1 Putna khan Chawng kha ruawm, Chawng kha Pathien le ruawm, khan Chawng kha Pathien runih. 2 Putna khan ama kha Pathien le ruawm. 3 Ama na irikip kha rumijir. Khan ama jaw boi a konsha `khatshe ruchangthiei mak. 4 Ama dieng ringna kha ruawm. Makha ringna kha miring hai rang a mieivar kha runih. 5 Mieivar kha na jingna mun a avar. Khan ajing kha na makha rumawtawr mak. 6 Pathien ah put ah tir miring `khat ruawm. Ama riming kha John ruti. 7 Ama jar a mi kholok na takashawnna rang le Mieivar chungchanga kungchangna rang, kungchangna `khat a ajong runih. 8 Ama kha Mieivar kha runimak, inia Mieivar chungchanga kungchangna rang a ajong runih. 9 Ama kha manmieshie shung a ajong mi rikip mavar, adik Mieivar kha runih. 10 Ama kha manmieshie hin ruawm. Khan ama jar a manmieshie hi irukon inih. Inia manmieshie na ama kha rujet mak. 11 Ama miringtak hai dieng a ajong runih, khan ama miringtak hai kha na ama kha ruloi u mak. 12 Khania ama kha iruloi a ama riming a takashawn hai kholok dieng khan, Pathien nai hai changna cham kha rupek. 13 Amani kha thishen, taksha mulungmining, khan miring mulungmining ah put ah rushok nih u mak, inia Pathien ah put ah shok runih uh. 14 Khan Chawng kha taksha ruchang a nakar ua ruawm. Apa ah put ah shapa `khatte lurna ang a numpokmirit le adik shipmer, ama lurna kha kieini na numuk u joi. 15 Ama chungchanga John na kungruchang, khan ama na ra`ai a ruti, “Mahipa chungchanga keng ‘Kanuk a avapa hi kieinek a rashangdet,’ tia kiruriei kha. Ajarla ama kha kamatieng ruawm joi.” 16 Ama shipna ah put ah nokholok na numpokmirit kha lawmlawm a nurumuk u joi. 17 Ajarla Dan kha Moses jar a nurupek uh, khan numpokmirit le adik kha Jesu Christa jar a jong inih. 18 Tute na`awm Pathien kha rumuh maklai. Apa mulungshom a awm Shapa khatte kha na ama kha rumalar joi. 19 Khan “Tumaw nangnih?” tia rawdawn rang, Jerusalem ah put ah Jihudi hai na thiempu hai le Levi miring hai kha rutir phakhan, John kungchangna kha hi inih: 20 Ama na ruruphong, khan jawt boi ruthaw mak, inia rurophong, “Kiei hi Christa kha nimi`ing.” 21 Khania ama dieng rurawdawn uh, “Khanitala nang tumaw nangnih? Elijah kha maw nangni?” Khan ama na ruti, “Nimi`ing.” “Thiempulien kha maw nangnih?” Khan ama na rumashang, “Nimi`ing.” 22 Khashole ama dieng rurawdawn uh, “Nojongtir hai dieng kamashangna u rang, nang tumaw nangnih? Nang nining a tumaw kanih nangti?” 23 Ama na ruti, “Thiempulien Isaiah na iruriei kha ang a, kiei hi ‘Ramthim ah ra`ai hesho `khat kha kanih: “PUMI lam kha moton pe roh.” ’ 24 Ijongtir miring hai kha Pharisee hai ah put ah runih uh. 25 Ama dieng rawdawn a ruti uh, “Christa kha nangnih nawk a, Elijah kha nangnih nawk a, khan Thiempulien kha nangnih nawkala, ijar a baptisma nangipek maw nih?” 26 John na mashang a amani dieng ruti, “Kiei na tui a baptisma kenepek uh, inia nang kar ua miring `khat ading kha jet u makche. 27 Ama hi keng kanuk a ava rang a kieinek a rashangdet kha, ama kekawkrui thut rangshe kiei rutuk mi`ing.” 28 Hihaihi John na baptisma irupek a ruawmna Jordan vara ah awm Bethabara ah ashok chon runih. 29 Jing tieng hin John na ama awmna tieng Jesu ava kha muk a ruti, “Enro! Manmieshie munu achawi Pathien Kengamte khaw! 30 Ama chungchanga keng kiei na kiruti, ‘Kanuk ah ava miring khaw kieinek a rashangdet, ajarla ama kha kamatieng ruawm joi.’ 31 Kieitak na ama kha rujet mi`ing, inia Israel dieng ama kha larnathiei rang, tui a baptisma apeh jong kanih.” 32 Khan John na kungchang a ruti, “Ratha na vashu ang a ravan ah put ah jong chum a ama chung ah awm kha kurumuk. 33 Kiei na ama kha rujet mi`ing, inia tui a baptisma mawthaw rang a nojongtirpa kha na kiei dieng nururiei, ‘Ratha na jong chum a ama chung ah awm nangimukpa kha na keng Ratha Riethieng le baptisma ipek rang a kha.’ 34 Kieitak na kurumuk joi, khan kungkuruchang joi, makhala ama hi Pathien Shapa kha inih.” 35 Jing tieng hin John na akhaichawi hai idi le ruding a ruawm. 36 Khan Jesu apang kha muk phakhan, ruti, “Enro, Pathien Kengamte khaw!” 37 Khaichawi idi na mahi iriei kha rujet u `le, Jesu anu kha rujui u joi. 38 Jesu na vak hiei a amani na ivakjui u kha rumuk phakhan, amani dieng ruti, “Imaw nangitawk uh?” Ama dieng rumashang uh, “Rabbi” (nemele a niti `le, Oja tina inih), “khoshekawt ah maw nangawm?” 39 Amani dieng ruti, “Va u tana vak en u roh.” Khan ava ua ama awmna kha vak muk uh, khan khanikhan ama le ruawm u joi. Apha kha nidan shawm dawr runih. 40 John iriei kha rujet a ama anu rujui hai idi kar a akhat kha Simon Peter naipangpa, Andrew kha runih. 41 Ama ulienpatak, Simon kha akhat changna a vak muk a ama dieng ruti, “Messiah kha kumuk u joi” (nemele le Christa tina inih). 42 Ama kha Jesu dieng vat pui phakhan, Jesu na en a ama dieng ruti, “Nang Jonah shapa Simon kha nangnih. Nang hi Cephas tia koi rang a nangnih joi” (nemele le Peter tina inih). 43 Jing tieng hin Jesu na Galilee ah shena rang, rumawdawn. Khan Philip kha rumuk a ama dieng ruti, “Kanu nujui roh.” 44 Philip kha Andrew le Peter awmna Bethsaida ah put ah runih. 45 Philip na Nathanael kha muk a ama dieng ruti, “Moses na Dan shung ah le khan thiempulien hai na`awm ama jar a irumiejiek, Joseph shapa Nazareth Jesu kha kumuk u joi.” 46 Nathanael na ama dieng ruti, “Nazareth ah put ah atha maw shok nih?” Philip na ruti, “Va tana vak en roh.” 47 Nathanael na ama dieng ava kha Jesu na rumuk phakhan, ama chungchanga ruti, “Enro, ama dieng milem-midawina awm boi Israel miring diktak `khat khaw!” 48 Nathanael na ama dieng rurawdawn, “Itia nanginejet maw nih?” Jesu na mashang a ruti, “Nang kha Philip na nurukoi mala a, thieichangkung thoi ah nangruawmlai khan, kunurumuk joi.” 49 Nathanael na mashang a ama dieng ruti, “Rabbi, nang hi Pathien Shapa kha nangnih! Nang hi Israel Reng kha nangnih!” 50 Jesu na mashang a ruti, “Thieichangkung thoi ah kunurumuk kiti jar a takaninawshawn maw nih? Hinek hin a alien chon hai kha nangmuk rangnih.” 51 Khan amani dieng ruriei, “Diktak a nangni dieng kiriei inih, tun ah put ah ravan rawlawng le Pathien ravantir hai na Miring Shapa chung ah aka le achum kha nangmuk u rangnih joi.”
1 Nithum changna khan Galilee ah awm Cana ah moiloina `khat ruawm. Makhan Jesu nuawm ruawm. 2 Jesu le akhaichawi haiawm moiloina khan rukoi uh. 3 Ju hawng ravat phakhan, Jesu unu na ama dieng ruti, “Ju niei u lai mak.” 4 Jesu na ama dieng ruti, “Nupang, kiei le nang na nithaw rang imaw awm? Kapha kha jong shok maklai.” 5 Unu kha na shepding hai dieng ruti, “Ama na nangni dieng iti`iti kha thaw u roh.” 6 Jihudi hai riethiengna dungjuia litre shawm shirilieirahnga ninawkle rajakhat shawmlieirahnga akeng lung baibe `ruk rumiding uh. 7 Jesu na amani dieng ruti, “Baibe hai kha tui miship u roh.” Khan amani na khahaikha rumishipmer uh. 8 Khan ama na amani dieng ruti, “Tun vak lok u tana shepulien dieng chawi u roh.” Khan amani na ruchawi uh. 9 Shepulien na ju rachangsha tui kha tuidan ruen phakhan, khoshekawt ah maw nih, iti rujet mak (inia tuilok shepding hai kha na tu rujet uh). Khan shepulien kha na moipa kha rukoi. 10 Khan ama dieng ruti, “Mi rikip na mashapek a ju athadet eshem, khan khawp phakhan, acham shemngai. Inia ju athadet kha tunshe nangtetlai.” 11 Jesu na akhat changna ama jetna kha Galilee ah awm Cana ah ruthaw. Khan ama lurna kha rumalar a akhaichawi hai kha na ama kha takarushawn uh. 12 Khashole unu, anaipang hai, khan akhaichawi hai le Capernaum ah rushe uh. Makhan nikho ashawt ruawm u mak. 13 Jihudi hai Rakanna kha hawng nai le roroia, Jesu na Jerusalem ah ruhawng joi. 14 Riethiengmun roko shung khan shiecha hai, kengam hai, pharphali ajor miring hai, khan shierleshier rotho miring hai rushuh u kha vak muk. 15 Ruiro le jemna rang rukon a riethiengmun roko ah put ah amani kholok kha runawt. Kengam hai le shiecha hai dire, khan shierleshier rotho hai shiernawi hai kha rubun pe a amani tebol hai kha shukthala a rutet pe. 16 Pharphali ajor miring hai dieng ruti, “Hihaihi hin ah put ah shok pui u roh, kapa in hi rievieithawna in machang u naw roh.” 17 Irumiejiek kha akhaichawi hai na rumininghep uh, “Nang in rang a ditrangai kha na kiei hi nakang joi.” 18 Khashole Jihudi hai na mashang a ama dieng ruti uh, “Hihaihi nangthaw jar a kieini dieng jetna imaw numumuk ngam u rawng?” 19 Jesu na amani dieng ruti, “Mahi riethiengmun hi shiet u roh, khan ni `thum shung a kiei na mothoi rang kanih.” 20 Khashole Jihudi hai na ruti uh, “Mahi in mothoina hin kum shawmmililieiruk rulut, nang na mahi ni `thum shung a mothoi rang maw?” 21 Inia makha ama pum riethiengmun jar a irurieina inih. 22 Ama na athi ah put ah hawng thoi shole, iruriei kha akhaichawi hai na rumininghep uh. Khan Miejiek le Jesu na iruriei chawng hai kha takarushawn uh. 23 Rakanna rohoi shung a ama na Jerusalem ah ruawmlai khan, ama na jetna iruthaw hai kha rumuk u jarkhan, mi tampui na ama riming kha takarushawn uh. 24 Inia Jesu na tu amani dieng rurepeh mak, ajarla ama na mi kholok kha rujetviek. 25 Khan ama rang tu tukhat na miring chungchanga kungachang rang a kha rangai pe mak. Ajarla miring mulung shung a awm kha imaw nih, iti kha ama na ijet inih.
1 Nicodemus iti Pharisee miring `khat ruawm. Ama kha Jihudi hai lamkai `khat runih. 2 Jan a Jesu dieng ava a ruti, “Rabbi, Pathien ah put ah ajong Oja `khat nangnih, iti kejet uh. Ajarla jetna nangithaw hai hi Pathien na ama dieng awm pui nawkatu tute na thaw ngam naw nih.” 3 Jesu na mashang a ama dieng ruti, “Diktak a nang dieng kiriei inih, tute na athar a shok joi nawkatu, Pathien rengchangna kha muh ngam naw nih.” 4 Nicodemus na ama dieng ruti, “Miring `khat na atar phakhan, itia maw shok ngam nih? Unu vawn shung ah lutthep a shok ngam nih maw?” 5 Jesu na rumashang, “Diktak a nang dieng kiriei inih, tukhat na tui le Ratha ah put ah shok joi nawkatu, Pathien rengchangna khan lut ngam naw nih. 6 Taksha ah put ah ashok kha taksha inih, khan Ratha ah put ah ashok kha ratha inih. 7 Nang dieng ‘Athar a ashokngirret rang nangnih,’ kiti hin shindawngna niei naw roh. 8 Rithi na iditna mun tieng ajap, khan imiri kha nangjet. Inia khoshekawt ah put ah ahawng a khoshekawt tieng ah ashe maw nih, iti kha jet makche. Hitihin Ratha ah put ah ashok mi rikip kha hi le ra`ang inih.” 9 Nicodemus na mashang a ama dieng ruti, “Hihaihi itia maw nithiei nih?” 10 Jesu na mashang a ama dieng ruti, “Nang Israel oja `khat nangnih, inia hihaihi nangijet boi maw nih? 11 Diktak a nang dieng kiriei inih, makhala kijet u kha kiriei u inih, khan kimuk u khan kungkachang u inih. Khan nangni na kukungchangna u hi loi u makche. 12 Rieliei nieinak chungchanga kienieriei u phakhan, nangni na takashawn u makche, itia maw ravan nieinak chungchanga kiriei hin takashawn u rawng? 13 Ravan ah put ah jong chum ama niboia, ravan a aka tute awm maklai. Makha ravan a awm Miring Shapa kha inih. 14 Ramthim ah Moses na moro irulawm kha ang a, Miring Shapa kha`awm ilawmngir rang a inih. 15 Khajarkhan tunita`awm ama takashawn kha na thangna niei naw nih, inia kumshawt ringna kha muk rangnih. 16 “Pathien na manmieshie hi hitihin numrupok jarkhan, ashapa khatte kha irupek inih. Makha tunita`awm ama takashawn kha na thangna niei boi a kumshawt ringna kha mukna rang a inih. 17 Ajarla Pathien na ashapa kha manmieshie chung a chawngshat rang a ijongtir nimak, inia ama jar a manmieshie na ringna kha muknathiei rang a inih. 18 Ama takashawn miring kha chawngshat pe mak, inia takashawn boi kha tu chawngishat pesho nih joi. Ajarla Pathien Shapa khatte riming kha takarushawn u mak. 19 Chawngshatna kha hi inih, makhala manmieshie a mieivar kha jong joi. Inia miring hai na ajing kha mieivarnek khan numrupok uh. Ajarla amani chonthaw u kha rutha pe u mak. 20 Ajarla ashie thaw mi rikip na mieivar kha raha pui. Khan amani chonthaw hai kha malangna boi rang, mieivar khan va u mak. 21 Inia amani chonthaw hai kha Pathien jar a ithaw inih, iti kha larna pe rang, adik thaw miring kha na mieivar khan ava inih.” 22 Hihaihi shole, Jesu na akhaichawi hai le Judea ram tieng rushe joi. Khan kha mun khan amani le ruawm, khan amani kha baptisma rupek a ruawm. 23 Johnawm Salim dieng ah awm Aenon khan baptisma pek a ruawm. Ajarla kha mun khan tui tampui ruawm. Mi hai kha na va ua baptisma ruloi uh. 24 Ajarla John kha lungroko shung ah thong u maklai. 25 Khan riethiengmashakna chungchanga Jihudi hai le John khaichawi hai na chawngrieshietna rumothoi uh. 26 Amani na John dieng va ua ruti uh, “Rabbi, Jordan vara ah nang le ruawm a kungnichangnapa kha na, enro, baptisma rupek a mi kholok na ama dieng rushe u joi.” 27 John na mashang a ruti, “Ravan ah put ah ama dieng ipek niboia, tute na iawm muh ngam mak. 28 ‘Kiei hi Christa kha nimi`ing,’ inia ‘Kiei hi amaton ah inurutir inih,’ kiruti chungchanga kungnangruchang uh. 29 Moinu anieipa kha moipa kha inih, moilawm kha na iding a chawng rangai phakhan, moipa hesho a iningaina kha lien pe. Khajarkhan kiningaina kha rupum joi. 30 Ama kha rashang shishitngir rangnih, inia kiei tu kerede shishitngir rangnih. 31 “Chung ah put ah ajong miring kha na kholok chung a awm. Rieliei ah put ah awm kha rieliei tah inih, khan rieliei chungchanga ieriei. Ravan ah put ah ajong miring kha na kholok chung a awm. 32 Imuksha le irangaisha khan kungruchang, inia tute na ama kungchangna kha ruloi pe mak. 33 Ama kungchangna aloi miring kha na Pathien hi adik inih, tia jetnam kha nam joi. 34 Ajarla Pathien na ijongtir miring kha na Pathien chawng hai kha ieriei, ajarla Pathien na Ratha kha ama dieng danlak boi a ipek inih. 35 Apa na ashapa kha numpok a irikip kha ama khut ah rupek joi. 36 Ashapa takashawn mi kha na kumshawt ringna kha ieniei, khan ashapa chawng ajui boi mi kha na ringna kha muh naw nih, inia ama chung a Pathien lunghangna kha awm.”
