TAMEUH MY PATHANG NAI "Areng Tameuh ly ati thuipi ai mo, na nai tangai si." (Sam 85:8)

HINI CHA-IU THEUNG Y AWM NAI

(1) Tameuh my amymy ai mana amteng hai man mo? Angchei y ly Tameuh my kani khaileaung sa. (A.A. 1:1) Kani sa nai Areng (mymy ly Tameuh kyp kyp ne,) khaileaung pri palum nai sa nai keung (mymy ly huni ai khaw hai; phra nai ka-keu my ang so y i, awm naira lawn ai nai ang sa;) mymy ly "Kai ly Areng ne, takhra ly by y ... kai, Areng kyp kyp my ly leu meitang thui reng, kateng kathuipi," napi. (Isaia 45:18-19)

(2) Tameuh my amy i satang khumichi teng y mana pany hai mo? Kani my Tameuh i nang parai naira thai hai; ali kau parai naira py mymy i ati ti sa nai sai amteng hai teang. (Sam 19:1) Mymy i ati ti niu thai y nairachi ly khaileaung palum angchei kha i dengdairei chai pyn pa-rei my niu nai bo, ati ti sa naira y amteng nai ne; huni ly mymy i deungtasarei ati ti sa thai naira hawi, mymy ly Tameuh ne nai sai py. (Rom 1:20) Tameuh my jangni y sangum cheaungkhang ra y amsi pajochi teng y amochi ai leu thui hai; na i py hini kangkhym ka-tem i neng y ly mymy ly Chapo ai achi teng y leu thui hai bo; mymy ly ni ai ati cheaungkhang amtym ai nai keung y khai rym i, ni i saho y kani khaileaung py sa. (Hebrai 1:1-2)

(3) Tameuh i awm nai sai ly mana atawm mo? Nang ly pany y nai sai a? Nang ly thai y nai sai a? Areng ly deungtasarei Tameuh ne, khuteng taki y tym pa-rei khaileaung pri sa angchi nai Keung ne. Mymy ly paha py paha y i, akawm py akawm y leang, mymy i cheng nai sai ly khen patawm ai nai by y. (Isaia 40:28) Kachai, na nai amyn pathi nai, deungtasarei ra y awm nai, salo keh nai, tahm asang parai nai Keung my ly, "Kai ly salo keh naira, meingtym kachai ra y awm, naibaly paleung y adawn ali nai, tahm apanem nai keung teng y py awm teang," napi. (Isaia 57:15) Tameuh ly kangvang ne, mymy y ly kaveng pi pi by y. (1 Johan 1:5) Tameuh ly tamen naira ne. Hini ra y ly Tameuh i tamen naira ly achi i tlang tleaung y amteng bo: achi ly mymy deaungkho y heng thai ai nai Tameuh my mymy i Chapo leaungrei awm khyh nai ai khaileaung pri y ang pato. (1 Johan 4:8-9)

(4) Tameuh my ly khumi teng i nai ati ngai mo? Nang i Areng Tameuh my ly nang teng i nai ati ngai mo? Nang ly Areng Tameuh ai ly tahm khai ai nai, mymy i lam patei naira y tako ai nai, mymy ai tamen ai nai, nangmy i paleung verei hawi phailo verei py nang i Areng Tameuh i kalop sa ai nai py ang ngai khyp. (Pa-nyh Leu 10:12) Areng Isu my ly: "Nang i Areng Tameuh ai ly nang i paleung verei hawi, nang i phailo verei hawi, nang i dawn nai bawi bawi hawi nang tamen ai nai tla. Huni ly leu pel nai len keh nai hawi, aly len ken nai ne. Naibaly huni ka-tla atawm hui nai ly hini he, Nangmy ai atamen nai kamta nang i saleaungchi ai py tamen ai nai tla," napi. (Matthai 22:37-39) Achi ly mymy i Chapo Isu Krista i amyn y ym iy, mymy i leu pei nai kamta atamen leungtang ai nai mymy i leu pei nai ne he. (1 Johan 3:23)

