai ham koei he thlaang pakhat lawng van thui u cakhaw, na tangna u roe manawh!’ tila a thui” a tina. 42 Sinakok bok-im kalawng Pawl oen Barnabas a ceh hih vengah te, Sabbath khawhin ah law koep hih langtah he kawng he yahawh la van thui de a tina u. 43 Thlaangping te sinakok bok-im kalawng a ceh boeih u coengah Pawl oen Barnabas te Judah thlaang thli oen Judah phung la aka kuun Gental thlaang broe lawngah a hu ah bung a vai u. Celtuih rawi lawng ahimi te Pathen lungvatna dawngah awm poe hamla thathluena awl a thui pe. 44 Tecoeng Sabbath khawhin atah te khawpui khuikah thlaang boeih lawng Bawipa awl te hutung hamla law u. 45 Judah thlaang thli lawngah thlaangping te a huh u vengah ahimi lawng uett-eena thinkaw a khueh u; Pawl lawng a thui te khaw a oelh ataih u tih amah te khaw aphawh akhah u. 46 Tede Pawl oen Barnabas lawng raltheenla a thui tare hih tih: “Nangmi tengah Pathen awl he lamhacuekla thui ham ngoe tangtang. Tede nangmi lawng na hoett u tih namah oen namah te dungyan hingna oen a tingtawkk nawh la na poek u atah kan ceh taak u vetih Gental thlaangphun tengla ka cet hih ai. 47 Metihtiah kai hih tengah Bawipa kah awlpeek tah: ‘Dilai pum lawng thlawnna a dangna ham nang hih tah Gental thlaang thli kah aangna la kan khueh poen.’ tila a thui” a tina hih. 48 Gental thlaang thli lawng he awl he a yaak u vengah, awmngaih u tangkiik tih Bawipa kah awlthang te a thangpawm u; dungyan hingna paang hamla a tuek thlaang thli te oengca la awm u. 49 Bawipa kah awl tah te kah ram pum ah te puung khuengdeng. 50 Tede Judah thlaang thli lawngah khawpui khuikah mawtkung thlaang thli oen Pathen aka bok hinyah koei Gental hutaa thli te a ceemtuh u tih Pawl oen Barnabas te heemtek ham a tong u, ahih rawi te a ram khui kalawng a vai u. 51 Celtuih rawi lawngah ahimi sawah a kawlawna nawh te ming sak nala a khow dawngkah laidiik te a khoek hih tih Ikoniam khaaw la poe cet hih. 52 Antiok khaw kah oengca thli tah awmngaihna oen Ciim Muithla oen ah betoet u.
1 Tetih toengtoeng la te Ikoniam ah khaw Pawl oen Barnabas tah sinakok bok-im la cet tih awl a thui hih, Judah thlaang thli oen Gental thlaang thli yahawh hlang te oengca la coengg u. 2 Tede aka tangna nawh Judah thlaang thli lawng Gental thlaang thli te a ceemtuh u tih oengca thli te a oelh a taih sak u. 3 Celtuih rawi tah te ah te asan hlang awm tih Bawipa kawng te raltheenla a thui hih, ahih rawi lawng a thui lungvatna kawng awlthang te soeng tila tueng sakna ham kawpoek rai miknoekna oen kawpoek rai sai thaina huham tharana te a peek. 4 Te khawpui khuikah thlaangping tah pek u tih khatsut lawng Judah thlaang te a bawngyawng u tih khatsut lawng celtuih rawi te a bawngyawng u. 5 Tecoengah Judah thlaang thli oen Gental thlaang thli lawngah celtuih rawi te thekhana tih lungto oen de hamla a thui u. 6 Celtuih rawi lawng he kawng he a ming tih Likonia ram khuiah aka awm Listra oen khaawteng khaawvai la te heeng hih. 7 Te ah te ahih rawi lawng Awlthang Theen te a thui hih. 8 Listra khaaw ah a thang pek kalawng a khow kheem tih aka cet thai nawh thlaang pakhat awm. 9 Ahih tah te ah te ngawl tih Pawl kah awl thui te a hutung. Pawl lawngah, ahih lawngtah a tangna dawngah hoeih thai ai tite a huh, tedawngah rangpatangla a bueh heet tih, 10 angaih hlang la ahih nala te, “Tho lang pai hang lah!” a tina. Te thlaang lawng cungpet tih yingyawi. 11 Pawl lawng a sai te thlaangping lawng a huh vengah, “Thlaanghing angla pathen thli he va thoeng tih mami tengah va law poen!” tila amami Likonia awl la te paang u. 12 Ahimi lawngah Barnabas te Zias tila miing a sak u tih Pawl tah awl thuikung la a awm dawngah Harmas tila miing a sak u. 13 Te khawpui kah adauben ah tempal bok-im awm tih Zias pathen khawsoeih lawng vaitaw taal thli oen raipai thli te khawpui vawng thawhka la te avan khuen, ahih oen thlaangping hue lawngah celtuih rawi tengah luciik thawthuengna te nawn ham a ngaih u. 14 Ahimi lawngah te tila ka sai ai a ti u te Pawl oen Barnabas lawng a yaak hih vengah amahih kah himbai te a pheuh hih, thlaangping tim ah heeng hih tih paang, 15 “N'tu ham he he na sai u? Kaihih khaw nangmi angla thlaanghing van ni! Nangmi lawng he ang aphu aka awm nawh te na hoettna u ham, vaan, dilai oen tuitunlii oen ah a khuiah aka awm boeih saikung aka hing Pathen tengla na maang u hamla kaihih lawng Awlthang Theen he phawng hamla ka law hih. 16 N'cui veng atah thlaang boeih he amami kah ngaihna angla a ceh sak. 17 Tede ahih tah thaihu theen saina oen ah awm tite a tueng sak poepa: vaan kalawng ah khaw a tlan sak tih atue atang vengah thing thaih rampu te m'peek u; caak awkk te m'peek u tih na kaw avan hoe sak u.” tila a thui pe hih. 18 He tila awl a thui pe hih ah Pateng khaw thlaangping lawngah ahih rawi tengah luciik thawthuengna te nawn nawh ham celtuih rawi lawng a khaang pe tloel hih. 19 Pisidia ram khuikah Antiok khaaw oen Ikoniam khaaw kalawng Judah thlaang khatsut te law u tih thlaangping te amami benla a doek u thai, Pawl te lungto oen a de u, duek poen tila a poek u tih khawpui adaubenla te a mawt u. 20 Tede oengca thli lawng ahih te a veel khoep u vengah tho tih khawpui khuila te koep cet. Avuen khawhin atah Barnabas oen Derbe khaaw la te cet hih. 21 Pawl oen Barnabas lawng Derbe ah Awlthang Theen te a phawng hih tih thlaang broe te hubang la coengg. Tecoengah Listra, Ikoniam, Pisidia ram kah Antiok khaaw la te cet hih koep. 22 Ahih rawi lawngah oengca thli te tha a peek hih tih oengna dawngah cak poe hamla thathluena awl a thui pe hih. Ahih rawi lawngah, “Mami lawng Pathen ram khuiah kuun ham ah khawdeng patang broela khang ham roe ni,” tila te a cang puei hih. 23 Ahih rawi lawng khrihcabu roekk ah ahaamca thli te a khueh pe, ahih rawi lawngah buhyeh thangthuina oen ahimi te a uepna Pathen tengah a nawn. 24 Pisidia ram te a pooeng hih coengah Pamfilia ram te a pha hih. 25 Perka khaaw ah awlthang a phawng hih tih tecoengah Attalia khaw la te cet hih. 26 Bii a coeng hih poen dawngah te kalawng ah Antiok la tuisangphaw oen koep cet hih. Antiok khaaw he tah biibi tong hamla Pathen kah lungvatna dawngah pum a peekna hih khaw ni. 27 Antiok khaaw te a pha hih veng atah khrihcabu kah thlaang thli te thik at la a tun sak hih tih ahih rawi rang oen Pathen lawng a sai thli oen Gental thlaang thli lawng a tangna thai ham lawngpui a awng pe kawng te ahimi tengah a thui pe hih. 28 Ahih rawi tah te ah te atue san hlang oengca thli oen awm u.
1 Thlaang khatsut tah Judia kalawng Antiok la law u tih, “Nangmi lawngah Mosi kah Phungawl lawng a kuek angla yahhuivuen na reet u nawh atah thlawnna na dang thai manawh.” tila a cang puei u. 2 Pawl oen Barnabas tah he kawngah ahimi oen oelh ataih u tih awl puung u. Tedawngah Pawl oen Barnabas he Antiok kah thlaang khatsut oen Jerusalem la cet u selang tah he kawng he celtuih thli oen ahaamca thli te doet u seh tila awl a thui u. 3 Khrihcabu lawng ahimi te yawh a thak u; Fonicia oen Samaria ram ben kalawng poe cet u tih Pathen ben ah Gental thlaangphun thli kah kawthawna kawng te ahimi lawng a thui u tih he kah awlthang lawngah oengca boeih te a awmngaih sak. 4 Jerusalem te ahimi a pha veng atah khrihcabu oen celtuih thli oen ah ahaamca thli lawng ahimi te a do u tih ahimi rang oen Pathen lawng thaihu a sai boeih te a thui pe u. 5 Tede Farasi benla aka awm oengca thli khatsut lawng pai u tih, “Gental thlaangphun lawng yahhuivuen reet u selang tah Mosi kah Phungawl he vai u seh tila thui pe ham awm” tila a thui u. 6 Celtuih thli oen ahaamca thli tah he kah awldoetna he poek hamla tun huh u. 7 Asan hlang a thui khiing u coengah Piter lawng pai tih, “Maya manau thli, Gental thlaangphun lawng Awlthang Theen te a yaak u tih a tangna u thai ham n'hu vengah Pathen lawng nangmi timkah kai he aka thuikung la n'tuek te nangmi lawng na ming u. 8 Thlaang boeih kah poekna mingkung Pathen lawngah Ciim Muithla te mami m'peek van angla Gental thlaang thli khaw a peek van tih ahimi te a do poen tite a tueng sak. 9 Ahih lawngah mami oen ahimi laklaw ah pekbona sai nawh; ahimi lawng a tangna u dawngah ahimi kah thawlhna te khawdawp a ngaai pe. 10 Tedawngah, n'tu hamla nangmi kah patuer thli lawngkhaw, mami nawn lawngkhaw phueih thai nawh thalrih te oengca thli na phueih sak rang oen tahe ah Pathen te noekdak ham na ngaih u? 11 Tetih moenih ta! Ahimi angla mami lawngkhaw n'tangna u van tih Bawipa Jesuh kah lungvatna rang oen thlawnna n'dang u.” a tina. 12 Barnabas oen Pawl lawng, ahih rawi rang oen Gental thlaangphun tengah Pathen lawng kawpoekrai miknoekna oen kawpoekrai thaihu a sai kawng te a thui hih vengah thlaangping lawng sap a hutung u. 13 Ahimi lawng awl a thui boeih u coeng atah Jeem lawng ah: “Maya manau thli, ka awl hutung u lah! 14 Simon lawng a thui angla Pathen lawng Gental thlaang thli te amah hamla a lawhna rang oen metihtluk la ahimi a thintlawhna tite lamhala a tueng sak poen. 15 Tawngha thli kah awl thui khaw he kah awl oen vai u. Caciim lawng a thui angla, 16 ‘Bawipa lawngah, he coengah koep kava meel vetih Devid kah ram te ka thawh koep ai. Aka rawk thli te ka sak koep vetih acakla ka pai sak koep ai. 17 Tecoengah thlaangphun boeih lawng ka tengla law u vetih kamah kah thlaang la awm hamla ka khue Gental thlaang thli khaw law u ai. 18 Te tila yan veng kalawng he awl aka mingsakkung Bawipa lawng a thui.’ a tina. 19 Jeem lawngkhaw a thui pe tih, ‘Pathen benla kaw aka thaw Gental thlaang thli he mami lawng raina peek ham awm nawh tila ka poek. 20 Te lak atah, kutsaimuei bokna ah a nawn u dawngah phung alam ben ah aka caih nawh caak awkk te caak nawh ham; hutaa oen tawngpa thawlhna dawngah kuemsuem ham, rawn khak ramsa te caak nawh ham, sathi khaw caak nawh hamla ca mah pat pe u sih. 21 Metihtiah sinakok bok-im ah n'cui veng kalawng Mosi kah Phung awl te Sabbath khawhin roekk ah a tae poepa u tih khaw tawm ah ahih awl te khaw a phawng u poen.” a tina. 22 Tecoengah celtuih thli, ahaamca thli oen khrihcabu lawng Pawl oen Barnabas oen ah Antiok khaaw la tuih haih ham amami bu khuikah thlaang khatsut te tuek hamla awl a tloek u. Ahimi lawngah oengca boeih lawng a hinyah u thlaang pahih Barnabas a ti u Judas oen ah Silas te a tuek u. 23 Ahih rawi kut ah te a dangkah angla ca a pat pe u: “Nangmi kah maya manau la aka awm kaimi celtuih thli oen ahaamca thli lawng Antiok, Siria oen Cilicia ah aka awm Gental phun maya manau thli te kan toei u. 24 Kaimi tim-kah thlaang khatsut aka law lawngah nangmi te raina m'peek u tih ahimi kah awlthui lawngah ngaihangtum la nangmi te n'khueh u tite ka yaak u. Tede ahimi te kaimi kah mingpueina awm nawh. 25 Tedawngah kaimi tun ka huh u tih laipai tuek u silang tah mami lawng n'lungna Barnabas oen Pawl oen ah nangmi tengla tuih haih sih tila boeih ka kaw vai u. 26 Pawl oen Barnabas tah Bawipa Jesuh Khrih kah bii dawngah duek oen hing khaw aka maa nawh thlaang ni. 27 Tedawngah ca oen kavan thut u he nangmi tengah thui pe hamla Judas oen Silas he kavan tuih u. 28 He kah angoe phung alam coengah atloe thalrih khatca khaw nangmi sawah tloeng nawh hamla Ciim Muithla oen kaimi ka kaw vai u poen: 29 kutsaimuei tengah a nawn caak awkk te ca u boel; sathi ca u boel; rawn khak ramsa te ca u boel; hutaa oen tawngpa thawlh u boel. He ang thaihu boeih he nangmi lawng sai nawh ham na kuemsuem u atah theen mai poen. Na sa ding u seh.” tila a thut pe u. 30 Laipai thli te a tuih u tih Antiok khaaw la te cet u, tela te a pha u atah oengca thli te vai at la a tun sak tih capat te ahimi kut ah a peek u. 31 Ahimi lawng ca te a tae u vengah thathlue thakawna awl dawngah te a kaw hoe u tangkiik. 32 Judas oen Silas khaw tawngha la a awm hih dawngah ahimi tengah thathluena awl oen thapeekna awl asanhlangla a thui pe hih. 33 Ahih rawi tah te ah te akhoek anoen a awm hih coeng atah oengca thli lawng sading ngaimawng la a thak u tih aka tuihkung thli tengla koep meel hih. 34 (Tede Silas tah te ah te awm hamla kamthlah.) 35 Pawl oen Barnabas tah Antiok khaaw ah asanhlang awm hih tih thlaangtloe hue oen Bawipa awl te a phawng u tih a cang puei u. 36 Te ah te a awm ran hih coeng atah Pawl lawng Barnabas nala te, “Bawipa awl mahih lawng n'thuina khaaw boeih ah te cet silang tah maya manau thli te hip lah sih, metila nuem a awm kai, hiil-adawng lah sih.” a tina. 37 Barnabas lawngtah Johan Mark te ceh puei ham a ngaih, 38 Tede ahih tah te rawi kah biibina aboet toe ah baang poe nawh tih ahih rawi te Pamfilia ah a ceh taak tih a meel koep dawngah Pawl lawngtah ahih te ceh puei hamla theen nawh tila a poek. 39 Te kawngah awl puung hih tih ahih rawi tah pek ahih: Barnabas lawng Mark te a khue tih Saipras la tuisangphaw oen cet hih. 40 Pawl lawngah Silas te a tuek tih oengca thli lawng Pathen kah lungvatna dawngah a nawn u coengah cet hih van. 41 Ahih tah Siria oen Cilicia ben kalawng poe cet tih khrihcabu thli te tha a thlue sak.
1 Pawl tah Derbe kalawng Listra khaaw la te cet, te ah te khrihca thlaang pakhat Timote aka miingna te awm. A manu tah khrihca van tih Judah thlaangphun la awm, tede ana pa tah Krik thlaangphun ni. 2 Listra oen Ikoniam kah oengca boeih lawng Timote te a koeh u. 3 Pawl lawng Timote te ceh puei a ngaih dawngah yahhuivuen a reet sak. Ahih lawng te tila a sai sak te tah te kah aka awm Judah thlaang boeih lawng Timote kah ana pa te Krik thlaang phun tila a ming u dawngah ni. 4 Ahimi lawng a cehna khaaw tawm ah te Jerusalem ah Celtuih thli oen ahaamca thli kah awltloekna phung alam a sai u te a thuicaih pe tih te kah phung te ahimi lawng vai hamla a thui pe u. 5 Tedawngah khrihcabu thli tah oengna ben ah a tha ra u tih khawhin roekk ah puung tare hang. 6 Ahimi te Ciim Muithla lawng Asia ram khuiah awlthang a phawng sak nawh dawngah Frikia ram oen Galati ram la te poe cet u. 7 Misia ramri a pha u veng atah Bitinia ram khuila ceh ham a yawm u, tede Jesuh kah Muithla lawng ahimi te ceh taak u nawh. 8 Tedawngah Misia ram kalawng Troas khaaw la poe cet u. 9 Khaw yiin atah Pawl lawng huhthlaam pakhat a huh tih te kah a huh na dawngah te Macidonia thlaang pakhat pai tih, “Macidonia ram la law u langtah kaimi he m'bawm u lah!” tila a bih. 10 He kah huhthlaam he Pawl lawng a huh coeng atah Macidonia ram la ceh ham pahoei ka kamthlah u, metihtiah te kah aka awm thlaang thli tengah Awlthang Theen thui hamla Pathen lawng n'khue ka ti u dawngah ka kamthlah pahoei u. 11 Kaimi tah Troas kalawng Samotarek la tuisangphaw oen ka cet u tih avuen ah Neapolis ka pha u. 12 Te kalawng ah Macidonia peng, lamhacuek khawpui Filipi la te lan lawngpui kalawng ah ka cet u. Te kah khawpui te tah Rom ram uk khuiah awm. Te ah te khawhin sanhlang ka awm u. 13 Sabbath khawhin ah khawpui avooel ben-kah tuivakeeng la ka cet u, te ah te Judah thlaang thli kah thangthui tunna ahuen awm ai tila ka poek u. Kaimi ka ngawl u tih te ah aka tun hutaa thli tengah awl ka thui pe u. 14 Ahimi timkah hutaa pakhat himbai lingdiik aka yoeikung Tiatira khaaw kah Lidia lawngah kaimi awl te a hutung. Ahih tah Pathen aka bok hutaa pakhat la awm tih Pawl kah awl thui te hutung nguenthuen ham Pathen lawng a thinkaw a awng pe. 15 Amah oen a imkhuikaw thlaang boeih lawng baptisma a huh u coeng atah, “Kai he Bawipa ah oengca taktak la nan poek u atah law u lang ka im ah pah uh.” tila n'ceel u. Tecoeng atah a im la ceh ham kaimi te n'tongnolh u. 16 Hin at atah thangthuina huen la kaimi ka ceh u vengah raaithe aka khueh sal hutaaca khat oen ka huh u. Ahih te raaithe lawngah hailamben ah aka thoeng ham koei te a thui sak thai. Ahih lawng hailamben thaihu kawng thuina rang oen a bawi thli ham tangka moen a dang pe. 17 Ahih te kaimi oen Pawl hu ah law tih, “He kah thlaang thli he tah Tloeng Khoelh Pathen kah tuihyoeihthlaang thli ni! Nangmi lawngah thlawnna te metila na dang u thai ai tite ahimi lawng avan thui ai!” tila paang. 18 Te tila te khawhin sanhlang ahih tah paang khiing, Pawl te thinsabat la a khueh aih dawngah a hu la maang dak tih raaithe nala te, “Jesuh Khrih miing oen ah ahih kaw khui kalawng co loeih kan tina he!” a tina. Tevengca roe ah ahih kaw khui kalawng raaithe te co pahoei. 19 Hutaaca kah a bawi thli lawng ahimi kah tangka dangna tah awm tlaih nawh tite a ming u veng atah Pawl oen Silas te a tuuk u tih rangpui a tunna huen ah aana khuehkung thli tengla te a mawt u. 20 Ahimi lawngah te rawi te Rom ram ukbawi thli tengla a khuen u tih, “He rawi he Judah thlaangphun ni, mami kah khawpui khuiah awlpuungna a sai hih. 21 Ahih rawi lawngah mami kah phung oen aka kalh u phung te a cang puei hih; kaimi tah Rom thlaang la ka awm u dawngah he ang phung he ka do u nawh vetih ka vai u manawh.” tila a thui u. 22 Tevengah thlaangping hue lawngkhaw Pawl oen Silas te sulh a cuuk thil u. Tecoeng atah Rom ram ukbawi thli lawng Pawl oen Silas kah himbai te a pit pe u tih cungpoelh oen bawh hamla awl a peek. 23 A bawh doetthloet u coeng atah ahih rawi te thongim khuiah a uup u, ahih rawi te longkhon buen sak tih piin rap hamla thongim toetkung thli te awl a peek. 24 Awlpeek te a dang coeng atah thong ukbawi lawng te rawi te thongim a khuicok la a uup u tih longkhon a rih khuethluek te a khow dawngah a buen u. 25 Yiinthuem tang yunyan atah Pawl oen Silas lawng thangthui hih tih Pathen koehna laa a sak hih, atloe thongtla thli lawng ahih rawi kah laa sak awl te a hutung u. 26 Tevengah bawtbet khawlai maiah likluei law khuengdeng tih thongim te lungdangsuem toela hinghuen. Kawlkalh maiah thawhka boeih te awng u phengvel tih thongtla thli a khihna thiirui te thlam u boeih. 27 Thong ukbawi te tho hang tih thong thawhka boeih a awng u te a huh vengah thongtla boeih tah co boeih poen cawini tila a poek; tedawngah a samsen te a suh tih amah oen amah te ka ngawn u ai ti. 28 Tede Pawl te paang khalau tih, ‘Namah oen namah nganbawh pe u boel! Kaimi boeih he ah ka awm u!” a tina. 29 Thong ukbawi lawng haithoei a tawh sak coengah thongim khuila te toklek la kuun phai tih Pawl oen Silas kah a khowkung ah rih oen thuen ruila te buekuep. 30 Tecoengah ahih rawi te adaubenla a ceh puei tih, “Ka bawipa rawi, thlawnna ka dangna ham n'tu ka sai ai?” tila a doet. 31 Ahih rawi lawngah, “Bawipa Jesuh te tangna lah, namah oen na imkhuikaw lawng thlawnna na dang u ai.” a tina. 32 Ahih rawi lawngah Bawipa awl te ahih oen a im kah thlaangtloe boeih tengah a thui pe hih. 33 Amah yiin vengah te thong ukbawi lawng ahih rawi te a ceh puei tih a boengha thli te a silh pe; ahih oen a imkhuikaw boeih lawng baptisma te pahoei a dang u. 34 Tecoengah thong ukbawi lawng amah im la Pawl oen Silas te a ceh puei tih caak awkk te a do adan. Tahe atah ahimi lawng Pathen te a tangna u poen dawngah amah oen a imkhuikaw boeih tah awmngaih tangkiik u. 35 Avuen mincang ah Rom thlaang aana khuehkung thli lawng palik bawi thli te awl a peek tih a tuih, “Te rawi te ceh sak loeih” a tina. 36 Tevengah thong ukbawi lawng Pawl nala te, “Bawi thli lawngah nang oen Silas te thlah hamla thlaang avan tuih poen. Tedawngah na cet thai hih poen, ngaimawng ngaitoe la cet hih loeih.” a tina. 37 Tede Pawl lawngah palik bawi nala te, “Kai hih kah thawlhpalhna te hu u nawh de rangpui haiah cungpoelh oen n'bawh u, kaihih he Rom thlaang de lah koen! Tecoengah thong n'thlaak u. Tahe ah ahimi lawng kaihih he ahuepla tuih ham a ngaih u. He tila sai ham tuueng nawh! Rom ram ukbawi thli amami te he la law selang kaihih he n'thlah seh.” a tina. 38 Palik bawi thli lawng he awl he Rom ram ukbawi thli tengah a thui pe u; Pawl oen Silas te Rom thlaang ni tila a yaak u veng atah a rih u. 39 Tedawngah ahih rawi tengla ahimi te cet u tih reenna a bih u, tecoeng ahimi lawngah te rawi te thongim khui kalawng a thlah u tih khawpui khui kalawng ceh loeih hamla reenna a bih u. 40 Pawl oen Silas lawng thongim te a thawh taak hih tih Lidia im la cet hih. Te ah te ahih rawi lawng oengca thli oen huh u tih ahimi tengah thathluena awl a thui pe coengah a ceh taak.
1 Pawl oen Silas te Amfipolis oen Apollonia kalawng poe cet hih tih Tesalon khaaw te a pha, te ah te sinakok bok-im pakhat awm. 2 Pawl lawng a ceh nooek angla sinakok la te cet. Te ah te Sabbath khawhin hin thum khuiah thlaangping oen awl a thui, 3 Caciim dawngkah awl te a thoel alang u tih a thui ngawng u, Messiah tah khawdeng patang a khang vetih duekna kalawng tho koep ai tite a thui caih pe. Pawl lawngah, “Nangmi tengah kavan phawng Jesuh he tah Messiah poen ni.” tila a thui pe. 4 Ahimi timkah khatsut lawngtah a yaakming u tih Pawl oen Silas te a bawngyawng u; tedawngah nu mawtkung thli oen Pathen aka bok Krik thlaang thli broe lawngkhaw a bawngyawng u van. 5 Tede Judah thlaang thli lawngtah a uett a ee u tih lawngteng lawngvai kah boethe halang thlaang thli te a cawi tun tih thlaangping la a tingtun sak. Ahimi lawngah khawpui khuiah cumplaam la tho u, Jason kah im te a muk u tih Pawl oen Silas te thlaangping tengah khuen hamla a tlap u. 6 Tede ahih rawi te a huh u nawh veng atah ahimi lawng Jason oen atloe oengca thli khatsut te akhup athalla avan mawt u tih te khawpui kah aana khuehkung thli tengah, “Khaaw tawm ah rai-acangna aka thoeng sak thlaang rawi te tahe tah mami khaw khuila avan pha poen! 7 tede Jason lawng te rawi te a im ah a thuh. Ahih rawi lawngah sengpahrang sangluel kah phung boeih khaw a phe hih, sengpahrang atloe awm tih Jesuh a miingna tila a thui.” tila paang u. 8 Te tila ahimi lawng a paang u dawngah thlaangping oen khawpui khuiah aana khuehkung thli kah thinkaw a phawh. 9 Aana khuehkung thli lawng Jason oen atloe hue te thlahna ham aamahkhanna tangka ahimi tengah a lawh u, tecoengah a thlah u. 10 Khaw a yiin thuk atah oengca thli lawng Pawl oen Silas te Berea khaaw la pahoei a tuih u. Ahih rawi lawng a pha atah sinakok bok-im la cet hih. 11 Te kah thlaang thli tah Tesalon ah aka awm thlaang thli lak ah a poekna kau bet. Ahimi lawng thinkaw thluembuek oen awl te a hutung u tih Pawl lawng a thui te soeng tang kai nuem ti u tih hin roekk ah Caciim te ahimi lawng athoel alang u. 12 Ahimi timkah thlaang broe lawngah a tangna u tih hinyah koei Krik hutaa thli oen Krik thlaang tawngpa broe lawngkhaw a tangna u. 13 Tede Tesalon ah aka awm Judah thlaang thli lawng Pawl lawngah Berea ah khaw Pathen awl a phawng tite a yaak u vengah tela te law u tih thlaangping te a ceemtuh u tih awl puungna a sai sak u. 14 Tedawngah oengca thli lawng Pawl te tuitunlii keeng la te pahoei a tuih u; tede Silas oen Timote tah Berea khaw ah te awm hih. 15 Pawl aka thak thlaang thli te Aaten khaw toela haih cet u tih Berea khaaw la a meel koep u vengah Silas oen Timote te Pawl amah tengla law yue seh tila awl a uen. 16 Pawl lawng Silas oen Timote te Aaten khaaw ah a ring vengah te kah khawpui tah kutsaimuei oen abehuepla a awm te a huh tih a kaw the tangkiik. 17 Tedawngah Judah thlaang thli oen khawseh, Pathen aka bok Gental thlaang thli oen khaw sinakok ah awl a thui u poepa tih, rangpui tunna huen ah khaw, cet thuk cet hang thlaang thli oen khawhin roekk ah awl a thui u. 18 Epikuras kah cangpueina aka vai thli kah cangpueikung hue oen khaw, Stoik a ti u cuihna te aka cangpueikung hue oen khaw ahih tah oelhtaih u. Ahimi tim-kah khatsut lawngah, “He kah thlaang koeih pavaih nawh lawng he n'tu nuem a thui van ca?” ti u. Thlaangtloe hue lawngah, “Ram tloe kah pathen kawng ni a thui muema he.” a tina u. Pawl lawngah Jesuh kawng oen a thawhkoepna kawng a thui dawngah ni ahimi lawng te tila te a tina u. 19 Tedawngah ahimi lawng Pawl te Areopakas a ti u awlcekna khonsil ah a ceh puei u tih, “Nang lawng akawng alam na thui cangpueina a thaai te ming hamla ka ngaih u. 20 Na thui thaihu thli he kaimi haa yaak atah alakloela awm tih te ang thli thui ngaihna te ming ham ka ngaih u.” a tina. 21 (Aaten khaaw kah thlaang thli oen te ah aka awm kamyin kamlai thli lawngah hukhueng la a yaak u thaihu thaai kawng te doet adap tih awl hutungna la atue atang te a hawna u.) 22 Pawl lawngah te khawpui kah awlcekna khonsil bawi thli haiah pai tih, “Nangmi Aaten thlaang thli he bokna ben ah na tlungmu u tite ka ming. 23 Metihtiah na vang khuiah ka yingyawi tih nangmi lawng na bokna ahuen boeih te ka bueh vengah asawah, “Ming Nawh Pathen Hamla” tila na thut u bokna-thaang pakhat te ka huh. Nangmi lawng ming heet muehla na bok u te ni tahe ah nangmi teng kavan thui. 24 Dilai oen a khuiah aka awm thaihu soeprep saikung, vaan oen dilai kah Bawipa te tah thlaanghing kut oen a sak tempal bok-im ah awm nawh. 25 Ahih tah thlaang boeih tengah hingna oen hillsang yilh oen ah thaihu cungkuem pekung la a awm dawngah mami lawngah ahih ham bii te bi pe tih do adan hamla khatca khaw ngoe mai nawh. 26 Thlaang pakhat dawng kalawng thlaangphun boeih te a sai tih dilai pumpui ah a awm sak. Amah lawngah ahimi kah atue atang oen a awmna ham ahuen amawl te oepsoehla a nuen pe sut poen. 27 Ahih lawng tila a sai he tah ahimi lawng angaai ahuett u tih amah te a tlap u atah a huh thaina ham ni. Ataktang atah Pathen he mami a-u khat oen khaw thla aih nawh. 28 Thlaang pakhat lawng, ‘Amah dawngah mami n'hing u, amah dawngah n'awm u tih n'tatvuet u.’ tila a thui angla te awm. Namami kah tingtoenglung aka thlaak hue lawngkhaw, ‘Mami khaw ahih kah cadil van ni’ tila a thui angla te awm. 29 Mami tah Pathen kah ca-anau la n'awm u dawngah thlaanghing kah cuihna, thoemthaina oen a sai muei asam sui, ngun, lungto kutsaimueime oen ah Pathen he lo u tila mami lawng poek ham awm nawh. 30 Pathen amah te thlaanghing lawng a ming nawh vengkah atue atang te n'tu la khaw poek asam nawh, tede tahe atah khaaw tawm ram tawm kah thlaang boeih kah the-arana boeih te mangthawng taak hamla awl a peek poen. 31 Metihtiah amah lawng a tuek oepsoeh thlaang pakhat rang oen ah dilai pumpui he doengna oen awlcek hamla atue khawhin a nuen poen. Ahih lawng te thlaang te duekna kalawng a thawh sak rang oen thlaang boeih tengah asoengna te a tueng sak!” tila a thui. 32 Duekna kalawng thawhkoepna kawng Pawl lawng a thui te ahimi lawng a yaak u vengah thlaang khatsut lawng ahih te a nuihna u, tede thlaangtloe lawngtah, “He kah akawng alam na thui he yaak koep ham ka ngaih u.” a tina. 33 Tecoeng atah tunna kalawng Pawl te cet poen. 34 Thlaang khatsut tah Pawl oen te bawngyawng u, khonsil ah aka thuum van, ahimi khuikah thlaang pakhat Dionisias lawngkhaw Damaris aka miingna hutaa pakhat oen thlaang-tloe khatsut hue lawngtah a tangna u.
1 He coeng atah Aaten khaaw te Pawl lawng a thawh taak tih Kawrin khaaw la cet. 2 Sengpahrang sangluel Klaudias lawng Rom kalawng ah Judah thlaang boeih te a hek dawngah Itali ram kalawng a yu Priscilla oen haih aka law pek Pontas ram kah Akuila aka miingna Judah thlaang pakhat oen te ah te huh u. Pawl te ahih rawi yuvaa tengah te laiawm, 3 Pawl khaw ahih rawi yuvaa angla saphaw riim-im saina oen tangka a dang van dawngah ahih rawi yuvaa tengah awm tih bii haih a bi u. 4 Ahih lawngah Sabbath khawhin roekk ah sinakok bok-im ah te awl a thui poepa, Judah thlaang oen Krik thlaang thli lawng a yaakming tih a tangna thai hamla te a yawm. 5 Macidonia kalawng Silas oen Timote avan pha hih atah Pawl lawng atue atang boeih te awlthang phawngna ham a hawna tih Jesuh tah Messiah ni tila Judah thlaang thli teng ah acairaula a thui pe. 6 Pawl te ahimi lawng a oel khaklal u tih ahih kawng te athela a thui u vengah a himbai dawngkah laidiik te a khoek thil tih, “Nangmi lawng na ha-ata u atah namami kah thebuh la awm seh! Ka sawah thoeng boel seh. Tahe kalawng tah Gental thlaang thli tengla ka cet poen ai.” a tina. 7 Tedawngah ahimi te a ceh taak tih Pathen aka bok Gental thlaang pakhat Titias Jastas aka miingna im ah awm hamla cet; ahih im tah sinakok bok-im a huben ah te awm. 8 Sinakok bok-im uktemkung Krispas oen a imkhuikaw boeih lawng-tah Bawipa te a tangna u; Kawrin khaaw kah thlaangtloe thli lawngkhaw awlthang te a yaak u, a tangna u tih baptisma te a dang u. 9 Yiin at atah Pawl lawng huhthlaam a huh tih te kah huhthlaam dawngah Bawipa lawng, “Rih boel, toeng tlaih ohla awlthang te poe thui, 10 metihtiah kai lawng kan awm puei dawngah a-u lawngkhaw nang te nganbawh n'yawkk sak manawh, he khawpui khuikah yahawh ngaai he tah kamah kah thlaang la ni a awm u.” a tina. 11 Tedawngah Pawl tah kum at coeng kum vaang te ah te awm tih thlaangping te Pathen awl a cang puei. 12 Akhaia ah Kallio te Rom ram ukbawi la a awm veng atah Judah thlaang thli lawng cawitun u tih Pawl te a tuuk u coeng atah awlcekna yungim la te a khuen u. 13 Ahimi lawngah, “He kah thlaang lawngah phungawl oen a kalh u la Pathen bok ham thlaangping te a suek ahalh!” a tina u. 14 Pawl lawng awl ka thui ai a ti vengah Kallio lawngah Judah thlaang thli nala te, “He he athe ara lumlai pakhat mai aw, tinawh atah thawlhpalhna lumlai pakhat mai kawinih nangmi Judah thlaang thli sawah kawdaw thinsanna oen kaw ka poek ham theen. 15 Tede he tah awllung thli, miing thli oen namami kah phungawl kawngah awlpuungna la a awm dawngah namami lawng thui uh. Kai lawng he ang thaihu thli dawngah awl ka cek manawh!” a tina. 16 Tecoeng atah awlcekna yungim kalawng ahimi te a hek poen. 17 Ahimi boeih lawng sinakok uktemkung Sostenes te a tuuk u tih awlcekna yungim haiah te a bawh u. Tede Kallio lawngtah tete n'tu la khaw ngaai pe nawh. 18 Pawl he Kawrin khaaw ah khawhin sanhlang oengca thli oen a awm coengah ahimi te a ceh taak u tih Priscilla oen Akuila oen ah Siria khaaw la tuisangphaw oen cet haih u. Kenkhria khaaw kalawng tuisangphaw oen a ceh thlan ah awlkamna a sai dawngah a luu te bithliingla a vawkk. 19 Efesa khaaw te a pha u atah Pawl lawngah te ah te Priscilla oen Akuila te a ceh taak. Amah tah sinakok bok-im khuila cet tih Judah thlaang thli oen awl a thui u. 20 Te kah thlaang thli lawngtah asan hlang awm hamla a thlawh u de ahih lawng a thana. 21 Aceh tawm atah, “Pathen lawng angaih atah nangmi tengla ka law koep ai.” a tina. Tecoeng atah Efesa khaaw kalawng tuisangphaw oen cet. 22 Sisaria khaaw te a pha coeng atah Jerusalem la phaat cet tih khrihcabu te a voem a toei, tecoengah Antiok la poe cet. 23 Te ah te asanhlang a awm coeng atah te kalawng Galati peng oen Frikia peng la cet tih oengca boeih te thathluena awl a thui pe. 24 Tevengah te Alekzandria khaaw kah Apollos aka miingna Judah thlaang pakhat te Efesa khaaw la va law. Ahih tah awlthui a thoem tangkiik tih Caciim dawngkah awl te acek aneh la a ming. 25 Ahih lawngah Bawipa kah Lawngpui thuinuetna te a cang heet poen dawngah Jesuh kawng te asoeng akamla a cang puei tih thathluela a thui. Tede ahih lawngah Johan kah baptisma bueng te ni a ming. 26 Sinakok bok-im ah raltheenla awl a thui. Priscilla oen Akuila lawng ahih awlthui te a yaak hih vengah ahih te im la a ceh puei tih Bawipa kah Lawngpui te asoeng tare la a thuicaih pe hih. 27 Tecoengah Apollos tah Akhaia la ceh ham kamthlah, tedawngah Efesa kah oengca thli lawng Akhaia kah oengca thli tengah ca a thut pe u tih ahih he uem u langtah dodan uh a tina. Ahih te a pha veng atah Pathen kah lungvatna rang oen oengca la aka awm hue ham ah bawmcemkung theen koek la awm. 28 Rangpui haiah awl a oelh u vengah Caciim dawngkah awl te ahih lawng a thoel tih Jesuh tah Messiah ni tila a oelh tangtang atah Judah thlaang thli te a taa.
1 Kawrin khaaw ah Apollos a awm veng te ah, te kah peng te a hiil adawng tih Efesa khaaw te a pha. Te ah te hubang thli khatsut te a huh tih, 2 Te atah, ‘Nangmi lawng oengca la na coengg u vengah te Ciim Muithla na dang u poen aw? tila ahimi te a doet. Tevengah ahimi lawng, “Ciim Muithla awm tite a yaak pateng khaw ka yaak u moenih.” ti u. 3 Tevengah Pawl lawngah, “Tetih atah nangmi lawng me ang baptisma na dang u?” a tina. Ahimi lawngah, “Johan kah baptisma ni ka dang u.” a tina. 4 Pawl lawngah, “Johan kah baptisma tah thawlhna aka yut thlaang thli ham ni, ahih lawng Israel thlaang thli tengah, ‘Ka hu ah aka law te na tangna u ham awm’ tila a thui te tah, Jesuh te ni.” a tina. 5 Ahih lawng he awl he a yaak vengah Bawipa Jesuh miing ah baptisma te a dang u. 6 Pawl lawng ahimi sawah a kut a tloeng atah Ciim Muithla te ahimi sawah va law; ahimi lawngah ming nawh awl la cal u tih Pathen awl te khaw a phawng u. 7 Ahimi tah a pum boeih la thlaang paha thlaihih yun tah awm u. 8 Pawl tah sinakok bok-im la te cet tih thla thum khui puet ah raltheenla thlaangping tengah awl a thui, ahimi oen ah awl a thui u pakcal tih Pathen Ram kawng te ahimi lawng a yaakmingna thai ham a yawm. 9 Tede khatsut tah amangkhak thlaang la a awm u dawngah tangna u nawh tih thlaang rangpui haiah Pathen kah Lawngpui along a-im te athela a thui u. Tedawngah ahimi te a ceh taak tih oengca thli te a ceh puei, hin roekk ah Tirannas cacangna im ah awl a thui pe. 10 He tila te kum hih khui a sai tih Asia ram ah aka awm thlaang boeih Judah oen Gental thlaang thli lawng Bawipa awl te a yaak u. 11 Pathen lawng Pawl rang oen ah aka awm nooek nawh kawpoekrai miknoekna te a sai. 12 Ahih kah a hawna kut thuutna baaipeen oen a raang dahna himbaica thli pateng khaw thlaangtlo thli tengla a khuen u vengah ahimi kah tlawhnatna hoeih tih raaithe aka khueh thlaang thli kah a kaw khui kalawng raaithe thli te co u. 13 Judah thlaang khatsut raaithe hek hamla aka yingyo thlaang thli lawngkhaw Jesuh miing te hawna ham a yawm u. Ahimi lawng raaithe thli nala te, “Pawl lawng a phawng Jesuh miing oen ah awl kan peek, co u loeih,” a tina. 14 Judah thlaang Khawsoeih Bawi Skeva capa thli pasarih lawngah he tila a sai u. 15 Tede raaithe lawng ahimi nala te, “Jesuh te ka ming, Pawl khaw ka ming; tede, nangmi he a-u?” a tina. 16 A kaw khuiah raaithe aka awm thlaang te lawngah ahimi te a hah doet thloet tih boeih a taa. Boengha a caak u tih hinaak himbai pawnsawi la ahih im kalawng heeng u. 17 Efesa ah aka awm Judah thlaang oen Gental thlaang boeih lawng he kawng he a yaak u vengah a rih tangkiik u tih Bawipa Jesuh miing te a hinyah tare u. 18 Oengca thli khuikah thlaang broe lawngah law tih ahimi lawng a sai thli te rangpui haiah a phawng u. 19 Caam thoemthaina te aka hawna thlaang broe lawngah amami kah cabu thli te avan khuen tih rangpui haiah te hai dawngah a phum u. Ahimi lawng cabu phu te atoek asam u vengah apum boeih la ngun tangka thong sawm ngaa a pha. 20 He tila te Bawipa awl tah puung tare tih roeng hang. 21 He ang thaihu thli a awm hang coengah Pawl lawngah Macidonia ram oen Akhaia ram kalawng Jerusalem la ceh poe hamla kamthlah. Ahih lawngah, “Tela te ka ceh coengah Rom khawpui la ka cet ai.” ti. 22 Tedawngah amah bawmcemkung thlaang pahih Timote oen Erastas te Macidonia la a tuih, amah tah Asia ram khuiah atue san hlang a hawna. 23 Tevengah te Bawipa kah Lawngpui kawng dawngah Efesa khaaw ah awl puungna awm. 24 Demetrias aka miingna ngun thiidekung lawng rai pathennu Artimis kah tempal bok-im muei-ame thli te ngun oen a sai, ahih kah biibina oen ah biibikung thli lawng tangka a dang u. 25 Tedawngah amah kah bii aka bi thlaang thli oen amah angla bii tloe aka sai thli te khaw a khue tun tih ahimi nala te, “Nangmi u, mami kah khuehtoen thaihu tah he kah biibina dawng kalawng ni n'dang u tite na ming u. 26 Tahe ah Pawl lawng a sai te nangmi lawng na huh thai tih na yaak thai u. Ahih lawngah, ‘Thlaanghing lawng a sai pathen thli he pathen tangtang nawh ni’ tila a thui tih Efesa khaaw oen Asia ram pum kah thlaang boeih te a yaakming sak poen. 27 Tedawngah mami kah biibina he miingthe a dang poen ai tite lakueng ham awm. Te bueng nawh tih Asia ram oen dilai pumpui kah thlaang lawng a bok rai pathennu Artimis kah bawilenna khaw yok vetih ahih kah tempal bok-im khaw apoeila awm poen ai tite lakueng ham awm!” a tina. 28 He awl he thlaangping lawng a yaak u vengah a thin sa soeh u tih, “Efesa khaaw kah Artimis tah bawilen duet ni” tila te paang u. 29 Te tila te khawpui khuiah cumplaam la tho u. Thlaangping lawngah Pawl oen yin aka cet haih Macidonia nam thlaang pahih Kaia oen Aristarkas te a tuuk u tih poei sai laamna-im la te aathamala a mawt u. 30 Pawl amah khaw thlaangping haiah te ceh ham a ngaih de oengca thli lawng ceh sak nawh. 31 Te peng kah aana khuehkung a paya khatsut hue lawngkhaw poei sai laamna-im la te ceh nawh hamla awl a tah u. 32 Te kah thlaangping thli te ngaihangtum luukiil haven la awm u: ahimi timkah thlaang yahawh ngaai lawngtah n'tu kawngah he tila ka tun u ti khaw a ming u nawh dawngah thlaang vaang lawng atloela paang u, atloe thlaangvaang lawng athloekla paang u. 33 Judah thlaang thli lawng Alekzandar te thlaangping hai la a ceh sak tih thlaang khatsut lawngtah ahih lawng ni awlpuungna he a thoeng sak cawini tila a poek u. Tecoeng atah Alekzandar lawng thlaangping te sap duem hamla a kut oen noekna a sai pe tih amah phungtuna awl te thui ham a yawm. 34 Tede ahimi lawng ahih te Judah thlaang ni tila a noek u vengah: “Efesa khaaw kah Artimis tah bawilen duet ni!” tila te khawnoek pahih khui puet ah ruek ruek paang u. 35 Hukhueng atah te kah khawpui ah aana aka khueh cathutkung lawng thlaangping te a duem sak thai. Ahih lawng, “Ka puei, Efesa thlaang thli, Efesa khaaw he tah alenduet Artimis tempal bok-im oen vaan kalawng aka tla thuk lungto cuem te doenkung la na awm u tite thlaang boeih lawng a ming u. 36 A-u lawngkhaw he tah oelh thai manawh. Tedawngah nangmi lawng duem na awm u ham awm tih poek muehla thaihu khat khaw sai ham awm nawh. 37 He rawi lawngah he tempal bok-im te khaw rot nawh tih mami kah pathennu kawng khaw athela thui nawh de ahih rawi he nangmi lawng he la navan khuen u. 38 Demetrias oen bii aka bi haih thlaang hue lawng a-u khaw tayacawi ham a khueh atah, aana khuehkung thli oen awlcekna yung oen ah awlcekna khawhin khaw mami lawng n'khueh u dawngah taya na cawi u thai ta. 39 Tede, apuehla na ngaih u atah pilnam rangpui tunna ah awl cek ham awm. 40 Tihin ah aka thoeng thaihu dawngah he, mami lawng ni awl puungna a thoeng sak tila m'peel hau ai ti he rih ham awm tih he tila a awm he akawng alam khaw atheenla n'thui u tang manawh.” a tina. 41 He awl he a thui coeng atah thlaangping te a meel sak.
1 Awlpuungna te aboet coeng atah Pawl lawng oengca thli te a khue tun tih thathluena awl a thui pe coeng atah sading ngaimawngla an awm uh a tina. Tecoeng atah Makedonia ram la te cet. 2 Ahih lawngah te kah peng te a hiil adawng tih thathluena awl a thui pe, tecoeng atah Akhaia ram la te cet tih te ah te thla thum awm. 3 Siria ram la ceh ham cai de, Judah thlaang thli lawng ahuepla ngawn ham a teeng u tite a ming tih Macidonia ram benla ceh koep hamla te kamthlah. 4 Berea khaaw kah Piras capa Sopatar, Tesalon khaaw kah Aristarkas oen Sekunda; Derbe khaaw kah Kaia; Asia ram kah Tukhikas oen Trofimas mi te Timote lawng a ceh puei u. 5 Ahimi te lamhala cet u tih Troas khaaw ah kaimi te n'ring u. 6 Tawlru thuum nawh Takawi Poei a boeih coengah Filipi kalawng Kaimi khaw tuisangphaw oen ka cet u tih hin ngaa coengah ahimi oen Troas ah ka huh u, te ah te khawhin hin rih ka cam u. 7 Yarh khat khuikah lamhacuek khawhin ah beroep lopaangna thlembuh veel haih hamla ka tun u. Avuen hin ah ceh ham a kamthlah u dawngah Pawl lawng thlaangping tengah yiinthuem toe ah awl a thui. 8 Kaimi ka tunna asaw im han ah haiim te moen a vaang u. 9 Cadawng pakhat Jutikas aka miingna te bangbuerh ah ngawl, Pawl lawng awl a thui lii vengah te ahih tah a mik kuu tih ngaam, ahula tah ip muelh tih im han apathumna kalawng dilai la tla thuk. Ahimi lawngah duek rawkk la a ruh u. 10 Tede Pawl te rum thuk tih ahih te koe a sambai, ayuh ayam tih a pooem. Ahih lawngah, “Lakueng u boel, hing hun he!” a tina. 11 Tecoengah im han la koep cet, takawi a eh tih a caak u. Ahimi oen mincang khawthaih toe asanhlang awl a thui u coengah Pawl te cet. 12 Ahimi lawngah cadawng te sading la amah im la te a ceh puei u tih ahimi boeih tah a ngaimawng u. 13 Kaimi te tuisangphaw oen lamhala Asos khaaw la te ka cet u, te kalawng tuisangphaw oen Pawl oen ah ceh haih hamla ka kamthlah u. Amah tah lan lawngpui kalawng a law dawngah te tila sai ham avan thui. 14 Asos khaaw ah kaimi oen ka huh u tih tuisangphaw dawngah ka luui sak u, tecoengah Mitilin khaw la ka cet u. 15 Te kalawng ah tuisangphaw oen ka cet u tih avuen hin ah Khios tuisanglak ka pha u. Tecoeng awmvai hin atah Samos tuisanglak ka pha u tih awmvaivuen hin atah Militas khaaw te ka pha u. 16 Pawl lawngah Asia ram khuiah poei-apah ham ngaih nawh tih Efesa khaaw te kaan tih tuisangphaw oen ceh phaat ham kamthlah. Acoeng thai atah Pentikos khawhin vengah Jerusalem te aloela pha ham a ngaih. 17 Pawl lawngah Militas kalawng Efesa la thlaang a tuih tih khrihcabu ahaamca thli te ahih oen huh u hamla law u lah seh, tila awl a tah. 18 Ahimi te avan pha u veng atah Pawl lawng, “Asia ram kavan pha peek kalawng nangmi teng ka awm khui puet ah atue khawhin metila ka hawna tite na ming u. 19 Judah thlaang thli lawng ngawn hamla n'teeng poepa u dawngah rai-acangna ka teng ah a pai vengah khaw, Bawipa kah tuihyoeihthlaang la ka awm van angla kawdaw thinsan oen ah bii ka bi. 20 Thlaang rangpui haiah khaw, namami im ah khaw, nangmi kah hoeikhangna koei te khatca khaw thuh phah muehla ka thui tih kan cang puei u te na ming u. 21 Pathen haiah na thawlhna yut tih mami kah Bawipa Jesuh te na tangna u ham Judah thlaang oen Gental thlaang khaw avan at la ngaithuenna rep kan peek u poen. 22 Tahe atah Ciim Muithla kah awl te ka ngaai tih Jerusalem la ka cet ai, te ah te ka sawah n'tu thaihu aka thoeng ai tite ka ming nawh. 23 Ka phana boeih khaaw roekk ah Ciim Muithla lawng ah ngaithuenna m'peek tih thongtlaak oen raina lawng kai he n'ring khuep ti bueng he ni ka ming. 24 Tede ka hingna he n'tu la khaw ka ngaai mai nawh; kai ham avan thloem bii oen ah kai lawng sai hamla Bawipa Jesuh lawng m'peek bii te coeng ham bueng ni ka ngaih. Te tah Pathen kah lungvatna kawng Awlthang Theen phawng ham he ni. 25 Kai lawngah nangmi boeih te khok kan hiil tih Pathen ram kawng te kavan thui u. Tede tahe kalawng tah a-u khat lawngkhaw kai he koep nan hu u tlaih manawh tite ka ming. 26 Tedawngah tihin nangmi tengah ataktang kavan thui; nangmi timkah pakhat khat khaw na ha-ata u mai atah ka sawah tla boel seh. 27 Metihtiah Pathen kah a kamthlahna te thuh phah muehla apum boeih la nangmi tengah biit kavan thui poen. 28 Tedawngah namah oen namah te ngaithuen u langtah nangmi lawng na doen hamla Ciim Muithla lawng m'peek tuu thli te doen-acaang u lah. Pathen lawng amah Capa duekna rang oen amah koe la a khueh Pathen Khrihcabu tuudoen la te awm u lah. 29 Kai ka ceh coeng atah nangmi tim ah metaang tluung thli te law u vetih ahimi lawng tuuca thli te a sa sueng sak manawh tite ka ming. 30 Namami tim kah thlaang khatsut lawngah oengca thli te amami ben la mawt ham a ngaih dawngah hoem awl a thuina atue te a pha ai. 31 Tedawngah ngaithuen uh, kum thum khui puet ah khawyiin khawdaai mikphi oen kan cang puei u te hilh u boel. 32 Tahe tah nangmi he Pathen kah doencangna oen amah kah lungvatna awlthang khuiah kan peek u poen, te lawngah nangmi te n'roeng sak vetih amah kah thlaang boeih hamla a toen oepsoeh yotheen kam-awmna te m'peek ai. 33 Kai lawngah a-u kah sui khaw, ngun khaw, hinaak himbai khaw ka naai nawh. 34 Ka paya laikoei thli oen kamah kah ngoe ngaihna boeih te dang hamla kamah lawng ka kut oen bii ka bi te nangmi lawng na ming u. 35 Mami lawng voetna aka awm thlaang thli te bawmcemna ham bii te bi ham awm tite soeprep boeih ah kan huh sak poen. Bawipa Jesuh amah lawng, ‘Dangna lak ah peekna he yo-akam awm ngaai’ tila a thui awl te hilh u boel.” a tina. 36 Pawl lawng awl a thui coeng atah ahimi oen haih khuklu oen cuengkueng u tih thangthui u. 37 Ahimi boeih lawng rap u tih Pawl te khak a kawp u, a mok u tih sadingla cet ne, a tina u. 38 Pawl lawng ahimi nala te, ‘Kai he koep nan hu u tlaih manawh’ a tina dawngah a kaw the u. Tecoeng atah Pawl te tuisangphaw a awmna la a thak u.
1 Kaimi lawngkhaw ahimi nala te sadingla awm uh ka tina coeng atah ka cet u. Tuisangphaw oen phaat ka cet u tih Kos tuisanglak te ka pha u; avuen hin atah Rodis tuisanglak ka pha u; te kalawng Patara la ka cet u. 2 Te ah te Fonicia la aka cet tuisangphaw pakhat ka huh u tih te oen ah te ka cet u. 3 Saipras tuisanglak a tuengna huen te ka pha u atah adang ben kalawng ka reel u tih Siria la te ka cet u. Turon khaaw atah lan la ka rum u, te ah te tuisangphaw dawngah thaihu a phueih te a sat u. 4 Te ah te oengca thli thlaang khatsut ka huh u tih ahimi tengah hin rih ka awm u. Pawl te Jerusalem la ceh nawh hamla ahimi lawng Muithla kah huham tharana oen a thui pe u. 5 Tede ahimi tengah khawhin hih rih ka awm u coeng atah ka cet u. Ahimi boeih oen a yu a ca thli lawng khawpui adauben tuikeeng toe la n'thak u, te ah te khuklu oen ka cuengkueng u tih ka thangthui u. 6 Tecoeng atah khat oen khat kut ka tuuk u coeng atah kaimi tah tuisangphaw dawng ka luui u, ahimi tah im la koep meel u. 7 Turon kalawng ka cet u tih Tolimas te ka pha u. Te ah te oengca thli oen ka voem ka toei u tih ahimi tengah hin at ka cam u. 8 Avuen khawhin ah ka cet u tih Sisaria khaaw te ka pha u. Te ah te, Jerusalem ah bawmkung la a tuek u thlaang pasarih khuiah aka thuum van awlthang phawngkung Filip im ah ka pah u. 9 Ahih lawng Pathen awl aka phawng a canu hulaa palii a khueh. 10 Te ah te asanhlang ka cam u coengah Akabas aka miingna tawngha te Judia ram kalawng avan pha. 11 Ahih te kaimi tengla law tih Pawl kah cihin te a lawh, a kut oen a khow te a piin tih, “Ciim Muithla lawng tila avan thui: He kah cihin khuehkung he Jerusalem ah Judah thlaang thli lawng he tila a piin vetih Gental thlaang thli kut ah a peek ai.” tila a thui. 12 He awl he kaimi lawng ka yaak u veng atah kaimi oen te kah aka awm thlaangtloe hue lawng Jerusalem la ceh nawh ham Pawl te ka thlawh u. 13 Tede ahih lawng, “Me tih na ti u, he tila na rah u he ka thin navan hoepp sak u! Jerusalem ah piin ayeen ham bueng oepsoehla ka awm nawh, te ah te Bawipa Jesuh kawngah duek ham pateng khaw oepsoehla ka awm poen.” a tina. 14 Kaimi lawng ahih te ka thlawh u thai tlaih nawh, ka toeng u tih, “Bawipa kawngaih hawn seh.” ka tina u. 15 Te ah te kawlkalh ka cam u coeng atah kamami kah thaihu te ka roek ka bah u tih Jerusalem la te ka cet u. 16 Sisaria khaaw kah hubang thli khatsut khaw kaimi oen ka cet haih u tih kaimi lawng ka pahna koei Manason im la te n'ceh puei u. Ahih tah Saipras khaaw kah thlaang, acuekca kalawng oengca la aka awm poen ni. 17 Jerusalem la te kaimi ka pha u atah oengca thli lawng awmngaihcala n'do u. 18 Avuen atah Jeem te huh hamla Pawl oen kaimi haih ka cet u; Khrihcabu ahaamca boeih khaw te ah te awm u. 19 Pawl lawng ahimi te kut a tuuk tih amah kah biibina rang oen Gental thlaang tim ah Pathen lawng a sai thaihu boeih te biit a thui pe 20 Ahih awl te a hutung u coeng atah ahimi boeih lawng Pathen te a thangpawm u. Tecoengah ahimi lawng, “Maya Pawl, Judah thlaangphun toeklek nawh oengca la awm u poen tih ahimi lawng Phungawl a thintlawhna mangkhak te na ming poen. 21 Gental ram ah aka awm Judah thlaang boeih te Mosi kah Phungawl te hoett hamla, a ca thli te yahhuivuen reet nawh ham khaw, Judah phung alam te khaw vai tlaih nawh hamla nang lawng na cang puei tila ahimi lawng a thui u. 22 He la nang navan pha khaw a ming u poen cawini. Te tih atah me tih ni n'ti u lah ai? 23 Kaimi lawngtah he tila na sai ham ka ngaih u. He ah he awlkamna aka sai thlaang palii awm. 24 Ahimi he ceh puei langtah bokna benkah ciimcaihna siing te sai puei van, nang lawngah tangka te kawnn peh, te atah ahimi lawng a luu te a vawkk bling thai ai. He tila na sai atah ahimi lawng nang kawng a thui u te atak tang nawh ni tila thlaang boeih lawng a ming u vetih namah khaw Mosi kah Phung awl angla ni khaw a sak van tite a ming u ai. 25 Tede oengca la aka awm Gental thlaang thli ham tah ahimi lawng kutsaimuei bokna ah a nawn u khatsut caak awkk te caak nawh ham, sathi caak nawh ham, ramsa rawn khak sa te caak nawh ham, ahimi lawngah hutaa tawngpa thawlhna te kuemsuem hamla mami kah awl tloekna ca te ahimi tengah m'pat pe u poen.” a tina u. 26 Tedawngah avuen atah te kah thlaang thli te Pawl lawng a ceh puei tih ahimi oen bokna siing angla ciimcaihna te a sai u. Tecoengah Pawl te Tempal bok-im la cet tih ciimcaihna atue atang he aboet toe ah khawhin meyoeh a awm ai, ahimi pakhat rip ham luciik nawnna atue te mevengah n'sai ai tite oepsoehla a thui pe. 27 Tede khawhin hin rih te aboet tawm veng atah Asia ram kalawng aka law Judah thlaang thli lawng Tempal bok-im khuiah Pawl te a huh u. Ahimi lawngah thlaangping te a ceemtuh u tih Pawl te a tuuk u. 28 Ahimi lawngah, “Israel thlaang thli, n'bawm u lah! Ahih he khaaw tawm ah cet tih Israel thlaang thli khaw, Mosi kah Phungawl oen Tempal bok-im he khaw Oelhtaih hamla thlaang boeih te a cang puei. Tecoengah tahe ah Gental thlaang khatsut te Tempal bok-im khuila avan law puei tih he huen ciim he a hok a aih” tila paang u. 29 (Efesa khaaw kah Trofimas oen Pawl te khawpui khuiah a huh haih u tih Pawl lawng ahih te Tempal bok-im khuila avan law puei tila a poek u dawngah te tila paang u.) 30 Khawpui pum te tokcaliik la tho u, thlaang boeih lawng heeng u, Pawl te a tuuk u tih Tempal bok-im adaubenla aathamala a mawt u. Tempal bok-im thawhka te pahoei a khaih u. 31 Tokcaliik la aka tho thlaangping lawng Pawl te ngawn ham kamthlah u, Jerusalem khawpui pum ah cumplaam la tho khuengdeng u poen tite Rom raalbawipa lawng a yaak. 32 Raalbawipa lawng raalkap bawi oen raalkap thli oen ah aathamala pahoei cet u. Thlaangping lawng raal bawipa oen raalkap thli te a huh u vengah Pawl a bawh u te a toeng u. 33 Raalbawipa te Pawl tengla cet, a tuuk tih thiirui pahih oen a khih sak. Tecoengah ahih lawng, “He kah thlaang he a-u, n'tu thawlhna a sai?” tila a doet u. 34 Thlaangping khatsut lawng atloela paang u tih, khatsut lawng athloekla paang u van. Thlaangping kah paang awl dawngah awlpuungna taktak te Raalbawipa lawng a ming thai nawh dawngah Pawl te raaltoetna vawngup khuila khuen hamla raalkap thli te awl a peek. 35 Thlakkung te a pha tawm u atah thlaangping te tlungsa soeh aih tih raalkap thli lawng Pawl te a pawm hang u. 36 Thlaangping lawng a hu ah avan vai u tih, “Ngawn uh.” tila te ruek paang u. 37 Raalkap thli lawng Pawl te raaltoetna vawngup khuila a khuen tawm u atah Raalbawipa nala te, “Na tengah awl ka thui thai ai aw?” a tina. Raalbawipa lawngah, “Krik awl na cal thai aw?” a tina tih, 38 “Tetih atah n'hu vengah thlaang thonglii awva oen ceem la a thawh puei tih ramhum rammawl la aka ceh puei Iyipt thlaang te nang nawh macawi?” a tina. 39 Pawl lawng awl a thung pe tih, “Kai tah Judah thlaang ni, Cilicia ram, Tarsas khawpui miing thaang kah thlaang ni. Reenna oen thlaangping tengah awl n'thui sak lah.” a tina. 40 Raalbawipa lawng awl a thui sak. Te atah Pawl te thlakk dawng pai tih thlaangping te sap duem ham a kut oen noekna a peek. Thlaangping lawng awl a phah sap u coeng atah ahimi tengah Hebru awl la Pawl lawng awl a thui pe.
1 “Maya manau thli oen a pa hue, nangmi haiah kamah ka phungtuna awl he hutung u lah!” a tina. 2 Ahimi tengah Hebru awl la a thui pe te a yaak u vengah awl a phah dingri u; Pawl lawngah: 3 “Kai he Cilicia ram Tarsas khaaw kah Judah thlaang ni, tede, Jerusalem ah he ka roeng hang tih Gamaliel kah sengcamoe la ka awm. Kai lawng mami patuer hue kah Phungawl oen thuituen-na te ka dang tih tihin ah he kah aka awm nangmi boeih angla Pathen tengah ka tlungmu van. 4 Kai lawngah he kah lawngpui aka vai thlaang thli te ka heem ka tek tih ka ngawn. Kai lawng hutaa khaw tawngpa khaw ka tuuk tih thong ah ka thlaak. 5 Kai lawng awltak ka thui tite Khawsoeih Bawi oen awlcekna Khonsil ah aka thuum boeih aka mingkung sausi la awm. Ahimi lawngah Damaskas khaw kah Judah thlaang thli tengah a thut pe u ca te khaw kai lawng ka lawh, tecoeng atah te kah thlaang thli te tuuk hamla, ahimi te thiirui oen khih tih dan tat ham Jerusalem la koep van khuen hamla te ka cet.” a tina. 6 Damaskas khaaw la ka cet tih ka pha tawm veng hingthun ah te vaan kah aangna pakhat lawng n'thue ploeng tih ka teng ka vaai te aang rawngtheng. 7 Dilai ah ka tlim tih awl pakhat lawng, ‘Sawl, Sawl! N'tu ah kai he nan heem nan tek aih?’ tila a thui awl te ka yaak. 8 Kai lawngah, ‘Bawipa, nang te a-u?’ ka tina. Ahih lawngah, ‘Kai tah nang lawng nan heem nan tek Nazaret khaaw kah Jesuh ni’ tila avan thui. 9 Kai oen ka cet haih thlaang thli lawng aangna te a huh u de ka tengah awl aka thuikung kah awl te tah ya u nawh. 10 Tevengah kai lawng, ‘N'tu ka sai ai, Bawipa!’ tila ka doet tih Bawipa lawngah, ‘Tho langtah Damaskas la cet, te ah te nang lawng na sai ham koei Pathen lawng avan khueh thaihu boeih te avan thui ai.’ tila avan thui. 11 Te kah aangna lawng ka mik avan tueng sak tlaih nawh dawngah ka cet haih ka puei thli lawng Damaskas khaaw la te a kut oen m'mawt u. 12 Te khawpui khuiah Ananias aka miingna thlaang pakhat awm, ahih tah bokna ben ah tlungmu tih mami kah Phungawl te a vai, te ah aka awm Judah thlaang boeih lawng a hinyah tangkiik u. 13 Ahih te law tih ka tengah pai, ‘Ka manau Sawl, na mik tueng loeih seh!’ n'tina. Teveng roe te ah ka mik tueng pahoei tih ahih te ka huh. 14 Ahih lawng, ‘Mami patuer hue kah Pathen lawng amah kawngaih te ming hamla amah kah aka doeng tuihyoeihthlaang te huh sak ham oen ah amah awl roe oen a thui awl te yaak hamla nang he n'tuek poen. 15 Metihtiah nang lawng na huh tih na yaak boeih te thlaang boeih tengah thui hamla nang he a hih ham aka mingkung sausi la na awm ai. 16 Tahe ah n'tu na ring khiing? Tho langtah baptisma te dang loeih, amah tengah thangthuina rang oen na thawlhna boeih te sil loeih’ tila avan thui. 17 “Jerusalem la te koep ka cet tih Tempal bok-im khuiah ka thangthui vengah huhthlaam pakhat ka huh, 18 te kah huhthlaam dawngah Bawipa te ka huh tih ahih lawngah, ‘He kah aka awm thlaang thli lawng kai kah kawng alam na thui he a do u nawh dawngah Jerusalem he ceh taak loeih, uelh tlaih boel.’ tila avan thui. 19 Tevengah kai lawng, ‘Bawipa, Sinakok boeih ah ka cet tih nang aka tangna thlaang thli te ka tuuk tih ka bawh te ahimi lawng atheenla a ming u. 20 Tecoengah nang kah sausi la aka awm Stefen te a ngawn u vengah te kamah khaw ka awm, ahih te ngawn ham ka ngaih puei van tih ahih aka ngawnkung thli kah hi-acuu te ka khoem pe.’ ka tina. 21 Bawipa lawngah, ‘Cet loeih, athla hlang la aka awm Gental thlaang thli tengla nang he kan tuih ai.’ n'tina” tila a thui pe. 22 He toe ah Pawl lawng awl a thui te tah thlaangping lawng a hutung u de, tecoeng atah awl a huer u tare tih, “Te kah thlaang te thip uh! Ngawn loeih! Ahih te hing paa nawh ni!” tila paang u. 23 Ahimi lawngah paang u, a him-bai thli te a thlek u tih laidiik te vaan la a heh u. 24 Judah thlaang thli lawng paang u tih a oel khaklal u te ming ham ah ahih te raaltoetna vawngup la khuen ham oen ah cungpoelh oen tam hamla a raalkap thli te awl a peek. 25 Tede ahih te cungpoelh oen bawh hamla ahimi lawng a piin u vengah te Pawl lawng te kah aka pai raalkapbawi nala te, “Rom thlaang pakhat he awl na cek thlan ah na bawh praap he upadi phung poen aw?” a tina. 26 He awl he raalkapbawi lawng a yaak vengah raalbawipa tengla cet tih, “Ahih he Rom thlaang ni! Metila ka sai ai na ti?” tila a doet. 27 Te atah raalbawipa lawng Pawl tengla cet tih a doet, “Nang he Rom thlaang aw? Van thui lah.” a tina. Pawl lawngah, “Oeih, kai tah Rom thlaang ni” a tina. 28 Raalbawipa lawng, “Kai lawngtah tangka ka peek tih Rom thlaang la ka coengg” a tina. Pawl lawngah, “Kai tah Rom thlaang roe la ka thang” a tina. 29 Tevengah Pawl te awl ka doet ai aka ti thlaang thli te pahoei nawng u; Pawl he Rom thlaang ni tite raalbawipa lawng a ming vengah thiirui oen a khih hau te caalla lakueng. 30 Judah thlaang thli lawng Pawl he thawlh a peel u te acek aneh la raalbawipa lawng ming ham a ngaih; tedawngah avuen hin atah Pawl a piinna thiirui te a thlam pe, khawsoeih ahaamca thli oen Khonsil ah aka thuum thlaang thli te ngawlh tun ham awl a peek. Tecoeng atah Pawl te ahimi haiah a pai sak.
1 Pawl lawng Khonsil ah aka thuum thlaang thli te a bueh rangpatang tih, “Ka puei, Israel thlaang thli! Kai tah tahe toe ah khaw ka sakna dawngah athe atheen mingna thinkaw he Pathen haiah ciim.” a tina. 2 Khawsoeih bawi Ananias lawng Pawl tengah aka pai thlaang thli nala te, ‘Pawl te a kaa ah bel pingmal uh,’ a tina. 3 Tevengah Pawl lawng ahih nala te, “Nang, abawk vuut vawngpui, Pathen lawng namah te m'bel malcal seh! Nang lawngah kai he Phungawl angla awl cek hamla te ah te na ngawl van de kai he bel hamla awl na peek dawngah Phungawl te na phe poen!” a tina. 4 Pawl tengah aka pai thlaang thli lawng ah te, “Nang lawngah Pathen kah Khawsoeih Bawi na sal na phaam!” a tina u. 5 Pawl lawng, “Ka puei, Israel thlaang thli, ahih he Khawsoeih Bawi ni tite ka ming nawh dawngah ni. Caciim lawngah, ‘Na thlaang phun ukkung te athela thui boel,’ tila a thui ta” a tina. 6 Te kah thlaangvaang te Sadusi thlaang tih thlaang vaang te tah Farasi thlaang ni tite Pawl lawng a huh vengah awlcekna Khonsil ah te paang tih, “Ka puei, Israel thli, Kai he Farasi thlaang pakhat ni, Farasi thlaang thli kah capa ni. Thlaang duek thli tho koep ai tite ngaiuepna ka khueh dawngah ni he ah he awl n'khee u.” tila a thui. 7 He tila a thui coeng khoeng atah Farasi thlaang thli oen Sadusi thli te awl puung u tih pahih la pek u. 8 (Sadusi thlaang thli lawngtah thlaang duek thli he koep tho tlaih nawh tih vanthlaang khaw, muithla khaw awm nawh tila a thui u; tede Farasi thlaang thli lawngtah te ang thli boeih te awm tangtang tila a tangna u.) 9 Ahimi kah awlpuungna awl te san tare hang tih Farasi thlaang timkah cangpueikung khatsut te pai u tih: “He kah thlaang dawngah he a thawlhna khat khaw ka hu u nawh! Muithla pakhat lawngkhaw, vanthlaang lawngkhaw a thui pe thai mai ta” tila a oelh khaklal u. 10 Awlpuungna te solaan tare hang tih Pawl te petpet a doek u hau mai ai ti tih lakueng u. Tedawngah raalkap thli te thlaangping tengla a tuih tih, ‘Pawl te ceh puei u langtah raaltoetna vawngup la khuen uh’ a tina. 11 Te kah khawyiin ah te Bawipa tah Pawl tengah pai tih, “Rih boel! Jerusalem ah he kai ham sausi la na pai angla Rom khawpui ah khaw he tila na pai hun ai.” a tina. 12 Avuen mincang atah Judah thlaang khatsut te tun huh u tih, khaw a khaan u. Ahimi lawngah Pawl te ngawn thlan roekk atah caak awkk khaw caak nawh hamla awl a taap u. 13 He tila khaw aka khaan thlaang thli te sawmlii thlai awm u. 14 Tecoengah ahimi lawng khawsoeih ahaamca thli oen Judah thlaang ahaamca thli tengla cet u tih, “Kaimi lawng Pawl he ka ngawn u thlan khui roekk tah thaihu khat khaw caak nawh ham athe ka phoei u tih awl ka taap u poen. 15 Tedawngah nangmi oen Khonsil ahaamca thli lawng ahih kawng te acek aneh la doet tare ham aka ngaih angla te sa u langtah nangmi tengah Pawl te avan khuen u thai ham Rom raalbawipa te yaak sak uh. He la he avan pha thlan ah ngawn hamla oepsoehla ka awm u ai” tila a thui pe u. 16 Tede Pawl ngannu kah a capa lawng te tila a teeng u kawng te a yaak; raaltoetna vawngup la cet tih Pawl tengah a thui pe. 17 Tecoengah Pawl lawng raalbawi pakhat te a khue tih, “Raalbawipa tengla cadawng he cet puei, pakhat khat thui pe ham a khueh cawini” a tina. 18 Raalbawi lawng ahih te raalbawipa tengla a ceh puei tih, “Thongtla Pawl lawng, ‘he kah cadawng lawng he nang tengah awl thui ham a khueh, ceh puei,’ a ti dawngah kavan law puei” a tina. 19 Raalbawipa lawng a kut ah a mawt tih atloela a ceh puei, “Kai tengah n'tu awl thui ham na khueh?” a tina. 20 Ahih lawngah, “Khonsil ah aka thuum thlaang thli lawng, Pawl kawng he acek aneh la ming heet ham aka ngaih angla te sa u silang Pawl te Khonsil ah van khuen thuk ham thangvuen ah bih hamla Judah aana khuehkung thli a kaw vai u poen. 21 Ahimi awl te ngaai pe boel; metihtiah thlaang sawmlii thlai lawng thuh u tih ahih te a mah u. Ahimi lawng Pawl te a ngawn thlan khui caak awkk khaw caak nawh ham awl a taap u poen. Ahimi lawng sai hamla oepsoehla awm u poen tih nang kah awl ni doek a lamtoen u poen” a tina. 22 Raalbawipa lawng, “Ka tengah navan thui he a-u khat tengah khaw thui boel.” a tina tih cadawng te koep a tuih. 23 Tecoengah raalbawipa lawng raalkapbawi pahih te a khue tih, “Raalkap yahnih, marang raalkap sawmsarih, cai aka pawm raalkap yahnih te khue langtah n'tu yiin khawnoek pakua ah Sisaria la ceh ham kamthlah oepsoeh uh. 24 Pawl lawng a cit ham marang pakhat ah roekbah pe langtah ram ukbawi Filik tengla ading asuekla pha sak uh” a tina. 25 Tecoengah raalbawipa lawng adangkah angla ca a thut tih a pat: 26 “Klaudias Lisias lawng Hinyah koei ram ukbawi Filip tengah ca kavan pat: 27 Judah thlaang thli lawng he kah thlaang he a tuuk u tih a ngawn dalh u. Ahih he Rom thlaang ni tila ka ming u dawngah raalkap thli oen ka cet u tih ka thlawn u. 28 Ahimi lawng thawlh a peel u te ming ham ka ngaih tih amami kah awlcekna Khonsil la ka ceh puei. 29 Ahih lawngah duekna koei oen thongtlaakna koei khat khaw sai nawh tite ka huh; ahih he thawlh a peel u tah amami kah phungawl kawng alam ni. 30 Ahih he ngawn hamla a teeng u tite ka yaak vengah, nang tengah tuih pahoei ham ka poek. Ahih he taya aka cawi hue te nang tengah taya cawi ham ka thui pe poen. Na sa ding seh.” tila a thut pe. 31 Raalkap thli lawng a thui pe angla te a sai u. Ahimi lawngah te yiin ah te Antipatris toela Pawl te a ceh puei u. 32 Avuen hin atah cai aka pawm raalkap thli oen raalkap yahnih te tah raaltoetna vawng up la meel u tih marangcit raalkap thli lawng Pawl te poe a ceh puei u. 33 Ahimi lawngah Sisaria te a pha u atah ram ukbawi te ca a peek u tih ahih kut ah Pawl te a tloeng pe u. 34 Ram ukbawi lawng ca te a tae coeng atah Pawl nala te, ‘Nang he ame ram kah’ tila a doet. Cilicia ram kah thlaang ni tite a ming coeng atah, 35 Ahih lawngah, “Nang te taya aka cawikung thli avan pha u vengah nang kah lumlai he kavan thui badai” a tina. Tecoengah Pawl te ram ukbawi amah kah yungimpui ah khueh tih raalkap thli lawng toet hamla awl a peek.
1 Khawhin hin ngaa a awm coeng atah Khawsoeih Bawi Ananias tah Judah thlaang khatsut hue oen thlaangcal Tertullas oen haih Sisaria la cet u. Ahimi te ram ukbawi Filik tengla cet u tih Pawl te taya a cawi u. 2 Pawl te a khue u tih thlaangcal Tertullas lawng adangkah angla thawlhpeelna te a thui: “Hinyah koei ram ukbawi! Nang lawngah cuihna oen nan mawt u dawngah roeproeina asanhlang la awm tih ram theenna ham ah tlaih pan ham angoena boeih te na tlaih poen. 3 Ame huen ah khaw te tila na sai dawngah kaimi ka awmngaih tih kan uem u tangkiik. 4 Nang kah atue atang te asan-hlang hawna ham ka ngaih nawh, tede atoila ka thui he na hutung hamla reenna kavan bih. 5 Kaimi lawng he kah thlaang he thlaang teekyaakkung la ka huh u: ahih lawng he dilai pum kah Judah thlaang thli tengah awlpuungna a sai tih Nazarin bu kah mawtkung la awm, 6 Tempal bok-im khaw hok-aih hamla a yawm vengah te ka tuuk u. (Kaimi lawng kamami kah Phungawl angla awl cek ham ka kamthlah u, 7 tede raalbawipa Lisias law tih ahih he kaimi kut dawngkah a rot. 8 Tecoengah ahih he taya aka cawikung thli te nang tengla law ham awl a peek.) He kah thlaang he nang lawng awl na doet atah kaimi lawng thawlh ka peel boeih te namah lawng na ming badai.” a tina. 9 Judah thlaang thli lawng-khaw ruek kawhuui u tih thawlh a peel he asoeng tang tang ni tila a thui u. 10 Ram ukbawi lawng Pawl te awl thui ham noekna a peek tih Pawl lawngah, “Nang tah he thlaangphun sawah kum san hlang awlcekkung la na awm poen tite ka ming, kamah phungtuna awl he na haiah nan thui sak dawngah ka awmngaih. 11 Jerusalem la Pathen bok ham ka cet, hin ha thlaihih pateng awm nawh hun tite nang lawng na ming thai ai. 12 Tempal bok-im khuiah thlaang pakhat khat oen ka tawh ka thaam u khaw, khawpui khui ame ang huen ah khaw, Sinakok bok-im khuiah khaw, kai lawng thlaangping ka ceemtuh tite Judah thlaang thli lawng hu manawh. 13 Tahe ah ahimi lawng ka sawah thawlhpeelna he asoengna tangtang te nang tengah van thui u tang manawh. 14 Ka sai tangtang tila nang tengah ka thui tah he ni: Ahimi lawng soeng nawh a ti u, Lawngpui te ka vai tih kamami patuer hue kah Pathen te ka bok. Tede kai lawngkhaw Mosi kah Phungawl oen tawngha thli kah cabu dawng a thut boeih te ka tangna. Thlaangthe khaw, thlaang theen khaw, duekna kalawng tho koep ai tite ahimi angla kai lawngkhaw ka ngaiuep van. 15 Ahimi lawngah thlaang boeih he thlaangdoeng oen thlaangthawlh khaw duekna kalawng tho ai tila Pathen ah ngaiuepna a khueh u te ang van ni kai lawngkhaw ka khueh van. 16 Tedawngah Pathen oen thlaanghing haiah athetheen mingna kawpoek ciim khueh hamla ka sai thai khui tah ka sai poepa. 17 Kum san hlang Jerusalem kalawng athlana la awm coengah ka thlaangphun thli hamla tangka thak ham, luciik nawn hamla te la te ka cet. 18 Bokna siing angla ciimcaihna te ka sai boet coengah Tempal bok-im khuiah luciik thawthuengna ka sai vengah kai he ahimi lawng n'huh u. Tevengah te ka tengah thlaangping khaw awm nawh, awlpuungna khaw awm nawh. 19 Tede, te ah te Asia ram kalawng aka law Judah thlaang khatsut tah awm; ahimi lawng kai he oelhtaih ham a ngaih u atah tayacawi hamla amami man nang tengah a law u ham awm de ta. 20 Tetih atah he kah aka awm thlaang hue lawngah Khonsil ahaamca thli haiah ka pai vengah kai lawng ka sai thawlh a huh u te van thui u seh. 21 Kai lawng ahimi haiah ka pai vengah: ‘Thlaangduek thli he tho koep ai tila ka tangna dawngah tihin ah nangmi lawng taya nan cawi u he.’ tila ka thui pakhat bueng he nawh atah atloe a awm atah van thui u seh.” a tina. 22 Filik lawngtah lawngpui a ti u te a ming heet dawngah awl thuina te a toeng sak tih, ahimi nala, ‘Raalbawipa Lisias avan pha vengah nangmi kah Lumlai he kavan tloek badai.” a tina. 23 Ahih lawng Pawl aka toet raalkapbawi te ahih he atheenla toet, tede ahoerpoengla awm sak langtah angoe angaih thli te khaw a paya thli lawng pe seh.’ a tina. 24 Khawhin meyoeh yun nuem a awm coeng atah Filik he a yu Judah nu Drusilla oen va law hih. Ahih lawng Pawl te a khue tih Pawl lawng Jesuh Khrih ah oengna kawng a thui te a hutung hih. 25 Tede Pawl lawngah theenna kawng, mah oen mah kuemsuemna kawng oen Awlcekna Khawhin a lawna kawng te a thui vengah Filik lawng caalla a rih tih, “Tahe tah cet de ne. Ka hoeng vengah kan khue sak koep badai.” a tina. 26 Te ah te ahih lawngah Pawl lawng he tangka m'peek ai tila a ngaiuep, tedawngah ni ahih lawng Pawl te a khue sak poepa tih awl a thui puei. 27 Khaw kum hih a awm coeng atah Filik te Porcias Fitas lawng avan thaw tih ram ukbawi la awm. Filik lawng Judah thlaang thli te a kaw hoe sak ham a ngaih dawngah Pawl te thong khuiah poe a khueh.
1 Fitas te hin thum a awm coeng atah te ram la te avan pha tih Sisaria kalawng Jerusalem la cet, 2 te ah te khawsoeih ahaamca thli oen Judah thlaang mawtkung thli lawng Pawl thawlh a peelna te a thui u. 3 Pawl te lawngpueng ah ngawn ham khawkhanna a khueh u dawngah ahih te Jerusalem la khuen pe ham Fitas tengah reenna a bih u. 4 Fitas lawng, “Pawl he Sisaria thong khuiah awm, kai khaw tela te yue ka meel koep ai. 5 Namami kah mawtkung thli he kai ka ceh vengah law u selang tah te kah thlaang lawng te thawlhpalhna a sai atah taya cawi u seh” a tina. 6 Fitas te ahimi tengah khawhin reet nuem, hin ha nuem awm tih tecoengah Sisaria la te cet. Avuen hin atah awlcekna ah ngawl tih Pawl te van law puei uh a tina. 7 Pawl te avan pha atah Jerusalem kalawng aka law Judah thlaang thli lawng Pawl te a veel khoep u tih thawlh broela a pup u, te tila thawlh a pup u te soeng tang tang tila ahimi lawng thui u thai nawh. 8 Tecoengah Pawl lawng amah phungtuna awl te a thui: “Kai lawngah Judah thlaang thli kah Phungawl te khaw Tempal bok-im khaw, Rom sengpahrang sangluel sawah khaw thawlhpalhna ka sai nawh.” a tina. 9 Tede Fitas lawng Judah thlaang thli kah haitheen peek te a ngaih dawngah Pawl nala te, “Jerusalem la cet tih he kah lumlai he ka haiah thui ham na ngaih aw?” a tina. 10 Tevengah Pawl lawng, “Sengpahrang sangluel kah awlcekna yungim ah ni thui ham ka ngaih. Namah lawng na ming angla Judah thlaang sawah thawlhpalhna ka sai nawh. 11 Kai lawng phungawl te ka phe tih pakhat khat ka sai dawngah duekna koei dantatna te awm kawinih loeih hamla kavan bih manawh. Tede ahimi kah thawlh peelna he asoeng nawh atah a-u lawngkhaw kai he ahimi kut ah pe thai manawh. Sengpahrang sangluel tengah ayuu ka khaan ai.” a tina. 12 Tecoeng atah Fitas lawng amah kah khawkhankung thli oen a doet u coeng atah, “Sengpahrang sangluel tengah ayuu khaan ham na ngaih dawngah ahih tengla na cet ai.” a tina. 13 Te kalawng a awm khueng coeng atah Sengpahrang Akrippa oen Berni tah Fitas tengah uemna awl thui pe ham Sisaria la cet hih. 14 Te ah te khawhin san hlang a awm hih coeng atah Fitas lawng Pawl kawng te sengpahrang tengah a thui pe: “He ah he Filik lawng thong a thlaak pakhat awm, 15 Jerusalem la ka ceh veng te ah Judah thli kah khawsoeih ahaamca thli oen Judah thlaang ahaamca thli lawng thawlh a peel u tih ahih te dan tat ham ka tengah avan bih u. 16 Tede kai lawngah, taya a cawi u thlaang pakhat te taya cawikung thli oen haitang u tih thawlh a peelna boeih dawngah amah oen amah phungtuna awl a thui thlan atah a-u khat khaw thlaang kut ah peek hamla Rom thlaang thli kah phung alam nawh ni ka tina. 17 Tecoengah he la he ahimi a law u vengah uelh muehla avuen hin ah awlcekna yungim ah ka ngawl tih te thlaang te ka khue sak. 18 Ahih taya aka cawi hue te pai u tih a thui u, tede ka poekna angla athe arana khat khaw peel u tangtang nawh. 19 Ahimi boeih lawng awlpuungna a thui he tah amami kah bokna kawng oen aka duek tangte Jesuh aka miingna thlaang kawng te mai ni; tede Pawl lawngtah ahih te hing tila a thui. 20 He kah awlpuungna kawng he metila awlceet ka yaak thai lah ai tite ka ming nawh, tedawngah Pawl te Jerusalem la cet tih thawlhpeelna thli he te ah te thui sak ham na ngaih aw ka tina. 21 Tede Pawl lawng ayuu akhaan; ahih lawngah amah te atheenla toet ham oen ah amah kah lumlai te Sengpahrang sangluel lawng awl van tloek seh tila a bih. Tedawngah Sengpahrang sangluel tengla tuih thlantoe ahih te atheenla toet ham awl ka peek.” a tina. 22 Akrippas lawng Fitas nala te, “Ahih kah awl thui te kamah lawng yaak rep ham ka ngaih a tina. Fitas lawngah, “Thangvuen ah na yaak badai” a tina. 23 Avuen khawhin atah Akrippa oen Berni tah a bawilen phawlip oen ruep-awm tangkiik la thoekcau u heet tih raalbawi thli oen khawpui khuikah mawtkung ahaamca thli oen ah rangpui tunna impui la te haih kuun u. Fitas lawng awl a thlaw a peek tih Pawl te avan law puei u. 24 Fitas lawng, “Akrippa Sengpahrang oen he ah aka awm boeih Judah thlaang boeih boeih, he kah aka awm lawngkhaw, Jerusalem ah aka awm lawngkhaw, he kah na huh u thlaang he kai tengah taya a cawi u. Ahimi lawng, ahih he hingpaa nawh ni tila paang u. 25 Tede ahih lawngah duekna koei dantat ham tangtang a sai khat khaw ka hu nawh. Tede amah lawngah Sengpahrang sangluel tengah ayuukhaan ham a ngaih tih te la te tuih hamla ka poek poen. 26 Tede ahih kawng he Sengpahrang sangluel tengah acek aneh la ca thut ham ka khueh nawh. Tedawngah he ah he nangmi boeih oen awlpui la Sengpahrang Akrippa haiah kavan law puei! Ahih kah lumlai he thuikhaan coeng atah cathut koei khat khaw awm ai aw ka ti mai dawngah ni. 27 Metihtiah thongtla thlaang pakhat taya a cawina akawng alam te atheenla tueng sak ohla tuih ham tah alawng-ala awm nawh.” tila a thui.
1 Akrippa lawng Pawl nala te, “Namah kawng te na thui thai poen.” a tina. Pawl lawng a kut te a phawh, tecoengah adangkah angla amah oen amah phungtuna awl te a thui: 2 “Sengpahrang Akrippa! Tihin na haiah, Judah thlaang thli kah thawlh peelna boeih dawngah kamah oen kamah ka phungtu u he yotheen tang poen ni tila ka poek. 3 He tila ka poek he nang lawngtah Judah thlaang thli kah phung oen awlpuungna te atheenla na ming dawngah ni. Tedawngah lunghoeihla ka awl thui he na hutung ham reenna kavan bih. 4 Kai he ka camaw veng kalawng metila ka awm ka ih ti he Judah thlaang boeih lawng a ming u. Kai he lamhacuek ah kamah ram khuiah khaw ka sak tih tecoengah Jerusalem ah ka awm te ahimi lawng a ming u. 5 Ahimi lawng kai he asan hlang m'ming u poen, acuekca veng kalawng kai tah kamami kah bokna ben ah arai koek Farasi thlaang pakhat la ka awm te a ngaih u atah a thui u thai. 6 Tahe veng awlcek ham he ah ka pai he tah Pathen lawng kamami kah patuer hue tengah awlkamna a sai ngaiuepna te ka khueh van dawngah ni. 7 Te ngaiuepna te tah kamami thlaangphun paha thlaihih lawng yiin, daai Pathen a bok u vengah dang hamla a ngaiuep u te ni. Hinyah kap Bawipa, te kah ngaiuepna kawngah ni Judah thlaang thli lawng kai he taya n'cawi u! 8 Pathen lawng thlaangduek a thawh sak ti he he kah aka awm thlaang thli lawng n'tu kawngah tangna ham awm nawh na ti u? 9 Nazaret khaaw kah Jesuh kawng te oelhtaih thai khui tah ka sai ai tila kamah roe lawngah kaw ka poek. 10 Jerusalem ah te tila te ka sai. Kai lawng khawsoeih ahaamca thli tengkah saithaina aana te ka dang tih Pathen kah thlaang yahawh hlang mai te thong ah ka thlaak; Ahimi te a ngawn u vengah khaw ngawn ham roe la kai lawng ka ngaih puei van. 11 Sinakok bok-im ah khaw ahimi te dan ka tat sak u tih amami kah oengna te hoett sak hamla ka yawm. Ahimi sawah ka thin sa soeh tih ahimi te heemtek hamla ram tloe kah khawpui toela ka pan. 12 “Te tila ka kamthlah dawngah khawsoeih ahaamca thli tengkah awlpeekna aana oen Damaskas khaaw la te ka cet. 13 Hinyah kap Bawipa, te tila hingthuntaang lawngpueng ka ceh vengah, khawmik lak ah aka aang ngaai aangna pakhat lawngah kamah khaw, ka cet haih thlaang thli khaw vaan kalawng n'thue rawngtheng u. 14 Kaimi boeih te dilai ah ka tlim drek u tih, ‘Sawl, Sawl! N'tu kawngah kai he nan heem nan tek aih ca? Vaitaw taal lawngah amah khuehkung kah cungpoelh te a peh atah a tam doetthloet angla namah oen namah te nganbawh na pe u khoeng’ tila Hebru awl la avan thui te ka yaak. 15 Kai lawngah, ‘Bawipa, nang te a-u?’ ka tina. Tevengah Bawipa lawng, ‘Kai tah nang kah heem atek Jesuh ni. 16 Tede tho langtah pai hang lah. Nang he kamah kah tuihyoeihthlaang la khueh ham na tengah ka phumpho. Tihin ah kai nan huh he khaw hailamben kah kan huh sak ham koei te khaw thlaangtloe tengah aka thui ham ni. 17 Kai lawngah nang he Israel thlaang thli kut dawng kalawng khaw, Gental thlaang tengah khaw kan tuih vetih ahimi kut dawng kalawng khaw kan thlawn ai. 18 Nang lawng ahimi te a mik na daai sak vetih yiinna kalawng aangna la, Seitan kah tharana khui kalawng Pathen tengla na mang sak ai, te dengah ni ahimi lawng kai he oengna rang oen ah thawlh khawdawp ngaaina te a khueh u vetih Pathen kah thlaangtuek thli tim ah ahuen amawl a dang u van ai’ tila avan thui” a tina. 19 “Tedawngah, Sengpahrang Akrippa, vaan kah huhthlaam ka huh te ngailaakna muehla ka awm ma-nawh. 20 Lamhacuek la Damaskas oen Jerusalem ah, tecoengah Judia ram pum oen Gental thlaang boeih tengah ahimi lawng thawlhna te yut u tih Pathen benla a mang u hamla, ahimi lawng a thawlh yutna te tueng sakna thaihu sai hamla ka phawng pe. 21 He kawng dawngah ni Judah thlaang thli lawng Tempal bok-im ah ka awm vengah te n'tuuk u tih ngawn hamla a yawm u. 22 Tede tihin toe ah Pathen lawng n'bawm, tedawngah thlaang yitt thlaangbo nangmi boeih haiah he ka pai tih awl ka thui. Tawngha thli oen Mosi lawng a thui oepsoeh aka thoeng ham koei thaihu te ni kai lawng ka thui: 23 te tah Judah thlaang thli oen Gental thlaang thli tengah thlawnna aangna te phawng hamla, Messiah lawng patang a khang coengah duekna kalawng lamhacuek aka tho koep thlaang la awm ai a ti te ni ka thui.” a tina. 24 Te tila Pawl te amah oen amah a phungtu u vengah Fitas lawng, “Pawl na cuih taal poen! Cuihna asangsang na cangna lawng ng'ngau sak poen.” a tina. 25 Pawl lawngah, “Bawipa, ka ngau moenih! Aka soeng awltak ni ka thui. 26 Sengpahrang Akrippa! Nang lawng he kah thaihu kawng he na ming dawngah ni na tengah tong-aa ohla ka thui. He tah ahuep ahel, akel acawng ah aka thoeng thaihu nawh tih he ang thli boeih he nang lawng na ming tangte poen ni tite ka tangna. 27 Sengpahrang Akrippa, tawngha thli kah ca thut te na tangna aw? Nang lawng na tangna tite ka ming!” a tina. 28 Akrippa lawng Pawl nala te, “Kai he atue soetca khuiah khrihca la ka coengg sak thai ai tila na poek aw?” a tina. 29 Pawl lawngah, “Atue soetca ah khaw, asan hlang ah khaw, he kah thiirui he tah thui muehla nang oen tihin ah ka awlthui aka hutung nangmi boeih he kai angla awm van ham Pathen tengah ka thangthui!” a tina. 30 Tecoeng atah sengpahrang khaw, ram ukbawi khaw, Berni oen atloe boeih te tho u tih, 31 a ceh u coeng atah ahimi khat oen khat lawngah, “He kah thlaang lawng he duekna koei oen thongtlaakna koei khat khaw sai nawh de ni.” tila a thui u. 32 Te atah Akrippa lawng Fitas nala, “Sengpahrang sangluel tengah ayuukhaan nawh kawinih he thlaang he thlah hamla awm de ni.” a tina.