1 Khashole Jesu na Johnnek a arawpdet khaichawi kon a baptisma pek joi, tia Pharisee hai na nokor a irujet u kha Pumi na rujet phakhan 2 (Jesu amatak na baptisma rupeh mak, inia akhaichawi hai na irupek inih), 3 ama na Judea kha mathan a Galilee ah rusheret joi. 4 Khan Samaria kha phaw a ama ashe rang a inih. 5 Khajarkhan Jacob na ashapa Joseph dieng a irupek ram dieng ah awm, Sychar iti Samaria kho khan rushe joi. 6 Makhan Jacob tuikhur ruawm. Jesu na ama khomijinna khan rushaw jarkhan, tuikhur dieng khan shawmuchum a ruawm. Apha kha nidan `ruk dawr runih. 7 Samaria ah put ah nupang `khat hi tuilah ava. Jesu na ama dieng ruti, “Nek rang tui nepeh roh.” 8 Ajarla akhaichawi hai kha khopui ah nekleshak rawchawh rushe uh. 9 Khashole Samaria nupangnu kha na ama dieng ruti, “Itia Jihudi miring nang na Samaria nupang kiei dieng hin nek rang tui nangininik maw nih?” Ajarla Jihudi miring hai na Samaria miring hai le rawlawpngai mak. 10 Jesu na mashang a ama dieng ruti, “Nang na Pathien khutchawi le nang dieng ‘Nek rang tui nepeh roh,’ tia ananipa kha tumaw nih, iti kha nangrujet joiatu, ama dieng nangrunik a tuiring kha nurupekawm jawt joi.” 11 Nupangnu kha na ama dieng ruti, “Oja, tuilok niei makche, khan tuikhur hi uthuk. Khoshekawt ah makha tuiring kha nangimuk maw nih? 12 Kieini dieng a mahi tuikhur nurupeh, amatak na anai hai le ama uilear hai le hin ah put ah runeh, kapa u Jacobnek a lien maw nangnih?” 13 Jesu na mashang a ama dieng ruti, “Tunita`awm mahi tui aneh miring kha na tuirana nieiret rangnih. 14 Inia kiei na kipek rang a tui aneh ama kha na tu, tuirana shukniei a nieilai naw nih. Khania kipek rang a tui hi na ama dieng kumshawt ringna rang a aput jawnjai tuinar kha chang pe rangnih.” 15 Nupangnu kha na ama dieng ruti, “Oja, tuira`awm kienieina boi rang, khan hi mun hinawm tuilah kavatna boi rang, makha tui kha kiei dieng nepeh roh.” 16 Jesu na ama dieng ruti, “She tana nang inkopa kha vak koi roh, khan hi mun hin va roh.” 17 Nupangnu kha na mashang a ruti, “Inkopa niei mi`ing.” Jesu na ama dieng ruti, “ ‘Inkopa niei mi`ing,’ nangiti kha adik inih. 18 Inkopa rahnga nangruniei joi, khania nanginiei khaw tu nang inkopa nimak, makha nangiti kha adik inih.” 19 Nupangnu kha na ama dieng ruti, “Oja, thiempulien `khat nangnih, iti kejet joi. 20 Kipilepu hai na hi lawn hin biekna runiei uh, inia Jihudi hai nangni na tu Jerusalem hi mi hai na Pathien ibieknangir rang a mun inih, nangti uh.” 21 Jesu na ama dieng ruti, “Aw nupang, takanawshawn roh, ajarla Apa kha hi lawn hinawm, khan Jerusalem a`awm biekna boi rang a pha kha jong nai joi. 22 Nangijet boi u kha nangbiek uh, khan kijet u kha kiebiek uh. Ajarla shandamna kha Jihudi hai ah put ah inih. 23 Inia pha kha jong shok joi, khan tun a pha hi nih joi. Makha pha khan Pathien abiehet miring hai kha na Apa kha ratha le adik a biekna niei rangnih. Hi ang hai hi keng Apa na abieh hai dieng a itawk kha. 24 Pathien hi Ratha inih, khan ama abieh miring rikip na ratha a le adik a ibiekngir rang a inih.” 25 Nupangnu kha na ama dieng ruti, “Messiah kha jong rangnih, iti kha kejet” (ama kha Christa tia ikoi inih). “Ama na jong phakhan, irikip kha kieini dieng rophong rangnih.” 26 Jesu na ama dieng ruti, “Ama kha nang dieng a chawng ariei, kiei hi kanih.” 27 Khalaitak khan akhaichawi hai vak shok u joi. Nupangnu le ruriebieh a ruawm khan shinrudawng pe uh. Inia tute na “Imaw nangitawk?” ninawkle “Ijar a ama le riebieh maw nangnih?” tia ruti u mak. 28 Khashole nupangnu kha na ama tuibe kha rumak a kho khan rushe joi. Khan miring hai dieng vak riei, 29 “Miring `khat na kiruthawsha chon kholok kiei dieng nieriei pe joi. Haro, vak en u rang roh, ama hi Christa kha ninih maw?” 30 Makhan kho ah put ah vak shok ua ama dieng rushe u joi. 31 Khakarkhan khaichawi hai na runik uh, “Rabbi, neh rang roh.” 32 Inia amani dieng ruti, “Nangijet boi u nekleshak nek rang, kiei na kieniei.” 33 Khajarkhan khaichawi hai kha na khatlekhat dieng ruti uh, “Tute na shak rang ivakchawi pe boi nimak maw?” 34 Jesu na amani dieng ruti, “Kiniei nekleshak hi tu nojongtirpa mulungmining athaw le ama chon rupummashak hi inih. 35 ‘Parrawkhawmna rang tha mili vatlai,’ nangiti u nimak maw? Enro, nangni dieng kiriei inih, nang ringrakanglam a en u roh, ajarla amani khaw rawkhawm rang, minsho joi! 36 Rawkhawm miringpa kha na lawh kha tum joi, khan ara kha kumshawt ringna rang, rawkhawm a awm joi. Makha avawrpa le rawkhawmpa kha na lawp `khat a ningaina rang a inih. 37 Ajarla mahin rieichawng kha adik inih: ‘Akhat na awvawr, khan shik `khat na rawkhawm.’ 38 Nangishin boi u ara kha rawkhawm rang, kunurutir uh. Shik miring hai na rushin uh, khan nangni na amani ishinna u kha nangnemna uh.” 39 “Ama na kiruthawsha chon kholok kiei dieng nururiei,” tia nupangnu kungchangna jar a makha kho ah awm Samaria miring tampui na ama kha takarushawn uh. 40 Samaria miring hai na ama dieng va u phakhan, amani dieng awmna rang, runik uh, khan kha mun khan ni `di ruawm. 41 Ama chawng jar a mi tampui na takarushawn uh. 42 Nupangnu dieng amani na ruti uh, “Nang chawngriei jar a takakishawn u nilai mak, ajarla diktak a ama hi rieliei Shandampa Christa kha inih, iti hi kieinitak na kejet u joi, khan kumuk u joi.” 43 Ni `di shole kha mun kha mathan a Galilee rulut joi. 44 Ajarla Jesu amatak na thiempulien `khat awmnatak khan richitna rumuh mak, tia kungruchang inih. 45 Ama na Galilee ah vat phakhan, Jerusalem rohoi `khat a iruthaw chon hai kha rumuk u jarkhan, Galilee miring hai na ama kha rupawm uh. Ajarla amaniawm rachang khan rushe u inih. 46 Khashole Jesu na tui kha ju imachangna mun, Galilee ah awm Cana kho khan varet. Capernaum khan, ashapa dam pe boi, rengmun ah chonpo miring `khat ruawm. 47 Jesu na Judea ah put ah Galilee ah va joi, iti rujet phakhan, ashapa kha madamnathiei rang, nojong pe roh, tia runik. Ajarla ama kha thimekai a ruawm nih joi. 48 Khajarkhan Jesu na ama dieng ruti, “Jetna le rekhekchon nangmuk joi nawkatu itikte nita`awm takanawshawn u naw tinih.” 49 Rengmun ah chonpo kha na ama dieng ruti, “Aw Pumi, naitepa thitmala hin nojong pe roh!” 50 Jesu na ama dieng ruti, “She rang roh, nang shapa kha dam joi.” Miringpa kha na Jesu na iruti kha takashawn a rushe joi. 51 Ojong chum le roroia, oshok hai kha na rurawtawng pui ua thangrukoi uh, “Nang nai kha dam joi.” 52 Khajarkhan hawng damna pha kha amani dieng rurekeche a ama dieng ruti uh, “Majan nidan shiri khan raitun kha na irumathan inih.” 53 Khajarkhan apa kha na Jesu na ama dieng “Nang shapa kha dam joi,” irutina pha kha inih, iti kha rujet. Khan ama na ama inshung kholok le takarushawn joi. 54 Mahi Jesu na Judea ah put ah Galilee ah vatlai a adi changna a iruthaw jetna kha inih.
1 Hishole Jihudi hai rohoi `khat ruawm, khan Jesu na Jerusalem ah ruhawng joi. 2 Jerusalem khan, Kengam Pakawt dieng ah awm, Hebrew chawng a Bethesda iti tomai`in rahnga a`awm, tuikhur `khat ruawm. 3 Khahai mun khan takshon, mikchaw, kekhawr, khan takthi miring hai na rurutung ua tui hawng rawnawk kha ngaklam a ruawm uh. 4 Ajarla phapha a ravantir `khat na tuikhur khan jong chum a tui kha jong rawnawkmashak. Tunita`awm tui hawng rawnawk shole, rapapek a achum kha na ih natna kha niei joiawm damna imuk inih. 5 Kha mun khan kum shawm `thumlieiriet natna niei miring `khat ruawm. 6 Jesu na aja a awm kha rumuk, khan khatikhan a awm kha ashawt nih joi, iti rujet `le, ama dieng ruti, “Nangdam jawt maw?” 7 Anapa kha na ama dieng rumashang, “Oja, tui hawng rawnawk phakhan, tuikhur hin numuchum rang, mi niei mi`ing. Khanikengta kashe phakhan, miring shik na kamatieng ruchummashathiei.” 8 Jesu na ama dieng ruti, “Thoi roh, nang jana kha loitana lawn rang roh.” 9 Relentak a ama kha rudam joi, khan ajana kha loi a rulawn joi. Makha nikho kha Sabbath nikho runih. 10 Khajarkhan imadampa dieng khan Jihudi hai kha na ruti uh, “Mahi Sabbath nikho inih, hi nikho hin nang jana nangichawi hi Dan nimak.” 11 Amani dieng rumashang, “Anamadampa kha na kiei dieng nuruti, ‘Nang jana kha chawitana lawn rang roh.’ ” 12 Khashole ama dieng rurawdawn uh, “ ‘Nang jana kha loi tana lawn rang roh,’ nati miring kha tumaw nih?” 13 Inia adam miringpa kha na tumaw nih, iti kha rujet mak, ajarla kha mun khan mirawp hawng ruchun jarkhan, khan ah put ah Jesu kha rushok joi. 14 Khashole Jesu na ama kha riethiengmun ah rumuk a ruti, “Enro, nangdam joi, nang dieng ashiedet shokna boi rang, munu thawlai naw roh.” 15 Miringpa kha na rushe a Jihudi hai dieng namadampa kha Jesu inih, tia ruriei joi. 16 Khan Jihudi hai na Jesu anu kha ruthir ua ama kha thatna rang, tawk a ruawm uh. Ajarla hihaihi Sabbath nikho a iruthaw inih. 17 Inia Jesu na amani dieng rumashang, “Kapa na tunshe hin chon thaw a awm, khan kieiawm chon kha kithaw inih.” 18 Hijarhin Jihudi hai na liekliek a ama kha thatna rang tawk a ruawm uh. Sabbath nikho kha irukhoi ranga niboia, Pathien kha`awm apatak iruti a nining a Pathien le rietiet inih. 19 Jesu na mashang a amani dieng ruti, “Diktak a nangni dieng kiriei inih, Apa ithaw imuk kha niboia, Shapa kha na nining a ithaw ngam awm mak. Ajarla Apa ithaw hai kha le ra`ang a Shapa na`awm ithaw inih. 20 Ajarla Apa na Shapa kha numpok, khan ama dieng ithaw chon kholok kha imumuk inih. Khan nang shindawngna u rang, ama dieng hinek hin a aliendet mumuk rangnih. 21 Ajarla Apa na athi hai kha imothoi a imiring kha ang a, Shapa na`awm idit miring hai dieng ringna kha ipek inih. 22 Ajarla Apa na tute chung a chawngshat mak, inia chawngshatna kholok kha Shapa dieng pek joi. 23 Makha Apa dieng richit ipek u kha ang a, mi kholok na Shapa dieng richit pekna rang a inih. Shapa richit apeh boi kha na ojongtir Apa kha`awm, richit ipek boi inih. 24 “Diktak a nangni dieng kiriei inih, tunitjoiawm kawchawng irangai a nojongtirpa kha takashawn ama kha na kumshawt ringna kha ieniei, khan chawngshatna shung khan va naw nih, inia athi ah put ah ringna khan rawthawt nih joi. 25 Diktak a nangni dieng kiriei inih, athi hai na Pathien Shapa hesho kha rangai a, rangai miring kholok ringna rang a pha kha jong joi, khan tun a pha hi nih joi. 26 Ajarla Apa na nining a ringna iniei kha ang a, Shapa diengawm nining a ringna nieina rang pek joi. 27 Khan ama dieng chawngshatna cham kha pek joi, ajarla ama kha Miring Shapa kha inih. 28 “Mahin shindawngna niei u naw roh, than shung ah awm kholok na ama hesho irangai ua vak shokna u rang a pha kha jong rangnih joi. 29 Atha chon thaw hai na ringna rang a thoiretna tieng, khan ashie thaw hai na chawngshatna rang a thoiretna tieng she u rangnih. 30 Kiningcham a kiei na iawm thaw mi`ing. Kirangai kha dungjuia chawngkishat inih, khan kawchawngshatna kha adik inih. Ajarla kumulungmining kha kiei tawk mi`ing, inia nojongtir, kapa mulungmining kha kitawk inih. 31 “Kiei rangbak khan kieriei joiatu, kiriei kha adik nimak. 32 Shik miring na kuchungchanga kungachang awm, khan kuchungchanga kungachang kha adik inih, iti kha kejet. 33 “Nangnitak na John dieng mi nangrutir uh, khan ama na adik khan kungruchangsha nih joi. 34 Kimuk kungchangna hi miring ah put ah nimak, inia hi kiti hi nangni kha nashanna u rang a inih. 35 John hi achong le avar thaomiei kha runih. Nangni na ama mieivar khan pha bawngte rawshawna rang, nangrumining uh. 36 “Kiei na John kungchangnanek a alien kungchangna kha kieniei, ajarla kapa na kiei dieng inepek chon hai kha rupummashakna rang, nurupek joi. Hihai chontak kithaw hi na kapa na kiei hi inojongtirsha inih, iti chungchanga kungachang inih. 37 Kiei hi nojongtir, kapa amatak na kuchungchanga kungruchangsha inih. Ama hesho kha voikhatshe rujet u makche, khan ama me kha`awm rumuh u makche. 38 Ama chawng kha nangni dieng chatboia awm mak. Ajarla ijongtir ama kha takashawn u makche. 39 Nangni na Miejiek hai kha nangtawk uh, ajarla amani dieng kumshawt ringna kha awm, tia nangmining uh; khahaitak kha na inih kuchungchanga kungachang u kha. 40 Inia ringna nangnieina u rang, kiei dieng va jawt u makche. 41 “Miring hai ah put ah mapak kha kiei na loi mi`ing. 42 Inia Pathien numpok kha nangni dieng awm mak, iti kha kejet. 43 Kapa riming a kajong joi, inia nuruloi u makche. Shik miring `khat na irimingrilik a jong joiatu, ama kha nangruloi u rangnih. 44 Pathien ranga na ipek ngam mapakna kha tawk boi a, khatlekhat ah put ah mapakna kha nangmuk u jarkhan, itia maw takanawshawn u rawng? 45 “Kapa maikung a kanaheng u rangnih, tia mining u naw roh. Ngakmining nangirutetna u Moses na keng inuruheng u kha. 46 Ajarla Moses kha takanangrushawn u joiatu, kiei hiawm takananginawshawn u rang a shok, ajarla kuchungchanga irumiejiek inih. 47 Inia imiejiek hai khan takanangrushawn u nawkala, itia maw kiriei hai hi takashawn u rawng?”