(5) Khumi ly awm nai sai takhra nga nai ny y baly Tameuh i satang pany thai pajau nai sai a? Tlang mang y asa nai khumi ly Tameuh i Phailo mang i ati tichi ai ly kawn y leang; ni i vui ly pathu naira ne; hunichi ai phailo mang y dawn pasym nai ne nai deaungkho y mymy ly pipi pany pajau y. (1 Korinth 2:14) Areng my ly, "Kaimy i dawn nai saichi ly nangmychi i dawn nai saichi kamta ny y, kaimy i sa nai saichi ly nangmy i sa nai saichi kamta ny y. Kani pri ly khaileaung pri tieaung y asang ken nai kamta ly kaimy i sa nai saichi hawi dawn nai saichi py nangmychi i sa nai saichi hawi dawn nai saichi tleaung y asang keh nai ne," ang napi. (Isaia 55:8-9)

(6) Khumi hawi Tameuh sala y taprei naira ly ati mo? Nangchi i taphra nairachi my ly nangchi hawi nangchi i Tameuh sala y taprei bo: naibaly nangchi i kamngochi my ly mymy i meimai ai nangchi teng i nai deng khy bo. (Isaia 59:2) Kai ly paleung theung y kamngo nai sai apany iy khrei i khaly Areng ly tangai pi y leang bo. (Sam 66:18) Chapo ai ym y nai ngierei ly hengra ngo y ai i, Tameuh i kado theu nai ly ni teng y awm jo. (Johan 3:36) Ym y nai ngierei ai ly Tameuh i Chapo leaungrei awm khyh nai i amyn y ym y nai deaungkho y pasum yb bo. Pasum naira ly hini ne he: kangvang ly khaileaung pri y ang tym bo, na i py khumichi i ati ti sa naichi ly hawi y nai deaungkho y, nichi ly kangvang tleaung y kaveng ngai keh bo. (Johan 3:18-19)

(7) Kamngo na nai ly ati mo? Hawi y naira bawi bawi ly kamngo ne. (1 Johan 5:17) Ym naira abawi y nai ati ti sa nai ly kamngo tla. (Rom 14:23) Areng Isu my ly: "Taku theung i nai, khumi i paleung theung i dengdairei ly kamngo dawn nairachi theu reng: angai naichi, paviu naichi, khumi ai padei naichi, pajang sa naichi, paleung ano naichi, kamngo naichi, tapawp naichi, paleaung naichi, akeng naichi, thui preaung naichi, am-e naichi, pathu naichi ly: huni ati ti kamngo naichi bawi bawi ly taku theung i dengdairei theu iy, khumi ai ly chai hai y reng nai ne," napi. (Marka 7:21-23) Amkym u ... ti y baly nangchi theung y ami py ym y nai paleung kamngo awm lawh na. (Hebrai 3:12)

(8) Kamngo sa be be na mo? Khumi bawi bawi kamngo sa be be i, Tameuh i nang parai naira py ngo y bo. (Rom 3:23) Tameuh ai hau iy kacheng sa nai keung ne na mo, na nai Areng ly kani mang dengdairei khumi chochi ai khen kathiu jo jo. Nichi ly lam tamang be veng bo i, nichi i hawi y nai ly ahyh bawi bawi; ami py kahawi sa nai keung ly by y, ne, leaung py by y. (Sam 14:2-3) Achi bawi bawi ly beramchi kamta lam tamang veng bo; achi leaung leaungrei ly amymy i ngai nai lam mang y tako veng bo. (lsaia 53:6) "Kaichi ly kamngo by y leang" napi baly amychi ai atapawp nai teu, leu meitang py achi teng y by y. (1 Johan 1:8)

(9) Kamngo deaungkho y ati tym mo? Hunaibaly khumi leaungrei nai deaungkho y kamngo khaileaung pri y kun i, kamngo nai deaungkho y deira py kun teang; hunai kamta khyp teang khumi bawi bawi kamngo sa nai deaungkho y deira my ly khumi bawi bawi ai num be bo. (Rom 5:12) Kamngo sa nai keung ly dei ai bo. (Ezekiela 18:4) Kamngo ly cheang iy dei naira tapen bi. (Jakob 1:15) Kamngo vang ly dei naira ne. (Rom 6:23) Chapo ai ym y nai ngierei ly hengra ngo y ai i, Tameuh i kado theu nai ly ni teng y awm jo. (Johan 3:36)