1 Kaimi he Itali ram la tuisangphaw oen ceh ham awl a khueng u coeng atah, “Sengpahrang sangluel kah Raalkapbu” a ti u Rom raalkapbu kah raalbawi Julias kut ah Pawl oen atloe thongtla khat sut te a peek u. 2 Asia ram kah tuisangphaw duemdawngna roekk ah aka cet tawm Adramitiam khaaw kah tuisangphaw pakhat dawngah ka luui u tih te oen ah ka cet u. Macidonia ram Tesalon khaaw kah Aristarkas khaw kaimi oen haih ka cet u. 3 Avuen atah Sidon ka pha u. Julias lawng Pawl te a reen dawngah a paya thli tengla a ceh sak tih angoe te avan peek u. 4 Te kalawng kaimi ka cet u de khawthlii lawng n'haang khoep u dawngah yilh uepna ben Saipras tuisanglak ben ka lawng ka cet u. 5 Tecoengah Cilicia oen Pamfilia ayaawnna tuueng tuitunlii ah te ka law u phai tih Licia peng kah Mira khaaw te ka pha u. 6 Te ah te Alekzandria kalawng aka law Itali ram la aka cet ham koei tuisangphaw pakhat te raalbawi lawng a huh tih te dawngah te n'luui sak u. 7 Khawhin sanhlang ahiing ayaaila ka cet u tih aboetna atah ahar abat la Nidas khaaw te ka pha u. Te ben kalawng ah ceh hamla yilh lawng m'maam khoep u tih yilh uepna ben Krit tuisanglak ben kalawng ka cet u tih Salmon Ngocou tengah te poet ka cet u. 8 Tuikeeng ah te poe ka cet u tih Tuisangphaw duemna Huen theen a ti u te ahar abat la ka pha u. Te tah Lasea khawpui kalawng thla aih tlaih nawh. 9 Te ah te asan hlang ka cam u tih Thawlh thlamna Khawhin khaw athloei poen dawngah tuisangphaw oen khawlawng thla ceh ham arih awm poen. Tedawngah Pawl lawng ahimi te ngaithuenna awl a thui pe: 10 “Nangmi u, he kalawng ah mami khawlawng ceh he arih ham awm tangkiik tila ka huh; thaihu thaiha khaw, tuisangphaw khaw, hingna toe khaw sungduehna awm khuengdeng ai.” a tina. 11 Tede raalbawi lawng tuisangphaw kungmah oen aka mongkung kah awl te a ngaai tih Pawl kah awlthui tah tula khaw toeh pe nawh. 12 Te kah tuisangphaw duemna huen te sikding khui puet ah awm ham theen nawh; tedawngah thlaang yahawh lawngah a coeng thai atah Finik la te cet ngala tih te ah te sikding khui puet awm ham a ngaih u. Finik he tah Krit tuisanglak kah tuisangphaw duemna huen la awm tih khawtlaak akakk ben oen khawtlaak aluen ben la te maang. 13 Akakk ben kalawng yilh te hiip hiip law tih amami kah kamthlahna angla coeng thai ai a ti u dawngah thiilungdue te a doek u tih Krit tuisanglak te ayoeii rep la poe ka hawng u tih ka cet u. 14 Tede raih a awm coeng atah, “Khawcuuk Aluen ben khawthlii” a ti u te tuisanglak ben kalawng ah thlii khuengdeng. 15 Tuisangphaw te khawthlii lawng avan haang tih khawthlii tim ah tuisangphaw te hoei tloel la awm poen, tedawngah ka thlah sut u tih khawthlii lawng a yawng aroeh mai poen. 16 Kauda tuisanglak ayiitca akaak ben te ka pha u atah khawthlii te avan oel tih hoeikhang. Te ah te tuisangphaw dawngkah lowng te ahar abat la ka soem ka sai u. 17 Ahimi lawngah lowng te ahanla a thooeng u coeng atah tuisangphaw dawngah rui oen a ven haih tih rap a piin u. Libia tuikeeng tuidang kah divin langdai te a tawh moek hau ai a ti u dawngah baiyaan te a doek u tih tuisangphaw te khawthlii lawng a khuenna roekk ah a ceh sak u. 18 Thlipui te a thawh toengtoeng dawngah avuen atah tuisangphaw dawngkah thaihu te thoem a voeih u. 19 Athum hin atah tuisangphaw dawngkah a hawna pawmcunghaiha thli te khaw thoem a voeih u. 20 Khawhin sanhlang khawmik khaw, aisi thli khaw, ka hu u tlaih nawh, khawthlii te duem nawh tih atlawhla thlii toengtoeng. Aboetna atah ka deem u hun ai tila ka ngaiuep u tlaih nawh poen. 21 Te kah thlaang thli te caak awkk khaw caak mueh la asanhlang a awm khiing u poen dawngah Pawl lawng ahimi nala te, “Nangmi u, ka awl thui te nangmi lawng navan ngaai u kawinih Krit tuisanglak kalawng ah te n'cet u nawh vetih he tila sung adeuhna oen arai asa he n'tawng u nawh sui. 22 Tede tahe ah na kaw boet sak u boel! Nangmi khuikah a-u khat khaw ha-ata manawh; tuisangphaw bueng ni n'sung ai. 23 Metihtiah n'thlem yiin ah kai he a thlaang la khuehkung, kai lawng ka bok Pathen kah vanthlaang te ka tengla law tih, 24 ‘Pawl, lakueng boel! Sengpahrang sangluel haiah na pai ngaikhoek ai. Pathen he na sawah atheen dawngah nang oen aka cet haih thlaang boeih kah hingna te a thlung poen’ tila avan thui. 25 Tedawngah nangmi lawng na kaw boet sak u boel! Metihtiah kai tah Pathen te ka uepna khak tih a thui angla te coengg ngai ai. 26 Tede tuisanglak pakhat khat kah tuikeeng ah ngoen tah n'khoe ngai badai” a tina. 27 Hin ha thlailiina yiin atah kaimi te Meditarenian tuitunlii yunyan ah thlipui lawng n'yawng u. Yiinthuem tang yun atah tuisangphaw dawngkah biibikung thli lawng lan benla voehvoeh yoeii poen tite a ming u. 28 Tedawngah ahimi lawng tuitahna dawngah thaihu rih te a baang u tih a thlaak thuk vengah tuilii te pe yakhat pakul dung tila a ming u; a awm bawt coengah ahimi lawng a tah koep u vengah pe sawmkua dung tila a ming u. 29 Tuisangphaw lawng lungsong a sut hau ai a ti u dawngah tuisangphaw kah ahu ben kalawng thiilungdue palii te a thlaak thuk u tih thangthuina oen khawthaih ka ring u. 30 Te vengah te tuisangphaw dawngkah biibikung thli lawng tuisangphaw te ceh taak sut ham a yawm u; ahimi lawngah a hai ben kalawng thiilungdue aka thlaak angla te sa u tih lowng te tui dawng la a thlaak u. 31 Tede Pawl lawngah raalbawi oen raalkap thli tengah a thui pe tih, “Tuisangphaw dawngah biibikung thli a awm nawh atah na loeih u tang manawh” a tina. 32 Tedawngah raalkap thli lawng lowng piinna rui te a tloek tih lowng te tuidang la a thlaak dingkang. 33 Khaw thaih tawm atah ahimi boeih te caak awkk te caak hamla a thui pe tih, “Nangmi buhmueh buhpawng la na awm u te tahe tah hin ha thlailii law poen, he veng khui puet ah n'tu khat khaw na ca u nawh. 34 Na hinglung thloetna ham caak awkk ca u de. Na luu dawngkah samthaam pakhat pateng ha-ata manawh.” a tina. 35 He tila a thui pe coengah Pawl lawng takawi te thoem a lawh tih ahimi haiah Pathen tengah awmngaih awl a thui, takawi te a eh tih a caak. 36 Ahimi tah a ngaai mawng u tih caak awkk khaw a caak u. 37 Tuisangphaw dawng aka awm boeih te thlaang yahnih sawm sarih paruk ka awm u. 38 Thlaang boeih lawng caak awkk te ahahla a caak u coeng atah tuisangphaw te a yaanghoep betna ham sangvut cang boeih te tuitunlii ah batt a voeih u. 39 Khaw athaih hang atah tuisangphaw dawngkah bii aka bi thlaang thli lawngah ame hue kah tuitunlii keeng ti khaw ming u nawh de tuitunlii acaawng ben ah langdai te a huh u tih acoengg thai atah te ah te tui aboenna ah tuisangphaw te duem sak ham a poek u. 40 Tedawngah thiilungdue a kiingna rui thli te a tloek u tih tuilii ah a thlaak u, tecoengah tuisangphaw hoei-alena tapaih piinna rui te a thlam u. Tecoengah tuisangphaw te yilh lawng a khuen thaina ham tuisangphaw a hai ben ah baiyaan te a tai u tih langdai benla te cet u. 41 Tede tuisangphaw lawng divin langdai a tawh tih tingtai sut; tuisangphaw a hai ben tah divin a tawh moek tih a tat thai tlaih nawh vengah te ahu ben te tah tuiphu tuilet lawng avan deng tih rek phawngg poen. 42 Thongtla thlaang thli te tui yo vetih lan la heeng boeih ai a ti dawngah raalkap thli lawng ngawn hamla kamthlah u. 43 Tede raalbawi lawng Pawl te deem sak ham a ngaih tih te tila sai nawh ham a khaang pe. Lamhacuek ah tui aka yo thai hue te tuisangphaw dawng kalawng sungpung tih lan la tui yo ham awl a peek; 44 Thlaangtloe hue lawngtah thingdeep khaw, tuisangphaw dawng-kah aka tlot thingboeng thingdeep te khaw ka tuuk u tih ahimi hu ah te ka yo u. He tila he kaimi boeih tah ading apuek la lan ka pha u.
1 Kaimi boeih asuengcala lan ka pha u atah te kah tuisanglak te Malta tuisanglak tila ka ming u. 2 Te kah aka awm khawkung thlaang thli lawng kaimi te n'reen tangkiik u. Khaw tlan tih khaw sik, ahimi lawng hai avan toeih u tih hai ka aawm u. 3 Pawl lawng thing pok at a lawh tih a toeih, tevengah hailing a yaak tih ruul pakhat te co, a kut te a lengven pe tih hoer bat. 4 Te kah khawsakung thlaang thli lawng Pawl kut ah ruul a bat te a huh u vengah, “Ahih he thlaang aka ngawn cawi ni, tuitunlii dawng kalawng loeih de Khaw lawngah hing sak manawh” tila a thui u. 5 Tede Pawl lawng ruul te hai dawngah a khek tih nganbawh khaw ya nawh. 6 Ahimi lawngtah phiing kueng ai, tihnawhtah tlim pahoei vetih duek ai tite ni a ring u mai poen. Tede asanhlang a ring u coeng atah ngan bawh tehca khaw a yaak nawh te a huh u veng atah ahimi te a kawpoek thawleng u tih, “Ahih he pathen ni” tila a thui u. 7 Te kalawng ayoeica ah tuisanglak ukkungbawi Pubilia kah lo te awm. Ahih lawng kaimi te beroep lopaangla n'khue u tih khawhin hin thum khui kaimi te buh n'kok u. 8 Pubilia kah ana pa te tlo tih ral, thimthe khaw tlo. Pawl te ahih a awmna la te cet, a kut te a sawah a tloeng pe coeng atah hoeih. 9 He tila a awm te a yaak u veng atah tuisanglak kah thlaangtlo te law u tih boeih hoeih u. 10 Ahimi lawng kutdo moen m'peek u, ka ceh u vengah khaw lawngpueng ah kaimi kah angoe koei thaihu te tuisangphaw dawng avan khueh u. 11 Thla thum coeng atah, Alekzandria kalawng aka law, te kah tuisanglak ah sikding khui puet aka awm “Pathen Caphee” a ti u tuisangphaw oen ka cet u. 12 Sirakas khawpui te ka pha u tih hin thum ka cam u. 13 Te kalawng ka cet u tih Rekium khawpui te ka pha u. Avuen hin atah akakk ben kalawng khaw thlii tih hin hih khuiah Puteoli khawpui ka pha u. 14 Te ah te oengca thli awm u tih ahimi te yarh khat tah awm puei hamla n'ceel u. Te kalawng tah Rom khawpui la ka cet u. 15 Rom khawpui kah oengca thli lawng kaimi kawng te a yaak u vengah Appias khawpui kah Thaihu yoeihna oen Reh-im Pathum a ti u khawpui toe ah te n'do u. Pawl lawng ahimi te a huh vengah Pathen tengah awmngaih ciil a thui tih a tha la khuek awm. 16 Rom khawpui te kaimi ka pha u atah Pawl te raalkap pakhat lawngah a toet tih amah poek ah awm thai na te a peek u. 17 Hin thum a awm coengah Pawl lawng te kah aka awm Judah thlaang mawtkung thli te tun a khue. Ahimi te a tun u atah, Pawl lawng ahimi nala te, “Ka puei Israel thlaang thli, kai lawngah mami Judah thlaang puei khaw, mami kah patuer hue teng kalawng n'dang u phung khaw ka oelh ka taih nawh de Jerusalem thongim ah n'thlaak u tih Rom thlaang thli kah kut dawngah m'peek u. 18 Kai he Rom thlaang thli lawngah awldoetna a khueh u coeng atah kai lawngah duekna koei thaihu khat khaw ka sai nawh te a huh u tih thlah ham a ngaih u. 19 Tede Judah thlaang thli lawngah kai he thlah ham te ngaih u nawh, ka thlaangphun thli te thawlh peel ham nawh de, sengpahrang sangluel tengah thui khaan nawh atah coeng thai nawh. 20 He dawng mai ah ni nangmi oen huh u tih thui hamla kan khue u. Kai he thiirui oen he tila n'khih u he tah Israel thlaang thli lawng a ngaiuep u tih a ring oel u thlaang kawng dawngah ni.” a tina. 21 Ahimi lawngah, “Nang kah kawng alam he Judia ram benkah capat khat khaw ka hu u nawh, te ben kalawng awlthang aka van khuen khaw, nang kawng te athela aka thui boenhui khat khaw law nawh. 22 Tede peng tawm ah he bu he athela a thui u dawngah namah kah poekna te kaimi lawng yaak ham ka ngaih u.” a tina. 23 Tedawngah ahimi lawng Pawl oen khawhin a tuntah u tih thlaang broe te tuntahna khawhin ah Pawl a pahna im la te cet u. Mincang kalawng thlemben toe Pathen ram kawng awlthang te a thui pe, tecoengah tawngha thli kah cathut oen Mosi Phungawl khuikah te athoel alaang pe tih Jesuh kawng te ahimi lawng a yaakming na ham a thui pe. 24 Thlaang khatsut lawngtah ahih kah awl thui rang oen a yaakming u de thlaangtloe hue lawngtah tangna nawh. 25 Ahimi te oelh u khiing tih Pawl lawng he awl pakhat he a thui pe coeng atah meel u; a thui pe awl tah: “Ciim Muithla lawng tawngha Isaiah rang oen ah na patuer hue tengah a thui te soeng tangtang! 26 Ahih lawng a thui tah, “Cet langtah he kah thlaang thli he thui pe lah: Na yaak u vetih na hutung u suide, na yaakming u tangtang manawh; Nangmi lawng na bueh u vetih na dan u suide na hu u tang manawh, 27 metihtiah he thlaangphun thli kah thinkaw lungbui tah mong sut tih ahimi lawng a haa te a buem khoep tih a mik khaw a yiin khoep u. Te tila sai u nawh kawinih ahimi kah mik lawng a huh sui tih a haa thli lawng a yaak sui, ahimi kah thinkaw lawng a yaakming sui tih Ka tengla va meel koep u sui, ahimi te ka hoeih sak sui,’ tila Pathen lawng a thui te ni” a tina. 28 Pawl lawng awlcuina la a thui tah: “Tedawngah Pathen kah thlawnna awlthang tah Gental thlaang thli te a peek poen tite ming uh. Ahimi lawng a hutung u ai!” a tina. 29 (Pawl lawng he awl he a thui coeng atah Judah thlaang thli te awlpuung kaa caan doe ah meel u.) 30 Pawl lawng im a vat tih kum hih khui te ah te awm. Amah tengla aka law boeih te atheenla a do. 31 Ahih lawng thincakna oen yalpawla Pathen Ram kawng te a thui tih Bawipa Jesuh Khrih kawng te a cang puei.
1 Khrih Jesuh kah tuihyoeihthlaang, Pathen lawng Awlthang Theen phawng hamla n'tuek tih n'khue celtuih Kai Pawl lawng ca kavan pat. 2 Te Awlthang Theen tah yan veng kalawng Pathen lawngah tawngha thli rang oen awl a kam tih Caciim dawngah a thut tangte te ni. 3 Te tah Pathen Capa mami kah Bawi Jesuh Khrih kawng te ni. Thlaanghing pumsa ben atah ahih he Devid cadil la awm. 4 Pathen la a awmna oen ciimna ben atah huham tharana oen duekna kalawng a thawhna rang oen ah Pathen Capa la a awm te a tueng sak. 5 Ahih rang oen Pathen lawng celtuih la awmna m'peek tih thlaangphun boeih lawng oengna oen awlngaaina a khueh thaina ham oen ah mawt ham kai he n'tuih. 6 Te kah Rom khawpui ah aka awm nangmi khaw Jesuh Khrih kah a koe la awm ham Pathen kah khuena ah na thuum u van. 7 Tedawngah Pathen lawng a lungna tih a thlaang la coengg ham a ceel Rom khawpui ah aka awm nangmi boeih tengah he ca he kavan pat. Pathen oen Bawipa Jesuh Khrih kah lungvatna oen ngaimawngna tah nangmi tengah awm hawn seh. 8 Dilai pum ah nangmi kah oengna kawng te a yaak boeih u poen dawngah Jesuh Khrih rang oen Pathen tengah lamhacuekla awmngaih ciil ka thui. 9 A Capa kawng Awlthang Theen te ka thinkaw lungbui boeih oen ka thui tih a bii ka bi he soeng tila Pathen tah kai kah sausi la awm. Ka thangthui roekk ah nangmi kan poek yoeyah te Pathen lawng a ming. 10 Pathen kawngaihna a awm atah vai at mai khaw nangmi tengla law ham Pathen tengah ka bih. 11 Metihtiah nangmi oen muithla ben yotheenna te veel haih tih tharana awm sak ham ka ngaih dawngah nangmi te huh ham ka ngaih tangkiik. 12 Ka thuingaihna tah kai kah oengna lawng nangmi te bawm ham tih nangmi kah oengna lawng kai he bawm patoeng ham ni. 13 Ka maya manau boeih, he he van ming u lah, nangmi tengla law ham ka kamthlah taitu poen de thaihu pakhat khat lawng n'kang poepa. Atloe Gental thlaang tim ah kawthawna ka khueh sak angla nangmi tim ah khaw kawthawna aka khueh awm sak ham ka ngaih tangkiik. 14 Metihtiah thlaangphun boeih tengah laiba ka khueh; Thlaang cuih oen thlaang cuih nawh tengah khaw, cathoem oen cathoem nawh tengah khaw bii bi ham laiba ka khueh. 15 Tedawngah ni Rom khawpui ah aka awm nangmi tengah khaw Awlthang Theen phawng ham ka ngaih tangkiik. 16 Awlthang Theen tah ka uepna rapsaat; aka tangna thlaang boeih thlawnna hamla Pathen kah tharana ni. Lamhacuekla Judah thlaangphun ham tih tecoengah Gental thlaangphun hamla khaw awm. 17 Pathen lawng thlaanghing he metila thlaangdoeng la a khueh tite Awlthang Theen lawng a tueng sak. “Pathen lawng thlaangdoeng la a khueh thlaang te lawngtah oengna oen hing ai.” tila Caciim lawng a thui angla te doengna tah acuekca veng kalawng aboet toe oengna rang oen ni. 18 Pathen kah thinsana lawngtah thlaanghing boeih kah athe-arana oen thawlhna boeih te a oel tih vaan kalawng va tueng poen. Te athe-arana lawng awltak te yaakming thai nawh ham a kang khoep. 19 Thlaanghing lawng Pathen he ming thai koei la awm ti he aciimla a tueng poen dawngah Pathen lawng ahimi te dan a peek; metihtiah Pathen amah roe lawng a tueng sak ni. 20 Pathen lawngah dilai a suen cuek veng kalawng huh thai nawh la aka awm dungyan a tharana oen dungyan Pathen la a awmna tah aciimphanla tueng poen. Pathen kah thaihu sai dawngah ahimi lawng a huh thai. Tedawngah thlaanghing lawng a thawlhna te thuh phah thai manawh. 21 Ahimi lawng Pathen te a ming u de thangpawm koeila thangpawm u nawh, awmngaih ciil khaw thui u nawh. Ahimi kah poekna boeih tah apoeila coengg, a lung mong sut u tih yiinna oen betoet. 22 Ahimi lawng te ka cuih ti u, tede ahimi tah cuih u nawh. 23 Dungyan aka hing Pathen te bok ohla aka duek thai koei thlaanghing, va oen ramsa oen ah aka cawlh thaihu hing oen aka lo u kutsai mueime te lat a bok u. 24 Tedawngah Pathen lawng te ang thlaang hue te amami kawngaih tuiileh kap thaihu sai ham a peek tih khat oen khat sawah yahpawh koei thaihu a sai u. 25 Ahimi lawng Pathen kawng awltak te thailatna awl oen a thaw u. Saikung Pathen te bok ohla a sai thaihu te a bok u tih bii a bi pe u. Saikung Pathen te ni thangpawm yoeyah ham a awm: Amen. 26 Tedawngah Pathen lawng thlaang-hing he yarau pawh koeila aka awm pumsa cuk-halhna dawngah a thlah phaam sut. Hutaa hue lawng pateng khaw asoeng akam awmna ham koei hutaa phung te asoeng nawh la a hawna u tih khat oen khat thawlhna a sai u. 27 Tih van toengtoengla tawngpa hue lawngkhaw asoeng akam la hutaa oen pawlneengna te a hoett tih pumsa cuk-halhna dawngah tawngpa lawng khat oen khat yahna koei thaihu the thawlhna a sai u dawngah thaihu the a sai phu te ahimi lawng a dang u van. 28 Pathen kawng cuihna taktak te thlaanghing lawng a thinkaw khuiah khueh ham a ngaih u nawh dawngah aciimcaih nawh thinkaw lungbui khueh ham Pathen lawng a thlahphaam. Tedawngah sai koei nawh athe thaihu a sai u. 29 Ahimi tah soeprep athe-arana athe thaihu cungkuem, apueh ngaihna, thawlhna oen betoet u tih uett-eena, thlaang ngawnna, tawhsina, thailatna, kawnehna oen be u. 30 Rengse kawkhah phukhue awl thuina, khat oen khat thuitheetna, Pathen thina, thekhana, oekthloenna, halangna, athe sai ham poekna thli oen ah nu apa awl khaw ngaai u nawh. 31 Khawboe ramlang theen u nawh, awlkaa cak u nawh, thlaangtloe sawah reenna, lungna khueh u nawh. 32 He tila aka hing thlaang thli tah duek ham awm tila Pathen phungawl lawng a thui te a ming u. Tede he ang thaihu amami kah sai bueng ohla thlaangtloe lawng a sai u te khaw a kawtlaak puei u.
1 Tedawngah ka paya, a-u nang khaw thlaangtloe sawah awl na cek vengah namah oen namah te na thlipdah u thai nawh. Metihtiah thlaangtloe awl na cek vengah ahimi angla nang lawngkhaw thawlhna na sai van dawngah namah oen namah ni awl na cek u. 2 He tila thaihu the aka sai thli Pathen lawng awl a cek vengah asoeng thaihu a sai tite na ming u. 3 Tede ka puei, thlaang lawng thaihu the a sai tih awl na cek vengah nang lawng awl na cek thlaangtloe angla namah khaw na awm van. Pathen kah awlcekna kalawng ka loeih ai tila na poek aw? 4 Tihnawhtah Pathen kah alentloe reenna, khawdawp ngaaina, kawdawna thli te tula khaw na sak u nawh aw? Pathen kah lungvatna te thawlh yutna ham lawngpui nuehkung ni tite ataktangla na ming u. 5 Tede nangmi tah na thin thah u tih thawlh na yut u nawh: tedawngah Pathen kah thinsana oen aka doeng awlcekna Khawhin a pha vengah namami kah dantatna abo tare ham ni na sai khoeng u. 6 Pathen lawng thlaang boeih te amami kah a sai taring ah kutdo a peek ai. 7 Thlaang khatsut lawng thaihu theen te a sai u tih ruep-awmna, hinyahna oen dungyan hingna te a tlap u; ahimi te Pathen lawng dungyan hingna te a peek ai. 8 Thlaang khatsut lawngtah amami ham bueng a poek u tih asoeng thaihu te a hoett, thaihu the saina te a vai u; Pathen lawng thinsana oen thinlingna te ahimi sawah a hok pe ai. 9 Athe-arana aka sai boeih lawng khawdeng lungmana oen patang tlawhna te a dang u ai, Lamhacuekla Judah thli lawng a dang vetih Gental thli lawngkhaw a dang van ai. 10 Tede thaihu theen aka sai boeih tengah Pathen lawng ruep-awmna hinyahna oen ngaimawngna a peek ai. Lamhacuekla Judah thlaang hue lawng a dang vetih Gental hue lawngkhaw a dang van ai. 11 Pathen lawngtah thlaang boeih avanpila awl a cek ai. 12 Gental hue lawng Mosi kah Phungawl khueh u nawh; a thawlh u atah phungawl ohla ha-ata u. Judah hue lawng Phungawl a khueh; A thawlh u atah Phungawl angla awlcekna a dang u. 13 Thlaanghing he Pathen haiah thlaangdoeng la a awmna tah Phungawl te yaakna rang oen nawh tih Phungawl lawng sai a ti te saina rang oen ni. 14 Gental hue lawng Phungawl khueh u nawh; Tede Phungawl khueh u nawh mai cakhaw Phungawl lawng sai a ti te lungbui cuihna oen a sai veng roekk-ah ahimi ham Phungawl la awm. 15 Phungawl lawng sai a tite a thinkaw ah thut la awm poen tila amami kah khawboe ramlang lawngah a tueng sak. Amami kah poekna lawngah meveng ah nuem tah ahimi te a pai puei vengah soeng tila amami kah athetheen pekbona thinkaw oen a tueng sak. 16 Tedawngah Awlthang Theen ka phawng angla awlcekna Hin ah Pathen lawng Jesuh Khrih rang oen thlaanghing boeih kah ahuepla poekna thli te awl a cek ai. 17 Tetih atah nangmi Judah hue metila? Judah thlaangphun la ka awm tila namah oen namah na ti u; nangmi tah phungawl te na uepna u tih Pathen te na oekthloenna; 18 Pathen lawng nangmi sai sak ham a ngaih te na ming u tih aka soeng te tuek ham khaw Phungawl dawngkah na cang u poen; 19 Mikpum thli te lawngpui nuehkung, yiinna khuikah thlaang thli ham aangna la ka awm na ti u; 20 Thlaang halang thli thuituenkung oen n'tu khaw aka ming nawh thlaang thli cangpueikung la ka awm na ti u; Phungawl dawngkah aka soep cuihna oen awltak te aka khueh la na ngaai u. 21 Thlaangtloe tah na cang puei u, n'tu kawngah namah oen namah tah na thuituen u nawh? “Huen boel” tila phung tah na thui u; namami tah na huen u aw? 22 “Samphaih boel” na ti u; namami tah na samphaih u? Kutsai pathen tah na tuii na leh u? tede kutsai pathen bok-im kah thaihu te na rot mangkhak u? 23 Pathen kah phungawl ka khueh na ti u tih na oekk u van, tede phungawl na phe u tih Pathen te yah na bai u? 24 Caciim lawngah, “Nangmi Judah thlaang thli kawng dawngah Gental thlaang lawng Pathen te thaang athe sak,” tila a thut. 25 Nangmi lawng Phungawl na vai u atah yahhuivuen na reet u te aphu awm tang tang, tede Phungawl te na vai u nawh atah yahhuivuen aka reet nawh oen na lo u. 26 Yahhuivuen aka reet nawh Gental thlaang lawng Phungawl lawng a kuek te a vai atah Pathen lawng yahhuivuen a reet angtoekla poek nawh ai aw? 27 Tedawngah Judah thlaang thli, Phungawl khaw thut tangte la na khueh u tih yahhuivuen khaw na reet u poen de Phungawl te na phe u dawngah Gental thlaang thli tah pumsa ben ah yahhuivuen reet nawh mai cakhaw Phungawl te a vai u dawngah ahimi lawng nangmi te thawlh n'peel u poen ai. 28 Ataktang atah a-u nuem Judah thlaang taktak tih yahhuivuen aka reet tangtang? Ahan atah Judah thlaang la awm tih yahhuivuen reetna te pumsa ah sai la a awm atah Judah thlaang tangtang nawh ni. 29 Akhuiben ah Judah thlaang la awm tih thinkaw khuiah yahhuivuen aka reet te ni Judah thlaang tangtang a miingna. Te ngoen tah kut oen thut Phungawl kah bii saina nawh tih Pathen Muithla kah bii bina ni. Te ang thlaang te tah thlaanghing ben kah nawh tih Pathen benkah thangtheenna aka dang thlaang ni.
1 Tetih atah Judah thlaang lawng Gental thlaang lak ah a hoeikhangna awm bet aw? Yahhuivuen reetna te pakhat mai khaw aphu awm aw? 2 Asoep arepla hoeikhangna awm. Lamhacuek ah Pathen lawng awlthang theen Judah thlaang thli a kuem sak. 3 Tede Judah thlaang thli khatsut hue lawng uep-awm nawh la a awm atah metila a awm ai? Pathen khaw ahimi tengah uep-awm nawh la awm van ai aw? 4 Tih nawh ni, Thlaang boeih lawng hoem awl thui mai cakhaw Pathen tah soeng tih uep-awm la awm toeng toeng. Caciim lawng, “Awl na thui vengah na awlthui te soeng tila na tueng sak vetih awlcek la na awm vengah taya cawina te na taa ai, ” tila a thui. 5 Tede nangmi kah thaihu the saina dawngah Pathen kah thaihu sai a soeng te a tueng sak atah metila a awm ai? Pathen lawng mami te thawlh m' peel tih dan n'tat atah Pathen he soeng nawh n'ti ai aw? (Thlaanghing poekna oen thui atah). 6 Tetih nawh ni; Pathen he doeng nawh kawinih metila dilai awl a cek thai ai? 7 Tede kai kah doengna nawh lawng Pathen kah doengna te aciimla a tueng sak rang oen Pathen te ruep-awmna a peek tare atah metila kai he thawlh peel la ka awm khak ai? 8 Tedawngah, “thaihu theen a tuengna hamla thaihu the sai u sih” n'ti u nawh kai? Tetih roe la awl na thui tite khatsut hue lawng thawlh n'peel u tih ka thaang a the sak u. Te ang thlaang hue te thawlh peel tuueng la a awm dawngah thawlh peel la awm ai. 9 Tetih atah mami Judah thlaang ta Gental thlaang lak ah bet atheenna n'tu aka awm? Atheen tloe moenih! Aciimphanla ka tueng sak tangte angla Judah thlaang oen Gental thlaang khaw avan at la thawlhna tharana huiah boeih awm u. 10 Caciim lawng tila a thui, “Thlaangdoeng a-u khat khaw awm nawh; 11 thlaangcuih pakhat khaw awm nawh, Pathen aka tlap khat khaw awm nawh. 12 Thlaang boeih lawng Pathen te a mangthawng taak; ahimi boeih tah lawngpui a hang u poen; doengna aka sai khat khaw awm nawh, pakhatca khaw awm roe nawh. 13 Ahimi kah awl tah duekna koei thailatna oen betoet; a laai dawng kalawng athe hoem awl thoeng; ahimi kah huikaa khui lawng rih koei saringrup awl ruul sue angla va thoeng; 14 ahimi kah awlthui tah kawsi awlkha runkhuen pansi awl oen be. 15 Ahimi tah thlaang nganbawh yaak sak ham oen ngawn tih thip hamla tah a tat loe thakbat u; 16 a cehna roekk-ah rawkna oen patang raina a thoeng sak u. 17 Ahimi lawng ngaimawngna lawngpui te ming u nawh. 18 Pathen rih ham roe te ahimi lawng ming u nawh” ti. 19 Phungawl khuiah aka awm awl soeprep he Phungawl huiah aka awm thlaang boeih sawah hawna ham ni tite tahe ah m'ming u, te tila a awm te tah thlaang boeih lawng peelnangna te a toeng tih dilai pum he Pathen kah awlcekna huiah a phana ham ni. 20 Phungawl vaina rang oen Pathen haiah a-u khat khaw thlaangdoeng la awm nawh. Phungawl kah bii sai tah thlaang lawng thawlhna a sai te ming sak ham mai ni. 21 Tede, tahe ah Pathen lawng thlaanghing he amah oen haih thlaangdoeng la a khuehna lawngpui tah a tueng sak poen. Te kah doengna te Mosi kah Phungawl oen tawngha thli lawng sausi a deng u de phungawl oen tuhkai u nawh. 22 Jesuh Khrih te oengna rang oen Pathen lawng thlaangdoeng la a khueh. Khrih aka tangna boeih hamla doengna te Pathen lawng a sai dawngah a-u tengah khaw alangna roe awm nawh: 23 thlaanghing boeih lawng thawlhna a sai u dawngah Pathen teng kalawng athlathloeila awm u poen. 24 Tede, Pathen kah ayoe peek reenna kutdo Jesuh Khrih mami boeih loeihsakkung rang oen thlaang boeih he thlaangdoeng la a khueh. 25 Pathen lawng Jesuh Khrih he a thisen rang oen thawlh khawdawp ngaaina saikung la a khueh tih te khawdawp ngaaina tah Jesuh Khrih oengna rang oen ni. Pathen lawng he tila thawlh khawdawp ngaaina a sai he tah a doengna te tueng sak a ngaih dawngah ni. Yan veng atah a kaw daw tih thlaanghing thawlhna te hu nawh angla awm; 26 tede, tahe tue veng atah amah kah doengna te a tuengna ham thlaanghing thawlhna te a pho sak. He-tila Pathen lawng amah thlaangdoeng la a awmna a tueng sak tih Jesuh aka oeng boeih tah thlaangdoeng la a khueh. 27 Tedawngah he kawng dawngah oekthloenna koei awm aw? Awm roeroe nawh? N'tu kawngah? Phung-awl n'vai u dawngah aw? Nawh ni! Mami lawng n'tangna dawngah ni. 28 Thlaanghing he Pathen lawng thlaangdoeng la a khueh he phungawl vaina rang oen nawh tih oengna rang oen ni. 29 Pathen he Judah thlaang thli bueng kah Pathen la awm aw? Gental thlaang thli kah Pathen la tah awm nawh aw? Gental thlaang thli kah Pathen la khaw awm. 30 Pathen tah pakhat ni, Judah thlaang khaw a oengna rang oen thlaangdoeng la a khueh tih Gental thlaang khaw a oengna rang oen thlaangdoeng la a khueh. 31 Tetih atah, oengna oen Phungawl he hoett la awm ti ngaihna aw? N'hoett moenih, Phungawl te n'cak sak dai ni.
1 Tetih atah mami kah patuer Abraham kawng he metila n'thui lah ai? ahih lawng n'tu nuem a tawng? 2 Thaihu theen saina rang oen Pathen haiah doengna dang kawinih oekthloen ham koei la awm suide, tede Pathen haiah oekthloenna koei n'tu khaw awm nawh. 3 Caciim lawngah, “Abraham lawng Pathen te a tangna tih a oengna rang oen Pathen lawng ahih te thlaangdoeng la a khueh” tila a thui. 4 Bii aka bi tah thapang a dang, te thapang te kutdo tila poek ham awm nawh. A thatlawh phu ni a dang. 5 Tede biibina ohla a oengna dawngah pangtung tih thlaangthawlh te thlaangthawlh nawh la aka toehkung Pathen te aka tangna tah a oengna te Pathen lawng doengna la a khueh pe. 6 Biibina khat khaw thuum muehla Pathen lawng thlaangdoeng la a pawm thlaang pakhat kah awmngaihna te Devid lawng a thui vengah a thui-ngaihna tah he tila awm: 7 “Athe saina te khawdawp a ngaai pe tih thawlhthlahna aka dang tah yotheen aka dawng ni. 8 “Bawipa lawng a thawlhna te thawlhna la a toeh pe nawh thlaang tah yotheen aka dawng ni. 9 Devid lawng a thui yotheenna he yahhuivuen aka reet hue ham bueng aw? Moenih ta! Yahhuivuen aka reet nawh hue hamla khaw awm. Caciim n'thui tangte angla, “Abraham lawng Pathen te a oeng tih a oengna rang oen ahih te Pathen lawng thlaangdoeng la a pawm.” 10 Te tila Pathen lawng Abraham thlaangdoeng la a pawm te Abraham lawng yahhuivuen a reet coengah aw? a reet thlan ah aw? Yahhuivuen a reet coengah nawh tih a reet thlan ah ni. 11 Abraham lawng thlaangdoeng la a awm coengah yahhuivuen a reet, ahih kah yahhuivuen reet he tah a oengna rang oen Pathen lawng thlaangdoeng la a pawm te a tuengna ham miknoek ni. Tedawngah yahhuivuen reetna ohla Pathen a oengna rang oen Pathen lawng thlaangdoeng la a pawm thlaang boeih kah Muithla ben ah Abraham tah Pahaam la awm. 12 Ahih tah yahhuivuen aka reet hue kah Pahaam la khaw awm toengtoeng, metihtiah yahhuivuen reet bueng ohla Abraham lawng yahhuivuen a reet thlan vengah oengna oen a hing angla ahimi lawng oengna oen ah a hing u van dawngah ni. 13 Pathen lawng Abraham oen a cadil thli tengah dilai he nang kah koeva la awm ai, tila awl a kam vengah Abraham lawngah Phungawl a vai dawngah moenih ta, tede ahih lawng a tangna tih Pathen lawng thlaangdoeng la a pawm dawngah ni. 14 Pathen awlkam he Phungawl aka vai hue lawng paang thai kawinih thlaanghing kah oengna he a hong la awm vetih Pathen kah awlkam tah apoeioep la ni a awm ai. 15 Phungawl lawngtah Pathen thinsana avan khuen, phungawl a awmna nawh huen atah phungawl eekna khaw awm van nawh. 16 Tedawngah te kah awlkamna tah oengna dawngah akung asut tih Abraham cadil boeih tengah Pathen kah ayoe peek kutdo la awm, phungawl aka vai hue ham bueng nawh tih Abraham angla aka oeng thli boeih khaw awm van. Metihtiah Abraham tah Muithla ben ah mami boeih kah Pahaam la a awm dawngah ni. 17 Caciim lawng, “Nang tah nam tawm thlaangphun kah Pahaam la kan sai poen” tila a thui angla awm. Tedawngah he awlkam he tah Pathen haiah theen tih Abraham lawng a oeng Pathen tah thlaangduek thawhsakkung oen awm nawh te awmsakkung ni. 18 Abraham lawng ngaiuep ham n'tu khaw a awm nawh maiah pateng a oeng tih a ngaiuep dawngah “Nam tawm thlaangphun kah Pahaam la coeng,” Caciim lawng, “Na cadil aisi yoeh la yahawh ai,” tila a thui. 19 Abraham tah a kum yakhat cup tawmca poen tih thlaangduek angla a pumsa a awmna oen Sarah khaw ca-anau cuun thai tlaih nawh koeila a awm kawng te a poek khuep vengah a oengna tah yok roeroe nawh. 20 A oengna te hoett sut nawh tih Pathen kah awlkam te khaw uepvoet baal nawh; a oengna tah tharana oen be tih Pathen te a thangpawm. 21 Ahih lawngtah Pathen lawng awl a kam coengthloeih te a sai ngaikhoek ai tila a tangna mangkhak. 22 Tedawngah Abraham tah a oengna rang oen Pathen lawng thlaangdoeng la a pawm. 23 “Ahih tah thlaangdoeng la a pawm” ti he Abraham bueng ham a thut tila awm nawh. 24 Jesuh Khrih mami Bawipa duekna kalawng koep aka thawhsakkung te oengna rang oen thlaangdoeng la a pawm mami ham khaw a thut van. 25 Mami kah thawlhna phu ah ahih tah duek tih Pathen oen mami roeproeina ham a thawh sak koep.
1 Tahe ah tah oengna rang oen mami tah Pathen lawng thlaangdoeng la n'khueh u poen tih mami kah Bawipa Jesuh Khrih rang oen Pathen oen ah n'roep u poen. 2 Ahih lawngtah oengna rang oen mami he Pathen kah lungvatna khuila n' kuun puei u poen, te lungvatna khuiah tahe n'awm u. Tedawngah Pathen bawilenna n'bur haih u ai tila ngaiuepna oen n'tha thlue u. 3 Raina n'tawng vengah khaw tha n'thlue sak u, metihtiah raina lawngah uehthaina m'peek tila m'ming u tih, 4 uehthaina lawngah Pathen kaw tawngna oen Pathen kaw tawngna lawngah ngaiuepna a thoeng sak tite m'ming u. 5 Pathen lawng a lungna te mami thinkaw khuiah Pathen amah kah kutdo Ciim Muithla oen ah avan toi poen dawngah he ngaiuepna lawng mami he kawpoek boet sak nawh. 6 Mami lawng n'tu khaw n'sai thai nawh vengah Pathen lawng atue atang a nuen tih mami thlaangthawlh hamla Khrih Jesuh tah duek. 7 Thlaangdoeng pakhat hamla thlaang pakhat duek ham rai tangkiik. Thlaang theen ham tah aka duek ngam khaw awm mai ai. 8 Tede, thlaangthawlh la n'awm vengah Khrih tah mami ham a duekna oen Pathen lawng mami he metila n'lungna tite a tueng sak poen. 9 Amah kah thisen oen tahe atah mami he Pathen oen ah n'roep u poen. Ahih rang oen Pathen kah thinsana kalawng metihtlukla n'thlawn tare ai! 10 Mami tah Pathen kah raal la ni n'awm u, tede a Capa duekna rang oen mami he paya laikoei la n'sai poen. Tahe atah Pathen kah paya laikoei la n'awm u poen dawngah Khrih hingna lawng mami he metihtlukla n'thlawn tare ai. 11 Te bueng nawh tih tahe ah Pathen kah paya laikoei la mami saikung mami kah Bawipa Jesuh Khrih rang oen Pathen kah thaihu sai dawngah n'awmngaih u. 12 Thawlhna tah thlaang pakhat rang oen he dilai ah law tih ahih kah thawlhna lawng duekna avan khuen. Metihtiah thlaang boeih tah a thawlh dawngah thawlhna phu ah thlaangphun boeih te duekna lawng a khuk. 13 Phungawl a awm thlan ah dilai dawng thawlhna awm poen; tede phungawl a awmna nawh huen ah thawlhna te thawlh la toeh pe nawh. 14 Tede Adam dung veng kalawng Mosi dung toe ah duekna lawng thlaanghing boeih te a uk, Adam lawng Pathen kah awlpeek te vai nawh tih a thawlh angla aka thawlh nawh thlaang thli khaw duekna lawng a uk boeih. Adam tah aka law ham koei thlaang pakhat te huhsakna ni. 15 Tede thlaang pahih te vai ahih nawh; metihtiah Pathen kah ayoe peek kutdo tah Adam kah thawlhna oen lo u nawh, te thlaang pakhat kah thawlhna dawng maiah thlaang yahawh duek ti he tah soeng ta-ngak. Tede Pathen kah lungvatna tah, te thlaang kah athe-arana lak ah apueh ngaaila bo tih tetih van toengtoengla thlaang pakhat Jesuh Khrih lungvatna rang oen thlaang yahawh ham aka thoeng Pathen kutdo tah bo tare ai. 16 Pathen kah ayoe peek kutdo oen thlaang pakhat kah thawlhna tah lo u nawh. Thlaang pakhat a thawlh coengah awltloekna tah “Na thawlh” ti he ni; tede thawlhna yahawh sawah atingtawkk nawh kutdo aka law tah “Na thawlh nawh!” tila awltloekna he ni. 17 Thlaang pakhat kah thawlhna rang oen duekna lawng uk ham akung a tongnan ti he soeng tangtang. Te cakhaw thlaang pakhat Jesuh Khrih kah sai tah metihtlukla a bo ngaai. Pathen kah asoepbir lungvatna aka dang thlaang boeih tah ayoela amah oen roeproei u tih Khrih rang oen a hing khuiah taana oen hing u ai. 18 Tedawngah thlaang pakhat kah thawlhna dawngah thlaang boeih tah thlaangthawlh la awm, tetih van angla thlaang pakhat kah adoeng saina rang oen thlaang boeih a loeih sak tih ahimi te hingna a peek. 19 Thlaang pakhat kah awlngaaina nawh lawng thlaang boeih te thlaangthawlh la a coeng sak, tetih van angla thlaang pakhat kah awlngaaina rang oen thlaang boeih te Pathen lawng thlaangdoeng la a khueh ai. 20 Phungawl he tah thawlhpalhna a puungna ham ni, tede thawlhna apuungna huen ah Pathen kah lungvatna khaw puung tare. 21 Tedawngah thawlhna lawngtah duekna te a hawna tih a uk, tetih van angla doengna lawngtah Pathen kah lungvatna oen a uk tih mami kah Jesuh Khrih rang oen mami te dungyan hingna benla n'ceh puei u.
1 Tetih atah metila n'ti u lah ai? Pathen kah lungvatna apuungna tare ham thawlhna te n'sai poepa ai aw? 2 Te tih moenih! Thawlhna ah n'duek u poen, metila thawlhna dawngah n'awm khuep thai ai? 3 Khrih Jesuh oen pumkhatla awmna dawngah mami baptisma n'dang vengah te a duekna ah baptisma n'dang haih poen tite ataktangla na ming u. 4 Tecoengah mami baptisma n'dang vengah mami tah ahih oen up haih la awm tih a duekna ah n'duek haih u, Khrih tah Pa kah ruep-awmna huham lawng duekna kalawng a thawh sak koep angla mami khaw hingna athaai oen hingna van ham ni. 5 A duekna ah amah oen n'duek haih atah a thawhna ah amah oen n'tho haih van ai. 6 Mami kah hing ruem te Jesuh Khrih oen thinglam dawngah khiing haih la awm poen tite m'ming u. Te tila a khiing haih he tah thawlhna oen aka be pumsa hing ruem te phe boeih tih thawlhna sal la awm tlaih nawh ham ni. 7 Metihtiah mami n'duek vengah thawlh tharana khui kalawng n'loeih u. 8 Khrih oen mami n'duek haih veng kalawng mami khaw amah oen n'hing haih van ai tila n'tang na. 9 Khrih tah duekna kalawng tho koep poen tih duek koep tlaih manawh tite m'ming u, duekna lawng a sawah ukna aana khueh roe tlaih manawh. 10 Te tila Khrih tah a duek poen dawngah thawlhna lawng a sawah huham khueh tlaih nawh; Tahe a hingna he tah Pathen oen pawlneengna ah hing poen. 11 Tetih van angla nangmi lawngkhaw thawlhna ah thlaang duek la ka awm u tih Khrih Jesuh rang oen ah Pathen oen pawlneengna khuiah ka hing u poen tila poek uh. 12 Nangmi lawng na pumsa ngaihna te vai hamla aka duek thai nangmi pum te thawlhna lawng uk tlaih boel seh. 13 Tecoengah na pumvaang ame ang mai te khaw thaihu the saina ah hawna hamla thawlhna ah pe u tlaih boel. Te lak atah duekna kalawng hingna ah n'thawh sak koep angla doengna sai ham na pum boeih te Pathen te pe u hawn. 14 Thawlhna he nangmi kah bawi la awm tlaih boel seh; metihtiah nangmi tah phungawl khuiah na awm u tlaih nawh tih Pathen lungvatna khuiah na awm u poen. 15 Tetih atah mami he phungawl huiah n'awm tlaih nawh tih Pathen lungvatna huiah n'awm u dawngah thawlhna n'sai ai aw? N'sai manawh! 16 Thlaang pakhat khat kah awl te ngaai pe ham na pum na peek vengah te a awl na ngaai pe bawi kah sal la na awm tite ataktangla na ming u, tetih angla thawlhna awl te na ngaai u atah thawlhna sal la na awm u tih thawlhna phu tah duekna ni; tetih van toengtoeng la Pathen awl na ngaai u atah, te awlngaaina phu tah nangmi te thlaangdoeng la n'khueh ai. 17 Tede Pathen te uem u lah! Anoekbuet atah nangmi he thawlhna sal la na awm u de, tahe tah cangpueina dawngah na huh awltak na dang u te na thinkaw lungbui tak oen na vai u poen. 18 Nangmi tah thawlhna kalawng na loeih u poen tih doengna sal la na awm u poen. 19 (Nangmi lawng yaakmingna pumsa ben ah na khueh u nawh dawngah yaakming thai koei tihinhang kah awl ka hawna) N'cui veng atah nangmi lawng athe sai hamla aciimcaih nawh oen athe-arana ah na pum te sal la na peek u rapcaat. Tetih van la tahe tah aciimcaih saina hamla na pum te doengna sal la pe u rapcaat loeih. 20 Nangmi tah thawlhna sal la na awm u vengah te doengna khui kalawng na loeih u. 21 Tahe ah nangmi lawng na yah puei thaihu na sai u te hoeikhangna awm aw? Te thaihu thli kah aphu tah duekna ni! 22 Tede tahe tah nangmi he thawlhna kalawng na loeih u poen tih Pathen kah sal la ni na awm u poen, Nang kah hoeikhangna tah na hingna te amah tengah na peek biit tih aphu tah dungyan hingna te ni. 23 Thawlh phu tah duekna ni. Tede Pathen kah ayoe peek kutdo tah mami Bawipa Jesuh Khrih oen pumkhatla awmna dawngah dungyan hingna te ni.
1 Maya manau thli, nangmi lawng yuvaa la awmna phung he acek aneh la na ming u poen dawngah nangmi tengah ka thui ham koei he khaw na ming u badai. Thlaanghing he a hing khui bueng ni yuvaa la awmna phung lawng a uk. 2 Thuina maiah, vaa aka sa hutaa pakhat he a vaa a hing khui bueng ni yuvaa la awmna phung lawng a piin. A vaa te a duek atah yuvaa la a awmna hih phung kah piinna kalawng loeih poen. 3 Tedawngah te hutaa lawng a vaa a hing hun maiah thlaangtloe vaana kawinih te hutaa te samphaih n'ti ai. Tede a vaa te a duek coeng atah te hutaa tah thlaanghoeng la a awm poen dawngah vaa a sak atah samphaih miingna tlaih nawh. 4 Maya manau thli, nangmi khaw te tila na awm u van. Nangmi tah Khrih kah pum vaang la na awm u poen dawngah Phungawl kah ukna khuiah hingna te na hoett u poen. Mami he Pathen kah biibina ah aphu aka awm la coeng ham tahe atah duekna kalawng aka tho koep Khrih kah thlaang la na awm u poen. 5 Thlaanghing pumsa ngaihna oen n'hing u vengah Phungawl lawng a bawnghorh dawngah thawlh sai ngaihna lawng mami pum khuiah bii a bi tih mami te n'duek sak. 6 Tede tahe tah Phungawl kah piinna thong khuiah te n'duek u poen dawngah Phungawl dawng kalawng n'loeih u poen. Tahe atah ca oen a thut phungawl lawngpui ruem ah bii m'bi u tlaih nawh tih Muithla ben kah lawngpui thaai ah ni bii m'bi u poen. 7 Tetih atah Phungawl amah roe he thawlh n'ti u thai ai aw? Thawlh n'ti thai manawh! Tede thawlhna he aka mingsakkung tah Phungawl ni. Phungawl lawng, “Thlaang kah thaihu naai boel,” tila van thui nawh kawinih thaihu naaina ti he ka ming manawh. 8 Tede he tila thawlhna lawngtah awlpeek dawngah bii a bi tih ka pumsa dawngah ngaihna soeprep te a bawnghorh, Phungawl a awmna nawh atah thawlhna he aka duek thaihu ni. 9 Kai kamah roe he n'cui vengah Phungawl ohla khaw ka sak, tede awlpeek te a law vengah tah thawlhna lawng hing tih kai tah ka duek. 10 Hingna aka pe ham koei awlpeek lawng he duekna avan thoeng puei lat. 11 Thawlhna lawng atue theen a dang tih awlpeek te a hawna vetkat tih n'thai n'latna; te awlpeek oen kai te ng'ngawn. 12 Tedawngah Phungawl tah ciim tih awlpeek khaw ciim, doeng tih theen. 13 Tetih atah athe thaihu lawng Kai ham duekna avan thoeng sak ti ngaihna aw? Tetih moenih. Te tila aka thoeng sak te tah thawlhna ni; Thawlhna lawng thawlhna tangtang la a awmna te a tuengna ham atheen thaihu te a hawna tih kai ham duekna te avan khuen. Tedawngah thawlhna he mueirihtamyiin thawlhna ni tila awlpeek rang oen tueng tare. 14 Phungawl he muithla ben thaihu ni tite mami lawng m'ming u; tede kai tah thawlhna tengla sal angla a yoeih thlaang ni. 15 Kai lawng ka sai he ka yaakming nawh; sai ham ka ngaih te ka sai nawh tih ka ngaih nawh dai te ka sai lat. 16 Sai ham ka ngaih nawh te ka sai vengah Phungawl te soeng tila ka kawtlaak puei van. 17 Tedawngah he thaihu aka sai tangtang he kai nawh tih ka khuiah aka awm thawlhna te ni. 18 Ka khuiah he thlaanghing la ka coenggna ah atheen awm nawh tila ka ming. Ka khuiah atheen sai ngaihna awm mai cakhaw atheen te ka sai thai nawh. 19 Sai ham ka ngaih atheen te ka sai nawh; sai hamla ka ngaih nawh athe te lat ka sai. 20 Kai lawng sai ham ka ngaih nawh te ka sai atah, te aka saikung tah kai tlaih nawh tih ka khuiah aka awm thawlhna lawng ni a sai tite thui ka ngaih. 21 Tedawngah he phungawl lawng bii a bi tila ka ming: atheen sai ham ka ngaih vengah kai lawngtah athe bueng te ka tuek. 22 Ka khui benkah thlaanghing lawngtah Pathen kah phungawl dawngah te awmngaih. 23 Tede ka pum khuikah phungawl tloe lawng bii a bi he ka ming, te phungawl te tah ka thinkaw lawng a ngaih phungawl te aka oel mangkhak awm. Te phungawl lawngah ka pum khuiah bii aka bi thawlhna phungawl khuiah thongtla angla te n'sai. 24 Ngaihang khawbing la ka awm mah aw! Duekna la aka ceh puei he kah ka pum dawng kalawng a-u lawng n'thlawn lah ai? 25 Mami Bawipa Jesuh Khrih rang oen thlawnna saikung Pathen te uem u lah! Tedawngah ka coenggna tangtang tah he ni: Kamah ben atah ka thlaanghing coenggna lawngah thawlhna phungawl te a vai vengah ka kawpoek bueng oen Pathen phungawl te ka vai thai.
1 Tahe tah Khrih Jesuh oen pumkhatla aka awm thli ham tah thawlh awlcekna awm tlaih nawh. 2 Metihtiah Khrih Jesuh oen pumkhatla hingna ah mami aka ceh puei Muithla kah phungawl lawng duekna oen thawlhna phungawl khui kalawng mami te n'loeih sak poen. 3 Thlaanghing pumsa a tha ayoek dawngah Phungawl lawng a sai thai nawh te Pathen lawng a sai. Thlaanghing pumsa ah aka awm thawlhna te a Capa avan tuihna rang oen a phe poen. Thawlhna taa hamla thlaanghing kah thawlhna pumsa angla va law. 4 Pathen lawng he tila a sai he tah thlaanghing pumsa ngaihna angla nawh tih Muithla ngaihna angla aka hing mami pum dawngah Phungawl lawng akuek doengna te asoepna ham ni. 5 Amami kah pumsa ngaihna angla aka hing thlaang tah pumsa ngaihna lawng a thinkaw te a uk. Muithla kah ngaihna angla aka hing thlaang tah Muithla ngaihna lawng a thinkaw te a uk. 6 Pumsa ngaihna ah khawsak phu tah duekna ni. Muithla ngaihna ah khawsak phu tah hingna oen ngaimawngna ni. 7 Tedawngah thlaanghing lawng amami pumsa ngaihna angla a awm a tah Pathen raal la awm; ahimi lawng Pathen kah phungawl te vai nawh, ahimi lawngah vai khaw vai thai roe nawh. 8 Amami kah pumsa ngaihna aka vai thli lawngtah Pathen te a kaw hoe sak thai nawh. 9 Tede nangmi tah thlaanghing pumsa ngaihna ah na awm u nawh, Pathen Muithla nangmi khuiah ataktangla a awm atah Muithla kawngaih angla na awm u. A-u khaw Khrih Muithla aka khueh nawh tah Khrih amah koe la awm nawh. 10 Tede Khrih te nangmi khuiah a awm atah thawlhna dawngah na pum te duek mai cakhaw nangmi tah Pathen oen na roep u poen dawngah nangmi kah muithla tah hing. 11 Jesuh te duekna kalawng aka thawh sak Pathen Muithla te nangmi khuiah a awm atah, Khrih te duekna kalawng aka thawh sak Pathen Muithla nangmi khuiah a awm dawngah nangmi kah aka duek ham koei pum te hingna a peek van ai. 12 Tedawngah maya manau hue, mami lawng sai ham koei n'khueh u, tede mami kah thlaanghing pumsa ngaihna angla hing ham awm nawh. 13 Nangmi lawng thlaanghing pumsa ngaihna angla na hing u atah na duek u ai; tede nangmi lawng thawlhna na sai thli te Muithla oen na ngawn atah na hing u ai. 14 Pathen Muithla lawng a mawt thlaang thli tah Pathen kah ca-anau la awm. 15 Metihtiah Pathen lawng m'peek u Muithla tah nangmi te sal la coengg sak ham oen ah birih ngaihuet sak ham nawh tih; te Muithla lawngtah nangmi te Pathen kah ca-anau la sai ham ni. Te Muithla kah tharana rang oen Pathen te, “A Pa! a Pa!” tila n'khue thai. 16 Mami he Pathen amah kah ca-anau la n'awm tite thui ham Pathen kah Muithla amah roe te mami kah muithla oen tuhkai haih hih. 17 Mami tah amah kah ca-anau la n'awm u veng kalawng a thlaang hue ham a khueh pe kam-awm yotheenna te n'dang van ai. Pathen lawng Khrih ham a khueh pe te mami lawngkhaw m'paang van ai; metihtiah Khrih kah patangraina te n'cuut u atah, mami lawng amah kah ruep-awmna te khaw m'paang van ai. 18 Tahe veng mami kah patang palai khangna he hai benkah mami tengah aka thoeng ham koei ruep-awmna oen ah nuehtah koei nawh ni tila ka poek. 19 Pathen lawng a ca-anau thli tengah a tueng sak ham koei te a thaihu suen boeih lawng ngaiuep tangkiik oen a lamtoen u. 20 Pathen lawng a thaihu suen boeih te apoei apit la awm ham dan a peek. Te tila a awm he thaihu suen thli amami kah kawngaih dawngah nawh tih Pathen amah kawngaih ni. Tede ngai-uepna tah awm hun. 21 Te ngaiuepna tah hin at vengah ngoen a thaihu suen boeih lawngah rawkna koei sal piinna kalawng loeih vetih Pathen ca thli kah loeihna ruep-awm te a dang u van ai. 22 Tecoengah a suen thaihu lawng tahe tue toe ah camoe awm tawm vengkah a tlawh angla tlawhna oen kopaang u tite mami lawng m'ming u. 23 Te tila a suen thaihu bueng lawngah kopaang u nawh, Muithla te lamhacuek Pathen kutdo la aka dang mami pum he loeih sak ham aka ring mami boeih khaw kawdaang ah ng'kopaang u van. 24 Metihtiah ngaiuepna oen thlawn la n'awm u. Tede mami lawng n'ngaiuep u te n'huh atah tete ngaiuepna tangtang moenih. Mik huh tangte te a-u lawng a ngaiuep nooek kai? 25 Tede mik huh nawh te n'ngaiuep u atah mami lawng kawdaw oen n'ring u. 26 Te tila mami tha a yoek dawngah mami bawmcem hamla Muithla tah va law. Mami lawng metila thangthui ham koei ti khaw m'ming u nawh dawngah awl oen thui thai nawh kopaangna oen Muithla lawng mami ham Pathen tengah avan bih. 27 Mami kah thinkaw aka ming Pathen lawng Muithla kah kawpoek te khaw a ming; metihtiah Muithla lawngtah Pathen amah kah kawngaih angla a thlaang thli yuengah a bih pe dawngah ni. 28 Pathen lawngtah amah aka lungna thli ham oen amah lawng a kamthlahna angla a khue thlaang thli lawng atheenna ham thaihu boeih he a sai pe tila m'ming u. 29 Pathen lawng a tuek tangte thlaang thli te amah Capa angla a coenggna ham a thloekcala a thloeng, te tila a sai he tah amah aka oeng thlaang yahawh tim ah a Capa te ahaamkoek camiing awmthang la awm sak ham ni. 30 Tedawngah Pathen lawng athloekla a thloeng thlaang thli te a khue; te tila a khue thlaang thli te amah oen a roep u sak tih a ruep-awmna te khaw a paang sak. 31 Tetih atah he kawngah he n'tu nuem mami lawng n'thui thai ai? Pathen lawng mami he m'pai puei atah a-u lawng mami he n'raalna ai? 32 Pathen lawng a Capa khueh duen pateng haih ohla mami ham m'peek! Mami hamla a Capa pekung lawng soeprep boeih he ayoela mami peek muehla awm ai aw? 33 Pathen lawng a tuek thlaang te a-u lawng thawlh a peel thai ai? Pathen amah lawngah na thawlh nawh a tina poen. 34 Tedawngah ahimi te a-u lawng thawlh a peel thai ai? Khrih Jesuh lawngkhaw thawlh peel manawh; Ahih tah duek, tede tho koep, Pathen bantang ben ah ngawl tih mami hamla reenna avan bih. 35 Tedawngah a-u lawng mami he Khrih kah lungna dawng kalawng m'pekbo thai ai? Raina, heemtekna, khawkhana, khawdengna, mueirihtamyiin duekna lawngah m'pek thai ai aw? 36 Caciim lawngah, “Nangmi kawngah kaimi tah mueirihtamyiin duekna oen ah saringrupla khawyungkhun ka awm u; Ngawn ham a teeng mangkhak tuu angla kaimi he ka awm u” tila a thui angla awm tangtang. 37 N'tu lawngkhaw, pek thai manawh, he ang raina thaihu thli boeih he mami aka lungnakung rang oen mami lawng n'taa boeih ai. 38 Metihtiah n'tu thaihu lawngkhaw amah kah lungna dawng kalawng m'pekbo thai manawh tite aciimphanla ka ming: duekna oen hingna lawngkhaw, vanthlaang thli oen vaan kah ukkung thli tha-awm tharana lawngkhaw, tahe kah atue atang oen hailam ben atue-atang lawngkhaw, 39 dilai sawah aka awm thaihu, dilai dangah aka awm thaihu lawngkhaw mami kah Bawipa Jesuh Khrih rang oen Pathen kah lungna dawng kalawng, a thaihu suen boeih khuikah me ang lawngkhaw m'pek thai roe manawh.
1 Awltak tang ka thui; Khrih kah thlaang la ka awm tih hoem awl ka thui nawh. Ciim Muithla lawng a uk athe atheen ka mingna lawngkhaw hoem awl ka thui nawh te a ming. 2 Ka thlaangphun ka thi ka sa la aka awm thli hamla ka kaw the tangkiik tih ka thinphatna lawng boet nawh. 3 Ahimi hamla atheen koei atah kai lawng Pathen kawsi yawkk tih Khrih oen pek u ham pateng ka ngaih ngaai. 4 Ahimi tah Pathen thlaangtuek ni: a ca la a khueh tih ahimi tengah a ruep-awmna te a tueng sak. Ahimi tengah awlkamna te a sai tih Phungawl thli te a peek u, ahimi lawng aka soeng bokna te a khueh u, Pathen kah awlkamna te a huh u, 5 Ahimi tah Hebru thlaangphun cuunkung patuer miingthang thli kah cadil la awm u, thlaanghing ben atah Khrih pateng ahimi kah a phun ni. Soeprep boeih ukkung Pathen tah yoeyahla a thaang theen hawn seh! Amen. 6 Israel thlaang thli he apumboeihla Pathen thlaangtuek la a awm aih nawh dawngah Pathen awlkam tah apoei-oep poen ni tila ka thui ngaihna nawh ni. Metihtiah Israel thlaang boeih he khaw Pathen kah thlaang boeih aih nawh ni. 7 Abraham cadil hue khaw apumboeihla Pathen cadil la awm boeih aih nawh. Pathen lawng Abraham te, “Kai lawng awl ka kam cadil nauha te Isak rang oen ah na khueh ai,” a tina. 8 A thuingaihna tah thlaanghing phung mailai oen cuun la aka awm ca-anau boeih he Pathen kah ca-anau la awm luem nawh. Pathen awlkam heet angla a cuun ca-anau te ni cadil nauha taktak la a khueh. 9 Pathen lawng awl a kam tah, “Atue atang a tluep vengah kava meel koep vetih Sarah lawng capa a cuun ai,” a tina te ni. 10 Tecoengah, he bueng nawh hun, Rebekka capa rawi lawngkhaw mami kah patuer Isak te ni anna pa na hih van. 11 Tede capa pakhat a tuek te tah amah kah mengtengna te asoepna ham ni; tedawngah Pathen lawng Rebekka te, “Ahaamca lawng anoca kah bii a bi pe ai,” a tina. He awl he tah ahih rawi boeinau te a cuun thlan vengah a thui ni, ahih rawi lawng athe atheen n'tu khat khaw a sai hih thlan ah ni a thui; tedawngah Pathen kah tuekna he tah amah kah khuena dawngah akung asut tih ahih rawi boeinau kah saina dawngah nawh ni. 13 Caciim lawng, “Jakob tah ka lungna tih Esau tah ka thina,” a ti angla ni. 14 Tetih atah Pathen he tuueng-aleng roe nawh n'ti thai ai aw? N'ti manawh. 15 Metihtiah Mosi tengah, “Kamah lawng ka ngaih te ka reen vetih; kamah lawng ka ngaih te tah ka thintlawhna ai,” tila a thui. 16 Tedawngah soeprep he mami thlaanghing kawngaih oen saina dawng nawh tih Pathen kah reenna rang oen ni. 17 Pathen lawng Iyipt sengpahrang nala, “Kai kah tharana huham oen ah dilai pum ah ka miing aka thang sak ham roe la nang tah sengpahrang la kan khueh,” tila caciim lawng a thui. 18 Tedawngah Pathen lawng amah ngaih te tah a reen tih amah lawng a ngaih te tah a thin a haam sak mai poen. 19 Tede nangmi tim kah thlaang pakhat mai lawngah, “He tila a awm oh atah a-u lawngah Pathen kawngaih te a oelh ataih thai ai,” na ti u mai ai. 20 Ka paya, nang ta a-u la na awm aih tih Pathen te awl na thung ngam? Dilai am lawng ambawpkung te, “N'tu ah he tila nan sai,” tila doet nawh. 21 Ambawpkung lawngah amlai te a lawh tih amah ngaih angla a sai thai tih amlaiboeng pakhat te am pahih la a sai tih pakhat te tah awmthoet ah hawna am mailai oen ah pakhat te tah tuisii-am la a sai. 22 Tetih van la te Pathen thaihu sai khaw awm. A thinsana oen a tharana te tueng sak ham a ngaih, tede ahih kah thinsana a yawkk dawngah rawk tih phe ham koeila aka awm thli sawah thinsan kawdawna a khueh. 23 Tecoengah amah kah aka soep ruep-awmna te tueng sak a ngaih tih amah kah reenna aka dang mami sawah a ruep-awmna te avan toi, mami he a ruep-awmna dang hamla a roek a bah tangte poen ni. 24 Mami tah a thlaangkhue la ng'awm u, Judah thlaangphun timkah bueng nawh tih Gental thlaangphun timkah khaw a khue. 25 He tah Hosi cabu khuiah a thui te ni: “Ka thlaang la ka awm nawh thli te ‘Ka thlaang,’ ka tina ai. Ka lungna nawh thlaangphun te, ‘Ka lungna thlaangphun,’ ka tina ai. 26 ‘Nangmi tah ka thlaang la na awm u nawh' a tina huen roe ah nangmi tah aka hing Pathen kah ca-anau thli ni a tina ai,” tila a thui. 27 Israel thlaangphun kawngah Isaiah lawng, “Israel thlaangphun he tuitunlii keengkah divinlai yoeh maila pateng yahawh cakhaw ahimi timkah thlaang a yawlca bueng lawng ni thlawnna a dang ai; 28 Metihtiah, dilai he amah kah athe atheenna angla Bawipa lawng awl a cek yue ai,” tila a thui. 29 He veng thlan ah Isaiah lawng, “Tharakoek Bawipa lawng mami kah cadil nauha khatsut te thlung nawh kawinih mami he Sodom angla n'coengg vetih, Gomorrah angla ni ng' awm poen ai” tila a thui oepsoeh poen. 30 Tedawngah kaimi lawng ka thui tah Pathen oen roeproei ham aka yawm nawh Gental thlaangphun lawngah oengna rang oen ah Pathen oen roeproei u poen; 31 Tede Pathen oen roeproeina hamla phungawl aka tlap khiing Pathen kah thlaangphun lawngah roepna te dang u nawh. 32 N'tu ah a dang u nawh? Ahimi lawng oengna dawngah pangtung nawh tih amami kah saina te a uep apaangna dawngah ni. Te tila “Ploengna lungto dawngah ploeng u tih, 33 Caciim lawngah, “Bueh lah! Zaion ah lungto pakhat ka khueh, te lungto lawng thlaang thli te a ploeng sak vetih, te lunghiim lawngah ahimi te a tlim sak ai. Tede a-u khaw ahih te a tangna atah yaraula awm tlaih manawh,” tila a thui.
1 Maya manau thli, ka thlaangphun lawng thlawnna dang u seh tila thinkaw tak oen ka ngaih tangkiik! Ahimi ham metihtlukla Pathen tengah ka thangthui. 2 Ahimi lawng a thinkaw te Pathen a peek tangtang tila nangmi tengah ka thui rapcaat thai; tede ahimi kah thinkaw a peek he cuihna taktak dawngah kung asut moenih. 3 Pathen lawng thlaang he me ang along a-im oen amah oen ah a roep u sak ti he ahimi lawng ming u nawh, amami kah lawngpui te sai ham a yawm u dai, tedawngah Pathen lawng amah oen thlaanghing roepna a sai lawngpui te paang u nawh. 4 Jesuh Khrih lawng Phungawl te aboet sak poen dawngah a-u khaw aka tangna thlaang boeih tah Pathen oen roeproeina a dang poen. 5 Mosi lawngtah Phungawl vaina rang oen Pathen oen ah roepna kawng te a thut: “A-u khaw Phungawl lawng sai a tite aka sai boeih tah hing ai,” ti. 6 Tede Caciim lawng, oengna rang oen Pathen oen ah roeproeina kawng a thui tah tila ni: “Nang lawngah, a-u nuem vaan la aka luui hang ai?’ tila namah oen namah te doet u boel,” (te tah Khrih te aka rum puei ham tila thuingaihna ni.) 7 “A-u nuem celkhui khaw la aka cet thuk ai? tila khaw ti boel?. (te tah Khrih te duekna kalawng thawh sak ham tila thuingaihna ni.) 8 A thui awl lawngtah, “Pathen awl tah na tengah awm, na huui na kaa dawngah na thinkaw khuiah awm” a tite tah kaimi lawng ka phawng u oengna awlthang he ni. 9 Jesuh tah Bawipa ni tila na phawng u tih Pathen lawngah ahih te duekna kalawng a thawh sak koep tila thinkaw oen na tangna u atah thlawn la na awm ai. 10 Metihtiah mami lawng oengna rang oen Pathen oen ah roeproeina n'huh; kaa oen m'phawng tih thlawnna n'dang u. 11 Caciim lawng, “A-u khaw amah aka tangna boeih tah yarau yahdengla awm manawh” ti. 12 Metihtiah Judah oen Gental thlaangphun pekthlena a awm tlaih nawh dawngah thlaang boeih thuum poen; Pathen tah thlaang boeih kah Bawipa la awm tih amah te aka khue boeih tah yotheen kawthawina yahawh hlang a lun thil. 13 Caciim lawng, “A-u lawngkhaw bawmna a ngaih dawngah Bawipa te a khue atah thlawnna a dang ai,” tila a thui angla te awm tangtang. 14 Tede ahimi lawng a tangna nawh atah bawmna dang ham metila a miing te a khue thai ai? Ahimi lawng awlthang te a yaak nawh atah metila a tangna thai ai? Awlthang te a thui nawh atah metila ahimi lawng a yaak thai ai? 15 A thuikung laipai te tuih la a awm nawh atah metila awlthang te a phawng ai? Caciim lawng, “Awlthang Theen van khuenkung laipai thli kah a khow tah theen tangkiik hlang mah aw!” tila a thui angla awm tangtang. 16 Tede thlaang boeih lawng Awlthang Theen te do u nawh. Isaiah amah lawngkhaw, “Bawipa, kaimi lawng ka phawng u awlthang he a-u lawng a tangna?” tila a thui. 17 Tedawngah oengna tah awlthang yaakna dawng kalawng va law tih awlthang tah Khrih te thuina dawng kalawng va law. 18 Tede awldoet ka ngaih tah: ahimi lawng awlthang he ya u nawh tangtang aw? A yaak u ta; Metihtiah Caciim lawng, “Ahimi kah paang awl lawng dilai pum ah thaang khok tih ahimi awl tah dilai boetna toe kheng a pha,” tila a thui. 19 Koep kan doet lah ai: Israel thlaang-thli lawng yaakming u nawh aw? Lamhacuekla awl aka thung ham tah Mosi amah ni. Ahih lawng, “Ka thlaangphun te uett-ee hamla, thlaangphun la toeksam nawh te ka hawna vetih, thlaang ngau paathuu phun rang oen ka thlaangphun te a thin ka sa sak ai,” tila a thui. 20 Tong-aa ohla Isaiah lawng thincakla a thui tah, “Kai aka tlap nawh thlaang thli lawng ng'huh u; Kai he aka thoel-alang nawh thlaang thli tengah ka phumpho pe,” tila a thui. 21 Tede Israel thlaangphun kawng oen tuhkaila tah, “Awl ngaai nawh tih ceem raal la aka tho thlaang thli te do hamla khawyungkhun kut ka son,” tila a thui.
1 Tetih atah Pathen lawng a thlaang thli te a hoett poen aw? Hoett roe roe nawh! Kai kamah khaw Israel thlaang, Abraham cadil, Benjamin phun ni. 2 Pathen lawng acuekca kalawng a tuek tangte a thlaang thli te hoett sut nawh. Caciim dawngkah awl, Elijah lawngah Israelca thli sawah a kaw a lawna nawh Pathen tengah a thui te nangmi lawng na ming u: 3 Elijah lawng, “Bawipa, nang kah tawngha thli te a ngawn u tih nang kah bokna-thaang khaw a phe boeih u; kai bueng he ka deem de, kai khaw ngawn ham n'teeng u” a tina. 4 Pathen lawng n'tu awl a thui pe? “Baal pathen rawlrap aka bok nawh thlaang thong sarih kamah hamla ka paih hun” a tina. 5 Tetih toeng la ni tahe khaw a awm: Pathen lawng a lungvatna dawngah a tuek tangte ayawl tah awm van hun. 6 Pathen kah tuekna tah ahimi kah saina dawngah nawh tih amah kah lungvatna dawngah ni kung asut. Pathen kah tuekna he thlaanghing kah saina dawngah kung asut atah ahih kah lungvatna te lungvatna tangtang la awm manawh. 7 Tetih atah metila a awm? Israel hue lawng a tlap te hu u nawh. Pathen lawng a tuek ayawlca bueng lawng ni a huh; atloe hue tah a haa pang malhtalh tih Pathen kah khuena awl te ya nawh. 8 Caciim lawngah, “Pathen lawng ahimi kah thinkaw oen lungbui te a mong sak; tihin toe ah ahimi lawng hu thai nawh tih ya thai u nawh,” tila a thui angla awm tangtang. 9 Tecoengah Devid lawng, “Amami kah poei khuiah tu selang dong dawngah man u seh; Ahimi te ploeng u selang dan tat u seh!. 10 Ahimi lawng a huh thaina nawh ham a mik thli te pum sak selang; patang raina thalrih phueih uett ah a uen te khun roepsoet u seh,” tila a thui. 11 Tetih atah awl kan doet u lah ai: Judah thlaang thli lawng a tlim u vengah rawk poe taktak poen aw? A rawk tang aih moenih. Ahimi lawng a thawlh u dawngah Gental thlaang thli tengah thlawnna te va law. Tedawngah Judah thlaang thli lawng uett-eena ahimi sawah a khueh u. 12 Judah thlaang thli kah thawlhna lawng dilai ah yotheen kam-awmna yahawh avan khuen tih ahimi kah sung-adeuhna lawng Gental hue hamla yotheen kam-awmna yahawh hlang avan khuen. Tecoengah Judah thlaang yahawh lawng asoepcala a thuum u van veng atah yotheen kam-awmna te metihtlukla asoep tare ai! 13 Tahe tah Gental thlaang thli nangmi tengah awl kavan thui. Gental hue nangmi tengah celtuih la ka awm khui roekk tah bii ka bina dawngah ka thangpawm u ai. 14 Ka thlaangphun thli te uett-eena thinkaw a khueh sak he tah thlaangvaang mai khaw thlawn thaina ham ni. 15 Metihtiah ahimi te hoett sut la a awm vengah thlaangtloe boeih te Pathen kah raal la awmna kalawng a paya laikoei la a sai. Tedawngah ahimi Judah thlaangphun te a do koep veng atah metila a awm tare ai? Thlaangduek thli ham hingna la coengg ai. 16 Takawi lamhacuek la thluem at te Pathen teng a nawn atah takawi boeih amah koe la awm poen; tecoengah thingkung ayung te Pathen tengah na nawn poen atah a beek-athleeng boeih te ahih kah akoe la awm poen. 17 Olif thingkung a liing u a beek thli khatsut te a tloek u tih te kah thingngaw dawngah te olif thingkung rawlrap a beek thli te oen a cong u. Te tila nangmi Gental thlaangphun khaw olif thing rawlrap angla na awm u tih, tahe tah Judah thlaangphun thli kah muithla ben hingna tharana te na bawn u van poen. 18 Tedawngah olif thingbeek tloek poet angla aka awm thli te huhsit u boel. Metila nangmi lawng na oekthloen thai lauh? Nangmi tah a beek mai ni; nangmi lawng akungpui te na cawm na cah moenih, nangmi te ni akungpui lawng n'cawm u. 19 Tede nangmi lawng, “Kaimi awmna hamla ni a beek thli te a tloek” na ti u mai ai. 20 Te ngoen tah soeng tangtang. Ahimi lawng a oeng u nawh dawngah a tloek tangtang, nangmi tah na oeng u dawngah na awmna huen ah te na awm u. Tede he kawngah oekthloen u boel lang rih lat u hawn. 21 Thingkung kah a beek tangtang la aka awm Judah hue pateng Pathen lawng a thlung nawh atah nangmi te n'thlung ai tila na poek aw? 22 He ah he Pathen kah thlaang reenna kaw a poekna oen rih koei la a awm te n'huh u. Aka tlim thli ham tah rih awm tangkiik tede nangmi te tah n'reen u, nangmi lawng a reenna khuiah na awm u poe atah reenna kaw avan poek ai, tede na awm u nawh atah nangmi khaw tloek poet la na awm u van ai. 23 Judah thlaangphun lawng a oengna nawh paihuen te a ceh taak u atah acuek kah a awmna paihuen ah te a khueh koep ai, Pathen lawngtah khueh koep thaina nawl a khueh. 24 Nangmi Gental thlaang thli tah, ramhum ah amah poek aka po olif thingkung dawngkah a beek thli a tloek poet tih olif thingkung tang dawngah a cong tlap oen na lo u. Judah thlaang thli tah olif thingkung tang oen lo u tih olif thingkung tang dawng-kah a tloek poet a beek thli te akungpui tang dawngah cong koep hamla Pathen ham tah yoeica mai. 25 Ka maya manau thli, nangmi lawng ka cuih ka hoe heet poen tila na poek u nawh ham nangmi te ming sak ka ngaih awlhuep pakhat awm. Te awlhuep tah he ni. Israel thlaang thli a thin a haam khaklal he aboet toe ham nawh ni, Gental thlaang thli Pathen tengah asoepcala apha thlan khui ham bueng ni. 26 Tecoengah Israel thlaang boeih thlawn la a awm na ham tah he tila ni. Caciim lawng, “Zaion kalawng Thlawnkung tah law vetih Jakob cadil thli kah athe arana boeih te a voeih ai. 27 Ahimi kah thawlhna te ka lawh pe boeih vengah he awlkamna he ahimi oen ka sai ai,” tila a thui. 28 Awlthang Theen a hoett u dawngah Judah hue tah Pathen kah raal la awm u. Te tah nangmi Gental thlaang thli theenna ham ni. Tede Pathen kah tuekna ben atah ahimi tah amami kah patuer thli rang oen Pathen kah paya laikoei la awm u. 29 Pathen lawngtah a tuek thlaang thli oen yotheen kam-awm a peek thlaang thli kawngah a kawpoek thloet nawh. 30 Nangmi Gental thli lawng anoekbuet atah Pathen awl te na ngaai u nawh, tede tahe ah Judah thlaang thli lawng a awl a ngaai pe u nawh dawngah nangmi lawng Pathen reenna te na dang u. 31 Tetih van angla nangmi lawng na dang u reenna te ahimi lawngkhaw Pathen reenna te tahe ah a dangna u van ham Judah thli lawng tahe toe ah Pathen awl te ngaai pe u nawh. 32 Pathen lawng thlaang boeih he awl ngaai nawh thongtla thlaang la a sai he tah ahimi boeih tengah a reenna te tueng sak ham a ngaih dawngah ni. 33 Pathen tah len kueng tangkiik mah aw! A cuihna oen a mingna tah dung tangkiik mah aw! A awltloekna he a-u lawng a thuicaih thai ai? A thaihu sai along a-im he a-u lawng a yaakming thai lek ai? 34 Caciim lawng, “Bawipa kah thinkaw te a-u lawng a ming? a-u lawngah poekna a peek thai? 35 Ahih lawng sah koep hamla a-u lawngah thaihu a peek?” tila a thui angla te awm. 36 Thaihu boeih he amah lawng a sai, thaihu boeih amah rang oen awm tih amah ham ni. Pathen tengah ayoeyahla ruep-awmna awm hawn seh! Amen.
1 Tedawngah maya manau thli, Pathen lawng mami he n'reen tangkiik dawngah amah bii bina ah amah kah kawtlaak la aka hing luciik angla na pum te Pathen tengah nawn uh tila nangmi te kan ceel u. He tah aka soeng bokna tih nangmi lawng na peek ham koei bokna te ni. 2 He dilai khawsak siing angla khaw sa u tlaih boel, tede Pathen lawng nangmi thinkaw a khui ben te asoepbirla van thaw pan hawn seh. Te atah aka theen thaihu, aka soep thaihu oen amah kawtlaak te nangmi lawng na ming u thai ai, he tah Pathen amah kawngaih ni. 3 Pathen kah lungvatna kutdo ka dangna rang oen he awl he nangmi boeih tengah ka thui: Namah oen namah te atuueng aleng lak ah asang la poek u aih boel. Te lak atah Pathen lawng oengna m'peek taring ah namah oen namah te nainawng u lah. 4 Mami lawng pum pakhat dawngah abeek yahawh n'khueh u tih, he a beek thli lawng bii atloe tloe rip a khueh u. 5 Tetih van la mami khaw thlaang yahawh mai de Khrih ah pumkhatla awmna rang oen pumkhatla n'coengg tih pum dawngkah abeek tloe tloe he pakhat oen pakhat a tuhkai u van angla mami khaw khat oen khat m'pha u boeih. 6 Tedawngah kutdo aphun tloetloe n'dang rip u tah Pathen kah peek lungvatna kutdo n'dang taring ah hawna u sih. Pathen kah awl te thui thaina kutdo te n'dang u atah oengna n'khueh taring ah hawna ham awm; 7 thlaangtloe ham bii bi koei atah bi ham awm; cang puei koei atah cang puei ham awm; 8 Thlaang te thapeek koei atah tha peek ham awm; khuehtoen thaihu te thlaangtloe rekra koei atah moeihoeihna oen rekra ham awm. Saithaina aana te n'dang atah bii yawm ham awm; thlaangtloe tengah thintlawhna tueng sak ham koei atah reenna oen tueng sak ham awm. 9 Nangmi kah lungna te thinkaw tak oen na lung u ham awm. Athe te thina uh, atheen te phoeih mangkhak uh. 10 Pakhat oen khat Khrihca maya manau angla lung u the lang thinkaw tak oen ah pakhat oen khat hinyahna te tueng sak uh. 11 Na tha rang sak uh, tha-ngak la awm u boel. Bawipa bii te na thinkaw tak oen bi uh; 12 Na ngaiuepna na khuehna dawng teah na tha thlue sak uh; raina na tawng u vengah thinsan kawdaw oen awm u lang thangthui yoeyah uh. 13 Khrihca na puei na paw thli kah a voetna ah te dodan u lang na im ah kamyin te pah sak uh. 14 Nangmi heemtekkung thli ham Pathen tengah kam-awm yotheenna bih pe uh; Oe, yotheen kam-awmna bih pe uh; tapvoep u boel. 15 Awmngaih thlaang thli tengah awmngaih u van. Rungrah oen aka awm thlaang thli tengah rap u van. 16 Pakhat oen pakhat roeproei patoeng uh. Oekthloen u boel; tede huhsit koei bii te khaw bi uh. Namah oen namah te thlaangcuih la poek u boel. 17 Nangmi sawah thlaang lawng athe a sai atah ahih te athe oen thung u boel. Thlaang boeih lawng theen tila a poek te sai hamla yawm. 18 Thlaang boeih oen roeproeicala awm ham soeprep boeih te acoengg thai khui sai u lah. 19 Ka puei thli mevengah khaw luu lo u boel, te lak atah Pathen thinsana lawng sai ngoen seh. Caciim lawngah, “Kai lawng luu ka lo ai, kai lawngah kut ka thung ai, Bawipa lawng ti,” tila a thui. 20 Te tih atah, “Na raal te a bung a pawng atah buh van cah, tui a halh atah tui van awkk sak; he tila na saina oen ah nang lawng ahih te yah na bai poen ni” tila caciim lawng a thui angla te sai uh. 21 Nangmi te athe lawng n'taa boel seh; Atheen saina oen athe te taa hamla yawm uh.
1 Thlaang boeih lawngah ram ukbawi thli te hinyah uh, metihtiah Pathen kah hatlaakna a awm nawh atah ukkung bawi khaw awm nawh tih tahe vengkah ukkung thli khaw Pathen lawng a khueh ukkung hue ni. 2 A-u khaw tahe vengkah ukkung thli aka oel khak tah Pathen kah awlthlaw te aka oelkung ni, a-u khaw te tila aka sai te tah amah sawah awlcekna a thoeng sak ai. 3 Theenna aka sai hue lawngtah ukkung bawi thli he rih hamla awm nawh, tede athe aka sai thli lawng ni rih ham a awm. Nang lawng aana khuehkung thli te rih ohla awm ham na ngaih atah theenna te sai lah, nang te ahih lawng n'koeh ai. 4 Metihtiah ahih tah Pathen kah tuihyoeih-thlaang tih nang ham theenna aka sai hamla ni. Tede nang lawng athe te na sai atah ahih te rih hawn, Metihtiah dantat thaina aana te a khueh tangtang. Ahih tah Pathen kah tuihyoeih-thlaang la awm tih athe-arana aka sai boeih sawah Pathen yuengah dantatna aka thoengsakkung ni. 5 He kah akawng alam dawngah nang lawng ukkung thli kah awl te ngaai peh, Pathen kah dantatna na rih u dawngah a awl ngaai pe mai ohla athe atheen pekbona kawpoek theen oen a awl ngaai pe uh. 6 Mangmu na peek u khaw he kawngah ni, metihtiah ukkung thli lawng bii a bi u te Pathen ham ni a bi. 7 Tedawngah ahimi na peek ham koei te tah pe uh; namah kah pumpakla peek ham koei mangmu oen kaawn-ava phu mangmu te khaw pe u langtah ahimi boeih te mik-hai yahna lang hinyah uh. 8 A-u tengah khaw laiba khueh u boel, nang lawng laiba na khueh tah khat oen khat lung u ham he ni. A-u khaw a thlaangpuei te a lungna atah Phungawl te a vai poen. 9 Phungawl lawngah, “Samphaih boel, thlaang ngawn boel, huuen boel, thlaang kah thaihu naai boel,” a ti boeih oen ah he thloei kah atloe awlpeek boeih tah, namah oen namah te na lungna u van angla na imbe te lungnah,” a tina dawngah te cui boeih poen. 10 Thlaang pakhat te na lungna atah meveng khaw a sawah athe te na sai roe manawh; tedawngah Phungawl boeih asoepla vaina he tah lungna ni. 11 Nangmi lawng he tah na sai u ham awm, metihtiah nangmi ham na ihduhna kalawng hinghang hamla atue avan pha poen tila na ming u. Metihtiah mami he thlawn la awmna ham atue atang tah mami lawng oengna n'khueh cuek vengkah lak ah tahe ah yoeii tare poen. 12 Yiinna tah boet tawm poen, khaw daai hang poen ai. Yiinna thaihu sai te toeng u poen silang tah aangna khuiah raal kahna awva te lo u sih. 13 Hingthun khawse ah aka awm thlaang thli angla mami lawng akoeih avaihla hing u sih, khawpaw rang au la awm u boel, yuuruui buh hah oen awm tlaih u boel, hutaa tawngpa thawlhna, boethe halangna awm boel seh, tawhsina oen uett-eena awm boel seh. 14 Bawipa Jesuh Khrih kah awva te lo uh, na pumsa kah thawlh sai ngaihna oen thawlhna kah kawkhuekna te toeng u loeih.
1 Oengna ben ah tha aka yoek thlaang thli te van do u lah, tede ahimi kah pumpakla a poek akawng alam dawngah ahimi oen oelhtaih u boel. 2 Thlaang pakhat lawngtah a oengna oen me ang khaw a caak boeih, tede oengna tha aka ra nawh lawngtah tawi-an bueng te a caak. 3 Soeprep aka ca thlaang lawngah te tila aka ca nawh te huhsit hamla awm nawh; soeprep aka ca thlaang te khaw tawi-an bueng aka ca thlaang lawngkhaw huhsit van boel seh. Metihtiah Pathen lawng ahih te a do poen. 4 Nang ta a-u la na awm aih tih thlaangtloe kah tuihyoeihthlaang te awl na cek thai? Te tuihyoeihthlaang lawng a bi thai, bi thai nawh tila awl-khuengkung tah amah kah Bawipa te ni. Ahih lawng a bi thai ai, metihtiah Bawipa lawng a bi sak thai ai. 5 Thlaang khatsut lawng atloe khawhin boeih lak ah khawhin hin at te awlpui bet la a poek, atloe pakhat lawngtah khawhin boeih he vai u tila a poek. Pakhat rip lawng a thinkaw ah a soengna te khueh seh. 6 A-u khaw, khawhin hin at te alue koek la a poek atah Bawipa te a hinyahna ni. A-u lawngkhaw soeprep boeih a caak atah Bawipa te a hinyahna ni. Metihtiah ahih lawng caak awkk dawngah te Bawipa tengah awmngaih ciil a thui. Caak awkk te aka yeh khatsut lawngkhaw Bawipa te hinyahna la a yeh van tih Bawipa tengah awmngaih ciil a thui. 7 Mami tim ah he a-u khaw mah ham bueng n'hing nawh tih mah ham bueng la n'duek nawh baal. 8 Mami lawng hing atah Bawipa ham n'hing u tih, duek ah khaw Bawipa ham ni duek u. Tedawngah mami tah n'duek ah khaw seh, hing ah khaw seh Bawipa kah thlaang ni. 9 Metihtiah thlaang duek oen thlaanghing boeih kah Bawipa la awm ham Khrih tah duek tih tho koep poen. 10 Tedawngah nangmi tawi-an bueng aka ca thli lawng n'tu hamla na maya manau te na coel khuep u? Tetih atah nangmi acungkuem aka ca lawng n'tu ah na maya manau te na hep na hap u? Mami boeih he Pathen haiah m'pai vetih amah lawng awl n'cek ai. 11 Metihtiah Caciim dawngah, “Kai tah aka hing Pathen la ka awm tangtang van angla Thlaang boeih lawng ka haiah khuklu oen cuengkueng ai, Kai he Pathen ni tila a phawng u ai, tila Bawipa lawng ti,” tila a thui. 12 Tedawngah mami boeih lawngah mah kah saina boeih te Pathen haiah m'phawng ai. 13 Tedawngah pakhat oen pakhat coelna he toeng u poen sih. Te lak atah, na maya manau a tlimna ham oen thawlhna khuiah a tlaakna koei te metuek khaw sai nawh ham tha huer uh. 14 Bawipa Jesuh oen pumkhatla awmna lawngah aciimphanla m'ming sak tah amah poek ah aciimcaih nawh caak awkk he a awm moenih ti he ni; tede thlaang pakhat lawngah khatsut caak awkk te caih nawh tila a poek atah te caak awkk tah ahih ham ciim-acaih nawh. 15 Nang lawng caak awkk pakhat khat oen na maya manau te a kaw na hoe sak nawh atah, te tah lungna dawngkah aka thoeng saina tlaih nawh ni. Ahih hamla Khrih tah a duek dawngah nang kah caak awkk oen ahih te tlim sak boel. 16 Nangmi lawng theen na ti u te miing the dangna hamla coeng sak boel. 17 Metihtiah Pathen kah Ram tah caak awkk dawng awm nawh tih Ciim Muithla kah peek doengna, ngaimawngna oen awmngaihna dawngah ni a awm. 18 He tila Khrih kah bii te aka bi lawngtah Pathen te a awmngaih sak tih thlaang lawngkhaw a koeh. 19 Tedawngah ngaimawngna taktak aka thoeng sak thaihu thli oen khat oen khat thara sak koei bawmcemna te mami lawng mengteng yoeyah ham awm. 20 Caak awkk dawng maiah Pathen kah sai tangte te phe u boel. Caak awkk boeih he caak koei ni, tede thlaang pakhat khat thawlhna ah aka tlim sak koei caak awkk he tah thawlhna ni. 21 Asoeng thaihu sai ham tah, na maya manau aka tlim sak thaihu saina, meh caakna, misuryuu awkkna te na kuemsuem u ham awm. 22 He kawng tah namah lawng na tangna angla te awm selang tah Pathen oen namah laklaw kah tuhkaina la khueh hawn. A-u khaw soeng a ti angla pakhat khat te a sai tih thinkaw a ciim atah yotheen aka dawng ni! 23 Tede caak awkk te a caak vengah ngaithliwhna a khueh atah Pathen lawng ahih te dan a tat ai. Metihtiah ahih lawng a sai te oengna dawngah akung a sut nawh dawngah ni. Thaihu boeih he oengna dawngah akung a sut nawh atah thawlhna ni.
1 Mami oengna tha aka ra hue lawngah amami kah thalrih phueih ham tha aka yoek thli te talawng takai ham awm. Mami lawng mah bueng kah ngaikhuekna te sai ham awm nawh. 2 Te lak ah, mami kah maya manau lawngah theenna koei, oengna ah a roengna koei te mami boeih lawng sai ham awm. 3 Metihtiah Khrih lawngkhaw amah kah ngaikhuekna te sai nawh. Te lak ah, Caciim lawng, “Nang salphaamna awl te ka sawah tla poen,” a ti angla te awm. 4 Caciim dawngah a thut soeprep boeih tah mami he cangpueina ham oen toelthaamna ham ni. Te tila a thut te tah, Caciim lawng mami m'peek uehthaina oen thincakna rang oen ah mami lawng ngaiuepna te khueh ham ni. 5 Khrih Jesuh kah lawngpui huh sakna te na vaina rang oen thinkaw khat la khueh thai ham ueh-thaina oen thincakna kungmah Pathen lawngah nangmi te n'bawmcem hawn seh. 6 Te atah nangmi boeih lawng thik at la awlkaa pakhat la te mami Bawipa Jesuh Khrih kah ana Pa oen Pathen te na thangpawm thai ai. 7 Khrih lawngah nangmi n'do van angla Pathen kah ruep-awmna a tuengna ham nangmi khat oen khat do u van lah. 8 Tedawngah nangmi tengah kavan thui tah Judah thlaang thli yuengla Khrih tah tuihyoeihthlaang la coengg, Te tah Pathen lawng ahimi kah patuer thli tengah awl a kam te asoepna ham oen ah Pathen tah uep-awm ni tite tueng sak ham tih, 9 Gental thlaangphun lawng-khaw Pathen amah kah reenna te a thangpawmna thai ham ni. Caciim lawngah, “Tedawngah Gental thlaangphun tim ah nang te kan thangpawm ai, Nang koehna laa ka sa ai” tila a thui. 10 A thui koep baal tih, “Gental thlaangphun Pathen kah thlaang thli oen awmngaih u lah.” 11 Koekthoek ah, “Gental thlaang boeih lawng Bawipa te thangpawm uh; thlaang boeih lawng Bawipa te thangpawm uh,” tila a thui. 12 Tecoengah Isaiah lawng, “Jesi kah cadil pakhat law ai; ahih tah Gental thlaangphun uk hamla law vetih ahimi lawng ahih dawngah ngaiuepna a khueh u ai,” tila a thui. 13 Ciim Muithla tharana oen nangmi kah ngaiuepna te roep poepa ham ngaiuepna kungpui, Pathen lawngah amah te na oengna rang oen awm-ngaihna oen ngaimawngna boeih oen ah nangmi te abetoetla n'toi hawn seh. 14 Maya manau thli: Nangmi tah theenna oen na be u, Cuihhoena na khueh u tih pakhat oen pakhat na cang puei patoeng u thai tite kamah roe lawng atheenla ka ming. 15 Tecakhaw, he capat dawngah kan ming sak koep ham ka ngaih akawng alam khatsut te raltheenla oen ka thut. Ka raltheenna tah Pathen lawng Gental thlaangphun ham bii aka bi la, 16 Khrih Jesuh kah tuihyoeihthlaang la awmna te m'peek dawngah ni. Gental thlaangphun lawngah Pathen kah do koei luciik la a awmna ham oen ah Ciim Muithla rang oen Pathen tengah nawn koei thaihu la awmna ham Pathen tengkah, Awlthang Theen ka phawng vengah he khawsoeih angla bii ka bi. 17 Tedawngah Khrih Jesuh oen pumkhat-la awmna rang oen Pathen bii ka bi he ka pawmsang u. 18 Gental thlaangphun te mawt ham oen Pathen awl te a ngaaina u ham awlkaa oen khawseh, saina oen khawseh, 19 kawpoek rai saina oen khawseh, kawpoek rai tharana oen khawseh, Pathen Muithla tharana oen khawseh, Khrih kah a sai bueng te ni raltheenla ka thui ai. 20 Ka kamthlahna poepa tah Khrih kawng a yaakna nawh ahuen amawl ah Awlthang Theen phawng ham he ni, thlaangtloe lawngah imtuung a sut tangte sawah im sak ham nawh ni. 21 Caciim lawngah, “Ahih kah akawng te aka thui noek nawh hue lawng a huh u vetih aka ya noek nawh thli lawng a yaakming u ai,” tila a thui angla te awm. 22 He dawngah ni nangmi tengah law heem te kanghalh la ka awm poepa. 23 Tede, tahe atah he peng yunyan ah bii ka coeng poen tih nangmi tengah law hamla kum yahawh hlang ka cai puet angla, 24 tahe tah nangmi tengah ka law thai poen ai tila ka ngaiuep. Sping ram la yin ka ceh vengah nangmi oen huh u ham ka ngaih tih nangmi tengah kawlkalh ka cam coengah tela te ceh ham tah nan bawm u ham ka ngaih. 25 Tede tahe tah kawlkalh ah Jerusalem khawpui la ka cet de silang te kah Pathen thlaang thli ham bii ka bi pe de ai. 26 Macidonia ram oen Akhaia ram kah Khrihcabu lawng Jerusalem ah aka awm Pathen thlaang thli timkah khawdeng lungma thli te kawthawh oen bawm hamla awl a tloek u tih thaihu peek a khueh u. 27 Te tila awltloekna a khueh u te tah amami kah kawthawh oen ni; tede ataktang atah ahimi lawng-khaw, khawdeng thli bawm ham te a sai koei bii van ni. Judah thlaangphun lawng Muithla ben kah yotheenna te Gental hue tengah arek ara van angla Gental hue lawngkhaw amami kah thaihu thaiha yotheenna a dang te oen Judah thlaangphun te a bawm van ham awm. 28 He bii he ka coeng tih ahimi ham a cawi pe tangka boeih te ahimi kut ah ka tloeng pe boeih coengah Sping ram la ka cet vetih nangmi tengah ka law pahoei ai. 29 Nangmi tengla ka law vengah Khrih kah yotheenna asoepbir oen ka law ai tila ka ming. 30 Maya manau thli, mami Bawipa Jesuh Khrih oen Muithla kah peek lungna oen ah kai hamla kamah oen haih Pathen tengah thinkaw thluembuekcala thangthui ham kan ceel u. 31 Judia ram kah aka oeng nawh hue teng kalawng ading asuekla ka awmna ham oen Jerusalem ah bii ka bi te, te kah aka awm Pathen thlaang thli lawng awmngaih oen a do thaina ham thangthui u lah. 32 Tedawngah Pathen kawngaih atah awmngaih oen nangmi teng ka law vetih nangmi tengah kamyin la ka law he kawhoena oen thadueng thaai dangna la awm ai. 33 Mami ngaimawngna kungpui Pathen tah nangmi boeih tengah awm hawn seh. Amen.
