Ба Эрса Мэсих сынёнхали

1 Нэҗитян, Римди хуоншон Август гиди фынфу, җё тянщяди жынму ду ба тамуди фур суанчулэни, йинви җыгə таму ё до зыҗиди чынпуни чи, ба тамуди щинмин щелини. 2 Квириний җыҗон Сирияди сыхур, җысы жынму туйибян чи щели зыҗиди щин минли. 3 Йиче жынму ду до зыҗиди чынпуни ще щинмин чили. 4 Юсуф е да Галилея дифоншонди Назарет чынпуни чўлэ, доли Иудея дифоншонди Давуди чынпуни (җыгə чынпуди минзы җёди Вифлеем), йинцысы Юсуф зусы Даву йизў-йиҗяди жын. 5 Юсуф лян Мария лёнгəр е ще щинмин чили. Нэгə сыхур таму лёр хан мə чынфон пыйдуйни, кəсы Мария дўли хуəйди вава. 6 Таму до нэтар Мария куэ ё зуəйүəни. 7 Та ба туйигə Эрзы сынёнхали; ба йүəвазы лян бу гуəчу чедо мацонили, йинцысы кифонзыни мəю вифынлэ. 8 Зэ нэгə дифоншон ю фон8ёнди жынни, таму йиванщи хуанбанзыди кан ёндини. 9 Анла дафа чиди тянщян зандо таму мянчянди сыхур, Анла щянчўди гуонлён сымян-баха ба фон-ёнди жынму җолёнли, ба таму хазали. 10-11 Нэгə тянщян дуйчў таму фəсы: «Ниму бə хэпали! Вə ги ниму фə до дуйчў йиче жынмушон ю хын гощинди сычин: җиргə зэ Давуди чынпуни ба даҗю нимуди Эрса Мэсих сынёнхали. 12 Ниму зэ нэтар нын кандо йигə йүəвазы физэ мацони лян бу гуəдини; җы зусы ги нимуди җихо». 13-14 Мынмын тяншовди да җүндуй лян нэгə тянщян йидарни куаҗён Анла фəли: «Җыган тяншонди Хўда! Ги Та щинэди диҗешонди жынму панвон пиннан!» 15 Тянщянму ба фон-ёнди жынму лёха, йиху шонли тянли. Фон-ёнди жынму йигə ги йигə фəди: «Заму зудо Вифлеем чынпуни чи кан Анла ги заму фəхади сычин зу». 16 Таму хуонхуон-монмонди чили шынли, доли нэгə дифон, зу ба Мария лян Юсуф зожуəли, җар фон-ёнди жынму зу ба мацони фиди Эрвазы канҗянли. 17 Йиху таму зу ба тянщян фəхади нэгə Эрвазы либянди хуа ги даҗя ду фəли. 18 Даҗя ба фон-ёнди жынму фəхади хуа тинли йиху, ду чёчихали. 19 Мария ба җыщезы сычин җидо зыҗиди шиннили. 20 Фон-ёнди жынму хуэйлэ зу куаҗён Анлади, йинцысы таму тинхади дэ җянхади йиче сычин җынсы лян нэгə тянщян ги таму фəхади йиён.