(10) Khumichi hawi mymychi i kamngo nai sai molam y py Tameuh my mana dawn mo? Areng Tameuh my ly, "Kai i hengra y tauh iy vaineng ka-abeu i, khumi kamngo i dei nai ly kakawn y leang, khumi kamngo naini mymy i ngai nai lam mang i nai hi vui iy heng thai ai nai kangai," ang napi. (Ezekiela 33:11) Areng ly ... ami ai py ang tama hai ai nai ngai y i, khumi bawi bawichi uikhei ai nai ngai nai, nangmychi ai ang kham pi nai teu. (2 Petera 3:9) Nangchi i kamngochi ly tama hai thai ai nai uikhei u ly, ali u teang jau. (Amtaw 3:19) Vai ly meingtym tleirei i khumi bawi bawichi ai uikhei ai nai leu Tameuh my ang pei bo. (Amtaw 17:30)

(11) Tameuh my kamngo molam y ka-vo sa pi bo a? Tameuh my khaileaung pri y khri khri pa-rei tamen, hunaibaly my i Chapo leaungrei awm khyh nai pei keih, ami py mymy ai ym nai ngierei ly tamo y ai, deungtasarei hengra nga lawh ai. (Johan 3:16) Achi khumi kamngo nai thym khala y Krista ly achi i vui y deipi nai deaungkho y, Tameuh ly mymy i achi ai ang tamen nai ly palo ai ataing nai amteng hai. (Rom 5:8) Krista ly Tameuh i cha-iu leu kamta my achi i kamngo nai deaungkho y dei i up bo; naibaly Tameuh i cha-iu leu kamta mymy ai kani thomrei kani y pathau. (1 Korinth 15:3-4) Khumi i Chapo malawm py mymy ai sabawm ai nai hau nai ny y i, kalangchi ai sabawm ai nai hawi, khumi neang neangchi ai atleu ai nai mymy i hengra pei lawh ai nai py ang jeu nai ne. (Marka 10:45)

(12) Hengra nga ai nai mana sa ai nai tla mo? Areng Isu ai ym, hunaibaly nang hengra nga ai. (Amtaw 16:31) Areng Isu my ly: "Kai ly katheu pa-kho ne; ami py kai i saho y kun baly lawi hai ai," napi. (Johan 10:9) Isu ly Areng ne, na nai nang ly nang i labeaung y pany hai iy, Tameuh my mymy ai ly kadeichi theung i nai pathau, na nai paleung y ym baly, nang ly hengra nga ai. Amichi my paleung y ym u iy hawi naira nga: naibaly labeaung y pany hai u iy heng naira nga. (Rom 10:9-10) Tameuh my achi i ati ti kahawi sa nai deaungkho y ny y naimy mymy i pahen nai kamta khyp naimy ang paheng bo. (Tita 3:5)

(13) Krista my achi ai lawi hai ai nai ati mana nai dei ai nai tla mo? Isu Krista ly achi i taphra naira bawi bawi i dengdairei achi ai atleu thai ai nai ... achi i vui y apei bo. (Tita 2:l4) Thi theu nai ny y baly pipi pahen naira by y leang bo. (Hebrai 9:22) Krista i thi vang teng parai nai hawi nangchi ai atleu nai ne. (1 Petera 1:19) Krista ly amymy ai apathyp nai deaungkho y kamngo tama hai vui ai nai tlenrei my ni ai amteng hai bo. (Hebrai 9:26) Krista ly achi ai Tameuh teng y ang pahawi thai ai nai kamngo nairachi deaungkho y tlenrei patang, khumi kahawi ly hawi y naichi i vui y. (1 Petera 3:18) Tameuh my Krista y khaileaung pri ai ly amymy hawi aly hai nai ne. (2 Korinth 5:19)

(14) Lawi hai ai nai lam takhra awm a? Nazaret Isu Krista i amyn ... Takhra ami teng y py pahengra by y leang, kani anui y khumi amyn pathi naichi theung y achi ai paheng ai nai amyn takhra ha py by y. (Amtaw 4:10, 12) Isu my: "Kai ly lam py, leu meitang py, hengra py ne. Kaimy ny y baly ami py Ngaai teng y tym vai y," napi. (Johan 14:6) Tameuh ly harei khyh, Tameuh hawi khumichi hawi sala y savai leaungrei awm khyh teang, mymy py khumi, Isu Krista ne, ni ly khumi bawi bawichi i atleu naira lawn ai nai apei bo. (1 Timothei 2:5-6)