1 Kenkhria khaaw kah Khrihcabu ah bii aka bi mami kah ngannu Fibi te nangmi tengah ming sak ham ka ngaih. 2 Pathen thlaang thli tah pakhat oen khat na do tueng van angla Bawipa miing oen ah ahih te do u lang angoe boeih te nangmi lawng van bawm uh; ahih tah thlaang yahawh ham paya theen la awm tih kai hamla khaw awm van. 3 Khrih Jesuh kah bii bina dawngah bii bi haih Priscilla oen Akuila te kavan toei. 4 Ahih rawi lawng kai hamla duek ngam hih. Ahih rawi te ka uem tangkiik, kai bueng nawh tih Gental Khrihcabu boeih lawngkhaw a uem u. 5 Ahih rawi im ah aka pum Khrihcabu te khaw kan toei u. Asia ram ah Khrih aka oeng lamhacuek, ka lungna ka paya Epenetas khaw kan toei. 6 Nangmi ham bii aka yawm Meri khaw ka toei. 7 Andronikas oen Junias te khaw ka toei, ahih rawi tah kai oen thong aka tla haih Judah thlaangphun ni. Ahih rawi te celtuih thli lawngkhaw atheenla a ming u. Kai lak ah lamhala Khrihca la aka awm hih ni. 8 Bawipa oen pawlneengna ah ka lungna paya theen Ampliatas khaw kan toei. 9 Khrih kah bii dawngah biibipuei Urbanas oen ka lungna paya Stakhis khaw kan toei hih. 10 Khrih ah uep-awm Apellis khaw kan toei. Aristobulas imkhuikaw khaw kan toei u. 11 Kamah kah Judah thlaangphun Herodion oen Nasisas imkhuikaw Khrihca maya manau khaw kan toei u. 12 Bawipa bii aka bi Traifina oen Traifosa khaw kan toei hih tih, Bawipa ham bii yahawh ngaai aka bi ka lungna ka paya Persis khaw kan toei. 13 Bawipa kah bii dawngah tha aka huer Rutas oen kai he a ca angla dodankung a manu te khaw kan toei hih. 14 Asinkritas, Flekon, Harmis, Patrobas, Harmas, ahimi oen ah aka awm haih atloe Khrihca maya manau boeih te kan toei u. 15 Filolokas oen Julia, Nirias oen a ngannu Olimpas oen ah ahimi oen aka awm haih Pathen kah thlaang boeih te kan toei u. 16 Nangmi pakhat oen khat maya manau angla toei u lah. Khrih kah Khrihcabu boeih lawng nangmi te n'toei u. 17 Maya manau thli: pekbona aka thoeng sak thli oen oengna te aka thumhang sak oen ah nangmi lawng na cang u tangte cangpueina aka oelh-taih thli te ngaithuen ham kan uen u: Ahimi teng kalawng thloeng uh. 18 Metihtiah te ang thaihu aka sai hue te tah mami Bawipa Khrih kah bii aka bi nawh ni, amami kawngaih ni a sai u. Ahimi lawngah awlding awltheen oen koehna awl oen ah tu khaw aka ming nawh thlaang-thli te athai alatna u. 19 Nangmi lawng awlthang theen dawngah ueppang koeila na awm u te thlaang boeih lawng a yaak u, tedawngah he kawngah he nangmi sawah ka kaw hoe tangkiik. Nangmi te theenna ben atah thlaangcuih la awm ham, tede athe ben atah tu khaw aka ming nawh angla awm sak ham ka ngaih. 20 Mami kah ngaimawngna kungpui Pathen lawngah Seitan te nangmi kah khowtang ah a neet yue poen ai. Mami Bawipa Jesuh kah lungvatna tah nangmi tengah awm hawn seh. 21 Kai oen biibipuei Timote lawng nangmi te n'toei u; Judah phun ka paya Lucias, Jason oen Sosipater mi khaw kan toei u. 22 He capat aka thut pe kai Tertias lawngkhaw nangmi te Khrihca thli kah toeina angla kan toei. 23 Kai dodankung oen ka pahna imkung Kaias khaw nangmi te Khrihca thli kah toeina angla kan toei. 24 Mami Bawipa Jesuh Khrih kah lungvatna tah nangmi boeih sawah awm hawn seh. Amen. 25 Pathen te thangtheen sak u sih! Awlthang Theen dawngkah angla, kai lawng ka phawng Jesuh Khrih kawng oen yan veng san broela a thuh a elh awltak awlhuep avan phawng te oen ah Pathen lawng nangmi te na oengna dawngah acakla m'pai sak thai ai. 26 Tede, tahe ah te kah awl tah tawngha thli kah cathut rang oen avan pha sak poen; thlaang boeih lawng awltak te a oeng tih a vai thaina ham dungyan Pathen kah awlpeek rang oen thlaangphun boeih tengah a phawng poen. 27 Pakhat bueng la aka awm tih cuihna boeih oen aka soep Pathen tah Jesuh Khrih rang oen dungyan toe ruep-awmna awm hawn seh! Amen.
1 Pathen kawngaihna oen Khrih Jesuh kah celtuih la awm ham khue la aka awm Kai Pawl oen mami kah manau Sostenes lawng - 2 Pathen kah thlaangciim la awm ham khue la aka awm tih Jesuh Khrih oen tuhkaina rang oen ah amah kah a koe la aka awm Kawrin khaaw kah Pathen Khrihcabu, mami oen ahimi kah Bawipa la aka awm Jesuh Khrih te a bok tih khaaw tawm ram tawm ah aka awm thlaang thli tengah khaw, naangmi tengah khaw ca kavan pat u: 3 Mami kah Pa Pathen oen Bawi-pa Jesuh Khrih lawng lungvatna, ngaimawngna te nangmi m'pe u hawn seh. 4 Khrih Jesuh rang oen lungvatna te nangmi m'peek dawngah Pathen tengah awmngaih awl ka thui poepa. 5 Metihtiah Khrih oen pumkhatla awmna rang oen ah awlcal thingkaa oen thoemthai cuihna boeih ah khaw soeprep boeih ah na bawireng soeh u poen. 6 Khrih kawng awlthang te nangmi kaw khuiah acakla awm poen tih, 7 mami kah Bawipa Jesuh Khrih te na lamtoen u vengah he yotheen kam-awmna pakhatca khaw avoetna na khueh nawh. 8 Mami Bawipa Jesuh Khrih khawhin ah cawttbauh kap awm nawh hamla amah lawng aboet toela nangmi te n'cak sak ai. 9 A Capa Jesuh Khrih mami Bawipa oen pawlneeng haih hamla khuekung Pathen tah uep-awm ni. 10 Maya manau thli, mami Bawipa Jesuh Khrih kah saithaina aana oen nangmi boeih tengah reenna kavan bih u, nangmi tim ah pekbona a awmna nawh ham awlthui kaalai dawngah na kaw vai u sak. Poekna pakhat, mengtengna pakhat oen ah awm uh. 11 Maya manau thli nangmi tim ah tawhsina awm tih Khloe kah imkhuikaw thlaang pakhat lawng avan thui. 12 Ka thui ngaih tah he ni: Nangmi pakhat rip lawngah athloek athloekla na thui u. Pakhat lawngah “Kai tah Pawl kah hubang ni” ti tih atloe khat lawngah, “Kai tah Apollos kah hubang ni,” ti, atloe khat lawngah, “Kai tah Piter hubang ni,” ti tih atloe khat lawng, “Kai tah Khrih hubang ni.” tila a thui u ti he ni. 13 Khrih he bu la pekbo u aw! Nang ham thinglam dawngah Pawl aw aka duek! Nangmi he Pawl kah hubang la awm ham aw baptisma na dang u? 14 Krispas oen Kaias bueng nawh atah nangmi tim kah a-u khat khaw baptisma ka peek nawh dawngah Pathen te ka uem tangkiik. 15 Tedawngah kamah kah hubang la awm ham baptisma ka dang tila a-u khat lawngkhaw thui thai manawh. 16 (Aw, Stetanas oen a imkhuikaw te baptisma ka peek; tede atloe baptisma ka peek te ka ming nawh.) 17 Khrih lawngah kai he baptisma aka pe hamla n'tuih nawh. Thinglam dawngah Khrih kah duekna te ahongla a coenggna nawh ham thlaanghing kah cuihna te hawna ohla Awlthang Theen thui hamla ni n'tuih. 18 Metihtiah thinglam dawngah Khrih kah duekna kawng awlthang he ha-ata lii thlaang thli hamla tah awlpoei la awm de, mami thlawn la aka awm lii hue ham tah Pathen kah tharana ni. 19 Caciim lawngah, “Thlaangcuih thli kah Cuihna te ka phe vetih thoemthaina aka khueh thlaang thli kah mingna te khaw ka hoett pe bangtlang ai.” tila a thui. 20 Tedawngah thlaangcuih thli te mela a awm ai? Thoemthaina aka khueh thlaang thli te mela a awm u? He dilai han kah calthai thli mela a awm u? He dilai dawngkah cuihna he tah ngau-athuuna ni tite Pathen lawng a tueng sak poen! 21 Thlaanghing lawng amah kah cuihna oen Pathen te a ming thaina nawh ham amah lawng a cuihna oen a sai poen. Kaimi lawng ka phawng, “ngau-athuuna” a ti u awlthang he aka tangna thlaang te thlawn hamla Pathen lawng awl a khueng. 22 Judah thlaang thli lawng kawpoek rai miknoekna te a ngaih u tih Krik thlaang thli lawngtah cuihna te a tlap u. 23 Kaimi lawngah thinglam dawngkah a ngawn u Khrih te ka phawng u tih te awlthang te Judah thlaang thli ham tah tlimna lungto la awm tih Gental thlaang thli ham tah awlpoei la awm; 24 tede Gental thlaang khaw, Judah thlaang khaw seh Pathen lawng a khue thlaang thli ham tah te awlthang te tah Pathen kah cuihna oen tharana la aka awm Khrih te ni. 25 Metihtiah Pathen kah ngau-athuuna tah thlaanghing cuihna lak ah apuehla cuih ngaai tih Pathen kah thayokna he tah thlaanghing kah tharana lak ah a tha ra ngaai. 26 Maya manau thli, Pathen lawng nangmi n'khue vengah metila na awm u tite tahe ah poek u lah. Thlaanghing kah huhna atah nangmi he thlaangcuih khaw, huham tharana aka awm thlaang khaw, hinyah koei thlaang khaw yoehca mai ni na awm u. 27 Thlaangcuih thli te yah pawh sak ham dilai lawngah n'tu tamu nawh la a poek te Pathen lawng a tuek tih huham tharana aka khueh thlaang thli te yah phueih sak ham dilai lawng tha aka ra nawh thlaang la a poek te a tuek. 28 Dilai lawng awlpuila a poek te phe hamla dilai lawng dapsitla a huh thlaang, thlaangnuih pariing la aka awm, thlaang la khaw a toehtham nawh thlaang te Pathen lawngtah a tuek noeng roe ni. 29 He ngoen tah Pathen haiah a-u khaw oekthloen u thai nawh ti ngaihna ni. 30 Tede nangmi tah Pathen lawng Khrih Jesuh oen pumkhatla n'awm sak poen tih Pathen lawng Khrih he mami kah cuihna la avan sai poen. Ahih rang oen ah mami tah Pathen oen roeproeina awm poen; mami tah Pathen kah a thlaangciim la n'coengg u tih mami he n'loeih sak poen. 31 Tedawngah Caciim lawng, “A-u khaw oekthloen u ham a ngaih atah Bawipa kah thaihu sai dawngah oekthloen u seh,” tila a thui.
1 Maya manau thli, nangmi tengah Pathen kah awlhuep awltak te phawng hamla ka law vengah te yaakming ham aka rai awllung thli oen cuihna awl te ka hawna nawh. 2 Metihtiah nangmi oen n'awm haih u vengah te awlpuila thinglam dawngah Jesuh Khrih kah a duekna kawng nawh atah soeprep boeih te hilh bangtlang tih thui tlaih nawh ham thinkaw ka melh rap poen. 3 Tedawngah nangmi teng ka law vengah te ka tha yoek sut tih rihna oen ka thuen, 4 Nangmi kan cangpueina oen awlthuina dawngah thlaanghing kah cuihna calthaina oen ka phawng nawh tih Pathen Muithla kah tharana oen ni ka phawng. 5 Tecoengah nangmi kah oengna he thlaanghing cuihna dawngah akung te sut u nawh tih Pathen tharana dawngah ni akung te a sut u. 6 Te cakhaw muithla ben ah poekna aka soep thlaang thli teng atah cuihna awl te ka thui pe. Tede te awl te tah he dilai dawngkah cuihna nawh ni, he dilai ukkung thli kah aka khum tharana te nawh ni. 7 Kai lawng ka phawng cuihna te tah Pathen kah cuihna awlhuep thlaanghing tengah pho sak ohla thuh khak la aka awm tih dilai a suen thlan veng kalawng mami kah ruep-awmna ham avan khueh tangte cuihna te ni. 8 He dilai ukkung thli a-u khat lawngkhaw cuihna he ming u nawh. Ahimi lawng ming u kawinih ruep-awmna Bawipa te thinglam dawngah ngawn u manawh. 9 Tede Caciim lawng a thui angla, “A-u lawng vaikhat khaw hu nawh tih ayaak nooek nawh, a-u lawngkhaw coengg thai ai tila poek nooek nawh te amah aka lungna thlaang thli hamla soeprep te Pathen lawng a roek a bah pe poen,” tila a thui. 10 Tede a awlhuep te amah Muithla rang oen ah mami he Pathen lawng m'ming sak poen. Muithla lawngtah soeprep boeih Pathen kah kamthlahna adungkoek thuh elh la aka awm te pateng khaw pheng a tlap. 11 Thlaang pakhat kah a kawng alam he amah khuiah aka awm a muithla bueng lawng ni a ming; tetih van angla Pathen kawng he khaw Pathen Muithla bueng lawng ni a ming. 12 Mami lawng he dilai dawngkah muithla te n'dang u moenih; Pathen lawng mami m'peek boeih te mingna ham Pathen lawng avan tuih Muithla te ni mami lawng n'dang u. 13 Tedawngah Muithla aka khueh thlaang thli tengah muithla ben awltak ka thuicaih u vengah he thlaanghing cangpueina awl oen te thui thai la awm nawh tih Muithla kah cangpueina awl oen ni ka thui. 14 A-u khaw Muithla aka khueh nawh te tah Pathen Muithla dawng kalawng aka law kutdo te dang thai manawh. Te ang thlaang lawngtah yaakming thai tang manawh; ahih hamla tah apoeila ni a awm, metihtiah Muithla ben kah kutdo thli te tah Muithla bueng oen ni ming thai la a awm. 15 Muithla aka khueh thlaang lawng atah soeprep boeih kah aphu te apek abo thai, tede ahih te tah a-u khat lawngkhaw pekbo thai nawh. 16 Caciim lawngah, “Bawipa thinkaw te a-u lawng a ming? A-u lawngah ahih te poekna a peek thai ai?” tila a thui. Tecakhaw kaimi tah khrih kah thinkaw te ka khueh u.
1 Maya manau thli, atak tang atah Muithla aka khueh thlaang thli tengah awl ka thui angla nangmi teng atah ka thui thai nawh; he dilai thlaang thli angla Khrihca oengna dawngah camaw angla ni nangmi tengah awl kavan thui. 2 Nangmi lawng buh haam na caak u thai thlan dawngah suuktui ni kan tuul u hun ai. Tahe ah pateng khaw buh haam na ca u thai thlan hun, 3 metihtiah nangmi tah tahe toe he dilai thlaang thli angla ni khaw na sak u hun. Nangmi tim ah uett-eena awm tih khat oen khat na tawh na thaam u vengah te nangmi tah dilai thlaang la na awm u tih dilai phung la khaw na sak u tite tueng sak nawh aw? 4 Nangmi lawngtah, “Kai tah Pawl kah hubang ni na ti u tih akhat lawngah, “Kai tah Apollos kah hubang ni,” tila na thui u te he dilai thlaang angla na sai u nawh aw? 5 Ataktang atah Apollos he a-u? Pawl he ta a-u? Kaimi he tah nangmi lawng Pathen te na tangna u hamla mawtkung Pathen kah thlaang thli mai ni. Kaimi lawngah Bawipa lawng sai hamla m'peek bii te ni ka bi u. 6 Kai lawngah ati-amu te ka tue tih Apollos lawng tui a suep, tede athing aka po sak tah Pathen ni. 7 Amu-ati tuekung oen tuisuepkung te awlpui nawh ni. Athing aka posakkung Pathen ni awlpui. 8 Amu-ati tuekung oen tuisuepkung tah alakloena awm nawh; A bina taring ah Pathen lawng kutdo rip a peek ai. 9 Metihtiah kaimi he tah Pathen ham bii aka bi haih la ka awm u tih nangmi te tah Pathen kah lo la ni na awm u. Nangmi tah Pathen kah impui la khaw na awm u. 10 Pathen kah peek kutdo te ka hawna tih im sak aka thoem tangkiik angla bii ka bi tih lungdang ka suem, te sawah te thlaangtloe lawng im a sak. Tede metila ka sak u tite a-u khaw ngaithuen rip u seh. 11 Metihtiah Pathen lawngtah Jesuh Khrih pakhat bueng te ni lungdang la a suem tih atloe lungdang te suem thai koei la awm tlaih nawh. 12 Thlaang khatsut lawngtah te kah lungdangsuem sawah sui oen khaw, ngun oen khaw, lungto phutlo oen khaw impui te a sak u mai ai; thlaangtloe hue lawngtah thing oen khaw, khawpawl oen khaw, caangying oen khaw a sak mai ai. 13 Ahimi pakhat rip kah biibi thoemthaina te tah Khrih Khawhin ah tueng peng vetih n'huh ai. Metihtiah te Khawhin atah thlaang boeih kah biibi te hai oen ah a tueng sak ai; hai oen ah a noek adak vetih thoemthaina taktak te tueng ai. 14 Lungdangsuem sawah a sak im lawngah hai te a khoeng atah imsakung lawng kutdo a dang ai. 15 Tede a-u khaw im a sak te a ung thloep atah ahih tah sung ai; tede amah ngoen tah hai dawngkah aloeih atah thlawn la awm ai. 16 Nangmi tah Pathen tempal bok-im la na awm u tih Pathen Muithla nangmi kaw khuiah a awm te ataktang la na ming u! 17 Tedawngah a-u lawngkhaw Pathen kah tempal bok-im te a phe atah Pathen lawng ahih te a phe van ai. Metihtiah Pathen kah tempal bok-im tah ciimcaih tih nangmi roeroe he ahih kah tempal bok-im la na awm u. 18 A-u khaw amah oen amah te thai alat u boel seh. Nangmi tim kah a-u lawngkhaw amah oen amah te he dilai siing angla thlaangcuih la a poek u atah thlaangcuih tang tang la a awm thaina ham thlaangngau-paathuu la coengg seh. 19 Metihtiah he dilai lawng cuihna tila a poek te Pathen mik huh atah a poei-oep mai ni. Caciim lawngah “Pathen lawngtah thlaangcuih thli te amami kah dongtung dawngah a man sak.” tila a thui, 20 tecoengah atloe caciim lawngah, “Bawipa lawngtah thlaangcuih thli kah poekna he apoeioep ni tila a ming” tila te a thui baal. 21 Tedawngah a-u khaw thlaanghing kah saithaina akawng alam dawngah oekthloen u ham awm nawh. Ataktang atah soeprep boeih he nangmi kah koe-ava la ni a awm: 22 Pawl, Apollos oen Piter khaw, he dilai khaw, duekna oen hingna khaw, tahe san he khaw, hai ben kah aka law koei san khaw seh he thli boeih he nangmi kah koe-ava ni, 23 Nangmi tah Khrih kah koe-ava la na awm u tih Khrih tah Pathen koe la awm.
1 Nangmi lawngah kaimi he Pathen kah awlhuep awltak khoembelkung, Khrih kah tuihyoeih-thlaang la nan poek u ham awm. 2 Te ang tuihyoeih-thlaang ham awlpui pakhat tah a bawipa tengah uep-awm la awm ham te ni. 3 Tahe ah nangmi lawngkhaw, thlaangtloe lawngkhaw kai kah kawng he thlaanghing siing angla na thui u atah n'tu la khaw ka ngaai mai nawh; kamah lawng pateng khaw ka thui thai nawh. 4 Ka kawpoek tah ciim acaih ngoen ta, tede te tila ka thui te ka thawlh nawh tila thuingaihna nawh ni. Bawipa khat bueng lawng ni ka sawah awl a cek thai ai. 5 Tedawngah atue a pha thlan ah nangmi lawng a-u khaw awl cek u boel. Hukhueng awlcekna tah Bawipa a law vengah ni a awm hun ai; ahih lawngtah thlaanghing thinkaw ah ahuepla a poek thli te a pho sak vetih yiinna khuikah awlhuep thli te aangna dawngah a tueng sak ai. Teveng atah thlaang boeih lawng amah kah a taring ah Pathen kah koehna te a dang ai. 6 Maya manau thli, nangmi kah theenna hamla he ang boeih he Apollos oen kamah he nuehtahna la ka hawna tih kavan thui. He tila ka thui he tah, “Phung-alam te pooeng voelh boel” tila a thui te nangmi lawng na mingna ham ni. Nangmi a-u khat lawngkhaw pakhat te tah koeh pakcal boel langtah atloe pakhat te tah thuitheet soeh aih boel. 7 Nangmi te thlaangtloe lak ah asangluelh la a-u lawng n'sai? Na khueh soeprep boeih he Pathen peek nawh aw? Na khueh na toen u te ayoe peek kutdo nawh angla metila na oekthloen u thai? 8 Nangmi lawng na ngoe soeprep boeih te na khueh tang tang u poen aw? Na bawi na len u tangtang aw? Kaimi tah sengpahrang la ka coengg u nawh de nangmi ta sengpahrang la na coengg u poen aw? Nangmi oen haih kaimi khaw sengpahrang la coengg thaina ham nangmi te sengpahrang la na coengg u tangtang ham ka ngaih. 9 Metihtiah kaimi celtuih thli he rangpui haiah ngawn ham koei thlaang, dilai oen vaan kah vanthlaang thli oen thlaangphun boeih lawng dan mailai ham a hukhueng koek la Pathen lawng n'khueh tila ni ka poek poen. 10 Kaimi he Khrih hamla thlaangngau la ka awm u; tede nangmi tah Khrih oen pumkhatla awmna rang oen ah thlaangcuih la na awm u! Kaimi tah ka tha yoek sut, tede nangmi tah na tha ra u! Kaimi tah thlaang kah hep-ahap la ka awm u, nangmi tah hinyah koei la na awm u! 11 Tahe vengah khaw buhpawng tuihalh oen ka rera u; hinaak himbai pawn sawi ka buen ka naak u; thlaang lawngah kaimi n'tam u; ahuen atloe tloe la ka pooeng reroe u; 12 thatlawh thaboep la bii ka bi u tih ka buen ka naak u. Thlaang lawng n'tap-voep vengah yotheen kam-awmna oen ka phuehsawm u; thlaang lawng n'heemtek vengah sut ka duen pe u; 13 Thlaang lawng thekha la n'sai vengah awlding oen ka thung pe u. Kaimi tah he dilai kah kawhnot vaiking la ka awm u; Tahe toe khaw he dilai ah thlaang kah tuiilehkap thlaang la ka awm u! 14 Nangmi he yah sak hamla ka ngaih dawngah nawh tih ka lungna ca-anau angla toelthaam ham ka ngaih dawngah ni kavan thut. 15 Metihtiah nangmi kah Khrihca khawsakna dawngah doenkung thli thongha na khueh u mai cakhaw na Pa tah pakhat bueng ni na khueh u. Metihtiah Khrih Jesuh oen pumkhatla na hingna dawngah Khrih Awlthang Theen nangmi tengah kavan khuenna rang oen na pa tah kai ni. 16 Tedawngah kai kah khawboe ramlang he na oett u hamla kan ceel u. 17 He tila ka kamthlah u dawngah ni Timote he kavan tuih, ahih tah Khrihca khawsakna dawngah ka lungna uep-awm ka capa ni. Ahih lawng atah kai lawng ka vai tih peng tawm khrihcabu tengah ka cang puei Khrih Jesuh oen pumkhatla awmna dawngah hingna athaai atungpui te avan thui koep ai. 18 Thlaang khatsut lawngtah kai lawng nangmi te n'hill adawng tlaih manawh tila na poek u tih na oekk u. 19 Tecakhaw Bawipa lawng a ngaih atah nangmi tengla yue ka law vetih te kah aka oekthloen u thlaang thli lawng a thui awl bueng muehla huham tharana a khueh u te khaw kamah lawng ka huh ai. 20 Metihtiah Pathen Ram he tah awlhong paikaa mai nawh tih huham tharana ni. 21 Nangmi tengah cungpoelh oen aw ka law ai? tih nawh atah lungna, kawdawna oen aw ka law ai? Ame ang na ngaih u?
1 Nangmi tim ah te lukih thlaang thli lawng pateng khaw a yahna koei rih awm tangkiik mai hutaa tawngpa thawlhna awm tila ka yaak. Thlaang pakhat lawngtah a manuthawn oen ip haih tila avan thui u! 2 Tedawngah metila nangmi na oekk u thai dai lauh mai? Tetih ohla nangmi tah na kaw the u vetih te ang thaihu aka sai thlaang thli te namami kah bu khui kalawng na hek u ham awm de ta. 3 Kai he ka pum ngoen tah nangmi oen ah athla hlang la ka awm de thinkaw oen tah nangmi tengah ka awm; tedawngah nangmi tengah aka awm angla rih awm thaihu aka sai thlaang thli sawah mami kah Bawipa Jesuh Khrih miing oen ah awl ka cek poen. Nangmi thik at la na pum u vengah te mami oen aka awm haih Bawipa Jesuh kah tharana rang oen ah ka thinkaw oen nangmi tengah ka awm. 5 Bawipa khawhin ah a muithla lawng thlawnna a dangna ham a pum te phe hamla te thlaang te Seitan kut ah pe uh. 6 Nangmi lawngah na oekthloen u ham awm roe nawh! Nangmi lawngah, “Tawlru yoehca lawng ta-ekk hawl at te a rawi sak.” a ti awl te na ming u. 7 Nangmi lawngah aciimthlaula na awmna u ham thawlhna tawlru ruem te hoett uh. Te atah tawlru aka thuum nawh takawi thaaithikla na awm u ai, te tila nangmi na awm tangtang tite ataktangla ka ming. Metihtiah mami kah Kaantaak Poei te oepsoeh la awm poen, mami kah Kaantaak Poei tuuca Khrih te Luciik la thawthueng u poen tih mami kah Kaantaak Poei sai ham oepsoeh la awm poen. 8 Tedawngah mami kah Kaantaak Poei te thawlhna tawlru ruem oen athe-arana te thuum ohla tawlru aka thuum nawh takawi, aciim acaih awltak takawi oen ah sai u sih. 9 Nangmi tengah kavan thut ca-pat dawngah te thlaanghalh paadak thlaang thli oen pawlneeng nawh ham kavan thui poen. 10 Te tila ka thui te thlaanghalh paadak thlaang, apueh asawm aka ngaih thlaang, thlaanghuuen paacaan thlaang thli, kutsaimuei aka bok thlaang thli oen pawlneeng u boel tila ka thuingaihna nawh ni. Te ang thlaang thli teng kalawng thloeng u sih ti mai kawinih he dilai he ceh taak ngala ham ni a awm poen ai. 11 Ka thuingaihna tah khrihca la ka awm ti van de thlaanghalh paadak, apueh asawm aka ngaih moek, kutsaimuei aka bok, thlaang thuitheet thlaang, yuuruui thlaang, thlaanghuuen paacaan thlaang la aka awm hue oen ah pawlneeng haih u boel tila ka thuingaihna ni. Te ang thlaang oen tah caak awkk ham pateng ngawl haih u roe boel. 12 Ataktang atah Khrihcabu khuiah aka awm nawh thlaang thli awlcek ham te kai kah biibi nawh ni. Ahimi te Pathen lawng awl a cek ai. Tede namami bu khuikah thlaang thli te tah nangmi lawng awl na cek ham koei nawh aw? Caciim lawngah, “Namami bu khuikah thlaangthe thli te hek uh.” tila a thui de lah koen.
1 Nangmi khat oen khat Khrihca paya oen awlpuungna a awm vengah lumlai te Pathen thlaang thli thui sak ohla metila lukih thlaang awlcekkung thli tengla na ceh u? 2 Pathen thlaang thli lawngah dilai he awl a cek ai tite na ming u nawh aw? Te tila te dilai he awl cek hamla na awm u maiah lumca laaica mai te awl na tloek thai u nawh aw? 3 Mami lawng vanthlaang thli te awl cek ham awm tite na ming u nawh aw? Tedawngah he dilai hing khuikah thaihu tah awlcek tare ham awm ta! 4 Te ang lumlai te a awm atah Khrihcabu oen aka betpha u nawh thlaang tengla te na cet u vetih na thui sak u ai aw? 5 Na yak u nawh aw! Khrihca pueipaw khat oen khat laklaw ah awlpuungna a awm vengah lumlai aka thui thai namami bu khuiah thlaangcuih pakhat tah awm macawi. 6 Khrihca khat oen khat taya na cawi u tih oengca la aka awm nawh thlaang te lumlai na tloek sak u aroeh mai! 7 Nangmi lawng upadi oen tuhkaina ben ah awlpuungna na khueh u dawngah te na dok dingri poen tite a tueng sak. Ka dok poen na ti u mai kawinih namami ham theen nawh ai aw? Na thaihu van rot batt u cakhaw nangmi ham theen bet nawh ai aw? 8 Tetih ohla nangmi lawngtah namami kah maya manau pakhat teng mai ah khaw athe ara te lat na sai u tih pakhat kah thaihu te na rot pe u! 9 Pathen Ram te thlaangthe lawngtah paang manawh tite ataktangla na ming u ta. Namami oen namami te thailat u khoeng boel: Thlaanghalh paadak thli, kutsaimuei aka bok thlaang thli, samphaih thlaang thli, hutaa puei oen tawngpa puei oen ah aka thawlh thlaang thli, 10 thlaang kah thaihu aka rot thli, apueh asawm aka ngaih moek thlaang thli, yuu aka ruui thlaang thli, thlaang aka theet thli, thlaanghuen thli tah a-u khaw Pathen Ram te pang manawh. 11 Thlaang khatsut tah te tila te thoem na awm u. Tede nangmi tah na thawlhna avan ciim sak poen; Nangmi ngoen tah Pathen tengah na tlungmu u poen; Bawipa Jesuh Khrih rang oen Pathen kah Muithla rang oen ah nangmi tah Pathen oen na roeproei u poen. 12 Thlaang khatsut lawngah, “Kai lawngtah me ang thaihu khaw ka sai thai” na ti u. Na sai thai u ngoen ta, tede nangmi hamla soeprep boeih he theen luem nawh. Kai lawng me ang thaihu khaw ka sai thai tila ka thui thai van ta, tede kai tah me ang thaihu lawngkhaw sal la n'sai thai manawh. 13 Thlaang khatsut lawng atah “Caak awkk he bungpui hamla awm tih bungpui he tah caak awkk hamla ni.” na ti u. Soeng mai ngoen ta; tede Pathen lawngtah aboetna te a pha sak bok ai. Thlaanghing pum he cuk-halh thawlhna ah hawna ham nawh ni, Bawipa biibina ah hawna ham ni, Bawipa lawng ni pum he a cawm acah. 14 Pathen lawng Bawipa te duekna kalawng a thawh sak tih mami khaw amah kah huham tharana oen n'thawh sak van ai. 15 Nangmi kah pum he tah Khrih kah pum vangg ni tite na ming u. Kai lawngah Khrih kah pum vangg te ka lawh vetih pum yooei thlaanghalhnu la ka sai ai aw? Ka sai roe manawh! 16 Pum yooei thlaanghalhnu tengah tabaw thlaang te tah ahih oen pumtaksa pakhatla awm tite na ming u nawh aw? Caciim lawngah, “Ahih rawi tah pumtaksa pakhat la awm ai,” tila aciimphanla a thui. 17 Tede Bawipa oen aka tuhkai u thlaang tah muithla ben ah Bawipa oen pumkhatla awm. 18 Cuk-halh thawlhna te kuemsuem uh. Atloe thawlhna lawngtah thlaang kah a pum te rawk sak aih nawh; tede cuk-halh thawlhna aka sai thlaang lawngtah amah pum roe te a thawlh sak poen. 19 Nangmi kah pum te tah namami kaw khuiah aka awm Pathen kah peek Ciim Muithla a awmna tempal bok-im ni tite na ming u nawh aw? Nangmi tah namami kah koe la na awm u nawh tih Pathen kah koe la ni na awm u; 20 nangmi te aphu oen ni n'lai u. Tedawngah na pum te Pathen kah ruep-awmna ham hawna uh.
1 Ka tengah capat oen nan doet u akawng alam te tahe ah kavan thui ai. Tawngpa pakhat he yu lawh muehla a awm te theen. 2 Tede cuk-halh thawlhsaina ayahawh aih dawngah tawngpa boeih lawng yu a khueh ham theen tih hutaa boeih lawngkhaw vaa a khueh ham theen. 3 Tawngpa lawng vaa pakhat la a awmna te soep sak selangtah hutaa lawngah yu pakhat la awmna te soep sak seh, te tila te pakhat kah ngoena dawngah pakhat lawng ngai-khuekna pe seh. 4 A yu lawngah amah pum kah bawi la awm nawh, tede a pum kah bawi tah a vaa te ni; tetih van angla a vaa lawngah amah pum kah bawi la awm nawh tih a pum kah bawi tah a yu te ni. 5 Nangmi lawng kawlkalh thangthuina ham ah kawvaina na khueh u atue bueng te nawh atah namami khat oen khat kah ngaihna te thana u boel; tecoeng atah na awm nooek la te awm koep uh. Te atah na kuemsuem thai u vetih Seitan kah suek-halhna te na taa u thai ai. 6 He tila kavan thui he awlpeek aana angla ka thui nawh, tede nangmi kawngaihna vai angtoekla ni ka thui. 7 Atak tang atah nangmi boeih he kai angla na awm u atah ka ngaih ngaai; tede thlaang boeih lawngah Pathen tengkah kutdo lakloe te rip a khueh u. 8 Tahe ah a yu, a vaa aka khueh nawh thlaang thli oen huhai patal la aka awm thlaang thli tengah kavan thui tah kai angla namah bueng poe na awm u atah namami ham theen bet ai. 9 Tede namami kah ngaihna te na kuemsuem thai u nawh atah na yu lo u lang vaa sa uh. Cuk-halh hurthok la awm lak atah yu lawh vaa sak te theen bet. 10 Yu khueh, vaa khueh thlaang thli ham thui hamla awlpeek ka khueh, te tah kamah tengkah nawh tih Bawipa kah awlpeek ni: A yu lawngah a vaa te maa boel seh; 11 tede a vaa te a maa atah vaa sak tlaih ohla poe awm seh, tetih nawh atah a vaa oen ah roep hih koep seh; a vaa lawngkhaw a yu te thlaak roe boel seh. 12 Thlaangtloe hue tengah kavan thui tah (kamah lawng ni ka thui, Bawipa lawng nawh ni): Khrihca tawngpa pakhat lawng oengca la aka awm nawh a yu te a khueh tih a yu lawngah ahih oen awm poe ham a ngaih atah thlaak boel seh. 13 Tecoengah Khrihca hutaa pakhat lawng oengca la aka awm nawh thlaang te a vaana tih a vaa lawngah ahih oen awm poe ham a ngaih atah maa boel seh. 14 Metihtiah oengca la aka awm nawh a vaa te a yu oen tuhkaina rang oen ah Pathen lawng a do tih oengca la aka awm nawh a yu te Khrihca a vaa oen tuhkaina rang oen ah Pathen lawng a do. Tetih nawh kawinih a ca thli te lukih ca anau thli angla awm u hau ai; tede te tila a awm u dawngah ahimi te Pathen lawng a do poen. 15 Te cakhaw oengca la aka awm nawh thlaang pakhat lawngah Khrihca a yu mai khaw, a vaa mai khaw maa ham a ngaih atah maa mai seh. He ang kawng atah Khrihca a yu lawng mai khaw, a vaa lawng mai khaw yalpawla sai seh. Nangmi ngaimawng ngaitoe la awm ham ni Pathen lawng n'khue u. 16 Khrihca la aka awm hutaa nang, ka vaa he ka thlawn thai manawh tite metila na thui thai? Khrihca la aka awm tawngpa nang ka yu he ka thlawn thai tlaih manawh tite metila na thui thai? 17 A-u khaw Bawipa lawng kutdo a peek tih Pathen lawng a khue vengkah angla te a awm u ham awm. He tah Khrihcabu boeih ah ka cang puei phung-alam ni. 18 Yahhuivuen aka reet thlaang te Pathen lawng a khue atah yahhuivuen reet la a awmna miknoekna te hoett boel seh; yahhui-vuen aka reet nawh thlaang te Pathen lawng a khue atah yahhui vuen te reet han boel seh. 19 Metihtiah yahhuivuen reet oen reet nawh te n'tu la khaw coengg nawh; Pathen kah awlpeek vai he ni awlpui la a awm. 20 Thlaang boeih lawngah Pathen lawng n'khue u vengkah angla te awm uh. 21 Pathen lawng nang n'khue vengah sal la aw na awm? N'tu poei aih nawh; tede loeih ham atawng aleeng atah loeih ham sai. 22 Metihtiah Bawipa lawng a khue Sal pakhat he Bawipa kah thlaangcuem la awm poen; tetih van angla thlaangcuem a-u khaw Khrih lawng a khue atah ahih kah saltamnaa la ni a awm. 23 Pathen lawng nangmi te aphu oen n'lai poen dawngah thlaanghing kah saltamnaa la te awm u boel. 24 Maya manau thli, nangmi te amah lawng n'khue coeng vengkah na awm u angla te pakhat rip lawng Pathen oen pawlneeng uh. 25 Tahe ah thlaanghoeng la aka awm thli kawng ca thut oen nan doet u te kavan thui ai. Bawipa tengkah awlpeek tah ka khueh nawh, tede Bawipa kah reenna rang oen uep-awm thlaang pakhat la ka awm van angla ka poekna he kan peek u. 26 Tihin hang kah raina he poek vengah tawngpa hue ham tah tahe veng-kah angla a awm u atah theen bet tila ka poek. 27 Na yu na lawh poen aw? Tetih atah na yu oen te pek hih boel. Na yu na lawh thlan atah na yu tlap hanlan boel. 28 Tede na yu na lo mai cakhaw thawlhna na sai moenih; hutaa thlaanghoeng lawng vaa sa mai cakhaw thawlhna a sai moenih. Tede yu aka lo, vaa aka sa thlaang thli lawng hin roekk ah a tawng u patang raina dawng kalawng nangmi te loeih sak hamla ka ngaih dawngah ni. 29 Maya manau thli, ka thuingaihna tah he tila ni: atue san hlang awm hang tlaih manawh, tedawngah tahe kalawng tah yu khueh thlaang lawngah yu khueh nawh thlaang angla awm seh; 30 aka rap thlaang thli lawng kawthe nawh thlaang angla awm seh; aka nui thlaang thli te kawhoe nawh thlaang angla awm seh; thaihu aka lai thlaang thli lawng a lai thaihu te ka koe nawh ni a ti angla te awm seh; 31 dilai thaihu aka hawna thlaang thli lawngah aka hawna nawh angla awm u seh. Metihtiah he dilai he tahe vengkah angla asan awm tlaih manawh. 32 Nangmi he lakuengna kalawng loeih sak hamla ka ngaih. Yu aka lo nawh thlaang pakhat lawngtah Bawipa kah kawhoe bueng te a yawm dawngah Bawipa bii dawngah te ngaithuen. 33 Tede yu aka lo thlaang lawngtah a yu te awmngaih sak ham a ngaih tih dilai thaihu dawngah nguenthuen; 34 Tedawngah ahih te kawngaihna pahih lawngah a doek. Vaa aka sa nawh hutaa, tihnawhtah hulaa cuem lawngtah a pum oen muithla pahih bok la peek ham a ngaih dawngah Bawipa kah bii dawngah nguenthuen; tede vaa aka khueh hutaa tah a vaa te kawhoe sak ham a ngaih dawngah dilai thaihu dawng nguenthuen. 35 Nangmi te bawm ham ka ngaih dawngah ni he he kavan thui. Kai lawng nangmi te khaang khak hamla ka yawm nawh. Te lak ah aka doeng tih aka soeng te nangmi sai sak ham ka ngaih tih atloe-abang awm tlaih ohla Bawipa kah bii dawngah namah oen namah te na peek u ngala ham ni. 36 Yuvaa hih hamla a kang tangte te yuvaa nawh ham a poek atah he tila awm seh: tawngpa lawng hutaa te yuna ham tuueng aleng nawh tila a poek de, te kah hulaa a ngaihna te tlo aih tih yuna ham a poek atah a ngaihna angla yuvaa hih seh. He dawngah thawlhna awm nawh. 37 Tede te tila sai ham ngah ngah tongnolh muehla tawngpa lawng yu lawh nawh ham a kaw a melh rap tih a ngaihna a thinkaw te a taa thai tih sai ham koei te anepla a poek heet ngoen poen atah te hutaa te a yuna nawh ah theen. 38 Tedawngah a kang tangte hutaa te aka yuna thlaang lawngah thaihu theen ni a sai, tede akang tangte te aka yuna nawh thlaang lawng atheen ngaai te a sai. 39 Vaa aka sa hutaa pakhat he a vaa te a hing khui atah hoerpoengla awm nawh; tede a vaa te a duek atah amah kawngaih tawngpa te ahoerpoengla a vaana thai, tede ca tah a vaa te Khrihca la a awm atah theen. 40 Tecakhaw a awm noek angla amah bueng a awm atah awmngaih bet ai. Te tah kamah kah poekna ni, kai khaw Pathen Muithla ka khueh tila ka poek.
1 Kutsaimuei tengah a nawn u caak awkk kawng cathut oen nan doet u te tahe ah kavan thui ai. Ahimi lawngah, “Mami boeih he cuihhoena n'khueh,” tila a thui u te soeng ngoen. Te cakhaw te ang cuihhoena lawngtah thlaang te a oekk athloen sak tih a halang sak, tede lungna lawngtah thlaang te asoem asai tih a roeng sak. 2 A-u khaw ‘Ka ming van poen’ tila aka poek u lawngah a ming ham koei te ming tangtang nawh. 3 Tede Pathen aka lungna thlaang te tah Pathen lawng a ming. 4 Tedawngah kutsaimuei tengah a nawn caak awkk kawngah te: kutsaimuei he tah aka awm tangtang nawh thaihu yuengah a khueh u tite mami lawng m'ming u; Pathen pakhat bueng ni a awm tite mami lawng m'ming u. 5 Vaan ah khaw dilai ah khaw “pathen thli,” a ti u te awm mai cakhaw, tecoengah “pathen thli” oen “bawipa thli,” awm moen mai cakhaw, 6 mami ham tah Pathen pakhat bueng ni a awm, ahih tah soeprep boeih saikung la awm tih ahih hamla mami tah n'hing u; tecoengah Jesuh Khrih Bawipa pakhat bueng te awm, ahih rang oen ah soeprep tah sai la awm tih ahih rang oen mami he n'hing u. 7 Tede thlaang boeih lawng awltak he ming u nawh. Thlaang khatsut tah tihin toe ah kutsaimuei bokna lawng a ceeng khak poen dawngah te ang caak awkk te a caak u vengah kutsaimuei kah buh, an la te ahimi lawng tahe toe ah a poek mangkhak u hun; ahimi kah athe athetheen mingna thinkaw te a tha yoek sut tih te kah caak awkk lawng ahimi te ciim acaih sak nawh tila a poek u. 8 Tecakhaw caak awkk lawngah Pathen oen mami tuhkaina te roeng sak nawh; mami lawng n'ca nawh cakhaw mami kah sungna khat khaw awm nawh, mami lawng n'ca oe cakhaw mami ham athawnna khat khaw awm nawh. 9 Tede nangmi kah yalpawna lawng oengna tha aka yoek thlaang thli te thawlhna khuiah a tlimna la a coeng hau nawh ham ngaithuen uh. 10 Thuina mai ah athe atheen pekbona thinkaw tha aka yoek thlaang pakhat lawngah nangmi ‘Cuihhoena’ aka khueh hue lawng kutsaimuei bokna tempal khuiah na caak na awkk u te hu kawinih kutsaimuei tengah a nawn u caak awkk te caak ham thapeek angla awm nawh ai aw? 11 Tedawngah tha aka yoek thlaang na maya manau, Khrih lawng a duek thil thlaang thli te nangmi kah ‘Cuihhoena’ lawngah te a rawk sak poen ai! 12 He tila te Khrihca maya manau thli sawah thawlhna na sai u tih athe-theen pekbona thinkaw tha aka yoek thlaang thli te boengha na caak sakna rang oen Khrih sawah thawlhna na sai la awm. 13 Tedawngah caak awkk lawng maya manau thli te a thawlh sak atah maya manau thli thawlhna dawngah a tlim u nawh ham luciik sa te metuek ah khaw ka ca koep tlaih manawh.
1 Kai he yalpaw thlaang nawh aw? Kai lawngah mami kah Bawipa Jesuh te ka hu nawh aw? Nangmi he ta, Bawipa dawngah kai kah biibi phu athaih apaai thli nawh aw? 2 Thlaangtloe lawng atah kai he celtuih pakhat la poek u nawh mai cakhaw nangmi lawngtah celtuih la nan poek u. Metihtiah Bawipa oen pum-khatla na hing u dawngah kai he celtuih pakhat van ni tite nangmi lawngah na tueng sak u. 3 Kai he thlaang kah coel-acaa la ka awm vengah kamah oen kamah ka phungtuna tah he ni: 4 Bii ka bi dawngah he caak awkk te ka dang van ham tuueng nawh aw? 5 Kai lawngah atloe celtuih thli oen Bawipa kah a manau oen ah Piter mi angla yin ka cehna ah Khrihca la aka awm yu-aca te ka ceh puei thai van nawh ai aw? 6 Barnabas oen kai bueng lawngah aw ka hingna ham bii ka bi hih ai? 7 A-u lawng nuem amah tangka oen raalkap bii a bi? Lotoen thlaang a-u nuem a lo khuikah misur thaih te caak ohla aka awm? Tuudoen a-u nuem amah kah tuu suuktui te awkk muehla aka awm? 8 Kai lawngah he ang thli he hin roekk kah huhna oen nuehtahna ka thui nawh, metihtiah Phungawl lawngkhaw hetih toeng toeng la ni a thui. 9 Mosi kah Phungawl dawngah, “Vaitaw taal pakhat te caang na tiil sak vengah a kaa te khuem pe rap boel” tila a thui. Pathen lawng vaitaw taal kawng aw a thui? 10 Te tila a thui te kaimi he thuingaihna tang tang nawh aw? Kaimi ham ni a thut. Laithawl aka sai thlaang oen caang aka aat thlaang lawngah a huh ham tuueng caangthaih te a ngaiuep tih a bi u. 11 Kai hih lawngah muithla caangti te nangmi tim ah ka tuh poen. Nangmi tengkah thaihu apuung ataai te kaimi lawng ka ah u te yahawh aih aw? 12 Thlaangtloe lawng nangmi tengkah te ang thaihu te dang hamla a ngaiuep u atah kaihih lawngah yahawh ngaai te ka ngaiuep nawh ai aw? Tede kaihih lawng te tila saithaina te ka hawna hih nawh. Khrih kawng Awlthang Theen lawngpui ah kanghalh-na khat khaw a awmna nawh ham soeprep boeih ah ka ueh hih. 13 Tempal bok-im khuiah bii aka bi lawng Tempal bok-im kah caak awkk te a dang u van tih bokna-thaang dawngah luciik buulna aka nawn thlaang lawngkhaw luciik sa te thoem a bawn van tite na ming u. 14 Tetih van angla awlthang theen aka thui thlaang thli lawngkhaw awlthang theen phawngna dawng kalawng bung-khuutna dang hamla Bawipa lawng a khueh. 15 Tede he saithaina he khatca khaw kai lawng ka hawna nawh, te ang sai thaina te kamah ham tahe ah ka ngaih dawngah ca kavan thut moenih. Te lak atah duek lamha ka ngaih ngaai! Ka thangpawmna u he a-u lawngkhaw awl poeila a sai ham te ka ngaih nawh! 16 Awlthang Theen ka thui dawng maiah ka thangpawm u ham awm nawh. Atak tang atah awlthang theen phawng ham roe la ni awl m'peek. Kai lawng awlthang theen ka phawng nawh kawinih metihtlukla kai ham mueirihtamyiin la a awm! 17 Kamah lawngah bii he ka tuek tih ka bi kawinih aphu dang hamla ka ngaiuep suide; he bii he bi hamla Pathen lawng m'peek dawngah ka bi ham koei roe la ka bi. 18 Te atah thapang n'tu ka dang? Ka bii phu te tah thapang lawh ohla Awlthang Theen ka phawng thaina oen awlthang theen bii ka bi dawngah kamah ham dang koei te ka bih nawh he ni. 19 Kai tah a-u kah saltamnaa la khaw ka awm nawh, kai tah thlaangcuem ni; tede thlaang yahawh te ka doek thaina ham kamah oen kamah thlaang boeih kah sal la ka awm. 20 Judah thlaang thli tengah bii ka bi vengah ahimi te lawh thaina ham Judah thlaang angla ka awm; tecoengah Mosi kah Phungawl huiah aka awm thlaang thli tengah bii ka bi vengah ahimi te lawh thaina ham, Phungawl huiah ka awm tlaih nawh de aka awm angla te ka awm van. 21 Tetih van la te Judah thlaang thli kah Phungawl dau ah aka awm Gental thlaang thli te lawh thai ham ahimi angla ka awm. He tila ka awm he Pathen kah phungawl te ka vai nawh ka tila thuingaihna moenih; ataktangla Khrih kah phung awl huiah ka awm. 22 Oengna tha aka yoek thlaang thli tengah bii ka bi vengah ahimi te lawh thaina ham ahimi tha aka yoek sut angla ka awm. Metila khaw acoengg thai khoem atah avaang athal mai khaw thoem ka thlawn ai nuem ka ti dawngah thlaang boeih tengah ahimi angla ka awm van. 23 He ang thli boeih he awlthang theen kawngah ni ka sai, awlthang theen dawngkah yotheen kam-awmna te rek-ara thaina ham ni. 24 Loehlang heengna poei ah thlaang yahawh lawngah loeh u de pakhat lawng ni kutdo a dang tite na ming u. Tedawngah kutdo huh hamla heeng u lah. 25 Loehlangna hengna poei ah thuum ham aka ngaih boeih lawngah atlawh hlangla amah oen amah phep u, aka cak poe nawh raipai lumuek te dang hamla te tila a sai u; tede mami lawngtah tlumtloei thai nawh dungyan aka cak poe te dang hamla ni n'sai u. 26 Tedawngah kai tah mengtengna lansak te pha ham adoengla ka heeng phaat; thoekna poei ah kut thluem oen thlaang phak phak aka thoek thlaang angla ni ka awm. 27 Thlaangtloe te loehlangna ah thuum ham ka ceel coengah loehlangna ah kamah he n'thoek hau nawh ham ka pum he atlawhla ka phep oepsoeh.
1 Maya manau thli, Mosi hu aka vai mami kah patuer thli tengah thaihu aka thoeng te na poek u hamla ka ngaih. Ahimi boeih te muui lawngah a thiing khoep tih Tuitunlii Seen ah te ading asuekla kaa u thai. 2 Ahimi lawngah Mosi kah hubang la muui oen ah tuitunlii khuiah baptisma a dang u. 3 Ahimi boeih lawng muithla takawi te a caak u tih, 4 muithla tui te a awkk u. Ahimi oen haih aka cet muithla lungnu dawngkah tui te a awkk u; te lungnu te tah Khrih amah te ni. 5 Tede ahimi tim kah thlaang yahawh sawah Pathen tah a kaw hoe nawh, tedawngah ahimi kah rawkk te divinlangre ah a darh u khonghak. 6 Te ang thli boeih te tahe ah mingna miknoek la awm. Ahimi lawng thaihu the te a ngaih u angla mami lawngtah ngaih nawh ham; 7 ahimi timkah thlaang vaang lawng kutsaimuei te a bok u angla mami lawngtah bok nawh ham ngaithuen sakna ni. Caciim lawngah, “thlaang thli lawng caak awkk hamla poei ah te ngawl u tih yuu awkkna, cuk-halh thawlhna poei la te a coengg sak u.” tila a thui. 8 Ahimi timkah thlaang vangg lawng hutaa tawngpa thawlhna a sai u van angla mami lawngtah sai ham awm nawh, te tila a sai u dawngah thlaang thongkul thongthum hin at ah duek drek u. 9 Mami lawng Bawipa te noekdak hamla awm nawh, thlaang vangg lawng te tila a sai u dawngah ruul lawngah a tuk dingkang tih duek u. 10 Thlaangvaang lawng angla te mami lawng a caitoek ham awm nawh, te tila a caitoek u dawngah ahimi te Duekna Vanthlaang lawng a ngawn u. 11 Te kah thaihu boeih ahimi tengah aka thoeng te thlaangtloe thli kah noekna ham oen mami kah ngaithuenna ham ni ahimi lawng a thut. Metihtiah atue aboet tawm vengah he mami n'hing u dawngah ni. 12 A-u khaw acakla ka pai ngoen tila aka poek thlaang lawngah a tlim thawlh nawh ham ngaithuen seh. 13 Nangmi sawah aka law noekna te thlaang boeih tengah aka thoeng noekdakna van mai ni. Tede Pathen tah awlkam cak tih nangmi lawng na taa thai nawh toe atah noekna te van thoeng sak aih manawh; nangmi tengah noekdakna avan pha vengah ueh thaina ham tharana te m'peek vetih loeihna hamla lawngpui avan roek ai. 14 Tedawngah ka lungna ka puei thli, kutsaimuei te bok u boel; 15 Nangmi tah kaw aka poek thai thlaang la na awm u dawngah ni kavan thui u; kavan thui he namami lawng pekthlee uh. 16 Mami lawng Pathen tengah awmngaih ciil n'thui tih Bawipa Thlembuh veelna ah boengloeng n'hawna tih te khui-kah misurtui n'awkk te Khrih thisen dawngah mami n'cuutna ni. Tecoengah mami lawng takawi te n'eh tih n'caak u te mami lawng Khrih pum dawngah cuutna ni. 17 Takawi thluem at awm tih, te takawi thluem at te n'cuut u dawngah mami he thlaangmi la tah yahawh mai cakhaw pumkhatla ni n'awm u. 18 Israel thli te poek u lah; Luciik la a nawn te aka ca boeih tah Pathen kah bokna-thaang dawngah biibina ah te thuum u. 19 He tila ka thui he kutsaimuei, tihnawhtah kutsaimuei tengah a nawn caak awkk te atheenna khaw awm van tila ka thuingaihna aw? 20 Tetih nawh ni! Kai lawng ka thui ngaihna tah he ni. Lukih thli kah bokna-thaang dawngah Luciik thawthuengna te tah raai thli tengah a nawn u ni, Pathen tengah a nawn nawh ni. Nangmi te raai thli oen tuhkai sak ham te ka ngaih nawh. 21 Nangmi lawngah Bawipa kah boengloeng oen raai kah boengloeng te khaw na aw renten thai nawh vetih Bawipa kah caboi oen raai thli kah caboi te khaw vai at la na veel thai manawh. 22 Mami lawng Bawipa te thatlai sak ham n'ngaih u aw? Ahih lak ah tha-awm thara ngaai la aw m'mah oen m'mah he m'poek u? 23 Ahimi lawngah, “Me ang thaihu khaw kaimi lawng sai thai koei ni,” ti u. Soeng ngoen ta, tede soeprep boeih sai he tah theen luem nawh. “me ang thaihu khaw kaimi lawng sai thai koei ni.” ti u, tede soeprep boeih he hoeikhangna awm luem nawh. 24 A-u khaw amah kah theenna ham bueng te tlap boel selang thlaangtloe kah theenna te khaw tlap seh. 25 Athetheen mingna kawpoek cawm-aam dawngah awl doet re muehla meh dawr kah a yoeih meh boeih te badipla ca u hawn. 26 Metihtiah Caciim lawngah, “Dilai oen dilai dawng aka awm thaihu boeih he Bawipa koe ni.” tila a thui. 27 Oengca la aka awm nawh thlaang lawng buh pan la n'khue tih na ceh atah awl kaa doet muehla na haiah avan toen boeih te kammueh la ca hawn. 28 Tede thlaang pakhat khat lawngah, “He tah kutsaimuei tengah a nawn u luciik thawthueng sa ni,” a ti atah aka thuikung kah athetheen mingna kawpoek acaihna ham te kah caak awkk te ca mai boel, 29 Athe atheen mingna kawpoek ka ti te nangmi kah kawpoek nawh tih thlaang kah kawpoek ni ka ti. Thlaang khatsut lawngah, “Te tih atah thlaangtloe kah athe atheen pekbona kawpoek lawng ka yalpawna he n'tu hamla avan kang khak ai? 30 Kai lawng caak awkk, hamla Pathen tengah awmngaih awl ka thui tih te kah awm ngaih awl ka thuina caak awkk kawngah te a-u lawng kai he athela a thui ai? tila nan doet u mai ai. 31 Theen ngoen ta, na sai boeih te khaw, na caak na awkk te khaw seh apum boeih la Pathen ruep-awmna ham sai uh. 32 Judah thlaang khaw, Gental thlaang khaw, Pathen Khrihcabu khaw, awlpuung kaacaan thuitheetna a awmna nawh ham te tila te na khawsakna te awm sak uh. 33 Ka sai angla sai u van; ka sai boeih he thlaang boeih kah kawhoena ham ni ka yawm, kamah ham theenna te ka poek nawh tih thlawnna te a dangna u thai ham thlaang boeih kah theenna te ni ka poek.
1 Tedawngah kai lawng Khrih kah khawboe ramlang te ka oett van angla nangmi lawngkhaw kai kah khawboe ramlang he oett u van lah. 2 Nangmi lawng kai he nan poek khuep u tih na kut dawngah kan peek cangpueina te na vai u dawngah kan koeh u. 3 Tede nangmi te ming sak ham ka ngaih tah Khrih tah tawngpa boeih kah a luu la awm, a vaa he tah a yu kah a luu la awm tih Pathen tah Khrih kah a luu la awm ti he ni. 4 Tedawngah tawngpa lawngah rangpui lawng Pathen a bokna ah a thangthui vengah khaw, Pathen awlthang a phawng vengah khaw a luu te a muui atah Khrih te thaang a the sak. 5 Tecoengah hutaa pakhat lawngah rangpui lawng Pathen a bokna ah a thangthui vengah khaw, Pathen awlthang a phawng vengah khaw a luu te a muui nawh atah a vaa te thang a the sak; te ang te tah luu-ngong hutaa oen atloe-abangna awm nawh. 6 Hutaa lawng a luu te a muui nawh atah a sam te luu-ngawng la vawkk ngala seh. Hutaa ham tah sam vawkk khaw, luu-ngawng khaw yahna koei la a awm dawngah hutaa lawng a luu muui seh. 7 Tawngpa he tah Pathen kah muei-asam oen ruep-awmna te tuengsakkung la a awm dawngah tawngpa lawng a luu muui hamla ngoe nawh. 8 Metihtiah tawngpa he hutaa pum dawngkah sai nawh tih hutaa ni tawngpa pum dawngkah a sai. 9 Tawngpa he hutaa hamla sai nawh tih hutaa he ni tawngpa hamla a sai. 10 Tedawngah vanthlaang thli te hinyahna la hutaa he a vaa kah ukna aana khuiah awm tite tuengsakna ham hutaa lawng a luu te muui seh. 11 Tecakhaw Bawipa ah mami hingna dawngah hutaa he amah poek ah tawngpa ohla awm thai nawh tih tawngpa khaw amah poek ah hutaa mueh la tah awm thai nawh. 12 Metihtiah hutaa he tawngpa dawngkah a sai, tetih van angla tawngpa khaw hutaa lawng ni a cuun van; soeprep boeih he a sai tih aka awmsakkung tah Pathen ni. 13 Hutaa he rangpui lawng Pathen a bokna ah a luu a muui muehla Pathen tengah a thangthui te hutaa pakhat ham roeproei aw tite namami lawng poek uh. 14 Dilai khawsakna dawngah tawngpa lawng asanla sam a thlung te; yaraula awm tih, 15 tede hutaa lawng sam asanla a thlung te a thlaang theenna la awm. A sam sanhlang te a luu muina ham ni a peek. 16 Tede a-u lawngkhaw he kawngah awl oelh ham a ngaih atah kaimi lawngkhaw, Pathen Khrihcabu thli lawngkhaw, Pathen bokna ah phung alam atloe khueh thloei nawh. 17 He tila kavan thui u vengah he nangmi te kan koeh thai nawh, metihtiah nangmi lawng Pathen bok ham na pum u te atheenna lak ah athe ni a thoeng sak ngaai. 18 Lamhacuek ah nangmi lawngah Pathen bok ham na pum u vengah te bu la pekbona awm tila te ka yaak tih te tah soeng mai cawini ka ti. 19 (Asoengna ben ah aka awm thlaang thli te aciimla huhna ham ah nangmi tim ah pekbona a awm te soeng mai.) 20 Nangmi lawngah thik at la na pum u vengah nangmi lawng na caak na awkk u te Bawipa Thlembuh nawh ni. 21 Metihtiah na caak u vengah te namah kah buh an te na caak na awkk u tih khatsut tah a bung a pawng vengah khatsut tah yuu te ruui u poen. 22 Nangmi lawng na caak na awkk na ham im na khueh u nawh aw? Te tila na awm u te Pathen kah Khrihcabu te yah bai ham na ngaih u tih voetna aka awm thlaang thli te yahpawh sak ham na ngaih u aw? He kawngah he nangmi tengah kai lawng n'tu avan thui ai tila na ngaiuep u? Nangmi te kan koeh ai aw? Kan koeh roeroe nawh mue! 23 Metihtiah Bawipa teng kah ka huh te ni nangmi te patoeng kan cang puei u. Thlaang kut ah a peekna yiin ah te Bawipa Jesuh lawng takawi te a lawh tih, 24 Pathen tengah awmngaih awl a thui coengah takawi te a eh tih, “He tah ka pum ni, nangmi ham ni. Kai he poe nan mingna poepa u ham he tila sai uh.” tila a thui. 25 Te tih van angla thlembuh a caak u coeng khoeng ah boengloeng te a lawh tih, “He boengloeng he tah ka thisen oen ka cak sak Pathen kah awlkam paipi athaai ni. Nangmi lawng na awkk u veng roekk ah kai he nan ming poena ham sai uh.” tila a thui. 26 He kah thuingaihna tah takawi te na caak u veng roekk ah, boengloeng dawngkah te na awkk u veng roekk ah amah a law thlantoe Bawipa kah duekna te na phawng u tila thuingaihna ni. 27 Tedawngah amah te hinyahna ohla pakhat khat lawng Bawipa kah takawi te a caak tih a boengloeng dawngkah te a awkk atah Bawipa kah pum oen a thisen sawah thawlhna ni a sai. 28 Tedawngah thlaang boeih lawng lamhala amah oen amah te noem acai u seh, tecoengah takawi te ca selang tah boengloeng dawngkah te khaw aw seh. 29 Metihtiah takawi te a caak tih boengloeng dawng-kah te a awkk vengah Bawipa kah pum a thuingaihna te a ming nawh atah amah sawah awlcekna te a caak a awkk haih. 30 Tedawngah ni nangmi thlaang yahawh tengah tlawhnat la thoeng tih thlaang yahawh hlangla na duek u lawt. 31 Mami lawng m'mah oen mah te lamhala n'noem acai u atah Pathen kah awlcekna mami sawah van pha manawh. 32 Tede mami tah he dilai oen phe haih nawh hamla Bawipa lawng mami he awl n'cek tih dan m'peek u. 33 Tedawngah maya manau thli, nangmi lawng Bawipa Thlembuh veel hamla thik at la na pum u vengah pakhat oen khat riing uh. 34 Tecoengah te tila na pum u vengah te Pathen kah awlcekna ah na phana u nawh ham bungpawng thlaang a awm atah amah im ah buh ca seh. Atloe abang thli ngoen tah kamah ka law vengah kavan thui u badai.
1 Ciim Muithla kutdo kawng cathut oen nan doet u te tahe ah kavan thui ai. Maya manau thli, he kawngah he awltak na ming u hamla ka ngaih. 2 Nangmi lukih la na awm u vengah te hingna aka khueh nawh kutsaimuei bokna lawnghang na vai u te na ming. 3 Nangmi ming sak hamla ka ngaih tah Pathen Muithla lawng a mawt thlaang a-u khat lawngkhaw “Jesuh te kawsi yawkk seh.” ti nawh vetih Ciim Muithla lawng a mawt thlaang nawh atah a-u khat lawngkhaw “Jesuh tah Bawipa ni,” tila thui tang manawh. 4 Muithla benkah kutdo he aphun atloetloela awm, tede te kutdo te Muithla pakhat lawng ni a peek. 5 Biibina he lawngpui atloetloela awm, tede Bawipa pakhat kah bii te ni m'bi u. 6 Bii bina ham thoemthaina atloetloela awm, tede ating atawkk la bii bina ham thoemthaina te Pathen lawng ni a peek. 7 Thlaang pakhat rip kaw khuiah Muithla a awm te lawngpui atloetloela tueng tih te tah thlaang boeih kah theenna ham ni. 8 Muithla lawng thlaang pakhat te cuihna oen aka betoet awlthang te a peek tih thlaang pakhat te tah mingna oen abetoet awlthang te Muithla lawng a peek. 9 Te kah Muithla pakhat te lawng ni thlaang pakhat tengah oengna a peek tih atloe pakhat teng atah thlaangtlo hoeih sak thaina huham tharana te a peek. 10 Thlaang pakhat teng atah kawpoek rai saithaina huham tharana te Muithla lawng a peek tih atloe teng atah Pathen awlthang thui thaina kutdo te a peek; tecoengah atloe khat teng atah kutdo thli he Muithla ben kah aka law aw, Muithla ben kah aka law nawh aw tite pekbona ham thoemthaina te a peek. Thlaang pakhat teng atah mingnawh awl cal hamla thoemthaina te a peek tih atloe pakhat teng atah mingnawh awl te thuicaih thaina te a peek. 11 Tede he thaihu boeih he aka saikung tah Muithla pakhat lawng ni a sai; amah kawngaih la thlaang pakhat rip te kutdo atloetloe a peek. 12 Khrih tah pum dawngah a beek thli moen aka awm pum pakhat oen lo u. Pum te a beek thli atloetloe moen awm de pum tah pakhat ni. 13 Tetih van angla mami boeih he tah Judah oen Gental thlaang khaw, sal oen thlaangcuem khaw, Muithla pakhat lawng pum pakhat dawngah baptisma m'peek tih awkk koeila Muithla pakhat te ni mami m'peek u. 14 Pum he a beek pakhat bueng oen sai nawh tih a beek yahawh hlang oen a sai. 15 Khow lawngah, “Kai tah kut la ka awm nawh tih pum dawngah ka thuum nawh,” ti kawinih, te tila a ti dawngah pum dawngkah a beek la a awmna te toeng sak manawh. 16 Tecoengah haa lawngah, “Kai tah mik la ka awm nawh tih pum dawngah ka thuum nawh” ti kawinih te tila a thui dawngah pum dawngkah a beek la a awmna te toeng sak manawh. 17 Pum boeih he mik la awm biit kawinih metila awl te n'yaak thai ai? Tecoengah haa bueng la awm boeih kawinih abaw-ava te metila huuem thai ai? 18 Tede Pathen lawngtah pum dawngkah a beek thli he amah lawng a khueh ngaihna ah atloetloela a khueh. 19 Pum he a beek pakhat bueng la awm kawinih pum la te awm thai manawh! 20 Te tila te a beek tah awm moen mai de pum tah pakhat ni. 21 Tedawngah kut lawngah mik te, “Nang he kan ngoe nawh” tina thai nawh. Luu lawngah khaw khow nala te, “Nang he kan ngoe nawh.” tina thai nawh. 22 Atak tang atah tha aka khueh nawh angla aka awm pum dawngkah a beek thli muehla tah coengg thai nawh; 23 Mami lawng a phu aka awm nawh la m'poek u a beek thli te mami lawng awlpuila thabuei thabahna ngaai u; pum dawngkah huh theen nawh a beek thli te n'thoei n'caam u, 24 aka theen tangte a beek thli te tah thoei acaam hamla ngoe nawh. Te kah a beek thli lawng hinyahna te a dang tarena ham te tila te Pathen amah lawng pum he te tila a sai. 25 Tedawngah pum dawngah he pekbona awm nawh, a beek atloetloe lawngah khat oen khat kah theenna te a sai u. 26 Pum dawngkah a beek pakhat lawng nganbawh a yaak atah a beek boeih nganbawh a yaak puei u; a beek pakhat te thangpawm la a awm atah atloe boeih lawng a awmngaih puei u. 27 Nangmi boeih tah Khrih kah pum la na awm u tih a beek la rip na awm u. 28 Khrihcabu khuiah he ang thli boeih he Pathen lawng a khueh; lamhacuek ah celtuih he a khueh, pahihna ah tawngha thli a khueh tih a pathumna ah cangpueikung thli te a khueh; tecoengah kawpoek rai aka sai thlaang thli te a khueh tih thlaangtlo hoeih sak thaina aka dang thlaang thli, thlaang aka bawmcemkung thli, thlaang uktemkung thli oen ming nawh awl aka cal thlaang thli lawng a thoei u. 29 Ahimi te celtuih la awm boeih nawh, tawngha la khaw awm boeih nawh tih cangpueikung la khaw awm boeih u nawh. Thlaang boeih lawng huham tharana khaw khueh rip nawh tih 30 thlaangtlo hoeihsakna khaw, ming nawh awl cal khaw, ming nawh awl te thuicaih thaina khaw khueh rip u nawh. 31 Tedawngah awlpui ngaai kutdo dawngah na thinkaw te khueh uh. Te ang thli boeih lak ah atheen koek te kavan thui ai.
1 Kai lawngah thlaanghing kah awlcawm awlcee oen vanthlaang awl pateng ka cal thai cakhaw lungna ka khueh nawh atah ka awl-thui he curumngang la awl aka riing mong oen tlaklak awl angla ni a awm mai. 2 Kai lawngah thlaang kawthawhna awl te thui thaina kutdo te ka khueh cakhaw; kai lawngah cuihna boeih ka khueh tih awlhuep boeih te yaakming thaina ka khueh cakhaw, kai lawngah tlaang sawm thoeih sak thaina oengna boeih te ka khueh cakhaw lungna ka khueh nawh atah kai he ahong la ni ka awm. 3 Kai lawngah ka khueh thaihu boeih he khawdeng harah te ka rek ka ra boeih mai tih ka pum he luciik la thawthueng ham ka pe mai cakhaw lungna ka khueh nawh atah kai dawngah atheenna roe awm nawh. 4 Lungna lawngtah khawdawp a ngaai tih reenna a khueh; lungna lawngtah uett-eena khaw, halangna khaw, Oekthloenna khaw khueh nawh; 5 lungna tah khawboe the nawh, amah ham bueng poek nawh, a thin toi nawh; lungna lawngtah thlaang kah thawlhpalhna te poek khuep nawh; 6 lungna tah athe dawngah awmngaih nawh tih awltak dawngah awmngaih. 7 Lungna tah a kaw boet nawh tih oengna, ngaiuepna a khueh, a thin san tih a kaw daw. 8 Lungna tah dungyan toela cak. Tawngha awl te thui thaina awm cakhaw kawlkalh ah boeih ai; ming nawh awl cal thaina awm cakhaw boet ai; cuihhoena awm cakhaw khum kang ai. 9 Metihtiah mami kah cuihhoena kutdo oen tawngha awl thui thaina he avaang athal mai ni; 10 tede asoepbirna te avan pha veng atah avaang athal la aka awm boeih he tah ha-ata boeih ai. 11 Camaw la ka awm veng atah camaw angla awl ka thui, camaw angla ka kaw thlawp tih camaw angla kaw ka poek; tahe atah tawngpataang la ka awm poen tih camaw moeiboe te ka hawna tlaih nawh. 12 Tahe ah mami lawng thaihu n'huh u he tah thlalang dawngah arui araila muei ame aka tueng angla ni a awm; vuenvai ah ngoen tah haitang heet la n'hu poen ai. Tahe ah kai lawng ka ming he avaang athal mai ni; Pathen lawng kai m'mingna he asoepbir van angla vuenvai ah ngoen tah asoepcala ka ming van ai. 13 Awlpui thaihu pathum awm: te tah oengna, ngaiuepna oen lungna he ni, he thli boeih khuiah lungna he abokoek ni.
1 Tecoengah lungna he hawna ham yawm u lah. Muithla ben kah kutdo dawngah na thinkaw te khueh uh, awlpuila Pathen awlthang phawngna kutdo te khueh hamla yawm uh. 2 Ming nawh awl aka cal thlaang pakhat lawngah thlaangtloe tengah awl thui nawh tih Pathen tengah ni a thui, metihtiah ahih awl te a-u lawngkhaw yaakming pe nawh. Ahih lawng Muithla kah huham tharana rang oen awlhuep awltak te ni a thui. 3 Tede Pathen kah awlthang te aka phawng lawngtah thlaangping tengah bawmcemna awl, thapeekna awl, thloepthloeina awl te a thui. 4 Ming nawh awl la a cal te tah amah bueng lawng ni a hoeikhangna, tede Pathen awlthang a thui te tah khrihcabu boeih lawng a hoeikhangna. 5 Nangmi boeih he ming nawh awl la cal sak ham ka ngaih; tede Pathen awl phawngna te na khueh u ham ka ngaih ngaai. Metihtiah Pathen awlthang aka phawngkung tah ming nawh awl aka cal lak ah aphu awm ngaai. Khrihcabu kah hoeikhangna hamla a awl thui te aka letkung a awm nawh atah aphu awm nawh. 6 Tedawngah maya manau thli, nangmi tengla ka law vengah mingnawh awl la ka cal kawinih nangmi hamla kai he hoeikhangna awm ai aw? Awm tang manawh! Pathen tengkah awlphawng pakhat mai khaw, cuihna mai khaw, tawngha kah awlthang mai khaw, cangpueina mai khaw kavan khuen nawh atah nangmi ham hoeikhangna awm nawh. 7 Hingna aka khueh nawh riingding thaihu phiviit khaw, tingtoeng khaw a awl te atheenla a thoeng nawh atah lum-alaa te me ang a tum u tite metila thlaang lawng a ming thai ai? 8 Pengsara aka tum lawngkhaw acairaula a tum nawh atah a-u ceem tloek ham a kamthlah ai? 9 Tetih van angla ming nawh awl oen ah mingtungplau nawh la awlthang na thui u te a-u lawngah nangmi kah awl thui akawng alam te a yaakming ai? Nangmi kah awl te yilh dawngah ni a ha-ata mai ai! 10 Dilai dawngah awl lakloe moen awm tih te awl boeih te a thuingaihna aka awm nawh awl khat khaw awm nawh. 11 Tede kai lawng ka yaakming nawh awl thuikung thlaang te kai ham tah thlaangphun tloe la awm tih kai khaw ahih ham tah thlaangphun tloe la ka awm van. 12 Nangmi lawngah muithla kutdo te khueh hamla na thinkaw a thluembuek u van angla atloe boeih lak ah khrihcabu roengna aka bawm thai ngaai te khueh ham yawm uh. 13 Tedawngah ming nawh awl aka cal thlaang lawngah amah kah awl thui kutdo te thuicaih thaina ham thangthui seh. 14 Metihtiah he tila ka thangthui vengah ka muithla tah thangthui ngoen de ka thinkaw tah te dawngah te awm nawh. 15 Tetih atah me tih ka ti ai? Kai lawng ka muithla oen ka thangthui vetih ka thinkaw oen khaw ka thangthui ai; ka muithla oen laa ka sak vetih ka thinkaw oen khaw laa ka sak ai. 16 Nang lawng muithla bueng oen Pathen teng awmngaih awl na thui vengah nangmi kah pumna ah aka thuum van thlaang thoet mailai lawngah nangmi kah awmngaih ciil thui thangthuina ah te metila “Amen” tila a thui thai ai? Nangmi kah awl thui te ahih lawng a ming moenih ta. 17 Nangmi kah awmngaih ciil thui thangthuina te theen hlang cakhaw thlaangtloe hamla hoeikhangna awm nawh. 18 Nangmi boeih lak ah ming nawh awl la yahawh ngaai ka cal dawngah Pathen ka uem tangkiik. 19 Tede khrihcabu lawng Pathen a bokna ah ming nawh awl oen athong asang thui lak ah thlaangtloe cangpueina ham tah yaakming thai awllung lung ngaa te ka thui bet dai ai. 20 Maya manau thli, kawpoekna dawngah camaw angla awm u boel; the-arana nawh ben atah camaw la awm uh, kawpoekna ben atah poekna aka soep lungcuih thlaang la awm uh. 21 Caciim dawngah, “Awl lakloe aka cal thlaang thli rang oen ah, ka thlaangphun thli tengah awl ka thui ai. Thlaangphun tloe thli kah hui-kaa oen ah awl ka thui pe ai, te pateng khaw ka thlaangphun thli lawng ka awl he hutung u nawh baal hun ai, tila Bawipa lawng a thui.” tila te a thut. 22 Tedawngah ming nawh awlcal kutdo he tah oengca la aka awm nawh thlaang thli ham noekna ni, oengca la aka awm thlaang thli ham nawh ni, Pathen awlthang phawngna kutdo he tah oengca thli kah noekna ni, oengca la aka awm nawh thlaang thli ham nawh ni. 23 Tecoengah khrihcabu lawng khat la kang na pum u tih thlaang boeih lawng ming nawh awl la na cal pluep vengah te thlaang thoet mailai khaw tihnawhtah oengca la aka awm nawh thlaang te va kuun mai kawinih nangmi te cuih taal thlaang thli ni ti nawh ai aw? 24 Tede nangmi boeih lawng Pathen kah awlthang na phawng u vengah oengca la aka awm thlaang khaw, thlaang thoet mailai khaw pakhat khat te va kuun mai kawinih awl a yaakna rang oen a thawlhna te ahih lawng a ming ai. A yaak awl boeih lawng a thinkaw te a phoel pe vetih, 25 ahuepla a poek boeih te a tueng pe pheng ai, tecoeng atah buekuep vetih Pathen te a bok van vetih, “Nangmi tim ah he Pathen awm tangtang!” tila te a thui van ai. 26 Maya manau thli ka thuingaihna tah he tila ni. Nangmi lawngah Pathen bok hamla na pum u vengah te pakhat lawngtah laa sak hamla na khueh, pakhat lawngtah cang puei ham na khueh, pakhat lawngtah Pathen tengkah awlphawng thui ham na khueh, pakhat lawngtah ming nawh awl oen awlthang thui ham na khueh tih pakhat lawngtah ming nawh awl thuicaih thaina te na khueh u mai ai. Soeprep boeih te Khrihcabu hoeikhangna ham sai uh. 27 Mingnawh awl oen thui ham aka ngaih te a awm atah yahawh koek ah pahih lawng aw, tih nawh atah pathum lawngah pakhat coeng pakhat thui u selang tah pakhat khat lawngah awl te thuicaih pe seh. 28 Tede te ah te awl aka let thai thlaang pakhat khaw a awm nawh atah ming nawh awl la aka cal thlaang te awm duem mai selang tah amah bueng Pathen tengah thui mai seh. 29 Thlaang pahih lawng aw, nawh atah pathum lawng aw Pathen awlthang te a thui vetih ahimi kah awl thui te atloe hue lawngah asoeng oen asoeng nawh khaw nai-anawng u seh. 30 Tede pumna ah aka ngawl thlaang pakhat lawngah Pathen tengkah awlthang a dang te thui ham a khueh atah awl aka thui lii te toeng sak ham awm. 31 Thlaang boeih lawng thuituenna awl te a yaak tih tharana te a dangna ham nangmi boeih lawng pakhat coeng pakhat Pathen awlthang te phawng uh. 32 Pathen awlthang phawng ham kutdo aka dang awlthuikung lawngah a kuemsuem u ham awm. 33 Metihtiah mami he khawpaw rang-au la awm ham Pathen lawng ngaih nawh, roeproeina oen ding asuek la awm sak ham ni a ngaih. 34 Khrihcabu boeih ah Pathen thlaang thli kah awm ih van angla pumna ah te hutaa lawng ading asuekla awm u seh. Ahimi te awl thui sak boel; Judah thlaang thli kah Phungawl lawngah a thui angla ahimi te teemkung la awm u boel seh. 35 Ahimi lawngah thaihu pakhat khat kawng te ming ham a ngaih u atah a vaa thli te im ah doet adap u seh. Khrihcabu pumna ah hutaa pakhat lawng awl a thui he yaraula awm. 36 Pathen kah awl he nangmi teng kalawng aw a law? Nangmi teng bueng ah aw avan pha? 37 Thlaang pakhat lawngah amah oen amah Pathen kah laipai la ka awm tila khaw, muithla ben kah kutdo ka khueh tila khaw a poek atah nangmi tengah ca kavan thut he Bawipa kah awlpeek ni tite ming seh. 38 Tede ca kavan thut he n'tula a sak nawh atah ahih te n'tula khaw ngaai u van boel. 39 Tedawngah maya manau thli, Pathen awlthang phawng ham te ngaih ngaai u lah, tede ming nawh awl cal te khaw khang u boel. 40 Thaihu soeprep boeih he along a-im ah anep-anoeila sai ham awm.
1 Maya manau thli, Nangmi tengah kavan phawng Awlthang Theen, nangmi lawng na do u tih oengna ah acakla na paina u te tahe ah nangmi ming sak koep ham ka ngaih. 2 Te tah nangmi tengah kavan phawng awlthang theen te ni. Nangmi lawng acakla na phoeih khak u atah te kah awlthang theen rang oen nangmi thlawnna na dang u, te tih nawh atah nangmi kah oengna te ahong la ni a awm. 3 Kai lawng ka dang tih nangmi kan peek patoeng he tah awlpui tangkiik ni, te tah Caciim dawngah a thut angla Khrih tah mami kah thawlhna dawngah ni a duek; 4 tecoengah a up u tih Caciim dawngah a thut angla athum hin ah tho koep; 5 Piter tengah te phumpho tih tecoengah celtuih paha thlaihih tengah te a phumpho pe. 6 Tecoengah a hubang thli ya-ngaa thlai tengah vai at a phumpho pe, thlaang vangg tah duek u poen, akuum ngaai tah hing u hun. 7 Tecoengah Jeem tengah a phumpho coengah celtuih boeih tengah te a phumpho pe. 8 Hukhueng atah thangyah angla aka awm kai thlaangtueng thlaangtaa nawh tengah khaw phumpho van. 9 Metihtiah celtuih boeih khuiah kai tah cawmthawk nawh koek la ka awm, kai lawng Pathen khrihcabu te ka heem ka tek dawngah celtuih ti ham pateng ka koeih nawh. 10 Tede Pathen lungvatna rang oen tahe kah ka awm angla he ka awm tih lungvatna m'peek te khaw apoei-oepla ka khueh van nawh. Atloe celtuih hue lak ah kai tah apuehla bii ka bi ngaai, tede kai lawng ka bi ti ham awm nawh tih ka tengkah Pathen lungvatna lawng ni a bi. 11 Tedawngah kai teng kalawng aka law te khaw, ahimi teng kalawng aka law te khaw, he ni kaimi boeih lawng ka phawng u tih he ni nangmi lawng na tangna u. 12 Tahe vengah he Khrih tah duekna kalawng tho koep tite kaimi lawng kavan phawng u lal maiah nangmi timkah thlaang khatsut lawng thlaangduek he tho koep tang manawh na ti u thai? 13 Tete asoeng tangtang atah Khrih he tho nawh ti ngaihna ni. 14 Khrih he duekna kalawng a thawh koep nawh atah kaimi lawng phawng ham koei n'tu khaw ka khueh u nawh vetih nangmi lawngkhaw tangna ham koei n'tu khaw awm van manawh. 15 Thlaangduek thli thawhkoepna awm nawh tite soeng taktak kawinih Khrih he thawh sak koep manawh, Khrih he duekna kalawng tho koep tite kaimi lawng ka thui u dawngah kaimi tah Pathen kawng hoempaw aka thui la ni ka awm u poen ai. 16 Metihtiah thlaangduek he tho nawh kawinih Khrih khaw tho manawh. 17 Tecoengah Khrih a thawh koep nawh atah nangmi kah oengna te khaw thailatna mailai la awm vetih tahe toe ah mami thawlhna khuiah na ha na taa lii u hun. 18 Tecoengah Khrih ah aka duek oengca thli khaw ha-ata boeih ti ngaihna poen ni. 19 Khrih ah mami kah ngaiuepna he tihin hang hingkhui bueng hamla theen doek kawinih vawva mai poen ni, dilai dawngah mami lak ah he tamreen tamvaih thlaang a-u khaw awm tlaih nawh. 20 Tede awltak tah duekna kalawng Khrih a thawh he tah duekna khuiah aka ip muelh thlaang thli ham khaw thawhkoepna aamahkhan la awm. 21 Metihtiah thlaang pakhat rang oen duekna he va law, tetih van angla duekna kalawng thawhkoepna he khaw thlaang pakhat rang oen va law. 22 Metihtiah Adam oen tuhkaina rang oen ah thlaang boeih he duekna lawng a khuk dulh, tetih van angla Khrih oen tuhkaina rang oen thlaang boeih he hingna ah tho koep ai. 23 Tede thlaang boeih he amah kah aitleng lawng a pha vengah tho rip ai; lamhacuek ah Khrih he tho poen, tecoengah amah a law vengah amah kah thlaang thli te tho ai. 24 Tecoeng atah atue boetna te a pha poen ai; Khrih lawngah ukkung muithla the boeih, ukna aana khuehkung thli oen huham tharana boeih te a taa vetih Pa Pathen tengah Ram ukna te a peek ai. 25 Metihtiah raal boeih te a taa tih amah khowtang ah a khueh thlanatah Khrih lawngah a uk ai. 26 Hukhueng koek taa ham raal te tah duekna ni. 27 Metihtiah Caciim lawng, “Pathen lawng soeprep boeih he amah khowtang ah a khueh” tila a thui. “Thaihu boeih” ti vengah Khrih khowtang ah soeprep khuehkung Pathen amah he tah thuum nawh ti he tah ciim ngoen. 28 Tede soeprep boeih he Khrih kah ukna huiah a khueh coeng atah soeprep boeih ahih khowtang ah khuekung Pathen kah ukna huiah a Capa amah he awm van vetih thaihu cungkuem soeprep boeih te Pathen lawng a uk poen ai. 29 Tetih atah thlaangduek yuengla baptisma aka dang thlaang thli te ta metila a awm ai? Ahimi lawng n'tu a ngaiuep u tih a sai u? Thlaangduek thli he tho nawh tite khatsut hue kah thui angla asoeng tangtang atah n'tu hamla ahimi lawngah thlaangduek hamla baptisma te a sai u kai? 30 Te atah, mami lawng ta, n'tu ham khawhin roekk ah rih awm patang raina he n'khang khiing u? 31 Maya manau thli, kai tah khawhin roekk ah pacil pahaai duek thlipit la ka awm poepa! Nangmi he tah mami kah Bawipa Khrih Jesuh oen pum khat la awmna ah ka pawmsangna la na awm u dawngah he tila ka thui ni. 32 Kai lawngah thlaanghing pumsa ngaihna ben oen ah he Efesa khaaw ah “Satluung thli” oen ka khoelh u mai kawinih n'tu ka dang ai? Tede thlaangduek thli he hingna ah a thawh pai atah, “Thangvuen ah n'duek u poen ai, ca u silang tah aw u sih,” tila a thui angla te awm u van sih aw! 33 Ngau-athuu u boel, “Thlaangthe lawng thlaang theen a poeih” ti de lah koen. 34 Na thinkaw te caihpan sak u langtah thawlhna te toeng u loeih. Khatsut lawngtah Pathen khaw na ming u nawh tih yak uh ka ti dawngah ni tila ka thui. 35 Thlaang pakhat lawngah, “Metila thlaangduek he hingna ah a thawh koep ai? Me ang pum araw la a awm ai? tila awldoetna awm mai ai. 36 Nangmi thlaangngau hue! Nang lawng dilai dawngah caangti na tuh vengah a duek nawh atah a thing po thai nawh. 37 Nang lawngah caangti mai khaw, khatsut atloe amu-ati mai khaw na tuh vengah amu-ati ni na tuh, athing aka roeng hang tangte na tuh moenih ta. 38 Pathen lawng te kah amu-ati te amah kawngaih la akung te acoeng sak; ati-amu boeih te amami kah akung te rip a peek. 39 Tecoengah aka hing boeih kah asa-ataai he vai u rip nawh; thlaanghing lawng asa-ataai phun tloe a khueh, ram sa lawng phuntloe a khueh, va lawng phun tloe a khueh tih nga lawngkhaw phun tloe a khueh. 40 Tecoengah vaan benkah pum awm tih dilai benkah pum khaw awm; vaan benkah pum lawng a khueh a thlaang theenna te atloela awm tih dilai ben kah pum lawng a khueh a thlaang theenna te atloela awm. 41 Khawmik lawng amah kah a thlaang theenna a khueh, thla lawngkhaw a thlaang theenna atloe a khueh tih aisi thli lawng a thlaang theenna alakloe a khueh; tecoengah aisi khuiah pateng khaw a thlaang theenna a phunphun alakloe rip a khueh u. 42 Thlaangduek thli khaw hingna ah a thawh koep u vengah he tila ni a awm van ai. Pum he up la a awm vengah aka duek thai la awm tih, a thawh koep vengah aka duek thai nawh la awm. 43 Pum he vui la a awm vengah te a thlaangthe tih a tha khueh nawh, a thawh koep vengah tah a thlaang theen tih a tha ra. 44 Pum he vui la a awm vengah dilai pumsa la awm tih a thawh koep veng atah muithla benkah pumsa la awm ai. Dilai, pumsa khaw awm tih muithla ben kah pumsa khaw awm. 45 Metihtiah Caciim lawngah, “Lamhacuek tawngpa Adam te thlaanghing la a sai.” ti, tede hukhueng Adam te tah hingna pekung Muithla ni. 46 Muithla benkah pum he lamhacuek la law nawh tih dilai ben kah pum he ni aka law, tecoengah ni muithla ben kah pum he a law hun. 47 Adam lamhacuek te dilai a sai tih dilai dawng kalawng va law; Adam apabena tah vaan kalawng ni a law. 48 Dilai koe la aka awm thlaang tah dilai oen a sai thlaang te oen ah lo u tih vaan kah thlaang tah vaan kalawng aka law thlaang oen ah lo u. 49 Dilai oen a sai thlaang kah muei asam oen ah mami n'khuk adah u van angla vaan ben thlaang kah muei-asam oen ah te mami n'khuk adah u van ai. 50 Maya manau thli ka thuingaihna tah thi-asa oen a sai pum lawngah he Pathen Ram te paang thai manawh, tecoengah aka duek thai lawngah aka duek thai nawh te khueh thai manawh. 51 Awlhuep awltak he hutung u lah: Mami he boeih n'duek u manawh, tede hukhueng koek pengsara te a tum vengah kawlkalh mikkhah palap ah n'thaw u poen ai. 52 Metihtiah pengsara te a tum veng atah thlaang thli te tho u vetih metuek ah khaw duek u tlaih manawh, mami boeih he n'thaw pan u poen ai. 53 Metihtiah a rong-ing la aka awm thai he rong-ing thai nawh la thaw u pan vetih aka duek thaihe aka duek thai nawh la pan thaw u poen ai. 54 Tedawngah rong-ing thai koei la aka awm te rong-ing thai koei nawh la pan thaw u vetih duek thai la aka awm te duek thai nawh la a thaw u pan veng atah,” Duekna te a phe poen; Taana tah soepbir poen!” 55 “Duekna, mela muem na taana te a awm? Duekna, mela nuem na tharana sue te a awm?” tila caciim lawng a thui te atak tang la thoeng poen ai. 56 Duekna lawng tharana sue te thawlhna dawng kalawng a dang tih thawlhna lawngah tharana te Phungawl dawngkah a dang. 57 Tede mami kah Bawipa Jesuh Khrih rang oen mami taana pekung Pathen tengah thangtheenna awm hawn seh! 58 Tedawngah ka lungna maya manau thli, paihuen net lang acakla pai uh. Bawipa kah bii na bi u te metuek ah khaw apoei-oepla awm nawh tih ahong-ahii nawh ni tite na ming u dawngah Bawipa bii na bina dawngah te tokthlue poepa uh.
1 Judia ram ah aka awm Pathen thlaang thli bawmna hamla tangka cawi ham kawng ca navan thut te tah: Galati peng kah khrihcabu thli tengah ka thui pe angla te sai u van. 2 Yarh roekk kah lamhacuek khawhin ah nangmi pakhat rip lawngah tangka na dang taring ah ayawl ayet khaw tungsep uh; te atah kai ka law vengah tangka cawi ham ngoe tlaih manawh. 3 Kai ka law coengah nangmi lawng na tuek thlaang thli te awl uenna ca ka peek vetih ahimi te nangmi kah kutdo thak hamla Jerusalem la ka tuih ai. 4 Kai khaw ceh van hamla angoena a awm atah ahimi oen kamah he haih ka cet u ai. 5 Macidonia ram he hiil-adawng ham a awm dawngah Macidonia ram hiil-adawng coengah ni nangmi tengla ka law hun ai. 6 Nangmi tengah te ka awm khiing la koeih mai, sikca khui puet tah ka awm maila koeih, tecoengah ka ceh ngaihna ah yin la koekthoek ka cehna ham te nan bawm u thai ai tila ka ngaiuep. 7 Nangmi tengah kawlkalh ah pah tih nangmi te huh doek ham mai tah ka ngaih nawh; Bawipa lawngkhaw akhan atah nangmi tengah asan hlang awm ham ka ngaiuep. 8 Efesa khaaw ah he pentikos khawhin toe ah ka awm ai. 9 Kai he aka oelhtaih thlaang yahawh awm de, he ah he bii bi thaina atue theen awm. 10 Nangmi tengla Timote he avan pha vengah a awmdamna nawh hamla nangmi lawng atheenla ngawlh pai puei uh, ahih he kai angla Bawipa kah bii ni a bi. 11 Nangmi a-u khat lawngkhaw ahih te dapsit la van hu u boel, ngaimawng ngaitoela yin la thoeng thoeng cet tih ka teng avan pha koep thaina hamla bawmcem uh, kai oen maya manau thli lawng ahih avan pha koep ham te ka ngaiuep u. 12 Tecoengah manau Apollos kawng tah: atloe maya manau thli oen haih nangmi tengah ceh hamla ka thui pe poepa de tahe veng atah coengg thai thlan ai tila a poek. Te cakhaw a hoeng atoeih vengah law badai. 13 Ngaithuen huertue uh, oengna dawngah acakla pai uh, na thin cak sak uh, na tha thloet u boel. 14 Na sai boeih te lungna oen sai uh. 15 Nangmi lawngah Stefanas oen a imkhuikaw te na ming u; Ahimi tah Akhaia khaw ah lamhacuek khrihca la awm u tih Pathen thlaang thli ham bii bina dawngah tlungmu u, 16 he ang thlaang thli kah mawtna te vai u lang bii aka bi thlaang boeih oen bawng-yawng u langtah bii bi uh. 17 Stefanas, Fotunatas oen Akhaikas mi he a law u dawngah ka awmngaih. Nangmi na awm u nawh ah khaw ahimi lawng n'hilh u sak. 18 Nangmi te na kaw avan hoe sak u van angla te kai khaw ka kaw avan hoe sak u. He ang thlaang thli he tah koeh ham awm. 19 Asia ram khuikah khrihcabu thli lawng nangmi te n'toei u; Akuila, Priscilla oen ahimi im ah aka pum khrihcabu lawng nangmi te n'toei u. 20 He kah aka awm maya manau boeih lawng n'toei u. Nangmi khat oen khat maya manau angla aciim kuttuukna oen toei uh. 21 Kai Pawl lawngah voemtoeina ca he kamah kut roeroe oen kavan thut. 22 Bawipa te aka lungna nawh thlaang tah kawsi yawkk seh! Marana tha. Kaimi Bawipa, law hawn loeih! 23 Bawipa Jesuh kah lungvatna tah nangmi boeih sawah awm hawn seh. 24 Kai kah lungna he Khrih Jesuh ah aka awm nangmi boeih sawah awm seh.
1 Pathen kawngaihna rang oen Khrih Jesuh kah celtuih la aka awm kai Pawl oen mami kah manau Timote lawng Kawrin khaw kah Pathen khrihcabu oen Akhaia peng pum ah aka awm Pathen thlaang thli tengah ca kavan pat u. 2 Mami na Pa Pathen oen Bawi-pa Jesuh Khrih lawng lungvatna ngaimawngna te nangmi m'pe hawn seh. 3 Mami Bawipa Jesuh Khrih kah ana Pa oen Pathen, thlaang reenkung mami na Pa, bawmcemna boeih a lawna kungpui Pathen te thangpawm u sih. 4 Raina phun soeprep aka tawng thlaangtloe te bawm thaina ham mami kah raina boeih ah amah lawng mami he m'bawm, te tila thlaangtloe te mami lawng m'bawm vengah Pathen tengkah n'dang u bawmna te n'hawna. 5 Mami lawngah Khrih kah patang khangna te n'dang u van angla Khrih rang oen ah mami lawng Pathen kah bawmna alentloe te khaw n'dang u van. 6 Kaimi lawng patang ka khang u atah nangmi te bawmna ham oen thlawnna ham ni; kaimi lawng bawmna ka dang atah nangmi lawngkhaw kaimi angla bawmna te na dang u van vetih kaimi kah patang khangna, te ang van te nangmi lawngkhaw kawdawna oen ah na ueh thaina ham tharana te m'peek u. 7 Tedawngah nangmi sawah ka ngaiuep-na te tah cak; kaimi kah patang khangna te nangmi lawng na khang u van tih kaimi lawng ka dang u bawmna te khaw na dang u van. 8 Maya manau thli, Asia peng ah kaimi lawng ka tawng u te nangmi ming sak hamla ka ngaih u. Kaimi sawah thalrih avan khueng u te bo aih tih arih aih tangkiik dawngah hing ham pateng ka ngaiuep tlaih nawh poen. 9 Kaimi he duek sak hamla awl a tloek u poen tila ni ka poek u. Tede he tila a awm he tah mami lawng mah oen mah te uepna ohla, thlaangduek aka thawh sak Pathen te uepna ham ni. 10 Nangmi lawngah kaimi he thangthuina oen nan bawm u van angla, rih awm tangkiik duekna kalawng kaimi he amah lawng n'thlawn tih hailam ben ah khaw n'thlawn baal hun ai. 11 Tedawngah nangmi lawng kaimi ham na thangthui poepa u te Pathen lawng avan thung vetih kaimi he yotheenna n'peek ai, thlaang yahawh lawng a awl a huer u vetih kaimi ham awmngaih ciil a thui u ai. 12 Kaimi lawng ka thangpawmna u tah he dilai dawng hing vengah awlpuila nangmi oen tuhkaina ah he thlaanghing kah cuihna nawh tih Pathen kah lungvatna huham tharana oen ah Pathen kah peek thinkaw ciimna oen thinkaw doengna oen ah ukna he athe atheen pekbona thinkaw oen m'ming sak he ni. 13 Ca kavan thut u he tah nangmi lawng na tae thai tih na yaakming thai koei ni kavan thut. 14 Tede tahe ah nangmi lawng kaimi nan ming u he tah avaang-athal mai ni, nangmi lawng kaimi he asoep heet la nan ming u ngai ai tila ka ngaiuep, mami kah Bawipa Jesuh Khawhin atah nangmi lawng na thangpawmna u tah kaimi vetih, kaimi lawngkhaw ka thangpawmna u tah nangmi van ai. 15 He ang thli he ka tangna khaklal dawngah nangmi lawng yotheenna arepla na dangna u ham lamhacuekla nangmi tengah yin hamla ka kamthlah. 16 Judia ram ka ceh vengah nangmi tengkah bawmna ka dangna ham ah Macidonia la ka ceh ah te nangmi tengla ka law silangtah ka mel ben ah khaw ka law koep ai tila ka kamthlah. 17 He tila kamthlah he thinkaw coep-hoeh la aw a awm kai? Ka kamthlah vengah he mah ham bueng poekna thinkaw khueh tih, “Oeih, oeih” ti oen ah, “Moenih, moenih” tila vai at maiah aka thui la ka awm aw? 18 Pathen tah uep-awm la awm tih awltak a thui angla nangmi tengkah ka awlkam he khaw, “Oeih,” ti oen ah, “Nawh ni” tila kawpoek thlumthle awl nawh ni. 19 Metihtiah, Silas, Timote oen kamah lawngkhaw nangmi tengah kavan phawng u Pathen Capa Jesuh Khrih te tah “Oeih” ti oen ah, “Nawh ni” tila thlumthle awl aka thui nawh ni. Tetih ohla ahih tah Pathen kah, “Oeih” tina ni. 20 Metihtiah ahih tah Pathen awlkam boeih dawngah “Oeih” tina ni. Tedawngah Jesuh Khrih rang oen Pathen kah ruep-awmna ham mami lawng, “Amen”, tila n'thui u. 21 Kaimi oen nangmi he thik at la a sai tih Khrih oen ah pumkhatla aka hing sak tah Pathen amah ni; mami he athloekla aka thloeng tih, 22 amah koe la awmna miknoekna te mami sawah a deng tih mami ham a toen oepsoeh boeih te aamahkhanna ham mami thinkaw ah Ciim Muithla pekung tah Pathen amah ni. 23 Pathen tah kai ham sausi la awm, amah lawng ka thinkaw a ming! Kawrin khaaw la law nawh ham kaw ka poek he tah nangmi na sa a suengna ham ni. 24 Nangmi lawng me ang na tangna ham koei tite nangmi tengah thui ham ka yawm u nawh; nangmi tah oengna dawngah acakla na pai u tite kaimi lawng ka ming. Tedawngah namami kah awmngaihna ham ni nangmi oen bii m'bi haih u.
