Zo khal Khrih sungih a um lekhaw hmaisa ih a hlun mi hmuah hmuah khi a hlon theh ih a thar a si zo. Zisu in, Keimah cu nun nak pek ding le nun nak kim ter dingah ka ra a ti. Zisu in, Hnangam nak ka lo pek ta hngai. Keimah hnangam nak cu ka lo pek hngai. Leilung mi ih an pek bangtuk in ka lo pek hngai a si lo. Nan thin phang in va tih hlah uh a ti.

Paul in, Zo hman ih ruat ban lo mi Pathian ih hnadaih nak, Bawi Zisu thawngin nan thin lung le nan ruah nak khi an lo tuamhlawm pei a ti. Zisu in, Nanmah cu keimah ka thu bangtuk in nan tuah lekhaw keimah thlun tu ngai ngai nan si. Thu ngai khi nan zum pei ih a hih thu ngai in nanmah cu a lo thlah hngai pei. Cuih hrangah fapa in nanmah cu a lo thlah ngai lekhaw a luat mi ngai ngai nan si pei a ti. Paul in, Kanmah cu Zisu Khrih thawng ih luat nak kan ngah zo a ti. Paul in, Bawi Zisu ih i pek mi thin lung a ding ter tu thawngvang in, ziang khal si seh ka tuah thei pei. U le nau tla, cu lo thu cu Pathian thawn nan peh ih amah lian nak thawng in fek ter ko uh. Satan bum nak khi do thei ding in Pathian thuam kim khi va hruk uh a ti.

Thlarau in a rah mi cu duh nak, lawm nak, daih nak, thin sau nak, velneih nak, that nak, ding nak, mi upat nak le sup nak tla an si. Zisu Khrih thawn a tlak mi cu taksa le taksa duh nak khi thinglamtah nak in a that zo. Cuih hrangah kanmah thlarau in kan nung lekhaw thlarau hruai nak in kan feh pei. Paul in, Kan Bawipa Zisu thawngih Pathian thawn rem nak kan ngah hnu in amah thawng ih Pathian thangthat nak cu kan thangthat a si a ti. Zisu in, Atu tiang keimah hmin in ziang hman nan dil hrih lo. Nanmah cu nan lung awi nak a kim thei nak ding va dil uh. Cu ti ih nan dil lekhaw nan ngah pei a ti.

Pathian ih fate ti ih kawh nak thu kan ngah thei nak dingah Pathian in kanmah tla khi ziang tluk in in duh ti thu khi ruat uh. Pathian ih Thlarau ih a hruai mi hmuah hmuah tla cu Pathian fa ah an cang a si. Amah ih fate can nak ih thlarau nan ngah a si ih hrangah, Abba, ka Pa, ti ih kawh nak a si. Thiang Thlarau khal in kannih tla cu Pathian fate kan si tiah kanmah thlarau tla thawn tetti a cang a si. Pathian in tih phan nak thlarau in pek lo ih huham le duhawk nak le, ziaza that nak thlarau laksawng in pek a si. Cuih hrangah hih zonzaih nak hi ka tuar. Sikhalsehla ka ning a zak lo. Zianghrangah so ti le, keimah ka zum mi khi ka thin lung in ka thei ih amah hnenah ka pek mi khal cun khi ni ah ih phen thei pei tiah ka zum. Zisu in, Ka Pa ih inn sungah um nak tampi a um, a um lo sisehla nanmah cu sim lo in ka um lo pei, ziang tin ti le nanmaih um nak rem ding ah ka feh thlang pei. Nanmaih hrangih um nak ka rem lekhaw ka ra sal pei ih ka hnen ih nan um thei nak ding ka lo hruai sal hngai pei a ti.

Paul in, Atu ih ka nun nak cu Pathian Fa, i duh tu le keimah hrangah a lu a hlo tu khi zum nak thawng in ka pum sungah ka nung nak khi a si a ti. Amah zangfah nak nan zum nak thawng in kham nak khi nan ngah zo. Nanmah tuah nak thawng in nan ngah lo. Pathian lak sawng then nak in a si. Mah ziaza that nak thawng in kham nak khi nan ngah lo hrangah zo hman zum aw ding a tlak lo. Zisu Khrih thawn kan peh aw nak thawng in ziaza tha tuah ding in kan rem aw nak khi Pathian in a ruat cia zo. Pathian in kanmah khi in rem zo a ti. Bawi Zisu in kanmaih hrangah thih nak a tuar ih kanmah din ter ding in a tho ter sal.

Ziang ti in so a si ti le na ka in Bawi Zisu ka Bawipa a si tiah na thin a kim ih na lung sung in Pathian in amah khi a thawh ter ti nak na zum lekhaw luat nak khi na ngah pei. Thilrit a phur mi le retheih zonzaih a tuar pawl, Keimah hnenah ra u law, nun nuam colh nak ka lo pek pei. Ka thil phurh nak kha va phur u la ka thu kha va zir uh. Ziang hrangah ti le keimah cu thinlung nem mi ka si ih thinlung daih nak nan ngah pei. Ziang hrangah ti le ka thil phurh nak cu a ol ih a zang khal a zang fawn a si. Leilung parah zonzaih nak nan tuar tikah tih hlah uh. Keimah in leilung ka neh zo. Thu ngai ka lo sim hngai. Keimah i zum mi cu kum khua nun nak an ngah zo tiah a sim.