(15) Achi i kamngo ang pahen bo, na nai pany khyp pajau a? Isu ai ly achi i kamngo nai deaungkho y patiu hai i, achi ai eaung naira nga hai ai nai pathau nai bo. (Rom 4:25) Ni ly kamngo pachai nai bo y salo mang y Tahm Asang Keh Nai i lamtang mang y ateh bo. (Hebrai 1:3) Ami py mymy ai ym nai ngierei ly mymy i amyn deaungkho y kamngochi pahen naira nga ai, na nai hini satang ly amo bawi bawichi my pany hai ly. (Amtaw 10:43) Nidym hawi nisi palo nai kamta, achi i kamngo py achi hawi ang tasyh vui bo. (Sam 103:12) Tameuh my deungtasarei hengra ang pei i, huni hengra ly mymy i Chapo teng y awm. Nangchi ly hengra nga bo, na nai apany u thai ai nai, nangchi Tameuh i Chapo i amyn y ym nai keungchi teng y ly hini katajiu nai ne. (1 Johan 5:11,13)

(16) Isu Krista ly mymy ai ym naichi teng y ati ti pei mo?

a. Kamngo pahen naira; Tameuh hawi aly naira Hini khumi (Isu Krista) i saho y kamngo pahen naira leu nangchi teng y thuipi nai he; ami py ym nai ngierei ly ati cheaungkhang ra y Mosi i Reita y eaung hai naira awm thai y nai ly mymy ly eaung hai bo. (Amtaw 13:38-39) Hunaibaly ym naira deaungkho y eaung naira nga iy achi ly achi i Areng Isu Krista i saho y Tameuh hawi aly naira nga bo. (Rom 5:1) Awm nem naira kang daw pi mang; kaimy i awm nem naira kang pei. (Johan 14:27)

b. Deungtasarei hengra Tameuh my deungtasarei hengra ang pei i, huni hengra ly mymy i Chapo teng y awm, na nai ly pany hai naira ne he. Chapo ai nga nai keung ly hengra py nga teang; Tameuh i Chapo ai ngo y nai keung ly hengra py ngo y leang. (1 Johan 5:11-12) Meitang khyp khyp kang thuipi, ami py kai i leu thai iy, kai ai pato nai keung ai ym nai ngierei ly deungtasarei hengra nga bo, sum py sum y ai, na i py dei naira i nai theu iy heng naira y kun bo. (Johan 5:24)

ch. Tameuh i chanau lawn ngau ai nai Mymy ai kawn iy, mymy i amyn y ym nai ngiereichi ai ly Tameuh i chanau lawn thai ai nai ang pei; nichi ly thi i tapen nai py ny y, tlang i kangai y tapen nai py ny y, khumi i kangai y tapen nai py ny y, Tameuh i tapen nai teu. (Johan 1:12-13) Neng angym khyp khala y ly achi ly chanau lawn ai naira nga thai ai nai, Reita i anui y awm naichi ai ly atleu ai nai, Tameuh my mymy i Chapo ai, neampachy my tapen nai, Reita i anui y tapen iy pato bo. Naibaly nangchi ly chanau ne u nai deaungkho y Tameuh my mymy i Chapo i Phailo ai ly Abba, Ngaai, na nai aeu naimy achi i paleung y ang pato bo. (Kalatia 4:4-6)

d. Hengra kangtha Ami py Krista y awm baly mymy ly kangtha lawn bo; ati ti kangngymchi ly tama vui bo; khen u cham, nichi ly kangtha lawn veng bo. (2 Korinth 5:17) Phailo Kachai achi teng y ang pei nai Tameuh i tamen naira ly achi i paleung y ang lei chum nai bo. (Rom 5:5) Phailo y tako u, hunaibaly nangchi ly tlang i ngai phi teng y nai patawm u y ai. (Kalatia 5:16)