1 Tedawngah nangmi na kaw kavan the sak koep nawh hamla nangmi tengah law nawh ham thinkaw ka melh poen. 2 Metihtiah nangmi te na kaw kavan the sak kawinih kai he ka kaw aka hoe sak a-u aka awm hun oh ai? Kai lawng kaw kavan the sak nangmi bueng lawng ni kaw navan hoe sak u. 3 Tedawngah ni ca ka thut tih nangmi tengla kavan pat. Kai he kaw aka hoe sak nangmi lawng kawtheboepla na awm u lak atah nangmi tengah law nawh hamla te ka ngaih. Metihtiah kai ka awmngaih atah nangmi boeih khaw na awmngaih u van tite ka ming. 4 Nangmi tengah lakuengna oen thinphatna oen ah mikphi oen ni ca te ka van thut. Kai lawng mengtengna tah nangmi te kawthe sak ham nawh tih nangmi boeih te kai lawng metihtlukla kan lungna tite ming sak ham ni. 5 Tahe ah a-u lawngkhaw thlaang pakhat khat te kaw a the sak atah kai bueng he ka kaw the sak nawh tih nangmi tim kah thlaang khatsut te khaw kaw avan the sak van. (He tila ka thui he tah ahih te atlawh khathlakla sai ham ka ngaih nawh dawngah ni.) 6 Nangmi thlaang yahawh lawng ahih dan na tat u te khoek poen. 7 Ahih te a kaw the malcal tih kawmoetkawma la a awmna nawh ham tahe atah nangmi lawng a sawah khawdawp na ngaai u vetih tha na peek u ham awm poen. 8 Nangmi lawngah ahih na lungna tangtang te ming sak uh tila reenna kavan bih u. 9 N'hu vengkah nangmi tengah ca kavan pat te tah noekdakna na tawng u vengah metihtlukla acakla na pai tih kan thuituenna awl te vai ham oepsoeh la na awm aw tite ming ham ka ngaih dawngah ni. 10 Nangmi lawng thlaang pakhat khat kah thawlh a sai te khawdawp na ngaai pe u atah, kai lawngkhaw khawdawp ka ngaai pe van. Metihtiah khawdawp ka ngaai vengah khawdawp ngaai ham thaihu te a awm tangtang atah nangmi rang oen ah Khrih haiah khawdawp ka ngaai. 11 Te tila khawdawp n'ngaai u he tah Seitan lawng mami he n'taa boel seh tila n'ngaih dawngah ni; metihtiah Seitan kah kamthlahna boeih te mami lawng m'ming u. 12 Khrih kawng Awlthang Theen te thui hamla Troas khaaw ka pha vengah, bawipa lawng te ah te bii bi ham lawngpui avan roek te ka huh. 13 Tede mami kah manau Titas te ka huh nawh dawngah ka lakueng tangkiik. Tedawngah te kah aka awm thlaang thli te sadingla ne ka tina tih Macidonia la poe ka cet. 14 Tecakhaw Pathen tengah thang-theenna awm hawn seh! Metihtiah Khrih oen pumkhat la awmna rang oen ah Khrih kah taana ah aka cet thlaangping tim ah thongtla thlaang angla Pathen lawng mami he m'mawt u. Khrih kawng mingna te riimtuui baw angla ram tawm ah a puungna ham mami he Pathen lawng n'hawna. 15 Tedawngah mami tah Khrih lawng Pathen tengah a nawn baw aka tuui riimtuui oen n'lo u, te riimtuui tah thlawn la aka awm lii thlaang tengah khaw, aka auh lii thlaang thli tengah khaw a pha. 16 Aka auh lii thlaang thli hamla tah te riimtuui te ahimi aka ngawn, baw aka the duekna la awm tih thlawn la aka awm thlaang thli ham tah, te riimtuui te hingna aka pe baw aka tuui riimtuui la awm. Tedawngah he ang bii he a-u lawngah a bi thai ai? 17 Kaimi tah Pathen kah awl te aphu aka awm nawh thaihu thaiha la aka sai thlaangtloe hue oen ka lo u nawh; tede Pathen lawng kaimi he n'tuih u dawngah, Khrih kah tuihyoeihthlaang la ka awm u van angla Pathen haiah te thinkaw ciimna oen ka thui.
1 He tila ka thui he kamami kawngah mah oen mah koeh koep angla awm ai aw! Thlaangtloe khatsut angla kaimi lawngah nangmi peek hamla, tihnawhtah nangmi tengkah lawh hamla mingpueina cathut ka ngoe u aw? 2 Nangmi he kaimi kah cathut la na awm u poen. thlaang boeih lawng ming ham oen ah tae hamla kaimi kah thinkaw lungbui ah thut la na awm u. 3 He ca he tah Khrih amah lawng a thut tih kaimi tah daakphuei mai ni tite aciimla tueng. He ca he tah catui cahaang oen thut nawh tih, aka hing Pathen kah Muithla oen a thut ni, lungpeel dawngah thut nawh tih thlaanghing lungbui ah ni a thut. 4 Kaimi lawng he tila ka thui ngam he tah Khrih rang oen Pathen te ka uepna u dawngah ni. 5 He bii he kaimi lawng ka bi thai tila thui ham koei n'tu khaw awm nawh. Kaimi lawng bi thaina ka khueh he tah Pathen teng kalawng ni a law; 6 awlkam thaai bii he kaimi aka bi sak thai tah Pathen amah ni. Te awlkam thaai te tah ca oen thut la aka awm phungawl nawh tih Muithla te ni. Ca oen a thut phungawl lawngtah duekna te a thoeng sak tih Muithla lawngtah hingna te a peek. 7 Phungawl te lungpeel dawngah ca la a tarik tih peek la a awm vengah Pathen kah ruep-awmna te tueng. Mosi mik-hai dawngkah aka aang rawngtheng te yum khap u thuk poen de, aangna te atak aih hun dawngah Israel thlaang thli lawng ahih te rangpatang la bueh thai nawh. Duekna aka thoeng sak Phungawl pateng khaw te tila ruep-awmna oen a law atah, 8 Muithla kah biibina ruep-awm tare tah metihtlukla a lentloe tare ai! 9 Thlaanghing awlcekna avan khuen te te tila ruep-awm tangkiik atah thlawnna akavan khuen bii saina te tah metihtlukla ruep-awm tare ai. 10 N'cui veng kah aka aang tangkiik ruep-awmna te tah tahe vengkah aka aang ruep-awmna lawngah a thue rawngtheng poen dawngah khum poen n'ti ai. 11 Metihtiah atue soetca khuiah aka cak pateng khaw tetih aih la ruep-awmna a khueh atah dungyan aka cak ham koei lawngtah metihtlukla ruep-awmna te a khueh tare ai. 12 Mami lawng he ang ngaiuepna n'khueh u dawngah n'thin cak u. 13 Kaimi tah Mosi angla ka awm u nawh, Mosi lawng a mik-hai dawngkah aangna yum khap u tih a khum yip te Israel thlaang thli lawng a huh nawh ham ah a mik-hai te bailoeng oen a dah khoep. 14 Ahimi kah thinkaw tah khai u khoep tangtang tih tihin toe ah khaw awlkam ruem cabu te a tae u veng roekk ah a thinkaw tah te kah bailoeng lawng te a khuk toengtoeng hun. Thlaang he Khrih oen a tuhkai u deng bueng ah ni te bailoeng te a thlih hun. 15 Tihin toe ah pateng khaw Mosi kah Phungawl te a tae u veng roekk ah ahimi kah thinkaw te bailoeng lawng a dah hun. 16 Tede te tah thlih thai la awm, Mosi kawng te caciim lawng, “Mosi lawng Bawipa benla a mang vengah a bailoeng te a thlih,” tila a thui. 17 Tahe ah he awl dawngah, “Bawipa” a ti he tah Muithla ti ngaihna tih; Bawipa Muithla awmna huen atah loeihna awm. 18 Tedawngah mami boeih tah mik-hai aka dah khoep tlaih nawh dawngah Bawipa kah ruep-awmna te aka tueng sak thlaang poen ni; te ruep-awmna tah Muithla la aka awm Bawipa teng kalawng law tih mami he amah oen aka lo u ruep-awm tare la n'sai.
1 Pathen lawng reenna oen he kah bii he bi hamla kaimi m'peek dawngah kaimi tah ka kaw boet nawh. 2 Kaimi lawng ahuepla thaihu sai boeih oen yarau saina boeih te ka hoett u poen; kaimi lawng thailatna ka sai u nawh, Pathen kah awl khaw asoeng a kam nawh la ka thui u nawh. Kaimi tah Pathen mik huh ah awltak aangna dawngah ka hing u tih thlaang boeih kah athetheen mingna kawpoek te atheenna ham kamami oen kamami he phep u ham ka yawm u. 3 Kaimi lawng ka phawng u awlthang theen he thuh la a awm atah aka auh lii thlaang thli ham ni thuh la a awm ai. 4 He dilai kah raaibawi pathen lawng ahimi kah thinkaw te yiinna khuiah a khueh dawngah ahimi lawngah tangna u nawh. Ahih lawngah Pathen oen aka lo u tangtang Khrih kah ruep-awmna kawng Awlthang Theen dawng kalawng aka thoeng aangna, ahimi sawah aka vangg aangna te huh nawh ham a dah khoep. 5 Kaimi lawng kamami kawng he ka thui u nawh; kaimi lawng Jesuh Khrih tah Bawipa ni tila ka thui u tih Khrih hamla kaimi he nangmi kah tuihyoeihthlaang la ka awm u. 6 Khrih kah mik-hai dawngah aka aang Pathen kah ruep-awmna te ming thaina ham mami kah lungbui khuiah amah kah aangna te aka vaang sak Pathen oen ah “Yiinna khui kalawng aangna te vaang ai!” tila aka thui te atloe nawh tih Pathen amah toeng toeng ni. 7 Tede Pathen tengah saithaina asang koek te awm tih mami tengah awm nawh tite a tuengna ham Muithla ben ro thaihu khuehkung mami he tah dilai-am mailai la ni n'awm mai. 8 Mami lawng patang raina tah n'tawng poepa de n'rek tang tang aih nawh; alak avai atah kawpoek cawm-am sut de kawpoek boet dingri aih nawh; 9 raal-asa broela awm de, paya khatca khaw khueh muehla tah n'awm aih nawh; mami he nganbawh tah broela n'yawkk sak u poen de a duek tah n'duek u aih nawh. 10 Mami kah pum dawngah amah kah hingna te a tueng thaina ham Jesuh kah duekna te mami kah aka duek thai pum dawngah n'khuen poepa. 11 Mami kah aka duek thai pum dawngah amah kah hingna te a tueng thaina ham Jesuh hamla mami lawng hingkhui puet ah duek thlipit la n'awm u poepa. 12 He kah thuingaihna tah kaimi pum dawngah he duekna lawng bii a bi de, nangmi pum dawng atah hingna lawng bii a bi. 13 Caciim lawngah, “Ka tangna tih ka thui” ti. Te ang oengna thinkaw oen ah te kaimi lawng ka tangna u dawngah ka thui van. 14 Bawipa Jesuh te duekna kalawng hingna ah aka thawh sak Pathen lawngah kaimi khaw Jesuh oen haih n'thawh sak vetih nangmi oen thik at la amah haiah te n'kuun puei ai tila mami lawng m'ming u. 15 He ang thli boeih he tah nangmi hamla ni, Pathen lungvatna lawng thlaang yahawh tengah a pha tare van angla Pathen ruep-awmna hamla ahimi lawng awmngaih ciil a thui khaw yahawh van ai. 16 He tila a awm dawngah metuek vengah khaw kaimi tah ka kaw boet nawh. Mami kah pumtaksa he voehvoeh ah tlum ahonn ngoen cakhaw, mami kah muithla hingna tah hin at coeng hin at athaaila coengg tare hang. 17 Tecoengah mami lawngah raina tehca kawlkalh ah n'tawngna lawngah he, he kah raina lak ah abo ngaai dungyan ruep-awmna te apueh asawmla m'peek ai. 18 Metihtiah mami lawngah mik huh thai thaihu te miktakna nawh tih mik huh nawh thaihu te ni m'miktakna. Mik huh thaihu tah kawlkalh ni a cak, tede mik huh nawh thaihu tah yoeyahla cak.
1 He dilai dawngah mami kah awmna mami pum riim-im he phe la awm atah, mami awmna ham Pathen amah kah sai dungyan aka cak im, vaan ah avan khueh ai tila mami lawng m'ming u. 2 Tahe vengah he vaan kah im te oen ah mami lawng thoekcau u hamla n'ngaih tangkiik dawngah n'kopaang u; 3 te im oen ah thoekcau la n'awm u atah mami he pumtliing la n'awm manawh. 4 He dilai riim-im ah mami n'awm vengah he thekhana yawkk oen n'kopaang u; te tila kopaang he tah mami kah he dilai n'pum he hoett hamla n'ngaih dawngah nawh ni, tede aka duek thai thaihu he hingna oen thawleng ham vaan benkah pum te khueh hamla n'ngaih u dawngah ni. 5 He tila thawleng ham roekbahkung tah Pathen amah ni. Mami ham avan khueh avan toen boeih te aamahkhanla Muithla te mami m'peek u. 6 Tedawngah mami lawng thincak oen n'awm u poepa. He pumtaksa im dawngah mami n'awm khui roekk atah Bawipa kah im oen ah n'thla u tite m'ming u. 7 Metihtiah mami kah hingna ham tah oengna he awlpui la awm, mik huh he awlpui nawh ni. 8 Mami tah thincak oen n'awm u tih pumtaksa he ceh taak tih Bawipa oen im ah awm haih hamla te n'ngaih u. 9 Tedawngah mami lawng he kah pumtaksa im ah n'awm ah khawseh, ke kah im ah n'awm u ah khawseh, atloe boeih lak ah amah te awmngaih sak ham ni n'ngaih u. 10 Metihtiah mami boeih he amah lawng awl cek ham Khrih haiah te m'pha boeih ai. Pumtaksa la hing vengah a the khaw, atheen khaw soeprep saina taring ah ating-atawkk la rip n'dang u ai. 11 Bawipa he rih ham awm tite thui-ngaihna ka ming u, tedawngah kaimi lawng thlaangtloe te ceel hamla ka yawm u. Pathen lawng kaimi he anep heet la m'ming tih nangmi lawngkhaw na thinkaw oen kai he atheen heet la nan ming u cawini tila ka ngaiuep. 12 Nangmi tengah kamah kah theenna te tueng sak koep hamla ka yawm u nawh; kaimi kawngah nangmi lawng na phoek-thloerna u ham ni ka yawm u. Te dengah ni thlaanghing khawboe ramlang te bueh ohla asaw ahan kah thlaanghing khawboe te a dan tih aka oekthloen u thlaang thli kah awl te na thung thai u ai. 13 Kaimi he ka ngau u tangtang kai aw? Ka ngau u oh atah Pathen ham ni. Ka ngau u nawh atah nangmi ham ni. 14 Thlaang boeih hamla thlaang pakhat duek tih ahih kah a duekna ah te thlaang boeih duek van tite m'ming u dawngah Khrih kah lungna lawngah mami he n'uk poen. 15 Khrih lawngah thlaang boeih hamla a duek he tah thlaanghing lawng a hing khuiah amah ham bueng la hing tlaih ohla ahimi ham duek tih aka tho koep thlaang hamla te hing ham ni. 16 Tedawngah tahe atah kaimi lawng a-u khat khaw thlaanghing siing oen ah alan atang ka thlit u tlaih nawh. N'hu veng atah Khrih he khaw thlaanghing siing angla alan atang ka thlit u de tahe atah te tila ka sai u tlaih nawh. 17 A-u khaw Khrih oen a tuhkai u coeng atah, ahih tah thlaang thaai poen ni; a hing ruem tah khum tih athaaila hing poen. 18 He ang thli boeih he Pathen lawng ni a sai; a raal la aka awm mami he Khrih rang oen Pathen lawng a paya la n'sai u tih thlaangtloe te khaw a paya la sai van ham mami he bii tungpui m'peek. 19 Kaimi lawng ka thui u awlthang tah Pathen lawng Khrih rang oen thlaang boeih te amah kah paya la a sai ti he ni. Pathen lawng ahimi kah thawlhna te cayin cabu khuiah khueh pe tlaih nawh; ahimi te amah paya la a saina awlthang theen te kaimi he m'peek. 20 Tedawngah kaimi lawng Khrih yueng la awl ka thui u; Pathen amah lawng nangmi te n'ceel angtoekla ni kaimi lawng kan ceel u. Nangmi lawngah Pathen kah raal la awmna kalawng a paya la awm u loeih tila kaimi lawng Khrih yueng ah kan ceel u. 21 Khrih tah a thawlhna awm nawh, tede amah oen pumkhatla awmna rang oen Pathen kah doengna te mami lawng paang thai van ham mami hamla ahih te Pathen lawng mami kah thawlhna te a paang sak.
1 Tedawngah kaimi tah Pathen oen bii aka bi haih la ka awm u dawngah Pathen kah lungvatna aka dang nangmi lawng te lungvatna te apoeila coeng sak u boel tila reenna kavan bih u. 2 Pathen awlthui he hutung u lah: ‘Nangmi te kan reenna atue atang a pha vengah nangmi awl te ka hutung poen; nangmi te thlawnna khawhin a pha vengah kan bawm u” tila a thui. Hutung u lah! Pathen kah reenna te dangna atue tah tahe poen ni; tihin he thlawnna khawhin poen ni! 3 Kaimi kah biibi he a-u lawngkhaw a cawtt abauh ham te ka ngaih u nawh dawngah a-u kah lawngpui ah khaw kanghalhna khat khaw ka khueh pe u nawh. 4 Te tila te sai ohla khawdeng mingna, raina, patang khangna boeih he kawdaw thinsan oen ka ueh u tih soeprep boeih ka saina dawngah Pathen kah tuihyoeihthlaang la ka awmna te ka tueng sak u. 5 Kaimi he cungpoelh oen n'bawh u, thong ah n'thlaak u tih rangpui kah awlpuung kaacaan la saina te ka yawkk u. Kaimi he duemdawng ohla bii n'bi sak u tih ih mueh ih naai la, buh mueh buh pawng la n'khueh u. 6 Kaimi lawng thinkaw ciimna, cuihhoena, kawdawna, reenna oen ah khaw, Ciim Muithla rang oen ah, lungna tang tang oen ah khaw, 7 awltak awlthang te phawngna oen, Pathen kah huham tharana oen ah Pathen kah tuihyoeihthlaang la ka awmna te ka tueng sak u. Kaimi lawng raal teekna ham khawseh, kamami pum thloetna ham khawseh, doengna te awva angla ka hawna u. 8 Kaimi lawng hinyahna khaw ka tawng u tih thekhana khaw ka tawng u; sal-aphaamna khaw ka tawng u tih koehna khaw ka tawng u. Kaimi he thlaangthaipalat la n'ngaai u de awltak ka thui u; 9 a-u lawngkhaw a ming nawh thlaang angla n'sai u de, thlaang boeih lawng m'ming u; thlaang duek angla n'poek u de, nan huh u angla ka hing u hun. Dan tah n'tat u de n'ngawn u nawh; 10 Kaw avan the sak u de ka awmngaih u yoeyah; kaimi khawdeng thlaang angla ka awm u de, thlaang yahawh te ka bawi sak u, thaihu khat khaw khueh nawh angla ka awm u de, atak tang atah kaimi lawng soeprep ka khueh ka toen u. 11 Kawrin khaaw kah ka lungna ka paya thli! Nangmi tengah acairaula kavan thui u poen; kaimi lawng lungbui thawhka akaula kavan awng u poen. 12 Kaimi lawng nangmi ham thinkaw thawh kavan khai khoep nawh; Nangmi lawng ni kaimi ham na thinkaw thawh na khaih khoep u. 13 Tahe ah nangmi he kamah kah ca anau thli angla awl kavan thui u: Nangmi tengah thinkaw ka khueh u van la te kaimi tengah khueh u van lah. Na lungbui thawhka te akaula van awng uh! 14 Nangmi lawng aka oeng nawh thlaang thli oen avan at la bii te bi haih ham yawm u boel, te tila bii haih ham te coeng thai nawh. Metila aka soeng oen ah aka soeng nawh te a yok u haih thai ai? Metila aangna oen yiinna te a awm haih thai ai? 15 Metila Khrih oen Raaibawi te a kaw a vai hih thai ai? Aka oeng thlaang pakhat lawng aka oeng nawh thlaang pakhat oen ah a khueh haih n'tu aka awm? 16 Metila Pathen kah tempal bok-im te aka oeng nawh kutsai mueime oen a roep hih thai ai? Metihtiah mami tah aka hing Pathen kah tempal bok-im ni! Pathen amah lawngah, “Kai lawngah ka awmna im te ka thlaang thli oen ka sak vetih ahimi tim ah ka awm ai; Kai tah ahimi kah Pathen la ka awm vetih ahimi te kai kah thlaang la awm u ai,” ti. 17 Tedawngah Bawipa lawng, “Nangmi lawng ahimi te ceh taak u lang ahimi teng kalawng athloekla thloeng uh. Nangmi lawng aka ciim nawh te ahimi oen sai haih u boel, te atah nangmi te kan do ai. 18 Kai tah nangmi kah na pa la ka awm vetih, nangmi tah ka canu oen capa la na awm u ai, tila Thara koek Bawipa lawng a thui,” ti.
1 Ka lungna paya thli, he awlkam boeih he mami tengah ni a sai. Tedawngah pumtaksa khawseh, muithla khawseh, aka ciim sak nawh soeprep boeih dawng kalawng mami he ciimcaih u silang Pathen hinyahna oen aciimsuekla hing u sih. 2 Nangmi thinkaw khuiah kaimi hamla ahuen van khueh u van lah. Kaimi lawng a-u khaw ka thena u nawh; a-u khaw ka rawk sak u nawh, a-u kah thaihu khaw atuueng nawh la lawh ham ka yawm u nawh. 3 He tila ka thui he nangmi te sal-aphaamna ham ka thui moenih; kaimi lawngah nangmi oen duek haih hing haih hamla ka thinkaw ah kan tleng-elh u tite n'hu vengah kavan thui u poen. 4 Nangmi te kan uep kan pangna tangkiik; Nangmi kawngah ka pawmsang u! Kaimi lawng raina soeprep ka tawng cakhaw thincak oen ka awm; Awmngaih kawhoena oen ka betoet. 5 Macidonia ka pha u vengah pateng khaw, ading asuek la ka awm u nawh. Khaw tawm ah raina awm, thlaangtloe hue oen tawhsina awm, ka kaw khuiah thluep ka luekueng. 6 Tede kawmoetkawma la aka awm thlaang thli te thathlue thakaw la aka awm sak Pathen lawngah kaimi tengah aka law Titas rang oen tha avan thlue sak. 7 Titas a law dawngah kaimi he awmngaih sak te bueng nawh tih ahih te nangmi lawng tha navan peek u dawngah khaw ka awmngaih u. Nangmi lawng kai he huh hamla na ngaih u tangkiik, metihtlukla na kaw a the u tih nangmi lawng kai he nan pai puei u tite Titas lawng kaimi tengah avan thui tih tahe ah ka awmngaih tare ngai. 8 Metihtiah ka capat lawngah nangmi te na kaw van the sak mai cakhaw te capat te kavan thut dawngah ka kaw the nawh. Te capat lawng kawlkalh ah nangmi na kaw avan the sak te ka ming vengah ngaaithe laat la ka awm. 9 Tede, tahe tah ka awmngaih poen, nangmi te kaw kavan the sak dawngah nawh tih na kawthena lawng nangmi te thinkaw avan thaw dawngah ni. Te kawthena te Pathen lawng ni a hawna, kaimi lawng nangmi te nganbawh kan peek aih moenih. 10 Pathen lawng ahawna kawthena lawngtah thlawnna ah aka ceh puei thinkaw thawna a thoeng sak tih te ang kawthena dawngah yutlawina ngoe nawh! Tede thlaanghing kah kawthena mai atah duekna te a thoeng sak. 11 Nangmi kah kawthena te Pathen lawng metila a hawna tite ming u lah: nangmi te tha avan thlue sak poen; na thawlh u nawh tite tueng sak ham metihtlukla na kaw a thluembuek u! Na thin sa u, na lakueng u, nan ngaai tangkiik u poen, doengna te sai ham na ngaih u poen; sai thawlhna te dan peek ham oepsoehla na awm u! He thaihu boeih dawngah he nangmi tah thawlhpalhna awm nawh tite namami lawng na tueng sak u poen. 12 Tedawngah te kah capat nangmi tengah ka thut te tah thlaang pakhat kah thawlhna, tihnawhtah, thlaang pakhat kah saithawlhna dawngah kavan thut nawh ni. Pathen mik huh ah kaimi ham ataktang la nangmi lawng pum na peek u tite tueng sak ham ni kavan thut. 13 Te tah kaimi kah tha-awmna ni. He dawng bueng ah ka tha thlue u nawh; Nangmi boeih lawng Titas te navan bawm u, a kaw navan hoe sak u tih ahih kah kawhoena lawngah kaimi he kaw avan hoe sak tare! 14 Kai lawng nangmi kawng te ahih tengah ka oekthloenna u poen, nangmi lawng kai he tha nan the sak u nawh. Kaimi lawng nangmi tengah awltak te ka thui yoeyah u tih te tila Titas tengah ka oekthloen u te khaw soeng. 15 Ahih kah thuituenna awl te ngaai hamla nangmi te oepsoehla na awm u tih nangmi lawngah ahih te rihna oen na thuen u tih lakueng lalapla na do u te a poek vengah nangmi n'lungna te tlo tare. 16 Nangmi te kan uepna rapcaat thai poen dawngah ka awmngaih tangkiik.
1 Maya manau thli, Macidonia ram kah khrihcabu boeih ah Pathen lungvatna lawng bii a bi te nangmi ming sak hamla ka ngaih u. 2 Ahimi tah patang khangna oen noekdak la awm u, tede ahimi tah awmngaih u tangkiik mai, amami ngoen khawdeng u mai de peekna ben atah a moeihoeih u tangkiik. 3 Ahimi lawng a peek thai koei lak ah pateng khaw yahawh ngaai a peek u tite nangmi tengah ka thui thai. 4 Judia ram ah aka awm Pathen thlaang thli bawmna ham ah ahimi khaw bawmna a thawh ham koei te m'pe u van tila amami kawthawh oen reenna avan bih u. 5 He tila a sai u he kaimi lawng ka ngaiuepna lak ah yahawh khuengdeng! lamhacuek ah amami te Bawipa tengah pe u; tecoengah Pathen kawngaih la kaimi tengah atheenla pe u. 6 Tedawngah he bii he tongnankung Titas te he bii he bi poe hamla, lungna awlpui bii he a coeng toe ah nangmi te bawm ham ahih te ka ceel u. 7 Nangmi tah oengna, awlthuina, cuihhoena, thlaangtloe bawm ngaihna thinkaw, kaimi nan lungna thinkaw oen ah te na bawi u tangkiik mai. Tedawngah ni he lungna bii dawngah khaw thinkaw aka tho thlaang la na awm u van ham ka ngaih u. 8 Kai lawngah phung-alam khat khaw kavan sai nawh. Tede thlaangtloe kah bawm ngaihna thinkaw a thawh te ka thui he tah nangmi kah lungna te ataktang aw tite ming ham ka ngaih dawngah ni. 9 nangmi lawng mami Bawipa Jesuh Khrih kah lungvatna te na ming u; ahih tah bawi soeh mai de nangmi kah theenna ham khawdeng thlaang la coengg, he tila khawdeng la a awmna oen ah nangmi te kuirang thlaanglen la coengg sak ham a ngaih dawngah ni. 10 Nangmi lawng n'hu kum ah bii na tongnan sut u te tahe atah na coeng u poen kawinih theen ai tila ka poek. He bii dawngah he bi ham bueng ohla bi hamla ngaihna ben ah khaw thinkaw aka tho cuek la na awm u. 11 Tedawngah bii te toeng ohla bi u langtah coeng u loeih! Nangmi lawng bii na tong cuek vengkah angla bii coeng ham ah khaw na kaw thawh sak u langtah tahe vengah na khueh toen taring oen ah te bi uh. 12 Nangmi lawngah peek ngaihna thinkaw a thawh atah, na khuehtoen nawh thaihu ohla, peek hamla na toen nangmi kah kutdo te Pathen lawng a do ai. 13 Nangmi te thalrih phueih sak tih thlaangtloe te tah thalrih yaanghoep sak ham ka yawm nawh; tede tahe vengah he koe-ava yahawh na khueh u dawngah voetna aka awm thli te na bawm ham roe la awm. Tecoengah nangmi khaw voetna a awm u van vengah ahimi lawngkhaw a khueh u atah nangmi te m'bawm van ai. He tila he pahih bok la avan at la na awm hih ai. 15 Caciim lawngah, “Yahawh hlang aka tungsep lawngkhaw toen muep nawh tih, ayawlca aka tungsep lawngkhaw yoehca bueng khueh toen van thloei nawh” tila a thui. 16 Nangmi te bawmcem hamla kaimi lawng thinkaw thluembuek van angla Titas kah thinkaw aka thawh sak Pathen tengah ka awmngaih u tangkiik! 17 Kaimi kah ceelna awl a ngaai te bueng muehla nangmi te bawm hamla a kaw tho tangkiik tih amah kawthawh oen nangmi tengah law hamla a ngaih roe poen. 18 Ahih oen aka awlthang theen thuina bii a bina dawngah khrihcabu boeih lawng a hinyah tangkiik boenhui pakhat te kaimi lawng kavan tuih ai. 19 Te bueng nawh tih Bawipa kah ruep-awmna hamla he kah lungna bii bina dawngah khaw, kaimi lawngah nangmi te bawm ngaihna tueng sakna ah khaw, kaimi oen yin aka cet haih la ahih te khrihcabu boeih lawng a tuek u tih bii a peek u. 20 He tila moeihoeihna oen a peek u kutdo he kaimi lawng ka boel ka rai u vengah, cawtbauhna khatca khaw he kawngah a awmna nawh ham ka ngaithuen u. 21 Kaimi lawng atah Bawipa kah mik huh bueng ah nawh tih thlaanghing kah mik huh ah khaw aka doeng thaihu te ni sai hamla ka kamthlah u. 22 Tedawngah kaimi lawng ahih rawi oen haih ah thlaangtloe boenhui pakhat kavan tuih u; ahih te kaimi lawng ka noek ka dak khiing u tih bawmcem ngaihna thinkaw a khueh poepa tite ka huh u. Tahe ah khaw nangmi sawah ueppangna a khueh poen tih bawm hamla a tha thlue soeh poen. 23 Titas tah kaimi oen biibipuei haih la awm tih nangmi bawm ham kaimi oen bii aka bi haih ni; ahih oen haih aka law atloe maya manau hue te tah khrihcabu thli kah laipai la awm u tih Khrih te a thaang aka theen sak ni. 24 Nangmi kah akawng-alam, kaimi lawng ka phoekthloerna u te ahimi lawngkhaw, khrihcabu boeih lawngkhaw soeng tangtang tite anepla a mingna u thai ham nangmi kah lungna te ahimi tengah tueng sak uh.
1 Judia ram ah aka awm Pathen thlaang thli tengah bawmcemna thaihu patna kawng te, ataktang atah kai lawng nangmi tengah capat thut ham ngoe nawh tila ka poek. 2 Nangmi lawngah bawm hamla na kaw tho tite ka ming tih, Macidonia ram kah thlaang thli tengah nangmi kawng te ka phoekthloerna poen. “Akhaia ram kah maya manau thli tah bawmna peek hamla te n'hu kum kalawng ah oepsoeh la awm u poen” ka tina. Nangmi kah thinkaw thluembuekna lawng ahimi yahawh ngaai te kaw a thawh sak poen. 3 Tahe atah maya manau hue he nangmi tengla kavan tuih, he tah nangmi kawngah kaimi lawng ka oekthloenna akawng alam te awlhong mai la a awm nawh ham ka ngaih dawngah ni. Tedawngah ka thui angla te na peek ham koei bawmna oen ah oepsoehla awm uh. 4 Tetih ohla Macidonia ram kah thlaang thli te kavan law puei tih nangmi oepsoeh la na awm u nawh te hu u mai kawinih nangmi kah yarau te ngoen thui han boel, nangmi kan uepna u dawngah te kaimi roe he mah metihtlukla yarau la ka awm u ai te! 5 Tedawngah nangmi lawng peek hamla na kam u kutdo te coekroek la na toen u ham ah he kah maya manau hue he kaimi ka law thlan ah nangmi tengla kavan tuih oepsoeh ham angoe tila ka poek. Tecoengah kai kavan pha vengah te coekroek la na awm u poen vetih nangmi te amangkhakla a peek sak ti ohla peek ham na ngaih u dawngah ni na peek u tite tueng ai. 6 He he hilh u boel; caangti ayawlca aka tuh lawngtah caangthaih yoehca ni a yuun van ai; caangti yahawh aka tuh lawngtah caangthaih yahawh a yuun van ai. 7 Thlaang boeih lawng amah kaw khuiah a nuen angla te pe seh, haihna thinkaw oen khaw pe boel seh, peek cingcing ham a ti dawngah khaw pe boel seh; metihtiah Pathen lawngtah awmngaihla aka pe te ni a lungna. 8 Tecoengah Pathen lawngtah na ngoena lak ah athloeila m'peek thai tih namami ham na ngoe boeih te na khueh na toen yoeyah vetih thaihu theen na saina boeih dawngah akhoek anoen lak ah a thloeila na dang ai. 9 Caciim lawngah, “Ahih lawngtah moeihoeihna oen khawdeng harah thli te a do-adan; ahih kah reenna tah dungyan toe cak,” tila a thui. 10 Tecoengah, caangti tuh ham oen buh caak ham pekung Pathen lawng nangmi kah ngoe boeih caangti te m'peek ai; moeihoeihla na peek u dawngah caangti aka po te athlur atawi sak vetih” caangvui caangthaih te avan puung sak ai. 11 Nangmi lawng moeihoeihla na peek poepa ham ah nangmi te kuirang thlaanglen la n'coeng sak ai. Nangmi kah kutdo peek te kaimi kut dawng kalawng patoeng aka do thlaang thli lawng Pathen te a koeh u ai. 12 Metihtiah nangmi lawng he bii he na saina oen ah Pathen thlaang thli kah a voetna dawngah na bawmcemna bueng te nawh tih Pathen tengah awmngaih ciil thuina awl khaw a thoeng sak. 13 Nangmi lawng he bii he na bina rang oen ah Khrih kah awlthang theen te acakla na phoeih u tih na pai u thai dawngah khawseh, nangmi lawng thlaangtloe thli oen ahimi te moeihoeihna oen na peek u dawngah khawseh, thlaang yahawh lawngah Pathen te a koeh u poen ai. 14 Tedawngah Pathen lawng a lungvatna te acoeih pawk la nangmi tengah avan lun poen dawngah ahimi lawng nangmi te n'thintlawhna vetih nangmi ham thangthui u poen ai. 15 Thui lek thuinaa nawh aphu aka tlo amah kah kutdo peek dawngah Pathen teng awmngaih ciil thui u sih.
1 Mami oen ng'awm haih veng atah awl kaa khaw thui nawh, athlathloei la a awm atah tluung-athang mai na ti u kai Pawl lawngah Khrih kah boe-ngaaina, kawdawna thinkaw oen ah reenna kavan bih u. 2 Nangmi teng kavan pha vengah te tluung-athaang ham koei la n'sai u boel; kaimi kah bii he dilai pumsa hue-ngaihna thinkaw oen a sai tila aka thui thli te tah awl tlawh oen ka tlung mai ai. 3 Kaimi he dilai dawngah ka awm u ti he tah soeng tangtang, tede kaimi lawngah dilai dawngah pumsa hue-ngaihna thinkaw oen raal ka kah moenih. 4 Kaimi lawng raal kahna ham ka hawna awva he tah dilai dawngkah awva nawh ni. Asoeng akam nawh awlpuungna te ka phe u, 5 Pathen kah cuihna te kanghalhkung la aka awm oekthloenna boeih boeih te ka phe u; thlaanghing kah poekna boeih te tamnaa angla ka tuuk u tih Khrih awl te ka ngaai sak u. 6 Nangmi lawngah uep-awm tangtang la na awm u te na tueng sak u coeng atah uep-awm nawh la saina boeih te dan tat ham oepsoehla ka awm ai. 7 Nangmi lawngtah thaihu boeih te asaw ahan ah ni na dan u. Te ah te pakhat khat lawng amah oen amah te Khrih kah thlaang la ka awm tila aka thui awm aw? Theen, a awm atah amah kawng te poek koep de lah seh, metihtiah ahih te Khrih thlaang la a awm van angla kaimi khaw ka awm van. 8 Bawipa lawngah kaimi m'peek saithaina aana akawng alam te apueh asawmla ka oekthloenna cakhaw ka yak nawh, te kah saithaina aana tah nangmi te phena ham nawh tih nangmi lawng na roengna ham ni. 9 Kai lawngah nangmi te capat oen hih-ahuut hamla a yawm tila na poek u ham te ka ngaih nawh. 10 Thlaang khatsut lawng atah, “Pawl lawng he a capat dawngah ngoen tah awl phawh tlo tih akhing awm mai, tede mami oen awm haih veng atah birih sut tih a ralthe, a awl thui khaw alawng-ala awm nawh,” ti u mai ai. 11 Te ang thlaang lawngah a ming ham tah, athlahlang kalawng kavan thut capat oen ah, nangmi tengah ka awm vengah ka sai ham koei te atloe-abangna awm nawh tite ming seh. 12 Amah oen amah te asang luelh la aka poek u thlaang hue oen te kaimi tah ka thumvan u nawh tih nuehtah ngam ham khaw ka mueinai u nawh. Ahimi tah ngau tangkiik mah aw! Ahimi lawngah amami oen amami te tahna hamla amami kah alan- atang te a sai u tih amami kah alan-atang oen ah te nuem-anai u. 13 Te cakhaw kaimi kah oekthloenna lawngtah ari-amawng voel te poeng voelh aih manawh; Pathen lawng kaimi ham bii avan nuenna ari-amawng khuiah ni a awm ai, te kah ari-amawng te tah nangmi tim ah kaimi kah biibina he khaw thuum. 14 Nangmi tah te kah ari-amawng khuiah na awm u dawngah Khrih kawng Awlthang Theen te nangmi tengla kavan khuen tih ka law u veng ah te te kah ari-amawng voel ah te kaimi ka cet u nawh. 15 Tedawngah Pathen lawng kaimi ham ari-amawng avan helhna voel ah thlaangtloe lawng bii a bina tangte kawngah te ka oekthloen u nawh. Te lak atah Pathen lawng ari-amawng a helhna khuiah te nangmi tim ah bii akau ngaaila ka bi thai u vetih nangmi kah oengna te roeng hang ai ti he ni ka ngaiuep u. 16 Tecoengah kaimi lawng nangmi ram voel kah thlaangtloe ram ah te Awlthang Theen ka phawng thai u ai, thlaangtloe kah lo khuiah, bii a saina tangte dawngah te kaimi oekthloen u ham ngoe nawh. 17 Tede caciim lawngah, “A-u lawngkhaw thangpawm u ham a ngaih atah Bawipa kah saina dawngah thangpawm u seh,” tila a thui. 18 Metihtiah Bawipa amah lawng thlaang theen la a pawm te ni a do, amah oen amah aka thangpawm u thlaang te tah do nawh.
1 Kai he ka ngau bet cakhaw khawdawp na ngaai u ham ka ngaih. Khawdawp van ngaai u hawn! 2 Pathen a thatlai van angla kai khaw ka thatlai van; Nangmi he Khrih amah bueng oen ah te yuvaa la awm ham kan kang sut hulaa cuem oen na lo u. 3 Evi te ruul lawngah asuek ahalh tih athai alatna angla te nangmi khaw na thinkaw thaw u vetih Khrih na uepna khaklal te na toeng u hau ai tila ka lakueng. 4 Metihtiah, thlaang pakhat lawng nangmi tengah law tih kaimi lawng ka thui nooek nawh atloe Jesuh te avan thui u vengah nangmi lawng na uemdoeh tih awmngaihla khawdawp na ngaai u. Nangmi lawngah kaimi teng kalawng na dang u Muithla oen awlthang theen oen ah aka vai u nawh muithla oen awlthang te na do u! 5 Nangmi lawngah, “Celtuih” tangtang na ti u thlaang hue lak ah te soetca khaw ahemla ka ngaai u nawh! 6 Kai he awlcal thingkaa tah ka thoem nawh mai ai, tede mingna ben tangtang atah ka voet roe nawh; He he nangmi tengah acaihla mevengah khaw thaihu soeprep ah kavan tueng sak u poen. 7 Pathen Awlthang Theen nangmi tengah kavan thui u vengah te kai lawng aphu kavan bih nawh; Nangmi te pawmsang hamla ka ngaih tih kamah tah adangla ka awm. Te tila ka awm te thawlh aw? 8 Nangmi tengah bii ka bi vengah atloe khrihcabu thli lawngah kai he m'bawm u. Nangmi bawm hamla kai lawngah ahimi tengkah te ka rot pe n'ti ai ta. 9 Tecoengah nangmi tengah ka awm vengah te tangka ka ngoe ah khaw bawmna kavan bih nawh; Macidonia kah aka law maya manau thli lawngah ka ngoe thaihu boeih te kai ham avan khuen u. N'hu vengkah ka awm angla ni hailam ben ah khaw ka awm ai: Nangmi ham thalrih la ka awm aih manawh. 10 He tila ka oekthloenna he Akhaia ram tawm ah a-u lawngkhaw khang khak thai manawh tite ka kaw khuikah Khrih kah awltak oen ah awl ka kam. 11 Nangmi te kan lungna nawh dawngah aw he tila ka thui? Nangmi kan lungna te Pathen lawng a ming! 12 “Celtuih” la ka awm u van aka ti hue lawngah te, ahimi kah a bi angla kaimi lawngkhaw ka bi thai van tila a oekthloenna thai nawh hamla tahe kah ka sai he poe ka sai ai. 13 Te ang thlaang thli te celtuih tangtang nawh ni, ahimi tah celtuih rawlrap thli ni, amami kah biibina kawngah hoem a thui u tih Khrih kah celtuih tangtang angla aka sa u mai ni. 14 Te tah kawpoek rai ham awm nawh! Seitan lawng pateng vanthlaang aka ang rawngtheng angla sa u thai van! 15 tedawngah ahih kah tuihyoeihthlaang thli lawngah doengna biibikung angla a sa u te kawpoek rai ham awm nawh. Aboetna atah ahimi lawngah amami kah saina angla ating atawk te a dang u ngaai ai. 16 Ka thui koep lah ai: a-u lawngkhaw thlaangngau la m'poek u boel seh. Tede nangmi lawng te tila na poek u atah ka oekthloenna bet van hamla thlaangngau angla te n'do u mai hawn. 17 Tahe ah kai lawng ka thui he, Bawipa lawng n'thui sak nawh ni; Oekthloenna ben atah thlaangngau angla awl ka thui taktak poen. 18 Tede thlaanghing kah akawng-alam mailai dawngah te thlaang yahawh lawng a oekthloen u dawngah kai khaw te tila ka oekthloen u van lah ai. 19 Nangmi ngoen tah na cuih u, tedawngah thlaangngau thli te awmngaihcala khawdawp na ngaai u thai! 20 Nangmi lawng ngoen tah, asoeng nawh la nangmi aka uk thli khaw, nangmi te thailatna tih apueh aka ca thli khaw, namami kah awlthuina dawngah khup lat la aka sai thli khaw, nangmi te huhsit thlaang thli khaw, na mik-hai te aka bel thli khaw, khawdawp na ngaai u thai ngoen ta. 21 Te ang thli te sai hamla kaimi tah ka tong-aa sut tih ka dok poen ti ham khaw ka yak sut oh poen! Tede, thlaangngau angla awl ka thui lah ai, a-u khaw thaihu pakhat khat dawngah a oekthloen u ngam atah kai khaw ka oekthloen u ngam van. 22 Ahimi te Hebru thlaangphun aw? Kai khaw Hebru thlaangphun van ni. Ahimi te Israel thlaangphun aw? Kai khaw Israel thlaangphun van ni. Ahimi te Abraham kah cadil thli aw? Kai khaw Abraham cadil van ni. 23 Ahimi te Khrih kah tuihyoeihthlaang aw? tede kai tah ahimi lak ah atheen ngaai tuihyoeihthlaang la ka awm tite thlaangngau angla ka thui! Kai tah bii rai yahawh ngaai ka bi; thong ah ka tla poepa, cungpoelh oen voei yahawh hlang la m'bawh u, alak avai atah duek dalh la ka awm. 24 Judah thlaang thli lawng cungpoelh oen ah voei sawmthum pakua toe voei nga m'bawh u; 25 Rom thlaang thli lawng cungpoelh oen voeithum n'bawh u; lungto oen ah vai n'de u. Tuitunlii ah tuisangphaw lawngah voeithum m'plet, voei khat atah daai hin at, yiin yiin at khui puet ah tui dawngah ka awm. 26 Khawlawng tloe la yin ka cehna ah tuiliw rih awm ka tawng, thlaanghuuen pacaan thli tengkah, ka thlaangphun Judah thli tengkah, Gental thlaangphun thli tengkah raina rih awm te ka tawng; ramhum rammawl ah khaw, khawpui khuiah khaw, tuitunlii dawngah khaw, paya thlaangthaipalat thli tengkah khaw, rih awm raina te ka tawng. 27 Thatlawh thaboepla bii sai ham koei awm, ih mueh ih naai la ka awm taitu; buhpawng tuihalh la ka awm poepa; kuepyingna im khueh mueh la, caak awkk khoeknoen khaw khueh ohla, nakbai khaw khueh ohla ka awm poepa. 28 Atloe thli te thui ohla khrihcabu boeih kah hailamben ham kaw ka poek veng roe ah he hin roekk ah thalrih angla n'naam. 29 Thlaang pakhat khat a tha a yoek sut vengah kai khaw ka tha poei yoek van; thlaang khatsut a thawlh vengah kawtheboepla ka awm. 30 Kai lawngah ka oekthloen u atah, kamah kah tharana nawh aka tueng sak thaihu dawngah ni ka oekk-thloen u ai. 31 Bawipa Jesuh kah Pa oen Pathen tah yoeyahla a miing thangtheenna awm hawn seh; hoem awl ka thui nawh he amah lawng a ming. 32 Damaskas khaaw ka awm vengah kai he tuuk hamla Sengpahrang Aritas kah ram ukbawi lawng khawpui vawng thawhka ah raalkap thli te a khueh. 33 Tede kai te vueihang khuiah n'sang u coengah vawngkulh bangbuerh kalawng ah n'thlaak thuk u tih ahih kut dawng kalawng ka loeih.
1 Oekthloenna lawng he thaihu theen khat khaw sai nawh de, ka oekk u de lah ai. tede tahe ah Bawipa kah peek huhthlaam oen awlphawng te ka thui lah ai. 2 N'hu kum thlailii vengah khrihca thlaang pakhat vaan asang koek la a pawmsang hang te ka ming (He tila apawmsang hang te a taktang kai aw, tihnawhtah huhthlaam aw ka huh kai, ka ming nawh - Pathen lawng ni a ming). 3 Ka thui koep lah ai, te thlaang te paradis toela a pawmsang hang te ka ming (he he ataktang kai nuem, huhthlaam nuem, ka ming toengtoeng nawh - Pathen lawng ni a ming), te ah te ahih lawng awl oen thui thai nawh awl te a yaak, te tah thlaanghing kah hui-akaa lawng thui thai nawh. 5 Tedawngah te thlaang kawng te ka oekthloenna lah ai. Tede, kamah kah ka tha ayoekna te aka tueng sak thaihu nawh atah, kamah kawng alam dawng atah ka oekk u manawh. 6 Kai lawng oekthloen ham ka ngaih atah thlaangngau la tah ka awm aih manawh, metihtiah awltak ni ka thui ai. Tede ka oek u manawh, metihtiah ka saina he a huhna oen ah ka awlthui a yaakna lak ah asangla kai he a poek u hamla ka ngaih nawh. 7 Tede kawpoekrai thaihu yahawh hlang ka huh dawngah oekthloenna oen pawmsangna kanghalhna ham aka tlo tangkiik nganbawh te ka pumsa dawngah m'peek, te tlawhna lawngah Seitan kah laipai angla bii a bi tih oekthloenna dawng kalawng kai he bawhna ham oen kanghalhna hamla a hawna. 8 He kawngah he Bawipa tengah voeithum ka thangthui tih tlawhna he avan lawh hamla ka bih. 9 Tede ahih lawngah, “Kan lungvatna tah nang hamla khoek, metihtiah nang na tha a awm nawh vengah kai kah huham tah a tha ra ngaai” tila awl avan thung. Tedawngah Khrih kah huham tharana lawng kai he n'thlipdah tite mingna ham kamah kah tharana nawh voetna dawngah ka oek u tih ka awmngaih tare poen. 10 Khrih rang oen atah ka tha a yokna dawngah, thekhana dawngah, raina dawngah, heemtekna oen patang khangna dawngah ka awmngaih poen. Metihtiah ka tha a awm nawh vengah ni ka tha a ra. 11 Thlaangngau angla ni ka thawh ka tat poen he - nangmi lawng kai he nan ngau sak u. Nangmi lawngah ni kai hamla ngaikhuekna na van sai u ham a awm de. Kai he metila khaw ka awm aih nawh de nangmi lawng “Celtuih” na ti u thlaang hue lak ah te soetca khaw ka heem thloei nawh. 12 Celtuih pakhat la ka awmna te nangmi tengah kawdaw thinsanna oen kawpoekrai miknoekna, kawpoekrai thaihu yahawh hlang saina oen ka tueng sak poen. 13 Khrihcabu atloe boeih lak ah metila nangmi te athe-eep la kan sai? Tangka oen nan bawm u ham kavan bih nawh bueng te de lah koen? Te tila thuum van nawh hamla kan sai u dawngah reenna oen khawdawp van ngaai u mai hawn. 14 Tahe avoeithumna ah nangmi hip hamla te oepsoehla ka awm poen, nangmi tengah n'tu khaw kavan bih manawh. Nangmi kah tangka te ka ngaih nawh tih namami te ni kan ngaih u. Ataktang atah ca-anau thli lawngah a manu oen ana pa te cawmcah nawh, tede nu a pa lawng ni ca-anau thli te a cawm a cah. 15 Nangmi bawmna ham tah ka khuehtoen boeih oen ka pum he khaw awmngaihla hawna ham ka ngaih. Nangmi te kan lungduetna dawngah kai nan lungna u te phoen ai aw? 16 Kai he nangmi ham thalrih la ka awm nawh tite namami lawngkhaw soeng na ti u van cawini. Tede khatsut lawngtah, kai lawngah nangmi te kan thaina doelh tih hoem awl oen khup plet la a thai alatna ti u mai ai. 17 Metila kan thai kan latna? Nangmi tengla kavan tuih laipai pakhat khat te hawna oen nangmi kah apueh alawila ka lawh aw? 18 Titas te nangmi tengah ceh hamla ka ceel tih ahih oen haih atloe khrihca maya manau te kavan tuih. Titas lawngah nangmi tengkah apueh alawila a lawh na ti u ai aw? Ahih oen kai tah mengtengna kawpoek thik at oen moeiboe thik at oen ah bii ka bi hih nawh aw? 19 Nangmi haiah kamami kah thlip adahna hamla a yawm puet tila khaw nan poek u mai ai. Tetih nawh ni! Khrih lawngah kaimi thui sak hamla a ngaih angla te Pathen haiah ka thui u, ka lungna ka paya thli, kaimi lawng ka sai boeih he nangmi bawmna ham ni ka sai u. 20 Tede nangmi teng kavan pha vengah te nangmi huh hamla ka ngaih tih ka ngaiuepna angla te kan hu u nawh hau vetih, nangmi lawngkhaw kai he huh na ngaih ngaiuepna angla te nan hu u nawh hau ai tite ka lakueng. Tawhsina oen uett-eena, thintoina oen mah ham bueng ngaihna, thlaang sal-aphaamna oen theetna, oekthloenna oen awlpuung kaacaanna thli te ka huh hau ai tila ka lakueng. 21 Nangmi tengla ka law koep vengah te ka Pathen lawng nangmi haiah yaraula n'khueh hau vetih n'hu vengah aka thawlh thlaang thli oen thinkaw ciimcaihna nawh boeih oen amami kah a sai pumsa hue-ngaihna, hutaa tawngpa thawlhna a yut u nawh dawngah te ka rap hau ai tite ka lakueng.
1 Nangmi tengla ka law tih kan hip u ham te tahe kah he a voeithumna la awm ai. Caciim lawngah, “Thawlh peelna boeih tah sausi thlaang pahih nawh atah, te lak ah yahawh lawngah a khee dengah ni a cak ai” a ti angla te awm ai. 2 Nangmi n'hu vengah thawlhna aka sai thli oen thlaangtloe boeih tengah thui ham ka ngaih: a voeihihna nangmi kan hip vengah te ka thui poen, tede tahe ah athlahlangla ka awm de, ka thui koep ai; ka law koep vengah ngoen tah a-u khaw dantatna na loeih manawh. 3 Khrih lawng kai hawna rang oen awl a thui tangtang aw tila ming ham na ngaih asoengna boeih te na huh ai. Khrih oen nangmi tuhkaina a awm vengah te ahih tah a tha yoek sut nawh; nangmi tim ah amah tharana ni a tueng sak dai. 4 Metihtiah a tha a yoek dawngah thinglam ah ngawn la awm tih duek cakhaw Pathen kah huham tharana oen hing poen. Ahih oen pumkhatla awmna ah mami khaw n'tha yoek u; tede nangmi oen kaimi tuhkaina tah Pathen kah tharana te ahih kah hingna dawngah mami lawng n'cuut u haih. 5 Oengna dawngah na hing oen na hing nawh te mingna hamla namami oen namami te noem acai u langtah noekdak u lah. Khrih Jesuh te nangmi thinkaw ah a awm tangtang te na ming u ai! A awm nawh tangtang atah noekdakna dawngah na tlim dingri u poen ai. 6 Kaimi tah noekdakna dawngah ka tlim u nawh tite nangmi lawng na ming u ai tila ka ngaiuep. 7 Nangmi lawng thawlhpalhna te na sai nawh ham Pathen tengah ka thangthui u, kaimi lawng noekdakna te ka taa tite tueng sak ham nawh ni, tede kaimi he aka tlim dingri angla ka awm mai cakhaw nangmi lawngtah asoeng thaihu te na saina ham ni. 8 Metihtiah awltak te kaimi lawng ka oel e-tla vetih thaihu khat khaw ka sai manawh, tede awltak ham bueng ni ka tlungmu u dai poen ai. 9 Kaimi ka tha a yoek u vengah nangmi tah na tha a ra u dawngah ka awmngaih. Tedawngah nangmi thlaangsoep la na awmna thai ham kaimi lawngkhaw nangmi hamla ka thangthui u. 10 Nangmi tengah he capat he athlahlang kalawng kavan thut he, nangmi teng kavan pha vengah te Bawipa kah peek saithaina aana te nangmi sawah atlawh hlang la hawna ka ngaih nawh dawngah ni, te kah saithaina aana tah nangmi te phena ham nawh tih nangmi lawng na roengna ham ni. 11 Maya manau thli, tahe atah sading-la anna awm uh! Thlaangsoep la awm ham tha huer uh; reenna kavan bihna awl he ngaai u lah; pakhat oen khat roeproei uh; ngaimawngna oen awm uh. Te atah lungna oen ngaimawngna Pathen te nangmi tengah awm ai. 12 Nangmi khat oen khat aciim mokna oen toei u lah. Pathen thlaang boeih lawng nangmi te n'toei u. 13 Bawipa Jesuh Khrih kah lungvatna, Pathen kah lungna oen ah Ciim Muithla kah beroepna tah nangmi boeih tengah awm hawn seh.
1 Galati peng kah khrihcabu boeih tengah kai Pawl lawngah ca kavan pat. He kah ka tengah aka awm maya manau boeih lawngah kan toei u. Kai he celtuih la awm ham khuena he tah thlaanghing teng kalawng law nawh tih thlaanghing kah tuih nawh ni; tede Jesuh Khrih amah te duekna kalawng aka thawh sak Pa Pathen tengkah khuena ni. 3 Mami kah Pa Pathen oen Bawipa Jesuh lawngah lungvatna, ngaimawngna te nangmi m'pe hawn seh. 4 Mami he tahe vengkah atue the khui kalawng loeih sak ham mami kah Pa Pathen kawngaihna te a vai tih mami kah thawlh dawngah Khrih lawng amah oen amah te pe u. 5 Pathen tengah dungyan toela ruep-awmna tah awm hawn seh! Amen. 6 Ka kawpoek rai tangkiik mah aw! Khrih kah lungvatna oen nangmi khuekung te bawtbet khawlai kawl-kalhca maiah na hoett u tih awlthang theen atloe te na do u. 7 Ataktang atah, “awlthang theen atloe” awm nawh, tede he tila ka thui he tah, nangmi te ngaihangtum la n'khueh tih Khrih kah awlthang theen te thawveel hamla aka yawm thlaang khatsut a awm dawngah ni. 8 Tede kaimi lawngkhaw, vaan kah vanthlaang lawngkhaw, nangmi tengah awlthang theen te van thui u mai cakhaw kaimi lawng ka thui tangte oen aka lo u nawh awlthang theen te aka thui tah hell ah kawsi yawkk seh! 9 Kaimi lawng kavan thui u poen de tahe ah ka thui koep ai: nangmi lawng na do tangte awlthang theen oen aka lo u nawh awlthang theen te aka thui tah hell ah kawsi yawkk seh! 10 He tila ka thui he thlaanghing kawkhuekna dang ham aka yawm angla ka awm aw? Te tila dang ham ka yawm nawh! Pathen kah kawkhuekna te ni ka ngaih. Thlaanghing teng kah mik-hai theen te dang ham ka yawm aw? kai lawng te tila dang ham ka yawm khiing atah kai he Khrih kah tuihyoeihthlaang la ka awm manawh. 11 Maya manau thli, nangmi teng-ah kavan thui awlthang theen he thlaanghing teng kalawng akung tong la awm nawh tite kavan thui u ai. 12 Te awlthang theen te kai lawngah thlaanghing tengkah ka dang nawh tih a-u lawngkhaw kai he n'cang puei nawh. Te tah Jesuh Khrih amah lawng ka tengah avan phawng ni. 13 Kai lawng Judah bokna dawngah ka tlungmu veng kah ka hingna te nangmi lawng na ming u poen, kai lawng reenna khueh muehla Pathen kah khrihcabu te ka heem ka tek tih amilh amoeng hamla ka sai. 14 Judah bokna phung-alam vaina ben ah ka thawnpuei Judah hue lak ah ka cawh ngaai tih mami patuer thli kah awlro te khaw alawnla ka vai ngaai. 15 Tede Pathen lawng a lungvatna oen ah ka thang thlan veng kalawng n'tuek poen tih amah kah bii bi hamla n'khue. 16 Gental thlaangphun tengah amah kawng Awlthang Theen phawng hamla amah capa te kai tengah avan tueng sak vengah te a-u tengah khaw poekna bih ham ka cet nawh. 17 Kai he celtuih la ka awm thlan ah lamhala aka awm thli te huh ham Jerusalem la ka cet nawh. Arabia la te ka cet pahoei tih tecoengah Damaskas la koep ka law. 18 Kum thum coeng dengah Piter tengah hin ha thlai-ngaa ka awm. 19 Bawipa amah kah a manau Jeem bueng te ka huh tih atloe celtuih a-u khaw ka hu nawh. 20 Ka thut boeih he aka soeng ni. Hoem ka thui nawh he Pathen lawng a ming! 21 Tecoengah Siria oen Cilicia la te ka cet. 22 Tevengah te Judia ram kah khrihcabu thlaang thli lawng kai he pumpakla m'ming u nawh. 23 Ahimi lawngah a ming u tah, “Mami heemtekkung thlaang lawngah te n'cui ah phe ham a yawm oengna te ni tahe atah a thui poen!” tila thlaangtloe thli kah awlthui te ni a ming u. 24 Tedawngah ahimi lawng kai kawngah te Pathen a thangpawm u.
1 Kum ha thlailii coengah Barnabas oen Jerusalem la koep ka cet, Titas khaw ka ceh puei. 2 Pathen lawngah na ceh ham awm tila avan thui dawngah ka cet. Mawtkung thli oen pumpakla ka huh u vengah te Gental thlaangphun thli tengah awlthang theen ka phawngna kawng te ka thui pe. N'hu veng kah bii ka bi te khaw, tahe ah bii ka bi he khaw apoeila coengg sak ham ka ngaih nawh. 3 Kai oen bii bi haih Titas he Krik thlaangphun la a awm dawngah thlaang khatsut lawngtah yahhuivuen reet sak ham a ngaih u de, a-u lawngkhaw amangkhakla kuek nawh. 4 Khrih Jesuh oen pumkhatla mami awmna rang oen loeihna n'khueh u te ming hamla thlaang khatsut tah aka oeng tangtang van angla sa u tih raalyam angla mami bu khuiah ahuepla va kuun u. Ahimi lawngah mami he saltamnaa la te sai ham a ngaih u. 5 Tede, nangmi hamla awlthang theen awltak te a sa sueng tih acakna yoeyah ham kaimi lawngah ahimi te kawlkalhca khaw ka thlahphaam u nawh. 6 Tede mawtkung ni tila ka poek thlaang hue lawngah te poekna atheen kai he m'pe u thloei nawh. Mawtkung la ka poek thlaang thli te metila awm u mai cakhaw kai ham tah awlpui mai nawh. Metihtiah Pathen lawngtah thlaang he asaw ahan kah huhna oen awl khueng nawh. 7 Poekna atheen peek ohla Piter te Judah thlaangphun tengah awlthang theen phawng ham bii a peek van angla te Gental thlaangphun tengah kai lawng awlthang theen phawng hamla Pathen lawng bii m'peek te a huh u dai. 8 Piter te Judah thlaangphun ham celtuih la a sai van angla kai khaw Pathen lawngah amah kah tharana oen Gental thlaangphun ham celtuih la n'sai van. 9 Mawtkung la ka poek Jeem, Piter oen Johan mi lawngah Pathen lawng biitungpui kai m'peek te acak sak u; tedawngah ahimi lawng mami boeih he biibipuei ni tila noekna la kai oen Barnabas te kut n'tuuk u. Barnabas oen kai tah Gental thlaangphun tim ah bii bi ham tih amami tah Judah thlaangphun tim ah bii bi hamla ka kaw vai u. 10 Ahimi boeih lawng kai tengah reenna avan bih u tah khawdeng thlaang thli te hilh nawh ham ni. Te thaihu te ni sai hamla kai khaw thinkaw a thluembuek van. 11 Antiok khaw la Piter a law vengah, rangpui haiah ahih te ka kaana, metihtiah ahih tah aciimphanla a palhna awm. 12 Jeem lawngah avan tuih thlaang thli te avan pha thlan veng atah Piter lawng Gental maya manau thli oen ah buh haih a caak u. Tede te thlaang thli te avan pha coeng atah, Gental thlaang thli te yahhuivuen reet sak ham aka ngaih thlaang thli te a rih u dawngah nawng tih Gental thlaang thli oen buh ca haih tlaih nawh. 13 Atloe Judah phun maya manau thli khaw riyawp u van tih Piter oen ahula poei nawng u van poen. 14 Awlthang theen awltak lawngdoeng ah cet u nawh tila ka ming vengah Piter te rangpui haiah, “Nang he Judah thlaang balboel tah Gental thlaang angla khaw na sak tih Judah thlaang angla khaw na sa nawh. Tetih atah, metila Gental thlaang thli he Judah thlaangphun angla khaw a sakna ham na yawm mangkhak thai ai?” ka tina. 15 Mami tah n'cuunna roe ah Judah thlaangphun tangtang tih, “Gental thlaangthawlh phun” a ti u te nawh ni. 16 Tede thlaanghing he Jesuh Khrih oengna bueng oen ah Pathen oen roeproeina awm tih Phungawl lawng a kuek te saina oen nawh ni tite mami lawng m'ming u. Mami khaw Phungawl lawng a kuek te saina rang oen nawh tih mami lawng Khrih oengna rang oen Pathen oen ah roeproeina a awmna ham Jesuh Khrih te n'oeng u. 17 Tecoengah mami lawng Khrih oen pumkhatla awmna rang oen ah Pathen oen roeproeina a awmna ham mami lawng n'yawm vengah he Gental thlaangphun angla thlaangthawlh la n'awm tite n'huh u, tete Khrih khaw thawlh saina ah thuum van ti ngaihna aw? Te tila ti ngaihna nawh ni! 18 Kai lawng ka phe tangte Phungawl kah alawng-a im te ka sak koep atah Phungawl phekung tah kamah ni tite ka tueng sak. 19 Tecakhaw Phungawl ben atah Phungawl amah lawng n'ngawn tih ka duek, te tah Pathen hamla te ka hing thaina ham ni. Amah kah thinglam dawngah Khrih oen kai tah ngawn haih la ka awm poen, 20 tedawngah aka hing he tah kai tlaih nawh tih ka khuiah aka hing tah Khrih poen ni. Tahe kah hingna he tah kai n'lungna tih hingna pekung Pathen Capa oengna rang oen ka hing. 21 Pathen kah lungvatna te hoett hamla ka ngaih nawh. Tede thlaanghing oen Pathen he Phungawl rang oen roeproeina awm kawinih Khrih kah duekna tah apoei ni tila thui ngaihna ni.
1 Nangmi Galati thlaangngau hue! Nangmi te a-u lawng a sii oen n'phueng u? Thinglam dawngah Jesuh Khrih kah a duekna te na mikthlaam ah aciimphanla tueng poen! 2 He thaihu khat he van thui u lah: Nangmi lawng Pathen Muithla te Phungawl lawng a kuek te na sai u dawngah aw na dang u, tih nawh atah awlthang theen te na yaak tih na oeng dawngah aw na dang u? 3 Metila tila he na ngau u tangkiik aih mai! Nangmi lawng Pathen Muithla oen na tongnan u tih tahe ah namami kah tharana oen boet sak ham na ngaih u aw? 4 Nangmi lawng na huh na tawng boeih te ahong-ahii la aw a awm kang aih poen? Ahong-ahii la tah awm boeih nawh! 5 Pathen lawng nangmi te Muithla m'peek u tih nangmi tim ah kawpoek rai a sai te, Phungawl lawng a kuek te na sai u dawngah aw, te tihnawhtah awlthang theen te na yaak u tih na tangna u dawngah aw? 6 Abraham lawng a huh a tawng thli boeih te poek u lah; caciim lawngah, “Abraham lawng Pathen te a tangna tih Pathen te a oeng dawngah ahih te thlaangdoeng la a khueh” tila a thui. 7 Tedawngah oengna aka khueh thlaang thli he ni Abraham cadil tangtang la a awm ti he nangmi lawng na ming u ham awm. 8 Gental thlaangphun he a oengna rang oen ah Pathen amah oen roeproei u poen ai tila a thui sut poen. Tedawngah caciim lawng Abraham tengah Awlthang Theen te a phawng pe poen: Caciim lawngah, “Thlaangphun boeih he nang rang oen ah Pathen lawng yotheen kam-awmna a peek ai,” ti. 9 Abraham lawng a oeng dawngah yotheenna te a dang; tedawngah aka oeng boeih tah Abraham angla yotheenna a dang. 10 Phungawl vaina dawngah aka pangtung u boeih tah tapvoepna huiah awm u. Caciim lawngah, “Phungawl cabu dawngah a thut boeih te a-u lawngkhaw a vai nawh atah Pathen kah tapvoepna huiah awm!” tila a thui. 11 Caciim lawng, “Thlaang he oengna oen ah Pathen oen roeproeina aka khueh bueng te ni a hing ai,” a ti dawngah, tahe atah a-u khaw Phungawl vaina rang oen ah Pathen oen roeproeina awm nawh tite aciimla tueng poen. 12 Tede Phungawl oen oengna tah tuhkaina awm nawh. Caciim lawngah, “Phungawl lawng akuek boeih te aka sai boeih tah hing ai” ti. 13 Caciim lawng, “Thing dawngah a tai thlaang te tah Pathen kah tapvoepna huiah awm,” tila a thui angla Khrih tah mami hamla tapvoepna kawsi aka yawkk thaang la va coengg tih Phungawl lawng avan thoeng puei tapvoepna dawng kalawng mami he n'tlang poen. 14 Khrih lawng tila a sai he tah, Pathen amah lawng Abraham tengah a awlkam yotheenna te Khrih Jesuh rang oen Gental thlaangphun tengah peek ham oen ah mami lawngkhaw oengna rang oen Pathen lawng peek ham awl a kam Muithla te dang van ham ni. 15 Maya manau hue, khawhin roekk khawsakna dawngkah nuehtahna khat ah ka thui lah ai, lumlai pakhat dawngah thlaang pahih lawng kawvaina awlkam te a sai hih vengah thlaang pakhat lawng te kah awlkamna te phe thai nawh tih tawm athap thai nawh. 16 Pathen lawng awl a kam te tah Abraham oen a cadil tengah ni awl a kam. Caciim lawngah thlaang yahawh thuingaihna awl “Cadil nauha thli” tila thui nawh, tede thlaang pakhat bueng thuingaihna awl, “Cadil nauha” tila ni a thui tih te tah Khrih ni. 17 Ka thuingaihna tah Pathen lawng Abraham oen paipi a sai tih te paipi te vai hamla awl a kam. Kum yalii sawmthum coengah Phungawl he peek la awm tih te lawngah paipi te phe thai nawh tih Pathen awlkam te khaw hoett thai nawh. 18 Metihtiah Pathen kah kutdo he Phungawl dawngah pangtung kawinih amah kah awlkam dawngah pangtung thai manawh. Tecakhaw Pathen lawng Abraham te kutdo a peek te tah amah lawng awl a kam dawngah ni. 19 Tetih atah Phungawl kah kam-thlahna he ta n'tu kai? He tah thawlhna he ame ang kai tite tueng sak ham a tawm athap tih te tah awlkamna aka dang Abraham cadil a law thlantoe ah aka cak ham mai ni. Phungawl he tah vanthlaang lawngah laipai thlaang pakhat tengah patoeng avan peek. 20 Tede thlaang pakhat bueng lawng bii a bi atah laipai ngoe nawh; metihtiah Pathen tah pakhat bueng ni. 21 Tetih atah Phungawl lawngah he Pathen awlkam te a oelh a taih ti ngaihna aw? Nawh ni, oelhtaih nawh! Metihtiah hingna aka pe thai phungawl te thlaanghing lawng dang kawinih te phungawl te vaina rang oen ah Pathen oen thlaanghing boeih he roeproeina awm ai. 22 Tede Caciim lawngah, ‘dilai pumpui he thawlh tharana huiah awm; tedawngah Jesuh Khrih oengna dawngah akung asut awlkam kutdo te aka oeng thlaang tengah a peek’ tila a thui. 23 Tede, oengna atue atang te avan pha thlan vengah Phungawl lawngah te thongtla thlaang angla ng'uup khak tih n'khawh roep; te tah oengna te a tueng thlantoe ni. 24 Tedawngah oengna rang oen ah Pathen oen mami roeproeina hamla Khrih a law thlantoe Phungawl he mami phungtukung la awm. 25 Tahe tah oengna atue atang te avan pha poen dawngah Phungawl he mami phungtukung la awm tlaih nawh. 26 Khrih Jesuh ah pumkhatla awmna dawngah nangmi boeih lawng Pathen kah ca-anau la na awm u he tah oengna rang oen ni. 27 Nangmi tah Khrih oen pumkhatla awmna dawngah baptisma na dang u poen tih tahe atah Khrih amah hingna oen na khuk na dah u poen. 28 Tedawngah Judah oen Gental laklaw ah khaw, saltamnaa oen thlaangcuem laklaw ah khaw, hutaa oen tawngpa laklaw ah khaw pekbona awm tlaih nawh; nangmi boeih tah Khrih Jesuh oen pumkhatla awmna dawngah pakhatla na awm u poen. 29 Nangmi lawng Khrih kah thlaang la na awm u atah nangmi tah Abraham kah cadil nauha la na awm u tih Pathen awlkam te na paang u ai.
1 Tede tahe ah ka thui de lah ai; Capa pakhat, ana Pa kah kaawn-ava ro thaihu aka pang koei te thaihu boeih khuehkung la awm mai cakhaw camaw la a awm veng atah saltamnaa angla ni a awm. 2 Camaw la a awm vengah ana pa lawng atue-atang anuen te apha thlantoe atah ahih te doenkung thli oen kaawn-ava oen ah thaihu boeih khoemdoenkung thli lawngah te a tahu tabem u. 3 Tetih van angla mami khaw muithla ben ah kawpoeksoepna n'khueh thlan vengah te khawhipuempa aka uk muithla kah saltamnaa la n'awm u. 4 Tede aboetna ah atue atang anuen te apha khuek vengah tah Pathen lawng a Capa te avan tuih. Thlaanghing hutaa kah capa angla te law tih Judah Phungawl huiah te khaw a sak, 5 te tah Phungawl huiah aka awm thlaang thli te tlang ham oen ah mami he Pathen kah ca-anau la coengg sak ham ni. 6 Amah kah a ca-anau la awmna te a tuengna ham Pathen lawng a Capa kah Muithla te mami kah thinkaw lungbui khuiah avan tuih tih te Muithla lawngah, “Apa, Apa” tila paang. 7 Tedawngah nangmi tah saltamnaa la na awm u tlaih nawh tih a ca la ni na awm poen. Nangmi tah a ca la na awm u poen dawngah Pathen lawng amah kah ca-anau thli hamla a khueh pe boeih te nangmi m'peek ai. 8 N'hu veng atah nangmi lawng Pathen te na ming u nawh tih pathen rawlrap hue kah saltamnaa la na awm u. 9 Tede tahe atah nangmi lawng Pathen te na ming u poen, tihnawhtah he tila ka ti ai ta, Pathen lawng nangmi te m'ming u poen, tetih atah n'tu hamla tha aka awm nawh tih tula khaw aka coengg nawh muithla benla te mel koep ham na ngaih u? N'tu hamla ahimi kah saltamnaa la te awm koep ham na ngaih u? 10 Nangmi lawng khatsut khawhin oen thla, atue-atang oen kum te awlpuila na khueh tih na yeh u. 11 Nangmi ham ka lakueng tangkiik mah aw? Kai lawng nangmi ham ka bi boeih te apoeila awm poen ai aw? 12 Maya manau thli, kai angla na awm u van ham reenna kavan bih u. Kai khaw nangmi angla ni ka awm. Nangmi lawng ka sawah thawlhpalhna na sai u nawh. 13 Nangmi tengah awlthang theen ka thui cuek vengah te sading nawh la ka awm tite na ming u. 14 Tede kai kah pumsa sadingna nawh te nangmi ham noekdakna la awm cakhaw kai he tula khaw poek ohla na awm u nawh tih nan hoett sut u nawh. Kai he Pathen kah vanthlaang pakhat angla te nan do u tih Khrih Jesuh angla te nan do u. 15 Te vengah te nangmi na awmngaih tangkiik u! Tahe ah me tih na ti u? Coengg thai kawinih na mik pateng khaw koeih pak tih kai he peek hamla na ngaih u tite ka thui thai. 16 Nangmi tengah awltak he kavan thui dawngah tahe tah na raal la ka awm oh poen aw? 17 Thlaangtloe hue lawngah nangmi sawah te thinkaw thluembuek tangkiik u mai, tede ahimi kah poekna te tah theen nawh. Ahimi lawng nangmi sawah thinkaw a thluembuek angla nangmi lawngkhaw ahimi sawah thinkaw thluembuek van ham ah nangmi oen kai he pekbo hamla ahimi boeih lawng a ngaih u. 18 Poekna theen oen thinkaw a thluembuek u atah theen khoet ai. Te ang thinkaw thluembuekna te nangmi tengah ka awm bueng vengah nawh tih khueh poepa ham theen. 19 Ka lungna ka ca ka nau thli! Nangmi kah thinkaw ah Khrih moeiboe a awm thlantoe tah hutaa lawng camoe a awm vengah tlawhna a ming angla te ka ming koep hun ai. 20 Nangmi sawah kawpoek khaw ka thloet thaina ham tahe vengah he nangmi oen n'awm haih kawinih ka ngaih de ta. Nangmi ham ka lakueng tangkiik mai. 21 Phungawl huiah awm ham aka ngaih nangmi te kan doet lah ai: Phungawl lawng a thui te na ya u nawh aw? 22 Phungawl lawng a thui tah Abraham lawng a capa pahih a sak tih pakhat te tah a salnu oen ah a cuun, akhat te tah thlaangcuem hutaa oen a cuun tila a thui. 23 A salnu oen a cuun a capa te tah awmthoet kah ca sak mailai la awm, tede thlaangcuem nu oen a cuun a capa te tah Pathen awlkamna rang oen ni a cuun. 24 He thaihu he nuehtahna ah yaakming koei la awm: hutaa pahih rawi he awlkam paipi pahih yuengla awm. Hutaa pakhat, Hagar lawngtah a ca thli te saltamnaa la a cuun tih Sinai Tlaang ah a sai paipi nuehtahna yuengah Hagar te awm. 25 Hagar tah Arabia ram kah Sinai Tlaang yuengla awm tih ahih tah tahe veng Jerusalem Khawpui khuikah thlaang boeih oen saltamnaa thli nuehtahna la awm. 26 Tede vaan benkah Jerusalem khawpui tah ahoerpoengla awm tih ahih tah mami kah nuhaam la awm. 27 Caciim lawngah, “Ca aka yaaw hutaa nang, awmngaih lah! Nang ca awm tlawhna aka ming nooek nawh, awmngaihna oen vupaang lah! Metihtiah, a vaa lawng a lunghoel hutaa lawngah a vaa oen aka awm haih hutaa lak ah a ca anau yahawh ngaai a khueh ai” tila a thui. 28 Maya manau thli, Isak angla te nangmi khaw Pathen awlkamna rang oen tahe tah a ca la na awm u. 29 Tevengah te thlaanghing siing angla a cuun a capa te lawngah Pathen kah Muithla rang oen a cuun Capa te a heem atek. Tahe khaw te tila ni a awm. 30 Tede caciim lawng metila a thui? “Salnu oen a capa te ceh sak; metihtiah, salnu kah capa lawngah thlaangcuem nu kah capa oen ah ana pa te paang haih manawh.” tila a thui. 31 Tedawngah maya manau thli, mami tah salnu kah a ca-anau nawh tih thlaangcuem nu kah a ca-anau thli ni.
1 Mami tah n'loeih poen, Khrih lawng n'loeih sak poen! Tedawngah aka loeih thlaang la na awm u van angla acakla pai u langtah namah oen namah te saltamnaa la coengg koep u boel. 2 Hutung u lah! Kai Pawl lawng kavan thui tah nangmi lawngah na yahhuivuen te reet ham na ngaih u atah nangmi boeih hamla Khrih tah aphu awm nawh ti ngaihna ni. 3 A-u lawngkhaw yahhuivuen te a reet atah Phungawl te a pum boeih la a vai ham awm tite ngaithuenna kan peek koep u. 4 Phungawl vaina oen ah Pathen oen roeproei hamla aka yawm thli tah namah oen namah Khrih oen na pek u poen. Nangmi tah Pathen kah lungvatna adau benla ni na awm poen. 5 Mami lawngah ngaiuep u tah Pathen lawng mami he amah oen roeproeina avan sai ai, mami kah oengna rang oen ah Pathen Muithla kah tharana oen a sai ai tite n'lamtoen u. 6 Khrih Jesuh oen mami pumkhatla ng'awm u atah yahhuivuen reet khaw, reet nawh khaw athloeina awm nawh; awlpui tah lungna oen bii aka bi oengna te ni. 7 Nangmi lawng atheenla na sai u ngoen ta! Nangmi lawng awltak na vai u te a-u lawng n'toeng sak u? 8 Nangmi khuekung Pathen lawngah a sai nawh ni. 9 “Tawlru ayawlca lawng ta-ekk hawl at a rawi sak” tila a thui u te soeng tangtang. 10 Tede nangmi kawngah te tahetoe ka ngaitluep hun. Mami kah hingna Bawipa oen pumkhatla awmna lawngah he nangmi te poekna tloe n'khueh sak tang manawh tila ka ngai a tluep sak tih a-u khawseh nangmi te khup pletla aka sai te tah Pathen lawng dan a tat ai. 11 Tede maya manau thli, kai lawngah yahhuivuen reet he angoe khaklal tila ka thui hun atah n'tu hamla thekha heemtekna patang he ka khang khiing kai? Tete asoeng tangtang atah Khrih kah thinglam kawng ka thuina lawng he raina m'pe manawh. 12 Nangmi te akhupplet la aka sai thlaang thli lawngah aboet toela lawngpui te a vai phaat ham ka ngaih de ta; vai poe u selang tah a til tleh ngala u seh! 13 Maya manau thli, nangmi te loeih sak hamla ni n'khue u. Tede, te loeihna te namami kah pumsa hue-ngaihna a dipna ham hawna u boel. Te lak atah lungna oen ah nangmi khat oen khat bawmcem uh. 14 Metihtiah Phungawl boeih he, “Namah oen namah te na lungna u van angla na imbe lovaai te lungna lah” tila a thui awlpeek pakhat dawngah cui boeih poen. 15 Tede nangmi lawngah ramsa aka sann angla na awm u tih khat oen khat te na ngeet u tih na khoelh u atah, an noek mai lah, namami oen namami te na phe u kang poen ai. 16 He tila kavan thui u: Na hingna te Muithla lawngah thuinuet selang tah thlaanghing pumsa kah hue-ngaihna dawngah ngaikhuek thindeeng la awm u boel. 17 Metihtiah, mami thlaanghing pumsa ngaihna tah Muithla kah ngaihna lawng a oel tih Muithla kah ngaihna te khaw mami kah thlaanghing pumsa ngaihna lawng a oel van. He rawi pahih he tah raal hih tih thui ngaihna tah sai ham na ngaih te na sai thai nawh tina ni. 18 Nangmi te Muithla lawng m'mawt atah nangmi tah Phungawl huiah na awm u tlaih nawh. 19 Thlaanghing pumsa kah a sai tah tuengkoer mai. Te ang thli te tah hutaa tawngpa thawlhna, tuiilehkap oen boethe halang na; 20 Kutsaimuei bokna oen runkhuenna, thlaang ruunna, khat oen khat thina, tawhsina; uett-eena, thinsana, loehlangna, athloekla phengterna, bu pekbona; 21 Lung-oena, yuuruuina, yuuruui buh hah oen hutaa tawngpa thawlhna; oen ah he ang atloe athe thaihu boeih te ni. N'hu vengah kavan thui u poen angla tahe ah koep kavan thui u: he ang thaihu aka sai te tah Pathen kah Ram te pang thai manawh. 22 Tede Muithla lawng a thoeng sak tah lungna, awmngaihna, ngaimawngna, kawdawna, reenna, theenna, uep-awmna, 23 boe-ngaaina oen mah oen mah kuemsuemna he ni. He ang thaihu thli oen a kalh u Phungawl awm nawh. 24 Tecoengah Khrih Jesuh kah thlaang la aka awm lawngtah amami kah thlaanghing coenggna dawngkah athe ngaihsoehna oen pumsa hue-ngaihna boeih te thinglam dawngah a ngawn poen. 25 Muithla lawngah mami he hingna n'peek poen; ahih lawng mami kah hingna he khaw a mawt ham awm. 26 Mami lawngah oekthloen ham awm nawh, khat oen khat te thinsa sak ham awm nawh, khat oen khat uett-ee u ham awm nawh.
1 Maya manau thli, thlaang pakhat lawngah thawlhpalhna pakhat te a sai hau atah, nangmi Muithla ah aka awm thlaang thli lawng lawngpui doeng ah na khueh koep ham awm; te tila na sai vengah te kawdaw thinsan oen na sai u ham awm. Namami khaw suek-halhna ah na thuum u van nawh ham ngaithuen uh. 2 Pakhat oen pakhat thalrih phueih te talawng takai u langtah, te tila te Khrih kah phungawl te vai uh. 3 A-u khaw, me tih khaw a ti aih tang nawh maiah amah oen amah te asangluepla aka poek u tah amah oen amah ni athailat u khoeng mai. 4 Thlaang pakhat rip lawng amah kah saina te noem-acai ham awm. Bii a sai te atheen atah thlaangtloe kah saina oen nuehtah tlaih ohla amah kah saina dawngah oekthloen u thai ai. 5 Metihtiah thlaang boeih lawng amah kah thalrih te a phueih rip ai. 6 Khrih kah awlthang aka cang thlaang pakhat lawngah thaihu theen a khueh toen boeih te ahih cangpueikung saya te pe lem seh. 7 Namah oen namah mai te thailat u boel; Pathen te a-u lawngkhaw thailatna thai nawh. Thlaang lawngah a tuh van angla a ah ca-ngai ai. 8 Thlaanghing lawng amah pumsa ngaihna lo ah caangti te a tuh atah ahih lawng duekna te a ah van ai; Muithla lo ah caangti te a tuh atah dungyan hingna te a ah van ai. 9 Tedawngah theenna te saina ben ah tha the sak u boel sih; toeng ohla n'sai u atah caangthaih yuunna atue te avan pha badai. 10 Tedawngah atue theen n'dang veng roekk ah thlaang boeih tengah theenna te sai u silang tah awlpui ngaaila oengna ben ah mami kah imkhuikaw la aka awm tengah sai u sih. 11 Kamah kut roeroe oen calung abohlangla nangmi tengah ca kavan thut he bueh u lah! 12 Nangmi te yahhuivuen reet sak ham mangkhakla aka yawm thli te tah asaw ahan kah akawng-alam dawngah oekthloenna tueng sak ham aka ngaih hue mai ni. Tede he tila a sai u he tah ahimi lawngah Khrih thinglam kawngkah heem-atek patang khangna te ahimi lawng khang van nawh ham mai ah ni. 13 Yahhuivuen aka reet thlaang thli lawng pateng khaw Phungawl te vai u nawh; ahimi lawngah yahhuivuen reet sak ham a ngaih u te tah, nangmi lawngah pumsa dawngah noekna a ngaih u tite ahimi lawng oekthloenna thaai ham mai ni. 14 Tede, kai tah mami Bawipa Jesuh Khrih kah thinglam bueng ni ka oekthloenna ai; metihtiah kai ham tah Khrih thinglam rang oen ah dilai he duek poen; kai khaw dilai ham tah ka duek poen. 15 Thlaang pakhat lawng yahhuivuen reet oen reet nawh he awlpui tlaih nawh ni; thlaang thaai la awm he ni awlpui poen. 16 Amami kah hingna dawngah he phung-alam aka vai thlaang thli tengah ngaimawngna oen reenna te awm hawn seh, Pathen thlaang thli boeih tengah khaw awm seh. 17 Awlcuina ah: a-u khatca lawngkhaw kai he raina m'pe u tlaih boel, metihtiah ka pum dawngkah boengha-ngaw lawng Jesuh kah saltamnaa la ka awm he a tueng sak poen. 18 Maya manau thli, mami Bawipa Jesuh Khrih kah lungvatna tah nangmi boeih sawah awm hawn seh. Amen.
1 Pathen kawngaihna oen Khrih kah celtuih pakhat la aka awm kai Pawl lawngah, Khrih Jesuh oen pumkhatla awmna dawngah aka hing tih uep-awm la khaw aka sa Efesa khaaw kah Pathen thlaang thli nangmi tengah ca kavan pat u. 2 Mami kah Pa Pathen oen Bawipa Jesuh Khrih lawngah nangmi te lungvatna, ngaimawngna te m'pe hawn seh. 3 Mami Bawipa Jesuh Khrih kah ana Pa oen Pathen te koeh u lah sih! Metihtiah Khrih oen pumkhatla awmna ah vaan ben kah Muithla yotheen kam-awmna soeprep peekna oen mami he yotheenna m'peek u. 4 Mami he amah haiah aka ciim tih cawttbauh kap nawh la awm ham, Khrih oen mami pumkhatla awmna rang oen ah amah koe la awm ham ah dilai he a suen thlan vengah, Pathen lawng mami he n'tuek poen. Amah lawng n'lungna dawngah, 5 Jesuh Khrih rang oen mami he a ca la sai ham Pathen tah cai oepsoeh poen, te tah amah kah awmngaihna oen a kamthlahna ni. 6 Amah kah ruep-awm lungvatna oen a lungna a Capa dawng kalawng mami he ayoela kutdo m'peek dawngah Pathen te thangpawm u sih! 7 Metihtiah Khrih kah duekna rang oen mami n'loeih u, te tah mami kah thawlhna boeih khawdawp a ngaai poen tina ni. Pathen lungvatna tah metihtlukla a bo, 8 ahih lawng mami m'peek te tah lentloe maimah aw; 9 Pathen lawng a cuihna boeih oen a ming athaina oen ah a kamthlahna te a sai tih Khrih rang oen soep sak ham a ngaih ahuep khawkhanna te mami m'ming sak poen. 10 Pathen lawng atue akhoek vengah soep sak ham a ngaih tah vaan oen dilai dawngah aka awm soeprep a sai boeih te thik at la cawitun tih Khrih te a luu la khueh sak ham te ni. 11 Thaihu soeprep boeih he Pathen kah khawkhana oen awltloekna angla ni boeih a awm; Khrih oen pumkhatla awmna rang oen ah Pathen lawng amah kah a thlaang la awm ham mami he n'tuek poen, te tah a cuekca veng kalawng amah kah kamthlahna khawkhannna poen ni. 12 Tedawngah Khrih ah ngaiuepna lamhacuekla aka khueh mami lawngah Pathen ruep-awmna te thangpawm u sih! 13 Te tila te nangmi khaw thlawnna avan khuenkung Awlthang Theen awltak awlthang te na yaak u vengah Pathen thlaang la na awm u poen. Nangmi lawngah Khrih te na oeng u tih amah thlaang la na awmna miknoekna te Pathen lawng nangmi sawah thawhcang a heen poen; te tah amah lawng awl a kam tangte Ciim Muithla te nangmi m'peekna rang oen ni. 14 Muithla he tah Pathen lawng a thlaang thli tengah awl a kam te mami lawng n'dang ngai ai tila aamahkhan la awm tih amah kah thlaang thli tengah loeihna aka soep te Pathen lawng a peek ai tila mami kah ngaitluepna la khaw awm. Mami lawngah amah kah ruep-awmna te thangpawm u lah sih! 15 Nangmi lawng Bawipa Jesuh na oengna, Pathen kah thlaang boeih na lungna u kawng te ka yaak cuek veng kalawng, 16 Pathen tengah nangmi ham awmngaih ciil thui he ka toeng nawh. Ka thangthuina dawngah nangmi te kan hilh nawh, 17 mami Bawipa Jesuh Khrih kah Pathen, mami kah ruep-awm m'Pa tengah nangmi te Muithla m'peekna hamla ka bih poepa, te Muithla lawngtah nangmi te n'cuih sak vetih Pathen te nangmi tengah avan tueng sak ai, te atah Pathen te na ming u ai. 18 Nangmi te me ang ngaiuep sak ham n'khue tih a thlaang thli hamla a kam pe kawpoek rai yotheen kam-awmna te metihtlukla a yahawh tih, 19 aka oeng mami khuiah bii aka bi a tharana te metihtlukla a bo tite na mingna thai hamla nangmi kah thinkaw te avan awng tih amah kah aangna te na dangna hamla ka bih. Mami kah akhui ben ah bii aka bi tharana he tah, 20 Khrih te duekna kalawng a thawh sak tih vaan ram ah amah kah bantang ben ah a ngawlh sak vengah Pathen lawng a hawna huham tharana te ni. 21 Te huen atah vaan kah ukkung boeih, saithaina aana aka khueh boeih, huham tharana boeih oen ah bawi boeih sawah te Khrih lawng a uk. He dilai oen aka law ham koei dilai ah khaw saithaina aana aka khueh miing boeih sawah ahih kah miing tah miinglue koek la awm. 22 Pathen lawng soeprep boeih he Khrih kah khowtang ah a khueh tih Khrih tah khrihcabu kah a luu la te a sai, thaihu boeih sawah sawsangkoek Bawi la awm. 23 Khrihcabu he tah soeprep boeih aka soepsakkung amah roe te asoepbirna Khrih kah a pum ni.
1 Anoekbuet atah nangmi lawng awl na ngaai u nawh tih na thawlh u dawngah muithla ben ah na duek u. 2 Te veng tue ah te nangmi lawng dilai han kah athe lawngpui te na vai u; khawhi dawngah aka awm muithla benkah tharana ukkung awl te na ngaai pe u; te muithla lawngah te Pathen awl aka ngaai nawh thli te tahe ah a uk. 3 Ataktang atah mami boeih he ahimi angla ni ng'awm u van tih mami lawng pumsa ngaihna angla khaw n'sak u, mami thinkaw oen pumsa lawng ahue angaih boeih te n'sai u. Mami khaw m'mah kah awm ih angla te thlaangtloe angla Pathen thinsana aka yawkk ham koei ni. 4 Tede Pathen kah reenna tah yahawh tih mami n'lungna te tah abo tangkiik dawngah, 5 Mami lawng awl n'ngaai nawh dawngah muithla ben ah n'duek vengah te Khrih oen haih mami he n'hing sak. Nangmi thlawn la na awm u he tah Pathen kah lungvatna rang oen ni. 6 Mami lawng Khrih Jesuh oen pumkhatla awmna rang oen ah vaan ram ah te amah oen haih uktem van hamla mami he amah oen n'thawh sak haih poen. 7 He tila a sai he tah Khrih Jesuh dawngah mami ham a lungna avan tueng sak lungvatna tah atloe boeih lak ah bo ngai tite yoeyahla tueng sak a ngaih dawngah ni. 8 Pathen kah lungvatna rang oen ah oengna oen nangmi tah thlawn la na awm u. te tah mami kah yawmna oen nawh ni, Pathen kah kutdo ni. Tedawngah a-u khat ca khaw he kawngah oekthloen u ham awm nawh. 10 Mami Khrih Jesuh ah pumkhatla awmna rang oen ah thaihu theen sai hamla mami he n'sai poen. Mami lawng sai hamla aroek abah oepsoeh thaihu theen saina oen hing hamla mami he n'sai koep poen. 11 Nangmi Gental thlaangphun te Judah thlaangphun lawngah, “yahhuivuen aka reet nawh thlaang” ti u. Judah phun lawng amami tah, “Yahhuivuen aka reet thlaang” ti u. (Yahhuivuen reet tite tah pumsa dawngah tueng sak na mai ni). N'hu vengah nangmi metila na awm u tite poek uh. 12 Tevengah te nangmi tah Khrih oen na thla u. Nangmi tah thlaangphun tloe la na awm u tih Pathen kah thlaangtuek khuiah na thuum u thai nawh. Pathen lawng a thlaang thli tengah a awlkamna dawngah akung asut awlkam paipi oen ah te na bet na pha u nawh tih he dilai dawngah ngaiuepna aka khueh nawh oen Pathen khueh nawh la khaw na sak u. 13 Tede tahe tah Khrih Jesuh oen pumkhatla awmna dawngah athlathloeila aka awm nangmi te Khrih kah duekna rang oen amah teng na pha u poen. 14 Judah oen Gental thlaangphun he pumkhatla a saina rang oen ah Khrih amah he mami kah roeproeina la awm. Ahimi te a pek abo tih raal la aka coeng sak vawngkulh te amah pum oen a phe poen. 15 Judah Phungawl te awlpeek thli oen phung-alam thli te khaw boeih a phe; te tila a sai te tah amah oen pumkhat la awmna ah thlaangphun pahih te thlaangphun thaai pakhatla sai tih roeproeina te awm sak ham a ngaih dawngah ni. 16 Khrih lawngah thinglam dawng a duekna oen ahimi khat oen khat a raal u the te a phe pe; thinglam oen ah thlaangphun pahih te pumkhat la a sai tih ahimi te Pathen tengla avan law puei koep. 17 Tedawngah Khrih tah va law tih Pathen oen athlathloeila aka awm nangmi Gental hue tengah khaw, thlaang boeih tengah ngaimawngna Awlthang Theen te a thui. 18 Khrih rang oen ah Judah thlaang khaw, Gental thlaang khaw mami boeih lawngah Muithla pakhat dawng kalawng Pathen haiah m'pha thai u. 19 Tedawngah nangmi Gental thlaangphun tah thlaangphun tloe tlaih nawh tih khawlawng thlaang la na awm u tlaih nawh; tahe ah nangmi tah Pathen thlaang thli oen haih ah ram khui thlaang la na awm u poen tih Pathen imkhuikaw kah thlaang poen ni. 20 Nangmi khaw celtuih thli oen tawngha thli lawng lungdang a suem tangte dawngah a sak im la te na awm u van poen tih Khrih Jesuh amah te imkil lungto la awm. 21 Ahih tah im pumpui te haih aka caksakkung la awm tih Bawipa tengah nawn la aka awm aciim tempal bok-im la aka roeng sak ni. 22 Amah oen pumkhatla awmna rang oen ah nangmi khaw thlaangtloe hue boeih oen a sak haih Pathen lawng amah Muithla oen a awmna im la na coengg u poen.