1 Khashole Jesu na Galilee Thampui vara ah awm Tiberias Thampui tieng ruhawng joi. 2 Ama na ana hai dieng a iruthaw jetna hai kha rumuk u jarkhan, mirawp tampui na anu rujui u joi. 3 Jesu na lawn ah ruhawng a akhaichawi hai le kha mun khan rushuh. 4 Jihudi hai rohoi, Rakanna kha hawng nai joi. 5 Jesu na iringrakang a en phakhan, mirawp tampui na ama tieng ava kha rumuk a Philip dieng ruti, “Amani shak rang khoshekawt a tan vak rawchawk rang a maw nih?” 6 Mahi ama kha enretena rang a iruti inih. Ajarla amatak na ithaw rang a rasham kha rujet. 7 Philip na ama dieng rumashang, “Dinari rajadi man tan hi na amani dieng mum `khatshe a`awm chang u naw nih.” 8 Akhaichawi hai kar a akhat, Simon Peter anaipangpa, Andrew na ama dieng ruti, 9 “Mahin nim tan rahnga le nga `di aniei pashanai `khat awm, inia mi hijat rang hin imaw ang nih?” 10 Inia Jesu na ruti, “Miring hai kha mushut u roh.” Kha mun khan champi tampui ruawm. Irumushut u miring hai kha bawp rahnga dawr runih. 11 Khajarkhan Jesu na tan hai kha ruloi, khan mapakna runiei a khaichawi hai dieng rupek. Khan khaichawi hai na ashuh miring hai dieng rushem pe. Khatikhan nga kha`awm amani idittukshe a rushem pe uh. 12 Amani kha vawn miship pe u phakhan, akhaichawi hai dieng ruti, “Lekvai mienieng hai kha `khatshe thangna boi rang, rawkhawm u roh.” 13 Khashole rawkhawm ua, aneh-ashah hai kha na imak u nim tan rahnga lekvai hai kha tiengkum shawmlieidi rumiship uh. 14 Jesu na iruthaw jetna kha miring hai na rumuk u phakhan, ruti uh, “Diktak a ama hi rieliei shung a ajong rang a Thiempulien kha inih.” 15 Khashole amani na rangrat a shur a Jesu kha reng machangna rang, rashamjer a ava u kha rujet phakhan, iethien a lawn tieng rurakai joi. 16 Kho hawng romo phakhan, akhaichawi hai na thampui tieng jong chum u joi. 17 Khan amani na rokong shung ah rulut ua thampui kha rurakan uh, khan Capernaum tieng ashe ruput u joi. Khan ni hawng tah joi, inia Jesu tu amani tieng rushe maklai. 18 Rithi ranaktak a hawng rang jarkhan, thampui kha rurawnawk. 19 Amani na majin `thum ninawkle mili dawr rujap u `le, Jesu na thampui chung ah vak lawn kha rumuk uh. Rokong kha vak ranai pui phakhan, amani kha ruchih uh. 20 Inia amani dieng ruti, “Kiei kanih keng, chih u naw roh.” 21 Khashole ama kha rokong shung ah rumulut u joi. Khan rokong kha eshena u rang a ram kha rushokrelen joi. 22 Jing tieng hin thampui vara `khat a arangah mipui kha na akhaichawi hai rulutna kha niboia, rokongte shik rumuh u mak. Khan Jesu na akhaichawi hai le rokongte khan rulutshom u mak, inia akhaichawi hai ranga kha rushe uh. 23 Khan Tiberias ah put ah rokongte ava hai kha na, Pumi na mapakna runiei shole, tan irushakna u mun kha, vak shok uh. 24 Makhan mipui na Jesuawm, khan akhaichawi haiawm rumuk boi u phakhan, rokongte hai khan rulut ua Capernaum ah Jesu atawk va u joi. 25 Amani na thampui vara `khat tieng ama kha rumuk u phakhan, ama dieng ruti uh, “Rabbi, hi mun hin itik a ava maw nangnih?” 26 Jesu na mashang a amani dieng ruti, “Diktak a nangni dieng kiriei inih, jetna kha nangrumuk u jar a ninatawk u nimak, inia tan kha nangshak ua vawn nangmiship u jar a inih. 27 Athangthiei nekleshak rang khan chon thaw u naw roh, inia kumshawt ringnashe a a`awm rang a, Miring Shapa na nangni dieng inepek rang a, nekleshak rang khan chon thaw u roh. Ajarla Apa Pathien na ama chung a ama jetnam kha nam pe joi.” 28 Khajarkhan ama dieng ruti uh, “Pathien chon hai kha thawna rang, imaw kithawthiei u awm?” 29 Jesu na mashang a amani dieng ruriei, “Ijongtir ama kha takanangishawn u kha Pathien chon inih.” 30 Khajarkhan ama dieng ruti uh, “Kumuk ua takakawnawshawnna u rang, ih jetna maw thaw rawng? Ih chon maw thaw rawng? 31 ‘Ravan ah put ah amani dieng nekleshak shak rang rupek uh,’ tia irumiejiek kha ang a, nipilepu hai na ramthim ah manna rushak uh.” 32 Khashole Jesu na amani dieng ruti, “Diktak a nangni dieng kiriei inih, Moses na ravan ah put ah tan kha nangni dieng nurupek u mak, inia kapa na ravan ah put ah tan adik kha nangni dieng nepek uh. 33 Ajarla Pathien tan kha tu ravan ah put ah jong chum a manmieshie dieng a ringna ipek ama kha inih.” 34 Khajarkhan ama dieng ruti uh, “Pumi, makha tan kha pha rikip a nepeh u roh.” 35 Jesu na amani dieng ruriei, “Kiei hi ringna tan kha kanih. Tunitjoiawm kiei dieng a ava ama kha na itikte nita`awm vawncham pe naw nih, khan tunitjoiawm kiei takanashawn ama kha na itikte nita`awm tuira pe naw nih. 36 Inia nangni dieng kieriei, makhala nangnurumuk u joi, khania takanawshawn u makche. 37 Kapa na inepek kholok na kiei dieng va rangnih, khan kiei dieng a ava ama kha kiei na shuknawt a nawt naw ning. 38 Ajarla kumulungmining athaw rang a jong niboia, nojongtirpa mulungmining kha thawna rang, ravan ah put ah ajong kanih. 39 Kiei dieng a inepeksha miring kholok kha, ama ah put ah mathang boi a, Nikho dawng khan mothoi rang a hi, nojongtir kapa mulungmining kha inih. 40 Nojongtirpa mulungmining kha hi inih, makhala Shapa kha imuk a ama kha takashawn mi rikip na kumshawt ringna kha niei rangnih, khan ama kha Nikho dawng khan mothoi rang kanih.” 41 Khashole Jihudi hai na ama kha mieshiet ruput uh. Ajarla ama na ruriei, “Kiei hi ravan ah put ah ajong tan kha kanih.” 42 Amani na ruti uh, “Mahi Jesu hi Joseph shapa, unulepa kijet u kha nimak maw? ‘Kiei hi ravan ah put ah jong chum kha kanih,’ iti hi iti dan a iti maw nih?” 43 Khashole Jesu na mashang a amani dieng ruti, “Khatlekhat dieng muruk a chawng riei u naw roh. 44 Nojongtir kapa na ama kha ahawr nawkatu, tute na kiei dieng va ngam naw nih, khan Nikho dawng khan mothoi rang kanih. 45 Thiempulien hai behangbuk ah miejiek a awm, ‘Amani kholok kha Pathien na ruchuk rangnih.’ Khajarkhan kapa ah put ah irangai a ajet mi rikip na kiei dieng ava inih. 46 Pathien ah put ah ajong ama kha na niboia, tu kha na nita`awm, kapa kha irumuk nimak. Ama ranga kha na kapa kha rumuk joi. 47 Diktak a nangni dieng kiriei inih, kiei hi takanashawn miring kha na kumshawt ringna kha ieniei. 48 Kiei hi ringna tan kha kanih. 49 Nang pilepu hai na ramthim khan manna rushak uh, khan ruthi uh. 50 Mahi mi rikip na ashak a thitna boi rang, ravan ah put ah jong chum tan kha inih. 51 Kiei ravan ah put ah jong chum tan aring kha kanih. Tukhat na mahi tan hi shak joiatu, kumshawt a ring rangnih. Khan kiei na kipek rang a tan kha tu kataksha hi inih. Makha manmieshie ringna rang a kipek rang a inih.” 52 Khashole Jihudi hai na chawngrieshiet a ruti uh, “Itia maw hi miring hi na ataksha hi shak rang kieini dieng nepeh ngam nih?” 53 Khajarkhan Jesu na amani dieng ruti, “Diktak a nangni dieng kiriei inih, Miring Shapa taksha kha nangshak u nawk a, khan ama thishen kha nangnek u nawkatu, nangni na ringna kha niei u makche. 54 Kataksha kha ashah, khan kithishen kha aneh mi kha na kumshawt ringna kha ieniei, khan Nikho dawng khan mothoi rang kanih. 55 Ajarla kataksha hi nekleshak adik kha inih, khan kithishen hi shakletui adik kha inih. 56 Kataksha kha ashah, khan kithishen kha aneh mi kha na kiei dieng awm, khan kiei na ama dieng ka`awm. 57 Aring kapa na inojongtir inih, khan kapa jar a aring kanih. Kha le ra`ang a, kiei anashah kha na kajar a ring rangnih. 58 Mahi ravan ah put ah jong chum tan kha inih. Nang pilepu hai kha na manna irushak a ruthi u kha ang a niboia, mahi tan ashah kha na kumshawt a ring rangnih.” 59 Hihaihi Capernaum ah awm synagogue `khat ah ruruchuklai khan a iruriei inih. 60 Akhaichawi hai tampui na rurangai u phakhan, ruti uh, “Mahi chawng matat inih. Tu na maw jet ngam nih?” 61 Hijarhin akhaichawi hai na mieshiet joi, iti rujet phakhan, Jesu na amani dieng ruti, “Hi na inakhar u maw nih? 62 Miring Shapa kha na matieng a ruawmna mun ah aka kha nangmuk uala, imaw ti u rawng?” 63 Ringna apeh kha Ratha inih. Miring chonthaw kha tu nemna awm mak. Nangni dieng kiriei chawng hi tu ratha le ringna kha inih. 64 Inia nang kar ua takashawn boi miring eshen awm. Ajarla putna ah put ah Jesu na takashawn boi miring hai le ama ajor rang a miring kha rujet.” 65 Khan ama na ruti, “Hijarhin nangni dieng kiriei inih, kapa na ama dieng irupeksha nitnawkatu, tute na kiei dieng va ngam naw nih.” 66 Hijarhin akhaichawi hai tampui na ama ah put ah rurakai ua ama anu rujui u lai mak. 67 Khajarkhan Jesu na shawmlieidi dieng ruti, “Nangniawm nangshe jawt u joi maw?” 68 Simon Peter na rumashang, “Pumi, kieini na tu dieng maw she u ning? Nang na tu kumshawt ringna chawng hai kha nangniei. 69 Nang hi Christa, aring Pathien Shapa kha nangnih, iti hi takakawshawn u joi, khan kejet u joi.” 70 Jesu na amani dieng rumashang, “Shawmlieidi nangni hi kiei na kinurumadan u nimak maw, inia nang kar ua akhat tu diabol kha anih boi maw nih?” 71 Makha Simon shapa Judas Iscariot irurieina inih. Ama kha Jesu ajor rang a, shawmlieidi kar a akhat, kha runih.
1 Hishole Jihudi hai na Jesu kha that rang rutawk u jarkhan, Judea khan ruleng jawtlai mak. Khajarkhan ama na Galilee shung khan riephiei a ruawm joi. 2 Khan Jihudi hai Thamber hai rohoi kha hawng nai joi. 3 Khajarkhan anaipang hai na ama dieng ruti uh, “Nang khaichawi hai na nangithaw hai kha muknathiei rang, hi mathan tana Judea tieng she rang roh. 4 Ajarla vanoi na ijet atawk miring tute na rethe a chon thawngai mak. Hihaihi nangthaw joiatu, nang nining a manmieshie dieng mumuk roh.” 5 Ajarla anaipang haishe na ama kha takarushawn u mak. 6 Jesu na amani dieng ruti, “Kapha kha jong shok maklai, inia nang pha u kha tu rasham jawnjai a awm. 7 Manmieshie na nangni inumukmak u rang a kha anithiei boi inih, inia kiei tu numukmak uh. Ajarla amani chonthaw hai kha ashie inih, iti chungchanga kungkachang inih. 8 Rohoi khawn nangni she u roh. Makhaw rohoi khawn kiei tu she naw ninglai, ajarla kapha kha hawng rupum maklai.” 9 Amani dieng hihaihi ruriei shole, Galilee ah rurangah joi 10 Inia anaipang hai kha rushe shole, malangsheng a niboia, muruk a ama`awm rohoi khan rushe joi. 11 Rohoi mun khan Jihudi hai na rutawk ua ruti uh, “Ama kha ih ah maw awm?” 12 Ama chungchanga mipui kar a chawngrieshietna tampui ruawm. Eshen na ruti uh, “Ama hi mitha inih,” khan shik `khat na ruti uh, “Nimak, ama na mipui kha irulem inih.” 13 Nikengta Jihudi hai kha ruchih u jarkhan, tute na ama chungchanga rophongleng a chawngruriei ngam u mak. 14 Inia rohoi laitak khan Jesu na riethiengmun khan ruhawng a mi ruruchuk. 15 Jihudi hai na shindawnglam a ruti uh, “Hi miring hi na behang ruchuh boipet a, itia miejiek hai hi ijet maw nih?” 16 Jesu na mashang a amani dieng ruti, “Kiei na kiruchuk hi katah nimak, inia nojongtirpa tah inih. 17 Tukhat na Pathien mulungmining kha thaw jawt joiatu, Pathien ah put ah maw nih, ninawkle katatak ah put ah ruchukna maw nih, iti kha jet rangnih. 18 Ama imining dungjuia chawngriei kha na amarilik rang a lurna kha itawk inih. Inia tunita`awm nojongtirpa ama lurna atawk ama kha adik miring kha inih. Khan dikna boi kha ama dieng awm pe mak. 19 Moses na nangni dieng Dan kha inurupek boi u maw nih? Khania tute na Dan kha rung u makche. Ijar a kiei hi thatna rang ninatawk u maw nih?” 20 Mipui kha na mashang a ruti uh, “Raikho nangniei, tu na maw nang kha that rang natawk?” 21 Jesu na mashang a amani dieng ruti, “Chon `khat kuruthaw, khan nang lawpsheng u na shindawngna nangruniei uh. 22 Khajarkhan Moses na vunepna nurupek uh (Moses ah put ah tu nimak, inia pilepu hai ah put inih), khan miring kha Sabbath nikho a vunnangep pe uh. 23 Moses Dan kha koina boi rang, miring `khat na Sabbath nikho a vunepna muk a la, sabbath nikho a miring `khat pumplang a kamadam jar a, kuchung a lunghangna nanginiei u maw nih? 24 Maila a chawngshat u naw roh, inia dikna dungjuia chawngshatna kha le chawngshat u roh.” 25 Khan Jerusalem miring eshen na ruti uh, “Ama hi nimak maw amani na that rang a irutawk u kha? 26 Khania, enro! Malangsheng a ama na chawngriei, inia ama dieng iawm ti u mak. Diktak a chamniei hai na ama hi Christa kha inihet, iti irujet boi u maw nih? 27 Khanikengta miringpa hi khoshekawt ah put ah maw nih, iti nejet uh. Inia Christa kha jong phakhan, tute na khoshekawt ah put ah maw nih, iti jet naw nih.” 28 Khashole Jesu na riethiengmun ah put ah miruchuklam a ra`ai a ruti, “Kiei hi nangnejet uh, khan khoshekawt ah put ah maw kanih, iti nangjet uh. Kinining a ajong nimi`ing, inia nojongtirpa kha adik inih, ama kha jet u makchelai. 29 Kiei na ama kha kejet, ajarla kiei hi ama ah put ah ajong kanih, khan ama na inojongtir inih.” 30 Khashole ama kha shurna rang, rutawk uh, inia ama pha kha jong pe boilai jarkhan, tute na ama chung a khut rubanna ngam u mak. 31 Nikengta mipui kar a tampui na ama kha takarushawn ua ruti uh, “Christa na jong phakhan, hi miring hi na iruthaw jetnanek hin arawpdet jetna kha jong thaw nih maw?” 32 Hihaihi mipui na ama chungchanga murukmuruk a chawng iruriei u kha Pharisee hai na rujet uh. Khan thiempu ulien hai le Pharisee hai na riethiengmun shipai hai kha ama ashur rang rutir uh. 33 Makhan Jesu na ruti, “Nangni le pha bawngkhat awm rang kanilai, khashole nojongtirpa dieng ahawng rang kanih joi. 34 Nangnatawk u rangnih, inia numuh u naw tinih. Kaw`awmna khan va ngam u naw tinih.” 35 Khashole Jihudi hai na khatlekhat dieng ruti uh, “Nimukna boi u rang a mun khoshekawt ah she rang a iti maw nih? Greek hai kar a awm Retherak hai dieng she a, Greek hai kha vak ruchuk rang, tia imining maw nih? 36 ‘Nangnatawk u rangnih, inia numuh u naw tinih, khan kaw`awmna mun khan hawng ngam u naw tinih,’ iruti kha ih itina maw nih?” 37 Rohoi nikho dawng alientak khan Jesu na ruding a ra`ailam a ruti, “Tunitjoiawm tuira miring kha na kiei dieng va rieshie tui kha neh rosho. 38 Kiei takanashawn miring kha na, Miejiek ah iruriei kha ang a, mulung ah put ah tuiring vadung hai kha long pe rangnih.” 39 Mahi takashawn miring hai na imuk rang a rasham Ratha chungchanga iruriei inih. Ajarla Jesu kha rumulur boilai jarkhan, Ratha Riethieng kha rupeh maklai. 40 Mipui kar a tampui na chawng kha rurangai u phakhan, ruti uh, “Diktak a ama hi Thiempulien `khat inih.” 41 Shik miring hai na ruti uh, “Ama hi Christa kha inih.” Shik miring hai na ruti uh, “Galilee ah put ah Christa shok nih maw? 42 David chicha ah put ah le David ruawmna Bethlehem ah put ah Christa kha jong rangnih, tia Miejiekna iruriei boi maw nih?” 43 Khajarkhan ama chungchanga mipui kar khan reshenna ruawm. 44 Eshen na ama kha shurna rang, rumining uh, inia tute na ama chung a khut rubang ngam u mak. 45 Khashole riethiengmun shipai hai na thiempu ulien hai le Pharisee hai dieng rushe uh. Khan amani dieng rurawdawn uh, “Ijar a nangishur boi u maw nih?” 46 Riethiengmun shipai hai na rumashang uh, “Miring tute na`awm hi miring hi ang a chawngruriei maklai!” 47 Pharisee hai na amani dieng rumashang uh, “Nangni tu inomohon boi u nimak maw? 48 Rampo hai kar a akhat, ninawkle Pharisee hai kar a akhat na`awm ama kha taka`irushawn u maw nih joi? 49 Inia Dan jet boi mipui kha pumbotna kha ruchang uh.” 50 Amani kar a akhat a ruawm, Jesu dieng jan a rushe, Nicodemus na amani dieng ruti, 51 “Nadan u na chawng rangai mala le ithaw kha imaw nih, iti jet mala, chawng maw shat?” 52 Ama dieng mashang a ruti uh, “Nangawm Galilee ah put ah maw nangnih? Tawk tana enro, Galilee ah put ah thiempulien thoi maklai.” 53 Khan mi rikip na i`inin ah rushesho u joi. Continue to JOHN 8 »