(17) Hini hengra kangtha khaw hai ai nai sai mana awm mo? Areng y hawi mymy i atho y ly ham parai naimy awm u. Diabola i parawi paryp naira y ly nangchi angdo u pajau ai nai, Tameuh i tavai ateaung kangym amthyp u. (Ephesi 6:10-11) Parawi naira y kun u y ai nai ajeng u rym paryp naimy chiu so u; phailo my ly angjeng i. Hang my ly ham y. (Matthai 26:41) Hini khaileaung pri i reita kamta awm u moh ly; huna ny y naimy nangchi ly Tameuh i kangai meitang nai hawi, kawn ai ataing nai hawi, hawi angym nai py dawn u cham thai ai nai paleung kangtha awm iy, takhra u veng jau. (Rom 12:2) Achi i Areng hawi Paheng Keung Isu Krista i pahenra y hawi pany naira y py veangu. (2 Petera 3:18) Tameuh i cha-iu leu bawi bawi ly Tameuh i taho hai nai kamhui ne, naibaly Tameuh ai dawn nai khumi ly ati ti kahawi cheaungkhang sa ai nai angym pa-rei my amthyp angym thai ai nai, patiu naira y hawi, sum hai naira y hawi, parip naira y hawi, ati ti kahawi patiu naira y ly chawn nai ne. (2 Timothei 3:16-17)

(18) Kani tleirei amhi amtlau nai sai molam y Kristianchi ai sabawm ai nai ly ati awm mo?

a. Kani tleirei y Tameuh i cha-iu phain nai y Isu ly: "Nangchi ly kai i leu y awm jo baly kai teng y abang nai khumichi ne khyp bo; nangchi ly leu meitang pany ai i, leu meitang my ly nangchi ai miseaung alaw hai ai," napi. (Johan 8:31-32) Hu i khumichi ly ... hawi kyh, ati mana nai mo na baly nichi ly paleung kawn parai naimy huni leu tangai iy, huni satang thuipi nai ly teng mo teng y mo, na nai Tameuh i cha-iu y kani tleirei hau U. (Amtaw 17:11) Achi ly Tameuh i cha-iu deaungkho y kham pajau naira hawi awm nem naira nga iy, athang khai naira nga thai ai nai, jangni i tajiu nai ngierei ly achi ai ang patiu ai nai tajiu nai ne. (Rom 15:4)

b. Kani tleirei y chiu sa nai y Atho si y naimy chiu sa jo jo ai nai tia, na nai pany hai ai nai Isu ly mychi teng y pata nai leu thui. (Luka 18:1) Achi ly pahenra nga thai ai nai hawi, aly aeang nai neng khala y pahenra i sabawm naira nga thai ai nai py, pahen naira areng atehra mang y vam parai naimy kasa u sina. (Hebrai 4:l6) Isu ly, "Nangchi ly kaimy teng y awm jo iy kai i leu nangchi teng y awm jo teang baly, nangchi i ngai nai ngierei ly hnei u, nangchi i vui ang sa pi ai," napi. (Johan 15:7) Ampo ai ly Chapo deaungkho y palo thai ai nai, kaimy i amyn y nangchi i ati py hnei nai ngierei ly kang sa pi jo jo ai. Nangchi ly kaimy i amyn y ati py hnei baly kaimy kang sa pi jo jo ai. (Johan 14:13-14) Nangchi theung y ami py cheng naira avaw baly, khumi bawi bawi teng y jo y nai hawi pasai y naimy pei reng nai keung Tameuh teng y hnei sy, naibaly ang pei takeng kei ai. Na i py ym thai y nai den py by y naimy, ym naimy hnei sy. (Jakob 1:5-6) Ati sai py paleung bi u moh; ati cheaungkhang ra y chiu sa nai hawi hnei nai ly kawn nai leu thui nai abawi iy, nangchi i ngai nairachi ly Tameuh teng y pany hai nai awm sy. (Philipi 4:6)