1 He kawngah ni Khrih Jesuh kah thongtla Kai Pawl lawng nangmi Gental thlaangphun ham Pathen tengah ka thangthui. 2 Nangmi kah theenna hamla Pathen lawng a lungvatna oen he bii he bi hamla kai m'peek tite ataktangla nangmi lawng na yaak u poen. 3 Pathen lawng ahuep ahella khawkhanna a sai te a tueng sak tih kai he m'ming sak poen. (He kawng he atoila ka thut poen tih, 4 Kai lawng ca ka thut te na tae u atah Khrih kah awlhuep kai lawng ka ming tite nangmi lawng na yaakming u thai ai.) 5 Yan veng atah he awlhuep he thlaang thli te ming sak nawh, tede tahe tah Pathen lawng amah Muithla oen amah kah aciim celtuih thli oen tawngha thli tengah a tueng sak poen. 6 Te awlhuep tah awlthang theen rang oen Gental thlaangphun lawng Judah thlaangphun oen haih Pathen kah yotheen kam awmna te a dang poen; ahimi tah pumkhat dawngah aka thuum haih van poen tih Jesuh Khrih rang oen ah Pathen kah awlkam te a dang poen. 7 Awlthang theen biibikung la ka awm he Pathen kah kutdo ni, he tah amah kah huham tharana oen a sai tih m'peek ni. 8 Kai tah Pathen kah thlaang boeih lak ah huhsit koek la ka awm de, Khrih kah thuilek thuina nawh a bawilenna kawng Awlthang Theen te Gental thlaangphun tengah thui hamla, 9 Pathen lawng ahuepla khaw akhan te metila ataktangla a thoeng hang tite thlaang boeih ming sak ham biitungpui te kai m'peek. Thaihu soeprep Suenkung Pathen lawng n'hu veng atah amah kah awlhuep te a thuh a elh, 10 te tila a thuh te tah khrihcabu rang oen ah vanthlaang ukkung thli oen vaan kah huham tharana boeih lawng Pathen kah cuihna soeprep cungkuem te a mingna ham ni. 11 Pathen lawng amah kah dungyan kamthlahna angla a sai tih mami kah Bawipa Khrih Jesuh rang oen a coeng poen. 12 Khrih oen pumkhatla awmna dawngah mami lawng oengna oen ah Pathen tengla uepna oen tong-aa ohla n'cet u. 13 Tedawngah nangmi ham patang ka khang dawngah na kaw boet sak u mai boel tila reenna kavan bih; he ang thli he nangmi kah theenna ham boeih ni. 14 He kawngah he Pathen haiah khuklu oen ka cuengkueng tih ka buekuep yoeyah, 15 ahih teng kalawng dilai oen vaan ah aka awm imkhuikaw boeih lawng amami kah miing tak te a dang u. 16 Nangmi kah akhuiben thinkaw tharana ham amah Muithla rang oen ah a ruep-awm bawilenna dawngkah tharana te nangmi m'peekna ham ka bih tih, 17 oengna rang oen ah nangmi kah thinkaw lungbui ah Khrih lawng a im te sa seh tila ka thangthui. Nangmi lawng lungna dawngah akung na liing tih thlengyung na thlaakna ham khaw ka thangthui, 18 te atah Pathen thlaang thli oen thik at la Khrih kah lungna metihtlukla adung tih asang, akau tih asan tite nangmi lawng na ming u ai. 19 Ahih kah lungna te meveng khaw asoepla ming thai koeila awm nawh de, nangmi lawng a lungna te na ming u ngai ai, tedawngah Pathen pumsa soepna boeih oen nangmi na betoet u ham ka thangthui. 20 Mami kaw khuiah biibikung a huham tharana rang oen mami kah bihna oen poekna lak ah yahawh ngaai aka sai, 21 Pathen tengah khrihcabu rang oen Khrih Jesuh rang oen ah yoeyahla dungyan toe ruep-awmna awm hawn seh! Amen.
1 Tedawngah, Bawipa bii ka bi dawngah thongtla kai lawngah awl kan uen u: nangmi te Pathen lawng n'khue veng kah a taring van ah te adoengla khaw sa uh. 2 Boe ngaai yoeyah uh, amueltuett la awm uh, na kaw daw sak uh. Nangmi lawng lungna te khat oen khat reenna oen tueng sak uh. 3 Nangmi te pakhatla aka piin roeproeina oen ah Muithla kah peek pumkhatla awmna te phoeih mangkhak uh. 4 Pathen lawng nangmi n'khue vengah te ngaiuepna pakhat a awm van angla pum pakhat oen Muithla pakhat ni a awm. 5 Bawipa pakhat, oengna pakhat, baptisma pakhat awm: 6 thlaang boeih kah ana Pa oen Pathen pakhat awm tih soeprep boeih kah Bawi, soeprep boeih dawng kalawng bii a bi tih soeprep boeih dawngah awm. 7 Mami pakhat rip lawngah Khrih kah peek alakloe kutdo te ating-atawk la ng'khueh u. 8 Caciim lawngah, “Ahih lawng asangna huen la a luui hang vengah, raal lawng a khawh khak thlaang thli te a ceh puei; thlaang thli te kutdo a peek” tila a thui. 9 Tahe ah “luui hang” a ti he n'tu a thuingaihna kai? Thuingaihna tah lamhacuekla dilai ahemna koek ah law thuk ti he ni. 10 Tedawngah aka rum thuk oen aka luui hang te tah vai ahih tih vaan asawben avooel la luui hang a ti he tah amah he khawhipuempa ah betoetna ham ni. 11 Thlaang he kutdo aka pe khaw amah ni; Ahih lawngah khatsut te celtuih la a khueh; khatsut te tawngha la a khueh; khatsut te awlthang theen thuikung la a khueh; khatsut te pastor oen cangpueikung la khueh. 12 He tila a sai he tah Khrih kah pum te a roengna ham Pathen kah thlaang boeih lawngah Khrihca bii te bi hamla roekbahna ni. 13 Tedawngah mami boeih lawng oengna dawngah khaw, Pathen capa mingna dawngah khaw pakhatla te avan-at la ng'awm u ai; mami lawng poekna aka soep thlaang la ng'awm vetih Khrih kah asoepna tangtang asang koek te m'pha van ai. 14 Te atah thlaangtloe te thawlhpalhna benla aka mawt, thlaang thailatna ham suen coplap hoem awl oen ah thlaangthaipalat thli kah cangpueina tuiphu lawng a khuen tih thlihueng lawng a yawng camoe angla te ng'awm u tlaih manawh. 15 Mami lawng lungna thinkaw oen awltak thuina oen ah luu la aka awm Khrih dawngah te soeprep ah roeng ham awm. 16 Ahih kah khawl-acuuina oen pum dawngkah atloe boeih te a bawlcawm kang tih ruhcong boeih oen pum te tuhkai u haih tih bawmcem u. Tedawngah pum dawngkah atloe boeih lawng a bi ham koei te a sai u tih pum lawngah lungna oen roeng hang. 17 Tedawngah Bawipa miing oen nangmi te ngaithuenna kan peek u: nangmi lawng Pathen aka bok nawh lukih thlaang thli angla awm u tlaih boel, ahimi kah poekna tah apoei-oepla awm tih a thinkaw tah khawyiin khoep. 18 Ahimi lawngah mingna tehca khaw khueh u nawh tih a thin a haam khaklal dawngah Pathen kah peek hingna te dang ham koei la awm nawh. 19 Ahimi lawngah yahna roe khaw khueh u nawh; thawlhna dawngah amami oen amami te bawl-aneeng u tih kuemsuem u tlaih ohla soeprep te a sai u. 20 Khrih kawng na cang u te te tila nawh ni! 21 Nangmi lawng ahih kawng te na yaak tangtang u poen tih amah kah hubang la na awm u van angla Jesuh dawngah aka awm awltak te nangmi lawng na cang u poen. 22 Tedawngah pumsa ngaihna lawng thailatna oen phe la aka awm na hing ruem te tah hoett u loeih. 23 Nangmi kah thinkaw oen lungbui te tah athaai, sai pan la awm ham awm. 24 Nangmi lawngah hingna athaai oen ah thoekcau uh, te tah Pathen kah mueisam oen aka lo u la a sai tih aka doeng tih aciim hingna tangtang a tuengna ni. 25 Tedawngah hoemthui thlaang awm tlaih boel seh! Thlaang boeih lawng aka oeng paya laikoei tengah awltak tang te thui seh; metihtiah mami boeih tah Khrih pum dawngah thik at la aka thuum boeih ni. 26 Nangmi na thin a sa atah na thinsana lawng thawlhna khuila m'mawt boel seh, khawyungkhun na thin sa sak boel. 27 Seitan te atue theen pe u boel. 28 Aka huen lawngah huen-caanna te toeng loeih selang tah amah kah hingna ham adoengla bungkhutna te a dangna ham oen ah khawdeng thlaang te bawmcem thaina ham bii bi seh. 29 Awl na thui u vengah awlthe te thui u boel; thlaang hamla hoeikhangna aka awm tih angoena ah theenna aka thoeng sak, nangmi kah awlthui aka ya hue lawng theenna te a saina ham awltheen te thui uh. 30 Pathen kah Ciim Muithla te a kaw the sak u boel; Metihtiah Muithla te tah, nangmi te Pathen kah thlaang la na awm u tite miknoekna la awm tih Pathen lawng nangmi loeih sakna Khawhin a pha ai tina kah aamahkhan ni. 31 Thunkha-thunthlimna, thinso-kawsana, thinsana te hoett u loeih. Pakhat oen khat tlungna oen sal-aphaamna, khat oen khat thina thinkaw awm tlaih boel seh. 32 Te ang thli lak atah pakhat oen khat reenna oen komyomna kawpoek te khueh u langtah Pathen lawng Khrih rang oen ah nangmi sawah khawdawp a ngaai van angla te khat oen khat sawah khawdawp ngaai uh.
1 Nangmi tah Pathen lawng a lungna a ca anau la na awm u dawngah amah oen lawh u van ham yawm u lah. 2 Khrih lawng mami he n'lungna tih a hingna te mami ham abaw aka tuui huihthlutna oen Pathen kawhoena luciik la a nawn u van angla nangmi kah hingna te lungna lawng uk seh. 3 Nangmi tah Pathen kah thlaang la na awm u dawngah hutaa tawngpa thawlhna, apueh ngaihna, tuiilehkap aka ciim nawh kawng te nangmi tim ah thui ham pateng khaw awm nawh. 4 Yahna koei awl, awlhang kaahang phawhna, awlthe awlkha te nangmi lawng na thui ham koeih tlaih nawh ni. Te lak atah nangmi lawng awmngaihna awl te Pathen tengah na thui u ham awm. 5 Nangmi lawng na ming ceet ham tah a-u khaw hutaa tawngpa thawlhna aka sai, tuiilehkap aciim nawh awl aka thui, apueh aka ngaih tah Khrih oen Pathen kah Ram ah adang ham koei te dang manawh tite ming uh (apueh asawm ngaihna he kutsaimuei bokna pakhat van ni). 6 Nangmi te awlpoei awlpit oen a-u lawngkhaw n'thailatna boel seh; he ang kawngah he amah awl te aka ngaai nawh tah Pathen thinsana te a yawkk ai. 7 Tedawngah te ang thlaang oen te pawl u roe boel. 8 Namami roe khaw n'hu vengah yiinna khui khawsakna ah na hing u poen, tede nangmi lawng Bawipa kah thlaang la na awm u coeng kalawng tah aangna khuiah na awm u poen. Tedawngah aangna khuiah aka awm thlaang angla te khaw sa uh. 9 Metihtiah te tila khawsakna lawngtah athaih-apai theenna phun soeprep, doengna phun soeprep oen awltak phun soeprep te a thoeng sak. 10 Bawipa kah kawhoena te sai hamla yawm u lah. 11 Yiinna khuiah aka awm thlaang thli lawng a sai thaihu, aphu aka awm nawh thaihu te sai u boel. Te ang thaihu te aangna dawngah daih lang tueng sak uh. 12 (Ahimi lawngah ahuep-ahella thaihu a sai kawng te thui ham pateng yah ham awm tangkiik). 13 Thaihu boeih te aangna ah pho sak la a awm veng atah te thli kah acoenggna tangtang te aciimphanla tueng; 14 Metihtiah aciimphanla aka tueng thaihu boeih tah aangna la te thoeng hang. Tedawngah, “Aka ip thli tho u loeih, duekna dawng kalawng tho uh, Khrih tah na sawah aang poen ai” tila a thui. 15 Tedawngah nangmi lawng khawsak ramsakna dawngah atheenla ngaithuen uh. Tu khaw aka ming nawh thlaang angla awm u boel, thlaangcuih angla awm uh. 16 Tahe kah atue khawhin he tah san the la a awm dawngah nangmi lawng atue theen na khueh boeih te atheenla hawna uh. 17 Nangmi lawngah thlaangcuih nawh angla awm u boel, Bawipa lawng nangmi sai sak ham a ngaih te dang hamla yawm uh. 18 Yuu te ruui u boel, yuu tah nangmi te aka rawk sak khoeng ni, te lak atah Muithla oen betoet u lah. 19 Nangmi pakhat oen khat te saam laa dawngkah awl, koehna laa dawngkah awl, laa ciim dawngkah awl oen ah voemtoei uh. Bawipa te na thinkaw tang oen koehna laa, saam laa oen ah thangpawm uh. 20 Mami kah Bawipa Jesuh Khrih miing oen ah soeprep boeih dawngah Pa Pathen tengah awmngaih ciil thui yoeyah uh. 21 Nangmi lawng Jesuh Khrih te na hinyah u dawngah nangmi pakhat oen khat awl ngaai u lah. 22 Yu-aca thli, Bawipa awl te na ngaai u van angla na vaa thli kah awl te ngaai u lah. 23 Khrih lawngah khrihcabu sawah aana a khueh angla vaa-aca lawng khaw yu-aca sawah aana a khueh tih Khrih tah amah pum la aka awm khrihcabu kah thlawnkung la awm. 24 Tedawngah khrihcabu lawng Khrih kah awl a ngaai angla yu-aca thli lawngah ataktang la a vaa-aca thli kah awl te ngaai seh. 25 Vaa-aca thli, Khrih lawngah khrih-cabu te a lungna tih a hingna te a peek angla yuu-aca thli te lungna uh. 26 Ahih lawngah he tila a sai, khrihcabu te tui oen aciimla a silh coengah a awl oen Pathen tengah a peek. 27 Te tila khrihcabu tah atheenna boeih boeih oen aka awm tih thawlhna aka awm nawh, atloe soepna nawh oen angaw-aha, aru-arii oen cawttbauh aka awm nawh la te amah tengah peek ham angaih dawngah ni. 28 Tawngpa hue lawngah amami pum te a lungna u van angla a yu-aca thli te a lungna ham awm. A yu te aka lungna tawngpa tah amah pum te aka lungna thlaang ni. 29 A-u lawngkhaw amah pum te thina nawh. Khrih lawngah khrihcabu te a doen acaang tih a cawm acah angla amah pum te thina ohla a doen acaang tih a cawm acah van. 30 Metihtiah mami tah amah pum dawngah aka thuum van ni. 31 Caciim lawngah “Tedawngah tawngpa lawng a manu oen ana pa te a ceh taak vetih a yu oen pumkhatla awm ai, ahih rawi tah pakhatla coengg ai” tila a thui. 32 He caciim dawngah aka tueng ataktang awlhuep aka dung te awm tih te tah Khrih oen khrihcabu he thuinuetna ni tila ka yaakming. 33 Tede nangmi oen khaw tuhkai u: vaa-aca boeih lawng amah pum te a lungna angla a yu-aca te lungna selang tah yu-aca boeih lawngkhaw a vaa-aca te hinyah van seh.
1 Ca-anau thli, na nu oen na pa awl te ngaai uh, te tah nangmi khrihca thli lawng na vai ham koei aka soeng thaihu ni. 2 “Na nu oen na pa te hinyah uh” a ti he tah lamhacuek awlpeek la awm tih, 3 “te tila na vai atah nangmi ham soeprep te theen vetih dilai han ah na hinglung vaang ai” tila a thap. 4 Nu-apa thli, nangmi lawng na ca na nau thli te a thinsa sak boel. Te lak atah khrihca moeiboe oen thuituen uh. 5 Nangmi sal thli, namami kah thlaanghing bawi thli te birih haitawk oen a awl ngaai pe uh; Nangmi lawng Khrih kah bii aka bi angla thinkaw tak oen a bii te bi pe uh. 6 Ahimi lawng nangmi te bii a bi ti seh tila na ngaih u dawngah ahimi kah mik huh bueng ah te bii sai u boel, tede Khrih kah sal la na awm u van angla Pathen kawngaih la na thinkaw lungbui boeih oen sai uh. 7 Thlaanghing kah bii ni ka bi tila poek ohla Bawipa kah bii aka bi angla thathlue thakaw oen bi pe uh. 8 Bawipa lawngah thlaang boeih he sal khawseh, thlaangcuem khawseh, amami kah atheen saina dawngah kutdo a peek ai tite poek uh. 9 Bawi thli, tetih van la te na sal thli tengah sai u van langtah hih-ahuut oen tluung-athangna te toeng u loeih. Nang oen sal thli lawng vaan ah aka awm, thlaang boeih te avanpila awlcekkung bawi kah thlaang la ka awm tite ming uh. 10 Aboetna ah amah kah tha-awm tharana rang oen ah Bawipa oen pumkhatla awmna dawngah na tharana te cak sak uh. 11 Seitan kah athe thailatna te padauh thaina ham Pathen kah peek phawlip acungkuem oen ah thoekcau u lah. 12 Metihtiah mami lawng thlaanghing te n'teek u nawh tih vaan benkah muithla the kah tharana, ukkung thli, saithaina aana khuehkung thli, tahe yiinna san kah khawhipuempa tharana huham oen ni n'teek u. 13 Tedawngah Pathen kah phawlip oen tahe ah thoekcau u lah! Te ah ni athe khawhin te avan pha vengah nangmi lawng ceemraal thli kah teek-ayakkna kalawng na deem u vetih ceemraal tloekna aboet toe ah acakla na pai poe u ai. 14 Tedawngah ngaithuen oepsoeh uh, awltak te cihin angla na hingcen dawng-ah acakla na lah, doengna te kahkawng angla daan langtah, 15 roepna Awlthang Theen phawng hamla ngaithuen oepsoehna te khawmuek angla muek uh. 16 Oengna te phring angla pawm yoeyah uh; metihtiah te phawlip oen Seitan kah kahna haialh pla boeih te na thih u thai ai. 17 Thlawnna te thiilumuek angla muek u langtah muithla kah peek, Pathen awl te samsen angla pawm uh. 18 He ang boeih he thangthuina oen sai u lang Pathen kah bawmcemna te bih uh. Muithla kah mawtna angla me ang atue atang vengah khaw thangthui uh. Tedawngah ahuertuela awm uh, thathepakla awm u boel; Pathen thlaang boeih ham thangthui yoeyah uh. 19 Kai khaw awl thui hamla oepsoehla ka awm vengah ka thui ham koei awl te Pathen lawng m'peekna ham khaw, raltheenna oen ka thuina ham khaw, awlthang theen kah awlhuep te tueng sak thaina ham ah kai ham khaw thangthui uh. 20 Tahe ah kai he thong khuiah ka awm de, he awlthang theen ham laipai la ka awm. Ka thui ham tuueng awlthang theen kawng te raltheen oen ka thuina ham thangthui uh. 21 Mami lawng n'lungna manau, Bawipa kah bii kawngah uep-awm la aka awm Taikhikas lawng metila ka awm tite nangmi lawng na mingna u hamla kamah kawng-alam awlthang boeih te avan thui ai. 22 Kaimi boeih metila ka awm u tite thui ham oen ah nangmi te tha thlue sak hamla ahih te nangmi tengla kavan tuih. 23 Pa Pathen oen Bawipa Jesuh Khrih lawngah khrihca maya manau boeih tengah ngaimawngna oen lungna, oengna te m'pe hawn seh. 24 Mami kah Bawipa Jesuh Khrih te aka duek nawh lungna oen ah aka lungna boeih sawah Pathen lungvatna awm hawn seh.
1 Khrih Jesuh kah tuihyoeihthlaang Pawl oen Timote lawng, Khrih Jesuh ah pumkhat la aka awm Filipi khaaw kah Pathen thlaang boeih khrihcabu mawtkung hue oen bawmkung boeih tengah ca kavan pat. 2 Mami kah Pathen oen Bawipa Jesuh Khrih lawng lungvatna, ngaimawngna te m'pe hawn seh. 3 Nangmi kan poek vengah nangmi ham awmngaih awl ka thui poepa; 4 nangmi boeih ham ka thangthui vengah awmngaihna oen ka thangthui, 5 Metihtiah awlthang theen bii bina ah a tong cuek kalawng tahe toe nangmi lawng nan bawm u dawngah ni. 6 Tedawngah nangmi tim ah he ang bii theen aka tongkung Pathen lawng Khrih Jesuh Khawhin a pha toe he bii he a bi poe ai tila ka tangna. 7 Nangmi he kan thintlawhna ni! He tila nangmi tengah thinkaw ka khueh he khueh ham tueng roe ni. Metihtiah kai he nangmi lawng nan lungduetna tih tahe thong ka tlaak vengah khaw, awlthang theen te yalpawla ka pai puei tih acakna ham bii ka bi vengah khaw Pathen kah peek bii dawngah he nangmi boeih khaw na thuum u van. 8 Khrih Jesuh lungbui dawngkah aka law boeih oen nangmi he kan thintlawhna ka ti vengah he awltak ka thui tih Pathen tah mingpueikung la awm. 9 Nangmi lawng atheen koek te na tuek thaina ham, nangmi kah lungna lawng cuihhoena tangtang oen ah nuemnai thaina oen haih a roeng tare hamla ka thangthui. 10 Te dengah ni Khrih Khawhin ah ciimna nawh boeih oen thawlhpeelna boeih kalawng na loeih u ai. 11 Pathen thangpawmna ham oen a ruep-awmna a tuengna ham Jesuh Khrih bueng lawngah peek thai la aka awm moeiboe theenna tangtang oen nangmi kah hingna te betoet ai. 12 Maya manau thli, ka tengah aka thoeng thaihu he awlthang theen a puungna ham aka bawmcem tangtang la coengg ti he nangmi ming sak ka ngaih. 13 He kawngah he, sengpahrang impui aka toet raalkapbu boeih oen he kah thlaangtloe boeih lawngah, Khrih kah tuihyoeihthlaang la ka awm dawngah thong ka tlaak he a ming u. 14 Tecoengah thong ka tlaakna lawngah he maya manau yahawh ngaai kah Bawipa a uepna te tare acak pe sak, tedawngah ahimi lawng a raal theen tare u tih rih ohla awlthang theen te a thui u. 15 Thlaang khatsut lawng atah uet-eena thinkaw oen, khatsut lawngtah tawhthaam ngaihna kawpoek oen Khrih awlthang theen te a thui u tangtang, tede khatsut lawngtah thinkaw ciim oen a thui u. 16 Ahimi lawngtah lungna oen a thui u, metihtiah awlthang theen paipueina bii he Pathen lawng kai m'peek te a ming u dawngah ni. 17 Thlaangtloe hue lawng atah lungna tangtang oen Khrih kawng te thui u nawh tih amami ham ngaihna kawpoek oen a thui u; ahimi lawng atah thong ah kai ka awm vengah he kai ham raina te sai tare hamla te a poek u. 18 Tete awlpui nawh ni! Ka awmngaih tangkiik mai ta; asoeng nawh kawpoek oen khaw, asoeng poekna oen khaw, me tih benla khawseh, Khrih kawng te a thui u mak atah ka awmngaih poepa ai. 19 Metihtiah nangmi kah thangthuina rang oen Jesuh Khrih kah Muithla dawng kalawng aka law bawmna oen ka loeih ngai ai tila ka ming dawngah ni. 20 Ka ngaihna oen ka ngaiuepna tah bii ka bi he meveng khaw tlawlh nawh ham ni, tede me ang atue atang ah khaw, tahe vengah khaw raltheenna oen betoet tih ka duek ka hing ah khaw, Khrih hinyahna hamla ka pum oen ka hingna boeih peek ham he ni. 21 Hingna he n'tu nuem? Kai ham tah hingna he Khrih ni. Tedawngah kai ham tah duekna he tharana ni. 22 Tede kai lawng ka hingna rang oen aphu aka awm bii te ka bi thai koei atah ame ang nuem ka tuek lah ai ka ngaai hang sut. 23 He pahih lawngah kai he n'doek. He hingna he ceh taak tih Khrih oen awm haih ka ngaih tangkiik, te tah atheen ngaai thaihu ni; 24 tede ka hing hun kawinih awlpuila nangmi ham tare theen. 25 He kawngah he ka uep u, ka hing hun ai tila ka ming. Nangmi lawng oengna dawngah na roengna ham awmngaihna te tawm athap hamla nangmi boeih te kan hing puei hun ai, 26 tedawngah nangmi tengah ka awm koep veng atah Khrih Jesuh ah nangmi kah hingna pumkhatla a awm dawngah kai rang oen ah nangmi lawng mik-hai theenna na khueh u tare ai. 27 Tahe ah awlpui tah Khrih kah awlthang lawngah a kuek angla nangmi lawng na hing u ham awm, nangmi tengla ka law thai tih kan huh u vengah khawseh, ka law thai nawh tih kan huh u nawh vengah khawseh, mengtengna pakhat oen acakla na pai u tih awlthang theen oengna dawngah kawngaihna pakhat oen thik at la raal na teek u tite yaak ka ngaih. 28 Nangmi lawng na raal te rih u boel; na thin cak sak uh, te lawngah te ahimi a sung sak vetih nangmi lawng na taa u te a ming sak ai, metihtiah nangmi taana te pekung tah Pathen ni. 29 Tedawngah amah te oeng doek ham bueng nawh tih ahih hamla patang khang ham khaw Khrih kah bii te nangmi m'peek u poen. 30 Tahe ah nangmi tah raal kahna huen ah kai oen bawngyawng haih thai poen. N'cui vengah kai lawng raal ka teek na huh u te ang te, nangmi lawng na yaak u angla tahe toe ah raal ka teek khiing hun.
1 Nangmi Khrih ah na hingna lawng tha a ra sak tih a lungna lawng nangmi kaw te a reem ahaal sak. Nangmi lawng Muithla oen pawlneengna na khueh u tih pakhat oen khat sawah lungna oen reenna te na khueh u. 2 Tedawngah nangmi te he tila kan uen, poekna pakhat la khuehna, pakhat oen khat lungna, thinkaw lungbui khat la khuehna oen ah ka awmngaihna te soep sak u lah. 3 Nangmi lawngah mah ham bueng poekna, oekthloen ngaihna mai oen ah thaihu khat khaw sai boel, thlaangtloe he nangmi lak ah theen ngaai tila poek poepa langtah pakhat oen khat boe-ngai uh. 4 Namami ham bueng te huh thai ohla thlaangtloe ham theenna khaw huh thai van ham awm. 5 Khrih lawng a khueh kawpoek te nangmi lawngkhaw khueh ham awm. 6 Ahih tah Pathen pumsa oen soep yoeyah, tede Pathen oen avan at la awm ham te yawm mangkhak ham poek nawh. 7 He lak atah a khueh boeih te amah kawthawhna oen a hoett tih tuihyoeihthlaang la awmna te a lawh Ahih tah thlaanghing angla coengg tih thlaanghing muei-asam la va tueng. 8 Ahih tah boe-ngaai tih duek toela awlngaaina lawngpui te a vai tih thinglam dawngah te duek. 9 Tedawngah Pathen lawng ahih te asaw sang koek huen ah a pawmsang tih miing tloe boeih lak ah miing luekoek a peek. 10 Tedawngah Jesuh miing hinyah peekna la vaan ah aka awm boeih, lai han ah aka awm oen dilai dangah aka awm boeih lawngah khuklu oen cuengkueng boeih u vetih, 11 Pa Pathen ruep-awmna ham Jesuh Khrih tah Bawipa ni tila boeih a phawng u ai. 12 Tedawngah ka lungna ka paya thli, nangmi oen haih ka awm vengah ka awl na ngaai u poepa angla te tahe athla hlang la ka awm vengah khaw, ka awl he na ngaai u ham awlpui koek la awm. Nangmi kah thlawnna asoepna ham birih haitawk oen bii te bi yoeyah uh, 13 metihtiah amah kah mengtengna te vai thai ham oen vai ngaihna thinkaw khueh ham Pathen lawng na kaw khuiah bii a bi poepa. 14 Soeprep boeih te caitoek ohla, oelhtaih u muehla sai uh, 15 te tila te he dilai dawngah aka awm thlaangthe thli oen thlaangthawlh thli lakli ah Pathen kah thlaangsoep ca anau angla thawlhna aka awm nawh, aciim acaih thlaang la nangmi tah na awm u ai, hingna awl te ahimi na peek vengah te ahimi tim ah vaan ah aka vaang aisi angla aang u lah. 16 Te tila na sai u atah Khrih khawhin ah nangmi rang oen mik-hai theen ka dang ai, metihtiah kai lawng ka yawmna boeih oen ka bi boeih te apoei-oep nawh ni tite na tueng sak ni. 17 Nangmi lawng oengna oen na nawn thaihu angla Pathen tengah na nawn u luciik dawngah ka hingna thisen he duei mai cakhaw ka awmngaih vetih nangmi boeih oen haih ka awmngaih ai. 18 Tetih van la te nangmi khaw na awmngaih u vetih kai oen haih na awmngaih u van ai. 19 Nangmi kawng awlthang te yaakna oen ka tha a thluena ham Bawipa lawng a kawngaih atah nangmi tengla Timote he kavan tuih yue ai tila ka poek. 20 Ahih bueng oen ah ka kawpoek cah ahih tih nangmi tengah a ngaai huett tangtang. 21 Tlaang tloe hue tah amami kah bii bueng te a khuituuk u, Jesuh Khrih kah bii te bi u nawh. 22 Ahih lawngtah bii te a palki tih kai oen Paca angla awlthang theen ham bii ka bi hih te nangmi lawng na ming u. 23 Tedawngah kamah kah kawng alam he metila a awm tite ka ming pahoei coeng atah ahih te nangmi tengla kavan tuih ai tila ka ngaiuep. 24 Bawipa uepna oen kamah khaw nangmi tengla ka law yue ai tila ka ngaiuep. 25 Mami kah manau Epafroditas he nangmi tengla tuih ham angoe tila ka poek, ahih tah kai oen biibipuei, ceem raal aka tloek haih van tih kai he bawmkung la nangmi lawng na van tuih laipai ni. 26 Ahih lawng nangmi te n'ngaai tangkiik u tih a sa ding nawh tila na yaak u dawngah te a kaw hoe nawh. 27 Ahih tah duek dalh toela tlo tangtang. Tede Pathen lawng a reen, ahih bueng nawh tih kai khaw n'reen van tih ka tengah kawthena bohlang aka law ham koei dawng kalawng ka sa avan sueng sak. 28 Tedawngah ni a hih he nangmi tengla tuih ham ka ngaih tangkiik tih, na huh u vengah na awmngaih u vetih kai kah kawthe khaw dip ai. 29 Tedawngah nangmi lawng ahih te Bawipa ah boenhui pakhat angla awmngaih oen van do uh. Ahih angla aka awm thlaang boeih te van hinyah uh, 30 metihtiah nangmi lawng nan peek thai nawh bawmcemna te ahih lawng peek hamla, Khrih kah bii dawngah duek khaw maa ohla duek dalh toela bii a bi.
1 Maya manau thli, awlcuina ah thui ka ngaih tah Bawipa oen pumkhat la awmna dawngah awmngaih u lah. Acuek ah kavan thut tangte te thut koep he n'tu la ka poei sak mai nawh, he tila kavan thut koep he tah nangmi na deemna ham ni. 2 Athe thaihu aka sai thli, pumsa yahhuivuen reetna aka thui mangkhak thlaang thli ui hue te ngaithuen uh. 3 Asoeng akam taktak yahhuivuen aka reet tah ahimi nawh tih mami he ni, metihtiah mami lawngtah amah kah Muithla oen ah Pathen n'bok u tih Khrih Jesuh ah pumkhatla awmna hingna dawngah te n'awmngaih u. Mami lawngtah asaw ahan kah saina dawngah uepna n'khueh u nawh. 4 Atak tang atah te ang thaihu thli te kai lawngkhaw ka uepna thai van ta. Asaw ahan kah saina te ka uepna thai tila thlaang pakhat khat lawng a poek atah te tila poek ham koei la kai lawng akawng alam yahawh ngaai ka khueh. 5 Kai tah hin reetna khawhin ah yahhuivuen reet la ka awm, thlaangphun ben ah Israel thlaang, Benjamin phun, Hebru thlaangciim la ka awm. Judah hue kah Phungawl vaina ben ah Farasi la ka awm, 6 Kai tah ka tha thlue akcak tih khrihcabu te ka heem ka tek. Phungawl dawngkah awlpeek thli te vaina rang oen thlaangdoeng la awmna ben ah kai tah thawlhna roe awm nawh. 7 Tede he thaihu boeih he kai ham thaawnna ni tila ka poek koei te tahe tah sungna ni tila Khrih rang oen ah ka poek poen. 8 Te thaihu thli bueng nawh tih; ka Bawipa Khrih Jesuh kah cuihhoena aphu aka awm ngaai rang oen soeprep cungkuem te sungna ni tila ka poek boeih poen. Amah rang oen ah soeprep boeih te ka hoett kang poen; te ang thli boeih te tah kaw-hnot vaiking la ni ka poek mai poen, Khrih ah ka thawnna ham oen ah, 9 amah oen pumkhatla awmna ham ni. Tahe ah kai lawng Phungawl vaina rang oen thaawnna kamah kah doengna te ka khueh tlaih nawh. Tahe tah Khrih oengna rang oen m'peek doengna, oengna dawngah akung asut Pathen tengkah aka law doengna ni ka khueh poen. 10 Kai lawng ka ngaih tah Khrih te ming ham oen ah amah thawhkoepna huham tharana te ming van ham amah kah patang khang te khang van ham oen ah amah angla duek van ham ni. 11 Te tila te kamah roe he duekna kalawng hingna ah thawh koep van ham ka ngaiuep. 12 He ang thli dawngah he taana ka khueh poen, thlaangsoep la ka awm poen tina nawh ni. Khrih Jesuh lawng amah hamla kai he n'tuuk khak poen tih kai hamla avan khueh kutdo te dang hamla tha ka huer. 13 Maya manau thli, kai lawng te ang thli boeih te ka dang poen tila khaw ka poek nawh; tede kai lawng ka sai pakhat tah ka hu benkah thaihu te hilh tih ka hai ben ah aka awm te pha hamla ka yawm. 14 Tedawngah kutdo dang hamla lansak benla te adoengla poe ka heng, te kutdo tah sawben hingna ah Khrih Jesuh rang oen Pathen kah khuena te ni. 15 Mami boeih muithla ben ah kawpoek soep la aka awm lawngtah he ang kawpoek he khueh roe hamla awm, tede nangmi timkah thlaang khatsut lawng poekna tloe na khueh u atah te poekna te Pathen lawng nangmi tengah aciimphanla avan tueng sak ai. 16 Me tih khawseh, mami lawng tahetoe ah n'vai u phung alam angla te hai benla cet u lah sih. 17 Maya manau thli, ka hingna he nangmi lawng oett u lah. Kai lawng nangmi ham kavan khueh oett koei theenna aka vai thlaang thli te dan u lah. 18 He kawng he n'hu vengah khaw kavan thui poepa u poen de, tahe ah mikphi oen kavan thui koep: Thinglam dawngah Khrih kah duekna te a hingna oen ah aka raalna thlaang yahawh awm. 19 Ahimi tah hell ah a lawngpui boet ai, metihtiah ahimi kah pathen tah amami kah pumsa ngaihna te ni. Ahimi lawngah yahna koei thaihu dawngah te oekthloen u tih dilai thaihu koeva thli bueng he a poek u. 20 Tede mami tah vaan ram thlaang la n'awm u tih mami Thlawnkung Bawipa Jesuh Khrih vaan kalawng a law thuk te huerh n'lamtoen u. 21 Amah lawngtah mami kah tha aka awm nawh, aka duek thai pum he avan thaw vetih amah kah ruep-awm pum angla avan sai ai, te tila a sai vengah te thaihu soeprep boeih amah ukna huiah aka pha sak huham tharana te a hawna ai.
1 Tedawngah ka lungna maya manau thli, kan lungduetna u tih kan ngaai u tangkiik! Nangmi kawngah ka kaw hoe tih ka awmngaih tangkiik! Ka lungna maya manau thli, Bawipa dawng na hingna ah te acakla pai uh. 2 Eodia oen Sintikhe, reenna kavan bih, Bawipa ah boeinau la na awm hih van angla thinkaw thik-at ham yawm hih. 3 Tecoengah, uep-awm biibipuei, thli nangmi lawngkhaw, he hutaa rawi he na bawm u hamla ka ngaih; metihtiah Klimen oen atloe biibipuei haih, Pathen kah hingna cabu khuiah a miing aka thuum thli boeih oen awlthang theen a puungna ham kai oen haih tha a huer hih tih bii aka bi rawi ni. 4 Bawipa oen pumkhatla na awm u dawngah awmngaih poepa u lah. Koep ka thui; awmngaih u lah! 5 Thlaang boeih tengah nangmi kah kawdawna te tueng sak uh. Bawipa tah law yue poen ai. 6 Me ang thaihu kawngah khaw lakueng u boel, na thangthui veng roekk ah na ngoe boeih te Pathen tengah bih uh; amah tengah uemna thinkaw tang oen bih yoeyah uh. 7 Te tila na bih atah thlaanghing kah yaakmingna voel ah aka awm Pathen ngaimawngna lawng Khrih Jesuh oen pumkhat la awmna rang oen ah nangmi kah thinkaw oen lungbui te ading-apuek la avan khueh ai. 8 Aboetna ah ka boenhui thli, nangmi lawng na thinkaw te aka theen tih thangpawm koei ataktang thaihu, aphu aka awm thaihu, aka soeng tih aciim thaihu, lungna koei thaihu, hinyah koei thaihu oen be sak uh. 9 Kai tengkah na cang u tih na dang u te ka awlthui dawngkah khawseh, ka saina dawngkah khaw pahih bokla sai u van. teahtah mami ngaimawngna pekung Pathen te nangmi oen haih awm ai. 10 Atue san hlang a awm coengah nangmi lawng kai he nan do nan dan koep u tih bawipa oen ah pumkhatla awmna rang oen ka awmngaih tangkiik. Nangmi lawng kai nan dodanna te na toeng pak u ka ti ngaihna nawh ni, nangmi lawng dodanna te tueng sak ham atue theen na dang u nawh ka ti ngaihna ni. 11 Nangmi lawng kai he nan ngaai nan laakna tlaih nawh tila ka poek dawngah he tila ka thui moenih, metihtiah kai tah ka khueh duen oen ka ngaai atluepna thai ham ka cang poen dawngah ni. 12 Voetna oen awm khawseh, acoeihpokla khueh toen khawseh me ang nuem tite ka ming poen. Tedawngah ame huen ah khaw, metuek vengah khaw, ka bung ahah ah khawseh, buh mueh la ka awm ah khaw seh, yahawh hlang ka khueh ah khaw, ayawlca ka khueh ah khaw ngaikhuek la awm thai ham he ang ahuep ahel he ka cang poen. 13 Khrih kah peek huham tharana oen me ang thaihu khaw taana hamla tharana ka khueh poen. 14 Tede raina ka tawng vengah nan bawm u he nangmi kah theenna ni. 15 Nangmi Filipi khaaw kah thlaang thli lawng atheencala na ming u, Macidonia kalawng ka cet tih Awlthang Theen ka thui cuek vengah te nangmi khrihcabu bueng lawng ni bawmna nan peek u, nangmi bueng lawng ni ka thawnna oen ka sungna khaw nan talawng u. 16 Tesalon khaaw ka awm vengah bawmna ka ngoe vengah te te vaikhat bueng nawh mai bawmna te navan pat u. 17 Kai lawng kutdo dang ngaih bueng maiah nawh tih; nangmi kah cayin cabu dawngah khaw athawnna, apuung ataaina te huh hamla ka ngaih. 18 Tecoengah nangmi kah thaihu pat boeih tite kavan thut tih akhoek anoen lak ah yahawh ngaaila navan pat u! Nangmi kah kutdo boeih te Epafroditas lawng avan khuen tih tahe atah ka ngoe boeih te ka khueh poen. Te ang thli boeih te Pathen lawng a ngaih tih a do luciik, Pathen tengah nawn la aka awm riimtuui angla awm. 19 Kai kah Pathen lawng amah kah bawilen kuirangna oen nangmi kah ngoena boeih te Khrih Jesuh rang oen ah m'peek ai. 20 Mami kah Pa oen Pathen tengah ruep-awmna tah dungyan toe awm hawn seh! Amen. 21 Khrih Jesuh kah a koe la aka awm, Pathen kah thlaang nangmi pakhat rip te kan toei u. He ah he kai oen aka awm haih boenhui hue lawngkhaw nangmi te n'toei u, 22 He ah aka awm Pathen kah thlaang boeih lawng n'toei u tih awlpuila Sengpahrang sangluel impui ah aka awm thli lawngkhaw n'toei u. 23 Bawipa Jesuh Khrih kah lungvatna tah nangmi boeih sawah awm hawn seh.
1 Pathen kah kawngaihna oen Khrih Jesuh kah celtuih pakhat la aka awm kai Pawl oen mami kah manau Timote lawng- 2 Khrih oen pumkhatla awmna ah uep-awm maya manau Kolosa khaw kah Pathen thlaang thli tengah ca kavan pat: Mami kah Pa Pathen lawng lungvatna ngaimawngna te nangmi m'pe hawn seh. 3 Nangmi ham ka thangthui u vengah mami kah Bawipa Jesuh Khrih kah ana Pa tengah awmngaih ciil ka thui u poepa. 4 Metihtiah Khrih Jesuh ah nangmi kah oengna Pathen kah thlaang boeih na lungna u te ka yaak u dawngah ni. 5 Awlthang Theen asoeng taktak te nangmi teng avan pha cuek vengah ngaiuepna m'peek kawng te nangmi lawng na yaak u. Tedawngah nangmi kah oengna oen lungna tah vaan ram ah nangmi ham a khueh ngaiuepna dawngah akung asut. 6 Nangmi lawng Pathen kah lungvatna kawng na yaak cuekca kalawng te lungvatna te ataktangla na ming u veng atah nangmi tim ah apuung ataai van angla te awlthang theen tah dilai pum ah puung khonghak tih yotheen kam-awmna te m'peek. 7 Nangmi lawng Epafras teng kalawng Pathen kah lungvatna te na ming u, Ahih tah kaimi lawng ka lungna biibipuei haih kaimi yuengah uep-awm la Khrih kah biibikung ni. 8 Muithla lawngah nangmi lungna m'peek te ahih lawng kaimi tengah avan thui. 9 Tedawngah nangmi kawng ka yaak cuek veng kalawng nangmi ham ka thangthui poepa u. Amah Muithla lawng m'peek cuihna boeih oen yaakmingna, amah kawngaih mingna oen nangmi na betoetna u ham Pathen tengah ka bih u. 10 Tedawngah Bawipa kah ngaihna angla nangmi lawng na ming thai vetih amah kawhoena te na sai poepa u thai ai. Nangmi kah hingna lawng thaihu theen soeprep boeih a sai vetih Pathen mingna dawngah te na roeng u ai. 11 Soeprep boeih te thinsan kawdaw oen na ueh thaina ham Pathen ruep-awmna huham dawng kalawng aka law tharana boeih oen n'cak sak u seh. 12 Tedawngah a aangna ram ukna khuiah Pathen lawng a thlaang thli ham oepsoehla a khueh thaihu te nang lawng paang thai koei la saikung Pa te awmngaih oen koeh uh. 13 Amah lawng mami he yiinna thara huham khui kalawng n'thlawn tih a lungna a Capa ram khuiah ngaimawngla te n'kuun poen; 14 a Capa rang oen mami tah n'loeih u tih mami thawlhna boeih te khawdawp avan ngaai poen. 15 Khrih tah huh thai nawh Pathen kah huh thai mueisam ni. Ahih tah a Capa camiing la awm tih a sai thaihu boeih lak ah asangluet la awm. 16 Metihtiah Khrih rang oen Pathen lawng vaan oen dilai dawngah aka awm thaihu boeih he a sai, huh thai oen huh thai nawh thaihu boeih, Muithla ben ah tharana thli, bawi thli, ukkung thli oen saithaina aana khuehkung boeih te a sai. Pathen lawng khawhipuempa dawngah aka awm boeih Khrih rang oen Khrih amah ham a sai. 17 Khrih tah thaihu soeprep boeih a awm thlan ah awm poen tih amah oen pumkhatla awmna ah thaihu soeprep boeih lawng amami awmna huen te rip a khueh. 18 Khrih tah amah kah pum la aka awm khrihcabu kah a luu ni; Ahih tah pum kah hingna kungpui la awm. Ahih tah camiing la awm tih thaihu boeih dawngah ahih bueng lawng lamhacuekla awmna huen a khuehna ham duekna kalawng a thawh sak poen. 19 A Capa lawng amah khuiah Pathen pumsa soepbir a khueh he Pathen amah kah awltloekna rang oen ni. 20 Tecoengah Pathen lawng a Capa rang oen khawhipuempa boeih he amah tengla doek koep hamla a ngaih. Pathen lawng a Capa thinglam dawngah a duekna rang oen roeproeina a sai tih vaan oen dilai ah aka awm thaihu boeih te amah tengah a doek koep. 21 N'cuiveng atah nangmi lawng athe thaihu thli na sai u tih, na poek u dawngah Pathen oen na thla u. 22 Tede tahe tah a Capa kah thlaanghing pumsa la a duekna rang oen Pathen lawng amah paya theen la n'sai poen. Te tila a sai he tah amah haiah nangmi te ciimcaih tih cawttbauh aka kap nawh la lawh ham ni. 23 Tedawngah, nangmi lawng thincak oen ayung na pengnelna dawngah te oengna oen acakla pai uh, awlthang theen na yaak vengkah na khueh u ngaiuepna dawng kalawng namah oen namah te thoeihnawng tlaih boel. He awlthang theen he dilai pum kah thlaang boeih tengah a phawng u tih he awlthang theen hamla Kai, Pawl khaw tuihyoeihthlaang la ka awm. 24 Tahe ah nangmi ham patang palai ka khangna dawngah he ka awmngaih, metihtiah Khrih lawng amah kah pum la aka awm khrihcabu ham patang khang hamla aka awm hun te asoepna ham ka pumsa patang khangna oen a yueng ka theng pe. 25 Tedawngah, Pathen lawng Khrihcabu kah tuihyoeihthlaang la kai he n'khueh poen tih bii m'peek he tah nangmi theenna ham ni. Te bii tah amah kah awlthang asoepla phawng ham te ni; 26 te awlthang te yan veng atah thlaangphun boeih tengah phawng ohla a thuh, tede tahe tah a thlaang thli tengah a phawng poen. 27 Pathen kah mengtengna tah thlaang boeih hamla a khueh pe lenna oen ruep-awm tangkiik awlhuep te a thlaang boeih tengah phawng hamla ni. Te awlhuep tah nangmi khuiah aka awm Khrih te ni, thuingaihna tah Pathen kah ruep-awmna te nangmi lawng na khueh u van ai tina ni. 28 Tedawngah kaimi lawng thlaang boeih tengah Khrih kawng he ka thui u. Thlaang boeih lawng Khrih oen pumkhatla awmna ah pakhat rip te thlaangsoep la Pathen haiah pha puei ham cuihna boeih oen ngaithuenna ka peek u tih ka cang puei u. 29 He bii ka bi vengah he Khrih kah peek, ka khuiah bii aka bi tha-awm tharana te hawna oen ka tho ka tat tih bii rai he ngah ngah ka bi.
1 Nangmi ham khaw Laudisia khaaw kah thlaang thli ham khaw, kai he pumpakla aka ming nawh thlaang boeih ham khaw patang palai ruila metila bii ka bi he nangmi lawng na ming u ham ka ngaih. 2 He tila ka bi he nangmi lawng raltheenna oen na betoet u vetih lungna dawngah pakhat oen khat beroep u ham, aka soeng yaakmingna lawng a thoeng sak ngaitluep ngaimawngna aka soep te na khuehna u thai ham ka ngaih dawngah ni. He tila nangmi lawngah Pathen kah awlhuep te na ming u thai ai, te awlhuep tah Khrih amah he ni. 3 Khrih tah Pathen kah cuihna oen mingna kaawn thuh la aka awm boeih te awngna caabi ni. 4 Tecoengah he he kavan thui u, metila asoeng tangkiik angla awm mai cakhaw, aka soeng nawh cal thai oelhtaihna oen nangmi te a-u lawngkhaw n'thaina u boel seh. 5 Kai he ka pum tah nangmi oen athlahlangla ka awm de Muithla atah nangmi oen haih ka awm tih nangmi lawng Khrih na oengna dawngah thinkaw melh tih thin at kaw at oen thik at la na pai u te ka huh vengah ka awmngaih. 6 Khrih Jesuh te Bawipa la na pawm u poen dawngah amah oen pumkhatla awm uh. 7 Amah khuiah na yung te adungla thlaak langtah amah dawngah na hingna te im angla sa u lang nangmi te n'cang puei u poen angla na oengna te cak sak u lah. Tecoengah awmngaih ciil thuina oen betoet uh. 8 Tecoengah Khrih tengkah ohla thlaang kah cangpueina patoeng oen khawhipuempa ukkung Muithla teng kalawng ah aka law, aphu aka awm nawh thlaanghing kah cuihna oen a-u lawngkhaw nangmi te sal la n'sai u nawh ham ngaithuen uh. 9 Metihtiah Khrih thlaanghing pumsa dawngah Pathen kah pumsa asoepbirla awm tih, 10 amah oen pumkhatla awmna dawngah hingna aka soep te nangmi m'peek u poen. Ahih tah muithla boeih ukkung oen saithaina aana aka khueh boeih sawah sawsang koek la awm. 11 Khrih oen pumkhatla awmna dawngah nangmi lawng yahhuivuen-reetna u, thlaanghing kah sai yahhuivuen na reet u nawh tih Khrih kah sai yahhuivuen-reetna oen ni. Te tah he pumsa kah thawlh tharana kalawng loeihna te ni. 12 Metihtiah nangmi lawng Baptisma na dang u vengah te Khrih oen haih up la na awm u poen tih duekna kalawng Khrih thawhsakkung Pathen kah huham tharana te nangmi lawng na oengna rang oen ah Khrih oen na tho haih u van poen. 13 Yan atah nangmi he phungawl khueh nawh Gental thlaang la na awm u tih namami kah thawlhna dawngah Muithla ben ah na duek u. Tede tahe tah Pathen lawng nangmi te Khrih oen haih ng'hing sak poen. Pathen lawng mami kah thawlhna boeih te khawdawp a ngaai poen. 14 Mami kah laiba thutna cabu oen a khuiah aka awm piinna phung te thinglam dawngah biit a hen tih aphe boeih poen. 15 Tecoengah Khrih lawng Muithla ukkung hue oen saithaina aana khuehkung hue kah tharana te thinglam dawng a hen boeih tih, rangpui kah huh la a sai, taana oen laam-eetna ah raalkhuen sal angla a mawt. 16 Tedawngah nangmi kah na caak oen na awkk kawngah khaw seh, khawhin ciim oen Thla Thaai Poei oen ah Sabbath kawngah khaw seh, a-u lawngkhaw phung-alam van sai boel seh. 17 Te ang thaihu thli boeih tah hai ben ah aka thoeng koei mueithlip mai ni; ataktang tah Khrih ni. 18 Huhthlaam sangthloei ka huh ti u tih thlaangtloe lak ah asangla aka ngaai u thlaang thli, asoeng nawh komyomna, m'mah kah pum he phep hamla awm aka ti thlaang thli a-u lawngkhaw nangmi te n'sal'phaam boel seh. Te ang thlaang thli tah thuingaihna tangtang aka awm nawh thlaanghing poekna angla a poek te oen ah oekthloen u. 19 Pum kah luu la aka awm Khrih phoeih mangkhak te a toeng u. (Khrih kah khoemdoenna oen pum lawngah cawmcah u tih ruh-rawng dakda oen tharui lawng a tawm malh coengah Pathen lawng roeng sak ham a ngaih angla te coengg.) 20 Nangmi tah Khrih oen na duek haih u tih khawhipuempa kah muithla boeih ukkung teng kalawng na loeih u poen. Teahtah, n'tu ah he dilai hingna angla na hing khuep u? 21 N'tu hamla nangmi lawng “He he tek boel, tete teng-alai boel, atloe te nen boel,” aka ti phung alam te na vai u? 22 Te ang phung boeih te tah vai-at hawna coeng atah tula khaw thuumhawm tlaih nawh poen; te ang thli te thlaanghing kah sai phung alam oen cangpueina ni. 23 Vanthlaang amangkhakla bokna, asoeng nawh komyom kawdawna, atlawhhlangla pum patang peekna, he ang phung alam thli he cuihna dawng kalawng aka thoeng angla awm mai ai; tede pumsa ngaihna te taana hamla tah hoeikhangna tangtang awm nawh.
1 Nangmi tah Khrih oen hingna benla na tho haih u poen, tedawngah Pathen bantang ben ah Khrih lawng a bawi ngawlhcoen dawng a ngawlhna huen, vaan ram kah thaihu dawngah na lungbui te khueh uh. 2 He dilai sawkah thaihu dawngah thinkaw khueh ohla vaan ah aka awm thaihu dawngah na thinkaw te arapcatla khueh uh. 3 Metihtiah nangmi tah na duek u poen tih nangmi kah hingna tah Khrih oen haih Pathen dawngah thuh u poen. 4 Nangmi kah hingna tangtang tah Khrih ni, amah a law veng atah nangmi khaw amah oen haih na phumpho u vetih amah kah ruep-awmna te na dang u van ai. 5 Tecoengah dilai pumsa ngaihna nangmi kaw khuiah bii aka bi hutaa tawngpa thawlhna, ciimcaih nawh khawsakna, halhna, athe ngaihsoehna, apueh ngaihna, he ang thli boeih he na duek sak ham awm. (Metihtiah apueh ngaihna he kutsaimuei bokna pakhat van ni) 6 He ang thaihu the aka sai tih Pathen awl aka ngaai nawh sawah te Pathen kah thinsana pai ai. 7 Anoekbuet ah nangmi kah hingna khaw pumsa ngaihna lawng uktem la a awm vengah namami khaw he ang pumsa ngaihna angla khaw na sak u. 8 Tede tahe tah he ang thaihu thli thinsana, thinthena oen thlaang thina boeih te nangmi lawng na hoett boeih ham awm. Thlaang thekhana awl, tapvoepna awlthe awlkha he na hui na kaa dawng kalawng thoeng boel seh. 9 Nangmi lawng thlaangruem hingna oen thlaangruem moeiboe te na dul u tih thlaang thaai hingna oen na khuk u poen dawngah pakhat oen khat te thailat u patoeng boel. 10 He thlaang thaai hingna saikung Pathen lawng amah mueime oen aka lo u tare ham boet ohla athaai sak poepa. Te tila athai sak he tah nangmi lawng amah te atheenla na mingna ham ni. 11 Te tila mingna dawng atah Gental oen Judah, yahhuivuen reet oen reet nawh, thlaangngau paathuu, n'tu khaw aka ming nawh thlaang, sal oen thlaangcuem tila ahimi laklaw ah pekbona awm tlaih nawh; Khrih tah soeprep tih soeprep dawngah Khrih tah awm. 12 Nangmi tah Pathen thlaang la na awm u; amah lawng nangmi te n'lungna tih amah hamla nangmi te n'tuek. Tedawngah thlaang kah hailam poekna, reenna, komyomna, boe-ngaaina, kawdawna oen ah khukdah u lah. 13 Nangmi pakhat oen khat kawlawna nawh a awm atah khat oen khat reen u langtah khawdawp ngaai uh. Bawipa lawng nangmi sawah khawdawp a ngaai van angla nangmi khaw thlaangtloe sawah khawdawp ngaai u van. 14 Tecoengah he thaihu boeih sawah lungna oen thap uh, metihtiah lungna lawngtah thaihu boeih he asoepcala pakhatla kang a tingtun tih a roep u sak. 15 Khrih kah peek ngaimawngna tah nangmi lawng awltloekna na saina ah nangmi te lawngpui aka tueng sak ham ni; metihtiah he ngaimawngna khuiah awm haih hamla Pathen lawng pum pakhat dawngah nangmi te n'khue u. Tedawngah awmngaih uh. 16 Khrih kah awl acungkuem ah aka soep te nangmi kaw khuiah awm seh. Cuihna aka awm boeih oen nangmi khat oen khat tuukkiik u lang toelthaam uh. Saam laa, Koehna laa oen laa ciim te sa uh; Na kaw khuikah awmngaihna laa oen Pathen te koeh uh; 17 Pathen tengah Khrih rang oen awmngaihna na thui u angla soeprep boeih na sai khaw, na thui khaw Bawipa Jesuh miing oen sai uh. 18 Yu-aca thli na vaa thli kah awl te ngaai uh, te tah Khrih thlaang la na awm u dawngah na sai ham koei ni. 19 Vaa-aca thli na yu ruk-awm thli te lungna u lang ahimi te awltlawh oen voemtoei u boel. 20 Ca-anau thli, Khrih thlaang la na awm u dawngah na nu oen na pa te yoeyahla hinyah uh, te tah Pathen kah kawngaih ni. 21 Nu-apa thli, na ca thli te a thin sa sak u boel, tetih atah ahimi te a kaw boet u hau ai. 22 Sal thli aw, soeprep boeih ah dilai hankah na manghai bawi hue kah awl te ngaai pe uh. Nangmi lawng ahimi kah kawtlaakna te na ngaih dawngah a mik-huh bueng ah a awl te ngaai mai ohla Bawipa hinyahna oen ah na thinkaw tangtang oen a awl ngaai pe uh. 23 Bii na sai roekk ah thlaanghing ham nawh tih Bawipa ham ni ka bi ti u langtah na thinkaw tangtang oen bi uh. 24 A thlaang thli ham a khueh pe kutdo te Bawipa lawng nangmi m'peek ai tite hilh u boel. Bii na bi pe Manghai Bawi tangtang tah Khrih ni. 25 Tedawngah a-u khaw athe aka sai boeih tah athe thaihu sai phu te a dang van ai, metihtiah Pathen lawngtah thlaang boeih te avanpila awl a cek dawngah ni.
1 Manghai Bawi hue, na sal thli te asoengla, adoengla aphangla, voemtoei uh. Nangmi khaw vaan ram ah Manghai Bawi na khueh u van te hilh u boel. 2 Thangthuina dawngah tlungmu u lang, na thangthui u vengah huertuela awm uh. Pathen tengah awmngaih ciil thui uh. 3 Te tila na thangthui u vengah Khrih awlhuep phawngthaina ham, Pathen tengkah atue theen ka dang thaina u hamla kaimi ham khaw thangthui u van. Tahe thong ah ka tlaak he khaw awlhuep ka phawng dawngah ni. 4 Tedawngah awlthang ka phawng ham koei te aciimphanla ka phawng thaina ham thangthui uh. 5 Aka oeng nawh thlaang thli tengah cuihna oen tho tat u lang atue theen na khueh boeih te hawna uh. 6 Nangmi kah awlthui boeih te yaak ngaih koei oen thinkaw thluembuek koeila awm selang thlaang boeih kah awl doetna te metila ka thung pe ai tite na ming u ham awm. 7 Kaimi lawng ka lungna ka manau, Bawipa kah bii dawngah uep-awm bii bikung, bii aka bi puei Taikhikas lawng kai kah kawng awlthang boeih he avan thui ai. 8 Tedawngah nangmi thathluena ham, kaimi kah khawsakna boeih aka thui hamla ahih te nangmi tengla kavan tuih. 9 Ahih oen haih Onisimas khaw va law van ai. Onisimas he ka lungna tih ka uepna ka manau, nangmi tim ah aka thuum van ni. He kah thaihu boeih aka coengg hang he ahih rawi lawng avan thui ai. 10 Kai oen thong ka tla haih Aristarkas lawngkhaw nangmi te n'toei u; tecoengah Barnabas kah nganca Mark lawngkhaw nangmi te n'toei u. (Mark he nangmi tengla a law atah anepla dodan ham kan uenna te na huh u poen) 11 Jastas aka miingna Joshua lawngkhaw nangmi te n'toei u. He kah thlaang pathum hue he Judah thlaang, thinkaw a thaw u tih Pathen ram ham kai oen bii aka bi haih thlaang la awm u tih ahimi lawng kai he yahawh hlang n'bawm u. 12 Khrih Jesuh kah tuihyoeihthlaang, namami kah paya laikoei Epafras lawng n'toei u. Ahih lawngah thinkaw tak oen nangmi ham thangthui poepa tih nangmi acakla na paina u ham, Khrihca thlaangsoep la na awmna u ham oen ah na oengna te aciimphanla na mingna u ham, Pathen kawngaih te asoepla na vaina u hamla a bih poepa. 13 Ahih lawngah nangmi ham khaw Laudisia oen Herapolish khaw kah thlaang thli ham khaw biirai a bi te kamah roe he aka mingkung la ka awm. 14 Mami lawng n'lungna Siibawi Luka oen Demas lawngkhaw nangmi te n'toei u. 15 Laudisia khaw kah maya manau thli oen Nimfa oen a im ah aka tun Khrihcabu tengah kaimi lawng n'toei u tila van thui pe uh. 16 He capat he na tae u coengah Laudisia khaw kah Khrihcabu hue khaw tae sak u van. Tetih van la nangmi lawng na tae ham capat te Laudisia khaw kah maya manau thli lawng nangmi ham avan pat van ai. 17 Tecoengah, Arkhipas te, “Bawipa kah bii dawngah nang m'peek bii te a coeng toe van bi seh tila van thui pe uh.” 18 Pawl lawng kan toei u ti he kamah kut roe oen he capat he ka thut. Thiirui oen n'khih u he van hilh u boel! Pathen lungvatna nangmi sawah awm hawn seh.
1 Pawl, Silas oen Timote lawngah Pa Pathen oen Bawipa Jesuh Khrih kah thlaang la aka awm Tesalon khaw kah khrihcabu tengah ca kavan pat u. A lungvatna, ngaimawngna tah nangmi tengah awm hawn seh. 2 Nangmi boeih ham Pathen tengah awmngaih ciil ka thui u poepa tih ka thangthuina u vengah khaw nangmi te kan poek u yoeyah. 3 Metihtiah, nangmi lawng na oengna te biibina dawngah na tuengsakna, namami kah lungna lawngah bii ruh m'bi sakna, mami Bawipa Jesuh Khrih ah aka cak ngaiuepna na khueh u te Pa Pathen haiah ka hilh u nawh. 4 Maya manau thli, Pathen lawng nangmi n'lungna tih amah kah thlaang la awm ham n'tuek u poen. 5 Metihtiah Awlthang Theen te nangmi tengla kavan khuen u vengah awl bueng nawh tih huham tharana oen Ciim Muithla khaw, awltak asoengna te asoepa kavan khuen haih poen. Nangmi tengah ka awm u vengkah kaimi kah khawsakna te na ming u poen; te tah nangmi lawng na theenna ham ni. 6 Nangmi lawng kaimi oen Bawipa kah moeiboe te na oett u, patangraina yahawh hlang na tawng u vengah khaw, Ciim Muithla tengkah aka law awlthang te awmngaih oen na do u. 7 Tedawngah nangmi tah Macidonia oen Akhaia khaw kah aka oeng thlaang boeih ham oett koeila na awm u poen. 8 Metihtiah nangmi teng kalawng aka cet Bawipa kawng awlthang te Macidonia oen Akhaia ram pum bueng ah nawh tih nangmi lawng Pathen na oengna kawng awlthang lawng te peng tawm ah cet khok poen. Tedawngah kaimi lawng thui ham ngoe tlaih nawh. 9 Nangmi tengah kamyin la ka law u vengkah kaimi metila nan do nan dan u kawng te khaw, kutsaimuei te na hoett u tih Pathen te metila na pan u tite khaw, aka soeng tih aka hing Pathen kah bii te bi ham oen ah, 10 Vaan kalawng aka law ham a Capa na lamtoen u te khaw ahimi boeih lawng a thui u. A Capa Jesuh tah duekna kalawng a thawh sak tih aka law ham koei Pathen thinsana kalawng mami loeihsakkung ni.
1 Maya manau thli, nangmi tengah yin la ka law te apoei-oep nawh ni tite namami lawng na ming u. 2 Tesalon khaaw ah nangmi tengla ka law thlan vengah kaimi he Filipi khaaw ah metihtlukla n'thena u tih raina mai awm cakhaw, amah teng kalawng aka law Awlthang Theen te nangmi tengah thui hamla Pathen lawng kaimi he thincakna m'peek u. 3 Nangmi tengah kaimi lawng reenna kavan bih u he asoeng nawh oen kawpoek ciimna nawh oen nawh tih, a-u khaw thailatna ham te ka ngaih u nawh dawngah ni. 4 Pathen lawng kaimi he n'noemcai tih ueppang koei, tueng-aleng a ti dawngah Awlthang Theen thui ham bii m'peek u tih amah lawng thui sak ham a ngaih angla te ka thui u. Kaimi lawng thlaang kah kawtawngna te ka yawm u nawh tih kaimi kah poekna noekdakkung Pathen kaw te tawng ham ni ka yawm u. 5 Nangmi lawng na ming u angla kaimi lawngah nangmi te koehna awl ka thui u nawh, apueh ngaihmoekna te dahkhoepna awl khaw ka thui u nawh, Pathen tah kaimi kah sausi la awm! 6 Kaimi lawng nangmi tengkah khaw, thlaangtloe tengkah khawseh koehna te dang ham ka yawm u nawh. 7 Khrih kah celtuih la ka awm u dawngah te ang te nangmi tengah ka thoehtham thai ngoen ta, tede nangmi tengah ka awm u vengah te a manu lawng a ca a nau thli a dawm athlai angla nangmi te kawdaw boe-ngaaina oen kan dawm u. 8 Kaimi lawngah nangmi te kan lungduetna dawngah Pathen tengkah Awlthang Theen bueng ohla kamami kah hingna pateng khaw peek hamla te oepsoehla ka awm u. Nangmi te kan lungduetna tangkiik u mai! 9 Maya manau thli, kaimi lawng thatlawh thaboepla bii ka bi u te na hilh nawh cawini! Pathen tengkah Awlthang Theen nangmi teng ka thui vengah te nangmi kah thalrih la ka awm nawh ham yiin, daai bii ka bi u. 10 Nangmi oengca thli oen kaimi kah benbaw benpangna he aka ciim, aka doeng tih thawlhpalhna a awm nawh te nangmi khawseh, Pathen khawseh kaimi kah sausi la na awm u. 11 Ana pa lawng a ca thli te a dawm a thlai angla nangmi pakhat rip te kaimi lawng kan dawm kan thlai u te na ming u. 12 Kaimi lawng nangmi te thathluena awl, ngaimawngna awl kavan thui u tih amah Ram oen ah ruep-awmna te paang hamla nangmi khuekung Pathen awmngaihna koei la na hingna u ham kan thuituen u. 13 Kaimi lawngah Pathen tengah awmngaih ciil ka thuina kawng atloe awm hun. Kaimi lawng Pathen awl te nangmi tengla kavan khuen vengah thlaanghing kah awl angla nawh tih, Pathen kah awl angla te na hutung u tih na do u, te tah ataktang ni. Metihtiah aka oeng nangmi tengah Pathen lawng bii a bi. 14 Maya manau thli, Judia ram kah Pathen khrihcabu boeih oen Khrih Jesuh kah thlaang thli lawng a tawng u te ang van te, Judah thlaangphun lawng ahimi te a heem a tek van angla nangmi khaw namami ram khui thlaang thli kah heemtekna patang te na khang u. 15 Judah thlaang thli tah Bawipa Jesuh oen tawngha thli te a ngawn u tih mami heemtekkung la khaw awm u. Ahimi lawng metihtlukla kaw a the sak! Thlaang boeih kah raal la awm u. 16 Kaimi lawngah thlawnna awl Gental thlaang thli tengah ka thui u te toeng sak hamla ahimi lawng a yawm u. He tila te ahimi lawng thawlh poepa u tih amami kah thawlhna boeih te asoep sak u. 17 Maya manau thli, thinkaw lungbui oen tah m'pekbo u nawh de pumtaksa oen kawlkalh ah m'pek u vengah he kan ngaai tangkiik u tih nangmi oen huh u koep ham te ka yawm u! 18 Nangmi tengah law koep ham ka ngaih u. Kamah he law koep ham vaikhat cang nawh ka yawm de Seitan lawng n'kang mangkhak. 19 Ataktang la, a-u thlaangtloe ohla Bawipa Jesuh a law koep vengah amah haiah taana oen m'pai u vengah tah nangmi he ni kaimi kah ngaiuepna, awmngaihna oen thangpawmna la na awm u ai. 20 Kaimi kah ruep-awmna oen awmngaihna tangtang tah nangmi ni!
1 Aboetna atah ka kaw tamte u tlaih nawh tih mami bueng he Aaten khaaw ah awm u mai sih tila awl ka khueng u coengah, 2 Khrih kawng Awlthang Theen thuina ah kaimi oen Pathen bii aka bi haih van, mami kah manau Timote te kavan tuih u. 3 He ang heemtekna patang na khang u dawngah nangmi a-u khatca khaw hu benla mel koep nawh ham, nangmi te tha thlue sak ham oen ah nangmi kah oengna te cak sak hamla ahih te kavan tuih u. Mami lawng heemtekna patang n'khang he Pathen kah kawngaihna avaang athal van ni tite namami lawng na ming u. 4 Nangmi tengah ka awm u vengah te mami lawng heemtekna patang n'khang ai tite kavan thui oepsoeh poen; ka thui angla thoeng khoet tangtang tite na ming u. 5 Tedawngah ni Timote kavan tuih. Ka kaw tamte tlaih nawh tih nangmi kah oengna kawng te ming ham ka ngaih dawngah ahih te kavan tuih. Nangmi te Seitan lawng n'suek u vetih kaimi kah bii boeih te apoeila coengg hau ai tite ka lakueng. 6 Tahe ah Timote tah va meel koep poen tih nangmi kah oengna oen lungna kawng awlthang te avan khuen. Kaimi he atheen benla na poek poepa u tih kaimi lawng nangmi te huh kan ngaih u van angla nangmi lawngkhaw kaimi he huh ham na ngaih u van tite avan thui. 7 Tedawngah maya manau thli, kaimi lawng raina oen thekhana ka tawng cakhaw nangmi kah kawng lawngah ka tha avan thlue sak, 8 metihtiah nangmi lawngah Bawipa oen pumkhatla hingna dawngah acakla na pai u poen tih tahe ah mami he n'hing tangtang poen. 9 Tahe atah nangmi kawngah Pathen tengah awmngaih ciil n'thui thai poen. Nangmi kawngah awmngaihna amah haiah n'huh u dawngah amah tengah awmngaih awl ka thui. 10 Nangmi te pumpakla kan huh thai tih na oengna dawngah angoena te tawm athap hamla thinkaw tang oen yiin daai ka bih poepa. 11 Nangmi tengah kaimi ka law thaina ham mami kah Pa Pathen oen Bawipa Jesuh lawngah lawngpui van roek hawn seh! 12 Nangmi khat oen khat khawseh, thlaang boeih na lungna u te khawseh kaimi lawng nangmi kan lungna abo van angla Pathen lawng van roeng sak tare seh. 13 He tila nangmi te amah lawng tha avan ra sak vetih Bawipa Jesuh amah kah thlaang boeih oen a law vengah nangmi tah Pa Pathen haiah thlaangsoep thlaangciim la na awm u ai.
1 Aboetna ah maya manau thli, Pathen kawhoena ham metila na hing u ham a awm tite kaimi tengah na cang u poen. Kaimi tengkah na cang u angla te na hing u hamla awm tih yahawh ngaaila na hingna tare ham Bawipa Jesuh miing oen ah kan ceel u. 2 Bawipa Jesuh kah saithaina aana oen thuituenna kan peek u te na ming u. 3 Pathen lawng nangmi te ciim sak ham oen ah hutaa tawngpa thawlhna cipp muelmang sak ham a ngaih. 4 Nangmi tawngpa boeih lawngah aka ciim tih hinyah koei la na yu oen benbaw benpang ham te ming uh, 5 Pathen aka ming nawh thlaang hurthok angla pumsa hue-ngaihna oen hing u boel. 6 Tecoengah he kawngah he a-u lawngkhaw khrihca paya laikoei sawah thawlhpalhna sai boel seh, koeih vaih nawh la proeih mak boel seh. Te tila aka sai boeih tah Pathen lawng dan a peek ai tite kavan thui u tih nangmi te ngaithuenna kan peek u poen. 7 Pathen lawng mami he cuk-halhna dawngah bawlneeng sak hamla n'khue nawh tih aciim acaihla awm ham ni n'khue u. 8 Tedawngah a-u khaw he kah cangpueina he aka vai nawh tah thlaanghing te hoett nawh, tede amah kah Ciim Muithla pekung Pathen te ni a hoett poen. 9 Nangmi lawng aka oeng na paya laikoei thli lungna ham a kawng te capat kavan thut ham ngoe nawh. Nangmi khat oen khat lung u ham Pathen lawng namami te n'cang puei u poen. 10 Nangmi lawngah ataktangla Macidonia rampum kah maya manau boeih te na lungna u poen. Tedawngah maya manau thli, te tila na lungna u tare ham kan coep kan ceel u. 11 Kavan thui u poen angla acuep amueihla khawsak ramsak ham poek uh, namami kah bungkhutna dang ham na bii na lawh te tluep ngaithuen uh. 12 Te atah aka oeng nawh thlaang thli lawngah n'hinyah u vetih na ngoena boeih ah te thlaangtloe sawah pangtung ham ngoe manawh. 13 Maya manau thli ngaiuepna aka khueh nawh thlaang thli angla nangmi na kaw a the nawh ham aka duek thli kawng awltak te nangmi ming sak hamla ka ngaih. 14 Jesuh tah duek tih tho koep tite mami lawng n'tangna u, tedawngah amah te oeng ruila a ka duek boeih tah Jesuh oen haih ah Pathen lawng avan khuen koep ai tite mami lawng n'tangna. 15 Tahe ah nangmi kan cang puei u he tah Bawipa kah cangpueina ni. Bawipa a lawna khawhin ah mami aka hing hue lawngah he aka duek thli te n'khall lettat manawh. 16 Metihtiah, awlpeekna paang awl, vanthlaang ukkung kah paang awl, Pathen kah pengsara awl oen Bawipa amah te vaan kalawng va rum thuk ai Khrih oeng ruila aka duek thli te lamhala tho u vetih, 17 tecoengah teveng tue ah aka hing mami tah khawhi ah Bawipa oen huh u hamla muui dawngah ahimi oen n'tun haih ai. Te tila te mami tah Bawipa oen n'awm haih poe poen ai. 18 Tedawngah he awl oen ah he nangmi pakhat oen khat thaphawh uh.
1 Maya manau thli, he ang thaihu a thoengna ham atue atang oen khawhin kawng he nangmi tengah ca thut ham ngoe nawh. 2 Metihtiah Bawipa a lawna Khawhin tah khawyiin ah thlaanghuuen angla law ai tite nangmi lawng atheenla na ming u. 3 thlaang thli lawngah, “Soeprep boeih tah ding asuek tih ngaimawng ngaitoela awm,” a ti u vengah bawtbet khawlai maiah raina lawng ahimi te a tlaak thil ai! Tattloel hutaa ca-awm tlawhna lawng kawlkalh ah a pha angla te awm vetih a-u thlaang khaw deem manawh. 4 Tede, maya manau thli, nangmi tah yiinna khuiah na awm u nawh dawngah te khawhin lawngah nangmi te thlaanghuuen angla n'let sak manawh. 5 Nangmi boeih tah aangna dawngkah thlaang, khawthaih thlaang la na awm u. Mami he tah khawyiin thlaang, yiinna thlaang nawh ni. 6 Tedawngah mami tah thlaangtloe angla ihdut ham awm nawh, mami lawng hinghang u silang huertuela awm u sih. 7 Thlaang he tah khawyiin ah ni a ih u, khawyiin ah ni ahimi yuu a ruui u. 8 Tede mami tah khawthaih thlaang ni, huertuela awm u sih. Mami lawng oengna oen lungna te kahkawng rangphaw la daan u silang tah mami kah ngaiuep thlawnna te thiilumuek la muek u sih. 9 Pathen lawng amah kah thinsana patang khang sak hamla mami he n'tuek nawh, mami kah Bawipa Jesuh Khrih rang oen thlawnna te paang ham ni n'tuek u; 10 amah a law vengah mami lawng duek ah khaw-seh, hing ah khaw seh amah oen hing haih ham ahih tah mami ham duek. 11 Tedawngah nangmi lawng tahe ah na sai u angla te khat oen khat thaphawh u langtah khat oen khat bawmcem uh. 12 Maya manau thli, khrihca hingna oen nangmi thuituen tih lawngpui aka nueh, nangmi tim ah bii aka bi thlaang thli te na hinyah u ham reenna kavan bih. 13 Ahimi kah biibina dawngah te asangla hinyahna lang lungna uh. Nangmi khat oen khat roeproeicala awm uh. 14 Maya manau thli, nangmi lawngah thayong thlaang te ngaithuenna pe uh, riyawp thlaang te thincakna pe uh, tha aka yoek thlaang te bawmcem uh, thlaang boeih tengah na kaw daw sak ham kan uen u. 15 A-u lawngkhaw athe te athe van oen thung u boel, khat oen khat sawah khawseh, thlaang boeih sawah khaw seh theenna te sai hamla poek yoeyah uh. 16 Awmngaih poepa u lah, 17 boet ohla thangthui uh, 18 soeprep boeih ah awmngaih ciil thui uh, Khrih Jesuh oen pumkhatla na hingna dawngah he tila hing hamla Pathen lawng a ngaih. 19 Ciim Muithla te kanghalh u boel; 20 Muithla kah bawnghorhna oen a thui awl te ngaai lakna ohla awm boel. 21 Soeprep boeih te noekdak uh, atheen te lo uh, 22 athe thaihu boeih te reel-aram uh. 23 Ngaimawngna pekung Pathen lawng soeprep ah n'ciim sak u hawn seh, mami kah Bawipa Jesuh Khrih a law vengah nangmi kah pum boeih, na muithla, na hingna, oen pumtaksa te amah lawng kuem selang tah thawlhpalhna boeih kalawng n'loeih sak seh. 24 Nangmi khuekung te tah uep-awm la a awm dawngah te tila avan sai ai. 25 Maya manau thli, kaimi ham khaw thangthui uh. 26 Aka oeng boeih te boenhui angla lungna oen toei uh. 27 Bawipa kah saithaina aana oen ah he capat he aka oeng thlaang boeih tengah tae pe ham reenna kavan bih. 28 Bawipa Jesuh Khrih kah lungvatna tah nangmi boeih sawah awm hawn seh.
1 Pawl, Silas oen Timote lawngah mami kah Pa Pathen oen Bawipa Jesuh kah thlaang thli, Tesalon khaw kah khrihcabu tengah ca kavan pat u. 2 Mami kah Pa Pathen oen Bawipa Jesuh Khrih lawngah nangmi te lungvatna, ngaimawngna m'pe hawn seh. 3 Maya manau thli, nangmi hamla Pathen tengah awmngaih ciil ka thui u poepa. Te tila awmngaih ciil thui te aka soeng ni, metihtiah nangmi kah oengna tah roeng hang tangkiik tih nangmi pakhat oen khat na lung u te a roeng hang tare dawngah ni. 4 Tedawngah nangmi kawng te Pathen kah khrihcabu thli tengah kamami roe lawng ka thangpawmna u. Nangmi lawng heemtekna oen patangraina na khang tangkiik u de na ueh thai u tih na oeng u dawngah kaimi lawng ka thangpawmna u. 5 He ang thli boeih lawngah Pathen kah awlcekna tah doeng tila a tueng sak tih nangmi tah Pathen Ram oen ah aphu ating-atawkk thlaang la na coengg u ai. Te ham ni nangmi lawng patangraina na khang u. 6 Pathen lawngtah asoeng ni a sai; nangmi patangraina aka pe thli te patangraina a peek van ai. 7 nangmi patangraina aka khang thli oen kaimi he khaw hoeikhangna te m'peek ai. He patangraina tah Bawipa Jesuh lawng amah kah thara vanthlaang thli oen ah, 8 hairawng haialh oen a law vengah, Pathen aka hoett thlaang thli oen mami kah Bawipa Jesuh Khrih kawng Awlthang Theen aka vai nawh thli te dan a tat ai. 9 Ahimi lawng dungyan rawkna, dantat patangna te a khang u ai, Bawipa lawng amah kah thlaang boeih teng kah ruep-awmna oen ah amah aka oeng thlaang boeih tengkah hinyahna te dang ham, 10 a lawna khawhin ah ahimi tah Bawipa teng kalawng ah thek u boeih ai. Nangmi tah kaimi lawng ka phawng awlthang te na tangna u dawngah Bawipa te ruep-awmna oen hinyahna aka pe thlaang thli tim ah na thuum u ai. 11 Te kawngah ni nangmi ham kaimi ka thangthui u poepa. Amah lawng nangmi n'khuena oen ating atawkk la na hingna u thai ham kaimi lawng mami kah Pathen tengah ka bih u. Pathen lawng amah kah huham tharana oen ah nangmi lawng na ngaih boeih theenna te van soep sak selangtah oengna oen bii na sai te van tluep sak seh. 12 He tila te mami Bawipa Jesuh miing lawngah nangmi rang oen ah ruep-awmna te a dang vetih, mami kah Pathen oen Bawipa Jesuh Khrih kah lungvatna rang oen nangmi lawngkhaw amah teng kah ruep-awmna te na dang u van ai.
1 Maya manau thli, mami Bawipa Jesuh Khrih a lawna oen amah oen thik at la tun haihna kawngah; 2 yoeikooek doek la na kawpoek thumhang sak u boel, Bawipa kah Khawhin tah law coeng poen tila aka thui thli kah awl lawngkhaw nangmi te khup plet la n'sai u boel seh tila kan uen u. Te tila a thui awl te thlaang khatsut lawng kaimi kah thuisut awl angla khaw seh, kaimi kah cathut awl angla khawseh a poek u mai ai. 3 Nangmi te a-u lawngkhaw n'thaina u boel seh. Metihtiah aboetna koek Raal kahna apha thlantoe, hell ah aka tla ham Thlaang The Pui te avan pha thlan khui tah te Khawhin te van pha manawh. 4 Ahih lawngah pathen a ti boeihboeih oen bokna thaihu boeih te a oel khak vetih amah oen amah te, te thli boeih sawah awm ai. Ahih lawngah Pathen kah Tempal bok-im khuila pateng kuun vetih ngawl ai, ‘kai tah Pathen ni,’ ti ai. 5 Nangmi lawng na hilh poen aw? Nangmi tengah ka awm vengah he ang thli boeih he kavan thui poen de ta. 6 Tahe ah he he a thoeng nawh ham ah kanghalhkung pakhat awm, te tah ame ang tite nangmi lawng na ming u. Tecoengah atue apha vengah Thlaangthe Pui tah va thoeng ai. 7 Ahuepla Thena lawngah bii a bi poen, tede kanghalhkung te khoe la a awm thlan atah Thlaangthe Pui te va thoeng thlan ai. 8 Tecoengah Thlaangthe Pui te phumpho ai, Tede Bawipa Jesuh a law vengah a kaa khuikah a hill oen Thlaangthe Pui te a ngawn vetih amah kah ruep-awm aangna oen a phe ai. 9 Thlaangthe Pui lawng Seitan kah huham tharana oen law vetih asoeng nawh kawpoekraina oen kawpoekrai-miknoekna phun soeprep a sai vetih, 10 aka rawk tih ha-ata ham koei thlaang thli sawah athe soeprep thai alatna te a hawna ai. Ahimi lawngah thlawnna hamla awltak te do u nawh tih a lungna u nawh dawngah ahimi boeih tah ha-ata boeih ai. 11 Tedawngah asoeng nawh te ahimi lawng a tangna u hamla ahimi tim ah bii aka sai la Pathen lawngah thawlhpalhna huham tharana te a tuih pe tih asoeng nawh te ahimi lawng a tangna u. 12 Awltak aka tangna nawh tih thawlhna dawngah awmtheen aka boenn thlaang boeih tah awlcekna te a dang ai. 13 Bawipa lawng a lungna maya manau thli, nangmi kawngah kaimi lawng Bawipa tengah awmngaih awl thui poepa ham awm. Metihtiah Muithla kah huham tharana rang oen Pathen kah aciim thlaanghing la coeng ham oen ah nangmi lawng awltak te na oengna rang oen thlawnna te na dangna u ham Pathen lawng nangmi te lamhacuekla n'tuek u. 14 He tila thlawnna dang ham kaimi lawng kavan thui Awlthang Theen oen ah nangmi te Pathen lawng n'khue u; mami Bawipa Jesuh Khrih kah ruep-awmna te dang ham oen paang van ham ni n'khue. 15 Tedawngah maya manau thli, kaimi kah phungthuina dawngah khawseh, capat dawngah khawseh pahih bok dawngkah awltak kan cang puei u te phoeih mangkhak u langtah acakla pai uh. 16 Mami he n'lungna tih aboet nawh thincakna oen acak ngaiuepna te a lungvatna oen pekung mami kah Bawipa Jesuh Khrih amah oen mami kah Pa Pathen lawngah, 17 atheen te na sai u tih awltheen te thui poepa ham thincakna oen ah tharana te m'pe hawn seh.
1 Aboetna ah maya manau thli, nangmi tim ah Pathen awlthang te apuung ataai van angla, aloela apuungna ham thangthui uh. 2 Thlaang boeih lawng awlthang te a tangna u nawh dawngah, thlaangthawlh oen thlaangthe thli kut khui kalawng kaimi he Pathen lawng n'loeih sakna ham khaw thangthui uh. 3 Tede Bawipa tah uep-awm thlaang la a awm dawngah nangmi te tha avan ra sak vetih Thlaang The Pui kah kut khui kalawng n'phungtu ai. 4 Bawipa lawng kaimi he nangmi te ueppangna ham m'peek tih kan uepna, kaimi lawng kavan thui te tahe ah na sai u angla hailam ben ah khaw na sai poe u poen ai tila ka tangna. 5 Nangmi lawng Pathen kah lungna te khawseh, Khrih kah peek uehthaina te khawseh yaakming tare ham ah Bawipa lawng nangmi te m'mawt hawn seh. 6 Maya manau thli, kaimi kah thuituenna awl te aka vai nawh tih thayong tha-ngak la aka awm maya manau boeih te nangmi lawngah relram hamla mami Bawipa Jesuh Khrih miing oen ah kaimi lawng awl kan peek u. 7 Kaimi lawng bii ka bi u van angla nangmi lawng na bi u van ham awm tite namami lawng atheenla na ming u. Nangmi tengah kaimi ka awm vengah te ka tha yong sut nawh. 8 Kaimi lawng aphu peek ohla bawmcemna te ayoela ka lo u nawh. Thatlawh thaboepla bii ka bi u; kaimi he nangmi pakhat khat kah thalrih la awm nawh ham khawyiin khawthaih bii ka bi u. 9 Kaimi lawng te tila ka bi u te nangmi tengah bawmna bih thaina te ka khueh u nawh dawngah moenih ta; kaimi lawng te tila ka bi u te tah nangmi lawng oett ham oen vai hamla ni. 10 Nangmi teng ka awm u vengah te kaimi lawngah, “A-u khaw bii aka bi nawh tah buh cah u boel,” kan tina u. 11 Te tila kan tina u te tah nangmi timkah thlaang khatsut tah thayong tha-ngak la awm u tih bii khaw sai ohla thlaangtloe kah biibi te rawlraak thlaang la awm khoeng tite ka yaak u dawngah ni. 12 Te tila aka awm thlaang thli te acuep amueihla awm ham oen ah amami kah bungkhutna bii te bi ham Bawipa Jesuh Khrih miing oen ah ngaithuenna awl ka peek. 13 Tede, maya manau thli, nangmi lawngtah atheen thaihu sai te ngak u boel. 14 He kah capat khuiah aka awm awl he aka vai nawh thlaang khaw awm mai ai. Te ang thlaang te a awm atah noek u langtah ayah laat la a awmna ham ahih oen te benbaw benpang u boel. 15 Tede, ahih te raal angla tah van ngaai u aih boel; maya manau pakhat van angla te thuituen uh. 16 Ngaimawngna kungpui Bawipa amah lawngah metuek tue vengah khawseh along a-im phun soeprep oen ah ngaimawngna m'pe hawn seh. 17 He capat he kamah kut roe oen kavan thut: Kai Pawl lawngah kan toei u. Ka capat roekk dawngah he tila mik-noekna ka thut; he tah kamah kah cathut phung poen ni. 18 Mami Bawipa Jesuh Khrih kah lungvatna tah nangmi boeih sawah awm hawn seh.
1 Mami kah Thlawnkung Pathen oen mami kah ngaiuepna Khrih Jesuh rang oen ah Khrih Jesuh kah celtuih la aka awm Kai Pawl lawngah: 2 Oengna ah ka capa tangtang la aka awm Timote nang hamla ca kavan pat. Pa Pathen oen Bawipa Jesuh Khrih lawngah lungvatna, reenna oen ngaimawngna te m'pe hawn seh. 3 Macidonia ram la ka ceh vengkah awl kan uen angla te Efesa khaaw ah na awm hamla ka ngaih. Thlaang khatsut lawng Efesa khaaw ah asoeng nawh oengna a cang puei u tih ahimi te na toeng sak ham awm. 4 Awlpuungna bueng aka thoeng sak ciil awl thli oen aka boet nawh nukaw pakaw patuer thli thoepna te ang thli te a toengna u ham thui peh; te ang thli oen ah te oengna oen ming ham koei la aka awm Pathen khawkhanna te n'sai thai nawh. 5 He tila awl kan peek he mengtengna tah athetheen mingna kawpoek ciim oen oengna tangtang oen ah thinkaw ciim dawng kalawng lungna te a thoengna ham thaphawhna ni. 6 Thlaang khatsut lawngtah he he a hoett u tih alawng ala nawh awlpuungna benla cet u. 7 Ahimi lawngah Pathen kah phungawl cangpueikung la coengg ham tah a ngaih u, tede ahimi lawngah amami kah awl-thui te khaw yaakming u nawh tih aka ming ceet angla a thui thaihu kawng te khaw ming u nawh. 8 Phungawl he atawng aleengla hawna koei ah n'hawna atah theen tite mami lawng m'ming u. 9 Ming ham tah phungawl he thlaang theen thli hamla sai nawh tih phungawl phekung thli oen lumlai aka hu thli, Pathen aka ming nawh thli oen thlaangthawlh thli ham, bokna ben oen muithla ben tu la aka sak nawh thli ham, a manu oen ana pa aka ngawn thlaang thli ham, thlaang aka ngawn thli ham, 10 Khawboe the thlaang thli ham, hutaa tawngpa thawlhna aka sai thlaang thli ham, tlangsum caak ngaih ah thlaang aka tu thli ham, hoem thui thli oen asoeng nawh sausi la aka pai thli ham, asoeng oengnakungpui te aka kalh thlaang thli ham ni a sai pe. 11 Te ang cangpueina te tah kai lawng ka thui ham koei la m'peek awlthang theen dawngah te awm tih, ruep-awm oen theenduet Pathen tengkah Awlthang Theen ni. 12 Bii ka bina dawngah tharana pekung Khrih Jesuh mami kah Bawipa tengah awmngaih ciil ka thui. Kai he amah kah bii bi hamla tueng aleng tila a poek tih bii m'peek dawngah ka uem tangkiik. 13 N'cui vengah ahih te kai lawng athela ka thui, ka heem ka tek tih thekha la ka sai, kai lawng oengna ka khueh nawh dawngah n'tu ka sai ti khaw ka ming nawh, tede Pathen lawngtah kai he n'reen. 14 Mami kah bawipa lawngah amah kah lungvatna te yahawh hlang la ka sawah avan lun tih oengna oen lungvatna te m'peek. Khrih Jesuh oen pumkhat la awmna rang oen ah te ang thli te mami kah koe-ava la awm poen. 15 Khrih Jesuh tah thlaangthawlh thlawn ham dilai la va law ti he tah aka soeng tangtang awl la awm tih lawh koeloe ham koei oen tangna koei ni. Kai tah thlaangthawlh boeih lak ah athe khuet ni; 16 tede Pathen lawng kai he n'reen tih thlaangthawlh boeih lak ah kai aka the khuet sawah kawdawna a khueh he tah hailam ben ah amah aka oeng tih dungyan hingna aka dang ham koei thlaang boeih kah miknoekna ham ni. 17 Dungyan Sengpahrang, aka duek thai nawh oen mik oen huh thai nawh pakhat bueng la aka awm Pathen tengah hinyahna oen ruep-awmna tah ayoeyah la awm hawn seh! Amen. 18 Ka ca Timote, n'hu vengah tawngha lawng nang kah kawng a thui angla te na tengah awl kan peek. Te awl te atheenla raal kahna ham awva la hawna lang na oengna, athetheen mingna kawpoek ciim te cak sak. 19 Thlaang khatsut lawng athetheen mingna kawpoek te n'tu la sak u nawh tih amami kah a oengna te a phe u. 20 Te thlaang thli tim ah te Himanias oen Alekzandar khaw thuum hih van tih te rawi te Seitan kut ah ka tloeng tih dan ka peek poen; te tila te ahih rawi lawng Pathen thangthe la a thui te toeng hamla a cang hih ai.
1 Tedawngah lamhacuek la reenna oen awl kan uen tah, thlaang boeih ham thangthuina, reenbihna, awmngaih awl thuina te Pathen tengah sai uh. 2 Mami lawng ading asuekla awmna ham, Pathen hinyahna oen ngaimawngla khaw sak tih khawboe ramlang theenna oen awm thaina ham ah sengpahrang thli oen saithaina aana aka khueh boeih ham thangthui uh. 3 He tah aka theen tih mami Thlawnkung Pathen kah kawhoena ni. 4 Thlaang boeih he thlawn la awm sak ham oen ah awltak te ming sak hamla a ngaih. 5 Metihtiah Pathen tah pakhat bueng awm tih Pathen oen thlaanghing laklaw ah roeproeina saikung thlaanghing boeih tlang ham hingna pekung thlaang Khrih Jesuh pakhat bueng awm. 6 Te tah atue atang apha khuek vengah Pathen lawng thlaang boeih thlawn ham a ngaih te tueng sakna ni. 7 Tedawngah ni oengna oen awltak kawng awlthang te phawng ham oen ah Gental thlaangphun te cangpueikung celtuih la kai he n'tuih. 8 Pathen bokna huen roekk ah tawngpa hue lawng a thangthui u ham ka ngaih. Pathen tengah pum aka pe tawngpa hue lawngah thinsanna oen awlpuungna awm ohla thangthui vengah amami kut te a thueng u thai. 9 Hutaa hue lawngkhaw akhoek anoen atheen khoeng la hinaak himbai te a buen anaak u ham ka ngaih; samtoel samveh te khaw alawnha aihla thloeih athlam ohla, sui kaawntheen oen khaw, latha kaawntheen oen khaw, phutlo hi-acuu oen khaw thoekcau u aih boel seh. 10 Tede bokna ben ah thinkaw pengnel hutaa hue lawng a sai ham tueng angla te thaihu theen saina oen thoekcau u seh. 11 Hutaa hue lawng awm duem selang tah awlngaaina oen cang u seh. 12 Ahimi te cangpueikung la awm ham oen ah tawngpa sawah ukna aana khueh ham khaw ka ngaih nawh; Ahimi te dipsipla awm duem seh. 13 Metihtiah Adam te a sai lamha coengah ni Evi te a sai. 14 Tedawngah thailatna la aka awm te Adam nawh ni; hutaa ni thailatna la awm tih Pathen Phungawl te a phe. 15 Tede hutaa lawngah acuep amueih la oengna, lungna oen ciimna dawngah acakla a awm atah camoe cuunna rang oen ah thlawnna a dang ai.
1 Thlaang pakhat lawng khrihca mawtkung la awm ham a ngaih atah ahih lawng biibi theen a ngaih ni tila a thui te soeng tangtang. 2 Khrihcabu mawtkung tah thawlhpalhna aka awm nawh tih a yu khat bueng aka khueh thlaang, mah oen mah aka uk u thai thlaang, mah oen mah kuemsuem thai thlaang, adoengla khaw aka sa thlaang, hinyah koei thlaang; kamyin kamlai aka lungna thlaang, thlaangtloe te riingtuuk thaihoen thai thlaang seh. 3 Ahih tah yuu aka ruui nawh tih boethe halang nawh thlaang, boe-ngaai kawdaw thlaang, tangka aka ngaih soeh nawh thlaang seh, 4 amah imkhuikaw ham atheenla khawkhanna aka sai thai oen a ca anau thli lawng hinyahna oen awl a ngaai pe thlaang seh. 5 Metihtiah amah imkhuikaw ham khawkhanna metila ka sai ai tite a ming nawh atah Pathen kah khrihcabu te metila a doen acaang thai ai? 6 Ahih tah oengna dawngah kawpoeksoepna aka khueh thlaang seh, tetih atah Seitan angla ahih tah oekthloen u nawh vetih awlcek la awm manawh. 7 Ahih tah khrihcabu khuiah aka awm nawh thlaang lawngkhaw a hinyah thlaang seh, te atah a thang the nawh vetih seitan kah dong dawngah te man manawh. 8 Khrihcabu khuikah bawmkung thli khawseh khawboe ramlang aka theen tih kawpoek ciim aka khueh thlaang seh; ahimi tah yuu aka aw nawh tih tangka ngaihmoekna aka khueh nawh thlaang seh; 9 Ahimi tah athetheen pekbo thaina kawpoek ciim oen oengna awltak aka dung te acakla aka phoeih thlaang la a awm ham awm. 10 Ahimi te lamhacuek ah noekdak la awm vetih cawttbauh koei a awm nawh atah bi u seh. 11 A yu thli khaw khawboe ramlang aka theen, thlaang theet awl aka thui nawh, mah oen mah aka uk u thai, soeprep ah thlaangdoeng la aka awm thlaang seh. 12 Khrihcabu bawmkung tah a yu khat bueng aka khueh tih a ca anau thli oen imkhuikaw ham atheenla khawkhanna aka sai thai thlaang seh. 13 Amami kah bii te atheenla aka bi bawmkung thli tah a hinyah u vetih Khrih Jesuh a oengna kawng te raltheenla a thui thai ai. 14 Nangmi ham capat kavan thut vengah he nangmi tengah ayuela law ham oen nangmi te huh hamla ka ngaiuep. 15 Tede ka law haai nawh oh atah aka hing Pathen kah khrihcabu, tuungtang la aka pai tih awltak aka hing puei, Pathen imkhuikaw ah mami lawng metila khaw n'sak ai tite he capat lawngah avan thui ai. 16 Mami kah bokna dawngah aka awm alenduet awlhuep he a-u lawngkhaw oelhtaih thai manawh; Ahih tah thlaanghing pumsa la va thoeng, soeng tangtang tite muithla lawng a tueng sak, vanthlaang thli lawng a huh u, Ahih kawng te thlaangphun boeih tengah a thui u tih dilai peng tawm thlaang lawng a oeng u, tecoengah ahih tah vaan la luui hang poen.