1 Khania Jesu tu Olive Lawn ah ruhawng joi. 2 Jingkara hin ama na riethiengmun ah rusheret, khan mi kholok na ama dieng rushe uh; khan ama na rushuh a amani kha ruruchuk. 3 Khan danoja hai le Pharisee hai na uirethaw nupang `khat hi shur ua ama dieng vak chawi uh. Khan ama kha mi kar a rumiding uh. 4 Ama dieng ruti uh, “Oja, mahi nupang hi uire ruthawlaitak a kirushur u inih. 5 Hi ang nupang hi lung le dengna rang, Dan a Moses na chawng nurupek uh. Hijarhin nang na imaw nangti?” 6 Ama chung a jar pekna rang, mahi enretena `khat a iruti u inih. Inia Jesu na rubu a pieipak ah khutlawi le rumiejiek. 7 Ama kha rawnaw a chawng rurawdawn u jarkhan, Jesu na hawng thoi a ruti, “Nang kar ua munu niei boi akhat na masha a lung le dieng rosho.” 8 Khan takthar a rubu a pieipak ah rumiejiekret. 9 Amani na rujet u phakhan, lungthim rushit pe ua, ulienchang ah put ah dawngshe, miring hai kha `khatkhat a rushe u joi. Jesu kha thiente a rumak u joi, khania nupangnu kha tu alai ah ding a awmlai. 10 Jesu na hawng thoi a nupangnu ranga niboia, tute hawng muk boi phakhan, ama dieng ruti, “Aw nupang, nanawng miring hai kha la? Tute na inaheng boi maw nih joi?” 11 Ama dieng rumashang, “Awh Pumi, tute na kiei hi naheng mak.” Jesu na ama dieng ruti, “Kiei na`awm nang kha naheng mi`ing. She tana tun ah put ah munu vak thawlai naw roh.” 12 Takthar a Jesu na amani dieng ruriei a ruti, “Kiei hi manmieshie mieivar kha kanih. Kiei najui ama kha na jingna khan shuklawn a lawn naw nih, inia ringna mieivar kha niei rangnih.” 13 Khashole Pharisee hai na ama dieng ruti, “Nangrilik rang a nangiriei inih, nangiriei kha adik nimak.” 14 Jesu na mashang a amani dieng ruti, “Kieirilik rang a kiriei nitjoiawm, kiriei hi adik inih. Ajarla khoshekawt ah put ah ajong maw kanih, khan khoshekawt tieng ah she maw kanih, iti kha kejet, inia khoshekawt ah put ah ajong maw kanih, khan khoshekawt tieng ah she maw kanih, iti kha nangni na jet u makche. 15 Nangni na miring ichatna dungjuia chawngnangshat uh. Kiei tu tute chung a chawngshat mi`ing. 16 Chawngkishatshe kha nitjoiawm, kawchawngshatna kha adik inih. Ajarla kiethien a nimi`ing, inia nojongtir, kapa kha le kanih. 17 Nang Dan u khanawm hitihin miejiek, makhala pasha `di kungchangna kha adik inih. 18 Kieirilik chung a kungachang kanih, khan nojongtir kapa na`awm kuchungchanga kungachang inih.” 19 Khajarkhan ama dieng ruti uh, “Nangpa kha ih ah maw awm?” Jesu na rumashang, “Kiei hiawm, kapa kha`awm jet u makche. Kiei hi nangnurujet uatu, kapa kha`awm nangrujet u rangnih.” 20 Hihai chawng hi Jesu na riethiengmun ah ruruchuklai a niei`in khan iruriei inih. Khan tute na ama kha rushur ngam u mak. Ajarla ama pha kha jong shok pe maklai. 21 Jesu na takthar a ruriei, “Kiei she rang kanih joi, khan nangnatawk u rangnih, khan nang munu u hai khan nangthi u rangnih. Keshena rang a mun khan hawng ngam u naw tinih.” 22 Khajarkhan Jihudi hai na ruti uh, “Nining a rathat rang a maw nih, ajarla iti, ‘Keshena rang a mun khan hawng ngam u naw tinih’?” 23 Amani dieng ruti, “Nangni noi ah put ah nangnih uh, kiei hi chung ah put ah kanih. Nangni hi manmieshie ah put ah nangnih uh, kiei hi mahi manmieshie ah put ah nimi`ing. 24 Khajarkhan nang munu u hai khan nangthi u rangnih, tia nangni dieng a kiruriei inih. Ajarla kiei hi ama kha kanih, iti kha takanangshawn u nawkatu, nang munu u hai khan nangthi u rangnih.” 25 Khajarkhan ama dieng ruti uh, “Tumaw nangnih?” Jesu na amani dieng ruti, “Nangni dieng kung ah put ah kiriei kha inih. 26 Nang chungchang ua riei rang le chawngshat rang, tampui kieniei, inia nojongtirpa kha adik inih. Khan ama ah put ah kijet hai kholok kha manmieshie dieng hin kiriei inih.” 27 Apa chungchanga amani dieng iruriei inih, iti kha rujet u mak. 28 Khajarkhan Jesu na amani dieng ruriei, “Nangni na Miring Shapa kha nanglawm u phakhan, kiei hi amatak kha kanih, khan kinining a kithaw nimak a kapa na inuruchuk dungjuia hihaihi kiriei inih, iti kha nangjet u rangnih. 29 Khan nojongtirpa kha kiei le awm. Kapa na kiethiente a namah mak, ajarla ama rang a ningnitnarok kha kithaw jawnjai inih.” 30 Ama na hihaihi iriei le roroia, mi tampui na ama kha takarushawn uh. 31 Khashole ama takarushawnsha Jihudi hai dieng Jesu na ruriei, “Nangni na kawchawng hi nangjui uatu, diktak a kakhaichawi hai kha nangnih u joi. 32 Khan nangni na adik kha nangjet u rangnih, khan adik kha na nangni kha nomoshok u rangnih.” 33 Khan ama dieng rumashang uh, “Kieini hi Abraham chicha hai kha kanih uh, khan tute diengawm shok a ruawm u mi`inglai. Itia ‘Moshok kha nangnih u rangnih,’ nangiti maw nih?” 34 Jesu na amani dieng rumashang, “Nangni dieng diktak a kiriei inih, munu athaw mi rikip kha munu shok kha inih. 35 Shok na in khan kumshawt a awm mak. Shapa kha na kumshawt a awm. 36 Shapa kha na nomoshok u joiatu, diktak a nangni hi moshok kha nangnih u joi. 37 Abraham chicha hai nangnih u kha kejet, inia that rang kiei hi nangnatawk uh, ajarla kawchawng kha na nangni dieng mun niei mak. 38 Kiei na kapa dieng a kirumuksha kha kiriei inih, khashole nangniawm nangpa ah put ah nangirangaisha u kha nangithaw u inih.” 39 Khan mashang a ama dieng ruti uh, “Abraham kha kapa u inih.” Jesu na amani dieng ruti, “Nangni hi Abraham nai hai kha nangni u joiatu, Abraham na iruthaw kha nangruthaw u rangnih. 40 Inia Pathien ah put ah kirujet adik nangni dieng ariei miring, kiei hi tun that rang nangnatawk uh. Abraham na iruthaw kha hi nimak. 41 Nangpa u na iruthaw kha nangithaw u inih.” Khajarkhan ama dieng ruti uh, “Kieini hi rejai nai nih u mi`ing. Kapa u `khat kieniei uh. Ama kha Pathien inih.” 42 Khajarkhan Jesu na amani dieng ruti, “Pathien kha nangpa u runih joiala, numnangnurupok u rangnih, ajarla kiei hi Pathien ah put ah ajong a hin ka`awm; kinining a ajong nimi`ing, inia ama na inojongtir inih. 43 Ijar a kiriei hi nangijet boi u maw nih? Ajarla kawchawng kha loi ngam u makche. 44 Nangni hi nangpa u diabol ah put ah nangnih uh, khan nangpa u ditrekhe kha nangthaw jawt uh. Ama kha kung ah put ah mithat miring runih, khan adik khan ruding mak, ajarla ama dieng adik kha awm pe mak. Mielieshiei thaw phakhan, ama awmchantak ah put ah iriei inih, ajarla ama kha mielieishiei miring le mielieishiei apa kha inih. 45 Kiei na adik kieriei jarkhan, takanawshawn u makche. 46 Nang kar ua tu na maw munu niei, tia anakhin rang awm? Adik kha kieriei joiala, ijar a takaninawshawn boi u maw nih? 47 Pathien ah put ah miring kha na Pathien chawng hai kha rangai. Nangirangaina boi u ajartu, nangni hi Pathien ah put ah nih u makche.” 48 Jihudi hai na mashang a ruti uh, “Nang hi Samaria miring nangnih, khan raikho nangniei kiti u hin dik u mi`ing maw?” 49 Jesu na rumashang, “Raikho niei mi`ing, inia kapa kha richit kepek, khan nangni na kiei hi richit nepeh u makche. 50 Khanikengta kulurna kha tawk mi`ing. Atawkpa le chawngshat miring `khat awm. 51 Nangni dieng diktak a kiriei inih, tukhat na kawchawng kha rung joiatu, kumshawt a thitna kha muhet naw nih.” 52 Khajarkhan Jihudi hai na ama dieng ruti uh, “Raikho nangniei, iti hi tun kejet u joi! Abraham kha ruthi joi, khan thiempulien haiawm ruthi u joi. Khanikengta nangti, ‘Kawchawng arung mi kha na thitna tuidan kha shuken a en naw nih.’ 53 Ruthi kapa u Abrahamnek a aliendet maw nangnih? Thiempulien hai kha`awm ruthi joi. Nang nining a ih kanih nangiti maw nih?” 54 Jesu na rumashang, “Kibibing a kumulurna joiatu, kulurna kha iawm nimak. Kapathien nangiti u kapatak kha na inumulur inih. 55 Ama kha jet u makche, inia kiei na ama kha kejet. ‘Kiei na ama kha jet mi`ing’ kiti joiatu, nangni ang a mielieishiei thawpa kha kanih rangnih. Inia ama kha kejet a ama chawng kha kirung inih. 56 Nangpa u Abraham na kinikho muknathiei rang, ningrungai pe. Ama na rumuk a ningrungai pe.” 57 Jihudi hai na ama dieng ruti uh, “Nang kum shawm rahngshe shok makchelai, Abraham kha nangrumuk maw khan?” 58 Jesu na amani dieng ruti, “Nangni dieng diktak a kiriei inih, Abraham ruawm mala khan Kiei Kanih.” 59 Khajarkhan ama kha dengna rang, lung rushar u joi. Inia rurethe a Jesu na riethiengmun ah put ah rushe joi, khan mi hai kar a rulut a khatikhan rupang joi.
1 Jesu na rupang le roroi a, shok ah put ah mikchaw miring `khat rumuk. 2 Akhaichawi hai na ama dieng rurawdawn uh, “Rabbi, mikchawlam a jong shok ama hi, tu na munu iruthaw maw nih, ama na maw ninawkle unulepa hai na munu iruthaw maw nih?” 3 Jesu na rumashang, “Ama na`awm, khan unulepa hai na`awm munu ruthaw u mak, inia ama dieng Pathien chon hai kha larnathiei rang a inih. 4 Nishun a nojongtirpa chon hai kha kithawngir rang a inih, jan hawng phakhan, tute na chon thaw ngam naw nih. 5 Manmieshie shung a kaw`awmlai hin, manmieshie mieivar kha kanih.” 6 Khatikhan ruriei shole, pieipak kha rumiechiei a, khan iemiechiei kha le piei kha rupawr, khan mikchawpa mik khan chir kha runawt pe. 7 Khan ama dieng ruti, “She tana Siloam tuikhur khawn vak rushuk roh” (Mahi nemele le Rutir, tina inih). Khajarkhan rushe a vak rushuk joi, khan ama na muklam a vak kir joi. 8 Khajarkhan ringchangpui, khan matieng a mikchawlai a rumuh hai kha na ruti uh, “Hipa hi shutlam a khutdawpa kha nimak maw?” 9 Shik miring hai na ruti uh, “Ama kha keng.” Inia shik miring hai na ruti uh, “Ama le ra`ang keng.” Ama na ruti, “Kieitak kanih.” 10 Khajarkhan ama dieng ruti uh, “Itia nang mik hai kha na imuk maw nih joi?” 11 Ama na mashang a ruti, “Jesu iti miring `khat na piei miechier a kimik hai hin nanawt pe, khan kiei dieng nuruti, ‘Siloam tuikhur khawn she roh, khan vak rushuk roh.’ Khan kurushe a kavak rushuk shole, kimuk nih joi.” 12 Ama dieng rurawdawn uh, “Ama kha ih ah maw awm joi?” Ama na ruti, “Jet mi`ing.” 13 Matienglai a mikchawpa kha Pharisee hai dieng ruchawi u joi. 14 Jesu na chir rukon a imik hai irumumuk kha Sabbath nikho runih. 15 Khajarkhan mik irumukna dan kha Pharisee hai na ama dieng rurawdawn u ret. Amani dieng ruti, “Kimik hai hin chir nanawt pe, khan kurushuk a kimuk inih.” 16 Pharisee eshen na ruti uh, “Hi miring hi Pathien ah put ah nimak, ajarla Sabbath nikho kha rung mak.” Shik miring hai na ruti uh, “Itia maw munu miring `khat na hihai jetna hi thaw ngam nih?” Khajarkhan amani dieng reshenna ruawm. 17 Khashole mikchawpa dieng rutiret uh, “Nang mik nurumumuk jarkhan, ama chung a imaw nangti?” Makhan ama na ruti, “Ama hi thiempulien `khat inih.” 18 Khashole Jihudi hai na imik ruchaw pe a irumukpa nulepa kha rukoi pe u masheng, ama kha mik ruchaw pe a irumuk inih, iti kha takarushawn u mak. 19 Khan amani kha rurawdawn uh, “Mikchawlam a shok nangiti u ama hi nang shapa u maw nih? Itia tun imuk maw nih?” 20 Unulepa kha na amani dieng rumashang uh, “Ama hi kashapa u inih, khan mikchawlam a shok inih, iti kejet uh. 21 Inia itia tun imuk maw nih, ninawkle tu na imik hai hi imumuk maw nih, iti hi jet u mi`ing. Achang keng joi, ama kha rawdawn u roh. Ama chungchanga nining a riei rangnih.” 22 Unulepa kha na hitihin a iruti kha Jihudi hai kha ichih u jar a inih. Ajarla tukhat na ama kha Christa inih, tia rophong joiatu, synagogue ah put ah nawt rang a inih, iti hi Jihudi hai rawjawtna inih. 23 Khajarkhan a inih unulepa na “Achang keng joi, ama kha rawdawn u roh” irutina u kha. 24 Khajarkhan voidi changna a mikchaw miringpa kha rukoi ua ama dieng ruti uh, “Pathien kha mapak roh; hi miring hi munu miring inih, iti kejet u joi.” 25 Khan ama na mashang a ruti, “Munu miring anih anih boi kiei jet mi`ing, kijet khatte tu awm, makhala kimikruchaw joiawm, tuntu kiei kumuk joi.” 26 Inia ama dieng rutir u ret, “Nang dieng imaw nuruthaw pe? Nang mik hai kha itia inurumumuk maw nih?” 27 Amani dieng rumashang, “Nangni dieng kururieisho joi, narangai pe u makche. Ijar a nangirangai jawtthep u maw nih? Ama khawchawi hai achang jawt maw nangnih uh?” 28 Khashole erawh a ama dieng ruti uh, “Nang keng ama khaichawi anih, inia kieini tu Moses khaichawi hai kha kanih u keng. 29 Moses dieng Pathien na ruriei, iti kha kejet uh, inia hipa hi tu khoshekawt ah put ah ajong maw nih, iti jet u mi`ing.” 30 Miringpa kha na mashang a amani dieng ruti, “Khoshekawt ah put ah ajong maw nih, iti nangijet boi u hi shindawngroi `khat inih, khanikengta kimik hai hi namadam pe joi! 31 Khan Pathien na munu miring hai inik kha rangai pe mak, inia Pathien achih miring le khan ama mulungmining athaw miring na inik kha irangai pe inih. 32 Shok ah put ah mikchaw mik hai hi tukhat na imawlawng pe, iti hi rong put ah put ah jet boi inih. 33 Hi miring hi Pathien ah put ah runih joi nawkatu, iawm ruthaw ngam naw nih.” 34 Amani na mashang a ama dieng ruti uh, “Nang hi munu kholok le ashok miring nangnih, kieini hi ninuruchuk u maw nih?” Khan ama kha runawt u joi. 35 Ama kha nawt joi, iti kha Jesu na rujet. Ama kha rumuk phakhan, ama dieng ruti, “Pathien Shapa kha takamawnangshawn?” 36 Ama na mashang a ruti, “Oja, takakawshawnnathiei rang, ama kha tumaw nih?” 37 Jesu na ama dieng ruti, “Ama kha nangmuk joi. Ama kha nang le chawng arieipa hi inih.” 38 Ama na ruti, “Takakawshawn joi, Aw Pumi!” Khan chubairubawk joi. 39 Jesu na ama dieng ruti, “Amuh boi hai na mukna rang, khan amuh hai na mikchaw changna rang, kiei hi manmieshie hin chawngshat ajong kanih.” 40 Ama le ruawm Pharisee eshen na hihaihi rujet u phakhan, ama dieng ruti uh, “Kieini hiawm mikchaw maw kanih uh?” 41 Jesu na amani dieng ruti, “Nang mik u kha ruchaw a tu, munu runiei u naw tinih, inia tun ‘Kumuk’ nangti uh. Khajarkhan nang munu u kha awm lai.