ch. Phailo Kachai my ly awm hai nai y Isu ly, "Kaimy Ampo teng y hnei ai i, deungtasa khrairei nangchi teng y awm jo ai nai Awm Hai Nem nai Keung takhra ang pei ai. Huni ly Leu Meitang Phailo ne," napi. (Johan 14:16-17) Nangchi theung y awm nai, Tameuh teng i dengdairei nga nai Phailo Kachai i awm naira ly nangchi i tlang ne, na nai nangchi pany y nai sai a? Nangchi ly nangmychi i py ny y leang, nangchi ai ly vang y ang van nai ne; hunai deaungkho y nangchi i tlang y ly Tameuh ai palo u. (1 Korinth 6:19-20) Phailo i athai ly tamen naira hawi, amo theu naira hawi, awm nem naira hawi, amnym naira hawi, neaung hawi naira hawi, hawi naira hawi, ka-ym awm naira hawi, leu anui naira hawi, amkym thai naira hawi ne. (Kalatia 5:22-23)

d. Tameuh ai chiu nai hawi mymy i kangai sa nai y Hunaibaly mymy i saho y palo naira ly apathyp naira lawn ai nai Tameuh teng y talam u reng sina, huni ly ni i amyn apha y nai labeaung athai ne. Na i py ati ti kahawi sa ai nai hawi, ati ti paawh y naimy tami u moh, hunai kamta apathyp naira y ly Tameuh ly khri khri paleung hawi na. (Hebrai 13:15-16) Tamen naira y hawi ati ti kahawi sa naira y py apachei ai nai dawn u leungtang sina; achi ly phyreichi i sa nai kamta achi i ach-u nai ly anawn vui y naimy apachei ahawi sina; kani ly kasa ryh kasa ryh, na nai dawn pany iy, hunai kamta khri pa-rei atho so u. (Hebrai 10:24-25) Khaw parai pa-rei, amchyh lei y pa-rei my Areng i kalop y ly sa ra sa ra jo jo ai nai awm u, nangchi i sa akawm nai ly Areng y ly jawm sum vai y, na nai nangchi pany. (1 Korinth 15:58)

e. Kamngo hawi parawi naira pajau ai nai Krista ai ym nai y Hunaibaly Tameuh i kangai awm u; na i py diabola ai ly paka u, hunaibaly ni ly angpreng veng ai mang. (Jakob 4:7) Khumi i kham pajau ai nai ryrei ny y baly, parawi naira na nai ly nangchi i tlang tleaung y pipi tym vai y leang. Na i py Tameuh ly ka-ym awm nai ne, ni my ly nangchi i kham pajau ai nai ryrei ny y baly parawi naira avum ai nai pei y ai; na i py nangchi kham pajau thai ai nai, parawi naira hawi vanrei nangchi i theu ai naira lam ang sa pi ryp ai. (1 Korinth 10:13) Khaileaung pri ai pajau iy eaung naira ly achi i ym naira ne. (1 Johan 5:4) (Isu Krista) kyp kyp ly parawi naira avum iy patang chum nai deaungkho y, parawi naira avum naichi ai ang sabawm pajau. (Hebrai 2:18) Achi ly achi i kamngochi ahui baly, mymy ly achi i kamngochi pahen ai nai hawi, achi i hawi y naira bawi bawi pachai ai nai py ka-ym awm nai hawi, hawi nai py ne. (1 Johan 1:9)

f. Krista i satang pany hai nai y Isu ly: "Kai tengy abang hawi, hunaibaly khumi patiu nai sara y kang palawn ai," napi. (Marka 1:17) Nangchi ly kai i leu pany hai nai keungchi lawn ai. (Amtaw 1:8) Nang i yhm y vawi ly, Tameuh my nang i vui mana tanrei ang sa pi nai sai ly thuipi. (Luka 8:39) Amichi i mo y kai ai apha y nai ngierei ai ly kani pri mang i Ngaai i mo y kaimy apha hai y teang ai. (Matthai 10:32) Khaileaung pri verei y chei u ly, Tameuh i sa naichi bawi bawi teng y Satang Kahawi thui u. (Marka 16:15)

(19) Vai mo mang y mana awm ai mo?