1 Hailam ben atah thlaang khatsut lawngah oengna te a hoett u ai tila Muithla lawng aciimphanla a thui; ahimi lawngah hoem thui muithla awl te a ngaai u vetih raaithe kah cangpueina te a vai u poen ai. 2 Te ang cangpueina te tah thiiling haialh oen a ung sak angla athetheen pekbona kawpoek aka duek moelh sut thlaangthaipalat hoem thui hue lawngah a puung adaw sak u. 3 Te ang thlaang thli lawngah yu lawh vaa sak nawh ham oen khatsut caak awkk te yeh ham a cang puei u. Tede aka oeng thlaang thli oen awltak aka ming tangte thlaang thli lawngtah awmngaih oen thangthui coengah caak hamla caak awkk thli te Pathen lawng a sai. 4 Soeprep boeih Pathen lawng a sai he tah theen; khat khaw hoett ham awm nawh, tede soeprep boeih he awmngaih thangthuina oen do ham awm, 5 metihtiah Pathen awl lawngkhaw, thangthuina lawngkhaw Pathen kah do ham koeila te a sai. 6 He kah thuituenna thli he maya manau thli tengah na thui pe atah nang tah Khrih Jesuh kah atheen tuihyoeihthlaang la na awm ai; namah oen namah muithla ben na cawm na cah u van angla te oengna awl oen aka soeng cangpueina namah lawng na vai te hawna lah. 7 Tede Pathen kawng alam aka awm nawh tih thui ham koeihvaih nawh ciil awl te tah reel-aram hawn. Pathen kawngaih la hing ham namah oen namah te phep uh. 8 Pumsa oen cangna he aphu tah awm thoem van, tede muithla ben cangna lawngtah soeprep ah aphu awm, metihtiah, tahe veng hingna ham khaw, hailam ben hingna ham khaw pahih bok hamla awl a kam. 9 He tah aka soeng tangtang awl la awm tih do koeloe ham oen ah tangna khaklal ham awm. 10 Mami lawngah he thlaang boeih thlawnkung, awlpuila aka oeng thlaang thli kah thlawnkung aka hing Pathen dawngah ngaiuepna te n'khueh u tih mami lawng patangplai oen arai acaangla bii m'bi u. 11 He thuituenna oen cangpueina thli he thui peh. 12 Roengthaai kum no la na awm dawngah nang te a-u lawngkhaw dapsit la n'hu boel seh; tede na awlthui thingkaa khaw, na khawboe ramlang khaw, lungna, oengna oen ciimcaihna khaw aka oeng thlaang thli ham oett koei la awm seh. 13 Kai ka law thlantoe tah rangpui tengah Caciim teena, phungthuina oen cangpueina te yawm langtah atue na khueh boeih te hawna lah. 14 Tawngha thli lawng awl avan thui tih ahaamca thli lawng na sawah kut avan tloeng vengah nang lawng na dang muithla ben kutdo te dalra thlothlamna boel. 15 Thlaang boeih lawng nang kah na bi na lawh a roeng hang te a huhna u thai ham hawna langtah thathluela te thli te sai lah. 16 Namah oen namah te ngaithuen lang na cang puei te khaw ngaithuen lah. He thaihu boeih he toeng ohla sai, metihtiah nang lawng na sai atah namah oen namah khaw, na awl-thui hutung thlaang thli te khaw pahih bok la na thlawn thai ai.
1 Kum haam tawngpa thli te ho boel, ahimi te na pa angla hoelh amaihla voemtoei lah. Kum no tawngpa te na nau angla thloep-hoelh lang, 2 kum haam hutaa thli te na nu angla ngaai langtah, kum no hutaa thli te kawpoek ciim oen na ngannu angla ngaai lang voemtoei lah. 3 Amah bueng ah khaw aka sa huhai thli te van hinyah. 4 Tede huhainu pakhat khat lawng a ca thli khawseh, tihnawhtah a ca kah ca-anau thli khaw a khueh atah amami kah imkhuikaw te bokna phung angla cawmcah ham lamhacuekla cang u seh, te tila te a manu oen ana pa khaw, nu haam pahaam thli kah cuun acahna te khaw a thung pe thai ai. Metihtiah he tah Pathen kah kawhoena ni. 5 Amah bueng aka awm tih ahih te cawmcah hamla aka khueh nawh huhai tumtee lawngtah a ngaiuepna te Pathen ah kang a khueh tih yiin daai thangthui tih bawmna a bih. 6 Tede pumsa awmtheen awmyaalna aka boenn huhai tumtee thli tah hing van ruung mai de aka duek poen ni. 7 Ahimi te a-u lawngkhaw a thuitheet nawh ham he kah thuituenna he thui peh. 8 Tede thlaang pakhat khat lawng amah kah a cakaw te awlpuila amah imkhuikaw te a cawm acah nawh atah oengna te aka hoett thlaang la awm tih aka oeng nawh thlaang lak ah pateng khaw the-eep ngaai. 9 Huhai pakhat te a kum sawmruk a kuep thlan atah huhai tumtee thli kah cayin cabu dawngah thuum sak boel. Cayin cabu dawngah aka thuum ham tah vai khat bueng vaa aka sa huhainu te thuum seh. 10 Thaihu theen saina, ca-anau thli atheenla cawm-acahna, kamyin kam lai lungna, khrihca paya laikoei thli ham bii aka yawm, khawdeng lungma thlaang aka bawm, thaihu theen saina dawngah miing theenna aka dang huhainu te thuum seh. 11 Tede kumno huhainu thli te cayin cabu dawngah thuum sak boel; metihtiah ahimi tah amami kah pumsa ngaihna dawngah vaa sak ham a ngaih tih Khrih te a mangthawng taak u tih, 12 Khrih tengah amami kah awlkamcuek te a phe u. 13 Ahimi lawngah im khat coeng im khat yingyawi paithle u tih atue atang te a poeih alak u; te lak ah athe-eep ngaai tah thlaang a thuitheet u tih thlaang alawl ala u, thui koei nawh te a thui u. 14 Tedawngah mami aka raalna thlaang thli lawng mami kawng he athela thuina tue khaw a dang nawh ham kumno huhai tumtee hue lawng vaa a sak tih ca-anau khueh ham, amami kah imkhuikaw te a cawm acah u ham ka ngaih. 15 Metihtiah khatsut huhai tumtee lawngtah meel koep u tih Seitan hu ah bang u poen. 16 Tede khrihca hutaa pakhat lawng imkhuikaw ah huhai tumtee pakhat a khueh atah amah lawng cawm a cah selang tah khrihcabu kah thalrih la khueh boel seh; tetih dengah ni amah bueng aka awm huhai tumtee thli te khrihcabu lawng a tu-acaa thai ai. 17 Mawtkung angla bii atheenla aka bi ahaamca lawngtah thapang te arepla a dang ham awm, awlpuila phungthuina oen cangpueina aka yawm lawng thapang a dang ngaai ham awm. 18 Metihtiah caciim lawngah, “vaitaw te caang a tiil lii vengah a kaa cuett pe boel, ti tih bii aka bi lawng thapang te a dang ham awm, tila a thui. 19 Ahaamca thawlh a peel u te aka mingkung sausi pahih, pathum a awm nawh atah hutung pe boel. 20 Thlaangtloe hue lawngkhaw thawlh sai a rihna van ham thawlhna aka sai boeih te rangpui haiah toelthaam peh. 21 Na saina boeih dawngah a-u tengah khaw pekbona oen mik-hai dan muehla na sai ham, thuituenna he nang lawng na vai hamla Pathen oen Khrih Jesuh oen ah aciim vanthlaang haiah ceetceet kan uen. 22 Bawipa kah biibina ah pumpeekna sai ham a-u tengah khaw tot-alet la na kut van tloeng praap boel. Thlaangtloe kah thawlh saina dawngah thuum boel; nang tah acuemsuekla va awm lah. 23 Nang tah na sa a ding nawh taitu dawngah tui bueng te aw boel lang na bung a raawina ham misurtui te ayawl akaai tah bet ah aw mai hawn. 24 Thlaang khatsut kah thawlhna tah tueng pheng tih amami haiah a thawlhna lawng awlcekna ah cet doen poen; tede thlaangtloe khatsut kah thawlhna tah hu-aha dengah tueng. 25 Tetihvan angla thaihu theen sai he khaw tueng pheng tih huh thai koeila aka awm thlan te khaw thuh thai la awm manawh.
1 Sal tamnaa la aka awm thli lawngah namami kah bawimanghai thli te hinyah peek tueng koeila a poek u ham awm, te dengah ni a-u lawngkhaw Pathen miing oen kaimi kah cangpueina te athela a thui nawh ai. 2 Bawimanghai thli te khrihca la a awm u atah ahimi khaw mami kah maya manau la awm van poen ti u boel selang sal thli lawngah te hinyah ohla awm u boel seh. Ahimi kah bii te atheenla a bi pe tare ham awm. Metihtiah ahimi kah biibina rang oen hoeikhangna aka dang te tah ahimi lawng a lungna khrihca thli van ni. 3 He thaihu thli he nang lawng cang puei langtah thui peh. A-u khaw mami Bawipa Jesuh Khrih kah aka soeng awl oen mami kah bokna phung cangpueina oen ah aka vai u nawh oengnakungpui alakloe te aka cang puei tah, 4 Oekk-thloen u tih n'tu khaw aka ming nawh thlaang ni. Ahih lawngah awllung kawngah oelhtaih u ham oen tawhsi ngaihna kawpoek theen nawh te a khueh tih, he lawngah uett-eena, awlpuungna, thekhana, atheen nawh uepvoetna, aboet tlaih nawh awlpuungna te a thoeng sak, 5 he tila aka awm thli tah kawpoek soeng tlaih nawh tih awltak te aka khueh tlaih nawh thlaang poen ni. Ahimi lawngah bokna he kuirang la coenggna lawngpui la a poek u. 6 Thlaang lawngah amah kah a khueh duen oen ah ngaikhuekna te a awm atah bokna lawngah thlaang he kuirang thlaanglen la a coengg sak tangtang. 7 Mami lawng dilai dawngla n'van khuen u khat khaw awm nawh! Dilai dawngkah n'tu n'khuen thai ai? Khat khaw n'khuen thai manawh! 8 Tedawngah mami lawng caak awkk oen hinaak himbai n'khueh atah tete mami ham khoek mai poen. 9 Tede kuirang la coengg ham aka ngaih thli tah suek-halhna khuiah tla u, ngau-athuuna soeprep oen rih awm hue-ngaihna dong dawngah man u tih te lawngah ahimi te sungna oen rawkna benla te a ceh puei. 10 Metihtiah tangka ngaih soeh aih he tah athe phun soeprep a thoengna kungpui ni. Thlaang khatsut tah tangka khueh moek a ngaih dawngah oengna te a ceh taak u tih kawthena acungkuem oen a thinkaw lungbui a rek sak u. 11 Tede nang tah Pathen kah thlaang la na awm dawngah he thaihu thli boeih he rel-aram hawn. Doengna, Pathen hinyahna, oengna, lungna, uehthaina oen kawdawna te khueh hamla yawm lah. 12 Oengna loeh-lang taana poei ah na tha khueh boeih oen heng lang dungyan hingna te namah ham lo lah; Pathen lawng nang n'khue tih mingpueikung sausi thlaang yahawh haiah na oengna te acakcala na phawng te tah dungyan hingna te huh sak ham ni. 13 Thaihu boeih hingna pekung Pathen haiah khaw, Pontias Pilat haiah a oengna acakcala aka phawng Jesuh haiah nang he awl kan uen. 14 Mami Bawipa Jesuh Khrih kah Khawhin te a pha thlantoe awl kan peek he atheenla vai. 15 Amah a lawkoepna tah bawi boeih kah Bawi, sengpahrang boeih kah Sengpahrang, aka theenduet tih pakhat bueng ukkung la aka awm Pathen lawngah atue atang a khoek tluep vengah avan pha sak ai. 16 Ahih bueng he ni aka duek thai nawh; a-u lawngkhaw a tengah yoeii mare thai nawh aangna khuiah te awm. Ahih te a-u lawngkhaw hu vai nawh; a-u lawngkhaw hu thai manawh. Amah tengah hinyahna oen dungyan ukna aana tah awm hawn seh! Amen. 17 He hing khuiah thaihu thaiha khuehtoenna oen aka len muep thli te oekthloen nawh ham van thui peh. Te ang ueptapna aka awm nawh thaihu khuehtoenna dawngah ngaiuepna khueh u boel seh. Tede mami awmngaihna ham haih muehla soeprep pekung Pathen dawngah te ngaiuepna khueh u seh. 18 Ahimi lawngah atheen thaihu sai ham, bii theen te bina oen kuirang la awmna u ham, moeihoeihla thlaangtloe a do adan thaina u ham van thui peh. 19 He tila te ahimi lawngah kaawntheen te amami ham a tung asep u vetih te tah hailam ben ham akung cak ai. Te tila ahimi lawng hingna te a dang thai vetih te tah hingna tangtang la awm ai. 20 Timote, nang lawng khoem abeel ham na kut dawngah avan tloeng boeih te atheenla kuem. Pathen hinyahna aka awm nawh awlthuina oen ngau-athuu awlpuungna, thlaang khatsut lawng asoeng nawh la, “Cuihna” a ti u te reel-aram hawn. 21 Thlaang khatsut lawng atah te ang cuihna te ka khueh ti u tih oengna lawngpui te a hang u poen. Pathen kah lungvatna nangmi boeih sawah awm hawn seh.
1 Khrih Jesuh oen pumkhatla awmna rang oen awl avan kam hingna mami lawng n'khueh te phawng hamla tuih la aka awm, Pathen kah kawngaihna oen Khrih Jesuh kah celtuih la aka awm kai Pawl lawngah, 2 Ka lungna ka capa Timote nang tengah ca kavan pat: Pa Pathen oen mami Bawipa Khrih Jesuh lawngah nang te lungvatna, reenna, oen ngaimawngna te m'pe hawn seh. 3 Patuer thli lawngah bii a bi pe angla kai lawngkhaw thinkaw ciim oen ka bi pe van Pathen tengah awmngaih awl ka thui. Yiin oen daai ka thangthuina dawngah nang te kan poek yoeyah tih awmngaih ciil ka thui. 4 Nang kah mikphi te ka hilh nawh tih awmngaihna oen ka betoet thaina ham nang te huh ham ka ngaih tangkiik. 5 Na nuhaam Loisi oen na nu Yunis lawng a khueh oengna tangtang te ang van te nang lawngkhaw na khueh van tila ka poek, tahe ah khaw na khueh tite ka tangna. 6 Tedawngah, na sawah kut kavan tloeng vengah Pathen kah peek kutdo te na hing sak poe hamla koep kavan thui. 7 Metihtiah Pathen kah peek Muithla lawngah mami he riyawp thlaang la n'sai nawh; ahih kah Muithla lawngtah mami he huham tharana, lungna, mah oen mah kuemsuemna oen ah m'betoet sak dai. 8 Tecoengah mami kah Bawipa kawng te thui hamla yak boel; Khrih kawngah thong aka tla kai kah kawngah khaw yak boel. Pathen lawng tharana m'peek angla te Awlthang Theen hamla khawdeng patang khang hawn. 9 Pathen lawng mami he amah thlaang la awm ham n'thlawn tih n'khue u, te tah mami kah saina dawngah nawh tih, a lungvatna tah atue a tong thlan veng kalawng Khrih Jesuh rang oen m'peek poen, 10 tede tahe tah, mami Thlawnkung Khrih Jesuh a lawna rang oen te lungvatna te avan tueng sak poen. Ahih lawng ah duekna tharana te aboet sak poen tih aka duek thai nawh hingna te awlthang theen rang oen avan tueng sak poen. 11 Pathen lawng Awlthang Theen phawngkung la kai he celtuih la khaw, cangpueikung la khaw n'khueh poen, 12 te dawngah ni kai lawngah he ang khawdeng patang he ka khang. Tede kai tah ka ngaai mawng, metihtiah kai lawngah a-u ka uepna tite ka ming tih ka kut dawngah avan tloeng thaihu te tah te Khawhin toe ah amah lawngah anepla avan kuem ai tite ka tangna. 13 Kai lawng kan cang puei aka soeng awl te acakla phoeih lang nang lawng na vai ham oen oett ham koeila te khueh, Khrih Jesuh oen pumkhatla awmna dawngah mami kah thaihu la aka awm oengna oen lungna dawngah te acakla awm. 14 Mami khuiah aka hing Ciim Muithla kah tharana rang oen ah nang tengah avan tloeng thaihu theen te anepla kuem-akawl. 15 Asia ram khuiah aka awm thlaang boeih lawngah, Fikela oen Hamokin lawngkhaw kai he n'thlah sut u poen tite nangmi lawng na ming u. 16 Onisiforas lawngah boehoengla ka kaw avan hoe sak dawngah Bawipa lawng a imkhuikaw te reen hawn seh. Ahih lawngtah thong ka tlaak khaw yah puei nawh, 17 Rom khaaw la avan pha tih a paipuek ah kai he n'huh thlantoe n'tlap khiing. 18 Te khawhin ah Bawipa lawng ahih te reen hawn seh! Efesa khaaw ah kai ham metihtlukla bii a bi tite nangmi lawng atheenla na ming u.
1 Ka capa nang tah Khrih Jesuh oen pumkhat la awmna rang oen n'dang u lungvatna dawngah acakla awm lah. 2 Mingpueikung Sausi boehoeng kah haiah ka thui cangpueina te na yaak poen. Thlaangtloe te patoeng aka cang puei thai van ueppangkoei thlaang tengah te thui peh. 3 Khrih Jesuh kah thincak raalkap la na awm van angla khawdeng patang te khang hawn. 4 Raalkap bii aka bi lawngtah raalbawi te a kaw hoe sak ham a ngaih tih raalkap la aka awm nawh thlaangthoet kah bii dawngah te poei apah tawmban nawh. 5 Loehlangna poei ah aka loeh u thlaang pakhat lawng loehlangna phung-alam te a vai nawh atah kutdo dang thai nawh. 6 Thatlawh thaboep la bii aka bi lotoen thlaang lawngah amah lo kah caangthaih te a caak lamha ham awm. 7 Awl kavan thui he atheenla poek, metihtiah he awl he boeih yaakming thaina te Bawipa lawng m'peek ai. 8 Awlthang theen dawngkah ka thui angla Devid cadil duekna kalawng aka tho koep Jesuh te hilh boel. 9 Metihtiah kai lawng Awlthang Theen ka phawng dawngah patang ka khang tih lumlai aka hu thlaanghuuen angla thiirui oen n'khih u. Tede Pathen kah awl tah thiirui oen khit thai nawh. 10 Tedawngah Pathen kah thlaangtuek thli lawngtah Khrih Jesuh teng kalawng aka law thlawnna te a dang u tih dungyan ruep-awmna te a pangna u ham patang raina boeih boeih he ka ueh. 11 Adangkah awl he aka soeng ni: “Amah oen n'duek haih atah amah oen n'hing haih van ai. 12 Mami lawng ueh thai mangkhak atah mami khaw amah oen haih ukkung la n'awm ai. Amah te n'hoett atah mami he n'hoett van ai. 13 Mami lawng uep-awm la n'awm nawh cakhaw Ahih tah uep-awm la awm yoeyah, metihtiah ahih tah amah oen amah te thai-alat u thai nawh.” 14 He he na thlaang thli tengah thui pe langtah awllung awllep mailai ah oelh u khiing nawh ham Pathen haiah ngaithuenna te peh. Tede atheen thaihu nawh ni, awl a hutung thlaang thli te ni a rawk sak khoeng. 15 Nang tah bii aka yah puei nawh, Pathen kah awltak te asoengla aka cangpueikung la na awm van angla Pathen kawtlaakna te na dangna ham yawm lah. 16 Pathen hinyahna aka awm nawh tih ngau-athuu awl oelhna te reel-aram lah, te ang awlkaa lawngah te Pathen teng kalawng athlathloeila ni thlaang a thak khoeng mai. 17 Te ang cangpueina te tah thi-asa aka rong sak vueihacang-ing oen ah lo u. Te ang thaihu aka cang puei thlaang pahih rawi te tah Himenia oen Filitas ni. 18 Ahih rawi lawng awltak lawngpui te a ceh taak hih tih, thawhkoepna tah awm coeng poen, tila a thui hih dawngah thlaang khatsut kah oengna te plet-plawng la a sai hih. 19 Tede Pathen lawng lungdang a suem te tah cak khak tih hinghuen thai nawh, te sawah te he awl he a thut: “Bawipa lawng amah kah thlaang la aka awm te a ming” tila khaw, “Bawipa kah thlaang la ka awm a ti lawngtah athe saina te a toeng ham awm,” tila te a thut. 20 lmpui phulum khuiah um, am thaihu acungkuem awm: khatsut te tah sui, ngun oen a sai tih atloe te tah thing oen a sai khaw awm tih amlai oen a sai khaw awm; khatsut tah khawniingtuikaa ah hawna ham tih atloe te tah awmthoet awmroelh ah hawna ham ni. 21 A-u khaw athe thaihu boeih te a ceh taak tih aciim acaihla aka awm tah bii phutlo dawngah a hawna ai, metihtiah ahih tah thloeng u tih thaihu theen sai ham oepsoehla aka toen u tih a bawipa kah hawna koeila a awm dawngah ni. 22 Roengthaai thawhthuem kah pumsa ngaihna te vai boel langtah thinkaw ciim oen Bawipa a khue tih bawmna aka bih thlaang thli oen ah thik at la doengna, oengna, lungna oen ngaimawngna dang hamla yawm lah. 23 Tede ngau-athuuna oen mingtung plau nawh awlpuungna te reel-aram hawn; te ang lawngtah tawhsina ni a thoeng sak tite nang lawng na ming. 24 Bawipa kah tuihyoeihthlaang tah tawhsi u ham awm nawh. Ahih tah thlaang boeih aka reen, kawdaw thlaang, cangpueikung saya theen la awm ham ni, 25 amah aka ngaih nawh thlaang thli te lunghoeih lungpaih la toelthaam ham awm. Tetih atah ahimi te Pathen lawngah thawlh yutna atue theen a peek vetih awltak te a ming u ai. 26 Tecoeng atah ahimi lawng a cuih a khueh u vetih ahimi te aka tu khak tih amah kah kawngaih vai sak ham aka saikung Seitan kah dong dawngah man nawh vetih loeih ai.
1 Hukhueng koek khawhin tah raina atue poen ni tite hilh boel. 2 Thlaang lawngah he, amah ham bueng poekna, ngaihmoekna, a khueh u vetih oekthloenna oen amah oen amah pawmsang u ai; ahimi tah thlaang thekhana, a manu oen ana pa awl aka ngaai nawh, lungvatna aka ming nawh tih bokna ben tula aka ngaai nawh thlaang la awm u ai; 3 ahimi tah reenna aka khueh nawh, thlaangtlung-pathang, thlaang thuitheet thlaang, boethe halang thlaang, halang cingpoh thlaang la awm u vetih ahimi lawng thaihu theen te a thina ai; 4 ahimi tah awl aka cak nawh thlaang, maru-marat thintoi thlaang, kawpoek sang oen aka hoell u thlaang la awm u vetih; Pathen te lungna lak ah awmtheen awmyaal boenn-atlaak te a lungna ngaai ai, 5 ahimi lawngah bokna phung he asaw ahan ah a phoeih u, tede akhuiben kah tharana tangtang te tah a hoett u. Te ang thlaang thli te tah reel-aram hawn. 6 Ahimi khatsut lawngah thlaang im thlaang lo ah kuun u tih a kaw aka cak nawh hutaa-tumphai, amami kah thawlhna thalrih lawng a namm tih pumsa ngaihna phun soeprep lawng a mawt hutaa hue te tah doelh a thloeih tih a tuuk u thai, 7 te hutaa hue lawng awltak te cang hamla a yawm poepa u, tede ahimi tah awltak te metuek khaw aka ming thai tlaih nawh poen ni. 8 Janni oen Jambri lawng Mosi te a oelh a taih hih angla he thlaang thli lawngkhaw awltak te a oelh a taih u, ahimi tah a kawpoek lawng bii aka bi tlaih nawh lungmong thlaang la awm u tih oengna ben ah dok u poen. 9 Tecakhaw ahimi kah saina te tah athlathloeila pha manawh, metihtiah thlaang boeih lawngah ahimi metihtlukla a ngau-athuu u tite a ming ai. Janni oen Jambri khaw te tila ni a awm hih van. 10 Tede nang lawngtah kai kah cangpueina, khawboe ramlang oen ka hingna dawngah ka mengtengna te na vai poen. Nang lawngtah ka oengna, kawdawna, lungna, uehthaina, 11 heem-atek la ka awmna oen patang ka khangna boeih te na ming poen. Antiok, Ikoniam oen Listra khaaw ah mueirihtamyiin, khawdeng patang heemtekna ka sawah aka thoeng te nang lawngah boeih na ming. Tede Bawipa lawng te ang thli boeih dawng kalawng n'loeih sak. 12 A-u khaw Khrih Jesuh oen pumkhatla awmna rang oen Pathen kawngaih la hing ham aka ngaih tah heemtekna patang te a khang ai; 13 tede thlaang the thli oen thlaangthaipalat thli kah the-arana tah khuet la khuet ai; thlaangtloe te athai alatna vetih amah te khaw a thai alatna u van ai. 14 Tede nang tah, na cang tangte tih acakla na oeng awltak dawngah te awm poe lah. Nang cangpueikung thli a-u tite namah lawng na ming; 15 Na camaw veng kalawng ah Aciim Baibal awl na ming poen tite hilh boel. Te Caciim lawngah Khrih Jesuh oengna rang oen thlawnna benla mawtkung cuihna te m'peek thai. 16 Caciim boeih he Pathen hillsang la awm tih awltak cangpueina ham, toelthaamna ham, thawlhpalhna te tlaihvawngna ham, asoengla khawsakna ham ah thuituenna la aphu awm, 17 te ah ni Pathen bii aka bi thlaang lawngah thoemthaina soep vetih thaihu theen phun soeprep sai hamla phawlip te asoepcala a khueh ai.
1 Thlaangduek oen thlaanghing awl aka cek ham koei Khrih Jesuh oen Pathen haiah awl ceetceet kan uen. Metihtiah ahih tah Sengpahrang angla uk ham law koep ai. 2 Tedawngah awlthang te thui lah, (atue atang alawlh amaih ah khaw, alawlh amaih nawh ah khaw) awlthang te thui ngaikhoek. A yaakming thaina ham thui peh, toel-thaam ham angoe atah siim langtah, thaphawh ham angoe atah thathluena awl thui peh, kawdaw thinsan oen cang puei. 3 Thlaang rangpui lawngah asoeng oengnakungpui cangpueina te hutung ngaih nawh la a awmna atue atang te apha ai, tede amami kah ngaihna te a vai vetih amami kah yaak ngaih bueng te aka thui hamla cangpueikung yahawh hlang te amami ham a cawi ai. 4 Ahimi lawng awltak te hutung ohla a mangthawng taak vetih ciil awl mailai te hutung ham a ngaih u ai. 5 Tede nang tah me ang akawng alam dawngah khawseh namah oen namah te kuemsuem uh, patang palai te ueh hawn, Awlthang Theen phawngkung la na awmna bii te bi langtah Pathen kah tuihyoeihthlaang la na awm van angla na bi koei boeih te sai. 6 Kai ham tah ka hingna he luciik la thawthueng ham atue apha poen; he dilai hingna he ceh taak ham tahe ah atue khoek poen. 7 Loehlangna poei ah khaw ka tha khueh boeih oen ka yawm poen, athla hlang aboet kheng toela ka heeng poen; oengna te ka phoeih rapsaat poen. 8 Tahe tah, adoengla aka hing thli a peek taana kutdo lawng te kai he n'ring poen, te kutdo te tah, Bawipa lawngah, te Khawhin ah te m'peek ai, kai bueng he m'pe manawh, amah a lawna te lungna oen a lamtoen thlaang boeih te a peek ai. 9 Ka tengah ayuela law ham van yawm. 10 Dema lawngtah dilai he a thintlawhna dawngah kai he n'ceh taak tih Tesalon khaw la cet poen. Kresen tah Galati ram la cet tih Titas tah Dalmatia ram la cet. 11 Luka bueng he ka tengah awm. Mark te van law puei, ahih tah kai he bii aka bawmkung ni. 12 Taikhikas tah Efesa khaaw la ka tuih. 13 Na law vengah Troas khaaw kah Karpas im ah ka ceh taak angki dung te van khuen; cabu thli te khaw van khuen, awlpuila saphaw oen a sai te van khuen. 14 Thiide Alekzandar lawngah ka sawah raina avan sai; amah kah a saina angla Bawipa lawng kutdo a peek ai. 15 Ahih tengah te namah oen namah ngaithuen uh, metihtiah ahih lawngah mami kah awlthang te a oelh khaklal. 16 Lamhacuek awlcekna ah kamah oen kamah ka phungtu u vengah te a-u khat lawngkhaw m'pai puei nawh; n'ceh taak boeih u. Ahimi sawah athela Pathen lawng poek mai boel seh! 17 Tede kai lawngah awlthang asoepla ka phawng thaina ham oen ah Gental thlaang boeih lawng a yaakna ham Bawipa lawng n'awm puei tih tharana m'peek, tedawngah duekna dawng kalawng ka loeih. 18 Bawipa lawng athe-arana boeih kalawng n'loeih sak tih amah kah vaan Ram ah te adingsuekla n'ceh puei ai. Amah tengah ruep-awmna dungyan toe awm hawn seh! Amen. 19 Priscilla oen Akuila khaw, Onisitoras cakaw khaw kan toei u. 20 Erastas tah Kawrin khaaw ah awm tih Trofimas tah atlawh dawngah Militas khaaw ah ka ceh taak. 21 Sikding a pha thlan ah law hamla van yawm. Jubulas, Puden, Linu oen Klaudia mi lawngkhaw atloe khrihca boenhui boeih lawng nang te n'toei u. 22 Bawipa tah na thinkaw lungbui ah awm seh. Pathen lungvatna nangmi boeih sawah awm seh.
1 Pathen kah tuihyoeihthlaang oen Jesuh Khrih kah celtuih kai Pawl lawng ca kavan pat. Pathen lawng a tuek thlaang thli kah oengna cak sak ham oen mami kah bokna oen awltak cangna ah ahimi te mawt hamla tuek la ka awm tih n'tuih. 2 Mami kah bokna tah dungyan hingna ngaiuepna dawngah kung a sut. Hoem awl aka thui nawh, Pathen lawng dilai a suen thlan veng kalawng he hingna he mami peek ham awl a kam poen tih; 3 atue akhoek tluep vengah te dungyan hingna te amah lawng awlthang dawngah avan tueng sak. Kai he ng'uepna dawngah bii he m'peek tih mami thlawnkung Pathen kah awlpeek angla kai lawng ka phawng. 4 Mami cuutna u oengna dawngah ka ca taktakla aka awm Titas, nang tengah ca kavan pat. Pa Pathen oen mami thlawnkung Jesuh Khrih lawngah lungvatna, ngaimawngna te m'pe hawn seh. 5 Krit tuisanglak ah kan ceh taak he tahe toe sai ham angoe thaihu thli te sai ham oen khaaw roekk ah khrihcabu ahaamca khueh sak ham ni. Awl kan uen te hilh boel. 6 Ahaamca tah cawtbauh aka awm nawh thlaang seh; ahih tah a yu khat bueng aka khueh thlaang, a ca thli khaw Pathen aka oeng thlaang la awm u vetih cingpoh halang oen awl ngaaina nawh ben ah miing aka tueng nawh thlaang la awm seh. 7 Metihtiah Khrihcabu mawtkung tah Pathen kah biitungpui khuehkung la a awm dawngah cawttbauh aka kap nawh thlaang seh. Ahih tah amah oen amah thoemthai koek la aka ngaai u nawh, thin aka toi nawh, yuu aka aw nawh, khawpaw rang-au la aka awm nawh, tangka ngaihmoekna aka khueh nawh thlaang seh. 8 Ahih tah kamyin aka lungna oen thaihu theen aka ngaih thlaang seh. Ahih tah amah oen amah kuemsuem thai, thlaangdoeng, thlaangciim oen khawboe aka theen thlaang seh. 9 Oengnakungpui oen avai u la ueppang koei, awlthang te acakla aka phoeih thlaang seh. Teah ni ahih lawng aka soeng cangpueina oen tha a peek thai vetih asoeng cangpueina aka oelhtaih thli kah thawlhpalhna khaw a tueng sak thai ai. 10 Metihtiah, awlpuila Judah bokna kalawng Khrihca la aka kuun thli tim ah awlhong awlhii oen thlaangtloe te a oelh ataih tih thlaang aka thailatna yahawh ngaai awm. 11 Te ang thlaang thli te awlthui toeng sak ham angoe; metihtiah, ahimi lawng cang puei koei nawh te a cang puei dawngah imkhuikaw boeih te a thek u, te tila a cang puei boeih te yaraula aka awm tangka dang ngaih maiah ni. 12 Amah Krit thlaang, amami kah tawngha thli khuikah pakhat awltak aka thui lawng a thui vengah “Krit thlaang thli tah hoem aka thui poepa athe satluung oen thayong thlaang, caruutpui thli ni” 13 tila a thui he soeng tangtang. Tedawngah, he kawng ah he ahimi te atlawh ngaaila toelthaam lah, tetih atah ahimi lawng sa aka ding oengna te a khueh u vetih, 14 Judah thli kah ciil awl mailai oen awltak aka hoett thli tengah aka thoeng thlaanghing awlpeek thli te pawm u tlaih manawh. 15 Thlaangciim hamla tah soeprep boeih he ciim, tede tuiilehkap thlaang thli oen oeng nawh thlaang thli hamla tah a lungbui oen athe atheen mingna thinkaw tuiilehkap lawngah te n'tu khaw ciim sak nawh. 16 Amami lawngtah Pathen ka ming ti u de a saina oen a hoett u, thaihu theen khat khaw sai ham aka koeih tlaih nawh thlaang thli poen ni.
1 Tede nang lawngtah asoeng oengna-kungpui oen avai u la cang puei. 2 Tawngpa kum haam hue te amah oen amah kuemsuem uh, asoeng oengna dawngah awm uh, lungna oen uehthaina khueh uh, tila te thuituen. 3 Tetih van la te kum haam nunu thli te khaw hutaa kah awm ih phung angla aciim hingna oen aka awm hutaa la awm ham thuituen. Ahimi lawng thlaang theetkung oen yuu kah saltamnaa la awm u boel seh. Ahimi lawng thaihu theen te cang puei seh, 4 hutaa kum no nunu thli te a vaa a ca thli te a lungna ham, 5 amah oen amah kuemsuem u ham oen aciim acaihla awm ham, a vaa thli kah awl aka ngaai, imkhuikaw khuutcemkung thai hutaa theen thli la a awm u thai ham thuituen. Teahtah Pathen tengkah aka law awlthang te a-u lawngkhaw athela thui manawh. 6 Tetih van la te kum no tawngpa thli te khaw amah oen amah kuemsuem u thai ham thaphawh lah. 7 Soeprep boeih ah namah roeroe he khawboe ramlang theen ben ah oett koeila awm. Hinyah koei la awm lang na cangpueina dawngah ataktangla awm. 8 Oelhtaih thai nawh aka soeng awl te hawna lah, te tih atah mami kawng he athela thui ham khat khaw khueh nawh vetih na raal thli te yah-laat la awm ai. 9 Sal thli lawngah a bawipa thli kah awl ngaai pe selang soeprep boeih ah ahimi te a kaw hoe sak seh. Ahimi lawng a bawi thli kah awl te thung u boel seh, 10 a thaihu thli khaw huen pe u boel seh. Te lak atah ahimi lawng thlaang theen la a awmna, ueppang koeila a awm u te tueng sak u seh, teah ni ahimi kah saina boeih dawngah mami thlawnkung Pathen kawng cangpueina te a thangpawm u ai. 11 Metihtiah, Pathen lawng thlaang boeih kah thlawnna hamla a lungvatna te avan tueng sak poen. 12 Te lungvatna lawngtah Pathen tula sak ohla hingna, dilai thaihu ngaihmoekna te hoett ham, mah oen mah kuemsuemna, doengna oen he dilai dawngah Pathen kawngaih la hingna oen awm ham mami te n'thuituen. 13 Te tila te mami kah bawilen Pathen oen thlawnkung Jesuh Khrih kah ruep-awmna va tueng ngai ai tila n'ngaiuep awmngaihna Khawhin te n'ring u. 14 Mami he athe-arana boeih dawng kalawng thlawn ham oen mami he thlaang ciim la sai tih amah bueng kah koe la awm ham oen ah theenna te thinkaw thluembuek oen aka sai ham, amah kah hingna roe te mami hamla a peek. 15 He awlkaa thli he cang puei langtah na awlthui hutung thli te tha na peek tih na toelthaam vengah saithaina aana na khueh boeih te haw nah. Nang te a-u lawngkhaw dapsit la n'hu roe boel seh.
1 Na thlaang thli lawng ukkung thli oen aana khuehkung thli kah awl a ngai u tih ahimi te a hinyahna u ham oen thaihu theen sai ben ah oepsoehla a awm poepa ham thui peh. 2 Ahimi lawng a-u kah athe-arana khaw thui nawh ham, tede adingsuekla roeproeicala awm tih thlaang boeih tengah kawdawna te tueng sak poepa ham thui peh. 3 Metihtiah n'hu vengah mami khaw ng'ngau u tih awl ngaai nawh lawnghang la ng'awm u. Pumsa ngaihna oen awmtheenna soeprep kah sal la ng'awm u. Mami kah hingna he uett-eena oen thaihu naai ah mami lawng n'hawna; Mami te thlaang tloe lawng n'thina tih ahimi te mami lawng n'thina van. 4 Tede, mami thlawnkung Pathen kah lungna oen reenna te a tueng veng kalawng tah, 5 mami he ahih lawng n'thlawn poen. Te tah mami kah thaihu theen saina dawngah nawh tih a lungna oen ni mami he ahih lawng n'thlawn. Ciim Muithla rang oen athaaila cuunna oen athaaila hingna pekung lawng n'silh dawngah ni. 6 Pathen lawng mami thlawnkung Jesuh Khrih rang oen mami sawah acoeihpokla Ciim Muithla te avan toi tih, 7 a lungvatna rang oen Pathen oen mami roeproei ham oen ah mami kah ngaiuep dungyan hingna te khueh thaina ham ni. 8 He awl tah awltak ni. He kah awl he awlpuila na khueh ham ka ngaih, Pathen aka oeng thlaang thli lawngtah thlaang boeih boeih ham thaihu theen saina ben ah amami kah atue atang te a hawna ham awm, te tah aka theen tih aphu aka awm ni. 9 Tede tula aka coeng nawh awlpuungna patuer hue kah phunthoepna, tawhsina oen phungawl kawngah oelhtaihna te reel aram lah. Te ang thli te tula aka coeng nawh tih aphu aka awm nawh ni. 10 Pekbona aka sai thlaang te ayawlkoek ah voei hih ngaaithuenna pe lang tecoeng atah ngaaina tlaih boel. 11 Te ang thlaang te tah thlaangthe ni tila na ming tih a thawlhna thli lawng ahimi kah asoeng nawh te a tueng sak. 12 Artima nuem, nawhtah, Tikhikas nuem na tengla kavan tuih vengah Nikopolis khaw ah ka tengla va lawh. Te ah te sikca khui puet ah awm ham ka kamthlah. 13 Thlaangcal Zenas oen Apollos te khawlawng la a cehna hih ah atheenla bawm lang te rawi kah ngoena boeih te soepsa peh. 14 Mami kah thlaang thli te bii theen a bi tih angoe taktak dangna ham cang puei uh. Ahimi lawng poei-oepla awm mailai u boel seh. 15 Kai oen aka awm haih boeih lawng nang te n'toei u. Pathen kah lungvatna tah nangmi boeih tengah awm seh.
1 Khrih Jesuh kawngah thongtla kai Pawl oen mami kah manau Timote lawng puei paw oen bii bi haih la aka awm Filemon oen, 2 Na im ah aka tun Khrihca thli oen ngannu Apphia oen raalkap puei Arkhipas tengah ca kavan pat. 3 Pa Pathen oen Bawipa Jesuh Khrih lawng a lungvatna, ngaimawngna m'pe u hawn seh. 4 Ka manau Filemon, ka thangthui veng roekk ah nang kawng ka thui tih ka Pathen tengah awmngaih ciil ka thui. 5 Metihtiah Pathen kah thlaang boeih na lungna oen Bawipa Jesuh na oengna kawng ka yaak dawngah ni. 6 Ka thangthuina tah aka oeng thlaang la ng'awm u angla nang oen kaimi kah pawlneengna lawng Khrih oen pumkhatla awmna dawng mami hingna ah aka awm yotheenna cungkuem te a dung ngaai la yaakmingna khueh ham ni. 7 Ka lungna ka manau, nang kah lungna lawng awmngaihna yahawh hlang m'peek tih ka tha avan thlue sak. Pathen kah thlaang boeih te nang lawng a kaw na hoe sak poen. 8 Tedawngah he kawng ah he Khrih ah na maya la ka awm van angla na sai koei te sai ham tong-aa muehla nang he awl kan peek thai mai de ta. 9 Tede, kan lungna dawngah reenna kavan bih. Jesuh Khrih kah laipai, tahe Jesuh Khrih kawng ah thongtla kai Pawl lawng reenna kavan bih. 10 Tedawngah, thong ka tlaak vengah he Muithla ben ah ahih kah anna pa la ka awm tih Khrih ah ka capa la aka awm Onisimas yuengla na tengah reenna kavan bih. 11 N'hu vengah tah nang hamla ahih he cawmthawkk nawh, tede tahe tah nang oen kai ham la cawmthawkk poen. 12 Tahe ah namah tengla ahih he kavan tuih koep de ka thinkaw tah ahih tengah awm. 13 Awlthang theen kawngah thong ka tlaak veng he ah nang yuengah kai bawmcemkung la ahih he ka tengah awm sak ka ngaih. 14 Tede, nang te amangkhakla kai he bawmcem sak ham ka ngaih nawh, te lak ah namah kawthawh oen sai sak ham ni ka ngaih. Tedawngah namah kah kawtlaak nawh atah n'tu khaw ka sai manawh. 15 Onisimas he nang teng kalawng a phengter kawlkalh he thik at la namah tengah awm poe ham mai cawi ni. 16 Tahe ah ahih tah sal mailai tlaih nawh ni, tede ahih tah sal lak ah atheen ngaai Khrih ah mami kah lungna boenhui la ni a awm poen. Kai hamla tah ahih he aphu awm tangkiik, nang ham tah sal pakhat la khaw Khrih ah boenhui pakhat la khaw metila aphu a awm tare ai. 17 Tedawngah kai he biibipuei la na poek atah kai nan do ham koei angla te ahih he do koep lah. 18 Na sawah ahih lawng thawlhpalhna a sai tih laiba mai khaw a awm atah kai kah laiba la khueh mai hawn. 19 He he kamah kut roe oen kavan thut, Kai Pawl lawng kan sah koep badai. (Na hingna roe nan peek ham na ba te thui koep ham ngoe mai nawh) 20 Tedawngah ka manau, Bawipa mik-hai te yahna mai lang kavan bih he tah reenna oen van sai mai; Khrih ah boenhui pakhat angla ka kaw van hoe sak mai. 21 He ca dawngah ka thut angla kavan bih he na sai ngaai ai tila ka tangna tih yahawh ngaai pateng na sai tangtang ai tila ka ming. 22 Tecoengah kai hamla a huen pakhat ah pahoei roekbah oepsoeh, nangmi boeih kah thangthuina te Pathen lawng avan thung vetih kai he nangmi tengla m'pha sak koep ngai ai tila ka ngaiuep dawngah ni. 23 Jesuh Khrih kawng ah kai oen thong aka tla haih Epafras lawngkhaw nang te n'toei, 24 Te tila te kai kah biibipuei Mark, Aristarkas, Demas oen Luka mi lawng nang te n'toei u.
1 Yan veng atah Pathen lawng patuer thli tengah voei yahawh hlang aphunphun la tawngha thli teng kalawng awl a thui. 2 Tede, tahe atue boetna ben atah a capa rang oen mami tengah awl avan thui. A Capa rang oen ah khawhipuempa he Pathen lawng a sai tih aboet lam ah thaihu soeprep khuehkung la ahih te Pathen lawng a tuek. 3 Ahih tah Pathen kah ruep-awmna aangna aka tueng sak tih Pathen amah coenggna oen aka lo u taktak ni. Huham tharana aka awm awl oen khawhipuempa he a khawl acuui tih a cak sak. Thlaanghing ham thawlh khawdawp ngaaina oen thawlh ciimna a sai coengah, vaan ah Huham Thara sangkoek Pathen kah bantang ben ah te ngawl. 4 Pathen lawng a Capa miing a sak he tah vanthlaang thli kah miing lak ah asang van angla a capa khaw vanthlaang thli lak ah bawilen ngai. 5 Pathen lawngah a vanthlaang a-u khat khaw, “Nang tah ka Ca la na awm tih tihin ah Kai tah nang kah na Pa la ka awm poen” tina vai nawh. Tecoengah me ang vanthlaang khaw “Kai tah ahimi kah ana Pa la, ka awm vetih ahimi tah ka Ca la awm ai,” tina vai nawh. 6 Tede Pathen lawng a Capa camiing awmthang dilai dawng avan tuih vengah, “Pathen kah vanthlaang boeih lawng ahih te a bok u ai” tila a thui. 7 Tede vanthlaang kawng tah, “Pathen lawng amah kah vanthlaang thli te yilh la a sai tih, a tuihyoeihthlaang thli te haialh angla a sai,” tila a thui. 8 A Capa kawng tah Pathen lawng: “Aw Pathen, namah kah ram tah dungyan toe cak ai! Nang lawngtah na thlaang thli te doengna oen na uk ai. 9 Nang lawngtah adoeng te na ngaih tih aka soeng nawh te na thina. Tedawngah nang kah Pathen la aka awm Pathen lawng nang te n'tuek tih na paya laikoei thli a peek lak ah hinyahna oen awmngaihna te nang m'peek tila a thui. 10 Tecoengah Ahih lawng “Bawipa, nang lawng acuekca ah dilai he na suen tih namah kut oen vaan khaw na sai. 11 Te thaihu tah khum boeih cakhaw, nang tah na cak yoeyah ai; Te thli boeih tah himbai angla pawn boeih ai. 12 Nang lawngah te thli te angki angla na tliim vetih himbai angla te thli tah thawleng u boeih ai. Tede nang tah amah moepoela na awm tih Na hinglung khaw boet tlaih nawh” tila a thui. 13 Pathen lawng a vanthlaang thli te: “Na raal thli he na khowpha huiah khowtloengna la ka khueh thlantoe ka bantang ben ah ngawl” tina vai nawh. 14 Tetih atah, vanthlaang thli he a-u te ang kai? Ahimi tah Pathen kah bii aka bi muithla la awm tih thlawnna aka dang ham koei thli te bawm hamla Pathen kah a tuih thlaang thli ni.
1 Tedawngah atloe abang la mami lawng m'phelh nawh ham n'yaak tangte awltak te acak tare la phoeih mangkhak ham awm. 2 Vanthlaang teng kalawng mami kah patuer thli tengah a peek awlthang te tah aka soeng awl ni tite tueng tih, te awl te ngaai nawh tih aka vai nawh boeih tah ating atawkk la dantatna te a dang ai. 3 Te atah hetih aihla aka lenduet thlawnna he mami lawng n'tu la n'sak nawh atah metila mami he sa a sueng ai? Bawipa amah lawng he thlawnna he lamhacuekla a phawng tih aka ya boeih lawngah soeng tila mami tengah a tueng sak poen. 4 Te tila te ahimi kah sausi te soeng tila a tuengna ham Pathen lawngah miknoekna oen kawpoekrai phun soeprep te a sai tih Ciim Muithla kah kutdo thli te amah kawngaih angla a rek ara. 5 Mami lawngah n'thui u dilai, hailam ben ah aka law ham koei dilai thaai te uk hamla Pathen lawng vanthlaang he khueh nawh. 6 Caciim dawngah ahuen pakhat ah, “Aw, Pathen thlaanghing he metih nuem a ti aih tih na poek khuep; Thlaang mailai he metila nuem a awm tih na doen na cang? 7 Vanthlaang thli lak ah aheem bet la kawlkalh ah na khueh; ruep-awmna oen hinyahna lumuek te na muek sak, 8 thaihu boeih sawah ukkung la na sai” tila a thui lat. Pathen lawng thlaanghing he, “thaihu boeih ukkung la a sai” tila awm. Thaihu boeih ti vengah me ang thaihu khaw thuum poen. Tede tahe ah thlaanghing lawng thaihu boeih ukkung la awm nawh ti he huh thai la awm. 9 Tede mami lawngah Pathen kah lungvatna oen thlaang boeih ham duek hamla vanthlaang thli lak ah ahem bet la aka awm Jesuh te n'huh u. Te tila te duekna patang a khangna rang oen tahe atah ruep-awmna oen hinyahna lumuek te a muek poen tite n'huh u. 10 Thaihu soeprep boeih a sai tih doenkung Pathen lawng amah kah ruep-awmna te a ca thli lawng a paangna hamla Jesuh te patang khangna oen thlaangsoep la a sai te tah tueng tang tang. Metihtiah Jesuh tah thlawnna dang ham aka mawtkung ni. 11 Jesuh lawngtah thlaang kah thawlh-na te a ciing sak tih thawlhna ciingsakkung oen amah lawng thawlhna a ciing pe sak thlaang boeih te lawng ana Pa pakhat ni a khueh u. Tedawngah Jesuh lawng te thli te amah kah maya manau tila khue hamla yak nawh. 12 Ahih lawng Pathen tengah, “Nang lawng na sai te maya manau thli tengah ka thui ai, Ahimi a tunna ah nang te kan thangpawm ai,” tila a thui. 13 Tecoengah ahih lawng, “Pathen te ka uepna ai” ti. Tecoeng baal ah, “Pathen kah peek ca-anau thli oen he ah he haih ka awm” tila khaw a thui. 14 Te tila ca-anau a tina thlaang thli te tah thi-asa oen aka awm thlaang thli ni. Jesuh amah khaw ahimi angla thi-asa oen awm tih ahimi kah thlaanghing pumsa coenggna angla awm van. Te tila a awm te tah amah kah duekna rang oen duekna sawah huham tharana khuehkung Raaibawi te phe ham tih, 15 duekna te a rih u dawngah hingkhui puet ah sal la aka awm thli te a loeih sak. 16 Te tila te ahih lawng vanthlaang thli te bawmcem nawh tite aciimphanla a tueng sak. Caciim lawngah, “Abraham kah cadil thli te a bawm,” tila a thui lat. 17 Tedawngah soeprep boeih ah maya manau angla awm ham roe la angoe tih te tila a awm te tah thlaang boeih kah thawlhna te khawdawp ngaai hamla Pathen bii a bina ah uep-awmna oen reenna aka khueh Khawsoeih Bawi la awm ham ni. 18 Amah roeroe lawng suek-halhna oen patang khangna te a tawng poen dawngah tahe ah suek-halhna aka tawng thli te a bawm thai.
1 Pathen kah thlaangkhue, Khrihca thlaangciim maya manau thli! Mami kah bokna phung ben ah Khawsoeih Bawi la awm ham Pathen lawng avan tuih Jesuh kawng te poek u lah. 2 Mosi lawng Pathen kah im ah amah kah bii bina dawngah uep-awm la a awm van angla Jesuh khaw he bii he bi hamla tuekkung Pathen tengah uep-awm la awm. 3 Imsakung lawng im lak ah hinyahna te a huh. Te tila te Mosi lak ah Jesuh lawngah asang ngaai hinyahna te a dang ham tuueng. 4 Im boeih he tah thlaang lawng a sak, thaihu boeih he tah Pathen lawng a sak. 5 Mosi tah tuihyoeihthlaang la a awm van angla Pathen im khuiah uep-awm biibikung la awm tih Pathen lawng hailam ben ah a thui ham te khaw a thui thai. 6 Tede Khrih tah Pathen im khuiah ukkung uep-awm a Capa la awm. Mami lawng ngaiuepna dawngah thincakna n'khueh tih uepvoetna a awm nawh atah mami tah amah kah im ni. 7 Tedawngah Ciim Muithla lawng avan thui angla, “Te hin ah Pathen awl te, na yaak u atah, na thin thah sak u boel; 8 Na patuer hue lawngah Pathen te a oelh ataih u tih Ramhum huhang ah a noek adak u van angla te awm u boel; 9 Pathen lawng, “Kum sawm lii khui puet ah ka sai thaihu thli te a huh u de, teah te kai n'noekdak u tih n'oelhtaih u; 10 Tedawngah ahimi sawah ka thinsa tih, ‘Ahimi tah, a awl cak u nawh tih ka awlpeek khaw vai hamla a thana. 11 Kai tah ka thin a sa dawngah awl ka taap tih: “Ahimi lawng mevengah khaw kai lawng ka peek duemna ram la te kuun manawh!’ ka tina” tila a thui. 12 Oengca maya manau hue, nangmi tim ah aka hing Pathen te mangthawng taak ngaihna thinkaw lungbui the khueh nawh ham oen tangna hamla aka ngaih nawh thlaang khatca khaw na awm hau nawh ham ngaithuen uh. 13 Te lak atah, nangmi te thawlhna lawng thai a latna nawh ham, thinthah la na awm u nawh hamla, caciim lawngah, “Tihin,” a ti te mami oen tuhkaina a awm khui atah hin roekk ah pakhat oen khat bawmcem yoeyah uh. 14 Metihtiah mami lawng acuekca veng kah ngaikhuekna n'khueh te aboettoe acakla m'phoeih rapsaat atah mami boeih tah Khrih oen bii bi haih la ng' awm u. 15 Caciim lawngah, “Tihin ah Pathen awl te na yaak u atah na thin thah sak u boel, Na patuer hue lawngah Pathen awl a eek u van angla awm u boel” ti. 16 A-u lawng Pathen awl te a yaak coengah ahih awl te a eek kai? Ahimi tah Iyipt ram kah Mosi lawng a mawt thlaang thli te ni. 17 A-u sawah Pathen he kum sawmlii khui a thin a sa? Thawlhna a sai u tih ramhum huhang ah aka duek thli sawah ni. 18 Pathen lawngah awl a taap tih. “Kai lawng ka peek ham koei duemna ram la te ahimi lawngah meveng khaw kuun u manawh” a tina vengah te a-u hue a tina kai? Awl aka ngaai nawh hue te ni a tina. 19 Tedawngah ahimi lawng duemna ram khuiah a kuun thai nawh he tah ahimi lawng a tangna u nawh dawngah ni tila m'miing u.
1 Tahe atah, Pathen lawng duemna huen a thui te pha thaina ham awlkamna m'peek poen. Te kah awlkam sut duemna khuiah te pha ohla awm hau nawh ham ngaithuen u sih. 2 Metihtiah ahimi lawng a yaak u angla, mami lawng Awlthang Then te n'yaak u poen. Tede, Ahimi lawng a yaak u awlthang te oengna oen a do u nawh dawngah ahimi ham hoeikhangna awm nawh. 3 Tede mami lawngtah n'tangna tih Pathen lawng a kam duemna te n'huh u. Pathen lawng, “Ka thin sa tih, ‘kai lawng ka peek ham koei duemna ram ah te ahimi lawng meveng khaw kuun manawh!’ tila awl ka taap tih ka thui.” a ti angla te awm tangtang. Dilai a suen cuek vengah bii a coeng boeih poen de ahih lawng te tila te a thui. 4 Metihtiah Caciim dawng ahuen pakhat ah khawhin hin rihna kawng te “Arih hin ah Pathen tah bii boeih te a coeng tih duem” tila a thui. 5 Asawkah akawng angla a thui koep tah: Kai lawng ka peek ham koei duemna ram ah te meveng khaw kuun manawh” ti. 6 Awlthang Theen te lamhala aka ya hue lawng a tangna u nawh dawngah duemna te dang u nawh. Tede, thlaangtloe aka dang hamla thlaang awm. 7 He kawngah Pathen lawng, “Tihin” tila a thui te, khawhin tloe pakhat a khueng pe tite a tueng sak. Kum yahawh a awm coengah asawkah thui la aka awm te caciim dawngah a awm van angla Pathen lawng Devid hawna oen, “Tihin ah Pathen awl na yaak u atah, na thin thah sak mangkhak u boel,” tila a thui. 8 Pathen kah awlkam duemna te Joshua lawng thlaangping te pe kawinih Pathen lawng atloe khawhin kawng te thui manawh. 9 Tedawngah, Pathen tah arih hin ah a duem van angla Pathen thlaang thli hamla duemna khawhin, hin at awm hun. 10 Pathen tah amah bii bina kalawng a duem van angla te Pathen awlkam duemna te aka dang boeih tah amah kah bii bina kalawng duem van ai. 11 Tedawngah awlkam duemna te dang thaina ham atlawh ngaaila tha huer u sih. Ahimi lawng oengna a khueh u nawh dawngah duemna a dang nawh angla te mami tah pakhat khaw te tila awm u boel sih. 12 Pathen kah awl tah hing tih bii a bi, voeivaang aka hatt samsen lak ah khaw hatt ngaai. Hingna oen muithla a humna toe, ruhcong oen thling athawkk a humna toela a pek abo thai. Thlaanghing lungbui kah ngaihna oen poekna boeih te khaw a ming thai. 13 Pathen haiah thuh phah thai thaihu khat khaw awm nawh; Pathen thaihu sai boeih lawng amah mik huh ah daih u vetih tueng pheng ai. Mami lawng m'mah kah sai boeih te a tengah n'thui ai. 14 Tedawngah mami lawng oengna te acakla phoeih rap u sih. Metihtiah, Pathen Capa Jesuh tah mami kah aka lenduet Khawsoeih Bawi la awm tih Pathen a awmna la te cet poen. 15 Mami kah Khawsoeih Bawi he mami kah tharana nawh dawngah reenna aka khueh thai nawh khawsoeih aih moenih ta. Mami kah khawsoeih Bawi he mami angla suekna phun soeprep aka tawng van ni, tede thawlhna tehca khaw sai nawh. 16 Tedawngah, lungvatna a awmna huen Pathen kah bawingawlh coen tengla cawh u sih. Te huen atah n'ngoe vengah mami bawm ham lungna oen lungvatna te n'dang ai.
1 Khawsoeih Bawi boeih he tah a tawngpa puei timkah a tuek tih amami yuengah Pathen bii bikung la a khueh. Ahih lawng thawthuengna oen thawlh huihthlutna te a sai. 2 Amah khaw asoepna nawh a phun phun a awm van dawngah cuihhoena aka khueh nawh thlaang thli oen thawlhpalhna aka sai thlaang thli sawah kawdawna a khueh thai. 3 Te tila te amah khaw voetna a khueh van dawngah thlaangping kah thawlhna bueng ham ohla amah kah thawlhna dawngah khaw luciik buulna thawthueng ham angoe. 4 A-u khaw amah oen amah te hinyah koei khawsoeih bawi la tuek u thai nawh. Aaron te Pathen lawng a khue tih Khawsoeih Bawi la a awm van angla Pathen kah khuena bueng oen ni khawsoeih bawi la a coengg thai. 5 Tetih van la te Khrih lawngkhaw amah ngaih ah hinyah koei khawsoeih bawi la coengg nawh. Pathen lawng ahih nala te, “Nang tah ka Capa la na awm; tihin ah Kai tah na Pa la ka awm poen” a tina. 6 Tecoeng huentloe pakhat ah, “Nang tah Melkhizedek kah bii te tomthlepkung dungyan khawsoeih la na awm ai” a tina. 7 Jesuh lawng dilai dawng a hing veng-ah duekna kalawng amah aka thlawn-thaikung Pathen tengah rung-arap tih mikphi haapcang ruila thangthuina oen a bih. Ahih tah boe a ngaai tih pum a peek dawngah a thangthuina te Pathen lawng a yaak. 8 Tecakhaw Pathen Capa la awm de, Pathen awl aka ngaai thlaang la coengg ham ah patang khangna oen a cang. 9 Ahih lawngah thlaangsoep la a awm coengah amah awl aka vai thlaang boeih ham dungyan thlawnna a kungpui la awm tih, 10 Pathen lawng, “Melkhizedek kah bii tomthlepkung khawsoeih bawi la na awm poen,” a tina. 11 He kawng he thui hamla yahawh hlang awm mai de, nangmi lawng yaakming thaina na khueh u nawh tih thuicaih ham rai tangkiik. 12 Nangmi he tahe vengah cangpueikung saya la pateng na awm u ham khoek thlai poen de, Pathen kah awl te akungcuek kalawng nangmi cang puei ham thlaangtloe te tahe toe na ngoe u hun. Nangmi lawngah buh tangtang te na caak u thai ham awm poen de tahe toe ah suuktui na awkk u khaak hun. 13 A-u khaw suuktui aka aw hun te tah camoe la awm hun tih asoeng oen asoeng nawh mingna khueh thai thlan hun. 14 Buh aka haam te tah kum haam thlaangsoep ham ni; ahimi lawngtah tuukkiik u tih athe atheen te a pek abo thai.
1 Tedawngah haila cawh u sih, lamhacuek kah khrihca kawng cangna te ceh taak u poen silang tah aka soep cangna ben la te cawh u sih. Aphu aka awm nawh bii ceh taak tangte te khaw, Pathen oengna te khaw, akung kalawng tong koep tlaih boel sih; 2 baptisma kawng cangna oen kuttloengna kawng, thlaang-duek thawhkoepna kawng oen dungyan awlcekna kawng thli te akung kalawng tong koep tlaih boel sih. 3 Haila cawh u sih! Pathen lawng sai a ti atah: te ang boeih te n'sai badai. 4 Amami kah oengna aka hoett thli te metila thawlhna a yut koep ai? Ahimi tah Pathen kah aangna khuiah awm u poen, vaan kutdo te khaw ateng alai u poen tih ahimi lawng a huh koei Ciim Muithla khaw a dang u poen; 5 Ahimi lawngah Pathen awl a tuui-athlim khaw a ming tih aka law ham koei atue atang san kah tharana te khaw a ming u poen. 6 Te tila a ming u lal maiah ahimi lawng oengna te a hoett u! Ahimi te thawlh yut sak koep ham coengg thai tlaih nawh, metihtiah ahimi lawng Pathen capa te thinglam dawng a ngawn koep u tih thlaangtim paalak ah yah a pawh sak u. 7 Rawtui khawtlan a yawn tih lotoen thlaang thli hamla aphu aka awm cangphung aka tawi sak dilai te tah Pathen lawng yotheen kam-awmna a peek. 8 Tede, thliing-ahang oen bel hawng aka po sak dilai te tah aphu awm nawh; Pathen lawng a tap avoep vetih hai dawngah a phum ai. 9 Ka paya thli he tila nangmi tengah awl kavan thui de nangmi kawngah ka ngai mawng, nangmi lawng yotheen kam-awmna atheen ngaai thlawnna na khueh u te kaimi lawng ka ming. 10 Pathen he atuueng aleeng nawh Pathen aih nawh ni. Nangmi lawng bii na bi u te khaw, amah na lungna u te tueng sak ham Khrihca na puei na paw bawmna na peek u tih tahe toe ah na do na dan u te khaw Pathen lawng hilh manawh. 11 Nangmi lawng na ngaiuep u te ataktang la acoenggna ham nangmi lawng bawmcem ngaihna thinkaw thluembuekna te aboettoe khueh poe uh tila ka ngaih. 12 Thayong thlaang la na awm u ham ka ngaih nawh, tede oengna, reenna a khueh tih Pathen lawng a kam pe te aka dang thlaang thli angla ni awm sak ham ka ngaih u. 13 Pathen lawng Abraham tengah awlkamna a sai vengah amah awlkam te sai hamla awl a taap. Te tila awl a taap vengah te amah lak ah alenduet khat khaw a awm nawh dawngah amah miing te a hawna. 14 Ahih lawngah Abraham nala, “Nang tengah awl ka kam, yotheen kam-awmna kan peek vetih na cadil nauha ka puung ka daw sak ai” a tina. 15 Abraham lawng kawdaw thinsan oen a ring tih Pathen lawng awl a kam te a dang. 16 Thlaang pakhat lawng awl a taap vengah amah lak ah aka lenduet thlaang pakhat khat kah miing te a hawna atah te awltaapna lawng awlpuungna boeih te a dip a der sak. 17 Pathen lawng a mengtengna te thlauh tlaih nawh tite amah kah awlkamna aka dang ham koei thlaang thli tengah aciimphanla tueng sak ham a ngaih, tedawngah a awlkam te awltaap oen a cak sak. 18 Tecoengah, he thaihu pahih awlkamna oen awltaap he tah thlauh thai koei nawh tih he kawngah Pathen lawng a hoem thui thai nawh. Tedawngah amah tengah ngaimawng ngaitoela aka awm mami lawng, mami haiah avan toen ngaiuepna te acakla phoeih ham n'tha thlue u. 19 He ngaiuepna tah mami lawng hingna hamla thiilungdue angla awm. Te ngaiuepna tah mami ham kuepyingna oen ngaimawngna la a awm dawngah vaan tempal bok-im kah baiyaan te a pooengvoelh tih huen ciim koek alungkir la te kuun. 20 Te kah huen ciim koek te mami m'pha thlan ah mami yuengla Jesuh lawng a pha poen tih Melkhizedek kah bii tomthlepkung la dungyan khawsoeih bawi la awm poen.
1 Melkhizedek he tah Salem seng-pahrang la awm tih Tloeng Khoelh Pathen kah khawsoeih la khaw awm. Abraham lawng raal a teek tih sengpahrang palii hue te a taana huen kalawng a law koep vengah Melkhizedek lawng a do tih ahih te yotheenna oen a phueh a sawm. 2 Abraham lawng raal kut kah avan khuen boeih thaihu paha ah pakhat te ahih a peek (Melkhizedek kah a miing, lamhacuek thuingaihna tah, “Doengna Sengpahrang,” ti ngaihna tih ahih tah Salem kah sengpahrang la khaw a awm dawngah ahih kah miing he “Roepna Sengpahrang,” tila khaw a thuingaihna ni.) 3 Melkhizedek kah a manu oen ana pa oen ah an patuer hue kah akawng alam cathut khaw awm nawh; ahih kah a cuunna oen a duekna akawng alam cathut khaw awm nawh. Ahih tah Pathen Capa angtoekla awm tih; dungyan khawsoeih la poe awm. 4 Tedawngah ahih he metihtlukla a lenduet tite nangmi lawng na ming u. Mami kah patuer miingthang Abraham lawng pateng raal kut dawngkah a lawh boeih thaihu paha ah pakhat te ahih a peek. 5 Levi cadil thli khawsoeih la aka awm hue lawng Israel thlaangphun tengah paha ah pakhat te Phungawl angla a cawi thai. Te tah amami nam, amami thlaangphun Abraham cadil thli van ni. 6 Melkhizedek he Levi cadil nawh ni, tede Abraham tengkah paha ah pakhat te a lawh tih Pathen kah awlkam aka dang Abraham te yotheen kam-awm oen a phueh asawm. 7 Yotheen kam-awmna pekung tah yotheen kam-awm peek la aka awm thlaang lak ah aka lenduet ni tite ngaithliwhna awm nawh. 8 Khawsoeih hue kah akawng atah, paha ah pakhat te aka duek thai thlaang lawng a cawi, tede Melkhizedek kawng atah caciim lawng a thui angla aka hing thlaang lawngah paha ah pakhat te a cawi. 9 Tecoengah Abraham lawng paha ah pakhat a peek vengah (Levi cadil thli lawngkhaw paha ah pakhat a peek) Levi lawngkhaw a peek tila n'thui thai. 10 Metihtiah Levi te cuun thlan de ahih kah patuer Abraham tah Melkhizedek oen a huh hih vengah te Abraham pum khuiah awm poen tila n'thui thai. 11 Israel thlaang phun tengah Phung-awl te a peek vengah Levi thlaang phun khawsoeih hue te akung la asut tih a peek. Tahe ah Levi phun khawsoeih hue kah bii bi te soep kawinih, Aaron phun thui ohla Melkhizedek kah bii te tomthlepkung la khawsoeih phun tloe a law ham ngoe manawh. 12 Khawsoeih la awmna te a thaw aleng u atah phungawl te khaw thawleng ham a ngoe. 13 He thaihu kawng a thui awl lawng a tueng sak tah mami kah bawipa he Levi phun nawh ni, thlaangphun tloe la awm tih ahih phun khuikah a-u khat khaw khawsoeih bii bi nawh. 14 Ahih tah Judah phun kalawng va law tite thlaang boeih lawng a ming, tede Mosi lawng khawsoeih kawng a thui vengah Judah phun kawng he thui nawh. 15 Melkhizedek angla atloe khawsoeih pakhat va pho ti he caih tare. 16 Ahih tah thlaanghing kah sai phung alam oen phung angla khawsoeih la coengg nawh, tede aboetna aka awm nawh hingna tharana rang oen ni a coengg. 17 Metihtiah caciim lawngah, “Nang tah Melkhizedek kah bii tomthlepkung dungyan khawsoeih la na awm poen ai,” tila a thui. 18 Phung-alam aruem te tah tharana khueh nawh tih hoeikhangna a awm nawh dawngah hoett la awm poen. 19 Metihtiah Mosi kah Phungawl lawng thaihu khat khaw asoepla sai thai nawh. Tahe atah mami lawng Pathen oen yoeiina ham atheen ngai ngaiuepna te m'peek poen. 20 Tecoengah Pathen kah awltaap khaw awm hun. Thlaangtloe hue tah khawsoeih la a awm u vengah te ang awltaap te awm nawh. 21 Tede Jesuh he awltaapna oen khawsoeih la a awm vengah Pathen lawng ahih te, “Bawipa lawng awltaapna a sai poen tih a kawpoek thaw-aleng tlaih manawh: ‘Nang tah dungyan khawsoeih la na awm poen ai” a tina. 22 He tila alakloela a awm he tah Jesuh te atheen ngaai paipi aka caksakkung la te a sai. 23 Tecoengah atloe alakloena awm hun; khawsoeih tloe yahawh awm maide ahimi tah a duek u dawngah amami kah bii te poe bi u thai nawh. 24 Tede Jesuh tah dungyan a hing dawngah amah bii khawsoeih la awmna te thlaangtloe kut ah pe nawh. 25 Tedawngah amah teng kalawng Pathen teng aka law hue te tahe ah khaw, yoeyahla a thlawn thai, metihtiah ahih tah dungyan hing tih ahimi ham Pathen tengah reenna aka bih pe hamla awm. 26 Tedawngah Jesuh tah mami kah ngoena aka soep sak Khawsoeih Bawi ni. Ahih tah ciim; thawlhpalhna khueh nawh tih thawlhna khaw ahih dawngah awm nawh; ahih te thlaangthawlh tim kalawng a thloeng tih vaan khawhi sawah a pawmsang hang poen. 27 Ahih tah atloe khawsoeih bawi hue oen lo u nawh; Ahih lawngah lamhacuekla amah kah thawlhna oen thlaangping kah thawlhna dawngah khawhin roekk ah thawthueng ham ngoe nawh. Ahih lawngah amah oen amah te vai at ah akhoekkoengla dungyan ham thawthuengna pakhat a sai poen. 28 Mosi kah Phungawl lawngtah aka soep nawh thlaang te khawsoeih bawi la awm ham a sai; tede Phungawl coengah aka law, Pathen lawng awl a taap tih a sai awlkam te lawngtah dungyan aka soep khawsoeih la a Capa te a khueh poen.
1 Kaimi lawng awlpui la ka thui u tah vaan ah Huham tharakoek Pathen kah ngawlhcoen bantang ben ah aka ngawl Khawsoeih Bawi pakhat mami lawng n'khueh u ti he ni ka thui u. 2 Ahih lawngtah Huen Ciim Koek khuiah Khawsoeih Bawi angla bii a bi tih, te huen te tah thlaanghing lawng a sak nawh Pathen lawng a sak riim-im tangtang ni. 3 Khawsoeih Bawi boeih boeih tah thaihu peek thli oen boiava thawthuengna te Pathen tengah nawn hamla a khueh, tetih van la te mami kah Khawsoeih Bawi lawngkhaw thaihu nawn hamla a khueh van. 4 Dilai dawngah he awm kawinih khawsoeih la awm poe manawh, metihtiah Judah Phungawl lawng a kuek angla kutdo thli nawnkung la khawsoeih thli awm. 5 Ahimi kah khawsoeih bii te tah vaan ah ataktangla aka awm thaihu kah muei asam oen mueithlip mueithla bueng mai ni. Mosi lawngkhaw te tila ni a sai. Ahih lawngah Riim-im te ka sa ai a ti vengah Pathen lawng, “Tlaangsawm ah kan huh sak muei-asam angla te thaihu soeprep te sai hamla hilh boel” a tina. 6 Tede tahe ah ahimi kah bii lak ah asangduet khawsoeih bii te Jesuh a peek poen. Pathen oen thlaanghing laklaw ah Jesuh lawng a sai paipi tah atheen ngaai van angla, awlkam dawngah akung asut tih khawsoeih la a awm te khaw sangduet. 7 Lamhacuek kah paipi te avoet-na awm nawh kawinih apabena paipi te sai ham ngoe manawh. 8 Tede Pathen lawng a thlaang thli kah thawlhna te a huh tih, “Bawipa lawng he tila a thui, Israel thlaangphun oen Judah thlaangphun oen ah paipi thaai ka saina khawhin te a pha ai. 9 Te kah paipi te tah ahimi kah patuer thli a kut ah ka tuuk tih Iyipt ram kalawng kavan mawt vengkah ahimi oen ka sai paipi angla awm manawh. Ahimi oen ka sai paipi dawngah uep-awm la a awm nawh dawngah, ahimi te ka mangthawng taak; tila Bawipa lawng a thui. 10 Tecoengah Bawipa lawng, “Aka law ham koei khawhin ah Israel thlaangphun oen he tila paipi te ka sai ai; Kai lawngah kamah kah phungawl thli te a thinkaw ah Ka khueh pe vetih a lungbui ah ka thut pe ai. Kai tah ahimi kah Pathen la ka awm vetih ahimi tah ka thlaangphun la awm ai. 11 A-u lawngkhaw a pilnam tengah khawseh, ram khuikah thlaang tengah khawseh, “Bawipa te ming uh’ tila cang puei nawh vetih thui pe tlaih manawh. Metihtiah camaw oen patawng ahimi boeih lawng kai he m'ming u poen ai. 12 Ahimi kah thawlhna te khawdawp ka ngaai vetih a sai thawlh boeih te ka hilh pe poen ai” tila a thui. 13 Te tila awlkam thaai kawng a thui dawngah lamhacuek awlkam te Pathen lawng aruem araw la a coengg sak tih aruem araw oen apawn apit thaihu te tah kawlkalh ah ha-ata poen ai.
1 Lamhacuek kah paipi lawngtah bokna phung alam a khueh tih thlaanghing lawng a sak bokna huen te khaw a khueh. 2 Riim-im te a sak u tih adauben kah pakhat te Huen Ciim ti u. Te kah a khuiah te haivangna awm tih Pathen tengah takawi a nawnna caboi khaw awm. 3 Baiyaan apahihna a hu ben ah te Huen Ciim Koek a ti u Riim-im te awm. 4 Te kah a khuiah riimtuui huihthlutna sui oen a sai boknathaang, sui oen a prang heet Awlkamna Kong te awm. Te kong khuiah manna takawi a khuehna sui tui-um, aramno aka cawn Aaron kah cawnghol oen ah awlpeek thutna lungpeel pahih te a khueh u. 5 Te kah Kong sawah te phe aka phuer cherubim kutsaimuei te awm. Te tah Pathen he ah awm tila tuengsakna ni. Te kah cherubim lawng te thawlh khawdawp-ngaaina ahuen sawah phe a phuer. Tede tahe ah te ang thaihu te asoepbirla thuina atue nawh ni. 6 Te kah bokna phung-alam thaihu tah he tila awm. Khawsoeih hue tah amami kah bi ham koei te sai ham la hin roekk ah Riim-im adauben la te cet u. 7 Tede, Khawsoeih Bawi bueng te Riim-im khuila kuun tih, te tila te kum khat ah vai-at bueng ni a kuun. Ahih lawngah thisen te a khuen tih amah ham khaw, ming ohla thawlhna aka sai thlaangping ham khaw Pathen tengah a nawn. 8 He tila phung-alam oen saina dawng kalawng Ciim Muithla lawng aciimphanla n'cang puei tah adauben Riim-im te a awm hun roekk atah Huen Ciim Koek khuila kuunna lawngpui te awng u thlan hun ti he ni. 9 He tah nuehtahna tih tahe veng kah atue atang he a khi ngaihna ni. A thuingaihna tah Pathen tengah a nawn u kutdo thaihu oen boiava oen thawthuengna lawng Pathen aka bok thlaang thli kah thinkaw te ciim sak thai nawh tila thuingaihna ni. 10 Te ang thli te caak awkk oen ciimcaihna poei bueng oen ni a sai mai. He ang thli tah asaw ahan kah phung-alam boeih ni, Pathen lawng phung-alam athaai a sai thlantoe ah a hawna mai ni. 11 Tede he kah aka awm tangte phung-alam thaihu theen sawah Khrih tah Khawsoeih Bawi la law poen. Ahih lawng bii a bina riim-im te tah bo ngaai tih soep; te tah thlaanghing kut oen a sak riim-im nawh tih he kah sai la aka awm dilai oen khaw tuhkai u nawh. 12 Jesuh lawngah riim-im Huen Ciim Koek khuila vai khat ah dungyan ham akhoekkoengla a kuun vengah me-ee thi oen vaitaw thi te luciik la nawn ham khuen nawh; amah kah thisen te ni a khuen tih mami ham dungyan hingna te avan sai. 13 Phung-alam lawng a kuek angla aka ciim nawh thlaangping sawah, me-ee thi, vaitaw taal thi oen vaitaw a canaica kah athloi te a heh u tih, te lawng atah phung-alam ben ah aka ciim nawh ahimi te acaih sak. 14 He tila ciimna te a awm tangtang atah, Khrih thisen lawngtah metihtlukla he lak ah aciim acaih sak ngaai ai! Dungyan Muithla rang oen ah aka soep luciik la amah oen amah te Pathen tengah nawn u poen. Aka hing Pathen kah bii te mami lawng bi thaina ham hoeikhangna aka awm nawh phung-alam vaina rang oen ciim acaih nawh athe atheen mingna thinkaw te a thisen oen a ciim sak ai. 15 Tedawngah Pathen kah a thlaangkhue thli lawngah dungyan yotheen kam-awmna Pathen lawng awl akam sut te a dangna ham Khrih lawngah paipi athaai te a sai. Te tila a dang he tah, ahimi lawng lamhacuek paipi khuiah a awm u vengkah a sai thawlhna boeih kalawng thlaangping te a duekna oen a loeih sak dawngah ni. 16 Ropangna awl he tah ropangna awl aka thuikung te a duek coengah ni a hawna. 17 Metihtiah ropangna awl he aka thuikung a hing vengah tah cak nawh; ahih te a duek coengah ni a cak. 18 Tedawngah ni lamhacuek kah paipi te khaw thisen oen a cak sak. 19 Mosi lawng lamhacuek ah Phungawl khuiah aka awm awlpeek boeih te thlaangping tengah a phawng pe. Tecoengah vaitaw oen me-ee kah a thi te a lawh tih tui oen a thoekk, hissop thingpe dawngah paangpawn a piin te a hawna tih Phungawl cabu oen rangpui sawah a heh. 20 Mosi lawng, “He tah, nangmi lawng na vai hamla Pathen kah peek paipi acakna thisen ni” a tina. 21 Tetih van toeng toeng la thisen te Riim-im oen bokna ben ah a hawna thaihu boeih sawah Mosi lawng a heh. 22 Ataktang atah Phungawl lawng a kuek angla thaihu cungkuem he thisen oen ciim tih thisen bueng oen ni thawlh khawdawp ngaaina a awm. 23 Vaan ah ataktang la aka awm thaihu thli kah mueithlip lawng te tila ciim sak ham angoe. Tede, vaan kah thaihu atak tang amah roe lawngah te atheen ngaai luciik thawthuengna a kuek. 24 Metihtiah vaan ah ataktangla aka awm kah mueithlip, thlaang kah sai Huen Ciim khuila te Khrih tah kuun nawh. Ahih tah vaan roe la te cet tih tahe ah te ah te mami yuengla Pathen haiah te a pha. 25 Judah thlaangphun hue kah Khawsoeih Bawi lawngtah ramsa thisen oen khawkum roekk ah Huen Ciim Koek khuila kuun. Tede Khrih tah amah oen amah te nawn u hamla voei yahawh cet nawh, 26 te tila te sai ham ngoe kawinih dilai suen cuek veng kalawng voei yahawh hlang patang a khang poen ai. Ahih lawng amah oen amah te luciik la thawthuengna rang oen thawlhna aciingna ham san boeih kah aboetna atue a pha tawm veng he ah vaikhat ah akhoek koeng la ahih tah va law. 27 Thlaang boeih he vai at tah duek ai, tecoengah Pathen lawng awl a cek ai. 28 Tetih toengtoeng la thlaang yahawh kah thawlhna aciingna ham Khrih lawngkhaw vaikhat tah luciik la nawn u. Ahih tah apabela law koep ai, te ngoen tah thawlhna ciing sak ham tlaih nawh tih amah aka lamtoen hue te thlawn ham poen ni.
1 Judah hue kah Phungawl he tah ataktang thaihu kah aka soep tih uepna koei muei-asam nawh ni; te tah aka law ham koei atheen thaihu kah mueithlip mai ni. A sai u nooek thawthuengna te khawkum khawhaal a nawn u yoeyah. Te tih atah, metila Phungawl lawngah te, he ang thawthuengna oen ah Pathen tengla aka law thlaang thli te thlaangsoep la a sai thai ai? 2 Pathen aka bok thlaang thli te amami kah thawlhna kalawng ciim sak taktak kawinih, ahimi lawng thawlhna ka khueh tila te poek nawh vetih, luciik thawthuengna boeih te a toeng poen ai. 3 Te cakhaw, he tila khawkum khawhaal luciik thawthuengna lawng atah thlaang thli te a thawlhna ming sak ham mai ni. 4 Metihtiah vaitaw thi oen me-ee thi lawngah thawlhna he ciing sak thai tangtang nawh. 5 Tedawngah he kawngah he Khrih lawng dilai la ka law ai a ti vengah te Pathen tengah: “Nang lawngah luciik oen thaihu nawn te na kuek nawh, tede kai hamla thlaangpum ni navan hoel sut poen. 6 Nang tah bokna-thaang sawah boiava oen huihthlutna te na ngaai khuek ti nawh tih thawlh ciingna ham thawthuengna khaw ngaikhuek thindeeng la awm nawh. 7 Tedawngah kai lawng, Phungawl cabu dawngah kamah kawng-alam a thut angla te, “Aw Pathen, na kawngaih te sai hamla he ah ka awm; ka tina,” tila a thui. 8 Lamhacuek ah a thui tah, “Nang lawngah luciik khaw, nawn thaihu khaw, bokna-thaang dawngah boiava huihthlutna khaw, thawlhthlamna luciik thawthuengna khaw na ngaih luem nawh tih na kaw khaw hoe baal nawh” ti. He luciik thawthuengna boeih he Phungawl lawng a kuek angla a nawn de he tila a thui toengtoeng ni. 9 Tecoengah ahih lawng, “Aw Pathen, na kawngaih te sai ham he ah ka awm” a tina. Tedawngah thawthuengna aruem boeih te a hoett tih Khrih thawthuengna oen ayueng a theng poen. 10 Pathen lawng sai sak a ngaih te Khrih lawng a sai tih vaikhat ah akhoek koengla amah pum te a nawnna rang oen mami boeih tah thawlhna kalawng n'ciim poen. 11 Judah khawsoeih boeih lawng khawhin roekk ah amami kah bii te a bi u tih a sai nooek luciik te voei yahawh hlang a nawn u; te luciik thawthuengna lawng metuek khaw thawlhna te ciim sak thai nawh. 12 Tede Khrih lawngtah thawlh-thlamna ham luciik thawthuengna vai at a nawn tih te tah dungyan ham khoek poen. Tecoeng atah Pathen kah bantang ben ah te ahih tah ngawl poen. 13 Pathen lawng ahih kah a raal thli te a khowtang ah khowtloengna la a khueh thlantoe tah te huen kalawng tahe ah a ring. 14 Te tila te vai at thawthuengna oen thawlhna aka ciim thlaang thli te dungyan ham thlaangsoep la a sai poen. 15 Tecoengah Ciim Muithla lawngkhaw amah kah sausi te mami tengah avan tueng sak. Ahih lawng lamhacuek ah, 16 “Hai ben atah ahimi oen he tila paipi ka sai ai, Kamah kah Phungawl te a lungbui ah ka khueh pe vetih a thinkaw ah ka thut pe ai” tila a thui. 17 Tecoengah a thui koep baal tah, “Ahimi kah thawlhna oen athe a sai te ka hilh pe poen ai” ti. 18 Tedawngah he tila khawdawp ngaaina a awm coeng atah thawlh aciimna ham luciik thawthuengna te ngoe tlaih nawh. 19 Tedawngah maya manau hue, Jesuh kah duekna rang oen Huen Ciim Koek khuila te mami lawng yalpawla n'kuun thai poen. 20 Ahih lawngah lawngpui thai, aka hing lawngpui te baiyaan khui kalawng mami ham avan awng poen, te kah baiyaan tah amah pum te ni. 21 Mami lawngah Pathen im ukkung khawsoeih alenduet te n'khueh u. 22 Tedawngah mami lawng tuiciil oen silh la aka awm “pum” mami pum oen ah, thawlhna kalawng aka ciim athetheen mingna kawpoek lungbui oen ah, thinkaw tak oen oengcakna oen ah Pathen tengla yoeii u lah sih. 23 Awlkam aka cak Pathen tah uep-awm la a awm dawngah mami lawng ngaiuepna n'khueh u te acakla phoeih mangkhak u sih. 24 Mami lawngah theenna te sai ham oen ah lungna te tueng sak ham pakhat oen khat bawmcem u silang pakhat oen khat thintlo u sih. Te lak atah, nangmi lawng Bawipa Khawhin tah yoeii poen tila na ming u dawngah pakhat oen khat thaphawh u tare sih. 25 Thik at la huhtun pumna sai nooek te thlaangtloe hue lawngah a hoett u angla mami lawngtah hoett boel sih. Te lak atah, nangmi lawng Bawipa Khawhin tah yoeii tare poen tila na ming u dawngah khat oen khat thaphawh u sih. 26 Mami lawng awltak te ming coengah mengtengna oen thawlhna te n'sai u khuep atah luciik thawthuengna khatca khaw awm tlaih nawh. 27 Te lak ah aka awm tah, aka law ham koei Awlcekna oen Pathen aka raalna thli ungna ham koei rih-awm haialh te ni rih oen thuen ruila ring ham a awm mai poen. 28 A-u khaw Mosi kah Phungawl aka vai nawh te tah, thlaang pahih tihnawhtah pathum kah thuina rang oen thawlhna awm tila awl a tloek atah reen ohla a ngawn u. 29 Te pateng khaw te tila a awm atah Pathen Capa tula aka sak nawh tih ahih te thawlhna kalawng aka ciim sak Pathen kah lungvatna khuehkung Muithla te athe akhana atah te thlaang te metila a sai ai? Ahih lawng a yawkk ham koei dantatna tah metihtlukla athe-eep ai tite poek u hawn! 30 Metihtiah, “Kai lawngah luu ka lo ai, kai lawngah kut ka thung ai,” tila khaw seh, “Bawipa lawng a thlaang thli te awl a cek ai” tila aka thui te mami lawngah m'ming u. 31 Aka hing Pathen kut khuiah tlaak ham tah arih awm tangkiik mai poen! 32 N'hu vengah thaihu metila a awm tite poek u lah. Pathen kah aangna nangmi teng avan pha pek vengah te raina phun soeprep na tawng u de, te raina lawng nangmi te n'taa nawh. 33 Nangmi lawng alakvai atah rangpui haiah thekhana oen heemtekna te na tawng u. Alakvai vengah thlaangtloe hue tetih van la thekha heemtekna a tawng u vengah nangmi lawngkhaw thekhana tawng van ham oepsoehla na kamtoen u. 34 Nangmi lawng thongtla thli te patang na khang puei tih na khueh thaihu boeih te avan rot u vengah na sung na deuh te awmngaih oen na ueh u. Metihtiah te ang thli lak ah atheen ngaai dungyan thaihu awm tila na ming u dawngah ni. 35 Tedawngah na thin hoepp sak boel, thincak thin-awmna lawngah kutdo bo hlang n'huh sak ai. 36 Pathen kah kawngaih te na sai thaina ham oen ah amah awlkam thaihu te na dangna u ham thinsan kawdaw oen awm uh. 37 Metihtiah Caciim lawng, “Kawlkalh bawtbet coengah aka law ham koei lawngah law ai; Ahih tah uelh manawh. 38 Tede, ka thlaangdoeng thli tah oengna oen hing ai; A-u khaw hu benla aka nawng tah, ahih tengah ka kaw hoe manawh” tila a thui. 39 Mami tah hu benla aka nawng koep thlaangpal paathaam nawh ni. Mami tah oengna aka khueh tih thlawn la aka awm thlaang ni.
1 Oengna khueh ti he tah, mami lawngah ngaiuep thaihu te awm tangtang tih mik huh nawh thaihu te ataktang la awm tila tangna he ni. 2 Yan vengkah thlaang thli lawng oengna oen ni Pathen kaw a tawng u. 3 Pathen awl lawng huh thai nawh khui kalawng huh thai he a sai tih Pathen kah awl lawng khawhipuempa he a sai tila mami lawng yaakming he tah oengna oen ni. 4 Abel lawngah Kain lak ah atheen ngaai Pathen teng thaw a thueng he oengna oen ni. Oengna rang oen ahih te Pathen lawng thlaangdoeng la a pawm, metihtiah Pathen lawng ahih kah kutdo te a do pe dawngah ni. Abel tah duek coeng poen de a oengna lawng tahetoe awl a thui. 5 Enok he duek ohla, Pathen tengla aka pawm hang he tah oengna ni. Pathen lawng ahih te a pawm hang poen dawngah a-u lawngkhaw ahih te hu tlaih nawh. Caciim lawngah, Enok he vaan la a pawm hang thlan vengah Pathen kaw a tawng poen, tila a thui. 6 A-u lawngkhaw oengna oen nawh atah Pathen kaw te tawng thai nawh; metihtiah a-u khaw Pathen tengla aka law lawng Pathen tah awm tih amah aka tlap boeih te kutdo a peek tite a oeng ham awm. 7 Noah lawng a huh thai nawh hailam ben kah thaihu kawng Pathen lawng ngaithuenna a peek awl te aka yaak sak tah oengna ni. Ahih lawngah Pathen awl te a ngaai tih amah oen a imkhuikaw thlawnna hamla lowng pakhat te a sai. Tedawngah dilai te dan tat la a awm vengah Noah lawngtah oengna rang oen aka law doengna te Pathen tengkah a huh. 8 Pathen lawng Abraham te a khue vengah awl a ngaai tih Pathen lawng kan pe ai a tina awlkam ram la te aka ceh sak tah oengna ni. Ahih lawngah mela ka ceh tite ming ohla amah kah ram te a ceh taak. 9 Pathen kah awlkam ram ah te oengna oen ram tloe thlaang angla khaw a sak. Pathen tengkah awlkam aka dang van Isak oen Jakob angla riim-im a sak tih awm. 10 Metihtiah Abraham lawng yoeyahla aka cak khawpui, Pathen lawng anuen ataak tih a sai khawpui te a lamtoen. 11 Abraham tah patawng aih poen tih Sarah khaw ca-anau khueh thai nawh koeila awm poen de, Abraham he pahaam la aka sai tah oengna ni. Pathen lawngtah a awlkam te a sai ai tila a oeng mangkhak. 12 Abraham tah thlaangduek angtoekla awm poen de ahih pakhat dawng kalawng cadil nauha vaan kah aisi yoeh la, tuitunlii keeng kah divinlai yoeh la yahawh. 13 Ahimi boeih lawngah oengna oen duek u. Ahimi lawngah Pathen kah awlkam thaihu thli te paang u nawh. Tede athla kalawng a dan u tih a uem u. Ahimi lawng dilai sawah ram tloe thlaang angla, thlaangpoeng angla ka awm ti u. 14 Te tila aka thui hue lawngah amami kah ram pakhat a tlap ti te a tueng sak. 15 Ahimi lawng a ceh taak ram te poek khuep u tlaih nawh; A ceh taak ram te poek u kawinih mel koep hamla atue theen khaw a dang u ngoen. 16 Ahimi lawng atheen ngaai ram, vaan benkah ram te ni a ngaai u. Pathen lawng ahimi ham ram pakhat te a roekbah pe dawngah ahimi lawng Pathen te a Pa tila a khue u vengah Pathen tah yak nawh. 17 Pathen lawngah Abraham te a noek adak vengah a capa Isak te luciik la aka nawn sak te tah oengna ni. Pathen lawng Abraham tengah ni awl a kam, tede a capa khueh duen pakhat te luciik la nawn ham kamtoen oepsoeh. 18 Pathen lawng Abraham nala te, “Kai lawng peek hamla awl ka kam cadil nauha te tah Isak dawng kalawng ni apuung ataai ai” a tina. 19 Abraham lawngtah Pathen lawng Isak he duekna kalawng a thawh sak thai tila a poek tih a peek angla Abraham lawng a capa Isak te duekna kalawng a dang koep tila n'thui thai. 20 Isak lawngah Jakob oen Esau nala te avoel avai ah yotheenna na dang hih ai tila oengna oen awl a kam. 21 Jakob lawng a duek thlan ah Josep kah a ca thli te oengna oen yotheenna rip a peek. Ahih lawngah a cawnghol dawngah kuituung tih Pathen te a bok. 22 Josep lawng a duek tawm ah, Iyipt ram kalawng Israel thlaang thli a pooengna te a thui tih amah kah rawkk kuemkawl ham a thuinuet te oengna oen ni. 23 Mosi he a cuun coengah a manu oen ana pa lawng thla thum khui puet ah oengna oen a thuh a elh. Ahih rawi lawng lungna aka kap camaw te a huh hih vengah sengpahrang kah aana eek ham te rih hih tlaih nawh. 24 Mosi lawng a roeng hang atah sengpahrang canu kah capa tila khue hamla aka ngaih sak nawh te tah oengna ni. 25 Ahih lawng thawlhna dawngah kawlkalhca awmtheen boenn lak ah Pathen thlaang thli oen patang khang ham te a ngaih dai. 26 Messiah ham khawdeng patang khang he tah Iyipt ram kah kaawn-ava, khawh-rang boeih lak ah aphu awm ngaai tila a poek. Metihtiah ahih lawngah hailam ben kah kutdo te a mikloeh na. 27 Mosi lawng sengpahrang kah thinsana te rih tlaih ohla Iyipt ram a pooeng taak te tah oengna rang oen ni. Huh nawh Pathen te ahih lawng hu nooek ang a ti maila mel koep ham a thana. 28 Israel thlaang thli kah a camiing hue te Thlaangngawn Vanthlaang lawng ngawn nawh hamla thawhka dawngah thisen a thluk tih a Kaantaak te oengna oen ni. 29 Israel thlaang thli te lanhak ah aka cet angla Tuitunlii Seen ah a kat sak te tah oengna ni. Iyipt thlaang thli lawng a kat u van veng atah ahimi te tui lawng a liw boeih tih duek. 30 Israel thlaang thli lawng Jeriko khaw te khawhin hin rih khui laam-eet tih a cungvel u coengah vawngkulh thli a tlim boeih te tah oengna oen ni. 31 Thlaanghalhnu Rahab lawngah Israel thlaang raalyam thli te beroepna oen a do dawngah Pathen awl aka ngaai nawh thlaang thli oen ngawn haih ohla sa a sueng he oengna oen ni. 32 Ka thui hun ai aw? Kideon, Barak, Samson, Jepta, Devid, Samu-el mi oen tawngha thli kawng te thui ham atue khoek nawh. 33 Oengna oen ah ram tawm te a teek u tih a taa u. Ahimi lawng asoeng thaihu te a sai u tih Pathen kah awlkam te a dang u. Sathueng thli kah a kaa te a khuem rap u tih, 34 rih-awm tangkiik hairawng haialh te a thih u tih samsen oen tloekna kalawng loeih u. Ahimi tah a tha yoek sut de a tha ra u; Ahimi tah ceem thawhna ah tluung-athang u tih ram tloe kah raal thli te a padauh boeih. 35 Oengna rang oen ah hutaa thli kah a cakaw thlaang duek thli te hing koep u. Thlaangtloe hue lawngtah atheen ngaai thawh koep hingna te a ngaih u dawngah loeihna te lawh ngaih ohla a thana tih heemtekna oen duek u. 36 Khatsut hue te nuihbu kamring la a sai u tih cungpoelh oen a bawh u, khatsut hue te thiirui oen a khih u tih thong ah a thlaak u. 37 Ahimi te lunghawh oen a de u, thlawh oen pahih la a ah poet u tih khatsut te samsen oen a tloek u. Ahimi tah a khawdeng u dawngah tuu phaw oen me-ee phaw te a bai a naak u tih rera u, thekha heemtekna oen a ngawn u. 38 Dilai he ahimi hamla atheenna roe awm nawh! Thlaangpooeng poedoe thli angla ramhum huhang oen tlaangsawm ah cet awm u tih lungkaw khuiah, longhoi dung ah, ungrawm khuiah rera u. 39 He kah thlaang boeih he amami kah oengna dawngah metihtlukla thangpawm ham a awm! Tede ahimi lawngah Pathen awlkam te dang u nawh. 40 Metihtiah Pathen lawng mami hamla khawkhanna atheen ngaai avan poek dawngah ni. A mengtengna tah ahimi lawngah mami oen thik at la ng'awm u dengah asoepna te a dang u thai ai ti he ni.