1 “Diktak a nangni dieng kiriei inih, tunita`awm kengam roko mawkawt ah hawng lut boi, inia shik `khat tieng ah hawng ka, ama kha murushah le minieisho miring kha inih. 2 Khania mawkawt ah hawng lut miring kha kengamroi kha inih. 3 Mawkawt rungpa kha na ama rang mawlawng pe, khan kengam hai kha na ama hesho kha rangai pe uh. Khan ama kengamtak hai kha iriming a koi a lamkai pe. 4 Ekengamtak hai kha hoi phakhan, ama na amani maton ah lawn, khan kengam hai kha na ama anu kha jui uh, ajarla amani na ehesho kha jet pe uh. 5 Milak kha shukjui a jui u naw nih, inia ama ah put ah tan u rangnih, ajarla milak hai hesho kha jet pe u mak.” 6 Mahi chawngmeloi hi Jesu na ruriei, inia amani dieng imaw iriei, iti kha rujet u mak. 7 Khajarkhan Jesu na amani dieng rurieiret, “Diktak a nangni dieng kiriei inih, kiei hi kengam hai rang a mawkawt kha kanih. 8 Kamatieng a ava kholok kha murushah le minieisho hai kha nih uh, inia kengam hai kha na amani chawng hai kha rurangai pe u mak. 9 Kiei hi mawkawt kha kanih. Tunita`awm kajar a vak lut joiatu, kiei na shan rang kanih, khan eshena mun rikip a shakhoina kha muk rangnih. 10 Murushah kha na murukna rang le thatna rang, khan mathangna rang niboia, va mak. Khania amani na ringna kha rutukthep a mukna rang a ajong kanih. 11 “Kiei Kengamroi atha kha kanih. Kengamroi atha kha na kengam hai rang iringkho ipek inih. 12 Inia kengamroi nih boi, moroi miring kha na kengam hai kha atatak nit boi jarkhan, melang vat phakhan, kengam hai kha mathan a atan. Khan melang kha na amani kha ushur, khan kengam hai kha chaiachai a atet. 13 Moroi miring kha na atan, ajarla ama kha moroi miring inih. Khan kengam hai rang khan tenreh mak. 14 “Kiei Kengamroi atha kha kanih. Kekengam hai kha kejet, khan kiei hi amani na nejet uh. 15 Kapa na inejettak hi ang a, kapa kha kejet, khan kengam hai rang khan kiringkho kepek. 16 Hi roko shung a awm boi kengam hai shik kienieilai. Amani kha`awm kivakchawingir rang a inih. Khan amani na kehesho kha rangai u rangnih. Khajarkhan kengam hawi `khat le kengamroi `khat awm rangnih. 17 Koloinathep rang, kiringkho hi kipek inih, hijarhin kapa na numinopok inih. 18 Kiei ah put ah tute na loi mak, inia kinining a kipek inih. Pekna rang cham kieniei, khan loinaret rangawm cham kieniei. Mahi chawngpek hi kapa ah put ah kiruman inih.” 19 Hihai chawng jar hin Jihudi hai rureshenthep uh. 20 Amani kar a tampui na ruti uh, “Raikho ieniei a vet joi. Ijar a ama chawng kha nangirangai u maw nih?” 21 Shik `khat na ruti uh, “Hihaihi raikho na ichutna miring chawngriei nimak. Itia maw raikho na mikchaw miring mik hai kha mumuk ngam nih?” 22 Khan Jerusalem ah Inlona Rachang hawng shok joi. Makha pha kha phabi runih. 23 Jesu na riethiengmun ah Solomon tomai`in khan rulawn a ruawm. 24 Khajarkhan Jihudi hai na ama kha ruroko ua ama dieng ruti uh, “Idawrshe a kieini hi awkchak a ninatet u maw nih? Christa kha nangnih a tu, madanghet a nieriei u roh.” 25 Jesu na amani dieng rumashang, “Nangni dieng kururiei joi, inia takanawshawn u makche. Kapa riming a kithaw hai kha na kuchungchanga kungachang inih. 26 Inia takashawn u makche, ajarla nangni dieng a kiruriei kha ang a, kekengam hai kar khan jaw u makche. 27 Kekengam hai kha na kehesho kha rangai uh. Amani kha kejet, khan amani na nujui uh. 28 Amani dieng kumshawt ringna kha kepek, khan amani kha shukthang a thang u lai naw nih. Khan tute na kukhut ah put ah nasho ngam naw nih. 29 Kiei dieng a anapeh kapa kha ih kholoknek a liendet. Khan tute na kapa khut ah put ah sho ngam naw nih. 30 Kapa le kiei hi khatte kanih uh.” 31 Khajarkhan Jihudi hai na ama kha lung le dengna rang, lung rushar u ret joi. 32 Jesu na amani dieng rumashang, “Kapa ah put ah chon atha tampui kunumumuk u joi. Khahai chon kar hin ih ang kha jar a maw lung le ninedengna u rang a?” 33 Jihudi hai na mashang a ama dieng ruti uh, “Chon atha jar a kinedeng u rang a nimak, inia mieshietna jar a inih. Ajarla miring `khat nangnih, inia nang nining a Pathien nangrasha.” 34 Jesu na amani dieng rumashang, “Nang Dan ua irumiejiek boi maw nih? ‘Kiei na kuruti, “Pathien hai kha nangnih uh.” ’ 35 Pathien chawng jongna miring hai dieng pathien hai, tia la (Miejiek kha koi ngam naw nih), 36 Apa na iruriethiengsha le manmieshie shung a inojongtir, kiei na ‘Pathien Shapa kanih,’ kiti jar a, ‘Pathien nangmieshiet,’ niniti u maw nih? 37 Kapa chon hai hi kawthaw joi nawkatu, takanawshawn u naw roh. 38 Inia kawthaw joiatu, takanangnawshawn u joi nawk awm, chon hai kha takashawn u roh. Khanitatu kapa na kiei dieng awm, khan kiei na ama dieng ka`awm, iti kha nangjet ua takanangnawshawn u rangnih.” 39 Khashole ama kha shurna rang, rutawk u ret, inia amani khut ah put ah rurekhe joi. 40 John na akhat changna a baptisma pek a ruawmna mun, Jordan vara tieng takthar a rushe a makhan ruawm joi. 41 Mi tampui na ama dieng va ua ruti uh, “John na jetna iawm ruthaw mak, inia John na mahi miring jar a iruriei rikip kha adik inih.” 42 Makha mun khan mi tampui na ama kha takarushawn uh.
1 Khan Mary le uliennu Martha awmna kho Bethany khan Lazarus iti miring `khat ana a ruawm. 2 Pumi kha rieipartui irunawt a eke hai kha asham le iruno pe ama kha mahi Mary hi inih. Anaipangpa Lazarus kha runa pe. 3 Khajarkhan uliennu hai kha na Jesu dieng chawng mawchawi a ruti uh, “Pumi, enro, numnangipok ama kha ana a awm joi.” 4 Rujet phakhan, Jesu na ruti, “Mahi natna hi thitnathiei nimak, inia Pathien lurna rang a inih, khan mahi jar hin Pathien Shapa kha mulurna rang a inih.” 5 Jesu na Martha, anaipangnu, khan Lazarus kha numrupok. 6 Khajarkhan, ana kha rujet joiawm, ruawmna mun khan ni `di ruawmlai. 7 Makha shole khaichawi hai dieng ruti, “Judea ah she u ret rawi.” 8 Akhaichawi hai na ama dieng ruti uh, “Rabbi, Jihudi hai na tuntun hin nang kha lung le deng rang, natawk uh. Khawn sheret rang a nangiti maw nih?” 9 Jesu na rumashang, “Nikho `khat a nidan shawmlieidi awm nimak maw? Tukhat na nishun a lawn a tu bakna niei naw nih, ajarla mahi manmieshie mieivar hi imuk inih. 10 Inia tukhat na jan a lawn a tu bakna niei rangnih, ajarla ama dieng mieivar kha awm pe mak.” 11 Ama na hihaihi ruriei shole, amani dieng ruti, “Nawlawm u Lazarus kha miei joi, inia meche rang, kiei she rang kanih.” 12 Akhaichawi hai na ruti uh, “Pumi, amiei nitatu atha rang keng.” 13 Khanikengta, Jesu na ama thitna chungchanga iruti inih, inia amani na tu aja a shawimuchum `khat a rumining uh. 14 Khashole Jesu na amani dieng madanghet a ruriei pe joi, “Lazarus kha thi joi. 15 Kiei na khawn kuruawm boi kha nangni rangbak kiningai, makha nangni na takanangshawnna u rang a inih. Nitjoiawm ama dieng she u rawi.” 16 Didymus iruti u Thomas na akhaichawi chang pui hai dieng ruti, “Kieiniawm ama le thitna rang, she u rawi.” 17 Jesu na vat phakhan, Lazarus na than shung ah ni mili ruawm kha vak jet joi. 18 Bethany kha Jerusalem ah put ah majin `di dawr inih. 19 Anaipangpa u chungchanga Mary le Martha maw`awi rang, Jihudi hai tampui vak ruchun uh. 20 Khan Martha na Jesu ava kha rujet `le, ama dieng rushe a vak rumuk pui, inia Mary tu in ah rushuh a ruawm. 21 Martha na Jesu dieng ruti, “Pumi, hin nangruawm a la, kanaipangpa khaw ruthi naw nih. 22 Khania tunawm Pathien dieng nanginik kha Pathien na nang dieng nepek rangnih, iti hi kejet.” 23 Jesu na ama dieng ruti, “Nang naipangpa khaw thoiret rang keng.” 24 Martha na ama dieng ruti, “Nikho dawng thoiretna khan, ama na thoiret rangnih, iti kejet.” 25 Jesu na ama dieng ruriei, “Kiei hi thoiretna le ringna kha kanih. Kiei hi takanashawn miring hai kha na thit joiawm ring rangnih. 26 Khan tunitjoiawm kiei dieng a aring a takanashawn mi rikip na kumshawt a thitna kha niei naw nih. Mahi takanangshawn maw?” 27 Ama dieng ruti, “Awh, kupumi, kiei na nang hi manmieshie a ajong Christa, Pathien Shapa kha nangnih, iti hi takakawshawn joi.” 28 Hihaihi ruriei shole, anaipangnu Mary kha murukte a akoi rushe a ruti, “Ojapa kha hin awm joi, khan nang kha nokoi.” 29 Ama na rujetphit `le, relentak a thoi a ama dieng rushe joi. 30 Jesu na kho khan rulut maklai, inia Martha na irumukna pui mun khan ruawmlai. 31 Mary na thoi a rawnawttak a rushe kha, in ah awm ama maw`awi Jihudi hai kha na rumuk u phakhan, “Thanmun ah achap she keng,” tia ama kha rujui uh. 32 Jesu ruawmna mun khan Mary na rushe a ama kha vak muk phakhan, ekekung a rubawklap a ama dieng ruti, “Pumi, hin nangruawm a la, kanaipangpa khaw ruthi naw nih.” 33 Khajarkhan Jesu na ama achap le ivatpui Jihudi hai achap kha rumuk phakhan, ajeng a mulung rushit pe a rushaw pui. 34 Ama na ruti, “Ama kha khoshekawt ah maw nangreh uh?” Ama dieng ruti uh, “Pumi, va tana vak en roh.” 35 Jesu na ruchap. 36 Jihudi hai na ruti uh, “Enro, idawr a ama khaw numipok maw nih!” 37 Amani kar a eshen na ruti uh, “Mikchawpa mik hai mumuk mahi miring hi na Lazarus thitna boi rang chon ithaw ngam boi rang a maw nih?” 38 Khashole Jesu na mulung runat puiret jarkhan, than khan rushe joi. Makha koh runih, khan makha lung le rumangai uh. 39 Jesu na ruti, “Lung hi melet u roh.” Athipa uliennu Martha na ama dieng ruti, “Pumi, manam shie rang keng joi, ajarla ni mili nih joi.” 40 Jesu na ama dieng ruti, “Takanangshawn joiatu, Pathien lurna kha nangmuk rangnih, tia kinururiei boi maw nih?” 41 Khajarkhan athipa rehna lung mawkawt kha rumelet uh. Khan Jesu na chung tieng ruen a ruti, “Kapa nangnururangai pe jarkhan kanamapak. 42 Nangnarangai pe jawnjai, iti hi kejet. Khan kiei hi ninojongtir inih, iti hi inoroko mipui hi na takashawnna rangbak a kiruriei inih.” 43 Hihaihi ruriei shole, he rashangtak a rura`ai, “Lazarus, vai vak shok roh.” 44 Ukhut le ke hai kha ponramasha le rokhop, khan amai kha ponte le rejemlam a athipa kha vai vak shok joi. Jesu na amani dieng ruti, “Ama kha thut u tana mawlawn u roh.” 45 Khajarkhan Mary dieng ava Jihudi hai kar a mi tampui na Jesu na ithaw hai kha rumuk u`le, ama kha takarushawn uh. 46 Inia eshen na Pharisee hai dieng rushe ua Jesu na iruthaw hai kha vak riei uh. 47 Khajarkhan thiempu ulien hai le Pharisee hai na Sanhedrin ruchunna runiei uh. Amani na ruti uh, “Imaw nithaw u rang? Hi miring hi na jetna tampui thaw joi. 48 Hitihin ama hi nemeshe u joiatu, mi kholok na ama kha takashawn u rangnih joi. Khan Rome miring hai na va u ning, tia nawawmna u mun le nuphung u hi nasho u rangnih joi.” 49 Amani hai kar a akhat, kha kum a thiempu rashang, Caiaphas na amani dieng ruti, “Nangni iawm jet u makche. 50 Miningawm mining u makche, makhala phung kholok athang rangnek a miring `khat vanoi ruhut a athi kha athadet inih.” 51 Mahi nining a iriei nimak, inia kha kum a thiempu rashang `khat chang a, phung ruhut a Jesu kha athingir rang a rasham inih, iti kha irurieimasha inih. 52 Khan phung ranga nimak a achairak a awm Pathien naite hai kha `khat a vak chawina rang a inih. 53 Khajarkhan khani ah put ah ama kha itia maw that rang, tia chawng rurashak u joi. 54 Khajarkhan Jesu na Jihudi hai kar a malangsheng a rulawnlai mak. Inia ramthim dieng ah awm ram `khat, Ephraim iti kho khan rushe joi. Khan kha mun khan akhaichawi hai le ruawm joi. 55 Khan Jihudi hai Rakanna kha hawng nai joi, khan mi tampui na kha ram ah put ah Rakanna mala a nining ua riethiengna rang, Jerusalem ah ruhawng uh. 56 Amani na riethiengmun ah ruding u le roroia, Jesu kha rutawk ua khatlekhat dieng ruti uh, “Imaw nangmining uh, rohoi hin ajonghet boi rang a maw nih?” 57 Khan thiempu ulien hai le Pharisee hai na chawng rupek u joi, makhala tukhat na ama awmna jet joiatu, ama kha shurnathiei rang, mejet rang a inih.
1 Rakanna rang ni `ruk mala khan, Jesu na Bethany ah rushe. Makha ama na athi ah put ah irumothoi, Lazarus ruawmna kha inih. 2 Kha mun khan amani na bunekna `khat runiei pui uh. Khan Lazarus kha ama le tebol ah buneh hai kar a akhat runih. Khan Martha na chon ruthaw pe uh. 3 Khashole Mary na nard riethienghiei manrawp rieipartui litre khoidawr hi ruloi a, Jesu ke khan runawt pe. Khan ama ke kha asham le runo pe. Rieipartui manamhoi kha na in kha rujeibieng. 4 Inia akhaichawi hai kar a akhat, ama ajor rang a, Simon shapa Judas Iscariot na ruti, 5 “Shara hai dieng pekna rang, ijar a mahi rieipartui hi dinari rajathum a jorthiei boi maw nih?” 6 Mahi shara hai kha ire a iruti nimak, inia ama kha murushah runih. Khan shierkawk ah iruthong hai kha ama rang ruloi jawnjai a ruawm inih. 7 Jesu na ruti, “Ama kha bieh u naw roh, kurukhumna nikho rang a itet nih joi. 8 Ajarla shara hai kha nangawm pui jawnjai uh, inia kiei tu nawawm pui jawnjai u makche.” 9 Jihudi mipui hawi `khat na ama kha makhan awm, iti rujet u phakhan, Jesu ranga kha niboia, ama na athi ah put ah irumothoi Lazarus kha`awm aen rushe uh. 10 Khan thiempu ulien hai na Lazarus kha`awm thatna rang, chawng rurashak u joi. 11 Ajarla ama jar a Jihudi tampui na ruhiei ua Jesu kha taka`irushawn u inih. 12 Jing tieng hin rohoi ah ajong mipui alientak `khat na Jesu kha Jerusalem ah va joi, iti kha rujet. 13 Naw bak hai kha rurak ua ama rumukna pui rang, rushe uh; khan amani na rura`ai uh, “Hosanna! ‘PUMI riming a ajong ama kha rahvantha inih!’ Ama hi Israel hai Reng kha inih!” 14 Jesu na ranngam acha remet `khat rumuk a, ama chung ah rushuh. Ajarla hitihin rumiejiek, 15 “Chih naw roh, Aw Zion shanu. Enro, nang Rengpa kha ranngam acha remet chung ah shuh a jong joi.” 16 Arapa khan akhaichawi hai na rujet u mak, inia Jesu kha rumulur phakhan, irumiejiek hai kha ama chungchanga inih, khan ama dieng iruthaw inih, iti kha rumininghep uh. 17 Khajarkhan Lazarus kha than ah put ah irukoi a athi ah put ah irumothoilai a irurawtawp pui mipui kha na kungruchang uh. 18 Khan mahi jetna iruthaw kha irujet u hi na`awm inih, mipui na ama rumuk pui rushena u kha. 19 Khajarkhan Pharisee hai na nining ua ama dieng ruti uh, “Iawm man u lai makme, enro manmieshie na ama anu kha juisho joi.” 20 Khan rohoi a chubaibawk ruhawng hai kar khan Greek haiawm ruawm uh. 21 Galilee ah awm Bethsaida miring Philip dieng va ua ruti uh, “Oja, Jesu kha kumuk jawt uh.” 22 Philip na Andrew dieng she a ruriei, khan takthar a Andrew le Philip na Jesu dieng ruriei uh. 23 Jesu na mashang a amani dieng ruti, “Miring Shapa lurna rang a pha kha jong joi. 24 Diktak a nangni dieng kiriei inih, gehu `khat na pieipak ah cho a thi nawkatu, ama kha khatte a awm, inia ithi a tu, ara tampui moshok. 25 Iringkho numapoh ama kha na makha mathang rangnih, khan mahi manmieshie hin iringkho amumak ama kha na mahi kumshawt ringna rang atet rangnih. 26 Kochon athaw miring kha na nujui rosho, khan kaw`awmna khan keshepding kha`awm awm rangnih. Khan tukhat na kochon kha thaw joiatu, kapa na richit pek rangnih. 27 “Tun karatha hi shaw joi, khan imaw kiti rang? ‘Kapa, mahi pha ah put ah nashan roh.’ Inia mahi rentuk rang hin a hi pha hin a kiei ajong kanih. 28 Kapa, nang riming kha mulur rang roh.” Khashole ravan ah put ah he `khat jong a ruti, “Kumulur joi, khan mulurret rang kanih.” 29 Khakawt ah ading mipui kha na rujet ua mahi khomelek keng, ruti uh.” Shik `khat na ruti uh, “Ravantir na ama dieng chawngiriei keng joi.” 30 Jesu na mashang a amani dieng ruti, “Hesho hi kiei rang a jong nimak, inia nangni rangbak a ajong inih. 31 Manmieshie chawngshatna kha tun a pha hi nih joi. Tun manmieshie rampopa kha nawt rangnih joi. 32 Khan kiei hi rieliei ah put ah nalawm phakhan, mi kholok kha kiei dieng pawt rang kanih.” 