a. Ym nai khumi my ly del ryp nai bo y ma y awm ai mo? Isu my ly mymy teng y, "Meitang khyp kang thuipi, vaini ly nang py kai teng y Paradais y awm teang ai mang," napi. (Luka 23:43) Achi i awm nai khaileaung i yhm ly aphrei iy py, kani mang y kiu so y nai, deungtasarei awm ai nai, Tameuh teng i yhm awm, na nai achi pany. Kaichi ly paleung sorai nai awm kana nai ne: kaichi ly tlang y awm y nai, Areng teng y awm ai nai ngai keh. (2 Korinth 5:1,8)

b. Krista ly satla bi ai, na nai adeu nairachi awm a? Ngaai i yhm y awmra neang neang awm; by y nai khaly kaimy kang thuipi ai bo; nangchi i vui meingtym sa rym ai nai kai chei ai bo he. Naibaly kai chei iy nangchi i vui meingtym sa rym baly, nangchi py kai i awmra y awm thai ai nai, kai kang jeu bi ai i nangchi ai py kai teng y kang laai. (Johan 14:2-3) Areng mymy kyp kyp ly aeu nai katyn hawi, kani pri i amtaw thau nai salo keh i raawi hawi, Tameuh i baw katyn hawi kani mang i dengdairei ang satla kathiu ai; naibaly Krista y dei chum naichi ly angthau u man ai: huni bo y ly achi vai heng naichi ly Areng ai langchum ai nai kani laileaung y mymychi hawi vanrei khupanym theung y achi ai ang la kalau ai; hunaibaly achi ly Areng teng y deungtasarei awm jo jo ai. (1 Thesalonika 4:16-17) Achi i khuteng sa nai ly kani pri mang y ne; achi ly Paheng Keung, Areng Isu Krista ai ly hu i dengdairei satla ai nai ajeng jo jo nai ne. (Philipi 3:20) Hini Isu, nangchi teng i dengdairei kani mang y pahawi kalau nai ly, kani mang y kalau nai nangchi i niu nai kamta mymy ly ang jeu takeng kei teang ai. (Amtaw 1:11)

(20) Amkym ryp ai nai satang Isu ly: "Tlang y padei iy, huni bo y ati takhra so bi thai y naichi ai ly jei u moh; na i py nangchi ly ami ai jei ai nai tla mo, na nai kang thuipi rym ai; padei nai bo y py ngari angawm y aphi bi pajau ai nai keung ai phai jei u; ne, huni ai phai jei u, kang napi kai ly" napi. (Luka 12:4-5) Khumi i vui ly tlenrei dei ai nai khai yb nai ne i, huni bo y ly tarachih ai tia nai ne. (Hebrai 9:27) Achi bawi bawi ly Tameuh teng y amymy i satang thuipi bawi bawi ai nai tia. (Rom 14:12) Isu ly, "Ami py kai ai ngai y iy kai i leu thui naichi py tangai y baly, ni ai pasum nai keung leaungrei awm; kai i leu thui nai ly huni leu kyp kyp my kani kangkhym y ly mymy ai pasum ryp ai," napi. (Johan 12:48) Nangchi py uikhei y baly hunai kamta tama be ai. (Luka 13:3)

(21) Paheng Keung my palau nai Nangchi akawm naichi hawi myn kaji pho nai bawi bawichi awi, kai teng y jeu u, kaimy anawn hai namang. Kai i langvui apatli u ly, kai teng y amtiu u; kai ly paleung jyp jyp nai hawi tahm apanem parai nai he: hunaibaly nangchi i phailo i vui anawn naira nga u ai. (Matthai 11:28-29) Kai ly heng nai tako ne: ami py kai teng y jeu nai ly biu anglam y ai, ami py kai ai ym nai ly mana khala y py tui ahai y ai. Ami py kai teng y jeu nai ai ly den py kapatheu y ai. (Johan 6:35,37) Khen cham, kai ly katheu ahawi y angdo i katakhei: ami py kai i raawi thai iy katheu paeaung pi baly, kai ly mymy teng y kun iy mymy teng y biu cha ai i, mymy py kai teng y cha teang ai. (Amteng nai 3:20) Hini cha-iu chy theung y tabawi nai leu ly Baibul Kachai, Tameuh i Cha-iu theung i nai nga nai ne, naibaly ka-thui ka-thui y paji pi bo. Tameuh i Cha-iu nga iy phain ai nai kang pachei ba, ati mana nai mo na baly huni ly khumi bawi bawichi teng y Tameuh i satang amteng hai ai nai leu ne khyp.