1 Tedawngah he yoeh aih la sausi yahawh lawng mami he n'yaawl khoep poen dawngah mami cehna lawngpui ah kanghalhkung thaihu soeprep boeih oen mami pum ah aka bat mangkhak thawlhna boeih te dul u silang tah mami haiah avan khueh lansak benla te loehlang u silang heng u sih. 2 Mami kah oengna atongna kalawng aboetna toe apangtungna thinglam dawng duekna te rih nawh! Te thinglam dawng duekna voel ah awmngaihna lawng a ring poen dawngah thinglam dawng duekna te yahpawhna tila poek nawh tih tahe ah Pathen kah bawi ngawlhcoen bantang ben ah te ngawl poen. 3 Patang a khangna boeih te poek u lah; Thlaangthawlh thli kah thina a ueh roe te mah! Tedawngah nangmi lawng kawboetna oen thathepak la awm u tlaih boel. 4 Metihtiah nangmi lawng thawlhna oen na khoelh u vengah he tahe toe atah duekna tangtang oen tah na maneng u thlan. 5 Pathen lawng a ca-anau thli nangmi tengah thapeekna awl avan thui te na hilh u poen aw? “Ka ca, Bawipa lawng nang n'siim vengah ngaithuen lah, nang te n'toelthaam vengah na kaw boet sak boel. 6 Metihtiah Bawipa lawngtah a lungna boeih te a siim tih a ca la a pawm boeih te tah dan a peek.” tila a thui. 7 Nangmi lawng patang na khang te na Pa kah dantatna tila poek hawn; nangmi kah patang khangna lawng nangmi te Pathen lawng a ca thli la a poek poen tite a tueng sak. Ana pa lawng dan a peek nawh a ca khat khaw awm kai aw? 8 A ca-anau boeih te dan a peek tih nangmi te dan m'peek nawh atah nangmi tah a ca tangtang nawh tih halhca ni tila thuingaihna awm. 9 Mami kah thlaanghing m'pa kawng te poek u lah; ahimi lawng mami te m'phep u de mami lawng n'hinyah u, tedawngah mami kah muithla ben ah m' Pa te metihtlukla a awl ngaai pe tare tih hinyah ham a awm! 10 Mami kah thlaanghing m'pa lawngtah amami lawngah soeng a ti angla mami te kawlkalhca ah dan m'peek u; tede Pathen lawngtah mami theenna ham oen amah kah ciimna te mami lawng dang van hamla ni dan m'peek. 11 Mami he dan n'tat tih patang khang vengah te kawhoena ohla mami te kaw avan the sak. Te cakhaw dantatna oen thuituen la aka awm thli lawng ahu la tah thlaangdoeng la hingna dawngkah ngaimawngna kutdo te a dang u. 12 Tedawngah ayaihoella aka awm na baan thli te asaw la thueng hang langtah thloet aka thuen na tankhuk thli te cak sak u lah! 13 Lawngpui doeng ah cet poe u lah, te atah na khow aka yuei te kheem poe nawh vetih hoeih lat poen ai. 14 Thlaang boeih oen roeproeicala awm ham yawm u lang aciim hingna oen hing hamla yawm uh, metihtiah aciim hingna nawh atah a-u lawngkhaw Bawipa te hu manawh. 15 Pathen kah lungvatna te a-u lawngkhaw mangthawng taak nawh ham ngaithuen uh. Thingkha thing lawng roeng hang tih asue oen thlaang te raina boehoengla a peek angla a-u khatca khaw awm u boel. 16 A-u khaw hutaa tawngpa thawlhna sai u boel. Muithla ben te n'tu la aka sak nawh Esau angla awm u boel; Ahih lawngtah amah kah camiing la a awmna te buh vai at caak la a yoeih mai poen. 17 Na ming u angla hu-aha la ngoen tah ana pa kah yotheenna te paang koep ham a ngaih; tede paang tlaih nawh poen. Metihtiah ahih lawng mikphi baw ruila tlap cakhaw a sai tangte te thawleng thai tlaih nawh. 18 Israel thlaang thli a law u angla nangmi lawng kut oen tek thai Sinai Tlaang la te na law u nawh. Te tlaang te tah hairawng haialhna, yiin samangting oen muui a yiin riit la yaalna, thlipui thliphoe thawhna oen, 19 pengsara tum awl oen ah tuen apauna awl yaakna tlaang ni. Te kah tuenpau awl te Israel thlaang thli lawng a yaak u vengah te awl te yaak koep tlaih nawh ham a bih u, 20 metihtiah, “Ramsa khaw, te tlaang te aka caawt sarui tah lungto oen de mat la awm ai” tila a thui awlthlaw te ahimi lawng a ueh thai tlaih nawh dawngah ni. 21 Te kah a huh u te tah saringrup la a awm dawngah Mosi lawng, “Ka rih uuet ah ka thuen!” tila a thui. 22 Tede nangmi ngoen tah Zaion Tlaang vanthlaang toeklek toekna oen a awmna, vaan Jerusalem aka hing Pathen kah khawpui la te na law u. 23 Vaan ah miing thut la aka awm Pathen kah a ca camiing hue awmngaih kawhoe la a tunna ah nangmi tah na law u. Thlaang boeih awlcekkung oen thlaangdoeng thli kah muithla thlaangsoep la aka sai Pathen tengla te na law u. 24 Abel thisen kah sai lak ah thaihu theen ngaai te a thisen dueina oen aka sai, awlkam thaai roekbahkung Jesuh tengla nangmi tah na law u. 25 Tedawngah nangmi tengah awl thuikung hue kah awl te oelhtaih nawh ham ngaithuen uh. Dilai dawngah awlthang thuikung hue kah awl te hutung ham aka ngaih nawh tah loeih u nawh. Vaan kah awl aka thui te mami lawng mangthawng taak atah metila mami n'loeih pai ai! 26 Tevengah te a awl lawng dilai te a hinghuen sak, tede tahe ah awl a kam tah, “Dilai bueng nawh tih vaan te khaw ka hinghuen sak koep ai,” ti. 27 “Ka hinghuen sak koep ai,” tila a thui awl lawngah a tueng sak tah amah lawng a sai thaihu boeih tah hinghuen vetih thoeih kang ai, hinghuen thai nawh thaihu thli te tah cak vetih awm poe ai tite aciimphanla a tueng sak. 28 Tedawngah awmngaih u lah sih, metihtiah mami lawng hinghuen thai nawh ram te m'pang u poen. Mami lawng uem u silang tah amah kawhoena koei hinyahna oen rihsakna oen ah Pathen te bok u sih; 29 metihtiah mami kah Pathen tah thlaang aka phe thai tangtang hai ni.
1 Khrihca maya manau la na awm u van angla pakhat oen khat lung u poe lah. 2 Na im ah kamyin kamlai pah sak u lang dodan ham hilh u boel. Te tila kamyin te a im ah aka pah sak lawngah ming mai ohla vanthlaang te a pah sak u. 3 Thong ah aka tla thli te van hilh u boel, namami te ahimi oen thong aka tla haih angla te poek uh. Patang aka khang thli te van hilh u boel, namami te ahimi angla patang aka khang van angla te poek uh. 4 Yu lawh vaa sakna he thlaang boeih lawng hinyah ham awm. Yuvaa lawngah khat oen khat uep-awm la awm ham awm. Pathen lawngah hutaa tawngpa thawlhna aka sai oen samphaih thlaang boeih te awl a cek ai. 5 Tangka he ngaih moek aih u boel lang na khueh duen oen te haan u mai hawn. Metihtiah Pathen lawng “Nang te kan ceh taak sut nawh vetih kan khueh sut manawh” ti. 6 Tedawngah mami lawng thincakna oen ah, “Bawipa tah kai aka bawmkung ni, Lakuengna roe ka khueh nawh. Thlaangtloe lawng ka sawah n'tu a sai thai ai? tila thui u sih. 7 Nangmi tengah Pathen awl aka thui lamhacuek mawtkung thli te hilh u boel. Ahimi kah hingna oen a duekna te poek u langtah ahimi kah oengna te oett u lah. 8 Jesuh Khrih tah n'thlem, tihin, dungyan toe amah moepoe la awm. 9 Cangpueina alakloe phun soeprep lawng nangmi te lawngpui doeng kalawng atloe abang la m'phelh sak boel seh. Thinkaw tharana he caak awkk kawng phung-alam vaina oen dang ohla Pathen kah lungvatna dawng kalawng dang ham theen; he ang phung-alam aka vai thli te amami kah a vai phung-alam lawng bawmcem nawh. 10 Judah thlaangphun kah bokna huen ah bii aka bi khawsoeih hue lawng mami kah bokna-thaang dawngah a nawn u luciik sa te khatca khaw ca thai nawh. 11 Judahthlaang Khawsoeih Bawi lawngah ramsa thisen te thawlh-thlahna luciik la Huen Ciim Koek ah nawn ham a khuen; tede bawi-ava pum te tah rehbukk kah adauben ah hai oen a tih. 12 Te tila a awm dawngah Jesuh lawngkhaw amah thisen oen thlaang boeih ciimna hamla khawpui adauben la te duek. 13 Tedawngah rehbukk adauben ah amah tengla te cet u silang ahih kah yarau a phueih te phuei u van sih. 14 Metihtiah he dilai han ah mami hamla huencak khawpui awm nawh; mami lawng aka law ham koei khawpui te ni n'lamtoen u. 15 Tedawngah amah thangpawmna te mami kah luciik angla Jesuh rang oen Pathen tengah nawn poepa u sih. Te thangpawmna tah huikaa oen ah thawthuengna tih ahih tah Bawipa ni tila phawngna ni. 16 Nangmi lawng pakhat oen khat bawmcemna oen atheen sai hamla te hilh u boel, metihtiah he ang he tah Pathen te kaw aka hoe sak thawthuengna ni. 17 Nangmi aka mawtkung thli kah awl te ngaai u lang ahimi kah awl thui te vai uh. Ahimi lawngah amami kah biibina kawng te Pathen tengah thui ham koei la a awm dawngah duemdawng ohla nangmi kah hingna te a doen a cang u. Nangmi lawng a awl na ngaai pe u atah ahimi lawngah awmngaih kawhoe la bii te a bi u ai; a awl te na ngaai pe u nawh atah ahimi lawng kawthe ruila bii te a bi u vetih nangmi ham hoeikhangna awm manawh. 18 Kaimi ham thangthui yoeyah uh. Asoeng thaihu te sai hamla ka ngaih yoeyah u dawngah athe atheen pekbona thinkaw ciim te ka khueh u tila ka ming. 19 Pathen lawngah nangmi tengla kai he ayuela n'tuih koep ham ah thinkaw thluembuekcala thangthui ham kan ceel u. 20 Tuudoen Bo la aka awm mami kah Bawipa Jesuh lawngah amah kah thawthueng duekna rang oen dungyan la awlkamna te a cak sak poen dawngah Pathen lawng ahih te duekna kalawng a thawh sak poen. 21 Nangmi lawngah ngaimawngna akung Pathen kah kawngaih te na sai u thai ham thaihu theen na ngoe boeih te m'pe hawn seh; Jesuh Khrih rang oen amah kawngaih te mami kaw khuiah sai hawn seh. Jesuh tengah ruep-awmna tah dungyan toe ayoeyahla awm hawn seh! Amen. 22 Maya manau thli, thathluena awl ka thui he na vai u hamla kan ceel u. He capat kavan thut he san aih nawh. 23 Mami kah manau Timote te thong khui kalawng a thlah u poen tite nangmi ming sak ham ka ngaih. Ka tengla avan pha yue atah nangmi kan hip vengah ahih te kavan law puei ai. 24 Nangmi kah mawtkung boeih oen Pathen kah thlaang boeih te kaimi kah toeina awl he van thui peh. Itali ram kah maya manau hue lawngkhaw nangmi te n'toei u. 25 Pathen lungvatna nangmi boeih sawah awm hawn seh.
1 Pathen oen Bawipa Jesuh Khrih kah tuihyoeihthlaang Jeem lawngah dilai peng tawm ah aka yan khonghak Pathen thlaang thli te kan toei u. 2 Ka maya manau thli, nangmi tengah raina soeprep a law vengah te yotheenna ni tila poek mai hawn; 3 Metihtiah te ang noekdakna te na oengna oen na taa u vengah tah uehthaina te na khueh u. 4 Nangmi lawng voetna awm ohla aka soep tangtang thlaangsoep la na awm u thai ham, na tlim hau nawh ham aboet toela ueh u hawn. 5 Tede nangmi tim ah cuihna aka voet te a awm atah Pathen tengah thangthui seh, Pathen lawng ahih te a peek ai, metihtiah Pathen lawngtah thlaang boeih te moeihoeihna oen reenna oen ah a peek. 6 Tede nangmi lawngah uepvoetna khueh muehla oengna oen thangthui uh. Uepvoetna aka khueh thlaang tah yilh lawng a yawng tih aka tat mailai tuitunlii kah tuisambaak oen lo u. 7 Te ang thlaang lawngtah a thinkaw melh rap nawh tih a saina boeih ah kawpoek a thlumthle dawngah Pathen tengkah thaihu khatca khaw ka dang ai tila a poek ham awm nawh. 9 Khrihca khawdeng thlaang pakhat te Pathen lawng a pawmsang hang atah awmngaih selang, 10 Khrihca kuirang thlaang pakhat te Pathen lawng a dangla a thlaak thuk atah awmngaih seh. Metihtiah kuirang thli tah ramhum kah raipai angla tlumtloei ai. 11 Khaw a thoeng hang atah raipaikung te khawling lawng a kaang tih yai, a pai khaw reem, tlumtloei tih atheenna khaw ha-ata. Tetih van la kuirang thli lawng bii a tok athlue u lii vengah pal atham ai. 12 Noekdakna a tawng vengah acak rap uep-awm la aka pai tah yotheen a dawng u, metihtiah te ang noekdakna te a taa thai tih Pathen lawng amah aka lungna thlaang thli ham awl a kam hingna te kutdo la a dang ai. 13 Te ang noekdakna te thlaang lawng a tawng vengah, “Suekna he Pathen tengkah va law” tila thui boel seh. Metihtiah Pathen tah athe lawngah suek thai nawh tih a-u khaw Pathen lawngah suek nawh. 14 Tede thlaang pakhat lawng suekna a tawng ti he tah amah kah athe ngaihna lawng a mawt tih dong dawngah a man sak ni. 15 Tecoengah amah kah athe ngaihna te a kaw khuiah suen tih thawlhna te a cuun; te thawlhna tah roeng hang tih duekna te a cuun. 16 Ka lungna maya manau thli, poek thawlh u boel! 17 Kutdo theen boeih oen aka soep kutdo ayoe peek boeih he vaan kalawng aka law ni: vaan kah aangna Saikung Pathen teng kalawng ni a law, ahih tah thawleng u nawh, hoei-athal u nawh tih yiinna khaw thoeng sak nawh. 18 Pathen lawng amah kah thaihu sai aka hing boeih khuiah lamhacuek huen ah awm ham awltak awl oen ah amah kawngaih angla mami he n'sai poen. 19 Ka lungna maya manau thli, he he hilh u boel! Thlaang boeih lawngah awl hutung ham a tat loe sak seh, tede awl thui ham tah a tat hiing sak selang thinsana ben atah a tat yaai u seh. 20 Thlaanghing kah thinsana lawng Pathen kah a mengteng doengna te thoeng sak thai nawh. 21 Tedawngah nangmi lawng tuiilehkap moeiboe boeih oen athe khawboe ramlang boeih te hoett u loeih. Pathen tengah te nawn u langtah nangmi aka thlawn thai na lungbui khuiah avan ling awl te do u lah. 22 A awl te hutung doek hong mai oen namah oen namah te thai-alat u boel. A awl te ataktangla hawna lah. 23 A-u khaw a awl te hutung hong la hutung doek tih ataktangla aka hawna nawh tah thlalang dawngah dan u tih amah muei te aka hu thlaang oen ni a lawh u. 24 Ahih lawngah atheenla dan u tih a ceh coeng atah metila ka awm tite a hilh pahoei. 25 Tede a-u khaw thlaang aka loeih sak aka soep phungawl dawngah te anepla dan u tih a harukna, hutung hong la hutung doek tih hilh pahoei mai ohla ataktangla a hawna atah te thlaang te a saina boeih ah Pathen lawng yotheenna a peek ai. 26 Bokna ben ah ka tlungmu tangkiik mai tila aka poek thlaang awm aw? Ahih lawng a laai te a khoem thai nawh atah ahih kah bokna te aphu awm nawh tih amah oen amah te ni athai-alat u khoeng mai. 27 Pa Pathen lawngah aciim acaih bokna oen bokna tangtang la a poek tah, khawdeng lungma aka khang cadah harah thli oen huhai tumtee thli cawm acahna oen ah he dilai thawlhna tuiilehkap dawng kalawng mah oen mah kuemsuemna he ni.
1 Ka maya manau thli, ruep-awmna akung, mami kah Bawipa Jesuh Khrih te aka oeng thlaang la na awm u dawngah, thlaang he asaw ahan kah na huhna dawngah meveng khaw nangmi lawng voemtoei u boel. 2 Thuina maiah kuirang thlaang pakhat lawng sui kutcabuen te a buen tih bainaak theen oen nangmi na tunna ah va law, khawdeng thlaang pakhat khaw bainaak pawn apit oen va law. 3 Nangmi lawngah bainaak theen oen aka law te na hinyah u tih ahih nala te, “He kah ngawlhcoen theen dawngah ngawl,” na tina u tih khawdeng thlaang te tah, “Teah te pai hawn, tihnawhtah cirawng ah ka khaw tengah he ngawl mai,” na tina u atah, 4 nangmi he mami tim ah pekthlena aka sai tih athe poekna oen awltloekna aka sai la na awm u. 5 Maya manau thli aw, hutung u lah! Pathen lawngah he dilai dawngkah khawdeng thlaang thli he oengna ah kuirang la awm ham, amah aka lungna thlaang thli ham a kam pe vaan ram te pang hamla a tuek. 6 Tede nangmi lawngtah khawdeng thlaang te haithelatt la na khueh u ! A-u lawngah nangmi te thekha la awlcekkung hai la te raat m'mawt u? Kuirang thlaang thli de lah koen! 7 Nangmi m'peek u miing theen te ahimi lawngah athela a thui u. 8 Caciim dawngah aka awm Vaan Ram kah phungawl, “Namah oen namah na lungna u van angla na imbe te lungnah,” a ti te na vai atah thaihu doeng te nangmi lawng na sai. 9 Tede nangmi lawngah thlaang te asaw ahan kah a tuengna angla pekthlena na khueh u atah nangmi tah na thawlh u tih phungawl lawngah nangmi te phungawl phekung la ni n'huh poen. 10 A-u lawngkhaw phungawl pakhat te a phe atah apum boeih la phungawl te a phe poen ni. 11 Metihtiah, “Samphaih boel” tila aka thuikung lawng ni, “Thlaang ngawn boel,” tila te a thui. Nang lawngah na samphaih nawh de thlaang na ngawn atah phungawl phekung la nang tah na awm poen. 12 Mami loeihna pekung phungawl lawng awl a cek ham koei thlaang angla te awl thui u lang bii te bi uh. 13 Metihtiah reenna aka khueh nawh thlaang te Pathen lawng awl a cek vengah reen van manawh; tede awlcekna te tah reenna lawng a taa. 14 Maya manau thli, thlaang pakhat lawng oengna ka khueh ti de saina oen a tueng sak nawh atah atheenna awm aw? Te oengna lawng ahih te a thlawn thai aw? 15 Thuina maiah maya manau hutaa khaw, tawngpa khaw, hinaak himbai angoe tih caak awkk aka khueh nawh ti mai lah sih. 16 Ahimi lawng a hingna hamla angoe te na peek nawh maiah, “Pathen lawng yotheen kam-awmna m'pe seh! Lum-up la awm langtah ahah la ca uh!” tila nangmi lawng ahimi na tina te n'tu theenna a awm? 17 Te tila te oengna khaw awm van: Tedawngah oengna bueng awm tih saina athum nawh atah aka duek ni. 18 Tede thlaang khatsut lawng, “Thlaang pakhat lawngah oengna a khueh tih atloe pakhat lawng saina a khueh,” ti ai. Awl ka thungna tah, “Saina awm ohla thlaang lawng oengna a khueh thaina te van tueng sak lah. Kai lawngtah ka oengna te saina oen kavan tueng sak ai,” ti he ni. 19 Nangmi lawngah Pathen pakhat bueng awm ti he na tangna u. Theen ngoen! Raai thli lawngkhaw a tangna u tih rihna oen thuen u. 20 Nangmi thlaangngau hue! Saina aka awm nawh oengna he apoei ni tite kavan tueng sak ham aw na ngaih u? 21 Mami kah patuer Abraham he metila Pathen oen roeproeina te a dang? A capa Isak te boknathaang dawngah Pathen tengah luciik la a nawn tih te kah a saina rang oen ni roeproeina te a dang. 22 Nangmi lawng na ming thai nawh aw? Ahih kah oengna oen saina lawng thik at la bii a bi; ahih kah oengna te a saina lawngah asoep sak. 23 Tedawngah caciim lawng, “Abraham lawng Pathen te a tangna tih te a oengna rang oen ah Pathen lawng ahih te thlaangdoeng la a do,” tila a thui te soep tangtang. 24 Tedawngah thlaanghing he oengna bueng oen nawh tih saina rang oen ah Pathen oen roeproeina a dang ti he nangmi lawng na ming u. 25 Thlaanghalhnu Rahab khaw te tila te awm. Ahih lawngah Israel thlaang raalyam thli te a do tih lawngpui tloe kalawng ceh hamla ahimi te a bawm, te tila a saina rang oen ah ahih tah Pathen oen roeproeina te a dang. 26 Tedawngah muithla a awm nawh atah pum he duek, tetih van angla saina aka awm nawh oengna tah duek.
1 Maya manau thli, nangmi thlaang yahawh lawngah cangpueikung la na awm u ham awm nawh. Metihtiah kaimi cangpueikung hue he thlaangtloe lak ah atlawh ngaaila awlcekna ka dang u ai ti he nangmi lawng na ming u. 2 Mami boeih lawngah thawlhpalhna te hau n'sai poepa. Awlcal thingkaa ah aka cal thawlh nawh tah thlaangsoep la awm tih a pum araw boeih te aka uk thai thlaang la awm. 3 Marang lawngah mami awl te a ngaaina hamla a kaa te rui oen n'cuett pe tih mami kah ngaihna benla te n'ceh sak. 4 Tecoengah tuisangphaw ke poek u lah: bo khuengdeng tih tha aka ra yilh lawng ni a ceh sak thai, tede tapaih tehca mai oen ah a hoei thai tih aka mongkung kah a ngaihna ahuen la te cet. 5 Te tila te hui-alaai he khaw awm van: tehca mai de khuengding khuengdeng la te oekthloen thai. Haihli tehca mai lawngah ramhum rammawl khawpahpuem a ung sak te poek u lah! 6 Te tila te laai he hai oen lo u. Thawlhpalhna dilai la khaw laai he awm. Mami kah pum dawngah ahuen a neet tih mami kah pum-araw boeih ah athe-ara te a puung sak. Mami kah hingna he hai oen a tih boeih, te kah hai te tah hell khui kalawng aka law nawn hai te ni. 7 Thlaanghing lawngah ramsa hing atloe boeih he a phep thai, ramsa aka sann thli oen va boeih khaw, aka cawlh ramsa boeih oen nga boeih khaw a phep thai. 8 Tede laai he aka phep thai a-u khat khaw awm nawh. Laai he tah athe thaihu, uk thai la aka awm nawh duekna sue oen ah betoet. 9 Mami lawngah laai he Bawipa oen Pathen te koehna ham khawseh, Pathen mueisam oen aka lo u mami kah thlaangpuei khaw tapvoepna hamla n'hawna u. 10 Kaa pakhat khui kalawng ah koehna awl oen tapvoepna runkhuen pansi awl te thoeng. Maya manau thli aw, te tila a awm ham nawh ni ! 11 Tuibaap pakhat dawng kalawng tui aka tuui oen tuikha thoeng haih nawh. 12 Maya manau thli, thaidut-thing dawngah olif te thaih nooek nawh; misur thing dawngah khaw thaidut te thaih nooek nawh, tui aal lawngkhaw tui aka tuui te thoeng sak thai nawh. 13 Nangmi tim ah mingna aka khueh thlaangcuih pakhat mai khaw awm aw? A awm atah atheen hingna oen ah tueng sak seh. Cuihna, boe-ngaaina, atheen a saina oen ah tueng sak seh. 14 Tede, na kaw khuiah thlaang uett-eena, thlaang thina, namah ham bueng poekna te na khueh u atah namami kah cuihna dawngah oekthloenna oen ah awltak te oelhtaih u boel. 15 Te ang cuihna te tah vaan kah aka law nawh ni; te ang te dilai cuihna ni, te tah muithla ben kah nawh tih raaithe ben kah cuihna ni. 16 Uett-eena oen mah ham bueng poekna te a awmna roekk atah roeproeina nawh oen athe phun soeprep khaw awm van. 17 Tede saw benkah cuihna tah atloe boeih lak ah ciim, te tah ngaimawngna, boe-ngaaina oen beroepna la awm, te tah reenna oen betoet tih atheen saina athaih theen te a thaih sak; te lawngtah thlaang pekthlena khueh nawh tih thlaang theen la khaw sa u nawh. 18 Roepna saikung thli lawng roepna oen a tuh amu-ati dawngkah athaih apai tah theenna te ni.
1 Nangmi tim kah tawhsina oen bawh-apaina he ame kalawng a law? Namami kah pumsa awmtheen awmyaal ngaihna dawng kalawng law tih, te thli te nangmi kaw khuiah boet ohla raal u poepa. 2 Nangmi lawng thaihu na ngaih u, tede na ngaih thaihu te na khueh thai nawh, tedawngah thlaang ngawn ham oepsoehla na kamtoen u; nangmi lawng thaihu khueh toen ham na ngaih tangkiik u, te ang thli te na dang u nawh, tedawngah na tawh na thaam u tih na bawpp u the. Nangmi lawng na ngaih thaihu na khueh u thai nawh he tah Pathen tengah na bih u nawh dawngah ni. 3 Nangmi lawng na bih u van de na dang u nawh, metihtiah nangmi lawngah namami kah pumsa awmtheen awmyaalna ah hawna hamla thaihu te na bih u tih nangmi kah poekna thinkaw te atheen nawh dawngah ni na dang u nawh. 4 Nangmi uep-awm nawh thlaang hue! Dilai oen ah beroep u he Pathen kah raal la awm tite na ming u nawh aw? A-u khaw dilai kah paya beroep la awm ham aka ngaih tah amah oen amah te Pathen kah raal la sai u. 5 Caciim lawngah, “Pathen lawng mami kaw khuiah avan khueh muithla tah rih-awm hue-angaihna oen betoet,” tila a thui te a thui ngaihna tangtang awm nawh tila poek hau u boel. 6 Tede Pathen kah peek lungvatna tah a tha ra tare ngaai. Caciim lawngah, “Pathen lawngtah aka oekthloen u thlaang thli te a oel tih boe-ngaai thlaang thli te a reen,” tila a thui angla ni a awm. 7 Tedawngah Pathen kawngaih te vai u lah. Raaibawi te hek u lah, tetih atah nangmi teng kalawng atloela heeng badai. 8 Pathen tengah yoeii u lah, ahih tah nangmi tengla law vetih va yoeii van ai. Nangmi thlaangthawlh hue na kut te sil u lah! nangmi thlaangdoeng la aka sa u thli, na lungbui thinkaw te ciim sak u lah! 9 Kawthe oen awm uh, ko-paang u langtah rap uh; nangmi kah nuih calna te rahna oen thawvel u lah, na awmngaihna te kawthe ngaihangna la coengg sak uh! 10 Nangmi lawngah namah oen namah te Bawipa haiah boe-ngai u lah, tetih atah nangmi te amah lawngah m'pawmsang badai. 11 Maya manau thli, nangmi pakhat oen khat thuitheet u boel. A-u khaw khrihca maya manau te a thuitheet tih awl aka cek tah Phungawl te a thuitheet tih awl a cek poen ni. Nang lawngah Phungawl te awl na cek atah, nang tah Phungawl te aka vai thlaang pakhat la na awm tlaih nawh tih awlcekkung la ni na awm poen. 12 Pathen bueng ni phungawl pekung oen awlcekkung la a awm. Ahih bueng lawng ni thlaang he a thlawn thai tih a phe thai. Nang ta a-u la na ngaai u railai aih tih na thlaangpuei te awl na cek? 13 “Tihin ah nuem, thangvuen ah nuem, khawpui pakhat ah yin cet u sih, te ah te kum khat mai khaw awm u silang tah tangthung tangleng silang tangka yahawh dang u sih,” aka ti nangmi hue tahe ah ka awl he hutung u lah. 14 Thangvuen ah na hingna metila a awm ai ti pateng khaw nangmi lawng na ming u nawh! Nangmi tah kawlkalh ah thoeng hang tih kawlkalh ah aka auh mai tuikhu oen ni na lawh u. 15 Nangmi lawngah: “Bawipa lawng a kawngaih tih mami n'hing u atah tete sai sih, he he sai sih.” tila ni na thui u ham a awm. 16 Tede tahe ah nangmi lawngtah na hal-auh u tih na oekk na thloen u; he ang oekthloenna boeih te tah aka soeng nawh ni. 17 Tedawngah, atheen thaihu te sai ham ni tila aka ming thlaang lawngah sai ohla a awm he tah thawlhna ni.
1 Kuirang thlaang len thli, tahe ah awl kavan thui he hutung u lah! Nangmi sawah aka law koei raina dawngah te rap u lah! 2 Nangmi kah kaawn-ava boeih te khaw honn kang poen tih hinaak himbai khaw kuum-akeet lawng a caak boeih poen. 3 Nangmi kah sui oen ngun te a ekk lawng a caak tih, te kah a ekk thli te tah nangmi oelhtaihkung sausi la awm vetih nangmi kah thi asa te hai-alh lawng a caak angla te avan caak ai. Nangmi lawngah khawhin aboetna ben ah ni kaawn-ava te na tung na sep u poen he! 4 Nangmi kah lo khuiah bii aka bi te thapang na pe u nawh. Ahimi kah laise awl te hutung lah! Nangmi kah caang aka att thli paang awl te Bawilen koek Bawipa Pathen lawng a yaak poen. 5 Nangmi tah he dilai dawngah kawngaih soepna oen awmngaihna oen ah na hing u. Meh-ngawnna khawhin ah sak-awm paduukla ngawn ham namah oen namah te purh athaula na cawm na cah u. 6 Nangmi lawngah thawlhna aka awm nawh thlaang thli te thawlh na peel u tih na ngawn u, ahimi lawngtah nangmi te n'tu khaw n'thung nawh. 7 Tedawngah maya manau thli, Bawi-pa a law thlantoe thinsan kawdaw oen awm uh. Lotoen thlaang pakhat lawngah a lo khuikah caangthaih yuun hamla meveng toe kawdaw oen a lamtoen puet tite poek u lah. Ahih lawngah rawtui a law cuek veng kalawng khawcui boet toe kawdaw thinsan oen a lamtoen. 8 Nangmi khaw na kaw te daw sak u van lah. Bawipa a lawna khawhin te ayoeica poen dawngah na ngaiuepna te cak sak uh. 9 Maya manau thli, Pathen lawng nangmi te awl cek nawh hamla nangmi khat oen khat thuitheet u boel. Awlcekkung tah va yoeii poen, oepsoehla awm poen. 10 Maya manau thli, Bawipa miing oen awl kavan thui, nangmi lawng tawngha thli te hilh u boel, Ahimi lawng kawdaw thinsan oen patang a khang u te nangmi lawng oett u lah. 11 Ahimi lawngah patang a khang u thai dawngah yotheenna aka dang thlaang ni ka ti u. Jobah kah kawdaw thinsanna te na yaak u poen tih aboet ben ah Pathen lawng ahih a peek te khaw na ming u. Metihtiah Bawipa tah reenna oen thlaang kah hailam ben poekna oen ah betoet. 12 Maya manau thli, atloe boeih lak ah awlkamna na sai u vengah awl taap u boel. Nangmi lawngah vaan phoei oen khawseh, dilai phoei oen khawseh, atloe tloe phoei oen khawseh awl taap u boel. “Oeih” tila thui na ngaih atah, “Oeih” ti bueng te mah thui mai hawn; “Moenih” tila thui na ngaih atah “Moenih,” ti bueng mah thui mai hawn. Te tila na thui u atah Pathen kah awlcekna dawng kalawng na loeih ai. 13 Nangmi tim ah raina aka tawng na awm aw? A awm atah thangthui seh. Awmngaih thlaang ta, awm aw? A awm atah ahih lawng koehna laa te sa seh. 14 Nangmi tim ah thlaangtlo awm aw? A awm atah ahih lawng khrihcabu kah ahaamca thli te khue seh, Bawipa miing oen olif situi te van koelh selang tah thangthui seh. 15 Oengna oen thangthuina lawng thlaangtlo te a hoeih sak ai, Bawipa lawng ahih te sa a ding sak vetih thawlhna a sai te khaw khawdawp a ngaai pe ai. 16 Tedawngah nangmi lawng na thawlhna te pakhat oen khat tengah phawng u lang khat oen khat hamla te thangthui uh, te atah nangmi na hoeih u ai. Thlaangdoeng kah thangthuina tah huham tharana awm. 17 Elijah he mami angla thlaang pakhat van ni. Ahih lawngah khaw akaangna ham thinkaw tak oen a thangthui vengah kumthum coengah kum vangg dilai dawng khawkaang. 18 Elijah lawngah a thangthui koep vengah tah khawtlan tih dilai lawngah khaw abuh ram a saai sak. 19 Maya manau thli, nangmi tim ah thlaang pakhat lawng awltak lawngpui te ahang tih aka phell te thlaangtloe pakhat lawng avan law puei koep atah; 20 he he hilh u boel: a-u khaw thlaang-thawlh pakhat te lawngpui a hangna kalawng aka mel puei tah, thlaangthawlh kah muithla te duekna kalawng a thlawn tih thawlhna toeklek nawh dawng kalawng khawdawp-ngaaina aka saikung la awm.
1 Jesuh Khrih kah celtuih kai Piter lawngah-- Pontas peng, Galati peng, Kappadocia peng, Asia oen Bitinia peng ah thlaangpoeng poedoe angla aka awm tih aka yan khok Pathen kah thlaangtuek thli tengah ca kavan pat. 2 Jesuh Khrih awl te na ngaai tih amah kah thisen oen ciim sak hamla Pathen kah mengtengna angla nangmi tah tuek la na awm u tih amah Muithla lawng thlaangciim la n'sai u. Lungvatna oen ngaimawngna tah nangmi tengah asoepbirla awm hawn seh. 3 Mami Bawipa Jesuh Khrih kah ana Pa oen Pathen te mami lawng uem u lah sih! Metihtiah aka lenduet a lungna lawngah Jesuh Khrih te duekna kalawng a thawh sakna rang oen mami he hingna a thaai m'peek poen. Tedawngah mami tah aka hing ngaiuepna oen m'betoet u, 4 Pathen lawng a thlaang thli hamla a khueh pe yotheen kam-awmna yahawh hlang te pang van hamla n'ngaiuep u. Te yotheen kam-awmna te tah amah lawng nangmi ham vaan ram ah avan kuem tih te huen atah honn thai nawh, rong-athaang thai nawh tih muingen thai nawh. 5 Atue boetna apha vengah tueng sak hamla a khueh oepsoeh thlawnna te oengna rang oen ah Pathen kah huham tharana lawng akhoem abeel tih nangmi ham vaan ah avan khueh ro na pang ham koei ni. 6 Nangmi lawng khawdeng patang phun soeprep te na khang u dawngah tahe veng kawlkalhca tah na kaw the u de, thlawnna kawngah he awmngaih u lah. 7 He ang raina na tawng u he nangmi kah oengna te ataktang oen ataktang nawh te noekdakna ham ni. Phe thai koei la aka awm sui pateng khaw hai oen ah anoekdak ta; tedawngah sui lak ah aphu aka awm ngaai nangmi kah oengna lawng raina he ueh thai ham ah noekdak la awm. Te dengah ni Jesuh Khrih a tuengna Khawhin ah nangmi lawng thangpawmna, ruep-awmna oen hinyahna te na dang u ai. 8 Nangmi lawng amah te na hu u nawh de na lungna u, tahe ah na hu u nawh de na tangna u. Tedawngah awl oen thui thai nawh awmngaihna alentloe oen asang koek kawhoena te na khueh u, 9 Metihtiah nangmi lawng amah oengna dawngah mengtengna muithla thlawnna te na dang u poen dawngah ni. 10 He thlawnna kawng he tawngha thli lawng acek-aneh la a doet adap tih a tlap u. Pathen lawng nangmi peek ham a ngaih kutdo kawng te a thui oepsoeh. 11 Ahimi lawngah, te kutdo te meveng tue ah a awm vetih metuek tue ah a law ai tite ming hamla a yawm u tih tahe veng atue he ahimi kaw khuiah aka awm Khrih Muithla lawngah a khi pe. Muithla lawngtah Khrih lawng patang khang ham koei oen ah, te tila patang a khang dawngah dang ham koei ruep-awmna te a thui oepsoeh poen. 12 Tawngha thli lawng bii a bi u he tah amami kah hoeikhangna ham nawh tih nangmi kah hoeikhangna ham ni tite Pathen lawng a thui pe. Nangmi tengah awlthang aka thui laipai thli oen tawngha thli lawngah a thui oepsoeh a kawng alam te vaan kah avan tuih Ciim Muithla tharana huham oen ah avan phawng poen tih tahe ah nangmi lawng na yaak u poen. He kah thaihu kawng he vanthlaang thli lawng pateng khaw yaakming ham a ngaih u. 13 Tedawngah bii bi hamla na thinkaw te roekbah oepsoeh uh. Ahuertuela awm u lang, Jesuh Khrih a tueng vengah na dang ham koei lungvatna kutdo dawngah na ngaiuepna te khueh uh. 14 Pathen awl te ngaai uh, nangmi lawng n'tu khaw na ming u nawh vengah namami kawngaih la na hing u angla te hing u tlaih boel. 15 Nangmi khuekung Pathen te aciim van angla nangmi khaw na saina boeih dawngah aciimla awm uh. 16 Caciim lawngah, “Kai tah ka ciim dawngah nangmi khaw aciimla awm uh,” tila a thui. 17 Nangmi lawng Pathen tengah na thangthui u vengah ahih te a Pa tila na khue u, ahih lawng atah thlaang boeih te a saina taring ah pekbona awm ohla awl a cek. Tedawngah he dilai dawng na hing khuiah he amah te hinyahna langtah hing u lah. 18 Nangmi lawng na patuer hue tengkah na pang patoeng hoeikhangna aka awm nawh hingna kalawng aphu a peek tih n'loeih sak te nangmi lawng na ming u. Te tah sui, ngun angla mui-angen thai koei thaihu nawh ni. 19 Te thaihu tah angaw aha awm nawh tih cawttbauh kap nawh tuuca oen aka lo u aphu aka tlo Khrih kah luciik thawthuengna te ni. 20 Ahih te tah dilai suen thlan vengah Pathen lawng a tuek poen tih he kah atue khawhin aboetna tue vengah nangmi ham avan tueng sak. 21 Amah rang oen Pathen te nangmi lawng na oeng u tih, Pathen lawng amah te duekna kalawng a thawh sak tih ruep-awmna te a peek; tedawngah nangmi kah oengna oen ngaiuepna tah Pathen dawngah cak khak. 22 Tahe ah nangmi lawng awltak te na vaina rang oen nangmi tah na ciim u poen tih oengca na puei na paw thli te lungna taktak oen na lungna u poen, tedawngah nangmi khat oen khat thinkaw tak oen lung u tare lah. 23 Tedawngah aka hing tih dungyan aka cak Pathen awl rang oen nangmi tah na thangthaai u poen; aka duek thai nu oen pa kah ca-anau angla nawh tih aka duek thai nawh kah ca-anau la na awm u. 24 Caciim lawngah, “Thlaang boeih he sul-aram angla ni a awm, ahimi kah ruep-awmna boeih tah raipai angla awm, sul-aram khaw au tih reu, raipai khaw tlumtloei, 25 tede Bawipa kah awl tah yoeyahla cak” tila a thui. Nangmi tengah avan phawng u awlthang theen tah he poen ni.
1 Tedawngah namami kah the-arana boeih, hoem awl thuina, thai-alatna, uett-eena, awlthe awlkha te hoett u loeih. 2 Camoe thangpek angla awm u langtah muithla ben kah suuktui ciim te hall yoeyah uh, muithla ben suuktui ciim te na awkk u atah na roeng hang vetih thlawn la na awm u ai. 3 Caciim lawngah, “Bawipa tah thlaang reenkung ni tite namami roe lawng na ming u poen” a ti angla te awm. 4 Bawipa tengah law u lah, ahih tah aka hing lunghiim thlaanghing lawng aphu aka awm nawh angla a hoett de Pathen lawng aphu aka tlo lunghiim la a tuek poen. 5 Nangmi khaw aka hing lunghiim angla law u langtah, namami roe te muithla ben kah tempal bok-im sakna la sai u lah. Te huen ah te aciim khawsoeih angla bii na bi u vetih Pathen lawng a do ham koei muithla ben kah luciik te Jesuh Khrih rang oen Pathen tengah na nawn u ai. 6 Tedawngah caciim lawng, “Kai lawngah lunghiim phutlo pakhat ka tuek, te lunghiim te Zaion ah imkil lungdang suemna la ka khueh; a-u khaw ahih te aka oeng tah metuek veng khaw a kaw boet manawh,” tila a thui. 7 He Lunghiim he aka tangna mami ham tah phutlo tangkiik la awm, tede aka tangna nawh thlaang thli ham tah; “Imsakung hue lawng aphu aka awm nawh angla a hoett u lunghiim tah, te thli boeih lak ah awlpui koek lunghiim la awm poen.” tila a thui. 8 Caciim atloe pakhat lawngah, “He lunghiim tah thlaang a ploengna lunghiim la awm ai, he lunghiim lawng ahimi te a tlim sak ai.” tila a thui. Ahimi lawngah awl te a tangna u nawh dawngah ploeng u; he tah ahimi hamla Pathen kah kawngaih roe ni. 9 Tede nangmi tah a tuek thlaangphun, seng-pahrang kah khawsoeih, thlaangphun ciim, Pathen kah thlaangphun la na awm u. Yiinna khui kalawng amah kah aangna khuila nangmi khuekung Pathen lawng kawpoekrai a sai te thui sak ham nangmi te n'tuek u. 10 N'hu veng atah nangmi he Pathen kah thlaang la na awm u nawh de tahe atah nangmi he amah kah thlaang la na awm u poen; anoekbuet atah Pathen kah reenna te na ming u nawh de tahe atah a reenna te na dang u poen. 11 Ka lungna paya thli, he dilai han ah kamyin kamlai oen thlaangpoeng poedoe angla aka awm nangmi tengah reenna kavan bih! Muithla oen aka raal u poepa pumsa ngaihna lawngah nangmi te n'taa u hau boel seh. 12 Nangmi kah khawboe ramlang he Pathen aka ming nawh thlaang thli tim ah atheen soeh ham awm, ahimi lawng nangmi te athe saikung la m'peel mai cakhaw nangmi kah moeiboe theen te a huh u vetih Pathen a lawna Khawhin ah amah te a thangpawm u badai. 13 Bawipa te na hinyah u van angla saithaina aana aka khueh ukkung thlaang boeih kah a awl te ngaai pe uh: saithaina aana sangkoek khuehkung sengpahrang sangluel kah awl te ngaai pe uh, 14 athe saikung thli dan tat ham oen theenna aka sai thli koeh hamla a khueh ram uk-bawi hue kah awl khaw ngaai pe uh. 15 Metihtiah amah ngaih la awl sah sah aka cal thlaangngau paathuu hue te nangmi kah thaihu theen saina lawng a awl phah sak seh tila Pathen lawng a ngaih ni. 16 Nangmi lawngah ahoeng ahoett la aka awm thlaang angla khaw sa uh; tede nangmi lawng ahoeng ahoett la na awmna te athe-ara thlipdahna ham hawna u boel, Pathen kah sal angla khaw sa uh. 17 Thlaang boeih te hinyah uh, aka oeng na puei na paw te lungna uh, Pathen te rih u lang sengpahrang sangluel te khaw hinyah uh. 18 Nangmi tuihyoeihthlaang thli aw, namami kah bawi manghai awl te ngaai u langtah ahimi tengah hinyahna te tueng sak uh. Reenna a khueh tih kaw aka poek thai bawi manghai hue bueng ohla tluunghuel bawi manghai hue te khaw hinyah uh. 19 Nangmi lawngah Pathen kawngaih te na ming u dawngah patang khang koei nawh te awl puung muehla na ueh u atah Pathen lawng nangmi te yotheen kam-awmna m'peek ai. 20 Nangmi lawng namami kah saithawlhna dawngah patang khang koei bawh-apaina patang te na khang u atah metila koeh ham koeila a awm ai? Tede asoeng thaihu na sai lal maiah nangmi lawng patang na khang oh atah Pathen lawng yotheenna m'peek ai. 21 He tila awm ham ah Pathen lawng nangmi te n'khue u, metihtiah Khrih amah roe lawngah nangmi ham patang a khang tih amah khowleh thuih ham te nangmi kah oett koeila avan ceh taak. 22 Ahih tah thawlhna khat khaw sai nawh, me veng khaw hoem awl thui vai nawh. 23 Awlthe awlkha oen asal aphaam u vengah te ahih lawng awlthe awlkha oen thung nawh; patang a khang vengah thlaang te hih-ahuut nawh, tede adoengla awl cekkung Pathen te ni a uepna. 24 Mami lawng thawlhna ah duek tih doengna ah hing hamla Khrih amah lawng a pum dawngah mami thawlhna te thinglam dawng a phueih poen. Ahih kah boengha ngaw oen nangmi tah na hoeih u poen. 25 Nangmi tah lawngpui aka hang tuu oen na lo u, tede tahe tah nangmi kah hingna Doenkung Tuudoen hu ah bang hamla nangmi te m'mel sak koep poen.
1 Tetih van angla nangmi yu-aca hue lawngah na vaa thli kah awl te na ngaai ham awm. Te dengah ni na vaa thli tim ah Pathen awl aka tangna nawh pakhat khat te a awm atah nangmi kah moeiboe lawng a taa vetih a oeng ai. Nangmi lawng awl kam at khaw thui ham ngoe manawh, 2 metihtiah nangmi kah khawboe ramlang te metila a ciim tih hinyah koei la a awm te ahimi lawng a huh u ai. 3 Nangmi kah na thlaang theenna te asaw ahan kah cawng acahna, na sam thloeih-thlam te ang thli, khawh-arang oen thoekcauna te ang thli, hi-acuu buen anaakna oen thoeicamna te ang thli dawngah awm ham nawh ni. 4 Te lak ah Pathen mik huh ah phutlo koek thlaangtheenna tangtang tah nangmi kah thinkaw khuiah aka awm boe-ngaaina oen kawdawna dawngah ni a awm. 5 Metihtiah yan veng kah Pathen aka uepna hutaa thli kah a thlaang theenna tah a vaa thli kah awlngaaina dawngah awm. 6 Sarah tah te tila awm; Ahih lawng Abraham kah awl a ngaai tih ahih te bawipa a tina. Nangmi lawng theenna te na sai u tih rihna tu khaw na khueh u nawh atah ahih kah canu la tahe ah na awm u. 7 Tetih van angla nangmi tawngpa hue lawng yu-aca oen thik-at la awm haih u lang ahimi te tha aka ra nawh ni tite yaakming uh. Ahimi te hinyahna oen voemtoei uh, metihtiah ahimi lawngkhaw Pathen kah hingna kutdo te nangmi oen thik-at la dang haih van ham ni. Na thangthuina te kanghalhna khat khaw a awmna nawh ham te tila te sai uh. 8 Hukhueng ah awl uen hamla ka ngaih tah; Nangmi boeih lawng thinkaw lungbui poekna te khat la kang khueh uh, maya manau angla khat oen khat lung u langtah reenna oen boe-ngaaina oen ah awm uh. 9 Nangmi lawng athe te athe van oen ah, tapvoepna te tapvoepna van oen ah thung u boel; te lak atah yotheen kam-awm peekna oen thung uh, metihtiah Pathen kah awlkam yotheen kam-awmna te nangmi peek hamla ni amah lawng n'khue u. 10 Caciim dawngah, “A-u khaw hing khuiah awmngaih hamla a ngaih tih atue theen huh ham aka ngaih tah, awlthe thui te kuemsuem selang hoem awl thui te toeng loeih seh. 11 Ahih lawngah athe te mangthawng taak selang atheen te sai lah seh; ahih lawngah thinkaw lungbui boeih oen roeproeina te tlap seh. 12 Metihtiah Pathen lawng thlaangdoeng te a doen-acaang tih ahimi kah thangthuina te a hutung; tede athe-ara te aka sai te tah Pathen lawng a mangthawng taak” tila a thui. 13 Nangmi lawng theenna te sai ham thinkaw a thluembuek tang atah a-u lawng nuem patang raina te m'peek tang ai? 14 Tede nangmi lawngah doengna na sai u lal maiah patang na khang u atah nangmi tah yotheenna aka dawng thlaang ni! A-u khaw rih u boel, lakueng khaw lakueng u boel. 15 Tede na thinkaw lungbui oen Khrih hinyah uh, na Bawipa la khueh langtah hinyah u lah. Nangmi lawng na kaw khuiah ngaiuepna na khueh u te thuicaih hamla pakhat khat lawng nangmi te n'doet u atah meveng tue ah khaw ahimi kah awldoet te thung hamla oepsoehla awm uh. 16 Tede awldoetna te kawdaw awlding oen hinyahna oen ah thung pe uh. Khrih kah hubang la na awm u dawngah nangmi kah khawboe ramlang theen te athela aka thui thli lawng amami kah awlthui han ah ayah toe la a awmna u ham thinkaw te ciim sak uh. 17 Athe sai dawngah patang khang lak ah Pathen kawngaih la a awm atah theenna sai dawngah patang khang te theen ngaai. 18 Metihtiah Khrih tah thlaangthawlh boeih yuengla vai at ah akhoek koeng la duek poen, nangmi te Pathen teng ceh puei ham thlaangthawlh yueng la thlaangdoeng te duek. Ahih te pumsa ben atah duek de, muithla ben atah hing koep tih, 19 muithla ben kah amah hingna oen muithla thongtla thli tengla cet tih awlthang a phawng pe. 20 He muithla thli tah Noah lawng tuisangphaw a sai vengah Pathen lawng thinsan kawdaw oen a ring khiing de awl aka ngaai tlaih nawh hue te ni. Tuisangphaw khuila aka kuun thlaang a yawlca, apum boeih la pareet hue te tui dawngkah a thlawn, 21 te tah tahe ah nangmi kah thlawnna baptisma miknoekna te a thuinuetna ni. He baptisma he tah pum dawngkah ciimcaih nawh te silhna nawh tih athe atheen pekbona kawpoek theen oen Pathen tengah awlkam saina ni. Jesuh Khrih thawhkoepna rang oen ah nangmi tah te baptisma oen n'thlawn u. 22 Ahih tah vaan la luui tih Pathen bantang ben ah te awm tih vanthlaang boeih oen vaan ah saithaina aana khuehkung boeih oen ah huham tharana boeih te a uk.
1 Khrih lawng amah pum dawngah patang a khang poen dawngah nangmi lawngkhaw ahih kah thinkaw a khueh te ang te khueh u van lang na tha thlue sak u lah; metihtiah a-u khaw pumsa dawngah patang aka khang tah thawlhna oen bawl-aneeng u tlaih nawh. 2 Tedawngah tahe kalawng tah dilai dawngah hingna na khueh khui roekk tah thlaanghing kah kawngaihna ohla Pathen kah kawngaihna lawng nangmi te n' uk u seh. 3 Pathen aka ming nawh thlaang thli lawng a sai u angla te nangmi lawng sai van hamla atue atang akhoek anoen te n'hu vengah na hawna u poen. Nangmi lawng na hingna te sai koei nawh yahpawhna, cuk-halhna, yuu ruuina, yuukung tai la ah so-atena, cingdoek halangna, tuiilehkap kutsaimuei bokna dawngah na hawna u poen. 4 Tahe atah nangmi lawng Pathen aka ming nawh thlaang thli kah khawpaw rang-au la a hingna dawngah te na thuum pe u tlaih nawh dawngah a kawpoek rai u tih tedawngah nangmi te n'thui theet u. 5 Tede thlaangduek oen thlaanghing awlcek ham oepsoeh la aka awm Pathen tengah ahimi lawng a hingna oen a saina boeih te a thui u ai. 6 Tedawngah ni Awlthang Theen he thlaangduek thli tengah khaw a thui pe. Thlaang boeih awl a cek van angla ahimi khaw pumsa la a hing vengah te awl cek la awm poen; te cakhaw ahimi tengah awlthang theen a thui pe he tah muithla ben kah a hingna lawngah te Pathen a hing van angla ahimi hingna hamla ni. 7 Thaihu boeih kah aboetna tah yoeii poen. Tedawngah thangthuina khueh thaina ham ah mah oen mah kuemsuem u langtah a huertuela awm uh. 8 Atloe boeih lak ah pakhat oen khat thinkaw tak oen lung uh, metihtiah lungna lawngtah thawlhna boeih te a khuk a dah dawngah ni. 9 Kawhuet cakbat ohla pakhat oen khat im yin luui sak uh. 10 Nangmi pakhat rip he Pathen kutdo atloetloe kuemkung theen la na awm u van angla Pathen teng kah na dang kutdo te thlaangtloe kah theenna hamla hawna uh. 11 Thaihu soeprep dawngah Jesuh Khrih rang oen Pathen lawng thangpawmna te a dang thaina ham a-u lawngkhaw awl a thui atah Pathen awlthang te thui seh; A-u lawngkhaw bii a bi atah Pathen lawng a peek tha-awm tharana oen bi seh, ruep-awmna oen huham tharana tah dungyan toela amah tengah awm hawn seh. Amen. 12 Ka lungna ka paya thli, aka tlo tangkiik noekdakna patang na khang u dawngah nangmi sawah aka awm noek nawh thaihu va thoeng tila na kawpoek rai sak u boel. 13 Te lak atah Khrih kah patang khangna te na khang u van dawngah awmngaih u lah. Te ah ni ahih kah ruep-awmna a tueng vengah nangmi lawng awmngaihna oen na betoet ai. 14 Khrih hubang la na awm u dawngah nangmi te n'thui theet u atah na kaw hoe sak u lah; he tah Pathen Muithla ruep-awmna oen aka be muithla te nangmi sawah awm ti ngaihna ni. 15 Nangmi pakhat khat lawngah patang raina na khang u te, thlaang ngawnna, huen-acanna, lumlai huhna, thlaangtloe kah kawng-alam rawlraakna dawngah patang khang u boel. 16 Tede khrihca la na awm u dawngah patang na khang u oh atah yak u roe boel, nangmi lawng Khrih miing te na lengkoena u dawngah Pathen te koeh u lah. 17 Awlcekna tongnan hamla atue khoek poen tih Pathen kah thlaang thli te lamhacuekla awl a cek ai. Mami tengah lamhacuek la awlcekna a tongnan oh atah Pathen tengkah Awlthang Theen aka oeng nawh thlaang thli tare metila aboetna a awm ai te? 18 Caciim lawngah, “Thlaangdoeng ham pateng thlawnna te a rai atah; Pathen khueh nawh thlaangthawlh ham tah metihtlukla a rai ai te,” tila a thui. 19 Tedawngah Pathen kah kawngaih la a awm dawngah khawdeng patang aka khang hue lawng awlkam aka thlauh nawh ahimi saikung Pathen tengah amah oen amah te nawn u ngala seh.
1 Khrihcabu ahaamca thli kai khaw ahaamca pakhat la ka awm van angla nangmi tengah reenna kavan bih u. Kai tah Khrih kah patang khangna te hukung la ka awm tih aka law ham koei ruep-awmna te khaw pang van hamla ka awm dawngah nangmi tengah reenna kavan bih. 2 Pathen peek tuuping te aka khaal tuudoen la awm u lah, thathe huut la awm ohla, Pathen kawngaih angla thathlue thakaw la tuu te doen uh. Bii bi phu dang ngaih maiah bi mailai ohla bi ngaihna thinkaw tang oen ah bi uh. 3 Nangmi kut dawngah avan khueh tuu thli te uk khangrang aih boel langtah tuuping kah oett koei la te awm ham yawm uh. 4 Tedawngah Tuudoen Ahaam koek te a tueng vengah a aangna aka duek yum thai tlaih nawh ruep-awmna bawilumuek te nangmi lawng na dang u ai. 5 Te tih van la te nangmi roengthaai kumno hue lawng ahaamca thli kah awl te na ngaai u ham awm. Nangmi boeih lawngah boe-ngaaina himbai te bai u langtah pakhat oen khat bawmcem u lah; metihtiah caciim lawngah, “Pathen lawng aka oekthloen u te tah amah khak tih boe-ngaai thlaang teng atah mik-hai a thlampaan sak,” tila a thui. 6 Tedawngah atue akhoek vengah Pathen lawng nangmi te pawmsangna ham namah oen namah boe-ngaai lang amah kah huham thara kut dawngah tloeng u hawn. 7 Nangmi te amah lawng n'doencang poen dawngah nangmi kah lakuengna boeih te amah pum ah hal u hawn. 8 Huertue la awm uh, ngaithuen lang awm uh! Nangmi kah raal, Raaibawi Seitan tah ngeh hamla sa aka tlap tih aka kaawk soeh sathueng angla yingyo soeh poen. 9 Nangmi lawng na oengna dawngah te acakla awm u lang Seitan te balkhawng uh. Metihtiah na ming u angla dilai pum ah aka awm oengca pueipaw thli khaw he ang khawdeng patang he a khang u van. 10 Tede nangmi lawng atue soetca ah patang na khang u kawlkalh coeng atah lungvatna boeih kah Pathen, Khrih ah pumkhat la awmna rang oen amah kah dungyan ruep-awmna te paang van hamla nangmi khuekung Pathen amah lawng nangmi te thlaangdoeng la n'khueh vetih acakla pai thaina oen tha-awm tharana te m'peek ai. 11 Amah tengah huham tharana tah yoeyahla awm hawn seh! Amen. 12 He capat atoica he Silas kah bawmna rang oen nangmi tengah kavan thut, ahih he uep-awm khrihca maya manau la ka poek ni. Nangmi tengah thaphawhna awl thui ham ka ngaih tih nangmi lawng na dang u lungvatna tah Pathen tengkah tangtang ni tila aka mingkung la ka awm. Te lungvatna dawngah acakla pai uh. 13 Pathen lawng a tuek Babilon khaaw kah khrihcabu lawngkhaw, ka capa Mark lawngkhaw nangmi te n'toei u. 14 Nangmi khat oen khat khrihca lungna oen mok u langtah voemtoei u lah. Khrih ah aka awm nangmi boeih sawah ngaimawngna awm hawn seh.
1 Jesuh Khrih kah tuihyoeihthlaang oen celtuih Simon Piter lawng mami kah Pathen oen Thlawnkung Jesuh Khrih kah doengna rang oen kaimi angla aphu aka tlo oengna aka dang van nangmi tengah: 2 Pathen oen mami kah Bawipa Jesuh te na mingna rang oen ah lungvatna oen ngaimawngna tah asoepla nangmi tengah awm hawn seh. 3 Pathen amah kah ruep-awmna oen atheenna pang van hamla mami khuekung Jesuh Khrih mingna rang oen Pathen hinyahna oen ah hing hamla mami kah ngoe soeprep boeih te Pathen kah tharana huham oen m'peek poen. 4 Te tila amah lawng peek ham awlkam aka bo hlang tih aphu aka tlo kutdo te mami m'peek poen. He kutdo rang oen mami aka phe thai dilai pumsa ngaihna kalawng na loeih u thai vetih Pathen pumsa te na cuut u thai van ai. 5 Tedawngah he kawngah he na oengna dawngah theenna te thap u lang, na theenna dawngah mingna oen thap uh; 6 na mingna dawngah te mah oen mah kuemsuemna oen thap uh; mah oen mah kuemsuemna dawngah uehna oen thap uh, uehna dawngah Pathen hinyahna oen thap uh; 7 Pathen hinyahna dawngah te boenhui angla thintlawhna oen thap uh, boenhui angla thintlawhna dawngah lungna oen thap uh. 8 He thli he nangmi lawng na ngoe thaihu ni, he ang he yahawh ngaai na khueh u atah mami kah Bawipa Jesuh Khrih na mingna dawngah tha avan thlue sak vetih theenna avan thoeng sak ai. 9 Tede a-u khaw te thaihu aka khueh nawh tah a huhna aka toica tangkiik mikpum thlaang ni; ahih lawngah aruem kah thawlhna boeih kalawng n'ciim sak tite a hilh ni. 10 Tedawngah maya manau hue, Pathen kah khuena oen tuekna te acakna poe ham tha huer tare uh; te tila tha na huer u atah thawlhna dawngah na tlim u manawh. 11 He tila te mami kah Bawipa oen Thlawnkung Jesuh Khrih kah dungyan ram ah nangmi kuun thaina te m'peek u ai. 12 Tedawngah nangmi lawng he kawng he na ming u tangte poen tih awltak na dang u dawngah acakla na pengnel u poen de he kawng he kan yaak sak poepa hun ai. 13 Ka hing khui roekk atah he kawng he nangmi kan yaak sak poepa hamla aka soeng ni tila ka poek. 14 Mami kah Bawipa Jesuh Khrih lawng aciimphanla ka tengah avan thui poen angla he aka duek thai pum he tah ka dul yue poen ai tila ka ming. 15 Tedawngah Kai ka duek coengah he thaihu thli he na ming u poepa hamla ka sai thai khui tah nangmi ham lawngpui ka roek ai. 16 Mami kah Bawipa Jesuh Khrih tharana huham oen a lawna te kavan thui u vengah thlaang lawng a suen coplap ciil awl te kavan thui nawh. Kaimi lawng a bawilenna te ka mik roeroe oen ka huh u. 17 Ruep-awm Sawsangkoek teng kalawng “Ahih he ka lungna ka Capa ni, ahih sawah ka kaw hoe tangkiik tila ahih tengah awl va law tih Pa Pathen lawng hinyahna oen ruep-awmna a peek vengah te kaimi khaw te huen ah te ka awm u. 18 Amah oen aciim tlaangsawm ah ka awm u vengah vaan kalawng awl a law te kamami roe lawng ka yaak u. 19 Tedawngah tawngha thli lawng a thui u awl te kaimi lawng ka tangna tare u. Nangmi lawng te awl te atheenla na khuui na ciing u ham awm, metihtiah khawthai tih aisi tumpa nangmi thinkaw khuiah a aang thlantoe yiinna khuiah aka vang hai-im oen lo u. 20 Tecakhaw he thli boeih coengah caciim dawng tawngha thli kah thuisut awl te a-u lawngkhaw amah poek ah thuicaih thai nawh tite ming uh. 21 Metihtiah tawngha thli kah thui oepsoeh awl he thlaanghing kawngaih-na oen law mailai nawh, tede thlaang he Ciim Muithla lawng a ceemtuh dawngah ahimi lawng Pathen tengkah awl aka law te a phawng u.
1 Yan veng Israel thlaang thli tim ah asoeng nawh tawngha thli pho. Tetih van angla nangmi tim ah asoeng nawh cangpueikung thli va thoeng ai. Ahimi lawng thlaang thek-yakna asoeng nawh oengnakungpui te avan khuen u vetih ahimi aka tlangkung Manghai Bawi te a hoett u ai, te tila amami sawah kawlkalhca ah rawkna te a pha sak ai. 2 Te tila a awm u lal maiah pateng ahimi kah athe khawboe ramlang te thlaang yahawh lawng a oett u vetih ahimi lawng athe a sai u dawngah awltak lawngpui te thlaangtloe lawng athela a thui ai. 3 Aka soeng nawh cangpueikung hue lawngtah amami kah apueh ngaih soeh te dang ham a ngaih u dawngah a suen coplap ciil te nangmi tengah avan thui ai. Aruem veng kalawng tahe toe ahimi Awlcekna te awm oepsoeh poen tih ahimi aka Phekung tah huertuela hak! 4 Pathen lawngtah thawlhna aka sai vanthlaang thli te thlung nawh tih ahimi te hell khuila a voeih, yiinna khuiah ahimi te thiirui oen a khih tih awlcekna khawhin te a ring u. 5 Pathen lawngtah yan kah dilai khaw thlung nawh tih Pathen tula aka sak nawh thlaang kawngah dilai dawng tuiliw a law sak, doengna aka thui Noah oen thlaangtloe pasarih hue bueng te a thlawn. 6 Pathen lawng Sodom oen Gomorrah khawpui te dan a peek tih hai oen a phe. Te tah Pathen tula aka sak nawh thli hamla miknoekna a sai. 7 Khawboe ramlang the tih phung aka khueh nawh thlaang thli lawngah a thekhana thlaangdoeng Lot te tah a loeih sak. 8 Te thlaangdoeng tah thlaangthe thli tim ah khawhin roekk khaw a sak tih ahimi kah athe moeiboe oen saina te a huh tih a yaak vengah a kaw the tih a thin phat. 9 Tedawngah Bawipa lawngtah amah aka ming thlaang thli te ahimi kah patang khangna kalawng loeih sak ham khaw, thlaangthe thli te Awlcekna Khawhin ah metila dan tat ham ti khaw a ming, 10 awlpui la tah amami kah tuiilehkap pumsa cuk-halhna oen Pathen kah aana n'tu la aka sak nawh hue te ni. He kah asoeng nawh cangpueikung thli he a thin cak u tih halang u, sawben vaan ah aka awm ruep-awm te khaw hinyah u nawh, ahimi lawng te thli te asal aphaam dai. 11 He kah asoeng nawh cangpuei-thawlhkung thli lak ah tha awm thara ngaai vanthlaang thli pateng Pathen haiah ahimi te thawlh a peel vengah tapvoep awl thui u nawh. 12 Tede, he thlaang thli lawngtah, tuuk tih ngawn doek ham aka thang ramsa sann angla poekna mailai oen thaihu a sai u; ahimi lawng a ming u nawh thaihu khat mai dawngah khaw tapvoep awlkha a thui u. Ahimi tah ramsa sann angla ngawn la awm ai. 13 Ahimi lawng thlaangtloe sawah raina a thoeng sak angla amami sawah raina oen a thung pe van ai. Ahimi ham tah nawmna ti he hingthuntaang ah pumsa kah hue-ngaihna soeprep sai he ni. Amami kah thailatna lawngpui ah te awmtheen u tih nangmi oen buh a veel haih u vengah khaw, haithelatt oen yarau aka thoeng sak la awm u. 14 Ahimi lawng thlaanghalhnu nawhtah atloe te bueh hamla ngaih u nawh; amami kah thawlh saina dawngah a kaw riim u nawh. Ahimi lawng oengna tha aka yoek thlaang thli te thawlhna dong dawngah a man sak. A thinkaw tah apuehngaihna oen betoet. Ahimi tah Pathen kah kawsi aka yawkk thlaang poen ni. 15 Ahimi lawng lawngdoeng te a ceh taak u tih lawngpui a hang u poen; ahimi lawngah Beor Capa Balaam lawngpui te a vai u, Ahih tah athe saina oen tangka huh ham a ngaih tih, 16 amah te a thawlh dawngah toelthaam la awm. Amah kah marang lawng thlaanghing awl la cal tih te tawngha kah a ngau avawk oen a sai te a toeng sak. 17 He ang thlaang thli tah tui aka kak sawkca angla awm, thlipui lawng a yawng mailai tuikhu oen lo u; Pathen lawng ahimi ham adungkoek yiinna khuiah huen a khueh pe sut poen. 18 Ahimi lawng oekthloenna oen awlpoei awlpit te a thui u tih, thawlhpalhna aka ceh taak pek thlaang thli te tuukna ham asoeng nawh pumsa hue-ngaihna te a hawna. 19 Ahimi lawng te thlaang thli te loeihna a dang ai tila awl akam pe u de, amami pateng rawkna moeiboe kah sal la awm u, thlaang he ahih aka taa thaihu kah sal la awm. 20 Thlaang he mami Bawipa oen thlawnkung Jesuh Khrih a mingna rang oen dilai tuiilehkap kalawng a loeih u coengah te dilai tuiilehna lawng a tuuk koep tih a taa atah te thlaang te lamhacuek kah lak ah ahukhueng ah the-eep ngai. 21 Doengna lawngpui te ming coengah ahimi a peek u aciim awlpeek te mel taak koep lak atah doengna lawngpui te ming nawh ngala kawinih ahimi ham theen ngaai sui de. 22 “Ui lawngah a lawkk a caak koep” tina awl oen “Awk lawngah tui thluk coengah nawng a nelh koep” tila a thui tatuk-awl soeng tangtang ti he ahimi lawng a tueng sak.
1 Ka lungna ka paya thli, tahe nangmi tengah ca kavan pat he voeihihna capat poen ni. Capat pahih bok dawngah ka ngaihna tah nangmi thinkaw khuiah poekna ciim awm sak hamla ni, tedawngah nangmi tengah he thaihu he kavan thui u. 2 Yan vengkah tawngha thlaangciim thli lawng a thui awl te oen nangmi kah celtuih hue teng kalawng nangmi teng peek la aka awm Bawipa oen thlawnkung tengkah awlpeek te na ming khuep u ham ka ngaih. 3 Lamhacuek ah nangmi lawng na ming u ham tah atue khawhin aboet ben ah ngoen tah a hingna te amami kah pumsa ngaihna lawng a uk thlaang khatsut law ai. Ahimi lawng nangmi te n'nuihna u vetih, 4 “Ka law koep ai” tila awl a khueh de lah koen? mela a awm kai? mami kah Pahaam thli khaw duek boeih poen, tede soeprep boeih he dilai suen cuek veng kah a awm nooek angla ni a awm!” ti u ai. 5 Pathen lawng yan vengah a awl oen ah vaan oen dilai a suen ti he ahimi lawng aka ming nawh angla awm u. Dilai he tui khui kalawng tui oen a sai tih, 6 te dilai ruem te tui toengtoeng tuiliw tui oen a phe. 7 Tede tahe ah aka awm vaan oen dilai he hai oen phe hamla Pathen lawng a awl oen a thlung hun ni. Pathen tula aka sak nawh thlaang thli awlcek tih phena khawhin veng ham te thli te a thlung hun. 8 Tede ka lungna ka paya thli, he thaihu pakhat he hilh u boel! Bawipa huh atah hin at he kum thong khat angla awm tih kum thong khat he hin at angla awm. 9 Thlaang khatsut lawng a poek angla Bawipa he amah awlkamna soep sak ham a tat a hiing aih moenih, Nangmi te amah lawng n'reen u dawngah ni. Metihtiah ahih lawngtah khatca khaw phe ham ngaih nawh tih thlaang boeih lawng a thawlhna yut u seh ti he a ngaih. 10 Tecakhaw Bawipa Khawhin tah thlaanghuuen angla law ai. Te Khawhin atah vaan lawng vupaang awl oen auh ai, vaan khawhi kah aka awm boeih khaw ung vetih a phe boeih ai, dilai oen dilai dawng aka awm boeih te kawlkalh ah auh poen ai. 11 He tila thaihu boeih he phe ham a awm dawngah nangmi lawng me ang thlaang la na awm u lah ai? Nangmi tah hingna aka ciim tih Pathen tengah pum aka pe thlaang la na awm u ham awm. 12 Vaan te ung tih phe la a awmna oen vaan khawhi te a lingsona oen atui la atleena khawhin Pathen Khawhin te ayuela law ai tila nangmi lawng na lamtoen u vengah he te tila awm hamla na yawm u ham awm. 13 Tede mami lawngtah Pathen awlkam vaan thaai oen dilai thaai doengna a awmna im te n'lamtoen u. 14 Tedawngah ka paya thli, te Khawhin te na lamtoen u vengah Pathen huh ah aka ciim tih cawttbauh kap ohla awm ham yawm u lang amah oen roeproeicala awm uh. 15 Mami lawng n'lungna maya Pawl lawng, Pathen kah peek cuihna te hawna oen nangmi tengah ca avan pat angla Bawipa lawng mami sawah kawdawna a khueh he tah mami he thlawn ham a ngaih dawngah atue atang avan soeng ni tila poek uh. 16 He kawng he a thut roekk ah a capat boeih boeih dawngah te he ni a thui. Ahih kah capat dawngah akawng alam khatsut tah yaakming ham rai tih cuihhoena aka khueh nawh oen kawthlawp thlaang thli lawngtah, Caciim dawngkah awl te atloetloe la a thui u angla te asoeng akam nawh la a thuicaih u. Tedawngah ahimi lawngah amami kah rawkna te a thoeng sak u. 17 Tede ka paya thli, nangmi lawngtah he kawng he na ming u poen. Tedawngah phung awl tula aka sak nawh thli kah thawlhpalhna lawng nangmi te m'mawt thawlh nawh ham oen ah namami kah aka cak paihuen dawng kalawng na thoeih na nawng u nawh ham ngaithuen uh. 18 Mami kah Bawipa Jesuh Khrih lungvatna oen mingna dawngah roeng hang uh. Amah tengah ruep-awmna tah tahe kalawng ayoeyah awm hawn seh. Amen.
1 Acuekca veng kalawng aka awm tangte hingna Awl kawng te nangmi tengah ca oen kavan thut u. Te kawng te kaimi lawng ka yaak u, mik oen ka huh u tih ka kut oen ka tek u. 2 He hingna he huh thai la ava coengg vengah kaimi lawng ka huh u, tedawngah Pa oen aka awm haih tih mami tengah avan tueng sak dungyan hingna kawng te nangmi tengah kavan thui u. 3 Kaimi lawng ka huh u tih ka yaak u te nangmi tengah khaw kavan phawng u. Pathen oen a Capa Jesuh Khrih oen ah kaimi lawng ka khueh pawlneengna dawngah nangmi khaw na thuum thaina ham kaimi lawng ka huh tih ka yaak te nangmi tengah khaw kavan phawng u. 4 Kaimi kah awmngaih asoepna hamla he ca he kaimi lawng kavan thut u. 5 Tahe ah, a Capa teng kalawng ka yaak u tih nangmi tengah kavan phawng u awl tah he ni: Pathen tah aangna la awm tih ahih dawngah yiinna roeroe awm nawh. 6 Tecoengah mami lawng ahih oen pawlneengna ka khueh n'ti u tih yiinna khuiah ng'awm u atah mami tah awlkaa oen khawseh, saina oen khawseh, hoem awl ni n'thui u. 7 Tede ahih tah aangna la a awm angla mami lawng aangna ah ng'awm u atah pakhat oen pakhat pawlneengna mami lawng n'khueh u tih a Capa Jesuh thisen oen soeprep thawlhna kalawng mami n'silh poen. 8 Mami lawng thawlhna ka khueh nawh n'ti u atah m'mah oen mah he, thailatna u tih mami khuiah awltak awm nawh. 9 Tede mami lawng thawlhna boeih te Pathen tengah m'phawng u atah ahih tah a awlkam cak tih thaihu doeng a sai dawngah mami thawlhna boeih te khawdawp a ngaai vetih mami kah sai thawlh boeih te avan ciim sak ai. 10 Mami lawng ka thawlh nawh n'ti u atah Pathen te hoem thui la n'sai u tih amah awl te khaw mami khuiah awm nawh.
1 Ka ca ka nau thli nangmi lawng thawlhna na sai u nawh hamla he ca he kavan thut; tede pakhat khat lawng thawlhna a sai hau atah, Pa, tengah mami yuengla aka bih ham thlaangdoeng Jesuh Khrih n'khueh u. 2 Metihtiah, Khrih amah roe he mami kah thawlh khawdawp ngaaina Luciik la awm tih mami kah thawlhna bueng nawh tih thlaang boeih kah thawlhna te khawdawp a ngaai. 3 Mami lawng Pathen kah awlpeek te n'vai atah amah te m'ming u tite aciimla m'ming. 4 Thlaang pakhat khat lawng ahih te ka ming ti de, a awlpeek te a vai nawh atah te ang thlaang tah hoem aka thui tih ahih dawngah awltak awm nawh. 5 Tede, a-u khaw a awl te a vai atah Pathen kah lungna oen ahih te soep tangtang poen. Pathen oen mami pumkhatla ng'awm tite mingna tah he tila ni, 6 a-u lawngkhaw Pathen oen pumkhatla ka awm a ti atah Jesuh Khrih angla awm van ham awm. 7 Ka lungna ka paya thli, nangmi tengah kavan thut awlpeek he athaai nawh ni; acuekca kalawng nangmi lawng na khueh tangte awlpeek ruem te ni. Te awlpeek ruem te tah na yaak tangte awl te ni. 8 Tede nangmi tengla kavan thut awlpeek he athaai ni; metihtiah he tah athaai ni tila asoengna tah Khrih ah huh la awm tih nangmi dawngah khaw huh la awm. Metihtiah yiinna tah khum tih aangna tangtang te aang poen. 9 A-u khaw aangna khuiah ka awm ti tih, a maya manau te a thina atah tahe toe ah yiinna khuiah awm hun. 10 A-u khaw a maya manau te a lungna atah aangna khuiah awm tih thlaangtloe thawlh sak ham ahih khuiah tu tehca khaw awm nawh. 11 Tede a-u khaw a maya manau te a thina atah yiinna khuiah awm hun; yiinna khuiah yingyawi tih te yiinna lawng mik a pum pe sak dawngah meben la ka ceh ti khaw ming nawh. 12 Ka ca ka nau thli Khrih rang oen nangmi kah thawlhna te khawdawp a ngaai poen dawngah nangmi tengah he ca he kavan thut. 13 Papa thli aw, acuekca kalawng aka awm ahih te na ming u dawngah nangmi tengah he ca he kavan thut. Cadawng caloe thli nangmi lawng Raaibawi te na taa u poen dawngah nangmi tengah he ca he kavan thut. 14 Ka ca ka nau thli nangmi lawng Pa te na ming u poen dawngah nangmi tengah he ca he kavan thut. Papa thli, acuekca kalawng aka awm ahih te na ming u dawngah nangmi tengah he ca he kavan pat. Cadawng caloe thli nangmi tah na tha a ra u dawngah nangmi tengah he ca he kavan pat. Pathen awl te nangmi khuiah awm tih Raaibawi te na taa poen. 15 Dilai oen dilai thaihu he khat khaw thintlawhna u boel. Dilai he na thintlawhna u atah Pa te na thintlawhna u nawh. 16 Dilai thaihu soeprep, pumsa ngaihna, thlaang lawng a huh tih a ngaih thaihu, he dilai dawngkah thaihu soeprep thlaang lawng a phoekthloerna khatca mai khaw Pa teng kah aka law thaihu nawh ni. 17 Dilai oen dilai thaihu thlaanghing lawng a ngaih he tah khumpel boeih, tede Pathen kawngaih aka sai tah dungyan hing ai. 18 Ka ca ka nau thli atue boetna yoeii poen! Khrih kah raal law ai tila na yaak u; tahe ah Khrih kah raal thli yahawh hlang thoeng poen, tedawngah atue boetna yoeii poen tila mami lawng m'ming u. 19 He thlaang thli he mami kah pawlneengna khuiah aka awm tangtang nawh ni, tedawngah mami he ahimi lawng n'ceh taak u poen; ahimi te mami pawlneengna khuikah tangtang kawinih mami tengah awm poe van ai. Tede ahimi tah khatca khaw mami pawlneengna ah aka awm tangtang nawh ni tite aciimphanna ham mami he n'ceh tak u. 20 Tecakhaw nangmi tah Khrih lawngah Ciim Muithla te na sawah avan toi u poen, tedawngah nangmi boeih lawng awltak te na ming u. 21 Tedawngah nangmi tengah ca kavan thut he awltak te na ming u nawh dawngah nawh tih, nangmi lawng awltak te na ming u tih awltak dawng kalawng hoem awl va thoeng vai nawh tite nangmi lawngkhaw na ming u van dawngah ni. 22 Tetih atah a-u nuem hoem-thuikung? Jesuh tah Messiah nawh ni tila aka thui te hoemthuikung la awm. Te ang thlaang te tah Khrih kah raal ni, Pa oen Capa te aka hoett thlaang ni. 23 A-u khaw Capa aka hoett tah Pa te khaw a hoett: A-u khaw Capa te aka do tah Pa te khaw a do. 24 Tedawngah nangmi lawng acuekca kalawng na yaak u awl te na kaw khuiah khueh uh. Te awl te na khueh u atah Capa oen Pa oen ah pumkhatla nangmi poe na awm u ai. 25 He tah Khrih amah roe lawng mami peek ham awl a kam dungyan hingna he ni. 26 Nangmi thailatna ham aka yawm hue kah akawng te nangmi tengah kavan thut. 27 Tede nangmi ham tah Khrih lawngah a Muithla te nangmi sawah avan toi poen. Nangmi kaw khuiah a Muithla te a awm atah, nangmi cang puei ham a-u khat khaw na ngoe u tlaih nawh. Metihtiah amah Muithla lawngah soeprep boeih kawng te nangmi n'cang puei u tih te cangpueina tah soeng taktak, aka thawlh nawh ni. 28 Ka ca thli, amah oen pumkhatla awm uh, metihtiah amah a tueng vengah mami tah raltheenna oen m'be u vetih amah a lawna Khawhin ah ayahtoela a teng kalawng thuh-elh u ham ngoe tlaih manawh. 29 Nangmi lawng Khrih tah thlaangdoeng tila na ming u; tedawngah a-u khaw thaihu doeng aka sai tah Pathen kah a ca thli ni tite na ming u ham awm.
1 Pathen lawng ningmi n'lungna tangkiik he poek u lah! A lungna tah bo tangkiik tih mami he Pathen amah kah Ca-anau ti poen, te tila te awm tangtang. He kawng ah ni dilai lawng mami he m'ming u nawh: Pathen khaw ming u nawh. 2 Ka lungna ka paya thli, tahe ah mami tah Pathen kah ca-anau la ng'awm u poen, tede hai ben ah mami he n'tu oen n'lawh u ai ti he tah m'ming thlan hun. Tede Khrih a law vengah Khrih amah oen n'lo u ai tila m'ming u, metihtiah ahih tah amah roeroe la te mami lawng n'huh ai. 3 A-u khaw Khrih ah he ang ngaiuepna aka khueh lawngtah Khrih aciimcaih van angla amah oen amah te aciimcaihla awm van. 4 A-u khaw thawlhna aka sai tah Pathen kah phungawl te a phe, metihtiah thawlhna tah phungawl phena he ni. 5 Khrih tah thawlhna ciim sak hamla law tite na ming u, ahih dawngah thawlhna roe awm nawh. 6 Tedawngah Khrih oen pumkhatla aka awm thlaang boeih lawngtah thawlhna sai taitu nawh; tede a-u khaw thawlhna aka sai poepa lawngtah ahih te hu nawh tih aka ming nawh ni. 7 Ka ca thli, nangmi te a-u khat lawngkhaw n'thaina boel seh! Khrih tah thlaangdoeng la a awm angla a-u khaw doengna aka sai boeih tah thlaangdoeng van ni. 8 A-u khaw thawlhna aka sai poepa tah Seitan thlaang ni, metihtiah Seitan tah acuek veng kalawng thawlhna a sai roe poen. He kawng ah he Seitan kah sai boeih te phe ham ni Pathen Capa tah a law. 9 A-u khaw Pathen kah ca-anau la aka awm tengah Pathen kah pumsa tah ahimi dawngah awm tih thawlhna te sai poepa nawh. Metihtiah Pathen tah ahimi kah ana Pa la a awm dawngah ahih lawng thawlhna sai taitu nawh. 10 Pathen kah ca-anau thli oen Seitan kah ca-anau thli a lawhna hih nawh noekna tah he tila ni: a-u khaw asoeng thaihu aka sai nawh boeih, thlaangtloe te aka lungna nawh boeih tah Pathen kah ca-anau thli nawh ni. 11 Acuekca veng kalawng na yaak u awl te tah he ni: mami pakhat oen khat lung u sih ti he ni. 12 Mami he Kain angla awm ham nawh ni; ahih tah Raaibawi kah thlaang la awm tih a manau kheet Abel te a ngawn. N'tu ah Abel te Kain lawng a ngawn? Metihtiah ahih lawng thaihu te athawlhla a sai, tede a manau lawngtah thaihu te adoengla a sai dawngah ni. 13 Tedawngah maya manau thli dilai thlaang lawng nangmi te n'thina u atah na kawpoek rai sak u boel. 14 Mami tah duekna n'ceh taak u poen tih hingna khuila n'kuun poen tite m'ming u; te tila m'mingna tah mami lawng maya manau n'lungna dawngah ni. A-u khaw lungna aka khueh nawh tah duekna khuiah ni a awm hun. 15 A-u khaw a maya manau te a thina atah thlaang aka ngawn ni, thlaang aka ngawn thli tah a khuiah dungyan hingna awm nawh tite na ming u. 16 Lungna he me ang nuem tila m'mingna tah he tila ni: Khrih lawng mami hamla a hingna te a peek. Tedawngah mami lawngkhaw maya manau thli hamla hingna he peek van hamla awm! 17 Thlaanglen kuirang lawng a maya manau kah a voetna te a huh vengah a thinkaw a khaih khoep atah metila Pathen ka lungna a ti thai ai? 18 Ka ca ka nau thli mami kah lungna he tah awlkaa hong mai ohla bii lawh thawhtatna dawngah aka tueng lungna taktak la a awm ham awm. 19 Tedawngah mami lawng awltak dawngah ka awm tite he tila m'ming u ai. Pathen haiah khaw ngaitluepla n'awm u ai. 20 Mami kah athetheen mingna thinkaw lawng mami te n'salphaam mai cakhaw Pathen tah mami kah athetheen mingna thinkaw lak ah bo ngaai tih ahih lawngtah soeprep boeih a ming tite mami lawng m'ming u. 21 Tedawngah ka lungna ka paya thli, mami he m'mah kah athetheen mingna thinkaw lawng n'salphaam nawh kawinih mami tah Pathen haiah raltheenna n'khueh u. 22 Mami lawng amah kah awlpeek te n'vai tih a kawngaih te n'sai dawngah mami lawng amah tengkah m'bih boeih te n'dang u. 23 Te a awlpeek tah a Capa Jesuh Khrih te mami lawng n'tangna tih mami tengah Khrih amah awlpeek angla pakhat oen khat n'lung u he ni. 24 A-u khaw Pathen kah awlpeek te aka vai tah Pathen oen pumkhatla awm tih Pathen khaw ahih oen ah pumkhatla awm. Te tila mami tengah Pathen kah peek Muithla rang oen ah Pathen tah mami oen pumkhatla awm tite m'ming u.
1 Ka lungna ka paya thli, Muithla ka khueh tila aka thui boeih te tangna u boel, tede ahimi kah Muithla khueh te Pathen tengkah aka law tang aw tite noekdak uh. Metihtiah, tawngha rawlrap thli, yahawh hlang dilai han ah yingyo u poen. 2 Pathen benkah Muithla ni tila ming thaina ham tah he tila ni; a-u khaw Jesuh Khrih tah thlaanghing pumsa la va law tila aka ti boeih lawngtah Pathen tengkah aka law Muithla te a khueh. 3 Tede, a-u khaw Jesuh kawngah te tila aka pawm nawh tah Pathen tengkah Muithla te khueh nawh. Ahih kah khueh muithla te tah Khrih raal tengkah ni; nangmi lawng te ang te va law ai tila na yaak u poen tih tahe dilai dawngah awm poen. 4 Tede ka ca ka nau thli nangmi tah Pathen thlaang la na awm u tih tawngha rawlrap thli te na taa u poen, metihtiah nangmi khuiah aka awm Muithla tah dilai koeva la aka awm thlaang thli kah muithla lak ah ahu-aham a awm ngaai dawngah ni. 5 Te kah tawngha rawlrap thli lawngtah dilai thaihu thli kawng he a thui u tih dilai koeva la a awm u dawngah dilai lawng a awl te a hutung. 6 Tede mami tah Pathen thlaang ni. A-u khaw Pathen aka ming lawngtah kaimi awl he a hutung u, a-u khaw Pathen thlaang la aka awm nawh lawngtah kaimi awl he hutung u nawh. He tila he awltak Muithla oen thawlhpalhna muithla laklaw kah alakloena te mami lawng n'thui thai u. 7 Ka lungna paya thli, lungna tah Pathen teng kalawng a law dawngah mami pakhat oen pakhat lung u sih. A-u khaw lungna aka khueh tah Pathen kah a ca la awm tih Pathen te a ming u. 8 A-u khaw lungna aka khueh nawhtah Pathen te ming nawh, metihtiah Pathen tah lungna ni. 9 Pathen lawng a Capa khueh duen khat bueng te mami ham dilai la avan tuihna rang oen a lungna te a tueng sak tih ahih rang oen mami lawng hingna khuehna ham ni. 10 Lungna ti he tah he tila ni: mami lawng Pathen n'lungna te nawh ni, tede amah lawng mami he n'lungna tih mami kah thawlhna khawdawp ngaaina ham a Capa avan tuih he ni. 11 Ka lungna ka paya thli, he tih aih la mami he Pathen lawng n'lungna atah mami khaw pakhat oen khat lung u van ham awm. 12 Pathen te a-u lawngkhaw hu noek nawh, tede pakhat oen khat n'lung u atah Pathen tah mami oen pumkhatla awm tih a lungna tah mami dawngah soep. 13 A Muithla te mami m'peek poen dawngah mami tah Pathen oen pumkhatla ng'awm u tih amah khaw mami oen pumkhatla awm tite aciimphanla m'ming u. 14 Ana Pa lawngah a Capa te dilai thlawnkung la avan tuih te hukung oen thlaangtloe tengah thuikung tah kaimi ni. 15 A-u khaw Jesuh tah Pathen Capa ni tila a phawng atah ahih te Pathen oen pumkhatla awm tih Pathen khaw ahih oen ah pumkhatla awm. 16 Te tila Pathen lawng mami n'lungna te kamami roeroe lawng ka ming u tih ka tangna u. Pathen tah lungna ni, a-u khaw lungna dawngah aka awm tah Pathen oen pumkhatla awm tih Pathen khaw ahih oen pumkhatla awm. 17 Awlcekna Khawhin ah mami lawng raltheenna khueh thaina hamla lungna tah mami dawngah avan soep sak poen; he dilai ah mami hingna tah Jesuh kah hingna oen avai u dawngah te raltheenna te ng'khueh ai. 18 Lungna dawngah rihsakna awm nawh. Aka soep lungna lawngtah rihna boeih te biit aha-ata sak. Tedawngah rihsakna aka khueh thlaang tah lungna asoepbir te khueh thlan hun. Metihtiah rihna lawngtah dantatna oen bawngyawng haih. 19 Pathen lawng mami n'lungna lamha dawngah mami lawngkhaw n'lungna van. 20 A-u lawngkhaw Pathen ka lungna ti de a maya manau te a thina mangkhak atah hoem aka thui thlaang ni. Amik oen a huh maya manau pateng khaw a lungna nawh maiah ahih lawng a huh thai nawh Pathen te lungna thai manawh. 21 Khrih lawng mami tengah m'peek a awlpeek tah “A-u khaw Pathen te a lungna atah a maya manau te lungna seh” a ti te ni.
1 A-u khaw Jesuh Khrih tah Messiah ni tila aka tangna tah Pathen kah a ca ni. A-u lawngkhaw ana Pa te a lungna atah, ana Pa kah a ca thli te khaw a lungna. 2 Mami lawng Pathen kah ca-anau thli n'lungna tite mingna tah he tila ni; mami lawng Pathen amah te n'lungna tih a awlpeek n'vai he ni. 3 Metihtiah mami lawng Pathen n'lungna tila thuingaihna tah a awlpeek thli n'vai he ni. Ahih kah awlpeek te tah mami ham rai aih mai nawh, 4 metihtiah Pathen kah ca-anau boeih lawngtah dilai a taa thai. Mami lawng oengna rang oen dilai n'taa u. 5 A-u lawng dilai a taa thai? Jesuh tah Pathen Capa ni tila aka tangna thlaang bueng lawngah a taa thai. 6 Jesuh Khrih tah amah kah Baptisma huhna tui oen a duekna thisen oen ah aka law ni. Ahih tah tui bueng oen law nawh tih pahih bok la tui oen thisen oen ah va law. He tah soeng tangtang tila Muithla amah roe lawng sausi a deeng, metihtiah Muithla tah awltak la a awm dawngah ni. 7 He kawngah sausi pathum awm. 8 Te tah Muithla, tui oen thisen he hue ni. He pathum hue lawng avan at rip la sausi a deeng u. 9 Mami lawngtah thlaang kah sausi deeng te n'tangna u; tede Pathen kah sausi deeng tah a tha ra ngaai tih a Capa kawng te Pathen amah lawng sausi a deeng poen. 10 A-u khaw Pathen Capa aka tangna boeih lawngtah he sausi he lungbui khuiah a khueh; tede a-u khaw Pathen te aka tangna nawh lawngtah Pathen lawng a Capa kawng a thui te a tangna nawh dawngah Pathen te hoemthuikung la a coengg sak. 11 Te sausi tah he ni: Pathen lawng mami he dungyan hingna m'peek poen tih te hingna tah a Capa dawngah awm. 12 A-u khaw a Capa te aka khueh lawngtah hingna te a khueh; a-u khaw Pathen Capa te aka khueh nawh tah hingna te khueh nawh. 13 Pathen Capa aka tangna nangmi lawng dungyan hingna na khueh u te na mingna u ham he kah ca he nangmi tengah kavan thut. 14 Mami lawng amah kawngaih angla me ang thaihu khaw m'bih u atah a hutung tite aciimphanla m'ming u dawngah Pathen haiah raltheenna mami lawng n'khueh u. 15 Mami lawng amah tengah m'bih vengah a hutung tangtang tila m'ming u veng kalawng tah amah tengah m'bih boeih te khaw m'peek tila m'ming u baal. 16 Na maya manau lawng duekna toe aka mawt nawh koei thawlhna a sai te na huh u atah nangmi lawng Pathen tengah thangthui pe uh. Pathen lawng ahih te hingna a peek ai. He tah duekna toe aka pha sak nawh thawlhna aka sai thli ham ni. Tede duekna toe aka pha sak thawlhna awm, te kawngah te nangmi lawng Pathen tengah thangthui uh ka ti nawh. 17 Sai thawlh boeih he thawlhna ni, tede duekna toe aka pha sak nawh thawlhna awm. 18 Pathen kah ca-anau la aka awm lawngtah thawlhna sai poepa nawh tite m'ming u, metihtiah Pathen Capa lawng a hih te ading asuekla a khueh tih Raai Bawi lawngah raina pe thai nawh. 19 Dilai pum he Seitan kah ukna khuiah awm de mami tah Pathen kah thlaang la ng'awm tite m'ming u. 20 Pathen Capa tah va law tih Pathen tangtang te mami lawng mingna hamla mami tengah yaakmingna te m'peek poen tite m'ming u. A Capa Jesuh Khrih oen pumkhatla awmna dawngah Pathen taktak oen mami pumkhatla m'awm u. Ahih tah aka soeng Pathen taktak la awm tih dungyan hingna la awm. 21 Ka ca ka nau thli aka soeng nawh pathen thli teng kalawng tloeng u lah.
1 Ahaamca teng kalawng- Ka lungna hinyah koei Nutakhong oen a ca thli tengah: Kai bueng lawng kan lungna nawh tih awltak aka ming boeih lawngtah n'lungna, 2 Metihtiah awltak tah mami khuiah awm tih mami tengah ayoeyah awm ai. 3 Pa Pathen oen Pa kah Capa Jesuh Khrih lawng lungvatna, reenna oen ngaimawngna te m'pe selang awltak oen lungna tah mami tengah awm yoeyah seh. 4 Pa lawngah mami awl m'peek angla na ca thli khatsut tah awltak dawngah a hing u te ka huh vengah ka awmngaih tangkiik. 5 Tedawngah ka lungna Nutakhong pakhat oen khat boeih lung u sih. He he awlpeek thaai kavan thut moe nih; he tah acuekca veng kalawng yaak tangte awlpeek te ni. 6 He kah lungna tila ka thui ngaihna tah Pathen kah awlpeek te vai tih mami lawng hing ham awm ti ngaihna ni. Te awlpeek te tah acuekca veng kalawng boeih na yaak u poen angla lungna oen awm boeih uh ti he ni. 7 Jesuh Khrih tah thlaanghing pumsa la law tila aka tangna nawh thlaang, thlaangthaipalat thli dilai pum ah cet khonghak poen. Te ang thlaang te tah thlaangthaipalat oen Khrih kah raal ni. 8 Tedawngah nangmi lawng ngaiuepna oen na bi u te sungdeuh nawh ham oen ah na mami kah kutdo te asoepla na dang thaina ham ngaithuen lang awm uh. 9 A-u khaw Khrih kah cangpueina dawngah aka awm nawh tih te voel ah aka cet lawngtah Pathen te khueh nawh. A-u khaw cangpueina dawngah aka awm khak tah pahih bokla Pa oen Capa te a khueh. 10 Tedawngah a-u khaw pakhat khat nangmi tengah law tih he kah cangpueina he avan khuen nawh atah na im ah pah sak u boel; “Na sawah ngaimawngna awm seh” tila khaw tina boel. 11 Metihtiah a sawah ngaimawngna awm seh tila aka ngaih tah ahih kah thaihu the saina dawngah bii bi puei la aka thuum van poen ni. 12 Nang tengah awl thui ham yahawh tangkiik awm de caram dawng catui cahaang oen ka thut nawh vetih mami awmngaih kawhoena asoepna ham ah nangmi oen pumpakla awlthui ham kamyin la nangmi teng law ham ka cai. 13 Na lungna na nau kah a ca thli lawng nang te n'toei u.
1 Ahaamca teng kalawng- Ka lungna Kaia, ataktangla ka lungduet tengah: 2 Ka lungna ka puei, soeprep boeih te anepnoeila a awmna ham oen sadingla na awm thaina ham ka thangthui. Muithla ben ah sadingla na awm tila ka ming. 3 Nang tah awltak ben ah ueppangla na awm tih awltak dawngah na awm yoeyah tila khatsut Khrihca maya manau thli a law u vengah avan thui u tih ka awmngaih tangkiik. 4 Ka ca thli te awltak dawngah awm u tila ka yaak thloei ah kai awmngaih sak tare ngai atloe awm nawh. 5 Ka lungna ka puei, Nang tah na pueipaw Khrihca thli ham Bii na bina ah ahimi mingtung mingnawh mai ham khaw ueppang tangtang la na awm. 6 Nang kah lungna kawng te ahimi lawng he kah Khrihcabu tengah a thui u poen. Ahimi khawlawng la poe a cehna u ham Pathen kah kawtlaakla bawmcem u de. 7 Ahimi lawng Khrih kah bii bina ah khawlawng ceh a tongcuek u vengah aka oeng nawh thli tengah bawmcemna thaihu khat khaw lawh ohla khawlawng cet u. 8 Tedawngah ahimi kah awltak bii he aka bi puei thlaang la awm van ham mami Khrihca thli lawng khaw he ang thlaang hue he tah bawmcem ham awm. 9 Khrihcabu tengah ca atoica kavan thut; tede ahimi kah mawtkung la awm ham aka ngaih Diotrifi lawngtah ka awlthui he n'tu la khaw ngaai manawh. 10 Tedawngah kai ka law atah a sai thaihu boeih oen mami kawng a thui boeih te oen a hoem thui boeih te ka daih pe badai. Tecoengah he bueng muehla Khrihca maya manau thli a law ah khaw ahih lawng do nawh, ahimi te do ham aka ngaih thli te khaw a khang pe tih Khrihcabu khui kalawng ahimi te hek hamla a yawm mangkhak. 11 Ka lungna ka puei, athe thaihu te oett boel lang atheen thaihu te oett lah. A-u khaw thaihu theen aka sai tah Pathen thlaang la awm; A-u khaw thaihu the aka sai tah Pathen te hu nawh. 12 Demetrias kah theenna he thlaang tawm lawng a thui; awltak roe lawng ahih kah theenna he a thui. Mami lawngkhaw atheenna te n'thui u tih kai lawng ka thui he soeng tila na ming u. 13 Nang tengah awl thui ham yahawh tangkiik awm, tede caram dawng catui cahaang oen thut ham ka ngaih nawh. 14 Nangmi te ayuela huh ham ka ngaih, tevengah pumpakla mami lawng awl n'thui u badai. 15 Nangmi tengah ngaimawngna awm hawn seh. Kaimi kah paya boeih te pumpakla rip van toei.