33 Hi irutina hi itia athi rang a maw nih iti mejetna rang a inih. 34 Mipui na ama dieng rumashang uh, “Christa na kumshawt a awm rangnih, tia Dan ah put ah kurujet uh. Itia ‘Miring Shapa hi ilawmngir rang a inih’ nangiti maw nih? Mahi Miring Shapa hi tumaw nih?” 35 Jesu na amani dieng ruti, “Mieivar hi nangni le shawtbawt awm rangnih. Ajing na nubukna boi rang, mieivar kha nangniei u lai hin lawn u roh. Khan ajing a lawn miring kha na ih ah lawn maw nih, iti jet mak. 36 Mieivar kha nangniei u lai hin mieivar naite hai kha nangchangna u rang, mieivar kha takashawn u roh.” Hihaihi ruriei shole, Jesu na rushe a amani ah put ah rubi joi. 37 Amani maikung a jetna tampui ruthaw a`awm ama kha takarushawn u mak. 38 Mahi Isaiah thiempulien chawng kha hawng rupumna rang a inih. Ama na iruriei khala: “Pumi, nawchawngriei u khan, tu na maw takarushawn joi? Khan tu dieng maw PUMI banbo kha rophong joi?” 39 Khajarkhan amani na takarushawn ngam u mak, ajarla Isaiah na rurieiret: 40 “Amani mik hai kha na mukna boi rang le amani mulung a jetna boi rang, amani mik hai kha imijing pe joi. Khan amani mulung kha michimmashak pe joi. Khanawkatu vak kir ua kamadam u rangnih.” 41 Ama lurna kha rumuk a ama chungchanga ruriei phakhan, Isaiah na hihaihi iruti inih. 42 Khanikengta rampo hai tampuishe na`awm ama kha takarushawn uh. Inia Pharisee hai jar a amani na rurophong u mak. Khanawkatu synagogue ah put ah irunawt u rang a inih. 43 Ajarla miring hai ah put ah mapakna kha Pathien ah put ah mapaknanek a numrupok uh. 44 Jesu na ra`ai a ruti, “Kiei hi takanashawn miring kha kiei hi taka`inawshawn nimak, inia nojongtirpa kha taka`ishawn inih. 45 Khan kiei namuh miring kha na nojongtirpa kha imuk inih. 46 Kiei hi takanashawn mi rikip na ajing a awmna boi rang, manmieshie mieivar `khat a ajong kanih. 47 “Tukhat na kawchawng hai kha rung joi nawkawm, ama chung a kiei na chawngshat mi`ing. Ajarla kiei na manmieshie chung a chawngshat ajong nimi`ing, inia manmieshie hi ashan rang a ajong kanih. 48 Kiei hi anada le kawchawng aloi boi miring chung a chawngshat rang akhat awm: kirurieisha chawngtak kha na Nikho dawng khan chawngshat pe rangnih. 49 Ajarla kinining ah put ah kiruriei nimak, inia nojongtir kapa ama na kiriei rang a chung a chawnginurupek inih. 50 Khan ama chawngpek kha kumshawt ringna inih, iti kha kejet. Khajarkhan kapa na kiei dieng irurieitak kha ang a, kiei na`awm kiriei inih.” Continue to JOHN 13 »
1 Rakanna rohoi malatak khan Jesu na manmieshie hi mathan a apa dieng hawngna rang a pha kha jong joi, iti kha rujet. Manmieshie ah awm ama tatak hai kha rupumping a numrupok joi. 2 Tun janbu runek u lai khan diabol na Simon shapa Judas Iscariot mulung shung a ama kha jorna rang, mulungmining rupekmasha joi. 3 Apa na ama khut chung a ih kholok irupek, Pathien ah put ah ajong, khan Pathien dieng ahawng rang a kha Jesu na rujet. 4 Janbu nekna ah put ah ama na ruthoi a opon rieshiei kha atet a pontete kha loi a kawng ah ruverep joi. 5 Khan thingkheng ah tui kha rushung a akhaichawi hai ke rushuk ruput joi. Khan awkawng a iruverep pontete kha le runo pe joi. 6 Simon Peter dieng vat phakhan, Peter na Jesu dieng ruti, “Pumi, keke nanginurushuk pe rang a maw nih?” 7 Jesu na mashang a ama dieng ruti, “Nang dieng kithawtak hi tun hin jet naw tinih, inia nuk a nangjet rangnih.” 8 Peter na ama dieng ruti, “Keke hi shukrushuk a nurushuk pethiei naw tinih.” Jesu na ama dieng rumashang, “Nang ke kunurushuk pe nawkatu, nang hi kiei le tak `khat changna kha niei makche.” 9 Simon Peter na ama dieng ruti, “Pumi, keke ranga hi niboia, kukhut hai le kulu hiawm nurushuk pe roh.” 10 Jesu na ama dieng ruti, “Tui robosha miring kha, eke hai ranga niboia, rushuk rang rangai mak, ajarla lawpsheng a riethiengsho joi. Nangni nangriethieng u joi, inia nang lawpsheng u riethieng tu nimaklai.” 11 Ajarla ama ajor rang a miring kha rujet jarkhan, “Nang lawpsheng u riethieng tu nimaklai” iruti inih. 12 Amani ke hai kha rurushuk pe shole, opon rieshiei kha loi a tebol khan vak shuret a amani dieng ruti, “Nangni dieng a kithawsha hai kha nangjet u maw? 13 Oja le Pumi, tia nangnokoi uh, makha adik inih, ajarla makha kiei kanih. 14 Nang Pumi u le nang Oja u kiei na nang ke u hai kha kunurushuk pe u joiatu, nangniawm khatlekhat ke hai kha nangirushuk u rang a kha nangiton u inih. 15 Ajarla nangni dieng kithaw hi ang a nangithaw u rang a endar `khat nangni dieng kipekmasha inih. 16 Diktak a nangni dieng kiriei inih, shok kha upuminek a liendet mak, khan itir ama kha atirpanek a liendet mak. 17 Hihaihi nangjet ua nangthaw u joiatu, rahvanmuh miring kha nangnih u joi. 18 “Nang lawpsheng u chungchanga kiriei nimak. Kimadansha amani kha kejet, inia Miejiek kha hawng rupumna rang a inih, makhala ‘Kiei le tan ashah miring hi na kiei hi miknamangana joi.’ 19 “Mahi shok phakhan, kiei kanih, iti kha takanangshawnna u rang, tun kiei na shok mala a nangni dieng kiriei inih. 20 Diktak a nangni dieng kiriei inih, kiei na kitir miring aloi mi kha na kiei hi inoloi inih. Kiei analoi miring kha na nojongtirpa kha iloi inih.” 21 Hihaihi ruriei shole, Jesu na ratha a shawna runiei a rurophong, “Diktak a nangni dieng kiriei inih, nang kar ua akhat na kiei hi nojor rangnih joi.” 22 Khajarkhan tu chungchanga iti maw nih, iti mulung rakhana le roroia akhaichawi hai kha na khatlekhat dieng rure`en uh. 23 Jesu na numipok akhaichawi hai kar a akhat na ama kha rungai`ir a ruawm. 24 Khajarkhan Simon Peter na, tu chungchanga iriei maw nih, iti kha rawdawnna rang, ama dieng imik rumakhapna. 25 Khan Jesu kha angairet a ama dieng ruti, “Pumi, tumaw nih?” 26 Jesu na rumashang, “Khengkam ah kinawm tanlek kipek rang a pa hi inih.” Khajarkhan tan kha khengkam khan runawm a Simon shapa Judas Iscariot dieng rupek joi. 27 Tanlek kha ruloi shole, Satan na ama dieng rulut joi. Khajarkhan Jesu na ama dieng ruti, “Nangithaw rang a chon kha relentak a thaw rang roh.” 28 Inia khatikhan ama dieng iruti kha tebol ah ashuh miring tute na rujet mak. 29 Ajarla eshen na Judas kha shierkawk rak miring nit jarkhan, Jesu na “Rohoi a rangai nieinak kha vak rawchawh roh,” ninawkle shara hai dieng peknathiei rang a iriei dan a rumining uh. 30 Khajarkhan tanlek kha ruloi shole, nawtshun a rushe joi. Makha jan runih. 31 Ama na rushe shole, Jesu na ruriei, “Tun Miring Shapa kha mulur joi, khan ama dieng Pathien na lurna niei joi. 32 Pathien na ama dieng lurna niei joiatu, Pathien na`awm amatak dieng ama kha mulur rangnih, khan ama kha mulurrelen rangnih joi. 33 “Naite hai, pha bawngte nangni le awm rang kanilai, khan kiei hi nangnatawk u rangnih. Khana Jihudi hai dieng kiruti kha ang a, ‘Keshena rang a mun khan nangni va ngam u naw tinih.’ Khajarkhan tun nangni dieng kiriei hi inih. 34 “Nangni dieng chawngpek `thar kenepek uh, makhala nangni khatlekhat numropoh u roh. Khan kiei na nangni numkinopok u hi ang a, nangni khatlekhat numropoh u roh. 35 Nangni na khatlekhat numnangropoh u joiatu, mi kholok na kakhaichawi hai kha nangnih uh, iti kha jet u rangnih.” 36 Simon Peter na ama dieng ruti, “Pumi, khoshekawt ah she rang a maw nangnih?” Jesu na ama dieng rumashang, “Keshena rang a mun khan, tun nujui ngam naw tinih. Inia nuk a nangnujui ngam rangnih.” 37 Peter na ama dieng ruti, “Pumi, ithaw tun kinujui ngam boi rang a maw nih? Nang rangbak kiringkho pek rang kanih.” 38 Jesu na ama dieng rumashang, “Kiei rang nang ringkho peh rawng maw? Diktak a nang dieng kiriei inih, voithum nangrapha masheng arkhawng na khong naw nih.
1 “Nang mulung mawshaw u naw roh. Pathien kha takashawn u roh, khan kiei hiawm takanawshawn u roh. 2 Kapa in ah awmna tampui awm. Khanitnawkatu nangni rang mun `khat rasham ahawng rang kanih, tia kunururiei u rangnih. 3 Khan nangni rang mun rasham kahawng joiatu, nangni kha katatak `khat a loina rang, kiei ajongret rang kanih. Makha kaw`awmna khan nangniawm nangawmna u rang a inih. 4 Khan kawhawngna rang a mun le lam kha nangjet uh.” 5 Thomas na ama dieng ruti, “Pumi, nanghawngna rang a mun kha jet u mi`ing. Itia maw lam kha jet u ning?” 6 Jesu na ama dieng ruriei, “Kiei hi lam, adik, khan ringna kha kanih. Tute na kajar a niboia kapa dieng hawng ngam mak. 7 Kiei hi nangnurujet u joiatu, kapa kha`awm nangrujet u rangnih. Tun ah put ah ama kha nangjet u joi, khan nangmuk u joi.” 8 Philip na ama dieng ruti, “Pumi, nangpa kha numumuk u roh, makhan kiningnih u rangnih.” 9 Jesu na ama dieng ruti, “Aw Philip, pha hidawr shawt a kiei le nangawm joi, inia nejet makchelai. Kiei namuh kha na kapa kha imuk inih, itia ‘Nangpa kha numumuk roh’ nangiti maw nih? 10 Kiei na kapa dieng ka`awm, khan kapa na kiei dieng awm, iti hi takashawn makche maw? Nang dieng kiriei chawng hai hi kinining a kiriei nimak. Inia kiei dieng a awm kapa na ama chon hai hi ithaw inih. 11 Kiei na kapa dieng ka`awm, khan kapa na kiei dieng awm, kiti hi takashawn u roh. Khanitnawkawm chon hai hi jar a takashawn u roh. 12 Diktak a nangni dieng kiriei inih, kiei takanashawn mi kha na kithaw chon hai hi thaw rangnih. Khan hihainek a aliendet kha thaw rangnih. Ajarla kapa dieng ahawng rang kanih joi. 13 Kapa na Shapa dieng lurnathiei rang, kiriming a nanginik u kholok kha thaw rang kanih. 14 Ih nitjoiawm kiriming a nangnik u joiatu, kiei na thawngir rang kanih. 15 “Numnangnopok uatu, kawchawngpek hai hi rung u roh. 16 Khan kiei na kapa dieng nik rang kanih, khan nangni rang Narashappui shik `khat nepek u rangnih. Makha ama na nangni le kumshawt a awmna rang a inih. 17 Mahi manmieshie na iman ngam boi Ratha adik kha inih. Ajarla manmieshie na mahi muawm muh mak, khan jetawm jet mak. Inia ama kha nangni le awm, khan jong awm rang a nitjarkhan, nangni na ama kha nangjet uh. 18 Nulepa boi `khat a namah u naw ning. Nangni dieng ajong rang kanih. 19 Pha bawngte shole tu, manmieshie na kiei hi numulai naw nih, inia nangni na tu nangnumuk u rangnih. Ajarla kiei hi aring kanih, khan nangniawm nangring u rangnih. 20 Kha nikho khan kiei na kapa dieng ka`awm, khan nangni na kiei dieng nangawm uh, khan kiei na nangni dieng ka`awm, iti kha nangjet u rangnih. 21 Kawchawngpek hai kha iniei a khahaikha arung ama kha kiei hi numnapoh miring kha inih. Khajarkhan kiei numnapoh miring kha kapa na numpok rangnih. Khan kiei na ama kha numpok rang kanih, khan ama dieng kinining a ralar rang kanih.” 22 Judas (Iscariot nih boi) na ama dieng ruti, “Pumi, itia nang nining a kieini dieng nangralar a manmieshie dieng ralar boi a awm rawng?” 23 Jesu na mashang a ama dieng ruti, “Tukhat na kiei hi numnopok a tu, kawchawng kha rung rangnih, khan kapa na ama kha numpok rangnih. Khan kieini na ama dieng va ua awmna a thaw u rang kanih. 24 Kiei hi numanapoh boi ama kha na kawchawng hai kha rung mak. Inia nangirangai u chawng kha katah nimak, inia kiei nojongtir kapa tah inih. 25 “Hihaihi nangni le kaw`awmlai a kitisha inih. 26 Inia kapa na kiriming a Narashappui u rang a ijongtir rang a, Ratha Riethieng kha na irikip nuruchuk u rangnih, khan nangni dieng kiruriei hai rikip kha niminingmashak u rangnih. 27 Lungdamna kha nangni dieng kamak joi, khan kulungdamna kha nangni dieng kenepek u joi. Manmieshie na inepek u kha ang boi a, nangni dieng kenepek u joi. Nang mulung u kha mawshaw u naw roh, khan michitawm michit u naw roh. 28 “ ‘Kiei ahawng a jong kir rang kanih,’ kiniti u kha nangrujet u joi. Numnangnopok u joiatu, ‘Kapa dieng ahawng rang kanih,’ kiruti jarkhan nang ningrungai u rangnih, ajarla kapa hi kieinek a liendet. 29 Khan oshok phakhan, takanangnawshawnna u rang, tun shok mala hin nangni dieng kirieimasha inih. 30 Kaishiei a nangni le chawngrieilai naw ning, ajarla manmieshie rampopa kha jong joi, khan ama na kuchung a ranak niei mak. 31 Inia kiei na kapa hi numkopok, iti hi manmieshie na jetna rang, kapa na kiei dieng chawnginurupek kha ang a hitihin a kithaw inih. Thoitaia hin ah put ah she u rang rawi.
1 “Kiei hi drakha kung adik kha kanih, khan kapa hi drakha rielienpa kha inih. 2 Kiei dieng a awm ara boi abak rikip kha erelem, khan ara abak rikip kha ara mupungna rang, ierielien. 3 Nangni dieng kirurieisha chawng jar a nangriethiengsho u joi. 4 Kiei dieng hin awm u roh, khan kiei na`awm nangni dieng awm rawng. Drakha kung khan abak kha na awm nawkatu, nining a ara imoshok boi kha ang a, kiei dieng nangawm u joi nawkatu, ra ngam u naw tinih. 5 “Kiei hi drakha kung kha kanih, nangni hi abak hai kha nangnih uh. Kiei dieng a awm ama dieng khan kieiawm ka`awm. Ama kha na ara arawp moshok, ajarla kiei jaw boi a iawm thaw ngam u makche. 6 Tukhat na kiei dieng awm joi nawkatu, abak kha ang a, apai a makha achar. Amani kha rawkhawm uh, khan miei a vawr a iha u inih. 7 Kiei dieng nangawm u joi a, khan kawchawng hai kha nangni dieng awm joiatu, nanginik jawt u kha nangni dieng nithiei rangnih. 8 Ara arawp nangimoshok u kha na kapa kha imulur inih. Khanitatu kakhaichawi hai kha nangnih u rangnih. 9 “Kapa na kiei hi numinopok kha ang a, kiei na`awm nangni kha numkonopok uh. Kunumpok khan awm u roh. 10 Kapa chawngpek hai kha kirung a ama numpok a ka`awm kha ang a, kawchawngpek hai kha nangrung u joiatu, kunumpok khan nangawm u rangnih. 11 Kiningaina kha nangni dieng awmnathiei rang le nang ningaina u kha rupumnathiei rang, nangni dieng hihaihi kinieriei u inih. 12 Mahi kawchawngpek inih, makhala kiei na numkinopok u hi ang a, nangni khatlekhat numropoh u roh. 13 Tukhat na awlawm hai rang iringkho irupek ngam, hinek a aliendet numpok tute na niei mak. 14 Nangni dieng kinepek u chawngpek hi nangthaw u joiatu, nangni hi kawlawm hai kha nangnih u joi. 15 Shok hai kha niti u lai mi`ing, ajarla shok na upumi na ithaw kha imaw nih, iti kha jet mak. Inia kawlawm hai kha kiniti u joi, ajarla kapa ah put ah kijet kholok nangni dieng kenemejet u joi. 16 Kiei hi ninurumadan u nimak, khania kiei na kinurumadan u inih. Khan nangni na she a ara moshokna rang le nang ra u kha awmnathiei rang, khan kiriming a kapa dieng nanginik u rikip kha nepeknathiei rang, kunurumadan u joi. 17 Nangni khatlekhat numnangropokna u rang, hihai chawng hi nangni dieng kinepek u inih. 18 “Manmieshie na numukmak u joiatu, nangni nurumukmak mala khan, kiei hi nurumukmak joi, iti kha nangjet uh. 19 Manmieshie ah put ah nangrunih u joiatu, manmieshie na imiringtak hai kha numpok. Kiei na manmieshie ah put ah kunurukoi u joi jarkhan, manmieshie ah put ah nih u lai makche. Hijarhin manmieshie na nangni hi inumukmak u inih. 20 ‘Shok `khat hi upuminek a liendet mak,’ tia kiei na nangni dieng kiruti kha mininghep u roh. Kiei hi epshawna nurupek u joiatu, nangniawm epshawna nepek u rangnih. Kawchawng kha nururung pe u joiatu, nang chawng u kha`awm nurung pe u rangnih. 21 Inia hihai kholok hi kiriming jarbak a nangni dieng thaw u rangnih, ajarla nojongtirpa kha jet u maklai. 22 Amani dieng kajong a kururiei pe u nawkala, munu runiei u naw nih, inia tuntu amani munu chungchanga rangaidam kha niei u lai mak. 23 Kiei hi namumah miring kha na kapa kha`awm imukmak inih. 24 Shik miring tute na iruthaw boi chon hai kha amani dieng kuruthaw pe nawkala, munu runiei u naw nih, inia tuntu amani na kiei hi numuk u joi, khan kiei le kapa kadinre hi numukmak u joi. 25 Inia amani Dan shung ah irumiejiek kha hawng rupumna rang a inih, ‘Jar niei boi a amani na kiei hi nurumukmak uh.’ 26 “Inia kapa ah put ah kijongtir rang a, makhala kapa ah put ah jong, Narashappui Ratha adik kha jong phakhan, ama na kajar a kungchang rangnih. 27 Kung ah put ah nangnawrawtawp pui u jarkhan, nangni na`awm kungnangchang u rangnih.
1 “Nangbakna boi u rang, hihaihi nangni dieng kiriei nih joi. 2 Nangni kha synagogue hai ah put ah nawnawt u rangnih. Khan nangni nathat rikip na Pathien dieng a rawthawi inih, tia miningna rang a pha kha jong rangnih. 3 Amani na hihaihi nangni dieng thaw u rangnih, ajarla kapa kha`awm, khan kiei hiawm rujet u mak. 4 Inia apha kha jong phakhan, amani chungchanga nangni dieng kiruti inih, iti nangmininghepna u rang, hihaihi kirieisha inih. Nangni le kuruawm jarkhan, kung ah put khan nangni dieng ruriei mi`ing. 5 “Inia tun nojongtirpa dieng ahawng rang kanih joi. Khanikengta tute na ‘Ih ah hawng rang a maw nangnih?’ tia nawrawdawn u makche. 6 Inia hihaihi nangni dieng kieriei joi jarkhan, shawna kha na nang mulung u kha nimiship pe u joi. 7 Khanikengta kiei na nangni dieng adik kiriei inih. Kahawng rang a hi nangni rang nemna inih. Ajarla kahawng joi nawkatu, Narashappui u kha nangni dieng jong naw nih. Inia kahawng joiatu, ama kha nangni dieng jong tir rang kanih. 8 Khan ama na jong phakhan, munu chungchanga, dikna chungchanga, khan chawngshatna chungchanga manmieshie hi jong khin rangnih. 9 Munu chungchanga, ajarla kiei hi takanawshawn u mak. 10 Dikna chungchanga, ajarla kapa dieng ahawng rang kanih, khan numuh u lai naw tinih. 11 Chawngshatna chungchanga, ajarla hi manmieshie rampopa kha chawngshat pe joi. 12 “Nangni dieng riei rang tampui kienieilai, inia tun hin rupu ngam u naw tinih. 13 Ratha adik ama na jong phakhan, adikrok a lamnakai pe u rangnih, khan nining a imining kha riei naw nih, inia ijet kha riei rangnih. Khan ashok rang a chon hai kha nangni dieng rophong rangnih. 14 Ama na kiei hi numulur rangnih, ajarla katah kha loi ning, tia nangni dieng rophong rangnih. 15 Kapa na iniei kholok kha katah inih. Hijarhin katah kha loi a nangni dieng rophong rangnih, tia kiriei inih. 16 “Pha bawngte shung a numuh u lai naw tinih. Khan pha bawngte anuk a nangnumuk u ret rangnih, ajarla kapa dieng ahawng rang kanih joi.” 17 Khajarkhan akhaichawi hai eshen na khatlekhat dieng ruti uh, “ ‘Pha bawngte anuk a numuh u lai naw tinih, khan pha bawngte anuk a nangnumuk u ret rangnih,’ khan ‘Ajarla kapa dieng ahawng rang kanih joi,’ iti hi kieini dieng imaw irieina?” 18 Amani na ruti uh, “ ‘Pha bawngte anuk a,’ iti kha imaw itina? Imaw iriei kieini na jet u makme.” 19 Khajarkhan amani na irurawdawn jawt u kha Jesu na jet a amani dieng ruti, “ ‘Pha bawngte anuk hin numuh u lai naw tinih, khan pha bawngte shung a nangnumuk u ret rangnih,’ kiruti jar a khatlekhat dieng nangitawk u maw nih? 20 Nangni dieng diktak a kiriei inih, nangchap a nangna`awi u rangnih, inia manmieshie hi tu ningai rangnih. Nang mulung shaw u rangnih, inia nang mulungshaw u kha ningai a jir rangnih. 21 Nupang `khat na nai niei phakhan, doila niei rangnih, ajarla ama rang pha kha jong joi. Inia nai kha niei phakhan, miring `khat rieliei a jong shok ningaina jarkhan, awshawna kha miningheplai mak. 22 Tun mulungshaw nangniei uh, inia kunumuk u ret rangnih, khan nang mulung u kha ningai rangnih. Khan nang ningaina u kha tute na nangni ah put ah noloi pe u lai naw nih. 23 Makha nikho khan kiei dieng iawm nawrawdawn u naw tinih. Diktak a nangni dieng kiriei inih, kapa dieng kiriming a nanginik u kholok nangni dieng nepek u rang kanih. 24 Tunshe hin kiriming a iawm ninih u makchelai. Nang ningaina u kha shipna rang, nikna niei u roh, khan nangmuk u rangnih. 25 “Hihaihi nangni dieng chawngmeloi a kiriei nih joi. Inia nangni dieng chawngmeloi a kirieina boi rang a pha kha jong rangnih. Inia malangsheng a nangni dieng kapa chungchanga rophong rang kanih. 26 Kha nikho khan kiriming a nangninik u rangnih, khan nang ruhut ua kapa dieng nikna niei rang kanih, tia nangni dieng kiei na timi`ing. 27 Ajarla kapatak na numnopok uh, ajarla kiei hi numnangnopok u joi, khan Pathien ah put ah ajong kanih, iti kha takanangshawn u joi. 28 Kapa ah put ah ajong kanih, khan rieliei a kajong joi. Manmieshie hi mathanret a kapa dieng ahawng rang kanih joi.” 29 Akhaichawi hai na ama dieng ruti uh, “Enro, tun malangsheng a nangriei joi, khan chawngmeloi a rieilai makche. 30 Tun nieinak kholok nangjet, iti kha kejet u joi, khan tukhat na inawrawdawn rang, rangailai mak. Mahin Pathien ah put ah ajong nangnih, iti kha takakawshawn u joi.” 31 Jesu na amani dieng rumashang, “Tun takanangnawshawn u joi maw? 32 Enro, mi rikip na i`inin ah retheh a kiethien a ninamakna u rang a pha kha jong joi. Khan tun hin jong joi. Khanikengta kiethien a nimi`ing, ajarla kapa na nawawm pui. 33 “Kiei dieng lungdamna nangnieina u rang, nangni dieng hihaihi kieriei joi. Manmieshie hin shawrana nangniei uh, inia nang mulung mangarmashak u roh. Kiei na manmieshie kha kawmawtawr joi.”
1 Hihaihi ruriei shole, Jesu na ravan tieng khonga a ruti, “Aw kapa, apha kha jong joi. Nang shapa na`awm nang kha numulurnathiei rang, nang shapa kha mulur rang roh. 2 Manmieshie kholok chung a cham kha ama dieng nangrupek joi. Makha ama dieng nangipeksha kholok dieng kumshawt ringna peknathiei rang a inih. 3 Nang ranga Pathien adik, nang le khan nijongtir Jesu Christa kha ijet u rang a hi kumshawt ringna kha inih. 4 Rieliei chung a kiei na nang kha kunumulur joi. Thaw rang a chon ninurupek kha kiei na kawmawtawr joi. 5 Aw kapa, manmieshie jir mala a nang le kiruniei lurna khan tun nang le numulur rang roh. 6 “Manmieshie ah put ah ninurupek hai dieng khan nang riming kha kemejet joi. Kiei dieng a ninurupek hai kha nangtah runih, khan nang chawng kha urung uh. 7 Tun kiei dieng a ninurupek hai kholok kha nangtah inih, iti ejet u joi. 8 Ajarla kiei dieng ninurupeksha chawng hai kha amani dieng kepek a ruloi u joi, khan nang ah put ah ajong kanih, iti hi rujet u joi. Khan nang na ninojongtir inih, iti hi takarushawn u joi. 9 Amani rang kinik inih, manmieshie rang kinik nimak, inia kiei dieng ninurupeksha hai rang a inih, ajarla amani hi nangtah inih. 10 Katah hai kholok hi nangtah inih, khan nangtah hai kholok hi katah inih. Khan amani dieng lurna kha kumuk joi. 11 Manmieshie hin awmlai naw ning, inia amani tu manmieshie shung a awm u lai. Kiei nang dieng kahawng joi. Kapa Riethieng, kiei dieng a ninurupeksha hai hi kieini ang a akhat nitna u rang, amani hi nang riming a nurung pe roh. 12 Manmieshie shung a amani le kuruawmlai khan, nang riming a kiei dieng a ninurupeksha hai kha kururung, khan athang rang a imadansha ama kha niboia, tuawm athang awm mak. Mahi Miejiek kha hawng rupumna rang a inih. 13 Tun nang dieng kahawng joi, khan kiningaina kha amanirilik dieng rupumna rang, hihaihi manmieshie shung a kiriei inih. 14 Amani dieng nang chawng kha kepek joi, khan amani hi manmieshie na mukmak u joi, ajarla kiei hi manmieshie tah kanih boi hi ang a, amani hi manmieshie tah nih u mak. 15 Amani hi manmieshie ah put ah nangloina rang, kinik nimak, inia thaboi ama ah put ah nangshanna rang a inih. 16 Kiei hi manmieshie tah ah put ah kanih boi hi ang a, amani hi manmieshie tah nih u mak. 17 Amani hi nang dikna khan riethiengmashak roh. Nang chawng kha adik inih. 18 Kiei hi manmieshie shung a ninojongtir hi ang a, amani hiawm manmieshie shung a kitir joi. 19 Khan amani hiawm adik a riethiengnathiei rang, amani rangbak khan kinining a riethieng kanih joi. 20 “Amani thiente rang a kinik nimak, inia amani chawng hai jar a kiei takanawhawngshawn hai rangawm kinik inih. 21 Makha kapa, nang na kiei dieng nangawm, khan kiei na nang dieng ka`awm hi ang a, amani kholok na akhat nitnathiei rang a inih. Mahi nang na ninojongtir inih, iti hi manmieshie na takashawnna rang a inih. 22 Kieini `khat nanih hi ang a, `khat nitnathiei u rang, ninurupek lurna kha amani dieng kepek joi. 23 Amani na rupumping a `khat nitnathiei rang, kiei hi ninojongtir inih, iti hi manmieshie na jetna rang, kiei hi numninopok hi ang a, amani hi numnangpok, iti jetnathiei rang, kiei na amani dieng ka`awm, khan nang na kiei dieng nangawm. 24 Aw kapa, kiei dieng a ninurupek hai hi kaw`awmna mun ah kiei le awmna rang le ninurupek lurna kha muknathiei rang, kadit. Ajarla manmieshie hi phun mala khan kiei hi numnangnurupok joi. 25 Aw kapa midik! Manmieshie na nang kha nejet maklai, inia kiei na tu kenejet joi. Khan kiei hi ninojongtir inih, iti kha amani na jet u joi. 26 Khan numninurupokna numpok kha amani dieng awmnathiei rang le kieiawm amani dieng kaw`awmnathiei rang, nang riming kha amani dieng kurumejet joi, khan makha amani dieng mejet a awm rang kanih.”
1 Jesu na hihaihi ruriei shole, akhaichawi hai le Kidron tuihawr kha rakan a vara `khat ah rushe joi. Makhan rohon `khat ruawm. Ama na kha mun khan akhaichawi hai le rulut. 2 Khan ama rujor Judas na`awm makha mun kha rujet, ajarla makha Jesu na akhaichawi hai le ruruchun jawnjaina mun inih. 3 Khajarkhan Judas na thiempu ulien hai le Pharisee hai ah put ah rarup `khat le riethiengmun shipai kha vak chawi a mieisher le thaomiei, khan mieriem raklam a kha mun khan va joi. 4 Khajarkhan Jesu na khahai kholok kha ama chung a ashok rang a inih, iti kha rujet. Khan amani kha rujawng a ruti, “Tumaw nangitawk uh?” 5 Ama dieng rumashang uh, “Nazareth Jesu.” Jesu na amani dieng ruti, “Kiei kanih.” Ama rujor Judas na amani le ruding a ruawm. 6 Khajarkhan amani dieng “Kiei kanih,” ruti phakhan, anuk tieng rurakai ua pieipak chung ah rupur uh. 7 Khashole amani kha rurawdawnret, “Tumaw nangitawk uh?” Amani na ruti uh, “Nazareth Jesu.” 8 Jesu na rumashang, “Nangni dieng kiei kanih kiniti u joi. Kiei hi ninatawk u nitjoiatu, hihai miring hi meshe u rang roh.” 9 Mahi iruriei chawng kha hawng rupumna rang a inih, “Kiei dieng a ninurupeksha amani kar a tuteawm rumathang mi`ing.” 10 Simon Peter na iniei chemjam kha rupawttap a thiempu rashang shok `khat rutuk a, chang tieng ah nokor kha rutan pe joi. Shokpa riming kha Malchus iti. 11 Khashole Jesu na Peter dieng ruti, “Nang chemjam kha awkawk khan thong roh. Kapa na kiei dieng a inurupeksha hai kha kinek boi rang a maw nih?” 12 Khashole rarup hai, rabawpkhat lamkai, khan Jihudi hai riethiengmun shipai hai kha na Jesu kha shur ua rukhop u joi. 13 Rapapek a Annas dieng ruchawi uh, ajarla ama kha, kha kum a thiempu rashang ruchang, Caiaphas upu runih. 14 Mi kholok ruhut a mi `khat athi kha thadet, tia Jihudi hai dieng a chawng rurachah Caiaphas kha runih. 15 Khan Simon Peter le khaichawi shik `khat na Jesu anu kha rujui uh. Makha khaichawi kha thiempu rashang kha le rurejet, khan ama na Jesu le thiempu rashang tolawng ah rulut u joi. 16 Inia Peter na mawkawt vai khan ruding a ruawm. Khajarkhan thiempu rashang le rejet khaichawi shik kha na rushok a mawkawt rungnu dieng ruriei a Peter kha hawng lut pui joi. 17 Khajarkhan mawkawt rung shok-nungak kha na Peter dieng ruti, “Nangawm hi miring khaichawi hai kar a akhat nimakche maw?” Peter na ruti, “Kiei nimi`ing.” 18 Khan shok hai le riethiengmun shipai hai kha na, adai jarkhan, mieirawhaw riti a ru`ulam a ruding uh. Peterawm amani le ruding a miei kha ruru`uh. 19 Khashole, thiempu rashang kha na akhaichawi hai le ama iruchukna chungchanga Jesu dieng rurawdawn. 20 Jesu na ama dieng rumashang, “Kiei na manmieshie dieng malangsheng a kiruriei inih. Pha rikip a synagogue hai le Jihudi hai na lawp a vak ruchun jawnjaina u riethiengmun khan kiruruchuk inih. Kiei na rethe a iawm ruriei mi`ing. 21 Ijar a ninawrawdawn maw nih? Amani dieng kiruriei rangai miring hai khaw rawdawn roh. Enro, kiei na kiruriei hai kha amani na jet uh.” 22 Ama na hihaihi rurieisho phakhan, kha dieng ah ruding riethiengmun shipai `khat na Jesu kha ruben a ruti, “Thiempu rashang dieng khatikhan nangimashang maw nih?” 23 Jesu na ama dieng rumashang, “Ashie kha kiruriei nitjoiatu, ashie chungchanga kungchang roh. Atha kha kiruriei nitala, ijar a kiei hi ninaben maw nih?” 24 Khashole Annas na Jesu kha khoplam a thiempu rashang Caiaphas dieng rutir joi. 25 Khan Simon Peter na ruding a miei ru`u a ruawm. Khajarkhan ama dieng ruti uh, “Nangawm akhaichawi hai kar a akhat nimakche maw?” Ama na rurapha a ruti, “Kiei nimi`ing.” 26 Peter na onokor ituk pe inko, thiempu rashang shok hai kar a akhat na ruti, “Rohon ah ama le awm kinurumuk boi maw nih?” 27 Peter na makhan rurapharet, makhan arkhawng hawng khongrelen joi. 28 Jingkara hin Jesu kha Caiaphas ah put ah Praetorium khan amani na ruchawi u joi. Khan rono boi a Rakanna shakna u rang, amani na Praetorium khan rulut u mak. 29 Khajarkhan Pilate na amani dieng vak shok a ruti, “Hi miring chung hin ih nawngna maw nivakchawi uh?” 30 Amani na mashang a ama dieng ruti uh, “Chon shie ruthaw joi nawkatu, ama hi nang dieng nepeh u naw ning.” 31 Pilate na amani dieng ruti, “Ama kha chawi u tana nang dan u dungjuia ama chung a chawngvakshat u roh.” Jihudi hai na ama dieng ruti uh, “Miring `khat that rang a hi kieini rang dan nimak.” 32 Mahi ih thit a athi rang a maw nih, tia Jesu na iruriei chawng kha hawng shokna rang a inih. 33 Khashole Pilate na Praetorium khan rulutret, khan Jesu kha rukoi a ama dieng ruti, “Nang Jihudi hai Reng kha maw nangnih?” 34 Jesu na ama dieng rumashang, “Mahi nang nining a nangiti maw nih, ninawkle miring shik hai na nang dieng kajar a iruti maw nih?” 35 Pilate na rumashang, “Kiei hi Jihudi maw kanih? Nang phung miring hai le thiempu ulien hairilik na nang kha kiei dieng inepek u inih. Imaw nangiruthaw awm joi?” 36 Jesu na rumashang, “Kerengchangna kha tu manmieshie ah put ah nimak. Kerengchangna kha mahi manmieshie ah put ah nitjoiatu, koshok hai na Jihudi hai dieng kerepekna boi rang, ra thaw u rangnih. Khania tun kerengchangna hi manmieshie hin ah put ah nimak.” 37 Pilate na ama dieng ruti, “Khanitala reng maw nangnih?” Jesu na rumashang, “Reng nangnih, nangiti kha keng. Ajarla adik khan kungkachangna rang, manmieshie a jong shok kanih. Adik a awm mi rikip na kawchawng kha rangai.” 38 Pilate na ama dieng ruti, “Adik kha imaw nih?” Khan hihaihi ruriei shole, Jihudi hai dieng rusheret a amani dieng ruti, “Ama chung a shietna `khatshe muk pe mi`ing. 39 Rakanna nikho a miring `khat kimoshok rang a hi nangni rang shena dan inih. Khajarkhan nangni rang Jihudi hai Reng kimoshok rang a hi nangdit u maw?” 40 Kha pha khan amani kholok na ra`airet a ruti uh, “Hi miring hi nimak, inia Barabbas kha!” Barabbas kha minieisho miring runih.