1 Jesuh Khrih kah tuihyoeihthlaang oen Jeem kah manau Juda lawng Pathen lawngah a khue thlaang-thli, Jesuh Khrih lawng a thlipdah tih Pa Pathen kah lungna khuiah aka awm thli tengah: 2 Reenna, ngaimawngna oen lungna tah asoepbirla nangmi kah koeva la awm hawn seh. 3 Ka lungna ka paya thli, mami lawng n'dang rip thlawnna kawng he nangmi tengah ca oen thut hamla ka yawm. Pathen lawng a thlaang thli tengah vaikhatla khoekkoeng ham a peek oengna dawngah acakla pai ham nangmi tengah ca thut pahoei tih thaphawh ham ka poek. 4 Metihtiah Pathen n'tu la aka sak nawh thlaang khatsut ming mai muehla mami tim ah ahuepla va kuun u tih amami kah cuk-halhna te thlipdahna ham Pathen kah lungvatna kawng awlthang te akhuppalet la a thui u tih mami kah pakhat bueng bawimanghai oen Bawipa la aka awm Jesuh Khrih te a hoett u. He ang thlaang thli tah dan a tat ai tila caciim lawngah aruem veng kalawng a thui oepsoeh poen. 5 He ang thli boeih he na ming u poen de, Bawipa lawng Israel thlaang thli he metila Iyipt ram kalawng vai khat tah a loeih sak tih, tede hukhueng atah aka tangna nawh thlaang thli a duek sak boeih te ming sak koep ham ka ngaih. 6 Amami kah awmna huen a hoett tih, amami kah khuehtoen saithaina ari amawng khuiah aka awm nawh vanthlaang thli te poek u lah: Pathen lawng awlcekna Khawhin pui ah ahimi te dantatna peek ham dungyan thiirui oen a piin tih yiinna khuiah a khueh. 7 Sodom oen Gomorrah oen ah a tengvaai kah khawpui thli, te kah aka awm thlaang thli lawngkhaw vanthlaang thli angla thawlh u tih hutaa tawngpa thawlhna, asoeng nawh hutaa puei oen, tawngpa puei oen ah a thawlh u te poek uh: Ahimi kah dungyan hai dantat patang khang te thlaang boeih ham ngaithuenna la awm. 8 Tetih toengtoengla, tahe kah thlaang thli lawngkhaw mang ka man ti u tih amami pum dawngah thawlhna a sai u; ahimi lawng Pathen kah aana te a hadalhna tih vaan asawsang kah ruep-awm thli te a thuitheet u. 9 Vanthlaang ukkung Maikal lawng pateng he tila sai nawh. Mosi rawkk te a-u lawng a lawh ai tila Seitan oen oelhtaih u tih a tawh athaam u vengah awlthe awlkha oen Seitan te Maikal lawng tapvoep ngam nawh, tede “Bawipa lawng nang ng'ho” a tina. 10 Tede he kah thlaang thli lawngtah amami kah yaakming nawh pakhat khat te the a phoei thil u; ramsa angla amami kah thang puei cuihna oen a ming u thaihu thli lawngah ahimi te a phe u poen. 11 Ahimi ham khawmap tangkiik! Kain kah lawngpui te ahimi lawng a vai u poen. Tangka ngaih dawngah Balaam kah thawlh saina te ang van ah te amami oen amami phuum u. Korah kah ceem raal thawh angla tho u tih ahih angla phe u boeih poen. 12 Ahimi lawng yahtaal pawk-arh la a caak a awk u tih nangmi kah lungna poeibuh veelna ah aka ciim nawh muenmawi oen lo u. Amami bueng ham te a poek u. Ahimi tah yilh lawng a yawng mailai khawtlantui aka awm nawh khawmai oen lo u. Atue atang ah pateng khaw aka thaih nawh thingkung thli oen lo u, ayung ruila phuk bangtlang tih aka duek roepsoet thingkung oen lo u. 13 Ahimi tah tuitunlii kah tuiphu oen lo u, ahimi kah yahpawhna thli te tuihawm angla pho. Ahimi tah aka cet mailai aisi oen lo u tih ahimi hamla Pathen lawng adungkoek yiinna ah dungyan huen a khueh pe poen. 14 Adam kalawng a pasarihna cadil Enok lawngah ahimi kawng te yan veng ka lawng he tila a thui oepsoeh poen: 15 “Thlaang boeih te awlcek hamla, Pathen tula ka sak nawh thlaangthawlh boeih oen Pathen tula sak ohla a sai thawlhna boeih oen ah Pathen te tula sak ohla saringrup awl oen asal aphaamna boeih sawah dantat hamla Bawipa tah amah kah aciim vanthlaang toeklek toekna yahawh oen law ai” tila ti. 16 He thlaang thli lawng caitoek khuep u tih thlaangtloe te a theet u; amami kah athe kawngaih te a vai u; amami oen amami te pawmsang u tih amami ngaihna dang ham tah thlaangtloe te thluethlue a koeh u. 17 Tede, Ka paya thli, mami Bawipa Jesuh Khrih kah celtuih thli lawng n'hu vengah nangmi tengah avan thui u te hilh u boel. 18 Ahimi lawng avan thui tah “Atue boetna khawhin apha veng atah nangmi nuihbu kamring la aka thui thlaang thli, Pathen te tula sak ohla amami kawngaih aka vai thlaang law ai,” tila a thui te ni. 19 He ang thlaang thli he tah pekbona saikung amami kah pumsa ngaihna oen aka piin u tih Muithla aka khueh nawh thlaang thli ni. 20 Tede ka paya thli, nangmi tah namami kah aciim oengna dawngah namami oen namami tawm athap patoeng uh. Aciim Muithla tharana oen thangthui uh. 21 Mami Bawipa Jesuh Khrih lawng reenna rang oen dungyan hingna m'peek ham te na ring u van angla Pathen kah lungna dawngah awm uh. 22 Uepvoetna aka khueh thlaang thli tengah reenna khueh uh; 23 Hai khuikah thlaang thli te rot u langtah thlawn uh; thlaangtloe tengah te rihna oen reenna khueh uh, tede ahimi kah pumsa ngaihna thawlh noknakna himbai te tah thina uh. 24 Nangmi na tlim nawh hamla aka doen thai, nangmi thawlhna a ciing sak tih awmngaihna oen amah Bawilen ruep-awmna haiah kuun thaina pekung; 25 Mami kah Bawipa Jesuh Khrih rang oen pakhat bueng la aka awm Pathen, mami thlawnkung sawah acuekca kalawng khawseh, tahe ah khawseh ruep-awmna, tharana oen saithaina aana tah dungyan toela awm hawn seh. Amen.
1 He cabu he tah Jesuh Khrih lawng a phawng thaihu kawng thutna ni. He awlphawng tah aka thoeng yue ham koei te a tuihyoeihthlaang thli tengah tueng sak ham Pathen lawng a peek. Khrih lawngah he thaihu thli he a tuihyoeihthlaang Johan te ming sak hamla vanthlaang te a tuih tih, 2 Johan lawng a huh thaihu boeih te a thui. Pathen tengkah awlthang oen Jesuh Khrih lawng a phawng awltak tah he ni. 3 He cabu aka tae thli tah a kam awm phoeih tih tawngha kah awlthang awl aka hutung thli oen he cabu khuiah a thut he aka vai tah yotheen a dawng u. Metihtiah he thaihu boeih a thoengna ham atue tah yoeii tengkek poen. 4 Johan teng kalawng, Asia ram khuiah aka awm Khrihcabu pasarih tengah: Aka awm lii, aka awm poen tih aka awm poe ham koei Pathen teng kalawng amah ngawlhcoen hai kah Muithla pasarih teng kalawng, 5 duekna kalawng lamhacuekla aka tho, thincak sausi la aka awm, dilai sengpahrang boeih ukkung la aka awm Jesuh Khrih teng kalawng lungvatna oen ngaimawngna tah nangmi tengah awm hawn seh. Mami n'lungna tih a duekna oen mami he thawlhna kalawng aka loeih sak tih, 6 ana Pa oen Pathen kah bii te bi thai ham mami he sengpahrang la khawseh Khawsoeih la khaw seh aka saikung Jesuh Khrih tengah ruep-awmna oen huham tharana tah dungyan toe awm yoeyah hawn seh! Amen. 7 Bueh lah! ahih tah muui dawng kalawng va rum thuk! thlaang boeih lawng a huh ai,amah te cai oen aka thun hue lawngkhaw a huh u ai, Dilai sawkah thlaang boeih lawng rungrap u ai. Te tila awm roe hawn seh. 8 “Kai tah lamhacuek, oen hukhuengkoek ni tila aka awm lii,aka awm coeng poen tih aka awm poe ham koei Thara koek Bawipa Pathen lawng a thui. 9 Kai tah nangmi kah maya Johan ni. Jesuh kah hubang la ka awm van angla a Ram khuiah aka awm hue kah patang khangna aka ming haih na puei na paw van ni. Pathen kah awl oen awltak, Jesuh lawng a phawng te ka thui dawngah Kai he Patmos tuisanglak ah n'khueh. 10 Bawipa Hin ah Muithla lawng ka sawah n'tlaak thil tih pengsara awl angla angaihhlangla aka riing awl te ka hu ben ah ka yaak. 11 Te awl lawng, “Na huh thli he ca oen thut lang na thut cabu te he kah khawpui pasarih Efesa, Samarna, Perkamum, Tiatira, Sardis, Filadelfia oen Laudisia ah aka awm Khrihcabu hue tengah pat peh, "tila a thui. 12 Te tila awl aka thui te huh hamla ket ka maang tih ka bueh vengah sui haivangna pasarih ka huh. 13 Te haivangna pasarih laklaw ah thlaanghing oen aka lo u pakhat pai, a khowsai toe aka pha baidung te a bai tih a raang dawngah sui cihin oen yeen u. 14 Ahih kah sam tah tuumul angla rawsawng angla bawk tih a mik tah hai angla alh; 15 a khow rawi tah hai dawng a thloei ruhum tuicii, a thuut heet angla thlupthlup pang tih a awl tah liksaituitlaak tuenn awl angla riing. 16 Ahih lawng a bantang kut ah aisi pasarih a pawm tih a kaa dawng kalawng voeivaang aka hatt samsen va thoeng. A mik-hai tah hingthun khawmik angla aang. 17 Ahih te ka huh vengah thlaangduek angla a khowkung ah ka tlim. A bantang kut te ka sawah a tloeng tih, “Rih boel! Kai tah lamhacuek oen hukhuengkoek la ka awm: 18 Kai tah aka hing ni!Kai tah ka duek, tede tahe ah kai tah dungyan toe yoeyahla ka hing poen. Kai lawng duekna oen thlaangduek khaaw celkhui sawah ukna aana ka khueh. 19 Tedawngah nang lawng na huh thaihu boeih tahe ah aka awmlii thaihu thli oen hai ben ah aka thoeng ham koei thaihu thli pahih bok la thut lah. 20 Ka bantang kut dawngah na huh aisi pasarih oen sui haivangna pasarih kah thuingaihna awlhuep tah he tila awm: aisi pasarih hue he tah Khrihcabu thli pasarih kah vanthlaang tih haivangna pasarih tah Khrihcabu pasarih ni.
1 “Efesa khaaw, Khrihcabu tengah he tila thut lah: A bantang kut ah aisi pasarih aka pawm tih sui haivangna pasarih tim ah aka yingyawi kah awl te tah he tila ni. 2 Kai lawng na sai boeih te ka ming; Metila thatlawh boep la bii na bi tih kawdaw oen na awm te khaw ka ming. Nangmi lawng thlaangthe sawah Khawdawp na ngaai thai nawh te ka ming tih celtuih la awm nawh de celtuih la ka awm aka ti te na noek na dak u tih, thlaangthaipalat ni tila na huh u te ka ming. 3 Nang tah na kaw daw,kai kawngah nang lawng patang na khang te na kaw boet nawh. 4 Tede ka kaw a lawna nawh pakhat awm:nang lawngah acuekca kah nan lungna angla tahe ah nan lungna tlaih nawh poen. 5 Metihtlukla adangla na tlaak thuk te poek lah!Na thawlhna te yut u lang acuekca kah na sai angla te sai lah. Nangmi lawng na thawlhna te na yut u nawh atah Nangmi tengla ka law vetih nangmi kah haivangna te huen tloe la kavan pawng poen ai. 6 Tede koeh ham pakhat tah awm:Nikolas hubang hue lawng a sai u te kai lawng ka thina van angla nangmi lawngkhaw na thina u van. 7 “Tedawngah yaakna haa aka khueh lawngtah Muithla lawng Khrihcabu hue tengah a thui he ya hawn seh! “Taakung la aka awm thli tah Pathen dum khuikah hingna thingthaih te caak thaina nawl ka peek ai” ti. 8 “Smarna khaaw Khrihcabu kah vanthlaang tengah he tila thut lah: “Lamhacuek oen hukhueng koek la aka awm; duek tih aka tho koep kah awl uen tah he tila awm. 9 Patang raina na tawng te ka ming;na khawdeng te khaw ka ming, tede nang tah kuirang tangtang! Judah thlaang nawh de, Judah thlaang la ka awm aka ti hue lawng na thaang a the sak u te ka ming; Ahimi tah Seitan kah thlaang ni! 10 Nang lawng patang khang ham koei me ang khaw rih boel. Hutung lah! Seitan lawng nangmi noekdakna ham thlaangvaang te thong ah a thlaak ai; nangmi kah patang khangna te hin ha khuiah boet ai. Duek toela kai ham uep-awm la awm lah; taana kutdo la hingna kan pe ai. 11 “Yaakna haa aka khueh lawng atah Muithla lawngah Khrihcabu thli tengah a thui awl he ya hawn seh! “Taakung la aka awm thli tah voeihih duekna kalawng loeih poen ai,” ti. 12 Perkamum khaaw Khrihcabu kah vanthlaang tengah he tila thut lah: “He awl tah voei vang aka hatt samsen khuehkung kah awl ni. 13 Ame huen ah na awm tite ka ming; Seitan lawng a bawi ngawlhcoen a khuehna huen ni. Ka sawah uep-awm la na awm dawngah kai hamla uep-awm sausi la aka awm Antipas te Seitan a awmna huen ah a ngawn u vengah pateng kai nan oengna te na hoett nawh. 14 Tede na sawah ka kaw a lawna nawh thaihu ayawlca awm: te tah nangmi tim ah Balaam kah cangpueina aka vai thlaang khatsut awm; Israel thlaangphun te thawlhna khuila mawt ham kutsai-muei thawthuengna caak awkk te caak ham hutaa tawngpa thawlhna oen ah thawlh hamla Balaam lawngah Balak te a cang puei. 15 Tetih van angla Nikolas kah cangpueina aka vai thlaang khatsut nangmi tim ah awm. 16 Tedawngah tahe ah thawlhna yut u loeih! Thawlhna na yut u nawh atah nang tengah ka law yue vetih te thlaang hue te ka kaa khui kalawng aka thoeng samsen oen ka tloek ai. 17 “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh! “Taakung la aka awm thli tah thuh elh la aka awm manna takawi te ka peek ai. Ahimi boeih te lungto abawk pakhat ah rip ka peek ai, te dawngkah a thut miing athaai te a-u lawngkhaw thuingaihna ming nawh vetih te lungto aka dang hue bueng lawng ni a ming ai. 18 Tiatira khaaw Khrihcabu kah van-thlaang tengah he tila thut lah! “Pathen Capa, a mik rawi hai angla alh tih a khow rawi tah ruhum thuut heet angla thlup aka pha kah awl uen tah he tila awm. 19 Kai lawng na sai boeih te ka ming. Lungna na khueh te ka ming. Acuek vengkah lak ah atlawh ngaaila tahe ah na bi te khaw ka ming. 20 Tede na sawah ka kaw a lawna nawh tah he ni:amah oen amah Pathen kah celtuih la ka awm aka ti hutaa Jezebel te nang lawng na thlahphaam sut te ni. Ahih lawng a cangpueina rang oen ka thlaang thli te hutaa tawngpa thawlhna oen kutsaimuei thli thawthuengna caak awkk te caak hamla a mawt thawlh. 21 A thawlhna yut ham atue ka peek, tede ahih lawngah hutaa tawngpa thawlhna kalawng thawlh yut ham ngaih nawh. 22 Tedawngah ahih te ihkhun dawngah ka voeih sut vetih te ah te ahih oen samphaih haih thlaang thli te anat ngaaila patang a khang ai. Ahimi lawngah te hutaa oen athe thaihu a sai te a yut u nawh atah tahe roe ah patang ka khang sak ai. 23 Ahih kah a hubang hue te khaw ka ngawn boeih vetih tevengah kai tah thlaang boeih kah poekna oen kawngaihna mingkung tila Khrihcabu boeih lawng a ming ai. Nangmi pakhat rip he na saina taring ah kan thung ai. 24 “Tede Tiatira khaaw kah thlaang-tloe hue lawngtah athe cangpueina te na vai u nawh tih thlaangtloe hue lawngah Seitan kah awlhuep dung a ti u te khaw na cang u nawh. Nangmi te atloe thalrih khatca khaw phueih sak ham ka ngaih nawh. 25 Tede na khueh u tangte te kai ka law toe acakla phoeih uh. 26 Taakung la aka awm thlaang oen ka kaw ngaihna aboet toe aka sai thlaang tah a Pa teng kah ka dang saithaina aana te ka peek van ai, thlaangphun tloe sawah thiicungpoelh oen uk ham oen ah ahimi te dilai am angla adiik anuui la de ham ah ukna aana te khaw ka peek ai. Aisi tumpa khaw ahimi te ka peek ai. 29 “Yaakna haa aka khueh lawngtah Khrihcabu tengah Muithla lawng a thui awl te ya hawn seh.” a tina.
1 Sardis khaaw Khrihcabu kah van-thlaang tengah he tila thut lah: “Pathen kah Muithla pasarih oen aisi pasarih khuehkung kah awl tah he tila awm. Nang lawng na sai te ka ming;nang tah aka hing angla na thaang theen, tede nang tah na duek tite ka ming! 2 Tedawngah hinghang langtah na khueh hun thaihu thli te a duek boeih taktak thlan ah na tha thlue sak koep uh. Nang lawng na sai thaihu te ka Pathen haiah soep thlan hun tite ka ming. 3 Tedawngah nang n'cang puei tangte thli oen na yaak tangte thli te hilh boel;te thli te vai langtah na thawlhna yut loeih. Nang lawng na hinghang nawh atah thlaanghuuen angla na teng ka law vetih ka lawna atue pateng na ming manawh. 4 Tede Sardis khaaw ah aka awm thlaang ayawl lawngtah na himbai te aciimcala na khueh u hun. Himbai bawk bai oen kai oen ah n'yingyawi haih u ai. 5 Taakung la aka awm hue lawngtah he ang himbai bawk a bai u vetih ka thlaang ni ka tina ai. 6 “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh! 7 “Filadelfia khaaw Khrihcabu kah vanthlaang tengah he tila thut lah: “He awl he tah aka ciim tih ataktang la aka awm tengkah awl ni. Ahih tah Devid kah caabi tukung la awm tih,ahih lawng thawhka a awng veng atah a-u lawngkhaw khai khoep thai nawh vetih ahih lawng thawhka a khaih khoep atah,a-u lawngkhaw awng thai manawh. 8 Nang lawng na sai te ka ming;nang lawng tha-awm tharana yoehca ni na khueh de kai lawng kan cang puei te na vai tih uep-awm la kai ham na awm te kan ming. Na haiah thawhka pakhat kavan awng poen, te tah a-u lawngkhaw khai khoep thai manawh. 9 Hutung lah! Judah thlaang la ka awm ti u tih Judah thlaang tak nawh hoem thui hue te tah Seitan kah thlaang thli te nangmi haiah kavan law sak vetih na khow kungah ka buekuep sak ai. Nang kan lungna te ahimi boeih lawng a ming ai. 10 Thinsan kawdaw oen ueh hamla awl kan peek te na vai u dawngah, dilai sawkah thlaang boeih noekdakna hamla dilai dawngah aka law ham koei patang raina atue ah kan loeih sak ai. 11 Kai tah ka law yue ai. Nang kah taana kutdo te a-u lawngkhaw avan rot nawh ham na khueh thaihu te atheenla kuemkawl uh. 12 Taakung la aka awm tah ka Pathen kah tempal bok-im tuung la ka liing vetih ahih lawng tempal bok-im te metuek vengah khaw thoeih taak manawh. Vaan kah ka Pathen teng kalawng aka law, Jerusalem thaai ka Pathen kah khawpui miing thaai oen ah ka Pathen kah a miing te ahih pum dawngah ka thut ai. Ahih pum dawngah ka miing a thai te khaw ka thut baal ai. 13 “Yaakna haa aka khueh lawngtah Khrihcabu thli tengah Muithla lawng a thui he ya hawn seh! 14 “Laudisia khaaw Khrihcabu kah vanthlaang tengah he tila thut lah: “Pathen lawng a suen thaihu boeih kah akungcuek la aka awm tih uep-awm oen ah ataktang sausi la aka awm Amen teng kah awl uenna tah he tila awm. 15 Nang lawng na sai boeih te ka ming;Nang tah ading khaw na ding nge nawh tih aling khaw na ling nge nawh te kan ming. Nang he ading tihnawhtah aling pakhat khat la na awm ham ka ngaih! 16 Tede nang tah aling khaw na ling nge nawh,ading khaw na ding nge nawh tih pawl-oep la na awm dawngah nang tah ka kaa khui kalawng kan tha poen ai! 17 Nang lawngah, “Kai tah ka bawi ka len tih ka voetna awm nawh; ka ngoe boeih te ka khueh’, na ti. Tede nang tah metihtlukla na khawdeng tih reen kap la na awm te na ming nawh! Nang tah na khawdeng, atliing ayaal la na awm tih na mik pum de lah koen. 18 Tedawngah bawilen kuirang taktang la na awmna ham kai teng kah sui tuiciil te lai hamla poekna theen kan peek. Atliing ayaal yaraula na awm te khukdahna ham oen ah na buen ham khaw, na mik a tuengna ham miksii te khaw lai baal. 19 Kai lawngtah ka lungna thlaang boeih te ka toel ka thaam tih dan ka tat. Tedawngah na tha thlue sak lang na thawlhna yut lah. 20 Hutung lah! Thawhka ah ka pai tih ka khooek; a-u lawngkhaw ka awl a yaak tih thawh a awng atah, a im khuila ka kuun vetih ahih oen buh ka caak haih vetih ahih khaw kai oen ah buh a caak haih van ai. 21 Kai tah taakung la ka awm tih tahe ah a Pa kah a bawingawlhcoen tengah ka ngawlh van angla, taakung la aka awm thli te ka bawingawlhcoen sawah kai oen haih ngawlhna nawl te ka peek ai. 22 “Yaakna haa aka khueh lawngtah Khrihcabu thli tengah Muithla lawng a thui awl he ya hawn seh!”
1 He coengah atloe huhthlaam ka huh tih vaan ah thawhka aka awng u pakhat te ka huh. Acuek vengkah ka yaak tih awl akavan thui pengsara awl tuen angla aka riing awl lawngah, “He la he law hang lah, he coengah aka thoeng ham koei te kan huh sak ai.” tila a thui. 2 Kawlkalh ah Muithla lawng pahoei ng'awm puei tih vaan ah bawi ngawlhcoen pakhat awm, te ngawlhcoen dawngah thlaang pakhat ngawl. 3 Ahih kah mik-hai tah lungto phutlo jaspa oen karnelian angla aang tih bawi-ngawlhcoen tengvaai ah te emaral lungto araawng angla aka awm malpacung te awm. 4 Te kah bawingawlhcoen te atloe bawi ngawlhcoen pakul palii lawng a veel, te kah bawingawlhcoen dawngah himbai bawk a bai tih suilumuek aka muek ahaamca pakul palii ngawl u. 5 Bawi-ngawlhcoen dawng kalawng khaw thlappha tih khawhumm awl oen rekk tlaak awl va thoeng. Bawingawlhcoen haiah haithoei pasarih aka vang te awm tih te haithoei tah Pathen Muithla pasa-rih ni. 6 Bawingawlhcoen haiah tuikhal angla ciil tih thlalang tuilii oen aka lo u te awm. Te kah bawingawlhcoen a teng avai ah ramsa hing palii lawng a veel khoep tih te ramsa hing tah a hu a haiah a mik hooeng la awm. 7 Ramsa hing lamhacuek pakhatna te tah sathueng oen lo u, apahihna tah vaitaw oen lo u tih a pathumna te tah thlaanghing mik-hai oen aka lo u mik-hai a khueh tih apaliina te tah aka sawng lii tuhuum oen lo u. 8 Ramsa hing palii boeih lawngah phe paruk rip a khueh u tih akhui oen adau ah mik hooeng la betoet. Ahimi lawngah yiin oen daai toeng tlaih ohla: “Aciim, aciim, aciim tah Bawilen koek Bawipa Pathen ni, Ahih tah aka awm poen, aka awm lii oen aka awm poe ham koei ni,” tila laa a sak u. 9 Ramsa hing palii lawng bawingawlhcoen dawngah aka ngawl tih dungyan dungyan toe aka hing te ruep-awmna, hinyahna oen awmngaihna oen ah a thangpawm u. 10 Te tila a thangpawm u vengah ahaamca pakul palii lawng bawingawlhcoen dawngah aka ngawl haih te buekuep u tih dungyan dungyan toe aka hing te a bok u. A suilumuek thli te bawi-ngawlhcoen haiah a tloeng u tih, 11 “Kaimi kah Bawipa oen Pathen! Nang lawngah ruep-awmna, hinyahna oen huham tharana te dang hamla tuueng ta-ngak, Metihtiah soeprep thaihu he nang lawng na sai tih na kawngaih angla, te thli te na awm sak tih na hing sak,” tila a thui u.
1 Bawingawlhcoen dawngah aka ngawl lawng a bantang kut ah cayaawl pakhat a pawm te ka huh. Te cayaawl tah khatben khatbang ah ca a thut boeih tih tacik pasarih oen a heen. 2 Tecoengah tha aka ra tangkiik vanthlaang pakhat ka huh tih te vanthlaang lawng, “A-u nuem he thawhcang heen aka phe tih cayaawl thlam ham aka tuueng?” tila angaihhlangla a paang awl te ka yaak. 3 Tede te cayaawl te thlam tih akhuiben bueh ham koei vaan ah khaw, dilai dawngkhaw, dilai dangah khaw a-u khatca khaw awm nawh, 4 Te cayaawl te aka thlam ham oen akhuiben aka bueh ham khatca khaw a huh u nawh dawngah thloekthloek ka rap. 5 Tevengah ahaamca pakhat lawng, “Rap boel, Bueh lah! Judah phun khuikah Sathueng, Devid cadil aka lenduet lawngah taana a khueh poen tih thawhcang pasarih te a phe thai tih cayaawl te a thlam thai.” tila avan thui. 6 Tecoengah tuuca pakhat bawingawlhcoen alungkir ah pai tih ramsa hing palii oen ahaamca thli lawng a veel khoep te ka huh. Te tuuca tah ngawn tangte angla awm. Te tuuca lawng ki pasarih oen mik pasarih a khueh tih; te mik pasarih tah dilai pum ah tuih la aka awm Pathen Muithla pasarih te ni. 7 Tuuca lawng cet tih bawingawlhcoen dawng aka ngawl kah bantang ben kut ah a pawm cayaawl te a lawh. 8 Te tila a lawh vengah te ramsa hing palii hue oen ahaamca hue pakul palii tah tuuca haiah buekuep u. Pakhat rip lawngah tingtoeng pakhat rip a khueh u tih riimtuui oen ah aka bepir sui boengloeng pakhat rip a pawm u, te riimtuui tah Pathen thlaang thli kah thangthuina ni. 9 Ahimi lawng, “Nang tah cayaawl te lawh ham oen tacik te phe tih thlam hamla na tuueng roe. Metihtiah n'ngawn u tih nang kah Luciik duekna oen thlaangphun soeprep, awlcawm awlcee, ram tawm oen namtawm te Pathen ham na lai poen. 10 Nang lawng ahimi te mami kah Pathen bii aka bi ham khawsoeih la khaw sengpahrang la khaw na sai poen dawngah ahimi lawng dilai he a uk u poen ai,” tila laa thaai te a sak u. 11 Tecoeng ka bueh koep vengah vanthlaang toeklek toekna nawh kah awl te ka yaak! Ahimi lawngah bawingawlhcoen te khaw, ramsa hing palii oen ah ahaamca hue te a veel tih pai u, 12 angaihhlangla laa a sak u tih: “A ngawn u Tuuca lawngah Huham tharana oen kuirangna, Cuihna oen tharana, hinyahna oen ruep-awmna oen ah thangpawmna tah dang hamla tuueng ta-ngak,” ti u. 13 Tecoengah vaan ah aka awm boeih oen dilai dawngah khaw, dilai dangkah aka awm boeih, tuitunlii ah aka awm boeih oen Khawhipuempa kah aka hing boeih lawng: “Bawingawlhcoen dawngah aka ngawl tuuca tengah thaangtheenna oen hinyahna, ruep-awmna oen tharana tah yoeyahla dungyan toe awm hawn seh,” tila laa a sak te ka yaak. 14 Ramsa hing palii hue lawngah te, “Amen!” tila a thui u tih ahaamca hue lawng buekuep u tih a bok u.
1 Tecoengah tuuca lawng tacik deng pasarih khuikah lamhacuek tacik deng a awng te ka huh tih ramsa hing palii khuikah pakhat lawng khawhumm awl angla aka humm awl oen “Law lah” a ti awl te ka yaak. 2 Ka bueh vengah marang bawk pakhat ka huh. Te marang aka cit lawngah li pakhat a pawm, ahih te bawilumuek pakhat a peek u. Taakung la aka awm lawng taa hamla aka cet angla te cet. 3 Tecoengah tuuca lawng tacik deng pahihna te a awng tih ramsa hing pahihna lawng, “Law lah” a ti awl te ka yaak. 4 Tecoengah atloe marang seen pakhat va thoeng. Marang aka cit tengah te thlaanghing pakhat oen khat ngawn u the ham, dilai ah raal thawh sakna aana te khaw a peek. Ahih te samsen bo hlang a peek. 5 Tuuca lawngah tacik deng pathumna te a awng vengah ramsa hing pathumna lawng, “Law lah” a ti awl te ka yaak. Ka bueh vengah marang muuem pakhat ka huh. Marang aka cit lawng te a kut dawngah cawi a pawm. 6 Ramsahing palii tim kalawng awl aka thoeng pakhat ka yaak tih, “Hin at kah thapang phu ah sangvut tah suum at, balii tah suum thum peek la awm. Tede olif thingkung oen misur dum thli tah phe boel ti. 7 Tecoengah Tuuca lawng tacik deng apaliina te a phe tih a awng, ramsa hing apaliina lawng, “Law lah” a ti awl te ka yaak. 8 Ka bueh vengah marang pawlvawkk pakhat te ka huh. Te marang aka cit te Duekna a miingna tih a hu ah Hell lawng a vai tawkkhak. Ahimi te dilai thloep lii ah thloep at te raalpui oen khaw, khawkha oen khaw, tlawhnatna oen khaw, ngawn hamla ukna aana a peek. 9 Tecoengah Tuuca lawng apa-ngaana tacik deng te a awng. Pathen awl a phawng u tih uep-awm sausi la a awm dawngah a ngawn u thlaang thli kah Muithla thli te bokna-thaang huiah ka huh. 10 Ahimi lawng angaihhlangla pang u tih, “Aka ciim tih aka doeng Thara koek Bawipa! Kaimi aka ngawn dilai thlaang thli he awlcek nawh tih dan tat ohla metuek toe nuem na awm hun ai” ti u. 11 Ahimi te baidung bawk pakhat rip a peek tih, ahimi angla ngawn ham aka awm biibipuei thli oen maya manau thli asoep thlantoe kawlkalh ah duem hamla a thui pe u. 12 Tecoengah Tuuca lawng tacik deng parukna te a awng te ka huh. Likluei angaih-hlangla hinghuen tih khawmik khaw himbai pawn amuuem angla muuem tih thla khaw apum boeih la thisen angla ling. 13 Thlipui lawng a hinghoek tih thaidut thaih munkang a thing dawngkah a rul angla vaan kah aisi thli khaw dilai la tla. 14 Vaan khaw cayaawl angla yaawl u tih ha-ata boeih oen tuisanglak boeih khaw a awmna huen kalawng thoeih boeih u. 15 Tecoengah dilai han sengpahrang boeih ukkung thli boeih oen raalbawi boeih, kuirang thlaanglen thli oen huham tharana boeih oen ah thlaangtloe boeih, saltamnaa oen thlaangcuem boeih lawngah tlaang kah lungnu thlip oen lungkaw khuiah thuh u boeih. 16 Ahimi lawngah tlaang oen lungnu nala te “kaimi he n'naam langtah bawingawlhcoen dawng aka ngawl kah mik huh oen Tuuca kah thinsana kalawng ng'thlip u lah! 17 Ahimi kah thinsana rih awm khawhin tah avan pha poen, a-u lawng a ueh thai ai?” tila paang u.
1 Tecoengah dilai akil palii ah aka pai vanthlaang palii te ka huh. Ahimi lawng dilai saw oen tuitunlii ah khaw, thingkung thlii dawngah khaw, khaw-athli nawh ham dilai a kil palii kah yilh te khak a tuuk u. 2 Tecoeng ah aka hing Pathen kah tacik deng aka pawm vanthlaang pakhat lawng khawcuuk ben kalawng a law hang te ka huh. Ahih lawng dilai oen tuitunlii sawah patang khang sak thaina aka khueh vanthlaang palii hue te angaihhlangla paang tih a khue. 3 Te kah vanthlaang lawng, “Ka Pathen kah tuihyoeihthlaang thli kah a tal ah thawhcang ka heen thlan ah nangmi lawng dilai oen tuitunlii oen ah thingkung thli sawah raina pha sak u boel de,” tila a thui. 4 Tecoengah Pathen kah thawhcang oen a heen thlaangmi tah thong yakhat coeng thong sawmlii coengah thong lii a awm te avan thui. Te thli tah Israel thlaangphun paha thlaihih khuikah tih, 5 Judah phun, Riubin phun, Kad phun, Asher phun, Naptali phun, Manasseh phun, Simeon phun, Levi phun, Issakar phun, Zebulun phun, Josep phun, oen Benjamin phun, ni. Phun khat dawngkah thlaang thongha thlaihih te thawhcang heen la awm. 9 Tecoeng atah ka bueh vengah a-u lawngkhaw a toek lek nawh thlaangping te ka huh. Ahimi tah awlcawm awlcee aka thui nam tawm oen phun soeprep peng tawm ram tawm kah aka law boeih tih Ahimi lawng himbai bawk bai oen samtoe a pawm u tih bawingawlhcoen oen Tuuca haiah pai u. 10 Ahimi lawng, “Thlawnna tah bawingawlh-coen dawng aka ngawl Pathen oen Tuuca teng kalawng ni a law” tila paang u. 11 Vanthlaang boeih lawng bawingawlhcoen oen ahaamca hue oen ah ramsahing palii te a veel khoep tih pai u. Tecoengah bawingawlhcoen haiah buekuep u tih Pathen te a bok u tih, 12 “Amen! Thaangtheenna, ruep-awmna, cuihna, awmngaihkoehna, hinyahna, huham tharana oen tha-awmna tah Pathen kah koeva la dungyan dungyan toe awm hawn seh! Amen!” tila a thui u. 13 Ahaamca thli tim kah pakhat lawngah, “Himbai bawk aka bai hue he a-u hue kai? ahimi he ame kalawng a law u?” tila kai te n'doet. 14 Kai lawng, “Ka ming nawh, Bawipa, Nang lawng ni na ming,” ka tina. Ahih lawngah, “He kah thlaang hue he tah mueirihtamyiin heemtekna kalawng aka loeih thli ni, Ahimi lawng Tuuca thisen oen a himbai te a suk u tih aciim sak u poen. 15 Tedawngah ahimi lawng Pathen kah bawingawlhcoen haiah pai u tih yiin oen daai tempal bok-im ah bii te a bi pe u. Bawingawlhcoen dawng aka ngawl lawngah ahimi te a awm puei vetih a thlip adah poen ai. 16 Ahimi lawngtah buhpawng tuihalh khaw ming koep u tlaih manawh; ahimi te khawling lawngkhaw kaang nawh vetih aling a-alh lawngkhaw daw yet tlaih manawh. 17 Metihtiah bawingawlhcoen alungkir ah aka awm Tuuca te tah ahimi doenkung tuudoen la awm vetih hingna tuibaap la te a ceh puei ai. Pathen lawngah ahimi kah mikphitui boeih te a huih pe poen ai,” tila avan thui.
1 Tuuca lawng tacik deng pasa-rihna te a awng vengah vaan ah khawnoek tentan yunyan dipsiditla awm. 2 Tecoengah Pathen haiah aka pai vanthlaang pasarih te ka huh tih pengsara pasarih te a peek u. 3 Atloe vanthlaang pakhat riimtuui huihthlutna pakhat aka pawm te law tih bokna-thaang tengah te pai. Bawingawlhcoen haiah aka awm sui oen a sai bokna-thaang dawngah Pathen thlaang boeih kah thangthuina oen nawn haih ham riimtuui yahawh hlang ahih te a peek. 4 Huihthlutna haikhu tah Pathen haiah aka pai vanthlaang kut dawng kalawng Pathen thlaang thli kah thangthuina oen ah asawla luui haih. 5 Tecoengah vanthlaang lawngah riimtuui beeldung te a lawh tih bokna-thaang dawngkah haialh te akhuila a sang coengah dilai la a voeih. Khaw humm tih rekk tla, khaw thlappha tih likluei hinghuen. 6 Tecoengah vanthlaang pasarih lawng pengsara pasarih tum hamla kamthlah u. 7 Lamhacuek vanthlaang lawng pengsara te a tum vengah thisen oen aka thoekk u hai oen reel te dilai la tla. Dilai thloep thum ah thloep at, thingkung thloep thum ah thloep at oen ramtliim khaw ung boeih. 8 Vanthlaang pahihna lawng pengsara te a tum vengah tlaang angla aka bo thaihu pakhat te tih hai angla aka alh te tuitunlii khuila tla. Tuitunlii thloep thum ah thloep at te thisen la coengg boeih tih, 9 tuitunlii khuiah aka hing boeih thloep thum ah thloep at te duek boeih tih tuisangphaw thloep thum ah thloep at te rawk boeih. 10 Tecoengah vanthlaang pathumna lawng pengsara a tum vengah haithoei hairawng angla aka alh aisi pakhat vaan kalawng tuiva oen sawkca thloep thum thloep at dawngah tla. 11 (Te aisi tah “Khahiik” a miingna) Tui thloep thum ah thloep at tah tuikha la coeng boeih tih, te tila khahiik aih dawngah tui aka aw thlaang boehoengla duek. 12 Tecoengah vanthlaang apaliina lawng pengsara a tum vengah khawmik thloep thum ah thloep at tah see tlaih nawh tih thla khaw thloep thum ah thloep at, aisi thloep thum ah thloep at vaang tlaih nawh. A aangna thloep thum ah thloep at auh boeih. Yiin thloep thum ah thloep at, daai thloep thum ah thloep at ah aangna te awm tlaih nawh. 13 Tecoeng ka bueh vengah vaan asanghlang khawhi ah aka sawng tuhuum pakhat lawng angaihhlangla, “khawmap! khawmap! vanthlaang atloe pathum hue lawng pengsara a tum veng atah dilai thlaang boeih hamla metihtlukla khaw amap ai” tila a paang awl te ka yaak.
1 Tecoengah vanthlaang pa-ngaana lawng pengsara a tum vengah vaan kalawng dilai la aisi pakhat a tlaak thuk te ka huh, te kah aisi tengah aka boet nawh ungrawmdung awngna caabi te a peek. 2 Ungrawmdung te aisi lawng a awng vengah haikhu te vahhai haikhu angla thoeng hang. Te haikhu lawng khawmik oen yilh te a yiin sak khoep. 3 Te kah haikhu khui kalawng khaurang thli va thoeng tih dilai la rum thuk, te kah khaurang thli te celkhui ta-ai angla tharana te a peek. 4 Te kah khaurang thli te dilai han kah ramtliim khaw thingkung rawkung oen atloe thingkung khaw, phe ham awl pe nawh tih a tal ah Pathen kah tacik deng aka awm nawh thlaang thli bueng ni te thli lawng a phe thai ai. 5 thlaang thli he ngawn hamla tah khaurang thli te awl pe nawh. Tede thla ngaa khuiah ngan bawh tah a peek vetih celkhui ta-ai kah atah tlawh angla tlo ai. 6 Te kah thla ngaa khuiah thlaang thli lawng duekna te a tlap u ai, tede duekna te dang u manawh; duek ham a ngaih u suide ahimi te duekna lawng a reel ai. 7 Te khaurang thli tah raal kah ham, kamthlah oepsoeh marang oen lo u; te thli tah a luu dawngah suilumuek oen aka lo u te a muek tih a mik-hai thli tah thlaanghing mik-hai angla awm. 8 Te thli kah a sam tah hutaa kah sam oen lo u tih a naw thli tah sathueng naw oen lo u. 9 A raang dawngah thii-rangphaw oen aka lo u te a daan tih a phe humm awl tah raaltukna ah aka cet marang-lengg thli kah tuenpau awl oen lo u. 10 Te kah khaurang thli lawng celkhui ta-ai kah a mai angla aka sum pikyik te a khueh tih thla ngaa khuiah thlaang nganbawh yaak sak thaina a sue awm. 11 Ahimi lawng ukkung sengpahrang a khueh u tih te ukkung tah boet nawh ungrawmdung ukkung vanthlaang te ni. A miing tah Hebru awl la Abaddon a miingna tih Krik awl la tah Apollion a miingna. (thui ngaihna tah “phekung” tina ni.) 12 Lamhacuek kah mueirihtamyiin pakhatna tah boeih poen; He coengah mueirihtamyiin pahihna law hun ai. 13 Tecoengah aparukna vanthlaang lawng pengsara te a tum vengah Pathen haiah aka awm sui oen a sai bokna-thaang kah akil palii kalawng awl pakhat aka law te ka yaak. 14 Te awl lawngah pengsara aka tum vanthlaang aparukna te, “Yufratis tuivapui ah a khawh mangkhak vanthlaang palii hue te thlah loeih,” a tina. 15 Vanthlaang palii hue te a thlah u. Ahimi te he kum, he thla, he khawhin kah atue atang roe ah dilaipum kah thlaangmi thloep thum ah thloep at te ngawn hamla aka awm oepsoeh thlaang hue poen ni. 16 Marang aka cit raalkap tah apum boeih la millian yahnih awm tila avan thui. 17 Huhthlaam ka huhna dawngah marang thli oen marang aka cit thli lawng hai angla a lingduuk, safaiar lungto phutlo khawcil angla a hiing, kat angla engpawn la aka awm rangphaw a khueh u te ka huh. Marang luu thli tah sathueng luu oen ah lo u tih te thli kah a kaa khui kalawng hairawng, haikhu oen kat haialh va thoeng. 18 Marang thli kah kaa khui kalawng aka thoeng hai, haikhu oen kat haialh tlawhtahaw pathum lawngah thlaanghing thloep thum ah thloep at te a ngawn boeih. 19 Marang thli kah huham tharana tah a kaa oen a mai dawngah awm. A mai thli tah ruul angla a luu awm tih te a mai te thlaang nganbawh peekna ham a hawna. 20 He kah tlawhtahaw ah aka duek nawh tih aka deem thlaang hue lawngah amami kah sai cawplap thaihu te hoett u nawh. Ahimi lawng raaithe a bok te khaw toeng nawh tih mik aka tueng nawh, haa aka pang, aka tatvuet thai nawh sui, ngun, ruhum, lungto, thing oen a sai kutsaimuei a bok te khaw toeng u nawh. 21 Ahimi lawngah thlaang ngawnna, mu-uih caakna, hutaa tawngpa thawlhna oen huencaanna te khaw yut u nawh.
1 Tecoengah tha aka ra vanthlaang atloe pakhat vaan kalawng a rum thuk te ka huh. Ahih lawngah muui oen yaawl u tih a luu te malpacung oen a yeen; A mik-hai tah khawmik oen lo u tih a khow rawi tah aka alh hai tuung angla awm. 2 A kut dawngah cayaawl ayiit pakhat a dai phak tih a pawm. A bantang khow oen tuitunlii te a caawt tih a voei khow oen dilai te a caawt, 3 Sathueng kaawk awl angla angaihhlangla te paang. Te tila a paang coengah khawhumm awl pasarih lawng avan roei. 4 Khawhumm pasarih kah awlthui te thut hamla ka kamthlah vengah vaan kah awl lawngah “khawhumm pasarih kah awl te awlhuep la khueh, thut boel de!” a ti te ka yaak. 5 Tecoengah tuitunlii oen dilai dawngah aka pai vanthlaang ka huh te lawngah a bantang kut te vaan benla a phawh tih, dungyan, dungyan toe aka hing tih vaan, dilai oen tuitunlii oen ah soeprep thaihu saikung, 6 Pathen miing oen ah awlkamna a sai. Vanthlaang lawngah, “Diw aih tlaih manawh! 7 Pathen lawng amah kah tuihyoeih tawngha hue tengah a thuisut angla Vanthlaang pasarih lawng pengsara a tum vengah a kamthlahna awlhuep te soep badai” tila a thui. 8 Tecoengah vaan kah awl ka yaak pakhat lawngah avan thui koep baal tih “Cet langtah dilai oen tuitunlii sawah aka pai vanthlaang kut dawngkah cayaawl a dai phak te lo lah” n'tina. 9 Vanthlaang tengla te ka cet tih, cayaawl yiitca te m'peekna ham ka bih. Vanthlaang lawng, “lo langtah ca lah; na bung khui atah khahiik vetih na kaa dawng tah khawitui angla didip ai” ti. 10 A kut dawngkah cayaawl yiitca te ka lawh tih ka caak, ka kaa dawngah khawitui angla didip tih ka bung khui atah khahiik sut. 11 Tecoengah van-thlaang lawng “Pathen lawng peng tawm ram tawm thlaangphun boeihboeih awlcawm awlcee oen ah sengpahrang thli kawng a thui awl te nang lawngah na thui pe koep ham awm,” tila avan thui.
1 Tecoengah tahna cungkui angla aka awm caapu thing pakhat te kai m'peek tih, “Cet lang Pathen kah tempal bok-im oen bokna-thaang te tah lah, tempal bok-im khuiah Pathen aka bok thli te khaw toek lah. 2 Tede tempal bok-im adauben kah talawng te hooep de, tah boel, metihtiah te huen te thlaangphun tloe thli a peek tih, ahimi lawng Aciim Khawpui te thla sawmlii thla hih khui a khow oen a caawt u ai. 3 Kai lawng sausi la thlaang pahih ka tuih ai, ahih rawi lawng tlamhi te a bai hih vetih khawhin thongkhat yahnih sawmruk khui Pathen awl te a phawng hih ai.” tila a thui. 4 Te sausi pahih te tah dilai Bawipa haiah aka pai olif thing pahih oen haiim pahih te ni. 5 A-u lawngkhaw te sausi pahih te nganbawh peek ham aka ngaih tah ahih rawi kah kaa khui kalawng aka thoeng hai oen a raal thli te boeih a ngawn; a-u lawngkhaw te rawi te nganbawh peek ham aka yawm boeih te tah he tila a ngawn boeih ai. 6 Ahih rawi lawngah Pathen awl a phawng vengkah atue atang khuiah khawtlan nawh ham ah vaan te khaihkhoep ham aana a khueh. Ahih rawi lawng sawkca tuiva tui khaw thisen la coengg sak ham aana a khueh; Te rawi lawngah amah ngaih vengah dilai he tlawhtahaw phun soeprep oen tlawh sak ham aana a khueh baal. 7 Te rawi lawng Pathen kah awlthang te a phawng hih coeng atah aka boet nawh ungrawmdung khui kalawng satluung te thoeng hang vetih te rawi te a teek ai. Te rawi te a taa vetih a ngawn ai. 8 ahih rawi kah a rawkk te a bawipa a ngawnna khawpui kah noekna a miing tah Sodom, tih-nawhtah Iyipt tila awm. 9 Ram boeih, thlaangphun boeih, awlcawm awlcee aka cal oen nam tawm lawngah hin thum coeng hin vaang toe ah ahih rawi kah a rawkk te a bueh u vetih up hamla a khang khak u ai. 10 He tawngha pahih lawng thlaanghing sawah patang khangna broela a thoeng sak dawngah, he tawngha pahih a duek dawngah dilai thlaang thli tah awmngaih u ai, pakhat oen khat kutdo pe u the vetih taana poei a sai u ai. 11 Khawhin hin thum coeng hin vaang adiw coengah Pathen tengkah hingna hill law tih te rawi kah a kaw khuiah kuun, te rawi lawng tho tih pai hih. Te rawi te aka hu boeih tah a phuu hluih tho tih caalla a rih u. 12 Tecoengah tawngha rawi lawng, “He la va luui hang!” tila angaihhlangla a tina awl te a yaak hih. A raal thli kah mik huh roe maiah muui dawngah te vaan la luui hang. 13 Teveng tue roe ah te likluei angaihhlangla hinghuen tih khawpui thloep ha ah thloep at tah rawk boeih tih thlaang thongsarih duek. Aka awm hun thlaang thli lawng lakueng u tih vaan ah aka awm Pathen kah alenna te a thangpawm u. 14 Mueirihtamyiin pahihna tah boeih poen; Tede apathumna mueirihtamyiin, te va thoeng yue ai. 15 Tecoengah pasarihna vanthlaang lawng pengsara a tum tih angaihhlangla aka humm vaan kah awl lawng, “Dilai ukna huham tharana tah mami kah Bawipa oen amah kah Messiah tengah tahe ah awm poen tih dungyan toela a uk poen ai!” tila a thui. 16 Tevengah bawingawlhcoen dawngah aka ngawl ahaamca pakul palii hue lawngah buekuep u tih Pathen te a bok u, 17 “Thara koek Bawipa Pathen, Nang tah tahe ah aka awm lii oen aka awm coeng la na awm! Na bawilenna huham thara te na hawna tih uk hamla na tong poen dawngah kan uem tangkiik! 18 Tahe kah atue he tah na thinsa a lawna atue tih thlaangduek thli awlcekna atue la a awm dawngah, Pathen a ka bok nawh thli tah a thinsa tangkiik. Tahe kah atue he tah na tuihyoeih tawngha thli oen na thlaang thli boeih, nang aka hinyah ayiit abo boeih kutdo peekna atue ni. Dilai aka phekung thli phena ham atue tah avan pha poen!” tila a thui. 19 Tevengah vaan ah aka awm Pathen tempal bok-im te awng u tih Tempal bok-im khuikah Awlkam Kong te tueng. Tecoengah khaw thlappha tih rekk tla, khaw humm, likluei hinghuen tih reelnu thoei.
1 Tecoengah vaan dawngah kawpoekrai noekna bohlang pakhat va tueng. Hutaa pakhat lawng khawmik te himbai la a bai, thla te a khow oen a caawt tih aisi paha thlaihih aka awm bawilumuek te a muek. 2 Camoe awm tawm-alel tih ca awm tlawh oen paang. 3 Vaan ah atloe kawpoekrai noekna pakhat va tueng. Ruultluung bohlang alingduuk pakhat, luu pasarih oen ki paha thlaihih a khueh tih a luu dawngah bawilumuek pakhat rip a muek. 4 Ahih lawngah vaan kah aisi thloep thum ah thloep at te a mai oen ah a khawl tih dilai la a voeih. Ruultluung lawngah camoe te a awm atah doelh pahoei hamla a ca awm tawm-alel hutaa haiah te pai. 5 Tecoengah thlaangphun boeih te thii cungpoelh oen uk hamla a capa te hutaa lawng a cuun. Tede camoe te a rot pe tih Pathen oen a bawingawlhcoen tengla a khuen. 6 Te hutaa tah Pathen lawng aroek abah pe sut ramhum huhang la te viil u vik. Te huen ah ahih te khawhin thongkhat yahnih sawmruk khui a cawm acah u. 7 Tecoengah vaan ah raalpui tho. Maikal oen a vanthlaang thli lawng Ruultluung te a teek u tih ruultluung lawngah khaw, ahimi te a vanthlaang thli oen a teek u van; 8 Tede ruultluung tah sung tih amah oen a vanthlaang thli lawng vaan ah awm ham dang u tlaih nawh. 9 Dilai pum thailatnakung Seitan, tihnawhtah Raaibawi aka miingna suenyan kah ruultluung bohlang te a vanthlaang thli oen dilai la avan thlaak haih. 10 Tecoengah vaan ah angaihhlang paang awl te ka yaak tih, “Pathen kah thlawnna tah tahe ah law poen! Pathen lawng sengpahrang angla amah huham tharana te a tueng sak poen! Tahe tah Messiah lawng amah aana te a tueng sak poen! Metihtiah Pathen haiah pai tih yiin, daai ah mami kah maya manau thli thawlh aka peelkung te vaan adaubenla a voeih poen. 11 Mami kah maya manau thli lawng Tuuca kah thisen rang oen amami lawng a thui awltak oen khaw Seitan te a taa poen; ahimi lawng a hingna peek tih duek ham toe a hep u poen. 12 Tedawngah nangmi vaan oen vaan ah aka awm boeih lawng awmngaih u lah! tecakhaw dilai oen tuitunlii hamla tah khawmap tangkiik mah aw! Metihtiah Raaibawi tah nang hih tengla va law thuk tih atue soetca bueng ni a awm tite a ming vengah a thin so sut poen.” tila a thui. 13 Ruultluung lawng, kai he dilai la dawng thuk la ka awm poen tila a ming vengah, a ca tawngpa aka cuun hutaa te a hu ah khek a vai. 14 Te hutaa lawng a awmna ramhum huhang la a sawng thaina ham tuhuum bohlang kah a phe pahih te a peek, ruultluung lawng a teek thai nawh ham te huen ah te kumthum coeng kum vaang doencang la awm. 15 Tecoengah ruultluung lawngah hutaa te tui yawh sak ham a kaa khui kalawng tuiliw te nawl a tha. 16 Tede dilai lawngah a kaa angg tih ruultluung kaa khuikah aka law tuiliw te a doelh boeih tih hutaa te a bawm. 17 Ruultluung tah hutaa sawah te a thin sa soeh tih hutaa kah cadil aka deem hue, Pathen kah awlpeek boeih aka vai oen Jesuh lawng a phawng awltak acakla aka phoeih boeih te teek hamla cet. 18 Ruultluung tah tuitunliikeeng ah te pai.
1 Tecoengah tuitunlii khuikah sa-tluung aka thoeng hang te ka huh. Te satluung lawngah ki paha oen luu pasarih a khueh tih ki pakhat dawngah bawilumuek pakhat rip a muek u tih a luu dawngah Pathen asal aphaamna miing pakhat rip awm. 2 Te satluung tah kaithleng oen lo u, a khow thli tah vawm khow oen lo u tih a kaa tah sathueng kaa oen lo u. Ruultluung lawngah kaithleng te amah kah tharana, a bawingawlhcoen oen aka bo koek ukna aana te a peek. 3 Satluung kah a luu pakhat tah duek puei koei boengha a caak angla awm de a boengha te hoeih koep poen. Dilai thlaang boeih tah a kawpoek rai u tih satluung hu ah bang u. 4 Ruultluung tah amah kah aana te satluung tengah pekung la a awm dawngah thlaang boeih lawng ruultluung te a bok u. Ahimi lawngah, “Satluung oen a-u nuem aka lo u? A-u lawng nuem ahih te a teek thai ai?” ti u tih satluung te khaw a bok u. 5 Te satluung lawng oekthloenna oen Pathen salphaam ham khaw, thla sawmlii coeng thla hih khui aana khueh ham te a dang. 6 Ahih lawngah Pathen oen Pathen miing te khaw, a awmna ahuen amawl oen vaan ah aka awm hue te khaw a tap avoep. 7 Pathen kah thlaang thli te teek ham oen ahimi te taa hamla khaw, thlaangphun boeih, ram tawm boeih, awlcawm awlcee oen namtawm sawah ukna aana te khaw a peek. 8 Dilai a suen thlan ah miing thut la aka awm tih ngawn la aka awm tuuca kah hingna cabu khuiah a miing aka thuum nawh dilai thlaang boeih lawngah satluung te a bok u ai. 9 Yaakna haa aka khueh lawngtah ya hawn seh! 10 A-u khaw sal la khuen ham aka awm te tah a khuen ngaikhoek ai; a-u khaw samsen oen ngawn hamla aka awm te tah a ngawn ngaikhoek ai. He vengah Pathen kah thlaang thli lawng ueh thaina khueh tih uep-awm la awm ham angoe. 11 Tecoengah atloe satluung dilai khui kalawng a thoeng hang te ka huh. Te lawngtah tuu ki oen aka lo u ki pahih a khueh tih ruultluung angla awl a thui. 12 Ahih lawng lamhacuek satluung kah ukna aana boeih te amah hai roe ah te a hawna. Duek puei koei boengha a caak tih aka hoeih koep lamhacuek kah satluung te amangkhakla dilai thlaang thli te a bok sak. 13 Satluung pahihna lawngah kawpoekraina alentloe te a sai. Thlaang boeih kah mik huh roe ah vaan kalawng dilai la hai a tlaak sak. 14 Ahih lawngah lamhacuek kah satluung haiah sai sak ham a peek kawpoekraina te a saina rang oen dilai han thlaang boeih te athai alatna. Samsen oen tloek la awm tih boengha a caak de aka hing lamhacuek satluung te hinyah peekna la ahih kah kutsaimuei pakhat dilai thlaang thli te a sai sak. 15 Kutsaimuei lawng awl a thui thaina ham oen amah te aka bok nawh thli a duek sak thaina ham ah apahihna satluung lawng lamhacuek satluung kah kutsaimuei te hill sang thaina te a peek. 16 Te satluung lawngah thlaangyiit oen thlaangbo khaw, kuirang thlaanglen oen khawdeng harah khaw, saltamnaa oen thlaangcuem khaw, thlaang boeih te a tal ah, tihnawhtah a bantang kut ah noekna te amangkhakla a khueh sak. 17 Te noekna te aka khueh nawh tah a-u khaw thaihu te lai thai nawh tih yoeih thai la khaw awm nawh. Te noekna tah satluung miing tihnawhtah satluung miing yuengla a hawna nambar ni. 18 He dawngah he cuihna hawna ham angoe. Cuihna aka khueh thli lawngtah satluung nambar kah thuingaihna te a toek asam thai ai. Te nambar tah thlaang pakhat kah miing yuengla a hawna tih te nambar te tah yaruk sawmruk paruk ni.
1 Tecoengah ka dan hang vengah Zaion Tlaang ah tuuca aka pai te ka huh; ahih kah miing oen ana Pa kah miing a tal ah aka thut thlaang thong yakhat coeng thong sawmlii palii hue tah tuuca oen awm haih u. 2 Khawhumm awl angla liksaituitlaak awl angla aka riing, vaan kah awl pakhat te ka yaak. Te awl tah tingtoeng aka tum thai thli kah tingtoeng awlding oen lo u. 3 Te kah thlaang ting yakhat coeng thong sawmlii palii hue lawngah bawingawlhcoen haiah khaw, ramsa hing palii oen ahaamca thli haiah te pai u tih ahimi lawng laa thaai te a sak u. Thlaang boeih timkah tlang tangte la aka awm thlaang bueng nawh atah te kah laa thaai te thlaang tloe a-u lawngkhaw sa thai nawh. 4 Te thli tah amah oen amah kuemsuem u tih hutaa tawngpa thawlhna aka sai nawh cadawng cuem la awm u tih tuuca a cehna roekk ah a vai u. Ahimi te tah thlaang boeih tim kah tlang tangte la awm u tih Pathen oen Tuuca tengah a nawn lamhacuek ni. 5 Ahimi tah hoem awl thui vai nawh; cawttbauh roe kap nawh. 6 Vaan alaklung ah atloe vanthlaang pakhat aka sawng te ka huh. Ahih lawngah dilai thlaang boeih nam tawm boeih oen thlaangphun boeih, awlcawm awlcee oen ram tawm boeihboeih ah phawng hamla dungyan awlthang theen a phueih tih, 7 Ahih lawngah angaih-hlangla, “Pathen te hinyah lang a alenna te koeh uh! metihtiah ahih lawng thlaangphun boeihboeih awlcekna atue tah a pha poen. Vaan oen dilai, tuitunlii oen ah sawkca tuiva saikung te bok uh! tila a thui. 8 Vanthlaang pakhatna te a pahihna vanthlaang lawng avan thoei tih, “Hutaa te tlim poen! Aka lentloe Babilon khawpui te tlim poen! cuk-halhna misur yuusang te thlaang boeih a tuul poen! tila a thui. 9 Tecoengah atloe vanthlaang pathumna lawng acuek kah pahih rawi te avan thoei tih, “A-u khaw satluung oen ahih kah kutsaimuei te aka bok tih a kut dawngah tihnawhtah a tal ah noekna aka khueh tah, 10 Pathen kah thinsana misuryuu, a thinsana boengloeng khuiah tharana abepirla a thloen misuryuu te a awkk ai! Aka aw boeih te tah aciim vanthlaang thli oen tuuca haiah kat haialh dawngah a heem atek ai. 11 Te heemtekna haikhu tah boet ohla asaw la luui hang. Satluung oen ahih kah kutsaimuei aka bok tih satluung kah noekna miing aka khueh boeih ham tah khawyiin khawdaai aphoengna roe awm manawh.” tila angaihhlangla a thui. 12 Pathen kah awlpeek aka vai thli oen Jesuh tengah uep-awm la aka awm Pathen thlaang thli lawngah tahe vengah ueh thaina khueh angoe. 13 Tecoengah vaan kah awl pakhat ka yaak tih, “He he thut lah! tahe kalawng atong vetih Bawipa kah bii te a bi dawngah aka duek tah yotheen aka dawng thlaang ni” tila a thui. Muithla lawngkhaw, “Oeih, soeng tang tang! Bii rai bina kalawng duem u poen ai. Metihtiah a biibi phu tah ahimi oen awm haih poen ai,” tila a thui. 14 Tecoengah ka dan vengah muui bawk aka yaal te ka huh, te muui sawah thlaanghing oen aka lo u te ngawl, a luu dawngah suilumuek te a muek tih a kut dawngah vin hatt te a pawm. 15 Tecoeng atah atloe vanthlaang pakhat tempal bok-im khui kalawng va thoeng tih muui dawngah aka ngawl tengah te “Na pawm vin hatt te hawna lang caang te aat loeih; dilai dawngkah caang hiin boeih poen!” tila angaihhlangla a thui. 16 Tecoengah mui sawah aka ngawl lawngah a pawm vin hatt te dilai dawngah a vawkveek tih caang te a ah. 17 Tecoengah atloe vanthlaang pakhat vaan kah tempal bok-im khuikah law tih ahih lawngkhaw vin hatt a pawm te ka huh. 18 Tecoengah hai aka ukkung atloe vanthlaang pakhat bokna-thaang ben kalawng va law. Ahih lawngah vin hatt aka pawm vanthlaang nala te “Na vin hatt te hawna lang dilai dawngkah misur dum khuiah aka awm misur te aat loeih, metihtiah misur thaih tah mun boeih poen!” tila angaihhlangla te a tina. 19 Tedawngah vanthlaang lawng a pawm vin hatt te dilai sawah a vawkveek tih misurdum khuikah misur thaih te a ah tih Pathen kah thinsana misurtui suina khuiah a sang. 20 Misur thaih te khawpui adauben kah misurtui suina ah a neet tih misurtui suina khui kalawng thisen va thoeng, meng yahnih toela laawng tih pe ngaa yunyan dung.
1 Tecoengah vaan ah atloe kawpoek rai noekna bohlang tlawhtahaw pasarih te vanthlaang pasarih lawng avan khuen te ka huh. Te kah tlawhtahaw tah hukhuengna poen tih Pathen kah thinsana aboetkoek a tuengna poen ni. 2 Tecoengah hai oen aka thoekk u tih thlalang tuitunlii oen aka lo u thaihu te ka huh. Satluung oen ahih kah kutsaimuei oen ah a miing yuengah nambar aka khueh boeih aka taakung thli te ka huh. Ahimi tah thlalang tuitunlii tengah pai u tih Pathen lawng a peek tingtoeng te a pawm u. 3 Ahimi lawngah Tuuca kah laa oen Pathen kah tuihyoeihthlaang Mosi kah laa te a sak u: “Bawipa Pathen Thara koek, metihtlukla na Lenduet tih na thaihu sai he kawpoek rai la a awm, Thlaangphun boeih kah sengpahrang, nang kah lawngpui tah metihtlukla asoeng tih adoeng! 4 Bawipa, nang te rih ohla a-u nuem aka awm tang ai! Na lenna te phawng hamla a-u lawng nuem a thana tang ai? Nang bueng ni na ciim, Na sai boeih tah doeng tih thlaang boeih lawng a huh dawngah thlaangphun boeih na haiah law vetih nang te m'bok u ai.” tila Laa a sak u. 5 Tecoengah vaan ah tempal bok-im awng u tih a khuiah Pathen awlkamna aka awm Riim-im te ka huh. 6 Vanthlaang pasarih, tlawhtahaw pasarih a pawm tih tempal bok-im khui kalawng va law, ahimi lawngah aciimbiitla aka awm thling thling aka aang himbai te a bai tih a raang te sui cihin oen a yeen u. 7 Tecoengah ramsahing palii khuikah pakhat lawngah dungyan aka hing Pathen kah thinsana oen aka be suibeeldung pasarih te vanthlaang pasarih te a peek. 8 Tempal bok-im tah Pathen kah ruep-awmna oen huham tharana haikhu oen betoet tih vanthlaang pasarih lawng avan khuen tlawhtahaw pasarih te aboeih thlantoe a-u khaw tempal bok-im khuila te kuun thai nawh.
1 Tecoengah tempal bok-im khuikah awl lawngah vanthlaang pasarih nala te, “Cet langtah Pathen kah thinsana beeldung pasarih te dilai dawngah hok thuk!” a tina te ka yaak. 2 Tecoeng atah lamhacuek vanthlaang lawng cet tih amah kah beeldung te dilai dawngah a hok. Satluung kah noekna tacik deng aka khueh thli oen ahih kah kutsaimuei aka bok tengah rih awm tangkiik buthlut tlawh la thoeng. 3 Apahihna vanthlaang lawngah amah kah beeldung te tuitunlii sawah a hok. Tui te thlaangduek kah thisen angla coengg tih tuitunlii ah aka hing boeih te duek. 4 Apathumna vanthlaang lawngah amah kah beeldung te tuiva boeih oen sawksipp boeih ah a hok tih thisen la boeih coengg. 5 Tui ukkung vanthlaang lawngah, “Aka awm lii oen aka awm poen, Aw, Aciim Pathen, nang kah awlcekna tah doeng!” tila a thui te ka yaak. 6 Ahimi lawngah Pathen thlaang thli oen tawngha thli kah thisen a laawng sak, tedawngah ahimi lawng a awkk hamla thisen te na peek poen. Ahimi lawng a dang ham koei te ni a dang u van!” tila a thui. 7 Tecoengah bokna-thaang dawngkah awl lawngah, “Bawipa Pathen Tharakoek! Nang kah awlcekna boeih he tah soeng tih doeng!” tila a thui te ka yaak. 8 Apaliina vanthlaang lawng amah kah beeldung te khawmik sawah a hok tih khawmik lawng thlaang thli te alingna oen ung sak thaina te a dang. 9 Khawmik lawng alingsona oen ahimi te a ung sak tih ahimi lawng he ang tlawhtahaw sawah aana khuehkung Pathen miing te a tap avoep u. Tede ahimi lawng thawlhna te yut u nawh tih Pathen bawilenna te koeh u nawh. 10 Tecoengah pa-ngaana vanthlaang lawng amah kah beeldung te satluung kah bawingawlhcoen dawngah a hok. Satluung kah ram pum te yiinna lawng a khuk muelh tih te ram kah thlaang thli lawng patang a khang uett ah a lai te a kueh u. 11 Ahimi lawng patang a khang, buthlut a tlawh u dawngah Pathen miing te a tap avoep u. Tede ahimi lawngah athe lawngpui te hoett u nawh. 12 Tecoengah aparukna vanthlaang lawng amah kah beeldung te Yufratis tuivapui dawngah te a hok. Tuivapui te kak rup tih khawcuuk ben kalawng aka law sengpahrang thli ham lawngpui a awng pe. 13 Tecoengah aciim nawh muithla ukong oen aka lo u pathum te ka huh. Te thli tah ruultluung kaa khui kalawng, satluung kaa khui kalawng, tawngha rawlrap kaa khui kalawng ah va thoeng. 14 Te thli tah raaithe kah muithla la awm u tih kawpoekraina te a sai u. He kah muithla pathum hue tah Thara koek Pathen Khawhin pui ah thik at la raal tuk ham, dilai pum kah sengpahrang boeih tengla ceemphawh hamla cet. 15 “Hutung lah! Kai tah thlaanghuuen angla ka law ai! Thlaangtim paalak ah yah pawh nawh ham oen atliing ayaalla a yingyawina nawh ham ahuertuela awm tih a hinaak himbai te aka kuem tah yotheen aka dawng ni. 16 Tecoengah muithla hue lawng sengpahrang thli te thikat la a tun sak tih te huen te Hebru awl la tah Amekidon ti u. 17 Apasarihna vanthlaang lawng amah kah beeldung te yilh dawngah a hok. Tempal bok-im khui, bawingawlhcoen dawngkah angaihhlangla awl pakhat va thoeng tih, “Boeih poen!” tila a thui. 18 Tecoeng atah khaw thlappha tih, khaw humm, rekk tla tih likluei angaihhlangla hinghuen. Thlaanghing sai cuek veng kalawng he ang likluei he hinghuen nooek nawh; he ngoen tah likluei boeih lak ah aka tlo koek ni! 19 Aka bo koek khawpui te thloep thum la rek tih ram boeihboeih kah khawpui thli tah rawk kang poen. Pathen lawng Babilon khawpui te a hilh dam tih amah boengloeng dawngkah misuryuu, a thinsana misuryuu te a awkk sak poen. 20 Tuisanglak boeih tah auh tih tlaang boeih khaw ha-ata boeih poen. 21 Vaan dawng kalawng cawi yakhat tluk aka rih reel bohlang lawngah thlaanghing sawah te tla. Rih-awm tangkiik tlawhtahaw reelnu a tlaak dawngah Pathen te thlaanghing lawngah a tap avoep u.
1 Tecoengah beeldung pasarih aka pawm vanthlaang pasarih timkah pakhat te ka tengla law tih, “Law lah, tuivapui tengah a sak, aka lentloe khawpui miingthang thlaanghalhnu te metihtlukla dantat la a awm ai ti te kan huh sak ai. 2 Dilai dawngkah sengpahrang thli lawng ahih oen samphaih u tih dilai thlaang boeih lawng ahih kah cuk-halhna misuryuu te a awkk u” tila a thui. 3 Muithla rang oen vanthlaang lawngah kai te ramhum huhang la n'ceh puei. Te huen ah satluung seen awrh dawng aka ngawl hutaa te ka huh. Satluung kah a pum tawm ah Pathen asal aphaamna ca te a thut. Te satluung lawngah luu pasarih oen ki paha a khueh. 4 Te hutaa lawngah alingdiik oen alinghuih himbai te a bai a naak tih sui, ngun, lungto phutlo, latha oen thoekcau u. A kut dawngah hutaa tawngpa thawlhna phu tuiilehkap thaihu oen samphaih raamna oen ah aka bepir sui boengloeng te a pawm. 5 A tal ah, “Dilai dawngkah thawlh tuiileh-kap oen thlaanghalhnu boeih kah a manu, Babilon Khawpui,” tila thuingaihna awlhuep miing te a thut. 6 Te hutaa lawng Pathen thlaang thli kah thisen oen Jesuh ah thincakla a awm dawngah ngawn la aka awm hue kah thisen a ruui u te ka huh. Te hutaa te ka huh vengah kawpoek la rai tangkiik. 7 Vanthlaang lawngah, “N'tu ah na kawpoek a rai? Te hutaa oen hutaa lawng a cit luu pasarih oen ki paha aka awm satluung thuingaihna awlhuep te kavan thui ai. 8 Nang lawng na huh satluung te n'cui atah hing de, tahe tah hing tlaih nawh; Ahih tah boetna aka awm nawh ungrawm khui kalawng thoeng hang vetih ngawn la awm ai. Dilai he a suen thlan veng kalawng hingna cabu khuiah miing aka thuum nawh dilai han thlaang thli lawng, n'hu vengah hing de tahe ah aka hing tlaih nawh tih aka hing koep ham koei satluung te a huh u vengah a kawpoek rai u ai. 9 He dawngah cuihna oen ming thaina angoe. Luu pasarih he tah hutaa lawng a ngawlhna tlaang pasarih ni. Sengpahrang pasarih te khaw a thuingaihna ni. 10 Ahimi khuikah pa-ngaa tah tlim poen, tahe ah pakhat lawng a uk tih atloe pakhat te tah va law thlan; ahih te law cakhaw kawlkalh ni a uk ai. 11 N'hu vengah hing tih tahe aka hing tlaih nawh satluung tah apareetna sengpahrang la awm. Sengpahrang pasarih khuiah thuum van tih ahih tah duek hamla te va thoeng. 12 Nang lawng na huh ki paha he tah ukna aka khueh thlan sengpahrang paha ni; tede ahimi tah satluung oen thik at la khawnoek pakhat khuiah uk rip van hamla aana aka dang thlaang thli ni. 13 He kah sengpahrang paha boeih lawng mengtengna khat bueng kang a khueh u tih ahimi lawng satluung tengah amami kah tharana huham oen aana te a peek u. 14 Ahimi lawngah Tuuca te a teek u ai, tede tuuca oen amah lawng a khue tih a tuek thlaang thli oen uep-awm hubang thlaang thli lawngah ahimi te a taa ai, metihtiah ahih tah bawi boeih kah Bawipa oen sengpahrang boeih kah Sengpahrang la awm,” tila te a thui. 15 Vanthlaang lawngah, “kai tengah Thlaanghalhnu lawng a ngawlhna tui he tah pengram boeih, thlaang boeih, thlaangphun boeih oen awlcawm awlcee ni. 16 Nang lawng na huh satluung oen ki paha lawngah thlaanghalhnu te a thina u ai; Ahimi lawngah thlaanghalhnu kah a khuen boeih te a rot pe u vetih atliing ayaalla a ceh taak u ai; ahih kah a thi asa te a caak u vetih hai dawngah a tih ai. 17 Metihtiah Pathen kah awl asoep thlantoe tah, ahimi lawng amami kah thara huham ukna te satluung tengah kaw at la a peekna u thai ham Pathen lawng ahimi kah thinkaw khuiah amah kah kawngaihna te a khueh pe. 18 Nang lawngah hutaa na huh te tah dilai sengpahrang boeih ukkung alentloe khawpui ni,” tila a thui.
1 He coengah atloe vanthlaang pakhat vaan kalawng a rum thuk te ka huh. Ahih lawng saithaina aana bo hlang a khueh tih a aangna lawng dilai pum a thue rawngtheng. 2 Ahih lawng angaihhlangla paang tih: “Hutaa te tlim poen! Babilon khawpui tah tlim poen! Te khawpui tah raaithe thli oen muithla ciimcaih nawh thli awmna ahuen la tahe tah coeng poen; tuiilehkap oen thina koei va phun soeprep a khuiah awm u. 3 Metihtiah thlaangphun boeih lawng ahih kah misuryuu te a awkk u poen, ahih kah cuk-halhna misuryuusang te a awkk u poen. Dilai dawngkah sengpahrang thli lawng ahih oen ah cuk-halh samphaihna a sai u tih a kuemsuem u thai nawh apueh ngaihna lawng dilai dawngkah thaihu yoeikung thli te a len sak poen,” tila a thui. 4 Tecoengah vaan kah awl tloe ka yaak, “Law uh, ka thlaang thli aw! Ahih teng kalawng law u loeih! Ahih kah thawlhna dawngah baawl u boel; Ahih kah yawkk ham koei dantatna dawngah thuum u boel! 5 Metihtiah ahih kah thawlhna tah khat sawah khat tlingtloen u tih vaan angla sang; Ahih kah tharana te Pathen lawng a poek khuep. 6 Ahih lawng nangmi thekhana angla ahih te thekhana u van; A saina boeih dawngah arepla thung pe uh. Nangmi lawng na awkk ham te athiipla a sai van angla ahih lawng a awkk ham boengloeng te khuibok ah athiipla sai pe u van. 7 Amah oen amah thangpawm u tih a awmtheenna taring ah patang raina oen kopaangna te pe u van. Metihtiah a kaw dang oen ah, ‘Sengpahrang bawinu la ka ngawl, Kai tah huhainu nawh ni Kawthena mevengah khaw ka ming roe manawh,’ ti. 8 He tila a ti dawngah hin at maiah ahih te tlawhtahaw lawng a tlaak thil ai, tlawhnatna, kawthe rungrahna oen khawkhana lawng a tlaak thil ai. Ahih awlcekkung Bawipa Pathen tha aka ra lawng ahih te hai dawng a tih ai.” ti. 9 Dilai dawngkah sengpahrang thli, ahih oen hutaa tawngpa thawlhna oen ah cuk-halhna dawngah aka baawlneeng haih hue lawng ahih a ungna hairawng dawngkah haikhu te a huh u vengah, te khawpui te a rah u ai. 10 Ahih kah patang khangna te ahimi lawng a rih u dawngah athlahlangla pai u. Ahimi lawng, “Khawmap tangkiik! Rih awm tangkiik mah aw! Aka lenkoek oen tha aka ra koek Babilon khawpui! khawnoek pakhat khui maiah dantat la na awm poen!” ti u. 11 Dilai saw kah thaihu yoeikung thli lawngkhaw ahih te a rah u tih lungnat a yaak u, metihtiah ahimi kah thaihu te a-u khatca lawngkhaw lai tlaih nawh. 12 Ahimi kah, sui, ngun, lungto phutlo oen latha; hisa haldoel oen kut tah hi-acuu himbai hinguih, pu hisa oen himbai lingdiik; thingcang phutlo phun soeprep, vueinaw oen a sai thaihu cungkuem oen ah thingphutlo, ruhum, thii oen ah lungto abawk oen a sai thaihu, 13 Thingsa thing, brue, huihthlutna riimtuui, mura oen farankinsen; misuryuu oen olifsitui, sangvutvaai, vaitaw, panaa oen tuu, marang oen ranglengg thli, saltamnaa oen thlaanghing khaw lai u thai nawh. 14 Thaihu yoeikung thli lawng ahih nala te, “Nang lawng khuehtoen ham na ngaih kaawn theen boeih tah ha-ata kang poen tih na bawina oen awmtheenna boeih tah khum poen, meveng khaw te ang kaawn theen te na dang koep tlaih manawh!” a tina u. 15 Te khawpui khuiah tangthung tangleng tih kuirang la aka coeng thaihu yoeikung thli lawng ahih kah patang khang te a rih u vetih athlahlangla pai u ai. 16 Ahimi lawng rap u vetih lungphit laithai ruila, “Khawmap tangkiik! Aka lentloe khawpui, Nang ham rih awm tangkiik mah aw! Hisa haldoel himbai hinguih oen himbai lingdiik na bai na naak tih sui awi-anaak, lungto phutlo awi-anaak oen latha oen ah na thoek na cau u! 17 Tede khawnoek khat khui maiah na bawi na rengna tah ha-ata boeih poen!” tila rap ai. Tuisangphaw boeih uktemkung thli oen khawlawng cet thli tuisangphaw dawngah bii aka bi boeih tuitunlii ah biibina oen bungpui riilcang aka khuut boeih lawng a thlahlangla pai u tih, 18 te khawpui a ungna hai-alh haikhu te a huh u vengah, “He ang alentloe khawpui angla atloe khawpui awm nooek nawh!” ti u. 19 Ahimi lawng a luu dawngah laivaai oen phull u tih rungrah oen lungphit laithai ruila, “Khawmap mai poen! He khawpui ham rih awm tangkiik mah aw! Tuitunlii ah tuisangphaw oen thaihu aka yooei boeih lawng ahih kah bawina oen kuirang la coengg u! tede khawnoek pakhat khui maiah a bawi a rengna a auh boeih mai,” ti u. 20 Vaan nang, te khawpui rawk dawngah awmngaih lah! Pathen kah thlaang thli oen celtuih thli oen ah tawngha thli awmngaih u lah! Nangmi sawah a saina boeih dawngah Pathen lawng ahih te awl a cek poen! 21 Tecoengah thara tangkiik van-thlaang pakhat lawng caang a neetna lungto sumngawl teh van aka bohlang lungto pakhat te a lawh tih tuitunlii khuila a dawng thuk, “He tila Babilon khawpui tah dawng thuk la awm vetih meveng khaw huh koep la awm tlaih manawh. 22 Riingding tingtoeng awlding oen laa sak awl theen, a tum phiviit awlding oen ah pengsara tum awl te meveng khaw yaak la awm tlaih manawh! 23 Hai-im dawngkah haivang te metuek khaw na khuiah hu u koep tlaih manawh; Cadawng yulokung oen tuemnu hulaa vaa sak awmtheen awl meveng khaw na khuiah ya tlaih roe manawh. Nang kah tangthung tangleng thli tah dilai pum ah huham thara aka awm koek ni, aka soeng nawh miklet thoemna oen dilai pum ah huham tharana aka awm koek ni, aka soeng nawh miklet thoemna oen dilai thlaang boeih na thai na latna poen. 24 Tawngha thli oen Pathen thlaang thli oen ah dilai dawngah a ngawn thlaang boeih kah thisen te khawpui khuiah a huh u dawngah Babilon tah dan a tat poen.
1 Tecoengah vaan ah thlaangping kah vupaang awl angla ka yaak tih, “Pathen tah koeh u lah! Thlawnna, ruep-awmna oen tharana tah mami kah Pathen amah koe ni. 2 Ahih kah awlcek tah doeng tih soeng. Dilai he cuk-halhna oen aka phekung thlaanghalhnu te ahih lawng dan a tat poen. Pathen kah tuihyoeihthlaang boeih te a ngawn dawngah ahih te dan a tat poen,” tila vupaang u. 3 Ahimi lawng paang u koep tih, “Pathen tah koeh u lah! Khawpui a ungna hairawng dawngkah haikhu tah ayoeyahla dungdung tho hang,” ti u. 4 Ahaamca kulpalii hue oen ramsa hing palii hue lawng buekuep u tih bawingawlhcoen dawng aka ngawl Pathen te a bok u. Ahimi lawng, “Amen! Pathen tah koeh u lah!” ti u. 5 Tecoengah te kah bawingawlhcoen dawng kalawng awl pakhat va law tih, “Amah kah tuihyoeihthlaang thli oen a thlaang boeih ayiit abo, amah aka hinyah thlaang boeih, mami kah Pathen te koeh u lah!” ti. 6 Tecoengah thlaangping kah paang awl angla liksaituitlaak awl angla, khawhumm rekk tlaak awl angla ka yaak. “Bawipa tah koeh u lah! Mami kah Bawipa, Thara Pathen tah Sengpahrang la a awm dawngah koeh u lah! 7 Awmngaih u silang tah awmtheen boenn u lah sih; alenna te koeh u lah sih! Tuuca kah yului poei atue tah khoek poen, a lawh ham koei tuemnu hulaa lawngkhaw coekroekla thloeihthlam u poen. 8 Ahih lawng a buen anaak ham thlipthlip aka aang hisa haldoel te khaw a peek poen,” ti u. (Hisa-haldoel ti he tah Pathen thlaang thli kah thaihu theen a sai te ni) 9 Tecoengah vanthlaang lawng ka tengah, “He he thut lah; Tuuca yului poei kah a ceel thlaang hue tah yotheen aka dawng thlaang ni,” n'tina. 10 Ahih te bok ham a khow kungah ka buekuep, tede ahih lawng, “He tila sai boel! Kai tah nang oen atloe aka oeng hue oen ah Jesuh lawng a phawng awltak aka phoeih rapsaat hue angla tuihyoeihthlaang pakhat van ni. Pathen mah bok lah!” n'tina. Jesuh lawng a phawng awltak lawng ni tawngha thli kawthawhna a peek. 11 Tecoengah vaan aka awng u te ka huh tih, te ah te marang bawk pakhat awm. Te marang bawk aka cit te tah Uep-awm oen Awltak a miingna; doengna oen awl a cek tih ceemraal khaw a tloek. 12 Amik rawi tah haialh oen lo hih tih a luu dawngah bawi-lumuek yahawh hlang te a muek. Amah bueng lawng a ming doek tih thlaangtloe a-u lawngkhaw thuingaihna a ming nawh miing te a pum dawngah a thut. 13 Ahih lawng thisen oen a nok baidung te a bai. A miing tah “Pathen Awl” a miingna. 14 Vaan raalkap thli lawng hisa haldoel aciimbiit abawk te a bai u tih, marang bawk te a cit u tih a hu ah a vai u. 15 A kaa dawng kalawng samsen aka hatt pakhat va thoeng, te oen ah ram boeihboeih te a taa ai. Ahih lawngah thii cungpoelh oen ahimi te a uk vetih Bawilen Pathen thinsana misur neetna khuiah misur te a neet ai. 16 A himbaidung oen a phai dawngah: “sengpahrang boeih kah Sengpahrang oen bawi boeih kah Bawi,” tila a thut. 17 Tecoengah vanthlaang pakhat khawmik dawngah aka pai te ka huh. Ahih lawng khawhi ah aka sawng va boeihboeih te, “Law u lah, Pathen kah bawilen buhlawi veel hamla va tun u lah! 18 Law u langtah sengpahrang thli, raalbawi thli oen raalkap thli kah thiasa te ca u lah, marang thli oen marang aka cit thli kah thiasa oen ah thlaang boeih kah thiasa, saltamnaa oen thlaangcuem thli kah thiasa, thlaang yiit thlaang bo boeih kah thiasa te ca u lah!” tila angaihhlangla paang. 19 Tecoengah marang aka cit thlaang oen ah a raalkap thli te teek hamla satluung oen dilai dawngkah sengpahrang thli oen ah a raalkap thli a tun kueng te ka huh. 20 Satluung oen ah ahih kah haiah kawpoekraina aka sai tawngha rawlrap te a tuuk haih tih thong ah a thlaak u. (Te kah tawngha rawlrap tah satluung miknoekna aka khueh thli oen satluung kah kutsaimuei aka bok thli te kawpoekrai saina oen aka thailatnakung te ni) Satluung oen tawngha rawlrap te pahih bokla kat hai-alh khuiah a hing sailapla a dawng. 21 Marang aka cit thlaang kah a kaa dawng kalawng aka thoeng samsen oen ahimi kah raalkap boeih te a ngawn; Va boeih lawng ahimi kah thiasa te ahahla a caak u.
1 Tecoengah vanthlaang pakhat lawng boetna aka awm nawh ungrawm dung te awngna caabi oen thiirui arih hlang a kut dawng a pawm tih a rum thuk te ka huh. 2 Ahih lawng-ah suenyan kah ruultluung Raaibawi tihnawhtah Seitan te a tuuk tih kum thong khat khui khawh hamla thiirui oen a piin. 3 Vanthlaang lawngah ruultluung te aboetna aka awm nawh ungrawm khuila a voeih tih ungrawm te a khaih khoep, kum thongkhat aboeih thlan atah nam tawm thlaang thli te thailatna tlaih nawh ham tacik a deng rap poen. Tecoeng atah kawlkalhca a thlah koep ai. 4 Tecoengah bawingawlhcoen thli te ka huh tih, te bawingawlhcoen dawngah aka ngawl hue tah awlcekna aana a peek te ka huh. Jesuh lawng a phawng awltak oen Pathen awl te a thui u dawngah a ngawn thlaang thli kah muithla boeih khaw ka huh. Ahimi lawngah satluung oen satluung kah kutsaimuei te khaw bok u nawh tih a tal ah khaw, akut dawngah khaw satluung kah miknoekna te khueh u nawh. Ahimi tah hing koep u tih Khrih oen sengpahrang angla kum thongkhat khui a uk u. 5 (Atloe thlaangduek thli tah kum thongkhat a boeih thlan khui tah hing u nawh hun). He tah thlaangduek thawhna lamhacuek ni. 6 He kah thlaangduek thawhna lamhacuek ah aka thuum thli tah awmngaih u tih yotheen aka dawng tangkiik ni. A pabe duekna lawng ahimi sawah n'tu aana tehca khaw khueh tlaih nawh; Ahimi tah Pathen oen Khrih kah khawsoeih la awm u vetih Khrih oen kum thongkhat khuiah ukkung la awm haih poen ai. 7 Kum thongkhat te a boeih coengah, Seitan te thong khui kalawng a thlah u ai, 8 dilai pum khawboet ram boet ah aka darh u thlaangphun boeih te thailatna ham cet ai, te tah Gog oen Magog te ni. Seitan lawngah ahimi te apum boeih la ceem thawh sak ham a cawi vetih te thli tah tuitunlii keeng kah divin lai yoeh la yahawh. 9 Ahimi tah dilai pum ah darh khonghak tih Pathen thlaang thli a awmna huen oen Pathen lawng a lungna khawpui te a veel khoep u. Tede vaan kalawng hai tla thuk tih ahimi tah ung thloep. 10 Tecoengah ahimi aka thailatna Raaibawi te satluung oen tawngha rawlrap thli a voeihna huen kat hai-alh khuila a dawng; te huen ah ahimi tah dungyan toela yiin oen daai patang a khang ai. 11 Tecoengah bawingawlhcoen abawk bohlang oen te kah bawi-ngawlhcoen dawngah aka ngawl thlaang te ka huh. Dilai oen vaan tah ahih teng kalawng aloela thoeih nawng tih khum boeih poen. 12 Tecoengah thlaangduek ayiit abo bawingawlhcoen haiah a pai u te ka huh. Cabu thli te a daih, tecoengah cabu tloe hingna cabu te a daih u. Te cabu dawngah amami kah saina khawboe ramlang a thut pe van angla thlaangduek thli te awl a cek u. 13 Tecoengah tuitunlii lawng amah khuiah aka duek te a peek. Duekna oen celkhui khaw lawngkhaw thlaangduek a tuuk te a peek. Thlaangduek boeih te amami kah a saina angla awl a cek. 14 Tecoengah duekna oen celkhui khaw te haialh khuila a voeih. (He kah haituilii tah apabe duekna ni.) 15 Hingna cabu dawngah a miing a thut nawh thlaang boeih te tah haituilii khuila a voeih u.
1 Tecoengah vaan thaai oen dilai thaai ka huh, lamhacuek kah vaan oen dilai tah khum poen tih tuitunlii khaw awm tlaih nawh. 2 Aciim khawpui Jerusalem thai tah a vaa oen huh u hamla roekbah u tih coekroekla aka thloeihthlam u tuemnu hulaa angla Pathen tengkah vaan kalawng a law thuk te ka huh. 3 Bawingawlhcoen dawng kalawng awl angaihhlangla a thui te ka yaak: “Tahe tah Pathen im te thlaanghing tengah awm poen! Pathen tah ahimi oen awm haih vetih ahimi tah Pathen kah thlaang la awm poen ai. Pathen amah roe te ahimi oen awm haih vetih ahimi kah Pathen la awm poen ai. 4 Ahimi kah mikphi boeih te Pathen lawng a huih pe poen ai. Te huen atah duekna roe awm tlaih nawh vetih kawthe lungnat yaakna, rungrahna oen tlawhnatna khaw awm tlaih manawh. Thaihu ruem boeih tah khum kang poen,” ti. 5 Tecoengah bawingawlhcoen dawng aka ngawl lawngah te, “Tahe tah thaihu cungkuem soeprep te athaaila ka sai pan boeih poen, he kah awl he thut lah, metihtiah he awl boeih he tah soeng tangtang tih uepna koei awl ni,” tila a thui. 6 Tecoengah ahih lawngah, “Bii ka coeng poen! Kai tah lamhacuek oen hukhueng koek, atongcuekna oen aboetna koek ni. A-u khaw tui aka hall tah hingna tuibaaptui te ayoela ka awkk sak ai. 7 Taakung la aka awm boeih lawngtah ka tengkah thaihu he a dang ai: Kai tah ahimi kah Pathen la ka awm vetih ahimi tah kai kah ca anau la awm ai. 8 Tede riyawp thlaang thli, paipi aka thleep thlaang thli, tuiilehkap thinkaw aka khueh thli, Thlaang aka ngawn thli, thlaanghalh paadak thli, Caamna oen mu-uih caakna aka hawna thli, kutsaimuei aka bok thli oen ah hoem awl aka thui boeih hamla ahuen amawl te tah kat hai-alh te ni, te tah apabe duekna ni,” tila a thui. 9 Vanthlaang pasarih timkah pakhat, tlawhtahaw aboetna koek pasarih oen aka bepir beeldung pasarih aka pawm te ka tengla law tih, “Law lah, Tuuca kah a yu, tuemnu hulaa te kan huh sak ai” n'tina. 10 Muithla rang oen ah vanthlaang lawng kai te tlaang sang cungcikdik la te n'ceh puei. Ahih lawngah Jerusalem Aciim Khawpui Pathen tengkah vaan kalawng aka law thuk, 11 Pathen kah ruep-awmna oen aka aang te n'huh sak. Te khawpui tah lungto phutlo Jaspa angla aang tih Kristol angla ciil. 12 Te khawpui tah thawhka paha thlaihih oen vawngkulh asanghlang awm tih thawhka toetkung vanthlaang paha thlaihih awm. Te thawhka dawngah te Israel thlaangphun paha thlaihih hue kah miing te a thut. 13 Te vawngkulh te khawcuuk ben ah thawhka pathum, aluen ben ah thawhka pathum, akaak ben ah thawhka pathum, khawtlaak ben ah thawhka pathum rip awm. 14 Khawpui kah vawngkulh te tah lungto paha thlaihih dawngah lungdang a suem tih Tuuca kah celtuih paha thlaihih kah miing te a thut. 15 Ka tengah awl aka thui vanthlaang lawng khawpui oen thawhka thli oen ah vawngkulh te tahna hamla, tahna sui cungkui pakhat a pawm. 16 Te khawpui tah ateng palii oen akil palii awm tih ayoei adang van-at la awm. Vanthlaang lawngtahna cungkui oen a tah vengah ayoei adang oen asang tah meng thongkhat ya-ngaa rip awm. 17 Vanthlaang lawng amah kah a pawm tahna oen vawngkulh te khaw a tah tih asang te pe yahnih thlairuk awm. 18 Vawngkulh te Jaspa lungto phutlo oen a sai, khawpui te tah suituicii oen a sai tih thlalang angla ciil. 19 Khawpui a thungna vawngkulh lungdangsuem lungto te tah lungto phutlo phun soeprep oen a thoek acau. Lamhacuek lungdangsuem lungto tah Jaspa lungto tih, apabena tah sapfaiar lungto; apathumna tah aakat lungto, apaliina tah imaral lungto; 20 apa-ngaana tah onik lungto, aparukna tah karnelian lungto, pasarihna tah krisolaih lungto, pareetna tah beril lungto, pakuana tah topas lungto, pahana tah khalsidoni lungto, thlaikhatna tah tarta lungto, thlaihihna tah ametis lungto phutlo oen a sai. 21 Thawhka paha thlaihih te latha paha thlaihih oen a sai tih thawhka pakhat te latha pakhat oen a sai. Khawpui khuikah lawngpui tah suituicii oen a sai tih thlalang angla ciil. 22 Te khawpui khuiah tempal bok-im ka hu nawh, metihtiah Thara koek Bawipa Pathen oen Tuuca tah te kah tempal bok-im la awm poen. 23 Te khawpui dawngah khawse oen thlavaang khaw ngoe tlaih nawh, metihtiah Pathen kah ruep-awmna te aang poen tih tuuca te haivang la awm poen. 24 Dilai dawngkah thlaangphun boeih lawngah te aangna oen ah yingyawi u vetih dilai dawngkah sengpahrang thli lawng amami kah khawh-rang kaawn thli te khawpui khuila a khuen u ai. 25 Khawpui kah thawhka thli te tah khawyungkhun a awng; te khawpui ah khawyiinna a awm tlaih nawh dawngah thawhka te khai manawh. 26 Thlaangphun boeih lawngah a ruep-awmna oen a bawilenna boeih te khawpui khuila te a khuen u. 27 Tede, te khawpui khuiah aka ciim nawh tah khatca khaw kuun thai manawh, yarau thaihu aka sai thli oen hoem awl aka thui boeih khaw kuun thai manawh. Tuuca kah hingna cabu khuiah miing aka thuum thli bueng khawpui khuiah kuun thai ai.
1 Tecoengah vanthlaang lawng hingna tui a laawngna tuiva te khaw n'huh sak. Te tuiva tah thlalang angla ciilrikla awm tih Pathen oen Tuuca kah bawingawlhcoen dawng kalawng va laawng tih khawpui khui alaklung ah te laawng. 2 Te tuiva keeng khatben khatbang ah hingna thingkung te awm, kum khat ah voei thlaihih thaih tih thla khat ah voei khat thaih poepa tih te thingkung kah aram te tah thlaangphun boeih kah hoeihna la awm. 3 Pathen lawngah a tap avoep thaihu khatca khaw te khawpui khuiah awm manawh. Pathen oen Tuuca kah bawingawlhcoen tah te khawpui khuiah awm tih amah kah a tuihyoeih-thlaang thli lawngah ahih te a bok u. 4 Ahimi lawngah Pathen mik-hai te a huh u vetih ahih kah miing te a tal ah a thut ai. 5 Khawyiin awm tlaih nawh tih ahimi lawngah hai-im khaw, khawse khaw ngoe tlaih nawh, metihtiah Bawipa Pathen te ahimi kah aangna la awm vetih ahimi tah sengpahrang angla dungyan dungyan toe ukkung la awm poen ai. 6 Tecoengah vanthlaang lawng ka tengah, “He awl tah awltak tih ueppangna koei awl ni. Tawngha thli te amah Muithla oen aka be sak Bawipa Pathen lawng adiw thlan ah aka thoeng koei thaihu te amah kah tuihyoeih-thlaang thli tengah aka thui hamla vanthlaang thli avan tuih poen,” tila a thui. 7 Jesuh lawng, “Hutung lah! Kai ka law yue poen ai: He cabu khuikah tawngha awl aka vai thli tah yotheen a dawng u!” tila a thui. 8 Kai Johan lawngah he thaihu boeih he ka yaak tih ka huh poen. Te thli te ka yaak tih ka huh coengah he thaihu boeih huhsakkung vanthlaang te bok hamla a khow kungah ka buekuep. 9 Tede ahih lawngah, “Te tila sai boel! Kai khaw nang oen nang kah maya manau tawngha thli oen ah he cabu khuikah awl aka vai thlaang boeih kah pueipaw van ni. Pathen te mah bok lah!” tila a thui. 10 Tecoengah ahih lawng, “He ang thli boeih he a thoengna ham atue ayoeica poen dawngah he cabu khuikah tawngha awl he ahuepla khueh boel. 11 Thlaangthe lawngah therana te sai poe mai de selang tah tuiilehkap thlaang te tah kawlot-thahnai la awm poe mai de seh; Thlaangdoeng te tah doeng poe mai de selang tah, aka ciim thlaang te tah ciim poe mai de seh.” tila a thui. 12 Jesuh lawng, “Hutung lah! Kai tah ka law yue poen ai! Thlaang boeih te a saina taring ah peek rip hamla Kai lawng kutdo kavan khuen ai. 13 Kai tah lamhacuek oen hukhueng koek, atongcuekna oen aboetna koek la ka awm,” tila a thui. 14 Amami kah himbai te aciimla aka suk tah yotheen a dawng u, ahimi tah hingna thingthaih te a caak thai vetih khawpui thawhka khuiah kuun thai u ai. 15 Te cakhaw cet thawlh lawnghang thli, caam oen mu-uih caakna aka hawna thli, hutaa tawngpa thawlhna aka sai thli, thlaang aka ngawn thli, kutsaimuei aka bok thli, saina oen khawseh, hoem awl thui oen khawseh thlaangthaipalat thli tah khawpui adauben ah awm u ai. 16 “Kai Jesuh lawng Khrihcabu khuiah aka awm nangmi tengah he thaihu boeih he aka hoe la kamah kah vanthlaang te kavan tuih poen. Kai tah Devid cadil tih aka aang tumpa ni.” tila a thui. 17 Muithla oen tuemnu hulaa lawng-ah, “Law lah!” tila a thui. A-u khaw he awl aka ya boeih lawngtah, “Law lah!” tila thui van seh. A-u khaw tui aka hall tah law uh; A-u khaw aka ngaih boeih tah hingna tui he ayoela lo uh. 18 He cabu dawngkah tawngha awl aka ya thlaang boeih te kai Johan lawng arapcatla ngaithuenna kan peek u: a-u lawngkhaw he cabu dawngkah tawngha awl he khatca khaw a tawm athap atah, he cabu khuiah a thui tlawhtahaw te Pathen lawng ahih sawah dantatna la a hawna ai. 19 A-u lawngkhaw he cabu dawngkah tawngha awl he khatca khaw a hoett atah he cabu khuiah a thui ahih kah dang ham koei hingna thingthaih caak thaina oen Aciim Khawpui khuiah kuun thaina te Pathen lawng a hoett pe van ai. 20 He thaihu boeih sausi dengkung lawng, “Oe, Ataktang! Kai tah ka law yue poen ai!” tila a thui. Tetih mai hawn seh. Bawipa Jesuh, law mai hawn loeih! 21 Bawipa Jesuh Khrih kah lungvatna tah thlaang boeih sawah awm seh. Amen.