1 Khashole Pilate na Jesu kha ruchawi a rumejem joi. 2 Khan ramiring hai na riling le iphan u renglukhum kha ama lu ah rurukhumashak uh. Khan ama kha ponshendup kha rurieshieimashak u joi. 3 Khan ama dieng va ua ruti uh, “Lawm roh, Jihudi hai Reng hi!” Khan ama kha ruben uh. 4 Takthar a Pilate na vai vak moshok a amani dieng ruti, “Enro, ama shietna `khatshe muk pe mi`ing, iti nangjetna u rang, ama hi nangni dieng kivakshok puiret inih.” 5 Khashole Jesu na riling renglukhum kha rukhu a ponshendup rieshieilam a vak shok phakhan, Pilate na amani dieng ruti, “Miringpa kha hilah!” 6 Khashole thiempu rashang hai le riethiengmun shipai hai na rumuk u phakhan, ra`ailam a ruti uh, “Ama kha cross ling ah that roh, cross ling ah that roh!” Pilate na amani dieng ruti, “Nangni na chawi u tana cross ling ah vak that u roh, ajarla ama shietna `khatshe muk pe mi`ing.” 7 Jihudi hai na ama dieng rumashang uh, “Dan kieniei uh, nining a Pathien Shapa rurasha jarkhan, kadan u dungjuia a athingir rang a inih.” 8 Pilate na makha chawng kha rujet phakhan, ruchidet joi. 9 Khan takthar a Praetorium shung khan rulut a Jesu dieng ruti, “Khoshekawt a jong maw nangnih?” Inia Jesu na ama dieng rumashanglai mak. 10 Khajarkhan Pilate na ama dieng ruti, “Kiei dieng chawngriei naw rawng maw? Nang hi cross ah thatna rang le moshokna rang, cham kieniei, iti hi jet makche maw?” 11 Jesu na rumashang, “Chung ah put ah nang dieng inurupeksha nitnawkatu, kuchung a cham shukniei a runiei naw tinih. Hijarhin kiei hi nang dieng nurupepa kha na munu aliendet ieniei.” 12 Khan ah put ah Pilate na ama kha moshokna rang lam rutawk. Inia Jihudi hai na ra`ailam a ruti uh, “Hi miring hi nangmoshok joiatu, Caesar lawmpa kha nilai makche. Tunita`awm nining a reng rasha miring kha na Caesar re`erpuina chawngiriei inih.” 13 Pilate na hihai chawng hi rujet phakhan, ama na Jesu kha vak shok pui a Lunglamrakam iti u, inia Hebrew chawng a tu Gabbatha iti, chawngshat shutna khan rushuh joi. 14 Khan Rakanna Rashamna Nikho nidan `ruk dawr hawng nih joi. Khan Pilate na Jihudi hai dieng ruti, “Nang Reng u kha hilah!” 15 Amani na rura`ai uh, “Chawite chawi rang roh, ama kha cross ling ah vak that rang roh.” Pilate na amani dieng ruti, “Nang Reng u hi cross ling ah kithat rang a maw nih?” Thiempu rashang hai na rumashang, “Caesar niboia, reng niei u mi`ing.” 16 Khashole cross ling ah thatna rang, ama kha amani dieng rupek joi. Khajarkhan Jesu kha rupawt ua ruchawi u joi. 17 Khan ama cross kha ruputlam a, Hebrew chawng a Golgotha iti Luru Mun khan, Jesu na ruhawng joi. 18 Kha mun khan ama kha cross ling ah rumakhai u joi. Khan shir le shir ah miring shik idiawm makhai a Jesu kha alai ah rumakhaichen uh. 19 Pilate na khetmiejiek `khat hi cross chung khan rumiejiek. Irumiejiek kha la: NAZARETH JESU HI JIHUDI HAI RENG INIH. 20 Makha khetmiejiek kha Jihudi hai kar a tampui na rute uh. Ajarla Jesu cross ling ah irumakhaina u mun kha khopui le ruranai, khan miejiek kha Hebrew, Greek, khan Latin chawng a irumiejiek inih. 21 Khashole Jihudi hai thiempu ulien hai na Pilate dieng ruti uh, “ ‘Jihudi hai Reng,’ tia miejiek naw roh, inia ‘Ama na “Jihudi hai Reng kanih ruti,” ’ tia miejiek roh.” 22 Pilate na rumashang, “Kiemiejieksha kha miejieksho keng joi.” 23 Ramiring hai na Jesu kha cross ling ah rumakhai u shole, ama ponledier kha ramiring rikip dieng tum `khat a changna rang, tum mili a rushem uh. Khan takdep kha`awm ruloi pe uh, inia takdep kha ichi boi, chung ah put ah rotho, inih. 24 Khajarkhan khatlekhat dieng ruti uh, “Mahi ther u naw rawi. Inia hi chung hin tu tah maw chang nih, tia vanmuk en u rawi.” Mahi Miejiek na iruriei kha hawng rupumna rang a inih: “Amani na koponledier hai kha amani kar a rushem uh, khan kopon rieshiei chung a vanmuk ruen uh.” Makha dungjuia ramiring hai na hitihin a iruthaw u inih. 25 Khan unu, unu naipangnu, Clopas inkonu Mary, khan Mary Magdalene, amani na Jesu cross diengtak khan ruding uh. 26 Khashole Jesu na unu le numipok akhaichawi kha rumuk phakhan, unu dieng ruti, “Nupang, nang shapa kha en roh!” 27 Khashole akhaichawi dieng khan ruti, “Nangnu kha en roh!” Makha pha ah put khan akhaichawi kha na ama kha i`intak ah ruchawi joi. 28 Mahi shole, Jesu na ih kholok hawng mawtawr joi, iti rujet `le, Miejiek kha hawng rupumna rang, “Kutuira,” ruti. 29 Kha mun khan ju athur shipmer be `khat ruawm. Khajarkhan spongos kha ju athur khan rumechemen ua hyssop bak ah aje ua, abai ah ruthong pe uh. 30 Jesu na ju athur kha rumechep shole, ruti, “Mawtawr joi.” Khashole ulu mukun a aratha kha rupek joi. 31 Rashamna Nikho nit jarkhan, Jihudi hai na amani rok hai kha Sabbath shung a rutetna boi rang (ajarla makha Sabbath kha nikholien runih), amani keranga hai kha khiek pe a amani rok hai kha chawina rang, Pilate dieng vak nik uh. 32 Khashole ramiring hai na va ua akhat changna le khan ama le cross ling ah imakhaishom shik `khat ke hai kha vak khiek pe uh. 33 Inia Jesu dieng vat phakhan, ruthisha a ivakmuk u le roroia eke hai kha rukhiek pe u lai mak. 34 Khania ramiring hai kar a akhat na shiei le edep ah vak shun a thishen le tui vak shokrelen joi. 35 Khan amupa kha na kungruchang. Khan ama kungchangna kha adik inih. Khan iriei kha adik inih, iti kha ejet. Makha takanangshawnna u rang a inih. 36 Hihai ashok hi Miejiek kha hawng rupumna rang a inih: “Uru `khatshe khiek pe naw nih.” 37 Khan Miejiek mun shik `khat na ieriei, “Iruvit u ama kha en u rangnih.” 38 Hihaihi shole, Jihudi hai kha chit jar a muruk a Jesu khaichawi ruchang, Arimathea Joseph na Jesu rok kha loina rang, Pilate dieng vak nik. Pilate na makha rujawt pe. Khashole rushe a Jesu rok kha vak loi joi. 39 Khan arapalai a jan a Jesu dieng rushe Nicodemus na`awm myrrh le aloe reche litre rajakhat dawr hi vak chawi. 40 Khashole amani na Jesu rok kha ruloi ua Jihudi hai khumna shedan dungjuia ponramasha le manamhoi rieipartui le rujo u joi. 41 Khan cross ling ah ithatna u mun khan rohon `khat ruawm, khan makha rohon shung khan tute na ijana boi thankhur athar `khat ruawm. 42 Jihudi hai Rashamna Nikho nit jar a le khan than kha iedieng ah ruawm jarkhan, Jesu kha makha mun khan rumaja u joi.
1 Hapta shung a akhat changna nikho varmuk a, Mary Magdalene na thanmun ah vat phakhan, than ah put ah lungpek rurawthawt kha vak muk. 2 Khajarkhan vak tan a Simon Peter le Jesu na numipok akhaichawi shik `khat dieng ava a amani dieng ruti, “Than shung ah put ah Pumi kha ruloi u joi, ama kha khoshekawt ah itet u maw nih joi, jet u lai mi`ing.” 3 Khashole Peter na khaichawi shik `khat kha le rushe a than khan va u joi. 4 Pasha `di kha na rutanshom ua khaichawi shik `khat kha na Peter kha rukhe a thanmun kha matieng rushok joi. 5 Ama na butlam a ruen a ponramasha hai rapai kha vak muk, inia rulut maklai. 6 Khashole Simon Peter na ama kha rujui a than shung khan vak lut; khan ponramasha hai rapai kha vak muk. 7 Khan lu ah ruawm pontete kha ponramasha hai kha le rurapai mak, inia shikjek a mun `khat ah rurethep a ruawm. 8 Khashole thanmun ah matieng rushok khaichawi shik kha na`awm rulut joi, khan ama na rumuk a takarushawn joi. 9 Ajarla ama na athi ah put ah hawng ringngir rangnih, iti Miejiek kha tunshe rujet u maklai. 10 Khajarkhan takthar a akhaichawi hai na amani inin ah rukir u joi. 11 Inia than vai tieng khan Mary na ding a rie`ieklam a ruchap. Achap le roroia than shung khan butlam a ruen. 12 Khan ponchek rieshiei ravantir idi kha Jesu rok irena mun khan ulu tieng `khat, khan eke tieng `khat rushuh u kha rumuk. 13 Amani na ama dieng ruti uh, “Nupang, ijar a chap maw nangnih?” Amani dieng ruti, “Ajarla kupumi kha nuruchawi pe u joi, khoshekawt a inatet pe u maw nih joi, jetlai mi`ing.” 14 Hihaihi ruti shole, anuk tieng vak hiei a Jesu ading kha vak muk, inia Jesu keng, iti rujet mak. 15 Jesu na ama dieng ruti, “Nupang, ijar a chap maw nangnih? Tumaw nangitawk?” Rohon rung miring `khat a rumining a ama dieng ruti, “Oja, ama kha ninuruchawi pe nitjoiatu, khoshekawt ah nitet maw nih, nieriei roh. Kiei na chawi rang kanih joi.” 16 Jesu na ama dieng ruti, “Mary!” Ama na vak hiei a ama dieng ruti, “Rabboni!” (mahi Oja tina inih). 17 Jesu na ama dieng ruti, “Numukui a awmlai naw roh, ‘Kiei na kapa dieng hawng mi`inglai. She tana kuliennai hai dieng vak riei rang roh. Kiei na kapa le nangpa u, kapathien le nang Pathien u dieng ahawng rang kanih joi.’ ” 18 Mary Magdalene na rushe a Pumi kha umuk joi, khan ama dieng hihaihi riei joi, tia khaichawi hai dieng vak rophong joi. 19 Hapta shung a akhat changna nikho nitak khan akhaichawi hai na Jihudi hai kha ruchih ua, ruruchunna u in mawkawt kha rukhar uh. Jesu na hawng lut a amani kar khan hawng ding a ruriei, “Lungdamna kha nangni le awm rosho.” 20 Makha ruriei shole, amani dieng ukhut hai le edep kha rumumuk uh. Khajarkhan khaichawi hai kha na Pumi kha rumuk u phakhan, ningrungai pe uh. 21 Takthar a Jesu na amani dieng ruti, “Lungdamna kha nangni dieng awm rosho. Kapa na inojongtir hi ang a, nangniawm kinitir uh.” 22 Mahi ruriei shole, amani dieng phuk thong pe a ruriei, “Ratha Riethieng kha tum u roh. 23 Miring hai munu kha nangrangaidam pe u joiatu, irangaidam pe inih. Nangni na nangdawn pe u joiatu, idawn pe inih.” 24 Inia Didymus iti u shawmlieidi kar a akhat Thomas kha Jesu na vatlai khan amani le ruawm mak. 25 Khaichawi shik hai na ama dieng ruti uh, “Pumi kha kumuk u joi.” Inia amani dieng ruti, “Ukhut ah hemthir shebe kha kumuk nawk a, hemthir shebe kha kukhut mieriei le kama nawk a, khan edep kha kukhut le kishit nawkatu, takashawn naw ning.” 26 Ni `riet shole, takthar a akhaichawi hai na inshung khan ruawm uh. Thomas`awm amani le ruawm joi. Mawkawt kha rurakhar joiawm, Jesu kha hawng lut, khan amani kar a ding a ruriei, “Lungdamna kha nangni dieng awm rosho.” 27 Khashole Thomas dieng ruti, “Nang khut mieriei kha vak shawn tana vak ma roh, khan nang khut kha vak shawn tana kedep hi vak shih roh. Takashawn boi miring kha niboia, takashawn miring kha chang roh.” 28 Thomas na mashang a ama dieng ruti, “Kupumi kapathien.” 29 Jesu na ama dieng ruti, “Thomas, nangnumuk joi jarkhan, takanangnawshawn joi. Amuh boi a takashawn miring hai kha rahvanmuh miring kha inih.” 30 Khan mahi behangbuk ah imiejiek boi Jesu na akhaichawi hai dieng iruthaw jetna tampui awmlai. 31 Khania Jesu hi Christa, Pathien Shapa kha inih, iti takanangshawnna u rang a irumiejiek inih. Makha, takanangshawn u phakhan, ama riming a ringna kha nangnieina u rang a inih.
1 Hihaihi shole, Jesu na Tiberias Thampui khan akhaichawi hai dieng hitihin rularret. 2 Simon Peter, Didymus iti u Thomas, Galilee shung ah awm Cana kho ah put ah Nathanael, Zebedee shapa hai le akhaichawi hai kar a idi hai kha ruawmshom uh. 3 Simon Peter na amani dieng ruti, “Ngashur she rang kanih.” Ama dieng ruti uh, “Kieiniawm nang le she u rang kanih.” Relentak a rushe ua rokong shung khan rulut u joi. Kha jan khan `khatshe rushur u mak. 4 Jingkar hin Jesu na kawmchang khan ruding, nitjoiawm khaichawi hai na Jesu keng, iti rujet u mak. 5 Khajarkhan Jesu na amani dieng ruti, “Naite hai, nekleshak nanginiei boi u maw nih?” Ama dieng rumashang uh, “Niei u mi`ing.” 6 Amani dieng ruti, “Len kha rokong chang tieng ah shir khan vawr u roh, khan nangshur u rangnih.” Makha dungjuia amani na ruvawr uh. Khan nga hai kha rawphai jarkhan, akaishe rumawtawr u lai mak. 7 Jesu na numipok khaichawi kha na Peter dieng ruti, “Mahi Pumi inih!” Simon Peter na Pumi inih, iti kha rujet phakhan, kotai ruko a (ajarla rekengver a ruawm inih) nining a thampui shung khan ruchawm joi. 8 Inia khaichawi hai eshen na tu, nga shipmer len kha pawtlam a rokongte a rushe uh (ajarla kawmchang kha le rurala mak, inia cubit rajadi dawr runih). 9 Kawmchang ah eke rumuchum u phakhan, kha mun khan rawhaw ra`ajin chung ah nga le khan tan vak muk uh. 10 Jesu na amani dieng ruti, “Tun a nangishur u nga hai kha eshen vak chawi u roh.” 11 Simon Peter na hawng ka a nga alien rajakhat shawm rahngalieithum shipmer len kha kawmchang ah hawng pawt joi. Khan nga hai kha tampui nitjoiawm len kha ruchiet mak. 12 Jesu na amani dieng ruti, “Khai! Jingkarbu neh u rang rawi.” Pumi keng, iti rujet u jarkhan, akhaichawi hai kar a tute na “Tumaw nangnih?” tia rurawdawn ngam u lai mak. 13 Khashole Jesu na ava a tan kha ruloi, khan amani dieng rupek. Khan nga kha`awm ra`angre a khatikhan rupek joi. 14 Jesu na athi ah put ah hawng thoi shole a akhaichawi hai dieng rularna kha mahi na athum changna kha inih. 15 Amani na jingkarbu kha runek u shole, Jesu na Simon Peter dieng ruti, “Jonah shapa Simon, kiei hi hihaihinek hin numnangnopok maw?” Ama dieng rumashang, “Awh, Pumi, numkonopok, iti kha nangjet.” Ama dieng ruriei, “Kekengamte hai hi navai pe roh.” 16 Adi changna khan rieiret, “Jonah shapa Simon, kiei hi numnangnopok maw?” Ama dieng rumashang, “Awh, Pumi, numkonopok, iti kha nangjet.” ama dieng ruriei, “Kekengam hai hi noroi pe roh.” 17 Athum changna a ama dieng ruti, “Jonah shapa Simon, kiei hi numnangnopok maw?” “Numnangnopok maw?” tia voithumhet ruti jarkhan, Peter kha mulungrushaw pe joi. Khan ama dieng ruti, “Pumi irikip nangjetviek; numkonopok, iti kha nangjet.” Jesu na ama dieng ruriei, “Kekengam hai hi navai pe roh.” 18 Diktak a nang dieng kiriei inih, “Nang shindetlai khan kawngkhit thaw a nangshena jawt mun khan nangshe, inia nang tar phakhan, nang khut lawm a shik miring na nang kawng nikhit pening, tia nangiditna boi mun khan nawchawi rangnih.” 19 Mahi iruti hi ih ang chat thitna kha le ama na Pathien imulur rang a maw nih, iti jetna inih. Mahi ruti shole, ama dieng ruriei, “Nujui roh.” 20 Peter na ruhiei a Jesu na numipok khaichawi kha na irujui kha rumuk. Ama kha janbu nekna a tebol ah Jesu kha irungiei a “Pumi, tumaw nih anajor rang a pa kha?” tia rurieipa kha inih. 21 Peter na ama kha muk phakhan, Jesu dieng ruti, “Pumi, ama la imaw rachang nih?” 22 Jesu na ama dieng ruriei, “Kojong masheng a`awm rang kadit joiatu, nang roiruputna imaw awm? Nujuite nujui roh.” 23 Khajarkhan uliennai shung khan ama hi thi naw nih, tia chawngrushok joi. Inia Jesu na ama dieng thi naw nih ruti mak, inia “Kojong masheng a`awm rang kadit joiatu, nang roiruputna imaw awm?” iruti inih. 24 Mahi khaichawi hi keng hihai chungchanga kungruchang miring le hihaihi irumiejiek kha. Khan ama na kungruchangna kha adik inih, iti kejet uh. 25 Jesu na iruthaw chon shik tampui awm, `khatkhat a miejiekviek joiatu, miejiek rang a behang hai kha manmieshie rieliei shung hin tawng naw nih, tia kimining. Amen.